𑁯. 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁧𑁭𑁦. 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑁂. 𑀯𑀺𑀤𑀺𑀢𑁄 𑀯𑀺𑀜𑁆𑀜𑀸𑀢𑁄 𑀦𑀸𑀫𑀭𑀽𑀧 𑀯𑀺𑀪𑀸𑀕𑁄 𑀬𑁂𑀦𑀸𑀢𑀺 𑀯𑀺𑀕𑁆𑀕𑀳𑁄. 𑀬𑁄𑀕𑀻 𑀧𑀼𑀕𑁆𑀕𑀮𑁄. ‘‘𑀓𑀺𑀮𑁂𑀲𑁂 𑀲𑀫𑁂𑀢𑀻’’𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀓𑁂 𑀦𑀻𑀯𑀭𑀡𑀓𑀺𑀮𑁂𑀲𑁂 𑀉𑀧𑀲𑀫𑁂𑀢𑀺. ‘‘𑀢𑀣𑀸 𑀧𑀯𑀢𑁆𑀢𑁄’’𑀢𑀺 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑁄. 𑀯𑀽𑀧𑀲𑀫𑀦𑀯𑀲𑁂𑀦 𑀯𑀸 𑀧𑀯𑀢𑁆𑀢𑁄. ‘‘𑀢𑀸𑀬𑀸’’𑀢𑀺 𑀢𑀸𑀬𑀪𑀸𑀯𑀦𑀸 𑀧𑀜𑁆𑀜𑀸𑀬, 𑀧𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀲𑁆𑀲𑀺𑀢𑀁’’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀁. 𑀓𑀣𑀁 𑀓𑀲𑀺𑀡𑀪𑀸𑀯𑀦𑀸𑀤𑀺𑀓𑀁 𑀬𑁄𑀕𑀓𑀫𑁆𑀫𑀁 𑀅𑀢𑁆𑀢𑀸𑀯 𑀅𑀢𑁆𑀢𑀦𑁄 𑀞𑀸𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁𑀳𑀻’’𑀢𑀺𑀆𑀤𑀺. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀧𑀤𑀝𑁆𑀞𑀸𑀦𑀢𑀸𑀬𑀸’’𑀢𑀺 𑀏𑀢𑁂𑀦 𑀢𑀺𑀝𑁆𑀞𑀢𑀺 𑀅𑀦𑀺𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀢𑀺 𑀏𑀢𑁂𑀦𑀸𑀢𑀺 𑀞𑀸𑀦𑀦𑁆𑀢𑀺 𑀅𑀢𑁆𑀣𑁂𑀦 𑀧𑀤𑀝𑁆𑀞𑀸𑀦𑀫𑁂𑀯 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀲𑀼𑀔𑀯𑀺𑀲𑁂𑀲𑀸𑀦𑀁’’𑀢𑀺 𑀛𑀸𑀦𑀲𑀼𑀔 𑀫𑀕𑁆𑀕𑀲𑀼𑀔 𑀨𑀮𑀲𑀼𑀔𑀸𑀦𑀁. ‘‘𑀤𑀲𑀓𑀲𑀺𑀡𑀸𑀦𑀻’’𑀢𑀺𑀆𑀤𑀻𑀲𑀼 𑀫𑀼𑀔𑁆𑀬𑀢𑁄 𑀯𑀸 𑀉𑀧𑀘𑀸𑀭𑀢𑁄 𑀯𑀸 𑀤𑁆𑀯𑀺𑀥𑀸𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀲𑀓𑀲𑀺𑀡𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑁂𑀲𑀸𑀦𑀺𑀧𑀻’’𑀢𑀺 𑀅𑀧𑁆𑀧𑀫𑀜𑁆𑀜𑀸𑀤𑀻𑀦𑀺 𑀲𑁂𑀲𑀓𑀫𑁆𑀫𑀝𑁆𑀞𑀸𑀦𑀸𑀦𑀺𑀧𑀺. 𑀬𑀁 𑀬𑀁 𑀅𑀦𑀼𑀭𑀽𑀧𑀁 𑀬𑀣𑀸𑀦𑀼𑀭𑀽𑀧𑀁. ‘‘𑀲𑀫𑀼𑀤𑀸𑀘𑀭𑀡𑀁’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀼𑀲𑀁 𑀧𑀯𑀢𑁆𑀢𑀦𑀁. ‘‘𑀲𑀁𑀲𑀕𑁆𑀕 𑀪𑁂𑀤𑁄’’𑀢𑀺 𑀏𑀓𑀫𑁂𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀲𑁆𑀲𑀘𑀺 𑀤𑁆𑀯𑁂𑀘𑀭𑀺𑀬𑀸, 𑀓𑀲𑁆𑀲𑀘𑀺 𑀢𑀺𑀲𑁆𑀲𑁄𑀢𑀺𑀆𑀤𑀺𑀦𑀸 𑀲𑀫𑁆𑀫𑀺𑀲𑁆𑀲 𑀯𑀺𑀪𑀸𑀕𑁄. 𑀅𑀝𑁆𑀞𑀓𑀣𑀸𑀬𑀁’’𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕 𑀅𑀝𑁆𑀞𑀓𑀣𑀸𑀬𑀁. ‘‘𑀲𑀩𑁆𑀩𑀸𑀬𑀧𑀺 𑀅𑀧𑁆𑀧𑀦𑀸𑀬𑀸’’𑀢𑀺 𑀛𑀸𑀦𑀧𑁆𑀧𑀦𑀸𑀬 𑀘 𑀫𑀕𑁆𑀕𑀧𑁆𑀧𑀦𑀸𑀬 𑀘 𑀨𑀮𑀧𑁆𑀧𑀦𑀸𑀬 𑀘. ‘‘𑀬𑀸 𑀆𑀲𑀦𑁆𑀦𑁂 𑀧𑀯𑀢𑁆𑀢𑀸 𑀤𑀽𑀭𑁂 𑀧𑀯𑀢𑁆𑀢𑀸𑀢𑀺 𑀅𑀥𑀺𑀓𑀸𑀭𑁄. ‘‘𑀇𑀢𑀭𑀸 𑀧𑀦𑀸’’𑀢𑀺 𑀤𑀽𑀭𑁂 𑀧𑀯𑀢𑁆𑀢𑀸𑀧𑀦. ‘‘𑀢𑀸𑀲𑀁 𑀧𑀦𑀸’’𑀢𑀺 𑀢𑀺𑀲𑁆𑀲𑀦𑁆𑀦𑀁 𑀪𑀸𑀯𑀦𑀸𑀦𑀁 𑀧𑀦. ‘‘𑀢𑁂𑀲𑀁 𑀧𑀻’’𑀢𑀺 𑀤𑁆𑀯𑀺𑀦𑁆𑀦𑀁 𑀦𑀺𑀫𑀺𑀢𑁆𑀢𑀸𑀦𑀁𑀧𑀺. ‘‘𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁’’ 𑀦𑀸𑀫 𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀁 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁. 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁 𑀯𑀸 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀯𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀢𑀣𑀸𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀸𑀬𑁄𑀓𑀲𑀺𑀡 𑀯𑀺𑀥𑀸𑀦𑁂 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀲𑀻𑀲𑀁 𑀯𑀸𑀢𑁂𑀦 𑀧𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸𑀢𑀺 𑀯𑀼𑀢𑁆𑀢𑀁. 𑀔𑀮𑀫𑀡𑁆𑀟𑀮𑀁 𑀦𑀸𑀫 𑀓𑀲𑁆𑀲𑀓𑀸𑀦𑀁 𑀓𑀲𑁆𑀲𑀫𑀤𑁆𑀤𑀦𑀪𑀽𑀫𑀺𑀪𑀸𑀕𑀫𑀡𑁆𑀟𑀮𑀁. ‘‘𑀓𑀢𑀁 𑀯𑀸’’𑀢𑀺 𑀦𑀻𑀮𑀸𑀤𑀺𑀯𑀡𑁆𑀡𑀯𑀺𑀲𑁂𑀲𑀭𑀳𑀺𑀢𑀁 𑀅𑀭𑀼𑀡𑀯𑀡𑁆𑀡𑀁 𑀫𑀢𑁆𑀢𑀺𑀓𑀓𑁆𑀔𑀡𑁆𑀟𑀁 𑀉𑀤𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀘𑀓𑁆𑀓𑀫𑀡𑁆𑀟𑀮𑀁 𑀯𑀺𑀬 𑀧𑀭𑀺𑀫𑀡𑁆𑀟𑀮𑀁 𑀲𑀼𑀫𑀝𑁆𑀞𑀢𑀮𑀁 𑀧𑀣𑀯𑀺𑀫𑀡𑁆𑀟𑀮𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀓𑀢𑀁 𑀯𑀸. ‘‘𑀅𑀓𑀢𑀁 𑀯𑀸’’𑀢𑀺 𑀓𑀢𑁆𑀣𑀘𑀺 𑀪𑀽𑀫𑀺𑀪𑀸𑀕𑁂 𑀓𑁂𑀦𑀘𑀺 𑀅𑀓𑀢𑀁 𑀲𑀬𑀁 𑀚𑀸𑀢𑀁 𑀯𑀸. ‘‘𑀓𑀲𑀺𑀡𑁂𑀦 𑀚𑀫𑁆𑀩𑀼𑀤𑀻𑀧𑀲𑁆𑀲𑀸’’𑀢𑀺 𑀏𑀢𑁆𑀣.

𑀩𑀼𑀤𑁆𑀥𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺;

𑀯𑀭𑀫𑁂𑀯 𑀳𑀺 𑀲𑀸𑀧𑀻𑀢𑀺, 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲𑀸𑀢𑀺.

𑀕𑀸𑀣𑀸𑀲𑁂𑀲𑁄. 𑀢𑀢𑁆𑀣 𑀚𑀫𑁆𑀩𑀼𑀤𑀻𑀧𑀲𑁆𑀲 𑀓𑀲𑀺𑀡𑀢𑁄 𑀲𑀸𑀧𑀻𑀢𑀺𑀯𑀭𑀸 𑀏𑀯𑀸𑀢𑀺 𑀬𑁄𑀚𑀦𑀸. ‘‘𑀓𑀲𑀺𑀡𑀢𑁄’’𑀢𑀺 𑀘 𑀲𑀓𑀮𑀫𑀡𑁆𑀟𑀮𑀢𑁄. 𑀲𑀓𑀮𑀲𑁆𑀲 𑀚𑀫𑁆𑀩𑀼𑀤𑀻𑀧𑀫𑀡𑁆𑀟𑀮𑀲𑁆𑀲 𑀇𑀲𑁆𑀲𑀭𑀺𑀬𑀸𑀥𑀺𑀧𑀢𑀺𑀢𑁄 𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀦𑁆𑀦𑀺𑀯𑀺𑀝𑁆𑀞𑀸’’𑀢𑀺 𑀲𑀫𑀁 𑀲𑀡𑁆𑀞𑀺𑀢𑀸. ‘‘𑀲𑀡𑁆𑀞𑀸𑀦 𑀧𑀜𑁆𑀜𑀢𑁆𑀢𑀻’’𑀢𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑁂𑀦 𑀉𑀧𑀝𑁆𑀞𑀺𑀢𑀸 𑀦𑀺𑀫𑀺𑀢𑁆𑀢𑀧𑀜𑁆𑀜𑀢𑁆𑀢𑀺 𑀏𑀯 𑀯𑀼𑀘𑁆𑀘𑀢𑀺. ‘‘𑀨𑀼𑀝𑁆𑀞𑀝𑁆𑀞𑀸𑀦𑁂’’𑀢𑀺 𑀓𑀸𑀬𑁂𑀯𑀸 𑀭𑀼𑀓𑁆𑀔𑀕𑁆𑀕𑀸𑀤𑀻𑀲𑀼𑀯𑀸 𑀯𑀸𑀢𑁂𑀦 𑀧𑀳𑀢𑀝𑁆𑀞𑀸𑀦𑁂. ‘‘𑀯𑀸𑀬𑀼 𑀯𑀝𑁆𑀝𑀻’’𑀢𑀺 𑀯𑀸𑀢𑀧𑀭𑀺𑀫𑀡𑁆𑀟𑀮𑀁. 𑀘𑀦𑁆𑀤𑀲𑀽𑀭𑀺𑀬𑀸𑀦𑀁 𑀅𑀕𑁆𑀕𑀺𑀲𑁆𑀲 𑀘 𑀑𑀪𑀸𑀲𑁂𑀦 𑀯𑀺𑀲𑀺𑀝𑁆𑀞𑀸𑀢𑀺 𑀲𑀫𑀸𑀲𑁄. ‘‘𑀯𑀺𑀲𑀺𑀝𑁆𑀞𑀸’’𑀢𑀺 𑀯𑀺𑀲𑁂𑀲𑀺𑀢𑀸.

‘‘𑀥𑀽𑀫𑀸𑀢𑀁’’𑀢𑀺 𑀥𑀽𑀫𑀸𑀬𑀺𑀢𑀁. 𑀥𑀽𑀫𑀧𑀽𑀭𑀺𑀢𑀧𑀝𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀽𑀦𑀪𑀸𑀯𑀁 𑀕𑀢𑀁’’𑀢𑀺. 𑀅𑀦𑁆𑀢𑁂 𑀓𑀓𑀸𑀭𑁄 𑀦𑀺𑀦𑁆𑀤𑀢𑁆𑀣𑀚𑁄𑀢𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀓𑀼𑀘𑁆𑀙𑀺𑀢𑀢𑁆𑀢𑀸’’𑀢𑀺. 𑀚𑁂𑀕𑀼𑀘𑁆𑀙𑀺 𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀙𑀯𑀲𑀭𑀻𑀭𑀲𑁆𑀲𑀸’’𑀢𑀺 𑀮𑀸𑀫𑀓𑀲𑀭𑀻𑀭𑀲𑁆𑀲. ‘‘𑀢𑀤𑁂𑀯𑀸’’𑀢𑀺 𑀙𑀯𑀲𑀭𑀻𑀭𑀫𑁂𑀯. 𑀯𑀺𑀧𑀼𑀩𑁆𑀩𑀓𑀁 𑀯𑀺𑀘𑁆𑀙𑀺𑀦𑁆𑀦𑀓𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀯𑀺𑀲𑁂𑀲𑁂𑀦 𑀦𑀻𑀮𑀦𑁆𑀢𑀺𑀯𑀺𑀦𑀻𑀮𑀁. 𑀢𑀫𑁂𑀯 𑀓𑀼𑀘𑁆𑀙𑀺𑀢𑀢𑁆𑀢𑀸 𑀯𑀺𑀦𑀻𑀮𑀓𑀁. ‘‘𑀢𑀤𑁂𑀯 𑀧𑀼𑀦 𑀧𑀘𑁆𑀘𑀺𑀢𑁆𑀯𑀸’’𑀢𑀺 𑀯𑀺𑀦𑀻𑀮𑀓𑀲𑀭𑀻𑀭𑀫𑁂𑀯 𑀧𑀼𑀦 𑀓𑀸𑀮𑀸𑀢𑀺𑀓𑁆𑀓𑀫𑁂 𑀧𑀘𑁆𑀘𑀺𑀢𑁆𑀯𑀸. 𑀧𑀽𑀢𑀺𑀮𑁄𑀳𑀺𑀢𑀸𑀦𑀁 𑀧𑀭𑀺𑀧𑀓𑁆𑀓𑀪𑀸𑀯𑀁 𑀧𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀢𑀢𑁄 𑀤𑁆𑀯𑀸𑀭𑀘𑁆𑀙𑀺𑀤𑁆𑀤𑀢𑁄. 𑀬𑀼𑀢𑁆𑀢𑀁 𑀢𑀤𑁂𑀯 𑀲𑀭𑀻𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀘𑁆𑀙𑀺𑀦𑁆𑀦𑀓𑀁 𑀦𑀸𑀫, 𑀯𑀺𑀘𑁆𑀙𑀺𑀤𑁆𑀤𑀓𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. ‘‘𑀅𑀧𑀓𑀟𑁆𑀠𑀺𑀢𑁆𑀯𑀸’’𑀢𑀺 𑀔𑀡𑁆𑀟𑀸𑀦𑀺 𑀲𑀭𑀻𑀭𑀢𑁄 𑀫𑁄𑀘𑁂𑀢𑁆𑀯𑀸 𑀢𑀁 𑀢𑀁 𑀧𑀤𑁂𑀲𑀁 𑀓𑀟𑁆𑀠𑀺𑀢𑁆𑀯𑀸. ‘‘𑀧𑀕𑁆𑀖𑀭𑀺𑀢𑀮𑁄𑀳𑀺𑀢 𑀲𑀭𑀻𑀭𑀁’’𑀢𑀺 𑀙𑀺𑀦𑁆𑀦𑀯𑀺𑀤𑁆𑀥𑀝𑁆𑀞𑀸𑀦𑁂𑀲𑀼 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀲𑀭𑀻𑀭𑀁.

‘‘𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑁄 𑀕𑀼𑀡𑁆𑀬𑀽𑀧𑀘𑀸𑀭 𑀯𑀘𑀦𑀁 𑀳𑁄𑀢𑀺. 𑀕𑀼𑀡𑀺𑀦𑁄 𑀤𑀩𑁆𑀩𑀲𑁆𑀲 𑀦𑀸𑀫𑁂𑀦 𑀕𑀼𑀡𑀸𑀦𑀁 𑀕𑀳𑁂𑀢𑀩𑁆𑀩𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀕𑀼𑀡𑀲𑁆𑀲 𑀅𑀦𑀼𑀲𑁆𑀲𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻’’𑀢𑀺. 𑀏𑀲𑀦𑀬𑁄 𑀥𑀫𑁆𑀫𑀸𑀦𑀼𑀲𑁆𑀲𑀢𑀸𑀤𑀻𑀲𑀼. ‘‘𑀅𑀭𑀳𑀢𑀸𑀤𑀻’’𑀢𑀺 𑀅𑀭𑀳𑀢𑀸𑀤𑀺𑀕𑀼𑀡𑁄. 𑀯𑀺𑀕𑀢𑀸𑀦𑀺 𑀤𑀼𑀲𑁆𑀲𑀺𑀮𑁆𑀬𑀸𑀤𑀺 𑀫𑀮𑀸𑀦𑀺 𑀘 𑀫𑀘𑁆𑀙𑁂𑀭𑀜𑁆𑀘 𑀬𑀲𑁆𑀲 𑀢𑀁 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀁. 𑀢𑀲𑁆𑀲 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀢𑁆𑀢𑀦𑀸 𑀅𑀥𑀺𑀕𑀢𑀦𑀺𑀩𑁆𑀩𑀸𑀦𑀜𑁆𑀘𑀸’’𑀢𑀺 𑀏𑀢𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀯𑀽𑀧𑀲𑀫𑁄 𑀯𑀼𑀢𑁆𑀢𑁄. ‘‘𑀬𑀁 𑀆𑀭𑀩𑁆𑀪𑀸’’𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀆𑀭𑀩𑁆𑀪. 𑀳𑀺𑀢𑀽𑀧𑀲𑀁𑀳𑀸𑀭𑁄 𑀦𑀸𑀫 𑀅𑀬𑀁 𑀧𑀼𑀕𑁆𑀕𑀮𑁄 𑀅𑀯𑁂𑀭𑁄 𑀳𑁄𑀢𑀼, 𑀅𑀩𑁆𑀬𑀸𑀧𑀚𑁆𑀚𑁄 𑀳𑁄𑀢𑀽𑀢𑀺𑀆𑀤𑀺𑀦𑀸 𑀅𑀯𑁂𑀭𑀢𑀸𑀤𑀻𑀦𑀺 𑀳𑀺𑀢𑀲𑀼𑀔𑀸𑀦𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘𑀺𑀢𑁆𑀢𑁂𑀦 𑀉𑀧𑀲𑀁𑀳𑀭𑀡𑀁. 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀳𑁂𑀝𑁆𑀞𑀸 𑀘𑁂𑀢𑀲𑀺𑀓𑀲𑀗𑁆𑀕𑀳𑁂 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀳𑀺𑀢𑀽𑀧𑀲𑀁𑀳𑀸𑀭𑁄 𑀘 𑀳𑀺𑀢𑀫𑁄𑀤𑀦𑀸 𑀘 𑀅𑀳𑀺𑀢𑀸𑀧𑀦𑀬𑀦𑀜𑁆𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀢𑀢𑁆𑀣 𑀳𑀺𑀢𑀽𑀧𑀲𑀁𑀳𑀸𑀭𑁄 𑀫𑁂𑀢𑁆𑀢𑀸𑀬 𑀓𑀺𑀘𑁆𑀘𑀁. 𑀳𑀺𑀢𑀫𑁄𑀤𑀦𑀸 𑀫𑀼𑀤𑀺𑀢𑀸𑀬. 𑀅𑀳𑀺𑀢𑀸𑀧𑀦𑀬𑀦𑀁 𑀓𑀭𑀼𑀡𑀸𑀬 𑀓𑀺𑀘𑁆𑀘𑀁. 𑀢𑀢𑁆𑀣 𑀧𑀭𑀁 𑀳𑀺𑀢𑀲𑀼𑀔𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 𑀢𑁂𑀦 𑀧𑀭𑀳𑀺𑀢𑁂𑀦 𑀅𑀢𑁆𑀢𑀦𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀯𑀟𑁆𑀠𑀦𑀁 𑀳𑀺𑀢𑀫𑁄𑀤𑀦𑀸 𑀦𑀸𑀫. 𑀧𑀭𑀁 𑀤𑀼𑀓𑁆𑀔𑀺𑀢𑀁 𑀤𑀺𑀲𑁆𑀯𑀸 𑀅𑀬𑀁 𑀇𑀫𑀫𑁆𑀳𑀸𑀤𑀼𑀓𑁆𑀔𑀸 𑀫𑀼𑀘𑁆𑀘𑀢𑀼, 𑀫𑀸𑀓𑀺𑀮𑀫𑀢𑀽𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀧𑀭𑀲𑁆𑀫𑀺𑀁 𑀅𑀳𑀺𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀧𑀦𑀬𑀦𑀁 𑀅𑀳𑀺𑀢𑀸𑀧𑀦𑀬𑀦𑀁 𑀦𑀸𑀫. ‘‘𑀢𑁂𑀲𑀁’’𑀢𑀺 𑀧𑀭𑀲𑀢𑁆𑀢𑀸𑀦𑀁. 𑀲𑀲𑁆𑀲 𑀅𑀢𑁆𑀢𑀦𑁄 𑀇𑀤𑀦𑁆𑀢𑀺 𑀲𑀓𑀁. ‘‘𑀇𑀤𑀁’’ 𑀲𑀼𑀔𑀤𑀼𑀓𑁆𑀔𑀓𑀸𑀭𑀡𑀁. 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀏𑀯 𑀲𑀓𑀁 𑀬𑁂𑀲𑀁 𑀢𑁂 𑀓𑀫𑁆𑀫𑀲𑁆𑀲𑀓𑀸. 𑀧𑀭𑀲𑀢𑁆𑀢𑀸 𑀏𑀯. 𑀢𑁂𑀲𑀁 𑀪𑀸𑀯𑁄. 𑀢𑀲𑁆𑀲 𑀅𑀦𑀼𑀩𑁆𑀭𑀽𑀳𑀦𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀲𑀻𑀫𑀲𑀫𑁆𑀪𑁂𑀤𑁄’’𑀢𑀺 𑀅𑀢𑁆𑀢𑀸 𑀘 𑀧𑀺𑀬𑀧𑀼𑀕𑁆𑀕𑀮𑁄 𑀘 𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑁄 𑀘 𑀯𑁂𑀭𑀺𑀧𑀼𑀕𑁆𑀕𑀮𑁄 𑀘𑀸𑀢𑀺 𑀘𑀢𑀲𑁆𑀲𑁄 𑀲𑀻𑀫𑀸. 𑀲𑀫𑁆𑀪𑀺𑀦𑁆𑀤𑀦𑀁 𑀲𑀫𑁆𑀪𑁂𑀤𑁄. 𑀲𑀫𑁆𑀫𑀺𑀲𑁆𑀲𑀦𑀁 𑀅𑀦𑀸𑀦𑀢𑁆𑀢𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀫𑀸𑀦𑀁 𑀲𑀫𑁆𑀪𑁂𑀤𑁄 𑀲𑀻𑀫𑀲𑀫𑁆𑀪𑁂𑀤𑁄. 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄, 𑀲𑀩𑁆𑀩𑁂𑀧𑀼𑀭𑀺𑀲𑀸𑀢𑀺𑀆𑀤𑀺𑀦𑀸 𑀑𑀥𑀺𑀲𑁄 𑀧𑀭𑀺𑀘𑁆𑀙𑁂𑀤𑀢𑁄 𑀨𑀭𑀡𑀁 𑀑𑀥𑀺𑀲𑁄𑀨𑀭𑀡𑀁 𑀦𑀸𑀫. 𑀲𑀩𑁆𑀩𑁂𑀲𑀢𑁆𑀢𑀸, 𑀲𑀩𑁆𑀩𑁂𑀧𑀸𑀡𑀸, 𑀲𑀩𑁆𑀩𑁂𑀪𑀽𑀢𑀸𑀢𑀺𑀆𑀤𑀺𑀦𑀸 𑀅𑀦𑁄𑀥𑀺𑀲𑁄 𑀅𑀧𑀭𑀺𑀘𑁆𑀙𑁂𑀤𑀢𑁄 𑀨𑀭𑀡𑀁 𑀅𑀦𑁄𑀥𑀺𑀲𑁄𑀨𑀭𑀡𑀁 𑀦𑀸𑀫. 𑀧𑀼𑀭𑀢𑁆𑀣𑀺𑀫𑀸𑀬𑀤𑀺𑀲𑀸𑀬 𑀲𑀩𑁆𑀩𑁂𑀲𑀢𑁆𑀢𑀸 𑀅𑀯𑁂𑀭𑀸𑀳𑁄𑀦𑁆𑀢𑀽𑀢𑀺𑀆𑀤𑀺𑀦𑀸 𑀤𑀺𑀲𑀸𑀯𑀺𑀪𑀸𑀕𑀯𑀲𑁂𑀦 𑀨𑀭𑀡𑀁 𑀤𑀺𑀲𑀸𑀨𑀭𑀡𑀁 𑀦𑀸𑀫. ‘‘𑀢𑀁 𑀲𑀫𑀗𑁆𑀕𑀻𑀦𑁄 𑀘𑀸’’𑀢𑀺 𑀢𑀸𑀳𑀺 𑀅𑀧𑁆𑀧𑀫𑀜𑁆𑀜𑀸𑀳𑀺 𑀲𑀫𑀗𑁆𑀕𑀻𑀦𑁄 𑀧𑀼𑀕𑁆𑀕𑀮𑀸. ‘‘𑀦𑀺𑀘𑁆𑀘𑀁 𑀲𑁄𑀫𑁆𑀫𑀳𑀤𑀬𑀪𑀸𑀯𑁂𑀦𑀸’’𑀢𑀺 𑀲𑀩𑁆𑀩𑀓𑀸𑀮𑀁 𑀲𑀦𑁆𑀢𑀲𑀻𑀢𑀮 𑀳𑀤𑀬𑀪𑀸𑀯𑁂𑀦. 𑀩𑁆𑀭𑀳𑁆𑀫𑀲𑀤𑁆𑀤𑁄 𑀯𑀸 𑀲𑁂𑀝𑁆𑀞𑀧𑀭𑀺𑀬𑀸𑀬𑁄 ‘𑀩𑁆𑀭𑀳𑁆𑀫𑀁 𑀧𑀼𑀜𑁆𑀜𑀁 𑀧𑀲𑀯𑀢𑀻’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀲𑀺𑀢𑀩𑁆𑀩𑀁 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀲𑀺𑀢𑀁. 𑀧𑀜𑁆𑀘𑀪𑁄𑀚𑀦𑀁. 𑀧𑀸𑀢𑀩𑁆𑀩𑀦𑁆𑀢𑀺 𑀧𑀻𑀢𑀁. 𑀅𑀝𑁆𑀞𑀯𑀺𑀥𑀁 𑀧𑀸𑀦𑀁. 𑀤𑀦𑁆𑀢𑁂𑀦 𑀔𑀸𑀬𑀺𑀢𑀩𑁆𑀩𑀁 𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀔𑀸𑀬𑀺𑀢𑀁. 𑀧𑀽𑀯𑀓𑁆𑀔𑀚𑁆𑀚𑀨𑀮𑀓𑁆𑀔𑀚𑁆𑀚𑀸𑀤𑀺𑀓𑀁 𑀦𑀸𑀦𑀸𑀔𑀸𑀤𑀦𑀻𑀬𑀁. 𑀅𑀗𑁆𑀕𑀼𑀮𑀻𑀳𑀺𑀧𑀺 𑀕𑀳𑁂𑀢𑁆𑀯𑀸 𑀲𑀸𑀬𑀺𑀢𑀩𑁆𑀩𑀁 𑀮𑁂𑀳𑀺𑀢𑀩𑁆𑀩𑀦𑁆𑀢𑀺 𑀲𑀸𑀬𑀺𑀢𑀁. 𑀫𑀥𑀼𑀧𑁆𑀨𑀸𑀡𑀺𑀢𑀸𑀤𑀺𑀓𑀁 𑀲𑀸𑀬𑀦𑀻𑀬𑀁. 𑀲𑀭𑀲𑀧𑁆𑀧𑀝𑀺𑀓𑀽𑀮𑀢𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀪𑀸𑀯𑀢𑁄 𑀧𑀝𑀺𑀓𑀽𑀮𑀢𑀸. 𑀘𑀢𑀼𑀩𑁆𑀩𑀺𑀥𑁄𑀧𑀺 𑀳𑀺 𑀆𑀳𑀸𑀭𑁄 𑀪𑀸𑀚𑀦𑁂𑀲𑀼 𑀯𑀸 𑀳𑀢𑁆𑀣𑀫𑀼𑀔𑀸𑀤𑀻𑀲𑀼 𑀯𑀸 𑀬𑀢𑁆𑀣 𑀬𑀢𑁆𑀣 𑀲𑀫𑁆𑀫𑀓𑁆𑀔𑁂𑀢𑀺, 𑀮𑀕𑁆𑀕𑀢𑀺, 𑀮𑀺𑀫𑁆𑀧𑀢𑀺. 𑀢𑀁 𑀉𑀤𑀓𑁂𑀦 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺. 𑀅𑀥𑁄𑀢𑀁 𑀧𑀦 𑀢𑀫𑁆𑀧𑀺 𑀚𑁂𑀕𑀼𑀘𑁆𑀙𑀦𑀻𑀬𑀁 𑀳𑁄𑀢𑀺. 𑀆𑀲𑀬𑀢𑁄 𑀧𑀝𑀺𑀓𑀽𑀮𑀢𑀸 𑀦𑀸𑀫 𑀢𑀲𑁆𑀲 𑀅𑀚𑁆𑀛𑁄𑀳𑀭𑀻𑀬𑀫𑀸𑀦𑀲𑁆𑀲 𑀓𑀡𑁆𑀞𑀸𑀤𑀻𑀲𑀼 𑀞𑀺𑀢𑁂𑀳𑀺 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀆𑀲𑀬𑁂𑀳𑀺 𑀲𑀫𑁆𑀫𑀺𑀲𑁆𑀲𑀦𑀯𑀲𑁂𑀦 𑀧𑀝𑀺𑀓𑀽𑀮𑀢𑀸. 𑀦𑀺𑀥𑀸𑀦𑀢𑁄 𑀧𑀝𑀺𑀓𑀽𑀮𑀢𑀸 𑀦𑀸𑀫 𑀦𑀺𑀥𑀸𑀦𑀢𑁄 𑀧𑀝𑀺𑀓𑀽𑀮𑀢𑀸. ‘‘𑀦𑀺𑀥𑀸𑀦𑀁’’𑀢𑀺 𑀘 𑀆𑀫𑀸𑀲𑀬𑁄 𑀯𑀼𑀘𑁆𑀘𑀢𑀺. 𑀧𑀓𑁆𑀓𑀢𑁄 𑀧𑀝𑀺𑀓𑀽𑀮𑀢𑀸 𑀦𑀸𑀫 𑀢𑀲𑁆𑀲 𑀦𑀺𑀥𑀸𑀦𑀕𑀢𑀲𑁆𑀲 𑀧𑀭𑀺𑀧𑀓𑁆𑀓𑀓𑀸𑀮𑁂 𑀕𑀽𑀣𑀫𑀼𑀢𑁆𑀢𑀸𑀤𑀺𑀪𑀸𑀯𑀧𑀢𑁆𑀢𑀺𑀢𑁄 𑀧𑀝𑀺𑀓𑀽𑀮𑀢𑀸. 𑀅𑀧𑀓𑁆𑀓𑀢𑁄 𑀧𑀝𑀺𑀓𑀽𑀮𑀢𑀸 𑀦𑀸𑀫 𑀢𑀲𑁆𑀫𑀺𑀁 𑀅𑀧𑀭𑀺𑀧𑀓𑁆𑀓𑁂 𑀅𑀚𑀺𑀡𑁆𑀡𑁂 𑀲𑀢𑀺 𑀲𑀭𑀻𑀭𑁂 𑀦𑀸𑀦𑀸𑀭𑁄𑀕𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀝𑀺𑀓𑀽𑀮𑀢𑀸. 𑀨𑀮𑀢𑁄 𑀧𑀝𑀺𑀓𑀽𑀮𑀢𑀸 𑀦𑀸𑀫 𑀢𑀲𑁆𑀲 𑀧𑀭𑀺𑀧𑀓𑁆𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀭𑀻𑀭𑁂 𑀓𑁂𑀲𑀮𑁄𑀫𑀸𑀤𑀻𑀦𑀁 𑀧𑀝𑀺𑀓𑀽𑀮𑀭𑀸𑀲𑀻𑀦𑀁 𑀯𑀟𑁆𑀠𑀦𑀯𑀲𑁂𑀦 𑀧𑀝𑀺𑀓𑀽𑀮𑀢𑀸. 𑀦𑀺𑀲𑁆𑀲𑀦𑁆𑀤𑀢𑁄 𑀧𑀝𑀺𑀓𑀽𑀮𑀢𑀸 𑀦𑀸𑀫 𑀢𑀲𑁆𑀲 𑀦 𑀯𑀳𑀺𑀤𑁆𑀯𑀸𑀭𑁂𑀳𑀺 𑀯𑀸 𑀮𑁄𑀫𑀓𑀽𑀧𑁂𑀳𑀺𑀯𑀸 𑀅𑀜𑁆𑀜𑁂𑀳𑀺 𑀦𑀸𑀦𑀸𑀯𑀡𑀫𑀼𑀔𑁂𑀳𑀺 𑀯𑀸 𑀉𑀕𑁆𑀖𑀭𑀡 𑀧𑀕𑁆𑀖𑀭𑀡𑀸𑀤𑀺𑀯𑀲𑁂𑀦 𑀧𑀝𑀺𑀓𑀽𑀮𑀢𑀸. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀘𑀢𑀼𑀩𑁆𑀩𑀺𑀥𑁂 𑀆𑀳𑀸𑀭𑁂. ‘‘𑀦𑀺𑀓𑀦𑁆𑀢𑀺𑀧𑁆𑀧𑀳𑀸𑀦𑀲𑀜𑁆𑀜𑀸’’𑀢𑀺 𑀓𑀦𑁆𑀢𑀸𑀭𑀫𑀕𑁆𑀕𑁂 𑀫𑀸𑀢𑀸𑀧𑀺𑀢𑀽𑀦𑀁 𑀓𑀦𑁆𑀢𑀸𑀭𑀦𑀺𑀢𑁆𑀢𑀭𑀡𑀢𑁆𑀣𑀸𑀬 𑀧𑀼𑀢𑁆𑀢 𑀫𑀁𑀲𑀔𑀸𑀤𑀦𑁂 𑀯𑀺𑀬 𑀅𑀢𑀺 𑀫𑀦𑀼𑀜𑁆𑀜𑁂𑀧𑀺 𑀆𑀳𑀸𑀭𑁂 𑀭𑀲𑀢𑀡𑁆𑀳𑀸 𑀧𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀜𑁆𑀜𑀸. ‘‘𑀲𑀮𑀓𑁆𑀔𑀡𑀸𑀤𑀺𑀯𑀲𑁂𑀦𑀸’’𑀢𑀺 𑀲𑀮𑀓𑁆𑀔𑀡𑀲𑀲𑀫𑁆𑀪𑀸𑀭𑀸𑀤𑀺𑀯𑀲𑁂𑀦. ‘‘𑀭𑀸𑀕𑁂𑀦 𑀘𑀭𑀢𑀻’’𑀢𑀺 𑀏𑀢𑁆𑀣 ‘‘𑀭𑀸𑀕𑁂𑀦𑀸’’𑀢𑀺 𑀓𑀭𑀡𑀢𑁆𑀣𑁂, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂𑀯𑀸 𑀓𑀭𑀡 𑀯𑀘𑀦𑀁. 𑀢𑀢𑁆𑀣 𑀓𑀭𑀡𑀢𑁆𑀣𑁂𑀢𑀸𑀯 ‘‘𑀭𑀸𑀕𑁂𑀦 𑀘𑀭𑀢𑀻’’𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀬𑁂𑀪𑀽𑀬𑁆𑀬𑁂𑀦 𑀭𑀸𑀕𑀘𑀺𑀢𑁆𑀢𑁂𑀦 𑀘𑀭𑀢𑀺. 𑀭𑀸𑀕𑀘𑀺𑀢𑁆𑀢𑁂𑀦 𑀦𑀺𑀬𑁆𑀬𑀫𑀸𑀦𑁄 𑀯𑀺𑀘𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑁆𑀣𑀫𑁆𑀪𑀽𑀢 𑀮𑀓𑁆𑀔𑀡𑁂 𑀧𑀦 ‘‘𑀭𑀸𑀕𑁂𑀦 𑀘𑀭𑀢𑀻’’𑀢𑀺 𑀢𑁂𑀲𑀼 𑀭𑀸𑀕𑀓𑁂𑀢𑀼 𑀭𑀸𑀕𑀥𑀚𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀲𑁆𑀲𑀸’’𑀢𑀺 𑀢𑀲𑁆𑀲𑀧𑀼𑀕𑁆𑀕𑀮𑀲𑁆𑀲. ‘‘𑀉𑀲𑁆𑀲𑀦𑁆𑀦𑁄’’𑀢𑀺 𑀉𑀕𑁆𑀕𑀢𑁄 𑀧𑀸𑀓𑀝𑀢𑀭𑁄. 𑀩𑀳𑀼𑀢𑀭𑁄𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀧𑀳𑀸𑀦𑀸𑀬𑀸’’𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑀺 𑀅𑀢𑁆𑀣𑁄. 𑀢𑁂𑀦 𑀓𑀭𑀼𑀡𑀸 𑀪𑀸𑀯𑁂𑀢𑀩𑁆𑀩𑀸 𑀯𑀺𑀳𑀺𑀁𑀲𑀸𑀬 𑀧𑀳𑀸𑀦𑀸𑀬. 𑀫𑀼𑀤𑀺𑀢𑀸 𑀪𑀸𑀯𑁂𑀢𑀩𑁆𑀩𑀸 𑀅𑀭𑀢𑀺𑀬𑀸 𑀧𑀳𑀸𑀦𑀸𑀬𑀸𑀢𑀺 𑀇𑀫𑀁 𑀧𑀸𑀴𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀦𑀺𑀲𑁆𑀲𑀭𑀡𑀢𑀸𑀯𑀘𑀦𑀢𑁄’’𑀢𑀺 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁 𑀩𑁆𑀬𑀸𑀧𑀸𑀤𑀲𑁆𑀲 𑀬𑀤𑀺𑀤𑀁 𑀫𑁂𑀢𑁆𑀢𑀸𑀘𑁂𑀢𑁄 𑀯𑀺𑀫𑀼𑀢𑁆𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁 𑀯𑀺𑀳𑁂𑀲𑀸𑀬𑀬𑀤𑀺𑀤𑀁 𑀓𑀭𑀼𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁 𑀅𑀭𑀢𑀺𑀬𑀸 𑀬𑀤𑀺𑀤𑀁 𑀫𑀼𑀤𑀺𑀢𑀸 𑀘𑁂𑀢𑁄 𑀯𑀺𑀫𑀼𑀢𑁆𑀢𑀻𑀢𑀺 𑀏𑀯𑀁 𑀦𑀺𑀲𑁆𑀲𑀭𑀡 𑀪𑀸𑀯𑀯𑀘𑀦𑀢𑁄 𑀘. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀮. 𑀤𑁄𑀲 𑀘𑀭𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁. ‘‘𑀤𑁄𑀲 𑀯𑀢𑁆𑀣𑀼𑀢𑁆𑀢𑀸𑀪𑀸𑀯𑀢𑁄 𑀘𑀸’’𑀢𑀺 𑀤𑁄𑀲𑀼𑀧𑁆𑀧𑀢𑁆𑀢𑀺𑀬𑀸 𑀯𑀢𑁆𑀣𑀼 𑀪𑀸𑀯𑀲𑁆𑀲𑀓𑀭𑀡 𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀘. 𑀦𑀻𑀮𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀲𑀺𑀡𑀸𑀦𑀺 𑀤𑁄𑀲 𑀘𑀭𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀧𑀦𑁂𑀢𑁆𑀣 𑀤𑁄𑀲 𑀘𑀭𑀺𑀢𑀲𑁆𑀲 𑀉𑀧𑁂𑀓𑁆𑀔𑀸 𑀲𑀧𑁆𑀧𑀸𑀬𑀓𑀸𑀭𑀡𑀁 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀦𑁆𑀢𑀺. 𑀅𑀜𑁆𑀜𑀓𑀸𑀭𑀡𑀢𑁆𑀢𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀺𑀲𑁆𑀲𑁄’’𑀢𑀺 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. ‘‘𑀫𑀦𑀸𑀧𑀺𑀬𑀭𑀽𑀧𑀸𑀦𑀻’’𑀢𑀺 𑀫𑀦𑀸𑀧𑀺𑀬𑀯𑀡𑁆𑀡𑀸𑀦𑀺. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀘 𑀳𑁄𑀢𑀻𑀢𑀺 𑀅𑀥𑀺𑀓𑀸𑀭𑁄. ‘‘𑀢𑀲𑁆𑀲𑀸’’𑀢𑀺 𑀧𑀫𑀸𑀤 𑀩𑀳𑀼𑀮𑀲𑁆𑀲 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲. 𑀯𑀼𑀢𑁆𑀢𑀁 𑀲𑀺𑀬𑀸. 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑁂 𑀧𑀦 𑀏𑀯𑀁 𑀯𑀼𑀢𑁆𑀢𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀩𑀼𑀤𑁆𑀥𑀺𑀯𑀺𑀲𑀬 𑀪𑀸𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀩𑀼𑀤𑁆𑀥𑀺𑀯𑀺𑀲𑀬𑀢𑁆𑀢𑀸 𑀫𑁄𑀳𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁. 𑀩𑀼𑀤𑁆𑀥𑀺𑀯𑀺𑀲𑀬𑀪𑀽𑀢𑀸𑀦𑀺 𑀫𑀭𑀡 𑀉𑀧𑀲𑀫𑀲𑀜𑁆𑀜𑀸 𑀯𑀯𑀢𑁆𑀣𑀸𑀦𑀸𑀦𑀺𑀧𑀺 𑀫𑁄𑀳𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀸𑀦𑀺 𑀲𑀺𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀜𑁆𑀳𑀺𑀲𑀢𑀻’’𑀢𑀺𑀆𑀤𑀺𑀁. ‘‘𑀪𑀽𑀢𑀓𑀲𑀺𑀡𑀸𑀦𑀻’’𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺 𑀫𑀳𑀸𑀪𑀽𑀢𑀓𑀲𑀺𑀡𑀸𑀦𑀺. ‘‘𑀢𑀢𑁆𑀣𑀸𑀧𑀻’’𑀢𑀺 𑀯𑀸 𑀢𑁂𑀲𑀼 𑀘𑀢𑁆𑀢𑀸𑀮𑀻𑀲 𑀓𑀫𑁆𑀫𑀝𑁆𑀞𑀸𑀦𑁂𑀲𑀼𑀧𑀺. 𑀏𑀯𑀁𑀲𑀢𑀺 𑀯𑀡𑁆𑀡𑀓𑀲𑀺𑀡𑀸𑀦𑀁 𑀧𑀼𑀣𑀼𑀮𑀔𑀼𑀤𑁆𑀤𑀓𑀢𑀸𑀧𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀸 𑀳𑁄𑀢𑀻𑀢𑀺. ‘‘𑀫𑀳𑀦𑁆𑀢𑀁’’𑀢𑀺 𑀯𑀺𑀤𑀢𑁆𑀣𑀺 𑀘𑀢𑀼𑀭𑀗𑁆𑀕𑀼𑀮𑀢𑁄 𑀫𑀳𑀦𑁆𑀢𑀁. 𑀬𑀤𑀺 𑀏𑀯𑀲𑀤𑁆𑀤𑁄 𑀬𑀣𑀸𑀭𑀼𑀢𑀫𑁂𑀯 𑀬𑀼𑀚𑁆𑀚𑁂𑀬𑁆𑀬. 𑀏𑀯𑀁𑀲𑀢𑀺 𑀔𑀼𑀤𑁆𑀤𑀓𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲𑁂𑀯 𑀲𑀧𑁆𑀧𑀸𑀬𑀁, 𑀦 𑀩𑀼𑀤𑁆𑀥𑀺𑀘𑀭𑀺𑀢𑀸𑀤𑀻𑀦𑀦𑁆𑀢𑀺 𑀏𑀯𑀫𑀢𑁆𑀣𑁄𑀧𑀺 𑀕𑀡𑁆𑀳𑁂𑀬𑁆𑀬. 𑀅𑀣 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀧𑀦 𑀅𑀲𑀧𑁆𑀧𑀸𑀬𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀔𑀼𑀤𑁆𑀤𑀓𑀦𑁆𑀢𑀺 𑀧𑀤𑁂𑀬𑀼𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣𑀯𑀸, 𑀧𑀼𑀣𑀼𑀮𑀁 𑀫𑁄𑀳𑀘𑀭𑀺𑀢𑀲𑁆𑀲, 𑀔𑀼𑀤𑁆𑀤𑀓𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲𑁂𑀯, 𑀦𑀫𑁄𑀳𑀘𑀭𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁂 𑀲𑀢𑀺, 𑀩𑀼𑀤𑁆𑀥𑀺𑀘𑀭𑀺𑀢𑀸𑀤𑀻𑀦𑀁 𑀧𑀦 𑀧𑀼𑀣𑀼𑀮𑀁𑀧𑀺 𑀔𑀼𑀤𑁆𑀤𑀓𑀁𑀧𑀺 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀩𑁆𑀩𑀜𑁆𑀘𑁂𑀢𑀁’’𑀢𑀺 𑀲𑀩𑁆𑀩𑀜𑁆𑀘 𑀏𑀢𑀁𑀘𑀭𑀺𑀢𑀯𑀺𑀪𑀸𑀕𑀯𑀘𑀦𑀁. 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦 𑀢𑀻𑀲𑀼 𑀅𑀓𑀼𑀲𑀮 𑀘𑀭𑀺𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀯𑀺𑀢𑀓𑁆𑀓 𑀘𑀭𑀺𑀢𑁂 𑀘 𑀅𑀢𑀺𑀲𑀧𑁆𑀧𑀸𑀬𑀢𑀸𑀬 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘𑀭𑀺𑀢𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀭𑀸𑀕𑀸𑀤𑀻𑀦𑀁 𑀧𑀦 𑀅𑀯𑀺𑀓𑁆𑀔𑀫𑁆𑀪𑀺𑀓𑀸’’𑀢𑀺𑀆𑀤𑀺𑀁.

‘‘𑀩𑀼𑀤𑁆𑀥𑀥𑀫𑁆𑀫. 𑀮. 𑀕𑀼𑀡𑀸𑀦𑀁’’𑀢𑀺 𑀏𑀢𑁆𑀣 𑀕𑀼𑀡𑀲𑀤𑁆𑀤𑁄 𑀧𑀼𑀩𑁆𑀩𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑁄 𑀩𑀼𑀤𑁆𑀥𑀕𑀼𑀡𑀸𑀦𑀜𑁆𑀘 𑀥𑀫𑁆𑀫𑀕𑀼𑀡𑀸𑀦𑀜𑁆𑀘𑀸𑀢𑀺𑀆𑀤𑀺𑀦𑀸. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀕𑀼𑀡𑀧𑀤𑁂. 𑀦 𑀢𑀧𑁆𑀧𑁂𑀢𑀻𑀢𑀺 𑀅𑀢𑀧𑁆𑀧𑀦𑀻𑀬𑁄. 𑀢𑀧𑁆𑀧𑀦𑀁 𑀲𑀦𑁆𑀢𑀼𑀝𑁆𑀞𑀺𑀁 𑀦 𑀚𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀁𑀯𑁂𑀚𑀦𑀁 𑀲𑀁𑀯𑁂𑀕𑀁 𑀚𑀦𑁂𑀢𑀻𑀢𑀺 𑀲𑀁𑀯𑁂𑀚𑀦𑀺𑀬𑁄. ‘‘𑀥𑀫𑁆𑀫𑁄’’𑀢𑀺 𑀲𑀪𑀸𑀯𑁄. 𑀲𑀁𑀯𑁂𑀚𑀦𑀺𑀬𑁄 𑀥𑀫𑁆𑀫𑁄 𑀬𑀲𑁆𑀲𑀸𑀢𑀺 𑀲𑀁𑀯𑁂𑀚𑀦𑀺𑀬 𑀥𑀫𑁆𑀫𑀁. 𑀫𑀭𑀡𑀁. ‘‘𑀧𑀜𑁆𑀘𑀫𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀲𑀸’’𑀢𑀺 𑀭𑀽𑀧𑀸𑀯𑀘𑀭 𑀧𑀜𑁆𑀘𑀫𑀚𑁆𑀛𑀸𑀦 𑀲𑀫𑀸𑀥𑀺𑀲𑁆𑀲. ‘‘𑀉𑀤𑀬𑀫𑀢𑁆𑀢𑀸𑀦𑀻’’𑀢𑀺 𑀯𑀟𑁆𑀠𑀺𑀢𑀫𑀢𑁆𑀢𑀸𑀦𑀺. ‘‘𑀢𑀢𑁆𑀣𑀸’’𑀢𑀺 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑁂𑀲𑀼. ‘‘𑀧𑀼𑀩𑁆𑀩𑀘𑁆𑀙𑀝𑁆𑀝𑀓𑀲𑁆𑀲𑀸’’𑀢𑀺 𑀧𑀼𑀭𑀸𑀡𑀘𑁆𑀙𑀝𑁆𑀝𑀓𑀲𑁆𑀲. 𑀕𑀽𑀣𑀫𑀼𑀢𑁆𑀢𑀯𑀺𑀲𑁆𑀲𑀚𑁆𑀚𑀦 𑀓𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀕𑀽𑀣𑀭𑀸𑀲𑀺 𑀤𑀲𑁆𑀲𑀦𑁂 𑀯𑀺𑀬𑀸’’𑀢𑀺. 𑀦 𑀢𑁂 𑀓𑀤𑀸𑀘𑀺 𑀲𑁄𑀫𑀦𑀲𑁆𑀲𑁂𑀦 𑀯𑀺𑀦𑀸 𑀅𑀧𑁆𑀧𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸 𑀅𑀭𑀢𑀻𑀦𑀁 𑀤𑀽𑀭𑀺𑀪𑀸𑀯𑁂𑀦 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀅𑀢𑀺𑀲𑀼𑀓𑀭𑀢𑁆𑀢𑀸 𑀧𑀜𑁆𑀘𑀫𑀚𑁆𑀛𑀸𑀦𑁂 𑀯𑀺𑀬 𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀜𑁆𑀘 𑀅𑀯𑀺𑀓𑁆𑀔𑀫𑁆𑀪𑀦𑀢𑁄. ‘‘𑀉𑀤𑀸𑀲𑀺𑀦𑀧𑀓𑁆𑀔𑁂’’𑀢𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀧𑀓𑁆𑀔𑁂. ‘‘𑀤𑀴𑁆𑀳𑀁’’𑀢𑀺 𑀪𑀼𑀲𑀁. ‘‘𑀯𑀺𑀪𑀽𑀢𑀁’’𑀢𑀺 𑀧𑀸𑀓𑀝𑀁. 𑀦𑀺𑀫𑀺𑀢𑁆𑀢𑀁 𑀤𑀴𑁆𑀳𑀯𑀺𑀪𑀽𑀢𑀁 𑀓𑀢𑁆𑀯𑀸 𑀕𑀳𑀡𑀁 𑀤𑀴𑁆𑀳 𑀯𑀺𑀪𑀽𑀢𑀕𑁆𑀕𑀳𑀡𑀁. ‘‘𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀲𑁆𑀲𑀸’’𑀢𑀺 𑀩𑀼𑀤𑁆𑀥𑀕𑀼𑀡𑀸𑀤𑀺 𑀆𑀭𑀫𑁆𑀫𑀡𑀲𑁆𑀲. ‘‘𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁’’𑀢𑀺 𑀏𑀢𑁆𑀣 𑀧𑀝𑀺𑀪𑀸𑀕𑀲𑀤𑁆𑀤𑁄 𑀢𑀲𑁆𑀲 𑀤𑀺𑀲𑁂 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀢𑀸𑀤𑀺𑀲𑁂’’𑀢𑀺𑀆𑀤𑀺𑀁. ‘‘𑀢𑀁𑀲𑀡𑁆𑀞𑀸𑀦𑁂’’𑀢𑀺 𑀏𑀢𑁂𑀦 𑀧𑀣𑀯𑀺𑀫𑀡𑁆𑀟𑀮𑀸𑀤𑀻𑀲𑀼 𑀯𑀺𑀬 𑀲𑀡𑁆𑀞𑀸𑀦𑀸𑀓𑀸𑀭𑁂𑀦 𑀞𑀺𑀢𑁂𑀲𑀼 𑀲𑀪𑀸𑀯 𑀥𑀫𑁆𑀫 𑀧𑀼𑀜𑁆𑀚𑁂𑀲𑀼 𑀏𑀯 𑀢𑀲𑁆𑀲𑀤𑀺𑀲𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀦𑀸𑀫 𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀯’’𑀦𑁆𑀢𑀺 𑀲𑀫𑀣𑀲𑀗𑁆𑀕𑀳𑁂 𑀢𑀸𑀯 𑀤𑀲𑀓𑀲𑀺𑀡𑀸𑀦𑀺, 𑀤𑀲𑀅𑀲𑀼𑀪𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀯𑀘𑀦𑀓𑁆𑀓𑀫𑁂𑀦. ‘‘𑀉𑀕𑁆𑀕𑀳𑀓𑁄𑀲𑀮𑁆𑀮𑀁’’𑀢𑀺 𑀪𑀸𑀯𑀦𑀸𑀓𑀫𑁆𑀫𑀁 𑀆𑀭𑀪𑀺𑀢𑀼𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀩𑁆𑀩𑀲𑁆𑀲 𑀓𑀫𑁆𑀫𑀝𑁆𑀞𑀸𑀦 𑀯𑀺𑀥𑀸𑀦𑀲𑁆𑀲 𑀉𑀕𑁆𑀕𑀳𑀡𑀁 𑀉𑀕𑁆𑀕𑀳𑁄. 𑀢𑀲𑁆𑀫𑀺𑀁 𑀓𑁄𑀲𑀮𑁆𑀮𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁. 𑀅𑀧𑀺𑀘𑁂𑀢𑁆𑀣. 𑀲𑀩𑁆𑀩𑀁 𑀉𑀕𑁆𑀕𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀬𑀁 𑀅𑀢𑁆𑀢𑀦𑀸 𑀆𑀭𑀪𑀺𑀲𑁆𑀲𑀢𑀺. 𑀢𑀲𑁆𑀲 𑀏𑀓𑀲𑁆𑀲 𑀯𑀺𑀥𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. ‘‘𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀉𑀓𑀸𑀭𑁄 𑀉𑀧𑀭𑀺 𑀅𑀢𑁆𑀣𑁄. ‘‘𑀕𑀳𑀡𑀁’’𑀢𑀺 𑀘 𑀬𑀣𑀸 𑀘𑀺𑀢𑁆𑀢𑁂 𑀅𑀯𑀺𑀦𑀲𑁆𑀲𑀫𑀸𑀦𑀁 𑀳𑀼𑀢𑁆𑀯𑀸 𑀮𑀩𑁆𑀪𑀢𑀺, 𑀢𑀣𑀸 𑀓𑀢𑁆𑀯𑀸 𑀘𑀺𑀢𑁆𑀢𑁂𑀦 𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀭𑀽𑀧𑀭𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲𑀸’’𑀢𑀺 𑀲𑀫𑁆𑀫𑀸 𑀧𑀼𑀦𑀧𑁆𑀧𑀼𑀦𑀁 𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀲𑀤𑀺𑀲𑀁 𑀓𑀭𑁄𑀦𑁆𑀢𑀲𑁆𑀲. 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀓𑀭𑀡𑀁 𑀧𑀭𑀺𑀓𑀫𑁆𑀫𑀁. 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀓𑀫𑁆𑀫𑁂 𑀬𑀁 𑀬𑀁 𑀓𑀢𑁆𑀢𑀩𑁆𑀩𑀯𑀺𑀥𑀸𑀦𑀁 𑀅𑀢𑁆𑀣𑀺, 𑀢𑀁 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀕𑀳𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀯𑀦𑀸𑀢𑀺 𑀯𑀟𑁆𑀠𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺𑀆𑀤𑀺𑀫𑀸𑀳. ‘‘𑀦𑀺𑀭𑀦𑁆𑀢𑀭𑀁 𑀧𑀤𑀳𑀦𑁆𑀢𑀲𑁆𑀲𑀸’’𑀢𑀺 𑀭𑀢𑁆𑀢𑀺𑀤𑀺𑀯𑀁 𑀦𑀺𑀭𑀦𑁆𑀢𑀭𑀁 𑀆𑀭𑀪𑀦𑁆𑀢𑀲𑁆𑀲. 𑀉𑀕𑁆𑀕𑀳 𑀦𑀺𑀫𑀺𑀢𑁆𑀢𑁂 𑀲𑀡𑁆𑀞𑀸𑀦𑀁 𑀕𑀡𑁆𑀳𑀦𑁆𑀢𑁄𑀧𑀺 𑀯𑀡𑁆𑀡𑀭𑀽𑀧𑀸𑀤𑀺𑀦𑀸 𑀲𑀪𑀸𑀯 𑀥𑀫𑁆𑀫𑁂𑀦 𑀲𑀳𑁂𑀯 𑀕𑀡𑁆𑀳𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀧𑀦 𑀲𑀪𑀸𑀯𑀥𑀫𑁆𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀲𑁆𑀲 𑀤𑀺𑀲𑀁 𑀦𑀺𑀫𑀺𑀢𑁆𑀢 𑀧𑀜𑁆𑀜𑀢𑁆𑀢𑀺 𑀲𑀗𑁆𑀔𑀸𑀢𑀁 𑀲𑀼𑀤𑁆𑀥𑀲𑀡𑁆𑀞𑀸𑀦𑀫𑁂𑀯 𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀲𑀺𑀬𑀸, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂𑀧𑀺 𑀯𑀡𑁆𑀡𑁄 𑀦𑀸𑀫 𑀲𑀦𑁆𑀤𑀺𑀲𑁆𑀲𑀢𑀺 𑀬𑁂𑀯𑀸𑀢𑀺. 𑀲𑀘𑁆𑀘𑀁. 𑀲𑁄 𑀧𑀦 𑀧𑀝𑀺𑀪𑀸𑀕𑀫𑀢𑁆𑀢𑀁 𑀳𑁄𑀢𑀺. 𑀦 𑀏𑀓𑀦𑁆𑀢𑀯𑀡𑁆𑀡𑁄. 𑀢𑁂𑀦𑀸𑀳 ‘‘𑀢𑀧𑁆𑀧𑀝𑀺𑀪𑀸𑀕𑀁 𑀯𑀢𑁆𑀣𑀼 𑀥𑀫𑁆𑀫𑀯𑀺𑀫𑀼𑀘𑁆𑀘𑀺𑀢𑀁’’𑀢𑀺. ‘‘𑀲𑀦𑁆𑀦𑀺𑀲𑀺𑀦𑁆𑀦𑀁’’𑀢𑀺 𑀅𑀘𑀮𑀁. ‘‘𑀧𑀯𑁂𑀲𑀺𑀢𑀁’’𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀑𑀪𑀸𑀲𑀢𑀻𑀢𑀺 𑀑𑀪𑀸𑀲𑁄. 𑀑𑀪𑀸𑀲𑁄 𑀳𑀼𑀢𑁆𑀯𑀸 𑀚𑀸𑀢𑀦𑁆𑀢𑀺 𑀑𑀪𑀸𑀲𑀚𑀸𑀢𑀁. 𑀑𑀪𑀸𑀲𑀦𑀁 𑀯𑀸 𑀑𑀪𑀸𑀲𑁄. 𑀚𑀸𑀢𑁄 𑀑𑀪𑀸𑀲𑁄 𑀅𑀲𑁆𑀲𑀸𑀢𑀺 𑀑𑀪𑀸𑀲𑀚𑀸𑀢𑀁. ‘‘𑀧𑀸𑀢𑁂𑀦𑁆𑀢𑀻’’𑀢𑀺 𑀧𑀝𑀺𑀧𑀸𑀢𑁂𑀦𑁆𑀢𑀺. 𑀧𑀼𑀦 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀉𑀝𑁆𑀞𑀸𑀢𑀼𑀁 𑀦 𑀤𑁂𑀦𑁆𑀢𑀺. ‘‘𑀏𑀢𑀸𑀬𑀸’’𑀢𑀺 𑀓𑀢𑁆𑀢𑀼 𑀅𑀢𑁆𑀣𑁂 𑀓𑀭𑀡𑀯𑀘𑀦𑀁. ‘‘𑀦𑀺𑀫𑀺𑀢𑁆𑀢𑀭𑀓𑁆𑀔𑀡𑀯𑀺𑀥𑀸𑀦𑀁’’𑀢𑀺 𑀲𑀫𑀼𑀧𑁆𑀧𑀦𑁆𑀦𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀲𑁆𑀲𑀦𑀢𑁆𑀣𑀸𑀬 𑀲𑀢𑁆𑀢𑀯𑀺𑀥𑁂𑀳𑀺 𑀧𑀮𑀺𑀩𑁄𑀥 𑀥𑀫𑁆𑀫𑁂𑀳𑀺 𑀭𑀓𑁆𑀔𑀡𑀢𑁆𑀣𑀁. 𑀓𑀢𑀫𑁂 𑀧𑀦 𑀢𑁂𑀲𑀢𑁆𑀢𑀯𑀺𑀥𑀸 𑀧𑀮𑀺𑀩𑁄𑀥𑀥𑀫𑁆𑀫𑀸 𑀦𑀸𑀫𑀸𑀢𑀺. 𑀇𑀥 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑁂 𑀏𑀯 𑀢𑁂 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳. ‘‘𑀆𑀯𑀸𑀲𑁄’’𑀢𑀺 𑀅𑀲𑀧𑁆𑀧𑀸𑀬𑀸𑀯𑀸𑀲𑁄. ‘‘𑀕𑁄𑀘𑀭𑁄’’𑀢𑀺 𑀅𑀲𑀧𑁆𑀧𑀸𑀬𑀕𑁄𑀘𑀭𑀕𑀸𑀫𑁄. ‘‘𑀪𑀲𑁆𑀲𑀁’’𑀢𑀺 𑀅𑀲𑀧𑁆𑀧𑀸𑀬𑀯𑀘𑀦𑀁. 𑀏𑀯𑀁 𑀧𑀼𑀕𑁆𑀕𑀮𑀸𑀤𑀻𑀲𑀼. ‘‘𑀲𑁂𑀯𑁂𑀣𑀸’’𑀢𑀺 𑀲𑁂𑀯𑁂𑀬𑁆𑀬. ‘‘𑀏𑀯𑀜𑁆𑀳𑀺𑀧𑀝𑀺𑀧𑀚𑁆𑀚𑀢𑁄’’𑀢𑀺 𑀏𑀯𑀁𑀳𑀺𑀯𑀚𑁆𑀚𑀺𑀢𑀩𑁆𑀩𑁂 𑀯𑀚𑁆𑀚𑀦𑀯𑀲𑁂𑀦 𑀲𑁂𑀯𑀺𑀢𑀩𑁆𑀩𑁂 𑀲𑁂𑀯𑀦𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲. ‘‘𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀓𑀸𑀫𑀪𑀽𑀫𑀺 𑀓𑀸𑀫𑀪𑀯𑀲𑀫𑀢𑀺𑀓𑁆𑀓𑀫𑁄, 𑀭𑀽𑀧𑀪𑀽𑀫𑀺𑀭𑀽𑀧𑀪𑀯 𑀑𑀓𑁆𑀓𑀫𑁄 𑀘 𑀯𑀼𑀢𑁆𑀢𑁄. 𑀯𑀲𑀦𑀁 𑀯𑀲𑀻. 𑀲𑀢𑁆𑀢𑀺. 𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀲𑀺𑀁 𑀪𑀽𑀢𑀁 𑀧𑀢𑁆𑀢𑀦𑁆𑀢𑀺 𑀯𑀲𑀺𑀪𑀽𑀢𑀁. 𑀯𑀲𑀻 𑀏𑀯 𑀯𑀲𑀺𑀢𑀸. 𑀬𑀣𑀸 𑀧𑀸𑀭𑀫𑀺𑀢𑀸𑀢𑀺. ‘‘𑀢𑀢𑁄 𑀯𑀺𑀘𑀸𑀭𑀦𑁆𑀢𑀺’’ 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀢𑀢𑁄 𑀧𑀻𑀢𑀺𑀁𑀢𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀘𑁆𑀙𑀦𑁆𑀢𑀸𑀦𑀁 𑀢𑁂𑀲𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁. ‘‘𑀬𑀢𑁆𑀣𑀸’’𑀢𑀺 𑀬𑁂𑀲𑀼𑀤𑁆𑀯𑀻𑀲𑀼𑀪𑀯𑀗𑁆𑀕𑁂𑀲𑀼. ‘‘𑀪𑀯𑀗𑁆𑀕𑀘𑀸𑀭𑁂’’𑀢𑀺 𑀪𑀯𑀗𑁆𑀕𑀧𑁆𑀧𑀯𑀢𑁆𑀢𑀺𑀬𑀁. ‘‘𑀤𑀦𑁆𑀥𑀸𑀬𑀺𑀢𑀢𑁆𑀢𑀁’’𑀢𑀺 𑀤𑀦𑁆𑀥𑀁 𑀳𑀼𑀢𑁆𑀯𑀸 𑀅𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀤𑀦𑁆𑀥𑀸𑀬𑀺𑀢𑀁. 𑀢𑀲𑁆𑀲 𑀪𑀸𑀯𑁄 𑀤𑀦𑁆𑀥𑀸𑀬𑀺𑀢𑀢𑁆𑀢𑀁. ‘‘𑀞𑀧𑁂𑀢𑀼𑀁’’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁. 𑀢𑀢𑁄 𑀅𑀦𑀢𑀺𑀓𑁆𑀓𑀫𑀺𑀢𑀼𑀁. ‘‘𑀬𑀢𑁆𑀣𑀺𑀘𑁆𑀙𑀓𑀁’’𑀢𑀺𑀆𑀤𑀻𑀦𑀺 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀧𑀤𑀸𑀦𑀺. ‘‘𑀬𑀢𑁆𑀣𑀺𑀘𑁆𑀙𑀓𑀁’’𑀢𑀺 𑀬𑀢𑁆𑀣 𑀬𑀢𑁆𑀣 𑀞𑀸𑀦𑁂 𑀇𑀘𑁆𑀙𑀸𑀦𑀼 𑀭𑀽𑀧𑀁. 𑀬𑀤𑀺𑀘𑁆𑀙𑀓𑀦𑁆𑀢𑀺𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀔𑀡𑁂 𑀇𑀘𑁆𑀙𑀸𑀦𑀼 𑀭𑀽𑀧𑀁. ‘‘𑀬𑀸𑀯𑀢𑀺𑀘𑁆𑀙𑀓𑀁’’𑀢𑀺 𑀬𑀢𑁆𑀢𑀓𑁂𑀦 𑀧𑀫𑀸𑀡𑁂𑀦 𑀇𑀘𑁆𑀙𑀸𑀦𑀼 𑀭𑀽𑀧𑀁. ‘‘𑀯𑀺𑀢𑀓𑁆𑀓𑀸𑀤𑀺𑀓𑀁 𑀑𑀴𑀸𑀭𑀺𑀓𑀗𑁆𑀕𑀁 𑀧𑀳𑀸𑀦𑀸𑀬𑀸’’𑀢𑀺 𑀏𑀢𑁆𑀣 𑀓𑀲𑁆𑀲 𑀩𑀮𑁂𑀦 𑀧𑀳𑀸𑀦𑀁 𑀳𑁄𑀢𑀺. 𑀢𑀁 𑀢𑀁 𑀯𑀺𑀭𑀸𑀕 𑀪𑀸𑀯𑀦𑀸 𑀩𑀮𑁂𑀦 𑀧𑀳𑀸𑀦𑀁 𑀳𑁄𑀢𑀺. 𑀓𑀸𑀘 𑀢𑀁 𑀢𑀁 𑀯𑀺𑀭𑀸𑀕𑀪𑀸𑀯𑀦𑀸 𑀦𑀸𑀫 𑀳𑁄𑀢𑀺. 𑀅𑀚𑁆𑀛𑀸𑀲𑀬 𑀯𑀺𑀲𑁂𑀲 𑀧𑀭𑀺𑀕𑁆𑀕𑀳𑀺𑀢𑀸 𑀉𑀧𑀘𑀸𑀭𑀪𑀸𑀯𑀦𑀸 𑀏𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀣𑀫𑀚𑁆𑀛𑀸𑀦𑀁 𑀢𑀸𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀆𑀢𑀸𑀧𑀯𑀻𑀭𑀺𑀬𑀁’’𑀢𑀺 𑀬𑁂𑀦𑀯𑀻𑀭𑀺𑀬𑁂𑀦 𑀬𑁄𑀕𑀺𑀦𑁄 𑀅𑀢𑁆𑀢𑀸𑀦𑀁 𑀯𑀸 𑀓𑀺𑀮𑁂𑀲 𑀥𑀫𑁆𑀫𑁂 𑀯𑀸 𑀆𑀢𑀸𑀧𑁂𑀦𑁆𑀢𑀺 𑀧𑀭𑀺𑀢𑀸𑀧𑁂𑀦𑁆𑀢𑀺. 𑀢𑀁 𑀆𑀢𑀸𑀧𑀯𑀻𑀭𑀺𑀬𑀁 𑀦𑀸𑀫. 𑀉𑀕𑁆𑀖𑀸𑀝𑀻𑀬𑀫𑀸𑀦𑀫𑁆𑀧𑀺 𑀆𑀓𑀸𑀲𑀫𑁂𑀯 𑀳𑁄𑀢𑀺. 𑀢𑀁 𑀆𑀭𑀩𑁆𑀪 𑀉𑀧𑀭𑀺𑀛𑀸𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀸 𑀪𑀸𑀯𑀦𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀫𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀆𑀭𑀫𑁆𑀫𑀡𑁂 𑀘 𑀅𑀦𑀢𑀺𑀓𑁆𑀓𑀦𑁆𑀢𑁂 𑀛𑀸𑀦𑀁𑀧𑀺 𑀅𑀦𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀻𑀢𑀺. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀆𑀓𑀸𑀲𑀓𑀲𑀺𑀡𑁂. ‘‘𑀢𑀤𑀢𑀺𑀓𑁆𑀓𑀫𑀦𑀲𑀫𑁆𑀪𑀯𑁄’’𑀢𑀺 𑀓𑀲𑀺𑀡 𑀦𑀺𑀫𑀺𑀢𑁆𑀢𑀸𑀢𑀺𑀓𑁆𑀓𑀫𑀦𑀲𑀫𑁆𑀪𑀯𑁄. ‘‘𑀬𑀣𑀸𑀤𑀺𑀝𑁆𑀞𑁂’’𑀢𑀺 𑀛𑀸𑀦𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀧𑁆𑀧𑀓𑀸𑀭𑁂. ‘‘𑀲𑀫𑁆𑀪𑀸𑀯𑁂𑀢𑁆𑀯𑀸’’𑀢𑀺 𑀣𑁄𑀫𑁂𑀢𑁆𑀯𑀸. 𑀲𑀫𑁆𑀫𑀸 𑀅𑀦𑀼𑀲𑁆𑀲𑀭𑀡𑀁 𑀲𑀫𑀦𑀼𑀲𑁆𑀲𑀭𑀡𑀁. ‘‘𑀇𑀢𑀭𑁂𑀲𑀁𑀧𑀺 𑀯𑀸’’𑀢𑀺 𑀧𑀼𑀣𑀼𑀚𑁆𑀚𑀦 𑀧𑀡𑁆𑀟𑀺𑀢𑀸𑀦𑀁𑀧𑀺 𑀯𑀸. 𑀫𑀭𑀡 𑀲𑀜𑁆𑀜𑀸 𑀯𑀯𑀢𑁆𑀣𑀸𑀦𑁂𑀲𑀼 𑀧𑀭𑀺𑀓𑀫𑁆𑀫𑀜𑁆𑀘 𑀲𑀫𑀸𑀥𑀺𑀬𑀢𑀺, 𑀉𑀧𑀘𑀸𑀭𑁄 𑀘 𑀲𑀫𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸 𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀧𑀦 𑀧𑀼𑀣𑀼𑀚𑁆𑀚𑀦𑀸𑀦𑀁𑀧𑀺 𑀲𑀢𑀁 𑀩𑀼𑀤𑁆𑀥𑀕𑀼𑀡𑀸𑀤𑀻𑀲𑀼𑀧𑀺 𑀉𑀧𑀘𑀸𑀭 𑀲𑀫𑁆𑀪𑀯𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. ‘‘𑀲𑀫𑀣𑀚𑁆𑀛𑀸𑀦𑁂𑀲𑀽’’𑀢𑀺 𑀇𑀤𑀁 𑀅𑀥𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁𑀧𑀺 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀩𑁆𑀩𑁂𑀤𑀸𑀦𑀁 𑀤𑀢𑁆𑀯𑀸 𑀇𑀫𑀺𑀦𑀸 𑀧𑀼𑀜𑁆𑀜𑁂𑀦 𑀆𑀬𑀢𑀺𑀁 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀯𑀸 𑀫𑀕𑁆𑀕𑀨𑀮𑀸𑀦𑀺 𑀯𑀸 𑀧𑀝𑀺𑀮𑀪𑀺𑀲𑁆𑀲𑀸𑀫𑀻𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀆𑀕𑀢𑁄𑀧𑀺 𑀓𑀢𑀸𑀥𑀺𑀓𑀸𑀭𑁄 𑀏𑀯𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀢𑀫𑁄 𑀧𑀦 𑀓𑀢𑀸𑀥𑀺𑀓𑀸𑀭𑁄 𑀦𑀸𑀫𑀸𑀢𑀺 𑀆𑀳 ‘‘𑀆𑀲𑀦𑁆𑀦𑀪𑀯𑁂’’𑀢𑀺𑀆𑀤𑀺𑀁. 𑀅𑀝𑁆𑀞𑀯𑀺𑀥𑁂𑀲𑀼 𑀘𑀢𑀼𑀓𑁆𑀓𑀦𑀬𑀯𑀲𑁂𑀦, 𑀦𑀯𑀯𑀺𑀥𑁂𑀲𑀼 𑀧𑀜𑁆𑀘𑀓𑀦𑀬𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀢𑁂𑀲𑀁 𑀯𑀸𑀤𑀻𑀦𑀁 𑀲𑀸𑀥𑀓𑀯𑀘𑀦𑀁. 𑀯𑀺𑀘𑀸𑀭𑁂𑀢𑁆𑀯𑀸 𑀧𑀦 𑀕𑀳𑁂𑀢𑀩𑁆𑀩𑀁. 𑀆𑀓𑀸𑀲 𑀓𑀲𑀺𑀡𑁂𑀦 𑀯𑀺𑀦𑀸 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀮𑀪𑀺𑀢𑁆𑀯𑀸 𑀧𑀼𑀦 𑀅𑀪𑀺𑀜𑁆𑀜𑀢𑁆𑀣𑀸𑀬 𑀧𑀭𑀺𑀓𑀫𑁆𑀫𑁂𑀓𑀢𑁂 𑀆𑀓𑀸𑀲𑀓𑀲𑀺𑀡𑁂𑀧𑀺 𑀓𑀢𑁆𑀢𑀩𑁆𑀩𑀢𑁆𑀢𑀸 𑀢𑀲𑁆𑀲 𑀅𑀪𑀺𑀜𑁆𑀜𑀸𑀧𑀸𑀤𑀓𑀢𑀸 𑀲𑀫𑁆𑀪𑀯𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄. 𑀧𑀼𑀩𑁆𑀩𑁂 𑀅𑀪𑀸𑀯𑀺𑀢 𑀪𑀸𑀯𑀦𑁄𑀢𑀺 𑀘 𑀅𑀓𑀢𑀸𑀥𑀺𑀓𑀸𑀭𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁. ‘‘𑀆𑀤𑀺𑀓𑀫𑁆𑀫𑀺𑀓𑁄’’𑀢𑀺 𑀅𑀪𑀺𑀜𑁆𑀜𑀸𑀓𑀫𑁆𑀫𑁂 𑀆𑀤𑀺𑀓𑀫𑁆𑀫𑀺𑀓𑁄. ‘‘𑀢𑀸𑀤𑀺𑀲𑀸𑀦𑀁’’𑀢𑀺 𑀧𑀼𑀩𑁆𑀩𑁂 𑀅𑀓𑀢𑀸𑀥𑀺𑀓𑀸𑀭𑀸𑀦𑀁 𑀅𑀪𑀸𑀯𑀺𑀢𑀪𑀸𑀯𑀦𑀸𑀦𑀁 𑀇𑀤𑀸𑀦𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀆𑀭𑀪𑀦𑁆𑀢𑀸𑀦𑀁 𑀅𑀪𑀺𑀜𑁆𑀜𑀸𑀓𑀫𑁆𑀫𑁂 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁’’𑀢𑀺 𑀘 𑀉𑀧𑀮𑀓𑁆𑀔𑀡𑀯𑀘𑀦𑀁. 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑀯𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀓𑀁𑀧𑀺 𑀕𑀳𑁂𑀢𑀩𑁆𑀩𑀁. 𑀇𑀤𑀜𑁆𑀘 𑀆𑀤𑀺𑀓𑀫𑁆𑀫𑀺𑀓𑀯𑀺𑀥𑀸𑀦𑀸𑀥𑀺𑀓𑀸𑀭𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀪𑀺𑀜𑁆𑀜𑀸𑀲𑀼 𑀯𑀲𑀺𑀧𑀢𑁆𑀢𑀸𑀦𑀫𑁆𑀧𑀺 𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀁 𑀙𑀲𑀼𑀆𑀭𑀫𑁆𑀫𑀡𑁂𑀲𑀼 𑀬𑀣𑀸𑀭𑀳𑀁 𑀅𑀧𑁆𑀧𑁂𑀢𑀺𑀬𑁂𑀯. ‘‘𑀅𑀥𑀺𑀝𑁆𑀞𑀸𑀢𑀩𑁆𑀩𑀁’’𑀢𑀺 𑀬𑀣𑀺𑀘𑁆𑀙𑀺𑀢 𑀦𑀺𑀧𑁆𑀨𑀢𑁆𑀢𑀢𑁆𑀣𑀸𑀬 𑀲𑀢𑀁 𑀳𑁄𑀢𑀼 𑀲𑀳𑀲𑁆𑀲𑀁 𑀳𑁄𑀢𑀽𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂𑀦 𑀅𑀪𑀺𑀯𑀺𑀥𑀸𑀢𑀩𑁆𑀩𑀁. 𑀅𑀪𑀺𑀦𑀻𑀳𑀭𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀢𑀁 𑀳𑁄𑀫𑀺, 𑀲𑀳𑀲𑁆𑀲𑀁 𑀳𑁄𑀫𑀻𑀢𑀺 𑀯𑀸’’𑀢𑀺 𑀅𑀢𑁆𑀢𑀸𑀦𑀁 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀦𑀺𑀫𑁆𑀫𑀺𑀦𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁂𑀲𑀁 𑀧𑀦 𑀅𑀜𑁆𑀜𑀣𑀸𑀦𑀺𑀫𑁆𑀫𑀺𑀦𑀦𑀯𑀲𑁂𑀦. 𑀲𑁄𑀢𑀼𑀁 𑀯𑀸 𑀲𑀤𑁆𑀤𑀁, 𑀧𑀲𑁆𑀲𑀺𑀢𑀼𑀁 𑀯𑀸 𑀭𑀽𑀧𑀁, 𑀚𑀸𑀦𑀺𑀢𑀼𑀁 𑀯𑀸 𑀧𑀭𑀘𑀺𑀢𑁆𑀢𑀁. 𑀅𑀦𑀼𑀲𑁆𑀲𑀭𑀺𑀢𑀼𑀁 𑀯𑀸 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀁. 𑀅𑀝𑁆𑀞𑀓𑀣𑀸𑀧𑀸𑀞𑁂. ‘‘𑀅𑀥𑀺𑀝𑁆𑀞𑀸𑀢𑀻’’𑀢𑀺 𑀅𑀪𑀺𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀢𑀺. 𑀅𑀪𑀺𑀯𑀺𑀥𑀸𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀯𑀺𑀥𑀁𑀳𑀺 𑀅𑀥𑀺𑀝𑁆𑀞𑀸𑀦𑀁 𑀧𑀭𑀺𑀓𑀫𑁆𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀦𑁆𑀢𑀺. 𑀇𑀥 𑀧𑀦 𑀅𑀪𑀺𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. ‘‘𑀅𑀥𑀺𑀝𑁆𑀞𑀸𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀆𑀯𑀚𑁆𑀚𑀦 𑀧𑀭𑀺𑀓𑀫𑁆𑀫 𑀅𑀥𑀺𑀝𑁆𑀞𑀸𑀦𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲. 𑀧𑀘𑁆𑀙𑀺𑀫𑀁 𑀧𑀦 𑀧𑀸𑀤𑀓𑀚𑁆𑀛𑀸𑀦 𑀲𑀫𑀸𑀧𑀚𑁆𑀚𑀦𑀁. 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑁂 𑀲𑀫𑀸𑀳𑀺𑀢𑁂 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀆𑀳 ‘‘𑀢𑀣𑀸𑀳𑀻’’𑀢𑀺𑀆𑀤𑀺𑀁. ‘‘𑀲𑁂𑀲𑀸𑀪𑀺𑀜𑁆𑀜𑀸𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑁄’’𑀢𑀺 𑀤𑀺𑀩𑁆𑀩𑀲𑁄𑀢𑀧𑀭𑀺𑀓𑀫𑁆𑀫𑁂 𑀢𑁂𑀦𑁂𑀯𑀧𑀭𑀺𑀓𑀫𑁆𑀫 𑀲𑀫𑀸𑀥𑀺𑀜𑁆𑀜𑀸𑀡𑀲𑁄𑀢𑁂𑀦 𑀆𑀲𑀦𑁆𑀦𑁂 𑀤𑀺𑀩𑁆𑀩𑀯𑀺𑀲𑀬𑀁𑀧𑀺 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. ‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀇𑀢𑀺 𑀫𑀦𑀲𑀺𑀓𑀢𑁆𑀯𑀸. ‘‘𑀢𑀁’’𑀢𑀺 𑀧𑀘𑁆𑀙𑀺𑀫𑀁 𑀧𑀸𑀤𑀓𑀚𑁆𑀛𑀸𑀦 𑀲𑀫𑀸𑀧𑀚𑁆𑀚𑀦𑀁. ‘‘𑀇𑀥 𑀦𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁’’𑀢𑀺 𑀣𑁂𑀭𑀲𑁆𑀲 𑀫𑀢𑁂𑀦 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀧𑀦 𑀆𑀤𑀺𑀓𑀫𑁆𑀫𑀺𑀓𑀯𑀺𑀥𑀸𑀦𑀧𑁆𑀧𑀥𑀸𑀦𑀢𑁆𑀢𑀸 𑀧𑀘𑁆𑀙𑀺𑀫𑀁𑀧𑀺 𑀧𑀸𑀤𑀓𑀚𑁆𑀛𑀸𑀦 𑀲𑀫𑀸𑀧𑀚𑁆𑀚𑀦𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺. ‘‘𑀓𑀸𑀬𑀕𑀢𑀺𑀓𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀅𑀬𑀁 𑀓𑀸𑀬𑁄 𑀯𑀺𑀬 𑀇𑀤𑀁 𑀘𑀺𑀢𑁆𑀢𑀁𑀧𑀺 𑀤𑀦𑁆𑀥𑀕𑀫𑀦𑀁 𑀳𑁄𑀢𑀽𑀢𑀺 𑀏𑀯𑀁 𑀘𑀺𑀢𑁆𑀢𑀁 𑀓𑀸𑀬𑀕𑀢𑀺𑀓𑀁 𑀓𑀭𑀡𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸. ‘‘𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦𑀸’’𑀢𑀺 𑀤𑀦𑁆𑀥𑀕𑀫𑀦𑁂𑀦 𑀕𑀘𑁆𑀙𑀦𑁆𑀢𑀢𑁆𑀢𑀸 𑀩𑀳𑀼𑀚𑀦𑀸𑀦𑀫𑁆𑀧𑀺 𑀤𑀺𑀲𑁆𑀲𑀫𑀸𑀦𑁂𑀦 𑀭𑀽𑀧𑀓𑀸𑀬𑁂𑀦. 𑀢𑀩𑁆𑀩𑀺 𑀧𑀭𑀻𑀢𑁂𑀦 𑀲𑀻𑀖𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀆𑀭𑀫𑁆𑀫𑀡𑀫𑀢𑁆𑀢𑀁 𑀳𑁄𑀢𑀻’’𑀢𑀺 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀆𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑀁’’𑀢𑀺 𑀦𑀺𑀧𑁆𑀨𑀦𑁆𑀦𑀭𑀽𑀧𑀁. 𑀇𑀢𑀭𑀁 𑀧𑀦 𑀳𑀤𑀬 𑀯𑀢𑁆𑀣𑀼𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀘𑀺𑀢𑁆𑀢 𑀯𑀺𑀚𑀸𑀦𑀦𑀝𑁆𑀞𑀸𑀦𑁂 𑀅𑀝𑁆𑀞𑀓𑀣𑀸𑀝𑀻𑀓𑀸𑀘𑀭𑀺𑀬𑀸𑀦𑀁 𑀯𑀺𑀘𑀸𑀭𑀡𑀸 𑀅𑀢𑁆𑀣𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀝𑁆𑀞𑀓𑀣𑀸𑀬𑀁’’𑀢𑀺 𑀥𑀫𑁆𑀫𑀲𑀗𑁆𑀕𑀡𑀺 𑀅𑀝𑁆𑀞𑀓𑀣𑀸𑀬𑀁𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕 𑀅𑀝𑁆𑀞𑀓𑀣𑀸𑀬𑀁𑀧𑀺. ‘‘𑀔𑀡𑀺𑀓𑀯𑀲𑁂𑀦𑀸’’𑀢𑀺 𑀔𑀡𑀺𑀓𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦. 𑀆𑀯𑀚𑁆𑀚𑀦𑁂 𑀦𑀺𑀭𑀼𑀤𑁆𑀥𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀓𑀁 𑀘𑀺𑀢𑁆𑀢𑀁’’𑀢𑀺 𑀧𑀭𑀲𑁆𑀲 𑀘𑀺𑀢𑁆𑀢𑀁. 𑀢𑀤𑁂𑀯 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀺. ‘‘𑀢𑀸𑀦𑀻’’𑀢𑀺 𑀚𑀯𑀦𑀸𑀦𑀺. ‘‘𑀢𑁂𑀲𑀁’’𑀢𑀺 𑀚𑀯𑀦𑀸𑀦𑀁. ‘‘𑀢𑁂𑀦𑀸’’𑀢𑀺 𑀆𑀯𑀚𑁆𑀚𑀦𑁂𑀦. ‘‘𑀇𑀢𑀭𑀣𑀸’’𑀢𑀺 𑀅𑀜𑁆𑀜𑀣𑀸 𑀲𑀦𑁆𑀢𑀢𑀺 𑀅𑀤𑁆𑀥𑀸𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑀺𑀢𑁂 𑀲𑀢𑀺. 𑀯𑀼𑀢𑁆𑀢𑁄 𑀲𑀺𑀬𑀸. 𑀓𑀲𑁆𑀫𑀸, 𑀲𑀦𑁆𑀢𑀢𑀺 𑀅𑀤𑁆𑀥𑀸𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀕𑀳𑀺𑀢𑁂 𑀲𑀢𑀺, 𑀲𑀩𑁆𑀩𑀸𑀬 𑀏𑀓𑀚𑀯𑀦𑀯𑀻𑀣𑀺𑀬𑀸 𑀏𑀓𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀢𑀸. ‘‘𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀸𑀦𑀻’’𑀢𑀺 𑀚𑀯𑀦𑀘𑀺𑀢𑁆𑀢𑀸𑀦𑀺. ‘‘𑀲𑀳𑀼𑀧𑁆𑀧𑀦𑁆𑀦𑀸𑀦𑀻’’𑀢𑀺 𑀇𑀤𑀁 𑀲𑀳𑀼𑀧𑁆𑀧𑀦𑁆𑀦𑀸𑀦𑀁𑀧𑀺 𑀅𑀢𑁆𑀣𑀺𑀢𑀸𑀬 𑀯𑀼𑀢𑁆𑀢𑀁. 𑀆𑀯𑀚𑁆𑀚𑀦𑀸𑀤𑀻𑀦𑀺 𑀧𑀦 𑀔𑀡𑀪𑁂𑀤𑀁 𑀦𑀕𑀡𑁆𑀳𑀦𑁆𑀢𑀺. 𑀲𑀩𑁆𑀩𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀏𑀓𑀘𑀺𑀢𑁆𑀢𑀫𑀺𑀯 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀓𑀸𑀮𑀪𑁂𑀤𑁄𑀧𑀺 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀦𑀺𑀩𑁆𑀩𑀸𑀦𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁, 𑀓𑀣𑀁 𑀦𑀺𑀩𑁆𑀩𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀁 𑀦𑀸𑀫 𑀲𑀺𑀬𑀸𑀢𑀺. 𑀅𑀢𑀻𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀫𑀕𑁆𑀕𑀨𑀮𑀸𑀦𑀺 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀁 𑀦𑀺𑀩𑁆𑀩𑀸𑀦𑀁𑀧𑀺 𑀅𑀦𑀼𑀲𑁆𑀲𑀭𑀢𑀺𑀬𑁂𑀯. 𑀢𑀢𑁆𑀣 𑀢𑁂𑀲𑀁 𑀫𑀕𑁆𑀕𑀨𑀮𑀸𑀦𑀁 𑀅𑀢𑀻𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁𑀧𑀺 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀁 𑀦𑀸𑀫 𑀳𑁄𑀢𑀻𑀢𑀺.

‘‘𑀬𑀁 𑀬𑀁 𑀅𑀥𑀺𑀝𑁆𑀞𑀸𑀢𑀻’’𑀢𑀺 𑀬𑀁 𑀬𑀁 𑀲𑀢𑀸𑀤𑀺𑀓𑀁 𑀲𑀁𑀯𑀺𑀥𑀸𑀢𑀺. ‘‘𑀬𑀣𑀸 𑀬𑀣𑀸 𑀅𑀥𑀺𑀝𑁆𑀞𑀸𑀢𑀻’’𑀢𑀺 𑀬𑁂𑀦 𑀬𑁂𑀦 𑀆𑀯𑀺𑀪𑀸𑀯𑀸𑀤𑀺𑀓𑁂𑀦 𑀧𑀓𑀸𑀭𑁂𑀦 𑀲𑀁𑀯𑀺𑀥𑀸𑀢𑀺. ‘‘𑀧𑀓𑀢𑀺𑀯𑀡𑁆𑀡𑀁’’𑀢𑀺 𑀧𑀓𑀢𑀺𑀲𑀡𑁆𑀞𑀸𑀦𑀁. ‘‘𑀢𑀲𑁆𑀲𑁂𑀯𑀸’’𑀢𑀺 𑀧𑀓𑀢𑀺𑀯𑀡𑁆𑀡𑀲𑁆𑀲𑁂𑀯. 𑀤𑁂𑀯𑀸𑀦𑀁 𑀧𑀲𑀸𑀤𑀲𑁄𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀆𑀭𑀫𑁆𑀫𑀡 𑀲𑀫𑁆𑀧𑀝𑀺𑀘𑁆𑀙𑀦 𑀲𑀫𑀢𑁆𑀣𑀁’’𑀢𑀺 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦 𑀲𑀫𑀢𑁆𑀣𑀁. 𑀢𑀤𑁂𑀯 𑀘𑁂𑀢𑁄𑀧𑀭𑀺𑀬𑀜𑀸𑀡𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀘𑁂𑀢𑁄’’𑀢𑀺 𑀘𑀺𑀢𑁆𑀢𑀁. ‘‘𑀧𑀭𑀺𑀘𑁆𑀙𑀺𑀚𑁆𑀚𑀸’’𑀢𑀺 𑀇𑀤𑀁 𑀲𑀭𑀸𑀕𑀘𑀺𑀢𑁆𑀢𑀁, 𑀇𑀤𑀁 𑀯𑀺𑀭𑀸𑀕𑀘𑀺𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. ‘‘𑀕𑁄𑀘𑀭 𑀦𑀺𑀯𑀸𑀲𑀯𑀲𑁂𑀦𑀸’’𑀢𑀺 𑀕𑁄𑀘𑀭𑀁 𑀓𑀢𑁆𑀯𑀸 𑀦𑀺𑀯𑀲𑀦𑀯𑀲𑁂𑀦. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀅𑀦𑀸𑀕𑀢𑀁 𑀲𑀜𑁆𑀜𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀢𑁄 𑀑𑀭𑀺𑀫𑀸 𑀘𑀺𑀢𑁆𑀢𑀘𑁂𑀢𑀲𑀺𑀓 𑀥𑀫𑁆𑀫𑀸 𑀘𑁂𑀢𑁄𑀧𑀭𑀺𑀬𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑁄𑀢𑀺 𑀓𑀢𑁆𑀯𑀸 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀢𑁄𑀢𑀺 𑀯𑀼𑀢𑁆𑀢𑀁. 𑀧𑀝𑁆𑀞𑀸𑀬 𑀧𑀯𑀢𑁆𑀢𑀫𑀸𑀦𑀸𑀢𑀺 𑀧𑀸𑀞𑀲𑁂𑀲𑁄. 𑀇𑀫𑀲𑁆𑀫𑀺𑀁 𑀤𑀺𑀯𑀲𑁂 𑀘 𑀅𑀦𑀸𑀕𑀢𑀧𑀓𑁆𑀔𑁂 𑀲𑀩𑁆𑀩𑀁𑀧𑀺 𑀆𑀭𑀫𑁆𑀫𑀡𑀁 𑀧𑀓𑀢𑀺𑀜𑀸𑀡𑀲𑁆𑀲 𑀯𑀺𑀲𑀬𑁄𑀢𑀺 𑀓𑀢𑁆𑀯𑀸 ‘‘𑀤𑀼𑀢𑀻𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀏𑀢𑀁’’𑀢𑀺 𑀏𑀢𑀁 𑀅𑀦𑀸𑀕𑀢𑀁 𑀲𑀜𑁆𑀜𑀸𑀡𑀁. ‘‘𑀬𑀣𑀸 𑀘𑁂𑀢𑀁’’𑀢𑀺 𑀬𑀣𑀸 𑀘 𑀏𑀢𑀁 𑀇𑀫𑀲𑁆𑀫𑀺𑀁 𑀪𑀯𑁂 𑀅𑀦𑀸𑀕𑀢 𑀥𑀫𑁆𑀫𑁂 𑀚𑀸𑀦𑀸𑀢𑀺. ‘‘𑀅𑀲𑀸𑀥𑀸𑀭𑀡𑀓𑀸𑀮𑀯𑀲𑁂𑀦𑀸’’𑀢𑀺 𑀅𑀜𑁆𑀜𑁂𑀦𑀜𑀸𑀡𑁂𑀦 𑀅𑀲𑀸𑀥𑀸𑀭𑀡 𑀓𑀸𑀮𑀯𑀲𑁂𑀦. 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁄𑀳𑀺 𑀅𑀜𑁆𑀜𑀜𑁆𑀜𑀸𑀡𑀲𑀸𑀥𑀸𑀭𑀡𑁄𑀢𑀺.

𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭𑁧. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂. ‘‘𑀬𑀣𑀸𑀤𑀺𑀝𑁆𑀞𑀁’’𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀬𑀣𑀸𑀤𑀺𑀝𑁆𑀞𑀁. 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀦𑀸𑀫 𑀲𑀢𑁆𑀢𑀧𑀼𑀕𑁆𑀕𑀮𑀸𑀤𑀺𑀦𑀺𑀫𑀺𑀢𑁆𑀢𑀫𑁂𑀯. 𑀲𑀢𑁆𑀢𑀦𑀺𑀫𑀺𑀢𑁆𑀢𑀜𑁆𑀳𑀺 𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀢𑁆𑀢𑀸 𑀔𑀡𑁂𑀔𑀡𑁂 𑀔𑀬𑀯𑀬𑀪𑁂𑀤𑀸𑀪𑀸𑀯𑀢𑁄 𑀲𑁄 𑀏𑀯𑀕𑀘𑁆𑀙𑀢𑀺 𑀲𑁄 𑀏𑀯 𑀢𑀺𑀝𑁆𑀞𑀢𑀻𑀢𑀺𑀆𑀤𑀺𑀦𑀸 𑀦𑀺𑀘𑁆𑀘𑀸𑀓𑀸𑀭𑀲𑀡𑁆𑀞𑀺𑀢𑀁 𑀳𑁄𑀢𑀻𑀢𑀺. ‘‘𑀥𑀼𑀯𑀦𑀺𑀫𑀺𑀢𑁆𑀢𑀁’’𑀢𑀺 𑀣𑀺𑀭𑀦𑀺𑀫𑀺𑀢𑁆𑀢𑀁. 𑀇𑀤𑀫𑁆𑀧𑀺 𑀲𑁄 𑀕𑀘𑁆𑀙𑀦𑁆𑀢𑁄𑀧𑀺 𑀦𑀦𑀲𑁆𑀲𑀢𑀺, 𑀢𑀺𑀝𑁆𑀞𑀦𑁆𑀢𑁄𑀧𑀺 𑀦𑀦𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀣𑀺𑀭𑀸𑀓𑀸𑀭𑀲𑀡𑁆𑀞𑀺𑀢𑀁 𑀲𑀢𑁆𑀢𑀦𑀺𑀫𑀺𑀢𑁆𑀢𑀫𑁂𑀯. ‘‘𑀲𑀼𑀔𑀦𑀺𑀫𑀺𑀢𑁆𑀢𑀁’’𑀢𑀺 𑀔𑀡𑁂𑀔𑀡𑁂 𑀔𑀬𑀯𑀬𑀪𑁂𑀤 𑀤𑀼𑀓𑁆𑀔𑀸𑀦𑀁 𑀅𑀪𑀸𑀯𑀢𑁄 𑀲𑀼𑀔𑀺𑀢𑁄 𑀦𑀺𑀤𑁆𑀤𑀼𑀓𑁆𑀔𑁄 𑀦𑀺𑀩𑁆𑀪𑀬𑁄𑀢𑀺𑀆𑀤𑀺𑀦𑀸 𑀲𑀼𑀔𑀸𑀓𑀸𑀭𑀲𑀡𑁆𑀞𑀺𑀢𑀁 𑀲𑀢𑁆𑀢𑀦𑀺𑀫𑀺𑀢𑁆𑀢𑀫𑁂𑀯. ‘‘𑀅𑀢𑁆𑀢𑀦𑀺𑀫𑀺𑀢𑁆𑀢𑀁’’𑀢𑀺 𑀕𑀦𑁆𑀢𑀼𑀁 𑀇𑀘𑁆𑀙𑀦𑁆𑀢𑁄 𑀕𑀘𑁆𑀙𑀢𑀺, 𑀞𑀸𑀢𑀼𑀁 𑀇𑀘𑁆𑀙𑀦𑁆𑀢𑁄 𑀢𑀺𑀝𑁆𑀞𑀢𑀻𑀢𑀺𑀆𑀤𑀺𑀦𑀸 𑀯𑀲𑀯𑀢𑁆𑀢𑀦𑀸𑀓𑀸𑀭 𑀲𑀡𑁆𑀞𑀺𑀢𑀁 𑀲𑀢𑁆𑀢𑀦𑀺𑀫𑀺𑀢𑁆𑀢𑀫𑁂𑀯. ‘‘𑀓𑀺𑀭𑀺𑀬𑀸’’𑀢𑀺 𑀪𑀸𑀯𑀦𑀸𑀓𑀺𑀭𑀺𑀬𑀸.

𑀯𑀺𑀲𑀼𑀚𑁆𑀛𑀢𑀻𑀢𑀺 𑀯𑀺𑀲𑀼𑀤𑁆𑀥𑀺. 𑀯𑀺𑀲𑁄𑀥𑁂𑀢𑀻𑀢𑀺 𑀯𑀸 𑀯𑀺𑀲𑀼𑀤𑁆𑀥𑀺. 𑀲𑀻𑀮𑀫𑁂𑀯 𑀯𑀺𑀲𑀼𑀤𑁆𑀥𑀺 𑀲𑀻𑀮𑀯𑀺𑀲𑀼𑀤𑁆𑀥𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀘𑁆𑀘𑀲𑀻𑀮𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀘𑁆𑀘𑀲𑀻𑀮𑀫𑁂𑀯 𑀉𑀧𑀭𑀺𑀛𑀸𑀦𑀸𑀤𑀺𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦 𑀓𑀺𑀘𑁆𑀘𑀲𑀸𑀥𑀓𑀢𑁆𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀘𑁆𑀘𑀲𑀻𑀮𑀫𑁂𑀯𑀸’’𑀢𑀺. 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀯𑀓𑁆𑀔𑀢𑀺𑀳𑀺 ‘‘𑀤𑀼𑀯𑀺𑀥𑁄𑀧𑀺 𑀲𑀫𑀸𑀥𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀦𑀸𑀫𑀸’’𑀢𑀺. 𑀏𑀢𑁂𑀦 𑀯𑀺𑀲𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀯𑀺𑀲𑀼𑀤𑁆𑀥𑀺. 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺. 𑀲𑀫𑀸𑀥𑀺 𑀏𑀯𑀸𑀢𑀺𑀧𑀺 𑀤𑀻𑀧𑁂𑀢𑀺. 𑀯𑀺𑀲𑀼𑀚𑁆𑀛𑀦𑀁 𑀯𑀸 𑀯𑀺𑀲𑀼𑀤𑁆𑀥𑀺. 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺. 𑀅𑀢𑁆𑀣𑀢𑁄𑀧𑀦 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀫𑁂𑀯 𑀯𑀼𑀘𑁆𑀘𑀢𑀻𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀯𑀺𑀲𑀼𑀤𑁆𑀥𑀺𑀲𑀤𑁆𑀤 𑀲𑀫𑁆𑀧𑀦𑁆𑀦𑁂 𑀳𑀺 𑀲𑀢𑀺, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀦 𑀲𑀫𑀸𑀥𑀺𑀯𑀺𑀲𑀼𑀤𑁆𑀥𑀻𑀢𑀺. ‘‘𑀲𑁄𑀴𑀲𑀯𑀺𑀥𑀁 𑀓𑀗𑁆𑀔𑀁’’𑀢𑀺 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳 𑀫𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀦𑁆𑀢𑁂𑀆𑀕𑀢𑀁 𑀲𑁄𑀴𑀲𑀯𑀺𑀥𑀁 𑀯𑀺𑀘𑀺𑀓𑀺𑀘𑁆𑀙𑀁. ‘‘𑀅𑀝𑁆𑀞𑀯𑀺𑀥𑀁 𑀯𑀸 𑀓𑀗𑁆𑀔𑀁’’𑀢𑀺 𑀲𑀢𑁆𑀣𑀭𑀺𑀓𑀗𑁆𑀔𑀢𑀻𑀢𑀺𑀆𑀤𑀺𑀦𑀸 𑀅𑀪𑀺𑀥𑀫𑁆𑀫𑁂 𑀆𑀕𑀢𑀁 𑀅𑀝𑁆𑀞𑀯𑀺𑀥𑀁 𑀯𑀺𑀘𑀺𑀓𑀺𑀘𑁆𑀙𑀁. 𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀺 𑀦𑀸𑀫 𑀲𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀓𑀸𑀭𑀡𑀫𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸 𑀕𑀳𑀡𑀤𑀺𑀝𑁆𑀞𑀺. ‘‘𑀫𑀦𑀲𑀺𑀓𑀸𑀭𑀯𑀺𑀥𑀻’’𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀲𑀼 𑀫𑀦𑀲𑀺𑀓𑀸𑀭𑀯𑀺𑀥𑀺. 𑀅𑀦𑀼𑀧𑀸𑀬𑀪𑀽𑀢𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑁄. 𑀅𑀥𑀺𑀫𑀸𑀦𑀯𑀢𑁆𑀣𑀼 𑀦𑀸𑀫 𑀑𑀪𑀸𑀲𑀸𑀤𑀻𑀦𑀺. ‘‘𑀫𑀕𑁆𑀕𑀢𑁄’’𑀢𑀺 𑀫𑀕𑁆𑀕𑀪𑀸𑀯𑁂𑀦. ‘‘𑀅𑀫𑀕𑁆𑀕𑀢𑁄’’𑀢𑀺 𑀅𑀫𑀕𑁆𑀕𑀪𑀸𑀯𑁂𑀦. ‘‘𑀤𑀲𑁆𑀲𑀦𑀜𑁆𑀘𑀸’’𑀢𑀺 𑀢𑁂𑀲𑀁𑀅𑀥𑀺𑀫𑀸𑀦𑀯𑀢𑁆𑀣𑀽𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀤𑀲𑁆𑀲𑀦𑀜𑁆𑀘. 𑀢𑀫𑁂𑀯 𑀯𑀺𑀲𑀼𑀤𑁆𑀥𑀺𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀫𑁆𑀫𑁄𑀳𑀫𑀮𑀢𑁄’’𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀘𑁆𑀙𑀸𑀤𑀓 𑀲𑀫𑁆𑀫𑁄𑀳𑀫𑀮𑀢𑁄. 𑀦𑀦𑀼 𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀫𑁂𑀯. 𑀏𑀯𑀁𑀲𑀢𑀺, 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑁂 𑀲𑀺𑀤𑁆𑀥𑁂 𑀓𑀢𑁆𑀯𑀸 𑀤𑀲𑁆𑀲𑀦𑀲𑀤𑁆𑀤𑁂𑀦 𑀲𑀳 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁆𑀣𑀘𑀸’’𑀢𑀺𑀆𑀤𑀺𑀁. ‘‘𑀲𑀼𑀢𑀫𑀬𑀸𑀤𑀺𑀯𑀲𑁂𑀦𑀸’’𑀢𑀺 𑀲𑀼𑀢𑀫𑀬 𑀘𑀺𑀦𑁆𑀢𑀸𑀫𑀬𑀯𑀲𑁂𑀦. 𑀢𑀢𑁆𑀣 𑀬𑀣𑀸𑀲𑀼𑀢𑀲𑁆𑀲 𑀧𑀸𑀴𑀺𑀥𑀫𑁆𑀫𑀲𑁆𑀲 𑀅𑀢𑁆𑀣𑀫𑀢𑁆𑀢𑀚𑀸𑀦𑀦𑀁 𑀲𑀼𑀢𑀫𑀬𑀜𑁆𑀜𑀸𑀡𑀁 𑀦𑀸𑀫. 𑀅𑀢𑁆𑀣𑀁 𑀜𑀢𑁆𑀯𑀸 𑀅𑀢𑁆𑀣𑀸𑀦𑀼𑀭𑀽𑀧𑀲𑁆𑀲 𑀲𑀪𑀸𑀯𑀮𑀓𑁆𑀔𑀡𑀲𑁆𑀲 𑀘𑀺𑀦𑁆𑀢𑀦𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁 𑀘𑀺𑀦𑁆𑀢𑀸𑀫𑀬𑀜𑁆𑀜𑀸𑀡𑀁 𑀦𑀸𑀫. ‘‘𑀅𑀦𑀼𑀫𑀸𑀦𑀸𑀤𑀺𑀜𑀸𑀡𑀁𑀧𑀻’’𑀢𑀺 𑀦𑀸𑀫𑀭𑀽𑀧 𑀥𑀫𑁆𑀫𑁂𑀲𑀼 𑀲𑀪𑀸𑀯𑀸𑀦𑀼𑀫𑀸𑀦𑀜𑁆𑀜𑀸𑀡 𑀲𑀪𑀸𑀯𑀚𑀸𑀦𑀦𑀜𑁆𑀜𑀸𑀡𑀁𑀧𑀺. ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑀜𑁆𑀜𑀸𑀡𑀫𑁂𑀯𑀸’’𑀢𑀺 𑀅𑀢𑁆𑀢𑀦𑀸 𑀧𑀘𑁆𑀘𑀓𑁆𑀔𑀓𑀭𑀡𑀜𑁆𑀜𑀸𑀡𑀫𑁂𑀯. ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀫𑀕𑁆𑀕𑀸𑀫𑀕𑁆𑀕𑀜𑁆𑀜𑀸𑀡𑀤𑀲𑁆𑀲𑀦𑀸𑀤𑀻𑀲𑀼 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼. 𑀏𑀢𑁆𑀣 𑀘 𑀤𑀲𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼𑀧𑀺 𑀯𑀺𑀧𑀲𑁆𑀲𑀦𑀸 𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀤𑀲𑁆𑀲𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑀢𑁆𑀯𑀸 𑀲𑀩𑁆𑀩𑀢𑁆𑀣𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀫𑀲𑀦𑀜𑁆𑀜𑀸𑀡𑀢𑁄 𑀧𑀝𑁆𑀞𑀸𑀬 𑀳𑀺 𑀤𑀲𑁆𑀲𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀦 𑀲𑀪𑀸𑀯𑀚𑀸𑀦𑀦𑀫𑀢𑁆𑀢𑀁. 𑀬𑀢𑁄 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀲𑀼𑀝𑁆𑀞𑀼 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀢𑁆𑀣𑀸𑀬 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑀦𑀸 𑀓𑀫𑁆𑀫𑀁 𑀦𑀸𑀫 𑀢𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀁 𑀳𑁄𑀢𑀺.

‘‘𑀥𑀫𑁆𑀫𑀸’’𑀢𑀺 𑀲𑀗𑁆𑀔𑀢 𑀥𑀫𑁆𑀫𑀸. 𑀅𑀦𑀺𑀘𑁆𑀘𑀢𑀸 𑀏𑀯 𑀮𑀓𑁆𑀔𑀡𑀦𑁆𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁. 𑀅𑀦𑀺𑀘𑁆𑀘𑀸𑀦𑀁 𑀯𑀸 𑀲𑀗𑁆𑀔𑀢 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀦𑁆𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑁆𑀧𑀻𑀴𑀦𑀸𑀓𑀸𑀭𑁄’’𑀢𑀺 𑀬𑀣𑀸 𑀲𑀻𑀖𑀲𑁄𑀢𑀸𑀬𑀁 𑀦𑀤𑀺𑀬𑀁 𑀦𑀸𑀯𑀸𑀬 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀁 𑀲𑀸𑀦𑀸𑀯𑀸 𑀅𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑁂𑀦 𑀅𑀪𑀺𑀡𑁆𑀳𑀁 𑀲𑀼𑀝𑁆𑀞𑀼 𑀧𑀝𑀺𑀧𑁆𑀧𑀻𑀴𑁂𑀢𑀺. 𑀓𑀲𑁆𑀫𑀸, 𑀅𑀲𑀢𑀺 𑀅𑀪𑀺𑀲𑀗𑁆𑀔𑀸𑀭𑁂 𑀢𑀗𑁆𑀔𑀡𑁂 𑀏𑀯 𑀅𑀥𑁄𑀯𑀼𑀬𑁆𑀳𑀦𑀢𑁄. 𑀅𑀥𑁄𑀯𑀼𑀬𑁆𑀳𑀦𑀜𑁆𑀳𑀺 𑀦𑀸𑀯𑀸𑀬 𑀧𑀓𑀢𑀺 𑀓𑀺𑀘𑁆𑀘𑀁. 𑀉𑀤𑁆𑀥𑀁 𑀆𑀭𑀽𑀳𑀦𑀁 𑀅𑀪𑀺𑀲𑀗𑁆𑀔𑀸𑀭 𑀲𑀺𑀤𑁆𑀥𑀁. 𑀏𑀯𑀫𑁂𑀯𑀁 𑀲𑀻𑀖𑀲𑁄𑀢𑁂 𑀲𑀁𑀲𑀸𑀭𑁂 𑀅𑀢𑁆𑀢𑀪𑀸𑀯𑁂𑀦 𑀉𑀤𑁆𑀥𑀁 𑀔𑀡𑀢𑁄 𑀔𑀡𑀁 𑀤𑀺𑀯𑀲𑀢𑁄 𑀤𑀺𑀯𑀲𑀁 𑀕𑀘𑁆𑀙𑀦𑁆𑀢𑀁 𑀧𑀼𑀕𑁆𑀕𑀮𑀁 𑀅𑀬𑀁 𑀅𑀢𑁆𑀢𑀪𑀸𑀯𑁄 𑀅𑀪𑀺𑀲𑀗𑁆𑀔𑀭𑀡 𑀤𑀼𑀓𑁆𑀔𑁂𑀦 𑀅𑀪𑀺𑀡𑁆𑀳𑀁 𑀲𑀼𑀝𑁆𑀞𑀼 𑀧𑀝𑀺𑀧𑁆𑀧𑀻𑀴𑁂𑀢𑀺. 𑀓𑀲𑁆𑀫𑀸, 𑀅𑀲𑀢𑀺 𑀅𑀪𑀺𑀲𑀗𑁆𑀔𑀸𑀭𑁂, 𑀧𑀘𑁆𑀘𑀬𑀯𑁂𑀓𑀮𑁆𑀮𑁂 𑀘 𑀲𑀢𑀺, 𑀢𑀗𑁆𑀔𑀡𑁂 𑀏𑀯 𑀯𑀺𑀧𑀭𑀺𑀡𑀫𑀦𑀢𑁄. 𑀯𑀺𑀧𑀭𑀺𑀡𑀫𑀦𑀜𑁆𑀳𑀺 𑀅𑀢𑁆𑀢𑀪𑀸𑀯𑀲𑁆𑀲 𑀧𑀓𑀢𑀺 𑀓𑀺𑀘𑁆𑀘𑀁. 𑀉𑀤𑁆𑀥𑀁𑀕𑀫𑀦𑀁 𑀅𑀪𑀺𑀲𑀗𑁆𑀔𑀸𑀭 𑀲𑀺𑀤𑁆𑀥𑀁. 𑀏𑀯𑀁 𑀅𑀪𑀺𑀡𑁆𑀳 𑀲𑀫𑁆𑀧𑀝𑀺𑀧𑁆𑀧𑀻𑀴𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀲𑀁𑀲𑀸𑀭𑀲𑁆𑀲 𑀲𑀻𑀖𑀲𑁄𑀢𑀢𑀸 𑀦𑀸𑀫 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀦𑀸𑀫 𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺 𑀲𑀻𑀖𑀢𑀸 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀫𑀭𑀡𑀁 𑀤𑀼𑀯𑀺𑀥𑀁 𑀲𑀫𑁆𑀫𑀼𑀢𑀺 𑀫𑀭𑀡𑀜𑁆𑀘 𑀧𑀭𑀫𑀢𑁆𑀣 𑀫𑀭𑀡𑀜𑁆𑀘. 𑀢𑀢𑁆𑀣 𑀲𑀫𑁆𑀫𑀼𑀢𑀺 𑀫𑀭𑀡𑀁 𑀦𑀸𑀫 𑀲𑀫𑁆𑀫𑀼𑀢𑀺 𑀲𑀘𑁆𑀘𑀪𑀽𑀢𑀲𑁆𑀲 𑀲𑀢𑁆𑀢𑀲𑁆𑀲 𑀫𑀭𑀡𑀁. 𑀢𑀁 𑀏𑀓𑀪𑀯𑀧𑀭𑀺𑀬𑀦𑁆𑀢𑁂 𑀲𑀦𑁆𑀤𑀺𑀲𑁆𑀲𑀢𑀺. 𑀧𑀭𑀫𑀢𑁆𑀣 𑀫𑀭𑀡𑀁 𑀦𑀸𑀫 𑀧𑀭𑀫𑀢𑁆𑀣 𑀲𑀘𑁆𑀘𑀪𑀽𑀢𑀸𑀦𑀁 𑀦𑀸𑀫𑀭𑀽𑀧 𑀥𑀫𑁆𑀫𑀸𑀦𑀁 𑀫𑀭𑀡𑀁. 𑀇𑀤𑀫𑁂𑀯 𑀏𑀓𑀦𑁆𑀢𑀫𑀭𑀡𑀁, 𑀲𑀘𑁆𑀘𑀫𑀭𑀡𑀁, 𑀲𑀪𑀸𑀯𑀫𑀭𑀡𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑁂 𑀇𑀤𑀁 𑀧𑀭𑀫𑀢𑁆𑀣 𑀫𑀭𑀡𑀁 𑀏𑀯 𑀅𑀦𑀺𑀘𑁆𑀘𑀢𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀸𑀦𑀁 𑀲𑀼𑀲𑀸𑀦𑀓𑁆𑀔𑁂𑀢𑁆𑀢𑀦𑁆𑀢𑀺 𑀘 𑀲𑀼𑀲𑀸𑀦𑀪𑀽𑀫𑀻𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺. 𑀲𑀸 𑀘 𑀲𑀼𑀲𑀸𑀦𑀪𑀽𑀫𑀺𑀦𑀸𑀫 𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀲𑀦𑁆𑀢𑀸𑀦𑀁 𑀅𑀦𑀼𑀩𑀦𑁆𑀥𑀢𑀺𑀬𑁂𑀯. 𑀅𑀦𑀼𑀩𑀦𑁆𑀥𑀢𑁆𑀢𑀸 𑀘 𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀲𑁄 𑀦𑀸𑀫 𑀲𑀫𑀬𑁄 𑀦𑀢𑁆𑀣𑀺, 𑀬𑀢𑁆𑀣 𑀲𑀢𑁆𑀢𑀸 𑀦 𑀫𑀭𑀦𑁆𑀢𑀻𑀢𑀺. 𑀇𑀤𑀜𑁆𑀘 𑀅𑀦𑀼𑀩𑀦𑁆𑀥𑀦𑀁 𑀲𑀢𑁆𑀢𑀸𑀦𑀁 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑁆𑀧𑀻𑀴𑀦𑀫𑁂𑀯 𑀳𑁄𑀢𑀺. 𑀢𑁂𑀲𑀁 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀚𑀻𑀯𑀺𑀢𑀲𑁆𑀲 𑀘 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀜𑁆𑀘 𑀓𑀸𑀬𑀯𑀘𑀻𑀫𑀦𑁄 𑀓𑀫𑁆𑀫𑀸𑀦𑀜𑁆𑀘 𑀲𑀫𑁆𑀩𑀸𑀥𑀧𑀢𑁆𑀢𑀺𑀢𑁄. 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀧𑀦 𑀅𑀪𑀺𑀲𑀗𑁆𑀔𑀸𑀭 𑀤𑀼𑀓𑁆𑀔𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀸𑀦𑀁 𑀧𑀸𑀓𑀝𑁄𑀬𑁂𑀯. 𑀯𑀲𑀯𑀢𑁆𑀢𑀦𑁂𑀳𑀺 𑀲𑀢𑀺, 𑀅𑀪𑀺𑀲𑀗𑁆𑀔𑀭𑀡 𑀓𑀺𑀘𑁆𑀘𑀲𑁆𑀲 𑀑𑀓𑀸𑀲𑁄 𑀦𑀢𑁆𑀣𑀺. 𑀯𑀲𑀯𑀢𑁆𑀢𑀦𑁂𑀦𑁂𑀯 𑀬𑀣𑀺𑀘𑁆𑀙𑀺 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀲𑀫𑁆𑀧𑀚𑁆𑀚𑀦𑀢𑁄. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀲𑀩𑁆𑀩𑀁𑀧𑀺 𑀅𑀪𑀺𑀲𑀗𑁆𑀔𑀸𑀭 𑀓𑀺𑀘𑁆𑀘𑀁 𑀦𑀸𑀫 𑀅𑀦𑁆𑀢𑀫𑀲𑁄 𑀅𑀲𑁆𑀲𑀸𑀲𑀦𑀧𑀲𑁆𑀲𑀸𑀲𑀦 𑀓𑀺𑀘𑁆𑀘𑀁 𑀉𑀧𑀸𑀤𑀸𑀬 𑀥𑀫𑁆𑀫𑀸𑀦𑀁 𑀯𑀲𑀯𑀢𑁆𑀢𑀦𑀸𑀪𑀸𑀯𑀢𑁄 𑀓𑀭𑁄𑀦𑁆𑀢𑀻𑀢𑀺.

𑀅𑀦𑀺𑀘𑁆𑀘𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀅𑀦𑀼𑀧𑀲𑁆𑀲𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑀼𑀅𑀦𑀼𑀧𑀲𑁆𑀲𑀦𑀸’’𑀢𑀺 𑀘 𑀜𑀸𑀡𑀘𑀓𑁆𑀔𑀼𑀦𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀚𑁆𑀛𑀸𑀬𑀦𑀸 𑀑𑀮𑁄𑀓𑀦𑀸. ‘‘𑀥𑀫𑁆𑀫𑀸𑀦𑀁’’𑀢𑀺 𑀧𑀜𑁆𑀘𑀓𑁆𑀔𑀦𑁆𑀥 𑀥𑀫𑁆𑀫𑀸𑀦𑀁. ‘‘𑀬𑀢𑁆𑀣 𑀬𑀢𑁆𑀣𑀸’’𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀲𑀭𑀻𑀭𑀗𑁆𑀕𑁂. ‘‘𑀧𑀼𑀭𑀸𑀡 𑀥𑀫𑁆𑀫𑀸𑀦𑀁’’𑀢𑀺 𑀧𑀼𑀭𑀸𑀡𑀸𑀦𑀁 𑀧𑀸𑀢𑀼𑀩𑁆𑀪𑀽𑀢𑀸𑀦𑀁, 𑀯𑀟𑁆𑀠𑀺𑀢𑀸𑀦𑀜𑁆𑀘 𑀥𑀫𑁆𑀫𑀓𑁄𑀝𑁆𑀞𑀸𑀲𑀸𑀦𑀁 𑀅𑀦𑁆𑀢𑀭𑀥𑀸𑀦𑀁 𑀯𑀬𑁄 𑀯𑀼𑀘𑁆𑀘𑀢𑀺. 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁 𑀧𑀢𑁆𑀯𑀸 𑀔𑀡𑀺𑀓𑀯𑀲𑁂𑀦 𑀏𑀓𑁂𑀓𑀥𑀫𑁆𑀫𑀯𑀺𑀪𑀸𑀕𑀯𑀲𑁂𑀦 𑀘 𑀅𑀦𑀼𑀧𑀲𑁆𑀲𑀦𑀸 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀫𑀽𑀳 𑀲𑀦𑁆𑀢𑀢𑀺𑀯𑀲𑁂𑀦 𑀧𑀦𑀸’’𑀢𑀺. 𑀏𑀓𑁂𑀓𑀥𑀫𑁆𑀫𑀯𑀺𑀪𑀸𑀕𑀯𑀲𑁂𑀦 𑀅𑀦𑀼𑀧𑀲𑁆𑀲𑀦𑀸𑀧𑀺 𑀧𑀦 𑀧𑀓𑀢𑀺𑀬𑀸 𑀲𑀼𑀧𑀸𑀓𑀝𑁂𑀲𑀼 𑀘𑀺𑀢𑁆𑀢𑀯𑁂𑀤𑀦𑀸𑀤𑀻𑀲𑀼 𑀇𑀘𑁆𑀙𑀺𑀢𑀩𑁆𑀩𑀸𑀬𑁂𑀯. ‘‘𑀅𑀦𑀺𑀘𑁆𑀘𑀢𑀸𑀬 𑀧𑀭𑀫𑀸𑀓𑁄𑀝𑀻’’𑀢𑀺 𑀢𑀢𑁄 𑀉𑀢𑁆𑀢𑀭𑀺 𑀅𑀦𑀺𑀘𑁆𑀘𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀸𑀦𑀁 𑀢𑀣𑀸 𑀢𑀣𑀸 𑀪𑀸𑀬𑀺𑀢𑀩𑁆𑀩𑀧𑁆𑀧𑀓𑀸𑀭𑁄 𑀦𑀸𑀫 𑀧𑀜𑁆𑀘𑀓𑁆𑀔𑀦𑁆𑀥𑁂 ‘𑀅𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄, 𑀭𑁄𑀕𑀢𑁄, 𑀕𑀡𑁆𑀟𑀢𑁄, 𑀲𑀮𑁆𑀮𑀢𑁄, 𑀅𑀖𑀢𑁄, 𑀆𑀩𑀸𑀥𑀢𑁄, 𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀪𑀸𑀬𑀺𑀢𑀩𑁆𑀩𑀧𑁆𑀧𑀓𑀸𑀭𑁄. 𑀢𑀲𑁆𑀲 𑀲𑀫𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀪𑀬𑀜𑀸𑀡𑀁. 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔 𑀲𑀁𑀲𑀸𑀭 𑀤𑀼𑀓𑁆𑀔𑀪𑀻𑀭𑀼𑀓𑁂𑀳𑀺 𑀚𑀦𑁂𑀳𑀺 𑀪𑀸𑀬𑀺𑀢𑀩𑁆𑀩𑀦𑁆𑀢𑀺 𑀪𑀬𑀁. 𑀢𑁂 𑀯𑀸 𑀪𑀸𑀬𑀦𑁆𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁. 𑀪𑀬𑀲𑁆𑀲 𑀲𑀫𑀦𑀼 𑀧𑀲𑁆𑀲𑀦𑀸𑀜𑀸𑀡𑀁 𑀪𑀬𑀜𑀸𑀡𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀓𑀺𑀜𑁆𑀘𑀺𑀪𑀬𑀯𑀢𑁆𑀣𑀼𑀁’’𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀓𑀁 𑀪𑀬𑀯𑀢𑁆𑀣𑀼𑀁. ‘‘𑀧𑀝𑀺𑀲𑁆𑀲𑀭𑀡𑁂’’𑀢𑀺 𑀕𑀼𑀳𑀸𑀮𑁂𑀡𑀸𑀤𑀺𑀓𑁂 𑀧𑀝𑀺𑀲𑁆𑀲𑀭𑀡𑁂. ‘‘𑀢𑁂𑀲𑀁’’𑀢𑀺 𑀪𑀺𑀚𑁆𑀚𑀦𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁. ‘‘𑀢𑁂𑀳𑀻’’𑀢𑀺 𑀪𑀺𑀚𑁆𑀚𑀦𑀲𑀪𑀸𑀯𑁂𑀳𑀺. 𑀉𑀓𑁆𑀓𑀡𑁆𑀞𑀢𑀸 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀯𑀺𑀭𑀼𑀤𑁆𑀥𑀢𑀸 𑀦𑀺𑀓𑁆𑀔𑀫𑀸𑀪𑀺𑀫𑀼𑀔𑀢𑀸. ‘‘𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀻’’𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 ‘𑀅𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄, 𑀭𑁄𑀕𑀢𑁄, 𑀕𑀡𑁆𑀟𑀢𑁄, 𑀲𑀮𑁆𑀮𑀢𑁄, 𑀅𑀖𑀢𑁄, 𑀆𑀩𑀸𑀥𑀢𑁄, 𑀧𑀭𑀢𑁄, 𑀧𑀮𑁄𑀓𑀢𑁄, 𑀈𑀢𑀺𑀢𑁄,. 𑀉𑀧𑀤𑁆𑀤𑀯𑀢𑁄, 𑀪𑀬𑀢𑁄, 𑀉𑀧𑀲𑀕𑁆𑀕𑀢𑁄, 𑀘𑀮𑀢𑁄, 𑀧𑀪𑀗𑁆𑀕𑀼𑀢𑁄, 𑀅𑀤𑁆𑀥𑀼𑀯𑀢𑁄, 𑀅𑀢𑀸𑀡𑀢𑁄, 𑀅𑀮𑁂𑀡𑀢𑁄, 𑀅𑀲𑁆𑀲𑀭𑀡𑀢𑁄, 𑀭𑀺𑀢𑁆𑀢𑀢𑁄,. 𑀢𑀼𑀘𑁆𑀙𑀢𑁄, 𑀲𑀼𑀜𑁆𑀜𑀢𑁄, 𑀅𑀦𑀢𑁆𑀢𑀢𑁄, 𑀆𑀤𑀻𑀦𑀯𑀢𑁄, 𑀯𑀺𑀧𑀭𑀺𑀡𑀸𑀫 𑀥𑀫𑁆𑀫𑀢𑁄, 𑀅𑀲𑀸𑀭𑀓𑀢𑁄, 𑀅𑀖𑀫𑀽𑀮𑀢𑁄, 𑀯𑀥𑀓𑀢𑁄, 𑀯𑀺𑀪𑀯𑀢𑁄, 𑀲𑀸𑀲𑀯𑀢𑁄,. 𑀲𑀗𑁆𑀔𑀢𑀢𑁄, 𑀫𑀸𑀭𑀸𑀫𑀺𑀲𑀢𑁄, 𑀚𑀸𑀢𑀺𑀥𑀫𑁆𑀫𑀢𑁄, 𑀚𑀭𑀸𑀥𑀫𑁆𑀫𑀢𑁄, 𑀩𑁆𑀬𑀸𑀥𑀺𑀥𑀫𑁆𑀫𑀢𑁄, 𑀫𑀭𑀡𑀥𑀫𑁆𑀫𑀢𑁄, 𑀲𑁄𑀓𑀧𑀭𑀺𑀤𑁂𑀯𑀥𑀫𑁆𑀫𑀢𑁄, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲 𑀥𑀫𑁆𑀫𑀢𑁄, 𑀉𑀧𑀸𑀬𑀸𑀲 𑀥𑀫𑁆𑀫𑀢𑁄, 𑀲𑀁𑀓𑀺𑀮𑁂𑀲𑀺𑀓 𑀥𑀫𑁆𑀫𑀢𑁄, 𑀧𑀲𑁆𑀲𑀦𑁆𑀢𑁄 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀻𑀢𑀺 𑀏𑀯𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑀫𑁄𑀖𑀧𑀜𑁆𑀳𑀦𑀺𑀤𑁆𑀤𑁂𑀲𑁂 𑀆𑀕𑀢𑁂𑀳𑀺 𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀅𑀦𑀺𑀘𑁆𑀘𑀢𑁄’’𑀢𑀺 𑀘 𑀅𑀦𑀺𑀘𑁆𑀘𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸 𑀏𑀯𑀸𑀢𑀺 𑀧𑀲𑁆𑀲𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁 𑀧𑀦 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀻𑀢𑀺. 𑀦𑀺𑀘𑁆𑀘𑀕𑀼𑀡 𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀪𑀽𑀢𑀁 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯𑀦𑀬𑁄. 𑀢𑀢𑁆𑀣 ‘‘𑀅𑀦𑀺𑀘𑁆𑀘𑀸 𑀏𑀯𑀸’’𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀬𑀤𑀸𑀓𑀤𑀸𑀘𑀺 𑀫𑀭𑀡 𑀥𑀫𑁆𑀫𑀢𑁆𑀢𑀸 𑀅𑀦𑀺𑀘𑁆𑀘𑀸 𑀏𑀯. ‘‘𑀤𑀼𑀓𑁆𑀔𑀸 𑀏𑀯𑀸’’𑀢𑀺 𑀅𑀦𑀺𑀘𑁆𑀘 𑀥𑀫𑁆𑀫𑀢𑁆𑀢𑀸𑀬𑁂𑀯 𑀤𑀼𑀓𑁆𑀔𑀸 𑀏𑀯. 𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁𑀢𑀺𑀳𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔 𑀲𑀘𑁆𑀘𑀥𑀫𑁆𑀫𑀢𑁆𑀢𑀸 𑀯𑀸. ‘‘𑀭𑁄𑀕𑀸 𑀏𑀯𑀸’’𑀢𑀺 𑀭𑁄𑀕𑀚𑀸𑀢𑀺𑀓𑀢𑁆𑀢𑀸 𑀭𑁄𑀕𑀸 𑀏𑀯. 𑀬𑁂𑀳𑀺 𑀓𑁂𑀘𑀺 𑀮𑁄𑀓𑁂 𑀘𑀓𑁆𑀔𑀼 𑀭𑁄𑀕𑀸𑀤𑀺𑀓𑀸 𑀅𑀦𑁂𑀓𑀲𑀳𑀲𑁆𑀲𑀸 𑀭𑁄𑀕𑀸 𑀦𑀸𑀫 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀲𑀩𑁆𑀩𑁂𑀢𑁂 𑀇𑀫𑁂𑀧𑀜𑁆𑀘𑀓𑁆𑀔𑀦𑁆𑀥𑀸 𑀏𑀯. 𑀇𑀢𑁄 𑀅𑀜𑁆𑀜𑁄𑀓𑁄𑀘𑀺 𑀭𑁄𑀕𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂 𑀏𑀓𑀦𑁆𑀢𑁂𑀦 𑀭𑁄𑀕𑀚𑀸𑀢𑀺𑀓𑀸 𑀏𑀯𑀸𑀢𑀺. 𑀅𑀧𑀺 𑀘, 𑀤𑀼𑀓𑁆𑀔𑀲𑀘𑁆𑀘 𑀥𑀫𑁆𑀫𑀢𑁆𑀢𑀸𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀘𑀢𑀽𑀳𑀺 𑀤𑀼𑀓𑁆𑀔𑀝𑁆𑀞𑁂𑀳𑀺 𑀘 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑁆𑀧𑀻𑀴𑀦𑀢𑁄 𑀭𑀼𑀚𑁆𑀚𑀦𑀝𑁆𑀞𑁂𑀦 𑀭𑁄𑀕𑀸 𑀏𑀯. 𑀢𑀢𑁆𑀣 ‘‘𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀻’’𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀲𑀗𑁆𑀔𑀸𑀭 𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫 𑀤𑀼𑀓𑁆𑀔𑀢𑀸𑀢𑀺 𑀇𑀫𑀸𑀳𑀺 𑀢𑀻𑀳𑀺𑀤𑀼𑀓𑁆𑀔𑀢𑀸𑀳𑀺. ‘‘𑀘𑀢𑀽𑀳𑀺 𑀤𑀼𑀓𑁆𑀔𑀝𑁆𑀞𑁂𑀳𑀻’’𑀢𑀺 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀡𑀸𑀫𑀝𑁆𑀞𑁄,𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀤𑀼𑀓𑁆𑀔𑀝𑁆𑀞𑁂𑀳𑀺. 𑀤𑀼𑀓𑁆𑀔 𑀓𑀺𑀘𑁆𑀘𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀲𑀦𑀬𑁄 𑀕𑀡𑁆𑀟𑀸𑀤𑀻𑀲𑀼. 𑀢𑀢𑁆𑀣 𑀕𑀡𑁆𑀟𑁄𑀦𑀸𑀫 𑀧𑀻𑀴𑀓𑀸𑀩𑀸𑀥𑁄. 𑀲𑀮𑁆𑀮𑀁 𑀦𑀸𑀫 𑀯𑀺𑀚𑁆𑀛𑀦𑀝𑁆𑀞𑁂𑀦 𑀓𑀺𑀮𑁂𑀲 𑀲𑀮𑁆𑀮𑀜𑁆𑀘 𑀤𑀼𑀓𑁆𑀔𑀲𑀮𑁆𑀮𑀜𑁆𑀘. 𑀅𑀖𑀦𑁆𑀢𑀺 𑀦𑀺𑀭𑀢𑁆𑀣𑀓𑀁. 𑀇𑀫𑁂 𑀘 𑀔𑀦𑁆𑀥𑀸 𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀦𑀺𑀭𑀢𑁆𑀣𑀓𑀸 𑀏𑀯 𑀳𑁄𑀦𑁆𑀢𑀺. 𑀲𑀩𑁆𑀩𑀸𑀲𑀫𑁆𑀧𑀢𑁆𑀢𑀺𑀬𑁄 𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑁂𑀦 𑀧𑀭𑁂 𑀏𑀯. 𑀦 𑀳𑀺 𑀢𑁂 𑀏𑀢𑀁 𑀫𑀫, 𑀏𑀲𑁄 𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀏𑀯𑀁 𑀯𑀺𑀲𑁆𑀲𑀸𑀲𑀁 𑀅𑀭𑀳𑀦𑁆𑀢𑀺. 𑀢𑀣𑀸 𑀯𑀺𑀲𑁆𑀲𑀸𑀲𑀁 𑀓𑀭𑁄𑀦𑁆𑀢𑀲𑁆𑀲 𑀦𑀸𑀦𑀸𑀤𑀼𑀓𑁆𑀔𑁂𑀳𑀺 𑀦𑀺𑀘𑁆𑀘𑀁 𑀯𑀺𑀳𑀺𑀁𑀲𑀦𑀢𑁄. 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀤𑀸𑀓𑀤𑀸𑀘𑀺 𑀧𑀮𑀼𑀚𑁆𑀚𑀦𑀥𑀫𑁆𑀫𑀢𑁆𑀢𑀸 𑀧𑀮𑁄𑀓𑀥𑀫𑁆𑀫𑀸 𑀏𑀯. ‘‘𑀈𑀢𑀻’’𑀢𑀺 𑀅𑀦𑁆𑀢𑀭𑀸𑀬𑁄 𑀯𑀼𑀘𑁆𑀘𑀢𑀺. 𑀔𑀦𑁆𑀥𑀸 𑀅𑀦𑁆𑀢𑀭𑀸𑀬 𑀚𑀸𑀢𑀺𑀓𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀤𑀼𑀢𑀢𑁆𑀢𑀸 𑀯𑀺𑀩𑀸𑀥𑀓𑀢𑁆𑀢𑀸 𑀉𑀧𑀤𑁆𑀤𑀯𑀸 𑀏𑀯. 𑀪𑀸𑀬𑀺𑀢𑀩𑁆𑀩𑀢𑁆𑀢𑀸 𑀪𑀬𑀸 𑀏𑀯. 𑀅𑀦𑀢𑁆𑀢𑀸 𑀏𑀯 𑀲𑀫𑀸𑀦𑀸 𑀅𑀚𑁆𑀛𑀢𑁆𑀢𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀲𑀚𑁆𑀚𑀦𑀢𑁄 𑀮𑀕𑁆𑀕𑀦𑀢𑁄 𑀤𑀼𑀫𑁆𑀫𑁄 𑀘𑀬𑀢𑁄 𑀉𑀧𑀲𑀕𑁆𑀕𑀸 𑀏𑀯. 𑀦𑀺𑀘𑁆𑀘𑀓𑀸𑀮𑀁 𑀮𑁄𑀓𑀥𑀫𑁆𑀫𑁂𑀳𑀺 𑀘𑀮𑀦𑀢𑁆𑀢𑀸 𑀯𑀺𑀧𑁆𑀨𑀦𑁆𑀤𑀦𑀢𑁆𑀢𑀸 𑀘𑀮𑀸𑀏𑀯. 𑀦𑀸𑀦𑀧𑁆𑀧𑀓𑀸𑀭𑁂𑀦 𑀪𑀜𑁆𑀚𑀦𑀥𑀫𑁆𑀫𑀢𑁆𑀢𑀸 𑀧𑀪𑀗𑁆𑀕𑀼𑀦𑁄 𑀏𑀯. 𑀔𑀡𑀫𑀢𑁆𑀢𑀫𑁆𑀧𑀺 𑀅𑀣𑀺𑀭𑀢𑁆𑀢𑀸 𑀅𑀤𑁆𑀥𑀼𑀯𑀸 𑀏𑀯. 𑀚𑀭𑀸𑀫𑀭𑀡𑀸𑀤𑀺𑀢𑁄 𑀅𑀧𑀸𑀬𑀯𑀺𑀦𑀺𑀧𑀢𑀦𑀸𑀤𑀺𑀢𑁄 𑀪𑀬𑀢𑁄 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀢𑀸𑀡𑀁. 𑀢𑁂 𑀘 𑀔𑀦𑁆𑀥𑀸 𑀓𑀲𑁆𑀲𑀘𑀺𑀢𑀸𑀡𑀸 𑀦 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀘 𑀓𑀺𑀜𑁆𑀘𑀺𑀢𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀢𑀸𑀡𑀸 𑀏𑀯. 𑀪𑀬𑀢𑁄 𑀪𑀻𑀭𑀼𑀓𑀸 𑀚𑀦𑀸 𑀮𑀻𑀬𑀦𑁆𑀢𑀺 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑀁. 𑀢𑁂 𑀘 𑀓𑀲𑁆𑀲𑀘𑀺𑀮𑁂𑀡𑀸 𑀦 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀘 𑀓𑀺𑀜𑁆𑀘𑀺𑀮𑁂𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀮𑁂𑀡𑀸 𑀏𑀯. 𑀪𑀬𑀁 𑀲𑀭𑀢𑀺𑀳𑀺𑀁𑀲𑀢𑀻𑀢𑀺 𑀲𑀭𑀡𑀁. 𑀢𑁂 𑀘 𑀓𑀲𑁆𑀲𑀘𑀺𑀲𑀭𑀡𑀁 𑀦 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀘 𑀓𑀺𑀜𑁆𑀘𑀺𑀲𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀲𑁆𑀲𑀭𑀡𑀸 𑀏𑀯. 𑀦𑀺𑀘𑁆𑀘𑀢𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀲𑁄𑀪𑀡𑀕𑀼𑀡𑁂𑀳𑀺 𑀲𑀩𑁆𑀩𑀲𑁄 𑀭𑀳𑀺𑀢𑀢𑁆𑀢𑀸 𑀢𑀼𑀘𑁆𑀙𑀢𑁆𑀢𑀸 𑀲𑀼𑀜𑁆𑀜𑀢𑁆𑀢𑀸𑀭𑀺𑀢𑁆𑀢𑀸 𑀏𑀯. 𑀢𑀼𑀘𑁆𑀙𑀸 𑀏𑀯. 𑀲𑀼𑀜𑁆𑀜𑀸 𑀏𑀯. 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀬𑀲𑁆𑀲𑀓𑀲𑁆𑀲𑀘𑀺 𑀓𑁄𑀘𑀺 𑀲𑀸𑀭𑀪𑀽𑀢𑁄 𑀧𑀝𑀺𑀲𑁆𑀲𑀭𑀡𑁄. 𑀢𑁂 𑀲𑀬𑀜𑁆𑀘 𑀓𑀲𑁆𑀲𑀘𑀺 𑀅𑀢𑁆𑀢𑀸𑀦 𑀳𑁄𑀦𑁆𑀢𑀺. 𑀅𑀢𑁆𑀢𑀦𑁄 𑀘 𑀓𑁄𑀘𑀺 𑀅𑀢𑁆𑀢𑀸𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀦𑀢𑁆𑀢𑀸 𑀏𑀯. 𑀅𑀦𑀺𑀘𑁆𑀘𑀢𑀸𑀤𑀻𑀳𑀺 𑀆𑀤𑀻𑀦𑀯𑁂𑀳𑀺 𑀤𑁄𑀲𑁂𑀳𑀺 𑀲𑀫𑁆𑀧𑀼𑀡𑁆𑀡𑀢𑁆𑀢𑀸 𑀆𑀤𑀻𑀦𑀯𑀸 𑀏𑀯. 𑀯𑀺𑀧𑀭𑀺𑀡𑀸𑀫 𑀲𑀪𑀸𑀯𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀸 𑀏𑀯. 𑀲𑀸𑀭𑀪𑀽𑀢𑀲𑁆𑀲 𑀓𑀲𑁆𑀲𑀘𑀺 𑀅𑀥𑀺𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀸 𑀅𑀲𑀸𑀭𑀸𑀏𑀯. 𑀅𑀖𑀲𑁆𑀲 𑀲𑀩𑁆𑀩𑀦𑀺𑀭𑀢𑁆𑀣𑀓𑀲𑁆𑀲 𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀅𑀖𑀫𑀽𑀮𑀸 𑀏𑀯. 𑀢𑁂 𑀲𑀬𑀁 𑀫𑀭𑀡 𑀥𑀫𑁆𑀫𑀲𑀫𑀗𑁆𑀕𑀻𑀦𑁄 𑀳𑀼𑀢𑁆𑀯𑀸 𑀢𑁂𑀦 𑀫𑀭𑀡𑀲𑀢𑁆𑀣𑁂𑀦 𑀫𑀭𑀡𑀸𑀯𑀼𑀥𑁂𑀦 𑀲𑀁𑀲𑀸𑀭𑁂 𑀲𑀢𑁆𑀢𑀸𑀦𑀁 𑀦𑀺𑀘𑁆𑀘𑀁 𑀫𑀸𑀭𑀓𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀢𑁆𑀢𑀸 𑀯𑀥𑀓𑀸 𑀏𑀯. 𑀦𑀺𑀘𑁆𑀘𑀲𑀼𑀔𑀳𑀺𑀢 𑀯𑀼𑀟𑁆𑀠𑀺𑀯𑀺𑀕𑀢𑀢𑁆𑀢𑀸 𑀯𑀺𑀪𑀯𑀸 𑀏𑀯. 𑀆𑀲𑀯𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀸𑀲𑀯𑀸 𑀏𑀯. 𑀦𑀺𑀘𑁆𑀘𑀓𑀸𑀮𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀢𑁆𑀢𑀸 𑀲𑀗𑁆𑀔𑀢𑀸 𑀏𑀯. 𑀓𑀺𑀮𑁂𑀲𑀫𑀸𑀭𑀫𑀘𑁆𑀘𑀼𑀫𑀸𑀭𑀸𑀦𑀁 𑀆𑀫𑀺𑀲𑀸𑀳𑀸𑀭𑀢𑁆𑀢𑀸 𑀫𑀸𑀭𑀸𑀫𑀺𑀲𑀸 𑀏𑀯. 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀲𑀢𑁄 𑀘𑀓𑁆𑀔𑀼𑀭𑁄𑀕𑀸𑀤𑀺𑀪𑀸𑀯𑁂𑀦 𑀅𑀧𑀸𑀬𑀪𑀯𑀸𑀤𑀺𑀪𑀸𑀯𑁂𑀦 𑀚𑀸𑀢𑀲𑀪𑀸𑀯𑀢𑁆𑀢𑀸 𑀚𑀸𑀢𑀺𑀥𑀫𑁆𑀫𑀸 𑀏𑀯. 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀲𑀢𑁄 𑀳𑀸𑀬𑀦𑀫𑀭𑀡𑀲𑀪𑀸𑀯𑀢𑁆𑀢𑀸 𑀚𑀭𑀸𑀫𑀭𑀡 𑀥𑀫𑁆𑀫𑀸 𑀏𑀯. 𑀲𑁄𑀓𑀸𑀤𑀻𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀥𑀸𑀭𑀡𑀢𑁆𑀢𑀸 𑀲𑁄𑀓𑀸𑀤𑀺 𑀥𑀫𑁆𑀫𑀸 𑀏𑀯. 𑀢𑀡𑁆𑀳𑀸 𑀲𑀁𑀓𑀺𑀮𑁂𑀲 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲 𑀤𑀼𑀘𑁆𑀘𑀭𑀺𑀢 𑀲𑀁𑀓𑀺𑀮𑁂𑀲𑁂𑀳𑀺 𑀦𑀺𑀬𑀼𑀢𑁆𑀢𑀢𑁆𑀢𑀸 𑀲𑀁𑀓𑀺𑀮𑁂𑀲𑀺𑀓 𑀥𑀫𑁆𑀫𑀸 𑀏𑀯𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀻’’𑀢𑀺. ‘‘𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑀸’’𑀢𑀺 𑀧𑀭𑀺𑀯𑀻𑀫𑀁𑀲𑀦𑀯𑀲𑁂𑀦.‘‘𑀦𑀺𑀓𑀦𑁆𑀢𑀺𑀬𑀸’’𑀢𑀺 𑀦𑀺𑀓𑀦𑁆𑀢𑀺𑀢𑀡𑁆𑀳𑀸𑀬. ‘‘𑀧𑀭𑀺𑀬𑀸𑀤𑀺𑀦𑁆𑀦𑀸𑀬𑀸’’𑀢𑀺 𑀲𑀼𑀓𑁆𑀔𑀪𑀸𑀯𑀧𑀢𑁆𑀢𑀸𑀬. ‘‘𑀪𑀬𑀜𑁆𑀘𑀸’’𑀢𑀺 𑀪𑀬𑀜𑀸𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀑𑀢𑁆𑀢𑀧𑁆𑀧𑀪𑀬𑀜𑁆𑀘.

𑀮𑁄𑀓𑁂 𑀅𑀢𑁆𑀢𑀚𑀻𑀯𑀸 𑀦𑀸𑀫 𑀲𑀢𑁆𑀢𑀸𑀦𑀁 𑀅𑀚𑁆𑀛𑀢𑁆𑀢 𑀥𑀫𑁆𑀫𑁂𑀲𑀼 𑀲𑀸𑀭𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀯𑀺𑀕𑀢𑁂𑀲𑀼 𑀲𑁂𑀲𑀥𑀫𑁆𑀫𑀸 𑀦𑀺𑀲𑁆𑀲𑀢𑁆𑀢 𑀦𑀺𑀚𑁆𑀚𑀻𑀯𑀪𑀸𑀯𑀁 𑀧𑀢𑁆𑀯𑀸 𑀨𑁂𑀕𑁆𑀕𑀼𑀪𑀽𑀢𑀸 𑀓𑀘𑀯𑀭𑀪𑀽𑀢𑀸𑀢𑀺 𑀮𑁄𑀓𑀲𑁆𑀲 𑀅𑀪𑀺𑀫𑀸𑀦𑁄. 𑀢𑁂 𑀘 𑀅𑀢𑁆𑀢𑀚𑀻𑀯𑀸 𑀦𑀸𑀫 𑀲𑀩𑁆𑀩𑀲𑁄 𑀦𑀢𑁆𑀣𑀻𑀢𑀺 𑀤𑀺𑀝𑁆𑀞𑁂 𑀔𑀦𑁆𑀥𑁂𑀲𑀼 𑀓𑀘𑀯𑀭𑀪𑀸𑀯𑀤𑀲𑁆𑀲𑀦𑀁 𑀅𑀢𑁆𑀢𑀚𑀻𑀯 𑀲𑀼𑀜𑁆𑀜𑀢𑀸 𑀤𑀲𑁆𑀲𑀦𑀁 𑀦𑀸𑀫. ‘‘𑀯𑀺𑀫𑀼𑀘𑁆𑀘𑀫𑀸𑀦𑁄’’𑀢𑀺 𑀏𑀢𑁂𑀦 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑁄𑀓𑁆𑀔𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀫𑀼𑀘𑁆𑀘𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀺𑀫𑁄𑀓𑁆𑀔𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀦𑀺𑀫𑀺𑀢𑁆𑀢𑀸𑀦𑀻’’𑀢𑀺 𑀯𑀺𑀧𑀮𑁆𑀮𑀸𑀲𑀥𑀫𑁆𑀫𑁂𑀳𑀺 𑀦𑀺𑀫𑁆𑀫𑀺𑀢𑀸𑀦𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢 𑀲𑀼𑀔𑀦𑀺𑀫𑀺𑀢𑁆𑀢 𑀅𑀢𑁆𑀢𑀦𑀺𑀫𑀺𑀢𑁆𑀢 𑀚𑀻𑀯𑀦𑀺𑀫𑀺𑀢𑁆𑀢𑀸𑀦𑀺. 𑀲𑀢𑁆𑀢 𑀧𑀼𑀕𑁆𑀕𑀮 𑀇𑀢𑁆𑀣𑀺 𑀧𑀼𑀭𑀺𑀲 𑀳𑀢𑁆𑀣 𑀧𑀸𑀤 𑀲𑀻𑀲 𑀕𑀻𑀯𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀘. 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓 𑀥𑀫𑁆𑀫𑀢𑁆𑀢𑀸 𑀅𑀦𑀺𑀘𑁆𑀘𑀸𑀦𑀁𑀬𑁂𑀯 𑀲𑀢𑀁 𑀲𑀦𑁆𑀢𑀢𑀺 𑀖𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀳𑀺𑀬𑁆𑀬𑁄𑀧𑀺 𑀲𑁄 𑀏𑀯, 𑀅𑀚𑁆𑀚𑀧𑀺 𑀲𑁄 𑀏𑀯𑀸𑀢𑀺𑀆𑀤𑀺𑀦𑀸 𑀦𑀺𑀘𑁆𑀘𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀓𑀺𑀮𑁂𑀲𑀫𑀮𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀲𑀼𑀪𑀸𑀦𑀁𑀬𑁂𑀯 𑀲𑀢𑀁 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀇𑀤𑀁 𑀇𑀝𑁆𑀞𑀁, 𑀓𑀦𑁆𑀢𑀁, 𑀫𑀦𑀸𑀧𑀁, 𑀧𑀺𑀬𑀭𑀽𑀧, 𑀦𑁆𑀢𑀺𑀆𑀤𑀺𑀦𑀸 𑀲𑀼𑀪𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀁 𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀪𑀬𑀝𑁆𑀞𑁂𑀦 𑀅𑀔𑁂𑀫𑀝𑁆𑀞𑁂𑀦 𑀤𑀼𑀓𑁆𑀔𑀸𑀦𑀁𑀧𑀺 𑀲𑀢𑀁 𑀢𑀸𑀬𑁂𑀯 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀇𑀤𑀁 𑀲𑀼𑀔𑀁, 𑀦𑀺𑀩𑁆𑀪𑀬𑀁, 𑀔𑁂𑀫𑀁, 𑀲𑀸𑀢𑀭𑀽𑀧, 𑀦𑁆𑀢𑀺𑀆𑀤𑀺𑀦𑀸 𑀲𑀼𑀔𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀁 𑀲𑀼𑀔𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀧𑀘𑁆𑀘𑀬𑀸 𑀬𑀢𑁆𑀢𑀯𑀼𑀢𑁆𑀢𑀺𑀓𑀢𑁆𑀢𑀸 𑀧𑀘𑁆𑀘𑀬𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀯𑀲𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀪𑀸𑀯𑀢𑁄 𑀅𑀦𑀢𑁆𑀢𑀸𑀦𑀁𑀬𑁂𑀯 𑀲𑀢𑀁 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦 𑀓𑀭𑁄𑀢𑀺, 𑀓𑀣𑁂𑀢𑀺, 𑀘𑀺𑀦𑁆𑀢𑁂𑀢𑀺, 𑀕𑀦𑁆𑀢𑀼𑀁 𑀇𑀘𑁆𑀙𑀦𑁆𑀢𑁄 𑀕𑀘𑁆𑀙𑀢𑀺, 𑀞𑀸𑀢𑀼𑀁 𑀇𑀘𑁆𑀙𑀦𑁆𑀢𑁄 𑀢𑀺𑀝𑁆𑀞𑀢𑀻, 𑀢𑀺𑀆𑀤𑀺𑀦𑀸 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀁 𑀅𑀢𑁆𑀢𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀢𑀣𑀸 𑀲𑀢𑁆𑀢𑁄𑀦𑀸𑀫 𑀲𑀢𑁆𑀢𑀸𑀳𑀁𑀧𑀺 𑀚𑀻𑀯𑀢𑀺, 𑀫𑀸𑀲𑀁𑀧𑀺 𑀚𑀻𑀯𑀢𑀺, 𑀲𑀁𑀯𑀘𑁆𑀙𑀭𑀁𑀧𑀺 𑀚𑀻𑀯𑀢𑀻𑀢𑀺𑀆𑀤𑀺𑀦𑀸 𑀚𑀻𑀯𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀁 𑀚𑀻𑀯𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀦𑀦𑀼 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦 𑀓𑀭𑁄𑀢𑀻𑀢𑀺𑀆𑀤𑀻𑀲𑀼 𑀇𑀘𑁆𑀙𑀸𑀦𑀸𑀫 𑀢𑀡𑁆𑀳𑀸𑀯𑀸𑀙𑀦𑁆𑀤𑁄 𑀯𑀸. 𑀢𑀤𑀼𑀪𑀬𑀫𑁆𑀧𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁. 𑀓𑀭𑀡𑀜𑁆𑀘 𑀦𑀸𑀫 𑀓𑀸𑀬𑀺𑀓𑀓𑁆𑀭𑀺𑀬𑀸𑀪𑀽𑀢𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀓𑀮𑀸𑀧𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑁄. 𑀏𑀯𑀜𑁆𑀘𑀲𑀢𑀺 𑀢𑁂𑀲𑀁 𑀘𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦 𑀓𑀭𑁄𑀢𑀻𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑀯𑀺𑀭𑀼𑀤𑁆𑀥𑀁 𑀦 𑀳𑁄𑀢𑀻𑀢𑀺. 𑀦 𑀦 𑀳𑁄𑀢𑀺. 𑀅𑀢𑁆𑀢𑀦𑁄𑀢𑀺 𑀘 𑀓𑀭𑁄𑀢𑀻𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. 𑀦 𑀳𑀺 𑀅𑀢𑁆𑀢𑀸𑀦𑀸𑀫 𑀅𑀢𑁆𑀣𑀺, 𑀬𑁄 𑀅𑀢𑁆𑀢𑀦𑁄𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀦 𑀘 𑀓𑀢𑁆𑀢𑀸𑀦𑀸𑀫 𑀅𑀢𑁆𑀣𑀺, 𑀬𑁄 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀇𑀥 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀯𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀫𑁂𑀯 𑀅𑀢𑁆𑀢𑀸𑀢𑀺 𑀘 𑀓𑀢𑁆𑀢𑀸𑀢𑀺 𑀘 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄𑀢𑀺 𑀘 𑀓𑀭𑁄𑀢𑀻𑀢𑀺 𑀘 𑀯𑀼𑀢𑁆𑀢𑀁. ‘‘𑀅𑀯𑀲𑁆𑀲𑀬𑁄 𑀳𑁄𑀢𑀻’’𑀢𑀺 𑀧𑀢𑀺𑀝𑁆𑀞𑀸 𑀳𑁄𑀢𑀺. ‘‘𑀯𑀺𑀥𑀫𑀺𑀢𑁆𑀯𑀸’’𑀢𑀺 𑀜𑀸𑀡𑁂𑀦 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸. 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀜𑀸𑀡𑁂𑀦 𑀯𑀺𑀦𑀺𑀘𑁆𑀙𑀬𑀁 𑀧𑀸𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀯𑀤𑀲𑁆𑀲𑀦𑀁 𑀦𑀸𑀫 𑀲𑁄𑀓𑀤𑀼𑀓𑁆𑀔𑀸𑀤𑀻𑀦𑀁 𑀅𑀪𑀸𑀯𑀤𑀲𑁆𑀲𑀦𑀁.

‘‘𑀢𑀁 𑀢𑀁 𑀖𑀦𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑀯𑀲𑁂𑀦𑀸’’𑀢𑀺 𑀲𑀫𑀽𑀳𑀲𑀦𑁆𑀢𑀢𑀺 𑀖𑀦𑀸𑀤𑀻𑀦𑀁 𑀪𑀺𑀦𑁆𑀤𑀦 𑀙𑀺𑀦𑁆𑀤𑀦𑀯𑀲𑁂𑀦. 𑀢𑀢𑁆𑀣 𑀲𑀫𑀽𑀳𑀖𑀦𑀪𑀺𑀦𑁆𑀤𑀦𑀁 𑀆𑀤𑀺𑀢𑁄 𑀥𑀫𑁆𑀫𑀯𑀯𑀢𑁆𑀣𑀸𑀦𑀜𑀸𑀡𑀓𑀺𑀘𑁆𑀘𑀁. 𑀢𑀤𑀸 𑀅𑀢𑁆𑀢𑀤𑀺𑀝𑁆𑀞𑀺 𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀢𑀺. 𑀚𑀻𑀯𑀤𑀺𑀝𑁆𑀞𑀺 𑀘 𑀦𑀸𑀫 𑀲𑀼𑀔𑀼𑀫𑀢𑀭𑀸 𑀅𑀢𑁆𑀢𑀤𑀺𑀝𑁆𑀞𑀺 𑀏𑀯 𑀯𑀼𑀘𑁆𑀘𑀢𑀺. 𑀫𑀕𑁆𑀕𑀓𑁆𑀔𑀡𑀁 𑀧𑀢𑁆𑀯𑀸 𑀏𑀯 𑀢𑀤𑀼𑀪𑀬𑀁𑀧𑀺 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀡𑀺𑀳𑀺𑀢𑀕𑀼𑀡𑀲𑁆𑀲𑀸’’𑀢𑀺 𑀧𑀢𑁆𑀣𑀺𑀢𑀕𑀼𑀡𑀲𑁆𑀲.

‘‘𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀢𑁆𑀣 ‘‘𑀧𑀢𑀻’’𑀢𑀺 𑀚𑁂𑀝𑁆𑀞𑀓𑁄 𑀯𑀼𑀘𑁆𑀘𑀢𑀺. ‘‘𑀫𑀼𑀔𑀁’’𑀢𑀺 𑀫𑀽𑀮𑀓𑀸𑀭𑀡𑀁. 𑀧𑀢𑀺 𑀘 𑀲𑁄 𑀫𑀼𑀔𑀜𑁆𑀘𑀸𑀢𑀺 𑀧𑀢𑀺𑀫𑀼𑀔𑀁. 𑀧𑀢𑀺𑀫𑀼𑀔𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀮𑁄𑀓𑀺𑀬𑀲𑀻𑀮𑀸𑀦𑀺 𑀦𑀸𑀫 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀺. 𑀢𑁂𑀲𑀁 𑀫𑀚𑁆𑀛𑁂. ‘‘𑀚𑁂𑀝𑁆𑀞𑀓𑀢𑁆𑀢𑀸’’𑀢𑀺 𑀚𑁂𑀝𑁆𑀞𑀓𑀲𑀻𑀮𑀢𑁆𑀢𑀸. ‘‘𑀢𑀫𑁂𑀯𑀸’’𑀢𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀻𑀮𑀫𑁂𑀯 +. ‘‘𑀬𑁂𑀲𑀁 𑀥𑀫𑁆𑀫𑀸𑀦𑀁’’𑀢𑀺 𑀉𑀤𑁆𑀥𑀘𑁆𑀘 𑀫𑀼𑀝𑁆𑀞𑀲𑁆𑀲𑀘𑁆𑀘𑀸𑀤𑀺 𑀥𑀫𑁆𑀫𑀸𑀦𑀁. ‘‘𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀦𑀸𑀫𑀸’’𑀢𑀺 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀮𑁄𑀮𑀸𑀦𑀺 𑀦𑀸𑀫𑀸’’𑀢𑀺. ‘‘𑀢𑀤𑀦𑀼𑀩𑀦𑁆𑀥𑀸’’𑀢𑀺 𑀢𑀸𑀦𑀺𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀼𑀕𑀢𑀸. ‘‘𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑁂𑀳𑀻’’𑀢𑀺 𑀩𑀼𑀤𑁆𑀥𑁂𑀦𑀪𑀕𑀯𑀢𑀸 𑀧𑀝𑀺𑀓𑁆𑀓𑁄𑀲𑀺𑀢𑁂𑀳𑀺 𑀦𑀻𑀯𑀸𑀭𑀺𑀢𑁂𑀳𑀺. ‘‘𑀫𑀺𑀘𑁆𑀙𑀸𑀧𑀬𑁄𑀕𑁂𑀳𑀻’’𑀢𑀺 𑀅𑀝𑁆𑀞𑀓𑀼𑀮𑀤𑀽𑀲𑀦𑀓𑀫𑁆𑀫𑁂𑀳𑀺 𑀘𑁂𑀯 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀓𑀫𑁆𑀫𑁂𑀳𑀺 𑀘. ‘‘𑀢𑀺𑀯𑀺𑀥𑀓𑀼𑀳𑀦𑀯𑀢𑁆𑀣𑀽𑀳𑀻’’𑀢𑀺 𑀧𑀘𑁆𑀘𑀬𑀧𑁆𑀧𑀝𑀺𑀲𑁂𑀯𑀦𑀜𑁆𑀘, 𑀲𑀸𑀫𑀦𑁆𑀢𑀚𑀧𑁆𑀧𑀦𑀜𑁆𑀘, 𑀇𑀭𑀺𑀬𑀸 𑀧𑀣 𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘𑀸𑀢𑀺 𑀇𑀫𑁂𑀳𑀺 𑀢𑀺𑀯𑀺𑀥𑁂𑀳𑀺 𑀓𑀼𑀳𑀦𑀯𑀢𑁆𑀣𑀽𑀳𑀺. 𑀢𑀺𑀯𑀺𑀥𑁂𑀳𑀺 𑀅𑀘𑁆𑀙𑀭𑀺𑀬 𑀓𑀫𑁆𑀫𑀯𑀺𑀥𑀸𑀦𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀲𑀼𑀚𑁆𑀛𑀢𑀻𑀢𑀺 𑀧𑀭𑀺𑀲𑀼𑀤𑁆𑀥𑀺. 𑀧𑀭𑀺𑀲𑀼𑀤𑁆𑀥𑀺 𑀏𑀯 𑀧𑀸𑀭𑀺𑀲𑀼𑀤𑁆𑀥𑀺. ‘‘𑀲𑀫𑁆𑀫𑁄𑀳𑀲𑁆𑀲𑀸’’𑀢𑀺 𑀥𑀸𑀢𑀼𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀲𑀫𑁆𑀫𑀼𑀬𑁆𑀳𑀦𑀲𑁆𑀲. ‘‘𑀕𑁂𑀥𑀲𑁆𑀲𑀸’’𑀢𑀺 𑀲𑀫𑁆𑀫𑁄𑀳𑀢𑁆𑀢𑀸𑀬𑁂𑀯 𑀧𑀘𑁆𑀘𑀬𑁂𑀲𑀼 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸 𑀓𑀲𑁆𑀲𑀯𑀺𑀬 𑀕𑁂𑀥𑀲𑁆𑀲, 𑀅𑀪𑀺𑀓𑀗𑁆𑀔𑀲𑁆𑀲. ‘‘𑀫𑀤𑀲𑁆𑀲𑀸’’𑀢𑀺 𑀮𑀸𑀪𑀲𑀓𑁆𑀓𑀸𑀭𑀸 𑀤𑀺𑀫𑀽𑀮𑀓𑀲𑁆𑀲 𑀫𑀸𑀦𑀫𑀤𑀲𑁆𑀲. ‘‘𑀧𑀫𑀸𑀤𑀲𑁆𑀲𑀸’’𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀧𑀫𑀸𑀤𑀲𑁆𑀲 𑀫𑀼𑀝𑁆𑀞𑀲𑁆𑀲𑀘𑁆𑀘𑀲𑁆𑀲. 𑀢𑀁 𑀢𑀁 𑀧𑀬𑁄𑀚𑀦 𑀫𑀭𑀺𑀬𑀸𑀤𑁄 𑀦𑀸𑀫 𑀘𑀻𑀯𑀭𑀧𑀘𑁆𑀘𑀬𑁂 𑀢𑀸𑀯 𑀲𑀻𑀢𑀧𑁆𑀧𑀝𑀺𑀖𑀸𑀢𑀸𑀤𑀺𑀓𑁄 𑀧𑀬𑁄𑀚𑀦𑀫𑀭𑀺𑀬𑀸𑀤𑁄. ‘‘𑀫𑀭𑀺𑀬𑀸𑀤𑁄’’𑀢𑀺 𑀘 𑀬𑀸𑀯𑀤𑁂𑀯𑀸𑀢𑀺 𑀧𑀤𑁂𑀦 𑀤𑀲𑁆𑀲𑀺𑀢𑁄 𑀲𑀻𑀢𑀧𑁆𑀧𑀝𑀺𑀖𑀸𑀢𑀸𑀤𑀺𑀓𑁄 𑀘𑀻𑀯𑀭𑀧𑁆𑀧𑀬𑁄𑀚𑀦 𑀧𑀭𑀺𑀘𑁆𑀙𑁂𑀤𑁄. 𑀲𑁄 𑀘 𑀘𑀻𑀯𑀭𑀧𑀘𑁆𑀘𑀬𑁂 𑀲𑀫𑁆𑀫𑁄𑀳𑀸𑀤𑀺𑀓𑁂 𑀲𑀸𑀯𑀚𑁆𑀚𑀧𑀓𑁆𑀔𑁂 𑀅𑀧𑀢𑀦𑀢𑁆𑀣𑀸𑀬 𑀞𑀧𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑁆𑀫𑁄𑀳𑀲𑁆𑀲 𑀕𑁂𑀥𑀲𑁆𑀲 𑀫𑀤𑀲𑁆𑀲 𑀧𑀫𑀸𑀤𑀲𑁆𑀲 𑀧𑀳𑀸𑀦𑀢𑁆𑀣𑀁’’𑀢𑀺. 𑀏𑀲𑀦𑀬𑁄 𑀧𑀺𑀡𑁆𑀟𑀧𑀸𑀢𑀧𑀘𑁆𑀘𑀬𑀸𑀤𑀻𑀲𑀼𑀧𑀺. 𑀏𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑀸𑀧𑀸𑀞𑁂𑀲𑀼 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬𑀸𑀢𑀺𑀆𑀤𑀻𑀲𑀼 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀧𑀝𑀺𑀲𑁂𑀯𑀢𑀺. 𑀦 𑀢𑀢𑁄 𑀉𑀢𑁆𑀢𑀭𑀺 𑀲𑀫𑁆𑀫𑁄𑀳𑀢𑁆𑀣𑀸𑀬 𑀕𑁂𑀥𑀢𑁆𑀣𑀸𑀬 𑀫𑀤𑀢𑁆𑀣𑀸𑀬 𑀧𑀫𑀸𑀤𑀢𑁆𑀣𑀸𑀬 𑀧𑀝𑀺𑀲𑁂𑀯𑀢𑀻𑀢𑀺𑀆𑀤𑀺. 𑀏𑀯𑀜𑁆𑀘𑀲𑀢𑀺, 𑀬𑀁 𑀘𑀻𑀯𑀭𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀲𑀫𑁆𑀫𑁄𑀳𑀕𑁂𑀥𑀫𑀤𑀧𑁆𑀧𑀫𑀸𑀤𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀇𑀢𑀭𑀁 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺.

‘‘𑀧𑀘𑁆𑀘𑀢𑁆𑀢𑀲𑀪𑀸𑀯𑁄’’𑀢𑀺 𑀧𑀘𑁆𑀘𑁂𑀓𑀲𑀪𑀸𑀯𑁄. ‘‘𑀓𑀸𑀭𑀺𑀬𑀲𑀗𑁆𑀔𑀸𑀢𑀁’’𑀢𑀺 𑀓𑀸𑀢𑀩𑁆𑀩𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀦𑁆𑀢𑀺 𑀓𑀸𑀭𑀺𑀬𑀁. 𑀆𑀲𑀦𑁆𑀦𑀧𑁆𑀨𑀮𑀁. 𑀢𑁂𑀦𑀸𑀳 ‘‘𑀅𑀕𑁆𑀕𑀺𑀲𑁆𑀲𑀥𑀽𑀫𑁄𑀯𑀺𑀬𑀸’’𑀢𑀺. 𑀆𑀲𑀦𑁆𑀦𑀓𑀸𑀭𑀡𑀁 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀅𑀕𑁆𑀕𑀺𑀓𑀸𑀭𑀓𑁄 𑀯𑀺𑀬. 𑀧𑀚𑁆𑀚𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀧𑀤𑀁. 𑀢𑀺𑀝𑁆𑀞𑀢𑀺 𑀨𑀮𑀁 𑀏𑀢𑁆𑀣𑀸𑀢𑀺 𑀞𑀸𑀦𑀁. 𑀉𑀪𑀬𑀁𑀧𑀺 𑀓𑀸𑀭𑀡 𑀧𑀭𑀺𑀬𑀸𑀬𑁄 𑀏𑀯. 𑀢𑁂𑀦 𑀅𑀢𑀺𑀲𑁆𑀲𑀬𑀢𑁆𑀣𑁄𑀧𑀺 𑀲𑀺𑀚𑁆𑀛𑀢𑀻𑀢𑀺 𑀆𑀳 ‘‘𑀆𑀲𑀦𑁆𑀦𑀓𑀸𑀭𑀡𑀁’’𑀢𑀺. ‘‘𑀲𑀤𑁆𑀥𑀺𑀁 𑀲𑀜𑁆𑀜𑀸 𑀘𑀺𑀢𑁆𑀢 𑀯𑀺𑀧𑀮𑁆𑀮𑀸𑀲𑁂𑀳𑀻’’𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸 𑀧𑀦 𑀲𑀜𑁆𑀜𑀸 𑀘𑀺𑀢𑁆𑀢 𑀯𑀺𑀧𑀮𑁆𑀮𑀸𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. ‘‘𑀲𑀸𑀲𑀦 𑀥𑀫𑁆𑀫𑁂’’𑀢𑀺 𑀅𑀦𑀢𑁆𑀢𑀮𑀓𑁆𑀔𑀡 𑀲𑀼𑀢𑁆𑀢𑀦𑁆𑀢𑀸𑀤𑀺𑀓𑁂 𑀲𑀼𑀜𑁆𑀜𑀢 𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂 𑀤𑁂𑀲𑀦𑀸𑀥𑀫𑁆𑀫𑁂. ‘‘𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀯𑀺𑀓𑁆𑀔𑀫𑁆𑀪𑀺𑀢𑁄’’𑀢𑀺 𑀢𑀸𑀤𑀺𑀲𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀤𑁂𑀲𑀓𑁂 𑀲𑀢𑁆𑀣𑀭𑀺 𑀘 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀘 𑀲𑀤𑁆𑀥𑀁 𑀧𑀝𑀺𑀮𑀪𑀺𑀢𑁆𑀯𑀸 𑀲𑀘𑁆𑀘𑀫𑁂𑀯 𑀪𑀕𑀯𑀸 𑀆𑀳, 𑀅𑀳𑀁 𑀧𑀦 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸,𑀢𑀺 𑀕𑀡𑁆𑀳𑀸𑀫𑀺, 𑀫𑀺𑀘𑁆𑀙𑀸𑀯𑀢𑀸𑀬𑀁 𑀫𑀫𑀕𑀸𑀳𑁄𑀢𑀺 𑀏𑀯𑀁 𑀯𑀺𑀓𑁆𑀔𑀫𑁆𑀪𑀺𑀢𑁄 𑀳𑁄𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀯𑀤𑀦𑁆𑀢𑁄𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀦 𑀯𑀤𑀢𑀺. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀏𑀯 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀫𑁆𑀧𑀦 𑀤𑀴𑁆𑀳𑀕𑁆𑀕𑀸𑀳 𑀯𑀺𑀓𑁆𑀔𑀫𑁆𑀪𑀦𑀫𑀢𑁆𑀢𑀁 𑀏𑀯. 𑀦 𑀅𑀢𑁆𑀢𑀤𑀲𑁆𑀲𑀦 𑀯𑀺𑀓𑁆𑀔𑀫𑁆𑀪𑀦𑀁. 𑀢𑀁 𑀧𑀦 𑀥𑀫𑁆𑀫𑀯𑀯𑀢𑁆𑀣𑀸𑀦𑀜𑁆𑀜𑀸𑀡𑁂 𑀲𑀺𑀤𑁆𑀥𑁂 𑀏𑀯 𑀲𑀺𑀚𑁆𑀛𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀯𑀲𑁂𑀦 𑀘𑀢𑀼𑀥𑀸 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀫𑁂𑀯. 𑀓𑀲𑁆𑀫𑀸, 𑀘𑀢𑁆𑀢𑀸𑀭𑁄 𑀆𑀳𑀸𑀭𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑁂𑀲𑁆𑀯𑁂𑀯 𑀮𑀓𑁆𑀔𑀡𑀢𑁆𑀢𑀬𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀅𑀦𑁆𑀢𑁂 𑀮𑁄𑀓𑀼𑀢𑁆𑀢𑀭𑀜𑁆𑀜𑀸𑀡𑀤𑀲𑁆𑀲𑀦𑀧𑁆𑀧𑀝𑀺𑀮𑀸𑀪𑀓𑀺𑀘𑁆𑀘𑀲𑁆𑀲 𑀲𑀺𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀘𑀥𑀸𑀢𑀺𑀆𑀤𑀻𑀲𑀼 𑀏𑀲𑀦𑀬𑁄. 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀯𑀺𑀲𑀬𑁄, 𑀯𑀺𑀲𑀼𑀁 𑀯𑀺𑀲𑀼𑀁 𑀮𑀓𑁆𑀔𑀡 𑀭𑀲𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀧𑀭𑀺𑀕𑁆𑀕𑀳𑀡𑁂 𑀲𑀓𑁆𑀓𑁄𑀦𑁆𑀢𑀲𑁆𑀲𑀧𑀺 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀲𑁆𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘. 𑀢𑀣𑀸𑀳𑀺 𑀯𑀓𑁆𑀔𑀢𑀺 ‘‘𑀓𑀮𑀸𑀧𑀯𑀲𑁂𑀦 𑀲𑀁𑀔𑀺𑀧𑀺𑀢𑁆𑀯𑀸’’𑀢𑀺. ‘‘𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀻’’𑀢𑀺 𑀅𑀢𑁆𑀢𑀚𑀻𑀯𑀸𑀤𑀺𑀓𑀲𑁆𑀲. 𑀲𑁄 𑀓𑀭𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁. 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀪𑀯𑀦𑁆𑀢𑀭𑀁 𑀧𑀢𑁆𑀯𑀸 𑀢𑀩𑁆𑀩𑀺𑀧𑀸𑀓𑀁. 𑀲𑀁𑀲𑀭𑀢𑀺 𑀪𑀯𑀢𑁄 𑀪𑀯𑀁. 𑀲𑀦𑁆𑀥𑀸𑀯𑀢𑀺 𑀓𑀫𑁆𑀫𑀯𑁂𑀕𑁂𑀦 𑀔𑀺𑀢𑁆𑀢𑁄. 𑀲𑀼𑀤𑁆𑀥𑁂 𑀦𑀸𑀫𑁂 𑀏𑀯 𑀯𑀸 𑀭𑀽𑀧𑁂 𑀏𑀯 𑀯𑀸 𑀈𑀳𑀸𑀩𑁆𑀬𑀸𑀧𑀸𑀭𑀸𑀦𑀁 𑀅𑀪𑀸𑀯𑀤𑀲𑁆𑀲𑀦𑀢𑁄𑀢𑀺 𑀬𑁄𑀚𑀦𑀸. 𑀧𑀼𑀕𑁆𑀕𑀮𑀲𑀢𑁆𑀢𑀸𑀦𑀁 𑀓𑁆𑀭𑀺𑀬𑀸𑀬𑁄𑀢𑀺 𑀲𑀜𑁆𑀜𑀺𑀢𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀻’’𑀢𑀺 𑀓𑀸𑀭𑀓 𑀤𑀺𑀝𑁆𑀞𑀺. ‘‘𑀢𑀤𑀢𑁆𑀣𑀸 𑀪𑀺𑀦𑀺𑀯𑁂𑀲𑀯𑀲𑁂𑀦𑀸’’𑀢𑀺 𑀲𑀢𑁆𑀢𑁄, 𑀧𑀼𑀕𑁆𑀕𑀮𑁄, 𑀢𑀺𑀆𑀤𑀺 𑀯𑁄𑀳𑀸𑀭𑀲𑁆𑀲 𑀲𑀩𑁆𑀪𑀸𑀯𑀢𑁄 𑀢𑀲𑁆𑀲 𑀅𑀢𑁆𑀣𑀪𑀽𑀢𑁄 𑀲𑀢𑁆𑀢𑀧𑀼𑀕𑁆𑀕𑀮𑀸𑀤𑀺𑀓𑁄𑀧𑀺 𑀲𑀪𑀸𑀯𑀢𑁄 𑀅𑀢𑁆𑀣𑀺𑀬𑁂𑀯. 𑀦𑁄 𑀦𑀢𑁆𑀣𑀻𑀢𑀺 𑀏𑀯𑀁 𑀤𑀴𑁆𑀳𑀁 𑀳𑀤𑀬𑁂 𑀲𑀦𑁆𑀦𑀺𑀥𑀸𑀦𑀓𑀭𑀡 𑀯𑀲𑁂𑀦. ‘‘𑀅𑀢𑀺𑀥𑀸𑀯𑀦𑀜𑁆𑀘𑀸’’𑀢𑀺 𑀯𑁄𑀳𑀸𑀭 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀢𑁆𑀢𑀸𑀤𑀺𑀪𑀸𑀯𑁂𑀦 𑀕𑀳𑀡𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀓𑀫𑁆𑀫𑀘𑀺𑀢𑁆𑀢𑁄𑀢𑀼𑀓𑀸𑀳𑀸𑀭𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀓𑀓𑀸𑀭𑁄 𑀲𑀦𑁆𑀥𑀺 𑀯𑀲𑁂𑀦 𑀆𑀕𑀫𑁄. 𑀓𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀯𑀲𑁂𑀦 𑀉𑀢𑀼𑀯𑀲𑁂𑀦 𑀆𑀳𑀸𑀭𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀭𑀽𑀧𑀸𑀦𑀁 𑀧𑀘𑁆𑀘𑀬𑀸𑀦𑀁 𑀲𑀸𑀫𑀕𑁆𑀕𑀻𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀜𑁆𑀜𑀣𑀸 𑀧𑀯𑀢𑁆𑀢𑀺𑀬𑀸’’𑀢𑀺 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀧𑀯𑀢𑁆𑀢𑀦𑀲𑁆𑀲. ‘‘𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑁂𑀳𑀻’’𑀢𑀺 𑀳𑁂𑀢𑀼𑀧𑀘𑁆𑀘𑀬 𑀲𑀫𑁆𑀪𑀸𑀭𑀧𑀘𑁆𑀘𑀬𑁂𑀳𑀺. 𑀚𑀦𑀓 𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀫. 𑀧𑀭𑀺𑀯𑀸𑀭𑀧𑀘𑁆𑀘𑀬𑀸 𑀲𑀫𑁆𑀪𑀸𑀭𑀧𑀘𑁆𑀘𑀬𑀸 𑀦𑀸𑀫. ‘‘𑀓𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸’’𑀢𑀺 𑀓𑀫𑁆𑀫𑀧𑁆𑀧𑀯𑀢𑁆𑀢𑀺𑀢𑁄. ‘‘𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸’’𑀢𑀺 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀢𑁄. 𑀏𑀓𑀲𑁆𑀲 𑀲𑀢𑁆𑀢𑀲𑁆𑀲 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑀲𑁆𑀲 𑀭𑀽𑀧𑀓𑀸𑀬𑁄𑀧𑀺 𑀅𑀢𑁆𑀣𑀺 𑀦𑀸𑀫𑀓𑀸𑀬𑁄𑀧𑀺 𑀅𑀢𑁆𑀣𑀺. 𑀢𑀢𑁄 𑀅𑀜𑁆𑀜𑁄 𑀓𑁄𑀘𑀺𑀲𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺. 𑀤𑁆𑀯𑁂 𑀘 𑀓𑀸𑀬𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀁𑀲𑀭𑀦𑁆𑀢𑀲𑁆𑀲 𑀏𑀓𑀢𑁄 𑀧𑀯𑀢𑁆𑀢𑀦𑁆𑀢𑀺. 𑀅𑀲𑀜𑁆𑀜𑀲𑀢𑁆𑀢𑁂 𑀲𑀁𑀲𑀭𑀦𑁆𑀢𑀲𑁆𑀲 𑀭𑀽𑀧𑀓𑀸𑀬𑁄 𑀏𑀯 𑀧𑀯𑀢𑁆𑀢𑀢𑀺. 𑀲𑁄 𑀏𑀯 𑀢𑀢𑁆𑀣 𑀏𑀓𑁄𑀲𑀢𑁆𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀅𑀭𑀽𑀧𑁂 𑀲𑀁𑀲𑀭𑀦𑁆𑀢𑀲𑁆𑀲 𑀦𑀸𑀫 𑀓𑀸𑀬𑁄 𑀏𑀯 𑀧𑀯𑀢𑁆𑀢𑀢𑀺. 𑀲𑁄 𑀏𑀯 𑀢𑀢𑁆𑀣 𑀏𑀓𑁄 𑀲𑀢𑁆𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. ‘‘𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺 𑀘 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀼 𑀘 𑀓𑀸𑀬𑁂𑀲𑀼 𑀭𑀽𑀧𑀓𑀸𑀬𑁂 𑀘𑀼𑀢𑀺 𑀧𑀝𑀺𑀲𑀦𑁆𑀥𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑁆𑀢𑀭 𑀧𑀘𑁆𑀘𑀬𑀢𑀸 𑀦𑀸𑀫 𑀦𑀢𑁆𑀣𑀺. 𑀏𑀓𑀫𑁂𑀓𑀲𑁆𑀫𑀺𑀁 𑀪𑀯𑁂 𑀏𑀓𑀫𑁂𑀓𑁄 𑀳𑀼𑀢𑁆𑀯𑀸 𑀘𑀼𑀢𑀺𑀓𑀸𑀮𑁂 𑀪𑀺𑀚𑁆𑀚𑀢𑀺. 𑀭𑀽𑀧𑀲𑀦𑁆𑀢𑀢𑀺 𑀙𑀺𑀚𑁆𑀚𑀢𑀺. 𑀧𑀝𑀺𑀲𑀦𑁆𑀥𑀺𑀭𑀽𑀧𑁂𑀦 𑀲𑀳 𑀧𑀘𑁆𑀘𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀧𑀩𑀦𑁆𑀥𑁄 𑀦𑀧𑁆𑀧𑀯𑀢𑁆𑀢𑀢𑀺. 𑀦𑀸𑀫 𑀓𑀸𑀬𑁂 𑀧𑀦 𑀘𑀼𑀢𑀺 𑀧𑀝𑀺𑀲𑀦𑁆𑀥𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀅𑀢𑁆𑀣𑀺. 𑀘𑀼𑀢𑀺𑀓𑀸𑀮𑁂𑀧𑀺 𑀦𑀸𑀫𑀲𑀦𑁆𑀢𑀢𑀺 𑀦 𑀙𑀺𑀚𑁆𑀚𑀢𑀺. 𑀧𑀝𑀺𑀲𑀦𑁆𑀥𑀺 𑀦𑀸𑀫𑁂𑀦 𑀲𑀳 𑀧𑀘𑁆𑀘𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀧𑀩𑀦𑁆𑀥𑁄 𑀧𑀯𑀢𑁆𑀢𑀢𑀺𑀬𑁂𑀯. 𑀢𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀓𑀼𑀲𑀮𑁄 𑀪𑀺𑀓𑁆𑀔𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑁆𑀜𑀸𑀡𑁂 𑀞𑀢𑁆𑀯𑀸 𑀏𑀓𑀲𑁆𑀫𑀺𑀁𑀪𑀯𑁂 𑀏𑀓𑀲𑁆𑀲 𑀲𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀲𑀢𑁆𑀢𑀁 𑀦𑀸𑀫 𑀦 𑀧𑀲𑁆𑀲𑀢𑀺. 𑀧𑀼𑀕𑁆𑀕𑀮𑀁 𑀦𑀸𑀫 𑀦 𑀧𑀲𑁆𑀲𑀢𑀺. 𑀅𑀳𑀦𑁆𑀢𑀺𑀧𑀺 𑀦 𑀧𑀲𑁆𑀲𑀢𑀺. 𑀧𑀭𑁄𑀢𑀺𑀧𑀺 𑀦 𑀧𑀲𑁆𑀲𑀢𑀺. 𑀅𑀳𑀁 𑀅𑀢𑀻𑀢𑁂𑀲𑀼 𑀪𑀯𑁂𑀲𑀼 𑀅𑀳𑁄𑀲𑀺𑀦𑁆𑀢𑀺𑀧𑀺 𑀦 𑀧𑀲𑁆𑀲𑀢𑀺. 𑀇𑀫𑀲𑁆𑀫𑀺𑀁𑀪𑀯𑁂 𑀅𑀲𑁆𑀫𑀻𑀢𑀺𑀧𑀺 𑀦 𑀧𑀲𑁆𑀲𑀢𑀺. 𑀅𑀦𑀸𑀕𑀢𑁂𑀲𑀼 𑀪𑀯𑀺𑀲𑁆𑀲𑀸𑀫𑀻𑀢𑀺𑀧𑀺 𑀦 𑀧𑀲𑁆𑀲𑀢𑀺. 𑀅𑀣 𑀔𑁄 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀲𑀗𑁆𑀔𑀸𑀭 𑀧𑀘𑁆𑀘𑀬𑀸 𑀪𑀯𑀦𑁆𑀢𑀭𑁂 𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀫𑀭𑀽𑀧 𑀥𑀫𑁆𑀫𑀸𑀦𑀁 𑀳𑁂𑀢𑀼𑀨𑀮 𑀧𑀭𑀫𑁆𑀧𑀭𑀸𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀫𑁂𑀯 𑀧𑀲𑁆𑀲𑀢𑀺. 𑀏𑀓𑀲𑁆𑀫𑀺𑀁𑀪𑀯𑁂 𑀧𑀯𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁂 𑀲𑀢𑀺, 𑀅𑀦𑀫𑀢𑀕𑁆𑀕𑁂𑀲𑀁𑀲𑀸𑀭𑁂 𑀅𑀦𑀦𑁆𑀢𑁂𑀲𑀼 𑀪𑀯𑁂𑀲𑀼 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀧𑀯𑀢𑁆𑀢𑀺 𑀤𑀺𑀝𑁆𑀞𑀸 𑀏𑀯 𑀳𑁄𑀢𑀺 𑀢𑀢𑁆𑀣𑀧𑀺 𑀏𑀯𑀫𑁂𑀯, 𑀢𑀢𑁆𑀣𑀧𑀺 𑀏𑀯𑀫𑁂𑀯𑀸𑀢𑀺. 𑀢𑀤𑀸 𑀢𑀲𑁆𑀲 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸 𑀧𑀳𑀻𑀬𑀢𑀻𑀢𑀺 𑀇𑀫𑀫𑀢𑁆𑀣𑀁 ‘‘𑀤𑀲𑁆𑀲𑁂𑀦𑁆𑀢𑁄 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀢𑀫𑀸 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸𑀢𑀺. 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀁. 𑀦 𑀦𑀼 𑀔𑁄 𑀅𑀳𑁄𑀲𑀺𑀁. 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀁. 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁. 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀏𑀯𑀁 𑀧𑀼𑀩𑁆𑀩𑀦𑁆𑀢𑁂 𑀧𑀜𑁆𑀘𑀯𑀺𑀥𑀸 𑀓𑀗𑁆𑀔𑀸𑀯𑀼𑀢𑁆𑀢𑀸. 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁. 𑀦 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺. 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺. 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺. 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀦𑁆𑀢𑀺 𑀏𑀯𑀁 𑀅𑀧𑀭𑀦𑁆𑀢𑁂 𑀧𑀜𑁆𑀘𑀯𑀺𑀥𑀸 𑀓𑀗𑁆𑀔𑀸 𑀯𑀼𑀢𑁆𑀢𑀸. 𑀅𑀳𑀁 𑀦𑀼 𑀔𑁄 𑀲𑁆𑀫𑀺. 𑀦𑁄 𑀦𑀼 𑀔𑁄 𑀲𑁆𑀫𑀺. 𑀓𑀺𑀦𑁆𑀦𑀼 𑀔𑁄 𑀲𑁆𑀫𑀺. 𑀓𑀣𑀁 𑀦𑀼 𑀔𑁄 𑀲𑁆𑀫𑀺. 𑀅𑀳𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄. 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀩𑁆𑀩𑀺𑀥𑀸 𑀓𑀗𑁆𑀔𑀸 𑀯𑀼𑀢𑁆𑀢𑀸. 𑀇𑀫𑀸 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸𑀢𑀺. 𑀢𑀢𑁆𑀣 𑀅𑀳𑁄𑀲𑀺𑀁 𑀦𑀼 𑀔𑁄, 𑀦 𑀦𑀼 𑀔𑁄 𑀅𑀳𑁄𑀲𑀺𑀦𑁆𑀢𑀺 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀅𑀢𑀻𑀢𑀓𑀸𑀮𑁂 𑀅𑀢𑁆𑀢𑀦𑁄 𑀅𑀢𑁆𑀣𑀺 𑀦𑀢𑁆𑀣𑀺𑀪𑀸𑀯𑁂 𑀓𑀗𑁆𑀔𑀢𑀺. 𑀲𑀘𑁂 𑀅𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀦𑁆𑀢𑀺 𑀓𑀗𑁆𑀔𑀢𑀺. 𑀓𑁂𑀦𑀘𑀺 𑀳𑁂𑀢𑀼𑀦𑀸 𑀧𑀘𑁆𑀘𑀬𑁂𑀦 𑀯𑀸 𑀅𑀳𑁄𑀲𑀺𑀁. 𑀓𑁂𑀦𑀘𑀺 𑀇𑀤𑁆𑀥𑀺𑀫𑀦𑁆𑀢𑁂𑀦 𑀯𑀸 𑀦𑀺𑀫𑁆𑀫𑀺𑀢𑁄 𑀅𑀳𑁄𑀲𑀺𑀁. 𑀅𑀳𑁂𑀢𑀼 𑀅𑀧𑀘𑁆𑀘𑀬𑀸 𑀯𑀸 𑀅𑀦𑀺𑀫𑁆𑀫𑀺𑀢𑁄 𑀯𑀸 𑀲𑀬𑀁𑀚𑀸𑀢𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀢𑁂𑀲𑀼𑀧𑀓𑀸𑀭𑁂𑀲𑀼 𑀅𑀜𑁆𑀜𑀢𑀭𑁂𑀦 𑀅𑀳𑁄𑀲𑀺𑀁. 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁. 𑀅𑀧𑀸𑀤𑀓𑁄𑀯𑀸 𑀅𑀳𑁄𑀲𑀺𑀁. 𑀤𑁆𑀯𑀺𑀧𑀸𑀤𑀓𑁄 𑀯𑀸. 𑀘𑀢𑀼𑀧𑁆𑀧𑀸𑀤𑀓𑁄𑀯𑀸. 𑀩𑀳𑀼𑀧𑁆𑀧𑀸𑀤𑀓𑁄𑀯𑀸. 𑀭𑀽𑀧𑀻𑀯𑀸. 𑀅𑀭𑀽𑀧𑀻𑀯𑀸. 𑀲𑀜𑁆𑀜𑀻𑀯𑀸. 𑀅𑀲𑀜𑁆𑀜𑀻𑀯𑀸 𑀇𑀘𑁆𑀘𑀸𑀤𑀺. 𑀅𑀣 𑀢𑁂𑀲𑀼 𑀅𑀧𑀸𑀤𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀅𑀳𑀁 𑀅𑀳𑁄𑀲𑀺𑀁. 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁. 𑀧𑀣𑀫𑀪𑀯𑁂 𑀓𑀺𑀁 𑀳𑀼𑀢𑁆𑀯𑀸 𑀤𑀼𑀢𑀻𑀬 𑀪𑀯𑀸𑀤𑀻𑀲𑀼 𑀓𑀺𑀁 𑀅𑀳𑁄𑀲𑀺𑀦𑁆𑀢𑀺 𑀇𑀤𑀁 𑀪𑀯𑀧𑀭𑀫𑁆𑀧𑀭𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀲𑀦𑀬𑁄 𑀅𑀧𑀭𑀦𑁆𑀢𑁂𑀧𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 ‘‘𑀅𑀳𑀁 𑀦𑀼 𑀔𑁄 𑀲𑁆𑀫𑀺, 𑀦𑁄 𑀦𑀼 𑀔𑁄 𑀲𑁆𑀫𑀻’’𑀢𑀺 𑀬𑀣𑀸 𑀔𑀼𑀤𑁆𑀤𑀓𑀯𑀢𑁆𑀣𑀼 𑀯𑀺𑀪𑀗𑁆𑀕𑁂 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑁂𑀲𑀼. 𑀲𑀢𑀲𑁆𑀫𑀻𑀢𑀺 𑀳𑁄𑀢𑀺. 𑀲𑀻𑀢𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀲𑀢𑀲𑁆𑀫𑀻’’𑀢𑀺 𑀅𑀳𑀁 𑀲𑀲𑁆𑀲𑀢𑁄 𑀯𑀸 𑀪𑀯𑀸𑀫𑀺. ‘‘𑀲𑀻𑀢𑀲𑁆𑀫𑀻’’𑀢𑀺 𑀅𑀳𑀁 𑀉𑀘𑁆𑀙𑀺𑀦𑁆𑀦𑁄𑀯𑀸 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀘. 𑀅𑀢𑁆𑀣𑀻𑀢𑀺 𑀔𑁄 𑀏𑀓𑁄 𑀅𑀦𑁆𑀢𑁄. 𑀦𑀢𑁆𑀣𑀻𑀢𑀺 𑀔𑁄 𑀤𑀼𑀢𑀻𑀬𑁄 𑀅𑀦𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀢𑁆𑀣𑀻’’𑀢𑀺 𑀅𑀢𑁆𑀢𑀸𑀦𑀸𑀫 𑀪𑀯𑀸𑀪𑀯𑁂𑀲𑀼 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀣𑀺. ‘‘𑀦𑀢𑁆𑀣𑀻’’𑀢𑀺 𑀢𑀣𑀸 𑀦𑀢𑁆𑀣𑀺, 𑀉𑀘𑁆𑀙𑀺𑀚𑁆𑀚𑀢𑀺. 𑀦 𑀳𑁄𑀢𑀺 𑀧𑀭𑀫𑁆𑀫𑀭𑀡𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀇𑀥𑀸𑀧𑀺 𑀅𑀳𑀁 𑀦𑀼 𑀔𑁄 𑀲𑁆𑀫𑀺. 𑀦𑁄 𑀦𑀼 𑀔𑁄 𑀲𑁆𑀫𑀻𑀢𑀺 𑀓𑀗𑁆𑀔𑀢𑀺. 𑀢𑀢𑁆𑀣 ‘‘𑀅𑀳𑀁 𑀦𑀼 𑀔𑁄𑀲𑁆𑀫𑀻’’𑀢𑀺 𑀅𑀬𑀁 𑀅𑀳𑀁 𑀦𑀸𑀫 𑀪𑀯𑀸𑀪𑀯𑁂𑀲𑀼 𑀦𑀺𑀘𑁆𑀘𑀓𑀸𑀮𑀁 𑀅𑀲𑁆𑀫𑀺 𑀦𑀼 𑀔𑁄, 𑀫𑀫 𑀅𑀢𑁆𑀢𑀸𑀦𑀸𑀫 𑀲𑀲𑁆𑀲𑀢𑁄 𑀳𑀼𑀢𑁆𑀯𑀸 𑀲𑀩𑁆𑀩𑀓𑀸𑀮𑀁 𑀅𑀢𑁆𑀣𑀺 𑀦𑀼 𑀔𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦𑁄 𑀦𑀼 𑀔𑁄 𑀲𑁆𑀫𑀻’’𑀢𑀺 𑀢𑀣𑀸 𑀦𑁄 𑀅𑀲𑁆𑀫𑀺 𑀦𑀼 𑀔𑁄. 𑀫𑀫 𑀅𑀢𑁆𑀢𑀸 𑀢𑀣𑀸 𑀦𑀢𑁆𑀣𑀺 𑀦𑀼 𑀔𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀪𑀯𑀸𑀪𑀯𑁂𑀲𑀽’’𑀢𑀺 𑀧𑀯𑀢𑁆𑀢𑁂𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀢𑁆𑀢𑀫𑀸𑀦𑀁 𑀅𑀢𑁆𑀢𑀸𑀦𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀺𑀁 𑀦𑀼 𑀔𑁄 𑀲𑁆𑀫𑀻’’𑀢𑀺 𑀅𑀳𑀁 𑀦𑀸𑀫 𑀲𑀦𑁆𑀢𑁄 𑀚𑀸𑀢𑁄 𑀓𑀺𑀁 𑀦𑀼 𑀔𑁄 𑀅𑀲𑁆𑀫𑀺. 𑀓𑁂𑀦𑀘𑀺 𑀳𑁂𑀢𑀼𑀦𑀸 𑀧𑀘𑁆𑀘𑀬𑁂𑀦 𑀯𑀸 𑀅𑀲𑁆𑀫𑀺 𑀦𑀼 𑀔𑁄. 𑀓𑁂𑀦𑀘𑀺 𑀇𑀤𑁆𑀥𑀺𑀫𑀦𑁆𑀢𑁂𑀦 𑀯𑀸 𑀦𑀺𑀫𑁆𑀫𑀺𑀢𑁄 𑀪𑀯𑀸𑀫𑀺 𑀦𑀼 𑀔𑁄. 𑀉𑀤𑀸𑀳𑀼 𑀅𑀳𑁂𑀢𑀼 𑀅𑀧𑀘𑁆𑀘𑀬𑀸 𑀯𑀸 𑀓𑁂𑀦𑀘𑀺 𑀅𑀦𑀺𑀫𑁆𑀫𑀺𑀢𑁄 𑀯𑀸 𑀲𑀬𑀁 𑀦𑀼 𑀔𑁄 𑀪𑀯𑀸𑀫𑀺 𑀦𑀼 𑀔𑁄𑀢𑀺 𑀅𑀢𑁆𑀣𑁄. ‘‘𑀓𑀣𑀁 𑀦𑀼 𑀔𑁄 𑀲𑁆𑀫𑀻’’𑀢𑀺 𑀏𑀢𑁆𑀣 𑀧𑀦 𑀅𑀧𑀤𑀸𑀤𑀻𑀳𑀺 𑀅𑀬𑁄𑀚𑁂𑀢𑁆𑀯𑀸 𑀅𑀳𑀁 𑀦𑀼 𑀔𑁄 𑀓𑀺𑀁 𑀕𑁄𑀢𑁆𑀢𑁄 𑀪𑀯𑀸𑀫𑀺. 𑀕𑁄𑀢𑀫𑀕𑁄𑀢𑁆𑀢𑁄 𑀯𑀸 𑀯𑀸𑀲𑁂𑀝𑁆𑀞 𑀕𑁄𑀢𑁆𑀢𑁄 𑀯𑀸 𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀆𑀤𑀺 𑀓𑀧𑁆𑀧𑀓𑀸𑀮𑁂 𑀢𑀸𑀦𑀺 𑀕𑁄𑀢𑁆𑀢𑀸𑀦𑀺 𑀏𑀢𑀭𑀳𑀺 𑀲𑀫𑁆𑀪𑁂𑀤𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀼 𑀓𑀗𑁆𑀔𑀦𑁆𑀢𑁄 𑀓𑀗𑁆𑀔𑀢𑀺𑀬𑁂𑀯. ‘‘𑀅𑀳𑀁 𑀓𑀼𑀢𑁄 𑀆𑀕𑀢𑁄’’𑀢𑀺 𑀅𑀳𑀁 𑀅𑀢𑀻𑀢𑁂 𑀓𑀼𑀢𑁄𑀪𑀯𑀢𑁄 𑀆𑀕𑀢𑁄 𑀅𑀲𑁆𑀫𑀺. ‘‘𑀲𑁄𑀓𑀼𑀳𑀺𑀁𑀕𑀸𑀫𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑁄 𑀅𑀳𑀁 𑀆𑀬𑀢𑀺𑀁 𑀪𑀯𑁂 𑀓𑀼𑀳𑀺𑀁 𑀕𑀸𑀫𑀺𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀓𑀗𑁆𑀔𑀢𑀺. ‘‘𑀓𑀗𑁆𑀔𑀸𑀬 𑀅𑀢𑀺𑀓𑁆𑀓𑀫𑁄’’𑀢𑀺 𑀲𑁄 𑀪𑀺𑀓𑁆𑀔𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀅𑀯𑀺𑀚𑁆𑀚𑀸𑀤𑀺𑀓𑀁 𑀅𑀢𑀻𑀢𑀳𑁂𑀢𑀼 𑀧𑀜𑁆𑀘𑀓𑀁 𑀧𑀲𑁆𑀲𑀦𑁆𑀢𑁄 𑀢𑀲𑁆𑀫𑀺𑀁𑀪𑀯𑁂 𑀲𑀩𑁆𑀩𑀁𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀲𑁆𑀲𑀢𑀺𑀬𑁂𑀯. 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀦 𑀢𑀢𑁆𑀣 𑀅𑀳𑀁 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺, 𑀬𑀁 𑀧𑀝𑀺𑀘𑁆𑀘 𑀅𑀢𑀻𑀢 𑀯𑀺𑀲𑀬𑀸 𑀧𑀜𑁆𑀘𑀯𑀺𑀥𑀸 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺. 𑀥𑀫𑁆𑀫 𑀫𑀢𑁆𑀢𑀫𑁂𑀯 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀏𑀯𑀁 𑀅𑀢𑀻𑀢𑁂 𑀓𑀗𑁆𑀔𑀸 𑀯𑀢𑁆𑀣𑀼𑀲𑁆𑀲 𑀅𑀪𑀸𑀯𑀤𑀲𑁆𑀲𑀦𑁂𑀦 𑀧𑀜𑁆𑀘𑀯𑀺𑀥𑀸𑀬 𑀓𑀗𑁆𑀔𑀸𑀬 𑀅𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀦𑀦𑀼 𑀢𑀣𑀸 𑀧𑀲𑁆𑀲𑀦𑁆𑀢𑀲𑁆𑀲𑀧𑀺 𑀓𑀣𑀁 𑀦𑀼 𑀔𑁄 𑀲𑁆𑀫𑀺, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄𑀢𑀺 𑀅𑀬𑀁 𑀓𑀗𑁆𑀔𑀸 𑀅𑀢𑁆𑀣𑀺𑀬𑁂𑀯. 𑀢𑀣𑀸 𑀧𑀲𑁆𑀲𑀦𑁆𑀢𑁄𑀧𑀺 𑀳𑀺 𑀯𑀺𑀦𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑁆𑀜𑀸𑀡𑁂𑀦 𑀅𑀢𑀻𑀢𑁂 𑀪𑀯𑁂 𑀅𑀳𑀁 𑀤𑁆𑀯𑀺𑀧𑀸𑀤𑀓𑁄 𑀅𑀳𑁄𑀲𑀺𑀦𑁆𑀢𑀺𑀯𑀸 𑀘𑀢𑀼𑀧𑁆𑀧𑀸𑀤𑀓𑁄 𑀅𑀳𑁄𑀲𑀺𑀦𑁆𑀢𑀺 𑀯𑀸 𑀢𑀢𑁄 𑀘𑀼𑀢𑁄 𑀅𑀲𑀼𑀓𑀪𑀯𑁂 𑀉𑀧𑁆𑀧𑀦𑁆𑀦𑁄𑀢𑀺 𑀯𑀸 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀻𑀢𑀺. 𑀯𑀼𑀘𑁆𑀘𑀢𑁂. 𑀲𑀸 𑀧𑀦 𑀓𑀗𑁆𑀔𑀸 𑀥𑀫𑁆𑀫 𑀫𑀢𑁆𑀢𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀸𑀬𑀺𑀓 𑀓𑀗𑁆𑀔𑀸 𑀦 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸 𑀧𑀝𑀺𑀭𑀽𑀧𑀺𑀓𑀸 𑀏𑀯. 𑀲𑀸 𑀳𑀺 𑀅𑀭𑀺𑀬𑀸𑀦𑀁𑀧𑀺 𑀮𑀩𑁆𑀪𑀢𑀺 𑀬𑁂𑀯𑀸𑀢𑀺. 𑀢𑀣𑀸 𑀅𑀦𑀸𑀕𑀢𑁂 𑀨𑀮𑀧𑀜𑁆𑀘𑀓𑀁 𑀧𑀲𑁆𑀲𑀦𑁆𑀢𑁄 𑀅𑀧𑀭𑀦𑁆𑀢𑁂 𑀧𑀜𑁆𑀘𑀯𑀺𑀥𑀁 𑀓𑀗𑁆𑀔𑀁 𑀅𑀢𑀺𑀓𑁆𑀓𑀫𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀨𑀮𑀧𑀜𑁆𑀘𑀓𑀜𑁆𑀘 𑀳𑁂𑀢𑀼𑀧𑀜𑁆𑀘𑀓𑀜𑁆𑀘 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀗𑁆𑀔𑀸 𑀙𑀓𑁆𑀓𑀁 𑀅𑀢𑀺𑀓𑁆𑀓𑀫𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀧𑀼𑀩𑁆𑀩𑀦𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀝𑁆𑀞𑀯𑀺𑀥𑀸𑀬 𑀓𑀗𑁆𑀔𑀸𑀬 𑀅𑀢𑀺𑀓𑁆𑀓𑀫𑀦𑁂 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀁 𑀧𑀲𑁆𑀲𑀦𑁆𑀢𑁄 𑀤𑁂𑀲𑀦𑀸 𑀥𑀫𑁆𑀫𑁂 𑀘 𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑁂𑀲𑀼 𑀘 𑀓𑀗𑁆𑀔𑀁 𑀅𑀢𑀺𑀓𑁆𑀓𑀫𑀢𑀺. 𑀥𑀫𑁆𑀫𑁂 𑀓𑀗𑁆𑀔𑀸𑀢𑀺𑀓𑁆𑀓𑀫𑀦𑁂𑀦 𑀲𑀳𑁂𑀯 𑀤𑁂𑀲𑁂𑀦𑁆𑀢𑁂 𑀲𑀢𑁆𑀣𑀭𑀺 𑀘, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀦𑁆𑀦𑁂 𑀲𑀗𑁆𑀖𑁂 𑀘, 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀘, 𑀬𑀣𑀸𑀯𑀼𑀢𑁆𑀢𑁂 𑀧𑀼𑀩𑁆𑀩𑀦𑁆𑀢𑁂 𑀘, 𑀅𑀧𑀭𑀦𑁆𑀢𑁂 𑀘, 𑀧𑀼𑀩𑁆𑀩𑀦𑁆𑀢𑀸 𑀧𑀭𑀦𑁆𑀢𑁂𑀲𑀼 𑀘, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀦 𑀲𑀳 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀘 𑀲𑀩𑁆𑀩𑀁 𑀓𑀗𑁆𑀔𑀁 𑀅𑀢𑀺𑀓𑁆𑀓𑀫𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀲𑀪𑀸𑀯 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀲𑀪𑀸𑀯𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀘𑀸’’𑀢𑀺 𑀧𑀘𑁆𑀘𑀬𑀧𑀭𑀫𑁆𑀧𑀭𑀸𑀯𑀲𑁂𑀦 𑀲𑀪𑀸𑀯𑀥𑀫𑁆𑀫𑀸𑀦𑀁 𑀧𑀭𑀫𑁆𑀧𑀭𑀧𑁆𑀧𑀯𑀢𑁆𑀢𑀺𑀬𑀸 𑀘. 𑀥𑀫𑁆𑀫𑀲𑀼 𑀥𑀫𑁆𑀫𑀢𑀸 𑀦𑀸𑀫 𑀤𑁂𑀲𑀦𑀸 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀪𑀸𑀯𑁂𑀦 𑀲𑀼𑀦𑁆𑀤𑀭 𑀥𑀫𑁆𑀫𑀢𑀸. 𑀅𑀦𑀯𑀚𑁆𑀚𑀥𑀫𑁆𑀫𑀢𑀸. 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸 𑀦𑀸𑀫 𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀢𑀸.

𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀁 𑀦𑀸𑀫 𑀳𑁂𑀝𑁆𑀞𑀸 𑀥𑀫𑁆𑀫𑀯𑀯𑀢𑁆𑀣𑀸𑀦 𑀯𑀲𑁂𑀦 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀲𑁂𑀦 𑀘 𑀲𑀺𑀚𑁆𑀛𑀢𑀺. 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁 𑀧𑀦 𑀅𑀦𑀼𑀲𑀬𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀲𑀮𑁆𑀮𑀺𑀔𑀦𑀢𑁆𑀣𑀸𑀬 𑀓𑀭𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀲𑀬 𑀲𑀫𑀽𑀳𑀦𑀦𑀢𑁆𑀣𑀜𑁆𑀘𑀸’’𑀢𑀺𑀆𑀤𑀺. ‘‘𑀢𑀢𑁆𑀣 𑀧𑀦𑀸’’𑀢𑀺 𑀢𑀲𑁆𑀫𑀺𑀁 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑁂 𑀧𑀦. 𑀯𑀺𑀪𑀢𑁆𑀢𑁂𑀲𑀽𑀢𑀺 𑀧𑀸𑀞𑀲𑁂𑀲𑁄. ‘‘𑀬𑀲𑁆𑀲𑀸’’𑀢𑀺 𑀬𑁄𑀕𑀻 𑀧𑀼𑀕𑁆𑀕𑀮𑀲𑁆𑀲. ‘‘𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂𑀯𑀸’’𑀢𑀺 𑀬𑀁 𑀤𑀽𑀭𑁂 𑀧𑀯𑀢𑁆𑀢𑀁 𑀭𑀽𑀧𑀁 𑀯𑀸, 𑀲𑀦𑁆𑀢𑀺𑀓𑁂 𑀧𑀯𑀢𑁆𑀢𑀁 𑀭𑀽𑀧𑀁𑀯𑀸𑀢𑀺 𑀧𑀸𑀞𑀲𑁂𑀲𑁄. ‘‘𑀢𑀤𑀢𑁆𑀣𑀲𑁆𑀲 𑀧𑀦𑀸’’𑀢𑀺 𑀲𑀫𑁆𑀫𑀲𑀺𑀢𑀥𑀫𑁆𑀫𑀼𑀤𑁆𑀥𑀸𑀭𑀢𑁆𑀣𑀲𑁆𑀲. ‘‘𑀜𑀸𑀡𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸’’𑀢𑀺 𑀥𑀫𑁆𑀫𑀯𑀯𑀢𑁆𑀣𑀸𑀦𑀜𑁆𑀜𑀸𑀡𑁂𑀦 𑀲𑀼𑀝𑁆𑀞𑀼𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀬𑀁 𑀬𑀁 𑀤𑀴𑁆𑀳𑀁 𑀕𑀳𑁂𑀢𑀩𑁆𑀩𑀁. 𑀢𑀁 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀦 𑀤𑀴𑁆𑀳𑀁 𑀕𑀳𑀺𑀢𑀲𑁆𑀲 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀘 𑀓𑁆𑀭𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀦𑀲𑁆𑀲𑀦𑁆𑀢𑀻’’𑀢𑀺 𑀪𑀺𑀚𑁆𑀚𑀦𑁆𑀢𑀺. 𑀅𑀦𑀺𑀘𑁆𑀘𑀢𑀁 𑀕𑀘𑁆𑀙𑀦𑁆𑀢𑀺. ‘‘𑀯𑀺𑀢𑁆𑀣𑀫𑁆𑀪𑀦 𑀓𑁆𑀭𑀺𑀬𑀸’’𑀢𑀺 𑀏𑀢𑁆𑀣 𑀯𑀺𑀯𑀺𑀥𑁂𑀦 𑀣𑀫𑁆𑀪𑀦𑀁 𑀯𑀺𑀢𑁆𑀣𑀫𑁆𑀪𑀦𑀁. 𑀦𑀸𑀦𑀸𑀤𑀺𑀲𑀸𑀪𑀺𑀫𑀼𑀔𑀯𑀲𑁂𑀦 𑀣𑀫𑁆𑀪𑀦𑀁 𑀯𑀳𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀫𑀸𑀲𑀜𑁆𑀘𑀸’’𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀜𑁆𑀘. 𑀯𑀺𑀲𑀼𑀁 𑀯𑀺𑀲𑀼𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀜𑁆𑀘 𑀲𑀳𑀚𑀸𑀢𑁂𑀲𑀼 𑀕𑀳𑀡𑀁 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀧𑀸𑀤𑀻𑀦𑀁’’𑀢𑀺. 𑀆𑀧𑀸𑀤𑀻𑀦𑀁 𑀲𑁂𑀲𑀫𑀳𑀸𑀪𑀽𑀢𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀢𑀺𑀬𑀸 𑀲𑀭𑀻𑀭𑀸𑀦𑀺 𑀲𑀦𑁆𑀢𑀢𑀺 𑀲𑀭𑀻𑀭𑀸𑀦𑀺. ‘‘𑀢𑀣𑀸 𑀢𑀣𑀸 𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀭𑀽𑀧𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀺 𑀧𑀭𑀺𑀯𑀢𑁆𑀢𑀺 𑀦𑀸𑀫 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀏𑀯𑀁 𑀪𑀯𑁂𑀬𑁆𑀬, 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲 𑀏𑀯𑀁 𑀪𑀯𑁂𑀬𑁆𑀬, 𑀢𑀣𑀸 𑀲𑀫𑀺𑀜𑁆𑀚𑀦𑁆𑀢𑀲𑁆𑀲 𑀧𑀲𑀸𑀭𑁂𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀦𑀸 𑀧𑀭𑀺𑀓𑀧𑁆𑀧𑁂𑀢𑁆𑀯𑀸. ‘‘𑀲𑁂𑀲𑀔𑀦𑁆𑀥𑁂𑀲𑀼𑀧𑀺 𑀢𑀁 𑀢𑀁 𑀲𑀦𑁆𑀢𑀢𑀺 𑀦𑀸𑀦𑀢𑁆𑀢𑀁’’𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂 𑀢𑀸𑀯 𑀓𑀸𑀬𑁂 𑀓𑀸𑀬𑀺𑀓𑀲𑀼𑀔𑀲𑀦𑁆𑀢𑀢𑀺 𑀤𑀼𑀓𑁆𑀔𑀲𑀦𑁆𑀢𑀢𑀻𑀦𑀁 𑀦𑀸𑀦𑀢𑁆𑀢𑀁. 𑀘𑀺𑀢𑁆𑀢𑁂 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲 𑀲𑀦𑁆𑀢𑀢𑀻𑀦𑀁. 𑀉𑀧𑁂𑀓𑁆𑀔𑀸 𑀲𑀦𑁆𑀢𑀢𑀺 𑀧𑀦 𑀅𑀯𑀺𑀪𑀽𑀢𑀸 𑀳𑁄𑀢𑀺. 𑀓𑀧𑁆𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸. 𑀬𑀤𑀸 𑀘𑀺𑀢𑁆𑀢𑁂 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀸𑀦𑀺 𑀦 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀇𑀤𑀸𑀦𑀺 𑀉𑀧𑁂𑀓𑁆𑀔𑀸 𑀫𑁂 𑀯𑁂𑀤𑀦𑀸 𑀧𑀯𑀢𑁆𑀢𑀢𑀻𑀢𑀺 𑀯𑀸, 𑀬𑀤𑀸 𑀢𑀸𑀦𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀲𑀸 𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑀸 𑀏𑀯𑀁 𑀢𑀓𑁆𑀓𑁂𑀢𑁆𑀯𑀸 𑀲𑀫𑁆𑀫𑀲𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀜𑁆𑀜𑀸𑀓𑁆𑀔𑀦𑁆𑀥𑁂 𑀭𑀽𑀧𑀲𑀜𑁆𑀜𑀸𑀲𑀤𑁆𑀤𑀲𑀜𑁆𑀜𑀸𑀤𑀻𑀦𑀁 𑀯𑀲𑁂𑀦. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀭𑀽𑀧𑀲𑀜𑁆𑀘𑁂𑀢𑀦𑀸 𑀲𑀤𑁆𑀤𑀲𑀜𑁆𑀘𑁂𑀢𑀦𑀸𑀤𑀻𑀦𑀁 𑀯𑀲𑁂𑀦, 𑀦𑀸𑀦𑀸𑀯𑀺𑀢𑀓𑁆𑀓 𑀯𑀺𑀘𑀸𑀭𑀸𑀤𑀻𑀦𑀁 𑀯𑀲𑁂𑀦, 𑀮𑁄𑀪𑀸𑀮𑁄𑀪 𑀤𑁄𑀲𑀸𑀤𑁄𑀲 𑀫𑁄𑀳𑀸𑀫𑁄𑀳𑀸𑀤𑀻𑀦𑀁 𑀯𑀲𑁂𑀦 𑀘. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁, 𑀓𑀼𑀲𑀮𑀸 𑀓𑀼𑀲𑀮𑀯𑀺𑀜𑁆𑀜𑀸𑀡𑀸𑀤𑀻𑀦𑀜𑁆𑀘 𑀯𑀲𑁂𑀦 𑀲𑀦𑁆𑀢𑀢𑀺 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁆𑀲𑀸𑀲𑀁 𑀓𑀭𑁄𑀢𑀻𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀏𑀢𑀁 𑀫𑁂’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀬𑁄𑀯𑀺𑀲𑁆𑀲𑀸𑀲𑀸 𑀢𑀡𑁆𑀳𑀸𑀯𑀺𑀲𑁆𑀲𑀸𑀲𑁄, 𑀫𑀸𑀦𑀯𑀺𑀲𑁆𑀲𑀸𑀲𑁄, 𑀤𑀺𑀝𑁆𑀞𑀺𑀯𑀺𑀲𑁆𑀲𑀸𑀲𑁄. 𑀢𑀢𑁆𑀣 𑀏𑀢𑀁 𑀫𑀫𑀸𑀢𑀺 𑀢𑀡𑁆𑀳𑀸𑀯𑀺𑀲𑁆𑀲𑀸𑀲𑁄. 𑀏𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀯𑀺𑀲𑁆𑀲𑀸𑀲𑁄. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀯𑀺𑀲𑁆𑀲𑀸𑀲𑁄. ‘‘𑀧𑀭𑀺𑀳𑀭𑀢𑀻’’𑀢𑀺 𑀪𑀯𑀸𑀪𑀯𑁂𑀲𑀼 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀳𑀭𑀢𑀺 𑀯𑀳𑀢𑀺. ‘‘𑀧𑀭𑀫𑀚𑁆𑀛𑀢𑁆𑀢𑀪𑀸𑀯𑁂𑀦𑀸’’𑀢𑀺 𑀧𑀥𑀸𑀦𑀅𑀚𑁆𑀛𑀢𑁆𑀢𑀪𑀸𑀯𑁂𑀦. 𑀅𑀚𑁆𑀛𑀢𑁆𑀢𑀲𑀸𑀭𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀭𑀺𑀕𑁆𑀕𑀳𑀺𑀢𑁄’’𑀢𑀺 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁂𑀦 𑀧𑀭𑀺𑀕𑁆𑀕𑀳𑀺𑀢𑁄. 𑀢𑀬𑁄 𑀳𑀺 𑀧𑀭𑀺𑀕𑁆𑀕𑀳𑀸 𑀢𑀡𑁆𑀳𑀸 𑀧𑀭𑀺𑀕𑁆𑀕𑀳𑁄, 𑀫𑀸𑀦𑀧𑀭𑀺𑀕𑁆𑀕𑀳𑁄, 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄𑀢𑀺. 𑀯𑀲𑁂 𑀲𑀩𑁆𑀩𑀲𑁄 𑀯𑀢𑁆𑀢𑀦𑁆𑀢𑁄 𑀦𑀸𑀫 𑀓𑁂𑀯𑀮𑀁 𑀯𑀲𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑁄 𑀏𑀯 𑀲𑀺𑀬𑀸, 𑀦 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀯𑀼𑀢𑁆𑀢𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀬𑀣𑀸𑀯𑀼𑀢𑁆𑀢𑁂𑀳𑀻’’𑀢𑀺 𑀲𑀩𑁆𑀩𑀲𑀗𑁆𑀕𑀳𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀭𑀡𑀸𑀤𑀻𑀳𑀺. ‘‘𑀢𑀣𑀸𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀏𑀯𑀁 𑀧𑀭𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀬𑁄 𑀅𑀢𑁆𑀢𑀦𑁄 𑀯𑀲𑁂𑀦 𑀯𑀢𑁆𑀢𑀢𑀺, 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀲𑀸𑀫𑀺𑀪𑀸𑀯𑁄 𑀦𑀢𑁆𑀣𑀺. 𑀬𑀲𑁆𑀫𑀺𑀜𑁆𑀘 𑀲𑀸𑀫𑀺𑀪𑀸𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀭𑀽𑀧𑀸𑀤𑀺𑀓𑁂 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀸𑀫𑀺𑀓𑀁 𑀓𑀢𑁆𑀯𑀸 𑀏𑀲𑁄 𑀫𑀫 𑀅𑀢𑁆𑀢𑀸𑀢𑀺 𑀧𑀭𑀺𑀕𑁆𑀕𑀳𑁄 𑀦𑀸𑀫 𑀫𑀺𑀘𑁆𑀙𑀸 𑀏𑀯. 𑀢𑀣𑀸 𑀬𑁄 𑀘 𑀔𑀡𑀺𑀓 𑀥𑀫𑁆𑀫𑁄 𑀳𑁄𑀢𑀺, 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀢𑀺, 𑀢𑀁 𑀭𑀽𑀧𑀸𑀤𑀺𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀅𑀢𑁆𑀢𑀦𑁄 𑀲𑀸𑀭𑀁 𑀓𑀢𑁆𑀯𑀸 𑀢𑀣𑀸 𑀧𑀭𑀺𑀕𑁆𑀕𑀳𑁄𑀧𑀺 𑀫𑀺𑀘𑁆𑀙𑀸 𑀏𑀯. 𑀏𑀢𑁆𑀣 𑀘 ‘‘𑀫𑀺𑀘𑁆𑀙𑀸 𑀏𑀯𑀸’’𑀢𑀺 𑀧𑀭𑀫𑀢𑁆𑀣 𑀲𑀘𑁆𑀘𑀁 𑀧𑀢𑁆𑀯𑀸 𑀫𑀺𑀘𑁆𑀙𑀸 𑀏𑀯. 𑀯𑀺𑀧𑀮𑁆𑀮𑀸𑀲𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀼𑀔𑀁 𑀯𑀺𑀤𑁆𑀥𑀁𑀲𑁂𑀢𑀻’’𑀢𑀺 𑀓𑀸𑀬𑀺𑀓𑀲𑀼𑀔𑀜𑁆𑀘 𑀘𑁂𑀢𑀲𑀺𑀓 𑀲𑀼𑀔𑀜𑁆𑀘 𑀯𑀺𑀤𑁆𑀥𑀁𑀲𑁂𑀢𑀺. 𑀯𑀺𑀦𑀸𑀲𑁂𑀢𑀺. ‘‘𑀦𑀸𑀦𑀸𑀤𑀼𑀓𑁆𑀔𑀁 𑀚𑀦𑁂𑀢𑀻’’𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀜𑁆𑀘 𑀘𑁂𑀢𑀲𑀺𑀓 𑀤𑀼𑀓𑁆𑀔𑀜𑁆𑀘 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺. ‘‘𑀇𑀤𑀜𑁆𑀘 𑀭𑀽𑀧𑀁 𑀏𑀤𑀺𑀲𑀫𑁂𑀯 𑀳𑁄𑀢𑀻’’𑀢𑀺 𑀓𑀣𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀬𑀣𑀸𑀧𑀯𑀢𑁆𑀢𑀁 𑀫𑀦𑀼𑀲𑁆𑀲 𑀲𑀼𑀔𑀁 𑀯𑀺𑀤𑁆𑀥𑀁𑀲𑁂𑀢𑀺, 𑀚𑀺𑀡𑁆𑀡𑀪𑀺𑀦𑁆𑀦𑀪𑀸𑀯𑀁 𑀧𑀸𑀧𑁂𑀢𑀺, 𑀦𑀸𑀦𑀸𑀤𑀼𑀓𑁆𑀔𑀁 𑀚𑀦𑁂𑀢𑀺. 𑀲𑀬𑀁 𑀅𑀧𑀸𑀬𑀢𑁆𑀢𑀪𑀸𑀯𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀦𑀸𑀦𑀸𑀅𑀧𑀸𑀬 𑀤𑀼𑀓𑁆𑀔𑀁 𑀚𑀦𑁂𑀢𑀺. 𑀢𑀣𑀸 𑀤𑁂𑀯𑀢𑁆𑀢𑀪𑀸𑀯𑁂 𑀲𑀓𑁆𑀓𑀢𑁆𑀢𑀪𑀸𑀯𑁂 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀦𑀸𑀦𑀸𑀯𑀺𑀧𑀭𑀺𑀡𑀸𑀫 𑀓𑀺𑀘𑁆𑀘𑁂𑀳𑀺 𑀬𑀣𑀸𑀧𑀯𑀢𑁆𑀢𑀁 𑀲𑀼𑀔𑀁 𑀯𑀺𑀤𑁆𑀥𑀁𑀲𑁂𑀢𑀺, 𑀦𑀸𑀦𑀸𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂𑀳𑀺 𑀦𑀸𑀦𑀸𑀤𑀼𑀓𑁆𑀔𑀁 𑀚𑀦𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀤𑀜𑁆𑀘 𑀭𑀽𑀧𑀁 𑀏𑀤𑀺𑀲𑀫𑁂𑀯𑀸’’𑀢𑀺. ‘‘𑀲𑀸𑀭𑁄𑀦𑀸𑀫 𑀣𑀸𑀫𑀩𑀮𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀏𑀢𑁂𑀦 𑀣𑀸𑀫𑀩𑀮𑀯𑀺𑀲𑁂𑀲𑁂𑀦 𑀲𑀫𑁆𑀧𑀦𑁆𑀦𑀁 𑀯𑀢𑁆𑀣𑀼𑀁𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀲𑀸𑀭𑀓𑀝𑁆𑀞𑁂𑀦𑀸’’𑀢𑀺 𑀏𑀢𑁆𑀣 𑀲𑀸𑀭𑁄 𑀏𑀯 𑀲𑀸𑀭𑀓𑀁, 𑀦 𑀲𑀸𑀭𑀓𑀁 𑀅𑀲𑀸𑀭𑀓𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀭𑀽𑀧𑀁 𑀧𑀦 𑀲𑀬𑀁𑀧𑀺 𑀏𑀯𑀭𑀽𑀧𑁄 𑀲𑀸𑀭𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀸𑀦𑀁 𑀅𑀢𑁆𑀢𑀲𑀸𑀭𑁄 𑀚𑀻𑀯𑀲𑀸𑀭𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀲𑀸𑀭𑁄 𑀏𑀢𑀲𑁆𑀲𑀸𑀢𑀺 𑀅𑀲𑀸𑀭𑀓𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀦 𑀘 𑀏𑀯𑀭𑀽𑀧𑁂𑀦 𑀲𑀸𑀭𑁂𑀦 𑀬𑀼𑀢𑁆𑀢𑀁’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀲𑀸𑀭𑁂𑀦 𑀚𑀻𑀯𑀲𑀸𑀭𑁂𑀦 𑀲𑀁𑀬𑀼𑀢𑁆𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀼𑀭𑀺𑀫𑁄 𑀅𑀢𑁆𑀣𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀧𑀘𑁆𑀙𑀺𑀫𑁄 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁𑀢𑀺 𑀇𑀫𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀏𑀢𑁂𑀦 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀲𑀸𑀭𑀪𑀸𑀯𑁂𑀦, 𑀅𑀲𑀸𑀭𑀬𑀼𑀢𑁆𑀢𑀪𑀸𑀯𑁂𑀦 𑀯𑀸𑀢𑀺 𑀘. 𑀅𑀦𑀢𑁆𑀢𑀸𑀢𑀺 𑀏𑀢𑁆𑀣𑀧𑀺 𑀦 𑀅𑀢𑁆𑀢𑀸 𑀅𑀦𑀢𑁆𑀢𑀸, 𑀦𑀢𑁆𑀣𑀺 𑀅𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀦𑀢𑁆𑀢𑀸𑀢𑀺 𑀘 𑀤𑁆𑀯𑀺𑀥𑀸 𑀅𑀢𑁆𑀣𑁄 𑀲𑀺𑀚𑁆𑀛𑀢𑀺. ‘‘𑀬𑀜𑁆𑀘𑀸’’𑀢𑀺 𑀬𑀜𑁆𑀘 𑀭𑀽𑀧𑀁. ‘‘𑀧𑀻𑀴𑁂𑀢𑀻’’𑀢𑀺 𑀢𑀁 𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑀁 𑀧𑀻𑀴𑁂𑀢𑀺. 𑀏𑀢𑁂𑀦 𑀅𑀦𑀢𑁆𑀢𑀪𑀸𑀯𑁂 𑀲𑀺𑀤𑁆𑀥𑁂 𑀤𑀼𑀓𑁆𑀔𑀪𑀸𑀯𑁄𑀧𑀺 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀢𑀺𑀡𑁆𑀡𑀁 𑀯𑀬𑀸𑀦𑀁 𑀯𑀲𑁂𑀦 𑀅𑀤𑁆𑀥𑀸𑀪𑁂𑀤𑁄 𑀬𑁄𑀚𑁂𑀢𑀩𑁆𑀩𑁄’’𑀢𑀺 𑀧𑀣𑀫𑀯𑀬𑁂 𑀧𑀯𑀢𑁆𑀢𑀁 𑀭𑀽𑀧𑀁 𑀤𑀼𑀢𑀻𑀬𑀯𑀬𑀁 𑀦 𑀧𑀸𑀧𑀼𑀡𑀸𑀢𑀺, 𑀧𑀣𑀫𑀯𑀬𑁂 𑀏𑀯 𑀦𑀺𑀭𑀼𑀚𑁆𑀛𑀢𑀻𑀢𑀺𑀆𑀤𑀺𑀦𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀦𑁆𑀢𑁄𑀕𑀥𑀪𑁂𑀤𑁄 𑀬𑁄𑀚𑁂𑀢𑀩𑁆𑀩𑁄. ‘‘𑀲𑀪𑀸𑀕𑁂𑀓𑀲𑀦𑁆𑀢𑀸𑀦𑀯𑀲𑁂𑀦𑀸’’𑀢𑀺 𑀲𑀪𑀸𑀕𑀸𑀦𑀁 𑀥𑀫𑁆𑀫𑀸𑀦𑀁 𑀲𑀪𑀸𑀕𑀝𑁆𑀞𑁂𑀦 𑀏𑀓𑀻𑀪𑀽𑀢𑀸 𑀲𑀦𑁆𑀢𑀢𑀺 𑀲𑀪𑀸𑀕𑁂𑀓𑀲𑀦𑁆𑀢𑀢𑀺. ‘‘𑀲𑀪𑀸𑀕𑀸𑀦𑀁 𑀥𑀫𑁆𑀫𑀸𑀦𑀁’’𑀢𑀺 𑀘 𑀘𑀺𑀢𑁆𑀢𑀚𑁂𑀲𑀼𑀢𑀸𑀯 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀸 𑀭𑀽𑀧𑀥𑀫𑁆𑀫𑀸 𑀲𑀪𑀸𑀕𑀭𑀽𑀧𑀥𑀫𑁆𑀫𑀸 𑀦𑀸𑀫. 𑀢𑀣𑀸 𑀦𑀸𑀫 𑀥𑀫𑁆𑀫𑀸 𑀘. 𑀏𑀯𑀁 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀸𑀤𑀻𑀲𑀼𑀧𑀺. 𑀉𑀢𑀼𑀚𑁂𑀲𑀼 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑁂𑀦 𑀲𑀻𑀢𑀉𑀢𑀼𑀦𑀸 𑀲𑀫𑀼𑀝𑁆𑀞𑀺𑀢𑀸 𑀭𑀽𑀧𑀥𑀫𑁆𑀫𑀸 𑀲𑀪𑀸𑀕𑀭𑀽𑀧 𑀥𑀫𑁆𑀫𑀸 𑀦𑀸𑀫. 𑀢𑀣𑀸 𑀉𑀡𑁆𑀳𑀉𑀢𑀼𑀦𑀸 𑀲𑀫𑀼𑀝𑁆𑀞𑀺𑀢𑀸. 𑀏𑀲𑀦𑀬𑁄 𑀆𑀳𑀸𑀭𑀚𑁂𑀲𑀼𑀧𑀻𑀢𑀺 𑀏𑀯𑀁 𑀲𑀪𑀸𑀕𑁂𑀓𑀲𑀦𑁆𑀢𑀢𑀺𑀯𑀲𑁂𑀦. ‘‘𑀲𑀫𑁆𑀧𑀸𑀧𑀼𑀡𑀺𑀢𑀼𑀁’’𑀢𑀺 𑀜𑀸𑀡𑁂𑀦 𑀲𑀫𑁆𑀧𑀸𑀧𑀼𑀡𑀺𑀢𑀼𑀁. ‘‘𑀅𑀤𑁆𑀥𑀸𑀲𑀦𑁆𑀢𑀢𑀺𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀲𑀦𑁆𑀢𑀢𑀺𑀯𑀲𑁂𑀦 𑀲𑀫𑁆𑀫𑀲𑀦𑀁 𑀯𑀺𑀲𑁂𑀲𑀢𑁄 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺 𑀧𑀤𑁂 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀦𑁆𑀢𑀢𑀺 𑀯𑀺𑀪𑀸𑀕𑀦𑀬𑁄 𑀲𑀼𑀝𑁆𑀞𑀼 𑀤𑀲𑁆𑀲𑀺𑀢𑁄𑀢𑀺. ‘‘𑀅𑀦𑀺𑀘𑁆𑀘𑀮𑀓𑁆𑀔𑀡 𑀤𑀲𑁆𑀲𑀦𑀫𑁂𑀯 𑀧𑀥𑀸𑀦𑀁’’𑀢𑀺 𑀇𑀫𑀲𑁆𑀫𑀺𑀁 𑀜𑀸𑀡𑁂𑀧𑀺 𑀉𑀤𑀬𑀩𑁆𑀩𑀬𑀜𑁆𑀜𑀸𑀡𑁂𑀧𑀺 𑀪𑀗𑁆𑀕𑀜𑁆𑀜𑀸𑀡𑁂𑀧𑀺 𑀅𑀦𑀺𑀘𑁆𑀘𑀮𑀓𑁆𑀔𑀡 𑀤𑀲𑁆𑀲𑀦𑀫𑁂𑀯 𑀧𑀥𑀸𑀦𑀁. 𑀪𑀬𑀜𑁆𑀜𑀸𑀡𑁂 𑀘 𑀆𑀤𑀻𑀦𑀯𑀜𑁆𑀜𑀸𑀡𑁂 𑀘 𑀦𑀺𑀩𑁆𑀩𑀺𑀤𑀸𑀜𑀸𑀡𑁂 𑀘 𑀤𑀼𑀓𑁆𑀔𑀮𑀓𑁆𑀔𑀡 𑀤𑀲𑁆𑀲𑀦𑀁 𑀧𑀥𑀸𑀦𑀁. 𑀉𑀧𑀭𑀺 𑀘𑀢𑀽𑀲𑀼 𑀜𑀸𑀡𑁂𑀲𑀼 𑀅𑀦𑀢𑁆𑀢𑀮𑀓𑁆𑀔𑀡 𑀤𑀲𑁆𑀲𑀦𑀁 𑀧𑀥𑀸𑀦𑀦𑁆𑀢𑀺. ‘‘𑀲𑀫𑀼𑀤𑀺𑀢𑁂𑀲𑀽’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀸𑀪𑀸𑀯𑀲𑀳𑀸𑀬𑀪𑀸𑀯𑁂𑀦 𑀲𑀫𑀼𑀧𑁆𑀧𑀦𑁆𑀦𑁂𑀲𑀼. 𑀇𑀤𑀜𑁆𑀘 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄. 𑀢𑀡𑁆𑀳𑀸𑀲𑀫𑀼𑀤𑀬𑀸 𑀉𑀧𑀸𑀤𑀸𑀦 𑀲𑀫𑀼𑀤𑀬𑁄. 𑀆𑀳𑀸𑀭 𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑀧𑀸𑀴𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑀳𑀻𑀦 𑀯𑀲𑁂𑀦𑀸𑀢𑀺 𑀧𑀸𑀴𑀺𑀧𑀤𑁂 𑀧𑀦 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀤𑀺𑀝𑁆𑀞𑀸𑀦𑀼𑀲𑀬𑀸𑀦𑀁 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀯𑀺𑀚𑁆𑀚𑀫𑀸𑀦𑀢𑀸 𑀏𑀯 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀫𑀼𑀤𑁂𑀦𑁆𑀢𑀻’’𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀏𑀓𑀢𑁄 𑀉𑀤𑁂𑀦𑁆𑀢𑀺. 𑀉𑀧𑀭𑀽𑀧𑀭𑀺 𑀏𑀦𑁆𑀢𑀺. 𑀆𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀪𑀯𑀪𑀸𑀯𑁂𑀦 𑀧𑀸𑀢𑀼𑀩𑁆𑀪𑀯𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀬𑀸𑀯𑀫𑀭𑀡𑀓𑀸𑀮𑀸’’𑀢𑀺𑀆𑀤𑀺𑀁. ‘‘𑀧𑀲𑀯𑀦𑁆𑀢𑀻’’𑀢𑀺 𑀧𑀯𑀟𑁆𑀠𑀫𑀸𑀦𑀸 𑀲𑀯𑀦𑁆𑀢𑀺, 𑀧𑀯𑀢𑁆𑀢𑀦𑁆𑀢𑀺, 𑀲𑀦𑁆𑀤𑀦𑁆𑀢𑀺. ‘‘𑀢𑁂𑀲𑀼 𑀧𑀦𑀸’’𑀢𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀼𑀧𑀸𑀤𑀸𑀦 𑀓𑀫𑁆𑀫𑁂𑀲𑀼. ‘‘𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀢𑀲𑁆𑀫𑀺𑀁𑀪𑀯𑁂 𑀏𑀯 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀯𑁂 𑀦𑀺𑀭𑁄𑀥𑁄 𑀦𑀸𑀫 𑀪𑀯𑀦𑁆𑀢𑀭𑁂 𑀧𑀼𑀦 𑀅𑀦𑀼𑀧𑁆𑀧𑀸𑀤𑁄 𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀪𑀯𑀦𑁆𑀢𑀭𑁂’’𑀢𑀺𑀆𑀤𑀺. ‘‘𑀢𑀁 𑀲𑀦𑁆𑀢𑀢𑀺𑀬𑀁’’𑀢𑀺 𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦 𑀪𑀯𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀼𑀦 𑀅𑀦𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀁 𑀦𑀺𑀭𑁄𑀥𑀁’’𑀢𑀺 𑀲𑀦𑁆𑀢𑀢𑀺 𑀦𑀺𑀭𑁄𑀥𑁄 𑀦𑀸𑀫 𑀯𑀼𑀢𑁆𑀢𑁄. 𑀦 𑀦𑀺𑀩𑁆𑀩𑀸𑀦 𑀦𑀺𑀭𑁄𑀥𑁄. 𑀏𑀢𑀸𑀳𑀺 𑀧𑀘𑁆𑀘𑀬𑁂 𑀲𑀢𑀺, 𑀪𑀯𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀻𑀲𑁆𑀲𑀦𑁆𑀢𑀺 𑀬𑁂𑀯𑀸𑀢𑀺. 𑀇𑀤𑀸𑀦𑀺 𑀬𑀣𑀸𑀧𑀯𑀢𑁆𑀢 𑀲𑀦𑁆𑀢𑀢𑀻𑀲𑀼 𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀔𑀡𑀺𑀓𑀦𑀺𑀭𑁄𑀥𑀯𑀲𑁂𑀦 𑀅𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀬𑀣𑀸𑀧𑀯𑀢𑁆𑀢 𑀲𑀦𑁆𑀢𑀢𑀺𑀬𑁄 𑀯𑀸 𑀙𑀺𑀚𑁆𑀚𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀉𑀤𑀬𑀩𑁆𑀩𑀬𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀘𑀸’’𑀢𑀺 𑀏𑀢𑁆𑀣 𑀓𑀢𑀫𑁄 𑀉𑀤𑀬𑁄 𑀦𑀸𑀫, 𑀓𑀢𑀫𑁄 𑀯𑀬𑁄 𑀦𑀸𑀫, 𑀓𑀣𑀜𑁆𑀘 𑀢𑀤𑀼𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀆𑀳 ‘‘𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀢𑀫𑁄 𑀔𑀦𑁆𑀥𑁄’’𑀢𑀺 𑀢𑀫𑁄𑀭𑀸𑀲𑀺. ‘‘𑀯𑁂𑀢𑀻’’𑀢𑀺 𑀯𑀺𑀕𑀘𑁆𑀙𑀢𑀺. 𑀅𑀦𑁆𑀢𑀭 𑀥𑀸𑀬𑀢𑀺.‘‘𑀉𑀤𑀬𑁄’’𑀢𑀺 𑀉𑀧𑁆𑀧𑀸𑀤𑁄 𑀘𑁂𑀯 𑀯𑀟𑁆𑀠𑀺 𑀘. ‘‘𑀯𑀬𑁄’’𑀢𑀺 𑀯𑀺𑀕𑀫𑀦𑀁, 𑀅𑀦𑁆𑀢𑀭𑀥𑀸𑀦𑀁. ‘‘𑀦𑀸𑀦𑀸𑀧𑀬𑁄𑀕𑀯𑀲𑁂𑀦𑀯𑀸’’𑀢𑀺 𑀲𑀫𑀺𑀜𑁆𑀚𑀦𑀧𑁆𑀧𑀲𑀸𑀭𑀡𑀸𑀤𑀺 𑀦𑀸𑀦𑀸𑀧𑀬𑁄𑀕𑀯𑀲𑁂𑀦 𑀯𑀸. 𑀉𑀤𑀬𑀧𑀓𑁆𑀔𑀸𑀦𑀁 𑀦𑀸𑀦𑀸𑀲𑀦𑁆𑀢𑀢𑀻𑀦𑀁 𑀉𑀤𑀬𑀜𑁆𑀘 𑀉𑀤𑀬𑀢𑁄. 𑀯𑀬𑀧𑀓𑁆𑀔𑀸𑀦𑀁 𑀦𑀸𑀦𑀸𑀲𑀦𑁆𑀢𑀢𑀻𑀦𑀁 𑀯𑀬𑀜𑁆𑀘 𑀯𑀬𑀢𑁄𑀢𑀺 𑀬𑁄𑀚𑀦𑀸.

𑀩𑁄𑀚𑁆𑀛𑀗𑁆𑀕 𑀥𑀫𑁆𑀫𑁂𑀳𑀺 𑀲𑀫𑁆𑀧𑀦𑁆𑀦𑀢𑁆𑀢𑀸 𑀆𑀭𑀸𑀥𑁂𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁𑀢𑀺 𑀆𑀭𑀤𑁆𑀥𑁄. 𑀢𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀓𑁄. 𑀆𑀭𑀤𑁆𑀥𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀓𑁄 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄. 𑀤𑀼𑀯𑀺𑀥𑁄𑀳𑀺 𑀯𑀺𑀧𑀲𑁆𑀲𑀓𑁄 𑀢𑀭𑀼𑀡 𑀯𑀺𑀧𑀲𑁆𑀲𑀓𑁄 𑀘 𑀆𑀭𑀤𑁆𑀥 𑀯𑀺𑀧𑀲𑁆𑀲𑀓𑁄 𑀘. 𑀢𑀢𑁆𑀣 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀲𑀼𑀝𑁆𑀞𑀼 𑀅𑀧𑀲𑁆𑀲𑀦𑁆𑀢𑁄 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀓𑁄 𑀢𑀭𑀼𑀡 𑀯𑀺𑀧𑀲𑁆𑀲𑀓𑁄 𑀦𑀸𑀫. 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀲𑀼𑀝𑁆𑀞𑀼 𑀧𑀲𑁆𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑁂 𑀆𑀭𑀸𑀥𑀺𑀢 𑀘𑀺𑀢𑁆𑀢𑁄 𑀩𑀮𑀯𑀯𑀺𑀧𑀲𑁆𑀲𑀓𑁄 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

[𑀓]

‘𑀲𑀼𑀜𑁆𑀜𑀸𑀕𑀸𑀭𑁂 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄,𑀢𑀺 𑀘.

[𑀔]

‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬𑀁,𑀢𑀺 𑀘.

𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀯𑀺𑀧𑀲𑁆𑀲𑀦𑀁 𑀉𑀧𑁂𑀘𑁆𑀘 𑀓𑀺𑀮𑁂𑀲𑁂𑀦𑁆𑀢𑀺, 𑀫𑀮𑀻𑀦𑀪𑀸𑀯𑀁 𑀕𑀫𑁂𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸. 𑀧𑀭𑀺𑀩𑀦𑁆𑀥𑀦𑁆𑀢𑀺 𑀦𑀻𑀯𑀸𑀭𑁂𑀦𑁆𑀢𑀻𑀢𑀺 𑀧𑀭𑀺𑀩𑀦𑁆𑀥𑀓𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯 𑀅𑀦𑁆𑀢𑀭𑀸𑀬𑀺𑀓 𑀥𑀫𑁆𑀫𑀸𑀦𑀁 𑀦𑀸𑀫𑀁. ‘‘𑀲𑀭𑀻𑀭𑁄𑀪𑀸𑀲𑁄’’𑀢𑀺 𑀲𑀓𑀮𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀑𑀪𑀸𑀲𑁄. ‘‘𑀧𑀜𑁆𑀘𑀯𑀺𑀥𑀸 𑀧𑀻𑀢𑀻’’𑀢𑀺 𑀔𑀼𑀤𑁆𑀤𑀺𑀓𑀸 𑀧𑀻𑀢𑀺, 𑀔𑀡𑀺𑀓𑀸 𑀧𑀻𑀢𑀺, 𑀑𑀓𑁆𑀓𑀦𑁆𑀢𑀺𑀓𑀸 𑀧𑀻𑀢𑀺, 𑀉𑀩𑁆𑀩𑁂𑀕𑀸 𑀧𑀻𑀢𑀺, 𑀨𑀭𑀡𑀸 𑀧𑀻𑀢𑀻𑀢𑀺. ‘‘𑀤𑀼𑀯𑀺𑀥𑀸 𑀧𑀲𑁆𑀲𑀤𑁆𑀥𑀻’’𑀢𑀺 𑀅𑀢𑀺𑀩𑀮𑀯𑀦𑁆𑀢𑀻 𑀓𑀸𑀬𑀧𑀲𑁆𑀲𑀤𑁆𑀥𑀺𑀘𑁂𑀯 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀘. 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑁂 𑀑𑀓𑀧𑁆𑀧𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀲𑀤𑁆𑀥𑀸𑀏𑀯 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦 𑀅𑀥𑀺𑀫𑁄𑀓𑁆𑀔𑁄 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑁄. ‘‘𑀯𑀻𑀭𑀺𑀬𑀁’’𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀁 𑀧𑀕𑁆𑀕𑀳𑀺𑀢𑀲𑀻𑀲𑀁 𑀯𑀻𑀭𑀺𑀬𑀁. ‘‘𑀲𑀼𑀔𑀁’’𑀢𑀺 𑀘𑀺𑀢𑁆𑀢𑀲𑀼𑀔𑀁. 𑀢𑁂𑀦𑀸𑀳 ‘‘𑀲𑁄𑀫𑀦𑀲𑁆𑀲𑀁’’𑀢𑀺. ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀁’’𑀢𑀺 𑀇𑀦𑁆𑀤𑀯𑀺𑀲𑁆𑀲𑀝𑁆𑀞𑀯𑀚𑀺𑀭𑀲𑀤𑀺𑀲𑀁 𑀩𑀮𑀯𑀯𑀺𑀧𑀲𑁆𑀲𑀦𑀸𑀜𑀸𑀡𑀁. ‘‘𑀲𑀢𑀻’’𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀅𑀧𑁆𑀧𑀫𑀼𑀝𑁆𑀞𑀸 𑀲𑀢𑀺. ‘‘𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸’’𑀢𑀺 𑀘𑀺𑀢𑁆𑀢𑀲𑁆𑀲 𑀮𑀻𑀦𑀼𑀤𑁆𑀥𑀘𑁆𑀘𑀸𑀤𑀻𑀳𑀺 𑀯𑀺𑀲𑀫𑀦𑁆𑀢𑁂𑀳𑀺 𑀯𑀺𑀫𑀼𑀢𑁆𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀲𑀗𑁆𑀔𑀸𑀢𑀸 𑀉𑀧𑁂𑀓𑁆𑀔𑀸. ‘‘𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸’’𑀢𑀺 𑀯𑀲𑀺𑀪𑀸𑀯𑀧𑀢𑁆𑀢𑀸 𑀆𑀯𑀚𑁆𑀚𑀦𑀲𑀗𑁆𑀔𑀸𑀢𑀸 𑀉𑀧𑁂𑀓𑁆𑀔𑀸. ‘‘𑀆𑀮𑀬𑀁’’𑀢𑀺 𑀢𑀡𑁆𑀳𑀸𑀮𑀬𑀁. ‘‘𑀓𑀼𑀭𑀼𑀫𑀸𑀦𑀸’’𑀢𑀺 𑀓𑀭𑁄𑀦𑁆𑀢𑀻. ‘‘𑀲𑀼𑀔𑀼𑀫𑀸 𑀢𑀡𑁆𑀳𑀸’’𑀢𑀺 𑀓𑀼𑀲𑀮𑁂𑀳𑀺 𑀫𑀺𑀲𑁆𑀲𑀓𑀢𑁆𑀢𑀸 𑀇𑀤𑀁 𑀅𑀓𑀼𑀲𑀮𑀦𑁆𑀢𑀺𑀧𑀺 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀲𑀼𑀔𑀼𑀫𑀢𑀡𑁆𑀳𑀸. ‘‘𑀦 𑀯𑀢𑀫𑁂’’𑀢𑀺 𑀫𑀫 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄𑀯𑀢𑀸𑀢𑀺 𑀬𑁄𑀚𑀦𑀸. ‘‘𑀅𑀲𑁆𑀲𑀸𑀤𑀲𑀳𑀺𑀢𑀸’’𑀢𑀺 𑀑𑀪𑀸𑀲𑀸𑀤𑀻𑀲𑀼 𑀅𑀲𑁆𑀲𑀸𑀤𑀢𑀡𑁆𑀳𑀸 𑀲𑀳𑀺𑀢𑀸. ‘‘𑀅𑀥𑀺𑀫𑀸𑀦 𑀯𑀲𑁂𑀦𑀸’’𑀢𑀺 𑀅𑀥𑀺𑀓𑀢𑀭𑀁 𑀫𑀜𑁆𑀜𑀦𑀸𑀯𑀲𑁂𑀦. ‘‘𑀢𑀸𑀯𑀤𑁂𑀯𑀸’’𑀢𑀺 𑀦𑀺𑀓𑀦𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂𑀬𑁂𑀯. ‘‘𑀦𑀺𑀓𑀸𑀫𑀦𑀸𑀓𑀸𑀭𑁄’’𑀢𑀺 𑀇𑀘𑁆𑀙𑀦𑀸𑀓𑀸𑀭𑁄. 𑀅𑀲𑁆𑀲𑀸𑀤𑀦𑀸𑀓𑀸𑀭𑁄. ‘‘𑀦𑀺𑀓𑀸𑀫𑀦𑀲𑁆𑀲𑀯𑀢𑁆𑀣𑀽’’𑀢𑀺 𑀦𑀺𑀓𑀦𑁆𑀢𑀺𑀬𑀸 𑀯𑀢𑁆𑀣𑀼. ‘‘𑀅𑀤𑁆𑀥𑀸’’𑀢𑀺 𑀏𑀓𑀦𑁆𑀢𑁂𑀦. ‘‘𑀳𑀦𑁆𑀤𑀸’’𑀢𑀺 𑀘𑀺𑀢𑁆𑀢𑀯𑀺𑀲𑁆𑀲𑀝𑁆𑀞𑀓𑀭𑀡𑁂 𑀦𑀺𑀧𑀸𑀢𑀧𑀤𑀁. 𑀇𑀤𑀸𑀦𑁂𑀯 𑀦𑀁 𑀯𑀺𑀲𑁄𑀥𑁂𑀫𑀺, 𑀦 𑀘𑀺𑀭𑀁 𑀧𑀯𑀢𑁆𑀢𑀺𑀢𑀼𑀁 𑀤𑀲𑁆𑀲𑀸𑀫𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. ‘‘𑀢𑁂𑀲𑁆𑀯𑁂𑀯𑀸’’𑀢𑀺 𑀢𑁂𑀲𑀼𑀑𑀪𑀸𑀲𑀸𑀤𑀻𑀲𑀼 𑀏𑀯. 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀦𑀺𑀓𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀲𑁆𑀲𑀦𑀸𑀧𑀭𑀺𑀧𑀸𑀓𑁄 𑀦𑀸𑀫 𑀯𑀺𑀲𑁂𑀲𑀦𑁆𑀢𑀭𑀧𑁆𑀧𑀯𑀢𑁆𑀢𑁂𑀦 𑀧𑀸𑀓𑀝𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀪𑀸𑀯𑀁 𑀧𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀧𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀤𑁆𑀯𑁂 𑀯𑀺𑀧𑀲𑁆𑀲𑀦𑀸 𑀘𑀺𑀢𑁆𑀢𑀸𑀦𑀻’’𑀢𑀺 𑀉𑀧𑀘𑀸𑀭𑀸𑀦𑀼𑀮𑁄𑀫𑀘𑀺𑀢𑁆𑀢𑀸𑀦𑀺. 𑀲𑁄 𑀳𑀺 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀔𑀸𑀭 𑀦𑀺𑀫𑀺𑀢𑁆𑀢𑀢𑁄 𑀯𑀸 𑀯𑀼𑀝𑁆𑀞𑀸𑀢𑀺. 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄. 𑀬𑀤𑀺 𑀏𑀯𑀁 𑀕𑁄𑀢𑁆𑀭𑀪𑀼𑀧𑀺 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀲𑀺𑀬𑀸𑀢𑀺. 𑀦 𑀲𑀺𑀬𑀸. 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀫𑀢𑁆𑀢𑁂 𑀞𑀺𑀢𑀢𑁆𑀢𑀸. 𑀧𑀝𑀺𑀯𑁂𑀥𑀓𑀺𑀘𑁆𑀘𑀲𑁆𑀲𑀘 𑀲𑀫𑁆𑀫𑁄𑀳 𑀲𑀫𑀼𑀘𑁆𑀙𑁂𑀤𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄. ‘‘𑀲𑀬𑀁’’𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑁄 𑀲𑀬𑀁. ‘‘𑀢𑀁 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀯𑀸’’𑀢𑀺 𑀢𑁂𑀦 𑀫𑀕𑁆𑀕𑁂𑀦 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀯𑀸. ‘‘𑀯𑀝𑁆𑀝𑀧𑁆𑀧𑀯𑀢𑁆𑀢𑀢𑁄 𑀘𑀸’’𑀢𑀺 𑀆𑀬𑀢𑀺𑀁 𑀪𑀯𑁂𑀲𑀼 𑀅𑀧𑀸𑀬𑀯𑀝𑁆𑀝𑀧𑁆𑀧𑀯𑀢𑁆𑀢𑀢𑁄 𑀯𑀸, 𑀅𑀝𑁆𑀞𑀫 𑀪𑀯𑀢𑁄 𑀧𑀝𑁆𑀞𑀸𑀬 𑀓𑀸𑀫𑀲𑀼𑀕𑀢𑀺 𑀯𑀝𑁆𑀝𑀧𑁆𑀧𑀯𑀢𑁆𑀢𑀢𑁄 𑀯𑀸. 𑀅𑀯𑀲𑁆𑀲𑀁 𑀯𑀼𑀝𑁆𑀞𑀸𑀦𑀁 𑀕𑀫𑁂𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀢𑀺 𑀯𑀘𑀦𑀢𑁆𑀣𑁄. ‘‘𑀅𑀯𑀲𑁆𑀲𑀁 𑀯𑀼𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀥 𑀞𑀺𑀢𑀸𑀦𑀁 𑀯𑀼𑀝𑁆𑀞𑀸𑀦𑀢𑁄 𑀦𑀺𑀯𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀯𑀲𑁂𑀦 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀜𑁆𑀜𑀼 𑀩𑁄𑀥𑀺𑀲𑀢𑁆𑀢𑀸 𑀧𑀦 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁 𑀆𑀭𑀪𑀦𑁆𑀢𑀸 𑀅𑀦𑀼𑀮𑁄𑀫𑀜𑁆𑀜𑀸𑀡𑀁 𑀆𑀳𑀘𑁆𑀘 𑀞𑀧𑁂𑀦𑁆𑀢𑀻𑀢𑀺 𑀅𑀝𑁆𑀞𑀓 𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀆𑀳𑀘𑁆𑀘𑀸’’𑀢𑀺 𑀇𑀤𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀫𑀢𑁆𑀣𑀓𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀁’’𑀢𑀺 𑀢𑀢𑁄 𑀧𑀼𑀩𑁆𑀩𑀪𑀸𑀕𑁂 𑀓𑁂𑀦𑀘𑀺 𑀘𑀺𑀢𑁆𑀢𑁂𑀦 𑀅𑀕𑁆𑀕𑀳𑀺𑀢𑁂 𑀦𑀺𑀩𑁆𑀩𑀸𑀦𑀸 𑀭𑀫𑁆𑀫𑀡𑁂 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀁. ‘‘𑀢𑀁’’𑀢𑀺 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀁. 𑀕𑁄𑀢𑁆𑀢𑀁 𑀪𑀯𑀢𑀺 𑀅𑀪𑀺𑀪𑀯𑀢𑀺 𑀙𑀺𑀦𑁆𑀤𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀕𑁄𑀢𑁆𑀢𑀁 𑀯𑀸 𑀅𑀪𑀺𑀲𑀫𑁆𑀪𑀼𑀡𑀸𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀕𑁄𑀢𑁆𑀭𑀪𑀽𑀢𑀺 𑀯𑀘𑀦𑀢𑁆𑀣𑁄. 𑀓𑀣𑀁 𑀧𑀦 𑀕𑁄𑀢𑁆𑀭𑀪𑀼 𑀘𑀺𑀢𑁆𑀢𑀁 𑀕𑁄𑀢𑁆𑀭𑀪𑀼𑀜𑁆𑀜𑀸𑀡𑀁 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀁 𑀙𑀺𑀦𑁆𑀤𑀢𑀺, 𑀅𑀭𑀺𑀬𑀕𑁄𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀲𑁄𑀳𑀺 𑀧𑀼𑀕𑁆𑀕𑀮𑁄 𑀢𑀲𑁆𑀫𑀺𑀁𑀔𑀡𑁂 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁄𑀏𑀯𑀸𑀢𑀺. 𑀲𑀘𑁆𑀘𑀁. 𑀅𑀢𑁆𑀢𑀦𑀺 𑀧𑀦 𑀙𑀺𑀦𑁆𑀦𑀢𑁆𑀢𑀸 𑀲𑀬𑀁 𑀙𑀺𑀦𑁆𑀤𑀢𑀺 𑀦𑀸𑀫. 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀭𑀺𑀬𑀕𑁄𑀘𑀭𑀢𑁆𑀢𑀸 𑀢𑀁 𑀆𑀭𑀫𑁆𑀫𑀡 𑀓𑀭𑀡𑀯𑀲𑁂𑀦 𑀅𑀭𑀺𑀬𑀕𑁄𑀢𑁆𑀢𑀁 𑀧𑀸𑀧𑀼𑀡𑀸𑀢𑀺 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀬𑀲𑀢𑁆𑀢𑀺𑀯𑀺𑀲𑁂𑀲𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀅𑀭𑀺𑀬𑀕𑁄𑀢𑁆𑀢𑀁 𑀪𑀸𑀯𑁂𑀢𑀺, 𑀧𑀸𑀢𑀼𑀪𑀸𑀯𑁂𑀢𑀻𑀢𑀺 𑀕𑁄𑀢𑁆𑀭𑀪𑀽𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀧𑀭𑀺𑀘𑁆𑀙𑀺𑀚𑁆𑀚𑀸’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀻𑀳𑀺 𑀲𑀩𑁆𑀩𑀯𑀺𑀧𑁆𑀨𑀦𑁆𑀤𑀦𑁂𑀳𑀺 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑁄𑀳𑀲𑁆𑀲 𑀧𑀳𑀸𑀦𑀫𑁂𑀯 𑀤𑀝𑁆𑀞𑀩𑁆𑀩𑀁. 𑀦 𑀢𑁂 𑀥𑀫𑁆𑀫𑁂 𑀆𑀭𑀫𑁆𑀫𑀡 𑀓𑀭𑀡 𑀯𑀲𑁂𑀦 𑀚𑀸𑀦𑀦𑀁. 𑀓𑀣𑀁 𑀢𑁂 𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀅𑀓𑀭𑁄𑀦𑁆𑀢𑁄 𑀫𑀕𑁆𑀕𑁄 𑀢𑁂 𑀥𑀫𑁆𑀫𑁂 𑀧𑀭𑀺𑀚𑀸𑀦𑀸𑀢𑀺 𑀦𑀸𑀫𑀸𑀢𑀺. 𑀓𑀺𑀘𑁆𑀘𑀲𑀺𑀤𑁆𑀥𑀺 𑀯𑀲𑁂𑀦. 𑀲𑁄 𑀳𑀺 𑀲𑀫𑁆𑀫𑁄𑀳𑀁 𑀧𑀚𑀳𑀦𑁆𑀢𑁄 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀸𑀦𑀺𑀧𑀺 𑀳𑀺 𑀧𑀼𑀩𑁆𑀩𑀪𑀸𑀕𑀜𑁆𑀜𑀸𑀡𑀸𑀦𑀺 𑀢𑀧𑁆𑀧𑀳𑀸𑀦𑀓𑀺𑀘𑁆𑀘𑀲𑁆𑀲 𑀅𑀲𑀸𑀥𑀓𑀢𑁆𑀢𑀸 𑀤𑀼𑀓𑁆𑀔 𑀲𑀘𑁆𑀘𑀁 𑀧𑀭𑀺𑀚𑀸𑀦𑀦𑁆𑀢𑀸𑀦𑀻𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀫𑀕𑁆𑀕𑁄 𑀧𑀦 𑀆𑀭𑀫𑁆𑀫𑀡𑀁 𑀅𑀓𑀭𑁄𑀦𑁆𑀢𑁄𑀧𑀺 𑀢𑀧𑁆𑀧𑀳𑀸𑀦𑀓𑀺𑀘𑁆𑀘𑀲𑁆𑀲 𑀲𑀸𑀥𑀓𑀢𑁆𑀢𑀸𑀢𑀁 𑀲𑀘𑁆𑀘𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸. 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑀓𑀸𑀮𑀁 𑀢𑀲𑁆𑀫𑀺𑀁𑀲𑀘𑁆𑀘𑁂 𑀧𑀭𑀺𑀚𑀸𑀦𑀦 𑀓𑀺𑀘𑁆𑀘𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀬𑀣𑀸𑀳𑀺 𑀏𑀓𑁄 𑀧𑀼𑀭𑀺𑀲𑁄 𑀘𑀓𑁆𑀔𑀼𑀫𑁆𑀳𑀺 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀤𑁄𑀲𑁂𑀳𑀺 𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀅𑀦𑁆𑀥𑁄 𑀳𑁄𑀢𑀺. 𑀦 𑀓𑀺𑀜𑁆𑀘𑀺 𑀧𑀲𑁆𑀲𑀢𑀺. 𑀬𑀤𑀸 𑀧𑀦 𑀲𑁄 𑀏𑀓𑀁 𑀢𑁂𑀚𑀯𑀦𑁆𑀢𑀁 𑀅𑀜𑁆𑀚𑀦𑀁 𑀮𑀪𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀜𑁆𑀚𑀬𑀦𑁆𑀢𑁄 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀸𑀬𑀢𑀺. 𑀢𑀲𑁆𑀲 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑁂𑀯 𑀘𑀓𑁆𑀔𑀼𑀫𑁆𑀳𑀺 𑀲𑀩𑁆𑀩𑀤𑁄𑀲𑀸 𑀦𑀲𑁆𑀲𑀦𑁆𑀢𑀺. 𑀘𑀓𑁆𑀔𑀼 𑀯𑀺𑀧𑁆𑀧𑀲𑀦𑁆𑀦𑀁 𑀳𑁄𑀢𑀺. 𑀢𑀗𑁆𑀔𑀡𑀢𑁄 𑀧𑀝𑁆𑀞𑀸𑀬 𑀲𑁄 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸, 𑀅𑀦𑁆𑀥𑀪𑀸𑀯𑀯𑀺𑀕𑀫𑁂𑀦 𑀤𑀲𑁆𑀲𑀦𑀓𑀺𑀘𑁆𑀘𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀏𑀯𑀫𑁂𑀯𑀫𑀺𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀏𑀓𑀤𑁂𑀲𑁂𑀦 𑀯𑀸 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀲𑀼, 𑀅𑀦𑀯𑀲𑁂𑀲𑁂𑀦 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂. ‘‘𑀅𑀧𑀘𑁆𑀙𑀸𑀯𑀢𑁆𑀢𑀺𑀓𑀁’’𑀢𑀺 𑀏𑀢𑁆𑀣 𑀧𑀘𑁆𑀙𑀢𑁄 𑀆𑀯𑀢𑁆𑀢𑀦𑀁 𑀧𑀘𑁆𑀙𑀸𑀯𑀢𑁆𑀢𑀁. 𑀦𑀢𑁆𑀣𑀺 𑀧𑀘𑁆𑀙𑀸𑀯𑀢𑁆𑀢𑀁 𑀅𑀲𑁆𑀲𑀸𑀢𑀺 𑀅𑀧𑀘𑁆𑀙𑀸𑀯𑀢𑁆𑀢𑀺𑀓𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀧𑀼𑀦 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑀁’’𑀢𑀺 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀢𑀸𑀦𑀺𑀯𑀝𑁆𑀝𑀸𑀦𑀺 𑀧𑀼𑀦 𑀅𑀦𑀼𑀧𑁆𑀧𑀸𑀤𑀲𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑀺, 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀣𑀸 𑀦𑀺𑀭𑁄𑀥𑀲𑀗𑁆𑀔𑀸𑀢𑀁. ‘‘𑀉𑀧𑁆𑀧𑀸𑀤𑀦𑀲𑀗𑁆𑀔𑀸𑀢𑀸𑀬 𑀪𑀸𑀯𑀦𑀸𑀬𑀸’’𑀢𑀺 𑀏𑀢𑁂𑀦 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀯𑀟𑁆𑀠𑀦𑀲𑀗𑁆𑀔𑀸𑀢𑀸𑀬 𑀪𑀸𑀯𑀦𑀸𑀬 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀭𑀺𑀬𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀦 𑀧𑀯𑀢𑁆𑀢𑀺𑀢𑀸 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀧𑀺 𑀫𑀕𑁆𑀕𑀪𑀸𑀯𑀦𑀸 𑀏𑀯. 𑀲𑀸 𑀘 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀯𑀸 𑀫𑀢𑁆𑀣𑀓𑀧𑀢𑁆𑀢𑀸 𑀳𑁄𑀢𑀺. 𑀢𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑁄 𑀏𑀯 𑀫𑀢𑁆𑀣𑀓𑀧𑀢𑁆𑀢𑁄 𑀪𑀸𑀯𑀦𑀸𑀦𑀼𑀢𑁆𑀢𑀭𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸𑀧𑀭𑀺𑀬𑀸𑀬𑁂𑀦 𑀯𑀟𑁆𑀠𑀦 𑀲𑀗𑁆𑀔𑀸𑀢𑀸𑀬 𑀪𑀸𑀯𑀦𑀸𑀬𑀸𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀧𑀯𑀢𑁆𑀢𑀁 𑀆𑀦𑀦𑁆𑀢𑀭𑀺𑀓𑀁. 𑀆𑀦𑀦𑁆𑀢𑀭𑀺𑀓𑀁 𑀨𑀮𑀁 𑀏𑀢𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀲𑁆𑀲 𑀘 𑀢𑀢𑁄𑀧𑀭𑀁 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀨𑀮𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀧𑀦𑀻𑀢𑁄 𑀅𑀕𑁆𑀕𑀺 𑀏𑀢𑀲𑁆𑀫𑀸𑀢𑀺 𑀅𑀧𑀦𑀻𑀢𑀕𑁆𑀕𑀺𑀓𑁄. ‘‘𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀯𑀺𑀬𑀸’’𑀢𑀺 𑀏𑀢𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀧𑁆𑀧𑀳𑀸𑀦𑀓𑀺𑀘𑁆𑀘𑁂𑀦 𑀫𑀕𑁆𑀕𑀸𑀦𑀼𑀓𑀼𑀮𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. ‘‘𑀢𑁂𑀲𑀁’’𑀢𑀺 𑀢𑁂𑀲𑀁 𑀘𑀓𑁆𑀔𑀽𑀦𑀁. 𑀢𑀁 𑀭𑀽𑀧𑀁 𑀢𑀲𑁆𑀲 𑀧𑀸𑀓𑀝𑀁 𑀦 𑀢𑀸𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲𑀸’’𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. ‘‘𑀧𑀘𑁆𑀘𑀯𑁂𑀓𑁆𑀔𑀦𑀯𑀸𑀭𑁂𑀲𑀽’’𑀢𑀺 𑀏𑀢𑁆𑀣 𑀧𑀲𑀸𑀤𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂 𑀧𑀯𑀢𑁆𑀢𑀸 𑀅𑀦𑀼𑀩𑀦𑁆𑀥𑀓 𑀯𑀻𑀣𑀺𑀬𑁄𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀉𑀧𑀭𑀺𑀫𑀕𑁆𑀕𑁂𑀳𑀺 𑀯𑀥𑀺𑀢𑀩𑁆𑀩𑀸 𑀫𑀸𑀭𑁂𑀢𑀩𑁆𑀩𑀸𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀸. ‘‘𑀓𑀺𑀮𑁂𑀲𑀯𑀺𑀪𑀸𑀕𑁂𑀲𑀽’’𑀢𑀺 𑀅𑀲𑀼𑀓𑀫𑀕𑁆𑀕𑁂𑀦 𑀅𑀲𑀼𑀓𑀸𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀯𑀺𑀪𑀸𑀕𑁂𑀲𑀼. ‘‘𑀧𑀸𑀴𑀺𑀬𑀁’’𑀢𑀺 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀧𑀸𑀴𑀺𑀬𑀁. 𑀯𑀼𑀘𑁆𑀘𑀫𑀸𑀦𑁂 𑀧𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑀁 𑀦𑀸𑀫 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀦𑀫𑁂𑀯. 𑀢𑀣𑀸 𑀧𑀘𑁆𑀙𑀸 𑀯𑀸 𑀧𑀯𑀢𑁆𑀢𑀢𑀻𑀢𑀺 𑀲𑀺𑀤𑁆𑀥𑀁. ‘‘𑀅𑀯𑀺𑀭𑀼𑀤𑁆𑀥𑀸 𑀳𑁄𑀢𑀻’’𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀅𑀲𑀫𑁂𑀦𑁆𑀢𑀸𑀧𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀇𑀘𑁆𑀙𑀸𑀦𑀼𑀭𑀽𑀧𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀥𑀺𑀫𑀸𑀦𑀦𑀺𑀤𑁆𑀤𑁂𑀲 𑀅𑀝𑁆𑀞𑀓𑀣𑀸𑀲𑀽’’𑀢𑀺 𑀯𑀺𑀦𑀬𑁂 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂 𑀅𑀥𑀺𑀫𑀸𑀦𑀧𑀤𑀦𑀺𑀤𑁆𑀤𑁂𑀲 𑀅𑀝𑁆𑀞𑀓𑀣𑀸𑀲𑀼. ‘‘𑀲𑁄’’𑀢𑀺 𑀅𑀭𑀺𑀬𑀪𑀽𑀢𑁄 𑀪𑀺𑀓𑁆𑀔𑀼. ‘‘𑀦𑁄 𑀮𑀤𑁆𑀥𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀮𑀤𑁆𑀥𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀮𑀤𑁆𑀥𑀼𑀁 𑀦𑁄 𑀦 𑀯𑀝𑁆𑀝𑀢𑀻𑀢𑀺 𑀯𑀸 𑀬𑁄𑀚𑀦𑀸. 𑀘𑀢𑀼𑀩𑁆𑀩𑀺𑀥𑀁 𑀫𑀕𑁆𑀕𑀜𑁆𑀜𑀸𑀡𑀁 𑀕𑀳𑀺𑀢𑀁. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫𑀸𑀢𑀺 𑀯𑀼𑀢𑁆𑀢𑀢𑁆𑀢𑀸.

‘‘𑀅𑀪𑀺𑀦𑀺𑀯𑀺𑀲𑀦𑀁’’𑀢𑀺 𑀅𑀚𑁆𑀛𑀢𑁆𑀢𑀁 𑀤𑀴𑁆𑀳𑀢𑀭𑀁 𑀧𑀢𑀺𑀝𑁆𑀞𑀸𑀦𑀁. ‘‘𑀦𑀺𑀔𑀸𑀢𑀲𑀺𑀦𑁂𑀭𑀼𑀧𑀸 𑀤𑀲𑁆𑀲𑀯𑀺𑀬𑀸’’𑀢𑀺 𑀢𑀲𑁆𑀲 𑀧𑀯𑀢𑁆𑀢𑀦𑀁 𑀯𑀺𑀬. ‘‘𑀓𑁂𑀯𑀮𑀁 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀸𑀬 𑀅𑀤𑀺𑀝𑁆𑀞𑀢𑁆𑀢𑀸’’𑀢𑀺 𑀏𑀢𑁂𑀦 𑀏𑀲𑁄 𑀫𑁂 𑀅𑀢𑁆𑀢𑀸, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀅𑀢𑁆𑀢𑀲𑁆𑀲 𑀲𑀸𑀫𑀺𑀓𑀁 𑀓𑀢𑁆𑀯𑀸 𑀕𑀳𑀡𑀓𑀸𑀭𑀡𑀁 𑀯𑀤𑀢𑀺. 𑀢𑀢𑁆𑀣 𑀓𑁂𑀯𑀮𑀲𑀤𑁆𑀤𑁂𑀦 𑀧𑀭𑀫𑀢𑁆𑀣 𑀲𑀘𑁆𑀘𑀁 𑀧𑀢𑁆𑀯𑀸 𑀅𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀅𑀢𑁆𑀢𑀦𑁄𑀯𑀲𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀫𑁆𑀫𑀼𑀢𑀺 𑀲𑀘𑁆𑀘𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀫𑀳𑀸𑀚𑀦𑁄 𑀅𑀢𑁆𑀢𑀦𑁄 𑀔𑀦𑁆𑀥𑀧𑀜𑁆𑀘𑀓𑀁 𑀅𑀢𑁆𑀢𑀦𑁄 𑀯𑀲𑀸𑀬𑀢𑁆𑀢 𑀯𑀼𑀢𑁆𑀢𑀺𑀁 𑀫𑀜𑁆𑀜𑀫𑀸𑀦𑁄 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺. ‘‘𑀔𑀡𑀪𑀗𑁆𑀕𑀲𑁆𑀲 𑀘 𑀅𑀤𑀺𑀝𑁆𑀞𑀢𑁆𑀢𑀸’’𑀢𑀺 𑀏𑀢𑁂𑀦 𑀏𑀲𑁄 𑀫𑁂 𑀲𑀸𑀭𑀝𑁆𑀞𑁂𑀦 𑀅𑀢𑁆𑀢𑀸. 𑀏𑀲𑁄 𑀫𑀫 𑀲𑀸𑀭𑁄. 𑀏𑀢𑀁 𑀫𑀫 𑀲𑀭𑀻𑀭𑀁. 𑀬𑀸𑀯 𑀯𑀲𑁆𑀲𑀲𑀢𑀁𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀏𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀦 𑀪𑀺𑀚𑁆𑀚𑀢𑀺, 𑀦 𑀯𑀺𑀦𑀲𑁆𑀲𑀢𑀺. 𑀢𑀸𑀯 𑀅𑀳𑀁 𑀦 𑀫𑀭𑀸𑀫𑀺. 𑀬𑀤𑀸 𑀏𑀢𑀁 𑀪𑀺𑀚𑁆𑀚𑀢𑀺, 𑀯𑀺𑀦𑀲𑁆𑀲𑀢𑀺. 𑀢𑀤𑀸 𑀅𑀳𑀁 𑀫𑀭𑀸𑀫𑀺. 𑀅𑀳𑀜𑁆𑀘 𑀫𑀫 𑀔𑀦𑁆𑀥𑀧𑀜𑁆𑀘𑀓𑀜𑁆𑀘 𑀅𑀤𑁆𑀯𑀬𑀁 𑀅𑀦𑀸𑀦𑀢𑁆𑀢𑀦𑁆𑀢𑀺 𑀏𑀯𑀁 𑀕𑀳𑀡𑀓𑀸𑀭𑀡𑀁 𑀯𑀤𑀢𑀺. 𑀢𑀢𑁆𑀣 ‘‘𑀔𑀡𑀪𑀗𑁆𑀕𑀲𑁆𑀲𑀸’’𑀢𑀺 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀔𑀡𑁂 𑀔𑀡𑁂 𑀪𑀜𑁆𑀚𑀦𑀲𑁆𑀲 𑀪𑀺𑀚𑁆𑀚𑀦𑀲𑁆𑀲 𑀫𑀭𑀡𑀲𑁆𑀲. 𑀇𑀤𑀫𑁆𑀧𑀦𑀫𑀭𑀡𑀁 𑀲𑀫𑁆𑀫𑀼𑀢𑀺 𑀲𑀘𑁆𑀘𑁂 𑀦𑀢𑁆𑀣𑀺. 𑀧𑀭𑀫𑀢𑁆𑀣 𑀲𑀘𑁆𑀘𑁂 𑀏𑀯 𑀅𑀢𑁆𑀣𑀺. 𑀢𑀲𑁆𑀫𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀫𑀳𑀸𑀚𑀦𑁄 𑀅𑀢𑁆𑀢𑀦𑁄 𑀔𑀦𑁆𑀥𑀧𑀜𑁆𑀘𑀓𑀁 𑀅𑀢𑁆𑀢𑀦𑁄𑀲𑀸𑀭𑀁 𑀫𑀜𑁆𑀜𑀫𑀸𑀦𑁄 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀻𑀢𑀺. ‘‘𑀢𑀁 𑀤𑁆𑀯𑀬𑀁 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸’’𑀢𑀺 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀓𑁂𑀯𑀮𑀁 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀜𑁆𑀘 𑀔𑀡𑀪𑀗𑁆𑀕𑀜𑁆𑀘 𑀜𑀸𑀡 𑀘𑀓𑁆𑀔𑀼𑀦𑀸 𑀲𑀼𑀝𑁆𑀞𑀼𑀤𑀺𑀝𑁆𑀞𑀁 𑀓𑀢𑁆𑀯𑀸. 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀼𑀝𑁆𑀞𑀼𑀧𑀲𑁆𑀲𑀦𑁆𑀢𑁄 𑀓𑁂𑀯𑀮𑀁 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀜𑁆𑀘 𑀅𑀯𑀲𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀜𑁆𑀘 𑀲𑀼𑀝𑁆𑀞𑀼 𑀧𑀲𑁆𑀲𑀢𑀺. 𑀬𑁄 𑀘 𑀅𑀢𑁆𑀢𑀦𑁄 𑀯𑀲𑀸𑀬𑀢𑁆𑀢𑀯𑀼𑀢𑁆𑀢𑀺 𑀦 𑀳𑁄𑀢𑀺. 𑀲𑁄 𑀧𑀭𑀫𑀢𑁆𑀣𑀲𑀘𑁆𑀘𑀁 𑀧𑀢𑁆𑀯𑀸 𑀏𑀲𑁄 𑀫𑀫 𑀲𑀦𑁆𑀢𑀓𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀦𑀸𑀭𑀳𑀢𑀺. 𑀓𑀼𑀢𑁄 𑀫𑀫 𑀅𑀢𑁆𑀢𑀸𑀢𑀺. 𑀅𑀧𑀺 𑀘, 𑀲𑀢𑁆𑀢𑁄 𑀦𑀸𑀫 𑀲𑀪𑀸𑀯𑀢𑁄 𑀦𑀢𑁆𑀣𑀺. 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀳𑁄𑀢𑀺. 𑀬𑁄 ‘𑀅𑀳𑀦𑁆𑀢𑀺 𑀯𑀸, 𑀫𑁂𑀢𑀺 𑀯𑀸, 𑀫𑀫𑀸𑀢𑀺 𑀯𑀸, 𑀕𑀬𑁆𑀳𑁂𑀬𑁆𑀬. 𑀅𑀲𑀦𑁆𑀢𑁂 𑀘 𑀅𑀢𑁆𑀢𑀲𑁆𑀫𑀺𑀁 𑀓𑁄 𑀫𑀫 𑀅𑀢𑁆𑀢𑀸 𑀦𑀸𑀫 𑀪𑀯𑁂𑀬𑁆𑀬𑀸𑀢𑀺. 𑀔𑀡𑀪𑀗𑁆𑀕𑁄 𑀳𑁄𑀢𑀺. 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀢𑀺. 𑀲𑀢𑁆𑀢𑁄 𑀘 𑀦𑀸𑀫 𑀏𑀓𑀲𑁆𑀫𑀺𑀁𑀪𑀯𑁂 𑀆𑀤𑀺𑀫𑁆𑀳𑀺 𑀲𑀓𑀺𑀁 𑀏𑀯 𑀚𑀸𑀬𑀢𑀺. 𑀅𑀦𑁆𑀢𑁂 𑀲𑀓𑀺𑀁 𑀏𑀯 𑀫𑀭𑀢𑀺. 𑀅𑀦𑁆𑀢𑀭𑀸 𑀯𑀲𑁆𑀲𑀲𑀢𑀁𑀧𑀺 𑀯𑀲𑁆𑀲𑀲𑀳𑀲𑁆𑀲𑀁𑀧𑀺 𑀫𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀅𑀜𑁆𑀜𑀸𑀳𑀺 𑀔𑀡𑀺𑀓𑀥𑀫𑁆𑀫𑀸𑀦𑀁 𑀕𑀢𑀺. 𑀅𑀜𑁆𑀜𑀸 𑀲𑀢𑁆𑀢𑀲𑁆𑀲. 𑀏𑀯𑀁𑀲𑀦𑁆𑀢𑁂 𑀓𑀣𑀁 𑀔𑀡𑀺𑀓𑀥𑀫𑁆𑀫𑀸 𑀲𑀢𑁆𑀢𑀲𑁆𑀲 𑀲𑀸𑀭𑀝𑁆𑀞𑁂𑀦 𑀅𑀢𑁆𑀢𑀸𑀦𑀸𑀫 𑀪𑀯𑁂𑀬𑁆𑀬𑀼𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀲𑀸𑀭𑀓𑀝𑁆𑀞𑁂𑀦 𑀘 𑀅𑀦𑀢𑁆𑀢𑀸 𑀏𑀯. 𑀅𑀧𑀺𑀘 ‘‘𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦𑀸’’𑀢𑀺 𑀏𑀢𑁆𑀣 𑀯𑀲𑁄 𑀦𑀸𑀫 𑀲𑀢𑁆𑀢𑀲𑀦𑁆𑀢𑀸𑀦𑁂 𑀏𑀓𑁄 𑀧𑀥𑀸𑀦𑀥𑀫𑁆𑀫𑁄. 𑀲𑀘𑁂 𑀅𑀢𑁆𑀢𑀸𑀦𑀸𑀫 𑀅𑀢𑁆𑀣𑀺. 𑀲𑁄 𑀏𑀯 𑀧𑀥𑀸𑀦𑀪𑀽𑀢𑀲𑁆𑀲 𑀯𑀲𑀲𑁆𑀲𑀧𑀺 𑀅𑀢𑁆𑀢𑀸 𑀪𑀯𑁂𑀬𑁆𑀬. 𑀏𑀯𑀁𑀲𑀢𑀺, 𑀬𑁄 𑀯𑀲𑁄, 𑀲𑁄 𑀅𑀢𑁆𑀢𑀸. 𑀬𑁄 𑀅𑀢𑁆𑀢𑀸, 𑀲𑁄 𑀯𑀲𑁄𑀢𑀺 𑀪𑀯𑁂𑀬𑁆𑀬. 𑀢𑀣𑀸 𑀘 𑀲𑀢𑀺, 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀦𑁆𑀢𑁄 𑀭𑀽𑀧𑀜𑁆𑀘 𑀯𑀲𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 𑀏𑀓𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺 𑀦𑀸𑀫. 𑀢𑀣𑀸 𑀯𑁂𑀤𑀦𑀁 𑀅𑀢𑁆𑀢𑀸𑀢𑀺. 𑀲𑀜𑁆𑀜𑀁, 𑀲𑀗𑁆𑀔𑀸𑀭𑁂, 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀦𑁆𑀢𑁂𑀧𑀺. 𑀏𑀯𑀜𑁆𑀘𑀲𑀢𑀺, 𑀲𑀢𑁆𑀢𑁄 𑀘 𑀔𑀦𑁆𑀥𑀧𑀜𑁆𑀘𑀓𑀜𑁆𑀘 𑀯𑀲𑁄 𑀘 𑀅𑀢𑁆𑀢𑀸 𑀘 𑀲𑀩𑁆𑀩𑀫𑁂𑀢𑀁 𑀏𑀓𑀢𑁆𑀢𑀁 𑀕𑀘𑁆𑀙𑀢𑀺, 𑀏𑀓𑁄 𑀲𑀢𑁆𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀦 𑀳𑀺 𑀇𑀫𑀲𑁆𑀫𑀺𑀁 𑀯𑀲𑀯𑀢𑁆𑀢𑀦𑀝𑁆𑀞𑁂 𑀏𑀓𑀲𑁆𑀲𑀲𑀢𑁆𑀢𑀲𑁆𑀲 𑀤𑁆𑀯𑁂 𑀅𑀢𑁆𑀢𑀸 𑀢𑀬𑁄 𑀅𑀢𑁆𑀢𑀸 𑀩𑀳𑀽𑀅𑀢𑁆𑀢𑀸𑀢𑀺 𑀲𑀓𑁆𑀓𑀸 𑀪𑀯𑀺𑀢𑀼𑀁. 𑀅𑀣 𑀬𑀣𑀸 𑀬𑀣𑀸 𑀲𑀢𑁆𑀢𑀲𑁆𑀲 𑀯𑀲𑁄 𑀯𑀢𑁆𑀢𑀢𑀺, 𑀇𑀘𑁆𑀙𑀸 𑀧𑀯𑀢𑁆𑀢𑀢𑀺. 𑀢𑀣𑀸 𑀢𑀣𑀸 𑀔𑀦𑁆𑀥𑀧𑀜𑁆𑀘𑀓𑀫𑁆𑀧𑀺 𑀦𑀺𑀘𑁆𑀘𑀓𑀸𑀮𑀁 𑀲𑀢𑁆𑀢𑀲𑁆𑀲𑀯𑀲𑀁 𑀅𑀦𑀼𑀕𑀘𑁆𑀙𑁂𑀬𑁆𑀬. 𑀓𑀲𑁆𑀫𑀸, 𑀲𑀢𑁆𑀢𑀲𑁆𑀲 𑀘 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀘 𑀯𑀲𑀲𑁆𑀲 𑀘 𑀦𑀸𑀦𑀢𑁆𑀢𑀸𑀪𑀸𑀯𑀢𑁄. 𑀏𑀯𑀁 𑀅𑀦𑀼𑀕𑀘𑁆𑀙𑀦𑁆𑀢𑁂 𑀲𑀢𑀺. 𑀭𑀽𑀧𑀁 𑀫𑁂 𑀅𑀢𑁆𑀢𑀸, 𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸𑀢𑀺𑀆𑀤𑀺𑀕𑁆𑀕𑀳𑀡𑀁 𑀯𑀝𑁆𑀝𑁂𑀬𑁆𑀬. 𑀲𑀪𑀸𑀯𑀢𑁄 𑀅𑀯𑀺𑀭𑀼𑀤𑁆𑀥𑀁 𑀪𑀯𑁂𑀬𑁆𑀬. 𑀦 𑀧𑀦 𑀢𑀣𑀸 𑀅𑀦𑀼𑀕𑀘𑁆𑀙𑀢𑀺. 𑀦 𑀳𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀭𑀽𑀧𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀭𑀽𑀧𑀓𑀸𑀬𑀁 𑀅𑀢𑁆𑀢𑀦𑁄 𑀯𑀲𑁂𑀦𑁂𑀯 𑀲𑀼𑀯𑀡𑁆𑀡𑀁 𑀲𑀼𑀭𑀽𑀧𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀣𑀸 𑀤𑀼𑀲𑁆𑀲𑀤𑁆𑀤𑁄𑀯𑀸 𑀲𑀼𑀲𑀤𑁆𑀤𑀁, 𑀤𑀼𑀕𑁆𑀕𑀦𑁆𑀥𑁄𑀯𑀸 𑀲𑀼𑀕𑀦𑁆𑀥𑀁. 𑀦 𑀘 𑀅𑀦𑁆𑀥𑁄𑀯𑀸 𑀅𑀦𑀦𑁆𑀥𑀁. 𑀩𑀥𑀺𑀭𑁄𑀯𑀸 𑀅𑀩𑀥𑀺𑀭𑀁. 𑀭𑁄𑀕𑀻𑀯𑀸 𑀅𑀭𑁄𑀕𑀁. 𑀓𑀼𑀝𑁆𑀞𑀻𑀯𑀸 𑀅𑀓𑀼𑀝𑁆𑀞𑀁. 𑀕𑀡𑁆𑀟𑀻𑀯𑀸 𑀅𑀕𑀡𑁆𑀟𑀁. 𑀚𑀺𑀡𑁆𑀡𑁄𑀯𑀸 𑀢𑀭𑀼𑀡𑀁. 𑀅𑀚𑀭𑀁 𑀯𑀸 𑀅𑀫𑀭𑀡𑀁 𑀯𑀸 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀦𑀸𑀧𑀺 𑀅𑀧𑀸𑀬𑁂𑀲𑀼 𑀘 𑀅𑀧𑀢𑀦𑁆𑀢𑀁. 𑀧𑀢𑀺𑀢𑁆𑀯𑀸 𑀯𑀸 𑀢𑀢𑁄 𑀯𑀺𑀫𑀼𑀢𑁆𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀣𑀸 𑀤𑁂𑀯𑁄 𑀯𑀸 𑀤𑁂𑀯𑀢𑁆𑀢𑀸 𑀅𑀘𑀸𑀯𑁂𑀢𑀼𑀁. 𑀲𑀓𑁆𑀓𑁄𑀯𑀸 𑀲𑀓𑁆𑀓𑀢𑁆𑀢𑀸, 𑀫𑀸𑀭𑁄 𑀯𑀸 𑀫𑀸𑀭𑀢𑁆𑀢𑀸, 𑀩𑁆𑀭𑀳𑁆𑀫𑀸 𑀯𑀸 𑀩𑁆𑀭𑀳𑁆𑀫𑀢𑁆𑀢𑀸𑀢𑀺. 𑀏𑀲𑀦𑀬𑁄 𑀲𑁂𑀲𑀔𑀦𑁆𑀥𑁂𑀲𑀼𑀧𑀺. 𑀢𑀣𑀸 𑀧𑀦 𑀅𑀯𑀲𑀸𑀦𑀼𑀕𑀫𑀦𑀢𑁄 𑀧𑀭𑀫𑀢𑁆𑀣 𑀲𑀘𑁆𑀘𑀁 𑀧𑀢𑁆𑀯𑀸 𑀔𑀦𑁆𑀥𑀧𑀜𑁆𑀘𑀓𑁂 𑀅𑀢𑁆𑀢𑀦𑁄 𑀲𑀸𑀫𑀺𑀓𑀺𑀘𑁆𑀘𑀁 𑀇𑀲𑁆𑀲𑀭𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀅𑀲𑀸𑀫𑀺𑀓𑀫𑁂𑀯 𑀢𑀁 𑀳𑁄𑀢𑀺, 𑀅𑀦𑀺𑀲𑁆𑀲𑀭𑀁. 𑀢𑀣𑀸 𑀘 𑀲𑀢𑀺, 𑀅𑀢𑁆𑀢𑀸𑀦𑀁 𑀢𑀲𑁆𑀲 𑀲𑀸𑀫𑀺𑀁 𑀇𑀲𑁆𑀲𑀭𑀁 𑀓𑀢𑁆𑀯𑀸 𑀭𑀽𑀧𑀁 𑀫𑁂 𑀅𑀢𑁆𑀢𑀸𑀢𑀺 𑀕𑀳𑀡𑀁 𑀫𑀺𑀘𑁆𑀙𑀸𑀕𑀳𑀡𑀁 𑀦𑀸𑀫 𑀳𑁄𑀢𑀻𑀢𑀺. 𑀮𑁄𑀓𑁂 𑀧𑀦 𑀫𑀳𑀸𑀚𑀦𑁄 𑀥𑀫𑁆𑀫𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀦 𑀚𑀸𑀦𑀦𑁆𑀢𑀺, 𑀦 𑀧𑀲𑁆𑀲𑀦𑁆𑀢𑀺, 𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀢𑁂𑀲𑀁 𑀧𑀭𑀫𑁆𑀧𑀭 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂 𑀔𑀦𑁆𑀥𑀲𑀦𑁆𑀢𑀸𑀦𑁂 𑀲𑀫𑁆𑀫𑀼𑀢𑀺 𑀲𑀘𑁆𑀘𑀯𑀲𑁂𑀦 𑀦𑀸𑀦𑀸𑀯𑀲𑀯𑀢𑁆𑀢𑀦𑀸𑀓𑀸𑀭𑀸 𑀦𑀸𑀫 𑀲𑀦𑁆𑀢𑀺. 𑀦𑀸𑀦𑀸𑀲𑀸𑀫𑀺 𑀇𑀲𑁆𑀲𑀭𑀸𑀥𑀺𑀧𑀢𑀺𑀯𑁄𑀳𑀸𑀭𑀸 𑀘 𑀮𑁄𑀓𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀢𑁂 𑀲𑀫𑁆𑀫𑀼𑀢𑀺 𑀲𑀘𑁆𑀘𑀯𑀲𑁂𑀦 𑀉𑀧𑁆𑀧𑀦𑁆𑀦𑁂𑀲𑀼 𑀢𑁂𑀲𑀼 𑀲𑀸𑀫𑀺𑀇𑀲𑁆𑀲𑀭𑀸𑀥𑀺𑀧𑀢𑀺 𑀯𑁄𑀳𑀸𑀭𑁂𑀲𑀼 𑀯𑁄𑀳𑀸𑀭𑀫𑀢𑁆𑀢𑁂 𑀅𑀞𑀢𑁆𑀯𑀸 𑀲𑀪𑀸𑀯𑀲𑀘𑁆𑀘𑀁 𑀫𑀜𑁆𑀜𑀦𑁆𑀢𑀸 𑀫𑀺𑀘𑁆𑀙𑀸𑀕𑀳𑀡𑀁 𑀕𑀡𑁆𑀳𑀦𑁆𑀢𑀺. 𑀏𑀢𑁆𑀣 𑀲𑀺𑀬𑀸. 𑀦 𑀦𑀼 𑀯𑀲𑁄𑀦𑀸𑀫 𑀇𑀘𑁆𑀙𑀸. 𑀲𑀢𑁆𑀢𑁄 𑀘 𑀕𑀦𑁆𑀢𑀼𑀁 𑀇𑀘𑁆𑀙𑀦𑁆𑀢𑁄 𑀕𑀘𑁆𑀙𑀢𑀺. 𑀞𑀸𑀢𑀼𑀁 𑀇𑀘𑁆𑀙𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀏𑀯𑀁𑀲𑀢𑀺. 𑀢𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀁 𑀢𑀲𑁆𑀲 𑀯𑀲𑀸𑀬𑀢𑁆𑀢 𑀯𑀼𑀢𑁆𑀢𑀺 𑀏𑀯 𑀳𑁄𑀢𑀻𑀢𑀺. 𑀦 𑀳𑁄𑀢𑀺. 𑀓𑀲𑁆𑀫𑀸, 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑁆𑀢𑀸 𑀏𑀯. 𑀢𑀣𑀸𑀳𑀺 𑀕𑀦𑁆𑀢𑀼𑀁 𑀇𑀘𑁆𑀙𑀸𑀦𑀸𑀫 𑀩𑀳𑀺𑀤𑁆𑀥𑀸 𑀥𑀦𑀳𑁂𑀢𑀼𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀦𑀸𑀦𑀸𑀪𑁄𑀕𑀳𑁂𑀢𑀼 𑀯𑀸. 𑀅𑀜𑁆𑀜𑁂𑀦 𑀯𑀸 𑀦𑀸𑀦𑀸𑀓𑀸𑀭𑀡𑁂𑀦. 𑀢𑀢𑁆𑀣 𑀬𑁂𑀲𑀁 𑀥𑀦𑁂 𑀅𑀲𑀢𑀺, 𑀬𑀁 𑀬𑀁 𑀤𑀼𑀓𑁆𑀔𑀁 𑀆𑀕𑀘𑁆𑀙𑁂𑀬𑁆𑀬 𑀓𑀸𑀬𑀺𑀓𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸. 𑀢𑁂𑀲𑀁 𑀢𑀁 𑀢𑀁 𑀤𑀼𑀓𑁆𑀔𑀧𑀘𑁆𑀘𑀬𑀸 𑀥𑀦𑀺𑀘𑁆𑀙𑀸 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀥𑀦𑀺𑀘𑁆𑀙𑀸 𑀧𑀘𑁆𑀘𑀬𑀸 𑀕𑀦𑁆𑀢𑀺𑀘𑁆𑀙𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀦𑀸𑀦𑀸𑀪𑁄𑀕𑀺𑀘𑁆𑀙𑀸 𑀦𑀸𑀦𑀸𑀓𑀫𑁆𑀫𑀺𑀘𑁆𑀙𑀸𑀲𑀼 𑀘𑀸𑀢𑀺. 𑀦𑀸𑀦𑀸𑀤𑀼𑀓𑁆𑀔𑀪𑀬𑀼𑀧𑀤𑁆𑀤𑀯𑀫𑀽𑀮𑀺𑀓𑀸𑀲𑀼 𑀇𑀘𑁆𑀙𑀸𑀲𑀼 𑀯𑀢𑁆𑀢𑀩𑁆𑀩 𑀫𑁂𑀯 𑀦𑀢𑁆𑀣𑀺. 𑀢𑀣𑀸 𑀦𑀸𑀦𑀸𑀭𑀫𑁆𑀫𑀡𑀸𑀦𑀁 𑀧𑀮𑁄𑀪𑀦 𑀤𑀼𑀓𑁆𑀔𑀫𑀽𑀮𑀺𑀓𑀸𑀲𑀼 𑀘 𑀦𑀸𑀦𑀸𑀯𑀺𑀢𑀓𑁆𑀓𑀸𑀦𑀁 𑀯𑀺𑀧𑁆𑀨𑀦𑁆𑀤𑀦𑀫𑀽𑀮𑀺𑀓𑀸𑀲𑀼 𑀘 𑀇𑀘𑁆𑀙𑀸𑀲𑀼. 𑀏𑀯𑀁 𑀯𑀲𑁄𑀧𑀺 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀓𑁄 𑀏𑀯 𑀳𑁄𑀢𑀺. ‘‘𑀕𑀫𑀦𑀁’’𑀢𑀺 𑀕𑀫𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀬𑁂𑀦𑀬𑁂𑀦𑀥𑀦𑀸𑀤𑀺𑀳𑁂𑀢𑀼𑀦𑀸 𑀲𑁄 𑀲𑁄 𑀯𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀕𑀫𑀦𑀫𑁆𑀧𑀺 𑀢𑁂𑀦 𑀢𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺 𑀆𑀳𑀸𑀭𑀼𑀧𑀢𑁆𑀣𑀫𑁆𑀪𑀦𑀸𑀤𑀺𑀧𑀘𑁆𑀘𑀬𑁂𑀦 𑀘. 𑀯𑀲𑁄 𑀧𑀦 𑀕𑀫𑀦𑀲𑁆𑀲 𑀧𑀘𑁆𑀘𑀬𑁂𑀓 𑀤𑁂𑀲𑀫𑀢𑁆𑀢𑀁 𑀳𑁄𑀢𑀺. 𑀲𑁄 𑀳𑀺 𑀢𑀤𑀜𑁆𑀜𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀲𑀬𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀼𑀢𑁄 𑀕𑀫𑀦𑀁 𑀉𑀧𑁆𑀧𑀸𑀤𑁂𑀢𑀼𑀁. 𑀏𑀯𑀁 𑀞𑀸𑀦𑀸𑀤𑀻𑀲𑀼. 𑀏𑀯𑀜𑁆𑀘 𑀲𑀢𑀺, 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀓𑀦𑁆𑀢𑀺𑀘𑁆𑀘𑁂𑀯 𑀯𑀢𑁆𑀢𑀼𑀁 𑀅𑀭𑀳𑀢𑀺. 𑀦𑁄 𑀯𑀲𑀸𑀬𑀢𑁆𑀢 𑀯𑀼𑀢𑁆𑀢𑀺𑀓𑀦𑁆𑀢𑀺. 𑀅𑀧𑀺 𑀘 𑀕𑀦𑁆𑀢𑀼𑀁 𑀇𑀘𑁆𑀙𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀧𑀜𑁆𑀜𑀢𑁆𑀢𑀺 𑀫𑀢𑁆𑀢𑀪𑀽𑀢𑁄 𑀲𑀢𑁆𑀢𑁄 𑀕𑀘𑁆𑀙𑀢𑀺. 𑀔𑀦𑁆𑀥𑀧𑀜𑁆𑀘𑀓𑀁 𑀧𑀦 𑀔𑀡𑀺𑀓 𑀥𑀫𑁆𑀫𑀢𑁆𑀢𑀸 𑀦 𑀕𑀘𑁆𑀙𑀢𑀺. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀢𑀺. 𑀲𑀦𑁆𑀢𑀢𑀺 𑀯𑀲𑁂𑀦 𑀕𑀫𑀦𑀸𑀓𑀸𑀭 𑀦𑀺𑀫𑀺𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀅𑀯𑀲𑀯𑀢𑁆𑀢𑀦𑀁 𑀳𑁄𑀢𑀻𑀢𑀺. 𑀳𑁄𑀢𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑀁. 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺, 𑀕𑀫𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯. 𑀕𑀫𑀦𑁂 𑀘 𑀲𑀫𑁆𑀧𑀚𑁆𑀚𑀫𑀸𑀦𑁂 𑀔𑀡𑀺𑀓𑀪𑀺𑀚𑁆𑀚𑀦𑁂𑀦 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀘𑁂. 𑀅𑀢𑁆𑀣𑀺. 𑀔𑀡𑀺𑀓𑀫𑀭𑀡𑀜𑁆𑀳𑀺 𑀲𑀢𑁆𑀢𑀲𑁆𑀲 𑀲𑀼𑀲𑀸𑀦𑀪𑀽𑀫𑀺 𑀦𑀸𑀫 𑀳𑁄𑀢𑀺. 𑀅𑀦𑁆𑀢𑀭𑀸𑀬𑁂𑀯𑀸 𑀆𑀕𑀢𑁂 𑀧𑀓𑁆𑀔𑀮𑀦𑁆𑀢𑁂 𑀯𑀸 𑀲𑀢𑀺, 𑀕𑀘𑁆𑀙𑀦𑁆𑀢𑁄 𑀲𑀢𑁆𑀢𑁄 𑀬𑀤𑀸 𑀓𑀤𑀸𑀘𑀺 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀢𑀺 𑀫𑀭𑀡 𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀦𑁆𑀢𑀺. 𑀓𑀺𑀮𑁂𑀲𑁂 𑀦𑀺𑀫𑀺𑀦𑀸𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑁄. ‘‘𑀯𑀺𑀧𑀮𑁆𑀮𑀸𑀲𑀦𑀺𑀫𑀺𑀢𑁆𑀢𑀁’’𑀢𑀺 𑀘 𑀯𑀺𑀧𑀮𑁆𑀮𑀸𑀲 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀉𑀧𑀝𑁆𑀞𑀺𑀢𑀁 𑀓𑀺𑀘𑁆𑀘 𑀦𑀺𑀫𑀺𑀢𑁆𑀢𑀁. 𑀢𑀡𑁆𑀳𑀸 𑀏𑀯 𑀧𑀡𑀺𑀥𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀦𑁆𑀢𑀸𑀦𑀁 𑀆𑀤𑀻𑀦𑀯𑀸𑀦𑀁 𑀭𑀸𑀲𑀺 𑀫𑀳𑀸𑀆𑀤𑀻𑀦𑀯𑀭𑀸𑀲𑀺. 𑀔𑀦𑁆𑀥𑁂𑀲𑀼 𑀲𑀼𑀜𑁆𑀜𑀢𑀮𑀓𑁆𑀔𑀡𑀁 𑀦𑀸𑀫 𑀅𑀢𑀺 𑀕𑀫𑁆𑀪𑀻𑀭𑀁 𑀳𑁄𑀢𑀺. 𑀜𑀸𑀡𑀲𑁆𑀲𑁂𑀯 𑀯𑀺𑀲𑀬𑀪𑀽𑀢𑀁. 𑀲𑀼𑀜𑁆𑀜𑀢 𑀤𑀲𑁆𑀲𑀦𑀜𑁆𑀘 𑀤𑀺𑀝𑁆𑀞𑀺𑀬𑀸 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑀦𑁆𑀢𑀺 𑀆𑀳 ‘‘𑀲𑀗𑁆𑀔𑀸𑀭𑁂𑀲𑀼 𑀲𑀼𑀜𑁆𑀜𑀢𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀅𑀢𑁆𑀣 𑀲𑀺𑀤𑁆𑀥𑀺 𑀦𑀸𑀫𑀸’’𑀢𑀺 𑀫𑀕𑁆𑀕𑀨𑀮𑀧𑁆𑀧𑀝𑀺𑀮𑀸𑀪𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺 𑀦𑀸𑀫. 𑀅𑀢𑁆𑀢𑀸𑀢𑀺 𑀅𑀪𑀺𑀦𑀺𑀯𑁂𑀲𑁄 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄. 𑀕𑀡𑁆𑀳𑀸𑀢𑀻𑀢𑀺 𑀕𑀸𑀳𑁄. 𑀉𑀧𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀕𑀸𑀳𑁄 𑀤𑀺𑀝𑁆𑀞𑀺𑀕𑁆𑀕𑀸𑀳𑁄. 𑀅𑀢𑁆𑀣𑀸𑀪𑀺𑀦𑀺𑀯𑁂𑀲𑁄 𑀘 𑀲𑁄 𑀤𑀺𑀝𑁆𑀞𑀺𑀕𑁆𑀕𑀸𑀳𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀲𑁆𑀲 𑀧𑀝𑀺𑀧𑀓𑁆𑀔𑀁 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁. 𑀅𑀦𑀼 𑀅𑀦𑀼 𑀪𑀯𑀦𑀁 𑀆𑀦𑀼𑀪𑀸𑀯𑁄. 𑀧𑀭𑀫𑁆𑀧𑀭𑀢𑁄 𑀯𑀟𑁆𑀠𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀣𑀸 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸’’𑀢𑀺 𑀲𑀼𑀜𑁆𑀜𑀢𑀸 𑀓𑀸𑀭𑁂𑀦 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸. 𑀯𑀺𑀫𑀼𑀜𑁆𑀘𑀦𑁆𑀢𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲. ‘‘𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀦𑀸𑀫 𑀦𑀸𑀢𑀺 𑀕𑀫𑁆𑀪𑀻𑀭𑀁 𑀳𑁄𑀢𑀺. 𑀲𑀤𑁆𑀥𑀸𑀬𑀧𑀺 𑀯𑀺𑀲𑀬𑀪𑀽𑀢𑀁. 𑀉𑀦𑁆𑀦𑀢𑀺𑀮𑀓𑁆𑀔𑀡𑁄 𑀘 𑀅𑀳𑀁 𑀫𑀸𑀦𑁄 𑀔𑀦𑁆𑀥𑁂𑀲𑀼 𑀦𑀺𑀘𑁆𑀘𑀥𑀼𑀯𑀯𑀺𑀧𑀮𑁆𑀮𑀸𑀲𑀫𑀽𑀮𑀓𑁄 𑀲𑀤𑁆𑀥𑀸𑀬 𑀘 𑀧𑀝𑀺𑀧𑀓𑁆𑀔𑁄𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺𑀆𑀤𑀺𑀁. ‘‘𑀦𑀺𑀫𑀺𑀢𑁆𑀢𑀸𑀪𑀺𑀦𑀺𑀯𑁂𑀲𑀪𑀽𑀢𑀲𑁆𑀲𑀸’’𑀢𑀺 𑀦𑀺𑀘𑁆𑀘𑀥𑀼𑀯𑀦𑀺𑀫𑀺𑀢𑁆𑀢𑀸𑀪𑀺𑀦𑀺𑀯𑁂𑀲𑀪𑀽𑀢𑀲𑁆𑀲. ‘‘𑀫𑀸𑀦𑀕𑁆𑀕𑀸𑀳𑀲𑁆𑀲𑀸’’𑀢𑀺 𑀫𑀸𑀦𑀲𑀗𑁆𑀔𑀸𑀢𑀲𑁆𑀲 𑀕𑀸𑀳𑀲𑁆𑀲. ‘‘𑀲𑀤𑁆𑀥𑀸𑀬 𑀧𑀻’’𑀢𑀺𑀧𑀺𑀲𑀤𑁆𑀤𑁂𑀦 𑀜𑀸𑀡𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀤𑀼𑀓𑁆𑀔𑀮𑀓𑁆𑀔𑀡𑀁 𑀦𑀸𑀫 𑀪𑀬𑀲𑀁𑀯𑁂𑀕 𑀚𑀦𑀓𑀁 𑀳𑁄𑀢𑀺. 𑀆𑀭𑀫𑁆𑀫𑀡𑁂𑀲𑀼 𑀢𑀡𑁆𑀳𑀸𑀮𑁄𑀮𑀲𑁆𑀲 𑀢𑀡𑁆𑀳𑀸𑀯𑀺𑀧𑁆𑀨𑀦𑁆𑀤𑀦𑀲𑁆𑀲 𑀧𑀝𑀺𑀧𑀓𑁆𑀔𑀁. 𑀯𑀺𑀲𑁂𑀲𑀢𑁄 𑀲𑀫𑀸𑀥𑀺𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 𑀆𑀳 ‘‘𑀤𑀼𑀓𑁆𑀔𑀤𑀲𑁆𑀲𑀦 𑀯𑀲𑁂𑀦𑀸’’𑀢𑀺𑀆𑀤𑀺𑀁. ‘‘𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁’’𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬 𑀲𑀫𑀸𑀥𑀺𑀦𑁆𑀤𑁆𑀭𑀺𑀬 𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀇𑀦𑁆𑀤𑁆𑀭𑀺𑀬 𑀥𑀫𑁆𑀫𑀸𑀦𑀁. ‘‘𑀯𑀺𑀧𑀲𑁆𑀲𑀦𑀸 𑀕𑀫𑀦𑀯𑀲𑁂𑀦𑁂 𑀯𑀸’’𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀢𑀲𑁆𑀲 𑀆𑀕𑀫𑀦 𑀓𑀸𑀭𑀡𑀲𑁆𑀲 𑀯𑀲𑁂𑀦𑁂𑀯.

𑀇𑀤𑀸𑀦𑀺 𑀧𑀼𑀩𑁆𑀩𑁂 𑀬𑀁 𑀯𑀼𑀢𑁆𑀢𑀁 ‘𑀲𑀢𑁆𑀢𑀅𑀭𑀺𑀬 𑀧𑀼𑀕𑁆𑀕𑀮𑀯𑀺𑀪𑀸𑀕𑀲𑁆𑀲 𑀧𑀘𑁆𑀘𑀬𑀪𑀸𑀯𑀧𑀢𑁆𑀢𑀺𑀬𑀸 𑀘𑀸’𑀢𑀺. 𑀢𑀢𑁆𑀣 𑀲𑀢𑁆𑀢 𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫𑀸𑀢𑀺 𑀏𑀢𑁆𑀣 ‘‘𑀥𑀫𑁆𑀫𑁄’’𑀢𑀺 𑀧𑀜𑁆𑀜𑀸 𑀯𑀼𑀘𑁆𑀘𑀢𑀺 ‘𑀲𑀘𑁆𑀘𑀁, 𑀥𑀫𑁆𑀫𑁄, 𑀥𑀻𑀢𑀺, 𑀘𑀸𑀕𑁄,𑀢𑀺 𑀏𑀢𑁆𑀣 𑀯𑀺𑀬. 𑀢𑀺𑀓𑁆𑀔𑀢𑀭𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀧𑀜𑁆𑀜𑀸𑀩𑀮𑀸𑀦𑀼𑀲𑀸𑀭𑁂𑀦 𑀆𑀤𑀺𑀫𑁆𑀳𑀺 𑀫𑀕𑁆𑀕𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣𑀯𑀸. ‘‘𑀥𑀫𑁆𑀫𑁄’’𑀢𑀺 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀲𑀗𑁆𑀔𑀸𑀭 𑀥𑀫𑁆𑀫𑁄 𑀯𑀼𑀘𑁆𑀘𑀢𑀺. 𑀲𑀼𑀜𑁆𑀜𑀢𑀤𑀲𑁆𑀲𑀦𑀜𑁆𑀘 𑀦𑀸𑀫 𑀯𑀺𑀲𑁂𑀲𑀢𑁄 𑀲𑀼𑀤𑁆𑀥𑀥𑀫𑁆𑀫 𑀤𑀲𑁆𑀲𑀦𑀁 𑀦𑀸𑀫. 𑀇𑀢𑀺 𑀲𑀼𑀤𑁆𑀥𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺, 𑀜𑀸𑀡𑀕𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀤𑀺𑀝𑁆𑀞𑀺𑀧𑀢𑁆𑀢𑁄𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀦𑀸𑀫 𑀤𑀲𑁆𑀲𑀦𑀜𑁆𑀜𑀸𑀡𑀁 𑀯𑀼𑀘𑁆𑀘𑀢𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀼𑀤𑁆𑀥 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀢𑁆𑀢𑀸 𑀤𑀺𑀝𑁆𑀞𑀺𑀩𑀮𑁂𑀦𑁂𑀯 𑀲𑀼𑀔𑁂𑀦 𑀢𑀁 𑀢𑀁 𑀫𑀕𑁆𑀕𑀨𑀮𑀁 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑀢𑁆𑀢𑁄. 𑀢𑁂𑀦𑁂𑀯 𑀤𑀲𑁆𑀲𑀦 𑀧𑀜𑁆𑀜𑀸𑀩𑀮𑁂𑀦 𑀓𑀺𑀮𑁂𑀲𑀩𑀦𑁆𑀥𑀦𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀲𑀗𑁆𑀔𑀸𑀭 𑀥𑀫𑁆𑀫𑀸𑀦𑀁 𑀔𑀡𑀺𑀓 𑀥𑀫𑁆𑀫𑀪𑀸𑀯𑁂 𑀲𑀼𑀝𑁆𑀞𑀼 𑀲𑀤𑁆𑀤𑀳𑀦𑀁 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀲𑀤𑁆𑀥𑀸 𑀦𑀸𑀫. 𑀢𑀢𑁆𑀣 ‘‘𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄’’𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀧𑁆𑀧𑀲𑀸𑀤𑁄. ‘‘𑀜𑀸𑀡𑀁’’𑀢𑀺 𑀘 𑀲𑀗𑁆𑀔𑀸𑀭 𑀥𑀫𑁆𑀫𑀸𑀦𑀁 𑀔𑀡𑀺𑀓𑀪𑀸𑀯𑀦𑀺𑀫𑀺𑀢𑁆𑀢𑀸𑀦𑀁 𑀤𑀲𑁆𑀲𑀦𑀜𑁆𑀜𑀸𑀡𑀁. 𑀢𑀸𑀤𑀺𑀲𑁂 𑀳𑀺 𑀜𑀸𑀡𑁂 𑀲𑀢𑀺, 𑀢𑀢𑁆𑀣 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀦𑀸𑀫 𑀚𑀸𑀬𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺. 𑀲𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀲𑀤𑁆𑀥𑀸𑀩𑀮𑁂𑀦𑁂𑀯 𑀆𑀤𑀺𑀫𑁆𑀳𑀺 𑀅𑀭𑀺𑀬𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀸𑀩𑀮𑁂𑀦 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. ‘‘𑀓𑀸𑀬𑀲𑀓𑁆𑀔𑀺 𑀦𑀸𑀫𑀸’’𑀢𑀺 𑀏𑀢𑁆𑀣 𑀲𑀓𑁆𑀔𑀁𑀢𑀺 𑀲𑀦𑁆𑀤𑀺𑀝𑁆𑀞𑀁. 𑀬𑀁 𑀲𑀸𑀥𑀓𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀦𑁄 𑀓𑀸𑀬𑁂 𑀏𑀯 𑀮𑀤𑁆𑀥𑀁 𑀲𑀓𑁆𑀔𑀁 𑀬𑀲𑁆𑀲𑀸𑀢𑀺 𑀓𑀸𑀬𑀲𑀓𑁆𑀔𑀻. 𑀤𑀼𑀓𑁆𑀔𑀸𑀦𑀼 𑀧𑀲𑁆𑀲𑀻 𑀧𑀼𑀕𑁆𑀕𑀮𑁄 𑀳𑀺 𑀲𑀁𑀯𑁂𑀕 𑀩𑀳𑀼𑀮𑁄 𑀳𑁄𑀢𑀺. 𑀲𑀁𑀯𑁂𑀕𑁄 𑀘 𑀧𑀥𑀸𑀦 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑁄 𑀲𑀁𑀯𑁂𑀕𑀯𑀲𑁂𑀦 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀬𑀁 𑀬𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀁 𑀢𑀁 𑀧𑀸𑀧𑀼𑀡𑀸𑀢𑀺. 𑀧𑀸𑀧𑀼𑀡𑀦𑁆𑀢𑁄 𑀘 𑀅𑀢𑁆𑀢𑀦𑁄 𑀓𑀸𑀬𑁂 𑀏𑀯 𑀲𑀓𑁆𑀔𑀁 𑀮𑀪𑀢𑀺. 𑀲𑀦𑁆𑀤𑀺𑀝𑁆𑀞𑀁 𑀛𑀸𑀦𑀲𑀼𑀔𑀁 𑀯𑀸 𑀫𑀕𑁆𑀕𑀨𑀮𑀲𑀼𑀔𑀁 𑀯𑀸 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀉𑀪𑀢𑁄𑀪𑀸𑀕 𑀯𑀺𑀫𑀼𑀢𑁆𑀢𑁄’’𑀢𑀺 𑀅𑀭𑀽𑀧𑀚𑁆𑀛𑀸𑀦𑁂𑀳𑀺 𑀭𑀽𑀧𑀓𑀸𑀬𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑁂𑀳𑀺 𑀦𑀸𑀫𑀓𑀸𑀬𑀢𑁄𑀢𑀺 𑀏𑀯𑀁 𑀉𑀪𑁄𑀳𑀺 𑀓𑀸𑀬𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀏𑀢𑁆𑀣 𑀘 𑀢𑀬𑁄 𑀅𑀭𑀺𑀬𑀧𑀼𑀕𑁆𑀕𑀮𑀸 𑀧𑀜𑁆𑀜𑀸𑀥𑀺𑀓𑁄 𑀘 𑀲𑀤𑁆𑀥𑀸𑀥𑀺𑀓𑁄 𑀘 𑀯𑀻𑀭𑀺𑀬𑀸𑀥𑀺𑀓𑁄 𑀘. 𑀢𑀢𑁆𑀣 𑀥𑀫𑁆𑀫𑀸𑀦𑀼𑀲𑀸𑀭𑀻 𑀘 𑀤𑀺𑀝𑁆𑀞𑀺𑀧𑀢𑁆𑀢𑁄 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀘 𑀧𑀜𑁆𑀜𑀸𑀥𑀺𑀓𑁄 𑀦𑀸𑀫. 𑀲𑀤𑁆𑀥𑀸𑀦𑀼𑀲𑀸𑀭𑀻 𑀘 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀘 𑀲𑀤𑁆𑀥𑀸𑀥𑀺𑀓𑁄 𑀦𑀸𑀫. 𑀓𑀸𑀬𑀲𑀓𑁆𑀔𑀻 𑀘 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀘 𑀯𑀻𑀭𑀺𑀬𑀸𑀥𑀺𑀓𑁄 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀘 𑀧𑀼𑀕𑁆𑀕𑀮𑀯𑀺𑀪𑀸𑀕𑀦𑀬𑁄 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀦𑀬𑁂𑀦 𑀯𑀼𑀢𑁆𑀢𑁄. 𑀅𑀪𑀺𑀥𑀫𑁆𑀫𑁂 𑀧𑀦 𑀧𑀼𑀕𑁆𑀕𑀮 𑀧𑀜𑁆𑀜𑀢𑁆𑀢𑀺𑀬𑀁 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀘 𑀓𑀸𑀬𑀲𑀓𑁆𑀔𑀻 𑀘 𑀤𑁆𑀯𑁂𑀧𑀼𑀕𑁆𑀕𑀮𑀸 𑀲𑁂𑀓𑁆𑀔𑁂𑀲𑀼 𑀏𑀯 𑀯𑀼𑀢𑁆𑀢𑀸. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀧𑀦 𑀏𑀢𑁂 𑀤𑁆𑀯𑁂𑀧𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀲𑀺𑀬𑀸, 𑀲𑀗𑁆𑀔𑀸𑀭 𑀥𑀫𑁆𑀫𑀸𑀦𑀁 𑀔𑀡𑀺𑀓 𑀥𑀫𑁆𑀫𑀪𑀸𑀯𑁂 𑀲𑀼𑀝𑁆𑀞𑀼 𑀲𑀤𑁆𑀤𑀳𑀦𑀁 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀲𑀤𑁆𑀥𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀢𑀸𑀤𑀺𑀲𑁂𑀦 𑀲𑀤𑁆𑀥𑀸𑀫𑀢𑁆𑀢𑁂𑀦 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀻𑀢𑀺. 𑀏𑀢𑁆𑀣 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀪𑀕𑀯𑀢𑀸 𑀏𑀯 𑀯𑀼𑀢𑁆𑀢𑀁. 𑀬𑀣𑀸𑀳 𑀫𑀳𑀸𑀯𑀕𑁆𑀕𑁂 𑀑𑀓𑁆𑀓𑀦𑁆𑀢 𑀲𑀁𑀬𑀼𑀢𑁆𑀢𑁂 𑀘𑀓𑁆𑀔𑀼 𑀪𑀺𑀓𑁆𑀔𑀯𑁂 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻, 𑀬𑁄 𑀏𑀯𑀁 𑀲𑀤𑁆𑀤𑀳𑀢𑀺, 𑀏𑀯𑀁 𑀅𑀥𑀺𑀫𑀼𑀘𑁆𑀘𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀑𑀓𑁆𑀓𑀦𑁆𑀢𑁄 𑀅𑀭𑀺𑀬𑀪𑀽𑀫𑀺𑀁. 𑀅𑀢𑀺𑀓𑁆𑀓𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁. 𑀲𑁄 𑀬𑁂𑀦𑀓𑀫𑁆𑀫𑁂𑀦 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀦 𑀢𑀁 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺. 𑀲𑁄𑀢𑀁 𑀪𑀺𑀓𑁆𑀔𑀯𑁂 𑀅𑀦𑀺𑀘𑁆𑀘𑀁. 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻𑀢𑀺𑀆𑀤𑀺𑀦𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀯𑀺𑀢𑁆𑀣𑀸𑀭𑁂 𑀢𑀩𑁆𑀩𑀸𑀦𑀺. 𑀢𑀢𑁆𑀣 ‘‘𑀯𑀺𑀧𑀭𑀺𑀡𑀸𑀫𑀻’’𑀢𑀺 𑀯𑀺𑀧𑀭𑀺𑀡𑀸𑀫𑁄 𑀬𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀧𑀭𑀺𑀡𑀸𑀫𑀻. 𑀯𑀺𑀧𑀭𑀺𑀡𑀸𑀫𑁄𑀢𑀺 𑀘 𑀔𑀡𑁂 𑀔𑀡𑁂 𑀚𑀻𑀭𑀡𑀢𑀸 𑀪𑀺𑀚𑁆𑀚𑀦𑀢𑀸 𑀯𑀼𑀘𑁆𑀘𑀢𑀺. ‘‘𑀅𑀜𑁆𑀜𑀣𑀸𑀪𑀸𑀯𑀻’’𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀏𑀯𑀁 𑀅𑀥𑀺𑀫𑀼𑀘𑁆𑀘𑀢𑀻’’𑀢𑀺 𑀏𑀢𑁂𑀦 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀥𑀁 𑀤𑀻𑀧𑁂𑀢𑀺. 𑀲𑀸 𑀏𑀯 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀥𑀫𑁆𑀫𑁂, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀥𑀸 𑀦𑀸𑀫 𑀘𑀓𑁆𑀔𑀸𑀤𑀻𑀦𑀁 𑀅𑀦𑀺𑀘𑁆𑀘𑀦𑀺𑀫𑀺𑀢𑁆𑀢 𑀤𑀲𑁆𑀲𑀦𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀑𑀓𑀧𑁆𑀧𑀦𑀲𑀤𑁆𑀥𑀸. 𑀅𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀜𑁆𑀘 𑀦𑀸𑀫 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀸𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀦𑁆𑀢𑀢𑀺 𑀧𑀭𑀺𑀯𑀢𑁆𑀢𑀦𑀸𑀤𑀺𑀓𑀁 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀧𑀲𑁆𑀲𑀦𑁆𑀢𑁄 𑀘𑀓𑁆𑀔𑀸𑀤𑀻𑀦𑀁 𑀅𑀦𑀺𑀘𑁆𑀘𑀪𑀸𑀯𑁂 𑀲𑀤𑁆𑀤𑀳𑀢𑀺, 𑀅𑀥𑀺𑀫𑀼𑀘𑁆𑀘𑀢𑀺. 𑀢𑀸𑀦𑀺𑀧𑀺 𑀔𑀡𑁂 𑀔𑀡𑁂 𑀏𑀓𑀦𑁆𑀢𑁂𑀦 𑀪𑀺𑀚𑁆𑀚𑀢𑀺 𑀬𑁂𑀯𑀸𑀢𑀺 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑀁 𑀲𑀤𑁆𑀥𑀸𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀮𑀪𑀢𑀻𑀢𑀺 𑀅𑀢𑁆𑀣𑁄. ‘‘𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸’’𑀢𑀺 𑀏𑀢𑁆𑀣 𑀧𑀦 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸𑀤𑀻𑀦𑀁 𑀩𑀼𑀤𑁆𑀥𑀕𑀼𑀡𑀸𑀤𑀻𑀦𑀁 𑀤𑀲𑁆𑀲𑀦𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀧𑀲𑀸𑀤𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀦𑀸𑀫. 𑀅𑀭𑀺𑀬𑀪𑀽𑀫𑀺 𑀦𑀸𑀫 𑀤𑀺𑀝𑁆𑀞𑀸𑀦𑀼𑀲𑀬 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁂𑀳𑀺 𑀧𑀭𑀺𑀲𑀼𑀤𑁆𑀥𑀸 𑀅𑀯𑀢𑁆𑀣𑀸𑀪𑀽𑀫𑀺 𑀯𑀼𑀘𑁆𑀘𑀢𑀺. 𑀢𑁂𑀳𑀺 𑀲𑀳𑀺𑀢𑀸 𑀅𑀯𑀢𑁆𑀣𑀸𑀪𑀽𑀫𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺 𑀦𑀸𑀫. 𑀓𑀣𑀁 𑀧𑀦 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁 𑀅𑀢𑀺𑀓𑁆𑀓𑀦𑁆𑀢𑀢𑀸 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑀢𑀸 𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀲𑁄 𑀬𑁂𑀦𑀸’’𑀢𑀺𑀆𑀤𑀺𑀁. 𑀬𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀓𑀺𑀜𑁆𑀘𑀺 𑀓𑀫𑁆𑀫𑀧𑀣𑀧𑀢𑁆𑀢𑀁 𑀅𑀧𑀸𑀬𑀕𑀸𑀫𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀲𑁄 𑀏𑀓𑀦𑁆𑀢𑁂𑀦 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 𑀲𑀤𑁆𑀥𑀸𑀦𑀼𑀲𑀸𑀭𑀺𑀲𑀼𑀢𑁆𑀢𑀁. 𑀅𑀧𑀭𑀁𑀧𑀺 𑀯𑀼𑀢𑁆𑀢𑀁 𑀘𑀓𑁆𑀔𑀼 𑀪𑀺𑀓𑁆𑀔𑀯𑁂 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑀲𑁆𑀲 𑀏𑀯𑀁 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻 𑀢𑀺𑀆𑀤𑀺. 𑀢𑀢𑁆𑀣 ‘‘𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀢𑀻’’𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻𑀯𑀺𑀬 𑀲𑀤𑁆𑀤𑀳𑀦𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀘𑀓𑁆𑀔𑀸𑀤𑀻𑀦𑀁 𑀢𑀸𑀤𑀺𑀲𑀁 𑀅𑀦𑀺𑀘𑁆𑀘𑀢𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀣𑁄𑀓𑀁 𑀣𑁄𑀓𑀁 𑀤𑀲𑁆𑀲𑀦𑀁 𑀮𑀪𑀢𑀺𑀬𑁂𑀯. 𑀏𑀯𑀁𑀲𑀢𑀺, 𑀘𑀓𑁆𑀔𑀸𑀤𑀻𑀦𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀚𑁆𑀛𑀸𑀦𑀁 𑀑𑀮𑁄𑀓𑀦𑀁 𑀫𑀢𑁆𑀢𑀲𑁄 𑀔𑀫𑀦𑁆𑀢𑀺 𑀦𑀸𑀫. 𑀇𑀤𑀁 𑀥𑀫𑁆𑀫𑀸𑀦𑀼𑀲𑀸𑀭𑀺𑀲𑀼𑀢𑁆𑀢𑀁. 𑀅𑀧𑀭𑀁𑀧𑀺 𑀯𑀼𑀢𑁆𑀢𑀁 𑀘𑀓𑁆𑀔𑀼 𑀪𑀺𑀓𑁆𑀔𑀯𑁂 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄 𑀏𑀯𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑁄𑀢𑀸𑀧𑀦𑁆𑀦𑁄 𑀢𑀺𑀆𑀤𑀺. 𑀢𑀢𑁆𑀣 ‘‘𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻𑀯𑀺𑀬 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀓𑁆𑀔𑀫𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀧𑀜𑁆𑀜𑀸𑀬 𑀧𑀚𑀸𑀦𑀸𑀢𑀺, 𑀜𑀸𑀡𑀘𑀓𑁆𑀔𑀼𑀦𑁄 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀤𑀺𑀝𑁆𑀞𑀺𑀧𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀁.

‘‘𑀬𑀣𑀸 𑀲𑀓𑀁 𑀨𑀮𑀁’’𑀢𑀺 𑀏𑀢𑁆𑀣 𑀲𑀲𑁆𑀲 𑀅𑀢𑁆𑀢𑀦𑁄 𑀇𑀤𑀁 𑀲𑀓𑀁. 𑀬𑀁 𑀬𑀁 𑀲𑀓𑀁 𑀬𑀣𑀸𑀲𑀓𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀢𑀺𑀆𑀤𑀺𑀦𑀸. 𑀨𑀮𑀲𑀫𑀸𑀧𑀢𑁆𑀢𑀺 𑀯𑀻𑀣𑀺𑀬𑀁 𑀧𑀦 𑀅𑀦𑀼𑀮𑁄𑀫𑀚𑀯𑀦𑀸𑀦𑀺 𑀏𑀯 𑀨𑀮𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀸𑀦𑀺, 𑀦 𑀫𑀕𑁆𑀕𑀚𑀯𑀦𑀸𑀦𑀻𑀢𑀺 𑀆𑀳 ‘‘𑀦 𑀫𑀕𑁆𑀕𑀸𑀕𑀫𑀦𑀯𑀲𑁂𑀦𑀸’’𑀢𑀺. ‘‘𑀲𑁄’’𑀢𑀺 𑀫𑀕𑁆𑀕𑁄. 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀲𑀩𑁆𑀪𑀸𑀯𑁄. ‘‘𑀅𑀲𑁆𑀲𑀸’’𑀢𑀺 𑀫𑀕𑁆𑀕𑀲𑁆𑀲.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀓𑀺𑀘𑁆𑀘𑀢𑁄 𑀅𑀦𑀺𑀫𑀺𑀢𑁆𑀢𑀸 𑀳𑁄𑀢𑀺. 𑀲𑀪𑀸𑀯𑀢𑁄 𑀲𑀦𑀺𑀫𑀺𑀢𑁆𑀢𑀸𑀏𑀯. 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀲𑀳𑀺𑀢𑀸𑀏𑀯. 𑀬𑀢𑁄 𑀲𑀸 𑀏𑀲𑁄𑀳𑀫𑀲𑁆𑀫𑀻𑀢𑀺𑀕𑁆𑀕𑀳𑀡𑀁 𑀮𑀪𑀢𑀺. 𑀇𑀤𑀁𑀧𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀩𑁆𑀩𑀸 𑀘 𑀳𑁄𑀢𑀻𑀢𑀺. 𑀢𑀢𑁆𑀣 𑀘 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀲𑀪𑀸𑀯𑀧𑁆𑀧𑀥𑀸𑀦𑀁 𑀳𑁄𑀢𑀺, 𑀦 𑀓𑀺𑀘𑁆𑀘𑀧𑁆𑀧𑀥𑀸𑀦𑀁. 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫 𑀦𑀬𑁂𑀦 𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢 𑀦𑀸𑀫𑀁 𑀫𑀕𑁆𑀕𑀲𑁆𑀲 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀬𑀁 𑀅𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀮𑁂𑀲 𑀥𑀫𑁆𑀫𑀸 𑀦𑀸𑀫 𑀬𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀧𑀮𑀺𑀩𑀼𑀦𑁆𑀥𑀦𑁆𑀢𑀺. 𑀲𑀫𑁆𑀩𑀸𑀥𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀧𑀮𑀺𑀩𑁄𑀥𑀓𑀭𑀸𑀦𑀸𑀫. 𑀢𑀁 𑀧𑀼𑀕𑁆𑀕𑀮𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢 𑀲𑀼𑀪𑀦𑀺𑀫𑀺𑀢𑁆𑀢 𑀲𑀼𑀔𑀦𑀺𑀫𑀺𑀢𑁆𑀢 𑀅𑀢𑁆𑀢𑀦𑀺𑀫𑀺𑀢𑁆𑀢𑀸𑀦𑀺 𑀕𑀸𑀳𑁂𑀦𑁆𑀢𑀺. 𑀢𑀲𑁆𑀫𑀸 𑀦𑀺𑀫𑀺𑀢𑁆𑀢𑀓𑀭𑀸𑀦𑀸𑀫. 𑀢𑀁 𑀧𑀼𑀕𑁆𑀕𑀮𑀁 𑀆𑀭𑀫𑁆𑀫𑀡𑁂𑀲𑀼 𑀪𑀼𑀲𑀁 𑀦𑀺𑀳𑀺𑀢𑀁 𑀦𑀺𑀯𑀺𑀝𑁆𑀞𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀧𑀡𑀺𑀥𑀺𑀓𑀭𑀸𑀦𑀸𑀫. 𑀢𑁂 𑀘 𑀫𑀕𑁆𑀕𑀨𑀮𑀸𑀦𑀺 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀦𑁆𑀢𑀺. 𑀫𑀕𑁆𑀕𑀨𑀮𑁂𑀳𑀺 𑀘 𑀲𑀫𑁆𑀧𑀬𑁄𑀕𑀁 𑀦 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀆𑀭𑀫𑁆𑀫𑀡𑀓𑀭𑀡𑀸 𑀤𑀺𑀯𑀲𑁂𑀦 𑀫𑀕𑁆𑀕𑀨𑀮𑁂𑀲𑀼 𑀢𑁂𑀲𑀁 𑀅𑀪𑀸𑀯𑁄. 𑀅𑀪𑀸𑀯𑀢𑁆𑀢𑀸𑀏𑀯 𑀘 𑀢𑀸𑀦𑀺 𑀫𑀕𑁆𑀕𑀨𑀮𑀸𑀦𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀢𑀻𑀡𑀺𑀦𑀸𑀫𑀸𑀦𑀺 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡 𑀓𑀭𑀡𑀯𑀲𑁂𑀦𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬.

‘‘𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀇𑀤𑀁 𑀢𑀸𑀲𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀅𑀯𑀺𑀦𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀦 𑀧𑀦 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀢𑀸𑀳𑀺 𑀅𑀯𑀺𑀦𑀸𑀪𑀸𑀯𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀅𑀧𑀸𑀬𑁂𑀲𑀼 𑀯𑀺𑀧𑀘𑁆𑀘𑀦𑁆𑀢𑀺. 𑀅𑀧𑀸𑀬𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀦𑁆𑀢𑀺. 𑀤𑀺𑀝𑁆𑀞𑀲𑀘𑁆𑀘𑀸𑀦𑀜𑁆𑀘 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁. 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀸 𑀅𑀓𑀼𑀲𑀮𑀥𑀫𑁆𑀫𑀸 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺. ‘‘𑀅𑀓𑀼𑀲𑀮𑀥𑀫𑁆𑀫𑀸𑀘𑁂 𑀯𑀸’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀸 𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣 𑀥𑀫𑁆𑀫𑀸 𑀘𑁂𑀯. ‘‘𑀲𑀢𑁆𑀢𑀳𑀺 𑀪𑀯𑁂𑀳𑀻’’𑀢𑀺 𑀓𑁆𑀭𑀺𑀬𑀸𑀧𑀯𑀕𑁆𑀕𑁂 𑀓𑀭𑀡𑀯𑀘𑀦𑀁. 𑀬𑀣𑀸 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀯𑀺𑀳𑀸𑀭𑀁 𑀦𑀺𑀝𑁆𑀞𑀸𑀧𑁂𑀢𑀻𑀢𑀺. 𑀓𑁆𑀭𑀺𑀬𑀸𑀧𑀯𑀕𑁆𑀕𑁄𑀢𑀺𑀘 𑀓𑁆𑀭𑀺𑀬𑀸𑀬𑀲𑀻𑀖𑀢𑀭𑀁 𑀦𑀺𑀝𑁆𑀞𑀸𑀧𑀦𑀁 𑀯𑀼𑀘𑁆𑀘𑀢𑀺. ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀁’’𑀢𑀺 𑀲𑀢𑁆𑀢𑀯𑀸𑀭𑀸. 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺𑀦𑀸𑀫 ‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀸𑀦𑀺,. ‘‘𑀅𑀯𑀺𑀦𑀺𑀧𑀸𑀢 𑀥𑀫𑁆𑀫𑁄’’𑀢𑀺 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀧𑀢𑀦𑀁 𑀯𑀺𑀦𑀺𑀧𑀸𑀢𑁄. 𑀅𑀧𑀸𑀬𑀦𑀺𑀧𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀥𑀫𑁆𑀫𑁄’’𑀢𑀺 𑀲𑀪𑀸𑀯𑁄. 𑀦𑀢𑁆𑀣𑀺 𑀯𑀺𑀦𑀺𑀧𑀸𑀢𑁄 𑀥𑀫𑁆𑀫𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀦𑀺𑀬𑀢𑁄’’𑀢𑀺 𑀲𑀼𑀕𑀢𑀺𑀪𑀯𑁂𑀲𑀼 𑀦𑀺𑀬𑀢 𑀕𑀢𑀺𑀓𑁄. 𑀲𑀫𑁆𑀫𑀸 𑀩𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑁄𑀥𑀺. 𑀫𑀕𑁆𑀕𑀜𑁆𑀜𑀸𑀡𑀁. ‘‘𑀧𑀭𑀸𑀬𑀦𑀁’’𑀢𑀺 𑀧𑀭𑀪𑀸𑀕𑁂 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺. 𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀁 𑀧𑀭𑀸𑀬𑀦𑀁 𑀅𑀲𑁆𑀲𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄. ‘‘𑀅𑀦𑀺𑀬𑀫𑀢𑁆𑀣𑁄’’𑀢𑀺 𑀯𑀸𑀲𑀤𑁆𑀤𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀸 𑀲𑀤𑁆𑀤𑀢𑁆𑀣𑁂𑀲𑀼 𑀘 𑀅𑀦𑀺𑀬𑀫𑀢𑁆𑀣𑁄. 𑀦 𑀯𑀺𑀓𑀧𑁆𑀧𑀢𑁆𑀣𑁄. 𑀯𑀺𑀓𑀧𑁆𑀧𑀢𑁆𑀣𑁂𑀳𑀺 𑀲𑀢𑀺 𑀤𑁆𑀯𑁂 𑀏𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸 𑀮𑀩𑁆𑀪𑀦𑁆𑀢𑀺. 𑀫𑀺𑀲𑁆𑀲𑀓𑀪𑀯𑁄𑀦 𑀮𑀩𑁆𑀪𑀢𑀺. 𑀅𑀦𑀺𑀬𑀫𑀢𑁆𑀣𑁂 𑀢𑀬𑁄𑀧𑀺 𑀮𑀩𑁆𑀪𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀫𑀼𑀘𑁆𑀘𑀬𑀢𑁆𑀣𑀲𑁆𑀲 𑀕𑀳𑀺𑀢𑀢𑁆𑀢𑀸 𑀏𑀓𑁄 𑀫𑀺𑀲𑁆𑀲𑀓𑀪𑀯𑁄 𑀏𑀯 𑀮𑀩𑁆𑀪𑀢𑀺. 𑀦𑀦𑀼 𑀘 𑀲𑀤𑁆𑀤𑁄 𑀦𑀸𑀫 𑀲𑀫𑀼𑀘𑁆𑀘𑀬𑀢𑁆𑀣𑁂 𑀧𑀸𑀓𑀝𑁄, 𑀦 𑀅𑀦𑀺𑀬𑀫𑀢𑁆𑀣𑁂. 𑀢𑀲𑁆𑀫𑀸 𑀲𑀫𑀼𑀘𑁆𑀘𑀬𑀢𑁆𑀣𑁄𑀯 𑀇𑀥 𑀬𑀼𑀢𑁆𑀢𑁄𑀢𑀺 𑀘𑁂. 𑀦 𑀬𑀼𑀢𑁆𑀢𑁄. 𑀓𑀲𑁆𑀫𑀸. 𑀤𑁆𑀯𑀺𑀦𑁆𑀦𑀁 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀫𑀼𑀘𑁆𑀘𑀬𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀇𑀫𑀲𑁆𑀫𑀺𑀁 𑀧𑀸𑀞𑁂 𑀅𑀲𑀗𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀢𑁂 𑀇𑀫𑀲𑁆𑀫𑀺𑀁 𑀧𑀸𑀞𑁂 𑀅𑀲𑀗𑁆𑀕𑀳𑀺𑀢𑀸. 𑀓𑀢𑁆𑀣𑀢𑁂 𑀲𑀗𑁆𑀕𑀳𑀺𑀢𑀸 𑀪𑀯𑁂𑀬𑁆𑀬𑀼𑀁. 𑀦 𑀳𑀺 𑀓𑁄𑀘𑀺 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄 𑀦𑀸𑀫 𑀇𑀥 𑀅𑀲𑀗𑁆𑀕𑀳𑀺𑀢𑁄𑀢𑀺 𑀬𑀼𑀢𑁆𑀢𑁄𑀢𑀺. ‘‘𑀅𑀲𑁆𑀲𑀸’’𑀢𑀺 𑀢𑀲𑁆𑀲𑀧𑀸𑀴𑀺𑀧𑀸𑀞𑀲𑁆𑀲. ‘‘𑀏𑀢𑁆𑀣 𑀘 𑀬𑀲𑁆𑀫𑀸. 𑀮. 𑀧𑀭𑀫𑁄 𑀦𑀸𑀫 𑀯𑀼𑀢𑁆𑀢𑁄’’𑀢𑀺 𑀇𑀤𑀁 𑀉𑀧𑀭𑀺 ‘𑀬𑁂 𑀓𑀸𑀫𑀪𑀯𑁂 𑀬𑁂𑀯𑀸’𑀢𑀺𑀆𑀤𑀺𑀦𑀸 ‘𑀬𑁂𑀤𑀺𑀝𑁆𑀞 𑀥𑀫𑁆𑀫𑁂 𑀯𑀸’𑀢𑀺𑀆𑀤𑀺𑀦𑀸 𑀘 𑀬𑁄𑀚𑁂𑀢𑀩𑁆𑀩𑀁. 𑀲𑁄 𑀘 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀯𑀸 𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀯𑀸 𑀤𑀝𑁆𑀞𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀸𑀴𑀺𑀬𑀁’’𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀸𑀴𑀺𑀬𑀁. ‘‘𑀇𑀥 𑀦𑀺𑀝𑁆𑀞𑀸’’𑀢𑀺 𑀇𑀫𑀲𑁆𑀫𑀺𑀁 𑀓𑀸𑀫𑀮𑁄𑀓𑁂 𑀆𑀲𑀯𑀓𑁆𑀔𑀬𑀁 𑀧𑀢𑁆𑀯𑀸 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀧𑀢𑁆𑀢𑀺 𑀯𑀲𑁂𑀦 𑀦𑀺𑀝𑁆𑀞𑀸. 𑀦𑀺𑀝𑁆𑀞𑀸𑀦𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀮𑀢𑁄 𑀓𑀼𑀮𑀁 𑀕𑀘𑁆𑀙𑀢𑀻𑀢𑀺 𑀓𑁄𑀮𑀁𑀓𑁄𑀮𑁄. 𑀪𑀯𑀢𑁄 𑀪𑀯𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀪𑀯𑀩𑀻𑀚𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀩𑀻𑀚𑀻. 𑀬𑁄 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀳𑀸. 𑀢𑀲𑁆𑀲 𑀘 𑀇𑀥 𑀦𑀺𑀝𑁆𑀞𑀸𑀢𑀺 𑀬𑁄𑀚𑀦𑀸. 𑀓𑁂𑀦 𑀧𑀦 𑀢𑀺𑀡𑁆𑀡𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀯𑀺𑀲𑁂𑀲𑁄 𑀓𑀢𑁄𑀢𑀺. 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄 𑀢𑀸𑀯 𑀓𑁂𑀯𑀮𑀁 𑀧𑀣𑀫𑀫𑀕𑁆𑀕 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀓𑀢𑁄. 𑀇𑀢𑀭𑁂 𑀤𑁆𑀯𑁂 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑁂𑀳𑀺 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀢𑁄𑀢𑀺. 𑀢𑀢𑁆𑀣 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄 𑀲𑀩𑁆𑀩𑀫𑀼𑀤𑀼𑀓𑁄 𑀳𑁄𑀢𑀺. 𑀢𑀢𑁄 𑀓𑁄𑀮𑀁𑀓𑁄𑀮𑁄 𑀢𑀺𑀓𑁆𑀔𑁄. 𑀲𑁄 𑀧𑀦 𑀙 𑀪𑀯𑀺𑀓𑁄, 𑀧𑀜𑁆𑀘𑀪𑀯𑀺𑀓𑁄, 𑀘𑀢𑀼𑀪𑀯𑀺𑀓𑁄, 𑀢𑀺𑀪𑀯𑀺𑀓𑁄, 𑀤𑁆𑀯𑀺𑀪𑀯𑀺𑀓𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀢𑀢𑁆𑀣 𑀧𑀜𑁆𑀘𑀪𑀯𑀺𑀓𑁄 𑀢𑀺𑀓𑁆𑀔𑁄. 𑀲𑁂𑀲𑀸 𑀅𑀦𑀼𑀓𑁆𑀓𑀫𑁂𑀦 𑀢𑀺𑀓𑁆𑀔𑀢𑀭𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀓𑀩𑀻𑀚𑀻 𑀧𑀦 𑀏𑀓𑀪𑀯𑀺𑀓𑁄 𑀲𑀩𑁆𑀩𑀢𑀺𑀓𑁆𑀔𑁄. 𑀢𑀢𑁆𑀣 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄 𑀓𑁂𑀯𑀮𑁂𑀦 𑀧𑀣𑀫𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀲𑀺𑀤𑁆𑀥𑀢𑁆𑀢𑀸 𑀲𑀩𑁆𑀩𑀫𑀼𑀤𑀼𑀓𑁄 𑀳𑁄𑀢𑀺. 𑀇𑀢𑀭𑁂 𑀤𑁆𑀯𑁂𑀧𑀓𑀢𑀺𑀬𑀸 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑀪𑀸𑀯𑁂 𑀞𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁 𑀧𑀝𑁆𑀞𑀧𑁂𑀦𑁆𑀢𑀺. 𑀢𑀤𑀸 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀼𑀦 𑀯𑀺𑀲𑁂𑀲 𑀧𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀺𑀓𑁆𑀔𑀸𑀦𑀺. 𑀢𑀲𑁆𑀫𑀸 𑀢𑁂 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑀢𑁄 𑀢𑀺𑀓𑁆𑀔𑀸𑀦𑀸𑀫 𑀳𑁄𑀦𑁆𑀢𑀻𑀢𑀺. ‘‘𑀲𑀢𑁆𑀢𑀯𑀸𑀭𑀢𑁄 𑀑𑀭𑀁 𑀯𑀸’’𑀢𑀺 𑀇𑀤𑀁 𑀓𑁄𑀮𑀁𑀓𑁄𑀮 𑀏𑀓𑀩𑀻𑀚𑀺𑀦𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀦𑀺𑀬𑀸𑀫𑁂𑀢𑀻’’𑀢𑀺 𑀇𑀤𑀁 𑀉𑀧𑀭𑀺𑀫𑁂 𑀤𑁆𑀯𑁂𑀲𑁄𑀢𑀸𑀧𑀦𑁆𑀦𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄𑀧𑀦 𑀧𑀣𑀫𑀫𑀕𑁆𑀕𑁂𑀦𑁂𑀯 𑀦𑀺𑀬𑀫𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸𑀳𑀺 𑀲𑁄𑀬𑁂𑀯 𑀲𑀗𑁆𑀕𑀳𑀧𑀸𑀞𑁂 𑀲𑀭𑀽𑀧𑀢𑁄 𑀆𑀕𑀢𑁄 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑁂𑀦 𑀧𑀳𑀻𑀦𑀸𑀧𑀸𑀬𑀕𑀫𑀦𑁄 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺. 𑀇𑀢𑀭𑁂 𑀧𑀦 𑀤𑁆𑀯𑁂 𑀧𑀸𑀴𑀺𑀬𑀁 𑀲𑁄𑀢𑀸𑀧𑀦𑁆𑀦 𑀧𑀼𑀕𑁆𑀕𑀮𑀯𑀺𑀪𑀸𑀕𑀝𑁆𑀞𑀸𑀦𑁂𑀲𑁆𑀯𑁂𑀯 𑀆𑀕𑀢𑀸𑀢𑀺. ‘‘𑀬𑁂 𑀧𑀦𑀸’’𑀢𑀺 𑀬𑁂 𑀲𑁄𑀢𑀸𑀧𑀦𑁆𑀦 𑀧𑀼𑀕𑁆𑀕𑀮𑀸𑀧𑀦. 𑀕𑀸𑀣𑀸𑀬𑀁 ‘‘𑀇𑀢𑁄𑀲𑀢𑁆𑀢𑀸’’𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀲𑀢𑁆𑀢 𑀲𑀁𑀲𑀭𑀸𑀦𑀺. ‘‘𑀢𑀢𑁄𑀲𑀢𑁆𑀢𑀸’’𑀢𑀺 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀼𑀢𑁆𑀢𑀭𑀧𑀸𑀞𑁂 ‘‘𑀢𑁂𑀦𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦𑀸’’𑀢𑀺 𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀲𑀢𑁆𑀣𑀼𑀕𑀼𑀡𑁂 𑀘𑀺𑀢𑁆𑀢𑀧𑁆𑀧𑀲𑀸𑀤𑁄 𑀚𑀸𑀬𑀢𑀺. 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦. ‘‘𑀢𑁂𑀦 𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀲𑀘𑁂 𑀲𑁄 𑀤𑁂𑀯𑁂𑀲𑀼 𑀏𑀯 𑀲𑀁𑀲𑀭𑀢𑀺. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀑𑀧𑀧𑀸𑀢𑀺𑀓 𑀧𑀝𑀺𑀲𑀦𑁆𑀥𑀺𑀬𑁄 𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀬𑀤𑀺 𑀫𑀦𑀼𑀲𑁆𑀲𑁂𑀲𑀼 𑀏𑀯 𑀲𑀁𑀲𑀭𑀢𑀺. 𑀲𑀢𑁆𑀢𑀕𑀩𑁆𑀪𑀲𑁂𑀬𑁆𑀬𑀓 𑀧𑀝𑀺𑀲𑀦𑁆𑀥𑀺𑀬𑁄 𑀕𑀡𑁆𑀳𑀺𑀢𑁆𑀯𑀸 𑀏𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀏𑀯𑀁 𑀤𑁂𑀲𑀦𑀸 𑀯𑀸𑀭𑁂𑀦 𑀘𑀼𑀤𑁆𑀤𑀲 𑀓𑀢𑁆𑀯𑀸 𑀤𑁂𑀲𑀺𑀢𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀁’’𑀢𑀺 𑀯𑀤𑀦𑁆𑀢𑁂𑀦 𑀝𑀻𑀓𑀸𑀘𑀭𑀺𑀬𑁂𑀦 𑀲𑀬𑀁 𑀘𑀼𑀤𑁆𑀤𑀲𑀧𑀝𑀺𑀲𑀦𑁆𑀥𑀺𑀬𑁄𑀯 𑀇𑀘𑁆𑀙𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀤𑀸𑀦𑀺 𑀢𑀁 𑀘𑀼𑀤𑁆𑀤𑀲𑀧𑀝𑀺𑀲𑀦𑁆𑀥𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀯𑀺𑀪𑀗𑁆𑀕𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀯𑀺𑀪𑀗𑁆𑀕𑁂’’𑀢𑀺 𑀅𑀪𑀺𑀥𑀫𑁆𑀫𑁂 𑀜𑀸𑀡𑀯𑀺𑀪𑀗𑁆𑀕𑁂. 𑀦𑀢𑁆𑀣𑀺 𑀞𑀸𑀦𑀫𑀲𑁆𑀲𑀸𑀢𑀺 𑀅𑀝𑁆𑀞𑀸𑀦𑀁. ‘‘𑀞𑀸𑀦𑀁’’𑀢𑀺 𑀫𑀽𑀮𑀓𑀸𑀭𑀡𑀁. 𑀦𑀢𑁆𑀣𑀺 𑀅𑀯𑀓𑀸𑀲𑁄 𑀅𑀲𑁆𑀲𑀸𑀢𑀺 𑀅𑀦𑀯𑀓𑀸𑀲𑁄. ‘‘𑀅𑀯𑀓𑀸𑀲𑁄’’𑀢𑀺 𑀧𑀘𑁆𑀘𑀬𑀓𑀸𑀭𑀡𑀁. ‘‘𑀬𑀁’’𑀢𑀺 𑀓𑁆𑀭𑀺𑀬𑀸𑀧𑀭𑀸𑀫𑀲𑀦𑀁. 𑀬𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑀁 𑀦𑀺𑀩𑁆𑀩𑀢𑁆𑀢𑀦𑀁 𑀅𑀝𑁆𑀞𑀸𑀦𑀁. 𑀲𑁄 𑀦𑀺𑀩𑁆𑀩𑀢𑁆𑀢𑀦 𑀥𑀫𑁆𑀫𑁄 𑀅𑀦𑀯𑀓𑀸𑀲𑁄𑀢𑀺 𑀬𑁄𑀚𑀦𑀸. ‘‘𑀅𑀪𑀺𑀲𑀗𑁆𑀔𑀸𑀭 𑀯𑀺𑀜𑁆𑀜𑀸𑀡𑀲𑁆𑀲𑀸’’𑀢𑀺 𑀲𑀢𑁆𑀢𑀪𑀯𑀢𑁄 𑀉𑀤𑁆𑀥𑀁 𑀓𑀸𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀚𑀦𑀓𑀲𑁆𑀲 𑀓𑀼𑀲𑀮𑀸 𑀓𑀼𑀲𑀮𑀓𑀫𑁆𑀫 𑀯𑀺𑀜𑁆𑀜𑀸𑀡𑀲𑁆𑀲. ‘‘𑀦𑀺𑀭𑁄𑀥𑁂𑀦𑀸’’𑀢𑀺 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀦𑀺𑀭𑁄𑀥𑀦𑁂𑀦. 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 𑀬𑁂 𑀦𑀸𑀫 𑀭𑀽𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀏𑀢𑁂 𑀦𑀸𑀫 𑀭𑀽𑀧𑀥𑀫𑁆𑀫𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀅𑀪𑀺𑀲𑀗𑁆𑀔𑀸𑀭 𑀯𑀺𑀜𑁆𑀜𑀸𑀡 𑀦𑀺𑀭𑁄𑀥𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑀬𑁂𑀦𑁂𑀯. ‘‘𑀢𑀤𑁂𑀓𑀝𑁆𑀞𑀫𑁄𑀳𑀲𑁆𑀲𑀸’’𑀢𑀺 𑀢𑁂𑀦 𑀭𑀸𑀕𑁂𑀦 𑀢𑁂𑀦 𑀤𑁄𑀲𑁂𑀦 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀏𑀓𑀢𑁄 𑀞𑀺𑀢𑀲𑁆𑀲 𑀫𑁄𑀳𑀲𑁆𑀲. 𑀦 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀫𑁄𑀳𑀲𑁆𑀲. 𑀢𑀲𑁆𑀲 𑀧𑀣𑀫𑀫𑀕𑁆𑀕𑁂 𑀏𑀯 𑀧𑀳𑀻𑀦𑀢𑁆𑀢𑀸. 𑀦𑀸𑀧𑀺 𑀉𑀤𑁆𑀥𑀘𑁆𑀘𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀫𑁄𑀳𑀲𑁆𑀲. 𑀢𑀲𑁆𑀲 𑀘𑀢𑀼𑀢𑁆𑀣𑀫𑀕𑁆𑀕𑁂 𑀏𑀯 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀉𑀧𑁆𑀧𑀚𑁆𑀚𑀦𑁆𑀢𑀸 𑀭𑀸𑀕𑀤𑁄𑀲𑀫𑁄𑀳𑀸. ‘‘𑀥𑀫𑁆𑀫𑀺𑀓𑁂𑀲𑀽’’𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑁂𑀲𑀼. ‘‘𑀬𑀢𑁄’’𑀢𑀺 𑀬𑀁𑀓𑀸𑀭𑀡𑀸. 𑀩𑀮𑀯𑀦𑁆𑀢𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. ‘‘𑀢𑁂𑀲𑀁’’𑀢𑀺 𑀲𑁄𑀢𑀸𑀧𑀦𑁆𑀦𑀸𑀦𑀁. ‘‘𑀲𑀮𑁆𑀮𑀺𑀔𑀦 𑀯𑀲𑁂𑀦𑀸’’𑀢𑀺 𑀩𑀳𑀮𑀧𑀓𑁆𑀔𑀁 𑀣𑀽𑀮𑀪𑀸𑀕𑀁 𑀲𑀼𑀝𑁆𑀞𑀼𑀮𑀺𑀔𑀦𑀯𑀲𑁂𑀦. 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺 𑀦𑀸𑀫 𑀧𑀼𑀩𑁆𑀩𑁂 𑀬𑀣𑀸𑀧𑀯𑀢𑁆𑀢𑀁 𑀓𑀸𑀮𑀁 𑀅𑀥𑀺𑀘𑁆𑀘 𑀅𑀢𑀺𑀓𑁆𑀓𑀫𑁆𑀫 𑀉𑀧𑁆𑀧𑀢𑁆𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀫𑁆𑀧𑀺 𑀭𑀸𑀕𑀤𑁄𑀲𑀫𑁄𑀳𑀸𑀦𑀁. ‘‘𑀢𑁂𑀲𑀁 𑀧𑀻’’𑀢𑀺 𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺. ‘‘𑀫𑁂𑀣𑀼𑀦𑀯𑀢𑁆𑀣𑀼 𑀲𑀫𑀸𑀬𑁄𑀕𑁄 𑀇𑀘𑁆𑀙𑀺𑀢𑁄’’𑀢𑀺 𑀚𑀸𑀬𑀫𑁆𑀧𑀢𑀻𑀦𑀁 𑀫𑁂𑀣𑀼𑀦𑀓𑀫𑁆𑀫𑀲𑀫𑀸𑀬𑁄𑀕𑁄 𑀦𑀸𑀫 𑀲𑀓𑀤𑀸𑀕𑀸𑀫𑀻𑀦𑀁 𑀅𑀢𑁆𑀣𑀻𑀢𑀺 𑀇𑀘𑁆𑀙𑀺𑀢𑁄. 𑀣𑁂𑀭𑁄𑀳𑀺 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀁 𑀇𑀘𑁆𑀙𑀢𑀺. 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀁 𑀦 𑀇𑀘𑁆𑀙𑀢𑀺. 𑀲𑀓𑀤𑀸𑀕𑀸𑀫𑀻𑀦𑀁 𑀧𑀼𑀢𑁆𑀢𑀥𑀻𑀢𑀭𑁄𑀧𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀤𑀢𑀺. ‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀣𑁂𑀭𑀲𑁆𑀲 𑀫𑀦𑁄𑀭𑀣𑀫𑀢𑁆𑀢𑀁𑀢𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀇𑀤𑀁 𑀲𑀩𑁆𑀩𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁. ‘‘𑀙𑀓𑁆𑀓𑀦𑀺𑀧𑀸𑀢𑁂’’𑀢𑀺 𑀅𑀗𑁆𑀕𑀼𑀢𑁆𑀢𑀭𑁂 𑀙𑀓𑁆𑀓𑀦𑀺𑀧𑀸𑀢𑁂. ‘‘𑀫𑀺𑀕𑀸𑀲𑀸𑀴𑀯𑀢𑁆𑀣𑀼𑀫𑁆𑀳𑀻’’𑀢𑀺 𑀫𑀺𑀕𑀸𑀲𑀸𑀴𑀦𑀸𑀫𑀺𑀓𑀸𑀬 𑀉𑀧𑀸𑀲𑀺𑀓𑀸𑀬 𑀯𑀢𑁆𑀣𑀼𑀫𑁆𑀳𑀺. 𑀓𑁂𑀘𑀺 𑀇𑀫𑀁 𑀯𑀢𑁆𑀣𑀼𑀁 𑀤𑀺𑀲𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀁 𑀦 𑀭𑁄𑀘𑁂𑀦𑁆𑀢𑀺. 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑀁 𑀭𑁄𑀘𑁂𑀦𑁆𑀢𑀺. ‘‘𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀢𑀺 𑀫𑁂𑀣𑀼𑀦 𑀥𑀫𑁆𑀫𑀸 𑀅𑀧𑁆𑀧𑀝𑀺𑀯𑀺𑀭𑀢𑀲𑁆𑀲. ‘‘𑀲𑀓𑀤𑀸𑀕𑀸𑀫𑀺𑀢𑁆𑀢𑀁 𑀩𑁆𑀬𑀸𑀓𑀢𑀁’’𑀢𑀺 𑀢𑀲𑁆𑀫𑀺𑀁 𑀓𑀸𑀮𑀗𑁆𑀓𑀢𑁂 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀇𑀥 𑀲𑀓𑀤𑀸𑀕𑀸𑀫𑀺𑀪𑀸𑀯𑀁 𑀧𑀢𑁆𑀯𑀸 𑀢𑀼𑀲𑀺𑀢𑀸𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺 𑀏𑀯𑀁 𑀢𑀲𑁆𑀲 𑀬𑀁 𑀲𑀓𑀤𑀸𑀕𑀸𑀫𑀺𑀢𑁆𑀢𑀁 𑀪𑀕𑀯𑀢𑀸 𑀩𑁆𑀬𑀸𑀓𑀢𑀁. ‘‘𑀅𑀥𑀺𑀕𑀫𑀯𑀲𑁂𑀦𑀸’’𑀢𑀺 𑀲𑀓𑀤𑀸𑀕𑀸𑀫𑀺𑀪𑀸𑀯𑀁 𑀧𑀝𑀺𑀮𑀸𑀪𑀯𑀲𑁂𑀦. 𑀦 𑀧𑀦 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀢𑁄 𑀅𑀥𑀺𑀕𑀫𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀭𑀡𑀸𑀲𑀦𑁆𑀦𑀓𑀸𑀮𑁂𑀧𑀺 𑀳𑀺 𑀲𑀺𑀓𑁆𑀔𑀸𑀧𑀤𑀸𑀥𑀺𑀝𑁆𑀞𑀸𑀦𑁂𑀦 𑀲𑀳 𑀉𑀧𑀭𑀺𑀫𑀕𑁆𑀕𑀨𑀮𑀸𑀥𑀺𑀕𑀫𑀦𑀁 𑀦𑀸𑀫 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦 𑀤𑀼𑀓𑁆𑀓𑀭𑀦𑁆𑀢𑀺. 𑀏𑀢𑁂𑀦 𑀓𑁂𑀲𑀜𑁆𑀘𑀺 𑀣𑁂𑀭𑀯𑀸𑀤𑀭𑁄𑀘𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. ‘‘𑀲𑀓𑀺𑀁𑀤𑁂𑀯 𑀇𑀫𑀁𑀮𑁄𑀓𑀁 𑀆𑀕𑀦𑁆𑀢𑁆𑀯𑀸’’𑀢𑀺 𑀏𑀢𑁂𑀦 𑀇𑀢𑁄 𑀧𑀭𑀮𑁄𑀓𑀁 𑀕𑀫𑀦𑀲𑁆𑀲 𑀘 𑀢𑀢𑁄 𑀧𑀼𑀦 𑀇𑀥𑀸𑀕𑀫𑀦𑀲𑁆𑀲 𑀘 𑀲𑀺𑀤𑁆𑀥𑀢𑁆𑀢𑀸 𑀅𑀬𑀁 𑀧𑀼𑀕𑁆𑀕𑀮𑁄 𑀲𑀼𑀤𑁆𑀥𑁂𑀦 𑀫𑀕𑁆𑀕𑀦𑀺𑀬𑀸𑀫𑁂𑀦 𑀓𑀸𑀫𑀪𑀯𑁂 𑀤𑁆𑀯𑀺𑀓𑁆𑀔𑀢𑁆𑀢𑀼 𑀧𑀭𑀫𑁄𑀦𑀸𑀫 𑀳𑁄𑀢𑀻𑀢𑀺 𑀲𑀺𑀤𑁆𑀥𑁄. 𑀓𑀣𑀁. 𑀇𑀥 𑀧𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀢𑁆𑀣 𑀧𑀢𑁆𑀯𑀸 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺. 𑀲𑁂𑀲𑀸𑀧𑀦 𑀘𑀢𑁆𑀢𑀸𑀭𑁄 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑁂𑀦 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄. 𑀇𑀥 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑀢𑁆𑀣 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻. 𑀇𑀥 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑀢𑁆𑀣 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺. 𑀏𑀢𑁆𑀣 𑀘 𑀢𑀻𑀲𑀼 𑀲𑁄𑀢𑀸𑀧𑀦𑁆𑀦𑁂𑀲𑀼 𑀏𑀓𑁄𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄 𑀏𑀯 𑀫𑀕𑁆𑀕𑀦𑀺𑀬𑀸𑀫𑁂𑀦 𑀲𑀺𑀤𑁆𑀥𑁄. 𑀲𑁂𑀲𑀸 𑀧𑀦 𑀤𑁆𑀯𑁂 𑀲𑁄𑀢𑀸𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑁂𑀦 𑀲𑀺𑀤𑁆𑀥𑀸. 𑀙 𑀲𑀓𑀤𑀸𑀕𑀸𑀫𑀻𑀲𑀼 𑀤𑁆𑀯𑁂 𑀏𑀯 𑀫𑀕𑁆𑀕𑀦𑀺𑀬𑀸𑀫𑁂𑀦 𑀲𑀺𑀤𑁆𑀥𑀸. 𑀲𑁂𑀲𑀸 𑀧𑀦 𑀘𑀢𑁆𑀢𑀸𑀭𑁄 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑁂𑀦 𑀲𑀺𑀤𑁆𑀥𑀸. 𑀢𑀢𑁆𑀣 𑀫𑀕𑁆𑀕𑀲𑀺𑀤𑁆𑀥𑁂𑀲𑀼 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀻𑀲𑀼 𑀲𑀗𑁆𑀓𑀭𑁄 𑀦𑀢𑁆𑀣𑀺. 𑀯𑀺𑀧𑀲𑁆𑀲𑀦𑀸𑀲𑀺𑀤𑁆𑀥𑁂𑀲𑀼 𑀧𑀦 𑀲𑀗𑁆𑀓𑀭𑁄 𑀅𑀢𑁆𑀣𑀺. 𑀅𑀢𑁆𑀣𑀢𑁄 𑀅𑀯𑀺𑀭𑀼𑀤𑁆𑀥𑁂 𑀲𑀢𑀺, 𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑀗𑁆𑀓𑀭𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀕𑀦𑁆𑀢𑁆𑀯𑀸𑀢𑀺 𑀧𑀸𑀞𑀯𑀲𑁂𑀦 𑀆𑀕𑀫𑀦𑀢𑁄𑀢𑀺 𑀯𑀼𑀢𑁆𑀢𑀁. 𑀆𑀕𑀦𑁆𑀢𑀸𑀢𑀺 𑀧𑀦 𑀧𑀸𑀞𑁄 𑀬𑀼𑀢𑁆𑀢𑁄. 𑀆𑀕𑀫𑀦𑀲𑀻𑀮𑁄 𑀆𑀕𑀫𑀦 𑀥𑀫𑁆𑀫𑁄 𑀳𑀼𑀢𑁆𑀯𑀸 𑀲𑀓𑀤𑀸𑀕𑀸𑀫𑀻 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀕𑀦𑁆𑀢𑁆𑀯𑀸 𑀇𑀢𑁆𑀣𑀢𑁆𑀢𑀦𑁆𑀢𑀺 𑀏𑀢𑁆𑀣𑀧𑀺 𑀏𑀲𑁂𑀯𑀦𑀬𑁄. 𑀅𑀭𑀳𑀢𑁄 𑀪𑀸𑀯𑁄 𑀅𑀭𑀳𑀢𑁆𑀢𑀁. 𑀅𑀭𑀳𑀢𑁆𑀢 𑀫𑀕𑁆𑀕𑀁. 𑀤𑀓𑁆𑀔𑀺𑀡𑀸𑀬 𑀯𑀺𑀧𑀢𑁆𑀢𑀺𑀓𑀭𑀸𑀦𑀸𑀫 𑀅𑀧𑁆𑀧𑀧𑁆𑀨𑀮 𑀅𑀧𑁆𑀧𑀸𑀦𑀺𑀲𑀁𑀲𑀓𑀭𑀸. 𑀲𑀫𑁆𑀧𑀢𑁆𑀢𑀺𑀓𑀭𑀸 𑀦𑀸𑀫 𑀫𑀳𑀧𑁆𑀨𑀮 𑀫𑀳𑀸𑀦𑀺𑀲𑀁𑀲𑀓𑀭𑀸. 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀸 𑀦𑀸𑀫 𑀲𑀻𑀮𑀓𑁆𑀔𑀦𑁆𑀥 𑀲𑀫𑀸𑀥𑀺𑀓𑁆𑀔𑀦𑁆𑀥 𑀧𑀜𑁆𑀜𑀸𑀓𑁆𑀔𑀦𑁆𑀥 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥 𑀯𑀺𑀫𑀼𑀢𑁆𑀢𑀺𑀜𑁆𑀜𑀸𑀡 𑀤𑀲𑁆𑀲𑀦𑀓𑁆𑀔𑀦𑁆𑀥𑀕𑀼𑀡𑀸. ‘‘𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀽’’𑀢𑀺 𑀤𑀓𑁆𑀔𑀺𑀡𑀸𑀭𑀳 𑀧𑀼𑀕𑁆𑀕𑀮𑁂𑀲𑀼. ‘‘𑀥𑀼𑀭𑀁’’𑀢𑀺 𑀧𑀥𑀸𑀦𑀲𑀻𑀲𑀝𑁆𑀞𑀸𑀦𑀺𑀬𑀁 𑀯𑀼𑀘𑁆𑀘𑀢𑀺. 𑀲𑀤𑁆𑀥𑀸 𑀏𑀯 𑀥𑀼𑀭𑀁 𑀅𑀲𑁆𑀲𑀸𑀢𑀺 𑀲𑀤𑁆𑀥𑀸𑀥𑀼𑀭𑁄. 𑀏𑀯𑀁 𑀧𑀜𑁆𑀜𑀸𑀥𑀼𑀭𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀻𑀭𑀺𑀬𑀥𑀼𑀭𑁄 𑀦 𑀕𑀳𑀺𑀢𑁄𑀢𑀺. 𑀧𑀸𑀴𑀺𑀬𑀁 𑀲𑀤𑁆𑀥𑀸𑀯𑀸𑀳𑀻 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀧𑀜𑁆𑀜𑀸𑀯𑀸𑀳𑀻 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀦 𑀧𑀦 𑀯𑀼𑀢𑁆𑀢𑀁 𑀯𑀻𑀭𑀺𑀬𑀯𑀸𑀳𑀻 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺. 𑀢𑀲𑁆𑀫𑀸 𑀦 𑀕𑀳𑀺𑀢𑁄𑀢𑀺. 𑀓𑀲𑁆𑀫𑀸 𑀧𑀦 𑀯𑀻𑀭𑀺𑀬𑀯𑀸𑀳𑀻 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺. 𑀯𑀼𑀘𑁆𑀘𑀢𑁂. 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀲𑁆𑀲 𑀦𑀸𑀫 𑀆𑀤𑀺𑀫𑁆𑀳𑀺 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀧𑀳𑀸𑀦𑀸𑀬 𑀓𑀫𑁆𑀫𑀁 𑀫𑀳𑀦𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸, 𑀅𑀧𑀸𑀬𑀫𑀽𑀮𑀓𑀢𑁆𑀢𑀸. 𑀢𑀢𑁆𑀣 𑀲𑀤𑁆𑀥𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀤𑁆𑀯𑁂 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀺. 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀤𑁆𑀥𑀸 𑀦𑀺𑀯𑀺𑀲𑀢𑀺, 𑀢𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸 𑀦𑀢𑁆𑀣𑀺. 𑀬𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸 𑀦𑀺𑀯𑀺𑀲𑀢𑀺, 𑀢𑀲𑁆𑀫𑀺𑀁 𑀲𑀤𑁆𑀥𑀸 𑀦𑀢𑁆𑀣𑀺. 𑀢𑀣𑀸 𑀧𑀜𑁆𑀜𑀸𑀤𑀺𑀝𑁆𑀞𑀺𑀬𑁄 𑀘 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑀸. 𑀬𑀢𑁆𑀣 𑀧𑀜𑁆𑀜𑀸, 𑀦 𑀢𑀢𑁆𑀣 𑀤𑀺𑀝𑁆𑀞𑀺. 𑀬𑀢𑁆𑀣 𑀤𑀺𑀝𑁆𑀞𑀺, 𑀦 𑀢𑀢𑁆𑀣 𑀧𑀜𑁆𑀜𑀸𑀢𑀺. 𑀅𑀧𑀺 𑀘 𑀲𑀤𑁆𑀥𑀸 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀤𑀺𑀝𑁆𑀞𑀺𑀁 𑀯𑀺𑀥𑀫𑀢𑀺𑀬𑁂𑀯. 𑀧𑀜𑁆𑀜𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀥𑀫𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀫𑀸 𑀆𑀭𑀤𑁆𑀥 𑀯𑀺𑀧𑀲𑁆𑀲𑀓𑁄 𑀅𑀦𑀺𑀘𑁆𑀘𑀸𑀤𑀻𑀲𑀼 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀫𑀢𑁆𑀢𑁂𑀦𑀧𑀺 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀬𑁄 𑀧𑀚𑀳𑀺𑀢𑁆𑀯𑀸 𑀲𑀤𑁆𑀥𑀸𑀦𑀼𑀲𑀸𑀭𑀺𑀪𑀸𑀯𑀜𑁆𑀘 𑀲𑀼𑀝𑁆𑀞𑀼𑀢𑀭𑀁 𑀧𑀲𑀻𑀤𑀺𑀢𑁆𑀯𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀧𑀜𑁆𑀜𑀸𑀬 𑀅𑀦𑀺𑀘𑁆𑀘𑀸𑀤𑀻𑀦𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀁 𑀓𑀢𑁆𑀯𑀸 𑀥𑀫𑁆𑀫𑀸𑀦𑀼𑀲𑀸𑀭𑀺𑀪𑀸𑀯𑀜𑁆𑀘 𑀲𑀼𑀝𑁆𑀞𑀼𑀢𑀭𑀁 𑀧𑀲𑁆𑀲𑀺𑀢𑁆𑀯𑀸 𑀤𑀺𑀝𑁆𑀞𑀺𑀧𑀢𑁆𑀢𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀯𑀻𑀭𑀺𑀬𑀁 𑀧𑀦 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀧𑀝𑀺𑀧𑀓𑁆𑀔𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺. 𑀅𑀣 𑀔𑁄 𑀢𑀸𑀲𑀁 𑀲𑀳𑀸𑀬𑁄𑀧𑀺 𑀳𑁄𑀢𑀺, 𑀥𑀼𑀭𑀪𑀽𑀢𑀜𑁆𑀘. 𑀧𑀕𑁆𑀕𑀳𑀮𑀓𑁆𑀔𑀡𑀜𑁆𑀳𑀺 𑀯𑀻𑀭𑀺𑀬𑀁. 𑀢𑀁 𑀲𑀤𑁆𑀥𑀁𑀧𑀺 𑀧𑀕𑁆𑀕𑀡𑁆𑀳𑀸𑀢𑀺, 𑀧𑀜𑁆𑀜𑀁𑀧𑀺 𑀧𑀕𑁆𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀺𑀁𑀧𑀺 𑀧𑀕𑁆𑀕𑀡𑁆𑀳𑀸𑀢𑀺, 𑀯𑀺𑀘𑀺𑀓𑀺𑀘𑁆𑀙𑀫𑁆𑀧𑀺 𑀧𑀕𑁆𑀕𑀡𑁆𑀳𑀸𑀢𑀺𑀬𑁂𑀯. 𑀓𑀼𑀢𑁄𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀬𑁄 𑀧𑀚𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀻𑀭𑀺𑀬𑀯𑀸𑀳𑀻𑀢𑀺 𑀘 𑀯𑀻𑀭𑀺𑀬𑀥𑀼𑀭𑁄𑀢𑀺 𑀘 𑀦 𑀯𑀼𑀢𑁆𑀢𑁄𑀢𑀺. 𑀓𑀸𑀬𑀲𑀓𑁆𑀔𑀺𑀫𑁆𑀳𑀺 𑀧𑀦 𑀲𑀤𑁆𑀥𑀸 𑀘 𑀧𑀜𑁆𑀜𑀸 𑀘 𑀲𑀫𑀩𑀮𑀸 𑀳𑁄𑀦𑁆𑀢𑀺. 𑀯𑀻𑀭𑀺𑀬𑀜𑁆𑀘 𑀲𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀢𑀤𑀼𑀪𑀬𑀁 𑀉𑀧𑀩𑁆𑀭𑀽𑀳𑁂𑀢𑀺. 𑀲𑁄 𑀘 𑀧𑀼𑀕𑁆𑀕𑀮𑁄 𑀢𑀤𑀼𑀪𑀬𑀩𑀮𑁂𑀦 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀬𑁄 𑀧𑀚𑀳𑀺𑀢𑁆𑀯𑀸 𑀓𑀸𑀬𑀲𑀓𑁆𑀔𑀺𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀅𑀝𑁆𑀞𑀯𑀺𑀫𑁄𑀓𑁆𑀔𑁂 𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀪𑀢𑁄𑀪𑀸𑀕 𑀯𑀺𑀫𑀼𑀢𑁆𑀢𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀼𑀕𑁆𑀕𑀮𑁂𑀲𑀼 𑀯𑀻𑀭𑀺𑀬𑀲𑁆𑀲 𑀣𑀸𑀫𑁄 𑀲𑀼𑀝𑁆𑀞𑀼 𑀧𑀸𑀓𑀝𑁄. 𑀢𑀲𑁆𑀫𑀸 𑀇𑀫𑁂 𑀤𑁆𑀯𑁂 𑀯𑀻𑀭𑀺𑀬𑀸𑀥𑀺𑀓𑀸𑀢𑁆𑀯𑁂𑀯 𑀯𑀢𑁆𑀢𑀩𑁆𑀩𑀸. 𑀦 𑀯𑀻𑀭𑀺𑀬𑀥𑀼𑀭𑁄𑀢𑀺. 𑀘𑀢𑀼𑀧𑁆𑀧𑀝𑀺𑀧𑀤𑀸 𑀦𑀸𑀫 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸. 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸. 𑀲𑀼𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸. 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸. 𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑁄 𑀦𑀸𑀫 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. ‘‘𑀢𑀬𑁄 𑀅𑀦𑁆𑀢𑀭𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄’’𑀢𑀺 𑀏𑀢𑁆𑀣 𑀆𑀬𑀼𑀓𑀧𑁆𑀧𑀲𑁆𑀲 𑀧𑀭𑀺𑀬𑀦𑁆𑀢𑀁 𑀅𑀧𑀢𑁆𑀯𑀸 𑀅𑀦𑁆𑀢𑀭𑀸 𑀏𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀧𑀢𑁆𑀢𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫. 𑀲𑁄 𑀢𑀺𑀯𑀺𑀥𑁄. 𑀆𑀬𑀼𑀓𑀧𑁆𑀧𑀲𑁆𑀲 𑀧𑀣𑀫𑀪𑀸𑀕𑁂 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀤𑀼𑀢𑀻𑀬𑀪𑀸𑀕𑁂, 𑀢𑀢𑀻𑀬𑀪𑀸𑀕𑁂𑀢𑀺. 𑀇𑀫𑁂 𑀢𑀬𑁄 𑀅𑀦𑁆𑀢𑀭𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀦𑀸𑀫. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫 𑀆𑀬𑀼𑀓𑀧𑁆𑀧 𑀧𑀭𑀺𑀬𑀦𑁆𑀢𑁂 𑀧𑀭𑀺𑀦𑀺𑀩𑁆𑀩𑀸𑀬𑀻. 𑀉𑀤𑁆𑀥𑀁 𑀫𑀼𑀔𑁄 𑀯𑀝𑁆𑀝𑀲𑁄𑀢𑁄 𑀏𑀢𑀲𑁆𑀲𑀸𑀢𑀺 𑀉𑀤𑁆𑀥𑀁𑀲𑁄𑀢𑁄. 𑀅𑀓𑀦𑀺𑀝𑁆𑀞𑀁 𑀅𑀯𑀲𑁆𑀲𑀁 𑀕𑀫𑀺𑀲𑁆𑀲𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁 𑀲𑀲𑀗𑁆𑀔𑀸𑀭𑀁 𑀲𑀧𑁆𑀧𑀬𑁄𑀕𑀁 𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻 𑀲𑀲𑀗𑁆𑀔𑀸𑀭 𑀧𑀭𑀺𑀦𑀺𑀩𑁆𑀩𑀸𑀬𑀻. 𑀲𑀗𑁆𑀔𑀸𑀭𑀭𑀳𑀺𑀢𑁂𑀦 𑀲𑀼𑀔𑁂𑀦 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀲𑀗𑁆𑀔𑀸𑀭 𑀧𑀭𑀺𑀦𑀺𑀩𑁆𑀩𑀸𑀬𑀻. ‘‘𑀤𑁆𑀯𑀸𑀤𑀲 𑀲𑁄𑀢𑀸𑀧𑀦𑁆𑀦𑀸’’𑀢𑀺 𑀏𑀓𑀩𑀻𑀚𑀺𑀓𑀸 𑀢𑀬𑁄. 𑀢𑁂 𑀏𑀯 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺 𑀕𑀼𑀡𑀺𑀢𑀸 𑀤𑁆𑀯𑀸𑀤𑀲. 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀺𑀦𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸 𑀏𑀯.

𑀏𑀓𑀘𑁆𑀘𑀸𑀦𑀁 𑀏𑀯 𑀅𑀦𑀸𑀕𑀸𑀫𑀺 𑀅𑀭𑀳𑀦𑁆𑀢𑀸𑀦𑀁 𑀏𑀯. ‘‘𑀅𑀚𑁆𑀛𑁄𑀲𑀺𑀢𑀲𑁆𑀲𑀸’’𑀢𑀺 𑀅𑀥𑀺𑀑𑀲𑀺𑀢𑀲𑁆𑀲. 𑀫𑀫𑁂𑀯𑀺𑀤𑀦𑁆𑀢𑀺 𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀞𑀧𑀺𑀢𑀲𑁆𑀲. 𑀕𑀺𑀮𑀺𑀢𑁆𑀯𑀸 𑀞𑀧𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀳𑀮𑁂𑀦 𑀣𑀽𑀮𑁂𑀦 𑀓𑀸𑀫𑀭𑀸𑀕𑁂𑀦 𑀯𑀺𑀫𑀼𑀢𑁆𑀢𑀸 𑀩𑀳𑀮𑀭𑀸𑀕𑀯𑀺𑀫𑀼𑀢𑁆𑀢𑀸. 𑀆𑀭𑀼𑀧𑁆𑀧𑁂𑀲𑀼 𑀘 𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀏𑀯 𑀅𑀢𑁆𑀣𑀺. 𑀦 𑀘𑀢𑀲𑁆𑀲𑁄 𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄. 𑀢𑀲𑁆𑀫𑀸 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑁄 𑀦 𑀮𑀩𑁆𑀪𑀢𑀺. ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀧𑀣𑀫𑀚𑁆𑀛𑀸𑀦 𑀲𑀫𑀸𑀧𑀢𑁆𑀢𑀺𑀆𑀤𑀺. 𑀢𑀢𑁄 𑀧𑀝𑁆𑀞𑀸𑀬. 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑁄 𑀦𑀸𑀫 𑀧𑀣𑀫𑀚𑁆𑀛𑀸𑀦𑁂 𑀧𑀝𑀺𑀖𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀦𑀺𑀭𑁄𑀥𑁄. 𑀧𑀝𑀺𑀖𑀲𑀜𑁆𑀜𑀸 𑀦𑀸𑀫 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀜𑁆𑀜𑀸. 𑀦𑀸𑀦𑀢𑁆𑀢𑀲𑀜𑁆𑀜𑀸 𑀦𑀸𑀫 𑀓𑀲𑀺𑀡 𑀦𑀺𑀫𑀺𑀢𑁆𑀢𑀢𑁄 𑀅𑀜𑁆𑀜𑁂𑀲𑀼 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀫𑀦𑁄𑀯𑀺𑀜𑁆𑀜𑀸𑀡 𑀲𑀜𑁆𑀜𑀸. 𑀤𑀼𑀢𑀻𑀬𑀚𑁆𑀛𑀸𑀦𑁂 𑀯𑀺𑀢𑀓𑁆𑀓 𑀯𑀺𑀘𑀸𑀭𑀸𑀦𑀁 𑀦𑀺𑀭𑁄𑀥𑁄𑀢𑀺𑀆𑀤𑀺𑀦𑀸 𑀅𑀦𑀼𑀧𑀼𑀩𑁆𑀩 𑀦𑀺𑀭𑁄𑀥𑁄. ‘‘𑀢𑀢𑁄 𑀧𑀜𑁆𑀘𑀫𑀚𑁆𑀛𑀸𑀦𑀁’’𑀢𑀺 𑀧𑀜𑁆𑀘𑀓𑀦𑀬𑁂𑀦 𑀯𑀼𑀢𑁆𑀢𑀁. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺 𑀯𑀘𑀦𑀁 𑀧𑀦 𑀘𑀢𑀼𑀓𑁆𑀓𑀦𑀬𑁂𑀦 𑀯𑀼𑀢𑁆𑀢𑀁. 𑀢𑀤𑀼𑀪𑀬𑀁𑀧𑀺 𑀧𑀼𑀕𑁆𑀕𑀮𑀸𑀦𑀼𑀭𑀽𑀧𑀁 𑀮𑀩𑁆𑀪𑀢𑀺𑀬𑁂𑀯. 𑀬𑀼𑀕𑀦𑀦𑁆𑀥𑀁 𑀦𑀸𑀫 𑀤𑁆𑀯𑀦𑁆𑀤𑀩𑀦𑁆𑀥𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀬𑀼𑀕𑀦𑀦𑁆𑀥𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀲𑀫𑀸𑀧𑀚𑁆𑀚𑀦 𑀯𑀼𑀝𑁆𑀞𑀸𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀯𑀲𑀺𑀪𑀸𑀯𑀧𑀢𑁆𑀢𑀁 𑀲𑀫𑀸𑀧𑀚𑁆𑀚𑀦𑀜𑁆𑀘 𑀯𑀼𑀝𑁆𑀞𑀸𑀦𑀜𑁆𑀘 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀭𑀻𑀭𑀸 𑀩𑀤𑁆𑀥𑁂𑀲𑀼 𑀧𑀭𑀺𑀓𑁆𑀔𑀸𑀭𑁂𑀲𑀼 𑀲𑀫𑀸𑀧𑀢𑁆𑀢𑀺𑀩𑀮𑁂𑀦𑁂𑀯 𑀅𑀦𑁆𑀢𑀭𑀸𑀬𑀸𑀪𑀸𑀯𑀢𑁄 𑀯𑀺𑀲𑀼𑀁 𑀅𑀥𑀺𑀝𑁆𑀞𑀸𑀢𑀩𑁆𑀩 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀲𑀭𑀻𑀭𑀸𑀩𑀤𑁆𑀥𑁂 𑀧𑀭𑀺𑀓𑁆𑀔𑀸𑀭𑁂 𑀞𑀧𑁂𑀢𑁆𑀯𑀸’’𑀢𑀺. ‘‘𑀦𑀸𑀦𑀸𑀩𑀤𑁆𑀥𑀸𑀦𑀻’’𑀢𑀺 𑀦𑀸𑀦𑀸𑀞𑀸𑀦𑁂𑀳𑀺 𑀆𑀩𑀤𑁆𑀥𑀸𑀦𑀺. 𑀦𑀸𑀦𑀸𑀞𑀸𑀦𑁂𑀲𑀼 𑀞𑀧𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀭𑀺𑀲𑁆𑀲𑀬𑁂𑀦𑀸’’𑀢𑀺 𑀅𑀦𑁆𑀢𑀭𑀸𑀬𑁂𑀦. 𑀫𑀸𑀯𑀺𑀦𑀲𑁆𑀲𑀦𑁆𑀢𑀽𑀢𑀺 𑀯𑀸 𑀦𑀸𑀦𑀸𑀩𑀤𑁆𑀥 𑀅𑀯𑀺𑀓𑁄𑀧𑀦𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀤𑀸 𑀯𑀼𑀝𑁆𑀞𑀳𑀸𑀫𑀻𑀢𑀺𑀯𑀸 𑀲𑀗𑁆𑀖𑀧𑁆𑀧𑀢𑀺𑀫𑀸𑀦𑀦𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀏𑀯𑀁 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁𑀧𑀺. ‘‘𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀓𑀸𑀮𑀲𑁆𑀲 𑀉𑀧𑀧𑀭𑀺𑀓𑁆𑀔𑀡𑀁. 𑀫𑀭𑀡𑀜𑁆𑀳𑀺 𑀦𑀸𑀫 𑀲𑀫𑀸𑀧𑀢𑁆𑀢𑀺𑀩𑀮𑁂𑀦𑀧𑀺 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀓𑀸𑀳𑁄𑀢𑀺. 𑀅𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀬𑀜𑁆𑀘 𑀫𑀭𑀡𑁂 𑀲𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀦 𑀓𑀭𑁂𑀬𑁆𑀬. 𑀏𑀢𑀜𑁆𑀳𑀺 𑀯𑀢𑁆𑀢𑀁 𑀬𑀁 𑀅𑀭𑀺𑀬𑀲𑀸𑀯𑀓𑀸𑀦𑀁 𑀫𑀭𑀡𑀸𑀲𑀦𑁆𑀦𑁂 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀯𑀸 𑀉𑀧𑀝𑁆𑀞𑀸𑀓𑀸𑀦𑀁 𑀯𑀸 𑀅𑀧𑁆𑀧𑀫𑀸𑀤𑀓𑀣𑀸𑀦𑀼 𑀲𑀸𑀲𑀦𑀺𑀓𑀫𑁆𑀫𑀁. 𑀲𑀫𑀸𑀧𑀢𑁆𑀢𑀺𑀬𑀁 𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀕𑀭𑀳𑀸 𑀯𑀺𑀯𑀚𑁆𑀚𑀦𑀢𑁆𑀣𑀁. 𑀏𑀯𑀜𑁆𑀳𑀺 𑀢𑁂 𑀕𑀭𑀳𑁂𑀬𑁆𑀬𑀼𑀁. 𑀕𑁄𑀢𑀫𑀲𑀸𑀯𑀓𑀸𑀦𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀸𑀫 𑀏𑀓𑀁 𑀫𑀭𑀡𑀫𑀼𑀔𑀁. 𑀬𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀫𑀭𑀡𑀁 𑀕𑀘𑁆𑀙𑀢𑀺. 𑀅𑀦𑀭𑀺𑀬 𑀓𑀫𑁆𑀫𑀁 𑀳𑁂𑀢𑀦𑁆𑀢𑀺.

‘‘𑀬𑀤𑀢𑁆𑀣𑀁’’𑀢𑀺 𑀧𑀝𑀺𑀧𑀢𑁆𑀢𑀺 𑀭𑀲𑀲𑁆𑀲𑀸𑀤𑀢𑁆𑀣𑀁. ‘‘𑀢𑀤𑀢𑁆𑀣𑁂’’𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀦𑀺𑀭𑀸𑀫𑀺𑀲 𑀲𑀼𑀔𑀁 𑀦𑀸𑀫 𑀆𑀫𑀺𑀲𑀭𑀳𑀺𑀢 𑀲𑀼𑀔𑀁. 𑀤𑀼𑀯𑀺𑀥𑀜𑁆𑀳𑀺 𑀲𑀼𑀔𑀁 𑀲𑀸𑀫𑀺𑀲𑀲𑀼𑀔𑀜𑁆𑀘 𑀦𑀺𑀭𑀸𑀫𑀺𑀲𑀲𑀼𑀔𑀜𑁆𑀘. 𑀢𑀢𑁆𑀣 𑀬𑁂 𑀮𑁄𑀓𑁂 𑀇𑀝𑁆𑀞 𑀓𑀦𑁆𑀢 𑀫𑀦𑀸𑀧𑀺𑀬𑀸 𑀧𑀜𑁆𑀘𑀓𑀸𑀫𑀕𑀼𑀡𑀸 𑀦𑀸𑀫 𑀅𑀢𑁆𑀣𑀺. 𑀢𑁂 𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁆𑀢𑀸 𑀆𑀫𑀺𑀲𑀸 𑀦𑀸𑀫. 𑀬𑀜𑁆𑀘𑀲𑀼𑀔𑀁 𑀢𑁂 𑀆𑀫𑀺𑀲𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀸𑀫𑀺𑀲𑀲𑀼𑀔𑀁 𑀦𑀸𑀫. 𑀬𑀁 𑀮𑁄𑀓𑁂 𑀤𑀺𑀩𑁆𑀩𑀁 𑀲𑀼𑀔𑀁 𑀫𑀸𑀦𑀼𑀲𑀓𑀁 𑀲𑀼𑀔𑀦𑁆𑀢𑀺 𑀫𑀫𑀸𑀬𑀦𑁆𑀢𑀺. 𑀬𑀜𑁆𑀘 𑀅𑀦𑀼𑀪𑀯𑀦𑁆𑀢𑀁 𑀫𑀳𑀸𑀚𑀦𑀁 𑀲𑀩𑁆𑀩𑀸𑀦𑀺 𑀅𑀧𑀸𑀬𑀪𑀬 𑀯𑀝𑁆𑀝𑀪𑀬𑀸𑀦𑀺 𑀲𑀫𑁆𑀧𑀭𑀺𑀯𑀸𑀭𑁂𑀦𑁆𑀢𑀺. 𑀛𑀸𑀦𑀲𑀼𑀔 𑀫𑀕𑁆𑀕𑀲𑀼𑀔 𑀨𑀮𑀲𑀼𑀔 𑀦𑀺𑀩𑁆𑀩𑀸𑀦𑀲𑀼𑀔𑀁 𑀧𑀦 𑀦𑀺𑀭𑀸𑀫𑀺𑀲𑀲𑀼𑀔𑀁 𑀦𑀸𑀫. 𑀬𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀦𑁆𑀢𑀺 𑀘 𑀧𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀘 𑀉𑀧𑀲𑀫𑀲𑀼𑀔𑀦𑁆𑀢𑀺 𑀘 𑀲𑀫𑁆𑀩𑁄𑀥𑀺𑀲𑀼𑀔𑀦𑁆𑀢𑀺 𑀘 𑀯𑀺𑀫𑀼𑀢𑁆𑀢𑀺𑀲𑀼𑀔𑀦𑁆𑀢𑀺 𑀘 𑀅𑀭𑀺𑀬𑀲𑀼𑀔𑀦𑁆𑀢𑀺 𑀘 𑀅𑀦𑀯𑀚𑁆𑀚𑀲𑀼𑀔𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀅𑀦𑀼𑀪𑀯𑀦𑁆𑀢𑀁 𑀅𑀭𑀺𑀬𑀚𑀦𑀁 𑀲𑀩𑁆𑀩𑀸𑀦𑀺 𑀅𑀧𑀸𑀬𑀪𑀬 𑀯𑀝𑁆𑀝𑀪𑀬𑀸𑀦𑀺 𑀲𑀫𑁆𑀧𑀭𑀺𑀯𑀚𑁆𑀚𑀦𑁆𑀢𑀺. ‘‘𑀅𑀲𑁆𑀲𑀸𑀤𑀺𑀢𑀩𑁆𑀩𑀝𑁆𑀞𑁂𑀦𑀸’’𑀢𑀺 𑀓𑀺𑀮𑁂𑀲𑀧𑀮𑀺𑀩𑁄𑀥𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀧𑀼𑀮 𑀕𑀫𑁆𑀪𑀻𑀭 𑀲𑀦𑁆𑀢 𑀧𑀡𑀻𑀢𑀭𑀲𑀢𑁆𑀢𑀸 𑀘 𑀅𑀳𑁄𑀲𑀼𑀔𑀁 𑀅𑀳𑁄𑀲𑀼𑀔𑀦𑁆𑀢𑀺 𑀉𑀤𑀸𑀳𑀭𑀦𑁆𑀢𑁂𑀦𑀧𑀺 𑀅𑀲𑁆𑀲𑀸𑀤𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺.

𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀕𑀸𑀣𑀸𑀲𑀼.

𑁨𑁬𑁨. 𑀘𑀭𑀺𑀢𑀩𑁆𑀩𑀦𑁆𑀢𑀺 𑀘𑀸𑀭𑀺𑀢𑁆𑀢𑀁. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀚𑀸𑀢𑀁. ‘‘𑀓𑀼𑀮𑀸𑀘𑀸𑀭𑁂𑀦𑀸’’𑀢𑀺 𑀓𑀼𑀮𑀧𑀭𑀫𑁆𑀧𑀭𑀢𑁄 𑀆𑀕𑀢𑁂𑀦 𑀆𑀘𑀸𑀭𑁂𑀦. ‘‘𑀜𑀸𑀢𑀺 𑀫𑀺𑀢𑁆𑀢 𑀥𑀦 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁. ‘‘𑀯𑀺𑀲𑀸𑀮𑁂’’𑀢𑀺 𑀯𑀺𑀧𑀼𑀮𑁂. ‘‘𑀢𑁂𑀦𑀸’’𑀢𑀺 𑀢𑀲𑁆𑀲𑀧𑀤𑀲𑁆𑀲 𑀯𑀺𑀪𑀢𑁆𑀬𑀦𑁆𑀢 𑀤𑀲𑁆𑀲𑀦𑀁. ‘‘𑀲𑀤𑁆𑀥𑀸𑀬𑀸’’𑀢𑀺 𑀭𑀢𑀦𑀢𑁆𑀢𑀬𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀤𑁆𑀥𑀸𑀯𑀲𑁂𑀦. ‘‘𑀅𑀪𑀺𑀯𑀼𑀟𑁆𑀠𑀸𑀦𑀁’’𑀢𑀺 𑀳𑀸𑀦𑀪𑀸𑀕𑀺𑀬 𑀞𑀺𑀢𑀺𑀪𑀸𑀕𑀺𑀬𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫𑀯𑀺𑀲𑁂𑀲𑀪𑀸𑀕𑀺𑀬 𑀦𑀺𑀩𑁆𑀩𑁂𑀥𑀪𑀸𑀕𑀺𑀬 𑀪𑀸𑀯𑀧𑀢𑁆𑀢𑀺𑀯𑀲𑁂𑀦 𑀅𑀢𑀺𑀲𑁆𑀲𑀬 𑀯𑀼𑀟𑁆𑀠𑀸𑀦𑀁. ‘‘𑀧𑀭𑀺𑀲𑀼𑀤𑁆𑀥𑀸𑀦𑀜𑁆𑀘𑀸’’𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦 𑀧𑀭𑀯𑀫𑁆𑀪𑀦𑀸𑀤𑀺 𑀤𑁄𑀲𑁂𑀳𑀺 𑀧𑀭𑀺𑀲𑀼𑀤𑁆𑀥𑀸𑀦𑀜𑁆𑀘. 𑀦𑀁 𑀦𑀁 𑀚𑀦𑀁 𑀧𑀸𑀢𑀺𑀭𑀓𑁆𑀔𑀢𑀻𑀢𑀺 𑀦𑀫𑁆𑀧𑁄. 𑀤𑀺𑀝𑁆𑀞𑀤𑀺𑀝𑁆𑀞𑁂𑀲𑀼 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀯𑁆𑀳𑀸𑀢𑀩𑁆𑀩𑁄𑀢𑀺 𑀅𑀯𑁆𑀳𑀬𑁄. 𑀦𑀸𑀫𑀁. 𑀦𑀫𑁆𑀧𑁄 𑀇𑀢𑀺 𑀅𑀯𑁆𑀳𑀬𑁄 𑀅𑀲𑁆𑀲𑀸𑀢𑀺 𑀦𑀫𑁆𑀧𑀯𑁆𑀳𑀬𑁄𑀢𑀺 𑀯𑀘𑀦𑀢𑁆𑀣𑁄. ‘‘𑀧𑀡𑀺𑀥𑀸𑀬𑀸’’𑀢𑀺 𑀧𑀢𑁆𑀣𑁂𑀢𑁆𑀯𑀸𑀢𑀺 𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺 ‘‘𑀪𑀼𑀲𑀁 𑀦𑀺𑀥𑀸𑀬𑀸’’𑀢𑀺𑀆𑀤𑀺𑀦𑀸. ‘‘𑀉𑀧𑀸𑀤𑀸𑀬 𑀧𑀝𑀺𑀘𑁆𑀘𑀸’’𑀢𑀺 𑀢𑀲𑁆𑀲 𑀧𑀤𑀲𑁆𑀲 𑀧𑀭𑀺𑀬𑀸𑀬𑀤𑀲𑁆𑀲𑀦𑀫𑁂𑀢𑀁. ‘‘𑀅𑀢𑁆𑀢𑀦𑁄 𑀫𑀦𑁆𑀤𑀩𑀼𑀤𑁆𑀥𑀻𑀦𑀁’’𑀢𑀺 𑀧𑀘𑁆𑀘𑀓𑁆𑀔𑁂 𑀥𑀭𑀫𑀸𑀦𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀧𑀘𑁆𑀙𑀺𑀫 𑀚𑀦𑀸𑀦𑀁 𑀯𑀸’’𑀢𑀺. 𑀅𑀦𑀼𑀓𑀫𑁆𑀧𑀦𑀁 𑀅𑀦𑀼𑀓𑀫𑁆𑀧𑁄. 𑀓𑀣𑀁 𑀦𑀼 𑀔𑁄 𑀇𑀫𑁂 𑀚𑀦𑀸 𑀅𑀪𑀺𑀥𑀫𑁆𑀫𑀢𑁆𑀣𑁂𑀲𑀼 𑀲𑀼𑀔𑁂𑀦 𑀆𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀘𑀺𑀢𑁆𑀢𑀩𑁆𑀬𑀸𑀧𑀸𑀭𑁄. 𑀅𑀢𑁆𑀣𑀢𑁄 𑀅𑀦𑀼𑀤𑀬𑀲𑀗𑁆𑀔𑀸𑀢𑀸 𑀓𑀭𑀼𑀡𑀸𑀬𑁂𑀯. 𑀢𑁂𑀦𑀸𑀳 ‘‘𑀅𑀦𑀼𑀤𑀬𑀁 𑀓𑀸𑀭𑀼𑀜𑁆𑀜𑀁’’𑀢𑀺. ‘‘𑀧𑀢𑁆𑀣𑀺𑀢𑀁’’𑀢𑀺 𑀯𑀸 𑀲𑀸𑀥𑀼𑀯𑀢𑀲𑁆𑀲 𑀬𑀁 𑀣𑁂𑀭𑁄 𑀏𑀯𑀭𑀽𑀧𑀁 𑀧𑀓𑀭𑀡𑀁 𑀓𑀭𑁂𑀬𑁆𑀬𑀸𑀢𑀺 𑀏𑀯𑀁 𑀘𑀺𑀭𑀓𑀸𑀮𑀁 𑀧𑀢𑁆𑀣𑀺𑀢𑀁 𑀆𑀲𑀺𑀁𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀔𑀼𑀤𑁆𑀤𑀲𑀺𑀓𑁆𑀔𑀸𑀝𑀻𑀓𑀸𑀬𑀁’’𑀢𑀺 𑀧𑁄𑀭𑀸𑀡𑀝𑀻𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄𑀫𑀯𑀺𑀳𑀸𑀭𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣 𑀢𑀲𑁆𑀫𑀺𑀁 𑀤𑀻𑀧𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀸𑀣𑀸𑀬𑀁 ‘‘𑀅𑀣𑀸’’𑀢𑀺 𑀢𑀲𑁆𑀫𑀺𑀁𑀓𑀸𑀮𑁂. ‘‘𑀏𑀢𑁆𑀣𑀸’’𑀢𑀺 𑀏𑀢𑀲𑁆𑀫𑀺𑀁 𑀦𑀕𑀭𑁂. ‘‘𑀲𑀤𑁆𑀤𑁄’’𑀢𑀺 𑀓𑀲𑁆𑀫𑀸 𑀭𑀸𑀚𑀸 𑀏𑀯𑀭𑀽𑀧𑀁 𑀫𑀗𑁆𑀕𑀮𑀳𑀢𑁆𑀣𑀺𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀸𑀲𑀺. 𑀦𑁂𑀢𑀁 𑀧𑀢𑀺𑀭𑀽𑀧𑀁 𑀬𑀁 𑀭𑀜𑁆𑀜𑀸 𑀓𑀢𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀅𑀫𑀦𑀸𑀧𑀲𑀤𑁆𑀤𑁄. ‘‘𑀪𑁂𑀭𑀯𑁄’’𑀢𑀺 𑀪𑀻𑀭𑀼𑀢𑀸𑀚𑀦𑀓𑁄 𑀪𑀬𑀸𑀦𑀓𑁄. ‘‘𑀲𑀺𑀯𑀻𑀦𑀁’’𑀢𑀺 𑀲𑀺𑀯𑀺𑀭𑀝𑁆𑀞𑀯𑀸𑀲𑀻𑀦𑀁. ‘‘𑀭𑀝𑁆𑀞𑀯𑀟𑁆𑀠𑀦𑁂’’𑀢𑀺 𑀭𑀝𑁆𑀞𑀁 𑀯𑀟𑁆𑀠𑁂𑀢𑀻𑀢𑀺 𑀭𑀝𑁆𑀞𑀯𑀟𑁆𑀠𑀦𑁄. 𑀳𑀢𑁆𑀣𑀺𑀦𑀸𑀕𑁄. 𑀲𑁄 𑀳𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀆𑀚𑀸𑀦𑀺𑀬𑁄 𑀳𑁄𑀢𑀺. 𑀬𑀲𑁆𑀫𑀺𑀁 𑀭𑀝𑁆𑀞𑁂 𑀢𑀁 𑀅𑀪𑀺𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀤𑁂𑀯𑁄 𑀲𑀫𑁆𑀫𑀸 𑀯𑀲𑁆𑀲𑀢𑀺, 𑀦𑀸𑀦𑀸𑀪𑀬𑀼𑀧𑀤𑁆𑀤𑀯𑀸 𑀢𑀲𑁆𑀫𑀺𑀁 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀮𑁄𑀓𑀲𑀫𑁆𑀫𑀢𑁄 𑀫𑀗𑁆𑀕𑀮𑀳𑀢𑁆𑀣𑀻 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁂’’𑀢𑀺. ‘‘𑀯𑀺𑀢𑁆𑀣𑀺𑀡𑁆𑀡𑁄’’𑀢𑀺 𑀯𑀺𑀢𑁆𑀣𑀸𑀭𑀺𑀢𑁄. 𑀅𑀢𑀺𑀯𑀺𑀢𑁆𑀣𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀦𑀻𑀬𑀦𑁆𑀢𑀺 𑀫𑀳𑀸𑀚𑀦𑁂𑀳𑀺 𑀤𑀝𑁆𑀞𑀼𑀁 𑀧𑀢𑁆𑀣𑀻𑀬𑀦𑁆𑀢𑀻𑀢𑀺 𑀥𑀜𑁆𑀜𑀸. 𑀫𑀳𑀺𑀤𑁆𑀥𑀺𑀓𑀸. 𑀅𑀥𑀺𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀯𑀸𑀲𑁄. 𑀥𑀜𑁆𑀜𑀸𑀦𑀁 𑀅𑀥𑀺𑀯𑀸𑀲𑁄𑀢𑀺 𑀲𑀫𑀸𑀲𑁄. 𑀅𑀚𑁆𑀛𑀸𑀯𑀲𑀺𑀁𑀲𑀼 𑀏𑀢𑁆𑀣𑀸𑀢𑀺 𑀅𑀚𑁆𑀛𑀸𑀯𑀼𑀢𑁆𑀣𑀁. 𑀓𑀺𑀢𑁆𑀢𑀺𑀕𑀼𑀡𑀯𑀲𑁂𑀦 𑀉𑀤𑁂𑀦𑁆𑀢𑀺 𑀉𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀉𑀤𑀺𑀢𑀸. 𑀉𑀤𑀺𑀢𑀸𑀦𑀁𑀧𑀺 𑀉𑀤𑀺𑀢𑁄𑀢𑀺 𑀯𑀺𑀕𑁆𑀕𑀳𑁄. 𑀢𑁂𑀦𑀸𑀳 ‘‘𑀦𑀪𑀫𑀚𑁆𑀛𑁂’’𑀢𑀺𑀆𑀤𑀺𑀁. 𑀲𑀸𑀭𑀚𑁆𑀚𑀦𑀁 𑀲𑀸𑀭𑀤𑁄. 𑀯𑀺𑀕𑀢𑁄 𑀲𑀸𑀭𑀤𑁄 𑀬𑀲𑁆𑀲𑀸𑀢𑀺 𑀯𑀺𑀲𑀸𑀭𑀤𑁄. 𑀯𑀺𑀲𑀸𑀭𑀤𑀲𑁆𑀲 𑀪𑀸𑀯𑁄 𑀯𑁂𑀲𑀸𑀭𑀚𑁆𑀚𑀁. 𑀧𑀭𑀺𑀬𑀢𑁆𑀢𑀺𑀬𑀁 𑀯𑁂𑀲𑀸𑀭𑀚𑁆𑀚𑀁 𑀧𑀭𑀺𑀬𑀢𑁆𑀢𑀺𑀯𑁂𑀲𑀸𑀭𑀚𑁆𑀚𑀁. 𑀢𑁂𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀬𑀁 𑀯𑁂𑀬𑁆𑀬𑀢𑁆𑀢𑀺𑀬𑀜𑁆𑀜𑀸𑀡𑀁. 𑀢𑀁 𑀆𑀤𑀺 𑀏𑀢𑀺𑀲𑁆𑀲𑀸 𑀧𑀜𑁆𑀜𑀸𑀬𑀸𑀢𑀺 𑀧𑀭𑀺𑀬𑀢𑁆𑀢𑀺𑀯𑁂𑀲𑀸𑀭𑀚𑁆𑀚𑀸𑀤𑀺 𑀧𑀜𑁆𑀜𑀸. 𑀧𑀸𑀧𑀢𑁄 𑀮𑀚𑁆𑀚𑀦𑀲𑀻𑀮𑀸𑀢𑀺 𑀮𑀚𑁆𑀚𑀺𑀦𑁄𑀢𑀺 𑀆𑀳 ‘‘𑀧𑀸𑀧𑀕𑀭𑀳𑀺𑀦𑁄’’𑀢𑀺. 𑀧𑀸𑀧𑀁 𑀥𑀫𑁆𑀫𑀁 𑀕𑀭𑀳𑀦𑁆𑀢𑀺𑀆𑀤𑀻𑀦𑀯𑀁 𑀓𑀣𑀬𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀧𑀸𑀧𑀕𑀭𑀳𑀺𑀦𑁄. ‘‘𑀅𑀦𑀼𑀲𑁆𑀲𑀭𑀦𑁆𑀢𑀽’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀭𑀦𑁆𑀢𑀼. 𑀯𑀺𑀲𑁂𑀲𑁂𑀦 𑀪𑀯𑀦𑁆𑀢𑀺 𑀯𑁂𑀧𑀼𑀮𑁆𑀮𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀪𑀯𑀸. 𑀧𑀼𑀜𑁆𑀜𑀸𑀦𑀺 𑀘 𑀢𑀸𑀦𑀺 𑀯𑀺𑀪𑀯𑀸𑀘𑀸𑀢𑀺 𑀧𑀼𑀜𑁆𑀜𑀯𑀺𑀪𑀯𑀸. 𑀯𑀺𑀧𑀼𑀮𑀧𑀼𑀜𑁆𑀜𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀼𑀮𑀸𑀦𑀁’’𑀢𑀺𑀆𑀤𑀺𑀫𑀸𑀳. 𑀅𑀦𑀼𑀢𑁆𑀢𑀭𑀺𑀬 𑀥𑀫𑁆𑀫𑀸 𑀦𑀸𑀫 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀸𑀤𑀬𑁄. 𑀮𑁄𑀓𑁂 𑀩𑀳𑀽𑀲𑀼 𑀤𑀲𑁆𑀲𑀦𑁂𑀲𑀼 𑀇𑀢𑁄 𑀉𑀢𑁆𑀢𑀭𑀁 𑀅𑀜𑁆𑀜𑀁 𑀤𑀲𑁆𑀲𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁. 𑀭𑀢𑀦𑀢𑁆𑀢𑀬𑀤𑀲𑁆𑀲𑀦𑀁. 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀜𑁆𑀘. 𑀭𑀢𑀦𑀢𑁆𑀢𑀬𑀕𑀼𑀡𑀓𑀣𑀸𑀲𑀯𑀦𑀁, 𑀔𑀦𑁆𑀥𑀸𑀬𑀢𑀦 𑀥𑀸𑀢𑀼 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀲𑀯𑀦𑀜𑁆𑀘 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀢𑁂𑀲𑀼 𑀭𑀢𑀦𑀢𑁆𑀢𑀬𑀸𑀤𑀻𑀲𑀼 𑀲𑀤𑁆𑀥𑀸 𑀧𑀝𑀺𑀮𑀸𑀪𑁄 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀢𑁂𑀲𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑀁 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀭𑀢𑀦𑀢𑁆𑀢𑀬𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀯𑀸 𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀓𑀭𑀡𑁂𑀦 𑀯𑀸 𑀧𑀭𑀺𑀘𑀭𑀡𑀁 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑀸𑀲𑀼 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀫𑀸𑀤𑀸𑀬 𑀲𑀺𑀓𑁆𑀔𑀦𑀁 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀢𑀸𑀤𑀺𑀲𑁂 𑀧𑀜𑁆𑀜𑀸𑀯𑀤𑀸𑀢𑀕𑀼𑀡𑀲𑁄𑀪𑀸𑀤𑀺𑀓𑁂 𑀕𑀼𑀡𑁂 𑀅𑀯𑀲𑁆𑀲𑀁 𑀪𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀻𑀢𑀺 𑀢𑀸𑀤𑀺𑀲𑀕𑀼𑀡𑀪𑀸𑀕𑀺𑀦𑁄. ‘‘𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀪𑀯𑀺𑀢𑀼𑀁 𑀉𑀲𑁆𑀲𑀸𑀳𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑀻𑀧𑀦𑀺𑀬𑀸 𑀦𑀺𑀕𑀫𑀕𑀸𑀣𑀸𑀲𑀼.

‘‘𑀩𑀲𑁆𑀳𑁆𑀬𑀼𑀲𑀼𑀜𑁆𑀜𑀘𑀫𑁆𑀫𑁂𑀓𑀫𑁆𑀳𑀻’’𑀢𑀺 𑀏𑀢𑁆𑀣 ‘‘𑀩𑀲𑁆𑀳𑁆𑀬𑀽’’𑀢𑀺 𑀅𑀝𑁆𑀞𑀲𑀗𑁆𑀔𑁆𑀬𑀸𑀬 𑀲𑀗𑁆𑀓𑁂𑀢 𑀯𑀘𑀦𑀁. ‘‘𑀘𑀫𑁆𑀫𑀁’’𑀢𑀺 𑀤𑁆𑀯𑀺𑀲𑀗𑁆𑀔𑁆𑀬𑀸𑀬. 𑀏𑀓𑀜𑁆𑀘 𑀤𑀼𑀓𑀜𑁆𑀘 𑀲𑀼𑀜𑁆𑀜𑀜𑁆𑀘 𑀅𑀝𑁆𑀞𑀘𑀸𑀢𑀺 𑀕𑀡𑀦𑀓𑁆𑀓𑀫𑁄. 𑀲𑀳𑀲𑁆𑀲 𑀤𑁆𑀯𑀺𑀲𑀢 𑀅𑀝𑁆𑀞𑀲𑀗𑁆𑀔𑀸𑀢𑁂 𑀲𑀸𑀓𑁂𑀢𑀺 𑀅𑀢𑁆𑀣𑁄. 𑀏𑀲𑀦𑀬𑁄 𑀧𑀭𑀢𑁄 ‘‘𑀦𑀯𑀧𑀜𑁆𑀘 𑀘𑀫𑁆𑀫𑁂𑀓𑀫𑁆𑀳𑀻’’𑀢𑀺 𑀧𑀤𑁂𑀧𑀺. 𑀕𑀸𑀣𑀸𑀯𑀡𑁆𑀡𑀦𑀸𑀲𑀼. 𑀦𑀕𑀭𑀢𑀺 𑀦 𑀘𑀯𑀢𑀻𑀢𑀺 𑀦𑀕𑀭𑀁. 𑀣𑀸𑀯𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀭𑀜𑁆𑀚𑁂𑀢𑀻’’𑀢𑀺 𑀭𑀫𑁂𑀢𑀺. 𑀔𑁂𑀫𑀲𑀼𑀪𑀺𑀓𑁆𑀔𑀢𑀸𑀤𑀺𑀕𑀼𑀡𑁂𑀳𑀺 𑀅𑀦𑀸𑀕𑀢𑁂 𑀚𑀦𑁂 𑀕𑀫𑀸𑀧𑁂𑀢𑀺, 𑀆𑀕𑀢𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑁄𑀳𑀺𑀢𑀫𑀺𑀕𑀸 𑀦𑀸𑀫 𑀲𑀼𑀯𑀡𑁆𑀡𑀯𑀡𑁆𑀡𑀫𑀺𑀕𑀸. ‘‘𑀲𑀸𑀓𑁂’’𑀢𑀺 𑀲𑀸𑀓𑀦𑀸𑀫𑁂𑀦 𑀭𑀜𑁆𑀜𑀸 𑀧𑀼𑀦 𑀲𑀗𑁆𑀔𑀢𑀢𑁆𑀢𑀸 𑀇𑀫𑀁 𑀓𑀮𑀺𑀬𑀼𑀕𑀁 𑀲𑀸𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀏𑀢𑀭𑀳𑀺 𑀲𑀸𑀓𑁆𑀭𑀭𑀸𑀚𑀦𑁆𑀢𑀺𑀧𑀺 𑀯𑁄𑀳𑀭𑀦𑁆𑀢𑀺. 𑀲𑀸𑀓𑀭𑀸𑀚𑀸 𑀘 𑀦𑀸𑀫 𑀉𑀢𑁆𑀢𑀭𑀸𑀧𑀣𑁂𑀲𑀼 𑀏𑀓𑁄 𑀕𑀦𑁆𑀥𑀸𑀭𑀭𑀸𑀚𑀸. 𑀬𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀪𑀺𑀦𑁆𑀦𑀮𑀤𑁆𑀥𑀺𑀓𑀸 𑀯𑀚𑁆𑀚𑀻𑀪𑀺𑀓𑁆𑀔𑀽 𑀇𑀫𑀁 𑀥𑀫𑁆𑀫 𑀯𑀺𑀦𑀬𑀁 𑀫𑀳𑀸𑀲𑀗𑁆𑀖𑀻𑀓𑀁 𑀦𑀸𑀫 𑀲𑀗𑁆𑀕𑀳𑀁 𑀆𑀭𑁄𑀧𑁂𑀦𑁆𑀢𑀺. 𑀲𑁄 𑀘 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁄 𑀉𑀢𑁆𑀢𑀭𑀸𑀧𑀣𑁂𑀲𑀼 𑀯𑀢𑁆𑀢𑀢𑀺. 𑀯𑁂𑀲𑀸𑀮𑀺𑀬𑀁 𑀬𑀲𑀢𑁆𑀣𑁂𑀭 𑀲𑀗𑁆𑀕𑀳𑁄 𑀧𑀦 𑀤𑀓𑁆𑀔𑀺𑀡𑀸𑀧𑀣𑁂𑀲𑀽𑀢𑀺. 𑀘𑀢𑁆𑀢𑀸𑀭𑀺𑀬𑀼𑀕𑀸𑀦𑀺 𑀦𑀸𑀫 𑀮𑁄𑀓𑁂 𑀧𑀜𑁆𑀜𑀧𑁂𑀦𑁆𑀢𑀺 𑀲𑀢𑁆𑀬𑀬𑀼𑀕𑀁, 𑀤𑁆𑀯𑀸𑀧𑀭𑀬𑀼𑀕𑀁, 𑀢𑁂𑀢𑁆𑀭𑀬𑀼𑀕𑀁, 𑀓𑀮𑀺𑀬𑀼𑀕,𑀦𑁆𑀢𑀺. 𑀬𑀼𑀕𑀦𑁆𑀢𑀺 𑀘 𑀆𑀬𑀼𑀧𑀭𑀺𑀫𑀸𑀡𑀁 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺𑀧𑀦 𑀓𑀮𑀺𑀬𑀼𑀕𑀁 𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀓𑁂𑀢𑀺 𑀓𑀮𑀺𑀬𑀼𑀕𑁂’’𑀢𑀺. 𑀧𑀸𑀧𑀬𑀼𑀕𑁂𑀢𑀺 𑀅𑀢𑁆𑀣𑁄. ‘‘𑀮 𑀢𑀻’’𑀢𑀺 𑀲𑀸𑀮𑀺𑀓𑁆𑀔𑁂𑀢𑁆𑀢𑀸𑀦𑀁 𑀲𑁄𑀥𑀦𑀝𑁆𑀞𑀸𑀦𑀢𑁆𑀢𑀸 𑀏𑀯𑀁 𑀫𑁆𑀭𑀫𑁆𑀫𑀤𑁂𑀲𑀯𑁄𑀳𑀸𑀭𑁂𑀦 𑀮𑀤𑁆𑀥𑀦𑀸𑀫𑀁 𑀅𑀭𑀜𑁆𑀜𑀁. 𑀢𑀁 𑀧𑀦 𑀫𑀼𑀁𑀭𑁆𑀯𑀸𑀦𑀕𑀭𑀲𑁆𑀲 𑀏𑀲𑀦𑁆𑀦𑁂 𑀧𑀜𑁆𑀘𑀥𑀦𑀼𑀲𑀢𑀺𑀓𑁂 𑀧𑀤𑁂𑀲𑁂 𑀚𑀸𑀢𑀁. ‘‘𑀯𑀺𑀲𑁆𑀲𑀼𑀢𑁂’’𑀢𑀺 𑀯𑀺𑀲𑁂𑀲𑁂𑀦 𑀓𑀺𑀢𑁆𑀢𑀺𑀢𑁂. 𑀲𑀸𑀭𑀜𑁆𑀘 𑀅𑀲𑀸𑀭𑀜𑁆𑀘 𑀯𑀺𑀯𑁂𑀘𑁂𑀦𑁆𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀚𑀸𑀦𑀦𑁆𑀢𑀺𑀲𑀻𑀮𑁂𑀦𑀸𑀢𑀺 𑀲𑀸𑀭𑀸𑀲𑀸𑀭 𑀯𑀺𑀯𑁂𑀓𑀺𑀦𑁄𑀢𑀺 𑀯𑀘𑀦𑀢𑁆𑀣𑁄𑀢𑀺.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀧𑀭𑀫𑀢𑁆𑀣𑀤𑀻𑀧𑀦𑀻 𑀦𑀸𑀫, 𑀬𑁂𑀦 𑀣𑁂𑀭𑁂𑀦 𑀲𑀸 𑀓𑀢𑀸.

𑀢𑁂𑀦𑁂𑀯𑁂 𑀲𑀸 𑀓𑀢𑀸 𑀳𑁄𑀢𑀺, 𑀅𑀬𑀁 𑀢𑀲𑁆𑀲𑀸𑀦𑀼 𑀤𑀻𑀧𑀦𑀻.

𑁨. 𑀅𑀝𑁆𑀞𑀲𑀢𑁆𑀢𑀤𑁆𑀯𑀬𑁂𑀓𑀫𑁆𑀳𑀺, 𑀲𑀸𑀓𑁂 𑀲𑀸 𑀚𑁂𑀝𑁆𑀞𑀫𑀸𑀲𑀓𑁂.

𑀓𑀸𑀴𑁂 𑀦𑀯𑀫𑀺𑀬𑀁 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑁂 𑀦𑀺𑀝𑁆𑀞𑀁 𑀕𑀢𑀸.

𑀅𑀦𑀼𑀤𑀻𑀧𑀦𑀻 𑀦𑀺𑀝𑁆𑀞𑀺𑀢𑀸.