𑁫. 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁧𑁪𑁩. 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑁂. ‘‘𑀧𑀯𑀢𑁆𑀢𑀺𑀲𑀗𑁆𑀕𑀳𑀁’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀧𑀯𑀢𑁆𑀢𑀸𑀓𑀸𑀭𑀓𑀣𑀦𑀲𑀗𑁆𑀕𑀳𑀁. ‘‘𑀧𑀝𑀺𑀲𑀦𑁆𑀥𑀺𑀬𑀁’’𑀢𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑁂. ‘‘𑀢𑁂𑀲𑀁’’𑀢𑀺 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀢𑀤𑀸𑀲𑀦𑁆𑀦𑀢𑀸𑀬𑀸’’𑀢𑀺 𑀢𑀸𑀬𑀧𑀝𑀺𑀲𑀦𑁆𑀥𑀺𑀬𑀸 𑀆𑀲𑀦𑁆𑀦𑀢𑀸𑀬. ‘‘𑀢𑀁 𑀕𑀳𑀡𑁂𑀦𑁂 𑀯𑀸’’𑀢𑀺 𑀲𑀦𑁆𑀥𑀺𑀕𑁆𑀕𑀳𑀡𑁂𑀦 𑀏𑀯 𑀲𑀦𑁆𑀥𑀺𑀯𑀘𑀦𑁂𑀦 𑀏𑀯. ‘‘𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀦𑀸𑀫𑀸’’𑀢𑀺 𑀓𑀫𑁆𑀫 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀯𑀺𑀲𑀬𑀸𑀦𑀁 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀸 𑀕𑀫𑀦 𑀯𑀲𑁂𑀦 𑀧𑀯𑀢𑁆𑀢𑀺 𑀦𑀸𑀫. ‘‘𑀫𑀭𑀡𑀼𑀧𑁆𑀧𑀢𑁆𑀢𑀺𑀬𑀁 𑀏𑀯 𑀲𑀺𑀤𑁆𑀥𑀸’’𑀢𑀺 𑀫𑀭𑀡𑀼𑀧𑁆𑀧𑀢𑁆𑀢𑀺𑀬𑀁 𑀚𑀯𑀦𑁂𑀲𑀼 𑀏𑀯 𑀲𑀺𑀤𑁆𑀥𑀸. 𑀏𑀢𑁂𑀦 𑀫𑀭𑀡𑀼𑀧𑁆𑀧𑀢𑁆𑀢𑀺 𑀯𑀺𑀥𑀸𑀦𑀁 𑀚𑀯𑀦𑀧𑁆𑀧𑀥𑀸𑀦𑀁 𑀳𑁄𑀢𑀺, 𑀦 𑀘𑀼𑀢𑀺𑀧𑁆𑀧𑀥𑀸𑀦𑀦𑁆𑀢𑀺 𑀤𑀻𑀧𑁂𑀢𑀺. 𑀦 𑀳𑀺 𑀢𑀲𑁆𑀫𑀺𑀁 𑀯𑀺𑀥𑀸𑀦𑁂 𑀢𑀲𑁆𑀲𑀁 𑀘𑀼𑀢𑀺𑀬𑀁 𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀯𑀘𑀦𑀁 𑀦𑀸𑀫 𑀅𑀢𑁆𑀣𑀺. 𑀚𑀯𑀦𑁂𑀲𑀼 𑀏𑀯 𑀅𑀢𑁆𑀣𑀺. 𑀲𑀸 𑀧𑀦 𑀘𑀼𑀢𑀺 𑀢𑀲𑁆𑀫𑀺𑀁 𑀪𑀯𑁂 𑀆𑀤𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺 𑀧𑀯𑀢𑁆𑀢𑀺𑀬𑀸 𑀲𑀺𑀤𑁆𑀥𑀸𑀬 𑀲𑀺𑀚𑁆𑀛𑀢𑀺 𑀬𑁂𑀯𑀸𑀢𑀺. ‘‘𑀢𑁂𑀲𑀁’’𑀢𑀺 𑀯𑀻𑀣𑀺𑀫𑀼𑀢𑁆𑀢𑀸𑀦𑀁. ‘‘𑀪𑀯𑀦𑁆𑀢𑀻’’𑀢𑀺 𑀧𑀸𑀢𑀼𑀩𑁆𑀪𑀯𑀦𑁆𑀢𑀺. ‘‘𑀢𑀢𑁄’’𑀢𑀺 𑀅𑀬𑀢𑁄. ‘‘𑀕𑀦𑁆𑀢𑀩𑁆𑀩𑀸’’𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀉𑀧𑀧𑀚𑁆𑀚𑀺𑀢𑀩𑁆𑀩𑀸. ‘‘𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀯𑀢𑁆𑀢𑀦𑁆𑀢𑀺. ‘‘𑀢𑀺𑀭𑁄’’𑀢𑀺 𑀢𑀺𑀭𑀺𑀬𑀢𑁄. ‘‘𑀅𑀜𑁆𑀙𑀺𑀢𑀸’’𑀢𑀺 𑀕𑀢𑀸 𑀧𑀯𑀢𑁆𑀢𑀸, 𑀆𑀬𑀢𑀸 𑀯𑀸. ‘‘𑀲𑀫𑀸𑀦𑀚𑀸𑀢𑀺𑀢𑀸𑀬𑀸’’𑀢𑀺 𑀢𑀺𑀭𑀘𑁆𑀙𑀸𑀦 𑀕𑀢𑀚𑀸𑀢𑀺 𑀯𑀲𑁂𑀦 𑀲𑀫𑀸𑀦𑀚𑀸𑀢𑀺 𑀪𑀸𑀯𑁂𑀦. ‘‘𑀬𑀼𑀯𑀦𑁆𑀢𑀻’’𑀢𑀺 𑀫𑀺𑀲𑁆𑀲𑀻 𑀪𑀯𑀦𑁆𑀢𑀺. ‘‘𑀲𑀼𑀔𑀲𑀫𑀼𑀲𑁆𑀲𑀬𑀢𑁄’’𑀢𑀺 𑀲𑀼𑀔𑀲𑀫𑀼𑀤𑀸𑀬𑀢𑁄. ‘‘𑀤𑀺𑀩𑁆𑀩𑀦𑁆𑀢𑀻’’𑀢𑀺 𑀯𑀺𑀚𑁆𑀚𑁄𑀢𑀦𑁆𑀢𑀺. ‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀇𑀢𑀺 𑀯𑀘𑀦𑀢𑁆𑀣𑀁 𑀓𑀢𑁆𑀯𑀸 𑀉𑀧𑀭𑀺𑀤𑁂𑀯𑀸 𑀲𑀼𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀯𑁂𑀧𑀘𑀺𑀢𑁆𑀢𑀺𑀧𑀳𑀸𑀭𑀸𑀤𑀸𑀤𑀬𑁄’’𑀢𑀺 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤 𑀧𑀳𑀸𑀭𑀸𑀤𑀅𑀲𑀼𑀭𑀺𑀦𑁆𑀤𑀸𑀤𑀺𑀓𑁂 𑀤𑁂𑀯𑀸𑀲𑀼𑀭𑁂. ‘‘𑀲𑀼𑀭𑀧𑁆𑀧𑀝𑀺 𑀧𑀓𑁆𑀔𑀸’’𑀢𑀺 𑀢𑀸𑀯𑀢𑀺𑀁𑀲𑀸𑀤𑁂𑀯𑀧𑁆𑀧𑀝𑀺𑀧𑀓𑁆𑀔𑀸. ‘‘𑀲𑀼𑀭𑀲𑀤𑀺𑀲𑀸’’𑀢𑀺 𑀢𑀸𑀯𑀢𑀺𑀁𑀲𑀸𑀤𑁂𑀯 𑀲𑀤𑀺𑀲𑀸. ‘‘𑀯𑁂𑀫𑀸𑀦𑀺𑀓𑀧𑁂𑀢𑁂’’𑀢𑀺 𑀯𑁂𑀫𑀸𑀦𑀺𑀓 𑀦𑀸𑀫𑀓𑁂 𑀧𑁂𑀢𑁂. ‘‘𑀯𑀺𑀦𑀺𑀧𑀸𑀢𑀺𑀓𑁂’’𑀢𑀺 𑀯𑀺𑀦𑀺𑀧𑀸𑀢𑀺𑀓 𑀦𑀸𑀫𑀓𑁂 𑀤𑀼𑀕𑁆𑀕𑀢 𑀤𑁂𑀯𑀚𑀸𑀢𑀺𑀓𑁂. 𑀢𑁂𑀲𑀁 𑀧𑀯𑀢𑁆𑀢𑀺 𑀉𑀧𑀭𑀺 ‘𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀦𑀜𑁆𑀘𑀸’𑀢𑀺 𑀧𑀤𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. ‘‘𑀢𑁂𑀧𑀻’’𑀢𑀺 𑀮𑁄𑀓𑀦𑁆𑀢𑀭𑀺𑀓 𑀦𑁂𑀭𑀬𑀺𑀓 𑀲𑀢𑁆𑀢𑀸𑀧𑀺. ‘‘𑀓𑀸𑀮𑀓𑀜𑁆𑀘𑀺𑀓𑀧𑁂𑀢𑁂’’𑀢𑀺 𑀓𑀸𑀮𑀓𑀜𑁆𑀘𑀺𑀓 𑀦𑀸𑀫𑀓𑁂 𑀧𑁂𑀢𑁂. 𑀏𑀯𑀁 𑀓𑀣𑀸𑀯𑀢𑁆𑀣𑀼 𑀧𑀸𑀴𑀺𑀬𑀁 𑀆𑀕𑀢𑀸 𑀯𑁂𑀲𑁆𑀲𑀪𑀼 𑀆𑀤𑀬𑁄 𑀬𑀫𑀭𑀸𑀚𑀸𑀦𑁄𑀧𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁂𑀲𑁆𑀲𑀪𑀽 𑀘 𑀦𑁄𑀢𑁆𑀢𑀺 𑀘 𑀲𑁄𑀫𑁄 𑀘 𑀬𑀫𑁄 𑀘 𑀯𑁂𑀲𑁆𑀲𑀯𑀡𑁄 𑀘 𑀇𑀢𑀺 𑀇𑀫𑁂 𑀧𑁂𑀢𑁆𑀢𑀺 𑀭𑀸𑀚𑀸𑀦𑁄. ‘‘𑀭𑀚𑁆𑀚’’𑀦𑁆𑀢𑀺 𑀭𑀸𑀚𑀪𑀸𑀯𑀁 𑀭𑀸𑀚𑀓𑀺𑀘𑁆𑀘𑀁. 𑀬𑁂 𑀘 𑀬𑀓𑁆𑀔𑀭𑀓𑁆𑀔𑀲𑀸 𑀦𑀸𑀫 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀼𑀭𑀽𑀭𑀓𑀫𑁆𑀫𑀓𑀸𑀭𑀺𑀦𑁄’’𑀢𑀺 𑀮𑀼𑀤𑁆𑀤𑀓𑀫𑁆𑀫𑀓𑀸𑀭𑀺𑀦𑁄. ‘‘𑀭𑁂𑀯𑀢𑀺 𑀯𑀺𑀫𑀸𑀦𑁂’’𑀢𑀺 𑀭𑁂𑀯𑀢𑀺 𑀯𑀺𑀫𑀸𑀦 𑀯𑀢𑁆𑀣𑀼𑀫𑁆𑀳𑀺. ‘‘𑀇𑀢𑁄’’𑀢𑀺 𑀫𑀦𑀼𑀲𑁆𑀲 𑀮𑁄𑀓𑀢𑁄, 𑀲𑀼𑀕𑀢𑀺𑀪𑀯𑀢𑁄 𑀯𑀸. 𑀢𑁂𑀳𑀺 𑀬𑀓𑁆𑀔 𑀭𑀓𑁆𑀔𑀲𑀸 𑀦𑀸𑀫 𑀪𑀽𑀫𑀝𑁆𑀞𑀓𑀸𑀧𑀺 𑀲𑀦𑁆𑀢𑀺, 𑀆𑀓𑀸𑀲𑀝𑁆𑀞𑀓𑀸𑀧𑀺. ‘‘𑀦𑀸𑀦𑀸𑀓𑀫𑁆𑀫𑀓𑀸𑀭𑀡𑀸𑀬𑁄’’𑀢𑀺 𑀤𑁆𑀯𑀢𑁆𑀢𑀺𑀁𑀲 𑀯𑀺𑀥𑀸𑀦𑀺 𑀓𑀫𑁆𑀫𑀓𑀭𑀡 𑀓𑀺𑀘𑁆𑀘𑀸𑀦𑀺. 𑀢𑁂𑀲𑀫𑁆𑀧𑀺 𑀦𑀺𑀭𑀬𑀧𑀸𑀮𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀺𑀲𑁆𑀲𑀦𑁆𑀦𑀁’’𑀢𑀺 𑀢𑀺𑀲𑁆𑀲𑀦𑁆𑀦𑀁 𑀅𑀧𑀸𑀬𑀪𑀽𑀫𑀻𑀦𑀁. 𑀅𑀧𑀸𑀬𑀪𑀽𑀫𑀺.

𑀉𑀲𑁆𑀲𑀺𑀢𑁄 𑀫𑀦𑁄 𑀏𑀢𑁂𑀲𑀦𑁆𑀢𑀺 𑀯𑀸, 𑀉𑀲𑁆𑀲𑀦𑁆𑀦𑁄 𑀫𑀦𑁄 𑀏𑀢𑁂𑀲𑀦𑁆𑀢𑀺 𑀯𑀸, 𑀤𑁆𑀯𑀺𑀥𑀸𑀯𑀺𑀕𑁆𑀕𑀳𑁄. ‘‘𑀉𑀲𑁆𑀲𑀺𑀢𑁄’’𑀢𑀺 𑀉𑀕𑁆𑀕𑀢𑁄. ‘‘𑀉𑀲𑁆𑀲𑀦𑁆𑀦𑁄’’𑀢𑀺 𑀯𑀺𑀧𑀼𑀮𑁄. 𑀓𑀲𑁆𑀫𑀸 𑀢𑀺𑀓𑁆𑀔𑀢𑀭 𑀘𑀺𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀸𑀦𑀁’’𑀢𑀺𑀆𑀤𑀺𑀁. 𑀧𑀼𑀩𑁆𑀩𑀯𑀸𑀓𑁆𑀬𑁂 𑀅𑀦𑀦𑁆𑀢 𑀘𑀓𑁆𑀓𑀯𑀸𑀴𑀲𑀸𑀥𑀸𑀭𑀡 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀼𑀦 ‘‘𑀇𑀫𑀲𑁆𑀫𑀺𑀁’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀇𑀥𑁂𑀯 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑀸𑀤𑀻𑀦𑀁 𑀉𑀧𑁆𑀧𑀦𑁆𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀅𑀥𑀺𑀓𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. ‘‘𑀲𑀽𑀭𑀸’’𑀢𑀺 𑀧𑀸𑀧𑀓𑀮𑁆𑀬𑀸𑀡 𑀓𑀫𑁆𑀫𑁂𑀲𑀼 𑀲𑀽𑀭𑀘𑀺𑀢𑁆𑀢𑀸. ‘‘𑀲𑀢𑀺𑀫𑀦𑁆𑀢𑁄’’𑀢𑀺 𑀯𑀺𑀧𑀼𑀮𑀲𑁆𑀲𑀢𑀺𑀓𑀸. ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀇𑀥𑁂𑀯 𑀲𑀺𑀓𑁆𑀔𑀢𑁆𑀢𑀬𑀧𑀽𑀭𑀡 𑀲𑀗𑁆𑀔𑀸𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀅𑀢𑁆𑀣𑀺𑀢𑀸. ‘‘𑀫𑀭𑀺𑀬𑀸𑀤𑀥𑀫𑁆𑀫𑁂𑀲𑀽’’𑀢𑀺 𑀮𑁄𑀓𑀘𑀸𑀭𑀺𑀢𑁆𑀢 𑀥𑀫𑁆𑀫𑁂𑀲𑀼. ‘‘𑀥𑀢𑀭𑀝𑁆𑀞𑁄’’𑀢𑀺 𑀥𑀢𑀭𑀝𑁆𑀞𑁄 𑀫𑀳𑀸𑀭𑀸𑀚𑀸. 𑀏𑀯𑀁 𑀯𑀺𑀭𑀼𑀴𑁆𑀳𑀓𑁄𑀢𑀺𑀆𑀤𑀻𑀲𑀼. ‘‘𑀕𑀦𑁆𑀥𑀭𑀼𑀓𑁆𑀔𑀸𑀥𑀺 𑀯𑀢𑁆𑀣𑀸’’𑀢𑀺 𑀕𑀦𑁆𑀥𑀭𑀼𑀓𑁆𑀔𑁂𑀲𑀼 𑀅𑀚𑁆𑀛𑀸𑀯𑀼𑀢𑁆𑀣𑀸. ‘‘𑀓𑀼𑀫𑁆𑀪𑀡𑁆𑀟𑀸’’𑀢𑀺 𑀓𑀼𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀧𑀣𑀯𑀺 𑀕𑀢𑀸𑀦𑀺 𑀭𑀢𑀦𑀪𑀡𑁆𑀟𑀸𑀦𑀺 𑀬𑁂𑀲𑀁 𑀢𑁂𑀢𑀺 𑀯𑀺𑀕𑁆𑀕𑀳𑁄. ‘‘𑀤𑀸𑀦𑀯𑀭𑀓𑁆𑀔𑀲𑀸’’𑀢𑀺 𑀤𑀦𑀼𑀦𑀸𑀫𑀤𑁂𑀯𑀥𑀻𑀢𑀸𑀬 𑀅𑀧𑀘𑁆𑀘𑀦𑁆𑀢𑀺 𑀅𑀢𑁆𑀣𑁂𑀦 𑀤𑀸𑀦𑀯 𑀦𑀸𑀫𑀓𑀸 𑀭𑀓𑁆𑀔𑀲𑀸. 𑀅𑀯𑀭𑀼𑀚𑁆𑀛𑀦𑁆𑀢𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀯𑀭𑀼𑀤𑁆𑀥𑀓𑀸. ‘‘𑀯𑀺𑀕𑀘𑁆𑀙𑀭𑀽𑀧𑁄’’𑀢𑀺 𑀯𑀺𑀧𑀦𑁆𑀦𑀯𑀡𑁆𑀡𑁄. ‘‘𑀦𑀺𑀳𑀻𑀦𑀓𑀫𑁆𑀫𑀓𑀢𑀸’’𑀢𑀺 𑀦𑀺𑀳𑀻𑀦𑀸𑀦𑀺𑀧𑀸𑀧𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀆𑀕𑀢𑀸. 𑀓𑀸𑀘𑀺𑀕𑀦𑁆𑀥𑀧𑁆𑀧𑀺𑀬𑁄 𑀚𑀸𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀕𑀦𑁆𑀥𑀧𑁆𑀧𑀺𑀬𑁄 𑀚𑁄𑀕𑀺𑀦𑀻𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀚𑀼𑀡𑁆𑀳𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀪𑀺𑀮𑀓𑁆𑀔𑀺𑀢𑀭𑀢𑁆𑀢𑀻𑀲𑀽’’𑀢𑀺 𑀅𑀪𑀺𑀜𑁆𑀜𑀸𑀢𑀭𑀢𑁆𑀢𑀻𑀲𑀼. 𑀉𑀧𑁄𑀲𑀣𑀭𑀢𑁆𑀢𑀻𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀕𑁄𑀘𑀭𑀧𑁆𑀧𑀲𑀼𑀢𑀓𑀸𑀮𑁂’’𑀢𑀺 𑀕𑁄𑀘𑀭𑀢𑁆𑀣𑀸𑀬 𑀯𑀺𑀘𑀭𑀺𑀢𑀓𑀸𑀮𑁂. ‘‘𑀚𑀼𑀢𑀺𑀅𑀢𑁆𑀣𑁂𑀦𑀸’’𑀢𑀺 𑀯𑀺𑀚𑁆𑀚𑁄𑀢𑀦𑀝𑁆𑀞𑁂𑀦. 𑀯𑀲𑀽𑀦𑀺 𑀥𑀦𑀸𑀦𑀺 𑀥𑀸𑀭𑁂𑀦𑁆𑀢𑀻𑀢𑀺 𑀯𑀲𑀼𑀦𑁆𑀥𑀭𑀸. 𑀯𑀲𑀼𑀦𑁆𑀥𑀭𑀸 𑀘 𑀢𑁂 𑀤𑁂𑀯 𑀬𑀓𑁆𑀔𑀸 𑀘𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀦𑀸𑀕𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀁 𑀦𑀸𑀕𑁂𑀲𑀼 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀸’’𑀢𑀺 𑀬𑀸 𑀪𑀼𑀫𑁆𑀫𑀤𑁂𑀯𑀬𑀓𑁆𑀔 𑀚𑀸𑀢𑀺𑀬𑁄. ‘‘𑀬𑀸𑀲𑀁’’𑀢𑀺 𑀬𑀸𑀲𑀁 𑀪𑀼𑀫𑁆𑀫𑀤𑁂𑀯 𑀬𑀓𑁆𑀔𑀚𑀸𑀢𑀻𑀦𑀁. ‘‘𑀓𑀻𑀴𑀸𑀧𑀲𑀼𑀢𑀯𑀲𑁂𑀦𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀜𑁆𑀘 𑀅𑀘𑁆𑀙𑀭𑀺𑀬 𑀥𑀫𑁆𑀫𑀚𑀸𑀢𑀓𑀸𑀮𑁂 𑀉𑀕𑁆𑀖𑁄𑀲𑀦 𑀓𑀻𑀴𑀸𑀓𑀫𑁆𑀫𑀯𑀟𑁆𑀠𑀦𑀯𑀲𑁂𑀦. ‘‘𑀬𑀸𑀲𑀜𑁆𑀘 𑀫𑀦𑁆𑀢𑀧𑀤𑀸𑀦𑀻’’𑀢𑀺 𑀬𑀸𑀲𑀁 𑀦𑀺𑀕𑁆𑀕𑀳 𑀧𑀕𑁆𑀕𑀳𑀧𑀽𑀚𑀦𑀸𑀤𑀺 𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀫𑀦𑁆𑀢𑀧𑀤𑀸𑀦𑀺. ‘‘𑀢𑁂𑀲𑀽’’𑀢𑀺 + 𑀢𑁂𑀲𑀼 𑀘𑀢𑀽𑀲𑀼 𑀅𑀯𑀭𑀼𑀤𑁆𑀥𑀓𑁂𑀲𑀼. ‘‘𑀓𑀻𑀴𑀸𑀲𑁄𑀡𑁆𑀟𑀯𑀲𑁂𑀦𑀸’’𑀢𑀺 𑀓𑀻𑀴𑀸𑀥𑀼𑀢𑁆𑀢𑀯𑀲𑁂𑀦. ‘‘𑀖𑀸𑀲𑀲𑁄𑀡𑁆𑀟𑀯𑀲𑁂𑀦𑀸’’𑀢𑀺 𑀔𑀸𑀤𑀦𑀪𑀼𑀜𑁆𑀚𑀦 𑀥𑀼𑀢𑁆𑀢𑀯𑀲𑁂𑀦. 𑀲𑁄𑀡𑁄 𑀯𑀼𑀘𑁆𑀘𑀢𑀺 𑀲𑀼𑀦𑀔𑁄. ‘‘𑀲𑀢𑁆𑀢𑁂’’ 𑀦𑁂𑀭𑀬𑀺𑀓𑁂 𑀯𑀸 𑀧𑁂𑀢𑁂𑀯𑀸. ‘‘𑀓𑀸𑀫𑀜𑁆𑀘 𑀳𑁄𑀢𑀻’’𑀢𑀺 𑀓𑀺𑀜𑁆𑀘𑀸𑀧𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀦𑀺𑀩𑀦𑁆𑀥𑀦𑁄𑀓𑀸𑀲𑁄’’𑀢𑀺 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀦𑁄𑀓𑀸𑀲𑁄. ‘‘𑀲𑀫𑀼𑀤𑀸𑀕𑀢𑁂𑀲𑀽’’𑀢𑀺 𑀧𑀭𑀫𑁆𑀧𑀭𑀢𑁄 𑀆𑀕𑀢𑁂𑀲𑀼. ‘‘𑀤𑁂𑀯𑀭𑀸𑀚𑀝𑁆𑀞𑀸𑀦𑁂𑀲𑀽’’𑀢𑀺 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀢𑀸𑀯𑀢𑀺𑀁𑀲𑀸𑀪𑀯𑀦𑁂 𑀤𑁂𑀯𑀭𑀸𑀚𑀝𑁆𑀞𑀸𑀦𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀸𑀴𑀺𑀬𑀁 𑀏𑀯𑀸’’𑀢𑀺 𑀤𑀻𑀖𑀦𑀺𑀓𑀸𑀬𑁂 𑀚𑀦𑀯𑀲𑀪𑀲𑀼𑀢𑁆𑀢𑀧𑀸𑀴𑀺𑀬𑀁 𑀏𑀯. 𑀬𑀘𑁆𑀙𑀦𑁆𑀢𑀺 𑀦𑀺𑀬𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀬𑀸𑀫𑁄. ‘‘𑀦𑀺𑀬𑀘𑁆𑀙𑀦𑁆𑀢𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀇𑀲𑁆𑀲𑀸𑀫𑀘𑁆𑀙𑀭𑀺𑀬 𑀫𑀽𑀮𑀓𑁂𑀳𑀺 𑀓𑀮𑀳𑀪𑀡𑁆𑀟𑀦𑀸𑀤𑀻𑀳𑀺 𑀯𑀺𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀁 𑀲𑀳𑀘𑀭𑀺𑀢𑀢𑁆𑀢𑀸’’𑀢𑀺 𑀢𑁂𑀦 𑀬𑀸𑀫 𑀦𑀸𑀫𑀓𑁂𑀦 𑀇𑀲𑁆𑀲𑀭𑀤𑁂𑀯𑀓𑀼𑀮𑁂𑀦 𑀦𑀺𑀘𑁆𑀘𑀓𑀸𑀮𑀁 𑀲𑀳 𑀧𑀯𑀢𑁆𑀢𑀢𑁆𑀢𑀸. ‘‘𑀯𑀲𑀁 𑀯𑀢𑁆𑀢𑁂𑀦𑁆𑀢𑀻’’𑀢𑀺 𑀇𑀘𑁆𑀙𑀁 𑀧𑀽𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀧𑀼𑀭𑁂’’𑀢𑀺 𑀲𑀫𑁆𑀫𑀼𑀔𑀝𑁆𑀞𑀸𑀦𑁂. 𑀢𑀁 𑀧𑀦 𑀞𑀸𑀦𑀁 𑀉𑀘𑁆𑀘𑀝𑁆𑀞𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀉𑀘𑁆𑀘𑁂𑀞𑀸𑀦𑁂’’𑀢𑀺. ‘‘𑀲𑀳𑀲𑁆𑀲𑁄 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦 𑀲𑀳𑀲𑁆𑀲𑀁 𑀘𑀓𑁆𑀓𑀯𑀸𑀴 𑀮𑁄𑀓𑀁 𑀨𑀭𑀦𑁆𑀢𑁄 𑀲𑀳𑀲𑁆𑀲𑁄𑀦𑀸𑀫𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀅𑀥𑀺𑀧𑁆𑀧𑁂𑀢𑀁. 𑀓𑀼𑀮𑀤𑁂𑀯𑀢𑀸𑀬𑁄 𑀦𑀸𑀫 𑀓𑀼𑀮 𑀧𑀭𑀫𑁆𑀧𑀭 𑀧𑀽𑀚𑀺𑀢 𑀤𑁂𑀯𑀢𑀸𑀬𑁄 𑀦𑀸𑀫. ‘‘𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑁂𑀯𑀯𑀢𑁆𑀣𑀼 𑀤𑁂𑀯𑀫𑀸𑀮𑀓𑀸𑀦𑀺 𑀓𑀢𑁆𑀯𑀸 𑀲𑀫𑀬𑁂 𑀲𑀫𑀬𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀺, 𑀯𑀦𑁆𑀤𑀦𑁆𑀢𑀺, 𑀣𑁄𑀫𑁂𑀦𑁆𑀢𑀺, 𑀯𑀭𑀁 𑀧𑀢𑁆𑀣𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀉𑀧𑀝𑁆𑀞𑀓𑀸 𑀏𑀯𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀉𑀧𑀝𑁆𑀞𑀓𑀫𑀢𑁆𑀢𑀸𑀯𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀲𑁆𑀲𑀘𑀻’’𑀢𑀺 𑀓𑀲𑁆𑀲𑀘𑀺 𑀳𑁂𑀝𑁆𑀞𑀺𑀫𑀲𑁆𑀲. ‘‘𑀢𑀢𑁆𑀣𑀸’’𑀢𑀺 𑀢𑀸𑀲𑀼 𑀩𑁆𑀭𑀳𑁆𑀫𑀪𑀽𑀫𑀻𑀲𑀼. 𑀧𑀼𑀦 ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀤𑀼𑀢𑀻𑀬𑀢𑀮𑁂. ‘‘𑀆𑀪𑀸’’𑀢𑀺 𑀲𑀭𑀻𑀭𑀸𑀪𑀸. 𑀦𑀺𑀘𑁆𑀙𑀭𑀦𑁆𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑀺. ‘‘𑀅𑀘𑀮 𑀲𑀡𑁆𑀞𑀺𑀢𑀸’’𑀢𑀺 𑀤𑀼𑀢𑀻𑀬 𑀢𑀮𑁂 𑀯𑀺𑀬 𑀘𑀮𑀺𑀢𑀸 𑀦 𑀳𑁄𑀢𑀺. 𑀅𑀣 𑀔𑁄 𑀅𑀘𑀮 𑀲𑀡𑁆𑀞𑀺𑀢𑀸. ‘‘𑀢𑁂𑀲𑀁’’𑀢𑀺 𑀢𑁂𑀲𑀁𑀯𑀸𑀤𑀻𑀦𑀁 𑀧𑀸𑀞𑁂. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀢𑀺𑀆𑀤𑀺𑀓𑀁 𑀦𑀸𑀫𑀁 𑀦𑀲𑀺𑀤𑁆𑀥𑀁𑀢𑀺 𑀬𑁄𑀚𑀦𑀸. ‘‘𑀇𑀜𑁆𑀚𑀦𑀚𑀸𑀢𑀺𑀓𑁂𑀳𑀻’’𑀢𑀺 𑀘𑀮𑀦𑀚𑀸𑀢𑀺𑀓𑁂𑀳𑀺. ‘‘𑀳𑁂𑀝𑁆𑀞𑀺𑀫𑀢𑀮𑀸𑀦𑀁 𑀇𑀜𑁆𑀚𑀺𑀢𑀁 𑀧𑀼𑀜𑁆𑀜𑀧𑁆𑀨𑀮𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀆𑀦𑁂𑀜𑁆𑀚 𑀚𑀸𑀢𑀺𑀓𑁂𑀦𑀸’’𑀢𑀺 𑀅𑀘𑀮𑀦𑀚𑀸𑀢𑀺𑀓𑁂𑀦 𑀉𑀧𑁂𑀓𑁆𑀔𑀸𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀁 𑀘𑀢𑀼𑀢𑁆𑀣𑀢𑀮𑀸𑀦𑀁. ‘‘𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦𑀸’’𑀢𑀺 𑀢𑁂𑀚𑁄𑀲𑀁𑀯𑀝𑁆𑀝𑀸𑀤𑀺𑀓𑁂𑀦 𑀅𑀦𑁆𑀢𑀭𑀸𑀬𑁂𑀦. ‘‘𑀏𑀢𑁆𑀣𑀧𑀻’’𑀢𑀺 𑀏𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀢𑀮𑁂𑀧𑀺. ‘‘𑀆𑀬𑀼 𑀯𑁂𑀫𑀢𑁆𑀢𑀢𑀸𑀬𑀸’’𑀢𑀺 𑀆𑀬𑀼𑀧𑁆𑀧𑀫𑀸𑀡𑀦𑀸𑀦𑀢𑁆𑀢𑀲𑁆𑀲. ‘‘𑀑𑀴𑀸𑀭𑀺𑀓𑀸𑀦𑀁’’𑀢𑀺 𑀇𑀤𑀁 𑀧𑀓𑀢𑀺𑀬𑀸 𑀑𑀴𑀸𑀭𑀺𑀓 𑀲𑀪𑀸𑀯𑀢𑀸𑀬 𑀯𑀼𑀢𑁆𑀢𑀁. 𑀦 𑀲𑀼𑀔𑀼𑀫𑀸𑀦𑀁 𑀅𑀢𑁆𑀣𑀺𑀢𑀸𑀬. 𑀦𑀢𑁆𑀣𑀺 𑀯𑀺𑀳𑀜𑁆𑀜𑀦𑀁 𑀏𑀢𑁂𑀲𑀦𑁆𑀢𑀺 𑀅𑀯𑀺𑀳𑀸. 𑀓𑀺𑀁 𑀯𑀺𑀳𑀜𑁆𑀜𑀦𑀁 𑀦𑀸𑀫𑀸𑀢𑀺 𑀆𑀳 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑁂𑀲𑀼 𑀅𑀯𑀺𑀧𑁆𑀨𑀸𑀭𑀺𑀓𑀢𑀸 𑀧𑀢𑁆𑀢𑀻’’𑀢𑀺. 𑀘𑀺𑀢𑁆𑀢𑀲𑁆𑀲 𑀅𑀯𑀺𑀧𑁆𑀨𑀸𑀭𑀢𑀸 𑀧𑀚𑁆𑀚𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀲𑀸𑀤 𑀤𑀺𑀩𑁆𑀩 𑀥𑀫𑁆𑀫 𑀧𑀜𑁆𑀜𑀸 𑀘𑀓𑁆𑀔𑀽𑀳𑀻’’𑀢𑀺 ‘𑀧𑀲𑀸𑀤 𑀘𑀓𑁆𑀔𑀼, 𑀤𑀺𑀩𑁆𑀩𑀘𑀓𑁆𑀔𑀼, 𑀥𑀫𑁆𑀫𑀘𑀓𑁆𑀔𑀼, 𑀧𑀜𑁆𑀜𑀸 𑀘𑀓𑁆𑀔𑀽, 𑀳𑀺. 𑀢𑀢𑁆𑀣 𑀧𑀲𑀸𑀤𑀘𑀓𑁆𑀔𑀼 𑀏𑀯 𑀇𑀥 𑀤𑀺𑀩𑁆𑀩𑀘𑀓𑁆𑀔𑀽𑀢𑀺𑀧𑀺 𑀯𑀼𑀘𑁆𑀘𑀢𑀺. ‘‘𑀥𑀫𑁆𑀫 𑀘𑀓𑁆𑀔𑀽’’𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀜𑁆𑀜𑀸𑀡𑀁. ‘‘𑀧𑀜𑁆𑀜𑀸 𑀘𑀓𑁆𑀔𑀽’’𑀢𑀺 𑀯𑀺𑀧𑀲𑁆𑀲𑀦𑀸 𑀜𑀸𑀡𑀧𑀘𑁆𑀘𑀯𑁂𑀓𑁆𑀔𑀦𑀸𑀜𑀸𑀡𑁂𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀁 𑀲𑀩𑁆𑀩𑀜𑁆𑀜𑀸𑀡𑀁. ‘‘𑀭𑀽𑀧𑀻𑀦𑀁 𑀲𑀢𑁆𑀢𑀸𑀦𑀁’’𑀢𑀺 𑀭𑀽𑀧𑀓𑀸𑀬𑀯𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁. ‘‘𑀓𑀦𑀺𑀝𑁆𑀞𑀪𑀸𑀯𑁄’’𑀢𑀺 𑀅𑀧𑁆𑀧𑀢𑀭𑀪𑀸𑀯𑁄. ‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑀲𑁆𑀲𑀧𑀺 𑀧𑀝𑀺𑀓𑁆𑀔𑁂𑀧𑁄’’𑀢𑀺 𑀲𑀓𑀤𑀸𑀕𑀸𑀫𑀺𑀪𑀸𑀯𑁂𑀞𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲𑁂𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀦𑁄 𑀅𑀜𑁆𑀜𑀣𑀸𑀢𑀺 𑀆𑀳 ‘‘𑀲𑀓𑀤𑀸𑀕𑀸𑀫𑀻𑀦𑀁 𑀧𑀝𑀺𑀓𑁆𑀔𑁂𑀧𑁂𑀦𑀸’’𑀢𑀺𑀆𑀤𑀺𑀁.

𑀪𑀽𑀫𑀺𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁪𑁪. 𑀪𑀯𑀦𑁆𑀢𑀭𑁂 𑀑𑀓𑁆𑀓𑀫𑀦𑁆𑀢𑀺 𑀏𑀢𑀸𑀬𑀸𑀢𑀺 𑀑𑀓𑁆𑀓𑀦𑁆𑀢𑀻𑀢𑀺 𑀧𑀺𑀬𑀼𑀚𑁆𑀚𑀢𑀺. ‘‘𑀲𑁄𑀢𑀭𑀳𑀺𑀢𑁄’’𑀢𑀺 𑀧𑀲𑀸𑀤𑀲𑁄𑀢𑀭𑀳𑀺𑀢𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. ‘‘𑀆𑀲𑀺𑀢𑁆𑀢𑀓𑀸𑀤𑀺𑀪𑀸𑀯𑁂𑀦𑀸’’𑀢𑀺 𑀆𑀲𑀺𑀢𑁆𑀢𑀓𑀧𑀡𑁆𑀟𑀓𑀸𑀤𑀺 𑀪𑀸𑀯𑁂𑀦. ‘‘𑀤𑁆𑀯𑀻𑀳𑀺 𑀩𑁆𑀬𑀜𑁆𑀚𑀦𑁂𑀳𑀻’’𑀢𑀺 𑀤𑁆𑀯𑀻𑀳𑀺 𑀦𑀺𑀫𑀺𑀢𑁆𑀢𑁂𑀳𑀺. ‘‘𑀯𑀺𑀩𑀘𑁆𑀙𑀯𑀘𑀦𑁄’’𑀢𑀺 𑀯𑀺𑀧𑀦𑁆𑀦𑀯𑀘𑀦𑁄. ‘‘𑀯𑀢𑁆𑀣𑀼 𑀯𑀺𑀧𑀦𑁆𑀦𑀲𑁆𑀲𑀸’’𑀢𑀺 𑀏𑀢𑁆𑀣 ‘‘𑀯𑀢𑁆𑀣𑀽’’𑀢𑀺 𑀲𑀫𑁆𑀪𑀸𑀭 𑀘𑀓𑁆𑀔𑀼 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀧𑀦𑁆𑀦𑀢𑁆𑀢𑀸 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀲𑁆𑀲 𑀢𑀲𑁆𑀲𑀸’’𑀢𑀺 𑀘𑀓𑁆𑀔𑀼𑀲𑁄 𑀢𑀸𑀤𑀺𑀓𑀲𑁆𑀲.‘‘𑀧𑀲𑀽𑀢𑀺𑀬𑀁 𑀬𑁂𑀯𑀸’’𑀢𑀺 𑀯𑀺𑀚𑀸𑀬𑀫𑀸𑀦𑀓𑀸𑀮𑁂𑀬𑁂𑀯. ‘‘𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀪𑀸𑀯𑀲𑁆𑀲𑀸’’𑀢𑀺 𑀏𑀢𑁆𑀣 𑀩𑁆𑀬𑀢𑁆𑀢𑀲𑁆𑀲 𑀪𑀸𑀯𑁄 𑀯𑁂𑀬𑁆𑀬𑀢𑁆𑀢𑀺𑀬𑀁. ‘‘𑀩𑁆𑀬𑀢𑁆𑀢𑀲𑁆𑀲𑀸’’𑀢𑀺 𑀨𑀭𑀡𑀜𑁆𑀜𑀸𑀡𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀧𑀜𑁆𑀜𑀸 𑀲𑀗𑁆𑀔𑀸𑀢𑀁 𑀯𑁂𑀬𑁆𑀬𑀢𑁆𑀢𑀺𑀬𑀁 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀤𑁆𑀯𑀺𑀳𑁂𑀢𑀼𑀓 𑀢𑀺𑀳𑁂𑀢𑀼𑀓𑀸𑀦𑀁𑀧𑀺 𑀦 𑀲𑀓𑁆𑀓𑀸 𑀦𑀺𑀬𑀫𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀦 𑀲𑀓𑁆𑀓𑀸𑀢𑀺 𑀆𑀳 ‘‘𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀯𑀺𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻’’𑀢𑀺. 𑀓𑀢𑀫𑁂𑀲𑀁 𑀯𑀺𑀧𑀢𑁆𑀢𑀻𑀢𑀺. 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀘𑀓𑁆𑀔𑀼 𑀲𑁄𑀢𑀸𑀦𑀁 𑀯𑀺𑀧𑀢𑁆𑀢𑀺. 𑀓𑁂𑀦𑀓𑀸𑀭𑀡𑁂𑀦 𑀯𑀺𑀧𑀢𑁆𑀢𑀻𑀢𑀺. 𑀧𑀭𑀽𑀧𑀓𑁆𑀓𑀫𑁂𑀦𑀯𑀸 𑀫𑀸𑀢𑀼𑀬𑀸 𑀯𑀺𑀲𑀫 𑀧𑀬𑁄𑀕𑁂𑀦 𑀯𑀸 𑀦𑀸𑀦𑀸𑀩𑀸𑀥𑁂𑀦 𑀯𑀸 𑀯𑀺𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀥𑀸𑀢𑀼𑀧𑀸𑀞𑁂 𑀬𑀓𑁆𑀔 𑀧𑀽𑀚𑀸𑀬𑀁𑀢𑀺 𑀧𑀞𑀺𑀢𑀢𑁆𑀢𑀸 ‘‘𑀧𑀽𑀚𑀦𑀻𑀬𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀬𑀓𑁆𑀔𑀺𑀢𑀩𑁆𑀩𑀸 𑀧𑀽𑀚𑀺𑀢𑀩𑁆𑀩𑀸 𑀬𑀓𑁆𑀔𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂 𑀧𑀦 𑀓𑀺𑀘𑁆𑀙𑀚𑀻𑀯𑀺𑀓𑀧𑀢𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀢𑁂 𑀪𑀽𑀫𑀲𑁆𑀲𑀺𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀪𑀽𑀫𑀺𑀲𑁆𑀲𑀺𑀢𑀸’’𑀢𑀺 𑀧𑀸𑀞𑁂 𑀪𑀽𑀫𑀺𑀬𑀁 𑀲𑀺𑀢𑀸 𑀦𑀺𑀲𑁆𑀲𑀺𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑀺𑀭𑀽𑀧𑀸 𑀳𑀼𑀢𑁆𑀯𑀸’’𑀢𑀺 𑀢𑁂 𑀯𑀡𑁆𑀡𑀢𑁄𑀧𑀺 𑀤𑀼𑀩𑁆𑀩𑀡𑁆𑀡𑀸 𑀳𑁄𑀦𑁆𑀢𑀺. 𑀲𑀡𑁆𑀞𑀸𑀦𑀢𑁄𑀧𑀺 𑀤𑀼𑀲𑁆𑀲𑀡𑁆𑀞𑀸𑀦𑀸. 𑀚𑀻𑀯𑀺𑀓𑀢𑁄𑀧𑀺 𑀓𑀺𑀘𑁆𑀙𑀚𑀻𑀯𑀺𑀓𑀸𑀢𑀺𑀆𑀤𑀺𑀦𑀸 𑀯𑀺𑀧𑀦𑁆𑀦𑀭𑀽𑀧𑀸 𑀳𑀼𑀢𑁆𑀯𑀸. ‘𑀯𑀺𑀯𑀲𑀸 𑀳𑀼𑀢𑁆𑀯𑀸 𑀦𑀺𑀧𑀢𑀦𑁆𑀢𑀻’𑀢𑀺 𑀯𑀺𑀦𑀺𑀧𑀸𑀢𑀺𑀓𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀺𑀯𑀲𑀸𑀢𑀺 𑀘 𑀅𑀢𑁆𑀢𑀦𑁄 𑀯𑀲𑁂𑀦 𑀇𑀘𑁆𑀙𑀸𑀬 𑀯𑀺𑀦𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑁂𑀲𑀽’’𑀢𑀺 𑀚𑀦𑀯𑀺𑀯𑀺𑀢𑁆𑀢𑁂𑀲𑀼 𑀞𑀸𑀦𑁂𑀲𑀼. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀻𑀴𑁂𑀢𑁆𑀯𑀸 𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀢𑀸𑀲𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀯𑁂𑀫𑀸𑀦𑀺𑀓𑀧𑁂𑀢𑀸𑀧𑀻’’𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀁 𑀤𑀺𑀩𑁆𑀩𑀯𑀺𑀫𑀸𑀦𑀁 𑀬𑁂𑀲𑀁 𑀅𑀢𑁆𑀣𑀺, 𑀢𑁂 𑀯𑁂𑀫𑀸𑀦𑀺𑀓𑀸. 𑀢𑁂 𑀧𑀦 𑀧𑀼𑀜𑁆𑀜𑀸𑀧𑀼𑀜𑁆𑀜𑀫𑀺𑀲𑁆𑀲𑀓 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑁂𑀘𑀺 𑀤𑀺𑀯𑀸 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀭𑀢𑁆𑀢𑀺𑀁 𑀧𑁂𑀢𑀤𑀼𑀓𑁆𑀔𑀁. 𑀓𑁂𑀘𑀺 𑀭𑀢𑁆𑀢𑀺𑀁 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀤𑀺𑀯𑀸 𑀧𑁂𑀢𑀤𑀼𑀓𑁆𑀔𑀦𑁆𑀢𑀺. 𑀧𑀭𑁂𑀳𑀺 𑀤𑀢𑁆𑀢𑀁 𑀤𑀺𑀦𑁆𑀦𑀁 𑀧𑀼𑀜𑁆𑀜𑀧𑁆𑀨𑀮𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄. ‘‘𑀧𑀭𑁂𑀳𑀺 𑀤𑀺𑀦𑁆𑀦𑀁 𑀧𑀼𑀜𑁆𑀜𑀧𑁆𑀨𑀮𑀁’’𑀢𑀺 𑀜𑀸𑀢𑀓𑁂𑀳𑀺 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀇𑀤𑀁 𑀫𑁂 𑀧𑀼𑀜𑁆𑀜𑀁 𑀧𑁂𑀢𑀸𑀦𑀁 𑀓𑀸𑀮𑀗𑁆𑀓𑀢𑀸𑀦𑀁 𑀜𑀸𑀢𑀻𑀦𑀁 𑀤𑁂𑀥𑀻𑀢𑀺 𑀏𑀯𑀁 𑀤𑀺𑀦𑁆𑀦𑀁 𑀧𑀼𑀜𑁆𑀜𑀧𑁆𑀨𑀮𑀁. ‘‘𑀲𑀓𑀮𑀘𑀓𑁆𑀓𑀯𑀸𑀴𑀧𑀭𑀺𑀬𑀸𑀧𑀦𑁆𑀦𑀸 𑀏𑀓𑀪𑀽𑀫𑀓𑀸’’𑀢𑀺 𑀬𑀣𑀸 𑀢𑀸𑀯𑀢𑀺𑀁𑀲𑀸𑀪𑀽𑀫𑀺 𑀦𑀸𑀫 𑀲𑀩𑁆𑀩 𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀅𑀢𑁆𑀣𑀺. 𑀲𑀩𑁆𑀩𑀸𑀧𑀺 𑀤𑀺𑀩𑁆𑀩𑁂𑀦 𑀯𑀲𑁆𑀲𑀲𑀳𑀲𑁆𑀲𑁂𑀦 𑀏𑀓𑀆𑀬𑀼 𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀦 𑀢𑀣𑀸 𑀦𑀺𑀭𑀬𑁂𑀲𑀼 𑀯𑀸 𑀢𑀺𑀭𑀘𑁆𑀙𑀸𑀦 𑀬𑁄𑀦𑀺𑀬𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑁂𑀯𑀸 𑀅𑀲𑀼𑀭𑀓𑀸𑀬𑁂𑀯𑀸 𑀫𑀦𑀼𑀲𑁆𑀲𑁂𑀲𑀼𑀯𑀸 𑀪𑀼𑀫𑁆𑀫𑀤𑁂𑀯𑁂𑀲𑀼 𑀯𑀸 𑀏𑀓𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀅𑀢𑁆𑀣𑀺. 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁 𑀆𑀬𑀼𑀧𑁆𑀧𑀫𑀸𑀡 𑀕𑀡𑀦𑀸𑀬 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁, 𑀦 𑀦𑀼 𑀩𑁆𑀭𑀳𑁆𑀫 𑀲𑀁𑀬𑀼𑀢𑁆𑀢𑁂 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀕𑀯𑀢𑀸 𑀯𑀼𑀢𑁆𑀢𑁄 𑀤𑀲𑀦𑁆𑀦𑀁 𑀦𑀺𑀭𑀬𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑀻𑀢𑀺. 𑀲𑀘𑁆𑀘𑀁 𑀅𑀢𑁆𑀣𑀺. 𑀢𑁂 𑀧𑀦 𑀤𑀲𑀦𑀺𑀭𑀬𑀸 𑀅𑀯𑀻𑀘𑀺𑀦𑀺𑀭𑀬𑁂 𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀧𑀤𑁂𑀲𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀦 𑀢𑁂𑀳𑀺 𑀧𑀤𑁂 𑀲𑀫𑀢𑁆𑀢𑁂𑀳𑀺 𑀲𑀓𑀮𑁄 𑀅𑀯𑀻𑀘𑀺𑀦𑀺𑀭𑀬𑁄 𑀦𑀺𑀬𑀢𑀸𑀬𑀼 𑀧𑀭𑀺𑀫𑀸𑀡𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀧𑀺 𑀘 𑀲𑁄𑀧𑀺 𑀢𑁂𑀲𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀅𑀯𑀻𑀘𑀺𑀪𑀽𑀫𑀺𑀬𑀸 𑀦𑀺𑀬𑀸𑀫𑁂𑀦 𑀲𑀺𑀤𑁆𑀥𑁄 𑀦 𑀳𑁄𑀢𑀺. 𑀢𑁂𑀦 𑀢𑁂𑀦 𑀓𑀫𑁆𑀫𑀯𑀺𑀲𑁂𑀲𑁂𑀦𑁂𑀯 𑀲𑀺𑀤𑁆𑀥𑁄. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀬𑁂𑀪𑀽𑀬𑁆𑀬𑁂𑀦 𑀓𑀫𑁆𑀫𑀧𑁆𑀧𑀫𑀸𑀡𑀢𑁆𑀢𑀸’’𑀢𑀺, 𑀢𑀁 𑀲𑀼 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣 𑀦𑀺𑀭𑀬𑁂𑀲𑀽’’𑀢𑀺𑀆𑀤𑀺𑀁. ‘‘𑀏𑀯𑀁 𑀲𑀦𑁆𑀢𑁂’’𑀢𑀺 𑀦 𑀇𑀢𑀭 𑀤𑀻𑀧𑀯𑀸𑀲𑀻𑀦𑀁 𑀆𑀬𑀼𑀓𑀧𑁆𑀧𑀲𑁆𑀲 𑀆𑀭𑁄𑀳𑀡𑀜𑁆𑀘 𑀑𑀭𑁄𑀳𑀡𑀜𑁆𑀘 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀘𑀸𑀭𑁄 𑀦𑀸𑀫 𑀤𑀲𑀲𑀼𑀘𑀭𑀺𑀢𑀸𑀦𑀺. 𑀯𑀺𑀲𑀫𑀸𑀘𑀸𑀭𑁄 𑀦𑀸𑀫 𑀤𑀲𑀤𑀼𑀘𑁆𑀘𑀭𑀺𑀢𑀸𑀦𑀺. 𑀢𑁂𑀲𑀁 𑀦𑀺𑀲𑁆𑀲𑀦𑁆𑀤𑀪𑀽𑀢𑀸 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀲𑀁 𑀧𑀻’’𑀢𑀺 𑀇𑀢𑀭 𑀤𑀻𑀧𑀯𑀸𑀲𑀻𑀦𑀁𑀧𑀺. 𑀲𑁄 𑀏𑀯𑀧𑀭𑀺𑀘𑁆𑀙𑁂𑀤𑁄𑀢𑀺 𑀆𑀧𑀚𑁆𑀚𑀢𑀺. 𑀦 𑀘 𑀲𑀓𑁆𑀓𑀸 𑀢𑀣𑀸 𑀪𑀯𑀺𑀢𑀼𑀁. 𑀆𑀤𑀺𑀓𑀧𑁆𑀧𑀓𑀸𑀮𑁂 𑀲𑀩𑁆𑀩𑁂𑀲𑀫𑁆𑀧𑀺 𑀘𑀢𑀼𑀤𑀻𑀧 𑀯𑀸𑀲𑀻𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀢𑀸 𑀲𑀫𑁆𑀪𑀯𑀢𑁄𑀢𑀺. 𑀅𑀣 𑀇𑀢𑀭𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀆𑀬𑀼𑀓𑀧𑁆𑀧𑀲𑁆𑀲 𑀆𑀭𑁄𑀳𑀡𑀁 𑀑𑀭𑁄𑀳𑀡𑀜𑁆𑀘 𑀅𑀢𑁆𑀣𑀺. 𑀏𑀯𑀁 𑀲𑀢𑀺, 𑀏𑀢𑀭𑀳𑀺𑀧𑀺 𑀢𑁂𑀲𑀁 𑀆𑀬𑀼𑀓𑀧𑁆𑀧𑁄 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀆𑀬𑀼𑀓𑀧𑁆𑀧𑁂𑀦 𑀏𑀓𑀕𑀢𑀺𑀓𑁄 𑀲𑀺𑀬𑀸𑀢𑀺 𑀘𑁄𑀤𑀦𑀸. 𑀦𑀺𑀲𑁆𑀲𑀦𑁆𑀤𑀫𑀢𑁆𑀢𑀢𑁆𑀢𑀸𑀢𑀺𑀆𑀤𑀺 𑀧𑀭𑀺𑀳𑀸𑀭𑁄. 𑀦𑀢𑁆𑀣𑀺 𑀇𑀤𑀁 𑀫𑀫 𑀇𑀤𑀁 𑀫𑀫𑀸𑀢𑀺 𑀧𑀯𑀢𑁆𑀢𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀢𑀡𑁆𑀳𑀸 𑀏𑀢𑁂𑀲𑀦𑁆𑀢𑀺 ‘‘𑀅𑀫𑀫𑀸’’. ‘‘𑀅𑀧𑀭𑀺𑀕𑁆𑀕𑀳𑀸’’𑀢𑀺 𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀕𑁆𑀕𑀳𑀭𑀳𑀺𑀢𑀸. ‘‘𑀉𑀧𑀭𑀺𑀫𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂’’𑀢𑀺 𑀆𑀓𑀸𑀲𑀝𑁆𑀞𑀓𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂. 𑀤𑀺𑀯𑁂 𑀤𑁂𑀯𑀮𑁄𑀓𑁂 𑀲𑀺𑀤𑁆𑀥𑀸𑀦𑀺 𑀤𑀺𑀩𑁆𑀩𑀸𑀦𑀺. ‘‘𑀬𑀸𑀯 𑀦𑀺𑀫𑀺𑀭𑀸𑀚𑀓𑀸𑀮𑀸’’𑀢𑀺 𑀬𑀸𑀯 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀦𑀺𑀫𑀺𑀭𑀜𑁆𑀜𑁄 𑀉𑀧𑁆𑀧𑀦𑁆𑀦𑀓𑀸𑀮𑀸. 𑀓𑀲𑁆𑀲 𑀧𑀩𑀼𑀤𑁆𑀥𑁄 𑀧𑀼𑀭𑀺𑀫𑁂 𑀅𑀦𑁆𑀢𑀭𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑁄. 𑀦𑀺𑀫𑀺𑀭𑀸𑀚𑀸 𑀧𑀦 𑀇𑀫𑀲𑁆𑀫𑀺𑀁 𑀅𑀦𑁆𑀢𑀭 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑁄. ‘‘𑀫𑀦𑀼𑀲𑁆𑀲 𑀮𑁄𑀓𑁂𑀳𑀺 𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀏𑀓𑁄𑀤𑀺𑀩𑁆𑀩𑀭𑀢𑁆𑀢𑀺𑀤𑀺𑀯𑁄 𑀳𑁄𑀢𑀻’’𑀢𑀺𑀆𑀤𑀺 𑀅𑀪𑀺𑀥𑀫𑁆𑀫𑁂 𑀥𑀫𑁆𑀫 𑀳𑀤𑀬 𑀯𑀺𑀪𑀗𑁆𑀕𑁂 𑀆𑀕𑀢𑀦𑀬𑁂𑀦 𑀯𑀼𑀢𑁆𑀢𑁄. 𑀘𑀢𑀼𑀕𑁆𑀕𑀼𑀡𑀯𑀘𑀦𑁂. ‘‘𑀉𑀧𑀭𑀺𑀫𑀸𑀦𑀁’’𑀢𑀺 𑀉𑀧𑀭𑀺𑀫𑀸𑀦𑀁 𑀤𑁂𑀯𑀸𑀦𑀁. 𑀏𑀓𑀁 𑀯𑀲𑁆𑀲𑀲𑀳𑀲𑁆𑀲𑀁 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑁆𑀯𑁂’’𑀢𑀺 𑀤𑁆𑀯𑁂 𑀯𑀲𑁆𑀲𑀲𑀳𑀲𑁆𑀲𑀸𑀦𑀺. ‘‘𑀅𑀝𑁆𑀞𑀸’’𑀢𑀺 𑀅𑀝𑁆𑀞𑀯𑀲𑁆𑀲𑀲𑀳𑀲𑁆𑀲𑀸𑀦𑀺. ‘‘𑀳𑁂𑀝𑁆𑀞𑀺𑀫𑀸𑀦𑀁’’𑀢𑀺 𑀳𑁂𑀝𑁆𑀞𑀺𑀫𑀸𑀦𑀁 𑀤𑁂𑀯𑀸𑀦𑀁. ‘‘𑀉𑀧𑀭𑀺𑀫𑀸𑀦𑀁’’𑀢𑀺 𑀉𑀧𑀭𑀺𑀫𑀸𑀦𑀁 𑀤𑁂𑀯𑀸𑀦𑀁. 𑀬𑀸𑀫𑁂 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀘𑀢𑁆𑀢𑀸𑀭𑀻’’𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀘𑀢𑁆𑀢𑀸𑀭𑀺 𑀯𑀲𑁆𑀲𑀲𑀢𑀸𑀦𑀺. 𑀏𑀯𑀁 𑀲𑁂𑀲𑁂𑀲𑀼. ‘‘𑀆𑀤𑀺𑀅𑀦𑁆𑀢 𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀫𑀦𑀼𑀲𑁆𑀲𑀯𑀲𑁆𑀲𑀕𑀡𑀦𑀸 𑀤𑀲𑁆𑀲𑀦𑀁 𑀆𑀤𑀺𑀤𑀲𑁆𑀲𑀦𑀁 𑀦𑀸𑀫. 𑀇𑀤𑀸𑀦𑀺 𑀯𑀲𑀯𑀢𑁆𑀢𑀺𑀬𑀁 𑀫𑀦𑀼𑀲𑁆𑀲𑀯𑀲𑁆𑀲𑀕𑀡𑀦𑀸 𑀤𑀲𑁆𑀲𑀦𑀁 𑀅𑀦𑁆𑀢 𑀤𑀲𑁆𑀲𑀦𑀁 𑀦𑀸𑀫.

𑀦 𑀅𑀢𑀺𑀤𑀼𑀩𑁆𑀩𑀮𑀁𑀢𑀺 𑀦𑀸𑀢𑀺𑀤𑀼𑀩𑁆𑀩𑀮𑀁. ‘‘𑀢𑀁’’𑀢𑀺 𑀢𑀁 𑀅𑀯𑀺𑀢𑀓𑁆𑀓 𑀅𑀯𑀺𑀘𑀸𑀭𑀫𑀢𑁆𑀢𑀛𑀸𑀦𑀁. ‘‘𑀪𑀽𑀫𑀦𑁆𑀢𑀭𑁂’’𑀢𑀺 𑀧𑀣𑀫𑀚𑁆𑀛𑀸𑀦𑀪𑀽𑀫𑀺𑀢𑁄 𑀅𑀜𑁆𑀜𑀺𑀲𑁆𑀲𑀁 𑀤𑀼𑀢𑀻𑀬𑀚𑁆𑀛𑀸𑀦𑀪𑀽𑀫𑀺𑀬𑀁. 𑀓𑀧𑁆𑀧𑀯𑀘𑀦𑁂. 𑀓𑀧𑁆𑀧𑀻𑀬𑀢𑀺 𑀯𑀲𑁆𑀲, 𑀉𑀢𑀼, 𑀫𑀸𑀲, 𑀧𑀓𑁆𑀔, 𑀭𑀢𑁆𑀢𑀺, 𑀤𑀺𑀯𑀸, 𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀻𑀬𑀢𑀻𑀢𑀺 𑀓𑀧𑁆𑀧𑁄. 𑀓𑀧𑁆𑀧𑀻𑀬𑀦𑁆𑀢𑀺 𑀯𑀸 𑀦𑀸𑀦𑀸𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑁄 𑀅𑀢𑀻𑀢𑀸 𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀓𑀧𑁆𑀧𑁄. 𑀓𑀸𑀮𑁄. 𑀫𑀳𑀦𑁆𑀢𑁄 𑀓𑀧𑁆𑀧𑁄𑀢𑀺 𑀫𑀳𑀸𑀓𑀧𑁆𑀧𑁄. 𑀯𑀲𑁆𑀲𑀸𑀦𑀁 𑀲𑀢𑀪𑀸𑀕𑁂𑀳𑀺𑀧𑀺 𑀲𑀳𑀲𑁆𑀲𑀪𑀸𑀕𑁂𑀳𑀺𑀧𑀺 𑀲𑀢𑀲𑀳𑀲𑁆𑀲𑀪𑀸𑀕𑁂𑀳𑀺𑀧𑀺 𑀲𑀗𑁆𑀔𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁄. 𑀏𑀓𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀅𑀦𑁆𑀢𑀭𑁂 𑀤𑀺𑀲𑁆𑀲𑀫𑀸𑀦𑁄 𑀓𑀧𑁆𑀧𑁄 𑀅𑀦𑁆𑀢𑀭𑀓𑀧𑁆𑀧𑁄. 𑀲𑀢𑁆𑀢𑀸𑀦𑀁 𑀦𑀸𑀦𑀸𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀆𑀬𑀼𑀓𑀧𑁆𑀧𑁄. 𑀲𑁄 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀤𑀲𑀯𑀲𑁆𑀲𑀸𑀬𑀼𑀓𑀓𑀸𑀮𑁂 𑀤𑀲𑀯𑀲𑁆𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀦𑁂𑀯𑀲𑀜𑁆𑀜𑀸 𑀤𑁂𑀯𑀸𑀦𑀁 𑀦𑀺𑀘𑁆𑀘𑀓𑀸𑀮𑀁 𑀘𑀢𑀼𑀭𑀸𑀲𑀻𑀢𑀺 𑀓𑀧𑁆𑀧𑀲𑀳𑀲𑁆𑀲𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀅𑀦𑁆𑀢𑀭𑀓𑀧𑁆𑀧𑁄 𑀦𑀸𑀫 𑀘𑀽𑀴𑀓𑀧𑁆𑀧𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀻𑀲𑀢𑀺𑀧𑁆𑀧𑀪𑁂𑀤𑀸 𑀘𑀽𑀴𑀓𑀧𑁆𑀧𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑀦𑀸. ‘‘𑀬𑁂’’𑀢𑀺 𑀬𑁂 𑀘𑀢𑀼𑀲𑀝𑁆𑀞𑀺𑀬𑀸𑀤𑀺𑀪𑁂𑀤𑀸 𑀅𑀦𑁆𑀢𑀭𑀓𑀧𑁆𑀧𑀸. ‘‘𑀬𑀣𑀸𑀯𑀺𑀦𑀝𑁆𑀞𑀁’’𑀢𑀺 𑀯𑀺𑀦𑀝𑁆𑀞𑀧𑁆𑀧𑀓𑀸𑀭𑁂𑀦 𑀯𑀺𑀦𑀝𑁆𑀞𑀧𑁆𑀧𑀓𑀢𑀺𑀬𑀸. 𑀯𑀟𑁆𑀠𑀫𑀸𑀦𑁄 𑀓𑀧𑁆𑀧𑁄 𑀯𑀺𑀯𑀝𑁆𑀝𑁄. ‘‘𑀬𑀣𑀸𑀯𑀺𑀯𑀝𑁆𑀝𑀁’’𑀢𑀺 𑀯𑀺𑀯𑀝𑁆𑀝𑀧𑁆𑀧𑀓𑀸𑀭𑁂𑀦 𑀯𑀺𑀯𑀝𑁆𑀝𑀧𑁆𑀧𑀓𑀢𑀺𑀬𑀸. 𑀅𑀘𑁆𑀘𑀬𑁂𑀦 𑀅𑀢𑀺𑀓𑁆𑀓𑀫𑀦𑁂𑀦. 𑀳𑀭𑀡𑁂𑀦 𑀅𑀧𑀦𑀬𑀦𑁂𑀦. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀓𑀧𑁆𑀧𑀯𑀘𑀦𑁂. 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀚𑁂𑀦𑀸’’𑀢𑀺 𑀅𑀕𑁆𑀕𑀺𑀦𑀸. ‘‘𑀲𑀁𑀯𑀝𑁆𑀝𑀢𑀻’’𑀢𑀺 𑀯𑀺𑀦𑀲𑁆𑀲𑀢𑀺 𑀢𑀤𑀸. ‘‘𑀳𑁂𑀝𑁆𑀞𑀸’’𑀢𑀺 𑀳𑁂𑀝𑁆𑀞𑀸𑀮𑁄𑀓𑁄. ‘‘𑀘𑀢𑀼𑀲𑀝𑁆𑀞𑀺𑀯𑀸𑀭𑁂𑀲𑀽’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀘𑀦𑀁.

𑀕𑀸𑀣𑀸𑀲𑀼. ‘‘𑀲𑀢𑁆𑀢𑀲𑀢𑁆𑀢𑀕𑁆𑀕𑀺𑀦𑀸𑀯𑀸𑀭𑀸’’𑀢𑀺 𑀲𑀢𑁆𑀢𑀲𑀢𑁆𑀢𑀯𑀸𑀭𑀸 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀅𑀣𑀯𑀸, 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀲𑀢𑁆𑀢𑀲𑀼𑀲𑀢𑁆𑀢𑀲𑀼𑀯𑀸𑀭𑁂𑀲𑀼 𑀮𑁄𑀓𑁄 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀅𑀝𑁆𑀞𑀫𑁂 𑀅𑀝𑁆𑀞𑀫𑁂’’𑀢𑀺. ‘‘𑀤𑀓𑀸’’𑀢𑀺 𑀉𑀤𑀓𑁂𑀦. 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂𑀯𑀸𑀭𑁂 𑀮𑁄𑀓𑁄 𑀤𑀓𑁂𑀦 𑀯𑀺𑀦𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀬𑀤𑀸 𑀘𑀢𑀼𑀲𑀝𑁆𑀞𑀺𑀯𑀸𑀭𑀸 𑀧𑀼𑀡𑁆𑀡𑀸, 𑀢𑀤𑀸 𑀏𑀓𑁄 𑀯𑀸𑀬𑀼𑀯𑀸𑀭𑁄 𑀲𑀺𑀬𑀸. 𑀢𑀢𑁆𑀣 ‘‘𑀢𑀤𑀸’’𑀢𑀺 𑀢𑀲𑁆𑀫𑀺𑀁 𑀘𑀢𑀼𑀲𑀝𑁆𑀞𑀺𑀯𑀸𑀭𑁂. ‘‘𑀯𑀺𑀯𑀝𑁆𑀝𑀫𑀸𑀦𑀁’’𑀢𑀺 𑀲𑀡𑁆𑀞𑀳𑀫𑀸𑀦𑀁. ‘‘𑀯𑀺𑀯𑀝𑁆𑀝𑀢𑀻’’𑀢𑀺 𑀲𑀡𑁆𑀞𑀳𑀢𑀺. ‘‘𑀲𑀁𑀯𑀝𑁆𑀝𑀫𑀸𑀦𑀁’’𑀢𑀺 𑀯𑀺𑀦𑀲𑁆𑀲𑀫𑀸𑀦𑀁. ‘‘𑀲𑀁𑀯𑀝𑁆𑀝𑀢𑀻’’𑀢𑀺 𑀯𑀺𑀦𑀲𑁆𑀲𑀢𑀺. ‘‘𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺 𑀅𑀟𑁆𑀠𑀤𑁆𑀯𑀬𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀦𑁆𑀢𑀺 𑀓𑀢𑁆𑀯𑀸 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑀁. 𑀬𑀣𑀸𑀢𑀁-𑀆𑀪𑀲𑁆𑀲𑀭𑀸𑀦𑀁 𑀅𑀝𑁆𑀞𑀓𑀧𑁆𑀧𑀸𑀦𑀻𑀢𑀺. ‘‘𑀉𑀧𑀟𑁆𑀠𑁂𑀦𑀸’’𑀢𑀺 𑀉𑀤𑀓𑀯𑀸𑀭𑁂 𑀳𑁂𑀝𑁆𑀞𑀺𑀫𑀪𑀽𑀫𑀻𑀲𑀼 𑀉𑀤𑀓𑁂𑀦 𑀯𑀺𑀦𑀲𑁆𑀲𑀫𑀸𑀦𑀸𑀲𑀼 𑀤𑀼𑀢𑀻𑀬𑀚𑁆𑀛𑀸𑀦𑀪𑀽𑀫𑀺 𑀦 𑀢𑀸𑀯 𑀯𑀺𑀦𑀲𑁆𑀲𑀢𑀺. 𑀲𑀁𑀯𑀝𑁆𑀝𑀓𑀧𑁆𑀧𑁂𑀧𑀺 𑀘𑀺𑀭𑀓𑀸𑀮𑀁 𑀢𑀺𑀝𑁆𑀞𑀢𑁂𑀬𑁂𑀯. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀇𑀤𑀫𑁂𑀯 𑀧𑀫𑀸𑀡𑀦𑁆𑀢𑀺.

𑀧𑀝𑀺𑀲𑀦𑁆𑀥𑀺𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁪𑁫. 𑀓𑀫𑁆𑀫𑀘𑀢𑀼𑀓𑁆𑀓𑁂. ‘‘𑀚𑀦𑁂𑀢𑀻’’𑀢𑀺 𑀅𑀚𑀦𑀺𑀢𑀁 𑀚𑀦𑁂𑀢𑀺. 𑀧𑀸𑀢𑀼𑀪𑀸𑀯𑁂𑀢𑀺. ‘‘𑀉𑀧𑀢𑁆𑀣𑀫𑁆𑀪𑀢𑀻’’𑀢𑀺 𑀚𑀦𑀺𑀢𑀁 𑀉𑀧𑀢𑁆𑀣𑀫𑁆𑀪𑀢𑀺. 𑀘𑀺𑀭𑀝𑁆𑀞𑀺𑀢𑀺𑀓𑀁 𑀓𑀭𑁄𑀢𑀺. ‘‘𑀉𑀧𑀧𑀻𑀴𑁂𑀢𑀻’’𑀢𑀺 𑀚𑀦𑀺𑀢𑀁 𑀉𑀧𑀧𑀻𑀴𑁂𑀢𑀺, 𑀧𑀭𑀺𑀳𑀸𑀧𑁂𑀢𑀺. ‘‘𑀉𑀧𑀖𑀸𑀢𑁂𑀢𑀻’’𑀢𑀺 𑀉𑀧𑀘𑁆𑀙𑀺𑀦𑁆𑀤𑀢𑀺. ‘‘𑀓𑀝𑀢𑁆𑀢𑀸 𑀭𑀽𑀧𑀸𑀦𑀁’’𑀢𑀺 𑀓𑀝𑀢𑁆𑀢𑀸𑀦𑀸𑀫𑀓𑀸𑀦𑀁 𑀓𑀫𑁆𑀫𑀚𑀭𑀽𑀧𑀸𑀦𑀁. ‘‘𑀓𑀫𑁆𑀫𑀧𑀣𑀧𑀢𑁆𑀢𑀸𑀯𑀸’’𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀚𑀦𑁂𑀦 𑀲𑀢𑀺, 𑀲𑀩𑁆𑀩𑀫𑁆𑀧𑀺 𑀓𑀫𑁆𑀫𑀁 𑀓𑀫𑁆𑀫𑀧𑀣𑀧𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀘𑁆𑀘𑀺𑀢𑁆𑀣𑀸𑀢𑀺 𑀯𑀺𑀧𑀓𑁆𑀓𑀁. 𑀯𑀺𑀧𑀓𑁆𑀓𑀁 𑀯𑀺𑀧𑀸𑀓𑀁 𑀬𑁂𑀲𑀦𑁆𑀢𑀺 𑀯𑀺𑀧𑀓𑁆𑀓 𑀯𑀺𑀧𑀸𑀓𑀸. 𑀉𑀧𑀢𑁆𑀣𑀫𑁆𑀪𑀫𑀸𑀦𑀸 𑀧𑀯𑀢𑁆𑀢𑀢𑀺. 𑀲𑀬𑀁𑀧𑀺 𑀧𑀘𑁆𑀘𑀬𑀮𑀸𑀪𑁂 𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀮𑀤𑁆𑀥𑁄𑀓𑀸𑀲𑀲𑁆𑀲𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦 𑀫𑀢𑁆𑀢𑀁. 𑀮𑀤𑁆𑀥𑁄𑀓𑀸𑀲𑀲𑁆𑀲𑀧𑀺 𑀉𑀧𑀢𑁆𑀣𑀫𑁆𑀪𑀦𑀁 𑀦𑀸𑀫 𑀇𑀘𑁆𑀙𑀺𑀢𑀩𑁆𑀩𑀫𑁂𑀯. 𑀅𑀜𑁆𑀜𑀁 𑀅𑀓𑀼𑀲𑀮𑀓𑀫𑁆𑀫𑀁 𑀑𑀓𑀸𑀲𑀁 𑀮𑀪𑀢𑀻𑀢𑀺 𑀬𑁄𑀚𑀦𑀸. ‘‘𑀘𑀸𑀬𑀁’’𑀢𑀺 𑀘𑁂 𑀅𑀬𑀁. ‘‘𑀓𑀸𑀮𑀗𑁆𑀓𑀭𑀺𑀬𑀸’’𑀢𑀺 𑀓𑀸𑀮𑀁𑀓𑀭𑁂𑀬𑁆𑀬. ‘‘𑀅𑀲𑁆𑀲𑀸’’𑀢𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. ‘‘𑀧𑀲𑀸𑀤𑀺𑀢𑀁’’𑀢𑀺 𑀧𑀲𑀦𑁆𑀦𑀁. ‘‘𑀧𑀤𑀽𑀲𑀺𑀢𑀁’’𑀢𑀺 𑀧𑀤𑀼𑀝𑁆𑀞𑀁. 𑀧𑀼𑀩𑁆𑀩𑁂 ‘𑀫𑀭𑀡𑀸𑀲𑀦𑁆𑀦 𑀓𑀸𑀮𑁂’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀥 ‘𑀧𑀯𑀢𑁆𑀢𑀺𑀓𑀸𑀮𑁂𑀧𑀻’𑀢𑀺 𑀯𑀼𑀢𑁆𑀢𑀁. ‘‘𑀏𑀢𑀁’’𑀢𑀺 𑀓𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀁. ‘‘𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂’’𑀢𑀺 𑀚𑀻𑀯𑀺𑀢𑀧𑀭𑀺𑀯𑀸𑀭𑁂 𑀧𑀘𑁆𑀘𑀬𑁂. ‘‘𑀲𑀫𑀼𑀤𑀸𑀦𑁂𑀢𑁆𑀯𑀸’’𑀢𑀺 𑀲𑀫𑀸𑀳 𑀭𑀺𑀢𑁆𑀯𑀸.‘‘𑀏𑀢𑁆𑀣𑀸’’𑀢𑀺 𑀉𑀧𑀢𑁆𑀣𑀫𑁆𑀪𑀓 𑀓𑀫𑁆𑀫𑀝𑁆𑀞𑀸𑀦𑁂. 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀉𑀧𑀩𑁆𑀭𑀽𑀳𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 ‘𑀚𑀻𑀯𑀺𑀢𑀦𑁆𑀢𑀭𑀸𑀬𑁂 𑀅𑀧𑀦𑁂𑀢𑁆𑀯𑀸’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑀸’’𑀢𑀺 ‘𑀯𑀺𑀧𑀘𑁆𑀘𑀺𑀢𑀼𑀁 𑀅𑀮𑀤𑁆𑀥𑁄𑀓𑀸𑀲𑀸𑀯𑀸 𑀯𑀺𑀧𑀓𑁆𑀓 𑀯𑀺𑀧𑀸𑀓𑀸 𑀯𑀸 𑀲𑀩𑁆𑀩𑀸𑀧𑀺 𑀓𑀼𑀲𑀮𑀸 𑀓𑀼𑀲𑀮 𑀘𑁂𑀢𑀦𑀸’𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸. ‘‘𑀤𑀼𑀩𑁆𑀩𑀮𑀢𑀭𑀁 𑀓𑀢𑁆𑀯𑀸 𑀯𑀸 𑀯𑀺𑀩𑀸𑀥𑀫𑀸𑀦𑀸’’𑀢𑀺 𑀉𑀧𑀧𑀻𑀴𑀓 𑀓𑀫𑁆𑀫𑀓𑀺𑀘𑁆𑀘𑀁 𑀯𑀼𑀢𑁆𑀢𑀁. ‘‘𑀚𑀦𑀓 𑀓𑀫𑁆𑀫𑀲𑁆𑀲 𑀤𑀼𑀩𑁆𑀩𑀮 𑀆𑀬𑀽𑀳𑀦𑀓𑀸𑀮𑁂’’𑀢𑀺 𑀲𑀫𑀼𑀘𑁆𑀘𑀬𑀦𑀓𑀸𑀮𑁂. ‘‘𑀯𑀺𑀳𑀢 𑀲𑀸𑀫𑀢𑁆𑀣𑀺𑀬𑀁’’𑀢𑀺 𑀯𑀺𑀦𑀸𑀲𑀺𑀢𑀲𑀢𑁆𑀢𑀺𑀓𑀁. ‘‘𑀫𑀳𑁂𑀲𑀓𑁆𑀔𑁂𑀲𑀽’’𑀢𑀺 𑀫𑀳𑀸𑀦𑀼𑀪𑀸𑀯𑁂𑀲𑀼. ‘‘𑀉𑀧𑀢𑁆𑀣𑀫𑁆𑀪𑀓𑀫𑁆𑀧𑀺 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁’’𑀢𑀺 𑀉𑀧𑀧𑀻𑀴𑀓 𑀓𑀫𑁆𑀫𑀢𑁄 𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. ‘𑀉𑀧𑀭𑀺𑀪𑀽𑀫𑀺 𑀦𑀺𑀩𑁆𑀩𑀢𑁆𑀢𑀓𑀫𑁆𑀧𑀺 𑀲𑀫𑀸𑀦𑀁 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀢𑀻’𑀢𑀺𑀆𑀤𑀻𑀲𑀼 ‘𑀳𑁂𑀝𑁆𑀞𑀸𑀪𑀽𑀫𑀺 𑀦𑀺𑀩𑁆𑀩𑀢𑁆𑀢𑀓𑀫𑁆𑀧𑀺 𑀲𑀫𑀸𑀦𑀁 𑀉𑀧𑀭𑀺𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀢𑀻’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀯𑀢𑁆𑀣𑀼𑀫𑁆𑀳𑀺 𑀢𑀲𑁆𑀲 𑀭𑀜𑁆𑀜𑁄 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀫𑀳𑀸𑀅𑀯𑀻𑀘𑀺𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑀫𑁆𑀧𑀺 𑀲𑀫𑀸𑀦𑀁 𑀧𑀘𑁆𑀙𑀸 𑀩𑀼𑀤𑁆𑀥𑀼 𑀧𑀝𑁆𑀞𑀸𑀦 𑀓𑀫𑁆𑀫𑁂𑀦 𑀩𑀸𑀥𑀻𑀬𑀫𑀸𑀦𑀁 𑀯𑀺𑀳𑀢𑀲𑀸𑀫𑀢𑁆𑀣𑀺𑀬𑀁 𑀳𑀼𑀢𑁆𑀯𑀸 𑀢𑀁 𑀉𑀲𑁆𑀲𑀤𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀯𑀺𑀩𑀸𑀥𑀦𑀁 𑀦𑀸𑀫 𑀲𑀢𑁆𑀢𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀕𑁄𑀫𑀳𑀺𑀁𑀲𑀸𑀤𑀻𑀦𑀁 𑀧𑀼𑀢𑁆𑀢𑀤𑀸𑀭𑀜𑀸𑀢𑀺𑀫𑀺𑀢𑁆𑀢𑀸𑀦𑀜𑁆𑀘 𑀯𑀺𑀧𑀢𑁆𑀢𑀺𑀓𑀭𑀡𑀁 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀉𑀧𑀧𑀻𑀴𑀓 𑀓𑀫𑁆𑀫𑀓𑀺𑀘𑁆𑀘𑀁 𑀪𑀯𑁂𑀬𑁆𑀬. 𑀅𑀜𑁆𑀜𑁄𑀳𑀺 𑀲𑁄 𑀧𑀼𑀕𑁆𑀕𑀮𑁄, 𑀅𑀜𑁆𑀜𑁂 𑀕𑁄𑀫𑀳𑀺𑀁𑀲𑀸𑀤𑀬𑁄. 𑀦 𑀘 𑀅𑀜𑁆𑀜𑁂𑀦 𑀓𑀢𑀁 𑀓𑀫𑁆𑀫𑀁 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀁 𑀯𑀸 𑀲𑀼𑀔𑀼𑀧𑁆𑀧𑀢𑁆𑀢𑀺𑀁 𑀯𑀸 𑀓𑀭𑁂𑀬𑁆𑀬𑀸𑀢𑀺 𑀘𑁄𑀤𑀦𑀸. 𑀤𑀼𑀯𑀺𑀥𑀦𑁆𑀢𑀺𑀆𑀤𑀺𑀦𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀆𑀦𑀦𑁆𑀤 𑀲𑁂𑀝𑁆𑀞𑀺𑀯𑀢𑁆𑀣𑀼𑀫𑁆𑀳𑀺. 𑀲𑁄𑀲𑁂𑀝𑁆𑀞𑀺 𑀫𑀳𑀸𑀫𑀘𑁆𑀙𑀭𑀺𑀬𑁄 𑀅𑀳𑁄𑀲𑀺. 𑀅𑀜𑁆𑀜𑁂𑀧𑀺 𑀤𑀸𑀦𑀁 𑀤𑁂𑀦𑁆𑀢𑁂 𑀦𑀻𑀯𑀸𑀭𑁂𑀲𑀺. 𑀲𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑁄. 𑀢𑀲𑁆𑀲 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀧𑀸𑀧𑀓𑀫𑁆𑀫𑁂𑀦 𑀫𑀸𑀢𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀓𑀮𑀕𑀸𑀫𑀺𑀓𑀸𑀦𑀁 𑀚𑀦𑀸𑀦𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀥𑀫𑁆𑀫𑀧𑀤 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀦𑀺𑀲𑁆𑀲𑀦𑁆𑀤𑀨𑀮𑀯𑀲𑁂𑀦 𑀅𑀜𑁆𑀜𑁂𑀦 𑀓𑀢𑀁 𑀓𑀫𑁆𑀫𑀁 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀁 𑀯𑀸 𑀲𑀼𑀔𑀼𑀧𑁆𑀧𑀢𑁆𑀢𑀺𑀁 𑀯𑀸 𑀓𑀭𑁄𑀢𑀺 𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. [‘‘𑀓𑀫𑁆𑀫𑀚𑀲𑀦𑁆𑀢𑀢𑀺 𑀲𑀻𑀲𑁂𑀲𑀽’’𑀢𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀸 𑀏𑀓𑁂𑀓𑀸 𑀓𑀫𑁆𑀫𑀚𑀭𑀽𑀧𑀲𑀦𑁆𑀢𑀢𑀺 𑀦𑀸𑀫 𑀅𑀢𑁆𑀣𑀺. 𑀲𑀸 𑀧𑀘𑁆𑀙𑀸 𑀅𑀧𑀭𑀸𑀧𑀭𑀁 𑀢𑀸𑀤𑀺𑀲𑀸𑀬 𑀓𑀫𑁆𑀫𑀚𑀭𑀽𑀧𑀲𑀦𑁆𑀢𑀢𑀺𑀬𑀸 𑀧𑀯𑀢𑁆𑀢𑀢𑁆𑀣𑀸𑀬 𑀲𑀻𑀲𑀪𑀽𑀢𑀢𑁆𑀢𑀸 𑀲𑀦𑁆𑀢𑀢𑀺 𑀲𑀻𑀲𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀯𑀸𑀓𑀫𑁆𑀫𑀚𑀲𑀦𑁆𑀢𑀢𑀺 𑀲𑀻𑀲𑀁. 𑀤𑁆𑀯𑁂 𑀯𑀸𑀓𑀫𑁆𑀫𑀚𑀲𑀦𑁆𑀢𑀢𑀺 𑀲𑀻𑀲𑀸𑀦𑀺 ]. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀧𑀸𑀞𑁂. ‘‘𑀢𑀤𑁂𑀯𑀸’’𑀢𑀺 𑀢𑀁 𑀉𑀧𑀖𑀸𑀢𑀓 𑀓𑀫𑁆𑀫𑀫𑁂𑀯. ‘‘𑀇𑀥 𑀘𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂. ‘‘𑀇𑀫𑀲𑁆𑀲 𑀧𑀻’’𑀢𑀺 𑀇𑀫𑀲𑁆𑀲 𑀉𑀧𑀖𑀸𑀢𑀓 𑀓𑀫𑁆𑀫𑀲𑁆𑀲𑀧𑀺. 𑀤𑀼𑀝𑁆𑀞𑀕𑀸𑀫𑀡𑀺 𑀭𑀜𑁆𑀜𑁄 𑀯𑀢𑁆𑀣𑀼𑀫𑁆𑀳𑀺 𑀘 𑀲𑁄𑀡𑀢𑁆𑀣𑁂𑀭 𑀧𑀺𑀢𑀼𑀦𑁄 𑀯𑀢𑁆𑀣𑀼𑀫𑁆𑀳𑀺 𑀘 𑀢𑁂𑀲𑀁 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀧𑀣𑀫𑀁 𑀤𑀼𑀕𑁆𑀕𑀢𑀺 𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑀺. 𑀧𑀘𑁆𑀙𑀸 𑀭𑀜𑁆𑀜𑁄 𑀏𑀓𑀁 𑀧𑀼𑀩𑁆𑀩𑀓𑀢𑀁 𑀓𑀮𑁆𑀬𑀸𑀡 𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀣𑁂𑀭𑀧𑀺𑀢𑀼 𑀘 𑀢𑀗𑁆𑀔𑀡𑁂 𑀏𑀯 𑀏𑀓𑀁 𑀓𑀮𑁆𑀬𑀸𑀡 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀢𑀸𑀦𑀺 𑀤𑀼𑀕𑁆𑀕𑀢𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀲𑀕𑁆𑀕𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀩𑁆𑀪𑀯𑀦𑁆𑀢𑀺. 𑀉𑀪𑁄𑀧𑀺 𑀘𑀯𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺. 𑀓𑀼𑀲𑀮𑀸 𑀓𑀼𑀲𑀮 𑀓𑀫𑁆𑀫𑀸𑀦𑀁 𑀔𑀬𑀁 𑀓𑀭𑁄𑀢𑀻𑀢𑀺 𑀓𑀼𑀲𑀮𑀸 𑀓𑀼𑀲𑀮 𑀓𑀫𑁆𑀫𑀓𑁆𑀔𑀬𑀓𑀭𑁄. ‘‘𑀆𑀬𑀼 𑀓𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀽’’𑀢𑀺 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀆𑀬𑀼 𑀧𑀭𑀺𑀘𑁆𑀙𑁂𑀤𑁄 𑀘 𑀧𑀭𑀺𑀬𑀦𑁆𑀢 𑀕𑀢𑁄 𑀦 𑀳𑁄𑀢𑀺, 𑀓𑀫𑁆𑀫𑀸𑀦𑀼𑀪𑀸𑀯𑁄 𑀘 𑀧𑀭𑀺𑀓𑁆𑀔𑀻𑀡𑁄 𑀦 𑀳𑁄𑀢𑀺. 𑀏𑀯𑀁 𑀆𑀬𑀼 𑀓𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼. ‘‘𑀅𑀧𑀭𑀸𑀥 𑀓𑀫𑁆𑀫𑀲𑁆𑀲𑀸’’𑀢𑀺 𑀫𑀸𑀢𑀸𑀧𑀺𑀢𑀽𑀲𑀼𑀯𑀸 𑀥𑀫𑁆𑀫𑀺𑀓𑀲𑀫𑀡 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀅𑀧𑀭𑀚𑁆𑀛𑀦𑀯𑀲𑁂𑀦 𑀓𑀢𑀲𑁆𑀲 𑀅𑀧𑀭𑀸𑀥𑀓𑀫𑁆𑀫𑀲𑁆𑀲. ‘‘𑀲𑁄 𑀧𑀦𑀸’’𑀢𑀺 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀯𑀸𑀤𑁄 𑀧𑀦. ‘‘𑀅𑀭𑀼𑀘𑁆𑀘𑀫𑀸𑀦𑁄 𑀯𑀺𑀬𑀸’’𑀢𑀺 𑀅𑀦𑀺𑀘𑁆𑀙𑀺𑀬𑀫𑀸𑀦𑁄𑀯𑀺𑀬. ‘‘𑀲𑁄’’𑀢𑀺 𑀫𑀚𑁆𑀛𑀺𑀫𑀝𑁆𑀞𑀓𑀣𑀸 𑀯𑀸𑀤𑁄. ‘‘𑀢𑀢𑁆𑀣 𑀧𑀦𑀸’’𑀢𑀺 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦. ‘‘𑀲𑀩𑁆𑀩𑀜𑁆𑀘𑁂𑀢𑀁’’𑀢𑀺 𑀲𑀩𑁆𑀩𑀜𑁆𑀘 𑀏𑀢𑀁 𑀲𑀼𑀢𑁆𑀢𑀯𑀘𑀦𑀁, 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀺𑀘𑁆𑀙𑀦𑁆𑀢𑁂𑀳𑀺 𑀝𑀻𑀓𑀸 𑀘𑀭𑀺𑀬𑁂𑀳𑀺. ‘‘𑀯𑀺𑀧𑀸𑀓𑀁 𑀧𑀝𑀺𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀯𑀺𑀧𑀸𑀓𑀁 𑀧𑀝𑀺𑀘𑁆𑀘 𑀇𑀘𑁆𑀙𑀺 𑀢𑀩𑁆𑀩𑁄. 𑀏𑀢𑁆𑀣 ‘‘𑀯𑀺𑀧𑀸𑀓𑀁’’𑀢𑀺 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥 𑀲𑀦𑁆𑀢𑀸𑀦𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀚𑀦𑀓𑀁 𑀓𑀫𑁆𑀫𑀁 𑀚𑀦𑀓 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑁂𑀯 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀁 𑀢𑀲𑁆𑀲𑁂𑀯 𑀉𑀧𑀧𑀻𑀴𑀓𑀁 𑀢𑀲𑁆𑀲𑁂𑀯 𑀉𑀧𑀖𑀸𑀢𑀓𑀁 𑀓𑀫𑁆𑀫𑀁 𑀉𑀧𑀖𑀸𑀢𑀓 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀸𑀓𑁂𑀢 𑀧𑀜𑁆𑀳𑁂’’𑀢𑀺 𑀯𑀺𑀧𑀸𑀓𑀼𑀤𑁆𑀥𑀸𑀭𑁂 𑀆𑀕𑀢𑁂 𑀲𑀸𑀓𑁂𑀢 𑀧𑀜𑁆𑀳𑁂. 𑀥𑀫𑁆𑀫𑀤𑀺𑀦𑁆𑀦𑀸𑀬 𑀦𑀸𑀫 𑀉𑀕𑁆𑀕𑀲𑁂𑀦 𑀭𑀜𑁆𑀜𑁄 𑀤𑁂𑀯𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀲𑀸𑀤𑁂𑀯𑀻 𑀧𑀼𑀩𑁆𑀩𑁂 𑀏𑀓𑀁 𑀅𑀚𑀁 𑀖𑀸𑀢𑁂𑀲𑀺, 𑀢𑁂𑀦 𑀓𑀫𑁆𑀫𑁂𑀦 𑀅𑀧𑀸𑀬𑁂𑀲𑀼 𑀧𑀢𑀺𑀢𑁆𑀯𑀸 𑀧𑀘𑁆𑀙𑀸 𑀧𑀯𑀢𑁆𑀢𑀺 𑀯𑀺𑀧𑀸𑀓𑀯𑀲𑁂𑀦 𑀩𑀳𑀽𑀲𑀼 𑀪𑀯𑁂𑀲𑀼 𑀅𑀚𑀲𑀭𑀻𑀭𑁂 𑀮𑁄𑀫𑀕𑀡𑀦𑀸𑀫𑀢𑁆𑀢𑀁 𑀅𑀢𑁆𑀢𑀦𑁄 𑀲𑀻𑀲𑀘𑁆𑀙𑁂𑀤𑀦 𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀻𑀢𑀺. ‘‘𑀲𑀸 𑀧𑀦𑀸’’𑀢𑀺 𑀲𑀸 𑀏𑀓𑀸 𑀧𑀸𑀡𑀸𑀢𑀺𑀧𑀸𑀢 𑀘𑁂𑀢𑀦𑀸 𑀧𑀦. 𑀫𑀳𑀸𑀫𑁄𑀕𑁆𑀕𑀮𑀸𑀦 𑀯𑀢𑁆𑀣𑀼 𑀦𑀸𑀫 𑀧𑀜𑁆𑀘𑀲𑀢 𑀘𑁄𑀭𑀸𑀦𑀁 𑀣𑁂𑀭𑀲𑁆𑀲 𑀖𑀸𑀢 𑀦 𑀯𑀢𑁆𑀣𑀼. 𑀣𑁂𑀭𑁄𑀳𑀺 𑀅𑀢𑁆𑀢𑀦𑀸 𑀧𑀼𑀩𑁆𑀩𑀓𑀢𑁂𑀦 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑁂𑀦 𑀘𑁄𑀭𑀖𑀸𑀢𑀦𑀁 𑀮𑀪𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀲𑀸𑀫𑀸𑀯𑀢𑀺𑀤𑁂𑀯𑀻 𑀘 𑀯𑀕𑁆𑀕𑀼𑀫𑀼𑀤𑀸𑀦𑀤𑀺𑀢𑀻𑀭𑀯𑀸𑀲𑀺𑀦𑁄 𑀧𑀜𑁆𑀘𑀲𑀢 𑀪𑀺𑀓𑁆𑀔𑀽 𑀘 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀢𑁂𑀳𑀺 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑁂𑀳𑀺 𑀢𑀸𑀤𑀺𑀲𑀁 𑀧𑀭𑀽𑀧𑀓𑁆𑀓𑀫𑀁 𑀮𑀪𑀺𑀢𑁆𑀯𑀸 𑀲𑀕𑁆𑀕𑁂𑀲𑀼 𑀦𑀺𑀩𑁆𑀩𑀢𑁆𑀢𑀸. 𑀤𑀼𑀲𑁆𑀲𑀺𑀫𑀸𑀭𑁄 𑀦𑀸𑀫 𑀓𑀓𑀼𑀲𑀦𑁆𑀥 𑀩𑀼𑀤𑁆𑀥𑀓𑀸𑀮𑁂 𑀫𑀸𑀭𑀤𑁂𑀯 𑀧𑀼𑀢𑁆𑀢𑁄 𑀯𑀼𑀘𑁆𑀘𑀢𑀺. 𑀓𑀮𑀸𑀩𑀼𑀭𑀸𑀚𑀸𑀦𑀸𑀫 𑀔𑀦𑁆𑀢𑀺 𑀯𑀸𑀤𑀺𑀢𑀸 𑀧𑀲𑀲𑁆𑀲 𑀖𑀸𑀢𑀓𑁄 𑀯𑀼𑀘𑁆𑀘𑀢𑀺. 𑀢𑁂 𑀧𑀦 𑀢𑀗𑁆𑀔𑀡𑁂 𑀅𑀢𑁆𑀢𑀦𑀸 𑀓𑀢𑁂𑀦 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑁂𑀦 𑀢𑀗𑁆𑀔𑀡𑁂 𑀏𑀯 𑀘𑀯𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸. 𑀢𑀢𑁆𑀣 𑀧𑀼𑀭𑀺𑀫 𑀯𑀢𑁆𑀣𑀽𑀲𑀼 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑀁 𑀉𑀧𑀘𑁆𑀙𑀺𑀦𑁆𑀤𑀦 𑀫𑀢𑁆𑀢𑀁 𑀓𑀭𑁄𑀢𑀺. 𑀦 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑁂𑀢𑀺. 𑀧𑀘𑁆𑀙𑀺𑀫𑀯𑀢𑁆𑀣𑀽𑀲𑀼 𑀧𑀦 𑀉𑀧𑀘𑁆𑀙𑀺𑀦𑁆𑀤𑀦𑀜𑁆𑀘 𑀓𑀭𑁄𑀢𑀺, 𑀯𑀺𑀧𑀸𑀓𑀜𑁆𑀘 𑀤𑁂𑀢𑀻𑀢𑀺. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀉𑀧𑀘𑁆𑀙𑁂𑀤𑀦 𑀧𑀼𑀩𑁆𑀩𑀓𑀁’’𑀢𑀺 𑀉𑀧𑀘𑁆𑀙𑁂𑀤𑀦 𑀧𑀼𑀩𑁆𑀩𑀓𑀁 𑀯𑀺𑀧𑀸𑀓𑀁 𑀚𑀦𑁂𑀢𑀻𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀧𑀸𑀓𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀯 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 ‘‘𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀻’’𑀢𑀺 𑀇𑀥 𑀓𑀤𑀸𑀘𑀺 𑀚𑀦𑁂𑀢𑀺, 𑀓𑀤𑀸𑀘𑀺 𑀦 𑀚𑀦𑁂𑀢𑀻𑀢𑀺 𑀏𑀯𑀁 𑀯𑀺𑀪𑀸𑀕𑀲𑁆𑀲 𑀅𑀓𑀢𑀢𑁆𑀢𑀸 ‘‘𑀢𑀁 𑀦 𑀲𑀼𑀦𑁆𑀤𑀭𑀁’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀥 𑀧𑀼𑀩𑁆𑀩𑀓𑀢𑁂𑀦𑀸’’𑀢𑀺𑀆𑀤𑀺𑀁. ‘‘𑀅𑀝𑁆𑀞𑀓𑀣𑀸𑀲𑀼𑀬𑁂𑀯 𑀆𑀕𑀢𑀢𑁆𑀢𑀸’’𑀢𑀺 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀢𑁂𑀚𑀦𑀸 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑁂𑀦 𑀫𑀭𑀦𑁆𑀢𑀻𑀢𑀺 𑀏𑀯𑀁 𑀯𑀢𑁆𑀯𑀸 𑀆𑀕𑀢𑀢𑁆𑀢𑀸. 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀺𑀧𑀸𑀓 𑀦𑀺𑀩𑁆𑀩𑀢𑁆𑀢𑀓𑀁. 𑀢𑀲𑁆𑀲 𑀪𑀸𑀯𑁄 𑀯𑀺𑀧𑀸𑀓 𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀁. 𑀯𑀺𑀧𑀸𑀓 𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀲𑁆𑀲 𑀅𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄.

𑀚𑀦𑀓𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁩𑁬. ‘‘𑀦𑀺𑀓𑀦𑁆𑀢𑀺 𑀩𑀮𑁂𑀦 𑀯𑀸 𑀧𑀝𑀺𑀩𑀸𑀳𑀺𑀬𑀫𑀸𑀦𑀁 𑀯𑀺𑀧𑀸𑀓𑀁 𑀦 𑀤𑁂𑀢𑀻’’𑀢𑀺 𑀛𑀸𑀦𑀮𑀸𑀪𑀺𑀦𑁄 𑀳𑀼𑀢𑁆𑀯𑀸𑀧𑀺 𑀫𑀭𑀡𑀓𑀸𑀮𑁂 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦𑀺𑀓𑀦𑁆𑀢𑀺𑀬𑀸 𑀲𑀢𑀺, 𑀢𑀁 𑀛𑀸𑀦𑀁 𑀯𑀺𑀧𑀸𑀓𑀁 𑀦 𑀤𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀓𑀲𑁆𑀲𑀸’’𑀢𑀺 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. ‘‘𑀢𑁂𑀲𑀁’’𑀢𑀺 𑀫𑀳𑀕𑁆𑀕𑀢𑀓𑀫𑁆𑀫 𑀆𑀦𑀦𑁆𑀢𑀭𑀺𑀬 𑀓𑀫𑁆𑀫𑀸𑀦𑀁. 𑀅𑀦𑁆𑀢𑀺𑀫 𑀚𑀯𑀦𑀯𑀻𑀣𑀺𑀬𑀁 𑀓𑀢𑀁 𑀦𑀸𑀫 𑀯𑀢𑁆𑀣𑀼 𑀤𑀼𑀩𑁆𑀩𑀮𑀢𑁆𑀢𑀸 𑀲𑀬𑀫𑁆𑀧𑀺 𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀁 𑀦 𑀚𑀦𑁂𑀢𑀺. 𑀢𑁂𑀦𑀸𑀳 ‘‘𑀅𑀦𑁆𑀢𑀺𑀫 𑀚𑀯𑀦𑀯𑀻𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀆𑀲𑀦𑁆𑀦𑁂 𑀓𑀢𑀁’’𑀢𑀺. 𑀇𑀤𑀜𑁆𑀘 𑀓𑀫𑁆𑀫𑀲𑀸𑀫𑀜𑁆𑀜 𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀫𑁆𑀫𑀯𑀺𑀲𑁂𑀲𑁂 𑀧𑀦 𑀲𑀢𑀺, 𑀦 𑀤𑁂𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀢𑀁 𑀆𑀲𑀦𑁆𑀦 𑀓𑀫𑁆𑀫𑀁 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀧𑀸𑀞𑁂. 𑀅𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀫𑀭𑀡𑀓𑀸𑀮𑁂𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸𑀢𑀺 𑀬𑁄𑀚𑀦𑀸. 𑀧𑀭𑀢𑁄 𑀧𑀭𑀺𑀧𑀼𑀡𑁆𑀡𑀁 𑀆𑀕𑀫𑀺𑀲𑁆𑀲𑀢𑀺. 𑀲𑁄𑀫𑀦𑀲𑁆𑀲 𑀚𑀦𑀓𑀁 𑀧𑀭𑀘𑁂𑀢𑀦𑀸 𑀧𑀯𑀢𑁆𑀢𑀺𑀯𑀲𑁂𑀦. 𑀲𑀦𑁆𑀢𑀸𑀧 𑀚𑀦𑀓𑀁 𑀓𑀼𑀓𑁆𑀓𑀼𑀘𑁆𑀘𑀯𑀺𑀧𑁆𑀧𑀝𑀺𑀲𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦. 𑀇𑀤𑀁 𑀕𑀭𑀼𑀓 𑀘𑀢𑀼𑀓𑁆𑀓𑀁 𑀦𑀸𑀫 𑀅𑀦𑀦𑁆𑀢𑀭𑁂 𑀪𑀯𑁂 𑀯𑀺𑀧𑀘𑁆𑀘𑀦𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀧𑀧𑀚𑁆𑀚𑀯𑁂𑀤𑀦𑀻𑀬 𑀓𑀫𑁆𑀫𑀸𑀦𑀺 𑀏𑀯𑀸’’𑀢𑀺. 𑀓𑀫𑁆𑀫𑀁 𑀦𑀸𑀫 𑀓𑀼𑀲𑀮𑀁 𑀯𑀸 𑀳𑁄𑀢𑀼, 𑀅𑀓𑀼𑀲𑀮𑀁 𑀯𑀸. 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸 𑀲𑁂𑀯𑀦𑁂 𑀲𑀢𑀺, 𑀯𑀺𑀧𑀸𑀓𑀁 𑀤𑁂𑀢𑀺. 𑀅𑀲𑀢𑀺 𑀦 𑀤𑁂𑀢𑀺. 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘, 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀏𑀢𑁆𑀣𑀳𑀺 𑀓𑀢𑀢𑁆𑀢𑀸𑀢𑀺 𑀯𑀢𑁆𑀯𑀸 𑀧𑀼𑀦 𑀉𑀧𑀘𑀺𑀢𑀢𑁆𑀢𑀸𑀢𑀺 𑀯𑀘𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀟𑁆𑀠𑀦𑀲𑀗𑁆𑀔𑀸𑀢𑁂 𑀆𑀲𑁂𑀯𑀦𑁂 𑀲𑀢𑀺 𑀏𑀯 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀜𑀸𑀧𑁂𑀢𑀺. 𑀢𑀲𑁆𑀫𑀸 𑀓𑀢𑀫𑀢𑁆𑀢 𑀓𑀫𑁆𑀫𑀢𑁆𑀢𑀸 𑀓𑀝𑀢𑁆𑀢𑀸 𑀓𑀫𑁆𑀫𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑁂𑀧𑀺 𑀅𑀦𑀦𑁆𑀢𑀭𑀪𑀯𑁂 𑀯𑀺𑀧𑀘𑁆𑀘𑀦𑀓 𑀓𑀫𑁆𑀫𑀲𑁆𑀲𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸 𑀲𑁂𑀯𑀦𑀫𑁂𑀯 𑀇𑀥 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦𑀁’’𑀢𑀺 𑀯𑀼𑀢𑁆𑀢𑀁.

‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺𑀆𑀤𑀻𑀲𑀼. ‘‘𑀬𑀢𑁆𑀣 𑀢𑀁 𑀧𑀼𑀩𑁆𑀩𑀓𑀢𑀁 𑀓𑀫𑁆𑀫𑀦𑁆𑀢𑀺 𑀆𑀕𑀢𑀁’’𑀢𑀺 𑀬𑀲𑁆𑀫𑀺𑀁 𑀅𑀝𑁆𑀞𑀓𑀣𑀸 𑀧𑀤𑁂𑀲𑁂 𑀢𑀁 𑀓𑀝𑀢𑁆𑀢𑀸 𑀓𑀫𑁆𑀫𑀁 𑀧𑀼𑀩𑁆𑀩𑀓𑀢𑀁 𑀓𑀫𑁆𑀫𑀁𑀢𑀺 𑀆𑀕𑀢𑀁. ‘‘𑀓𑀲𑁆𑀫𑀸 𑀇𑀥𑀸’’𑀢𑀺𑀆𑀤𑀻𑀲𑀼. ‘‘𑀇𑀥𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑁂. 𑀧𑀸𑀴𑀺𑀬𑀁. 𑀬𑀁 𑀕𑀭𑀼𑀓𑀁, 𑀢𑀁 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀲𑁆𑀫𑀺𑀁 𑀅𑀲𑀢𑀺, 𑀬𑀁 𑀩𑀳𑀼𑀮𑀁. 𑀢𑀲𑁆𑀫𑀺𑀁 𑀅𑀲𑀢𑀺, 𑀬𑀁 𑀆𑀲𑀦𑁆𑀦𑀁. 𑀢𑀲𑁆𑀫𑀺𑀁 𑀅𑀲𑀢𑀺, 𑀬𑀁 𑀓𑀝𑀢𑁆𑀢𑀸 𑀯𑀸 𑀧𑀦 𑀓𑀫𑁆𑀫𑀁, 𑀢𑀁 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀲𑀼𑀢𑁆𑀢𑀦𑁆𑀢𑀧𑀸𑀞𑁂. 𑀲𑀼𑀔𑀯𑁂𑀤𑀦𑀁 𑀚𑀦𑁂𑀢𑀻𑀢𑀺 𑀲𑀼𑀔𑀯𑁂𑀤𑀦𑀻𑀬𑀁. ‘‘𑀲𑀫𑀢𑁆𑀢𑀸’’𑀢𑀺 𑀲𑀼𑀝𑁆𑀞𑀼𑀕𑀳𑀺𑀢𑀸. ‘‘𑀲𑀫𑀸𑀤𑀺𑀦𑁆𑀦𑀸’’𑀢𑀺 𑀢𑀤𑀢𑁆𑀣𑀯𑀺𑀯𑀭𑀡𑀁. ‘‘𑀧𑀭𑀺𑀬𑀢𑁆𑀢𑀁’’𑀢𑀺 𑀲𑀫𑀢𑁆𑀣𑀁. 𑀢𑀫𑁆𑀩𑀤𑀸𑀥𑀺𑀓𑀲𑁆𑀲 𑀬𑀸𑀯𑀚𑀻𑀯𑀁 𑀩𑀳𑀽𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀆𑀘𑀺𑀡𑁆𑀡𑀸𑀦𑀺. 𑀫𑀭𑀡 𑀤𑀺𑀯𑀲𑁂 𑀧𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀘𑀯𑀺𑀢𑁆𑀯𑀸 𑀢𑁂𑀦 𑀆𑀲𑀦𑁆𑀦 𑀓𑀫𑁆𑀫𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺. 𑀯𑀸𑀢𑀓𑀸𑀮𑀲𑁆𑀲 𑀬𑀸𑀯𑀚𑀻𑀯𑀁 𑀩𑀳𑀽𑀦𑀺 𑀓𑀮𑁆𑀬𑀸𑀡 𑀓𑀫𑁆𑀫𑀸𑀦𑀺 𑀆𑀘𑀺𑀡𑁆𑀡𑀸𑀦𑀺. 𑀫𑀭𑀡 𑀤𑀺𑀯𑀲𑁂𑀧𑀦 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀧𑀭𑀻𑀢 𑀲𑀜𑁆𑀜𑀁 𑀓𑀢𑁆𑀯𑀸 𑀢𑁂𑀦 𑀆𑀲𑀦𑁆𑀦 𑀓𑀫𑁆𑀫𑁂𑀦 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀺.

𑀕𑀭𑀼𑀓𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁪. 𑁭. 𑀤𑀺𑀝𑁆𑀞𑀥𑀫𑁆𑀫𑀘𑀢𑀼𑀓𑁆𑀓𑁂. 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀤𑀺𑀝𑁆𑀞𑁄. ‘‘𑀥𑀫𑁆𑀫𑁄’’𑀢𑀺 𑀔𑀦𑁆𑀥𑀸𑀬𑀢𑀦 𑀥𑀫𑁆𑀫 𑀲𑀫𑀽𑀳𑁄. 𑀤𑀺𑀝𑁆𑀞𑁄 𑀥𑀫𑁆𑀫𑁄𑀢𑀺 𑀤𑀺𑀝𑁆𑀞 𑀥𑀫𑁆𑀫𑁄. 𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑀲𑀫𑀽𑀳𑁄. 𑀬𑁄 𑀅𑀢𑁆𑀢𑀪𑀸𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑀲𑀸𑀭𑀲𑁆𑀲 𑀪𑀸𑀯𑁄 𑀧𑀯𑀢𑁆𑀢𑀺 𑀓𑀸𑀭𑀡𑀦𑁆𑀢𑀺 𑀓𑀢𑁆𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞 𑀥𑀫𑁆𑀫𑁄 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳. ‘‘𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀏𑀢𑁂𑀦 𑀓𑀣𑀁 𑀓𑀫𑁆𑀫𑀲𑀸𑀥𑀦𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀲𑀁𑀯𑁂𑀤𑀦 𑀓𑁆𑀭𑀺𑀬𑀸𑀧𑀤𑁂 𑀯𑀺𑀧𑀸𑀓𑀦𑁆𑀢𑀺 𑀓𑀫𑁆𑀫𑀧𑀤𑀁 𑀤𑀺𑀲𑁆𑀯𑀸 𑀯𑀺𑀧𑀸𑀓𑀁 𑀦𑀸𑀫 𑀯𑁂𑀤𑀺𑀢𑀩𑁆𑀩𑀁 𑀯𑁂𑀤𑀦𑀻𑀬𑀁. 𑀧𑀝𑀺𑀲𑀁𑀯𑁂𑀤𑀺𑀢𑀩𑁆𑀩𑀁 𑀧𑀝𑀺𑀲𑀁𑀯𑁂𑀤𑀦𑀻𑀬𑀦𑁆𑀢𑀺 𑀯𑀺𑀜𑁆𑀜𑀸𑀢𑀢𑁆𑀢𑀸. ‘‘𑀉𑀧𑁂𑀘𑁆𑀘𑀸’’𑀢𑀺 𑀉𑀧𑀕𑀦𑁆𑀢𑁆𑀯𑀸. ‘‘𑀉𑀧𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀉𑀧𑁂𑀘𑁆𑀘 𑀧𑀚𑁆𑀚𑀺𑀢𑁆𑀯𑀸. 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀤𑀺𑀝𑁆𑀞 𑀥𑀫𑁆𑀫𑀢𑁄’’𑀢𑀺 𑀤𑀺𑀝𑁆𑀞 𑀥𑀫𑁆𑀫𑀲𑁆𑀲. 𑀲𑀸𑀫𑀺𑀅𑀢𑁆𑀣𑁂 𑀧𑀜𑁆𑀘𑀫𑀻. 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. ‘‘𑀏𑀢𑁆𑀣𑀳𑀻’’𑀢𑀺𑀆𑀤𑀺 𑀧𑀼𑀩𑁆𑀩𑀯𑀸𑀓𑁆𑀬𑁂 𑀯𑀼𑀢𑁆𑀢 𑀦𑀬𑀫𑁂𑀯. 𑀅𑀧𑀭𑀲𑀤𑁆𑀤𑁄 𑀦𑀺𑀘𑁆𑀘𑀁 𑀅𑀧𑀸𑀤𑀸𑀦𑀸 𑀧𑁂𑀓𑁆𑀔𑁄. 𑀢𑀜𑁆𑀘 𑀅𑀧𑀸𑀤𑀸𑀦𑀁 𑀦𑀸𑀫 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀧𑀤𑁂𑀳𑀺. ‘‘𑀤𑀺𑀝𑁆𑀞𑀥𑀫𑁆𑀫𑀸 𑀦𑀸𑀕𑀢𑀸𑀦𑀦𑁆𑀢𑀭 𑀪𑀯𑁂𑀳𑀻’’𑀢𑀺 𑀤𑀺𑀝𑁆𑀞𑀥𑀫𑁆𑀫𑀢𑁄 𑀘 𑀅𑀦𑀸𑀕𑀢𑀸𑀦𑀦𑁆𑀢𑀭 𑀪𑀯𑀢𑁄 𑀘𑀸𑀢𑀺 𑀅𑀢𑁆𑀣𑁄. ‘‘𑀧𑀭𑀺𑀯𑀢𑁆𑀢𑁄’’𑀢𑀺 𑀧𑀩𑀦𑁆𑀥𑁄. 𑀅𑀧𑀭𑀸𑀧𑀭𑀺𑀬𑁄𑀢𑀺 𑀯𑀸, 𑀅𑀧𑀭𑁄 𑀘 𑀅𑀧𑀭𑁄 𑀘 𑀅𑀧𑀭𑀸𑀧𑀭𑁄. 𑀅𑀧𑀭𑀸𑀧𑀭𑁂 𑀧𑀯𑀢𑁆𑀢𑁄 𑀅𑀧𑀭𑀸𑀧𑀭𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀉𑀧𑀧𑀚𑁆𑀚𑀪𑀯𑀁’’𑀢𑀺 𑀅𑀦𑀸𑀕𑀢𑀸𑀦𑀦𑁆𑀢𑀭𑀪𑀯𑀁. 𑀅𑀳𑁄𑀲𑀺 𑀓𑀫𑁆𑀫𑁂 ‘‘𑀅𑀳𑁄𑀲𑀻’’𑀢𑀺 𑀧𑀤𑀁 𑀅𑀜𑁆𑀜𑀸𑀲𑀺 𑀓𑁄𑀡𑁆𑀟𑀜𑁆𑀜𑁄𑀢𑀺 𑀧𑀤𑁂𑀯𑀺𑀬 𑀭𑀼𑀴𑁆𑀳𑀻𑀦𑀸𑀫𑀧𑀤𑀦𑁆𑀢𑀺 𑀆𑀳 ‘‘𑀅𑀳𑁄𑀲𑀺 𑀦𑀸𑀫𑀓𑀁’’𑀢𑀺. 𑀢𑀁 𑀧𑀦 𑀭𑀼𑀴𑁆𑀳𑀺𑀧𑀤𑀁 𑀓𑀼𑀢𑁄𑀧𑀯𑀢𑁆𑀢𑀁𑀢𑀺 𑀆𑀳 ‘‘𑀅𑀳𑁄𑀲𑀺 𑀓𑀫𑁆𑀫𑀁’’𑀢𑀺𑀆𑀤𑀺𑀁. ‘‘𑀏𑀯𑀁 𑀯𑀼𑀢𑁆𑀢 𑀧𑀸𑀞𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀇𑀥 𑀯𑀼𑀢𑁆𑀢𑁄 𑀧𑀸𑀞𑁄 𑀲𑀸 𑀯𑀲𑁂𑀲𑁄. 𑀧𑀭𑀺𑀧𑀼𑀡𑁆𑀡𑀧𑀸𑀞𑁄 𑀧𑀦 𑀅𑀳𑁄𑀲𑀺 𑀓𑀫𑁆𑀫𑀁 𑀅𑀳𑁄𑀲𑀺 𑀓𑀫𑁆𑀫 𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫 𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀅𑀢𑁆𑀣𑀺𑀓𑀫𑁆𑀫 𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫 𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫 𑀯𑀺𑀧𑀸𑀓𑁄𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑁂 𑀆𑀕𑀢𑁄. ‘‘𑀲𑀸’’𑀢𑀺 𑀧𑀣𑀫 𑀚𑀯𑀦 𑀘𑁂𑀢𑀦𑀸. ‘‘𑀅𑀧𑁆𑀧𑀢𑀭 𑀯𑀺𑀧𑀸𑀓𑀸 𑀘𑀸𑀢𑀻’’𑀢𑀺 𑀏𑀢𑁆𑀣 ‘‘𑀇𑀢𑀻’’𑀢𑀺 𑀳𑁂𑀢𑀼 𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀅𑀘𑀺𑀭𑀝𑁆𑀞𑀺𑀢𑀺 𑀓𑀢𑁆𑀢𑀸 𑀤𑀺𑀝𑁆𑀞 𑀥𑀫𑁆𑀫𑁂 𑀏𑀯 𑀨𑀮𑀁 𑀤𑀢𑁆𑀯𑀸 𑀯𑀺𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀢𑀭 𑀯𑀺𑀧𑀸𑀓𑀢𑁆𑀢𑀸 𑀅𑀳𑁂𑀢𑀼𑀓𑀫𑀢𑁆𑀢𑀁 𑀨𑀮𑀁 𑀤𑀢𑁆𑀯𑀸 𑀯𑀺𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀘𑁆𑀘𑀬𑁄𑀢𑀺 𑀘𑀸’’𑀢𑀺 𑀧𑀘𑁆𑀘𑀬𑀁 𑀮𑀤𑁆𑀥𑀸𑀢𑀺 𑀯𑀼𑀢𑁆𑀢𑁄 𑀧𑀘𑁆𑀘𑀬𑁄𑀢𑀺 𑀘. ‘‘𑀲𑁄’’𑀢𑀺 𑀫𑀳𑀦𑁆𑀢𑀁 𑀯𑀼𑀢𑁆𑀢𑁄 𑀧𑀘𑁆𑀘𑀬𑁄. ‘‘𑀓𑀸𑀓𑀯𑀮𑀺𑀬𑀸𑀤𑀻𑀦𑀁 𑀯𑀺𑀬𑀸’’𑀢𑀺 𑀓𑀸𑀓𑀯𑀮𑀺𑀬𑀸𑀤𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀤𑀺𑀝𑁆𑀞𑀯𑁂𑀤𑀦𑀻𑀬 𑀓𑀫𑁆𑀫𑀁 𑀯𑀺𑀬. ‘‘𑀧𑀸𑀓𑀝𑀢𑀭𑀧𑁆𑀨𑀮𑀤𑀸𑀦𑀁’’𑀢𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀏𑀯 𑀲𑁂𑀝𑁆𑀞𑀺𑀝𑁆𑀞𑀸𑀦𑀧𑁆𑀧𑀝𑀺 𑀮𑀸𑀪𑀸𑀤𑀺𑀯𑀲𑁂𑀦 𑀧𑀸𑀓𑀝𑀢𑀭𑀧𑁆𑀨𑀮𑀤𑀸𑀦𑀓𑀁 𑀓𑀫𑁆𑀫𑀯𑀺𑀲𑁂𑀲𑀁. 𑀓𑀫𑁆𑀫 𑀧𑀣𑀚𑀯𑀦𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀧𑀣𑀫𑀚𑀯𑀦 𑀘𑁂𑀢𑀦𑀸 𑀯𑀸 𑀇𑀢𑀭𑀸𑀧𑀺 𑀧𑀣𑀫 𑀚𑀯𑀦 𑀘𑁂𑀢𑀦𑀸 𑀯𑀸𑀢𑀺 𑀬𑁄𑀚𑀦𑀸. ‘‘𑀓𑀸𑀘𑀻’’𑀢𑀺 𑀏𑀓𑀘𑁆𑀘𑀸 𑀧𑀣𑀫𑀚𑀯𑀦 𑀘𑁂𑀢𑀦𑀸. 𑀲𑁂𑀲𑀸𑀦𑀺 𑀤𑀺𑀝𑁆𑀞𑀥𑀫𑁆𑀫 𑀯𑁂𑀤𑀦𑀻𑀬 𑀓𑀫𑁆𑀫𑀸𑀦𑀺.

𑀉𑀧𑀧𑀚𑁆𑀚𑀓𑀫𑁆𑀫𑁂. ‘‘𑀅𑀢𑁆𑀣 𑀲𑀸𑀥𑀺𑀓𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀲𑀸𑀥𑀺𑀓𑀸. 𑀧𑀸𑀡𑀖𑀸𑀢𑀸𑀤𑀺 𑀓𑀺𑀘𑁆𑀘𑀲𑀸𑀥𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀝𑁆𑀞𑀼 𑀦𑀺𑀝𑁆𑀞𑀸𑀧𑁂𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀧𑀺𑀓𑀸. ‘‘𑀲𑁂𑀲𑀸𑀦𑀺 𑀧𑀻’’𑀢𑀺 𑀲𑁂𑀲𑀸𑀦𑀺 𑀉𑀧𑀧𑀚𑁆𑀚 𑀯𑁂𑀤𑀦𑀻𑀬 𑀓𑀫𑁆𑀫𑀸𑀦𑀺𑀧𑀺. ‘‘𑀇𑀥𑀸’’𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲 𑀮𑁄𑀓𑁂. ‘‘𑀫𑀺𑀲𑁆𑀲𑀓𑀓𑀫𑁆𑀫𑀸𑀦𑀻’’𑀢𑀺 𑀓𑀼𑀲𑀮𑀸 𑀓𑀼𑀲𑀮𑀫𑀺𑀲𑁆𑀲𑀓𑀸𑀦𑀺 𑀓𑀫𑁆𑀫𑀸𑀦𑀺. 𑀯𑁂𑀫𑀸𑀦𑀺𑀓𑀧𑁂𑀢𑀯𑀢𑁆𑀣𑀽𑀦𑀺 𑀯𑀺𑀫𑀸𑀦𑀯𑀢𑁆𑀣𑀼 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺. ‘‘𑀲𑀼𑀕𑀢𑀺𑀬𑀁 𑀯𑀺𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀸𑀦𑀺 𑀯𑀢𑁆𑀣𑀽𑀦𑀻’’𑀢𑀺 𑀏𑀢𑁆𑀣 ‘‘𑀯𑀺𑀧𑀢𑁆𑀢𑀺𑀁’’𑀢𑀺 𑀘𑀓𑁆𑀔𑀼 𑀲𑁄𑀢𑀸𑀤𑀻𑀦𑀁 𑀅𑀗𑁆𑀕 𑀧𑀘𑁆𑀘𑀗𑁆𑀕𑀸𑀦𑀁 𑀯𑀸 𑀯𑀺𑀧𑀢𑁆𑀢𑀺𑀁. 𑀦𑀸𑀦𑀸 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀪𑀽𑀢𑀁 𑀯𑀸 𑀯𑀺𑀧𑀢𑁆𑀢𑀺𑀁. ‘‘𑀤𑀼𑀕𑁆𑀕𑀢𑀺𑀬𑀁 𑀲𑀫𑁆𑀧𑀢𑁆𑀢𑀺𑀁’’𑀢𑀺 𑀫𑀳𑀺𑀤𑁆𑀥𑀻𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺𑀁. ‘‘𑀬𑀣𑀸 𑀯𑀼𑀢𑁆𑀢 𑀯𑀢𑁆𑀣𑀽𑀳𑀻’’𑀢𑀺 𑀯𑁂𑀫𑀸𑀦𑀺𑀓 𑀧𑁂𑀢𑀯𑀢𑁆𑀣𑀸𑀤𑀻𑀳𑀺. 𑀅𑀝𑁆𑀞𑀓𑀣𑀸𑀧𑀸𑀞𑁂. ‘‘𑀢𑁂𑀲𑀁 𑀲𑀗𑁆𑀓𑀫𑀦𑀁 𑀦𑀢𑁆𑀣𑀻’’𑀢𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀯𑀺𑀧𑀘𑁆𑀘𑀦𑀓𑀸𑀮 𑀲𑀗𑁆𑀓𑀦𑁆𑀢𑀺 𑀦𑀸𑀫 𑀦𑀢𑁆𑀣𑀺. ‘‘𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀢𑀸𑀦𑀺 𑀤𑀺𑀝𑁆𑀞 𑀥𑀫𑁆𑀫𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀪𑀕𑀯𑀢𑀸 𑀬𑀣𑀸 𑀯𑀼𑀢𑁆𑀢𑀝𑁆𑀞𑀸𑀦𑁂 𑀏𑀯 𑀢𑀺𑀝𑁆𑀞𑀦𑁆𑀢𑀺. ‘‘𑀏𑀯𑀁 𑀯𑀼𑀢𑁆𑀢𑀁’’𑀢𑀺 𑀢𑁂𑀲𑀁 𑀲𑀗𑁆𑀓𑀫𑀦𑀁 𑀦𑀢𑁆𑀣𑀻𑀢𑀺𑀆𑀤𑀺𑀦𑀬𑁂𑀦 𑀯𑀼𑀢𑁆𑀢𑀁. ‘‘𑀬𑀼𑀢𑁆𑀢𑀺𑀬𑀸 𑀯𑀸 𑀅𑀪𑀸𑀯𑀢𑁄’’𑀢𑀺 𑀏𑀢𑁆𑀣 𑀤𑀺𑀝𑁆𑀞 𑀥𑀫𑁆𑀫 𑀯𑁂𑀤𑀦𑀻𑀬𑀲𑁆𑀲 𑀧𑀝𑀺𑀲𑀦𑁆𑀥𑀺 𑀯𑀺𑀧𑀸𑀓𑀸𑀤𑀺 𑀬𑀼𑀢𑁆𑀢𑀺𑀬𑀸 𑀅𑀪𑀸𑀯𑀢𑁄.

𑀤𑀺𑀝𑁆𑀞𑀥𑀫𑁆𑀫𑀘𑀢𑀼𑀓𑁆𑀓𑀁.

𑁧𑁪𑁮. 𑀧𑀸𑀓𑀝𑁆𑀞𑀸𑀦𑀘𑀢𑀼𑀓𑁆𑀓𑁂. ‘‘𑀓𑀸𑀬𑀸𑀤𑀻𑀦𑀁’’𑀢𑀺 𑀘𑁄𑀧𑀦𑀓𑀸𑀬𑀸𑀤𑀻𑀦𑀁. 𑀓𑀸𑀬 𑀯𑀺𑀜𑁆𑀜𑀢𑁆𑀢𑀸𑀤𑀻𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀢𑀺𑀧𑀸𑀢𑁂𑀦𑁆𑀢𑀻’’𑀢𑀺 𑀅𑀢𑀺𑀓𑁆𑀓𑀫𑁆𑀫 𑀧𑀬𑁄𑀕𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀢𑀺𑀧𑀸𑀢𑀦𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺𑀁. ‘‘𑀅𑀤𑀺𑀦𑁆𑀦𑀁’’𑀢𑀺 𑀲𑀸𑀫𑀺𑀓𑁂𑀦𑀅𑀤𑀺𑀦𑁆𑀦𑀁 𑀧𑀭𑀲𑀦𑁆𑀢𑀓𑀁. 𑀅𑀕𑀫𑀦𑀻𑀬𑀯𑀢𑁆𑀣𑀽𑀦𑀺 𑀦𑀸𑀫 𑀅𑀯𑀻𑀢𑀺𑀓𑁆𑀓𑀫𑀦𑀢𑁆𑀣𑀸𑀬 𑀅𑀦𑀼𑀧𑀕𑀦𑁆𑀢𑀩𑁆𑀩𑀸𑀦𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀻𑀦𑀺 𑀇𑀢𑁆𑀣𑀺 𑀧𑀼𑀭𑀺𑀲𑀲𑀭𑀻𑀭𑀸𑀦𑀺. ‘‘𑀢𑀲𑁆𑀲𑀸’’𑀢𑀺 𑀧𑀭𑀧𑀸𑀡𑀲𑁆𑀲. ‘‘𑀢𑀢𑁄’’𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢 𑀪𑀸𑀯𑀢𑁄. ‘‘𑀅𑀘𑁆𑀙𑀺𑀦𑁆𑀤𑀓 𑀘𑁂𑀢𑀦𑀸’’𑀢𑀺 𑀧𑀭𑀲𑀦𑁆𑀢𑀓𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀓𑀭𑀡𑀯𑀲𑁂𑀦 𑀪𑀼𑀲𑀁 𑀧𑀭𑀲𑀦𑁆𑀢𑀓𑀸 𑀪𑀸𑀯𑀘𑁆𑀙𑀺𑀦𑁆𑀤𑀓 𑀘𑁂𑀢𑀦𑀸. 𑀯𑀺𑀮𑀼𑀧𑁆𑀧𑀦 𑀘𑁂𑀢𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀝𑀺𑀧𑀸𑀤𑀓𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀫𑀕𑁆𑀕𑁂𑀦 𑀧𑀭𑀫𑀕𑁆𑀕 𑀲𑀫𑁆𑀧𑀬𑁄𑀚𑀓𑀲𑁆𑀲. ‘‘𑀏𑀢𑁆𑀣𑀧𑀻’’𑀢𑀺 𑀬𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑁂 𑀧𑀭𑀧𑀭𑀺𑀕𑁆𑀕𑀳𑀺𑀢 𑀲𑀜𑁆𑀜𑀺𑀦𑁄𑀢𑀺 𑀤𑀼𑀢𑀻𑀬𑀁 𑀅𑀗𑁆𑀕𑀧𑀤𑀁 𑀯𑀼𑀢𑁆𑀢𑀁. 𑀏𑀯𑀁 𑀏𑀢𑁆𑀣𑀧𑀺. 𑀏𑀢𑁆𑀣 𑀯𑀤𑀦𑁆𑀢𑀺 𑀅𑀕𑀫𑀦𑀻𑀬 𑀯𑀢𑁆𑀣𑀼 𑀯𑀲𑁂𑀦 𑀘𑀺𑀢𑁆𑀢𑀦𑁆𑀢𑀺 𑀅𑀯𑀢𑁆𑀯𑀸 𑀢𑀲𑁆𑀫𑀺𑀁 𑀲𑁂𑀯𑀦 𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀕𑀫𑀦𑀻𑀬 𑀯𑀢𑁆𑀣𑀼 𑀲𑀜𑁆𑀜𑀺𑀢𑀸𑀢𑀺 𑀅𑀯𑀼𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀻𑀢𑀺. 𑀦 𑀳𑁄𑀢𑀺. 𑀦 𑀳𑀺 𑀢𑀲𑁆𑀫𑀺𑀦𑁆𑀢𑀺 𑀯𑀘𑀦𑀁 𑀲𑀜𑁆𑀜𑀸𑀯𑀺𑀲𑁂𑀲 𑀲𑀳𑀺𑀢𑀁 𑀅𑀢𑁆𑀣𑀁 𑀯𑀤𑀢𑀺. 𑀈𑀤𑀺𑀲𑁂𑀲𑀼 𑀘 𑀞𑀸𑀦𑁂𑀲𑀼 𑀲𑀘𑁂 𑀲𑀜𑁆𑀜𑀸𑀧𑀥𑀸𑀦𑀁 𑀳𑁄𑀢𑀺. 𑀧𑀸𑀡𑀲𑀜𑁆𑀜𑀺𑀢𑀸, 𑀧𑀭𑀧𑀭𑀺𑀕𑁆𑀕𑀳𑀺𑀢 𑀲𑀜𑁆𑀜𑀺𑀢𑀸,𑀢𑀺 𑀅𑀗𑁆𑀕 𑀧𑀤𑀁 𑀯𑀺𑀬 𑀇𑀥𑀧𑀺 𑀅𑀕𑀫𑀦𑀻𑀬 𑀯𑀢𑁆𑀣𑀼 𑀲𑀜𑁆𑀜𑀺𑀢𑀸𑀢𑀺 𑀤𑀼𑀢𑀻𑀬𑀁 𑀅𑀗𑁆𑀕𑀧𑀤𑀁 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀓𑀲𑁆𑀫𑀸, 𑀅𑀗𑁆𑀕𑀦𑀺𑀬𑀫𑀝𑁆𑀞𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀏𑀢𑁂𑀦𑀸’’𑀢𑀺𑀆𑀤𑀺𑀁. ‘‘𑀘𑀢𑀼𑀭𑀗𑁆𑀕𑀻𑀓𑁄𑀯 𑀯𑀼𑀢𑁆𑀢𑁄’’𑀢𑀺 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸. 𑀅𑀕𑀫𑀦𑀻𑀬 𑀯𑀢𑁆𑀣𑀼, 𑀢𑀲𑁆𑀫𑀺𑀁 𑀲𑁂𑀯𑀦 𑀘𑀺𑀢𑁆𑀢𑀁, 𑀲𑁂𑀯𑀦𑀧𑁆𑀧𑀬𑁄𑀕𑁄, 𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀺 𑀅𑀥𑀺𑀯𑀸𑀲𑀦𑀦𑁆𑀢𑀺. ‘‘𑀲𑀸’’𑀢𑀺 𑀪𑀺𑀓𑁆𑀔𑀼𑀦𑀻. ‘‘𑀭𑀓𑁆𑀔𑀺𑀢𑀸𑀲𑀼 𑀲𑀗𑁆𑀕𑀳𑀺𑀢𑀸’’𑀢𑀺 𑀫𑀸𑀢𑀼𑀭𑀓𑁆𑀔𑀺𑀢 𑀧𑀺𑀢𑀼 𑀭𑀓𑁆𑀔𑀺𑀢𑀸𑀤𑀻𑀲𑀼 𑀲𑀗𑁆𑀕𑀳𑀺𑀢𑀸. ‘‘𑀝𑀻𑀓𑀸𑀲𑀼 𑀧𑀦𑀸’’𑀢𑀺 𑀲𑀼𑀢𑁆𑀢𑀦𑁆𑀢𑀝𑀻𑀓𑀸𑀲𑀼 𑀧𑀦. ‘‘𑀲𑀸’’𑀢𑀺 𑀪𑀺𑀓𑁆𑀔𑀼𑀦𑀻. 𑀧𑀸𑀲𑀡𑁆𑀟𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀤𑀻𑀦𑀺. 𑀢𑀁 𑀯𑀸𑀤𑀺𑀦𑁄 𑀧𑀸𑀲𑀡𑁆𑀟𑀺𑀬𑀸 𑀦𑀸𑀫. 𑀢𑁂𑀲𑀁 𑀥𑀫𑁆𑀫𑁄 𑀧𑀸𑀲𑀡𑁆𑀟𑀺𑀬 𑀥𑀫𑁆𑀫𑁄 𑀦𑀸𑀫. 𑀫𑀺𑀘𑁆𑀙𑀸𑀘𑀸𑀭𑁄𑀧𑀺 𑀤𑀼𑀲𑁆𑀲𑀻𑀮𑀸𑀬 𑀇𑀢𑁆𑀣𑀺𑀬𑀸 𑀯𑀻𑀢𑀺𑀓𑁆𑀓𑀫𑁄 𑀅𑀧𑁆𑀧𑀲𑀸𑀯𑀚𑁆𑀚𑁄. 𑀢𑀢𑁄 𑀕𑁄𑀭𑀽𑀧 𑀲𑀻𑀮𑀺𑀓𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀢𑁄 𑀲𑀭𑀡𑀗𑁆𑀕𑀢𑀸𑀬, 𑀧𑀜𑁆𑀘 𑀲𑀺𑀓𑁆𑀔𑀸 𑀧𑀤𑀺𑀓𑀸𑀬, 𑀲𑀸𑀫𑀡𑁂𑀭𑀺𑀬𑀸, 𑀧𑀼𑀣𑀼𑀚𑁆𑀚𑀦 𑀪𑀺𑀓𑁆𑀔𑀼𑀦𑀺𑀬𑀸𑀢𑀺𑀆𑀤𑀺. 𑀅𑀝𑁆𑀞𑀓𑀣𑀸 𑀧𑀸𑀞𑁂. ‘‘𑀏𑀢𑁆𑀣𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀓𑀼𑀲𑀮𑀓𑀸𑀬𑀓𑀫𑁆𑀫𑁂. ‘‘𑀦 𑀕𑀳𑀺𑀢𑀁’’𑀢𑀺 𑀣𑁂𑀭𑁂𑀦 𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀸 𑀦 𑀕𑀳𑀺𑀢𑀁. 𑀲𑀼𑀭𑀜𑁆𑀘 𑀫𑁂𑀭𑀬𑀜𑁆𑀘 𑀧𑀺𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀼𑀭𑀸𑀫𑁂𑀭𑀬 𑀧𑀸𑀦𑀁. 𑀢𑀤𑀚𑁆𑀛𑁄𑀳𑀭𑀡 𑀘𑁂𑀢𑀦𑀸 𑀓𑀫𑁆𑀫𑀁. ‘‘𑀲𑀩𑁆𑀩 𑀮𑀳𑀼𑀓𑁄’’𑀢𑀺 𑀲𑀩𑁆𑀩𑁂𑀲𑀁 𑀲𑀼𑀭𑀸𑀧𑀸𑀦 𑀓𑀫𑁆𑀫 𑀯𑀺𑀧𑀸𑀓𑀸𑀦𑀁 𑀫𑀚𑁆𑀛𑁂 𑀬𑁄 𑀯𑀺𑀧𑀸𑀓𑁄 𑀮𑀳𑀼𑀓𑀢𑀭𑁄, 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀉𑀫𑁆𑀫𑀢𑁆𑀢𑀓𑀲𑀁𑀯𑀢𑁆𑀢𑀦𑀺𑀓𑁄’’𑀢𑀺 𑀉𑀫𑁆𑀫𑀢𑁆𑀢𑀪𑀸𑀯 𑀲𑀁𑀯𑀢𑁆𑀢𑀦𑀺𑀓𑁄. ‘‘𑀧𑀜𑁆𑀘𑀧𑀻’’𑀢𑀺 𑀲𑀼𑀭𑀸𑀧𑀸𑀦 𑀓𑀫𑁆𑀫𑁂𑀦 𑀲𑀳 𑀧𑀜𑁆𑀘𑀧𑀺. 𑀫𑀽𑀮𑀝𑀻𑀓𑀸 𑀯𑀘𑀦𑁂. ‘‘𑀢𑀲𑁆𑀲𑀸’’𑀢𑀺 𑀲𑀼𑀭𑀸𑀧𑀸𑀦 𑀓𑀫𑁆𑀫𑀲𑁆𑀲. 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀝𑀻𑀓𑀸𑀬𑀁 𑀇𑀫𑀲𑁆𑀲 𑀯𑀸𑀓𑁆𑀬𑀲𑁆𑀲 𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 ‘‘𑀢𑀩𑁆𑀩𑀺 𑀭𑀫𑀡𑀸𑀤𑀬𑁄 𑀘𑀸’’𑀢𑀺 𑀢𑀢𑁄 𑀲𑀼𑀭𑀸𑀧𑀸𑀦𑀢𑁄 𑀯𑀺𑀭𑀫𑀡𑀸𑀤𑀬𑁄 𑀘. ‘‘𑀫𑀤𑀲𑁆𑀲𑀸’’𑀢𑀺 𑀫𑀚𑁆𑀚𑀦𑀲𑁆𑀲. ‘‘𑀅𑀧𑀼𑀜𑁆𑀜𑀧𑀣𑀲𑁆𑀲𑀸’’𑀢𑀺 𑀅𑀓𑀼𑀲𑀮 𑀓𑀫𑁆𑀫 𑀧𑀣𑀲𑁆𑀲. ‘‘𑀢𑀩𑁆𑀩𑀺𑀭𑀢𑀺 𑀧𑀻’’𑀢𑀺 𑀢𑀢𑁄 𑀲𑀼𑀭𑀸𑀧𑀸𑀦𑀢𑁄 𑀯𑀺𑀭𑀢𑀺𑀧𑀺. ‘‘𑀦𑀺𑀫𑁆𑀫𑀤𑀢𑀸𑀬𑀸’’𑀢𑀺 𑀫𑀚𑁆𑀚𑀦𑀭𑀳𑀺𑀢 𑀪𑀸𑀯𑀲𑁆𑀲. ‘‘𑀲𑀸’’𑀢𑀺 𑀦𑀺𑀫𑁆𑀫𑀤𑀢𑀸. ‘‘𑀧𑀼𑀜𑁆𑀜𑀧𑀣𑀲𑁆𑀲𑀸’’𑀢𑀺 𑀓𑀼𑀲𑀮𑀓𑀫𑁆𑀫 𑀧𑀣𑀲𑁆𑀲. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. ‘‘𑀢𑀸𑀦𑀻’’𑀢𑀺 𑀲𑀼𑀭𑀸𑀧𑀸𑀦 𑀓𑀫𑁆𑀫𑀢𑀩𑁆𑀩𑀺𑀭𑀢𑀺 𑀓𑀫𑁆𑀫𑀸𑀦𑀺. ‘‘𑀦 𑀇𑀢𑀭𑀁’’𑀢𑀺 𑀓𑀫𑁆𑀫𑀧𑀣𑁂𑀳𑀺 𑀅𑀲𑀫𑁆𑀩𑀦𑁆𑀥𑀁. 𑀲𑀼𑀭𑀸𑀧𑀸𑀦𑀁 𑀯𑀺𑀲𑀼𑀁 𑀧𑀝𑀺𑀲𑀦𑁆𑀥𑀺𑀁 𑀦 𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀢𑀩𑁆𑀩𑀺𑀭𑀢𑀺 𑀓𑀫𑁆𑀫𑁂 𑀧𑀦 𑀲𑀘𑁂 𑀇𑀤𑀁 𑀲𑀼𑀭𑀸𑀧𑀸𑀦𑀁 𑀦𑀸𑀫 𑀧𑀸𑀧𑀓𑀫𑁆𑀫𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀜𑀢𑁆𑀯𑀸 𑀲𑀫𑀸𑀤𑀸𑀦 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺 𑀯𑀲𑁂𑀦 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀭𑀓𑁆𑀔𑀢𑀺. 𑀢𑀁 𑀲𑀻𑀮𑀁 𑀅𑀜𑁆𑀜𑁂𑀳𑀺 𑀧𑀼𑀜𑁆𑀜𑀧𑀣𑁂𑀳𑀺 𑀅𑀲𑀫𑁆𑀩𑀦𑁆𑀥𑀫𑁆𑀧𑀺 𑀯𑀺𑀲𑀼𑀁 𑀧𑀝𑀺𑀲𑀦𑁆𑀥𑀺𑀁 𑀦 𑀤𑁂𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. ‘‘𑀏𑀯𑀫𑀺𑀤𑀁 𑀧𑀻’’𑀢𑀺 𑀏𑀯𑀁 𑀇𑀤𑀫𑁆𑀧𑀺 𑀲𑀼𑀭𑀸𑀧𑀸𑀦 𑀓𑀫𑁆𑀫𑀁 𑀓𑀫𑁆𑀫 𑀧𑀣𑀧𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀁 𑀏𑀯 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀢𑁆𑀣𑀸’’𑀢𑀺 𑀓𑀫𑁆𑀫𑀧𑀣𑀲𑀼𑀢𑁆𑀢𑁂𑀲𑀼. 𑀲𑀭𑀽𑀧𑀢𑁄 𑀦 𑀯𑀼𑀢𑁆𑀢𑀦𑁆𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀁’’𑀢𑀺 𑀬𑀁 𑀲𑀼𑀭𑀸𑀧𑀸𑀦 𑀓𑀫𑁆𑀫𑀁. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼 𑀓𑀫𑁆𑀫𑀧𑀣𑀲𑀼𑀢𑁆𑀢𑁂𑀲𑀼. 𑀓𑀫𑁆𑀫 𑀚𑀦𑀦𑀁 𑀦𑀸𑀫 𑀤𑀼𑀘𑁆𑀘𑀭𑀺𑀢 𑀓𑀫𑁆𑀫𑀸𑀦𑀁 𑀚𑀦𑀦𑀁. 𑀲𑀓𑁆𑀓𑁂𑀦 𑀤𑁂𑀯𑀸𑀦 𑀫𑀺𑀦𑁆𑀤𑁂𑀦 𑀢𑀲𑁆𑀲 𑀅𑀧𑀸𑀬𑀕𑀸𑀫𑀺𑀢𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀲𑀼𑀭𑀸𑀬 𑀧𑀼𑀡𑁆𑀡𑀁 𑀇𑀫𑀁 𑀲𑀼𑀭𑀸𑀓𑀼𑀫𑁆𑀪𑀁𑀓𑀺𑀡𑀸𑀣. 𑀫𑀽𑀮𑀁 𑀤𑁂𑀣 𑀕𑀡𑁆𑀳𑀸𑀣𑀸𑀢𑀺 𑀅𑀢𑁆𑀣𑁄. ‘‘𑀢𑀲𑁆𑀲𑀸’’𑀢𑀺 𑀲𑀼𑀭𑀸𑀧𑀸𑀦 𑀓𑀫𑁆𑀫𑀲𑁆𑀲. 𑀅𑀧𑀸𑀬𑀁 𑀕𑀫𑁂𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 𑀅𑀧𑀸𑀬 𑀕𑀸𑀫𑀻. ‘‘𑀬𑀤𑀺𑀤𑀁’’𑀢𑀺 𑀬𑀸 𑀅𑀬𑀁 𑀬𑀣𑀸𑀮𑀸𑀪 𑀬𑁄𑀚𑀦𑀸 𑀅𑀢𑁆𑀣𑀺. 𑀫𑀽𑀮𑀝𑀻𑀓𑀸 𑀯𑀘𑀦𑁂. ‘‘𑀓𑀫𑁆𑀫𑀲𑀳𑀚𑀸𑀢𑀸’’𑀢𑀺 𑀅𑀓𑀼𑀲𑀮 𑀓𑀫𑁆𑀫𑀲𑀳𑀚𑀸𑀢𑀸 𑀢𑀡𑁆𑀳𑀸. ‘‘𑀢𑁂𑀲𑀁’’𑀢𑀺 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀓𑀫𑁆𑀫𑀸𑀦𑀁. ‘‘𑀓𑁄𑀝𑁆𑀞𑀸𑀲𑀢𑁄’’𑀢𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀛𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀸 𑀦𑀸𑀫 𑀆𑀕𑀢𑀸. 𑀢𑁂𑀲𑀼 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑁄𑀝𑁆𑀞𑀸𑀲𑀢𑁄 𑀓𑀫𑁆𑀫𑀧𑀣 𑀓𑁄𑀝𑁆𑀞𑀸𑀲𑀺𑀓𑀸 𑀏𑀯. 𑀓𑀫𑁆𑀫𑀧𑀣 𑀓𑁄𑀝𑁆𑀞𑀸𑀲𑁂 𑀅𑀦𑁆𑀢𑁄𑀕𑀥𑀸𑀢𑀺 𑀅𑀢𑁆𑀣𑁄. ‘‘𑀧𑀼𑀭𑀺𑀫𑀸𑀦𑀁 𑀘𑀢𑀼𑀦𑁆𑀦𑀁’’𑀢𑀺 𑀧𑀸𑀡𑀸𑀢𑀺 𑀧𑀸𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁. ‘‘𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀢𑀲𑁆𑀲 𑀓𑀫𑁆𑀫𑀧𑀣𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. ‘‘𑀢𑀢𑀻𑀬𑀁’’𑀢𑀺 𑀢𑀢𑀻𑀬 𑀲𑀼𑀢𑁆𑀢𑀁. 𑀏𑀢𑀸𑀲𑀼𑀧𑀺 𑀘 𑀅𑀝𑁆𑀞𑀓𑀣𑀸𑀲𑀼.

𑀓𑀸𑀬𑀓𑀫𑁆𑀫𑀸𑀤𑀻𑀲𑀼. 𑀲𑀲𑀫𑁆𑀪𑀸𑀭𑀓𑀸𑀬𑁄 𑀦𑀸𑀫 𑀲𑀓𑀮𑁄 𑀭𑀽𑀧𑀓𑀸𑀬𑁄. 𑀧𑀲𑀸𑀤𑀓𑀸𑀬𑁄 𑀦𑀸𑀫 𑀓𑀸𑀬𑀧𑀲𑀸𑀤𑁄 𑀏𑀯. 𑀓𑀸𑀬 𑀯𑀺𑀜𑁆𑀜𑀢𑁆𑀢𑀺 𑀘𑁄𑀧𑀦𑀓𑀸𑀬𑁄 𑀦𑀸𑀫. ‘‘𑀘𑁄𑀧𑀦’’𑀦𑁆𑀢𑀺 𑀘 𑀘𑀮𑀦𑀁 𑀯𑀼𑀘𑁆𑀘𑀢𑀺. ‘‘𑀲𑁄 𑀬𑁂𑀯𑀸’’𑀢𑀺 𑀘𑁄𑀧𑀦𑀓𑀸𑀬𑁄𑀬𑁂𑀯. 𑀓𑀸𑀬𑀓𑀫𑁆𑀫 𑀦𑀸𑀫 𑀮𑀸𑀪𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀫𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. ‘‘𑀓𑀫𑁆𑀫𑀸𑀦𑀺 𑀯𑀺𑀲𑁂𑀲𑁂𑀢𑀼𑀁’’𑀢𑀺 𑀇𑀤𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀇𑀤𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫𑀸𑀢𑀺 𑀯𑀺𑀲𑁂𑀲𑁂𑀢𑀼𑀁 𑀦𑀺𑀬𑀫𑁂𑀢𑀼𑀁. ‘‘𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀓𑀫𑁆𑀫𑀸𑀦𑀺 𑀯𑀺𑀲𑁂𑀲𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀓𑀸𑀬𑀤𑁆𑀯𑀸𑀭𑁂 𑀯𑀼𑀢𑁆𑀢𑀺𑀢𑁄𑀢𑀺 𑀘 𑀯𑀘𑀻𑀤𑁆𑀯𑀸𑀭𑁂 𑀯𑀼𑀢𑁆𑀢𑀺𑀢𑁄𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀯𑀘𑀻𑀤𑁆𑀯𑀸𑀭𑁂 𑀅𑀧𑁆𑀧𑀯𑀢𑁆𑀢𑀺𑀢𑁄 ‘‘𑀧𑀼𑀭𑀺𑀫𑀸𑀦𑀺 𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. ‘‘𑀫𑀚𑁆𑀛𑀺𑀫𑀸𑀦𑀺 𑀘𑀢𑁆𑀢𑀸𑀭𑀻’’𑀢𑀺 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀘𑀻𑀓𑀫𑁆𑀫𑀸𑀦𑀺. ‘‘𑀙𑀩𑁆𑀩𑀺𑀥𑀸𑀦𑀺 𑀢𑀸𑀦𑀺 𑀯𑀚𑁆𑀚𑀸𑀦𑀻𑀢𑀺’’𑀢𑀺 ‘𑀓𑀸𑀬𑀓𑀫𑁆𑀫𑀁 𑀚𑀳𑁂𑀬𑁆𑀬𑀼’𑀦𑁆𑀢𑀺𑀆𑀤𑀻𑀦𑀺 𑀙𑀩𑁆𑀩𑀺𑀥𑀸𑀦𑀺 𑀢𑀸𑀦𑀺 𑀯𑀚𑁆𑀚𑀸𑀦𑀺. 𑀓𑀣𑀁 𑀏𑀓𑀫𑁂𑀓𑁂𑀦 𑀩𑀸𑀳𑀼𑀮𑁆𑀮 𑀲𑀤𑁆𑀤𑁂𑀦 𑀙𑀩𑁆𑀩𑀺𑀥𑀸𑀦𑀺 𑀢𑀸𑀦𑀺 𑀯𑀚𑁆𑀚𑁂𑀢𑀻𑀢𑀺. 𑀅𑀦𑁆𑀯𑀬𑀢𑁄 𑀘 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀯𑀚𑁆𑀚𑁂𑀢𑀺. 𑀓𑀣𑀁, 𑀧𑀸𑀡𑀸𑀢𑀺𑀧𑀸𑀢 𑀓𑀫𑁆𑀫𑀁 𑀓𑀤𑀸𑀘𑀺 𑀅𑀧𑁆𑀧𑀓𑁂𑀦 𑀯𑀘𑀻𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑁂 𑀏𑀯 𑀧𑀯𑀢𑁆𑀢𑀺 𑀩𑀳𑀼𑀮𑀢𑁆𑀢𑀸 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀯𑀘𑀻𑀓𑀫𑁆𑀫 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀤𑁆𑀯𑁂 𑀯𑀸 𑀅𑀲𑁆𑀲 𑀦𑀸𑀫𑀸𑀦𑀺 𑀦 𑀪𑀯𑀦𑁆𑀢𑀺. 𑀯𑀘𑀻𑀤𑁆𑀯𑀸𑀭𑁂 𑀧𑀦 𑀅𑀧𑁆𑀧𑀓𑀯𑀼𑀢𑁆𑀢𑀺𑀢𑁆𑀢𑀸 𑀯𑀘𑀻𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. 𑀓𑀸𑀬𑀓𑀫𑁆𑀫𑀦𑁆𑀢𑀺 𑀦𑀸𑀫𑀁 𑀦 𑀚𑀳𑀢𑀺. 𑀤𑁆𑀯𑁂 𑀯𑀸 𑀅𑀲𑁆𑀲 𑀦𑀸𑀫𑀸𑀦𑀺 𑀦 𑀪𑀯𑀦𑁆𑀢𑀻𑀢𑀺 𑀏𑀯𑀁 𑀏𑀓𑁂𑀦 𑀓𑀸𑀬𑀤𑁆𑀯𑀸𑀭𑁂 𑀩𑀸𑀳𑀼𑀮𑁆𑀮 𑀯𑀼𑀢𑁆𑀢𑀺𑀯𑀘𑀦𑁂𑀦 𑀧𑀸𑀡𑀸𑀢𑀺𑀧𑀸𑀢 𑀓𑀫𑁆𑀫𑁂 𑀙𑀩𑁆𑀩𑀺𑀥𑀸𑀦𑀺 𑀯𑀚𑁆𑀚𑀸𑀦𑀺 𑀯𑀚𑁆𑀚𑁂𑀢𑀻𑀢𑀺. 𑀏𑀯𑀁 𑀲𑁂𑀲𑁂𑀲𑀼. 𑀯𑀦𑀘𑀭𑀓𑁄 𑀦𑀸𑀫 𑀯𑀦𑀮𑀼𑀤𑁆𑀤𑀓𑁄. 𑀲𑁄 𑀧𑀦 𑀓𑀤𑀸𑀘𑀺 𑀅𑀧𑁆𑀧𑀓𑁂𑀦 𑀕𑀸𑀫𑁂 𑀘𑀭𑀦𑁆𑀢𑁄𑀧𑀺 𑀯𑀦𑁂 𑀩𑀸𑀳𑀼𑀮𑁆𑀮 𑀘𑀸𑀭𑀺𑀢𑁆𑀢𑀸 𑀯𑀦𑀘𑀭𑀓𑁄 𑀏𑀯 𑀳𑁄𑀢𑀺. 𑀕𑀸𑀫𑀘𑀭𑀓𑁄𑀢𑀺 𑀦𑀸𑀫𑀁 𑀦 𑀮𑀪𑀢𑀺. 𑀤𑁆𑀯𑁂 𑀯𑀸 𑀅𑀲𑁆𑀲 𑀦𑀸𑀫𑀸𑀦𑀺 𑀦 𑀪𑀯𑀦𑁆𑀢𑀺. 𑀏𑀯𑀁 𑀲𑀗𑁆𑀕𑀸𑀫𑀸𑀯𑀘𑀭𑀓𑀸𑀧𑀺. 𑀲𑀗𑁆𑀕𑀸𑀫𑀸𑀯𑀘𑀭𑁄 𑀦𑀸𑀫 𑀲𑀗𑁆𑀕𑀸𑀫𑁂 𑀩𑀸𑀳𑀼𑀮𑁆𑀮𑀸𑀯𑀘𑀭𑁄 𑀳𑀢𑁆𑀣𑀻 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀫𑀦𑁄𑀤𑁆𑀯𑀸𑀭𑀁 𑀲𑀩𑁆𑀩 𑀓𑀫𑁆𑀫 𑀲𑀸𑀥𑀸𑀭𑀡𑀢𑁆𑀢𑀸 𑀓𑀫𑁆𑀫𑀸𑀦𑀺 𑀯𑀺𑀲𑁂𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘𑀲𑀢𑀺, ‘𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑁂𑀢𑀺 𑀫𑀦𑀲𑁆𑀫𑀺𑀁 𑀯𑀼𑀢𑁆𑀢𑀺𑀢𑁄 𑀫𑀦𑁄𑀓𑀫𑁆𑀫𑀁 𑀦𑀸𑀫𑀸’𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀦𑁄 𑀦 𑀯𑀢𑁆𑀢𑀩𑁆𑀩𑀁. 𑀓𑀫𑁆𑀫 𑀲𑀺𑀤𑁆𑀥𑀺𑀁 𑀧𑀝𑀺𑀘𑁆𑀘 𑀅𑀜𑁆𑀜𑀤𑁆𑀯𑀸𑀭𑁂𑀳𑀺 𑀅𑀲𑀸𑀥𑀸𑀭𑀡𑀢𑁆𑀢𑀸. 𑀢𑁂𑀦𑀸𑀳 ‘‘𑀫𑀦𑁄𑀓𑀫𑁆𑀫𑀸𑀦𑀺 𑀧𑀦𑀸’’𑀢𑀺𑀆𑀤𑀺𑀁. ‘‘𑀲𑀺𑀤𑁆𑀥𑀁’’𑀢𑀺 𑀦𑀺𑀩𑁆𑀩𑀢𑁆𑀢𑀁. ‘‘𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀁’’𑀢𑀺 𑀏𑀢𑁆𑀣 𑀢𑀢𑁆𑀣 𑀘𑁄𑀧𑀦𑀓𑀸𑀬𑁄 𑀓𑀸𑀬𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀩𑀳𑀼𑀮𑀢𑁆𑀢𑀸 𑀓𑀸𑀬𑀓𑀫𑁆𑀫 𑀤𑁆𑀯𑀸𑀭𑀁 𑀦𑀸𑀫. 𑀘𑁄𑀧𑀦𑀯𑀸𑀘𑀸 𑀢𑀢𑁆𑀣 𑀯𑀘𑀻𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀩𑀳𑀼𑀮𑀢𑁆𑀢𑀸 𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀁 𑀦𑀸𑀫. 𑀓𑀼𑀲𑀮𑀸 𑀓𑀼𑀲𑀮 𑀚𑀯𑀦 𑀘𑀺𑀢𑁆𑀢𑀁 𑀧𑀦 𑀫𑀦𑁄𑀓𑀫𑁆𑀫𑀸𑀦𑀁 𑀢𑀢𑁆𑀣𑁂𑀯 𑀓𑀫𑁆𑀫 𑀓𑀺𑀘𑁆𑀘 𑀲𑀺𑀤𑁆𑀥𑀺𑀢𑁄 𑀫𑀦𑁄𑀓𑀫𑁆𑀫 𑀤𑁆𑀯𑀸𑀭𑀁 𑀦𑀸𑀫𑀸𑀢𑀺 𑀏𑀯𑀁 𑀓𑀫𑁆𑀫𑁂𑀦 𑀤𑁆𑀯𑀸𑀭 𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀲𑁆𑀲 𑀤𑁆𑀯𑀸𑀭𑀲𑁆𑀲 𑀦𑀸𑀫𑀁 𑀪𑀺𑀦𑁆𑀤𑀺𑀢𑀼𑀁 𑀯𑀸’’𑀢𑀺 𑀓𑀸𑀬𑁄𑀢𑀺 𑀦𑀸𑀫𑀁 𑀪𑀺𑀦𑁆𑀤𑀺𑀢𑀼𑀁 𑀯𑀸. ‘‘𑀅𑀢𑁆𑀢𑀦𑁄 𑀦𑀸𑀫𑀁 𑀤𑀸𑀢𑀼𑀦𑁆𑀢𑀺 𑀯𑀸’’𑀢𑀺 𑀯𑀘𑀻𑀢𑀺 𑀦𑀸𑀫𑀁 𑀢𑀲𑁆𑀲 𑀤𑀸𑀢𑀼𑀁 𑀯𑀸. ‘‘𑀩𑁆𑀭𑀸𑀳𑁆𑀫𑀡 𑀕𑀸𑀫𑀸𑀤𑀻𑀦𑀁 𑀩𑁆𑀭𑀸𑀳𑁆𑀫𑀡 𑀕𑀸𑀫𑀸𑀤𑀺𑀪𑀸𑀯𑁄 𑀯𑀺𑀬𑀸’’𑀢𑀺 𑀢𑀲𑁆𑀫𑀺𑀁 𑀅𑀜𑁆𑀜𑀓𑀼𑀮𑁂𑀲𑀼 𑀯𑀲𑀦𑁆𑀢𑁂𑀲𑀼𑀧𑀺 𑀩𑁆𑀭𑀸𑀳𑁆𑀫𑀡 𑀓𑀼𑀮𑀩𑀳𑀼𑀮𑀢𑁆𑀢𑀸 𑀩𑁆𑀭𑀸𑀳𑁆𑀫𑀡 𑀕𑀸𑀫𑁄𑀢𑁆𑀯𑁂𑀯 𑀦𑀸𑀫𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀯𑀦𑁂 𑀅𑀜𑁆𑀜𑀭𑀼𑀓𑁆𑀔𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 𑀔𑀤𑀻𑀭𑀭𑀼𑀓𑁆𑀔 𑀩𑀳𑀼𑀮𑀢𑁆𑀢𑀸 𑀔𑀤𑀻𑀭𑀯𑀦𑀦𑁆𑀢𑁆𑀯𑁂𑀯 𑀦𑀸𑀫𑀁 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀓𑀸𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁.

𑁧𑁪𑁯. 𑀯𑀘𑀻𑀓𑀫𑁆𑀫𑁂. ‘‘𑀫𑀼𑀲𑀸 𑀯𑀤𑀦𑁆𑀢𑀻’’𑀢𑀺 𑀅𑀪𑀽𑀢𑀢𑁄 𑀯𑀤𑀦𑁆𑀢𑀺. 𑀧𑀺𑀲𑀢𑀺 𑀏𑀢𑀸𑀬𑀸𑀢𑀺 𑀧𑀺𑀲𑀼𑀡𑀸. ‘‘𑀦𑀺𑀭𑀼𑀢𑁆𑀢𑀺 𑀦𑀬𑁂𑀦𑀸’’𑀢𑀺 𑀏𑀢𑁆𑀣 𑀧𑀺𑀬𑀲𑀼𑀜𑁆𑀜 𑀓𑀭𑀡𑀸𑀢𑀺 𑀯𑀢𑁆𑀢𑀩𑁆𑀩𑁂 𑀅𑀓𑁆𑀔𑀭 𑀮𑁄𑀧𑀓𑀭𑀡𑀁 𑀦𑀺𑀭𑀼𑀢𑁆𑀢𑀺 𑀦𑀬𑁄 𑀦𑀸𑀫. ‘‘𑀬𑁂𑀦𑀸’’𑀢𑀺 𑀬𑁂𑀦𑀚𑀦𑁂𑀦. ‘‘𑀲𑀫𑁆𑀨𑀁’’𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑁄 𑀲𑀫𑁆𑀫𑀢𑀺 𑀤𑀼𑀓𑁆𑀔𑀁 𑀏𑀢𑁂𑀦𑀸𑀢𑀺 𑀅𑀢𑁆𑀣𑁂𑀦 𑀲𑀼𑀔𑁂 𑀳𑀺𑀢𑁂 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀁 𑀲𑀼𑀔𑀁 𑀳𑀺𑀢𑀜𑁆𑀘𑀸’’𑀢𑀺. 𑀓𑀻𑀤𑀺𑀲𑀁 𑀲𑀼𑀔𑀁 𑀳𑀺𑀢𑀜𑁆𑀘𑀸𑀢𑀺 𑀆𑀳 ‘‘𑀲𑀸𑀥𑀼𑀚𑀦𑁂𑀳𑀺 𑀅𑀥𑀺𑀕𑀦𑁆𑀢𑀩𑁆𑀩𑀁’’𑀢𑀺. 𑀏𑀢𑁂𑀦 𑀧𑀸𑀧𑀚𑀦𑁂𑀳𑀺 𑀅𑀥𑀺𑀕𑀦𑁆𑀢𑀩𑁆𑀩𑀁 𑀳𑀺𑀢𑀲𑀼𑀔𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀳𑀺𑀢𑀲𑀼𑀔𑀲𑁆𑀲 𑀯𑀺𑀦𑀸𑀲𑀦𑀁 𑀦𑀸𑀫 𑀢𑀲𑁆𑀲 𑀆𑀕𑀫𑀦 𑀫𑀕𑁆𑀕𑀪𑀺𑀦𑁆𑀤𑀦𑀦𑁆𑀢𑀺 𑀆𑀳 ‘‘𑀳𑀺𑀢𑀲𑀼𑀔 𑀫𑀕𑁆𑀕𑀁 𑀪𑀺𑀦𑁆𑀤𑀢𑀻’’𑀢𑀺. ‘‘𑀢𑀁 𑀯𑀸’’𑀢𑀺 𑀏𑀢𑁆𑀣 ‘‘𑀢𑀁’’𑀢𑀺 𑀳𑀺𑀢𑀲𑀼𑀔𑀁. ‘‘𑀅𑀢𑁆𑀣 𑀥𑀫𑁆𑀫𑀸 𑀧𑀕𑀢𑀲𑁆𑀲𑀸’’𑀢𑀺 𑀅𑀢𑁆𑀣𑀢𑁄 𑀘 𑀥𑀫𑁆𑀫𑀢𑁄 𑀘 𑀅𑀧𑀕𑀢𑀲𑁆𑀲. ‘‘𑀧𑀝𑀺𑀪𑀸𑀡 𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀲𑀼𑀡𑀦𑁆𑀢𑀸𑀦𑀁 𑀘𑀺𑀢𑁆𑀢𑀭𑀢𑀺 𑀘𑀺𑀢𑁆𑀢𑀳𑀸𑀲𑀯𑀟𑁆𑀠𑀦𑀢𑁆𑀣𑀸𑀬 𑀧𑀝𑀺𑀪𑀸𑀡𑀜𑁆𑀜𑀸𑀡𑁂𑀦 𑀘𑀺𑀢𑁆𑀢𑀻𑀓𑀢𑀲𑁆𑀲. ‘‘𑀬𑀢𑁆𑀣𑀸’’𑀢𑀺 𑀬𑀲𑁆𑀫𑀺𑀁 𑀓𑀣𑀸 𑀫𑀕𑁆𑀕𑁂. ‘‘𑀅𑀢𑁆𑀣 𑀥𑀫𑁆𑀫 𑀯𑀺𑀦𑀬𑀧𑀤𑀁’’𑀢𑀺 𑀅𑀢𑁆𑀣 𑀧𑀤𑀜𑁆𑀘 𑀥𑀫𑁆𑀫𑀧𑀤𑀜𑁆𑀘 𑀯𑀺𑀦𑀬 𑀧𑀤𑀜𑁆𑀘. 𑀢𑀢𑁆𑀣 𑀅𑀢𑁆𑀣𑁄 𑀦𑀸𑀫 𑀆𑀭𑁄𑀕𑁆𑀬𑀲𑀫𑁆𑀧𑀢𑁆𑀢𑀺, 𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺, 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺, 𑀥𑀦 𑀲𑀫𑁆𑀧𑀢𑁆𑀢𑀺, 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄. 𑀢𑀸𑀲𑀼 𑀓𑁄𑀲𑀮𑁆𑀮𑀚𑀦𑀓𑀁 𑀯𑀸𑀓𑁆𑀬𑀧𑀤𑀁 𑀅𑀢𑁆𑀣𑀧𑀤𑀁 𑀦𑀸𑀫. 𑀇𑀤𑀁 𑀲𑀼𑀘𑀭𑀺𑀢𑀁 𑀦𑀸𑀫 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁, 𑀇𑀤𑀁 𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀅𑀧𑀸𑀬 𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀏𑀯𑀁 𑀲𑀪𑀸𑀯 𑀥𑀫𑁆𑀫𑁂𑀲𑀼 𑀓𑁄𑀲𑀮𑁆𑀮 𑀚𑀦𑀓𑀁 𑀯𑀸𑀓𑁆𑀬 𑀧𑀤𑀁 𑀥𑀫𑁆𑀫 𑀧𑀤𑀁 𑀦𑀸𑀫. 𑀏𑀯𑀁 𑀘𑀺𑀢𑁆𑀢𑀁 𑀤𑀫𑀺𑀢𑀩𑁆𑀩𑀁, 𑀏𑀯𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀫𑀺𑀢𑀩𑁆𑀩𑀸𑀦𑀺, 𑀏𑀯𑀁 𑀭𑀸𑀕𑁄 𑀯𑀺𑀦𑁂𑀢𑀩𑁆𑀩𑁄, 𑀏𑀯𑀁 𑀤𑁄𑀲𑁄 𑀯𑀺𑀦𑁂𑀢𑀩𑁆𑀩𑁄𑀢𑀺𑀆𑀤𑀺𑀦𑀸 𑀯𑀺𑀦𑁂𑀢𑀩𑁆𑀩𑁂𑀲𑀼 𑀯𑀺𑀦𑀬 𑀓𑁄𑀲𑀮𑁆𑀮𑀚𑀦𑀓𑀁 𑀯𑀸𑀓𑁆𑀬𑀧𑀤𑀁 𑀯𑀺𑀦𑀬 𑀧𑀤𑀁 𑀦𑀸𑀫. 𑀬𑀢𑁆𑀣 𑀏𑀯𑀭𑀽𑀧𑀁 𑀅𑀢𑁆𑀣 𑀧𑀤𑀜𑁆𑀘 𑀥𑀫𑁆𑀫 𑀧𑀤𑀜𑁆𑀘 𑀯𑀺𑀦𑀬 𑀧𑀤𑀜𑁆𑀘 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀢𑀲𑁆𑀲 𑀯𑀸𑀘𑀸 𑀯𑀢𑁆𑀣𑀼𑀫𑀢𑁆𑀢𑀲𑁆𑀲 𑀏𑀢𑀁𑀦𑀸𑀫𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀫𑁆𑀨𑀁’’𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀭𑀢𑁆𑀣𑀓𑀯𑀘𑀦𑀁. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼 𑀯𑀘𑀻𑀓𑀫𑁆𑀫𑁂𑀲𑀼. 𑀯𑀺𑀲𑀁𑀯𑀸𑀤𑀦𑀁 𑀦𑀸𑀫 𑀯𑀺𑀭𑀚𑁆𑀛𑀸 𑀧𑀦𑀁. 𑀯𑀺𑀲𑀁𑀯𑀸𑀤𑀓𑁄 𑀦𑀸𑀫 𑀯𑀺𑀭𑀚𑁆𑀛𑀸𑀧𑀦𑀓𑁄. 𑀅𑀢𑁆𑀣𑀁 𑀪𑀜𑁆𑀚𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣 𑀪𑀜𑁆𑀚𑀦𑀓𑁄. ‘‘𑀓𑀫𑁆𑀫𑀧𑀣𑀪𑁂𑀤𑁄’’𑀢𑀺 𑀧𑀝𑀺𑀲𑀦𑁆𑀥𑀺 𑀚𑀦𑀓𑁄 𑀓𑀫𑁆𑀫𑀧𑀣𑀯𑀺𑀲𑁂𑀲𑁄. ‘‘𑀇𑀢𑀭𑁄’’𑀢𑀺 𑀅𑀢𑁆𑀣 𑀪𑀜𑁆𑀚𑀦𑀓𑀢𑁄 𑀅𑀜𑁆𑀜𑁄 𑀫𑀼𑀲𑀸𑀯𑀸𑀤𑁄. ‘‘𑀓𑀫𑁆𑀫 𑀫𑁂𑀯𑀸’’𑀢𑀺 𑀧𑀯𑀢𑁆𑀢𑀺 𑀯𑀺𑀧𑀸𑀓 𑀚𑀦𑀓𑀁 𑀯𑀘𑀻𑀓𑀫𑁆𑀫𑀫𑁂𑀯. ‘‘𑀭𑀚𑀸𑀦𑀁’’𑀢𑀺 𑀥𑀽𑀮𑀻𑀦𑀁. 𑀢𑀸𑀲𑀼 𑀲𑀼𑀕𑀢𑀺 𑀤𑀼𑀕𑁆𑀕𑀢𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑀤𑀼𑀧𑁆𑀧𑀚𑁆𑀚𑀦𑀓𑀸𑀦𑀺. ‘‘𑀧𑀣𑀪𑀽𑀢𑀢𑁆𑀢𑀸’’𑀢𑀺 𑀉𑀧𑁆𑀧𑀢𑁆𑀢𑀺𑀫𑀕𑁆𑀕𑀪𑀽𑀢𑀢𑁆𑀢𑀸. ‘‘𑀪𑁂𑀤 𑀧𑀼𑀭𑁂𑀓𑁆𑀔𑀸𑀭𑁂𑀦𑀸’’𑀢𑀺 𑀫𑀺𑀢𑁆𑀢𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑁂𑀦. 𑀫𑀺𑀢𑁆𑀢𑀁 𑀪𑀺𑀦𑁆𑀤𑀢𑀻𑀢𑀺 𑀪𑁂𑀤𑀓𑁄. ‘‘𑀲𑀁𑀓𑀺𑀮𑀺𑀝𑁆𑀞 𑀘𑁂𑀢𑀦𑀸’’𑀢𑀺 𑀅𑀢𑁆𑀣 𑀧𑀼𑀭𑁂𑀓𑁆𑀔𑀸𑀭 𑀥𑀫𑁆𑀫 𑀧𑀼𑀭𑁂𑀓𑁆𑀔𑀸𑀭 𑀯𑀺𑀦𑀬 𑀧𑀼𑀭𑁂𑀓𑁆𑀔𑀸𑀭 𑀅𑀦𑀼𑀲𑀸𑀲𑀦𑀺 𑀧𑀼𑀭𑁂𑀓𑁆𑀔𑀸𑀭 𑀭𑀳𑀺𑀢𑀸 𑀓𑁂𑀯𑀮𑀁 𑀪𑁂𑀤𑀧𑀼𑀭𑁂𑀓𑁆𑀔𑀸𑀭 𑀘𑁂𑀢𑀦𑀸 𑀲𑀁𑀓𑀺𑀮𑀺𑀝𑁆𑀞 𑀘𑁂𑀢𑀦𑀸 𑀦𑀸𑀫. ‘‘𑀧𑀭𑁂 𑀪𑀺𑀦𑁆𑀦𑁂 𑀬𑁂𑀯𑀸’’𑀢𑀺 𑀧𑀭𑀚𑀦𑁂 𑀧𑀭𑀚𑀦𑁂𑀦 𑀫𑀺𑀣𑀼𑀪𑁂𑀤𑀯𑀲𑁂𑀦 𑀪𑀺𑀦𑁆𑀦𑁂𑀬𑁂𑀯. ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀓𑁆𑀓𑁄𑀲𑀯𑀢𑁆𑀣𑀼. ‘‘𑀅𑀬𑀁 𑀧𑀻’’𑀢𑀺 𑀅𑀬𑀁 𑀨𑀭𑀼𑀲𑀯𑀸𑀘𑀸𑀧𑀺. 𑀏𑀯𑀁 𑀅𑀓𑁆𑀓𑁄𑀲𑀦 𑀓𑀫𑁆𑀫𑀁𑀧𑀺 𑀅𑀓𑁆𑀓𑁄𑀲𑀺𑀢𑀩𑁆𑀩𑀲𑁆𑀲 𑀤𑀽𑀭𑁂 𑀞𑀺𑀢𑀲𑁆𑀲𑀧𑀺 𑀫𑀢𑀲𑁆𑀲𑀧𑀺 𑀲𑀫𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀅𑀦𑀢𑁆𑀣𑀁 𑀦𑀺𑀭𑀢𑁆𑀣𑀓𑀯𑀸𑀘𑀸 𑀯𑀢𑁆𑀣𑀼 𑀫𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦𑀓𑁄. ‘‘𑀲𑀘𑁆𑀘𑀢𑁄 𑀕𑀡𑁆𑀳𑀦𑁆𑀢𑁂 𑀬𑁂𑀯𑀸’’𑀢𑀺 𑀬𑀣𑀸 𑀲𑁄 𑀓𑀣𑁂𑀢𑀺, 𑀢𑀣𑀸 𑀢𑀁 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦 𑀧𑀼𑀩𑁆𑀩𑀦𑁆𑀢𑀺 𑀏𑀯𑀁 𑀲𑀘𑁆𑀘𑀢𑁄 𑀕𑀡𑁆𑀳𑀦𑁆𑀢𑁂𑀬𑁂𑀯. 𑀓𑁂𑀘𑀺 𑀲𑀘𑁆𑀘𑀢𑁄 𑀕𑀡𑁆𑀳𑀺𑀢𑁆𑀯𑀸 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀧𑀽𑀚𑀦𑀻𑀬 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀣𑁄𑀫𑁂𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀯𑀦𑁆𑀤𑀦𑁆𑀢𑀸 𑀧𑀭𑀺𑀳𑀭𑀦𑁆𑀢𑀺. 𑀲𑀫𑁆𑀧𑀭𑀸𑀬𑀺 𑀓𑀢𑁆𑀣𑀸𑀬 𑀢𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀺. 𑀲𑀩𑁆𑀩𑀫𑁂𑀢𑀁 𑀦𑀺𑀭𑀢𑁆𑀣𑀓𑀁 𑀳𑁄𑀢𑀺. ‘‘𑀢𑀤𑀲𑁆𑀲𑀸𑀤𑀯𑀲𑁂𑀦𑀸’’𑀢𑀺 𑀢𑀁 𑀭𑀸𑀚𑀓𑀣𑀸𑀤𑀺𑀁 𑀢𑀢𑁆𑀣 𑀘𑀺𑀢𑁆𑀢𑀭𑀢𑀺𑀁 𑀮𑀪𑀺𑀢𑁆𑀯𑀸 𑀅𑀲𑁆𑀲𑀸𑀤𑀯𑀲𑁂𑀦 𑀓𑀣𑁂𑀦𑁆𑀢𑀲𑁆𑀲𑁂𑀯 𑀓𑀫𑁆𑀫𑀁 𑀳𑁄𑀢𑀺. 𑀅𑀦𑀺𑀘𑁆𑀘 𑀮𑀓𑁆𑀔𑀡 𑀯𑀺𑀪𑀸𑀯𑀦𑀢𑁆𑀣𑀸𑀬 𑀯𑀸 𑀭𑀢𑀦𑀢𑁆𑀢𑀬 𑀕𑀼𑀡𑀯𑀺𑀪𑀸𑀯𑀦𑀢𑁆𑀣𑀸𑀬 𑀯𑀸 𑀧𑀸𑀧 𑀕𑀭𑀳 𑀓𑀮𑁆𑀬𑀸𑀡 𑀲𑀫𑁆𑀪𑀸𑀯𑀦𑀸𑀬 𑀯𑀸 𑀓𑀣𑁂𑀦𑁆𑀢𑀲𑁆𑀲 𑀧𑀦 𑀲𑀢𑁆𑀣𑀓𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀢𑁆𑀣 𑀥𑀫𑁆𑀫 𑀯𑀺𑀦𑀬 𑀦𑀺𑀲𑁆𑀲𑀺𑀢𑀁’’𑀢𑀺𑀆𑀤𑀺𑀁. 𑀲𑁂𑀲𑀫𑁂𑀢𑁆𑀣 𑀓𑀸𑀬𑀤𑁆𑀯𑀸𑀭𑁂 𑀤𑀻𑀧𑀺𑀢𑀫𑁂𑀯.

𑁧𑁫𑁦. 𑀫𑀦𑁄𑀓𑀫𑁆𑀫𑁂. ‘‘𑀅𑀪𑀺𑀛𑀸𑀬𑀦𑁆𑀢𑀻’’𑀢𑀺 𑀅𑀢𑀺𑀭𑁂𑀓𑀢𑀭𑀁 𑀛𑀸𑀬𑀦𑁆𑀢𑀺, 𑀘𑀺𑀦𑁆𑀢𑁂𑀦𑁆𑀢𑀺, 𑀑𑀮𑁄𑀓𑁂𑀦𑁆𑀢𑀺 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁆𑀲𑀸𑀤𑀫𑀢𑁆𑀢𑁂 𑀅𑀞𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀩𑁆𑀬𑀸𑀧𑀸𑀤𑁂𑀦𑁆𑀢𑀻’’𑀢𑀺 𑀯𑀺𑀕𑀢𑀪𑀸𑀯𑀁 𑀆𑀧𑀸𑀤𑁂𑀦𑁆𑀢𑀺 𑀲𑀫𑁆𑀧𑀸𑀧𑁂𑀦𑁆𑀢𑀺. 𑀢𑀜𑁆𑀘 𑀆𑀧𑀸𑀤𑀦𑀁 𑀦 𑀓𑀸𑀬𑀯𑀸𑀘𑀸𑀳𑀺. 𑀅𑀣 𑀔𑁄 𑀘𑀺𑀢𑁆𑀢𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀘𑀺𑀦𑁆𑀢𑁂𑀦𑁆𑀢𑀻’’𑀢𑀺. ‘‘𑀢𑀩𑁆𑀩𑀺 𑀧𑀭𑀻𑀢𑀢𑁄’’𑀢𑀺 𑀲𑀧𑁆𑀧𑀼𑀭𑀺𑀲 𑀧𑀜𑁆𑀜𑀢𑁆𑀢𑀺𑀢𑁄 𑀯𑀺𑀧𑀭𑀻𑀢𑁂𑀦. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼 𑀫𑀦𑁄𑀓𑀫𑁆𑀫𑁂𑀲𑀼. ‘‘𑀇𑀤𑀁 𑀫𑀫𑀲𑁆𑀲𑀸’’𑀢𑀺 𑀇𑀤𑀁 𑀲𑀦𑁆𑀢𑀓𑀁 𑀫𑀫𑀲𑀦𑁆𑀢𑀓𑀁 𑀪𑀯𑁂𑀬𑁆𑀬, 𑀅𑀳𑁄 𑀲𑀸𑀥𑀼 𑀯𑀢𑀸𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀢𑀦𑁄 𑀓𑀢𑁆𑀯𑀸’’𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸. ‘‘𑀮𑀸𑀪𑀸𑀯𑀢𑀺𑀫𑁂’’𑀢𑀺 𑀏𑀢𑁆𑀣 𑀲𑀼𑀮𑀸𑀪𑀁 𑀮𑀪𑀦𑁆𑀢𑀻𑀢𑀺 𑀮𑀸𑀪𑀸. ‘‘𑀅𑀢𑁆𑀢𑀦𑁄 𑀓𑀭𑁂𑀬𑁆𑀬𑀁’’𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀭𑁂𑀬𑁆𑀬𑀁. 𑀧𑀭𑀪𑀡𑁆𑀟𑀁 𑀯𑀢𑁆𑀣𑀼 𑀬𑀲𑁆𑀲𑀸𑀢𑀺 𑀧𑀭𑀪𑀡𑁆𑀟 𑀯𑀢𑁆𑀣𑀼𑀓𑁄. ‘‘𑀯𑀢𑁆𑀣𑀽’’𑀢𑀺 𑀆𑀭𑀫𑁆𑀫𑀡𑀪𑀽𑀢𑀁 𑀯𑀢𑁆𑀣𑀼. 𑀬𑀸𑀯 𑀦 𑀧𑀭𑀺𑀡𑀸𑀫𑁂𑀢𑀺, 𑀢𑀸𑀯 𑀦 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀲𑀽’’𑀢𑀺 𑀅𑀥𑀺𑀓𑀸𑀭𑁄. ‘‘𑀅𑀬𑀁’’𑀢𑀺 𑀅𑀬𑀁 𑀲𑀢𑁆𑀢𑁄. ‘‘𑀢𑀲𑁆𑀲𑀸’’𑀢𑀺 𑀢𑀲𑁆𑀲 𑀲𑀢𑁆𑀢𑀲𑁆𑀲. 𑀤𑀲𑀯𑀢𑁆𑀣𑀼𑀓𑀸𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀸𑀫 ‘𑀦𑀢𑁆𑀣𑀺𑀤𑀺𑀦𑁆𑀦𑀁, 𑀦𑀢𑁆𑀣𑀺𑀬𑀺𑀝𑁆𑀞𑀁, 𑀦𑀢𑁆𑀣𑀺𑀳𑀼𑀢𑀁’𑀢𑀺𑀆𑀤𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑁂𑀲𑀼 𑀓𑀸𑀘𑀺𑀤𑀺𑀝𑁆𑀞𑀺𑀬𑁄 𑀦𑀢𑁆𑀣𑀺𑀓𑀸𑀤𑀺 𑀲𑀪𑀸𑀯𑀸 𑀳𑁄𑀦𑁆𑀢𑀺. 𑀇𑀥 𑀧𑀦 𑀢𑀩𑁆𑀩𑀳𑀼𑀮𑀦𑀬𑁂𑀦 𑀓𑀫𑁆𑀫𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑁂. ‘‘𑀧𑀲𑁆𑀲𑀦𑁆𑀢𑁄’’𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀦𑁆𑀢𑁄. 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀺𑀬𑀸𑀫𑀁’’𑀢𑀺 𑀲𑀫𑁆𑀫𑀢𑁆𑀢 𑀦𑀺𑀬𑀸𑀫𑀁. 𑀅𑀯𑀺𑀧𑀭𑀻𑀢𑀦𑀺𑀬𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀦 ‘‘𑀦𑀺𑀬𑀸𑀫𑀁’’𑀢𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀁. 𑀯𑀺𑀧𑀭𑀻𑀢 𑀦𑀺𑀬𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀓𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁂𑀓𑀺𑀘𑁆𑀙𑁄. 𑀏𑀓𑀦𑁆𑀢𑁂𑀦 𑀅𑀧𑀸𑀬𑀕𑀸𑀫𑀻 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀧𑀲𑁆𑀲𑀺𑀢𑁆𑀯𑀸’’𑀢𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀁 𑀅𑀧𑀲𑁆𑀲𑀺𑀢𑁆𑀯𑀸. ‘‘𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑀫𑀢𑁆𑀢𑁂𑀦𑀸’’𑀢𑀺 𑀢𑀺𑀢𑁆𑀣𑀸 𑀘𑀭𑀺𑀬𑁂𑀲𑀼 𑀲𑀤𑁆𑀤𑀳𑀦 𑀫𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀓𑀁 𑀆𑀘𑀭𑀺𑀬𑀓𑀁’’𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀓𑀪𑀽𑀢𑀁. 𑀞𑀺𑀢𑁄 𑀧𑀼𑀕𑁆𑀕𑀮𑁄. 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄, 𑀬𑀣𑀸𑀳 𑀫𑀺𑀘𑁆𑀙𑀢𑁆𑀢𑀢𑀺𑀓𑁂 𑀫𑀺𑀘𑁆𑀙𑀸𑀲𑀪𑀸𑀯𑀸𑀢𑀺 𑀫𑀺𑀘𑁆𑀙𑀢𑁆𑀢𑀸. 𑀯𑀺𑀧𑀸𑀓𑀤𑀸𑀦𑁂 𑀲𑀢𑀺, 𑀔𑀦𑁆𑀥𑀪𑁂𑀤𑀸𑀦𑀦𑁆𑀢𑀭𑀫𑁂𑀯 𑀯𑀺𑀧𑀸𑀓𑀤𑀸𑀦𑀢𑁄 𑀦𑀺𑀬𑀢𑀸. 𑀫𑀺𑀘𑁆𑀙𑀢𑁆𑀢𑀸 𑀘 𑀢𑁂 𑀦𑀺𑀬𑀢𑀸 𑀘𑀸𑀢𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸. 𑀲𑀫𑁆𑀫𑀸𑀲 𑀪𑀸𑀯𑀸𑀢𑀺 𑀲𑀫𑁆𑀫𑀢𑁆𑀢𑀸. 𑀲𑀫𑁆𑀫𑀢𑁆𑀢𑀸 𑀘 𑀢𑁂 𑀦𑀺𑀬𑀢𑀸 𑀘 𑀅𑀦𑀦𑁆𑀢𑀭𑀫𑁂𑀯 𑀨𑀮𑀤𑀸𑀦 𑀦𑀺𑀬𑀫𑁂𑀦𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀢𑀸𑀢𑀺. ‘‘𑀢𑀲𑁆𑀲𑀸’’𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. ‘‘𑀅𑀘𑁄𑀧𑁂𑀢𑁆𑀯𑀸’’𑀢𑀺 𑀅𑀘𑀸𑀮𑁂𑀢𑁆𑀯𑀸. ‘‘𑀏𑀢𑁂𑀦𑀸’’𑀢𑀺 𑀏𑀢𑁂𑀦𑀧𑀺 𑀲𑀤𑁆𑀤𑁂𑀦. ‘‘𑀇𑀫𑁂𑀲𑀁’’𑀢𑀺 𑀫𑀦𑁄𑀓𑀫𑁆𑀫𑀸𑀦𑀁. ‘‘𑀏𑀢𑁂𑀦𑀸’’𑀢𑀺 𑀫𑀦𑀲𑁆𑀫𑀺𑀁 𑀏𑀯𑀸𑀢𑀺 𑀯𑀘𑀦𑁂𑀦. ‘‘𑀉𑀧𑀧𑀦𑁆𑀦𑀁’’𑀢𑀺 𑀧𑀭𑀺𑀧𑀼𑀡𑁆𑀡𑀁. ‘‘𑀉𑀧𑀮𑀓𑁆𑀔𑀡𑀸𑀤𑀺𑀯𑀲𑁂𑀦𑀸’’𑀢𑀺 𑀉𑀧𑀮𑀓𑁆𑀔𑀡𑀦𑀬 𑀦𑀺𑀤𑀲𑁆𑀲𑀦𑀦𑀬 𑀧𑀥𑀸𑀦𑀦𑀬𑀸𑀤𑀺𑀯𑀲𑁂𑀦. ‘‘𑀅𑀢𑁆𑀣𑀦𑁆𑀢𑀭𑀧𑁆𑀧𑀲𑀗𑁆𑀕𑁄 𑀳𑁄𑀢𑀻’’𑀢𑀺 𑀓𑀣𑀁 𑀳𑁄𑀢𑀺. 𑀏𑀯𑀲𑀤𑁆𑀤𑁂𑀦 𑀯𑀺𑀦𑀸 𑀧𑀸𑀡𑀸𑀢𑀺𑀧𑀸𑀢 𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂 𑀩𑀸𑀳𑀼𑀮𑁆𑀮 𑀯𑀼𑀢𑁆𑀢𑀺𑀢𑁄 𑀓𑀸𑀬𑀓𑀫𑁆𑀫𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑁂 𑀇𑀤𑀁 𑀮𑀤𑁆𑀥𑀸𑀢𑀧𑀢𑁆𑀢𑁄 𑀭𑀸𑀚𑀓𑀼𑀫𑀸𑀭𑁄𑀢𑀺 𑀯𑀺𑀬 𑀉𑀧𑀮𑀓𑁆𑀔𑀡𑀦𑀬𑀫𑀢𑁆𑀢𑀁. 𑀢𑁂𑀦 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀩𑀸𑀳𑀼𑀮𑁆𑀮 𑀯𑀼𑀢𑁆𑀢𑀺𑀁 𑀉𑀧𑀲𑀮𑁆𑀮𑀓𑁆𑀔𑁂𑀢𑀻𑀢𑀺 𑀅𑀢𑁆𑀣𑀦𑁆𑀢𑀭𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺. 𑀏𑀯𑀁 𑀲𑁂𑀲𑀦𑀬𑁂𑀲𑀼𑀧𑀻𑀢𑀺. ‘‘𑀅𑀧𑀺𑀘𑀸’’𑀢𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀚𑁄𑀢𑁂𑀢𑀺. ‘‘𑀢𑁂𑀲𑀽’’𑀢𑀺 𑀧𑀸𑀡𑀯𑀥𑀸𑀤𑀻𑀲𑀼. ‘‘𑀏𑀓𑀁 𑀅𑀗𑁆𑀕𑀁’’𑀢𑀺 𑀉𑀧𑀓𑁆𑀓𑀫𑁄𑀢𑀺 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁. ‘‘𑀢𑀁 𑀲𑀳𑀚𑀸𑀢𑀸 𑀘𑀸’’𑀢𑀺 𑀘𑁂𑀢𑀦𑀸 𑀲𑀳𑀚𑀸𑀢𑀸 𑀘. 𑀘𑁂𑀢𑀦𑀸 𑀧𑀓𑁆𑀔𑁂 𑀪𑀯𑀸𑀢𑀺 𑀘𑁂𑀢𑀦𑀸 𑀧𑀓𑁆𑀔𑀺𑀓𑀸. 𑀘𑁂𑀢𑀦𑀸 𑀯𑀺𑀬 𑀓𑀸𑀬𑀓𑀫𑁆𑀫𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀫𑀦𑁄𑀓𑀫𑁆𑀫𑀦𑁆𑀢𑀺 𑀯𑁄𑀳𑀭𑀺𑀢𑀼𑀁 𑀅𑀧𑁆𑀧𑀳𑁄𑀦𑀓𑀢𑁆𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸 𑀧𑀥𑀸𑀦𑀁 𑀬𑁂𑀲𑀁 𑀢𑁂 𑀅𑀢𑁆𑀢𑀧𑁆𑀧𑀥𑀸𑀦𑀸. 𑀅𑀪𑀺𑀚𑁆𑀛𑀸𑀤𑀬𑁄. 𑀅𑀢𑁆𑀢𑀧𑁆𑀧𑀥𑀸𑀦𑀸 𑀦 𑀳𑁄𑀦𑁆𑀢𑀺. 𑀘𑁂𑀢𑀦𑀸 𑀧𑀥𑀸𑀦𑀸 𑀳𑁄𑀦𑁆𑀢𑀺. 𑀇𑀥𑁂𑀯 𑀢𑁂 𑀅𑀢𑁆𑀢𑀧𑁆𑀧𑀥𑀸𑀦𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀣𑀸 𑀢𑀣𑀸’’𑀢𑀺 𑀅𑀳𑁄𑀯𑀢 𑀇𑀤𑀁 𑀫𑀫𑀲𑁆𑀲𑀸𑀢𑀺𑀆𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼 𑀫𑀦𑁄𑀓𑀫𑁆𑀫𑁂𑀲𑀼. ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁’’𑀢𑀺 𑀧𑀸𑀝𑀺𑀧𑀤𑀺𑀓𑀧𑀤𑀫𑁂𑀢𑀁. 𑀲𑀩𑁆𑀩𑀧𑁆𑀧𑀓𑀸𑀭𑀢𑁄𑀢𑀺 𑀅𑀢𑁆𑀣𑁄. ‘‘𑀇𑀥𑀸’’𑀢𑀺 𑀫𑀦𑁄𑀓𑀫𑁆𑀫𑀝𑁆𑀞𑀸𑀦𑁂. ‘‘𑀫𑀦𑁄𑀓𑀫𑁆𑀫 𑀓𑀺𑀘𑁆𑀘𑀯𑀺𑀲𑁂𑀲𑁂𑀦𑀸’’𑀢𑀺 𑀅𑀳𑁄𑀯𑀢 𑀇𑀤𑀁 𑀫𑀫𑀲𑁆𑀲𑀸𑀢𑀺𑀆𑀤𑀺𑀓𑁂𑀦 𑀓𑀺𑀘𑁆𑀘 𑀯𑀺𑀲𑁂𑀲𑁂𑀦. 𑀫𑀦𑁄𑀓𑀫𑁆𑀫 𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫𑁧. ‘‘𑀏𑀢𑁆𑀣 𑀘 𑀤𑀲𑀦𑁆𑀦𑀁 𑀧𑀻’’𑀢𑀺𑀆𑀤𑀻𑀲𑀼. ‘‘𑀢𑀸𑀧𑀻’’𑀢𑀺 𑀢𑀸 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀬𑁄𑀧𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀸 𑀢𑀸𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀸𑀦𑀺𑀧𑀦𑀸’’𑀢𑀺𑀆𑀤𑀻𑀲𑀼. 𑀏𑀓𑁄 𑀏𑀓𑀲𑁆𑀲 𑀯𑀤𑀢𑀺 𑀅𑀳𑀁 𑀇𑀫𑀁 𑀲𑀢𑁆𑀢𑀁 𑀫𑀸𑀭𑁂𑀫𑀺, 𑀢𑁆𑀯𑀁 𑀅𑀲𑀼𑀓𑀁𑀲𑀢𑁆𑀢𑀁 𑀫𑀸𑀭𑁂𑀳𑀻𑀢𑀺. 𑀏𑀯𑀁 𑀯𑀢𑁆𑀯𑀸 𑀉𑀪𑁄𑀧𑀺 𑀉𑀧𑀓𑁆𑀓𑀫𑀁 𑀓𑀭𑁄𑀦𑁆𑀢𑀺. 𑀓𑀫𑁆𑀫𑀁 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 𑀦 𑀲𑀺𑀚𑁆𑀛𑀢𑀺. 𑀢𑀢𑁆𑀣 𑀆𑀡𑀸𑀧𑀓𑀲𑁆𑀲 𑀢𑁆𑀯𑀁 𑀅𑀲𑀼𑀓𑀁 𑀲𑀢𑁆𑀢𑀁 𑀫𑀸𑀭𑁂𑀳𑀻𑀢𑀺 𑀆𑀡𑀸𑀧𑀦 𑀓𑀫𑁆𑀫𑀁 𑀲𑀘𑁂 𑀲𑀺𑀚𑁆𑀛𑀢𑀺. 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀅𑀲𑀺𑀤𑁆𑀥𑀢𑁆𑀢𑀸 𑀯𑀘𑀻𑀤𑁆𑀯𑀸𑀭𑁂 𑀤𑀺𑀲𑁆𑀲 𑀫𑀸𑀦𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀘𑀻𑀤𑀼𑀘𑁆𑀘𑀭𑀺𑀢𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺.

‘‘𑀤𑁄𑀲𑀫𑀽𑀮𑁂𑀦𑀸’’𑀢𑀺𑀆𑀤𑀻𑀲𑀼. 𑀤𑁄𑀲𑁄 𑀏𑀯 𑀫𑀽𑀮𑀁 𑀤𑁄𑀲𑀫𑀽𑀮𑀁. 𑀤𑁄𑀲𑁄 𑀫𑀽𑀮𑀁 𑀫𑀲𑁆𑀲𑀸𑀢𑀺 𑀤𑁄𑀲𑀫𑀽𑀮𑀁. 𑀢𑀁 𑀲𑀫𑁆𑀧𑀬𑀼𑀢𑁆𑀢 𑀘𑀺𑀢𑁆𑀢𑀦𑁆𑀢𑀺 𑀤𑁆𑀯𑀺𑀥𑀸 𑀅𑀢𑁆𑀣𑁄. 𑀩𑁆𑀬𑀸𑀧𑀸𑀤𑁄 𑀦𑀸𑀫 𑀤𑁄𑀲𑁄 𑀏𑀯. 𑀲𑁄 𑀓𑀣𑀁 𑀤𑁄𑀲𑁂𑀦 𑀫𑀽𑀮𑁂𑀦 𑀚𑀸𑀬𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑁄 𑀩𑁆𑀬𑀸𑀧𑀸𑀤𑀯𑀚𑁆𑀚𑁂𑀳𑀻’’𑀢𑀺. 𑀧𑀭𑀢𑁄 𑀅𑀪𑀺𑀚𑁆𑀛𑀸𑀬𑀫𑁆𑀧𑀺 𑀏𑀲𑀦𑀬𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂. 𑀦𑀺𑀥𑀺𑀧𑀸𑀞𑀓𑀸 𑀦𑀸𑀫 𑀭𑀸𑀚𑀦𑀺𑀥𑀺 𑀯𑀺𑀥𑀸𑀬𑀓𑀸. 𑀢𑀢𑁆𑀣 𑀘𑀡𑁆𑀟𑁄 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀆𑀕𑀢𑀢𑁆𑀢𑀸 𑀤𑀼𑀝𑁆𑀞𑀦𑀺𑀕𑁆𑀕𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁. 𑀭𑀸𑀚𑀽𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁 𑀫𑁄𑀳𑀫𑀽𑀮𑁂𑀦 𑀚𑀸𑀬𑀢𑀻𑀢𑀺 𑀬𑁄𑀚𑀦𑀸. ‘‘𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘𑀸’’𑀢𑀺 𑀲𑀓𑀲𑀜𑁆𑀜𑀸𑀬 𑀏𑀯 𑀬𑀁 𑀓𑀺𑀜𑁆𑀘𑀺 𑀳𑀭𑀦𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀸𑀧𑀯𑀸𑀤𑀻𑀦𑀜𑁆𑀘. ‘‘𑀆𑀳𑀭𑀡𑀁’’𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀯𑀲𑁂𑀦 𑀳𑀭𑀡𑀁. 𑀅𑀯𑀳𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀧𑀦 𑀫𑁄𑀳𑁄 𑀭𑀸𑀚𑀽𑀦𑀁 𑀉𑀧𑁆𑀧𑀦𑁆𑀦𑁄, 𑀬𑁄 𑀘 𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑁆𑀧𑀦𑁆𑀦𑁄, 𑀬𑁄 𑀘 𑀓𑀫𑁆𑀫 𑀨𑀮𑀲𑀫𑁆𑀩𑀦𑁆𑀥𑀸 𑀧𑀯𑀸𑀤𑀻𑀦𑀁 𑀉𑀧𑁆𑀧𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺 𑀮𑁄𑀪𑁄 𑀓𑀫𑁆𑀫𑀸𑀦𑀁 𑀲𑀼𑀝𑁆𑀞𑀼𑀯𑀟𑁆𑀠𑀦𑀸𑀬 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀜𑁆𑀚𑀸𑀢𑀸 𑀓𑀗𑁆𑀔𑀸𑀬𑁂𑀲𑀁 𑀢𑁂 𑀲𑀜𑁆𑀚𑀸𑀢𑀓𑀗𑁆𑀔𑀸. 𑀧𑀭𑀺𑀢𑁄 𑀉𑀝𑁆𑀞𑀸𑀢𑀺 𑀏𑀢𑁆𑀣𑀸𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀓𑀗𑁆𑀔𑀸𑀬 𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀗𑁆𑀔𑀸𑀧𑀭𑀺𑀬𑀼𑀝𑁆𑀞𑀸𑀦𑀁. 𑀚𑀦𑀸𑀦𑀁 𑀢𑀸𑀦𑀺𑀓𑀫𑁆𑀫𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀓𑀼𑀲𑀮𑀓𑀫𑁆𑀫𑀤𑀻𑀧𑀦𑀸𑀦𑀺𑀝𑁆𑀞𑀺𑀢𑀸.

𑁧𑁫𑁭. 𑀓𑀼𑀲𑀮𑀓𑀫𑁆𑀫𑁂. 𑀅𑀬𑀁 𑀧𑀦 𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀆𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁’’𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁 𑀓𑀸𑀬𑀓𑀫𑁆𑀫𑀁. 𑀏𑀯𑀁 𑀯𑀘𑀻𑀓𑀫𑁆𑀫𑁂𑀧𑀺. 𑀘𑁂𑀢𑀦𑀸 𑀳𑁂𑀢𑁆𑀣 𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀫𑀦𑁄𑀓𑀫𑁆𑀫𑁂 𑀧𑀦 𑀘𑁂𑀢𑀦𑀸𑀧𑀺 𑀬𑀼𑀚𑁆𑀚𑀢𑀺. 𑀅𑀩𑁆𑀬𑀸𑀧𑀸𑀤𑁄𑀧𑀺 𑀬𑀼𑀚𑁆𑀚𑀢𑀺. 𑀜𑀸𑀡𑀁 𑀅𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀁. 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺𑀧𑀺 𑀧𑀸𑀞𑁄, 𑀲𑁄 𑀬𑁂𑀯𑀢𑁆𑀣𑁄. ‘‘𑀧𑀤𑀓𑁆𑀔𑀺𑀡𑀁’’𑀢𑀺 𑀧𑀯𑀟𑁆𑀠𑀺𑀢𑀁. 𑀅𑀧𑀭𑀁 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑀺 ‘‘𑀬𑀲𑁆𑀫𑀺𑀁 𑀧𑀦𑀸’’𑀢𑀺𑀆𑀤𑀺𑀦𑀸. 𑀤𑀼𑀲𑁆𑀲𑀻𑀮𑀲𑁆𑀲 𑀪𑀸𑀯𑁄 𑀤𑀼𑀲𑁆𑀲𑀺𑀮𑁆𑀬𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀁. ‘‘𑀧𑀯𑀢𑁆𑀢𑀫𑀸𑀦𑁂’’𑀢𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀫𑀸𑀦𑁂. ‘‘𑀬𑀁 𑀧𑀦 𑀓𑀼𑀲𑀮𑀁’’𑀢𑀺 𑀧𑀸𑀡𑀸𑀢𑀺 𑀧𑀸𑀢𑀸𑀤𑀺𑀢𑁄 𑀯𑀺𑀭𑀢𑀺 𑀓𑀼𑀲𑀮𑀁. ‘‘𑀧𑀯𑀢𑁆𑀢𑀫𑀸𑀦𑀁’’𑀢𑀺 𑀘𑀺𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑀁. ‘‘𑀓𑀺𑀘𑁆𑀘 𑀲𑀻𑀲𑁂𑀦𑀸’’𑀢𑀺 𑀓𑀺𑀘𑁆𑀘𑀧𑁆𑀧𑀥𑀸𑀦𑁂𑀦. 𑀓𑀺𑀘𑁆𑀘𑀁 𑀧𑀥𑀸𑀦𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀫𑁂𑀢𑁆𑀣 𑀓𑀸𑀬𑀓𑀫𑁆𑀫𑁂 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

‘‘𑀯𑀘𑀻𑀓𑀫𑁆𑀫𑁂𑀧𑀺 𑀏𑀲𑁂𑀯𑀦𑀬𑁄’’𑀢𑀺 𑀬𑀲𑁆𑀫𑀺𑀁 𑀤𑀼𑀲𑁆𑀲𑀺𑀮𑁆𑀬𑁂 𑀧𑀯𑀢𑁆𑀢𑀫𑀸𑀦𑁂 𑀯𑀸𑀘𑀸 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺. 𑀯𑀘𑀻 𑀲𑀁𑀯𑀭𑁄 𑀪𑀺𑀚𑁆𑀚𑀢𑀻𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. ‘‘𑀅𑀯𑀲𑁂𑀲𑀁 𑀧𑀦𑀸’’𑀢𑀺 𑀢𑀻𑀳𑀺 𑀓𑀸𑀬𑀓𑀫𑁆𑀫𑁂𑀳𑀺 𑀘𑀢𑀽𑀳𑀺 𑀯𑀘𑀻𑀓𑀫𑁆𑀫𑁂𑀳𑀺 𑀅𑀯𑀲𑁂𑀲𑀁. 𑀢𑀢𑁆𑀣 ‘‘𑀢𑀻𑀳𑀺 𑀓𑀸𑀬𑀓𑀫𑁆𑀫𑁂𑀳𑀻’’𑀢𑀺 𑀢𑀻𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢 𑀯𑀺𑀭𑀢𑀺 𑀓𑀫𑁆𑀫𑁂𑀳𑀺. ‘‘𑀘𑀢𑀽𑀳𑀺 𑀯𑀘𑀻𑀓𑀫𑁆𑀫𑁂𑀳𑀻’’𑀢𑀺 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢 𑀯𑀺𑀭𑀢𑀺 𑀓𑀫𑁆𑀫𑁂𑀳𑀺. ‘‘𑀲𑀩𑁆𑀩𑀁𑀧𑀺 𑀓𑀮𑁆𑀬𑀸𑀡 𑀓𑀫𑁆𑀫𑀁’’𑀢𑀺 𑀲𑀩𑁆𑀩𑀫𑁆𑀧𑀺 𑀤𑀸𑀦𑀓𑀫𑁆𑀫𑀁, 𑀲𑀩𑁆𑀩𑀫𑁆𑀧𑀺 𑀪𑀸𑀯𑀦𑀸 𑀓𑀫𑁆𑀫𑀁, 𑀅𑀧𑀘𑀸𑀬𑀦 𑀓𑀫𑁆𑀫𑀁, 𑀯𑁂𑀬𑁆𑀬𑀸𑀯𑀘𑁆𑀘𑀓𑀫𑁆𑀫𑀁, 𑀧𑀢𑁆𑀢𑀺𑀤𑀸𑀦𑀓𑀫𑁆𑀫𑀁, 𑀧𑀢𑁆𑀢𑀸𑀦𑀼𑀫𑁄𑀤𑀦𑀸𑀓𑀫𑁆𑀫𑀁, 𑀥𑀫𑁆𑀫𑀲𑀯𑀦 𑀓𑀫𑁆𑀫𑀁, 𑀥𑀫𑁆𑀫 𑀤𑁂𑀲𑀦𑀸 𑀓𑀫𑁆𑀫𑀁, 𑀲𑀩𑁆𑀩𑀫𑁆𑀧𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀢𑀻𑀲𑀼𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀫𑁆𑀧𑀺 𑀫𑀦𑁄𑀓𑀫𑁆𑀫𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀭𑀺𑀬𑀸𑀬𑁂𑀲𑀼 𑀧𑀘𑁆𑀙𑀺𑀫𑁄𑀬𑁂𑀯 𑀧𑀥𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀸𑀯 𑀤𑁂𑀯𑀸’’𑀢𑀺 𑀅𑀦𑁆𑀢𑀺𑀫 𑀧𑀭𑀺𑀘𑁆𑀙𑁂𑀤 𑀚𑁄𑀢𑀓𑁄 𑀦𑀺𑀧𑀸𑀢𑁄. 𑀫𑀢𑁆𑀣𑀓𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀅𑀢𑁆𑀣𑁄.

𑀲𑀻𑀮𑀧𑀤𑁂. ‘‘𑀲𑀻𑀮𑀬𑀢𑀻’’𑀢𑀺 𑀲𑀫𑁆𑀫𑀸 𑀤𑀳𑀢𑀺 𑀘 𑀉𑀧𑀥𑀸𑀭𑁂𑀢𑀺 𑀘𑀸𑀢𑀺 𑀤𑁆𑀯𑀺𑀥𑀸 𑀅𑀢𑁆𑀣𑁄. ‘‘𑀲𑀼𑀲𑀫𑀸𑀳𑀺𑀢𑀸𑀦𑀻’’𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀦𑀺. ‘‘𑀉𑀧𑀭𑀺𑀫𑁂 𑀓𑀼𑀲𑀮 𑀥𑀫𑁆𑀫𑁂’’𑀢𑀺 𑀫𑀳𑀕𑁆𑀕𑀢 𑀮𑁄𑀓𑀼𑀢𑁆𑀢𑀭 𑀓𑀼𑀲𑀮𑀥𑀫𑁆𑀫𑁂. 𑀲𑀢𑁆𑀢𑀲𑀼 𑀯𑀺𑀲𑀼𑀤𑁆𑀥𑀻𑀲𑀼 𑀉𑀧𑀭𑀺𑀫𑁂 𑀘𑀺𑀢𑁆𑀢 𑀯𑀺𑀲𑀼𑀤𑁆𑀥𑀸𑀤𑀺 𑀓𑀼𑀲𑀮𑀥𑀫𑁆𑀫𑁂. ‘‘𑀅𑀥𑀺𑀓𑀼𑀲𑀮 𑀥𑀫𑁆𑀫𑁂’’𑀢𑀺 𑀅𑀥𑀺𑀓𑁂 𑀩𑁄𑀥𑀺𑀧𑀓𑁆𑀔𑀺𑀬 𑀓𑀼𑀲𑀮 𑀥𑀫𑁆𑀫𑁂. 𑀧𑀭𑁂𑀳𑀺 𑀤𑀺𑀦𑁆𑀦𑀁, 𑀢𑀤𑁂𑀯 𑀧𑀢𑁆𑀢𑀺𑀁. 𑀲𑀩𑁆𑀩𑀸𑀦𑀺 𑀧𑀦 𑀢𑀸𑀦𑀺 𑀤𑀸𑀦𑀸𑀤𑀻𑀦𑀺 𑀓𑀼𑀲𑀮𑀸𑀦𑀺. 𑀲𑁄𑀥𑁂𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀸𑀚𑀦𑀸. 𑀢𑀸𑀦𑀺 𑀏𑀯𑀧𑀼𑀜𑁆𑀜𑀸𑀦𑀺. 𑀏𑀓𑀫𑁂𑀓𑀁 𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀼. ‘‘𑀇𑀫𑀺𑀦𑀸 𑀧𑀘𑁆𑀘𑀬𑁂𑀦𑀸’’𑀢𑀺 𑀘𑀻𑀯𑀭𑀸𑀤𑀺 𑀧𑀘𑁆𑀘𑀬𑁂𑀦, 𑀅𑀦𑁆𑀦𑀧𑀸𑀦𑀸𑀤𑀺 𑀧𑀘𑁆𑀘𑀬𑁂𑀦, 𑀥𑀦 𑀥𑀦𑀜𑁆𑀜𑀸𑀤𑀺𑀧𑀘𑁆𑀘𑀬𑁂𑀦 𑀯𑀸. ‘‘𑀲𑀩𑁆𑀩𑀁𑀧𑀺 𑀘𑁂𑀢𑀁’’𑀢𑀺 𑀲𑀩𑁆𑀩𑀫𑁆𑀧𑀺 𑀏𑀢𑀁 𑀤𑀲𑀯𑀺𑀥𑀁 𑀧𑀼𑀜𑁆𑀜𑀁. ‘‘𑀳𑀻𑀦𑁂𑀦 𑀙𑀦𑁆𑀤𑁂𑀦𑀸’’𑀢𑀺 𑀬𑀲𑀓𑀸𑀫𑀢𑀸𑀤𑀺𑀯𑀲𑁂𑀦 𑀳𑀻𑀦𑁂𑀦 𑀙𑀦𑁆𑀤𑁂𑀦, 𑀳𑀻𑀦𑁂𑀦 𑀘𑀺𑀢𑁆𑀢𑁂𑀦, 𑀳𑀻𑀦𑁂𑀦 𑀯𑀻𑀭𑀺𑀬𑁂𑀦, 𑀳𑀻𑀦𑀸𑀬 𑀯𑀻𑀫𑀁𑀲𑀸𑀬. ‘‘𑀫𑀚𑁆𑀛𑀺𑀫𑁂𑀦𑀸’’𑀢𑀺 𑀧𑀼𑀜𑁆𑀜𑀧𑁆𑀨𑀮𑀓𑀸𑀫𑀢𑀸𑀤𑀺𑀯𑀲𑁂𑀦 𑀫𑀚𑁆𑀛𑀺𑀫𑁂𑀦. ‘‘𑀧𑀡𑀻𑀢𑁂𑀦𑀸’’𑀢𑀺 𑀓𑀢𑁆𑀢𑀩𑁆𑀩𑀫𑁂𑀯𑀺𑀤𑀦𑁆𑀢𑀺 𑀅𑀭𑀺𑀬𑀯𑀁𑀲𑀸𑀦𑀼 𑀩𑁆𑀭𑀽𑀳𑀦𑀯𑀲𑁂𑀦 𑀧𑀡𑀻𑀢𑁂𑀦 𑀙𑀦𑁆𑀤𑀸𑀤𑀺𑀦𑀸 𑀧𑀯𑀢𑁆𑀢𑀺 𑀢𑀁 𑀧𑀡𑀻𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀬𑀲𑀓𑀸𑀫𑀢𑀸𑀬𑀸’’𑀢𑀺 𑀓𑀺𑀢𑁆𑀢𑀺 𑀲𑀤𑁆𑀤𑀓𑀸𑀫𑀢𑀸𑀬 𑀯𑀸, 𑀧𑀭𑀺𑀯𑀸𑀭𑀓𑀸𑀫𑀢𑀸𑀬 𑀯𑀸. ‘‘𑀧𑀼𑀜𑁆𑀜𑀧𑁆𑀨𑀮𑀓𑀸𑀫𑀢𑀸𑀬𑀸’’𑀢𑀺 𑀪𑀯𑀲𑀫𑁆𑀧𑀢𑁆𑀢𑀺 𑀪𑁄𑀕𑀲𑀫𑁆𑀧𑀢𑁆𑀢𑀺𑀓𑀸𑀫𑀢𑀸𑀬. ‘‘𑀅𑀭𑀺𑀬𑀪𑀸𑀯𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀇𑀤𑀁 𑀤𑀸𑀦𑀁 𑀦𑀸𑀫 𑀅𑀭𑀺𑀬𑀸𑀦𑀁 𑀯𑀁𑀲𑁄. 𑀅𑀳𑀫𑁆𑀧𑀺 𑀅𑀭𑀺𑀬𑁄. 𑀢𑀲𑁆𑀫𑀸 𑀫𑀬𑀸𑀧𑀺 𑀓𑀢𑁆𑀢𑀩𑁆𑀩𑀫𑁂𑀯𑀺𑀤𑀦𑁆𑀢𑀺 𑀏𑀯𑀁 𑀅𑀭𑀺𑀬𑀪𑀸𑀯𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀅𑀭𑀺𑀬𑁄’’𑀢𑀺 𑀆𑀘𑀸𑀭 𑀅𑀭𑀺𑀬𑁄𑀧𑀺 𑀬𑀼𑀚𑁆𑀚𑀢𑀺 𑀤𑀲𑁆𑀲𑀦 𑀅𑀭𑀺𑀬𑁄𑀧𑀺. 𑀢𑀢𑁆𑀣 𑀆𑀘𑀸𑀭 𑀅𑀭𑀺𑀬𑁄 𑀦𑀸𑀫 𑀲𑀧𑁆𑀧𑀼𑀭𑀺𑀲𑁄 𑀧𑀼𑀣𑀼𑀚𑁆𑀚𑀦 𑀓𑀮𑁆𑀬𑀸𑀡𑀓𑁄 𑀯𑀼𑀘𑁆𑀘𑀢𑀺. 𑀤𑀲𑁆𑀲𑀦 𑀅𑀭𑀺𑀬𑁄 𑀦𑀸𑀫 𑀧𑀭𑀫𑀢𑁆𑀣 𑀅𑀭𑀺𑀬𑁄. ‘‘𑀧𑀸𑀭𑀫𑀺𑀢𑀸 𑀤𑀸𑀦𑀁’’𑀢𑀺 𑀲𑀩𑁆𑀩𑀤𑀸𑀦𑁂𑀳𑀺 𑀅𑀕𑁆𑀕𑀧𑀢𑁆𑀢𑀁 𑀫𑀳𑀸𑀩𑁄𑀥𑀺 𑀲𑀢𑁆𑀢𑀸𑀦𑀁 𑀧𑀸𑀭𑀗𑁆𑀕𑀢𑀤𑀸𑀦𑀁. 𑀢𑀜𑁆𑀳𑀺 𑀲𑀩𑁆𑀩 𑀲𑀢𑁆𑀢𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀧𑀯𑀢𑁆𑀢𑀺 𑀢𑀢𑁆𑀢𑀸 𑀅𑀕𑁆𑀕𑀧𑀢𑁆𑀢𑀁 𑀳𑁄𑀢𑀺, 𑀧𑀸𑀭𑀗𑁆𑀕𑀢𑀁. 𑀢𑀢𑁄 𑀉𑀢𑁆𑀢𑀭𑀺𑀢𑀭𑀲𑁆𑀲 𑀓𑀲𑁆𑀲𑀘𑀺𑀤𑀸𑀦𑀲𑁆𑀲 𑀅𑀪𑀸𑀯𑀢𑁄. 𑀲𑁂𑀲𑁂𑀲𑀼𑀧𑀺 𑀧𑀼𑀜𑁆𑀜 𑀓𑁆𑀭𑀺𑀬𑀯𑀢𑁆𑀣𑀽𑀲𑀼. ‘‘𑀢𑀺𑀓𑀤𑁆𑀯𑀬𑀁’’𑀢𑀺 𑀧𑀼𑀭𑀺𑀫𑀸𑀤𑀺 𑀳𑀻𑀦𑀸𑀤𑀺 𑀢𑀺𑀓𑀤𑁆𑀯𑀬𑀁. ‘‘𑀅𑀦𑁆𑀢𑀺𑀫 𑀯𑀢𑁆𑀣𑀼𑀦𑀸’’𑀢𑀺 𑀅𑀦𑁆𑀢𑀺𑀫 𑀯𑀢𑁆𑀣𑀼 𑀅𑀚𑁆𑀛𑀸𑀧𑀚𑁆𑀚𑀦𑁂𑀦 𑀯𑀸. ‘‘𑀤𑀼𑀲𑁆𑀲𑀻𑀮𑁄 𑀦𑀸𑀫𑀸’’𑀢𑀺 𑀤𑀼𑀲𑁆𑀲𑀻𑀮 𑀪𑀺𑀓𑁆𑀔𑀼 𑀦𑀸𑀫. 𑀲𑁄 𑀳𑀺 𑀬𑀸𑀯𑀪𑀺𑀓𑁆𑀔𑀼𑀧𑁆𑀧𑀝𑀻𑀜𑁆𑀜𑀁 𑀦 𑀯𑀺𑀚𑀳𑀺. 𑀢𑀸𑀯 𑀪𑀺𑀓𑁆𑀔𑀼 𑀏𑀯. 𑀦 𑀲𑀸𑀫𑀡𑁂𑀭𑁄, 𑀦 𑀕𑀺𑀳𑀻. 𑀢𑀁 𑀘𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫 𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺 𑀲𑁂𑀲𑁄. 𑀑𑀫𑀲𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀳𑀲𑁂𑀬𑁆𑀬𑀝𑁆𑀞𑀸𑀦𑁂 𑀢𑁂𑀦 𑀲𑀳 𑀅𑀢𑀺𑀭𑁂𑀓 𑀭𑀢𑁆𑀢𑀺𑀁 𑀲𑀬𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑁄 𑀤𑀼𑀲𑁆𑀲𑀻𑀮 𑀪𑀺𑀓𑁆𑀔𑀼𑀢𑁆𑀯𑁂𑀯 𑀯𑀢𑁆𑀢𑀩𑁆𑀩𑁄𑀢𑀺. ‘‘𑀧𑀼𑀦 𑀓𑀫𑁆𑀫𑀯𑀸𑀘𑀸𑀬 𑀲𑀫𑀸𑀤𑀸𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀻’’𑀢𑀺 𑀬𑀣𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀲𑁆𑀲 𑀲𑀩𑁆𑀩𑀁 𑀲𑀫𑀸𑀤𑀸𑀦𑀁 𑀪𑀺𑀚𑁆𑀚𑀢𑀺. 𑀧𑀼𑀦 𑀪𑀺𑀓𑁆𑀔𑀼𑀪𑀸𑀯𑀁 𑀇𑀘𑁆𑀙𑀦𑁆𑀢𑁂𑀦 𑀧𑀼𑀦 𑀓𑀫𑁆𑀫𑀯𑀸𑀘𑀸𑀬 𑀲𑀫𑀸𑀤𑀸𑀢𑀩𑁆𑀩𑀁 𑀳𑁄𑀢𑀺. 𑀏𑀯𑀁 𑀧𑀼𑀦 𑀓𑀫𑁆𑀫𑀯𑀸𑀘𑀸𑀬 𑀲𑀫𑀸𑀤𑀸𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺. ‘‘𑀇𑀢𑀭𑁂𑀲𑀼 𑀧𑀦𑀸’’𑀢𑀺 𑀮𑀺𑀗𑁆𑀕𑀦𑀸𑀲𑀦𑀗𑁆𑀕𑀢𑁄 𑀅𑀜𑁆𑀜𑁂𑀲𑀼 𑀤𑀡𑁆𑀟𑀓𑀫𑁆𑀫𑀗𑁆𑀕𑁂𑀲𑀼. 𑀦𑀺𑀘𑁆𑀘𑀲𑀻𑀮𑀸𑀤𑀻𑀲𑀼. ‘‘𑀬𑀁 𑀦𑀺𑀘𑁆𑀘𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀬𑀁 𑀧𑀸𑀡𑀸𑀢𑀺𑀧𑀸𑀢 𑀯𑀺𑀭𑀢𑀺 𑀲𑀻𑀮𑀁 𑀦𑀺𑀘𑁆𑀘𑀫𑁂𑀯 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀺𑀘𑁆𑀘𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸, 𑀧𑀸𑀡𑀖𑀸𑀢𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀓𑀸𑀮𑀫𑁆𑀧𑀺 𑀤𑀼𑀘𑁆𑀘𑀭𑀺𑀢 𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀅𑀦𑀺𑀘𑁆𑀘𑀁 𑀲𑀸𑀯𑀚𑁆𑀚𑀁 𑀳𑁄𑀢𑀻’’𑀢𑀺. 𑀤𑀼𑀘𑁆𑀘𑀭𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀬𑀁 𑀦𑀺𑀘𑁆𑀘𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀧𑀓𑀢𑀺 𑀕𑀳𑀝𑁆𑀞𑀸𑀦𑀁 𑀬𑀁 𑀯𑀺𑀓𑀸𑀮 𑀪𑁄𑀚𑀦𑀸𑀤𑀺 𑀯𑀺𑀭𑀢𑀺 𑀲𑀻𑀮𑀁 𑀦𑀺𑀘𑁆𑀘𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀅𑀦𑀺𑀘𑁆𑀘𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀲𑀫𑀸𑀤𑀸𑀦 𑀤𑀺𑀯𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀓𑀸𑀮 𑀪𑁄𑀚𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀯𑀻𑀢𑀺𑀓𑁆𑀓𑀫 𑀤𑁄𑀲𑁄𑀯𑀸 𑀤𑀼𑀘𑁆𑀘𑀭𑀺𑀢 𑀤𑁄𑀲𑁄 𑀯𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀲𑀸𑀯𑀚𑁆𑀚𑀁 𑀦 𑀳𑁄𑀢𑀻’’𑀢𑀺. 𑀤𑀼𑀘𑁆𑀘𑀭𑀺𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀤𑀲𑀲𑀻𑀮𑀜𑁆𑀘 𑀧𑀓𑀢𑀺 𑀕𑀳𑀝𑁆𑀞𑀸𑀦𑀁 𑀅𑀦𑀺𑀘𑁆𑀘𑀲𑀻𑀮𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀅𑀦𑀺𑀘𑁆𑀘𑀲𑀻𑀮𑀫𑁂𑀯 𑀳𑁄𑀢𑀻’’𑀢𑀺 𑀧𑀓𑀢𑀺 𑀕𑀳𑀝𑁆𑀞𑀸𑀦𑀁 𑀢𑀁 𑀤𑀲𑀲𑀻𑀮𑀁 𑀬𑀸𑀯𑀚𑀻𑀯𑀁 𑀦𑀺𑀘𑁆𑀘𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑀸𑀦𑀫𑁆𑀧𑀺 𑀅𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀩𑁆𑀩𑀚𑀺𑀢𑁂𑀲𑀼 𑀚𑀸𑀢𑀺 𑀲𑀪𑀸𑀯𑁂𑀦𑁂𑀯 𑀲𑀺𑀤𑁆𑀥𑀁 𑀦𑀺𑀘𑁆𑀘𑀲𑀻𑀮𑀁 𑀦𑀸𑀫 𑀦 𑀳𑁄𑀢𑀺. 𑀬𑀸𑀯𑀚𑀻𑀯𑀁 𑀓𑀢𑁆𑀯𑀸 𑀲𑀫𑀸𑀤𑀸𑀦 𑀯𑀲𑁂𑀦𑁂𑀯 𑀦𑀺𑀘𑁆𑀘𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑁂𑀲𑀥𑀸𑀭𑀡𑁂𑀦 𑀲𑀳 𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀏𑀢𑁆𑀣 𑀓𑀣𑀁 𑀯𑁂𑀲𑀥𑀸𑀭𑀡𑁂𑀦 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺. 𑀯𑁂𑀲𑀥𑀸𑀭𑀡𑀁 𑀦𑀸𑀫 𑀕𑀺𑀳𑀺𑀯𑀢𑁆𑀣𑀁 𑀧𑀳𑀸𑀬 𑀓𑀸𑀲𑀸𑀬 𑀯𑀢𑁆𑀣 𑀥𑀸𑀭𑀡𑀁. 𑀓𑀸𑀲𑀸𑀬𑀯𑀢𑁆𑀣𑀜𑁆𑀘 𑀦𑀸𑀫 𑀅𑀭𑀳𑀢𑁆𑀢𑀥𑀚𑁄 𑀳𑁄𑀢𑀺. 𑀦 𑀘 𑀅𑀭𑀳𑀢𑁆𑀢𑀥𑀚𑀁 𑀥𑀸𑀭𑁂𑀦𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀁 𑀅𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀧𑀺 𑀯𑀺𑀓𑀸𑀮𑁂 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀣𑀸 𑀦𑀘𑁆𑀘𑀸𑀤𑀻𑀦𑀺 𑀧𑀲𑁆𑀲𑀺𑀢𑀼𑀁, 𑀫𑀸𑀮𑀸𑀤𑀻𑀦𑀺 𑀥𑀸𑀭𑁂𑀢𑀼𑀁, 𑀉𑀘𑁆𑀘𑀸𑀲𑀬𑀦𑀸𑀤𑀻𑀲𑀼 𑀯𑀲𑀺𑀢𑀼𑀁, 𑀚𑀸𑀢𑀭𑀽𑀧𑀸𑀤𑀻𑀦𑀺 𑀲𑀸𑀤𑀺𑀢𑀼𑀁. 𑀓𑀲𑁆𑀫𑀸 𑀇𑀢𑀺 𑀘𑁂, 𑀢𑁂𑀲𑀜𑁆𑀳𑀺 𑀢𑀁 𑀢𑀁 𑀬𑀣𑀸𑀲𑀓𑀁 𑀲𑀻𑀮𑀁 𑀦𑀺𑀘𑁆𑀘𑀁 𑀲𑀼𑀤𑁆𑀥𑀁 𑀓𑀢𑁆𑀯𑀸 𑀭𑀓𑁆𑀔𑀺𑀢𑀼𑀫𑁂𑀯 𑀯𑀝𑁆𑀝𑀢𑀻𑀢𑀺𑀆𑀤𑀺𑀦𑀸 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺. ‘‘𑀅𑀧𑁆𑀧𑀦𑀁 𑀅𑀧𑀢𑁆𑀢𑀸𑀯 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀸𑀦𑀁 𑀫𑀳𑀕𑁆𑀕𑀢𑀪𑀸𑀯𑀦𑀸𑀦𑀁 𑀯𑀺𑀲𑀼𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀢𑁆𑀣𑁂𑀯𑀸’’𑀢𑀺 𑀇𑀫𑀲𑁆𑀫𑀺𑀁 𑀪𑀸𑀯𑀦𑀸 𑀓𑀫𑁆𑀫𑁂 𑀏𑀯. ‘‘𑀢𑁂 𑀲𑀜𑁆𑀜𑁂𑀯𑀸’’𑀢𑀺 𑀭𑀢𑀦𑀢𑁆𑀢𑀬𑀸𑀤𑀻𑀦𑀁 𑀏𑀯 𑀘. 𑀕𑀦𑁆𑀢𑀼𑀁 𑀆𑀭𑀤𑁆𑀥𑁄 𑀕𑀫𑀺𑀓𑁄. 𑀅𑀤𑁆𑀥𑀸𑀦𑀁 𑀤𑀻𑀖𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀅𑀤𑁆𑀥𑀺𑀓𑁄. ‘‘𑀧𑀭𑀺𑀲𑀼𑀤𑁆𑀥𑁂𑀦𑀸’’𑀢𑀺 𑀮𑀸𑀪𑀲𑀓𑁆𑀓𑀸𑀭𑀸𑀤𑀺 𑀦𑀺𑀭𑀧𑁂𑀓𑁆𑀔𑀢𑀸𑀬 𑀅𑀢𑁆𑀢𑀼𑀓𑁆𑀓𑀁 𑀲𑀦 𑀧𑀭𑀯𑀫𑁆𑀪𑀦𑀸𑀤𑀺 𑀭𑀳𑀺𑀢𑀢𑀸𑀬 𑀘 𑀧𑀭𑀺𑀲𑀼𑀤𑁆𑀥𑁂𑀦. ‘‘𑀳𑀺𑀢𑀧𑁆𑀨𑀭𑀡 𑀘𑀺𑀢𑁆𑀢𑁂𑀦𑀸’’𑀢𑀺 𑀫𑀬𑀺 𑀓𑀭𑁄𑀦𑁆𑀢𑁂 𑀇𑀫𑀲𑁆𑀲 𑀏𑀢𑁆𑀢𑀓𑀁 𑀳𑀺𑀢𑀲𑀼𑀔𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀢𑁂𑀲𑀁 𑀳𑀺𑀢𑀲𑀼𑀔𑁂𑀲𑀼 𑀨𑀭𑀡 𑀘𑀺𑀢𑁆𑀢𑁂𑀦. 𑀫𑁂𑀢𑁆𑀢𑀘𑀺𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀯𑀺𑀬𑀸’’𑀢𑀺 𑀏𑀢𑁂𑀦 𑀢𑁂𑀲𑀁 𑀲𑀩𑁆𑀩𑀁 𑀓𑀺𑀘𑁆𑀘𑀁 𑀅𑀢𑁆𑀢𑀦𑁄𑀪𑀸𑀭𑀁 𑀓𑀭𑁄𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀲𑀸𑀥𑀸𑀭𑀡 𑀓𑀭𑀡𑀁’’𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀭𑁂𑀲𑀁 𑀤𑀸𑀦𑀁. 𑀅𑀢𑁆𑀢 𑀫𑀦𑀢𑀸𑀧𑀯𑁂𑀤𑀦𑀺𑀬𑀸𑀥𑀼𑀲𑀸𑀥𑀽𑀢𑀺 𑀯𑀘𑀻𑀪𑁂𑀤𑀓𑀭𑀡𑀁. 𑀢𑀜𑁆𑀳𑀺𑀤𑀺𑀦𑁆𑀦𑀜𑁆𑀘𑀸𑀦𑀼𑀫𑁄𑀤𑀺𑀢𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀚𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀞𑀢𑁆𑀯𑀸𑀢𑀺 𑀏𑀢𑁆𑀣 𑀲𑀺𑀮𑁄𑀓𑀸𑀤𑀺𑀧𑀓𑁆𑀔𑀺𑀓𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀚𑀳𑀺𑀢𑁆𑀯𑀸 𑀲𑀼𑀡𑀦𑁆𑀢𑀲𑁆𑀲 𑀇𑀫𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀢𑁆𑀣𑀭𑀲𑀥𑀫𑁆𑀫𑀭𑀲𑀧𑁆𑀧𑀝𑀺𑀲𑀁𑀯𑁂𑀤𑀻 𑀪𑀯𑀺𑀲𑁆𑀲𑀸𑀫𑀻𑀢𑀺, 𑀤𑁂𑀲𑁂𑀦𑁆𑀢𑀲𑁆𑀲 𑀇𑀫𑀁 𑀤𑁂𑀲𑁂𑀦𑁆𑀢𑁄 𑀥𑀫𑁆𑀫𑀲𑁆𑀲 𑀘 𑀲𑀼𑀡𑀦𑁆𑀢𑀸𑀦𑀜𑁆𑀘 𑀅𑀦𑀼𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀞𑀢𑁆𑀯𑀸. 𑀮𑀸𑀪 𑀲𑀓𑁆𑀓𑀸𑀭𑀸𑀤𑀺 𑀧𑀓𑁆𑀔𑀺𑀓𑁄 𑀫𑀦𑀲𑀺𑀓𑀸𑀭𑁄 𑀅𑀬𑁄𑀦𑀺 𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀦𑀺𑀬𑁆𑀬𑀸𑀦𑀢𑁆𑀣 𑀦𑀺𑀲𑁆𑀲𑀭𑀡𑀢𑁆𑀣 𑀧𑀓𑁆𑀔𑀺𑀓𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀦𑀺𑀭𑀯𑀚𑁆𑀚 𑀓𑀫𑁆𑀫𑀸𑀦𑀺 𑀦𑀸𑀫 𑀓𑀲𑀺𑀕𑁄𑀭𑀓𑁆𑀔𑀸𑀤𑀺 𑀓𑀫𑁆𑀫𑀸𑀦𑀺. 𑀦𑀺𑀭𑀯𑀚𑁆𑀚𑀲𑀺𑀧𑁆𑀧𑀸𑀦𑀺 𑀦𑀸𑀫 𑀯𑀟𑁆𑀠𑀓𑀺𑀲𑀺𑀧𑁆𑀧𑀸𑀤𑀻𑀦𑀺 𑀯𑁂𑀚𑁆𑀚𑀲𑀺𑀧𑁆𑀧𑀸𑀤𑀻𑀦𑀺 𑀘. 𑀦𑀺𑀭𑀯𑀚𑁆𑀚 𑀯𑀺𑀚𑁆𑀚𑀸𑀞𑀸𑀦𑀸𑀦𑀺 𑀦𑀸𑀫 𑀧𑀭𑀽𑀧𑀭𑁄𑀥𑀭 𑀳𑀺𑀢𑀸𑀦𑀺 𑀅𑀗𑁆𑀕𑀯𑀺𑀚𑁆𑀚𑀸 𑀯𑁂𑀤𑀯𑀺𑀚𑁆𑀚𑀸 𑀫𑀦𑁆𑀢𑀯𑀺𑀚𑁆𑀚𑀸𑀤𑀻𑀦𑀺. ‘‘𑀯𑁄𑀤𑀸𑀦 𑀓𑀭𑀡𑀁’’𑀢𑀺 𑀯𑀺𑀲𑁂𑀲𑁂𑀦 𑀯𑀺𑀲𑀼𑀤𑁆𑀥𑀓𑀭𑀡𑀁. ‘‘𑀢𑀁 𑀲𑀪𑀸𑀯𑀢𑁆𑀢𑀸’’𑀢𑀺 𑀤𑀸𑀦𑀲𑀪𑀸𑀯𑀢𑁆𑀢𑀸. ‘‘𑀘𑀸𑀭𑀺𑀢𑁆𑀢 𑀲𑀻𑀮𑀢𑁆𑀢𑀸’’𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀓𑀢𑀺 𑀘𑀸𑀭𑀺𑀢𑁆𑀢 𑀲𑀻𑀮𑀢𑁆𑀢𑀸. 𑀧𑀼𑀦 ‘‘𑀢𑀁 𑀲𑀪𑀸𑀯𑀢𑁆𑀢𑀸’’𑀢𑀺 𑀪𑀸𑀯𑀦𑀸 𑀲𑀪𑀸𑀯𑀢𑁆𑀢𑀸. 𑀢𑀣𑀸𑀳𑀺 𑀤𑁂𑀲𑁂𑀦𑁆𑀢𑀲𑁆𑀲 𑀘 𑀲𑀼𑀡𑀦𑁆𑀢𑀲𑁆𑀲 𑀘 𑀤𑁂𑀲𑀦𑀸𑀲𑁄𑀢𑀸𑀦𑀼𑀲𑀸𑀭𑁂𑀦 𑀘𑀺𑀢𑁆𑀢𑀪𑀸𑀯𑀦𑀸 𑀜𑀸𑀡𑀪𑀸𑀯𑀦𑀸𑀯𑀳𑀢𑁆𑀢𑀸 𑀤𑁂𑀲𑀦𑀸𑀲𑀯𑀦𑀸 𑀲𑀪𑀸𑀯𑀸 𑀳𑁄𑀦𑁆𑀢𑀺. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀲𑀬𑀫𑁂𑀯 𑀉𑀚𑀼𑀁 𑀓𑀭𑁄𑀦𑁆𑀢𑀲𑁆𑀲 𑀘 𑀜𑀸𑀡𑀪𑀸𑀯𑀦𑀸 𑀓𑀫𑁆𑀫𑀫𑁂𑀯. 𑀢𑀣𑀸 𑀧𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀉𑀚𑀼𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀻𑀢𑀺. ‘‘𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀤𑁂𑀲𑀦𑀸 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀓𑀲𑁆𑀫𑀸, 𑀤𑀸𑀦𑀲𑀻𑀮𑀸𑀦𑀺 𑀤𑁂𑀲𑁂𑀦𑁆𑀢𑁂𑀦𑀧𑀺 𑀅𑀦𑁆𑀢𑁂 𑀮𑀓𑁆𑀔𑀡𑀢𑁆𑀢𑀬𑁂𑀦 𑀲𑀳𑀲𑀘𑁆𑀘𑀧𑁆𑀧𑀓𑀸𑀲𑀦𑀲𑁆𑀲 𑀓𑀢𑁆𑀢𑀩𑁆𑀩𑀢𑁆𑀢𑀸. 𑀏𑀢𑁂𑀦 𑀤𑁂𑀲𑀦𑀸𑀲𑀯𑀦𑀸 𑀅𑀦𑁆𑀢𑁂 𑀮𑀓𑁆𑀔𑀡𑀢𑁆𑀢𑀬𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀦𑀸 𑀓𑀫𑁆𑀫𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀢𑀁 𑀲𑀪𑀸𑀯𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀦𑁄𑀓𑀫𑁆𑀫 𑀫𑁂𑀯𑀸’’𑀢𑀺 𑀧𑀤𑀼𑀤𑁆𑀥𑀸𑀭𑁄. ‘‘𑀫𑀦𑀲𑁆𑀫𑀺𑀁 𑀏𑀯𑀸’’𑀢𑀺 𑀫𑀦𑁄𑀤𑁆𑀯𑀸𑀭𑁂 𑀏𑀯. ‘‘𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄’’𑀢𑀺 𑀅𑀧𑁆𑀧𑀦𑀸𑀓𑀺𑀘𑁆𑀘𑀲𑁆𑀲 𑀲𑀺𑀚𑁆𑀛𑀦𑀢𑁄. ‘‘𑀅𑀗𑁆𑀕𑀪𑀸𑀯𑀸 𑀲𑀫𑁆𑀪𑀯𑀢𑁄’’𑀢𑀺 𑀅𑀧𑁆𑀧𑀦𑀸 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀁 𑀅𑀗𑁆𑀕𑀪𑀸𑀯𑀸 𑀲𑀫𑁆𑀪𑀯𑀢𑁄. ‘‘𑀢𑀜𑁆𑀘𑀪𑀸𑀯𑀦𑀸 𑀫𑀬’’𑀦𑁆𑀢𑀺 𑀧𑀤𑀼𑀤𑁆𑀥𑀸𑀭𑁄. ‘‘𑀤𑀸𑀦𑀸𑀤𑀺𑀯𑀲𑁂𑀦𑀸’’𑀢𑀺 𑀤𑀸𑀦𑀲𑀻𑀮𑀯𑀲𑁂𑀦. 𑀤𑀸𑀦𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄𑀢𑀺 𑀇𑀤𑀁 𑀢𑀸𑀯 𑀬𑀼𑀚𑁆𑀚𑀢𑀺. 𑀲𑀻𑀮𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄𑀢𑀺 𑀇𑀤𑀁 𑀧𑀦 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀧𑀸𑀴𑀺𑀬𑀜𑁆𑀳𑀺 𑀫𑀳𑀕𑁆𑀕𑀢𑀚𑁆𑀛𑀸𑀦𑁂𑀲𑀼𑀧𑀺 𑀧𑀳𑀸𑀦𑀁 𑀲𑀻𑀮𑀁 𑀯𑁂𑀭𑀫𑀡𑀺 𑀲𑀻𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁’’𑀢𑀺 𑀓𑁂𑀦𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀧𑀓𑀢𑀺 𑀘𑀸𑀭𑀺𑀢𑁆𑀢𑀁 𑀲𑀻𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀧𑁆𑀧𑀦𑁆𑀦𑁂 𑀘 𑀧𑀣𑀫𑀚𑁆𑀛𑀸𑀦𑁂 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀁 𑀦𑀸𑀫 𑀧𑀓𑀢𑀺𑀘𑀸𑀭𑀺𑀢𑁆𑀢𑀫𑁂𑀯 𑀧𑀓𑀢𑀺 𑀦𑀺𑀬𑀸𑀫𑁂𑀦 𑀧𑀯𑀢𑁆𑀢𑀫𑁂𑀯. 𑀇𑀢𑀺 𑀧𑀓𑀢𑀺𑀘𑀸𑀭𑀺𑀢𑁆𑀢𑀢𑁆𑀢𑀸 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀫𑁂𑀯 𑀢𑁂𑀳𑀺 𑀯𑀺𑀕𑀫𑀦𑀝𑁆𑀞𑁂𑀦 𑀯𑁂𑀭𑀫𑀡𑀻𑀢𑀺 𑀘, 𑀧𑀺𑀤𑀳𑀦𑀝𑁆𑀞𑁂𑀦 𑀲𑀁𑀯𑀭𑁄𑀢𑀺 𑀘, 𑀧𑀳𑀸𑀦 𑀓𑀺𑀘𑁆𑀘𑀁 𑀅𑀯𑀺𑀚𑀳𑀦𑀝𑁆𑀞𑁂𑀦 𑀅𑀯𑀻𑀢𑀺𑀓𑁆𑀓𑀫𑁄𑀢𑀺 𑀘, 𑀯𑀼𑀢𑁆𑀢𑀁. 𑀘𑁂𑀢𑀦𑀸𑀲𑀻𑀮𑀦𑁆𑀢𑀺 𑀏𑀢𑁆𑀣 𑀧𑀦 𑀛𑀸𑀦𑀲𑀫𑁆𑀧𑀬𑀼𑀢𑁆𑀢 𑀘𑁂𑀢𑀦𑀸 𑀏𑀯 𑀯𑀼𑀘𑁆𑀘𑀢𑀺. 𑀲𑀸 𑀘 𑀲𑀻𑀮𑀚𑀸𑀢𑀺 𑀓𑀢𑁆𑀢𑀸 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀧𑁆𑀧𑀦𑀸𑀧𑀢𑁆𑀢’’𑀦𑁆𑀢𑀺 𑀧𑀤𑀼𑀤𑁆𑀥𑀸𑀭𑁄. ‘‘𑀛𑀸𑀦𑀪𑁂𑀤𑁂𑀦𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀭𑀽𑀧𑀸𑀯𑀘𑀭𑀓𑀼𑀲𑀮𑀜𑁆𑀳𑀺 𑀛𑀸𑀦𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀁, 𑀛𑀸𑀦𑀫𑁂𑀯 𑀧𑀦 𑀛𑀸𑀦𑀗𑁆𑀕𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀦𑁆𑀢𑀺.

𑀓𑀼𑀲𑀮𑀓𑀫𑁆𑀫𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫𑁩. ‘‘𑀏𑀢𑁆𑀣𑀸’’𑀢𑀺𑀆𑀤𑀻𑀲𑀼. ‘‘𑀥𑀫𑁆𑀫𑀲𑀗𑁆𑀕𑀳𑁂’’𑀢𑀺 𑀥𑀫𑁆𑀫𑀲𑀗𑁆𑀕𑀡𑀺 𑀧𑀸𑀴𑀺𑀬𑀁. ‘‘𑀤𑀲𑁆𑀲𑀦𑁂𑀦𑀸’’𑀢𑀺 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀜𑁆𑀜𑀸𑀡𑁂𑀦. ‘‘𑀢𑀁’’𑀢𑀺 𑀉𑀤𑁆𑀥𑀘𑁆𑀘 𑀘𑁂𑀢𑀦𑀁. ‘‘𑀪𑀸𑀯𑀦𑀸𑀬𑀸’’𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑀸𑀬 𑀪𑀸𑀯𑀦𑀸𑀬. 𑀧𑀸𑀴𑀺𑀧𑀸𑀞𑁂. ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀯𑀼𑀘𑁆𑀘𑀦𑁆𑀢𑀺. ‘‘𑀲𑀺𑀬𑀸’’𑀢𑀺 𑀏𑀓𑀘𑁆𑀘𑁂𑀢𑀺 𑀅𑀢𑁆𑀣𑁂 𑀦𑀺𑀧𑀸𑀢 𑀧𑀤𑀁. 𑀇𑀫𑁂𑀲𑀼 𑀙𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀏𑀓𑀘𑁆𑀘𑁂 𑀙 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀸, 𑀏𑀓𑀘𑁆𑀘𑁂 𑀙 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀢𑀻𑀳𑀺 𑀉𑀧𑀭𑀺 𑀫𑀕𑁆𑀕𑁂𑀳𑀺 𑀧𑀳𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀣𑀫𑀧𑀤𑁂 ‘‘𑀏𑀓𑀘𑁆𑀘𑁂 𑀙 𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺 𑀓𑀫𑁆𑀫𑀧𑀣𑀧𑀢𑁆𑀢𑀓𑀫𑁆𑀫𑀲𑀳𑀚𑀸𑀢𑀸 𑀙 𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀤𑀼𑀢𑀻𑀬 𑀧𑀤𑁂 ‘‘𑀏𑀓𑀘𑁆𑀘𑁂 𑀙 𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺 𑀅𑀓𑀫𑁆𑀫𑀧𑀣 𑀧𑀢𑁆𑀢𑀸 𑀥𑀫𑁆𑀫𑀺𑀓𑁂𑀲𑀼 𑀞𑀸𑀦𑁂𑀲𑀼 𑀅𑀲𑁆𑀲𑀸𑀤𑀦𑀸𑀪𑀺 𑀦𑀦𑁆𑀤𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀙 𑀘𑀺𑀢𑁆𑀢𑀼𑀧𑁆𑀧𑀸𑀤𑀸. ‘‘𑀢𑀢𑁆𑀣𑀸’’𑀢𑀺 𑀥𑀫𑁆𑀫𑀲𑀗𑁆𑀕𑀳𑁂. ‘‘𑀇𑀢𑀭𑀢𑁆𑀣𑀸’’𑀢𑀺 𑀇𑀢𑀭𑁂𑀲𑀼 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁂𑀲𑀼. ‘‘𑀢𑀲𑁆𑀲𑀸’’𑀢𑀺 𑀦𑀸𑀦𑀓𑁆𑀔𑀡𑀺𑀓 𑀓𑀫𑁆𑀫𑀧𑀘𑁆𑀘𑀬𑀲𑁆𑀲. 𑀧𑀸𑀴𑀺𑀧𑀸𑀞𑁂. ‘‘𑀲𑀳𑀚𑀸𑀢𑀸’’𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀲𑀳𑀚𑀸𑀢𑀸. ‘‘𑀦𑀸𑀦𑀓𑁆𑀔𑀡𑀺𑀓𑀸’’𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀅𑀲𑀳𑀚𑀸𑀢𑀸 𑀅𑀢𑀻𑀢𑀓𑀸𑀮𑀪𑀽𑀢𑁂 𑀦𑀸𑀦𑀓𑁆𑀔𑀡𑁂 𑀧𑀯𑀢𑁆𑀢𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀘𑁂𑀢𑀦𑀸. ‘‘𑀬𑀤𑀺 𑀏𑀯𑀁’’𑀢𑀺 𑀏𑀯𑀁 𑀬𑀤𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀉𑀤𑁆𑀥𑀘𑁆𑀘 𑀘𑁂𑀢𑀦𑀸 𑀤𑀲𑁆𑀲𑀦 𑀧𑀤𑁂 𑀅𑀦𑀼𑀤𑁆𑀥𑀝𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀁 𑀦𑀸𑀓𑀟𑁆𑀠𑀢𑀻𑀢𑀺 𑀯𑀺𑀜𑁆𑀜𑀸𑀬𑁂𑀬𑁆𑀬. 𑀏𑀯𑀁 𑀲𑀢𑀻𑀢𑀺 𑀧𑀸𑀞𑀲𑁂𑀲𑁄. ‘‘𑀘𑁂’’𑀢𑀺 𑀘𑁂 𑀯𑀤𑁂𑀬𑁆𑀬. ‘‘𑀦𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. ‘‘𑀢𑀲𑁆𑀲𑀸 𑀯𑀺𑀧𑀸𑀓𑀲𑁆𑀲𑀸’’𑀢𑀺 𑀢𑀲𑁆𑀲𑀸 𑀉𑀤𑁆𑀥𑀘𑁆𑀘 𑀘𑁂𑀢𑀦𑀸𑀬 𑀯𑀺𑀧𑀸𑀓𑀲𑁆𑀲. 𑀧𑀸𑀴𑀺𑀧𑀸𑀞𑁂. ‘‘𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁’’𑀢𑀺 𑀇𑀫𑁂 𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀜𑁆𑀜𑀸𑀡𑀁. ‘‘𑀢𑁂𑀲𑀁 𑀯𑀺𑀧𑀸𑀓𑁂’’𑀢𑀺 𑀉𑀤𑁆𑀥𑀘𑁆𑀘 𑀲𑀳𑀕𑀢𑀸𑀦𑀁 𑀯𑀺𑀧𑀸𑀓𑁂. ‘‘𑀜𑀸𑀡𑀁’’𑀢𑀺 𑀢𑀁 𑀯𑀺𑀧𑀸𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀜𑁆𑀜𑀸𑀡𑀁. ‘‘𑀲𑀩𑁆𑀩 𑀤𑀼𑀩𑁆𑀩𑀮𑀦𑁆𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀢𑀺𑀯𑀺𑀬 𑀓𑀸𑀴𑀓𑀥𑀫𑁆𑀫𑀢𑁆𑀢𑀸’’𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀫𑀳𑀦𑁆𑀢𑁂𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀭𑀢𑀦𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀅𑀢𑀺𑀬𑁂𑀯𑀓𑀡𑁆𑀳 𑀥𑀫𑁆𑀫𑀢𑁆𑀢𑀸. 𑀢𑀲𑁆𑀲𑀸 𑀯𑀺𑀘𑀺𑀓𑀺𑀘𑁆𑀙𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺 𑀆𑀓𑀟𑁆𑀠𑀦𑀫𑁆𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀲𑀪𑀸𑀯 𑀯𑀺𑀭𑀼𑀤𑁆𑀥𑀢𑁆𑀢𑀸 𑀬𑁂𑀯𑀸’’𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀅𑀲𑀦𑁆𑀦𑀺𑀝𑁆𑀞𑀸𑀦 𑀲𑀪𑀸𑀯𑀸. 𑀅𑀥𑀺𑀫𑁄𑀓𑁆𑀔𑁄 𑀲𑀦𑁆𑀦𑀺𑀝𑁆𑀞𑀸𑀦 𑀲𑀪𑀸𑀯𑁄𑀢𑀺 𑀏𑀯𑀁 𑀲𑀪𑀸𑀯 𑀯𑀺𑀭𑀼𑀤𑁆𑀥𑀢𑁆𑀢𑀸𑀬𑁂𑀯.

‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀻𑀲𑀼. ‘‘𑀯𑀺𑀧𑀘𑁆𑀘𑀢𑀻𑀢𑀺 𑀯𑀺𑀧𑀸𑀘𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀧𑀤𑀭𑀽𑀧𑁂𑀦 𑀦 𑀲𑀫𑁂𑀢𑀻𑀢𑀺 𑀅𑀜𑁆𑀜𑀁 𑀅𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀲𑀩𑁆𑀩𑀫𑁆𑀧𑀺 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀤𑁂𑀯𑀮𑁄𑀓𑁂 𑀤𑁂𑀯𑀲𑀫𑁆𑀧𑀢𑁆𑀢𑀺 𑀲𑀤𑀺𑀲𑀸 𑀤𑀺𑀩𑁆𑀩𑀯𑀺𑀫𑀸𑀦𑀸𑀤𑀺𑀓𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸. 𑀇𑀤𑀁 ‘‘𑀑𑀓𑀸𑀲𑀁 𑀓𑀢𑁆𑀯𑀸’’𑀢𑀺 𑀧𑀤𑁂 𑀯𑀺𑀲𑁂𑀲𑀦𑀁. 𑀢𑀢𑁆𑀣 ‘‘𑀲𑀼𑀔 𑀯𑀺𑀧𑀸𑀓𑀁’’𑀢𑀺 𑀇𑀤𑀁 𑀅𑀝𑁆𑀞 𑀅𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀮𑁄𑀓𑁂 𑀩𑁆𑀭𑀳𑁆𑀫𑀸𑀦𑀁 𑀭𑀽𑀧𑀓𑀸𑀬𑁄 𑀭𑀽𑀧𑀸𑀯𑀘𑀭 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀘 𑀓𑀸𑀫𑀸𑀯𑀘𑀭 𑀥𑀫𑁆𑀫 𑀲𑀫𑀽𑀳𑁄 𑀏𑀯. 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀫𑀺𑀁 𑀮𑁄𑀓𑁂 𑀧𑀜𑁆𑀘 𑀅𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀺𑀧𑀺 𑀭𑀽𑀧𑀸𑀯𑀘𑀭 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺 𑀲𑀺𑀬𑀼𑀦𑁆𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀭𑀽𑀧𑀸𑀯𑀘𑀭 𑀓𑀼𑀲𑀮𑀁𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀢𑀸𑀦𑀻’’𑀢𑀺 𑀅𑀧𑀸𑀬𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑀸𑀦𑀺 𑀅𑀝𑁆𑀞 𑀅𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀺. ‘‘𑀲𑀩𑁆𑀩𑀲𑁆𑀫𑀺𑀁 𑀓𑀸𑀫𑀮𑁄𑀓𑁂’’𑀢𑀺 𑀏𑀓𑀸𑀤𑀲𑀯𑀺𑀥𑁂 𑀓𑀸𑀫𑀮𑁄𑀓𑁂. ‘‘𑀢𑁂𑀲𑀼 𑀘𑀸’’𑀢𑀺 𑀢𑁂𑀲𑀼 𑀅𑀝𑁆𑀞 𑀅𑀳𑁂𑀢𑀼𑀓 𑀯𑀺𑀧𑀸𑀓𑁂𑀲𑀼 𑀘. ‘‘𑀆𑀭𑀫𑁆𑀫𑀡𑀦𑁆𑀢𑀭𑁂’’𑀢𑀺 𑀓𑀲𑀺𑀡 𑀦𑀺𑀫𑀺𑀢𑁆𑀢𑀸𑀤𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂. ‘‘𑀦𑀺𑀫𑀺𑀢𑁆𑀢𑀸 𑀭𑀫𑁆𑀫𑀡𑁂’’𑀢𑀺 𑀓𑀲𑀺𑀡 𑀦𑀺𑀫𑀺𑀢𑁆𑀢𑀸𑀤𑀺𑀓𑁂 𑀦𑀺𑀫𑀺𑀢𑁆𑀢 𑀧𑀜𑁆𑀜𑀢𑁆𑀢𑀸 𑀭𑀫𑁆𑀫𑀡𑁂. ‘‘𑀢𑀸𑀦𑀺 𑀧𑀜𑁆𑀘𑀯𑀺𑀧𑀸𑀓𑀸𑀦𑀻’’𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀜𑁆𑀘 𑀅𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀺 𑀓𑀸𑀫𑀸𑀯𑀘𑀭 𑀓𑀼𑀲𑀮 𑀓𑀫𑁆𑀫𑀲𑁆𑀲𑁂𑀯 𑀯𑀺𑀧𑀸𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀲𑁄𑀴𑀲𑀓 𑀫𑀕𑁆𑀕𑁄’’𑀢𑀺 𑀲𑁄𑀴𑀲𑀓𑀣𑀸 𑀫𑀕𑁆𑀕𑁄 𑀓𑀣𑀸𑀧𑀩𑀦𑁆𑀥𑁄. 𑀏𑀯𑀁 𑀤𑁆𑀯𑀸𑀤𑀲 𑀓𑀫𑀕𑁆𑀕𑁄. ‘‘𑀅𑀳𑁂𑀢𑀼𑀓𑀝𑁆𑀞𑀓’’𑀦𑁆𑀢𑀺 𑀅𑀳𑁂𑀢𑀼𑀓 𑀯𑀺𑀧𑀸𑀓𑀝𑁆𑀞𑀓𑀁. 𑀲𑀫𑁆𑀫𑀸 𑀧𑀓𑀸𑀭𑁂𑀦 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑀁. 𑀜𑀸𑀡𑀁. 𑀲𑀫𑁆𑀧𑀚𑀸𑀦𑁂𑀦 𑀓𑀢𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀦 𑀲𑀫𑁆𑀧𑀚𑀸𑀦𑀓𑀢𑀁 𑀅𑀲𑀫𑁆𑀧𑀚𑀸𑀦𑀓𑀢𑀁. ‘‘𑀲𑀤𑁆𑀤𑀳𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀤𑀺𑀝𑁆𑀞𑀼𑀚𑀼 𑀓𑀫𑁆𑀫𑀜𑀸𑀡 𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀦 𑀳𑀺 𑀢𑁂𑀦 𑀜𑀸𑀡𑁂𑀦 𑀅𑀲𑀫𑁆𑀧𑀦𑁆𑀦𑁄 𑀓𑀫𑁆𑀫𑀜𑁆𑀘 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀤𑀳𑀢𑀻𑀢𑀺. 𑀚𑀸𑀦𑀺𑀢𑁆𑀯𑀸𑀢𑀺 𑀯𑀸 𑀧𑀸𑀞𑁄 𑀲𑀺𑀬𑀸. ‘‘𑀏𑀓𑀫𑁂𑀓𑀁’’𑀢𑀺 𑀏𑀓𑀫𑁂𑀓𑀁 𑀓𑀼𑀲𑀮𑀓𑀫𑁆𑀫𑀁. ‘‘𑀓𑀼𑀲𑀮 𑀲𑀫𑀬𑁂’’𑀢𑀺 𑀓𑀼𑀲𑀮 𑀓𑀫𑁆𑀫 𑀓𑀭𑀡𑀓𑀸𑀮𑁂. 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀯𑀸. 𑀬𑀲𑁆𑀲𑀫𑁂 𑀈𑀤𑀺𑀲𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁. 𑀢𑀲𑁆𑀲𑀫𑁂 𑀪𑀯𑀮𑀸𑀪𑁄 𑀪𑁄𑀕𑀮𑀸𑀪𑁄 𑀫𑀺𑀢𑁆𑀢𑀮𑀸𑀪𑁄 𑀲𑀩𑁆𑀩𑁂𑀮𑀸𑀪𑀸 𑀏𑀓𑀦𑁆𑀢𑁂𑀦 𑀲𑀼𑀮𑀸𑀪𑀸𑀢𑀺 𑀅𑀢𑁆𑀣𑁄. ‘‘𑀲𑀼𑀮𑀤𑁆𑀥𑀁’’𑀢𑀺 𑀇𑀤𑀁 𑀧𑀼𑀜𑁆𑀜𑀁 𑀲𑀼𑀮𑀤𑁆𑀥𑀁. 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. ‘‘𑀲𑁂𑀲𑁂𑀦𑀸’’𑀢𑀺 𑀢𑀲𑁆𑀲𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦. 𑀅𑀝𑁆𑀞𑀓𑀣𑀸 𑀧𑀸𑀞𑁂. ‘‘𑀏𑀓𑀧𑀺𑀡𑁆𑀟𑀧𑀸𑀢𑀲𑁆𑀫𑀺𑀁’’𑀢𑀺 𑀏𑀓𑀯𑀸𑀭𑀁 𑀧𑀺𑀡𑁆𑀟𑀧𑀸𑀢𑀤𑀸𑀦𑁂. 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 ‘𑀏𑀓𑀸 𑀘𑁂𑀢𑀦𑀸 𑀏𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀻’𑀢𑀺, 𑀢𑀁 𑀲𑀼𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀝𑀺𑀧𑀓𑁆𑀔𑁂𑀳𑀻’’𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀼𑀲𑀮𑁂𑀳𑀺. 𑀯𑀺𑀲𑁂𑀲𑁂𑀦 𑀪𑀼𑀲𑀁 𑀫𑀼𑀴𑁆𑀳𑁄 𑀩𑁆𑀬𑀸𑀫𑀼𑀴𑁆𑀳𑁄. 𑀅𑀢𑀺𑀯𑀺𑀬 𑀩𑁆𑀬𑀸𑀫𑀼𑀴𑁆𑀳𑁄 𑀅𑀢𑀺𑀩𑁆𑀬𑀸𑀫𑀼𑀴𑁆𑀳𑁄. 𑀅𑀢𑀺𑀩𑁆𑀬𑀸𑀫𑀼𑀴𑁆𑀳𑀢𑁆𑀣𑀸𑀬 𑀧𑀘𑁆𑀘𑀬𑀪𑀽𑀢𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀅𑀢𑀺𑀤𑀼𑀧𑁆𑀧𑀜𑁆𑀜𑀸𑀬 𑀧𑀘𑁆𑀘𑀬𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀣𑁂𑀭𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀏𑀯𑀁 𑀫𑀦𑀲𑀺𑀓𑀭𑀺𑀢𑁆𑀯𑀸. ‘‘𑀲𑀦𑁆𑀦𑀺𑀳𑀺𑀢𑀧𑀘𑁆𑀘𑀬𑀫𑀢𑁆𑀢𑁂𑀦𑀸’’𑀢𑀺 𑀆𑀲𑀦𑁆𑀦𑁂 𑀲𑀡𑁆𑀞𑀺𑀢𑀧𑀘𑁆𑀘𑀬 𑀫𑀢𑁆𑀢𑁂𑀦. ‘‘𑀧𑀼𑀩𑁆𑀩𑀧𑀬𑁄𑀕 𑀧𑀘𑁆𑀘𑀬𑀫𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀮𑀯𑀓𑀫𑁆𑀫𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀢𑀺𑀓𑁆𑀔𑀢𑀭𑀁 𑀯𑀺𑀧𑀸𑀓𑀁. 𑀬𑀤𑀸 𑀧𑀬𑁄𑀕 𑀭𑀳𑀺𑀢𑁂𑀦 𑀧𑀘𑁆𑀘𑀬𑀕𑀡𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀅𑀲𑀗𑁆𑀔𑀸𑀭𑀺𑀓𑀁 𑀦𑀸𑀫. 𑀬𑀤𑀸 𑀧𑀬𑁄𑀕𑀲𑀳𑀺𑀢𑁂𑀦, 𑀢𑀤𑀸 𑀲𑀲𑀗𑁆𑀔𑀸𑀭𑀺𑀓𑀁 𑀦𑀸𑀫. 𑀢𑀢𑁆𑀣 𑀅𑀲𑀗𑁆𑀔𑀸𑀭𑀺𑀓𑀁 𑀢𑀺𑀓𑁆𑀔𑀁 𑀦𑀸𑀫. 𑀲𑀲𑀗𑁆𑀔𑀸𑀭𑀺𑀓𑀁 𑀫𑀦𑁆𑀤𑀁 𑀦𑀸𑀫. 𑀢𑀣𑀸 𑀤𑀼𑀩𑁆𑀩𑀮 𑀓𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑁂 𑀫𑀦𑁆𑀤𑀯𑀺𑀧𑀸𑀓𑁂𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀢𑀺𑀓𑁆𑀔𑀫𑀦𑁆𑀤𑀸𑀦𑀁 𑀫𑀦𑁆𑀤𑀢𑀺𑀓𑁆𑀔𑀢𑀸𑀧𑀢𑁆𑀢𑀺 𑀦𑀸𑀫 𑀲𑀺𑀬𑀸. 𑀦 𑀘 𑀢𑀣𑀸 𑀲𑀓𑁆𑀓𑀸 𑀪𑀯𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀲𑀺𑀬𑀸, 𑀬𑀤𑀺 𑀧𑀼𑀩𑁆𑀩𑀓𑀫𑁆𑀫𑀯𑀲𑁂𑀦 𑀅𑀝𑁆𑀞𑀦𑁆𑀦𑀁 𑀫𑀳𑀸𑀯𑀺𑀧𑀸𑀓𑀸𑀦𑀁 𑀲𑀗𑁆𑀔𑀸𑀭𑀪𑁂𑀤𑁄 𑀲𑀺𑀤𑁆𑀥𑁄 𑀲𑀺𑀬𑀸, 𑀅𑀝𑁆𑀞𑀦𑁆𑀦𑀁 𑀅𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀫𑁆𑀧𑀺 𑀲𑁄𑀲𑀗𑁆𑀔𑀸𑀭𑀪𑁂𑀤𑁄 𑀲𑀺𑀤𑁆𑀥𑁄 𑀪𑀯𑁂𑀬𑁆𑀬. 𑀢𑀸𑀦𑀺𑀧𑀺 𑀳𑀺 𑀓𑀸𑀦𑀺𑀘𑀺 𑀅𑀲𑀗𑁆𑀔𑀸𑀭𑀺𑀓𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀓𑀸𑀦𑀺𑀘𑀺 𑀲𑀲𑀗𑁆𑀔𑀸𑀭𑀺𑀓𑁂𑀦𑀸𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀅𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀉𑀪𑀬𑀓𑀫𑁆𑀫 𑀦𑀺𑀩𑁆𑀩𑀢𑁆𑀢𑀦𑀁’’𑀢𑀺 𑀢𑁂𑀲𑀁 𑀲𑀗𑁆𑀔𑀸𑀭 𑀪𑁂𑀤𑀭𑀳𑀺𑀢𑀢𑁆𑀢𑀸 𑀅𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑁂𑀦𑀧𑀺 𑀯𑀺𑀭𑁄𑀥𑁄 𑀦𑀢𑁆𑀣𑀺. 𑀲𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑁂𑀦𑀧𑀺 𑀯𑀺𑀭𑁄𑀥𑁄 𑀦𑀢𑁆𑀣𑀺. 𑀅𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑁂𑀦𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀲𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑁂𑀦𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀏𑀯𑀁 𑀉𑀪𑀬𑀓𑀫𑁆𑀫 𑀦𑀺𑀩𑁆𑀩𑀢𑁆𑀢𑀦𑀁 𑀬𑀼𑀢𑁆𑀢𑀁. ‘‘𑀇𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. ‘‘𑀦 𑀓𑀫𑁆𑀫𑀸𑀕𑀫𑀦 𑀯𑀲𑁂𑀦𑀸’’𑀢𑀺 𑀓𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀘𑀺𑀭𑀓𑀸𑀮𑀢𑁄 𑀆𑀕𑀫𑀦 𑀧𑀘𑁆𑀘𑀬𑀲𑁆𑀲 𑀯𑀲𑁂𑀦. ‘‘𑀆𑀕𑀫𑀦𑀁’’𑀢𑀺 𑀘 𑀆𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀆𑀕𑀫𑀦𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀓𑀫𑁆𑀫𑀪𑀯𑁂’’𑀢𑀺 𑀅𑀢𑀻𑀢𑁂 𑀓𑀫𑁆𑀫𑀓𑀭𑀡𑀪𑀯𑁂. ‘‘𑀓𑁂𑀘𑀦𑀸’’𑀢𑀺 𑀓𑁂𑀘𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀆𑀕𑀢𑀸𑀢𑀺 𑀘. 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑁂 𑀧𑀦 𑀤𑁆𑀯𑀺𑀳𑁂𑀢𑀼𑀓𑀸 𑀯𑀼𑀢𑁆𑀢𑀸𑀢𑀺 𑀘 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀝𑁆𑀞𑀓𑀣𑀸 𑀯𑀘𑀦𑀫𑁆𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑁄 ‘‘𑀢𑀢𑁆𑀣 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀻𑀲𑀼𑀔𑀡𑁂𑀲𑀽’’𑀢𑀺 𑀓𑀫𑁆𑀫𑀓𑁆𑀔𑀡𑁂 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀢𑀺 𑀢𑀻𑀲𑀼𑀔𑀡𑁂𑀲𑀼. ‘‘𑀝𑀻𑀓𑀸𑀓𑀸𑀭𑀸𑀧𑀦𑀸’’𑀢𑀺 𑀅𑀪𑀺𑀥𑀫𑁆𑀫𑀝𑀻𑀓𑀸𑀓𑀸𑀭𑀸𑀧𑀦. ‘‘𑀲𑀸𑀯𑀲𑁂𑀲𑀧𑀸𑀞𑁄’’𑀢𑀺 𑀧𑀸𑀴𑀺𑀬𑀁 𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺, 𑀤𑁆𑀯𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀅𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺 𑀅𑀯𑀲𑁂𑀲𑀸 𑀳𑁄𑀢𑀺. 𑀏𑀯𑀁 𑀅𑀯𑀲𑁂𑀲 𑀯𑀸𑀓𑁆𑀬 𑀲𑀳𑀺𑀢𑁄 𑀧𑀸𑀞𑁄. 𑀲𑀭𑀺𑀓𑁆𑀔𑀫𑁂𑀯 𑀲𑀭𑀺𑀓𑁆𑀔𑀓𑀁. 𑀓𑀫𑁆𑀫𑁂𑀦 𑀲𑀭𑀺𑀓𑁆𑀔𑀓𑀁 𑀲𑀤𑀺𑀲𑀁 𑀓𑀫𑁆𑀫𑀲𑀭𑀺𑀓𑁆𑀔𑀓𑀁. 𑀯𑀺𑀧𑀸𑀓𑀁. ‘‘𑀫𑀳𑀸𑀣𑁂𑀭𑁂𑀦𑀸’’𑀢𑀺 𑀲𑀸𑀭𑀺𑀧𑀼𑀢𑁆𑀢 𑀫𑀳𑀸𑀣𑁂𑀭𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀝𑀻𑀓𑀸𑀓𑀸𑀭𑀸𑀦𑀁 𑀯𑀘𑀦𑀁 𑀉𑀧𑀢𑁆𑀣𑀫𑁆𑀪𑁂𑀢𑀺.

𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁.

𑁧𑁫𑁪. 𑀭𑀽𑀧𑀸𑀯𑀘𑀭𑀓𑀫𑁆𑀫𑁂. ‘‘𑀅𑀧𑁆𑀧𑀕𑀼𑀡𑀢𑀸𑀬𑀸’’𑀢𑀺 𑀅𑀧𑀭𑀺𑀘𑀺𑀢𑀢𑀸𑀬. 𑀅𑀯𑀟𑁆𑀠𑀢𑀸𑀬. ‘‘𑀳𑀻𑀦𑁂𑀳𑀺 𑀙𑀦𑁆𑀤𑀸𑀤𑀻𑀳𑀻’’𑀢𑀺 𑀮𑀸𑀪𑀲𑀓𑁆𑀓𑀸𑀭 𑀲𑀺𑀮𑁄𑀓𑀸𑀤𑀺 𑀲𑀸𑀧𑁂𑀓𑁆𑀔𑀢𑀸𑀬 𑀳𑀻𑀦𑁂𑀳𑀺 𑀙𑀦𑁆𑀤𑀸𑀤𑀻𑀳𑀺. ‘‘𑀢𑁂 𑀥𑀫𑁆𑀫𑀸’’𑀢𑀺 𑀙𑀦𑁆𑀤𑀸𑀤𑀬𑁄 𑀥𑀫𑁆𑀫𑀸. 𑀢𑀸𑀦𑀺 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀦𑀺. 𑀓𑀲𑁆𑀫𑀸, 𑀉𑀧𑀧𑀢𑁆𑀢𑀺𑀧𑁆𑀧𑀪𑁂𑀤𑀲𑁆𑀲 𑀅𑀲𑀸𑀥𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑀸𑀦𑁂𑀯𑀸’’𑀢𑀺 𑀇𑀫𑀸𑀦𑀺 𑀏𑀯 𑀛𑀸𑀦𑀸𑀦𑀺. ‘‘𑀢𑀺𑀯𑀺𑀥𑀸𑀲𑀽’’𑀢𑀺 𑀏𑀓𑀲𑁆𑀫𑀺𑀁𑀢𑀮𑁂 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺 𑀯𑀲𑁂𑀦 𑀢𑀺𑀯𑀺𑀥𑀸𑀲𑀼. ‘‘𑀅𑀝𑁆𑀞𑀸𑀭𑀲𑀧𑁆𑀧𑀪𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸’’𑀢𑀺 𑀢𑀻𑀲𑀼 𑀳𑀻𑀦 𑀫𑀚𑁆𑀛𑀺𑀫𑀧𑀡𑀻𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀳𑀻𑀦 𑀳𑀻𑀦𑀁 𑀳𑀻𑀦 𑀫𑀚𑁆𑀛𑀺𑀫𑀁 𑀳𑀻𑀦 𑀧𑀡𑀻𑀢𑀦𑁆𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑁂𑀦 𑀦𑀯𑀯𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀦 𑀢𑁂𑀲𑀼 𑀢𑀻𑀡𑀺 𑀫𑀚𑁆𑀛𑀺𑀫𑀸𑀦𑀺. 𑀫𑀚𑁆𑀛𑀺𑀫𑀳𑀻𑀦𑀁 𑀫𑀚𑁆𑀛𑀺𑀫𑀫𑀚𑁆𑀛𑀺𑀫𑀦𑁆𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑀸𑀦𑀺 𑀦𑀯𑀯𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀅𑀝𑁆𑀞𑀸𑀭𑀲𑀪𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸. ‘‘𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀦𑀸𑀫𑀸’’𑀢𑀺 𑀓𑀫𑁆𑀫𑀧𑁆𑀧𑀯𑀢𑁆𑀢𑀺 𑀫𑀼𑀔𑀸𑀦𑀺 𑀦𑀸𑀫. ‘‘𑀇𑀫𑁂𑀳𑀺 𑀧𑀪𑀸𑀯𑀺𑀢𑀢𑁆𑀢𑀸’’𑀢𑀺 𑀇𑀫𑁂𑀳𑀺 𑀧𑀪𑀸𑀯𑁂𑀳𑀺 𑀫𑀽𑀮𑀓𑀸𑀭𑀡𑁂𑀳𑀺 𑀧𑀪𑀸𑀯𑀺𑀢𑀢𑁆𑀢𑀸 𑀧𑀯𑀢𑁆𑀢𑀸𑀧𑀺𑀢𑀢𑁆𑀢𑀸. ‘‘𑀅𑀝𑁆𑀞𑀸𑀭𑀲𑀔𑀢𑁆𑀢𑀺𑀬𑀸’’𑀢𑀺 𑀳𑀻𑀦𑀫𑀚𑁆𑀛𑀺𑀫𑀸𑀤𑀺𑀪𑁂𑀤𑁂𑀦 𑀅𑀝𑁆𑀞𑀸𑀭𑀲 𑀔𑀢𑁆𑀢𑀺𑀬𑀸. 𑀢𑀣𑀸 𑀅𑀝𑁆𑀞𑀸𑀭𑀲 𑀩𑁆𑀭𑀸𑀳𑁆𑀫𑀡𑀸𑀤𑀬𑁄. 𑀅𑀝𑁆𑀞 𑀘𑀢𑁆𑀢𑀸𑀮𑀻𑀲 𑀕𑁄𑀢𑁆𑀢𑀸𑀦𑀺 𑀦𑀸𑀫 𑀳𑀻𑀦𑀫𑀚𑁆𑀛𑀺𑀫𑀸 𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀸𑀦𑀺 𑀕𑁄𑀢𑀫𑀕𑁄𑀢𑁆𑀢𑀸𑀤𑀻𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀕𑁄𑀢𑁆𑀢𑀸𑀦𑀺. 𑀢𑁂𑀲𑀁 𑀘𑀸𑀭𑀺𑀢𑁆𑀢 𑀧𑀝𑀺𑀧𑀢𑁆𑀢𑀺𑀪𑀽𑀢𑀸𑀦𑀺 𑀘𑀭𑀡𑀸𑀦𑀺𑀧𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀣 𑀲𑀺𑀬𑀸. 𑀧𑀼𑀭𑀺𑀫 𑀯𑀘𑀦𑁂 𑀳𑀻𑀦𑀸𑀤𑀻𑀦𑀺 𑀩𑁆𑀭𑀳𑁆𑀫𑀮𑁄𑀓𑁂, 𑀅𑀝𑁆𑀞𑀓𑀣𑀸 𑀯𑀘𑀦𑁂𑀳𑀻𑀦𑀸𑀤𑀻𑀦𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀲𑀸𑀥𑁂𑀢𑀩𑁆𑀩𑀁 𑀅𑀜𑁆𑀜𑀁, 𑀲𑀸𑀥𑀓𑀁 𑀅𑀜𑁆𑀜𑀦𑁆𑀢𑀺 𑀘𑁄𑀤𑀦𑀸. 𑀢𑀁 𑀧𑀭𑀺𑀳𑀭𑀢𑀺 ‘‘𑀏𑀢𑁂𑀦𑀳𑀻’’𑀢𑀺𑀆𑀤𑀺𑀦𑀸. ‘‘𑀉𑀧𑀮𑀓𑁆𑀔𑁂𑀢𑀻’’𑀢𑀺 𑀧𑀘𑁆𑀘𑀓𑁆𑀔𑀢𑁄 𑀧𑀸𑀓𑀝𑀁 𑀏𑀓𑀤𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀸𑀓𑀝𑁂 𑀢𑀸𑀤𑀺𑀲𑁂𑀧𑀺 𑀚𑀸𑀦𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀫𑀢𑁆𑀣𑀸 𑀲𑀫𑀢𑁆𑀣𑀁 𑀯𑀸’’𑀢𑀺 𑀲𑀫𑀢𑁆𑀣𑀸 𑀲𑀫𑀢𑁆𑀣𑀪𑀸𑀯𑀁 𑀯𑀸. ‘‘𑀢𑀣𑀸 𑀳𑀸𑀦𑁂𑀦𑀸’’𑀢𑀺 𑀢𑀣𑀸𑀳𑀺 𑀅𑀦𑁂𑀦 𑀆𑀘𑀭𑀺𑀬𑁂𑀦. 𑀅𑀦𑀼𑀭𑀼𑀤𑁆𑀥𑀸 𑀘𑀭𑀺𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀸𑀫 𑀭𑀽𑀧 𑀧𑀭𑀺𑀘𑁆𑀙𑁂𑀤𑁂 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀦𑀸𑀲𑁂𑀯𑀦𑁂 𑀮𑀤𑁆𑀥𑁂 𑀲𑀢𑀺, 𑀫𑀳𑀩𑁆𑀩𑀮𑁂 𑀯𑀺𑀚𑁆𑀚𑀫𑀸𑀦𑁂 𑀫𑀳𑀕𑁆𑀕𑀢𑀓𑀫𑁆𑀫𑀁 𑀯𑀺𑀧𑀸𑀓𑀁 𑀚𑀦𑁂𑀢𑀺. 𑀢𑀸𑀤𑀺𑀲𑀁 𑀳𑁂𑀢𑀼𑀁 𑀅𑀮𑀤𑁆𑀥𑀸 𑀅𑀮𑀪𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘𑁂𑀢𑀦𑀸 𑀯𑀺𑀧𑀸𑀓𑀁 𑀦 𑀧𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀲𑀫𑀸𑀦𑀸 𑀲𑁂𑀯𑀦𑁂’’𑀢𑀺 𑀪𑀽𑀫𑀺𑀲𑀫𑀸𑀦𑀢𑀸 𑀯𑀲𑁂𑀦 𑀲𑀫𑀸𑀦𑀸𑀲𑁂𑀯𑀦𑁂. 𑀓𑀸𑀫𑀚𑀯𑀦𑀁 𑀓𑀸𑀫𑀚𑀯𑀦𑁂𑀦 𑀲𑀫𑀸𑀦𑀸𑀲𑁂𑀯𑀦𑀁. 𑀭𑀽𑀧𑀚𑀯𑀦𑀁 𑀭𑀽𑀧𑀚𑀯𑀦𑁂𑀦. 𑀅𑀭𑀽𑀧𑀚𑀯𑀦𑀁 𑀅𑀭𑀽𑀧𑀚𑀯𑀦𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀸𑀦𑀪𑀽𑀫𑀺𑀓𑀢𑁄’’𑀢𑀺𑀆𑀤𑀺. 𑀢𑀢𑁆𑀣 ‘‘𑀢𑀤𑀪𑀸𑀯𑀢𑁄’’𑀢𑀺 𑀢𑀸𑀤𑀺𑀲𑀲𑁆𑀲 𑀩𑀮𑀯𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀏𑀓𑀯𑀸𑀭𑀫𑀢𑁆𑀢𑀪𑀽𑀢𑀸 𑀫𑀳𑀕𑁆𑀕𑀢 𑀘𑁂𑀢𑀦𑀸 𑀘. ‘‘𑀲𑀩𑁆𑀩 𑀧𑀣𑀫𑀪𑀽𑀢𑀸’’𑀢𑀺 𑀲𑀫𑀸𑀧𑀢𑁆𑀢𑀺 𑀯𑀻𑀣𑀻𑀲𑀼 𑀕𑁄𑀢𑁆𑀭𑀪𑀼𑀲𑁆𑀲 𑀅𑀦𑀦𑁆𑀢𑀭𑁂 𑀫𑀳𑀕𑁆𑀕𑀢 𑀚𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀮𑁄𑀓𑀼𑀢𑁆𑀢𑀭 𑀫𑀕𑁆𑀕𑀘𑁂𑀢𑀦𑀸 𑀓𑀤𑀸𑀘𑀺𑀧𑀺 𑀲𑀫𑀸𑀦𑀸 𑀲𑁂𑀯𑀦𑀁 𑀦 𑀮𑀪𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀫𑁆𑀧𑀺 𑀪𑀯𑀦𑁆𑀢𑀭𑁂𑀧𑀺 𑀅𑀭𑀺𑀬𑀨𑀮𑀁 𑀚𑀦𑁂𑀢𑀺𑀬𑁂𑀯. 𑀏𑀯𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 𑀧𑀯𑀢𑁆𑀢𑀺𑀨𑀮𑀁 𑀦𑀸𑀫 𑀳𑁄𑀢𑀺, 𑀇𑀥 𑀧𑀦 𑀧𑀝𑀺𑀲𑀦𑁆𑀥𑀺 𑀨𑀮𑀁 𑀯𑀺𑀘𑀸𑀭𑀺𑀢𑀁, 𑀢𑀲𑁆𑀫𑀸 𑀅𑀲𑀫𑀸𑀦𑀁 𑀇𑀤𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀘𑁂. 𑀯𑀼𑀘𑁆𑀘𑀢𑁂. 𑀫𑀕𑁆𑀕𑀘𑁂𑀢𑀦𑀸 𑀦𑀸𑀫 𑀢𑀡𑁆𑀳𑀸 𑀲𑀳𑀸𑀬𑀓𑀁 𑀯𑀝𑁆𑀝𑀕𑀸𑀫𑀺 𑀓𑀫𑁆𑀫𑀁 𑀦 𑀳𑁄𑀢𑀺. 𑀅𑀢𑀡𑁆𑀳𑀸 𑀲𑀳𑀸𑀬𑀓𑀁 𑀯𑀺𑀯𑀝𑁆𑀝𑀕𑀸𑀫𑀺 𑀓𑀫𑁆𑀫𑀁 𑀳𑁄𑀢𑀺. 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀁 𑀦 𑀤𑁂𑀢𑀺. 𑀲𑀘𑁂 𑀧𑀦 𑀢𑀁 𑀢𑀡𑁆𑀳𑀸 𑀲𑀳𑀸𑀬𑀓𑀁 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀁 𑀪𑀯𑁂𑀬𑁆𑀬. 𑀧𑀝𑀺𑀲𑀦𑁆𑀥𑀺 𑀓𑀸𑀮𑁂𑀧𑀺 𑀨𑀮𑀁 𑀤𑀤𑁂𑀬𑁆𑀬. 𑀅𑀲𑀫𑀸𑀦𑀸 𑀲𑁂𑀯𑀦𑀢𑀸 𑀧𑀫𑀸𑀡𑀁 𑀦 𑀪𑀯𑁂𑀬𑁆𑀬. 𑀏𑀯𑀁 𑀅𑀜𑁆𑀜𑀓𑀸𑀭𑀡𑀢𑁆𑀢𑀸 𑀅𑀲𑀫𑀸𑀦𑀁 𑀦𑀺𑀤𑀲𑁆𑀲𑀦𑀁 𑀳𑁄𑀢𑀺. 𑀦 𑀅𑀲𑀫𑀸𑀦𑀸 𑀲𑁂𑀯𑀦𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀉𑀧𑀘𑀺𑀢𑀢𑁆𑀢𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀦 𑀮𑀸𑀪𑁂𑀦 𑀯𑀟𑁆𑀠𑀺𑀢𑀢𑁆𑀢𑀸. ‘‘𑀲𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀓𑀫𑁆𑀫𑀺𑀓𑀫𑀳𑀕𑁆𑀕𑀢 𑀘𑁂𑀢𑀦𑀸 𑀘. ‘‘𑀦𑀸’’𑀢𑀺 𑀘𑁄𑀤𑀦𑀸, 𑀦 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀦 𑀘 𑀲𑀸𑀧𑀺 𑀲𑀫𑀸𑀦𑀪𑀽𑀫𑀓 𑀥𑀫𑁆𑀫𑀢𑁄 𑀮𑀤𑁆𑀥𑀸 𑀲𑁂𑀯𑀦𑀸 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀢𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀪𑀸𑀯𑀺𑀢𑀢𑁆𑀢𑀸𑀢𑀺 𑀘 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀦 𑀮𑀸𑀪𑁂𑀦 𑀯𑀟𑁆𑀠𑀺𑀢𑀢𑁆𑀢𑀸 𑀇𑀘𑁆𑀘𑁂𑀯𑀢𑁆𑀣𑁄. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 𑀅𑀲𑀫𑀸𑀦𑀪𑀽𑀫𑀺𑀓𑁂𑀳𑀺 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑁂𑀳𑀺 𑀓𑀸𑀫𑀚𑀯𑀦𑁂𑀳𑀺 𑀧𑀭𑀫𑁆𑀧𑀭𑀢𑁄 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸 𑀲𑁂𑀯𑀦𑀢𑀸𑀬 𑀏𑀯 𑀇𑀥 𑀉𑀧𑀘𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀪𑀬𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀉𑀪𑀬𑀢𑁆𑀣𑀸’’𑀢𑀺 𑀉𑀪𑀬𑁂𑀲𑀼 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸𑀢𑀺 𑀘 𑀓𑀢𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸𑀢𑀺 𑀘 𑀯𑀼𑀢𑁆𑀢𑁂𑀲𑀼 𑀧𑀸𑀞𑁂𑀲𑀼. ‘‘𑀧𑀣𑀫 𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀝𑀸𑀬𑀸’’𑀢𑀺 𑀫𑀳𑀕𑁆𑀕𑀢𑀚𑁆𑀛𑀸𑀦𑁂 𑀅𑀧𑁆𑀧𑀦𑀸𑀯𑀻𑀣𑀺𑀢𑁄 𑀧𑀼𑀭𑁂 𑀤𑁆𑀯𑀻𑀲𑀼 𑀧𑀭𑀺𑀓𑀫𑁆𑀫 𑀪𑀸𑀯𑀦𑀸 𑀉𑀧𑀘𑀸𑀭 𑀪𑀸𑀯𑀦𑀸𑀲𑀼 𑀧𑀭𑀺𑀓𑀫𑁆𑀫 𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑀲𑁆𑀲 𑀧𑀣𑀯𑀻 𑀧𑀣𑀯𑀻𑀢𑀺𑀆𑀤𑀺𑀦𑀸 𑀧𑀣𑀫 𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬. 𑀮𑁄𑀓𑀼𑀢𑁆𑀢𑀭 𑀫𑀕𑁆𑀕𑁂𑀧𑀦 𑀤𑀲𑀲𑀼 𑀯𑀺𑀧𑀲𑁆𑀲𑀦𑀸 𑀜𑀸𑀡𑁂𑀲𑀼 𑀲𑀩𑁆𑀩𑀧𑀣𑀫𑀁 𑀲𑀫𑁆𑀫𑀲𑀦𑀜𑁆𑀜𑀸𑀡𑀁 𑀪𑀸𑀯𑁂𑀦𑁆𑀢𑀲𑁆𑀲 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸𑀢𑀺𑀆𑀤𑀺𑀦𑀸 𑀧𑀣𑀫 𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀘𑀺𑀦𑀺𑀢𑁆𑀯𑀸𑀢𑀺 𑀘 𑀪𑀸𑀯𑁂𑀢𑁆𑀯𑀸𑀢𑀺 𑀘 𑀯𑀟𑁆𑀠𑁂𑀢𑁆𑀯𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. ‘‘𑀅𑀩𑁆𑀪𑀼𑀡𑁆𑀳𑀸’’𑀢𑀺 𑀅𑀪𑀺𑀦𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀬𑀁 𑀯𑀸𑀤𑁄’’𑀢𑀺 𑀅𑀦𑀼𑀭𑀼𑀤𑁆𑀥𑀸 𑀘𑀭𑀺𑀬𑀲𑁆𑀲 𑀯𑀸𑀤𑁄. 𑀬𑀤𑀺 𑀏𑀯𑀁, 𑀅𑀝𑁆𑀞𑀓𑀣𑀸𑀲𑀼 𑀲𑀗𑁆𑀔𑀸𑀭 𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡 𑀧𑀤 𑀦𑀺𑀤𑁆𑀤𑁂𑀲𑁂𑀲𑀼 𑀅𑀪𑀺𑀜𑁆𑀜𑀸 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀧𑀭𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀁 𑀬𑀼𑀢𑁆𑀢𑀁 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀦𑁆𑀢𑀺, 𑀢𑀁 𑀯𑀤𑀦𑁆𑀢𑁄 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦 𑀲𑀫𑀸𑀥𑀺𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀝𑀻𑀓𑀸𑀓𑀸𑀭𑀸’’𑀢𑀺 𑀅𑀪𑀺𑀥𑀫𑁆𑀫𑀝𑀻𑀓𑀸𑀓𑀸𑀭𑀸. ‘‘𑀢𑀲𑁆𑀲𑀸 𑀧𑀦𑀸’’𑀢𑀺𑀆𑀤𑀺 𑀅𑀢𑁆𑀢𑀦𑁄𑀯𑀸𑀤 𑀤𑀲𑁆𑀲𑀦𑀁. 𑀲𑀸𑀥𑁂𑀦𑁆𑀢𑀺𑀬𑀸 𑀅𑀪𑀺𑀜𑁆𑀜𑀸 𑀘𑁂𑀢𑀦𑀸𑀬. 𑀅𑀘𑀺𑀢𑁆𑀢𑀓𑀪𑀯 𑀧𑀢𑁆𑀣𑀦𑀸𑀲𑀳𑀺𑀢𑀁 𑀲𑀜𑁆𑀜𑀸 𑀯𑀺𑀭𑀸𑀕𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀥𑀸’’𑀢𑀺 𑀫𑀦𑀼𑀲𑁆𑀲 𑀮𑁄𑀓𑁂.

‘‘𑀅𑀦𑀸𑀕𑀸𑀫𑀺𑀦𑁄 𑀧𑀦𑀸’’𑀢𑀺𑀆𑀤𑀻𑀲𑀼. ‘‘𑀏𑀢𑁂𑀦𑀸’’𑀢𑀺 𑀏𑀢𑁂𑀦 𑀅𑀢𑁆𑀣 𑀯𑀘𑀦𑁂𑀦. ‘‘𑀲𑀤𑁆𑀥𑀸𑀥𑀺𑀓𑁄’’𑀢𑀺 𑀲𑀦𑁆𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑁄. 𑀏𑀯𑀁 𑀯𑀻𑀭𑀺𑀬𑀸𑀥𑀺𑀓𑀸𑀤𑀻𑀲𑀼𑀧𑀺. ‘‘𑀅𑀢𑁆𑀢𑀦𑀸 𑀮𑀤𑁆𑀥 𑀲𑀫𑀸𑀧𑀢𑁆𑀢𑀻𑀦𑀁’’𑀢𑀺 𑀏𑀓𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀩𑀳𑀽𑀦𑀁 𑀅𑀢𑁆𑀢𑀦𑀸 𑀮𑀤𑁆𑀥 𑀲𑀫𑀸𑀧𑀢𑁆𑀢𑀻𑀦𑀁. 𑀢𑁂𑀲𑀼 𑀧𑀼𑀣𑀼𑀚𑁆𑀚𑀦 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀻𑀲𑀼. ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀛𑀸𑀦𑀮𑀸𑀪𑀺 𑀧𑀼𑀣𑀼𑀚𑁆𑀚𑀦𑁄. ‘‘𑀦𑀺𑀓𑀦𑁆𑀢𑀺𑀬𑀸𑀲𑀢𑀻’’𑀢𑀺 𑀓𑀸𑀫𑀪𑀯𑀦𑀺𑀓𑀦𑁆𑀢𑀺𑀬𑀸 𑀲𑀢𑀺. ‘‘𑀇𑀢𑀭𑁂 𑀧𑀦𑀸’’𑀢𑀺 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀺𑀦𑁄 𑀧𑀦. 𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀏𑀯 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦 𑀦𑀺𑀓𑀦𑁆𑀢𑀺 𑀩𑀮𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀢𑁂𑀲𑀁 𑀧𑀻’’𑀢𑀺 𑀛𑀸𑀦𑀮𑀸𑀪𑀺 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺. 𑀇𑀘𑁆𑀙𑀦𑁆𑀢𑁂𑀦 𑀝𑀻𑀓𑀸𑀘𑀭𑀺𑀬𑁂𑀦. 𑀢𑀣𑀸 𑀦𑀺𑀓𑀦𑁆𑀢𑀺𑀬𑀸 𑀲𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀓𑀸𑀫𑀸𑀯𑀘𑀭 𑀓𑀫𑁆𑀫 𑀩𑀮𑁂𑀦 𑀓𑀸𑀫𑀪𑀯𑁂𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀘𑁂𑀢𑁄𑀧𑀡𑀺𑀥𑀺 𑀇𑀚𑁆𑀛𑀢𑀺. 𑀓𑀲𑁆𑀫𑀸, 𑀯𑀺𑀲𑀼𑀤𑁆𑀥𑀢𑁆𑀢𑀸. 𑀲𑀻𑀮𑀯𑀺𑀲𑀼𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑁂’’𑀢𑀺 𑀛𑀸𑀦𑀮𑀸𑀪𑀺 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀺𑀦𑁄. 𑀅𑀗𑁆𑀕𑀼𑀢𑁆𑀢𑀭 𑀧𑀸𑀞𑁂. ‘‘𑀲𑀳𑀤𑀲𑁆𑀲𑀦𑀼𑀧𑁆𑀧𑀸𑀤𑀸’’𑀢𑀺 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀜𑁆𑀜𑀸𑀡𑀁 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀲𑁆𑀲𑀦𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀦 𑀲𑀤𑁆𑀥𑀺𑀁. 𑀦𑀢𑁆𑀣𑀺 𑀢𑀲𑁆𑀲 𑀢𑀁 𑀲𑀁𑀬𑁄𑀚𑀦𑀦𑁆𑀢𑀺𑀧𑀺 𑀧𑀸𑀞𑁄. ‘‘𑀇𑀫𑀁 𑀮𑁄𑀓𑀁’’𑀢𑀺 𑀇𑀫𑀁 𑀓𑀸𑀫𑀮𑁄𑀓𑀁. ‘‘𑀯𑀺𑀧𑀲𑁆𑀲𑀦𑀸 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸’’𑀢𑀺 𑀢𑁂𑀦𑁂𑀯 𑀥𑀫𑁆𑀫𑀭𑀸𑀕𑁂𑀦 𑀢𑀸𑀬 𑀥𑀫𑁆𑀫 𑀦𑀦𑁆𑀤𑀺𑀬𑀸𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀲𑀼𑀔𑁂 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸. 𑀧𑀘𑁆𑀘𑀬𑁂 𑀲𑀢𑀺 𑀓𑀼𑀧𑁆𑀧𑀦𑁆𑀢𑀺 𑀦𑀲𑁆𑀲𑀦𑁆𑀢𑀻𑀢𑀺 𑀓𑀼𑀧𑁆𑀧𑀸. 𑀓𑀼𑀧𑁆𑀧𑀸 𑀥𑀫𑁆𑀫𑀸 𑀬𑁂𑀲𑀁 𑀢𑁂 𑀓𑀼𑀧𑁆𑀧 𑀥𑀫𑁆𑀫𑀸. ‘‘𑀥𑀫𑁆𑀫𑀸’’𑀢𑀺 𑀫𑀳𑀕𑁆𑀕𑀢 𑀥𑀫𑁆𑀫𑀸. 𑀇𑀫𑁂 𑀤𑁆𑀯𑁂 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀺𑀦𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀦𑀸𑀫. 𑀲𑀻𑀮𑀧𑁆𑀧𑀝𑀺 𑀧𑀓𑁆𑀔𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸. 𑀢𑀲𑁆𑀫𑀸 𑀢𑁂 𑀲𑀻𑀮𑁂𑀲𑀼 𑀅𑀓𑀼𑀧𑁆𑀧 𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀫𑀸𑀥𑀺𑀲𑁆𑀫𑀺𑀁 𑀧𑀦 𑀓𑀼𑀧𑁆𑀧 𑀥𑀫𑁆𑀫𑀸 𑀏𑀯. ‘‘𑀫𑀳𑀸𑀩𑁆𑀭𑀳𑁆𑀫𑁂𑀲𑀼 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀫𑀳𑀸𑀩𑁆𑀭𑀳𑁆𑀫𑀢𑁆𑀢𑀁 𑀦 𑀮𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀳𑀻𑀦𑀚𑁆𑀛𑀸𑀲𑀬𑀢𑁆𑀢𑀸’’𑀢𑀺 𑀏𑀢𑁆𑀣 𑀇𑀢𑁆𑀣𑀺𑀬𑁄 𑀦𑀸𑀫 𑀧𑀓𑀢𑀺𑀬𑀸𑀯 𑀳𑀻𑀦𑀚𑁆𑀛𑀸𑀲𑀬𑀸 𑀳𑁄𑀦𑁆𑀢𑀺 𑀦𑀻𑀘 𑀙𑀦𑁆𑀤𑀸 𑀦𑀻𑀘 𑀘𑀺𑀢𑁆𑀢𑀸 𑀫𑀦𑁆𑀤𑀯𑀻𑀭𑀺𑀬𑀸 𑀫𑀦𑁆𑀤𑀧𑀜𑁆𑀜𑀸. 𑀓𑀲𑁆𑀫𑀸, 𑀳𑀻𑀦𑀮𑀺𑀗𑁆𑀕𑀢𑁆𑀢𑀸. 𑀓𑀲𑁆𑀫𑀸 𑀘 𑀢𑀸 𑀳𑀻𑀦𑀮𑀺𑀗𑁆𑀕𑀸 𑀳𑁄𑀦𑁆𑀢𑀺. 𑀤𑀼𑀩𑁆𑀩𑀮 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀤𑀼𑀩𑁆𑀩𑀮 𑀓𑀫𑁆𑀫𑀦𑁆𑀢𑀺 𑀘 𑀧𑀼𑀭𑀺𑀲𑀢𑁆𑀢 𑀚𑀦𑀓𑀁 𑀓𑀫𑁆𑀫𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀫𑁆𑀧𑀺 𑀲𑀗𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸, 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀦𑁆𑀢𑀺 𑀅𑀝𑁆𑀞𑀓𑀣𑀸 𑀯𑀘𑀦𑀲𑁆𑀲 𑀬𑁂𑀪𑀽𑀬𑁆𑀬𑀯𑀘𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀫𑀳𑀸𑀩𑁆𑀭𑀳𑁆𑀫𑀸𑀦𑀁’’𑀢𑀺. 𑀇𑀢𑀭𑀣𑀸 𑀦 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀁 𑀦 𑀘 𑀫𑀳𑀸𑀩𑁆𑀭𑀳𑁆𑀫𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀦 𑀘 𑀢𑀣𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘𑀩𑁆𑀭𑀳𑁆𑀫𑀢𑁆𑀢𑀦𑁆𑀢𑀺 𑀫𑀳𑀸𑀩𑁆𑀭𑀳𑁆𑀫𑀢𑁆𑀢’𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀦𑀢𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀦 𑀓𑁂𑀯𑀮𑀁 𑀬𑁂𑀪𑀽𑀬𑁆𑀬𑀦𑀬𑀫𑀢𑁆𑀢𑁂𑀦 𑀲𑀺𑀤𑁆𑀥𑁄. 𑀅𑀣 𑀔𑁄 𑀩𑁆𑀬𑀜𑁆𑀚𑀦 𑀲𑀸𑀫𑀢𑁆𑀣𑀺𑀬𑁂𑀦𑀸𑀧𑀺 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀢𑁂’’𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸. 𑀲𑀁𑀬𑀼𑀢𑁆𑀢𑀧𑀸𑀞𑁂. ‘‘𑀧𑀝𑀺𑀪𑀸𑀢𑀼𑀢𑀁’’𑀢𑀺 𑀏𑀢𑁆𑀣 ‘‘𑀢𑀁’’𑀢𑀺 𑀢𑀼𑀬𑁆𑀳𑀁. 𑀥𑀫𑁆𑀫𑀻𑀓𑀣𑀸 𑀢𑀼𑀬𑁆𑀳𑀁 𑀧𑀝𑀺𑀪𑀸𑀢𑀼, 𑀧𑀸𑀢𑀼𑀩𑁆𑀪𑀯𑀢𑀼. 𑀓𑀣𑁂𑀢𑀼 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀆𑀮𑀧𑀢𑀺. ‘‘𑀩𑁆𑀭𑀳𑁆𑀫𑀼𑀦𑁄’’𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀅𑀢𑁆𑀣𑀸𑀬. 𑀏𑀯𑀁 𑀲𑁂𑀲𑁂𑀲𑀼 𑀤𑁆𑀯𑀻𑀲𑀼. ‘‘𑀢𑁂𑀲𑀁’’𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀇𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 ‘‘𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂𑀲𑀼 𑀬𑁂𑀯𑀸’’𑀢𑀺 𑀧𑀼𑀮𑁆𑀮𑀺𑀗𑁆𑀕 𑀯𑀘𑀦𑀢𑁆𑀢𑀸 𑀧𑀼𑀕𑁆𑀕𑀮𑀧𑁆𑀧𑀥𑀸𑀦𑀁 𑀳𑁄𑀢𑀺. 𑀦𑀪𑀽𑀫𑀺𑀧𑁆𑀧𑀥𑀸𑀦𑀁. 𑀢𑀲𑁆𑀫𑀸 𑀅𑀬𑀫𑀢𑁆𑀣𑁄 𑀬𑀼𑀢𑁆𑀢𑀺𑀯𑀲𑁂𑀦 𑀤𑀝𑁆𑀞𑀩𑁆𑀩𑁄𑀢𑀺. ‘‘𑀢𑀻𑀲𑀼𑀪𑀯𑀕𑁆𑀕𑁂𑀲𑀽’’𑀢𑀺 𑀯𑁂𑀳𑀧𑁆𑀨𑀮𑀪𑀽𑀫𑀺 𑀧𑀼𑀣𑀼𑀚𑁆𑀚𑀦𑀪𑀯𑀕𑁆𑀕𑁄 𑀦𑀸𑀫 𑀳𑁄𑀢𑀺 𑀭𑀽𑀧𑀮𑁄𑀓𑁂. 𑀢𑀢𑁄 𑀉𑀧𑀭𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀬𑀸 𑀅𑀪𑀸𑀯𑀢𑁄. 𑀅𑀓𑀦𑀺𑀝𑁆𑀞𑀪𑀽𑀫𑀺 𑀅𑀭𑀺𑀬𑀪𑀯𑀕𑁆𑀕𑁄 𑀦𑀸𑀫. 𑀢𑀢𑁆𑀣 𑀞𑀺𑀢𑀸𑀦𑀁 𑀅𑀭𑀺𑀬𑀸𑀦𑀁 𑀢𑀢𑁆𑀣𑁂𑀯 𑀦𑀺𑀝𑁆𑀞𑀸𑀦𑀢𑁄. 𑀦𑁂𑀯𑀲𑀜𑁆𑀜𑀸𑀪𑀽𑀫𑀺 𑀮𑁄𑀓𑀪𑀯𑀕𑁆𑀕𑁄 𑀦𑀸𑀫. 𑀢𑀢𑁄 𑀉𑀧𑀭𑀺 𑀮𑁄𑀓𑀲𑁆𑀲𑁂𑀯 𑀅𑀪𑀸𑀯𑀢𑁄𑀢𑀺.

𑀓𑀫𑁆𑀫𑀘𑀢𑀼𑀓𑁆𑀓𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫𑁫. 𑀫𑀭𑀡𑀼𑀧𑁆𑀧𑀢𑁆𑀢𑀺𑀬𑀁. ‘‘𑀆𑀬𑀼𑀧𑀭𑀺𑀫𑀸𑀡𑀲𑁆𑀲𑀸’’𑀢𑀺 𑀆𑀬𑀼𑀓𑀧𑁆𑀧𑀲𑁆𑀲. ‘‘𑀢𑀤𑀼𑀪𑀬𑀲𑁆𑀲𑀸’’𑀢𑀺 𑀆𑀬𑀼𑀓𑀧𑁆𑀧𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀘. ‘‘𑀉𑀧𑀖𑀸𑀢𑀓 𑀓𑀫𑁆𑀫𑁂𑀦𑀸’’𑀢𑀺 𑀩𑀮𑀯𑀦𑁆𑀢𑁂𑀦 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑁂𑀦. ‘‘𑀤𑀼𑀲𑁆𑀲𑀺𑀫𑀸𑀭 𑀓𑀮𑀸𑀩𑀼𑀭𑀸𑀚𑀸𑀤𑀻𑀦𑀁 𑀯𑀺𑀬𑀸’’𑀢𑀺 𑀢𑁂𑀲𑀁 𑀫𑀭𑀡𑀁 𑀯𑀺𑀬. 𑀉𑀧𑀭𑁄𑀥𑀺𑀢𑀁 𑀔𑀦𑁆𑀥 𑀲𑀦𑁆𑀢𑀸𑀦 𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀉𑀧𑀭𑁄𑀥𑀺𑀢𑀁’’𑀢𑀺 𑀉𑀧𑀕𑀦𑁆𑀢𑁆𑀯𑀸 𑀦𑀺𑀭𑁄𑀥𑀸𑀧𑀺𑀢𑀁. 𑀓𑀫𑁆𑀫𑀁 𑀔𑀺𑀬𑁆𑀬𑀢𑀺𑀬𑁂𑀯. 𑀏𑀯𑀁 𑀲𑀢𑀺, 𑀲𑀩𑁆𑀩𑀁𑀧𑀺 𑀫𑀭𑀡𑀁 𑀏𑀓𑁂𑀦 𑀓𑀫𑁆𑀫𑀓𑁆𑀔𑀬𑁂𑀦 𑀲𑀺𑀤𑁆𑀥𑀁. 𑀢𑀲𑁆𑀫𑀸 𑀏𑀓𑀁 𑀓𑀫𑁆𑀫𑀓𑁆𑀔𑀬 𑀫𑀭𑀡𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀢𑀭𑁂𑀧𑀺 𑀯𑀼𑀢𑁆𑀢𑀸’’𑀢𑀺 𑀇𑀢𑀭𑀸𑀦𑀺𑀧𑀺 𑀢𑀻𑀡𑀺 𑀫𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀘𑁄𑀤𑀦𑀸. 𑀯𑀼𑀘𑁆𑀘𑀢𑁂 𑀧𑀭𑀺𑀳𑀸𑀭𑁄. ‘‘𑀲𑀭𑀲𑀯𑀲𑁂𑀦𑁂𑀯𑀸’’𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀯𑀲𑁂𑀦𑁂𑀯. 𑀦𑀸𑀦𑀸 𑀆𑀬𑀼 𑀓𑀧𑁆𑀧𑀁 𑀯𑀺𑀤𑀳𑀦𑁆𑀢𑀺 𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀦𑀸𑀦𑀸𑀆𑀬𑀼𑀓𑀧𑁆𑀧 𑀯𑀺𑀥𑀸𑀬𑀓𑀸. ‘‘𑀲𑀢𑁆𑀢𑀦𑀺𑀓𑀸𑀬𑁂’’𑀢𑀺 𑀲𑀢𑁆𑀢𑀲𑀫𑀽𑀳𑁂. 𑀦𑀺𑀘𑁆𑀘𑀓𑀸𑀮𑀁 𑀞𑀺𑀢𑀺𑀁 𑀓𑀭𑁄𑀦𑁆𑀢𑀻𑀢𑀺 𑀞𑀺𑀢𑀺𑀓𑀭𑀸. 𑀓𑀤𑀸𑀘𑀺 𑀯𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑀺, 𑀓𑀤𑀸𑀘𑀺 𑀳𑀸𑀦𑀺𑀁 𑀓𑀭𑁄𑀦𑁆𑀢𑀻𑀢𑀺 𑀯𑀼𑀤𑁆𑀥𑀺𑀓𑀭𑀸 𑀳𑀸𑀦𑀺𑀓𑀭𑀸 𑀘. ‘‘𑀢𑁂𑀲𑀁 𑀯𑀲𑁂𑀦𑀸’’𑀢𑀺 𑀢𑁂𑀲𑀁 𑀉𑀢𑀼 𑀆𑀳𑀸𑀭𑀸𑀦𑀁 𑀯𑀲𑁂𑀦. ‘‘𑀢𑀬𑁄𑀧𑀺 𑀘𑁂𑀢𑁂’’𑀢𑀺 𑀏𑀢𑁂𑀢𑀬𑁄𑀧𑀺 𑀞𑀺𑀢𑀺𑀓𑀭𑀸𑀤𑀬𑁄. 𑀓𑀫𑁆𑀫𑀁 𑀯𑀺𑀧𑀘𑁆𑀘𑀫𑀸𑀦𑀁 𑀤𑀢𑁆𑀯𑀸 𑀔𑀺𑀬𑁆𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁂𑀦 𑀏𑀯𑀭𑀽𑀧𑁂𑀞𑀸𑀦𑁂 𑀓𑀫𑁆𑀫𑀁 𑀅𑀧𑁆𑀧𑀥𑀸𑀦𑀦𑁆𑀢𑀺 𑀤𑀻𑀧𑁂𑀢𑀺. ‘‘𑀢𑀤𑀦𑀼𑀭𑀽𑀧𑀁 𑀏𑀯𑀸’’𑀢𑀺 𑀢𑀁 𑀤𑀲𑀯𑀲𑁆𑀲𑀓𑀸𑀮𑀸𑀦𑀼 𑀭𑀽𑀧𑀁 𑀏𑀯. ‘‘𑀪𑁄 𑀕𑀜𑁆𑀘𑀸’’𑀢𑀺 𑀥𑀦𑀥𑀜𑁆𑀜𑀸𑀤𑀺𑀧𑀭𑀺𑀪𑁄𑀕𑀜𑁆𑀘. 𑀢𑁂𑀲𑀁 𑀉𑀢𑀼𑀆𑀳𑀸𑀭𑀸𑀦𑀁 𑀕𑀢𑀺 𑀏𑀢𑁂𑀲𑀦𑁆𑀢𑀺 𑀢𑀕𑁆𑀕𑀢𑀺𑀓𑀸. 𑀢𑁂𑀲𑀁 𑀉𑀢𑀼𑀆𑀳𑀸𑀭𑀸𑀦𑀁 𑀕𑀢𑀺𑀁 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀤𑀦𑀼𑀯𑀢𑁆𑀢𑀺𑀓𑀸’’𑀢𑀺. 𑀲𑀗𑁆𑀔𑀸𑀭𑀯𑀺𑀤𑀽𑀳𑀺 𑀅𑀜𑁆𑀜𑀢𑁆𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀔𑀸𑀭𑀯𑀺𑀤𑀼𑀦𑁄 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀬𑀸 𑀧𑀓𑀢𑀸𑀢𑀺 𑀇𑀤𑁆𑀥𑀺𑀫𑀬𑀸. ‘‘𑀇𑀤𑁆𑀥𑀺𑀬𑀸’’𑀢𑀺 𑀤𑁂𑀯𑀺𑀤𑁆𑀥𑀺𑀬𑀸𑀯𑀸 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸𑀯𑀸. 𑀯𑀺𑀚𑁆𑀚𑀸𑀬 𑀧𑀓𑀢𑀸𑀢𑀺 𑀯𑀺𑀚𑁆𑀚𑀸𑀫𑀬𑀸. ‘‘𑀯𑀺𑀚𑁆𑀚𑀸𑀬𑀸’’𑀢𑀺 𑀕𑀦𑁆𑀥𑀸𑀭𑀺𑀯𑀺𑀚𑁆𑀚𑀸𑀬. 𑀅𑀝𑁆𑀞𑀺 𑀦𑁆𑀳𑀸𑀭𑀼 𑀫𑀁𑀲 𑀮𑁄𑀳𑀺𑀢𑀸𑀤𑀺𑀓𑀸 𑀭𑀲𑀥𑀸𑀢𑀼𑀬𑁄 𑀅𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀲𑀸𑀬𑀦𑀸𑀦𑀺. 𑀢𑀸𑀦𑀺 𑀯𑀺𑀤𑀳𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀲𑀸𑀬𑀦 𑀯𑀺𑀥𑀬𑁄. 𑀦𑀬𑀽𑀧𑀤𑁂𑀲𑀸. 𑀘𑀺𑀭𑀝𑁆𑀞𑀺𑀢𑀺 𑀓𑀢𑁆𑀣𑀸𑀬 𑀚𑀻𑀯𑀺𑀢𑀁 𑀲𑀗𑁆𑀔𑀭𑁄𑀦𑁆𑀢𑀺 𑀏𑀢𑁂𑀳𑀻𑀢𑀺 𑀚𑀻𑀯𑀺𑀢 𑀲𑀗𑁆𑀔𑀸𑀭𑀸. 𑀇𑀤𑁆𑀥𑀺𑀫𑀬 𑀯𑀺𑀚𑁆𑀚𑀸𑀫𑀬 𑀚𑀻𑀯𑀺𑀢 𑀲𑀗𑁆𑀔𑀸𑀭𑁂𑀲𑀼 𑀘 𑀭𑀲𑀸𑀬𑀦 𑀯𑀺𑀥𑀺𑀲𑀗𑁆𑀔𑀸𑀢𑁂𑀲𑀼 𑀚𑀻𑀯𑀺𑀢 𑀲𑀗𑁆𑀔𑀸𑀭𑁂𑀲𑀼 𑀘 𑀯𑀺𑀤𑀼𑀦𑁄𑀢𑀺 𑀲𑀫𑀸𑀲𑁄. ‘‘𑀤𑁆𑀯𑀺 𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀥𑀫𑁆𑀫𑁂𑀲𑀽’’𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀥𑀫𑁆𑀫𑁂𑀲𑀼 𑀘 𑀆𑀳𑀸𑀭 𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀥𑀫𑁆𑀫𑁂𑀲𑀼 𑀘. ‘‘𑀧𑀭𑀺𑀡𑀫𑀦𑁆𑀢𑁂𑀲𑀽’’𑀢𑀺 𑀯𑀺𑀧𑀭𑀺𑀡𑀫𑀦𑁆𑀢𑁂𑀲𑀼. 𑀢𑁂𑀦𑀸𑀳 ‘‘𑀚𑀺𑀬𑁆𑀬𑀫𑀸𑀦𑁂𑀲𑀽’’𑀢𑀺𑀆𑀤𑀺𑀁. ‘‘𑀬𑀸𑀯𑀫𑀳𑀦𑁆𑀢𑀁 𑀧𑀻𑀢𑀺’’ 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀓𑀫𑁆𑀫𑀁 𑀯𑀺𑀬 𑀓𑁄𑀝𑀺𑀧𑀢𑁆𑀢𑀯𑀲𑁂𑀦 𑀅𑀢𑀺𑀫𑀳𑀦𑁆𑀢𑀫𑁆𑀧𑀺. ‘‘𑀅𑀲𑁆𑀲𑀸’’𑀢𑀺 𑀓𑀫𑁆𑀫𑀲𑁆𑀲. ‘‘𑀉𑀧𑀘𑁆𑀙𑁂𑀤𑀓 𑀫𑀭𑀡𑁂𑀧𑀺 𑀦𑁂𑀢𑀩𑁆𑀩𑁄’’𑀢𑀺 𑀩𑀮𑀯𑀦𑁆𑀢𑁂 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑁂 𑀆𑀕𑀢𑁂 𑀬𑀸𑀯𑀫𑀳𑀦𑁆𑀢𑀫𑁆𑀧𑀺 𑀚𑀦𑀓 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀸𑀥𑀺𑀝𑁆𑀞𑀸𑀦 𑀯𑀺𑀧𑀢𑁆𑀢𑀺𑀬𑀸 𑀔𑀺𑀬𑁆𑀬𑀢𑀺𑀬𑁂𑀯. 𑀲𑁄 𑀘𑀲𑁆𑀲𑀔𑀬𑁄 𑀦 𑀲𑀭𑀲𑁂𑀦 𑀳𑁄𑀢𑀺, 𑀅𑀣 𑀔𑁄 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫 𑀩𑀮𑁂𑀦 𑀳𑁄𑀢𑀻𑀢𑀺 𑀇𑀥 𑀉𑀧𑀘𑁆𑀙𑁂𑀤𑀓 𑀫𑀭𑀡𑀁 𑀯𑀺𑀲𑀼𑀁 𑀕𑀳𑀺𑀢𑀦𑁆𑀢𑀺 𑀏𑀯𑀁 𑀉𑀧𑀘𑁆𑀙𑁂𑀤𑀓 𑀫𑀭𑀡𑁂𑀧𑀺 𑀦𑁂𑀢𑀩𑁆𑀩𑁄. ‘‘𑀅𑀓𑀸𑀮 𑀫𑀭𑀡𑀁’’𑀢𑀺 𑀆𑀬𑀼𑀓𑁆𑀔𑀬𑀫𑀭𑀡𑀸𑀤𑀻𑀦𑀺 𑀢𑀻𑀡𑀺 𑀫𑀭𑀡𑀸𑀦𑀺 𑀓𑀸𑀮𑀫𑀭𑀡𑀸𑀦𑀺 𑀦𑀸𑀫, 𑀫𑀭𑀡𑀸 𑀭𑀳𑀓𑀸𑀮𑁂 𑀫𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀫𑀭𑀡𑀁 𑀅𑀓𑀸𑀮 𑀫𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀢𑀜𑁆𑀳𑀺 𑀧𑀯𑀢𑁆𑀢𑀫𑀸𑀦𑀁’’𑀢𑀺𑀆𑀤𑀺𑀁. ‘‘𑀫𑀽𑀮𑀪𑁂𑀤𑀢𑁄’’𑀢𑀺 𑀫𑀽𑀮𑀓𑀸𑀭𑀡𑀧𑁆𑀧𑀪𑁂𑀤𑀢𑁄. 𑀬𑀲𑁆𑀫𑀸 𑀧𑀦 𑀫𑀺𑀮𑀺𑀦𑁆𑀤 𑀧𑀜𑁆𑀳𑁂 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀦𑀺𑀧𑀢𑀦𑁆𑀢𑀻𑀢𑀺 𑀲𑀦𑁆𑀦𑀺𑀧𑀸𑀢𑀸. 𑀲𑀦𑁆𑀦𑀺𑀧𑀸𑀢𑁂𑀳𑀺 𑀉𑀧𑁆𑀧𑀦𑁆𑀦𑀸 𑀲𑀦𑁆𑀦𑀺𑀧𑀸𑀢𑀺𑀓𑀸𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁’’𑀢𑀺 𑀯𑀼𑀢𑁆𑀢𑀁. 𑀅𑀣𑀯𑀸. 𑀲𑀦𑁆𑀦𑀺𑀧𑀢𑀦𑀁 𑀲𑀦𑁆𑀦𑀺𑀧𑀸𑀢𑁄. 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀤𑁄𑀲𑀸𑀦𑀁 𑀫𑀺𑀲𑁆𑀲𑀓𑀪𑀸𑀯𑁄. 𑀲𑀦𑁆𑀦𑀺𑀧𑀸𑀢𑁂𑀦 𑀉𑀧𑁆𑀧𑀦𑁆𑀦𑀸 𑀲𑀦𑁆𑀦𑀺𑀧𑀸𑀢𑀺𑀓𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀅𑀦𑀺𑀲𑀫𑁆𑀫𑀓𑀸𑀭𑀻𑀦𑀁’’𑀢𑀺 𑀅𑀦𑀺𑀲𑀸𑀫𑁂𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀓𑀭𑀡 𑀲𑀻𑀮𑀸𑀦𑀁. 𑀧𑀯𑀢𑁆𑀢𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀢𑀦𑀸 𑀯𑀸𑀓𑀢𑀸𑀦𑀁 𑀧𑀬𑁄𑀕𑀸𑀦𑀁’’𑀢𑀺 𑀲𑀢𑁆𑀣𑀳𑀭𑀡, 𑀯𑀺𑀲𑀔𑀸𑀤𑀦, 𑀉𑀤𑀓𑀧𑀸𑀢𑀦𑀸𑀤𑀺𑀯𑀲𑁂𑀦 𑀓𑀢𑀸𑀦𑀁. ‘‘𑀯𑀺𑀦𑀸𑀲𑁂𑀦𑁆𑀢𑀻’’𑀢𑀺 𑀲𑀢𑁆𑀣𑀯𑀲𑁆𑀲 𑀯𑀸𑀮𑀼𑀓𑀯𑀲𑁆𑀲𑀸𑀤𑀻𑀦𑀺 𑀯𑀲𑁆𑀲𑀸𑀧𑁂𑀢𑁆𑀯𑀸𑀯𑀸 𑀲𑀫𑀼𑀤𑁆𑀤 𑀯𑀻𑀘𑀺𑀬𑁄 𑀉𑀝𑁆𑀞𑀸𑀧𑁂𑀢𑁆𑀯𑀸𑀯𑀸 𑀏𑀯𑀭𑀽𑀧𑁂 𑀫𑀳𑀦𑁆𑀢𑁂 𑀪𑀬𑀼𑀧𑀤𑁆𑀤𑀯𑁂 𑀓𑀢𑁆𑀯𑀸 𑀯𑀺𑀦𑀸𑀲𑁂𑀦𑁆𑀢𑀺. ‘‘𑀫𑀦𑀼𑀲𑁆𑀲 𑀧𑀣𑁂’’𑀢𑀺 𑀫𑀦𑀼𑀲𑁆𑀲 𑀧𑀤𑁂𑀲𑁂. ‘‘𑀢𑁂’’𑀢𑀺 𑀘𑀡𑁆𑀟𑀸 𑀬𑀓𑁆𑀔𑀸. ‘‘𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀻’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀕𑁄𑀫𑀳𑀺𑀁𑀲𑀸𑀦𑀁 𑀯𑀸 𑀫𑁂𑀤𑀮𑁄𑀳𑀺𑀢𑀸𑀦𑀺 𑀧𑀸𑀢𑀩𑁆𑀬𑀢𑁆𑀣𑀸𑀬 𑀢𑁂𑀲𑀼 𑀦𑀸𑀦𑀸𑀭𑁄𑀕𑀦𑁆𑀢𑀭 𑀓𑀧𑁆𑀧𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻’’𑀢𑀺 𑀲𑀓𑀮𑀁 𑀭𑀚𑁆𑀚𑀁 𑀯𑀸 𑀭𑀝𑁆𑀞𑀁 𑀯𑀸 𑀤𑀻𑀧𑀓𑀁 𑀯𑀸 𑀯𑀺𑀦𑀸𑀲𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑁂 𑀲𑀓𑀮𑀁 𑀚𑀦𑀧𑀤𑀁 𑀯𑀸 𑀦𑀕𑀭𑀁 𑀯𑀸 𑀦𑀺𑀕𑀫𑀁 𑀯𑀸 𑀕𑀸𑀫𑀁 𑀯𑀸 𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀯𑀸 𑀯𑀺𑀦𑀸𑀲𑁂𑀦𑁆𑀢𑀻𑀢𑀺 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀢𑁆𑀣𑀤𑀼𑀩𑁆𑀪𑀺𑀓𑁆𑀔𑀭𑁄𑀕𑀦𑁆𑀢𑀭 𑀓𑀧𑁆𑀧𑀸𑀧𑀻’’𑀢𑀺 𑀲𑀢𑁆𑀣𑀦𑁆𑀢𑀭 𑀓𑀧𑁆𑀧𑁄 𑀤𑀼𑀩𑁆𑀪𑀺𑀓𑁆𑀔𑀦𑁆𑀢𑀭 𑀓𑀧𑁆𑀧𑁄 𑀭𑁄𑀕𑀦𑁆𑀢𑀭 𑀓𑀧𑁆𑀧𑁄𑀢𑀺 𑀇𑀫𑁂 𑀢𑀬𑁄 𑀅𑀦𑁆𑀢𑀭 𑀓𑀧𑁆𑀧𑀸𑀧𑀺 𑀇𑀥 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀧𑀦 𑀭𑁄𑀕𑀦𑁆𑀢𑀭 𑀓𑀧𑁆𑀧𑁄 𑀬𑀓𑁆𑀔𑀸 𑀯𑀸𑀴𑁂 𑀅𑀫𑀦𑀼𑀲𑁆𑀲𑁂 𑀑𑀲𑁆𑀲𑀚𑁆𑀚𑀦𑁆𑀢𑀺, 𑀢𑁂𑀦 𑀩𑀳𑀽 𑀫𑀦𑀼𑀲𑁆𑀲𑀸 𑀓𑀸𑀮𑀗𑁆𑀓𑀭𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀏𑀓𑀤𑁂𑀲𑁂𑀦 𑀯𑀼𑀢𑁆𑀢𑁄𑀬𑁂𑀯. ‘‘𑀉𑀧𑀧𑀻𑀴𑀓𑁄 𑀧𑀖𑀸𑀢𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀘𑁆𑀘𑀦𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀑𑀓𑀸𑀲𑀧𑁆𑀧𑀝𑀺𑀮𑀸𑀪𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑁂 𑀲𑀼𑀔𑀲𑀦𑁆𑀢𑀸𑀦𑀁 𑀯𑀺𑀩𑀸𑀥𑁂𑀢𑁆𑀯𑀸 𑀫𑀭𑀡𑀁 𑀯𑀸 𑀧𑀸𑀧𑁂𑀢𑁆𑀯𑀸 𑀫𑀭𑀡 𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀚𑀦𑁂𑀢𑁆𑀯𑀸 𑀧𑀻𑀴𑀦𑀜𑁆𑀘 𑀖𑀸𑀢𑀦𑀜𑁆𑀘 𑀇𑀥 𑀯𑀺𑀧𑀘𑁆𑀘𑀦 𑀦𑀸𑀫𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀸𑀓𑀁 𑀧𑀦 𑀚𑀦𑁂𑀦𑁆𑀢𑀼𑀯𑀸, 𑀫𑀸𑀯𑀸, 𑀇𑀥 𑀅𑀧𑁆𑀧𑀫𑀸𑀡𑀦𑁆𑀢𑀺. 𑀏𑀢𑁆𑀣 𑀲𑀺𑀬𑀸. 𑀅𑀝𑁆𑀞𑀲𑀼 𑀓𑀸𑀭𑀡𑁂𑀲𑀼 𑀑𑀧𑀓𑁆𑀓𑀫𑀺𑀓𑀝𑁆𑀞𑀸𑀦𑁂 ‘𑀓𑀼𑀧𑁆𑀧𑀺𑀢𑀸𑀳𑀺 𑀤𑁂𑀯𑀢𑀸 𑀲𑀓𑀮𑀁 𑀭𑀚𑁆𑀚𑀸𑀤𑀺𑀓𑀁 𑀅𑀲𑁂𑀲𑀁 𑀓𑀢𑁆𑀯𑀸 𑀯𑀺𑀦𑀸𑀲𑁂𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀦𑀸𑀲𑀺𑀢𑀸 𑀚𑀦𑀸 𑀓𑀺𑀁 𑀦𑀼 𑀔𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀫𑁆𑀫 𑀯𑀺𑀧𑀸𑀓𑀚𑁂𑀳𑀺 𑀆𑀩𑀸𑀥𑀦 𑀤𑀡𑁆𑀟𑁂𑀳𑀺 𑀯𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀉𑀤𑀸𑀳𑀼 𑀯𑀺𑀲𑀼𑀁 𑀑𑀧𑀓𑁆𑀓𑀫𑀺𑀓𑁂𑀳𑀺 𑀆𑀩𑀸𑀥𑀦 𑀤𑀡𑁆𑀟𑁂𑀳𑀺 𑀯𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀬𑀜𑁆𑀘𑁂𑀢𑁆𑀣 𑀯𑀼𑀢𑁆𑀢𑀁 ‘𑀏𑀯𑀁 𑀅𑀓𑀸𑀮 𑀫𑀭𑀡𑀁 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑀼𑀦𑀸 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀅𑀦𑁂𑀓 𑀲𑀳𑀲𑁆𑀲𑁂𑀳𑀺 𑀓𑀸𑀭𑀡𑁂𑀳𑀺 𑀳𑁄𑀢𑀻’𑀢𑀺. 𑀢𑀢𑁆𑀣 𑀬𑀲𑁆𑀲 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺. 𑀓𑀺𑀁 𑀢𑀲𑁆𑀲 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮 𑀫𑀭𑀡𑀁 𑀦𑀸𑀫 𑀪𑀯𑁂𑀬𑁆𑀬𑀸𑀢𑀺. 𑀏𑀢𑁆𑀣 𑀯𑀤𑁂𑀬𑁆𑀬𑀼𑀁, 𑀢𑀲𑁆𑀲 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮 𑀫𑀭𑀡𑀁 𑀦𑀸𑀫 𑀦 𑀪𑀯𑁂𑀬𑁆𑀬. 𑀲𑀩𑁆𑀩𑁂 𑀲𑀢𑁆𑀢𑀸 𑀓𑀫𑁆𑀫𑀲𑁆𑀲𑀓𑀸, 𑀓𑀫𑁆𑀫𑀤𑀸𑀬𑀸𑀤𑀸, 𑀓𑀫𑁆𑀫𑀬𑁄𑀦𑀻, 𑀓𑀫𑁆𑀫 𑀩𑀦𑁆𑀥𑀽, 𑀓𑀫𑁆𑀫𑀧𑁆𑀧𑀝𑀺𑀲𑁆𑀲𑀭𑀡𑀸𑀢𑀺𑀳𑀺 𑀯𑀼𑀢𑁆𑀢𑀁𑀢𑀺. 𑀢𑁂𑀲𑀁 𑀢𑀁 𑀯𑀸𑀤𑀁 𑀪𑀺𑀦𑁆𑀤𑀦𑁆𑀢𑁄 ‘‘𑀬𑁂𑀳𑀺𑀓𑁂𑀘𑀺 𑀮𑁄𑀓𑁂 𑀤𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀧𑀼𑀦 𑀢𑀤𑀢𑁆𑀣𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑁄 ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀁 𑀯𑀤𑀢𑀺. 𑀢𑀢𑁆𑀣 𑀤𑀼𑀯𑀺𑀥𑀁 𑀓𑀫𑁆𑀫𑀨𑀮𑀁, 𑀯𑀺𑀧𑀸𑀓 𑀨𑀮𑀜𑁆𑀘 𑀦𑀺𑀲𑁆𑀲𑀦𑁆𑀤 𑀨𑀮𑀜𑁆𑀘. 𑀢𑀢𑁆𑀣 𑀯𑀺𑀧𑀸𑀓 𑀨𑀮𑀁 𑀦𑀸𑀫 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀘 𑀘𑀓𑁆𑀔𑀼 𑀲𑁄𑀢𑀸𑀤𑀻𑀦𑀺 𑀓𑀝𑀢𑁆𑀢𑀸 𑀭𑀽𑀧𑀸𑀦𑀺 𑀘. 𑀢𑀁 𑀬𑁂𑀦 𑀧𑀼𑀩𑁆𑀩𑁂 𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲𑁂𑀯 𑀲𑀸𑀥𑀸𑀭𑀡𑀁 𑀳𑁄𑀢𑀺. 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀏𑀯 𑀧𑀯𑀢𑁆𑀢𑀢𑀺. 𑀦𑀺𑀲𑁆𑀲𑀦𑁆𑀤 𑀨𑀮𑀁 𑀦𑀸𑀫 𑀢𑀲𑁆𑀲 𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀩𑀳𑀺𑀤𑁆𑀥𑀸 𑀲𑀫𑀼𑀝𑁆𑀞𑀺𑀢𑀸𑀦𑀺 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀺 𑀯𑀸 𑀅𑀦𑀺𑀝𑁆𑀞𑀸 𑀭𑀫𑁆𑀫𑀡𑀸𑀦𑀺 𑀯𑀸. 𑀢𑀁 𑀧𑀦 𑀅𑀜𑁆𑀜𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀁 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀓𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀸 𑀏𑀯. 𑀮. 𑀧𑀭𑁂𑀲𑀁 𑀲𑀸𑀥𑀸𑀭𑀡𑀸 𑀏𑀯𑀸’’𑀢𑀺. 𑀮𑁄𑀓𑁂 𑀅𑀝𑁆𑀞𑀮𑁄𑀓 𑀥𑀫𑁆𑀫𑀸 𑀦𑀸𑀫 𑀲𑀩𑁆𑀩𑁂 𑀓𑀫𑁆𑀫 𑀯𑀺𑀧𑀸𑀓𑀚𑀸 𑀏𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀇𑀫𑁂 𑀘 𑀲𑀢𑁆𑀢𑀸 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑀸 𑀅𑀝𑁆𑀞𑀲𑀼𑀮𑁄𑀓 𑀥𑀫𑁆𑀫𑁂𑀲𑀼 𑀦𑀺𑀫𑁆𑀫𑀼𑀚𑁆𑀚𑀦𑁆𑀢𑀸 𑀲𑀁𑀲𑀭𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀯𑀺𑀦𑀸𑀧𑀺 𑀉𑀧𑀧𑀻𑀴𑀓 𑀓𑀫𑁆𑀫𑁂𑀦 𑀅𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀦𑀸𑀦𑀸𑀤𑀼𑀓𑁆𑀔𑀁 𑀨𑀼𑀲𑀦𑁆𑀢𑀺𑀬𑁂𑀯. 𑀢𑀣𑀸 𑀯𑀺𑀦𑀸𑀧𑀺 𑀉𑀧𑀘𑁆𑀙𑁂𑀤𑀓 𑀓𑀫𑁆𑀫𑁂𑀦 𑀫𑀭𑀡 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀫𑁆𑀫𑁂𑀦 𑀯𑀺𑀦𑀸 𑀬𑀢𑁄𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀺𑀢𑀸’’𑀢𑀺𑀆𑀤𑀺.

‘‘𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀢𑁂 𑀦𑀸𑀦𑀸𑀭𑁄𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. ‘‘𑀦 𑀉𑀧𑀸𑀬 𑀓𑀼𑀲𑀮𑀸 𑀯𑀸’’𑀢𑀺 𑀢𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑀼𑀁 𑀓𑀸𑀭𑀡 𑀓𑀼𑀲𑀮𑀸 𑀯𑀸 𑀦 𑀳𑁄𑀦𑁆𑀢𑀺. ‘‘𑀦 𑀘 𑀧𑀝𑀺𑀓𑀸𑀭 𑀓𑀼𑀲𑀮𑀸 𑀯𑀸’’𑀢𑀺 𑀉𑀧𑁆𑀧𑀦𑁆𑀦𑀁 𑀭𑁄𑀕𑀸𑀤𑀺𑀪𑀬𑀁 𑀅𑀧𑀦𑁂𑀢𑀼𑀁 𑀯𑀽𑀧𑀲𑀫𑁂𑀢𑀼𑀁 𑀧𑀝𑀺𑀓𑀸𑀭 𑀓𑀫𑁆𑀫𑁂𑀢𑀺 𑀓𑀺𑀘𑁆𑀙𑀓𑀫𑁆𑀫𑁂 𑀓𑀼𑀲𑀮𑀸 𑀯𑀸 𑀦 𑀳𑁄𑀦𑁆𑀢𑀺. ‘‘𑀦𑀸𑀧𑀺 𑀧𑀭𑀺𑀳𑀸𑀭 𑀓𑀼𑀲𑀮𑀸 𑀯𑀸’’𑀢𑀺 𑀢𑀢𑁄 𑀫𑁄𑀘𑀦𑀢𑁆𑀣𑀁 𑀧𑀭𑀺𑀳𑀭𑀺𑀢𑀼𑀁 𑀤𑁂𑀲𑀦𑁆𑀢𑀭𑀁 𑀕𑀦𑁆𑀢𑀼𑀁 𑀓𑀼𑀲𑀮𑀸 𑀯𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀭𑁄𑀕𑀸𑀤𑀬𑁄 𑀏𑀯 𑀢𑀁 𑀔𑁂𑀧𑁂𑀦𑁆𑀢𑀸 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀓𑀣𑀁 𑀢𑁂 𑀧𑀼𑀩𑁆𑀩𑀓𑀫𑁆𑀫𑀁 𑀔𑁂𑀧𑁂𑀦𑁆𑀢𑀻𑀢𑀺. 𑀢𑀲𑁆𑀲 𑀯𑀺𑀧𑀸𑀓𑀪𑀽𑀢𑀁 𑀚𑀻𑀯𑀺𑀢 𑀲𑀦𑁆𑀢𑀸𑀦𑀁 𑀯𑀺𑀦𑀸𑀲𑁂𑀦𑁆𑀢𑀸 𑀔𑁂𑀧𑁂𑀦𑁆𑀢𑀺. 𑀯𑀺𑀦𑀝𑁆𑀞𑁂𑀳𑀺 𑀚𑀻𑀯𑀺𑀢 𑀲𑀦𑁆𑀢𑀸𑀦𑁂 𑀢𑀁 𑀪𑀯𑀁 𑀚𑀦𑁂𑀦𑁆𑀢𑀁 𑀔𑀺𑀬𑁆𑀬𑀢𑀺 𑀬𑁂𑀯𑀸𑀢𑀺. 𑀢𑁂𑀦𑀸𑀳 ‘‘𑀬𑀣𑀸𑀳𑀻’’𑀢𑀺𑀆𑀤𑀺𑀁. ‘‘𑀓𑀫𑁆𑀫𑀲𑁆𑀲𑀧𑀺 𑀢𑀣𑁂𑀯𑀸’’𑀢𑀺 𑀢𑀣𑁂𑀯 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀧𑀺 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯 𑀩𑀺𑀦𑁆𑀤𑀼𑀲𑁆𑀲𑁂𑀯 𑀧𑀭𑀺𑀤𑀼𑀩𑁆𑀩𑀮𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀚𑀻𑀯𑀺𑀢𑁂 𑀧𑀭𑀺𑀓𑁆𑀔𑀻𑀡𑁂 𑀢𑀁 𑀪𑀯𑀁 𑀚𑀦𑁂𑀦𑁆𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀧𑀺 𑀧𑀭𑀺𑀓𑁆𑀔𑀻𑀡𑀢𑁆𑀢𑀸. ‘‘𑀏𑀯𑀜𑁆𑀘𑁂𑀢𑀁’’𑀢𑀺 𑀏𑀢𑀁 𑀓𑀫𑁆𑀫𑀧𑁆𑀧𑀝𑀺 𑀲𑀁𑀬𑀼𑀢𑁆𑀢 𑀯𑀘𑀦𑀁 𑀇𑀥 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀲𑀩𑁆𑀩𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀤𑀺𑀝𑁆𑀞𑀺 𑀦𑀸𑀫 𑀲𑀩𑁆𑀩𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀲𑀼𑀘𑀭𑀺𑀢𑀁 𑀯𑀸 𑀤𑀼𑀘𑁆𑀘𑀭𑀺𑀢𑀁 𑀯𑀸 𑀧𑀼𑀩𑁆𑀩𑀪𑀯𑁂 𑀅𑀢𑁆𑀢𑀦𑀸 𑀓𑀢𑁂𑀦 𑀧𑀼𑀩𑁆𑀩𑀓𑀫𑁆𑀫𑀳𑁂𑀢𑀼𑀦𑀸 𑀏𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺. ‘‘𑀬𑀁 𑀓𑀺𑀜𑁆𑀘𑀸𑀬𑀁’’𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀬𑀁. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀢𑁆𑀢𑀺𑀓𑀸𑀮𑀗𑁆𑀓𑀭𑀺𑀬𑀸 𑀦𑀸𑀫 𑀇𑀥 𑀫𑁂 𑀘𑀺𑀭𑀓𑀸𑀮𑀁 𑀞𑀺𑀢𑀲𑁆𑀲 𑀧𑀸𑀭𑀫𑀺𑀧𑀽𑀭𑀡 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀇𑀤𑀸𑀦𑁂𑀯 𑀇𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀺, 𑀉𑀧𑀭𑀼𑀚𑁆𑀛𑀢𑀼 𑀫𑁂 𑀇𑀤𑀁 𑀚𑀻𑀯𑀺𑀢𑀦𑁆𑀢𑀺 𑀅𑀥𑀺𑀫𑀼𑀜𑁆𑀘𑀺𑀢𑁆𑀯𑀸 𑀤𑀴𑁆𑀳𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀓𑀸𑀮𑀗𑁆𑀓𑀭𑀺𑀬𑀸. ‘‘𑀲𑀬𑀫𑁂𑀯 𑀲𑀢𑁆𑀣𑀁 𑀆𑀳𑀭𑀺𑀢𑁆𑀯𑀸’’𑀢𑀺 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀕𑀻𑀯𑀁 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀏𑀢𑁆𑀣𑁂𑀯𑀸’’𑀢𑀺 𑀅𑀓𑀸𑀮𑀫𑀭𑀡𑁂 𑀏𑀯.

‘‘𑀢𑀣𑀸 𑀘𑀸’’𑀢𑀺𑀆𑀤𑀻𑀲𑀼. ‘‘𑀲𑀫𑀸𑀧𑀢𑁆𑀢𑀺 𑀮𑀸𑀪𑀻𑀦𑀁’’𑀢𑀺 𑀦𑀺𑀤𑁆𑀥𑀸𑀭𑀡𑁂𑀪𑀼𑀫𑁆𑀫 𑀯𑀘𑀦𑀁. ‘‘𑀚𑀻𑀯𑀺𑀢 𑀲𑀫𑀲𑀻𑀲𑀻𑀦𑀁’’𑀢𑀺 𑀅𑀭𑀳𑀢𑁆𑀢 𑀫𑀕𑁆𑀕𑀁 𑀮𑀪𑀺𑀢𑁆𑀯𑀸 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀦𑀯𑀻𑀣𑀺 𑀏𑀯 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀁 𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀢𑀸 𑀲𑀫𑀁 𑀲𑀻𑀲𑀁 𑀏𑀢𑁂𑀲𑀦𑁆𑀢𑀺 𑀲𑀫𑀲𑀻𑀲𑀺𑀦𑁄. ‘‘𑀲𑀫𑀁 𑀲𑀻𑀲𑀁’’𑀢𑀺 𑀚𑀻𑀯𑀺𑀢 𑀲𑀦𑁆𑀢𑀸𑀦 𑀧𑀭𑀺𑀬𑀦𑁆𑀢𑁂𑀦 𑀲𑀫𑀁 𑀯𑀝𑁆𑀝𑀤𑀼𑀓𑁆𑀔 𑀲𑀦𑁆𑀢𑀸𑀦 𑀧𑀭𑀺𑀬𑀦𑁆𑀢𑀁 𑀯𑀼𑀘𑁆𑀘𑀢𑀺. ‘‘𑀲𑀩𑁆𑀩𑁂𑀲𑀁 𑀧𑀻’’𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀔𑀻𑀡𑀸𑀲𑀯𑀸𑀦𑀁. ‘‘𑀇𑀫𑀁 𑀲𑀼𑀢𑁆𑀢𑀧𑀤𑀁’’𑀢𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂 𑀆𑀕𑀢𑀁 𑀲𑀼𑀢𑁆𑀢𑀧𑀤𑀁. ‘‘𑀢𑁂’’𑀢𑀺 𑀢𑁂 𑀯𑀸𑀤𑀺𑀦𑁄. ‘‘𑀢𑁂𑀦𑀸’’𑀢𑀺 𑀢𑁂𑀦 𑀯𑀸𑀤𑀯𑀘𑀦𑁂𑀦. 𑀓𑁆𑀭𑀺𑀬𑀫𑀦𑁄𑀥𑀸𑀢𑀼 𑀦𑀸𑀫 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁. 𑀓𑁆𑀭𑀺𑀬𑀸𑀳𑁂𑀢𑀼𑀓𑀫𑀦𑁄 𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀁. ‘‘𑀅𑀲𑁆𑀲𑀸’’𑀢𑀺 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀩𑀼𑀤𑁆𑀥𑀲𑁆𑀲. ‘‘𑀦 𑀲𑀫𑁂𑀢𑀺 𑀬𑁂𑀯𑀸’’𑀢𑀺 𑀲𑀦𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀦 𑀚𑀯𑀦𑁂𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀲𑀫𑁂𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀢𑀣𑀸𑀳𑀻’’𑀢𑀺𑀆𑀤𑀺𑀁. ‘‘𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻’’𑀢𑀺 𑀏𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀦 𑀘𑀼𑀢𑀺𑀘𑀺𑀢𑁆𑀢𑀫𑁂𑀯 𑀪𑀯𑀗𑁆𑀕𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀘 𑀪𑀯𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀯𑁄𑀳𑀸𑀭 𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂. 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀁 𑀫𑀭𑀡𑀸𑀲𑀦𑁆𑀦 𑀘𑀺𑀢𑁆𑀢𑀸𑀦𑀁. 𑀬𑀣𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀬𑀸𑀯𑀚𑀻𑀯𑀁 𑀉𑀧𑁆𑀧𑀦𑁆𑀦𑀁 𑀫𑀳𑀸𑀪𑀯𑀗𑁆𑀕𑀘𑀺𑀢𑁆𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀬𑁄 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺𑀬𑁂𑀯. 𑀢𑀣𑀸 𑀧𑀭𑀺𑀦𑀺𑀩𑁆𑀩𑀸𑀦 𑀘𑀼𑀢𑀺𑀘𑀺𑀢𑁆𑀢𑀁 𑀧𑀻𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺𑀁. 𑀦𑀦𑀼 𑀫𑀭𑀡𑀓𑀸𑀮𑁂 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀕𑀳𑀡𑀁 𑀦𑀸𑀫 𑀪𑀯𑀦𑁆𑀢𑀭 𑀕𑀫𑀦𑀢𑁆𑀣𑀸𑀬 𑀳𑁄𑀢𑀺, 𑀩𑀼𑀤𑁆𑀥𑀸 𑀘 𑀪𑀯𑀦𑁆𑀢𑀭𑀁 𑀦 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 ‘‘𑀦 𑀳𑀺. 𑀮. 𑀦 𑀓𑀭𑁄𑀢𑀻’’𑀢𑀺 𑀇𑀤𑀁 𑀦 𑀬𑀼𑀢𑁆𑀢𑀦𑁆𑀢𑀺. 𑀦𑁄 𑀦 𑀬𑀼𑀢𑁆𑀢𑀁. 𑀪𑀯𑀦𑁆𑀢𑀭 𑀕𑀫𑀦𑀢𑁆𑀣𑀸𑀬𑀸𑀢𑀺 𑀇𑀤𑀁 𑀚𑀯𑀦𑁂𑀳𑀺 𑀕𑀳𑀡𑁂 𑀤𑀝𑁆𑀞𑀩𑁆𑀩𑀁. 𑀇𑀥 𑀧𑀦 𑀘𑀼𑀢𑀺𑀘𑀺𑀢𑁆𑀢𑁂𑀦 𑀕𑀳𑀡𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀘𑀘𑀼𑀢𑀺𑀬𑀸𑀕𑀳𑀺𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. ‘‘𑀓𑀫𑁆𑀫𑀲𑀺𑀤𑁆𑀥𑀺𑀬𑀸’’𑀢𑀺 𑀓𑀫𑁆𑀫𑀲𑀺𑀚𑁆𑀛𑀦𑀢𑁆𑀣𑀸𑀬.‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼. ‘‘𑀢𑀲𑁆𑀲𑀸’’𑀢𑀺 𑀲𑁄𑀡𑀢𑁆𑀣𑁂𑀭 𑀧𑀺𑀢𑀼𑀦𑁄. ‘‘𑀓𑀫𑁆𑀫𑀩𑀮𑁂𑀦𑀸’’𑀢𑀺𑀆𑀤𑀻𑀲𑀼. ‘‘𑀅𑀜𑁆𑀜𑁂𑀦𑀧𑀺 𑀓𑀸𑀭𑀡 𑀩𑀮𑁂𑀦𑀸’’𑀢𑀺 𑀆𑀘𑀺𑀡𑁆𑀡𑀪𑀸𑀯𑀸𑀤𑀺𑀓𑁂𑀦 𑀓𑀸𑀭𑀡𑀩𑀮𑁂𑀦. 𑀕𑀢𑀺𑀦𑀺𑀫𑀺𑀢𑁆𑀢𑀁 𑀧𑀦 𑀓𑀫𑁆𑀫𑀩𑀮𑁂𑀦𑁂𑀯𑀸𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. ‘‘𑀢𑀣𑁄𑀧𑀝𑁆𑀞𑀺𑀢𑀁’’𑀢𑀺 𑀅𑀦𑁆𑀢𑀺𑀫𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀩𑀳𑀽𑀲𑀼𑀯𑀻𑀣𑀻𑀲𑀼 𑀉𑀧𑀝𑁆𑀞𑀺𑀢𑀧𑁆𑀧𑀓𑀸𑀭𑀦𑁆𑀢𑀺𑀅𑀢𑁆𑀣𑁄. 𑀧𑀸𑀧𑀧𑀓𑁆𑀔𑀺𑀬𑁂𑀲𑀼 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑁂𑀲𑀼. 𑀓𑀮𑁆𑀬𑀸𑀡𑀧𑀓𑁆𑀔𑀺𑀬𑀸𑀦𑀺 𑀲𑀕𑁆𑀕𑀦𑀺𑀫𑀺𑀢𑁆𑀢𑀸𑀦𑀺. 𑀥𑀫𑁆𑀫𑀸𑀲𑁄𑀓𑀭𑀜𑁆𑀜𑁄 𑀫𑀭𑀡𑀓𑀸𑀮𑁂 𑀧𑀸𑀧𑀧𑀓𑁆𑀔𑀺𑀬𑀸𑀦𑀁 𑀉𑀧𑀝𑁆𑀞𑀸𑀦𑀁 𑀓𑀢𑁆𑀣𑀘𑀺 𑀲𑀻𑀳𑀴𑀕𑀦𑁆𑀣𑁂 𑀯𑀼𑀢𑁆𑀢𑀁.

𑀲𑀓𑀮𑀁 𑀧𑀣𑀯𑀺𑀁 𑀪𑀼𑀢𑁆𑀯𑀸,

𑀤𑀢𑁆𑀯𑀸 𑀓𑁄𑀝𑀺𑀲𑀢𑀁 𑀥𑀦𑀁;

𑀅𑀦𑁆𑀢𑁂 𑀅𑀟𑁆𑀠𑀸𑀫𑀮𑀓𑀫𑀢𑁆𑀢𑀲𑁆𑀲;

𑀅𑀲𑁄𑀓𑁄 𑀇𑀲𑁆𑀲𑀭𑀁 𑀕𑀢𑁄; 𑀢𑀺 𑀘;

𑀅𑀲𑁄𑀓𑁄 𑀲𑁄𑀓 𑀫𑀸𑀕𑀢𑁄; 𑀢𑀺 𑀘;

‘‘𑀢𑀁’’𑀢𑀺 𑀯𑀺𑀧𑀘𑁆𑀘𑀫𑀸𑀦𑀓𑀁 𑀓𑀫𑁆𑀫𑀁. ‘‘𑀦𑀺𑀬𑀸𑀫𑀓 𑀲𑀳𑀓𑀸𑀭𑀺 𑀧𑀘𑁆𑀘𑀬𑀪𑀽𑀢𑀸’’𑀢𑀺 𑀏𑀢𑁆𑀣 𑀬𑀣𑀸 𑀦𑀸𑀯𑀸𑀬𑀁 𑀦𑀺𑀬𑀸𑀫𑀓𑁄 𑀦𑀸𑀫 𑀦𑀸𑀯𑀁 𑀇𑀘𑁆𑀙𑀺𑀢𑀤𑀺𑀲𑀸𑀪𑀺𑀫𑀼𑀔𑀁 𑀦𑀺𑀬𑀸𑀫𑁂𑀢𑀺, 𑀦𑀺𑀬𑁄𑀚𑁂𑀢𑀺. 𑀢𑀣𑀸 𑀅𑀬𑀁 𑀢𑀡𑁆𑀳𑀸𑀧𑀺 𑀪𑀯𑀦𑀺𑀓𑀦𑁆𑀢𑀺 𑀳𑀼𑀢𑁆𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀕𑀦𑁆𑀢𑀩𑁆𑀩𑀪𑀯𑀸𑀪𑀺𑀫𑀼𑀔𑀁 𑀦𑀺𑀬𑀸𑀫𑁂𑀢𑀺, 𑀦𑀺𑀬𑁄𑀚𑁂𑀢𑀺. 𑀓𑀫𑁆𑀫𑀲𑁆𑀲 𑀘 𑀅𑀘𑁆𑀘𑀸𑀬𑀢𑁆𑀢 𑀲𑀳𑀸𑀬𑀪𑀸𑀯𑁂𑀦 𑀲𑀳𑀓𑀸𑀭𑀻 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀺 𑀯𑀸’’𑀢𑀺 𑀅𑀜𑁆𑀜𑀸𑀦𑀺 𑀓𑀼𑀲𑀮𑀸 𑀓𑀼𑀲𑀮𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀺 𑀯𑀸. ‘‘𑀢𑀤𑀼𑀧𑀢𑁆𑀣𑀫𑁆𑀪𑀺𑀓𑀸’’𑀢𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀉𑀧𑀢𑁆𑀣𑀫𑁆𑀪𑀺𑀓𑀸. ‘‘𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁’’𑀢𑀺 𑀫𑀼𑀔𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀅𑀲𑁆𑀲𑀸𑀤𑁂𑀦𑁆𑀢𑀁 𑀕𑀺𑀚𑁆𑀛𑀦𑁆𑀢𑀁. ‘‘𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀻’’𑀢𑀺 𑀢𑀺𑀝𑁆𑀞𑀫𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀫𑀼𑀜𑁆𑀘𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀩𑁆𑀬𑀜𑁆𑀚𑀦𑀁 𑀦𑀸𑀫 𑀧𑀺𑀬𑀲𑀸𑀢𑀭𑀽𑀧𑁄 𑀓𑀣𑀺𑀢𑀮𑀧𑀺𑀢𑀸𑀤𑀺 𑀓𑁆𑀭𑀺𑀬𑀸𑀯𑀺𑀲𑁂𑀲𑁄. ‘‘𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺 𑀆𑀲𑀦𑁆𑀦 𑀫𑀭𑀡𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀅𑀝𑁆𑀞𑀓𑀣𑀸 𑀧𑀸𑀞𑁂. ‘‘𑀓𑀺𑀮𑁂𑀲 𑀩𑀮𑀯𑀺𑀦𑀸𑀫𑀺𑀢𑀁’’𑀢𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸𑀤𑀻𑀦𑀁 𑀓𑀺𑀮𑁂𑀲𑀸𑀦𑀁 𑀩𑀮𑁂𑀦 𑀯𑀺𑀦𑀸𑀫𑀺𑀢𑀁. 𑀧𑀝𑀺𑀘𑁆𑀙𑀸𑀤𑀺𑀓𑀸 𑀆𑀤𑀻𑀦 𑀯𑀸 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀢𑀁’’𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀁. ‘‘𑀢𑀲𑁆𑀫𑀺𑀁’’𑀢𑀺 𑀓𑀫𑁆𑀫𑀸𑀤𑀺𑀯𑀺𑀲𑀬𑁂. 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀢𑀲𑁆𑀫𑀺𑀁 𑀯𑀺𑀲𑀬𑁂𑀢𑀺𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀦 𑀯𑀼𑀢𑁆𑀢𑀁 𑀢𑀲𑁆𑀫𑀺𑀁 𑀪𑀯𑁂𑀢𑀺. ‘‘𑀢𑀲𑁆𑀫𑀺𑀁 𑀯𑀼𑀢𑁆𑀢𑀸 𑀦𑀁’’𑀢𑀺 𑀢𑀲𑁆𑀫𑀺𑀁 ‘𑀬𑁂𑀪𑀽𑀬𑁆𑀬𑁂𑀦 𑀪𑀯𑀦𑁆𑀢𑀭𑁂 𑀙 𑀤𑁆𑀯𑀸𑀭𑀕𑁆𑀕𑀳𑀺𑀢𑀁’𑀢𑀺 𑀞𑀸𑀦𑁂 𑀝𑀻𑀓𑀸𑀲𑀼 𑀯𑀼𑀢𑁆𑀢𑀸𑀦𑀁. 𑀢𑀁 𑀲𑀤𑀺𑀲 𑀚𑀯𑀦𑀼𑀧𑁆𑀧𑀢𑁆𑀢𑀺 𑀦𑀸𑀫 𑀓𑀫𑁆𑀫𑀓𑀭𑀡𑀓𑀸𑀮𑁂 𑀧𑀯𑀢𑁆𑀢 𑀚𑀯𑀦𑁂𑀳𑀺 𑀲𑀤𑀺𑀲𑀸𑀦𑀁 𑀇𑀤𑀸𑀦𑀺 𑀚𑀯𑀦𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀪𑀯𑀧𑁆𑀧𑀝𑀺𑀘𑁆𑀙𑀦𑁆𑀦𑀜𑁆𑀘 𑀓𑀫𑁆𑀫𑀁 𑀅𑀧𑀸𑀓𑀝𑀜𑁆𑀘 𑀓𑀫𑁆𑀫𑀁 𑀦 𑀢𑀣𑀸 𑀉𑀧𑀝𑁆𑀞𑀸𑀢𑀺. 𑀓𑁂𑀯𑀮𑀁 𑀅𑀢𑁆𑀢𑀸𑀦𑀁 𑀅𑀪𑀺𑀦𑀯𑀓𑀭𑀡 𑀯𑀲𑁂𑀦 𑀤𑁆𑀯𑀸𑀭𑀧𑀢𑁆𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑀺𑀲𑀻𑀤 𑀧𑀢𑁆𑀢𑀸’’𑀢𑀺 𑀯𑀺𑀲𑀜𑁆𑀜𑀻𑀪𑀸𑀯𑁂𑀦 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀲𑀻𑀤𑀦𑀧𑀢𑁆𑀢𑀸. ‘‘𑀢𑀩𑁆𑀩𑀺𑀧𑀭𑀻𑀢𑁂𑀦 𑀧𑀸𑀧𑀓𑀫𑁆𑀫 𑀩𑀳𑀼𑀮𑀸𑀧𑀺 𑀯𑀢𑁆𑀢𑀩𑁆𑀩𑀸’’𑀢𑀺 𑀢𑁂𑀧𑀺𑀯𑀺𑀲𑀻𑀤𑀦𑁆𑀢𑀭𑁂 𑀆𑀯𑀼𑀥 𑀳𑀢𑁆𑀣𑀸 𑀧𑀸𑀡𑀖𑀸𑀢𑀁 𑀓𑀭𑁄𑀦𑁆𑀢𑀸 𑀕𑀡𑁆𑀳𑀣𑀩𑀦𑁆𑀥𑀣𑀸𑀢𑀺 𑀉𑀕𑁆𑀖𑁄𑀲𑀦𑁆𑀢𑀸 𑀤𑀼𑀝𑁆𑀞𑀘𑀺𑀢𑁆𑀢𑀸 𑀳𑁄𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸 𑀧𑀸𑀞𑁂𑀲𑀼. 𑀉𑀓𑁆𑀔𑀺𑀢𑁆𑀢𑁄 𑀅𑀲𑀺 𑀬𑀲𑁆𑀲𑀸𑀢𑀺 𑀉𑀓𑁆𑀔𑀺𑀢𑁆𑀢𑀸 𑀲𑀺𑀓𑁄. 𑀧𑀢𑀼𑀤𑀦𑁆𑀢𑀺 𑀯𑀺𑀚𑁆𑀛𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀢𑁄𑀤𑀦𑀁. 𑀧𑀸𑀚𑀦𑀤𑀡𑁆𑀟𑁄. 𑀢𑀲𑁆𑀲 𑀅𑀕𑁆𑀕𑁂 𑀓𑀢𑀸 𑀲𑀽𑀘𑀺 𑀧𑀢𑁄𑀤𑀦 𑀲𑀽𑀘𑀺. ‘‘𑀧𑀢𑁄𑀤𑀦 𑀤𑀼𑀓𑁆𑀔𑀁’’𑀢𑀺 𑀯𑀺𑀚𑁆𑀛𑀦 𑀤𑀼𑀓𑁆𑀔𑀁. 𑀓𑀣𑀁 𑀧𑀦 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀸𑀤𑀺𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀁 𑀓𑀫𑁆𑀫𑀼𑀧𑀝𑁆𑀞𑀸𑀦𑀁 𑀦𑀸𑀫 𑀳𑁄𑀢𑀺. 𑀓𑀣𑀜𑁆𑀘 𑀢𑀁 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑁂𑀢𑀻𑀢𑀺 𑀆𑀳 ‘‘𑀲𑁄 𑀘𑀸’’𑀢𑀺𑀆𑀤𑀺𑀁. 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁. ‘‘𑀇𑀢𑀭𑁂𑀲𑀁 𑀧𑀦𑀸’’𑀢𑀺 𑀭𑀽𑀧𑀸𑀭𑀽𑀧 𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀦. ‘‘𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸’’𑀢𑀺 𑀢𑀤𑀸𑀭𑀫𑁆𑀫𑀡 𑀧𑀭𑀺𑀬𑁄𑀲𑀸𑀦𑀸𑀬𑀯𑀸 𑀲𑀼𑀤𑁆𑀥𑀸𑀬 𑀯𑀸 𑀚𑀯𑀦𑀯𑀻𑀣𑀺𑀬𑀸𑀢𑀺 𑀏𑀯𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸. 𑀅𑀬𑀁 𑀧𑀦 𑀪𑀯𑀗𑁆𑀕𑀸𑀯𑀲𑀸𑀦𑁂 𑀘𑀼𑀢𑀺𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀦𑀸𑀫 𑀅𑀝𑁆𑀞𑀓𑀣𑀸𑀲𑀼 𑀦𑀢𑁆𑀣𑀺. 𑀬𑀜𑁆𑀘 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺𑀆𑀤𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁. 𑀢𑀢𑁆𑀣𑀧𑀺 ‘‘𑀪𑀯𑀗𑁆𑀕𑀁’’𑀢𑀺 𑀘𑀼𑀢𑀺𑀘𑀺𑀢𑁆𑀢𑀫𑁂𑀯 𑀝𑀻𑀓𑀸𑀲𑀼 𑀯𑀡𑁆𑀡𑁂𑀦𑁆𑀢𑀺. 𑀢𑀲𑁆𑀫𑀸 ‘‘𑀪𑀯𑀗𑁆𑀕𑀓𑁆𑀔𑀬𑁂𑀯𑀸’’𑀢𑀺 𑀇𑀤𑀁 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀁. 𑀅𑀦𑀼𑀭𑀽𑀧𑀁 𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀅𑀦𑀼𑀩𑀦𑁆𑀥𑁄 𑀳𑀼𑀢𑁆𑀯𑀸 𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀅𑀦𑀼 𑀅𑀦𑀼 𑀯𑀸 𑀲𑁂𑀢𑀻𑀢𑀺 𑀅𑀦𑀼𑀲𑀬𑁄. 𑀏𑀢𑁆𑀣 𑀘 𑀅𑀦𑀼𑀲𑀬𑁄 𑀦𑀸𑀫 𑀚𑀯𑀦𑀲𑀳𑀚𑀸𑀢𑁄 𑀦 𑀳𑁄𑀢𑀺. 𑀇𑀥 𑀘 𑀅𑀦𑀼𑀲𑀬 𑀦𑀸𑀫𑁂𑀦 𑀯𑀼𑀢𑁆𑀢𑀁. 𑀦𑀸𑀦𑀸𑀚𑀯𑀦 𑀲𑀳𑀚𑀸𑀢𑀸 𑀘 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀲𑁂𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑁂𑀯. 𑀓𑀣𑀁 𑀢𑀸 𑀇𑀥 𑀕𑀳𑀺𑀢𑀸 𑀲𑀺𑀬𑀼𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀁. 𑀏𑀯𑀁 𑀲𑀦𑁆𑀢𑁂 𑀅𑀯𑀺𑀚𑁆𑀚𑀸 𑀧𑀭𑀺𑀓𑁆𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀫𑀽𑀮𑀓𑁂𑀦𑀸𑀢𑀺 𑀯𑀼𑀢𑁆𑀢𑁂𑀲𑀼 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀅𑀦𑀼𑀲𑀬𑁂𑀳𑀺 𑀲𑀳 𑀚𑀯𑀦𑀲𑀳𑀚𑀸𑀢𑀸𑀦𑀫𑁆𑀧𑀺 𑀮𑀤𑁆𑀥𑀢𑁆𑀢𑀸. 𑀢𑀲𑁆𑀫𑀸 𑀇𑀥 𑀅𑀦𑀼𑀲𑀬 𑀯𑀘𑀦𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀸. 𑀬𑀼𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀧𑀭𑀺𑀬𑀢𑁆𑀢𑀸’’𑀢𑀺 𑀲𑀫𑀢𑁆𑀢𑀸. ‘‘𑀲𑁄 𑀧𑀻’’𑀢𑀺 𑀨𑀲𑁆𑀲𑀸𑀤𑀺 𑀥𑀫𑁆𑀫 𑀲𑀫𑀽𑀳𑁄𑀧𑀺.‘‘𑀢𑀣𑀸 𑀭𑀽𑀧𑀸 𑀬𑁂𑀯𑀸’’𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦 𑀭𑀽𑀧𑀸𑀬𑁂𑀯, 𑀅𑀦𑀼𑀲𑀬𑀪𑀽𑀢𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀁’’𑀢𑀺 𑀘𑀺𑀢𑁆𑀢 𑀲𑀦𑁆𑀢𑀸𑀦𑀁. ‘‘𑀢𑀢𑁆𑀣𑀸’’𑀢𑀺 𑀢𑀤𑀼𑀪𑀬𑀲𑁆𑀫𑀺𑀁. 𑀓𑀣𑀁 𑀢𑀁 𑀢𑀢𑁆𑀣 𑀔𑀺𑀧𑀦𑁆𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀺𑀁’’𑀢𑀺𑀆𑀤𑀺𑀁. ‘‘𑀯𑀺𑀚𑀸𑀦𑀦𑀥𑀸𑀢𑀼𑀬𑀸’’𑀢𑀺 𑀯𑀺𑀜𑁆𑀜𑀸𑀡 𑀥𑀸𑀢𑀼𑀬𑀸. 𑀲𑀗𑁆𑀓𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀢𑁄 𑀫𑀭𑀡𑀓𑀸𑀮𑁂 𑀲𑀗𑁆𑀓𑀦𑁆𑀢𑀸 𑀦𑀸𑀫 𑀅𑀢𑁆𑀣𑀺 𑀯𑀺𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑀦𑁆𑀢𑁂 𑀇𑀤𑀁 𑀯𑀘𑀦𑀁 𑀅𑀦𑀫𑀢𑀕𑁆𑀕𑀺𑀬 𑀲𑀼𑀢𑁆𑀢𑁂𑀦 𑀯𑀺𑀭𑀼𑀤𑁆𑀥𑀁 𑀲𑀺𑀬𑀸𑀢𑀺. 𑀦 𑀯𑀺𑀭𑀼𑀤𑁆𑀥𑀁. 𑀇𑀤𑀜𑁆𑀳𑀺 𑀅𑀪𑀺𑀥𑀫𑁆𑀫 𑀯𑀘𑀦𑀁, 𑀫𑀼𑀔𑁆𑀬𑀯𑀘𑀦𑀁, 𑀅𑀦𑀫𑀢𑀕𑁆𑀕𑀺𑀬 𑀲𑀼𑀢𑁆𑀢𑀁 𑀧𑀦 𑀲𑀼𑀢𑁆𑀢𑀦𑁆𑀢 𑀯𑀘𑀦𑀁 𑀧𑀭𑀺𑀬𑀸𑀬 𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑀺 ‘‘𑀬𑁂𑀲𑀜𑁆𑀳𑀻’’𑀢𑀺𑀆𑀤𑀺𑀦𑀸. ‘‘𑀲𑁄’’𑀢𑀺 𑀲𑁄 𑀧𑀼𑀕𑁆𑀕𑀮𑁄. ‘‘𑀢𑁂𑀲𑀁’’𑀢𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀲𑀗𑁆𑀔𑀸𑀭𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀭𑀽𑀧 𑀥𑀫𑁆𑀫𑀸𑀦𑀜𑁆𑀘. ‘‘𑀳𑁂𑀢𑀼𑀧𑁆𑀨𑀮𑀲𑀫𑁆𑀩𑀦𑁆𑀥𑁂𑀦 𑀪𑀯𑀦𑁆𑀢𑀭𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀧𑀼𑀩𑁆𑀩𑁂 𑀓𑀫𑁆𑀫𑀓𑀭𑀡𑀓𑀸𑀮𑁂𑀧𑀺 𑀢𑁂 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀲𑀗𑁆𑀔𑀸𑀭𑀸 𑀏𑀯 𑀲𑁄 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀘𑁆𑀙𑀸 𑀢𑁂𑀲𑀁 𑀨𑀮𑀪𑀽𑀢𑀸𑀬𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀸𑀢𑀼𑀪𑀯𑀦𑀓𑀸𑀮𑁂𑀧𑀺 𑀲𑀸𑀧𑀝𑀺𑀲𑀦𑁆𑀥𑀺 𑀏𑀯 𑀲𑁄 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀫𑀚𑁆𑀛𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁄𑀧𑀺 𑀲𑁄 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀳𑁂𑀢𑀼𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀨𑀮𑀥𑀫𑁆𑀫𑁂 𑀏𑀓𑀁 𑀲𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 𑀳𑁂𑀢𑀼𑀧𑁆𑀨𑀮 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺. 𑀏𑀯𑀁 𑀳𑁂𑀢𑀼𑀧𑁆𑀨𑀮 𑀲𑀫𑁆𑀩𑀦𑁆𑀥𑁂𑀦 𑀲𑁄 𑀏𑀯 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑁂𑀦 𑀓𑀫𑁆𑀫𑁂𑀦 𑀲𑁄 𑀏𑀯 𑀪𑀯𑀦𑁆𑀢𑀭𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀅𑀦𑀫𑀢𑀕𑁆𑀕𑁄 𑀬𑀁 𑀪𑀺𑀓𑁆𑀔𑀯𑁂. 𑀮. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁𑀢𑀺 𑀏𑀯𑀁 𑀲𑀢𑁆𑀢𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀸𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑀸𑀬𑀤𑁂𑀲𑀦𑀸 𑀳𑁄𑀢𑀺. 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀘 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀦𑁆𑀢𑀺 𑀧𑀭𑀺𑀬𑀸𑀬𑁄𑀧𑀺 𑀲𑀺𑀚𑁆𑀛𑀢𑀺. 𑀬𑀲𑁆𑀲𑀁 𑀧𑀦 𑀥𑀫𑁆𑀫 𑀤𑁂𑀲𑀦𑀸𑀬𑀁 𑀥𑀫𑁆𑀫𑀤𑁂𑀲𑀦𑀸𑀢𑀺 𑀯𑀘𑀦𑀸𑀦𑀼 𑀭𑀽𑀧𑀁 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀺, 𑀦 𑀲𑀢𑁆𑀢𑀁, 𑀦 𑀧𑀼𑀕𑁆𑀕𑀮𑀁. 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸 𑀏𑀯 𑀫𑀼𑀔𑁆𑀬𑀤𑁂𑀲𑀦𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀤𑁂𑀲𑀺𑀢 𑀥𑀫𑁆𑀫𑀸 𑀧𑀦 𑀧𑀓𑀢𑀺𑀓𑀸𑀮𑁂𑀧𑀺 𑀤𑁂𑀲𑀦𑁆𑀢𑀭𑀁 𑀓𑀸𑀮𑀦𑁆𑀢𑀭𑀁 𑀔𑀡𑀦𑁆𑀢𑀭𑀁 𑀲𑀗𑁆𑀓𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺. 𑀔𑀬𑀯𑀬𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘𑀦 𑀳𑀺 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸. 𑀮. 𑀲𑀗𑁆𑀓𑀦𑁆𑀢𑀸 𑀦𑀸𑀫 𑀅𑀢𑁆𑀣𑀻’𑀢𑀺. 𑀧𑀝𑀺𑀖𑁄𑀲𑁄 𑀘, 𑀧𑀤𑀻𑀧𑁄 𑀘, 𑀫𑀼𑀤𑁆𑀤𑀸 𑀘. 𑀆𑀤𑀺𑀲𑀤𑁆𑀤𑁂𑀦 𑀧𑀝𑀺𑀩𑀺𑀫𑁆𑀩𑀘𑁆𑀙𑀸𑀬𑀸 𑀘, 𑀩𑀻𑀚𑀲𑀗𑁆𑀔𑀸𑀭𑁄 𑀘, 𑀧𑀸𑀝𑀺𑀪𑁄𑀕𑁄 𑀘, 𑀩𑀸𑀮𑀓𑀼𑀫𑀸𑀭 𑀲𑀭𑀻𑀭𑁂𑀲𑀼 𑀉𑀧𑀬𑀼𑀢𑁆𑀢𑀸 𑀯𑀺𑀚𑁆𑀚𑀸𑀲𑀺𑀧𑁆𑀧𑁄𑀲𑀥𑀸 𑀘𑀸𑀢𑀺 𑀏𑀯𑀁 𑀅𑀝𑁆𑀞𑀓𑀣𑀸 𑀬𑀁 𑀆𑀕𑀢𑀸𑀦𑀺 𑀦𑀺𑀤𑀲𑁆𑀲𑀦𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. ‘‘𑀦𑀺𑀤𑀲𑁆𑀲𑀦𑀸’’𑀦𑀻𑀢𑀺 𑀘 𑀉𑀧𑀫𑀸𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 ‘‘𑀧𑀝𑀺𑀖𑁄𑀲𑁄’’𑀢𑀺 𑀕𑀫𑁆𑀪𑀻𑀭𑀮𑁂𑀡 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑁄𑀮𑁂𑀡𑁂 𑀧𑀝𑀺𑀖𑁄𑀲𑁄 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑁄 𑀫𑀽𑀮𑀲𑀤𑁆𑀤𑁄 𑀅𑀦𑁆𑀢𑁄𑀮𑁂𑀡𑀁 𑀦 𑀕𑀘𑁆𑀙𑀢𑀺, 𑀉𑀧𑁆𑀧𑀦𑁆𑀦𑀝𑁆𑀞𑀸𑀦𑁂 𑀏𑀯 𑀦𑀺𑀭𑀼𑀚𑁆𑀛𑀢𑀺. 𑀧𑀝𑀺𑀖𑁄𑀲𑁄 𑀘 𑀢𑀢𑁄 𑀆𑀕𑀢𑁄 𑀦 𑀳𑁄𑀢𑀺. 𑀦 𑀘 𑀯𑀺𑀦𑀸 𑀫𑀽𑀮𑀲𑀤𑁆𑀤 + 𑀧𑀘𑁆𑀘𑀬𑁂𑀦 𑀅𑀜𑁆𑀜𑀢𑁄 𑀧𑀯𑀢𑁆𑀢𑀢𑀺. 𑀫𑀽𑀮𑀲𑀤𑁆𑀤𑀧𑀘𑁆𑀘𑀬𑀸 𑀏𑀯 𑀢𑀢𑁆𑀣 𑀧𑀯𑀢𑁆𑀢𑀢𑀻𑀢𑀺. 𑀢𑀢𑁆𑀣 𑀫𑀽𑀮𑀲𑀤𑁆𑀤𑁄 𑀯𑀺𑀬 𑀅𑀢𑀻𑀢 𑀓𑀫𑁆𑀫𑀁. 𑀧𑀝𑀺𑀖𑁄𑀲𑁄 𑀯𑀺𑀬 𑀅𑀦𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺. 𑀏𑀲𑀦𑀬𑁄 𑀧𑀤𑀻𑀧 𑀫𑀼𑀤𑁆𑀤𑀸 𑀧𑀝𑀺𑀩𑀺𑀫𑁆𑀩𑀘𑁆𑀙𑀸𑀬𑀸𑀲𑀼. 𑀢𑀢𑁆𑀣 ‘‘𑀧𑀤𑀻𑀧𑁄’’𑀢𑀺 𑀧𑀣𑀫𑀁 𑀏𑀓𑀁 𑀧𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑁂𑀦 𑀅𑀜𑁆𑀜𑀁 𑀧𑀤𑀻𑀧𑀲𑀢𑀫𑁆𑀧𑀺 𑀧𑀤𑀻𑀧 𑀲𑀳𑀲𑁆𑀲𑀫𑁆𑀧𑀺 𑀚𑀸𑀮𑁂𑀢𑀺. ‘‘𑀫𑀼𑀤𑁆𑀤𑀸’’𑀢𑀺 𑀮𑀜𑁆𑀙𑀦𑀮𑁂𑀔𑀸. 𑀢𑀢𑁆𑀣 𑀏𑀓𑁂𑀦 𑀮𑀜𑁆𑀙𑀦𑀓𑁆𑀔𑀦𑁆𑀥𑁂𑀦, 𑀢𑁂𑀦 𑀮𑀜𑁆𑀙𑀦𑀮𑁂𑀔𑀸𑀲𑀢𑀫𑁆𑀧𑀺 𑀮𑀜𑁆𑀙𑀦𑀮𑁂𑀔𑀸 𑀲𑀳𑀲𑁆𑀲𑀫𑁆𑀧𑀺 𑀓𑀭𑁄𑀢𑀺. ‘‘𑀧𑀝𑀺𑀩𑀺𑀫𑁆𑀩𑀘𑁆𑀙𑀸𑀬𑀸’’𑀢𑀺 𑀧𑀲𑀦𑁆𑀦𑁂𑀲𑀼 𑀆𑀤𑀸𑀲𑀧𑀝𑁆𑀝𑁂𑀲𑀼𑀯𑀸 𑀉𑀤𑀓𑁂𑀲𑀼𑀯𑀸 𑀉𑀧𑁆𑀧𑀦𑁆𑀦𑀸 𑀲𑀭𑀻𑀭𑀘𑁆𑀙𑀸𑀬𑀸. 𑀏𑀢𑁂𑀳𑀺 𑀦𑀺𑀤𑀲𑁆𑀲𑀦𑁂𑀳𑀺 𑀨𑀮𑀁 𑀦𑀸𑀫 𑀳𑁂𑀢𑀼𑀢𑁄 𑀆𑀕𑀢𑀁 𑀦 𑀳𑁄𑀢𑀺. 𑀳𑁂𑀢𑀼𑀦𑀸 𑀘 𑀯𑀺𑀦𑀸 𑀦 𑀲𑀺𑀚𑁆𑀛𑀢𑀻𑀢𑀺 𑀏𑀢𑁆𑀢𑀓𑀫𑀢𑁆𑀣𑀁 𑀤𑀻𑀧𑁂𑀢𑀺. ‘‘𑀩𑀻𑀚𑀲𑀗𑁆𑀔𑀸𑀭𑁄’’𑀢𑀺 𑀓𑀸𑀮𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑁂𑀲𑀼 𑀧𑀼𑀧𑁆𑀨𑀨𑀮𑁂𑀲𑀼 𑀇𑀘𑁆𑀙𑀺𑀢𑀯𑀡𑁆𑀡 𑀕𑀦𑁆𑀥𑀭𑀲𑀧𑀸𑀢𑀼𑀪𑀸𑀯𑀢𑁆𑀣𑀸𑀬 𑀭𑁄𑀧𑀦𑀓𑀸𑀮𑁂 𑀅𑀫𑁆𑀩𑀩𑀻𑀚𑀸𑀤𑀻𑀲𑀼 𑀇𑀘𑁆𑀙𑀺𑀢𑀯𑀡𑁆𑀡 𑀕𑀦𑁆𑀥𑀭𑀲𑀥𑀸𑀢𑀽𑀦𑀁 𑀧𑀭𑀺𑀪𑀸𑀯𑀦𑀸. 𑀢𑀢𑁆𑀣 𑀢𑀧𑁆𑀧𑀘𑁆𑀘𑀬𑀸 𑀓𑀸𑀮𑀦𑁆𑀢𑀭𑁂 𑀧𑀼𑀧𑁆𑀨𑀨𑀮𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑁂𑀯𑀡𑁆𑀡𑀕𑀦𑁆𑀥𑀭𑀲𑀸 𑀧𑀸𑀢𑀼𑀩𑁆𑀪𑀯𑀦𑁆𑀢𑀺. ‘‘𑀧𑀸𑀝𑀺𑀪𑁄𑀕𑁄’’𑀢𑀺 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀲𑀸𑀥𑁂𑀢𑀼𑀁 𑀧𑀭𑀲𑁆𑀲 𑀲𑀦𑁆𑀢𑀺𑀓𑁂 𑀇𑀡𑀁 𑀕𑀡𑁆𑀳𑀦𑁆𑀢𑀲𑁆𑀲 𑀢𑀯𑀥𑀦𑀁 𑀲𑀁𑀯𑀘𑁆𑀙𑀭𑁂𑀦 𑀯𑀼𑀟𑁆𑀠𑀺𑀬𑀸 𑀲𑀳 𑀤𑀲𑁆𑀲𑀸𑀫𑀺, 𑀲𑀘𑁂 𑀦𑀤𑀤𑁂𑀬𑁆𑀬𑀁. 𑀅𑀲𑀼𑀓𑀁 𑀦𑀸𑀫 𑀫𑀫𑀔𑁂𑀢𑁆𑀢𑀁 𑀯𑀸 𑀯𑀢𑁆𑀣𑀼𑀯𑀸 𑀢𑀼𑀬𑁆𑀳𑀁 𑀳𑁄𑀢𑀽𑀢𑀺 𑀧𑀝𑀺𑀜𑁆𑀜𑀸𑀞𑀧𑀦𑀁. 𑀢𑀢𑁆𑀣 𑀢𑀧𑁆𑀧𑀘𑁆𑀘𑀬𑀸 𑀥𑀦𑀁 𑀮𑀪𑀺𑀢𑁆𑀯𑀸 𑀢𑀁 𑀅𑀢𑁆𑀣𑀜𑁆𑀘 𑀲𑀸𑀥𑁂𑀢𑀺. 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀼𑀟𑁆𑀠𑀺𑀬𑀸 𑀲𑀳 𑀇𑀡𑀜𑁆𑀘 𑀲𑁄𑀥𑁂𑀢𑀺. ‘‘𑀯𑀺𑀚𑁆𑀚𑀸𑀲𑀺𑀧𑁆𑀧𑁄𑀲𑀥𑀸’’𑀢𑀺 𑀮𑁄𑀓𑁂 𑀧𑀼𑀢𑁆𑀢𑀓𑁂 𑀬𑀸𑀯𑀚𑀻𑀯𑀁 𑀳𑀺𑀢𑀢𑁆𑀣𑀸𑀬 𑀤𑀳𑀭𑀓𑀸𑀮𑁂 𑀓𑀺𑀜𑁆𑀘𑀺 𑀯𑀺𑀚𑁆𑀚𑀁𑀯𑀸 𑀲𑀺𑀧𑁆𑀧𑀁𑀯𑀸 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀬𑀸𑀯𑀚𑀻𑀯𑀁 𑀔𑀭𑀭𑁄𑀕𑀸𑀦𑀁 𑀅𑀦𑀼𑀧𑁆𑀧𑀸𑀤𑀢𑁆𑀣𑀸𑀬 𑀤𑀳𑀭𑀓𑀸𑀮𑁂 𑀑𑀚𑀯𑀦𑁆𑀢𑀁 𑀓𑀺𑀜𑁆𑀘𑀺 𑀑𑀲𑀥𑀁 𑀯𑀸 𑀅𑀚𑁆𑀛𑁄𑀳𑀸𑀭𑁂𑀦𑁆𑀢𑀺. 𑀢𑀢𑁆𑀣 𑀢𑀧𑁆𑀧𑀘𑁆𑀘𑀬𑀸 𑀧𑀼𑀢𑁆𑀢𑀸𑀦𑀁 𑀬𑀸𑀯𑀚𑀻𑀯𑀁 𑀳𑀺𑀢𑀧𑁆𑀧𑀝𑀺𑀮𑀸𑀪𑁄 𑀯𑀸 𑀢𑀸𑀤𑀺𑀲𑀸𑀦𑀁 𑀭𑁄𑀕𑀸𑀦𑀁 𑀅𑀦𑀼𑀧𑁆𑀧𑀸𑀤𑁄 𑀯𑀸 𑀳𑁄𑀢𑀺𑀬𑁂𑀯. 𑀏𑀢𑁂𑀳𑀺 𑀬𑀣𑀸 𑀓𑀸𑀮𑀦𑁆𑀢𑀭𑁂 𑀅𑀲𑀦𑁆𑀢𑁂𑀲𑀼𑀬𑁂𑀯 𑀧𑀸𑀝𑀺𑀪𑁄𑀕𑀸𑀤𑀻𑀲𑀼 𑀫𑀽𑀮𑀓𑀫𑁆𑀫𑁂𑀲𑀼 𑀧𑀼𑀩𑁆𑀩𑀪𑀸𑀕𑁂 𑀓𑀢𑀧𑀘𑁆𑀘𑀬𑀸 𑀏𑀯 𑀧𑀘𑁆𑀙𑀸 𑀅𑀢𑁆𑀣 𑀲𑀸𑀥𑀦𑀸𑀤𑀻𑀦𑀺 𑀲𑀺𑀚𑁆𑀛𑀦𑁆𑀢𑀺. 𑀢𑀣𑀸 𑀓𑀼𑀲𑀮𑀸 𑀓𑀼𑀲𑀮 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀓𑀸𑀮𑀦𑁆𑀢𑀭𑁂 𑀢𑁂𑀲𑀼 𑀅𑀲𑀦𑁆𑀢𑁂𑀲𑀼𑀧𑀺 𑀧𑀼𑀩𑁆𑀩𑁂 𑀓𑀢𑀢𑁆𑀢𑀸 𑀏𑀯 𑀧𑀘𑁆𑀙𑀸 𑀧𑀝𑀺𑀲𑀦𑁆𑀥𑀸𑀤𑀻𑀦𑀺 𑀨𑀮𑀸𑀦𑀺 𑀧𑀸𑀢𑀼𑀩𑁆𑀪𑀯𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀯𑀼𑀢𑁆𑀢𑀁 ‘‘𑀧𑀝𑀺𑀖𑁄𑀲 𑀧𑀤𑀻𑀧𑀫𑀼𑀤𑁆𑀤𑀸𑀤𑀻𑀦𑀺 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀸𑀦𑀻’’𑀢𑀺. ‘‘𑀓𑀫𑁆𑀫𑀤𑀼𑀩𑁆𑀩𑀮𑀪𑀸𑀯𑁂𑀦𑀸’’𑀢𑀺 𑀢𑀤𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀼𑀩𑁆𑀩𑀮𑀢𑁆𑀢𑀸 𑀓𑀫𑁆𑀫𑀫𑁆𑀧𑀺 𑀤𑀼𑀩𑁆𑀩𑀮𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀯𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀢𑀣𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 ‘‘𑀢𑀁 𑀧𑀻’’𑀢𑀺 𑀕𑀢𑀺𑀦𑀺𑀫𑀺𑀢𑁆𑀢𑀫𑁆𑀧𑀺. ‘‘𑀢𑀣𑀸 𑀘𑀯𑀦𑁆𑀢𑀸𑀦𑀁’’𑀢𑀺 𑀤𑀺𑀩𑁆𑀩𑀭𑀣𑀸𑀤𑀻𑀦𑀺 𑀕𑀢𑀺𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀘𑀯𑀦𑁆𑀢𑀸𑀦𑀁. ‘‘𑀤𑀬𑁆𑀳𑀫𑀸𑀦𑀓𑀸𑀬𑁂𑀦𑀸’’𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀕𑀸𑀣𑀸𑀬𑀁. 𑀧𑀜𑁆𑀘𑀤𑁆𑀯𑀸𑀭𑁂 𑀧𑀝𑀺𑀲𑀦𑁆𑀥𑀺𑀓𑀫𑁆𑀫𑀁 𑀯𑀺𑀦𑀸 𑀤𑁆𑀯𑀺𑀕𑁄𑀘𑀭𑁂 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀤𑁆𑀯𑀺𑀕𑁄𑀘𑀭𑁂’’𑀢𑀺 𑀓𑀫𑁆𑀫𑀦𑀺𑀫𑀺𑀢𑁆𑀢 𑀕𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑁂 𑀤𑁆𑀯𑀺𑀕𑁄𑀘𑀭𑁂. 𑀢𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑁂 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀧𑀜𑁆𑀘𑀤𑁆𑀯𑀸𑀭𑀺𑀓 𑀫𑀭𑀡𑀸𑀲𑀦𑁆𑀦 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀅𑀦𑁆𑀢𑁂 𑀘 𑀯𑀦𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺. 𑀲𑀸𑀧𑀺 𑀕𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑁂 𑀕𑁄𑀘𑀭𑁂 𑀲𑀺𑀬𑀸𑀢𑀺 𑀯𑀼𑀢𑁆𑀢𑁂 𑀧𑀜𑁆𑀘𑀤𑁆𑀯𑀸𑀭𑀺𑀓 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀪𑀽𑀢𑀸𑀦𑀺 𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀻𑀢𑀺𑀧𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀏𑀯𑀜𑁆𑀘 𑀲𑀢𑀺. 𑀢𑁂𑀲𑀁 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀅𑀦𑁆𑀢𑁂 𑀅𑀘𑀯𑀺𑀢𑁆𑀯𑀸 𑀢𑀤𑀦𑀼𑀩𑀦𑁆𑀥𑀓 𑀫𑀦𑁄𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑁂𑀳𑀺𑀧𑀺 𑀓𑀤𑀸𑀘𑀺 𑀓𑁂𑀲𑀜𑁆𑀘𑀺 𑀘 𑀯𑀦𑀁 𑀦𑀦𑀲𑀫𑁆𑀪𑀯𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑁂𑀲𑀼 𑀧𑀦 𑀅𑀦𑀼𑀩𑀦𑁆𑀥𑀓 𑀯𑀻𑀣𑀻𑀲𑀼 𑀅𑀢𑀻𑀢𑀕𑁆𑀕𑀳𑀡 𑀲𑀫𑀼𑀤𑀸𑀬𑀕𑁆𑀕𑀳𑀡𑁂𑀳𑀺 𑀘 𑀯𑀦𑁆𑀢𑀸𑀦𑀁 𑀅𑀢𑀻𑀢𑀸𑀦𑀺𑀧𑀺 𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀯𑀢𑁆𑀣𑀼𑀕𑁆𑀕𑀳𑀡𑀦𑀸𑀫𑀕𑁆𑀕𑀳𑀡𑁂𑀳𑀺 𑀘 𑀯𑀦𑁆𑀢𑀸𑀦𑀁 𑀥𑀫𑁆𑀫𑀸 𑀭𑀫𑁆𑀫𑀡𑀁𑀧𑀺 𑀮𑀩𑁆𑀪𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑀓𑀸𑀫𑀸𑀯𑀘𑀭 𑀧𑀝𑀺𑀲𑀦𑁆𑀥𑀺𑀬𑀸 𑀙 𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀸 𑀭𑀫𑁆𑀫𑀡𑀁 𑀉𑀧𑀮𑀩𑁆𑀪𑀢𑀻𑀢𑀺. 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀧𑀦 ‘𑀢𑀫𑁂𑀯 𑀢𑀣𑁄𑀧𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀢𑀻’𑀢𑀺 𑀏𑀯𑀁 𑀅𑀦𑁆𑀢𑀺𑀫𑀯𑀻𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀩𑀳𑀽𑀦𑀁 𑀯𑀻𑀣𑀺𑀯𑀸𑀭𑀸𑀦𑀁 𑀧𑀯𑀢𑁆𑀢𑀦𑀁 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀢𑀁 𑀢𑀣𑁄𑀧𑀝𑁆𑀞𑀺𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀆𑀭𑀩𑁆𑀪𑀸𑀢𑀺𑀧𑀺 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀏𑀯𑀜𑁆𑀘𑀲𑀢𑀺, 𑀕𑀢𑀺𑀦𑀺𑀫𑀺𑀢𑁆𑀢𑀁𑀧𑀺 𑀅𑀢𑀻𑀢𑀁 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀦𑁆𑀢𑀢𑀺 𑀯𑀲𑁂𑀦𑀸’’𑀢𑀺 𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦 𑀯𑀲𑁂𑀦. ‘‘𑀢𑀲𑁆𑀲𑀸’’𑀢𑀺 𑀕𑀢𑀺𑀦𑀺𑀫𑀺𑀢𑁆𑀢𑀲𑁆𑀲. 𑀬𑁂𑀪𑀽𑀬𑁆𑀬𑁂𑀦 𑀯𑀼𑀢𑁆𑀢𑁄, 𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁂𑀦 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀫𑀦𑁄𑀤𑁆𑀯𑀸𑀭𑀺𑀓 𑀫𑀭𑀡𑀸𑀲𑀦𑁆𑀦 𑀚𑀯𑀦𑀸𑀦𑀁𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸’’𑀢𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬 𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀤𑀦𑀼𑀩𑀦𑁆𑀥𑀸𑀬𑀸’’𑀢𑀺 𑀢𑀸𑀦𑀺 𑀫𑀦𑁄𑀤𑁆𑀯𑀸𑀭𑀺 𑀓𑀫𑀭𑀡𑀸𑀲𑀦𑁆𑀦 𑀚𑀯𑀦𑀸𑀦𑀺 𑀅𑀦𑀼𑀕𑀢𑀸𑀬. ‘‘𑀧𑀝𑀺𑀲𑀦𑁆𑀥𑀺𑀬𑀸𑀧𑀺 𑀲𑀫𑁆𑀪𑀯𑀢𑁄’’𑀢𑀺 𑀢𑀲𑁆𑀲 𑀧𑀼𑀭𑁂𑀚𑀸𑀢 𑀧𑀘𑁆𑀘𑀬𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀸𑀧𑀺 𑀧𑀼𑀭𑁂𑀚𑀸𑀢 𑀧𑀘𑁆𑀘𑀬𑀢𑀸 𑀲𑀫𑁆𑀪𑀯𑀢𑁄. 𑀦𑀦𑀼 𑀣𑁂𑀭𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀅𑀯𑀼𑀢𑁆𑀢𑁂𑀧𑀺 𑀪𑀺𑀦𑁆𑀤𑀺𑀢𑀩𑁆𑀩𑁂 𑀲𑀢𑀺, 𑀪𑀺𑀦𑁆𑀤𑀦𑀫𑁂𑀯 𑀬𑀼𑀢𑁆𑀢𑀦𑁆𑀢𑀺 𑀘𑁂. 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸, 𑀓𑀫𑁆𑀫𑀦𑀺𑀫𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸. 𑀢𑁂𑀦𑀸𑀳 ‘‘𑀦𑀘𑀢𑀁’’𑀢𑀺𑀆𑀤𑀺𑀁. 𑀯𑀺𑀪𑀸𑀯𑀦𑀺𑀬𑀁 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁𑀢𑀺 𑀯𑀢𑁆𑀯𑀸 𑀅𑀧𑀭𑁂𑀧𑀦 𑀅𑀯𑀺𑀲𑁂𑀲𑀢𑁄𑀯 𑀯𑀡𑁆𑀡𑁂𑀦𑁆𑀢𑀻𑀢𑀺 𑀅𑀧𑀭𑁂𑀯𑀸𑀤𑁄𑀧𑀺 𑀯𑀼𑀢𑁆𑀢𑁄. 𑀢𑀢𑁆𑀣 ‘‘𑀅𑀯𑀺𑀲𑁂𑀲𑀢𑁄 𑀯𑀡𑁆𑀡𑁂𑀦𑁆𑀢𑀻’’𑀢𑀺 𑀅𑀪𑀺𑀦𑁆𑀤𑀺𑀢𑁆𑀯𑀸𑀯 𑀯𑀡𑁆𑀡𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦 𑀢𑀁 𑀅𑀧𑀭𑁂𑀯𑀸𑀤𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀥 𑀧𑀦 𑀢𑀁 𑀅𑀧𑀭𑁂𑀯𑀸𑀤𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀧𑀼𑀦 ‘‘𑀬𑀜𑁆𑀘 𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀢𑀤𑀸𑀭𑀫𑁆𑀫𑀡𑀸𑀬𑀸’’𑀢𑀺 𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀸 𑀭𑀫𑁆𑀫𑀡𑀸𑀬. ‘‘𑀢𑁂𑀲𑀁 𑀯𑀘𑀦𑀁’’𑀢𑀺 𑀅𑀧𑀭𑁂𑀲𑀁 𑀯𑀘𑀦𑀁. ‘‘𑀅𑀜𑁆𑀜𑀢𑁆𑀭 𑀅𑀯𑀺𑀘𑀸𑀭𑀡𑀸𑀬𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀅𑀝𑁆𑀞𑀓𑀣𑀸𑀬𑀁 𑀧𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀯𑀺𑀘𑀸𑀭𑀡𑀸 𑀯𑀘𑀦𑀫𑁂𑀯 𑀳𑁄𑀢𑀻𑀢𑀺. 𑀲𑀘𑁆𑀘𑀁 𑀬𑀣𑀸 𑀤𑀺𑀝𑁆𑀞𑀧𑀸𑀞𑀯𑀲𑁂𑀦, 𑀲𑀸𑀯𑀲𑁂𑀲 𑀧𑀸𑀞𑀪𑀸𑀯𑀁 𑀧𑀦 𑀦 𑀯𑀺𑀘𑀸𑀭𑁂𑀢𑀺𑀬𑁂𑀯. 𑀢𑀲𑁆𑀫𑀸 ‘‘𑀅𑀜𑁆𑀜𑀢𑁆𑀭 𑀅𑀯𑀺𑀘𑀸𑀭𑀡𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀲𑀺𑀬𑀸. 𑀅𑀝𑁆𑀞𑀓𑀣𑀸𑀧𑀸𑀞𑁄 𑀲𑀸𑀯𑀲𑁂𑀲𑁄 𑀳𑁄𑀢𑀼, 𑀫𑀽𑀮𑀝𑀻𑀓𑀸𑀧𑀸𑀞𑁄 𑀧𑀦 𑀫𑀦𑁄𑀤𑁆𑀯𑀸𑀭𑁂 𑀬𑁂𑀯𑀸𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀓𑀣𑀁 𑀲𑀸𑀯𑀲𑁂𑀲𑁄 𑀲𑀺𑀬𑀸𑀢𑀺. 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄𑀧𑀺 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀣𑁂 𑀅𑀧𑀭𑀺𑀧𑀼𑀡𑁆𑀡𑁂 𑀲𑀸𑀯𑀲𑁂𑀲𑁄 𑀏𑀯 𑀳𑁄𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀁 𑀓𑀸𑀭𑀡𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀅𑀯𑀺𑀘𑀸𑀭𑀡𑀸𑀬𑀸’’𑀢𑀺. ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁’’𑀢𑀺𑀆𑀤𑀻𑀲𑀼. 𑀢𑀤𑀸𑀭𑀫𑁆𑀫𑀡𑀸𑀯𑀲𑀸𑀦𑀸𑀬 𑀧𑀜𑁆𑀘𑀤𑁆𑀯𑀸𑀭𑀺𑀓 𑀚𑀯𑀦𑀯𑀻𑀣𑀺𑀬𑀸 𑀘 𑀯𑀦𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀅𑀧𑀭𑀢𑁆𑀣𑀧𑀺. 𑀩𑀮𑀯𑀦𑁆𑀢𑁂𑀧𑀺 𑀲𑀢𑀺. 𑀢𑀤𑀸𑀭𑀫𑁆𑀫𑀡𑀸𑀯𑀲𑀸𑀦𑀸𑀬 𑀏𑀯 𑀯𑀻𑀣𑀺𑀬𑀸. ‘‘𑀯𑀼𑀢𑁆𑀢𑀢𑁆𑀢𑀸 𑀧𑀦𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀏𑀯 𑀯𑀼𑀢𑁆𑀢𑀢𑁆𑀢𑀸 𑀧𑀦. ‘‘𑀧𑀼𑀭𑀺𑀫𑀪𑀸𑀕𑁂 𑀏𑀯𑀸’’𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓 𑀅𑀦𑁆𑀢𑀺𑀫 𑀯𑀻𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀏𑀯. ‘‘𑀢𑀸𑀳𑀻’’𑀢𑀺 𑀤𑁂𑀬𑁆𑀬𑀥𑀫𑁆𑀫𑀯𑀢𑁆𑀣𑀽𑀳𑀺. ‘‘𑀬𑀣𑀸𑀢𑀁’’𑀢𑀺 𑀢𑀁 𑀅𑀢𑁆𑀣𑀚𑀸𑀢𑀁 𑀓𑀢𑀫𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. ‘‘𑀇𑀢𑁄’’𑀢𑀺 𑀫𑀦𑀼𑀲𑁆𑀲 𑀪𑀯𑀢𑁄. 𑀦𑀺𑀫𑀺𑀢𑁆𑀢 𑀲𑀤𑀺𑀲𑀁 𑀲𑀤𑁆𑀤𑀁 𑀯𑀡𑁆𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀝𑁆𑀞𑀘𑀓𑀸𑀭𑀁’’𑀢𑀺 𑀧𑀢𑀺𑀢𑀘𑀓𑀸𑀭𑀁. 𑀅𑀝𑁆𑀞𑀓𑀣𑀸𑀧𑀸𑀞𑁂 𑀜𑀸𑀢𑀓𑀸 𑀫𑀸𑀢𑀸𑀤𑀬𑁄 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀯𑀢𑁆𑀣𑀸𑀬𑀸’’𑀢𑀺 𑀢𑀯𑀅𑀢𑁆𑀣𑀸𑀬. ‘‘𑀘𑀻𑀦𑀧𑀝𑀲𑁄𑀫𑀸𑀭𑀧𑀝𑀸𑀤𑀺𑀯𑀲𑁂𑀦𑀸’’𑀢𑀺 𑀘𑀻𑀦𑀭𑀝𑁆𑀞𑁂 𑀧𑀯𑀢𑁆𑀢𑁄 𑀧𑀝𑁄 𑀘𑀻𑀦𑀧𑀝𑁄. 𑀢𑀣𑀸 𑀲𑁄𑀫𑀸𑀭𑀧𑀝𑁂𑀧𑀺. ‘‘𑀢𑀸𑀦𑀻’’𑀢𑀺 𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀺. 𑀨𑁄𑀝𑁆𑀞𑀩𑁆𑀩𑀁 𑀧𑀦 𑀅𑀜𑁆𑀜𑀁𑀧𑀺 𑀬𑀼𑀚𑁆𑀚𑀢𑁂𑀯. 𑀅𑀢𑁆𑀣𑀺𑀤𑀸𑀦𑀻𑀢𑀺 𑀫𑀦𑀲𑀺𑀓𑀢𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀸𑀦𑀻𑀢𑀺 𑀯𑀼𑀢𑁆𑀢𑀁. ‘‘𑀅𑀭𑀽𑀧𑀻𑀦𑀁’’𑀢𑀺 𑀅𑀭𑀽𑀧𑀩𑁆𑀭𑀳𑁆𑀫𑀸𑀦𑀁. ‘‘𑀢𑁂’’𑀢𑀺 𑀅𑀭𑀽𑀧𑀺𑀦𑁄. ‘‘𑀢𑀸𑀦𑀻’’𑀢𑀺 𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀸𑀦𑀺. 𑀯𑀺𑀲𑁆𑀲𑀝𑁆𑀞𑀁 𑀮𑀤𑁆𑀥𑀛𑀸𑀦𑀁 𑀬𑁂𑀲𑀁 𑀢𑁂 𑀯𑀺𑀲𑁆𑀲𑀝𑁆𑀞𑀚𑁆𑀛𑀸𑀦𑀸. ‘‘𑀢𑀢𑁄𑀬𑁂𑀯 𑀘𑀸’’𑀢𑀺 𑀯𑀺𑀲𑁆𑀲𑀝𑁆𑀞𑀚𑁆𑀛𑀸𑀦𑀢𑁆𑀢𑀸𑀬𑁂𑀯 𑀘. 𑀆𑀓𑀟𑁆𑀠𑀺𑀢𑀁 𑀫𑀸𑀦𑀲𑀁 𑀘𑀺𑀢𑁆𑀢𑀁 𑀏𑀢𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀇𑀤𑀜𑁆𑀘 𑀳𑁂𑀢𑀼𑀯𑀺𑀲𑁂𑀲𑀦 𑀧𑀤𑀁. 𑀆𑀓𑀟𑁆𑀠𑀺𑀢𑀫𑀸𑀦𑀲𑀢𑁆𑀢𑀸 𑀓𑀸𑀫𑀪𑀯𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀦𑁆𑀢𑀺 𑀤𑀻𑀧𑁂𑀢𑀺. 𑀢𑁂𑀲𑀁 𑀅𑀭𑀽𑀧𑀻𑀦𑀁. ‘‘𑀅𑀜𑁆𑀜𑀁 𑀤𑀼𑀩𑁆𑀩𑀮 𑀓𑀫𑁆𑀫𑀁’’𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀓𑀫𑁆𑀫𑀢𑁄 𑀅𑀜𑁆𑀜𑀁 𑀢𑀺𑀳𑁂𑀢𑀼𑀓𑁄𑀫𑀓𑀁 𑀓𑀫𑁆𑀫𑀁. ‘‘𑀢𑁂𑀲𑀁’’𑀢𑀺 𑀭𑀽𑀧𑀮𑁄𑀓𑀢𑁄 𑀘 𑀯𑀦𑁆𑀢𑀸𑀦𑀁. ‘‘𑀲𑀢𑁄’’𑀢𑀺 𑀲𑀦𑁆𑀢𑀲𑁆𑀲 𑀲𑀫𑀸𑀦𑀲𑁆𑀲. ‘‘𑀉𑀧𑀢𑁆𑀣𑀫𑁆𑀪𑀦𑁂 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺 𑀇𑀤𑀁 𑀉𑀧𑀘𑀸𑀭𑀚𑁆𑀛𑀸𑀦 𑀓𑀫𑁆𑀫𑀲𑁆𑀲 𑀕𑀭𑀼𑀓 𑀓𑀫𑁆𑀫𑀕𑀢𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀓𑀦𑁆𑀢 𑀕𑀭𑀼𑀓𑀓𑀫𑁆𑀫𑀪𑀽𑀢𑀁𑀧𑀺 𑀧𑀦 𑀫𑀳𑀕𑁆𑀕𑀢𑀚𑁆𑀛𑀸𑀦 𑀓𑀫𑁆𑀫𑀁 𑀦𑀸𑀫 𑀦𑀸𑀦𑀸𑀦𑀺𑀓𑀦𑁆𑀢𑀺 𑀩𑀮𑁂𑀦 𑀧𑀝𑀺𑀩𑀸𑀳𑀻𑀬𑀫𑀸𑀦𑀁 𑀧𑀝𑀺𑀲𑀦𑁆𑀥𑀺𑀁 𑀦 𑀤𑁂𑀢𑀺𑀬𑁂𑀯. 𑀉𑀧𑀘𑀸𑀭𑀚𑁆𑀛𑀸𑀦 𑀓𑀫𑁆𑀫𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑀸𑀤𑀺𑀲𑀸𑀦𑀻’’𑀢𑀺 𑀢𑀣𑀸 𑀭𑀽𑀧𑀸𑀦𑀺 𑀤𑁆𑀯𑀺𑀳𑁂𑀢𑀼𑀓𑁄𑀫𑀓 𑀓𑀫𑁆𑀫𑀸𑀦𑀺 𑀢𑁂𑀲𑀁 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺. 𑀦𑀻𑀯𑀭𑀡𑀸𑀦𑀁 𑀲𑀼𑀝𑁆𑀞𑀼𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀬𑁂𑀯. ‘‘𑀬𑁂𑀦𑀸’’𑀢𑀺 𑀬𑁂𑀦 𑀙𑀦𑁆𑀤𑀸𑀤𑀻𑀦𑀁 𑀧𑀯𑀢𑁆𑀢𑀺 𑀓𑀸𑀭𑀡𑁂𑀦. ‘‘𑀦𑀸𑀦𑀸𑀓𑀫𑁆𑀫𑀸𑀦𑀺 𑀧𑀻’’𑀢𑀺 𑀉𑀧𑀘𑀸𑀭𑀚𑁆𑀛𑀸𑀦 𑀓𑀫𑁆𑀫𑀢𑁄 𑀅𑀜𑁆𑀜𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦 𑀓𑀫𑁆𑀫𑀸𑀦𑀺𑀧𑀺 𑀅𑀢𑀻𑀢𑀪𑀯𑁂𑀲𑀼 𑀓𑀢𑀸𑀦𑀺 𑀅𑀧𑀭𑀧𑀭𑀺𑀬𑀸𑀬 𑀓𑀫𑁆𑀫𑀸𑀦𑀺𑀧𑀺. ‘‘𑀬𑁂𑀦 𑀘𑀸’’𑀢𑀺 𑀬𑁂𑀦 𑀦𑀸𑀦𑀸𑀓𑀫𑁆𑀫𑀸𑀦𑀫𑁆𑀧𑀺 𑀑𑀓𑀸𑀲 𑀮𑀸𑀪𑀓𑀸𑀭𑀡𑁂𑀦 𑀘. ‘‘𑀢𑁂’’𑀢𑀺 𑀭𑀽𑀧𑀻 𑀩𑁆𑀭𑀳𑁆𑀫𑀸𑀦𑁄. ‘‘𑀯𑀼𑀢𑁆𑀢𑀦𑀬𑁂𑀦𑁂 𑀯𑀸’’𑀢𑀺 𑀲𑀼𑀝𑁆𑀞𑀼𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀸𑀦𑀁 𑀢𑁂𑀲𑀁 𑀅𑀧𑁆𑀧𑀦𑀸 𑀧𑀢𑁆𑀢𑀚𑁆𑀛𑀸𑀦𑀯𑀺𑀲𑁂𑀲𑁂𑀦 [ 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺𑀦𑀸 𑀘 ] 𑀧𑀭𑀺𑀪𑀸𑀯𑀺𑀢 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁆𑀢𑀸’𑀢𑀺 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯. ‘‘𑀢𑀁 𑀓𑀸𑀭𑀡𑀁’’𑀢𑀺 𑀅𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺𑀬𑀸 𑀅𑀪𑀸𑀯 𑀓𑀸𑀭𑀡𑀁. 𑀧𑀭𑀫𑁆𑀧𑀭 𑀪𑀯𑁂𑀲𑀼𑀘 𑀯𑀻𑀣𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀣𑀸 𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻’’𑀢𑀺 𑀮𑁄𑀓𑁂 𑀏𑀓𑀁 𑀑𑀲𑀥𑀁 𑀮𑀪𑀺𑀢𑁆𑀯𑀸𑀢𑀁 𑀤𑁂𑀯𑀲𑀺𑀓𑀁 𑀪𑀼𑀜𑁆𑀚𑀢𑀺. 𑀏𑀓𑁄𑀧𑀣𑀫𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 𑀓𑀢𑀫𑀁 𑀦𑀸𑀫 𑀢𑁆𑀯𑀁 𑀑𑀲𑀥𑀁 𑀪𑀼𑀜𑁆𑀚𑀲𑀻𑀢𑀺 𑀧𑀼𑀘𑁆𑀙𑀺. 𑀇𑀤𑀁 𑀦𑀸𑀫 𑀑𑀲𑀥𑀁 𑀪𑀼𑀜𑁆𑀚𑀸𑀫𑀻𑀢𑀺 𑀯𑀤𑀢𑀺. 𑀧𑀼𑀦𑀤𑀺𑀯𑀲𑁂𑀲𑀼𑀧𑀺 𑀑𑀲𑀥𑀁 𑀪𑀼𑀜𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺. 𑀢𑀫𑁂𑀯 𑀑𑀲𑀥𑀁 𑀪𑀼𑀜𑁆𑀚𑀸𑀫𑀻𑀢𑀺 𑀯𑀤𑀢𑀺. 𑀢𑀢𑁆𑀣 ‘‘𑀢𑀫𑁂𑀯 𑀑𑀲𑀥𑀁’’𑀢𑀺 𑀬𑀁 𑀧𑀣𑀫𑀤𑀺𑀯𑀲𑁂 𑀑𑀲𑀥𑀁 𑀢𑀬𑀸𑀘 𑀧𑀼𑀘𑁆𑀙𑀺𑀢𑀁. 𑀫𑀬𑀸 𑀘 𑀓𑀣𑀺𑀢𑀁. 𑀢𑀫𑁂𑀯 𑀅𑀚𑁆𑀚 𑀪𑀼𑀜𑁆𑀚𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀦 𑀧𑀣𑀫𑀤𑀺𑀯𑀲𑁂 𑀪𑀼𑀢𑁆𑀢𑀁 𑀑𑀲𑀥𑀁 𑀅𑀜𑁆𑀜𑀁. 𑀅𑀚𑁆𑀚 𑀪𑀼𑀢𑁆𑀢𑀁 𑀅𑀜𑁆𑀜𑀁. 𑀢𑀁𑀲𑀤𑀺𑀲𑀁 𑀧𑀦 𑀅𑀜𑁆𑀜𑀁𑀧𑀺 𑀢𑀫𑁂𑀯𑀸𑀢𑀺 𑀮𑁄𑀓𑁂 𑀯𑁄𑀳𑀭𑀦𑁆𑀢𑀺 𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀺 𑀪𑀼𑀜𑁆𑀚𑀸𑀫𑀻𑀢𑀺. 𑀏𑀯𑀁 𑀇𑀥𑀧𑀺 𑀢𑀲𑁆𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑁄 𑀤𑀝𑁆𑀞𑀩𑁆𑀩𑁄. ‘‘𑀢𑀲𑁆𑀫𑀺𑀁’’𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑁂. 𑀅𑀯𑀢𑁆𑀢𑀫𑀸𑀦𑁂 𑀉𑀧𑀧𑀢𑁆𑀢𑀺𑀪𑀯𑁄 𑀑𑀘𑁆𑀙𑀺𑀚𑁆𑀚𑀢𑀺. 𑀯𑀢𑁆𑀢𑀫𑀸𑀦𑁂 𑀦 𑀑𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀉𑀧𑀧𑀢𑁆𑀢𑀺 𑀪𑀯𑀲𑁆𑀲 𑀅𑀦𑁄𑀘𑁆𑀙𑁂𑀤 𑀅𑀗𑁆𑀕𑀢𑁆𑀣𑀸𑀬 𑀓𑀸𑀭𑀡𑀢𑁆𑀢𑀸 𑀪𑀯𑀗𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀉𑀧𑀧𑀢𑁆𑀢𑀺 𑀪𑀯𑁄’’𑀢𑀺 𑀘 𑀓𑀫𑁆𑀫𑀚𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁 𑀯𑀼𑀘𑁆𑀘𑀢𑀺. ‘‘𑀧𑀭𑀲𑀫𑀬𑁂’’𑀢𑀺 𑀉𑀘𑁆𑀙𑁂𑀤 𑀤𑀺𑀝𑁆𑀞𑀻𑀦𑀁 𑀯𑀸𑀤𑁂. ‘‘𑀯𑀝𑁆𑀝𑀫𑀽𑀮𑀸𑀦𑀻’’𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸 𑀯𑀼𑀘𑁆𑀘𑀦𑁆𑀢𑀺. 𑀯𑀝𑁆𑀝𑀫𑀽𑀮𑀸𑀦𑀺 𑀲𑀼𑀝𑁆𑀞𑀼𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀬𑀲𑁆𑀲 𑀅𑀢𑁆𑀣𑀸𑀬𑀸’’𑀢𑀺 𑀲𑀉𑀧𑀸𑀤𑀺𑀲𑁂𑀲𑀸𑀤𑀺𑀓𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀝𑀺𑀮𑀸𑀪𑀢𑁆𑀣𑀸𑀬. ‘‘𑀧𑀝𑁆𑀞𑀧𑀻𑀬𑀦𑁆𑀢𑀻’’𑀢𑀺 𑀧𑀯𑀢𑁆𑀢𑀸𑀧𑀻𑀬𑀦𑁆𑀢𑀺. 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺 𑀅𑀭𑀺𑀬𑀸 𑀚𑀦𑀸 𑀏𑀢𑁆𑀣𑀸𑀢𑀺 𑀧𑀤𑀁. 𑀧𑀭𑀢𑁄 𑀲𑀫𑀦𑁆𑀢𑀺𑀧𑀤𑁂 𑀅𑀦𑀼𑀧𑀸𑀤𑀺𑀲𑁂𑀲𑀲𑁆𑀲 𑀕𑀬𑁆𑀳𑀫𑀸𑀦𑀢𑁆𑀢𑀸 𑀇𑀥 𑀲𑀉𑀧𑀸𑀤𑀺𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑀼𑀥𑀸. 𑀲𑀼𑀝𑁆𑀞𑀼 𑀲𑀤𑁆𑀥𑀺𑀁 𑀉𑀘𑁆𑀙𑀺𑀦𑁆𑀦𑀁 𑀲𑀺𑀦𑁂𑀳𑀩𑀦𑁆𑀥𑀦𑀁 𑀬𑁂𑀳𑀺 𑀢𑁂 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀲𑀺𑀦𑁂𑀳𑀩𑀦𑁆𑀥𑀦𑀸. 𑀓𑀣𑀜𑁆𑀘 𑀲𑀼𑀝𑁆𑀞𑀼𑀉𑀘𑁆𑀙𑀺𑀦𑁆𑀦𑀁, 𑀓𑁂𑀳𑀺 𑀘 𑀲𑀤𑁆𑀥𑀺𑀁 𑀉𑀘𑁆𑀙𑀺𑀦𑁆𑀦𑀦𑁆𑀢𑀺𑀆𑀳 ‘‘𑀅𑀦𑀼𑀲𑀬𑀫𑀢𑁆𑀢𑀁 𑀧𑀻’’𑀢𑀺𑀆𑀤𑀺𑀁. ‘‘𑀲𑁂𑀲𑀓𑀺𑀮𑁂𑀲𑁂𑀳𑀻’’𑀢𑀺 𑀢𑀡𑁆𑀳𑀸𑀲𑀺𑀦𑁂𑀳 𑀩𑀦𑁆𑀥𑀦𑀢𑁄 𑀅𑀯𑀲𑁂𑀲 𑀓𑀺𑀮𑁂𑀲𑁂𑀳𑀺. ‘‘𑀅𑀥𑀺𑀲𑀬𑀺𑀢𑀁’’𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀼𑀁𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀳𑀼𑀢𑁆𑀯𑀸 𑀅𑀢𑀺𑀭𑁂𑀓𑀢𑀭𑀁 𑀲𑀬𑀺𑀢𑀁. ‘‘𑀅𑀥𑀺𑀕𑀫𑀸𑀯𑀳𑀁’’𑀢𑀺 𑀅𑀥𑀺𑀕𑀫𑁄 𑀯𑀼𑀘𑁆𑀘𑀢𑀺 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑁄. 𑀢𑀁 𑀆𑀯𑀳𑀢𑀻𑀢𑀺 𑀅𑀥𑀺𑀕𑀫𑀸𑀯𑀳𑀁. ‘‘𑀲𑀻𑀮𑀁’’𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. ‘‘𑀥𑀼𑀢𑀗𑁆𑀕𑀁’’𑀢𑀺 𑀢𑁂𑀭𑀲𑀥𑀼𑀢𑀗𑁆𑀕𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.