𑁭. 𑀲𑀫𑀼𑀘𑁆𑀘𑀬𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁧𑁬𑁨. 𑀲𑀫𑀼𑀘𑁆𑀘𑀬𑀲𑀗𑁆𑀕𑀳𑁂. 𑀅𑀢𑁆𑀢𑀦𑁄 𑀆𑀯𑁂𑀡𑀺𑀓𑀪𑀽𑀢𑁂𑀦 𑀲𑀸𑀫𑀜𑁆𑀜 𑀮𑀓𑁆𑀔𑀡𑁂𑀦𑀢𑀺 𑀘 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀸𑀧𑀤𑁂𑀲𑁂𑀦 𑀏𑀯 𑀢𑀤𑀼𑀪𑀬𑀮𑀓𑁆𑀔𑀡𑁂𑀦 𑀲𑀮𑀓𑁆𑀔𑀡𑀸𑀦𑀺 𑀦𑀸𑀫 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀲𑀭𑀽𑀧𑀢𑁄 𑀮𑀩𑁆𑀪𑀫𑀸𑀦𑀲𑀪𑀸𑀯𑀢𑀸’’𑀢𑀺 𑀅𑀜𑁆𑀜𑀦𑀺𑀲𑁆𑀲𑀬 𑀭𑀳𑀺𑀢𑁂𑀦 𑀮𑀩𑁆𑀪𑀫𑀸𑀦𑀲𑀪𑀸𑀯𑀢𑀸. 𑀦𑀦𑀼 𑀦𑀺𑀩𑁆𑀩𑀸𑀦𑀫𑁆𑀧𑀺 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺𑀆𑀤𑀺𑀦𑀸 𑀅𑀜𑁆𑀜𑀦𑀺𑀲𑁆𑀲𑀬𑀤𑀲𑁆𑀲𑀦𑀁 𑀅𑀢𑁆𑀣𑀺 𑀬𑁂𑀯𑀸𑀢𑀺. 𑀤𑀲𑁆𑀲𑀦𑀫𑀢𑁆𑀢𑀁 𑀅𑀢𑁆𑀣𑀺. 𑀦𑀺𑀩𑁆𑀩𑀸𑀦𑀁 𑀧𑀦 𑀭𑀸𑀕𑀸𑀤𑀻𑀳𑀺 𑀧𑀝𑀺𑀩𑀤𑁆𑀥𑀁 𑀦 𑀳𑁄𑀢𑀺. 𑀅𑀣 𑀔𑁄 𑀢𑁂𑀳𑀺 𑀤𑀽𑀭𑀢𑀭𑀁 𑀳𑁄𑀢𑀺. 𑀧𑀝𑀺𑀧𑀓𑁆𑀔𑀢𑀭𑀁, 𑀧𑀝𑀺𑀯𑀺𑀭𑀼𑀤𑁆𑀥𑀢𑀭𑀁. 𑀬𑀜𑁆𑀳𑀺 𑀭𑀽𑀧𑀲𑁆𑀲 𑀔𑀬𑁄 𑀯𑀬𑁄 𑀪𑁂𑀤𑁄 𑀅𑀦𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀽𑀧𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀔𑀬𑁄 𑀯𑀼𑀢𑁆𑀢𑁄𑀢𑀺 𑀲𑁄 𑀭𑀽𑀧𑀲𑁆𑀲 𑀦𑀺𑀲𑁆𑀲𑀺𑀢𑁄 𑀏𑀯 𑀳𑁄𑀢𑀺. 𑀇𑀥 𑀧𑀦 𑀭𑀸𑀕𑀸𑀤𑀻𑀦𑀁 𑀧𑀼𑀦 𑀉𑀧𑁆𑀧𑀸𑀤𑀲𑁆𑀲𑀧𑀺 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀲𑁄 𑀭𑀸𑀕𑀸𑀤𑀻𑀲𑀼 𑀅𑀦𑀺𑀲𑁆𑀲𑀺𑀢𑁄 𑀏𑀯. 𑀦 𑀓𑁂𑀯𑀮𑀁 𑀅𑀦𑀺𑀲𑁆𑀲𑀺𑀢𑁄. 𑀅𑀣 𑀔𑁄 𑀢𑁂𑀳𑀺 𑀤𑀽𑀭𑀢𑀭𑁄 𑀘 𑀧𑀝𑀺𑀧𑀓𑁆𑀔𑀢𑀭𑁄 𑀘 𑀢𑁂𑀲𑀁 𑀧𑀝𑀺𑀧𑀓𑁆𑀔𑀕𑀼𑀡𑁂𑀳𑀺 𑀇𑀫𑀲𑁆𑀲𑀲𑀺𑀤𑁆𑀥𑀢𑁆𑀢𑀸𑀢𑀺. 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺𑀧𑀺 𑀅𑀥𑀺𑀧𑁆𑀧𑁂𑀢𑀸𑀦𑀺 𑀏𑀯 𑀢𑁂𑀲𑀫𑁆𑀧𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼 𑀲𑀘𑁆𑀘𑁂𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸.

𑀆𑀲𑀯𑀸𑀤𑀻𑀲𑀼. ‘‘𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦𑀸’’𑀢𑀺 𑀧𑀭𑀺𑀯𑀸𑀲𑀓𑀭𑀡𑀝𑁆𑀞𑁂𑀦. ‘‘𑀫𑀤𑀦𑀻𑀬𑀝𑁆𑀞𑁂𑀦𑀸’’𑀢𑀺 𑀫𑀤𑀦𑀚𑀦𑀓𑀝𑁆𑀞𑁂𑀦. ‘‘𑀧𑀭𑀺𑀯𑀸𑀲𑀁 𑀕𑀡𑁆𑀳𑀦𑁆𑀢𑀻’’𑀢𑀺 𑀤𑁄𑀲𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦 ‘‘𑀧𑀭𑀺𑀯𑀸𑀲𑀁’’𑀢𑀺 𑀤𑀼𑀕𑁆𑀕𑀦𑁆𑀥𑀢𑀸𑀤𑀺𑀧𑀭𑀺𑀯𑀸𑀲𑀁. ‘‘𑀆𑀲𑀯𑀪𑀭𑀺𑀢𑀫𑁂𑀯𑀸’’𑀢𑀺 𑀆𑀲𑀯𑁂𑀳𑀺 𑀧𑀽𑀭𑀺𑀢𑀫𑁂𑀯. ‘‘𑀙𑀴𑀸𑀭𑀫𑁆𑀫𑀡𑀸𑀦𑀺 𑀤𑀽𑀲𑁂𑀦𑁆𑀢𑀻’’𑀢𑀺 𑀢𑀸𑀦𑀺 𑀲𑀸𑀲𑀯𑀸𑀤𑀺𑀪𑀸𑀯𑀁 𑀧𑀸𑀧𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑀯𑀢𑁄’’𑀢𑀺 𑀪𑀽𑀫𑀺𑀢𑁄 𑀇𑀘𑁆𑀘𑁂𑀯𑀢𑁆𑀣𑁄. 𑀅𑀯𑀥𑀻𑀬𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀻𑀬𑀢𑀺 𑀏𑀢𑀲𑁆𑀫𑀸𑀢𑀺 𑀅𑀯𑀥𑀺. 𑀅𑀧𑀸𑀤𑀸𑀦𑀁 𑀯𑀼𑀘𑁆𑀘𑀢𑀺. 𑀫𑀭𑀺𑀬𑀸𑀤𑁄 𑀦𑀸𑀫 𑀧𑀭𑀺𑀬𑀦𑁆𑀢𑀧𑀭𑀺𑀘𑁆𑀙𑁂𑀤𑁄. 𑀫𑀭𑀺𑀬𑀸𑀤𑀫𑀢𑁆𑀢𑀪𑀽𑀢𑁄 𑀓𑁆𑀭𑀺𑀬𑀸𑀯𑀺𑀲𑀬𑁄 𑀫𑀭𑀺𑀬𑀸𑀤𑀯𑀺𑀲𑀬𑁄. 𑀅𑀯𑀥𑀺 𑀦𑀸𑀫 𑀩𑁆𑀬𑀸𑀧𑀦 𑀯𑀺𑀥𑀸𑀦𑀁, 𑀓𑁆𑀭𑀺𑀬𑀸 𑀩𑁆𑀬𑀸𑀧𑀦𑀲𑁆𑀲 𑀯𑀺𑀲𑀬𑁄 𑀅𑀪𑀺𑀯𑀺𑀥𑀺𑀯𑀺𑀲𑀬𑁄. ‘‘𑀬𑀲𑁆𑀲𑀸’’𑀢𑀺 𑀅𑀯𑀥𑀺 𑀯𑀢𑁆𑀣𑀼𑀲𑁆𑀲. ‘‘𑀅𑀢𑁆𑀢𑀸𑀦𑀁’’𑀢𑀺 𑀅𑀯𑀥𑀺𑀯𑀢𑁆𑀣𑀼𑀁. ‘‘𑀩𑀳𑀺𑀓𑀢𑁆𑀯𑀸’’𑀢𑀺 𑀲𑀫𑁆𑀧𑀢𑁆𑀢𑀫𑀢𑁆𑀢𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀥𑀺𑀯𑀺𑀘𑀸𑀭𑀡𑀸𑀬𑀁. ‘‘𑀲𑀤𑁆𑀤𑀲𑁆𑀲𑀸’’𑀢𑀺 𑀪𑀕𑀯𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲. ‘‘𑀢𑀁’’𑀢𑀺 𑀅𑀯𑀥𑀺𑀪𑀽𑀢𑀁 𑀅𑀢𑁆𑀣𑀁. ‘‘𑀬𑀲𑁄’’𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄. ‘‘𑀇𑀢𑀭𑀁’’𑀢𑀺 𑀅𑀦𑀪𑀺𑀯𑀺𑀥𑀺𑀯𑀺𑀲𑀬𑀁 𑀩𑀳𑀺 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺.

𑀓𑀸𑀫𑀸𑀲𑀯𑀸𑀤𑀻𑀲𑀼. ‘‘𑀢𑀦𑁆𑀦𑀸𑀫𑁂𑀦𑀸’’𑀢𑀺 𑀓𑀸𑀫𑀦𑀸𑀫𑁂𑀦. ‘‘𑀢𑀤𑀸𑀭𑀫𑁆𑀫𑀡𑀸’’𑀢𑀺 𑀓𑀸𑀫𑀥𑀫𑁆𑀫𑀸𑀭𑀫𑁆𑀫𑀡𑀸. ‘‘𑀅𑀬𑀫𑀢𑁆𑀣𑁄 𑀯𑀸’’𑀢𑀺 𑀓𑀸𑀫𑀻𑀬𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀧𑀘𑁆𑀙𑀺𑀫𑀢𑁆𑀣𑁄𑀯. ‘‘𑀫𑀳𑀕𑁆𑀕𑀢𑀓𑀼𑀲𑀮𑀥𑀫𑁆𑀫𑀸’’𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀁 𑀓𑀫𑁆𑀫𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀢𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀢𑁂𑀦 𑀦𑀺𑀩𑁆𑀩𑀢𑁆𑀢𑀸. ‘‘𑀢𑀤𑀸𑀭𑀫𑁆𑀫𑀡𑀸’’𑀢𑀺 𑀤𑀼𑀯𑀺𑀥𑀪𑀯𑀸𑀭𑀫𑁆𑀫𑀡𑀸. ‘‘𑀢𑀡𑁆𑀳𑀸 𑀏𑀯𑀸’’𑀢𑀺 𑀪𑀯𑀢𑀡𑁆𑀳𑀸 𑀏𑀯. ‘‘𑀪𑀯𑁄 𑀏𑀯𑀸’’𑀢𑀺 𑀪𑀯𑀸𑀭𑀫𑁆𑀫𑀡𑀢𑀸𑀬 𑀪𑀯𑀦𑀸𑀫𑀺𑀓𑀸 𑀢𑀡𑁆𑀳𑀸 𑀏𑀯. ‘‘𑀇𑀫𑁂 𑀏𑀯𑀸’’𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺 𑀅𑀯𑀺𑀚𑁆𑀚𑀸 𑀏𑀯. ‘‘𑀧𑀭𑀺𑀯𑀼𑀢𑁆𑀣𑁂 𑀲𑀢𑀻’’𑀢𑀺 𑀧𑀭𑀺𑀯𑀲𑀺𑀢𑁂 𑀲𑀢𑀺. ‘‘𑀓𑀸𑀫𑀯𑀺𑀲𑀬𑀸’’𑀢𑀺 𑀓𑀸𑀫𑀥𑀫𑁆𑀫𑀯𑀺𑀲𑀬𑀸. ‘‘𑀢𑀲𑁆𑀫𑀺𑀁’’𑀢𑀺 𑀓𑀸𑀫𑀸𑀲𑀯𑁂. 𑀪𑀯𑀯𑀺𑀲𑀬𑀸 𑀫𑀸𑀦𑀸𑀤𑀬𑁄 𑀧𑀭𑀺𑀯𑀼𑀢𑁆𑀣𑀸 𑀏𑀯𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸 𑀤𑀺𑀝𑁆𑀞𑀺𑀯𑀺𑀲𑀬𑀸𑀢𑀺 𑀧𑀤𑁂𑀧𑀺.

‘‘𑀅𑀦𑀲𑁆𑀲𑀸𑀲𑀺𑀓𑀁 𑀓𑀢𑁆𑀯𑀸’’𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀭𑀳𑀺𑀢𑀁 𑀓𑀢𑁆𑀯𑀸. ‘‘𑀅𑀯𑀳𑀦𑀦𑀝𑁆𑀞𑁂𑀦𑀸’’𑀢𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑀡𑀝𑁆𑀞𑁂𑀦. 𑀅𑀥𑁄𑀓𑀢𑁆𑀯𑀸 𑀫𑀸𑀭𑀡𑀝𑁆𑀞𑁂𑀦𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀤𑀼𑀢𑁆𑀢𑀭𑀝𑁆𑀞𑁂𑀦𑀸’’𑀢𑀺 𑀢𑀢𑁆𑀣 𑀧𑀢𑀦𑁆𑀢𑀲𑁆𑀲 𑀢𑀭𑀺𑀢𑀼𑀁 𑀤𑀼𑀓𑁆𑀓𑀭𑀝𑁆𑀞𑁂𑀦. ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 𑀆𑀲𑀯𑁂𑀲𑀼 𑀯𑀼𑀢𑁆𑀢𑀦𑀬𑁂𑀦.

‘‘𑀯𑀝𑁆𑀝𑀲𑁆𑀫𑀺𑀁’’𑀢𑀺 𑀢𑀺𑀯𑀺𑀥𑀯𑀝𑁆𑀝𑀲𑁆𑀫𑀺𑀁. ‘‘𑀪𑀯𑀬𑀦𑁆𑀢𑀓𑁂’’𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀓𑁂 𑀪𑀯𑀘𑀓𑁆𑀓𑁂. ‘‘𑀆𑀫𑀲𑀦𑀁’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀢𑀣𑀸 𑀢𑀣𑀸 𑀓𑀧𑁆𑀧𑁂𑀢𑁆𑀯𑀸 𑀕𑀳𑀡’’𑀦𑁆𑀢𑀺. ‘‘𑀲𑀸𑀲𑀦𑁂’’𑀢𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑁂. ‘‘𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁’’𑀢𑀺 𑀤𑀺𑀝𑁆𑀞𑀺𑀯𑀢𑁆𑀣𑀽𑀲𑀼 𑀤𑀴𑁆𑀳𑀕𑁆𑀕𑀸𑀳𑀝𑁆𑀞𑁂𑀦 𑀤𑀺𑀝𑁆𑀞𑀺𑀬𑁄 𑀏𑀯 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂. 𑀧𑀭𑀺𑀓𑀧𑁆𑀧 𑀩𑀼𑀤𑁆𑀥𑀺 𑀦𑀸𑀫 𑀫𑀺𑀘𑁆𑀙𑀸𑀜𑀸𑀡𑀁 𑀯𑀼𑀘𑁆𑀘𑀢𑀺. ‘‘𑀇𑀲𑁆𑀲𑀭 𑀦𑀺𑀫𑁆𑀫𑀺𑀢𑀁’’𑀢𑀺 𑀲𑀓𑀮𑀮𑁄𑀓𑀺𑀲𑁆𑀲𑀭𑁂𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀆𑀤𑀺𑀓𑀧𑁆𑀧𑀓𑀸𑀮𑁂 𑀦𑀺𑀫𑁆𑀫𑀺𑀢𑀁. ‘‘𑀅𑀥𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑀁’’𑀢𑀺 𑀅𑀳𑁂𑀢𑀼 𑀅𑀧𑀘𑁆𑀘𑀬𑀸 𑀲𑀫𑀼𑀧𑁆𑀧𑀦𑁆𑀦𑀁. ‘‘𑀅𑀘𑁆𑀘𑀦𑁆𑀢𑀲𑀲𑁆𑀲𑀢𑀁’’𑀢𑀺 𑀪𑀯𑀧𑀭𑀫𑁆𑀧𑀭𑀸𑀲𑀼 𑀲𑀲𑁆𑀲𑀢𑀁. ‘‘𑀏𑀓𑀘𑁆𑀘𑀲𑀲𑁆𑀲𑀢𑀁’’𑀢𑀺 𑀪𑀯𑀯𑀺𑀲𑁂𑀲𑀁 𑀧𑀢𑁆𑀯𑀸 𑀏𑀓𑀘𑁆𑀘𑀸𑀦𑀁 𑀲𑀢𑁆𑀢𑀸𑀦𑀁 𑀲𑀲𑁆𑀲𑀢𑀁. ‘‘𑀉𑀘𑁆𑀙𑀺𑀦𑁆𑀦𑀁’’𑀢𑀺 𑀬𑀢𑁆𑀣𑀓𑀢𑁆𑀣𑀘𑀺 𑀧𑀭𑀫𑁆𑀫𑀭𑀡𑀸 𑀉𑀘𑁆𑀙𑀺𑀦𑁆𑀦𑀁. 𑀧𑀼𑀭𑀸𑀡𑀜𑁆𑀘𑀓𑀫𑁆𑀫𑀁 𑀧𑀭𑀺𑀓𑁆𑀔𑀻𑀡𑀁, 𑀦𑀯𑀜𑁆𑀘𑀓𑀫𑁆𑀫𑀁 𑀅𑀓𑀢𑀁. 𑀏𑀯𑀁 𑀲𑀁𑀲𑀸𑀭 𑀲𑀼𑀤𑁆𑀥𑀻𑀢𑀺𑀆𑀤𑀺𑀦𑀸 𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀢𑁄 𑀓𑀸𑀬𑁄 𑀲𑀓𑁆𑀓𑀸𑀬𑁄. ‘‘𑀲𑀦𑁆𑀢𑁄’’𑀢𑀺 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑁄. ‘‘𑀓𑀸𑀬𑁄’’𑀢𑀺 𑀭𑀽𑀧𑀓𑀸𑀬𑁄, 𑀦𑀸𑀫𑀓𑀸𑀬𑁄. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀸𑀬𑁄 𑀯𑀸 𑀲𑀓𑁆𑀓𑀸𑀬𑁄. 𑀧𑀘𑁆𑀘𑀢𑁆𑀢𑀓𑀸𑀬𑁄, 𑀧𑀸𑀝𑀺𑀧𑀼𑀕𑁆𑀕𑀮𑀺𑀓 𑀓𑀸𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀯𑀼𑀢𑁆𑀢𑀓𑀸𑀬 𑀤𑁆𑀯𑀬𑀫𑁂𑀯. 𑀲𑀓𑁆𑀓𑀸𑀬𑁂 𑀤𑀺𑀝𑁆𑀞𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀢𑀢𑁆𑀣 ‘‘𑀲𑀓𑁆𑀓𑀸𑀬𑁂 𑀤𑀺𑀝𑁆𑀞𑀻’’𑀢𑀺 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢 𑀓𑀧𑁆𑀧𑀺𑀓𑀸𑀦𑀁 𑀯𑀺𑀬 𑀧𑀼𑀩𑁆𑀩𑀦𑁆𑀢𑀸 𑀧𑀭𑀦𑁆𑀢𑁂𑀅𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁𑀧𑀺 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼 𑀏𑀯 ‘𑀭𑀽𑀧𑀁 𑀫𑁂 𑀅𑀢𑁆𑀢𑀸𑀢𑀺 𑀯𑀸’ 𑀅𑀢𑁆𑀢𑀸 𑀫𑁂 𑀭𑀽𑀧𑀯𑀸𑀢𑀺 𑀯𑀸, 𑀅𑀢𑁆𑀢𑀦𑀺 𑀫𑁂 𑀭𑀽𑀧𑀦𑁆𑀢𑀺 𑀯𑀸, 𑀭𑀽𑀧𑀲𑁆𑀫𑀺𑀁 𑀫𑁂 𑀅𑀢𑁆𑀢𑀸𑀢𑀺 𑀯𑀸, 𑀏𑀯𑀫𑀸𑀤𑀺𑀦𑀸 𑀥𑀫𑁆𑀫𑀢𑀸 𑀲𑀺𑀤𑁆𑀥𑀸 𑀤𑀺𑀝𑁆𑀞𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀔𑀦𑁆𑀥𑀤𑁂𑀲𑀦𑀸𑀤𑀺𑀓𑁂 𑀲𑀼𑀜𑁆𑀜𑀢𑀥𑀫𑁆𑀫𑀧𑁆𑀧𑀝𑀺𑀲𑀁 𑀬𑀼𑀢𑁆𑀢𑁂 𑀤𑁂𑀲𑀦𑀸 𑀥𑀫𑁆𑀫𑁂 𑀅𑀲𑁆𑀲𑀼𑀢 𑀧𑀼𑀩𑁆𑀩𑀢𑁆𑀢𑀸 𑀦𑀢𑁆𑀣𑀺 𑀲𑀼𑀢𑀁 𑀏𑀢𑀲𑁆𑀲𑀸𑀢𑀺 𑀅𑀲𑁆𑀲𑀼𑀢𑀯𑀸. ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑁄. 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑁄 𑀧𑀦 𑀏𑀓𑀧𑀼𑀕𑁆𑀕𑀮𑁄𑀧𑀺 𑀧𑀼𑀣𑀼𑀚𑁆𑀚𑀦𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀲𑁄 𑀲𑀼𑀢𑀯𑀸𑀧𑀺 𑀅𑀢𑁆𑀣𑀺, 𑀅𑀲𑁆𑀲𑀼𑀢𑀯𑀸𑀧𑀺 𑀅𑀢𑁆𑀣𑀺. 𑀇𑀥 𑀅𑀲𑁆𑀲𑀼𑀢𑀯𑀸 𑀅𑀥𑀺𑀧𑁆𑀧𑁂𑀢𑁄. 𑀅𑀭𑀺𑀬 𑀧𑀼𑀕𑁆𑀕𑀮𑁄 𑀧𑀦 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑁄 𑀦 𑀳𑁄𑀢𑀺. 𑀅𑀳𑀦𑁆𑀢𑀺𑀯𑀸, 𑀫𑀫𑀸𑀢𑀺 𑀯𑀸, 𑀫𑀬𑀻𑀢𑀺 𑀯𑀸, 𑀫𑁂𑀢𑀺 𑀯𑀸, 𑀧𑀭𑀸𑀫𑀲𑀦 𑀧𑀤𑀸𑀦𑀺 𑀦𑀸𑀫. ‘‘𑀲𑁂𑀲𑀥𑀫𑁆𑀫𑁂𑀯𑀸 𑀕𑀳𑁂𑀢𑁆𑀯𑀸’’𑀢𑀺 𑀭𑀽𑀧𑀢𑁄 𑀅𑀯𑀲𑁂𑀲𑁂 𑀦𑀸𑀫𑀓𑁆𑀔𑀦𑁆𑀥 𑀥𑀫𑁆𑀫𑁂 𑀅𑀢𑁆𑀢𑀸 𑀫𑁂𑀢𑀺 𑀕𑀳𑁂𑀢𑁆𑀯𑀸 𑀯𑀸. ‘‘𑀥𑀫𑁆𑀫 𑀫𑀼𑀢𑁆𑀢𑀓𑀁 𑀯𑀸 𑀅𑀢𑁆𑀢𑀸𑀦𑀁 𑀕𑀳𑁂𑀢𑁆𑀯𑀸’’𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀯𑀺𑀫𑀼𑀢𑁆𑀢𑀁 𑀧𑀭𑀺𑀓𑀧𑁆𑀧𑀲𑀺𑀤𑁆𑀥𑀁 𑀅𑀢𑁆𑀢𑀸𑀦𑀁 𑀯𑀸 𑀕𑀳𑁂𑀢𑁆𑀯𑀸. 𑀘𑀢𑀲𑁆𑀲𑁄 𑀅𑀯𑀢𑁆𑀣𑀸 𑀬𑀲𑁆𑀲𑀸𑀢𑀺 𑀘𑀢𑀼𑀭𑀸𑀯𑀢𑁆𑀣𑀺𑀓𑀸. 𑀯𑁂𑀤𑀦𑀸𑀬 𑀲𑀫𑁆𑀪𑁄𑀕𑀭𑀲𑀢𑁆𑀢𑀸 ‘‘𑀲𑀁𑀪𑀼𑀜𑁆𑀚𑀺𑀁’’𑀢𑀺 𑀯𑀼𑀢𑁆𑀢𑀁. ‘‘𑀲𑀼𑀔𑀺𑀢𑁄’’𑀢𑀺 𑀲𑀼𑀔𑀯𑁂𑀤𑀦𑀸𑀬 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀥𑀫𑁆𑀫𑀢𑁄 𑀔𑀦𑁆𑀥 𑀧𑀜𑁆𑀘𑀓𑀫𑁂𑀯. 𑀢𑀢𑁆𑀣 𑀧𑀦 𑀲𑀼𑀔𑀯𑁂𑀤𑀦𑀸𑀧𑀥𑀸𑀦𑀢𑁆𑀢𑀸 𑀢𑀣𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀯𑁂𑀤𑀦𑀁 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺 𑀦𑀸𑀫. ‘‘𑀲𑀫𑀽𑀳𑀢𑁄 𑀕𑀳𑁂𑀢𑁆𑀯𑀸’’𑀢𑀺 𑀅𑀳𑀫𑀲𑁆𑀫𑀺, 𑀅𑀳𑀁 𑀏𑀓𑁄 𑀲𑀢𑁆𑀢𑁄𑀢𑀺𑀆𑀤𑀺𑀦𑀸 𑀲𑀫𑀽𑀳𑀢𑁄. ‘‘𑀯𑀢𑁆𑀣𑀽’’𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀯𑀼𑀘𑁆𑀘𑀦𑁆𑀢𑀺. 𑀜𑀸𑀢𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀅𑀧𑀭𑀺𑀜𑁆𑀜𑀸𑀢𑀸𑀦𑀺 𑀯𑀢𑁆𑀣𑀽𑀦𑀺 𑀏𑀢𑁂𑀳𑀻𑀢𑀺 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸. 𑀏𑀓𑀫𑀼𑀳𑀼𑀢𑁆𑀢𑀫𑀢𑁆𑀢𑁂𑀧𑀺 𑀓𑀸𑀮𑁂. 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀺𑀓𑀁 𑀘𑀢𑀼𑀭𑀸𑀯𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀓𑀤𑀸𑀘𑀺 𑀅𑀢𑁆𑀢𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑀺𑀫𑀺𑀢𑁆𑀢𑀁’’𑀢𑀺 𑀅𑀪𑀺𑀓𑁆𑀓𑀫𑀦𑀸𑀤𑀻𑀲𑀼 𑀓𑀸𑀬𑀯𑀘𑀻𑀫𑀦𑁄 𑀓𑁆𑀭𑀺𑀬𑀸𑀲𑀼 𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀺, 𑀅𑀳𑀁 𑀧𑀝𑀺𑀓𑁆𑀓𑀫𑀸𑀫𑀻𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂 𑀤𑀺𑀲𑁆𑀲𑀫𑀸𑀦𑀸 𑀅𑀢𑁆𑀢𑀘𑁆𑀙𑀸𑀬𑀸 𑀯𑀼𑀘𑁆𑀘𑀢𑀺.

‘‘𑀓𑀸𑀫𑀦𑀝𑁆𑀞𑁂𑀦𑀸’’𑀢𑀺 𑀇𑀘𑁆𑀙𑀦𑀝𑁆𑀞𑁂𑀦. ‘‘𑀙𑀦𑁆𑀤𑀦𑀝𑁆𑀞𑁂𑀦𑀸’’𑀢𑀺 𑀧𑀢𑁆𑀣𑀦𑀝𑁆𑀞𑁂𑀦. 𑀮𑀻𑀦𑀪𑀸𑀯𑁄 𑀦𑀸𑀫 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀝𑀺𑀓𑀼𑀝𑀦𑀁. 𑀆𑀧𑀸𑀤𑀻𑀬𑀢𑁂 𑀆𑀧𑀸𑀤𑀦𑀁. 𑀮𑀻𑀦𑀪𑀸𑀯𑀲𑁆𑀲 𑀆𑀧𑀸𑀤𑀦𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀢𑀦𑁆𑀤𑀻’’𑀢𑀺 𑀆𑀮𑀲𑁆𑀬𑀁 𑀯𑀼𑀘𑁆𑀘𑀢𑀺. ‘‘𑀯𑀺𑀚𑀫𑁆𑀪𑀺𑀢𑀢𑀸’’ 𑀦𑀸𑀫 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀗𑁆𑀕𑀸𑀦𑀁 𑀯𑀺𑀚𑀫𑁆𑀪𑀦𑀁 𑀲𑀫𑀺𑀜𑁆𑀚𑀦𑀧𑁆𑀧𑀲𑀸𑀭𑀡𑀸𑀤𑀺𑀓𑀭𑀡𑀁. 𑀲𑀸 𑀏𑀯 𑀧𑀘𑁆𑀘𑀬𑁄 𑀏𑀢𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀅𑀦𑀼𑀲𑀬𑀧𑀤𑀢𑁆𑀣𑁂. ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀦 𑀧𑀦 𑀏𑀓𑀦𑁆𑀢𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀦𑁆𑀢𑁂𑀲𑀼𑀳𑀺 𑀏𑀓𑀦𑁆𑀢𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 𑀅𑀦𑀼𑀲𑀬𑀸 𑀦𑀸𑀫 𑀦 𑀳𑁄𑀦𑁆𑀢𑀺 𑀲𑀬𑀦𑀓𑀺𑀘𑁆𑀘𑀲𑁆𑀲𑁂𑀯 𑀅𑀪𑀸𑀯𑀢𑁄. ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀧𑀳𑁄𑀦𑁆𑀢𑀺. 𑀧𑀢𑁆𑀣𑁄𑀤𑀦𑁄 𑀩𑀳𑀽𑀦𑀁 𑀚𑀦𑀸𑀦𑀁 𑀧𑀳𑁄𑀢𑀻𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀜𑁆𑀜𑀢𑁆𑀢𑀺𑀬𑁄𑀳𑀺 𑀅𑀲𑀪𑀸𑀯𑀥𑀫𑁆𑀫𑀚𑀸𑀢𑀺𑀓𑀢𑁆𑀢𑀸 𑀓𑀸𑀭𑀡 𑀮𑀸𑀪𑁂𑀧𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦𑀧𑁆𑀧𑀳𑁄𑀦𑁆𑀢𑀺. 𑀇𑀫𑁂 𑀧𑀦 𑀲𑀪𑀸𑀯𑀥𑀫𑁆𑀫𑀚𑀸𑀢𑀺𑀓𑀢𑁆𑀢𑀸 𑀓𑀸𑀭𑀡 𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀧𑀳𑁄𑀦𑁆𑀢𑀻𑀢𑀺. 𑀏𑀯𑀜𑁆𑀳𑀺𑀲𑀢𑀺, 𑀉𑀧𑁆𑀧𑀸𑀤𑀁 𑀅𑀧𑀢𑁆𑀢𑀸𑀦𑀁𑀧𑀺 𑀢𑁂𑀲𑀁 𑀧𑀭𑀫𑀢𑁆𑀣𑀚𑀸𑀢𑀺𑀓𑀢𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺. ‘‘𑀲𑀳 𑀅𑀦𑀼𑀲𑁂𑀦𑁆𑀢𑀻’’𑀢𑀺 𑀏𑀓𑀢𑁄 𑀅𑀦𑀼𑀲𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀫𑀸𑀦𑀸𑀦𑀼𑀲𑀬𑁄 𑀘 𑀤𑀺𑀝𑁆𑀞𑀸𑀦𑀼𑀲𑀬𑁄 𑀘 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀘. 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀲𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀓𑀺𑀘𑁆𑀘𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀤𑁆𑀯𑀸𑀤𑀲𑀸 𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀦 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 𑀉𑀧𑁆𑀧𑀚𑁆𑀚𑀦𑀁 𑀦𑀸𑀫 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀪𑀸𑀯𑁄 𑀯𑀼𑀢𑁆𑀢𑁄𑀢𑀺. 𑀲𑁂𑀦𑁆𑀢𑀻𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀲𑀼𑀁’’𑀢𑀺𑀆𑀤𑀺𑀦𑀸. ‘‘𑀅𑀯𑀼𑀝𑁆𑀞𑀺𑀢𑀸’’𑀢𑀺 𑀉𑀧𑁆𑀧𑀸𑀤𑀁 𑀅𑀧𑀢𑁆𑀢𑀸. ‘‘𑀢𑀣𑀸𑀧𑀯𑀢𑁆𑀢𑀸’’𑀢𑀺 𑀘𑀸𑀮𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸. 𑀧𑀼𑀦 ‘‘𑀢𑀣𑀸𑀧𑀯𑀢𑁆𑀢𑀸’’𑀢𑀺 𑀚𑀯𑀦𑀲𑀳𑀚𑀸𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀸. ‘‘𑀬𑁂𑀲𑀁’’𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀁. ‘‘𑀆𑀯𑀚𑁆𑀚𑀦𑀁’’𑀢𑀺 𑀆𑀯𑀚𑁆𑀚𑀦𑀘𑀺𑀢𑁆𑀢𑀁. ‘‘𑀤𑀫𑀣𑀁’’𑀢𑀺 𑀲𑀼𑀤𑀦𑁆𑀢𑀪𑀸𑀯𑀁. ‘‘𑀢𑀣𑀸 𑀧𑀯𑀢𑁆𑀢𑀸’’𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀦𑀼𑀲𑀬𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸. 𑀢𑀸𑀅𑀯𑀢𑁆𑀣𑀸 𑀬𑁂𑀲𑀁 𑀢𑁂 𑀢𑀤𑀯𑀢𑁆𑀣𑀺𑀓𑀸. 𑀬𑀤𑀺 𑀢𑁂 𑀉𑀧𑁆𑀧𑀸𑀤𑀁 𑀅𑀧𑀢𑁆𑀢𑀸. 𑀏𑀯𑀁𑀲𑀢𑀺, 𑀢𑁂 𑀧𑀭𑀫𑀢𑁆𑀣𑀸𑀧𑀺 𑀦𑀸𑀫 𑀦 𑀪𑀯𑁂𑀬𑁆𑀬𑀼𑀦𑁆𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺 ‘‘𑀢𑁂 𑀧𑀦𑀸’’𑀢𑀺𑀆𑀤𑀺𑀦𑀸. 𑀲𑀘𑁂 𑀢𑁂 𑀓𑀼𑀲𑀮𑀸𑀩𑁆𑀬𑀸𑀓𑀢 𑀘𑀺𑀢𑁆𑀢𑀲𑀦𑁆𑀢𑀸𑀦𑀫𑁆𑀧𑀺 𑀅𑀦𑀼𑀕𑀢𑀸. 𑀏𑀯𑀁𑀲𑀢𑀺, 𑀢𑁂 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺 𑀦𑀸𑀫 𑀲𑀺𑀬𑀼𑀦𑁆𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺 ‘‘𑀦 𑀘𑀸’’𑀢𑀺𑀆𑀤𑀺𑀦𑀸. 𑀅𑀣 𑀢𑁂 𑀏𑀓𑀦𑁆𑀢 𑀅𑀓𑀼𑀲𑀮𑀸 𑀲𑀺𑀬𑀼𑀁. 𑀏𑀯𑀁𑀲𑀢𑀺, 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀯𑀺𑀭𑀼𑀤𑁆𑀥𑀸 𑀪𑀯𑁂𑀬𑁆𑀬𑀼𑀁𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺 ‘‘𑀦𑀸𑀧𑀻’’𑀢𑀺𑀆𑀤𑀺𑀦𑀸. 𑀬𑀤𑀺 𑀉𑀧𑁆𑀧𑀸𑀤𑀁 𑀅𑀧𑀢𑁆𑀢𑀸. 𑀏𑀯𑀁𑀲𑀢𑀺, 𑀓𑀸𑀮𑀯𑀺𑀫𑀼𑀢𑁆𑀢𑀸 𑀲𑀺𑀬𑀼𑀦𑁆𑀢𑀺 𑀆𑀳 ‘‘𑀦𑀸𑀧𑀺𑀓𑀸𑀮𑀢𑁆𑀢𑀬 𑀯𑀺𑀦𑀺𑀫𑀼𑀢𑁆𑀢𑀸’’𑀢𑀺𑀆𑀤𑀺𑀁. ‘‘𑀲𑀸𑀦𑀼𑀲𑀬𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂’’𑀢𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂. ‘‘𑀲𑀳 𑀫𑀕𑁆𑀕𑀼𑀧𑁆𑀧𑀸𑀤𑀸’’𑀢𑀺 𑀫𑀕𑁆𑀕𑀼𑀧𑁆𑀧𑀸𑀤𑁂𑀦 𑀲𑀳𑁂𑀯. ‘‘𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀯𑀼𑀢𑁆𑀢𑁄. ‘‘𑀅𑀦𑀸𑀕𑀢𑀲𑀸𑀫𑀜𑁆𑀜𑀁’’𑀢𑀺 𑀅𑀦𑀸𑀕𑀢𑀲𑀤𑀺𑀲𑀁. 𑀦 𑀏𑀓𑀦𑁆𑀢 𑀅𑀦𑀸𑀕𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀣𑀁 𑀢𑁂 𑀲𑀗𑁆𑀔𑀢𑀚𑀸𑀢𑀺𑀓𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀢𑁂𑀳𑀺 𑀫𑀕𑁆𑀕𑁂’’𑀢𑀺𑀆𑀤𑀺𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀅𑀧𑁆𑀧𑀳𑀻𑀦𑀸’’𑀢𑀺 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀸. ‘‘𑀢𑀤𑀯𑀢𑁆𑀣𑀸’’𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀯𑀢𑁆𑀣𑀸. ‘‘𑀢𑀁 𑀲𑀪𑀸𑀯𑀢𑁆𑀢𑀸’’𑀢𑀺 𑀓𑀸𑀫𑀭𑀸𑀕𑀸𑀤𑀺 𑀲𑀪𑀸𑀯𑀢𑁆𑀢𑀸. ‘‘𑀢𑀣𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀅𑀦𑀼𑀲𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀦𑀸𑀕𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺. 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀲𑀺𑀤𑁆𑀥𑀢𑁆𑀢𑀸. ‘‘𑀳𑀜𑁆𑀘𑀺 𑀧𑀚𑀳𑀢𑀻’’𑀢𑀺 𑀬𑀤𑀺𑀧𑀚𑀳𑀢𑀺. ‘‘𑀢𑁂𑀦𑀳𑀻’’𑀢𑀺 𑀢𑀢𑁄 𑀏𑀯. ‘‘𑀭𑀢𑁆𑀢𑁄’’𑀢𑀺 𑀭𑀸𑀕𑀲𑀫𑀗𑁆𑀕𑀻 𑀳𑀼𑀢𑁆𑀯𑀸. ‘‘𑀤𑀼𑀝𑁆𑀞𑁄’’𑀢𑀺 𑀤𑁄𑀲𑀲𑀫𑀗𑁆𑀕𑀻 𑀳𑀼𑀢𑁆𑀯𑀸. ‘‘𑀫𑀼𑀴𑁆𑀳𑁄’’𑀢𑀺 𑀫𑁄𑀳𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀧𑀚𑀳𑀢𑀻𑀢𑀺 𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀬𑀼𑀝𑁆𑀞𑀸𑀦 𑀧𑀢𑁆𑀢𑀸𑀦𑀁 𑀭𑀸𑀕𑀸𑀤𑀻𑀦𑀁. ‘‘𑀫𑀕𑁆𑀕𑀯𑀚𑁆𑀛𑀁’’𑀢𑀺 𑀫𑀕𑁆𑀕𑁂𑀦 𑀯𑀥𑀺𑀢𑀩𑁆𑀩𑀁. ‘‘𑀉𑀧𑁆𑀧𑀦𑁆𑀦𑀁’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀯𑀢𑁆𑀢𑀫𑀸𑀦𑀜𑁆𑀘 𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁. ‘‘𑀪𑀼𑀢𑁆𑀯𑀸’’𑀢𑀺 𑀆𑀭𑀫𑁆𑀫𑀡𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸. 𑀯𑀺𑀕𑀘𑁆𑀙𑀢𑀻𑀢𑀺 𑀯𑀺𑀕𑀢𑀁. 𑀪𑀼𑀢𑁆𑀯𑀸 𑀯𑀺𑀕𑀢𑀜𑁆𑀘 𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀪𑀼𑀢𑁆𑀯𑀸 𑀯𑀺𑀕𑀢𑀼𑀧𑁆𑀧𑀦𑁆𑀦𑀁. 𑀯𑀺𑀧𑀘𑁆𑀘𑀦𑀢𑁆𑀣𑀸𑀬 𑀑𑀓𑀸𑀲𑀁 𑀓𑀭𑁄𑀦𑁆𑀢𑀻𑀢𑀺 𑀑𑀓𑀸𑀲𑀓𑀢𑀁. 𑀑𑀓𑀸𑀲𑀓𑀢𑀜𑁆𑀘 𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁. 𑀲𑀫𑀼𑀤𑀸𑀘𑀸𑀭𑁄 𑀯𑀼𑀘𑁆𑀘𑀢𑀺 𑀪𑀺𑀬𑁆𑀬𑁄 𑀧𑀯𑀢𑁆𑀢𑀦𑀁. 𑀲𑀫𑀼𑀤𑀸𑀘𑀸𑀭𑁄 𑀘 𑀲𑁄 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁. 𑀔𑀦𑁆𑀥𑀧𑀜𑁆𑀘𑀓 𑀲𑀗𑁆𑀔𑀸𑀢𑀁 𑀪𑀽𑀫𑀺𑀁 𑀮𑀪𑀢𑀻𑀢𑀺 𑀪𑀽𑀫𑀺𑀮𑀤𑁆𑀥𑀁. 𑀪𑀽𑀫𑀺𑀮𑀤𑁆𑀥𑀜𑁆𑀘 𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁. 𑀆𑀭𑀫𑁆𑀫𑀡𑀁 𑀅𑀥𑀺𑀓𑀢𑀭𑀁 𑀕𑀡𑁆𑀳𑀸𑀢𑀻𑀢𑀺 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀁. 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀜𑁆𑀘 𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀁. 𑀫𑀳𑀕𑁆𑀕𑀢𑀚𑁆𑀛𑀸𑀦𑁂𑀦 𑀅𑀯𑀺𑀓𑁆𑀔𑀫𑁆𑀪𑀺𑀢𑀜𑁆𑀘 𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁. 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀝𑀺𑀢𑀜𑁆𑀘 𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑀸𑀢𑀺 𑀅𑀲𑀫𑀼𑀕𑁆𑀖𑀸𑀝𑀺𑀢𑀼𑀧𑁆𑀧𑀦𑁆𑀦𑀁. 𑀏𑀯𑀁 𑀫𑀕𑁆𑀕𑀯𑀚𑁆𑀛𑀸𑀦𑀁 𑀅𑀦𑀼𑀲𑀬𑀸𑀦𑀁 𑀉𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀧𑀭𑀺𑀬𑀸𑀬𑁄𑀯 𑀢𑁂𑀲𑀁 𑀯𑀢𑁆𑀢𑀩𑁆𑀩𑁄𑀢𑀺. ‘‘𑀲𑁂𑀓𑁆𑀔𑀸’’𑀢𑀺 𑀲𑀢𑁆𑀢𑀲𑁂𑀓𑁆𑀔𑀧𑀼𑀕𑁆𑀕𑀮𑀸.

𑀑𑀭𑀫𑁆𑀪𑀸𑀕𑁄 𑀯𑀼𑀘𑁆𑀘𑀢𑀺 𑀓𑀸𑀫𑀮𑁄𑀓𑁄𑀘𑁂𑀯 𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀘. 𑀑𑀭𑀫𑁆𑀪𑀸𑀕𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀉𑀤𑁆𑀥𑀁𑀪𑀸𑀕𑁄 𑀯𑀼𑀘𑁆𑀘𑀢𑀺 𑀫𑀳𑀕𑁆𑀕𑀢𑀪𑀸𑀯𑁄𑀘𑁂𑀯 𑀅𑀭𑀺𑀬𑀪𑀸𑀯𑁄 𑀘. 𑀉𑀤𑁆𑀥𑀁𑀪𑀸𑀕𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀉𑀤𑁆𑀥𑀁𑀪𑀸𑀕𑀺𑀬𑀸𑀦𑀺. 𑀢𑀢𑁆𑀣. 𑀓𑀸𑀫𑀘𑁆𑀙𑀦𑁆𑀤𑁄, 𑀩𑁆𑀬𑀸𑀧𑀸𑀤𑁄,𑀢𑀺 𑀇𑀫𑀸𑀦𑀺 𑀤𑁆𑀯𑁂𑀲𑀁 𑀬𑁄𑀚𑀦𑀸𑀦𑀺 𑀓𑀸𑀫𑀮𑁄𑀓𑀲𑀗𑁆𑀔𑀸𑀢𑁂 𑀑𑀭𑀫𑁆𑀪𑀸𑀕𑁂 𑀏𑀯 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄,𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀼𑀣𑀼𑀚𑁆𑀚𑀦𑀪𑀸𑀯 𑀲𑀗𑁆𑀔𑀸𑀢𑁂. 𑀲𑁂𑀲𑀸𑀦𑀺 𑀧𑀦 𑀧𑀜𑁆𑀘 𑀫𑀳𑀕𑁆𑀕𑀢𑀪𑀸𑀯𑀲𑀗𑁆𑀔𑀸𑀢𑁂 𑀘 𑀅𑀭𑀺𑀬𑀪𑀸𑀯𑀲𑀗𑁆𑀔𑀸𑀢𑁂𑀘 𑀉𑀤𑁆𑀥𑀁𑀪𑀸𑀕𑁂𑀧𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀅𑀣𑀯𑀸. 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘𑀬𑀲𑁆𑀲 𑀢𑀸𑀦𑀺 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀸𑀦𑀺, 𑀢𑀁 𑀉𑀧𑀭𑀺𑀪𑀯𑀕𑁆𑀕𑁂 𑀞𑀺𑀢𑀁𑀧𑀺 𑀓𑀸𑀫𑀮𑁄𑀓𑀲𑀗𑁆𑀔𑀸𑀢𑀁 𑀑𑀭𑀫𑁆𑀪𑀸𑀕𑀁 𑀆𑀓𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀑𑀭𑀫𑁆𑀪𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀧𑀘𑁆𑀙𑀺𑀫𑀸𑀦𑀺 𑀧𑀜𑁆𑀘 𑀬𑀲𑁆𑀲 𑀢𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀢𑀁 𑀓𑀸𑀫𑀮𑁄𑀓𑁂 𑀞𑀺𑀢𑀁𑀧𑀺 𑀉𑀤𑁆𑀥𑀁𑀪𑀸𑀕𑀁 𑀆𑀓𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀉𑀤𑁆𑀥𑀁𑀪𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀉𑀤𑁆𑀥𑀁𑀪𑀸𑀕𑀺𑀬𑀸𑀦𑀺. 𑀢𑀢𑁆𑀣𑀳𑀺 𑀤𑁆𑀯𑁂𑀭𑀽𑀧𑀸𑀭𑀽𑀧𑀭𑀸𑀕𑀸 𑀏𑀓𑀦𑁆𑀢𑁂𑀦 𑀫𑀳𑀕𑁆𑀕𑀢𑀪𑀸𑀯𑀁 𑀆𑀓𑀟𑁆𑀠𑀦𑁆𑀢𑀺𑀬𑁂𑀯. 𑀫𑀸𑀦𑁄 𑀘 𑀉𑀤𑁆𑀥𑀘𑁆𑀘𑀜𑁆𑀘 𑀅𑀯𑀺𑀚𑁆𑀚𑀸𑀘𑀸𑀢𑀺 𑀇𑀫𑀸𑀦𑀺 𑀘 𑀭𑀽𑀧𑀸𑀭𑀽𑀧𑀭𑀸𑀕𑀲𑀳𑀕𑀢𑀸𑀦𑀺 𑀳𑀼𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀺. 𑀑𑀭𑀁 𑀳𑁂𑀝𑁆𑀞𑀺𑀫𑀁 𑀓𑀸𑀫𑀮𑁄𑀓𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀉𑀤𑁆𑀥𑀁 𑀭𑀽𑀧𑀸𑀭𑀽𑀧𑀮𑁄𑀓𑀁 𑀪𑀚𑀦𑁆𑀢𑀻𑀢𑀺 𑀉𑀤𑁆𑀥𑀁𑀪𑀸𑀕𑀺𑀬𑀸𑀦𑀻𑀢𑀺𑀧𑀺 𑀯𑀡𑁆𑀡𑁂𑀦𑁆𑀢𑀺. ‘‘𑀇𑀢𑀭𑀸𑀦𑀺 𑀧𑀦𑀸’’𑀢𑀺 𑀤𑁆𑀯𑁂 𑀇𑀲𑁆𑀲𑀸 𑀲𑀁𑀬𑁄𑀚𑀦 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀸𑀦𑀺. ‘‘𑀓𑀫𑁄𑀧𑀦 𑀤𑁆𑀯𑀺𑀦𑁆𑀦𑀁 𑀧𑀻’’𑀢𑀺 𑀇𑀥 𑀲𑀗𑁆𑀕𑀳𑁂 𑀤𑁆𑀯𑀺𑀦𑁆𑀦𑀁𑀧𑀺 𑀅𑀦𑀼𑀓𑁆𑀓𑀫𑁄𑀧𑀦.

‘‘𑀯𑀺𑀩𑀸𑀥𑁂𑀦𑁆𑀢𑀻’’𑀢𑀺 𑀯𑀺𑀳𑀺𑀁𑀲𑀦𑁆𑀢𑀺. ‘‘𑀉𑀧𑀢𑀸𑀧𑁂𑀦𑁆𑀢𑀺𑀘𑀸’’𑀢𑀺 𑀉𑀧𑀕𑀦𑁆𑀢𑁆𑀯𑀸 𑀲𑀦𑁆𑀢𑀸𑀧𑁂𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀅𑀓𑀼𑀲𑀮𑀲𑀗𑁆𑀕𑀳𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁩. 𑀫𑀺𑀲𑁆𑀲𑀓𑀲𑀗𑁆𑀕𑀳𑁂. ‘‘𑀘𑀺𑀢𑁆𑀢𑀧𑁆𑀧𑀝𑀺𑀧𑀸𑀤𑀦𑀁 𑀘𑀺𑀢𑁆𑀢𑀦𑀺𑀬𑁄𑀚𑀦𑀁. ‘‘𑀲𑀼𑀕𑀢𑀺 𑀤𑀼𑀕𑁆𑀕𑀢𑀺 𑀯𑀺𑀯𑀝𑁆𑀝𑀲𑀗𑁆𑀔𑀸𑀢𑀸𑀲𑀼 𑀘𑀸’’𑀢𑀺 𑀲𑀼𑀕𑀢𑀺𑀪𑀯 𑀤𑀼𑀕𑁆𑀕𑀢𑀺 𑀪𑀯𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸𑀲𑀼 𑀘. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀯𑀝𑁆𑀝𑀢𑁄 𑀕𑀺𑀕𑀢𑀢𑁆𑀢𑀸 𑀯𑀺𑀯𑀝𑁆𑀝𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀤𑀲𑁆𑀲𑀦𑀸𑀤𑀻𑀳𑀺 𑀏𑀯𑀸’’𑀢𑀺 𑀤𑀲𑁆𑀲𑀦𑀲𑀗𑁆𑀓𑀧𑁆𑀧𑀦𑀸𑀤𑀻𑀳𑀺 𑀏𑀯. 𑀉𑀚𑀼𑀕𑀢𑀺 𑀦𑀸𑀫 𑀳𑀺𑀢𑀲𑀼𑀔𑀲𑀁𑀯𑀢𑁆𑀢𑀦𑀺𑀓𑀸 𑀧𑀯𑀢𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀗𑁆𑀓𑀕𑀢𑀺𑀦𑀸𑀫 𑀅𑀳𑀺𑀢 𑀤𑀼𑀓𑁆𑀔𑀲𑀁𑀯𑀢𑁆𑀢𑀦𑀺𑀓𑀸 𑀧𑀯𑀢𑁆𑀢𑀺. ‘‘𑀧𑀣𑀗𑁆𑀕𑀸𑀦𑀻’’𑀢𑀺 𑀧𑀣𑀲𑁆𑀲𑀫𑀕𑁆𑀕𑀲𑁆𑀲 𑀅𑀗𑁆𑀕𑀸𑀦𑀺. 𑀫𑀕𑁆𑀕𑁄𑀢𑀺 𑀘 𑀉𑀧𑀸𑀬𑁄 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀉𑀧𑀸𑀬𑀗𑁆𑀕𑀸𑀦𑀻’’𑀢𑀺. ‘‘𑀇𑀢𑀭𑀸𑀦𑀻’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀺 𑀅𑀗𑁆𑀕𑀸𑀦𑀺. 𑀉𑀚𑀼𑀕𑀢𑀺𑀬𑀸 𑀕𑀫𑀦𑀲𑁆𑀲 𑀉𑀧𑀸𑀬𑀗𑁆𑀕𑀸𑀦𑀺. 𑀇𑀫𑁂𑀧𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀗𑁆𑀕 𑀥𑀫𑁆𑀫𑀸 𑀥𑀫𑁆𑀫𑀸 𑀦𑀸𑀫 𑀆𑀕𑀢𑀸. ‘‘𑀢𑀣𑀸 𑀢𑀣𑀸 𑀧𑀯𑀢𑁆𑀢𑀸𑀦𑀁’’𑀢𑀺 𑀫𑀼𑀲𑀸𑀯𑀸𑀤𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁. ‘‘𑀦𑀸 𑀦𑀸𑀫𑀕𑁆𑀕𑁄𑀯𑀸’’𑀢𑀺 𑀫𑀺𑀘𑁆𑀙𑀸𑀫𑀕𑁆𑀕𑁄 𑀘 𑀲𑀫𑁆𑀫𑀸𑀫𑀕𑁆𑀕𑁄 𑀘.

‘‘𑀅𑀢𑁆𑀢𑀸𑀥𑀻𑀦𑀯𑀼𑀢𑁆𑀢𑀺𑀓𑁂’’𑀢𑀺 𑀅𑀢𑁆𑀢𑀸𑀬𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑁂. 𑀅𑀢𑁆𑀢𑀦𑁄 𑀕𑀢𑀺 𑀦𑀸𑀫 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀤𑀲𑁆𑀲𑀦𑀸𑀤𑀺 𑀓𑀺𑀘𑁆𑀘𑀫𑁂𑀯 𑀯𑀼𑀘𑁆𑀘𑀢𑀺. ‘‘𑀇𑀲𑁆𑀲𑀭𑀸 𑀅𑀥𑀺𑀧𑀢𑀺𑀦𑁄’’𑀢𑀺 𑀇𑀤𑀁 𑀆𑀥𑀺𑀧𑁆𑀧𑀘𑁆𑀘𑀢𑁆𑀣𑀧𑀸𑀓𑀝𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀪𑀸𑀯𑀧𑁆𑀧𑀥𑀸𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀇𑀦𑁆𑀤𑁆𑀭𑀺𑀬𑀁 𑀇𑀲𑁆𑀲𑀭𑀺𑀬𑀁 𑀆𑀥𑀺𑀧𑁆𑀧𑀘𑁆𑀘𑀦𑁆𑀢𑀺𑀳𑀺 𑀇𑀫𑁂 𑀏𑀓𑀢𑁆𑀣𑀸𑀢𑀺. ‘‘𑀇𑀢𑁆𑀣𑀸𑀓𑀸𑀭𑀸𑀦𑀺’’ 𑀦𑀸𑀫 𑀇𑀢𑁆𑀣𑀺𑀮𑀺𑀗𑁆𑀕𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺. ‘‘𑀅𑀜𑁆𑀜𑀣𑀸 𑀅𑀧𑁆𑀧𑀯𑀢𑁆𑀢𑀺𑀬𑀁’’𑀢𑀺 𑀇𑀢𑁆𑀣𑀺𑀲𑀡𑁆𑀞𑀸𑀦𑁂 𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀻𑀦𑀁, 𑀧𑀼𑀭𑀺𑀲𑀲𑀡𑁆𑀞𑀸𑀦𑁂 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺𑀬𑀁. 𑀢𑁂𑀦𑀸𑀳 ‘‘𑀢𑀣𑀸𑀳𑀻’’𑀢𑀺𑀆𑀤𑀺𑀁. 𑀫𑀦𑁄 𑀯𑀺𑀚𑀸𑀦𑀦𑀓𑀺𑀘𑁆𑀘𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀲𑁆𑀲𑀭𑁄 𑀳𑁄𑀢𑀺 𑀅𑀦𑀜𑁆𑀜𑀸𑀪𑀺𑀪𑀯𑀦𑀻𑀬𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀧𑀭𑀢𑁆𑀣. ‘‘𑀆𑀭𑀫𑁆𑀫𑀡𑀸𑀥𑀺𑀫𑀼𑀘𑁆𑀘𑀦𑁂’’𑀢𑀺 𑀆𑀭𑀫𑁆𑀫𑀡𑁂 𑀦𑀺𑀭𑀸𑀲𑀗𑁆𑀓𑀧𑁆𑀧𑀯𑀢𑁆𑀢𑀺𑀬𑀁. ‘‘𑀆𑀭𑀫𑁆𑀫𑀡𑀼𑀧𑀝𑁆𑀞𑀸𑀦𑁂’’𑀢𑀺 𑀘𑀺𑀢𑁆𑀢𑁂 𑀩𑀼𑀤𑁆𑀥𑀕𑀼𑀡𑀸𑀥𑀺𑀓𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑁂. ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑁄’’𑀢𑀺 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀅𑀦𑀜𑁆𑀜𑀸𑀢 𑀧𑀼𑀩𑁆𑀩𑁄 𑀘𑀢𑀼𑀲𑀘𑁆𑀘 𑀥𑀫𑁆𑀫𑁄. 𑀅𑀦𑀜𑁆𑀜𑀸𑀢 𑀧𑀼𑀩𑁆𑀩𑀁 𑀅𑀫𑀢𑀁 𑀯𑀸 𑀧𑀤𑀁. 𑀅𑀦𑀜𑁆𑀜𑀸𑀢𑀁 𑀜𑀲𑁆𑀲𑀸𑀫𑀺 𑀇𑀢𑀺 𑀧𑀯𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀲𑀫𑀸𑀲𑁄. 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀧𑀦 𑀅𑀢𑁆𑀣𑀢𑁄 𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀯𑀺𑀧𑁆𑀧𑀓𑀢𑀪𑀸𑀯𑁂𑀦𑀸’’𑀢𑀺 𑀅𑀦𑀺𑀝𑁆𑀞𑀗𑁆𑀕𑀢𑀪𑀸𑀯𑁂𑀦. 𑀧𑀼𑀦𑀧𑁆𑀧𑀼𑀦𑀁 𑀚𑀸𑀦𑀦𑀓𑀺𑀘𑁆𑀘𑀬𑀼𑀢𑁆𑀢𑀸𑀦𑀁 𑀫𑀚𑁆𑀛𑁂 𑀙𑀦𑁆𑀦𑀁𑀲𑁂𑀓𑁆𑀔𑀸𑀦𑀁. 𑀏𑀢𑁂𑀦 𑀅𑀯𑀲𑀤𑁆𑀤𑀲𑁆𑀲𑀬𑀸𑀯 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀸 𑀚𑀸𑀦𑀦𑀦𑁆𑀢𑀺 𑀅𑀢𑁆𑀣𑀁 𑀤𑀻𑀧𑁂𑀢𑀺. 𑀧𑀣𑀫 𑀫𑀕𑁆𑀕𑁂𑀦 𑀜𑀸𑀢𑀁 𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑁆𑀫 𑀚𑀸𑀦𑀦𑀦𑁆𑀢𑀺𑀧𑀺 𑀯𑀡𑁆𑀡𑁂𑀦𑁆𑀢𑀺. 𑀆𑀚𑀸𑀦𑀺𑀢𑀢𑁆𑀣𑀸𑀢𑀺 𑀅𑀜𑁆𑀜𑀸𑀢𑀸𑀯𑀻. 𑀅𑀭𑀳𑀸 𑀔𑀻𑀡𑀸𑀲𑀯𑁄 𑀓𑀢𑀓𑀺𑀘𑁆𑀘𑁄 𑀯𑀼𑀲𑀺𑀢 𑀩𑁆𑀭𑀳𑁆𑀫𑀘𑀭𑀺𑀬𑁄. 𑀅𑀜𑁆𑀜𑀸𑀢𑀸𑀯𑀺𑀦𑁄 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀦𑀺𑀝𑁆𑀞𑀺𑀢 𑀆𑀚𑀸𑀦𑀦𑀓𑀺𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀩𑁆𑀩𑀺𑀫𑀼𑀢𑁆𑀢𑀻’’𑀢𑀺 𑀅𑀢𑁆𑀢𑀕𑁆𑀕𑀸𑀳 𑀯𑀺𑀫𑀼𑀢𑁆𑀢𑀺. ‘‘𑀢𑀲𑁆𑀫𑀺𑀁 𑀯𑀸’’𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀦𑀺𑀯𑀸. ‘‘𑀲𑀁𑀓𑀺𑀮𑀺𑀝𑁆𑀞𑁄’’𑀢𑀺 𑀦𑀸𑀦𑀸𑀓𑀺𑀮𑁂𑀲𑁂𑀳𑀺 𑀲𑀁𑀓𑀺𑀮𑁂𑀲𑀺𑀢𑁄. ‘‘𑀯𑀺𑀧𑁆𑀨𑀦𑁆𑀤𑀺𑀢𑁄’’𑀢𑀺 𑀦𑀸𑀦𑀸𑀲𑀼𑀔𑀤𑀼𑀓𑁆𑀔𑁂𑀳𑀺 𑀲𑀁𑀓𑀫𑁆𑀧𑀺𑀢𑁄. ‘‘𑀯𑁄𑀤𑀸𑀦𑀧𑀢𑁆𑀢𑀺𑀬𑀸’’𑀢𑀺 𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀢𑁆𑀣𑀸𑀬. ‘‘𑀢𑀸𑀬𑀧𑀝𑀺 𑀧𑀢𑁆𑀢𑀺𑀬𑀸’’𑀢𑀺 𑀓𑀭𑀡𑀢𑁆𑀣𑁂, 𑀳𑁂𑀢𑀼 𑀅𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁. ‘‘𑀯𑁄𑀤𑀸𑀦𑀧𑀢𑁆𑀢𑀺𑀬𑀸’’𑀢𑀺 𑀲𑀸𑀫𑀺𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀁.

‘‘𑀩𑀮𑀻𑀬𑀦𑁆𑀢𑀻’’𑀢𑀺 𑀦𑀸𑀫𑀥𑀸𑀢𑀼𑀦𑀺𑀤𑁆𑀤𑁂𑀲𑁄. 𑀢𑁂𑀦𑀸𑀳 ‘‘𑀩𑀮𑀲𑀸 𑀓𑀭𑁄𑀦𑁆𑀢𑀻’’𑀢𑀺. ‘‘𑀩𑀮𑀲𑀸’’𑀢𑀺 𑀩𑀮𑁂𑀦. 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀲𑁂𑀦𑁆𑀢𑀺 𑀧𑀭𑀺𑀯𑀸𑀭𑁂𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸. 𑀅𑀲𑁆𑀲𑀤𑁆𑀥𑀲𑁆𑀲 𑀪𑀸𑀯𑁄 𑀅𑀲𑁆𑀲𑀤𑁆𑀥𑀺𑀬𑀁. 𑀓𑁄𑀲𑀚𑁆𑀚𑀲𑀗𑁆𑀔𑀸𑀢𑁂𑀦 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀦. 𑀫𑀼𑀝𑁆𑀞𑀸 𑀦𑀝𑁆𑀞𑀸 𑀲𑀢𑀺 𑀬𑀲𑁆𑀲𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺. 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁. ‘‘𑀲𑁂𑀲𑀤𑀼𑀓 𑀤𑁆𑀯𑀬𑀁’’𑀢𑀺 𑀅𑀳𑀺𑀭𑀺𑀓𑀤𑀼𑀓𑀁 𑀳𑀺𑀭𑀺𑀤𑀼𑀓𑀜𑁆𑀘.

𑀕𑀳𑀧𑀢𑀺, 𑀚𑀸𑀬𑀫𑁆𑀧𑀢𑀻, 𑀢𑀺𑀆𑀤𑀻𑀲𑀼 𑀯𑀺𑀬 𑀧𑀢𑀺𑀲𑀤𑁆𑀤𑁄 𑀲𑀸𑀫𑀺𑀇𑀲𑁆𑀲𑀭 𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀢𑀻𑀢𑀺 𑀲𑀸𑀫𑀺𑀇𑀲𑁆𑀲𑀭𑁄’’𑀢𑀺. ‘‘𑀧𑀭𑁂𑀲𑀁’’𑀢𑀺 𑀲𑀳𑀚𑀸𑀢𑁂𑀲𑀼 𑀧𑀭𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁. ‘‘𑀧𑀭𑁂𑀳𑀻’’𑀢𑀺 𑀓𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀧𑀭𑁂 𑀲𑀳𑀚𑀸𑀢𑁂 𑀇𑀦𑁆𑀤𑁆𑀭𑀺𑀬 𑀥𑀫𑁆𑀫𑁂𑀢𑀺 𑀅𑀢𑁆𑀣𑁄. ‘‘𑀅𑀥𑀺𑀓𑁄’’𑀢𑀺 𑀅𑀥𑀺𑀓𑀢𑀭𑁄. ‘‘𑀅𑀢𑁆𑀢𑀸𑀥𑀻𑀦 𑀯𑀼𑀢𑁆𑀢𑀻𑀦𑀁’’𑀢𑀺 𑀅𑀢𑁆𑀢𑀸𑀬𑀢𑁆𑀢𑀯𑀼𑀢𑁆𑀢𑀻𑀦𑀁. ‘‘𑀙𑀦𑁆𑀤𑀸𑀕𑀫𑀦𑀯𑀲𑁂𑀦 𑀯𑀸’’𑀢𑀺 𑀏𑀢𑁆𑀣 𑀆𑀕𑀘𑁆𑀙𑀢𑀺 𑀨𑀮𑀁 𑀏𑀢𑁂𑀦𑀸𑀢𑀺 𑀆𑀕𑀫𑀦𑀁. 𑀆𑀤𑀺𑀓𑀸𑀭𑀡𑀁, 𑀫𑀽𑀮𑀓𑀸𑀭𑀡𑀁, 𑀧𑀪𑀯𑀓𑀸𑀭𑀡𑀁. 𑀙𑀦𑁆𑀤𑁄 𑀏𑀯 𑀆𑀕𑀫𑀦𑀁 𑀙𑀦𑁆𑀤𑀸𑀕𑀫𑀦𑀁. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀅𑀢𑀻𑀢𑀪𑀯𑁂𑀲𑀽’’𑀢𑀺𑀆𑀤𑀺𑀁. 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂 𑀅𑀢𑁆𑀢𑀧𑀭𑀸𑀥𑀻𑀦𑁂 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑁄𑀖𑁄 𑀢𑀺𑀡𑀧𑀡𑁆𑀡𑀓𑀲𑀝𑁂 𑀅𑀢𑁆𑀢𑀧𑀭𑀸𑀥𑀻𑀦𑁂 𑀓𑀭𑁄𑀦𑁆𑀢𑁄 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀅𑀢𑁆𑀢𑀧𑀭𑀸𑀥𑀻𑀦𑁂’’𑀢𑀺 𑀅𑀢𑁆𑀢𑀲𑀗𑁆𑀔𑀸𑀢𑁄𑀧𑀭𑁄 𑀅𑀢𑁆𑀢𑀧𑀭𑁄. 𑀅𑀢𑁆𑀢𑀧𑀭𑁂𑀦 𑀅𑀥𑀻𑀦𑀸 𑀅𑀢𑁆𑀢𑀧𑀭𑀸𑀥𑀻𑀦𑀸𑀢𑀺 𑀅𑀢𑁆𑀣𑁄. ‘‘𑀲𑁂𑀲𑁂𑀲𑀼𑀧𑀻’’𑀢𑀺 𑀲𑁂𑀲𑁂𑀲𑀼 𑀯𑀻𑀭𑀺𑀬 𑀘𑀺𑀢𑁆𑀢 𑀯𑀻𑀫𑀁𑀲𑀸𑀥𑀺𑀧𑀢𑀻𑀲𑀼𑀧𑀺. 𑀏𑀢𑁂𑀦 ‘𑀯𑀻𑀭𑀺𑀬𑀫𑁂𑀯 𑀅𑀥𑀺𑀧𑀢𑀺 𑀯𑀻𑀭𑀺𑀬𑀸𑀥𑀺𑀧𑀢𑀺. 𑀯𑀻𑀭𑀺𑀬𑀯𑀢𑁄 𑀓𑀺𑀁 𑀦𑀸𑀫 𑀓𑀫𑁆𑀫𑀁 𑀦 𑀲𑀺𑀚𑁆𑀛𑀢𑀻𑀢𑀺 𑀏𑀯𑀁 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀯𑀸 𑀧𑀼𑀩𑁆𑀩𑁂 𑀅𑀢𑀻𑀢𑀪𑀯𑁂𑀲𑀼 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀯𑀻𑀭𑀺𑀬𑀸𑀕𑀫𑀦𑀯𑀲𑁂𑀦 𑀯𑀸 𑀢𑁂𑀲𑀼 𑀢𑁂𑀲𑀼 𑀓𑀮𑁆𑀬𑀸𑀡 𑀧𑀸𑀧𑀓𑀫𑁆𑀫𑁂𑀲𑀼 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂 𑀫𑀳𑁄𑀖𑁄 𑀯𑀺𑀬 𑀢𑀺𑀡𑀧𑀡𑁆𑀡𑀓𑀲𑀝𑁂 𑀅𑀢𑁆𑀢𑀧𑀭𑀸𑀥𑀻𑀦𑁂 𑀦𑀺𑀘𑁆𑀘𑀁 𑀧𑀕𑁆𑀕𑀳𑀺𑀢𑀥𑀼𑀭𑁂𑀓𑀢𑁆𑀯𑀸 𑀧𑀯𑀢𑁆𑀢𑀁 𑀯𑀻𑀭𑀺𑀬’𑀦𑁆𑀢𑀺𑀆𑀤𑀺𑀦𑀬𑀁 𑀅𑀢𑀺𑀤𑀺𑀲𑀢𑀺. ‘‘𑀧𑀘𑁆𑀙𑀺𑀫𑀸 𑀢𑀬𑁄 𑀥𑀫𑁆𑀫𑀸’’𑀢𑀺 𑀯𑀻𑀭𑀺𑀬 𑀘𑀺𑀢𑁆𑀢 𑀯𑀻𑀫𑀁𑀲𑀸 𑀥𑀫𑁆𑀫𑀸. 𑀧𑀭𑀯𑀲𑁂𑀧𑀺 𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀢𑁂𑀲𑀁 𑀅𑀥𑀺𑀧𑀢𑀺𑀪𑀸𑀯𑁄 𑀦𑀢𑁆𑀣𑀻𑀢𑀺 𑀘𑁄𑀤𑀦𑀸. 𑀅𑀥𑀺𑀧𑀢𑀺 𑀓𑀺𑀘𑁆𑀘𑀁 𑀦𑀸𑀫 𑀥𑀼𑀭𑀯𑀸𑀳𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀁 𑀢𑀁 𑀓𑀺𑀘𑁆𑀘 𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸’’𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀤𑀲𑁆𑀲𑀦 𑀓𑀺𑀘𑁆𑀘𑁂 𑀇𑀲𑁆𑀲𑀭𑁄, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀲𑀯𑀦 𑀓𑀺𑀘𑁆𑀘𑁂𑀢𑀺𑀆𑀤𑀻𑀲𑀼 𑀢𑀁 𑀢𑀁 𑀓𑀺𑀘𑁆𑀘𑀯𑀺𑀲𑁂𑀲𑀁 𑀅𑀧𑁂𑀓𑁆𑀔𑀢𑀺, 𑀢𑀣𑀸 𑀅𑀦𑀧𑁂𑀓𑁆𑀔𑀺𑀢𑁆𑀯𑀸. ‘‘𑀯𑀺𑀚𑀸𑀦𑀦𑀸𑀤𑀺 𑀓𑀺𑀘𑁆𑀘𑀁’’𑀢𑀺 ‘𑀫𑀦𑁄 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦𑁂’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀇𑀦𑁆𑀤𑁆𑀭𑀺𑀬 𑀓𑀺𑀘𑁆𑀘𑀁.

𑀪𑀼𑀲𑁄 𑀳𑀭𑀦𑁆𑀢𑀺 𑀯𑀳𑀦𑁆𑀢𑀻𑀢𑀺 𑀆𑀳𑀸𑀭𑀸. ‘‘𑀪𑀼𑀲𑁄’’𑀢𑀺 𑀅𑀢𑀺𑀭𑁂𑀓𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀪𑀼𑀲𑁄 𑀳𑀭𑀦𑁆𑀢𑀻𑀢𑀺 𑀆𑀳 ‘‘𑀲𑀳𑀚𑀸𑀢𑀸𑀤𑀻’’𑀢𑀺𑀆𑀤𑀺𑀁. 𑀢𑁂𑀢𑁂 𑀧𑀘𑁆𑀘𑀬 𑀥𑀫𑁆𑀫𑀸 𑀢𑁂𑀢𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀥𑀫𑁆𑀫𑀸 𑀘𑀸𑀢𑀺 𑀬𑁄𑀚𑀦𑀸. ‘‘𑀏𑀢𑁆𑀣𑀸’’𑀢𑀺 𑀇𑀫𑀺𑀲𑁆𑀲𑀁 𑀧𑀸𑀴𑀺𑀬𑀁. ‘‘𑀧𑀘𑁆𑀘𑀬𑀸𑀳𑀸𑀭𑁄 𑀯𑀸’’𑀢𑀺 𑀏𑀢𑁆𑀣 𑀳𑁂𑀢𑀼 𑀆𑀭𑀫𑁆𑀫𑀡𑀸𑀤𑀺𑀓𑁄 𑀲𑀩𑁆𑀩𑁄𑀧𑀘𑁆𑀘𑀬𑁄 𑀧𑀘𑁆𑀘𑀬𑀸𑀳𑀸𑀭𑁄 𑀦𑀸𑀫. 𑀆𑀳𑀸𑀭 𑀧𑀘𑁆𑀘𑀬𑁄𑀧𑀦 𑀯𑀺𑀲𑀼𑀁 𑀏𑀓𑁄 𑀧𑀘𑁆𑀘𑀬𑀯𑀺𑀲𑁂𑀲𑁄. ‘‘𑀧𑀘𑁆𑀘𑀬𑀝𑁆𑀞𑁂𑀦𑀸’’𑀢𑀺 𑀳𑁂𑀢𑀼 𑀆𑀭𑀫𑁆𑀫𑀡𑀸𑀤𑀺 𑀧𑀘𑁆𑀘𑀬𑀝𑁆𑀞𑁂𑀦. ‘‘𑀆𑀳𑀸𑀭𑀪𑀽𑀢𑀸’’𑀢𑀺 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀯𑀺𑀲𑁂𑀲𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀓𑀴𑀻𑀭𑀗𑁆𑀓𑀼𑀭𑀸𑀦𑀁’’𑀢𑀺 𑀓𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. ‘‘𑀯𑀟𑁆𑀠𑀺𑀬𑀸’’𑀢𑀺 𑀯𑀟𑁆𑀠𑀦𑀢𑁆𑀣𑀸𑀬. ‘‘𑀞𑀺𑀢𑀺𑀬𑀸’’𑀢𑀺 𑀞𑀺𑀢𑀢𑁆𑀣𑀸𑀬. 𑀇𑀫𑁂𑀲𑀢𑁆𑀢𑀸 𑀯𑀝𑁆𑀝𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀧𑀓𑁆𑀔𑁂 𑀯𑀺𑀬𑀽𑀳𑀺𑀢𑁆𑀯𑀸’’𑀢𑀺 𑀧𑀓𑁆𑀔𑁂 𑀲𑀜𑁆𑀘𑀸𑀮𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀓𑁆𑀔𑁂’’𑀢𑀺 𑀯𑀸 𑀧𑀓𑁆𑀔𑁂𑀳𑀺 𑀯𑀸𑀢𑀁 𑀩𑁆𑀬𑀽𑀳𑀺𑀢𑁆𑀯𑀸. ‘‘𑀢𑀤𑀦𑀼𑀲𑀬𑀺𑀢𑀲𑁆𑀲𑀸’’𑀢𑀺 𑀢𑀲𑁆𑀫𑀺𑀁 𑀯𑀺𑀧𑀸𑀓 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀺 𑀢𑀲𑁆𑀲. ‘‘𑀯𑀺𑀪𑀸𑀯𑁂𑀢𑁆𑀯𑀸’’𑀢𑀺 𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸. ‘‘𑀅𑀮𑀪𑀺𑀢𑁆𑀯𑀸’’𑀢𑀺 𑀘𑀓𑁆𑀔𑀼𑀫𑁆𑀳𑀺 𑀅𑀮𑀪𑀺𑀢𑁆𑀯𑀸. 𑀅𑀧𑀲𑁆𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀢𑁆𑀣𑁂𑀯𑀸’’𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑁂 𑀏𑀯. ‘‘𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀸. 𑀪𑀯𑀺𑀁𑀲𑀼 𑀯𑀟𑁆𑀠𑀺𑀁 𑀲𑀽𑀢𑀺 𑀪𑀽𑀢𑀸. 𑀲𑀫𑁆𑀪𑀯𑀁 𑀯𑀼𑀟𑁆𑀠𑀺𑀓𑀸𑀭𑀡𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀺𑀦𑁄. ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 ‘𑀬𑀣𑀸 𑀬𑀯𑀩𑀻𑀚𑀸𑀦𑀁 𑀯𑀸 𑀲𑀸𑀮𑀺𑀩𑀻𑀚𑀸𑀦𑀁 𑀯𑀸’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. ‘‘𑀆𑀳𑀸𑀭𑁂𑀢𑀻’’𑀢𑀺 𑀧𑀯𑀢𑁆𑀢𑁂𑀢𑀺. ‘‘𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄’’𑀢𑀺 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀪𑀽𑀢𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄. ‘‘𑀢𑀬𑁄 𑀪𑀯𑁂’’𑀢𑀺 𑀢𑀬𑁄 𑀓𑀸𑀫𑀪𑀯𑀸𑀤𑀺𑀓𑁂 𑀉𑀧𑀧𑀢𑁆𑀢𑀺𑀪𑀯𑁂. 𑀞𑀺𑀢𑀺𑀬𑀸𑀢𑀺 𑀘 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀘 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀉𑀧𑁆𑀧𑀢𑁆𑀢𑀺𑀬𑀸𑀢𑀺 𑀘 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀤𑀼𑀩𑁆𑀩𑀮𑀓𑀺𑀘𑁆𑀘𑀝𑁆𑀞𑀸𑀦𑀯𑀢𑁆𑀣𑀼𑀓𑀢𑁆𑀢𑀸’’𑀢𑀺 𑀤𑀼𑀩𑁆𑀩𑀮𑀓𑀺𑀘𑁆𑀘𑀢𑁆𑀢𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀢𑁆𑀢𑀸 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸. ‘‘𑀅𑀪𑀺𑀦𑀺𑀧𑀸𑀢 𑀫𑀢𑁆𑀢𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀤𑀲𑁆𑀲𑀦 𑀲𑀯𑀦𑀸𑀤𑀺 𑀫𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑀺𑀢𑀓𑁆𑀓 𑀧𑀘𑁆𑀙𑀺𑀫𑀓𑀁 𑀛𑀸𑀦𑀁’’𑀢𑀺 𑀛𑀸𑀦𑀸𑀦𑀺 𑀦𑀸𑀫 𑀯𑀺𑀢𑀓𑁆𑀓𑀲𑁆𑀲 𑀧𑀘𑁆𑀙𑀸𑀦𑀼𑀕𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼. ‘‘𑀢𑀸’’𑀢𑀺 𑀯𑁂𑀤𑀦𑀸 𑀏𑀓𑀕𑁆𑀕𑀢𑀸. ‘‘𑀢𑀁’’𑀢𑀺 𑀛𑀸𑀦𑀓𑀺𑀘𑁆𑀘𑀁. 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀕𑁆𑀕𑀺𑀦𑁆𑀤𑁆𑀭𑀺𑀬 𑀩𑀮𑀪𑀸𑀯𑀸𑀬𑀸’’𑀢𑀺 𑀫𑀕𑁆𑀕𑀺𑀦𑁆𑀤𑁆𑀭𑀺𑀬 𑀩𑀮𑀪𑀸𑀯𑀢𑁆𑀣𑀸𑀬. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀺 𑀚𑀯𑀦𑀓𑀺𑀘𑁆𑀘𑀸𑀦𑀺 𑀘 𑀲𑀸𑀥𑀺𑀧𑀢𑀺𑀓𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀺𑀪𑀽𑀫𑀓𑀸𑀦𑀻’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀩𑁄𑀥𑀁.

𑀫𑀺𑀲𑁆𑀲𑀓𑀲𑀗𑁆𑀕𑀳𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁪. 𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑁂. ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀏𑀢𑁆𑀣 𑀧𑀲𑀤𑁆𑀤𑁄 𑀧𑀫𑀼𑀔𑀢𑁆𑀣𑁄 𑀧𑀥𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀫𑀼𑀔𑀸 𑀧𑀥𑀸𑀦𑀸 𑀳𑀼𑀢𑁆𑀯𑀸’’𑀢𑀺. 𑀞𑀸𑀲𑀤𑁆𑀤𑁄 𑀕𑀢𑀺𑀦𑀺𑀯𑀢𑁆𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀘𑀺𑀢𑁆𑀢𑀕𑀫𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻’’𑀢𑀺. ‘‘𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀸’’𑀢𑀺 𑀓𑀸𑀬𑁂 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸. 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀦𑁆𑀢𑀺 𑀬𑁄𑀕𑀺𑀦𑁄 𑀏𑀢𑀸𑀬𑀸𑀢𑀺 𑀅𑀦𑀼𑀧𑀲𑁆𑀲𑀦𑀸. 𑀓𑀢𑀫𑀁 𑀧𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀓𑀲𑁆𑀲𑀸’’𑀢𑀺𑀆𑀤𑀺𑀁. 𑀓𑀣𑀜𑁆𑀘𑀢𑀁 𑀧𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀁 𑀢𑀁 𑀓𑀸𑀬𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀇𑀤𑀸𑀦𑀺 𑀧𑀼𑀦𑀧𑁆𑀧𑀼𑀦 𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑁂𑀤𑀦𑀸𑀦𑀼 𑀧𑀲𑁆𑀲𑀦𑀸𑀤𑀻𑀲𑀼𑀧𑀺 𑀏𑀲𑁂𑀯𑀦𑀬𑁄. 𑀢𑀁 𑀦 𑀲𑀼𑀦𑁆𑀤𑀭𑀁. 𑀓𑀲𑁆𑀫𑀸, 𑀲𑀓𑀮𑀲𑁆𑀲 𑀭𑀽𑀧𑀓𑀸𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. 𑀬𑀤𑀺 𑀏𑀯𑀦𑁆𑀢𑀺𑀆𑀤𑀻𑀲𑀼. ‘‘𑀇𑀢𑀭𑀸𑀧𑀺 𑀲𑀺𑀤𑁆𑀥𑀸’’𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀬𑁄𑀧𑀺 𑀲𑀺𑀤𑁆𑀥𑀸. 𑀓𑀲𑁆𑀫𑀸, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬 𑀅𑀦𑁆𑀢𑁄𑀕𑀥𑀢𑁆𑀢𑀸. ‘‘𑀢𑀣𑀸 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲𑀸’’𑀢𑀺 𑀭𑀽𑀧𑁆𑀧𑀦𑀮𑀓𑁆𑀔𑀡𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲. ‘‘𑀢𑀁 𑀢𑀁 𑀲𑀫𑀽𑀳𑀪𑀽𑀢𑀭𑀽𑀧𑀥𑀫𑁆𑀫𑀯𑀲𑁂𑀦𑀸’’𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺 𑀲𑀫𑀽𑀳𑀪𑀽𑀢𑀲𑁆𑀲 𑀭𑀽𑀧 𑀥𑀫𑁆𑀫𑀲𑁆𑀲 𑀯𑀲𑁂𑀦. ‘‘𑀲𑀼𑀪𑀸𑀤𑀺𑀯𑀺𑀧𑀮𑁆𑀮𑀸𑀲𑀲𑁆𑀲𑀸’’𑀢𑀺 𑀲𑀼𑀪 𑀲𑀼𑀔 𑀦𑀺𑀘𑁆𑀘𑀯𑀺𑀧𑀮𑁆𑀮𑀸𑀲𑀲𑁆𑀲. ‘‘𑀑𑀴𑀸𑀭𑀺𑀓𑀲𑁆𑀲𑀸’’𑀢𑀺 𑀲𑀼𑀧𑀸𑀓𑀝𑀯𑀲𑁂𑀦 𑀑𑀴𑀸𑀭𑀺𑀓𑀲𑁆𑀲. ‘‘𑀅𑀢𑁆𑀢𑀽𑀧𑀦𑀺𑀩𑀦𑁆𑀥𑀸’’𑀢𑀺 𑀅𑀢𑁆𑀢𑁂𑀦 𑀉𑀧𑀦𑀺𑀩𑀦𑁆𑀥𑀸, 𑀧𑀝𑀺𑀩𑀤𑁆𑀥𑀸.

‘‘𑀓𑀸𑀫𑀁’’𑀢𑀺 𑀏𑀓𑀦𑁆𑀢𑁂𑀦. 𑀉𑀧𑀲𑀼𑀲𑁆𑀲𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀦𑁆𑀢𑀁’’𑀢𑀺 𑀛𑀸𑀦𑀸𑀪𑀺𑀜𑁆𑀜𑀸 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀁. ‘‘𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁’’𑀢𑀺 𑀯𑀻𑀭𑀺𑀬𑀕𑀫𑀦𑀲𑁆𑀲 𑀯𑀻𑀭𑀺𑀬𑀧𑁆𑀧𑀯𑀢𑁆𑀢𑀦𑀲𑁆𑀲 𑀦𑀺𑀯𑀢𑁆𑀢𑀺𑀯𑀲𑁂𑀦 𑀲𑀡𑁆𑀞𑀸𑀦𑀁. 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀅𑀢𑀻𑀢 𑀓𑀺𑀮𑁂𑀲𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦 𑀓𑀺𑀮𑁂𑀲𑀸𑀧𑀺 𑀕𑀳𑁂𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀸𑀮𑁂’’𑀢𑀺𑀆𑀤𑀺𑀁. ‘‘𑀫𑀬𑁆𑀳𑀁 𑀉𑀧𑁆𑀧𑀦𑁆𑀦𑀁’’𑀢𑀺 𑀇𑀤𑀸𑀦𑀺 𑀉𑀧𑁆𑀧𑀦𑁆𑀦𑀁. ‘‘𑀧𑀳𑀸𑀦𑀸𑀬𑀸’’𑀢𑀺 𑀏𑀢𑁆𑀣 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀢𑀸𑀧𑀸𑀤𑀦𑀓𑀭𑀡𑀢𑁆𑀣𑀁’’𑀢𑀺. 𑀢𑀢𑁆𑀣 𑀅𑀦𑀼𑀧𑁆𑀧𑀸𑀤𑁄 𑀥𑀫𑁆𑀫𑁄 𑀬𑁂𑀲𑀁 𑀢𑁂 𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀸. 𑀫𑀕𑁆𑀕𑁂𑀦 𑀧𑀳𑀻𑀦𑀸 𑀅𑀓𑀼𑀲𑀮 𑀥𑀫𑁆𑀫𑀸. 𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀸𑀦𑀁 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. 𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀢𑀸𑀬 𑀆𑀧𑀸𑀤𑀦𑀁. 𑀢𑀲𑁆𑀲 𑀓𑀭𑀡𑀦𑁆𑀢𑀺 𑀲𑀫𑀸𑀲𑁄. ‘‘𑀤𑀺𑀲𑁆𑀯𑀸’’𑀢𑀺 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺 𑀯𑀢𑁆𑀣𑀼𑀁 𑀤𑀺𑀲𑁆𑀯𑀸. ‘‘𑀧𑀘𑁆𑀘𑀬𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁆𑀣𑀁’’𑀢𑀺 𑀧𑀘𑁆𑀘𑀬𑀪𑀽𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁆𑀣𑀁. ‘‘𑀅𑀧𑀢𑁆𑀢𑀸’’𑀢𑀺 𑀇𑀤𑀸𑀦𑀺 𑀅𑀧𑀢𑁆𑀢𑀸. ‘‘𑀲𑀫𑀬𑁂’’𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀦𑀯𑀫𑀓𑁆𑀔𑀡𑁂. ‘‘𑀦𑀺𑀬𑀸𑀫𑀁 𑀦 𑀑𑀓𑁆𑀓𑀫𑀦𑁆𑀢𑀻’’𑀢𑀺 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀦 𑀑𑀓𑁆𑀓𑀫𑀦𑁆𑀢𑀺. 𑀦𑀧𑁆𑀧𑀯𑀺𑀲𑀦𑁆𑀢𑀺. 𑀓𑀺𑀮𑁂𑀲𑁂𑀳𑀺 𑀅𑀓𑁄𑀧𑁂𑀢𑀩𑁆𑀩𑀢𑀸𑀬 𑀅𑀓𑀼𑀧𑁆𑀧𑁄 𑀥𑀫𑁆𑀫𑁄 𑀬𑀲𑁆𑀲𑀸𑀢𑀺 𑀅𑀓𑀼𑀧𑁆𑀧 𑀥𑀫𑁆𑀫𑁄. 𑀔𑀻𑀡𑀸𑀲𑀯𑁄. 𑀅𑀓𑀼𑀧𑁆𑀧 𑀥𑀫𑁆𑀫𑀲𑁆𑀲 𑀪𑀸𑀯𑁄 𑀅𑀓𑀼𑀧𑁆𑀧 𑀥𑀫𑁆𑀫𑀢𑀸. 𑀅𑀭𑀳𑀢𑁆𑀢 𑀨𑀮𑀁. ‘‘𑀢𑁂𑀲𑀁’’𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀧𑀳𑀸𑀦𑀸𑀬𑀸𑀢𑀺 𑀓𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀥𑀫𑁆𑀫𑁂𑀲𑀼 𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀪𑀸𑀯𑀦𑀸 𑀓𑀫𑁆𑀫𑁂 𑀫𑀢𑁆𑀣𑀓𑀁 𑀧𑀢𑁆𑀢𑁂𑀆𑀤𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀸𑀧𑀺 𑀧𑀸𑀧𑀓𑀸 𑀧𑀳𑀺𑀬𑁆𑀬𑀦𑁆𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸𑀧𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸𑀧𑀺 𑀓𑀼𑀲𑀮𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀦𑁆𑀦𑀸𑀧𑀺 𑀪𑀸𑀯𑀦𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀏𑀲𑀦𑀬𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺𑀆𑀤𑀻𑀲𑀼. 𑀏𑀯𑀁 𑀘𑀢𑀽𑀲𑀼 𑀫𑀼𑀔𑁂𑀲𑀼 𑀏𑀓𑁂𑀓𑀫𑀼𑀔𑁂𑀦𑀧𑀺 𑀲𑀫𑁆𑀫𑀸 𑀧𑀤𑀳𑀦𑁆𑀢𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀏𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀁.

𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀥𑀫𑁆𑀫𑀯𑀯𑀢𑁆𑀣𑀸𑀦𑀜𑁆𑀜𑀸𑀡𑁂𑀦 𑀜𑀸𑀢𑀩𑁆𑀩𑀸 𑀲𑀩𑁆𑀩𑁂 𑀧𑀭𑀫𑀢𑁆𑀣 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀦𑀸𑀫. ‘‘𑀅𑀪𑀺𑀜𑁆𑀜𑀸 𑀲𑀺𑀤𑁆𑀥𑀻’’𑀢𑀺 𑀅𑀪𑀺𑀚𑀸𑀦𑀦 𑀓𑀺𑀘𑁆𑀘𑀲𑀺𑀤𑁆𑀥𑀺. 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀩𑁆𑀩𑀸 𑀘𑀢𑀼𑀲𑀘𑁆𑀘 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦𑀸𑀫. 𑀢𑁂𑀳𑀺 𑀤𑀼𑀓𑁆𑀔𑀲𑀘𑁆𑀘 𑀥𑀫𑁆𑀫𑀸 𑀧𑀭𑀺𑀜𑁆𑀜𑀸𑀢𑀩𑁆𑀩𑀪𑀸𑀯𑁂𑀦, 𑀲𑀫𑀼𑀤𑀬 𑀲𑀘𑁆𑀘 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩 𑀪𑀸𑀯𑁂𑀦, 𑀦𑀺𑀭𑁄𑀥𑀲𑀘𑁆𑀘 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩 𑀪𑀸𑀯𑁂𑀦, 𑀫𑀕𑁆𑀕𑀲𑀘𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀪𑀸𑀯𑁂𑀦 𑀜𑀸𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺. ‘‘𑀪𑀸𑀯𑀦𑀸𑀲𑀺𑀤𑁆𑀥𑀻’’𑀢𑀺 𑀪𑀸𑀯𑀦𑀸𑀓𑀺𑀘𑁆𑀘 𑀲𑀺𑀤𑁆𑀥𑀺. 𑀢𑀁 𑀲𑀁𑀬𑀼𑀢𑁆𑀢𑀓𑁂 𑀇𑀫𑀸𑀬𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀪𑀗𑁆𑀕𑁂 𑀧𑀦𑀸’’𑀢𑀺 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 𑀧𑀦. ‘‘𑀘𑀺𑀢𑁆𑀢 𑀘𑁂𑀢𑀲𑀺𑀓𑀭𑀸𑀲𑀻’’𑀢𑀺 𑀲𑀳 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲 𑀥𑀫𑁆𑀫𑀧𑀭𑀺𑀬𑀸 𑀧𑀦𑁆𑀦𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺. ‘‘𑀢𑀢𑁆𑀣 𑀧𑀦𑀸’’𑀢𑀺 𑀯𑀺𑀪𑀗𑁆𑀕𑁂 𑀢𑀲𑁆𑀫𑀺𑀁 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 𑀧𑀦. ‘‘𑀇𑀥𑀸’’𑀢𑀺 𑀇𑀫𑀲𑁆𑀫𑀺𑀁 𑀲𑀗𑁆𑀕𑀳𑁂.

𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀦𑀸𑀫 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀫𑁆𑀫𑁂, 𑀲𑀗𑁆𑀖𑁂, 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀸𑀦𑀺. 𑀢𑀢𑁆𑀣 ‘‘𑀅𑀭𑀺𑀬𑀓𑀦𑁆𑀢𑁂𑀳𑀻’’𑀢𑀺 𑀅𑀭𑀺𑀬𑀚𑀦𑁂𑀳𑀺 𑀓𑀸𑀫𑀺𑀢𑁂𑀳𑀺 𑀇𑀘𑁆𑀙𑀺𑀢𑁂𑀳𑀺. ‘‘𑀲𑀻𑀮𑁂𑀳𑀻’’𑀢𑀺 𑀧𑀜𑁆𑀘𑀦𑀺𑀘𑁆𑀘𑀲𑀻𑀮𑁂𑀳𑀺, 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑁂𑀳𑀺 𑀯𑀸. ‘‘𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀽’’𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀓𑀺𑀘𑁆𑀘𑁂𑀲𑀼.

‘‘𑀲𑁄𑀴𑀲𑀳𑀺𑀓𑀺𑀘𑁆𑀘𑁂𑀳𑀻’’𑀢𑀺 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑁂 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀲𑁄𑀴𑀲𑀳𑀺 𑀓𑀺𑀘𑁆𑀘𑁂𑀳𑀺. 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀢𑀺𑀆𑀤𑀻𑀳𑀺 𑀲𑁄𑀴𑀲𑀳𑀺 𑀅𑀢𑁆𑀣𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀅𑀢𑁆𑀣𑀸 𑀧𑀭𑀢𑁄 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀲𑀢𑀺 𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀯𑀼𑀢𑁆𑀢𑀁, 𑀓𑀣𑀁 𑀧𑀦 𑀲𑀸𑀲𑀢𑀺 𑀲𑀫𑁆𑀩𑁄𑀥𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀆𑀳 ‘‘𑀲𑀸𑀳𑀻’’𑀢𑀺𑀆𑀤𑀺𑀁. 𑀏𑀲𑀦𑀬𑁄 𑀲𑁂𑀲𑀩𑁄𑀚𑁆𑀛𑀗𑁆𑀕𑁂𑀲𑀼𑀧𑀺. ‘‘𑀢𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼. ‘‘𑀮𑀻𑀦𑀲𑀗𑁆𑀓𑁄𑀘 𑀓𑁄𑀲𑀚𑁆𑀚𑀧𑀓𑁆𑀔𑀁’’𑀢𑀺 𑀮𑀻𑀦𑀧𑀓𑁆𑀔 𑀲𑀗𑁆𑀓𑁄𑀘 𑀧𑀓𑁆𑀔𑀓𑁄𑀲𑀚𑁆𑀚 𑀧𑀓𑁆𑀔𑀁. 𑀥𑀼𑀭𑀁 𑀲𑀼𑀝𑁆𑀞𑀼 𑀧𑀕𑁆𑀕𑀡𑁆𑀳𑀸𑀢𑀺 𑀉𑀓𑁆𑀔𑀺𑀧𑀢𑀻𑀢𑀺 𑀥𑀼𑀭𑀲𑀫𑁆𑀧𑀕𑁆𑀕𑀳𑁄. ‘‘𑀥𑀼𑀭𑀁’’𑀢𑀺 𑀲𑀫𑀣𑀥𑀼𑀭𑀁 𑀯𑀺𑀧𑀲𑁆𑀲𑀦𑀸 𑀥𑀼𑀭𑀜𑁆𑀘. ‘‘𑀅𑀭𑀢𑀺 𑀉𑀓𑁆𑀓𑀡𑁆𑀞 𑀧𑀓𑁆𑀔𑀁’’𑀢𑀺 𑀅𑀭𑀢𑀺𑀧𑀓𑁆𑀔 𑀦𑀺𑀩𑁆𑀩𑀺𑀤𑀸𑀧𑀓𑁆𑀔𑀁. 𑀥𑀫𑁆𑀫𑁂 𑀭𑀢𑀺 𑀥𑀫𑁆𑀫𑀭𑀢𑀺. 𑀥𑀫𑁆𑀫𑁂 𑀦𑀦𑁆𑀤𑀻 𑀥𑀫𑁆𑀫𑀦𑀦𑁆𑀤𑀻. 𑀥𑀫𑁆𑀫𑁂 𑀆𑀭𑀸𑀫𑁄 𑀥𑀫𑁆𑀫𑀸𑀭𑀸𑀫𑁄. ‘‘𑀲𑀸𑀭𑀫𑁆𑀪𑁄’’ 𑀦𑀸𑀫 𑀘𑀺𑀢𑁆𑀢𑀯𑀺𑀳𑁂𑀲𑀸. ‘‘𑀤𑀭𑀣𑁄’’ 𑀦𑀸𑀫 𑀘𑀺𑀢𑁆𑀢𑀲𑀦𑁆𑀢𑀸𑀧𑁄. 𑀲𑀫𑀸𑀳𑀺𑀢𑁄 𑀪𑀺𑀓𑁆𑀔𑀯𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀯𑀘𑀦𑀢𑁄 𑀧𑀜𑁆𑀜𑀸𑀬 𑀲𑀫𑀸𑀥𑀺 𑀧𑀸𑀤𑀓𑀢𑀸 𑀧𑀸𑀓𑀝𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀲𑁆𑀲𑀸’’𑀢𑀺𑀆𑀤𑀺𑀁. 𑀲𑀫𑀁 𑀅𑀯𑀺𑀲𑀫𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀯𑀳𑀢𑀺 𑀲𑀻𑀮𑁂𑀦𑀸𑀢𑀺 𑀲𑀫𑀯𑀸𑀳𑀻. 𑀲𑀫𑀯𑀸𑀳𑀺𑀲𑁆𑀲 𑀪𑀸𑀯𑁄 𑀲𑀫𑀯𑀸𑀳𑀺𑀢𑀸.

𑀲𑀸 𑀧𑀦 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲𑀸’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. ‘‘𑀯𑀺𑀲𑀸𑀔𑀸’’𑀢𑀺 𑀆𑀮𑀧𑀦 𑀧𑀤𑀁. ‘𑀲𑀩𑁆𑀩𑁂 𑀮𑁄𑀓𑀼𑀢𑁆𑀢𑀭𑁂 𑀳𑁄𑀦𑁆𑀢𑀻’𑀢𑀺 𑀯𑀘𑀦𑀲𑁆𑀲 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀧𑀦 𑀲𑀢𑁆𑀢𑀢𑀺𑀁𑀲𑀧𑁆𑀧𑀪𑁂𑀤𑀸’’𑀢𑀺𑀆𑀤𑀺𑀫𑀸𑀳. 𑀦 𑀯𑀝𑁆𑀞𑀸𑀦𑀸𑀦𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀦𑀯𑀝𑁆𑀞𑀸𑀦𑀺𑀓𑀁. ‘‘𑀮𑁄𑀓𑀼𑀢𑁆𑀢𑀭𑁂’’𑀢𑀺 𑀮𑁄𑀓𑀼𑀢𑁆𑀢𑀭 𑀘𑀺𑀢𑁆𑀢𑁂. ‘‘𑀅𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁’’𑀢𑀺 𑀅𑀢𑁆𑀢𑀦𑀸 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑀸𑀦𑀁. ‘‘𑀢𑁂’’𑀢𑀺 𑀩𑁄𑀥𑀺𑀧𑀓𑁆𑀔𑀺𑀬 𑀥𑀫𑁆𑀫𑀸. 𑀏𑀢𑁂𑀦 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀼𑀡𑁆𑀟𑀮𑀺𑀬𑀸’’𑀢𑀺 𑀏𑀯𑀁 𑀦𑀸𑀫𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀮𑀧𑀢𑀺. ‘‘𑀯𑀺𑀚𑁆𑀚𑀸’’𑀢𑀺 𑀫𑀕𑁆𑀕𑀯𑀺𑀚𑁆𑀚𑀸. ‘‘𑀯𑀺𑀫𑀼𑀢𑁆𑀢𑀻’’𑀢𑀺 𑀨𑀮𑀯𑀺𑀫𑀼𑀢𑁆𑀢𑀺.

𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁫. 𑀲𑀩𑁆𑀩𑀲𑀗𑁆𑀕𑀳𑁂. ‘‘𑀧𑀜𑁆𑀘𑀭𑀸𑀲𑀬𑁄’’𑀢𑀺 𑀧𑀜𑁆𑀘𑀲𑀗𑁆𑀕𑀳𑀸. ‘‘𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁’’𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑁂𑀤𑁂𑀦, 𑀅𑀚𑁆𑀛𑀢𑁆𑀢 𑀩𑀳𑀺𑀤𑁆𑀥𑀸𑀪𑁂𑀤𑁂𑀦, 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑁂𑀤𑁂𑀦, 𑀳𑀻𑀦𑀧𑀡𑀻𑀢𑀪𑁂𑀤𑁂𑀦, 𑀤𑀽𑀭𑀲𑀦𑁆𑀢𑀺𑀓𑀪𑁂𑀤𑁂𑀦 𑀘 𑀪𑀺𑀦𑁆𑀦𑀸𑀦𑀁. ‘‘𑀉𑀧𑀧𑀢𑁆𑀢𑀺 𑀤𑁆𑀯𑀸𑀭𑁂𑀲𑀽’’𑀢𑀺 𑀘𑀓𑁆𑀔𑀸𑀤𑀺 𑀤𑁆𑀯𑀸𑀭𑁂𑀲𑀼. ‘‘𑀓𑀫𑁆𑀫𑀤𑁆𑀯𑀸𑀭𑁂𑀲𑀽’’𑀢𑀺 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀸𑀤𑀻𑀲𑀼. ‘‘𑀲𑀗𑁆𑀕𑀫𑁆𑀫𑀸’’𑀢𑀺 𑀲𑀗𑁆𑀕𑀦𑁆𑀢𑁆𑀯𑀸. ‘‘𑀲𑀫𑀸𑀕𑀫𑁆𑀫𑀸’’𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. ‘‘𑀲𑀸𑀥𑀸𑀭𑀡 𑀓𑀺𑀘𑁆𑀘𑀸𑀦𑀺 𑀯𑀸’’𑀢𑀺 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀳𑀺 𑀲𑀸𑀥𑀸𑀭𑀡 𑀓𑀺𑀘𑁆𑀘𑀸𑀦𑀺𑀯𑀸. 𑀧𑀸𑀴𑀺𑀧𑀸𑀞𑁂. ‘‘𑀓𑀺𑀜𑁆𑀘𑀸’’𑀢𑀺 𑀓𑀲𑁆𑀫𑀸 𑀘. ‘‘𑀲𑀗𑁆𑀔𑀸𑀭𑁂𑀯𑀤𑁂𑀣𑀸’’𑀢𑀺 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀸 𑀇𑀢𑀺 𑀢𑀼𑀫𑁆𑀳𑁂 𑀯𑀤𑁂𑀣. ‘‘𑀓𑀺𑀜𑁆𑀘𑀲𑀗𑁆𑀔𑀢𑀁’’𑀢𑀺 𑀓𑀢𑀫𑀜𑁆𑀘𑀲𑀗𑁆𑀔𑀢𑀁. ‘‘𑀭𑀽𑀧𑀁 𑀭𑀽𑀧𑀢𑁆𑀣𑀸𑀬𑀸’’𑀢𑀺 𑀭𑀽𑀧𑀯𑀺𑀓𑀢𑀺𑀬𑀸 𑀚𑀸𑀢𑀢𑁆𑀣𑀸𑀬 𑀭𑀽𑀧𑀲𑀗𑁆𑀔𑀸𑀢𑀁 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀪𑁄𑀕𑁄 𑀦𑀸𑀫 𑀯𑀢𑁆𑀣𑀸𑀪𑀭𑀡𑀸𑀤𑀺𑀓𑁄 𑀅𑀦𑁆𑀢𑁄𑀪𑁄𑀕𑁄. 𑀧𑀭𑀺𑀪𑁄𑀕𑁄 𑀦𑀸𑀫 𑀫𑀜𑁆𑀘𑀧𑀻𑀞𑀸𑀤𑀺𑀓𑁄 𑀩𑀸𑀳𑀺𑀭 𑀧𑀭𑀺𑀪𑁄𑀕𑁄. 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀯𑁂𑀤𑀦𑀦𑁆𑀢𑀺 𑀅𑀥𑀺𑀓𑀸𑀭𑁄. 𑀲𑁂𑀲𑁂𑀲𑀼𑀧𑀺 𑀲𑀜𑁆𑀜𑀸𑀲𑀗𑁆𑀔𑀸𑀭 𑀯𑀺𑀜𑁆𑀜𑀸𑀡𑁂𑀲𑀼𑀧𑀺. ‘‘𑀤𑀸𑀦𑀁 𑀤𑀸𑀦𑀢𑁆𑀣𑀸𑀬𑀸’’𑀢𑀺 𑀤𑀸𑀦𑀧𑀼𑀜𑁆𑀜𑀲𑁆𑀲 𑀚𑀸𑀢𑀢𑁆𑀣𑀸𑀬. 𑀤𑀸𑀦𑀲𑀗𑁆𑀔𑀸𑀢𑀁 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀯𑀸 𑀤𑀸𑀦𑀲𑁆𑀲 𑀅𑀢𑁆𑀣𑁄 𑀤𑀸𑀦𑀢𑁆𑀣𑁄. ‘‘𑀅𑀢𑁆𑀣𑁄’’𑀢𑀺 𑀘 𑀯𑀺𑀧𑀸𑀓𑀢𑁆𑀣𑁄 𑀨𑀮𑀢𑁆𑀣𑁄. 𑀤𑀸𑀦𑀯𑀺𑀧𑀸𑀓𑀢𑁆𑀣𑀸𑀬 𑀤𑀸𑀦𑀨𑀮𑀢𑁆𑀣𑀸𑀬 𑀤𑀸𑀦𑀧𑀼𑀜𑁆𑀜𑀲𑀗𑁆𑀔𑀸𑀢𑀁 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. ‘‘𑀅𑀦𑀼𑀬𑀼𑀜𑁆𑀚𑀦𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀸. ‘‘𑀢𑀻𑀲𑀼 𑀥𑀫𑁆𑀫𑁂𑀲𑀼 𑀓𑀺𑀮𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀓𑀺𑀮𑀫𑀺𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀢𑀣𑀸𑀳𑀺 𑀬𑀣𑀸’’𑀢𑀺𑀆𑀤𑀺𑀁. ‘‘𑀲𑀼𑀔𑀲𑀜𑁆𑀜𑀺𑀢𑁂𑀲𑀼 𑀧𑀝𑀺𑀲𑀭𑀡𑁂𑀲𑀽’’𑀢𑀺 𑀘𑀺𑀢𑁆𑀢𑀲𑀸𑀢𑀘𑀺𑀢𑁆𑀢𑀭𑀢𑀺 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀝𑀺𑀲𑀭𑀡𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. ‘‘𑀢𑀸𑀳𑀻’’𑀢𑀺 𑀲𑀫𑁆𑀧𑀢𑁆𑀢𑀻𑀳𑀺. ‘‘𑀢𑀸’’𑀢𑀺 𑀲𑀫𑁆𑀧𑀢𑁆𑀢𑀺𑀬𑁄. 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀲𑀼𑀔𑀲𑀜𑁆𑀜𑀺𑀢𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑀺𑀭𑁂𑀓𑀢𑀭𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀢𑀤𑀢𑁆𑀣𑀸𑀬 𑀪𑀕𑀯𑀸 𑀢𑀁 𑀯𑁂𑀤𑀦𑀁 𑀯𑀺𑀲𑀼𑀁 𑀏𑀓𑀁 𑀔𑀦𑁆𑀥𑀁 𑀓𑀢𑁆𑀯𑀸 𑀔𑀦𑁆𑀥 𑀤𑁂𑀲𑀦𑀁 𑀤𑁂𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲𑀦𑀬𑁄 𑀧𑀭𑀢𑁆𑀣𑀧𑀺. ‘‘𑀜𑀸𑀡𑀲𑀫𑁆𑀫𑀢𑀁’’𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀜𑀸𑀡𑀲𑀫𑁆𑀫𑀢𑀁. ‘‘𑀧𑀭𑀫𑀁 𑀅𑀢𑁆𑀢𑀸𑀦𑀁 𑀓𑀢𑁆𑀯𑀸’’𑀢𑀺 𑀮𑁄𑀓𑁂 𑀯𑀺𑀜𑁆𑀜𑀼𑀢𑁆𑀢𑀁 𑀧𑀭𑀫𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀚𑀸𑀦𑀦𑀁 𑀧𑀭𑀫𑀁 𑀅𑀢𑁆𑀢𑀸𑀦𑀁 𑀓𑀢𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀧𑀸𑀓𑀝𑀁. ‘‘𑀬𑀢𑁆𑀣𑀪𑀼𑀜𑁆𑀚𑀢𑀻’’𑀢𑀺𑀆𑀤𑀻𑀲𑀼. ‘‘𑀬𑀢𑁆𑀣 𑀪𑀼𑀜𑁆𑀚𑀢𑀻’’𑀢𑀺 𑀬𑀲𑁆𑀫𑀺𑀁 𑀪𑀸𑀚𑀦𑁂 𑀪𑀼𑀜𑁆𑀚𑀢𑀺. ‘‘𑀬𑀜𑁆𑀘 𑀪𑀼𑀜𑁆𑀚𑀢𑀻’’𑀢𑀺 𑀬𑀜𑁆𑀘 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺. ‘‘𑀬𑁂𑀦 𑀘 𑀪𑀼𑀜𑁆𑀚𑀢𑀻’’𑀢𑀺 𑀬𑁂𑀦𑀩𑁆𑀬𑀜𑁆𑀚𑀦𑁂𑀦 𑀪𑀼𑀜𑁆𑀚𑀢𑀺. ‘‘𑀬𑁄 𑀘 𑀪𑁄𑀚𑀓𑁄’’𑀢𑀺 𑀲𑀫𑀻𑀧𑁂 𑀞𑀢𑁆𑀯𑀸 𑀧𑀭𑀺𑀯𑁂𑀲𑀓𑁄. ‘‘𑀬𑁄 𑀘 𑀪𑀼𑀜𑁆𑀚𑀺𑀢𑀸’’𑀢𑀺 𑀬𑁄 𑀘 𑀪𑀼𑀜𑁆𑀚𑀓𑁄.

‘‘𑀲𑀸𑀲𑀯𑀸 𑀏𑀯𑀸’’𑀢𑀺 𑀲𑀸𑀲𑀯𑀸 𑀦𑀸𑀫 𑀮𑁄𑀓𑀺𑀬 𑀥𑀫𑁆𑀫𑀸. ‘‘𑀉𑀲𑁆𑀲𑀸𑀳𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻’’𑀢𑀺 𑀅𑀩𑁆𑀬𑀸𑀧𑀸𑀭 𑀥𑀫𑁆𑀫𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀅𑀩𑁆𑀬𑀸𑀧𑀸𑀭 𑀥𑀫𑁆𑀫𑀸𑀦𑀁 𑀏𑀓𑀦𑁆𑀢𑁂𑀦 𑀉𑀲𑁆𑀲𑀸𑀳𑁄 𑀦𑀸𑀫 𑀅𑀢𑁆𑀣𑀺. 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 𑀨𑀮𑀢𑁆𑀣𑀸𑀬 𑀉𑀲𑁆𑀲𑀸𑀳𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺. ‘‘𑀆𑀓𑀺𑀭𑀺𑀢𑁆𑀯𑀸’’𑀢𑀺 𑀧𑀢𑁆𑀣𑀭𑀺𑀢𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀩𑁄𑀥𑀁.

𑀥𑀸𑀢𑀼𑀲𑀗𑁆𑀕𑀳𑁂. ‘‘𑀅𑀢𑁆𑀢𑀦𑁄 𑀏𑀯 𑀲𑀪𑀸𑀯𑀁’’𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀏𑀯𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀈𑀳𑀸 𑀘 𑀩𑁆𑀬𑀸𑀧𑀸𑀭𑁄 𑀘𑀸’’𑀢𑀺 𑀅𑀪𑀺𑀓𑁆𑀓𑀫𑀸𑀫𑀺 𑀧𑀝𑀺𑀓𑁆𑀓𑀫𑀸𑀫𑀻𑀢𑀺𑀆𑀤𑀺𑀦𑀸 𑀉𑀲𑁆𑀲𑀸𑀳𑁄 𑀘, 𑀅𑀪𑀺𑀓𑁆𑀓𑀫𑀦𑀸𑀤𑀺 𑀩𑁆𑀬𑀸𑀧𑀸𑀭𑁄 𑀘. ‘‘𑀦 𑀘 𑀚𑀻𑀯𑀬𑁄𑀕𑀸’’𑀢𑀺 𑀦 𑀘 𑀮𑁄𑀓𑀺𑀬𑀫𑀳𑀸𑀚𑀦 𑀲𑀫𑁆𑀫𑀢𑁂𑀦 𑀚𑀻𑀯𑁂𑀦 𑀬𑀼𑀢𑁆𑀢𑀸. 𑀅𑀝𑁆𑀞𑀓𑀣𑀸𑀧𑀸𑀞𑁂. 𑀬𑀸𑀬𑀢𑀺 𑀏𑀢𑁆𑀣𑀸𑀢𑀺 𑀬𑀦𑁆𑀢𑀁. 𑀉𑀤𑀼𑀓𑁆𑀔𑀮𑀁. 𑀬𑀦𑁆𑀢 𑀘𑀓𑁆𑀓𑀬𑀝𑁆𑀞𑀺𑀦𑀸𑀫 𑀬𑀦𑁆𑀢 𑀘𑀓𑁆𑀓𑀲𑀫𑁆𑀩𑀦𑁆𑀥𑀸 𑀫𑀼𑀲𑀮𑀬𑀝𑁆𑀞𑀺. 𑀅𑀭𑀡𑀻 𑀯𑀼𑀘𑁆𑀘𑀢𑀺 𑀅𑀕𑁆𑀕𑀺𑀦𑀺𑀩𑁆𑀩𑀢𑁆𑀢𑀓𑀢𑁆𑀣𑀸𑀬 𑀓𑀢𑀸 𑀤𑁆𑀯𑁂 𑀲𑀸𑀭𑀖𑀝𑀺𑀓𑀸. 𑀅𑀥𑀭𑀸𑀭𑀡𑀻 𑀦𑀸𑀫 𑀳𑁂𑀝𑁆𑀞𑀸𑀭𑀡𑀻. 𑀉𑀢𑁆𑀢𑀭𑀸𑀭𑀡𑀻 𑀦𑀸𑀫 𑀉𑀤𑁆𑀥𑀸𑀭𑀡𑀻. ‘‘𑀲𑀮𑁆𑀮𑀫𑀺𑀯𑀸’’𑀢𑀺 𑀓𑀡𑁆𑀟𑁄𑀯𑀺𑀬. ‘‘𑀲𑀽𑀮𑀫𑀺𑀯𑀸’’𑀢𑀺 𑀯𑀺𑀚𑁆𑀛𑀦𑀓𑀤𑀡𑁆𑀟𑁄 𑀯𑀺𑀬. ‘‘𑀆𑀢𑀼𑀭𑀸𑀯𑀺𑀬𑀸’’𑀢𑀺 𑀢𑁂𑀳𑀺𑀲𑀮𑁆𑀮𑀲𑀽𑀮𑁂𑀳𑀺 𑀯𑀺𑀤𑁆𑀥𑀕𑀺𑀮𑀸𑀦𑀸 𑀯𑀺𑀬. 𑀅𑀬𑀣𑀸𑀪𑀼𑀘𑁆𑀘 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀅𑀬𑀣𑀸𑀪𑀽𑀢𑀁 𑀲𑀢𑁆𑀢𑀧𑀼𑀕𑁆𑀕𑀮𑀸𑀤𑀺𑀦𑀺𑀫𑀺𑀢𑁆𑀢𑀁. ‘‘𑀯𑀦𑀫𑀺𑀕𑁄 𑀯𑀺𑀬𑀸’’𑀢𑀺 𑀢𑀺𑀡 𑀭𑀽𑀧𑁂 𑀧𑀼𑀭𑀺𑀲 𑀲𑀜𑁆𑀜𑀸𑀮𑀸𑀪𑁄 𑀯𑀦𑀫𑀺𑀕𑁄 𑀯𑀺𑀬. ‘‘𑀅𑀗𑁆𑀕𑀸𑀭𑀓𑀸𑀲𑀼𑀬𑀁’’𑀢𑀺 𑀅𑀗𑁆𑀕𑀸𑀭𑀓𑀽𑀧𑁂. ‘‘𑀦𑀸𑀦𑀸𑀯𑀺𑀥𑀼𑀧𑀤𑁆𑀤𑀯 𑀦𑀺𑀫𑀺𑀢𑁆𑀢𑀢𑁄’’𑀢𑀺 𑀦𑀸𑀦𑀸𑀯𑀺𑀥𑀸𑀦𑀁 𑀉𑀧𑀤𑁆𑀤𑀯𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀘𑁆𑀘𑀬𑀢𑁄. ‘‘𑀯𑀦𑀫𑀓𑁆𑀓𑀝𑁄 𑀯𑀺𑀬𑀸’’𑀢𑀺 𑀯𑀦𑀯𑀸𑀦𑀭𑁄 𑀯𑀺𑀬. 𑀤𑀼𑀓𑁆𑀔𑁂𑀦 𑀤𑀫𑀦𑀁 𑀅𑀲𑁆𑀲𑀸𑀢𑀺 𑀤𑀼𑀤𑁆𑀤𑀫𑀦𑁄. ‘‘𑀅𑀲𑁆𑀲𑀔𑀴𑀼𑀗𑁆𑀓𑁄’’𑀢𑀺 𑀤𑀼𑀝𑁆𑀞 𑀅𑀲𑁆𑀲𑁄. ‘‘𑀬𑀢𑁆𑀣 𑀓𑀸𑀫𑀦𑀺𑀧𑀸𑀢𑀺𑀢𑁄’’𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀢𑀺𑀢𑀼𑀁 𑀓𑀸𑀫𑁂𑀢𑀺 𑀇𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣 𑀦𑀺𑀧𑀸𑀢𑀺𑀢𑁄. 𑀧𑀼𑀕𑁆𑀕𑀮𑀯𑀲𑁂 𑀅𑀯𑀢𑁆𑀢𑀺𑀢𑁆𑀯𑀸 𑀆𑀭𑀫𑁆𑀫𑀡𑁂𑀲𑀼 𑀬𑀤𑀺𑀘𑁆𑀙𑀓𑀁 𑀦𑀺𑀧𑀢𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀭𑀗𑁆𑀕𑀦𑀝𑁄 𑀯𑀺𑀬𑀸’’𑀢𑀺 𑀲𑀫𑀚𑁆𑀚𑀦𑀝𑀓𑁄 𑀯𑀺𑀬. 𑀲𑀪𑀸𑀯𑀢𑁄 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀢𑀻𑀢𑀺 𑀲𑀦𑁆𑀢𑁄. 𑀢𑀣𑁄𑀢𑀺 𑀘 𑀅𑀯𑀺𑀢𑀣𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁. 𑀅𑀜𑁆𑀜𑁄 𑀧𑀓𑀸𑀭𑁄 𑀅𑀜𑁆𑀜𑀣𑀸. 𑀦𑀢𑁆𑀣𑀺 𑀅𑀜𑁆𑀜𑀣𑀸 𑀅𑀲𑁆𑀲𑀸𑀢𑀺 𑀅𑀦𑀜𑁆𑀜𑀣𑀁. 𑀤𑀼𑀓𑁆𑀔𑀤𑀼𑀓𑁆𑀔𑀁 𑀦𑀸𑀫 𑀓𑀸𑀬𑀺𑀓𑀤𑀼𑀓𑁆𑀔 𑀘𑁂𑀢𑀲𑀺𑀓𑀤𑀼𑀓𑁆𑀔𑀁. ‘‘𑀓𑀫𑁆𑀫𑀚𑀸𑀦𑀁’’𑀢𑀺 𑀯𑀺𑀧𑀸𑀓𑀓𑁆𑀔𑀦𑁆𑀥𑀓𑀝𑀢𑁆𑀢𑀸 𑀭𑀽𑀧𑀸𑀦𑀁. ‘‘𑀉𑀧𑁆𑀧𑀢𑁆𑀢𑀺𑀬𑀸’’𑀢𑀺 𑀉𑀧𑁆𑀧𑀸𑀤𑀢𑁆𑀣𑀸𑀬. ‘‘𑀧𑀕𑁂𑀯𑀸’’𑀢𑀺 𑀧𑀼𑀭𑁂𑀢𑀭𑀫𑁂𑀯. ‘‘𑀉𑀧𑁆𑀧𑀦𑁆𑀦𑀁 𑀧𑀻’’𑀢𑀺 𑀉𑀧𑁆𑀧𑀦𑁆𑀦𑀫𑁆𑀧𑀺 𑀘𑀓𑁆𑀔𑀼. ‘‘𑀧𑀯𑀢𑁆𑀢𑀺𑀬𑀸’’𑀢𑀺 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀬𑀸 𑀞𑀺𑀢𑀢𑁆𑀣𑀸𑀬. ‘‘𑀧𑀝𑀺𑀚𑀕𑁆𑀕𑀦 𑀤𑀼𑀓𑁆𑀔𑀁’’𑀢𑀺 𑀲𑁄𑀥𑀦 𑀤𑀼𑀓𑁆𑀔𑀁. 𑀧𑀘𑁆𑀘𑀬𑀯𑁂𑀓𑀮𑁆𑀮𑀁 𑀦𑀸𑀫 𑀆𑀳𑀸𑀭𑀘𑁆𑀙𑁂𑀤𑀸𑀤𑀺𑀓𑀁. 𑀦𑀦𑀼 𑀪𑀺𑀚𑁆𑀚𑀦𑀪𑀬𑁂𑀦 𑀧𑀕𑁂𑀯 𑀧𑀘𑁆𑀘𑀬𑀲𑀫𑁆𑀧𑀸𑀤𑀦𑀁 𑀦𑀸𑀫 𑀲𑀗𑁆𑀔𑀸𑀭 𑀤𑀼𑀓𑁆𑀔𑀫𑁂𑀯 𑀲𑀺𑀬𑀸𑀢𑀺. 𑀲𑀘𑁆𑀘𑀁. 𑀇𑀥 𑀧𑀦 𑀆𑀲𑀦𑁆𑀦𑁂 𑀪𑀺𑀚𑁆𑀚𑀦𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀓𑀢𑀁 𑀧𑀘𑁆𑀘𑀬 𑀲𑀫𑁆𑀧𑀸𑀤𑀦𑀁 𑀅𑀥𑀺𑀧𑁆𑀧𑁂𑀢𑀁. ‘‘𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀁𑀯𑀺𑀥𑀸𑀦 𑀤𑀼𑀓𑁆𑀔𑀁’’𑀢𑀺 𑀦𑀸𑀦𑀸𑀪𑀬𑀢𑁄 𑀭𑀓𑁆𑀔𑀡𑀲𑁆𑀲 𑀘 𑀆𑀯𑀭𑀡𑀲𑁆𑀲 𑀘 𑀕𑁄𑀧𑀦𑀲𑁆𑀲 𑀘 𑀲𑀁𑀯𑀺𑀥𑀸𑀦 𑀤𑀼𑀓𑁆𑀔𑀁. ‘‘𑀢𑀤𑀼𑀪𑀬𑁂𑀦 𑀲𑀳𑁂𑀯 𑀲𑀺𑀚𑁆𑀛𑀢𑀻’’𑀢𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀦𑀺 𑀲𑀗𑁆𑀔𑀸𑀭 𑀓𑀫𑁆𑀫𑀸𑀦𑀺 𑀯𑀸 𑀭𑀓𑁆𑀔𑀸𑀯𑀭𑀡 𑀕𑀼𑀢𑁆𑀢𑀺𑀲𑀁 𑀯𑀺𑀥𑀸𑀦𑀸𑀤𑀻𑀦𑀺𑀯𑀸 𑀓𑀭𑁄𑀦𑁆𑀢𑀸𑀦𑀁 𑀢𑀁 𑀤𑀼𑀓𑁆𑀔 𑀤𑀼𑀓𑁆𑀔𑀁 𑀢𑀤𑀼𑀪𑀬𑁂𑀦 𑀤𑀼𑀓𑁆𑀔𑁂𑀦 𑀲𑀳𑁂𑀯 𑀲𑀺𑀚𑁆𑀛𑀢𑀺. ‘‘𑀢𑁂𑀲𑀁’’𑀢𑀺 𑀘𑀓𑁆𑀔𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀦𑁆𑀢𑀸𑀦𑀁 𑀦 𑀫𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀯𑀢𑁆𑀢𑀺 𑀦𑀺𑀭𑁄𑀥 𑀪𑀽𑀢𑀲𑁆𑀲𑀸’’𑀢𑀺 𑀧𑀯𑀢𑁆𑀢𑀺𑀬𑀸 𑀦𑀺𑀭𑁄𑀥 𑀪𑀽𑀢𑀲𑁆𑀲. ‘‘𑀢𑀁 𑀧𑀚𑀳𑀢𑀺 𑀬𑁂𑀯𑀸’’𑀢𑀺 𑀢𑀁 𑀮𑁄𑀪𑀁 𑀧𑀚𑀳𑀢𑀺𑀬𑁂𑀯. ‘‘𑀬𑀸𑀯𑀤𑁂𑀯𑀸’’𑀢𑀺 𑀉𑀧𑀭𑀺𑀫𑀧𑀭𑀺𑀬𑀦𑁆𑀢𑁂𑀦. 𑀅𑀳𑀁 𑀅𑀲𑁆𑀫𑀻𑀢𑀺 𑀧𑀯𑀢𑁆𑀢𑁄 𑀫𑀸𑀦𑁄 𑀅𑀲𑁆𑀫𑀺𑀫𑀸𑀦𑁄. 𑀢𑀲𑁆𑀲 𑀲𑀫𑀼𑀕𑁆𑀖𑀸𑀢𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁. ‘‘𑀧𑀭𑀺𑀜𑁆𑀜𑀸𑀢𑁂𑀲𑀽’’𑀢𑀺 𑀢𑁂𑀲𑀼 𑀅𑀦𑀼𑀲𑀬𑀺𑀢𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀯𑀲𑁂𑀦 𑀧𑀭𑀺𑀜𑁆𑀜𑀸𑀢𑁂𑀲𑀼. ‘‘𑀢𑀩𑁆𑀩𑀺𑀧𑀭𑀻𑀢𑁂𑀦 𑀧𑀦𑀸’’𑀢𑀺 𑀢𑀢𑁄 𑀯𑀺𑀧𑀭𑀻𑀢𑁂𑀦 𑀧𑀦. 𑀅𑀲𑁆𑀫𑀺𑀫𑀸𑀦𑀲𑁆𑀲 𑀅𑀦𑀥𑀺𑀝𑁆𑀞𑀸𑀦𑀪𑀽𑀢𑀸𑀢𑀺𑀆𑀤𑀺 𑀅𑀢𑁆𑀣𑁂𑀦. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥 𑀥𑀫𑁆𑀫𑀸 𑀦𑀸𑀫 𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀲𑀼 𑀧𑀯𑀢𑁆𑀢𑀸 𑀭𑀽𑀧 𑀥𑀫𑁆𑀫𑀸.

𑀲𑀢𑁆𑀢𑁂 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁂 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. 𑀢𑁂𑀲𑀁 𑀲𑀢𑁆𑀢𑀸𑀦𑀁. 𑀤𑀼𑀚𑁆𑀚𑀳𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀮𑁄𑀪𑁄𑀬𑁂𑀯 𑀤𑀼𑀓𑁆𑀔𑀲𑀫𑀼𑀤𑀬𑀸𑀭𑀺𑀬 𑀲𑀘𑁆𑀘𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑀸𑀲𑀯𑀸 𑀓𑀼𑀲𑀮𑀸 𑀓𑀼𑀲𑀮 𑀥𑀫𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁 𑀦𑀸𑀫, 𑀤𑀼𑀓𑁆𑀔 𑀲𑀘𑁆𑀘𑀪𑀽𑀢𑀸𑀦𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀓𑀝𑀢𑁆𑀢𑀸 𑀭𑀽𑀧𑀸𑀦𑀁 𑀲𑀫𑀼𑀤𑀬𑀢𑁆𑀢𑀸 𑀲𑀁𑀯𑀟𑁆𑀠𑀦𑀢𑁆𑀢𑀸. 𑀫𑀽𑀮𑀪𑀸𑀯𑁂𑀦 𑀯𑀼𑀢𑁆𑀢𑀸 ‘𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’𑀢𑀺𑀆𑀤𑀻𑀲𑀼. ‘‘𑀦𑀦𑁆𑀤𑀦𑀲𑀤𑀺𑀲𑀁’’𑀢𑀺 𑀤𑁂𑀯𑀮𑁄𑀓𑁂 𑀦𑀦𑁆𑀤𑀦𑀯𑀦𑀼𑀬𑁆𑀬𑀸𑀦𑀲𑀤𑀺𑀲𑀁. ‘‘𑀆𑀤𑀺𑀧𑀪𑀯𑀧𑀥𑀸𑀦𑀪𑀽𑀢𑀸’’𑀢𑀺 𑀤𑀼𑀓𑁆𑀔 𑀥𑀫𑁆𑀫𑀸𑀦𑀁 𑀆𑀤𑀺𑀪𑀽𑀢𑀸, 𑀧𑀪𑀯𑀪𑀽𑀢𑀸, 𑀧𑀥𑀸𑀦𑀪𑀽𑀢𑀸. ‘‘𑀧𑀪𑀯𑀪𑀽𑀢𑀸’’𑀢𑀺 𑀘 𑀧𑀣𑀫𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸. ‘‘𑀢𑁂𑀲𑀁’’𑀢𑀺 𑀤𑀼𑀓𑁆𑀔 𑀥𑀫𑁆𑀫𑀸𑀦𑀁.

‘‘𑀓𑀢𑁆𑀣𑀘𑀻’’𑀢𑀺 𑀓𑀸𑀫𑀪𑀯𑀸𑀤𑀻𑀲𑀼 𑀓𑀺𑀲𑁆𑀫𑀺𑀜𑁆𑀘𑀺𑀪𑀯𑁂. ‘‘𑀓𑀤𑀸𑀘𑀻’’𑀢𑀺 𑀅𑀢𑀻𑀢𑀸𑀤𑀺𑀓𑀸𑀮𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺𑀓𑀸𑀮𑁂. ‘‘𑀓𑁂𑀲𑀜𑁆𑀘𑀻’’𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀤𑀻𑀲𑀼 𑀲𑀢𑁆𑀢𑁂𑀲𑀼 𑀓𑁂𑀲𑀜𑁆𑀘𑀺𑀲𑀢𑁆𑀢𑀸𑀦𑀁. ‘‘𑀓𑀼𑀢𑁄𑀘𑀻’’𑀢𑀺 𑀩𑀳𑀽𑀲𑀼𑀓𑀸𑀭𑀡𑁂𑀲𑀼 𑀓𑀼𑀢𑁄𑀘𑀺𑀓𑀸𑀭𑀡𑀸. ‘‘𑀓𑀣𑀜𑁆𑀘𑀻’’𑀢𑀺 𑀓𑁂𑀦𑀘𑀺𑀧𑀓𑀸𑀭𑁂𑀦.

‘‘𑀧𑀭𑀺𑀡𑀸𑀫𑁄’’𑀢𑀺 𑀧𑀭𑀺𑀡𑀫𑀦𑀁 𑀅𑀜𑁆𑀜𑀣𑀸𑀪𑀸𑀯𑁄. ‘‘𑀢𑀁 𑀲𑀫𑀗𑁆𑀕𑀻𑀦𑀁’’𑀢𑀺 𑀢𑁂𑀳𑀺 𑀘𑀓𑁆𑀔𑀸𑀤𑀻𑀳𑀺 𑀲𑀫𑀗𑁆𑀕𑀻𑀦𑀁 𑀧𑀼𑀕𑁆𑀕𑀮𑀁. 𑀧𑀸𑀴𑀺𑀧𑀸𑀞𑁂. ‘‘𑀆𑀤𑀺𑀢𑁆𑀢𑀁’’𑀢𑀺𑀆𑀤𑀻𑀧𑀺𑀢𑀁 𑀲𑀫𑀼𑀚𑁆𑀚𑀮𑀦𑁆𑀢𑀁. ‘‘𑀓𑁂𑀦𑀸’’𑀢𑀺 𑀓𑀭𑀡𑀪𑀽𑀢𑁂𑀦 𑀓𑁂𑀦 𑀅𑀕𑁆𑀕𑀺𑀦𑀸. 𑀢𑀣𑀸 𑀅𑀭𑀺𑀬𑀫𑀕𑁆𑀕𑁄 𑀯𑀺𑀧𑀭𑀺𑀡𑀸𑀫 𑀥𑀫𑁆𑀫𑁄 𑀘 𑀳𑁄𑀢𑀺. 𑀲𑁄𑀯𑀺𑀧𑀭𑀺𑀡𑀸𑀫 𑀤𑀼𑀓𑁆𑀔𑁂𑀦𑀧𑀺 𑀧𑀼𑀕𑁆𑀕𑀮𑀁 𑀪𑀼𑀲𑀁 𑀧𑀻𑀴𑁂𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. ‘‘𑀦𑀸’’𑀢𑀺 𑀦 𑀲𑀺𑀬𑀸. 𑀲𑀫𑀦𑀁 𑀯𑀽𑀧𑀲𑀫𑀦𑀁 𑀲𑀦𑁆𑀢𑀺. 𑀲𑀩𑁆𑀩𑀤𑀼𑀓𑁆𑀔𑀸𑀦𑀁 𑀲𑀦𑁆𑀢𑀻𑀢𑀺 𑀯𑀺𑀕𑁆𑀕𑀳𑁄. 𑀲𑀩𑁆𑀩𑀁 𑀯𑀝𑁆𑀝𑀤𑀼𑀓𑁆𑀔𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲𑀸’’𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲. ‘‘𑀧𑀯𑀢𑁆𑀢𑀫𑀸𑀦𑀸 𑀘𑀸’’𑀢𑀺 𑀲𑀦𑁆𑀢𑀢𑀺𑀞𑀺𑀢𑀺𑀯𑀲𑁂𑀦 𑀯𑀢𑁆𑀢𑀫𑀸𑀦𑀸 𑀘. ‘‘𑀫𑀳𑀦𑁆𑀢𑀁 𑀧𑀭𑀺𑀴𑀸𑀳𑀤𑀼𑀓𑁆𑀔𑀁’’𑀢𑀺 𑀲𑁄𑀓 𑀧𑀭𑀺𑀤𑁂𑀯 𑀤𑀼𑀓𑁆𑀔 𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀫𑀳𑀦𑁆𑀢𑀁 𑀧𑀭𑀺𑀴𑀸𑀳 𑀤𑀼𑀓𑁆𑀔𑀁. 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀢𑁆𑀢𑀸 𑀉𑀧𑁆𑀧𑀸𑀤𑀢𑁆𑀣𑀸𑀬 𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺 𑀥𑀫𑁆𑀫𑀢𑁆𑀢𑀸 𑀧𑀯𑀢𑁆𑀢𑀢𑁆𑀣𑀸𑀬. 𑀲𑀫𑁆𑀧𑀸𑀧𑀼𑀡𑀺𑀢𑀩𑁆𑀩𑀢𑁆𑀢𑀸 𑀧𑀦 𑀲𑀫𑁆𑀧𑀸𑀧𑀦𑀢𑁆𑀣𑀸𑀬 𑀧𑀘𑁆𑀘𑀬𑁄 𑀅𑀢𑁆𑀣𑀻𑀢𑀺 𑀆𑀳 ‘‘𑀲𑀫𑁆𑀧𑀸𑀧𑀓 𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀭𑀡𑀮𑁂𑀲𑀁’’𑀢𑀺. 𑀲𑀫𑁆𑀧𑀸𑀧𑀓 𑀧𑀘𑁆𑀘𑀬𑀸 𑀦𑀸𑀫 𑀅𑀭𑀺𑀬 𑀫𑀕𑁆𑀕𑁄 𑀘 𑀢𑀲𑁆𑀲 𑀧𑀘𑁆𑀘𑀬𑀸 𑀘.

𑀪𑀯𑀸𑀪𑀯𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀤𑁂𑀯𑀸’’𑀢𑀺 𑀢𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀁 𑀏𑀯. 𑀅𑀦𑀼𑀧𑀼𑀦𑀧𑁆𑀧𑀼𑀦𑀁 𑀧𑀤𑀻𑀬𑀢𑁂 𑀅𑀦𑀼𑀧𑁆𑀧𑀤𑀸𑀦𑀁. ‘‘𑀦𑀺𑀬𑁆𑀬𑀸𑀢𑀦𑀝𑁆𑀞𑁄’’𑀢𑀺 𑀳𑀦𑁆𑀤 𑀕𑀡𑁆𑀳𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑀦𑀝𑁆𑀞𑁄. ‘‘𑀢𑀢𑁄’’𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄. ‘‘𑀫𑀼𑀘𑁆𑀘𑀦𑀽𑀧𑀸𑀬𑀲𑁆𑀲𑀸’’𑀢𑀺 𑀤𑀸𑀦𑀲𑀻𑀮𑀦𑀺𑀓𑁆𑀔𑀫𑀸𑀤𑀺𑀓𑀲𑁆𑀲 𑀫𑀼𑀘𑁆𑀘𑀦𑀽𑀧𑀸𑀬𑀲𑁆𑀲. ‘‘𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺𑀬𑀸’’𑀢𑀺 𑀦𑀺𑀲𑁆𑀲𑀭𑀡 𑀲𑀗𑁆𑀔𑀸𑀢𑀸𑀬 𑀯𑀺𑀫𑀼𑀢𑁆𑀢𑀺𑀬𑀸. 𑀲𑀗𑁆𑀔𑀸𑀭 𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀝𑁆𑀞𑁄. ‘‘𑀲𑀫𑁆𑀫𑁄𑀳𑀲𑁆𑀲 𑀧𑀳𑀸𑀦𑀯𑀲𑁂𑀦𑀸’’𑀢𑀺 𑀏𑀢𑁂𑀦 𑀇𑀥 𑀤𑀲𑁆𑀲𑀦𑀁 𑀦𑀸𑀫 𑀇𑀢𑁄 𑀧𑀝𑁆𑀞𑀸𑀬 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀲𑀫𑁆𑀫𑁄𑀳 𑀪𑀸𑀯𑀧𑀢𑁆𑀢𑀺 𑀏𑀯 𑀆𑀮𑁄𑀓𑀧𑀢𑁆𑀢𑀺 𑀏𑀯 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁄’’𑀢𑀺. 𑀢𑀡𑁆𑀳𑀸𑀬 𑀤𑀸𑀲𑁄 𑀢𑀡𑁆𑀳𑀸𑀤𑀸𑀲𑁄. 𑀢𑀡𑁆𑀳𑀸𑀤𑀸𑀲𑀲𑁆𑀲 𑀪𑀸𑀯𑁄 𑀢𑀡𑁆𑀳𑀸𑀤𑀸𑀲𑀩𑁆𑀬𑀁. 𑀧𑀭𑀯𑀲𑀢𑁄 𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀅𑀧𑀭𑀸𑀥𑀻𑀦𑀢𑀸 𑀪𑀼𑀚𑀺𑀲𑁆𑀲𑀪𑀸𑀯𑁄 𑀦𑀸𑀫. 𑀮𑁄𑀓𑀺𑀬𑀫𑀕𑁆𑀕𑀸𑀳𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺. 𑀢𑀡𑁆𑀳𑀸𑀯𑀲𑀁 𑀧𑀽𑀭𑀬𑀫𑀸𑀦𑀸 𑀢𑀡𑁆𑀳𑀸𑀯𑀺𑀲𑀬𑀁 𑀯𑀺𑀧𑀸𑀓𑀁 𑀚𑀦𑁂𑀦𑁆𑀢𑀺. 𑀅𑀬𑀁 𑀅𑀭𑀺𑀬𑀫𑀕𑁆𑀕𑁄 𑀏𑀯 𑀢𑀡𑁆𑀳𑀸𑀬 𑀅𑀦𑀸𑀭𑀫𑁆𑀫𑀡𑀪𑀸𑀯𑁂 𑀞𑀺𑀢𑁄 𑀢𑀡𑁆𑀳𑀸𑀤𑀸𑀲𑀩𑁆𑀬𑀁 𑀅𑀢𑀺𑀯𑀢𑁆𑀢𑀢𑀺. 𑀢𑀡𑁆𑀳𑀸𑀯𑀲𑀁 𑀪𑀺𑀦𑁆𑀤𑀫𑀸𑀦𑁄 𑀢𑀡𑁆𑀳𑀸𑀬 𑀅𑀯𑀺𑀲𑀬𑀁 𑀯𑀺𑀧𑀸𑀓𑀁 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀤𑀼𑀓𑁆𑀔𑀫𑀼𑀢𑁆𑀢𑀺𑀬𑀸’’𑀢𑀺 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀦𑀢𑁆𑀣𑀁. ‘‘𑀤𑀼𑀓𑁆𑀔𑀯𑀟𑁆𑀠𑀺𑀬𑀸’’𑀢𑀺 𑀤𑀼𑀓𑁆𑀔𑀯𑀟𑁆𑀠𑀦𑀢𑁆𑀣𑀸𑀬. 𑀲𑁂𑀲𑀫𑁂𑀢𑁆𑀣 𑀲𑀼𑀩𑁄𑀥𑀁. ‘‘𑀔𑀬𑀯𑀺𑀭𑀸𑀕 𑀦𑀺𑀭𑁄𑀥 𑀪𑀽𑀢𑁄’’𑀢𑀺 𑀏𑀢𑁆𑀣 𑀓𑀺𑀮𑁂𑀲 𑀥𑀫𑁆𑀫𑀸𑀦𑀁 𑀯𑀺𑀭𑀚𑁆𑀚𑀦𑀁 𑀯𑀺𑀕𑀫𑀦𑀁 𑀅𑀦𑁆𑀢𑀭𑀥𑀸𑀦𑀁 𑀯𑀺𑀭𑀸𑀕𑁄. ‘‘𑀅𑀦𑀢𑁆𑀣 𑀧𑀤𑀸𑀦𑀻’’𑀢𑀺 𑀅𑀳𑀺𑀢𑀧𑀤𑀸𑀦𑀺. 𑀪𑀬𑀸𑀤𑀻𑀦𑀯𑀧𑀤𑀸𑀦𑀺. ‘‘𑀤𑁆𑀯𑀸𑀭𑀙𑀓𑁆𑀓𑀆𑀭𑀫𑁆𑀫𑀡 𑀙𑀓𑁆𑀓𑀪𑁂𑀤𑁂𑀦𑀸’’𑀢𑀺 𑀤𑁆𑀯𑀸𑀭𑀙𑀓𑁆𑀓𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀁𑀲𑀢𑀺, 𑀆𑀭𑀫𑁆𑀫𑀡 𑀙𑀓𑁆𑀓𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸𑀢𑀺. 𑀦𑁄 𑀦𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸, 𑀤𑁆𑀯𑀸𑀭𑀙𑀓𑁆𑀓𑀢𑁄 𑀲𑁂𑀲𑀸𑀦𑀁 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀁 𑀅𑀢𑁆𑀣𑀺𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀢𑁄 ‘‘𑀏𑀢𑁆𑀣𑀧𑀻’’𑀢𑀺𑀆𑀤𑀻𑀲𑀼 𑀏𑀲𑁂𑀯𑀦𑀬𑁄𑀢𑀺.

𑀲𑀩𑁆𑀩𑀲𑀗𑁆𑀕𑀳𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀘𑁆𑀘𑀬𑀲𑀗𑁆𑀕𑀳𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.