𑁮. 𑀧𑀘𑁆𑀘𑀬𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁧𑁬𑁬. 𑀬𑁂𑀳𑀺𑀧𑀓𑀸𑀭𑁂𑀳𑀺 𑀬𑀣𑀸. 𑀢𑁂𑀲𑀁 𑀯𑀺𑀪𑀸𑀕𑁄 𑀢𑀁 𑀯𑀺𑀪𑀸𑀕𑁄. 𑀅𑀬𑀜𑁆𑀘𑀦𑀺𑀤𑁆𑀤𑁂𑀲𑁄 𑀏𑀓𑀲𑁂𑀲𑀦𑀺𑀤𑁆𑀤𑁂𑀲𑁄, 𑀯𑀺𑀘𑁆𑀙𑀸𑀮𑁄𑀧𑀦𑀺𑀤𑁆𑀤𑁂𑀲𑁄𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀁’’𑀢𑀺𑀆𑀤𑀺𑀫𑀸𑀳. 𑀦 𑀲𑀫𑁂𑀢𑀺. 𑀕𑀸𑀣𑀸𑀬𑀁 ‘𑀬𑁂𑀲𑀁’𑀢𑀺𑀆𑀤𑀺𑀦𑀸 𑀢𑀻𑀳𑀺-𑀬-𑀲𑀤𑁆𑀤𑁂𑀳𑀺 𑀤𑀲𑁆𑀲𑀺𑀢𑀸𑀦𑀁 𑀢𑀺𑀡𑁆𑀡𑀁 𑀅𑀢𑁆𑀣𑀸𑀦𑀁-𑀢-𑀲𑀤𑁆𑀤𑀢𑁆𑀣 𑀲𑀫𑁆𑀪𑀯𑀢𑁄. 𑀢-𑀲𑀤𑁆𑀤𑀢𑁆𑀣𑀸𑀦𑀜𑁆𑀘 𑀅𑀦𑀼𑀲𑀦𑁆𑀥𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀢𑁄. ‘‘𑀲𑀫𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀼𑀝𑁆𑀞𑀼 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀸𑀢𑀼𑀪𑀯𑀢𑀺. ‘‘𑀅𑀯𑀺𑀦𑀸’’𑀢𑀺 𑀅𑀯𑀺𑀦𑀸 𑀳𑀼𑀢𑁆𑀯𑀸. ‘‘𑀲𑀳𑀚𑀸𑀢 𑀥𑀫𑁆𑀫𑁂𑀳𑀻’’𑀢𑀺 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼 𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀳𑀚𑀸𑀢 𑀥𑀫𑁆𑀫𑁂𑀳𑀺 𑀲𑀳𑁂𑀯 𑀉𑀧𑁆𑀧𑀚𑁆𑀚𑀦𑀁. ‘‘𑀓𑀮𑀸𑀧𑀯𑀲𑁂𑀦𑀸’’𑀢𑀺 𑀲𑀼𑀤𑁆𑀥 𑀥𑀫𑁆𑀫 𑀓𑀮𑀸𑀧𑀯𑀲𑁂𑀦. ‘‘𑀲𑀸𑀫𑀜𑁆𑀜 𑀮𑀓𑁆𑀔𑀡𑀁’’𑀢𑀺 𑀲𑀸𑀥𑀸𑀭𑀡 𑀮𑀓𑁆𑀔𑀡𑀁. ‘‘𑀅𑀢𑁆𑀣𑁄’’𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸 𑀲𑀤𑁆𑀤𑀲𑁆𑀲 𑀅𑀢𑁆𑀣𑁄. ‘‘𑀅𑀬𑀫𑀢𑁆𑀣𑁄 𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺 ‘𑀲𑀫𑀼𑀧𑁆𑀧𑀚𑁆𑀚𑀦𑀁 𑀲𑀫𑀼𑀧𑁆𑀧𑀸𑀤𑁄’𑀢𑀺 𑀅𑀬𑀁𑀪𑀸𑀯𑀲𑀸𑀥𑀦𑀢𑁆𑀣𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. ‘‘𑀅𑀬𑀫𑁂𑀯𑀸’’𑀢𑀺 𑀅𑀬𑀁 𑀪𑀸𑀯𑀲𑀸𑀥𑀦𑀢𑁆𑀣𑁄 𑀏𑀯. 𑀚𑀭𑀸𑀫𑀭𑀡𑀁 𑀲𑀫𑁆𑀪𑀯𑀢𑀻𑀢𑀺 𑀬𑁄𑀚𑀦𑀸. ‘‘𑀉𑀧𑁆𑀧𑀸𑀤𑀸𑀯𑀸 𑀢𑀣𑀸𑀕𑀢𑀸𑀦𑀁’’𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁂𑀯𑀸 𑀲𑀢𑀺. ‘‘𑀅𑀦𑀼𑀧𑁆𑀧𑀸𑀤𑀸𑀯𑀸’’𑀢𑀺 𑀅𑀦𑀼𑀧𑁆𑀧𑀸𑀤𑁂𑀯𑀸 𑀲𑀢𑀺. ‘‘𑀞𑀺𑀢𑀸𑀯 𑀲𑀸𑀥𑀸𑀢𑀽’’𑀢𑀺 𑀚𑀸𑀢𑀺𑀬𑀸 𑀲𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀯𑀢𑁆𑀢𑀺𑀲𑀪𑀸𑀯𑁄 𑀮𑁄𑀓𑁂 𑀞𑀺𑀢𑁄𑀬𑁂𑀯. 𑀓𑀢𑀫𑀸 𑀧𑀦 𑀲𑀸𑀥𑀸𑀢𑀽𑀢𑀺 𑀆𑀳 ‘‘𑀥𑀫𑁆𑀫𑀝𑁆𑀞𑀺𑀢𑀢𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀥𑀫𑁆𑀫𑀝𑁆𑀞𑀺𑀢𑀢𑀸’’𑀢𑀺 𑀓𑁂𑀦𑀘𑀺 𑀅𑀓𑀢𑀸 𑀲𑀪𑀸𑀯𑀝𑁆𑀞𑀺𑀢𑀢𑀸. ‘‘𑀥𑀫𑁆𑀫𑀦𑀺𑀬𑀸𑀫𑀢𑀸’’𑀢𑀺 𑀲𑀪𑀸𑀯𑀦𑀺𑀬𑀸𑀫𑀢𑀸. ‘‘𑀢𑀢𑁆𑀭 𑀢𑀣𑀢𑀸’’𑀢𑀺 𑀢𑀲𑁆𑀫𑀺𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑁂 𑀲𑀗𑁆𑀔𑀢 𑀥𑀫𑁆𑀫𑀸𑀦𑀁 𑀢𑀣𑀢𑀸. 𑀲𑀸𑀫𑀜𑁆𑀜 𑀮𑀓𑁆𑀔𑀡𑀫𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺, 𑀦 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬 𑀥𑀫𑁆𑀫𑁄. 𑀓𑀲𑁆𑀫𑀸, 𑀢𑁂𑀳𑀺 𑀯𑀘𑀦𑁂𑀳𑀺 𑀥𑀫𑁆𑀫𑀦𑀺𑀬𑀸𑀫𑀢𑀸 𑀫𑀢𑁆𑀢𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀅𑀯𑀺𑀚𑁆𑀚𑀸𑀤𑀻𑀦𑀁 𑀥𑀫𑁆𑀫 𑀲𑀭𑀽𑀧𑀸𑀦𑀁 𑀅𑀤𑀲𑁆𑀲𑀺𑀢𑀢𑁆𑀢𑀸. ‘‘𑀥𑀫𑁆𑀫𑀦𑀺𑀬𑀸𑀫𑀢𑀸𑀫𑀢𑁆𑀢𑀁’’𑀢𑀺 𑀘 𑀬𑀣𑀸 𑀯𑀼𑀢𑁆𑀢𑀲𑀸𑀫𑀜𑁆𑀜 𑀮𑀓𑁆𑀔𑀡𑀫𑁂𑀯 𑀯𑀼𑀘𑁆𑀘𑀢𑀺. 𑀬𑀤𑀺 𑀪𑀸𑀯𑀲𑀸𑀥𑀦𑀁 𑀇𑀘𑁆𑀙𑁂𑀬𑁆𑀬, 𑀪𑀸𑀯𑀲𑀸𑀥𑀦𑀁 𑀦𑀸𑀫 𑀓𑀢𑁆𑀢𑀼𑀭𑀳𑀺𑀢𑀁 𑀪𑀯𑁂𑀬𑁆𑀬. 𑀓𑀢𑁆𑀢𑀼𑀭𑀳𑀺𑀢𑁂 𑀘 𑀲𑀢𑀺, 𑀓𑀣𑀁 𑀧𑀝𑀺𑀘𑁆𑀘 𑀓𑁆𑀭𑀺𑀬𑀸𑀬 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀮𑀩𑁆𑀪𑀢𑀺. 𑀅𑀮𑀤𑁆𑀥𑁂 𑀘 𑀲𑀫𑀸𑀦𑀓𑀢𑁆𑀢𑀼𑀓𑀢𑁆𑀢𑁂 𑀓𑀣𑀜𑁆𑀘 𑀧𑀼𑀩𑁆𑀩𑀓𑀸𑀮𑁂𑀢𑁆𑀯𑀸 𑀧𑀘𑁆𑀘𑀬𑀲𑀫𑁆𑀪𑀯𑁄𑀢𑀺. 𑀅𑀬𑀁 𑀪𑀸𑀯𑀲𑀸𑀥𑀦𑀁 𑀇𑀘𑁆𑀙𑀦𑁆𑀢𑀲𑁆𑀲 𑀩𑁆𑀬𑀜𑁆𑀚𑀦𑀬𑀼𑀢𑁆𑀢𑀺𑀯𑀺𑀭𑁄𑀥𑁄. 𑀢𑀁 𑀧𑀭𑀺𑀳𑀭𑀦𑁆𑀢𑁄 𑀦 𑀘𑁂𑀢𑁆𑀣𑀸𑀢𑀺𑀆𑀤𑀺𑀫𑀸𑀳. 𑀕𑀫𑁆𑀪𑀻𑀭𑁄𑀘𑀸𑀦𑀦𑁆𑀤 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯 𑀪𑀸𑀲𑁄𑀘𑀸𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀪𑀸𑀯𑀲𑀸𑀥𑀦𑁂 𑀘 𑀓𑀢𑁂 𑀉𑀧𑁆𑀧𑀚𑁆𑀚𑀦 𑀓𑁆𑀭𑀺𑀬𑀸𑀫𑀢𑁆𑀢𑀁 𑀦𑀸𑀫 𑀯𑀺𑀲𑀼𑀁 𑀏𑀓𑁄 𑀥𑀫𑁆𑀫𑁄 𑀦 𑀳𑁄𑀢𑀻𑀢𑀺 𑀓𑀣𑀁 𑀢𑀁 𑀕𑀫𑁆𑀪𑀻𑀭𑀁 𑀲𑀺𑀬𑀸𑀢𑀺. 𑀅𑀬𑀁 𑀪𑀸𑀯𑀲𑀸𑀥𑀦𑀁 𑀇𑀘𑁆𑀙𑀦𑁆𑀢𑀲𑁆𑀲 𑀕𑀫𑁆𑀪𑀻𑀭𑀯𑀘𑀦 𑀯𑀺𑀭𑁄𑀥𑁄. 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀗𑁆𑀔𑀢 𑀥𑀫𑁆𑀫𑁂𑀲𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀧𑀺 𑀘 𑀲𑀗𑁆𑀔𑀢 𑀮𑀓𑁆𑀔𑀡𑀁 𑀦𑀸𑀫 𑀲𑀗𑁆𑀔𑀢 𑀥𑀫𑁆𑀫𑀢𑁄𑀧𑀺 𑀕𑀫𑁆𑀪𑀻𑀭𑀁 𑀳𑁄𑀢𑀺. 𑀢𑀣𑀸𑀳𑀺 𑀘𑀺𑀢𑁆𑀢𑀁 𑀦𑀸𑀫 𑀲𑀗𑁆𑀔𑀢 𑀥𑀫𑁆𑀫𑁄. 𑀢𑀜𑁆𑀘 𑀅𑀢𑁆𑀣𑀺 𑀫𑁂𑀘𑀺𑀢𑁆𑀢𑀁 𑀦𑀸𑀫𑀸𑀢𑀺 𑀲𑀢𑁆𑀢𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺. 𑀢𑀲𑁆𑀲 𑀧𑀦 𑀅𑀦𑀺𑀘𑁆𑀘𑀢𑀸 𑀲𑀗𑁆𑀔𑀸𑀢𑀁 𑀲𑀗𑁆𑀔𑀢 𑀮𑀓𑁆𑀔𑀡𑀁 𑀅𑀧𑀸𑀓𑀝𑀁 𑀳𑁄𑀢𑀺 𑀲𑀼𑀝𑁆𑀞𑀼 𑀲𑀦𑁆𑀢𑀢𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀁. 𑀢𑀣𑀸 𑀯𑁂𑀤𑀦𑀸 𑀦𑀸𑀫 𑀲𑀼𑀔𑀸𑀯𑀸 𑀤𑀼𑀓𑁆𑀔𑀸𑀯𑀸 𑀲𑀗𑁆𑀔𑀢 𑀥𑀫𑁆𑀫𑁄. 𑀲𑀸 𑀘 𑀅𑀢𑁆𑀣𑀺 𑀫𑁂𑀯𑁂𑀤𑀦𑀸𑀢𑀺 𑀲𑀢𑁆𑀢𑀸𑀦𑀁 𑀧𑀸𑀓𑀝𑀸 𑀳𑁄𑀢𑀺. 𑀢𑀲𑁆𑀲𑀸 𑀧𑀦 𑀅𑀦𑀺𑀘𑁆𑀘𑀢𑀸 𑀲𑀗𑁆𑀔𑀸𑀢𑀁 𑀲𑀗𑁆𑀔𑀢 𑀮𑀓𑁆𑀔𑀡𑀁 𑀅𑀧𑀸𑀓𑀝𑀁 𑀳𑁄𑀢𑀺 𑀲𑀼𑀝𑁆𑀞𑀼 𑀲𑀦𑁆𑀢𑀢𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀁. 𑀏𑀯𑀁 𑀲𑁂𑀲𑁂𑀲𑀼 𑀦𑀸𑀫𑀥𑀫𑁆𑀫𑁂𑀲𑀼 𑀘 𑀭𑀽𑀧𑀥𑀫𑁆𑀫𑁂𑀲𑀼 𑀘. 𑀬𑀢𑁄 𑀲𑀢𑁆𑀢𑀲𑀼 𑀯𑀺𑀲𑀼𑀤𑁆𑀥𑀻𑀲𑀼 𑀲𑀗𑁆𑀔𑀢 𑀥𑀫𑁆𑀫 𑀯𑀯𑀢𑁆𑀣𑀸𑀦 𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀜𑀸𑀡𑀜𑁆𑀘 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬 𑀧𑀭𑀺𑀕𑁆𑀕𑀳 𑀲𑀗𑁆𑀔𑀸𑀢𑀁 𑀓𑀗𑁆𑀔𑀸𑀯𑀺𑀢𑀭𑀡 𑀯𑀺𑀲𑀼𑀤𑁆𑀥𑀺𑀜𑀸𑀡𑀜𑁆𑀘 𑀧𑀣𑀫𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀤𑀲𑀯𑀺𑀥𑀸𑀦𑀺 𑀲𑀗𑁆𑀔𑀢 𑀮𑀓𑁆𑀔𑀡𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀸𑀦𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀬𑀣𑀸 𑀘 𑀅𑀦𑀺𑀘𑁆𑀘𑀢𑀸 𑀲𑀗𑁆𑀔𑀸𑀢𑀁 𑀲𑀗𑁆𑀔𑀢 𑀮𑀓𑁆𑀔𑀡𑀁 𑀲𑀗𑁆𑀔𑀢 𑀥𑀫𑁆𑀫𑀢𑁄 𑀕𑀫𑁆𑀪𑀻𑀭𑀁 𑀳𑁄𑀢𑀺. 𑀢𑀣𑀸 𑀇𑀤𑀫𑁆𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀲𑀗𑁆𑀔𑀸𑀢𑀁 𑀲𑀗𑁆𑀔𑀢 𑀮𑀓𑁆𑀔𑀡𑀁 𑀲𑀗𑁆𑀔𑀢 𑀥𑀫𑁆𑀫𑀢𑁄 𑀕𑀫𑁆𑀪𑀻𑀭𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀢𑀩𑁆𑀪𑀸𑀯𑀪𑀸𑀯𑀻𑀪𑀸𑀯𑁄’’𑀢𑀺 𑀏𑀢𑁆𑀣 𑀪𑀯𑀢𑀺 𑀲𑀁𑀯𑀺𑀚𑁆𑀚𑀢𑀻𑀢𑀺 𑀪𑀸𑀯𑁄. 𑀲𑁄 𑀲𑁄 𑀅𑀯𑀺𑀚𑁆𑀚𑀸𑀤𑀺𑀓𑁄 𑀪𑀸𑀯𑁄 𑀢𑀩𑁆𑀪𑀸𑀯𑁄. 𑀢𑀩𑁆𑀪𑀸𑀯𑁂 𑀪𑀯𑀦𑁆𑀢𑀺 𑀲𑀫𑁆𑀪𑀯𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀢𑀩𑁆𑀪𑀸𑀯𑀪𑀸𑀯𑀺𑀦𑁄. 𑀲𑀗𑁆𑀔𑀸𑀭𑀸𑀤𑀬𑁄. ‘‘𑀪𑀸𑀯𑁄’’𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀢𑀩𑁆𑀪𑀸𑀯𑀪𑀸𑀯𑀻𑀦𑀁 𑀪𑀸𑀯𑁄𑀢𑀺 𑀢𑀩𑁆𑀪𑀸𑀯𑀪𑀸𑀯𑀺 𑀪𑀸𑀯𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁’’𑀢𑀺𑀆𑀤𑀺𑀫𑀸𑀳. 𑀅𑀧𑀺 𑀘 ‘‘𑀪𑀸𑀯𑁄’’𑀢𑀺 𑀯𑀺𑀚𑁆𑀚𑀫𑀸𑀦𑀢𑀸 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬 𑀥𑀫𑁆𑀫𑀲𑁆𑀲 𑀪𑀸𑀯𑁄𑀢𑀺 𑀢𑀩𑁆𑀪𑀸𑀯𑁄. 𑀢𑀩𑁆𑀪𑀸𑀯𑁂 𑀲𑀢𑀺 𑀪𑀯𑀦𑁆𑀢𑀺 𑀲𑀫𑁆𑀪𑀯𑀦𑁆𑀢𑀺 𑀥𑀫𑁆𑀫𑀢𑀸𑀬𑀸𑀢𑀺 𑀢𑀩𑁆𑀪𑀸𑀯𑀪𑀸𑀯𑀺𑀦𑁄. 𑀢𑁂𑀲𑀁 𑀪𑀸𑀯𑁄𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. ‘‘𑀳𑁂𑀢𑁆𑀯𑀸𑀤𑀺 𑀧𑀘𑁆𑀘𑀬 𑀲𑀢𑁆𑀢𑀺𑀦𑀺𑀬𑀸𑀫𑀁’’𑀢𑀺 𑀳𑁂𑀢𑀼𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄, 𑀢𑀺𑀆𑀤𑀻𑀲𑀼 𑀳𑁂𑀢𑀼𑀲𑀤𑁆𑀤 𑀆𑀭𑀫𑁆𑀫𑀡 𑀲𑀤𑁆𑀤𑀸𑀤𑀬𑁄 𑀮𑁄𑀪𑀸𑀤𑀻𑀦𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀢𑀁 𑀢𑀁 𑀧𑀘𑁆𑀘𑀬 𑀲𑀢𑁆𑀢𑀺𑀯𑀺𑀲𑁂𑀲𑀁 𑀤𑀻𑀧𑁂𑀦𑁆𑀢𑀺. 𑀢𑁂𑀲𑀜𑁆𑀘 𑀲𑁄 𑀲𑁄 𑀧𑀘𑁆𑀘𑀬 𑀲𑀢𑁆𑀢𑀺𑀯𑀺𑀲𑁂𑀲𑁄 𑀯𑀺𑀲𑀼𑀁 𑀥𑀫𑁆𑀫𑀦𑀺𑀬𑀸𑀫𑁄 𑀳𑁄𑀢𑀺, 𑀏𑀯𑀁 𑀳𑁂𑀢𑁆𑀯𑀸𑀤𑀺 𑀧𑀘𑁆𑀘𑀬𑀲𑀢𑁆𑀢𑀺𑀦𑀺𑀬𑀸𑀫𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀢𑀣𑀸 𑀢𑀣𑀸’’𑀢𑀺 𑀫𑀽𑀮𑀝𑁆𑀞𑀕𑁄𑀘𑀭𑀯𑀺𑀲𑀬𑀝𑁆𑀞𑀸𑀤𑀺𑀓𑁂𑀦 𑀢𑁂𑀦 𑀢𑁂𑀦 𑀧𑀘𑁆𑀘𑀬𑀸𑀓𑀸𑀭𑁂𑀦. 𑀲𑁄 𑀳𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀘𑁆𑀘𑀬 𑀥𑀫𑁆𑀫𑀼𑀤𑁆𑀥𑀸𑀭 𑀫𑀢𑁆𑀢𑁂 𑀅𑀞𑀢𑁆𑀯𑀸’’𑀢𑀺 𑀧𑀘𑁆𑀘𑀬 𑀥𑀫𑁆𑀫𑀸𑀦𑀁 𑀦𑀸𑀫 𑀲𑀜𑁆𑀜𑀸𑀯𑀲𑁂𑀦 𑀉𑀤𑁆𑀥𑀭𑀡𑀫𑀢𑁆𑀢𑀁 𑀅𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀳𑀘𑁆𑀘𑀸’’𑀢𑀺 𑀆𑀳𑀦𑀺𑀢𑁆𑀯𑀸 𑀢𑀁 𑀢𑀁 𑀧𑀘𑁆𑀘𑀬𑀲𑀢𑁆𑀢𑀺 𑀯𑀺𑀲𑁂𑀲𑀁 𑀧𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸’’𑀢𑀺. 𑀧𑀘𑁆𑀘𑀬𑀲𑀢𑁆𑀢𑀺 𑀯𑀺𑀲𑁂𑀲𑁄 𑀳𑀺 𑀳𑁂𑀢𑀼𑀨𑀮𑀤𑀻𑀧𑀦𑁂 𑀢𑀢𑁄 𑀉𑀢𑁆𑀢𑀭𑀺 𑀯𑀢𑁆𑀢𑀩𑁆𑀩 𑀓𑀺𑀘𑁆𑀘𑀸𑀪𑀸𑀯𑀢𑁄 𑀫𑀢𑁆𑀣𑀓𑀁 𑀦𑀸𑀫 𑀳𑁄𑀢𑀻𑀢𑀺. ‘‘𑀅𑀦𑁄𑀲𑀓𑁆𑀓𑀫𑀸𑀦𑀸’’𑀢𑀺 𑀅𑀦𑀺𑀯𑀢𑁆𑀢𑀫𑀸𑀦𑀸. ‘‘𑀏𑀢𑀸𑀬𑀸’’𑀢𑀺 𑀧𑀘𑁆𑀘𑀬 𑀲𑀢𑁆𑀢𑀺𑀬𑀸. 𑀧𑀧𑀜𑁆𑀘𑁂𑀦𑁆𑀢𑁂 𑀆𑀘𑀭𑀺𑀬𑁂.

𑀏𑀢𑀲𑁆𑀫𑀸 𑀓𑀸𑀭𑀡𑀸 𑀨𑀮𑀁 𑀏𑀢𑀤𑁂𑀯 𑀧𑀝𑀺𑀘𑁆𑀘 𑀅𑀦𑀸𑀕𑀢𑀧𑀓𑁆𑀔𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀓𑁆𑀔𑀁 𑀆𑀕𑀘𑁆𑀙𑀢𑀺 𑀧𑀸𑀢𑀼𑀩𑁆𑀪𑀯𑀢𑀻𑀢𑀺 𑀧𑀘𑁆𑀘𑀬𑁄. 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀧𑀯𑀢𑁆𑀢𑀺𑀓𑀸𑀭𑀡𑀜𑁆𑀘. 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀚𑀦𑀓𑀧𑀘𑁆𑀘𑀬𑁄. 𑀧𑀯𑀢𑁆𑀢𑀺𑀓𑀸𑀭𑀡𑀁 𑀉𑀧𑀢𑁆𑀣𑀫𑁆𑀪𑀓 𑀧𑀘𑁆𑀘𑀬𑁄. ‘‘𑀏𑀢𑁂𑀦𑀸’’𑀢𑀺 𑀳𑁂𑀢𑀼𑀦𑀸. ‘‘𑀓𑀸𑀬𑀯𑀘𑀻 𑀫𑀦𑁄𑀓𑀫𑁆𑀫𑀁’’𑀢𑀺 𑀏𑀢𑁆𑀣 ‘‘𑀓𑀫𑁆𑀫𑀁’’𑀢𑀺 𑀓𑁆𑀭𑀺𑀬𑀸𑀯𑀼𑀘𑁆𑀘𑀢𑀺, 𑀕𑀫𑀦 𑀞𑀸𑀦 𑀦𑀺𑀲𑀚𑁆𑀚𑀲𑀬𑀦𑀸𑀤𑀺𑀓𑀁 𑀓𑀸𑀬𑀺𑀓 𑀓𑁆𑀭𑀺𑀬𑀜𑁆𑀘. 𑀆𑀮𑀸𑀧 𑀲𑀮𑁆𑀮𑀸𑀧 𑀓𑀣𑀦 𑀲𑀚𑁆𑀛𑀸𑀬𑀦 𑀕𑀸𑀬𑀦𑀸𑀤𑀺𑀓𑀁 𑀯𑀸𑀘𑀲𑀺𑀓 𑀓𑁆𑀭𑀺𑀬𑀜𑁆𑀘. 𑀯𑀺𑀚𑀸𑀦𑀦 𑀘𑀺𑀦𑁆𑀢𑀦 𑀯𑀻𑀫𑀁𑀲𑀦𑀸𑀤𑀺𑀓𑀁 𑀫𑀸𑀦𑀲𑀺𑀓 𑀓𑁆𑀭𑀺𑀬𑀜𑁆𑀘. ‘‘𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻’’𑀢𑀺 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺. ‘‘𑀏𑀢𑁂𑀳𑀻’’𑀢𑀺 𑀏𑀢𑁂𑀳𑀺 𑀮𑁄𑀓𑀺𑀬𑀓𑀼𑀲𑀮𑀸 𑀓𑀼𑀲𑀮 𑀘𑁂𑀢𑀦𑀸 𑀥𑀫𑁆𑀫𑁂𑀳𑀺. 𑀅𑀧𑀺 𑀘 𑀲𑀗𑁆𑀔𑀭𑁄𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀻𑀢𑀺 𑀲𑀗𑁆𑀔𑀸𑀭𑀸. ‘‘𑀲𑀗𑁆𑀔𑀭𑁄𑀦𑁆𑀢𑀻’’𑀢𑀺 𑀓𑀺𑀁 𑀲𑀗𑁆𑀔𑀭𑁄𑀦𑁆𑀢𑀺. 𑀅𑀢𑁆𑀢𑀪𑀸𑀯𑀁 𑀲𑀗𑁆𑀔𑀭𑁄𑀦𑁆𑀢𑀺. 𑀪𑀯𑀸𑀪𑀯𑀁 𑀲𑀗𑁆𑀔𑀭𑁄𑀦𑁆𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀅𑀢𑁆𑀣𑀁 𑀯𑀸 𑀅𑀦𑀢𑁆𑀣𑀁 𑀯𑀸 𑀲𑀗𑁆𑀔𑀭𑁄𑀦𑁆𑀢𑀺. 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀢𑁆𑀣𑀁 𑀯𑀸 𑀅𑀦𑀢𑁆𑀣𑀁 𑀯𑀸 𑀲𑀗𑁆𑀔𑀭𑁄𑀦𑁆𑀢𑀻𑀢𑀺𑀆𑀤𑀺𑀦𑀸. 𑀘𑀓𑁆𑀔𑀼𑀫𑁆𑀧𑀺 𑀲𑀗𑁆𑀔𑀭𑁄𑀦𑁆𑀢𑀺, 𑀲𑁄𑀢𑀁𑀧𑀺 𑀲𑀗𑁆𑀔𑀭𑁄𑀦𑁆𑀢𑀻𑀢𑀺𑀆𑀤𑀺𑀦𑀸. 𑀤𑀲𑁆𑀲𑀦𑀫𑁆𑀧𑀺 𑀲𑀗𑁆𑀔𑀭𑁄𑀦𑁆𑀢𑀺, 𑀲𑀯𑀦𑀫𑁆𑀧𑀺 𑀲𑀗𑁆𑀔𑀭𑁄𑀦𑁆𑀢𑀻𑀢𑀺𑀆𑀤𑀺𑀦𑀸 𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. ‘‘𑀯𑀺𑀚𑀸𑀦𑀸𑀢𑀻’’𑀢𑀺 𑀯𑀺𑀯𑀺𑀥𑁂𑀦 𑀚𑀸𑀦𑀸𑀢𑀺. 𑀪𑀽𑀢𑁂𑀦𑀧𑀺 𑀚𑀸𑀦𑀸𑀢𑀺, 𑀅𑀪𑀽𑀢𑁂𑀦𑀧𑀺 𑀚𑀸𑀦𑀸𑀢𑀺. ‘‘𑀦𑀫𑀢𑀻’’𑀢𑀺 𑀕𑁄𑀘𑀭 𑀯𑀺𑀲𑀬𑀢𑁆𑀣𑀸𑀬 𑀦𑀫𑀢𑀺. ‘‘𑀭𑀼𑀧𑁆𑀧𑀢𑀻’’𑀢𑀺 𑀓𑀼𑀧𑁆𑀧𑀢𑀺, 𑀔𑁄𑀪𑀢𑀺. ‘‘𑀨𑀼𑀲𑀢𑀻’’𑀢𑀺 𑀲𑀁𑀳𑀦𑀢𑀺. ‘‘𑀯𑁂𑀤𑀬𑀢𑀻’’𑀢𑀺 𑀯𑀺𑀤𑀺𑀢𑀁 𑀓𑀭𑁄𑀢𑀺. 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀮𑀕𑁆𑀕𑀦𑀯𑀲𑁂𑀦 𑀪𑀼𑀲𑀁 𑀦𑀳𑀢𑀺 𑀩𑀦𑁆𑀥𑀢𑀺, 𑀫𑀼𑀜𑁆𑀘𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀢𑀡𑁆𑀳𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀉𑀧𑀸𑀤𑀺𑀬𑀢𑀻’’𑀢𑀺 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀅𑀫𑀼𑀜𑁆𑀘𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀻’’𑀢𑀺. 𑀪𑀯𑀢𑀻𑀢𑀺 𑀪𑀯𑁄. 𑀉𑀧𑀧𑀢𑁆𑀢𑀺𑀪𑀯𑁄. 𑀪𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀪𑀯𑁄. 𑀓𑀫𑁆𑀫𑀪𑀯𑁄. ‘‘𑀚𑀦𑀦𑀁’’𑀢𑀺 𑀅𑀪𑀺𑀦𑀯𑀲𑁆𑀲 𑀧𑀸𑀢𑀼𑀩𑁆𑀪𑀯𑀦𑀁. ‘‘𑀚𑀻𑀭𑀡𑀁’’𑀢𑀺 𑀅𑀪𑀺𑀦𑀯𑀪𑀸𑀯𑀢𑁄 𑀳𑀸𑀬𑀦𑀁. ‘‘𑀲𑁄𑀘𑀦𑀁’’𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀧𑀦𑀁. ‘‘𑀧𑀭𑀺𑀤𑁂𑀯𑀦𑀁’’𑀢𑀺 𑀭𑁄𑀤𑀦𑀁. ‘‘𑀤𑀼𑀓𑁆𑀔𑀁’’𑀢𑀺 𑀓𑀸𑀬𑀭𑀼𑀚𑁆𑀚𑀦𑀁. ‘‘𑀤𑁄𑀫𑀦𑀲𑁆𑀲𑀁’’𑀢𑀺 𑀘𑀺𑀢𑁆𑀢𑀭𑀼𑀚𑁆𑀚𑀦𑀁. ‘‘𑀯𑀺𑀲𑀻𑀤𑀦𑀁’’𑀢𑀺 𑀩𑀸𑀴𑁆𑀳𑀁 𑀘𑀺𑀢𑁆𑀢𑀓𑀺𑀮𑀫𑀣𑀪𑀸𑀯𑁂𑀦 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀘𑀺𑀢𑁆𑀢𑀲𑁆𑀲𑀲𑀻𑀤𑀦𑀁. 𑀣𑀸𑀫𑀩𑀮𑀔𑀺𑀬𑁆𑀬𑀦𑀁. 𑀬𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀺𑀭𑀽𑀧𑀧𑁆𑀧𑀯𑀢𑁆𑀢𑀺𑀯𑀸 𑀢𑀗𑁆𑀔𑀡𑁂 𑀲𑀩𑁆𑀩𑀲𑁄 𑀉𑀧𑀭𑀼𑀚𑁆𑀛𑀦𑀁 𑀯𑀸 𑀳𑁄𑀢𑀻𑀢𑀺. ‘‘𑀓𑁂𑀦𑀘𑀺 𑀲𑀼𑀔𑁂𑀦𑀸’’𑀢𑀺 𑀤𑀼𑀓𑁆𑀔𑀲𑀘𑁆𑀘𑀢𑁄 𑀯𑀺𑀫𑀼𑀢𑁆𑀢𑁂𑀦 𑀓𑁂𑀦𑀘𑀺 𑀲𑀦𑁆𑀢𑀺𑀲𑀼𑀔𑁂𑀦.

‘‘𑀤𑀼𑀓𑁆𑀔𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸’’𑀢𑀺 𑀪𑀬𑀝𑁆𑀞𑁂𑀦 𑀤𑀼𑀓𑁆𑀔𑀪𑀽𑀢𑀸𑀦𑀁 𑀢𑁂𑀪𑀽𑀫𑀺𑀓 𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. ‘‘𑀲𑀫𑀼𑀤𑀬𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸’’𑀢𑀺 𑀢𑀡𑁆𑀳𑀸𑀬 𑀤𑀼𑀓𑁆𑀔 𑀲𑀫𑀼𑀤𑀬 𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. ‘‘𑀦𑀺𑀭𑁄𑀥𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸’’𑀢𑀺 𑀢𑀡𑁆𑀳𑀸𑀦𑀺𑀭𑁄𑀥𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥 𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. ‘‘𑀫𑀕𑁆𑀕𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸’’𑀢𑀺 𑀅𑀝𑁆𑀞𑀗𑁆𑀕𑀻𑀓 𑀫𑀕𑁆𑀕𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥 𑀫𑀕𑁆𑀕𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀧𑀼𑀩𑁆𑀩𑀦𑁆𑀢𑁄 𑀯𑀼𑀘𑁆𑀘𑀢𑀺 𑀅𑀢𑀻𑀢𑁂𑀓𑀸𑀮𑁂 𑀪𑀯𑀧𑀭𑀫𑁆𑀧𑀭𑀸. 𑀅𑀧𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑁂 𑀪𑀯𑀧𑀭𑀫𑁆𑀧𑀭𑀸. 𑀧𑀼𑀩𑁆𑀩𑀦𑁆𑀢𑀸 𑀧𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 𑀢𑀤𑀼𑀪𑀬𑀁. ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀔𑀦𑁆𑀥𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. ‘‘𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦𑀸’’𑀢𑀺 𑀅𑀪𑀺𑀥𑀫𑁆𑀫𑁂𑀧𑀺 𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢 𑀪𑀸𑀚𑀦𑀻𑀬𑀁 𑀦𑀸𑀫 𑀆𑀕𑀢𑀁. 𑀢𑁂𑀦 𑀲𑀼𑀢𑁆𑀢𑀦𑁆𑀢 𑀪𑀸𑀚𑀦𑀻𑀬𑀦𑀬𑁂𑀦. 𑀲𑀸𑀲𑀯𑀸 𑀓𑀼𑀲𑀮𑀸 𑀓𑀼𑀲𑀮 𑀘𑁂𑀢𑀦𑀸 𑀲𑀗𑁆𑀔𑀸𑀭𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀅𑀪𑀺𑀥𑀫𑁆𑀫𑀦𑀬𑁂𑀦𑀸’’𑀢𑀺 𑀯𑀺𑀪𑀗𑁆𑀕𑁂 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀦𑀬𑁂𑀦. 𑀅𑀝𑁆𑀞𑀓𑀣𑀸𑀧𑀸𑀞𑁂. 𑀅𑀯𑀺𑀚𑁆𑀚𑀸 𑀓𑀺𑀭𑀺𑀬 𑀥𑀫𑁆𑀫𑀸𑀦𑀁 𑀦𑁂𑀯 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀢𑁆𑀢𑀁 𑀮𑀪𑀢𑀺. 𑀓𑀼𑀲𑀮𑀸 𑀓𑀼𑀲𑀮𑀫𑀽𑀮𑀸𑀦𑀺 𑀓𑀺𑀭𑀺𑀬 𑀥𑀫𑁆𑀫𑀸𑀦𑀁 𑀦 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀢𑁆𑀢𑀁 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀓𑀺𑀭𑀺𑀬 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀢𑁄 𑀘 𑀓𑀼𑀲𑀮𑀸 𑀓𑀼𑀲𑀮 𑀫𑀽𑀮𑁂𑀳𑀺 𑀘 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀁 𑀦 𑀮𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀘𑁆𑀘𑀬𑀸𑀓𑀸𑀭𑁄’’𑀢𑀺 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑁄. ‘‘𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸’’𑀢𑀺 𑀅𑀯𑀺𑀚𑁆𑀚𑀸 𑀯𑀺𑀕𑀫𑀦𑀢𑁄. 𑀢𑁂𑀲𑀁𑀧𑀺𑀓𑀺𑀭𑀺𑀬 𑀥𑀫𑁆𑀫𑀸𑀦𑀁. 𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀓𑀺𑀭𑀺𑀬 𑀯𑀺𑀜𑁆𑀜𑀸𑀡𑀁, 𑀓𑀺𑀭𑀺𑀬 𑀦𑀸𑀫𑀁, 𑀓𑀺𑀭𑀺𑀬 𑀫𑀦𑀸𑀬𑀢𑀦𑀁, 𑀓𑀺𑀭𑀺𑀬𑀨𑀲𑁆𑀲𑁄, 𑀓𑀺𑀭𑀺𑀬 𑀯𑁂𑀤𑀦𑀸𑀢𑀺 𑀅𑀢𑁆𑀣𑀺𑀢𑀸𑀬 ‘‘𑀏𑀲𑀦𑀬𑁄 𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀻’’𑀢𑀺 𑀯𑀼𑀢𑁆𑀢𑀁. ‘‘𑀓𑀼𑀲𑀮𑀸 𑀓𑀼𑀲𑀮 𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀁’’𑀢𑀺 𑀓𑀼𑀲𑀮 𑀯𑀺𑀜𑁆𑀜𑀸𑀡 𑀲𑀫𑁆𑀧𑀬𑀼𑀢𑁆𑀢𑀁, 𑀅𑀓𑀼𑀲𑀮𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀯𑀺𑀧𑀸𑀓 𑀯𑀺𑀜𑁆𑀜𑀸𑀡 𑀲𑀫𑁆𑀧𑀬𑀼𑀢𑁆𑀢𑀁. ‘‘𑀢𑀁 𑀅𑀦𑀼𑀧𑀧𑀦𑁆𑀦𑀁’’𑀢𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀯𑀺𑀜𑁆𑀜𑀸𑀡 𑀲𑀳𑀕𑀢𑀲𑁆𑀲 𑀔𑀦𑁆𑀥𑀢𑁆𑀢𑀬𑀲𑁆𑀲 𑀢𑀁 𑀲𑀳𑀚𑀸𑀢𑀲𑁆𑀲 𑀘𑀺𑀢𑁆𑀢𑀚𑀭𑀽𑀧𑀲𑁆𑀲 𑀘 𑀅𑀯𑀲𑀺𑀝𑁆𑀞𑀢𑁆𑀢𑀸 𑀢𑀁 𑀦 𑀲𑀫𑁆𑀧𑀦𑁆𑀦𑀁𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀳𑀺 𑀯𑀺𑀜𑁆𑀜𑀸𑀡𑀧𑀤𑁂 𑀧𑀯𑀢𑁆𑀢𑀺𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘𑀲𑀢𑀺, 𑀦𑀸𑀫 𑀭𑀽𑀧𑀧𑀤𑁂𑀧𑀺 𑀧𑀯𑀢𑁆𑀢𑀺𑀯𑀲𑁂𑀦 𑀢𑀤𑀼𑀪𑀬𑀁 𑀧𑀯𑀢𑁆𑀢𑀺𑀯𑀺𑀜𑁆𑀜𑀸𑀡𑀲𑀳𑀕𑀢𑀁𑀧𑀺 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺. ‘‘𑀢𑀁 𑀢𑀁 𑀯𑀺𑀜𑁆𑀜𑀸𑀡 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡 𑀧𑀯𑀢𑁆𑀢𑀺 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸. ‘‘𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺𑀧𑀸𑀓𑀝𑀸𑀦𑀻’’𑀢𑀺 𑀙 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸𑀤𑀺𑀯𑀲𑁂𑀦. 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀯𑀲𑁂𑀦𑀸𑀢𑀺 𑀏𑀯𑀁 𑀧𑀸𑀓𑀝𑀸𑀦𑀺𑀬𑁂𑀯. ‘‘𑀮𑀓𑁆𑀔𑀡𑀫𑀢𑁆𑀢𑀸𑀦𑀻’’𑀢𑀺 𑀲𑀗𑁆𑀔𑀢 𑀥𑀫𑁆𑀫𑀸𑀦𑀁 𑀲𑀗𑁆𑀔𑀢𑀪𑀸𑀯𑀲𑀮𑁆𑀮𑀓𑁆𑀔𑀡 𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀦𑀺. ‘‘𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀻’’𑀢𑀺 𑀜𑀸𑀢𑀺𑀯𑀺𑀦𑀸𑀲𑀦𑀸𑀤𑀻𑀳𑀺. ‘‘𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀁’’𑀢𑀺 𑀜𑀸𑀢𑀺𑀯𑀺𑀦𑀸𑀲𑀦𑀸𑀤𑀺𑀓𑀸𑀭𑀡𑀸.

‘‘𑀔𑀦𑁆𑀥𑀤𑀼𑀓𑁆𑀔𑁂’’𑀢𑀺 𑀧𑀘𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀤𑀼𑀓𑁆𑀔𑀲𑀘𑁆𑀘𑁂. 𑀔𑀦𑁆𑀥𑀧𑁆𑀧𑀯𑀢𑁆𑀢𑀺 𑀫𑀕𑁆𑀕𑁄 𑀦𑀸𑀫 𑀢𑀡𑁆𑀳𑀸𑀲𑀫𑀼𑀤𑀬𑁄 𑀏𑀯. 𑀔𑀦𑁆𑀥𑀦𑀺𑀭𑁄𑀥 𑀫𑀕𑁆𑀕𑁄 𑀦𑀸𑀫 𑀅𑀭𑀺𑀬𑀫𑀕𑁆𑀕𑁄. ‘‘𑀔𑀦𑁆𑀥 𑀲𑀫𑀼𑀤𑀬𑀪𑀽𑀢𑀸’’𑀢𑀺 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸. ‘‘𑀅𑀯𑀺𑀚𑁆𑀚𑀸𑀦𑀺 𑀯𑀼𑀝𑀸𑀦𑀁’’𑀢𑀺 𑀅𑀯𑀺𑀚𑁆𑀚𑀸𑀬𑀦𑀻𑀯𑀸𑀭𑀺𑀢𑀸𑀦𑀁 𑀧𑀺𑀳𑀺𑀢𑀸𑀦𑀁. ‘‘𑀅𑀧𑁆𑀧𑀳𑀻𑀦 𑀪𑀯𑀸𑀪𑀺𑀮𑀸𑀲𑀸𑀦𑀁’’𑀢𑀺 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦 𑀪𑀯𑀧𑀢𑁆𑀣𑀦𑀸𑀦𑀁. 𑀅𑀧𑁆𑀧𑀳𑀻𑀦𑀪𑀯𑀢𑀡𑁆𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀺𑀩𑀦𑁆𑀥𑁄’’𑀢𑀺 𑀅𑀦𑁆𑀢𑀭𑀸𑀬𑁄. ‘‘𑀉𑀤𑀬𑀪𑀽𑀢𑀸𑀦𑀁’’𑀢𑀺 𑀯𑀟𑁆𑀠𑀺𑀪𑀽𑀢𑀸𑀦𑀁. ‘‘𑀅𑀯𑀲𑁆𑀲𑀬𑁄’’𑀢𑀺 𑀦𑀺𑀲𑁆𑀲𑀬𑁄. 𑀲𑀼𑀔𑀯𑁂𑀤𑀦𑀸 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀔𑀯𑁂𑀤𑀦𑀸𑀲𑀤𑀺𑀲𑁄’’𑀢𑀺𑀆𑀤𑀺. 𑀤𑁄𑀫𑀦𑀲𑁆𑀲𑀸𑀦𑀁 𑀧𑀦 𑀢𑀲𑁆𑀲𑀸 𑀧𑀘𑁆𑀘𑀬𑀪𑀸𑀯𑁄 𑀧𑀭𑀢𑁄 𑀧𑀭𑀺𑀬𑁂𑀝𑁆𑀞𑀺𑀢𑀡𑁆𑀳𑀸𑀬𑀁 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀧𑀺 𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑀲𑁆𑀲 𑀲𑀼𑀔𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀲𑀼𑀔𑀁 𑀯𑀺𑀬 𑀢𑀁 𑀧𑀢𑁆𑀣𑁂𑀢𑀻𑀢𑀺. 𑀲𑀫𑀼𑀤𑀸 𑀘𑀭𑀺𑀢𑁆𑀯𑀸 𑀧𑀭𑀺𑀘𑀬𑀺𑀢𑁆𑀯𑀸. ‘‘𑀢𑀡𑁆𑀳𑀸 𑀏𑀯𑀸’’𑀢𑀺 𑀓𑀸𑀫𑀢𑀡𑁆𑀳𑀸 𑀏𑀯. ‘‘𑀅𑀢𑁆𑀢𑀦𑀺 𑀘𑀸’’𑀢𑀺 𑀤𑀺𑀝𑁆𑀞𑀺𑀬𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑁂𑀲𑀽’’𑀢𑀺 𑀅𑀢𑁆𑀢 𑀚𑀻𑀯 𑀮𑁄𑀓𑀸𑀤𑀻𑀲𑀼 𑀤𑀺𑀝𑁆𑀞𑀺𑀬𑀸𑀕𑀳𑀺𑀢𑀸 𑀭𑀫𑁆𑀫𑀡𑁂𑀲𑀼. ‘‘𑀅𑀲𑁆𑀲𑀸𑀤𑀦 𑀔𑀫𑀦𑀭𑁄𑀘𑀦𑀪𑀽𑀢𑀸𑀬𑀸’’𑀢𑀺 𑀲𑀸𑀥𑀼𑀯𑀢𑀸𑀬𑀁 𑀫𑀫𑀤𑀲𑁆𑀲𑀦𑀦𑁆𑀢𑀺 𑀏𑀯𑀁 𑀭𑀚𑁆𑀚𑀦 𑀢𑀼𑀲𑁆𑀲𑀦 𑀓𑀦𑁆𑀢𑀺𑀪𑀽𑀢𑀸𑀬. ‘‘𑀉𑀧𑀸𑀤𑀸𑀦𑀻𑀬𑀲𑁆𑀲𑀸’’𑀢𑀺 𑀤𑀴𑁆𑀳𑀁 𑀕𑀳𑁂𑀢𑀩𑁆𑀩𑀲𑁆𑀲. ‘‘𑀅𑀢𑁆𑀣𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀸𑀤𑀺𑀓𑀲𑁆𑀲 𑀅𑀢𑁆𑀣𑀲𑁆𑀲. 𑀕𑀸𑀣𑀸𑀬𑀁.‘‘𑀪𑀯𑀁 𑀳𑁄𑀢𑀻’’𑀢𑀺 𑀪𑀯𑀦𑁆𑀢𑁄 𑀯𑀟𑁆𑀠𑀦𑁆𑀢𑁄 𑀳𑁄𑀢𑀺. ‘‘𑀧𑀭𑀸𑀪𑀯𑁄’’𑀢𑀺 𑀯𑀺𑀦𑀸𑀲𑀦𑁆𑀢𑁄.

‘‘𑀅𑀤𑁆𑀥𑀸𑀦𑀯𑀦𑁆𑀢𑁂 𑀥𑀫𑁆𑀫𑁂’’𑀢𑀺 𑀢𑁂𑀓𑀸𑀮𑀺𑀓𑀲𑀗𑁆𑀔𑀢 𑀥𑀫𑁆𑀫𑁂. 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. 𑀬𑀣𑀸 𑀉𑀧𑀸𑀤𑀸𑀦𑀁𑀢𑀺 𑀤𑀺𑀲𑁆𑀯𑀸 𑀉𑀧𑀸𑀤𑀸𑀭𑀽𑀧𑀁𑀢𑀺 𑀧𑀤𑁂 𑀆𑀤𑀸𑀲𑀤𑁆𑀤𑁄 𑀯𑀺𑀜𑁆𑀜𑀸𑀬𑀢𑀺. 𑀦 𑀉𑀧𑀼𑀩𑁆𑀩 𑀧𑀤𑀲𑀤𑁆𑀤𑁄. 𑀇𑀢𑀭𑀣𑀸 𑀉𑀧𑀸𑀤𑀸𑀦𑀦𑁆𑀢𑀺 𑀦𑀲𑀺𑀚𑁆𑀛𑀢𑀺. 𑀏𑀯𑀁 𑀅𑀤𑁆𑀥𑀸, 𑀅𑀤𑁆𑀥𑀸𑀦, 𑀧𑀤𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀅𑀤𑁆𑀥𑀸𑀦𑀁’’𑀢𑀺 𑀦𑀲𑀺𑀚𑁆𑀛𑀢𑀻𑀢𑀺. 𑀲𑀁𑀔𑀺𑀧𑀦𑁆𑀢𑀺 𑀯𑀻𑀲𑀢𑀸𑀓𑀸𑀭𑀸 𑀏𑀢𑁂𑀲𑀽𑀢𑀺 𑀲𑀗𑁆𑀔𑁂𑀧𑀸. 𑀲𑀗𑁆𑀕𑀳𑀸. ‘‘𑀯𑀝𑁆𑀝𑀥𑀫𑁆𑀫𑀸’’𑀢𑀺 𑀲𑀗𑁆𑀔𑀸𑀭𑀸𑀤𑀬𑁄 𑀥𑀫𑁆𑀫𑀸. ‘‘𑀏𑀢𑁆𑀣𑀸’’𑀢𑀺 𑀏𑀢𑀸𑀲𑀼 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀼. 𑀓𑀣𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀆𑀳 ‘‘𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸’’𑀢𑀺. ‘‘𑀧𑀢𑀺𑀝𑁆𑀞𑀸’’𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀸𑀦𑀺. ‘‘𑀧𑀪𑀯𑀸’’𑀢𑀺 𑀯𑀝𑁆𑀝𑀥𑀫𑁆𑀫𑀧𑀭𑀫𑁆𑀧𑀭𑀧𑁆𑀧𑀯𑀢𑁆𑀢𑀺𑀬𑀸 𑀫𑀽𑀮 𑀧𑀥𑀸𑀦 𑀓𑀸𑀭𑀡𑀸𑀦𑀺. 𑀢𑀢𑁆𑀣 𑀳𑁂𑀢𑀼 𑀘 𑀤𑁂𑀲𑁂𑀢𑀩𑁆𑀩𑁄 𑀳𑁄𑀢𑀺. 𑀇𑀢𑀭𑀣𑀸 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀤𑀺𑀝𑁆𑀞𑀺 𑀅𑀳𑁂𑀢𑀼𑀓 𑀤𑀺𑀝𑁆𑀞𑀻𑀦𑀁 𑀑𑀓𑀸𑀲𑁄 𑀲𑀺𑀬𑀸𑀢𑀺. 𑀨𑀮𑀜𑁆𑀘 𑀤𑁂𑀲𑁂𑀢𑀩𑁆𑀩𑀁 𑀳𑁄𑀢𑀺. 𑀇𑀢𑀭𑀣𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀑𑀓𑀸𑀲𑁄 𑀲𑀺𑀬𑀸𑀢𑀺. ‘‘𑀅𑀤𑁆𑀥𑀼𑀦𑁄’’𑀢𑀺 𑀤𑀻𑀖𑀓𑀸𑀮𑀲𑁆𑀲. ‘‘𑀦𑀺𑀯𑀢𑁆𑀢𑁂𑀢𑀻’’𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. ‘‘𑀅𑀳𑁂𑀢𑀽 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀧𑀼𑀩𑁆𑀩𑀳𑁂𑀢𑀼𑀭𑀳𑀺𑀢𑀸 𑀧𑀼𑀩𑁆𑀩𑀧𑀘𑁆𑀘𑀬𑀭𑀳𑀺𑀢𑀸 𑀳𑀼𑀢𑁆𑀯𑀸 𑀇𑀫𑁂𑀲𑀢𑁆𑀢𑀸 𑀧𑀯𑀢𑁆𑀢𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀤𑀻𑀳𑀺 𑀲𑀸𑀥𑁂𑀢𑀩𑁆𑀩𑁄 𑀦 𑀳𑁄𑀢𑀻’’𑀢𑀺 𑀪𑀯𑀧𑀭𑀫𑁆𑀧𑀭𑀸𑀲𑀼 𑀦𑀺𑀘𑁆𑀘𑁄 𑀳𑀼𑀢𑁆𑀯𑀸 𑀲𑀦𑁆𑀥𑀸𑀯𑀦𑁆𑀢𑀲𑁆𑀲 𑀅𑀯𑀺𑀚𑁆𑀚𑀸𑀤𑀻𑀳𑀺 𑀓𑀢𑁆𑀢𑀩𑁆𑀩 𑀓𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑁂𑀲𑀜𑁆𑀘𑀺 𑀦 𑀲𑀫𑁆𑀪𑀯𑀦𑁆𑀢𑀺𑀬𑁂𑀯𑀸’’𑀢𑀺 𑀅𑀦𑀸𑀕𑀸𑀫𑀻𑀦𑀁 𑀅𑀭𑀳𑀦𑁆𑀢𑀸𑀦𑀜𑁆𑀘 𑀦 𑀲𑀫𑁆𑀪𑀯𑀦𑁆𑀢𑀺𑀬𑁂𑀯. 𑀫𑀳𑀸𑀆𑀤𑀻𑀦𑀯𑀭𑀸𑀲𑀺𑀤𑀲𑁆𑀲𑀦𑀢𑁆𑀣𑀁 𑀲𑁄𑀓𑀸𑀤𑀺𑀯𑀘𑀦𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀢𑁂𑀲𑀁’’𑀢𑀺 𑀅𑀜𑁆𑀜𑁂𑀲𑀁 𑀧𑀘𑁆𑀘𑀬𑀸𑀦𑀁. ‘‘𑀮𑀤𑁆𑀥𑀸’’𑀢𑀺 𑀅𑀢𑁆𑀣𑀢𑁄 𑀮𑀤𑁆𑀥𑀸. ‘‘𑀢𑀤𑀯𑀺𑀦𑀸𑀪𑀸𑀯𑀺𑀪𑀸𑀯𑀮𑀓𑁆𑀔𑀡𑁂𑀦𑀸’’𑀢𑀺 𑀏𑀢𑁆𑀣 𑀢𑁂𑀦 𑀢𑁂𑀦 𑀧𑀘𑁆𑀘𑀬𑁂𑀦 𑀅𑀯𑀺𑀦𑀸𑀪𑀸𑀯𑀻𑀦𑀁 𑀪𑀸𑀯𑁄, 𑀲𑁄 𑀏𑀯 𑀮𑀓𑁆𑀔𑀡𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀧𑀭𑀢𑁆𑀣 𑀧𑀻’’𑀢𑀺 𑀇𑀢𑁄 𑀧𑀭𑁂𑀲𑀼 𑀢𑀡𑁆𑀳𑀼𑀧𑀸𑀤𑀸𑀦 𑀪𑀯𑀕𑁆𑀕𑀳𑀡𑁂𑀦𑀸𑀢𑀺𑀆𑀤𑀻𑀲𑀼𑀧𑀺. ‘‘𑀆𑀤𑀺𑀢𑁄’’𑀢𑀺𑀆𑀤𑀺𑀫𑁆𑀳𑀺. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀓𑀺𑀮𑁂𑀲𑀪𑀸𑀯𑀲𑀸𑀫𑀜𑁆𑀜𑀢𑁄’’𑀢𑀺 𑀓𑀺𑀮𑁂𑀲𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸 𑀲𑀤𑀺𑀲𑀢𑁆𑀢𑀸. ‘‘𑀮𑀓𑁆𑀔𑀺𑀢𑀩𑁆𑀩 𑀥𑀫𑁆𑀫𑁂𑀳𑀻’’𑀢𑀺 𑀯𑀺𑀜𑁆𑀜𑀸𑀡𑀸𑀤𑀻𑀳𑀺. ‘‘𑀧𑀣𑀫𑁂𑀦 𑀤𑀼𑀢𑀻𑀬𑀲𑁆𑀲𑀸’’𑀢𑀺 𑀧𑀣𑀫𑀲𑀗𑁆𑀔𑁂𑀧𑁂𑀦 𑀲𑀤𑁆𑀥𑀺𑀁 𑀤𑀼𑀢𑀻𑀬𑀲𑁆𑀲 𑀲𑀗𑁆𑀔𑁂𑀧𑀲𑁆𑀲 𑀏𑀓𑀸 𑀲𑀦𑁆𑀥𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀮𑁄𑀓𑀲𑁆𑀲 𑀧𑀸𑀓𑀝 𑀯𑁄𑀳𑀸𑀭𑁂𑀦𑀸’’𑀢𑀺 𑀓𑀺𑀮𑁂𑀲𑀥𑀫𑁆𑀫𑀸 𑀓𑀫𑁆𑀫𑀥𑀫𑁆𑀫𑀸 𑀘 𑀮𑁄𑀓𑁂 𑀳𑁂𑀢𑀽𑀢𑀺 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀯𑀺𑀧𑀸𑀓𑀥𑀫𑁆𑀫𑀸 𑀧𑀦 𑀨𑀮𑀦𑁆𑀢𑀺 𑀧𑀸𑀓𑀝𑀸. 𑀏𑀯𑀁 𑀮𑁄𑀓𑁂 𑀧𑀸𑀓𑀝 𑀯𑁄𑀳𑀸𑀭𑁂𑀦. 𑀇𑀥 𑀧𑀦 𑀓𑀺𑀮𑁂𑀲𑀥𑀫𑁆𑀫𑀓𑀫𑁆𑀫𑀥𑀫𑁆𑀫𑀸 𑀯𑀸 𑀳𑁄𑀦𑁆𑀢𑀼, 𑀯𑀺𑀧𑀸𑀓𑀥𑀫𑁆𑀫𑀸 𑀯𑀸, 𑀬𑁄 𑀬𑁄 𑀧𑀘𑁆𑀘𑀬𑀧𑀓𑁆𑀔𑁂 𑀞𑀺𑀢𑁄, 𑀲𑁄 𑀲𑁄 𑀳𑁂𑀢𑀽𑀢𑀺𑀧𑀺 𑀯𑀢𑁆𑀢𑀩𑁆𑀩𑁄𑀬𑁂𑀯. 𑀬𑁄 𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀧𑀓𑁆𑀔𑁂 𑀞𑀺𑀢𑁄, 𑀲𑁄 𑀲𑁄 𑀨𑀮𑀦𑁆𑀢𑀺𑀤𑀲𑁆𑀲𑁂𑀦𑁆𑀢𑁄 ‘‘𑀳𑁂𑀢𑀼𑀨𑀮𑀲𑀤𑁆𑀤𑀸𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸 𑀧𑀸𑀞𑁂. ‘‘𑀲𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺 𑀲𑀁𑀯𑀺𑀤𑀳𑀦𑁆𑀢𑀲𑁆𑀲. ‘‘𑀆𑀬𑀽𑀳𑀦 𑀲𑀗𑁆𑀔𑀸𑀭𑀸 𑀦𑀸𑀫𑀸’’𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀫𑀼𑀘𑁆𑀘𑀬𑀦𑀲𑀗𑁆𑀔𑀸𑀭𑀸 𑀦𑀸𑀫. ‘‘𑀤𑀓𑁆𑀔𑀺𑀡𑀁’’𑀢𑀺 𑀤𑀸𑀦𑀯𑀢𑁆𑀣𑀼𑀁. 𑀤𑀓𑁆𑀔𑀺𑀡𑁄𑀤𑀓𑀁 𑀯𑀸. ‘‘𑀏𑀢𑁆𑀣 𑀘𑀸’’𑀢𑀺 𑀇𑀫𑀲𑁆𑀫𑀺𑀁 𑀢𑀢𑀻𑀬𑀧𑀜𑁆𑀘𑀓𑁂 𑀘. ‘‘𑀯𑀼𑀢𑁆𑀢𑀦𑀬𑁂𑀦𑁂 𑀯𑀸’’𑀢𑀺 𑀧𑀣𑀫𑀧𑀜𑁆𑀘𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀘𑁂𑀢𑀦𑀸 𑀪𑀯𑁄 𑀦𑀸𑀫𑀸’’𑀢𑀺 𑀇𑀤𑀁 𑀉𑀤𑁆𑀤𑁂𑀲𑀧𑀸𑀴𑀺𑀬𑀁 𑀬𑀣𑀸𑀤𑀺𑀝𑁆𑀞𑀧𑀸𑀞𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀣𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀘𑁂𑀢𑀦𑀸 𑀲𑀗𑁆𑀔𑀸𑀭𑀸 𑀦𑀸𑀫𑀸𑀢𑀺 𑀇𑀤𑀜𑁆𑀘. 𑀇𑀥 𑀧𑀦 𑀧𑀼𑀩𑁆𑀩𑁂𑀬𑁂𑀯 𑀤𑁆𑀯𑀻𑀲𑀼𑀳𑁂𑀢𑀼𑀧𑀜𑁆𑀘𑀓𑁂𑀲𑀼 𑀤𑁆𑀯𑀺𑀦𑁆𑀦𑀁 𑀲𑀗𑁆𑀔𑀸𑀭 𑀓𑀫𑁆𑀫𑀪𑀯𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁆𑀯𑀺𑀦𑁆𑀦𑀁 𑀲𑀗𑁆𑀔𑀸𑀭 𑀓𑀫𑁆𑀫𑀪𑀯𑀸𑀦𑀁 𑀯𑀺𑀲𑁂𑀲𑁄 𑀬𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀢𑀁 𑀇𑀥 𑀦 𑀬𑀼𑀚𑁆𑀚𑀢𑀻’’𑀢𑀺. ‘‘𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀧𑀼𑀩𑁆𑀩𑁂𑀬𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸. ‘‘𑀏𑀢𑀁’’𑀢𑀺 𑀯𑀺𑀪𑀸𑀯𑀦𑀺 𑀯𑀘𑀦𑀁. ‘‘𑀥𑀫𑁆𑀫𑀯𑀺𑀪𑀸𑀕𑀭𑀓𑁆𑀔𑀡𑀢𑁆𑀣𑀁’’𑀢𑀺 𑀯𑀺𑀪𑀗𑁆𑀕𑁂 𑀪𑀯𑀧𑀤𑁂 𑀉𑀧𑀧𑀢𑁆𑀢𑀺𑀪𑀯𑀲𑁆𑀲𑀧𑀺 𑀯𑀺𑀪𑀢𑁆𑀢𑀢𑁆𑀢𑀸 𑀏𑀯𑀁 𑀯𑀺𑀪𑀢𑁆𑀢𑀲𑁆𑀲 𑀥𑀫𑁆𑀫𑀯𑀺𑀪𑀸𑀕𑀲𑁆𑀲 𑀭𑀓𑁆𑀔𑀡𑀢𑁆𑀣𑀁. 𑀨𑀮𑀧𑀜𑁆𑀘𑀓𑀢𑁄 𑀅𑀦𑀜𑁆𑀜𑀁𑀧𑀺 𑀉𑀧𑀧𑀢𑁆𑀢𑀺𑀪𑀯𑀁 𑀅𑀜𑁆𑀜𑀁𑀯𑀺𑀬 𑀓𑀢𑁆𑀯𑀸 ‘𑀉𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑁄 𑀪𑀯𑁂𑀓𑀤𑁂𑀲𑁄’𑀢𑀺 𑀯𑀼𑀢𑁆𑀢𑀁. 𑀲𑁄 𑀘 𑀉𑀧𑀧𑀢𑁆𑀢𑀺𑀪𑀯𑁄 𑀦𑀸𑀫 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀽𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀘𑀢𑀼𑀢𑁆𑀣𑁂 𑀨𑀮𑀧𑀜𑁆𑀘𑀓𑁂 𑀏𑀯 𑀲𑀗𑁆𑀕𑀳𑀺𑀢𑁄. 𑀢𑀲𑁆𑀫𑀸 𑀢𑁂𑀦 𑀉𑀧𑀧𑀢𑁆𑀢𑀺𑀪𑀯𑀲𑀤𑁆𑀤𑁂𑀦 𑀘𑀢𑀼𑀢𑁆𑀣 𑀧𑀜𑁆𑀘𑀓𑀫𑁂𑀯 𑀕𑀳𑀺𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀇𑀢𑀭𑀣𑀸 𑀤𑁆𑀯𑁂 𑀨𑀮𑀧𑀜𑁆𑀘𑀓𑀸𑀦𑀺 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀯𑀼𑀢𑁆𑀢𑁂 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀏𑀯𑀜𑁆𑀘𑀲𑀢𑀺 𑀅𑀯𑀲𑁂𑀲𑀸 𑀘𑀸𑀢𑀺 𑀏𑀢𑁆𑀣 𑀤𑀼𑀢𑀻𑀬𑀨𑀮𑀧𑀜𑁆𑀘𑀓𑀫𑁂𑀯 𑀅𑀯𑀲𑀺𑀝𑁆𑀞𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀯𑀺𑀚𑁆𑀚𑀸 𑀦𑀸𑀫 𑀫𑁄𑀳𑁄, 𑀲𑁄 𑀘 𑀅𑀓𑀼𑀲𑀮 𑀫𑀽𑀮’’𑀦𑁆𑀢𑀺𑀆𑀤𑀺 𑀅𑀪𑀺𑀥𑀫𑁆𑀫𑁂 𑀫𑀽𑀮𑀬𑀫𑀓𑁂 𑀫𑀽𑀮𑀦𑀸𑀫𑁂𑀦 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀤𑁆𑀯𑀻𑀲𑀼𑀧𑀦𑀪𑀯 𑀘𑀓𑁆𑀓𑁂𑀲𑀼 𑀧𑀼𑀭𑀺𑀫𑀘𑀓𑁆𑀓𑁂 𑀅𑀯𑀺𑀚𑁆𑀚𑀸 𑀆𑀤𑀺 𑀳𑁄𑀢𑀺. 𑀧𑀘𑁆𑀙𑀺𑀫𑀘𑀓𑁆𑀓𑁂 𑀢𑀡𑁆𑀳𑀸. 𑀆𑀤𑀺 𑀘 𑀦𑀸𑀫 𑀫𑀽𑀮𑀦𑁆𑀢𑀺 𑀘 𑀲𑀻𑀲𑀦𑁆𑀢𑀺 𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.‘‘𑀆𑀕𑀫𑀦𑀲𑀫𑁆𑀪𑀸𑀭𑁂𑀲𑀽’’𑀢𑀺 𑀅𑀢𑀻𑀢𑀪𑀯𑀢𑁄 𑀇𑀫𑀁𑀪𑀯𑀁 𑀆𑀕𑀫𑀦𑀲𑀫𑁆𑀪𑀸𑀭𑁂𑀲𑀼. 𑀢𑀡𑁆𑀳𑀸 𑀏𑀯 𑀲𑀻𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. ‘‘𑀢𑁂𑀲𑀁 𑀅𑀦𑁆𑀢𑀭𑁂’’𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀅𑀦𑁆𑀢𑀭𑁂. 𑀢𑀡𑁆𑀳𑀸𑀬 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀅𑀯𑀺𑀚𑁆𑀚𑀸𑀬 𑀲𑀢𑀺, 𑀢𑀡𑁆𑀳𑀸 𑀦𑀸𑀫 𑀏𑀓𑀦𑁆𑀢𑁂𑀦 𑀲𑀫𑁆𑀪𑀯𑀢𑀺𑀬𑁂𑀯. 𑀲𑀸 𑀘 𑀲𑀗𑁆𑀔𑀸𑀭𑀸𑀦𑀁 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑀸 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺. 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀯𑀼𑀢𑁆𑀢𑀁. 𑀧𑀝𑀺𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀦𑀸𑀫 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. ‘‘𑀚𑀭𑀸𑀫𑀭𑀡𑀫𑀼𑀘𑁆𑀙𑀬𑀸𑀢𑀺𑀆𑀤𑀺 𑀦𑀯𑀢𑁆𑀢𑀩𑁆𑀩𑀁 𑀲𑀺𑀬𑀸’’𑀢𑀺 𑀚𑀭𑀸𑀫𑀭𑀡𑀫𑀼𑀘𑁆𑀙𑀸𑀬𑀸𑀢𑀺𑀆𑀤𑀺𑀯𑀘𑀦𑀁 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀲𑀫𑁆𑀩𑀦𑁆𑀥 𑀯𑀘𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀉𑀧𑀭𑀺𑀯𑀝𑁆𑀝𑀫𑀽𑀮 𑀥𑀫𑁆𑀫𑀧𑁆𑀧𑀝𑀺𑀧𑀸𑀤𑀓𑀸𑀦𑀁’’𑀢𑀺 𑀉𑀧𑀭𑀺 𑀤𑀼𑀢𑀺𑀬𑀸𑀦𑀸𑀕𑀢𑀪𑀸𑀯𑀸𑀤𑀻𑀲𑀼 𑀅𑀯𑀺𑀚𑁆𑀚𑀸𑀢𑀡𑁆𑀳𑀸 𑀲𑀗𑁆𑀔𑀸𑀢𑀸𑀦𑀁 𑀯𑀝𑁆𑀝𑀫𑀽𑀮𑀥𑀫𑁆𑀫𑀸𑀦𑀁 𑀦𑀺𑀬𑁄𑀚𑀓𑀸𑀦𑀁. ‘‘𑀢𑁂 𑀧𑀻’’𑀢𑀺 𑀲𑁄𑀓𑀸𑀤𑀬𑁄 𑀤𑀼𑀓𑁆𑀔𑀥𑀫𑁆𑀫𑀸𑀧𑀺. ‘‘𑀆𑀲𑀯𑀲𑀫𑁆𑀪𑀽𑀢𑀸’’𑀢𑀺 𑀆𑀲𑀯𑁂𑀳𑀺 𑀲𑀫𑁆𑀪𑀽𑀢𑀸 𑀲𑀜𑁆𑀚𑀸𑀢𑀸. ‘‘𑀢𑁂𑀲𑀁’’𑀢𑀺 𑀲𑁄𑀓𑀸𑀤𑀻𑀦𑀁 𑀤𑀼𑀓𑁆𑀔𑀥𑀫𑁆𑀫𑀸𑀦𑀁. ‘‘𑀚𑀭𑀸𑀫𑀭𑀡𑀗𑁆𑀕𑁂 𑀕𑀳𑀡𑀁’’𑀢𑀺 𑀤𑁆𑀯𑀸𑀤𑀲𑀲𑀼 𑀅𑀗𑁆𑀕𑁂𑀲𑀼 𑀚𑀭𑀸𑀫𑀭𑀡𑀗𑁆𑀕𑁂 𑀲𑀗𑁆𑀕𑀳𑀡𑀁. ‘‘𑀧𑀯𑀟𑁆𑀠𑀢𑀻’’𑀢𑀺 𑀪𑀼𑀲𑀁 𑀯𑀟𑁆𑀠𑀢𑀺. ‘‘𑀆𑀲𑀯𑀲𑀫𑀼𑀤𑀬𑀸’’𑀢𑀺 𑀆𑀲𑀯𑀲𑀫𑀼𑀧𑁆𑀧𑀸𑀤𑀸. ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 𑀅𑀯𑀺𑀚𑁆𑀚𑀸𑀲𑀫𑀼𑀧𑁆𑀧𑀸𑀤𑁄. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀲𑀗𑁆𑀔𑀸𑀭𑀸𑀢𑀻’’𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. ‘‘𑀦𑀸𑀦𑀸𑀩𑁆𑀬𑀲𑀦 𑀨𑀼𑀝𑁆𑀞𑀲𑁆𑀲𑀸’’𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀦𑀸𑀦𑀸𑀩𑁆𑀬𑀲𑀦𑁂𑀳𑀺 𑀨𑀼𑀝𑁆𑀞𑀲𑁆𑀲, 𑀯𑀺𑀳𑀺𑀁𑀲𑀺𑀢𑀲𑁆𑀲. ‘‘𑀬𑀢𑁄’’𑀢𑀺 𑀬𑀁 𑀓𑀸𑀭𑀡𑀸, 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀯𑀟𑁆𑀠𑀦𑀓𑀸𑀭𑀡𑀸. ‘‘𑀯𑀝𑁆𑀝𑀁’’𑀢𑀺 𑀲𑀗𑁆𑀔𑀸𑀭𑀸𑀤𑀺𑀓𑀁 𑀪𑀯𑀘𑀓𑁆𑀓𑀁. 𑀲𑀁𑀫𑀼𑀬𑁆𑀳𑀦𑀁 𑀲𑀫𑁆𑀫𑁄𑀳𑁄. 𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀝𑁆𑀞𑀺. 𑀯𑀺𑀧𑀘𑁆𑀘𑀢𑀻𑀢𑀺 𑀯𑀺𑀧𑀸𑀓𑁄. 𑀯𑀺𑀧𑀸𑀓𑁄 𑀏𑀯 𑀯𑁂𑀧𑀓𑁆𑀓𑀁. 𑀲𑀫𑁆𑀫𑁄𑀳𑁄 𑀯𑁂𑀧𑀓𑁆𑀓𑀁 𑀅𑀲𑁆𑀲𑀸𑀢𑀺 𑀲𑀫𑁆𑀫𑁄𑀳𑀯𑁂𑀧𑀓𑁆𑀓𑀁. 𑀢𑀣𑀸 𑀧𑀭𑀺𑀬𑁂𑀝𑁆𑀞𑀺𑀯𑁂 𑀧𑀓𑁆𑀓𑀜𑁆𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀢𑀤𑀼𑀪𑀬𑀁’’𑀢𑀺𑀆𑀤𑀺𑀦𑀸. 𑀢𑀤𑀼𑀪𑀬𑀁 𑀯𑀺𑀧𑀸𑀓𑀁 𑀏𑀢𑀲𑁆𑀲𑀸𑀢𑀺 𑀓𑀢𑁆𑀯𑀸 𑀤𑀼𑀓𑁆𑀔𑀁 𑀲𑀫𑁆𑀫𑁄𑀳𑀯𑁂𑀧𑀓𑁆𑀓𑀦𑁆𑀢𑀺 𑀘 𑀧𑀭𑀺𑀬𑁂𑀝𑁆𑀞𑀺𑀯𑁂𑀧𑀓𑁆𑀓𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀅𑀧𑀺 𑀘, 𑀲𑀫𑁆𑀫𑁄𑀳𑀁 𑀯𑀺𑀧𑀸𑀘𑁂𑀢𑀺 𑀲𑀜𑁆𑀚𑀦𑁂𑀢𑀻𑀢𑀺 𑀲𑀫𑁆𑀫𑁄𑀳 𑀯𑁂𑀧𑀓𑁆𑀓𑀁. 𑀏𑀯𑀁 𑀧𑀭𑀺𑀬𑁂𑀝𑁆𑀞𑀺𑀯𑁂𑀧𑀓𑁆𑀓𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀓𑀺𑀘𑁆𑀙𑀁’’𑀢𑀺 𑀓𑀲𑀺𑀭𑀁 𑀤𑀼𑀓𑁆𑀔𑀁 𑀆𑀧𑀦𑁆𑀦𑁄. ‘‘𑀫𑀺𑀬𑁆𑀬𑀢𑀻’’𑀢𑀺 𑀫𑀭𑀢𑀺. ‘‘𑀘 𑀯𑀢𑀻’’𑀢𑀺 𑀲𑀗𑁆𑀓𑀫𑀢𑀺. ‘‘𑀉𑀧𑀧𑀚𑁆𑀚𑀢𑀻’’𑀢𑀺 𑀪𑀯𑀦𑁆𑀢𑀭𑀁 𑀉𑀧𑁂𑀢𑀺. ‘‘𑀅𑀣 𑀘 𑀧𑀦𑀸’’𑀢𑀺 𑀏𑀯𑀁𑀪𑀽𑀢𑀲𑁆𑀲 𑀲𑀢𑁄. ‘‘𑀚𑀭𑀸𑀫𑀭𑀡𑀲𑁆𑀲𑀸’’𑀢𑀺 𑀚𑀭𑀸𑀫𑀭𑀡 𑀲𑀗𑁆𑀔𑀸𑀢𑀲𑁆𑀲 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀺𑀲𑁆𑀲𑀭𑀡𑀁’’𑀢𑀺 𑀦𑀺𑀕𑁆𑀕𑀫𑀦𑀁. ‘‘𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺 𑀅𑀬𑀁 𑀮𑁄𑀓𑁄 𑀦𑀧𑁆𑀧𑀚𑀸𑀦𑀸𑀢𑀺. ‘‘𑀆𑀕𑀢𑀺𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀆𑀕𑀫𑀦𑁂𑀦. ‘‘𑀕𑀢𑀺𑀬𑀸 𑀘𑀸’’𑀢𑀺 𑀅𑀦𑀸𑀕𑀢𑀪𑀯𑁂 𑀚𑀸𑀢𑀺𑀧𑀸𑀢𑀼𑀩𑁆𑀪𑀸𑀯𑀯𑀲𑁂𑀦 𑀕𑀫𑀦𑁂𑀦 𑀘. 𑀆𑀤𑀺𑀲𑀗𑁆𑀔𑀸𑀢𑁄 𑀧𑀼𑀩𑁆𑀩𑀧𑀭𑀺𑀬𑀦𑁆𑀢𑁄 𑀬𑀲𑁆𑀲 𑀅𑀢𑁆𑀣𑀻𑀢𑀺𑀆𑀤𑀺𑀫𑀦𑁆𑀢𑀁. 𑀦 𑀆𑀤𑀺𑀫𑀦𑁆𑀢𑀁 𑀅𑀦𑀸𑀤𑀺𑀫𑀦𑁆𑀢𑀁. ‘‘𑀯𑀝𑁆𑀝𑀧𑁆𑀧𑀯𑀢𑁆𑀢𑀲𑁆𑀲𑀸’’𑀢𑀺 𑀢𑀺𑀯𑀺𑀥𑀯𑀝𑁆𑀝𑀲𑀗𑁆𑀔𑀸𑀢𑀲𑁆𑀲 𑀧𑀩𑀦𑁆𑀥𑀧𑁆𑀧𑀯𑀢𑁆𑀢𑀲𑁆𑀲. 𑀚𑀸𑀢𑀺𑀬𑀸 𑀯𑀼𑀢𑁆𑀢𑀸𑀬 𑀲𑀩𑁆𑀩𑀸𑀦𑀺 𑀢𑀲𑁆𑀲𑀸 𑀦𑀺𑀤𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺 𑀏𑀯 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 ‘‘𑀚𑀸𑀢𑀺𑀬𑀸 𑀏𑀯 𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀇𑀘𑁆𑀘𑁂𑀯𑀁’’𑀢𑀺 𑀇𑀢𑀺 𑀏𑀯𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀝𑁆𑀞𑀧𑁂𑀲𑀺 𑀫𑀳𑀸𑀫𑀼𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀘𑀭𑀺𑀬 𑀯𑀸𑀤𑁂𑀧𑀦 ‘‘𑀇𑀘𑁆𑀘𑁂𑀯𑀁’’𑀢𑀺 𑀚𑀭𑀸𑀫𑀭𑀡 𑀫𑀼𑀘𑁆𑀙𑀸𑀬𑀸𑀢𑀺𑀆𑀤𑀺𑀦𑀸𑀦𑀬𑁂𑀦. 𑀆𑀩𑀦𑁆𑀥𑀁 𑀅𑀦𑀸𑀤𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀧𑀺 𑀢𑀫𑁂𑀯 𑀲𑀫𑁆𑀩𑀦𑁆𑀥𑀁 𑀕𑀳𑁂𑀢𑁆𑀯𑀸 𑀬𑁄𑀚𑁂𑀢𑀺 ‘‘𑀇𑀘𑁆𑀘𑁂𑀯𑀁 𑀆𑀩𑀦𑁆𑀥𑀦𑁆𑀢𑀺. 𑀮. 𑀧𑀼𑀦𑀧𑁆𑀧𑀼𑀦𑀁 𑀆𑀩𑀦𑁆𑀥𑀁’’𑀢𑀺. 𑀅𑀯𑀺𑀚𑁆𑀚𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀲𑀸 𑀲𑀬𑀁 𑀅𑀳𑁂𑀢𑀼 𑀅𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀯𑀝𑁆𑀝𑀲𑁆𑀲 𑀆𑀤𑀺𑀧𑀘𑁆𑀘𑀬𑀪𑀽𑀢𑀸 𑀳𑁄𑀢𑀻𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀢𑀺 ‘‘𑀯𑀝𑁆𑀝𑀲𑁆𑀲𑀸’’𑀢𑀺𑀆𑀤𑀺𑀦𑀸. ‘‘𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀽𑀢𑀢𑁆𑀢𑀸’’𑀢𑀺 𑀯𑀝𑁆𑀝𑀲𑁆𑀲 𑀆𑀤𑀺𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀧𑀦 𑀧𑀯𑀢𑁆𑀢𑀺 𑀦𑀺𑀯𑀢𑁆𑀢𑀺𑀬𑁄 𑀅𑀢𑁆𑀣𑀺. 𑀚𑀸𑀦𑀦𑁆𑀢𑁂𑀳𑀺 𑀢𑀸𑀲𑀁 𑀧𑀓𑀸𑀲𑀦𑀢𑁆𑀣𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀦𑀸𑀫 𑀯𑀝𑁆𑀝𑀓𑀣𑀸 𑀏𑀓𑀦𑁆𑀢𑁂𑀦 𑀓𑀣𑁂𑀢𑀩𑁆𑀩𑀸 𑀳𑁄𑀢𑀺. 𑀓𑀣𑁂𑀦𑁆𑀢𑁂𑀳𑀺 𑀘 𑀯𑀝𑁆𑀝𑀥𑀫𑁆𑀫𑀸𑀦𑀁 𑀫𑀚𑁆𑀛𑁂 𑀓𑀢𑀫𑀲𑁆𑀲 𑀥𑀫𑁆𑀫𑀲𑁆𑀲 𑀓𑀺𑀘𑁆𑀘𑀁 𑀯𑀝𑁆𑀝𑀧𑁆𑀧𑀯𑀢𑁆𑀢𑀢𑁆𑀣𑀸𑀬 𑀧𑀥𑀸𑀦𑀢𑀭𑀁 𑀳𑁄𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀁 𑀳𑁄𑀢𑀺. 𑀢𑀤𑀸 𑀓𑀺𑀘𑁆𑀘𑀯𑀲𑁂𑀦 𑀧𑀥𑀸𑀦𑀢𑀭𑀁 𑀏𑀓𑀁 𑀥𑀫𑁆𑀫𑀁 𑀫𑀽𑀮𑀁 𑀲𑀻𑀲𑀁 𑀓𑀢𑁆𑀯𑀸 𑀯𑀝𑁆𑀝𑀓𑀣𑀸 𑀓𑀣𑁂𑀢𑀩𑁆𑀩𑀸𑀢𑀺. 𑀇𑀤𑀁 𑀯𑀝𑁆𑀝𑀓𑀣𑀸𑀬 𑀲𑀻𑀲𑀁 𑀦𑀸𑀫. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀦𑀸𑀫 𑀫𑁄𑀳𑁄. 𑀲𑁄 𑀘 𑀫𑀼𑀬𑁆𑀳𑀦𑀓𑀺𑀭𑀺𑀬𑀸. 𑀅𑀦𑁆𑀥𑀪𑀸𑀯𑀓𑀭𑀡𑀜𑁆𑀘𑀲𑁆𑀲 𑀓𑀺𑀘𑁆𑀘𑀁. 𑀦 𑀘 𑀧𑀜𑁆𑀜𑀸 𑀘𑀓𑁆𑀔𑀼𑀲𑁆𑀲 𑀅𑀦𑁆𑀥𑀪𑀸𑀯𑀓𑀭𑀡 𑀲𑀤𑀺𑀲𑀁 𑀅𑀜𑁆𑀜𑀁 𑀯𑀝𑁆𑀝𑀲𑁆𑀲 𑀧𑀯𑀢𑁆𑀢𑀢𑁆𑀣𑀸𑀬 𑀧𑀥𑀸𑀦𑀓𑀺𑀘𑁆𑀘𑀁 𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀏𑀯𑁂𑀢𑁆𑀣 𑀲𑀩𑁆𑀩𑀧𑁆𑀧𑀥𑀸𑀦 𑀓𑀺𑀘𑁆𑀘𑀢𑁆𑀢𑀸 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀽𑀢𑀸 𑀳𑁄𑀢𑀺. 𑀏𑀯𑀁 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀽𑀢𑀢𑁆𑀢𑀸 𑀲𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸𑀢𑀺. ‘‘𑀅𑀦𑀸𑀤𑀺𑀓𑀪𑀸𑀯𑁄 𑀏𑀯 𑀤𑀲𑁆𑀲𑀺𑀢𑁄’’𑀢𑀺 𑀅𑀦𑀸𑀤𑀺𑀓𑀪𑀸𑀯𑁄 𑀤𑀲𑁆𑀲𑀺𑀢𑁄 𑀏𑀯. 𑀦𑁄 𑀦 𑀤𑀲𑁆𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀏𑀢𑀁 𑀅𑀢𑁆𑀣𑀚𑀸𑀢𑀁 𑀧𑀘𑁆𑀘𑀓𑁆𑀔𑀢𑁄 𑀲𑀺𑀤𑁆𑀥𑀁. ‘‘𑀇𑀥𑀸’’𑀢𑀺 𑀇𑀫𑀲𑁆𑀫𑀺𑀁𑀪𑀯𑁂. ‘‘𑀢𑀲𑁆𑀲𑀸’’𑀢𑀺 𑀅𑀢𑀻𑀢 𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀬 𑀅𑀯𑀺𑀚𑁆𑀚𑀸𑀬. ‘‘𑀅𑀜𑁆𑀜𑀸𑀬 𑀅𑀯𑀺𑀚𑁆𑀚𑀸𑀬 𑀏𑀯𑀸’’𑀢𑀺 𑀅𑀢𑀻𑀢𑀪𑀯𑀢𑁄𑀧𑀺 𑀧𑀼𑀭𑀺𑀫𑀪𑀯𑁂 𑀲𑀺𑀤𑁆𑀥𑀸𑀬 𑀅𑀜𑁆𑀜𑀸𑀬 𑀅𑀯𑀺𑀚𑁆𑀚𑀸𑀬 𑀏𑀯. ‘‘𑀢𑀲𑁆𑀲𑀸𑀧𑀻’’𑀢𑀺 𑀧𑀼𑀭𑀺𑀫𑀢𑀭𑀪𑀯𑁂 𑀅𑀯𑀺𑀚𑁆𑀚𑀸𑀬𑀧𑀺. ‘‘𑀅𑀢𑁆𑀢𑀪𑀸𑀯𑁄’’𑀢𑀺 𑀧𑀼𑀭𑀺𑀫𑀢𑀭𑁄 𑀅𑀢𑁆𑀢𑀪𑀸𑀯𑁄. ‘‘𑀧𑀥𑀸𑀦 𑀧𑀘𑁆𑀘𑀬𑀪𑀽𑀢𑀢𑁆𑀢𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀅𑀦𑁆𑀥𑀪𑀸𑀯𑀓𑀭𑀡 𑀓𑀺𑀘𑁆𑀘𑀢𑁆𑀢𑀸 𑀯𑀝𑁆𑀝𑀧𑁆𑀧𑀯𑀢𑁆𑀢𑀺𑀬𑀸 𑀧𑀥𑀸𑀦 𑀧𑀘𑁆𑀘𑀬𑀪𑀽𑀢𑀸 𑀳𑁄𑀢𑀺. 𑀏𑀯𑀁 𑀧𑀥𑀸𑀦𑀧𑀘𑁆𑀘𑀬𑀪𑀽𑀢𑀢𑁆𑀢𑀸. ‘‘𑀢𑀲𑁆𑀲 𑀢𑀲𑁆𑀲𑀸𑀢𑀺 𑀦𑀺𑀝𑁆𑀞𑀸𑀦𑀫𑁂𑀯 𑀦 𑀧𑀜𑁆𑀜𑀸𑀬𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑁄 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀲𑀧𑀺 𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑁄 𑀯𑀢𑁆𑀢𑀩𑁆𑀩𑁄𑀢𑀺 𑀏𑀯𑀁 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀁𑀧𑀺 𑀦𑀺𑀝𑁆𑀞𑀸𑀦𑀫𑁂𑀯 𑀦 𑀧𑀜𑁆𑀜𑀸𑀬𑁂𑀬𑁆𑀬. ‘‘𑀯𑀼𑀢𑁆𑀢𑁄𑀬𑁂𑀯𑀸’’𑀢𑀺 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄𑀬𑁂𑀯. ‘‘𑀧𑀜𑁆𑀘𑀦𑀻𑀯𑀭𑀡𑀸𑀢𑀺𑀲𑁆𑀲𑀯𑀘𑀦𑀻𑀬𑀁’’𑀢𑀺 𑀧𑀜𑁆𑀘𑀦𑀻𑀯𑀭𑀡 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀬 𑀆𑀳𑀸𑀭𑁄𑀢𑀺 𑀯𑀘𑀦𑀻𑀬𑀁 𑀪𑀯𑁂𑀬𑁆𑀬. 𑀢𑀢𑁆𑀣 ‘‘𑀆𑀳𑀸𑀭𑁄’’𑀢𑀺 𑀩𑀮𑀯𑀧𑀘𑁆𑀘𑀬𑁄 𑀯𑀼𑀘𑁆𑀘𑀢𑀻𑀢𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁭. 𑀧𑀝𑁆𑀞𑀸𑀦𑀦𑀬𑁂. ‘‘𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸’’𑀢𑀺 𑀏𑀢𑁆𑀣 𑀮𑁄𑀪𑁄 𑀳𑁂𑀢𑀼𑀚𑀸𑀢𑀺𑀓𑀢𑁆𑀢𑀸 𑀳𑁂𑀢𑀼 𑀘 𑀳𑁄𑀢𑀺. 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀸𑀤𑀺 𑀧𑀘𑁆𑀘𑀬𑁂𑀦 𑀅𑀜𑁆𑀜𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀘 𑀳𑁄𑀢𑀻𑀢𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄 ‘‘𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄’’𑀢𑀺 𑀯𑀡𑁆𑀡𑁂𑀢𑀺. 𑀏𑀯𑀁 𑀯𑀡𑁆𑀡𑀺𑀢𑁂𑀧𑀺 ‘‘𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄’’𑀢𑀺 𑀳𑁂𑀢𑀼 𑀳𑁄𑀦𑁆𑀢𑁄 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁂 𑀲𑀢𑀺, 𑀲𑁄 𑀬𑁂𑀯𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 ‘‘𑀧𑀼𑀦 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀡𑁆𑀡𑁂𑀢𑀺. 𑀏𑀢𑁆𑀣 𑀲𑀺𑀬𑀸, 𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀏𑀢𑁆𑀣 𑀧𑀤 𑀤𑁆𑀯𑀬𑀁 𑀏𑀓𑀥𑀫𑁆𑀫𑀸𑀥𑀺𑀓𑀭𑀡𑀢𑁆𑀢𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀁 𑀳𑁄𑀢𑀺. 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀦 𑀧𑀤𑀤𑁆𑀯𑀬𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀁 𑀦 𑀳𑁄𑀢𑀺. 𑀧𑀼𑀭𑀺𑀫 𑀧𑀤𑀜𑁆𑀳𑀺 𑀥𑀫𑁆𑀫 𑀪𑀸𑀯𑀧𑁆𑀧𑀥𑀸𑀦𑀁, 𑀧𑀘𑁆𑀙𑀺𑀫𑀁 𑀥𑀫𑁆𑀫𑀧𑁆𑀧𑀥𑀸𑀦𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑀁 𑀯𑀸𑀓𑁆𑀬𑀁 𑀪𑀺𑀦𑁆𑀦𑀸𑀥𑀺𑀓𑀭𑀡𑀁 𑀓𑀢𑁆𑀯𑀸 𑀯𑀡𑁆𑀡𑁂𑀢𑀻𑀢𑀺 𑀦 𑀬𑀼𑀢𑁆𑀢𑀫𑁂𑀢𑀦𑁆𑀢𑀺. 𑀦𑁄 𑀦 𑀬𑀼𑀢𑁆𑀢𑀁. 𑀫𑀼𑀔𑁆𑀬𑁄𑀧𑀘𑀸𑀭𑀫𑀢𑁆𑀢𑁂𑀦 𑀦𑀸𑀦𑀢𑁆𑀣𑀢𑁆𑀢𑀸. 𑀧𑀘𑁆𑀙𑀺𑀫𑀯𑀸𑀓𑁆𑀬𑀁𑀳𑀺 𑀫𑀼𑀔𑁆𑀬𑀯𑀘𑀦𑀁. 𑀧𑀼𑀭𑀺𑀫𑀯𑀸𑀓𑁆𑀬𑀁 𑀉𑀧𑀘𑀸𑀭 𑀯𑀘𑀦𑀁. 𑀉𑀧𑀘𑀸𑀭𑀯𑀘𑀦𑁂 𑀘 𑀉𑀧𑀘𑀸𑀭𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀫𑀼𑀔𑁆𑀬𑀯𑀘𑀦𑁂 𑀫𑀼𑀔𑁆𑀬𑀢𑁆𑀣𑁄𑀢𑀺. ‘‘𑀳𑁂𑀝𑁆𑀞𑀸𑀯𑀼𑀢𑁆𑀢𑀫𑁂𑀯𑀸’’𑀢𑀺 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑁂 𑀯𑀼𑀢𑁆𑀢𑀫𑁂𑀯. 𑀳𑀺𑀦𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑁂𑀢𑀼. 𑀳𑀺𑀦𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀳𑁂𑀢𑀼. 𑀢𑀢𑁆𑀣 ‘‘𑀳𑀺𑀦𑁄𑀦𑁆𑀢𑀻’’𑀢𑀺 𑀲𑀼𑀝𑁆𑀞𑀼𑀧𑀢𑀺𑀝𑁆𑀞𑀳𑀦𑁆𑀢𑀺. 𑀓𑁂 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀆𑀳 ‘‘𑀲𑀳𑀚𑀸𑀢 𑀥𑀫𑁆𑀫𑀸’’𑀢𑀺. 𑀓𑀣𑀜𑁆𑀘 𑀲𑀼𑀝𑁆𑀞𑀼𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀆𑀳 ‘‘𑀯𑀼𑀤𑁆𑀥𑀺 𑀯𑀺𑀭𑀼𑀴𑁆𑀳𑀺 𑀯𑁂𑀧𑀼𑀮𑁆𑀮𑀧𑀢𑁆𑀢𑀯𑀲𑁂𑀦𑀸’’𑀢𑀺. 𑀓𑀲𑁆𑀫𑀸 𑀢𑁂 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺. 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀲𑁆𑀲 𑀧𑀢𑀺𑀝𑁆𑀞𑀺𑀢𑀓𑀸𑀭𑀡𑀲𑁆𑀲 𑀯𑀸 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑁂 𑀤𑀴𑁆𑀳𑀦𑀺𑀧𑀸𑀢𑀺𑀦𑀸 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀳𑁂𑀢𑀼𑀯𑀺𑀲𑁂𑀲𑀦𑀜𑁆𑀘𑁂𑀢𑀁. 𑀆𑀭𑀫𑁆𑀫𑀡𑁂 𑀤𑀴𑁆𑀳𑀦𑀺𑀧𑀸𑀢𑀺𑀫𑁆𑀳𑀺 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑁂 𑀏𑀢𑁆𑀣 𑀥𑀫𑁆𑀫𑁂𑀢𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀧𑀓𑀸𑀭𑀓𑁄𑀢𑀺 𑀘 𑀉𑀧𑀮𑀤𑁆𑀥𑀺𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀸𑀤𑀺𑀲𑁂𑀦𑀲𑀪𑀸𑀯𑁂𑀦𑀸’’𑀢𑀺 𑀳𑁂𑀢𑀼𑀪𑀸𑀯𑀸𑀤𑀺𑀲𑀪𑀸𑀯𑁂𑀦. ‘‘𑀉𑀧𑀮𑀤𑁆𑀥𑀺𑀬𑁂𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀉𑀧𑀓𑀸𑀭𑀓 𑀲𑀤𑁆𑀤𑁄 𑀓𑀢𑁆𑀢𑀸𑀭𑀁 𑀯𑀸 𑀓𑀸𑀭𑁂𑀢𑀸𑀭𑀁 𑀯𑀸 𑀯𑀤𑀢𑀻𑀢𑀺. 𑀯𑁄𑀳𑀸𑀭𑀫𑀢𑁆𑀢𑁂𑀦 𑀯𑀤𑀢𑀺. 𑀥𑀫𑁆𑀫𑀢𑁄 𑀧𑀦 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀺 𑀲𑀪𑀸𑀯 𑀥𑀫𑁆𑀫𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀥𑀫𑁆𑀫𑀢𑁄 𑀓𑀢𑁆𑀢𑀸𑀯𑀸 𑀓𑀸𑀭𑁂𑀢𑀸𑀯𑀸 𑀦𑀢𑁆𑀣𑀺. 𑀓𑀲𑁆𑀫𑀸 𑀉𑀧𑀓𑀸𑀭𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀢𑀣𑀸 𑀉𑀧𑀮𑀤𑁆𑀥𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀁.

𑀆𑀭𑀫𑁆𑀫𑀡𑀧𑀘𑁆𑀘𑀬𑁂. ‘‘𑀅𑀚𑁆𑀛𑁄𑀮𑀫𑁆𑀩𑀫𑀸𑀦𑀸’’𑀢𑀺 𑀆𑀭𑀫𑁆𑀫𑀡 𑀓𑀭𑀡𑀯𑀲𑁂𑀦 𑀅𑀥𑀺𑀑𑀮𑀫𑁆𑀩𑀫𑀸𑀦𑀸. ‘‘𑀆𑀭𑀫𑁆𑀫𑀡𑀪𑀸𑀯𑁂𑀦𑀸’’𑀢𑀺 𑀕𑁄𑀘𑀭𑀯𑀺𑀲𑀬𑀪𑀸𑀯𑁂𑀦.

𑀅𑀥𑀺𑀧𑀢𑀺𑀧𑀘𑁆𑀘𑀬𑁂. ‘‘𑀕𑀭𑀼𑀓𑀢𑀸’’𑀢𑀺 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀸𑀤𑀺𑀯𑀲𑁂𑀦 𑀯𑀸 𑀲𑀤𑁆𑀥𑀸𑀧𑀲𑀸𑀤𑀸𑀤𑀺𑀯𑀲𑁂𑀦 𑀯𑀸 𑀕𑀭𑀼𑀓𑀢𑀸. ‘‘𑀲𑀸𑀫𑀺𑀦𑁄 𑀯𑀺𑀬 𑀤𑀸𑀲𑁂’’𑀢𑀺 𑀲𑀸𑀫𑀺𑀦𑁄 𑀅𑀢𑁆𑀢𑀦𑁄𑀤𑀸𑀲𑁂 𑀅𑀢𑁆𑀢𑀦𑁄𑀯𑀲𑁂 𑀯𑀢𑁆𑀢𑀬𑀫𑀸𑀦𑀸 𑀯𑀺𑀬. 𑀲𑀳𑀚𑀸𑀢𑀸𑀥𑀺𑀧𑀢𑀺 𑀧𑀦 𑀳𑁂𑀝𑁆𑀞𑀸 𑀲𑀫𑀼𑀘𑁆𑀘𑀬 𑀲𑀗𑁆𑀕𑀳𑁂 𑀯𑀼𑀢𑁆𑀢𑁄𑀢𑀺 𑀇𑀥 𑀦 𑀯𑀼𑀢𑁆𑀢𑁄.

𑀅𑀦𑀦𑁆𑀢𑀭𑀧𑀘𑁆𑀘𑀬𑀤𑁆𑀯𑀬𑁂. ‘‘𑀅𑀦𑁆𑀢𑀭𑀁’’𑀢𑀺 𑀙𑀺𑀤𑁆𑀤𑀁 𑀯𑀺𑀯𑀭𑀁. ‘‘𑀲𑀦𑁆𑀢𑀸𑀦𑀁’’𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀁. ‘‘𑀲𑀦𑁆𑀢𑀸𑀦𑀸𑀦𑀼𑀩𑀦𑁆𑀥𑀯𑀲𑁂𑀦𑀸’’𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀩𑀦𑁆𑀥𑀦𑀯𑀲𑁂𑀦. 𑀉𑀧𑁆𑀧𑀸𑀤𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀥𑀫𑁆𑀫𑀦𑁆𑀢𑀭𑀲𑁆𑀲𑀸’’𑀢𑀺 𑀦𑀸𑀫𑀓𑁆𑀔𑀦𑁆𑀥 𑀥𑀫𑁆𑀫𑀦𑁆𑀢𑀭𑀲𑁆𑀲. ‘‘𑀅𑀦𑀦𑁆𑀢𑀭 𑀧𑀘𑁆𑀘𑀬𑀢𑀸’’𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬 𑀓𑀺𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀦𑁆𑀢𑀭𑀁. ‘‘𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀕𑀧𑁆𑀧𑀯𑀢𑁆𑀢𑀸𑀦𑀁’’𑀢𑀺 𑀦𑀺𑀭𑁄𑀥𑀲𑁆𑀲 𑀅𑀲𑀜𑁆𑀜𑀻𑀪𑀯𑀲𑁆𑀲 𑀘 𑀧𑀼𑀭𑀺𑀫𑀪𑀸𑀕𑁂 𑀘 𑀧𑀘𑁆𑀙𑀺𑀫𑀪𑀸𑀕𑁂 𑀘 𑀧𑀯𑀢𑁆𑀢𑀸𑀦𑀁. ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀧𑀻’’𑀢𑀺 𑀦𑀺𑀭𑁄𑀥𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦 𑀓𑀼𑀲𑀮 𑀓𑁆𑀭𑀺𑀬 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀧𑀘𑁆𑀙𑀸𑀪𑀸𑀕𑁂 𑀅𑀦𑀸𑀕𑀸𑀫𑀺𑀨𑀮 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀅𑀲𑀜𑁆𑀜𑀻𑀪𑀯𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀪𑀯𑁂 𑀘𑀼𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀧𑀘𑁆𑀙𑀸𑀪𑀸𑀕𑁂 𑀓𑀸𑀫𑀪𑀯𑁂 𑀏𑀯 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀢𑁂𑀲𑀼 𑀧𑀦 𑀓𑀣𑀁 𑀅𑀦𑀦𑁆𑀢𑀭𑀁 𑀦𑀸𑀫 𑀲𑀺𑀬𑀸. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀪𑀸𑀕 𑀧𑀘𑁆𑀙𑀺𑀫 𑀪𑀸𑀕𑀸𑀦𑀁 𑀫𑀚𑁆𑀛𑁂 𑀅𑀘𑀺𑀢𑁆𑀢𑀓𑀲𑁆𑀲 𑀓𑀸𑀮𑀲𑁆𑀲 𑀅𑀘𑀺𑀢𑁆𑀢𑀓𑀲𑁆𑀲 𑀭𑀽𑀧𑀲𑀦𑁆𑀢𑀸𑀦𑀲𑁆𑀲 𑀘 𑀅𑀦𑁆𑀢𑀭𑀺𑀓𑀢𑁆𑀢𑀸𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀦 𑀳𑀺 𑀅𑀪𑀸𑀯𑀪𑀽𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑁂𑀲𑀁’’𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀭𑀽𑀧𑀥𑀫𑁆𑀫𑁄 𑀅𑀦𑁆𑀢𑀭𑀁 𑀦 𑀘 𑀓𑀭𑁄𑀢𑀺 𑀦𑀸𑀫. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀢𑀸 𑀦𑀸𑀫𑀸𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀳𑁄𑀢𑀺. ‘‘𑀢𑀣𑀸𑀧𑀯𑀢𑁆𑀢𑀦 𑀲𑀫𑀢𑁆𑀣𑀢𑀸’’𑀢𑀺 𑀏𑀓𑀻𑀪𑀽𑀢𑀸𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀥𑀫𑁆𑀫𑀦𑁆𑀢𑀭𑀁 𑀉𑀧𑁆𑀧𑀸𑀤𑀦𑁂 𑀲𑀫𑀢𑁆𑀣𑀢𑀸.

𑀲𑀳𑀚𑀸𑀢𑀧𑀘𑁆𑀘𑀬𑁂. ‘‘𑀬𑁂 𑀧𑀦 𑀥𑀫𑁆𑀫𑀸’’𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀥𑀫𑁆𑀫𑀸. ‘‘𑀅𑀢𑁆𑀢𑀦𑀻’’𑀢𑀺 𑀧𑀘𑁆𑀘𑀬 𑀥𑀫𑁆𑀫𑁄 𑀯𑀼𑀘𑁆𑀘𑀢𑀺.

‘‘𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑀦𑁆𑀢𑀁 𑀢𑀺𑀤𑀡𑁆𑀟𑀁 𑀯𑀺𑀬𑀸’’𑀢𑀺 𑀪𑀽𑀫𑀺𑀬𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀉𑀲𑁆𑀲𑀺𑀢𑀸 𑀢𑀬𑁄𑀤𑀡𑁆𑀟𑀸 𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑀦𑁆𑀢𑀸 𑀯𑀺𑀬. ‘‘𑀧𑀼𑀭𑀺𑀫𑁂𑀦𑀸’’𑀢𑀺 𑀧𑀼𑀭𑀺𑀫𑁂𑀦 𑀲𑀳𑀚𑀸𑀢 𑀧𑀘𑁆𑀘𑀬𑁂𑀦. ‘‘𑀇𑀢𑀭𑀻𑀢𑀭𑁄 𑀧𑀢𑁆𑀣𑀫𑁆𑀪𑀦𑀁’’𑀢𑀺 𑀅𑀜𑁆𑀜𑀫𑀜𑁆𑀜𑁄 𑀧𑀢𑁆𑀣𑀫𑁆𑀪𑀦𑀁.

‘‘𑀲𑀽𑀤𑁄’’𑀢𑀺 𑀪𑀢𑁆𑀢𑀓𑀸𑀭𑀓𑁄. ‘‘𑀉𑀓𑁆𑀔𑀮𑀻’’𑀢𑀺 𑀪𑀢𑁆𑀢𑀧𑀘𑀦𑀓𑀼𑀫𑁆𑀪𑀻. ‘‘𑀯𑀼𑀝𑁆𑀞𑀺𑀥𑀸𑀭𑀸’’𑀢𑀺 𑀫𑁂𑀖𑀯𑀼𑀝𑁆𑀞𑀺𑀥𑀸𑀭𑀸. ‘‘𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀪𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑁄. ‘‘𑀢𑀸𑀲𑀼 𑀅𑀲𑀢𑀻’’𑀢𑀺 𑀲𑀸𑀮𑀺𑀓𑁆𑀔𑁂𑀢𑁆𑀢 𑀯𑀼𑀝𑁆𑀞𑀺𑀥𑀸𑀭𑀸𑀲𑀼 𑀅𑀲𑀢𑀺. ‘‘𑀩𑀮𑀯𑀢𑀭𑀝𑁆𑀞𑁂𑀦𑀸’’𑀢𑀺 𑀩𑀮𑀯𑀢𑀭𑀦𑀺𑀲𑁆𑀲𑀬𑀝𑁆𑀞𑁂𑀦. ‘‘𑀧𑀓𑀢𑀽𑀧𑀦𑀺𑀲𑁆𑀲𑀬𑁄’’𑀢𑀺 𑀏𑀢𑁆𑀣 ‘‘𑀧𑀓𑀢𑁄’’𑀢𑀺 𑀪𑀼𑀲𑀁 𑀓𑀢𑁄. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼𑀓𑀢𑁄’’𑀢𑀺. 𑀓𑀭𑀡𑀜𑁆𑀘 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀼𑀝𑁆𑀞𑀼𑀉𑀧𑁆𑀧𑀸𑀤𑀦𑀜𑁆𑀘 𑀲𑀼𑀝𑁆𑀞𑀼𑀉𑀧𑀲𑁂𑀯𑀦𑀜𑁆𑀘 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸’’𑀢𑀺 ‘𑀬𑀣𑀸 𑀓𑀢𑁂 𑀲𑀢𑀻’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦.

‘‘𑀦𑀺𑀲𑁆𑀲𑀬𑀸𑀭𑀫𑁆𑀫𑀡 𑀥𑀫𑁆𑀫𑀸 𑀏𑀯𑀸’’𑀢𑀺 𑀦𑀺𑀲𑁆𑀲𑀬 𑀧𑀘𑁆𑀘𑀬 𑀥𑀫𑁆𑀫 𑀆𑀭𑀫𑁆𑀫𑀡 𑀧𑀘𑁆𑀘𑀬 𑀥𑀫𑁆𑀫𑀸 𑀏𑀯. ‘‘𑀧𑀼𑀭𑁂𑀚𑀸𑀢𑀢𑀸𑀫𑀢𑁆𑀢𑀯𑀺𑀲𑀺𑀝𑁆𑀞𑀸’’𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁂𑀦 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀲𑀢𑁆𑀢𑀺𑀢𑁄 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢𑀲𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢𑀲𑀢𑁆𑀢𑀺 𑀦𑀸𑀫 𑀅𑀢𑁆𑀣𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀁 𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀧𑀜𑁆𑀘𑀯𑀢𑁆𑀣𑀽𑀦𑀺 𑀘 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀘 𑀧𑀼𑀭𑁂𑀚𑀸𑀢𑀢𑁆𑀢𑀸 𑀏𑀯 𑀲𑀼𑀝𑁆𑀞𑀼𑀩𑀮𑀯𑀢𑀸𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀯𑀢𑁆𑀣𑀼 𑀓𑀺𑀘𑁆𑀘 𑀆𑀭𑀫𑁆𑀫𑀡 𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀦𑁆𑀢𑀺. 𑀢𑀣𑀸 𑀳𑀤𑀬𑀯𑀢𑁆𑀣𑀼 𑀘 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽 𑀦𑀦𑁆𑀢𑀺. 𑀅𑀬𑀁 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢𑀲𑀢𑁆𑀢𑀺 𑀯𑀺𑀲𑁂𑀲𑁄𑀢𑀺 𑀯𑀤𑁂𑀬𑁆𑀬. 𑀲𑀘𑁆𑀘𑀁. 𑀲𑀼𑀤𑁆𑀥𑀫𑀦𑁄 𑀤𑁆𑀯𑀸𑀭𑁂𑀧𑀦 𑀇𑀥 𑀞𑀢𑁆𑀯𑀸 𑀦𑀺𑀭𑀬𑁂𑀲𑀼 𑀏𑀯𑀭𑀽𑀧𑀸𑀦𑀺 𑀦𑀺𑀭𑀬𑀕𑁆𑀕𑀺𑀭𑀽𑀧𑀸𑀦𑀺 𑀅𑀢𑁆𑀣𑀺. 𑀇𑀤𑀸𑀦𑀺 𑀤𑁂𑀯𑁂𑀲𑀼 𑀘 𑀏𑀯𑀭𑀽𑀧𑀸𑀦𑀺 𑀤𑀺𑀩𑁆𑀩𑀭𑀽𑀧𑀸𑀦𑀺 𑀅𑀢𑁆𑀣𑀻𑀢𑀺 𑀘𑀺𑀦𑁆𑀢𑀬𑀦𑁆𑀢𑀸𑀦𑀫𑁆𑀧𑀺, 𑀢𑁂𑀲𑀼 𑀧𑀼𑀭𑁂 𑀏𑀯𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀽𑀢𑀺 𑀯𑀸, 𑀢𑁂𑀲𑀼 𑀅𑀦𑀸𑀕𑀢𑁂 𑀏𑀯𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀯𑀸 𑀘𑀺𑀦𑁆𑀢𑀬𑀦𑁆𑀢𑀸𑀦𑀁𑀧𑀺𑀢𑀸𑀦𑀺 𑀭𑀽𑀧𑀸𑀦𑀺 𑀦𑀺𑀩𑁆𑀩𑀺𑀲𑁂𑀲𑀸𑀦𑀺 𑀳𑀼𑀢𑁆𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀸𑀦𑀁 𑀆𑀭𑀫𑁆𑀫𑀡 𑀧𑀘𑁆𑀘𑀬𑀢𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀧𑀼𑀭𑁂 𑀚𑀸𑀢𑀸𑀦𑀺 𑀳𑀼𑀢𑁆𑀯𑀸 𑀢𑀤𑀸 𑀯𑀺𑀚𑁆𑀚𑀫𑀸𑀦𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀦𑀺 𑀆𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀇𑀢𑀭𑀸𑀦𑀺 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄 𑀏𑀯. 𑀦 𑀘𑁂𑀢𑁆𑀣 𑀧𑀼𑀭𑁂𑀚𑀸𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀦𑀁 𑀧𑀼𑀭𑁂𑀚𑀸𑀢𑀢𑁆𑀢𑁂𑀦 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀦 𑀘 𑀢𑀸𑀦𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀺. 𑀬𑀤𑀺 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢𑀲𑀢𑁆𑀢𑀺𑀯𑀺𑀲𑁂𑀲𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄𑀢𑀺 𑀯𑀤𑁂𑀬𑁆𑀬. 𑀢𑀸𑀦𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦𑀸𑀫 𑀦 𑀪𑀯𑁂𑀬𑁆𑀬𑀼𑀁. 𑀓𑀲𑁆𑀫𑀸, 𑀢𑀸𑀤𑀺𑀲𑀲𑁆𑀲 𑀯𑀺𑀲𑁂𑀲𑀲𑁆𑀲 𑀦𑀢𑁆𑀣𑀺𑀢𑀸𑀬. 𑀦 𑀘 𑀦𑀪𑀯𑀦𑁆𑀢𑀺. 𑀓𑀲𑁆𑀫𑀸, 𑀧𑀼𑀭𑁂𑀚𑀸𑀢𑀫𑀢𑁆𑀢𑀯𑀺𑀲𑁂𑀲𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀏𑀢𑁆𑀣 𑀯𑀤𑁂𑀬𑁆𑀬𑀼𑀁, 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢𑀲𑀢𑁆𑀢𑀺𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀻𑀢𑀺. 𑀓𑀺𑀜𑁆𑀘𑀸𑀧𑀺𑀤𑀺𑀲𑁆𑀲𑀢𑀺. 𑀲𑁄 𑀧𑀦 𑀩𑀳𑀼𑀯𑀺𑀥𑀸𑀦𑀁 𑀦𑀺𑀲𑁆𑀲𑀬 𑀧𑀘𑁆𑀘𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀦𑀁 𑀫𑀚𑁆𑀛𑁂 𑀦𑀺𑀲𑁆𑀲𑀬 𑀲𑀢𑁆𑀢𑀺𑀯𑀺𑀲𑁂𑀲𑁄 𑀏𑀯, 𑀆𑀭𑀫𑁆𑀫𑀡 𑀲𑀢𑁆𑀢𑀺𑀯𑀺𑀲𑁂𑀲𑁄 𑀏𑀯 𑀘𑀸𑀢𑀺. 𑀅𑀧𑀺 𑀘 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢 𑀲𑀢𑁆𑀢𑀺𑀯𑀺𑀲𑁂𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑁂 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀢𑀩𑁆𑀩𑀺𑀲𑁂𑀲𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢 𑀲𑀢𑁆𑀢𑀺𑀯𑀺𑀲𑁂𑀲𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀇𑀤𑀁 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀢𑀩𑁆𑀩𑀺𑀲𑁂𑀲𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁.

𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂. ‘‘𑀭𑀼𑀓𑁆𑀔𑀧𑁄𑀢𑀓𑀸𑀦𑀁 𑀯𑀺𑀬𑀸’’𑀢𑀺 𑀧𑀘𑁆𑀙𑀸 𑀆𑀲𑀺𑀜𑁆𑀘𑀺𑀬𑀫𑀸𑀦𑀁 𑀉𑀤𑀓𑀁 𑀭𑀼𑀓𑁆𑀔𑀧𑁄𑀢𑀓𑀸𑀦𑀁 𑀯𑀼𑀤𑁆𑀥𑀯𑀺𑀭𑀼𑀴𑁆𑀳𑀪𑀸𑀯𑀁 𑀧𑀸𑀧𑁂𑀢𑁆𑀯𑀸 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀉𑀧𑀓𑀸𑀭𑀓𑁄 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀆𑀳𑀸𑀭𑀁 𑀆𑀲𑀺𑀁 𑀲𑀢𑀻𑀢𑀺 𑀆𑀳𑀸𑀭𑀸𑀲𑀸. 𑀚𑀺𑀖𑀘𑁆𑀙𑀸, 𑀧𑀺𑀧𑀸𑀲𑀸, 𑀢𑀡𑁆𑀳𑀸. 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸𑀢𑀺 𑀯𑀺𑀕𑁆𑀕𑀳𑁄. 𑀲𑀸 𑀧𑀦 𑀆𑀳𑀸𑀭𑀸𑀲𑀸 𑀘𑁂𑀢𑀦𑀸 𑀉𑀧𑀢𑁆𑀣𑀫𑁆𑀪𑀢𑀺 𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀬𑀫𑀢𑁆𑀣𑁄’’𑀢𑀺 ‘𑀲𑀼𑀧𑀸𑀓𑀝𑁂𑀦𑀸’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀅𑀬𑀫𑀢𑁆𑀣𑁄. 𑀲𑀩𑁆𑀩𑀸𑀘𑁂𑀲𑀸𑀯𑀺𑀘𑀸𑀭𑀡𑀸 𑀕𑀺𑀚𑁆𑀛𑁄𑀧𑀫𑀸𑀬 𑀉𑀧𑀫𑀸𑀫𑀢𑁆𑀢𑀪𑀸𑀯𑀁 𑀦𑀻𑀯𑀸𑀭𑁂𑀢𑀸 𑀳𑁄𑀢𑀻𑀢𑀺.

𑀆𑀲𑁂𑀯𑀦𑁆𑀢𑀺 𑀢𑀁 𑀧𑀘𑁆𑀘𑀬 𑀥𑀫𑁆𑀫𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸𑀢𑀺 𑀆𑀲𑁂𑀯𑀦𑀁. 𑀏𑀢𑁂𑀦 𑀪𑀼𑀲𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀥𑀫𑁆𑀫𑁂𑀳𑀺 𑀆𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀆𑀲𑁂𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀻𑀢𑀺. ‘‘𑀢𑀁’’𑀢𑀺 𑀢𑀁 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀘𑁆𑀘𑀬 𑀥𑀫𑁆𑀫𑀁. ‘‘𑀪𑀚𑀦𑁆𑀢𑀻’’𑀢𑀺 𑀉𑀧𑁂𑀦𑁆𑀢𑀺. 𑀓𑁂 𑀪𑀚𑀦𑁆𑀢𑀻𑀢𑀺 𑀆𑀳 ‘‘𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀥𑀫𑁆𑀫𑀸’’𑀢𑀺. ‘‘𑀥𑀫𑁆𑀫𑀸’’𑀢𑀺 𑀘 𑀅𑀦𑀦𑁆𑀢𑀭𑀼𑀧𑁆𑀧𑀦𑁆𑀦𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸. 𑀓𑀣𑀜𑁆𑀘 𑀢𑀁 𑀢𑁂𑀪𑀚𑀦𑁆𑀢𑀻𑀢𑀺 𑀆𑀳 ‘‘𑀲𑀼𑀝𑁆𑀞𑀼𑀲𑁂𑀯𑀫𑀸𑀦𑀸 𑀯𑀺𑀬 𑀪𑀚𑀫𑀸𑀦𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀻’’𑀢𑀺. 𑀯𑀺𑀬 𑀲𑀤𑁆𑀤𑁂𑀦 𑀮𑁄𑀓𑁂 𑀓𑀺𑀜𑁆𑀘𑀺𑀚𑀦𑀁 𑀓𑁂𑀘𑀺𑀚𑀦𑀸 𑀓𑁂𑀦𑀘𑀺 𑀅𑀢𑁆𑀣𑁂𑀦 𑀲𑀼𑀝𑁆𑀞𑀼𑀲𑁂𑀯𑀦𑁆𑀢𑀸 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀁 𑀲𑀼𑀝𑁆𑀞𑀼𑀲𑁂𑀯𑀺𑀬𑀫𑀸𑀦𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀢𑀲𑁆𑀲 𑀧𑀼𑀭𑀺𑀫𑀲𑁆𑀲𑀸’’𑀢𑀺𑀆𑀤𑀺𑀁. 𑀧𑀼𑀭𑀺𑀫𑀲𑁆𑀲 𑀅𑀦𑀦𑁆𑀢𑀭𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑀧𑀭𑀺𑀧𑀽𑀭𑀁 𑀆𑀓𑀸𑀭𑀁’’𑀢𑀺 𑀚𑀯𑀯𑁂𑀕𑀲𑀳𑀺𑀢𑁂𑀳𑀺 𑀯𑀺𑀚𑀸𑀦𑀦 𑀨𑀼𑀲𑀦𑀸𑀤𑀻𑀳𑀺 𑀲𑀸𑀯𑀚𑁆𑀚𑀸𑀦 𑀯𑀚𑁆𑀚𑀸𑀤𑀻𑀳𑀺 𑀘 𑀲𑀩𑁆𑀩𑁂𑀳𑀺 𑀚𑀯𑀦𑀕𑀼𑀡𑁂𑀳𑀺 𑀧𑀭𑀺𑀧𑀽𑀭𑀁 𑀆𑀓𑀸𑀭𑀁. ‘‘𑀆𑀲𑁂𑀯𑁂𑀢𑀻’’𑀢𑀺 𑀫𑀁 𑀲𑀼𑀝𑁆𑀞𑀼 𑀲𑁂𑀯𑀣𑀸𑀢𑀺 𑀦𑀺𑀬𑁄𑀚𑁂𑀦𑁆𑀢𑀁 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀯𑀸𑀲𑀁’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀯𑀸𑀲𑀁’’𑀢𑀺 𑀯𑀸𑀲𑀦𑀁. ‘‘𑀲𑀼𑀝𑁆𑀞𑀼 𑀕𑀸𑀳𑀸𑀧𑁂𑀢𑀻’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀬𑀣𑀸 𑀮𑁄𑀓𑁂 𑀏𑀓𑁄 𑀧𑀭𑁂𑀲𑀁 𑀬𑀣𑀺𑀘𑁆𑀙𑀺𑀢𑀁 𑀤𑁂𑀢𑀺. 𑀏𑀯𑀁 𑀤𑁂𑀦𑁆𑀢𑀁 𑀧𑀦 𑀧𑀭𑁂 𑀪𑀚𑀦𑁆𑀢𑀺𑀬𑁂𑀯. 𑀫𑀁 𑀪𑀚𑀣𑀸𑀢𑀺 𑀦𑀺𑀬𑁄𑀚𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀏𑀯𑀫𑁂𑀯 𑀇𑀥𑀧𑀺 𑀲𑀼𑀝𑁆𑀞𑀼𑀯𑀸𑀲𑀤𑀸𑀦𑀫𑁂𑀯 𑀪𑀚𑀸𑀧𑀦𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀟𑁆𑀠𑁂𑀢𑀺 𑀯𑀸’’𑀢𑀺 𑀏𑀢𑁂𑀦 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀯𑀟𑁆𑀠𑀦𑀸𑀢𑀺 𑀇𑀫𑀁𑀧𑀭𑀺𑀬𑀸𑀬𑀢𑁆𑀣𑀁 𑀯𑀤𑀢𑀺. 𑀧𑀼𑀭𑀺𑀫𑀸𑀪𑀺𑀬𑁄𑀕𑁄 𑀦𑀸𑀫 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀚𑁆𑀛𑀸𑀬𑀦𑀸𑀤𑀺𑀓𑀫𑁆𑀫𑁂𑀲𑀼 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀯𑀸 𑀬𑀸𑀫𑀓𑀭𑀡𑀁. 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀢𑀁 𑀉𑀕𑁆𑀕𑀳𑀡 𑀓𑀫𑁆𑀫𑀁 𑀉𑀧𑀭𑀽𑀧𑀭𑀺 𑀧𑀕𑀼𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺. ‘‘𑀆𑀲𑁂𑀯𑀦𑀝𑁆𑀞𑁂𑀦𑀸’’𑀢𑀺 𑀯𑀟𑁆𑀠𑀸𑀧𑀦𑀝𑁆𑀞𑁂𑀦, 𑀉𑀧𑀓𑀸𑀭𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀚𑀸𑀢𑀺𑀬𑀸𑀦𑀁’’𑀢𑀺 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀲𑀫𑀸𑀦𑀚𑀸𑀢𑀺𑀓𑀸𑀦𑀁.

𑀓𑀸𑀬𑀗𑁆𑀕𑀸𑀪𑀺𑀲𑀗𑁆𑀔𑀭𑀡𑀁 𑀦𑀸𑀫 𑀓𑀸𑀬𑀲𑀜𑁆𑀘𑁂𑀢𑀦𑀸𑀓𑀺𑀘𑁆𑀘𑀁. 𑀯𑀸𑀘𑀗𑁆𑀕𑀸𑀪𑀺𑀲𑀗𑁆𑀔𑀭𑀡𑀁 𑀯𑀘𑀻𑀲𑀜𑁆𑀘𑁂𑀢𑀦𑀸𑀓𑀺𑀘𑁆𑀘𑀁. 𑀘𑀺𑀢𑁆𑀢𑀗𑁆𑀕𑀸𑀪𑀺𑀲𑀗𑁆𑀔𑀭𑀡𑀁 𑀫𑀦𑁄𑀲𑀜𑁆𑀘𑁂𑀢𑀦𑀸𑀓𑀺𑀘𑁆𑀘𑀁. ‘‘𑀓𑀺𑀭𑀺𑀬𑀸𑀪𑀸𑀯𑁂𑀦𑀸’’𑀢𑀺 𑀤𑀲𑁆𑀲𑀦𑀲𑀯𑀦𑀸𑀤𑀺𑀓𑀺𑀘𑁆𑀘𑁂𑀲𑀼 𑀕𑀫𑀦𑀞𑀸𑀦 𑀦𑀺𑀲𑀚𑁆𑀚𑀸𑀤𑀺𑀓𑀺𑀘𑁆𑀘𑁂𑀲𑀼 𑀲𑀁𑀯𑀺𑀥𑀸𑀦𑀓𑀺𑀭𑀺𑀬𑀸𑀪𑀸𑀯𑁂𑀦. ‘‘𑀯𑀢𑁆𑀣𑀼𑀫𑁆𑀳𑀻’’𑀢𑀺 𑀕𑀩𑁆𑀪𑀯𑀢𑁆𑀣𑀼𑀫𑁆𑀳𑀺. 𑀬𑀣𑀸𑀯𑀼𑀢𑁆𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀁 𑀦𑀸𑀫 𑀓𑀸𑀬𑀗𑁆𑀕𑀯𑀸𑀘𑀗𑁆𑀕 𑀘𑀺𑀢𑁆𑀢𑀗𑁆𑀕𑀸𑀪𑀺𑀲𑀗𑁆𑀔𑀭𑀡 𑀓𑀺𑀘𑁆𑀘𑀁. ‘‘𑀢𑀤𑀪𑀺𑀲𑀗𑁆𑀔𑀭𑀡𑀯𑁂𑀕𑀚𑀦𑀺𑀢𑀁’’𑀢𑀺 𑀢𑀲𑁆𑀲 𑀓𑀸𑀬𑀗𑁆𑀕𑀸𑀤𑀺𑀓𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀯𑁂𑀕𑁂𑀦 𑀚𑀦𑀺𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲 𑀦𑀺𑀥𑀸𑀦𑀓𑀺𑀘𑁆𑀘𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀦𑁆𑀢𑀸𑀦𑁂’’𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑁂.

𑀯𑀺𑀧𑀘𑁆𑀘𑀦𑀪𑀸𑀯𑁄 𑀘 𑀦𑀸𑀫 𑀧𑀸𑀢𑀼𑀪𑀸𑀯𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀭𑀼𑀲𑁆𑀲𑀸𑀳 𑀲𑀦𑁆𑀢𑀪𑀸𑀯𑁄 𑀦𑀸𑀫 𑀓𑀼𑀲𑀮𑀸 𑀓𑀼𑀲𑀮𑀸𑀦𑀁 𑀯𑀺𑀬 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀪𑀺𑀲𑀗𑁆𑀔𑀭𑀡 𑀓𑀺𑀘𑁆𑀘𑁂𑀲𑀼 𑀘 𑀆𑀬𑀢𑀺𑀁 𑀯𑀺𑀧𑀘𑁆𑀘𑀦 𑀓𑀺𑀘𑁆𑀘𑁂𑀲𑀼 𑀘 𑀦𑀺𑀭𑀼𑀲𑁆𑀲𑀸𑀳𑀪𑀸𑀯𑁂𑀦 𑀲𑀦𑁆𑀢𑀪𑀸𑀯𑁄. 𑀦 𑀓𑀺𑀮𑁂𑀲𑀼 𑀧𑀲𑀦𑁆𑀢𑀪𑀸𑀯𑁂𑀦. 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀭𑀡 𑀓𑀺𑀘𑁆𑀘𑁂𑀲𑀼𑀧𑀦 𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀯𑀲𑁂𑀦 𑀬𑀣𑁄𑀧𑀝𑁆𑀞𑀺𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑀕𑀫𑀦𑀼𑀲𑁆𑀲𑀸𑀳𑀫𑀢𑁆𑀢𑀁 𑀅𑀢𑁆𑀣𑀺. 𑀢𑀢𑁄𑀧𑀭𑀁 𑀧𑀦 𑀲𑀼𑀧𑀺𑀦 𑀤𑀲𑁆𑀲𑀦 𑀓𑀺𑀘𑁆𑀘𑀁𑀧𑀺 𑀦𑀢𑁆𑀣𑀻𑀢𑀺. ‘‘𑀫𑀦𑁆𑀤𑀫𑀦𑁆𑀤𑀸𑀓𑀸𑀭𑁂𑀦𑀸’’𑀢𑀺 𑀫𑀦𑁆𑀤𑀢𑁄 𑀅𑀢𑀺𑀫𑀦𑁆𑀤𑀸𑀓𑀸𑀭𑁂𑀦. 𑀓𑀺𑀜𑁆𑀘𑀺𑀚𑀸𑀦𑀦 𑀘𑀺𑀢𑁆𑀢𑀁 𑀦𑀸𑀫 𑀓𑀫𑁆𑀫𑀸𑀤𑀺 𑀆𑀭𑀫𑁆𑀫𑀡𑀁 𑀅𑀧𑁆𑀧𑀫𑀢𑁆𑀢𑀓𑀁𑀧𑀺 𑀚𑀸𑀦𑀦𑀁 𑀯𑀻𑀣𑀺𑀘𑀺𑀢𑁆𑀢𑀁. 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸.

‘‘𑀅𑀭𑀽𑀧𑀺𑀦𑁄’’𑀢𑀺 𑀅𑀭𑀽𑀧𑀮𑀓𑁆𑀔𑀡 𑀲𑀫𑀗𑁆𑀕𑀺𑀦𑁄. 𑀦𑀸𑀫𑀮𑀓𑁆𑀔𑀡 𑀲𑀫𑀗𑁆𑀕𑀻𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀚𑀦𑀬𑀦𑁆𑀢𑀸𑀧𑀻’’𑀢𑀺 𑀲𑀳𑀚𑀸𑀢 𑀥𑀫𑁆𑀫𑁂 𑀚𑀦𑁂𑀦𑁆𑀢𑀸𑀧𑀺. ‘‘𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀬𑀸’’𑀢𑀺 𑀧𑀩𑀦𑁆𑀥𑀧𑁆𑀧𑀢𑀺𑀝𑁆𑀞𑀸𑀦𑀲𑁆𑀲.

‘‘𑀓𑀲𑁆𑀫𑀸𑀧𑀦𑁂𑀢𑁆𑀣𑀸’’𑀢𑀺𑀆𑀤𑀻𑀲𑀼. ‘‘𑀪𑀸𑀯𑀺𑀦𑁆𑀤𑁆𑀭𑀺𑀬 𑀤𑁆𑀯𑀬𑀁’’𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬 𑀤𑁆𑀯𑀬𑀁. ‘‘𑀇𑀥𑀸’’𑀢𑀺 𑀇𑀫𑀲𑁆𑀫𑀺𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂. 𑀓𑀲𑁆𑀫𑀸 𑀦 𑀕𑀳𑀺𑀢𑀁. 𑀦𑀦𑀼 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀁 𑀧𑀯𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀇𑀥 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀦𑀓𑀢𑁆𑀢𑀁 𑀦𑀸𑀫 𑀚𑀦𑀓 𑀓𑀺𑀘𑁆𑀘𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. ‘‘𑀏𑀢𑀁𑀢𑀬𑀁𑀧𑀺 𑀦𑀢𑁆𑀣𑀻’’𑀢𑀺 𑀚𑀦𑀓𑀢𑁆𑀢𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀁𑀧𑀺 𑀦𑀢𑁆𑀣𑀺. 𑀏𑀯𑀁𑀲𑀦𑁆𑀢𑁂𑀓𑀣𑀁 𑀮𑀺𑀗𑁆𑀕𑀸𑀤𑀻𑀦𑀁 𑀧𑀯𑀢𑁆𑀢𑀺𑀓𑀸𑀭𑀡𑀁 𑀳𑁄𑀢𑀻𑀢𑀺𑀆𑀳 ‘‘𑀓𑁂𑀯𑀮𑀁 𑀧𑀦𑀸’’𑀢𑀺𑀆𑀤𑀺𑀁. ‘‘𑀤𑁆𑀯𑀬𑀁’’𑀢𑀺 𑀇𑀢𑁆𑀣𑀺𑀪𑀸𑀯𑀧𑀼𑀫𑁆𑀪𑀸𑀯 𑀤𑁆𑀯𑀬𑀁. 𑀦 𑀇𑀦𑁆𑀤𑁆𑀭𑀺𑀬 𑀧𑀘𑁆𑀘𑀬𑀢𑁆𑀢𑁂𑀦 𑀇𑀦𑁆𑀤𑁆𑀭𑀺𑀬𑀁 𑀦𑀸𑀫 𑀳𑁄𑀢𑀺. 𑀬𑀣𑀸𑀳𑀺 𑀏𑀓𑁄 𑀭𑀸𑀚𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀕𑁂𑀳𑀸𑀦𑀺 𑀓𑀭𑁄𑀦𑁆𑀢𑀺. 𑀏𑀯𑀁 𑀓𑀭𑁄𑀦𑁆𑀢𑀽𑀢𑀺 𑀕𑁂𑀳𑀲𑀡𑁆𑀞𑀸𑀦𑀁 𑀧𑀝𑁆𑀞𑀧𑁂𑀢𑀺. 𑀲𑀩𑁆𑀩𑁂𑀚𑀦𑀸 𑀢𑀣𑁂𑀯 𑀓𑀭𑁄𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸. 𑀢𑀢𑁆𑀣 𑀭𑀸𑀚𑀸 𑀕𑁂𑀳𑀼𑀧𑁆𑀧𑀢𑁆𑀢𑀺𑀬𑀸 𑀘 𑀕𑁂𑀳𑀝𑁆𑀞𑀺𑀢𑀺𑀬𑀸 𑀘 𑀓𑀺𑀜𑁆𑀘𑀺 𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺. 𑀕𑁂𑀳𑀲𑀸𑀫𑀺𑀓𑀸𑀯𑀸 𑀕𑁂𑀳𑀯𑀟𑁆𑀠𑀓𑀺𑀦𑁄 𑀯𑀸 𑀓𑀭𑁄𑀦𑁆𑀢𑀺. 𑀓𑀭𑁄𑀦𑁆𑀢𑀸 𑀧𑀦 𑀭𑀜𑁆𑀜𑀸 𑀧𑀝𑁆𑀞𑀧𑀺𑀢𑀁 𑀲𑀡𑁆𑀞𑀸𑀦𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀓𑀭𑁄𑀦𑁆𑀢𑀺. 𑀏𑀯𑀫𑁂𑀯 𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀉𑀧𑀕𑀦𑁆𑀢𑁆𑀯𑀸 𑀛𑀸𑀬𑀦𑀝𑁆𑀞𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀲𑀤𑁆𑀤𑁄 𑀉𑀧𑀦𑀺𑀲𑁆𑀲𑀬 𑀧𑀤𑁂𑀯𑀺𑀬 𑀉𑀧𑀭𑀺 𑀅𑀢𑁆𑀣𑁄. ‘‘𑀉𑀧𑀭𑀻’’𑀢𑀺 𑀘 𑀣𑀸𑀫𑀩𑀮𑀯𑀼𑀤𑁆𑀥𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀯𑀸’’𑀢𑀺𑀆𑀤𑀺𑀁. ‘‘𑀢𑀲𑁆𑀫𑀺𑀁’’𑀢𑀺 𑀆𑀭𑀫𑁆𑀫𑀡𑁂.

‘‘𑀲𑀼𑀕𑀢𑀺 𑀤𑀼𑀕𑁆𑀕𑀢𑀺 𑀦𑀺𑀩𑁆𑀩𑀸𑀦 𑀲𑀫𑁆𑀧𑀸𑀧𑀓𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑁄 𑀅𑀢𑁆𑀣𑁄 𑀅𑀩𑁆𑀬𑀸𑀓𑀢𑀫𑀕𑁆𑀕𑀗𑁆𑀕𑁂𑀲𑀼 𑀦𑀢𑁆𑀣𑀺. 𑀏𑀯𑀜𑁆𑀘𑀲𑀢𑀺 𑀢𑀸𑀦𑀺 𑀓𑀣𑀁 𑀫𑀕𑁆𑀕𑀧𑀘𑁆𑀘𑀬𑀢𑁆𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀁. ‘‘𑀲𑀫𑁆𑀫𑀸𑀤𑀲𑁆𑀲𑀦𑀸𑀤𑀺𑀦𑀸’’𑀢𑀺 𑀲𑀫𑁆𑀫𑀸𑀤𑀲𑁆𑀲𑀦 𑀲𑀗𑁆𑀓𑀧𑁆𑀧𑀦𑀸𑀤𑀺𑀦𑀸. ‘‘𑀢𑁂𑀲𑀁’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀁. ‘‘𑀢𑁂𑀲𑀁 𑀧𑀻’’𑀢𑀺 𑀅𑀩𑁆𑀬𑀸𑀓𑀢 𑀪𑀽𑀢𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀫𑁆𑀧𑀺. ‘‘𑀢𑁂𑀦𑁂𑀯𑀝𑁆𑀞𑁂𑀦𑀸’’𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑀸𑀤𑀺𑀦𑀸 𑀮𑀓𑁆𑀔𑀡𑀝𑁆𑀞𑁂𑀦. 𑀅𑀣𑀯𑀸. ‘‘𑀢𑁂𑀦𑁂𑀯𑀝𑁆𑀞𑁂𑀦𑀸’’𑀢𑀺 𑀲𑀼𑀕𑀢𑀺 𑀦𑀺𑀩𑁆𑀩𑀸𑀦 𑀲𑀫𑁆𑀧𑀸𑀧𑀓𑀝𑁆𑀞𑁂𑀦𑁂 𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘𑀲𑀢𑀺 𑀲𑀳𑁂𑀢𑀼𑀓𑀸 𑀯𑀺𑀧𑀸𑀓 𑀓𑁆𑀭𑀺𑀬𑀸 𑀩𑁆𑀬𑀸𑀓𑀢𑀥𑀫𑁆𑀫𑀸𑀧𑀺 𑀢𑁂𑀦𑁂𑀯𑀝𑁆𑀞𑁂𑀦 𑀲𑀩𑁆𑀩𑀲𑁄 𑀓𑀼𑀲𑀮𑀲𑀤𑀺𑀲𑀸 𑀲𑀺𑀬𑀼𑀦𑁆𑀢𑀺. 𑀦 𑀲𑀺𑀬𑀼𑀁, 𑀧𑀘𑁆𑀘𑀬 𑀯𑁂𑀓𑀮𑁆𑀮𑀢𑁆𑀢𑀸. 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀳𑀺 𑀓𑀫𑁆𑀫𑀯𑁂𑀕𑁂𑀦 𑀲𑀦𑁆𑀢𑀸𑀦𑁂 𑀧𑀢𑀺𑀢𑀫𑀢𑁆𑀢𑀢𑁆𑀢𑀸 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀲𑀪𑀸𑀯𑀢𑁄 𑀢𑀁 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸 𑀦𑀸𑀦𑀓𑁆𑀔𑀡𑀺𑀓 𑀓𑀫𑁆𑀫𑀧𑀘𑁆𑀘𑀬𑀢𑁆𑀢𑀁 𑀦 𑀕𑀘𑁆𑀙𑀢𑀺. 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀘 𑀦𑀺𑀭𑀦𑀼𑀲𑀬𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀢𑀁 𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀧𑀺 𑀢𑀧𑁆𑀧𑀘𑁆𑀘𑀬𑀢𑁆𑀢𑀁 𑀦 𑀕𑀘𑁆𑀙𑀢𑀺𑀬𑁂𑀯. 𑀢𑀲𑁆𑀫𑀸 𑀢𑁂𑀲𑀼 𑀯𑀺𑀧𑀸𑀓 𑀓𑁆𑀭𑀺𑀬𑀸𑀩𑁆𑀬𑀸𑀓𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀻𑀦𑀺𑀧𑀺 𑀲𑀼𑀕𑀢𑀺 𑀲𑀫𑁆𑀧𑀸𑀧𑀓𑀝𑁆𑀞𑀁 𑀦 𑀲𑀸𑀥𑁂𑀦𑁆𑀢𑀺. 𑀓𑀺𑀮𑁂𑀲𑀧𑁆𑀧𑀳𑀸𑀦 𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄 𑀦𑀺𑀩𑁆𑀩𑀸𑀦 𑀲𑀫𑁆𑀧𑀸𑀧𑀓𑀝𑁆𑀞𑀫𑁆𑀧𑀺 𑀦𑀲𑀸𑀥𑁂𑀦𑁆𑀢𑀺. 𑀲𑀪𑀸𑀯 𑀮𑀓𑁆𑀔𑀡𑀯𑁂𑀓𑀮𑁆𑀮𑀢𑀸𑀧𑀦 𑀢𑁂𑀲𑀁 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀻𑀦𑀁 𑀦𑀢𑁆𑀣𑀺𑀬𑁂𑀯. 𑀢𑀲𑁆𑀫𑀸 𑀢𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑁂 𑀲𑀗𑁆𑀕𑀳𑀺𑀢𑀸𑀦𑀻𑀢𑀺. 𑀇𑀦𑁆𑀤𑁆𑀭𑀺𑀬 𑀥𑀫𑁆𑀫𑁂𑀲𑀼 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀁 𑀆𑀥𑀺𑀧𑁆𑀧𑀘𑁆𑀘 𑀓𑀺𑀘𑁆𑀘𑀁 𑀅𑀭𑀽𑀧𑀥𑀫𑁆𑀫𑁂 𑀲𑁆𑀯𑁂𑀯 𑀨𑀭𑀢𑀺. 𑀭𑀽𑀧𑀥𑀫𑁆𑀫𑀸 𑀧𑀦 𑀢𑀁 𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀏𑀯 𑀢𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀯𑀼𑀢𑁆𑀢𑀸. 𑀢𑀣𑀸 𑀳𑁂𑀢𑀼 𑀓𑀫𑁆𑀫 𑀫𑀕𑁆𑀕 𑀛𑀸𑀦𑁂𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀲𑀦𑀬𑁄 𑀓𑀫𑁆𑀫𑀺𑀦𑁆𑀤𑁆𑀭𑀺𑀬𑀛𑀸𑀦𑀧𑀘𑁆𑀘𑀬𑁂𑀲𑀼𑀧𑀻’’𑀢𑀺. 𑀢𑀢𑁆𑀣 𑀓𑀫𑁆𑀫𑀲𑀤𑁆𑀤𑁂𑀦 𑀦𑀸𑀦𑀓𑁆𑀔𑀡𑀺𑀓 𑀧𑀘𑁆𑀘𑀬𑁄 𑀕𑀳𑁂𑀢𑀩𑁆𑀩𑁄.

‘‘𑀲𑀫𑁆𑀧𑀬𑀼𑀢𑁆𑀢𑀸𑀲𑀗𑁆𑀓𑀸 𑀲𑀫𑁆𑀪𑀯𑀢𑀻’’𑀢𑀺 𑀲𑀳𑀚𑀸𑀢𑀸 𑀦𑀸𑀫𑀥𑀫𑁆𑀫𑀸 𑀢𑀁 𑀲𑀫𑀼𑀝𑁆𑀞𑀸𑀦 𑀭𑀽𑀧𑁂𑀳𑀺, 𑀧𑀘𑁆𑀙𑀸𑀚𑀸𑀢𑀸 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀭𑀽𑀧𑁂𑀳𑀺, 𑀯𑀢𑁆𑀣𑀼 𑀥𑀫𑁆𑀫𑀸 𑀘 𑀢𑀦𑁆𑀦𑀺𑀲𑁆𑀲𑀺𑀢𑀦𑀸𑀫𑀥𑀫𑁆𑀫𑁂𑀳𑀺 𑀓𑀸𑀮𑀢𑁄 𑀘 𑀞𑀸𑀦𑀢𑁄 𑀘 𑀏𑀓 𑀲𑀫𑁆𑀩𑀦𑁆𑀥𑀢𑁆𑀢𑀸 𑀢𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀸𑀲𑀗𑁆𑀓𑀸 𑀲𑀫𑁆𑀪𑀯𑀢𑀺. ‘‘𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀧𑁆𑀧𑀲𑀗𑁆𑀕𑁄 𑀦𑀢𑁆𑀣𑀻’’𑀢𑀺 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬 𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸𑀢𑀺 𑀏𑀯𑀭𑀽𑀧𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀧𑁆𑀧𑀲𑀗𑁆𑀕𑁄 𑀢𑁂𑀲𑀼 𑀆𑀭𑀫𑁆𑀫𑀡 𑀧𑀘𑁆𑀘𑀬𑀸𑀤𑀻𑀲𑀼 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀳𑁂𑀝𑁆𑀞𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀏𑀯𑀸’’𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑁂𑀦 𑀧𑀘𑁆𑀘𑀬𑀦𑁆𑀢𑀭𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀧𑀘𑁆𑀘𑀬𑀦𑁆𑀢𑀭𑀁 𑀦 𑀳𑁄𑀢𑀺, 𑀦 𑀯𑀢𑁆𑀢𑀩𑁆𑀩𑁄𑀬𑁂𑀯. 𑀓𑀲𑁆𑀫𑀸, 𑀤𑁂𑀲𑀓𑀲𑁆𑀲 𑀧𑀼𑀦𑀭𑀼𑀢𑁆𑀢𑀺𑀦𑀺𑀭𑀢𑁆𑀣𑀓𑀯𑀸𑀤𑀺𑀢𑀸 𑀧𑀢𑁆𑀢𑀺𑀢𑁄𑀢𑀺. 𑀦𑁄 𑀦 𑀯𑀢𑁆𑀢𑀩𑁆𑀩𑁄. 𑀓𑀲𑁆𑀫𑀸, 𑀮𑁄𑀓𑁂 𑀬𑁄 𑀲𑀬𑀁 𑀦𑀢𑁆𑀣𑀺, 𑀯𑀺𑀕𑀢𑁄 𑀳𑁄𑀢𑀺. 𑀲𑁄 𑀓𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀏𑀯𑀭𑀽𑀧𑀲𑁆𑀲 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀳𑀸𑀦𑀢𑁄. 𑀢𑁂𑀦 𑀇𑀫𑀫𑀢𑁆𑀣𑀁 𑀜𑀸𑀧𑁂𑀢𑀺, 𑀮𑁄𑀓𑁂 𑀓𑁂𑀘𑀺𑀥𑀫𑁆𑀫𑀸 𑀲𑀬𑀁 𑀅𑀢𑁆𑀣𑀺𑀓𑀸𑀮𑁂 𑀏𑀯 𑀅𑀜𑁆𑀜𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑁄 𑀦𑀢𑁆𑀣𑀺𑀓𑀸𑀮𑁂. 𑀓𑁂𑀘𑀺 𑀥𑀫𑁆𑀫𑀸 𑀲𑀬𑀁 𑀦𑀢𑁆𑀣𑀺𑀓𑀸𑀮𑁂 𑀏𑀯 𑀅𑀜𑁆𑀜𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑁄 𑀅𑀢𑁆𑀣𑀺𑀓𑀸𑀮𑁂𑀢𑀺 𑀅𑀬𑀜𑁆𑀘𑀯𑀺𑀪𑀸𑀕𑁄 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑁄 𑀬𑁂𑀯𑀸𑀢𑀺. ‘‘𑀑𑀓𑀸𑀲𑀤𑀸𑀦𑀲𑀗𑁆𑀔𑀸𑀢𑁂𑀦𑀸’’𑀢𑀺 𑀢𑀲𑁆𑀲 𑀅𑀜𑁆𑀜𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀤𑀸𑀦𑀲𑀗𑁆𑀔𑀸𑀢𑁂𑀦.

𑀲𑀼𑀢𑁆𑀢𑀦𑁆𑀢𑁂, 𑀅𑀢𑁆𑀣𑀻𑀢𑀺 𑀅𑀬 𑀫𑁂𑀓𑁄 𑀅𑀦𑁆𑀢𑁄𑀢𑀺 𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑀲𑀸𑀭𑀪𑀽𑀢𑁄 𑀅𑀢𑁆𑀢𑀸𑀦𑀸𑀫 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀣𑀺. 𑀉𑀘𑁆𑀙𑁂𑀤𑁄 𑀯𑀸 𑀯𑀺𑀫𑁄𑀓𑁆𑀔𑁄 𑀯𑀸 𑀲𑀩𑁆𑀩𑀲𑁄 𑀦𑀢𑁆𑀣𑀺. 𑀅𑀬𑀁 𑀲𑀲𑁆𑀲𑀢𑀯𑀸𑀤𑁄 𑀦𑀸𑀫 𑀏𑀓𑁄𑀯𑀺𑀲𑀫𑀦𑁆𑀢𑁄 𑀏𑀓𑀸𑀯𑀺𑀲𑀫𑀸𑀓𑁄𑀝𑀺. 𑀦𑀢𑁆𑀣𑀻𑀢𑀺 𑀲𑀢𑁆𑀢𑁄𑀦𑀸𑀫 𑀏𑀓𑀪𑀯𑀧𑀭𑀫𑁄 𑀳𑁄𑀢𑀺, 𑀫𑀭𑀡𑀢𑁄 𑀧𑀭𑀁 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀉𑀘𑁆𑀙𑀺𑀚𑁆𑀚𑀢𑀺. 𑀅𑀬𑀁 𑀉𑀘𑁆𑀙𑁂𑀤𑀯𑀸𑀤𑁄 𑀦𑀸𑀫 𑀤𑀼𑀢𑀻𑀬𑁄 𑀯𑀺𑀲𑀫𑀦𑁆𑀢𑁄 𑀤𑀼𑀢𑀻𑀬𑀸𑀯𑀺𑀲𑀫𑀓𑁄𑀝𑀺. 𑀇𑀫𑁂 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑀁 𑀅𑀚𑀸𑀦𑀦𑁆𑀢𑀸𑀦𑀁 𑀉𑀪𑁄𑀯𑀺𑀲𑀫𑀦𑁆𑀢𑀸 𑀦𑀸𑀫. 𑀚𑀸𑀦𑀦𑁆𑀢𑀸𑀦𑀁 𑀧𑀦 𑀢𑀸𑀤𑀺𑀲𑁄 𑀅𑀢𑁆𑀢𑀸𑀦𑀸𑀫 𑀦𑀢𑁆𑀣𑀺, 𑀬𑁄 𑀅𑀢𑁆𑀣𑀻𑀢𑀺 𑀯𑀸 𑀦𑀢𑁆𑀣𑀻𑀢𑀺 𑀯𑀸 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀲𑀼𑀤𑁆𑀥𑀥𑀫𑁆𑀫𑀧𑁆𑀧𑀩𑀦𑁆𑀥𑁄 𑀏𑀯 𑀅𑀢𑁆𑀣𑀺. 𑀢𑀲𑁆𑀲 𑀘 𑀬𑀸𑀯 𑀅𑀯𑀺𑀚𑁆𑀚𑀸 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺, 𑀢𑀸𑀯 𑀉𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺. 𑀅𑀯𑀺𑀚𑁆𑀚𑀸𑀬 𑀧𑀦 𑀧𑀳𑀻𑀦𑀸𑀬 𑀢𑀢𑁄𑀧𑀭𑀁 𑀦 𑀧𑀯𑀢𑁆𑀢𑀢𑀺. 𑀅𑀢𑁆𑀣𑀺 𑀦𑀸𑀫 𑀦 𑀳𑁄𑀢𑀺. 𑀅𑀬𑀁 𑀅𑀦𑁆𑀢𑀤𑁆𑀯𑀬𑀫𑀼𑀢𑁆𑀢𑁄 𑀫𑀚𑁆𑀛𑀺𑀫𑀜𑀸𑀬𑁄 𑀦𑀸𑀫. 𑀩𑀳𑀼𑀁 𑀦𑀸𑀦𑀢𑁆𑀣 𑀲𑀫𑁆𑀪𑀯𑀁 𑀯𑀡𑁆𑀡𑁂𑀦𑁆𑀢𑀺𑀬𑁂𑀯. 𑀯𑀡𑁆𑀡𑁂𑀦𑁆𑀢𑀸𑀦𑀁𑀧𑀺 𑀢𑁂𑀲𑀁 𑀩𑀳𑀼 𑀧𑀬𑁄𑀚𑀦𑀁 𑀦𑀢𑁆𑀣𑀺 𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀘𑁆𑀘𑀬𑀼𑀤𑁆𑀤𑁂𑀲𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁮. 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂. ‘‘𑀧𑀜𑁆𑀘𑀥𑀸’’𑀢𑀺 𑀧𑀜𑁆𑀘𑀯𑀺𑀥𑁂𑀳𑀺 𑀧𑀘𑁆𑀘𑀬𑁂𑀳𑀺. ‘‘𑀏𑀓𑀥𑀸’’𑀢𑀺 𑀏𑀓𑀯𑀺𑀥𑁂𑀦 𑀧𑀘𑁆𑀘𑀬𑁂𑀦. 𑀏𑀯𑀁 𑀲𑁂𑀲𑁂𑀲𑀼𑀧𑀺. ‘‘𑀅𑀯𑀺𑀘𑁆𑀙𑁂𑀤𑀸𑀬𑀸’’𑀢𑀺 𑀅𑀯𑀺𑀘𑁆𑀙𑁂𑀤𑀢𑁆𑀣𑀸𑀬. ‘‘𑀧𑀝𑀺𑀧𑀸𑀤𑀦𑀸𑀬𑀸’’𑀢𑀺 𑀬𑁄𑀚𑀦𑀢𑁆𑀣𑀸𑀬. 𑀬𑁄 𑀓𑁄𑀘𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀯𑀺𑀭𑀼𑀤𑁆𑀥𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀘𑁆𑀘𑀬𑁄 𑀦 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀼𑀦𑀼𑀧𑁆𑀧𑀦𑁆𑀦𑀸𑀦𑀁’’𑀢𑀺 𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀼𑀦 𑀉𑀧𑁆𑀧𑀦𑁆𑀦𑀸𑀦𑀁. ‘‘𑀧𑀼𑀭𑀺𑀫𑀸𑀦𑀺 𑀚𑀯𑀦𑀸𑀦𑀻’’𑀢𑀺 𑀏𑀢𑁆𑀣 𑀫𑀕𑁆𑀕𑁄 𑀕𑁄𑀢𑁆𑀭𑀪𑀼𑀢𑁄 𑀆𑀲𑁂𑀯𑀦 𑀧𑀘𑁆𑀘𑀬𑀁 𑀮𑀪𑀢𑀺. 𑀨𑀮𑀲𑁆𑀲 𑀧𑀦 𑀲𑁄 𑀪𑀺𑀦𑁆𑀦𑀚𑀸𑀢𑀺𑀓𑀢𑁆𑀢𑀸 𑀆𑀲𑁂𑀯𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀨𑀮𑀁 𑀧𑀦 𑀲𑀩𑁆𑀩𑀲𑁄 𑀆𑀲𑁂𑀯𑀦 𑀫𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀇𑀥 𑀧𑀼𑀭𑀺𑀫𑀚𑀯𑀦𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀕𑁆𑀕 𑀨𑀮𑀚𑀯𑀦𑀯𑀚𑁆𑀚𑀸𑀦𑀻’’𑀢𑀺. 𑀨𑀮𑀚𑀯𑀦𑀯𑀚𑁆𑀚𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀚𑀯𑀦𑀸𑀦𑀁. ‘‘𑀲𑀩𑁆𑀩𑀸𑀓𑀸𑀭𑀧𑀸𑀭𑀺𑀧𑀽𑀭𑀁’’𑀢𑀺 𑀏𑀢𑁆𑀣 𑀓𑀼𑀲𑀮𑀸𑀤𑀺𑀚𑀸𑀢𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀚𑀸𑀢𑀺𑀫𑀢𑁆𑀢𑁂𑀦𑀧𑀻’’𑀢𑀺. 𑀅𑀪𑀺𑀦𑁆𑀦𑀸 𑀏𑀯 𑀲𑀺𑀬𑀼𑀁. 𑀦 𑀧𑀦 𑀪𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀓𑀤𑀸𑀘𑀺 𑀓𑁂𑀘𑀺𑀪𑀺𑀦𑁆𑀦𑀸 𑀏𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀪𑀺𑀦𑁆𑀦𑀚𑀸𑀢𑀺𑀓𑀸 𑀥𑀫𑁆𑀫𑀸. 𑀮. 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀓𑀸𑀫𑀸𑀯𑀘𑀭𑀪𑀸𑀯𑀢𑁄 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀪𑀸𑀯𑀧𑀢𑁆𑀢𑀺 𑀦𑀸𑀫𑀸’’𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑁄𑀢𑁆𑀭 𑀪𑀼𑀘𑀺𑀢𑁆𑀢𑀁 𑀓𑀸𑀫𑀪𑀽𑀫𑀺. 𑀛𑀸𑀦𑀘𑀺𑀢𑁆𑀢𑀁 𑀫𑀳𑀕𑁆𑀕𑀢𑀪𑀽𑀫𑀺. 𑀫𑀕𑁆𑀕𑀘𑀺𑀢𑁆𑀢𑀁 𑀮𑁄𑀓𑀼𑀢𑁆𑀢𑀭 𑀪𑀽𑀫𑀺. 𑀓𑀫𑁆𑀫𑀘𑁂𑀢𑀦𑀸𑀬 𑀦𑀺𑀭𑀼𑀤𑁆𑀥𑀸𑀬𑀧𑀺 𑀢𑀲𑁆𑀲𑀸 𑀧𑀯𑀢𑁆𑀢𑀸𑀓𑀸𑀭𑁄 𑀦𑀦𑀺𑀭𑀼𑀚𑁆𑀛𑀢𑀺. 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀦𑀼𑀕𑀘𑁆𑀙𑀢𑀺. 𑀲𑁄 𑀏𑀯 𑀆𑀬𑀢𑀺𑀁 𑀯𑀺𑀧𑀸𑀓𑀥𑀫𑁆𑀫𑀭𑀸𑀲𑀺 𑀳𑀼𑀢𑁆𑀯𑀸 𑀧𑀸𑀢𑀼𑀩𑁆𑀪𑀯𑀢𑀺. 𑀢𑀲𑁆𑀫𑀸 𑀲𑁄 𑀯𑀺𑀧𑀸𑀓𑀲𑁆𑀲 𑀩𑀻𑀚𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀲𑁄 𑀘 𑀬𑀸𑀯 𑀦 𑀯𑀺𑀧𑀘𑁆𑀘𑀢𑀺. 𑀢𑀸𑀯 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺, 𑀅𑀦𑁆𑀢𑀭𑀸 𑀯𑀺𑀦𑀝𑁆𑀞𑁄 𑀦𑀸𑀫 𑀦 𑀳𑁄𑀢𑀺. 𑀢𑀲𑁆𑀫𑀸 𑀓𑀫𑁆𑀫𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀢𑀲𑁆𑀲 𑀩𑀻𑀚𑀲𑁆𑀲 𑀦𑀺𑀥𑀸𑀦𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀭𑀼𑀚𑁆𑀛𑀫𑀸𑀦𑀸 𑀘 𑀦𑀺𑀤𑀳𑀺𑀢𑁆𑀯𑀸 𑀏𑀯 𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀯𑀢𑁆𑀢𑀸𑀓𑀸𑀭𑀲𑀗𑁆𑀔𑀸𑀢 𑀩𑀻𑀚𑀦𑀺𑀥𑀸𑀦𑀜𑁆𑀘𑀸’’𑀢𑀺. ‘‘𑀘𑁂𑀢𑀦𑀸𑀬 𑀳𑁄𑀢𑀻’’𑀢𑀺 𑀘𑁂𑀢𑀦𑀸𑀬 𑀲𑀸𑀥𑀸𑀭𑀡𑀁 𑀳𑁄𑀢𑀺. 𑀧𑀼𑀭𑁂𑀚𑀸𑀢𑀸 𑀲𑀸𑀮𑀭𑀼𑀓𑁆𑀔𑀧𑁄𑀢𑀓𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀘𑀺𑀢𑁆𑀢𑀓𑁆𑀔𑀡𑁂𑀲𑀼 𑀉𑀧𑁆𑀧𑀦𑁆𑀦𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀆𑀳𑀸𑀭𑀚𑀓𑀸𑀬𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀢𑀺 𑀧𑀸𑀞𑀲𑁂𑀲𑁄. ‘‘𑀧𑀘𑁆𑀙𑀸 𑀚𑀸𑀢𑁂𑀦𑀸’’𑀢𑀺 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀚𑀺𑀡𑁆𑀡𑀧𑀢𑀭𑀼𑀓𑁆𑀔𑀲𑁆𑀲 𑀉𑀤𑀓𑀸𑀲𑀺𑀜𑁆𑀘𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀤𑀕𑁆𑀕𑁂𑀦𑀸’’𑀢𑀺 𑀬𑁂𑀦𑀓𑀸𑀭𑀡 𑀓𑁄𑀝𑁆𑀞𑀸𑀲𑁂𑀦. ‘‘𑀯𑀢𑁆𑀣𑀼 𑀭𑀽𑀧𑀁’’𑀢𑀺 𑀦𑀺𑀭𑁄𑀥𑀸𑀲𑀦𑁆𑀦𑀁 𑀳𑀤𑀬𑀯𑀢𑁆𑀣𑀼 𑀭𑀽𑀧𑀁. ‘‘𑀏𑀯𑀫𑀬𑀁 𑀧𑀻’’𑀢𑀺 𑀏𑀯𑀁 𑀅𑀬𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄𑀧𑀺. 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀨𑀭𑀡𑀁 𑀓𑀸𑀮𑀦𑁆𑀢𑀭 𑀤𑁂𑀲𑀦𑁆𑀢𑀭 𑀕𑀫𑀦𑀁 𑀯𑀺𑀧𑁆𑀨𑀸𑀭𑁄. 𑀫𑀳𑀦𑁆𑀢𑁄 𑀯𑀺𑀧𑁆𑀨𑀸𑀭𑁄 𑀬𑀲𑁆𑀲𑀸𑀢𑀺 𑀲𑀫𑀸𑀲𑁄. ‘‘𑀯𑀢𑁆𑀣𑀼𑀫𑁆𑀳𑀻’’𑀢𑀺 𑀳𑀤𑀬𑀯𑀢𑁆𑀣𑀼𑀫𑁆𑀳𑀺. 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑁄𑀓𑀺𑀡𑁆𑀡𑁄 𑀲𑀫𑁆𑀫𑀺𑀲𑁆𑀲𑁄𑀢𑀺 𑀧𑀜𑁆𑀘𑀯𑁄𑀓𑀸𑀭𑁄. 𑀓𑀸𑀫 𑀭𑀽𑀧𑀪𑀯𑁄. 𑀯𑀺𑀦𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀩𑀮𑁂𑀦 𑀭𑀽𑀧𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀼𑀭𑁂𑀚𑀸𑀢𑀁 𑀯𑀸’’𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑁂 𑀧𑀼𑀭𑁂𑀚𑀸𑀢𑀁 𑀯𑀸. ‘‘𑀯𑀟𑁆𑀠𑀦𑀧𑀓𑁆𑀔𑁂 𑀞𑀺𑀢𑀁 𑀯𑀸’’𑀢𑀺 𑀢𑀢𑁄 𑀧𑀘𑁆𑀙𑀸 𑀬𑀸𑀯 𑀅𑀝𑁆𑀞𑀫 𑀘𑀺𑀢𑁆𑀢𑀓𑁆𑀔𑀡𑀸 𑀯𑀟𑁆𑀠𑀦𑀧𑀓𑁆𑀔𑁂 𑀞𑀺𑀢𑀁 𑀯𑀸. ‘‘𑀉𑀧𑁆𑀧𑀦𑁆𑀦𑀁 𑀯𑀢𑁆𑀣𑀽’’𑀢𑀺 𑀉𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀭𑀽𑀧𑀁. ‘‘𑀏𑀢𑁆𑀣𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀼𑀭𑁂𑀚𑀸𑀢 𑀧𑀘𑁆𑀘𑀬𑁂. 𑀓𑀺𑀜𑁆𑀘𑀸𑀧𑀺 𑀤𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀘𑁆𑀘𑀦𑀻𑀬𑁂’’𑀢𑀺 𑀧𑀘𑁆𑀘𑀦𑀻𑀬 𑀯𑀸𑀭𑁂. ‘‘𑀢𑀁’’𑀢𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁. 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀧𑀭𑀺𑀩𑁆𑀬𑀢𑁆𑀢𑀢𑁆𑀢𑀸𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀭𑀡𑀁 𑀯𑀤𑀦𑁆𑀢𑀺 𑀧𑀝𑁆𑀞𑀸𑀦𑀝𑀻𑀓𑀸𑀘𑀭𑀺𑀬𑀸. 𑀅𑀭𑀽𑀧𑀪𑀯𑁂 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀓𑀲𑁆𑀲𑀘𑀺 𑀕𑀢𑀺𑀦𑀺𑀫𑀺𑀢𑁆𑀢𑀼 𑀧𑀝𑁆𑀞𑀸𑀦𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀫𑁂𑀯. 𑀏𑀯𑀜𑁆𑀘𑀲𑀢𑀺, 𑀢𑀢𑁆𑀣 𑀆𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑀁 𑀮𑀤𑁆𑀥𑀩𑁆𑀩𑀫𑁂𑀯. 𑀧𑀝𑁆𑀞𑀸𑀦𑁂𑀧𑀦 𑀢𑀲𑁆𑀫𑀺𑀁𑀪𑀯𑁂 𑀲𑀩𑁆𑀩𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀲𑁆𑀫𑀸 𑀇𑀢𑀺 𑀘𑁂, 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀲𑁆𑀲 𑀢𑀢𑁆𑀣 𑀅𑀮𑀤𑁆𑀥𑀩𑁆𑀩𑀢𑁆𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀆𑀭𑀼𑀧𑁆𑀧𑁂𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀝𑁆𑀞𑀸𑀦𑁂 𑀅𑀭𑀽𑀧𑀪𑀯𑁂 𑀤𑁆𑀯𑁂𑀧𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀅𑀭𑀽𑀧 𑀧𑀼𑀕𑁆𑀕𑀮𑀸 𑀲𑀩𑁆𑀩𑀁𑀧𑀺 𑀭𑀽𑀧𑀥𑀫𑁆𑀫𑀁 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀦𑁆𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀆𑀭𑀫𑁆𑀫𑀡 𑀲𑀗𑁆𑀕𑀳𑀤𑀻𑀧𑀦𑀺𑀬𑀁 ‘𑀅𑀲𑀜𑁆𑀜𑀻𑀪𑀯𑀢𑁄 𑀘𑀼𑀢𑀸𑀦𑀁 𑀯𑀺𑀬 𑀅𑀭𑀽𑀧𑀪𑀯𑀢𑁄 𑀘𑀼𑀢𑀸𑀦𑀁𑀧𑀺 𑀕𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀁 𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁 𑀪𑀯𑀦𑁆𑀢𑀭𑁂 𑀓𑁂𑀦𑀘𑀺𑀤𑁆𑀯𑀸𑀭𑁂𑀦 𑀅𑀕𑁆𑀕𑀳𑀺𑀢𑀁, 𑀓𑁂𑀯𑀮𑀁 𑀓𑀫𑁆𑀫𑀩𑀮𑁂𑀦𑁂𑀯 𑀉𑀧𑀝𑁆𑀞𑀸𑀧𑀺𑀢’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀕𑀽𑀣𑀓𑀼𑀡𑀧𑀸𑀤𑀻𑀦𑀻’’𑀢𑀺 𑀕𑀽𑀣𑀜𑁆𑀘 𑀫𑀢𑀧𑀽𑀢𑀺𑀲𑀭𑀻𑀭𑀸𑀦𑀺 𑀘. ‘‘𑀏𑀯𑀁 𑀯𑀼𑀢𑁆𑀢𑁂𑀳𑀻’’𑀢𑀺 𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑁂𑀳𑀺. 𑀢𑁂 𑀧𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀣𑀁 𑀘𑀢𑀼𑀪𑀽𑀫𑀺𑀓 𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀢𑀢𑁆𑀣 𑀆𑀦𑀦𑁆𑀢𑀭𑀺𑀬 𑀯𑀚𑁆𑀚𑀸𑀦𑀻’’𑀢𑀺𑀆𑀤𑀺𑀁. 𑀢𑀢𑁆𑀣 𑀆𑀦𑀦𑁆𑀢𑀭𑀺𑀬 𑀓𑀫𑁆𑀫𑀓𑀢𑀸𑀦𑀁 𑀓𑀺𑀮𑁂𑀲𑀸𑀯𑀭𑀡 𑀓𑀫𑁆𑀫𑀸𑀯𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀛𑀸𑀦𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀦𑀦𑁆𑀢𑀭𑀺𑀬 𑀯𑀚𑁆𑀚𑀸𑀦𑀻’’𑀢𑀺. ‘‘𑀢𑀸𑀦𑀻’’𑀢𑀺 𑀭𑀸𑀕𑀸𑀤𑀻𑀦𑀺 𑀅𑀓𑀼𑀲𑀮𑀸𑀦𑀺 𑀘𑀢𑀼𑀪𑀽𑀫𑀺𑀓 𑀓𑀼𑀲𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦𑀸’’𑀢𑀺 𑀧𑀝𑁆𑀞𑀸𑀦𑁂 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀪𑀗𑁆𑀕𑁂 𑀧𑀸𑀡𑀁 𑀳𑀦𑁆𑀢𑁆𑀯𑀸 𑀢𑀲𑁆𑀲 𑀧𑀝𑀺𑀖𑀸 𑀢𑀢𑁆𑀣𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬𑀸’’𑀢𑀺 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲 𑀧𑀝𑀺𑀳𑀦𑀦𑀢𑁆𑀣𑀸𑀬 𑀧𑀳𑀸𑀦𑀢𑁆𑀣𑀸𑀬 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀘𑁂 𑀧𑀸𑀡𑀸𑀢𑀺𑀧𑀸𑀢𑀻 𑀧𑀼𑀕𑁆𑀕𑀮𑁄 𑀧𑀼𑀦 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀤𑀸 𑀢𑀁 𑀧𑀸𑀡𑀸𑀢𑀺 𑀧𑀸𑀢𑀓𑀫𑁆𑀫𑀁 𑀢𑀁 𑀧𑀼𑀕𑁆𑀕𑀮𑀁 𑀤𑀸𑀦𑀓𑀫𑁆𑀫𑁂𑀦𑀺𑀬𑁄𑀚𑁂𑀢𑀺 𑀦𑀸𑀫. 𑀢𑀣𑀸 𑀲𑀻𑀮𑀓𑀫𑁆𑀫𑁂 𑀉𑀧𑁄𑀲𑀣 𑀓𑀫𑁆𑀫𑁂𑀢𑀺. 𑀬𑀣𑀸𑀳𑀺 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑀇𑀫𑀲𑁆𑀫𑀺𑀁 𑀤𑀺𑀯𑀲𑁂 𑀬𑁄 𑀉𑀧𑁄𑀲𑀣𑀁 𑀦𑀼𑀧𑀯𑀲𑀢𑀺, 𑀢𑀁 𑀖𑀸𑀢𑁂𑀲𑁆𑀲𑀸𑀫𑀻𑀢𑀺. 𑀢𑀤𑀸 𑀲𑀩𑁆𑀩𑁂𑀧𑀺 𑀦𑀸𑀕𑀭𑀸 𑀉𑀧𑁄𑀲𑀣𑀁 𑀉𑀧𑀯𑀲𑁂𑀬𑁆𑀬𑀼𑀁. 𑀏𑀯𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀭𑀸𑀚𑀸𑀯𑀺𑀬 𑀳𑀺 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁. 𑀦𑀸𑀕𑀭𑀸 𑀯𑀺𑀬 𑀲𑁄 𑀧𑀸𑀡𑀖𑀸𑀢𑀓𑁄. 𑀉𑀧𑁄𑀲𑀣 𑀓𑀫𑁆𑀫 𑀓𑀼𑀲𑀮𑀸𑀦𑀺 𑀯𑀺𑀬 𑀢𑀲𑁆𑀲 𑀤𑀸𑀦𑀲𑀻𑀮 𑀉𑀧𑁄𑀲𑀣 𑀓𑀫𑁆𑀫 𑀓𑀼𑀲𑀮𑀸𑀦𑀻𑀢𑀺. ‘‘𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺 𑀧𑀤𑁂𑀲𑀼𑀧𑀺 𑀏𑀲𑁂𑀯𑀦𑀬𑁄. 𑀏𑀯𑀁 𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦 𑀏𑀓𑀁𑀧𑀺 𑀅𑀓𑀼𑀲𑀮𑀁 𑀲𑀩𑁆𑀩𑀸𑀦𑀺 𑀘𑀢𑀼𑀪𑀽𑀫𑀺𑀓 𑀓𑀼𑀲𑀮𑀸𑀦𑀺 𑀉𑀧𑀦𑀺𑀲𑁆𑀲𑀬 𑀲𑀢𑁆𑀢𑀺𑀬𑀸 𑀚𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀸𑀦𑀺𑀬𑁂𑀯 𑀲𑀩𑁆𑀩𑀸𑀦𑀻’’𑀢𑀺 𑀆𑀦𑀦𑁆𑀢𑀭𑀺𑀬 𑀓𑀫𑁆𑀫𑀲𑀳𑀺𑀢𑀸𑀦𑀺𑀲𑀩𑁆𑀩𑀸𑀦𑀺 𑀅𑀓𑀼𑀲𑀮𑀸𑀦𑀺𑀬𑁂𑀯 𑀲𑀩𑁆𑀩𑁂𑀲𑀁 𑀅𑀓𑀼𑀲𑀮𑀸𑀦𑀁 𑀅𑀩𑁆𑀬𑀸𑀓𑀢 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀤𑀸𑀦𑀲𑀻𑀮𑀸𑀤𑀬𑁄 𑀓𑀼𑀲𑀮𑀸 𑀥𑀫𑁆𑀫𑀸. 𑀲𑀼𑀝𑁆𑀞𑀼 𑀩𑀮𑀯𑀁 𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀤𑀼𑀩𑁆𑀩𑀮𑀁. 𑀉𑀧𑀦𑀺𑀲𑁆𑀲𑀬𑀝𑁆𑀞𑀸𑀦𑀢𑁆𑀢𑀸. 𑀢𑁂𑀲𑀁𑀧𑀺 𑀭𑀽𑀧𑀥𑀫𑁆𑀫𑀸𑀦𑀁 𑀩𑀮𑀯𑀦𑀺𑀲𑁆𑀲𑀬𑀸 𑀦𑀦𑀼𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀩𑀳𑀺𑀤𑁆𑀥𑀸𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀁’’𑀢𑀺𑀆𑀤𑀺𑀁. 𑀢𑀢𑁆𑀣 𑀧𑀣𑀯𑀻𑀭𑀲 𑀆𑀧𑁄𑀭𑀲𑀯𑀲𑁆𑀲𑁄𑀤𑀓 𑀩𑀻𑀚𑀸𑀦𑀺 𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀁 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀫𑀽𑀮𑀪𑁂𑀲𑀚𑁆𑀚𑀸𑀤𑀻𑀦𑀺 𑀅𑀚𑁆𑀛𑀢𑁆𑀢𑀁 𑀲𑀦𑁆𑀢𑀸𑀦𑀁 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀓𑀢𑀲𑁆𑀲𑁂𑀯𑀸’’𑀢𑀺 𑀧𑀣𑀫𑀢𑀭𑀁 𑀓𑀢𑀲𑁆𑀲 𑀉𑀧𑁆𑀧𑀸𑀤𑀦𑀸𑀤𑀺𑀓𑀫𑁆𑀫𑀲𑁆𑀲𑁂𑀯. ‘‘𑀦 𑀏𑀯𑀁 𑀭𑀽𑀧𑀲𑀦𑁆𑀢𑀸𑀦𑁂𑀦𑀸’’𑀢𑀺 𑀏𑀯𑀁 𑀭𑀽𑀧𑀲𑀦𑁆𑀢𑀸𑀦𑁂𑀦 𑀉𑀧𑁆𑀧𑀸𑀤𑀺𑀢𑀸 𑀉𑀧𑀲𑁂𑀯𑀺𑀢𑀸 𑀥𑀫𑁆𑀫𑀸 𑀦𑀢𑁆𑀣𑀺. ‘‘𑀢𑀁’’𑀢𑀺 𑀉𑀢𑀼𑀩𑀻𑀚𑀸𑀤𑀺𑀓𑀁. 𑀓𑀫𑁆𑀫𑀸𑀤𑀺𑀓𑀜𑁆𑀘. ‘‘𑀧𑀓𑀢𑀁’’𑀢𑀺 𑀧𑀼𑀭𑁂𑀢𑀭𑀁 𑀉𑀧𑁆𑀧𑀸𑀤𑀺𑀢𑀜𑁆𑀘 𑀉𑀧𑀲𑁂𑀯𑀺𑀢𑀜𑁆𑀘. 𑀲𑀘𑁂𑀢𑀦𑀲𑁆𑀲𑁂𑀯 𑀘𑁂𑀢𑀦𑀁 𑀧𑀓𑀧𑁆𑀧𑀦𑀁 𑀧𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑁂𑀢𑀦𑀁 𑀧𑀓𑀧𑁆𑀧𑀦𑀁 𑀧𑀓𑀭𑀡𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀧𑀓𑀧𑁆𑀧𑀦𑀁’’𑀢𑀺 𑀘 𑀲𑀁𑀯𑀺𑀥𑀸𑀦𑀁. ‘‘𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺𑀓𑀫𑁆𑀫𑀸𑀤𑀺𑀓𑀁 𑀉𑀢𑀼𑀪𑁄𑀚𑀦𑀸𑀤𑀺𑀓𑀜𑁆𑀘. 𑀅𑀢𑁆𑀢𑀦𑁄 𑀘 𑀉𑀧𑁆𑀧𑀦𑁆𑀦𑀸 𑀭𑀸𑀕𑀸𑀤𑀬𑁄 𑀧𑀭𑀲𑁆𑀲 𑀘 𑀲𑀦𑁆𑀢𑀸𑀦𑁂 𑀧𑀭𑀲𑁆𑀲 𑀘 𑀉𑀧𑁆𑀧𑀦𑁆𑀦𑀸 𑀭𑀸𑀕𑀸𑀤𑀬𑁄 𑀅𑀢𑁆𑀢𑀦𑁄 𑀘 𑀲𑀦𑁆𑀢𑀸𑀦𑁂𑀢𑀺 𑀬𑁄𑀚𑀦𑀸. ‘‘𑀦𑀺𑀤𑀲𑁆𑀲𑀦𑀁’’𑀢𑀺 𑀉𑀤𑀸𑀳𑀭𑀡𑀁 𑀳𑁄𑀢𑀺. 𑀫𑀦𑁄𑀧𑀤𑁄𑀲𑀺𑀓𑀤𑁂𑀯𑀸 𑀅𑀜𑁆𑀜𑀫𑀜𑁆𑀜𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀫𑀦𑀁 𑀧𑀤𑀽𑀲𑁂𑀦𑁆𑀢𑀺. 𑀩𑀸𑀴𑁆𑀳𑀁 𑀇𑀲𑁆𑀲𑀸𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀘𑀯𑀦𑁆𑀢𑀺. 𑀢𑁂𑀲𑀁 𑀤𑁆𑀯𑁂 𑀇𑀲𑁆𑀲𑀸𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺. 𑀓𑀸𑀫𑀸𑀯𑀘𑀭 𑀓𑀼𑀲𑀮𑀲𑁆𑀲 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂. 𑀛𑀸𑀦 𑀫𑀕𑁆𑀕 𑀨𑀮 𑀯𑀺𑀧𑀲𑁆𑀲𑀦𑀸𑀤𑀺𑀪𑁂𑀤𑀁 𑀆𑀮𑀫𑁆𑀩𑀡𑀁 𑀧𑀘𑁆𑀘𑀯𑁂𑀓𑁆𑀔𑀦 𑀅𑀲𑁆𑀲𑀸𑀤𑀦𑀸𑀤𑀺 𑀥𑀫𑁆𑀫𑁂 𑀅𑀢𑁆𑀢𑀸𑀥𑀻𑀦𑁂 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀢𑀸𑀥𑀻𑀦𑁂’’𑀢𑀺 𑀅𑀢𑁆𑀢𑀸𑀬𑀢𑁆𑀢𑁂 𑀅𑀢𑁆𑀢𑀸𑀩𑀤𑁆𑀥𑁂. 𑀧𑀝𑁆𑀞𑀸𑀦𑁂 𑀧𑀜𑁆𑀳𑀯𑀸𑀭𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀻𑀢𑀺𑀆𑀤𑀺𑀦𑀸 𑀆𑀕𑀢𑀢𑁆𑀢𑀸𑀤𑀸𑀦 𑀲𑀻𑀮. 𑀮. 𑀦𑀺𑀩𑁆𑀩𑀸𑀦𑀸𑀦𑀺 𑀘𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀭𑀸𑀕𑀁 𑀕𑀭𑀼𑀁𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀦𑁆𑀢𑀺, 𑀅𑀪𑀺𑀦𑀦𑁆𑀤𑀢𑀻𑀢𑀺𑀆𑀤𑀺𑀦𑀸, 𑀘𑀓𑁆𑀔𑀼𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺𑀆𑀤𑀺𑀦𑀸 𑀘 𑀆𑀕𑀢𑀢𑁆𑀢𑀸 ‘‘𑀭𑀸𑀕 𑀤𑀺𑀝𑁆𑀞𑀺 𑀘𑀓𑁆𑀔𑀼 𑀲𑁄𑀢𑀸𑀤𑀻𑀦𑀺𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀧𑀭𑀢𑁆𑀣 𑀧𑀻’’𑀢𑀺 𑀧𑀭𑀢𑁄 𑀦𑀺𑀲𑁆𑀲𑀬 𑀧𑀘𑁆𑀘𑀬𑀸𑀤𑀻𑀲𑀼𑀧𑀺. ‘‘𑀲𑁄 𑀏𑀯𑀸’’𑀢𑀺 𑀧𑀘𑁆𑀘𑀼𑀧𑀢𑁆𑀣𑀫𑁆𑀪𑀓𑁄 𑀏𑀯. ‘‘𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺𑀫𑀢𑁆𑀢𑀁𑀧𑀺. 𑀫𑀳𑀸𑀪𑀽𑀢𑁂 𑀓𑀺𑀜𑁆𑀘𑀺 𑀉𑀧𑀢𑁆𑀣𑀫𑁆𑀪𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀦𑀦𑀼 𑀆𑀳𑀸𑀭 𑀭𑀽𑀧𑀁 𑀫𑀳𑀸𑀪𑀽𑀢𑁂 𑀉𑀧𑀢𑁆𑀣𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀚𑀻𑀯𑀺𑀢𑀭𑀽𑀧𑀜𑁆𑀘 𑀓𑀫𑁆𑀫𑀚𑀫𑀳𑀸𑀪𑀽𑀢𑁂 𑀅𑀦𑀼𑀧𑀸𑀮𑁂𑀢𑀼𑀦𑁆𑀢𑀺. 𑀲𑀘𑁆𑀘𑀁. 𑀇𑀥 𑀧𑀦 𑀲𑀳𑀚𑀸𑀢𑀧𑀘𑁆𑀘𑀬 𑀓𑀺𑀘𑁆𑀘𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀲𑀳𑀚𑀸𑀢𑀧𑀘𑁆𑀘𑀬 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑀁 𑀧𑀭𑀢𑁄 𑀆𑀯𑀻 𑀪𑀯𑀺𑀲𑁆𑀲𑀢𑀻𑀢𑀺. ‘‘𑀯𑀢𑁆𑀣𑀼 𑀯𑀺𑀧𑀸𑀓𑀸𑀦𑀁’’𑀢𑀺 𑀯𑀢𑁆𑀣𑀼𑀭𑀽𑀧𑀁 𑀯𑀺𑀧𑀸𑀓𑀸𑀦𑀁. 𑀧𑀝𑁆𑀞𑀸𑀦𑀧𑀸𑀞𑁂. 𑀆𑀭𑀫𑁆𑀫𑀡𑀜𑁆𑀘, 𑀦𑀺𑀲𑁆𑀲𑀬𑁄 𑀘, 𑀧𑀼𑀭𑁂𑀚𑀸𑀢𑀜𑁆𑀘, 𑀯𑀺𑀧𑁆𑀧𑀬𑀼𑀢𑁆𑀢𑁄 𑀘, 𑀅𑀢𑁆𑀣𑀺 𑀘, 𑀅𑀯𑀺𑀕𑀢𑁄 𑀘𑀸,𑀢𑀺 𑀙𑀲𑀼𑀧𑀘𑁆𑀘𑀬𑁂𑀲𑀼 𑀖𑀝𑀺𑀢𑁂𑀲𑀼 𑀢𑀻𑀡𑀺 𑀯𑀺𑀲𑀚𑁆𑀚𑀦𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀻𑀡𑀺 𑀯𑀺𑀲𑀚𑁆𑀚𑀦𑀸𑀦𑀺 𑀦𑀸𑀫 𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀙 𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄. 𑀯𑀢𑁆𑀣𑀼 𑀅𑀓𑀼𑀲𑀮𑀸𑀦𑀁, 𑀯𑀢𑁆𑀣𑀼 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺. 𑀏𑀢𑁆𑀣 𑀘 𑀅𑀢𑁆𑀢𑀦𑁄 𑀅𑀚𑁆𑀛𑀢𑁆𑀢𑀁 𑀯𑀢𑁆𑀣𑀼𑀁 𑀆𑀭𑀩𑁆𑀪 𑀯𑀢𑁆𑀣𑀼 𑀫𑁂 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀢𑁆𑀣𑀼𑀭𑀽𑀧𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀙𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄. 𑀏𑀢𑀁 𑀫𑀫, 𑀏𑀲𑁄 𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸,𑀢𑀺 𑀉𑀧𑀸𑀤𑀺𑀬𑀦𑁆𑀢𑀲𑁆𑀲 𑀯𑀢𑁆𑀣𑀼 𑀭𑀽𑀧𑀁 𑀅𑀓𑀼𑀲𑀮𑀸𑀦𑀁. 𑀉𑀪𑀬𑀢𑁆𑀣𑀧𑀺 𑀆𑀯𑀚𑁆𑀚𑀦𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑀸𑀦𑀁. 𑀅𑀭𑀳𑀢𑁄 𑀧𑀦 𑀢𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀓𑁆𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀔𑀦𑁆𑀥𑀸𑀦𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁’’𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁. 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑁂 𑀧𑀦 𑀆𑀓𑀸𑀲 𑀕𑀫𑀦𑁂 𑀭𑀽𑀧𑀓𑀸𑀬𑀁 𑀆𑀭𑀩𑁆𑀪𑀘𑀺𑀢𑁆𑀢𑀁 𑀯𑀺𑀬 𑀓𑀸𑀬𑀁 𑀮𑀳𑀼𑀓𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀯𑀢𑁆𑀣𑀼 𑀅𑀪𑀺𑀜𑁆𑀜𑀸𑀘𑀺𑀢𑁆𑀢 𑀤𑁆𑀯𑀬𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀅𑀦𑀺𑀝𑁆𑀞𑁂𑀞𑀸𑀦𑁂’’𑀢𑀺 𑀚𑀯𑀦𑀘𑀺𑀢𑁆𑀢𑀲𑁆𑀲 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀉𑀧𑁆𑀧𑀚𑁆𑀚𑀦𑀁 𑀦𑀸𑀫 𑀓𑀢𑁆𑀣𑀘𑀺 𑀇𑀘𑁆𑀙𑀺𑀢𑀩𑁆𑀩𑀁 𑀳𑁄𑀢𑀺. 𑀓𑀢𑁆𑀣𑀘𑀺 𑀅𑀦𑀺𑀘𑁆𑀙𑀺𑀢𑀩𑁆𑀩𑀁. 𑀢𑀢𑁆𑀣 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑁂, 𑀫𑀕𑁆𑀕𑀯𑀻𑀣𑀻𑀲𑀼 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀝𑁆𑀞𑀸𑀦𑁂, 𑀆𑀕𑀦𑁆𑀢𑀼𑀓 𑀪𑀯𑀗𑁆𑀕𑀝𑁆𑀞𑀸𑀦𑁂𑀢𑀺 𑀇𑀤𑀁 𑀇𑀘𑁆𑀙𑀺𑀢𑀩𑁆𑀩𑀝𑁆𑀞𑀸𑀦𑀁 𑀦𑀸𑀫. 𑀇𑀢𑁄 𑀅𑀜𑁆𑀜𑀁 𑀅𑀦𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀦𑀸𑀫. 𑀏𑀯𑀁 𑀅𑀦𑀺𑀘𑁆𑀙𑀺𑀢𑀩𑁆𑀩𑁂 𑀞𑀸𑀦𑁂𑀢𑀺 𑀅𑀢𑁆𑀣𑁄. ‘‘𑀧𑀓𑀢𑀺𑀓𑀸𑀮𑁂’’𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑀢𑁄 𑀅𑀜𑁆𑀜𑀲𑁆𑀫𑀺𑀁𑀓𑀸𑀮𑁂. ‘‘𑀢𑀸𑀦𑀺𑀯𑀸’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀯𑀢𑁆𑀣𑀽𑀦𑀺𑀯𑀸. ‘‘𑀅𑀜𑁆𑀜𑀁 𑀯𑀸’’𑀢𑀺 𑀯𑀢𑁆𑀣𑀼𑀢𑁄 𑀅𑀜𑁆𑀜𑀁 𑀭𑀽𑀧𑀸𑀤𑀺𑀓𑀁 𑀯𑀸. ‘‘𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀺 𑀦𑀸𑀫𑀸’’𑀢𑀺 𑀅𑀜𑁆𑀜𑀁 𑀆𑀯𑀚𑁆𑀚𑀦𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀚𑀯𑀦𑀸𑀦𑀦𑁆𑀢𑀺 𑀏𑀯𑀁 𑀚𑀯𑀦𑀸𑀦𑀺 𑀆𑀯𑀚𑁆𑀚𑀦𑁂𑀦 𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀺 𑀯𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀸𑀉𑀧𑁆𑀧𑀦𑁆𑀦𑀸𑀦𑀻’’𑀢𑀺𑀆𑀤𑀺. ‘‘𑀢𑁂𑀲𑀁’’𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀁. ‘‘𑀢𑀤𑁂𑀯𑀸’’𑀢𑀺 𑀢𑀁 𑀏𑀯𑀯𑀢𑁆𑀣𑀼 𑀭𑀽𑀧𑀁. ‘‘𑀯𑀢𑁆𑀣𑀼 𑀘𑀸’’𑀢𑀺 𑀦𑀺𑀲𑁆𑀲𑀬𑁄 𑀘. ‘‘𑀢𑁂𑀲𑀁’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁. 𑀦 𑀳𑀺 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀩𑁄𑀥𑀁. ‘‘𑀓𑀲𑁆𑀫𑀸 𑀯𑀼𑀢𑁆𑀢𑀁’’𑀢𑀺𑀆𑀤𑀻𑀲𑀼. ‘‘𑀢𑀲𑁆𑀲 𑀬𑀓𑁆𑀔𑀲𑁆𑀲𑀸’’𑀢𑀺 𑀇𑀦𑁆𑀤𑀓𑀦𑀸𑀫𑀲𑁆𑀲 𑀢𑀲𑁆𑀲𑀬𑀓𑁆𑀔𑀲𑁆𑀲. ‘‘𑀇𑀢𑀭𑁂𑀲𑀁𑀧𑀻’’𑀢𑀺 𑀲𑀁𑀲𑁂𑀤𑀚𑁄𑀧𑀧𑀸𑀢𑀺𑀓𑀸𑀦𑀁𑀧𑀺. ‘‘𑀤𑀼𑀯𑀺𑀥𑁂𑀦𑀸’’𑀢𑀺 𑀭𑀽𑀧𑀚𑀦𑀦 𑀓𑀺𑀘𑁆𑀘𑀁 𑀭𑀽𑀧𑀽𑀧𑀢𑁆𑀣𑀫𑁆𑀪𑀦 𑀓𑀺𑀘𑁆𑀘𑀦𑁆𑀢𑀺 𑀏𑀯𑀁 𑀤𑀼𑀯𑀺𑀥𑁂𑀦. 𑀅𑀣𑀯𑀸 ‘‘𑀤𑀼𑀯𑀺𑀥𑁂𑀦𑀸’’𑀢𑀺 𑀅𑀚𑁆𑀛𑀢𑁆𑀢𑀸𑀳𑀸𑀭𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀁 𑀩𑀳𑀺𑀤𑁆𑀥𑀸𑀳𑀸𑀭𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀦𑁆𑀢𑀺 𑀏𑀯𑀁 𑀤𑀼𑀯𑀺𑀥𑁂𑀦. ‘‘𑀢𑀣𑀸𑀭𑀽𑀧𑀸𑀦𑀜𑁆𑀘𑀸’’𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀓𑀫𑁆𑀫𑀯𑀺𑀲𑁂𑀲𑁂𑀦 𑀲𑀺𑀤𑁆𑀥𑀸𑀦𑀜𑁆𑀘. ‘‘𑀅𑀚𑁆𑀛𑀢𑁆𑀢𑀸𑀳𑀸𑀭𑁄𑀧𑀻’’𑀢𑀺 𑀧𑀺𑀲𑀤𑁆𑀤𑁂𑀦 𑀬𑀣𑀸𑀯𑀼𑀢𑁆𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀅𑀭𑀽𑀧𑀸𑀳𑀸𑀭𑁂 𑀘 𑀲𑀫𑁆𑀧𑀺𑀡𑁆𑀟𑁂𑀢𑀺. ‘‘𑀯𑀢𑁆𑀣𑀼𑀯𑀺𑀧𑀸𑀓𑀸𑀦𑀁’’𑀢𑀺 𑀯𑀢𑁆𑀣𑀼𑀭𑀽𑀧𑀁 𑀯𑀺𑀧𑀸𑀓𑀸𑀦𑀁. ‘‘𑀲𑀩𑁆𑀩𑀣𑀸’’𑀢𑀺 𑀅𑀩𑁆𑀬𑀸𑀬𑀧𑀤𑀁. 𑀢𑀜𑁆𑀘 𑀲𑀩𑁆𑀩𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀁. 𑀇𑀥 𑀧𑀦 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀣𑀸’’𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀦𑁆𑀢𑀺. 𑀧𑀓𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀢𑀺𑀯𑀺𑀥𑁄’’𑀢𑀺𑀆𑀤𑀺𑀁. ‘‘𑀲𑀳𑀚𑀸𑀢𑁂 𑀲𑀗𑁆𑀕𑀳𑁂𑀢𑀩𑁆𑀩𑀁’’𑀢𑀺 𑀧𑀘𑁆𑀘𑀬𑀪𑀸𑀯𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀁. 𑀲𑀳𑀚𑀦𑀦𑀁 𑀦𑀸𑀫 𑀅𑀢𑁆𑀢𑀦𑀸 𑀲𑀳 𑀚𑀦𑁂𑀦𑁆𑀢𑀲𑁆𑀲 𑀲𑀳𑀚𑀦𑀦𑀁. 𑀢𑀜𑁆𑀘 𑀓𑀫𑁆𑀫𑀘𑀺𑀢𑁆𑀢𑀸𑀤𑀻𑀦𑀁 𑀯𑀺𑀬 𑀯𑀺𑀲𑀼𑀁 𑀚𑀦𑀦𑀓𑀺𑀘𑁆𑀘𑀁 𑀦 𑀳𑁄𑀢𑀺. 𑀅𑀢𑁆𑀢𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑁂 𑀏𑀯 𑀇𑀢𑀭𑀸𑀦𑀺 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀭𑀽𑀧𑀁 𑀚𑀦𑀦𑀓𑀺𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁.‘‘𑀯𑀺𑀦𑀸𑀯 𑀲𑀳𑀼𑀧𑁆𑀧𑀸𑀤𑀦𑀓𑀺𑀘𑁆𑀘𑁂𑀦𑀸’’𑀢𑀺 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀸𑀤𑀦𑀓𑀺𑀘𑁆𑀘𑁂 𑀆𑀳𑀸𑀭𑀲𑁆𑀲 𑀩𑁆𑀬𑀸𑀧𑀸𑀭𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀲𑀳𑀚𑀸𑀢𑀸𑀦𑀺 𑀉𑀧𑀢𑁆𑀣𑀫𑁆𑀪𑀦𑁆𑀢𑁄𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀁 𑀦 𑀕𑀘𑁆𑀙𑀢𑀻𑀢𑀺. 𑀏𑀲𑀦𑀬𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀧𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀚𑀻𑀯𑀺𑀢𑀁𑀧𑀻’’𑀢𑀺𑀆𑀤𑀺. ‘‘𑀢𑀻𑀲𑀽’’𑀢𑀺 𑀆𑀭𑀫𑁆𑀫𑀡𑀜𑁆𑀘 𑀉𑀧𑀦𑀺𑀲𑁆𑀲𑀬𑁄 𑀘 𑀅𑀢𑁆𑀣𑀺𑀘𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀫𑁆𑀳𑀺 𑀧𑀼𑀭𑁂𑀚𑀸𑀢𑀸 𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀺 𑀅𑀢𑁆𑀣𑀺. 𑀲𑁄 𑀧𑀼𑀭𑁂𑀚𑀸𑀢𑀢𑁆𑀣𑀺 𑀧𑀘𑁆𑀘𑀬𑁄 𑀏𑀯𑀸𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑁂 𑀲𑀗𑁆𑀕𑀳𑀺𑀢𑁄. ‘‘𑀢𑀲𑁆𑀫𑀺𑀁 𑀓𑀢𑁂 𑀧𑀯𑀢𑁆𑀢𑀫𑀸𑀦𑀸𑀦𑀁’’𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂 𑀢𑀲𑁆𑀲 𑀓𑀢𑀢𑁆𑀢𑀸 𑀏𑀯 𑀧𑀯𑀢𑁆𑀢𑀫𑀸𑀦𑀸𑀦𑀁. 𑀆𑀭𑀫𑁆𑀫𑀡𑀸𑀓𑀸𑀭𑁄 𑀕𑁄𑀘𑀭𑀯𑀺𑀲𑀬𑀸𑀓𑀸𑀭𑁄. ‘‘𑀲𑀦𑁆𑀢𑀸𑀦𑀯𑀺𑀲𑁂𑀲𑀁 𑀓𑀢𑁆𑀯𑀸’’𑀢𑀺 𑀩𑀻𑀚𑀦𑀺𑀥𑀸𑀦𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑁂’’𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬 𑀓𑀫𑁆𑀫 𑀧𑀘𑁆𑀘𑀬𑀸. ‘‘𑀅𑀓𑀸𑀮𑀺𑀓𑁄’’𑀢𑀺 𑀫𑀕𑁆𑀕𑀘𑁂𑀢𑀦𑀸𑀯𑀲𑁂𑀦 𑀅𑀓𑀸𑀮𑀺𑀓𑁄. 𑀲𑁄𑀳𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂𑀨𑀮𑀁 𑀚𑀦𑁂𑀢𑀺. 𑀢𑀲𑁆𑀫𑀸 𑀆𑀕𑀫𑁂𑀢𑀩𑁆𑀩𑀲𑁆𑀲 𑀆𑀬𑀢𑀺𑀓𑀸𑀮𑀲𑁆𑀲 𑀅𑀪𑀸𑀯𑀸 𑀅𑀓𑀸𑀮𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀲𑁂𑀲𑁄 𑀦𑀸𑀦𑀓𑁆𑀔𑀡𑀺𑀓𑀧𑀘𑁆𑀘𑀬𑁄 𑀓𑀸𑀮𑀺𑀓𑁄. ‘‘𑀧𑀘𑁆𑀘𑀬𑀝𑁆𑀞𑁂𑀦𑀸’’𑀢𑀺 𑀧𑀘𑁆𑀘𑀬𑀓𑀺𑀘𑁆𑀘𑁂𑀦. 𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀸 𑀓𑀫𑁆𑀫𑀳𑁂𑀢𑀼𑀓𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀨𑀮𑀳𑁂𑀢𑀽 𑀧𑀘𑀸𑀭𑁂𑀦𑀸’’𑀢𑀺 𑀨𑀮𑀪𑀽𑀢𑀸𑀬 𑀲𑀩𑁆𑀩𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀸𑀫𑀁 𑀨𑀮𑀫𑁆𑀳𑀺 𑀆𑀭𑁄𑀧𑁂𑀢𑁆𑀯𑀸 𑀯𑁄𑀳𑀸𑀭𑁂𑀦 𑀲𑀩𑁆𑀩𑁂𑀧𑀺 𑀢𑁂𑀯𑀻𑀲𑀢𑀺𑀧𑀘𑁆𑀘𑀬𑀸 𑀓𑀫𑁆𑀫𑀲𑀪𑀸𑀯𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀧𑀘𑁆𑀘𑀬 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀺𑀚𑁆𑀚𑀫𑀸𑀦𑀸 𑀬𑁂𑀯𑀸’’𑀢𑀺 𑀅𑀢𑁆𑀣𑀺𑀧𑀘𑁆𑀘𑀬𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀸𑀲𑀦𑀬𑀼𑀢𑁆𑀢𑀺𑀬𑀸 𑀯𑀺𑀭𑀼𑀤𑁆𑀥𑀫𑁂𑀯𑀸’’𑀢𑀺 𑀏𑀢𑁆𑀣 𑀲𑀸𑀲𑀦𑀬𑀼𑀢𑁆𑀢𑀺 𑀦𑀸𑀫 𑀢𑀻𑀡𑀺𑀧𑀺𑀝𑀓𑀸𑀦𑀺. ‘‘𑀯𑀺𑀭𑀼𑀤𑁆𑀥𑀫𑁂𑀯𑀸’’𑀢𑀺 𑀆𑀭𑀫𑁆𑀫𑀡 𑀧𑀘𑁆𑀘𑀬𑀪𑀽𑀢𑀸 𑀲𑀩𑁆𑀩𑁂 𑀧𑀣𑀯𑀻 𑀧𑀩𑁆𑀩𑀢 𑀦𑀤𑀻𑀲𑀫𑀼𑀤𑁆𑀤 𑀅𑀚𑀝𑀸𑀓𑀸𑀲𑀸𑀤𑀬𑁄 𑀘 𑀲𑀩𑁆𑀩𑀸𑀧𑀜𑁆𑀜𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀓𑀫𑁆𑀫𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀤𑀦𑁆𑀢𑁄 𑀘, 𑀲𑀩𑁆𑀩𑁂 𑀅𑀢𑀻𑀢𑀸𑀦𑀸𑀕𑀢 𑀥𑀫𑁆𑀫𑀸 𑀅𑀢𑁆𑀣𑀺𑀧𑀘𑁆𑀘𑀬𑀸 𑀏𑀯𑀸𑀢𑀺 𑀯𑀤𑀦𑁆𑀢𑁄 𑀘, 𑀢𑀻𑀳𑀺 𑀧𑀺𑀝𑀓𑁂𑀳𑀺𑀧𑀺 𑀯𑀺𑀭𑀼𑀚𑁆𑀛𑀢𑀺𑀬𑁂𑀯. 𑀧𑀝𑁆𑀞𑀸𑀦𑀧𑀸𑀴𑀺𑀬𑀸 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀢𑁆𑀣𑀺 𑀲𑀤𑁆𑀤𑁄𑀳𑀺 𑀧𑀝𑁆𑀞𑀸𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀣𑁄. 𑀦 𑀧𑀭𑀫𑀢𑁆𑀣 𑀥𑀫𑁆𑀫 𑀪𑀸𑀯𑁂𑀦. 𑀦𑀸𑀧𑀺𑀮𑁄𑀓 𑀲𑀫𑁆𑀫𑀼𑀢𑀺𑀯𑀲𑁂𑀦. 𑀦 𑀳𑀺 𑀧𑀭𑀫𑀢𑁆𑀣 𑀥𑀫𑁆𑀫 𑀪𑀽𑀢𑀸𑀧𑀺 𑀅𑀢𑀻𑀢𑀸𑀦𑀸𑀕𑀢𑀥𑀫𑁆𑀫𑀸 𑀇𑀥 𑀅𑀢𑁆𑀣𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀦𑀸𑀧𑀺𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. ‘‘𑀅𑀜𑁆𑀜𑀫𑀜𑁆𑀜𑀧𑁆𑀧𑀝𑀺𑀩𑀤𑁆𑀥𑀑𑀓𑀸𑀲𑁂’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀪𑀸𑀯𑁂 𑀦 𑀧𑀝𑀺𑀩𑀤𑁆𑀥𑁂 𑀓𑀸𑀫𑀭𑀽𑀧𑀪𑀯𑁄𑀓𑀸𑀲𑁂. ‘‘𑀬𑀢𑁄’’𑀢𑀺 𑀬𑀫𑁆𑀳𑀸𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀢𑁄. ‘‘𑀬𑀢𑁄’’𑀢𑀺 𑀯𑀸 𑀬𑀫𑁆𑀳𑀸𑀲𑀻𑀲𑀢𑁄, 𑀬𑀫𑁆𑀳𑀸𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀩𑀻𑀚𑀢𑁄 𑀯𑀺𑀬 𑀫𑀳𑀸𑀭𑀼𑀓𑁆𑀔𑀲𑁆𑀲𑀸’’𑀢𑀺 𑀩𑀻𑀚𑀧𑀘𑁆𑀘𑀬𑀸 𑀓𑀴𑀻𑀭𑀗𑁆𑀓𑀼𑀭𑀸𑀤𑀺𑀓𑀲𑁆𑀲 𑀫𑀳𑀸𑀭𑀼𑀓𑁆𑀔𑀲𑀦𑁆𑀢𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀯𑀺𑀬. 𑀧𑀸𑀴𑀺𑀧𑀸𑀞𑁂. ‘‘𑀦 𑀑𑀓𑁆𑀓𑀫𑀺𑀲𑁆𑀲𑀣𑀸’’𑀢𑀺 𑀲𑀘𑁂 𑀦 𑀑𑀓𑁆𑀓𑀫𑁂𑀬𑁆𑀬. ‘‘𑀲𑀫𑀼𑀘𑁆𑀘𑀺𑀲𑁆𑀲𑀣𑀸’’𑀢𑀺 𑀅𑀧𑀺𑀦𑀼𑀔𑁄 𑀲𑀫𑀼𑀘𑁆𑀘𑁂𑀬𑁆𑀬, 𑀯𑀟𑁆𑀠𑁂𑀬𑁆𑀬. ‘‘𑀯𑁄𑀓𑁆𑀓𑀫𑀺𑀲𑁆𑀲𑀣𑀸’’𑀢𑀺 𑀲𑀘𑁂 𑀯𑀺𑀕𑀫𑁂𑀬𑁆𑀬, 𑀯𑀺𑀦𑀸𑀲𑁂𑀬𑁆𑀬. ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀣𑀸’’𑀢𑀺 𑀅𑀧𑀺𑀦𑀼𑀔𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀧𑀸𑀢𑀼𑀪𑀯𑁂𑀬𑁆𑀬. ‘‘𑀯𑁄𑀘𑁆𑀙𑀺𑀚𑁆𑀚𑀺𑀲𑁆𑀲𑀣𑀸’’𑀢𑀺 𑀲𑀘𑁂𑀉𑀘𑁆𑀙𑀺𑀚𑁆𑀚𑁂𑀬𑁆𑀬. ‘‘𑀆𑀧𑀚𑁆𑀚𑀺𑀲𑁆𑀲𑀣𑀸’’𑀢𑀺 𑀅𑀧𑀺𑀦𑀼𑀔𑁄 𑀆𑀧𑀚𑁆𑀚𑁂𑀬𑁆𑀬. ‘‘𑀬𑀤𑀺𑀤𑀁’’𑀢𑀺 𑀬𑀁 𑀇𑀤𑀁. ‘‘𑀇𑀤𑀁’’𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀯𑀺𑀜𑁆𑀜𑀸𑀡𑀁’’𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺. 𑀏𑀲𑁂𑀯 𑀯𑀺𑀜𑁆𑀜𑀸𑀡 𑀥𑀫𑁆𑀫𑁄𑀢𑀺 𑀬𑁄𑀚𑀦𑀸. ‘‘𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸’’𑀢𑀺 𑀭𑀽𑀧𑀼𑀧𑁆𑀧𑀸𑀤𑀲𑁆𑀲. 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀏𑀢𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡 𑀧𑀘𑁆𑀘𑀬𑀸. 𑀭𑀽𑀧𑀼𑀧𑁆𑀧𑀢𑁆𑀢𑀺. ‘‘𑀭𑀽𑀧𑀧𑁆𑀧𑀯𑁂𑀡𑀺𑀬𑀸’’𑀢𑀺 𑀓𑀫𑁆𑀫𑀚𑀭𑀽𑀧𑀲𑀦𑁆𑀢𑀢𑀺𑀬𑀸. ‘‘𑀉𑀢𑀼𑀆𑀳𑀸𑀭𑀸𑀧𑀻’’𑀢𑀺 𑀅𑀚𑁆𑀛𑀢𑁆𑀢 𑀉𑀢𑀼𑀅𑀚𑁆𑀛𑀢𑁆𑀢 𑀆𑀳𑀸𑀭𑀸𑀧𑀺. 𑀇𑀤𑀜𑁆𑀘 𑀲𑀫𑁆𑀪𑀯𑀬𑀼𑀢𑁆𑀢𑀺 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀭𑀽𑀧𑀧𑁆𑀧𑀯𑁂𑀡𑀺𑀬𑀸 𑀅𑀲𑀢𑀺, 𑀅𑀚𑁆𑀛𑀢𑁆𑀢𑀁 𑀢𑁂 𑀉𑀢𑀼𑀆𑀳𑀸𑀭𑀸𑀧𑀺 𑀦𑀢𑁆𑀣𑀺𑀬𑁂𑀯. 𑀩𑀳𑀺𑀤𑁆𑀥𑀸 𑀉𑀢𑀼𑀧𑀦 𑀅𑀲𑀢𑀺𑀧𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀭𑀽𑀧𑀧𑁆𑀧𑀯𑁂𑀡𑀺𑀬𑀸 𑀭𑀽𑀧𑀁 𑀦 𑀚𑀦𑁂𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀝𑀻𑀓𑀸𑀧𑀸𑀞𑁂. ‘‘𑀅𑀭𑀽𑀧𑀁 𑀧𑀦𑀸’’𑀢𑀺 𑀅𑀭𑀽𑀧𑀪𑀽𑀫𑀺𑀧𑀦. ‘‘𑀬𑀲𑁆𑀫𑀺𑀁𑀭𑀽𑀧𑁂’’𑀢𑀺 𑀓𑀫𑁆𑀫𑀚𑀭𑀽𑀧𑁂. ‘‘𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀻’’𑀢𑀺 𑀧𑀘𑁆𑀙𑀺𑀫𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀲𑀢𑁆𑀢𑀺 𑀅𑀢𑁆𑀣𑀺. 𑀓𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂. ‘‘𑀧𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. ‘‘𑀩𑀻𑀚𑀪𑀸𑀯𑀲𑀗𑁆𑀔𑀸𑀢𑀁’’𑀢𑀺 𑀅𑀫𑁆𑀩𑀩𑀻𑀚𑀸𑀤𑀻𑀦𑀁 𑀩𑀻𑀚𑀪𑀸𑀯𑀲𑀗𑁆𑀔𑀸𑀢𑀁. ‘‘𑀦𑀺𑀬𑀸𑀫𑀭𑀽𑀧𑀁 𑀦𑀸𑀫𑀸’’𑀢𑀺 𑀉𑀢𑀼𑀯𑀺𑀲𑁂𑀲𑀫𑀸𑀳. ‘‘𑀬𑀣𑀸 𑀯𑀸 𑀢𑀣𑀸 𑀯𑀸’’𑀢𑀺 𑀅𑀦𑀺𑀬𑀫𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀬𑁄𑀦𑀺𑀪𑀸𑀯𑀲𑀗𑁆𑀔𑀸𑀢𑀁’’𑀢𑀺 𑀢𑀁 𑀢𑀁 𑀕𑁄𑀢𑁆𑀢𑀓𑀼𑀮𑀚𑀸𑀢𑀻𑀦𑀁 𑀚𑀸𑀢𑀺𑀪𑀸𑀯𑀲𑀗𑁆𑀔𑀸𑀢𑀁. ‘‘𑀦𑀺𑀬𑀸𑀫𑀭𑀽𑀧𑀁’’𑀢𑀺 𑀉𑀢𑀼𑀯𑀺𑀲𑁂𑀲 𑀲𑀗𑁆𑀔𑀸𑀢𑀁 𑀦𑀺𑀬𑀸𑀫𑀭𑀽𑀧𑀁. 𑀲𑀤𑀺𑀲𑀸𑀦𑀺 𑀭𑀽𑀧𑀲𑀡𑁆𑀞𑀸𑀦𑀸𑀦𑀺 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀧𑀝𑀺𑀲𑀦𑁆𑀥𑀺𑀭𑀽𑀧𑀲𑁆𑀲𑁂𑀯 𑀆𑀦𑀼𑀪𑀸𑀯𑁄’’𑀢𑀺 𑀓𑀮𑀮𑀓𑀸𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀭𑀽𑀧𑀲𑁆𑀲𑁂𑀯 𑀆𑀦𑀼𑀪𑀸𑀯𑁄. 𑀧𑀼𑀦 𑀢𑀫𑁂𑀯𑀢𑁆𑀣𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀲𑀫𑀼𑀤𑀸𑀕𑀢𑀁’’𑀢𑀺 𑀲𑀼𑀝𑁆𑀞𑀼 𑀉𑀧𑀭𑀽𑀧𑀭𑀺𑀆𑀕𑀢𑀁. 𑀇𑀢𑁆𑀣𑀺𑀪𑀸𑀯𑀸𑀤𑀺𑀭𑀽𑀧𑀁 𑀩𑀻𑀚𑀭𑀽𑀧𑀜𑁆𑀘 𑀦𑀺𑀬𑀸𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀺𑀬𑀸𑀫𑀓𑀁’’𑀢𑀺 𑀦𑀸𑀦𑀸𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀦𑀁 𑀦𑀺𑀬𑀸𑀫𑀓𑀁. ‘‘𑀢𑀢𑁆𑀣 𑀇𑀫𑀲𑁆𑀫𑀺𑀁 𑀪𑀯𑁂’’𑀢𑀺𑀆𑀤𑀻𑀲𑀼. 𑀥𑀦𑀜𑁆𑀘 𑀥𑀜𑁆𑀜𑀜𑁆𑀘 𑀢𑀢𑁄 𑀅𑀯𑀲𑁂𑀲𑀸 𑀲𑀩𑁆𑀩𑁂𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀯𑀺𑀚𑁆𑀚𑀸 𑀘 𑀲𑀺𑀧𑁆𑀧𑀜𑁆𑀘 𑀦𑀸𑀦𑀸𑀩𑀳𑀼𑀲𑁆𑀲𑀼𑀢𑀜𑁆𑀘 𑀧𑀭𑀺𑀬𑀢𑁆𑀢𑀺 𑀘𑀸𑀢𑀺 𑀤𑁆𑀯𑀦𑁆𑀤𑁄. ‘‘𑀅𑀦𑀸𑀕𑀢𑀸𑀦𑀁 𑀢𑀸𑀲𑀁’’𑀢𑀺 𑀢𑀸𑀲𑀁 𑀅𑀪𑀺𑀦𑀯𑀥𑀦𑀥𑀜𑁆𑀜𑀸𑀤𑀺𑀲𑀫𑁆𑀧𑀢𑁆𑀢𑀻𑀦𑀁. ‘‘𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀢𑀸’’𑀢𑀺 𑀧𑀼𑀩𑁆𑀩𑀬𑁄𑀕𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀢𑀸. 𑀢𑀢𑁆𑀣 𑀥𑀦𑀥𑀜𑁆𑀜𑀪𑁄𑀕𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀼𑀩𑁆𑀩𑀬𑁄𑀕𑀓𑀭𑀡𑀁 𑀦𑀸𑀫 𑀓𑀲𑀺𑀓𑀫𑁆𑀫 𑀯𑀸𑀡𑀺𑀚𑁆𑀚𑀓𑀫𑁆𑀫𑀸𑀤𑀻𑀦𑀁 𑀓𑀭𑀡𑀁. 𑀢𑀢𑁆𑀣 𑀓𑀲𑀺𑀓𑀫𑁆𑀫𑁂 𑀢𑀸𑀯 𑀥𑀦𑀥𑀜𑁆𑀜𑀪𑁄𑀕𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀓𑀲𑀺𑀓𑀫𑁆𑀫𑀓𑀭𑀡𑁂 𑀥𑀦𑀥𑀜𑁆𑀜𑀪𑁄𑀕𑀸 𑀅𑀦𑀸𑀕𑀢𑀽𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑁄. 𑀇𑀤𑀸𑀦𑀺 𑀓𑀲𑀺𑀓𑀫𑁆𑀫𑀓𑀭𑀡𑀁 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀥𑀦𑀥𑀜𑁆𑀜 𑀪𑁄𑀕𑀸𑀦𑀁 𑀧𑀝𑀺𑀮𑀸𑀪𑀧𑀭𑀺𑀪𑁄𑀕𑀓𑀸𑀮𑁂𑀲𑀼 𑀓𑀲𑀺𑀓𑀫𑁆𑀫𑀓𑀭𑀡𑀁 𑀅𑀢𑀻𑀢𑀽𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑁄. 𑀢𑁂𑀲𑀁 𑀧𑀝𑀺𑀮𑀸𑀪𑁄 𑀘 𑀧𑀭𑀺𑀪𑁄𑀕𑁄 𑀘 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄. 𑀓𑀲𑀺𑀓𑀫𑁆𑀫𑀓𑀭𑀡𑀓𑁆𑀔𑀡𑁂 𑀧𑀦 𑀔𑁂𑀢𑁆𑀢, 𑀯𑀢𑁆𑀣𑀼, 𑀩𑀻𑀚, 𑀫𑁂𑀖𑀯𑀼𑀝𑁆𑀞𑀺𑀬𑁄 𑀘 𑀦𑀗𑁆𑀕𑀮𑀸𑀤𑀻𑀦𑀺 𑀓𑀲𑀺𑀪𑀡𑁆𑀟𑀸𑀦𑀺 𑀘 𑀕𑁄𑀫𑀳𑀺𑀁𑀲𑀸 𑀘 𑀓𑀫𑁆𑀫𑀓𑀸𑀭𑀓 𑀧𑀼𑀭𑀺𑀲𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀽𑀧𑀦𑀺𑀲𑁆𑀲𑀬𑁄. 𑀓𑀲𑀺𑀓𑀫𑁆𑀫𑀓𑀭𑀡𑀁 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁. 𑀓𑀫𑁆𑀫𑀲𑀸𑀥𑀺𑀓𑀲𑁆𑀲 𑀫𑀸𑀢𑀸𑀧𑀺𑀢𑀸𑀤𑀬𑁄 𑀧𑀼𑀩𑁆𑀩𑀧𑀼𑀭𑀺𑀲𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀢𑀻𑀢𑀽𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑁄. 𑀢𑀁 𑀓𑀫𑁆𑀫𑀁 𑀢𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

‘‘𑀧𑀜𑁆𑀘𑀯𑀺𑀥’’𑀦𑁆𑀢𑀺𑀆𑀤𑀻𑀲𑀼. ‘‘𑀲𑀡𑁆𑀞𑀸𑀦𑀢𑁆𑀢𑀁’’𑀢𑀺 𑀅𑀡𑀼, 𑀢𑀚𑁆𑀚𑀸𑀭𑀻, 𑀭𑀣𑀭𑁂𑀡𑀼, 𑀮𑀺𑀓𑁆𑀔𑀸𑀤𑀻𑀦𑀺 𑀉𑀧𑀸𑀤𑀸𑀬 𑀲𑀩𑁆𑀩𑁂𑀲𑀁 𑀭𑀽𑀧𑀲𑀡𑁆𑀞𑀸𑀦𑀸𑀦𑀁 𑀪𑀸𑀯𑁄 𑀲𑀡𑁆𑀞𑀸𑀦𑀢𑁆𑀢𑀁. ‘‘𑀪𑀸𑀯𑁄’’𑀢𑀺 𑀘 𑀢𑁂𑀲𑀁 𑀧𑀯𑀢𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀯𑀢𑁆𑀢𑀺 𑀳𑁂𑀢𑀽’’𑀢𑀺 𑀘 𑀧𑀭𑀫𑀢𑁆𑀣 𑀭𑀽𑀧 𑀥𑀫𑁆𑀫𑀸 𑀏𑀯. ‘‘𑀅𑀦𑀼𑀧𑀕𑀫𑀦𑀢𑁄’’𑀢𑀺 𑀏𑀢𑁆𑀣 𑀲𑀪𑀸𑀯𑀢𑁄 𑀅𑀢𑀺𑀲𑀼𑀔𑀼𑀫𑀢𑁆𑀢𑀸 𑀅𑀦𑀼𑀧𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀥𑀺𑀯𑀘𑀦𑀲𑀗𑁆𑀔𑀸𑀢𑀁 𑀦𑀸𑀫𑀸𑀪𑀺𑀥𑀸𑀦𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀥𑀺𑀯𑀘𑀦𑀁’’𑀢𑀺 𑀘 𑀅𑀢𑁆𑀣𑀧𑁆𑀧𑀓𑀸𑀲𑀓𑀢𑁆𑀢𑀸 𑀅𑀥𑀺𑀓𑀁 𑀯𑀘𑀦𑀁 𑀅𑀥𑀺𑀯𑀘𑀦𑀁. ‘‘𑀦𑀸𑀫𑀸𑀪𑀺𑀥𑀸𑀦’’𑀦𑁆𑀢𑀺 𑀘 𑀦𑀸𑀫𑀧𑀜𑁆𑀜𑀢𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀕𑀳𑁂𑀢𑀩𑁆𑀩 𑀪𑀸𑀯𑁄’’𑀢𑀺 𑀇𑀤𑀁 𑀘𑀺𑀢𑁆𑀢𑀁 𑀦𑀸𑀫, 𑀅𑀬𑀁 𑀨𑀲𑁆𑀲𑁄𑀦𑀸𑀫𑀸𑀢𑀺𑀆𑀤𑀺𑀦𑀸 𑀓𑀣𑁂𑀦𑁆𑀢𑀸𑀦𑀁 𑀲𑀦𑁆𑀢𑀺𑀓𑀸 𑀦𑀸𑀫𑀸𑀪𑀺𑀥𑀸𑀦𑀁 𑀲𑀼𑀢𑁆𑀯𑀸 𑀢𑀤𑀦𑀼𑀭𑀽𑀧𑀲𑁆𑀲 𑀲𑀪𑀸𑀯𑀢𑁆𑀣𑀲𑁆𑀲 𑀚𑀸𑀦𑀦𑀯𑀲𑁂𑀦 𑀜𑀸𑀡𑁂𑀦 𑀕𑀳𑁂𑀢𑀩𑁆𑀩𑀪𑀸𑀯𑁄. 𑀦𑀸𑀫 𑀧𑀜𑁆𑀜𑀢𑁆𑀢𑀸𑀦𑀼𑀲𑀸𑀭𑁂𑀦 𑀚𑀸𑀦𑀺𑀢𑀩𑁆𑀩𑀢𑁆𑀢𑀸 𑀦𑀸𑀫𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀫𑁆𑀫𑀡𑁂 𑀦𑀫𑀢𑀻𑀢𑀺 𑀦𑀸𑀫𑀁. 𑀆𑀭𑀫𑁆𑀫𑀡𑀺𑀓 𑀥𑀫𑁆𑀫𑀸 𑀯𑀸 𑀏𑀢𑁆𑀣 𑀦𑀫𑀦𑁆𑀢𑀻𑀢𑀺 𑀦𑀸𑀫𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺.

𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀲𑀗𑁆𑀕𑀳𑁂 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀧𑀜𑁆𑀜𑀢𑁆𑀢𑀻𑀦𑀁𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀺 𑀲𑀗𑁆𑀕𑀳𑁄𑀧𑀺 𑀣𑁂𑀭𑁂𑀦 𑀇𑀥 𑀦𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 ‘‘𑀧𑀜𑁆𑀜𑀸𑀯𑀻𑀬𑀢𑀻’’𑀢𑀺 𑀏𑀢𑁆𑀣 𑀧𑀜𑁆𑀜𑀸𑀧𑀦𑀁 𑀦𑀸𑀫 𑀯𑁄𑀳𑀸𑀭𑀝𑁆𑀞𑀧𑀦𑀁. 𑀢𑀜𑁆𑀘𑀞𑀧𑀦𑀁 𑀤𑁆𑀯𑀻𑀳𑀺𑀓𑀸𑀭𑀡𑁂𑀳𑀺 𑀲𑀺𑀚𑁆𑀛𑀢𑀺 𑀯𑀤𑀦𑁆𑀢𑀸𑀦𑀁 𑀯𑁄𑀳𑀸𑀭𑁂𑀦 𑀘, 𑀲𑀼𑀡𑀦𑁆𑀢𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀻’’𑀢𑀺𑀆𑀤𑀺𑀫𑀸𑀳. ‘‘𑀲𑀫𑁆𑀧𑀝𑀺𑀘𑁆𑀙𑀻𑀬𑀢𑀻’’𑀢𑀺 𑀬𑀣𑀸 𑀧𑀼𑀩𑁆𑀩𑀧𑀼𑀭𑀺𑀲𑁂𑀳𑀺 𑀯𑁄𑀳𑀭𑀻𑀬𑀢𑀺, 𑀢𑀣𑀸 𑀧𑀘𑁆𑀙𑀺𑀫 𑀚𑀦𑀧𑀭𑀫𑁆𑀧𑀭𑀸𑀳𑀺 𑀯𑁄𑀳𑀭𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀓𑀸𑀭𑁂𑀦 𑀜𑀸𑀧𑀻𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀻𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀩𑁆𑀬𑀜𑁆𑀚𑀦𑀢𑁆𑀣𑁄’’𑀢𑀺 𑀫𑀦𑀼𑀲𑁆𑀲, 𑀤𑁂𑀯, 𑀧𑀣𑀯𑀻, 𑀧𑀩𑁆𑀩𑀢𑀸𑀤𑀺𑀓𑁄 𑀲𑀤𑁆𑀤𑀢𑁆𑀣𑁄. ‘‘𑀧𑀜𑁆𑀜𑀸 𑀧𑀻𑀬𑀦𑁆𑀢𑀻’’𑀢𑀺 𑀧𑀓𑀸𑀭𑁂𑀦 𑀞𑀧𑀻𑀬𑀦𑁆𑀢𑀺. 𑀲𑀤𑁆𑀤𑀧𑀜𑁆𑀜𑀢𑁆𑀢𑀺𑀁 𑀆𑀳𑀸𑀢𑀺 𑀅𑀥𑀺𑀓𑀸𑀭𑁄. 𑀅𑀥𑀺𑀫𑀢𑁆𑀢𑀪𑀸𑀯𑀧𑁆𑀧𑀓𑀸𑀭𑁄 𑀦𑀸𑀫 𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀲𑀼 𑀧𑀣𑀯𑀻𑀥𑀸𑀢𑀼𑀬𑀸 𑀅𑀥𑀺𑀫𑀢𑁆𑀢 𑀪𑀸𑀯𑀯𑀺𑀲𑁂𑀲𑁄. 𑀦𑀤𑀻 𑀲𑀫𑀼𑀤𑁆𑀤𑁄𑀤𑀓𑀸𑀤𑀻𑀲𑀼 𑀆𑀧𑁄𑀥𑀸𑀢𑀼𑀬𑀸. 𑀅𑀕𑁆𑀕𑀺𑀓𑁆𑀔𑀦𑁆𑀥𑁂𑀲𑀼 𑀢𑁂𑀚𑁄𑀥𑀸𑀢𑀼𑀬𑀸. 𑀯𑀸𑀢𑀓𑁆𑀔𑀦𑁆𑀥𑁂𑀲𑀼 𑀯𑀸𑀬𑁄𑀥𑀸𑀢𑀼𑀬𑀸𑀢𑀺 𑀏𑀯𑀁 𑀅𑀥𑀺𑀫𑀢𑁆𑀢 𑀪𑀸𑀯𑀯𑀺𑀲𑁂𑀲𑁄. 𑀯𑀺𑀯𑀺𑀥𑁂𑀦 𑀧𑀓𑀸𑀭𑁂𑀦 𑀧𑀭𑀺𑀡𑀫𑀦𑀁 𑀯𑀺𑀧𑀭𑀺𑀡𑀸𑀫𑁄𑀢𑀺 𑀆𑀳 𑀢𑀣𑀸 𑀢𑀣𑀸 𑀯𑀺𑀧𑀭𑀺𑀡𑀸𑀫𑀸𑀓𑀸𑀭𑀦𑁆𑀢𑀺. 𑀧𑀣𑀯𑀻𑀧𑀩𑁆𑀩𑀢𑀸𑀤𑀺𑀯𑁄𑀳𑀸𑀭𑁄 𑀲𑀡𑁆𑀞𑀺𑀢𑀸𑀓𑀸𑀭𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀦 𑀳𑁄𑀢𑀺. 𑀧𑀣𑀯𑀻 𑀦𑀸𑀫 𑀏𑀯𑀁 𑀲𑀡𑁆𑀞𑀸𑀦𑀸, 𑀧𑀩𑁆𑀩𑀢𑁄 𑀦𑀸𑀫 𑀏𑀯𑀁 𑀲𑀡𑁆𑀞𑀸𑀦𑁄𑀢𑀺 𑀲𑀡𑁆𑀞𑀸𑀦𑀦𑀺𑀬𑀫𑁄 𑀦𑀢𑁆𑀣𑀺. 𑀧𑀁𑀲𑀼𑀲𑀺𑀮𑀸𑀦𑀁 𑀭𑀸𑀲𑀺𑀧𑀼𑀜𑁆𑀚𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁂𑀦 𑀯𑁄𑀳𑀸𑀭𑁄 𑀲𑀺𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 ‘‘𑀦 𑀳𑀺 𑀇𑀥 𑀲𑀡𑁆𑀞𑀸𑀦𑀁 𑀧𑀥𑀸𑀦𑀁’’𑀢𑀺. ‘‘𑀓𑀝𑁆𑀞𑀸𑀤𑀬𑁄 𑀏𑀯 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀢𑁂 𑀏𑀯𑀲𑀡𑁆𑀞𑀸𑀦𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀦𑀸𑀦𑀸𑀯𑁄𑀳𑀸𑀭𑁂𑀦 𑀯𑀼𑀘𑁆𑀘𑀦𑁆𑀢𑀺. 𑀧𑀣𑀯𑀻 𑀧𑀩𑁆𑀩𑀢 𑀦𑀤𑀻 𑀲𑀫𑀼𑀤𑁆𑀤𑀸𑀤𑀻𑀲𑀼 𑀯𑀺𑀬 𑀪𑀽𑀢𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑀸𑀓𑀸𑀭𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀦 𑀳𑀺 𑀇𑀥 𑀲𑀫𑀽𑀳𑁄 𑀧𑀥𑀸𑀦𑀁’’𑀢𑀺. ‘‘𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀻’’𑀢𑀺 𑀧𑀜𑁆𑀘𑀓𑁆𑀔𑀦𑁆𑀥 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀳𑀺 𑀅𑀦𑀜𑁆𑀜𑀁 𑀏𑀓𑀻𑀪𑀽𑀢𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀺. 𑀦 𑀆𑀓𑀸𑀲 𑀧𑀜𑁆𑀜𑀢𑁆𑀢𑀺 𑀤𑀺𑀲𑀸𑀤𑁂𑀲𑀧𑀜𑁆𑀜𑀢𑁆𑀢𑀺𑀬𑁄 𑀯𑀺𑀬 𑀢𑁂𑀳𑀺 𑀔𑀦𑁆𑀥𑁂𑀳𑀺 𑀫𑀼𑀜𑁆𑀘𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀺. ‘‘𑀬𑀢𑁄’’𑀢𑀺 𑀬𑀫𑁆𑀳𑀸𑀤𑀺𑀲𑀢𑁄. ‘‘𑀮𑀤𑁆𑀥𑀧𑁆𑀧𑀓𑀸𑀲𑀢𑁆𑀢𑀸’’𑀢𑀺 𑀮𑀤𑁆𑀥𑀧𑁆𑀧𑀪𑀸𑀲𑀢𑁆𑀢𑀸. ‘‘𑀅𑀳𑀲𑁆𑀲𑀸’’𑀢𑀺 𑀤𑀺𑀯𑀲𑀲𑁆𑀲. 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀺 ‘𑀉𑀤𑁆𑀥𑀼𑀫𑀸𑀢𑀓𑀁 𑀧𑀝𑀺𑀓𑀽𑀮𑀁’𑀢𑀺𑀆𑀤𑀺𑀦𑀸 𑀧𑀝𑀺𑀓𑀽𑀮𑀯𑀲𑁂𑀦 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀧𑀺 𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀳𑀦𑁆𑀢𑀁 𑀪𑀽𑀢𑀯𑀺𑀓𑀸𑀭𑀧𑁆𑀧𑀓𑀸𑀭𑁂𑀦 𑀉𑀧𑀝𑁆𑀞𑀳𑀢𑀻𑀢𑀺 𑀓𑀢𑁆𑀯𑀸 𑀪𑀽𑀢𑀦𑀺𑀫𑀺𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀝𑁆𑀞𑀓𑀣𑀸𑀬𑀁’’𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁. ‘‘𑀢𑀸𑀲𑀁’’𑀢𑀺 𑀪𑀽𑀫𑀺𑀧𑀩𑁆𑀩𑀢𑀸𑀤𑀺𑀓𑀸𑀦𑀁 𑀅𑀢𑁆𑀣 𑀧𑀜𑁆𑀜𑀢𑁆𑀢𑀻𑀦𑀁. ‘‘𑀢𑀣𑀸 𑀢𑀣𑀸’’𑀢𑀺 𑀅𑀬𑀁 𑀪𑀽𑀫𑀺, 𑀅𑀬𑀁 𑀧𑀩𑁆𑀩𑀢𑁄, 𑀢𑀺𑀆𑀤𑀺𑀦𑀸 𑀢𑁂𑀦 𑀢𑁂𑀦 𑀯𑁄𑀳𑀸𑀭𑁂𑀦. 𑀅𑀢𑁆𑀣𑀸𑀦𑀁 𑀧𑀭𑀫𑀢𑁆𑀣𑀸𑀦𑀁 𑀙𑀸𑀬𑀸𑀢𑀺 𑀅𑀢𑁆𑀣𑀘𑁆𑀙𑀸𑀬𑀸. ‘‘𑀙𑀸𑀬𑀸’’𑀢𑀺 𑀘 𑀦𑀺𑀫𑀺𑀢𑁆𑀢𑀘𑁆𑀙𑀸𑀬𑀸𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀅𑀢𑁆𑀣𑀘𑁆𑀙𑀸𑀬𑀸𑀦𑀁 𑀆𑀓𑀸𑀭𑁄 𑀅𑀢𑁆𑀣𑀘𑁆𑀙𑀸𑀬𑀸𑀓𑀸𑀭𑁄. ‘‘𑀆𑀓𑀸𑀭𑁄’’𑀢𑀺 𑀘 𑀦𑀸𑀦𑀸𑀲𑀫𑀽𑀳 𑀦𑀸𑀦𑀸𑀲𑀡𑁆𑀞𑀸𑀦𑀸𑀤𑀺𑀓𑁄 𑀆𑀓𑀸𑀭𑁄. 𑀅𑀢𑁆𑀣𑁄𑀢𑀺 𑀯𑀸 𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄 𑀯𑀘𑀦𑀢𑁆𑀣𑁄. 𑀲𑁄𑀬𑁂𑀯 𑀲𑀫𑀽𑀳𑀸𑀓𑀸𑀭𑀸𑀤𑀺 𑀦𑀺𑀫𑀺𑀢𑁆𑀢 𑀫𑀢𑁆𑀢𑀢𑁆𑀢𑀸 𑀅𑀢𑁆𑀣𑀘𑁆𑀙𑀸𑀬𑀸𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀤𑁆𑀤𑀸𑀪𑀺𑀥𑁂𑀬𑁆𑀬 𑀲𑀗𑁆𑀔𑀸𑀢𑁂𑀦𑀸’’𑀢𑀺𑀆𑀤𑀺𑀦𑀸. ‘‘𑀤𑀩𑁆𑀩𑀧𑁆𑀧𑀝𑀺𑀩𑀺𑀫𑁆𑀩𑀸𑀓𑀸𑀭𑁂𑀦𑀸’’𑀢𑀺 𑀤𑀩𑁆𑀩𑀲𑀗𑁆𑀔𑀸𑀢𑁂𑀦 𑀧𑀝𑀺𑀩𑀺𑀫𑁆𑀩𑀸𑀓𑀸𑀭𑁂𑀦. ‘‘𑀑𑀮𑀫𑁆𑀩𑀺𑀬𑀸’’𑀢𑀺 𑀅𑀯𑀮𑀫𑁆𑀩𑀺𑀢𑁆𑀯𑀸. ‘‘𑀕𑀡𑀦𑀽𑀧𑀕𑀁 𑀓𑀢𑁆𑀯𑀸’’𑀢𑀺 𑀅𑀬 𑀫𑁂𑀓𑁄 𑀅𑀢𑁆𑀣𑁄, 𑀇𑀤𑀫𑁂𑀓𑀁 𑀯𑀢𑁆𑀣𑀽𑀢𑀺 𑀏𑀯𑀁 𑀕𑀡𑀦𑀽𑀧𑀕𑀁 𑀓𑀢𑁆𑀯𑀸. ‘‘𑀇𑀫𑁂𑀙𑀸’’𑀢𑀺 𑀇𑀫𑁂 𑀙𑀲𑀤𑁆𑀤𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑀸 𑀦𑀸𑀫 𑀦𑀸𑀫𑀓𑀫𑁆𑀫𑀸𑀤𑀺 𑀦𑀸𑀫. ‘‘𑀅𑀢𑁆𑀢𑀦𑀻’’𑀢𑀺 𑀦𑀸𑀫𑀧𑀤 𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑀺. 𑀅𑀢𑁆𑀣 𑀯𑀺𑀲𑀬𑀁 𑀏𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺 𑀪𑀸𑀲𑀜𑁆𑀜𑀽𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀸𑀫𑁂 𑀲𑀢𑀻’’𑀢𑀺 𑀅𑀓𑁆𑀔𑀭𑀲𑀫𑀽𑀳𑁄 𑀧𑀤𑀁, 𑀧𑀤𑀲𑀫𑀽𑀳𑁄 𑀯𑀸𑀓𑁆𑀬𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀦𑀸𑀫𑀧𑀤𑁂 𑀯𑀺𑀚𑁆𑀚𑀫𑀸𑀦𑁂 𑀲𑀢𑀺. ‘‘𑀢𑀤𑀼𑀕𑁆𑀕𑀡𑁆𑀳𑀦𑁆𑀢𑀸𑀦𑀁’’𑀢𑀺 𑀢𑀁 𑀢𑀁 𑀦𑀸𑀫𑀧𑀤𑀁 𑀯𑀸𑀘𑀼𑀕𑁆𑀕𑀢𑀓𑀭𑀡 𑀯𑀲𑁂𑀦 𑀉𑀕𑁆𑀕𑀡𑁆𑀳𑀦𑁆𑀢𑀸𑀦𑀁 𑀚𑀦𑀸𑀦𑀁. ‘‘𑀢𑀤𑀢𑁆𑀣𑀸’’𑀢𑀺 𑀢𑀲𑁆𑀲 𑀢𑀲𑁆𑀲 𑀦𑀸𑀫 𑀧𑀤𑀲𑁆𑀲 𑀅𑀢𑁆𑀣𑀸. ‘‘𑀆𑀕𑀘𑁆𑀙𑀦𑁆𑀢𑀺 𑀬𑁂𑀯𑀸’’𑀢𑀺 𑀪𑀸𑀲𑀜𑁆𑀜𑀽𑀦𑀁 𑀜𑀸𑀡𑀸𑀪𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑀺𑀬𑁂𑀯. 𑀏𑀢𑁂𑀦 𑀅𑀢𑁆𑀢𑀦𑀺 𑀅𑀢𑁆𑀣𑀲𑁆𑀲 𑀦𑀸𑀫𑀦𑀁 𑀦𑀸𑀫 𑀅𑀢𑁆𑀣𑀚𑁄𑀢𑀦 𑀓𑀺𑀘𑁆𑀘𑀫𑁂𑀯𑀸𑀢𑀺 𑀤𑀻𑀧𑁂𑀢𑀺. ‘‘𑀲𑀼𑀡𑀦𑁆𑀢𑀸𑀦𑀁 𑀜𑀸𑀡𑀁’’𑀢𑀺 𑀏𑀢𑁆𑀣 ‘‘𑀜𑀸𑀡𑀁’’𑀢𑀺 𑀉𑀧𑀮𑀓𑁆𑀔𑀡 𑀯𑀘𑀦𑀁, 𑀅𑀓𑀼𑀲𑀮 𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀢𑀁 𑀢𑀁 𑀅𑀢𑁆𑀣𑀸𑀪𑀺𑀫𑀼𑀔𑀁 𑀦𑀸𑀫𑁂𑀢𑀻’’𑀢𑀺 𑀆𑀭𑀫𑁆𑀫𑀡 𑀓𑀭𑀡𑀯𑀲𑁂𑀦 𑀦𑀸𑀫𑁂𑀢𑀺. ‘‘𑀦𑀸𑀫𑀕𑁆𑀕𑀳𑀡 𑀯𑀲𑁂𑀦𑀸’’𑀢𑀺 𑀅𑀬𑀁 𑀅𑀲𑀼𑀓𑁄𑀦𑀸𑀫 𑀳𑁄𑀢𑀽𑀢𑀺 𑀏𑀯𑀁 𑀦𑀸𑀫𑀕𑁆𑀕𑀳𑀡𑀯𑀲𑁂𑀦. ‘‘𑀥𑀸𑀭𑀻𑀬𑀢𑀻’’𑀢𑀺 𑀬𑀸𑀯𑀚𑀻𑀯𑀁𑀧𑀺 𑀅𑀧𑁆𑀧𑀫𑀼𑀲𑁆𑀲𑀫𑀸𑀦𑀁 𑀓𑀢𑁆𑀯𑀸 𑀥𑀸𑀭𑀻𑀬𑀢𑀺. 𑀦𑀻𑀳𑀭𑀺𑀢𑁆𑀯𑀸 𑀯𑀼𑀘𑁆𑀘𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀦𑀺𑀭𑀼𑀢𑁆𑀢𑀺. ‘‘𑀏𑀢𑀸𑀬𑀸’’𑀢𑀺 𑀓𑀭𑀡𑀪𑀽𑀢𑀸𑀬 𑀏𑀢𑀸𑀬𑀦𑀸𑀫𑀚𑀸𑀢𑀺𑀬𑀸. ‘‘𑀅𑀯𑀺𑀤𑀺𑀢𑀧𑀓𑁆𑀔𑁂’’𑀢𑀺 𑀦𑀸𑀫𑀧𑀤𑀁 𑀅𑀲𑁆𑀲𑀼𑀢𑀓𑀸𑀮𑁂 𑀅𑀯𑀺𑀜𑁆𑀜𑀸𑀢𑀧𑀓𑁆𑀔𑁂. ‘‘𑀢𑀢𑁄 𑀦𑀻𑀳𑀭𑀺𑀢𑁆𑀯𑀸’’𑀢𑀺 𑀅𑀯𑀺𑀤𑀺𑀢𑀧𑀓𑁆𑀔𑀢𑁄 𑀜𑀸𑀡𑁂𑀦 𑀦𑀻𑀳𑀭𑀺𑀢𑁆𑀯𑀸. ‘‘𑀓𑀣𑀻𑀬𑀢𑀻’’𑀢𑀺 𑀢𑀁 𑀲𑀼𑀢𑀓𑀸𑀮𑁂 𑀯𑀤𑀦𑁆𑀢𑁂𑀦 𑀲𑀼𑀡𑀦𑁆𑀢𑀲𑁆𑀲 𑀆𑀘𑀺𑀓𑁆𑀔𑀻𑀬𑀢𑀺 𑀚𑀸𑀦𑀸𑀧𑀻𑀬𑀢𑀺. ‘‘𑀅𑀢𑁆𑀣𑀲𑁆𑀲𑀸’’𑀢𑀺 𑀅𑀯𑀺𑀤𑀺𑀢𑀧𑀓𑁆𑀔𑁂 𑀞𑀺𑀢𑀲𑁆𑀲 𑀅𑀢𑁆𑀣𑀲𑁆𑀲. ‘‘𑀏𑀢𑀲𑁆𑀲𑁂 𑀯𑀸’’𑀢𑀺 𑀦𑀸𑀫𑀧𑀤𑀲𑁆𑀲𑁂𑀯. 𑀦𑀸𑀫𑀧𑀤𑀦𑁆𑀢𑀺 𑀘 𑀓𑁆𑀭𑀺𑀬 𑀧𑀤𑀁𑀧𑀺, 𑀉𑀧𑀲𑀕𑁆𑀕𑀧𑀤𑀫𑁆𑀧𑀺, 𑀦𑀺𑀧𑀸𑀢𑀧𑀤𑀫𑁆𑀧𑀺, 𑀧𑀸𑀝𑀺𑀧𑀤𑀺𑀓𑀧𑀤𑀁𑀧𑀺, 𑀇𑀥 𑀦𑀸𑀫𑀧𑀤𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. ‘‘𑀯𑀺𑀲𑁂𑀲𑀦𑀪𑀽𑀢𑀸𑀦𑀁’’𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂 𑀲𑀫𑀸𑀲𑀧𑀤𑀸𑀦𑀁 𑀅𑀢𑁆𑀣𑀸 𑀯𑀺𑀲𑁂𑀲𑀦𑀸 𑀦𑀸𑀫. 𑀏𑀯𑀁 𑀯𑀺𑀲𑁂𑀲𑀦𑀪𑀽𑀢𑀸𑀦𑀁. ‘‘𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺 𑀅𑀜𑁆𑀜𑀧𑀤𑀢𑁆𑀣𑀪𑀽𑀢𑀲𑁆𑀲 𑀅𑀪𑀺𑀜𑁆𑀜𑀸𑀮𑀸𑀪𑀻 𑀧𑀼𑀕𑁆𑀕𑀮𑀲𑁆𑀲. ‘‘𑀯𑀤𑀦𑁆𑀢𑀻’’𑀢𑀺 𑀆𑀦𑀦𑁆𑀤𑀸𑀘𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀧𑀜𑁆𑀜𑀢𑁆𑀢𑀺𑀤𑀼𑀓𑀦𑀺𑀤𑁆𑀤𑁂𑀲𑁂 𑀫𑀽𑀮𑀝𑀻𑀓𑀸𑀬𑀁 𑀢𑀣𑀸 𑀯𑀤𑀢𑀺. ‘‘𑀢𑀩𑁆𑀪𑀸𑀯𑀁’’𑀢𑀺 𑀅𑀓𑁆𑀔𑀭 𑀧𑀤𑀩𑁆𑀬𑀜𑁆𑀚𑀦𑀪𑀸𑀯𑀁. ‘‘𑀅𑀲𑁆𑀲𑀸’’𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸. 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀁 𑀕𑁄𑀘𑀭𑁄 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀦𑀼𑀲𑀸𑀭𑁂𑀦𑀸’’𑀢𑀺 𑀅𑀦𑀼𑀕𑀫𑀦𑁂𑀦. ‘‘𑀮𑁄𑀓𑀲𑀗𑁆𑀓𑁂𑀢 𑀦𑀺𑀫𑁆𑀫𑀺𑀢𑀸’’𑀢𑀺 𑀮𑁄𑀓𑀲𑀗𑁆𑀓𑁂𑀢𑀜𑁆𑀜𑀸𑀡𑁂𑀦 𑀧𑀯𑀢𑁆𑀢𑀺𑀢𑀸. ‘‘𑀮𑁄𑀓𑀲𑀗𑁆𑀓𑁂𑀢𑀜𑁆𑀜𑀸𑀡𑀁’’𑀢𑀺 𑀘 𑀇𑀤𑀁 𑀦𑀸𑀫𑀁 𑀇𑀫𑀲𑁆𑀲𑀢𑁆𑀣𑀲𑁆𑀲 𑀦𑀸𑀫𑀁, 𑀅𑀬𑀫𑀢𑁆𑀣𑁄 𑀇𑀫𑀲𑁆𑀲 𑀦𑀸𑀫𑀲𑁆𑀲 𑀅𑀢𑁆𑀣𑁄𑀢𑀺 𑀏𑀯𑀁 𑀧𑀼𑀭𑁂𑀢𑀭𑀁 𑀮𑁄𑀓𑀲𑀜𑁆𑀜𑀸𑀡 𑀚𑀸𑀦𑀦𑀓𑀜𑁆𑀜𑀸𑀡𑀁. ‘‘𑀅𑀢𑀻𑀢 𑀲𑀤𑁆𑀤𑀫𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀲𑁄𑀢𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸 𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀅𑀢𑀻𑀢 𑀲𑀤𑁆𑀤𑀫𑀢𑁆𑀢𑀁 𑀓𑀼𑀭𑀼𑀫𑀸𑀦𑀸. ‘‘𑀢𑁂𑀦 𑀯𑀼𑀢𑁆𑀢𑀯𑀘𑀦𑁂’’𑀢𑀺 𑀢𑁂𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀯𑀼𑀢𑁆𑀢𑀯𑀘𑀦𑁂. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀤𑁆𑀤𑀁 𑀲𑁄𑀢𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸, 𑀅𑀢𑀻𑀢𑀜𑁆𑀘 𑀲𑀤𑁆𑀤𑀁 𑀫𑀦𑁄𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀢𑀸𑀦𑀺 𑀅𑀓𑁆𑀔𑀭𑀸𑀦𑀻’’𑀢𑀺 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀯𑀸𑀓𑁆𑀬𑁂 𑀅𑀯𑀬𑀯𑀓𑁆𑀔𑀭𑀸𑀦𑀺. ‘‘𑀅𑀬𑀁 𑀅𑀓𑁆𑀔𑀭 𑀲𑀫𑀽𑀳𑁄’’𑀢𑀺 𑀇𑀤𑀁 𑀦𑀸𑀫𑀧𑀤𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲. ‘‘𑀯𑀺𑀦𑀺𑀘𑁆𑀙𑀬𑀯𑀻𑀣𑀺𑀁’’𑀢𑀺 𑀅𑀓𑁆𑀔𑀭 𑀧𑀤𑀲𑀮𑁆𑀮𑀓𑁆𑀔𑀡𑀯𑀻𑀣𑀺𑀜𑁆𑀘. ‘‘𑀏𑀓𑀓𑁆𑀔𑀭𑁂 𑀲𑀤𑁆𑀤𑁂’’𑀢𑀺 ‘𑀕𑁄’ 𑀇𑀘𑁆𑀘𑀸𑀤𑀺𑀓𑁂 𑀏𑀓𑀓𑁆𑀔𑀭𑁂 𑀧𑀜𑁆𑀜𑀢𑁆𑀢𑀺 𑀲𑀤𑁆𑀤𑁂. ‘‘𑀬𑀸’’𑀢𑀺 𑀦𑀸𑀫 𑀧𑀜𑁆𑀜𑀢𑁆𑀢𑀺. ‘‘𑀯𑀤𑀦𑁆𑀢𑀲𑁆𑀲 𑀫𑀦𑀲𑀸’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀼𑀩𑁆𑀩𑀪𑀸𑀕𑁂’’𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀧𑀭𑁂𑀲𑀁 𑀯𑀢𑁆𑀢𑀼𑀓𑀸𑀫𑁄 𑀯𑀤𑀦𑁆𑀢𑁄 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀸𑀫𑀁 𑀧𑀣𑀫𑀁 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀦𑀺𑀬𑀫𑁂𑀢𑁆𑀯𑀸 𑀏𑀯 𑀯𑀤𑀢𑀺, 𑀢𑀁 𑀦𑀸𑀫𑀁 𑀧𑀼𑀩𑁆𑀩𑀪𑀸𑀕𑁂 𑀯𑀤𑀦𑁆𑀢𑁂𑀦 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀧𑀸𑀝𑀺𑀓𑀣𑀦𑀁 𑀧𑀯𑀢𑁆𑀢𑀺𑀓𑁆𑀓𑀫𑀓𑀣𑀦𑀁. ‘‘𑀯𑀼𑀢𑁆𑀢𑀁’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀣𑀸 𑀅𑀤𑁆𑀥𑀫𑀢𑁆𑀢𑀺𑀓𑀦𑁆𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀼𑀢𑁆𑀢𑀁’’𑀢𑀺 𑀘 𑀲𑀤𑁆𑀤𑀲𑀢𑁆𑀣𑁂𑀲𑀼 𑀯𑀼𑀢𑁆𑀢𑀁.

𑀕𑀸𑀣𑀸𑀬𑀁. ‘‘𑀫𑀢𑁆𑀢𑀸’’𑀢𑀺 𑀏𑀓𑀯𑀺𑀚𑁆𑀚𑀼𑀧𑁆𑀧𑀸𑀤𑀓𑁆𑀔𑀡𑀁 𑀯𑀼𑀘𑁆𑀘𑀢𑀺. 𑀏𑀓𑀸 𑀫𑀢𑁆𑀢𑀸𑀬𑀲𑁆𑀲𑀸𑀢𑀺 𑀏𑀓𑀫𑀢𑁆𑀢𑁄. ‘‘𑀤𑀻𑀖𑀫𑀼𑀘𑁆𑀘𑀢𑁂’’𑀢𑀺 𑀤𑀻𑀖𑁄 𑀦𑀸𑀫 𑀯𑀼𑀘𑁆𑀘𑀢𑁂. ‘‘𑀧𑁆𑀮𑀼𑀢𑁄’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀭𑀼𑀢𑁄 𑀕𑀸𑀬𑀺𑀢𑁄𑀢𑀺 𑀧𑀭𑀼𑀢𑁄. 𑀲𑁄 𑀏𑀯 𑀭𑀓𑀸𑀭𑀲𑁆𑀲 𑀮𑀓𑀸𑀭𑀁 𑀓𑀢𑁆𑀯𑀸 𑀧𑀓𑀸𑀭𑁂 𑀘 𑀲𑀭𑀮𑁄𑀧𑀁 𑀓𑀢𑁆𑀯𑀸 𑀧𑁆𑀮𑀼𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀕𑀻𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀭𑀫𑀢𑁆𑀣 𑀲𑀤𑁆𑀤𑀲𑀗𑁆𑀖𑀸𑀝𑀸𑀦𑀁’’𑀢𑀺 𑀧𑀭𑀫𑁆𑀧𑀭𑀸 𑀧𑀯𑀢𑁆𑀢𑀸𑀦𑀁 𑀧𑀭𑀫𑀢𑁆𑀣 𑀲𑀤𑁆𑀤𑀭𑀸𑀲𑀻𑀦𑀁. ‘‘𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀘𑀺𑀢𑁆𑀢𑀸𑀦𑀻’’𑀢𑀺 𑀚𑀯𑀦𑀯𑀻𑀣𑀻𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀪𑀯𑀗𑁆𑀕𑀘𑀺𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀘𑀺𑀢𑁆𑀢𑀸𑀦𑀺.

𑀧𑀝𑁆𑀞𑀸𑀦𑀦𑀬𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀲𑀗𑁆𑀕𑀳𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.