𑁨. 𑀤𑀼𑀢𑀺𑀬𑁄 𑀓𑀡𑁆𑀟𑁄 (𑀲𑁆𑀬𑀸𑀤𑀺)

𑁧. 𑀤𑁆𑀯𑁂 𑀤𑁆𑀯𑁂-𑀓𑀸𑀦𑁂𑀓𑁂𑀲𑀼 𑀦𑀸𑀫𑀲𑁆𑀫𑀸 𑀲𑀺 𑀬𑁄, 𑀅𑀁 𑀬𑁄, 𑀦𑀸 𑀳𑀺, 𑀲 𑀦𑀁, 𑀲𑁆𑀫𑀸 𑀳𑀺, 𑀲 𑀦𑀁, 𑀲𑁆𑀫𑀺𑀁 𑀲𑀼.

𑀏𑀢𑁂𑀲𑀁 𑀤𑁆𑀯𑁂 𑀤𑁆𑀯𑁂 𑀳𑁄𑀦𑁆𑀢𑀺 𑀏𑀓𑀸𑀦𑁂𑀓𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸. 𑀫𑀼𑀦𑀺 𑀫𑀼𑀦𑀬𑁄, 𑀫𑀼𑀦𑀺𑀁 𑀫𑀼𑀦𑀬𑁄, 𑀫𑀼𑀦𑀺𑀦𑀸 𑀫𑀼𑀦𑀻𑀳𑀺, 𑀫𑀼𑀦𑀺𑀲𑁆𑀲 𑀫𑀼𑀦𑀻𑀦𑀁, 𑀫𑀼𑀦𑀺𑀲𑁆𑀫𑀸 𑀫𑀼𑀦𑀻𑀳𑀺, 𑀫𑀼𑀦𑀺𑀲𑁆𑀲 𑀫𑀼𑀦𑀻𑀦𑀁, 𑀫𑀼𑀦𑀺𑀲𑁆𑀫𑀺𑀁 𑀫𑀼𑀦𑀻𑀲𑀼, 𑀏𑀯𑀁 𑀓𑀼𑀫𑀸𑀭𑀻 𑀓𑀼𑀫𑀸𑀭𑀺𑀬𑁄, 𑀓𑀜𑁆𑀜𑀸 𑀓𑀜𑁆𑀜𑀸𑀬𑁄𑀢𑀺. 𑀏𑀢𑀸𑀦𑀺 𑀲𑀢𑁆𑀢 𑀤𑀼𑀓𑀸𑀦𑀺 𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄 𑀯𑀺𑀪𑀸𑀕𑁄 𑀯𑀺𑀪𑀢𑀻𑀢𑀺 𑀓𑀢𑁆𑀯𑀸, 𑀏𑀢𑁆𑀣 𑀲𑀺𑀅𑀫𑀺𑀢𑀻-𑀓𑀸𑀭𑀸-𑀓𑀸𑀭𑀸 ‘‘𑀓𑀺𑀫𑀁 𑀲𑀺𑀲𑀼’’ 𑁨,𑁨𑁦𑁦 𑀢𑀺 𑀲𑀁𑀓𑁂𑀢𑀢𑁆𑀣𑀸.

𑁨. 𑀓𑀫𑁆𑀫𑁂 𑀤𑀼𑀢𑀺𑀬𑀸.

𑀓𑀭𑀻𑀬𑀢𑀺 𑀓𑀢𑁆𑀢𑀼 𑀓𑀺𑀭𑀺𑀬𑀸𑀬𑀸-𑀪𑀺𑀲𑀫𑁆𑀩𑀦𑁆𑀥𑀻𑀬𑀢𑀻𑀢𑀺 𑀓𑀫𑁆𑀫𑀁, 𑀢𑀲𑁆𑀫𑀺𑀁 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀁. 𑀓𑀝𑀁 𑀓𑀭𑁄𑀢𑀺, 𑀑𑀤𑀦𑀁 𑀧𑀘𑀢𑀺, 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺.

‘𑀑𑀤𑀦𑁄 𑀧𑀘𑁆𑀘𑀢𑀻’𑀢𑀺 𑀑𑀤𑀦𑀲𑀤𑁆𑀤𑀢𑁄 𑀓𑀫𑁆𑀫𑀢𑀸 𑀦𑀧𑁆𑀧𑀢𑀻𑀬𑀢𑁂, 𑀓𑀺𑀜𑁆𑀘𑀭𑀳𑀺? 𑀆𑀔𑁆𑀬𑀸𑀢𑀢𑁄. ‘𑀓𑀝𑀁 𑀓𑀭𑁄𑀢𑀺 𑀯𑀺𑀧𑀼𑀮𑀁 𑀤𑀲𑁆𑀲𑀦𑀻𑀬’𑀦𑁆𑀢𑀺 𑀅𑀢𑁆𑀣𑁂𑀯 𑀕𑀼𑀡𑀬𑀼𑀢𑁆𑀢𑀲𑁆𑀲 𑀓𑀫𑁆𑀫𑀢𑀸, 𑀇𑀘𑁆𑀙𑀺𑀢𑁂𑀧𑀺 𑀓𑀫𑁆𑀫𑀢𑁆𑀢𑀸𑀯 𑀤𑀼𑀢𑀺𑀬𑀸 𑀲𑀺𑀤𑁆𑀥𑀸 𑀕𑀸𑀯𑀼𑀁 𑀧𑀬𑁄 𑀤𑁄𑀳𑀢𑀺, 𑀕𑁄𑀫𑀦𑁆𑀢𑀁 𑀕𑀸𑀯𑀁 𑀬𑀸𑀘𑀢𑀺, 𑀕𑀸𑀯𑀫𑀯𑀭𑀼𑀦𑁆𑀥𑀢𑀺 𑀯𑀚𑀁, 𑀫𑀸𑀡𑀯𑀓𑀁 𑀫𑀕𑁆𑀕𑀁 𑀧𑀼𑀘𑁆𑀙𑀢𑀺, 𑀕𑁄𑀫𑀦𑁆𑀢𑀁 𑀕𑀸𑀯𑀁 𑀪𑀺𑀓𑁆𑀔𑀢𑁂, 𑀭𑀼𑀓𑁆𑀔𑀫𑀯𑀘𑀺𑀦𑀸𑀢𑀺 𑀨𑀮𑀸𑀦𑀺, 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀩𑁆𑀭𑀽𑀢𑁂, 𑀲𑀺𑀲𑁆𑀲𑀁 𑀥𑀫𑁆𑀫𑀫𑀦𑀼𑀲𑀸𑀲𑀢𑀻𑀢𑀺. 𑀏𑀯𑀁 𑀅𑀦𑀺𑀘𑁆𑀙𑀺𑀢𑁂𑀧𑀺 𑀅𑀳𑀺𑀁 𑀮𑀗𑁆𑀖𑀬𑀢𑀺, 𑀯𑀺𑀲𑀁 𑀪𑀓𑁆𑀔𑁂𑀢𑀺. 𑀬𑀁𑀦𑁂𑀯𑀺𑀘𑁆𑀙𑀺𑀢𑀁 𑀦𑀸𑀧𑀺 𑀅𑀦𑀺𑀘𑁆𑀙𑀺𑀢𑀁, 𑀢𑀢𑁆𑀣𑀸𑀧𑀺 𑀤𑀼𑀢𑀺𑀬𑀸 𑀲𑀺𑀤𑁆𑀥𑀸. 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀭𑀼𑀓𑁆𑀔𑀫𑀽𑀮𑀫𑀼𑀧𑀲𑀧𑁆𑀧𑀢𑀺.

𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀕𑀸𑀫𑀫𑀥𑀺𑀢𑀺𑀝𑁆𑀞𑀢𑀺, 𑀭𑀼𑀓𑁆𑀔𑀫𑀚𑁆𑀛𑀸𑀲𑀢𑁂𑀢𑀺𑀅𑀥𑀺𑀲𑀻𑀞𑀸𑀲𑀸𑀦𑀁𑀧𑀬𑁄𑀕𑁂-𑀥𑀺𑀓𑀭𑀡𑁂 𑀓𑀫𑁆𑀫𑀯𑀘𑀦𑀺𑀘𑁆𑀙𑀸, 𑀯𑀢𑁆𑀢𑀺𑀘𑁆𑀙𑀸𑀢𑁄 𑀳𑀺 𑀓𑀸𑀭𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀬𑀣𑀸-𑀯𑀮𑀸𑀳𑀓𑀸 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑀲𑁆𑀲 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁄 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁂 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁂𑀦 𑀯𑀺𑀚𑁆𑀚𑁄𑀢𑀢𑁂𑀢𑀺. 𑀏𑀯𑀫𑀪𑀺𑀦𑀺𑀯𑀺𑀲𑀲𑁆𑀲 𑀯𑀸 𑀥𑀫𑁆𑀫𑀫𑀪𑀺𑀦𑀺𑀯𑀺𑀲𑀢𑁂 𑀥𑀫𑁆𑀫𑁂 𑀯𑀸.

𑀢𑀣𑀸 𑀉𑀧𑀦𑁆𑀯𑀚𑁆𑀛𑀸𑀯𑀲𑀲𑁆𑀲𑀸𑀪𑁄𑀚𑀦 𑀦𑀺𑀯𑀼𑀢𑁆𑀢𑀺𑀯𑀘𑀦𑀲𑁆𑀲 𑀕𑀸𑀫𑀫𑀼𑀧𑀯𑀲𑀢𑀺, 𑀕, 𑀫𑀫𑀦𑀼𑀯𑀲𑀢𑀺, 𑀧𑀩𑁆𑀩𑀢𑀫𑀥𑀺𑀯𑀲𑀢𑀺, 𑀖𑀭𑀫𑀸𑀯𑀲𑀢𑀺. 𑀅𑀪𑁄𑀚𑀦𑀦𑀺𑀯𑀼𑀢𑁆𑀢𑀺 𑀯𑀘𑀦𑀲𑁆𑀲𑀸𑀢𑀺 𑀓𑀺𑀁? 𑀕𑀸𑀫𑁂 𑀉𑀧𑀯𑀲𑀢𑀺, 𑀪𑁄𑀚𑀦𑀦𑀺𑀯𑀼𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀧𑁆𑀧𑀸𑀦𑀸𑀘𑀸𑀭𑁂𑀧𑀺 𑀓𑀫𑁆𑀫𑀢𑁆𑀢𑀸𑀯 𑀤𑀼𑀢𑀺𑀬𑀸 𑀲𑀺𑀬𑀸 𑀦𑀤𑀺𑀫𑁆𑀧𑀺𑀯𑀢𑀺, 𑀕𑀸𑀫𑀁 𑀘𑀭𑀢𑀺, 𑀏𑀯𑀁 ‘𑀲𑀘𑁂 𑀫𑀁 𑀆𑀮𑀧𑀺𑀲𑁆𑀲𑀢𑀻’𑀢𑀺𑀆𑀤𑀻𑀲𑀼𑀧𑀺. 𑀯𑀺𑀳𑀺𑀢𑀸𑀯 𑀧𑀢𑀺𑀥𑀬𑁄𑀕𑁂 𑀤𑀼𑀢𑀺𑀬𑀸 𑁋 ‘𑀧𑀝𑀺𑀪𑀦𑁆𑀢𑀼 𑀢𑀁 𑀘𑀼𑀦𑁆𑀤 𑀩𑁄𑀚𑁆𑀛𑀗𑁆𑀕𑀸’𑀢𑀺. 𑀢𑀁 𑀧𑀢𑀺 𑀩𑁄𑀚𑁆𑀛𑀗𑁆𑀕𑀸 𑀪𑀸𑀲𑀦𑁆𑀢𑀽𑀢𑀺 𑀅𑀢𑁆𑀣𑁄, 𑀬𑀤𑀸𑀢𑀼 𑀥𑀸𑀢𑀼𑀦𑀸𑀬𑀼𑀢𑁆𑀢𑁄 𑀧𑀢𑀺, 𑀢𑀤𑀸 𑀢𑁂𑀦𑀸-𑀬𑁄𑀕𑀸 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻𑀯 ‘𑀢𑀲𑁆𑀲 𑀦𑀧𑁆𑀧𑀝𑀺𑀪𑀸𑀢𑀻’𑀢𑀺. 𑀅𑀓𑁆𑀔𑁂 𑀤𑀺𑀩𑁆𑀩𑀢𑀺, 𑀅𑀓𑁆𑀔𑁂𑀳𑀺 𑀤𑀺𑀩𑁆𑀩𑀢𑀺, 𑀅𑀓𑁆𑀔𑁂𑀲𑀼 𑀤𑀺𑀩𑁆𑀩𑀢𑀻𑀢𑀺 𑀓𑀫𑁆𑀫𑀓𑀭𑀡𑀸𑀥𑀺𑀓𑀭𑀡𑀯𑀘𑀦𑀺𑀘𑁆𑀙𑀸.

𑁩. 𑀓𑀸𑀮𑀤𑁆𑀥𑀸𑀦𑀫𑀘𑁆𑀘𑀦𑁆𑀢𑀲𑀁𑀬𑁄𑀕𑁂.

𑀓𑀺𑀭𑀺𑀬𑀸, 𑀕𑀼𑀡, 𑀤𑀩𑁆𑀩𑁂𑀳𑀺 𑀲𑀸𑀓𑀮𑁆𑀮𑁂𑀦 𑀓𑀸𑀮𑀤𑁆𑀥𑀸𑀦𑀁 𑀲𑀫𑁆𑀩𑀦𑁆𑀥𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄. 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀬𑀫𑀸𑀦𑁂 𑀓𑀸𑀮𑀲𑀤𑁆𑀤𑁂𑀳𑀺 𑀅𑀤𑁆𑀥𑀅𑀤𑁆𑀤𑁂𑀳𑀺 𑀘 𑀤𑀼𑀢𑀺𑀬𑀸 𑀳𑁄𑀢𑀺. 𑀫𑀸𑀲𑀫𑀥𑀻𑀢𑁂, 𑀫𑀸𑀲𑀁 𑀓𑀮𑁆𑀬𑀸𑀡𑀺, 𑀫𑀸𑀲𑀁 𑀕𑀼𑀴𑀥𑀸𑀦𑀸, 𑀓𑁄𑀲𑀫𑀥𑀻𑀢𑁂, 𑀓𑁄𑀲𑀁 𑀓𑀼𑀝𑀺𑀮𑀸 𑀦𑀤𑀻, 𑀓𑁄𑀲𑀁 𑀧𑀩𑁆𑀩𑀢𑁄. 𑀅𑀘𑀦𑁆𑀢𑀲𑀁𑀬𑁄𑀕𑁂𑀢𑀺 𑀓𑀺𑀁? 𑀫𑀸𑀲𑀲𑁆𑀲 𑀤𑁆𑀯𑀻𑀳𑀫𑀥𑀻𑀢𑁂, 𑀓𑁄𑀲𑀲𑁆𑀲𑁂𑀓𑀤𑁂𑀲𑁂 𑀧𑀩𑁆𑀩𑀢𑁄.

𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀓𑀁 𑀲𑀫𑀬𑀁 𑀪𑀕𑀯𑀸, 𑀇𑀫𑀁 𑀭𑀢𑁆𑀢𑀺𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀢𑀺 𑀏𑀯𑀫𑀸𑀤𑀻𑀲𑀼 𑀓𑀸𑀮𑀯𑀸𑀘𑀻 𑀳𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀢𑀸𑀯 𑀤𑀼𑀢𑀺𑀬𑀸 𑀲𑀺𑀤𑁆𑀥𑀸. 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦𑀧𑀺 𑀯𑀸 𑀩𑀳𑀼𑀮𑀁𑀯𑀺𑀥𑀸𑀦𑀸.

𑀨𑀮𑀧𑁆𑀧𑀢𑁆𑀢𑀺𑀬𑀁 𑀓𑀺𑀭𑀺𑀬𑀸𑀧𑀭𑀺𑀲𑀫𑀢𑁆𑀢𑁆𑀬𑀧𑀯𑀕𑁆𑀕𑁄, 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀬𑀫𑀸𑀦𑁂 𑀓𑀸𑀮𑀤𑁆𑀥𑀸𑀦𑀁 𑀓𑀺𑀭𑀺𑀬𑀸𑀬𑀸𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀢𑀢𑀺𑀬𑀸𑀪𑀺𑀫𑀢𑀸, 𑀲𑀸𑀧𑀺 𑀓𑀭𑀡𑀢𑁆𑀢𑀸𑀯 𑀲𑀺𑀤𑁆𑀥𑀸 ‘𑀫𑀸𑀲𑁂𑀦𑀸𑀦𑀼𑀯𑀸𑀓𑁄-𑀥𑀻𑀢𑁄, 𑀓𑁄𑀲𑁂𑀦𑀸𑀦𑀼𑀯𑀸𑀓𑁄-𑀥𑀻𑀢𑁄’𑀢𑀺. 𑀅𑀦𑀧𑀯𑀕𑁆𑀕𑁂𑀢𑀼 𑀅𑀲𑀸𑀥𑀓𑀢𑀫𑀢𑁆𑀢𑀸𑀓𑀭𑀡𑀢𑁆𑀢𑀸𑀪𑀸𑀯𑁂 𑀤𑀼𑀢𑀺𑀬𑀸𑀯 ‘𑀫𑀸𑀲𑀫𑀥𑀻𑀢𑁄-𑀦𑀼𑀯𑀸𑀓𑁄, 𑀦 𑀘𑀸𑀦𑁂 𑀦 𑀕𑀳𑀺𑀢𑁄’𑀢𑀺.

𑀓𑀸𑀭𑀓𑀫𑀚𑁆𑀛𑁂 𑀬𑁂 𑀓𑀸𑀮𑀤𑁆𑀥𑀸𑀦𑀯𑀸𑀘𑀺𑀦𑁄, 𑀢𑀢𑁄 𑀲𑀢𑁆𑀢𑀫𑀻𑀧𑀜𑁆𑀘𑀫𑀺𑀬𑁄 𑀅𑀪𑀺𑀫𑀢𑀸 ‘𑀅𑀚𑁆𑀚 𑀪𑀼𑀢𑁆𑀯𑀸 𑀤𑁂𑀯𑀤𑀢𑁆𑀢𑁄 𑀤𑁆𑀯𑀺𑀳𑁂 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀤𑁆𑀯𑀻𑀳𑀸 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀅𑀢𑁆𑀭𑀝𑁆𑀞𑁄-𑀬𑀫𑀺𑀲𑁆𑀲𑀸𑀲𑁄 𑀓𑁄𑀲𑁂 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺, 𑀓𑁄𑀲𑀸 𑀮𑀓𑁆𑀔𑀁 𑀯𑀺𑀚𑁆𑀛𑀢𑀻’𑀢𑀺, 𑀢𑀸𑀧𑀻𑀳 𑀲𑀓𑀲𑀓𑀓𑀸𑀭𑀓𑀯𑀘𑀦𑀺𑀘𑁆𑀙𑀸𑀬𑁂𑀯 𑀲𑀺𑀤𑁆𑀥𑀸.

𑁪. 𑀕𑀢𑀺 𑀩𑁄𑀥𑀸𑀳𑀸𑀭 𑀲𑀤𑁆𑀤𑀢𑁆𑀣𑀸𑀓𑀫𑁆𑀫𑀓 𑀪𑀚𑁆𑀚𑀸𑀤𑀻𑀦𑀁 𑀧𑀬𑁄𑀚𑁆𑀚𑁂.

𑀕𑀫𑀦𑀢𑁆𑀣𑀸𑀦𑀁 𑀩𑁄𑀥𑀢𑁆𑀣𑀸𑀦𑀁 𑀆𑀳𑀸𑀭𑀢𑁆𑀣𑀸𑀦𑀁 𑀲𑀤𑁆𑀤𑀢𑁆𑀣𑀸𑀦𑀫𑀓𑀫𑁆𑀫𑀓𑀸𑀦𑀁 𑀪𑀚𑁆𑀚𑀸𑀤𑀻𑀦𑀜𑁆𑀘 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀳𑁄𑀢𑀺. 𑀲𑀸𑀫𑀢𑁆𑀣𑀺𑀬𑀸 𑀘 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂𑀦 𑀓𑀫𑁆𑀫𑀢𑀸𑀯𑀲𑁆𑀲 𑀳𑁄𑀢𑀻𑀢𑀺 𑀧𑀢𑀻𑀬𑀢𑁂. 𑀕𑀫𑀬𑀢𑀺 𑀫𑀸𑀡𑀯𑀓𑀁 𑀕𑀸𑀫𑀁, 𑀬𑀸𑀧𑀬𑀢𑀺 𑀫𑀸𑀡𑀯𑀓𑀁 𑀕𑀸𑀫𑀁, 𑀩𑁄𑀥𑀬𑀢𑀺 𑀫𑀸𑀡𑀯𑀓𑀁 𑀥𑀫𑁆𑀫𑀁, 𑀯𑁂𑀤𑀬𑀢𑀺 𑀫𑀸𑀡𑀯𑀓𑀁 𑀥𑀫𑁆𑀫𑀁, 𑀪𑁄𑀚𑀬𑀢𑀺 𑀫𑀸𑀡-𑀯𑀓𑀁 𑀫𑁄𑀤𑀓𑀁, 𑀆𑀲𑀬𑀢𑀺 𑀫𑀸𑀡𑀯𑀓𑀁 𑀫𑁄𑀤𑀓𑀁, 𑀅𑀚𑁆𑀛𑀸𑀧𑀬𑀢𑀺 𑀫𑀸𑀡𑀯𑀓𑀁 𑀯𑁂𑀤𑀁, 𑀧𑀸𑀞𑀬𑀢𑀺 𑀫𑀸𑀡𑀯𑀓𑀁 𑀯𑁂𑀤𑀁, 𑀆𑀲𑀬𑀢𑀺 𑀤𑁂𑀯𑀤𑀢𑁆𑀢𑀁, 𑀲𑀸𑀬𑀬𑀢𑀺 𑀤𑁂𑀯𑀤𑀢𑁆𑀢𑀁, 𑀅𑀜𑁆𑀜𑀁 𑀪𑀚𑁆𑀚𑀸𑀧𑁂𑀢𑀺, 𑀅𑀜𑁆𑀜𑀁 𑀓𑁄𑀝𑁆𑀝𑀸𑀧𑁂𑀢𑀺, 𑀅𑀜𑁆𑀜𑀁 𑀲𑀦𑁆𑀣𑀭𑀸𑀧𑁂𑀢𑀺. 𑀏𑀢𑁂𑀲𑀫𑁂𑀯𑀸𑀢𑀺 𑀓𑀺𑀁? 𑀧𑀸𑀘𑁂𑀢𑀺 𑀑𑀤𑀦𑀁 𑀤𑁂𑀯𑀤𑀢𑁆𑀢𑁂𑀦 𑀬𑀜𑁆𑀜𑀤𑀢𑁆𑀢𑁄. 𑀧𑀬𑁄𑀚𑁆𑀚𑁂𑀢𑀺 𑀓𑀺𑀁? 𑀕𑀘𑁆𑀙𑀢𑀺 𑀤𑁂𑀯𑀤𑀢𑁆𑀢𑁄. 𑀬𑀤𑀸 𑀘𑀭𑀳𑀺 𑀕𑀫𑀬𑀢𑀺 𑀤𑁂𑀯𑀤𑀢𑁆𑀢𑀁 𑀬𑀜𑁆𑀜𑀤𑀢𑁆𑀢𑁄, 𑀢𑀫𑀧𑀭𑁄 𑀧𑀬𑁄𑀚𑁂𑀢𑀺, 𑀢𑀤𑀸 𑀕𑀫𑀬𑀢𑀺 𑀤𑁂𑀯𑀤𑀢𑁆𑀢𑀁 𑀬𑀜𑁆𑀜𑀤𑀢𑁆𑀢𑁂𑀦𑁂𑀢𑀺 𑀪𑀯𑀺𑀢𑀩𑁆𑀩𑀁 … 𑀕𑀫𑀬𑀢𑀺𑀲𑁆𑀲𑀸-𑀕𑀫𑀦𑀢𑁆𑀣𑀢𑁆𑀢𑀸.

𑁫. 𑀳𑀭𑀸𑀤𑀻𑀦𑀁 𑀯𑀸.

𑀳𑀭𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀳𑁄𑀢𑀺 𑀯𑀸. 𑀳𑀸𑀭𑁂𑀢𑀺 𑀪𑀸𑀭𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸, 𑀅𑀚𑁆𑀛𑁄𑀳𑀸𑀭𑁂𑀢𑀺 𑀲𑀢𑁆𑀢𑀼𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸, 𑀓𑀸𑀭𑁂𑀢𑀺 𑀓𑀝𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸 𑀤𑀲𑁆𑀲𑀬𑀢𑁂 𑀚𑀦𑀁 𑀭𑀸𑀚𑀁 𑀚𑀦𑁂𑀦𑁂𑀢𑀺 𑀯𑀸, 𑀅𑀪𑀺𑀯𑀸𑀤𑀬𑀢𑁂 𑀕𑀼𑀭𑀼𑀁 𑀤𑁂𑀯𑀤𑀢𑁆𑀢𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑀺 𑀯𑀸.

𑁬. 𑀦 𑀔𑀸𑀤𑀸𑀤𑀻𑀦𑀁.

𑀔𑀸𑀤𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀦 𑀳𑁄𑀢𑀺. 𑀔𑀸𑀤𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀆𑀤𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀅𑀯𑁆𑀳, 𑀧𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀲𑀤𑁆𑀤𑀸𑀬𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀓𑀦𑁆𑀤𑀬𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀦𑀸𑀬𑀬𑀢𑀺 𑀤𑁂𑀯𑀤𑀢𑁆𑀢𑁂𑀦.

(𑁧) 𑀯𑀳𑀺𑀲𑁆𑀲𑀸𑀦𑀺𑀬𑀦𑁆𑀢𑀼𑀓𑁂. 𑀯𑀸𑀳𑀬𑀢𑀺 𑀪𑀸𑀭𑀁 𑀤𑁂𑀯𑀤𑀢𑁆𑀢𑁂𑀦 𑀅𑀦𑀺𑀬𑀦𑁆𑀢𑀼𑀓𑁂𑀢𑀺 𑀓𑀺𑀁? 𑀯𑀸𑀳-𑀬𑀢𑀺 𑀪𑀸𑀭𑀁 𑀩𑀮𑀻𑀩𑀤𑁆𑀤𑁂.

(𑁨) 𑀪𑀓𑁆𑀔𑀺𑀲𑁆𑀲𑀸𑀳𑀺𑀁 𑀲𑀸𑀬𑀁. 𑀪𑀓𑁆𑀔𑀬𑀢𑀺 𑀫𑁄𑀤𑀓𑁂 𑀤𑁂𑀯𑀤𑀢𑁆𑀢𑁂𑀦. 𑀅𑀳𑀺𑀁𑀲𑀸𑀬𑀦𑁆𑀢𑀺 𑀓𑀺𑀁? 𑀪𑀓𑁆𑀔𑀬𑀢𑀺 𑀩𑀮𑀻𑀩𑀤𑁆𑀤𑁂 𑀲𑀲𑁆𑀲𑀁.

𑁭. 𑀛𑀸𑀤𑀻𑀳𑀺 𑀬𑀼𑀢𑁆𑀢𑀸.

𑀥𑀻𑀆𑀤𑀻𑀳𑀺 𑀬𑀼𑀢𑁆𑀢𑀢𑁄 𑀤𑀼𑀢𑀺𑀬𑀸 𑀳𑁄𑀢𑀺. 𑀥𑀺𑀭𑀢𑁆𑀣𑀼 𑀫𑀁 𑀧𑀽𑀢𑀺𑀓𑀸𑀬𑀁, 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀮𑀦𑁆𑀤𑀁, 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦, 𑀫𑀼𑀘𑀮𑀺𑀦𑁆𑀤𑀫𑀪𑀺𑀢𑁄 𑀲𑀭𑀫𑀺𑀘𑁆𑀘𑀸𑀤𑀺, 𑀙𑀝𑁆𑀞𑀺𑀬𑀸𑀧𑀯𑀸𑀤𑁄-𑀬𑀁.

𑁮. 𑀮𑀓𑁆𑀔𑀡𑀺𑀢𑁆𑀣𑀫𑁆𑀪𑀽𑀢𑀯𑀺𑀘𑁆𑀙𑀸𑀲𑁆𑀯𑀪𑀺𑀦𑀸.

𑀮𑀓𑁆𑀔𑀡𑀸𑀤𑀻𑀲𑁆𑀯𑀢𑁆𑀣𑁂𑀲𑁆𑀯𑀪𑀺𑀦𑀸 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸 𑀫𑀳𑀸𑀢𑀺. 𑀭𑀼𑀓𑁆𑀔𑀫𑀪𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀺, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀫𑀪𑀺𑀢𑀺𑀝𑁆𑀞𑀢𑀺.

𑁯. 𑀧𑀢𑀺𑀧𑀭𑀻𑀳𑀺 𑀪𑀸𑀕𑁂 𑀘.

𑀧𑀢𑀺𑀧𑀭𑀻𑀳𑀺 𑀬𑀼𑀢𑁆𑀢𑀫𑁆𑀳𑀸 𑀮𑀓𑁆𑀔𑀡𑀸𑀤𑀻𑀲𑀼 𑀪𑀸𑀕𑁂 𑀘𑀢𑁆𑀣𑁂 𑀤𑀼𑀢𑀺𑀬𑀸 𑀳𑁄𑀢𑀺. 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁 𑀧𑀢𑀺, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀢𑀺 𑀢𑀺𑀝𑁆𑀞𑀢𑀺, 𑀬𑀤𑁂𑀢𑁆𑀣 𑀫𑀁 𑀧𑀢𑀺 𑀲𑀺𑀬𑀸. 𑀭𑀼𑀓𑁆𑀔𑀁 𑀧𑀭𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁 𑀧𑀭𑀺, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀭𑀺 𑀢𑀺𑀝𑁆𑀞𑀢𑀺, 𑀬𑀤𑁂𑀢𑁆𑀣 𑀫𑀁 𑀧𑀭𑀺 𑀲𑀺𑀬𑀸.

𑁧𑁦. 𑀅𑀦𑀼𑀦𑀸.

𑀮𑀓𑁆𑀔𑀡𑀸𑀤𑀻𑀲𑁆𑀯𑀢𑁆𑀣𑁂𑀲𑁆𑀯𑀦𑀼𑀦𑀸 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺. 𑀭𑀼𑀓𑁆𑀔𑀫𑀦𑀼 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀲𑀘𑁆𑀘𑀓𑀺𑀭𑀺𑀬𑀫𑀦𑀼 𑀯𑀼𑀝𑁆𑀞𑀺 𑀧𑀸𑀯𑀲𑁆𑀲𑀺, 𑀳𑁂𑀢𑀼 𑀘 𑀮𑀓𑁆𑀔𑀡𑀁 𑀪𑀯𑀢𑀺, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀦𑀼, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀫𑀦𑀼 𑀢𑀺𑀝𑁆𑀞𑀢𑀺, 𑀬𑀤𑁂𑀢𑁆𑀣 𑀫𑀁 𑀅𑀦𑀼 𑀲𑀺𑀬𑀸.

𑁧𑁧. 𑀲𑀳𑀢𑁆𑀣𑁂.

𑀲𑀳𑀢𑁆𑀣𑁂-𑀦𑀼𑀦𑀸 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺. 𑀧𑀩𑁆𑀩𑀢𑀫𑀦𑀼 𑀲𑁂𑀦𑀸 𑀢𑀺𑀝𑁆𑀞𑀢𑀺.

𑁧𑁨. 𑀳𑀻𑀦𑁂.

𑀳𑀻𑀦𑀢𑁆𑀣𑁂-𑀦𑀼𑀦𑀸 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺. 𑀅𑀦𑀼 𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄.

𑁧𑁩. 𑀉𑀧𑁂𑀦.

𑀳𑀻𑀦𑀢𑁆𑀣𑁂 𑀉𑀧𑁂𑀦 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺. 𑀉𑀧 𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀣𑁄.

𑁧𑁪. 𑀲𑀢𑁆𑀢𑀫𑁆𑀬𑀸𑀥𑀺𑀓𑁆𑀬𑁂.

𑀆𑀥𑀺𑀓𑁆𑀬𑀢𑁆𑀣𑁂 𑀉𑀧𑁂𑀦 𑀬𑀼𑀢𑁆𑀢𑀫𑁆𑀳𑀸 𑀲𑀢𑁆𑀢𑀫𑀻 𑀳𑁄𑀢𑀺. 𑀉𑀧 𑀔𑀸𑀭𑀺𑀬𑀁 𑀤𑁄𑀡𑁄.

𑁧𑁫. 𑀲𑀸𑀫𑀺𑀢𑁆𑀢𑁂-𑀥𑀺𑀦𑀸.

𑀲𑀸𑀫𑀺𑀪𑀸𑀯𑀢𑁆𑀣𑁂-𑀥𑀺𑀦𑀸 𑀬𑀼𑀢𑁆𑀢𑀫𑁆𑀳𑀸 𑀲𑀢𑁆𑀢𑀫𑀻 𑀳𑁄𑀢𑀺. 𑀅𑀥𑀺 𑀩𑁆𑀭𑀳𑁆𑀫𑀤𑀢𑁆𑀢𑁂 𑀧𑀜𑁆𑀘𑀸𑀮𑀸, 𑀅𑀥𑀺 𑀧𑀜𑁆𑀘𑀸𑀮𑁂𑀲𑀼 𑀩𑁆𑀭𑀳𑁆𑀫𑀤𑀢𑁆𑀢𑁄.

𑁧𑁬. 𑀓𑀢𑁆𑀢𑀼𑀓𑀭𑁂𑀡𑁂𑀲𑀼 𑀢𑀢𑀺𑀬𑀸.

𑀓𑀢𑁆𑀢𑀭𑀺 𑀓𑀭𑀡𑁂 𑀘 𑀓𑀸𑀭𑀓𑁂 𑀢𑀢𑀺𑀬𑀸 𑀳𑁄𑀢𑀺. 𑀧𑀼𑀭𑀺𑀲𑁂𑀦 𑀓𑀢𑀁, 𑀅𑀲𑀺𑀦𑀸 𑀙𑀺𑀦𑁆𑀤𑀢𑀺. 𑀧𑀓𑀢𑀺𑀬𑀸-𑀪𑀺𑀭𑀽𑀧𑁄, 𑀕𑁄𑀢𑁆𑀣𑁂𑀦 𑀕𑁄𑀢𑀫𑁄, 𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄𑀢𑀺 𑀪𑀽𑀥𑀸𑀢𑀼𑀲𑁆𑀲 𑀲𑀫𑁆𑀪𑀯𑀸 𑀓𑀭𑀡𑁂 𑀏𑀯 𑀢𑀢𑀺𑀬𑀸. 𑀏𑀯𑀁 𑀲𑀫𑁂𑀦 𑀥𑀸𑀯𑀢𑀺 𑀯𑀺𑀲𑀫𑁂𑀦 𑀥𑀸𑀯𑀢𑀺, 𑀤𑁆𑀯𑀺𑀤𑁄𑀡𑁂𑀦 𑀥𑀜𑁆𑀜𑀁 𑀓𑀺𑀡𑀸𑀢𑀺, 𑀧𑀜𑁆𑀘𑀓𑁂𑀦 𑀧𑀲𑀯𑁄 𑀓𑀺𑀡𑀸𑀢𑀻𑀢𑀺.

𑁧𑁭. 𑀲𑀳𑀢𑁆𑀣𑁂𑀦.

𑀲𑀳𑀢𑁆𑀣𑁂𑀦 𑀬𑁄𑀕𑁂 𑀢𑀢𑀺𑀬𑀸 𑀲𑀺𑀬𑀸. 𑀧𑀼𑀢𑁆𑀢𑁂𑀦 𑀲𑀳 𑀕𑀢𑁄, 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀆𑀕𑀢𑁄, 𑀢𑀢𑀺𑀬𑀸𑀧𑀺 𑀙𑀝𑁆𑀞𑀻𑀯 𑀅𑀧𑁆𑀧𑀥𑀸𑀦𑁂 𑀏𑀯 𑀪𑀯𑀢𑀺.

𑁧𑁮. 𑀮𑀓𑁆𑀔𑀡𑁂.

𑀮𑀓𑁆𑀔𑀡𑁂 𑀯𑀢𑁆𑀢𑀫𑀸𑀦𑀢𑁄 𑀢𑀢𑀺𑀬𑀸 𑀲𑀺𑀬𑀸. 𑀢𑀺𑀤𑀡𑁆𑀟𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑀫𑀤𑁆𑀤𑀓𑁆𑀔𑀻, 𑀅𑀓𑁆𑀔𑀺𑀦𑀸 𑀓𑀸𑀡𑁄, 𑀢𑁂𑀦 𑀳𑀺 𑀅𑀗𑁆𑀕𑁂𑀦 𑀅𑀗𑁆𑀕𑀺𑀦𑁄 𑀯𑀺𑀓𑀸𑀭𑁄 𑀮𑀓𑁆𑀔𑀻𑀬𑀢𑁂.

𑁧𑁯. 𑀳𑁂𑀢𑀼𑀫𑁆𑀳𑀺.

𑀢𑀓𑁆𑀓𑀺𑀭𑀺𑀬𑀸 𑀬𑁄𑀕𑁆𑀕𑁂 𑀢𑀢𑀺𑀬𑀸 𑀲𑀺𑀬𑀸. 𑀅𑀦𑁆𑀦𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀬𑀲𑁄.

𑁨𑁦. 𑀧𑀜𑁆𑀘𑀫𑀻𑀡𑁂 𑀯𑀸.

𑀇𑀡𑁂 𑀳𑁂𑀢𑀼𑀫𑁆𑀳𑀺 𑀧𑀜𑁆𑀘𑀫𑀻 𑀳𑁄𑀢𑀺 𑀯𑀸. 𑀲𑀢𑀲𑁆𑀫𑀸 𑀩𑀤𑁆𑀥𑁄, 𑀲𑀢𑁂𑀦 𑀯𑀸.

𑁨𑁧. 𑀕𑀼𑀡𑁂.

𑀧𑀭𑀗𑁆𑀕𑀪𑀽𑀢𑁂 𑀳𑁂𑀢𑀼𑀫𑁆𑀳𑀺 𑀧𑀜𑁆𑀘𑀫𑀻 𑀳𑁄𑀢𑀺 𑀯𑀸. 𑀚𑀴𑀢𑁆𑀢𑀸 𑀩𑀤𑁆𑀥𑁄 𑀚𑀴𑀢𑁆𑀢𑁂𑀦 𑀯𑀸, 𑀧𑀜𑁆𑀜𑀸𑀬 𑀫𑀼𑀢𑁆𑀢𑁄, 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄.

𑁨𑁨. 𑀙𑀝𑁆𑀞𑀻 𑀳𑁂𑀢𑁆𑀯𑀢𑁆𑀣𑁂𑀳𑀺.

𑀳𑁂𑀢𑁆𑀯𑀢𑁆𑀣𑀯𑀸𑀘𑀻𑀳𑀺 𑀬𑁄𑀕𑁂 𑀳𑁂𑀢𑀼𑀫𑁆𑀳𑀺 𑀙𑀝𑁆𑀞𑀻 𑀲𑀺𑀬𑀸. 𑀉𑀤𑀭𑀲𑁆𑀲 𑀳𑁂𑀢𑀼, 𑀉𑀤𑀭𑀲𑁆𑀲 𑀓𑀸𑀭𑀡𑀸.

𑁨𑁩. 𑀲𑀩𑁆𑀩𑀸𑀤𑀺𑀢𑁄 𑀲𑀩𑁆𑀩𑀸.

𑀳𑁂𑀢𑁆𑀯𑀢𑁆𑀣𑁂𑀳𑀺 𑀬𑁄𑀕𑁂 𑀲𑀩𑁆𑀩𑀸𑀤𑀻𑀳𑀺 𑀲𑀩𑁆𑀩𑀸 𑀯𑀺𑀪𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀓𑁄 𑀳𑁂𑀢𑀼, 𑀓𑀁 𑀳𑁂𑀢𑀼𑀁, 𑀓𑁂𑀦 𑀳𑁂𑀢𑀼𑀦𑀸, 𑀓𑀲𑁆𑀲 𑀳𑁂𑀢𑀼𑀲𑁆𑀲, 𑀓𑀲𑁆𑀫𑀸 𑀳𑁂𑀢𑀼𑀲𑁆𑀫𑀸, 𑀓𑀲𑁆𑀲 𑀳𑁂𑀢𑀼𑀲𑁆𑀲, 𑀓𑀲𑁆𑀫𑀺𑀁 𑀳𑁂𑀢𑀼𑀲𑁆𑀫𑀺𑀁, 𑀓𑀺𑀁 𑀓𑀸𑀭𑀡𑀁, 𑀓𑁂𑀦 𑀓𑀸𑀭𑀡𑁂𑀦, 𑀓𑀺𑀁 𑀦𑀺𑀫𑀺𑀢𑁆𑀢𑀁, 𑀓𑁂𑀦 𑀦𑀺𑀫𑀺𑀢𑁆𑀢𑁂𑀦, 𑀓𑀺𑀁 𑀧𑀬𑁄𑀚𑀦𑀁, 𑀓𑁂𑀦 𑀧𑀬𑁄𑀚𑀦𑁂𑀦 𑀇𑀘𑁆𑀘𑁂𑀯𑀫𑀸𑀤𑀺. 𑀳𑁂𑀢𑁆𑀯𑀢𑁆𑀣𑁂𑀳𑀻𑀢𑁆𑀯𑁂𑀯? 𑀓𑁂𑀦 𑀓𑀢𑀁.

𑁨𑁪. 𑀘𑀢𑀼𑀢𑁆𑀣𑀻 𑀲𑀫𑁆𑀧𑀤𑀸𑀦𑁂.

𑀬𑀲𑁆𑀲 𑀲𑀫𑁆𑀫𑀸 𑀧𑀤𑀻𑀬𑀢𑁂 𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀻 𑀲𑀺𑀬𑀸. 𑀲𑀗𑁆𑀖𑀲𑁆𑀲 𑀤𑀤𑀸𑀢𑀺. 𑀆𑀥𑀸𑀭𑀯𑀺𑀯𑀓𑁆𑀔𑀸𑀬𑀁 𑀲𑀢𑁆𑀢𑀫𑀻𑀧𑀺 𑀲𑀺𑀬𑀸 𑀲𑀗𑁆𑀖𑁂 𑀤𑁂𑀳𑀺.

𑁨𑁫. 𑀢𑀸𑀤𑀢𑁆𑀣𑁆𑀬𑁂.

𑀢𑀲𑁆𑀲𑁂-𑀤𑀁 𑀢𑀤𑀢𑁆𑀣𑀁, 𑀢𑀤𑀢𑁆𑀣𑀪𑀸𑀯𑁂 𑀚𑁄𑀢𑀦𑀻𑀬𑁂 𑀦𑀸𑀫𑀲𑁆𑀫𑀸 𑀘𑀢𑀼𑀢𑁆𑀣𑀻 𑀲𑀺𑀬𑀸. 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀅𑀢𑁆𑀣𑀸𑀬 𑀳𑀺𑀢𑀸𑀬 (𑀲𑀼𑀔𑀸𑀬) 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀦𑀸𑀮𑀁 𑀤𑀸𑀭𑀪𑀭𑀡𑀸𑀬, 𑀬𑀽𑀧𑀸𑀬 𑀤𑀸𑀭𑀼, 𑀧𑀸𑀓𑀸𑀬 𑀯𑀚𑀢𑀻𑀢𑁆𑀯𑁂𑀯𑀫𑀸𑀤𑀺.

𑀓𑀲𑁆𑀲 𑀲𑀸𑀤𑀼𑀁 𑀦 𑀭𑀼𑀘𑁆𑀘𑀪𑀺, 𑀫𑀸-𑀬𑀲𑁆𑀫𑀦𑁆𑀢𑀸𑀦𑀫𑁆𑀧𑀺 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀪𑀢𑁆𑀢𑀫𑀲𑁆𑀲 𑀦𑀘𑁆𑀙𑀸𑀤𑁂𑀲𑀻𑀢𑀺 𑀙𑀝𑁆𑀞𑀻 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑀁, 𑀦 𑀘𑁂𑀯𑀁 𑀯𑀺𑀭𑁄𑀥𑁄 𑀲𑀺𑀬𑀸 𑀲𑀤𑀺𑀲𑀭𑀽𑀧𑀢𑁆𑀢𑀸, 𑀏𑀯𑀁𑀯𑀺𑀥𑁂𑀲𑀼 𑀘 𑀲𑀫𑁆𑀩𑀦𑁆𑀥𑀲𑁆𑀲 𑀲𑀤𑁆𑀤𑀺𑀓𑀸𑀦𑀼𑀫𑀢𑀢𑁆𑀢𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻𑀢𑀺 𑀅𑀢𑁆𑀣𑀫𑀢𑁆𑀢𑁂 𑀧𑀞𑀫𑀸.

𑀏𑀯𑀫𑀜𑁆𑀜𑀸𑀧𑀺 𑀯𑀺𑀥𑀜𑁆𑀜𑀬𑁆𑀬𑀸, 𑀧𑀭𑀢𑁄𑀧𑀺 𑀬𑀣𑀸𑀕𑀫𑀁.

𑀭𑀜𑁆𑀜𑁄 𑀲𑀢𑀁 𑀥𑀸𑀭𑁂𑀢𑀺, 𑀭𑀜𑁆𑀜𑁄 𑀙𑀢𑁆𑀢𑀁 𑀥𑀸𑀭𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀏𑀯𑀁 𑀭𑀜𑁆𑀜𑁄 𑀲𑀺𑀮𑀸𑀖𑀢𑁂, 𑀭𑀜𑁆𑀜𑁄 𑀳𑀦𑀼𑀢𑁂, 𑀭𑀜𑁆𑀜𑁄 𑀉𑀧𑀢𑀺𑀝𑁆𑀞𑀢𑁂, 𑀭𑀜𑁆𑀜𑁄 𑀲𑀧𑀢𑁂, 𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄, 𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀬𑀤𑀺𑀳𑀁 𑀢𑀲𑁆𑀲 𑀧𑀓𑀼𑀧𑁆𑀧𑁂𑀬𑁆𑀬𑀁, 𑀤𑀼𑀳𑀬𑀢𑀺 𑀤𑀺𑀲𑀸𑀦𑀁 𑀫𑁂𑀖𑁄, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀽𑀪𑀢𑀺, 𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀓𑁆𑀬𑀸𑀳𑀁 𑀅𑀬𑁆𑀬𑀸𑀦𑀁 𑀅𑀧𑀭𑀚𑁆𑀛𑀸𑀫𑀺, 𑀇𑀲𑁆𑀲𑀬𑀦𑁆𑀢𑀺 𑀲𑀫𑀡𑀸𑀦𑀁 𑀢𑀺𑀢𑁆𑀣𑀺𑀬𑀸, 𑀥𑀫𑁆𑀫𑁂𑀦 𑀦𑀬𑀫𑀸𑀦𑀸𑀦𑀁 𑀓𑀸 𑀉𑀲𑀽𑀬𑀸 𑀭𑀜𑁆𑀜𑁄 𑀪𑀸𑀕𑁆𑀬𑀫𑀸𑀭𑀚𑁆𑀛𑀢𑀺, 𑀭𑀜𑁆𑀜𑁄 𑀪𑀸𑀕𑁆𑀬𑀫𑀺𑀓𑁆𑀔𑀢𑁂, 𑀢𑁂𑀦 𑀬𑀸𑀘𑀺𑀢𑁄 𑀅𑀬𑀸𑀘𑀺𑀢𑁄 𑀯𑀸 𑀢𑀲𑁆𑀲 𑀕𑀸𑀯𑁄 𑀧𑀝𑀺𑀲𑀼𑀡𑀸𑀢𑀺, 𑀕𑀸𑀯𑁄 𑀆𑀲𑀼𑀡𑀸𑀢𑀺, 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁, 𑀳𑁄𑀢𑀼 𑀧𑀢𑀺𑀕𑀺𑀡𑀸𑀢𑀺, 𑀳𑁄𑀢𑁆𑀯𑀦𑀼𑀕𑀺𑀡𑀸𑀢𑀺, 𑀆𑀭𑁄𑀘𑀬𑀸𑀫𑀺 𑀯𑁄 𑀧𑀢𑀺𑀯𑁂𑀤𑀬𑀸𑀫𑀺 𑀯𑁄, 𑀥𑀫𑁆𑀫𑀁 𑀢𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬, 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦, 𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀅𑀭𑀳𑀢𑀺 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲𑀸𑀢𑀺.

𑀚𑀻𑀯𑀺𑀢𑀁 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀫𑀸𑀦𑁄𑀢𑀺 𑀢𑀸𑀤𑀢𑁆𑀣𑁆𑀬 𑀘𑀢𑀼𑀢𑁆𑀣𑀻, 𑀢𑀺𑀡𑁂𑀦 𑀬𑁄 𑀅𑀢𑁆𑀣𑁄 𑀢𑀤𑀢𑁆𑀣𑀸𑀬𑀧𑀻𑀢𑀺 𑀅𑀢𑁆𑀣𑁄, ‘‘𑀬𑁄 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀺’’ 𑀢𑀺𑀡𑀫𑀺𑀯 𑀚𑀻𑀯𑀺𑀢𑀁 𑀫𑀜𑁆𑀜𑀫𑀸𑀦𑁄𑀢𑀺 𑀲𑀯𑀺𑀲𑀬𑀸𑀯 𑀯𑀺𑀪𑀢𑁆𑀢𑀺𑀬𑁄. 𑀲𑀕𑁆𑀕𑀸𑀬 𑀕𑀘𑁆𑀙𑀢𑀻𑀢𑀺 𑀢𑀸𑀤𑀢𑁆𑀣𑁆𑀬𑁂 𑀘𑀢𑀼𑀢𑁆𑀣𑀻, 𑀬𑁄 𑀳𑀺 𑀲𑀕𑁆𑀕𑀁 𑀕𑀘𑁆𑀙𑀢𑀺 𑀢𑀤𑀢𑁆𑀣𑀁 𑀢𑀲𑁆𑀲 𑀕𑀫𑀦𑀦𑁆𑀢𑀺, 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀼 𑀤𑀼𑀢𑀺𑀬𑀸𑀯 𑀲𑀕𑁆𑀕𑀁 𑀕𑀘𑁆𑀙𑀢𑀻𑀢𑀺.

𑀆𑀬𑀼 𑀪𑁄𑀢𑁄 𑀳𑁄𑀢𑀼, 𑀘𑀺𑀭𑀁 𑀚𑀻𑀯𑀺𑀢𑀁, 𑀪𑀤𑁆𑀤𑀁 𑀓𑀮𑁆𑀬𑀸𑀡𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁, 𑀓𑀼𑀲𑀮𑀁 𑀅𑀦𑀸𑀫𑀬𑀁, 𑀳𑀺𑀢𑀁 𑀧𑀣𑁆𑀬𑀁 𑀲𑀼𑀔𑀁 𑀲𑀸𑀢𑀁 𑀪𑁄𑀢𑁄 𑀳𑁄𑀢𑀼, 𑀲𑀸𑀥𑀼 𑀲𑀫𑁆𑀫𑀼𑀢𑀺 𑀫𑁂𑀢𑀲𑁆𑀲, 𑀧𑀼𑀢𑁆𑀢𑀲𑁆𑀲𑀸𑀯𑀺𑀓𑀭𑁂𑀬𑁆𑀬 𑀕𑀼𑀬𑁆𑀳𑀫𑀢𑁆𑀣𑀁, 𑀢𑀲𑁆𑀲 𑀫𑁂 𑀲𑀓𑁆𑀓𑁄 𑀧𑀸𑀢𑀼𑀭𑀳𑁄𑀲𑀺, 𑀢𑀲𑁆𑀲 𑀧𑀳𑀺𑀡𑁂𑀬𑁆𑀬, 𑀪𑀺𑀓𑁆𑀔𑀽𑀦𑀁 𑀤𑀼𑀢𑀁 𑀧𑀸𑀳𑁂𑀲𑀺, 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀆𑀬𑁄𑀕𑁄, 𑀏𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀧𑀳𑁄𑀢𑀺, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀅𑀜𑁆𑀚𑀮𑀺𑀁 𑀢𑁂 𑀧𑀕𑁆𑀕𑀡𑁆𑀳𑀸𑀫𑀺, 𑀢𑀲𑁆𑀲 𑀨𑀸𑀲𑀼, 𑀮𑁄𑀓𑀲𑁆𑀲𑀢𑁆𑀣𑁄, 𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀲𑁄𑀢𑁆𑀣𑀺 𑀢𑀲𑁆𑀲, 𑀅𑀮𑀁 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲, 𑀲𑀫𑀢𑁆𑀣𑁄 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲, 𑀢𑀲𑁆𑀲 𑀳𑀺𑀢𑀁, 𑀢𑀲𑁆𑀲 𑀲𑀼𑀔𑀁, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚𑀸𑀢𑀺 𑀲𑀩𑁆𑀩𑀢𑁆𑀣 𑀙𑀝𑁆𑀞𑀻 𑀲𑀫𑁆𑀩𑀦𑁆𑀥𑁂, 𑀏𑀯𑀁𑀯𑀺𑀥𑀫𑀜𑁆𑀜𑀫𑁆𑀧𑁂𑀯 𑀯𑀺𑀜𑁆𑀜𑁂𑀬𑁆𑀬𑀁 𑀬𑀣𑀸𑀕𑀫𑀁.

𑁨𑁬. 𑀧𑀜𑁆𑀘𑀫𑁆𑀬𑀯𑀥𑀺𑀲𑁆𑀫𑀸.

𑀧𑀤𑀢𑁆𑀣𑀸𑀯𑀥𑀺𑀲𑁆𑀫𑀸 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀕𑀸𑀫𑀲𑁆𑀫𑀸 𑀆𑀕𑀘𑁆𑀙𑀢𑀼, 𑀏𑀯𑀁 𑀘𑁄𑀭𑀲𑁆𑀫𑀸 𑀪𑀸𑀬𑀢𑀺, 𑀘𑁄𑀭𑀲𑁆𑀫𑀸 𑀉𑀢𑁆𑀢𑀲𑀢𑀺, 𑀑𑀭𑀲𑁆𑀫𑀸 𑀢𑀸𑀬𑀢𑀺, 𑀘𑁄𑀭𑀲𑁆𑀫𑀸 𑀭𑀓𑁆𑀔𑀢𑀻𑀢𑀺, 𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺𑀯𑀸, 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲𑀸𑀢𑀺 𑀙𑀝𑁆𑀞𑀻 𑀲𑀢𑁆𑀢𑀫𑀺𑀬𑁄𑀧𑀺 𑀳𑁄𑀦𑁆𑀢𑁂𑀯 𑀲𑀫𑁆𑀩𑀦𑁆𑀥𑀸𑀥𑀸𑀭𑀯𑀘𑀦𑀺𑀘𑁆𑀙𑀸𑀬𑀁.

𑀅𑀚𑁆𑀛𑁂𑀦𑀸 𑀧𑀭𑀸𑀚𑁂𑀢𑀺, 𑀧𑀝𑀺𑀧𑀓𑁆𑀔𑁂 𑀧𑀭𑀸𑀚𑁂𑀢𑀻𑀢𑀺 𑀲𑀯𑀺𑀲𑀬𑀸𑀯 𑀯𑀺𑀪𑀢𑁆𑀢𑀺𑀬𑁄. 𑀲𑀘𑁂 𑀓𑁂𑀯𑀝𑁆𑀝𑀲𑁆𑀲 𑀧𑀭𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀙𑀝𑁆𑀞𑀻𑀧𑀺 𑀳𑁄𑀢𑀺 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑀁. 𑀬𑀯𑁂𑀳𑀺 𑀕𑀸𑀯𑁄 𑀯𑀸𑀭𑁂𑀢𑀺, 𑀧𑀸𑀧𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂, 𑀓𑀸𑀓𑁂 𑀭𑀓𑁆𑀔𑀢𑀺 𑀢𑀡𑁆𑀟𑀼𑀮𑀸𑀢𑀺 𑀲𑀯𑀺𑀲𑀬𑁂𑀯 𑀧𑀜𑁆𑀘𑀫𑀻. 𑀘𑀺𑀢𑁆𑀢𑀁 𑀭𑀓𑁆𑀔𑁂𑀣 𑀫𑁂𑀥𑀸𑀯𑀻𑀢𑀺 𑀤𑀼𑀢𑀺𑀬𑀸𑀯 𑀤𑀺𑀲𑁆𑀲𑀢𑀺 𑀓𑀫𑁆𑀫𑀢𑁆𑀣𑁂. 𑀉𑀧𑀚𑁆𑀛𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀉𑀧𑀚𑁆𑀛𑀸𑀬𑀸 𑀅𑀥𑀺𑀢𑁂, 𑀓𑀸𑀫𑀢𑁄 𑀚𑀸𑀬𑀢𑁂 𑀲𑁄𑀓𑁄𑀢𑀺 𑀲𑀯𑀺𑀲𑀬𑁂 𑀧𑀜𑁆𑀘𑀫𑀻.

𑀢𑀢𑁆𑀣𑁂𑀯-𑀦𑁆𑀢𑀭𑀥𑀸𑀬𑀺 𑀲𑀼, 𑀦𑀝𑀲𑁆𑀲 𑀲𑀼𑀡𑁄𑀢𑀺, 𑀧𑀤𑀼𑀫𑀁 𑀢𑀢𑁆𑀣 𑀚𑀸𑀬𑁂𑀣𑀸𑀢𑀺 𑀲𑀢𑁆𑀢𑀫𑀻𑀙𑀝𑁆𑀞𑀺𑀬𑁄𑀧𑀺 𑀳𑁄𑀦𑁆𑀢𑁂𑀯 𑀲𑀯𑀺𑀲𑀬𑁂. 𑀳𑀺𑀫𑀯𑀦𑁆𑀢𑀸 𑀧𑀪𑀯𑀢𑀺 𑀕𑀗𑁆𑀕𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀲𑁆𑀲𑀼 𑀔𑀺𑀧𑁆𑀧𑀁, 𑀅𑀜𑁆𑀜𑁄 𑀤𑁂𑀯𑀤𑀢𑁆𑀢𑀸, 𑀪𑀺𑀦𑁆𑀦𑁄 𑀤𑁂𑀯𑀤𑀢𑁆𑀢𑀸𑀢𑀺 𑀲𑀯𑀺𑀲𑀬𑁂𑀯 𑀧𑀜𑁆𑀘𑀫𑀻. 𑀏𑀯𑀁 𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸, 𑀇𑀢𑀭𑁄 𑀤𑁂𑀯𑀤𑀢𑁆𑀢𑀸, 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸, 𑀧𑀼𑀩𑁆𑀩𑁄 𑀕𑀸𑀫𑀸, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸, 𑀢𑀢𑁄 𑀧𑀭𑀁, 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦, 𑀢𑀢𑀼𑀢𑁆𑀢𑀭𑀺𑀦𑁆𑀢𑀺. 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑀁 𑀙𑀝𑁆𑀞𑀻𑀧𑀺 𑀧𑀼𑀭𑀢𑁄 𑀕𑀸𑀫𑀲𑁆𑀲, 𑀤𑀓𑁆𑀔𑀺𑀡𑀢𑁄 𑀕𑀸𑀫𑀲𑁆𑀲, 𑀉𑀧𑀭𑀺 𑀧𑀩𑁆𑀩𑀢𑀲𑁆𑀲, 𑀳𑁂𑀝𑁆𑀞𑀸 𑀧𑀸𑀲𑀸𑀤𑀲𑁆𑀲𑀸𑀢𑀺. 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀧𑁂𑀓𑁆𑀔𑀢𑀺 𑀧𑀸𑀲𑀸𑀤𑀸 𑀧𑁂𑀓𑁆𑀔𑀢𑀺, 𑀆𑀲𑀦𑁂 𑀉𑀧𑀯𑀺𑀲𑀺𑀢𑁆𑀯𑀸 𑀧𑁂𑀓𑁆𑀔𑀢𑀺 𑀆𑀲𑀦𑀸 𑀧𑁂𑀓𑁆𑀔𑀢𑀻𑀢𑀺 𑀅𑀯𑀥𑀺𑀯𑀘𑀦𑀺𑀘𑁆𑀙𑀸𑀬𑀁 𑀧𑀜𑁆𑀘𑀫𑀻.

𑀧𑀼𑀘𑁆𑀙𑀸𑀦𑀸𑀔𑁆𑀬𑀸𑀦𑁂𑀲𑀼 𑀓𑀼𑀢𑁄 𑀪𑀯𑀁? 𑀧𑀸𑀢𑀝𑀮𑀺𑀧𑀼𑀢𑁆𑀢𑀲𑁆𑀫𑀸𑀢𑀺. 𑀢𑀣𑀸 𑀤𑁂𑀲𑀓𑀸𑀮𑀫𑀸𑀦𑁂𑀧𑀺 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀸 𑀭𑀸𑀚𑀕𑀳𑀁 𑀲𑀢𑁆𑀢 𑀬𑁄𑀚𑀦𑀸𑀦𑀺, 𑀲𑀢𑁆𑀢𑀲𑀼 𑀬𑁄𑀚𑀦𑁂𑀲𑀽𑀢𑀺 𑀯𑀸. 𑀏𑀯𑀁 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦-𑀫𑀘𑁆𑀘𑀬𑁂𑀦𑀸𑀢𑀺, 𑀓𑀺𑀘𑁆𑀙𑀸𑀮𑀤𑁆𑀥𑀦𑁆𑀢𑀺 𑀕𑀼𑀡𑁂 𑀧𑀜𑁆𑀘𑀫𑀻. 𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀦𑁆𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑁂 𑀯𑀸 𑀢𑀢𑀺𑀬𑀸. 𑀏𑀯𑀁 𑀣𑁄𑀓𑀸 𑀫𑀼𑀢𑁆𑀢𑁄, 𑀣𑁄𑀓𑁂𑀦 𑀫𑀼𑀢𑁆𑀢𑁄𑀢𑀺. 𑀣𑁄𑀓𑀁 𑀘𑀮𑀢𑀻𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑁂 𑀓𑀫𑁆𑀫𑀦𑀺 𑀤𑀼𑀢𑀺𑀬𑀸.

𑀤𑀽𑀭𑀦𑁆𑀢𑀺 𑀓𑀢𑁆𑀣𑀬𑁄𑀕𑁂𑀧𑀺 𑀲𑀯𑀺𑀲𑀬𑁂𑀯 𑀧𑀜𑁆𑀘𑀫𑀻𑀙𑀝𑁆𑀞𑀺𑀬𑁄 𑀲𑀺𑀬𑀼𑀁, 𑀤𑀽𑀭𑀁 𑀕𑀸𑀫𑀲𑁆𑀫𑀸, 𑀅𑀦𑁆𑀢𑀺𑀓𑀁 𑀕𑀸𑀫𑀲𑁆𑀫𑀸, 𑀤𑀽𑀭𑀁 𑀕𑀸𑀫𑀲𑁆𑀲, 𑀅𑀦𑁆𑀢𑀺𑀓𑀁 𑀕𑀸𑀫𑀲𑁆𑀲𑀸𑀢𑀺, 𑀤𑀽𑀭𑀦𑁆𑀢𑀺 𑀓𑀢𑁆𑀣𑁂𑀳𑀺 𑀢𑀼 𑀲𑀩𑁆𑀩𑀸𑀯 𑀲𑀯𑀺𑀲𑀬𑁂 𑀲𑀺𑀬𑀼𑀁 𑀩𑀸𑀥𑀓𑀸𑀪𑀸𑀯𑀸 𑀤𑀽𑀭𑁄 𑀕𑀸𑀫𑁄, 𑀅𑀦𑁆𑀢𑀺𑀓𑁄 𑀕𑀸𑀫𑁄𑀢𑁆𑀯𑁂𑀯𑀫𑀸𑀤𑀺.

𑀓𑁂𑀘𑀺 𑀧𑀦𑀸𑀳𑀼 ‘𑀅𑀲𑀢𑁆𑀢𑀯𑀘𑀦𑀳𑁂𑀢𑁂𑀳𑀺 𑀧𑀸𑀝𑀺𑀧𑀤𑀺𑀓𑀢𑁆𑀣𑁂 𑀤𑀼𑀢𑀺𑀬𑀸𑀢𑀢𑀺𑀬𑀸𑀧𑀜𑁆𑀘𑀫𑀻𑀲𑀢𑁆𑀢𑀫𑀺𑀬𑁄, 𑀲𑀢𑁆𑀢𑀯𑀘𑀦𑁂𑀳𑀺 𑀢𑀼 𑀲𑀩𑁆𑀩𑀸𑀯 𑀲𑀯𑀺𑀲𑀬𑁂’𑀢𑀺, 𑀢𑁂 𑀧𑀦𑀜𑁆𑀜𑁂𑀳𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀤𑀽𑀭𑀁 𑀫𑀕𑁆𑀕𑁄, 𑀅𑀦𑁆𑀢𑀺𑀓𑀁 𑀫𑀕𑁆𑀕𑁄𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁… 𑀪𑀽𑀥𑀸𑀢𑀼𑀲𑁆𑀲 𑀕𑀫𑁆𑀫𑀫𑀸𑀦𑀢𑁆𑀢𑀸. 𑀯𑀺𑀲𑀼𑀤𑁆𑀥𑁄 𑀮𑁄𑀪𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀺, 𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀕𑀫𑁆𑀪𑀻𑀭𑀢𑁄 𑀘 𑀧𑀼𑀣𑀼𑀮𑀢𑁄 𑀘 𑀬𑁄𑀚𑀦𑀁, 𑀆𑀬𑀸𑀫𑁂𑀦 𑀬𑁄𑀚𑀦𑀁, 𑀢𑀢𑁄 𑀧𑀪𑀼𑀢𑀺, 𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀦𑁆𑀢𑀺 𑀲𑀯𑀺𑀲𑀬𑁂𑀯 𑀯𑀺𑀪𑀢𑁆𑀢𑀺𑀬𑁄.

𑁨𑁭. 𑀅𑀧𑀧𑀭𑀻𑀳𑀺 𑀯𑀚𑁆𑀚𑀦𑁂.

𑀯𑀚𑁆𑀚𑀦𑁂 𑀯𑀢𑁆𑀢𑀫𑀸𑀦𑁂𑀳𑀺 𑀅𑀧𑀧𑀭𑀻𑀳𑀺 𑀬𑁄𑀕𑁂 𑀧𑀜𑁆𑀘𑀫𑀻 𑀳𑁄𑀢𑀺. 𑀅𑀧 𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀧𑀭𑀺 𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀲𑀸𑀮𑀁 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀚𑁆𑀚𑀦𑁂𑀢𑀺 𑀓𑀺𑀁? 𑀭𑀼𑀓𑁆𑀔𑀁 𑀧𑀭𑀺𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼. 𑀆𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀸 𑀯𑀲𑁆𑀲𑀺 𑀤𑁂𑀯𑁄𑀢𑀺 𑀫𑀭𑀺𑀬𑀸𑀤𑀸-𑀪𑀺𑀯𑀺𑀥𑀻𑀲𑁆𑀯𑀯𑀥𑀺 𑀯𑀺𑀲𑀬𑁂𑀯 𑀧𑀜𑁆𑀘𑀫𑀻, 𑀯𑀺𑀦𑀸 𑀧𑀸𑀝𑀮𑀺𑀧𑀼𑀢𑁆𑀢𑁂𑀦 𑀲𑀳 𑀯𑁂𑀢𑀺 𑀯𑀺𑀲𑁂𑀲𑁄, 𑀏𑀯𑀁 𑀬𑀸𑀯 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀸 𑀯𑀲𑁆𑀲𑀺 𑀤𑁂𑀯𑁄𑀢𑀺.

𑁨𑁮. 𑀧𑀝𑀺𑀦𑀺𑀥𑀺𑀧𑀝𑀺𑀤𑀸𑀦𑁂𑀲𑀼 𑀧𑀢𑀺𑀦𑀸.

𑀧𑀝𑀺𑀦𑀺𑀥𑀺𑀫𑁆𑀳𑀺 𑀧𑀝𑀺𑀤𑀸𑀦𑁂 𑀘 𑀯𑀢𑁆𑀢𑀫𑀸𑀦𑁂𑀦 𑀧𑀢𑀺𑀦𑀸 𑀬𑁄𑀕𑁂 𑀦𑀸𑀫𑀲𑁆𑀫𑀸 𑀧𑀜𑁆𑀘𑀫𑀻 𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀩𑀼𑀤𑁆𑀥𑀲𑁆𑀫𑀸 𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀖𑀢𑀫𑀲𑁆𑀲 𑀢𑁂𑀲𑀲𑁆𑀫𑀸 𑀧𑀢𑀺 𑀤𑀤𑀸𑀢𑀺, 𑀧𑀝𑀺𑀦𑀺𑀥𑀺𑀧𑀝𑀺𑀤𑀸𑀦𑁂𑀲𑀽𑀢𑀺 𑀓𑀺𑀁? 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂.

𑁨𑁯. 𑀭𑀺𑀢𑁂 𑀤𑀼𑀢𑀺𑀬𑀸 𑀘.

𑀭𑀺𑀢𑁂𑀲𑀤𑁆𑀤𑁂𑀦 𑀬𑁄𑀕𑁂 𑀦𑀸𑀫𑀲𑁆𑀫𑀸 𑀤𑀼𑀢𑀺𑀬𑀸 𑀳𑁄𑀢𑀺 𑀧𑀜𑁆𑀘𑀫𑀻 𑀘. 𑀭𑀺𑀢𑁂 𑀲𑀤𑁆𑀥𑀫𑁆𑀫𑀁, 𑀭𑀺𑀢𑁂 𑀲𑀤𑁆𑀥𑀫𑁆𑀫𑀸.

𑁩𑁦. 𑀯𑀺𑀦𑀸-𑀜𑁆𑀜𑀢𑁆𑀭 𑀢𑀢𑀺𑀬𑀸 𑀘.

𑀯𑀺𑀦𑀸-𑀜𑁆𑀜𑀢𑁆𑀭𑀲𑀤𑁆𑀤𑁂𑀳𑀺 𑀬𑁄𑀕𑁂 𑀦𑀸𑀫𑀲𑁆𑀫𑀸 𑀢𑀢𑀺𑀬𑀸 𑀘 𑀳𑁄𑀢𑀺 𑀤𑀼𑀢𑀺𑀬𑀸 𑀧𑀜𑁆𑀘𑀫𑀺𑀬𑁄 𑀘. 𑀯𑀺𑀦𑀸 𑀯𑀸𑀢𑁂𑀦, 𑀯𑀺𑀦𑀸 𑀯𑀸𑀢𑀁, 𑀯𑀺𑀦𑀸 𑀯𑀸𑀢𑀲𑁆𑀫𑀸, 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦, 𑀅𑀜𑁆𑀜𑀢𑁆𑀭 𑀥𑀫𑁆𑀫𑀁, 𑀅𑀜𑁆𑀜𑀢𑁆𑀭 𑀥𑀫𑁆𑀫𑀸.

𑁩𑁧. 𑀧𑀼𑀣𑀦𑀸𑀦𑀸𑀳𑀺.

𑀏𑀢𑁂𑀳𑀺 𑀬𑁄𑀕𑁂 𑀢𑀢𑀺𑀬𑀸 𑀳𑁄𑀢𑀺 𑀧𑀜𑁆𑀘𑀫𑀻 𑀘. 𑀧𑀼𑀣𑀕𑁂𑀯 𑀚𑀦𑁂𑀦, 𑀧𑀼𑀣𑀕𑁂𑀯 𑀚𑀦𑀲𑁆𑀫𑀸, 𑀚𑀦𑁂𑀦 𑀦𑀸𑀦𑀸, 𑀚𑀦𑀲𑁆𑀫𑀸 𑀦𑀸𑀦𑀸.

𑁩𑁨. 𑀲𑀢𑁆𑀢𑀫𑁆𑀬𑀸𑀥𑀸𑀭𑁂.

𑀓𑀺𑀭𑀺𑀬𑀸𑀥𑀸𑀭 𑀪𑀽𑀢 𑀓𑀢𑁆𑀢𑀼 𑀓𑀫𑁆𑀫𑀸𑀦𑀁 𑀥𑀸𑀭𑀡𑁂𑀦 𑀬𑁄 𑀓𑀺𑀭𑀺𑀬𑀸𑀬𑀸𑀥𑀸𑀭𑁄 𑀢𑀲𑁆𑀫𑀺𑀁 𑀓𑀸𑀭𑀓𑁂 𑀦𑀸𑀫𑀲𑁆𑀫𑀸 𑀲𑀢𑁆𑀢𑀫𑀻 𑀳𑁄𑀢𑀺. 𑀓𑀝𑁂 𑀦𑀺𑀲𑀻𑀤𑀢𑀺 (𑀤𑁂𑀯𑀤𑀢𑁆𑀢𑁄), 𑀣𑀸𑀮𑀺𑀬𑀁 𑀑𑀤𑀦𑀁 𑀧𑀘𑀢𑀺, 𑀆𑀓𑀸𑀲𑁂 𑀲𑀓𑀼𑀦𑀸, 𑀪𑀺𑀮𑁂𑀲𑀼 𑀢𑁂𑀮𑀁, 𑀕𑀗𑁆𑀕𑀸𑀬𑀁 𑀯𑀚𑁄.

𑁩𑁩. 𑀦𑀺𑀫𑀺𑀢𑁆𑀢𑁂.

𑀦𑀺𑀫𑀺𑀢𑁆𑀢𑀢𑁆𑀣𑁂 𑀲𑀢𑁆𑀢𑀫𑀻 𑀳𑁄𑀢𑀺. 𑀅𑀚𑀺𑀦𑀫𑁆𑀳𑀺 𑀳𑀜𑁆𑀜𑀢𑁂 𑀤𑀻𑀧𑀺, 𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀣𑀺𑀬𑀁.

𑁩𑁪. 𑀬𑀩𑁆𑀪𑀸𑀯𑁄𑀪𑀸𑀯𑀮𑀓𑁆𑀔𑀡𑀁.

𑀬𑀲𑁆𑀲 𑀪𑀸𑀯𑁄 𑀪𑀸𑀯𑀦𑁆𑀢𑀭𑀲𑁆𑀲 𑀮𑀓𑁆𑀔𑀡𑀁 𑀪𑀯𑀢𑀺, 𑀢𑀢𑁄 𑀲𑀢𑁆𑀢𑀫𑀻 𑀳𑁄𑀢𑀺. 𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄. 𑀪𑀸𑀯𑁄𑀢𑀺 𑀓𑀺𑀁? 𑀬𑁄 𑀚𑀝𑀸𑀳𑀺 𑀲𑁄 𑀪𑀼𑀜𑁆𑀚𑀢𑀺. 𑀪𑀸𑀯𑀮𑀓𑁆𑀔𑀡𑀦𑁆𑀢𑀺 𑀓𑀺𑀁? 𑀬𑁄 𑀪𑀼𑀜𑁆𑀚𑀢𑀺 𑀲𑁄 𑀤𑁂𑀯𑀤𑀢𑁆𑀢𑁄, ‘‘𑀅𑀓𑀸𑀮𑁂 𑀯𑀲𑁆𑀲𑀢𑀺 𑀢𑀲𑁆𑀲, 𑀢𑀸𑀮𑁂 𑀢𑀲𑁆𑀲 𑀦 𑀯𑀲𑁆𑀲𑀢𑀻’’𑀢𑀺 𑀯𑀺𑀲𑀬𑀲𑀢𑁆𑀢𑀫𑀻.

𑁩𑁫. 𑀙𑀝𑁆𑀞𑀻 𑀘𑀸𑀦𑀸𑀤𑀭𑁂.

𑀬𑀲𑁆𑀲 𑀪𑀸𑀯𑁄 𑀪𑀸𑀯𑀦𑁆𑀢𑀭𑀲𑁆𑀲 𑀮𑀓𑁆𑀔𑀡𑀁 𑀪𑀯𑀢𑀺, 𑀢𑀢𑁄 𑀙𑀝𑁆𑀞𑀻 𑀪𑀯𑀢𑀺 𑀲𑀢𑁆𑀢𑀫𑀻 𑀘 𑀅𑀦𑀸𑀤𑀭𑁂 𑀕𑀫𑁆𑀬𑀫𑀸𑀦𑁂. ‘‘𑀆𑀓𑁄𑀝𑀬𑀦𑁆𑀢𑁄 𑀲𑁄 𑀦𑁂𑀢𑀺, 𑀲𑀺𑀯𑀺𑀭𑀸𑀚𑀲𑁆𑀲 𑀧𑁂𑀓𑁆𑀔𑀢𑁄’’, ‘‘𑀫𑀘𑁆𑀘𑀼 𑀕𑀘𑁆𑀙𑀢𑀺 𑀆𑀤𑀸𑀬, 𑀧𑁂𑀓𑁆𑀔𑀫𑀸𑀦𑁂 𑀫𑀳𑀸𑀚𑀦𑁂’’.

𑀕𑀼𑀦𑁆𑀦𑀁 𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀕𑁄𑀲𑀼 𑀲𑀸𑀫𑀻𑀢𑀺 𑀯𑀺𑀲𑀬𑀲𑀢𑁆𑀢𑀫𑀻, 𑀏𑀯𑀁 𑀕𑀼𑀦𑁆𑀦𑀫𑀺𑀲𑁆𑀲𑀭𑁄, 𑀕𑁄𑀲𑁆𑀯𑀺𑀲𑁆𑀲𑀭𑁄, 𑀕𑀼𑀦𑁆𑀦𑀁 𑀅𑀥𑀺𑀧𑀢𑀺, 𑀕𑁄𑀲𑀼 𑀅𑀥𑀺𑀧𑀢𑀺, 𑀕𑀼𑀦𑁆𑀦𑀁 𑀤𑀸𑀬𑀸𑀤𑁄, 𑀕𑁄𑀲𑀼 𑀤𑀸𑀳𑀸𑀤𑁄, 𑀤𑀼𑀦𑁆𑀦𑀁 𑀲𑀓𑁆𑀔𑀺, 𑀕𑁄𑀲𑀼 𑀲𑀓𑁆𑀔𑀺, 𑀕𑀼𑀦𑁆𑀦𑀁 𑀧𑀢𑀺𑀪𑀽, 𑀕𑁄𑀲𑀼 𑀧𑀢𑀺𑀪𑀽, 𑀕𑀼𑀦𑁆𑀦𑀁 𑀧𑀲𑀽𑀢𑁄, 𑀕𑁄𑀲𑀼 𑀧𑀲𑀽𑀢𑁄, 𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲, 𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑁂, 𑀆𑀬𑀼𑀢𑁆𑀢𑁄 𑀓𑀝𑀓𑀭𑀡𑀲𑁆𑀲, 𑀆𑀬𑀼𑀢𑁆𑀢𑁄 𑀓𑀝𑀓𑀭𑀡𑁂𑀢𑀺.

𑀢𑀣𑀸𑀥𑀸𑀭𑀯𑀘𑀦𑀺𑀘𑁆𑀙𑀸𑀬𑀁 𑀲𑀢𑁆𑀢𑀫𑀻, 𑀪𑀺𑀓𑁆𑀔𑀽𑀲𑀼 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀫𑀼𑀤𑁆𑀥𑀦𑀺 𑀥𑀼𑀫𑁆𑀩𑀺𑀢𑁆𑀯𑀸, 𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸, 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀧𑀣𑁂𑀲𑀼 𑀕𑀘𑁆𑀙𑀦𑁆𑀢𑀺, 𑀓𑀤𑀮𑀻𑀲𑀼 𑀕𑀚𑁂 𑀭𑀓𑁆𑀔𑀦𑁆𑀢𑀻𑀢𑀺. 𑀜𑀸𑀡𑀲𑁆𑀫𑀺𑀁 𑀧𑀲𑀦𑁆𑀦𑁄𑀢𑀺 𑀯𑀺𑀲𑀬𑀲𑀢𑁆𑀢𑀫𑀻, 𑀜𑀸𑀡𑁂𑀦 𑀧𑀲𑀦𑁆𑀦𑁄𑀢𑀺 𑀓𑀭𑀡𑁂 𑀢𑀢𑀺𑀬𑀸, 𑀏𑀯𑀁 𑀜𑀸𑀡𑀲𑁆𑀫𑀺𑀁 𑀉𑀲𑁆𑀲𑀼𑀓𑁆𑀓𑁄 𑀜𑀸𑀡𑁂𑀦 𑀉𑀲𑁆𑀲𑀼𑀓𑁆𑀓𑁄𑀢𑀺.

𑁩𑁬. 𑀬𑀢𑁄 𑀦𑀺𑀤𑁆𑀥𑀸𑀭𑀡𑀁.

𑀚𑀸𑀢𑀺𑀕𑀼𑀡𑀓𑀺𑀭𑀺𑀬𑀸𑀳𑀺 𑀲𑀫𑀼𑀤𑀸𑀬𑀢𑁂𑀓𑀤𑁂𑀲𑀲𑁆𑀲 𑀧𑀼𑀣𑀓𑁆𑀓𑀭𑀡𑀁 𑀦𑀺𑀤𑁆𑀥𑀸𑀭𑀡𑀁. 𑀬𑀢𑁄 𑀢𑀁 𑀓𑀭𑀻𑀬𑀢𑀺, 𑀢𑀢𑁄 𑀙𑀝𑁆𑀞𑀻𑀲𑀢𑁆𑀢𑀫𑀺𑀬𑁄 𑀳𑁄𑀦𑁆𑀢𑀺. 𑀲𑀸𑀮𑀬𑁄 𑀲𑀽𑀓𑀥𑀜𑁆𑀜𑀸𑀦𑀁 𑀧𑀣𑁆𑀬𑀢𑀫𑀸, 𑀲𑀸𑀮𑀬𑁄 𑀲𑀽𑀓𑀥𑀜𑁆𑀜𑁂𑀲𑀼 𑀧𑀣𑁆𑀬𑀢𑀫𑀸, 𑀓𑀡𑁆𑀳𑀸 𑀕𑀸𑀯𑀻𑀦𑀁 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸, 𑀓𑀡𑁆𑀳𑀸 𑀕𑀸𑀯𑀻𑀲𑀼 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸, 𑀕𑀘𑁆𑀙𑀢𑀁 𑀥𑀸𑀯𑀦𑁆𑀢𑁄 𑀲𑀻𑀖𑀢𑀫𑁄, 𑀕𑀘𑁆𑀙𑀦𑁆𑀢𑁂𑀲𑀼 𑀥𑀸𑀯𑀦𑁆𑀢𑁄 𑀲𑀻𑀖𑀢𑀫𑁄. 𑀲𑀻𑀮𑀫𑁂𑀯 𑀲𑀼𑀢𑀸 𑀲𑁂𑀬𑁆𑀬𑁄𑀢𑀺 𑀅𑀯𑀥𑀺𑀫𑁆𑀳𑀺𑀬𑁂𑀯 𑀧𑀜𑁆𑀘𑀫𑀻.

𑁩𑁭. 𑀧𑀞𑀫𑀸𑀢𑁆𑀣𑀫𑀢𑁆𑀢𑁂.

𑀦𑀸𑀫𑀲𑁆𑀲𑀸𑀪𑀺𑀥𑁂𑀬𑁆𑀬𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀭𑀼𑀓𑁆𑀔𑁄. 𑀇𑀢𑁆𑀣𑀺 𑀧𑀼𑀫𑀸 𑀦𑀧𑀼𑀁𑀲𑀓𑀦𑁆𑀢𑀺 𑀮𑀺𑀗𑁆𑀕𑀫𑁆𑀧𑀺 𑀲𑀤𑁆𑀤𑀢𑁆𑀣𑁄𑀯, 𑀢𑀣𑀸 𑀤𑁄𑀡𑁄 𑀔𑀸𑀭𑀻 𑀆𑀴𑁆𑀳𑀓𑀦𑁆𑀢𑀺 𑀧𑀭𑀺𑀫𑀸𑀡𑀫𑁆𑀧𑀺 𑀲𑀤𑁆𑀤𑀢𑁆𑀣𑁄𑀯, 𑀏𑀓𑁄 𑀤𑁆𑀯𑁂 𑀩𑀳𑀯𑁄𑀢𑀺 𑀲𑀗𑁆𑀔𑁆𑀬𑀸𑀧𑀺 𑀲𑀤𑁆𑀤𑀢𑁆𑀣𑁄𑀯.

𑁩𑁮. 𑀆𑀫𑀦𑁆𑀢𑀡𑁂.

𑀲𑀢𑁄 𑀲𑀤𑁆𑀤𑁂𑀦𑀸𑀪𑀺𑀫𑀼𑀔𑀻𑀓𑀭𑀡𑀫𑀸𑀫𑀦𑁆𑀢𑀡𑀁. 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀧𑀞𑀫𑀸 𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀪𑁄𑀧𑀼𑀭𑀺𑀲, 𑀪𑁄𑀓𑁆𑀓𑀢𑁆𑀣𑀺, 𑀪𑁄 𑀦𑀧𑀼𑀁𑀲𑀓.

𑁩𑁯. 𑀙𑀝𑁆𑀞𑀻 𑀲𑀫𑁆𑀩𑀦𑁆𑀥𑁂.

𑀓𑀺𑀭𑀺𑀬𑀸𑀓𑀸𑀭𑀓𑀲𑀜𑁆𑀚𑀸𑀢𑁄 𑀅𑀲𑁆𑀲𑁂𑀤𑀫𑁆𑀪𑀸𑀯𑀳𑁂𑀢𑀼𑀓𑁄 𑀲𑀫𑁆𑀩𑀦𑁆𑀥𑁄 𑀦𑀸𑀫. 𑀢𑀲𑁆𑀫𑀺𑀁 𑀙𑀝𑁆𑀞𑀻 𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀭𑀜𑁆𑀜𑁄 𑀧𑀼𑀭𑀺𑀲𑁄, 𑀲𑀭𑀢𑀺 𑀭𑀚𑁆𑀚𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀭𑀚𑁆𑀚𑀲𑀫𑁆𑀩𑀦𑁆𑀥𑀺𑀦𑀺𑀁 𑀲𑀢𑀺𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄, 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀭𑀦𑁆𑀢𑀼 𑀤𑀼𑀢𑀺𑀬𑀸𑀯 𑀲𑀭𑀢𑀺 𑀭𑀚𑁆𑀚𑀁. 𑀢𑀣𑀸 𑀭𑀚𑀓𑀲𑁆𑀲 𑀯𑀢𑁆𑀣𑀁 𑀤𑀤𑀸𑀢𑀺, 𑀧𑀳𑀭𑀢𑁄 𑀧𑀺𑀝𑁆𑀞𑀺𑀁 𑀤𑀤𑀸𑀢𑀺, 𑀩𑀸𑀮𑁄 𑀧𑀽𑀭𑀢𑀺 𑀧𑀸𑀧𑀲𑁆𑀲, 𑀅𑀫𑀘𑁆𑀘𑁂 𑀢𑀸𑀢 𑀚𑀸𑀦𑀸𑀳𑀺, 𑀥𑀻𑀭𑁂 𑀅𑀢𑁆𑀣𑀲𑁆𑀲 𑀓𑁄𑀯𑀺𑀤𑁂, 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁, 𑀲𑀓𑀺𑀁 𑀧𑀓𑁆𑀔𑀲𑁆𑀲, 𑀧𑀽𑀭𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀓𑀼𑀫𑁆𑀪𑀦𑁆𑀢𑁆𑀯𑁂𑀯𑀫𑀸𑀤𑀺.

𑀓𑀺𑀢𑀓𑀧𑁆𑀧𑀬𑁄𑀕𑁂 𑀓𑀓𑁆𑀢𑀼𑀓𑀫𑁆𑀫𑁂𑀲𑀼 𑀩𑀳𑀼𑀮𑀁 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑀁 𑀙𑀝𑁆𑀞𑀻, 𑀲𑀸𑀥𑀼 𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲, 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀥𑀸𑀢𑀼, 𑀥𑀫𑁆𑀫𑀲𑁆𑀲 𑀕𑀼𑀢𑁆𑀢𑁄 𑀫𑁂𑀥𑀸𑀯𑀻, 𑀅𑀫𑀢𑀁 𑀢𑁂𑀲𑀁 𑀧𑀭𑀺𑀪𑀼𑀢𑁆𑀢𑀁, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄, 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲, 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀸𑀬, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄𑀢𑁆𑀯𑁂𑀯𑀫𑀸𑀤𑀺.

𑀓𑀢𑁆𑀢𑀼𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀼 𑀢𑀢𑀺𑀬𑀸 𑀤𑀼𑀢𑀺𑀬𑀸𑀬𑁄 𑀘, 𑀲𑀜𑁆𑀘𑀢𑁆𑀢𑁄 𑀧𑀺𑀢𑀭𑀸 𑀅𑀳𑀁, 𑀲𑀭𑀲𑀺 𑀢𑁆𑀯𑀁 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀢𑁆𑀯𑁂𑀯𑀫𑀸𑀤𑀺.

𑁪𑁦. 𑀢𑀼𑀮𑁆𑀬𑀢𑁆𑀣𑁂𑀦 𑀯𑀸 𑀢𑀢𑀺𑀬𑀸.

𑀢𑀼𑀮𑁆𑀬𑀢𑁆𑀣𑁂𑀦 𑀬𑁄𑀕𑁂 𑀙𑀝𑁆𑀞𑀻 𑀳𑁄𑀢𑀺 𑀢𑀢𑀺𑀬𑀸 𑀯𑀸, 𑀢𑀼𑀮𑁆𑀬𑁄 𑀧𑀺𑀢𑀼, 𑀢𑀼𑀮𑁆𑀬𑁄 𑀧𑀺𑀢𑀭𑀸, 𑀲𑀤𑀺𑀲𑁄 𑀧𑀺𑀢𑀼, 𑀲𑀤𑀺𑀲𑁄 𑀧𑀺𑀢𑀭𑀸, 𑀇𑀳 𑀓𑀣𑀁 𑀢𑀢𑀺𑀬𑀸 𑀦 𑀳𑁄𑀢𑀺? 𑀅𑀚𑁆𑀚𑀼𑀦𑀲𑁆𑀲 𑀢𑀼𑀮𑀸 𑀦𑀢𑁆𑀣𑀺, 𑀓𑁂𑀲𑀯𑀲𑁆𑀲𑀼𑀧𑀫𑀸 𑀦 𑀘𑁂𑀢𑀺, 𑀦𑁂𑀢𑁂 𑀢𑀼𑀮𑁆𑀬𑀢𑁆𑀣𑀸, 𑀓𑀺𑀜𑁆𑀚𑀭𑀳𑀺 𑀢𑀼𑀮𑁆𑀬𑀸𑀦𑀫𑁄𑀧𑀫𑁆𑀫𑀢𑁆𑀣𑀸.

𑁪𑁧. 𑀅𑀢𑁄 𑀬𑁄𑀦𑀁 𑀝𑀸𑀝𑁂.

𑀅𑀓𑀸𑀭𑀦𑁆𑀣𑀢𑁄 𑀦𑀸𑀫𑀲𑁆𑀫𑀸 𑀬𑁄𑀦𑀁 𑀝𑀸𑀝𑁂 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁, 𑀝𑀓𑀸𑀭𑀸 𑀲𑀩𑁆𑀩𑀤𑁂𑀲𑀢𑁆𑀣𑀸, 𑀩𑀼𑀤𑁆𑀥𑀸 𑀩𑀼𑀤𑁆𑀥𑁂, 𑀅𑀢𑁄𑀢𑀺 𑀓𑀺𑀁? 𑀓𑀜𑁆𑀜𑀸𑀬𑁄, 𑀇𑀢𑁆𑀣𑀺𑀬𑁄, 𑀯𑀥𑀼𑀬𑁄, 𑀇𑀥 𑀓𑀲𑁆𑀫𑀸 𑀦 𑀪𑀯𑀢𑀺 𑀅𑀕𑁆𑀕𑀬𑁄. 𑀅𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸.

𑁪𑁨. 𑀦𑀺𑀦𑀁 𑀯𑀸.

𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀦𑀺𑀦𑀁 𑀝𑀸𑀝𑁂 𑀯𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀭𑀽𑀧𑀸, 𑀭𑀽𑀧𑁂, 𑀭𑀽𑀧𑀸𑀦𑀺, 𑀅𑀢𑁄𑀢𑁆𑀯𑁂𑀯 𑀅𑀝𑁆𑀞𑀻𑀦𑀺.

𑁪𑁩. 𑀲𑁆𑀫𑀸𑀲𑁆𑀫𑀺𑀁𑀦𑀁.

𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀲𑁆𑀫𑀸𑀲𑁆𑀫𑀺𑀦𑁆𑀦𑀁 𑀝𑀸𑀝𑁂 𑀯𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀩𑀼𑀤𑁆𑀥𑀸 𑀩𑀼𑀤𑁆𑀥𑀲𑁆𑀫𑀸, 𑀩𑀼𑀤𑁆𑀥𑁂 𑀩𑀼𑀤𑁆𑀥𑀲𑁆𑀫𑀺𑀁, 𑀅𑀢𑁄𑀢𑁆𑀯𑁂𑀯 𑀅𑀕𑁆𑀕𑀺𑀲𑁆𑀫𑀸 𑀅𑀕𑁆𑀕𑀺𑀲𑁆𑀫𑀺𑀁.

𑁪𑁪. 𑀲𑀲𑁆𑀲𑀸𑀬 𑀘𑀢𑀼𑀢𑁆𑀣𑀺𑀬𑀸.

𑀅𑀓𑀸𑀭𑀦𑁆𑀢𑀢𑁄 𑀧𑀭𑀲𑁆𑀲 𑀲𑀲𑁆𑀲 𑀘𑀢𑀼𑀢𑁆𑀣𑀺𑀬𑀸 𑀆𑀬𑁄 𑀳𑁄𑀢𑀺 𑀯𑀸. 𑀩𑀼𑀤𑁆𑀥𑀸𑀬 𑀩𑀼𑀤𑁆𑀥𑀲𑁆𑀲, 𑀪𑀺𑀬𑁆𑀬𑁄 𑀢𑀸𑀤𑀢𑁆𑀣𑁆𑀬𑁂𑀬𑁂𑀯𑀸𑀬𑀫𑀸𑀬𑁄 𑀤𑀺𑀲𑁆𑀲𑀢𑁂, 𑀓𑁆𑀯𑀘𑀺𑀤𑁂𑀯𑀜𑁆𑀜𑀢𑁆𑀣, 𑀅𑀢𑁄𑀢𑁆𑀯𑁂𑀯 𑀇𑀲𑀺𑀲𑁆𑀲, 𑀘𑀢𑀼𑀢𑁆𑀣𑀺𑀬𑀸𑀢𑀺 𑀓𑀺𑀁? 𑀩𑀼𑀤𑁆𑀥𑀲𑁆𑀲 𑀫𑀼𑀔𑀁, 𑀅𑀢𑁆𑀢𑀢𑁆𑀣𑀦𑁆𑀢𑀺 𑀅𑀢𑁆𑀣𑀲𑀤𑁆𑀤𑁂𑀦 𑀲𑀫𑀸𑀲𑁄.

𑀲𑀩𑁆𑀩𑀸𑀤𑀺𑀢𑁄𑀧𑀺 𑀲𑁆𑀫𑀸𑀲𑁆𑀫𑀺𑀁𑀲𑀸𑀦𑀁 𑀝𑀸𑀝𑁂𑀆𑀬𑀸 𑀳𑁄𑀦𑁆𑀢𑁂𑀯… 𑀦𑀺𑀭𑀼𑀢𑁆𑀢𑀺𑀓𑀸𑀭𑀸𑀦𑀼𑀫𑀢𑀢𑁆𑀢𑀸 𑀩𑀼𑀤𑁆𑀥𑀯𑀘𑀦𑁂 𑀲𑀦𑁆𑀤𑀲𑁆𑀲𑀦𑀯𑀢𑁄 𑀘, 𑀢𑀢𑁆𑀭𑁄𑀤𑀫𑀼𑀤𑀸𑀳𑀭𑀡𑀁 ‘𑀅𑀲𑁆𑀫𑀸 𑀮𑁄𑀓𑀸 𑀧𑀭𑀫𑁆𑀳𑀸 𑀘, 𑀉𑀪𑀬𑀸 𑀥𑀁𑀲𑀢𑁂 𑀦𑀭𑁄’, ‘𑀢𑁆𑀬𑀸𑀳𑀁 𑀫𑀦𑁆𑀢𑁂 𑀧𑀭𑀢𑁆𑀣𑀤𑁆𑀥𑁄’, ‘𑀬𑀸𑀬𑁂𑀯 𑀔𑁄 𑀧𑀦𑀢𑁆𑀣𑀸𑀬 𑀆𑀕𑀘𑁆𑀙𑁂𑀬𑁆𑀬𑀸𑀣𑁄 𑀢𑀫𑁂𑀯𑀢𑁆𑀣𑀁 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁂𑀬𑁆𑀬𑀸𑀣𑁄’𑀢𑀺.

𑁪𑁫. 𑀖𑀧𑀢𑁂𑀓𑀲𑁆𑀫𑀺𑀁 𑀦𑀸𑀤𑀻𑀦𑀁 𑀬𑀬𑀸.

𑀖𑀧𑀢𑁄 𑀦𑀸𑀤𑀻𑀦𑀫𑁂𑀓𑀲𑁆𑀫𑀺𑀁 𑀬𑀬𑀸 𑀳𑁄𑀦𑀺 𑀬𑀣𑀸𑀓𑁆𑀓𑀫𑀁. 𑀓𑀜𑁆𑀜𑀸𑀬, 𑀭𑀢𑁆𑀢𑀺𑀬𑀸, 𑀇𑀢𑁆𑀣𑀺𑀬𑀸, 𑀥𑁂𑀦𑀼𑀬𑀸, 𑀯𑀥𑀼𑀬𑀸, 𑀏𑀓𑀲𑁆𑀫𑀺𑀦𑁆𑀢𑀺 𑀓𑀺𑀁? 𑀓𑀜𑁆𑀜𑀸𑀳𑀺, 𑀭𑀢𑁆𑀢𑀻𑀳𑀺.

𑁪𑁬. 𑀲𑁆𑀲𑀸 𑀯𑀸 𑀢𑁂𑀢𑀺𑀫𑀸𑀫𑀽𑀳𑀺.

𑀖𑀧𑀲𑀜𑁆𑀜𑁂𑀳𑀺 𑀢𑁂𑀢𑀺𑀫𑀸𑀫𑀽𑀳𑀺 𑀦𑀸𑀤𑀻𑀦𑀫𑁂𑀓𑀲𑁆𑀫𑀺𑀁𑀲𑁆𑀲𑀸 𑀯𑀸 𑀳𑁄𑀢𑀺, 𑀢𑀲𑁆𑀲𑀸 𑀓𑀢𑀁, 𑀢𑀲𑁆𑀲𑀸 𑀤𑀻𑀬𑀢𑁂, 𑀢𑀲𑁆𑀲𑀸 𑀦𑀺𑀲𑁆𑀲𑀝𑀁, 𑀢𑀲𑁆𑀲𑀸 𑀧𑀭𑀺𑀕𑁆𑀕𑀳𑁄, 𑀢𑀲𑁆𑀲𑀸 𑀧𑀢𑀺𑀝𑁆𑀞𑀺𑀢𑀁, 𑀢𑀸𑀬 𑀯𑀸, 𑀏𑀯𑀁 𑀏𑀢𑀺𑀲𑁆𑀲𑀸 𑀏𑀢𑀸𑀬, 𑀇𑀫𑀺𑀲𑁆𑀲𑀸 𑀇𑀫𑀸𑀬, 𑀅𑀫𑀼𑀲𑁆𑀲𑀸 𑀅𑀫𑀼𑀬𑀸, 𑀏𑀢𑁂𑀳𑀻𑀢𑀺 𑀓𑀺𑀁? 𑀲𑀩𑁆𑀩𑀸𑀬, 𑀦𑀸𑀤𑀻𑀦𑀁 𑀢𑁆𑀯𑁂𑀯? 𑀲𑀸, 𑀖𑀧𑀢𑁄𑀢𑁆𑀯𑁂𑀯? 𑀢𑀸𑀳𑀺 𑀅𑀫𑀽𑀳𑀺.

𑁪𑁭. 𑀦𑀁𑀫𑁆𑀳𑀺 𑀦𑀼𑀓 𑀤𑁆𑀯𑀸𑀤𑀻𑀦𑀁 𑀲𑀢𑁆𑀢𑀭𑀲𑀦𑁆𑀦𑀁.

𑀤𑁆𑀯𑀸𑀤𑀻𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀦𑀼𑀓 𑀳𑁄𑀢𑀺 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀫𑁆𑀳𑀺, 𑀤𑁆𑀯𑀺𑀦𑁆𑀦𑀁 𑀘𑀢𑀼𑀦𑁆𑀦𑀁, 𑀧𑀜𑁆𑀘𑀦𑁆𑀦𑀁, 𑀏𑀯𑀁 𑀬𑀸𑀯 𑀅𑀝𑁆𑀞𑀸𑀭𑀲𑀦𑁆𑀦𑀁, 𑀉𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄, 𑀓𑀓𑀸𑀭𑁄 𑀅𑀦𑁆𑀢𑀸𑀯𑀬𑀯𑀢𑁆𑀣𑁄, 𑀢𑁂𑀦 𑀦𑀁𑀫𑁆𑀳𑀺 𑀦 𑀤𑀻𑀖𑁄.

𑁪𑁮. 𑀩𑀲𑀼𑀓𑀢𑀺𑀦𑁆𑀦𑀁.

𑀦𑀁𑀫𑁆𑀳𑀺 𑀩𑀳𑀼𑀦𑁄 𑀓𑀢𑀺𑀲𑁆𑀲 𑀘 𑀦𑀼𑀓 𑀳𑁄𑀢𑀺, 𑀩𑀳𑀼𑀦𑁆𑀦𑀁, 𑀓𑀢𑀺𑀦𑁆𑀦𑀁.

𑁪𑁯. 𑀡𑁆𑀡𑀁𑀡𑁆𑀡𑀦𑁆𑀦𑀁 𑀢𑀺𑀢𑁄 𑀛𑀸.

𑀛𑀲𑀜𑁆𑀜𑀸 𑀢𑀺𑀢𑁄 𑀦𑀁𑀯𑀘𑀦𑀲𑁆𑀲 𑀡𑁆𑀡𑀁𑀡𑁆𑀡𑀦𑁆𑀦𑀁 𑀳𑁄𑀢𑀺, 𑀢𑀺𑀡𑁆𑀡𑀁, 𑀢𑀺𑀡𑁆𑀡𑀦𑁆𑀦𑀁, 𑀛𑀸𑀢𑀺 𑀓𑀺𑀁 𑀢𑀺𑀲𑁆𑀲𑀦𑁆𑀦𑀁.

𑁫𑁦. 𑀉𑀪𑀺𑀦𑁆𑀦𑀁.

𑀉𑀪𑀸 𑀦𑀁𑀯𑀘𑀦𑀲𑁆𑀲 𑀇𑀦𑁆𑀦𑀁 𑀳𑁄𑀢𑀺, 𑀉𑀪𑀺𑀦𑁆𑀦𑀁.

𑁫𑁧. 𑀲𑀼𑀜 𑀲𑀲𑁆𑀲.

𑀦𑀸𑀫𑀲𑁆𑀫𑀸 𑀲𑀲𑁆𑀲 𑀲𑀼𑀜 𑀳𑁄𑀢𑀺, 𑀩𑀼𑀤𑁆𑀥𑀲𑁆𑀲, 𑀤𑁆𑀯𑀺𑀲𑀓𑀸𑀭𑀧𑀸𑀞𑁂𑀦 𑀲𑀺𑀤𑁆𑀥𑁂 𑀮𑀸𑀖𑀯𑀢𑁆𑀣𑀫𑀺𑀤𑀁.

𑁫𑁨. 𑀲𑁆𑀲𑀁𑀲𑁆𑀲𑀸𑀲𑁆𑀲𑀸𑀬𑁂𑀲𑁆𑀯𑀺𑀢𑀭𑁂 𑀓𑀜𑁆𑀜𑁂𑀪𑀺𑀫𑀸𑀦𑀫𑀺.

𑀲𑁆𑀲𑀫𑀸𑀤𑀻𑀲𑁆𑀯𑀺𑀢𑀭𑀸𑀤𑀻𑀦𑀫𑀺 𑀳𑁄𑀢𑀺, 𑀇𑀢𑀭𑀺𑀲𑁆𑀲𑀁, 𑀇𑀢𑀭𑀺𑀲𑁆𑀲𑀸, 𑀏𑀓𑀺𑀲𑁆𑀲𑀁, 𑀏𑀓𑀺𑀲𑁆𑀲𑀸, 𑀅𑀜𑁆𑀜𑀺𑀲𑁆𑀲𑀁, 𑀅𑀜𑁆𑀜𑀺𑀲𑁆𑀲𑀸, 𑀏𑀢𑀺𑀲𑁆𑀲𑀁, 𑀏𑀢𑀺𑀲𑁆𑀲𑀸, 𑀏𑀢𑀺𑀲𑁆𑀲𑀸𑀬, 𑀇𑀫𑀺𑀲𑁆𑀲𑀁, 𑀇𑀫𑀺𑀲𑁆𑀲𑀸, 𑀇𑀫𑀺𑀲𑁆𑀲𑀸𑀬, 𑀏𑀲𑁆𑀯𑀺𑀢𑀺 𑀓𑀺𑀁? 𑀇𑀢𑀭𑀸𑀬, 𑀏𑀲𑀦𑁆𑀢𑀺 𑀓𑀺𑀁? 𑀲𑀩𑁆𑀩𑀲𑁆𑀲𑀁, 𑀲𑀩𑁆𑀩𑀲𑁆𑀲𑀸.

𑁫𑁩. 𑀢𑀸𑀬 𑀯𑀸.

𑀲𑁆𑀲𑀫𑀸𑀤𑀻𑀲𑀼 𑀢𑀲𑁆𑀲𑀸 𑀯𑀸 𑀇 𑀳𑁄𑀢𑀺, 𑀢𑀺𑀲𑁆𑀲𑀁 𑀢𑀲𑁆𑀲𑀁, 𑀢𑀺𑀲𑁆𑀲𑀸 𑀢𑀲𑁆𑀲𑀸, 𑀢𑀺𑀲𑁆𑀲𑀸𑀬 𑀢𑀲𑁆𑀲𑀸𑀬, 𑀲𑁆𑀲𑀁𑀲𑁆𑀲𑀸𑀲𑁆𑀲𑀸𑀬𑁂𑀲𑁆𑀯𑀺𑀢𑁆𑀯𑁂𑀯? 𑀢𑀸𑀬.

𑁫𑁪. 𑀢𑁂𑀢𑀺𑀫𑀸𑀢𑁄 𑀲𑀲𑁆𑀲 𑀲𑁆𑀲𑀸𑀬.

𑀢𑀸𑀏𑀢𑀸𑀇𑀫𑀸𑀢𑁄 𑀲𑀲𑁆𑀲 𑀲𑁆𑀲𑀸𑀬𑁄 𑀳𑁄𑀢𑀺 𑀯𑀸. 𑀢𑀲𑁆𑀲𑀸𑀬 𑀢𑀸𑀬, 𑀏𑀢𑀺𑀲𑁆𑀲𑀸𑀬 𑀏𑀢𑀸𑀬, 𑀇𑀫𑀺𑀲𑁆𑀲𑀸𑀬 𑀇𑀫𑀸𑀬.

𑁫𑁫. 𑀭𑀢𑁆𑀬𑀸𑀤𑀻𑀳𑀺 𑀝𑁄 𑀲𑁆𑀫𑀺𑀦𑁄.

𑀭𑀢𑁆𑀬𑀸𑀤𑀻𑀳𑀺 𑀲𑁆𑀫𑀺𑀦𑁄 𑀝𑁄 𑀳𑁄𑀢𑀺 𑀯𑀸, 𑀭𑀢𑁆𑀢𑁄 𑀭𑀢𑁆𑀢𑀺𑀬𑀁, 𑀆𑀤𑁄 𑀆𑀤𑀺𑀲𑁆𑀫𑀺𑀁.

𑁫𑁬. 𑀲𑀼𑀳𑀺𑀲𑀼𑀪𑀲𑁆𑀲𑁄.

𑀉𑀪𑀲𑁆𑀲 𑀲𑀼𑀳𑀺𑀲𑁆𑀯𑁄 𑀳𑁄𑀢𑀺. 𑀉𑀪𑁄𑀲𑀼, 𑀉𑀪𑁄𑀳𑀺.

𑁫𑁭. 𑀮𑁆𑀢𑀼𑀧𑀺𑀢𑀸𑀤𑀺𑀦𑀫𑀸 𑀲𑀺𑀫𑁆𑀳𑀺.

𑀮𑁆𑀢𑀼𑀧𑁆𑀧𑀘𑁆𑀘𑀬𑀦𑁆𑀢𑀸𑀦𑀁 𑀧𑀺𑀢𑀸𑀤𑀻𑀦𑀁 𑀘 𑀆 𑀳𑁄𑀢𑀺 𑀲𑀺𑀫𑁆𑀳𑀺. 𑀓𑀢𑁆𑀢𑀸, 𑀧𑀺𑀢𑀸. 𑀧𑀺𑀢𑀼, 𑀫𑀸𑀢𑀼, 𑀪𑀸𑀯𑀼, 𑀫𑀻𑀢𑀼, 𑀤𑀼𑀳𑀺𑀢𑀼, 𑀚𑀸𑀫𑀸𑀢𑀼, 𑀦𑀢𑁆𑀢𑀼, 𑀳𑁄𑀢𑀼, 𑀧𑁄𑀢𑀼.

𑁫𑁮. 𑀕𑁂 𑀅 𑀘.

𑀮𑁆𑀢𑀼𑀧𑀺𑀢𑀸𑀤𑀻𑀦𑀁 𑀅 𑀳𑁄𑀢𑀺 𑀕𑁂 𑀆 𑀘, 𑀪𑁄 𑀓𑀢𑁆𑀢, 𑀪𑁄 𑀓𑀢𑁆𑀢𑀸, 𑀪𑁄 𑀧𑀺𑀢, 𑀪𑁄 𑀧𑀺𑀢𑀸.

𑁫𑁯. 𑀅𑀬𑀼𑀦𑀁 𑀯𑀸 𑀤𑀻𑀖𑁄.

𑀅 𑀇 𑀉 𑀇𑀘𑁆𑀘𑁂𑀲𑀁 𑀯𑀸 𑀤𑀻𑀖𑁄 𑀳𑁄𑀢𑀺 𑀕𑁂 𑀧𑀭𑁂 𑀢𑀺𑀮𑀺𑀗𑁆𑀕𑁂. 𑀪𑁄 𑀧𑀼𑀭𑀺𑀲𑀸, 𑀪𑁄 𑀧𑀼𑀭𑀺𑀲, 𑀪𑁄 𑀅𑀕𑁆𑀕𑀻, 𑀪𑁄 𑀅𑀕𑁆𑀕𑀺, 𑀪𑁄 𑀪𑀺𑀓𑁆𑀔𑀽, 𑀪𑁄 𑀪𑀺𑀓𑁆𑀔𑀽.

𑁬𑁦. 𑀖𑀩𑁆𑀭𑀳𑁆𑀫𑀸𑀤𑀺𑀢𑁂.

𑀖𑀢𑁄 𑀩𑁆𑀭𑀳𑁆𑀫𑀸𑀤𑀺𑀢𑁄 𑀘 𑀕𑀲𑁆𑀲𑁂 𑀯𑀸 𑀳𑁄𑀢𑀺. 𑀪𑁄𑀢𑀺 𑀓𑀜𑁆𑀜𑁂, 𑀪𑁄𑀢𑀺 𑀓𑀜𑁆𑀜𑀸, 𑀪𑁄 𑀩𑁆𑀭𑀳𑁆𑀫𑁂, 𑀪𑁄 𑀩𑁆𑀭𑀳𑁆𑀫, 𑀪𑁄 𑀔𑀢𑁆𑀢𑁂, 𑀪𑁄 𑀔𑀢𑁆𑀢, 𑀪𑁄 𑀇𑀲𑁂, 𑀪𑁄 𑀇𑀲𑀺, 𑀪𑁄 𑀲𑀔𑁂, 𑀪𑁄 𑀲𑀔. 𑀲𑀔𑀺 𑀲𑀔𑀻𑀢𑀺 𑀇𑀢𑁆𑀣𑀺𑀬𑀁 𑀲𑀺𑀤𑁆𑀥𑀫𑁂𑀯. 𑀆𑀓𑀢𑀺𑀕𑀡𑁄-𑀬𑀁, 𑀏𑀯𑀫𑀜𑁆𑀜𑀢𑁆𑀭𑀸𑀧𑀺.

𑁬𑁧. 𑀦𑀫𑁆𑀫𑀸𑀤𑀻𑀳𑀺.

𑀅𑀫𑁆𑀫𑀸𑀤𑀻𑀳𑀺 𑀕𑀲𑁆𑀲𑁂 𑀦 𑀳𑁄𑀢𑀺. 𑀪𑁄𑀢𑀺 𑀅𑀫𑁆𑀫𑀸, 𑀪𑁄𑀢𑀺 𑀅𑀦𑁆𑀦𑀸, 𑀪𑁄𑀢𑀺 𑀅𑀫𑁆𑀩𑀸.

𑁬𑁨. 𑀭𑀲𑁆𑀲𑁄 𑀯𑀸.

𑀅𑀫𑁆𑀫𑀸𑀤𑀻𑀦𑀁 𑀕𑁂 𑀭𑀲𑁆𑀲𑁄 𑀳𑁄𑀢𑀺 𑀯𑀸. 𑀪𑁄𑀢𑀺 𑀅𑀫𑁆𑀫, 𑀪𑁄𑀢𑀺 𑀅𑀫𑁆𑀫𑀸.

𑁬𑁩. 𑀖𑁄 𑀲𑁆𑀲𑀁, 𑀲𑁆𑀲𑀸, 𑀲𑁆𑀲𑀸𑀬𑀁 𑀢𑀺𑀁𑀲𑀼.

𑀲𑁆𑀲𑀫𑀸𑀤𑀻𑀲𑀼 𑀖𑁄 𑀭𑀲𑁆𑀲𑁄 𑀳𑁄𑀢𑀺. 𑀢𑀲𑁆𑀲𑀁, 𑀢𑀲𑁆𑀲𑀸, 𑀢𑀲𑁆𑀲𑀸𑀬, 𑀢𑀁, 𑀲𑀪𑀢𑀺𑀁, 𑀏𑀲𑁆𑀯𑀺𑀢𑀺 𑀓𑀺𑀁? 𑀢𑀸𑀬, 𑀲𑀪𑀸𑀬.