𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑀁

𑁧. 𑀧𑀞𑀫𑁄 𑀲𑀜𑁆𑀜𑀸𑀤𑀺𑀓𑀡𑁆𑀟𑁄

𑀲𑀺𑀤𑁆𑀥𑀫𑀺𑀤𑁆𑀥𑀕𑀼𑀡𑀁 𑀲𑀸𑀥𑀼, 𑀦𑀫𑀲𑁆𑀲𑀺𑀢𑁆𑀯𑀸 𑀢𑀣𑀸𑀕𑀢𑀁;

𑀲𑀥𑀫𑁆𑀫𑀲𑀗𑁆𑀖𑀁 𑀪𑀸𑀲𑀺𑀲𑁆𑀲𑀁, 𑀫𑀸𑀕𑀥𑀁 𑀲𑀤𑁆𑀤𑀮𑀓𑁆𑀔𑀡𑀁.

𑁧. 𑀅𑀆𑀤𑀬𑁄 𑀢𑀺𑀢𑀸𑀮𑀻𑀲 𑀯𑀡𑁆𑀡𑀸.

𑀅𑀓𑀸𑀭𑀸𑀤𑀬𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑀸 𑀢𑁂𑀘𑀢𑁆𑀢𑀸𑀮𑀻𑀲-𑀓𑁆𑀔𑀭𑀸 𑀯𑀡𑁆𑀡𑀸 𑀦𑀸𑀫 𑀳𑁄𑀦𑁆𑀢𑀺. 𑀅 𑀆 𑀇 𑀈 𑀉 𑀊 𑀏 𑀏 𑀑 𑀑, 𑀓 𑀔 𑀕 𑀖 𑀗 𑀘 𑀙 𑀚 𑀛 𑀜𑁆𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮 𑀯 𑀲 𑀳 𑀴 𑀅𑀁. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀏 𑀑 𑀦 𑀫𑀯𑀡𑁆𑀡𑁂’’ 𑁧. 𑁩𑁭. 𑀢𑀺𑀢𑀸𑀮𑀻𑀲𑀸𑀪𑀺 𑀯𑀘𑀦𑀁 𑀓𑀢𑁆𑀣𑀘𑀺 𑀯𑀡𑁆𑀡𑀮𑁄𑀧𑀁 𑀜𑀸𑀧𑁂𑀢𑀺. 𑀢𑁂𑀦 ‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’𑀢𑀺𑀆𑀤𑀺 𑀲𑀺𑀤𑁆𑀥𑀁.

𑁨. 𑀤𑀲𑀸𑀤𑁄 𑀲𑀭𑀸.

𑀢𑀢𑁆𑀣𑀸𑀤𑀺𑀫𑁆𑀳𑀺 𑀤𑀲 𑀯𑀡𑁆𑀡𑀸 𑀲𑀭𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀲𑀭𑁄 𑀮𑁄𑀧𑁄 𑀲𑀭𑁂’’ 𑁧, 𑁨𑁬 𑀇𑀘𑁆𑀘𑀸𑀤𑀺.

𑁩. 𑀤𑁆𑀯𑁂𑀤𑁆𑀯𑁂 𑀲𑀯𑀡𑁆𑀡𑀸. 𑀢𑁂𑀲𑀼 𑀤𑁆𑀯𑁂𑀤𑁆𑀯𑁂 𑀲𑀭𑀸 𑀲𑀯𑀡𑁆𑀡𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀯𑀡𑁆𑀡𑀧𑀭𑁂𑀦 𑀲𑀯𑀡𑁆𑀡𑁄𑀧𑀺’’ 𑁧, 𑁨𑁪.

𑁪. 𑀧𑀼𑀩𑁆𑀩𑁄 𑀭𑀲𑁆𑀲𑁄.

𑀢𑁂𑀲𑀼 𑀤𑁆𑀯𑀻𑀲𑀼 𑀬𑁄 𑀬𑁄 𑀧𑀼𑀩𑁆𑀩𑁄, 𑀲𑁄 𑀲𑁄 𑀭𑀲𑁆𑀲𑀲𑀜𑁆𑀜𑁄 𑀳𑁄𑀢𑀺. 𑀢𑁂𑀲𑀼 𑀏.𑀑.𑀲𑀁𑀬𑁄𑀕𑀢𑁄 𑀧𑀼𑀩𑁆𑀩𑀸𑀯 𑀤𑀺𑀲𑁆𑀲𑀦𑁆𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀭𑀲𑁆𑀲𑁄 𑀯𑀸’’ 𑁨,𑁬𑁨 𑀇𑀘𑁆𑀘𑀸𑀤𑀺.

𑁫. 𑀧𑀭𑁄 𑀤𑀻𑀖𑁄.

𑀢𑁂 𑀲𑁆𑀯𑁂𑀯 𑀤𑁆𑀯𑀻𑀲𑀼𑀬𑁄 𑀬𑁄 𑀧𑀭𑁄, 𑀲𑁄 𑀲𑁄 𑀤𑀻𑀖𑀲𑀜𑁆𑀜𑁄 𑀳𑁄𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀬𑁄 𑀮𑁄 𑀧𑀦𑀺𑀲𑀼 𑀤𑀻𑀖𑁄’’ 𑁨,𑁮𑁮 𑀇𑀘𑁆𑀘𑀸𑀤𑀺.

𑁬. 𑀓𑀸𑀤𑀬𑁄 𑀩𑁆𑀬𑀜𑁆𑀚𑀦𑀸.

𑀓𑀓𑀸𑀭𑀸𑀤𑀬𑁄 𑀯𑀡𑁆𑀡𑀸 𑀦𑀺𑀕𑁆𑀕𑀳𑀻𑀢𑀧𑀭𑀺𑀬𑀦𑁆𑀢𑀸 𑀩𑁆𑀬𑀜𑁆𑀚𑀦𑀲𑀜𑁆𑀜𑀸𑀳𑁄𑀦𑁆𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’ 𑁧,𑁩𑁩 𑀇𑀘𑁆𑀘𑀸𑀤𑀺.

𑁭. 𑀧𑀜𑁆𑀘 𑀧𑀜𑁆𑀘𑀓𑀸 𑀯𑀕𑁆𑀕𑀸.

𑀓𑀸𑀤𑀬𑁄 𑀧𑀜𑁆𑀘 𑀧𑀜𑁆𑀘𑀓𑀸 𑀯𑀕𑁆𑀕, 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀯𑀕𑁆𑀕𑁂 𑀯𑀕𑁆𑀕𑀦𑁆𑀢𑁄’’ 𑁧,𑁪𑁧 𑀇𑀘𑁆𑀘𑀸𑀤𑀺.

𑁮. 𑀩𑀺𑀦𑁆𑀤𑀼 𑀦𑀺𑀕𑁆𑀕𑀳𑀻𑀢𑀁.

𑀬𑁆𑀯𑀸𑀬𑀁 𑀯𑀡𑁆𑀡𑁄 𑀩𑀺𑀦𑁆𑀤𑀼𑀫𑀢𑁆𑀢𑁄, 𑀲𑁄 𑀦𑀺𑀕𑁆𑀕𑀳𑀻𑀢𑀲𑀜𑁆𑀜𑁄 𑀳𑁄𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀦𑀺𑀕𑁆𑀕𑀳𑀻𑀢𑀁’’ 𑁧,𑁩𑁮 𑀇𑀘𑀸𑀤𑀺. 𑀕𑀭𑀼𑀲𑀜𑁆𑀜𑀸𑀓𑀭𑀡𑀁 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑁆𑀣𑀁.

𑁯. 𑀇𑀬𑀼𑀯𑀡𑁆𑀡𑀸 𑀛𑀮𑀸 𑀦𑀸𑀫𑀲𑁆𑀲𑀦𑁆𑀢𑁂.

𑀦𑀸𑀫𑀁 𑀧𑀸𑀝𑀺𑀧𑀤𑀺𑀓𑀁, 𑀢𑀲𑁆𑀲𑀅𑀦𑁆𑀢𑁂 𑀯𑀢𑁆𑀢𑀫𑀸𑀦𑀸 𑀇𑀯𑀡𑁆𑀡𑀼𑀯𑀡𑁆𑀡𑀸 𑀛𑀮𑀲𑀜𑁆𑀜𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀛𑀮𑀸 𑀯𑀸’’ 𑁨,𑁧𑁧𑁧 𑀇𑀘𑁆𑀘𑀸𑀤𑀺.

𑁧𑁦. 𑀧𑀺𑀢𑁆𑀣𑀺𑀬𑀁.

𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑀲𑁆𑀲 𑀦𑀸𑀫𑀲𑁆𑀲-𑀦𑁆𑀢𑁂 𑀯𑀢𑁆𑀢𑀫𑀸𑀦𑀸 𑀇𑀯𑀡𑁆𑀡𑀼𑀯𑀡𑁆𑀡𑀸 𑀧𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? 𑀬𑁂 𑀧𑀲𑁆𑀲𑀺𑀯𑀡𑁆𑀡𑀲𑁆𑀲’’ 𑁨,𑁧𑁧𑁬 𑀇𑀘𑁆𑀘𑀸𑀤𑀺.

𑁧𑁧. 𑀖𑀸.

𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑀲𑁆𑀲 𑀦𑀸𑀫𑀲𑁆𑀲-𑀦𑁆𑀢𑁂 𑀯𑀢𑁆𑀣𑀫𑀸𑀦𑁄 𑀆𑀓𑀸𑀭𑁄 𑀖𑀲𑀜𑁆𑀜𑁄 𑀳𑁄𑀢𑀺. 𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀖𑀩𑁆𑀭𑀳𑁆𑀫𑀸𑀤𑀺𑀢𑁂’’ 𑁨,𑁬𑁦 𑀇𑀘𑁆𑀘𑀸𑀤𑀺.

𑁧𑁨. 𑀕𑁄 𑀲𑁆𑀬𑀸𑀮𑀧𑀦𑁂.

𑀆𑀮𑀧𑀦𑁂 𑀲𑀺 𑀕𑀲𑀜𑁆𑀜𑁄 𑀳𑁄𑀢𑀺.

𑀢𑁂𑀦 𑀓𑁆𑀯𑀢𑁆𑀣𑁄? ‘‘𑀕𑁂𑀯𑀸’’ 𑁨,𑁬𑁫 𑀇𑀘𑁆𑀘𑀸𑀤𑀺.

(𑀲𑀜𑁆𑀜𑀸)

𑁧𑁩. 𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲.

𑀬𑀁 𑀯𑀺𑀲𑁂𑀲𑀦𑀁, 𑀢𑀤𑀦𑁆𑀢𑀲𑁆𑀲 𑀯𑀺𑀥𑀺 𑀜𑀸𑀢𑀩𑁆𑀩𑁄 ‘‘𑀅𑀢𑁄 𑀬𑁄𑀦𑀁 𑀝𑀸𑀝𑁂’’ 𑁨,𑁪𑁧 𑀦𑀭𑀸𑀦𑀭𑁂.

𑁧𑁪. 𑀲𑀢𑁆𑀢𑀫𑀺𑀬𑀁 𑀧𑀼𑀩𑁆𑀩𑀲𑁆𑀲.

𑀲𑀢𑁆𑀢𑀫𑀻𑀦𑀺𑀤𑁆𑀤𑁂𑀲𑁂 𑀧𑀼𑀩𑁆𑀩𑀲𑁆𑀲𑁂𑀯 𑀓𑀸𑀭𑀺𑀬𑀁 𑀜𑀸𑀢𑀩𑁆𑀩𑀁 ‘‘𑀲𑀭𑁄 𑀮𑁄𑀧𑁄 𑀲𑀭𑁂’’ 𑁧,𑁨𑁬 𑀯𑁂𑀴𑀕𑁆𑀕𑀁. ‘𑀢𑀫𑀳’𑀦𑁆𑀢𑀻𑀥 𑀓𑀲𑁆𑀫𑀸 𑀦 𑀳𑁄𑀢𑀺?, 𑀲𑀭𑁂𑀢𑁄𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑁄 𑀢𑀢𑁆𑀣𑁂𑀢𑀸𑀯 𑀯𑀼𑀘𑁆𑀘𑀢𑁂 ‘𑀧𑀼𑀩𑁆𑀩𑀲𑁆𑀲𑁂𑀯 𑀳𑁄𑀢𑀺 𑀦 𑀧𑀭𑀲𑁆𑀲𑀸’𑀢𑀺.

𑁧𑁫. 𑀧𑀜𑁆𑀘𑀫𑀺𑀬𑀁 𑀧𑀭𑀲𑁆𑀲.

𑀧𑀜𑁆𑀘𑀫𑀻𑀦𑀺𑀤𑁆𑀤𑁂𑀲𑁂 𑀧𑀭𑀲𑁆𑀲 𑀓𑀸𑀭𑀺𑀬𑀁 𑀜𑀸𑀢𑀩𑁆𑀩𑀁 ‘‘𑀅𑀢𑁄𑀬𑁄𑀦𑀁 𑀝𑀸𑀝𑁂’’ 𑁨,𑁪𑁧 𑀦𑀭𑀸𑀦𑀭𑁂. 𑀇𑀥 𑀦 𑀳𑁄𑀢𑀁 ‘𑀚𑀦𑁆𑀢𑀼𑀳𑁄 𑀅𑀦𑀢𑁆𑀢𑀸’. 𑀇𑀥 𑀓𑀲𑁆𑀫𑀸 𑀦 𑀳𑁄𑀢𑀺? 𑀑𑀲𑀔𑁆𑀬𑁄, 𑀅𑀦𑀦𑁆𑀢𑀭𑁂 𑀓𑀢𑀢𑁆𑀣𑀢𑀸𑀬 𑀦 𑀩𑁆𑀬𑀯𑀳𑀺𑀢𑀲𑁆𑀲 𑀓𑀸𑀭𑀺𑀬𑀁.

𑁧𑁬. 𑀆𑀤𑀺𑀲𑁆𑀲.

𑀧𑀭𑀲𑁆𑀲 𑀲𑁆𑀲𑀺𑀲𑁆𑀲𑀫𑀸𑀦𑀁 𑀓𑀸𑀭𑀺𑀬𑀫𑀸𑀤𑀺𑀯𑀡𑁆𑀡𑀲𑁆𑀲 𑀜𑀸𑀢𑀩𑁆𑀩𑀁 ‘‘𑀭 𑀲𑀗𑁆𑀔𑁆𑀬𑀸𑀢𑁄 𑀯𑀸’’ 𑁩,𑁧𑁦𑁩 𑀢𑁂𑀭𑀲.

𑁧𑁭. 𑀙𑀝𑁆𑀞𑀺𑀬𑀦𑁆𑀢𑀲𑁆𑀲.

𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀬𑀁 𑀓𑀸𑀭𑀺𑀬𑀁, 𑀢𑀤𑀦𑁆𑀢𑀲𑁆𑀲 𑀯𑀡𑁆𑀡𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑀁 ‘‘𑀭𑀸𑀚𑀲𑁆𑀲𑀺 𑀦𑀸𑀫𑁆𑀳𑀺’’ 𑁨,𑁨𑁩 𑀭𑀸𑀚𑀺𑀦𑀸.

𑁧𑁮. 𑀗𑀸𑀦𑀼𑀩𑀦𑁆𑀥𑁄.

𑀗𑀓𑀸𑀭𑁄 𑀅𑀦𑀼𑀩𑀦𑁆𑀥𑁄 𑀬𑀲𑁆𑀲, 𑀲𑁄 𑀅𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀕𑁄𑀲𑁆𑀲𑀸 𑀯𑀗’’ 𑁧,𑁩𑁨 𑀕𑀯𑀸𑀲𑁆𑀲𑀁.

𑁧𑁯. 𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲.

𑀝𑀓𑀸𑀭𑁄-𑀦𑀼𑀩𑀦𑁆𑀥𑁄 𑀬𑀲𑁆𑀲, 𑀲𑁄-𑀦𑁂𑀓𑀓𑁆𑀔𑀭𑁄 𑀘𑀸𑀤𑁂𑀲𑁄 𑀲𑀩𑁆𑀩𑀲𑁆𑀲 𑀳𑁄𑀢𑀺 ‘‘𑀇𑀫𑀲𑁆𑀲𑀸𑀦𑀺𑀢𑁆𑀣𑀺𑀬𑀁 𑀝𑁂’’ 𑁨,𑁧𑁨𑁮 𑀏𑀲𑀼, ‘‘𑀦𑀸𑀫𑁆𑀳-𑀦𑀺𑀫𑀺’’ 𑁨,𑁧𑁨𑁬 𑀅𑀦𑁂𑀦.

𑁨𑁦. 𑀜𑀓𑀸𑀦𑀼𑀩𑀦𑁆𑀥𑀸𑀤𑁆𑀬𑀦𑁆𑀢𑀸.

𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀜𑀸𑀦𑀼𑀩𑀦𑁆𑀥𑀓𑀸𑀦𑀼𑀩𑀦𑁆𑀥𑀸 𑀆𑀤𑁆𑀬𑀦𑁆𑀢𑀸 𑀳𑁄𑀦𑁆𑀢𑀺 ‘‘𑀩𑁆𑀭𑀽𑀢𑁄 𑀢𑀺𑀲𑁆𑀲𑀻𑀜’’ 𑁬,𑁩𑁬 𑀩𑁆𑀭𑀯𑀻𑀢𑀺, ‘‘𑀪𑀽𑀲𑁆𑀲 𑀯𑀼𑀓’’ 𑁬,𑁧𑁭 𑀩𑀪𑀽𑀯.

𑁨𑁧. 𑀫𑀸𑀦𑀼𑀩𑀦𑁆𑀥𑁄 𑀲𑀭𑀸𑀦𑀫𑀦𑁆𑀢𑀸 𑀧𑀭𑁄.

𑀫𑀓𑀸𑀭𑁄-𑀦𑀼𑀩𑀦𑁆𑀥𑁄 𑀬𑀲𑁆𑀲, 𑀲𑁄 𑀲𑀭𑀸 𑀦𑀫𑀦𑁆𑀢𑀸 𑀲𑀭𑀸 𑀧𑀭𑁄 𑀳𑁄𑀢𑀺 ‘‘𑀫𑀜𑁆𑀘 𑀭𑀼𑀥𑀸𑀤𑀻𑀦𑀁’’ 𑁫-𑁧𑁯 𑀭𑀼𑀦𑁆𑀥𑀢𑀺.

𑁨𑁨. 𑀯𑀺𑀧𑁆𑀧𑀝𑀺𑀲𑁂𑀥𑁂.

𑀤𑁆𑀯𑀺𑀦𑁆𑀦𑀁 𑀲𑀸𑀯𑀓𑀸𑀲𑀸𑀦𑀫𑁂𑀓𑀢𑁆𑀣𑀧𑁆𑀧𑀲𑀗𑁆𑀕𑁂 𑀧𑀭𑁄 𑀳𑁄𑀢𑀺. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸𑀧𑀼𑀭𑀺𑀲𑀸𑀦𑀁 𑀲𑀳𑀧𑁆𑀧𑀢𑁆𑀢𑀺𑀬𑀁 𑀧𑀭𑁄, 𑀲𑁄 𑀘 (𑀕𑀘𑁆𑀙𑀢𑀺) 𑀢𑁆𑀯𑀁 𑀘 (𑀕𑀘𑁆𑀙𑀲𑀺, 𑀢𑀼𑀫𑁆𑀳𑁂) 𑀕𑀘𑁆𑀙𑀣. 𑀲𑁄 𑀘 (𑀕𑀘𑁆𑀙𑀢𑀺,) 𑀢𑁆𑀯𑀁 𑀘 (𑀕𑀘𑁆𑀙𑀲𑀺,) 𑀅𑀳𑀁 𑀘 (𑀕𑀘𑁆𑀙𑀸𑀫𑀺, 𑀫𑀬𑀁) 𑀕𑀘𑁆𑀙𑀸𑀫.

𑁨𑁩. 𑀲𑀗𑁆𑀓𑁂𑀢𑁄-𑀦𑀯𑀬𑀯𑁄-𑀦𑀼𑀩𑀦𑁆𑀥𑁄.

𑀬𑁄 𑀦𑀯𑀬𑀯𑀪𑀽𑀢𑁄𑀲𑀗𑁆𑀓𑁂𑀢𑁄, 𑀲𑁄-𑀦𑀼𑀩𑀦𑁆𑀥𑁄𑀢𑀺 𑀜𑀸𑀢𑀩𑁆𑀩𑁄, ‘‘𑀮𑀼𑀧𑀺𑀢𑀸𑀤𑀻𑀦𑀫𑀸𑀲𑀺𑀫𑁆𑀳𑀺’’ 𑁨-𑁫𑁭 𑀓𑀢𑁆𑀢𑀸.

𑀲𑀗𑁆𑀓𑁂𑀢𑀕𑁆𑀕𑀳𑀡𑀁 𑀓𑀺𑀁? 𑀧𑀓𑀢𑀺𑀬𑀸𑀤𑀺𑀲𑀫𑀼𑀤𑀸𑀬𑀲𑁆𑀲𑀸𑀦𑀼𑀩𑀦𑁆𑀥𑀢𑀸 𑀫𑀸 𑀳𑁄𑀢𑀽𑀢𑀺, 𑀅𑀦𑀯𑀬𑀯𑁄𑀳𑀺 𑀲𑀫𑀼𑀤𑀸𑀬𑁄… 𑀲𑀫𑀼𑀤𑀸𑀬𑀭𑀽𑀧𑀢𑁆𑀢𑀸𑀬𑁂𑀯.

𑀅𑀦𑀯𑀬𑀯𑀕𑁆𑀕𑀳𑀡𑀁 𑀓𑀺𑀁? ‘‘𑀅𑀢𑁂𑀦’’ 𑁨-𑁧𑁦𑁮 𑀚𑀦𑁂𑀦. 𑀇𑀫𑀺𑀦𑀸𑀯 𑀮𑁄𑀧𑀲𑁆𑀲𑀸𑀯𑀕𑀢𑀢𑁆𑀢𑀸 𑀦𑀸𑀦𑀼𑀩𑀦𑁆𑀥𑀮𑁄𑀧𑀸𑀬 𑀯𑀘𑀦𑀫𑀸𑀭𑀤𑁆𑀥𑀁.

𑁨𑁪. 𑀯𑀡𑁆𑀡𑀧𑀭𑁂𑀦 𑀲𑀯𑀡𑁆𑀡𑁄𑀧𑀺.

𑀯𑀡𑁆𑀡𑀲𑀤𑁆𑀤𑁄 𑀧𑀭𑁄 𑀬𑀲𑁆𑀫𑀸 𑀢𑁂𑀦 𑀲𑀯𑀡𑁆𑀡𑁄𑀧𑀺 𑀕𑀬𑁆𑀳𑀢𑀺 𑀲𑀁𑀘 𑀭𑀽𑀧𑀁 ‘‘𑀬𑀼𑀯𑀡𑁆𑀡𑀸𑀦𑀫𑁂𑀑 𑀮𑀼𑀢𑁆𑀢𑀸’’ 𑁧-𑁨𑁯 𑀯𑀸𑀓𑁂𑀭𑀺𑀢𑀁, 𑀲𑀫𑁄𑀦𑀸.

𑁨𑁫. 𑀦𑁆𑀢𑀼 𑀯𑀦𑁆𑀢𑀼𑀫𑀦𑁆𑀢𑁆𑀯𑀸𑀯𑀦𑁆𑀢𑀼𑀢𑀯𑀦𑁆𑀢𑀼𑀲𑀫𑁆𑀩𑀦𑁆𑀥𑀻.

𑀯𑀦𑁆𑀢𑁆𑀯𑀸𑀤𑀺𑀲𑀫𑁆𑀩𑀦𑁆𑀥𑀻𑀬𑁂𑀯𑀦𑁆𑀢𑀼 𑀕𑀬𑁆𑀳𑀢𑀺, ‘‘𑀦𑁆𑀢𑀦𑁆𑀢𑀽𑀦𑀁 𑀦𑁆𑀢𑁄 𑀬𑁄𑀫𑁆𑀳𑀺 𑀧𑀞𑀫𑁂’’ 𑁨-𑁨𑁧𑁫 𑀕𑀼𑀡𑀯𑀦𑁆𑀢𑁄.

𑀯𑀦𑁆𑀢𑁆𑀯𑀸𑀤𑀺𑀲𑀫𑁆𑀩𑀦𑁆𑀥𑀻𑀢𑀺 𑀓𑀺𑀁? 𑀚𑀦𑁆𑀢𑀽 𑀢𑀦𑁆𑀢𑀽.

(𑀧𑀭𑀺𑀪𑀸𑀲𑀸𑀬𑁄.)

𑁨𑁬. 𑀲𑀭𑁄 𑀮𑁄𑀧𑁄 𑀲𑀭𑁂.

𑀲𑀭𑁂 𑀲𑀭𑁄 𑀮𑁄𑀧𑀦𑀻𑀬𑁄 𑀳𑁄𑀢𑀺. 𑀢𑀢𑁆𑀭𑀺-𑀫𑁂, 𑀲𑀤𑁆𑀥𑀺-𑀦𑁆𑀤𑁆𑀭𑀺𑀬𑀁, 𑀦𑁄𑀳𑁂-𑀢𑀁, 𑀪𑀺𑀓𑁆𑀔𑀼𑀦𑁄-𑀯𑀸𑀤𑁄, 𑀲𑀫𑁂𑀢𑀸-𑀬𑀲𑁆𑀫𑀸, 𑀅𑀪𑀺𑀪𑀸-𑀬𑀢𑀦𑀁, 𑀧𑀼𑀢𑁆𑀢𑀸𑀫-𑀢𑁆𑀣𑀺, 𑀅𑀲𑀦𑁆𑀢𑁂-𑀢𑁆𑀣.

𑁨𑁭. 𑀧𑀭𑁄 𑀓𑁆𑀯𑀘𑀺.

𑀲𑀭𑀫𑁆𑀳𑀸 𑀧𑀭𑁄 𑀲𑀭𑁄 𑀓𑁆𑀯𑀘𑀺 𑀮𑁄𑀧𑀦𑀻𑀬𑁄 𑀳𑁄𑀢𑀺. 𑀲𑁄-𑀧𑀺, 𑀲𑀸𑀯, 𑀬𑀢𑁄-𑀤𑀓𑀁, 𑀢𑀢𑁄-𑀯. 𑀓𑁆𑀯𑀘𑀻𑀢𑀺𑀓𑀺𑀁? 𑀲𑀤𑁆𑀥𑀺-𑀦𑁆𑀤𑁆𑀭𑀺𑀬𑀁, 𑀅𑀬𑀫𑀥𑀺𑀓𑀸𑀭𑁄 𑀆𑀧𑀭𑀺𑀘𑁆𑀙𑁂𑀤𑀸𑀯𑀲𑀸𑀦𑀸, 𑀢𑁂𑀦 𑀦𑀸𑀢𑀺𑀧𑁆𑀧𑀲𑀗𑁆𑀕𑁄.

𑁨𑁮. 𑀦 𑀤𑁆𑀯𑁂𑀯𑀸.

𑀧𑀼𑀩𑁆𑀩𑀧𑀭𑀲𑀭𑀸 𑀤𑁆𑀯𑁂𑀧𑀺 𑀯𑀸 𑀓𑁆𑀯𑀘𑀺 𑀦 𑀮𑀼𑀧𑁆𑀬𑀦𑁆𑀢𑁂, 𑀮𑀢𑀸 𑀇𑀯, 𑀮𑀢𑁂-𑀯, 𑀮𑀢𑀸-𑀯.

𑁨𑁯. 𑀬𑀼𑀯𑀡𑁆𑀡𑀸𑀦𑀫𑁂𑀑 𑀮𑀼𑀢𑁆𑀢𑀸.

𑀮𑀼𑀢𑁆𑀢𑀸 𑀲𑀭𑀸 𑀧𑀭𑁂𑀲𑀁 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀏𑀑 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁.

𑀢𑀲𑁆𑀲𑁂-𑀤𑀁, 𑀯𑀸𑀢𑁂-𑀭𑀺𑀢𑀁, 𑀦𑁄-𑀧𑁂𑀢𑀺, 𑀯𑀸𑀫𑁄-𑀭𑀽, 𑀅𑀢𑁂-𑀯𑀜𑁆𑀜𑁂𑀳𑀺, 𑀯𑁄-𑀤𑀓𑀁. 𑀓𑀣𑀁 ‘‘𑀧𑀘𑁆𑀘𑁄𑀭𑀲𑁆𑀫𑀺’’𑀦𑁆𑀢𑀺? 𑀬𑁄𑀕𑀯𑀺𑀪𑀸𑀕𑀸. 𑀯𑀸𑀢𑁆𑀯𑁂𑀯? 𑀢𑀲𑁆𑀲𑀺𑀤𑀁.

𑀮𑀼𑀢𑁆𑀢𑁂𑀢𑀺 𑀓𑀺𑀁? 𑀮𑀢𑀸 𑀇𑀯.

𑁩𑁦. 𑀬𑀯𑀸 𑀲𑀭𑁂.

𑀲𑀭𑁂 𑀧𑀭𑁂 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀬𑀓𑀸𑀭𑀯𑀓𑀸𑀭𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀩𑁆𑀬𑀸𑀓𑀢𑁄, 𑀇𑀘𑁆𑀘𑀲𑁆𑀲, 𑀅𑀚𑁆𑀛𑀺𑀡𑀫𑀼𑀢𑁆𑀢𑁄, 𑀲𑁆𑀯𑀸𑀕𑀢𑀁, 𑀲𑁆𑀯𑀸𑀧𑀦𑀮𑀸𑀦𑀺𑀮𑀁, 𑀯𑀸𑀢𑁆𑀯𑁂𑀯? 𑀇𑀢𑀺-𑀲𑁆𑀲. 𑀓𑁆𑀯𑀘𑀺𑀢𑁆𑀯𑁂𑀯? 𑀬𑀸𑀦𑀻-𑀥, 𑀲𑀽-𑀧𑀝𑁆𑀞𑀺𑀢𑀁.

𑁩𑁧. 𑀏𑀑𑀦𑀁.

𑀏𑀑𑀦𑀁𑀬𑀯𑀸𑀬𑁄𑀦𑁆𑀢𑀺 𑀯𑀸 𑀲𑀭𑁂 𑀬𑀣𑀸𑀓𑁆𑀓𑀫𑀁. 𑀢𑁆𑀬𑀚𑁆𑀚 𑀢𑁂-𑀚𑁆𑀚, 𑀲𑁆𑀯𑀸𑀳𑀁 𑀲𑁄-𑀳𑀁. 𑀓𑁆𑀯𑀘𑀺𑀢𑁆𑀯𑁂𑀯? 𑀧𑀼𑀢𑁆𑀢𑀸𑀫-𑀢𑁆𑀣𑀺, 𑀅𑀲𑀦𑁆𑀢𑁂-𑀢𑁆𑀣.

𑁩𑁨. 𑀕𑁄𑀲𑁆𑀲𑀸-𑀯𑀗.

𑀲𑀭𑁂 𑀕𑁄𑀲𑁆𑀲 𑀅𑀯𑀗 𑀳𑁄𑀢𑀺. 𑀕𑀯𑀸-𑀲𑁆𑀲𑀁. ‘𑀬𑀣𑀭𑀻𑀯, 𑀢𑀣𑀭𑀺𑀯𑁂’𑀢𑀺 𑀦𑀺𑀧𑀸𑀢𑀸𑀯, ‘𑀪𑀼𑀲𑀸𑀫𑀺𑀯𑁂’𑀢𑀺 𑀇𑀯𑀲𑀤𑁆𑀤𑁄 𑀏𑀯𑀢𑁆𑀣𑁄.

𑁩𑁩. 𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸.

𑀭𑀲𑁆𑀲𑀤𑀻𑀖𑀸𑀦𑀁 𑀓𑁆𑀯𑀘𑀺 𑀤𑀻𑀖𑀭𑀲𑁆𑀲𑀸 𑀳𑁄𑀦𑁆𑀢𑀺 𑀩𑁆𑀬𑀜𑁆𑀚𑀦𑁂. 𑀢𑀢𑁆𑀭𑀸-𑀬𑀁, 𑀫𑀼𑀦𑀻𑀘𑀭𑁂, 𑀲𑀫𑁆𑀫𑀤𑁂𑀯, 𑀫𑀸𑀮𑀪𑀸𑀭𑀻.

𑁩𑁪. 𑀲𑀭𑀫𑁆𑀳𑀸 𑀤𑁆𑀯𑁂.

𑀲𑀭𑀫𑁆𑀳𑀸 𑀧𑀭𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀓𑁆𑀯𑀘𑀺 𑀤𑁆𑀯𑁂 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀧𑀕𑁆𑀕𑀳𑁄. 𑀲𑀭𑀫𑁆𑀳𑀸𑀢𑀺 𑀓𑀺𑀁? 𑀢𑀁 𑀔𑀡𑀁.

𑁩𑁫. 𑀘𑀢𑀼𑀢𑁆𑀣𑀤𑀼𑀢𑀺𑀬𑁂𑀲𑁆𑀯𑁂𑀲𑀁 𑀢𑀢𑀺𑀬𑀧𑀞𑀫𑀸.

𑀘𑀢𑀼𑀢𑁆𑀣𑀤𑀼𑀢𑀺𑀬𑁂𑀲𑀼 𑀧𑀭𑁂𑀲𑁆𑀯𑁂𑀲𑀁 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀢𑀩𑁆𑀩𑀕𑁆𑀕𑁂 𑀢𑀢𑀺𑀬 𑀧𑀞𑀫𑀸 𑀳𑁄𑀦𑁆𑀢𑀺. 𑀧𑀘𑁆𑀘𑀸𑀲𑀢𑁆𑀣𑁆𑀬𑀸, 𑀦𑀺𑀕𑁆𑀖𑁄𑀲𑁄, 𑀅𑀓𑁆𑀔𑀦𑁆𑀢𑀺, 𑀩𑁄𑀚𑁆𑀛𑀗𑁆𑀕𑀸, 𑀲𑁂𑀢𑀘𑁆𑀙𑀢𑁆𑀢𑀁, 𑀤𑀟𑁆𑀠𑁄, 𑀦𑀺𑀝𑁆𑀞𑀸𑀦𑀁, 𑀫𑀳𑀤𑁆𑀥𑀦𑁄, 𑀬𑀲𑀢𑁆𑀣𑁂𑀭𑁄, 𑀅𑀧𑁆𑀨𑀼𑀝𑀁, 𑀅𑀩𑁆𑀪𑀼𑀕𑁆𑀕𑀢𑁄. 𑀏𑀲𑁆𑀯𑀻𑀢𑀺 𑀓𑀺𑀁? 𑀣𑁂𑀭𑁄. 𑀏𑀲𑀦𑁆𑀢𑀺 𑀓𑀺𑀁? 𑀧𑀢𑁆𑀣𑁄.

𑁩𑁬. 𑀯𑀺𑀢𑀺𑀲𑁆𑀲𑁂𑀯𑁂 𑀯𑀸.

𑀏𑀯𑀲𑀤𑁆𑀤𑁂 𑀧𑀭𑁂 𑀇𑀢𑀺𑀲𑁆𑀲 𑀯𑁄 𑀳𑁄𑀢𑀺 𑀯𑀸. 𑀇𑀢𑁆𑀯𑁂𑀯, 𑀇𑀘𑁆𑀘𑁂𑀯. 𑀏𑀯𑁂𑀢𑀺 𑀓𑀺𑀁? 𑀇𑀘𑁆𑀘𑀸𑀳.

𑁩𑁭. 𑀏𑀑𑀦𑀫 𑀯𑀡𑁆𑀡𑁂.

𑀏𑀑𑀦𑀁 𑀯𑀡𑁆𑀡𑁂 𑀓𑁆𑀯𑀘𑀺 𑀅 𑀳𑁄𑀢𑀺 𑀯𑀸. 𑀤𑀺𑀲𑁆𑀯𑀸 𑀬𑀸𑀘𑀓 𑀫𑀸𑀕𑀢𑁂, 𑀅𑀓𑀭𑀫𑁆𑀳𑀲 𑀢𑁂, 𑀏𑀲 𑀅𑀢𑁆𑀣𑁄, 𑀏𑀲 𑀥𑀫𑁆𑀫𑁄, 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀲𑁆𑀯𑀸𑀢𑀦𑀁, 𑀳𑀺𑀬𑁆𑀬𑀢𑁆𑀢𑀦𑀁, 𑀓𑀭𑀲𑁆𑀲𑀼. 𑀯𑀸𑀢𑁆𑀯𑁂𑀯? 𑀬𑀸𑀘𑀓𑁂 𑀆𑀕𑀢𑁂 𑀏𑀲𑁄 𑀥𑀫𑁆𑀫𑁄. 𑀯𑀡𑁆𑀡𑁂𑀢𑀺 𑀓𑀺𑀁? 𑀲𑁄.

𑁩𑁮. 𑀦𑀺𑀕𑁆𑀕𑀳𑀻𑀢𑀁.

𑀦𑀺𑀕𑁆𑀕𑀳𑀻𑀢𑀫𑀸𑀕𑀫𑁄 𑀳𑁄𑀢𑀺 𑀯𑀸 𑀓𑁆𑀯𑀘𑀺. 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀘𑀓𑁆𑀔𑀼𑀉𑀤𑀧𑀸𑀤𑀺, 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀚𑀸𑀢𑀺𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁. 𑀅𑀯𑀁𑀲𑀺𑀭𑁄𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑀁… 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀯𑀸𑀥𑀺𑀓𑀸𑀭𑀲𑁆𑀲, 𑀲𑀸𑀫𑀢𑁆𑀢𑀺𑀬𑁂𑀦𑀸𑀕𑀫𑁄𑀯, 𑀲 𑀘 𑀭𑀲𑁆𑀲 𑀲𑀭𑀲𑁆𑀲𑁂𑀯 𑀳𑁄𑀢𑀺… 𑀢𑀲𑁆𑀲 𑀭𑀲𑁆𑀲𑀸𑀦𑀼𑀕𑀢𑀢𑁆𑀢𑀸.

𑁩𑁯. 𑀮𑁄𑀧𑁄.

𑀦𑀺𑀕𑁆𑀕𑀳𑀻𑀢𑀲𑁆𑀲 𑀮𑁄𑀧𑁄 𑀳𑁄𑀢𑀺 𑀯𑀸 𑀓𑁆𑀯𑀘𑀺. 𑀓𑁆𑀬𑀸𑀳𑀁 𑀓𑀺𑀫𑀳𑀁𑀲𑀸𑀭𑀢𑁆𑀢𑁄 𑀲𑀁𑀭𑀢𑁆𑀢𑁄. 𑀲𑀮𑁆𑀮𑁂 𑀔𑁄-𑀕𑀦𑁆𑀢𑀼𑀓𑀸𑀫𑁄 𑀕𑀦𑁆𑀢𑀼𑀫𑀦𑁄𑀢𑀺, 𑀆𑀤𑀻𑀲𑀼 𑀦𑀺𑀘𑁆𑀘𑀁.

𑁪𑁦. 𑀧𑀭𑀲𑀭𑀲𑁆𑀲.

𑀦𑀺𑀕𑁆𑀕𑀳𑀻𑀢𑀫𑁆𑀳𑀸 𑀧𑀭𑀲𑁆𑀲 𑀲𑀭𑀲𑁆𑀲 𑀮𑁄𑀧𑁄 𑀳𑁄𑀢𑀺 𑀯𑀸 𑀓𑁆𑀯𑀘𑀺. 𑀢𑁆𑀯𑀁-𑀲𑀺 𑀢𑁆𑀯𑀫𑀲𑀺.

𑁪𑁧. 𑀯𑀕𑁆𑀕𑁂 𑀯𑀕𑁆𑀕𑀦𑁆𑀢𑁄.

𑀦𑀺𑀕𑁆𑀕𑀳𑀻𑀢𑀲𑁆𑀲 𑀔𑁄 𑀯𑀕𑁆𑀕𑁂 𑀯𑀕𑁆𑀕𑀦𑁆𑀢𑁄 𑀯𑀸 𑀳𑁄𑀢𑀺 𑀧𑀘𑁆𑀘𑀸𑀲𑀢𑁆𑀢𑁆𑀬𑀸. 𑀢𑀗𑁆𑀓𑀭𑁄𑀢𑀺 𑀢𑀁 𑀓𑀭𑁄𑀢𑀺, 𑀢𑀜𑁆𑀘𑀭𑀢𑀺 𑀢𑀁 𑀘𑀭𑀢𑀺, 𑀢𑀡𑁆𑀞𑀸𑀦𑀁 𑀢𑀁 𑀞𑀸𑀦𑀁, 𑀢𑀦𑁆𑀥𑀦𑀁 𑀢𑀁 𑀥𑀦𑀁, 𑀢𑀫𑁆𑀧𑀸𑀢𑀺 𑀢𑀁 𑀧𑀸𑀢𑀺. 𑀦𑀺𑀘𑁆𑀘𑀁 𑀧𑀤𑀫𑀚𑁆𑀛𑁂 𑀕𑀦𑁆𑀢𑁆𑀯𑀸, 𑀓𑁆𑀯𑀘𑀜𑁆𑀜𑀸𑀢𑁆𑀭𑀧𑀺 𑀲𑀦𑁆𑀢𑀺𑀝𑁆𑀞𑀢𑀺.

𑁪𑁨. 𑀬𑁂𑀯𑀳𑀺𑀲𑀼 𑀜𑁄.

𑀬 𑀏𑀯 𑀳𑀺 𑀲𑀤𑁆𑀤𑁂𑀲𑀼 𑀦𑀺𑀕𑁆𑀕𑀳𑀻𑀢𑀲𑁆𑀲 𑀯𑀸 𑀜𑁄 𑀳𑁄𑀢𑀺. 𑀬𑀜𑁆𑀜𑀤𑁂𑀯, 𑀢𑀜𑁆𑀜𑁂𑀯, 𑀢𑀜𑁆𑀳𑀺, 𑀯𑀸𑀢𑁆𑀯𑁂𑀯? 𑀬𑀁 𑀬𑀤𑁂𑀯.

𑁪𑁩. 𑀬𑁂 𑀲𑀁𑀲𑁆𑀲.

𑀲𑀁𑀲𑀤𑁆𑀤𑀲𑁆𑀲 𑀬𑀁 𑀦𑀺𑀕𑁆𑀕𑀳𑀻𑀢𑀁 𑀢𑀲𑁆𑀲 𑀯𑀸 𑀜𑁄 𑀳𑁄𑀢𑀺 𑀬𑀓𑀸𑀭𑁂. 𑀲𑀜𑁆𑀜𑀫𑁄 𑀲𑀁𑀬𑀫𑁄.

𑁪𑁪. 𑀫𑀬𑀤𑀸 𑀲𑀭𑁂.

𑀦𑀺𑀕𑁆𑀕𑀳𑀻𑀢𑀲𑁆𑀲 𑀫𑀬𑀤𑀸 𑀳𑁄𑀦𑁆𑀢𑀺 𑀯𑀸 𑀲𑀭𑁂 𑀓𑁆𑀯𑀘𑀺. 𑀢𑀫𑀳𑀁, 𑀢𑀬𑀺𑀤𑀁, 𑀢𑀤𑀮𑀁. 𑀯𑀸 𑀢𑁆𑀯𑁂𑀯? 𑀢𑀁 𑀅𑀳𑀁.

𑁪𑁫. 𑀯𑀦𑀢𑀭𑀕𑀸 𑀘𑀸𑀕𑀫𑀸.

𑀏𑀢𑁂 𑀫𑀬𑀤𑀸 𑀘 𑀆𑀕𑀫𑀸 𑀳𑁄𑀦𑁆𑀢𑀺 𑀲𑀭𑁂 𑀯𑀸 𑀓𑁆𑀯𑀘𑀺. 𑀢𑀺𑀯𑀗𑁆𑀕𑀺𑀓𑀁, 𑀇𑀢𑁄 𑀦𑀸𑀬𑀢𑀺, 𑀘𑀺𑀦𑀺𑀢𑁆𑀯𑀸, 𑀢𑀲𑁆𑀫𑀸𑀢𑀺𑀳, 𑀦𑀺𑀭𑁄𑀚𑀁, 𑀧𑀼𑀣𑀕𑁂𑀯, 𑀇𑀥𑀫𑀸𑀳𑀼, 𑀬𑀣𑀬𑀺𑀤𑀁, 𑀅𑀢𑁆𑀢𑀤𑀢𑁆𑀣𑀁. 𑀯𑀸 𑀢𑁆𑀯𑁂𑀯? 𑀅𑀢𑁆𑀢𑀢𑁆𑀣𑀁. ‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯𑀸’𑀢𑀺-𑀧𑀞𑀫𑀦𑁆𑀢𑁄 𑀧𑀕𑀲𑀤𑁆𑀤𑁄𑀯.

𑁪𑁬. 𑀙𑀸 𑀴𑁄.

𑀙𑀲𑀤𑁆𑀤𑀸 𑀧𑀭𑀲𑁆𑀲 𑀲𑀭𑀲𑁆𑀲 𑀴𑀓𑀸𑀭𑁄 𑀆𑀕𑀫𑁄 𑀳𑁄𑀢𑀺 𑀯𑀸. 𑀙𑀴𑀗𑁆𑀕𑀁, 𑀙𑀴𑀸𑀬𑀢𑀦𑀁. 𑀯𑀸𑀢𑁆𑀯𑁂𑀯? 𑀙𑀅𑀪𑀺𑀜𑁆𑀜𑀸.

𑁪𑁭. 𑀢𑀤𑀫𑀺𑀦𑀸𑀤𑀻𑀦𑀺.

𑀢𑀤𑀫𑀺𑀦𑀸𑀤𑀻𑀦𑀺 𑀲𑀸𑀥𑀽𑀦𑀺 𑀪𑀯𑀦𑁆𑀢𑀺. 𑀢𑀁 𑀇𑀫𑀺𑀦𑀸 𑀢𑀤𑀫𑀺𑀦𑀸, 𑀲𑀓𑀺𑀁 𑀆𑀕𑀸𑀫𑀻 𑀲𑀓𑀤𑀸𑀕𑀸𑀫𑀻, 𑀏𑀓𑀁 𑀇𑀥 𑀅𑀳𑀁 𑀏𑀓𑀫𑀺𑀤𑀸𑀳𑀁, 𑀲𑀁𑀯𑀺𑀥𑀸𑀬 𑀅𑀯𑀳𑀸𑀭𑁄 𑀲𑀁𑀯𑀺𑀤𑀸𑀯𑀳𑀸𑀭𑁄, 𑀯𑀸𑀭𑀺𑀦𑁄 𑀯𑀸𑀳𑀓𑁄 𑀯𑀮𑀸𑀳𑀓𑁄, 𑀚𑀻𑀯𑀦𑀲𑁆𑀲 𑀫𑀽𑀢𑁄 𑀚𑀻𑀫𑀽𑀢𑁄, 𑀙𑀯𑀲𑁆𑀲 𑀲𑀬𑀦𑀁 𑀲𑀼𑀲𑀸𑀦𑀁, 𑀉𑀤𑁆𑀥𑀁 𑀔𑀫𑀲𑁆𑀲 𑀉𑀤𑀼𑀓𑁆𑀔𑀮𑀁, 𑀧𑀺𑀲𑀺𑀢𑀸𑀲𑁄 𑀧𑀺𑀲𑀸𑀘𑁄, 𑀫𑀳𑀺𑀬𑀁 𑀭𑀯𑀢𑀻𑀢𑀺 𑀫𑀬𑀽𑀭𑁄, 𑀏𑀯𑀫𑀜𑁆𑀜𑁂𑀧𑀺 𑀧𑀬𑁄𑀕𑀢𑁄-𑀦𑀼𑀕𑀦𑁆𑀢𑀩𑁆𑀩𑀸, 𑀧𑀭𑁂𑀲𑀁 𑀧𑀺𑀲𑁄𑀤𑀭𑀸𑀤𑀺𑀫𑀺𑀯𑁂𑀤𑀁 𑀤𑀝𑁆𑀞𑀩𑁆𑀩𑀁.

𑁪𑁮. 𑀢𑀯𑀕𑁆𑀕𑀯𑀭𑀡𑀸𑀦𑀁 𑀬𑁂 𑀘𑀯𑀕𑁆𑀕𑀩𑀬𑀜𑀸.

𑀢𑀯𑀕𑁆𑀕𑀯𑀭𑀡𑀸𑀦𑀁 𑀓𑁆𑀯𑀘𑀺 𑀘𑀯𑀕𑁆𑀕𑀩𑀬𑀜𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀬𑀓𑀸𑀭𑁂. 𑀅𑀧𑀼𑀘𑁆𑀘𑀡𑁆𑀟𑀢𑀸𑀬, 𑀢𑀘𑁆𑀙𑀁, 𑀬𑀚𑁆𑀚𑁂𑀯𑀁, 𑀅𑀚𑁆𑀛𑀢𑁆𑀢𑀁, 𑀣𑀜𑁆𑀜𑀁, 𑀤𑀺𑀩𑁆𑀩𑀁, 𑀧𑀬𑁆𑀬𑁄𑀲𑀦𑀸, 𑀧𑁄𑀓𑁆𑀔𑀭𑀜𑁆𑀜𑁄. 𑀓𑁆𑀯𑀘𑀺𑀢𑁆𑀯𑁂𑀯? 𑀭𑀢𑁆𑀢𑁆𑀬𑀸

𑁪𑁯. 𑀯𑀕𑁆𑀕𑀮𑀲𑁂𑀳𑀺 𑀢𑁂.

𑀯𑀕𑁆𑀕𑀮𑀲𑁂𑀳𑀺 𑀧𑀭𑀲𑁆𑀲 𑀬𑀓𑀸𑀭𑀲𑁆𑀲 𑀓𑁆𑀯𑀘𑀺 𑀢𑁂 𑀯𑀕𑁆𑀕𑀮𑀲𑀸 𑀳𑁄𑀦𑁆𑀢𑀺.

𑀲𑀓𑁆𑀓𑀢𑁂, 𑀧𑀘𑁆𑀘𑀢𑁂, 𑀅𑀝𑁆𑀝𑀢𑁂, 𑀓𑀼𑀧𑁆𑀧𑀢𑁂, 𑀨𑀮𑁆𑀮𑀢𑁂, 𑀅𑀲𑁆𑀲𑀢𑁂. 𑀓𑁆𑀯𑀘𑀺𑀢𑁆𑀯𑁂𑀯? 𑀓𑁆𑀬𑀸𑀳𑀁.

𑁫𑁦. 𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄.

𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄 𑀳𑁄𑀢𑀺 𑀬𑀓𑀸𑀭𑁂. 𑀕𑀼𑀬𑁆𑀳𑀁.

𑁫𑁧. 𑀯𑁂 𑀯𑀸.

𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄 𑀳𑁄𑀢𑀺 𑀯𑀸 𑀯𑀓𑀸𑀭𑁂. 𑀩𑀯𑁆𑀳𑀸𑀩𑀸𑀥𑁄 𑀩𑀯𑁆𑀳𑀸𑀩𑀸𑀥𑁄.

𑁫𑁨. 𑀢𑀣𑀸𑀦𑀭𑀸𑀦𑀁 𑀝𑀞𑀡𑀮𑀸

𑀢𑀣𑀦𑀭𑀸𑀦𑀁 𑀝𑀞𑀡𑀮𑀸 𑀳𑁄𑀦𑁆𑀢𑀺 𑀯𑀸. 𑀤𑀼𑀓𑁆𑀓𑀝𑀁, 𑀅𑀝𑁆𑀞𑀓𑀣𑀸, 𑀕𑀳𑀡𑀁, 𑀧𑀮𑀺𑀖𑁄, 𑀧𑀮𑀸𑀬𑀢𑀺. 𑀯𑀸𑀢𑁆𑀯𑁂𑀯? 𑀤𑀼𑀓𑁆𑀓𑀢𑀁. 𑀓𑁆𑀯𑀘𑀺𑀢𑁆𑀯𑁂𑀯? 𑀲𑀼𑀕𑀢𑁄.

𑁫𑁩. 𑀲𑀁𑀬𑁄𑀕𑀸𑀤𑀺 𑀮𑁄𑀧𑁄.

𑀲𑀁𑀬𑁄𑀕𑀲𑁆𑀲 𑀬𑁄 𑀆𑀤𑀻𑀪𑀽𑀢𑁄-𑀯𑀬𑀯𑁄 𑀢𑀲𑁆𑀲 𑀯𑀸 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀺. 𑀧𑀼𑀧𑁆𑀨𑀁-𑀲𑀸 𑀚𑀸𑀬𑀢𑁂-𑀕𑀺𑀦𑀺.

𑁫𑁪. 𑀯𑀺𑀘𑁆𑀙𑀸𑀪𑀺𑀓𑁆𑀔𑀜𑁆𑀜𑁂𑀲𑀼 𑀤𑁆𑀯𑁂.

𑀯𑀺𑀘𑁆𑀙𑀸𑀬𑀫𑀸𑀪𑀺𑀓𑁆𑀔𑀜𑁆𑀜𑁂 𑀘 𑀬𑀁 𑀯𑀢𑁆𑀢𑀢𑁂, 𑀢𑀲𑁆𑀲 𑀤𑁆𑀯𑁂 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀓𑁆𑀭𑀺𑀬𑀸𑀬 𑀕𑀼𑀡𑁂𑀦 𑀤𑀩𑁆𑀩𑁂𑀦 𑀯𑀸 𑀪𑀺𑀦𑁆𑀦𑁂 𑀅𑀢𑁆𑀣𑁂 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸 𑀯𑀺𑀘𑁆𑀙𑀸. 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀲𑀺𑀜𑁆𑀘𑀢𑀺, 𑀕𑀸𑀫𑁄 𑀕𑀸𑀫𑁄 𑀭𑀫𑀡𑀻𑀬𑁄, 𑀕𑀸𑀫𑁂 𑀕𑀸𑀫𑁂 𑀧𑀸𑀦𑀻𑀬𑀁, 𑀕𑁂𑀳𑁂 𑀕𑁂𑀳𑁂 𑀇𑀲𑁆𑀲𑀭𑁄, 𑀭𑀲𑀁 𑀭𑀲𑀁 𑀪𑀓𑁆𑀔𑀬𑀢𑀺, 𑀓𑀺𑀭𑀺𑀬𑀁 𑀓𑀺𑀭𑀺𑀬𑀫𑀸𑀭𑀪𑀢𑁂.

𑀅𑀢𑁆𑀣𑀺𑀬𑁂𑀯𑀸-𑀦𑀼𑀧𑀼𑀩𑁆𑀩𑀺𑀬𑁂𑀧𑀺 𑀯𑀺𑀘𑁆𑀙𑀸 𑀫𑀽𑀮𑁂 𑀫𑀽𑀮𑁂 𑀣𑀽𑀮𑀸, 𑀅𑀕𑁆𑀕𑁂 𑀅𑀕𑁆𑀕𑁂 𑀲𑀼𑀔𑀼𑀫𑀸, 𑀬𑀤𑀺 𑀳𑀺 𑀏𑀢𑁆𑀣 𑀫𑀽𑀮𑀕𑁆𑀕𑀪𑁂𑀤𑁄 𑀦 𑀲𑀺𑀬𑀸, 𑀆𑀦𑀼𑀧𑀼𑀩𑁆𑀩𑀺𑀬𑀫𑁆𑀧𑀺 𑀦 𑀪𑀯𑁂𑀬𑁆𑀬. 𑀫𑀸𑀲𑀓𑀁 𑀫𑀸𑀲𑀓𑀁 𑀇𑀫𑀫𑁆𑀳𑀸 𑀓𑀳𑀸𑀧𑀡𑀸 𑀪𑀯𑀦𑁆𑀣𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁂𑀳𑀻𑀢𑀺 𑀫𑀸𑀲𑀓𑀁 𑀫𑀸𑀲𑀓𑀫𑀺𑀘𑁆𑀘𑁂𑀢𑀲𑁆𑀫𑀸 𑀯𑀺𑀘𑁆𑀙𑀸𑀕𑀫𑁆𑀬𑀢𑁂, 𑀲𑀤𑁆𑀤𑀦𑁆𑀢𑀭𑀢𑁄 𑀧𑀦 𑀇𑀫𑀫𑁆𑀳𑀸 𑀓𑀳𑀸𑀧𑀡𑀸𑀢𑀺 𑀅𑀯𑀥𑀸𑀭𑀡𑀁. 𑀧𑀼𑀩𑁆𑀩𑀁 𑀧𑀼𑀩𑁆𑀩𑀁 𑀧𑀼𑀧𑁆𑀨𑀦𑁆𑀢𑀺, 𑀧𑀞𑀫𑀁 𑀧𑀞𑀫𑀁 𑀧𑀘𑁆𑀘𑀦𑁆𑀢𑀻𑀢𑁆𑀬𑀢𑁆𑀭𑀸𑀧𑀺 𑀯𑀺𑀘𑁆𑀙𑀸𑀯. 𑀇𑀫𑁂 𑀉𑀪𑁄 𑀅𑀟𑁆𑀠𑀸 𑀓𑀢𑀭𑀸 𑀓𑀢𑀭𑀸 𑀏𑀲𑀁 𑀤𑁆𑀯𑀺𑀦𑁆𑀦𑀫𑀟𑁆𑀠𑀢𑀸, 𑀲𑀩𑁆𑀩𑁂 𑀇𑀫𑁂 𑀅𑀟𑁆𑀠𑀸 𑀓𑀢𑀫𑀸 𑀓𑀢𑀫𑀸 𑀇𑀫𑁂𑀲𑀁 𑀅𑀟𑁆𑀠𑀼𑀢𑀸 𑀇𑀳𑀸𑀧𑀺 𑀯𑀺𑀘𑁆𑀙𑀸𑀯. 𑀆𑀪𑀺𑀓𑁆𑀔𑀜𑁆𑀜𑀁 𑀧𑁄𑀦𑁄𑀧𑀼𑀜𑁆𑀜𑀁 𑀧𑀘𑀢𑀺 𑀧𑀘𑀢𑀺, 𑀧𑀧𑀘𑀢𑀺 𑀧𑀧𑀘𑀢𑀺, 𑀮𑀼𑀦𑀸𑀳𑀺 𑀮𑀼𑀦𑀸𑀳𑀺𑀢𑁆𑀯𑁂𑀯𑀸𑀬𑀁 𑀮𑀼𑀦𑀸𑀢𑀺, 𑀪𑀼𑀢𑁆𑀯𑀸 𑀪𑀼𑀢𑁆𑀯𑀸 𑀕𑀘𑁆𑀙𑀢𑀺, 𑀧𑀝𑀧𑀝𑀸 𑀓𑀭𑁄𑀢𑀺, 𑀧𑀝𑀧𑀝𑀸𑀬𑀢𑀺.

𑁫𑁫. 𑀲𑁆𑀬𑀸𑀤𑀺𑀮𑁄𑀧𑁄 𑀧𑀼𑀩𑁆𑀩𑀲𑁆𑀲𑁂𑀓𑀲𑁆𑀲.

𑀯𑀺𑀘𑁆𑀙𑀸𑀬𑀫𑁂𑀓𑀲𑁆𑀲 𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀲𑁆𑀲 𑀲𑁆𑀬𑀸𑀤𑀺𑀮𑁄𑀧𑁄 𑀳𑁄𑀢𑀺. 𑀏𑀓𑁂𑀓𑀲𑁆𑀲. 𑀓𑀣𑀁 𑀫𑀢𑁆𑀣𑀓𑀫𑀢𑁆𑀣𑀓𑁂𑀦𑀸𑀢𑀺? ‘𑀲𑁆𑀬𑀸𑀤𑀺𑀮𑁄𑀧𑁄 𑀧𑀼𑀩𑁆𑀩𑀲𑁆𑀲𑀸’𑀢𑀺 𑀬𑁄𑀕𑀯𑀺𑀪𑀸𑀕𑀸, 𑀦𑀸𑀘𑀸𑀢𑀺𑀧𑁆𑀧𑀲𑀗𑁆𑀕𑁄 𑀬𑁄𑀕𑀯𑀺𑀪𑀸𑀕𑀸 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀻𑀢𑀺.

𑁫𑁬. 𑀲𑀩𑁆𑀩𑀸𑀤𑀻𑀦𑀁 𑀯𑀻𑀢𑀺𑀳𑀸𑀭𑁂.

𑀲𑀩𑁆𑀩𑀸𑀤𑀻𑀦𑀁 𑀯𑀻𑀢𑀺𑀳𑀸𑀭𑁂 𑀤𑁆𑀯𑁂 𑀪𑀯𑀦𑁆𑀢𑀺 𑀧𑀼𑀩𑁆𑀩𑀲𑁆𑀲 𑀲𑁆𑀬𑀸𑀤𑀺𑀮𑁄𑀧𑁄 𑀘. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀪𑁄𑀚𑀓𑀸, 𑀇𑀢𑀭𑀻𑀢𑀭𑀲𑁆𑀲 𑀪𑁄𑀚𑀓𑀸.

𑁫𑁭. 𑀬𑀸𑀯𑀩𑁄𑀥𑀁 𑀲𑀫𑁆𑀪𑀫𑁂.

𑀢𑀼𑀭𑀺𑀢𑁂𑀦𑀸𑀧𑀸𑀬𑀳𑁂𑀢𑀼𑀧𑀤𑀲𑁆𑀲𑀦𑀁 𑀲𑀫𑁆𑀪𑀫𑁄, 𑀢𑀲𑁆𑀫𑀺𑀁𑀲𑀢𑀺 𑀯𑀢𑁆𑀣𑀼 𑀬𑀸𑀯𑀦𑁆𑀢𑁂𑀳𑀺 𑀲𑀤𑁆𑀤𑁂𑀳𑀺 𑀲𑁄-𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂, 𑀢𑀸𑀯𑀦𑁆𑀢𑁄 𑀲𑀤𑁆𑀤𑀸 𑀧𑀬𑀼𑀚𑁆𑀚𑀦𑁆𑀢𑁂. 𑀲𑀧𑁆𑀧𑁄 𑀲𑀧𑁆𑀧𑁄 𑀲𑀧𑁆𑀧𑁄, 𑀩𑀼𑀚𑁆𑀛𑀲𑁆𑀲𑀼 𑀩𑀼𑀚𑁆𑀛𑀲𑁆𑀲𑀼 𑀩𑀼𑀚𑁆𑀛𑀲𑁆𑀲𑀼, 𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄.

𑁫𑁮. 𑀩𑀳𑀼𑀮𑀁.

𑀅𑀬𑀫𑀥𑀺𑀓𑀸𑀭𑁄 𑀆𑀲𑀢𑁆𑀣𑀧𑀭𑀺𑀲𑀫𑀢𑁆𑀢𑀺𑀬𑀸. 𑀢𑁂𑀦 𑀦𑀸𑀢𑀺𑀧𑁆𑀧𑀲𑀗𑁆𑀕𑁄 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀺 𑀘.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑁂 𑀩𑁆𑀬𑀸𑀓𑀭𑀡𑁂 𑀯𑀼𑀢𑁆𑀢𑀺𑀬𑀁

𑀧𑀞𑀫𑁄 𑀓𑀡𑁆𑀟𑁄.

𑁨. 𑀤𑀼𑀢𑀺𑀬𑁄 𑀓𑀡𑁆𑀟𑁄 (𑀲𑁆𑀬𑀸𑀤𑀺)

𑁧. 𑀤𑁆𑀯𑁂 𑀤𑁆𑀯𑁂-𑀓𑀸𑀦𑁂𑀓𑁂𑀲𑀼 𑀦𑀸𑀫𑀲𑁆𑀫𑀸 𑀲𑀺 𑀬𑁄, 𑀅𑀁 𑀬𑁄, 𑀦𑀸 𑀳𑀺, 𑀲 𑀦𑀁, 𑀲𑁆𑀫𑀸 𑀳𑀺, 𑀲 𑀦𑀁, 𑀲𑁆𑀫𑀺𑀁 𑀲𑀼.

𑀏𑀢𑁂𑀲𑀁 𑀤𑁆𑀯𑁂 𑀤𑁆𑀯𑁂 𑀳𑁄𑀦𑁆𑀢𑀺 𑀏𑀓𑀸𑀦𑁂𑀓𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸. 𑀫𑀼𑀦𑀺 𑀫𑀼𑀦𑀬𑁄, 𑀫𑀼𑀦𑀺𑀁 𑀫𑀼𑀦𑀬𑁄, 𑀫𑀼𑀦𑀺𑀦𑀸 𑀫𑀼𑀦𑀻𑀳𑀺, 𑀫𑀼𑀦𑀺𑀲𑁆𑀲 𑀫𑀼𑀦𑀻𑀦𑀁, 𑀫𑀼𑀦𑀺𑀲𑁆𑀫𑀸 𑀫𑀼𑀦𑀻𑀳𑀺, 𑀫𑀼𑀦𑀺𑀲𑁆𑀲 𑀫𑀼𑀦𑀻𑀦𑀁, 𑀫𑀼𑀦𑀺𑀲𑁆𑀫𑀺𑀁 𑀫𑀼𑀦𑀻𑀲𑀼, 𑀏𑀯𑀁 𑀓𑀼𑀫𑀸𑀭𑀻 𑀓𑀼𑀫𑀸𑀭𑀺𑀬𑁄, 𑀓𑀜𑁆𑀜𑀸 𑀓𑀜𑁆𑀜𑀸𑀬𑁄𑀢𑀺. 𑀏𑀢𑀸𑀦𑀺 𑀲𑀢𑁆𑀢 𑀤𑀼𑀓𑀸𑀦𑀺 𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄 𑀯𑀺𑀪𑀸𑀕𑁄 𑀯𑀺𑀪𑀢𑀻𑀢𑀺 𑀓𑀢𑁆𑀯𑀸, 𑀏𑀢𑁆𑀣 𑀲𑀺𑀅𑀫𑀺𑀢𑀻-𑀓𑀸𑀭𑀸-𑀓𑀸𑀭𑀸 ‘‘𑀓𑀺𑀫𑀁 𑀲𑀺𑀲𑀼’’ 𑁨,𑁨𑁦𑁦 𑀢𑀺 𑀲𑀁𑀓𑁂𑀢𑀢𑁆𑀣𑀸.

𑁨. 𑀓𑀫𑁆𑀫𑁂 𑀤𑀼𑀢𑀺𑀬𑀸.

𑀓𑀭𑀻𑀬𑀢𑀺 𑀓𑀢𑁆𑀢𑀼 𑀓𑀺𑀭𑀺𑀬𑀸𑀬𑀸-𑀪𑀺𑀲𑀫𑁆𑀩𑀦𑁆𑀥𑀻𑀬𑀢𑀻𑀢𑀺 𑀓𑀫𑁆𑀫𑀁, 𑀢𑀲𑁆𑀫𑀺𑀁 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀁. 𑀓𑀝𑀁 𑀓𑀭𑁄𑀢𑀺, 𑀑𑀤𑀦𑀁 𑀧𑀘𑀢𑀺, 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺.

‘𑀑𑀤𑀦𑁄 𑀧𑀘𑁆𑀘𑀢𑀻’𑀢𑀺 𑀑𑀤𑀦𑀲𑀤𑁆𑀤𑀢𑁄 𑀓𑀫𑁆𑀫𑀢𑀸 𑀦𑀧𑁆𑀧𑀢𑀻𑀬𑀢𑁂, 𑀓𑀺𑀜𑁆𑀘𑀭𑀳𑀺? 𑀆𑀔𑁆𑀬𑀸𑀢𑀢𑁄. ‘𑀓𑀝𑀁 𑀓𑀭𑁄𑀢𑀺 𑀯𑀺𑀧𑀼𑀮𑀁 𑀤𑀲𑁆𑀲𑀦𑀻𑀬’𑀦𑁆𑀢𑀺 𑀅𑀢𑁆𑀣𑁂𑀯 𑀕𑀼𑀡𑀬𑀼𑀢𑁆𑀢𑀲𑁆𑀲 𑀓𑀫𑁆𑀫𑀢𑀸, 𑀇𑀘𑁆𑀙𑀺𑀢𑁂𑀧𑀺 𑀓𑀫𑁆𑀫𑀢𑁆𑀢𑀸𑀯 𑀤𑀼𑀢𑀺𑀬𑀸 𑀲𑀺𑀤𑁆𑀥𑀸 𑀕𑀸𑀯𑀼𑀁 𑀧𑀬𑁄 𑀤𑁄𑀳𑀢𑀺, 𑀕𑁄𑀫𑀦𑁆𑀢𑀁 𑀕𑀸𑀯𑀁 𑀬𑀸𑀘𑀢𑀺, 𑀕𑀸𑀯𑀫𑀯𑀭𑀼𑀦𑁆𑀥𑀢𑀺 𑀯𑀚𑀁, 𑀫𑀸𑀡𑀯𑀓𑀁 𑀫𑀕𑁆𑀕𑀁 𑀧𑀼𑀘𑁆𑀙𑀢𑀺, 𑀕𑁄𑀫𑀦𑁆𑀢𑀁 𑀕𑀸𑀯𑀁 𑀪𑀺𑀓𑁆𑀔𑀢𑁂, 𑀭𑀼𑀓𑁆𑀔𑀫𑀯𑀘𑀺𑀦𑀸𑀢𑀺 𑀨𑀮𑀸𑀦𑀺, 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀩𑁆𑀭𑀽𑀢𑁂, 𑀲𑀺𑀲𑁆𑀲𑀁 𑀥𑀫𑁆𑀫𑀫𑀦𑀼𑀲𑀸𑀲𑀢𑀻𑀢𑀺. 𑀏𑀯𑀁 𑀅𑀦𑀺𑀘𑁆𑀙𑀺𑀢𑁂𑀧𑀺 𑀅𑀳𑀺𑀁 𑀮𑀗𑁆𑀖𑀬𑀢𑀺, 𑀯𑀺𑀲𑀁 𑀪𑀓𑁆𑀔𑁂𑀢𑀺. 𑀬𑀁𑀦𑁂𑀯𑀺𑀘𑁆𑀙𑀺𑀢𑀁 𑀦𑀸𑀧𑀺 𑀅𑀦𑀺𑀘𑁆𑀙𑀺𑀢𑀁, 𑀢𑀢𑁆𑀣𑀸𑀧𑀺 𑀤𑀼𑀢𑀺𑀬𑀸 𑀲𑀺𑀤𑁆𑀥𑀸. 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀭𑀼𑀓𑁆𑀔𑀫𑀽𑀮𑀫𑀼𑀧𑀲𑀧𑁆𑀧𑀢𑀺.

𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀕𑀸𑀫𑀫𑀥𑀺𑀢𑀺𑀝𑁆𑀞𑀢𑀺, 𑀭𑀼𑀓𑁆𑀔𑀫𑀚𑁆𑀛𑀸𑀲𑀢𑁂𑀢𑀺𑀅𑀥𑀺𑀲𑀻𑀞𑀸𑀲𑀸𑀦𑀁𑀧𑀬𑁄𑀕𑁂-𑀥𑀺𑀓𑀭𑀡𑁂 𑀓𑀫𑁆𑀫𑀯𑀘𑀦𑀺𑀘𑁆𑀙𑀸, 𑀯𑀢𑁆𑀢𑀺𑀘𑁆𑀙𑀸𑀢𑁄 𑀳𑀺 𑀓𑀸𑀭𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀬𑀣𑀸-𑀯𑀮𑀸𑀳𑀓𑀸 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑀲𑁆𑀲 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁄 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁂 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁂𑀦 𑀯𑀺𑀚𑁆𑀚𑁄𑀢𑀢𑁂𑀢𑀺. 𑀏𑀯𑀫𑀪𑀺𑀦𑀺𑀯𑀺𑀲𑀲𑁆𑀲 𑀯𑀸 𑀥𑀫𑁆𑀫𑀫𑀪𑀺𑀦𑀺𑀯𑀺𑀲𑀢𑁂 𑀥𑀫𑁆𑀫𑁂 𑀯𑀸.

𑀢𑀣𑀸 𑀉𑀧𑀦𑁆𑀯𑀚𑁆𑀛𑀸𑀯𑀲𑀲𑁆𑀲𑀸𑀪𑁄𑀚𑀦 𑀦𑀺𑀯𑀼𑀢𑁆𑀢𑀺𑀯𑀘𑀦𑀲𑁆𑀲 𑀕𑀸𑀫𑀫𑀼𑀧𑀯𑀲𑀢𑀺, 𑀕, 𑀫𑀫𑀦𑀼𑀯𑀲𑀢𑀺, 𑀧𑀩𑁆𑀩𑀢𑀫𑀥𑀺𑀯𑀲𑀢𑀺, 𑀖𑀭𑀫𑀸𑀯𑀲𑀢𑀺. 𑀅𑀪𑁄𑀚𑀦𑀦𑀺𑀯𑀼𑀢𑁆𑀢𑀺 𑀯𑀘𑀦𑀲𑁆𑀲𑀸𑀢𑀺 𑀓𑀺𑀁? 𑀕𑀸𑀫𑁂 𑀉𑀧𑀯𑀲𑀢𑀺, 𑀪𑁄𑀚𑀦𑀦𑀺𑀯𑀼𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀧𑁆𑀧𑀸𑀦𑀸𑀘𑀸𑀭𑁂𑀧𑀺 𑀓𑀫𑁆𑀫𑀢𑁆𑀢𑀸𑀯 𑀤𑀼𑀢𑀺𑀬𑀸 𑀲𑀺𑀬𑀸 𑀦𑀤𑀺𑀫𑁆𑀧𑀺𑀯𑀢𑀺, 𑀕𑀸𑀫𑀁 𑀘𑀭𑀢𑀺, 𑀏𑀯𑀁 ‘𑀲𑀘𑁂 𑀫𑀁 𑀆𑀮𑀧𑀺𑀲𑁆𑀲𑀢𑀻’𑀢𑀺𑀆𑀤𑀻𑀲𑀼𑀧𑀺. 𑀯𑀺𑀳𑀺𑀢𑀸𑀯 𑀧𑀢𑀺𑀥𑀬𑁄𑀕𑁂 𑀤𑀼𑀢𑀺𑀬𑀸 𑁋 ‘𑀧𑀝𑀺𑀪𑀦𑁆𑀢𑀼 𑀢𑀁 𑀘𑀼𑀦𑁆𑀤 𑀩𑁄𑀚𑁆𑀛𑀗𑁆𑀕𑀸’𑀢𑀺. 𑀢𑀁 𑀧𑀢𑀺 𑀩𑁄𑀚𑁆𑀛𑀗𑁆𑀕𑀸 𑀪𑀸𑀲𑀦𑁆𑀢𑀽𑀢𑀺 𑀅𑀢𑁆𑀣𑁄, 𑀬𑀤𑀸𑀢𑀼 𑀥𑀸𑀢𑀼𑀦𑀸𑀬𑀼𑀢𑁆𑀢𑁄 𑀧𑀢𑀺, 𑀢𑀤𑀸 𑀢𑁂𑀦𑀸-𑀬𑁄𑀕𑀸 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻𑀯 ‘𑀢𑀲𑁆𑀲 𑀦𑀧𑁆𑀧𑀝𑀺𑀪𑀸𑀢𑀻’𑀢𑀺. 𑀅𑀓𑁆𑀔𑁂 𑀤𑀺𑀩𑁆𑀩𑀢𑀺, 𑀅𑀓𑁆𑀔𑁂𑀳𑀺 𑀤𑀺𑀩𑁆𑀩𑀢𑀺, 𑀅𑀓𑁆𑀔𑁂𑀲𑀼 𑀤𑀺𑀩𑁆𑀩𑀢𑀻𑀢𑀺 𑀓𑀫𑁆𑀫𑀓𑀭𑀡𑀸𑀥𑀺𑀓𑀭𑀡𑀯𑀘𑀦𑀺𑀘𑁆𑀙𑀸.

𑁩. 𑀓𑀸𑀮𑀤𑁆𑀥𑀸𑀦𑀫𑀘𑁆𑀘𑀦𑁆𑀢𑀲𑀁𑀬𑁄𑀕𑁂.

𑀓𑀺𑀭𑀺𑀬𑀸, 𑀕𑀼𑀡, 𑀤𑀩𑁆𑀩𑁂𑀳𑀺 𑀲𑀸𑀓𑀮𑁆𑀮𑁂𑀦 𑀓𑀸𑀮𑀤𑁆𑀥𑀸𑀦𑀁 𑀲𑀫𑁆𑀩𑀦𑁆𑀥𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄. 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀬𑀫𑀸𑀦𑁂 𑀓𑀸𑀮𑀲𑀤𑁆𑀤𑁂𑀳𑀺 𑀅𑀤𑁆𑀥𑀅𑀤𑁆𑀤𑁂𑀳𑀺 𑀘 𑀤𑀼𑀢𑀺𑀬𑀸 𑀳𑁄𑀢𑀺. 𑀫𑀸𑀲𑀫𑀥𑀻𑀢𑁂, 𑀫𑀸𑀲𑀁 𑀓𑀮𑁆𑀬𑀸𑀡𑀺, 𑀫𑀸𑀲𑀁 𑀕𑀼𑀴𑀥𑀸𑀦𑀸, 𑀓𑁄𑀲𑀫𑀥𑀻𑀢𑁂, 𑀓𑁄𑀲𑀁 𑀓𑀼𑀝𑀺𑀮𑀸 𑀦𑀤𑀻, 𑀓𑁄𑀲𑀁 𑀧𑀩𑁆𑀩𑀢𑁄. 𑀅𑀘𑀦𑁆𑀢𑀲𑀁𑀬𑁄𑀕𑁂𑀢𑀺 𑀓𑀺𑀁? 𑀫𑀸𑀲𑀲𑁆𑀲 𑀤𑁆𑀯𑀻𑀳𑀫𑀥𑀻𑀢𑁂, 𑀓𑁄𑀲𑀲𑁆𑀲𑁂𑀓𑀤𑁂𑀲𑁂 𑀧𑀩𑁆𑀩𑀢𑁄.

𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀓𑀁 𑀲𑀫𑀬𑀁 𑀪𑀕𑀯𑀸, 𑀇𑀫𑀁 𑀭𑀢𑁆𑀢𑀺𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀢𑀺 𑀏𑀯𑀫𑀸𑀤𑀻𑀲𑀼 𑀓𑀸𑀮𑀯𑀸𑀘𑀻 𑀳𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀢𑀸𑀯 𑀤𑀼𑀢𑀺𑀬𑀸 𑀲𑀺𑀤𑁆𑀥𑀸. 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦𑀧𑀺 𑀯𑀸 𑀩𑀳𑀼𑀮𑀁𑀯𑀺𑀥𑀸𑀦𑀸.

𑀨𑀮𑀧𑁆𑀧𑀢𑁆𑀢𑀺𑀬𑀁 𑀓𑀺𑀭𑀺𑀬𑀸𑀧𑀭𑀺𑀲𑀫𑀢𑁆𑀢𑁆𑀬𑀧𑀯𑀕𑁆𑀕𑁄, 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀬𑀫𑀸𑀦𑁂 𑀓𑀸𑀮𑀤𑁆𑀥𑀸𑀦𑀁 𑀓𑀺𑀭𑀺𑀬𑀸𑀬𑀸𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀢𑀢𑀺𑀬𑀸𑀪𑀺𑀫𑀢𑀸, 𑀲𑀸𑀧𑀺 𑀓𑀭𑀡𑀢𑁆𑀢𑀸𑀯 𑀲𑀺𑀤𑁆𑀥𑀸 ‘𑀫𑀸𑀲𑁂𑀦𑀸𑀦𑀼𑀯𑀸𑀓𑁄-𑀥𑀻𑀢𑁄, 𑀓𑁄𑀲𑁂𑀦𑀸𑀦𑀼𑀯𑀸𑀓𑁄-𑀥𑀻𑀢𑁄’𑀢𑀺. 𑀅𑀦𑀧𑀯𑀕𑁆𑀕𑁂𑀢𑀼 𑀅𑀲𑀸𑀥𑀓𑀢𑀫𑀢𑁆𑀢𑀸𑀓𑀭𑀡𑀢𑁆𑀢𑀸𑀪𑀸𑀯𑁂 𑀤𑀼𑀢𑀺𑀬𑀸𑀯 ‘𑀫𑀸𑀲𑀫𑀥𑀻𑀢𑁄-𑀦𑀼𑀯𑀸𑀓𑁄, 𑀦 𑀘𑀸𑀦𑁂 𑀦 𑀕𑀳𑀺𑀢𑁄’𑀢𑀺.

𑀓𑀸𑀭𑀓𑀫𑀚𑁆𑀛𑁂 𑀬𑁂 𑀓𑀸𑀮𑀤𑁆𑀥𑀸𑀦𑀯𑀸𑀘𑀺𑀦𑁄, 𑀢𑀢𑁄 𑀲𑀢𑁆𑀢𑀫𑀻𑀧𑀜𑁆𑀘𑀫𑀺𑀬𑁄 𑀅𑀪𑀺𑀫𑀢𑀸 ‘𑀅𑀚𑁆𑀚 𑀪𑀼𑀢𑁆𑀯𑀸 𑀤𑁂𑀯𑀤𑀢𑁆𑀢𑁄 𑀤𑁆𑀯𑀺𑀳𑁂 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀤𑁆𑀯𑀻𑀳𑀸 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀅𑀢𑁆𑀭𑀝𑁆𑀞𑁄-𑀬𑀫𑀺𑀲𑁆𑀲𑀸𑀲𑁄 𑀓𑁄𑀲𑁂 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺, 𑀓𑁄𑀲𑀸 𑀮𑀓𑁆𑀔𑀁 𑀯𑀺𑀚𑁆𑀛𑀢𑀻’𑀢𑀺, 𑀢𑀸𑀧𑀻𑀳 𑀲𑀓𑀲𑀓𑀓𑀸𑀭𑀓𑀯𑀘𑀦𑀺𑀘𑁆𑀙𑀸𑀬𑁂𑀯 𑀲𑀺𑀤𑁆𑀥𑀸.

𑁪. 𑀕𑀢𑀺 𑀩𑁄𑀥𑀸𑀳𑀸𑀭 𑀲𑀤𑁆𑀤𑀢𑁆𑀣𑀸𑀓𑀫𑁆𑀫𑀓 𑀪𑀚𑁆𑀚𑀸𑀤𑀻𑀦𑀁 𑀧𑀬𑁄𑀚𑁆𑀚𑁂.

𑀕𑀫𑀦𑀢𑁆𑀣𑀸𑀦𑀁 𑀩𑁄𑀥𑀢𑁆𑀣𑀸𑀦𑀁 𑀆𑀳𑀸𑀭𑀢𑁆𑀣𑀸𑀦𑀁 𑀲𑀤𑁆𑀤𑀢𑁆𑀣𑀸𑀦𑀫𑀓𑀫𑁆𑀫𑀓𑀸𑀦𑀁 𑀪𑀚𑁆𑀚𑀸𑀤𑀻𑀦𑀜𑁆𑀘 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀳𑁄𑀢𑀺. 𑀲𑀸𑀫𑀢𑁆𑀣𑀺𑀬𑀸 𑀘 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂𑀦 𑀓𑀫𑁆𑀫𑀢𑀸𑀯𑀲𑁆𑀲 𑀳𑁄𑀢𑀻𑀢𑀺 𑀧𑀢𑀻𑀬𑀢𑁂. 𑀕𑀫𑀬𑀢𑀺 𑀫𑀸𑀡𑀯𑀓𑀁 𑀕𑀸𑀫𑀁, 𑀬𑀸𑀧𑀬𑀢𑀺 𑀫𑀸𑀡𑀯𑀓𑀁 𑀕𑀸𑀫𑀁, 𑀩𑁄𑀥𑀬𑀢𑀺 𑀫𑀸𑀡𑀯𑀓𑀁 𑀥𑀫𑁆𑀫𑀁, 𑀯𑁂𑀤𑀬𑀢𑀺 𑀫𑀸𑀡𑀯𑀓𑀁 𑀥𑀫𑁆𑀫𑀁, 𑀪𑁄𑀚𑀬𑀢𑀺 𑀫𑀸𑀡-𑀯𑀓𑀁 𑀫𑁄𑀤𑀓𑀁, 𑀆𑀲𑀬𑀢𑀺 𑀫𑀸𑀡𑀯𑀓𑀁 𑀫𑁄𑀤𑀓𑀁, 𑀅𑀚𑁆𑀛𑀸𑀧𑀬𑀢𑀺 𑀫𑀸𑀡𑀯𑀓𑀁 𑀯𑁂𑀤𑀁, 𑀧𑀸𑀞𑀬𑀢𑀺 𑀫𑀸𑀡𑀯𑀓𑀁 𑀯𑁂𑀤𑀁, 𑀆𑀲𑀬𑀢𑀺 𑀤𑁂𑀯𑀤𑀢𑁆𑀢𑀁, 𑀲𑀸𑀬𑀬𑀢𑀺 𑀤𑁂𑀯𑀤𑀢𑁆𑀢𑀁, 𑀅𑀜𑁆𑀜𑀁 𑀪𑀚𑁆𑀚𑀸𑀧𑁂𑀢𑀺, 𑀅𑀜𑁆𑀜𑀁 𑀓𑁄𑀝𑁆𑀝𑀸𑀧𑁂𑀢𑀺, 𑀅𑀜𑁆𑀜𑀁 𑀲𑀦𑁆𑀣𑀭𑀸𑀧𑁂𑀢𑀺. 𑀏𑀢𑁂𑀲𑀫𑁂𑀯𑀸𑀢𑀺 𑀓𑀺𑀁? 𑀧𑀸𑀘𑁂𑀢𑀺 𑀑𑀤𑀦𑀁 𑀤𑁂𑀯𑀤𑀢𑁆𑀢𑁂𑀦 𑀬𑀜𑁆𑀜𑀤𑀢𑁆𑀢𑁄. 𑀧𑀬𑁄𑀚𑁆𑀚𑁂𑀢𑀺 𑀓𑀺𑀁? 𑀕𑀘𑁆𑀙𑀢𑀺 𑀤𑁂𑀯𑀤𑀢𑁆𑀢𑁄. 𑀬𑀤𑀸 𑀘𑀭𑀳𑀺 𑀕𑀫𑀬𑀢𑀺 𑀤𑁂𑀯𑀤𑀢𑁆𑀢𑀁 𑀬𑀜𑁆𑀜𑀤𑀢𑁆𑀢𑁄, 𑀢𑀫𑀧𑀭𑁄 𑀧𑀬𑁄𑀚𑁂𑀢𑀺, 𑀢𑀤𑀸 𑀕𑀫𑀬𑀢𑀺 𑀤𑁂𑀯𑀤𑀢𑁆𑀢𑀁 𑀬𑀜𑁆𑀜𑀤𑀢𑁆𑀢𑁂𑀦𑁂𑀢𑀺 𑀪𑀯𑀺𑀢𑀩𑁆𑀩𑀁 … 𑀕𑀫𑀬𑀢𑀺𑀲𑁆𑀲𑀸-𑀕𑀫𑀦𑀢𑁆𑀣𑀢𑁆𑀢𑀸.

𑁫. 𑀳𑀭𑀸𑀤𑀻𑀦𑀁 𑀯𑀸.

𑀳𑀭𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀳𑁄𑀢𑀺 𑀯𑀸. 𑀳𑀸𑀭𑁂𑀢𑀺 𑀪𑀸𑀭𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸, 𑀅𑀚𑁆𑀛𑁄𑀳𑀸𑀭𑁂𑀢𑀺 𑀲𑀢𑁆𑀢𑀼𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸, 𑀓𑀸𑀭𑁂𑀢𑀺 𑀓𑀝𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸 𑀤𑀲𑁆𑀲𑀬𑀢𑁂 𑀚𑀦𑀁 𑀭𑀸𑀚𑀁 𑀚𑀦𑁂𑀦𑁂𑀢𑀺 𑀯𑀸, 𑀅𑀪𑀺𑀯𑀸𑀤𑀬𑀢𑁂 𑀕𑀼𑀭𑀼𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸.

𑁬. 𑀦 𑀔𑀸𑀤𑀸𑀤𑀻𑀦𑀁.

𑀔𑀸𑀤𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀦 𑀳𑁄𑀢𑀺. 𑀔𑀸𑀤𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀆𑀤𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀅𑀯𑁆𑀳, 𑀧𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀲𑀤𑁆𑀤𑀸𑀬𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀓𑀦𑁆𑀤𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀦𑀸𑀬𑀬𑀢𑀺 𑀤𑁂𑀯𑀤𑀢𑁆𑀢𑁂𑀦.