𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀓𑀯𑀺𑀤𑀧𑁆𑀧𑀡𑀦𑀻𑀢𑀺

𑀫𑀸𑀢𑀺𑀓𑀸

𑀬𑀣𑀸𑀥𑀫𑁆𑀫𑀺𑀓𑀭𑀸𑀚𑀽𑀦𑀁, 𑀅𑀫𑀘𑁆𑀘𑀸 𑀘 𑀧𑀼𑀭𑁄𑀳𑀺𑀢𑀸;

𑀦𑀻𑀢𑀺𑀲𑀢𑁆𑀣𑀁 𑀲𑀼𑀦𑀺𑀲𑁆𑀲𑀸𑀬, 𑀦𑀺𑀘𑁆𑀙𑀬𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑀁.

𑀅𑀗𑁆𑀕𑀸𑀦𑀺 𑀯𑁂𑀤𑀸 𑀘𑀢𑁆𑀢𑀸𑀭𑁄, 𑀫𑀻𑀫𑀁𑀲𑀸𑀦𑁆𑀬𑀸𑀬 𑀯𑀺𑀢𑁆𑀣𑀸𑀭𑁄;

𑀥𑀫𑁆𑀫𑀲𑀢𑁆𑀣𑀁 𑀧𑀼𑀭𑀸𑀡𑀜𑁆𑀘, 𑀯𑀺𑀚𑁆𑀚𑀸 𑀳𑁂𑀢𑀸 𑀘𑀢𑀼𑀤𑁆𑀤𑀲.

𑀆𑀬𑀼𑀩𑁆𑀩𑁂𑀤𑁄 𑀫𑀦𑀼𑀩𑁆𑀩𑁂𑀤𑁄, 𑀕𑀦𑁆𑀥𑀩𑁆𑀩𑁄 𑀘𑁂𑀢𑀺 𑀢𑁂 𑀢𑀬𑁄;

𑀅𑀢𑁆𑀣𑀲𑀢𑁆𑀣𑀁 𑀘𑀢𑀼𑀢𑁆𑀣𑀜𑁆𑀘, 𑀯𑀺𑀚𑁆𑀚𑀸𑀳𑁆𑀬𑀸𑀝𑁆𑀞𑀭𑀲 𑀫𑀢𑀸.

𑀲𑀼𑀢𑀺𑀲𑀫𑀼𑀢𑀺𑀲𑀗𑁆𑀔𑁆𑀬𑀸 𑀘, 𑀭𑁄𑀕𑀸𑀦𑀻𑀢𑀺 𑀯𑀺𑀲𑁂𑀲𑀓𑀸;

𑀕𑀦𑁆𑀥𑀩𑁆𑀩𑀸 𑀕𑀡𑀺𑀓𑀸 𑀘𑁂𑀯, 𑀥𑀦𑀼𑀩𑁆𑀩𑁂𑀤𑀸 𑀘 𑀧𑀽𑀭𑀡𑀸.

𑀢𑀺𑀓𑀺𑀘𑁆𑀙𑀸 𑀇𑀢𑀺𑀳𑀸𑀲𑁄 𑀘, 𑀚𑁄𑀢𑀺𑀫𑀸𑀬𑀸 𑀘 𑀙𑀦𑁆𑀤𑀢𑀺;

𑀓𑁂𑀢𑀼𑀫𑀦𑁆𑀢𑀸 𑀘 𑀲𑀤𑁆𑀤𑀸 𑀘, 𑀲𑀺𑀧𑁆𑀧𑀸𑀝𑁆𑀞𑀸𑀭𑀲𑀓𑀸 𑀇𑀫𑁂.

𑀤𑀫𑁄 𑀤𑀡𑁆𑀟𑁄 𑀇𑀢𑀺𑀔𑁆𑀬𑀸𑀢𑁄, 𑀢𑀝𑁆𑀞𑀸𑀤𑀡𑁆𑀟𑁄 𑀫𑀳𑀻𑀧𑀢𑀺;

𑀢𑀲𑁆𑀲 𑀦𑀻𑀢𑀺 𑀤𑀡𑁆𑀟𑀦𑀻𑀢𑀺, 𑀦𑀬𑀦𑀸𑀦𑀻𑀢𑀺 𑀯𑀼𑀘𑁆𑀘𑀢𑀺.

𑀤𑀡𑁆𑀟𑁂𑀦 𑀦𑀻𑀬𑀢𑁂 𑀘𑁂𑀤𑀁, 𑀤𑀡𑁆𑀟𑀁 𑀦𑀬𑀢𑀺 𑀯𑀸 𑀧𑀼𑀦;

𑀤𑀡𑁆𑀟𑀦𑀻𑀢𑀺 𑀇𑀢𑀺𑀔𑁆𑀬𑀸𑀢𑁄, 𑀢𑀺𑀮𑁄𑀓𑀸 𑀦𑀢𑀺 𑀯𑀢𑁆𑀢𑀢𑁂.

𑀦𑀸𑀦𑀸𑀲𑀢𑁆𑀣𑁄𑀤𑁆𑀥𑀢𑀁 𑀯𑀓𑁆𑀔𑁂, 𑀭𑀸𑀚𑀦𑀻𑀢𑀺 𑀲𑀫𑀼𑀘𑁆𑀘𑀬𑀁;

𑀲𑀩𑁆𑀩𑀩𑀻𑀚𑀫𑀺𑀤𑀼𑀁 𑀲𑀢𑁆𑀣𑀁, 𑀘𑀸𑀡𑀓𑁆𑀬 𑀲𑀸𑀭𑀲𑀗𑁆𑀕𑀳𑀁.

𑀫𑀽𑀮𑀲𑀼𑀢𑁆𑀢𑀁 𑀧𑀯𑀓𑁆𑀔𑀸𑀫𑀺, 𑀘𑀸𑀡𑀓𑁆𑀬𑁂𑀦 𑀬𑀣𑁄𑀤𑀺𑀢𑀁;

𑀬𑀲𑁆𑀲𑀁 𑀯𑀺𑀜𑁆𑀜𑀸𑀢𑀫𑀢𑁆𑀢𑁂𑀦, 𑀫𑀽𑀴𑁆𑀳𑁄 𑀪𑀯𑀢𑀺 𑀧𑀡𑁆𑀟𑀺𑀢𑁄.

𑀫𑀺𑀢𑁆𑀢𑀮𑀸𑀪𑁄 𑀲𑀼𑀳𑀤𑀪𑁂𑀤𑁄, 𑀯𑀺𑀕𑁆𑀕𑀳𑁄 𑀲𑀦𑁆𑀥𑀺𑀭𑁂𑀯 𑀘;

𑀧𑀜𑁆𑀘𑀢𑀦𑁆𑀤𑁆𑀭𑀸 𑀢𑀣𑀸𑀜𑁆𑀜𑀲𑁆𑀫𑀸, 𑀕𑀦𑁆𑀣𑀸 𑀓𑀲𑁆𑀲𑀺𑀬𑀮𑀺𑀔𑁆𑀬𑀢𑁂.

𑀮𑁄𑀓𑀦𑀻𑀢𑀺𑀫𑁆𑀳𑀸 𑁋

(𑁧) 𑀧𑀡𑁆𑀟𑀺𑀢𑀓𑀡𑁆𑀟. (𑁨) 𑀲𑀼𑀚𑀦𑀓𑀡𑁆𑀟. (𑁩) 𑀩𑀸𑀮𑀤𑀼𑀚𑁆𑀚𑀦 𑀓𑀡𑁆𑀟. (𑁪) 𑀫𑀺𑀢𑁆𑀢𑀓𑀡𑁆𑀟. (𑁫) 𑀇𑀢𑁆𑀣𑀺𑀓𑀡𑁆𑀟. (𑁬) 𑀭𑀸𑀚𑀓𑀡𑁆𑀟. (𑁭) 𑀧𑀓𑀺𑀡𑁆𑀡𑀓 𑀓𑀡𑁆𑀟-

𑀮𑁄𑀓𑀦𑀻𑀢𑀺 𑁋

𑀧𑀡𑁆𑀟𑀺𑀢𑁄 𑀲𑀼𑀚𑀦𑁄 𑀓𑀡𑁆𑀟𑁄, 𑀤𑀼𑀚𑁆𑀚𑀦𑁄 𑀫𑀺𑀢𑁆𑀢𑀇𑀢𑁆𑀣𑀻 𑀘;

𑀭𑀸𑀚𑀧𑀓𑀺𑀡𑁆𑀡𑀓𑁄 𑀘𑀸𑀢𑀺, 𑀲𑀢𑁆𑀢𑀓𑀡𑁆𑀟𑁂 𑀯𑀺𑀪𑀽𑀲𑀺𑀦𑁄.

𑀘𑀓𑁆𑀓𑀺𑀦𑁆𑀤𑀸𑀪𑀺𑀲𑀺𑀭𑀺𑀦𑀸𑀬𑀁, 𑀲𑁄𑀥𑀺𑀢𑁄 𑀓𑀸𑀲𑀺𑀓𑁂 𑀲𑀸𑀓𑁂;

𑀙𑀦𑁄𑀢𑁆𑀬𑀁 𑀤𑀼𑀢𑀺𑀬𑀸𑀲𑀴𑁆𑀳𑁂, 𑀓𑀸𑀴𑀲𑀢𑁆𑀢𑀫 𑀆𑀤𑀺𑀳𑁂.

𑀮𑁄𑀓𑀦𑀻𑀢𑀺𑀁 𑀧𑀯𑀓𑁆𑀔𑀸𑀫𑀺, 𑀦𑀸𑀦𑀸𑀲𑀢𑁆𑀣𑀲𑀫𑀼𑀤𑁆𑀥𑀝𑀁;

𑀫𑀸𑀕𑀥𑁂𑀦𑁂𑀯 𑀲𑀗𑁆𑀔𑁂𑀧𑀁, 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀁.

𑀦𑀻𑀢𑀺 𑀮𑁄𑀓𑁂 𑀧𑀼𑀭𑀺𑀲𑀲𑁆𑀲 𑀲𑀸𑀭𑁄,

𑀫𑀸𑀢𑀸 𑀧𑀺𑀢𑀸 𑀆𑀘𑀭𑀺𑀬𑁄 𑀫𑀺𑀢𑁆𑀢𑁄;

𑀢𑀲𑁆𑀫𑀸 𑀳𑀺 𑀦𑀻𑀢𑀺𑀁 𑀧𑀼𑀭𑀺𑀲𑁄 𑀯𑀺𑀚𑀜𑁆𑀜𑀸,

𑀜𑀸𑀡𑀻𑀫𑀳𑀸 𑀳𑁄𑀢𑀺 𑀩𑀳𑀼𑀲𑁆𑀲𑀼𑀢𑁄.

𑀫𑀳𑀸𑀭𑀳𑀦𑀻𑀢𑀺 𑁋

(𑁧) 𑀧𑀡𑁆𑀟𑀺𑀢𑀓𑀣𑀸. (𑁨) 𑀲𑀫𑁆𑀪𑁂𑀤𑀓𑀣𑀸. (𑁩) 𑀫𑀺𑀢𑁆𑀢𑀓𑀣𑀸. (𑁪) 𑀦𑀸𑀬𑀓 𑀓𑀣𑀸. (𑁫) 𑀇𑀢𑁆𑀣𑀺𑀓𑀣𑀸

𑀫𑀳𑀸𑀭𑀳 𑀭𑀳𑀁𑀲𑀓𑁆𑀬-𑀫𑀼𑀦𑀺𑀁 𑀦𑀻𑀯𑀭𑀡𑀸 𑀢𑀡𑁆𑀳𑀸;

𑀫𑀼𑀢𑁆𑀢𑀁 𑀫𑀼𑀢𑁆𑀢𑀁 𑀲𑀼𑀤𑀲𑁆𑀲𑀦𑀁, 𑀯𑀦𑁆𑀤𑁂 𑀩𑁄𑀥𑀺𑀯𑀭𑀁 𑀯𑀭𑀁.

𑀦𑀻𑀢𑀺𑀥 𑀚𑀦𑁆𑀢𑀽𑀦𑀁 𑀲𑀸𑀭𑁄, 𑀫𑀺𑀢𑁆𑀢𑀸𑀘𑀭𑀺𑀬𑀸 𑀘 𑀧𑀺𑀢𑀭𑁄;

𑀦𑀻𑀢𑀺𑀫𑀸 𑀲𑀼𑀩𑀼𑀤𑁆𑀥𑀺𑀩𑁆𑀬𑀢𑁆𑀢𑁄, 𑀲𑀼𑀢𑀯𑀸 𑀅𑀢𑁆𑀣𑀤𑀲𑁆𑀲𑀺𑀫𑀸.

𑀥𑀫𑁆𑀫𑀦𑀻𑀢𑀺 𑁋

(𑁧) 𑀆𑀘𑀭𑀺𑀬𑀓𑀣𑀸 (𑁨) 𑀲𑀺𑀧𑁆𑀧𑀓𑀣𑀸 (𑁩) 𑀧𑀜𑁆𑀜𑀸𑀓𑀣𑀸 (𑁪) 𑀲𑀼𑀢𑀓𑀣𑀸 (𑁫) 𑀓𑀣𑀸𑀦𑀓𑀣𑀸 (𑁬) 𑀥𑀦𑀓𑀣𑀸 (𑁭) 𑀤𑁂𑀲𑀓𑀣𑀸 (𑁮) 𑀦𑀺𑀲𑁆𑀲𑀬𑀓𑀣𑀸 (𑁯) 𑀫𑀺𑀢𑁆𑀢𑀓𑀣𑀸 (𑁧𑁦) 𑀤𑀼𑀚𑁆𑀚𑀦𑀓𑀣𑀸 (𑁧𑁧) 𑀲𑀼𑀚𑀦𑀓𑀣𑀸 (𑁧𑁨) 𑀩𑀮𑀓𑀣𑀸 (𑁧𑁩) 𑀇𑀢𑁆𑀣𑀺𑀓𑀣𑀸 (𑁧𑁪) 𑀬𑀼𑀢𑁆𑀢𑀓𑀣𑀸 (𑁧𑁫) 𑀤𑀸𑀲𑀓𑀣𑀸 (𑁧𑁬) 𑀖𑀭𑀸𑀯𑀸𑀲𑀓𑀣𑀸 (𑁧𑁭) 𑀓𑀸𑀢𑀩𑁆𑀩𑀓𑀣𑀸 (𑁧𑁮) 𑀅𑀓𑀸𑀢𑀩𑁆𑀩𑀓𑀣𑀸 (𑁧𑁯) 𑀜𑀸𑀢𑀩𑁆𑀩𑀓𑀣𑀸 (𑁨𑁦) 𑀅𑀮𑀗𑁆𑀓𑀸𑀭𑀓𑀣𑀸 (𑁨𑁧) 𑀭𑀸𑀚𑀥𑀫𑁆𑀫𑀓𑀣𑀸 (𑁨𑁨) 𑀉𑀧𑀲𑁂𑀯𑀓𑀓𑀣𑀸 (𑁨𑁩) 𑀤𑀼𑀓𑁆𑀔𑀸𑀤𑀺𑀫𑀺𑀲𑁆𑀲𑀓𑀓𑀣𑀸 (𑁨𑁪) 𑀧𑀓𑀺𑀡𑁆𑀡𑀓𑀓𑀣𑀸

𑀘𑀓𑁆𑀓𑀸𑀢𑀺𑀘𑀓𑁆𑀓𑀘𑀓𑁆𑀓𑀺𑀦𑁆𑀤𑁄, 𑀤𑁂𑀯𑀸𑀢𑀺𑀤𑁂𑀯𑀸𑀤𑁂𑀯𑀺𑀦𑁆𑀤𑁄,

𑀩𑁆𑀭𑀳𑁆𑀫𑀸𑀢𑀺 𑀩𑁆𑀭𑀳𑁆𑀫𑀩𑁆𑀭𑀳𑁆𑀫𑀺𑀦𑁆𑀤𑁄, 𑀚𑀺𑀦𑁄 𑀧𑀽𑀭𑁂𑀢𑀼 𑀫𑁂 𑀪𑀸𑀯𑀁.

𑀘𑀺𑀭𑀁 𑀢𑀺𑀝𑁆𑀞𑀢𑀼 𑀮𑁄𑀓𑀫𑁆𑀳𑀺, 𑀥𑀁𑀲𑀓𑀁 𑀲𑀩𑁆𑀩𑀧𑀸𑀡𑀺𑀦𑀁;

𑀫𑀳𑀸𑀫𑁄𑀳𑀢𑀫𑀁 𑀚𑀬𑀁, 𑀚𑁄𑀢𑀦𑁆𑀢𑀁 𑀚𑀺𑀦𑀲𑀸𑀲𑀦𑀁.

𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀁 𑀲𑁂𑀝𑁆𑀞𑀁, 𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀓𑁂 𑀕𑀭𑀼;

𑀦𑀻𑀢𑀺𑀥𑀫𑁆𑀫𑀁 𑀧𑀯𑀓𑁆𑀔𑀸𑀫𑀺, 𑀲𑀩𑁆𑀩𑀮𑁄𑀓 𑀲𑀼𑀔𑀸𑀯𑀳𑀁.

𑀆𑀘𑀭𑀺𑀬𑁄 𑀘 𑀲𑀺𑀧𑁆𑀧𑀜𑁆𑀘, 𑀧𑀜𑁆𑀜𑀸𑀲𑀼𑀢𑀓𑀣𑀸𑀥𑀦𑀁;

𑀤𑁂𑀲𑀜𑁆𑀘 𑀦𑀺𑀲𑁆𑀲𑀬𑁄 𑀫𑀺𑀢𑁆𑀢𑀁, 𑀤𑀼𑀚𑁆𑀚𑀦𑁄 𑀲𑀼𑀚𑀦𑁄 𑀩𑀮𑀁.

𑀇𑀢𑁆𑀣𑀻 𑀧𑀼𑀢𑁆𑀢𑁄 𑀘 𑀤𑀸𑀲𑁄 𑀘, 𑀖𑀭𑀸𑀯𑀸𑀲𑁄 𑀓𑀢𑀸𑀓𑀢𑁄;

𑀜𑀸𑀢𑀩𑁆𑀩𑁄 𑀘 𑀅𑀮𑀗𑁆𑀓𑀸𑀭𑁄, 𑀭𑀸𑀚𑀥𑀫𑁆𑀫𑀸 𑀧𑀲𑁂𑀯𑀓𑁄;

𑀤𑀼𑀓𑁆𑀔𑀸𑀤𑀺𑀫𑀺𑀲𑁆𑀲𑀓𑁄 𑀘𑁂𑀯, 𑀧𑀓𑀺𑀡𑁆𑀡𑀓𑀸𑀢𑀺 𑀫𑀸𑀢𑀺𑀓𑀸.

𑀭𑀸𑀚𑀦𑀻𑀢𑀺 𑁋

𑀲𑀻𑀳𑀸 𑀏𑀓𑀁 𑀩𑀓𑀸 𑀏𑀓𑀁, 𑀲𑀺𑀓𑁆𑀔𑁂 𑀘𑀢𑁆𑀢𑀸𑀭𑀺 𑀓𑀼𑀓𑁆𑀓𑀼𑀝𑀸;

𑀧𑀜𑁆𑀘 𑀓𑀸𑀓𑀸 𑀭𑀸𑀚𑀸 𑀦𑀸𑀫, 𑀙 𑀲𑀼𑀦𑀓𑁆𑀔𑀸 𑀢𑀻𑀡𑀺 𑀕𑀤𑁆𑀭𑀪𑀸.

𑁧. 𑀫𑀳𑀸𑀓𑀫𑁆𑀫𑀁 𑀔𑀼𑀤𑁆𑀤𑀓𑀁 𑀯𑀸, 𑀬𑀁 𑀓𑀫𑁆𑀫𑀁 𑀓𑀸𑀢𑀼𑀫𑀺𑀘𑁆𑀙𑀢𑀺;

𑀲𑀩𑁆𑀩𑀸𑀭𑀫𑁆𑀪𑁂𑀦 𑀓𑀸𑀢𑀩𑁆𑀩𑀁, 𑀲𑀻𑀳𑀸 𑀏𑀓𑀁 𑀢𑀤𑀸 𑀪𑀯𑁂.

𑁨. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀲𑀁𑀬𑀫, 𑀩𑀓𑁄𑀯 𑀧𑀡𑁆𑀟𑀺𑀢𑁄 𑀪𑀯𑁂;

𑀤𑁂𑀲𑀓 𑀮𑁄𑀫𑀧𑀦𑁆𑀦𑀸𑀦𑀺, 𑀲𑀩𑁆𑀩𑀓𑀫𑁆𑀫𑀸𑀦𑀺 𑀲𑀸𑀥𑀬𑁂.

𑁩. 𑀧𑀼𑀩𑁆𑀩𑀝𑁆𑀞𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘, 𑀲𑀁𑀯𑀺𑀪𑀸𑀕𑀜𑁆𑀘 𑀩𑀦𑁆𑀥𑀼 𑀳𑀺;

𑀣𑀺𑀬𑀸 𑀅𑀓𑁆𑀓𑀫𑁆𑀫 𑀪𑀼𑀢𑁆𑀢𑀜𑁆𑀘, 𑀲𑀺𑀓𑁆𑀔𑁂 𑀘𑀢𑁆𑀢𑀸𑀭𑀺 𑀓𑀼𑀓𑁆𑀓𑀼𑀝𑁄.

𑁪. 𑀕𑀼𑀬𑁆𑀳𑁂 𑀫𑁂𑀣𑀼𑀦𑀁 𑀧𑁂𑀓𑁆𑀔𑀺𑀢𑁆𑀯𑀸, 𑀪𑁄𑀚𑀦𑀁 𑀜𑀸𑀢𑀺𑀲𑀗𑁆𑀕𑀳𑁄;

𑀯𑀺𑀮𑁄𑀓𑀸 𑀧𑁂𑀓𑁆𑀔𑀦𑀸𑀮𑀲𑁆𑀬𑀁, 𑀧𑀜𑁆𑀘 𑀲𑀺𑀓𑁆𑀔𑁂𑀬𑁆𑀬 𑀯𑀸𑀬𑀲𑀸.

𑁫. 𑀅𑀦𑀸𑀮𑀲𑁆𑀲𑀁𑀢𑀺𑀲𑀯𑀦𑁆𑀢𑀸𑀲𑁄, 𑀲𑀼𑀦𑀺𑀤𑁆𑀥𑀸 𑀲𑀼𑀧𑁆𑀧𑀩𑁄𑀥𑀦𑀸;

𑀤𑀴𑁆𑀳𑀪𑀢𑁆𑀢𑀺 𑀘 𑀲𑀽𑀭𑀜𑁆𑀘, 𑀙 𑀏𑀢𑁂𑀲𑁆𑀯𑀸𑀦𑀢𑁄 𑀕𑀼𑀡𑁄.

𑁬. 𑀔𑀺𑀦𑁆𑀦𑁄𑀯 𑀯𑀳𑀢𑁂 𑀪𑀸𑀭𑀁, 𑀲𑀻𑀢𑀼𑀡𑁆𑀳𑀜𑁆𑀘 𑀦 𑀘𑀺𑀦𑁆𑀢𑀬𑀻;

𑀲𑀦𑁆𑀢𑀼𑀝𑁆𑀞𑁄 𑀘 𑀪𑀯𑁂 𑀦𑀺𑀘𑁆𑀘𑀁, 𑀢𑀻𑀡𑀺 𑀲𑀺𑀓𑁆𑀔𑁂𑀬𑁆𑀬 𑀕𑀤𑁆𑀭𑀪𑀸.

𑁭. 𑀯𑀻𑀲𑀢𑀺 𑀢𑀸𑀦𑀺 𑀕𑀼𑀡𑀸𑀦𑀺, 𑀘𑀭𑁂𑀬𑁆𑀬 𑀇𑀳 𑀧𑀡𑁆𑀟𑀺𑀢𑁄;

𑀯𑀺𑀚𑁂𑀬𑁆𑀬 𑀭𑀺𑀧𑀽 𑀲𑀩𑁆𑀩𑁂𑀧𑀺, 𑀢𑁂𑀚𑀲𑁆𑀲𑀻 𑀲𑁄 𑀪𑀯𑀺𑀲𑁆𑀲𑀢𑀺.

(𑁧) 𑀧𑀡𑁆𑀟𑀺𑀢𑀓𑀡𑁆𑀟 (𑁨) 𑀲𑀼𑀚𑀦𑀓𑀡𑁆𑀟 (𑁩) 𑀩𑀸𑀮𑀤𑀼𑀚𑁆𑀚𑀦𑀓𑀡𑁆𑀟 (𑁪) 𑀫𑀺𑀢𑁆𑀢𑀓𑀡𑁆𑀟 (𑁫) 𑀭𑀸𑀚𑀓𑀡𑁆𑀟 (𑁬) 𑀦𑀸𑀬𑀓𑀓𑀡𑁆𑀟 (𑁭) 𑀧𑀼𑀢𑁆𑀢𑀓𑀡𑁆𑀟 (𑁮) 𑀯𑁂𑀚𑁆𑀚𑀸𑀘𑀭𑀺𑀬𑀓𑀡𑁆𑀟 (𑁯) 𑀤𑀸𑀲𑀓𑀓𑀡𑁆𑀟 (𑁧𑁦) 𑀇𑀢𑁆𑀣𑀺𑀓𑀡𑁆𑀟 (𑁧𑁧) 𑀧𑀓𑀺𑀡𑁆𑀡𑀓𑀓𑀡𑁆𑀟

𑀓𑀯𑀺𑀤𑀧𑁆𑀧𑀡𑀦𑀻𑀢𑀺𑀁𑀬𑁄, 𑀯𑀸𑀘𑀼𑀕𑁆𑀕𑀢𑀁 𑀓𑀭𑁄𑀢𑀺 𑀘𑁂;

𑀪𑀼𑀯𑀦𑀫𑀚𑁆𑀛𑁂 𑀏𑀲𑁄 𑀳𑀺, 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑀚𑀸𑀢𑀺𑀓𑁄.

𑀓𑀯𑀺𑀤𑀧𑁆𑀧𑀡𑀦𑀻𑀢𑀺

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀭𑀢𑀦𑀢𑁆𑀢𑀬𑀧𑀡𑀸𑀫

𑁧. 𑀫𑀳𑀸𑀓𑀯𑀺𑀯𑀭𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘 𑀢𑁂𑀦 𑀲𑁂𑀯𑀺𑀢𑀁;

𑀲𑀗𑁆𑀖𑀁 𑀦𑀺𑀭𑀗𑁆𑀕𑀡𑀜𑁆𑀘𑀸𑀧𑀺, 𑀯𑀦𑁆𑀤𑀸𑀫𑀺 𑀲𑀺𑀭𑀲𑀸 𑀤𑀭𑀁.

𑁨. 𑀓𑀭𑀺𑀲𑁆𑀲𑀸𑀫𑀺 𑀲𑀫𑀸𑀲𑁂𑀦, 𑀦𑀸𑀦𑀸𑀲𑀢𑁆𑀣 𑀲𑀫𑀼𑀤𑁆𑀥𑀝𑀁;

𑀳𑀺𑀢𑀸𑀬 𑀓𑀯𑀺𑀦𑀁 𑀦𑀻𑀢𑀺𑀁, 𑀓𑀯𑀺𑀤𑀧𑁆𑀧𑀡𑀦𑀸𑀫𑀓𑀁.

𑀧𑀡𑁆𑀟𑀺𑀢𑀓𑀡𑁆𑀟

𑁩. 𑀦𑀻𑀢𑀺 𑀲𑀸𑀭𑁄 𑀫𑀦𑀼𑀲𑁆𑀲𑀸𑀦𑀁, 𑀫𑀺𑀢𑁆𑀢𑁄 𑀆𑀘𑀭𑀺𑀬𑁄𑀧𑀺 𑀘;

𑀫𑀸𑀢𑀸 𑀧𑀺𑀢𑀸 𑀘 𑀦𑀻𑀢𑀺𑀫𑀸, 𑀲𑀼𑀢𑀯𑀸 𑀕𑀦𑁆𑀣𑀓𑀸𑀭𑀓𑁄.

𑁪. 𑀅𑀮𑀲𑀲𑁆𑀲 𑀓𑀼𑀢𑁄 𑀲𑀺𑀧𑁆𑀧𑀁, 𑀅𑀲𑀺𑀧𑁆𑀧𑀲𑁆𑀲 𑀓𑀼𑀢𑁄 𑀥𑀦𑀁;

𑀅𑀥𑀦𑀲𑁆𑀲 𑀓𑀼𑀢𑁄 𑀫𑀺𑀢𑁆𑀢𑀁, 𑀅𑀫𑀺𑀢𑁆𑀢𑀲𑁆𑀲 𑀓𑀼𑀢𑁄 𑀲𑀼𑀔𑀁;

𑀅𑀲𑀼𑀔𑀲𑁆𑀲 𑀓𑀼𑀢𑁄 𑀧𑀼𑀜𑁆𑀜𑀁, 𑀅𑀧𑀼𑀜𑁆𑀜𑀲𑁆𑀲 𑀓𑀼𑀢𑁄 𑀯𑀭𑀁.

𑁫. 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘𑁂𑀯, 𑀲𑀼𑀪𑀸𑀲𑀺𑀢𑀪𑀸𑀲𑀻𑀧𑀺 𑀘;

𑀲𑀼𑀓𑀢𑀓𑀫𑁆𑀫𑀓𑀸𑀭𑀻 𑀘, 𑀧𑀡𑁆𑀟𑀺𑀢𑁄 𑀲𑀸𑀥𑀼𑀫𑀸𑀦𑀼𑀲𑁄.

𑁬. 𑀓𑀯𑀺𑀳𑁂𑀭𑀜𑁆𑀜𑀓𑀸 𑀓𑀢𑁆𑀯𑀸, 𑀉𑀢𑁆𑀢𑀢𑁆𑀢𑀁 𑀲𑀢𑁆𑀣𑀓𑀜𑁆𑀘𑀦𑀁;

𑀪𑀽𑀲𑀦𑀁 𑀕𑀚𑁆𑀚𑀧𑀚𑁆𑀚𑀸𑀤𑀺𑀁, 𑀓𑀭𑁄𑀦𑁆𑀢𑀺 𑀘 𑀫𑀦𑁄𑀳𑀭𑀁.

𑁭. 𑀩𑀳𑀼𑀁 𑀮𑀳𑀼𑀜𑁆𑀘 𑀕𑀳𑀡𑀁, 𑀲𑀫𑁆𑀫𑀽𑀧𑀥𑀸𑀭𑀡𑀫𑁆𑀧𑀺 𑀘;

𑀕𑀳𑀺𑀢 𑀅𑀲𑀫𑁆𑀫𑀼𑀲𑁆𑀲𑀦𑀁, 𑀏𑀢𑀁 𑀲𑀼𑀯𑀺𑀜𑁆𑀜𑀼𑀮𑀓𑁆𑀔𑀡𑀁.

𑁮. 𑀅𑀚𑀭𑀸𑀫𑀭𑀁𑀯 𑀧𑀜𑁆𑀜𑁄, 𑀯𑀺𑀚𑁆𑀚𑀫𑀢𑁆𑀣𑀜𑁆𑀘 𑀘𑀺𑀦𑁆𑀢𑀬𑁂;

𑀕𑀳𑀺𑀢𑁄 𑀇𑀯 𑀓𑁂𑀲𑁂𑀲𑀼, 𑀫𑀘𑁆𑀘𑀼𑀦𑀸 𑀥𑀫𑁆𑀫𑀫𑀸𑀘𑀭𑁂.

𑁯. 𑀲𑀺𑀧𑁆𑀧𑀲𑀫𑀁 𑀥𑀦𑀁 𑀦𑀢𑁆𑀣𑀺, 𑀲𑀺𑀧𑁆𑀧𑀁 𑀘𑁄𑀭𑀸 𑀦 𑀕𑀡𑁆𑀳𑀭𑁂;

𑀇𑀥 𑀮𑁄𑀓𑁂 𑀲𑀺𑀧𑁆𑀧𑀁 𑀫𑀺𑀢𑁆𑀢𑀁, 𑀧𑀭𑀮𑁄𑀓𑁂 𑀲𑀼𑀔𑀸𑀯𑀳𑀁.

𑁧𑁦. 𑀪𑀼𑀜𑁆𑀚𑀦𑀢𑁆𑀣𑀁 𑀓𑀣𑀦𑀢𑁆𑀣𑀁, 𑀫𑀼𑀔𑀁 𑀳𑁄𑀢𑀻𑀢𑀺 𑀦𑁄 𑀯𑀤𑁂;

𑀬𑀁 𑀯𑀸𑀢𑀁 𑀯𑀸 𑀫𑀼𑀔𑀸𑀭𑀼𑀴𑁆𑀳𑀁, 𑀯𑀘𑀦𑀁 𑀧𑀡𑁆𑀟𑀺𑀢𑁄 𑀦𑀭𑁄.

𑁧𑁧. 𑀤𑀼𑀫𑁆𑀫𑁂𑀥𑁂𑀳𑀺 𑀧𑀲𑀁𑀲𑀸 𑀘, 𑀯𑀺𑀜𑁆𑀜𑀽𑀳𑀺 𑀕𑀭𑀳𑀸 𑀘 𑀬𑀸;

𑀕𑀭𑀳𑀸𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀳𑀺, 𑀬𑀜𑁆𑀘𑁂 𑀩𑀸𑀮𑀧𑁆𑀧𑀲𑀁𑀲𑀦𑀸.

𑁧𑁨. 𑀅𑀘𑀺𑀦𑁆𑀢𑀺𑀬𑁂 𑀲𑀸𑀝𑁆𑀞𑀓𑀣𑁂, 𑀧𑀡𑁆𑀟𑀺𑀢𑁄 𑀚𑀺𑀦𑀪𑀸𑀲𑀺𑀢𑁂;

𑀉𑀧𑀤𑁂𑀲𑀁 𑀲𑀤𑀸 𑀕𑀡𑁆𑀳𑁂, 𑀕𑀭𑀼𑀁 𑀲𑀫𑁆𑀫𑀸 𑀉𑀧𑀝𑁆𑀞𑀳𑀁.

𑀢𑀲𑁆𑀫𑀸 𑀲𑀸𑀝𑁆𑀞𑀓𑀣𑁂 𑀥𑀻𑀭𑁄, 𑀕𑀫𑁆𑀪𑀻𑀭𑁂 𑀚𑀺𑀦𑀪𑀸𑀲𑀺𑀢𑁂;

𑀉𑀧𑀤𑁂𑀲𑀁 𑀲𑀤𑀸 𑀕𑀡𑁆𑀳𑁂, 𑀕𑀭𑀼𑀁 𑀲𑀫𑁆𑀫𑀸 𑀉𑀧𑀝𑁆𑀞𑀳𑀁.

𑁧𑁩. 𑀕𑀭𑀽𑀧𑀤𑁂𑀲𑀳𑀻𑀦𑁄 𑀳𑀺, 𑀅𑀢𑁆𑀣𑀲𑀸𑀭𑀁 𑀦 𑀯𑀺𑀦𑁆𑀤𑀢𑀺;

𑀅𑀢𑁆𑀣𑀲𑀸𑀭𑀯𑀺𑀳𑀻𑀦𑁄 𑀲𑁄, 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺.

𑁧𑁪. 𑀕𑀭𑀽𑀧𑀤𑁂𑀲𑀮𑀸𑀪𑀻 𑀘, 𑀅𑀢𑁆𑀣𑀲𑀸𑀭𑀲𑀫𑀸𑀬𑀼𑀢𑁄;

𑀲𑀤𑁆𑀥𑀫𑁆𑀫𑀁 𑀧𑀭𑀺𑀧𑀸𑀮𑁂𑀦𑁆𑀢𑁄, 𑀲𑀤𑁆𑀥𑀫𑁆𑀫𑀲𑁆𑀫𑀸 𑀦 𑀳𑀸𑀬𑀢𑀺.

𑁧𑁫. 𑀲𑀩𑁆𑀩𑀤𑀩𑁆𑀩𑁂𑀲𑀼 𑀯𑀺𑀚𑁆𑀚𑁂𑀯, 𑀤𑀩𑁆𑀩𑀫𑀸𑀳𑀼 𑀅𑀦𑀼𑀢𑁆𑀢𑀭𑀁;

𑀅𑀳𑀸𑀭𑀢𑁆𑀢𑀸 𑀅𑀦𑀕𑁆𑀖𑀢𑁆𑀢𑀸, 𑀅𑀓𑁆𑀔𑀬𑀢𑁆𑀢𑀸 𑀘 𑀲𑀩𑁆𑀩𑀤𑀸.

𑁧𑁬. 𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀁.

𑁧𑁭. 𑀧𑀡𑁆𑀟𑀺𑀢𑁂 𑀘 𑀕𑀼𑀡𑀸 𑀲𑀩𑁆𑀩𑁂, 𑀫𑀽𑀴𑁆𑀳𑁂 𑀤𑁄𑀲𑀸 𑀳𑀺 𑀓𑁂𑀯𑀮𑀁;

𑀢𑀲𑁆𑀫𑀸 𑀫𑀽𑀴𑁆𑀳𑀲𑀳𑀲𑁆𑀲𑁂𑀲𑀼, 𑀧𑀜𑁆𑀜𑁄 𑀏𑀓𑁄 𑀯𑀺𑀲𑁂𑀲𑀺𑀬𑀢𑁂.

𑁧𑁮. 𑀩𑀸𑀮𑀸 𑀇𑀲𑁆𑀲𑀦𑁆𑀢𑀺 𑀤𑀼𑀫𑁆𑀫𑁂𑀥𑀸, 𑀕𑀼𑀡𑀻 𑀦𑀺𑀤𑁆𑀤𑁄𑀲𑀓𑀸𑀭𑀺𑀦𑁄;

𑀕𑀭𑀼𑀓𑁄 𑀧𑀡𑁆𑀟𑀺𑀢𑁄 𑀏𑀢𑀲-𑀫𑀺𑀲𑁆𑀲𑀁 𑀢𑁂𑀳𑁆𑀬𑀯𑀺𑀤𑁆𑀯𑀸 𑀲𑀫𑁄.

𑁧𑁯. 𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬, 𑀦𑀸𑀫𑀦𑀼𑀜𑁆𑀜𑀁 𑀓𑀼𑀤𑀸𑀘𑀦𑀁;

𑀫𑀦𑀼𑀜𑁆𑀜𑀁 𑀪𑀸𑀲𑀫𑀸𑀦𑀲𑁆𑀲, 𑀕𑀭𑀼𑀁 𑀪𑀸𑀭𑀁 𑀉𑀤𑀤𑁆𑀥𑀭𑀺;

𑀥𑀦𑀜𑁆𑀘 𑀦𑀁 𑀅𑀮𑀸𑀪𑁂𑀲𑀺, 𑀢𑁂𑀦 𑀘𑀢𑁆𑀢𑀫𑀦𑁄 𑀅𑀳𑀼.

𑁨𑁦. 𑀯𑀺𑀚𑁆𑀚𑀸 𑀤𑀤𑀸𑀢𑀺 𑀯𑀺𑀦𑀬𑀁, 𑀯𑀺𑀦𑀬𑀸 𑀬𑀸𑀢𑀺 𑀧𑀢𑁆𑀢𑀢𑀁;

𑀧𑀢𑁆𑀢𑀢𑁆𑀢𑀸 𑀥𑀦𑀁 𑀧𑀧𑁆𑀧𑁄𑀢𑀺, 𑀥𑀦𑀸 𑀥𑀫𑁆𑀫𑀁 𑀢𑀢𑁄 𑀲𑀼𑀔𑀁.

𑁨𑁧. 𑀬𑁂 𑀯𑀼𑀟𑁆𑀠𑀫𑀧𑀘𑀬𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀺𑀁.

𑁨𑁨. 𑀫𑀸𑀢𑀭𑀺𑀯 𑀧𑀭𑀤𑀸𑀭𑁂𑀲𑀼, 𑀧𑀭𑀤𑀩𑁆𑀩𑁂𑀲𑀼 𑀮𑁂𑀤𑁆𑀤𑀼𑀁𑀯;

𑀅𑀢𑁆𑀢𑀦𑀻𑀯 𑀲𑀩𑁆𑀩𑀪𑀽𑀢𑁂𑀲𑀼, 𑀬𑁄 𑀧𑀲𑁆𑀲𑀢𑀺 𑀲𑁄 𑀧𑀡𑁆𑀟𑀺𑀢𑁄.

𑁨𑁩. 𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀅𑀦𑀯𑀚𑁆𑀚𑁂𑀲𑀼 𑀓𑀫𑁆𑀫𑁂𑀲𑀼, 𑀧𑀲𑀁𑀲𑀺𑀢𑁂𑀲𑀼 𑀲𑀸𑀥𑀼𑀪𑀺.

𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

𑁨𑁪. 𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀽𑀲𑀼, 𑀧𑀲𑀁𑀲𑀺𑀢𑁂𑀲𑀼 𑀯𑀺𑀜𑁆𑀜𑀼𑀪𑀺.

𑁨𑁫. 𑀮𑁄𑀓𑁂 𑀉𑀲𑁆𑀲𑀸𑀳𑀯𑀦𑁆𑀢𑀸𑀦𑀁, 𑀚𑀦𑀸𑀦𑀁 𑀓𑀺𑀫𑀲𑀸𑀥𑀺𑀬𑀁;

𑀲𑀸𑀕𑀭𑁂𑀧𑀺 𑀫𑀳𑀸𑀲𑁂𑀢𑀼𑀁, 𑀓𑀧𑀺𑀬𑀽𑀣𑁂𑀳𑀺 𑀩𑀦𑁆𑀥𑀢𑀺.

𑁨𑁬. 𑀓𑀺𑀁 𑀓𑀼𑀮𑁂𑀦 𑀯𑀺𑀲𑀸𑀮𑁂𑀦, 𑀕𑀼𑀡𑀳𑀻𑀦𑁄 𑀢𑀼 𑀬𑁄 𑀦𑀭𑁄;

𑀅𑀓𑀼𑀮𑀺𑀦𑁄𑀧𑀺 𑀲𑀢𑁆𑀣𑀜𑁆𑀜𑁄, 𑀤𑁂𑀯𑀢𑀸𑀳𑀺𑀧𑀺 𑀧𑀼𑀚𑁆𑀚𑀢𑁂.

𑁨𑁭. 𑀉𑀓𑁆𑀓𑀝𑁆𑀞𑁂 𑀲𑀽𑀭𑀫𑀺𑀘𑁆𑀙𑀦𑁆𑀢𑀺, 𑀫𑀦𑁆𑀢𑀻𑀲𑀼 𑀅𑀓𑀼𑀢𑀽𑀳𑀮𑀁;

𑀧𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢𑀁.

𑁨𑁮. 𑀭𑀽𑀧𑀬𑁄𑀩𑁆𑀩𑀦𑁆𑀦𑀲𑀫𑁆𑀧𑀦𑁆𑀦𑀸, 𑀯𑀺𑀲𑀸𑀮𑀓𑀼𑀮𑀲𑀫𑁆𑀪𑀯𑀸;

𑀯𑀺𑀚𑁆𑀚𑀸𑀳𑀻𑀦𑀸 𑀦 𑀲𑁄𑀪𑀦𑁆𑀢𑁂, 𑀦𑀺𑀕𑁆𑀕𑀦𑁆𑀥𑀸 𑀇𑀯 𑀓𑀺𑀁 𑀲𑀼𑀓𑀸.

𑁨𑁯. 𑀯𑀼𑀢𑁆𑀬𑀁 𑀯𑀺𑀲𑀤𑀜𑀸𑀡𑀲𑁆𑀲, 𑀜𑀸𑀢𑁄 𑀅𑀢𑁆𑀣𑁄 𑀢𑀭𑀲𑁆𑀲𑀦;

𑀲𑀽𑀭𑀧𑁆𑀧𑀪𑀸𑀬 𑀆𑀤𑀸𑀲𑁄, 𑀙𑀸𑀬𑀁 𑀤𑀺𑀲𑁆𑀲𑁂 𑀦 𑀫𑀸𑀓𑀭𑁂.

𑁩𑁦. 𑀅𑀯𑁂𑀬𑁆𑀬𑀸𑀓𑀭𑀡𑁄 𑀢𑁆𑀯𑀦𑁆𑀥𑁄, 𑀩𑀥𑀺𑀭𑁄 𑀓𑁄𑀲𑀯𑀚𑁆𑀚𑀺𑀢𑁄;

𑀲𑀸𑀳𑀺𑀘𑁆𑀘𑀭𑀳𑀺𑀢𑁄 𑀧𑀗𑁆𑀕𑀼, 𑀫𑀽𑀕𑁄 𑀢𑀓𑁆𑀓𑀯𑀺𑀯𑀚𑁆𑀚𑀺𑀢𑁄.

𑁩𑁧. 𑀥𑀻𑀭𑁄 𑀘 𑀯𑀺𑀯𑀺𑀥𑀸𑀦𑀜𑁆𑀜𑀽, 𑀧𑀭𑁂𑀲𑀁 𑀯𑀺𑀯𑀭𑀸𑀦𑀼𑀕𑀽;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀯𑀲𑀻𑀓𑀢𑁆𑀯𑀸, 𑀓𑁄𑀲𑀺𑀬𑁄𑀯 𑀲𑀼𑀔𑀻 𑀲𑀺𑀬𑀸.

𑁩𑁨. 𑀫𑀳𑀸𑀢𑁂𑀚𑁄𑀧𑀺 𑀢𑁂𑀚𑁄𑀬𑀁, 𑀫𑀢𑁆𑀢𑀺𑀓𑀁 𑀦 𑀫𑀼𑀤𑀼𑀁 𑀓𑀭𑁂;

𑀆𑀧𑁄 𑀆𑀧𑁂𑀲𑀺 𑀫𑀼𑀤𑀼𑀓𑀁, 𑀲𑀸𑀥𑀼𑀯𑀸𑀘𑀸𑀯 𑀓𑀓𑁆𑀔𑀴𑀁.

𑁩𑁩. 𑀓𑁄𑀢𑁆𑀣𑁄 𑀧𑀼𑀢𑁆𑀢𑁂𑀦 𑀚𑀸𑀢𑁂𑀦, 𑀬𑁄 𑀦 𑀯𑀺𑀤𑀽 𑀦 𑀥𑀫𑁆𑀫𑀺𑀓𑁄;