𑁪. 𑀯𑀻𑀣𑀺𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁧𑁩𑁬. 𑀯𑀻𑀣𑀺𑀲𑀗𑁆𑀕𑀳𑁂. ‘‘𑀢𑁂𑀲𑀜𑁆𑀜𑁂 𑀯𑀸’’𑀢𑀺 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁 𑀏𑀯. ‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸’’𑀢𑀺 ‘𑀢𑀢𑁆𑀣 𑀘𑀺𑀢𑁆𑀢𑀁 𑀢𑀸𑀯 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁, 𑀢𑀺𑀆𑀤𑀺𑀦𑀸 𑀇𑀘𑁆𑀘𑁂𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. ‘‘𑀧𑀼𑀩𑁆𑀩𑀸 𑀧𑀭𑀦𑀺𑀬𑀸𑀫𑀺𑀢𑀁’’𑀢𑀺 𑀯𑀸 𑀤𑁆𑀯𑀢𑁆𑀢𑀺𑀁𑀲 𑀲𑀼𑀔 𑀧𑀼𑀜𑁆𑀜𑀫𑁆𑀳𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀩𑁆𑀩𑀸 𑀧𑀭𑀦𑀺𑀬𑀸𑀫𑀺𑀢𑀁. ‘‘𑀆𑀭𑀩𑁆𑀪𑀕𑀸𑀣𑀸𑀬𑀸’’𑀢𑀺.

𑀯𑀻𑀣𑀺 𑀘𑀺𑀢𑁆𑀢𑀯𑀲𑁂𑀦𑁂𑀯𑀁, 𑀧𑀯𑀢𑁆𑀢𑀺𑀬 𑀫𑀼𑀤𑀻𑀭𑀺𑀢𑁄;

𑀧𑀯𑀢𑁆𑀢𑀺 𑀲𑀗𑁆𑀕𑀳𑁄 𑀦𑀸𑀫, 𑀲𑀦𑁆𑀥𑀺𑀬𑀁 𑀤𑀸𑀦𑀺 𑀯𑀼𑀘𑁆𑀘𑀢𑀻.𑀢𑀺

𑀏𑀯𑀁 𑀧𑀯𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀺 𑀲𑀗𑁆𑀕𑀳𑁄, 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀧𑀯𑀢𑁆𑀢𑀺 𑀲𑀗𑁆𑀕𑀳𑁄𑀢𑀺 𑀲𑀺𑀤𑁆𑀥𑁄 𑀳𑁄𑀢𑀺. 𑀓𑁂𑀘𑀺 𑀯𑀸𑀤𑁂 ‘‘𑀧𑀝𑀺𑀲𑀦𑁆𑀥𑀺 𑀧𑀯𑀢𑁆𑀢𑀺𑀬𑀁’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀕𑀳𑀺𑀢𑁂 𑀤𑁆𑀯𑀻𑀲𑀼 𑀧𑀝𑀺𑀲𑀦𑁆𑀥𑀺 𑀲𑀗𑁆𑀕𑀳 𑀧𑀯𑀢𑁆𑀢𑀺 𑀲𑀗𑁆𑀕𑀳𑁂𑀲𑀼 𑀇𑀤𑀸𑀦𑀺 𑀧𑀯𑀢𑁆𑀢𑀺 𑀲𑀗𑁆𑀕𑀳𑀁 𑀧𑀯𑀓𑁆𑀔𑀸𑀫𑀺, 𑀧𑀘𑁆𑀙𑀸 𑀧𑀝𑀺𑀲𑀦𑁆𑀥𑀺 𑀲𑀗𑁆𑀕𑀳𑀁 𑀧𑀯𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀣 ‘‘𑀧𑀝𑀺𑀲𑀦𑁆𑀥𑀺 𑀲𑀗𑁆𑀕𑀳𑁄’’𑀢𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀲𑀗𑁆𑀕𑀳𑁄. ‘‘𑀧𑀯𑀢𑁆𑀢𑀺 𑀲𑀗𑁆𑀕𑀳𑁄’’𑀢𑀺 𑀧𑀯𑀢𑁆𑀢𑀺𑀓𑀸𑀮𑁂 𑀲𑀗𑁆𑀕𑀳𑁄. 𑀲𑁄 𑀘 𑀉𑀧𑀭𑀺𑀕𑀸𑀣𑀸𑀬 𑀦 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑀢𑀻’’𑀢𑀺𑀆𑀤𑀺𑀫𑀸𑀳. ‘‘𑀢𑀸𑀦𑀺 𑀢𑀻𑀡𑀺 𑀙𑀓𑁆𑀓𑀸𑀦𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀻’’𑀢𑀺 𑀙𑀓𑁆𑀓𑀫𑀢𑁆𑀢𑀸𑀦𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀺, 𑀦 𑀲𑀓𑀮𑀁. 𑀯𑀢𑁆𑀣𑀼 𑀤𑁆𑀯𑀸𑀭𑀸 𑀮𑀫𑁆𑀩𑀡 𑀲𑀗𑁆𑀕𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀸 𑀧𑀦𑀸’’𑀢𑀺 𑀲𑀸𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀧𑀦. ‘‘𑀓𑀸𑀘𑀺 𑀲𑀻𑀖𑀢𑀫𑀸’’𑀢𑀺 𑀓𑀸𑀘𑀺 𑀅𑀢𑀺𑀭𑁂𑀓𑀢𑀭𑀁 𑀲𑀻𑀖𑀸. ‘‘𑀤𑀦𑁆𑀥𑀸’’𑀢𑀺 𑀲𑀡𑀺𑀓𑀸, 𑀘𑀺𑀭𑀸𑀬𑀺𑀓𑀸. ‘‘𑀅𑀦𑀼𑀧𑀧𑀦𑁆𑀦𑀸’’𑀢𑀺 𑀅𑀲𑀫𑁆𑀧𑀦𑁆𑀦𑀸. 𑀅𑀲𑀫𑁆𑀧𑀦𑁆𑀦 𑀤𑁄𑀲𑁄 𑀆𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀥𑀸𑀢𑀼𑀪𑁂𑀤𑀁’’𑀢𑀺 𑀲𑀢𑁆𑀢 𑀯𑀺𑀜𑁆𑀜𑀸𑀡 𑀥𑀸𑀢𑀽𑀦𑀁 𑀯𑀺𑀪𑀸𑀕𑀁. ‘‘𑀥𑀸𑀢𑀼𑀦𑀸𑀦𑀢𑁆𑀢𑀁’’𑀢𑀺 𑀥𑀸𑀭𑀡 𑀓𑀺𑀘𑁆𑀘𑀦𑀸𑀦𑀢𑁆𑀢𑀁. 𑀇𑀢𑀺 𑀢𑀲𑁆𑀫𑀸 𑀫𑀦𑁄𑀥𑀸𑀢𑀼 𑀯𑀺𑀲𑀼𑀁 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀦𑀦𑀁’’𑀢𑀺 𑀯𑀺𑀚𑀸𑀦𑀦𑀪𑀸𑀯𑀁 𑀅𑀧𑀢𑁆𑀢𑀁. 𑀆𑀯𑀚𑁆𑀚𑀦𑀫𑀢𑁆𑀢 𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢 𑀲𑀗𑁆𑀔𑀸𑀢𑀁 𑀚𑀸𑀦𑀦𑀫𑀢𑁆𑀢𑀁. ‘‘𑀬𑀁 𑀓𑀺𑀜𑁆𑀘𑀺 𑀫𑀦𑀦𑀁’’𑀢𑀺 𑀅𑀦𑁆𑀢𑀫𑀲𑁄 𑀆𑀯𑀚𑁆𑀚𑀦𑀫𑀢𑁆𑀢 𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢𑀁 𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀼𑀤𑁆𑀥𑁄 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑁄’’𑀢𑀺 𑀫𑀦𑁄𑀤𑁆𑀯𑀸𑀭 𑀯𑀺𑀓𑀸𑀭𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑁄. 𑀦 𑀪𑀯𑀗𑁆𑀕 𑀫𑀦𑁄𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑁄. 𑀲𑁄 𑀳𑀺 𑀯𑀻𑀣𑀺𑀫𑀼𑀢𑁆𑀢𑀢𑁆𑀢𑀸 𑀇𑀥 𑀅𑀧𑁆𑀧𑀲𑀗𑁆𑀕𑁄𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀤𑁆𑀯𑀺𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀣𑀫𑀸𑀪𑀺𑀦𑀻𑀳𑀸𑀭𑀓𑀸𑀮𑁄 𑀦𑀸𑀫 𑀲𑀼𑀫𑁂𑀥𑀢𑀸𑀧𑀲𑀓𑀸𑀮𑁂 𑀩𑀼𑀤𑁆𑀥 𑀪𑀸𑀯𑀸𑀬 𑀓𑀸𑀬 𑀘𑀺𑀢𑁆𑀢𑀸𑀦𑀁 𑀅𑀪𑀺𑀦𑀻𑀳𑀸𑀭𑀓𑀸𑀮𑁄. 𑀆𑀤𑀺𑀲𑀤𑁆𑀤𑁂𑀦 𑀧𑀘𑁆𑀙𑀺𑀫 𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀚𑀸𑀢𑀺 𑀨𑀮𑀺𑀓𑀓𑁆𑀔𑀦𑁆𑀥𑀸 𑀯𑀺𑀬 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀢𑁂𑀦 𑀑𑀪𑀸𑀲𑁂𑀦 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸 𑀚𑀸𑀢𑀺𑀨𑀮𑀺𑀓𑀓𑁆𑀔𑀦𑁆𑀥 𑀲𑀤𑀺𑀲𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀉𑀧𑀧𑀢𑁆𑀢𑀺 𑀤𑁂𑀯 𑀩𑁆𑀭𑀳𑁆𑀫𑀸𑀦𑀁 𑀧𑀦𑀸’’𑀢𑀺 𑀉𑀧𑀧𑀢𑁆𑀢𑀺𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀑𑀧𑀧𑀸𑀢𑀺𑀓 𑀤𑁂𑀯 𑀩𑁆𑀭𑀳𑁆𑀫𑀸𑀦𑀁 𑀧𑀦. ‘‘𑀧𑀲𑀸𑀤 𑀦𑀺𑀲𑁆𑀲𑀬 𑀪𑀽𑀢𑀸𑀦𑀁’’𑀢𑀺 𑀘𑀓𑁆𑀔𑀸𑀤𑀻𑀦𑀁 𑀧𑀲𑀸𑀤 𑀯𑀢𑁆𑀣𑀽𑀦𑀁 𑀦𑀺𑀲𑁆𑀲𑀬 𑀫𑀳𑀸𑀪𑀽𑀢𑀸𑀦𑀁.

‘‘𑀬𑀸𑀦𑀺 𑀧𑀦𑀸’’𑀢𑀺𑀆𑀤𑀻𑀲𑀼. 𑀤𑁆𑀯𑀢𑁆𑀢𑀺 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀧𑀭𑀢𑁆𑀣𑀧𑀺. 𑀯𑀺𑀪𑀽𑀢𑀲𑁆𑀲𑀸𑀢𑀺 𑀘 𑀅𑀯𑀺𑀪𑀽𑀢𑀲𑁆𑀲𑀸𑀢𑀺 𑀘 𑀇𑀤𑀁 𑀆𑀤𑀺𑀫𑁆𑀳𑀺 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀯𑀺𑀪𑀽𑀢𑀲𑁆𑀲𑀸𑀢𑀺 𑀘 𑀅𑀯𑀺𑀪𑀽𑀢𑀲𑁆𑀲𑀸𑀢𑀺 𑀘 𑀧𑀤𑀸𑀦𑀁 𑀉𑀤𑁆𑀥𑀭𑀡𑀁. ‘‘𑀭𑀽𑀧𑀸 𑀭𑀽𑀧𑀸𑀦𑀁’’𑀢𑀺 𑀭𑀽𑀧 𑀥𑀫𑁆𑀫𑀸𑀦𑀜𑁆𑀘 𑀅𑀭𑀽𑀧 𑀥𑀫𑁆𑀫𑀸𑀦𑀜𑁆𑀘. ‘‘𑀢𑀸𑀯𑀸’’𑀢𑀺 𑀯𑀻𑀣𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀦𑀢𑁄 𑀧𑀣𑀫𑀢𑀭𑀁 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀸𑀦 𑀧𑀭𑀺𑀘𑁆𑀙𑁂𑀤𑀁’’𑀢𑀺 𑀔𑀡𑀓𑀸𑀮 𑀧𑀭𑀺𑀘𑁆𑀙𑁂𑀤𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀅𑀢𑀺𑀫𑀳𑀦𑁆𑀢𑀸 𑀤𑀺𑀯𑀲𑁂𑀦 𑀯𑀺𑀲𑀬 𑀯𑀯𑀢𑁆𑀣𑀸𑀦𑀁 𑀳𑁄𑀢𑀻’’𑀢𑀺 𑀯𑀘𑀦𑁂𑀦 𑀆𑀤𑀺𑀫𑁆𑀳𑀺 ‘𑀙𑀯𑀢𑁆𑀣𑀽𑀦𑀺, 𑀙 𑀤𑁆𑀯𑀸𑀭𑀸𑀦𑀺, 𑀙 𑀆𑀭𑀫𑁆𑀫𑀡𑀸𑀦𑀺, 𑀙 𑀯𑀺𑀜𑁆𑀜𑀸𑀡𑀸𑀦𑀺, 𑀙 𑀯𑀻𑀣𑀺𑀬𑁄, 𑀙 𑀥𑀸𑀯𑀺𑀲𑀬𑀧𑁆𑀧𑀯𑀢𑁆𑀢𑀻,𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀙𑀓𑁆𑀓𑁂𑀲𑀼 𑀙𑀥𑀸𑀯𑀺𑀲𑀬𑀧𑁆𑀧𑀯𑀢𑁆𑀢𑀻𑀢𑀺 𑀧𑀤𑀫𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀁 𑀅𑀦𑀼𑀧𑀧𑀦𑁆𑀦𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀏𑀯𑀜𑁆𑀳𑀺 𑀲𑀢𑀻’’𑀢𑀺𑀆𑀤𑀺𑀁. ‘‘𑀯𑀺𑀲𑀬 𑀯𑀯𑀢𑁆𑀣𑀸𑀦𑀢𑁆𑀣 𑀫𑁂𑀯𑀸’’𑀢𑀺 𑀅𑀢𑀺𑀫𑀳𑀦𑁆𑀢𑀸𑀤𑀺 𑀯𑀺𑀲𑀬 𑀯𑀯𑀢𑁆𑀣𑀸𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀦 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀭𑀽𑀧𑀸 𑀭𑀽𑀧 𑀥𑀫𑁆𑀫𑀸𑀦𑀁 𑀅𑀤𑁆𑀥𑀸𑀦 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀅𑀪𑀺𑀥𑀫𑁆𑀫𑁂 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀪𑀸𑀯𑀧𑁆𑀧𑀝𑀺𑀮𑀸𑀪𑁄’’𑀢𑀺 𑀘𑀺𑀦𑁆𑀢𑀦 𑀨𑀼𑀲𑀦𑀸𑀤𑀻𑀦𑀁 𑀧𑀸𑀢𑀼𑀪𑀸𑀯𑁄 𑀯𑀼𑀘𑁆𑀘𑀢𑀺. ‘‘𑀅𑀦𑀺𑀯𑀢𑁆𑀢𑀻’’𑀢𑀺 𑀅𑀦𑀦𑁆𑀢𑀭𑀥𑀸𑀦𑀁 𑀯𑀼𑀘𑁆𑀘𑀢𑀺. ‘‘𑀧𑀭𑀺𑀳𑀸𑀬𑀺𑀢𑁆𑀯𑀸’’𑀢𑀺 𑀚𑀭𑀸 𑀓𑀺𑀘𑁆𑀘𑀁 𑀆𑀳. ‘‘𑀅𑀘𑁆𑀙𑀭𑀸𑀲𑀗𑁆𑀖𑀸𑀝𑀓𑁆𑀔𑀡𑀲𑁆𑀲𑀸’’𑀢𑀺 𑀅𑀗𑁆𑀕𑀼𑀮𑀻𑀦𑀁 𑀲𑀗𑁆𑀖𑀝𑁆𑀝𑀦𑀓𑁆𑀔𑀡𑀲𑁆𑀲. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁄 𑀦𑀸𑀫 𑀅𑀪𑀺𑀥𑀫𑁆𑀫 𑀝𑀻𑀓𑀸𑀓𑀸𑀭𑁄 𑀯𑀼𑀘𑁆𑀘𑀢𑀺. ‘‘𑀅𑀲𑁆𑀲𑀸 𑀯𑀺𑀚𑁆𑀚𑀼𑀬𑀸𑀞𑀺𑀢𑀺 𑀦𑀸𑀫 𑀯𑀺𑀲𑀼𑀁 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀺𑀚𑁆𑀚𑀼𑀧𑁆𑀧𑀸𑀤𑀁 𑀧𑀲𑁆𑀲𑀦𑁆𑀢𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀢𑀣𑀸 𑀘𑀺𑀢𑁆𑀢𑀫𑁆𑀧𑀺 𑀯𑀟𑁆𑀠𑀦𑀸𑀦𑀦𑁆𑀢𑀭𑀫𑁂𑀯 𑀪𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀢𑀁 𑀧𑀻’’𑀢𑀺𑀆𑀤𑀺𑀁. 𑀉𑀤𑀬𑀪𑀸𑀕𑁄 𑀦𑀸𑀫 𑀯𑀟𑁆𑀠𑀦𑀪𑀸𑀕𑁄, 𑀯𑀬𑀪𑀸𑀕𑁄 𑀦𑀸𑀫 𑀅𑀦𑁆𑀢𑀭𑀥𑀸𑀦𑀪𑀸𑀕𑁄. ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺 𑀮𑀤𑁆𑀥𑀕𑀼𑀡 𑀯𑀘𑀦𑀁. ‘‘𑀏𑀓𑀁𑀘𑀺𑀢𑁆𑀢𑀁 𑀤𑀺𑀯𑀲𑀁 𑀢𑀺𑀝𑁆𑀞𑀢𑀻’’𑀢𑀺 𑀧𑀼𑀘𑁆𑀙𑀸 𑀯𑀘𑀦𑀁. ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀜𑁆𑀜𑀸 𑀯𑀘𑀦𑀁. ‘‘𑀯𑀬𑀓𑁆𑀔𑀡𑁄’’𑀢𑀺 𑀧𑀼𑀘𑁆𑀙𑀸. ‘‘𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀧𑀘𑁆𑀘𑀢𑁆𑀢 𑀯𑀘𑀦𑀲𑁆𑀲 𑀏𑀓𑀸𑀭𑀢𑁆𑀢𑀁. 𑀏𑀯𑀁 𑀦𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀫𑀳𑀸𑀣𑁂𑀭𑁂𑀦𑀸’’𑀢𑀺 𑀫𑁄𑀕𑁆𑀕𑀮𑀺 𑀧𑀼𑀢𑁆𑀢𑀢𑀺𑀲𑁆𑀲 𑀫𑀳𑀸𑀣𑁂𑀭𑁂𑀦. 𑀦𑀦𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀸’’𑀢𑀺 𑀦 𑀉𑀧𑀮𑀩𑁆𑀪𑀢𑀺. ‘‘𑀇𑀫𑀲𑁆𑀲 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀲𑀗𑁆𑀔𑀢 𑀮𑀓𑁆𑀔𑀡𑀁 𑀯𑀺𑀲𑀬𑁄 𑀬𑁂𑀲𑀁 𑀢𑀸𑀦𑀺 𑀲𑀗𑁆𑀔𑀢 𑀯𑀺𑀲𑀬 𑀮𑀓𑁆𑀔𑀡𑀸𑀦𑀺. 𑀲𑀗𑁆𑀔𑀢 𑀥𑀫𑁆𑀫𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀅𑀬𑀁 𑀅𑀪𑀺𑀥𑀫𑁆𑀫𑁂 𑀥𑀫𑁆𑀫𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀗𑁆𑀕𑀳 𑀓𑀸𑀭𑁂𑀦𑀸’’𑀢𑀺 𑀆𑀘𑀭𑀺𑀬 𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀁 𑀯𑀤𑀢𑀺. ‘‘𑀅𑀢𑁆𑀣𑀺𑀓𑁆𑀔𑀡𑀁’’𑀢𑀺 𑀔𑀡𑀤𑁆𑀯𑀬𑀫𑁂𑀯 𑀯𑀼𑀘𑁆𑀘𑀢𑀺. 𑀇𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀸𑀣𑀸𑀬𑀁. ‘‘𑀢𑀲𑁆𑀲𑁂𑀯𑀸’’𑀢𑀺 𑀢𑀲𑁆𑀲𑀸 𑀞𑀺𑀢𑀺𑀬𑀸 𑀏𑀯 𑀪𑁂𑀤𑁄. 𑀲𑀩𑁆𑀩𑀤𑀸 𑀲𑀩𑁆𑀩𑀧𑀸𑀡𑀺𑀦𑀁 𑀫𑀭𑀡𑀁 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀫𑀢𑁆𑀣𑀁’’𑀢𑀺 𑀢𑀸𑀦𑀺 𑀅𑀢𑁆𑀣𑀺𑀓𑁆𑀔𑀡𑀁 𑀉𑀧𑀸𑀤𑀸𑀬 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑀁. ‘‘𑀅𑀣𑀯𑀸’’𑀢𑀺 𑀏𑀓𑁄 𑀣𑁂𑀭𑀯𑀸𑀤𑁄. ‘‘𑀲𑀦𑁆𑀢𑀢𑀺 𑀯𑀲𑁂𑀦 𑀞𑀸𑀦𑀁’’𑀢𑀺 𑀞𑀺𑀢𑀸𑀬 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑁆𑀣 𑀞𑀺𑀢𑀪𑀸𑀯𑀲𑀗𑁆𑀔𑀸𑀢𑀁 𑀞𑀸𑀦𑀁 𑀲𑀦𑁆𑀢𑀢𑀺 𑀞𑀺𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂’’𑀢𑀺 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀸𑀬 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀯𑀤𑀢𑀺. ‘‘𑀅𑀧𑁆𑀧𑀝𑀺𑀩𑀸𑀳𑁂𑀢𑁆𑀯𑀸’’𑀢𑀺 𑀅𑀦𑀻𑀯𑀸𑀭𑁂𑀢𑁆𑀯𑀸. 𑀬𑀸𑀯𑀟𑁆𑀠𑀦𑀲𑁆𑀲 𑀦𑀺𑀯𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺. 𑀉𑀤𑀬 𑀧𑀭𑀺𑀬𑀦𑁆𑀢 𑀫𑀢𑁆𑀢𑀪𑀽𑀢𑀸 𑀲𑀸 𑀏𑀯 𑀦𑀺𑀯𑀢𑁆𑀢𑀺. ‘‘𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀻’’𑀢𑀺 𑀭𑀽𑀧 𑀚𑀭𑀸 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸. 𑀅𑀭𑀽𑀧 𑀚𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦𑀸𑀢𑀺 𑀏𑀯𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺. 𑀬𑀜𑁆𑀘 𑀢𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀤𑁆𑀯𑀺𑀥𑀸𑀪𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑀺𑀢𑁄. 𑀓𑀣𑀁, 𑀉𑀧𑀘𑀬𑁄 𑀲𑀦𑁆𑀢𑀢𑀻 𑀢𑀺𑀬𑁄𑀚𑀦𑀸. ‘‘𑀯𑀺𑀪𑀸𑀕𑀸 𑀭𑀳𑀲𑁆𑀲𑀸’’𑀢𑀺 𑀉𑀧𑁆𑀧𑀸𑀤𑁄 𑀉𑀧𑁆𑀧𑀚𑁆𑀚 𑀦𑀝𑁆𑀞𑁂𑀦 𑀏𑀓𑁄 𑀲𑀫𑀸𑀦𑁄 𑀭𑀽𑀧𑀸𑀦𑀁 𑀯𑀟𑁆𑀠𑀦 𑀲𑀫𑀬𑁂 𑀉𑀧𑁆𑀧𑀸𑀤𑁄. 𑀉𑀧𑀭𑀺 𑀯𑀟𑁆𑀠𑀦𑀝𑁆𑀞𑁂𑀦 𑀉𑀧𑀘𑀬𑁄𑀢𑀺 𑀯𑀼𑀢𑁆𑀢𑁄. 𑀅𑀯𑀟𑁆𑀠𑀺𑀢𑁆𑀯𑀸 𑀞𑀺𑀢 𑀲𑀫𑀬𑁂 𑀉𑀧𑁆𑀧𑀸𑀤𑁄 𑀬𑀣𑀸 𑀞𑀺𑀢 𑀦𑀻𑀳𑀸𑀭𑁂𑀦 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀺 𑀅𑀢𑁆𑀣𑁂𑀦 𑀲𑀦𑁆𑀢𑀢𑀻𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀯𑀺𑀪𑀸𑀕𑀸 𑀭𑀳𑀲𑁆𑀲. ‘‘𑀬𑀣𑀸𑀦𑀼𑀮𑁄𑀫 𑀲𑀸𑀲𑀦𑀁’’𑀢𑀺 𑀯𑀺𑀦𑁂𑀢𑀩𑁆𑀩 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀮𑁄𑀫 𑀲𑀸𑀲𑀦𑀁.

‘‘𑀅𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼. ‘‘𑀅𑀭𑀽𑀧𑀁’’𑀢𑀺 𑀲𑀩𑁆𑀩𑀲𑁄 𑀭𑀽𑀧𑀲𑀡𑁆𑀞𑀸𑀦 𑀭𑀳𑀺𑀢𑀢𑁆𑀢𑀸 𑀘𑀺𑀢𑁆𑀢 𑀘𑁂𑀢𑀲𑀺𑀓𑀁 𑀦𑀸𑀫𑀁 𑀯𑀼𑀘𑁆𑀘𑀢𑀺. ‘‘𑀅𑀭𑀽𑀧𑀺 𑀲𑀪𑀸𑀯𑀢𑁆𑀢𑀸’’𑀢𑀺 𑀅𑀭𑀽𑀧 𑀥𑀫𑁆𑀫 𑀲𑀪𑀸𑀯𑀢𑁆𑀢𑀸 𑀇𑀘𑁆𑀘𑁂𑀯𑀢𑁆𑀣𑁄. 𑀢𑀢𑁆𑀣 𑀅𑀭𑀽𑀧 𑀥𑀫𑁆𑀫 𑀲𑀪𑀸𑀯𑁄 𑀦𑀸𑀫 𑀭𑀽𑀧 𑀥𑀫𑁆𑀫𑀢𑁄 𑀲𑀢𑀕𑀼𑀡𑁂𑀦𑀯𑀸𑀲𑀳𑀲𑁆𑀲𑀕𑀼𑀡𑁂𑀦𑀯𑀸𑀲𑀡𑁆𑀳𑀲𑀼𑀔𑀼𑀫𑀲𑀪𑀸𑀯𑁄. 𑀯𑀺𑀪𑀸𑀯 𑀦𑀺𑀧𑀸𑀞𑁂. ‘‘𑀕𑀸𑀳𑀓 𑀕𑀳𑁂𑀢𑀩𑁆𑀩 𑀪𑀸𑀯𑀲𑁆𑀲 𑀢𑀁 𑀢𑀁 𑀔𑀡𑀯𑀲𑁂𑀦 𑀦𑀺𑀧𑁆𑀨𑀚𑁆𑀚𑀦𑀢𑁄’’𑀢𑀺 𑀏𑀢𑁆𑀣 𑀧𑀜𑁆𑀘𑀤𑁆𑀯𑀸𑀭 𑀯𑀻𑀣𑀻𑀲𑀼 𑀯𑀻𑀣𑀺 𑀘𑀺𑀢𑁆𑀢𑀸𑀦𑀜𑁆𑀘 𑀆𑀭𑀫𑁆𑀫𑀡𑀸𑀦𑀜𑁆𑀘 𑀯𑀺𑀲𑀬𑀻 𑀯𑀺𑀲𑀬𑀪𑀸𑀯𑁄 𑀕𑀸𑀳𑀓 𑀕𑀳𑁂𑀢𑀩𑁆𑀩 𑀪𑀸𑀯𑁄 𑀦𑀸𑀫. ‘‘𑀢𑀁 𑀢𑀁 𑀔𑀡𑀯𑀲𑁂𑀦 𑀦𑀺𑀧𑁆𑀨𑀚𑁆𑀚𑀦𑀢𑁄’’𑀢𑀺 𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀘 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀧𑀺 𑀆𑀯𑀚𑁆𑀚𑀦𑀸𑀤𑀻𑀳𑀺 𑀦𑀸𑀦𑀸 𑀓𑀺𑀘𑁆𑀘𑁂𑀳𑀺 𑀕𑀡𑁆𑀳𑀦𑁆𑀢𑀸 𑀏𑀯 𑀕𑀳𑀡 𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀦𑀸𑀦𑀸 𑀓𑀺𑀘𑁆𑀘𑀸𑀦𑀺 𑀘 𑀦𑀸𑀦𑀸 𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀆𑀭𑀫𑁆𑀫𑀡𑀸𑀦𑀺 𑀘 𑀧𑀼𑀭𑁂𑀚𑀸𑀢𑀸𑀦𑀺 𑀳𑀼𑀢𑁆𑀯𑀸 𑀬𑀸𑀯 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀥𑀭𑀫𑀸𑀦𑀸𑀦𑀺 𑀏𑀯 𑀕𑀳𑀡𑀁 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀏𑀯𑀁 𑀲𑀢𑀺, 𑀕𑀸𑀳𑀓𑀸𑀦𑀁 𑀯𑀻𑀣𑀺 𑀘𑀺𑀢𑁆𑀢𑀸𑀦𑀜𑁆𑀘 𑀔𑀡𑀢𑁆𑀢𑀬𑀸𑀬𑀼𑀓𑀢𑁆𑀢𑀸 𑀏𑀯 𑀕𑀸𑀳𑀓 𑀓𑀺𑀘𑁆𑀘𑀁 𑀦𑀺𑀧𑁆𑀨𑀚𑁆𑀚𑀢𑀺, 𑀲𑀺𑀚𑁆𑀛𑀢𑀺. 𑀕𑀳𑁂𑀢𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀲𑀢𑁆𑀢𑀭𑀲 𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑁆𑀢𑀸 𑀏𑀯 𑀕𑀳𑁂𑀢𑀩𑁆𑀩 𑀓𑀺𑀘𑁆𑀘𑀁 𑀦𑀺𑀧𑁆𑀨𑀚𑁆𑀚𑀢𑀺, 𑀲𑀺𑀚𑁆𑀛𑀢𑀺. 𑀏𑀯𑀁 𑀢𑀁 𑀢𑀁 𑀔𑀡 𑀯𑀲𑁂𑀦 𑀦𑀺𑀧𑁆𑀨𑀚𑁆𑀚𑀦𑀢𑁄. 𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬𑀁 𑀏𑀓 𑀘𑀺𑀢𑁆𑀢𑀓𑁆𑀔𑀡𑀺𑀓𑀁. 𑀓𑀲𑁆𑀫𑀸, 𑀘𑀺𑀢𑁆𑀢𑀸𑀦𑀼 𑀧𑀭𑀺𑀯𑀢𑁆𑀢𑀺 𑀥𑀫𑁆𑀫𑀢𑁆𑀢𑀸. ‘‘𑀉𑀧𑁆𑀧𑀸𑀤𑀫𑀢𑁆𑀢𑀸’’𑀢𑀺 𑀦𑀺𑀧𑁆𑀨𑀦𑁆𑀦 𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑀫𑀢𑁆𑀢𑀸. ‘‘𑀪𑀗𑁆𑀕𑀫𑀢𑁆𑀢𑀸’’𑀢𑀺 𑀢𑁂𑀲𑀫𑁂𑀯 𑀪𑀗𑁆𑀕𑀫𑀢𑁆𑀢𑀸. ‘‘𑀭𑀽𑀧 𑀥𑀫𑁆𑀫𑀸𑀦𑀁’’𑀢𑀺 𑀦𑀺𑀧𑁆𑀨𑀦𑁆𑀦 𑀭𑀽𑀧 𑀥𑀫𑁆𑀫𑀸𑀦𑀁. ‘‘𑀉𑀧𑁆𑀧𑀸𑀤𑀦𑀺𑀭𑁄𑀥 𑀯𑀺𑀥𑀸𑀦𑀲𑁆𑀲𑀸’’𑀢𑀺 𑀉𑀧𑁆𑀧𑀸𑀤 𑀦𑀺𑀭𑁄𑀥 𑀯𑀺𑀥𑀸𑀦𑀪𑀽𑀢𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀝𑀺𑀲𑀺𑀤𑁆𑀥𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀁’’𑀢𑀺 𑀢𑀁 𑀫𑀳𑀸𑀅𑀝𑁆𑀞𑀓𑀣𑀸 𑀯𑀘𑀦𑀁. ‘‘𑀢𑀲𑁆𑀫𑀺𑀁 𑀯𑀸𑀤𑁂’’𑀢𑀺 𑀢𑀲𑁆𑀫𑀺𑀁 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁂. ‘‘𑀢𑀢𑁆𑀣 𑀆𑀕𑀢𑀸’’𑀢𑀺 𑀢𑀲𑁆𑀫𑀺𑀁 𑀯𑀸𑀤𑁂 𑀆𑀕𑀢𑀸. 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀁 𑀝𑀻𑀓𑀸𑀦𑀬𑀁’’𑀢𑀺 𑀢𑀁 𑀲𑁄𑀴𑀲 𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓 𑀤𑀻𑀧𑀓𑀁 𑀫𑀽𑀮𑀝𑀻𑀓𑀸𑀦𑀬𑀁. 𑀢𑀤𑀢𑁆𑀣𑀁 𑀲𑀸𑀥𑁂𑀦𑁆𑀢𑁂𑀦 𑀯𑀺𑀪𑀸𑀯𑀦𑀺 𑀝𑀻𑀓𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀕𑀳𑀓𑀸𑀭𑀲𑁆𑀲 𑀅𑀝𑁆𑀞𑀓𑀣𑀸 𑀘𑀭𑀺𑀬𑀲𑁆𑀲. ‘‘𑀉𑀧𑀘𑀭𑀻𑀬𑀢𑀻’’𑀢𑀺 𑀉𑀧𑀘𑀸𑀭 𑀯𑀲𑁂𑀦 𑀯𑁄𑀳𑀭𑀻𑀬𑀢𑀺. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀏𑀢𑀸𑀦𑀻’’𑀢𑀺 𑀆𑀭𑀫𑁆𑀫𑀡𑀸𑀦𑀺. ‘‘𑀢𑀁’’𑀢𑀺 𑀢𑀁 𑀏𑀓 𑀘𑀺𑀢𑁆𑀢𑀓𑁆𑀔𑀡𑀁. ‘‘𑀢𑁂 𑀘𑀸’’𑀢𑀺 𑀭𑀽𑀧 𑀥𑀫𑁆𑀫𑀸 𑀘. ‘‘𑀧𑀭𑀺𑀧𑀼𑀡𑁆𑀡 𑀧𑀘𑁆𑀘𑀬𑀽𑀧𑀮𑀤𑁆𑀥𑀸’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀧𑀘𑁆𑀘𑀬𑀁 𑀉𑀧𑀮𑀤𑁆𑀥𑀸. ‘‘𑀲𑁄’’𑀢𑀺 𑀝𑀻𑀓𑀸𑀓𑀸𑀭𑁄. ‘‘𑀇𑀢𑀭𑀸𑀦𑀻’’𑀢𑀺 𑀕𑀦𑁆𑀥𑀭𑀲 𑀨𑁄𑀝𑁆𑀞𑀩𑁆𑀩𑀸𑀦𑀺. ‘‘𑀕𑁄𑀘𑀭𑀪𑀸𑀯𑀁’’𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓 𑀘𑀺𑀢𑁆𑀢𑀸𑀦𑀁 𑀕𑁄𑀘𑀭𑀪𑀸𑀯𑀁. ‘‘𑀧𑀼𑀭𑀺𑀫𑀸𑀦𑀺 𑀤𑁆𑀯𑁂’’𑀢𑀺 𑀭𑀽𑀧𑀲𑀤𑁆𑀤𑀸 𑀭𑀫𑁆𑀫𑀡𑀸𑀦𑀺. ‘‘𑀦𑀺𑀫𑀺𑀢𑁆𑀢 𑀯𑀲𑁂𑀦 𑀖𑀝𑁆𑀝𑁂𑀦𑁆𑀢𑀻’’𑀢𑀺 𑀆𑀤𑀸𑀲𑀁 𑀧𑀲𑁆𑀲𑀦𑁆𑀢𑀲𑁆𑀲 𑀫𑀼𑀔𑀲𑀤𑀺𑀲𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀫𑀼𑀔𑀧𑁆𑀧𑀝𑀺𑀩𑀺𑀫𑁆𑀩𑀁 𑀆𑀤𑀸𑀲𑁂 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀧𑀲𑀸𑀤𑁂 𑀲𑀤𑁆𑀤𑀸𑀭𑀫𑁆𑀫𑀡𑀜𑁆𑀘 𑀲𑁄𑀢𑀧𑀲𑀸𑀤𑁂 𑀢𑀁 𑀲𑀤𑀺𑀲 𑀦𑀺𑀫𑀺𑀢𑁆𑀢 𑀯𑀲𑁂𑀦 𑀖𑀝𑁆𑀝𑁂𑀦𑁆𑀢𑀺. 𑀦𑀯𑀢𑁆𑀣𑀼 𑀯𑀲𑁂𑀦 𑀖𑀝𑁆𑀝𑁂𑀦𑁆𑀢𑀺. 𑀲𑀬𑀁 𑀕𑀦𑁆𑀢𑁆𑀯𑀸 𑀦 𑀖𑀝𑁆𑀝𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀜𑁂𑀯 𑀆𑀭𑀫𑁆𑀫𑀡𑀸𑀦𑀁. ‘‘𑀦𑀺𑀫𑀺𑀢𑁆𑀢𑀼 𑀧𑀝𑁆𑀞𑀸𑀦 𑀯𑀲𑁂𑀦𑀸’’𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀯𑀲𑁂𑀦. ‘‘𑀦𑀺𑀫𑀺𑀢𑁆𑀢 𑀅𑀧𑁆𑀧𑀦𑀸𑀯𑀲𑁂𑀦𑀸’’𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀧𑀯𑁂𑀲𑀦 𑀯𑀲𑁂𑀦. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀅𑀲𑀫𑁆𑀧𑀢𑁆𑀢𑀸𑀦𑀺𑀬𑁂𑀯 𑀳𑀼𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. ‘‘𑀆𑀧𑀸𑀢𑀸 𑀕𑀫𑀦𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀻𑀲𑀼. ‘‘𑀮𑀜𑁆𑀙𑀓𑀸𑀦𑀁’’𑀢𑀺 𑀮𑀜𑁆𑀙𑀦𑀓𑀸𑀭𑀸𑀦𑀁. ‘‘𑀮𑀜𑁆𑀙𑀦𑀓𑁆𑀔𑀦𑁆𑀥𑀁’’𑀢𑀺 𑀅𑀬𑁄𑀫𑀬𑀁 𑀮𑀜𑁆𑀙𑀦𑀓𑁆𑀔𑀦𑁆𑀥𑀁. 𑀲𑁄 𑀘 𑀮𑀜𑁆𑀙𑀦𑀓𑁆𑀔𑀦𑁆𑀥𑁄 𑀢𑀸𑀮𑀧𑀡𑁆𑀡𑁂 𑀆𑀧𑀸𑀢𑁂𑀢𑁆𑀯𑀸 𑀅𑀓𑁆𑀔𑀭𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀢𑀢𑁆𑀣 ‘‘𑀆𑀧𑀸𑀢𑁂𑀢𑁆𑀯𑀸’’𑀢𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸. ‘‘𑀘𑀓𑁆𑀔𑀸𑀤𑀺𑀧𑁆𑀧𑀣𑁂’’𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑀬𑀓𑁆𑀔𑁂𑀢𑁆𑀢𑁂. 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀤𑁆𑀯𑀸𑀭𑁂𑀲𑀼 𑀏𑀯 𑀆𑀧𑀸𑀢 𑀫𑀸𑀕𑀘𑁆𑀙𑀦𑁆𑀢𑀺. 𑀅𑀣 𑀔𑁄 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀸𑀢 𑀫𑀸𑀕𑀘𑁆𑀙𑀦𑁆𑀢𑀺. 𑀦 𑀓𑁂𑀯𑀮𑀁 𑀪𑀯𑀗𑁆𑀕 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀆𑀧𑀸𑀢 𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀢𑁂𑀲𑀼 𑀧𑀦𑀸’’𑀢𑀺 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀦. 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀬𑁂𑀲𑀁 𑀢𑀸𑀦𑀺 𑀢𑀤𑀸 𑀭𑀫𑁆𑀫𑀡𑀸𑀦𑀺. 𑀦 𑀏𑀓𑀓𑁆𑀔𑀡𑁂 𑀧𑀜𑁆𑀘𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀏𑀓𑁂𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀏𑀯𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀤𑁆𑀯𑀻𑀲𑀼, 𑀦 𑀢𑀻𑀲𑀼, 𑀦 𑀘𑀢𑀽𑀲𑀽𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑁂 𑀧𑀜𑁆𑀘𑀤𑁆𑀯𑀸𑀭𑁂𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀤𑁆𑀯𑀸𑀭𑁂𑀢𑀺 𑀘 𑀧𑀜𑁆𑀘𑀤𑁆𑀯𑀸𑀭𑁂𑀲𑀽𑀢𑀺 𑀅𑀢𑁆𑀣𑁄. ‘‘𑀏𑀯𑀁 𑀲𑀢𑀻’’𑀢𑀺 𑀢𑁂𑀲𑀁 𑀧𑀲𑀸𑀤𑀸𑀦𑀁 𑀆𑀯𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀢𑁆𑀢𑀺𑀬𑀸 𑀲𑀢𑀺. ‘‘𑀆𑀤𑀺𑀮𑀓𑁆𑀔𑀡𑀁’’𑀢𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀁 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀸 𑀕𑀫𑀦 𑀲𑀗𑁆𑀔𑀸𑀢𑀁 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀬𑀸 𑀆𑀤𑀺𑀮𑀓𑁆𑀔𑀡𑀁. 𑀘𑀮𑀦𑀜𑁆𑀘 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀣𑀸 𑀕𑀳𑀺𑀢𑀁’’𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀕𑀳𑀺𑀢𑀧𑁆𑀧𑀓𑀸𑀭𑀁. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀬𑁄𑀕𑁆𑀬 𑀤𑁂𑀲𑀸𑀯𑀝𑁆𑀞𑀸𑀦 𑀯𑀲𑁂𑀦𑀸’’𑀢𑀺 𑀆𑀧𑀸𑀢𑀁 𑀆𑀕𑀦𑁆𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀯𑁂𑀘𑁆𑀘𑀝𑁆𑀞𑀸𑀦 𑀯𑀲𑁂𑀦. 𑀬𑀼𑀚𑁆𑀚𑀦𑀜𑁆𑀘, 𑀫𑀦𑁆𑀣𑀦𑀜𑁆𑀘, 𑀔𑁄𑀪𑀓𑀭𑀡𑀜𑁆𑀘, 𑀖𑀝𑁆𑀝𑀦𑀦𑁆𑀢𑀺 𑀘 𑀆𑀧𑀸𑀢𑀸 𑀕𑀫𑀦𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯 𑀆𑀧𑀸𑀢𑀸 𑀕𑀫𑀦𑀜𑁆𑀘𑁂𑀢𑁆𑀣𑀸𑀢𑀺𑀆𑀤𑀺𑀦𑀸. ‘‘𑀦𑀸𑀦𑀸 𑀞𑀸𑀦𑀺𑀬𑁂𑀲𑀽’’𑀢𑀺 𑀦𑀸𑀦𑀸 𑀞𑀸𑀦𑁂𑀲𑀼 𑀞𑀺𑀢𑁂𑀲𑀼. ‘‘𑀏𑀓𑁄 𑀥𑀫𑁆𑀫𑀦𑀺𑀬𑀸𑀫𑁄 𑀦𑀸𑀫𑀸’’𑀢𑀺 𑀬𑀣𑀸 𑀩𑁄𑀥𑀺𑀲𑀢𑁆𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑁂 𑀥𑀫𑁆𑀫𑀦𑀺𑀬𑀸𑀫 𑀯𑀲𑁂𑀦 𑀲𑀓𑀮𑁂 𑀚𑀸𑀢𑀺𑀓𑁆𑀔𑁂𑀢𑁆𑀢𑁂 𑀧𑀣𑀯𑀺𑀓𑀫𑁆𑀧𑀦𑀁 𑀅𑀳𑁄𑀲𑀺. 𑀢𑀣𑀸 𑀇𑀥𑀧𑀺 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀆𑀭𑀫𑁆𑀫𑀡𑁂 𑀖𑀝𑁆𑀝𑁂𑀦𑁆𑀢𑁂 𑀥𑀫𑁆𑀫𑀦𑀺𑀬𑀸𑀫 𑀯𑀲𑁂𑀦 𑀪𑀯𑀗𑁆𑀕 𑀘𑀮𑀦𑀁 𑀳𑁄𑀢𑀺. 𑀅𑀬𑀁 𑀥𑀫𑁆𑀫𑀦𑀺𑀬𑀸𑀫𑁄 𑀦𑀸𑀫. ‘‘𑀲𑀳𑁂𑀯𑀸’’𑀢𑀺 𑀏𑀓𑀢𑁄𑀬𑁂𑀯. 𑀓𑀣𑀁 𑀳𑀤𑀬 𑀯𑀢𑁆𑀣𑀼 𑀦𑀺𑀲𑁆𑀲𑀺𑀢𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁆𑀲 𑀘𑀮𑀦𑀁 𑀲𑀺𑀬𑀸𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸, 𑀢𑀤𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀤𑀸 𑀘 𑀢𑀁 𑀯𑀺𑀚𑁆𑀚𑀢𑀺, 𑀢𑀤𑀸 𑀢𑀁 𑀦 𑀘𑀮𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀳𑀺 𑀯𑀻𑀣𑀺𑀘𑀺𑀢𑁆𑀢𑀁 𑀦𑀸𑀫 𑀘𑀮𑀢𑀺 𑀬𑁂𑀯𑀸𑀢𑀺. 𑀲𑀦𑁆𑀢𑀢𑀺 𑀦𑀸𑀫 𑀧𑀼𑀩𑁆𑀩𑀸 𑀧𑀭𑀧𑁆𑀧𑀩𑀦𑁆𑀥𑁄. 𑀲𑀡𑁆𑀞𑀸𑀦𑀁 𑀦𑀸𑀫 𑀲𑀳𑀧𑁆𑀧𑀯𑀢𑁆𑀢𑀸𑀦𑀁 𑀏𑀓𑀢𑁄 𑀞𑀺𑀢𑀺. 𑀇𑀥 𑀲𑀡𑁆𑀞𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀜𑁆𑀘𑀦𑀺𑀲𑁆𑀲𑀬 𑀫𑀳𑀸𑀪𑀽𑀢𑁂𑀳𑀺 𑀲𑀤𑁆𑀥𑀺𑀁 𑀳𑀤𑀬 𑀯𑀢𑁆𑀣𑀼 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀏𑀓 𑀲𑀡𑁆𑀞𑀸𑀦 𑀪𑀸𑀯𑁂𑀦 𑀏𑀓𑀸𑀩𑀤𑁆𑀥𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀡𑁆𑀞𑀸𑀦 𑀯𑀲𑁂𑀦𑀸𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁’’𑀢𑀺. ‘‘𑀢𑀸𑀤𑀺𑀲𑀲𑁆𑀲 𑀅𑀦𑀼𑀓𑁆𑀓𑀫 𑀘𑀮𑀦𑀲𑁆𑀲𑀸’’𑀢𑀺 𑀯𑀺𑀪𑀸𑀯𑀦𑀺𑀬𑀁 𑀪𑁂𑀭𑀺𑀲𑀓𑁆𑀔𑀭𑁄𑀧𑀫𑀸𑀬 𑀲𑀤𑁆𑀥𑀺𑀁 𑀭𑀽𑀧𑀸𑀤𑀺𑀦𑀸 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀦𑁆𑀦𑀺𑀲𑁆𑀲 𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀘𑀮𑀺𑀢𑁂𑀲𑀼 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀲𑀫𑁆𑀩𑀦𑁆𑀥𑀸𑀦𑀁 𑀲𑁂𑀲𑀭𑀽𑀧𑀸𑀦𑀫𑁆𑀧𑀺 𑀘𑀮𑀦𑁂𑀦 𑀳𑀤𑀬 𑀯𑀢𑁆𑀣𑀼𑀫𑁆𑀳𑀺 𑀘𑀮𑀺𑀢𑁂 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀸 𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀅𑀦𑀼𑀓𑁆𑀓𑀫 𑀘𑀮𑀦𑀲𑁆𑀲. ‘‘𑀪𑀯𑀗𑁆𑀕𑀧𑁆𑀧𑀯𑀸𑀳𑀁’’𑀢𑀺 𑀪𑀯𑀗𑁆𑀕 𑀲𑀦𑁆𑀢𑀢𑀺𑀁. ‘‘𑀓𑀼𑀭𑀼𑀫𑀸𑀦𑀁’’𑀢𑀺 𑀓𑀭𑁄𑀦𑁆𑀢𑀁. 𑀲𑀮𑁆𑀮𑀓𑁆𑀔𑁂𑀦𑁆𑀢𑀁’’𑀢𑀺 𑀇𑀤𑀫𑁂𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀧𑁂𑀦𑁆𑀢𑀁. ‘‘𑀬𑁄𑀦𑀺 𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦𑀸’’𑀢𑀺 𑀬𑁄𑀦𑀺 𑀲𑁄𑀫𑀦𑀲𑀺𑀓𑀸𑀭𑁄 𑀓𑀼𑀲𑀮 𑀚𑀯𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄. 𑀅𑀬𑁄𑀦𑀺 𑀲𑁄𑀫𑀦𑀲𑀺𑀓𑀸𑀭𑁄 𑀅𑀓𑀼𑀲𑀮 𑀚𑀯𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄. 𑀦𑀺𑀭𑀦𑀼𑀲𑀬 𑀲𑀦𑁆𑀢𑀸𑀦𑀢𑀸 𑀓𑁆𑀭𑀺𑀬𑀚𑀯𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄. 𑀢𑁂𑀲𑀼 𑀘 𑀲𑁄𑀫𑀦𑀲𑁆𑀲 𑀚𑀯𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺 𑀧𑀘𑁆𑀘𑀬𑁄𑀧𑀺 𑀳𑁂𑀝𑁆𑀞𑀸 𑀘𑀺𑀢𑁆𑀢 𑀲𑀗𑁆𑀕𑀳𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

‘‘𑀪𑀯𑀗𑁆𑀕𑀧𑀸𑀢𑁄’’𑀢𑀺𑀆𑀤𑀻𑀲𑀼. ‘‘𑀆𑀯𑀚𑁆𑀚𑀦𑀢𑁄 𑀧𑀝𑁆𑀞𑀸𑀬 𑀉𑀝𑁆𑀞𑀺𑀢𑀁’’𑀢𑀺 𑀓𑀫𑁆𑀫 𑀯𑀺𑀧𑀸𑀓𑀲𑀦𑁆𑀢𑀸𑀦𑀢𑁄 𑀘 𑀢𑀤𑀸𑀭𑀫𑁆𑀫𑀡𑀢𑁄 𑀘 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑀼𑀁 𑀓𑁆𑀭𑀺𑀬𑀸𑀫𑀬 𑀩𑁆𑀬𑀸𑀧𑀸𑀭𑁂𑀦 𑀆𑀭𑀫𑁆𑀫𑀡𑀦𑁆𑀢𑀭𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀺𑀢𑀁 𑀲𑀫𑀼𑀝𑁆𑀞𑀺𑀢𑀁. 𑀪𑀯𑀗𑁆𑀕 𑀘𑀮𑀦𑀫𑁆𑀧𑀺 𑀉𑀝𑁆𑀞𑀸𑀦𑀲𑁆𑀲 𑀆𑀤𑀺 𑀳𑁄𑀢𑀺. 𑀢𑀲𑁆𑀫𑀸 𑀢𑀫𑁆𑀧𑀺 𑀉𑀝𑁆𑀞𑀺𑀢𑁂 𑀘𑀺𑀢𑁆𑀢 𑀲𑀦𑁆𑀢𑀸𑀦𑁂 𑀲𑀗𑁆𑀕𑀡𑁆𑀳𑀦𑁆𑀢𑁄 𑀧𑀣𑀫 𑀪𑀯𑀗𑁆𑀕 𑀘𑀮𑀦𑀢𑁄𑀬𑁂𑀯 𑀯𑀸𑀢𑀺 𑀯𑀼𑀢𑁆𑀢𑀁. ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂’’𑀢𑀺 𑀯𑀻𑀣𑀺 𑀘𑀺𑀢𑁆𑀢𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀳𑀺 𑀆𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑁂. ‘‘𑀤𑁄𑀯𑀸𑀭𑀺𑀓𑁄𑀧𑀫𑀸’’𑀢𑀺 𑀩𑀥𑀺𑀭𑀤𑁄𑀯𑀸𑀭𑀺𑀓𑁄𑀧𑀫𑀸. ‘‘𑀕𑀸𑀫𑀺𑀮𑁆𑀮𑁄𑀧𑀫𑀸’’𑀢𑀺 𑀕𑀸𑀫𑀤𑀸𑀭𑀓𑁄𑀧𑀫𑀸. ‘‘𑀅𑀫𑁆𑀩𑁄𑀧𑀫𑀸’’𑀢𑀺 𑀅𑀫𑁆𑀩𑀧𑁆𑀨𑀮𑁄𑀧𑀫𑀸. 𑀅𑀜𑁆𑀜𑀸𑀧𑀺 𑀉𑀧𑀫𑀸 𑀅𑀢𑁆𑀣𑀺. 𑀫𑀓𑁆𑀓𑀝𑀲𑀼𑀢𑁆𑀢𑁄𑀧𑀫𑀸, 𑀉𑀘𑁆𑀙𑀼𑀬𑀦𑁆𑀢𑁄𑀧𑀫𑀸, 𑀚𑀘𑁆𑀘𑀦𑁆𑀥𑁄𑀧𑀫𑀸. 𑀢𑀸𑀲𑀩𑁆𑀩𑀸𑀧𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀺𑀧𑀸𑀓𑀼𑀤𑁆𑀥𑀸𑀭 𑀓𑀣𑀸𑀢𑁄 𑀕𑀳𑁂𑀢𑀩𑁆𑀩𑀸. ‘‘𑀬𑀢𑁆𑀣𑀳𑀻’’𑀢𑀺𑀆𑀤𑀻𑀲𑀼. ‘‘𑀓𑀣𑀁 𑀙 𑀙𑀓𑁆𑀓 𑀬𑁄𑀚𑀦𑀸 𑀳𑁄𑀢𑀻’’𑀢𑀺. 𑀘𑀓𑁆𑀔𑀼 𑀯𑀢𑁆𑀣𑀼 𑀯𑀘𑀦𑀜𑁆𑀘, 𑀘𑀓𑁆𑀔𑀼𑀤𑁆𑀯𑀸𑀭 𑀯𑀘𑀦𑀜𑁆𑀘, 𑀭𑀽𑀧𑀸 𑀭𑀫𑁆𑀫𑀡 𑀯𑀘𑀦𑀜𑁆𑀘, 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡 𑀯𑀘𑀦𑀜𑁆𑀘, 𑀘𑀓𑁆𑀔𑀼𑀤𑁆𑀯𑀸𑀭 𑀯𑀻𑀣𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡 𑀯𑀻𑀣𑀺 𑀯𑀘𑀦𑀜𑁆𑀘, 𑀅𑀢𑀺𑀫𑀳𑀦𑁆𑀢𑀸 𑀭𑀫𑁆𑀫𑀡 𑀯𑀘𑀦𑀜𑁆𑀘𑀸,𑀢𑀺 𑀏𑀢𑀸𑀦𑀺 𑀙𑀯𑀘𑀦𑀸𑀦𑀺. 𑀢𑁂𑀳𑀺 𑀙𑀙𑀓𑁆𑀓𑁂𑀳𑀺 𑀆𑀳𑀭𑀺𑀢𑁆𑀯𑀸 𑀇𑀫𑀺𑀲𑁆𑀲𑀁 𑀯𑀻𑀣𑀺𑀬𑀁 𑀤𑀲𑁆𑀲𑀺𑀢𑀸𑀦𑀺. 𑀲𑁂𑀲𑀯𑀻𑀣𑀻𑀲𑀼𑀧𑀺 𑀬𑀣𑀸𑀮𑀸𑀪𑀁 𑀤𑀲𑁆𑀲𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀙𑀙𑀓𑁆𑀓𑀬𑁄𑀚𑀦𑀸 𑀳𑁄𑀢𑀺. ‘‘𑀏𑀢𑁆𑀣 𑀘 𑀬𑀢𑁆𑀢𑀓𑀸𑀦𑀻’’𑀢𑀺𑀆𑀤𑀻𑀲𑀼. ‘‘𑀏𑀓𑀽𑀦 𑀧𑀜𑁆𑀜𑀸𑀲 𑀧𑀭𑀺𑀫𑀸𑀡𑁂𑀲𑀽’’𑀢𑀺 𑀏𑀓𑀲𑁆𑀲𑀦𑀺𑀧𑁆𑀨𑀦𑁆𑀦 𑀭𑀽𑀧𑀥𑀫𑁆𑀫𑀲𑁆𑀲 𑀏𑀓𑀧𑀜𑁆𑀜𑀸𑀲 𑀫𑀢𑁆𑀢𑁂𑀲𑀼 𑀔𑀼𑀤𑁆𑀤𑀓𑀓𑁆𑀔𑀡𑁂𑀲𑀼 𑀉𑀧𑁆𑀧𑀸𑀤𑀓𑁆𑀔𑀡𑀜𑁆𑀘 𑀪𑀗𑁆𑀕𑀓𑁆𑀔𑀡𑀜𑁆𑀘 𑀞𑀧𑁂𑀢𑁆𑀯𑀸 𑀫𑀚𑁆𑀛𑁂 𑀏𑀓𑀽𑀦 𑀧𑀜𑁆𑀜𑀸𑀲 𑀫𑀢𑁆𑀢𑀸𑀦𑀺 𑀞𑀺𑀢𑀺𑀓𑁆𑀔𑀡𑀸𑀦𑀺 𑀲𑀦𑁆𑀢𑀺. 𑀢𑁂𑀲𑀼 𑀔𑀡𑁂𑀲𑀼 𑀅𑀦𑀼𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀸 𑀏𑀓𑀽𑀦 𑀧𑀜𑁆𑀜𑀸𑀲 𑀘𑀓𑁆𑀔𑀼 𑀧𑀲𑀸𑀤𑀸 𑀘 𑀲𑀦𑁆𑀢𑀺. ‘‘𑀓𑀺𑀲𑁆𑀫𑀺𑀜𑁆𑀘𑀻’’𑀢𑀺 𑀢𑁂𑀲𑀼 𑀓𑀢𑀭𑀲𑁆𑀫𑀺𑀁 𑀦𑀸𑀫 𑀘𑀓𑁆𑀔𑀼 𑀧𑀲𑀸𑀤𑁂 𑀦 𑀖𑀝𑁆𑀝𑁂𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺. ‘‘𑀢𑁂𑀲𑀼 𑀧𑀦𑀸’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀘𑀦𑀁. ‘‘𑀬𑀤𑁂𑀯 𑀏𑀓𑀁 𑀘𑀓𑁆𑀔𑀽’’𑀢𑀺 𑀦𑀺𑀤𑁆𑀥𑀸𑀭𑀡𑀻𑀬𑀁. 𑀢𑀁 𑀧𑀦 𑀓𑀢𑀫𑀦𑁆𑀢𑀺. 𑀅𑀢𑀻𑀢 𑀪𑀯𑀗𑁆𑀕𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑁆𑀫 𑀪𑀯𑀗𑁆𑀕 𑀘𑀮𑀦𑀓𑁆𑀔𑀡𑁂 𑀮𑀤𑁆𑀥𑀖𑀝𑀦𑀁 𑀏𑀓𑀁 𑀘𑀓𑁆𑀔𑀼. 𑀢𑀁 𑀧𑀦 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼 𑀪𑀸𑀯𑀜𑁆𑀘 𑀤𑁆𑀯𑀸𑀭𑀪𑀸𑀯𑀜𑁆𑀘 𑀲𑀸𑀥𑁂𑀢𑀺. 𑀲𑁂𑀲𑀯𑀺𑀜𑁆𑀜𑀸𑀡𑀸𑀦𑀁 𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑁂𑀢𑀻𑀢𑀺. 𑀢𑁂𑀦𑀸𑀳 ‘‘𑀬𑀣𑀸𑀭𑀳𑀁’’𑀢𑀺. 𑀏𑀢𑀤𑁂𑀯 𑀏𑀢𑀁 𑀏𑀯 𑀘𑀓𑁆𑀔𑀼 𑀓𑀺𑀘𑁆𑀘 𑀲𑀸𑀥𑀦𑀁 𑀦𑀸𑀫 𑀳𑁄𑀢𑀺 𑀯𑀻𑀣𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀢𑁆𑀣𑀼 𑀓𑀺𑀘𑁆𑀘𑀤𑁆𑀯𑀸𑀭 𑀓𑀺𑀘𑁆𑀘𑀸𑀦𑀁 𑀲𑀸𑀥𑀦𑀢𑁄. ‘‘𑀬𑀁 𑀫𑀚𑁆𑀛𑀺𑀫𑀸𑀬𑀼𑀓𑀁’’𑀢𑀺 𑀫𑀦𑁆𑀤𑀸𑀬𑀼𑀓 𑀅𑀫𑀦𑁆𑀤𑀸𑀬𑀼𑀓𑀸𑀦𑀁 𑀫𑀚𑁆𑀛𑁂 𑀧𑀯𑀢𑁆𑀢𑀢𑁆𑀢𑀸 𑀬𑀁 𑀫𑀚𑁆𑀛𑀺𑀫𑀸𑀬𑀼𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀓𑀺𑀘𑁆𑀘 𑀲𑀸𑀥𑀦𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀇𑀢𑀭𑀸𑀦𑀺 𑀧𑀦𑀸’’𑀢𑀺 𑀏𑀓𑀽𑀦 𑀧𑀜𑁆𑀜𑀸𑀲 𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀔𑀼 𑀧𑀲𑀸𑀤𑁂𑀲𑀽𑀢𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀼 𑀏𑀓𑀁 𑀓𑀺𑀘𑁆𑀘 𑀲𑀸𑀥𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀇𑀢𑀭𑀸𑀦𑀺 𑀅𑀝𑁆𑀞 𑀘𑀢𑁆𑀢𑀸𑀮𑀻𑀲 𑀘𑀓𑁆𑀔𑀽𑀦𑀺 𑀫𑁄𑀖𑀯𑀢𑁆𑀣𑀽𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀭𑀽𑀧𑀸 𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀮𑀤𑁆𑀥 𑀖𑀝𑁆𑀝𑀦𑀸𑀦𑀫𑁆𑀧𑀺 𑀲𑀢𑀁 𑀯𑀻𑀣𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀢𑁆𑀣𑀼 𑀓𑀺𑀘𑁆𑀘𑀤𑁆𑀯𑀸𑀭 𑀓𑀺𑀘𑁆𑀘𑀭𑀳𑀺𑀢𑀢𑁆𑀢𑀸. 𑀢𑁂𑀲𑀼 𑀓𑀢𑀫𑀸𑀦𑀺 𑀫𑀦𑁆𑀤𑀸𑀬𑀼𑀓𑀸𑀦𑀺 𑀦𑀸𑀫𑀸𑀢𑀺 𑀆𑀳 ‘‘𑀢𑀸𑀦𑀺 𑀧𑀦𑀸’’𑀢𑀺𑀆𑀤𑀺𑀁. 𑀓𑀺𑀘𑁆𑀘 𑀲𑀸𑀥𑀦𑀢𑁄 𑀧𑀼𑀭𑀺𑀫𑀸𑀦𑀺 𑀦𑀸𑀫 𑀅𑀢𑀻𑀢 𑀪𑀯𑀗𑁆𑀕𑀢𑁄 𑀧𑀼𑀭𑁂 𑀢𑁂𑀭𑀲𑀲𑀼 𑀪𑀯𑀗𑁆𑀕𑁂𑀲𑀼 𑀆𑀤𑀺 𑀪𑀯𑀗𑁆𑀕𑀲𑁆𑀲 𑀪𑀗𑁆𑀕𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀔𑀡𑁂 𑀔𑀡𑁂 𑀉𑀧𑁆𑀧𑀦𑁆𑀦𑀸 𑀲𑀢𑁆𑀢𑀢𑀺𑀁𑀲 𑀘𑀓𑁆𑀔𑀼 𑀧𑀲𑀸𑀤𑀸. 𑀢𑀸𑀦𑀺 𑀫𑀦𑁆𑀤𑀸𑀬𑀼𑀓𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸, 𑀓𑀺𑀘𑁆𑀘 𑀲𑀸𑀥𑀦𑀢𑁄 𑀅𑀧𑁆𑀧𑀢𑀭𑀸𑀬𑀼𑀓𑀢𑁆𑀢𑀸. 𑀓𑀺𑀘𑁆𑀘 𑀲𑀸𑀥𑀦𑀢𑁄 𑀧𑀘𑁆𑀙𑀺𑀫𑀸𑀦𑀺 𑀦𑀸𑀫 𑀅𑀢𑀻𑀢 𑀪𑀯𑀗𑁆𑀕𑀲𑁆𑀲 𑀞𑀺𑀢𑀺𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀔𑀡𑁂 𑀔𑀡𑁂 𑀉𑀧𑁆𑀧𑀦𑁆𑀦𑀸 𑀏𑀓𑀸𑀤𑀲 𑀘𑀓𑁆𑀔𑀼 𑀧𑀲𑀸𑀤𑀸, 𑀢𑀸𑀦𑀺 𑀅𑀫𑀦𑁆𑀤𑀸𑀬𑀼𑀓𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸, 𑀓𑀺𑀘𑁆𑀘 𑀲𑀸𑀥𑀦𑀢𑁄 𑀩𑀳𑀼𑀢𑀭𑀸𑀬𑀼𑀓𑀢𑁆𑀢𑀸. 𑀢𑀤𑀼𑀪𑀬𑀸𑀦𑀺𑀧𑀺 𑀅𑀝𑁆𑀞 𑀘𑀢𑁆𑀢𑀸𑀮𑀻𑀲 𑀫𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀢𑁄’’𑀢𑀺 𑀢𑁂𑀳𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀫𑀢𑁆𑀢𑁂𑀳𑀺. ‘‘𑀧𑀼𑀭𑀺𑀫𑀢𑀭𑀸𑀦𑀻’’𑀢𑀺 𑀲𑀢𑁆𑀢𑀢𑀺𑀁𑀲 𑀫𑀦𑁆𑀤𑀸𑀬𑀼𑀓𑁂𑀳𑀺 𑀧𑀼𑀭𑀺𑀫𑀢𑀭𑀸𑀦𑀺. 𑀢𑀸𑀦𑀺 𑀳𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀞𑀺𑀢𑀺 𑀪𑀸𑀯𑁂𑀦 𑀅𑀦𑀼𑀧𑀮𑀤𑁆𑀥𑀢𑁆𑀢𑀸 𑀇𑀥 𑀦 𑀕𑀳𑀺𑀢𑀸𑀦𑀺. ‘‘𑀧𑀘𑁆𑀙𑀺𑀫𑀢𑀭𑀸𑀦𑀻’’𑀢𑀺 𑀏𑀓𑀸𑀤𑀲 𑀅𑀫𑀦𑁆𑀤𑀸𑀬𑀼𑀓𑁂𑀳𑀺 𑀧𑀘𑁆𑀙𑀺𑀫𑀢𑀭𑀸𑀦𑀺. 𑀢𑀸𑀦𑀺 𑀘 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀞𑀺𑀢𑀺 𑀪𑀸𑀯𑁂𑀦 𑀅𑀦𑀼𑀧𑀮𑀤𑁆𑀥𑀢𑁆𑀢𑀸 𑀇𑀥 𑀦 𑀕𑀳𑀺𑀢𑀸𑀦𑀺. 𑀓𑀲𑁆𑀫𑀸 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀞𑀺𑀢𑀺 𑀪𑀸𑀯𑁂𑀦 𑀅𑀦𑀼𑀧𑀮𑀤𑁆𑀥𑀸𑀦𑀺 𑀢𑀤𑀼𑀪𑀬𑀸𑀦𑀺 𑀇𑀥 𑀦 𑀕𑀳𑀺𑀢𑀸𑀦𑀻𑀢𑀺. 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀞𑀺𑀢𑀺 𑀪𑀸𑀯𑁂𑀦 𑀥𑀭𑀫𑀸𑀦𑀸𑀦𑀁 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀫𑀢𑁆𑀢𑀸𑀦𑀁 𑀘𑀓𑁆𑀔𑀽𑀦𑀁 𑀫𑀚𑁆𑀛𑁂 𑀏𑀯 𑀓𑀢𑀫𑀁 𑀘𑀓𑁆𑀔𑀼 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼 𑀓𑀺𑀘𑁆𑀘 𑀤𑁆𑀯𑀸𑀭 𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀆𑀲𑀗𑁆𑀓𑀺𑀢𑀩𑁆𑀩𑀁 𑀳𑁄𑀢𑀺. 𑀏𑀢𑁆𑀣 𑀘 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀦𑀸𑀫 𑀅𑀢𑁆𑀢𑀦𑁄 𑀞𑀺𑀢𑀺𑀓𑁆𑀔𑀡𑁂 𑀏𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀯𑀢𑁆𑀣𑀼𑀤𑁆𑀯𑀸𑀭 𑀓𑀺𑀘𑁆𑀘 𑀲𑀸𑀥𑀓𑀢𑁆𑀢𑀸 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀞𑀺𑀢𑀺 𑀪𑀸𑀯𑁂𑀦 𑀅𑀦𑀼𑀧𑀮𑀤𑁆𑀥𑀢𑁆𑀢𑀸 𑀇𑀥 𑀦 𑀕𑀳𑀺𑀢𑀸𑀦𑀻𑀢𑀺 𑀘, 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀞𑀺𑀢𑀺 𑀪𑀸𑀯𑁂𑀦 𑀥𑀭𑀫𑀸𑀦𑀸𑀦𑀦𑁆𑀢𑀺 𑀘, 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀏𑀢𑁆𑀣 𑀲𑀺𑀬𑀸’’𑀢𑀺𑀆𑀤𑀻𑀲𑀼. ‘‘𑀇𑀫𑀸𑀬 𑀯𑀻𑀣𑀺𑀬𑀸’’𑀢𑀺 𑀇𑀫𑀸𑀬 𑀅𑀢𑀺𑀫𑀳𑀦𑁆𑀢𑀸 𑀭𑀫𑁆𑀫𑀡 𑀯𑀻𑀣𑀺𑀬𑀸. ‘‘𑀲𑀫𑀼𑀤𑀸𑀬𑀕𑁆𑀕𑀸𑀳𑀺𑀓𑀸’’𑀢𑀺 𑀭𑀽𑀧𑀸 𑀭𑀫𑁆𑀫𑀡𑀸𑀦𑀁 𑀲𑀫𑀽𑀳𑀕𑁆𑀕𑀸𑀳𑀺𑀓𑀸. ‘‘𑀯𑀡𑁆𑀡𑀲𑀮𑁆𑀮𑀓𑁆𑀔𑀡𑀸’’𑀢𑀺 𑀯𑀡𑁆𑀡𑀯𑀯𑀢𑁆𑀣𑀸𑀦𑀺𑀓𑀸. ‘‘𑀯𑀢𑁆𑀣𑀼𑀕𑁆𑀕𑀸𑀳𑀺𑀓𑀸’’𑀢𑀺 𑀤𑀩𑁆𑀩 𑀲𑀡𑁆𑀞𑀸𑀦𑀕𑁆𑀕𑀸𑀳𑀺𑀓𑀸. ‘‘𑀦𑀸𑀫𑀕𑁆𑀕𑀸𑀳𑀺𑀓𑀸’’𑀢𑀺 𑀦𑀸𑀫 𑀧𑀜𑁆𑀜𑀢𑁆𑀢𑀺𑀕𑁆𑀕𑀸𑀳𑀺𑀓𑀸. ‘‘𑀅𑀮𑀸𑀢𑀘𑀓𑁆𑀓𑀲𑁆𑀲 𑀕𑀸𑀳𑀺𑀓𑀸 𑀯𑀺𑀬𑀸’’𑀢𑀺 𑀭𑀢𑁆𑀢𑀦𑁆𑀥𑀓𑀸𑀭𑁂 𑀏𑀓𑁄 𑀅𑀮𑀸𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀩𑁆𑀪𑀫𑀢𑀺. 𑀅𑀜𑁆𑀜𑁄 𑀢𑀁 𑀧𑀲𑁆𑀲𑀦𑁆𑀢𑁄 𑀘𑀓𑁆𑀓𑀁 𑀯𑀺𑀬 𑀫𑀜𑁆𑀜𑀢𑀺. 𑀢𑀢𑁆𑀣 𑀅𑀮𑀸𑀢𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀆𑀭𑀩𑁆𑀪 𑀘𑀓𑁆𑀔𑀼𑀤𑁆𑀯𑀸𑀭 𑀯𑀻𑀣𑀺𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭 𑀯𑀻𑀣𑀺𑀬𑁄 𑀧𑀦 𑀧𑀼𑀭𑀺𑀫 𑀧𑀼𑀭𑀺𑀫𑀸𑀳𑀺 𑀘𑀓𑁆𑀔𑀼𑀤𑁆𑀯𑀸𑀭 𑀯𑀻𑀣𑀻𑀳𑀺 𑀕𑀳𑀺𑀢𑀸𑀦𑀺 𑀅𑀢𑀻𑀢 𑀭𑀽𑀧𑀸𑀦𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀢𑁄 𑀲𑀡𑁆𑀞𑀸𑀦𑀜𑁆𑀘 𑀲𑀦𑁆𑀢𑀢𑀺𑀜𑁆𑀘 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀢𑀤𑀸 𑀧𑀲𑁆𑀲𑀦𑁆𑀢𑀲𑁆𑀲 𑀘𑀓𑁆𑀓𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀅𑀬𑀁 𑀲𑀫𑀼𑀤𑀸𑀬𑀕𑁆𑀕𑀸𑀳𑀺𑀓𑀸 𑀤𑀝𑁆𑀞𑀩𑁆𑀩𑀸. ‘‘𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄’’𑀢𑀺𑀆𑀤𑀻𑀲𑀼. ‘‘𑀬𑀲𑁆𑀲𑀸’’𑀢𑀺 𑀬𑀲𑁆𑀲 𑀆𑀭𑀫𑁆𑀫𑀡𑀲𑁆𑀲. 𑀘𑀺𑀢𑁆𑀢𑀸𑀦𑀻𑀢𑀺 𑀘 𑀦𑀸𑀦𑀸𑀭𑀫𑁆𑀫𑀡𑀸𑀦𑀻𑀢𑀺 𑀘 𑀓𑀫𑁆𑀫𑀧𑀤𑀸𑀦𑀺. 𑀅𑀯𑀲𑁂𑀲𑁂 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂. ‘‘𑀲𑀗𑁆𑀕𑀳 𑀓𑀸𑀭𑁂𑀦𑀸’’𑀢𑀺 𑀧𑁄𑀭𑀸𑀡 𑀅𑀝𑁆𑀞𑀓𑀣𑀸𑀬𑁄 𑀏𑀓𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 𑀓𑀢𑀢𑁆𑀢𑀸 𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁂𑀦 𑀓𑀢𑀸 𑀲𑀩𑁆𑀩𑀸 𑀅𑀝𑁆𑀞𑀓𑀣𑀸𑀬𑁄 𑀲𑀗𑁆𑀕𑀳𑀝𑁆𑀞𑀓𑀣𑀸 𑀦𑀸𑀫. 𑀲𑁄 𑀘 𑀲𑀗𑁆𑀕𑀳 𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀇𑀥 𑀧𑀻’’𑀢𑀺 𑀇𑀫𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑁂𑀧𑀺. ‘‘𑀣𑁂𑀭𑁂𑀦𑀸’’𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦. ‘‘𑀏𑀓𑀫𑁆𑀧𑀺 𑀇𑀘𑁆𑀙𑀢𑀺 𑀬𑁂𑀯𑀸’’𑀢𑀺. ‘‘𑀬𑀲𑁆𑀲 𑀳𑀺 𑀘𑀢𑁆𑀢𑀸𑀭𑀻’’𑀢𑀺𑀆𑀤𑀻𑀲𑀼 𑀬𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀘𑀢𑁆𑀢𑀸𑀭𑀺 𑀯𑀸 𑀧𑀜𑁆𑀘𑀯𑀸 𑀙𑀯𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀚𑀯𑀦𑀫𑁆𑀧𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼. ‘‘𑀅𑀢𑁆𑀢𑀦𑁄 𑀧𑀥𑀸𑀦 𑀓𑁆𑀭𑀺𑀬𑀸𑀬𑀸’’𑀢𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀧𑀤𑀲𑁆𑀲 𑀧𑀭𑀢𑁄 ‘𑀬𑀁 𑀧𑀯𑀢𑁆𑀢𑀢𑀻’𑀢𑀺 𑀅𑀢𑁆𑀢𑀦𑁄 𑀧𑀥𑀸𑀦 𑀓𑁆𑀭𑀺𑀬𑀸𑀧𑀤𑀁 𑀅𑀢𑁆𑀣𑀺. 𑀢𑁂𑀦 𑀅𑀢𑁆𑀢𑀦𑁄 𑀓𑁆𑀭𑀺𑀬𑀸𑀧𑀤𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀓𑀢𑁆𑀣𑀘𑀺 𑀯𑀼𑀢𑁆𑀢𑀸’’𑀢𑀺 𑀓𑀢𑁆𑀣𑀘𑀺 𑀲𑀤𑁆𑀤𑀕𑀦𑁆𑀣𑁂𑀲𑀼 𑀯𑀼𑀢𑁆𑀢𑀸. 𑀅𑀧𑀺 𑀘, 𑀳𑁂𑀢𑀼𑀫𑁆𑀳𑀺 𑀢𑁆𑀯𑀸𑀧𑀘𑁆𑀘𑀬𑁄 𑀮𑀓𑁆𑀔𑀡𑁂 𑀳𑁂𑀢𑀼𑀫𑁆𑀳𑀺 𑀘 𑀫𑀸𑀦𑀦𑁆𑀢 𑀧𑀘𑁆𑀘𑀬𑀸 𑀚𑁄𑀢𑀦𑀻𑀬𑀝𑁆𑀞𑁂𑀦 𑀯𑀼𑀢𑁆𑀢𑀸, 𑀦 𑀯𑀘𑀦𑀻𑀬𑀝𑁆𑀞𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀧𑀓𑀢𑀺 𑀦𑀺𑀬𑀸𑀫𑁂𑀦𑀸’’𑀢𑀺 𑀏𑀢𑁂𑀦 𑀧𑀘𑁆𑀘𑀬 𑀯𑀺𑀲𑁂𑀲𑁂𑀲𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀧𑀜𑁆𑀘𑀯𑀸 𑀙𑀯𑀸 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀣𑀧𑀦𑀸’’𑀢𑀺𑀆𑀤𑀺𑀁. ‘‘𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁’’𑀢𑀺 𑀯𑀸𑀲𑀤𑁆𑀤𑀢𑁆𑀣𑁂 𑀅𑀜𑁆𑀜𑀧𑀤𑀢𑁆𑀣 𑀲𑀫𑀸𑀲𑀧𑀤𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸’’𑀢𑀺. ‘‘𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀢𑀸’’𑀢𑀺 𑀆𑀲𑁂𑀯𑀦 𑀧𑀘𑁆𑀘𑀬𑀢𑀸𑀯𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀯𑀸. ‘‘𑀆𑀯𑀚𑁆𑀚𑀦𑀸𑀬𑀸’’𑀢𑀺 𑀏𑀢𑁆𑀣 𑀯𑁄𑀝𑁆𑀞𑀩𑁆𑀩𑀦 𑀓𑀺𑀘𑁆𑀘𑀁 𑀆𑀯𑀚𑁆𑀚𑀦𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀥𑀧𑀺 𑀆𑀭𑀫𑁆𑀫𑀡 𑀤𑀼𑀩𑁆𑀩𑀮𑀢𑀸𑀬 𑀘𑀢𑀼𑀧𑁆𑀧𑀜𑁆𑀘 𑀚𑀯𑀦𑀼𑀧𑁆𑀧𑀢𑁆𑀢𑀺 𑀇𑀘𑁆𑀙𑀺 𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀇𑀥 𑀧𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀭𑀺𑀢𑁆𑀢𑀸 𑀭𑀫𑁆𑀫𑀡 𑀯𑀸𑀭𑁂𑀧𑀺. 𑀢𑀺𑀯𑁄𑀝𑁆𑀞𑀩𑁆𑀩𑀦𑀺𑀓𑀸 𑀧𑀜𑁆𑀘 𑀧𑀭𑀺𑀢𑁆𑀢𑀸 𑀭𑀫𑁆𑀫𑀡 𑀯𑀻𑀣𑀺𑀬𑁄𑀢𑀺 𑀬𑁄𑀚𑀦𑀸. ‘‘𑀇𑀢𑀭𑀸𑀦𑀻’’𑀢𑀺 𑀧𑀭𑀺𑀢𑁆𑀢 𑀫𑀳𑀦𑁆𑀢𑀸𑀢𑀺 𑀫𑀳𑀦𑁆𑀢𑀸 𑀭𑀫𑁆𑀫𑀡𑀸𑀦𑀺. ‘‘𑀉𑀪𑀬𑀣𑀸𑀧𑀻’’𑀢𑀺 𑀆𑀧𑀸𑀢𑀸 𑀕𑀫𑀦 𑀯𑀲𑁂𑀦𑀧𑀺 𑀆𑀭𑀫𑁆𑀫𑀡 𑀓𑀭𑀡 𑀯𑀲𑁂𑀦𑀧𑀺. 𑀇𑀫𑀲𑁆𑀲 𑀧𑀤𑀲𑁆𑀲.

𑁧𑁩𑁭. ‘‘𑀫𑀦𑁄𑀤𑁆𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀻𑀲𑀼. ‘‘𑀧𑀭𑀺𑀢𑁆𑀢𑀓𑁆𑀔𑀡𑀸 𑀧𑀻’’𑀢𑀺 𑀘𑀺𑀢𑁆𑀢 𑀨𑀲𑁆𑀲𑀸𑀤𑀬𑁄 𑀅𑀧𑁆𑀧𑀢𑀭𑀓𑁆𑀔𑀡𑀸𑀧𑀺. ‘‘𑀅𑀢𑀻𑀢𑀸𑀦𑀸𑀕𑀢𑀸 𑀧𑀻’’𑀢𑀺 𑀅𑀢𑀻𑀢𑀸𑀦𑀸𑀕𑀢 𑀥𑀫𑁆𑀫𑀸𑀧𑀺. ‘‘𑀖𑀝𑁆𑀝𑀦𑁂𑀦𑀸’’𑀢𑀺 𑀭𑀽𑀧𑀸𑀤𑀻𑀦𑀁 𑀖𑀝𑁆𑀝𑀦𑁂𑀦. ‘‘𑀬𑀢𑁆𑀣𑀸’’𑀢𑀺 𑀬𑀲𑁆𑀫𑀺𑀁 𑀪𑀯𑀗𑁆𑀕𑁂. ‘‘𑀧𑀜𑁆𑀘𑀤𑁆𑀯𑀸𑀭𑀸𑀦𑀼 𑀩𑀦𑁆𑀥𑀓𑀁’’𑀢𑀺 𑀧𑀜𑁆𑀘𑀤𑁆𑀯𑀸𑀭 𑀯𑀻𑀣𑀺 𑀅𑀦𑀼𑀕𑀢𑀁. 𑀅𑀢𑀻𑀢𑀁 𑀆𑀮𑀫𑁆𑀩𑀡𑀁 𑀧𑀯𑀢𑁆𑀢𑁂𑀢𑀺 𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀣𑀸𑀧𑀸𑀢𑀸 𑀕𑀢𑀫𑁂𑀯𑀸’’𑀢𑀺 𑀧𑀓𑀢𑀺𑀬𑀸 𑀆𑀧𑀸𑀢𑀸 𑀕𑀢𑀧𑁆𑀧𑀓𑀸𑀭𑀫𑁂𑀯. ‘‘𑀢𑀣𑀸 𑀢𑀣𑀸’’𑀢𑀺 𑀤𑀺𑀝𑁆𑀞 𑀲𑀫𑁆𑀩𑀦𑁆𑀥𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. ‘‘𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁. ‘‘𑀤𑀺𑀲𑁆𑀯𑀸’’𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀧𑀜𑁆𑀘𑀤𑁆𑀯𑀸𑀭𑀕𑁆𑀕𑀳𑀺𑀢𑀜𑁆𑀳𑀺 𑀆𑀭𑀫𑁆𑀫𑀡𑀁 𑀧𑀘𑁆𑀘𑀓𑁆𑀔𑀓𑀢𑀝𑁆𑀞𑁂𑀦 𑀤𑀺𑀝𑁆𑀞𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁. ‘‘𑀅𑀦𑀼𑀫𑀸𑀦𑁂𑀦𑁆𑀢𑀲𑁆𑀲𑀸’’𑀢𑀺 𑀏𑀯𑀫𑁂𑀯 𑀪𑀯𑀺𑀢𑁆𑀣, 𑀪𑀯𑀺𑀲𑁆𑀲𑀢𑀺, 𑀪𑀯𑀢𑀻𑀢𑀺 𑀅𑀦𑀼𑀫𑀸𑀦𑀜𑁆𑀜𑀸𑀡𑁂𑀦 𑀘𑀺𑀦𑁆𑀢𑁂𑀦𑁆𑀢𑀲𑁆𑀲. 𑀢𑀁 𑀲𑀤𑀺𑀲𑀁 𑀆𑀭𑀫𑁆𑀫𑀡𑀁. ‘‘𑀧𑀭𑀲𑁆𑀲 𑀲𑀤𑁆𑀤𑀳𑀦𑀸’’𑀢𑀺 𑀧𑀭𑀯𑀘𑀦𑀁 𑀲𑀼𑀢𑁆𑀯𑀸 𑀬𑀣𑀸 𑀅𑀬𑀁 𑀯𑀤𑀢𑀺, 𑀢𑀣𑁂 𑀯𑁂𑀢𑀦𑁆𑀢𑀺 𑀲𑀤𑁆𑀤𑀳𑀦𑀸. ‘‘𑀤𑀺𑀝𑁆𑀞𑀺’’ 𑀯𑀼𑀘𑁆𑀘𑀢𑀺 𑀜𑀸𑀡𑀁 𑀯𑀸 𑀮𑀤𑁆𑀥𑀺 𑀯𑀸. ‘‘𑀦𑀺𑀚𑁆𑀛𑀸𑀦𑀁’’𑀢𑀺 𑀲𑀼𑀝𑁆𑀞𑀼 𑀑𑀮𑁄𑀓𑀦𑀁. ‘‘𑀔𑀦𑁆𑀢𑀻’’𑀢𑀺 𑀔𑀫𑀦𑀁 𑀲𑀳𑀦𑀁. 𑀅𑀜𑁆𑀜𑀣𑀢𑁆𑀢𑀁 𑀅𑀕𑀫𑀦𑀁. 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀁. 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀲𑁆𑀲 𑀔𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺. ‘‘𑀲𑁂𑀲𑀁’’𑀢𑀺 𑀦𑀸𑀦𑀸𑀓𑀫𑁆𑀫 𑀩𑀮𑁂𑀦𑀸𑀢𑀺𑀆𑀤𑀺𑀓𑀁. ‘‘𑀤𑁂𑀯𑀢𑁄 𑀧𑀲𑀁𑀳𑀸𑀭𑀯𑀲𑁂𑀦𑀸’’𑀢𑀺 𑀤𑁂𑀯𑀢𑀸 𑀓𑀤𑀸𑀘𑀺 𑀓𑁂𑀲𑀜𑁆𑀘𑀺 𑀲𑀼𑀧𑀺𑀦𑀦𑁆𑀢𑁂 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀉𑀧𑀲𑀁𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀏𑀯𑀁 𑀤𑁂𑀯𑀢𑁄 𑀧𑀲𑀁𑀳𑀸𑀭 𑀯𑀲𑁂𑀦𑀸𑀧𑀺. 𑀅𑀦𑀼𑀩𑁄𑀥𑁄 𑀦𑀸𑀫 𑀮𑁄𑀓𑀺𑀬𑀜𑁆𑀜𑀸𑀡 𑀯𑀲𑁂𑀦 𑀘𑀢𑀼𑀲𑁆𑀲𑀘𑁆𑀘 𑀥𑀫𑁆𑀫𑀸𑀦𑀁 𑀅𑀦𑀼𑀩𑀼𑀚𑁆𑀛𑀦𑀁. 𑀧𑀝𑀺𑀯𑁂𑀥𑁄 𑀦𑀸𑀫 𑀮𑁄𑀓𑀼𑀢𑁆𑀢𑀭𑀜𑁆𑀜𑀸𑀡 𑀓𑀺𑀘𑁆𑀘𑀁. 𑀅𑀦𑀦𑁆𑀢 𑀭𑀽𑀧 𑀦𑀺𑀲𑁆𑀲𑀬 𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀧𑀓𑀢𑀽 𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀫𑁆𑀧𑀺 𑀉𑀧𑀮𑀓𑁆𑀔𑁂𑀢𑀺. 𑀘𑀺𑀢𑁆𑀢 𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀪𑀸𑀯𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀦𑁆𑀢 𑀭𑀽𑀧 𑀦𑀺𑀲𑁆𑀲𑀬 𑀧𑀘𑁆𑀘𑀬𑀲𑀢𑁆𑀢𑀺 𑀦𑀸𑀫 𑀅𑀦𑀦𑁆𑀢𑀭 𑀧𑀭𑀫𑁆𑀧𑀭 𑀯𑀺𑀧𑁆𑀨𑀭𑀡𑀯𑀲𑁂𑀦 𑀫𑀳𑀸𑀕𑀢𑀺𑀓𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀦𑁆𑀢 𑀭𑀽𑀧 𑀦𑀺𑀲𑁆𑀲𑀬 𑀧𑀘𑁆𑀘𑀬𑀸𑀦𑀼 𑀪𑀸𑀯𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀓𑀣𑀁 𑀫𑀳𑀸𑀯𑀺𑀧𑁆𑀨𑀸𑀭𑁄𑀢𑀺 𑀆𑀳 ‘‘𑀲𑀓𑀺𑀁 𑀧𑀻’’𑀢𑀺𑀆𑀤𑀺𑀁. ‘‘𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀧𑀘𑁆𑀙𑀸 𑀅𑀧𑁆𑀧𑀫𑀼𑀲𑁆𑀲𑀫𑀸𑀦𑀁 𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀲𑁂𑀯𑀦𑀁 𑀲𑀼𑀝𑁆𑀞𑀼 𑀆𑀲𑁂𑀯𑀦𑀁 𑀦𑀸𑀫. 𑀦 𑀓𑁂𑀯𑀮𑀁 𑀧𑀼𑀭𑀺𑀫 𑀘𑀺𑀢𑁆𑀢 𑀲𑀦𑁆𑀢𑀸𑀦𑀲𑁆𑀲 𑀲𑁄 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀸𑀦𑀼𑀪𑀸𑀯𑁄 𑀏𑀯 𑀫𑀳𑀸𑀯𑀺𑀧𑁆𑀨𑀸𑀭𑁄 𑀳𑁄𑀢𑀺. 𑀧𑀓𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀯𑀺𑀘𑀺𑀢𑁆𑀢 𑀪𑀸𑀯 𑀲𑀗𑁆𑀔𑀸𑀢𑀁 𑀘𑀺𑀦𑁆𑀢𑀦𑀸 𑀓𑀺𑀘𑁆𑀘𑀫𑁆𑀧𑀺 𑀫𑀳𑀸𑀯𑀺𑀧𑁆𑀨𑀸𑀭𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀜𑁆𑀘 𑀦𑀸𑀫𑀸’’𑀢𑀺𑀆𑀤𑀺𑀯𑀼𑀢𑁆𑀢𑀁. 𑀓𑀣𑀁 𑀫𑀳𑀸𑀯𑀺𑀧𑁆𑀨𑀸𑀭𑀁 𑀳𑁄𑀢𑀻𑀢𑀺 𑀆𑀳 ‘‘𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁’’𑀢𑀺𑀆𑀤𑀺𑀁. ‘‘𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁’’𑀢𑀺 𑀤𑀺𑀝𑁆𑀞𑀸𑀤𑀻𑀲𑀼 𑀦𑀸𑀦𑀸 𑀭𑀫𑁆𑀫𑀡𑁂𑀲𑀼 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀁 𑀤𑀺𑀝𑁆𑀞𑀸𑀤𑀺𑀓𑀁 𑀆𑀭𑀫𑁆𑀫𑀡 𑀦𑀺𑀫𑀺𑀢𑁆𑀢𑀁. ‘‘𑀢𑁂𑀳𑀺 𑀘𑀓𑀸𑀭𑀡𑁂𑀳𑀻’’𑀢𑀺 𑀢𑁂𑀳𑀺 𑀓𑀢𑁆𑀢𑀼𑀪𑀽𑀢𑁂𑀳𑀺 𑀤𑀺𑀝𑁆𑀞𑀸𑀤𑀻𑀳𑀺 𑀓𑀸𑀭𑀡𑁂𑀳𑀺. ‘‘𑀘𑁄𑀤𑀻𑀬𑀫𑀸𑀦𑀁’’𑀢𑀺 𑀧𑀬𑁄𑀚𑀻𑀬𑀫𑀸𑀦𑀁. ‘‘𑀅𑀚𑁆𑀛𑀸𑀲𑀬 𑀬𑀼𑀢𑁆𑀢𑀁’’𑀢𑀺 𑀅𑀚𑁆𑀛𑀸𑀲𑀬𑁂𑀦 𑀲𑀁𑀬𑀼𑀢𑁆𑀢𑀁. 𑀪𑀯𑀗𑁆𑀕 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀦𑀸𑀫 𑀅𑀯𑀺𑀪𑀽𑀢𑀁 𑀳𑁄𑀢𑀺. 𑀪𑀯𑀗𑁆𑀕𑀁 𑀘𑀸𑀮𑁂𑀢𑁆𑀯𑀸 𑀆𑀯𑀚𑁆𑀚𑀦𑀁 𑀦𑀺𑀬𑁄𑀚𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀮𑀤𑁆𑀥 𑀧𑀘𑁆𑀘𑀬𑁂𑀲𑀽’’𑀢𑀺 𑀆𑀮𑁄𑀓𑀸𑀤𑀺𑀯𑀲𑁂𑀦 𑀯𑀸 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀯𑀸 𑀮𑀤𑁆𑀥 𑀧𑀘𑁆𑀘𑀬𑀯𑀦𑁆𑀢𑁂𑀲𑀼. 𑀢𑀤𑀪𑀺𑀦𑀺𑀦𑁆𑀦𑀸𑀓𑀸𑀭𑁄 𑀦𑀸𑀫 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀪𑀺𑀫𑀼𑀔𑀁 𑀦𑀺𑀦𑁆𑀦𑀸𑀓𑀸𑀭𑁄. 𑀢𑁂𑀦 𑀆𑀓𑀸𑀭𑁂𑀦 𑀧𑀯𑀢𑁆𑀢𑁄 𑀫𑀦𑀲𑀺𑀓𑀸𑀭𑁄. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀲𑁆𑀲. 𑀏𑀢𑁂𑀳𑀺 𑀯𑀘𑀦𑁂𑀳𑀺 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂 𑀆𑀭𑀫𑁆𑀫𑀡𑀸𑀦𑀁 𑀅𑀧𑀸𑀢𑀸𑀕𑀫𑀦𑀜𑁆𑀘 𑀪𑀯𑀗𑁆𑀕 𑀘𑀮𑀦𑀜𑁆𑀘 𑀦 𑀓𑁂𑀯𑀮𑀁 𑀮𑀤𑁆𑀥 𑀧𑀘𑁆𑀘𑀬𑀸𑀦𑀁 𑀆𑀭𑀫𑁆𑀫𑀡𑀸𑀦𑀁 𑀯𑀲𑁂𑀦𑁂𑀯 𑀳𑁄𑀢𑀺. 𑀢𑀸𑀤𑀺𑀲𑁂𑀦 𑀧𑀦 𑀫𑀦𑀲𑀺𑀓𑀸𑀭𑁂𑀦 𑀬𑀼𑀢𑁆𑀢𑀲𑁆𑀲 𑀲𑀬𑀜𑁆𑀘 𑀯𑀻𑀣𑀺 𑀘𑀺𑀢𑁆𑀢 𑀘𑀺𑀦𑁆𑀢𑀦𑀸 𑀓𑀺𑀘𑁆𑀘𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦𑀸𑀧𑀺 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀦 𑀳𑀺 𑀆𑀭𑀫𑁆𑀫𑀡𑀦𑁆𑀢𑀭𑁂 𑀅𑀪𑀺𑀦𑀺𑀦𑁆𑀦𑀸𑀓𑀸𑀭𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀲𑁆𑀫𑀸, 𑀅𑀪𑀸𑀯𑀺𑀢 𑀘𑀺𑀢𑁆𑀢𑀸𑀦𑀁 𑀧𑀫𑀸𑀤 𑀩𑀳𑀼𑀮𑀸𑀦𑀁 𑀚𑀦𑀸𑀦𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀪𑀸𑀯𑀦𑀸 𑀫𑀦𑀲𑀺𑀓𑀸𑀭𑁂 𑀓𑀭𑀻𑀬𑀫𑀸𑀦𑁂𑀧𑀺 𑀯𑀻𑀣𑀺 𑀘𑀺𑀢𑁆𑀢 𑀲𑀦𑁆𑀢𑀸𑀦𑀲𑁆𑀲 𑀩𑀳𑀺𑀤𑁆𑀥𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀅𑀪𑀺𑀦𑀺𑀦𑁆𑀦𑀸𑀓𑀸𑀭𑀲𑁆𑀲 𑀲𑀦𑁆𑀤𑀺𑀲𑁆𑀲𑀦𑀢𑁄𑀢𑀺. ‘‘𑀬𑀣𑀸 𑀘𑁂𑀢𑁆𑀣𑀸’’𑀢𑀺 𑀬𑀣𑀸 𑀏𑀢𑁆𑀣 𑀫𑀦𑁄𑀤𑁆𑀯𑀸𑀭𑁂 𑀭𑀽𑀧𑀸𑀭𑀽𑀧 𑀲𑀢𑁆𑀢𑀸𑀦𑀁 𑀯𑀺𑀪𑀽𑀢𑀸 𑀭𑀫𑁆𑀫𑀡𑁂𑀧𑀺 𑀢𑀤𑀸 𑀭𑀫𑁆𑀫𑀡𑀼𑀧𑁆𑀧𑀸𑀤𑁄 𑀦𑀢𑁆𑀣𑀺, 𑀏𑀯𑀦𑁆𑀢𑀺 𑀬𑁄𑀚𑀦𑀸. 𑀜𑀸𑀡𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀧𑀦 𑀯𑁄𑀝𑁆𑀞𑀩𑁆𑀩𑀦𑀯𑀸𑀭𑁄𑀧𑀺 𑀆𑀕𑀢𑁄. 𑀬𑀣𑀸𑀳 𑀲𑀼𑀧𑀺𑀦𑁂𑀦𑁂𑀯 𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂𑀢𑀺 𑀓𑀣𑀦𑀓𑀸𑀮𑁂𑀧𑀺 𑀅𑀩𑁆𑀬𑀸𑀓𑀢𑁄 𑀬𑁂𑀯𑀸𑀢𑀺. 𑀢𑀢𑁆𑀣 𑀳𑀺 ‘‘𑀅𑀩𑁆𑀬𑀸𑀓𑀢𑁄 𑀬𑁂𑀯𑀸’’𑀢𑀺 𑀲𑀼𑀧𑀺𑀦𑀦𑁆𑀢𑁂 𑀫𑀦𑁄𑀤𑁆𑀯𑀸𑀭𑁂 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀦𑁆𑀦𑀲𑁆𑀲 𑀆𑀯𑀚𑁆𑀚𑀦𑀲𑁆𑀲 𑀯𑀲𑁂𑀦 𑀅𑀩𑁆𑀬𑀸𑀓𑀢𑁄𑀬𑁂𑀯. 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀧𑀸𑀢𑁄. 𑀅𑀝𑁆𑀞𑀲𑀸𑀮𑀺𑀦𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 𑀅𑀬𑀁 𑀧𑀦 𑀯𑀸𑀭𑁄 𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂 𑀢𑀺𑀆𑀤𑀻𑀦𑀺 𑀯𑀤𑀦𑀓𑀸𑀮𑁂 𑀮𑀩𑁆𑀪𑀢𑀻𑀢𑀺. 𑀢𑀁 𑀧𑀦 𑀧𑀜𑁆𑀘 𑀤𑁆𑀯𑀸𑀭𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀦𑁆𑀦𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀲𑁄𑀧𑀺 𑀇𑀥 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺 𑀬𑁂𑀯𑀸’’𑀢𑀺 𑀲𑁄𑀧𑀺 𑀯𑀸𑀭𑁄 𑀇𑀫𑀲𑁆𑀫𑀺𑀁 𑀫𑀦𑁄𑀤𑁆𑀯𑀸𑀭𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺𑀬𑁂𑀯. ‘‘𑀪𑀯𑀗𑁆𑀕𑁂 𑀘𑀮𑀺𑀢𑁂 𑀦𑀺𑀯𑀢𑁆𑀢𑀦𑀓𑀯𑀸𑀭𑀸𑀦𑀁’’𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕 𑀘𑀮𑀦𑀫𑀢𑁆𑀢𑁂 𑀞𑀢𑁆𑀯𑀸 𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀯𑀗𑁆𑀕𑀧𑀸𑀢𑀯𑀲𑁂𑀦 𑀦𑀺𑀯𑀢𑁆𑀢𑀦𑀓𑀸𑀦𑀁 𑀫𑁄𑀖𑀯𑀸𑀭𑀸𑀦𑀁 𑀫𑀦𑁄𑀤𑁆𑀯𑀸𑀭𑁂𑀧𑀺 𑀧𑀫𑀸𑀡𑀁 𑀦 𑀪𑀯𑀺𑀲𑁆𑀲𑀢𑀺𑀬𑁂𑀯. 𑀅𑀣 𑀇𑀫𑀲𑁆𑀫𑀺𑀁𑀯𑀸𑀭𑁂 𑀯𑀻𑀣𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀦𑀢𑁆𑀣𑀺. 𑀏𑀯𑀁 𑀲𑀢𑀺, 𑀇𑀫𑀲𑁆𑀫𑀺𑀁 𑀯𑀻𑀣𑀺 𑀲𑀗𑁆𑀕𑀳𑁂 𑀲𑁄 𑀯𑀸𑀭𑁄 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀘𑁂. 𑀯𑀢𑁆𑀢𑀩𑁆𑀩𑁄𑀬𑁂𑀯. 𑀓𑀲𑁆𑀫𑀸, 𑀙𑀥𑀸 𑀯𑀺𑀲𑀬𑀧𑁆𑀧𑀯𑀢𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀙𑀓𑁆𑀓𑁂 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑀬𑁂 𑀘 𑀆𑀧𑀸𑀢𑀸𑀕𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀪𑀽𑀢𑀸 𑀯𑀺𑀲𑀬𑀧𑁆𑀧𑀯𑀢𑁆𑀢𑀺. 𑀏𑀓𑁂𑀓𑀲𑁆𑀫𑀺𑀁 𑀅𑀦𑀼𑀩𑀦𑁆𑀥𑀓𑀯𑀸𑀭𑁂. ‘‘𑀢𑀤𑀸𑀭𑀫𑁆𑀫𑀡 𑀯𑀸𑀭𑀸𑀤𑀬𑁄’’𑀢𑀺 𑀢𑀤𑀸𑀭𑀫𑁆𑀫𑀡 𑀯𑀸𑀭𑁄 𑀚𑀯𑀦𑀯𑀸𑀭𑁄 𑀯𑁄𑀝𑁆𑀞𑀩𑁆𑀩𑀦 𑀯𑀸𑀭𑁄 𑀫𑁄𑀖𑀯𑀸𑀭𑁄. 𑀢𑁂𑀲𑀼 𑀧𑀦 𑀢𑀤𑀸 𑀭𑀫𑁆𑀫𑀡𑀯𑀸𑀭𑁄 𑀯𑀢𑁆𑀣𑀼𑀕𑁆𑀕𑀳𑀡𑁂 𑀘 𑀦𑀸𑀫𑀕𑁆𑀕𑀳𑀡𑁂 𑀘 𑀦 𑀮𑀩𑁆𑀪𑀢𑀺. ‘‘𑀯𑀢𑁆𑀣𑀽’’𑀢𑀺 𑀳𑀺 𑀲𑀡𑁆𑀞𑀸𑀦 𑀧𑀜𑁆𑀜𑀢𑁆𑀢𑀺. ‘‘𑀦𑀸𑀫𑀁’’𑀢𑀺 𑀦𑀸𑀫 𑀧𑀜𑁆𑀜𑀢𑁆𑀢𑀺. 𑀦 𑀘 𑀢𑀤𑀸 𑀭𑀫𑁆𑀫𑀡𑀁 𑀧𑀜𑁆𑀜𑀢𑁆𑀢𑀸 𑀭𑀫𑁆𑀫𑀡𑀁 𑀳𑁄𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀭𑀳𑀁’’𑀢𑀺. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼 𑀤𑀺𑀝𑁆𑀞𑀯𑀸𑀭𑀸𑀤𑀻𑀲𑀼 𑀙𑀲𑀼 𑀯𑀸𑀭𑁂𑀲𑀼. 𑀏𑀢𑀭𑀳𑀺 𑀧𑀦 𑀓𑁂𑀘𑀺 𑀆𑀘𑀭𑀺𑀬𑀸𑀢𑀺 𑀧𑀸𑀞𑀲𑁂𑀲𑁄. ‘‘𑀅𑀢𑀻𑀢 𑀪𑀯𑀗𑁆𑀕 𑀯𑀲𑁂𑀦𑀸’’𑀢𑀺 𑀏𑀓𑀁 𑀪𑀯𑀗𑁆𑀕𑀁 𑀅𑀢𑀺𑀓𑁆𑀓𑀫𑁆𑀫 𑀆𑀧𑀸𑀢𑀸 𑀕𑀢𑁂 𑀆𑀭𑀫𑁆𑀫𑀡𑁂 𑀏𑀓𑁄 𑀯𑀸𑀭𑁄, 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀆𑀧𑀸𑀢𑀸 𑀕𑀢𑁂 𑀏𑀓𑁄𑀢𑀺𑀆𑀤𑀺𑀦𑀸 𑀅𑀢𑀻𑀢 𑀪𑀯𑀗𑁆𑀕 𑀪𑁂𑀤𑀯𑀲𑁂𑀦. ‘‘𑀢𑀤𑀸 𑀭𑀫𑁆𑀫𑀡 𑀯𑀲𑁂𑀦𑀸’’𑀢𑀺 𑀢𑀤𑀸 𑀭𑀫𑁆𑀫𑀡𑀲𑁆𑀲 𑀉𑀧𑁆𑀧𑀦𑁆𑀦𑀯𑀸𑀭𑁄 𑀅𑀦𑀼𑀧𑁆𑀧𑀦𑁆𑀦 𑀯𑀸𑀭𑁄𑀢𑀺 𑀏𑀯𑀁 𑀢𑀤𑀸 𑀭𑀫𑁆𑀫𑀡 𑀯𑀲𑁂𑀦. 𑀓𑀧𑁆𑀧𑁂𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀺, 𑀯𑀺𑀤𑀳𑀦𑁆𑀢𑀺 𑀯𑀸. ‘‘𑀔𑀡 𑀯𑀲𑁂𑀦 𑀩𑀮𑀯𑀤𑀼𑀩𑁆𑀩𑀮𑀢𑀸 𑀲𑀫𑁆𑀪𑀯𑁄’’𑀢𑀺 𑀬𑀣𑀸 𑀧𑀜𑁆𑀘𑀤𑁆𑀯𑀸𑀭𑁂 𑀅𑀢𑀺𑀫𑀳𑀦𑁆𑀢𑀸 𑀭𑀫𑁆𑀫𑀡𑁂𑀲𑀼𑀧𑀺 𑀆𑀭𑀫𑁆𑀫𑀡 𑀥𑀫𑁆𑀫𑀸 𑀉𑀧𑁆𑀧𑀸𑀤𑀁 𑀧𑀢𑁆𑀯𑀸 𑀆𑀤𑀺𑀢𑁄 𑀏𑀓𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑁂 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺. 𑀅𑀢𑁆𑀢𑀦𑁄 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀁 𑀆𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀓 𑀘𑀺𑀢𑁆𑀢𑀓𑁆𑀔𑀡𑀁 𑀧𑀦 𑀅𑀢𑀺𑀓𑁆𑀓𑀫𑁆𑀫 𑀩𑀮𑀯𑀦𑁆𑀢𑀸 𑀳𑁄𑀦𑁆𑀢𑀺. 𑀅𑀢𑁆𑀢𑀦𑁄 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀁 𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀫𑀳𑀦𑁆𑀢𑀸 𑀭𑀫𑁆𑀫𑀡𑀸𑀤𑀻𑀲𑀼 𑀧𑀦 𑀤𑁆𑀯𑀺 𑀘𑀺𑀢𑁆𑀢𑀓𑁆𑀔𑀡𑀺𑀓𑀫𑀢𑁆𑀢𑁂 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀸. 𑀦 𑀢𑀣𑀸 𑀫𑀦𑁄𑀤𑁆𑀯𑀸𑀭𑁂 𑀆𑀭𑀫𑁆𑀫𑀡𑀸𑀦𑀁 𑀔𑀡 𑀯𑀲𑁂𑀦 𑀩𑀮𑀯𑀤𑀼𑀩𑁆𑀩𑀮𑀢𑀸 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀓𑀲𑁆𑀫𑀸 𑀦𑀢𑁆𑀣𑀻𑀢𑀺 𑀆𑀳 ‘‘𑀢𑀤𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀢𑀤𑀸’’𑀢𑀺 𑀢𑀲𑁆𑀫𑀺𑀁 𑀯𑀻𑀣𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑁂. ‘‘𑀢𑀢𑁆𑀣𑀸’’𑀢𑀺 𑀫𑀦𑁄𑀤𑁆𑀯𑀸𑀭𑁂.

‘‘𑀏𑀢𑁆𑀣 𑀲𑀺𑀬𑀸’’𑀢𑀺𑀆𑀤𑀻𑀲𑀼. ‘‘𑀲𑀺𑀬𑀸’’𑀢𑀺 𑀓𑁂𑀲𑀜𑁆𑀘𑀺 𑀯𑀺𑀘𑀸𑀭𑀡𑀸 𑀲𑀺𑀬𑀸. 𑀏𑀓𑀁 𑀆𑀯𑀚𑁆𑀚𑀦𑀁 𑀅𑀲𑁆𑀲𑀸𑀢𑀺 𑀏𑀓𑀸𑀯𑀚𑁆𑀚𑀦𑀸. ‘‘𑀯𑀻𑀣𑀻’’𑀢𑀺 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑁄. 𑀏𑀓𑀸𑀯𑀚𑁆𑀚𑀦𑀸 𑀘 𑀲𑀸 𑀯𑀻𑀣𑀺 𑀘𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀆𑀯𑀚𑁆𑀚𑀦𑀁’’𑀢𑀺 𑀆𑀯𑀚𑁆𑀚𑀦 𑀘𑀺𑀢𑁆𑀢𑀁. 𑀢𑀁 𑀯𑀸 𑀆𑀯𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀁 𑀢𑀁 𑀚𑀯𑀦𑁂𑀦𑀸’’𑀢𑀺 𑀢𑁂𑀦 𑀢𑁂𑀦 𑀚𑀯𑀦𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀯𑀸 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀆𑀯𑀚𑁆𑀚𑀢𑀺 𑀓𑀺𑀦𑁆𑀢𑀺 𑀬𑁄𑀚𑀦𑀸. ‘‘𑀓𑀺𑀜𑁆𑀘𑁂𑀢𑁆𑀣𑀸’’𑀢𑀺 𑀏𑀢𑁆𑀣 𑀯𑀘𑀦𑁂 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀢𑀸𑀯 𑀆𑀯𑀚𑁆𑀚𑀦𑀜𑁆𑀘 𑀚𑀯𑀦𑀸𑀦𑀺 𑀘𑀸𑀢𑀺 𑀅𑀥𑀺𑀓𑀸𑀭𑁄. ‘‘𑀢𑀜𑁆𑀳𑀺 𑀘𑀺𑀢𑁆𑀢𑀁’’𑀢𑀺 𑀧𑀭𑀲𑁆𑀲 𑀘𑀺𑀢𑁆𑀢𑀁. ‘‘𑀏𑀯𑀫𑁆𑀧𑀺 𑀪𑀺𑀦𑁆𑀦𑀫𑁂𑀯𑀸’’𑀢𑀺 𑀚𑀯𑀦𑀸𑀦𑀁 𑀥𑀫𑁆𑀫𑀢𑁄 𑀪𑀺𑀦𑁆𑀦𑀫𑁂𑀯. 𑀏𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀤𑁆𑀥𑀫𑁆𑀧𑀺 𑀚𑀯𑀦𑀸𑀦𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀤𑁆𑀥𑀸𑀯𑀲𑁂𑀦 𑀕𑀳𑀺𑀢𑀁’’𑀢𑀺 𑀅𑀤𑁆𑀥𑀸 𑀧𑀘𑁆𑀘𑀼𑀧𑁆𑀧𑀦𑁆𑀦 𑀯𑀲𑁂𑀦 𑀕𑀳𑀺𑀢𑀁. ‘‘𑀲𑀦𑁆𑀢𑀢𑀺𑀯𑀲𑁂𑀦 𑀕𑀳𑀺𑀢𑀁’’𑀢𑀺 𑀲𑀦𑁆𑀢𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀕𑀳𑀺𑀢𑀁. 𑀆𑀘𑀭𑀺𑀬𑀸𑀦𑀦𑁆𑀤𑀫𑀢𑁂. 𑀲𑀩𑁆𑀩𑁂𑀲𑀫𑁆𑀧𑀺 𑀆𑀯𑀚𑁆𑀚𑀦 𑀚𑀯𑀦𑀸𑀦𑀁. 𑀘𑀺𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀢𑁄 𑀅𑀪𑀺𑀦𑁆𑀦𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀮𑀢𑁄 𑀅𑀪𑀺𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀦𑁆𑀢𑀭𑀧𑀘𑁆𑀘𑀬𑁂 𑀅𑀢𑀻𑀢𑁄 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀘 𑀔𑀡 𑀯𑀲𑁂𑀦 𑀬𑀼𑀚𑁆𑀚𑀢𑀺. 𑀬𑀤𑀺 𑀅𑀤𑁆𑀥𑀸𑀲𑀦𑁆𑀢𑀢𑀺 𑀯𑀲𑁂𑀦 𑀬𑀼𑀚𑁆𑀚𑁂𑀬𑁆𑀬, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬. 𑀓𑀲𑁆𑀫𑀸, 𑀏𑀓𑀸𑀯𑀚𑁆𑀚𑀦 𑀯𑀻𑀣𑀺𑀬𑀜𑁆𑀳𑀺 𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀸𑀦𑀺 𑀅𑀤𑁆𑀥𑀸𑀲𑀦𑁆𑀢𑀢𑀺 𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀏𑀯 𑀳𑁄𑀦𑁆𑀢𑀻𑀢𑀺.

𑁧𑁩𑁮. 𑀅𑀧𑁆𑀧𑀦𑀸𑀯𑀸𑀭𑁂. ‘‘𑀅𑀧𑁆𑀧𑀦𑀸 𑀚𑀯𑀦𑀁’’𑀢𑀺 𑀓𑀫𑁆𑀫𑀧𑀤𑀁. ‘‘𑀢𑀤𑀸 𑀭𑀫𑁆𑀫𑀡𑀁’’𑀢𑀺 𑀓𑀢𑁆𑀢𑀼𑀧𑀤𑀁. ‘‘𑀇𑀦𑁆𑀤𑁆𑀭𑀺𑀬 𑀲𑀫𑀢𑀸𑀤𑀻𑀳𑀻’’𑀢𑀺 𑀲𑀤𑁆𑀥𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺 𑀯𑀢𑁆𑀢𑀦𑀯𑀲𑁂𑀦 𑀲𑀫𑀢𑀸𑀤𑀻𑀳𑀺. ‘‘𑀧𑀭𑀺𑀢𑁄’’𑀢𑀺 𑀲𑀫𑀦𑁆𑀢𑀢𑁄. ‘‘𑀉𑀧𑁂𑀘𑁆𑀘𑀸’’𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀅𑀧𑁆𑀧𑀦𑀁 𑀯𑀳𑀺𑀢𑀼𑀁 𑀚𑀦𑁂𑀢𑀼𑀁 𑀲𑀫𑀢𑁆𑀣 𑀪𑀸𑀯𑁄 𑀅𑀧𑁆𑀧𑀦𑀸𑀯𑀳𑀲𑀫𑀢𑁆𑀣𑀪𑀸𑀯𑁄. ‘‘𑀬𑀲𑁆𑀲 𑀧𑀯𑀢𑁆𑀢𑀺𑀬𑀸’’𑀢𑀺 𑀬𑀲𑁆𑀲 𑀉𑀧𑀘𑀸𑀭 𑀚𑀯𑀦𑀲𑁆𑀲 𑀧𑀯𑀢𑁆𑀢𑀺𑀢𑁄. ‘‘𑀅𑀘𑀺𑀭𑀁 𑀓𑀸𑀮𑀁’’𑀢𑀺 𑀅𑀘𑀺𑀭𑁂𑀓𑀸𑀮𑁂. 𑀧𑀭𑀺𑀢𑁆𑀢 𑀚𑀸𑀢𑀺𑀓𑀸 𑀦𑀸𑀫 𑀓𑀸𑀫𑀸𑀯𑀘𑀭𑀚𑀸𑀢𑀺. ‘‘𑀕𑁄𑀢𑁆𑀢𑀁’’𑀢𑀺 𑀓𑀫𑁆𑀫𑀓𑀢𑁆𑀢𑀼 𑀧𑀤𑀁. ‘‘𑀅𑀪𑀺𑀪𑀼𑀬𑁆𑀬𑀢𑀻’’𑀢𑀺 𑀪𑀸𑀯𑀦𑀸 𑀩𑀮𑁂𑀦 𑀅𑀪𑀺𑀪𑀼𑀬𑁆𑀬𑀫𑀸𑀦𑀁 𑀳𑁄𑀢𑀺. 𑀅𑀪𑀺𑀫𑀤𑁆𑀤𑀻𑀬𑀫𑀸𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀙𑀺𑀚𑁆𑀚𑀢𑀻’’𑀢𑀺 𑀇𑀤𑀁 𑀧𑀦 𑀅𑀪𑀺𑀪𑀯𑀦𑀲𑁆𑀲 𑀲𑀺𑀔𑀸𑀧𑀢𑁆𑀢 𑀤𑀲𑁆𑀲𑀦𑀁. 𑀬𑀸𑀯 𑀢𑀁 𑀕𑁄𑀢𑁆𑀢𑀁 𑀙𑁂𑀤𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀅𑀪𑀺𑀪𑀼𑀬𑁆𑀬𑀢𑀺, 𑀫𑀤𑁆𑀤𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑁄𑀢𑁆𑀢𑀁 𑀅𑀪𑀺𑀪𑀯𑀢𑀻𑀢𑀺 𑀕𑁄𑀢𑁆𑀭𑀪𑀽𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀧𑀜𑁆𑀘𑀫𑀁’’𑀢𑀺 𑀧𑀜𑁆𑀘𑀫𑁂 𑀘𑀺𑀢𑁆𑀢𑀯𑀸𑀭𑁂. ‘‘𑀢𑀤𑀸𑀳𑀺 𑀚𑀯𑀦𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀧𑀓𑀢𑀺𑀬𑀸 𑀚𑀯𑀦𑀧𑁆𑀧𑀯𑀢𑁆𑀢𑀺𑀦𑀸𑀫 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄 𑀳𑁄𑀢𑀺. 𑀘𑀢𑀼𑀢𑁆𑀣𑀜𑁆𑀘 𑀫𑀼𑀤𑁆𑀥𑀧𑀢𑁆𑀢𑀁. 𑀧𑀜𑁆𑀘𑀫𑀢𑁄 𑀧𑀝𑁆𑀞𑀸𑀬 𑀧𑀢𑀺𑀢𑀁. 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀜𑁆𑀘𑀫𑀯𑀸𑀭𑁂 𑀚𑀯𑀦𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺. ‘‘𑀤𑀼𑀢𑀻𑀬𑁂𑀦𑀸’’𑀢𑀺 𑀤𑀼𑀢𑀻𑀬𑁂𑀦 𑀏𑀯 𑀲𑀤𑁆𑀤𑁂𑀦. ‘‘𑀤𑀼𑀢𑀻𑀬𑀁’’𑀢𑀺 𑀤𑀼𑀢𑀻𑀬𑁂 𑀘𑀺𑀢𑁆𑀢𑀯𑀸𑀭𑁂. 𑀢𑀤𑀸 𑀅𑀦𑀼𑀮𑁄𑀫𑀁 𑀧𑀣𑀫𑀚𑀯𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀮𑀤𑁆𑀥𑀸 𑀲𑁂𑀯𑀦𑀁 𑀅𑀦𑀼𑀮𑁄𑀫’’𑀦𑁆𑀢𑀺. ‘‘𑀏𑀢𑁂𑀦𑁂𑀯𑀸’’𑀢𑀺 𑀏𑀢𑁂𑀦 𑀏𑀯 𑀲𑀤𑁆𑀤 𑀤𑁆𑀯𑀬𑁂 𑀦𑁂𑀯. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀅𑀦𑀼𑀜𑁆𑀜𑀸𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣. 𑀫𑀦𑁆𑀤𑀧𑀜𑁆𑀜𑀲𑁆𑀲 𑀘𑀢𑁆𑀢𑀸𑀭𑀺 𑀅𑀦𑀼𑀮𑁄𑀫𑀸𑀦𑀺 𑀳𑁄𑀦𑁆𑀢𑀺, 𑀧𑀜𑁆𑀘𑀫𑀁 𑀕𑁄𑀢𑁆𑀭𑀪𑀼, 𑀙𑀝𑁆𑀞𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀲𑀢𑁆𑀢𑀫𑀁 𑀨𑀮𑀦𑁆𑀢𑀺. ‘‘𑀇𑀢𑀭𑀝𑁆𑀞𑀓𑀣𑀸𑀲𑀽’’𑀢𑀺 𑀯𑀺𑀦𑀬𑀝𑁆𑀞 𑀓𑀣𑀸𑀤𑀻𑀲𑀼. ‘‘𑀧𑀝𑀺𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀧𑀜𑁆𑀘𑀫𑀁 𑀕𑁄𑀢𑁆𑀭 𑀪𑀼𑀧𑁆𑀧𑀯𑀢𑁆𑀢𑀺𑀬𑀸 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀆𑀤𑀺𑀫𑁆𑀳𑀺 𑀅𑀝𑁆𑀞𑀦𑁆𑀦𑀁 𑀅𑀜𑁆𑀜𑀢𑁆𑀭𑀲𑁆𑀫𑀺𑀁𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀦𑀺𑀭𑀼𑀤𑁆𑀥𑁂𑀢𑀺 𑀧𑀤𑀁 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀭𑀼𑀤𑁆𑀥𑁂 𑀅𑀦𑀦𑁆𑀢𑀭𑀫𑁂𑀯𑀸𑀢𑀺 𑀧𑀤𑀘𑁆𑀙𑁂𑀤𑁄’’𑀢𑀺. 𑀅𑀦𑀦𑁆𑀢𑀭 𑀲𑀤𑁆𑀤𑀲𑁆𑀲 𑀘 𑀦𑀺𑀘𑁆𑀘𑀁 𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑀢𑁆𑀢𑀸 𑀢𑀫𑁂𑀯𑀧𑀤𑀁 𑀯𑀺𑀪𑀢𑁆𑀢𑀺 𑀧𑀭𑀺𑀡𑀸𑀫𑁂𑀦 𑀅𑀥𑀺𑀓𑀢𑀦𑁆𑀢𑀺 𑀆𑀳 ‘‘𑀦𑀺𑀭𑀼𑀤𑁆𑀥𑀲𑁆𑀲𑀸𑀢𑀺 𑀅𑀢𑁆𑀣𑀢𑁄 𑀮𑀤𑁆𑀥𑀫𑁂𑀯𑀸’’𑀢𑀺. ‘‘𑀯𑀲𑀺𑀪𑀽𑀢𑀸𑀧𑀻’’𑀢𑀺 𑀯𑀲𑀺𑀪𑀽𑀢𑀸𑀧𑀺 𑀲𑀫𑀸𑀦𑀸. ‘‘𑀏𑀓𑀯𑀸𑀭𑀁 𑀚𑀯𑀺𑀢𑁆𑀯𑀸’’𑀢𑀺 𑀇𑀤𑀁 𑀮𑁄𑀓𑀺𑀬𑀧𑁆𑀧𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀮𑁄𑀓𑀼𑀢𑁆𑀢𑀭 𑀅𑀧𑁆𑀧𑀦𑀸𑀧𑀦 𑀲𑀢𑁆𑀢𑀫𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀫𑀽𑀮𑀝𑀻𑀓𑀸 𑀧𑀸𑀞𑁂 ‘‘𑀪𑀽𑀫𑀦𑁆𑀢𑀭𑀧𑀢𑁆𑀢𑀺𑀬𑀸’’𑀢𑀺 𑀕𑁄𑀢𑁆𑀭𑀪𑀼 𑀘𑀺𑀢𑁆𑀢𑀁 𑀓𑀸𑀫𑀪𑀽𑀫𑀺 𑀳𑁄𑀢𑀺. 𑀅𑀧𑁆𑀧𑀦𑀸𑀧𑀦 𑀫𑀳𑀕𑁆𑀕𑀢𑀪𑀽𑀫𑀺 𑀯𑀸 𑀮𑁄𑀓𑀼𑀢𑁆𑀢𑀭𑀪𑀽𑀫𑀺 𑀯𑀸 𑀳𑁄𑀢𑀺. 𑀏𑀯𑀁 𑀪𑀽𑀫𑀦𑁆𑀢𑀭𑀧𑀢𑁆𑀢𑀺𑀬𑀸. ‘‘𑀆𑀭𑀫𑁆𑀫𑀡𑀦𑁆𑀢𑀭 𑀮𑀤𑁆𑀥𑀺𑀬𑀸’’𑀢𑀺 𑀨𑀮𑀲𑀫𑀸𑀧𑀢𑁆𑀢𑀺 𑀯𑀻𑀣𑀺𑀬𑀁 𑀨𑀮𑀚𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣𑀳𑀺 𑀧𑀼𑀭𑀺𑀫𑀸𑀦𑀺 𑀅𑀦𑀼𑀮𑁄𑀫 𑀚𑀯𑀦𑀸𑀦𑀺 𑀲𑀗𑁆𑀔𑀸𑀭𑀸 𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀨𑀮𑀚𑀯𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁. 𑀇𑀤𑀜𑁆𑀘 𑀓𑀸𑀭𑀡𑀫𑀢𑁆𑀢𑀫𑁂𑀯. 𑀬𑀣𑀸𑀯𑀼𑀢𑁆𑀢 𑀮𑁂𑀟𑁆𑀟𑀼𑀧𑀫𑀸 𑀏𑀯 𑀇𑀥 𑀬𑀼𑀢𑁆𑀢𑀭𑀽𑀧𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀏𑀢𑀁 𑀅𑀢𑁆𑀣𑀚𑀸𑀢𑀁 𑀦 𑀔𑁄 𑀏𑀯𑀁 𑀤𑀝𑁆𑀞𑀩𑁆𑀩𑀁. ‘‘𑀅𑀦𑀤𑁆𑀥𑀦𑀻𑀬𑀸’’𑀢𑀺 𑀅𑀤𑁆𑀥𑀸𑀦𑀁 𑀤𑀻𑀖𑀓𑀸𑀮𑀁 𑀦𑀔 𑀫𑀦𑁆𑀢𑀻𑀢𑀺 𑀅𑀦𑀤𑁆𑀥𑀦𑀻𑀬𑀸. 𑀅𑀲𑀸𑀭𑀸. 𑀅𑀲𑀸𑀭𑀢𑁆𑀢𑀸 𑀏𑀯 𑀲𑀻𑀖𑀢𑀭𑀁 𑀭𑀼𑀳𑀦𑁆𑀢𑀺. 𑀲𑀻𑀖𑀢𑀭𑀁 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀲𑀸𑀭𑀯𑀦𑁆𑀢𑀸 𑀧𑀦 𑀲𑀸𑀭𑁂𑀦 𑀲𑀳 𑀯𑀟𑁆𑀠𑀫𑀸𑀦𑀢𑁆𑀢𑀸 𑀲𑀻𑀖𑀢𑀭𑀁 𑀦𑀭𑀼𑀳𑀦𑁆𑀢𑀺. 𑀲𑀻𑀖𑀢𑀭𑀁 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀦𑀸 𑀧𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀓𑀯𑀲𑁆𑀲𑀚𑀻𑀯𑀺𑀦𑁄’’𑀢𑀺𑀆𑀤𑀺𑀁. ‘‘𑀏𑀯𑀫𑁂𑀯𑀸’’𑀢𑀺𑀆𑀤𑀻𑀲𑀼 ‘‘𑀧𑀢𑀺𑀢𑀚𑀯𑀦𑁂𑀲𑀽’’𑀢𑀺 𑀧𑀜𑁆𑀘𑀫 𑀙𑀝𑁆𑀞 𑀲𑀢𑁆𑀢𑀫 𑀚𑀯𑀦𑁂𑀲𑀼. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼. ‘‘𑀲𑀼𑀧𑀓𑁆𑀓𑀲𑀸𑀮𑀺𑀪𑀢𑁆𑀢 𑀲𑀤𑀺𑀲𑀸𑀦𑀻’’𑀢𑀺 𑀬𑀣𑀸 𑀲𑀸𑀮𑀺𑀪𑀢𑁆𑀢𑀸𑀦𑀺 𑀲𑀼𑀧𑀓𑁆𑀓𑀢𑁆𑀢𑀸 𑀏𑀯 𑀫𑀼𑀤𑀼𑀢𑀭𑀸𑀦𑀺 𑀳𑀼𑀢𑁆𑀯𑀸 𑀤𑀼𑀩𑁆𑀩𑀮𑀸𑀦𑀺 𑀅𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺. 𑀢𑀲𑁆𑀫𑀺𑀁 𑀤𑀺𑀯𑀲𑁂𑀧𑀺 𑀧𑀽𑀢𑀺𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀅𑀧𑁆𑀧𑀦𑀸 𑀚𑀯𑀦𑀸𑀦𑀺. ‘‘𑀬𑀲𑁆𑀫𑀸 𑀘𑀸’’𑀢𑀺𑀆𑀤𑀻𑀲𑀼. ‘‘𑀤𑀼𑀯𑀺𑀥𑀲𑁆𑀲 𑀦𑀺𑀬𑀫𑀲𑁆𑀲𑀸’’𑀢𑀺 𑀚𑀯𑀦𑀦𑀺𑀬𑀫𑀲𑁆𑀲 𑀘 𑀓𑀸𑀮𑀦𑀺𑀬𑀫𑀲𑁆𑀲 𑀘. ‘‘𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭 𑀧𑀘𑁆𑀘𑀬 𑀪𑀸𑀯𑀺𑀦𑁄’’𑀢𑀺 𑀲𑀢𑁆𑀢𑀫 𑀚𑀯𑀦 𑀘𑁂𑀢𑀦𑀸 𑀅𑀦𑀦𑁆𑀢𑀭 𑀧𑀘𑁆𑀘𑀬𑁄, 𑀢𑀤𑀦𑀦𑁆𑀢𑀭𑁂 𑀧𑀯𑀢𑁆𑀢𑀁 𑀯𑀺𑀧𑀸𑀓 𑀲𑀦𑁆𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄, 𑀢𑀫𑁂𑀯 𑀘 𑀅𑀯𑀲𑀸𑀦𑁂 𑀘𑀼𑀢𑀺 𑀘𑀺𑀢𑁆𑀢𑀁 𑀳𑀼𑀢𑁆𑀯𑀸 𑀪𑀯𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭 𑀧𑀘𑁆𑀘𑀬𑁄. 𑀏𑀯𑀁 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭 𑀧𑀘𑁆𑀘𑀬 𑀪𑀸𑀯𑁂𑀦 𑀅𑀯𑀲𑁆𑀲𑀁 𑀪𑀯𑀺𑀲𑁆𑀲𑀫𑀸𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀓𑀸𑀭𑀡 𑀫𑀢𑁆𑀢𑀫𑁂𑀯. 𑀫𑀳𑀸𑀝𑀻𑀓𑀸𑀯𑀘𑀦𑀁 𑀧𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩 𑀭𑀽𑀧𑀦𑁆𑀢𑀺 𑀦 𑀧𑀝𑀺𑀓𑁆𑀔𑀺𑀢𑁆𑀢𑀁. ‘‘𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀦𑀁’’𑀢𑀺 𑀆𑀤𑀻𑀲𑀼. 𑀪𑀺𑀦𑁆𑀦𑀸 𑀅𑀲𑀤𑀺𑀲𑀸 𑀯𑁂𑀤𑀦𑀸 𑀬𑁂𑀲𑀁 𑀢𑀸𑀦𑀺 𑀪𑀺𑀦𑁆𑀦𑀯𑁂𑀤𑀦𑀸𑀦𑀺. ‘‘𑀆𑀲𑁂𑀯𑀦 𑀧𑀘𑁆𑀘𑀦𑀻𑀓𑀸𑀦𑀁’’𑀢𑀺 𑀆𑀲𑁂𑀯𑀦 𑀧𑀘𑁆𑀘𑀬𑀧𑁆𑀧𑀝𑀺 𑀧𑀓𑁆𑀔𑀸𑀦𑀁. 𑀅𑀪𑀺𑀦𑁆𑀦𑀸 𑀯𑁂𑀤𑀦𑀸 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀓𑁆𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀨𑀮𑀁 𑀨𑀮𑀲𑀫𑀸𑀧𑀢𑁆𑀢𑀺 𑀯𑀻𑀣𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁧𑁩𑁯. ‘‘𑀲𑀩𑁆𑀩𑀣𑀸 𑀧𑀻’’𑀢𑀺𑀆𑀤𑀻𑀲𑀼. 𑀮𑁄𑀓𑁂 𑀫𑀚𑁆𑀛𑀺𑀫𑀓𑁂 𑀳𑀺 𑀫𑀳𑀸𑀚𑀦𑁂𑀳𑀺 𑀇𑀘𑁆𑀙𑀺𑀢𑀫𑁆𑀧𑀺 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀅𑀢𑀺𑀉𑀓𑁆𑀓𑀝𑁆𑀞𑁂𑀳𑀺 𑀫𑀦𑁆𑀥𑀸𑀢𑀼 𑀭𑀸𑀚𑀸𑀤𑀻𑀳𑀺 𑀇𑀘𑁆𑀙𑀺𑀢𑀁 𑀦 𑀳𑁄𑀢𑀺. 𑀢𑀣𑀸 𑀢𑁂𑀳𑀺 𑀫𑀳𑀸𑀚𑀦𑁂𑀳𑀺 𑀅𑀦𑀺𑀘𑁆𑀙𑀺𑀢𑀫𑁆𑀧𑀺 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀅𑀢𑀺𑀤𑀼𑀕𑁆𑀕𑀢𑁂𑀳𑀺 𑀧𑀘𑁆𑀘𑀦𑁆𑀢 𑀯𑀸𑀲𑀻𑀳𑀺 𑀇𑀘𑁆𑀙𑀺𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀆𑀭𑀫𑁆𑀫𑀡𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞 𑀯𑀯𑀢𑁆𑀣𑀸𑀦𑀁 𑀧𑀢𑁆𑀯𑀸 𑀅𑀢𑀺𑀉𑀓𑁆𑀓𑀝𑁆𑀞𑁂𑀳𑀺 𑀘 𑀅𑀢𑀺𑀤𑀼𑀕𑁆𑀕𑀢𑁂𑀳𑀺 𑀘 𑀯𑀯𑀢𑁆𑀣𑀸𑀦𑀁 𑀦 𑀕𑀘𑁆𑀙𑀢𑀺, 𑀫𑀚𑁆𑀛𑀺𑀫𑀓𑁂𑀳𑀺 𑀏𑀯 𑀯𑀯𑀢𑁆𑀣𑀸𑀦𑀁 𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺𑀁. ‘‘𑀆𑀭𑀫𑁆𑀫𑀡𑀁’’𑀢𑀺 𑀓𑀢𑁆𑀢𑀼𑀧𑀤𑀁. ‘‘𑀯𑀺𑀧𑀸𑀓𑀘𑀺𑀢𑁆𑀢𑀁’’𑀢𑀺 𑀓𑀫𑁆𑀫𑀧𑀤𑀁. ‘‘𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺 𑀭𑀽𑀧𑀁. ‘‘𑀓𑀺𑀲𑁆𑀫𑀺𑀜𑁆𑀘𑀻’’𑀢𑀺 𑀓𑀲𑁆𑀫𑀺𑀁𑀘𑀺 𑀏𑀓𑀲𑁆𑀫𑀺𑀁 𑀧𑀼𑀧𑁆𑀨𑁂. ‘‘𑀢𑁂𑀦 𑀯𑀸’’𑀢𑀺 𑀢𑁂𑀦 𑀯𑀸 𑀲𑀼𑀔𑀲𑀫𑁆𑀨𑀲𑁆𑀲𑁂𑀦 𑀯𑀢𑁆𑀣𑁂𑀦. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

‘‘𑀯𑁂𑀤𑀦𑀸𑀦𑀺𑀬𑀫𑁄𑀧𑀦𑀸’’𑀢𑀺𑀆𑀤𑀻𑀲𑀼. ‘‘𑀆𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀲𑁆𑀲 𑀯𑀺𑀬𑀸’’𑀢𑀺 𑀬𑀣𑀸 𑀆𑀤𑀸𑀲𑁂 𑀫𑀼𑀔 𑀦𑀺𑀫𑀺𑀢𑁆𑀢𑀲𑁆𑀲 𑀘𑀮𑀦 𑀘𑀯𑀦𑀸𑀤𑀺𑀬𑁄𑀕𑁄 𑀦𑀸𑀦𑀸𑀯𑀡𑁆𑀡𑀬𑁄𑀕𑁄 𑀘 𑀬𑀣𑀸𑀫𑀼𑀔𑀫𑁂𑀯 𑀲𑀺𑀤𑁆𑀥𑁄. 𑀢𑀣𑀸 𑀯𑀺𑀧𑀸𑀓𑀸𑀦𑀁. 𑀯𑁂𑀤𑀦𑀸 𑀬𑁄𑀕𑁄 𑀧𑀦 𑀬𑀣𑀸𑀭𑀫𑁆𑀫𑀡𑀫𑁂𑀯 𑀲𑀺𑀤𑁆𑀥𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀯𑁂𑀤𑀦𑀸𑀬𑁄𑀕𑁄’’𑀢𑀺 𑀦𑀸𑀦𑀸𑀯𑁂𑀤𑀦𑀸𑀬𑁄𑀕𑁄. ‘‘𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸. ‘‘𑀧𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀘𑀺𑀦𑁆𑀢𑁂𑀢𑁆𑀯𑀸. 𑀦 𑀓𑁂𑀯𑀮𑀜𑁆𑀘 𑀯𑀺𑀧𑀸𑀓𑀸𑀦𑀁 𑀏𑀯 𑀬𑀣𑀸𑀭𑀫𑁆𑀫𑀡𑀁 𑀯𑁂𑀤𑀦𑀸 𑀬𑁄𑀕𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸.

‘‘𑀅𑀬𑀜𑁆𑀘𑀸’’𑀢𑀺𑀆𑀤𑀻𑀲𑀼. ‘‘𑀅𑀝𑁆𑀞𑀓𑀣𑀸𑀬𑀁 𑀧𑀻’’𑀢𑀺 𑀧𑀝𑁆𑀞𑀸𑀦 𑀅𑀝𑁆𑀞𑀓𑀣𑀸𑀬𑀫𑁆𑀧𑀺. ‘‘𑀢𑀤𑀸𑀭𑀫𑁆𑀫𑀡 𑀯𑀲𑁂𑀦𑀸’’𑀢𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀸𑀦𑀦𑁆𑀢𑀺 𑀧𑀸𑀞𑀲𑁂𑀲𑁄. ‘‘𑀧𑀜𑁆𑀘𑀦𑁆𑀦𑀁’’𑀢𑀺 𑀲𑁄𑀫𑀦𑀲𑁆𑀲 𑀲𑀦𑁆𑀢𑀻𑀭𑀡𑁂𑀦 𑀲𑀤𑁆𑀥𑀺𑀁 𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀧𑀸𑀓 𑀲𑁄𑀫𑀦𑀲𑁆𑀲𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀧𑀓𑀢𑀺 𑀦𑀻𑀳𑀸𑀭𑁂𑀦𑀸’’𑀢𑀺 𑀧𑀓𑀢𑀺𑀬𑀸 𑀦𑀺𑀘𑁆𑀘𑀓𑀸𑀮𑀁 𑀧𑀯𑀢𑁆𑀢𑀧𑁆𑀧𑀓𑀸𑀭𑁂𑀦. 𑀧𑀸𑀴𑀺𑀧𑀸𑀞𑁂. 𑀪𑀸𑀯𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀬𑁂𑀦𑀸𑀢𑀺 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄. ‘‘𑀫𑀦𑀸𑀧𑀁’’𑀢𑀺 𑀫𑀦𑁄𑀭𑀫𑁆𑀫𑀁. ‘‘𑀅𑀫𑀦𑀸𑀧𑀁’’𑀢𑀺 𑀅𑀫𑀦𑁄𑀭𑀫𑁆𑀫𑀁. 𑀯𑀺𑀳𑀭𑁂𑀬𑁆𑀬𑀦𑁆𑀢𑀺 𑀲𑀘𑁂 𑀓𑀗𑁆𑀔𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀝𑀺𑀓𑀽𑀮𑁂’’𑀢𑀺 𑀅𑀫𑀦𑀸𑀧𑁂. ‘‘𑀅𑀧𑁆𑀧𑀝𑀺𑀓𑀽𑀮 𑀲𑀜𑁆𑀜𑀻’’𑀢𑀺 𑀫𑀦𑀸𑀧𑀲𑀜𑁆𑀜𑀻. 𑀏𑀯𑀁 𑀲𑁂𑀲𑁂𑀲𑀼. ‘‘𑀢𑁂𑀲𑀁’’𑀢𑀺 𑀔𑀻𑀡𑀸𑀲𑀯𑀸𑀦𑀁. 𑀧𑀸𑀴𑀺𑀧𑀸𑀞𑁂. ‘‘𑀲𑀼𑀫𑀦𑁄’’𑀢𑀺 𑀲𑁄𑀫𑀦𑀲𑁆𑀲𑀺𑀢𑁄. ‘‘𑀤𑀼𑀫𑁆𑀫𑀦𑁄’’𑀢𑀺 𑀤𑁄𑀫𑀦𑀲𑁆𑀲𑀺𑀢𑁄. 𑀧𑀸𑀴𑀺𑀧𑀸𑀞𑁂. ‘‘𑀫𑁂𑀢𑁆𑀢𑀸𑀬𑀯𑀸 𑀨𑀭𑀢𑀻’’𑀢𑀺 𑀅𑀬𑀁 𑀲𑀢𑁆𑀢𑁄 𑀅𑀯𑁂𑀭𑁄𑀳𑁄𑀢𑀽𑀢𑀺𑀆𑀤𑀺𑀦𑀸 𑀫𑁂𑀢𑁆𑀢𑀸𑀘𑀺𑀢𑁆𑀢𑁂𑀦 𑀯𑀸 𑀨𑀭𑀢𑀺. ‘‘𑀥𑀸𑀢𑀼𑀲𑁄 𑀉𑀧𑀲𑀁𑀳𑀭𑀢𑀻’’𑀢𑀺 𑀬𑀣𑀸 𑀫 𑀫 𑀓𑀸𑀬𑁄𑀧𑀺 𑀘𑀢𑀼𑀥𑀸𑀢𑀼 𑀲𑀫𑀼𑀲𑁆𑀲𑀬𑁄 𑀳𑁄𑀢𑀺. 𑀢𑀢𑁆𑀣 𑀏𑀓𑀸𑀧𑀺 𑀥𑀸𑀢𑀼 𑀦𑀸𑀫 𑀧𑀝𑀺𑀓𑀽𑀮𑀸 𑀯𑀸 𑀅𑀧𑁆𑀧𑀝𑀺𑀓𑀽𑀮𑀸 𑀯𑀸 𑀦 𑀳𑁄𑀢𑀺. 𑀓𑁂𑀯𑀮𑀁 𑀢𑀼𑀘𑁆𑀙 𑀲𑀼𑀜𑁆𑀜 𑀲𑀪𑀸𑀯𑀫𑀢𑁆𑀢𑀸 𑀳𑁄𑀢𑀺. 𑀏𑀯𑀫𑁂𑀯 𑀇𑀫𑀲𑁆𑀲 𑀲𑀢𑁆𑀢𑀲𑁆𑀲 𑀓𑀸𑀬𑁄𑀧𑀻𑀢𑀺𑀆𑀤𑀺𑀦𑀸 𑀥𑀸𑀢𑀼 𑀲𑁄 𑀉𑀧𑀲𑀁𑀳𑀭𑀢𑀺. ‘‘𑀅𑀲𑀼𑀪𑀸𑀬 𑀯𑀸’’𑀢𑀺 𑀅𑀲𑀼𑀪 𑀪𑀸𑀯𑀦𑀸𑀬 𑀯𑀸. 𑀅𑀲𑀼𑀪 𑀪𑀸𑀯𑀦𑀸 𑀘𑀺𑀢𑁆𑀢𑁂𑀦 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀲𑀼𑀪𑀸𑀬𑀸’’𑀢𑀺 𑀯𑀸 𑀢𑀲𑁆𑀲 𑀅𑀲𑀼𑀪𑀪𑀸𑀯𑀢𑁆𑀣𑀸𑀬. 𑀤𑁂𑀯𑀦𑀸𑀝𑀓𑀸 𑀤𑁂𑀯𑀘𑁆𑀙𑀭𑀸 𑀦𑀸𑀫. 𑀓𑀼𑀣𑀺𑀢𑀸𑀦𑀺 𑀓𑀼𑀝𑁆𑀞𑀸𑀦𑀺 𑀬𑁂𑀲𑀁 𑀢𑀸𑀦𑀺 𑀓𑀼𑀣𑀺𑀢 𑀓𑀼𑀝𑁆𑀞𑀸𑀦𑀺. ‘‘𑀲𑀭𑀻𑀭𑀸𑀦𑀻’’𑀢𑀺 𑀓𑀸𑀬𑀗𑁆𑀕𑀸𑀦𑀺. 𑀓𑀼𑀣𑀺𑀢 𑀓𑀼𑀝𑁆𑀞𑀸𑀦𑀺 𑀲𑀭𑀻𑀭𑀸𑀦𑀺 𑀬𑀲𑁆𑀲 𑀲𑁄 𑀓𑀼𑀣𑀺𑀢𑀓𑀼𑀝𑁆𑀞𑀲𑀭𑀻𑀭𑁄. ‘‘𑀓𑀼𑀣𑀺𑀢𑀸𑀦𑀻’’𑀢𑀺 𑀅𑀩𑁆𑀪𑀼𑀓𑁆𑀓𑀺𑀭𑀡𑀸𑀦𑀺. 𑀯𑁂𑀤𑀦𑀸 𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀇𑀢𑀺 𑀅𑀧𑀭𑁂 𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀬𑀣𑀸 𑀆𑀦𑀺𑀲𑀁𑀲 𑀤𑀲𑁆𑀲𑀦𑁂𑀦𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀅𑀝𑁆𑀞𑀓𑀣𑀸𑀬𑀁’’𑀢𑀺 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑀝𑁆𑀞𑀓𑀣𑀸𑀬𑀁. ‘‘𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸 𑀤𑀲𑁆𑀲𑀦𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀲𑀢𑁆𑀣𑀼𑀪𑀽𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀼𑀩𑀼𑀤𑁆𑀥𑀢𑀸 𑀤𑀲𑁆𑀲𑀦𑁂𑀦. ‘‘𑀅𑀢𑁆𑀢𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀦𑁂𑀦𑀸’’𑀢𑀺 𑀫𑀬𑀁 𑀧𑀦 𑀏𑀯𑀭𑀽𑀧𑀸 𑀤𑀼𑀓𑁆𑀔𑀸 𑀫𑀼𑀢𑁆𑀢𑀸𑀫𑁆𑀳𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀦𑁂𑀦. ‘‘𑀅𑀝𑁆𑀞𑀺𑀓𑀗𑁆𑀓𑀮𑀺𑀓𑀧𑁂𑀢𑀭𑀽𑀧𑁂’’𑀢𑀺 𑀦𑀺𑀫𑁆𑀫𑀁 𑀲𑀮𑁄𑀳𑀺𑀢𑁂 𑀅𑀝𑁆𑀞𑀺𑀧𑀼𑀜𑁆𑀚𑀧𑁂𑀢𑀲𑀭𑀻𑀭𑁂. ‘‘𑀓𑀼𑀝𑁆𑀞𑀺𑀦𑁄’’𑀢𑀺 𑀓𑀼𑀝𑁆𑀞𑀲𑀭𑀻𑀭𑀲𑁆𑀲. ‘‘𑀅𑀝𑁆𑀞𑀓𑀣𑀸𑀬𑀁’’𑀢𑀺 𑀥𑀫𑁆𑀫𑀧𑀤 𑀅𑀝𑁆𑀞𑀓𑀣𑀸𑀬𑀁. 𑀅𑀢𑀺 𑀇𑀝𑁆𑀞𑁂 𑀤𑁂𑀯𑀘𑁆𑀙𑀭 𑀯𑀡𑁆𑀡𑀸𑀤𑀺𑀓𑁂. 𑀅𑀢𑀺 𑀅𑀦𑀺𑀝𑁆𑀞𑁂 𑀓𑀼𑀣𑀺𑀢𑀓𑀼𑀝𑁆𑀞𑀲𑀭𑀻𑀭𑀸𑀤𑀺𑀓𑁂. ‘‘𑀯𑀢𑁆𑀣𑀼 𑀪𑀽𑀢𑁄’’𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦 𑀪𑀽𑀢𑁄. ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁’’𑀢𑀺 𑀓𑀢𑁆𑀢𑀼 𑀅𑀢𑁆𑀣𑁂𑀲𑀸𑀫𑀺𑀯𑀘𑀦𑀁. ‘‘𑀢𑀤𑀼𑀪𑀬𑀁 𑀧𑀻’’𑀢𑀺 𑀉𑀪𑀬𑀁 𑀢𑀁 𑀕𑀳𑀡𑀁𑀧𑀺. ‘‘𑀢𑁂𑀲𑀁’’𑀢𑀺 𑀢𑁂𑀲𑀁 𑀮𑁄𑀓𑀺𑀬 𑀫𑀳𑀸𑀚𑀦𑀸𑀦𑀁. ‘‘𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑁂𑀯 𑀳𑁄𑀢𑀻’’𑀢𑀺 𑀤𑁂𑀯𑀘𑁆𑀙𑀭𑀯𑀡𑁆𑀡𑀸𑀤𑀻𑀲𑀼 𑀅𑀢𑀺𑀇𑀝𑁆𑀞𑁂𑀲𑀼 𑀅𑀢𑀺𑀇𑀝𑁆𑀞𑀸𑀓𑀸𑀭𑀢𑁄 𑀕𑀳𑀡𑀫𑁆𑀧𑀺 𑀯𑀺𑀧𑀮𑁆𑀮𑀸𑀲 𑀯𑀲𑁂𑀦𑁂𑀯 𑀳𑁄𑀢𑀺. 𑀓𑀲𑁆𑀫𑀸, 𑀤𑁂𑀯𑀘𑁆𑀙𑀭 𑀯𑀡𑁆𑀡𑀸𑀤𑀻𑀲𑀼 𑀅𑀢𑀺 𑀇𑀝𑁆𑀞 𑀲𑀜𑁆𑀜𑀸𑀬 𑀯𑀺𑀧𑀮𑁆𑀮𑀸𑀲 𑀲𑀜𑁆𑀜𑀸𑀪𑀸𑀯𑀢𑁄.

𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀧𑀯𑀢𑁆𑀢𑀺𑀬𑀸’’𑀢𑀺 𑀧𑀯𑀢𑁆𑀢𑀦𑀢𑁄. 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀕𑀸𑀭𑀯𑁂𑀦’’𑀢𑀁 𑀯𑀺𑀘𑀸𑀭𑁂𑀢𑀩𑁆𑀩 𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀅𑀬𑀼𑀢𑁆𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲𑀦𑀬𑁄 𑀅𑀜𑁆𑀜𑀢𑁆𑀣𑀧𑀺. ‘‘𑀥𑀫𑁆𑀫 𑀘𑀓𑁆𑀔𑀼𑀭𑀳𑀺𑀢𑀸’’𑀢𑀺 𑀥𑀫𑁆𑀫 𑀯𑀯𑀢𑁆𑀣𑀸𑀦𑀜𑁆𑀜𑀸𑀡 𑀘𑀓𑁆𑀔𑀼 𑀭𑀳𑀺𑀢𑀸. ‘‘𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀬𑁂𑀯𑀸’’𑀢𑀺 𑀢𑁂𑀲𑀁 𑀥𑀫𑁆𑀫 𑀘𑀓𑁆𑀔𑀼 𑀭𑀳𑀺𑀢𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀺𑀬𑁂𑀯. 𑀕𑀸𑀣𑀸𑀬𑀁. ‘‘𑀭𑀽𑀧𑀸’’𑀢𑀺 𑀭𑀽𑀧𑀢𑁄 𑀦𑀧𑁆𑀧𑀯𑁂𑀥𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀤𑁆𑀤𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯𑀦𑀬𑁄. 𑀦𑀧𑁆𑀧𑀯𑁂𑀥𑀦𑁆𑀢𑀻𑀢𑀺 𑀘 𑀦 𑀘𑀮𑀦𑁆𑀢𑀺, 𑀦 𑀓𑀫𑁆𑀧𑀦𑁆𑀢𑀺, 𑀘𑀺𑀢𑁆𑀢𑀜𑁆𑀜𑀣𑀢𑁆𑀢𑀁 𑀦 𑀕𑀘𑁆𑀙𑀦𑁆𑀢𑀺. 𑀢𑀣𑀸 𑀉𑀧𑁂𑀓𑁆𑀔𑀸 𑀓𑁆𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀸𑀦𑀺 𑀲𑁄𑀫𑀦𑀲𑁆𑀲𑀼 𑀧𑁂𑀓𑁆𑀔𑀸𑀯𑁂𑀤𑀦𑀸 𑀬𑀼𑀢𑁆𑀢𑀸𑀦𑀺 𑀏𑀯 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀫𑀽𑀮𑀝𑀻𑀓𑀸𑀧𑀸𑀞𑁂. ‘‘𑀢𑀤𑀸𑀭𑀫𑁆𑀫𑀡𑀢𑀸’’𑀢𑀺 𑀢𑀤𑀸𑀭𑀫𑁆𑀫𑀡𑀢𑀸𑀬 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦. ‘‘𑀓𑀢𑁆𑀣𑀘𑀻’’𑀢𑀺 𑀓𑀢𑁆𑀣𑀘𑀺 𑀅𑀪𑀺𑀥𑀫𑁆𑀫 𑀧𑀸𑀴𑀺𑀬𑀁. ‘‘𑀯𑀺𑀚𑁆𑀚𑀫𑀸𑀦𑁂 𑀘 𑀢𑀲𑁆𑀫𑀺𑀁’’𑀢𑀺 𑀢𑀲𑁆𑀫𑀺𑀁 𑀓𑁆𑀭𑀺𑀬𑀚𑀯𑀦𑀸𑀦𑀼 𑀩𑀦𑁆𑀥𑀓𑁂 𑀢𑀤𑀸 𑀭𑀫𑁆𑀫𑀡𑁂 𑀯𑀺𑀚𑁆𑀚𑀫𑀸𑀦𑁂 𑀲𑀢𑀺. 𑀏𑀢𑀁 𑀪𑀯𑀗𑁆𑀕𑀜𑁆𑀘 𑀦𑀸𑀫 𑀅𑀦𑀼𑀩𑀦𑁆𑀥𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀤𑀻𑀲𑁄𑀢𑁄 𑀧𑀝𑀺𑀲𑁄𑀢𑀕𑀸𑀫𑀺𑀦𑀸𑀯𑀁 𑀅𑀦𑀼𑀩𑀦𑁆𑀥𑀢𑀺 𑀯𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀲𑀯𑀺𑀧𑁆𑀨𑀸𑀭𑀺𑀓𑀁 𑀏𑀯𑀚𑀯𑀦𑀁’’𑀢𑀺 𑀓𑀺𑀮𑁂𑀲 𑀥𑀫𑁆𑀫𑀸𑀦𑀁 𑀯𑀺𑀧𑀮𑁆𑀮𑀸𑀲 𑀥𑀫𑁆𑀫𑀸𑀦𑀜𑁆𑀘 𑀯𑀲𑁂𑀦 𑀔𑀡𑀫𑀢𑁆𑀢𑁂𑀧𑀺 𑀅𑀦𑁂𑀓𑀲𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀺𑀯𑀺𑀥𑀸𑀓𑀸𑀭𑁂𑀦 𑀨𑀭𑀡𑀯𑁂𑀕𑀲𑀳𑀺𑀢𑀁 𑀓𑀼𑀲𑀮𑀸𑀓𑀼𑀲𑀮 𑀚𑀯𑀦𑀫𑁂𑀯 𑀅𑀦𑀼𑀩𑀦𑁆𑀥𑀢𑀻𑀢𑀺 𑀬𑀼𑀢𑁆𑀢𑀁. 𑀦 𑀧𑀦 𑀓𑁆𑀭𑀺𑀬𑀚𑀯𑀦𑀁 𑀅𑀦𑀼𑀩𑀦𑁆𑀥𑀢𑀻𑀢𑀺 𑀬𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀙𑀴𑀗𑁆𑀕𑀼 𑀧𑁂𑀓𑁆𑀔𑀸𑀯𑀢𑁄’’𑀢𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺, 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻-𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀬 𑀙 𑀤𑁆𑀯𑀸𑀭𑀺𑀓𑀯𑀲𑁂𑀦 𑀙𑀴𑀗𑁆𑀕 𑀲𑀫𑀦𑁆𑀦𑀸𑀕𑀢𑀸𑀬 𑀉𑀧𑁂𑀓𑁆𑀔𑀸𑀬 𑀲𑀫𑁆𑀧𑀦𑁆𑀦𑀲𑁆𑀲. 𑀯𑀢𑁆𑀢𑀦𑀁 𑀯𑀼𑀢𑁆𑀢𑀺. 𑀲𑀦𑁆𑀢𑀸 𑀯𑀼𑀢𑁆𑀢𑀺 𑀅𑀲𑁆𑀲𑀸𑀢𑀺 𑀲𑀦𑁆𑀢 𑀯𑀼𑀢𑁆𑀢𑀺. 𑀢𑀁 𑀯𑀺𑀘𑀸𑀭𑁂𑀦𑁆𑀢𑁄 ‘‘𑀧𑀝𑁆𑀞𑀸𑀦𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀬𑀤𑀺 𑀘𑁂𑀢𑀁 𑀯𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀏𑀢𑁆𑀣 ‘‘𑀏𑀢𑀁’’𑀢𑀺 𑀓𑁆𑀭𑀺𑀬𑀸 𑀩𑁆𑀬𑀸𑀓𑀢𑁂𑀢𑀺𑀆𑀤𑀺𑀓𑀁 𑀏𑀢𑀁 𑀯𑀘𑀦𑀁. ‘‘𑀢𑀲𑁆𑀫𑀺𑀁’’𑀢𑀺 𑀢𑀲𑁆𑀫𑀺𑀁 𑀯𑀘𑀦𑁂. ‘‘𑀏𑀯𑀫𑀸𑀤𑀺𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀉𑀢𑁆𑀢𑀭𑀁’’𑀢𑀺 𑀧𑀭𑀺𑀳𑀸𑀭𑀁. ‘‘𑀯𑀺𑀧𑀲𑁆𑀲𑀦𑀸𑀘𑀸𑀭 𑀯𑀲𑁂𑀦𑀸’’𑀢𑀺 𑀯𑀺𑀧𑀲𑁆𑀲𑀦𑀸 𑀧𑀯𑀢𑁆𑀢𑀺 𑀯𑀲𑁂𑀦. ‘‘𑀢𑁂𑀲𑀁’’𑀢𑀺 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀸𑀦𑀁. ‘‘𑀇𑀢𑀭𑀻𑀢𑀭𑀸𑀦𑀦𑁆𑀢𑀭 𑀧𑀘𑁆𑀘𑀬𑀢𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀸𑀦𑀦𑁆𑀢𑀭 𑀧𑀘𑁆𑀘𑀬𑀢𑀸𑀢𑀺 𑀅𑀢𑁆𑀣𑁄. ‘‘𑀣𑁂𑀭𑁂𑀦𑀸’’𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦. 𑀲𑀩𑁆𑀩𑀸𑀦𑀺 𑀢𑀤𑀸 𑀭𑀫𑁆𑀫𑀡𑀸𑀦𑀺, 𑀲𑀩𑁆𑀩𑀸𑀦𑀺 𑀪𑀯𑀗𑁆𑀕𑀸𑀦𑀺 𑀘. ‘‘𑀲𑀫𑀼𑀤𑀸 𑀘𑀭𑀦𑁆𑀢𑀻’’𑀢𑀺 𑀘𑀺𑀭𑀓𑀸𑀮𑀁 𑀲𑀜𑁆𑀘𑀭𑀦𑁆𑀢𑀺. ‘‘𑀏𑀢𑀸𑀦𑀺𑀳𑀻’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀸𑀦𑀁 𑀅𑀦𑀺𑀬𑀫𑀢𑁄 𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀪𑀯𑀢𑀺 𑀉𑀧𑁆𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀪𑀯𑁄. 𑀢𑀤𑀸 𑀭𑀫𑁆𑀫𑀡𑀲𑁆𑀲 𑀲𑀫𑁆𑀪𑀯𑁄 𑀢𑀤𑀸 𑀭𑀫𑁆𑀫𑀡 𑀲𑀫𑁆𑀪𑀯𑁄. 𑀅𑀣𑀯𑀸, 𑀲𑀫𑁆𑀪𑀯𑀦𑀁 𑀉𑀧𑁆𑀧𑀚𑁆𑀚𑀦𑀁 𑀲𑀫𑁆𑀪𑀯𑁄𑀢𑀺 𑀇𑀫𑁂 𑀤𑁆𑀯𑁂 𑀅𑀢𑁆𑀣𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀸 𑀭𑀫𑁆𑀫𑀡 𑀲𑀫𑁆𑀪𑀯𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀬𑁂𑀲𑀁 𑀧𑀦𑀸’’𑀢𑀺𑀆𑀤𑀻𑀲𑀼. ‘‘𑀬𑁂𑀲𑀁’’𑀢𑀺 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁. ‘‘𑀇𑀢𑀭𑀸𑀦𑀻’’𑀢𑀺 𑀉𑀧𑁂𑀓𑁆𑀔𑀸 𑀲𑀦𑁆𑀢𑀻𑀭𑀡 𑀤𑁆𑀯𑀬𑀢𑁄 𑀅𑀜𑁆𑀜𑀸𑀦𑀺. ‘‘𑀦 𑀳𑁄𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁𑀲𑀢𑀺, 𑀓𑀲𑁆𑀫𑀸 𑀣𑁂𑀭𑁂𑀦 𑀇𑀥 𑀦 𑀯𑀼𑀢𑁆𑀢𑀸𑀦𑀻𑀢𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸 𑀇𑀥 𑀦 𑀯𑀼𑀢𑁆𑀢𑀸𑀦𑀻𑀢𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀸𑀦𑀺. 𑀬𑁂𑀪𑀽𑀬𑁆𑀬 𑀦𑀺𑀬𑀫𑀲𑁄𑀢𑁂 𑀧𑀢𑀺𑀢𑀢𑁆𑀢𑀸 𑀦 𑀯𑀼𑀢𑁆𑀢𑀸𑀦𑀺. 𑀦 𑀧𑀦 𑀅𑀮𑀩𑁆𑀪𑀫𑀸𑀦𑀢𑁆𑀢𑀸 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀉𑀧𑁂𑀓𑁆𑀔𑀸𑀲𑀳𑀕𑀢 𑀲𑀦𑁆𑀢𑀻𑀭𑀡 𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀁’’𑀢𑀺 𑀆𑀕𑀦𑁆𑀢𑀼𑀓 𑀪𑀯𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀣𑀲𑁆𑀲 𑀬𑀤𑀸 𑀲𑁄𑀫𑀦𑀲𑁆𑀲 𑀲𑀳𑀕𑀢𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀯𑀢𑁆𑀢𑁂 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀫𑀸𑀤𑁂𑀦 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀧𑀡𑀻𑀢 𑀥𑀫𑁆𑀫𑁄 𑀫𑁂 𑀦𑀝𑁆𑀞𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑀺 𑀯𑀲𑁂𑀦 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀓𑀺𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀜𑁆𑀳𑀺 𑀤𑁄𑀫𑀦𑀲𑁆𑀲𑀁, 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀜𑁆𑀘 𑀲𑁄𑀫𑀦𑀲𑁆𑀲𑀁 𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀁. 𑀫𑀳𑀕𑁆𑀕𑀢 𑀥𑀫𑁆𑀫𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸 𑀭𑀫𑁆𑀫𑀡𑀫𑁆𑀧𑀺 𑀢𑀢𑁆𑀣𑁂𑀯 𑀧𑀝𑀺𑀲𑀺𑀤𑁆𑀥𑀦𑁆𑀢𑀺. 𑀓𑀼𑀲𑀮 𑀯𑀺𑀧𑀸𑀓𑀸𑀯𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀯𑀸 𑀉𑀧𑁂𑀓𑁆𑀔𑀸 𑀲𑀳𑀕𑀢𑀸 𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡 𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀫𑀲𑁆𑀲𑀸 𑀭𑀫𑁆𑀫𑀡𑀦𑁆𑀢𑀺. 𑀭𑀽𑀧𑀸𑀤𑀻𑀲𑀼 𑀧𑀭𑀺𑀢𑁆𑀢 𑀥𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑀁. 𑀏𑀢𑁂𑀲𑀼 𑀳𑀺 𑀬𑀤𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀧𑀸𑀢𑀫𑀸𑀕𑀢𑀁 𑀳𑁄𑀢𑀺. 𑀢𑀁 𑀆𑀭𑀩𑁆𑀪 𑀏𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁-𑀢𑀺. 𑀏𑀯𑀁 𑀤𑁄𑀫𑀦𑀲𑁆𑀲𑀲𑀳𑀕𑀢 𑀚𑀯𑀦𑀸𑀦𑀼𑀭𑀽𑀧𑀁 𑀉𑀧𑁂𑀓𑁆𑀔𑀸𑀲𑀳𑀕𑀢 𑀲𑀦𑁆𑀢𑀻𑀭𑀡 𑀤𑁆𑀯𑀬𑀫𑁂𑀯 𑀆𑀕𑀦𑁆𑀢𑀼𑀓 𑀪𑀯𑀗𑁆𑀕𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺. ‘‘𑀏𑀢𑀫𑁆𑀧𑀺 𑀬𑀼𑀚𑁆𑀚𑀢𑀺 𑀬𑁂𑀯𑀸’’𑀢𑀺 𑀅𑀓𑀼𑀲𑀮 𑀚𑀯𑀦𑀸𑀯𑀲𑀸𑀦𑁂 𑀏𑀢𑀁 𑀲𑀳𑁂𑀢𑀼𑀓𑀁 𑀆𑀕𑀦𑁆𑀢𑀼𑀓 𑀪𑀯𑀗𑁆𑀕𑀁𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. ‘‘𑀤𑁄𑀫𑀦𑀲𑁆𑀲 𑀚𑀯𑀦𑀸𑀦𑀦𑁆𑀢𑀭𑀁 𑀪𑀯𑀗𑁆𑀕 𑀧𑀸𑀢𑁄𑀯 𑀳𑁄𑀢𑀻’’𑀢𑀺 𑀉𑀧𑁂𑀓𑁆𑀔𑀸 𑀲𑀳𑀕𑀢 𑀫𑀽𑀮𑀪𑀯𑀗𑁆𑀕 𑀧𑀸𑀢𑁄𑀯 𑀳𑁄𑀢𑀺. 𑀆𑀕𑀦𑁆𑀢𑀼𑀓 𑀪𑀯𑀗𑁆𑀕𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀓𑀲𑁆𑀫𑀸, 𑀉𑀧𑁂𑀓𑁆𑀔𑀸 𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸. 𑀦𑁂𑀯𑀢𑀤𑀸𑀭𑀫𑁆𑀫𑀡 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀓𑀲𑁆𑀫𑀸, 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀤𑀸𑀭𑀫𑁆𑀫𑀡𑀯𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀫𑀳𑀦𑁆𑀢𑀸𑀭𑀫𑁆𑀫𑀡𑁂𑀲𑀼 𑀘 𑀅𑀯𑀺𑀪𑀽𑀢𑀸𑀭𑀫𑁆𑀫𑀡𑁂𑀲𑀼 𑀘 𑀢𑀤𑀸𑀭𑀫𑁆𑀫𑀡𑀯𑀸𑀭𑁄 𑀲𑀫𑁆𑀪𑀯𑀢𑀺. 𑀦 𑀘 𑀫𑀽𑀮𑀪𑀯𑀗𑁆𑀕 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀓𑀲𑁆𑀫𑀸, 𑀫𑀽𑀮𑀪𑀯𑀗𑁆𑀕𑀪𑀽 𑀢𑀲𑁆𑀲 𑀲𑁄𑀫𑀦𑀲𑁆𑀲 𑀪𑀯𑀗𑁆𑀕𑀲𑁆𑀲 𑀤𑁄𑀫𑀦𑀲𑁆𑀲 𑀚𑀯𑀦𑁂𑀦 𑀲𑀳 𑀯𑀺𑀭𑀼𑀤𑁆𑀥𑀢𑁆𑀢𑀸. ‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. ‘‘𑀏𑀓𑀁’’𑀢𑀺 𑀏𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢 𑀯𑀺𑀧𑀸𑀓𑀁. 𑀢𑀣𑀸 𑀢𑀲𑁆𑀲𑁂𑀯 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀦𑁂𑀯 𑀢𑀤𑀸𑀭𑀫𑁆𑀫𑀡 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀦 𑀘 𑀫𑀽𑀮𑀪𑀯𑀗𑁆𑀕 𑀲𑀫𑁆𑀪𑀯𑁄𑀢𑀺 𑀓𑀢𑁆𑀯𑀸 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀙𑀲𑀼…𑀧𑁂… 𑀧𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀢𑀲𑁆𑀲𑁂𑀯𑀸’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑁂𑀯. 𑀦𑁂𑀯𑀢𑀤𑀸𑀭𑀫𑁆𑀫𑀡 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀓𑀲𑁆𑀫𑀸, 𑀆𑀭𑀫𑁆𑀫𑀡𑀸𑀦𑀁 𑀅𑀢𑀺𑀫𑀳𑀦𑁆𑀢𑀢𑁆𑀢𑁂𑀧𑀺 𑀅𑀢𑀺𑀯𑀺𑀪𑀽𑀢𑀢𑁆𑀢𑁂𑀧𑀺 𑀲𑀢𑀺 𑀲𑁄𑀫𑀦𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀚𑀯𑀦𑁂𑀦 𑀲𑀳 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀉𑀧𑁂𑀓𑁆𑀔𑀸 𑀢𑀤𑀸 𑀭𑀫𑁆𑀫𑀡𑀲𑁆𑀲 𑀘 𑀆𑀭𑀫𑁆𑀫𑀡𑁂𑀦 𑀲𑀳 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀦 𑀳𑀺 𑀅𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸 𑀢𑀤𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀢𑀺. 𑀫𑀳𑀕𑁆𑀕𑀢 𑀧𑀜𑁆𑀜𑀢𑁆𑀢𑀸 𑀭𑀫𑁆𑀫𑀡𑁂𑀲𑀼 𑀧𑀦 𑀉𑀪𑀬𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦𑀼𑀧𑁆𑀧𑀚𑁆𑀚𑀢𑀺𑀬𑁂𑀯. 𑀦 𑀘 𑀫𑀽𑀮𑀪𑀯𑀗𑁆𑀕 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀓𑀲𑁆𑀫𑀸, 𑀚𑀯𑀦𑁂𑀦 𑀲𑀳 𑀯𑀺𑀭𑀼𑀤𑁆𑀥𑀢𑁆𑀢𑀸𑀢𑀺.

‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼. ‘‘𑀲𑀩𑁆𑀩 𑀥𑀫𑁆𑀫𑁂𑀲𑀽’’𑀢𑀺 𑀲𑀩𑁆𑀩𑁂𑀲𑀼 𑀆𑀭𑀫𑁆𑀫𑀡 𑀥𑀫𑁆𑀫𑁂𑀲𑀼. ‘‘𑀧𑀣𑀫 𑀲𑀫𑀦𑁆𑀦𑀸𑀳𑀸𑀭𑁄’’𑀢𑀺 𑀆𑀯𑀚𑁆𑀚𑀦 𑀓𑀺𑀘𑁆𑀘𑀁 𑀆𑀳. 𑀲𑀼𑀢𑁆𑀢𑀦𑁆𑀢 𑀧𑀸𑀞𑁂. ‘‘𑀢𑀚𑁆𑀚𑁄’’𑀢𑀺 𑀢𑁂𑀦 𑀆𑀭𑀫𑁆𑀫𑀡𑀸𑀦𑀁 𑀆𑀧𑀸𑀢𑀸 𑀕𑀫𑀦𑁂𑀦 𑀚𑀸𑀢𑁄. ‘‘𑀢𑀚𑁆𑀚𑁄’’𑀢𑀺 𑀯𑀸 𑀢𑀤𑀦𑀼𑀭𑀽𑀧𑁄𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀯𑀺𑀜𑁆𑀜𑀸𑀡𑀪𑀸𑀕𑀲𑁆𑀲𑀸’’𑀢𑀺 𑀘𑀓𑁆𑀔𑀼 𑀤𑁆𑀯𑀸𑀭𑀺𑀓 𑀯𑀺𑀜𑁆𑀜𑀸𑀡 𑀓𑁄𑀝𑁆𑀞𑀸𑀲𑀲𑁆𑀲. ‘‘𑀬𑀢𑁄’’𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀓𑀣𑀁 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀲𑀘𑁂 𑀆𑀯𑀚𑁆𑀚𑀦𑁂𑀦𑀸’’𑀢𑀺𑀆𑀤𑀺𑀁. ‘‘𑀏𑀢𑁆𑀣 𑀲𑀺𑀬𑀸’’𑀢𑀺𑀆𑀤𑀻𑀲𑀼. 𑀬𑀣𑀸 𑀧𑀦 𑀦𑀺𑀭𑀸𑀯𑀚𑁆𑀚𑀦𑀁 𑀳𑁄𑀢𑀺 𑀪𑀺𑀦𑁆𑀦𑀸 𑀭𑀫𑁆𑀫𑀡𑀜𑁆𑀘, 𑀏𑀯𑀁 𑀢𑀣𑀸𑀢𑀺 𑀬𑁄𑀚𑀦𑀸. ‘‘𑀏𑀓𑀲𑁆𑀲𑀧𑀻’’𑀢𑀺 𑀏𑀓𑀲𑁆𑀲 𑀆𑀕𑀦𑁆𑀢𑀼𑀓 𑀪𑀯𑀗𑁆𑀕𑀲𑁆𑀲𑀧𑀺 𑀦𑀢𑁆𑀣𑀺 𑀤𑁄𑀲𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 𑀦𑀢𑁆𑀣𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀅𑀢𑁆𑀣𑀺𑀬𑁂𑀯. ‘‘𑀲𑀯𑀺𑀧𑁆𑀨𑀦𑁆𑀤𑀦𑀢𑁆𑀢𑀸’’𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀲𑀯𑀺𑀧𑁆𑀨𑀸𑀭𑀺𑀓𑀦𑁆𑀢𑀺 𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀇𑀢𑀭𑁂 𑀲𑀜𑁆𑀘𑀸’’𑀢𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭 𑀚𑀯𑀦𑀸𑀦𑀜𑁆𑀘. 𑀓𑀸𑀦𑀺 𑀘𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺𑀧𑀺 𑀲𑀫𑀸𑀦𑀸𑀦𑀺. 𑀬𑀤𑀺 𑀢𑀤𑀸𑀭𑀫𑁆𑀫𑀡𑀽 𑀧𑀦𑀺𑀲𑁆𑀲 𑀬𑀲𑁆𑀲 𑀓𑀸𑀫𑀪𑀯𑀗𑁆𑀕𑀲𑁆𑀲 𑀅𑀪𑀸𑀯𑀢𑁄 𑀢𑀤𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀭𑀽𑀧 𑀩𑁆𑀭𑀳𑁆𑀫𑀸𑀦𑀁 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀲𑀢𑀺, 𑀘𑀓𑁆𑀔𑀼𑀲𑁄𑀢 𑀤𑁆𑀯𑀸𑀭𑀺𑀓 𑀘𑀺𑀢𑁆𑀢𑀸𑀦𑀺𑀧𑀺 𑀭𑀽𑀧 𑀩𑁆𑀭𑀳𑁆𑀫𑀸𑀦𑀁 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀆𑀳 ‘‘𑀘𑀓𑁆𑀔𑀼 𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀺 𑀧𑀦𑀸’’𑀢𑀺𑀆𑀤𑀺𑀁. ‘‘𑀇𑀦𑁆𑀤𑁆𑀭𑀺𑀬𑀧𑁆𑀧𑀯𑀢𑁆𑀢𑀺 𑀆𑀦𑀼𑀪𑀸𑀯𑀢𑁄’’𑀢𑀺 𑀘𑀓𑁆𑀔𑀼 𑀯𑀢𑁆𑀣𑀼 𑀲𑁄𑀢𑀯𑀢𑁆𑀣𑀼 𑀲𑀗𑁆𑀔𑀸𑀢𑀸𑀦𑀁 𑀇𑀦𑁆𑀤𑁆𑀭𑀺𑀬 𑀯𑀢𑁆𑀣𑀽𑀦𑀁 𑀭𑀽𑀧 𑀩𑁆𑀭𑀳𑁆𑀫 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀧𑀯𑀢𑁆𑀢𑀺 𑀆𑀦𑀼𑀪𑀸𑀯𑀢𑁄 𑀘𑀓𑁆𑀔𑀼 𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀺 𑀭𑀽𑀧𑀩𑁆𑀭𑀳𑁆𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺𑀬𑁂 𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀝𑀺𑀘𑁆𑀙𑀦 𑀲𑀦𑁆𑀢𑀻𑀭𑀡𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑀺𑀓𑀧𑁆𑀧𑀩𑀮𑁂𑀯𑀸’’𑀢𑀺 𑀓𑀸𑀫𑀓𑀼𑀲𑀮𑀸 𑀓𑀼𑀲𑀮𑀸𑀦𑀁 𑀯𑀺𑀬 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀓𑀧𑁆𑀧𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀆𑀭𑀫𑁆𑀫𑀡𑀕𑁆𑀕𑀳𑀲𑀸𑀫𑀢𑁆𑀣𑀺𑀬𑁂𑀯𑀸𑀲𑀢𑀺. ‘‘𑀅𑀧𑁆𑀧𑀦𑀸𑀧𑀢𑁆𑀢 𑀪𑀸𑀯𑀦𑀸 𑀓𑀫𑁆𑀫𑀯𑀺𑀲𑁂𑀲𑁂 𑀯𑀸’’𑀢𑀺 𑀏𑀢𑁆𑀣 𑀅𑀪𑀺𑀜𑁆𑀜𑀸 𑀚𑀯𑀦𑀸𑀦𑀺 𑀯𑀺𑀬 𑀫𑀳𑀕𑁆𑀕𑀢 𑀯𑀺𑀧𑀸𑀓 𑀮𑁄𑀓𑀼𑀢𑁆𑀢𑀭 𑀯𑀺𑀧𑀸𑀓𑀸𑀦𑀺 𑀯𑀺𑀬 𑀘𑀸𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀅𑀝𑁆𑀞𑀓𑀣𑀸𑀬𑀁’’𑀢𑀺 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁. ‘‘𑀯𑀺𑀪𑀸𑀯𑀦𑀺𑀬𑀁 𑀯𑀼𑀢𑁆𑀢 𑀓𑀸𑀭𑀡𑀸𑀦𑀻’’𑀢𑀺 𑀅𑀝𑁆𑀞𑀓𑀣𑀸𑀢𑁄 𑀆𑀳𑀭𑀺𑀢𑁆𑀯𑀸 𑀯𑀺𑀪𑀸𑀯𑀦𑀺𑀬𑀁 𑀯𑀼𑀢𑁆𑀢𑀸𑀦𑀺 ‘𑀅𑀚𑀦𑀓𑀢𑁆𑀢𑀸 𑀚𑀦𑀓 𑀲𑀫𑀸𑀦𑀢𑁆𑀢𑀸 𑀪𑀸𑀯𑀢𑁄’𑀢𑀺𑀆𑀤𑀻𑀦𑀺 𑀓𑀸𑀭𑀡𑀸𑀦𑀺.

𑁧𑁪𑁦. 𑀚𑀯𑀦 𑀦𑀺𑀬𑀫𑁂. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀙𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑀲𑀘𑁂 𑀧𑀦 𑀩𑀮𑀯𑀸 𑀭𑀫𑁆𑀫𑀡𑀁 𑀆𑀧𑀸𑀢𑀸𑀕𑀢𑀁 𑀳𑁄𑀢𑀺. 𑀓𑁆𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀚𑀯𑀦𑀝𑁆𑀞𑀸𑀦𑁂 𑀧𑀦 𑀧𑀣𑀫𑀓𑀸𑀫𑀸𑀯𑀘𑀭 𑀓𑀼𑀲𑀮 𑀘𑀺𑀢𑁆𑀢𑀁 𑀚𑀯𑀦𑀁 𑀳𑀼𑀢𑁆𑀯𑀸 𑀙𑀲𑀢𑁆𑀢𑀯𑀸𑀭𑁂 𑀚𑀯𑀺𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀸𑀭𑀁 𑀤𑁂𑀢𑀻𑀢𑀺. ‘‘𑀫𑀼𑀤𑀼𑀢𑀭 𑀪𑀸𑀯𑁂𑀦𑀸’’𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀞𑀺𑀢𑀓𑀸𑀮𑁂𑀯𑀸 𑀲𑀫𑁆𑀧𑀢𑀺 𑀚𑀸𑀢𑀓𑀸𑀮𑁂 𑀯𑀸 𑀯𑀢𑁆𑀣𑀼𑀲𑁆𑀲 𑀅𑀢𑀺𑀫𑀼𑀤𑀼𑀪𑀸𑀯𑁂𑀦. ‘‘𑀓𑁂𑀦𑀘𑀺𑀉𑀧𑀤𑁆𑀤𑀼𑀢 𑀪𑀸𑀯𑁂𑀦𑀸’’𑀢𑀺 𑀩𑀸𑀴𑁆𑀳𑀕𑁂𑀮𑀜𑁆𑀜𑀚𑀸𑀢𑀓𑀸𑀮𑁂 𑀓𑁂𑀦𑀘𑀺 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀦𑀸 𑀉𑀧𑀤𑁆𑀤𑀼𑀢 𑀪𑀸𑀯𑁂𑀦. ‘‘𑀅𑀚𑁆𑀛𑁄𑀢𑁆𑀣𑀝 𑀪𑀸𑀯𑁂𑀦𑀸’’𑀢𑀺 𑀢𑀲𑁆𑀲 𑀯𑁂𑀯𑀘𑀦𑀫𑀢𑁆𑀢𑀁. 𑀫𑀦𑁆𑀤𑀻𑀪𑀽𑀢𑁄 𑀯𑁂𑀕𑁄 𑀬𑁂𑀲𑀁 𑀢𑀸𑀦𑀺 𑀫𑀦𑁆𑀤𑀻𑀪𑀽𑀢 𑀯𑁂𑀕𑀸𑀦𑀺. ‘‘𑀅𑀲𑀬𑁆𑀳 𑀭𑀽𑀧𑁂𑀳𑀻’’𑀢𑀺 𑀤𑀼𑀓𑁆𑀔𑀫𑀲𑀪𑀸𑀯𑁂𑀳𑀺. 𑀅𑀪𑀺𑀪𑀽𑀢𑀸𑀦𑀁 𑀲𑀢𑁆𑀢𑀸𑀦𑀁. 𑀢𑀜𑁆𑀘 𑀔𑁄 𑀯𑀘𑀦𑀁 𑀧𑀸𑀓𑀢𑀺𑀓 𑀲𑀢𑁆𑀢𑀸𑀦𑀁 𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀦 𑀲𑀢𑁆𑀢𑀯𑀺𑀲𑁂𑀲𑀸𑀦𑀁 𑀯𑀲𑁂𑀦. 𑀏𑀯𑀁 𑀲𑀢𑀺, 𑀲𑀢𑁆𑀢𑀯𑀺𑀲𑁂𑀲𑀸𑀦𑀁 𑀯𑀲𑁂𑀦 𑀓𑀣𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 ‘‘𑀬𑁂 𑀧𑀦𑀸’’𑀢𑀺𑀆𑀤𑀺𑀁. ‘‘𑀉𑀧𑀭𑀻’’𑀢𑀺 𑀫𑀭𑀡𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂. ‘‘𑀯𑀼𑀢𑁆𑀢𑀜𑁆𑀳𑀻’’𑀢𑀺 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. ‘‘𑀬𑀫𑀓𑀧𑁆𑀧𑀸𑀝𑀺𑀳𑀸𑀭𑀺𑀬𑀁’’𑀢𑀺 𑀬𑀼𑀕𑀴𑀯𑀢𑁆𑀣𑀽𑀦𑀁 𑀏𑀓𑀢𑁄 𑀧𑀯𑀢𑁆𑀢 𑀅𑀘𑁆𑀙𑀭𑀺𑀬 𑀓𑀫𑁆𑀫𑀁. ‘‘𑀤𑁆𑀯𑁂 𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸 𑀛𑀸𑀦𑀗𑁆𑀕𑀸𑀦𑀺.

‘‘𑀬𑁄𑀕𑀓𑀫𑁆𑀫𑀲𑀺𑀤𑁆𑀥𑀺𑀬𑀸’’𑀢𑀺 𑀪𑀸𑀯𑀦𑀸𑀦𑀼 𑀬𑁄𑀕𑀓𑀫𑁆𑀫𑀲𑀺𑀤𑁆𑀥𑀲𑁆𑀲. 𑀇𑀤𑁆𑀥𑀺 𑀯𑀺𑀓𑀼𑀩𑁆𑀩𑀦𑀁 𑀦𑀸𑀫 𑀇𑀤𑁆𑀥𑀺𑀬𑀸 𑀦𑀸𑀦𑀸𑀓𑀫𑁆𑀫𑀓𑀭𑀡𑀁. ‘‘𑀲𑀺𑀤𑁆𑀥𑀺𑀬𑀸 𑀏𑀯𑀸’’𑀢𑀺 𑀲𑀺𑀚𑁆𑀛 𑀦𑀢𑁆𑀣𑀸𑀬 𑀏𑀯. 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀏𑀯 𑀉𑀧𑁆𑀧𑀦𑁆𑀦𑀁 𑀨𑀮𑀁 𑀏𑀢𑀺𑀲𑁆𑀲𑀸𑀢𑀺 𑀆𑀦𑀦𑁆𑀢𑀭𑀺𑀓𑀧𑁆𑀨𑀮𑀸. 𑀫𑀕𑁆𑀕𑀘𑁂𑀢𑀦𑀸. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. ‘‘𑀫𑀦𑁆𑀤𑀲𑁆𑀲𑀸’’𑀢𑀺 𑀫𑀦𑁆𑀤 𑀧𑀼𑀕𑁆𑀕𑀮𑀲𑁆𑀲. ‘‘𑀢𑀺𑀓𑁆𑀔𑀲𑁆𑀲𑀸’’𑀢𑀺 𑀢𑀺𑀓𑁆𑀔 𑀧𑀼𑀕𑁆𑀕𑀮𑀲𑁆𑀲. 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺. ‘‘𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑀲𑁆𑀲𑀸’’𑀢𑀺 𑀧𑀣𑀫𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀲𑀫𑀣 𑀯𑀺𑀧𑀲𑁆𑀲𑀦𑀸𑀬𑀼𑀕𑀦𑀦𑁆𑀥𑀧𑁆𑀧𑀯𑀢𑁆𑀢𑀺 𑀲𑀗𑁆𑀔𑀸𑀢𑀲𑁆𑀲 𑀧𑀼𑀩𑁆𑀩𑀧𑁆𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑀲𑁆𑀲. ‘‘𑀅𑀓𑀢𑀸𑀥𑀺𑀓𑀸𑀭𑀲𑁆𑀲𑀸’’𑀢𑀺 𑀆𑀲𑀦𑁆𑀦𑁂 𑀧𑀼𑀭𑀺𑀫𑀪𑀯𑁂 𑀅𑀓𑀢 𑀛𑀸𑀦𑀧𑀭𑀺𑀓𑀫𑁆𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀲𑀩𑁆𑀩𑁂𑀲𑀫𑁆𑀧𑀺 𑀨𑀮𑀝𑁆𑀞𑀸𑀦𑀁 𑀘𑀺𑀡𑁆𑀡𑀯𑀲𑀺𑀪𑀸𑀯𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀚𑀯𑀦𑀦𑀺𑀬𑀫𑁄𑀦𑀺𑀝𑁆𑀞𑀺𑀢𑁄.

𑁧𑁪𑁧. 𑀤𑀼𑀳𑁂𑀢𑀼𑀓𑀸𑀤𑀻𑀲𑀼. 𑀚𑀸𑀢𑀺 𑀤𑁆𑀯𑀺𑀳𑁂𑀢𑀼𑀓𑀸𑀤𑀬𑁄 𑀏𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡 𑀲𑀳𑀕𑀢𑀸’’𑀢𑀺𑀆𑀤𑀺𑀁. ‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀻’’𑀢𑀺 𑀤𑁆𑀯𑀺𑀳𑁂𑀢𑀼𑀓𑀸𑀦𑀫𑁆𑀧𑀺 𑀅𑀳𑁂𑀢𑀼𑀓𑀸𑀦𑀫𑁆𑀧𑀺. 𑀪𑀼𑀲𑁄𑀛𑀸𑀦 𑀫𑀕𑁆𑀕𑀨𑀮𑀸𑀦𑀺 𑀯𑀸𑀭𑁂𑀦𑁆𑀢𑀺 𑀦𑀻𑀯𑀸𑀭𑁂𑀦𑁆𑀢𑀻𑀢𑀺 𑀆𑀯𑀭𑀡𑀸𑀦𑀺. 𑀯𑀺𑀧𑀸𑀓𑀸𑀦𑀺 𑀘 𑀢𑀸𑀦𑀺 𑀆𑀯𑀭𑀡𑀸𑀦𑀺 𑀘𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀯𑀺𑀧𑀸𑀓𑀸𑀦𑀻’’𑀢𑀺 𑀅𑀳𑁂𑀢𑀼𑀓 𑀤𑁆𑀯𑀺𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀺. 𑀢𑁂𑀳𑀺 𑀕𑀳𑀺𑀢𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀇𑀫𑀲𑁆𑀫𑀺𑀁 𑀪𑀯𑁂𑀛𑀸𑀦 𑀫𑀕𑁆𑀕𑀨𑀮𑀧𑁆𑀧𑀝𑀺𑀮𑀸𑀪𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑀸𑀯𑀭𑀡 𑀲𑀩𑁆𑀪𑀸𑀯𑀢𑁄’’𑀢𑀺𑀆𑀤𑀺𑀁. ‘‘𑀢𑁂𑀲𑀁’’𑀢𑀺 𑀤𑀼𑀕𑁆𑀕𑀢𑀺 𑀅𑀳𑁂𑀢𑀼𑀓 𑀧𑀼𑀕𑁆𑀕𑀮𑀸𑀦𑀁. 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀭𑁂𑀲𑀁’’𑀢𑀺 𑀢𑀢𑁄 𑀅𑀜𑁆𑀜𑁂𑀲𑀁 𑀲𑀼𑀕𑀢𑀺 𑀅𑀳𑁂𑀢𑀼𑀓 𑀧𑀼𑀕𑁆𑀕𑀮𑀸𑀦𑀁.

‘‘𑀏𑀢𑁆𑀣 𑀲𑀺𑀬𑀸’’𑀢𑀺𑀆𑀤𑀻𑀲𑀼. 𑀤𑀼𑀕𑁆𑀕𑀢𑀺 𑀧𑀭𑀺𑀬𑀸𑀧𑀦𑁆𑀦𑀸𑀦𑀜𑁆𑀘 𑀅𑀳𑁂𑀢𑀼𑀓𑀸𑀦𑀁. ‘‘𑀫𑀽𑀮𑀪𑀯𑀗𑁆𑀕𑁂’’𑀢𑀺𑀆𑀤𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑀁 𑀳𑀼𑀢𑁆𑀯𑀸 𑀆𑀕𑀢𑁂 𑀫𑀽𑀮𑀪𑀯𑀗𑁆𑀕𑁂. ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀬𑀁 𑀓𑀺𑀜𑁆𑀘𑀺 𑀪𑀯𑀗𑁆𑀕𑀁. ‘‘𑀯𑀼𑀘𑁆𑀘𑀢𑁂’’𑀢𑀺 𑀯𑀺𑀲𑀚𑁆𑀚𑀦𑀸 𑀯𑀼𑀘𑁆𑀘𑀢𑁂. ‘‘𑀲𑀩𑁆𑀩 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀢𑀸𑀯 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀬𑀁 𑀲𑁄𑀴𑀲𑀲𑀼 𑀓𑀸𑀫𑀸𑀯𑀘𑀭 𑀓𑀼𑀲𑀮 𑀯𑀺𑀧𑀸𑀓𑁂𑀲𑀼 𑀅𑀝𑁆𑀞𑀦𑁆𑀦𑀁 𑀅𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀁 𑀏𑀯 𑀆𑀧𑀸𑀬𑀺𑀓𑁂𑀲𑀼 𑀲𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀦 𑀅𑀝𑁆𑀞𑀦𑁆𑀦𑀁 𑀲𑀳𑁂𑀢𑀼𑀓 𑀯𑀺𑀧𑀸𑀓𑀸𑀦𑀁. 𑀢𑀣𑀸 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑀝𑁆𑀞 𑀓𑀣𑀸𑀲𑀼 𑀘 𑀯𑀺𑀜𑁆𑀜𑀸𑀡 𑀧𑀤𑀯𑀡𑁆𑀡𑀦𑀸𑀲𑀼 𑀅𑀜𑁆𑀜𑀸𑀲𑀼 𑀘 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀸𑀤𑀻𑀲𑀽𑀢𑀺 𑀏𑀯𑀁 𑀲𑀩𑁆𑀩𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. ‘‘𑀬𑁄𑀕𑀲𑀸 𑀥𑀦𑀻𑀬𑀢𑁆𑀢𑀸’’𑀢𑀺 𑀧𑀬𑁄𑀕𑁂𑀦 𑀲𑀸𑀥𑁂𑀢𑀩𑁆𑀩𑀢𑁆𑀢𑀸. 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀳𑀺 𑀯𑀟𑁆𑀠𑁂𑀢𑀼𑀁 𑀯𑀸 𑀳𑀸𑀧𑁂𑀢𑀼𑀁 𑀯𑀸 𑀧𑀬𑁄𑀕𑁂 𑀓𑀢𑁂 𑀯𑀟𑁆𑀠𑀦𑁆𑀢𑀺 𑀘𑁂𑀯 𑀳𑀸𑀬𑀦𑁆𑀢𑀺 𑀘. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀪𑀽𑀢𑀁 𑀕𑀳𑁂𑀢𑀼𑀁 𑀬𑀼𑀢𑁆𑀢𑀁. 𑀓𑀲𑁆𑀫𑀸, 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲𑀸𑀢𑀺 𑀯𑀼𑀢𑁆𑀢𑀲𑁆𑀲 𑀫𑀽𑀮𑀪𑀯𑀗𑁆𑀕𑀲𑁆𑀲 𑀅𑀳𑁂𑀢𑀼𑀓𑀢𑁆𑀢𑀸. ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀳𑁂𑀢𑀼𑀓𑀸𑀦𑀁’’𑀢𑀺 𑀤𑀼𑀕𑁆𑀕𑀢𑀺 𑀅𑀳𑁂𑀢𑀼𑀓𑀸𑀦𑀜𑁆𑀘 𑀲𑀼𑀕𑀢𑀺 𑀅𑀳𑁂𑀢𑀼𑀓𑀸𑀦𑀜𑁆𑀘. ‘‘𑀅𑀧𑀭𑁂𑀧𑀦𑀸’’𑀢𑀺𑀆𑀤𑀺 𑀯𑀺𑀪𑀸𑀯𑀦𑀺𑀬𑀁 𑀆𑀕𑀢𑁄 𑀅𑀧𑀭𑁂 𑀯𑀸𑀤𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘𑀅𑀧𑀭𑁂𑀧𑀦 𑀬𑀣𑀸 𑀅𑀳𑁂𑀢𑀼𑀓𑀸𑀦𑀁 𑀲𑀳𑁂𑀢𑀼𑀓 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀏𑀯𑀁 𑀤𑁆𑀯𑀺𑀳𑁂𑀢𑀼𑀓𑀸𑀦𑀁 𑀢𑀺𑀳𑁂𑀢𑀼𑀓 𑀢𑀤𑀸𑀭𑀫𑁆𑀫𑀡𑀁𑀧𑀻’𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀢𑁂𑀲𑀁𑀫𑀢𑀸𑀦𑀼𑀭𑁄𑀥𑁂𑀦 𑀘 𑀇𑀥𑀧𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢 𑀯𑀺𑀧𑀸𑀓𑀧𑁆𑀧𑀝𑀺𑀓𑁆𑀔𑁂𑀧𑁄 𑀅𑀳𑁂𑀢𑀼𑀓𑁂𑀬𑁂𑀯 𑀲𑀦𑁆𑀥𑀸𑀬𑀸𑀢𑀺 𑀯𑀤𑀦𑁆𑀢𑀻𑀢𑀺. 𑀢𑀁 𑀧𑀦 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀬𑀁 ‘𑀏𑀢𑁆𑀣𑁂𑀯 𑀤𑁆𑀯𑀸𑀤𑀲 𑀓𑀫𑀕𑁆𑀕𑁄𑀧𑀻’𑀢𑀺 𑀘, 𑀏𑀢𑁆𑀣𑁂𑀯 𑀤𑀲𑀓𑀫𑀕𑁆𑀕𑁄𑀧𑀻’𑀢𑀺 𑀘 𑀆𑀕𑀢𑁂𑀳𑀺 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀲𑁄𑀴𑀲𑀲𑀼𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀤𑁆𑀯𑀺𑀳𑁂𑀢𑀼𑀓 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓 𑀧𑀼𑀕𑁆𑀕𑀮𑀸𑀦𑀁 𑀘𑀢𑁆𑀢𑀸𑀭𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢 𑀯𑀺𑀧𑀸𑀓𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀤𑁆𑀯𑀸𑀤𑀲 𑀓𑀫𑀕𑁆𑀕𑁄 𑀦𑀸𑀫 𑀳𑁄𑀢𑀺. 𑀧𑀼𑀦 𑀲𑁂𑀲𑁂𑀲𑀼 𑀤𑁆𑀯𑀸𑀤𑀲 𑀯𑀺𑀧𑀸𑀓𑁂𑀲𑀼𑀧𑀺 𑀅𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀤𑁆𑀯𑁂 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢 𑀲𑀲𑀗𑁆𑀔𑀸𑀭𑀺𑀓 𑀯𑀺𑀧𑀸𑀓𑀸𑀦𑀺, 𑀲𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀜𑁆𑀘 𑀤𑁆𑀯𑁂 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢 𑀅𑀲𑀗𑁆𑀔𑀸𑀭𑀺𑀓 𑀯𑀺𑀧𑀸𑀓𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀤𑀼𑀢𑀺𑀬𑀢𑁆𑀣𑁂𑀭 𑀯𑀸𑀤𑁂 𑀤𑀲𑀓𑀫𑀕𑁆𑀕𑁄 𑀦𑀸𑀫 𑀳𑁄𑀢𑀻𑀢𑀺. 𑀏𑀢𑁆𑀣 𑀧𑀦 𑀤𑁆𑀯𑀺 𑀳𑁂𑀢𑀼𑀓𑁄𑀧𑀺 𑀧𑀼𑀕𑁆𑀕𑀮𑁄 𑀅𑀥𑀺𑀓𑁂𑀦 𑀙𑀦𑁆𑀤𑁂𑀦 𑀯𑀸 𑀯𑀻𑀭𑀺𑀬𑁂𑀦 𑀯𑀸 𑀘𑀺𑀢𑁆𑀢𑁂𑀦 𑀯𑀸 𑀬𑀼𑀢𑁆𑀢𑁄 𑀧𑀭𑀺𑀬𑀢𑁆𑀢𑀺 𑀥𑀫𑁆𑀫𑀁 𑀯𑀸 𑀦𑀸𑀦𑀸𑀯𑀺𑀚𑁆𑀚𑀸𑀲𑀺𑀧𑁆𑀧𑀸𑀦𑀺 𑀯𑀸 𑀩𑀳𑀼𑀁 𑀕𑀡𑁆𑀳𑁂𑀬𑁆𑀬, 𑀲𑀼𑀡𑁂𑀬𑁆𑀬, 𑀥𑀸𑀭𑁂𑀬𑁆𑀬, 𑀯𑀸𑀘𑁂𑀬𑁆𑀬, 𑀘𑀺𑀦𑁆𑀢𑁂𑀬𑁆𑀬. 𑀅𑀣𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢 𑀚𑀯𑀦𑀁 𑀩𑀳𑀼𑀮𑀁 𑀲𑀫𑀼𑀤𑀸 𑀘𑀭𑁂𑀬𑁆𑀬. 𑀢𑀤𑀸 𑀢𑀲𑁆𑀲 𑀦𑀸𑀦𑀸𑀓𑀫𑁆𑀫𑁂𑀦 𑀚𑀯𑀦𑀸𑀦𑀼 𑀭𑀽𑀧𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢 𑀢𑀤𑀸𑀭𑀫𑁆𑀫𑀡𑀁 𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺. ‘‘𑀅𑀝𑁆𑀞𑀓𑀣𑀸𑀬𑀁 𑀧𑀺𑀳𑀺. 𑀮. 𑀯𑀼𑀢𑁆𑀢𑀸’’𑀢𑀺 𑀓𑀣𑀁 𑀯𑀼𑀢𑁆𑀢𑀸. 𑀏𑀢𑀸𑀦𑀺 𑀳𑀺 𑀫𑀦𑀼𑀲𑁆𑀲𑁂𑀲𑀼 𑀘 𑀓𑀸𑀫𑀸𑀯𑀘𑀭 𑀤𑁂𑀯𑁂𑀲𑀼 𑀘 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀤𑁆𑀯𑀺𑀳𑁂𑀢𑀼𑀓𑀢𑀺 𑀳𑁂𑀢𑀼𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀧𑀝𑀺𑀲𑀦𑁆𑀥𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀢𑀺. 𑀢𑁂 𑀧𑀦 𑀢𑀺𑀯𑀺𑀥𑀸, 𑀦𑀯𑀯𑀺𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀲𑀁 𑀢𑀩𑁆𑀪𑀸𑀯𑁄’’𑀢𑀺 𑀓𑀼𑀲𑀮𑀸𑀦𑀁 𑀓𑀼𑀲𑀮𑀪𑀸𑀯𑁄, 𑀅𑀓𑀼𑀲𑀮𑀸𑀦𑀁 𑀅𑀓𑀼𑀲𑀮𑀪𑀸𑀯𑁄. ‘‘𑀲𑀺𑀓𑁆𑀔𑀦 𑀥𑀫𑁆𑀫𑀬𑀼𑀢𑁆𑀢𑀸’’𑀢𑀺 𑀢𑀻𑀳𑀺 𑀲𑀺𑀓𑁆𑀔𑀸𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑀺𑀓𑁆𑀔𑀺𑀢𑀩𑁆𑀩𑀢𑀸 𑀧𑀓𑀢𑀺𑀬𑀁 𑀞𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.‘‘𑀳𑁂𑀝𑁆𑀞𑀺𑀫𑀸𑀦𑀜𑁆𑀘𑀸’’𑀢𑀺 𑀳𑁂𑀝𑁆𑀞𑀺𑀫 𑀨𑀮𑀸𑀦𑀜𑁆𑀘. 𑀬𑀸𑀦𑀺𑀬𑀸𑀦𑀺𑀲𑀓𑀸𑀦𑀺 𑀬𑀣𑀸𑀲𑀓𑀁. ‘‘𑀉𑀧𑀭𑀺𑀫𑀸𑀦𑀁’’𑀢𑀺 𑀉𑀧𑀭𑀺𑀫𑀸𑀦𑀁 𑀧𑀼𑀕𑁆𑀕𑀮𑀸𑀦𑀁. ‘‘𑀧𑀭𑀺𑀦𑀺𑀝𑁆𑀞𑀺𑀢 𑀲𑀺𑀓𑁆𑀔𑀸 𑀓𑀺𑀘𑁆𑀘𑀢𑁆𑀢𑀸’’𑀢𑀺 𑀲𑀺𑀓𑁆𑀔𑀸 𑀓𑀺𑀘𑁆𑀘𑀁 𑀦𑀸𑀫 𑀓𑀺𑀮𑁂𑀲 𑀥𑀫𑁆𑀫𑀸𑀦𑀁 𑀧𑀳𑀸𑀦𑀢𑁆𑀣𑀸𑀬 𑀏𑀯 𑀳𑁄𑀢𑀻𑀢𑀺 𑀢𑁂𑀲𑀼 𑀲𑀩𑁆𑀩𑀲𑁄 𑀧𑀳𑀻𑀦𑁂𑀲𑀼 𑀲𑀺𑀓𑁆𑀔𑀸 𑀓𑀺𑀘𑁆𑀘𑀁 𑀧𑀭𑀺𑀦𑀺𑀝𑁆𑀞𑀺𑀢𑀁 𑀳𑁄𑀢𑀺. 𑀏𑀯𑀁 𑀧𑀭𑀺𑀦𑀺𑀝𑁆𑀞𑀺𑀢 𑀲𑀺𑀓𑁆𑀔𑀸 𑀓𑀺𑀘𑁆𑀘𑀢𑁆𑀢𑀸. 𑀲𑀼𑀝𑁆𑀞𑀼 𑀪𑀩𑁆𑀩𑁄𑀢𑀺 𑀲𑀫𑁆𑀪𑀯𑁄. 𑀲𑀫𑁆𑀪𑀯𑁄𑀢𑀺 𑀯𑀺𑀲𑁂𑀲𑀦 𑀧𑀤𑀫𑁂𑀢𑀦𑁆𑀢𑀺 𑀆𑀳 ‘‘𑀬𑀣𑀸 𑀲𑀫𑁆𑀪𑀯𑀁’’𑀢𑀺.

𑁧𑁪𑁨. ‘‘𑀏𑀢𑁆𑀣𑁂𑀯𑀸’’𑀢𑀺 𑀏𑀢𑀲𑁆𑀫𑀺𑀁 𑀓𑀸𑀫𑀮𑁄𑀓𑁂 𑀏𑀯. ‘‘𑀢𑀁 𑀢𑀁 𑀧𑀲𑀸𑀤𑀭𑀳𑀺𑀢𑀸𑀦𑀁’’𑀢𑀺 𑀢𑁂𑀦𑀢𑁂𑀦 𑀧𑀲𑀸𑀤𑁂𑀦 𑀭𑀳𑀺𑀢𑀸𑀦𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸𑀦𑀺 𑀢𑀁 𑀢𑀁 𑀤𑁆𑀯𑀸𑀭𑀺𑀓𑀸𑀦𑀺. 𑀘𑀢𑀼𑀲𑀝𑁆𑀞𑀺𑀯𑀻𑀣𑀺 𑀘𑀺𑀢𑁆𑀢𑀸𑀦𑀺. 𑀤𑁆𑀯𑁂 𑀘𑀢𑁆𑀢𑀸𑀮𑀻𑀲 𑀯𑀻𑀣𑀺 𑀘𑀺𑀢𑁆𑀢𑀸𑀦𑀺. ‘‘𑀩𑁆𑀭𑀳𑁆𑀫𑀮𑁄𑀓𑁂 𑀯𑀸’’𑀢𑀺𑀆𑀤𑀻𑀲𑀼. 𑀇𑀤𑀁 𑀅𑀝𑁆𑀞𑀓𑀣𑀸 𑀯𑀘𑀦𑀁. 𑀬𑀣𑀸𑀳 𑀭𑀽𑀧𑀪𑀯𑁂 𑀘𑀢𑀼𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁, 𑀢𑀣𑁂𑀯 𑀧𑀘𑁆𑀘𑀬𑁄. 𑀧𑀯𑀢𑁆𑀢𑁂, 𑀦𑁄𑀧𑀝𑀺𑀲𑀦𑁆𑀥𑀺𑀬𑀁. 𑀲𑁄𑀘 𑀔𑁄 𑀓𑀸𑀫𑀸𑀯𑀘𑀭𑁂 𑀅𑀦𑀺𑀝𑁆𑀞 𑀭𑀽𑀧𑀤𑀲𑁆𑀲𑀦 𑀲𑀤𑁆𑀤𑀲𑀯𑀦𑀯𑀲𑁂𑀦, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀦 𑀅𑀦𑀺𑀝𑁆𑀞𑀸 𑀭𑀽𑀧𑀸𑀤𑀬𑁄 𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀓𑀸𑀫𑀸𑀯𑀘𑀭 𑀤𑁂𑀯𑀮𑁄𑀓𑁂 𑀧𑀻𑀢𑀺. 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀭𑀽𑀧𑀮𑁄𑀓𑁂. 𑀯𑀺𑀪𑀸𑀯𑀦𑀺𑀧𑀸𑀞𑁂. ‘‘𑀇𑀥𑀸’’𑀢𑀺 𑀇𑀫𑀲𑁆𑀫𑀺𑀁 𑀯𑀘𑀦𑁂. ‘‘𑀢𑀁 𑀢𑀁 𑀪𑀽𑀫𑀺 𑀧𑀭𑀺𑀬𑀸𑀧𑀦𑁆𑀦𑁂’’𑀢𑀺 𑀢𑀺𑀲𑁆𑀲𑀁 𑀢𑀺𑀲𑁆𑀲𑀁 𑀪𑀽𑀫𑀺𑀬𑀁 𑀧𑀭𑀺𑀬𑀸𑀧𑀦𑁆𑀦𑁂. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀯𑀻𑀣𑀺𑀲𑀗𑁆𑀕𑀳𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.