𑁩. 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁧𑁨𑁯. 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑁂. 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁. ‘‘𑀢𑁂𑀧𑀜𑁆𑀜𑀸𑀲𑀸’’𑀢𑀺 𑀢𑁂𑀧𑀜𑁆𑀜𑀸𑀲𑀯𑀺𑀥𑀸. ‘‘𑀪𑀸𑀯𑁄’’𑀢𑀺 𑀯𑀺𑀚𑁆𑀚𑀫𑀸𑀦𑀓𑀺𑀭𑀺𑀬𑀸. 𑀬𑁄 𑀮𑀓𑁆𑀔𑀡 𑀭𑀲𑀸𑀤𑀻𑀲𑀼 𑀮𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀥𑀫𑁆𑀫𑀸𑀦𑀁’’𑀢𑀺𑀆𑀤𑀺𑀁. 𑀧𑀯𑀢𑁆𑀢𑁄𑀢𑀺 𑀧𑀸𑀞𑀲𑁂𑀲 𑀧𑀤𑀁. 𑀏𑀢𑁂𑀦 ‘𑀯𑁂𑀤𑀦𑀸 𑀪𑁂𑀤𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄’𑀢𑀺𑀆𑀤𑀻𑀲𑀼𑀧𑀺 𑀯𑁂𑀤𑀦𑀸 𑀪𑁂𑀤𑁂𑀦 𑀧𑀯𑀢𑁆𑀢𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀺. ‘‘𑀯𑀘𑀦𑀢𑁆𑀣𑁄 𑀤𑀲𑁆𑀲𑀺𑀢𑁄’’𑀢𑀺, 𑀓𑀣𑀁 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀯𑁂𑀤𑀦𑀸 𑀪𑁂𑀤𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄’’𑀢𑀺𑀆𑀤𑀺. ‘‘𑀢𑁂𑀲𑀁 𑀤𑀸𑀦𑀺 𑀬𑀣𑀸𑀭𑀳𑀁’’𑀢𑀺 𑀏𑀢𑁆𑀣 ‘‘𑀢𑁂𑀲𑀁’’𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁, 𑀲𑀗𑁆𑀕𑀳𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁂𑀦 𑀅𑀬𑀁 𑀲𑀗𑁆𑀕𑀳𑁄 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁 𑀏𑀯 𑀲𑀗𑁆𑀕𑀳𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀯𑁂𑀤𑀦𑀸 𑀳𑁂𑀢𑀼𑀢𑁄. 𑀮. 𑀮𑀫𑁆𑀩𑀡𑀯𑀢𑁆𑀣𑀼𑀢𑁄 𑀲𑀗𑁆𑀕𑀳𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁂𑀦 𑀉𑀧𑀭𑀺 𑀯𑁂𑀤𑀦𑀸 𑀲𑀗𑁆𑀕𑀳𑁄𑀢𑀺𑀆𑀤𑀻𑀲𑀼 𑀯𑁂𑀤𑀦𑀸𑀢𑁄 𑀲𑀗𑁆𑀕𑀳𑁄 𑀯𑁂𑀤𑀦𑀸 𑀲𑀗𑁆𑀕𑀳𑁄. 𑀮. 𑀯𑀢𑁆𑀣𑀼𑀢𑁄 𑀲𑀗𑁆𑀕𑀳𑁄 𑀯𑀢𑁆𑀣𑀼 𑀲𑀗𑁆𑀕𑀳𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀯𑁂𑀤𑀦𑀸𑀢𑁄𑀢𑀺𑀆𑀤𑀻𑀲𑀼 𑀘 𑀯𑁂𑀤𑀦𑀸 𑀪𑁂𑀤𑀢𑁄𑀢𑀺𑀆𑀤𑀺 𑀅𑀢𑁆𑀣𑀢𑁄 𑀲𑀺𑀤𑁆𑀥𑀁 𑀳𑁄𑀢𑀺. 𑀏𑀯𑀁 𑀙𑀦𑁆𑀦𑀁 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑀸𑀦𑀁 𑀯𑀘𑀦𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑁂𑀦𑀸𑀳 ‘‘𑀯𑁂𑀤𑀦𑀸 𑀪𑁂𑀤𑁂𑀦𑀸’’𑀢𑀺𑀆𑀤𑀺𑀁. 𑀆𑀤𑀺𑀦𑀸 𑀤𑀲𑁆𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀗𑁆𑀕𑀳𑁄 𑀦𑀸𑀫 𑀦𑀺𑀬𑁆𑀬𑀢𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀦𑀻𑀢𑁄 𑀦𑀸𑀫 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. ‘‘𑀦𑀺𑀬𑁆𑀬𑀢𑁂’’𑀢𑀺 𑀘 𑀧𑀯𑀢𑁆𑀢𑀻𑀬𑀢𑁂𑀢𑀺 𑀅𑀢𑁆𑀣𑁄. 𑀦𑀦𑀼 𑀢𑁂𑀲𑀁 ‘‘𑀲𑀗𑁆𑀕𑀳𑁄 𑀦𑀸𑀫 𑀦𑀺𑀬𑁆𑀬𑀢𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑀻𑀳𑀺 𑀘𑀺𑀢𑁆𑀢 𑀘𑁂𑀢𑀲𑀺𑀓𑁂𑀳𑀺 𑀏𑀯 𑀅𑀬𑀁 𑀲𑀗𑁆𑀕𑀳𑁄 𑀦𑁂𑀢𑀩𑁆𑀩𑁄𑀢𑀺. 𑀦. 𑀘𑀺𑀢𑁆𑀢𑁂𑀦 𑀦𑀻𑀢𑁂 𑀘𑁂𑀢𑀲𑀺𑀓𑁂𑀳𑀺 𑀯𑀺𑀲𑀼𑀁 𑀦𑁂𑀢𑀩𑁆𑀩 𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑁂 𑀧𑀦 𑀲𑀺𑀤𑁆𑀥𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁩𑁦. 𑀯𑁂𑀤𑀦𑀸 𑀲𑀗𑁆𑀕𑀳𑁂. 𑀯𑁂𑀤𑀦𑀸 𑀪𑁂𑀤𑀁 𑀦𑀺𑀲𑁆𑀲𑀸𑀬 𑀇𑀫𑀲𑁆𑀲 𑀲𑀗𑁆𑀕𑀳𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 ‘‘𑀦𑀺𑀲𑁆𑀲𑀬 𑀥𑀫𑁆𑀫 𑀧𑀭𑀺𑀕𑁆𑀕𑀳𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀁𑀬𑀼𑀢𑁆𑀢𑀓𑁂’’𑀢𑀺 𑀯𑁂𑀤𑀦𑀸 𑀲𑀁𑀬𑀼𑀢𑁆𑀢𑀓𑁂. ‘‘𑀆𑀭𑀫𑁆𑀫𑀡𑀁 𑀅𑀦𑀼𑀪𑁄𑀦𑁆𑀢𑀻’’𑀢𑀺 𑀆𑀭𑀫𑁆𑀫𑀡 𑀭𑀲𑀁 𑀅𑀦𑀼𑀪𑁄𑀦𑁆𑀢𑀺. ‘‘𑀢𑁂’’𑀢𑀺 𑀢𑁂𑀚𑀦𑀸. ‘‘𑀢𑀁’’𑀢𑀺 𑀢𑀁 𑀆𑀭𑀫𑁆𑀫𑀡𑀁. ‘‘𑀲𑀸𑀢𑀢𑁄’’𑀢𑀺 𑀲𑀼𑀔𑀸𑀓𑀸𑀭𑀢𑁄. ‘‘𑀅𑀲𑁆𑀲𑀸𑀢𑀢𑁄’’𑀢𑀺 𑀤𑀼𑀓𑁆𑀔𑀸 𑀓𑀸𑀭𑀢𑁄. 𑀢𑀢𑁄 𑀅𑀜𑁆𑀜𑁄𑀧𑀓𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑁂𑀤𑀦𑀸 𑀅𑀦𑀼𑀪𑀯𑀦 𑀮𑀓𑁆𑀔𑀡𑁂𑀦 𑀢𑀺𑀯𑀺𑀥𑀸 𑀏𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀤𑁆𑀯𑁂’’𑀢𑀺 𑀤𑁆𑀯𑁂 𑀯𑁂𑀤𑀦𑀸𑀬𑁄. 𑀉𑀧𑁂𑀓𑁆𑀔𑀁 𑀲𑀼𑀔𑁂 𑀲𑀗𑁆𑀕𑀳𑁂𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀯𑀲𑁂𑀦 𑀯𑀸 𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. ‘‘𑀲𑀦𑁆𑀢𑀲𑁆𑀫𑀺𑀁 𑀏𑀲𑀸 𑀧𑀡𑀻𑀢𑁂 𑀲𑀼𑀔𑁂’’𑀢𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀅𑀤𑀼𑀓𑁆𑀔𑀫 𑀲𑀼𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀜𑁆𑀘 𑀪𑁂𑀤𑀸𑀤𑀻𑀲𑀼 𑀯𑀺𑀢𑁆𑀣𑀸𑀭𑁄 𑀯𑁂𑀤𑀦𑀸 𑀲𑀁𑀬𑀼𑀢𑁆𑀢𑁂 𑀕𑀳𑁂𑀢𑀩𑁆𑀩𑁄. 𑀯𑁂𑀤𑀬𑀺𑀢𑀦𑁆𑀢𑀺 𑀘 𑀯𑁂𑀤𑀦𑀸𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁. ‘‘𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀁’’𑀢𑀺 𑀲𑀩𑁆𑀩𑀁 𑀢𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀲𑁆𑀫𑀺𑀁 𑀏𑀯 𑀧𑀯𑀺𑀝𑁆𑀞𑀁 𑀳𑁄𑀢𑀺. 𑀲𑀗𑁆𑀔𑀸𑀭 𑀤𑀼𑀓𑁆𑀔𑀢𑀁 𑀆𑀦𑀦𑁆𑀤 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀲𑀗𑁆𑀔𑀸𑀭 𑀯𑀺𑀧𑀭𑀺𑀡𑀸𑀫𑀢𑀜𑁆𑀘, 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀁𑀢𑀺 𑀧𑀸𑀴𑀺. ‘‘𑀇𑀦𑁆𑀤𑁆𑀭𑀺𑀬𑀪𑁂𑀤𑀯𑀲𑁂𑀦𑀸’’𑀢𑀺 𑀲𑁄𑀫𑀦𑀲𑁆𑀲 𑀲𑀳𑀕𑀢𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀤𑁄𑀫𑀦𑀲𑁆𑀲 𑀲𑀳𑀕𑀢𑀁, 𑀲𑀼𑀔𑀲𑀳𑀕𑀢𑀁, 𑀤𑀼𑀓𑁆𑀔 𑀲𑀳𑀕𑀢𑀦𑁆𑀢𑀺 𑀏𑀯𑀁 𑀇𑀦𑁆𑀤𑁆𑀭𑀺𑀬 𑀪𑁂𑀤𑀯𑀲𑁂𑀦. ‘‘𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂𑀲𑀼. ‘‘𑀢𑁂𑀲𑀁’’𑀢𑀺 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀁. 𑀢𑀢𑁆𑀣 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀓𑀸𑀬𑀺𑀓 𑀲𑀼𑀔 𑀲𑀫𑁆𑀧𑀬𑀼𑀢𑁆𑀢 𑀘𑁂𑀢𑀲𑀺𑀓 𑀲𑀼𑀔 𑀲𑀫𑁆𑀧𑀬𑀼𑀢𑁆𑀢 𑀯𑀲𑁂𑀦 𑀤𑀼𑀯𑀺𑀥𑀸. 𑀏𑀯𑀁 𑀇𑀲𑁆𑀲𑀭𑀝𑁆𑀞𑀸𑀦𑀪𑀽𑀢𑀸𑀦𑀁 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀁 𑀤𑀼𑀯𑀺𑀥𑀢𑁆𑀢𑀸 𑀅𑀦𑀼𑀪𑀯𑀦 𑀪𑁂𑀤𑁂 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀏𑀓𑀁 𑀲𑀼𑀔 𑀯𑁂𑀤𑀦𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂𑀲𑀼𑀧𑀺 𑀏𑀲𑁂𑀯𑀦𑀬𑁄. ‘‘𑀅𑀧𑀺 𑀘𑀸’’𑀢𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀢𑁂𑀧𑀻’’𑀢𑀺 𑀉𑀧𑁂𑀓𑁆𑀔𑀸 𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀥𑀫𑁆𑀫𑀸. 𑀘𑀓𑁆𑀔𑀸𑀤𑀺 𑀧𑀲𑀸𑀤𑀓𑀸𑀬𑀸 𑀦𑀸𑀫 𑀘𑀓𑁆𑀔𑀼 𑀲𑁄𑀢 𑀖𑀸𑀦 𑀚𑀺𑀯𑁆𑀳𑀸 𑀧𑀲𑀸𑀤𑀓𑀸𑀬𑀸. 𑀢𑁂𑀲𑀼 𑀦𑀺𑀲𑁆𑀲𑀺𑀢𑀸 𑀦𑀸𑀫 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀬𑁄. ‘‘𑀲𑀩𑁆𑀪𑀸𑀯𑀸’’𑀢𑀺 𑀲𑀦𑁆𑀢𑀪𑀸𑀯𑀢𑁄 𑀲𑀁𑀯𑀺𑀚𑁆𑀚𑀫𑀸𑀦 𑀪𑀸𑀯𑀢𑁄 𑀤𑀼𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀏𑀓 𑀭𑀲𑀢𑁆𑀢𑀸’’𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀏𑀓𑀭𑀲𑀢𑁆𑀢𑀸. ‘‘𑀇𑀢𑀭𑀸𑀦𑀻’’𑀢𑀺 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁧𑁩𑁧. 𑀳𑁂𑀢𑀼𑀲𑀗𑁆𑀕𑀳𑁂. ‘‘𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀁’’𑀢𑀺 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢 𑀪𑀸𑀯𑀲𑀸𑀥𑀦𑀁 𑀳𑁂𑀢𑀼 𑀓𑀺𑀘𑁆𑀘𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀇𑀫𑁂𑀧𑀺 𑀥𑀫𑁆𑀫𑀸’’𑀢𑀺 𑀇𑀫𑁂𑀧𑀺 𑀙 𑀳𑁂𑀢𑀼 𑀥𑀫𑁆𑀫𑀸. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼, 𑀲𑀸𑀥𑁂𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢 𑀪𑀸𑀯𑀲𑀸𑀥𑀦𑀁 𑀳𑁂𑀢𑀼𑀓𑀺𑀘𑁆𑀘𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. ‘‘𑀅𑀧𑀭𑁂 𑀧𑀦𑀸’’𑀢𑀺 𑀧𑀝𑁆𑀞𑀸𑀦𑀝𑁆𑀞 𑀓𑀣𑀸𑀬𑀁 𑀆𑀕𑀢𑁄 𑀭𑁂𑀯𑀢𑀢𑁆𑀣𑁂𑀭 𑀯𑀸𑀤𑁄. ‘‘𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺 𑀪𑀸𑀯𑀲𑀸𑀥𑀦𑀁’’𑀢𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀓𑀼𑀲𑀮𑀪𑀸𑀯𑀲𑀸𑀥𑀦𑀁 𑀅𑀓𑀼𑀲𑀮𑀪𑀸𑀯𑀲𑀸𑀥𑀦𑀁 𑀅𑀩𑁆𑀬𑀸𑀓𑀢𑀪𑀸𑀯𑀲𑀸𑀥𑀦𑀁. ‘‘𑀏𑀯𑀁 𑀲𑀦𑁆𑀢𑁂’’𑀢𑀺𑀆𑀤𑀺 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀸𑀦𑀁 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. ‘‘𑀬𑁂𑀲’’𑀦𑁆𑀢𑀺 𑀫𑁄𑀳𑀫𑀽𑀮 𑀘𑀺𑀢𑁆𑀢 𑀤𑁆𑀯𑀬𑁂 𑀫𑁄𑀳𑁄 𑀘 𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤 𑀭𑀽𑀧 𑀦𑀺𑀩𑁆𑀩𑀸𑀦𑀸𑀦𑀺 𑀘. ‘‘𑀦 𑀲𑀫𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀲𑀳𑀚𑀸𑀢 𑀳𑁂𑀢𑀼𑀦𑁄 𑀅𑀪𑀸𑀯𑀸 𑀢𑀲𑁆𑀲 𑀫𑁄𑀳𑀲𑁆𑀲 𑀅𑀓𑀼𑀲𑀮 𑀪𑀸𑀯𑁄, 𑀇𑀢𑀭𑁂 𑀲𑀜𑁆𑀘 𑀅𑀩𑁆𑀬𑀸𑀓𑀢 𑀪𑀸𑀯𑁄 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀢𑀼 𑀦𑀸𑀫 𑀲𑀳𑀚𑀸𑀢 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀲𑀸𑀥𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀺, 𑀲𑁄 𑀫𑁄𑀳𑁄 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮 𑀪𑀸𑀯𑀁 𑀲𑀸𑀥𑁂𑀬𑁆𑀬. 𑀅𑀢𑁆𑀢𑀦𑁄 𑀧𑀦 𑀅𑀓𑀼𑀲𑀮 𑀪𑀸𑀯𑀁 𑀲𑀸𑀥𑁂𑀦𑁆𑀢𑁄 𑀲𑀳𑀚𑀸𑀢𑁄 𑀅𑀜𑁆𑀜𑁄 𑀳𑁂𑀢𑀼 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀲𑁆𑀲 𑀅𑀓𑀼𑀲𑀮𑀪𑀸𑀯𑁄 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬. 𑀢𑀣𑀸 𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤 𑀭𑀽𑀧 𑀦𑀺𑀩𑁆𑀩𑀸𑀦𑀸𑀦𑀜𑁆𑀘 𑀅𑀩𑁆𑀬𑀸𑀓𑀢𑀪𑀸𑀯𑀁 𑀲𑀸𑀥𑁂𑀦𑁆𑀢𑁄 𑀓𑁄𑀘𑀺 𑀲𑀳𑀚𑀸𑀢𑁄 𑀳𑁂𑀢𑀼 𑀦𑀸𑀫 𑀦𑀢𑁆𑀣𑀻𑀢𑀺 𑀢𑁂𑀲𑀫𑁆𑀧𑀺 𑀅𑀩𑁆𑀬𑀸𑀓𑀢 𑀪𑀸𑀯𑁄 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬. 𑀦 𑀘 𑀦 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀲𑁄 𑀣𑁂𑀭𑀯𑀸𑀤𑁄 𑀦 𑀬𑀼𑀢𑁆𑀢𑁄𑀢𑀺. 𑀏𑀢𑁆𑀣 𑀲𑀺𑀬𑀸. 𑀲𑁄𑀘 𑀫𑁄𑀳𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀓𑀼𑀲𑀮𑁄 𑀳𑁄𑀢𑀺. 𑀢𑀸𑀦𑀺 𑀘 𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤𑀭𑀽𑀧 𑀦𑀺𑀩𑁆𑀩𑀸𑀦𑀸𑀦𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀩𑁆𑀬𑀸𑀓𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂, 𑀬𑀣𑀸 𑀢𑁂 𑀥𑀫𑁆𑀫𑀸. 𑀢𑀣𑀸 𑀅𑀜𑁆𑀜𑁂𑀧𑀺 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀓𑀼𑀲𑀮𑀸 𑀓𑀼𑀲𑀮𑀸 𑀩𑁆𑀬𑀸𑀓𑀢𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀦 𑀘𑁂𑀢𑁆𑀣 𑀓𑀸𑀭𑀡𑀁 𑀅𑀢𑁆𑀣𑀺, 𑀬𑁂𑀦𑀓𑀸𑀭𑀡𑁂𑀦 𑀢𑁂 𑀏𑀯 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀓𑀼𑀲𑀮𑀸 𑀩𑁆𑀬𑀸𑀓𑀢𑀸 𑀳𑁄𑀦𑁆𑀢𑀺. 𑀅𑀜𑁆𑀜𑁂 𑀧𑀦 𑀥𑀫𑁆𑀫𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀼𑀲𑀮𑀸 𑀓𑀼𑀲𑀮𑀸 𑀩𑁆𑀬𑀸𑀓𑀢𑀸 𑀦 𑀳𑁄𑀦𑁆𑀢𑀺, 𑀳𑁂𑀢𑀽𑀳𑀺 𑀏𑀯 𑀳𑁄𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀓𑀼𑀲𑀮𑀸𑀤𑀺 𑀪𑀸𑀯𑀢𑁆𑀣𑀸𑀬 𑀳𑁂𑀢𑀽𑀳𑀺 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑁄 𑀣𑁂𑀭𑀯𑀸𑀤𑁄 𑀦 𑀬𑀼𑀢𑁆𑀢𑁄 𑀬𑁂𑀯𑀸𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀫𑀺𑀁 𑀣𑁂𑀭𑀯𑀸𑀤𑁂 𑀏𑀢𑁆𑀢𑀓𑁄 𑀤𑁄𑀲𑁄 𑀅𑀢𑁆𑀣𑀺. 𑀅𑀣 𑀔𑁄 𑀅𑀜𑁆𑀜𑁄𑀧𑀺 𑀤𑁄𑀲𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀦𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺 𑀪𑀸𑀯𑁄 𑀲𑀳𑀚𑀸𑀢 𑀳𑁂𑀢𑀼𑀧𑁆𑀧𑀝𑀺𑀩𑀤𑁆𑀥𑁄 𑀲𑀺𑀬𑀸. 𑀏𑀯𑀁 𑀲𑀢𑀺, 𑀳𑁂𑀢𑀼 𑀧𑀘𑁆𑀘𑀬𑁂 𑀓𑀼𑀲𑀮 𑀳𑁂𑀢𑀼𑀢𑁄 𑀮𑀤𑁆𑀥 𑀧𑀘𑁆𑀘𑀬𑀸𑀦𑀺 𑀭𑀽𑀧𑀸𑀦𑀺 𑀓𑀼𑀲𑀮𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀅𑀓𑀼𑀲𑀮 𑀳𑁂𑀢𑀼𑀢𑁄 𑀮𑀤𑁆𑀥 𑀧𑀘𑁆𑀘𑀬𑀸𑀦𑀺 𑀭𑀽𑀧𑀸𑀦𑀺 𑀅𑀓𑀼𑀲𑀮𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀦 𑀘 𑀪𑀯𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀯𑀸𑀤𑁄 𑀅𑀬𑀼𑀢𑁆𑀢𑁄 𑀬𑁂𑀯𑀸𑀢𑀺. 𑀇𑀤𑀸𑀦𑀺 𑀧𑀼𑀦 𑀢𑀁 𑀣𑁂𑀭𑀯𑀸𑀤𑀁 𑀧𑀕𑁆𑀕𑀳𑁂𑀢𑀼𑀁 ‘‘𑀬𑀣𑀸𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀥𑀫𑁆𑀫𑁂𑀲𑀽’’𑀢𑀺 𑀘𑀢𑀼𑀲𑁆𑀲𑀘𑁆𑀘 𑀥𑀫𑁆𑀫𑁂𑀲𑀼. 𑀫𑀼𑀬𑁆𑀳𑀦𑀓𑀺𑀭𑀺𑀬𑀸 𑀦𑀸𑀫 𑀅𑀦𑁆𑀥𑀓𑀸𑀭 𑀓𑀺𑀭𑀺𑀬𑀸. 𑀥𑀫𑁆𑀫𑀘𑁆𑀙𑀦𑁆𑀤𑁄 𑀦𑀸𑀫 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄, 𑀲𑀻𑀮𑀁 𑀧𑀽𑀭𑁂𑀢𑀼𑀓𑀸𑀫𑁄, 𑀪𑀸𑀯𑀦𑀁 𑀪𑀸𑀯𑁂𑀢𑀼𑀓𑀸𑀫𑁄 𑀇𑀘𑁆𑀘𑀸𑀤𑀺𑀦𑀸 𑀧𑀯𑀢𑁆𑀢𑁄 𑀙𑀦𑁆𑀤𑁄. ‘‘𑀅𑀓𑁆𑀔𑀦𑁆𑀢𑀻’’𑀢𑀺 𑀅𑀓𑁆𑀔𑀫𑀦𑀁, 𑀅𑀭𑁄𑀘𑀦𑀁, 𑀅𑀫𑀦𑀸𑀧𑁄. 𑀧𑀸𑀧 𑀥𑀫𑁆𑀫 𑀧𑀸𑀧𑀸 𑀭𑀫𑁆𑀫𑀡 𑀯𑀺𑀭𑁄𑀥𑁄 𑀦𑀸𑀫 𑀓𑀸𑀫𑀭𑀸𑀕𑀝𑁆𑀞𑀸𑀦𑀻𑀬𑁂𑀳𑀺 𑀲𑀢𑁆𑀢𑀯𑀺𑀥 𑀫𑁂𑀣𑀼𑀦 𑀥𑀫𑁆𑀫𑀸𑀤𑀻𑀳𑀺 𑀧𑀸𑀧 𑀥𑀫𑁆𑀫𑁂𑀳𑀺 𑀘𑁂𑀯 𑀧𑀜𑁆𑀘𑀓𑀸𑀫𑀕𑀼𑀡𑀸 𑀭𑀫𑁆𑀫𑀡𑁂 𑀳𑀺 𑀘 𑀘𑀺𑀢𑁆𑀢𑀲𑁆𑀲 𑀯𑀺𑀭𑁄𑀥𑁄, 𑀚𑁂𑀕𑀼𑀘𑁆𑀙𑁄 𑀧𑀝𑀺𑀓𑀽𑀮𑁄. 𑀫𑀼𑀬𑁆𑀳𑀦𑀓𑀺𑀭𑀺𑀬𑀸 𑀧𑀦 𑀏𑀓𑀦𑁆𑀢 𑀅𑀓𑀼𑀲𑀮 𑀚𑀸𑀢𑀺𑀓𑀸 𑀏𑀯 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀫𑁄𑀳𑀫𑀽𑀮 𑀘𑀺𑀢𑁆𑀢 𑀤𑁆𑀯𑀬𑁂 𑀫𑁄𑀳𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀓𑀼𑀲𑀮𑁄 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀏𑀯𑀁 𑀲𑀦𑁆𑀢𑁂’’𑀢𑀺𑀆𑀤𑀺𑀓𑀁 𑀢𑀢𑁆𑀣 𑀤𑁄𑀲𑀸𑀭𑁄𑀧𑀦𑀁 𑀯𑀺𑀥𑀫𑀢𑀺. 𑀇𑀤𑀸𑀦𑀺 𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤 𑀭𑀽𑀧 𑀦𑀺𑀩𑁆𑀩𑀸𑀦𑀸𑀦𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀩𑁆𑀬𑀸𑀓𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀬𑁄𑀘 𑀥𑀫𑁆𑀫𑁄’’𑀢𑀺𑀆𑀤𑀺𑀫𑀸𑀳. ‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀅𑀜𑁆𑀜𑀁 𑀤𑀼𑀓𑁆𑀓𑀭 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀳𑁂𑀢𑀼𑀓 𑀘𑀺𑀢𑁆𑀢𑀸𑀦𑀁’’𑀢𑀺 𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀲𑀺𑀤𑁆𑀥𑁄. 𑀏𑀢𑁆𑀢𑀸𑀯𑀢𑀸-𑀅𑀳𑁂𑀢𑀼𑀓. 𑀮. 𑀦𑀺𑀩𑁆𑀩𑀸𑀦𑀸𑀦𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀩𑁆𑀬𑀸𑀓𑀢𑀸𑀦𑀺 𑀳𑁄𑀦𑁆𑀢𑀻-𑀢𑀺 𑀇𑀫𑀫𑀢𑁆𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀏𑀯𑀁 𑀲𑀦𑁆𑀢𑁂’’𑀢𑀺𑀆𑀤𑀺 𑀢𑀢𑁆𑀣 𑀤𑁄𑀲𑀸𑀭𑁄𑀧𑀦𑀁 𑀅𑀧𑀦𑁂𑀢𑀺. 𑀇𑀤𑀸𑀦𑀺 𑀲𑀩𑁆𑀩𑁄𑀧𑀺 𑀫𑁄𑀳𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀓𑀼𑀲𑀮 𑀪𑀸𑀯𑁂𑀞𑀢𑁆𑀯𑀸 𑀅𑀜𑁆𑀜𑁂𑀲𑀁 𑀇𑀘𑁆𑀙𑀸 𑀦𑀸𑀫 𑀅𑀢𑁆𑀣𑀺, 𑀅𑀓𑁆𑀔𑀦𑁆𑀢𑀺 𑀦𑀸𑀫 𑀅𑀢𑁆𑀣𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀇𑀘𑁆𑀙𑀸 𑀅𑀓𑁆𑀔𑀦𑁆𑀢𑀺 𑀥𑀫𑁆𑀫𑀸𑀦𑀫𑁆𑀧𑀺 𑀅𑀓𑀼𑀲𑀮 𑀪𑀸𑀯𑀁 𑀲𑀸𑀥𑁂𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀫𑁄𑀳𑁄’’𑀢𑀺𑀆𑀤𑀺𑀫𑀸𑀳. ‘‘𑀫𑀼𑀬𑁆𑀳𑀦 𑀦𑀺𑀲𑁆𑀲𑀦𑁆𑀤𑀸𑀦𑀺 𑀏𑀯𑀸’’𑀢𑀺 𑀫𑀼𑀬𑁆𑀳𑀦𑀓𑀺𑀭𑀺𑀬𑀸𑀬 𑀦𑀺𑀲𑁆𑀲𑀦𑁆𑀤𑀧𑁆𑀨𑀮𑀸𑀦𑀺 𑀏𑀯. 𑀦 𑀓𑁂𑀯𑀮𑀁 𑀲𑁄 𑀮𑁄𑀪𑀸𑀤𑀻𑀦𑀁 𑀅𑀓𑀼𑀲𑀮𑀪𑀸𑀯𑀁 𑀲𑀸𑀥𑁂𑀢𑀺, 𑀅𑀣 𑀔𑁄 𑀅𑀮𑁄𑀪𑀸𑀤𑀻𑀦𑀫𑁆𑀧𑀺 𑀓𑀼𑀲𑀮𑀪𑀸𑀯𑀁 𑀲𑁄 𑀏𑀯 𑀲𑀸𑀥𑁂𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀮𑁄𑀪𑀸𑀤𑀻𑀦𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀯𑀺𑀚𑁆𑀚𑀸𑀦𑀼𑀲𑀬𑁂𑀦 𑀲𑀳𑁂𑀯 𑀲𑀺𑀤𑁆𑀥𑁄’’𑀢𑀺 𑀢𑀸𑀦𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀅𑀯𑀺𑀚𑁆𑀚𑀸𑀦𑀼𑀲𑀬𑁂 𑀅𑀧𑁆𑀧𑀳𑀻𑀦𑁂 𑀓𑀼𑀲𑀮𑀸𑀦𑀺 𑀳𑁄𑀦𑁆𑀢𑀺. 𑀧𑀳𑀻𑀦𑁂 𑀓𑀺𑀭𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀮𑁄𑀪 𑀤𑁄𑀲𑀸𑀦𑀁 𑀅𑀮𑁄𑀪𑀸𑀤𑀻𑀦𑀜𑁆𑀘 𑀳𑁂𑀢𑀼 𑀓𑀺𑀘𑁆𑀘𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀸𑀦𑀺 𑀧𑀦 𑀮𑁄𑀪𑀸𑀤𑀻𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀚𑁆𑀚𑀦 𑀤𑀼𑀲𑁆𑀲𑀦𑀸𑀦𑀁 𑀦𑀺𑀲𑁆𑀲𑀦𑁆𑀤𑀸𑀦𑀺 𑀭𑀚𑁆𑀚𑀦𑀸𑀤𑀺𑀦𑀺𑀲𑁆𑀲𑀦𑁆𑀤𑀸𑀦𑀺. ‘‘𑀤𑀺𑀝𑁆𑀞𑀺 𑀫𑀸𑀦𑀸𑀤𑀻𑀦𑀻’’𑀢𑀺 𑀤𑀺𑀝𑁆𑀞𑀺 𑀫𑀸𑀦 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀸𑀤𑀻𑀦𑀺. 𑀅𑀭𑀚𑁆𑀚𑀦 𑀅𑀤𑀼𑀲𑁆𑀲𑀦 𑀅𑀫𑀼𑀬𑁆𑀳𑀦𑀸𑀦𑀁 𑀦𑀺𑀲𑁆𑀲𑀦𑁆𑀤𑀸𑀦𑀺 𑀅𑀭𑀚𑁆𑀚𑀦𑀸𑀤𑀺 𑀦𑀺𑀲𑁆𑀲𑀦𑁆𑀤𑀸𑀦𑀺. ‘‘𑀲𑀤𑁆𑀥𑀸𑀤𑀻𑀦𑀻’’𑀢𑀺 𑀲𑀤𑁆𑀥𑀸 𑀲𑀢𑀺 𑀳𑀺𑀭𑀺 𑀑𑀢𑁆𑀢𑀧𑁆𑀧𑀸𑀤𑀻𑀦𑀺. ‘‘𑀳𑁂𑀢𑀼𑀫𑀼𑀔𑁂𑀦𑀧𑀻’’𑀢𑀺 𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤 𑀭𑀽𑀧 𑀦𑀺𑀩𑁆𑀩𑀸𑀦𑀸𑀦𑀁 𑀅𑀩𑁆𑀬𑀸𑀓𑀢𑀪𑀸𑀯𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀺𑀤𑁆𑀥𑁄𑀢𑀺 𑀯𑀼𑀢𑁆𑀢𑁄. 𑀲𑀳𑁂𑀢𑀼𑀓 𑀯𑀺𑀧𑀸𑀓 𑀓𑁆𑀭𑀺𑀬𑀸𑀦𑀁 𑀅𑀩𑁆𑀬𑀸𑀓𑀢 𑀪𑀸𑀯𑁄 𑀧𑀦 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀺𑀤𑁆𑀥𑁄𑀢𑀺𑀧𑀺 𑀲𑀳𑀚𑀸𑀢 𑀳𑁂𑀢𑀽𑀦𑀁 𑀳𑁂𑀢𑀼 𑀓𑀺𑀘𑁆𑀘𑁂𑀦 𑀲𑀺𑀤𑁆𑀥𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀸𑀯 𑀦𑀺𑀧𑀸𑀞𑁂. ‘‘𑀫𑀕𑁆𑀕𑀺𑀢𑀩𑁆𑀩𑁄’’𑀢𑀺 𑀕𑀯𑁂𑀲𑀺𑀢𑀩𑁆𑀩𑁄. 𑀅𑀣 𑀢𑁂𑀲𑀁 𑀓𑀼𑀲𑀮𑀸𑀤𑀺 𑀪𑀸𑀯𑁄 𑀲𑁂𑀲𑀲𑀫𑁆𑀧𑀬𑀼𑀢𑁆𑀢 𑀳𑁂𑀢𑀼𑀧𑁆𑀧𑀝𑀺 𑀩𑀤𑁆𑀥𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀅𑀧𑁆𑀧𑀝𑀺 𑀩𑀤𑁆𑀥𑁄’’𑀢𑀺 𑀳𑁂𑀢𑀼𑀦𑀸 𑀅𑀧𑁆𑀧𑀝𑀺 𑀩𑀤𑁆𑀥𑁄. ‘‘𑀓𑀼𑀲𑀮𑀸𑀤𑀺𑀪𑀸𑀯𑁄’’𑀢𑀺 𑀓𑀼𑀲𑀮𑀸𑀤𑀺𑀪𑀸𑀯𑁄 𑀲𑀺𑀬𑀸. ‘‘𑀲𑁄’’𑀢𑀺 𑀓𑀼𑀲𑀮𑀸𑀤𑀺𑀪𑀸𑀯𑁄. ‘‘𑀅𑀳𑁂𑀢𑀼𑀓𑀸𑀦𑀁’’𑀢𑀺 𑀅𑀳𑁂𑀢𑀼𑀓 𑀘𑀺𑀢𑁆𑀢𑀼𑀧𑁆𑀧𑀸𑀤 𑀭𑀽𑀧 𑀦𑀺𑀩𑁆𑀩𑀸𑀦𑀸𑀦𑀁. 𑀇𑀤𑀸𑀦𑀺 ‘𑀬𑀸𑀦𑀺 𑀘 𑀮𑀤𑁆𑀥𑀳𑁂𑀢𑀼 𑀧𑀘𑁆𑀘𑀬𑀸𑀦𑀻’𑀢𑀺𑀆𑀤𑀺 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀬𑀣𑀸𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀭𑀽𑀧𑀸𑀭𑀽𑀧 𑀥𑀫𑁆𑀫𑁂𑀲𑀽’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫 𑀯𑀘𑀦𑀁. ‘‘𑀅𑀭𑀽𑀧 𑀥𑀫𑁆𑀫𑁂𑀲𑀼 𑀏𑀯𑀸’’𑀢𑀺 𑀦𑀺𑀤𑁆𑀥𑀸𑀭𑀡𑀻𑀬𑀁. 𑀦 𑀭𑀽𑀧 𑀥𑀫𑁆𑀫𑁂𑀲𑀼 𑀨𑀭𑀦𑁆𑀢𑀺. 𑀏𑀯𑀁 𑀲𑀢𑀺, 𑀓𑀲𑁆𑀫𑀸 𑀢𑁂 𑀭𑀽𑀧 𑀥𑀫𑁆𑀫𑀸 𑀛𑀸𑀦𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑁂 𑀧𑀦𑀸’’𑀢𑀺𑀆𑀤𑀺𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀢𑀁 𑀧𑀦 𑀢𑁂𑀲𑀁’’𑀢𑀺 𑀢𑁂𑀲𑀁 𑀳𑀁𑀲𑀸𑀤𑀻𑀦𑀁 𑀢𑀁 𑀯𑀡𑁆𑀡𑀯𑀺𑀲𑁂𑀲𑀁. ‘‘𑀬𑁄𑀦𑀺𑀬𑁄’’𑀢𑀺 𑀫𑀸𑀢𑀸𑀧𑀺𑀢𑀼 𑀚𑀸𑀢𑀺𑀬𑁄. ‘‘𑀅𑀩𑁆𑀬𑀸𑀓𑀢𑀸𑀦𑀁 𑀧𑀦𑀸𑀢𑀺 𑀲𑀩𑁆𑀩𑀁’’𑀢𑀺 𑀅𑀩𑁆𑀬𑀸𑀓𑀢𑀸𑀦𑀁 𑀧𑀦 𑀅𑀩𑁆𑀬𑀸𑀓𑀢𑀪𑀸𑀯𑁄 𑀦𑀺𑀭𑀦𑀼𑀲𑀬 𑀲𑀦𑁆𑀢𑀸𑀦𑀧𑁆𑀧𑀝𑀺 𑀩𑀤𑁆𑀥𑁄, 𑀓𑀫𑁆𑀫𑀧𑁆𑀧𑀝𑀺 𑀩𑀤𑁆𑀥𑁄, 𑀅𑀯𑀺𑀧𑀸𑀓𑀪𑀸𑀯𑀧𑁆𑀧𑀝𑀺 𑀩𑀤𑁆𑀥𑁄 𑀘𑀸𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀇𑀤𑀁 𑀲𑀩𑁆𑀩𑀁. ‘‘𑀯𑀼𑀢𑁆𑀢 𑀧𑀓𑁆𑀔𑁂𑀧𑀢𑀢𑀺 𑀬𑁂𑀯𑀸’’𑀢𑀺 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀅𑀦𑁆𑀢𑁄𑀕𑀥𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩𑁨. 𑀓𑀺𑀘𑁆𑀘𑀲𑀗𑁆𑀕𑀳𑁂. 𑀢𑀲𑁆𑀫𑀺𑀁 𑀧𑀭𑀺𑀓𑁆𑀔𑀻𑀡𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀫𑁆𑀫𑀲𑁆𑀲𑀸’’𑀢𑀺 𑀓𑀫𑁆𑀫𑀦𑁆𑀢𑀭𑀲𑁆𑀲. 𑀘𑀼𑀢𑀲𑁆𑀲 𑀲𑀢𑁆𑀢𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀪𑀯𑀦𑁆𑀢𑀭𑀸𑀤𑀺𑀧𑁆𑀧𑀝𑀺 𑀲𑀦𑁆𑀥𑀸𑀦 𑀯𑀲𑁂𑀦𑀸’’𑀢𑀺 𑀪𑀯𑀦𑁆𑀢𑀭𑀲𑁆𑀲 𑀆𑀤𑀺𑀓𑁄𑀝𑀺𑀬𑀸 𑀧𑀝𑀺𑀲𑀦𑁆𑀥𑀸𑀦 𑀯𑀲𑁂𑀦. 𑀪𑀯𑀲𑀦𑁆𑀢𑀸𑀦𑀲𑁆𑀲 𑀧𑀯𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀬𑀸𑀯 𑀢𑀁 𑀓𑀫𑁆𑀫𑀁’’𑀢𑀺𑀆𑀤𑀺𑀁. ‘‘𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺 𑀧𑀘𑁆𑀘𑀬𑀗𑁆𑀕𑀪𑀸𑀯𑁂𑀦𑀸’’𑀢𑀺 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀬𑀸 𑀧𑀥𑀸𑀦 𑀧𑀘𑁆𑀘𑀬 𑀲𑀗𑁆𑀔𑀸𑀢𑁂𑀦 𑀅𑀗𑁆𑀕𑀪𑀸𑀯𑁂𑀦. 𑀏𑀢𑁂𑀦 𑀪𑀯𑀗𑁆𑀕𑀧𑀤𑁂 𑀅𑀗𑁆𑀕𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑀳𑀻’’𑀢𑀺𑀆𑀤𑀺𑀁. ‘‘𑀢𑀲𑁆𑀲𑀸’’𑀢𑀺 𑀪𑀯𑀗𑁆𑀕𑀲𑁆𑀲. 𑀆𑀯𑀚𑁆𑀚𑀦𑀁 𑀆𑀯𑀝𑁆𑀝𑀦𑀦𑁆𑀢𑀺 𑀏𑀓𑁄 𑀯𑀘𑀦𑀢𑁆𑀣𑁄. 𑀢𑀁 𑀯𑀸 𑀆𑀯𑀚𑁆𑀚𑁂𑀢𑀻𑀢𑀺 𑀏𑀓𑁄. ‘‘𑀢𑀁’’𑀢𑀺 𑀘𑀺𑀢𑁆𑀢 𑀲𑀦𑁆𑀢𑀸𑀦𑀁. 𑀆𑀯𑀝𑁆𑀝𑀢𑀺 𑀯𑀸 𑀢𑀁 𑀏𑀢𑁆𑀣𑀸𑀢𑀺 𑀏𑀓𑁄. 𑀆𑀯𑀝𑁆𑀝𑀢𑀺 𑀯𑀸 𑀢𑀁 𑀏𑀢𑁂𑀦𑀸𑀢𑀺 𑀏𑀓𑁄. ‘‘𑀢𑀁’’𑀢𑀺 𑀘𑀺𑀢𑁆𑀢 𑀲𑀦𑁆𑀢𑀸𑀦𑀁. 𑀆𑀯𑀚𑁆𑀚𑁂𑀢𑀺 𑀯𑀸𑀢𑀺 𑀏𑀓𑁄. ‘‘𑀯𑁄𑀝𑁆𑀞𑀩𑁆𑀩𑀦𑀁’’𑀢𑀺 𑀯𑀺-𑀅𑀯-𑀞𑀧𑀦𑀁𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀪𑀸𑀯𑀦𑀺 𑀯𑀺𑀘𑀸𑀭𑀡𑀸𑀬𑀁. ‘‘𑀏𑀓𑀸𑀯𑀚𑁆𑀚𑀦 𑀧𑀭𑀺𑀓𑀫𑁆𑀫 𑀘𑀺𑀢𑁆𑀢𑀢𑁄’’𑀢𑀺 𑀫𑀕𑁆𑀕𑁂𑀦 𑀯𑀸 𑀅𑀪𑀺𑀜𑁆𑀜𑀸𑀬 𑀯𑀸 𑀏𑀓𑀁 𑀲𑀫𑀸𑀦𑀁 𑀆𑀯𑀚𑁆𑀚𑀦𑀁 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀲𑁆𑀲𑀁 𑀯𑀻𑀣𑀺𑀬𑀁 ‘𑀆𑀯𑀚𑁆𑀚𑀦𑀁, 𑀧𑀭𑀺𑀓𑀫𑁆𑀫𑀁, 𑀉𑀧𑀘𑀸𑀭𑁄, 𑀅𑀦𑀼𑀮𑁄𑀫𑀁, 𑀕𑁄𑀢𑁆𑀭𑀪𑀽,𑀢𑀺 𑀏𑀢𑁆𑀣 𑀧𑀭𑀺𑀓𑀫𑁆𑀫 𑀚𑀯𑀦𑀘𑀺𑀢𑁆𑀢𑀁 𑀇𑀥 𑀧𑀭𑀺𑀓𑀫𑁆𑀫 𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑀸𑀦𑀻’’𑀢𑀺 𑀫𑀕𑁆𑀕𑀸 𑀪𑀺𑀜𑁆𑀜𑀸𑀚𑀯𑀦𑀸𑀦𑀺. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀯𑀺𑀪𑀸𑀯𑀦𑀺 𑀧𑀸𑀞𑁂. ‘‘𑀤𑀻𑀖𑀁 𑀅𑀤𑁆𑀥𑀸𑀦𑀁’’𑀢𑀺 𑀲𑀓𑀮𑀭𑀢𑁆𑀢𑀺𑀬𑀁 𑀯𑀸 𑀲𑀓𑀮 𑀤𑀺𑀯𑀲𑀁 𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦 𑀯𑀲𑁂𑀦 𑀤𑀻𑀖𑀁 𑀓𑀸𑀮𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀧𑀝𑀺𑀲𑀦𑁆𑀥𑀺𑀬𑀸𑀞𑀸𑀦𑀁’’𑀢𑀺 𑀧𑀝𑀺𑀲𑀦𑁆𑀥𑀺𑀓𑀺𑀘𑁆𑀘𑀲𑁆𑀲 𑀞𑀸𑀦𑀁. 𑀓𑀸𑀮𑁄𑀳𑀺 𑀦𑀸𑀫 𑀯𑀺𑀲𑀼𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡 𑀪𑀽𑀢𑁄 𑀏𑀓𑁄 𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑁄𑀢𑀺 𑀏𑀢𑁂𑀦 𑀓𑀸𑀮𑁄 𑀦𑀸𑀫 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀓𑀣𑀁 𑀓𑀺𑀘𑁆𑀘𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀦𑀸𑀫 𑀲𑀓𑁆𑀓𑀸 𑀪𑀯𑀺𑀢𑀼𑀦𑁆𑀢𑀺 𑀇𑀫𑀁 𑀆𑀲𑀗𑁆𑀓𑀁 𑀯𑀺𑀲𑁄𑀥𑁂𑀢𑀺. ‘‘𑀇𑀢𑀭𑀣𑀸’’𑀢𑀺 𑀢𑀣𑀸 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀣𑀸 𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀁 𑀅𑀪𑁂𑀤𑁂 𑀕𑀳𑀺𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀬𑀁 𑀲𑁄𑀫𑀦𑀲𑁆𑀲 𑀬𑀼𑀢𑁆𑀢𑀁𑀧𑀻’’𑀢𑀺 𑀓𑀤𑀸𑀘𑀺 𑀲𑀬𑀁 𑀲𑁄𑀫𑀦𑀲𑁆𑀲 𑀬𑀼𑀢𑁆𑀢𑀁𑀧𑀺. ‘‘𑀢𑀁’’𑀢𑀺 𑀲𑁄𑀫𑀦𑀲𑁆𑀲 𑀲𑀦𑁆𑀢𑀻𑀭𑀡𑀁. ‘‘𑀮𑀤𑁆𑀥𑀧𑀘𑁆𑀘𑀬 𑀪𑀸𑀯𑁂𑀦𑀸’’𑀢𑀺 𑀮𑀤𑁆𑀥𑀅𑀦𑀦𑁆𑀢𑀭 𑀧𑀘𑁆𑀘𑀬𑀪𑀸𑀯𑁂𑀦. ‘‘𑀆𑀲𑁂𑀯𑀦 𑀪𑀸𑀯 𑀭𑀳𑀺𑀢𑀁 𑀧𑀻’’𑀢𑀺 𑀆𑀲𑁂𑀯𑀦 𑀕𑀼𑀡 𑀭𑀳𑀺𑀢𑀫𑁆𑀧𑀺. 𑀢𑀜𑁆𑀳𑀺 𑀆𑀲𑁂𑀯𑀦 𑀧𑀘𑁆𑀘𑀬𑁂 𑀧𑀘𑁆𑀘𑀬𑁄𑀧𑀺 𑀦 𑀳𑁄𑀢𑀺, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁆𑀧𑀺 𑀦 𑀳𑁄𑀢𑀻𑀢𑀺. ‘‘𑀧𑀭𑀺𑀓𑀫𑁆𑀫 𑀪𑀸𑀯𑀦𑀸 𑀩𑀮𑁂𑀦 𑀘 𑀧𑀯𑀢𑁆𑀢𑀢𑁆𑀢𑀸’’𑀢𑀺 𑀇𑀤𑀁 𑀨𑀮𑀲𑀫𑀸𑀧𑀢𑁆𑀢𑀺 𑀯𑀻𑀣𑀺𑀬𑀁 𑀨𑀮𑀚𑀯𑀦𑁂𑀲𑀼 𑀧𑀸𑀓𑀝𑀁. 𑀲𑁂𑀲𑀫𑁂𑀢𑁆𑀣𑀲𑀼𑀩𑁄𑀥𑀫𑁂𑀯.

𑁧𑁩𑁩. 𑀤𑁆𑀯𑀸𑀭𑀲𑀗𑁆𑀕𑀳𑁂. ‘‘𑀆𑀤𑀸𑀲𑀧𑀝𑁆𑀝𑀫𑀬𑁄’’𑀢𑀺 𑀆𑀤𑀸𑀲𑀧𑀝𑁆𑀝𑁂𑀦 𑀧𑀓𑀢𑁄. ‘‘𑀤𑁆𑀯𑁂 𑀏𑀯𑀸’’𑀢𑀺 𑀤𑁆𑀯𑁂 𑀏𑀯 𑀤𑁆𑀯𑀸𑀭𑀸𑀦𑀺. ‘‘𑀤𑁆𑀯𑀸𑀭 𑀲𑀤𑀺𑀲𑀢𑁆𑀢𑀸’’𑀢𑀺 𑀦𑀕𑀭 𑀤𑁆𑀯𑀸𑀭 𑀲𑀤𑀺𑀲𑀢𑁆𑀢𑀸. ‘‘𑀓𑀫𑁆𑀫𑀯𑀺𑀲𑁂𑀲 𑀫𑀳𑀸𑀪𑀽𑀢 𑀯𑀺𑀲𑁂𑀲 𑀲𑀺𑀤𑁆𑀥𑁂𑀦𑀸’’𑀢𑀺 𑀏𑀢𑁆𑀣 𑀓𑀫𑁆𑀫𑀯𑀺𑀲𑁂𑀲𑁂𑀦 𑀘 𑀫𑀳𑀸𑀪𑀽𑀢 𑀯𑀺𑀲𑁂𑀲𑁂𑀦 𑀘 𑀲𑀺𑀤𑁆𑀥𑁄𑀢𑀺 𑀯𑀺𑀕𑁆𑀕𑀳𑁄. 𑀆𑀯𑀚𑁆𑀚𑀦𑀸𑀤𑀻𑀦𑀺 𑀘 𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀕𑀡𑁆𑀳𑀦𑁆𑀢𑀺. ‘‘𑀬𑀫𑁆𑀳𑀻’’𑀢𑀺 𑀬𑀲𑁆𑀫𑀺𑀁 𑀘𑀓𑁆𑀔𑀼𑀫𑁆𑀳𑀺. 𑀢𑀤𑁂𑀯 𑀘𑀓𑁆𑀔𑀼 𑀘𑀓𑁆𑀔𑀼𑀤𑁆𑀯𑀸𑀭𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀁’’𑀢𑀺 𑀭𑀽𑀧 𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀆𑀯𑀚𑁆𑀚𑀦𑀸𑀤𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀜𑁆𑀘. ‘‘𑀯𑀺𑀲𑀬 𑀯𑀺𑀲𑀬𑀻 𑀪𑀸𑀯𑀽𑀧𑀕𑀫𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀭𑀽𑀧 𑀦𑀺𑀫𑀺𑀢𑁆𑀢𑀸𑀦𑀁 𑀯𑀺𑀲𑀬𑀪𑀸𑀯𑀲𑁆𑀲 𑀉𑀧𑀕𑀫𑀦𑀁 𑀦𑀸𑀫 𑀘𑀓𑁆𑀔𑀼 𑀫𑀡𑁆𑀟𑁂 𑀆𑀧𑀸𑀢𑀸𑀕𑀫𑀦𑀁 𑀯𑀼𑀘𑁆𑀘𑀢𑀺. 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑀺𑀲𑀬𑀻 𑀪𑀸𑀯𑀲𑁆𑀲 𑀉𑀧𑀕𑀫𑀦𑀁 𑀦𑀸𑀫 𑀢𑁂𑀲𑀁 𑀦𑀺𑀫𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡 𑀓𑀭𑀡𑀁 𑀯𑀼𑀘𑁆𑀘𑀢𑀺. ‘‘𑀫𑀼𑀔𑀧𑁆𑀧𑀣𑀪𑀽𑀢𑀢𑁆𑀢𑀸’’𑀢𑀺 𑀫𑀼𑀔𑀫𑀕𑁆𑀕𑀪𑀽𑀢𑀢𑁆𑀢𑀸. 𑀏𑀯𑀁 𑀤𑁆𑀯𑀸𑀭 𑀲𑀤𑁆𑀤𑀲𑁆𑀲 𑀓𑀭𑀡 𑀲𑀸𑀥𑀦𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀥𑀺𑀓𑀭𑀡 𑀲𑀸𑀥𑀦 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀅𑀣𑀯𑀸’’𑀢𑀺𑀆𑀤𑀺𑀦𑀸. ‘‘𑀭𑀽𑀧𑀸𑀦𑀁’’𑀢𑀺 𑀭𑀽𑀧 𑀦𑀺𑀫𑀺𑀢𑁆𑀢𑀸𑀦𑀁. ‘‘𑀘𑀓𑁆𑀔𑀼𑀫𑁂𑀯 𑀘𑀓𑁆𑀔𑀼 𑀤𑁆𑀯𑀸𑀭’’𑀦𑁆𑀢𑀺 𑀏𑀢𑁂𑀦 𑀘𑀓𑁆𑀔𑀼𑀫𑁂𑀯 𑀤𑁆𑀯𑀸𑀭𑀁 𑀘𑀓𑁆𑀔𑀼 𑀤𑁆𑀯𑀸𑀭𑀦𑁆𑀢𑀺 𑀅𑀯𑀥𑀸𑀭𑀡 𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. ‘‘𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯𑀸’’𑀢𑀺 𑀳𑁂𑀝𑁆𑀞𑀸 𑀘𑀺𑀢𑁆𑀢𑀲𑀗𑁆𑀕𑀳𑁂 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀧𑀤𑁂 𑀯𑀼𑀢𑁆𑀢𑀫𑁂𑀯. 𑀲𑀩𑁆𑀩𑀁 𑀏𑀓𑀽𑀦 𑀦𑀯𑀼𑀢𑀺𑀯𑀺𑀥𑀁 𑀘𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀫𑁂𑀯 𑀦𑀸𑀫 𑀳𑁄𑀢𑀺. 𑀢𑀣𑀸𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀅𑀬𑀁 𑀦𑀸𑀫𑀫𑀦𑁄 𑀫𑀦𑁄𑀤𑁆𑀯𑀸𑀭𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺. ‘‘𑀉𑀧𑀧𑀢𑁆𑀢𑀺 𑀤𑁆𑀯𑀸𑀭𑀫𑁂𑀯𑀸’’𑀢𑀺 𑀉𑀧𑀧𑀢𑁆𑀢𑀺𑀪𑀯 𑀧𑀭𑀺𑀬𑀸𑀧𑀦𑁆𑀦𑀁 𑀓𑀫𑁆𑀫𑀚𑀤𑁆𑀯𑀸𑀭𑀫𑁂𑀯. ‘‘𑀇𑀥 𑀘𑀸’’𑀢𑀺 𑀇𑀫𑀲𑁆𑀫𑀺𑀁 𑀲𑀗𑁆𑀕𑀳𑀕𑀦𑁆𑀣𑁂 𑀘. 𑀬𑀜𑁆𑀘 𑀲𑀸𑀥𑀓 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀢𑁆𑀣𑀸’’𑀢𑀺 𑀯𑀺𑀪𑀸𑀯𑀦𑀺𑀬𑀁. ‘‘𑀢𑀢𑁆𑀣𑁂𑀯 𑀢𑀁 𑀬𑀼𑀢𑁆𑀢𑀁’’𑀢𑀺 𑀢𑀲𑁆𑀫𑀺𑀁 𑀧𑀸𑀴𑀺𑀧𑁆𑀧𑀤𑁂𑀲𑁂 𑀏𑀯 𑀢𑀁 𑀲𑀸𑀥𑀓 𑀯𑀘𑀦𑀁 𑀬𑀼𑀢𑁆𑀢𑀁. 𑀇𑀢𑀭𑁂 𑀤𑁆𑀯𑁂 𑀧𑀘𑁆𑀘𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀦𑀜𑁆𑀘𑀸𑀢𑀺 𑀏𑀢𑁆𑀣𑀸’’𑀢𑀺 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁𑀢𑀺 𑀯𑀸𑀓𑁆𑀬𑁂 𑀫𑀦𑀜𑁆𑀘𑀸𑀢𑀺𑀧𑀤𑁂. 𑀢𑀢𑁆𑀣 𑀧𑀦 𑀚𑀯𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀫𑀦𑀜𑁆𑀘𑀸𑀢𑀺 𑀏𑀢𑁆𑀣 𑀤𑁆𑀯𑀸𑀭𑀪𑀽𑀢𑀁 𑀪𑀯𑀗𑁆𑀕𑀫𑀦𑁄 𑀘 𑀆𑀯𑀚𑁆𑀚𑀦 𑀫𑀦𑁄 𑀘𑀸𑀢𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀺. 𑀥𑀫𑁆𑀫𑁂 𑀘𑀸𑀢𑀺 𑀧𑀤𑁂 𑀥𑀫𑁆𑀫𑀸𑀭𑀫𑁆𑀫𑀡 𑀲𑀗𑁆𑀔𑀸𑀢𑁄 𑀏𑀓𑁄 𑀧𑀘𑁆𑀘𑀬𑁄 𑀮𑀩𑁆𑀪𑀢𑀺. 𑀘 𑀲𑀤𑁆𑀤𑁂𑀦 𑀫𑀦𑁄𑀯𑀺𑀜𑁆𑀜𑀸𑀡 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸 𑀕𑀬𑁆𑀳𑀦𑁆𑀢𑀺. 𑀏𑀯𑀁 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. ‘‘𑀏𑀢𑁆𑀣 𑀘𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀝𑁆𑀞𑀓𑀣𑀸 𑀯𑀘𑀦𑁂. ‘‘𑀲𑀦𑁆𑀦𑀺𑀳𑀺𑀢 𑀧𑀘𑁆𑀘𑀬𑀸𑀦𑀁 𑀏𑀯 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀢𑀸’’𑀢𑀺 𑀧𑀝𑀺𑀘𑁆𑀘 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑁂𑀦 𑀆𑀲𑀦𑁆𑀦𑁂 𑀥𑀭𑀫𑀸𑀦𑀧𑀘𑁆𑀘𑀬𑀸𑀦𑀁 𑀏𑀯 𑀢𑀲𑁆𑀫𑀺𑀁 𑀧𑀸𑀴𑀺𑀯𑀸𑀓𑁆𑀬𑁂 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀤𑁆𑀯𑀸𑀭𑀪𑀸𑀯𑀸𑀭𑀳𑀲𑁆𑀲𑀸’’𑀢𑀺 𑀯𑀺𑀲𑀬 𑀯𑀺𑀲𑀬𑀻𑀦𑀁 𑀯𑀼𑀢𑁆𑀢 𑀦𑀬𑁂𑀦 𑀧𑀯𑀢𑁆𑀢𑀺 𑀫𑀼𑀔𑀪𑀸𑀯𑀸𑀭𑀳𑀲𑁆𑀲. 𑀏𑀢𑁂𑀦 𑀆𑀭𑀫𑁆𑀫𑀡𑀸𑀦𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀼 𑀯𑀸, 𑀫𑀸𑀯𑀸, 𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀼𑀯𑀸, 𑀫𑀸𑀯𑀸, 𑀅𑀧𑁆𑀧𑀫𑀸𑀡𑀁. 𑀧𑀪𑀲𑁆𑀲𑀭𑀧𑁆𑀧𑀲𑀦𑁆𑀦𑀪𑀸𑀯𑁂𑀦 𑀤𑁆𑀯𑀸𑀭𑀪𑀸𑀯𑀸 𑀭𑀳𑀢𑀸 𑀏𑀯 𑀧𑀫𑀸𑀡𑀦𑁆𑀢𑀺 𑀤𑀻𑀧𑁂𑀢𑀺. ‘‘𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀤𑁆𑀯𑀸𑀭𑀯𑀺𑀓𑀸𑀭 𑀫𑀽𑀮𑀓𑀸𑀦𑀺 𑀢𑀸𑀤𑀺𑀲𑀸𑀦𑀺 𑀓𑀺𑀘𑁆𑀘𑀸𑀦𑀺 𑀬𑁂𑀲𑀁 𑀢𑀸𑀦𑀺 𑀢𑀁 𑀓𑀺𑀘𑁆𑀘𑀯𑀦𑁆𑀢𑀸𑀦𑀺. ‘‘𑀓𑀫𑁆𑀫𑀯𑀲𑁂𑀦 𑀲𑀺𑀚𑁆𑀛𑀦𑁆𑀢𑀻’’𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀓𑀺𑀘𑁆𑀘𑀯𑀦𑁆𑀢𑀸𑀦𑀺 𑀘𑀺𑀢𑁆𑀢𑀸𑀦𑀺. 𑀯𑀺𑀪𑀸𑀯𑀦𑀺 𑀧𑀸𑀞𑁂 ‘‘𑀫𑀦𑁄𑀤𑁆𑀯𑀸𑀭 𑀲𑀗𑁆𑀔𑀸𑀢 𑀪𑀯𑀗𑁆𑀕𑀢𑁄’’𑀢𑀺 𑀫𑀦𑁄𑀤𑁆𑀯𑀸𑀭 𑀲𑀗𑁆𑀔𑀸𑀢 𑀪𑀯𑀗𑁆𑀕 𑀪𑀸𑀯𑀢𑁄 𑀘. ‘‘𑀆𑀭𑀫𑁆𑀫𑀡𑀦𑁆𑀢𑀭𑀕𑁆𑀕𑀳𑀡𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄’’𑀢𑀺 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑁂𑀦 𑀬𑀣𑀸 𑀕𑀳𑀺𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀆𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀺𑀓𑀸𑀮𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀸𑀕𑀢𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀭𑀲𑁆𑀲 𑀕𑀳𑀡 𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘. 𑀳𑁂𑀝𑁆𑀞𑀸𑀧𑀺 𑀧𑀜𑁆𑀘𑀤𑁆𑀯𑀸𑀭𑀸 𑀯𑀚𑁆𑀚𑀦 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡 𑀲𑀫𑁆𑀧𑀝𑀺𑀘𑁆𑀙𑀦 𑀲𑀦𑁆𑀢𑀻𑀭𑀡 𑀯𑁄𑀝𑁆𑀞𑀩𑁆𑀩𑀦 𑀓𑀸𑀫𑀸𑀯𑀘𑀭𑀚𑀯𑀦 𑀢𑀤𑀸 𑀭𑀫𑁆𑀫𑀡 𑀯𑀲𑁂𑀦𑀸𑀢𑀺𑀆𑀤𑀺𑀦𑀸 𑀓𑀺𑀘𑁆𑀘𑀲𑀻𑀲𑁂𑀦𑁂𑀯. 𑀮. 𑀯𑀼𑀢𑁆𑀢𑁄. 𑀏𑀢𑁆𑀣𑀳𑀺 𑀆𑀯𑀚𑁆𑀚𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀓𑀺𑀘𑁆𑀘 𑀯𑀺𑀲𑁂𑀲𑀸𑀦𑀁 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺. ‘‘𑀘𑁂’’𑀢𑀺 𑀘𑁂 𑀯𑀤𑁂𑀬𑁆𑀬. ‘‘𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. ‘‘𑀢𑀣𑀸 𑀅𑀲𑁆𑀲𑀼𑀢𑀢𑁆𑀢𑀸’’𑀢𑀺 𑀏𑀓𑀽𑀦 𑀯𑀻𑀲𑀢𑀺 𑀤𑁆𑀯𑀸𑀭 𑀯𑀺𑀫𑀼𑀢𑁆𑀢𑀸𑀦𑀻𑀢𑀺 𑀘, 𑀙 𑀤𑁆𑀯𑀸𑀭𑀺𑀓𑀸𑀦𑀺 𑀘𑁂𑀯 𑀤𑁆𑀯𑀸𑀭 𑀯𑀺𑀫𑀼𑀢𑁆𑀢𑀸𑀦𑀻𑀢𑀺 𑀘, 𑀫𑀳𑀕𑁆𑀕𑀢 𑀯𑀺𑀧𑀸𑀓𑀸𑀦𑀺 𑀤𑁆𑀯𑀸𑀭 𑀯𑀺𑀫𑀼𑀢𑁆𑀢𑀸𑀦𑁂 𑀯𑀸𑀢𑀺 𑀘, 𑀲𑀼𑀢𑀁. 𑀦 𑀧𑀦 𑀤𑁆𑀯𑀸𑀭𑀺𑀓 𑀯𑀺𑀫𑀼𑀢𑁆𑀢𑀸𑀦𑀻𑀢𑀺 𑀲𑀼𑀢𑀁.

𑁧𑁩𑁪. 𑀆𑀭𑀫𑁆𑀫𑀡 𑀲𑀗𑁆𑀕𑀳𑁂. ‘‘𑀤𑀼𑀩𑁆𑀩𑀮 𑀧𑀼𑀭𑀺𑀲𑁂𑀦𑀸’’𑀢𑀺 𑀕𑁂𑀮𑀜𑁆𑀜𑀸𑀪𑀺𑀪𑀽𑀢𑀢𑁆𑀢𑀸 𑀯𑀸 𑀚𑀭𑀸𑀪𑀺𑀪𑀽𑀢𑀢𑁆𑀢𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀭𑀚𑁆𑀚𑀼𑀓𑁂𑀦 𑀯𑀸 𑀯𑀺𑀦𑀸 𑀉𑀝𑁆𑀞𑀸𑀢𑀼𑀫𑁆𑀧𑀺 𑀧𑀢𑀺𑀝𑁆𑀞𑀸𑀢𑀼𑀫𑁆𑀧𑀺 𑀅𑀧𑀭𑀸𑀧𑀭𑀁 𑀕𑀦𑁆𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁂𑀦 𑀤𑀼𑀩𑁆𑀩𑀮 𑀧𑀼𑀭𑀺𑀲𑁂𑀦 𑀤𑀡𑁆𑀟𑀓𑀁 𑀯𑀸 𑀭𑀚𑁆𑀚𑀼𑀓𑀁 𑀯𑀸 𑀆𑀮𑀫𑁆𑀩𑀺𑀬𑀢𑀺. 𑀆𑀮𑀫𑁆𑀩𑀺𑀢𑁆𑀯𑀸 𑀉𑀝𑁆𑀞𑀸𑀢𑀺. 𑀧𑀢𑀺𑀝𑁆𑀞𑀸𑀢𑀺. 𑀅𑀧𑀭𑀸𑀧𑀭𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯. 𑀅𑀫𑀼𑀜𑁆𑀘 𑀫𑀸𑀦𑁂𑀳𑀺 𑀳𑀼𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. ‘‘𑀆𑀕𑀦𑁆𑀢𑁆𑀯𑀸’’𑀢𑀺 𑀆𑀭𑀫𑁆𑀫𑀡 𑀓𑀭𑀡 𑀯𑀲𑁂𑀦 𑀢𑀢𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸. ‘‘𑀯𑀺𑀲𑀼𑀁 𑀲𑀺𑀤𑁆𑀥𑀸𑀦𑀻’’𑀢𑀺 𑀆𑀮𑀫𑁆𑀩𑀺𑀬𑀢𑀻𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑀺, 𑀆𑀮𑀫𑁆𑀩𑀡𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀆𑀭𑀫𑁆𑀫𑀡𑀦𑁆𑀢𑀺 𑀦 𑀲𑀺𑀚𑁆𑀛𑀢𑀺. 𑀢𑀸𑀦𑀺 𑀏𑀢𑁆𑀣 𑀆𑀕𑀦𑁆𑀢𑁆𑀯𑀸 𑀭𑀫𑀦𑁆𑀢𑀻𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑀺, 𑀆𑀭𑀫𑁆𑀫𑀡𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀆𑀮𑀫𑁆𑀩𑀡𑀦𑁆𑀢𑀺 𑀦 𑀲𑀺𑀚𑁆𑀛𑀢𑀺. 𑀏𑀯𑀜𑁆𑀘 𑀲𑀢𑀺 𑀏𑀓𑀁 𑀧𑀤𑀁 𑀤𑁆𑀯𑀻𑀳𑀺𑀯𑀸𑀓𑁆𑀬𑁂𑀳𑀺 𑀤𑀲𑁆𑀲𑀦𑀁 𑀦 𑀲𑀼𑀦𑁆𑀤𑀭𑀦𑁆𑀢𑀺. ‘‘𑀅𑀜𑁆𑀜𑀸𑀦𑀺 𑀆𑀭𑀫𑁆𑀫𑀡𑀸𑀦𑀻’’𑀢𑀺 𑀭𑀽𑀧𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀸𑀦𑀺 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀦𑀺. ‘‘𑀆𑀕𑀘𑁆𑀙𑀢𑀻’’𑀢𑀺 𑀆𑀯𑀺𑀪𑀸𑀯𑀁 𑀕𑀘𑁆𑀙𑀢𑀺, 𑀉𑀧𑁆𑀧𑀸𑀤𑀧𑁆𑀧𑀯𑀢𑁆𑀢𑀺 𑀯𑀲𑁂𑀦 𑀧𑀘𑁆𑀘𑀓𑁆𑀔𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. ‘‘𑀆𑀕𑀘𑁆𑀙𑀺𑀢𑁆𑀣𑀸’’𑀢𑀺 𑀆𑀯𑀺𑀪𑀸𑀯𑀁 𑀕𑀘𑁆𑀙𑀺𑀢𑁆𑀣, 𑀉𑀧𑁆𑀧𑀸𑀤𑀧𑁆𑀧𑀯𑀢𑁆𑀢𑀺 𑀯𑀲𑁂𑀦 𑀧𑀘𑁆𑀘𑀓𑁆𑀔𑀪𑀸𑀯𑀁 𑀧𑀸𑀧𑀼𑀡𑀺𑀢𑁆𑀣. ‘‘𑀅𑀦𑀸𑀕𑀢𑀁’’𑀢𑀺 𑀏𑀢𑁆𑀣 𑀦 𑀓𑀸𑀭𑁄 𑀅𑀯𑀢𑁆𑀣𑀸 𑀯𑀲𑁂𑀦 𑀧𑀝𑀺𑀲𑁂𑀥𑁄. 𑀬𑁄 𑀥𑀫𑁆𑀫𑁄 𑀧𑀘𑁆𑀘𑀬 𑀲𑀸𑀫𑀕𑁆𑀕𑀺𑀬𑀁 𑀲𑀢𑀺 𑀆𑀕𑀫𑀦 𑀚𑀸𑀢𑀺𑀓𑁄 𑀉𑀧𑁆𑀧𑀚𑁆𑀚𑀦 𑀲𑀻𑀮𑁄. 𑀲𑁄 𑀏𑀯 𑀇𑀤𑀸𑀦𑀺 𑀆𑀕𑀘𑁆𑀙𑀢𑀺, 𑀇𑀤𑀸𑀦𑀺 𑀆𑀕𑀘𑁆𑀙𑀺𑀢𑁆𑀣, 𑀇𑀤𑀸𑀦𑀺 𑀆𑀕𑀫𑀦 𑀚𑀸𑀢𑀺𑀬𑀁 𑀞𑀺𑀢𑁄, 𑀦𑀸𑀕𑀘𑁆𑀙𑀢𑀺 𑀦𑀸𑀕𑀘𑁆𑀙𑀺𑀢𑁆𑀣𑀸𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀲𑁄 𑀅𑀦𑀸𑀕𑀢𑁄 𑀦𑀸𑀫. 𑀦𑀺𑀩𑁆𑀩𑀸𑀦 𑀧𑀜𑁆𑀜𑀢𑁆𑀢𑀺𑀬𑁄 𑀧𑀦 𑀆𑀕𑀫𑀦 𑀚𑀸𑀢𑀺𑀓𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀆𑀕𑀫𑀦𑀧𑁆𑀧𑀲𑀗𑁆𑀕𑀸𑀪𑀸𑀯𑀢𑁄 𑀅𑀦𑀸𑀕𑀢𑀸𑀢𑀺 𑀦 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀢𑁂𑀦𑀸𑀳 ‘‘𑀉𑀧𑁆𑀧𑀸𑀤 𑀚𑀸𑀢𑀺𑀓𑀸’’𑀢𑀺𑀆𑀤𑀺𑀁. ‘‘𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁’’𑀢𑀺 𑀯𑀢𑁆𑀯𑀸 𑀯𑀺𑀘𑀸𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀲𑀩𑁆𑀩𑁂𑀧𑀺𑀳𑀻’’𑀢𑀺𑀆𑀤𑀺𑀦𑀸. 𑀢𑁂 𑀬𑀤𑀸 𑀯𑀢𑁆𑀢𑀩𑁆𑀩 𑀧𑀓𑁆𑀔𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁆𑀧𑀸𑀤 𑀚𑀸𑀢𑀺𑀓𑀸𑀦𑀜𑁆𑀜𑁂𑀯 𑀲𑀗𑁆𑀔𑀢 𑀥𑀫𑁆𑀫𑀸𑀦𑀁. 𑀢𑀸𑀲𑀁 𑀦𑀺𑀩𑁆𑀩𑀸𑀦 𑀧𑀜𑁆𑀜𑀢𑁆𑀢𑀻𑀦𑀁. ‘‘𑀦 𑀢𑀣𑀸 𑀇𑀫𑁂𑀲𑀁’’𑀢𑀺 𑀇𑀫𑁂𑀲𑀁 𑀤𑁆𑀯𑀸𑀭 𑀯𑀺𑀫𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀧𑀦 𑀢𑀣𑀸 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀪𑀯 𑀯𑀺𑀲𑁂𑀲𑁂. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀆𑀯𑀚𑁆𑀚𑀦𑀲𑁆𑀲𑀯𑀺𑀬𑀸’’𑀢𑀺 𑀆𑀯𑀚𑁆𑀚𑀦𑀲𑁆𑀲 𑀆𑀭𑀫𑁆𑀫𑀡𑀁 𑀯𑀺𑀬. 𑀅𑀕𑁆𑀕𑀳𑀺𑀢𑀫𑁂𑀯 𑀳𑀼𑀢𑁆𑀯𑀸. ‘‘𑀏𑀓𑀯𑀚𑁆𑀚𑀦 𑀯𑀻𑀣𑀺𑀬𑀁 𑀅𑀕𑁆𑀕𑀳𑀺𑀢 𑀪𑀸𑀯𑁄 𑀇𑀥 𑀦 𑀧𑀫𑀸𑀡’’𑀦𑁆𑀢𑀺 𑀙 𑀤𑁆𑀯𑀸𑀭𑀕𑁆𑀕𑀳𑀺𑀢𑀦𑁆𑀢𑀺 𑀇𑀥 𑀅𑀧𑁆𑀧𑀫𑀸𑀡𑀁. 𑀪𑀯𑀦𑁆𑀢𑀭𑁂 𑀕𑀳𑀺𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀓𑀸𑀮𑀯𑀺𑀫𑀼𑀢𑁆𑀢 𑀲𑀸𑀫𑀜𑁆𑀜𑀁’’𑀯𑀸𑀢𑀺 𑀬𑀁 𑀓𑀺𑀜𑁆𑀘𑀺𑀓𑀸𑀮 𑀯𑀺𑀫𑀼𑀢𑁆𑀢𑀁 𑀯𑀸 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀕𑀫𑀲𑀺𑀤𑁆𑀥𑀺 𑀯𑁄𑀳𑀸𑀭𑁄 𑀦𑀸𑀫 ‘‘𑀓𑀫𑁆𑀫𑀦𑁆𑀢𑀺 𑀯𑀸, 𑀓𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀸, 𑀕𑀢𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀸, 𑀧𑀲𑀺𑀤𑁆𑀥𑁄 𑀯𑁄𑀳𑀸𑀭𑁄 𑀯𑀼𑀘𑁆𑀘𑀢𑀺. 𑀅𑀚𑀸𑀢 𑀲𑀢𑁆𑀢𑀼𑀭𑀸𑀚𑀸 𑀲𑀗𑁆𑀓𑀺𑀘𑁆𑀘𑀚𑀸𑀢𑀓𑁂𑀧𑀺 𑀧𑀺𑀢𑀭𑀁 𑀫𑀸𑀭𑁂𑀢𑀺. 𑀢𑀲𑁆𑀫𑀸 ‘‘𑀤𑁆𑀯𑀻𑀲𑀼𑀪𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁. ‘‘𑀙 𑀳𑀺 𑀤𑁆𑀯𑀸𑀭𑁂𑀳𑀻’’𑀢𑀺 𑀓𑀭𑀡 𑀪𑀽𑀢𑁂𑀳𑀺 𑀙𑀳𑀺 𑀘𑀓𑁆𑀔𑀸𑀤𑀺 𑀤𑁆𑀯𑀸𑀭𑁂𑀳𑀺. ‘‘𑀫𑀭𑀡𑀸𑀲𑀦𑁆𑀦 𑀚𑀯𑀦𑁂𑀳𑀻’’𑀢𑀺 𑀓𑀢𑁆𑀢𑀼 𑀪𑀽𑀢𑁂𑀳𑀺 𑀫𑀭𑀡𑀸𑀲𑀦𑁆𑀦𑁂 𑀧𑀯𑀢𑁆𑀢𑁂𑀳𑀺 𑀙 𑀤𑁆𑀯𑀸𑀭𑀺𑀓 𑀚𑀯𑀦𑁂𑀳𑀺. ‘‘𑀅𑀦𑁂𑀓𑀁 𑀲𑀪𑀸𑀯𑀁’’𑀢𑀺 𑀅𑀦𑁂𑀓𑀦𑁆𑀢 𑀪𑀸𑀯𑀁. 𑀬𑀜𑁆𑀳𑀺 𑀆𑀭𑀫𑁆𑀫𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻’’𑀢𑀺 𑀏𑀢𑁆𑀣 𑀅𑀲𑀜𑁆𑀜𑀻 𑀪𑀯𑀢𑁄 𑀘𑀼𑀢𑀸𑀦𑀁 𑀲𑀢𑁆𑀢𑀸𑀦𑀁 𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸 𑀓𑀫𑁆𑀫𑀸𑀤𑀺 𑀆𑀭𑀫𑁆𑀫𑀡𑀁 𑀪𑀯𑀦𑁆𑀢𑀭𑁂 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀅𑀕𑁆𑀕𑀳𑀺𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀓𑀲𑁆𑀫𑀸, 𑀢𑀲𑁆𑀫𑀺𑀁 𑀪𑀯𑁂 𑀓𑀲𑁆𑀲𑀘𑀺𑀤𑁆𑀯𑀸𑀭𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀅𑀭𑀽𑀧𑀪𑀯𑀢𑁄 𑀘𑀼𑀢𑀸𑀦𑀁 𑀧𑀦 𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸 𑀕𑀢𑀺 𑀦𑀺𑀫𑀺𑀢𑁆𑀢 𑀲𑀫𑁆𑀫𑀢𑀁 𑀆𑀭𑀫𑁆𑀫𑀡𑀁 𑀓𑀣𑀁 𑀪𑀯𑀦𑁆𑀢𑀭𑁂 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀅𑀕𑁆𑀕𑀳𑀺𑀢𑀁 𑀪𑀯𑁂𑀬𑁆𑀬, 𑀫𑀦𑁄𑀤𑁆𑀯𑀸𑀭𑀕𑁆𑀕𑀳𑀺𑀢𑀫𑁂𑀯 𑀪𑀯𑁂𑀬𑁆𑀬𑀸𑀢𑀺 𑀇𑀫𑀁 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀼𑀁 ‘‘𑀏𑀢𑁆𑀣 𑀘 𑀬𑀲𑁆𑀫𑀸 𑀧𑀝𑁆𑀞𑀸𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄 𑀘𑀼𑀢𑀸𑀦𑀁 𑀲𑀢𑁆𑀢𑀸𑀦𑀁 𑀬𑀸 𑀓𑀸𑀫𑀧𑀝𑀺𑀲𑀦𑁆𑀥𑀺, 𑀢𑀲𑁆𑀲𑀸𑀓𑀸𑀫𑀧𑀝𑀺 𑀲𑀦𑁆𑀥𑀺𑀬𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀓𑀸𑀫𑀧𑀝𑀺𑀲𑀦𑁆𑀥𑀺. 𑀧𑀭𑁂𑀲𑀁 𑀧𑀬𑁄𑀕 𑀩𑀮𑁂𑀦𑀸𑀧𑀺 𑀓𑀫𑁆𑀫𑀸𑀤𑀻𑀦𑀁 𑀉𑀧𑀝𑁆𑀞𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀸𑀦𑀁’’𑀢𑀺 𑀘𑀺𑀭𑀓𑀸𑀮𑀁 𑀲𑀗𑁆𑀖 𑀯𑀢𑁆𑀢 𑀘𑁂𑀢𑀺𑀬𑀯𑀢𑁆𑀢 𑀓𑀭𑀡𑀸𑀤𑀺𑀯𑀲𑁂𑀦 𑀢𑀁 𑀢𑀁 𑀪𑀸𑀯𑀦𑀸 𑀓𑀫𑁆𑀫𑀯𑀲𑁂𑀦 𑀘 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀸𑀦𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀁. ‘‘𑀳𑁄𑀢𑀺 𑀬𑁂𑀯𑀸’’𑀢𑀺 𑀓𑀫𑁆𑀫𑀸𑀤𑀻𑀦𑀁 𑀉𑀧𑀝𑁆𑀞𑀸𑀦𑀁 𑀦𑀸𑀫 𑀳𑁄𑀢𑀺𑀬𑁂𑀯. ‘‘𑀆𑀕𑀦𑁆𑀢𑁆𑀯𑀸’’𑀢𑀺 𑀇𑀫𑀁 𑀫𑀦𑀼𑀲𑁆𑀲 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀺𑀬𑁂𑀯. 𑀢𑀤𑀸𑀧𑀺 𑀦𑀺𑀭𑀬𑀧𑀸𑀮𑁂𑀳𑀺 𑀤𑀲𑁆𑀲𑀺𑀢𑀁 𑀢𑀁 𑀢𑀁 𑀕𑀢𑀺 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀯𑀦𑁆𑀢𑀺. ‘‘𑀢𑀁’’𑀢𑀺 𑀭𑁂𑀯𑀢𑀺𑀁 𑀦𑀸𑀫 𑀇𑀢𑁆𑀣𑀺𑀁. 𑀦𑀦𑀼 𑀦𑀺𑀭𑀬𑀧𑀸𑀮𑀸 𑀦𑀸𑀫 𑀢𑀸𑀯𑀢𑀺𑀁𑀲𑀸 𑀪𑀯𑀦𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀦𑁆𑀢𑀺. 𑀦𑁄 𑀦𑀲𑀓𑁆𑀓𑀼𑀡𑁂𑀬𑁆𑀬𑀼𑀁. 𑀓𑀲𑁆𑀫𑀸, 𑀫𑀳𑀺𑀤𑁆𑀥𑀺𑀓 𑀬𑀓𑁆𑀔 𑀚𑀸𑀢𑀺𑀓𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑁂𑀲𑁆𑀲𑀯𑀡 𑀤𑀽𑀢𑀸’’𑀢𑀺 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀤𑀽𑀢𑀸. ‘‘𑀉𑀧𑀘𑀸𑀭𑀚𑁆𑀛𑀸𑀦𑁂𑀞𑀢𑁆𑀯𑀸’’𑀢𑀺 𑀅𑀧𑁆𑀧𑀦𑀸𑀛𑀸𑀦𑀁 𑀅𑀧𑀢𑁆𑀢𑀢𑀸𑀬 𑀉𑀧𑀘𑀸𑀭𑀪𑀸𑀯𑀦𑀸𑀪𑀽𑀢𑁂 𑀓𑀸𑀫𑀸𑀯𑀘𑀭𑀚𑁆𑀛𑀸𑀦𑁂𑀞𑀢𑁆𑀯𑀸. ‘‘𑀢𑀸𑀦𑁂𑀯 𑀦𑀺𑀫𑀺𑀢𑁆𑀢𑀸𑀦𑀻’’𑀢𑀺 𑀧𑀣𑀯𑀻𑀓𑀲𑀺𑀡 𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀧𑀝𑀺𑀪𑀸𑀕 𑀦𑀺𑀫𑀺𑀢𑁆𑀢𑀸𑀦𑀺. ‘‘𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁’’𑀢𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁂𑀳𑀺 𑀅𑀜𑁆𑀜𑀁 𑀉𑀧𑀘𑀸𑀭 𑀪𑀸𑀯𑀦𑀸 𑀓𑀫𑁆𑀫𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀅𑀦𑀼𑀭𑀽𑀧𑀁 𑀕𑀢𑀺 𑀦𑀺𑀫𑀺𑀢𑁆𑀢𑀁 𑀯𑀸. ‘‘𑀢𑀸𑀦𑁂𑀯 𑀦𑀺𑀫𑀺𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸’’𑀢𑀺 𑀯𑀘𑀦𑁂𑀦 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀫𑀭𑀡𑀸𑀲𑀦𑁆𑀦 𑀚𑀯𑀦𑁂𑀳𑀺 𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀸𑀦𑀺 𑀘 𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀢𑁆𑀢𑀸 𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺. ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑀢𑀺 𑀦𑀺𑀫𑀺𑀢𑁆𑀢𑁂 𑀲𑀺𑀤𑁆𑀥𑁂 𑀲𑀺𑀤𑁆𑀥𑀫𑁂𑀯𑀸’’𑀢𑀺 𑀢𑀲𑁆𑀫𑀺𑀁 𑀪𑀯𑁂 𑀕𑀢𑀲𑁆𑀲 𑀢𑀢𑁆𑀣 𑀬𑀸𑀯𑀚𑀻𑀯𑀫𑁆𑀧𑀺 𑀅𑀦𑀼 𑀪𑀯𑀺𑀢𑀩𑁆𑀩𑀁 𑀆𑀭𑀫𑁆𑀫𑀡𑀁 𑀦𑀸𑀫 𑀢𑀲𑁆𑀫𑀺𑀁 𑀔𑀡𑁂 𑀥𑀭𑀫𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀢𑁆𑀣𑀺. 𑀢𑀢𑁄 𑀯𑀟𑁆𑀠𑀫𑀸𑀦𑀁 𑀅𑀦𑀸𑀕𑀢𑀫𑁆𑀧𑀺 𑀅𑀢𑁆𑀣𑀺. 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀉𑀧𑀝𑁆𑀞𑀳𑀦𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁 𑀲𑀫𑁆𑀧𑀚𑁆𑀚𑀢𑀺. 𑀅𑀦𑀸𑀕𑀢𑀁 𑀧𑀦 𑀅𑀦𑀼𑀧𑀝𑁆𑀞𑀳𑀦𑁆𑀢𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀦𑁆𑀢𑁄𑀕𑀥𑀲𑀤𑀺𑀲𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀸𑀯𑀦𑀺 𑀧𑀸𑀞𑁂𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀺𑀬 𑀆𑀧𑀸𑀢𑀫𑀸𑀕𑀢𑀁, 𑀓𑀲𑁆𑀫𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦 𑀕𑀢𑀺 𑀦𑀺𑀫𑀺𑀢𑁆𑀢𑁂𑀦𑁂𑀯 𑀓𑀺𑀘𑁆𑀘 𑀲𑀺𑀤𑁆𑀥𑀺𑀢𑁄-𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀩𑁄𑀥𑀁. ‘‘𑀢𑀸𑀦𑀺𑀳𑀻’’𑀢𑀺𑀆𑀤𑀻𑀲𑀼. 𑀓𑁂𑀘𑀺 𑀯𑀤𑀦𑁆𑀢𑀺. 𑀅𑀦𑁂𑀚𑁄𑀲𑀦𑁆𑀢𑀺 𑀫𑀸𑀭𑀩𑁆𑀪. 𑀬𑀁 𑀓𑀸𑀮𑀫𑀓𑀭𑀻𑀫𑀼𑀦𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑀸𑀤𑀻𑀦𑀁 𑀧𑀭𑀺𑀦𑀺𑀩𑁆𑀩𑀸𑀦 𑀘𑀼𑀢𑀺 𑀘𑀺𑀢𑁆𑀢𑀁 𑀲𑀦𑁆𑀢𑀺 𑀮𑀓𑁆𑀔𑀡𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺. 𑀢𑀁 𑀲𑀩𑁆𑀩𑀣𑀸𑀧𑀺 𑀓𑀸𑀫𑀸𑀯𑀘𑀭𑀸 𑀮𑀫𑁆𑀩𑀡𑀸 𑀦𑁂𑀯𑀸𑀢𑀺 𑀇𑀫𑀺𑀦𑀸 𑀅𑀧𑀦𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀸 𑀦𑀺𑀳𑀺 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀺 𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼. ‘‘𑀢𑀸𑀦𑀻’’𑀢𑀺 𑀤𑁆𑀯𑀸𑀤𑀲𑀸 𑀓𑀼𑀲𑀮 𑀘𑀺𑀢𑁆𑀢𑀸𑀦𑀺 𑀅𑀝𑁆𑀞𑀜𑀸𑀡 𑀯𑀺𑀧𑁆𑀧𑀬𑀼𑀢𑁆𑀢 𑀓𑀼𑀲𑀮 𑀓𑁆𑀭𑀺𑀬 𑀚𑀯𑀦𑀸𑀦𑀺 𑀘. 𑀅𑀚𑁆𑀛𑀸𑀦 𑀮𑀸𑀪𑀺𑀦𑁄 𑀧𑀼𑀣𑀼𑀚𑁆𑀚𑀦𑀸 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺𑀧𑀺 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀢𑁆𑀢𑀺𑀬𑀸 𑀲𑀳 𑀓𑀸𑀫𑀸𑀯𑀘𑀭𑀸 𑀭𑀫𑁆𑀫𑀡𑀸𑀦𑀻’’𑀢𑀺. ‘‘𑀢𑀸𑀦𑁂 𑀯𑀸’’𑀢𑀺 𑀜𑀸𑀡 𑀲𑀫𑁆𑀧𑀬𑀼𑀢𑁆𑀢 𑀓𑀸𑀫 𑀓𑀼𑀲𑀮𑀸𑀦𑀺 𑀏𑀯. 𑀛𑀸𑀦𑀮𑀸𑀪𑀻𑀦𑀁 𑀢𑀸𑀦𑁂𑀯 𑀜𑀸𑀡 𑀲𑀫𑁆𑀧𑀬𑀼𑀢𑁆𑀢𑀓𑀸𑀫 𑀓𑀼𑀲𑀮𑀸𑀦𑀺. 𑀳𑁂𑀝𑁆𑀞𑀺𑀫 𑀨𑀮𑀝𑁆𑀞𑀸𑀦𑀁 𑀢𑀸𑀦𑁂𑀯 𑀅𑀢𑁆𑀢𑀦𑀸 𑀅𑀥𑀺𑀕𑀢 𑀫𑀕𑁆𑀕𑀨𑀮 𑀦𑀺𑀩𑁆𑀩𑀸𑀦𑀸 𑀭𑀫𑁆𑀫𑀡𑀸𑀦𑀺. ‘‘𑀛𑀸𑀦𑀸𑀦𑀺 𑀧𑀢𑁆𑀣𑁂𑀦𑁆𑀢𑀻’’𑀢𑀺 𑀆𑀬𑀢𑀺𑀁 𑀛𑀸𑀦𑀮𑀸𑀪𑀺𑀦𑁄 𑀪𑀯𑁂𑀬𑁆𑀬𑀸𑀫𑀸𑀢𑀺 𑀧𑀢𑁆𑀣𑀦𑀁 𑀓𑀭𑁄𑀦𑁆𑀢𑀺. ‘‘𑀢𑁂𑀲𑀁 𑀧𑀻’’𑀢𑀺 𑀢𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺. ‘‘𑀢𑁂’’𑀢𑀺 𑀢𑁂 𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑀸. ‘‘𑀅𑀦𑀼𑀪𑁄𑀦𑁆𑀢𑀻’’𑀢𑀺 𑀲𑀫𑁆𑀧𑀸𑀧𑀼𑀡𑀦𑁆𑀢𑀺. ‘‘𑀦𑀯𑀦𑀺𑀧𑀸𑀢𑁂’’𑀢𑀺 𑀅𑀗𑁆𑀕𑀼𑀢𑁆𑀢𑀭 𑀦𑀺𑀓𑀸𑀬𑁂 𑀦𑀯𑀦𑀺𑀧𑀸𑀢𑁂. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧𑁩𑁫. 𑀯𑀢𑁆𑀣𑀼𑀲𑀗𑁆𑀕𑀳𑁂. ‘‘𑀯𑀢𑁆𑀣𑀽’’𑀢𑀺 𑀦𑀺𑀲𑁆𑀲𑀬 𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀺. 𑀢𑀸𑀦𑀺 𑀦𑀺𑀲𑁆𑀲𑀬 𑀯𑀢𑁆𑀣𑀽𑀦𑀺 𑀬𑁂𑀲𑀁 𑀢𑀸𑀦𑀺 𑀢𑀩𑁆𑀩𑀢𑁆𑀣𑀼𑀓𑀸𑀦𑀺. ‘‘𑀢𑁂𑀲𑀜𑁆𑀘 𑀲𑀤𑁆𑀤𑁄 𑀦 𑀬𑀼𑀚𑁆𑀚𑀢𑀻’’𑀢𑀺 𑀢𑁂𑀲𑀁 𑀯𑀸𑀤𑁂 𑀘 𑀲𑀤𑁆𑀤𑁄 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀅𑀮𑀼𑀢𑁆𑀢 𑀘 𑀓𑀸𑀭𑀁 𑀤𑁆𑀯𑀦𑁆𑀤 𑀧𑀤𑀁 𑀦𑀸𑀫 𑀅𑀢𑁆𑀣𑀻𑀢𑀺. ‘‘𑀧𑀼𑀩𑁆𑀩𑀧𑀤𑁂𑀲𑀼 𑀆𑀦𑁂𑀢𑀩𑁆𑀩𑁄’’𑀢𑀺 𑀘𑀓𑁆𑀔𑀼 𑀯𑀢𑁆𑀣𑀼 𑀘 𑀲𑁄𑀢𑀯𑀢𑁆𑀣𑀼 𑀘𑀸𑀢𑀺𑀆𑀤𑀺𑀦𑀸 𑀆𑀦𑁂𑀢𑀩𑁆𑀩𑁄. 𑀲𑀫𑀸𑀲 𑀧𑀤𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀲𑀫𑀸𑀲 𑀧𑀤𑀢𑁄 𑀏𑀓 𑀤𑁂𑀲𑀁 𑀅𑀜𑁆𑀜𑀢𑁆𑀣 𑀆𑀦𑁂𑀢𑀼𑀁 𑀬𑀼𑀚𑁆𑀚𑀢𑀻𑀢𑀺. 𑀅𑀯𑀺𑀪𑀢𑁆𑀢𑀺𑀓 𑀦𑀺𑀤𑁆𑀤𑁂𑀲𑁄 𑀦𑀸𑀫 𑀘𑀓𑁆𑀔𑀼𑀁, 𑀲𑁄𑀢𑀁, 𑀖𑀸𑀦𑀁, 𑀚𑀺𑀯𑁆𑀳𑀸, 𑀓𑀸𑀬𑁄, 𑀳𑀤𑀬𑀁, 𑀯𑀢𑁆𑀣𑀼 𑀘𑀸𑀢𑀺 𑀯𑀢𑁆𑀢𑀩𑁆𑀩𑁂 𑀧𑀼𑀩𑁆𑀩𑀧𑀤𑁂𑀲𑀼 𑀅𑀯𑀺𑀪𑀢𑁆𑀢𑀺𑀓 𑀦𑀺𑀤𑁆𑀤𑁂𑀲𑁄. 𑀏𑀯𑀜𑁆𑀘𑀲𑀢𑀺 𑀯𑀢𑁆𑀣𑀼 𑀲𑀤𑁆𑀤𑁄 𑀘 𑀲𑀤𑁆𑀤𑁄 𑀘 𑀧𑀼𑀩𑁆𑀩𑀧𑀤𑁂𑀲𑀼 𑀆𑀦𑁂𑀢𑀼𑀁 𑀮𑀩𑁆𑀪𑀦𑁆𑀢𑀻𑀢𑀺. 𑀓𑀸𑀫𑀢𑀡𑁆𑀳𑀸𑀬 𑀅𑀥𑀻𑀦𑁂𑀦 𑀆𑀬𑀢𑁆𑀢𑁂𑀦 𑀓𑀸𑀫𑀸𑀯𑀘𑀭 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸 𑀓𑀸𑀫𑀢𑀡𑁆𑀳𑀸𑀥𑀻𑀦 𑀓𑀫𑁆𑀫 𑀦𑀺𑀩𑁆𑀩𑀢𑁆𑀢𑀸. ‘‘𑀭𑀽𑀧𑀸𑀤𑀻𑀦𑀁 𑀧𑀭𑀺𑀪𑁄𑀕𑁄’’𑀢𑀺 𑀭𑀽𑀧𑀸𑀤𑀻𑀦𑀁 𑀧𑀜𑁆𑀘𑀓𑀸𑀫𑀕𑀼𑀡𑀸𑀦𑀁 𑀧𑀭𑀺𑀪𑁄𑀕𑁄. ‘‘𑀧𑀭𑀺𑀢𑁆𑀢𑀓𑀫𑁆𑀫𑀁 𑀧𑀻’’𑀢𑀺 𑀲𑀩𑁆𑀩𑀁 𑀓𑀸𑀫𑀸𑀯𑀘𑀭 𑀓𑀫𑁆𑀫𑀫𑁆𑀧𑀺. ‘‘𑀧𑀽𑀭𑀬𑀫𑀸𑀦𑀁’’𑀢𑀺 𑀧𑀭𑀺𑀧𑀽𑀭𑁂𑀦𑁆𑀢𑀁. 𑀘𑀓𑁆𑀔𑀼 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀲𑁄𑀢𑀁 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀲𑀩𑁆𑀩𑁂𑀲𑀁 𑀤𑀲𑁆𑀲𑀦 𑀓𑀺𑀘𑁆𑀘𑀸𑀦𑀁 𑀫𑀚𑁆𑀛𑁂 𑀩𑀼𑀤𑁆𑀥 𑀤𑀲𑁆𑀲𑀦𑀸 𑀤𑀺𑀯𑀲𑁂𑀦 𑀅𑀦𑀼𑀢𑁆𑀢𑀭𑀁 𑀤𑀲𑁆𑀲𑀦𑀁 𑀚𑀦𑁂𑀢𑀻𑀢𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁. 𑀏𑀯𑀁 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑁂𑀧𑀺 𑀘𑀢𑀼𑀲𑀘𑁆𑀘 𑀥𑀫𑁆𑀫𑀲𑁆𑀲𑀯𑀦𑀸 𑀤𑀺𑀯𑀲𑁂𑀦𑀸𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀅𑀚𑁆𑀛𑀢𑁆𑀢 𑀩𑀳𑀺𑀤𑁆𑀥 𑀲𑀦𑁆𑀢𑀸 𑀦𑁂𑀲𑀼 𑀧𑀻’’𑀢𑀺 𑀅𑀚𑁆𑀛𑀢𑁆𑀢 𑀲𑀦𑁆𑀢𑀸𑀦𑁂𑀧𑀺 𑀩𑀳𑀺𑀤𑁆𑀥 𑀲𑀦𑁆𑀢𑀸𑀦𑁂𑀧𑀺. ‘‘𑀲𑀼𑀤𑁆𑀥𑁂’’𑀢𑀺 𑀓𑁂𑀦𑀘𑀺 𑀆𑀮𑁄𑀓𑁂𑀦 𑀘 𑀅𑀦𑁆𑀥𑀓𑀸𑀭𑁂𑀦 𑀘 𑀯𑀺𑀭𑀳𑀺𑀢𑁂. 𑀆𑀮𑁄𑀓𑁄 𑀳𑀺 𑀏𑀓𑁄 𑀭𑀽𑀧 𑀯𑀺𑀲𑁂𑀲𑁄. 𑀢𑀣𑀸 𑀅𑀦𑁆𑀥𑀓𑀸𑀭𑁄 𑀘. 𑀢𑁂 𑀘 𑀢𑀢𑁆𑀣 𑀦𑀢𑁆𑀣𑀺. ‘‘𑀇𑀫𑀲𑁆𑀫𑀺𑀁 𑀲𑀗𑁆𑀕𑀳𑁂’’𑀢𑀺 𑀯𑀢𑁆𑀣𑀼 𑀲𑀗𑁆𑀕𑀳𑁂. 𑀯𑀺𑀲𑀺𑀝𑁆𑀞𑀁 𑀚𑀸𑀦𑀦𑀁 𑀯𑀺𑀚𑀸𑀦𑀦𑀁. 𑀢𑀜𑁆𑀘 𑀯𑀺𑀚𑀸𑀦𑀦𑀁 𑀢𑀻𑀲𑀼 𑀫𑀦𑁄𑀥𑀸𑀢𑀽𑀲𑀼 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀚𑀸𑀦𑀦 𑀓𑀺𑀘𑁆𑀘𑀸𑀪𑀸𑀯𑀢𑁄’’𑀢𑀺. 𑀆𑀯𑀚𑁆𑀚𑀦 𑀓𑀺𑀘𑁆𑀘𑀁 𑀓𑀺𑀫𑁂𑀢𑀦𑁆𑀢𑀺, 𑀫𑀦𑀲𑀺𑀓𑀸𑀭 𑀫𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦 𑀓𑀺𑀘𑁆𑀘𑀜𑁆𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀬𑀣𑀸 𑀕𑀳𑀺𑀢𑀸𑀦𑁂𑀯 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀲𑀫𑁆𑀧𑀝𑀺𑀘𑁆𑀙𑀦 𑀫𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀺𑀲𑁂𑀲𑀚𑀸𑀦𑀦 𑀓𑀺𑀘𑁆𑀘𑀸𑀦𑀺 𑀦 𑀳𑁄𑀦𑁆𑀢𑀻’’𑀢𑀺. 𑀤𑀲𑁆𑀲𑀦𑀁, 𑀲𑀯𑀦𑀁, 𑀖𑀸𑀬𑀦𑀁, 𑀲𑀸𑀬𑀦𑀁, 𑀨𑀼𑀲𑀦, 𑀦𑁆𑀢𑀺 𑀇𑀫𑀸𑀦𑀺 𑀓𑀺𑀘𑁆𑀘𑀸𑀦𑀺 𑀣𑁄𑀓𑀁 𑀯𑀺𑀲𑁂𑀲 𑀚𑀸𑀦𑀦 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀸 𑀤𑀺𑀯𑀲𑁂𑀦𑀸’’𑀢𑀺𑀆𑀤𑀺𑀁. 𑀣𑁄𑀓𑀁 𑀯𑀺𑀲𑁂𑀲 𑀚𑀸𑀦𑀦 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀯𑀲𑁂𑀲𑀸 𑀧𑀦 𑀲𑀦𑁆𑀢𑀻𑀭𑀡𑀸𑀤𑀬𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑀼 𑀫𑀦𑀦𑀝𑁆𑀞𑁂𑀦 𑀫𑀦𑁄 𑀘 𑀢𑀁 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀢𑀺 𑀯𑀼𑀢𑁆𑀢𑁂𑀧𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀅𑀢𑀺𑀲𑁆𑀲𑀬 𑀯𑀺𑀲𑁂𑀲 𑀚𑀸𑀦𑀦 𑀥𑀸𑀢𑀼𑀬𑁄𑀢𑀺 𑀅𑀢𑁆𑀣𑁄’’𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑁄 𑀅𑀢𑁆𑀣𑁄 𑀲𑀤𑁆𑀤𑀬𑀼𑀢𑁆𑀢𑀺𑀬𑀸 𑀲𑀺𑀤𑁆𑀥𑁄 𑀦 𑀳𑁄𑀢𑀺. 𑀬𑀤𑀺𑀘𑁆𑀙𑀸 𑀯𑀲𑁂𑀦 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀺𑀬𑀸𑀬 𑀧𑀤𑀸𑀦𑀁’’𑀢𑀺𑀆𑀤𑀺. 𑀏𑀢𑁂𑀦 𑀲𑁄 𑀅𑀢𑁆𑀣𑁄 𑀲𑀤𑁆𑀤𑀬𑀼𑀢𑁆𑀢𑀺𑀬𑀸 𑀏𑀯 𑀲𑀺𑀤𑁆𑀥𑁄. 𑀦 𑀬𑀤𑀺𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀲𑁂𑀲𑀦 𑀲𑀫𑀸𑀲𑁂’’𑀢𑀺 𑀫𑀦𑁄 𑀘 𑀢𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀭𑀽𑀧𑁂 𑀓𑀫𑁆𑀫𑀥𑀸𑀭𑀬 𑀲𑀫𑀸𑀲𑁂. ‘‘𑀧𑀤𑀝𑁆𑀞𑀸𑀦𑀁’’𑀢𑀺 𑀏𑀢𑁆𑀣 𑀧𑀤𑀦𑁆𑀢𑀺 𑀘 𑀞𑀸𑀦𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣 𑀯𑀘𑀦𑀸𑀦𑀺, 𑀢𑀲𑁆𑀫𑀸 𑀧𑀭𑀺𑀬𑀸𑀬 𑀲𑀤𑁆𑀤𑀸 𑀦𑀸𑀫. 𑀧𑀤𑀜𑁆𑀘 𑀢𑀁 𑀞𑀸𑀦𑀜𑁆𑀘𑀸𑀢𑀺 𑀯𑀼𑀢𑁆𑀢𑁂 𑀅𑀢𑀺𑀲𑁆𑀲𑀬 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀤𑀼𑀓𑁆𑀔 𑀤𑀼𑀓𑁆𑀔𑀁, 𑀭𑀽𑀧 𑀭𑀽𑀧𑀁, 𑀭𑀸𑀚 𑀭𑀸𑀚𑀸, 𑀤𑁂𑀯𑀤𑁂𑀯𑁄𑀢𑀺𑀆𑀤𑀻𑀦𑀺. ‘‘𑀓𑀢𑁆𑀣𑀘𑀺 𑀤𑀺𑀲𑁆𑀲𑀢𑀺 𑀬𑀼𑀚𑁆𑀚𑀢𑀺 𑀘𑀸’’𑀢𑀺 𑀦 𑀳𑀺 𑀓𑀢𑁆𑀣𑀘𑀺 𑀤𑀺𑀲𑁆𑀲𑀢𑀺 𑀘. 𑀲𑀘𑁂𑀧𑀺 𑀓𑀢𑁆𑀣𑀘𑀺 𑀤𑀺𑀲𑁆𑀲𑁂𑀬𑁆𑀬, 𑀦 𑀳𑀺 𑀬𑀼𑀚𑁆𑀚𑀢𑀺 𑀘𑀸𑀢𑀺 𑀅𑀢𑁆𑀣𑁄. ‘‘𑀫𑀦𑀲𑁄 𑀯𑀺𑀜𑁆𑀜𑀸𑀡𑀁’’𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺 𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀘𑀼𑀢𑀺 𑀘𑀺𑀢𑁆𑀢𑀸 𑀅𑀦𑁆𑀢𑀭𑁂 𑀲𑀩𑁆𑀩𑀁 𑀘𑀺𑀢𑁆𑀢 𑀲𑀦𑁆𑀢𑀸𑀦𑀁 𑀲𑀢𑁆𑀢 𑀯𑀺𑀜𑁆𑀜𑀸𑀡 𑀥𑀸𑀢𑀽𑀦𑀁 𑀯𑀲𑁂𑀦 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀧𑀜𑁆𑀘𑀤𑁆𑀯𑀸𑀭𑀸 𑀯𑀚𑁆𑀚𑀦𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀦 𑀤𑁆𑀯𑀬𑀜𑁆𑀘 𑀫𑀦𑁄𑀥𑀸𑀢𑀼 𑀫𑀢𑁆𑀢𑀢𑁆𑀢𑀸 𑀫𑀦𑁄 𑀦𑀸𑀫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀯𑀺𑀜𑁆𑀜𑀸𑀡 𑀫𑀢𑁆𑀢𑀸𑀦𑀺 𑀦𑀸𑀫. 𑀅𑀯𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺 𑀫𑀦𑀲𑁆𑀲 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀢𑁆𑀣𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑀸𑀦𑀺 𑀦𑀸𑀫. 𑀢𑀢𑁆𑀣 ‘‘𑀫𑀦𑀲𑁆𑀲 𑀯𑀺𑀜𑁆𑀜𑀸𑀡𑀁’’𑀢𑀺 𑀅𑀦𑀦𑁆𑀢𑀭 𑀧𑀘𑁆𑀘𑀬 𑀪𑀽𑀢𑀲𑁆𑀲 𑀯𑀸 𑀫𑀦𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀪𑀽𑀢𑀁 𑀯𑀺𑀜𑁆𑀜𑀸𑀡𑀁. 𑀏𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦 𑀤𑁆𑀯𑀬𑀁 𑀧𑀘𑁆𑀘𑀬𑀫𑀦𑁄 𑀦𑀸𑀫. 𑀲𑀦𑁆𑀢𑀻𑀭𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁆𑀯𑀸𑀭𑀦𑁆𑀢𑀭𑁂 𑀧𑀜𑁆𑀘𑀤𑁆𑀯𑀸𑀭𑀸 𑀯𑀚𑁆𑀚𑀦𑀁 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀅𑀦𑁆𑀢𑀭𑁂 𑀲𑀩𑁆𑀩𑀁 𑀫𑀦𑁄𑀯𑀺𑀜𑁆𑀜𑀸𑀡 𑀲𑀦𑁆𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀯𑀺𑀜𑁆𑀜𑀸𑀡𑀁 𑀦𑀸𑀫. 𑀧𑀼𑀦 ‘‘𑀫𑀦𑀲𑁆𑀲 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀪𑀽𑀢𑀲𑁆𑀲 𑀫𑀦𑀲𑁆𑀲 𑀧𑀘𑁆𑀘𑀬 𑀪𑀽𑀢𑀁 𑀯𑀺𑀜𑁆𑀜𑀸𑀡𑀁. 𑀏𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀸 𑀯𑀚𑁆𑀚𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀫𑀦𑁄 𑀦𑀸𑀫. 𑀢𑀢𑁄 𑀧𑀼𑀭𑁂 𑀲𑀩𑁆𑀩𑀁 𑀫𑀦𑁄𑀯𑀺𑀜𑁆𑀜𑀸𑀡 𑀲𑀦𑁆𑀢𑀸𑀦𑀁 𑀧𑀘𑁆𑀘𑀬 𑀫𑀦𑁄 𑀦𑀸𑀫. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. 𑀅𑀯𑀲𑁂𑀲𑀸𑀧𑀦𑀸𑀢𑀺𑀆𑀤𑀻𑀲𑀼. ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀪𑀸𑀯𑀁 𑀲𑀫𑁆𑀪𑀸𑀯𑁂𑀢𑀻’’𑀢𑀺 𑀅𑀯𑀲𑁂𑀲𑀸 𑀧𑀦 𑀥𑀫𑁆𑀫𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀦𑀸𑀫 𑀳𑁄𑀦𑁆𑀢𑀺, 𑀳𑀤𑀬 𑀯𑀢𑁆𑀣𑀼𑀜𑁆𑀘 𑀦𑀺𑀲𑁆𑀲𑀸𑀬𑀬𑁂𑀯 𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀪𑀸𑀯𑀜𑁆𑀘 𑀲𑀫𑁆𑀪𑀸𑀯𑁂𑀢𑀺, 𑀯𑀡𑁆𑀡𑁂𑀢𑀺. 𑀲𑀼𑀝𑁆𑀞𑀼 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦𑀸𑀢𑀺𑀆𑀤𑀻𑀲𑀼. ‘‘𑀧𑀸𑀴𑀺𑀬𑀁’’𑀢𑀺 𑀇𑀦𑁆𑀤𑁆𑀭𑀺𑀬 𑀲𑀁𑀬𑀼𑀢𑁆𑀢 𑀧𑀸𑀴𑀺𑀬𑀁. 𑀤𑀼𑀢𑀻𑀬𑀚𑁆𑀛𑀸𑀦𑁂 𑀏𑀯 𑀅𑀧𑀭𑀺𑀲𑁂𑀲 𑀦𑀺𑀭𑁄𑀥 𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀲𑀺𑀬𑀸. 𑀓𑀣𑀁, 𑀲𑀘𑁂 𑀧𑀝𑀺𑀖𑁄 𑀅𑀦𑀻𑀯𑀭𑀡𑀸 𑀯𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀧𑀣𑀫𑀚𑁆𑀛𑀸𑀦𑀢𑁄 𑀧𑀼𑀩𑁆𑀩𑁂 𑀏𑀯 𑀲𑁄 𑀦𑀺𑀭𑀼𑀤𑁆𑀥𑁄 𑀲𑀺𑀬𑀸. 𑀅𑀣 𑀤𑀼𑀢𑀻𑀬𑀚𑁆𑀛𑀸𑀦𑀼𑀧𑀘𑀸𑀭𑁂𑀧𑀺 𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀣𑀫𑀚𑁆𑀛𑀸𑀦𑀫𑁆𑀧𑀺 𑀧𑀭𑀺𑀳𑀻𑀦𑀁 𑀲𑀺𑀬𑀸. 𑀢𑀲𑁆𑀫𑀺𑀁 𑀧𑀭𑀺𑀳𑀻𑀦𑁂 𑀲𑀢𑀺, 𑀤𑀼𑀢𑀻𑀬𑀚𑁆𑀛𑀸𑀦𑀫𑁆𑀧𑀺 𑀦𑀼𑀧𑁆𑀧𑀚𑁆𑀚𑁂𑀬𑁆𑀬. 𑀏𑀯𑀁 𑀯𑀺𑀭𑀼𑀤𑁆𑀥𑀁 𑀲𑀺𑀬𑀸. ‘‘𑀧𑀼𑀭𑀺𑀫 𑀓𑀸𑀭𑀡𑀫𑁂𑀯𑀸’’𑀢𑀺 𑀅𑀦𑀻𑀯𑀭𑀡𑀸 𑀯𑀢𑁆𑀣𑀲𑁆𑀲 𑀧𑀝𑀺𑀖𑀲𑁆𑀲 𑀅𑀪𑀸𑀯𑀢𑁄𑀢𑀺 𑀓𑀸𑀭𑀡𑀁 𑀏𑀯. 𑀧𑀭𑀢𑁄𑀖𑁄𑀲𑁄 𑀦𑀸𑀫 𑀲𑀸𑀯𑀓𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑁆𑀧𑀝𑀺𑀮𑀸𑀪𑀸𑀬 𑀧𑀥𑀸𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁄 𑀘 𑀅𑀭𑀽𑀧𑀪𑀯𑁂 𑀦𑀢𑁆𑀣𑀺. 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦𑀸𑀫 𑀘𑀢𑀼𑀲𑀘𑁆𑀘 𑀥𑀫𑁆𑀫𑀧𑁆𑀧𑀝𑀺𑀯𑁂𑀥𑁄, 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓 𑀲𑀫𑁆𑀩𑀼𑀤𑁆𑀥𑀸 𑀘 𑀲𑀬𑀫𑁆𑀪𑀼𑀦𑁄 𑀧𑀭𑀢𑁄 𑀖𑁄𑀲𑁂𑀦 𑀯𑀺𑀦𑀸 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀢𑁂 𑀘 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. ‘‘𑀭𑀽𑀧𑀯𑀺𑀭𑀸𑀕 𑀪𑀸𑀯𑀦𑀸𑀬𑀸’’𑀢𑀺 𑀭𑀽𑀧𑀯𑀺𑀭𑀸𑀕 𑀪𑀸𑀯𑀦𑀸 𑀩𑀮𑁂𑀦. 𑀢𑁂𑀲𑀁 𑀭𑀽𑀧𑀸𑀯𑀘𑀭 𑀘𑀺𑀢𑁆𑀢𑀸𑀦𑀁. ‘‘𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸’’𑀢𑀺 𑀢𑁂𑀲𑀼 𑀦𑀺𑀓𑀦𑁆𑀢𑀺𑀧𑁆𑀧𑀳𑀸𑀦𑀯𑀲𑁂𑀦 𑀲𑀼𑀝𑁆𑀞𑀼 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸𑀦𑀺𑀝𑁆𑀞𑀺𑀢𑀸.