𑀭𑀸𑀚𑀓𑀡𑁆𑀟

𑁨𑁫𑁧. 𑀫𑀳𑀸𑀚𑀦𑀁 𑀬𑁄 𑀭𑀜𑁆𑀚𑁂𑀢𑀺, 𑀘𑀢𑀽𑀳𑀺𑀧𑀺 𑀯𑀢𑁆𑀣𑀽𑀳𑀺 𑀯𑀸;

𑀭𑀸𑀚𑀸𑀢𑀺 𑀯𑀼𑀘𑁆𑀘𑀢𑁂 𑀮𑁄𑀓𑁂, 𑀇𑀢𑀺 𑀲𑀮𑁆𑀮𑀓𑁆𑀔𑀬𑁂 𑀯𑀺𑀤𑁆𑀯𑀸.

𑁨𑁫𑁨. 𑀤𑀸𑀦𑀜𑁆𑀘 𑀅𑀢𑁆𑀣𑀘𑀭𑀺𑀬𑀸, 𑀧𑀺𑀬𑀯𑀸𑀘𑀸 𑀅𑀢𑁆𑀢𑀲𑀫𑀁;

𑀲𑀗𑁆𑀕𑀳𑀸 𑀘𑀢𑀼𑀭𑁄 𑀇𑀫𑁂, 𑀫𑀼𑀦𑀺𑀦𑁆𑀤𑁂𑀦 𑀧𑀓𑀸𑀲𑀺𑀢𑀸.

𑀤𑀸𑀦𑀫𑁆𑀧𑀺 𑀅𑀢𑁆𑀣𑀘𑀭𑀺𑀬𑀢𑀜𑁆𑀘, 𑀧𑀺𑀬𑀯𑀸𑀤𑀺𑀢𑀜𑁆𑀘 𑀲𑀫𑀸𑀦𑀢𑁆𑀢𑀢𑀜𑁆𑀘;

𑀓𑀭𑀺𑀬𑀘𑀭𑀺𑀬𑀲𑀼𑀲𑀗𑁆𑀕𑀳𑀁 𑀩𑀳𑀽𑀦𑀁, 𑀅𑀦𑀯𑀫𑀢𑁂𑀦 𑀕𑀼𑀡𑁂𑀦 𑀬𑀸𑀢𑀺 𑀲𑀕𑁆𑀕𑀁;

𑀤𑀸𑀦𑀜𑁆𑀘 𑀧𑁂𑀬𑁆𑀬𑀯𑀚𑁆𑀚𑀜𑁆𑀘, 𑀅𑀢𑁆𑀣𑀘𑀭𑀺𑀬𑀸 𑀘 𑀬𑀸 𑀇𑀥;

𑀲𑀫𑀸𑀦𑀢𑁆𑀢𑀢𑀸 𑀘 𑀥𑀫𑁆𑀫𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.

𑁨𑁫𑁩. 𑀤𑀸𑀦𑀁 𑀲𑀻𑀮𑀁 𑀧𑀭𑀺𑀘𑁆𑀘𑀸𑀕𑀁, 𑀅𑀚𑁆𑀚𑀯𑀁 𑀫𑀤𑁆𑀤𑀯𑀁 𑀢𑀧𑀁;

𑀅𑀓𑁆𑀓𑁄𑀥𑀁 𑀅𑀯𑀺𑀳𑀺𑀁𑀲𑀜𑁆𑀘, 𑀔𑀦𑁆𑀢𑀻 𑀘 𑀅𑀯𑀺𑀭𑁄𑀥𑀦𑀁;

𑀤𑀲𑁂𑀢𑁂 𑀥𑀫𑁆𑀫𑁂 𑀭𑀸𑀚𑀸𑀦𑁄, 𑀅𑀧𑁆𑀧𑀫𑀢𑁆𑀢𑁂𑀦 𑀥𑀸𑀭𑀬𑁆𑀬𑀼𑀁.

𑁨𑁫𑁪. 𑀏𑀓𑀬𑀸𑀫𑀁 𑀲𑀬𑁂 𑀭𑀸𑀚𑀸, 𑀤𑁆𑀯𑀺𑀬𑀸 𑀫𑀜𑁆𑀜𑁂𑀯 𑀧𑀡𑁆𑀟𑀺𑀢𑁄;

𑀖𑀭𑀸𑀯𑀸𑀲𑁄 𑀢𑀺𑀬𑀸𑀫𑁄𑀯, 𑀘𑀢𑀼𑀬𑀸𑀫𑁄 𑀢𑀼 𑀬𑀸𑀘𑀓𑁄.

𑁨𑁫𑁫. 𑀅𑀧𑀼𑀢𑁆𑀢𑀓𑀁 𑀖𑀭𑀁 𑀲𑀼𑀜𑁆𑀜𑀁, 𑀭𑀝𑁆𑀞𑀁 𑀲𑀼𑀜𑁆𑀜𑀁 𑀅𑀭𑀸𑀚𑀓𑀁;

𑀅𑀲𑀺𑀧𑁆𑀧𑀲𑁆𑀲 𑀫𑀼𑀔𑀁 𑀲𑀼𑀜𑁆𑀜𑀁, 𑀲𑀩𑁆𑀩𑀲𑀼𑀜𑁆𑀜𑀁 𑀤𑀮𑀺𑀤𑁆𑀤𑀢𑁆𑀢𑀁.

𑁨𑁫𑁬. 𑀥𑀦𑀫𑀺𑀘𑁆𑀙𑁂 𑀯𑀸𑀡𑀺𑀚𑁂𑀬𑁆𑀬, 𑀯𑀺𑀚𑁆𑀚𑀫𑀺𑀘𑁆𑀙𑁂 𑀪𑀚𑁂 𑀲𑀼𑀢𑀁;

𑀧𑀼𑀢𑁆𑀢𑀫𑀺𑀘𑁆𑀙𑁂 𑀢𑀭𑀼𑀡𑀺𑀢𑁆𑀣𑀺𑀁, 𑀭𑀸𑀚𑀸𑀫𑀘𑁆𑀘𑀁 𑀇𑀘𑁆𑀙𑀸𑀕𑀢𑁂.

𑁨𑁫𑁭. 𑀧𑀓𑁆𑀔𑀻𑀦𑀁 𑀩𑀮𑀫𑀸𑀓𑀸𑀲𑁄, 𑀫𑀘𑁆𑀙𑀸𑀦𑀫𑀼𑀤𑀓𑀁 𑀩𑀮𑀁;

𑀤𑀼𑀩𑁆𑀩𑀮𑀲𑁆𑀲 𑀩𑀮𑀁 𑀭𑀸𑀚𑀸, 𑀓𑀼𑀫𑀸𑀭𑀸𑀦𑀁 𑀭𑀼𑀤𑀁 𑀩𑀮𑀁.

𑁨𑁫𑁮. 𑀔𑀫𑀸 𑀚𑀸𑀕𑀭𑀺𑀬𑀼𑀝𑁆𑀞𑀸𑀦𑀁, 𑀲𑀁𑀯𑀺𑀪𑀸𑀕𑁄 𑀤𑀬𑀺𑀓𑁆𑀔𑀡𑀸;

𑀦𑀸𑀬𑀓𑀲𑁆𑀲 𑀕𑀼𑀡𑀸 𑀏𑀢𑁂, 𑀇𑀘𑁆𑀙𑀺𑀢𑀩𑁆𑀩𑀸 𑀲𑀢𑀁 𑀲𑀤𑀸.

𑁨𑁫𑁯. 𑀲𑀓𑀺𑀁 𑀯𑀤𑀦𑁆𑀢𑀺 𑀭𑀸𑀚𑀸𑀦𑁄, 𑀲𑀓𑀺𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀲𑀓𑀺𑀁 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

𑁨𑁬𑁦. 𑀅𑀮𑀲𑁄 𑀕𑀻𑀳𑀺 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼,

𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻,

𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁨𑁬𑁧. 𑀆𑀬𑀁 𑀔𑀬𑀁 𑀲𑀬𑀁 𑀚𑀜𑁆𑀜𑀸, 𑀓𑀢𑀸𑀓𑀢𑀁 𑀲𑀬𑀁 𑀚𑀜𑁆𑀜𑀸;

𑀦𑀺𑀕𑁆𑀕𑀳𑁂 𑀦𑀺𑀕𑁆𑀕𑀳𑀸𑀭𑀳𑀁, 𑀧𑀕𑁆𑀕𑀳𑁂 𑀧𑀕𑁆𑀕𑀳𑀸𑀭𑀳𑀁.

𑁨𑁬𑁨. 𑀫𑀸𑀢𑀸 𑀧𑀼𑀢𑁆𑀢𑀓𑀢𑀁 𑀧𑀸𑀧𑀁, 𑀲𑀺𑀲𑁆𑀲𑀓𑀢𑀁 𑀕𑀼𑀭𑀼 𑀢𑀣𑀸;

𑀭𑀸𑀚𑀸 𑀭𑀝𑁆𑀞𑀓𑀢𑀁 𑀧𑀸𑀧𑀁, 𑀭𑀸𑀚𑀓𑀢𑀁 𑀧𑀼𑀭𑁄𑀳𑀺𑀢𑁄.

𑁨𑁬𑁩. 𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦𑀁.

𑁨𑁬𑁪. 𑀅𑀤𑀦𑁆𑀢𑀤𑀫𑀦𑀁 𑀤𑀸𑀦𑀁, 𑀤𑀸𑀦𑀁 𑀲𑀩𑁆𑀩𑀢𑁆𑀣𑀲𑀸𑀥𑀓𑀁;

𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘.

𑀅𑀤𑀦𑁆𑀢𑀤𑀫𑀦𑀁 𑀤𑀸𑀦𑀁, 𑀅𑀤𑀸𑀦𑀁 𑀤𑀦𑁆𑀢𑀤𑀽𑀲𑀓𑀁;

𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘.

𑁨𑁬𑁫. 𑀤𑀸𑀦𑀁 𑀲𑀺𑀦𑁂𑀳𑀪𑁂𑀲𑀚𑁆𑀚𑀁, 𑀫𑀘𑁆𑀙𑁂𑀭𑀁 𑀤𑁄𑀲𑀦𑁄𑀲𑀥𑀁;

𑀤𑀸𑀦𑀁 𑀬𑀲𑀲𑁆𑀲𑀻𑀪𑁂𑀲𑀚𑁆𑀚𑀁, 𑀫𑀘𑁆𑀙𑁂𑀭𑀁 𑀓𑀧𑀡𑁄𑀲𑀥𑀁.

𑁨𑁬𑁬. 𑀦 𑀭𑀜𑁆𑀜𑀸 𑀲𑀫𑀓𑀁 𑀪𑀼𑀜𑁆𑀚𑁂, 𑀓𑀸𑀫𑀪𑁄𑀕𑀁 𑀓𑀼𑀤𑀸𑀘𑀦𑀁;

𑀆𑀓𑀧𑁆𑀧𑀁 𑀭𑀲𑀪𑀼𑀢𑁆𑀢𑀁 𑀯𑀸, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁;

𑀯𑀢𑁆𑀣𑀲𑀩𑁆𑀩𑀫𑀮𑀗𑁆𑀓𑀸𑀭𑀁, 𑀦 𑀭𑀜𑁆𑀜𑀸 𑀲𑀤𑀺𑀲𑀁 𑀓𑀭𑁂.

𑁨𑁬𑁭. 𑀦 𑀫𑁂 𑀭𑀸𑀚𑀸 𑀲𑀔𑀸 𑀳𑁄𑀢𑀺, 𑀦 𑀭𑀸𑀚𑀸 𑀳𑁄𑀢𑀺 𑀲𑀫𑀓𑁄;

𑀏𑀲𑁄 𑀲𑀸𑀫𑀺𑀓𑁄 𑀫𑀬𑁆𑀳𑀦𑁆𑀢𑀺, 𑀘𑀺𑀢𑁆𑀢𑁂 𑀦𑀺𑀝𑁆𑀞𑀁 𑀲𑀡𑁆𑀞𑀸𑀧𑀬𑁂.

𑁨𑁬𑁮. 𑀦𑀸𑀢𑀺𑀤𑀽𑀭𑁂 𑀪𑀚𑁂 𑀭𑀜𑁆𑀜𑁄, 𑀦𑀘𑁆𑀘𑀸𑀲𑀦𑁆𑀦𑁂 𑀧𑀯𑀸𑀢𑀓𑁂;

𑀉𑀚𑀼𑀓𑁂 𑀦𑀸𑀢𑀺𑀦𑀺𑀦𑁆𑀦𑁂 𑀘, 𑀦 𑀪𑀚𑁂 𑀉𑀘𑁆𑀘𑀫𑀸𑀲𑀦𑁂;

𑀙 𑀤𑁄𑀲𑁂 𑀯𑀚𑁆𑀚𑁂 𑀲𑁂𑀯𑀓𑁄, 𑀅𑀕𑁆𑀕𑀻𑀯 𑀲𑀁𑀬𑀢𑁄 𑀢𑀺𑀝𑁆𑀞𑁂.

𑀦 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀸𑀧𑀺 𑀆𑀲𑀦𑁆𑀦𑀤𑀽𑀭𑀢𑁄;

𑀦 𑀓𑀘𑁆𑀙𑁂 𑀦𑁄𑀧𑀺 𑀧𑀝𑀺𑀯𑀸𑀢𑁂, 𑀦 𑀘𑀸𑀧𑀺 𑀑𑀡𑀢𑀼𑀡𑁆𑀡𑀢𑁂;

𑀇𑀫𑁂 𑀤𑁄𑀲𑁂 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀼 𑁋

𑁨𑁬𑁯. 𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦,

𑀅𑀦𑀼𑀧𑁆𑀧𑀤𑀸𑀦𑁂𑀦 𑀧𑀯𑁂𑀡𑀺𑀬𑀸 𑀯𑀸;

𑀬𑀣𑀸 𑀬𑀣𑀸 𑀬𑀢𑁆𑀣 𑀮𑀪𑁂𑀣 𑀅𑀢𑁆𑀣𑀁,

𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬.

𑁨𑁭𑁦. 𑀓𑀲𑁆𑀲𑀓𑁄 𑀯𑀸𑀡𑀺𑀚𑁄 𑀫𑀘𑁆𑀘𑁄, 𑀲𑀫𑀡𑁄 𑀲𑀼𑀢𑀲𑀻𑀮 𑀯𑀸;

𑀢𑁂𑀲𑀼 𑀯𑀺𑀧𑀼𑀮𑀚𑀸𑀢𑁂𑀲𑀼, 𑀭𑀝𑁆𑀞𑀫𑁆𑀧𑀺 𑀯𑀺𑀧𑀼𑀮𑀁 𑀲𑀺𑀬𑀸.

𑁨𑁭𑁧. 𑀢𑁂𑀲𑀼 𑀤𑀼𑀩𑁆𑀩𑀮𑀚𑀸𑀢𑁂𑀲𑀼, 𑀭𑀝𑁆𑀞𑀫𑁆𑀧𑀺 𑀤𑀼𑀩𑁆𑀩𑀮𑀁 𑀲𑀺𑀬𑀸;

𑀢𑀲𑁆𑀫𑀸 𑀲𑀭𑀝𑁆𑀞𑀁 𑀯𑀺𑀧𑀼𑀮𑀁, 𑀥𑀸𑀭𑀬𑁂 𑀭𑀝𑁆𑀞𑀪𑀸𑀭𑀯𑀸.

𑁨𑁭𑁨. 𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄, 𑀆𑀫𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;

𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀩𑀻𑀚𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.

𑁨𑁭𑁩. 𑀫𑀳𑀸𑀭𑀼𑀓𑁆𑀔𑀽𑀧𑀫𑀁 𑀭𑀝𑁆𑀞𑀁, 𑀅𑀥𑀫𑁆𑀫𑁂𑀦 𑀧𑀲𑀸𑀲𑀢𑀺;

𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.

𑁨𑁭𑁪. 𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄, 𑀧𑀓𑁆𑀓𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;

𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀩𑀻𑀚𑀜𑁆𑀚𑀲𑁆𑀲 𑀦 𑀦𑀲𑁆𑀲𑀢𑀺.

𑁨𑁭𑁫. 𑀫𑀳𑀸𑀭𑀼𑀓𑁆𑀔𑀽𑀧𑀫𑀁 𑀭𑀝𑁆𑀞𑀁, 𑀥𑀫𑁆𑀫𑁂𑀦 𑀬𑁄 𑀧𑀲𑀸𑀲𑀢𑀺;

𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀘𑀲𑁆𑀲 𑀦 𑀦𑀲𑁆𑀲𑀢𑀺.