𑁬. 𑀭𑀽𑀧𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁧𑁫𑁬. 𑀭𑀽𑀧𑀲𑀗𑁆𑀕𑀳𑁂. ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑁂’’𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓 𑀥𑀫𑁆𑀫𑁂. ‘‘𑀤𑁆𑀯𑀻𑀳𑀺 𑀧𑀪𑁂𑀤𑀧𑁆𑀧𑀯𑀢𑁆𑀢𑀻𑀳𑀻’’𑀢𑀺 𑀤𑁆𑀯𑀻𑀳𑀺 𑀧𑀪𑁂𑀤𑀲𑀗𑁆𑀕𑀳𑀧𑀯𑀢𑁆𑀢𑀺 𑀲𑀗𑁆𑀕𑀳𑁂𑀳𑀺. ‘‘𑀬𑁂 𑀯𑀢𑁆𑀢𑀦𑁆𑀢𑀻’’𑀢𑀺 𑀬𑁂 𑀥𑀫𑁆𑀫𑀸 𑀯𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. ‘‘𑀏𑀢𑁆𑀢𑀸𑀯𑀢𑀸’’𑀢𑀺 𑀏𑀢𑁆𑀢𑀓𑁂𑀦 ‘𑀢𑀢𑁆𑀣 𑀯𑀼𑀢𑁆𑀢𑀸𑀪𑀺𑀥𑀫𑁆𑀫𑀢𑁆𑀣𑀸’𑀢𑀺𑀆𑀤𑀺𑀓𑁂𑀦 𑀯𑀘𑀦𑀓𑁆𑀓𑀫𑁂𑀦. 𑀦𑀺𑀧𑀸𑀢𑀁 𑀇𑀘𑁆𑀙𑀦𑁆𑀢𑀸 𑀏𑀢𑁆𑀢𑀓𑁂𑀳𑀺 𑀧𑀜𑁆𑀘𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀻𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀯𑀘𑀦𑀯𑀺𑀧𑀮𑁆𑀮𑀸𑀲𑀁 𑀇𑀘𑁆𑀙𑀦𑁆𑀢𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀲𑀼𑀝𑁆𑀞𑀼 𑀉𑀝𑁆𑀞𑀸𑀢𑀺, 𑀧𑀸𑀢𑀼𑀩𑁆𑀪𑀯𑀢𑀺, 𑀯𑀺𑀚𑁆𑀚𑀫𑀸𑀦𑀢𑀁 𑀕𑀘𑁆𑀙𑀢𑀺. ‘‘𑀓𑀫𑁆𑀫𑀸𑀤𑀻’’𑀢𑀺 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁄. ‘‘𑀧𑀺𑀡𑁆𑀟𑀻’’𑀢𑀺 𑀏𑀓𑀕𑁆𑀖𑀦𑀢𑀸 𑀯𑀼𑀘𑁆𑀘𑀢𑀺. 𑀉𑀧𑀸𑀤𑀸𑀬 𑀫𑀳𑀦𑁆𑀢𑀸𑀦𑀺 𑀏𑀯 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑀁 𑀲𑀢𑁆𑀢𑀲𑀦𑁆𑀢𑀸𑀦𑀁. 𑀅𑀚𑁆𑀛𑀢𑁆𑀢 𑀲𑀦𑁆𑀢𑀸𑀦𑀁𑀢𑀺𑀧𑀺 𑀯𑀼𑀘𑁆𑀘𑀢𑀺. ‘‘𑀯𑀺𑀲𑀁𑀯𑀸𑀤𑀓𑀝𑁆𑀞𑁂𑀦𑀸’’𑀢𑀺 𑀯𑀺𑀭𑀸𑀥𑀓𑀝𑁆𑀞𑁂𑀦. 𑀪𑀽𑀢𑀜𑁆𑀘 𑀅𑀪𑀽𑀢𑀁 𑀓𑀢𑁆𑀯𑀸 𑀅𑀪𑀽𑀢𑀜𑁆𑀘 𑀪𑀽𑀢𑀁 𑀓𑀢𑁆𑀯𑀸 𑀲𑀦𑁆𑀤𑀲𑁆𑀲𑀓𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀽𑀢𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀦𑀓𑀫𑁆𑀫𑀁 𑀫𑀳𑀸𑀫𑀸𑀬𑀸 𑀦𑀸𑀫. 𑀫𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀫𑀸𑀬𑀸𑀓𑀸𑀭𑀸. 𑀆𑀯𑀺𑀲𑀦𑀁 𑀦𑀸𑀫 𑀲𑀢𑁆𑀢𑀸𑀦𑀁 𑀲𑀭𑀻𑀭𑁂𑀲𑀼 𑀆𑀯𑀺𑀲𑀦𑀁. 𑀕𑀳𑀡𑀁 𑀦𑀸𑀫 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑁄𑀯𑀲𑀁 𑀯𑀢𑁆𑀢𑀸𑀧𑀦𑀁. 𑀢𑀤𑀼𑀪𑀬𑀁 𑀓𑀭𑁄𑀦𑁆𑀢𑀸 𑀓𑀢𑁆𑀣 𑀞𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀅𑀦𑁆𑀢𑁄𑀯𑀸𑀞𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀩𑀳𑀺𑀯𑀸 𑀞𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀧𑀸𑀓𑀢𑀺𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀘𑀺𑀦𑁆𑀢𑁂𑀬𑁆𑀬𑀝𑁆𑀞𑀸𑀦𑀁 𑀦𑀸𑀫. ‘‘𑀯𑀜𑁆𑀘𑀓𑀝𑁆𑀞𑁂𑀦𑀸’’𑀢𑀺 𑀏𑀢𑀸 𑀧𑀓𑀢𑀺𑀬𑀸 𑀅𑀢𑀺𑀤𑀼𑀩𑁆𑀩𑀡𑁆𑀡𑀁 𑀅𑀢𑁆𑀢𑀸𑀦𑀁 𑀤𑁂𑀯𑀘𑁆𑀙𑀭𑀸𑀯𑀡𑁆𑀡𑀁 𑀓𑀢𑁆𑀯𑀸 𑀯𑀜𑁆𑀘𑁂𑀦𑁆𑀢𑀺. 𑀯𑀲𑀦𑀭𑀼𑀓𑁆𑀔𑀕𑀼𑀫𑁆𑀩𑀁𑀧𑀺 𑀤𑀺𑀩𑁆𑀩𑀯𑀺𑀫𑀸𑀦𑀁 𑀓𑀢𑁆𑀯𑀸 𑀯𑀜𑁆𑀘𑁂𑀦𑁆𑀢𑀺. 𑀏𑀯𑀭𑀽𑀧𑁂𑀦 𑀯𑀜𑁆𑀘𑀓𑀝𑁆𑀞𑁂𑀦. ‘‘𑀢𑁂𑀦𑁂𑀯𑀝𑁆𑀞𑁂𑀦𑀸’’𑀢𑀺 𑀯𑀺𑀲𑀁𑀯𑀸𑀤𑀓𑀝𑁆𑀞𑀸𑀤𑀺𑀦𑀸 𑀢𑀺𑀯𑀺𑀥𑁂𑀦𑁂𑀯 𑀅𑀢𑁆𑀣𑁂𑀦. 𑀢𑀸𑀦𑀺𑀧𑀺𑀳𑀺 𑀅𑀲𑀢𑁆𑀢𑀪𑀽𑀢𑀁𑀬𑁂𑀯 𑀅𑀢𑁆𑀢𑀸𑀦𑀁 𑀲𑀢𑁆𑀢𑁄𑀢𑀺 𑀯𑀺𑀲𑀁𑀯𑀸𑀤𑁂𑀦𑁆𑀢𑀺. 𑀅𑀭𑀼𑀓𑁆𑀔𑀁𑀬𑁂𑀯 𑀅𑀢𑁆𑀢𑀸𑀦𑀁 𑀭𑀼𑀓𑁆𑀔𑁄𑀢𑀺 𑀯𑀺𑀲𑀁𑀯𑀸𑀤𑁂𑀦𑁆𑀢𑀺. 𑀅𑀦𑀺𑀝𑁆𑀞𑀁, 𑀅𑀓𑀦𑁆𑀢𑀁, 𑀅𑀫𑀦𑀸𑀧𑀁𑀬𑁂𑀯 𑀅𑀢𑁆𑀢𑀸𑀦𑀁 𑀇𑀝𑁆𑀞𑁄, 𑀓𑀦𑁆𑀢𑁄, 𑀫𑀦𑀸𑀧𑁄𑀢𑀺 𑀯𑀜𑁆𑀘𑁂𑀦𑁆𑀢𑀺, 𑀢𑀣𑀸 𑀲𑀳𑀚𑀸𑀢𑀸𑀦𑀜𑁆𑀘 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑁄 𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀉𑀤𑀸𑀳𑀼𑀩𑀳𑀺𑀯𑀸𑀢𑀺𑀝𑁆𑀞𑀦𑁆𑀢𑀻𑀢𑀺 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀞𑀸𑀦𑀁 𑀳𑁄𑀢𑀻𑀢𑀺. ‘‘𑀉𑀪𑀬𑀢𑁆𑀣𑀧𑀻’’𑀢𑀺 𑀫𑀸𑀬𑀸𑀓𑀸𑀭𑀸𑀤𑀺 𑀫𑀳𑀸𑀪𑀽𑀢𑁂𑀲𑀼 𑀘 𑀧𑀣𑀯𑀺𑀬𑀸𑀤𑀺𑀫𑀳𑀸𑀪𑀽𑀢𑁂𑀲𑀼 𑀘. ‘‘𑀅𑀪𑀽𑀢𑀸𑀦𑀻’’𑀢𑀺 𑀅𑀲𑀦𑁆𑀢𑀸𑀦𑀺, 𑀅𑀲𑀘𑁆𑀘𑀸𑀦𑀺.‘‘𑀅𑀩𑁆𑀪𑀼𑀢𑀸𑀦𑀻’’𑀢𑀺 𑀅𑀘𑁆𑀙𑀭𑀺𑀬𑀓𑀫𑁆𑀫𑀸𑀦𑀺. ‘‘𑀇𑀫𑀲𑁆𑀫𑀺𑀁 𑀧𑀸𑀞𑁂’’𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀦𑁆𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥 𑀧𑀤𑀲𑀳𑀺𑀢𑁂 𑀧𑀸𑀞𑁂. 𑀅𑀜𑁆𑀜𑀢𑁆𑀣 𑀧𑀦 𑀉𑀧𑀸𑀤𑀸𑀭𑀽𑀧𑀁 𑀅𑀦𑀼𑀧𑀸𑀤𑀸𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀬𑀓𑀸𑀭 𑀯𑀺𑀭𑀳𑁄 𑀤𑀺𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀸𑀢𑀽𑀦𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 ‘‘𑀧𑀣𑀬𑀢𑀺 𑀧𑀓𑁆𑀔𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀧𑀼𑀣𑀽’’𑀢𑀺 𑀧𑀸𑀝𑀺𑀧𑀤𑀺𑀓𑀧𑀤𑀁. 𑀢𑀫𑁂𑀯 𑀚𑀸𑀢𑀢𑁆𑀣𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀣𑀯𑀻𑀢𑀺 𑀲𑀺𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀣𑀼𑀫𑀳𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀓𑀸𑀭𑁂𑀦 𑀣𑀯𑀻𑀬𑀢𑀻𑀢𑀺 𑀅𑀢𑁆𑀣𑁂 𑀧𑀣𑀯𑀻𑀢𑀺 𑀇𑀤𑀁 𑀉𑀚𑀼𑀓𑀫𑁂𑀯. ‘‘𑀆𑀧𑁂𑀢𑀻’’𑀢𑀺 𑀩𑁆𑀬𑀸𑀧𑁂𑀢𑀺. ‘‘𑀅𑀧𑁆𑀧𑀸𑀬𑀢𑀻’’𑀢𑀺 𑀪𑀼𑀲𑀁 𑀧𑀸𑀬𑀢𑀺, 𑀯𑀟𑁆𑀠𑁂𑀢𑀺. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼 𑀩𑁆𑀭𑀽𑀳𑁂𑀢𑀻’’𑀢𑀺𑀆𑀤𑀺𑀁. 𑀦𑀺𑀲𑀸𑀦𑀢𑁆𑀣𑀯𑀲𑁂𑀦𑁂𑀯 𑀧𑀭𑀺𑀧𑀸𑀘𑀦𑀢𑁆𑀣𑁄𑀧𑀺 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀧𑀭𑀺𑀧𑀸𑀘𑁂𑀢𑀺𑀯𑀸’’𑀢𑀺. ‘‘𑀲𑀫𑀻𑀭𑁂𑀢𑀻’’𑀢𑀺 𑀲𑀼𑀝𑁆𑀞𑀼 𑀈𑀭𑁂𑀢𑀺 𑀓𑀫𑁆𑀧𑁂𑀢𑀺. 𑀯𑀸𑀬𑀢𑀺 𑀯𑀳𑀢𑀻𑀢𑀺 𑀯𑀸𑀬𑁄 𑀅𑀢𑁆𑀣𑀸𑀢𑀺𑀲𑁆𑀲𑀬 𑀦𑀬𑁂𑀦. ‘‘𑀯𑀺𑀢𑁆𑀣𑀫𑁆𑀪𑀦𑀁’’𑀢𑀺 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀪𑀽𑀢𑀲𑀗𑁆𑀖𑀸𑀝𑀸𑀦𑀁 𑀣𑀫𑁆𑀪𑀦𑀁 𑀯𑀳𑀦𑀁 𑀅𑀪𑀺𑀦𑀻𑀳𑀭𑀡𑀁. 𑀓𑀓𑁆𑀔𑀴𑀢𑀸 𑀦𑀸𑀫 𑀔𑀭𑀢𑀸 𑀨𑀭𑀼𑀲𑀢𑀸. 𑀲𑀳𑀚𑀸𑀢𑀭𑀽𑀧𑀸𑀦𑀁 𑀧𑀢𑀺𑀝𑁆𑀞𑀸𑀦𑀢𑁆𑀣𑀸𑀬 𑀣𑀤𑁆𑀥𑀢𑀸 𑀣𑀽𑀮𑀢𑀸. 𑀲𑀸 𑀲𑁂𑀲𑀪𑀽𑀢𑁂𑀲𑀼 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑁂𑀲𑀪𑀽𑀢𑀢𑁆𑀢𑀬𑀁 𑀉𑀧𑀸𑀤𑀸𑀬𑀸’’𑀢𑀺. ‘‘𑀅𑀦𑀯𑀝𑁆𑀞𑀸𑀦𑀢𑀸’’𑀢𑀺 𑀏𑀢𑁆𑀣 𑀅𑀯𑀝𑁆𑀞𑀸𑀦𑀁 𑀦𑀸𑀫 𑀅𑀘𑀮𑀝𑁆𑀞𑀸𑀦𑀁. 𑀦 𑀅𑀯𑀝𑁆𑀞𑀸𑀦𑀦𑁆𑀢𑀺 𑀅𑀦𑀯𑀝𑁆𑀞𑀸𑀦𑀁. 𑀘𑀮𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀫𑀼𑀤𑀼𑀪𑀽𑀢𑀸𑀧𑀻’’𑀢𑀺𑀆𑀤𑀺𑀁. 𑀆𑀩𑀦𑁆𑀥𑀓𑀁 𑀦𑀸𑀫 𑀆𑀩𑀦𑁆𑀥𑀺𑀢𑀩𑁆𑀩𑁂 𑀯𑀢𑁆𑀣𑀼𑀫𑁆𑀳𑀺 𑀫𑀼𑀤𑀼𑀫𑁆𑀳𑀺 𑀲𑀢𑀺, 𑀤𑀴𑁆𑀳𑀁 𑀦 𑀩𑀦𑁆𑀥𑀢𑀺. 𑀣𑀤𑁆𑀥𑁂𑀲𑀢𑀺, 𑀤𑀴𑁆𑀳𑀁 𑀩𑀦𑁆𑀥𑀢𑀻𑀢𑀺 𑀇𑀤𑀁 𑀮𑁄𑀓𑀢𑁄𑀯 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀆𑀩𑀦𑁆𑀥𑀺𑀢𑀩𑁆𑀩𑀸𑀬𑀸’’𑀢𑀺𑀆𑀤𑀺𑀁. ‘‘𑀢𑀩𑁆𑀪𑀸𑀯𑀁’’𑀢𑀺 𑀧𑀭𑀺𑀡𑀢𑀪𑀸𑀯𑀁. ‘‘𑀧𑀭𑀺𑀧𑀸𑀘𑀓𑀢𑀸 𑀤𑀲𑁆𑀲𑀦𑀢𑁄’’𑀢𑀺 𑀳𑁂𑀫𑀦𑁆𑀢𑁂 𑀅𑀚𑁆𑀛𑁄𑀳𑀝𑀸𑀳𑀸𑀭𑀸𑀦𑀁 𑀲𑀼𑀝𑁆𑀞𑀼𑀧𑀭𑀺𑀧𑀸𑀘𑀓𑀢𑀸 𑀤𑀲𑁆𑀲𑀦𑀢𑁄𑀢𑀺 𑀯𑀤𑀦𑁆𑀢𑀺. 𑀉𑀲𑀢𑀺 𑀤𑀳𑀢𑀻𑀢𑀺 𑀉𑀡𑁆𑀳𑀁. ‘‘𑀤𑀳𑀢𑀻’’𑀢𑀺 𑀘 𑀉𑀡𑁆𑀳𑀢𑁂𑀚𑁄𑀧𑀺 𑀉𑀡𑁆𑀳𑀪𑀸𑀯𑁂𑀦 𑀤𑀳𑀢𑀺, 𑀲𑀻𑀢𑀢𑁂𑀚𑁄𑀧𑀺 𑀲𑀻𑀢𑀪𑀸𑀯𑁂𑀦 𑀤𑀳𑀢𑀺. 𑀉𑀡𑁆𑀳𑁂𑀦 𑀨𑀼𑀝𑁆𑀞𑀁 𑀯𑀢𑁆𑀣𑀼 𑀉𑀡𑁆𑀳𑀢𑁆𑀢𑀁 𑀕𑀘𑁆𑀙𑀢𑀺, 𑀲𑀻𑀢𑁂𑀦 𑀨𑀼𑀝𑁆𑀞𑀁 𑀯𑀢𑁆𑀣𑀼 𑀲𑀻𑀢𑀢𑁆𑀢𑀁 𑀕𑀘𑁆𑀙𑀢𑀺. 𑀬𑀜𑁆𑀘 𑀉𑀡𑁆𑀳𑀢𑁆𑀢𑀁 𑀕𑀘𑁆𑀙𑀢𑀺, 𑀢𑀁 𑀉𑀡𑁆𑀳𑀢𑁂𑀚𑁄 𑀉𑀡𑁆𑀳𑀪𑀸𑀯𑁂𑀦 𑀤𑀳𑀢𑀺𑀦𑀸𑀫. 𑀬𑀜𑁆𑀘 𑀲𑀻𑀢𑀢𑁆𑀢𑀁 𑀕𑀘𑁆𑀙𑀢𑀺, 𑀢𑀁 𑀲𑀻𑀢𑀢𑁂𑀚𑁄 𑀲𑀻𑀢𑀪𑀸𑀯𑁂𑀦 𑀤𑀳𑀢𑀺𑀦𑀸𑀫. 𑀏𑀯𑀁 𑀲𑀻𑀢𑀢𑁂𑀚𑁄𑀧𑀺 𑀉𑀲𑀢𑀺𑀤𑀳𑀢𑀻𑀢𑀺 𑀅𑀢𑁆𑀣𑁂𑀦 𑀉𑀡𑁆𑀳𑀢𑁆𑀢 𑀮𑀓𑁆𑀔𑀡𑁄𑀦𑀸𑀫 𑀳𑁄𑀢𑀻𑀢𑀺. 𑀏𑀯𑀁𑀲𑀦𑁆𑀢𑁂 𑀦𑀻𑀮𑁂𑀦𑀯𑀡𑁆𑀡𑁂𑀦 𑀨𑀼𑀝𑁆𑀞𑀁 𑀯𑀢𑁆𑀣𑀼 𑀦𑀻𑀮𑀁 𑀳𑁄𑀢𑀺. 𑀧𑀻𑀢𑁂𑀦 𑀨𑀼𑀝𑁆𑀞𑀁 𑀧𑀻𑀢𑀁 𑀳𑁄𑀢𑀺. 𑀦𑀻𑀮𑀁𑀧𑀺 𑀧𑀻𑀢𑀁𑀧𑀺 𑀢𑀁 𑀯𑀢𑁆𑀣𑀼𑀁 𑀤𑀳𑀢𑀺𑀦𑀸𑀫𑀸𑀢𑀺 𑀘𑁂. 𑀦𑀻𑀮𑁂𑀦 𑀯𑀡𑁆𑀡𑁂𑀦 𑀨𑀼𑀝𑁆𑀞𑀁𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀧𑀻𑀢𑁂𑀦. 𑀓𑀲𑁆𑀫𑀸, 𑀦𑀻𑀮𑀸𑀤𑀻𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀁 𑀨𑀼𑀲𑀦 𑀓𑀺𑀘𑁆𑀘𑀸 𑀪𑀸𑀯𑀢𑁄. 𑀲𑀫𑁆𑀫𑀺𑀲𑁆𑀲𑀺𑀢𑀁 𑀦𑀸𑀫 𑀳𑁄𑀢𑀺. 𑀦 𑀘 𑀲𑀫𑁆𑀫𑀺𑀲𑁆𑀲𑀦𑀫𑀢𑁆𑀢𑁂𑀦 𑀤𑀳𑀢𑀺. 𑀨𑀼𑀲𑀦𑁆𑀢𑁄 𑀏𑀯 𑀤𑀳𑀢𑀺. 𑀨𑀼𑀲𑀦𑁆𑀢𑀸𑀦𑀁𑀧𑀺 𑀧𑀣𑀯𑀺𑀯𑀸𑀢𑀸𑀦𑀁 𑀤𑀳𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀭𑀺𑀧𑀸𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀖𑀦𑀣𑀤𑁆𑀥𑁂 𑀲𑀺𑀮𑀸𑀣𑀫𑁆𑀪𑁂 𑀯𑀺𑀢𑁆𑀣𑀫𑁆𑀪𑀦𑀁 𑀅𑀢𑁆𑀣𑀺, 𑀲𑀓𑀮𑁄 𑀲𑀺𑀮𑀸𑀣𑀫𑁆𑀪𑁄 𑀓𑀧𑁆𑀧𑀸𑀲𑀧𑀺𑀘𑀼𑀕𑀼𑀴𑁆𑀳𑁄𑀯𑀺𑀬 𑀲𑀺𑀣𑀺𑀮𑁄 𑀘 𑀮𑀳𑀼𑀓𑁄 𑀘 𑀪𑀯𑁂𑀬𑁆𑀬. 𑀦𑀘 𑀪𑀯𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀢𑁆𑀣𑀫𑁆𑀪𑀦𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑁄 𑀧𑀦 𑀖𑀦𑀣𑀤𑁆𑀥𑁂𑀲𑀼 𑀲𑀺𑀮𑀸𑀣𑀫𑁆𑀪𑀸𑀤𑀻𑀲𑀼 𑀦 𑀮𑀩𑁆𑀪𑀢𑀻’’𑀢𑀺 𑀘𑁄𑀤𑁂𑀢𑀺. 𑀢𑀢𑁆𑀣 𑀧𑀦 𑀯𑀺𑀢𑁆𑀣𑀫𑁆𑀪𑀦𑀁 𑀮𑀩𑁆𑀪𑀫𑀸𑀦𑀁 𑀅𑀥𑀺𑀫𑀢𑁆𑀢𑁂𑀦 𑀦 𑀮𑀩𑁆𑀪𑀢𑀺, 𑀲𑀳𑀚𑀸𑀢𑀪𑀽𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀫𑀢𑁆𑀢𑁂𑀦 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸’’𑀢𑀺 𑀯𑀢𑁆𑀯𑀸 ‘‘𑀢𑀢𑁆𑀣𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀯𑀳𑀢𑀻’’𑀢𑀺 𑀣𑀤𑁆𑀥𑀓𑀓𑁆𑀔𑀴 𑀓𑀺𑀘𑁆𑀘𑀁 𑀯𑀳𑀢𑀺.

𑀧𑀲𑀸𑀤𑀭𑀽𑀧𑁂𑀲𑀼. ‘‘𑀲𑀫𑀯𑀺𑀲𑀫𑀁’’𑀢𑀺 𑀲𑀫𑀝𑁆𑀞𑀸𑀦𑀜𑁆𑀘 𑀯𑀺𑀲𑀫𑀝𑁆𑀞𑀸𑀦𑀜𑁆𑀘, 𑀲𑀫𑀤𑁂𑀲𑀜𑁆𑀘 𑀯𑀺𑀲𑀫𑀤𑁂𑀲𑀜𑁆𑀘, 𑀲𑀫𑀧𑀣𑀜𑁆𑀘 𑀯𑀺𑀲𑀫𑀧𑀣𑀜𑁆𑀘𑀸𑀢𑀺 𑀏𑀯𑀫𑀸𑀤𑀺𑀁 𑀲𑀫𑀯𑀺𑀲𑀫𑀁. ‘‘𑀆𑀘𑀺𑀓𑁆𑀔𑀢𑀻’’𑀢𑀺 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀢𑀁 𑀚𑀸𑀦𑀦 𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦𑀸𑀳 ‘‘𑀲𑀫𑀯𑀺𑀲𑀫𑀚𑀸𑀦𑀦𑀲𑁆𑀲 𑀢𑀁 𑀫𑀽𑀮𑀓𑀢𑁆𑀢𑀸’’𑀢𑀺. ‘‘𑀅𑀦𑀺𑀭𑀸𑀓𑀭𑀡𑀢𑁄’’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀦𑀢𑁄. ‘‘𑀢𑀁 𑀯𑀸’’𑀢𑀺 𑀭𑀽𑀧𑀁 𑀯𑀸. 𑀲𑀼𑀡𑀦𑁆𑀢𑀺 𑀚𑀦𑀸. 𑀲𑀼𑀬𑁆𑀬𑀦𑁆𑀢𑀺 𑀚𑀦𑁂𑀳𑀺. 𑀏𑀯𑀁 𑀖𑀸𑀬𑀦𑁆𑀢𑀻𑀢𑀺𑀆𑀤𑀻𑀲𑀼. ‘‘𑀚𑀻𑀯𑀺𑀢 𑀦𑀺𑀫𑀺𑀢𑁆𑀢𑀁’’𑀢𑀺 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀓𑀸𑀭𑀡𑀪𑀽𑀢𑁄. ‘‘𑀦𑀺𑀦𑁆𑀦𑀢𑀸𑀬𑀸’’𑀢𑀺 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑀽𑀧𑀕𑀫𑀦𑁂𑀦 𑀦𑀺𑀦𑁆𑀦𑀢𑀸𑀬. ‘‘𑀚𑀻𑀯𑀺𑀢𑀯𑀼𑀢𑁆𑀢𑀺 𑀲𑀫𑁆𑀧𑀸𑀤𑀓𑀢𑁆𑀢𑀸’’𑀢𑀺 𑀦𑀸𑀦𑀸𑀯𑀘𑀻𑀪𑁂𑀤𑀯𑀘𑀻𑀓𑀫𑁆𑀫𑀧𑁆𑀧𑀯𑀢𑁆𑀢𑀦𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑁂 𑀧𑀦 𑀧𑀜𑁆𑀘 𑀘𑀓𑁆𑀔𑀼 𑀧𑀲𑀸𑀤𑀸𑀤𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑀝𑁆𑀞𑀼𑀓𑀸𑀫𑀢𑀸’’𑀢𑀺 𑀭𑀽𑀧𑀢𑀡𑁆𑀳𑀸 𑀯𑀼𑀘𑁆𑀘𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀲𑁄𑀢𑀼𑀓𑀸𑀫𑀢𑀸 𑀖𑀸𑀬𑀺𑀢𑀼𑀓𑀸𑀫𑀢𑀸 𑀲𑀸𑀬𑀺𑀢𑀼𑀓𑀸𑀫𑀢𑀸 𑀨𑀼𑀲𑀺𑀢𑀼𑀓𑀸𑀫𑀢𑀸𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀅𑀢𑁆𑀣𑀢𑁄 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀏𑀯. ‘‘𑀦𑀺𑀤𑀸𑀦𑀁’’𑀢𑀺 𑀓𑀸𑀭𑀡𑀁. 𑀤𑀝𑁆𑀞𑀼𑀓𑀸𑀫𑀢𑀸𑀤𑀬𑁄 𑀦𑀺𑀤𑀸𑀦 𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀓𑀼𑀲𑀮𑀸 𑀓𑀼𑀲𑀮𑀓𑀫𑁆𑀫𑀁. 𑀲𑀫𑀼𑀝𑁆𑀞𑀸𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀓𑀫𑁆𑀫𑀫𑁂𑀯. 𑀤𑀝𑁆𑀞𑀼𑀓𑀸𑀫𑀢𑀸𑀤𑀺𑀦𑀺𑀤𑀸𑀦𑀓𑀫𑁆𑀫𑀁 𑀲𑀫𑀼𑀝𑁆𑀞𑀸𑀦𑀁 𑀬𑁂𑀲𑀦𑁆𑀢𑀺 𑀲𑀫𑀸𑀲𑁄. 𑀧𑀣𑀯𑀺𑀆𑀤𑀻𑀦𑀺 𑀪𑀽𑀢𑀸𑀦𑀺. 𑀢𑁂𑀲𑀁 𑀧𑀲𑀸𑀤𑁄 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀤𑀼𑀢𑀻𑀬 𑀯𑀺𑀓𑀧𑁆𑀧𑁂. 𑀭𑀽𑀧𑀸𑀤𑀻𑀦𑀁 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀁 𑀅𑀪𑀺𑀖𑀸𑀢𑀁 𑀅𑀭𑀳𑀢𑀻𑀢𑀺 𑀭𑀽𑀧𑀸𑀤𑀺𑀅𑀪𑀺𑀖𑀸𑀢𑀸𑀭𑀳𑁄. 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀪𑀽𑀢𑀧𑁆𑀧𑀲𑀸𑀤𑁄. 𑀲𑁄 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀘𑀓𑁆𑀔𑀼 𑀊𑀓𑀸𑀲𑀺𑀭𑀧𑁆𑀧𑀫𑀸𑀡𑁂 𑀤𑀺𑀝𑁆𑀞 𑀫𑀡𑁆𑀟𑀮𑁂 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑀺𑀝𑁆𑀞𑀫𑀡𑁆𑀟𑀮𑁂’’𑀢𑀺 𑀫𑀳𑀸𑀚𑀦𑁂𑀳𑀺 𑀧𑀓𑀢𑀺 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂 𑀧𑀲𑀦𑁆𑀦𑀫𑀡𑁆𑀟𑀮𑁂. 𑀢𑁂𑀮𑀁 𑀲𑀢𑁆𑀢𑀧𑀺𑀘𑀼𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺𑀯𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀲𑁄𑀢𑀩𑀺𑀮𑀁’’ 𑀦𑀸𑀫 𑀲𑁄𑀢𑀓𑀽𑀧𑁄. ‘‘𑀅𑀗𑁆𑀕𑀼𑀮𑀺𑀯𑁂𑀞𑀦𑀸’’ 𑀦𑀸𑀫 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸. ‘‘𑀉𑀧𑀘𑀺𑀢𑀢𑀦𑀼𑀢𑀫𑁆𑀩𑀮𑁄𑀫𑀁’’𑀢𑀺 𑀭𑀸𑀲𑀻𑀓𑀢𑀜𑁆𑀘 𑀯𑀺𑀭𑀴𑀜𑁆𑀘 𑀢𑀫𑁆𑀩𑀮𑁄𑀳𑀯𑀡𑁆𑀡𑀜𑁆𑀘 𑀲𑀼𑀔𑀼𑀫𑀮𑁄𑀫𑀁. 𑀉𑀧𑀘𑀺𑀢𑀁 𑀭𑀸𑀲𑀻𑀓𑀢𑀁 𑀢𑀦𑀼𑀢𑀫𑁆𑀩𑀮𑁄𑀫𑀁 𑀏𑀢𑁆𑀣𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀚𑀧𑀤𑀲𑀡𑁆𑀞𑀸𑀦𑀁’’𑀢𑀺 𑀅𑀚𑀲𑁆𑀲 𑀧𑀸𑀤𑁂𑀦 𑀅𑀓𑁆𑀓𑀦𑁆𑀢𑀧𑀤𑀲𑀡𑁆𑀞𑀸𑀦𑀯𑀦𑁆𑀢𑀁. ‘‘𑀉𑀧𑁆𑀧𑀮𑀤𑀮𑀁’’ 𑀦𑀸𑀫 𑀉𑀧𑁆𑀧𑀮𑀧𑀡𑁆𑀡𑀁. 𑀉𑀧𑁆𑀧𑀮𑀤𑀮𑀲𑁆𑀲 𑀅𑀕𑁆𑀕𑀲𑀡𑁆𑀞𑀸𑀦𑀯𑀦𑁆𑀢𑀁. ‘‘𑀯𑀝𑁆𑀝𑀺’’ 𑀦𑀸𑀫 𑀇𑀥 𑀫𑀦𑀼𑀲𑁆𑀲𑀸𑀦𑀁 𑀲𑀭𑀻𑀭𑀸𑀓𑀸𑀭𑀲𑀡𑁆𑀞𑀺𑀢𑀸 𑀆𑀬𑀢𑀧𑀺𑀡𑁆𑀟𑀺. ‘‘𑀲𑀼𑀓𑁆𑀔𑀘𑀫𑁆𑀫𑀸𑀦𑀺 𑀘 𑀞𑀧𑁂𑀢𑁆𑀯𑀸’’𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂 𑀧𑀦 𑀧𑀜𑁆𑀘𑀧𑁆𑀧𑀲𑀸𑀤𑀸. 𑀲𑀫𑀼𑀤𑀻𑀭𑀡𑀁 𑀘𑀜𑁆𑀘𑀮𑀦𑀁. ‘‘𑀬𑀣𑀸𑀢𑀁’’𑀢𑀺 𑀓𑀢𑀫𑀁 𑀯𑀺𑀬 𑀢𑀁. 𑀇𑀫𑁂 𑀧𑀲𑀸𑀤𑀸 𑀯𑀺𑀘𑀺𑀢𑁆𑀢𑀸, 𑀓𑀣𑀁𑀯𑀺𑀘𑀺𑀢𑁆𑀢𑀸𑀢𑀺 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸’’𑀢𑀺. 𑀓𑀣𑀁 𑀅𑀲𑀤𑀺𑀲𑀸𑀢𑀺 𑀆𑀳 ‘‘𑀢𑁂𑀳𑀻’’𑀢𑀺𑀆𑀤𑀺𑀁.

𑀕𑁄𑀘𑀭𑀭𑀽𑀧𑁂𑀲𑀼. ‘‘𑀯𑀡𑁆𑀡𑀯𑀺𑀲𑁂𑀲𑀁’’𑀢𑀺 𑀯𑀡𑁆𑀡𑀯𑀺𑀲𑁂𑀲𑀢𑁆𑀣𑀁. 𑀯𑀡𑁆𑀡𑀯𑀺𑀓𑀸𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀤𑀬𑁂 𑀕𑀢𑁄 𑀧𑀯𑀢𑁆𑀢𑁄 𑀪𑀸𑀯𑁄 𑀳𑀤𑀬𑀗𑁆𑀕𑀢𑀪𑀸𑀯𑁄. ‘‘𑀪𑀸𑀯𑁄’’𑀢𑀺 𑀘 𑀅𑀥𑀺𑀧𑁆𑀧𑀸𑀬𑁄 𑀯𑀼𑀘𑁆𑀘𑀢𑀺. 𑀢𑀁 𑀧𑀓𑀸𑀲𑁂𑀢𑀺, 𑀫𑀼𑀔𑁂 𑀯𑀡𑁆𑀡𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 𑀅𑀬𑀁 𑀫𑁂 𑀢𑀼𑀲𑁆𑀲𑀢𑀺, 𑀅𑀬𑀁 𑀫𑁂 𑀭𑀼𑀘𑁆𑀘𑀢𑀺, 𑀅𑀬𑀁 𑀫𑁂 𑀓𑀼𑀧𑁆𑀧𑀢𑀺, 𑀅𑀬𑀁 𑀲𑁄𑀫𑀦𑀲𑁆𑀲𑀺𑀢𑁄, 𑀅𑀬𑀁 𑀤𑁄𑀫𑀦𑀲𑁆𑀲𑀺𑀢𑁄𑀢𑀺 𑀏𑀯𑀁 𑀚𑀸𑀦𑀦𑀧𑀘𑁆𑀘𑀬𑀢𑁆𑀢𑀸. ‘‘𑀧𑀓𑀢𑀺𑀬𑀸 𑀧𑀻’’𑀢𑀺 𑀯𑀡𑁆𑀡𑀯𑀺𑀲𑁂𑀲𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀁 𑀓𑀺𑀜𑁆𑀘𑀺𑀤𑀩𑁆𑀩𑀁’’𑀢𑀺 𑀲𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀼𑀁. 𑀲𑀫𑀯𑀺𑀲𑀫𑀁 𑀧𑀼𑀩𑁆𑀩𑁂 𑀧𑀓𑀸𑀲𑀺𑀢𑀁. 𑀢𑀁 𑀢𑀁 𑀅𑀢𑁆𑀣𑀁 𑀯𑀸 𑀆𑀘𑀺𑀓𑁆𑀔𑀢𑀺 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀚𑀸𑀦𑀦𑀢𑁄. 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀯𑀸 𑀆𑀘𑀺𑀓𑁆𑀔𑀢𑀺 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲𑀧𑀺 𑀚𑀸𑀦𑀦𑀢𑁄. ‘‘𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑁂𑀢𑀻’’𑀢𑀺 𑀇𑀥 𑀇𑀤𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀧𑀓𑀸𑀲𑁂𑀢𑀺. ‘‘𑀨𑀼𑀲𑀻𑀬𑀢𑀻’’𑀢𑀺 𑀨𑀼𑀲𑀺𑀢𑁆𑀯𑀸 𑀯𑀺𑀚𑀸𑀦𑀻𑀬𑀢𑀺. ‘‘𑀢𑀁’’𑀢𑀺 𑀨𑀼𑀲𑀦𑀁. ‘‘𑀢𑀲𑁆𑀲𑀸’’𑀢𑀺 𑀆𑀧𑁄𑀥𑀸𑀢𑀼𑀬𑀸. ‘‘𑀤𑁆𑀭𑀯𑀢𑀸𑀯𑀸’’𑀢𑀺 𑀅𑀤𑁆𑀤𑀢𑀺𑀦𑁆𑀢𑀭𑀲𑀢𑀸𑀯𑀸. 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀺, 𑀲𑀸 𑀘 𑀆𑀧𑁄𑀥𑀸𑀢𑀼 𑀲𑀺𑀬𑀸𑀢𑀺 𑀘𑁄𑀤𑁂𑀢𑀺. 𑀯𑀼𑀘𑁆𑀘𑀢𑁂 𑀧𑀭𑀺𑀳𑀸𑀭𑁄. 𑀏𑀯𑀁 𑀧𑀦 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀲𑀸 𑀢𑁂𑀚𑁄𑀬𑁂𑀯. 𑀦 𑀆𑀧𑁄𑀢𑀺. 𑀏𑀢𑁆𑀣 𑀏𑀯𑀁 𑀅𑀮𑀩𑁆𑀪𑀫𑀸𑀦𑀸𑀧𑀺 𑀲𑀸𑀲𑀻𑀢𑀢𑀸 𑀆𑀧𑁄𑀬𑁂𑀯, 𑀦 𑀢𑁂𑀚𑁄. 𑀓𑀲𑁆𑀫𑀸, 𑀆𑀧𑀲𑁆𑀲𑀧𑀺 𑀲𑀻𑀢𑀼𑀡𑁆𑀳𑀯𑀲𑁂𑀦 𑀤𑀼𑀯𑀺𑀥𑀢𑀸 𑀲𑀫𑁆𑀪𑀯𑀢𑁄. 𑀢𑀲𑁆𑀫𑀺𑀜𑁆𑀳𑀺 𑀮𑁄𑀳𑀭𑀲𑁂 𑀉𑀡𑁆𑀳𑀢𑀸 𑀉𑀡𑁆𑀳𑀆𑀧𑁄, 𑀲𑀻𑀢𑀯𑀢𑁆𑀣𑀽𑀲𑀼 𑀲𑀻𑀢𑀢𑀸 𑀲𑀻𑀢𑀆𑀧𑁄𑀢𑀺 𑀘𑁂. 𑀏𑀯𑀁 𑀧𑀦 𑀲𑀢𑀺 𑀢𑁂𑀚𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀧𑀭𑀺𑀳𑀸𑀭𑁄. ‘‘𑀲𑀳 𑀅𑀧𑁆𑀧𑀯𑀢𑁆𑀢𑀦𑀢𑁄’’𑀢𑀺 𑀏𑀓𑀢𑁄 𑀅𑀧𑁆𑀧𑀯𑀢𑁆𑀢𑀦𑀢𑁄. ‘‘𑀑𑀭𑀧𑀸𑀭𑀸𑀦𑀁 𑀯𑀺𑀬𑀸’’𑀢𑀺 𑀦𑀤𑀺𑀬𑀁 𑀢𑀻𑀭𑀁 𑀦𑀸𑀫 𑀇𑀤𑀁 𑀑𑀭𑀺𑀫𑀢𑀻𑀭𑀁, 𑀇𑀤𑀁 𑀧𑀸𑀭𑀺𑀫𑀦𑁆𑀢𑀺 𑀦𑀺𑀬𑀫𑀢𑁄 𑀦𑀢𑁆𑀣𑀺. 𑀬𑀢𑁆𑀣 𑀲𑀬𑀁 𑀢𑀺𑀝𑁆𑀞𑀢𑀺, 𑀢𑀁 𑀑𑀭𑀺𑀫𑀦𑁆𑀢𑀺, 𑀇𑀢𑀭𑀁 𑀧𑀸𑀭𑀺𑀫𑀦𑁆𑀢𑀺 𑀯𑁄𑀳𑀭𑀢𑀺. 𑀏𑀯𑀁 𑀑𑀭𑀧𑀸𑀭𑀸𑀦𑀁 𑀅𑀦𑀯𑀝𑁆𑀞𑀸𑀦𑀁 𑀳𑁄𑀢𑀻𑀢𑀺. 𑀏𑀢𑁆𑀣 𑀘 ‘‘𑀲𑀻𑀢𑀼𑀡𑁆𑀳𑀸𑀦𑀁 𑀲𑀳 𑀅𑀧𑁆𑀧𑀯𑀢𑁆𑀢𑀦𑀢𑁄’’𑀢𑀺 𑀏𑀢𑁂𑀦 𑀬𑀤𑀺 𑀢𑁂 𑀲𑀳 𑀧𑀯𑀢𑁆𑀢𑁂𑀬𑁆𑀬𑀼𑀁. 𑀢𑀢𑁆𑀣 𑀲𑀻𑀢𑀢𑀸 𑀆𑀧𑁄𑀦𑀸𑀫, 𑀉𑀡𑁆𑀳𑀢𑀸 𑀢𑁂𑀚𑁄𑀦𑀸𑀫𑀸𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁. 𑀦 𑀧𑀦 𑀢𑁂 𑀲𑀳 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸, 𑀉𑀡𑁆𑀳𑀢𑁂𑀚𑁂𑀦 𑀬𑀼𑀢𑁆𑀢𑁄𑀳𑀺 𑀆𑀧𑁄 𑀉𑀡𑁆𑀳𑀢𑁆𑀢𑀫𑁂𑀯 𑀕𑀘𑁆𑀙𑀢𑀺. 𑀬𑀣𑀸𑀢𑀁 𑀉𑀡𑁆𑀳𑀢𑁂𑀚𑁂𑀦 𑀬𑀼𑀢𑁆𑀢𑀸 𑀧𑀣𑀯𑀻𑀧𑀺 𑀯𑀸𑀬𑁄𑀧𑀺 𑀉𑀡𑁆𑀳𑀢𑁆𑀢𑀫𑁂𑀯 𑀕𑀘𑁆𑀙𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀢𑁂 𑀲𑀳 𑀦 𑀧𑀯𑀢𑁆𑀢𑀦𑁆𑀢𑀺. 𑀲𑀳 𑀅𑀧𑁆𑀧𑀯𑀢𑁆𑀢𑁂𑀲𑀼𑀧𑀺 𑀢𑁂𑀲𑀼 𑀅𑀜𑁆𑀜𑀢𑁆𑀣 𑀲𑀻𑀢𑀯𑀢𑁆𑀣𑀽𑀲𑀼 𑀲𑀻𑀢𑀢𑀸 𑀆𑀧𑁄𑀦𑀸𑀫𑀸𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀳𑁄𑀢𑀻𑀢𑀺 𑀘𑁄𑀤𑀦𑀸. 𑀏𑀯𑀁𑀲𑀦𑁆𑀢𑁂 𑀢𑀲𑁆𑀫𑀺𑀁 𑀮𑁄𑀳𑀭𑀲𑁂 𑀲𑀩𑁆𑀩𑁂𑀧𑀺 𑀭𑀽𑀧𑀥𑀫𑁆𑀫𑀸 𑀉𑀡𑁆𑀳𑀢𑁆𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀢𑁂𑀚𑁄𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺. ‘𑀉𑀡𑁆𑀳𑀢𑁆𑀢 𑀮𑀓𑁆𑀔𑀡𑁄 𑀢𑁂𑀚𑁄’𑀢𑀺𑀳𑀺 𑀯𑀼𑀢𑁆𑀢𑀁. 𑀬𑀤𑀺 𑀘 𑀲𑀻𑀢𑀯𑀢𑁆𑀣𑀽𑀲𑀼 𑀲𑀻𑀢𑀪𑀸𑀯𑁄 𑀦𑀸𑀫 𑀲𑀺𑀬𑀸. 𑀢𑀢𑁆𑀣𑀧𑀺 𑀢𑁂𑀦 𑀬𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀭𑀽𑀧𑀥𑀫𑁆𑀫𑀸 𑀲𑀻𑀢𑀢𑀁 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀢𑀢𑁆𑀣𑀧𑀺 𑀢𑀯𑀫𑀢𑀺𑀬𑀸 𑀲𑀩𑁆𑀩𑁂𑀧𑀺 𑀆𑀧𑁄𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺. 𑀦 𑀧𑀦 𑀲𑀓𑁆𑀓𑀸 𑀢𑀣𑀸 𑀪𑀯𑀺𑀢𑀼𑀁. 𑀦 𑀳𑀺 𑀏𑀯𑀭𑀽𑀧𑀁 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀦𑀸𑀫 𑀢𑁂𑀲𑀁 𑀅𑀢𑁆𑀣𑀺. 𑀪𑀸𑀯𑀜𑁆𑀜𑀣𑀢𑁆𑀢𑀫𑁂𑀯 𑀅𑀢𑁆𑀣𑀺. 𑀢𑀢𑁆𑀣 ‘‘𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁’’ 𑀦𑀸𑀫 𑀧𑀣𑀯𑀻 𑀆𑀧𑁄𑀪𑀸𑀯𑀁 𑀕𑀘𑁆𑀙𑀢𑀺. 𑀆𑀧𑁄 𑀧𑀣𑀯𑀺𑀪𑀸𑀯𑀁 𑀕𑀘𑁆𑀙𑀢𑀻𑀢𑀺𑀆𑀤𑀺. ‘‘𑀪𑀸𑀯𑀜𑁆𑀜𑀣𑀢𑁆𑀢𑀁’’ 𑀦𑀸𑀫 𑀧𑀣𑀯𑀻 𑀓𑀤𑀸𑀘𑀺 𑀓𑀓𑁆𑀔𑀴𑀸 𑀳𑁄𑀢𑀺. 𑀓𑀤𑀸𑀘𑀺 𑀫𑀼𑀤𑀼𑀓𑀸. 𑀆𑀧𑁄 𑀓𑀤𑀸𑀘𑀺 𑀆𑀩𑀦𑁆𑀥𑀦𑀫𑀢𑁆𑀢𑁄 𑀳𑁄𑀢𑀺. 𑀓𑀤𑀸𑀘𑀺 𑀧𑀕𑁆𑀖𑀭𑀡𑀓𑁄. 𑀢𑁂𑀚𑁄 𑀓𑀤𑀸𑀘𑀺 𑀉𑀡𑁆𑀳𑁄, 𑀓𑀤𑀸𑀘𑀺 𑀲𑀻𑀢𑁄. 𑀯𑀸𑀬𑁄 𑀓𑀤𑀸𑀘𑀺 𑀯𑀺𑀢𑁆𑀣𑀫𑁆𑀪𑀦𑀫𑀢𑁆𑀢𑁄, 𑀓𑀤𑀸𑀘𑀺 𑀲𑀫𑀼𑀤𑀻𑀭𑀡𑁄𑀢𑀺. 𑀏𑀯𑀁 𑀏𑀓𑀫𑁂𑀓𑀲𑁆𑀲𑀸 𑀥𑀸𑀢𑀼𑀬𑀸 𑀢𑀺𑀓𑁆𑀔 𑀫𑀦𑁆𑀤 𑀑𑀫𑀢𑁆𑀢𑀸𑀥𑀺𑀫𑀢𑁆𑀢𑀯𑀲𑁂𑀦 𑀓𑁆𑀭𑀺𑀬𑀸𑀲𑀗𑁆𑀓𑀦𑁆𑀢𑀺 𑀦𑀸𑀫 𑀅𑀢𑁆𑀣𑀻𑀢𑀺. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 ‘𑀉𑀡𑁆𑀳𑀢𑁂𑀚𑁂𑀦 𑀬𑀼𑀢𑁆𑀢𑁄𑀳𑀺 𑀆𑀧𑁄 𑀉𑀡𑁆𑀳𑀢𑁆𑀢𑀫𑁂𑀯 𑀕𑀘𑁆𑀙𑀢𑀺, 𑀬𑀣𑀸 𑀢𑀁 𑀉𑀡𑁆𑀳𑀢𑁂𑀚𑁂𑀦 𑀬𑀼𑀢𑁆𑀢𑀸 𑀧𑀣𑀯𑀻𑀧𑀺 𑀯𑀸𑀬𑁄𑀧𑀺 𑀉𑀡𑁆𑀳𑀢𑁆𑀢𑀫𑁂𑀯 𑀕𑀘𑁆𑀙𑀦𑁆𑀢𑀻’𑀢𑀺. 𑀢𑀁 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀯𑀘𑀦𑀁 𑀳𑁄𑀢𑀺. 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀉𑀡𑁆𑀳𑀢𑁂𑀚𑁂𑀦 𑀬𑀼𑀢𑁆𑀢𑀸 𑀲𑀩𑁆𑀩𑁂𑀢𑁂𑀥𑀫𑁆𑀫𑀸 𑀉𑀡𑁆𑀳𑀢𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀦 𑀯𑀺𑀚𑀳𑀦𑁆𑀢𑀺. 𑀢𑀣𑀸𑀳𑀺 𑀢𑀲𑁆𑀫𑀺𑀁 𑀧𑀓𑁆𑀓𑀼𑀣𑀺𑀢𑁂 𑀲𑀦𑁆𑀢𑀢𑁆𑀢𑁂 𑀮𑁄𑀳𑀭𑀲𑁂 𑀪𑀸𑀯𑁄 𑀉𑀡𑁆𑀳𑀢𑁆𑀢𑀁 𑀦 𑀕𑀘𑁆𑀙𑀢𑀺. 𑀆𑀩𑀦𑁆𑀥𑀦 𑀲𑀪𑀸𑀯𑀁 𑀯𑀸 𑀧𑀕𑁆𑀖𑀭𑀡 𑀲𑀪𑀸𑀯𑀁 𑀯𑀸 𑀦 𑀯𑀺𑀚𑀳𑀢𑀺. 𑀬𑀤𑀺 𑀉𑀡𑁆𑀳𑀢𑁆𑀢𑀁 𑀕𑀘𑁆𑀙𑁂𑀬𑁆𑀬, 𑀢𑀁 𑀲𑀪𑀸𑀯𑀁 𑀯𑀺𑀚𑀳𑁂𑀬𑁆𑀬. 𑀏𑀯𑀁𑀲𑀢𑀺, 𑀢𑀲𑁆𑀫𑀺𑀁 𑀮𑁄𑀳𑀭𑀲𑁂 𑀆𑀩𑀦𑁆𑀥𑀦𑀸𑀓𑀸𑀭𑁄 𑀯𑀸 𑀧𑀕𑁆𑀖𑀭𑀡𑀸𑀓𑀸𑀭𑁄 𑀯𑀸 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀲𑀩𑁆𑀩𑁂𑀭𑀽𑀧 𑀥𑀫𑁆𑀫𑀸 𑀯𑀺𑀓𑁆𑀓𑀺𑀭𑁂𑀬𑁆𑀬𑀼𑀁. 𑀯𑀺𑀓𑁆𑀓𑀺𑀭𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀭𑁂𑀬𑁆𑀬𑀼𑀁. 𑀦 𑀘 𑀦 𑀧𑀜𑁆𑀜𑀸𑀬𑀢𑀺. 𑀦𑀸𑀧𑀺 𑀯𑀺𑀓𑁆𑀓𑀺𑀭𑀦𑁆𑀢𑀺. 𑀦𑁄𑀘 𑀢𑀢𑁆𑀣 𑀆𑀩𑀦𑁆𑀥𑀦𑀸𑀓𑀸𑀭𑁄 𑀉𑀡𑁆𑀳𑀢𑁆𑀢𑀁 𑀕𑀘𑁆𑀙𑀢𑀺. 𑀅𑀜𑁆𑀜𑁄𑀳𑀺 𑀆𑀩𑀦𑁆𑀥𑀦𑀸𑀓𑀸𑀭𑁄, 𑀅𑀜𑁆𑀜𑀁 𑀉𑀡𑁆𑀳𑀢𑁆𑀢𑀁. 𑀆𑀩𑀦𑁆𑀥𑀦𑀸𑀓𑀸𑀭𑁄 𑀆𑀧𑁄, 𑀉𑀡𑁆𑀳𑀢𑁆𑀢𑀁 𑀢𑁂𑀚𑁄. 𑀢𑀢𑁆𑀣 𑀧𑀣𑀯𑀺𑀯𑀸𑀬𑁂𑀲𑀼𑀧𑀺 𑀏𑀲𑁂𑀯𑀦𑀬𑁄. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 ‘‘𑀬𑀤𑀺 𑀢𑁂 𑀲𑀳 𑀧𑀯𑀢𑁆𑀢𑁂𑀬𑁆𑀬𑀼𑀁. 𑀢𑀢𑁆𑀣 𑀲𑀻𑀢𑀢𑀸 𑀆𑀧𑁄𑀦𑀸𑀫, 𑀉𑀡𑁆𑀳𑀢𑀸 𑀢𑁂𑀚𑁄 𑀦𑀸𑀫𑀸𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁. 𑀦 𑀧𑀦 𑀢𑁂 𑀲𑀳 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺. 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑁂𑀲𑀁 𑀅𑀦𑀯𑀝𑁆𑀞𑀸𑀦𑀢𑁄’’𑀢𑀺 𑀏𑀢𑁂𑀦 𑀲𑀘𑁂 𑀢𑁂 𑀲𑀻𑀢𑀼𑀡𑁆𑀳𑀸 𑀅𑀯𑀝𑁆𑀞𑀺𑀢𑀸 𑀲𑀺𑀬𑀼𑀁. 𑀅𑀣 𑀲𑀩𑁆𑀩𑀓𑀸𑀮𑁂𑀧𑀺 𑀲𑀻𑀢𑀢𑀸 𑀆𑀧𑁄𑀦𑀸𑀫, 𑀉𑀡𑁆𑀳𑀢𑀸 𑀢𑁂𑀚𑁄𑀦𑀸𑀫𑀸𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁. 𑀦 𑀧𑀦 𑀢𑁂 𑀅𑀯𑀝𑁆𑀞𑀺𑀢𑀸 𑀳𑁄𑀦𑁆𑀢𑀺. 𑀅𑀦𑀯𑀝𑁆𑀞𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀅𑀦𑀯𑀝𑁆𑀞𑀺𑀢𑁂𑀲𑀼 𑀲𑀦𑁆𑀢𑁂𑀲𑀼 𑀬𑀤𑀺 𑀲𑀻𑀢𑀢𑀸 𑀆𑀧𑁄 𑀦𑀸𑀫, 𑀉𑀡𑁆𑀳𑀢𑀸 𑀢𑁂𑀚𑁄𑀦𑀸𑀫𑀸𑀢𑀺 𑀯𑀤𑁂𑀬𑁆𑀬𑀼𑀁. 𑀏𑀯𑀜𑁆𑀘𑀲𑀢𑀺, 𑀆𑀧𑀢𑁂𑀚𑀸𑀧𑀺 𑀅𑀦𑀯𑀝𑁆𑀞𑀺𑀢𑀸 𑀲𑀺𑀬𑀼𑀁. 𑀬𑁄 𑀇𑀤𑀸𑀦𑀺 𑀆𑀧𑁄, 𑀲𑁄𑀬𑁂𑀯 𑀔𑀡𑀦𑁆𑀢𑀭𑁂 𑀢𑁂𑀚𑁄 𑀦𑀸𑀫. 𑀬𑁄 𑀯𑀸 𑀇𑀤𑀸𑀦𑀺 𑀢𑁂𑀚𑁄, 𑀲𑁄𑀬𑁂𑀯 𑀔𑀡𑀦𑁆𑀢𑀭𑁂 𑀆𑀧𑁄 𑀦𑀸𑀫𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀼𑀁. 𑀦 𑀘 𑀲𑀓𑁆𑀓𑀸 𑀢𑀣𑀸 𑀪𑀯𑀺𑀢𑀼𑀁. 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑁂 𑀅𑀲𑀦𑁆𑀢𑁂 𑀯𑁄𑀳𑀸𑀭𑀜𑁆𑀜𑀣𑀢𑁆𑀢𑀲𑁆𑀲𑀧𑀺 𑀅𑀲𑀫𑁆𑀪𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀑𑀭𑀧𑀸𑀭𑀸𑀦𑀁 𑀯𑀺𑀬 𑀢𑁂𑀲𑀁 𑀅𑀦𑀯𑀝𑁆𑀞𑀸𑀦𑀢𑁄 𑀘 𑀯𑀺𑀜𑁆𑀜𑀸𑀬𑀢𑀻’’𑀢𑀺. 𑀢𑀢𑁆𑀣 ‘‘𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀲𑀸𑀲𑀻𑀢𑀢𑀸 𑀢𑁂𑀚𑁄𑀬𑁂𑀯, 𑀦 𑀆𑀧𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

‘‘𑀅𑀣 𑀧𑀦𑀸’’𑀢𑀺𑀆𑀤𑀻𑀲𑀼. 𑀬𑀁 𑀧𑀼𑀩𑁆𑀩𑁂 𑀧𑀭𑁂𑀦 𑀯𑀼𑀢𑁆𑀢𑀁 ‘𑀦𑀦𑀼 𑀤𑁆𑀭𑀯𑀢𑀸 𑀯𑀸 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀻’𑀢𑀺. 𑀢𑀁 𑀯𑀺𑀘𑀸𑀭𑁂𑀢𑀼𑀁 ‘‘𑀅𑀣 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀣 𑀧𑀦𑀸’’𑀢𑀺 𑀬𑀤𑀺 𑀧𑀦 𑀕𑀬𑁆𑀳𑀢𑀺, 𑀏𑀯𑀁𑀲𑀢𑀻𑀢𑀺 𑀘. 𑀏𑀯𑀜𑁆𑀘𑀲𑀢𑀺 𑀆𑀭𑀫𑁆𑀫𑀡 𑀪𑀽𑀢𑁄 𑀏𑀯 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑁂𑀢𑁆𑀣𑀸 𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀤𑁆𑀭𑀯𑀪𑀸𑀯𑀪𑀽𑀢𑁄 𑀆𑀧𑁄 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑁂𑀬𑁆𑀬. 𑀏𑀯𑀁 𑀲𑀢𑀺, 𑀅𑀬𑁄𑀧𑀺𑀡𑁆𑀟𑀸𑀤𑀻𑀲𑀼 𑀆𑀩𑀦𑁆𑀥𑀦𑀫𑀢𑁆𑀢𑀪𑀽𑀢𑁄 𑀆𑀧𑁄𑀧𑀺 𑀨𑀼𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄 𑀲𑀺𑀬𑀸. 𑀓𑀲𑁆𑀫𑀸, 𑀆𑀧𑀪𑀸𑀯𑁂𑀦 𑀏𑀓𑀢𑁆𑀢𑀸. 𑀏𑀯𑀜𑁆𑀘𑀲𑀢𑀺, 𑀢𑁂𑀲𑀼 𑀅𑀬𑁄𑀧𑀺𑀡𑁆𑀟𑀸𑀤𑀻𑀲𑀼 𑀲𑁄 𑀆𑀧𑁄 𑀢𑀸𑀦𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀨𑀼𑀲𑀦𑁆𑀢𑀲𑁆𑀲 𑀧𑀳𑀭𑀦𑁆𑀢𑀲𑁆𑀲 𑀯𑀺𑀦𑀸 𑀇𑀢𑀭 𑀫𑀳𑀸𑀪𑀽𑀢𑁂𑀳𑀺 𑀯𑀺𑀲𑀼𑀁 𑀓𑀸𑀬𑀺𑀓 𑀲𑀼𑀔𑀤𑀼𑀓𑁆𑀔𑀸𑀦𑀁 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄 𑀲𑀺𑀬𑀸. 𑀬𑀣𑀸𑀢𑀁, 𑀢𑁂𑀲𑁆𑀯𑁂𑀯 𑀅𑀬𑁄𑀧𑀺𑀡𑁆𑀟𑀸𑀤𑀻𑀲𑀼 𑀧𑀣𑀯𑀺𑀫𑀳𑀸𑀪𑀽𑀢𑀁 𑀯𑀺𑀦𑀸 𑀇𑀢𑀭𑀫𑀳𑀸𑀪𑀽𑀢𑁂𑀳𑀺 𑀯𑀺𑀲𑀼𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀢𑁂𑀚𑁄𑀯𑀸𑀬𑁂𑀲𑀼𑀧𑀻𑀢𑀺. 𑀦 𑀧𑀦 𑀲𑁄 𑀯𑀺𑀲𑀼𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀨𑁄𑀝𑁆𑀞𑀩𑁆𑀩 𑀲𑀪𑀸𑀯𑁄 𑀦 𑀳𑁄𑀢𑀺. 𑀬𑀣𑀸 𑀘 𑀲𑁄 𑀨𑁄𑀝𑁆𑀞𑀩𑁆𑀩𑀲𑀪𑀸𑀯𑁄 𑀦 𑀳𑁄𑀢𑀺. 𑀢𑀣𑀸 𑀧𑀓𑀢𑀺 𑀉𑀤𑀓𑀸𑀤𑀻𑀲𑀼 𑀤𑁆𑀭𑀯𑀪𑀸𑀯𑀪𑀽𑀢𑁄𑀧𑀺 𑀆𑀧𑁄 𑀢𑀸𑀦𑀺 𑀨𑀼𑀲𑀦𑁆𑀢𑀲𑁆𑀲 𑀧𑀳𑀭𑀦𑁆𑀢𑀲𑁆𑀲 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀦 𑀘 𑀨𑁄𑀝𑁆𑀞𑀩𑁆𑀩 𑀲𑀪𑀸𑀯𑁄𑀢𑀺. 𑀏𑀯𑀜𑁆𑀘𑀲𑀢𑀺, 𑀓𑀣𑀁 𑀅𑀬𑁄𑀧𑀺𑀡𑁆𑀟𑀸𑀤𑀻𑀲𑀼 𑀆𑀩𑀦𑁆𑀥𑀦𑀫𑀢𑁆𑀢𑀪𑀽𑀢𑁄 𑀆𑀧𑁄 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀓𑀣𑀜𑁆𑀘 𑀢𑁂𑀲𑀼 𑀇𑀢𑀭𑀫𑀳𑀸𑀪𑀽𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀲𑀡𑁆𑀳𑀣𑀤𑁆𑀥𑀢𑀸𑀯𑀲𑁂𑀦𑀯𑀸’’𑀢𑀺 𑀢𑁂𑀲𑀼 𑀞𑀺𑀢𑀸𑀬 𑀧𑀣𑀯𑀺𑀥𑀸𑀢𑀼𑀬𑀸 𑀲𑀡𑁆𑀳𑀣𑀤𑁆𑀥𑀢𑀸𑀯𑀲𑁂𑀦 𑀯𑀸. 𑀲𑀡𑁆𑀳𑀧𑀣𑀯𑀻𑀲𑀼𑀔𑀯𑁂𑀤𑀦𑀸𑀬 𑀣𑀤𑁆𑀥𑀧𑀣𑀯𑀻𑀤𑀼𑀓𑁆𑀔𑀯𑁂𑀤𑀦𑀸𑀬 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑁂𑀲𑁂𑀲𑀼. ‘‘𑀅𑀩𑁆𑀪𑀦𑁆𑀢𑀭𑀢𑁆𑀣𑀫𑁆𑀪𑀦𑀲𑁆𑀲𑀸’’𑀢𑀺 𑀢𑁂𑀲𑀁 𑀅𑀬𑁄𑀧𑀺𑀡𑁆𑀟𑀸𑀤𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀲𑁆𑀲 𑀯𑀺𑀢𑁆𑀣𑀫𑁆𑀪𑀦 𑀲𑀪𑀸𑀯𑀲𑁆𑀲. ‘‘𑀦𑁄 𑀅𑀜𑁆𑀜𑀣𑀸’’𑀢𑀺 𑀢𑀸𑀦𑀺𑀢𑀻𑀡𑀺 𑀓𑀸𑀭𑀡𑀸𑀦𑀺 𑀞𑀧𑁂𑀢𑁆𑀯𑀸 𑀆𑀩𑀦𑁆𑀥𑀦 𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀧𑀓𑀢𑀺 𑀉𑀤𑀓𑀸𑀤𑀻𑀲𑀼 𑀤𑁆𑀭𑀯𑀪𑀸𑀯𑀪𑀽𑀢𑀁 𑀆𑀧𑁄𑀥𑀸𑀢𑀼𑀫𑁆𑀧𑀺 𑀨𑀼𑀲𑀺𑀢𑁆𑀯𑀸 𑀚𑀸𑀦𑀦𑁆𑀢𑀻𑀢𑀺 𑀫𑀳𑀸𑀚𑀦𑀸 𑀫𑀜𑁆𑀜𑀦𑁆𑀢𑀺. 𑀢𑀩𑁆𑀩𑀺𑀲𑁄𑀥𑀦𑁂𑀦 𑀲𑀳 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀧𑀣𑀫𑀁 𑀤𑁆𑀭𑀯𑀢𑀸 𑀲𑀳𑀺𑀢𑀸𑀦𑀺. 𑀮. 𑀚𑀸𑀦𑀦𑁆𑀢𑀻’’𑀢𑀺 𑀇𑀤𑀁 𑀧𑀥𑀸𑀦 𑀯𑀘𑀦𑀁. 𑀮𑁄𑀓𑁂 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀯𑀸 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀯𑀸 𑀇𑀤𑀁 𑀭𑀲𑁆𑀲𑀁, 𑀇𑀤𑀁 𑀤𑀻𑀖𑀁, 𑀇𑀤𑀁 𑀯𑀝𑁆𑀝𑀁, 𑀇𑀤𑀁 𑀫𑀡𑁆𑀟𑀮𑀦𑁆𑀢𑀺𑀆𑀤𑀺𑀦𑀸 𑀲𑀡𑁆𑀞𑀸𑀦𑀁 𑀚𑀸𑀦𑀦𑁆𑀢𑀸 𑀳𑀢𑁆𑀣 𑀨𑀼𑀲𑀦𑁂𑀦 𑀯𑀸 𑀘𑀓𑁆𑀔𑀼 𑀤𑀲𑁆𑀲𑀦𑁂𑀦 𑀯𑀸 𑀲𑀳𑁂𑀯 𑀢𑀁 𑀚𑀸𑀦𑀦𑁆𑀢𑀻𑀢𑀺 𑀫𑀜𑁆𑀜𑀦𑁆𑀢𑀺. 𑀢𑀢𑁆𑀣 𑀧𑀦 𑀧𑀼𑀭𑀺𑀫𑀪𑀸𑀕𑁂 𑀓𑀸𑀬𑀤𑁆𑀯𑀸𑀭𑀯𑀻𑀣𑀺 𑀘𑀺𑀢𑁆𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀢𑀻𑀡𑀺𑀪𑀽𑀢𑀸𑀦𑀺 𑀨𑀼𑀲𑀺𑀢𑁆𑀯𑀸 𑀯𑀸 𑀘𑀓𑁆𑀔𑀼𑀤𑁆𑀯𑀸𑀭 𑀯𑀻𑀣𑀺𑀘𑀺𑀢𑁆𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀯𑀸 𑀧𑀘𑁆𑀙𑀸 𑀯𑀢𑁆𑀣𑀼𑀕𑁆𑀕𑀳𑀡𑀯𑀻𑀣𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀏𑀯 𑀲𑀡𑁆𑀞𑀸𑀦𑀁 𑀚𑀸𑀦𑀦𑁆𑀢𑀺. 𑀏𑀲𑁂𑀯𑀦𑀬𑁄 𑀭𑀢𑁆𑀢𑀺𑀬𑀁 𑀅𑀮𑀸𑀢𑀘𑀓𑁆𑀓𑀲𑀡𑁆𑀞𑀸𑀦𑀁 𑀚𑀸𑀦𑀦𑁆𑀢𑀲𑁆𑀲𑀧𑀺. 𑀢𑀢𑁆𑀣 𑀧𑀦 𑀩𑀳𑀽𑀦𑀺𑀧𑀺 𑀧𑀼𑀩𑁆𑀩𑀸𑀧𑀭𑀯𑀻𑀣𑀺𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀮𑁄𑀓𑁂 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀻𑀦𑀁 𑀙𑀺𑀤𑁆𑀤𑀯𑀺𑀯𑀭𑀸𑀦𑀺 𑀚𑀸𑀦𑀦𑁆𑀢𑀸 𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑁂𑀦 𑀲𑀳𑁂𑀯 𑀢𑀸𑀦𑀺 𑀚𑀸𑀦𑀦𑁆𑀢𑀻𑀢𑀺 𑀫𑀜𑁆𑀜𑀦𑁆𑀢𑀺. 𑀢𑀢𑁆𑀣 𑀧𑀦 𑀧𑀼𑀭𑀺𑀫𑀪𑀸𑀕𑁂 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀯𑀻𑀣𑀺 𑀘𑀺𑀢𑁆𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀓𑀯𑀸𑀝𑀭𑀽𑀧𑀪𑀺𑀢𑁆𑀢𑀺 𑀭𑀽𑀧𑀸𑀦𑀺 𑀧𑀼𑀦𑀧𑁆𑀧𑀼𑀦𑀁 𑀤𑀺𑀲𑁆𑀯𑀸 𑀧𑀘𑁆𑀙𑀸 𑀅𑀮𑀸𑀢𑀘𑀓𑁆𑀓𑀲𑁆𑀲 𑀫𑀚𑁆𑀛𑁂 𑀯𑀺𑀯𑀭𑀁𑀧𑀺 𑀚𑀸𑀦𑀦𑁆𑀢𑀸 𑀯𑀺𑀬 𑀯𑀺𑀲𑀼𑀁 𑀉𑀧𑁆𑀧𑀦𑁆𑀦𑀸𑀬 𑀫𑀦𑁄𑀤𑁆𑀯𑀸𑀭𑀺𑀓 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀏𑀯 𑀢𑀁 𑀙𑀺𑀤𑁆𑀤𑀯𑀺𑀯𑀭𑀪𑀽𑀢𑀁 𑀆𑀓𑀸𑀲𑀁 𑀚𑀸𑀦𑀦𑁆𑀢𑀺. 𑀢𑀣𑀸 𑀳𑀢𑁆𑀣𑁂𑀦 𑀉𑀤𑀓𑀁 𑀨𑀼𑀲𑀦𑁆𑀢𑀲𑁆𑀲 𑀧𑀣𑀫𑀁 𑀤𑁆𑀭𑀯𑀲𑀳𑀺𑀢𑀸𑀦𑀺 𑀯𑀺𑀮𑀻𑀦𑀸𑀦𑀺 𑀫𑀼𑀤𑀽𑀦𑀺 𑀢𑀻𑀡𑀺𑀨𑁄𑀝𑁆𑀞𑀩𑁆𑀩 𑀫𑀳𑀸𑀪𑀽𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀸𑀬𑀤𑁆𑀯𑀸𑀭𑀺𑀓 𑀯𑀻𑀣𑀺 𑀘𑀺𑀢𑁆𑀢𑁂𑀳𑀺 𑀨𑀼𑀲𑀦𑀓𑀺𑀘𑁆𑀘𑁂𑀦 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀧𑀘𑁆𑀙𑀸 𑀯𑀺𑀲𑀼𑀁 𑀲𑀼𑀤𑁆𑀥𑀸𑀬 𑀫𑀦𑁄𑀤𑁆𑀯𑀸𑀭𑀺𑀓 𑀯𑀻𑀣𑀺𑀬𑀸 𑀏𑀯 𑀤𑁆𑀭𑀯𑀪𑀸𑀯𑀲𑀗𑁆𑀔𑀸𑀢𑀁 𑀧𑀕𑁆𑀖𑀭𑀡𑀓 𑀆𑀧𑁄𑀥𑀸𑀢𑀼𑀁 𑀚𑀸𑀦𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀤𑁆𑀭𑀯𑀪𑀸𑀯𑀁𑀧𑀺 𑀳𑀢𑁆𑀣𑁂𑀦 𑀨𑀼𑀲𑀦𑁂𑀦 𑀲𑀳𑁂𑀯 𑀚𑀸𑀦𑀦𑁆𑀢𑀻𑀢𑀺 𑀫𑀜𑁆𑀜𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀳 ‘‘𑀕𑀼𑀦𑁆𑀦𑀁 𑀘𑀭𑀡𑀝𑁆𑀞𑀸𑀦𑀁’’𑀢𑀺. 𑀅𑀓𑁆𑀔𑀭 𑀯𑀺𑀤𑀽 𑀧𑀦 𑀕𑁄𑀲𑀤𑁆𑀤𑀁 𑀇𑀦𑁆𑀤𑁆𑀭𑀺𑀬𑀢𑁆𑀣𑁂𑀧𑀺 𑀇𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀕𑁄𑀢𑀺 𑀯𑀸’’𑀢𑀺𑀆𑀤𑀺𑀁. 𑀢𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀏𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀘𑀭𑀦𑁆𑀢𑀺, 𑀏𑀢𑀸𑀦𑀺 𑀯𑀸 𑀭𑀽𑀧𑀸𑀤𑀻𑀦𑀺 𑀢𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀘𑀭𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀕𑀸𑀯𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀭𑀦𑁆𑀢𑀺 𑀏𑀢𑁂𑀲𑀽𑀢𑀺 𑀕𑁄𑀘𑀭𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑁂𑀦 𑀕𑁄𑀲𑀼𑀇𑀦𑁆𑀤𑁆𑀭𑀺𑀬𑁂𑀲𑀼 𑀘𑀭𑀦𑁆𑀢𑀻𑀢𑀺 𑀕𑁄𑀘𑀭𑀸𑀦𑀻𑀢𑀺. 𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀭𑀽𑀧𑀸𑀤𑀻𑀦𑀺.

𑀪𑀸𑀯𑀤𑁆𑀯𑀬𑁂. 𑀇𑀘𑁆𑀙𑀦𑀝𑁆𑀞𑁂𑀦 𑀞𑀸𑀦𑀝𑁆𑀞𑁂𑀦 𑀞𑀧𑀦𑀝𑁆𑀞𑁂𑀦 𑀘 𑀇𑀢𑁆𑀣𑀻. 𑀲𑀸𑀳𑀺𑀓𑀸𑀫𑀭𑀢𑀺 𑀅𑀢𑁆𑀣𑀸𑀬 𑀲𑀬𑀁𑀧𑀺 𑀅𑀜𑁆𑀜𑀁𑀓𑀸𑀫𑀺𑀓𑀁 𑀇𑀘𑁆𑀙𑀢𑀺. 𑀲𑀬𑀜𑁆𑀘 𑀓𑀸𑀫𑀺𑀓𑁂𑀦 𑀇𑀘𑁆𑀙𑀻𑀬𑀢𑀺. 𑀅𑀜𑁆𑀜𑁄 𑀘 𑀓𑀸𑀫𑀺𑀓𑁄 𑀖𑀭𑀸𑀯𑀸𑀲 𑀲𑀼𑀔𑀢𑁆𑀣𑀸𑀬 𑀢𑀢𑁆𑀣 𑀞𑀸𑀦𑀁 𑀉𑀧𑁂𑀢𑀺, 𑀧𑀢𑀺𑀝𑁆𑀞𑀸𑀢𑀺. 𑀆𑀬𑀢𑀺𑀜𑁆𑀘 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀦𑀢𑁆𑀣𑀸𑀬 𑀢𑀢𑁆𑀣 𑀓𑀼𑀮𑀯𑀁𑀲 𑀩𑀻𑀚𑀁 𑀞𑀧𑁂𑀢𑀻𑀢𑀺. 𑀧𑀽𑀭𑀡𑀝𑁆𑀞𑁂𑀦 𑀇𑀘𑁆𑀙𑀦𑀝𑁆𑀞𑁂𑀦 𑀘 𑀧𑀼𑀭𑀺𑀲𑁄. 𑀲𑁄𑀳𑀺 𑀅𑀢𑁆𑀢𑀳𑀺𑀢𑀜𑁆𑀘 𑀧𑀽𑀭𑁂𑀢𑀺, 𑀧𑀭𑀳𑀺𑀢𑀜𑁆𑀘 𑀇𑀘𑁆𑀙𑀢𑀺. 𑀇𑀥𑀮𑁄𑀓𑀳𑀺𑀢𑀜𑁆𑀘 𑀧𑀽𑀭𑁂𑀢𑀺, 𑀧𑀭𑀮𑁄𑀓𑀳𑀺𑀢𑀜𑁆𑀘 𑀇𑀘𑁆𑀙𑀢𑀺. 𑀉𑀪𑀬𑀮𑁄𑀓𑀳𑀺𑀢𑀜𑁆𑀘 𑀧𑀽𑀭𑁂𑀢𑀺, 𑀮𑁄𑀓𑀼𑀢𑁆𑀢𑀭𑀳𑀺𑀢𑀜𑁆𑀘 𑀇𑀘𑁆𑀙𑀢𑀺, 𑀏𑀲𑀢𑀺, 𑀕𑀯𑁂𑀲𑀢𑀻𑀢𑀺. 𑀧𑀼𑀫𑀲𑁆𑀲𑀲𑀓𑀁 𑀧𑀼𑀁𑀲𑀓𑀁. 𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺. 𑀦𑀢𑁆𑀣𑀺 𑀧𑀼𑀁𑀲𑀓𑀁 𑀏𑀢𑀲𑁆𑀲𑀸𑀢𑀺 𑀦𑀧𑀼𑀁𑀲𑀓𑀁. ‘‘𑀬𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲𑀸’’𑀢𑀺 𑀪𑀸𑀯𑀭𑀽𑀧𑀥𑀫𑁆𑀫𑀲𑁆𑀲. ‘‘𑀢𑀁’’𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀫𑀳𑀸𑀲𑀡𑁆𑀞𑀸𑀦𑀁 𑀲𑀢𑁆𑀢𑀸𑀦𑀁 𑀚𑀸𑀢𑀺𑀪𑁂𑀤𑀁 𑀮𑀺𑀗𑁆𑀕𑁂𑀢𑀺 𑀜𑀸𑀧𑁂𑀢𑀻𑀢𑀺 𑀮𑀺𑀗𑁆𑀕𑀁. 𑀮𑀓𑁆𑀔𑀡𑀧𑀸𑀞𑀓𑀸 𑀦𑀺𑀫𑀺𑀦𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺 𑀓𑀮𑁆𑀬𑀸𑀡 𑀧𑀸𑀧𑀓𑀁 𑀓𑀫𑁆𑀫𑀯𑀺𑀧𑀸𑀓𑀁 𑀏𑀢𑁂𑀦𑀸𑀢𑀺 𑀦𑀺𑀫𑀺𑀢𑁆𑀢𑀁. 𑀓𑀺𑀭𑀺𑀬𑀸 𑀓𑀼𑀢𑁆𑀢𑀁. 𑀆𑀬𑀼𑀓𑀦𑁆𑀢𑀁 𑀓𑀧𑁆𑀧𑀻𑀬𑀢𑀺 𑀲𑀗𑁆𑀔𑀭𑀻𑀬𑀢𑀻𑀢𑀺 𑀆𑀓𑀧𑁆𑀧𑁄. 𑀲𑀩𑁆𑀩𑁂𑀧𑁂𑀢𑁂𑀮𑀺𑀗𑁆𑀕𑀸𑀤𑀬𑁄. 𑀲𑁄𑀘 𑀅𑀯𑀺𑀲𑀤𑀸𑀤𑀺𑀪𑀸𑀯𑁄. ‘‘𑀯𑀘𑀦𑁂𑀲𑀼𑀘𑀸’’𑀢𑀺 𑀇𑀢𑁆𑀣𑀺𑀲𑀤𑁆𑀤𑀧𑀼𑀭𑀺𑀲𑀲𑀤𑁆𑀤𑀸𑀤𑀻𑀲𑀼 𑀘. ‘‘𑀯𑀘𑀦𑀢𑁆𑀣𑁂𑀲𑀼 𑀘𑀸’’𑀢𑀺 𑀇𑀢𑁆𑀣𑀺 𑀲𑀡𑁆𑀞𑀸𑀦 𑀧𑀼𑀭𑀺𑀲𑀲𑀡𑁆𑀞𑀸𑀦𑀸𑀤𑀺 𑀅𑀢𑁆𑀣𑁂𑀲𑀼 𑀘. ‘‘𑀦𑀺𑀫𑀺𑀢𑁆𑀢𑀲𑀤𑁆𑀤𑁄 𑀯𑀺𑀬𑀸’’𑀢𑀺 𑀦𑀺𑀫𑀺𑀢𑁆𑀢 𑀲𑀤𑁆𑀤𑁄 𑀅𑀗𑁆𑀕𑀚𑀸𑀢𑁂 𑀧𑀸𑀓𑀝𑁄 𑀯𑀺𑀬𑀸𑀢𑀺. 𑀦 𑀧𑀸𑀓𑀝𑁄 𑀤𑀺𑀝𑁆𑀞𑁄. 𑀅𑀧𑀸𑀓𑀝𑁄 𑀧𑀦 𑀓𑀢𑁆𑀣𑀘𑀺 𑀤𑀺𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑀯𑀦𑁆𑀢𑀺 𑀲𑀤𑁆𑀤𑀩𑀼𑀤𑁆𑀥𑀺𑀬𑁄’’𑀢𑀺 𑀲𑀤𑁆𑀤𑀲𑀢𑁆𑀣𑀦𑀬𑁄. ‘‘𑀪𑀯𑀦𑁆𑀢𑀺 𑀮𑀺𑀗𑁆𑀕𑀸𑀤𑀻𑀦𑀻’’𑀢𑀺 𑀅𑀝𑁆𑀞𑀓𑀣𑀸𑀦𑀬𑁄. 𑀢𑀢𑁆𑀣 𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀁 𑀳𑁂𑀢𑀼𑀪𑀸𑀯 𑀮𑀓𑁆𑀔𑀡𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀏𑀢𑀲𑁆𑀫𑀺𑀁 𑀲𑀢𑀻’’𑀢𑀺 𑀘 𑀚𑀸𑀢𑀺𑀬𑀸 𑀲𑀢𑀺, 𑀚𑀭𑀸𑀫𑀭𑀡𑀁 𑀳𑁄𑀢𑀺. 𑀅𑀲𑀢𑀺 𑀦 𑀳𑁄𑀢𑀻𑀢𑀺 𑀏𑀢𑁆𑀣𑀯𑀺𑀬 𑀳𑁂𑀢𑀼 𑀨𑀮𑀪𑀸𑀯𑀧𑀸𑀓𑀝𑀢𑁆𑀣𑀁 𑀯𑀼𑀢𑁆𑀢𑀁.

𑀯𑀢𑁆𑀣𑀼𑀭𑀽𑀧𑁂. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀘𑀦𑀢𑁆𑀣𑀸 𑀪𑀯𑀦𑁆𑀢𑀺. 𑀥𑀸𑀢𑀼 𑀤𑁆𑀯𑀬𑀁 𑀦𑀸𑀫 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀤𑁆𑀯𑀬𑀁. ‘‘𑀅𑀯𑀢𑁆𑀯𑀸’’𑀢𑀺 𑀳𑀤𑀬 𑀯𑀢𑁆𑀣𑀼𑀁 𑀅𑀯𑀢𑁆𑀯𑀸. ‘‘𑀢𑀁’’𑀢𑀺 𑀳𑀤𑀬 𑀯𑀢𑁆𑀣𑀼 𑀭𑀽𑀧𑀁. ‘‘𑀧𑀜𑁆𑀘𑀸’’𑀢𑀺 𑀧𑀜𑁆𑀘𑀯𑀢𑁆𑀣𑀽𑀦𑀺. ‘‘𑀢𑁂𑀲𑀁’’𑀢𑀺 𑀢𑁂𑀲𑀁 𑀓𑀼𑀲𑀮𑀸𑀤𑀻𑀦𑀁. ‘‘𑀢𑀢𑁆𑀣 𑀯𑀼𑀢𑁆𑀢𑀁’’𑀢𑀺 𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀁. ‘‘𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀻𑀢𑀺 𑀇𑀫𑀁 𑀧𑀸𑀞𑀁 𑀦𑀺𑀤𑁆𑀤𑀺𑀲𑀢𑀺. ‘‘𑀅𑀦𑀜𑁆𑀜 𑀲𑀸𑀥𑀸𑀭𑀡𑁂𑀲𑀼 𑀞𑀸𑀦𑁂𑀲𑀽’’𑀢𑀺 𑀘𑀓𑁆𑀔𑀼 𑀯𑀢𑁆𑀣𑀸𑀤𑀻𑀳𑀺 𑀅𑀜𑁆𑀜𑀯𑀢𑁆𑀣𑀽𑀳𑀺 𑀅𑀲𑀸𑀥𑀸𑀭𑀡𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀝𑁆𑀞𑀸𑀦𑁂𑀲𑀼.

𑀚𑀻𑀯𑀺𑀢𑀭𑀽𑀧𑁂. ‘‘𑀆𑀥𑀺𑀧𑁆𑀧𑀘𑁆𑀘𑀬𑁄𑀕𑁂𑀦𑀸’’𑀢𑀺 𑀅𑀥𑀺𑀧𑀢𑀺𑀪𑀸𑀯𑀬𑁄𑀕𑁂𑀦. ‘‘𑀅𑀥𑀺𑀧𑀢𑀺𑀪𑀸𑀯𑁄’’𑀢𑀺 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬 𑀓𑀺𑀘𑁆𑀘𑀁 𑀯𑀼𑀘𑁆𑀘𑀢𑀺. 𑀦 𑀅𑀥𑀺𑀧𑀢𑀺 𑀧𑀘𑁆𑀘𑀬𑀓𑀺𑀘𑁆𑀘𑀁. ‘‘𑀚𑀻𑀯𑀦𑁆𑀢𑀻’’𑀢𑀺 𑀳𑀭𑀺𑀢𑀪𑀸𑀯𑀁 𑀦 𑀯𑀺𑀚𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀢𑀸𑀦𑀺 𑀏𑀓𑀦𑁆𑀢𑁂𑀦 𑀚𑀻𑀯𑀦𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀚𑀻𑀯𑀺𑀢 𑀭𑀽𑀧𑀲𑁆𑀲 𑀏𑀓𑀦𑁆𑀢 𑀓𑀫𑁆𑀫𑀚𑀲𑁆𑀲 𑀩𑀳𑀺𑀤𑁆𑀥𑀸 𑀅𑀦𑀼𑀧𑀮𑀤𑁆𑀥𑀢𑁆𑀢𑀸. 𑀓𑀫𑁆𑀫𑀚𑀭𑀽𑀧𑀸𑀦𑀺 𑀚𑀻𑀯𑀦𑁆𑀢𑀺 𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀫𑁆𑀫𑁂 𑀅𑀲𑀦𑁆𑀢𑁂𑀧𑀻’’𑀢𑀺 𑀓𑀫𑁆𑀫𑀘𑁂𑀢𑀦𑀸𑀬 𑀧𑀼𑀩𑁆𑀩𑁂 𑀦𑀺𑀭𑀼𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀤𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀢𑀣𑀸𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀇𑀢𑀭 𑀭𑀽𑀧𑀸𑀦𑀻’’𑀢𑀺 𑀘𑀺𑀢𑁆𑀢𑀚𑀭𑀽𑀧𑀸𑀤𑀻𑀦𑀺. 𑀏𑀓𑀯𑀻𑀣𑀺𑀯𑀸𑀭𑁄 𑀦𑀸𑀫 𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺𑀯𑀸𑀭𑁄. 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀯𑀸𑀭𑁄 𑀏𑀓𑀚𑀯𑀦 𑀯𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀺. 𑀓𑀲𑁆𑀫𑀸, 𑀏𑀓𑁂𑀓𑀲𑁆𑀫𑀺𑀁 𑀯𑀻𑀣𑀺𑀯𑀸𑀭𑁂 𑀦𑀺𑀭𑀼𑀤𑁆𑀥𑁂 𑀪𑀯𑀗𑁆𑀕 𑀲𑀫𑀬𑁂 𑀅𑀲𑀤𑀺𑀲𑀲𑁆𑀲 𑀭𑀽𑀧𑀲𑀦𑁆𑀢𑀸𑀦𑀲𑁆𑀲 𑀧𑀸𑀢𑀼𑀩𑁆𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀘 𑀔𑁄 𑀭𑀽𑀧𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀲𑁆𑀲𑁂𑀯 𑀧𑀸𑀓𑀝𑀁 𑀳𑁄𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲 𑀧𑀦 𑀢𑀗𑁆𑀔𑀡𑀫𑀢𑁆𑀢𑁂 𑀅𑀧𑀸𑀓𑀝𑀁. 𑀓𑀲𑁆𑀫𑀸, 𑀢𑀸𑀤𑀺𑀲𑀲𑁆𑀲𑀧𑀺 𑀉𑀢𑀼𑀚𑀭𑀽𑀧𑀲𑀦𑁆𑀢𑀸𑀦𑀲𑁆𑀲 𑀣𑁄𑀓𑀁 𑀧𑀯𑀢𑁆𑀢𑀦𑀢𑁄. 𑀬𑀲𑁆𑀲𑀳𑀺 𑀤𑁄𑀲 𑀲𑀫𑀼𑀝𑁆𑀞𑀺𑀢𑁂𑀦 𑀭𑀽𑀧𑀲𑀦𑁆𑀢𑀸𑀦𑁂𑀦 𑀫𑀼𑀔𑀭𑀽𑀧𑀁 𑀤𑀼𑀩𑁆𑀩𑀡𑁆𑀡𑀁 𑀳𑁄𑀢𑀺. 𑀢𑀲𑁆𑀲 𑀤𑁄𑀲𑁂 𑀦𑀺𑀭𑀼𑀤𑁆𑀥𑁂𑀧𑀺 𑀢𑀁 𑀭𑀽𑀧𑀁 𑀣𑁄𑀓𑀁 𑀤𑀼𑀩𑁆𑀩𑀡𑁆𑀡𑀫𑁂𑀯 𑀔𑀸𑀬𑀢𑀻𑀢𑀺. ‘‘𑀉𑀢𑀼𑀚𑀸𑀳𑀸𑀭𑀚𑀸𑀦𑀜𑁆𑀘 𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁’’𑀢𑀺 𑀅𑀥𑀺𑀓𑀸𑀭𑁄. 𑀏𑀓𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀦 𑀦𑀼 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀺 𑀓𑀫𑁆𑀫𑀚𑀭𑀽𑀧𑀲𑀦𑁆𑀢𑀸𑀦𑀸𑀦𑀺𑀧𑀺 𑀧𑀯𑀢𑁆𑀢𑀺𑀓𑀸𑀮𑁂 𑀓𑀤𑀸𑀘𑀺 𑀲𑀼𑀧𑁆𑀧𑀲𑀦𑁆𑀦𑀸𑀦𑀺, 𑀓𑀤𑀸𑀘𑀺 𑀧𑀲𑀦𑁆𑀦𑀸𑀦𑀺, 𑀓𑀤𑀸𑀘𑀺 𑀅𑀧𑁆𑀧𑀲𑀦𑁆𑀦𑀸𑀦𑀺 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀲𑀘𑁆𑀘𑀁, 𑀢𑀣𑀸 𑀧𑀯𑀢𑁆𑀢𑀺 𑀧𑀦 𑀲𑀦𑁆𑀢𑀸𑀦 𑀯𑀺𑀘𑁆𑀙𑁂𑀤𑁂𑀦 𑀦 𑀳𑁄𑀢𑀺, 𑀦𑀸𑀦𑀸𑀯𑀺𑀘𑁆𑀙𑀺𑀦𑁆𑀦𑁂 𑀘 𑀏𑀓𑁂𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀢𑁂𑀲𑀁 𑀧𑀼𑀦𑀖𑀝𑀦𑀁 𑀦𑀸𑀫 𑀦𑀢𑁆𑀣𑀺. 𑀲𑀓𑀺𑀁 𑀅𑀦𑁆𑀥𑁄 𑀅𑀦𑁆𑀥𑁄𑀬𑁂𑀯 𑀳𑁄𑀢𑀺. 𑀩𑀥𑀺𑀭𑁄𑀘 𑀩𑀥𑀺𑀭𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀤𑀺 𑀏𑀯𑀁’’𑀢𑀺 𑀏𑀯𑀁 𑀬𑀤𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. ‘‘𑀅𑀭𑀽𑀧 𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁’’𑀢𑀺 𑀅𑀥𑀺𑀓𑀸𑀭𑁄. ‘‘𑀯𑀺𑀧𑀸𑀓𑀸𑀦𑀻’’𑀢𑀺 𑀪𑀯𑀗𑁆𑀕𑀪𑀽𑀢𑀸𑀦𑀺 𑀯𑀺𑀧𑀸𑀓𑀸𑀦𑀺. 𑀏𑀓𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀢𑁂𑀲𑀁 𑀦𑀸𑀦𑀸𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸, 𑀬𑀸𑀯𑀚𑀻𑀯𑀫𑁆𑀧𑀺 𑀏𑀓 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀢𑀭𑀸𑀦𑀺 𑀧𑀦𑀸’’𑀢𑀺 𑀓𑀼𑀲𑀮𑀸 𑀓𑀼𑀲𑀮 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀧𑀦. ‘‘𑀢𑀤𑀸𑀭𑀫𑁆𑀫𑀡𑀸’’𑀢𑀺 𑀦𑀺𑀭𑀼𑀤𑁆𑀥𑀸𑀭𑀫𑁆𑀫𑀡𑀸. 𑀅𑀤𑁆𑀥𑀸𑀦𑀧𑁆𑀨𑀭𑀡𑀸𑀦𑀼𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺𑀬𑁂𑀯. 𑀦 𑀧𑀦 𑀘𑀺𑀢𑁆𑀢𑀚𑀭𑀽𑀧𑀸𑀤𑀻𑀦𑀺 𑀯𑀺𑀬 𑀅𑀢𑁆𑀢𑀦𑁄 𑀚𑀦𑀓𑀧𑀘𑁆𑀘𑀬𑁂 𑀦𑀺𑀭𑀼𑀤𑁆𑀥𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀬𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀚𑀻𑀯𑀦𑁆𑀢𑀢𑁆𑀢𑁂 𑀯𑀺𑀲𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀬𑀫𑀢𑁆𑀣𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀅𑀭𑀽𑀧 𑀥𑀫𑁆𑀫𑀸𑀦𑀁 𑀚𑀻𑀯𑀦𑁆𑀢𑀢𑀸𑀯𑀺𑀲𑁂𑀲𑁄 𑀯𑀢𑁆𑀢𑀩𑁆𑀩𑁄. 𑀬𑀣𑀸 𑀭𑀽𑀧𑀲𑀦𑁆𑀢𑀢𑀺𑀬𑀁 𑀅𑀦𑀦𑁆𑀢𑀭 𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀺. 𑀘𑀼𑀢𑀺𑀓𑀸𑀮𑁂 𑀪𑀯𑀦𑁆𑀢𑀭𑀭𑀽𑀧𑀲𑀦𑁆𑀢𑀸𑀦𑀲𑁆𑀲 𑀓𑀺𑀜𑁆𑀘𑀺 𑀧𑀘𑁆𑀘𑀬𑀢𑁆𑀢𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦 𑀪𑀯𑀦𑁆𑀢𑀭 𑀧𑀸𑀢𑀼𑀩𑁆𑀪𑀸𑀯𑁄 𑀦𑀸𑀫 𑀢𑁂𑀲𑀁 𑀦𑀢𑁆𑀣𑀺. 𑀦 𑀢𑀣𑀸 𑀅𑀭𑀽𑀧𑀲𑀦𑁆𑀢𑀢𑀺𑀬𑀁. 𑀢𑀢𑁆𑀣 𑀧𑀦 𑀘𑀼𑀢𑀺𑀘𑀺𑀢𑁆𑀢𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦 𑀪𑀯𑀦𑁆𑀢𑀭𑀧𑀸𑀢𑀼𑀩𑁆𑀪𑀸𑀯𑁄 𑀦𑀸𑀫 𑀢𑁂𑀲𑀁 𑀅𑀢𑁆𑀣𑀺. 𑀅𑀬𑀫𑁆𑀧𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀚𑀻𑀯𑀦𑁆𑀢𑀢𑁆𑀢𑁂 𑀯𑀺𑀲𑁂𑀲𑁄. 𑀢𑀲𑁆𑀫𑀸 𑀅𑀭𑀽𑀧𑀥𑀫𑁆𑀫𑀸𑀦𑀁𑀧𑀺 𑀓𑀫𑁆𑀫𑀚𑀭𑀽𑀧𑀸𑀦𑀁 𑀯𑀺𑀬 𑀦𑀺𑀘𑁆𑀘𑀁 𑀚𑀻𑀯𑀺𑀢𑀬𑁄𑀕𑁂𑀦 𑀚𑀻𑀯𑀦𑁆𑀢𑀢𑁆𑀢𑀸 𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀦 𑀪𑀯𑁂𑀬𑁆𑀬𑀸𑀢𑀺 𑀦 𑀘𑁄𑀤𑁂𑀢𑀩𑁆𑀩𑀦𑁆𑀢𑀺. 𑀓𑀼𑀲𑀮𑀸 𑀓𑀼𑀲𑀮 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀦𑀸𑀫 𑀅𑀓𑀫𑁆𑀫𑀚𑀸𑀦𑀺 𑀳𑁄𑀦𑁆𑀢𑀺. 𑀘𑀺𑀢𑁆𑀢𑀚𑀭𑀽𑀧𑀸𑀤𑀻𑀦𑀺 𑀯𑀺𑀬 𑀅𑀢𑀻𑀢𑀁 𑀓𑀫𑁆𑀫𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀢𑀗𑁆𑀔𑀡𑀺𑀓𑁂𑀳𑀺 𑀦𑀸𑀦𑀸𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀚𑀻𑀯𑀦𑁆𑀢𑀸𑀦𑀁𑀧𑀺 𑀲𑀢𑀁 𑀅𑀚𑀻𑀯𑀦𑁆𑀢𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀸𑀤𑀻𑀦𑀁 𑀯𑀺𑀬 𑀦𑀸𑀦𑀸𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫 𑀅𑀢𑁆𑀣𑀺. 𑀚𑀻𑀯𑀦𑁆𑀢𑀢𑀸 𑀯𑀺𑀲𑁂𑀲𑁄𑀧𑀺 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀓𑁂𑀘𑀺 𑀯𑀤𑀦𑁆𑀢𑀺. 𑀭𑀼𑀓𑁆𑀔𑀸𑀤𑀻𑀲𑀼𑀧𑀺 𑀚𑀻𑀯𑀺𑀢𑀁 𑀦𑀸𑀫 𑀅𑀢𑁆𑀣𑀺. 𑀬𑀢𑁄 𑀢𑁂𑀲𑀁 𑀳𑀭𑀺𑀢𑀢𑀸 𑀘 𑀅𑀳𑀭𑀺𑀢𑀢𑀸 𑀘 𑀭𑀽𑀳𑀦𑀜𑁆𑀘-𑀅𑀭𑀽𑀳𑀦𑀜𑁆𑀘 𑀤𑀺𑀲𑁆𑀲𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀬𑀤𑀺 𑀢𑁂𑀲𑀁 𑀚𑀻𑀯𑀺𑀢𑀁 𑀦𑀸𑀫 𑀅𑀢𑁆𑀣𑀺, 𑀅𑀭𑀽𑀧𑀚𑀻𑀯𑀺𑀢𑀁 𑀯𑀸 𑀲𑀺𑀬𑀸, 𑀭𑀽𑀧𑀚𑀻𑀯𑀺𑀢𑀁 𑀯𑀸. 𑀢𑀢𑁆𑀣 𑀲𑀘𑁂 𑀅𑀭𑀽𑀧𑀚𑀻𑀯𑀺𑀢𑀁 𑀳𑁄𑀢𑀺. 𑀬𑀣𑀸 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀫𑀭𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀪𑀯𑀦𑁆𑀢𑀭𑁂 𑀧𑀸𑀢𑀼𑀩𑁆𑀪𑀯𑀦𑁆𑀢𑀺. 𑀢𑀣𑀸 𑀭𑀼𑀓𑁆𑀔𑀸𑀧𑀺 𑀫𑀭𑀺𑀢𑁆𑀯𑀸 𑀪𑀯𑀦𑁆𑀢𑀭𑁂 𑀧𑀸𑀢𑀼𑀩𑁆𑀪𑀯𑁂𑀬𑁆𑀬𑀼𑀁. 𑀅𑀣 𑀭𑀽𑀧𑀚𑀻𑀯𑀺𑀢𑀁 𑀲𑀺𑀬𑀸. 𑀬𑀣𑀸 𑀲𑀢𑁆𑀢𑀸𑀦𑀁 𑀘𑀓𑁆𑀔𑀸𑀤𑀺 𑀅𑀗𑁆𑀕𑁂𑀲𑀼 𑀚𑀻𑀯𑀺𑀢 𑀲𑀦𑁆𑀢𑀸𑀦𑁂 𑀪𑀺𑀦𑁆𑀦𑁂 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀧𑀼𑀦 𑀚𑀻𑀯𑀦𑁆𑀢𑀸𑀦𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀣𑀸 𑀭𑀼𑀓𑁆𑀔𑀸𑀧𑀺 𑀔𑀦𑁆𑀥𑁂𑀲𑀼 𑀯𑀸 𑀲𑀸𑀔𑀸𑀲𑀼𑀯𑀸 𑀙𑀺𑀦𑁆𑀦𑁂𑀲𑀼 𑀚𑀻𑀯𑀺𑀢𑀲𑀦𑁆𑀢𑀸𑀦𑁂 𑀪𑀺𑀦𑁆𑀦𑁂 𑀢𑁂𑀔𑀦𑁆𑀥𑀸𑀯𑀸 𑀲𑀸𑀔𑀸𑀬𑁄 𑀯𑀸 𑀧𑀼𑀦 𑀅𑀜𑁆𑀜𑀢𑁆𑀣 𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬𑀼𑀁. 𑀲𑀓𑁆𑀓𑀸 𑀏𑀯 𑀪𑀯𑀦𑁆𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀁𑀧𑀺 𑀚𑀻𑀯𑀺𑀢𑀁 𑀦𑀸𑀫 𑀢𑁂𑀲𑀁 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂. 𑀦 𑀳𑀺 𑀢𑁂𑀲𑀁 𑀓𑀫𑁆𑀫𑀁𑀬𑁂𑀯 𑀞𑀺𑀢𑀺𑀓𑀸𑀭𑀡𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀫𑁆𑀫𑀁 𑀞𑀺𑀢𑀺𑀓𑀸𑀭𑀡𑀁 𑀏𑀯 𑀦 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀆𑀳𑀸𑀭𑀚𑀸𑀤𑀻𑀦𑀁’’𑀢𑀺𑀆𑀤𑀺𑀁. 𑀏𑀓𑀓𑀮𑀸𑀧𑁂 𑀕𑀢𑀸 𑀧𑀯𑀢𑁆𑀢𑀸 𑀲𑀳𑀚𑀸𑀢 𑀧𑀘𑁆𑀘𑀬𑀸, 𑀢𑁂𑀳𑀺 𑀆𑀬𑀢𑁆𑀢𑀸 𑀧𑀝𑀺𑀩𑀤𑁆𑀥𑀸𑀢𑀺 𑀯𑀺𑀕𑁆𑀕𑀳𑁄. 𑀓𑀫𑁆𑀫𑀸𑀤𑀻𑀦𑀁 𑀭𑀽𑀧𑀚𑀦𑀓𑀧𑀘𑁆𑀘𑀬𑀸𑀦𑀁 𑀚𑀦𑀓𑀸𑀦𑀼𑀪𑀸𑀯𑁄 𑀦𑀸𑀫 𑀭𑀽𑀧𑀓𑀮𑀸𑀧𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀨𑀭𑀢𑀺, 𑀦 𑀞𑀺𑀢𑀺𑀓𑁆𑀔𑀡𑁂. 𑀉𑀧𑀘𑀬𑀲𑀦𑁆𑀢𑀢𑀺𑀬𑁄 𑀘 𑀉𑀧𑁆𑀧𑀸𑀤𑀓𑁆𑀔𑀡𑁂 𑀮𑀩𑁆𑀪𑀦𑁆𑀢𑀺, 𑀦 𑀞𑀺𑀢𑀺𑀓𑁆𑀔𑀡𑁂. 𑀢𑀲𑁆𑀫𑀸 𑀢𑀸 𑀚𑀦𑀓𑀧𑀘𑁆𑀘𑀬𑀸𑀦𑀼𑀪𑀸𑀯𑀓𑁆𑀔𑀡𑁂 𑀮𑀤𑁆𑀥𑀢𑁆𑀢𑀸 𑀓𑀼𑀢𑁄𑀘𑀺𑀚𑀸𑀢𑀦𑀸𑀫𑀁 𑀮𑀪𑀦𑁆𑀢𑀺. 𑀚𑀭𑀢𑀸𑀧𑀦 𑀞𑀺𑀢𑀺𑀓𑁆𑀔𑀡𑁂 𑀏𑀯 𑀮𑀩𑁆𑀪𑀢𑀺, 𑀦 𑀉𑀧𑁆𑀧𑀸𑀤𑀓𑁆𑀔𑀡𑁂. 𑀢𑀲𑁆𑀫𑀸 𑀲𑀸 𑀓𑀼𑀢𑁄𑀘𑀺𑀚𑀸𑀢 𑀦𑀸𑀫𑀁 𑀦 𑀮𑀪𑀢𑀺. 𑀬𑀤𑀺 𑀧𑀦 𑀆𑀳𑀸𑀭𑀚𑀸𑀤𑀻𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀞𑀺𑀢𑀺 𑀦𑀸𑀫 𑀆𑀳𑀸𑀭𑀸𑀤𑀺 𑀚𑀦𑀓𑀧𑀘𑁆𑀘𑀬𑀸𑀬𑀢𑁆𑀢𑀸 𑀪𑀯𑁂𑀬𑁆𑀬. 𑀚𑀭𑀢𑀸𑀧𑀺 𑀚𑀦𑀓𑀧𑀘𑁆𑀘𑀬𑀸𑀦𑀼𑀪𑀸𑀯𑀓𑁆𑀔𑀡𑁂𑀯 𑀮𑀩𑁆𑀪𑀫𑀸𑀦𑀸 𑀲𑀺𑀬𑀸. 𑀏𑀯𑀜𑁆𑀘𑀲𑀢𑀺, 𑀲𑀸𑀧𑀺 𑀓𑀼𑀢𑁄𑀘𑀺𑀚𑀸𑀢 𑀦𑀸𑀫𑀁 𑀮𑀪𑁂𑀬𑁆𑀬. 𑀦 𑀧𑀦 𑀮𑀪𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀞𑀺𑀢𑀺 𑀦𑀸𑀫 𑀚𑀦𑀓𑀧𑀘𑁆𑀘𑀬𑀸𑀬𑀢𑁆𑀢𑀸 𑀦 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀭𑀣𑀸’’𑀢𑀺𑀆𑀤𑀺𑀫𑀸𑀳. ‘‘𑀉𑀧𑀢𑁆𑀣𑀫𑁆𑀪𑀫𑀸𑀦𑀸’’𑀢𑀺 𑀓𑀮𑀸𑀧𑀦𑁆𑀢𑀭𑁂 𑀞𑀢𑁆𑀯𑀸 𑀉𑀧𑀢𑁆𑀣𑀫𑁆𑀪𑀫𑀸𑀦𑀸. ‘‘𑀦 𑀔𑀡𑀞𑀺𑀢𑀺𑀧𑁆𑀧𑀯𑀢𑁆𑀢𑀺𑀬𑀸’’𑀢𑀺 𑀔𑀡𑀞𑀺 𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀺𑀅𑀢𑁆𑀣𑀸𑀬 𑀉𑀧𑀢𑁆𑀣𑀫𑁆𑀪𑀦𑁆𑀢𑀺, 𑀅𑀦𑀼𑀧𑀸𑀮𑁂𑀢𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑁂𑀲𑀁𑀧𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁. ‘‘𑀢𑀁’’𑀢𑀺 𑀯𑀺𑀪𑀸𑀯𑀦𑀺𑀯𑀘𑀦𑀁. ‘‘𑀇𑀤𑀁 𑀧𑀦𑀸’’𑀢𑀺 𑀚𑀻𑀯𑀺𑀢𑀭𑀽𑀧𑀁 𑀧𑀦.

𑀆𑀳𑀸𑀭𑀭𑀽𑀧𑁂. ‘‘𑀲𑀯𑀢𑁆𑀣𑀼𑀓𑀯𑀘𑀦𑀁’’𑀢𑀺 𑀪𑁄𑀚𑀦𑀸𑀤𑀺 𑀯𑀢𑁆𑀣𑀼𑀦𑀸 𑀲𑀳 𑀧𑀯𑀢𑁆𑀢𑀢𑀻𑀢𑀺 𑀲𑀯𑀢𑁆𑀣𑀼𑀓𑀁. 𑀯𑀘𑀦𑀁. 𑀦 𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀁 𑀆𑀳𑀸𑀭 𑀭𑀽𑀧𑀁 𑀦𑀸𑀫 𑀓𑀩𑀴𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀻𑀢𑀺. ‘‘𑀯𑀺𑀯𑁂𑀘𑀺𑀢𑀸𑀦𑀻’’𑀢𑀺 𑀧𑀸𑀘𑀦 𑀓𑀺𑀘𑁆𑀘𑁂𑀦 𑀯𑀺𑀪𑀚𑀺𑀢𑀸𑀦𑀺. 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑀸𑀦𑀺. ‘‘𑀧𑀜𑁆𑀘𑀥𑀸 𑀯𑀺𑀪𑀸𑀕𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀏𑀓𑀁 𑀪𑀸𑀕𑀁 𑀧𑀸𑀡𑀓𑀸 𑀔𑀸𑀤𑀦𑁆𑀢𑀺. 𑀏𑀓𑀁 𑀪𑀸𑀕𑀁 𑀉𑀤𑀭𑀕𑁆𑀕𑀺 𑀛𑀸𑀧𑁂𑀢𑀺. 𑀏𑀓𑁄 𑀪𑀸𑀕𑁄 𑀫𑀼𑀢𑁆𑀢𑀁 𑀳𑁄𑀢𑀺. 𑀏𑀓𑁄𑀪𑀸𑀕𑁄 𑀓𑀭𑀻𑀲𑀁. 𑀏𑀓𑁄𑀪𑀸𑀕𑁄 𑀭𑀲𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑁄𑀡𑀺𑀢𑀫𑀁𑀲𑀸𑀤𑀻𑀦𑀺 𑀉𑀧𑀩𑁆𑀭𑀽𑀳𑀬𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀥𑀸 𑀯𑀺𑀪𑀸𑀕𑀁 𑀕𑀘𑁆𑀙𑀦𑁆𑀢𑀺. ‘‘𑀮𑁄𑀓𑁂’’𑀢𑀺 𑀮𑁄𑀓𑀺𑀬 𑀕𑀦𑁆𑀣𑁂. ‘‘𑀢𑀢𑁄’’𑀢𑀺 𑀆𑀫𑀸𑀲𑀬𑀢𑁄. 𑀅𑀦𑀼𑀨𑀭𑀦𑁆𑀢𑁄 𑀳𑀼𑀢𑁆𑀯𑀸. ‘‘𑀢𑀲𑁆𑀲𑀸’’𑀢𑀺 𑀭𑀲𑀪𑀸𑀕𑀲𑁆𑀲. ‘‘𑀪𑀽𑀢𑁂𑀲𑀽’’𑀢𑀺 𑀫𑀳𑀸𑀪𑀽𑀢𑁂𑀲𑀼. 𑀲𑀳 𑀇𑀦𑁆𑀤𑁆𑀭𑀺𑀬𑁂𑀦 𑀯𑀢𑁆𑀢𑀢𑀻𑀢𑀺 𑀲𑁂𑀦𑁆𑀤𑁆𑀭𑀺𑀬𑁄. 𑀓𑀸𑀬𑁄. 𑀉𑀤𑀬𑀢𑀻𑀢𑀺 𑀑𑀚𑀸. 𑀤𑀓𑀸𑀭𑀲𑁆𑀲 𑀚𑀓𑀸𑀭𑁄. 𑀅𑀯𑀢𑀺 𑀚𑀦𑁂𑀢𑀻𑀢𑀺 𑀑𑀚𑀸. 𑀅𑀯𑀲𑀤𑁆𑀤𑀲𑁆𑀲 𑀑𑀓𑀸𑀭𑁄. ‘‘𑀅𑀢𑁆𑀢𑀦𑁄𑀯𑀢𑁆𑀣𑀼𑀁’’𑀢𑀺 𑀅𑀢𑁆𑀢𑀦𑁄𑀦𑀺𑀲𑁆𑀲𑀬𑀪𑀽𑀢𑀁 𑀭𑀽𑀧𑀓𑀸𑀬𑀁.

‘‘𑀅𑀜𑁆𑀜𑀸𑀧𑀤𑁂𑀲𑁄’’ 𑀦𑀸𑀫 𑀭𑀽𑀧𑀲𑁆𑀲 𑀮𑀳𑀼𑀢𑀸𑀢𑀺𑀆𑀤𑀻𑀲𑀼 𑀅𑀜𑁆𑀜𑀲𑁆𑀲 𑀭𑀽𑀧𑀲𑁆𑀲 𑀓𑁆𑀭𑀺𑀬𑀸𑀫𑀢𑁆𑀢𑀪𑀸𑀯𑁂𑀦 𑀅𑀧𑀤𑀺𑀲𑀦𑀁 𑀯𑀼𑀘𑁆𑀘𑀢𑀺. ‘‘𑀉𑀚𑀼𑀓𑀢𑁄𑀯 𑀦𑀺𑀧𑁆𑀨𑀸𑀤𑀺𑀢𑀁’’𑀢𑀺 𑀫𑀼𑀔𑁆𑀬𑀢𑁄𑀯 𑀚𑀦𑀺𑀢𑀁. 𑀬𑀣𑀸𑀳𑀺 𑀲𑀩𑁆𑀩𑀁 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀅𑀚𑀸𑀢𑀺 𑀥𑀫𑁆𑀫𑀢𑁆𑀢𑀸 𑀉𑀚𑀼𑀓𑀢𑁄 𑀓𑀫𑁆𑀫𑀸𑀤𑀻𑀳𑀺 𑀚𑀸𑀢𑀁 𑀦𑀸𑀫 𑀦 𑀳𑁄𑀢𑀺. 𑀓𑀫𑁆𑀫𑀸𑀤𑀻𑀳𑀺 𑀚𑀸𑀢𑀁 𑀧𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀦𑀺𑀲𑁆𑀲𑀸𑀬 𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀞𑀸𑀦𑀽𑀧𑀘𑀸𑀭𑁂𑀦 𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬𑀁 𑀘𑀺𑀢𑁆𑀢𑀚𑀁𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀢𑀺. 𑀦 𑀢𑀣𑀸 𑀇𑀤𑀁 𑀦𑀺𑀧𑁆𑀨𑀦𑁆𑀦𑀭𑀽𑀧𑀁. 𑀇𑀤𑀁 𑀧𑀦 𑀚𑀸𑀢𑀺𑀥𑀫𑁆𑀫𑀢𑁆𑀢𑀸 𑀉𑀚𑀼𑀓𑀢𑁄𑀯 𑀓𑀫𑁆𑀫𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀁 𑀚𑀦𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀭𑀽𑀧𑀁’’𑀢𑀺 𑀯𑀼𑀢𑁆𑀢𑁂 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀁𑀧𑀺 𑀮𑀩𑁆𑀪𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 𑀭𑀽𑀧𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀭𑀼𑀧𑁆𑀧𑀦𑀮𑀓𑁆𑀔𑀡 𑀲𑀫𑁆𑀧𑀦𑁆𑀦𑀁’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀁’’ 𑀦𑀸𑀫 𑀲𑀻𑀢𑀼𑀡𑁆𑀳𑀸𑀤𑀻𑀳𑀺 𑀯𑀺𑀓𑀸𑀭𑀧𑀢𑁆𑀢𑀺𑀮𑀓𑁆𑀔𑀡𑀁. 𑀢𑀫𑁆𑀧𑀦 𑀅𑀦𑀺𑀧𑁆𑀨𑀦𑁆𑀦 𑀭𑀽𑀧𑁂 𑀫𑀼𑀔𑁆𑀬𑀢𑁄 𑀦 𑀮𑀩𑁆𑀪𑀢𑀺. 𑀦𑀺𑀧𑁆𑀨𑀦𑁆𑀦𑀭𑀽𑀧𑁂 𑀏𑀯 𑀮𑀩𑁆𑀪𑀢𑀺. 𑀓𑀲𑁆𑀫𑀸, 𑀦𑀺𑀧𑁆𑀨𑀦𑁆𑀦𑀭𑀽𑀧𑀲𑁆𑀲𑀳𑀺 𑀦𑀸𑀦𑀸𑀯𑀺𑀓𑀸𑀭𑁄 𑀯𑀺𑀓𑀸𑀭𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑀓𑁆𑀔𑀡𑀁 𑀮𑀓𑁆𑀔𑀡 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀓𑀸𑀭𑀲𑁆𑀲 𑀧𑀦 𑀯𑀺𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺. 𑀮𑀓𑁆𑀔𑀡𑀲𑁆𑀲 𑀘 𑀮𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀅𑀢𑁆𑀣𑀻𑀢𑀺 𑀯𑀤𑁂𑀬𑁆𑀬. 𑀯𑀺𑀓𑀸𑀭𑀲𑁆𑀲 𑀯𑀺𑀓𑀸𑀭𑁄, 𑀢𑀲𑁆𑀲 𑀘 𑀯𑀺𑀓𑀸𑀭𑁄, 𑀢𑀲𑁆𑀲 𑀘 𑀯𑀺𑀓𑀸𑀭𑁄𑀢𑀺 𑀅𑀧𑀭𑀺𑀬𑀦𑁆𑀢𑀫𑁂𑀯 𑀲𑀺𑀬𑀸. 𑀢𑀣𑀸 𑀮𑀓𑁆𑀔𑀡𑁂𑀧𑀻𑀢𑀺.

𑀆𑀓𑀸𑀲𑀥𑀸𑀢𑀼𑀬𑀁. ‘‘𑀧𑀓𑀸𑀲𑀦𑁆𑀢𑀻’’𑀢𑀺 𑀇𑀤𑀁 𑀏𑀓𑀁 𑀇𑀤𑀁 𑀏𑀓𑀦𑁆𑀢𑀺 𑀧𑀜𑁆𑀜𑀸𑀬𑀦𑁆𑀢𑀺. ‘‘𑀧𑀭𑀺𑀘𑁆𑀙𑀺𑀦𑁆𑀤𑀢𑀻’’𑀢𑀺 𑀆𑀳 ‘‘𑀧𑀭𑀺𑀢𑁄’’𑀢𑀺𑀆𑀤𑀺𑀁. ‘‘𑀅𑀲𑀫𑁆𑀫𑀺𑀲𑁆𑀲𑀁’’𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀏𑀓𑀢𑁆𑀢𑀁 𑀅𑀦𑀼𑀧𑀕𑀫𑀦𑀁’’𑀢𑀺. 𑀧𑀭𑀺𑀘𑁆𑀙𑀺𑀦𑁆𑀤𑀻𑀬𑀢𑀻𑀢𑀺 𑀧𑀭𑀺𑀘𑁆𑀙𑁂𑀤𑁄𑀢𑀺 𑀆𑀳 ‘‘𑀢𑁂𑀳𑀺 𑀯𑀸’’𑀢𑀺𑀆𑀤𑀺𑀁. ‘‘𑀢𑁂𑀳𑀺 𑀯𑀸’’𑀢𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀯𑀸. ‘‘𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀅𑀓𑀢𑁆𑀯𑀸’’𑀢𑀺 𑀅𑀢𑁆𑀢𑀦𑁄𑀧𑀓𑁆𑀔𑀺𑀓𑀁 𑀯𑀸 𑀧𑀭𑁂𑀲𑀁 𑀧𑀓𑁆𑀔𑀺𑀓𑀁 𑀯𑀸 𑀅𑀓𑀢𑁆𑀯𑀸. 𑀧𑀭𑀺𑀘𑁆𑀙𑁂𑀤 𑀓𑁆𑀭𑀺𑀬𑀸𑀫𑀢𑁆𑀢𑀁 𑀧𑀭𑀺𑀘𑁆𑀙𑁂𑀤𑁄𑀢𑀺 𑀆𑀳 ‘‘𑀢𑁂𑀲𑀁 𑀯𑀸’’𑀢𑀺𑀆𑀤𑀺𑀁. ‘‘𑀢𑁂𑀲𑀁 𑀯𑀸’’𑀢𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀯𑀸. ‘‘𑀅𑀬𑀁 𑀧𑀦𑀸’’𑀢𑀺 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄 𑀧𑀦. ‘‘𑀢𑀲𑁆𑀲𑀸’’𑀢𑀺 𑀧𑀭𑀺𑀘𑁆𑀙𑁂𑀤𑀲𑁆𑀲. 𑀲𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀏𑀯𑀁 𑀫𑀦𑀲𑀺𑀓𑀢𑁆𑀯𑀸. ‘‘𑀏𑀢𑁂𑀳𑀻’’𑀢𑀺 𑀏𑀢𑁂𑀳𑀺 𑀫𑀳𑀸𑀪𑀽𑀢𑁂𑀳𑀺. ‘‘𑀅𑀜𑁆𑀜𑀫𑀜𑁆𑀜 𑀅𑀩𑁆𑀬𑀸𑀧𑀺𑀢𑀢𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀭𑀽𑀧𑀓𑀮𑀸𑀧𑀸𑀦𑀁 𑀏𑀓𑀓𑀮𑀸𑀧𑀢𑁆𑀢𑀽𑀧𑀕𑀫𑀦𑀁 𑀅𑀜𑁆𑀜𑀫𑀜𑁆𑀜 𑀩𑁆𑀬𑀸𑀧𑀺𑀢𑀸 𑀦𑀸𑀫, 𑀢𑀣𑀸 𑀅𑀦𑀼𑀧𑀕𑀫𑀦𑀁 𑀅𑀜𑁆𑀜𑀫𑀜𑁆𑀜 𑀅𑀩𑁆𑀬𑀸𑀧𑀺𑀢𑀢𑀸 𑀦𑀸𑀫. 𑀢𑁂𑀦𑀸𑀳 ‘‘𑀏𑀓𑀢𑁆𑀢𑀁’’𑀢𑀺𑀆𑀤𑀺𑀁. ‘‘𑀢𑀢𑁆𑀣𑀸’’𑀢𑀺 𑀢𑀺𑀲𑁆𑀲𑀁 𑀧𑀸𑀴𑀺𑀬𑀁. ‘‘𑀦𑀸𑀦𑀸𑀓𑀮𑀸𑀧𑀕𑀢𑀸𑀦𑀁 𑀪𑀽𑀢𑀸𑀦𑀁’’𑀢𑀺 𑀏𑀢𑁂𑀦 𑀓𑀮𑀸𑀧𑀧𑀭𑀺𑀬𑀦𑁆𑀢𑀢𑀸 𑀏𑀯 𑀯𑀼𑀢𑁆𑀢𑀸 𑀳𑁄𑀢𑀺.

𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬𑁂. ‘‘𑀲𑀬𑀜𑁆𑀘𑀸’’𑀢𑀺 𑀯𑀺𑀜𑁆𑀜𑀢𑁆𑀢𑀺 𑀲𑀗𑁆𑀔𑀸𑀢𑀁 𑀲𑀬𑀜𑁆𑀘. ‘‘𑀢𑁂𑀦𑀸’’𑀢𑀺 𑀘𑀮𑀫𑀸𑀦𑁂𑀦 𑀓𑀸𑀬𑀗𑁆𑀕𑁂𑀦. ‘‘𑀢𑁂𑀳𑀻’’𑀢𑀺 𑀧𑀘𑁆𑀘𑀓𑁆𑀔𑁂 𑀞𑀺𑀢𑁂𑀳𑀺 𑀚𑀦𑁂𑀳𑀺. 𑀢𑀢𑁆𑀣𑀸𑀢𑀺𑀆𑀤𑀻𑀲𑀼. ‘‘𑀓𑀸𑀬𑀗𑁆𑀕𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺 𑀅𑀪𑀺𑀓𑁆𑀓𑀫𑀦𑀸𑀤𑀺 𑀅𑀢𑁆𑀣𑀸𑀬 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀓𑀸𑀬𑀗𑁆𑀕𑀸𑀦𑀁 𑀘𑀮𑀦 𑀲𑀗𑁆𑀔𑀸𑀢𑀁 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲. 𑀉𑀧𑁆𑀧𑀚𑁆𑀚𑀦𑁆𑀢𑀸 𑀘 𑀲𑀩𑁆𑀩𑁂𑀢𑁂 𑀘𑀺𑀢𑁆𑀢𑀚𑀯𑀸𑀢𑀓𑀮𑀸𑀧𑀸 𑀬𑀣𑀸𑀥𑀺𑀧𑁆𑀧𑁂𑀢 𑀤𑀺𑀲𑀸𑀪𑀺𑀫𑀼𑀔𑀸 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀬𑀣𑀸 𑀯𑀸 𑀢𑀣𑀸 𑀯𑀸 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀅𑀦𑀺𑀬𑀫𑀢𑁄 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀲 𑀘𑁄𑀧𑀦 𑀓𑀸𑀬𑀲𑁆𑀲. ‘‘𑀢𑁂𑀳𑀻’’𑀢𑀺 𑀘𑀺𑀢𑁆𑀢𑀚𑀯𑀸𑀢𑀓𑀮𑀸𑀧𑁂𑀳𑀺. 𑀦𑀺𑀬𑀸𑀫𑀓𑁄 𑀦𑀸𑀯𑀸𑀦𑀺𑀬𑁄𑀚𑀓𑁄. ‘‘𑀢𑁂 𑀘𑀸’’𑀢𑀺 𑀢𑁂𑀘𑀺𑀢𑁆𑀢𑀚𑀯𑀸𑀢𑀓𑀮𑀸𑀧𑀲𑀗𑁆𑀖𑀸𑀝𑀸. 𑀏𑀢𑁂𑀦 𑀲𑀓𑀮𑀁 𑀓𑀸𑀬𑀗𑁆𑀕𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀓𑀮𑀓𑀸𑀬𑀗𑁆𑀕𑀁 𑀦𑀸𑀯𑀸𑀲𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀘𑀸𑀭𑁂𑀢𑁆𑀯𑀸’’𑀢𑀺 𑀯𑀺𑀬𑀽𑀳𑀺𑀢𑁆𑀯𑀸. 𑀓𑀣𑀁 𑀧𑀦 𑀲𑀸 𑀦𑀺𑀬𑀸𑀫𑀓𑀲𑀤𑀺𑀲𑀻 𑀳𑁄𑀢𑀻𑀢𑀺 𑀆𑀳 ‘‘𑀬𑀣𑀸𑀳𑀻’’𑀢𑀺𑀆𑀤𑀺. 𑀬𑀤𑁂𑀢𑀁 𑀲𑀓𑁆𑀓𑁄𑀢𑀻𑀢𑀺 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀢𑀻𑀧𑀬𑀚𑀯𑀦 𑀯𑀸𑀭𑁂𑀳𑀻’’𑀢𑀺 𑀤𑁆𑀯𑀢𑁆𑀢𑀺 𑀚𑀯𑀦𑀯𑀸𑀭𑁂𑀳𑀺. ‘‘𑀢𑀢𑁄’’𑀢𑀺 𑀬𑀲𑁆𑀫𑀺𑀁 𑀯𑀸𑀭𑁂 𑀘𑀮𑀦 𑀲𑀗𑁆𑀔𑀸𑀢𑀁 𑀤𑁂𑀲𑀦𑁆𑀢𑀭 𑀧𑀸𑀧𑀦𑀁 𑀚𑀸𑀬𑀢𑀺. 𑀢𑀢𑁄 𑀘𑀮𑀦𑀯𑀸𑀭𑀢𑁄. 𑀲𑀦𑁆𑀣𑀫𑁆𑀪𑀦 𑀲𑀦𑁆𑀥𑀸𑀭𑀡𑀸𑀦𑀺 𑀏𑀯 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀦 𑀘𑀮𑀦𑀲𑀗𑁆𑀔𑀸𑀢𑀁 𑀤𑁂𑀲𑀦𑁆𑀢𑀭 𑀧𑀸𑀧𑀦𑀁. ‘‘𑀏𑀢𑁆𑀣𑀸’’𑀢𑀺 𑀏𑀢𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁. 𑀦𑀸𑀦𑀸𑀚𑀯𑀦𑀯𑀻𑀣𑀻𑀲𑀼. 𑀮. 𑀉𑀧𑀢𑁆𑀣𑀫𑁆𑀪𑀦𑁂 𑀘 𑀬𑀼𑀚𑁆𑀚𑀢𑀺𑀬𑁂𑀯. 𑀦 𑀏𑀓𑀺𑀲𑁆𑀲𑀸𑀬 𑀚𑀯𑀦𑀯𑀻𑀣𑀺𑀬𑀁 𑀏𑀯 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀦𑀸𑀦𑀸𑀚𑀯𑀦𑀯𑀻𑀣𑀻𑀲𑀼 𑀢𑀣𑀸 𑀉𑀧𑀢𑁆𑀣𑀫𑁆𑀪𑀦𑀜𑁆𑀘 𑀕𑀬𑁆𑀳𑁂𑀬𑁆𑀬. 𑀏𑀯𑀁𑀲𑀢𑀺, 𑀅𑀦𑁆𑀢𑀭𑀦𑁆𑀢𑀭𑀸 𑀩𑀳𑀽 𑀪𑀯𑀗𑁆𑀕𑀯𑀸𑀭𑀸𑀧𑀺 𑀲𑀦𑁆𑀢𑀺. 𑀢𑀢𑁆𑀣 𑀓𑀣𑀁 𑀢𑀤𑀼𑀧𑀢𑁆𑀣𑀫𑁆𑀪𑀦𑀁 𑀲𑀫𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀆𑀳 ‘‘𑀢𑀣𑀸𑀳𑀻’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀉𑀢𑀼𑀚𑀭𑀽𑀧𑀲𑀗𑁆𑀖𑀸𑀝𑀸𑀦𑀺 𑀧𑀻’’𑀢𑀺 𑀪𑀯𑀗𑁆𑀕𑀲𑀫𑀬𑁂 𑀧𑀯𑀢𑁆𑀢𑀸𑀦𑀺 𑀉𑀢𑀼𑀚𑀭𑀽𑀧𑀓𑀮𑀸𑀧𑀲𑀦𑁆𑀥𑀸𑀦𑀓𑀸𑀦𑀺. ‘‘𑀢𑀤𑀸𑀓𑀸𑀭 𑀯𑀦𑁆𑀢𑀸𑀦𑀻’’𑀢𑀺 𑀢𑀲𑁆𑀲𑀸 𑀘𑀺𑀢𑁆𑀢𑀚𑀭𑀽𑀧𑀲𑀦𑁆𑀢𑀢𑀺𑀬𑀸 𑀆𑀓𑀸𑀭 𑀯𑀦𑁆𑀢𑀸𑀦𑀺. 𑀧𑀘𑁆𑀙𑀺𑀫 𑀧𑀘𑁆𑀙𑀺𑀫𑀸𑀦𑀁 𑀭𑀽𑀧𑀓𑀮𑀸 𑀧𑀲𑀗𑁆𑀖𑀸𑀝𑀸𑀦𑀁 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀧𑀼𑀭𑀺𑀫𑀸𑀦𑀁 𑀭𑀽𑀧𑀓𑀮𑀸𑀧𑀲𑀗𑁆𑀖𑀸𑀝𑀸𑀦𑀁 𑀔𑀡𑀺𑀓𑀥𑀫𑁆𑀫𑀢𑀸 𑀘 𑀢𑁂𑀲𑀁 𑀦 𑀲𑀺𑀬𑀸. 𑀦 𑀘 𑀢𑁂 𑀔𑀡𑀺𑀓𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺. 𑀅𑀜𑁆𑀜𑀣𑀸 𑀤𑁂𑀲𑀦𑁆𑀢𑀭 𑀲𑀗𑁆𑀓𑀫𑀦𑀲𑀗𑁆𑀔𑀸𑀢𑀁 𑀘𑀮𑀦𑀁 𑀏𑀯 𑀦 𑀲𑀺𑀬𑀸. 𑀘𑀮𑀦𑀁 𑀢𑀺𑀳𑀺 𑀦𑀸𑀦𑀸𑀓𑁆𑀭𑀺𑀬𑀸𑀦𑀁 𑀧𑀸𑀢𑀼𑀩𑁆𑀪𑀸𑀯𑁄 𑀯𑀼𑀘𑁆𑀘𑀢𑀺. 𑀦𑀸𑀦𑀸𑀓𑁆𑀭𑀺𑀬𑀸 𑀘 𑀦𑀸𑀫 𑀦𑀸𑀦𑀸𑀥𑀫𑁆𑀫𑀸 𑀏𑀯. 𑀬𑀲𑁆𑀫𑀸 𑀘 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀔𑀡𑁂𑀔𑀡𑁂 𑀘𑀮𑀦𑀁 𑀦𑀸𑀫 𑀮𑁄𑀓𑁂 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀁. 𑀢𑀲𑁆𑀫𑀸 𑀢𑁂𑀲𑀁 𑀔𑀡𑀺𑀓𑀥𑀫𑁆𑀫𑀢𑀸𑀧𑀺 𑀤𑀝𑁆𑀞𑀩𑁆𑀩𑀸 𑀳𑁄𑀢𑀻𑀢𑀺. 𑀏𑀢𑁂𑀦 𑀢𑁂𑀲𑀁 𑀔𑀡𑀺𑀓𑀫𑀭𑀡𑀁 𑀤𑀲𑁆𑀲𑁂𑀢𑀺, 𑀬𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀩𑁆𑀬𑀸𑀧𑀸𑀭 𑀥𑀫𑁆𑀫𑀢𑀸 𑀘 𑀅𑀯𑀲𑀯𑀢𑁆𑀢𑀺𑀢𑀸 𑀘 𑀢𑁂𑀲𑀁 𑀦 𑀲𑀺𑀬𑀸. 𑀦 𑀘 𑀢𑁂 𑀅𑀩𑁆𑀬𑀸𑀧𑀸𑀭 𑀥𑀫𑁆𑀫𑀸, 𑀦 𑀅𑀯𑀲𑀯𑀢𑁆𑀢𑀺 𑀥𑀫𑁆𑀫𑀸 𑀘 𑀦 𑀳𑁄𑀦𑁆𑀢𑀺. 𑀅𑀜𑁆𑀜𑀣𑀸 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀸 𑀏𑀯 𑀢𑁂𑀲𑀁 𑀦 𑀲𑀺𑀬𑀸. 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀸𑀢𑀺 𑀘 𑀧𑀘𑁆𑀘𑀬𑁂 𑀲𑀢𑀺, 𑀢𑁂 𑀯𑀢𑁆𑀢𑀦𑁆𑀢𑀺, 𑀅𑀲𑀢𑀺 𑀦 𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀸 𑀬𑀲𑁆𑀫𑀸 𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁 𑀲𑀢𑀺, 𑀢𑁂 𑀯𑀢𑁆𑀢𑀦𑁆𑀢𑀺𑀬𑁂𑀯. 𑀢𑁂𑀲𑀁 𑀯𑀢𑁆𑀢𑀦𑀢𑁆𑀣𑀸𑀬 𑀓𑁂𑀦𑀘𑀺𑀩𑁆𑀬𑀸𑀧𑀸𑀭𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂 𑀫𑀸𑀯𑀢𑁆𑀢𑀦𑁆𑀢𑀽𑀢𑀺 𑀘 𑀅𑀢𑁆𑀢𑀦𑁄 𑀯𑀲𑁂𑀦 𑀯𑀢𑁆𑀢𑀦𑁆𑀢𑀺. 𑀧𑀘𑁆𑀘𑀬𑁂 𑀅𑀲𑀢𑀺, 𑀦 𑀯𑀢𑁆𑀢𑀦𑁆𑀢𑀺𑀬𑁂𑀯. 𑀢𑁂𑀲𑀁 𑀅𑀯𑀢𑁆𑀢𑀦𑀢𑁆𑀣𑀸𑀬 𑀓𑁂𑀦𑀘𑀺𑀩𑁆𑀬𑀸𑀧𑀸𑀭𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀫𑀸𑀯𑀢𑁆𑀢𑀦𑁆𑀢𑀽𑀢𑀺 𑀘 𑀅𑀢𑁆𑀢𑀦𑁄 𑀯𑀲𑁂𑀦𑀯𑀢𑁆𑀢𑀦𑁆𑀢𑀺. 𑀬𑀲𑁆𑀫𑀸 𑀘 𑀢𑁂𑀲𑀁 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀸 𑀦𑀸𑀫 𑀮𑁄𑀓𑁂 𑀯𑀺𑀜𑁆𑀜𑀽𑀦𑀁 𑀧𑀘𑁆𑀘𑀓𑁆𑀔𑀢𑁄𑀤𑀺𑀝𑁆𑀞𑀸. 𑀢𑀲𑁆𑀫𑀸 𑀢𑁂𑀲𑀁 𑀅𑀩𑁆𑀬𑀸𑀧𑀸𑀭𑀢𑀸 𑀘 𑀅𑀯𑀲𑀯𑀢𑁆𑀢𑀺𑀢𑀸 𑀘 𑀤𑀝𑁆𑀞𑀩𑁆𑀩𑀸 𑀳𑁄𑀢𑀺. 𑀏𑀢𑁂𑀦 𑀢𑁂𑀲𑀁 𑀲𑀩𑁆𑀩𑁂𑀳𑀺 𑀲𑀢𑁆𑀢𑀧𑀼𑀕𑁆𑀕𑀮 𑀅𑀢𑁆𑀢𑀸𑀓𑀸𑀭𑁂𑀳𑀺 𑀲𑀩𑁆𑀩𑀲𑁄 𑀲𑀼𑀜𑁆𑀜𑀁 𑀤𑀲𑁆𑀲𑁂𑀢𑀺, 𑀬𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀢𑁆𑀢𑀮𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

‘‘𑀯𑀘𑀻𑀪𑁂𑀤𑀁’’𑀢𑀺 𑀅𑀓𑁆𑀔𑀭 𑀧𑀤𑀪𑀸𑀯𑀧𑀢𑁆𑀢𑀁 𑀯𑀘𑀻𑀫𑀬𑀲𑀤𑁆𑀤𑀧𑁆𑀧𑀓𑀸𑀭𑀁. 𑀉𑀧𑀸𑀤𑀺𑀦𑁆𑀦𑀓𑀧𑀣𑀯𑀻𑀥𑀸𑀢𑀼𑀬𑁄 𑀦𑀸𑀫 𑀓𑀫𑁆𑀫𑀚 𑀧𑀣𑀯𑀻𑀥𑀸𑀢𑀼𑀬𑁄. 𑀢𑀸𑀲𑀼 𑀲𑀗𑁆𑀖𑀝𑁆𑀝𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑀸 𑀲𑀳𑀚𑀸𑀢𑁂𑀦𑀬𑁂𑀦 𑀆𑀓𑀸𑀭𑀯𑀺𑀓𑀸𑀭𑁂𑀦 𑀉𑀧𑀕𑀘𑁆𑀙𑀢𑀺, 𑀬𑁂𑀦 𑀘 𑀉𑀧𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀚𑁆𑀛𑀢𑁆𑀢 𑀲𑀦𑁆𑀢𑀸𑀦𑀕𑀢𑀸 𑀲𑀩𑁆𑀩𑁂 𑀘𑀢𑀼𑀚𑀭𑀽𑀧𑀥𑀫𑁆𑀫𑀸𑀧𑀺 𑀓𑀢𑁆𑀣𑀘𑀺 𑀉𑀧𑀸𑀤𑀺𑀦𑁆𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀘𑀢𑀼𑀚𑀪𑀽𑀢𑀸𑀬 𑀏𑀯 𑀯𑀸’’𑀢𑀺. 𑀤𑁆𑀯𑀻𑀲𑀼𑀞𑀸𑀦 𑀓𑀭𑀡𑁂𑀲𑀼 𑀓𑀭𑀡𑀧𑀓𑁆𑀔𑁂 𑀘𑀮𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀘𑀺𑀢𑁆𑀢𑀚𑀧𑀣𑀯𑀻𑀥𑀸𑀢𑀼 𑀞𑀸𑀦𑀧𑀓𑁆𑀔𑁂 𑀧𑀣𑀯𑀺𑀥𑀸𑀢𑀼𑀬𑀁 𑀲𑀗𑁆𑀖𑀝𑁆𑀝𑀬𑀫𑀸𑀦𑀸 𑀓𑀫𑁆𑀫𑀚𑀧𑀣𑀯𑀺𑀬𑀁 𑀏𑀯 𑀖𑀝𑁆𑀝𑁂𑀢𑀺. 𑀇𑀢𑀭 𑀧𑀣𑀯𑀺𑀬𑀁 𑀦 𑀖𑀝𑁆𑀝𑁂𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁𑀢𑀺 𑀓𑀢𑁆𑀯𑀸 𑀇𑀥 𑀏𑀯𑀕𑁆𑀕𑀳𑀡𑀁 𑀓𑀢𑀁. ‘‘𑀯𑀺𑀓𑀸𑀭 𑀤𑁆𑀯𑀬𑀜𑁆𑀘𑀸’’𑀢𑀺 𑀓𑀸𑀬𑀯𑀺𑀓𑀸𑀭 𑀯𑀘𑀻𑀯𑀺𑀓𑀸𑀭 𑀤𑁆𑀯𑀬𑀜𑁆𑀘. 𑀓𑀣𑀁 𑀧𑀦 𑀅𑀲𑀫𑁆𑀫𑀺𑀲𑁆𑀲𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀢𑁆𑀣𑀘𑀸’’𑀢𑀺𑀆𑀤𑀺𑀁. 𑀬𑀁 𑀧𑀦 𑀢𑀸𑀲𑀁 𑀖𑀝𑁆𑀝𑀦𑀧𑁆𑀧𑀓𑀸𑀭𑀯𑀺𑀥𑀸𑀦𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀸𑀲𑀁’’ 𑀘𑀺𑀢𑁆𑀢𑀚𑀧𑀣𑀯𑀻𑀦𑀁. ‘‘𑀢𑀁 𑀢𑀁 𑀯𑀡𑁆𑀡𑀢𑁆𑀢𑀧𑀢𑁆𑀢𑀺𑀬𑀸’’𑀢𑀺 𑀓, 𑀔𑀸, 𑀤𑀺𑀯𑀡𑁆𑀡𑀢𑁆𑀢𑀧𑀢𑁆𑀢𑀢𑁆𑀣𑀸𑀬. 𑀬𑀁 𑀧𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑁂 ‘𑀅𑀬𑀜𑁆𑀘 𑀅𑀢𑁆𑀣𑁄 𑀉𑀧𑀭𑀺 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺 𑀯𑀺𑀘𑀸𑀭𑀡𑀸𑀬𑀁 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀁 𑀇𑀥 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀯 𑀳𑀺 𑀫𑀽𑀮𑀝𑀻𑀓𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀢𑁆𑀣 𑀘𑀸’’𑀢𑀺 𑀫𑀽𑀮𑀝𑀻𑀓𑀸𑀧𑀸𑀞𑁂. ‘‘𑀧𑀼𑀩𑁆𑀩𑀪𑀸𑀕𑁂’’𑀢𑀺 𑀧𑀭𑀺𑀩𑁆𑀬𑀢𑁆𑀢 𑀅𑀓𑁆𑀔𑀭𑀧𑁆𑀧𑀯𑀢𑁆𑀢𑀯𑀻𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑁂. ‘‘𑀦𑀸𑀦𑀸𑀚𑀯𑀦𑀯𑀻𑀣𑀻𑀳𑀻’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀚𑀯𑀦𑀯𑀻𑀣𑀺𑀯𑀸𑀭𑁂𑀳𑀺. ‘‘𑀧𑀣𑀫𑀚𑀯𑀦𑀘𑀺𑀢𑁆𑀢𑀲𑁆𑀲𑀧𑀻’’𑀢𑀺 𑀧𑀭𑀺𑀩𑁆𑀬𑀢𑁆𑀢 𑀅𑀓𑁆𑀔𑀭𑀧𑁆𑀧𑀯𑀢𑁆𑀢𑀺𑀯𑀻𑀣𑀺𑀬𑀁 𑀉𑀧𑁆𑀧𑀦𑁆𑀦𑀧𑀣𑀫𑀚𑀯𑀦 𑀘𑀺𑀢𑁆𑀢𑀲𑁆𑀲𑀧𑀺. 𑀢𑀲𑁆𑀲 𑀆𑀲𑁂𑀯𑀦𑀜𑁆𑀘 𑀦𑀸𑀫 𑀢𑀢𑁄 𑀧𑀼𑀭𑀺𑀫𑁂𑀳𑀺 𑀯𑀻𑀣𑀺𑀯𑀸𑀭𑁂𑀳𑀺 𑀏𑀯 𑀮𑀤𑁆𑀥𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀲𑁂𑀯𑀦𑀁’’𑀢𑀺 𑀘 𑀉𑀧𑀘𑀸𑀭 𑀯𑀘𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. ‘‘𑀢𑀲𑁆𑀲𑀸’’𑀢𑀺 𑀧𑀭𑀺𑀩𑁆𑀬𑀢𑁆𑀢𑀓𑁆𑀔𑀭𑀲𑁆𑀲. 𑀯𑀼𑀢𑁆𑀢𑀜𑁆𑀘 𑀲𑀤𑁆𑀤𑀲𑀢𑁆𑀣𑁂𑀲𑀼. ‘‘𑀤𑀻𑀖𑀫𑀼𑀘𑁆𑀘𑀭𑁂’’𑀢𑀺 𑀧𑀜𑁆𑀘𑀤𑀻𑀖𑀸 𑀯𑀼𑀘𑁆𑀘𑀦𑁆𑀢𑀺. 𑀫𑀺𑀣𑀺𑀦𑁆𑀤 𑀧𑀜𑁆𑀳𑀸𑀧𑀸𑀞𑁂. ‘‘𑀲𑀸𑀥𑀺𑀓𑁂 𑀯𑀻𑀳𑀺𑀯𑀸𑀳𑀲𑀢𑁂’’𑀢𑀺 𑀯𑀻𑀳𑀺𑀥𑀜𑁆𑀜𑀧𑀽𑀭𑁄 𑀲𑀓𑀝𑁄 𑀯𑀻𑀳𑀺𑀯𑀸𑀳𑁄 𑀦𑀸𑀫. 𑀯𑀻𑀳𑀺𑀯𑀸𑀳𑀸𑀦𑀁 𑀲𑀸𑀥𑀺𑀓𑁂 𑀲𑀢𑀲𑁆𑀫𑀺𑀁. 𑀅𑀪𑀺𑀫𑀜𑁆𑀜𑀦𑀁 𑀅𑀪𑀺𑀫𑀸𑀦𑁄. ‘‘𑀲𑁂𑀲𑀫𑁂𑀢𑁆𑀣 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂 𑀦𑀸’’𑀢𑀺 𑀢𑀣𑀸𑀳𑀺 𑀘𑀮𑀦𑀘𑀺𑀢𑁆𑀢𑀚𑀭𑀽𑀧𑀲𑀦𑁆𑀢𑀢𑀺𑀬𑀁 𑀧𑀯𑀢𑁆𑀢𑀸𑀦𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢 𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀯𑀘𑀻𑀪𑁂𑀤𑀓𑀭 𑀘𑀺𑀢𑁆𑀢𑀚𑀲𑀤𑁆𑀤𑀲𑀦𑁆𑀢𑀢𑀺𑀬𑀁 𑀧𑀯𑀢𑁆𑀢𑀸𑀦𑀺 𑀉𑀢𑀼𑀚𑀭𑀽𑀧𑀲𑀗𑁆𑀖𑀸𑀝𑀸𑀦𑀻𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑀣𑀸𑀲𑀫𑁆𑀪𑀯𑀁’’𑀢𑀺. ‘‘𑀧𑀯𑀢𑁆𑀢𑀦𑀢𑁆𑀣𑁄’’𑀢𑀺 𑀅𑀪𑀺𑀓𑁆𑀓𑀫𑀦𑀸𑀤𑀺 𑀲𑀚𑁆𑀛𑀸𑀬𑀦𑀸𑀤𑀻𑀦𑀁 𑀧𑀯𑀢𑁆𑀢𑀸𑀧𑀦𑀢𑁆𑀣𑁄. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼. ‘‘𑀩𑁄𑀥𑁂𑀢𑀼 𑀓𑀸𑀫𑀢𑀸 𑀭𑀳𑀺𑀢𑁂𑀲𑀽’’𑀢𑀺 𑀅𑀪𑀺𑀓𑁆𑀓𑀫𑀦𑀧𑀝𑀺𑀓𑁆𑀓𑀫𑀦𑀸𑀤𑀻𑀲𑀼 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀘, 𑀲𑀼𑀢𑁆𑀢𑀦𑁆𑀢 𑀲𑀚𑁆𑀛𑀸𑀬𑀦𑀸𑀤𑀻𑀲𑀼 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀘 𑀧𑀭𑀁 𑀩𑁄𑀥𑁂𑀢𑀼𑀓𑀸𑀫𑀢𑀸 𑀭𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀤𑁆𑀯𑀻𑀲𑀼 𑀩𑁄𑀥𑀓𑀯𑀺𑀜𑁆𑀜𑀢𑁆𑀢𑀻𑀲𑀽’’𑀢𑀺 𑀩𑁄𑀥𑀓𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀩𑁄𑀥𑀓𑀯𑀘𑀻 𑀯𑀺𑀜𑁆𑀜𑀢𑁆𑀢𑀻𑀲𑀼. 𑀧𑀼𑀭𑀺𑀫𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀧𑀘𑁆𑀙𑀺𑀫𑀸 𑀘 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀧𑀘𑁆𑀙𑀸 𑀲𑀼𑀤𑁆𑀥𑁂𑀦 𑀫𑀦𑁄𑀤𑁆𑀯𑀸𑀭𑀺𑀓 𑀚𑀯𑀦𑁂𑀦 𑀏𑀯 𑀯𑀺𑀜𑁆𑀜𑀸𑀬𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓 𑀚𑀯𑀦𑁂𑀦𑀸𑀢𑀺 𑀬𑁄𑀚𑀦𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀸𑀬𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸’’𑀢𑀺 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 𑀳𑀢𑁆𑀣𑀕𑁆𑀕𑀳𑀡𑀸𑀤𑀺 𑀯𑀲𑁂𑀦 𑀅𑀥𑀺𑀧𑁆𑀧𑀸𑀬 𑀯𑀺𑀜𑁆𑀜𑀸𑀧𑀦𑁂 𑀅𑀬𑀁 𑀓𑀸𑀬𑀯𑀺𑀜𑁆𑀜𑀸𑀡𑀯𑀻𑀣𑀺 𑀤𑀝𑁆𑀞𑀩𑁆𑀩𑀸. 𑀓𑀲𑁆𑀫𑀸 𑀧𑀦 𑀲𑀬𑀜𑁆𑀘𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀻𑀢𑀺 𑀅𑀬𑀁 𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀲𑀸𑀳𑀺 𑀅𑀢𑁆𑀢𑀸𑀦𑀁’’𑀢𑀺𑀆𑀤𑀺𑀁. ‘‘𑀫𑀚𑁆𑀛𑁂’’𑀢𑀺 𑀯𑀺𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀯𑀻𑀣𑀺 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀯𑀻𑀣𑀺𑀦𑀁 𑀫𑀚𑁆𑀛𑁂. 𑀓𑀣𑀁 𑀧𑀯𑀢𑁆𑀢𑀓𑀯𑀺𑀜𑁆𑀜𑀢𑁆𑀢𑀻𑀲𑀼 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀬𑀜𑁆𑀘𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑁆𑀯𑁂 𑀅𑀢𑁆𑀣𑀸 𑀮𑀩𑁆𑀪𑀦𑁆𑀢𑀻𑀢𑀺 𑀆𑀳 ‘‘𑀤𑁆𑀯𑀻𑀲𑀼 𑀧𑀦𑀸’’𑀢𑀺𑀆𑀤𑀺𑀁. 𑀅𑀬𑀁 𑀅𑀪𑀺𑀓𑁆𑀓𑀫𑀢𑀺, 𑀅𑀬𑀁 𑀧𑀝𑀺𑀓𑁆𑀓𑀫𑀢𑀻𑀢𑀺 𑀚𑀸𑀦𑀦𑁆𑀢𑀸 𑀅𑀪𑀺𑀓𑁆𑀓𑀫𑀦𑀧𑀬𑁄𑀕𑀜𑁆𑀘 𑀢𑀧𑁆𑀧𑀬𑁄𑀕 𑀚𑀦𑀓𑀘𑀺𑀢𑁆𑀢𑀜𑁆𑀘 𑀚𑀸𑀦𑀦𑁆𑀢𑀺. ‘‘𑀧𑀭𑀲𑁆𑀲𑀓𑀣𑀁’’𑀢𑀺 𑀩𑁄𑀥𑁂𑀢𑀼𑀓𑀸𑀫𑀢𑀸𑀭𑀳𑀺𑀢𑀫𑁆𑀧𑀺 𑀧𑀭𑀲𑁆𑀲𑀯𑀘𑀦𑀲𑀤𑁆𑀤𑀁. 𑀭𑀸𑀕𑀘𑀺𑀢𑁆𑀢𑀜𑁆𑀘 𑀚𑀸𑀦𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀫𑀽𑀮𑀝𑀻𑀓𑀸𑀬𑀁 𑀧𑀭𑀁 𑀩𑁄𑀥𑁂𑀢𑀼𑀓𑀸𑀫𑀢𑀸𑀬 𑀯𑀺𑀦𑀸𑀧𑀺 𑀅𑀪𑀺𑀓𑁆𑀓𑀫𑀦𑀸𑀤𑀺𑀧𑁆𑀧𑀯𑀢𑁆𑀢𑀦𑁂𑀦 𑀲𑁄𑀘𑀺𑀢𑁆𑀢𑀲𑀳𑀪𑀼𑀯𑀺𑀓𑀸𑀭𑁄 𑀅𑀥𑀺𑀧𑁆𑀧𑀸𑀬𑀁. 𑀮. 𑀤𑁆𑀯𑀺𑀥𑀸𑀧𑀺 𑀯𑀺𑀜𑁆𑀜𑀢𑁆𑀢𑀺 𑀬𑁂𑀯𑀸𑀢𑀺.

𑀯𑀺𑀓𑀸𑀭𑀭𑀽𑀧𑁂𑀲𑀼. ‘‘𑀓𑀫𑁆𑀫𑀬𑁄𑀕𑁆𑀬𑀁’’𑀢𑀺 𑀅𑀪𑀺𑀓𑁆𑀓𑀫𑀦𑀸𑀤𑀺𑀓𑀫𑁆𑀫𑁂𑀲𑀼 𑀬𑁄𑀚𑁂𑀢𑀼𑀁 𑀬𑀼𑀢𑁆𑀢𑀁. 𑀅𑀤𑀦𑁆𑀥𑀢𑀸 𑀯𑀼𑀘𑁆𑀘𑀢𑀺 𑀲𑀻𑀖𑀧𑁆𑀧𑀯𑀢𑁆𑀢𑀺. 𑀲𑀸 𑀮𑀓𑁆𑀔𑀡𑀁 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀲𑀭𑀻𑀭 𑀓𑁆𑀭𑀺𑀬𑀸𑀦𑀼𑀓𑀼𑀮𑁄 𑀓𑀫𑁆𑀫𑀜𑁆𑀜𑀪𑀸𑀯𑁄 𑀮𑀓𑁆𑀔𑀡𑀁 𑀬𑀲𑁆𑀲𑀸𑀢𑀺 𑀲𑀫𑀸𑀲𑁄. ‘‘𑀥𑀸𑀢𑀼𑀬𑁄’’𑀢𑀺 𑀫𑀳𑀸𑀪𑀽𑀢𑀥𑀸𑀢𑀼𑀬𑁄 𑀯𑀸, 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀥𑀸𑀢𑀼𑀬𑁄 𑀯𑀸. 𑀧𑀽𑀢𑀺𑀫𑀼𑀔𑀲𑀧𑁆𑀧𑀲𑀗𑁆𑀔𑀸𑀢𑀲𑁆𑀲 𑀆𑀧𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀯𑀸𑀓𑁆𑀬𑀁. 𑀅𑀲𑀬𑁆𑀳𑀪𑀸𑀭𑁄 𑀦𑀸𑀫 𑀯𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀭𑁄. ‘‘𑀲𑀸 𑀧𑀯𑀢𑁆𑀢𑀢𑀻’’𑀢𑀺 𑀓𑀸𑀬𑀮𑀳𑀼𑀢𑀸 𑀧𑀯𑀢𑁆𑀢𑀢𑀺. 𑀣𑀤𑁆𑀥𑀁 𑀓𑀭𑁄𑀦𑁆𑀢𑀺 𑀲𑀭𑀻𑀭𑀕𑀢𑀸 𑀥𑀸𑀢𑀼𑀬𑁄𑀢𑀺 𑀅𑀥𑀺𑀓𑀸𑀭𑁄. 𑀪𑀼𑀲𑀁 𑀫𑀸𑀭𑁂𑀢𑀻𑀢𑀺 𑀆𑀫𑀭𑀺𑀓𑁄. 𑀤𑀓𑀸𑀭𑁄 𑀆𑀕𑀫𑁄. 𑀕𑀸𑀫𑀦𑀺𑀕𑀫𑀯𑀺𑀮𑀼𑀧𑁆𑀧𑀓𑁄 𑀘𑁄𑀭𑀕𑀡𑁄. 𑀢𑀲𑁆𑀲 𑀪𑀬𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀁. ‘‘𑀯𑀺𑀯𑀝𑁆𑀝𑀫𑀸𑀦𑀁’’𑀢𑀺 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀯𑀝𑁆𑀝𑀦𑁆𑀢𑀁. ‘‘𑀫𑀽𑀮𑀪𑀽𑀢𑀸 𑀳𑁄𑀢𑀻’’𑀢𑀺 𑀅𑀲𑀧𑁆𑀧𑀸𑀬 𑀲𑁂𑀯𑀦𑁂 𑀲𑀢𑀺, 𑀲𑀸 𑀧𑀣𑀫𑀁 𑀧𑀭𑀺𑀬𑀼𑀝𑁆𑀞𑀸𑀢𑀺. 𑀲𑀻𑀢𑀸𑀥𑀺𑀓𑀸𑀯𑀸 𑀳𑁄𑀢𑀺, 𑀉𑀡𑁆𑀳𑀸𑀥𑀺𑀓𑀸𑀯𑀸. 𑀢𑀸𑀬 𑀧𑀭𑀺𑀬𑀼𑀝𑁆𑀞𑀺𑀢𑀸𑀬 𑀏𑀯 𑀲𑀩𑁆𑀩𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀫𑀸𑀧𑀦𑀢𑀺𑀲𑁆𑀲𑁄 𑀭𑀽𑀧𑀚𑀸𑀢𑀺𑀬𑁄 𑀭𑀽𑀧𑀓𑀸𑀬𑀲𑁆𑀲 𑀯𑀺𑀲𑁂𑀲𑀸𑀓𑀸𑀭𑀸 𑀳𑁄𑀦𑁆𑀢𑀺. 𑀇𑀢𑀺 𑀢𑀲𑁆𑀫𑀸 𑀯𑀺𑀓𑀸𑀭𑀭𑀽𑀧𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑀮𑀓𑁆𑀔𑀡𑀭𑀽𑀧𑁂𑀲𑀼. ‘‘𑀘𑀬𑀦𑀁’’𑀢𑀺 𑀲𑀜𑁆𑀘𑀺𑀢𑀪𑀸𑀯𑀕𑀫𑀦𑀁. ‘‘𑀆𑀤𑀺𑀢𑁄’’𑀢𑀺𑀆𑀤𑀺𑀫𑁆𑀳𑀺. ‘‘𑀉𑀧𑀭𑀺𑀢𑁄’’𑀢𑀺 𑀉𑀧𑀭𑀺𑀪𑀸𑀕𑁂. ‘‘𑀆𑀘𑀬𑁄’’𑀢𑀺𑀆𑀤𑀺𑀫𑁆𑀳𑀺 𑀘𑀬𑁄. ‘‘𑀉𑀧𑀘𑀬𑁄’’𑀢𑀺 𑀉𑀧𑀭𑀽𑀧𑀭𑀺𑀘𑀬𑁄. ‘‘𑀅𑀤𑁆𑀥𑀸𑀦𑀧𑀽𑀭𑀡𑀯𑀲𑁂𑀦𑀸’’𑀢𑀺 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀤𑀻𑀖𑀓𑀸𑀮𑀁 𑀅𑀢𑁆𑀢𑀪𑀸𑀯𑀁 𑀧𑀽𑀭𑀡𑀯𑀲𑁂𑀦. ‘‘𑀢𑁂𑀦 𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀉𑀧𑀲𑀤𑁆𑀤𑀲𑁆𑀲 𑀅𑀢𑁆𑀣𑀦𑀸𑀦𑀢𑁆𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁 𑀯𑀟𑁆𑀠𑀺𑀬𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑁂𑀦 𑀢𑁂𑀦𑀧𑀭𑀺𑀬𑀸𑀬𑁂𑀦. 𑀢𑀲𑁆𑀲 𑀘 𑀏𑀓𑁂𑀓𑀲𑁆𑀲 𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲. 𑀢𑀢𑁆𑀣 𑀘𑀺𑀢𑁆𑀢𑀚𑀭𑀽𑀧𑁂𑀲𑀼 𑀅𑀲𑁆𑀲𑀸𑀲 𑀧𑀲𑁆𑀲𑀸𑀲𑀸𑀦𑀁 𑀯𑀸 𑀧𑀤𑀯𑀸𑀭𑀳𑀢𑁆𑀣𑀯𑀸𑀭𑀸𑀤𑀻𑀦𑀁 𑀯𑀸 𑀅𑀓𑁆𑀔𑀭𑀸𑀦𑀁 𑀯𑀸 𑀦𑀺𑀩𑁆𑀩𑀢𑁆𑀢𑀺 𑀯𑀟𑁆𑀠𑀺 𑀧𑀯𑀢𑁆𑀢𑀺𑀬𑁄 𑀤𑀺𑀲𑁆𑀲𑀦𑁆𑀢𑀺𑀬𑁂𑀯. 𑀢𑀣𑀸 𑀦𑀸𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀸𑀦𑀁 𑀦𑀸𑀦𑀸𑀭𑀽𑀧𑀲𑀦𑁆𑀢𑀢𑀻𑀦𑀁 𑀧𑀻𑀢𑀺. 𑀉𑀢𑀼𑀚𑀭𑀽𑀧𑁂𑀲𑀼 𑀇𑀭𑀺𑀬𑀸 𑀧𑀣𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀲𑀼𑀔𑀤𑀼𑀓𑁆𑀔𑀚𑀦𑀓𑀸𑀦𑀁 𑀦𑀸𑀦𑀸𑀭𑀽𑀧𑀲𑀦𑁆𑀢𑀢𑀻𑀦𑀁 𑀦𑀺𑀩𑁆𑀩𑀢𑁆𑀢𑀺𑀯𑀟𑁆𑀠𑀺𑀧𑀯𑀢𑁆𑀢𑀺𑀬𑁄 𑀤𑀺𑀲𑁆𑀲𑀦𑁆𑀢𑀺𑀬𑁂𑀯. 𑀢𑀣𑀸 𑀩𑀳𑀺𑀤𑁆𑀥𑀸 𑀔𑀸𑀡𑀼𑀓𑀡𑁆𑀝𑀓𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀲𑀻𑀢𑀼𑀡𑁆𑀳𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀯𑀸𑀢𑀸𑀢𑀧𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀯𑀸 𑀲𑀭𑀻𑀭𑁂 𑀉𑀧𑁆𑀧𑀦𑁆𑀦𑀸𑀦𑀁 𑀦𑀸𑀦𑀸𑀭𑀽𑀧𑀲𑀦𑁆𑀢𑀢𑀻𑀦𑀫𑁆𑀧𑀺 𑀘𑀓𑁆𑀔𑀼𑀭𑁄𑀕𑀸𑀤𑀺𑀭𑀽𑀧𑀸𑀦𑀫𑁆𑀧𑀻𑀢𑀺. 𑀆𑀳𑀸𑀭𑀚𑀭𑀽𑀧𑁂𑀲𑀼 𑀆𑀳𑀸𑀭𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀲𑀭𑀻𑀭𑁂 𑀉𑀧𑁆𑀧𑀦𑁆𑀦𑀸𑀦𑀁 𑀲𑀫𑀯𑀺𑀲𑀫𑀭𑀽𑀧𑀲𑀦𑁆𑀢𑀢𑀻𑀦𑀁𑀢𑀺. ‘‘𑀅𑀬𑀁 𑀦𑀬𑁄’’𑀢𑀺 𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑁂 𑀦𑀺𑀤𑀲𑁆𑀲𑀦 𑀦𑀬𑁄. 𑀢𑁂𑀦 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂𑀧𑀺 𑀲𑀢𑁆𑀢𑀲𑀦𑁆𑀢𑀸𑀦𑀸𑀦𑀁 𑀳𑀢𑁆𑀣𑀧𑀸𑀤𑀸𑀤𑀺𑀲𑀦𑁆𑀢𑀸𑀦𑀸𑀦𑀁 𑀓𑁂𑀲𑀮𑁄𑀫𑀸𑀤𑀺 𑀲𑀦𑁆𑀢𑀸𑀦𑀸𑀦𑀜𑁆𑀘 𑀦𑀺𑀩𑁆𑀩𑀢𑁆𑀢𑀺 𑀯𑀟𑁆𑀠𑀺𑀧𑀯𑀢𑁆𑀢𑀺𑀬𑁄 𑀦𑀺𑀤𑀲𑁆𑀲𑁂𑀢𑀺. ‘‘𑀚𑀻𑀭𑀡𑀁’’𑀢𑀺 𑀅𑀪𑀺𑀦𑀯𑀸𑀯𑀢𑁆𑀣𑀢𑁄 𑀳𑀸𑀬𑀦𑀁. 𑀧𑀸𑀴𑀺𑀧𑀸𑀞𑁂. ‘‘𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁’’𑀢𑀺 𑀅𑀜𑁆𑀜𑁄 𑀧𑀓𑀸𑀭𑁄 𑀅𑀜𑁆𑀜𑀣𑀸. 𑀅𑀜𑁆𑀜𑀣𑀸 𑀪𑀸𑀯𑁄 𑀅𑀜𑁆𑀜𑀣𑀢𑁆𑀢𑀁. 𑀏𑀢𑁂𑀦 𑀚𑀭𑀸𑀯𑀲𑁂𑀦𑀯𑀸 𑀦𑀸𑀦𑀸𑀭𑁄𑀕𑀸𑀩𑀸𑀥𑀸𑀤𑀺𑀯𑀲𑁂𑀦 𑀯𑀸 𑀯𑀺𑀧𑀭𑀺𑀡𑀸𑀫𑁄 𑀯𑀼𑀢𑁆𑀢𑁄. ‘‘𑀢𑀣𑀸 𑀅𑀯𑀢𑁆𑀣𑀸𑀪𑁂𑀤𑀬𑁄𑀕𑀢𑁄’’𑀢𑀺 𑀚𑀸𑀢𑀺𑀭𑀽𑀧𑀫𑁂𑀯 𑀆𑀤𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀢𑀢𑁄𑀧𑀭𑀁 𑀢𑀫𑁂𑀯 𑀯𑀟𑁆𑀠𑀺 𑀳𑁄𑀢𑀺. 𑀢𑀢𑁄 𑀧𑀭𑀁 𑀢𑀫𑁂𑀯 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀏𑀯𑀁 𑀢𑀣𑀸 𑀅𑀯𑀢𑁆𑀣𑀸𑀪𑁂𑀤𑀬𑁄𑀕𑀢𑁄. 𑀢𑁂𑀦𑀸𑀳 ‘‘𑀲𑀸𑀳𑀻’’𑀢𑀺𑀆𑀤𑀺𑀁. ‘‘𑀧𑀩𑀦𑁆𑀥𑀬𑀢𑀻’’𑀢𑀺 𑀧𑀩𑀦𑁆𑀥𑀁 𑀓𑀭𑁄𑀢𑀺. 𑀲𑀗𑁆𑀕𑀳𑀕𑀸𑀣𑀸𑀤𑀻𑀲𑀼 𑀧𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸. ‘‘𑀏𑀢𑁆𑀣 𑀘 𑀧𑀘𑁆𑀙𑀺𑀫𑀸𑀦𑀻’’𑀢𑀺𑀆𑀤𑀻𑀲𑀼. 𑀯𑁄𑀳𑀸𑀭𑀲𑀺𑀤𑁆𑀥𑀫𑀢𑁆𑀢𑀪𑀸𑀯𑀁’’𑀢𑀺 𑀧𑀼𑀕𑁆𑀕𑀮𑁄 𑀲𑀢𑁆𑀢𑁄 𑀅𑀢𑁆𑀢𑀸 𑀚𑀻𑀯𑁄𑀢𑀺𑀆𑀤𑀺𑀓𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀯𑁄𑀳𑀸𑀭 𑀲𑀺𑀤𑁆𑀥𑀫𑀢𑁆𑀢𑀸 𑀳𑁄𑀢𑀺. 𑀲𑀪𑀸𑀯𑀲𑀺𑀤𑁆𑀥𑀸 𑀦 𑀳𑁄𑀢𑀺. 𑀲𑀸𑀳𑀺 𑀫𑀳𑀸𑀚𑀦𑁂𑀳𑀺 𑀔𑀦𑁆𑀥 𑀧𑀜𑁆𑀘𑀓𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀲𑀫𑁆𑀫𑀢𑀢𑁆𑀢𑀸 𑀯𑁄𑀳𑀭𑀺𑀢𑀢𑁆𑀢𑀸 𑀯𑁄𑀳𑀸𑀭𑀲𑀺𑀤𑁆𑀥𑀸 𑀦𑀸𑀫. 𑀲𑀪𑀸𑀯𑀲𑀺𑀤𑁆𑀥𑀸 𑀧𑀦 𑀦 𑀳𑁄𑀢𑀺. 𑀢𑀲𑁆𑀫𑀸 𑀅𑀭𑀺𑀬𑀸𑀦𑀁 𑀯𑁄𑀳𑀸𑀭𑁂 𑀧𑀼𑀕𑁆𑀕𑀮𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀺𑀚𑁆𑀛𑀢𑀺. 𑀇𑀫𑀸𑀦𑀺 𑀧𑀦 𑀭𑀽𑀧𑀸𑀦𑀺 𑀲𑀪𑀸𑀯𑀲𑀺𑀤𑁆𑀥𑀢𑁆𑀢𑀸 𑀅𑀭𑀺𑀬𑀸𑀦𑀁 𑀯𑁄𑀳𑀸𑀭𑁂𑀧𑀺 𑀅𑀢𑁆𑀣𑀻𑀢𑀺 𑀲𑀺𑀚𑁆𑀛𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀸𑀤𑀺𑀲𑁂𑀦𑀸’’𑀢𑀺𑀆𑀤𑀺𑀁. ‘‘𑀲𑀼𑀤𑁆𑀥𑀥𑀫𑁆𑀫𑀕𑀢𑀺𑀬𑀸 𑀲𑀺𑀤𑁆𑀥𑁂𑀦𑀸’’𑀢𑀺 𑀧𑀣𑀯𑀻𑀥𑀸𑀢𑀼 𑀦𑀸𑀫 𑀲𑀼𑀤𑁆𑀥𑀥𑀫𑁆𑀫𑁄 𑀳𑁄𑀢𑀺. 𑀲𑀸 𑀉𑀧𑁆𑀧𑀸𑀤𑀫𑁆𑀧𑀺 𑀕𑀘𑁆𑀙𑀢𑀺, 𑀚𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀪𑁂𑀤𑀫𑁆𑀧𑀺 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀢𑀲𑁆𑀲𑀸 𑀉𑀧𑁆𑀧𑀸𑀤𑁄𑀧𑀺 𑀚𑀭𑀸𑀧𑀺 𑀪𑁂𑀤𑁄𑀧𑀺 𑀲𑀼𑀤𑁆𑀥𑀥𑀫𑁆𑀫𑀕𑀢𑀺𑀬𑀸 𑀲𑀺𑀤𑁆𑀥𑁄 𑀦𑀸𑀫. 𑀏𑀯𑀁 𑀮𑀓𑁆𑀔𑀡𑀭𑀽𑀧𑀸𑀦𑀁 𑀲𑀼𑀤𑁆𑀥𑀥𑀫𑁆𑀫𑀕𑀢𑀺𑀲𑀺𑀤𑁆𑀥𑀁 𑀧𑀭𑀫𑀢𑁆𑀣𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬𑀲𑁆𑀲𑀧𑀺 𑀯𑀺𑀓𑀸𑀭𑀭𑀽𑀧𑀢𑁆𑀢𑀬𑀲𑁆𑀲𑀧𑀺 𑀧𑀭𑀺𑀘𑁆𑀙𑁂𑀤 𑀭𑀽𑀧𑀲𑁆𑀲𑀧𑀻𑀢𑀺. 𑀬𑀣𑀸 𑀘 𑀇𑀫𑁂𑀲𑀁 𑀭𑀽𑀧𑀸𑀦𑀁. 𑀢𑀣𑀸 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀲𑀼𑀤𑁆𑀥𑀥𑀫𑁆𑀫𑀕𑀢𑀺𑀲𑀺𑀤𑁆𑀥𑀁 𑀧𑀭𑀫𑀢𑁆𑀣𑀮𑀓𑁆𑀔𑀡𑀁 𑀅𑀢𑁆𑀣𑀺𑀬𑁂𑀯. 𑀓𑀺𑀮𑁂𑀲𑀥𑀫𑁆𑀫𑀸𑀳𑀺 𑀅𑀭𑀺𑀬𑀫𑀕𑁆𑀕𑁂 𑀅𑀪𑀸𑀯𑀺𑀢𑁂 𑀪𑀯𑀧𑀭𑀫𑁆𑀧𑀭𑀸𑀬 𑀉𑀧𑁆𑀧𑀸𑀤𑀁 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀪𑀸𑀯𑀺𑀢𑁂𑀧𑀦 𑀅𑀦𑀼𑀧𑁆𑀧𑀸𑀤𑀁 𑀦𑀺𑀭𑁄𑀥𑀁 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄𑀧𑀺 𑀲𑀼𑀤𑁆𑀥𑀥𑀫𑁆𑀫𑀕𑀢𑀺𑀬𑀸 𑀲𑀺𑀤𑁆𑀥𑁄 𑀦𑀸𑀫. 𑀏𑀯𑀁 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀲𑀼𑀤𑁆𑀥𑀥𑀫𑁆𑀫𑀕𑀢𑀺𑀲𑀺𑀤𑁆𑀥𑀁 𑀧𑀭𑀫𑀢𑁆𑀣𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀚𑀸𑀢𑀁 𑀅𑀪𑀽𑀢𑀦𑁆𑀢𑀺 𑀇𑀤𑀁 𑀲𑀼𑀢𑁆𑀢𑀁𑀧𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀏𑀢𑁂𑀦 𑀅𑀭𑀺𑀬𑀯𑁄𑀳𑀸𑀭𑁂 𑀦𑀺𑀩𑁆𑀩𑀸𑀦𑀲𑁆𑀲 𑀏𑀓𑀦𑁆𑀢𑁂𑀦 𑀅𑀢𑁆𑀣𑀺𑀢𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀢𑀭𑀣𑀸’’𑀢𑀺𑀆𑀤𑀺𑀁. ‘‘𑀦𑀲𑀪𑀸𑀯𑀢𑁄 𑀅𑀦𑀼𑀧𑀮𑀤𑁆𑀥𑀢𑁆𑀢𑀸 𑀅𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀏𑀢𑁂𑀦 𑀏𑀢𑀸𑀦𑀺 𑀅𑀲𑀪𑀸𑀯𑀭𑀽𑀧𑀸𑀦𑀻𑀢𑀺 𑀘 𑀅𑀮𑀓𑁆𑀔𑀡 𑀭𑀽𑀧𑀸𑀦𑀻𑀢𑀺 𑀘 𑀅𑀲𑀫𑁆𑀫𑀲𑀦𑀭𑀽𑀧𑀸𑀦𑀻𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁𑀢𑀺𑀧𑀺 𑀤𑀻𑀧𑁂𑀢𑀺. 𑀓𑀲𑁆𑀫𑀸, 𑀬𑀣𑀸𑀲𑀓𑀁 𑀲𑀪𑀸𑀯𑁂𑀳𑀺 𑀲𑀪𑀸𑀯𑀯𑀦𑁆𑀢𑀢𑁆𑀢𑀸 𑀬𑀣𑀸𑀲𑀓𑀁 𑀮𑀓𑁆𑀔𑀡𑁂 𑀳𑀺 𑀲𑀮𑀓𑁆𑀔𑀡𑀢𑁆𑀢𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀲𑀫𑁆𑀫𑀲𑀦𑀜𑁆𑀜𑀸𑀡 𑀯𑀺𑀪𑀗𑁆𑀕𑁂 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀫𑁆𑀧𑀺 𑀲𑀫𑁆𑀫𑀲𑀺𑀢𑀩𑁆𑀩𑀥𑀫𑁆𑀫𑁂𑀲𑀼 𑀆𑀕𑀢𑀢𑁆𑀢𑀸𑀢𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀫𑁆𑀧𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀬𑀣𑀸𑀳 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀧𑀦𑁆𑀦𑀭𑀲𑀭𑀽𑀧𑀸𑀦𑀺 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫. 𑀤𑀲𑀭𑀽𑀧𑀸𑀦𑀺 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫. 𑀬𑀤𑀺 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫. 𑀏𑀯𑀁𑀲𑀢𑀺, 𑀅𑀲𑀗𑁆𑀔𑀢𑀸𑀦𑀺 𑀦𑀸𑀫 𑀲𑀺𑀬𑀼𑀁. 𑀢𑁂𑀲𑀁𑀬𑁂𑀯 𑀧𑀦𑀭𑀽𑀧𑀸𑀦𑀁 𑀓𑀸𑀬𑀯𑀺𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀯𑀘𑀻𑀯𑀺𑀓𑀸𑀭𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀙𑀺𑀤𑁆𑀤𑀁 𑀯𑀺𑀯𑀭𑀁 𑀆𑀓𑀸𑀲𑀥𑀸𑀢𑀼 𑀦𑀸𑀫. 𑀮𑀳𑀼𑀪𑀸𑀯𑁄 𑀮𑀳𑀼𑀢𑀸 𑀦𑀸𑀫. 𑀫𑀼𑀤𑀼𑀪𑀸𑀯𑁄 𑀫𑀼𑀤𑀼𑀢𑀸 𑀦𑀸𑀫. 𑀓𑀫𑁆𑀫𑀜𑁆𑀜𑀪𑀸𑀯𑁄 𑀓𑀫𑁆𑀫𑀜𑁆𑀜𑀢𑀸 𑀦𑀸𑀫. 𑀦𑀺𑀩𑁆𑀩𑀢𑁆𑀢𑀺 𑀉𑀧𑀘𑀬𑁄 𑀦𑀸𑀫. 𑀧𑀯𑀢𑁆𑀢𑀺 𑀲𑀦𑁆𑀢𑀢𑀺 𑀦𑀸𑀫. 𑀚𑀻𑀭𑀡𑀸𑀓𑀸𑀭𑁄 𑀚𑀭𑀢𑀸 𑀦𑀸𑀫. 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁄 𑀅𑀦𑀺𑀘𑁆𑀘𑀢𑀸 𑀦𑀸𑀫𑀸𑀢𑀺 𑀲𑀩𑁆𑀩𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀁 𑀲𑀗𑁆𑀔𑀢𑀫𑁂𑀯𑀸𑀢𑀺. 𑀢𑀢𑁆𑀣 ‘‘𑀢𑁂𑀲𑀁𑀬𑁂𑀯 𑀭𑀽𑀧𑀸𑀦𑀁’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑁂𑀲𑀁𑀬𑁂𑀯 𑀤𑀲𑀦𑁆𑀦𑀁 𑀭𑀽𑀧𑀸𑀦𑀁 𑀫𑀚𑁆𑀛𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀢𑀺𑀲𑀩𑁆𑀩𑀁’’𑀢𑀺 𑀇𑀤𑀁 𑀲𑀩𑁆𑀩𑀁 𑀤𑀲𑀯𑀺𑀥𑀁 𑀭𑀽𑀧𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀫𑁂𑀯 𑀲𑀗𑁆𑀔𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑁄𑀯. 𑀬𑀣𑀸𑀳 𑀧𑀜𑁆𑀘𑀯𑀺𑀧𑀦𑀔𑀦𑁆𑀥𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀦𑁄 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸. 𑀲𑀗𑁆𑀔𑀢𑀸𑀯, 𑀦𑁄 𑀅𑀲𑀗𑁆𑀔𑀢𑀸. 𑀅𑀧𑀺𑀘 𑀦𑀺𑀧𑁆𑀨𑀦𑁆𑀦𑀸𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀲𑀪𑀸𑀯𑀥𑀫𑁆𑀫𑁂𑀲𑀼𑀳𑀺 𑀦𑀺𑀩𑁆𑀩𑀸𑀦𑀫𑁂𑀯𑁂𑀓𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀁 𑀅𑀦𑀺𑀧𑁆𑀨𑀦𑁆𑀦𑀜𑁆𑀘𑀸𑀢𑀺 𑀘. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀘 𑀦𑀸𑀫 𑀧𑀜𑁆𑀜𑀢𑁆𑀢𑀺 𑀘 𑀓𑀣𑀦𑁆𑀢𑀺. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀢𑀺 𑀯𑀸 𑀲𑀗𑁆𑀔𑀢𑀸𑀲𑀗𑁆𑀔𑀢𑀸𑀢𑀺 𑀯𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀦𑀺𑀧𑁆𑀨𑀦𑁆𑀦𑀸 𑀧𑀦 𑀳𑁄𑀢𑀺. 𑀲𑀫𑀸𑀧𑀚𑁆𑀚𑀦𑁆𑀢𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄. 𑀢𑀣𑀸 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀲𑀸𑀧𑀺𑀳𑀺 𑀮𑁄𑀓𑀺𑀬𑀸𑀤𑀺𑀪𑁂𑀤𑀁 𑀦𑀮𑀪𑀢𑀺. 𑀦𑀺𑀧𑁆𑀨𑀦𑁆𑀦𑀸 𑀧𑀦 𑀳𑁄𑀢𑀺. 𑀦𑁄 𑀅𑀦𑀺𑀧𑁆𑀨𑀦𑁆𑀦𑀸. 𑀦𑀸𑀫𑀕𑁆𑀕𑀳𑀡𑀜𑁆𑀳𑀺 𑀕𑀡𑁆𑀳𑀦𑁆𑀢𑁄𑀯 𑀕𑀡𑁆𑀳𑀸𑀢𑀻𑀢𑀺 𑀘. 𑀏𑀢𑁂𑀦 𑀮𑀓𑁆𑀔𑀡𑀭𑀽𑀧𑀸𑀦𑀫𑁆𑀧𑀺 𑀦𑀺𑀧𑁆𑀨𑀦𑁆𑀦𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑁂𑀧𑀦 𑀦𑀺𑀧𑁆𑀨𑀦𑁆𑀦𑀁 𑀅𑀦𑀺𑀧𑁆𑀨𑀦𑁆𑀦𑀁𑀢𑀺𑀤𑀼𑀓𑀲𑁆𑀲 𑀦𑀺𑀤𑁆𑀤𑁂𑀲𑁂. 𑀅𑀝𑁆𑀞𑀸𑀭𑀲𑀯𑀺𑀥𑀁 𑀭𑀽𑀧𑀁 𑀧𑀭𑀺𑀘𑁆𑀙𑁂𑀤𑀯𑀺𑀓𑀸𑀭 𑀮𑀓𑁆𑀔𑀡𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀯𑁂𑀦𑁂𑀯 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀢𑁄 𑀦𑀺𑀧𑁆𑀨𑀦𑁆𑀦𑀁, 𑀲𑁂𑀲𑀁 𑀢𑀩𑁆𑀩𑀺𑀧𑀭𑀻𑀢𑀢𑀸𑀬 𑀅𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀘. 𑀦𑀺𑀧𑁆𑀨𑀦𑁆𑀦𑀭𑀽𑀧𑀁 𑀧𑀦 𑀭𑀽𑀧𑀭𑀽𑀧𑀁 𑀦𑀸𑀫𑀸𑀢𑀺 𑀘. 𑀬𑀁 𑀘𑀢𑀽𑀳𑀺 𑀓𑀫𑁆𑀫𑀸𑀤𑀻𑀳𑀺 𑀚𑀸𑀢𑀁, 𑀢𑀁 𑀘𑀢𑀼𑀚𑀁 𑀦𑀸𑀫. 𑀢𑀁 𑀮𑀓𑁆𑀔𑀡 𑀭𑀽𑀧𑀯𑀚𑁆𑀚𑀁 𑀅𑀯𑀲𑁂𑀲𑀭𑀽𑀧𑀁. 𑀮𑀓𑁆𑀔𑀡𑀭𑀽𑀧𑀁 𑀧𑀦 𑀦 𑀓𑀼𑀢𑁄𑀘𑀺𑀚𑀸𑀢𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀆𑀘𑀭𑀺𑀬𑁂𑀳𑀺 𑀕𑀳𑀺𑀢𑀦𑀸𑀫𑀫𑀢𑁆𑀢𑀢𑁆𑀢𑀸 𑀯𑀢𑁆𑀢𑀺𑀘𑁆𑀙𑀸𑀦𑀼𑀕𑀢𑀁 𑀳𑁄𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀦𑁆𑀢𑀺.

𑀭𑀽𑀧𑀲𑀫𑀼𑀤𑁆𑀤𑁂𑀲𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯𑁭. 𑀭𑀽𑀧𑀯𑀺𑀪𑀸𑀕𑁂.‘‘𑀏𑀓𑀯𑀺𑀥𑀦𑀬𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁’’𑀢𑀺 𑀭𑀽𑀧𑀯𑀺𑀪𑀸𑀕𑀢𑁄 𑀧𑀣𑀫𑀁 𑀤𑀲𑁆𑀲𑁂𑀢𑀼𑀁. 𑀏𑀢𑁂𑀦 𑀏𑀓𑀯𑀺𑀥𑀦𑀬𑁄 𑀭𑀽𑀧𑀯𑀺𑀪𑀸𑀕𑁄 𑀦𑀸𑀫 𑀦 𑀢𑀸𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀦 𑀲𑀫𑁂𑀢𑀺. 𑀓𑁂𑀦 𑀦 𑀲𑀫𑁂𑀢𑀻𑀢𑀺 𑀆𑀳 ‘‘𑀯𑀓𑁆𑀔𑀢𑀺𑀳𑀻’’𑀢𑀺𑀆𑀤𑀺𑀁. ‘‘𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀪𑁂𑀤𑁂𑀦 𑀯𑀺𑀪𑀚𑀦𑁆𑀢𑀺 𑀯𑀺𑀘𑀓𑁆𑀔𑀡𑀸’’𑀢𑀺 𑀏𑀢𑁂𑀦 𑀲𑀩𑁆𑀩𑀁𑀭𑀽𑀧𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦 𑀤𑀼𑀯𑀺𑀥𑀦𑁆𑀢𑀺𑀆𑀤𑀺𑀓𑁄 𑀤𑀼𑀯𑀺𑀥𑀦𑀬𑁄 𑀏𑀯 𑀭𑀽𑀧𑀯𑀺𑀪𑀸𑀕𑀦𑀬𑁄 𑀦𑀸𑀫𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀢𑁂𑀦 𑀦 𑀲𑀫𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀺𑀘 𑀧𑀸𑀴𑀺𑀬𑀁. 𑀲𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀅𑀳𑁂𑀢𑀼𑀓𑀸 𑀥𑀫𑁆𑀫𑀸𑀢𑀺𑀆𑀤𑀺 𑀤𑀼𑀓𑁂𑀲𑀼 𑀲𑀩𑁆𑀩𑀁𑀭𑀽𑀧𑀁 𑀅𑀳𑁂𑀢𑀼𑀓𑀫𑁂𑀯, 𑀦 𑀲𑀳𑁂𑀢𑀼𑀓𑀦𑁆𑀢𑀺𑀆𑀤𑀺 𑀦𑀺𑀬𑀫𑀓𑀭𑀡𑀫𑁆𑀧𑀺 𑀭𑀽𑀧𑀯𑀺𑀪𑀸𑀕𑁄 𑀏𑀯𑀸𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀇𑀢𑀭𑀸𑀦𑀺 𑀧𑀦𑀸’’𑀢𑀺 𑀓𑀸𑀫𑀸𑀯𑀘𑀭𑀦𑁆𑀢𑀺𑀆𑀤𑀻𑀦𑀺 𑀧𑀦. ‘‘𑀚𑀦𑀓𑁂𑀦 𑀧𑀘𑁆𑀘𑀬𑁂𑀦𑀸’’𑀢𑀺 𑀧𑀥𑀸𑀦𑀯𑀘𑀦𑀫𑁂𑀢𑀁. 𑀉𑀧𑀢𑁆𑀣𑀫𑁆𑀪𑀓𑀸𑀤𑀺 𑀧𑀘𑁆𑀘𑀬𑀸𑀧𑀺 𑀕𑀳𑁂𑀢𑀩𑁆𑀩𑀸 𑀏𑀯. ‘‘𑀲𑀗𑁆𑀕𑀫𑁆𑀫𑀸’’𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. ‘‘𑀓𑀭𑀻𑀬𑀢𑀻’’𑀢𑀺 𑀦𑀺𑀧𑁆𑀨𑀸𑀤𑀻𑀬𑀢𑀺. 𑀬𑁄𑀥𑀫𑁆𑀫𑁄𑀢𑀺𑀆𑀤𑀻𑀲𑀼. ‘‘𑀧𑀳𑀻𑀦𑁄 𑀧𑀻’’𑀢𑀺 𑀙𑀺𑀦𑁆𑀤𑀦𑀪𑀺𑀦𑁆𑀤𑀦𑀸𑀤𑀺𑀯𑀲𑁂𑀦 𑀧𑀳𑀻𑀦𑁄𑀧𑀺. ‘‘𑀢𑀲𑁆𑀫𑀺𑀁 𑀲𑀢𑀻’’𑀢𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑁂 𑀲𑀢𑀺. 𑀓𑀺𑀘𑁆𑀘𑀧𑀘𑁆𑀘𑀬𑀸𑀦𑀁 𑀅𑀭𑀳𑀢𑁆𑀣𑀲𑁆𑀲 𑀘 𑀲𑀓𑁆𑀓𑀢𑁆𑀣𑀲𑁆𑀲 𑀘 𑀤𑀻𑀧𑀦𑀢𑁄 𑀤𑀼𑀯𑀺𑀥𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀦𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀩𑁆𑀩𑀺𑀲𑀬𑀲𑁆𑀲𑀸’’𑀢𑀺 𑀭𑀽𑀧𑀯𑀺𑀲𑀬𑀲𑁆𑀲. ‘‘𑀏𑀯𑀁’’𑀢𑀺 𑀏𑀯𑀁𑀲𑀦𑁆𑀢𑁂. ‘‘𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀸𑀕𑀢𑀪𑀯𑁂 𑀧𑀼𑀦 𑀅𑀦𑀼𑀧𑁆𑀧𑀸𑀤𑀢𑁆𑀣𑀸𑀬 𑀇𑀥𑁂𑀯 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀘𑁆𑀙𑀺𑀦𑁆𑀦𑀫𑀽𑀮𑀁’’𑀢𑀺𑀆𑀤𑀺𑀁. ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀁’’𑀢𑀺 𑀙𑀺𑀦𑁆𑀦𑀢𑀸𑀮𑀓𑁆𑀔𑀸𑀡𑀼𑀓𑀁 𑀯𑀺𑀬 𑀓𑀢𑀁 𑀪𑀯𑀺𑀲𑁆𑀲𑀢𑀺. ‘‘𑀅𑀦𑀪𑀸𑀯𑀁 𑀓𑀢𑀁’’𑀢𑀺 𑀧𑀼𑀦 𑀅𑀪𑀸𑀯𑀁 𑀓𑀢𑀁. ‘‘𑀧𑀸𑀓𑀝𑁄’’𑀢𑀺 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑁂𑀳𑀺 𑀧𑀜𑁆𑀜𑀸𑀢𑁄. ‘‘𑀢𑀤𑀼𑀧𑀸𑀤𑀸𑀬𑀸’’𑀢𑀺 𑀢𑀁 𑀉𑀧𑀦𑀺𑀥𑀸𑀬. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁’’𑀢𑀺 𑀧𑀤𑀼𑀤𑁆𑀥𑀸𑀭𑀡𑀁. 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀁 𑀅𑀚𑁆𑀛𑀢𑁆𑀢𑀁. 𑀅𑀚𑁆𑀛𑀢𑁆𑀢𑀫𑁂𑀯 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁’’𑀢𑀺𑀆𑀤𑀺𑀦𑀸. 𑀢𑀁 𑀦 𑀲𑀼𑀦𑁆𑀤𑀭𑀁. 𑀓𑀲𑁆𑀫𑀸, 𑀅𑀚𑁆𑀛𑀢𑁆𑀢𑀥𑀫𑁆𑀫 𑀅𑀚𑁆𑀛𑀢𑁆𑀢𑀺𑀓 𑀥𑀫𑁆𑀫𑀸𑀦𑀜𑁆𑀘 𑀅𑀯𑀺𑀲𑁂𑀲𑁄 𑀆𑀧𑀚𑁆𑀚𑀢𑀻𑀢𑀺 𑀯𑀓𑁆𑀔𑀫𑀸𑀦𑀓𑀸𑀭𑀡𑀢𑁆𑀢𑀸. ‘‘𑀤𑁆𑀯𑀸𑀭𑀭𑀽𑀧𑀁 𑀦𑀸𑀫𑀸’’𑀢𑀺 𑀧𑀤𑀼𑀤𑁆𑀥𑀸𑀭𑀧𑀤𑀁. 𑀓𑀲𑁆𑀫𑀸 𑀤𑁆𑀯𑀸𑀭𑀭𑀽𑀧𑀁 𑀦𑀸𑀫𑀸𑀢𑀺 𑀆𑀳 ‘‘𑀬𑀣𑀸𑀓𑁆𑀓𑀫𑀁’’𑀢𑀺𑀆𑀤𑀺𑀁. 𑀧𑀭𑀢𑁄𑀧𑀺 𑀏𑀲𑀦𑀬𑁄. ‘‘𑀤𑁂𑀲𑀦𑀸𑀪𑁂𑀤 𑀭𑀓𑁆𑀔𑀡𑀢𑁆𑀣𑀁’’𑀢𑀺 𑀤𑀼𑀓𑀤𑁂𑀲𑀦𑀸𑀪𑁂𑀤𑀢𑁄 𑀭𑀓𑁆𑀔𑀡𑀢𑁆𑀣𑀁. 𑀢𑀢𑁆𑀣 𑀤𑁂𑀲𑀦𑀸𑀪𑁂𑀤𑁄 𑀦𑀸𑀫 𑀭𑀽𑀧𑀓𑀡𑁆𑀟𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀯𑀢𑁆𑀣𑀼 𑀭𑀽𑀧𑀜𑁆𑀘, 𑀦 𑀯𑀢𑁆𑀣𑀼 𑀭𑀽𑀧𑀜𑁆𑀘, 𑀆𑀭𑀫𑁆𑀫𑀡 𑀭𑀽𑀧𑀜𑁆𑀘, 𑀦 𑀆𑀭𑀫𑁆𑀫𑀡 𑀭𑀽𑀧𑀜𑁆𑀘 𑀯𑀢𑁆𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀦 𑀯𑀼𑀢𑁆𑀢𑀁. 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬, 𑀆𑀭𑀫𑁆𑀫𑀡𑀤𑀼𑀓𑁂 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡 𑀭𑀽𑀧𑀁, 𑀦 𑀆𑀭𑀫𑁆𑀫𑀡 𑀭𑀽𑀧𑀦𑁆𑀢𑀺 𑀤𑀼𑀓𑀧𑀤𑀁 𑀦 𑀮𑀩𑁆𑀪𑁂𑀬𑁆𑀬. 𑀅𑀬𑀁 𑀤𑁂𑀲𑀦𑀸𑀪𑁂𑀤𑁄 𑀦𑀸𑀫. 𑀯𑀢𑁆𑀣𑀼𑀤𑀼𑀓𑁂𑀲𑀼 𑀳𑀤𑀬𑀯𑀢𑁆𑀣𑀼𑀯𑀲𑁂𑀦 𑀮𑀩𑁆𑀪𑀫𑀸𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀤𑀼𑀓𑀁 𑀦 𑀯𑀼𑀢𑁆𑀢𑀦𑁆𑀢𑀺. ‘‘𑀣𑀽𑀮𑀲𑀪𑀸𑀯𑀢𑁆𑀢𑀸’’𑀢𑀺 𑀲𑀼𑀔𑀼𑀫𑀭𑀽𑀧𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. ‘‘𑀤𑀽𑀭𑁂 𑀧𑀯𑀢𑁆𑀢𑀲𑁆𑀲𑀧𑀻’’𑀢𑀺 𑀬𑀣𑀸 𑀲𑀼𑀔𑀼𑀫𑀭𑀽𑀧𑀁 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀧𑀯𑀢𑁆𑀢𑀫𑁆𑀧𑀺 𑀜𑀸𑀡𑁂𑀦 𑀲𑀻𑀖𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀣𑀸 𑀇𑀤𑀁. 𑀇𑀫𑀲𑁆𑀲 𑀧𑀦 𑀤𑀽𑀭𑁂 𑀧𑀯𑀢𑁆𑀢𑀲𑁆𑀲𑀧𑀺. ‘‘𑀕𑀳𑀡𑀬𑁄𑀕𑁆𑀬𑀢𑁆𑀢𑀸’’𑀢𑀺 𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑀡𑀧𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀲𑀬𑀁𑀦𑀺𑀲𑁆𑀲𑀬𑀯𑀲𑁂𑀦 𑀘𑀸’’𑀢𑀺 𑀲𑀬𑀜𑁆𑀘 𑀦𑀺𑀲𑁆𑀲𑀬 𑀫𑀳𑀸𑀪𑀽𑀢𑀯𑀲𑁂𑀦 𑀘. 𑀢𑀢𑁆𑀣 𑀲𑀬𑀁 𑀲𑀫𑁆𑀧𑀢𑁆𑀢𑀸 𑀦𑀸𑀫 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀬𑁄. 𑀦𑀺𑀲𑁆𑀲𑀬𑀯𑀲𑁂𑀦 𑀲𑀫𑁆𑀧𑀢𑁆𑀢𑀸 𑀦𑀸𑀫 𑀕𑀦𑁆𑀥𑀭𑀲𑀸. 𑀉𑀪𑀬𑀣𑀸𑀧𑀺 𑀅𑀲𑀫𑁆𑀧𑀢𑁆𑀢𑀸 𑀦𑀸𑀫 𑀘𑀓𑁆𑀔𑀼 𑀭𑀽𑀧, 𑀲𑁄𑀢 𑀲𑀤𑁆𑀤𑀸. 𑀬𑁄 𑀧𑀝𑀺𑀫𑀼𑀔𑀪𑀸𑀯𑁄 𑀅𑀢𑁆𑀣𑀺, 𑀬𑀁 𑀅𑀜𑁆𑀜𑀫𑀜𑁆𑀜𑀧𑀢𑀦𑀁 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀦 𑀘 𑀢𑀸𑀦𑀺 𑀅𑀜𑁆𑀜𑀧𑁆𑀧𑀓𑀸𑀭𑀸𑀦𑀺 𑀏𑀯 𑀲𑀓𑁆𑀓𑀸 𑀪𑀯𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑀼𑀕𑁆𑀕𑀳 𑀉𑀧𑀖𑀸𑀢𑀯𑀲𑁂𑀦𑀸’’𑀢𑀺 𑀯𑀟𑁆𑀠𑀦𑀢𑁆𑀣𑀸𑀬 𑀅𑀦𑀼𑀕𑁆𑀕𑀳𑀯𑀲𑁂𑀦, 𑀳𑀸𑀬𑀦𑀸𑀤𑀺 𑀅𑀢𑁆𑀣𑀸𑀬 𑀉𑀧𑀖𑀸𑀢𑀯𑀲𑁂𑀦. ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀁 𑀕𑀡𑁆𑀳𑀸𑀢𑀺. ‘‘𑀆𑀤𑀺𑀦𑁆𑀦𑀧𑀭𑀸𑀫𑀝𑁆𑀞𑀢𑁆𑀢𑀸’’𑀢𑀺 𑀢𑀡𑁆𑀳𑀸𑀫𑀸𑀦𑁂𑀳𑀺 𑀏𑀢𑀁 𑀫𑀫 𑀏𑀲𑁄𑀳𑀫𑀲𑁆𑀫𑀻𑀢𑀺𑀆𑀤𑀺𑀦𑁆𑀦𑀢𑁆𑀢𑀸, 𑀤𑀺𑀝𑁆𑀞𑀺𑀬𑀸 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀧𑀭𑀸𑀫𑀝𑁆𑀞𑀢𑁆𑀢𑀸 𑀘. ‘‘𑀦𑀺𑀘𑁆𑀘𑀓𑀸𑀮𑀁 𑀧𑀯𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀏𑀓𑁂𑀦 𑀚𑀦𑀓𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀦𑀺𑀘𑁆𑀘𑀓𑀸𑀮𑀁 𑀧𑀯𑀢𑁆𑀢𑀺𑀯𑀲𑁂𑀦. ‘‘𑀉𑀧𑀘𑀭𑀻𑀬𑀢𑀻’’𑀢𑀺 𑀯𑁄𑀳𑀭𑀻𑀬𑀢𑀺. ‘‘𑀅𑀢𑁆𑀣𑀯𑀺𑀲𑁂𑀲𑀩𑁄𑀥𑁄’’𑀢𑀺 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀓𑀺𑀘𑁆𑀘𑀯𑀺𑀲𑁂𑀲𑀩𑁄𑀥𑁄. ‘‘𑀅𑀲𑀫𑁆𑀧𑀢𑁆𑀢𑀯𑀲𑁂𑀦𑀸’’𑀢𑀺 𑀯𑀺𑀲𑀬𑀝𑁆𑀞𑀸𑀦𑀁 𑀲𑀬𑀁 𑀅𑀲𑀫𑁆𑀧𑀚𑁆𑀚𑀦𑀯𑀲𑁂𑀦. 𑀅𑀢𑁆𑀢𑀦𑁄𑀞𑀸𑀦𑀁 𑀯𑀸 𑀯𑀺𑀲𑀬𑀲𑁆𑀲 𑀅𑀲𑀫𑁆𑀧𑀚𑁆𑀚𑀦𑀯𑀲𑁂𑀦. 𑀢𑀢𑁆𑀣 𑀯𑀺𑀲𑀬𑀲𑁆𑀲 𑀅𑀲𑀫𑁆𑀧𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀲𑁄𑀢𑀲𑀤𑁆𑀤𑁂𑀲𑀼 𑀘 𑀅𑀜𑁆𑀜𑀫𑀜𑁆𑀜𑀁 𑀮𑀕𑁆𑀕𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼. ‘‘𑀲𑀫𑁆𑀧𑀢𑁆𑀢𑀺𑀬𑀸 𑀏𑀯𑀸’’𑀢𑀺 𑀲𑀫𑁆𑀧𑀚𑁆𑀚𑀦𑀢𑁆𑀣𑀸𑀬 𑀏𑀯. 𑀢𑀣𑀸 𑀆𑀧𑁄 𑀘 𑀲𑀫𑁆𑀧𑀢𑁆𑀢𑀺𑀬𑀸 𑀏𑀯 𑀧𑀘𑁆𑀘𑀬𑁄𑀢𑀺 𑀬𑁄𑀚𑀦𑀸. 𑀤𑀼𑀩𑁆𑀩𑀮𑀧𑀣𑀯𑀻 𑀏𑀯 𑀲𑀦𑁆𑀦𑀺𑀲𑁆𑀲𑀬𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀲𑁆𑀲𑀸’’𑀢𑀺 𑀘𑀓𑁆𑀔𑀼𑀲𑁆𑀲. ‘‘𑀲𑁄𑀢𑀲𑁆𑀲𑀧𑀦𑀓𑀣𑀁’’𑀢𑀺 𑀲𑁄𑀢𑀲𑁆𑀲 𑀅𑀲𑀫𑁆𑀧𑀢𑁆𑀢𑀕𑁆𑀕𑀳𑀡𑀁 𑀓𑀣𑀁 𑀧𑀸𑀓𑀝𑀁. 𑀲𑀫𑁆𑀧𑀢𑁆𑀢𑀕𑁆𑀕𑀳𑀡𑀁 𑀏𑀯 𑀧𑀸𑀓𑀝𑀦𑁆𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀳𑀻’’𑀢𑀺𑀆𑀤𑀺𑀁. 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀯𑀸 𑀲𑀼𑀬𑁆𑀬𑀢𑀺, 𑀘𑁂𑀢𑀺𑀬𑀸𑀤𑀺𑀓𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀞𑀺𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄’’𑀢𑀺 𑀲𑁄𑀢𑁂𑀲𑀼 𑀧𑀝𑀺𑀖𑀝𑁆𑀝𑀦𑀯𑁂𑀕𑁄. ‘‘𑀢𑁂𑀲𑀁’’𑀢𑀺 𑀆𑀲𑀦𑁆𑀦𑁂𑀯𑀸 𑀤𑀽𑀭𑁂 𑀯𑀸 𑀞𑀺𑀢𑀸𑀦𑀁. 𑀳𑁄𑀢𑀼 𑀤𑀽𑀭𑁂 𑀞𑀺𑀢𑀸𑀦𑀁 𑀘𑀺𑀭𑁂𑀦 𑀲𑀼𑀢𑁄𑀢𑀺 𑀅𑀪𑀺𑀫𑀸𑀦𑁄. 𑀓𑀲𑁆𑀫𑀸 𑀧𑀦 𑀉𑀚𑀼𑀓𑀁 𑀅𑀲𑀼𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀢𑁄𑀯𑀸 𑀉𑀢𑁆𑀢𑀭𑀧𑀲𑁆𑀲𑀢𑁄 𑀯𑀸 𑀲𑀼𑀡𑁂𑀬𑁆𑀬, 𑀅𑀲𑀼𑀬𑁆𑀬𑀫𑀸𑀦𑁄 𑀪𑀯𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀸. 𑀢𑀁 𑀓𑀣𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀕𑀦𑁆𑀢𑁆𑀯𑀸 𑀯𑀺𑀲𑀬𑀤𑁂𑀲𑀁 𑀢𑀁, 𑀨𑀭𑀺𑀢𑁆𑀯𑀸 𑀕𑀡𑁆𑀳𑀢𑀻𑀢𑀺 𑀘𑁂’’𑀢𑀺 𑀢𑀁 𑀘𑀓𑁆𑀔𑀼𑀲𑁄𑀢 𑀤𑁆𑀯𑀬𑀁 𑀤𑀽𑀭𑁂𑀯𑀺𑀲𑀬𑀸𑀦𑀁 𑀉𑀧𑁆𑀧𑀦𑁆𑀦𑀤𑁂𑀲𑀁 𑀨𑀭𑀺𑀢𑁆𑀯𑀸 𑀕𑀡𑁆𑀳𑀢𑀻𑀢𑀺 𑀘𑁂𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀤𑀽𑀭𑁂𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑁄 𑀲𑀼𑀡𑀦𑁆𑀢𑁄 𑀘 𑀫𑀳𑀦𑁆𑀢𑀫𑁆𑀧𑀺𑀧𑀩𑁆𑀩𑀢𑀁 𑀏𑀓𑀓𑁆𑀔𑀡𑁂 𑀧𑀲𑁆𑀲𑀢𑀺, 𑀫𑀳𑀦𑁆𑀢𑀁𑀧𑀺 𑀫𑁂𑀖𑀲𑀤𑁆𑀤𑀁 𑀏𑀓𑀓𑁆𑀔𑀡𑁂 𑀲𑀼𑀡𑀸𑀢𑀺. 𑀢𑀲𑁆𑀫𑀸 𑀉𑀪𑀬𑀁 𑀅𑀲𑀫𑁆𑀧𑀢𑁆𑀢𑀕𑁄𑀘𑀭𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀇𑀫𑀲𑁆𑀫𑀺𑀁 𑀯𑀘𑀦𑁂 𑀞𑀢𑁆𑀯𑀸 𑀇𑀤𑀁 𑀧𑀭𑀺𑀓𑀧𑁆𑀧𑀯𑀘𑀦𑀁 𑀤𑀲𑁆𑀲𑁂𑀢𑀺 𑀢𑀁 𑀤𑁆𑀯𑀬𑀁 𑀯𑀺𑀲𑀬𑀧𑁆𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀫𑀳𑀦𑁆𑀢𑀁𑀧𑀺 𑀧𑀩𑁆𑀩𑀢𑀁 𑀯𑀸 𑀫𑁂𑀖𑀲𑀤𑁆𑀤𑀁 𑀯𑀸 𑀨𑀭𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀫𑀳𑀦𑁆𑀢𑀁𑀧𑀺 𑀧𑀲𑁆𑀲𑀢𑀺, 𑀲𑀼𑀡𑀸𑀢𑀺. 𑀦 𑀅𑀲𑀫𑁆𑀧𑀢𑁆𑀢𑀕𑁄𑀘𑀭𑀢𑁆𑀢𑀸 𑀫𑀳𑀦𑁆𑀢𑀁 𑀧𑀲𑁆𑀲𑀢𑀺 𑀲𑀼𑀡𑀸𑀢𑀻𑀢𑀺 𑀓𑁄𑀘𑀺 𑀯𑀤𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑁂𑀧𑀺 𑀢𑀲𑁆𑀲 𑀲𑁄 𑀕𑁄𑀘𑀭𑁄 𑀲𑀺𑀬𑀸𑀢𑀺. 𑀏𑀯𑀁𑀲𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀤𑀺𑀩𑁆𑀩𑀲𑁄𑀢𑀸𑀪𑀺𑀜𑁆𑀜𑀸𑀦𑀁 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑁂𑀧𑀺 𑀲𑁄 𑀭𑀽𑀧𑀲𑀤𑁆𑀤𑀯𑀺𑀲𑀬𑁄 𑀢𑀲𑁆𑀲 𑀧𑀲𑀸𑀤𑀘𑀓𑁆𑀔𑀼𑀲𑁄𑀢𑀲𑁆𑀲 𑀕𑁄𑀘𑀭𑁄 𑀲𑀺𑀬𑀸𑀢𑀺 𑀅𑀪𑀺𑀜𑁆𑀜𑀸𑀥𑀺𑀝𑁆𑀞𑀸𑀦 𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀘𑀓𑁆𑀔𑀼𑀲𑁄𑀢𑀁 𑀤𑁂𑀯𑀮𑁄𑀓𑀫𑁆𑀧𑀺 𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑀭𑀽𑀧𑀫𑁆𑀧𑀺 𑀤𑀺𑀩𑁆𑀩𑀲𑀤𑁆𑀤𑀫𑁆𑀧𑀺 𑀕𑀡𑁆𑀳𑁂𑀬𑁆𑀬. 𑀦 𑀧𑀦 𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀲𑀬𑀤𑁂𑀲𑀕𑀫𑀦𑀜𑁆𑀘 𑀫𑀳𑀦𑁆𑀢𑀤𑁂𑀲𑀨𑀭𑀡𑀜𑁆𑀘 𑀦 𑀘𑀺𑀦𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀭𑀽𑀧𑀯𑀺𑀪𑀸𑀕𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫𑁮. 𑀭𑀽𑀧𑀲𑀫𑀼𑀝𑁆𑀞𑀸𑀦𑁂. 𑀲𑀼𑀢𑁆𑀢𑀦𑁆𑀢𑁂𑀲𑀼 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄𑀧𑀺 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀸. 𑀢𑁂 𑀧𑀦 𑀧𑀝𑁆𑀞𑀸𑀦𑁂 𑀓𑀫𑁆𑀫𑀧𑀘𑁆𑀘𑀬𑀁 𑀧𑀢𑁆𑀯𑀸 𑀢𑀧𑁆𑀧𑀘𑁆𑀘𑀬𑀓𑀺𑀘𑁆𑀘𑀁 𑀦 𑀲𑀸𑀥𑁂𑀦𑁆𑀢𑀺, 𑀘𑁂𑀢𑀦𑀸 𑀏𑀯 𑀲𑀸𑀥𑁂𑀢𑀻𑀢𑀺 𑀆𑀳 ‘‘𑀲𑀸 𑀬𑁂𑀯𑀸’’𑀢𑀺𑀆𑀤𑀺𑀁. ‘‘𑀢𑀁 𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁’’𑀢𑀺 𑀳𑁂𑀢𑀽𑀳𑀺 𑀘 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑁂𑀳𑀺 𑀘 𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀦𑁆𑀢𑀺 𑀅𑀢𑁆𑀣𑀯𑀲𑁂𑀦 𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀫𑁆𑀧𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀲𑁄 𑀳𑀺 𑀉𑀤𑀬𑀢𑀺 𑀧𑀲𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀧𑁆𑀧𑀲𑀡𑁆𑀞𑀸𑀧𑀦𑀯𑀲𑁂𑀦𑀸’’𑀢𑀺 𑀓𑀧𑁆𑀧𑀧𑁆𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦. 𑀅𑀚𑁆𑀛𑀢𑁆𑀢𑀺𑀓𑀲𑀤𑁆𑀤𑁄 𑀙𑀲𑀼 𑀘𑀓𑁆𑀔𑀸𑀤𑀻𑀲𑀼 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂 𑀲𑁆𑀯𑁂𑀯 𑀧𑀯𑀢𑁆𑀢𑀢𑀺. 𑀇𑀥 𑀧𑀦 𑀲𑀓𑀮𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀚𑁆𑀛𑀢𑁆𑀢 𑀲𑀦𑁆𑀢𑀸𑀦𑁂𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁’’𑀢𑀺. ‘‘𑀔𑀡𑁂 𑀔𑀡𑁂’’𑀢𑀺 𑀯𑀺𑀘𑁆𑀙𑀸𑀯𑀘𑀦𑀁. ‘‘𑀯𑀺𑀘𑁆𑀙𑀸’’𑀢𑀺 𑀘 𑀩𑀳𑀽𑀲𑀼𑀔𑀡𑁂𑀲𑀼 𑀩𑁆𑀬𑀸𑀧𑀦𑀦𑁆𑀢𑀺 𑀆𑀳 ‘‘𑀢𑀻𑀲𑀼𑀢𑀻𑀲𑀼𑀔𑀡𑁂𑀲𑀽’’𑀢𑀺.

𑀬𑀫𑀓𑀧𑀸𑀞𑁂𑀲𑀼. 𑀬𑀲𑁆𑀲 𑀯𑀸 𑀧𑀦 𑀧𑀼𑀕𑁆𑀕𑀮𑀲𑁆𑀲. ‘‘𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀪𑀗𑁆𑀕𑀓𑁆𑀔𑀡 𑀲𑀫𑀗𑁆𑀕𑀺𑀢𑀫𑀸𑀳. ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀉𑀧𑁆𑀧𑀸𑀤𑀓𑁆𑀔𑀡 𑀲𑀫𑀗𑁆𑀕𑀺𑀢𑀁. ‘‘𑀇𑀢𑀻’’𑀢𑀺 𑀅𑀬𑀁 𑀧𑀼𑀘𑁆𑀙𑀸. ‘‘𑀦𑁄’’𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀤𑀼𑀓𑁆𑀔𑀲𑀘𑁆𑀘𑀪𑀽𑀢𑀲𑁆𑀲 𑀭𑀽𑀧𑀲𑁆𑀲𑀯𑀸 𑀦𑀸𑀫𑀲𑁆𑀲𑀯𑀸 𑀉𑀧𑁆𑀧𑀸𑀤𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑁆𑀯𑁂 𑀧𑀸𑀞𑀸𑀕𑀳𑁂𑀢𑀩𑁆𑀩𑀸. ‘‘𑀦𑁄’’𑀢𑀺 𑀓𑀼𑀲𑀮𑀸𑀓𑀼𑀲𑀮 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑀪𑀽𑀢𑀸𑀦𑀁 𑀭𑀽𑀧𑀸𑀦𑀁 𑀯𑀸 𑀦𑀸𑀫𑀸𑀦𑀁 𑀯𑀸 𑀦𑀺𑀭𑁄𑀥𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀲𑀼𑀧𑀸𑀞𑁂𑀲𑀼 𑀓𑁂𑀲𑀜𑁆𑀘𑀺𑀯𑀸𑀤𑀻𑀦𑀁 𑀯𑀘𑀦𑁄𑀓𑀸𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀽𑀧𑀪𑀯𑀁’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀘𑁂’’𑀢𑀺 𑀓𑁄𑀘𑀺𑀯𑀸𑀤𑀻 𑀘𑁂𑀯𑀤𑁂𑀬𑁆𑀬. ‘‘𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀘 𑀉𑀤𑁆𑀥𑀝𑀸 𑀲𑀺𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀭𑀢𑁆𑀣 𑀘𑀸’’𑀢𑀺 𑀢𑀢𑁄 𑀇𑀢𑀭𑀲𑁆𑀫𑀺𑀁 𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀺𑀧𑀸𑀞𑁂 𑀘. ‘‘𑀢𑀫𑁆𑀧𑀺 𑀦𑀸’’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂’’𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀧𑀼𑀭𑀺𑀫𑀧𑀓𑁆𑀔𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂’’𑀢𑀺 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲𑀪𑀗𑁆𑀕𑀓𑁆𑀔𑀡𑁂𑀢𑀺 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫 𑀧𑀓𑁆𑀔𑁂. 𑀘𑀯𑀦𑁆𑀢𑀸𑀦𑀁 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀲𑀺𑀬𑀸, 𑀦 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀢𑀺, 𑀦𑁄 𑀘 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀘 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁂 𑀲𑀢𑀺, 𑀲𑀩𑁆𑀩𑀸𑀦𑀺 𑀓𑀫𑁆𑀫𑀚𑀭𑀽𑀧𑀸𑀦𑀺 𑀉𑀢𑀼𑀚𑀭𑀽𑀧𑀸𑀦𑀺 𑀆𑀳𑀸𑀭𑀚𑀭𑀽𑀧𑀸𑀦𑀺 𑀘 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂’’𑀢𑀺 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀢𑀺 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀧𑀓𑁆𑀔𑁂. 𑀢𑀢𑁆𑀣 𑀘 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀢𑀺 𑀇𑀤𑀁 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀁 𑀧𑀸𑀴𑀺𑀲𑀸𑀥𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀼𑀢𑁆𑀢𑀺𑀲𑀸𑀥𑀓𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀲𑁆𑀲𑀸’’𑀢𑀺 𑀆𑀦𑀦𑁆𑀤𑀸 𑀘𑀭𑀺𑀬𑀲𑁆𑀲 𑀫𑀽𑀮𑀝𑀻𑀓𑀸𑀓𑀸𑀭𑀲𑁆𑀲. 𑀯𑀺𑀪𑀸𑀯𑀦𑀺𑀬𑀁. 𑀪𑀗𑁆𑀕𑁂 𑀭𑀽𑀧𑀲𑁆𑀲 𑀦𑀼𑀧𑁆𑀧𑀸𑀤𑁄, 𑀘𑀺𑀢𑁆𑀢𑀚𑀸𑀦𑀁 𑀯𑀲𑁂𑀦 𑀯𑀸. 𑀆𑀭𑀼𑀧𑁆𑀧𑀁 𑀯𑀸𑀧𑀺 𑀲𑀦𑁆𑀥𑀸𑀬, 𑀪𑀸𑀲𑀺𑀢𑁄 𑀬𑀫𑀓𑀲𑁆𑀲 𑀳𑀺. 𑀦 𑀘𑀺𑀢𑁆𑀢𑀝𑁆𑀞𑀺𑀢𑀺 𑀪𑀗𑁆𑀕𑁂 𑀘, 𑀦 𑀭𑀽𑀧𑀲𑁆𑀲 𑀅𑀲𑀫𑁆𑀪𑀯𑁄. 𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀦 𑀳𑀺 𑀦 𑀘𑀺𑀢𑁆𑀢𑀝𑁆𑀞𑀺𑀢𑀻’’𑀢𑀺 𑀘𑀺𑀢𑁆𑀢𑀲𑁆𑀲𑀞𑀺𑀢𑀺 𑀦𑀸𑀫 𑀦 𑀳𑀺 𑀦𑀢𑁆𑀣𑀺. ‘‘𑀪𑀗𑁆𑀕𑁂𑀘𑀸’’𑀢𑀺 𑀘𑀺𑀢𑁆𑀢𑀲𑁆𑀲𑀪𑀗𑁆𑀕𑀓𑁆𑀔𑀡𑁂 𑀘. 𑀢𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀬𑀫𑀓𑀧𑀸𑀴𑀺𑀬𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸’’𑀢𑀺 𑀏𑀢𑁂𑀦 𑀧𑀸𑀴𑀺𑀲𑀁𑀲𑀦𑁆𑀤𑀦𑀸 𑀦𑀸𑀫 𑀕𑀭𑀼𑀓𑀢𑁆𑀢𑀩𑁆𑀩𑀸𑀢𑀺 𑀤𑀻𑀧𑁂𑀢𑀺. ‘‘𑀕𑀫𑁆𑀪𑀻𑀭𑁄 𑀘 𑀲𑀢𑁆𑀣𑀼 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀏𑀢𑁂𑀦 𑀅𑀢𑁆𑀢𑀸𑀦𑀁 𑀲𑀢𑁆𑀣𑀼𑀫𑀢𑀜𑁆𑀜𑀼𑀁 𑀓𑀢𑁆𑀯𑀸 𑀇𑀤𑀁 𑀲𑀦𑁆𑀥𑀸𑀬 𑀏𑀢𑀁 𑀲𑀦𑁆𑀥𑀸𑀬𑀸𑀢𑀺 𑀯𑀢𑁆𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀤𑀻𑀧𑁂𑀢𑀺. ‘‘𑀲𑀼𑀤𑁆𑀥𑀁 𑀅𑀭𑀽𑀧𑀫𑁂𑀯𑀸’’𑀢𑀺 𑀲𑀼𑀤𑁆𑀥𑀁 𑀅𑀭𑀽𑀧𑀧𑁆𑀧𑀝𑀺𑀲𑀦𑁆𑀥𑀺𑀁 𑀏𑀯. 𑀙 𑀘𑀢𑁆𑀢𑀸𑀮𑀻𑀲𑀘𑀺𑀢𑁆𑀢𑀸𑀦𑀺 𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀁 𑀲𑀢𑀺 𑀅𑀭𑀽𑀧𑀯𑀺𑀧𑀸𑀓𑀯𑀚𑁆𑀚𑀺𑀢𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀭𑀽𑀧𑀯𑀺𑀧𑀸𑀓𑀸𑀧𑀦𑀸’’𑀢𑀺𑀆𑀤𑀺𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀳𑁂𑀢𑀼𑀦𑁄’’𑀢𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀓𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀳𑁂𑀢𑀼𑀲𑁆𑀲. ‘‘𑀢𑀩𑁆𑀩𑀻𑀥𑀼𑀭𑀢𑀸𑀬𑀸’’𑀢𑀺 𑀭𑀽𑀧𑀯𑀺𑀭𑀼𑀤𑁆𑀥𑀢𑀸𑀬. 𑀭𑀽𑀧𑀸𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀪𑀽𑀢𑁄 𑀫𑀕𑁆𑀕𑁄. 𑀢𑁂𑀦 𑀦𑀺𑀩𑁆𑀩𑀢𑁆𑀢𑀲𑁆𑀲. 𑀭𑀽𑀧𑁄𑀓𑀸𑀲𑁄 𑀦𑀸𑀫 𑀓𑀸𑀫𑀭𑀽𑀧𑀪𑀯𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀏𑀓𑀽𑀦 𑀦 𑀯𑀼𑀢𑀺𑀪𑀯𑀗𑁆𑀕𑀲𑁆𑀲𑁂 𑀯𑀸’’𑀢𑀺 𑀧𑀯𑀢𑁆𑀢𑀺𑀓𑀸𑀮𑁂 𑀭𑀽𑀧𑀚𑀦𑀓𑀲𑁆𑀲 𑀏𑀓𑀽𑀦 𑀦 𑀯𑀼𑀢𑀺𑀪𑀯𑀗𑁆𑀕 𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀦 𑀅𑀭𑀽𑀧𑀯𑀺𑀧𑀸𑀓𑀁 𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀭𑀽𑀧𑀚𑀦𑀓𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀁. 𑀓𑁂𑀘𑀺 𑀧𑀦 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀭𑀽𑀧𑀁 𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬𑀁 𑀦 𑀮𑀪𑀢𑀺. 𑀞𑀺𑀢𑀺𑀓𑁆𑀔𑀡𑁂 𑀭𑀽𑀧𑀁 𑀧𑀭𑀢𑁄 𑀪𑀯𑀗𑁆𑀕𑀘𑀺𑀢𑁆𑀢𑀢𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀁 𑀮𑀪𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀺 𑀅𑀢𑁆𑀢𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀬𑀁 𑀯𑀺𑀚𑁆𑀚𑀫𑀸𑀦𑁄 𑀳𑀼𑀢𑁆𑀯𑀸 𑀉𑀧𑀓𑀸𑀭𑀓𑁄 𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀧𑀘𑁆𑀙𑀸𑀚𑀸𑀢𑁄 𑀘 𑀢𑀲𑁆𑀲 𑀏𑀓𑀤𑁂𑀲𑁄. ‘‘𑀆𑀬𑀼𑀲𑀗𑁆𑀔𑀸𑀭𑀸𑀦𑀁’’𑀢𑀺 𑀉𑀲𑁆𑀫𑀸𑀤𑀻𑀦𑀁. ‘‘𑀢𑀁’’𑀢𑀺 𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀁. ‘‘𑀬𑀣𑀸𑀳𑀸’’𑀢𑀺 𑀲𑁄 𑀣𑁂𑀭𑁄 𑀓𑀺𑀁 𑀆𑀳. ‘‘𑀯𑀼𑀢𑁆𑀢𑀁’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀇𑀢𑀺 𑀧𑀦 𑀯𑀘𑀦𑀢𑁄 𑀅𑀜𑁆𑀜𑁂𑀲𑀁𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀧𑀥𑀸𑀦𑀯𑀘𑀦𑀁. 𑀧𑀦 𑀲𑀤𑁆𑀤𑁄 𑀅𑀭𑀼𑀘𑀺 𑀚𑁄𑀢𑀓𑁄. ‘‘𑀢𑀣𑀸 𑀯𑀼𑀢𑁆𑀢𑁂𑀧𑀻’’𑀢𑀺 𑀚𑁄𑀢𑁂𑀢𑀺. 𑀯𑀘𑀻𑀲𑀗𑁆𑀔𑀸𑀭𑁄 𑀦𑀸𑀫 𑀯𑀺𑀢𑀓𑁆𑀓𑀯𑀺𑀘𑀸𑀭𑁄. 𑀓𑀸𑀬𑀲𑀗𑁆𑀔𑀸𑀭𑁄 𑀦𑀸𑀫 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀸𑀢𑁄. 𑀲𑁄 𑀲𑀩𑁆𑀩𑁂𑀲𑀁𑀧𑀺 𑀓𑀸𑀫𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀢𑀢𑁄 𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀦𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑀘𑀦𑁂𑀦 𑀘𑀼𑀢𑀺𑀘𑀺𑀢𑁆𑀢𑀢𑁄 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀪𑀸𑀯𑀁 𑀜𑀸𑀧𑁂𑀢𑀺. 𑀦𑀦𑀼 𑀇𑀫𑀺𑀲𑁆𑀲𑀁 𑀧𑀸𑀴𑀺𑀬𑀁 𑀘𑀼𑀢𑀺𑀓𑀸𑀮𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑁆𑀲 𑀅𑀪𑀸𑀯𑀁 𑀯𑀤𑀢𑀺. 𑀅𑀜𑁆𑀜𑁂𑀲𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀅𑀪𑀸𑀯𑀁 𑀦 𑀯𑀤𑀢𑀺. 𑀢𑀲𑁆𑀫𑀸 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀩𑁆𑀩𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀦 𑀚𑀦𑁂𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀅𑀜𑁆𑀜𑀸𑀦𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀻𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀦 𑀳𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭 𑀲𑀫𑀼𑀝𑁆𑀞𑀸𑀧𑀦𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀕𑀩𑁆𑀪𑀕𑀫𑀦𑀸𑀤𑀺𑀯𑀺𑀦𑀺𑀩𑀤𑁆𑀥𑀸𑀪𑀸𑀯𑁂’’𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀕𑀢𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀉𑀤𑀓𑁂 𑀦𑀺𑀫𑀼𑀕𑁆𑀕𑀲𑁆𑀲. 𑀩𑀸𑀴𑁆𑀳𑀁 𑀯𑀺𑀲𑀜𑁆𑀜𑀻𑀪𑀽𑀢𑀲𑁆𑀲. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲. 𑀭𑀽𑀧𑀸𑀭𑀽𑀧𑀪𑀯𑁂 𑀞𑀺𑀢𑀲𑁆𑀲𑀸𑀢𑀺. 𑀢𑀲𑁆𑀫𑀸 𑀏𑀢𑁂𑀕𑀩𑁆𑀪𑀕𑀫𑀦𑀸𑀤𑀬𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀯𑀺𑀦𑀺𑀩𑀤𑁆𑀥𑀦𑁆𑀢𑀺 𑀦𑀻𑀯𑀸𑀭𑁂𑀦𑁆𑀢𑀻𑀢𑀺 𑀕𑀩𑁆𑀪𑀕𑀫𑀦𑀸𑀤𑀺𑀯𑀺𑀦𑀺𑀩𑀤𑁆𑀥𑀸. 𑀢𑁂𑀲𑀁 𑀅𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. 𑀯𑀺𑀦𑀸 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑁆𑀲 𑀘 𑀅𑀜𑁆𑀜𑀘𑀺𑀢𑁆𑀢𑀚𑀭𑀽𑀧𑀸𑀦𑀜𑁆𑀘 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀁𑀧𑀺 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀘𑀼𑀢𑁄 𑀘𑀸’’𑀢𑀺𑀆𑀤𑀺𑀦𑀸. 𑀘𑀼𑀢𑁄 𑀘 𑀳𑁄𑀢𑀺, 𑀅𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦 𑀭𑀽𑀧𑀜𑁆𑀘 𑀧𑀯𑀢𑁆𑀢𑀢𑀻𑀢𑀺 𑀦 𑀘 𑀬𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀲𑁄 𑀘 𑀲𑀼𑀝𑁆𑀞𑀼 𑀑𑀴𑀸𑀭𑀺𑀓𑁄 𑀭𑀽𑀧𑀥𑀫𑁆𑀫𑁄. 𑀇𑀢𑀺 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀫𑀲𑁆𑀲 𑀅𑀢𑁆𑀣𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀢𑀁 𑀅𑀢𑁆𑀣𑀁 𑀯𑀤𑀢𑀺 ‘‘𑀑𑀴𑀸𑀭𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸. ‘‘𑀓𑀢𑀻𑀧𑀬 𑀔𑀡𑀫𑀢𑁆𑀢𑀁’’𑀢𑀺 𑀧𑀦𑁆𑀦𑀭𑀲𑀔𑀡𑀲𑁄𑀴𑀲𑀔𑀡𑀫𑀢𑁆𑀢𑀁. ‘‘𑀘𑀺𑀢𑁆𑀢𑀚𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸’’𑀢𑀺 𑀘𑀺𑀢𑁆𑀢𑀚𑀭𑀽𑀧𑀧𑁆𑀧𑀯𑀢𑁆𑀢𑀦𑀢𑁄. 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀢𑀤𑀸 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺𑀧𑀺 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀁 𑀦𑀸𑀕𑀘𑁆𑀙𑀦𑁆𑀢𑀺. ‘‘𑀧𑀘𑁆𑀘𑀬𑀧𑀭𑀺𑀢𑁆𑀢𑀢𑀸𑀬 𑀯𑀸’’𑀢𑀺 𑀢𑀤𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀲𑁆𑀲 𑀅𑀮𑀸𑀪𑀢𑁄 𑀯𑀼𑀢𑁆𑀢𑀁. 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺. 𑀢𑀤𑀸 𑀤𑀼𑀩𑁆𑀩𑀮𑀢𑁆𑀢𑀸 𑀏𑀯 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀁 𑀦𑀸𑀕𑀘𑁆𑀙𑀦𑁆𑀢𑀺. 𑀧𑀭𑀺𑀬𑁄𑀲𑀸𑀦𑁂𑀧𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑁂. 𑀯𑀢𑁆𑀣𑀼𑀲𑁆𑀲 𑀆𑀤𑀺𑀅𑀦𑁆𑀢𑀦𑀺𑀲𑁆𑀲𑀺𑀢𑀸𑀦𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀆𑀤𑀺𑀫𑁆𑀳𑀺 𑀦𑀺𑀲𑁆𑀲𑀺𑀢𑀸𑀦𑀺. 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀅𑀦𑁆𑀢𑁂 𑀦𑀺𑀲𑁆𑀲𑀺𑀢𑀸𑀦𑀺. 𑀲𑀫𑀤𑀼𑀩𑁆𑀩𑀮𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀲𑀩𑁆𑀩𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑁆𑀧𑀺 𑀭𑀽𑀧𑀁 𑀦 𑀚𑀦𑁂𑀢𑀺, 𑀢𑀣𑀸 𑀲𑀩𑁆𑀩𑀘𑀼𑀢𑀺𑀘𑀺𑀢𑁆𑀢𑀫𑁆𑀧𑀺 𑀭𑀽𑀧𑀁 𑀦 𑀚𑀦𑁂𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. ‘‘𑀧𑀸𑀴𑀺𑀯𑀺𑀭𑁄𑀥𑀁’’𑀢𑀺 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀸𑀬 𑀲𑀗𑁆𑀔𑀸𑀭 𑀬𑀫𑀓𑀧𑀸𑀴𑀺𑀬𑀸 𑀯𑀺𑀭𑁄𑀥𑀁.‘‘𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯𑀸’’𑀢𑀺 𑀘𑀺𑀢𑁆𑀢𑀜𑁆𑀳𑀺 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀧𑀭𑀺𑀧𑀼𑀡𑁆𑀡𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀩𑀮𑀯𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀫𑁂𑀯. ‘‘𑀢𑀁’’𑀢𑀺 𑀅𑀧𑁆𑀧𑀦𑀸𑀚𑀯𑀦𑀁. 𑀅𑀘𑀮𑀫𑀸𑀦𑀁 𑀳𑀼𑀢𑁆𑀯𑀸. ‘‘𑀅𑀩𑁆𑀩𑁄𑀓𑀺𑀡𑁆𑀡𑁂’’𑀢𑀺 𑀯𑀻𑀣𑀺𑀘𑀺𑀢𑁆𑀢 𑀯𑀸𑀭𑁂𑀦 𑀅𑀯𑁄𑀓𑀺𑀡𑁆𑀡𑁂. 𑀦 𑀢𑀣𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀅𑀗𑁆𑀕𑀸𑀦𑀺 𑀑𑀲𑀻𑀤𑀦𑁆𑀢𑀺, 𑀬𑀣𑀸 𑀞𑀧𑀺𑀢𑀸𑀦𑁂𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. ‘‘𑀦 𑀢𑀢𑁄𑀧𑀭𑀁’’𑀢𑀺 𑀢𑀢𑁄 𑀅𑀢𑀺𑀭𑁂𑀓𑀁 𑀭𑀽𑀧𑀯𑀺𑀲𑁂𑀲𑀁 𑀦 𑀚𑀦𑁂𑀢𑀺. ‘‘𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺𑀘𑀺𑀢𑁆𑀢𑀁. ‘‘𑀉𑀢𑁆𑀢𑀭𑀓𑀺𑀘𑁆𑀘𑀁’’𑀢𑀺 𑀉𑀧𑀭𑀽𑀧𑀭𑀺𑀓𑀺𑀘𑁆𑀘𑀁. ‘‘𑀅𑀝𑁆𑀞 𑀧𑀼𑀣𑀼𑀚𑁆𑀚𑀦𑀸𑀦𑀁’’𑀢𑀺 𑀅𑀝𑁆𑀞 𑀲𑁄𑀫𑀦𑀲𑁆𑀲 𑀚𑀯𑀦𑀸𑀦𑀺 𑀳𑀲𑀦𑀁𑀧𑀺 𑀚𑀦𑁂𑀦𑁆𑀢𑀺. 𑀙 𑀚𑀯𑀦𑀸𑀦𑀺 𑀧𑀜𑁆𑀘𑀚𑀯𑀦𑀸𑀦𑀻𑀢𑀺 𑀅𑀥𑀺𑀓𑀸𑀭𑁄. 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁. 𑀲𑀺𑀢𑀓𑀫𑁆𑀫𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀢𑀓𑀫𑁆𑀫𑀁 𑀦𑀸𑀫 𑀫𑀺𑀳𑀺𑀢𑀓𑀫𑁆𑀫𑀁. ‘‘𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯𑀸’’𑀢𑀺 ‘𑀭𑀽𑀧𑀲𑁆𑀲 𑀧𑀦 𑀉𑀧𑀢𑁆𑀣𑀫𑁆𑀪𑀓𑀪𑀽𑀢𑀸 𑀉𑀢𑀼𑀆𑀳𑀸𑀭𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬 𑀥𑀫𑁆𑀫𑀸 𑀘 𑀞𑀺𑀢𑀺𑀓𑁆𑀔𑀡𑁂 𑀏𑀯 𑀨𑀭𑀦𑁆𑀢𑀻’𑀢𑀺 𑀏𑀯𑀁 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. ‘‘𑀉𑀢𑀼𑀦𑁄 𑀩𑀮𑀯𑀪𑀸𑀯𑁄’’𑀢𑀺 𑀭𑀽𑀧𑀼𑀧𑁆𑀧𑀸𑀤𑀦𑀢𑁆𑀣𑀸𑀬 𑀩𑀮𑀯𑀪𑀸𑀯𑁄. 𑀲𑀦𑁆𑀢𑀢𑀺𑀞𑀺𑀢𑀺𑀬𑀸 𑀩𑀮𑀯𑀪𑀸𑀯𑁄 𑀧𑀦 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸𑀬𑀢𑁆𑀢𑁄 𑀳𑁄𑀢𑀺. 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀬𑁆𑀬. 𑀦𑁄 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀆𑀳 ‘‘𑀯𑀓𑁆𑀔𑀢𑀺 𑀘𑀸’’𑀢𑀺𑀆𑀤𑀺𑀁. 𑀅𑀚𑁆𑀛𑀢𑁆𑀢 𑀲𑀦𑁆𑀢𑀸𑀦𑀕𑀢𑁄 𑀘 𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑀕𑀢𑁄 𑀘 𑀤𑀼𑀯𑀺𑀥𑀸𑀳𑀸𑀭𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁆𑀣𑀘𑀸𑀢𑀺𑀆𑀤𑀻𑀲𑀼. 𑀉𑀢𑀼 𑀧𑀜𑁆𑀘𑀯𑀺𑀥𑁄. 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀘𑀢𑀼𑀚𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀩𑀳𑀺𑀤𑁆𑀥𑀸 𑀲𑀦𑁆𑀢𑀸𑀦𑁂 𑀉𑀢𑀼𑀚𑀯𑀲𑁂𑀦 𑀏𑀓𑁄. 𑀢𑀣𑀸 𑀆𑀳𑀸𑀭𑁄𑀧𑀺 𑀧𑀜𑁆𑀘𑀯𑀺𑀥𑁄. 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀩𑀳𑀺𑀤𑁆𑀥𑀸𑀳𑀸𑀭𑀁 𑀅𑀯𑀲𑁂𑀲𑀸𑀦𑀁 𑀅𑀚𑁆𑀛𑀢𑁆𑀢 𑀲𑀦𑁆𑀢𑀸𑀦𑁂 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂 𑀯𑀺𑀯𑀸𑀤𑁄 𑀦𑀢𑁆𑀣𑀺. 𑀩𑀳𑀺𑀤𑁆𑀥𑀸𑀳𑀸𑀭𑀲𑁆𑀲 𑀧𑀦 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂 𑀯𑀺𑀯𑀸𑀤𑁄 𑀅𑀢𑁆𑀣𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀉𑀢𑀼𑀑𑀚𑀸𑀦𑀁 𑀯𑀺𑀬𑀸’’𑀢𑀺 𑀉𑀢𑀼𑀑𑀚𑀸𑀦𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀁 𑀯𑀺𑀬. 𑀅𑀝𑁆𑀞𑀓𑀣𑀸𑀧𑀸𑀞𑁂. ‘‘𑀤𑀦𑁆𑀢𑀯𑀺𑀘𑀼𑀡𑁆𑀡𑀺𑀢𑀁 𑀧𑀦𑀸’’𑀢𑀺 𑀤𑀦𑁆𑀢𑁂𑀳𑀺 𑀲𑀗𑁆𑀔𑀸𑀤𑀺𑀢𑁆𑀯𑀸 𑀯𑀺𑀘𑀼𑀡𑁆𑀡𑀁 𑀓𑀢𑀁 𑀧𑀦. ‘‘𑀲𑀺𑀢𑁆𑀣𑀁’’𑀢𑀺 𑀪𑀢𑁆𑀢𑀘𑀼𑀡𑁆𑀡𑀲𑀺𑀢𑁆𑀣𑀁. 𑀝𑀻𑀓𑀸𑀧𑀸𑀞𑁂. ‘‘𑀲𑀸’’𑀢𑀺 𑀩𑀳𑀺𑀤𑁆𑀥𑀸 𑀑𑀚𑀸. ‘‘𑀦𑀲𑀗𑁆𑀔𑀸𑀤𑀺𑀢𑁄’’𑀢𑀺 𑀦 𑀲𑀼𑀝𑁆𑀞𑀼𑀔𑀸𑀤𑀺𑀢𑁄. ‘‘𑀢𑀢𑁆𑀢𑀓𑁂𑀦𑀧𑀻’’𑀢𑀺 𑀫𑀼𑀔𑁂𑀞𑀧𑀺𑀢𑀫𑀢𑁆𑀢𑁂𑀦𑀧𑀺. ‘‘𑀅𑀩𑁆𑀪𑀦𑁆𑀢𑀭𑀲𑁆𑀲𑀸’’𑀢𑀺 𑀅𑀚𑁆𑀛𑀢𑁆𑀢𑀸𑀳𑀸𑀭𑀲𑁆𑀲. ‘‘𑀅𑀝𑁆𑀞𑀅𑀝𑁆𑀞𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀚𑀦𑀦 𑀯𑀲𑁂𑀦 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸𑀳𑀸𑀭𑁄 𑀏𑀯 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀉𑀧𑀸𑀤𑀺𑀦𑁆𑀦𑀓𑀸’’𑀢𑀺 𑀅𑀚𑁆𑀛𑀢𑁆𑀢 𑀲𑀫𑁆𑀪𑀽𑀢𑀸 𑀯𑀼𑀘𑁆𑀘𑀦𑁆𑀢𑀺. 𑀩𑀳𑀺𑀤𑁆𑀥𑀸 𑀑𑀚𑀸𑀧𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀦𑀉𑀢𑀼𑀦𑀸’’𑀢𑀺 𑀅𑀚𑁆𑀛𑀢𑁆𑀢 𑀉𑀢𑀼𑀦𑀸. ‘‘𑀲𑁂𑀤𑀺𑀬𑀫𑀸𑀦𑀸’’𑀢𑀺 𑀉𑀲𑁆𑀫𑀸𑀧𑀺𑀬𑀫𑀸𑀦𑀸. ‘‘𑀢𑀸𑀬 𑀘 𑀑𑀚𑀸𑀬𑀸’’𑀢𑀺 𑀅𑀚𑁆𑀛𑀢𑁆𑀢 𑀑𑀚𑀸𑀬. ‘‘𑀫𑁂𑀤𑀲𑀺𑀦𑁂𑀳𑀼𑀧𑀘𑀬 𑀯𑀲𑁂𑀦𑀸’’𑀢𑀺 𑀫𑁂𑀤𑀓𑁄𑀝𑁆𑀞𑀸𑀲𑀭𑀲𑀲𑀺𑀦𑁂𑀳 𑀓𑁄𑀝𑁆𑀞𑀸𑀲𑀸𑀦𑀁 𑀯𑀟𑁆𑀠𑀦𑀯𑀲𑁂𑀦. 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺𑀭𑀽𑀧𑀲𑀫𑀼𑀝𑁆𑀞𑀸𑀦𑀸𑀦𑀺. 𑀧𑀸𑀴𑀺𑀧𑀸𑀞𑁂. ‘‘𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬 𑀭𑀽𑀧𑀸𑀦𑀺. ‘‘𑀯𑀺𑀳𑀸𑀭𑁄’’𑀢𑀺 𑀲𑀫𑀸𑀧𑀢𑁆𑀢𑀺 𑀏𑀯 𑀯𑀼𑀘𑁆𑀘𑀢𑀺. 𑀲𑀫𑀸𑀧𑀢𑁆𑀢𑀺 𑀘𑀺𑀢𑁆𑀢𑁂𑀦 𑀚𑀸𑀢𑀢𑁆𑀢𑀸 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦 𑀦𑀻𑀢𑀺 𑀓𑀢𑁆𑀯𑀸 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀢𑀺. ‘‘𑀉𑀧𑀘𑀭𑀺𑀢𑀢𑁆𑀢𑀸’’𑀢𑀺 𑀞𑀸𑀦𑀽𑀧𑀘𑀸𑀭𑁂𑀦 𑀯𑁄𑀳𑀭𑀺𑀢𑀢𑁆𑀢𑀸. ‘‘𑀢𑁂𑀲𑀁 𑀦 𑀯𑀦𑁆𑀦𑀁’’𑀢𑀺 𑀇𑀦𑁆𑀤𑁆𑀭𑀺𑀬𑀭𑀽𑀧𑀸𑀦𑀁. 𑀦𑀺𑀥𑀺𑀓𑀡𑁆𑀟𑀧𑀸𑀞𑁂. 𑀲𑀼𑀦𑁆𑀤𑀭𑁄 𑀯𑀡𑁆𑀡𑁄 𑀬𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑁄. 𑀲𑀼𑀯𑀡𑁆𑀡𑀲𑁆𑀲 𑀪𑀸𑀯𑁄 𑀲𑀼𑀯𑀡𑁆𑀡𑀢𑀸. 𑀢𑀣𑀸𑀲𑀼𑀲𑁆𑀲𑀭𑀢𑀸. ‘‘𑀲𑀭𑁄’’𑀢𑀺 𑀘 𑀲𑀤𑁆𑀤𑁄 𑀯𑀼𑀘𑁆𑀘𑀢𑀺. ‘‘𑀲𑀼𑀲𑀡𑁆𑀞𑀸𑀦𑀁’’𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀼𑀝𑁆𑀞𑀼𑀲𑀡𑁆𑀞𑀸𑀦𑀁. ‘‘𑀲𑀼𑀭𑀽𑀧𑀢𑀸’’𑀢𑀺 𑀲𑀼𑀦𑁆𑀤𑀭𑀭𑀽𑀧𑀓𑀸𑀬𑀢𑀸. ‘‘𑀬𑀣𑀸’’𑀢𑀺 𑀬𑁂𑀦𑀆𑀓𑀸𑀭𑁂𑀦 𑀲𑀡𑁆𑀞𑀺𑀢𑁂 𑀲𑀢𑀺. 𑀢𑀣𑀸 𑀢𑁂𑀦 𑀆𑀓𑀸𑀭𑁂𑀦 𑀲𑀡𑁆𑀞𑀺𑀢𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀮𑀳𑀼𑀢𑀸𑀤𑀺𑀢𑁆𑀢𑀬𑁂. 𑀤𑀦𑁆𑀥𑀢𑁆𑀢𑀸𑀤𑀺𑀓𑀭𑀸𑀦𑀁 𑀥𑀸𑀢𑀼𑀓𑁆𑀔𑁄𑀪𑀸𑀦𑀁 𑀧𑀝𑀺𑀧𑀓𑁆𑀔𑁂𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑀺𑀕𑁆𑀕𑀳𑁄. ‘‘𑀏𑀢𑀲𑁆𑀲𑀸’’𑀢𑀺 𑀮𑀳𑀼𑀢𑀸𑀤𑀺𑀢𑁆𑀢𑀬𑀲𑁆𑀲 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀏𑀢𑀁 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀫𑀓𑁂𑀲𑀼𑀧𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑁂𑀯 𑀕𑀳𑀺𑀢𑁄’’𑀢𑀺 𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑁄𑀢𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀅𑀲𑁄𑀢𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺𑀆𑀤𑀻𑀲𑀼 𑀉𑀧𑁆𑀧𑀸𑀤𑀯𑀸𑀭𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦, 𑀦𑀺𑀭𑁄𑀥𑀯𑀸𑀭𑁂 𑀘𑀼𑀢𑀺𑀯𑀲𑁂𑀦 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀯 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀓𑀫𑁆𑀫𑀚𑀸𑀦𑀁 𑀧𑀯𑀢𑁆𑀢𑀺𑀓𑀸𑀮𑁂 𑀓𑀸𑀮𑀪𑁂𑀤𑁄 𑀯𑀼𑀢𑁆𑀢𑁄𑀢𑀺. ‘‘𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸𑀢𑀺 𑀯𑀼𑀢𑁆𑀢𑀁’’𑀢𑀺 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑁂 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀤𑀻𑀧𑀦𑀺𑀬𑀁 ‘𑀅𑀢𑁆𑀣𑀺 𑀯𑀸𑀢 𑀲𑀫𑀼𑀝𑁆𑀞𑀺𑀢𑀸 𑀆𑀩𑀸𑀥𑀸. 𑀮. 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸’𑀢𑀺 𑀯𑀼𑀢𑁆𑀢𑀁. 𑀢𑀸𑀦𑀺 𑀉𑀧𑀧𑀻𑀴𑀓𑀼𑀧𑀖𑀸𑀢𑀓 𑀓𑀫𑁆𑀫𑀸𑀦𑀺𑀧𑀺 𑀯𑀺𑀧𑀢𑁆𑀢𑀺𑀬𑁄 𑀮𑀪𑀫𑀸𑀦𑀸𑀦𑀺 𑀏𑀯 𑀔𑁄𑀪𑁂𑀢𑁆𑀯𑀸 𑀦𑀸𑀦𑀸𑀩𑀸𑀥𑁂 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀭𑀻𑀭𑁂 𑀞𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀭𑀻𑀭𑀝𑁆𑀞𑀓𑀸. ‘‘𑀢𑀤𑀦𑀼𑀕𑀢𑀺𑀓𑀸𑀦𑀺 𑀏𑀯 𑀳𑁄𑀦𑁆𑀢𑀻’’𑀢𑀺 𑀓𑀫𑁆𑀫𑀚𑀸𑀤𑀻𑀦𑀺𑀧𑀺 𑀔𑀼𑀩𑁆𑀪𑀺𑀢𑀸𑀦𑀺 𑀏𑀯 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 𑀅𑀝𑁆𑀞𑀲𑀼 𑀓𑀸𑀭𑀡𑁂𑀲𑀼 𑀬𑁂𑀦𑀓𑁂𑀦𑀘𑀺𑀓𑀸𑀭𑀡𑁂𑀦 𑀘𑀓𑁆𑀔𑀼𑀭𑁄𑀕𑀸𑀤𑀺𑀓𑁂 𑀆𑀩𑀸𑀥𑁂 𑀚𑀸𑀢𑁂 𑀢𑀲𑁆𑀫𑀺𑀁 𑀅𑀗𑁆𑀕𑁂 𑀧𑀯𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺 𑀭𑁄𑀕𑀲𑀫𑀼𑀝𑁆𑀞𑀸𑀦𑀸𑀦𑀺 𑀆𑀩𑀸𑀥𑀪𑀸𑀯𑀁 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀓𑀫𑁆𑀫𑀚𑀭𑀽𑀧𑀸𑀦𑀺 𑀢𑀤𑀦𑀼𑀕𑀢𑀺𑀓𑀪𑀸𑀯𑁂𑀦 𑀆𑀩𑀸𑀥𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀦 𑀉𑀚𑀼𑀓𑀢𑁄 𑀓𑀫𑁆𑀫𑀯𑀲𑁂𑀦𑀸𑀢𑀺 𑀤𑀻𑀧𑁂𑀢𑀺. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄 𑀦𑀸𑀫 𑀦𑀢𑁆𑀣𑀺. 𑀢𑀣𑀸𑀧𑀺 𑀅𑀝𑁆𑀞𑀲𑀼 𑀆𑀩𑀸𑀥𑁂𑀲𑀼𑀧𑀺 𑀅𑀢𑁆𑀣𑀺 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸𑀢𑀺𑀆𑀤𑀻𑀲𑀼 𑀯𑀺𑀬 𑀅𑀢𑁆𑀣𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸𑀢𑀺 𑀅𑀯𑀢𑁆𑀯𑀸 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀧𑀻𑀴𑀓𑁄 𑀧𑀖𑀸𑀢𑀓𑀓𑀫𑁆𑀫𑀸𑀦𑀁𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀬𑁄𑀓𑁄𑀘𑀺𑀥𑀸𑀢𑀼𑀓𑁆𑀔𑁄𑀪𑁄 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂 𑀦 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀘𑁆𑀘𑀢𑀺𑀬𑁂𑀯. 𑀢𑀢𑁄 𑀚𑀸𑀢𑁄 𑀬𑁄𑀓𑁄𑀘𑀺 𑀆𑀩𑀸𑀥𑁄 𑀓𑀫𑁆𑀫𑀯𑀺𑀧𑀸𑀓𑀚𑁄𑀢𑀺 𑀯𑀼𑀢𑁆𑀢𑁄𑀢𑀺. 𑀲𑀼𑀕𑀫𑁆𑀪𑀻𑀭𑀫𑀺𑀤𑀁𑀞𑀸𑀦𑀁. 𑀲𑀼𑀝𑁆𑀞𑀼𑀯𑀺𑀘𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. ‘‘𑀬𑀢𑁄’’𑀢𑀺 𑀬𑀲𑁆𑀫𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀩𑀸𑀥𑀧𑀘𑁆𑀘𑀬𑀸. 𑀮. 𑀮𑀩𑁆𑀪𑀫𑀸𑀦𑁄 𑀲𑀺𑀬𑀸. 𑀓𑁂𑀯𑀮𑀁 𑀲𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. ‘‘𑀅𑀯𑀺𑀳𑀺𑀁𑀲𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀫𑁂𑀢𑁆𑀢𑀸𑀓𑀭𑀼𑀡𑀸𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸. 𑀲𑀼𑀯𑀺𑀤𑀽𑀭𑀢𑀸𑀬𑀘𑁂𑀯 𑀦𑀺𑀭𑀸𑀩𑀸𑀥𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀡𑁆𑀞𑀺𑀢𑀺𑀬𑀸’’𑀢𑀺 𑀤𑀼𑀓𑁆𑀔𑁄𑀪𑀦𑀻𑀬𑁂 𑀯𑀺𑀲𑁂𑀲𑀦𑀧𑀤𑀁. 𑀳𑁂𑀢𑀼𑀧𑀤𑀁 𑀯𑀸 𑀤𑀝𑁆𑀞𑀩𑁆𑀩𑀁. 𑀔𑁄𑀪𑁂𑀢𑀼𑀁 𑀤𑀼𑀓𑁆𑀓𑀭𑀸 𑀤𑀼𑀓𑁆𑀔𑁄𑀪𑀦𑀻𑀬𑀸. ‘‘𑀓𑀸𑀫𑀁’’𑀢𑀺 𑀓𑀺𑀜𑁆𑀘𑀸𑀧𑀻𑀢𑀺 𑀅𑀢𑁆𑀣𑁂 𑀦𑀺𑀧𑀸𑀢𑀧𑀤𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

‘‘𑀯𑀼𑀘𑁆𑀘𑀢𑁂’’𑀢𑀺𑀆𑀤𑀻𑀲𑀼. 𑀭𑀽𑀧𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀓𑀺𑀘𑁆𑀘𑀁 𑀢𑀺𑀯𑀺𑀥𑀁. 𑀚𑀦𑀦𑀜𑁆𑀘 𑀉𑀧𑀢𑁆𑀣𑀫𑁆𑀪𑀦𑀜𑁆𑀘 𑀅𑀦𑀼𑀧𑀸𑀮𑀦𑀜𑁆𑀘. 𑀢𑀢𑁆𑀣 𑀚𑀦𑀦𑀓𑀺𑀘𑁆𑀘𑀁 𑀚𑀦𑁂𑀢𑀩𑁆𑀩𑀸𑀦𑀁 𑀚𑀸𑀢𑀺𑀓𑁆𑀔𑀡𑁂 𑀏𑀯 𑀮𑀩𑁆𑀪𑀢𑀺. 𑀲𑁂𑀲𑀤𑁆𑀯𑀬𑀁 𑀧𑀦 𑀞𑀺𑀢𑀺𑀓𑁆𑀔𑀡𑁂𑀧𑀺 𑀮𑀩𑁆𑀪𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀧𑀦 𑀲𑀩𑁆𑀩𑀁 𑀧𑀘𑁆𑀘𑀬𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑀢𑁆𑀣 𑀚𑀦𑀦𑀓𑀺𑀘𑁆𑀘𑀯𑀲𑁂𑀦 𑀯𑀺𑀘𑀸𑀭𑁂𑀦𑁆𑀢𑁄 ‘‘𑀭𑀽𑀧𑀚𑀦𑀓𑀸𑀦𑀁’’𑀢𑀺𑀆𑀤𑀺𑀫𑀸𑀳. ‘‘𑀅𑀧𑀺𑀘𑀸’’𑀢𑀺𑀆𑀤𑀻𑀲𑀼. ‘‘𑀢𑀸𑀲𑀁’’𑀢𑀺 𑀉𑀧𑀘𑀬𑀲𑀦𑁆𑀢𑀢𑀻𑀦𑀁, 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸𑀦𑀜𑁆𑀘. ‘‘𑀢𑁂𑀲𑀽’’𑀢𑀺 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑁂𑀲𑀼. 𑀇𑀥 𑀧𑀦 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑁂𑀧𑀦. ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀅𑀤𑀺𑀲𑁆𑀲𑀫𑀸𑀦𑀯𑀺𑀲𑁂𑀲𑀢𑁆𑀣𑁂𑀧𑀺. ‘‘𑀲𑀸𑀭𑀢𑀭’’𑀦𑁆𑀢𑀺 𑀅𑀢𑀺𑀲𑀸𑀭𑀪𑀽𑀢𑀁. ‘‘𑀲𑁂𑀬𑁆𑀬𑁄’’𑀢𑀺 𑀲𑁂𑀝𑁆𑀞𑁄.

𑀭𑀽𑀧𑀲𑀫𑀼𑀝𑁆𑀞𑀸𑀦𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁯. 𑀓𑀮𑀸𑀧𑀬𑁄𑀚𑀦𑀸𑀬𑀁. ‘‘𑀲𑀗𑁆𑀔𑀸𑀦𑁂’’𑀢𑀺 𑀕𑀡𑀦𑁂. ‘‘𑀢𑁂𑀦𑀸’’𑀢𑀺 𑀲𑀗𑁆𑀔𑀸𑀦𑀝𑁆𑀞𑁂𑀦 𑀏𑀓𑀲𑀤𑁆𑀤𑁂𑀦 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀺𑀡𑁆𑀟𑀻’’𑀢𑀺 𑀏𑀓𑀕𑁆𑀖𑀦𑁄. 𑀫𑀽𑀮𑀝𑀻𑀓𑀸𑀧𑀸𑀞𑁂. ‘‘𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀯𑀢𑁆𑀢𑀺𑀢𑁄’’𑀢𑀺 𑀉𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. 𑀉𑀧𑀸𑀤𑀸𑀭𑀽𑀧𑀸𑀦𑀺 𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. ‘‘𑀏𑀯𑀁 𑀯𑀺𑀓𑀸𑀭𑀧𑀭𑀺𑀘𑁆𑀙𑁂𑀤 𑀭𑀽𑀧𑀸𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀧𑀜𑁆𑀘𑀯𑀺𑀓𑀸𑀭𑀭𑀽𑀧𑀸𑀦𑀺 𑀓𑀮𑀸𑀧𑀲𑁆𑀲𑁂𑀯 𑀘𑁄𑀧𑀦𑀸𑀤𑀺𑀲𑀪𑀸𑀯𑀸 𑀳𑁄𑀦𑁆𑀢𑀺, 𑀦 𑀏𑀓𑀫𑁂𑀓𑀲𑁆𑀲 𑀭𑀽𑀧𑀲𑁆𑀲. 𑀢𑀲𑁆𑀫𑀸 𑀢𑀸𑀦𑀺 𑀏𑀓𑁂𑀓𑀲𑁆𑀫𑀺𑀁 𑀓𑀮𑀸𑀧𑁂 𑀏𑀓𑁂𑀓𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀭𑀽𑀧𑀁 𑀧𑀦 𑀓𑀮𑀸𑀧𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀁 𑀦 𑀳𑁄𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀓𑀮𑀸𑀧𑀸𑀦𑀁 𑀅𑀦𑁆𑀢𑀭𑀸 𑀢𑀁𑀧𑀺 𑀏𑀓𑁂𑀓𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀦𑀺𑀲𑁆𑀲𑀬𑀢𑀸 𑀲𑀫𑁆𑀪𑀯𑀢𑁄’’𑀢𑀺 𑀏𑀢𑁆𑀣 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁𑀧𑀺 𑀮𑀓𑁆𑀔𑀡𑀫𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀳𑁄𑀢𑀺, 𑀧𑀯𑀢𑁆𑀢𑀺𑀯𑀲𑁂𑀦 𑀧𑀦 𑀏𑀓𑀕𑁆𑀖𑀦𑀢𑁆𑀢𑀸 𑀲𑀗𑁆𑀔𑀸𑀦𑀝𑁆𑀞𑁂𑀦𑀧𑀺 𑀏𑀓𑁄 𑀦𑀺𑀲𑁆𑀲𑀬𑁄𑀢𑀺 𑀯𑀢𑁆𑀢𑀩𑁆𑀩𑀫𑁂𑀯. 𑀏𑀯𑀜𑁆𑀳𑀺𑀲𑀢𑀺 𑀏𑀓𑀲𑀤𑁆𑀤𑀲𑁆𑀲 𑀅𑀢𑁆𑀣 𑀘𑀮𑀦𑀁 𑀦𑀢𑁆𑀣𑀻𑀢𑀺. ‘‘𑀢𑁂𑀦 𑀲𑀤𑁆𑀤𑁂𑀦𑀸’’𑀢𑀺 𑀘𑀺𑀢𑁆𑀢𑀚𑀲𑀤𑁆𑀤𑁂𑀦. 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑁄 ‘‘𑀅𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺 𑀆𑀳. 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀲𑀤𑁆𑀤𑁂𑀦𑀸’’𑀢𑀺 𑀘𑀺𑀢𑁆𑀢𑀚𑀲𑀤𑁆𑀤𑁂𑀦. ‘‘𑀢𑀸𑀬𑀯𑀸𑀘𑀸𑀬𑀸’’𑀢𑀺 𑀯𑀘𑀻𑀫𑀬𑀲𑀤𑁆𑀤𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀺𑀜𑁆𑀜𑀸𑀧𑀦𑀁 𑀇𑀘𑁆𑀘𑁂𑀯𑀢𑁆𑀣𑁄. 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀸𑀧𑀺𑀢𑁄. 𑀢𑀲𑁆𑀲 𑀪𑀸𑀯𑁄 𑀯𑀺𑀜𑁆𑀜𑀸𑀯𑀺𑀢𑀢𑁆𑀢𑀁. 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦𑀸𑀫 𑀓𑀲𑁆𑀲𑀘𑀺 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀲𑁄𑀓𑀯𑀲𑁂𑀦 𑀯𑀸 𑀢𑀼𑀝𑁆𑀞𑀺𑀯𑀲𑁂𑀦 𑀯𑀸 𑀩𑀮𑀯𑀯𑀺𑀢𑀓𑁆𑀓𑁄 𑀧𑀯𑀢𑁆𑀢𑀢𑀺. 𑀲𑁄 𑀲𑁄𑀓𑀁 𑀯𑀸 𑀢𑀼𑀝𑁆𑀞𑀺𑀁 𑀯𑀸 𑀲𑀦𑁆𑀥𑀸𑀭𑁂 𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑀼𑀢𑀻𑀬𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀫𑀼𑀔𑁂𑀬𑁂𑀯 𑀅𑀩𑁆𑀬𑀢𑁆𑀢𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀲𑀫𑀼𑀤𑀻𑀭𑀢𑀺. 𑀧𑀓𑀢𑀺𑀚𑀦𑁄 𑀢𑀁 𑀲𑀤𑁆𑀤𑀫𑀢𑁆𑀢𑀁 𑀲𑀼𑀡𑀸𑀢𑀺 𑀯𑀸 𑀦 𑀯𑀸𑀲𑀼𑀡𑀸𑀢𑀺. 𑀲𑀼𑀡𑀦𑁆𑀢𑁄𑀧𑀺 𑀅𑀓𑁆𑀔𑀭𑀁 𑀯𑀸 𑀅𑀢𑁆𑀣𑀁 𑀯𑀸 𑀅𑀥𑀺𑀧𑁆𑀧𑀸𑀬𑀁 𑀯𑀸 𑀦 𑀚𑀸𑀦𑀸𑀢𑀺. 𑀤𑀺𑀩𑁆𑀩𑀲𑁄𑀢𑁂𑀦 𑀯𑀸 𑀯𑀺𑀚𑁆𑀚𑀸𑀲𑁄𑀢𑁂𑀦 𑀯𑀸𑀲𑀼𑀡𑀦𑁆𑀢𑁄 𑀅𑀓𑁆𑀔𑀭𑀁𑀧𑀺 𑀅𑀢𑁆𑀣𑀁𑀧𑀺 𑀅𑀥𑀺𑀧𑁆𑀧𑀸𑀬𑀁𑀧𑀺 𑀚𑀸𑀦𑀸𑀢𑀺. 𑀚𑀸𑀦𑀺𑀢𑁆𑀯𑀸 𑀏𑀯𑀁𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀁𑀧𑀺 𑀢𑁂 𑀫𑀦𑁄𑀢𑀺𑀆𑀤𑀺𑀲𑀢𑀺. 𑀅𑀬𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦𑀸𑀫. 𑀲𑁄 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑁄 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀲𑀗𑁆𑀕𑀳𑀓𑀸𑀭𑁄𑀧𑀦 𑀯𑀘𑀻𑀫𑀬𑀲𑀤𑁆𑀤𑁄𑀦𑀸𑀫 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑁄𑀢𑀺 𑀯𑀸 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀯𑀸 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀆𑀕𑀢𑁂’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑁂. ‘‘𑀧𑀘𑁆𑀘𑁂𑀢𑀩𑁆𑀩𑀸’’𑀢𑀺 𑀲𑀤𑁆𑀥𑀸𑀢𑀩𑁆𑀩𑀸. ‘‘𑀝𑀻𑀓𑀸𑀲𑀼𑀧𑀦𑀲𑁆𑀲𑀸’’𑀢𑀺 𑀅𑀲𑁆𑀲𑀲𑀘𑁆𑀘𑀲𑀗𑁆𑀔𑁂𑀧𑀲𑁆𑀲 𑀤𑁆𑀯𑀻𑀲𑀼𑀝𑀻𑀓𑀸𑀲𑀼. 𑀅𑀓𑁆𑀔𑀭𑀜𑁆𑀘 𑀧𑀤𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀅𑀧𑁆𑀧𑀜𑁆𑀜𑀸𑀬𑀫𑀸𑀦𑀸 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀢𑁆𑀣𑀸 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀅𑀦𑁆𑀥𑀤𑀫𑀺𑀴𑀸𑀤𑀻𑀦𑀁’’𑀢𑀺 𑀅𑀦𑁆𑀥𑀚𑀸𑀢𑀺𑀓𑀤𑀫𑀺𑀴𑀚𑀸𑀢𑀺𑀓𑀸𑀤𑀻𑀦𑀁 𑀫𑀺𑀮𑀓𑁆𑀔𑀽𑀦𑀁. ‘‘𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑁄 𑀘 𑀔𑀺𑀧𑀺𑀢𑀲𑀤𑁆𑀤𑁄 𑀘 𑀯𑀫𑀺𑀢𑀲𑀤𑁆𑀤𑁄 𑀘 𑀙𑀟𑁆𑀟𑀺𑀢𑀲𑀤𑁆𑀤𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀆𑀤𑀺𑀲𑀤𑁆𑀤𑁂𑀦 𑀢𑀸𑀤𑀺𑀲𑀸 𑀉𑀕𑁆𑀕𑀸𑀭 𑀳𑀺𑀓𑁆𑀓𑀸𑀭 𑀳𑀲𑀺𑀢 𑀭𑁄𑀤𑀺𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀲𑀫𑁂𑀢𑁆𑀣𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀓𑀮𑀸𑀧𑀬𑁄𑀚𑀦𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁧. 𑀭𑀽𑀧𑀧𑁆𑀧𑀯𑀢𑁆𑀢𑀺𑀓𑁆𑀓𑀫𑁂. 𑀦𑀧𑀼𑀕𑁆𑀕𑀮𑀯𑀲𑁂𑀦 𑀯𑀺𑀲𑁂𑀲𑀦𑀁 𑀳𑁄𑀢𑀺. 𑀪𑀽𑀫𑀺𑀯𑀲𑁂𑀦 𑀯𑀺𑀲𑁂𑀲𑀦𑀁 𑀳𑁄𑀢𑀺. 𑀢𑀜𑁆𑀘 𑀔𑁄 𑀧𑀯𑀢𑁆𑀢𑀺𑀓𑀸𑀮𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣𑀘𑀸𑀢𑀺𑀆𑀤𑀻𑀲𑀼. 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀬𑁄𑀦𑀻𑀲𑀼 𑀧𑀸𑀴𑀺𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀓𑁆𑀔𑀦𑁆𑀢𑀸, 𑀇𑀢𑀺 𑀢𑀲𑁆𑀫𑀸 𑀅𑀡𑁆𑀟𑀚𑀸𑀢𑀺 𑀘 𑀚𑀮𑀸𑀩𑀼𑀚𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀓𑀣𑀁 𑀅𑀬𑀁 𑀦𑀬𑁄 𑀧𑀸𑀴𑀺𑀦𑀬𑁄 𑀦𑀸𑀫 𑀳𑁄𑀢𑀻𑀢𑀺. 𑀧𑀸𑀴𑀺𑀬𑀁 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀁 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀚𑀸𑀬𑀦𑁆𑀢𑀻𑀢𑀺 𑀯𑀘𑀦𑁂𑀦 𑀅𑀡𑁆𑀟𑀢𑁄 𑀚𑀮𑀸𑀩𑀼𑀢𑁄 𑀚𑀸𑀢𑀸 𑀯𑀺𑀚𑀸𑀢𑀸 𑀦𑀺𑀓𑁆𑀔𑀦𑁆𑀢𑀸𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀡𑁆𑀟𑁂𑀚𑀸𑀢𑀸 𑀚𑀮𑀸𑀩𑀼𑀫𑁆𑀳𑀺𑀚𑀸𑀢𑀸𑀢𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀧𑀮𑀺𑀯𑁂𑀞𑀦𑀸𑀲𑀬𑁄 𑀦𑀸𑀫 𑀬𑁂𑀦 𑀧𑀮𑀺𑀯𑁂𑀞𑀺𑀢𑁄 𑀕𑀩𑁆𑀪𑁄 𑀢𑀺𑀝𑁆𑀞𑀢𑀺. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀉𑀓𑁆𑀓𑀁𑀲𑀕𑀢𑀺 𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺 𑀉𑀓𑁆𑀓𑀝𑁆𑀞𑀧𑁆𑀧𑀯𑀢𑁆𑀢𑀺𑀦𑀺𑀬𑀫𑀦𑀯𑀲𑁂𑀦. 𑀉𑀓𑁆𑀓𑀝𑁆𑀞𑀦𑀬𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀭𑀽𑀧𑀲𑁆𑀲 𑀓𑀜𑁆𑀜𑀸 𑀤𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀓𑀜𑁆𑀜𑀸 𑀤𑀸𑀢𑀩𑁆𑀩𑀸𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀅𑀪𑀺𑀭𑀽𑀧𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀜𑁆𑀜𑀸𑀧𑀺 𑀅𑀪𑀺𑀭𑀽𑀧𑀓𑀜𑁆𑀜𑀸 𑀏𑀯 𑀯𑀺𑀜𑁆𑀜𑀸𑀬𑀢𑀺. 𑀅𑀬𑀁 𑀉𑀓𑁆𑀓𑀝𑁆𑀞𑀦𑀬𑁄 𑀦𑀸𑀫. ‘‘𑀢𑀢𑁆𑀣 𑀢𑀸𑀦𑀺 𑀲𑀩𑁆𑀩𑀸𑀦𑀻’’𑀢𑀺𑀆𑀤𑀻𑀲𑀼. 𑀢𑀸𑀦𑀺𑀲𑀩𑁆𑀩𑀸𑀦𑀺𑀧𑀺 𑀘𑀓𑁆𑀔𑀼 𑀲𑁄𑀢 𑀖𑀸𑀦 𑀪𑀸𑀯 𑀤𑁆𑀯𑀬𑀸𑀦𑀺 𑀦 𑀑𑀫𑀓𑁂𑀦 𑀓𑀫𑁆𑀫𑁂𑀦 𑀮𑀩𑁆𑀪𑀢𑀺. 𑀉𑀓𑁆𑀓𑀝𑁆𑀞𑁂𑀦 𑀓𑀫𑁆𑀫𑁂𑀦 𑀏𑀯 𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀗𑁆𑀕𑀧𑀸𑀞𑁂. 𑀲𑀤𑁆𑀤𑀸𑀬𑀢𑀦𑀁 𑀦𑀸𑀫 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀦 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺. 𑀘𑀓𑁆𑀔𑀼𑀯𑁂𑀓𑀮𑁆𑀮𑀲𑁆𑀲 𑀤𑀲, 𑀲𑁄𑀢𑀯𑁂𑀓𑀮𑁆𑀮𑀲𑁆𑀲 𑀅𑀧𑀭𑀸𑀦𑀺𑀤𑀲, 𑀘𑀓𑁆𑀔𑀼 𑀲𑁄𑀢𑀯𑁂𑀓𑀮𑁆𑀮𑀲𑁆𑀲𑀦𑀯, 𑀕𑀩𑁆𑀪𑀲𑁂𑀬𑁆𑀬𑀲𑁆𑀲𑀯𑀲𑁂𑀦 𑀲𑀢𑁆𑀢𑀸𑀬𑀢𑀦𑀸𑀦𑀺. 𑀧𑀸𑀴𑀺𑀬𑀁 𑀑𑀧𑀧𑀸𑀢𑀺 𑀓𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀏𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀁𑀧𑀺𑀧𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀼𑀢𑁆𑀢𑀫𑁆𑀧𑀺 𑀘𑀓𑁆𑀔𑀸𑀤𑀺𑀯𑁂𑀓𑀮𑁆𑀮𑀁. ‘‘𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀸𑀪𑀸𑀯𑀯𑀼𑀢𑁆𑀢𑀺𑀢𑀸 𑀯𑀼𑀢𑁆𑀢𑀸’’𑀢𑀺 𑀓𑀣𑀁 𑀯𑀼𑀢𑁆𑀢𑀸 𑀬𑀲𑁆𑀲 𑀖𑀸𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀚𑀺𑀯𑁆𑀳𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺, 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀚𑀺𑀯𑁆𑀳𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀖𑀸𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺, 𑀆𑀫𑀦𑁆𑀢𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀧𑁂𑀬𑁆𑀬𑀸𑀮𑀫𑀼𑀔𑁂𑀦. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂 𑀦 𑀧𑀦 𑀇𑀘𑁆𑀙𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀚𑀺𑀯𑁆𑀳𑀸𑀯𑁂𑀓𑀮𑁆𑀮𑀢𑀸𑀯𑀺𑀬𑀸’’𑀢𑀺 𑀚𑀺𑀯𑁆𑀳𑀸𑀯𑁂𑀓𑀮𑁆𑀮𑀢𑀸𑀦𑀸𑀫 𑀦𑀢𑁆𑀣𑀺 𑀯𑀺𑀬. ‘‘𑀖𑀸𑀦𑀯𑁂𑀓𑀮𑁆𑀮𑀢𑀸𑀧𑀺 𑀅𑀢𑁆𑀣𑀻𑀢𑀺 𑀬𑀼𑀢𑁆𑀢𑀁’’𑀢𑀺 𑀏𑀢𑁆𑀣 𑀧𑀸𑀴𑀺𑀬𑀁 𑀅𑀖𑀸𑀦𑀓𑀸𑀦𑀁 𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀸𑀦𑀁𑀢𑀺 𑀇𑀤𑀁 𑀫𑀸𑀢𑀼𑀕𑀩𑁆𑀪𑁂 𑀖𑀸𑀦𑀸𑀬𑀢𑀦𑁂 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀧𑀼𑀭𑁂𑀢𑀭𑀜𑁆𑀘 𑀯𑀦𑁆𑀢𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀖𑀸𑀦𑀯𑁂𑀓𑀮𑁆𑀮𑀸𑀦𑀁 𑀅𑀢𑁆𑀣𑀺𑀢𑀸𑀬𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀕𑀩𑁆𑀪𑁂 𑀲𑁂𑀦𑁆𑀢𑀻𑀢𑀺 𑀕𑀩𑁆𑀪𑀲𑀬𑀸. 𑀕𑀩𑁆𑀪𑀲𑀬𑀸 𑀏𑀯 𑀕𑀩𑁆𑀪𑀲𑁂𑀬𑁆𑀬𑀸.

𑀧𑀯𑀢𑁆𑀢𑀺𑀓𑀸𑀮𑁂𑀢𑀺𑀆𑀤𑀻𑀲𑀼. 𑀫𑀽𑀮𑀝𑀻𑀓𑀸𑀧𑀸𑀞𑁂. ‘‘𑀑𑀭𑀢𑁄’’𑀢𑀺 𑀧𑀝𑀺𑀲𑀦𑁆𑀥𑀺𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀏𑀓𑀸𑀤𑀲𑀫𑀲𑀢𑁆𑀢𑀸𑀳𑁂 𑀅𑀦𑀸𑀕𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀽𑀧𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀦𑁄 𑀘 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀇𑀤𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀁 𑀭𑀽𑀧𑀸𑀬𑀢𑀦𑀁 𑀬𑀸𑀯𑀚𑀻𑀯𑀁𑀧𑀺 𑀉𑀧𑁆𑀧𑀦𑁆𑀦𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀫𑀸𑀦𑀦𑁆𑀢𑀺. 𑀘𑀓𑁆𑀔𑀸𑀬𑀢𑀦𑀁 𑀧𑀦 𑀏𑀓𑀸𑀤𑀲𑀫𑀲𑀢𑁆𑀢𑀸𑀳𑀸 𑀑𑀭𑀢𑁄 𑀞𑀺𑀢𑀲𑁆𑀲 𑀦 𑀉𑀧𑁆𑀧𑀦𑁆𑀦𑀁. 𑀢𑀤𑀸 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀏𑀓𑀸𑀤𑀲𑀫𑁂 𑀲𑀢𑁆𑀢𑀸𑀳𑁂 𑀲𑀫𑁆𑀧𑀢𑁆𑀢𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀧𑀘𑁆𑀙𑀺𑀫 𑀪𑀯𑀺𑀓𑀢𑁆𑀢𑀸 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀪𑀯𑀦𑁆𑀢𑀭𑁂 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺𑀬𑁂𑀯𑀸𑀢𑀺. 𑀖𑀸𑀦𑀸𑀬𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀖𑀸𑀦𑀸𑀬𑀢𑀦𑀸𑀦𑀺𑀩𑁆𑀩𑀢𑁆𑀢𑀢𑀁, 𑀓𑀫𑁆𑀫𑀁. 𑀢𑁂𑀦 𑀓𑀫𑁆𑀫𑁂𑀦 𑀕𑀳𑀺𑀢𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀁. 𑀇𑀤𑀜𑁆𑀘 𑀬𑀤𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑁂𑀦 𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑁂𑀬𑁆𑀬𑀼𑀁. 𑀖𑀸𑀦𑀸𑀬𑀢𑀦𑁂 𑀅𑀦𑀼𑀧𑁆𑀧𑀦𑁆𑀦𑁂 𑀅𑀦𑁆𑀢𑀭𑀸 𑀦 𑀓𑀸𑀮𑀗𑁆𑀓𑀭𑁂𑀬𑁆𑀬𑀼𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑁂𑀦 𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀸𑀧𑀺 𑀢𑀢𑁄 𑀩𑀮𑀯𑀦𑁆𑀢𑁂 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑁂 𑀆𑀕𑀢𑁂 𑀲𑀢𑀺. 𑀖𑀸𑀦𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀸𑀮𑀁 𑀅𑀧𑀢𑁆𑀯𑀸 𑀅𑀦𑁆𑀢𑀭𑀸 𑀦𑀓𑀸𑀮𑀗𑁆𑀓𑀭𑁄𑀦𑁆𑀢𑀻𑀢𑀺 𑀦𑀢𑁆𑀣𑀺. ‘‘𑀘𑀓𑁆𑀔𑀼𑀖𑀸𑀦𑁂𑀲𑀼 𑀯𑀼𑀢𑁆𑀢𑁂𑀲𑀽’’𑀢𑀺 𑀝𑀻𑀓𑀸𑀬𑀁 𑀯𑀼𑀢𑁆𑀢𑁂𑀲𑀼. ‘‘𑀅𑀢𑁆𑀣𑀢𑁄 𑀲𑀺𑀤𑁆𑀥𑀸 𑀏𑀯𑀸’’𑀢𑀺 𑀏𑀓𑀸𑀤𑀲𑀫𑀲𑀢𑁆𑀢𑀸𑀳𑁂 𑀉𑀧𑁆𑀧𑀦𑁆𑀦𑀸𑀢𑀺 𑀲𑀺𑀤𑁆𑀥𑀸 𑀏𑀯. ‘‘𑀈𑀤𑀺𑀲𑁂𑀲𑀼𑀞𑀸𑀦𑁂𑀲𑀽’’𑀢𑀺 𑀲𑀪𑀸𑀯𑀁 𑀯𑀺𑀘𑀸𑀭𑁂 𑀢𑀼𑀁 𑀤𑀼𑀓𑁆𑀓𑀭𑁂𑀲𑀼 𑀞𑀸𑀦𑁂𑀲𑀼. 𑀅𑀝𑁆𑀞𑀓𑀣𑀸𑀬𑁂𑀯 𑀧𑀫𑀸𑀡𑀁 𑀓𑀸𑀢𑀼𑀁 𑀬𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀓𑀣𑀸𑀧𑀸𑀞𑁂. ‘‘𑀧𑀼𑀭𑀺𑀫𑀁 𑀪𑀯𑀘𑀓𑁆𑀓𑀁’’𑀢𑀺 𑀅𑀯𑀺𑀚𑁆𑀚𑀸𑀫𑀽𑀮𑀓𑀁 𑀯𑁂𑀤𑀦𑀸𑀯𑀲𑀸𑀦𑀁 𑀪𑀯𑀘𑀓𑁆𑀓𑀁. ‘‘𑀅𑀦𑀼𑀧𑀼𑀩𑁆𑀩𑀧𑁆𑀧𑀯𑀢𑁆𑀢𑀺𑀤𑀻𑀧𑀦𑀢𑁄’’𑀢𑀺 𑀬𑀣𑀸 𑀧𑀘𑁆𑀙𑀺𑀫𑁂 𑀢𑀡𑁆𑀳𑀸𑀫𑀽𑀮𑀓𑁂 𑀪𑀯𑀘𑀓𑁆𑀓𑁂 𑀉𑀧𑀧𑀢𑁆𑀢𑀺𑀪𑀯𑀧𑁆𑀧𑀯𑀢𑁆𑀢𑀺𑀁 𑀯𑀤𑀦𑁆𑀢𑁂𑀦 𑀪𑀯𑀧𑀘𑁆𑀘𑀬𑀸𑀚𑀸𑀢𑀻𑀢𑀺 𑀏𑀯𑀁 𑀏𑀓𑀢𑁄 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀢𑀣𑀸 𑀧𑀼𑀭𑀺𑀫𑁂 𑀪𑀯𑀘𑀓𑁆𑀓𑁂. 𑀢𑀢𑁆𑀣 𑀧𑀦 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡 𑀧𑀘𑁆𑀘𑀬𑀸 𑀦𑀸𑀫 𑀭𑀽𑀧𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀧𑀼𑀩𑁆𑀩𑀧𑁆𑀧𑀯𑀢𑁆𑀢𑀺𑀤𑀻𑀧𑀦𑀢𑁄. ‘‘𑀲𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯𑀸’’𑀢𑀺 𑀆𑀬𑀢𑀦𑀸𑀦𑀁 𑀓𑀫𑀢𑁄 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀤𑁂𑀲𑀦𑀸𑀓𑁆𑀓𑀫𑁄𑀯 𑀬𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀲𑁄 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀧𑀝𑀺𑀓𑁆𑀔𑀺𑀢𑁆𑀢𑁄.

𑀲𑀁𑀬𑀼𑀢𑁆𑀢𑀓𑁂 𑀬𑀓𑁆𑀔𑀲𑀁𑀬𑀼𑀢𑁆𑀢𑀧𑀸𑀴𑀺𑀬𑀁. 𑀕𑀸𑀣𑀸𑀲𑀼. ‘‘𑀓𑀮𑀮𑀸’’𑀢𑀺 𑀓𑀮𑀮𑀢𑁄. ‘‘𑀅𑀩𑁆𑀩𑀼𑀤𑀸’’𑀢𑀺 𑀅𑀩𑁆𑀩𑀼𑀤𑀢𑁄. ‘‘𑀧𑁂𑀲𑀺𑀬𑀸’’𑀢𑀺 𑀧𑁂𑀲𑀺𑀢𑁄. ‘‘𑀖𑀦𑀸’’𑀢𑀺 𑀖𑀦𑀢𑁄. ‘‘𑀚𑀸𑀢𑀺𑀉𑀡𑁆𑀡𑀁𑀲𑀽𑀳𑀻’’𑀢𑀺 𑀲𑀼𑀤𑁆𑀥𑀚𑀸𑀢𑀺𑀓𑀲𑁆𑀲 𑀏𑀮𑀓𑀲𑁆𑀲 𑀮𑁄𑀫𑀁𑀲𑀽𑀳𑀺. ‘‘𑀧𑀭𑀺𑀧𑀓𑁆𑀓𑀲𑀫𑀽𑀳𑀓𑀁’’𑀢𑀺 𑀓𑀮𑀮𑀢𑁄 𑀧𑀭𑀁 𑀣𑁄𑀓𑀁 𑀧𑀭𑀺𑀧𑀓𑁆𑀓𑀜𑁆𑀘 𑀲𑀫𑀽𑀳𑀸𑀓𑀸𑀭𑀜𑁆𑀘 𑀳𑀼𑀢𑁆𑀯𑀸. ‘‘𑀯𑀺𑀯𑀢𑁆𑀢𑀫𑀸𑀦𑀁 𑀢𑀩𑁆𑀪𑀸𑀯𑀁’’𑀢𑀺 𑀓𑀮𑀮𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑀁. ‘‘𑀯𑀺𑀮𑀻𑀦𑀢𑀺 𑀧𑀼𑀲𑀤𑀺𑀲𑀸’’𑀢𑀺 𑀅𑀕𑁆𑀕𑀺𑀫𑁆𑀳𑀺 𑀯𑀺𑀮𑀻𑀦𑀢𑀺𑀧𑀼𑀭𑀲𑀲𑀤𑀺𑀲𑀸. ‘‘𑀫𑀼𑀘𑁆𑀘𑀢𑀻’’𑀢𑀺 𑀓𑀧𑀸𑀮𑁂 𑀦𑀮𑀕𑁆𑀕𑀢𑀺. 𑀏𑀢𑀸𑀦𑀺𑀚𑀸𑀬𑀦𑁆𑀢𑀻𑀢𑀺 𑀏𑀯𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀁. ‘‘𑀤𑁆𑀯𑀸 𑀘𑀢𑁆𑀢𑀸𑀮𑀻𑀲𑀫𑁂 𑀲𑀢𑁆𑀢𑀸𑀳𑁂’’𑀢𑀺 𑀦𑀯𑀫𑀸𑀲𑁂 𑀅𑀢𑀺𑀓𑁆𑀓𑀫𑁆𑀫 𑀯𑀻𑀲𑀢𑀺𑀫𑁂𑀤𑀺𑀯𑀲𑁂. 𑀬𑀤𑀺 𑀏𑀯𑀁, 𑀧𑀜𑁆𑀘𑀫𑁂𑀲𑀢𑁆𑀢𑀸𑀳𑁂 𑀧𑀜𑁆𑀘𑀧𑁆𑀧𑀲𑀸𑀔𑀸 𑀚𑀸𑀬𑀦𑁆𑀢𑀺, 𑀏𑀓𑀸𑀤𑀲𑀫𑁂𑀲𑀢𑁆𑀢𑀸𑀳𑁂 𑀘𑀢𑁆𑀢𑀸𑀭𑀺 𑀆𑀬𑀢𑀦𑀸𑀦𑀺 𑀚𑀸𑀬𑀦𑁆𑀢𑀺, 𑀫𑀚𑁆𑀛𑁂𑀧𑀦 𑀧𑀜𑁆𑀘𑀲𑀢𑁆𑀢𑀸𑀳𑀸 𑀅𑀢𑁆𑀣𑀺. 𑀢𑀢𑁆𑀣 𑀓𑀣𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀁. ‘‘𑀙𑀲𑀢𑁆𑀢𑀸𑀳𑀸’’𑀢𑀺 𑀏𑀓𑀸𑀤𑀲𑀫𑁂𑀦 𑀲𑀤𑁆𑀥𑀺𑀁 𑀙𑀲𑀢𑁆𑀢𑀸𑀳𑀸. 𑀏𑀓𑀸𑀤𑀲𑀫𑁂𑀧𑀺 𑀳𑀺 𑀧𑀘𑁆𑀙𑀺𑀫𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀙𑀤𑀺𑀯𑀲𑀸𑀦𑀺 𑀅𑀯𑀲𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺. ‘‘𑀧𑀭𑀺𑀡𑀢𑀓𑀸𑀮𑀸’’𑀢𑀺 𑀧𑀭𑀺𑀧𑀓𑁆𑀓𑀓𑀸𑀮𑀸. 𑀧𑀭𑀺𑀧𑀸𑀓𑀕𑀢𑀸 𑀏𑀯 𑀳𑀺 𑀓𑀫𑁆𑀫𑀚𑀫𑀳𑀸𑀪𑀽𑀢𑀸 𑀲𑀼𑀧𑁆𑀧𑀲𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀘 𑀧𑀲𑀸𑀤𑀕𑀼𑀡𑀸 𑀧𑀲𑀸𑀤𑀭𑀽𑀧𑀸 𑀳𑁄𑀦𑁆𑀢𑀻𑀢𑀺. ‘‘𑀢𑀲𑁆𑀲𑀸’’𑀢𑀺 𑀓𑀮𑀮𑀲𑁆𑀲. 𑀯𑀡𑁆𑀡𑀚𑀸𑀢𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀆𑀓𑀸𑀲𑀓𑁄𑀝𑁆𑀞𑀸𑀲𑀺𑀓𑁄’’𑀢𑀺 𑀫𑀦𑀼𑀲𑁆𑀲𑁂𑀳𑀺 𑀆𑀓𑀸𑀲𑀓𑁄𑀝𑁆𑀞𑀸𑀲𑁂 𑀞𑀧𑀺𑀢𑁄. 𑀳𑀼𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. 𑀓𑀣𑀁 𑀧𑀭𑀫𑀸𑀡𑀼𑀢𑁄 𑀧𑀭𑀺𑀢𑁆𑀢𑀓𑀁 𑀲𑀺𑀬𑀸𑀢𑀺 𑀆𑀳 ‘‘𑀲𑁄𑀳𑀻’’𑀢𑀺𑀆𑀤𑀺𑀁. ‘‘𑀲𑁄’’𑀢𑀺 𑀧𑀭𑀫𑀸𑀡𑀼. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀮𑀮𑀭𑀽𑀧𑀁 𑀓𑀮𑀸𑀧𑀢𑁆𑀢𑀬𑀧𑀭𑀺𑀫𑀸𑀡𑀁. 𑀧𑀭𑀫𑀸𑀡𑀼 𑀧𑀦 𑀏𑀓𑀽𑀦𑀧𑀜𑁆𑀜𑀸𑀲𑀓𑀮𑀸𑀧𑀧𑀭𑀺𑀫𑀸𑀡𑁄. 𑀢𑀲𑁆𑀫𑀸 𑀢𑀁 𑀢𑀢𑁄 𑀧𑀭𑀺𑀢𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀢𑁄 𑀧𑀭𑀁 𑀧𑀦 𑀢𑀁𑀧𑀺 𑀔𑀡𑁂𑀔𑀡𑁂 𑀉𑀧𑀘𑀺𑀢𑀫𑁂𑀯 𑀳𑁄𑀢𑀺. ‘‘𑀥𑀸𑀢𑀽𑀦𑀁’’𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀆𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁. 𑀓𑀮𑀮𑀲𑁆𑀲𑀯𑀸 𑀉𑀧𑀘𑀺𑀢𑀧𑁆𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀯𑀢𑁆𑀣𑀼𑀲𑁆𑀫𑀺𑀁’’𑀢𑀺 𑀅𑀩𑁆𑀩𑀼𑀤𑀸𑀤𑀺𑀯𑀢𑁆𑀣𑀼𑀫𑁆𑀳𑀺. ‘‘𑀚𑀮𑀸𑀩𑀼𑀫𑀽𑀮𑀸𑀦𑀼𑀲𑀸𑀭𑁂𑀦𑀸’’𑀢𑀺 𑀚𑀮𑀸𑀩𑀼𑀚𑀸𑀢𑀓𑀸𑀮𑁂 𑀢𑀲𑁆𑀲 𑀫𑀽𑀮𑀸𑀦𑀼 𑀲𑀸𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀸𑀣𑀸𑀬𑀁. ‘‘𑀫𑀸𑀢𑀼𑀢𑀺𑀭𑁄 𑀓𑀼𑀘𑁆𑀙𑀺𑀕𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀢𑀺𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀸𑀢𑀼𑀬𑀸 𑀢𑀺𑀭𑁄𑀓𑀼𑀘𑁆𑀙𑀺 𑀕𑀢𑁄’’𑀢𑀺. ‘‘𑀙𑀺𑀤𑁆𑀤𑁄’’𑀢𑀺 𑀲𑀼𑀔𑀼𑀫𑁂𑀳𑀺 𑀙𑀺𑀤𑁆𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀮𑀤𑁆𑀥𑀁𑀯𑀸 𑀧𑀸𑀦𑀪𑁄𑀚𑀦𑀁. ‘‘𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀲𑀢𑁆𑀢𑀭𑀲𑀫𑀪𑀯𑀗𑁆𑀕𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬. ‘‘𑀭𑀽𑀧𑀲𑀫𑀼𑀝𑁆𑀞𑀸𑀦𑁂 𑀯𑀼𑀢𑁆𑀢𑀫𑁂𑀯𑀸’’𑀢𑀺 𑀭𑀽𑀧𑀲𑀫𑀼𑀝𑁆𑀞𑀸𑀦𑁂 𑀫𑀽𑀮𑀝𑀻𑀓𑀸𑀯𑀸𑀤 𑀯𑀺𑀘𑀸𑀭𑀡𑀸𑀬𑀁 ‘𑀬𑀁 𑀧𑀺𑀢𑀢𑁆𑀣 𑀦 𑀘 𑀬𑀼𑀢𑁆𑀢’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯. ‘‘𑀅𑀚𑁆𑀛𑁄𑀳𑀝𑀸𑀳𑀸𑀭𑀸𑀪𑀸𑀯𑀢𑁄’’𑀢𑀺 𑀩𑀳𑀺𑀤𑁆𑀥𑀸𑀳𑀸𑀭𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀢𑁆𑀣𑀸’’𑀢𑀺 𑀭𑀽𑀧𑀩𑁆𑀭𑀳𑁆𑀫𑀮𑁄𑀓𑁂. 𑀅𑀪𑀸𑀯𑀁 𑀯𑀡𑁆𑀡𑁂𑀢𑀺. 𑀓𑀲𑁆𑀫𑀸𑀧𑀦 𑀯𑀡𑁆𑀡𑁂𑀢𑀺, 𑀦𑀦𑀼 𑀯𑀡𑁆𑀡𑁂𑀦𑁆𑀢𑀲𑁆𑀲 𑀅𑀝𑁆𑀞𑀓𑀣𑀸 𑀯𑀺𑀭𑁄𑀥𑁄 𑀲𑀺𑀬𑀸𑀢𑀺. 𑀯𑀺𑀭𑁄𑀥𑁄 𑀯𑀸 𑀳𑁄𑀢𑀼, 𑀅𑀯𑀺𑀭𑁄𑀥𑁄 𑀯𑀸. 𑀧𑀸𑀴𑀺𑀬𑁂𑀯 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀥𑀸𑀢𑀼𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 𑀧𑀸𑀴𑀺𑀁 𑀆𑀳𑀭𑀺. 𑀢𑀢𑁆𑀣 ‘‘𑀭𑀽𑀧𑀥𑀸𑀢𑀼𑀬𑀸’’𑀢𑀺 𑀭𑀽𑀧𑀮𑁄𑀓𑀥𑀸𑀢𑀼𑀬𑀸. 𑀭𑀽𑀧 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀉𑀧𑀧𑀢𑁆𑀢𑀺𑀓𑁆𑀔𑀡𑁂’’𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀆𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀏𑀢𑁆𑀣𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀨𑁄𑀝𑁆𑀞𑀩𑁆𑀩𑁂 𑀧𑀝𑀺𑀓𑁆𑀔𑀺𑀢𑁆𑀢𑁂𑀧𑀻’’𑀢𑀺 𑀧𑀜𑁆𑀘𑀸𑀬𑀢𑀦𑀸𑀦𑀻𑀢𑀺 𑀯𑀸 𑀧𑀜𑁆𑀘𑀥𑀸𑀢𑀼𑀬𑁄𑀢𑀺 𑀯𑀸 𑀧𑀭𑀺𑀘𑁆𑀙𑁂𑀤𑀓𑀭𑀡𑀫𑁂𑀯 𑀧𑀝𑀺𑀓𑁆𑀔𑀺 𑀧𑀦𑀁 𑀤𑀝𑁆𑀞𑀩𑁆𑀩𑀁. ‘‘𑀓𑀺𑀘𑁆𑀘𑀦𑁆𑀢𑀭 𑀲𑀩𑁆𑀪𑀸𑀯𑀸’’𑀢𑀺 𑀨𑁄𑀝𑁆𑀞𑀩𑁆𑀩𑀓𑀺𑀘𑁆𑀘𑀢𑁄 𑀓𑀺𑀘𑁆𑀘𑀦𑁆𑀢𑀭𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀓𑀺𑀫𑁆𑀧𑀦 𑀓𑀺𑀘𑁆𑀘𑀦𑁆𑀢𑀭𑀦𑁆𑀢𑀺. 𑀭𑀽𑀧𑀓𑀸𑀬𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀁. 𑀫𑀳𑀸𑀪𑀽𑀢𑀸 𑀳𑁂𑀢𑀽 𑀫𑀳𑀸𑀪𑀽𑀢𑀸 𑀧𑀘𑁆𑀘𑀬𑀸 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀳𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁂𑀢𑀼𑀓𑀺𑀘𑁆𑀘𑀁 𑀦𑀸𑀫 𑀭𑀽𑀧𑀚𑀦𑀦𑀓𑀺𑀘𑁆𑀘𑀁. 𑀧𑀘𑁆𑀘𑀬 𑀓𑀺𑀘𑁆𑀘𑀁 𑀦𑀸𑀫 𑀭𑀽𑀧𑀽𑀧𑀢𑁆𑀣𑀫𑁆𑀪𑀦 𑀓𑀺𑀘𑁆𑀘𑀁. 𑀓𑀺𑀘𑁆𑀘𑀦𑁆𑀢𑀭𑀫𑁂𑀯𑀦𑀢𑁆𑀣𑀻𑀢𑀺 𑀖𑀸𑀦𑀸𑀤𑀻𑀦𑀁 𑀯𑀺𑀲𑀬 𑀕𑁄𑀘𑀭𑀪𑀸𑀯𑀓𑀺𑀘𑁆𑀘𑀁 𑀢𑁂𑀲𑀁 𑀓𑀺𑀘𑁆𑀘𑀁 𑀦𑀸𑀫, 𑀢𑀢𑁄 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. ‘‘𑀬𑁂𑀦𑀸’’𑀢𑀺 𑀓𑀺𑀘𑁆𑀘𑀦𑁆𑀢𑀭𑁂𑀦. ‘‘𑀢𑁂’’𑀢𑀺 𑀕𑀦𑁆𑀥𑀸𑀤𑀬𑁄. 𑀇𑀤𑀸𑀦𑀺 𑀅𑀝𑁆𑀞𑀓 𑀢𑀸𑀦𑀼𑀕𑀢𑀁 𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀬𑁂𑀦 𑀓𑀺𑀘𑁆𑀘𑀯𑀺𑀲𑁂𑀲𑁂𑀦𑀸’’𑀢𑀺 𑀯𑀺𑀲𑀬𑀕𑁄𑀘𑀭𑀪𑀸𑀯𑀓𑀺𑀘𑁆𑀘𑀯𑀺𑀲𑁂𑀲𑁂𑀦. 𑀭𑀽𑀧𑀚𑀦𑀦𑀭𑀽𑀧𑀽𑀧𑀢𑁆𑀣𑀫𑁆𑀪𑀦 𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀘. ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀲𑀩𑁆𑀩𑀲𑁆𑀫𑀺𑀁 𑀧𑀸𑀴𑀺𑀧𑁆𑀧𑀤𑁂𑀲𑁂. ‘‘𑀢𑁂𑀲𑀁’’𑀢𑀺 𑀕𑀦𑁆𑀥𑀸𑀤𑀻𑀦𑀁. ‘‘𑀢𑀢𑁆𑀣𑀸’’𑀢𑀺 𑀭𑀽𑀧𑀮𑁄𑀓𑁂. ‘‘𑀦𑀺𑀲𑁆𑀲𑀦𑁆𑀤 𑀥𑀫𑁆𑀫𑀫𑀢𑁆𑀢𑀪𑀸𑀯𑁂𑀦𑀸’’𑀢𑀺 𑀏𑀢𑁆𑀣 𑀬𑀣𑀸 𑀅𑀕𑁆𑀕𑀺𑀫𑁆𑀳𑀺 𑀚𑀸𑀢𑁂 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀸 𑀦𑀸𑀫 𑀇𑀘𑁆𑀙𑀦𑁆𑀢𑀲𑁆𑀲𑀧𑀺 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀧𑀺 𑀚𑀸𑀬𑀦𑁆𑀢𑀺𑀬𑁂𑀯. 𑀯𑀡𑁆𑀡𑁄𑀧𑀺 𑀚𑀸𑀬𑀢𑀺, 𑀑𑀪𑀸𑀲𑁄𑀧𑀺, 𑀕𑀦𑁆𑀥𑁄𑀧𑀺, 𑀭𑀲𑁄𑀧𑀺, 𑀥𑀽𑀫𑁄𑀧𑀺, 𑀧𑀼𑀧𑁆𑀨𑀼𑀮𑁆𑀮𑀸𑀦𑀺𑀧𑀺 𑀓𑀤𑀸𑀘𑀺 𑀚𑀸𑀬𑀦𑁆𑀢𑀺𑀬𑁂𑀯. 𑀢𑁂𑀳𑀺 𑀯𑀡𑁆𑀡𑀸𑀤𑀻𑀳𑀺 𑀓𑀭𑀡𑀻𑀬𑁂 𑀓𑀺𑀘𑁆𑀘𑀯𑀺𑀲𑁂𑀲𑁂 𑀲𑀢𑀺𑀧𑀺 𑀅𑀲𑀢𑀺𑀧𑀺. 𑀢𑀣𑀸 𑀫𑀳𑀸𑀪𑀽𑀢𑁂𑀲𑀼 𑀚𑀸𑀢𑁂𑀲𑀼 𑀢𑁂𑀲𑀁 𑀦𑀺𑀲𑁆𑀲𑀦𑁆𑀤𑀸 𑀦𑀸𑀫 𑀇𑀘𑁆𑀙𑀦𑁆𑀢𑀲𑁆𑀲𑀧𑀺 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀧𑀺 𑀓𑀺𑀘𑁆𑀘𑀯𑀺𑀲𑁂𑀲𑁂 𑀲𑀢𑀺𑀧𑀺 𑀅𑀲𑀢𑀺𑀧𑀺 𑀚𑀸𑀬𑀦𑁆𑀢𑀺𑀬𑁂𑀯. 𑀏𑀯𑀁 𑀦𑀺𑀲𑁆𑀲𑀦𑁆𑀤𑀥𑀫𑁆𑀫𑀫𑀢𑁆𑀢𑀪𑀸𑀯𑁂𑀦. 𑀅𑀦𑀼𑀧𑁆𑀧𑀯𑁂𑀲𑁄 𑀬𑀼𑀢𑁆𑀢𑁄 𑀲𑀺𑀬𑀸 𑀅𑀚𑁆𑀛𑀢𑁆𑀢 𑀲𑀦𑁆𑀢𑀸𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀳𑀺𑀤𑁆𑀥𑀸 𑀲𑀦𑁆𑀢𑀸𑀦𑁂 𑀧𑀦 𑀯𑀢𑁆𑀣𑀸 𑀪𑀭𑀡 𑀯𑀺𑀫𑀸𑀦𑀸𑀤𑀻𑀲𑀼 𑀢𑁂𑀲𑀁 𑀪𑀸𑀯𑁄 𑀇𑀘𑁆𑀙𑀺 𑀢𑀩𑁆𑀩𑁄 𑀲𑀺𑀬𑀸. 𑀅𑀚𑁆𑀛𑀢𑁆𑀢𑁂𑀧𑀺 𑀯𑀸 𑀓𑀸𑀬𑀁 𑀑𑀴𑀸𑀭𑀺𑀓𑀁 𑀓𑀢𑁆𑀯𑀸 𑀫𑀸𑀧𑀺𑀢𑀓𑀸𑀮𑁂𑀢𑀺. 𑀏𑀢𑁆𑀣 𑀘 ‘‘𑀥𑀫𑁆𑀫𑀸𑀬𑀢𑀦 𑀥𑀫𑁆𑀫𑀥𑀸𑀢𑀽𑀲𑀼 𑀅𑀦𑀼𑀧𑁆𑀧𑀯𑁂𑀲𑁄’’𑀢𑀺 𑀏𑀢𑁆𑀣 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀢𑀸𑀯. 𑀬𑁂 𑀧𑀦 𑀅𑀦𑀸𑀧𑀸𑀢𑀸𑀕𑀢𑀸 𑀭𑀽𑀧𑀸𑀤𑀬𑁄𑀧𑀺 𑀥𑀫𑁆𑀫𑀸𑀭𑀫𑁆𑀫𑀡𑀫𑀺𑀘𑁆𑀘𑁂𑀯 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀢𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀅𑀦𑀸𑀧𑀸𑀢𑀸𑀕𑀫𑀦𑀁 𑀦𑀸𑀫 𑀯𑀺𑀲𑀬𑀕𑁄𑀘𑀭 𑀓𑀺𑀘𑁆𑀘𑀭𑀳𑀺𑀢𑀢𑀸 𑀯𑀼𑀘𑁆𑀘𑀢𑀺. 𑀢𑀜𑁆𑀘 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀤𑁂𑀯𑀸𑀦𑀫𑁆𑀧𑀺 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀧𑀲𑀸𑀤𑀭𑀽𑀧𑁂𑀲𑀼 𑀅𑀦𑀸𑀧𑀸𑀢𑀸 𑀕𑀫𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀧𑀦 𑀅𑀢𑁆𑀣𑀺𑀦𑀢𑁆𑀣𑀻𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀅𑀧𑀺 𑀘 𑀦𑀺𑀲𑁆𑀲𑀦𑁆𑀤𑀥𑀫𑁆𑀫𑀸 𑀦𑀸𑀫 𑀑𑀴𑀸𑀭𑀺𑀓𑀸𑀦𑀁 𑀫𑀳𑀸𑀪𑀽𑀢𑀸𑀦𑀁 𑀯𑀺𑀯𑀺𑀥𑀸𑀓𑀸𑀭𑀸𑀧𑀺 𑀪𑀯𑁂𑀬𑁆𑀬𑀼𑀁. 𑀩𑁆𑀭𑀳𑁆𑀫𑀸𑀦𑀁 𑀧𑀦 𑀅𑀚𑁆𑀛𑀢𑁆𑀢 𑀭𑀽𑀧𑀁 𑀅𑀧𑁆𑀧𑀦𑀸 𑀧𑀢𑁆𑀢𑀓𑀫𑁆𑀫𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀁 𑀅𑀢𑀺𑀲𑀼𑀔𑀼𑀫𑀁 𑀳𑁄𑀢𑀺. 𑀢𑀲𑁆𑀫𑀸 𑀓𑀸𑀫𑀲𑀢𑁆𑀢 𑀲𑀦𑁆𑀢𑀸𑀦𑁂 𑀯𑀺𑀬 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀁 𑀦𑀺𑀲𑁆𑀲𑀦𑁆𑀤𑀭𑀽𑀧𑀁 𑀦𑀸𑀫 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀯. 𑀥𑀫𑁆𑀫𑀸 𑀭𑀫𑁆𑀫𑀡𑀜𑁆𑀘 𑀫𑀼𑀔𑁆𑀬𑀥𑀫𑁆𑀫𑀸𑀭𑀫𑁆𑀫𑀡𑀁 𑀅𑀦𑀼𑀮𑁄𑀫 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀦𑀢𑁆𑀣𑀺 𑀬𑁂𑀯𑀸𑀢𑀺. ‘‘𑀚𑀻𑀯𑀺𑀢 𑀙𑀓𑁆𑀓𑀜𑁆𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀭𑀽𑀧𑀮𑁄𑀓𑁂. ‘‘𑀢𑀢𑁆𑀣𑀸’’𑀢𑀺 𑀅𑀲𑀜𑁆𑀜𑀲𑀢𑁆𑀢𑁂. 𑀓𑀸𑀫𑀮𑁄𑀓𑁂 𑀚𑀻𑀯𑀺𑀢𑀦𑀯𑀓𑀁 𑀓𑀲𑁆𑀫𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀁. 𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀫𑁂𑀯. ‘‘𑀆𑀳𑀸𑀭𑀽𑀧𑀢𑁆𑀣𑀫𑁆𑀪𑀓𑀲𑁆𑀲𑀸’’𑀢𑀺 𑀆𑀳𑀸𑀭𑀲𑀗𑁆𑀔𑀸𑀢𑀲𑁆𑀲 𑀭𑀽𑀧𑀽𑀧𑀢𑁆𑀣𑀫𑁆𑀪𑀓𑀲𑁆𑀲. ‘‘𑀲𑀓𑀮𑀲𑀭𑀻𑀭 𑀩𑁆𑀬𑀸𑀧𑀺𑀦𑁄 𑀅𑀦𑀼𑀧𑀸𑀮𑀓𑀚𑀻𑀯𑀺𑀢𑀲𑁆𑀲𑀸’’𑀢𑀺 𑀓𑀸𑀬𑀤𑀲𑀓𑀪𑀸𑀯𑀤𑀲𑀓𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀚𑀻𑀯𑀺𑀢𑀲𑁆𑀲. ‘‘𑀏𑀢 𑀤𑁂𑀯𑀸’’𑀢𑀺 𑀚𑀻𑀯𑀺𑀢𑀦𑀯𑀓𑀫𑁂𑀯. ‘‘𑀢𑀢𑁆𑀣𑀸’’𑀢𑀺 𑀭𑀽𑀧𑀮𑁄𑀓𑁂. 𑀉𑀤𑀬𑀪𑀽𑀢𑀲𑁆𑀲𑀸’’𑀢𑀺 𑀯𑀟𑁆𑀠𑀺𑀪𑀽𑀢𑀲𑁆𑀲. ‘‘𑀤𑁆𑀯𑀻𑀲𑀼 𑀅𑀕𑁆𑀕𑀻𑀲𑀽’’𑀢𑀺 𑀧𑀸𑀘𑀓𑀕𑁆𑀕𑀺𑀲𑁆𑀫𑀺𑀜𑁆𑀘 𑀓𑀸𑀬𑀕𑁆𑀕𑀺𑀲𑁆𑀫𑀺𑀜𑁆𑀘. 𑀆𑀢𑀗𑁆𑀓𑁄 𑀯𑀼𑀘𑁆𑀘𑀢𑀺 𑀭𑁄𑀕𑁄. 𑀩𑀳𑀼𑀓𑁄 𑀆𑀢𑀗𑁆𑀓𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀯𑀺𑀲𑀫𑀯𑁂𑀧𑀸𑀓𑀺𑀦𑀺𑀬𑀸’’𑀢𑀺 𑀯𑀺𑀲𑀫𑀁 𑀧𑀸𑀘𑁂𑀦𑁆𑀢𑀺𑀬𑀸. ‘‘𑀕𑀳𑀡𑀺𑀬𑀸’’𑀢𑀺 𑀉𑀤𑀭𑀕𑁆𑀕𑀺𑀦𑀸. ‘‘𑀧𑀥𑀸𑀦𑀓𑁆𑀔𑀫𑀸𑀬𑀸’’𑀢𑀺 𑀧𑀥𑀸𑀦 𑀲𑀗𑁆𑀔𑀸𑀢𑀁 𑀪𑀸𑀯𑀦𑀸𑀭𑀩𑁆𑀪𑀓𑀺𑀘𑁆𑀘𑀁 𑀔𑀫𑀦𑁆𑀢𑀺𑀬𑀸. ‘‘𑀏𑀢𑀁’’𑀢𑀺 𑀚𑀻𑀯𑀺𑀢𑀦𑀯𑀓𑀁. ‘‘𑀣𑁂𑀭𑁂𑀦 𑀘𑀸’’𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦 𑀘. ‘‘𑀏𑀢𑀁’’𑀢𑀺 𑀚𑀻𑀯𑀺𑀢 𑀦𑀯𑀓𑀁. ‘‘𑀦𑀺𑀭𑁄𑀥𑀓𑁆𑀓𑀫𑁄’’𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀦𑀺𑀭𑁄𑀥𑀓𑁆𑀓𑀫𑁄. ‘‘𑀏𑀢𑁆𑀣𑀸’’𑀢𑀺 𑀭𑀽𑀧𑀮𑁄𑀓𑁂. 𑀓𑀴𑁂𑀯𑀭𑀁 𑀯𑀼𑀘𑁆𑀘𑀢𑀺 𑀫𑀢𑀲𑀭𑀻𑀭𑀁. 𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀓𑀴𑁂𑀯𑀭𑀦𑀺𑀓𑁆𑀔𑁂𑀧𑁄. 𑀅𑀜𑁆𑀜𑁂𑀲𑀜𑁆𑀘 𑀑𑀧𑀧𑀸𑀢𑀺𑀓𑀸𑀦𑀁 𑀓𑀴𑁂𑀯𑀭𑀦𑀺𑀓𑁆𑀔𑁂𑀧𑁄 𑀦𑀸𑀫 𑀦𑀢𑁆𑀣𑀺. 𑀓𑀲𑁆𑀫𑀸 𑀧𑀦 𑀢𑁂𑀲𑀁 𑀓𑀴𑁂𑀯𑀭𑀦𑀺𑀓𑁆𑀔𑁂𑀧𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂. 𑀲𑀩𑁆𑀩𑁂𑀲𑀁𑀧𑀺 𑀭𑀽𑀧𑀩𑁆𑀭𑀳𑁆𑀫𑀸𑀦𑀁. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀅𑀪𑀸𑀯𑀢𑁄 𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀅𑀲𑀜𑁆𑀜𑀲𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀅𑀪𑀸𑀯𑀢𑁄 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀯𑀼𑀢𑁆𑀢𑀁. ‘‘𑀢𑀸𑀦𑀻’’𑀢𑀺 𑀫𑀭𑀡𑀸𑀲𑀦𑁆𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑀁 𑀧𑀭𑀺𑀫𑀸𑀡𑀁 𑀅𑀲𑁆𑀲𑀸𑀢𑀺 𑀢𑀸𑀯𑀢𑁆𑀢𑀓𑀁. ‘‘𑀮𑀳𑀼𑀓𑀕𑀭𑀼𑀓𑀢𑀸𑀤𑀺𑀯𑀺𑀓𑀸𑀭𑁄’’𑀢𑀺 𑀲𑀓𑀮𑀭𑀽𑀧𑀓𑀸𑀬𑀲𑁆𑀲 𑀮𑀳𑀼𑀓𑀕𑀭𑀼𑀓𑀸𑀤𑀺𑀯𑀺𑀓𑀸𑀭𑁄. 𑀅𑀧𑀺 𑀘 𑀢𑀢𑁆𑀣 𑀤𑀦𑁆𑀥𑀢𑁆𑀢𑀸𑀤𑀺𑀓𑀭 𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀸𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑀢𑁄 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀲𑀓𑀮𑀲𑀭𑀻𑀭𑀲𑁆𑀲 𑀮𑀳𑀼𑀢𑀸𑀤𑀺𑀕𑀼𑀡𑁄 𑀯𑀢𑁆𑀢𑀢𑀺𑀬𑁂𑀯. 𑀓𑀺𑀁 𑀢𑀢𑁆𑀣 𑀧𑀝𑀺𑀧𑀓𑁆𑀔 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀘𑀺𑀦𑁆𑀢𑀸𑀬. 𑀢𑀣𑀸 𑀅𑀲𑀜𑁆𑀜𑀲𑀢𑁆𑀢𑁂𑀧𑀺 𑀭𑀼𑀧𑁆𑀧𑀦𑀯𑀺𑀓𑀸𑀭 𑀘𑀺𑀦𑁆𑀢𑀸𑀬𑀸𑀢𑀺.

𑀭𑀽𑀧𑀧𑁆𑀧𑀯𑀢𑁆𑀢𑀺𑀓𑁆𑀓𑀫𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁧. 𑀦𑀺𑀩𑁆𑀩𑀸𑀦𑀲𑀗𑁆𑀕𑀳𑁂. 𑀤𑁆𑀯𑀻𑀲𑀼 𑀦𑀺𑀩𑁆𑀩𑀸𑀦𑀧𑀤𑁂𑀲𑀼 𑀧𑀣𑀫𑀧𑀤𑀁 𑀅𑀯𑀺𑀜𑁆𑀜𑀸𑀢𑀢𑁆𑀣𑀁 𑀲𑀸𑀫𑀜𑁆𑀜 𑀧𑀤𑀁. 𑀤𑀼𑀢𑀻𑀬𑀁 𑀯𑀺𑀜𑁆𑀜𑀸 𑀢𑀢𑁆𑀣𑀁 𑀯𑀺𑀲𑁂𑀲𑀧𑀤𑀁. 𑀓𑀺𑀮𑁂𑀲𑁂 𑀲𑀫𑁂𑀢𑀻𑀢𑀺 𑀲𑀫𑀡𑁄. 𑀅𑀭𑀺𑀬𑀧𑀼𑀕𑁆𑀕𑀮𑁄. 𑀲𑀫𑀡𑀲𑁆𑀲 𑀪𑀸𑀯𑁄 𑀲𑀸𑀫𑀜𑁆𑀜𑀁. 𑀅𑀭𑀺𑀬𑀫𑀕𑁆𑀕𑁄. 𑀲𑀸𑀫𑀜𑁆𑀜𑀲𑁆𑀲 𑀨𑀮𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀮𑁄𑀓𑀢𑁄 𑀉𑀢𑁆𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀮𑁄𑀓𑁂 𑀦 𑀧𑀜𑁆𑀜𑀸𑀯𑀻𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀦𑀳𑀻’’𑀢𑀺𑀆𑀤𑀺𑀫𑀸𑀳. 𑀘𑀢𑁆𑀢𑀸𑀭𑀺𑀫𑀕𑁆𑀕𑀜𑁆𑀜𑀸𑀡𑀸𑀦𑀺 𑀘𑀢𑀼𑀫𑀕𑁆𑀕𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀲𑀫𑀸𑀲𑀯𑀲𑁂𑀦 𑀏𑀓𑀯𑀘𑀦𑀦𑁆𑀢𑀁 𑀧𑀤𑀁 𑀯𑀸𑀓𑁆𑀬𑀁 𑀧𑀢𑁆𑀯𑀸 𑀩𑀳𑀼𑀯𑀘𑀦𑀦𑁆𑀢𑀁 𑀳𑁄𑀢𑀻𑀢𑀺𑀆𑀳 ‘‘𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑀜𑁆𑀜𑀸𑀡𑁂𑀳𑀻’’𑀢𑀺. ‘‘𑀢𑀸𑀤𑀺𑀲𑀫𑁆𑀳𑀸’’𑀢𑀺 𑀅𑀭𑀺𑀬𑀫𑀕𑁆𑀕𑀲𑀤𑀺𑀲𑀫𑁆𑀳𑀸. ‘‘𑀯𑀺𑀫𑀼𑀔𑀸𑀦𑀁’’𑀢𑀺 𑀧𑀭𑀫𑁆𑀫𑀼𑀔𑀸𑀦𑀁. ‘‘𑀚𑀘𑁆𑀘𑀦𑁆𑀥𑀸𑀦𑀁 𑀯𑀺𑀬𑀸’’𑀢𑀺 𑀚𑀘𑁆𑀘𑀦𑁆𑀥𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀅𑀯𑀺𑀲𑀬𑀪𑀸𑀯𑁄 𑀯𑀺𑀬. ‘‘𑀢𑀲𑁆𑀲𑀸’’𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀢𑀢𑁆𑀣 ‘‘𑀚𑀘𑁆𑀘𑀦𑁆𑀥𑀸𑀦𑀁’’𑀢𑀺 𑀅𑀯𑀺𑀲𑀬𑀧𑀤𑁂 𑀲𑀸𑀫𑀺𑀧𑀤𑀁. ‘‘𑀢𑀲𑁆𑀲𑀸’’𑀢𑀺 𑀪𑀸𑀯𑀧𑀤𑀁. ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺𑀬𑀁 𑀅𑀢𑁆𑀣𑀚𑀸𑀢𑀁. 𑀅𑀲𑁆𑀲𑀦𑀺𑀩𑁆𑀩𑀸𑀦𑀲𑁆𑀲 𑀲𑀺𑀤𑁆𑀥𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀸𑀓𑀝𑀲𑁆𑀲 𑀥𑀫𑁆𑀫𑀲𑁆𑀲. 𑀯𑀸𑀬𑀸𑀫𑁄𑀧𑀺 𑀦𑀸𑀫 𑀦 𑀅𑀢𑁆𑀣𑀺. 𑀓𑀼𑀢𑁄 𑀢𑀲𑁆𑀲 𑀲𑀘𑁆𑀙𑀺𑀓𑀭𑀡𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑁂𑀦𑀸’’𑀢𑀺 𑀯𑀸𑀬𑀸𑀫𑁂𑀦. ‘‘𑀦𑀺𑀩𑁆𑀩𑀸𑀦𑁂𑀦 𑀯𑀺𑀦𑀸’’𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀅𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀓𑀺𑀘𑁆𑀘𑀲𑀺𑀤𑁆𑀥𑀺𑀁’’𑀢𑀺 𑀓𑀺𑀮𑁂𑀲𑀧𑁆𑀧𑀳𑀸𑀦 𑀓𑀺𑀘𑁆𑀘𑀲𑁆𑀲 𑀅𑀲𑀺𑀤𑁆𑀥𑀺𑀁. ‘‘𑀢𑀢𑁄’’𑀢𑀺 𑀢𑀲𑁆𑀫𑀸. ‘‘𑀯𑀥𑀸𑀬𑀸’’𑀢𑀺 𑀯𑀥𑀺𑀢𑀼𑀁. ‘‘𑀧𑀭𑀺𑀲𑀓𑁆𑀓𑀦𑁆𑀢𑀸’’𑀢𑀺 𑀯𑀸𑀬𑀫𑀦𑁆𑀢𑀸. 𑀕𑀸𑀣𑀸𑀬𑀁. ‘‘𑀅𑀦𑁆𑀢𑁄𑀚𑀝𑀸’’𑀢𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀢𑀡𑁆𑀳𑀸𑀚𑀝𑀸, 𑀢𑀡𑁆𑀳𑀸𑀯𑀺𑀦𑀤𑁆𑀥𑀸. ‘‘𑀩𑀳𑀺𑀚𑀝𑀸’’𑀢𑀺 𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑁂 𑀢𑀡𑁆𑀳𑀸𑀚𑀝𑀸, 𑀢𑀡𑁆𑀳𑀸𑀯𑀺𑀦𑀤𑁆𑀥𑀸. ‘‘𑀢𑀲𑁆𑀲𑀸’’𑀢𑀺 𑀢𑀡𑁆𑀳𑀸𑀬. ‘‘𑀯𑀢𑁆𑀣𑀼𑀢𑁄’’𑀢𑀺 𑀯𑀺𑀲𑀼𑀁𑀯𑀺𑀲𑀼𑀁 𑀚𑀸𑀢𑀲𑀭𑀽𑀧𑀢𑁄. 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼, 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑀸. 𑀢𑀓𑀸𑀭𑀧𑀘𑁆𑀘𑀬𑀲𑁆𑀲 𑀓𑀸𑀮𑀢𑁆𑀢𑀬𑁂𑀧𑀺 𑀧𑀯𑀢𑁆𑀢𑀦𑀢𑁄. 𑀬𑀣𑀸 𑀤𑀺𑀝𑁆𑀞𑀸, 𑀲𑀼𑀢𑀸, 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸,𑀢𑀺. 𑀯𑀺𑀲𑀺𑀝𑁆𑀞𑀁 𑀓𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀡𑀁. 𑀦 𑀦𑀺𑀤𑀲𑁆𑀲𑀺𑀢𑀩𑁆𑀩𑀦𑁆𑀢𑀺 𑀅𑀦𑀺𑀤𑀲𑁆𑀲𑀦𑀁. 𑀦𑀢𑁆𑀣𑀺 𑀅𑀦𑁆𑀢𑁄 𑀏𑀢𑀲𑁆𑀲𑀸𑀢𑀺 𑀅𑀦𑀦𑁆𑀢𑀁. 𑀲𑀩𑁆𑀩𑀢𑁄 𑀧𑀯𑀢𑁆𑀢𑀸 𑀕𑀼𑀡𑀧𑁆𑀧𑀪𑀸 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀢𑁄𑀧𑀪𑀁. ‘‘𑀪𑀕𑀯𑀢𑀸 𑀯𑀼𑀢𑁆𑀢𑀁’’𑀢𑀺 𑀤𑀻𑀖𑀦𑀺𑀓𑀸𑀬𑁂 𑀓𑁂𑀯𑀝𑁆𑀝𑀲𑀼𑀢𑁆𑀢𑁂 𑀯𑀼𑀢𑁆𑀢𑀁. ‘‘𑀲𑀯𑀦𑁆𑀢𑀺𑀬𑁄’’𑀢𑀺 𑀫𑀳𑀸𑀦𑀤𑀺𑀬𑁄 𑀯𑀸 𑀓𑀼𑀦𑁆𑀦𑀤𑀺𑀬𑁄 𑀯𑀸. ‘‘𑀅𑀧𑁆𑀧𑁂𑀦𑁆𑀢𑀻’’𑀢𑀺 𑀧𑀯𑀺𑀲𑀦𑁆𑀢𑀺. ‘‘𑀥𑀸𑀭𑀸𑀢𑀺’’ 𑀫𑁂𑀖𑀯𑀼𑀝𑁆𑀞𑀺𑀥𑀸𑀭𑀸. 𑀩𑀼𑀤𑁆𑀥𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂𑀲𑀼 𑀏𑀓𑀲𑀢𑁆𑀢𑁄𑀧𑀺 𑀧𑀭𑀺𑀦𑀺𑀩𑁆𑀩𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀇𑀤𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀧𑁆𑀧𑁂 𑀏𑀯 𑀧𑀘𑁆𑀘𑁂𑀓 𑀲𑀫𑁆𑀩𑀼𑀤𑁆𑀥𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑀤𑀸𑀦 𑀧𑀸𑀴𑀺𑀬𑀁 𑀧𑀦 𑀩𑀼𑀤𑁆𑀥𑀲𑀼𑀜𑁆𑀜𑀓𑀧𑁆𑀧𑁂𑀧𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺 𑀆𑀕𑀢𑀸 𑀏𑀯. ‘‘𑀏𑀓𑀲𑀢𑁆𑀢𑁄𑀧𑀻’’𑀢𑀺 𑀯𑀸 𑀲𑀸𑀯𑀓𑀲𑀢𑁆𑀢𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀅𑀧𑀤𑀸𑀦𑀧𑀸𑀴𑀺𑀬𑀸 𑀅𑀯𑀺𑀭𑁄𑀥𑁄 𑀳𑁄𑀢𑀺. ‘‘𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀲𑀸𑀥𑁂𑀦𑁆𑀢𑀺 𑀧𑀝𑀺𑀮𑀪𑀦𑁆𑀢𑀺. 𑀲𑀩𑁆𑀩𑀢𑁄 𑀧𑀯𑀢𑁆𑀢𑀸 𑀕𑀼𑀡𑀧𑁆𑀧𑀪𑀸 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀢𑁄𑀧𑀪𑀸 𑀲𑀫𑁆𑀧𑀦𑁆𑀦𑀁’’𑀢𑀺 𑀯𑀼𑀢𑁆𑀢𑀁. ‘‘𑀚𑁄𑀢𑀺 𑀯𑀦𑁆𑀢 𑀢𑀭𑁄𑀯𑀸’’𑀢𑀺 𑀑𑀪𑀸𑀲𑀯𑀦𑁆𑀢𑀢𑀭𑁄 𑀯𑀸. 𑀲𑀩𑁆𑀩𑀢𑁆𑀣 𑀧𑀪𑀯𑀢𑀺 𑀲𑀁𑀯𑀺𑀚𑁆𑀚𑀢𑀻𑀢𑀺 𑀲𑀩𑁆𑀩𑀢𑁄𑀧𑀪𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀲𑀩𑁆𑀩𑀢𑁄 𑀯𑀸 𑀧𑀪𑀼𑀢𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀓𑀢𑁆𑀣𑀘𑀺 𑀦𑀢𑁆𑀣𑀻’’𑀢𑀺. ‘‘𑀏𑀯𑀁𑀲𑀦𑁆𑀢𑁂 𑀧𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀏𑀓𑀯𑀺𑀥𑁂 𑀲𑀦𑁆𑀢𑁂𑀧𑀺. ‘‘𑀉𑀧𑀘𑀭𑀺𑀢𑀼𑀁’’𑀢𑀺 𑀉𑀧𑀘𑀸𑀭𑀯𑀲𑁂𑀦 𑀯𑁄𑀳𑀭𑀺𑀢𑀼𑀁. ‘‘𑀬𑀣𑀸𑀳𑀸’’𑀢𑀺 𑀢𑀲𑁆𑀫𑀺𑀁 𑀬𑁂𑀯𑀲𑀼𑀢𑁆𑀢𑁂 𑀧𑀼𑀦 𑀓𑀺𑀁 𑀆𑀳. 𑀪𑀯𑀁 𑀦𑁂𑀢𑀻𑀢𑀺 𑀪𑀯𑀦𑁂𑀢𑁆𑀢𑀺. 𑀪𑀯𑀢𑀡𑁆𑀳𑀸 𑀏𑀯. ‘‘𑀲𑀫𑁆𑀧𑀭𑀸𑀬𑀺𑀓𑀸’’𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀸. 𑀤𑁆𑀯𑀺𑀦𑁆𑀦𑀁 𑀔𑀻𑀡𑀸𑀲𑀯𑀸𑀦𑀁 𑀅𑀦𑀼𑀧𑀸𑀤𑀺𑀲𑁂𑀲𑀢𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 ‘‘𑀅𑀦𑀼𑀧𑀸𑀤𑀺𑀲𑁂𑀲𑀢𑀸’’𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺. 𑀲𑁂𑀓𑁆𑀔𑁂𑀲𑀼 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀲𑁆𑀲 𑀲𑁂𑀓𑁆𑀔𑀲𑁆𑀲 𑀓𑀺𑀮𑁂𑀲𑀼𑀧𑀸𑀤𑀺𑀲𑁂𑀲 𑀯𑀲𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀢𑀸 𑀯𑀼𑀢𑁆𑀢𑀸. ‘‘𑀓𑀺𑀮𑁂𑀲𑀼𑀧𑀸𑀤𑀺𑀲𑁂𑀲𑁄’’𑀢𑀺 𑀘 𑀓𑀺𑀮𑁂𑀲 𑀲𑀗𑁆𑀔𑀸𑀢𑁄 𑀉𑀧𑀸𑀤𑀺𑀲𑁂𑀲𑁄. 𑀢𑀣𑀸 𑀔𑀦𑁆𑀥𑀼𑀧𑀸𑀤𑀺𑀲𑁂𑀲𑁄𑀧𑀺. 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺𑀆𑀤𑀻𑀲𑀼 𑀧𑀭𑀺𑀦𑀺𑀩𑁆𑀩𑀸𑀦𑀁 𑀦𑀸𑀫 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀁. 𑀉𑀪𑀢𑁄 𑀪𑀸𑀕 𑀯𑀺𑀫𑀼𑀢𑁆𑀢𑀸𑀤𑀻𑀦𑀁 𑀧𑀤𑀢𑁆𑀣𑁄 𑀦𑀯𑀫𑀧𑀭𑀺𑀘𑁆𑀙𑁂𑀤𑁂 𑀆𑀕𑀫𑀺𑀲𑁆𑀲𑀢𑀺. ‘‘𑀓𑀺𑀮𑁂𑀲𑀓𑁆𑀔𑀬𑁂𑀦 𑀲𑀳𑁂𑀯 𑀔𑀺𑀬𑁆𑀬𑀦𑁆𑀢𑀻’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁂 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀓𑁆𑀔𑀬𑁂𑀦 𑀲𑀤𑁆𑀥𑀺𑀁 𑀏𑀯 𑀔𑀺𑀬𑁆𑀬𑀦𑁆𑀢𑀺. 𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀢𑀁 𑀕𑀘𑁆𑀙𑀦𑁆𑀢𑀺. 𑀢𑀣𑀸 𑀅𑀦𑀸𑀕𑀸𑀫𑀺 𑀧𑀼𑀕𑁆𑀕𑀮𑀲𑁆𑀲 𑀓𑀸𑀫𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀸𑀧𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁆𑀢𑀪𑀯𑁂𑀞𑀧𑁂𑀢𑁆𑀯𑀸 𑀅𑀯𑀲𑁂𑀲 𑀓𑀸𑀫𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀸 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀓𑁆𑀔𑀡𑁂 𑀢𑀁 𑀢𑀁 𑀓𑀺𑀮𑁂𑀲𑀓𑁆𑀔𑀬𑁂 𑀦 𑀲𑀳𑁂𑀯 𑀔𑀺𑀬𑁆𑀬𑀦𑁆𑀢𑀻𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀦𑁆𑀥𑀸 𑀧𑀦 𑀓𑀺𑀮𑁂𑀲𑀓𑁆𑀔𑀬𑁂𑀦 𑀲𑀳𑀔𑀺𑀬𑁆𑀬𑀦𑁆𑀢𑀺. 𑀔𑀦𑁆𑀥𑀼𑀧𑀸𑀤𑀺𑀲𑁂𑀲𑀸 𑀦𑀸𑀫 𑀳𑀼𑀢𑁆𑀯𑀸 𑀬𑀸𑀯𑀫𑀭𑀡𑀓𑀸𑀮𑀸 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀧𑀯𑀢𑁆𑀢𑀦𑁆𑀢𑀺. 𑀓𑀲𑁆𑀫𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀬𑀸𑀯𑀘𑀼𑀢𑀺𑀬𑀸 𑀧𑀯𑀢𑁆𑀢𑀫𑀸𑀦𑀁’’𑀢𑀺𑀆𑀤𑀺𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁 𑀧𑀦 𑀥𑀫𑁆𑀫𑀢𑀸𑀲𑀺𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀨𑀮𑀦𑀺𑀲𑁆𑀲𑀦𑁆𑀤𑀪𑀽𑀢𑀁’’𑀢𑀺 𑀯𑀺𑀧𑀸𑀓𑀨𑀮𑀪𑀽𑀢𑀜𑁆𑀘 𑀦𑀺𑀲𑁆𑀲𑀦𑁆𑀤𑀨𑀮𑀪𑀽𑀢𑀜𑁆𑀘 𑀳𑀼𑀢𑁆𑀯𑀸. ‘‘𑀢𑁂𑀦𑀲𑀳𑁂𑀯𑀸’’𑀢𑀺 𑀓𑀺𑀮𑁂𑀲𑀓𑁆𑀔𑀬𑁂𑀦 𑀲𑀳𑁂𑀯. ‘‘𑀬𑀲𑁆𑀫𑀸𑀧𑀦𑀸’’𑀢𑀺𑀆𑀤𑀻𑀲𑀼. 𑀧𑀭𑀺𑀲𑀫𑀦𑁆𑀢𑀢𑁄 𑀩𑀼𑀦𑁆𑀥𑀦𑁆𑀢𑀺 𑀦𑀻𑀯𑀸𑀭𑁂𑀦𑁆𑀢𑀺, 𑀲𑀦𑁆𑀢𑀺𑀲𑀼𑀔𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀧𑀮𑀺𑀩𑁄𑀥𑀸. 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀭𑀡 𑀓𑀺𑀘𑁆𑀘𑀸𑀦𑀺, 𑀓𑀫𑁆𑀫𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀸𑀦𑀺, 𑀔𑀦𑁆𑀥𑀸𑀪𑀺𑀲𑀗𑁆𑀔𑀭𑀡 𑀓𑀺𑀘𑁆𑀘𑀸𑀦𑀺 𑀘. 𑀧𑀮𑀺𑀩𑁄𑀥𑁂𑀳𑀺 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀲𑀧𑀮𑀺𑀩𑁄𑀥𑀸. 𑀲𑀗𑁆𑀔𑀸𑀭 𑀦𑀺𑀫𑀺𑀢𑁆𑀢𑁂𑀳𑀺 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀲𑀦𑀺𑀫𑀺𑀢𑁆𑀢𑀸. 𑀢𑀡𑁆𑀳𑀸𑀧𑀡𑀺𑀥𑀻𑀳𑀺 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀲𑀧𑀡𑀺𑀳𑀺𑀢𑀸.‘‘𑀢𑀢𑁄’’𑀢𑀺 𑀧𑀸𑀧𑀓𑀫𑁆𑀫𑀢𑁄, 𑀅𑀧𑀸𑀬𑀤𑀼𑀓𑁆𑀔𑀢𑁄 𑀘. ‘‘𑀓𑁄𑀘𑀻’’𑀢𑀺 𑀓𑁄𑀘𑀺𑀥𑀫𑁆𑀫𑁄. ‘‘𑀦𑀺𑀭𑁄𑀥𑁂𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀦𑀺𑀭𑀼𑀤𑁆𑀥𑀸𑀬 𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀦𑀺𑀭𑀼𑀤𑁆𑀥𑀸𑀬 𑀦𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦𑀺𑀭𑁄𑀥𑁄 𑀦𑀺𑀩𑁆𑀬𑀸𑀧𑀸𑀭𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀢𑁂 𑀧𑀮𑀺𑀩𑁄𑀥𑁂 𑀦𑀺𑀭𑁄𑀥𑁂𑀢𑀺 𑀦𑀸𑀫. ‘‘𑀦𑀺𑀭𑁄𑀥𑁂𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀘 𑀅𑀩𑁆𑀬𑀸𑀧𑀸𑀭𑁂 𑀩𑁆𑀬𑀸𑀧𑀸𑀭𑀧𑀭𑀺𑀓𑀧𑁆𑀧𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀦𑀺𑀭𑁄𑀥𑁄𑀬𑁂𑀯 𑀢𑁂 𑀧𑀮𑀺𑀩𑁄𑀥𑁂 𑀦𑀺𑀭𑁄𑀥𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀏𑀢𑁆𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀭𑁄𑀥𑁄 𑀏𑀓𑁄𑀬𑁂𑀯. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀯𑀺𑀚𑁆𑀚𑀸 𑀦𑀺𑀭𑁄𑀥𑀸 𑀲𑀗𑁆𑀔𑀸𑀭 𑀦𑀺𑀭𑁄𑀥𑁄𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑁂𑀤𑁂 𑀪𑁂𑀤𑀧𑀭𑀺𑀓𑀧𑁆𑀧𑀦𑀸 𑀳𑁄𑀢𑀻𑀢𑀺. 𑀉𑀧𑁆𑀧𑀸𑀤𑁄 𑀘 𑀧𑀯𑀢𑁆𑀢𑁄 𑀘 𑀉𑀧𑁆𑀧𑀸𑀤𑀧𑁆𑀧𑀯𑀢𑁆𑀢𑀸. 𑀢𑁂 𑀫𑀽𑀮𑀁 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀬𑁂𑀦 𑀑𑀴𑀸𑀭𑀺𑀓𑀸𑀓𑀸𑀭𑁂𑀦. 𑀫𑀸𑀭𑁂𑀦𑁆𑀢𑀻𑀢𑀺 𑀫𑀸𑀭𑀸. 𑀯𑀥𑀓𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀮𑁂𑀲𑀫𑀸𑀭𑀸𑀤𑀬𑁄. 𑀫𑀸𑀭𑀸 𑀤𑀳𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀺 𑀏𑀢𑁂𑀲𑀽𑀢𑀺 𑀫𑀸𑀭𑀥𑁂𑀬𑁆𑀬𑀸. 𑀫𑀸𑀭𑁂𑀢𑀺 𑀘𑀸𑀯𑁂𑀢𑀺 𑀘𑀸𑀢𑀺 𑀫𑀘𑁆𑀘𑀼. 𑀫𑀭𑀡𑀫𑁂𑀯. 𑀫𑀘𑁆𑀘𑀼𑀤𑀳𑀢𑀺 𑀢𑀺𑀝𑁆𑀞𑀢𑀺 𑀏𑀢𑁂𑀲𑀽𑀢𑀺 𑀫𑀘𑁆𑀘𑀼𑀥𑁂𑀬𑁆𑀬𑀸. ‘‘𑀦𑀢𑁆𑀣𑀺 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁’’𑀢𑀺 𑀯𑀼𑀢𑁆𑀢𑁂 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀲𑀼𑀧𑀺 𑀉𑀧𑁆𑀧𑀸𑀤𑀧𑁆𑀧𑀯𑀢𑁆𑀢𑀫𑀽𑀮𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁𑀲𑀢𑀺, 𑀢𑁂𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀯𑀺𑀲𑁂𑀲𑁄 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀢𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀤𑁆𑀥𑀁𑀲𑁂𑀢𑁆𑀯𑀸𑀢𑀺 𑀘 𑀲𑀸𑀥𑁂𑀦𑁆𑀢𑀦𑁆𑀢𑀺 𑀘 𑀅𑀢𑁆𑀣𑀯𑀺𑀲𑁂𑀲 𑀧𑀸𑀓𑀝𑀢𑁆𑀣𑀸𑀬 𑀅𑀩𑁆𑀬𑀸𑀧𑀸𑀭𑁂 𑀩𑁆𑀬𑀸𑀧𑀸𑀭 𑀧𑀭𑀺𑀓𑀧𑁆𑀧𑀦𑀸 𑀏𑀯. 𑀧𑀡𑀻𑀢𑀸𑀤𑀺𑀪𑁂𑀤𑁂. 𑀇𑀤𑀁 𑀩𑀼𑀤𑁆𑀥𑀸𑀦𑀁 𑀦𑀺𑀩𑁆𑀩𑀸𑀦𑀁 𑀧𑀡𑀻𑀢𑀁. 𑀇𑀤𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀺𑀩𑁆𑀩𑀸𑀦𑀁 𑀫𑀚𑁆𑀛𑀺𑀫𑀁. 𑀇𑀤𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀁 𑀳𑀻𑀦𑀦𑁆𑀢𑀺 𑀪𑀺𑀦𑁆𑀦𑀁 𑀦 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀸𑀦𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀁 𑀦𑀺𑀥𑁂𑀢𑀺 𑀏𑀢𑁂𑀦𑀸𑀢𑀺 𑀧𑀡𑀺𑀳𑀺𑀢𑀁. ‘‘𑀦𑀺𑀥𑁂𑀢𑀻’’𑀢𑀺 𑀆𑀭𑀫𑁆𑀫𑀡𑁂𑀲𑀼 𑀦𑀺𑀦𑁆𑀦𑀁 𑀧𑁄𑀡𑀁 𑀧𑀩𑁆𑀪𑀸𑀭𑀁 𑀓𑀢𑁆𑀯𑀸 𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀧𑀡𑀺𑀥𑀸𑀦𑀧𑀡𑀺𑀥𑀻𑀲𑀼. 𑀅𑀢𑁆𑀣𑀢𑁄 𑀏𑀓𑀁 𑀆𑀲𑀸𑀢𑀡𑁆𑀳𑀸𑀬 𑀦𑀸𑀫𑀁. ‘‘𑀮𑀩𑁆𑀪𑀫𑀸𑀦𑀸𑀧𑀻’’𑀢𑀺 𑀪𑀯𑀲𑀫𑁆𑀧𑀢𑁆𑀢𑀺 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄 𑀮𑀩𑁆𑀪𑀫𑀸𑀦𑀸𑀧𑀺. ‘‘𑀧𑀺𑀧𑀸𑀲𑀯𑀺𑀦𑀬 𑀥𑀫𑁆𑀫𑀢𑁆𑀢𑀸’’𑀢𑀺 𑀧𑀸𑀢𑀼𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀇𑀘𑁆𑀙𑀸 𑀧𑀺𑀧𑀸𑀲𑀸. 𑀧𑀺𑀧𑀸𑀲𑀁 𑀯𑀺𑀦𑁂𑀢𑀺 𑀯𑀺𑀕𑀫𑁂𑀢𑀻𑀢𑀺 𑀧𑀺𑀧𑀸𑀲𑀯𑀺𑀦𑀬𑁄. ‘‘𑀯𑁂𑀤𑀬𑀺𑀢𑀲𑀼𑀔𑀁’’𑀢𑀺 𑀯𑁂𑀤𑀦𑀸𑀲𑀼𑀔𑀁. ‘‘𑀓𑀢𑀫𑀁 𑀢𑀁 𑀆𑀯𑀼𑀲𑁄’’𑀢𑀺 𑀧𑀸𑀴𑀺𑀧𑀸𑀞𑁂 ‘‘𑀢𑀁’’𑀢𑀺 𑀢𑀲𑁆𑀫𑀸. ‘‘𑀬𑀤𑁂𑀢𑁆𑀣 𑀯𑁂𑀤𑀬𑀺𑀢𑀁 𑀦𑀢𑁆𑀣𑀻’’𑀢𑀺 𑀬𑀲𑁆𑀫𑀸 𑀏𑀢𑁆𑀣 𑀯𑁂𑀤𑀬𑀺𑀢𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑁂 𑀲𑀼𑀔𑀁 𑀦𑀸𑀫 𑀓𑀢𑀫𑀦𑁆𑀢𑀺 𑀬𑁄𑀚𑀦𑀸. ‘‘𑀏𑀢𑁆𑀣𑀸’’𑀢𑀺 𑀏𑀢𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂. ‘‘𑀏𑀢𑀤𑁂𑀯𑁂𑀢𑁆𑀣𑀸’’𑀢𑀺𑀆𑀤𑀺𑀫𑁆𑀳𑀺. ‘‘𑀏𑀢 𑀤𑁂𑀯𑀸’’𑀢𑀺 𑀏𑀲𑁄𑀏𑀯. 𑀬𑀲𑁆𑀫𑀸 𑀏𑀢𑁆𑀣 𑀯𑁂𑀤𑀬𑀺𑀢𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀏𑀲𑁄 𑀯𑁂𑀤𑀬𑀺𑀢𑀲𑁆𑀲 𑀦𑀢𑁆𑀣𑀺𑀪𑀸𑀯𑁄 𑀏𑀯 𑀏𑀢𑁆𑀣𑀦𑀺𑀩𑁆𑀩𑀸𑀦𑁂 𑀲𑀼𑀔𑀦𑁆𑀢𑀺 𑀬𑁄𑀚𑀦𑀸.

‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼. 𑀬𑀤𑁂𑀢𑀁 𑀔𑀺𑀬𑁆𑀬𑀦𑀁 𑀦𑀺𑀭𑀼𑀚𑁆𑀛𑀦𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀘𑀺 𑀧𑀦 𑀢𑀁𑀔𑀺𑀬𑁆𑀬𑀦 𑀦𑀺𑀭𑀼𑀚𑁆𑀛𑀦 𑀓𑁆𑀭𑀺𑀬𑀸𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀦 𑀳𑁄𑀢𑀺. 𑀅𑀪𑀸𑀯 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀦 𑀳𑀺𑀢𑀁’’𑀢𑀺𑀆𑀤𑀺𑀫𑀸𑀳. ‘‘𑀧𑀜𑁆𑀜𑀢𑁆𑀢𑀺𑀭𑀽𑀧𑀁’’𑀢𑀺 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑁄. 𑀧𑀸𑀴𑀺𑀧𑀸𑀞𑁂. ‘‘𑀧𑀤𑀳𑀢𑀻’’𑀢𑀺 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀭𑁄𑀢𑀺. 𑀧𑀳𑀺𑀢𑁄 𑀅𑀢𑁆𑀢𑀸 𑀅𑀦𑁂𑀦𑀸𑀢𑀺 𑀧𑀳𑀺𑀢𑀢𑁆𑀢𑁄. ‘‘𑀧𑀳𑀺𑀢𑁄’’𑀢𑀺 𑀧𑀤𑀳𑀺𑀢𑁄. 𑀅𑀦𑀺𑀯𑀢𑁆𑀢𑀪𑀸𑀯𑁂 𑀞𑀧𑀺𑀢𑁄. 𑀧𑁂𑀲𑀺𑀢𑁄𑀢𑀺𑀧𑀺 𑀯𑀡𑁆𑀡𑁂𑀦𑁆𑀢𑀺. ‘‘𑀓𑀸𑀬𑁂𑀦𑀸’’𑀢𑀺 𑀦𑀸𑀫𑀓𑀸𑀬𑁂𑀦. 𑀢𑀡𑁆𑀳𑀸𑀯𑀲𑁂 𑀯𑀢𑁆𑀢𑀦𑁆𑀢𑀻𑀢𑀺 𑀢𑀡𑁆𑀳𑀸𑀯𑀲𑀺𑀓𑀸. ‘‘𑀢𑁂𑀲𑀁 𑀧𑀻’’𑀢𑀺 𑀢𑁂𑀲𑀁 𑀯𑀸𑀤𑁂𑀧𑀺. 𑀢𑀲𑁆𑀫𑀺𑀁 𑀔𑀬 𑀦𑀺𑀭𑁄𑀥𑀫𑀢𑁆𑀢𑁂 𑀅𑀦𑀦𑁆𑀢𑀕𑀼𑀡𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀁 𑀯𑀸𑀤𑀁 𑀯𑀺𑀲𑁄𑀥𑁂𑀢𑀼𑀁 ‘‘𑀦𑀺𑀩𑁆𑀩𑀸𑀦𑀲𑁆𑀲 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀺𑀚𑁆𑀛𑀦𑁆𑀢𑀻’’𑀢𑀺 𑀏𑀢𑁂𑀦 𑀯𑀝𑁆𑀝𑀥𑀫𑁆𑀫𑁂𑀲𑀼 𑀫𑀳𑀦𑁆𑀢𑀁 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑀸 𑀏𑀯 𑀢𑁂𑀲𑀁 𑀦𑀺𑀭𑁄𑀥𑁂 𑀫𑀳𑀦𑁆𑀢𑀁 𑀕𑀼𑀡𑀸𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀬𑁂 𑀧𑀦 𑀬𑀣𑀸𑀯𑀼𑀢𑁆𑀢𑀁 𑀔𑀬𑀦𑀺𑀭𑁄𑀥𑀁 𑀧𑀭𑀫𑀢𑁆𑀣𑀦𑀺𑀩𑁆𑀩𑀸𑀦𑀦𑁆𑀢𑀺 𑀦 𑀚𑀸𑀦𑀦𑁆𑀢𑀺, 𑀢𑁂𑀲𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀏𑀯𑀁 𑀕𑀼𑀡𑀧𑀤𑀸𑀦𑀁 𑀕𑀫𑁆𑀪𑀻𑀭𑀢𑁆𑀢𑀸 𑀢𑀁𑀔𑀬𑀦𑀺𑀭𑁄𑀥𑀫𑀢𑁆𑀢𑀁 𑀅𑀦𑀦𑁆𑀢𑀕𑀼𑀡𑀸𑀦𑀁 𑀯𑀢𑁆𑀣𑀼 𑀦 𑀳𑁄𑀢𑀻𑀢𑀺 𑀫𑀜𑁆𑀜𑀦𑁆𑀢𑀺. 𑀇𑀤𑀸𑀦𑀺 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀢𑀁 𑀔𑀬𑀦𑀺𑀭𑁄𑀥𑀫𑀢𑁆𑀢𑀁 𑀧𑀭𑀫𑀲𑀼𑀔𑀁 𑀦𑀸𑀫 𑀪𑀯𑁂𑀬𑁆𑀬𑀸𑀢𑀺 𑀇𑀫𑀁 𑀯𑀸𑀤𑀁 𑀯𑀺𑀲𑁄𑀥𑁂𑀢𑀼𑀁 ‘‘𑀲𑀦𑁆𑀢𑀺𑀲𑀼𑀔𑀜𑁆𑀘𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀺𑀪𑀺𑀓𑁆𑀔𑀯𑁂𑀢𑀺 𑀲𑀼𑀢𑁆𑀢𑁂. ‘‘𑀦𑁄𑀘𑁂𑀢𑀁 𑀅𑀪𑀯𑀺𑀲𑁆𑀲𑀸’’𑀢𑀺 𑀏𑀢𑀁 𑀅𑀚𑀸𑀢𑀁 𑀦𑁄𑀘𑁂 𑀲𑀦𑁆𑀢𑀁 𑀯𑀺𑀚𑁆𑀚𑀫𑀸𑀦𑀁 𑀦 𑀪𑀯𑁂𑀬𑁆𑀬. ‘‘𑀦𑀬𑀺𑀫𑀲𑁆𑀲𑀸’’𑀢𑀺 𑀦 𑀇𑀫𑀲𑁆𑀲. 𑀧𑀘𑁆𑀘𑀓𑁆𑀔𑀪𑀽𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀲𑁆𑀲𑀸’’𑀢𑀺 𑀯𑀤𑀢𑀺. 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀘 𑀲𑀸𑀫𑀺𑀯𑀘𑀦𑀁. 𑀇𑀫𑀲𑁆𑀫𑀸 𑀚𑀸𑀢𑀸 𑀪𑀽𑀢𑀸 𑀓𑀢𑀸 𑀲𑀗𑁆𑀔𑀢𑀸 𑀲𑀢𑁆𑀢𑀸𑀦𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦 𑀧𑀜𑁆𑀜𑀸𑀬𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀧𑀭𑀢𑁆𑀣𑀧𑀺 𑀏𑀲𑀦𑀬𑁄. 𑀏𑀲𑀦𑀬𑁄 𑀲𑀩𑁆𑀩𑁂𑀲𑀽𑀢𑀺𑀆𑀤𑀻𑀲𑀼. 𑀤𑀼𑀘𑁆𑀘𑀭𑀺𑀢 𑀥𑀫𑁆𑀫𑀸 𑀦𑀸𑀫 𑀧𑀘𑁆𑀘𑀬𑁂 𑀲𑀢𑀺, 𑀚𑀸𑀬𑀦𑁆𑀢𑀺. 𑀅𑀲𑀢𑀺, 𑀦 𑀚𑀸𑀬𑀦𑁆𑀢𑀻𑀢𑀺 𑀏𑀯𑀁 𑀚𑀸𑀢𑀁 𑀯𑀺𑀬 𑀅𑀚𑀸𑀢𑀫𑁆𑀧𑀺 𑀢𑁂𑀲𑀁 𑀅𑀢𑁆𑀣𑀺. 𑀬𑀤𑀺 𑀘 𑀅𑀚𑀸𑀢𑀁 𑀦𑀸𑀫 𑀦𑀢𑁆𑀣𑀺. 𑀚𑀸𑀢𑀫𑁂𑀯 𑀅𑀢𑁆𑀣𑀺. 𑀏𑀯𑀁𑀲𑀢𑀺, 𑀅𑀢𑁆𑀢𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀁 𑀅𑀚𑀸𑀢𑀢𑁆𑀣𑀸𑀬 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁𑀧𑀺 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢 𑀥𑀫𑁆𑀫𑀸 𑀅𑀢𑁆𑀢𑀦𑀺 𑀚𑀸𑀢𑀸𑀬𑁂𑀯 𑀲𑀺𑀬𑀼𑀁, 𑀦𑁄 𑀅𑀚𑀸𑀢𑀸. 𑀓𑀲𑁆𑀫𑀸, 𑀅𑀚𑀸𑀢𑀲𑁆𑀲 𑀦𑀸𑀫 𑀦𑀢𑁆𑀣𑀺𑀢𑀸𑀬𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

‘‘𑀏𑀢𑁆𑀢𑀸𑀯𑀢𑀸’’𑀢𑀺, 𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀚𑀸𑀢𑀁𑀢𑀺𑀆𑀤𑀺𑀦𑀸 𑀧𑀸𑀴𑀺𑀯𑀘𑀦𑁂𑀦. 𑀲𑀩𑁆𑀩𑁂𑀲𑀗𑁆𑀔𑀸𑀭𑀸 𑀲𑀫𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭 𑀲𑀫𑀣𑁄. 𑀲𑀩𑁆𑀩𑁂 𑀉𑀧𑀥𑀬𑁄 𑀏𑀢𑁆𑀣 𑀦𑀺𑀲𑁆𑀲𑀚𑁆𑀚𑀦𑁆𑀢𑀺 𑀅𑀭𑀺𑀬𑀸𑀚𑀦𑀸𑀢𑀺 𑀲𑀩𑁆𑀩𑀼𑀧𑀥𑀺𑀦𑀺𑀲𑁆𑀲𑀕𑁆𑀕𑁄. ‘‘𑀉𑀧𑀮𑀩𑁆𑀪𑀫𑀸𑀦𑁄’’𑀢𑀺 𑀲𑀦𑁆𑀢𑀺𑀮𑀓𑁆𑀔𑀡𑁂𑀦 𑀜𑀸𑀡𑁂𑀦 𑀉𑀧𑀮𑀩𑁆𑀪𑀫𑀸𑀦𑁄. ‘‘𑀏𑀲𑀺𑀁𑀲𑀽’’𑀢𑀺 𑀓𑀢𑁆𑀯𑀸 𑀏𑀲𑀦𑀓𑀺𑀘𑁆𑀘𑀲𑁆𑀲 𑀲𑀺𑀔𑀸𑀧𑀢𑁆𑀢𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀕𑀘𑁆𑀙𑀺𑀁𑀲𑀽’’𑀢𑀺 𑀯𑀼𑀢𑁆𑀢𑀁.

𑀦𑀺𑀩𑁆𑀩𑀸𑀦𑀲𑀗𑁆𑀕𑀳𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀲𑀗𑁆𑀕𑀳𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.