𑁨. 𑀘𑁂𑀢𑀲𑀺𑀓𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁬𑁮. 𑀏𑀯𑀁 𑀘𑀺𑀢𑁆𑀢 𑀲𑀗𑁆𑀕𑀳𑀲𑁆𑀲 𑀤𑀻𑀧𑀦𑀺𑀁 𑀓𑀢𑁆𑀯𑀸 𑀘𑁂𑀢𑀲𑀺𑀓 𑀲𑀗𑁆𑀕𑀳𑀲𑁆𑀲 𑀤𑀻𑀧𑀦𑀺𑀁 𑀓𑀭𑁄𑀦𑁆𑀢𑁄 𑀧𑀣𑀫𑀁 𑀧𑀼𑀩𑁆𑀩𑀸𑀧𑀭𑀸𑀦𑀼 𑀲𑀦𑁆𑀥𑀺𑀜𑁆𑀘 𑀆𑀤𑀺𑀕𑀸𑀣𑀸𑀬 𑀧𑀬𑁄𑀚𑀦 𑀲𑀫𑁆𑀩𑀦𑁆𑀥𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁’’𑀢𑀺𑀆𑀤𑀺 𑀫𑀸𑀭𑀤𑁆𑀥𑁄. 𑀢𑀢𑁆𑀣 ‘‘𑀅𑀦𑀼𑀧𑀢𑁆𑀢’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀫𑀺𑀢𑀺𑀲𑀩𑁆𑀩𑀣𑀸𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀢𑁂𑀦 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀧𑀢𑁆𑀢𑀁. 𑀳𑁂𑀢𑀼 𑀯𑀺𑀲𑁂𑀲𑀦𑀜𑁆𑀘𑁂𑀢𑀁. 𑀬𑀲𑁆𑀫𑀸 𑀘𑀺𑀢𑁆𑀢𑀲𑀗𑁆𑀕𑀳𑀸𑀦𑀦𑁆𑀢𑀭𑀁 𑀘𑁂𑀢𑀲𑀺𑀓 𑀲𑀗𑁆𑀕𑀳𑁄 𑀅𑀦𑀼𑀧𑀢𑁆𑀢𑁄, 𑀢𑀲𑁆𑀫𑀸 𑀇𑀤𑀸𑀦𑀺 𑀢𑀁 𑀲𑀗𑁆𑀕𑀳𑀁 𑀓𑀭𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀘𑀢𑁆𑀢𑀸𑀭𑀺 𑀲𑀫𑁆𑀧𑀬𑁄𑀕 𑀮𑀓𑁆𑀔𑀡𑀸𑀦𑀺 ‘𑀏𑀓𑀼𑀧𑁆𑀧𑀸𑀤𑀢𑀸, 𑀏𑀓 𑀦𑀺𑀭𑁄𑀥𑀢𑀸, 𑀏𑀓𑀸 𑀭𑀫𑁆𑀫𑀡𑀢𑀸, 𑀏𑀓 𑀯𑀢𑁆𑀣𑀼𑀓𑀢𑀸,𑀢𑀺. ‘‘𑀘𑁂𑀢𑀲𑀺 𑀬𑀼𑀢𑁆𑀢𑀸’’𑀢𑀺 𑀘𑀺𑀢𑁆𑀢𑀲𑁆𑀫𑀺𑀁 𑀦𑀺𑀬𑀼𑀢𑁆𑀢𑀸. 𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. ‘‘𑀘𑁂𑀢𑀲𑀸 𑀯𑀸𑀬𑀼𑀢𑁆𑀢𑀸’’𑀢𑀺 𑀘𑀺𑀢𑁆𑀢𑁂𑀦 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸. 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀻𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄. ‘‘𑀲𑀭𑀽𑀧𑀤𑀲𑁆𑀲𑀦’’𑀦𑁆𑀢𑀺 𑀲𑀗𑁆𑀔𑁆𑀬𑀸𑀲𑀭𑀽𑀧𑀤𑀲𑁆𑀲𑀦𑀁. 𑀲𑀺𑀤𑁆𑀥𑀧𑀤𑀁 𑀦𑀸𑀫 𑀧𑀓𑀢𑀺 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀦𑁆𑀦 𑀧𑀤𑀁. ‘‘𑀧𑀼𑀩𑁆𑀩𑀦𑁆𑀢𑀢𑁄’’𑀢𑀺 𑀏𑀓𑀲𑁆𑀲𑀲𑀗𑁆𑀔𑀢 𑀥𑀫𑁆𑀫𑀲𑁆𑀲 𑀧𑀣𑀫 𑀪𑀸𑀕𑀢𑁄. 𑀉𑀤𑁆𑀥𑀁 𑀧𑀚𑁆𑀚𑀦𑀁 𑀦𑀸𑀫 𑀓𑀢𑀫𑀦𑁆𑀢𑀺 𑀆𑀳 ‘‘𑀲𑀭𑀽𑀧𑀢𑁄 𑀧𑀸𑀢𑀼𑀪𑀯𑀦’’𑀦𑁆𑀢𑀺. 𑀥𑀸𑀢𑀼 𑀧𑀸𑀞𑁂𑀲𑀼-𑀚𑀦𑀺𑀧𑀸𑀢𑀼𑀪𑀸𑀯𑁂-𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀚𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. ‘‘𑀲𑀭𑀽𑀧 𑀯𑀺𑀦𑀸𑀲𑁄’’𑀢𑀺 𑀲𑀭𑀽𑀧𑀢𑁄 𑀧𑀸𑀢𑀼𑀪𑀯𑀦𑁆𑀢𑀲𑁆𑀲 𑀪𑀸𑀯𑀲𑁆𑀲 𑀯𑀺𑀦𑀸𑀲𑁄 𑀅𑀦𑁆𑀢𑀭𑀥𑀸𑀦𑀁. ‘‘𑀏𑀯𑀁 𑀧𑀭𑀢𑁆𑀣 𑀧𑀻’’𑀢𑀺 𑀧𑀭𑀲𑁆𑀫𑀺𑀁 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸𑀤𑀺𑀧𑀤𑁂𑀧𑀺. ‘‘𑀏𑀓 𑀘𑀺𑀢𑁆𑀢𑀲𑁆𑀲𑀧𑀺 𑀩𑀳𑀼𑀤𑁂𑀯𑀸’’𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀧𑀲𑁆𑀲𑀦𑁆𑀢𑀁 𑀏𑀓𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺 𑀦𑀢𑁆𑀣𑀺. 𑀅𑀦𑁂𑀓𑀸𑀦𑀺 𑀏𑀯𑀭𑀽𑀧𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀧𑀲𑁆𑀲𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀸𑀴𑀺𑀬𑀁. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀁. 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀤𑁆𑀯𑀸𑀭𑁂𑀲𑀼 𑀏𑀓𑀯𑀘𑀦𑀁 𑀯𑀢𑁆𑀯𑀸 𑀆𑀭𑀫𑁆𑀫𑀡𑁂𑀲𑀼 𑀩𑀳𑀼𑀯𑀘𑀦𑀁 𑀓𑀢𑀦𑁆𑀢𑀺. ‘‘𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸’’𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑁂 𑀩𑀳𑀽𑀦𑀺𑀧𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀢𑀸 𑀲𑀫𑀜𑁆𑀜𑁂𑀦 𑀏𑀓𑀻𑀪𑀸𑀯𑀁 𑀓𑀢𑁆𑀯𑀸 𑀏𑀓𑀁 𑀆𑀭𑀫𑁆𑀫𑀡𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀦 𑀲𑀼𑀦𑁆𑀤𑀭𑀁. 𑀓𑀲𑁆𑀫𑀸. 𑀅𑀢𑁆𑀣 𑀯𑀺𑀲𑁂𑀲𑀲𑁆𑀲 𑀅𑀯𑀺𑀜𑁆𑀜𑀸𑀧𑀦𑀢𑁄. 𑀓𑁄𑀧𑀦𑀸𑀬𑀁 𑀅𑀢𑁆𑀣 𑀯𑀺𑀲𑁂𑀲𑁄𑀢𑀺. 𑀬𑀸𑀘𑀺𑀢𑁆𑀢𑀲𑁆𑀲 𑀚𑀸𑀢𑀺, 𑀲𑀸𑀬𑁂𑀯 𑀨𑀲𑁆𑀲𑀸𑀤𑀻𑀦𑀦𑁆𑀢𑀺𑀆𑀤𑀺𑀓𑁄 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀣 𑀔𑁄’’𑀢𑀺𑀆𑀤𑀺𑀁. 𑀅𑀥𑀺𑀧𑁆𑀧𑁂𑀢𑀸 𑀏𑀓𑀼𑀧𑁆𑀧𑀸𑀤𑀢𑀸. 𑀏𑀲 𑀦𑀬𑁄 𑀏𑀓 𑀦𑀺𑀭𑁄𑀥𑀢𑀸𑀤𑀻𑀲𑀼. ‘‘𑀫𑀽𑀮𑀝𑀻𑀓𑀸𑀬’’𑀦𑁆𑀢𑀺 𑀭𑀽𑀧𑀓𑀡𑁆𑀟𑀫𑀽𑀮𑀝𑀻𑀓𑀸𑀬𑀁. ‘‘𑀲𑀳𑁂𑀯𑀸’’𑀢𑀺 𑀏𑀓𑀢𑁄 𑀏𑀯. ‘‘𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀯𑀢𑁆𑀢𑀺𑀢𑁄’’𑀢𑀺 𑀉𑀧𑁆𑀧𑀸𑀤𑀲𑁆𑀲 𑀘 𑀚𑀻𑀭𑀡𑀲𑁆𑀲 𑀘 𑀦𑀺𑀭𑁄𑀥𑀲𑁆𑀲 𑀘 𑀧𑀯𑀢𑁆𑀢𑀺𑀢𑁄. ‘‘𑀉𑀧𑁆𑀧𑀸𑀤𑀸𑀤𑀬𑁄’’𑀢𑀺 𑀉𑀧𑁆𑀧𑀸𑀤 𑀚𑀻𑀭𑀡 𑀦𑀺𑀭𑁄𑀥𑀸. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀘𑁂𑀢𑀲𑀺𑀓𑀸𑀫𑀢𑀸’’𑀢𑀺 𑀘𑁂𑀢𑀲𑀺𑀓𑀸 𑀇𑀢𑀺 𑀯𑀺𑀜𑁆𑀜𑀸𑀢𑀸. ‘‘𑀪𑀸𑀯𑀧𑁆𑀧𑀥𑀸𑀦𑀁’’𑀢𑀺 𑀏𑀓𑀼𑀧𑁆𑀧𑀸𑀤 𑀪𑀸𑀯𑁄 𑀏𑀓𑀼𑀧𑁆𑀧𑀸𑀤𑁄𑀢𑀺 𑀯𑀼𑀢𑁆𑀢𑁄. 𑀢𑀣𑀸 𑀏𑀓 𑀦𑀺𑀭𑁄𑀥𑀸𑀤𑀻𑀲𑀼. 𑀬𑀣𑀸 𑀇𑀤𑀁𑀧𑀺 𑀲𑀗𑁆𑀖𑁂𑀭𑀢𑀦𑀁 𑀧𑀡𑀻𑀢-𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀭𑀢𑀦 𑀪𑀸𑀯𑁄 𑀧𑀡𑀻𑀢𑁄𑀢𑀺 𑀳𑁂𑀢𑁆𑀣 𑀅𑀢𑁆𑀣𑁄. ‘‘𑀬𑁂’’𑀢𑀺 𑀬𑁂 𑀥𑀫𑁆𑀫𑀸. ‘‘𑀲𑀳𑀚𑀸𑀢 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀭𑀽𑀧𑀸𑀦𑀺 𑀧𑀻’’𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀢𑁄 𑀉𑀧𑁆𑀧𑀦𑁆𑀦𑀸𑀦𑀺 𑀭𑀽𑀧𑀸𑀦𑀺𑀧𑀺. 𑀘𑁂𑀢𑀲𑀺𑀓𑀸𑀦𑀺 𑀦𑀸𑀫 𑀲𑀺𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀤𑀸 𑀬𑀢𑁆𑀢 𑀯𑀼𑀢𑁆𑀢𑀺𑀢𑀸𑀬𑀸’’𑀢𑀺 𑀘𑀺𑀢𑁆𑀢𑀸𑀬𑀢𑁆𑀢𑀯𑀼𑀢𑁆𑀢𑀺𑀬𑀸𑀬. ‘‘𑀘𑁂𑀢𑁄𑀬𑀼𑀢𑁆𑀢𑀸𑀦𑀻’’𑀢𑀺 𑀳𑁂𑀢𑀼 𑀯𑀺𑀲𑁂𑀲𑀦𑀁. 𑀢𑀤𑁂𑀯 𑀳𑁂𑀢𑀼𑀫𑀦𑁆𑀢 𑀯𑀺𑀲𑁂𑀲𑀦𑀦𑁆𑀢𑀺 𑀘 𑀳𑁂𑀢𑀼 𑀅𑀦𑁆𑀢𑁄 𑀦𑀻𑀢𑀯𑀺𑀲𑁂𑀲𑀦𑀦𑁆𑀢𑀺 𑀘 𑀳𑁂𑀢𑀼 𑀅𑀦𑁆𑀢𑁄 𑀕𑀥𑀯𑀺𑀲𑁂𑀲𑀦𑀦𑁆𑀢𑀺 𑀘 𑀯𑀤𑀦𑁆𑀢𑀺. ‘‘𑀢𑁂𑀲’’𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀭𑀽𑀧𑀸𑀦𑀁. ‘‘𑀦𑀸𑀦𑀼𑀪𑁄𑀦𑁆𑀢𑀻’’𑀢𑀺 𑀦𑀧𑀸𑀧𑀼𑀡𑀦𑁆𑀢𑀺. ‘‘𑀦 𑀳𑀺 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁’’𑀢𑀺 𑀏𑀢𑁂𑀦 𑀪𑀽𑀢𑀓𑀣𑀦 𑀯𑀺𑀲𑁂𑀲𑀦𑀸𑀦𑀺 𑀏𑀢𑀸𑀦𑀻𑀢𑀺 𑀤𑀻𑀧𑁂𑀢𑀺. 𑀪𑀽𑀢𑀓𑀣𑀦𑀁𑀧𑀺 𑀲𑀫𑀸𑀦𑀁 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦 𑀩𑁆𑀬𑀯𑀘𑁆𑀙𑁂𑀤𑀓𑀁𑀧𑀺 𑀲𑀫𑁆𑀪𑀯𑀢𑀺. ‘‘𑀯𑀬𑁄𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀺𑀦𑀸𑀲𑁄 𑀧𑀓𑀸𑀲𑀢𑀺. ‘‘𑀞𑀺𑀢𑀸𑀬𑀸’’𑀢𑀺 𑀢𑀺𑀝𑁆𑀞 𑀫𑀸𑀦𑀸𑀬 𑀯𑁂𑀤𑀦𑀸𑀬. 𑀅𑀜𑁆𑀜𑁄 𑀧𑀓𑀸𑀭𑁄 𑀅𑀜𑁆𑀜𑀣𑀸. 𑀅𑀜𑁆𑀜𑀣𑀸 𑀪𑀸𑀯𑁄 𑀅𑀜𑁆𑀜𑀣𑀢𑁆𑀢𑀁. 𑀚𑀭𑀸𑀯𑀲𑁂𑀦 𑀧𑀭𑀺𑀡𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑁆𑀧𑀸𑀤𑁄, 𑀬𑀸 𑀞𑀺𑀢𑀺, 𑀬𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀬𑁄 𑀧𑀸𑀢𑀼𑀪𑀸𑀯𑁄. 𑀏𑀲𑁄 𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀸𑀤𑁄, 𑀏𑀲𑀸 𑀭𑁄𑀕𑀸𑀦𑀁 𑀞𑀺𑀢𑀺, 𑀏𑀲𑁄 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄𑀢𑀺 𑀬𑁄𑀚𑀦𑀸. ‘‘𑀇𑀢𑀭𑀣𑀸’’𑀢𑀺 𑀇𑀢𑁄 𑀅𑀜𑁆𑀜𑀣𑀸 𑀕𑀳𑀺𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀭𑀽𑀧𑀸𑀭𑀽𑀧𑀓𑀮𑀸𑀧𑁂 𑀦𑀸𑀦𑀸 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀩𑀳𑀽𑀲𑀼 𑀉𑀧𑁆𑀧𑀸𑀤𑁂𑀲𑀼 𑀘 𑀦𑀺𑀭𑁄𑀥𑁂𑀲𑀼 𑀘 𑀕𑀳𑀺𑀢𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀺𑀓𑀸𑀭𑀭𑀽𑀧𑀸𑀦𑀁’’𑀢𑀺 𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬 𑀮𑀳𑀼𑀢𑀸𑀤𑀺𑀢𑁆𑀢𑀬𑀸𑀦𑀁. 𑀲𑀩𑁆𑀩𑀸𑀦𑀺𑀧𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀢𑁆𑀢𑀸 𑀫𑀳𑀸𑀪𑀽𑀢 𑀕𑀡𑀦𑀸𑀬 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀲𑀺𑀬𑀼𑀁𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀯𑀸’’𑀢𑀺𑀆𑀤𑀺𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀘𑀓𑁆𑀔𑀸𑀤𑀻𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀓𑀮𑀸𑀧𑁂 𑀩𑀳𑀼𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀩𑀳𑀼𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦’’𑀦𑁆𑀢𑀺𑀆𑀤𑀺𑀁.

𑀬𑀤𑀺 𑀏𑀯𑀁, 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀮𑀳𑀼𑀢𑀸𑀤𑀻𑀦𑀺𑀧𑀺 𑀏𑀓𑁂𑀓𑀸𑀦𑀺 𑀏𑀯 𑀲𑀺𑀬𑀼𑀁, 𑀅𑀣 𑀓𑀺𑀫𑀢𑁆𑀣𑀁 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢 𑀮𑀳𑀼𑀢𑀸𑀤𑀬𑁄𑀧𑀦𑀸’’𑀢𑀺𑀆𑀤𑀺𑀁. ‘‘𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀈𑀤𑀺𑀲𑀁 𑀯𑀺𑀦𑀺𑀘𑁆𑀙𑀬𑀢𑁆𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄’’𑀢𑀺 𑀏𑀢𑁂𑀦 𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀳𑀦𑀺𑀭𑀼𑀚𑁆𑀛𑀦𑀯𑀲𑁂𑀦 𑀘𑀺𑀢𑁆𑀢𑀁 𑀅𑀦𑀼𑀧𑀭𑀺𑀯𑀢𑁆𑀢𑀺𑀲𑁆𑀲. ‘‘𑀧𑀲𑀗𑁆𑀕𑀸’’𑀢𑀺 𑀘𑁂𑀢𑀲𑀺𑀓𑀢𑀸 𑀧𑀲𑀗𑁆𑀕𑁄. ‘‘𑀧𑀼𑀭𑁂𑀢𑀭𑀫𑀼𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀧𑀼𑀭𑁂𑀢𑀭𑀁 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀘𑀺𑀢𑁆𑀢𑀲𑁆𑀲𑀪𑀗𑁆𑀕𑀓𑁆𑀔𑀡𑁂’’𑀢𑀺 𑀅𑀜𑁆𑀜𑀲𑁆𑀲 𑀲𑀢𑁆𑀢𑀭 𑀲𑀫 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂. 𑀢𑀣𑀸 𑀭𑀽𑀧𑀥𑀫𑁆𑀫𑀸𑀦𑀁 𑀧𑀲𑀗𑁆𑀕𑁄 𑀦 𑀲𑀓𑁆𑀓𑀸 𑀦𑀻𑀯𑀸𑀭𑁂𑀢𑀼𑀁 𑀢𑀺𑀬𑁄𑀚𑀦𑀸. ‘‘𑀧𑀲𑀗𑁆𑀕𑁄’’𑀢𑀺 𑀘𑁂𑀢𑀲𑀺𑀓𑀢𑀸 𑀧𑀲𑀗𑁆𑀕𑁄. ‘‘𑀅𑀮𑀫𑀢𑀺 𑀧𑀧𑀜𑁆𑀘𑁂𑀦𑀸’’𑀢𑀺 𑀅𑀪𑀺𑀥𑀫𑁆𑀫𑁂 𑀯𑁂𑀤𑀦𑀸𑀢𑁆𑀢𑀺𑀓𑁂𑀝𑀻𑀓𑀸𑀲𑀼 𑀯𑀺𑀬 𑀅𑀢𑀺 𑀯𑀺𑀢𑁆𑀣𑀸𑀭𑁂𑀦 𑀦𑀺𑀭𑀢𑁆𑀣𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀦𑀺𑀭𑀢𑁆𑀣𑀓𑀁’’𑀢𑀺 𑀯𑀺𑀪𑀸𑀯𑀦𑀺𑀬𑀁 𑀧𑀧𑀜𑁆𑀘𑁄 𑀦𑀺𑀭𑀢𑁆𑀣𑀓𑁄 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁯. 𑀨𑀲𑁆𑀲𑀯𑀘𑀦𑀢𑁆𑀣𑁂. ‘‘𑀨𑀼𑀲𑀢𑀻’’𑀢𑀺 𑀆𑀭𑀫𑁆𑀫𑀡𑀁 𑀆𑀳𑀦𑀢𑀺, 𑀲𑀗𑁆𑀖𑀝𑁆𑀝𑁂𑀢𑀺. 𑀢𑀜𑁆𑀘 𑀲𑀗𑁆𑀖𑀝𑁆𑀝 𑀦𑀁 𑀦𑀤𑁄𑀲𑀧𑀝𑀺𑀖𑀲𑁆𑀲 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀯𑀺𑀩𑀸𑀥𑀦𑀁 𑀳𑁄𑀢𑀺, 𑀅𑀣 𑀔𑁄 𑀪𑀫𑀭𑀲𑁆𑀲 𑀧𑀤𑀼𑀫 𑀧𑀼𑀧𑁆𑀨𑁂𑀲𑀼 𑀧𑀼𑀧𑁆𑀨𑀭 𑀲𑀕𑁆𑀕𑀳𑀡𑀁 𑀯𑀺𑀬 𑀯𑀺𑀚𑀸𑀦𑀦 𑀫𑀢𑁆𑀢𑁂 𑀅𑀞𑀢𑁆𑀯𑀸 𑀆𑀭𑀫𑁆𑀫𑀡 𑀭𑀲𑀧𑀸𑀢𑀼𑀪𑀸𑀯𑀢𑁆𑀣𑀁 𑀬𑀣𑀸𑀭𑀫𑁆𑀫𑀡𑀁 𑀲𑀁𑀳𑀦𑀦 𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀨𑀼𑀲𑀦𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. ‘‘𑀆𑀳𑀘𑁆𑀘𑀸’’𑀢𑀺 𑀆𑀳𑀦𑀺𑀢𑁆𑀯𑀸 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸. ‘‘𑀉𑀧𑀳𑀘𑁆𑀘𑀸’’𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀬𑀫𑀢𑁆𑀣𑁄 𑀓𑀣𑀁 𑀧𑀸𑀓𑀝𑁄𑀢𑀺 𑀆𑀳 ‘‘𑀬𑀢𑁄’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀬𑀢𑁄’’𑀢𑀺 𑀬𑀁 𑀓𑀸𑀭𑀡𑀸. ‘‘𑀢𑀤𑀦𑀼𑀪𑀯𑀦𑁆𑀢𑀻’’𑀢𑀺 𑀢𑀁 𑀆𑀭𑀫𑁆𑀫𑀡 𑀭𑀲𑀁 𑀅𑀦𑀼𑀪𑀯𑀦𑁆𑀢𑀻, 𑀯𑁂𑀤𑀦𑀸 𑀧𑀸𑀢𑀼𑀪𑀯𑀢𑀺, 𑀯𑁂𑀤𑀦𑀸 𑀧𑀸𑀢𑀼𑀪𑀸𑀯𑀁 𑀤𑀺𑀲𑁆𑀯𑀸 𑀆𑀭𑀫𑁆𑀫𑀡𑀧𑁆𑀨𑀼𑀲𑀦𑀁 𑀜𑀸𑀡𑁂 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁆𑀯𑀸𑀬𑀁 𑀨𑀼𑀲𑀦 𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀧𑀸𑀢𑀸 𑀕𑀢𑀯𑀺𑀲𑀬 𑀧𑀤𑀝𑁆𑀞𑀸𑀦𑁄. 𑀢𑀢𑁆𑀣 𑀲𑀦𑁆𑀦𑀺𑀧𑀸𑀢𑁄 𑀦𑀸𑀫 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀤𑁆𑀯𑀸𑀭𑀸 𑀭𑀫𑁆𑀫𑀡 𑀯𑀺𑀜𑁆𑀜𑀸𑀡𑀸𑀦𑀁 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀲𑀫𑁄𑀥𑀸𑀦𑀁. 𑀢𑀣𑀸𑀳𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄 𑀢𑀺𑀆𑀤𑀺. ‘‘𑀲𑀗𑁆𑀖𑀝𑁆𑀝𑀦𑀭𑀲𑁄’’𑀢𑀺 𑀆𑀭𑀫𑁆𑀫𑀡𑁂 𑀲𑀫𑁆𑀫𑀤𑁂𑀯 𑀖𑀝𑁆𑀝𑀦 𑀓𑀺𑀘𑁆𑀘𑁄. 𑀲𑀗𑁆𑀖𑀝𑁆𑀝𑀦 𑀓𑀺𑀘𑁆𑀘𑀢𑁆𑀢𑀸 𑀏𑀯 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑁄 𑀳𑀼𑀢𑁆𑀯𑀸 𑀥𑀫𑁆𑀫 𑀘𑀺𑀦𑁆𑀢𑀸𑀜𑀸𑀡𑀲𑁆𑀲 𑀧𑀝𑀺𑀫𑀼𑀔𑀁 𑀉𑀧𑀝𑁆𑀞𑀸𑀢𑀺 𑀧𑀓𑀸𑀲𑀢𑀻𑀢𑀺. ‘‘𑀲𑀦𑁆𑀦𑀺𑀧𑀸𑀢 𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’. 𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 𑀯𑀸 𑀧𑀜𑁆𑀜𑀸𑀡𑀁 𑀯𑀼𑀘𑁆𑀘𑀢𑀺 𑀥𑀚𑁄𑀭𑀣𑀲𑁆𑀲 𑀧𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀯𑀺𑀬. 𑀲𑀦𑁆𑀦𑀺𑀧𑀸𑀢𑀸𑀓𑀸𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀬𑀲𑁆𑀲𑀸𑀢𑀺 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑁂𑀤𑀦𑀸𑀧𑀘𑁆𑀘𑀼 𑀧𑀝𑁆𑀞𑀸𑀦𑁄 𑀯𑀸. 𑀥𑀽𑀫𑁄𑀯𑀺𑀬 𑀅𑀕𑁆𑀕𑀺𑀲𑁆𑀲. 𑀯𑁂𑀤𑀦𑀸𑀨𑀮𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑁄 𑀧𑀣𑀫𑀁 𑀯𑀼𑀢𑁆𑀢𑁄 𑀢𑀺𑀧𑀼𑀘𑁆𑀙𑀺𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸 𑀯𑀸𑀤𑁄𑀢𑀸𑀯 𑀤𑀲𑁆𑀲𑀺𑀢𑁄. 𑀘𑀺𑀢𑁆𑀢𑀲𑁆𑀲 𑀧𑀣𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸. 𑀆𑀭𑀫𑁆𑀫𑀡𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀲𑁆𑀲 𑀧𑀣𑀫𑀸𑀪𑀺𑀦𑀺𑀧𑀸𑀢𑁄 𑀳𑀼𑀢𑁆𑀯𑀸 𑀨𑀲𑁆𑀲𑁄 𑀆𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀧𑀣𑀫𑀁 𑀯𑀼𑀢𑁆𑀢𑁄. 𑀨𑀲𑁆𑀲𑁂𑀦 𑀨𑀼𑀲𑁆𑀲𑀺𑀢𑁆𑀯𑀸 𑀯𑁂𑀤𑀦𑀸𑀬 𑀯𑁂𑀤𑀬𑀢𑀺. 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀸𑀢𑀺. 𑀘𑁂𑀢𑀦𑀸𑀬 𑀘𑁂𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀨𑀼𑀝𑁆𑀞𑁄 𑀪𑀺𑀓𑁆𑀔𑀯𑁂 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻𑀢𑀺. 𑀅𑀧𑀺 𑀘 𑀅𑀬𑀁 𑀨𑀲𑁆𑀲𑁄 𑀦𑀸𑀫 𑀬𑀣𑀸𑀧𑀸𑀲𑀸𑀤𑀁 𑀧𑀢𑁆𑀯𑀸 𑀣𑀫𑁆𑀪𑁄 𑀦𑀸𑀫 𑀲𑁂𑀲𑀤𑀩𑁆𑀩 𑀲𑀫𑁆𑀪𑀸𑀭𑀸𑀦𑀁 𑀩𑀮𑀯𑀧𑀘𑁆𑀘𑀬𑁄. 𑀏𑀯𑀫𑁂𑀯 𑀲𑀳𑀚𑀸𑀢 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀁 𑀩𑀮𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀣𑀫𑀁 𑀯𑀼𑀢𑁆𑀢𑁄𑀢𑀺. 𑀲𑀗𑁆𑀕𑀳𑀓𑀸𑀭𑁂𑀦 𑀧𑀦 𑀇𑀤𑀁 𑀧𑀦 𑀅𑀓𑀸𑀭𑀡𑀁, 𑀏𑀓𑀓𑁆𑀔𑀡𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦 𑀥𑀫𑁆𑀫𑀸𑀦𑀁 𑀅𑀬𑀁 𑀧𑀣𑀫𑀁 𑀉𑀧𑁆𑀧𑀦𑁆𑀦𑁄 𑀅𑀬𑀁 𑀧𑀘𑁆𑀙𑀸𑀢𑀺 𑀇𑀤𑀁 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀸. 𑀩𑀮𑀯𑀧𑀘𑁆𑀘𑀬𑀪𑀸𑀯𑁂𑀧𑀺 𑀨𑀲𑁆𑀲𑀲𑁆𑀲𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀏𑀯𑀁 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑁂𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑀤𑁂𑀲𑀦𑀸 𑀯𑀸𑀭𑁂𑀦𑁂𑀯 𑀨𑀲𑁆𑀲𑁄 𑀧𑀣𑀫𑀁 𑀯𑀼𑀢𑁆𑀢𑁄𑀢𑀺. 𑀢𑀢𑁆𑀣 ‘‘𑀤𑁂𑀲𑀦𑀸𑀯𑀸𑀭𑁂 𑀦𑁂𑀯𑀸’’𑀢𑀺 𑀤𑁂𑀲𑀦𑀓𑁆𑀓𑀫𑁂𑀦𑁂𑀯, 𑀢𑀢𑁄 𑀅𑀜𑁆𑀜𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀯𑀸𑀤𑁂𑀲𑀼 𑀫𑀳𑀸𑀅𑀝𑁆𑀞𑀓𑀣𑀸 𑀯𑀸𑀤𑁄 𑀏𑀯 𑀬𑀼𑀢𑁆𑀢𑁄. 𑀬𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀧𑀣𑀫𑀸𑀪𑀺𑀦𑀺𑀧𑀸𑀢𑁄 𑀳𑀼𑀢𑁆𑀯𑀸𑀢𑀺. 𑀢𑀢𑁆𑀣 𑀧𑀣𑀫𑀸𑀪𑀺𑀦𑀺𑀧𑀸𑀢𑁄𑀢𑀺 𑀇𑀤𑀁 𑀓𑀺𑀘𑁆𑀘𑀧𑁆𑀧𑀥𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀧𑀦𑀜𑁆𑀜𑁂𑀳𑀺 𑀘𑁂𑀢𑀲𑀺𑀓𑁂𑀳𑀺 𑀯𑀺𑀦𑀸 𑀯𑀺𑀲𑀼𑀁 𑀧𑀣𑀫𑀁 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀬𑀣𑀸 𑀢𑀁 𑀬𑁂 𑀓𑁂𑀘𑀺 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸. 𑀲𑀩𑁆𑀩𑁂 𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸, 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀣𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀺𑀘𑁆𑀘𑀧𑁆𑀧𑀥𑀸𑀦𑀢𑁆𑀢𑀸 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀣𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀦 𑀧𑀦 𑀲𑀩𑁆𑀩𑀘𑁂𑀢𑀲𑀺𑀓𑁂𑀳𑀺 𑀯𑀺𑀦𑀸 𑀯𑀺𑀲𑀼𑀁 𑀧𑀣𑀫𑀁 𑀉𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀩𑀮𑀯𑀧𑀘𑁆𑀘𑀬 𑀪𑀸𑀯𑁂𑀧𑀺 𑀨𑀲𑁆𑀲𑀲𑁆𑀲𑀓𑀸𑀭𑀡𑀁 𑀤𑀺𑀲𑁆𑀲𑀢𑀺𑀬𑁂𑀯. 𑀨𑀲𑁆𑀲𑁄𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸 𑀧𑀦𑀸𑀬. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸 𑀦𑀸𑀬. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀨𑀲𑁆𑀲𑀧𑁆𑀧𑀥𑀸𑀦𑀢𑁆𑀢𑀸 𑀏𑀯 𑀨𑀲𑁆𑀲 𑀩𑀮𑀯𑀧𑀘𑁆𑀘𑀬𑀢𑁆𑀢𑀸 𑀏𑀯 𑀘 𑀨𑀲𑁆𑀲𑁄 𑀧𑀣𑀫𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦𑀝𑁆𑀞𑁂𑀦 𑀨𑀲𑁆𑀲𑀸𑀤𑀻𑀦𑀁 𑀲𑀩𑁆𑀩𑀘𑁂𑀢𑀲𑀺𑀓 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀁 𑀳𑁄𑀢𑀺, 𑀧𑀥𑀸𑀦𑀁, 𑀚𑁂𑀝𑁆𑀞𑀓𑀁. 𑀨𑀲𑁆𑀲𑁄 𑀧𑀦 𑀆𑀭𑀫𑁆𑀫𑀡 𑀲𑀗𑁆𑀖𑀝𑁆𑀝𑀦𑀝𑁆𑀞𑁂𑀦 𑀲𑀩𑁆𑀩𑁂𑀲𑀁 𑀘𑁂𑀢𑀲𑀺𑀓 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺, 𑀧𑀥𑀸𑀦𑁄, 𑀚𑁂𑀝𑁆𑀞𑀓𑁄𑀢𑀺 𑀅𑀬𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄𑀢𑀺. 𑀏𑀢𑁆𑀣 𑀘𑁄𑀤𑀓𑁄 𑀨𑀼𑀲𑀦𑀁 𑀦𑀸𑀫 𑀲𑀧𑁆𑀧𑀝𑀺𑀖𑀭𑀽𑀧𑀸𑀦𑀁 𑀏𑀯 𑀓𑀺𑀘𑁆𑀘𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀦𑀦𑀼𑀘𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. ‘‘𑀦𑀦𑀼𑀘𑀸’’𑀢𑀺 𑀘𑁄𑀤𑁂𑀥𑀻𑀢𑀺 𑀤𑀻𑀧𑁂𑀢𑀺. ‘‘𑀅𑀧𑁆𑀧𑀝𑀺𑀖𑀲𑀪𑀸𑀯𑀸’’𑀢𑀺 𑀳𑁂𑀢𑀼𑀯𑀺𑀲𑁂𑀲𑀦𑀁. ‘‘𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺𑀯𑀢𑁆𑀣𑀼𑀁. 𑀅𑀬𑀁 𑀧𑀦 𑀨𑀲𑁆𑀲𑁄. ‘‘𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀸 𑀧𑀢𑁆𑀢𑀺𑀁’’𑀢𑀺 𑀘𑀮𑀦 𑀓𑀫𑁆𑀧𑀦 𑀣𑀫𑁆𑀪𑀦 𑀚𑁂𑀕𑀼𑀘𑁆𑀙 𑀪𑀬 𑀢𑀸𑀲 𑀙𑀫𑁆𑀪𑀺𑀢𑀢𑁆𑀢𑀸 𑀤𑀺𑀯𑀲𑁂𑀦 𑀯𑀺𑀓𑀸𑀭𑀸 𑀧𑀚𑁆𑀚𑀦𑀁. ‘‘𑀯𑁂𑀤𑀦𑀸 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀁’’𑀢𑀺 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀲𑀼𑀔𑀯𑁂𑀤𑀦𑀸, 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀤𑀼𑀓𑁆𑀔 𑀯𑁂𑀤𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀨𑀲𑁆𑀲 𑀯𑀺𑀲𑁂𑀲𑀸𑀦𑀼𑀭𑀽𑀧𑀁 𑀯𑁂𑀤𑀦𑀸 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀁 𑀲𑀸𑀥𑁂𑀢𑀺. 𑀏𑀢𑁆𑀣 𑀘 𑀨𑀼𑀲𑀦𑀁 𑀦𑀸𑀫 𑀤𑀼𑀯𑀺𑀥𑀁 𑀭𑀽𑀧𑀧𑁆𑀨𑀼𑀲𑀦𑀁, 𑀦𑀸𑀫𑀧𑁆𑀨𑀼𑀲𑀦, 𑀦𑁆𑀢𑀺. 𑀢𑀢𑁆𑀣 𑀭𑀽𑀧𑀧𑁆𑀨𑀼𑀲𑀦𑀁 𑀦𑀸𑀫 𑀨𑁄𑀝𑁆𑀞𑀩𑁆𑀩 𑀥𑀸𑀢𑀽𑀦𑀁 𑀓𑀺𑀘𑁆𑀘𑀁. 𑀦𑀸𑀫𑀧𑁆𑀨𑀼𑀲𑀦𑀁 𑀤𑀼𑀯𑀺𑀥𑀁 𑀨𑀲𑁆𑀲𑀧𑁆𑀨𑀼𑀲𑀦𑀁, 𑀜𑀸𑀡𑀧𑁆𑀨𑀼𑀲𑀦, 𑀦𑁆𑀢𑀺. 𑀢𑀢𑁆𑀣 𑀜𑀸𑀡𑀧𑁆𑀨𑀼𑀲𑀦𑀁 𑀦𑀸𑀫 𑀜𑀸𑀡𑀧𑁆𑀧𑀝𑀺𑀯𑁂𑀥𑁄. 𑀅𑀧𑀺 𑀘 𑀛𑀸𑀦𑀫𑀕𑁆𑀕 𑀨𑀮 𑀦𑀺𑀩𑁆𑀩𑀸𑀦𑀸𑀦𑀁 𑀧𑀝𑀺𑀮𑀸𑀪𑁄𑀧𑀺 𑀨𑀼𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀲𑀦𑁆𑀢𑀺 𑀥𑀻𑀭𑀸 𑀦𑀺𑀩𑁆𑀩𑀸𑀦𑀁. 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀁. 𑀨𑀼𑀲𑀸𑀫𑀺 𑀦𑁂𑀓𑁆𑀔𑀫𑀁 𑀲𑀼𑀔𑀁. 𑀅𑀧𑀼𑀣𑀼𑀚𑁆𑀚𑀦 𑀲𑁂𑀯𑀺𑀢𑀦𑁆𑀢𑀺-𑀆𑀤𑀻𑀲𑀼. 𑀇𑀤𑀁 𑀉𑀧𑀫𑀸 𑀫𑀢𑁆𑀢𑀁 𑀲𑀺𑀬𑀸, 𑀓𑀲𑁆𑀲𑀘𑀺 𑀫𑀦𑁆𑀤 𑀧𑀜𑁆𑀜𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀤’’𑀦𑁆𑀢𑀺 𑀔𑁂𑀴𑀼𑀧𑁆𑀧𑀸𑀤 𑀯𑀘𑀦𑀁. 𑀯𑀺𑀜𑁆𑀜𑀼𑀲𑁆𑀲 𑀧𑀦 𑀅𑀢𑀺𑀧𑀸𑀓𑀝 𑀨𑀲𑁆𑀲 𑀦𑀺𑀤𑀲𑁆𑀲𑀦𑁂𑀦 𑀅𑀧𑁆𑀧𑀸𑀓𑀝 𑀨𑀲𑁆𑀲 𑀯𑀺𑀪𑀸𑀯𑀦𑀁 𑀬𑀼𑀢𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀅𑀢𑀺𑀧𑀸𑀓𑀝𑀸𑀬 𑀧𑀦𑀸’’𑀢𑀺𑀆𑀤𑀺𑀁.

𑁭𑁦. 𑀯𑁂𑀤𑀦𑀸𑀯𑀘𑀦𑀢𑁆𑀣𑁂. ‘‘𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀸𑀦𑀁 𑀯𑀸’’𑀢𑀺 𑀯𑁂𑀤𑀦𑀸 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀸𑀦𑀁 𑀯𑀸. ‘‘𑀲𑀸𑀢𑀁 𑀯𑀸’’𑀢𑀺 𑀲𑀸𑀥𑀼𑀭𑀲𑀁 𑀯𑀸. ‘‘𑀅𑀲𑁆𑀲𑀸𑀢𑀁 𑀯𑀸’’𑀢𑀺 𑀅𑀲𑀸𑀥𑀼𑀭𑀲𑀁 𑀯𑀸. ‘‘𑀓𑀺𑀁 𑀯𑁂𑀤𑀬𑀢𑀻’’𑀢𑀺 𑀓𑀢𑀫𑀁 𑀯𑁂𑀤𑀬𑀢𑀺. ‘‘𑀲𑀼𑀔𑀫𑁆𑀧𑀺 𑀯𑁂𑀤𑀬𑀢𑀻’’𑀢𑀺 𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀅𑀣𑀯𑀸 ‘‘𑀓𑀺𑀜𑁆𑀘𑀯𑁂𑀤𑀬𑀢𑀻’’𑀢𑀺 𑀓𑀣𑀜𑁆𑀘𑀯𑁂𑀤𑀬𑀢𑀺. ‘‘𑀲𑀼𑀔𑀫𑁆𑀧𑀺 𑀯𑁂𑀤𑀬𑀢𑀻’’𑀢𑀺 𑀲𑀼𑀔𑀁 𑀳𑀼𑀢𑁆𑀯𑀸𑀧𑀺 𑀯𑁂𑀤𑀬𑀢𑀺. 𑀲𑀼𑀔 𑀪𑀸𑀯𑁂𑀦 𑀯𑁂𑀤𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑁂𑀲𑀧𑀤𑁂𑀲𑀼𑀧𑀺. ‘‘𑀓𑀺𑀘𑁆𑀘𑀦𑁆𑀢𑀭𑀩𑁆𑀬𑀸𑀯𑀝𑀸’’𑀢𑀺 𑀅𑀜𑁆𑀜𑀓𑀺𑀘𑁆𑀘𑀩𑁆𑀬𑀸𑀯𑀝𑀸. 𑀅𑀥𑀺𑀧𑀢𑀺 𑀪𑀸𑀯𑁄 𑀆𑀥𑀺𑀧𑀘𑁆𑀘𑀁. 𑀇𑀦𑁆𑀤𑁆𑀭𑀺𑀬 𑀓𑀺𑀘𑁆𑀘𑀁. ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺 𑀮𑀤𑁆𑀥𑀕𑀼𑀡𑀯𑀘𑀦𑀁. 𑀭𑀸𑀚𑀸𑀭𑀳 𑀪𑁄𑀚𑀦𑀁 𑀭𑀸𑀚𑀕𑁆𑀕𑀪𑁄𑀚𑀦𑀁. ‘‘𑀲𑀽𑀤𑀲𑀤𑀺𑀲𑀢𑀸’’𑀢𑀺 𑀭𑀜𑁆𑀜𑁄𑀪𑀢𑁆𑀢𑀓𑀸𑀭𑀲𑀤𑀺𑀲𑀢𑀸. 𑀢𑀢𑁆𑀣 𑀲𑀽𑀤𑁄 𑀭𑀜𑁆𑀜𑁄𑀪𑀢𑁆𑀢𑀁 𑀧𑀘𑀦𑁆𑀢𑁄 𑀭𑀲𑀚𑀸𑀦𑀦𑀢𑁆𑀣𑀁 𑀣𑁄𑀓𑀁 𑀕𑀳𑁂𑀢𑁆𑀯𑀸 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀢𑁆𑀯𑀸 𑀭𑀲𑀁 𑀯𑀻𑀫𑀁𑀲𑀢𑀺. 𑀬𑀣𑀺𑀘𑁆𑀙𑀺𑀢𑀁 𑀧𑀦 𑀪𑀼𑀜𑁆𑀚𑀺𑀢𑀼𑀁 𑀅𑀦𑀺𑀲𑁆𑀲𑀭𑁄. 𑀭𑀸𑀚𑀸 𑀏𑀯 𑀬𑀣𑀺𑀘𑁆𑀙𑀺𑀢𑀁 𑀪𑀼𑀜𑁆𑀚𑀺𑀢𑀼𑀁 𑀇𑀲𑁆𑀲𑀭𑁄. 𑀭𑀸𑀚𑀸 𑀯𑀺𑀬 𑀯𑁂𑀤𑀦𑀸. 𑀲𑀽𑀤𑁄 𑀯𑀺𑀬 𑀲𑁂𑀲𑀘𑁂𑀢𑀲𑀺𑀓 𑀥𑀫𑁆𑀫𑀸.

𑁭𑁧. 𑀲𑀜𑁆𑀜𑀸𑀯𑀘𑀦𑀢𑁆𑀣𑁂. ‘‘𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀲𑀼𑀝𑁆𑀞𑀼 𑀚𑀸𑀦𑀸𑀢𑀺. 𑀲𑀼𑀝𑁆𑀞𑀼𑀚𑀸𑀦𑀦𑀜𑁆𑀘 𑀦𑀸𑀫 𑀦 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀬 𑀯𑀺𑀯𑀺𑀥𑀚𑀸𑀦𑀦𑀁 𑀳𑁄𑀢𑀺. 𑀦 𑀘 𑀧𑀜𑁆𑀜𑀸𑀬 𑀯𑀺𑀬 𑀬𑀣𑀸𑀪𑀽𑀢𑀚𑀸𑀦𑀦𑀁 𑀳𑁄𑀢𑀺. 𑀅𑀣 𑀔𑁄 𑀪𑀽𑀢𑀁 𑀯𑀸 𑀳𑁄𑀢𑀼, 𑀅𑀪𑀽𑀢𑀁 𑀯𑀸. 𑀬𑀁 𑀬𑀁 𑀙 𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀚𑀸𑀦𑀸𑀢𑀺, 𑀧𑀜𑁆𑀜𑀸𑀬 𑀯𑀸 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀙𑀸 𑀅𑀧𑁆𑀧𑀫𑀼𑀲𑁆𑀲𑀓𑀭𑀡 𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀦𑀚𑀸𑀦𑀦𑀢𑁆𑀣𑀁 𑀲𑀜𑁆𑀜𑀸𑀡𑀁 𑀓𑀭𑁄𑀢𑀻’’𑀢𑀺. 𑀢𑀢𑁆𑀣 ‘‘𑀲𑀜𑁆𑀜𑀸𑀡’’𑀦𑁆𑀢𑀺 𑀦𑀺𑀫𑀺𑀢𑁆𑀢 𑀓𑀭𑀡𑀁. 𑀪𑀯𑀦𑁆𑀢𑀭𑀁 𑀧𑀢𑁆𑀯𑀸𑀧𑀺 𑀅𑀧𑁆𑀧𑀫𑀼𑀝𑁆𑀞𑀪𑀸𑀯𑀁 𑀲𑀸𑀥𑁂𑀢𑀺 𑀑𑀧𑀧𑀸𑀢𑀺𑀓 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀳𑀺 𑀧𑀼𑀭𑀺𑀫𑀁 𑀅𑀢𑁆𑀢𑀦𑁄 𑀪𑀯𑀁 𑀚𑀸𑀦𑀦𑁆𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀧𑀺 𑀓𑁂𑀘𑀺 𑀧𑀼𑀭𑀺𑀫𑀁 𑀪𑀯𑀁 𑀚𑀸𑀦𑀦𑁆𑀢𑀺, 𑀬𑁂𑀚𑀸𑀢𑀺𑀲𑁆𑀲𑀭 𑀧𑀼𑀕𑁆𑀕𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 ‘‘𑀅𑀧𑁆𑀧𑀫𑀼𑀝𑁆𑀞𑀪𑀸𑀯’’𑀦𑁆𑀢𑀺 𑀅𑀦𑀝𑁆𑀞𑀪𑀸𑀯𑀁. 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲 𑀲𑀜𑁆𑀜𑀸 𑀦𑀸𑀫 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀧𑁆𑀧𑀯𑀢𑁆𑀢𑀸 𑀲𑀜𑁆𑀜𑀸. ‘‘𑀩𑁄𑀥𑁂𑀢𑀼’’𑀦𑁆𑀢𑀺 𑀩𑀼𑀚𑁆𑀛𑀸𑀧𑁂𑀢𑀼𑀁. ‘‘𑀤𑀸𑀭𑀼𑀢𑀘𑁆𑀙𑀓𑀲𑀤𑀺𑀲𑀸𑀢𑀺 𑀘 𑀯𑀼𑀢𑁆𑀢𑀸’’𑀢𑀺 𑀤𑀸𑀭𑀼𑀢𑀘𑁆𑀙𑀓𑁄 𑀦𑀸𑀫 𑀓𑀝𑁆𑀞𑀯𑀟𑁆𑀠𑀓𑀻. 𑀲𑁄 𑀓𑀝𑁆𑀞𑀓𑁆𑀔𑀦𑁆𑀥𑁂𑀲𑀼 𑀦𑀺𑀫𑀺𑀢𑁆𑀢𑀓𑀸𑀭𑀻𑀳𑁄𑀢𑀺. 𑀲𑀼𑀢𑀘𑁆𑀙𑀺𑀢𑀙𑀺𑀦𑁆𑀤𑀺𑀢𑁂𑀲𑀼 𑀓𑀝𑁆𑀞𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀢𑁆𑀯𑀸 𑀞𑀧𑁂𑀢𑀺. 𑀧𑀘𑁆𑀙𑀸𑀢𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀓𑀝𑁆𑀞𑀸𑀦𑀺 𑀓𑀫𑁆𑀫𑁂 𑀉𑀧𑀦𑁂𑀢𑀺. ‘‘𑀳𑀢𑁆𑀣𑀺 𑀤𑀲𑁆𑀲𑀓 𑀅𑀦𑁆𑀥𑀲𑀤𑀺𑀲𑀸’’𑀢𑀺 𑀏𑀢𑁆𑀣 𑀏𑀓𑁄 𑀓𑀺𑀭 𑀭𑀸𑀚𑀸 𑀓𑁂𑀴𑀺𑀧𑁆𑀧𑀲𑀼𑀢𑁄 𑀳𑁄𑀢𑀺. 𑀲𑁄 𑀚𑀘𑁆𑀘𑀦𑁆𑀥𑀸𑀦𑀁𑀞𑀸𑀦𑁂 𑀏𑀓𑀁 𑀳𑀢𑁆𑀣𑀺𑀁 𑀆𑀦𑁂𑀢𑁆𑀯𑀸𑀞𑀧𑁂𑀦𑁆𑀢𑁄 𑀚𑀘𑁆𑀘𑀦𑁆𑀥𑁂 𑀆𑀳 𑀚𑀸𑀦𑀸𑀣 𑀪𑁄 𑀢𑀼𑀫𑁆𑀳𑁂 𑀳𑀢𑁆𑀣𑀺𑀦𑁆𑀢𑀺. 𑀢𑁂 𑀳𑀢𑁆𑀣𑀺𑀁 𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀧𑀭𑀸𑀫𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀸𑀫𑀲𑀺𑀢𑀁 𑀢𑀁 𑀢𑀁 𑀅𑀗𑁆𑀕𑀫𑀯𑀳𑀢𑁆𑀣𑀻𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀤𑀴𑁆𑀳𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺. 𑀧𑀼𑀦 𑀭𑀸𑀚𑀸 𑀢𑁂 𑀧𑀼𑀘𑁆𑀙𑀺 𑀓𑀻𑀤𑀺𑀲𑁄 𑀪𑁄 𑀳𑀢𑁆𑀣𑀻𑀢𑀺. 𑀢𑁂 𑀭𑀜𑁆𑀜𑁄 𑀳𑀢𑁆𑀣𑀺𑀲𑀡𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑀸 𑀯𑀺𑀯𑀸𑀤𑀁 𑀆𑀧𑀚𑁆𑀚𑀦𑁆𑀢𑀺. 𑀆𑀘𑀺𑀓𑁆𑀔𑀦𑀫𑁂𑀯 𑀭𑀜𑁆𑀜𑁄𑀳𑀢𑁆𑀣𑀺𑀤𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸 𑀢𑁂 𑀳𑀢𑁆𑀣𑀺𑀤𑀲𑁆𑀲𑀓 𑀅𑀦𑁆𑀥𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀉𑀧𑀝𑁆𑀞𑀺𑀢𑀯𑀺𑀲𑀬𑀕𑁆𑀕𑀳𑀡𑁂’’𑀢𑀺 𑀭𑀢𑁆𑀢𑀺𑀬𑀁 𑀅𑀦𑁆𑀥𑀓𑀸𑀭𑁂 𑀭𑀚𑁆𑀚𑀼𑀓𑁆𑀔𑀡𑁆𑀟𑀁 𑀧𑀲𑁆𑀲𑀦𑁆𑀢𑀲𑁆𑀲 𑀲𑀧𑁆𑀧𑀲𑀡𑁆𑀞𑀸𑀦𑀁 𑀉𑀧𑀝𑁆𑀞𑀸𑀢𑀺. 𑀲𑁄 𑀉𑀧𑀝𑁆𑀞𑀺𑀢𑀁 𑀲𑀡𑁆𑀞𑀸𑀦𑀫𑀢𑁆𑀢𑀁 𑀲𑀧𑁆𑀧𑁄𑀢𑀺 𑀕𑀡𑁆𑀳𑀸𑀢𑀺. 𑀏𑀯𑀁 𑀉𑀧𑀝𑁆𑀞𑀺𑀢𑀯𑀺𑀲𑀬𑀕𑁆𑀕𑀳𑀡𑀁 𑀳𑁄𑀢𑀺. 𑀫𑀺𑀕𑀧𑁄𑀢𑀓𑀸𑀦𑀜𑁆𑀘 𑀅𑀭𑀜𑁆𑀜𑁂𑀔𑁂𑀢𑁆𑀢𑀫𑀚𑁆𑀛𑁂𑀧𑀼𑀭𑀺𑀲𑀲𑀡𑁆𑀞𑀸𑀦𑀁 𑀢𑀺𑀡 𑀭𑀽𑀧𑀁 𑀧𑀲𑁆𑀲𑀦𑁆𑀢𑀸𑀦𑀁 𑀧𑀼𑀭𑀺𑀲𑀲𑀡𑁆𑀞𑀸 𑀦𑀁 𑀉𑀧𑀝𑁆𑀞𑀸𑀢𑀺. 𑀢𑁂 𑀉𑀧𑀝𑁆𑀞𑀺𑀢𑀁 𑀲𑀡𑁆𑀞𑀸𑀦𑀫𑀢𑁆𑀢𑀁 𑀧𑀼𑀭𑀺𑀲𑁄𑀢𑀺 𑀕𑀡𑁆𑀳𑀺𑀢𑁆𑀯𑀸 𑀲𑁄 𑀅𑀫𑁆𑀳𑁂 𑀧𑀳𑀭𑁂𑀬𑁆𑀬𑀸𑀢𑀺 𑀧𑀮𑀸𑀬𑀦𑁆𑀢𑀺. 𑀯𑀼𑀢𑁆𑀢𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀁.

𑁭𑁨. 𑀘𑁂𑀢𑀦𑀸𑀯𑀘𑀦𑀢𑁆𑀣𑁂. 𑀘𑁂𑀢𑁂𑀢𑀻𑀢𑀺 𑀘𑁂𑀢𑀦𑀸. 𑀘𑁂𑀢𑀦𑀜𑁆𑀘𑁂𑀢𑁆𑀣 𑀅𑀪𑀺𑀲𑀦𑁆𑀥𑀸𑀦𑀁 𑀯𑀸 𑀯𑀼𑀘𑁆𑀘𑀢𑀺 𑀧𑀓𑀧𑁆𑀧𑀦𑀁 𑀯𑀸 𑀆𑀬𑀽𑀳𑀦𑀁 𑀯𑀸𑀢𑀺 𑀏𑀯𑀁 𑀢𑀺𑀥𑀸 𑀅𑀢𑁆𑀣𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀪𑀺𑀲𑀦𑁆𑀤𑀳𑀢𑀻’’𑀢𑀺 𑀅𑀪𑀺𑀫𑀼𑀔𑀁 𑀲𑀦𑁆𑀤𑀳𑀢𑀺, 𑀲𑀁𑀬𑁄𑀕𑀁 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀖𑀝𑁂𑀢𑀻’’𑀢𑀺. ‘‘𑀖𑀝𑁂𑀢𑀻’’𑀢𑀺 𑀲𑀫𑁆𑀩𑀦𑁆𑀥𑀢𑀺. ‘‘𑀧𑀓𑀧𑁆𑀧𑁂𑀢𑀺 𑀯𑀸𑀢𑁂’’𑀢𑀺 𑀅𑀣𑀯𑀸 𑀢𑁂 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂 𑀧𑀓𑀸𑀭𑀢𑁄 𑀓𑀧𑁆𑀧𑁂𑀢𑀺, 𑀲𑀚𑁆𑀚𑁂𑀢𑀺. 𑀢𑁂𑀦𑀸𑀳 ‘‘𑀲𑀁𑀯𑀺𑀤𑀳𑀢𑀻’’𑀢𑀺. ‘‘𑀲𑀁𑀯𑀺𑀤𑀳𑀢𑀻’’𑀢𑀺 𑀢𑁆𑀯𑀁 𑀨𑀼𑀲𑀦𑀓𑀺𑀘𑁆𑀘𑀁 𑀓𑀭𑁄𑀳𑀺, 𑀢𑁆𑀯𑀁 𑀯𑁂𑀤𑀬𑀺𑀢 𑀓𑀺𑀘𑁆𑀘𑀁 𑀓𑀭𑁄𑀳𑀺, 𑀢𑁆𑀯𑀁 𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀁 𑀓𑀭𑁄𑀳𑀻𑀢𑀺𑀆𑀤𑀺𑀦𑀸 𑀯𑀤𑀫𑀸𑀦𑀸 𑀯𑀺𑀬 𑀲𑀁𑀯𑀺𑀤𑀳𑀢𑀺. ‘‘𑀆𑀬𑀽𑀳𑀢𑀺𑀯𑀸𑀢𑁂’’𑀢𑀺 𑀅𑀣𑀯𑀸 𑀢𑁂𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂 𑀪𑀼𑀲𑁄 𑀩𑁆𑀬𑀽𑀳𑀬𑀢𑀺, 𑀭𑀸𑀲𑀺𑀁 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑁂 𑀲𑀫𑁆𑀧𑀺𑀡𑁆𑀟𑁂𑀢𑀻’’𑀢𑀺. ‘‘𑀲𑀫𑁄𑀲𑀭𑀦𑁆𑀢𑁂’’𑀢𑀺 𑀏𑀓𑀢𑁄 𑀑𑀲𑀭𑀦𑁆𑀢𑁂. 𑀲𑀗𑁆𑀕𑀫𑀦𑁆𑀢𑁂. ‘‘𑀲𑀸’’𑀢𑀺 𑀘𑁂𑀢𑀦𑀸. ‘‘𑀢𑀸𑀬𑀸’’𑀢𑀺 𑀘𑁂𑀢𑀦𑀸𑀬. ‘‘𑀢𑀲𑁆𑀫𑀺𑀁’’𑀢𑀺 𑀭𑀽𑀧𑀸𑀤𑀺𑀓𑁂𑀯𑀸 𑀆𑀭𑀫𑁆𑀫𑀡𑁂. 𑀧𑀼𑀜𑁆𑀜𑀸𑀧𑀼𑀜𑁆𑀜 𑀓𑀺𑀘𑁆𑀘𑁂𑀯𑀸. 𑀧𑀯𑀢𑁆𑀢𑀫𑀸𑀦𑀸𑀬 𑀲𑀢𑀺𑀬𑀸. 𑀚𑁂𑀝𑁆𑀞𑀲𑀺𑀲𑁆𑀲𑁄 𑀦𑀸𑀫 𑀩𑀳𑀽𑀲𑀼 𑀲𑀺𑀲𑁆𑀲𑁂𑀲𑀼 𑀚𑁂𑀝𑁆𑀞𑀪𑀽𑀢𑁄 𑀲𑀺𑀲𑁆𑀲𑁄. 𑀢𑀲𑁆𑀫𑀺𑀁 𑀲𑀚𑁆𑀛𑀸𑀬𑀦𑁆𑀢𑁂 𑀲𑁂𑀲𑀸 𑀲𑀩𑁆𑀩𑁂 𑀲𑀚𑁆𑀛𑀸𑀬𑀦𑁆𑀢𑀺𑀬𑁂𑀯. 𑀢𑁂𑀦 𑀲𑁄 𑀉𑀪𑀬𑀓𑀺𑀘𑁆𑀘 𑀲𑀸𑀥𑀓𑁄 𑀳𑁄𑀢𑀺. 𑀏𑀯𑀁 𑀫𑀳𑀸𑀯𑀟𑁆𑀠𑀓𑀻𑀧𑀺.

𑁭𑁩. 𑀏𑀓𑀕𑁆𑀕𑀢𑀸𑀯𑀘𑀦𑀢𑁆𑀣𑁂. 𑀏𑀓𑀢𑁆𑀢𑀸𑀭𑀫𑁆𑀫𑀡𑀁 𑀦𑀸𑀫 𑀏𑀓𑀸𑀭𑀫𑁆𑀫𑀡𑀲𑁆𑀲𑀧𑀺 𑀩𑀳𑀽𑀲𑀼 𑀲𑀪𑀸𑀯𑁂𑀲𑀼 𑀏𑀓𑀲𑀪𑀸𑀯𑀲𑀗𑁆𑀔𑀸𑀢𑀁 𑀆𑀭𑀫𑁆𑀫𑀡𑀁. ‘‘𑀢𑀲𑁆𑀫𑀺𑀁’’ 𑀘𑀺𑀢𑁆𑀢𑀲𑁆𑀫𑀺𑀁. ‘‘𑀦𑀺𑀯𑀸𑀢𑁂’’𑀢𑀺 𑀯𑀸𑀢𑀭𑀳𑀺𑀢𑁂 𑀧𑀤𑁂𑀲𑁂. ‘‘𑀤𑀻𑀧𑀘𑁆𑀘𑀻𑀦𑀁’’𑀢𑀺 𑀤𑀻𑀧𑀚𑀸𑀮𑀸𑀦𑀁.

𑁭𑁪. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀘𑀦𑀢𑁆𑀣𑁂. ‘‘𑀇𑀲𑁆𑀲𑀭𑀪𑀸𑀯𑁄 𑀯𑀼𑀘𑁆𑀘𑀢𑀺’’ 𑀪𑀸𑀯𑀧𑁆𑀧𑀥𑀸𑀦 𑀦𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺 𑀚𑀻𑀯𑀦 𑀓𑀺𑀘𑁆𑀘𑁂 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑀸𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢 𑀲𑀦𑁆𑀢𑀸𑀦𑀁 𑀚𑀻𑀯𑀦𑁆𑀢𑀁 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁫. 𑀫𑀦𑀲𑀻𑀓𑀸𑀭𑀯𑀘𑀦𑀢𑁆𑀣𑁂. 𑀲𑀫𑀸𑀲𑀫𑀚𑁆𑀛𑁂 𑀲𑀓𑀸𑀭𑀸𑀕𑀫𑁄. 𑀓𑀭𑀥𑀸𑀢𑀼𑀬𑁄𑀕𑁂 𑀈𑀓𑀸𑀭𑀸𑀕𑀫𑁄 𑀘 𑀤𑀝𑁆𑀞𑀩𑁆𑀩𑁄. 𑀅𑀮𑀼𑀢𑁆𑀢 𑀲𑀢𑁆𑀢𑀫𑀻 𑀧𑀤𑀦𑁆𑀣𑀺 𑀓𑁂𑀘𑀺. 𑀏𑀯𑀁 𑀲𑀢𑀺 𑀈𑀤𑀻𑀖𑀢𑁆𑀢𑀁 𑀦𑀲𑀺𑀚𑁆𑀛𑀢𑀺. ‘‘𑀅𑀲𑀼𑀜𑁆𑀜𑀁’’𑀢𑀺 𑀅𑀭𑀺𑀢𑁆𑀢𑀁. ‘‘𑀧𑀝𑀺𑀧𑀸𑀤𑁂𑀢𑀻’’𑀢𑀺 𑀧𑀝𑀺𑀧𑀚𑁆𑀚𑀦𑀁 𑀓𑀺𑀘𑁆𑀘𑀲𑀸𑀥𑀦𑀁 𑀓𑀸𑀭𑀸𑀧𑁂𑀢𑀺. 𑀅𑀢𑁆𑀣𑀢𑁄 𑀦𑀺𑀬𑁄𑀚𑁂𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀬𑁄𑀚𑁂𑀢𑀻’’𑀢𑀺. ‘‘𑀇𑀤𑀫𑁂𑀯 𑀤𑁆𑀯𑀬𑀁’’𑀢𑀺 𑀆𑀯𑀚𑁆𑀚𑀦 𑀤𑁆𑀯𑀬𑀁. ‘‘𑀢𑀁’’𑀢𑀺 𑀢𑀁 𑀤𑁆𑀯𑀬𑀁. 𑀉𑀧𑀢𑁆𑀣𑀫𑁆𑀪𑀺𑀢𑀁 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑁂 𑀦𑀺𑀦𑁆𑀦𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑁄𑀦𑀺𑀲𑁄’’𑀢𑀺 𑀉𑀧𑀸𑀬𑁂𑀦 𑀳𑀺𑀢𑀲𑀼𑀔 𑀫𑀕𑁆𑀕𑁂𑀦. ‘‘𑀅𑀬𑁄𑀦𑀺𑀲𑁄’’𑀢𑀺 𑀅𑀦𑀼𑀧𑀸𑀬𑁂𑀦 𑀅𑀳𑀺𑀢 𑀅𑀲𑀼𑀔 𑀫𑀕𑁆𑀕𑁂𑀦. ‘‘𑀲𑀫𑀼𑀤𑀸𑀘𑀺𑀡𑁆𑀡𑀦𑀺𑀦𑁆𑀦𑀦𑀺𑀬𑀸𑀫𑀺𑀢𑀸𑀤𑀻𑀳𑀻’’𑀢𑀺 𑀏𑀢𑁆𑀣 𑀲𑀫𑀼𑀤𑀸𑀘𑀺𑀡𑁆𑀡𑀁 𑀦𑀸𑀫 𑀆𑀘𑀺𑀡𑁆𑀡 𑀓𑀫𑁆𑀫𑀯𑀲𑁂𑀦 𑀲𑀼𑀝𑁆𑀞𑀼 𑀧𑀼𑀦𑀧𑁆𑀧𑀼𑀦𑀁 𑀆𑀘𑀭𑀺𑀢𑀁. 𑀦𑀺𑀦𑁆𑀦𑀁 𑀦𑀸𑀫 𑀇𑀤𑀁 𑀦𑀸𑀫 𑀧𑀲𑁆𑀲𑀸𑀫𑀺, 𑀇𑀤𑀁 𑀦𑀸𑀫 𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀼𑀩𑁆𑀩𑁂 𑀏𑀯 𑀅𑀚𑁆𑀛𑀸𑀲𑀬𑁂𑀦 𑀦𑀺𑀦𑁆𑀦𑀁. 𑀦𑀺𑀬𑀸𑀫𑀺𑀢𑀁 𑀦𑀸𑀫 𑀇𑀤𑀁 𑀦𑀸𑀫 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀦𑀸𑀫 𑀦 𑀓𑀢𑁆𑀢𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀭𑁄𑀫𑀺, 𑀅𑀓𑀢𑁆𑀢𑀩𑁆𑀩𑀁 𑀦𑀓𑀭𑁄𑀫𑀻𑀢𑀺 𑀏𑀯𑀁 𑀦𑀺𑀬𑀸𑀫𑀺𑀢𑀁. ‘‘𑀅𑀲𑀢𑀺 𑀓𑀸𑀭𑀡 𑀯𑀺𑀲𑁂𑀲𑁂’’𑀢𑀺 𑀪𑀯𑀗𑁆𑀕 𑀘𑀺𑀢𑁆𑀢𑀁 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀢𑀺, 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀘 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀓𑀮𑁆𑀮𑀸𑀤𑀺𑀓𑁂𑀯𑀸 𑀅𑀥𑀺𑀫𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀭𑀲𑁆𑀲 𑀉𑀧𑀝𑁆𑀞𑀸𑀦𑁂𑀯𑀸 𑀅𑀲𑀢𑀺. ‘‘𑀲𑀸𑀥𑀸𑀭𑀡𑀸’’𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑁂 𑀩𑀺𑀦𑁆𑀤𑀼 𑀮𑁄𑀧𑁄, 𑀤𑀻𑀖𑀢𑁆𑀢𑀜𑁆𑀘𑀸𑀢𑀺 𑀆𑀳 ‘‘𑀲𑀫𑀁 𑀥𑀸𑀭𑁂𑀦𑁆𑀢𑀻𑀢𑀺 𑀲𑀸𑀥𑀸𑀭𑀡𑀸’’𑀢𑀺.

𑁭𑁬. 𑀯𑀺𑀢𑀓𑁆𑀓𑀯𑀘𑀦𑀢𑁆𑀣𑁂. ‘‘𑀢𑀣𑀸 𑀢𑀣𑀸 𑀲𑀗𑁆𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀜𑁆𑀘𑀯𑀲𑁂𑀦 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀲𑀼𑀝𑁆𑀞𑀼 𑀘𑀺𑀦𑁆𑀢𑁂𑀢𑁆𑀯𑀸. ‘‘𑀢𑀁’’𑀢𑀺 𑀆𑀭𑀫𑁆𑀫𑀡𑀁. ‘‘𑀢𑁂’’𑀢𑀺 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂. ‘‘𑀅𑀯𑀺𑀢𑀓𑁆𑀓𑀫𑁆𑀧𑀺 𑀘𑀺𑀢𑁆𑀢𑀁’’𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡 𑀘𑀺𑀢𑁆𑀢𑀜𑁆𑀘 𑀤𑀼𑀢𑀻𑀬𑀸 𑀤𑀺𑀚𑁆𑀛𑀸𑀦 𑀘𑀺𑀢𑁆𑀢𑀜𑁆𑀘. ‘‘𑀅𑀧𑀺𑀘𑀸’’𑀢𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀤𑀼𑀢𑀻𑀬𑀚𑁆𑀛𑀸𑀦𑀸𑀤𑀻𑀦𑀺 𑀘𑀸’’𑀢𑀺 𑀤𑀼𑀢𑀻𑀬𑀚𑁆𑀛𑀸𑀦 𑀘𑀺𑀢𑁆𑀢𑀸𑀤𑀻𑀦𑀺 𑀘. ‘‘𑀉𑀧𑀘𑀸𑀭 𑀪𑀸𑀯𑀦𑀸 𑀯𑀲𑁂𑀦𑀸’’𑀢𑀺 𑀲𑀫𑀼𑀤𑀸𑀘𑀺𑀡𑁆𑀡 𑀯𑀲𑀺𑀪𑀽𑀢𑀸𑀬 𑀉𑀧𑀘𑀸𑀭 𑀪𑀸𑀯𑀦𑀸𑀬 𑀯𑀲𑁂𑀦. ‘‘𑀓𑀺𑀁 𑀯𑀸 𑀏𑀢𑀸𑀬𑀬𑀼𑀢𑁆𑀢𑀺𑀬𑀸’’𑀢𑀺 𑀲𑀯𑀺𑀢𑀓𑁆𑀓 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀢𑀺𑀆𑀤𑀺𑀓𑀸𑀬 𑀬𑀼𑀢𑁆𑀢𑀺𑀬𑀸 𑀓𑀺𑀁 𑀧𑀬𑁄𑀚𑀦𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺𑀬𑁂𑀯 𑀆𑀭𑀫𑁆𑀫𑀡𑁂𑀦 𑀅𑀯𑀺𑀦𑀸𑀪𑀸𑀯𑀯𑀼𑀢𑁆𑀢𑀺𑀓𑀢𑁆𑀢𑀸. ‘‘𑀢𑀁’’𑀢𑀺 𑀘𑀺𑀢𑁆𑀢𑀁. 𑀦𑀺𑀬𑀸𑀫𑀓𑁄 𑀦𑀸𑀫 𑀦𑀸𑀯𑀁 𑀇𑀘𑁆𑀙𑀺𑀢 𑀤𑀺𑀲𑀸𑀤𑁂𑀲𑀦𑀺𑀬𑁄𑀚𑀓𑁄. ‘‘𑀅𑀓𑀼𑀲𑀮𑀁 𑀧𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀁 𑀧𑀢𑁆𑀯𑀸 𑀧𑀦 𑀓𑀣𑀁𑀢𑀺. 𑀓𑀼𑀲𑀮𑀁 𑀧𑀢𑁆𑀯𑀸𑀧𑀺 𑀧𑀢𑀺𑀭𑀽𑀧𑀤𑁂𑀲𑀸𑀯𑀸𑀲𑀸𑀤𑀺𑀯𑀲𑁂𑀦 𑀲𑀫𑀼𑀤𑀸 𑀘𑀺𑀡𑁆𑀡 𑀦𑀺𑀦𑁆𑀦𑀸𑀤𑀺𑀯𑀲𑁂𑀦 𑀘 𑀮𑀤𑁆𑀥 𑀧𑀘𑁆𑀘𑀬𑁂 𑀲𑀢𑀺 𑀘𑀺𑀢𑁆𑀢𑀫𑁆𑀧𑀺 𑀲𑀤𑁆𑀥𑀸𑀲𑀢𑀺 𑀆𑀤𑀬𑁄𑀧𑀺 𑀆𑀭𑀫𑁆𑀫𑀡 𑀭𑀽𑀳𑀦𑁂 𑀣𑀸𑀫𑀕𑀢𑀸 𑀏𑀯. 𑀅𑀮𑀤𑁆𑀥 𑀧𑀘𑁆𑀘𑀬𑁂 𑀧𑀦 𑀲𑀢𑀺 𑀅𑀓𑀼𑀲𑀮 𑀪𑀸𑀯𑁂 𑀞𑀢𑁆𑀯𑀸 𑀣𑀸𑀫𑀕𑀢𑀁 𑀳𑁄𑀢𑀺. ‘‘𑀫𑀦𑀲𑀺𑀓𑀸𑀭 𑀯𑀻𑀭𑀺𑀬 𑀲𑀢𑀻𑀦𑀁’’𑀢𑀺 𑀪𑀸𑀯𑀦𑀸 𑀩𑀮𑀧𑀢𑁆𑀢𑀸 𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀲𑀢𑀺, 𑀯𑀺𑀢𑀓𑁆𑀓𑀲𑁆𑀲 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺. 𑀅𑀢𑁆𑀣𑀺. 𑀲𑀗𑁆𑀓𑀧𑁆𑀧𑀦 𑀓𑀺𑀘𑁆𑀘 𑀯𑀺𑀲𑁂𑀲𑀢𑁆𑀢𑀸. 𑀢𑀜𑁆𑀳𑀺 𑀓𑀺𑀘𑁆𑀘𑀁 𑀅𑀜𑁆𑀜𑁂𑀲𑀁 𑀅𑀲𑀸𑀥𑀸𑀭𑀡𑀁, 𑀯𑀺𑀢𑀓𑁆𑀓𑀲𑁆𑀲𑁂𑀯 𑀓𑀺𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀢𑀓𑁆𑀓𑁄𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀲𑀸𑀭𑀫𑁆𑀫𑀡 𑀲𑀪𑀸𑀯𑀸’’𑀢𑀺 𑀳𑁂𑀢𑀼 𑀯𑀺𑀲𑁂𑀲𑀦𑀫𑁂𑀢𑀁. ‘‘𑀢𑀣𑀸 𑀯𑀼𑀢𑁆𑀢𑁄’’𑀢𑀺 𑀯𑀺𑀢𑀓𑁆𑀓𑁄𑀢𑀺 𑀯𑀼𑀢𑁆𑀢𑁄.

𑁭𑁭. 𑀯𑀺𑀘𑀸𑀭𑀯𑀘𑀦𑀢𑁆𑀣𑁂. ‘‘𑀯𑀺𑀘𑀭𑀢𑀻’’𑀢𑀺 𑀏𑀓𑀫𑁂𑀓𑀲𑁆𑀫𑀺𑀁 𑀏𑀯 𑀆𑀭𑀫𑁆𑀫𑀡𑁂 𑀯𑀺𑀯𑀺𑀥𑁂𑀦 𑀘𑀭𑀢𑀺, 𑀧𑀯𑀢𑁆𑀢𑀢𑀺. 𑀲𑀪𑀸𑀯𑀸𑀓𑀸𑀭𑁄 𑀦𑀸𑀫 𑀦𑀻𑀮𑀧𑀻𑀢𑀸𑀤𑀺𑀓𑁄 𑀅𑀕𑀫𑁆𑀪𑀻𑀭𑁄 𑀆𑀭𑀫𑁆𑀫𑀡 𑀲𑀪𑀸𑀯𑁄 𑀘 𑀆𑀭𑀫𑁆𑀫𑀡𑀲𑁆𑀲 𑀦𑀸𑀦𑀸 𑀧𑀯𑀢𑁆𑀢𑀸𑀓𑀸𑀭𑁄 𑀘. ‘‘𑀅𑀦𑀼𑀫𑀚𑁆𑀚𑀦𑀯𑀲𑁂𑀦𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀚𑁆𑀚𑀦𑀯𑀲𑁂𑀦 𑀲𑁄𑀥𑀦𑀯𑀲𑁂𑀦. 𑀯𑀺𑀢𑀓𑁆𑀓𑁄 𑀑𑀴𑀸𑀭𑀺𑀓𑁄 𑀘 𑀳𑁄𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀑𑀴𑀸𑀭𑀺𑀓𑁄’’𑀢𑀺 𑀯𑀺𑀘𑀸𑀭𑀢𑁄 𑀑𑀴𑀸𑀭𑀺𑀓𑁄. 𑀏𑀯𑀁 𑀲𑁂𑀲𑀧𑀤𑁂𑀲𑀼. ‘‘𑀖𑀡𑁆𑀟𑀸𑀪𑀺𑀖𑀸𑀢𑁄 𑀯𑀺𑀬𑀸’’𑀢𑀺 𑀖𑀡𑁆𑀟𑀸𑀪𑀺𑀖𑀸𑀢𑁂𑀦 𑀧𑀣𑀫𑀼𑀧𑁆𑀧𑀦𑁆𑀦𑀲𑀤𑁆𑀤𑁄 𑀯𑀺𑀬𑀸𑀢𑀺 𑀯𑀤𑀦𑁆𑀢𑀺. 𑀢𑀣𑀸𑀳𑀺 𑀯𑀺𑀘𑀸𑀭𑁄 𑀖𑀡𑁆𑀟𑀲𑁆𑀲 𑀅𑀦𑀼𑀭𑀯𑁄 𑀯𑀺𑀬 𑀯𑀼𑀢𑁆𑀢𑁄𑀢𑀺. 𑀤𑀡𑁆𑀟𑀓𑁂𑀦 𑀖𑀡𑁆𑀟𑀲𑁆𑀲 𑀅𑀪𑀺𑀖𑀸𑀢 𑀓𑀺𑀭𑀺𑀬𑀸 𑀯𑀸 𑀖𑀡𑁆𑀟𑀸𑀪𑀺𑀖𑀸𑀢𑁄. 𑀢𑀣𑀸𑀳𑀺 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀧𑀣𑀫𑀸𑀪𑀺 𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄𑀢𑀺 𑀘, 𑀆𑀳𑀦𑀦 𑀧𑀭𑀺𑀬𑀸𑀳𑀦𑀦 𑀭𑀲𑁄𑀢𑀺 𑀘 𑀯𑀼𑀢𑁆𑀢𑀁. ‘‘𑀖𑀡𑁆𑀟𑀸𑀦𑀼𑀭𑀯𑁄 𑀯𑀺𑀬𑀸’’𑀢𑀺 𑀖𑀡𑁆𑀟𑀲𑁆𑀲 𑀅𑀦𑀼𑀭𑀯𑀲𑀤𑁆𑀤𑁄 𑀯𑀺𑀬.

𑁭𑁮. 𑀅𑀥𑀺𑀫𑁄𑀓𑁆𑀔𑀯𑀘𑀦𑀢𑁆𑀣𑁂. ‘‘𑀲𑀁𑀲𑀧𑁆𑀧𑀦𑀁’’𑀢𑀺 𑀅𑀦𑀯𑀢𑁆𑀣𑀸𑀦𑀁. ‘‘𑀧𑀓𑁆𑀔𑀢𑁄 𑀫𑀼𑀘𑁆𑀘𑀦𑀯𑀲𑁂𑀦𑀸’’𑀢𑀺 𑀏𑀯𑀁 𑀦𑀼 𑀔𑁄𑀢𑀺 𑀏𑀓𑁄 𑀧𑀓𑁆𑀔𑁄, 𑀦𑁄𑀦𑀼 𑀔𑁄𑀢𑀺 𑀤𑀼𑀢𑀻𑀬𑁄 𑀧𑀓𑁆𑀔𑁄. 𑀢𑀸𑀤𑀺𑀲𑀫𑁆𑀳𑀸 𑀧𑀓𑁆𑀔𑀢𑁄 𑀫𑀼𑀘𑁆𑀘𑀦𑀯𑀲𑁂𑀦.

𑁭𑁯. 𑀯𑀻𑀭𑀺𑀬𑀯𑀘𑀦𑀢𑁆𑀣𑁂. ‘‘𑀯𑀻𑀭𑀲𑁆𑀲𑀸’’𑀢𑀺 𑀯𑀺𑀲𑁆𑀲𑀝𑁆𑀞𑀲𑁆𑀲. 𑀲𑁄 𑀘 𑀓𑀸𑀬𑀯𑀘𑀻𑀫𑀦𑁄 𑀓𑀫𑁆𑀫𑁂𑀲𑀼 𑀧𑀘𑁆𑀘𑀼 𑀧𑀝𑁆𑀞𑀺𑀢𑁂𑀲𑀼 𑀲𑀻𑀢𑀼𑀡𑁆𑀳𑀸𑀤𑀺 𑀤𑀼𑀓𑁆𑀔 𑀪𑀬𑀢𑁄 𑀅𑀮𑀻𑀦 𑀯𑀼𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀓𑀫𑁆𑀫𑀲𑀽𑀭𑀲𑁆𑀲𑀸’’𑀢𑀺. 𑀏𑀢𑁂𑀦 𑀅𑀦𑁄𑀢𑁆𑀢𑀧𑁆𑀧𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀦𑁄𑀢𑁆𑀢𑀯𑁆𑀯𑀻𑀳𑀺 𑀧𑀸𑀧𑀲𑀽𑀭𑁄, 𑀅𑀬𑀁 𑀓𑀫𑁆𑀫 𑀲𑀽𑀭𑁄𑀢𑀺. ‘‘𑀫𑀳𑀦𑁆𑀢𑀁 𑀧𑀺𑀓𑀫𑁆𑀫’’𑀦𑁆𑀢𑀺 𑀓𑀼𑀲𑀻𑀢𑀲𑁆𑀲 𑀫𑀳𑀦𑁆𑀢𑀦𑁆𑀢𑀺 𑀫𑀜𑁆𑀜𑀺𑀢𑀁 𑀓𑀫𑁆𑀫𑀁. 𑀏𑀯𑀁 𑀲𑁂𑀲𑁂𑀲𑀼. ‘‘𑀅𑀧𑁆𑀧𑀓𑀢𑁄 𑀕𑀡𑁆𑀳𑀸𑀢𑀻’’𑀢𑀺 𑀅𑀧𑁆𑀧𑀓𑀪𑀸𑀯𑁂𑀦 𑀕𑀡𑁆𑀳𑀸𑀢𑀺. 𑀅𑀧𑁆𑀧𑀓𑀫𑁂𑀯𑀺𑀤𑀦𑁆𑀢𑀺 𑀫𑀜𑁆𑀜𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀢𑁆𑀢 𑀓𑀺𑀮𑀫𑀣𑀁’’𑀢𑀺 𑀓𑀸𑀬𑀘𑀺𑀢𑁆𑀢𑀓𑁆𑀔𑁂𑀤𑀁. ‘‘𑀢𑀁’’𑀢𑀺 𑀯𑀻𑀭𑀺𑀬𑀁. ‘‘𑀢𑀣𑀸𑀧𑀯𑀢𑁆𑀢𑀺𑀬𑀸’’𑀢𑀺 𑀓𑀫𑁆𑀫𑀲𑀽𑀭𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸. ‘‘𑀳𑁂𑀢𑀼𑀘𑁂 𑀯𑀸’’𑀢𑀺 𑀏𑀢𑁂𑀦 𑀪𑀸𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺. ‘‘𑀓𑀸𑀬𑀘𑀺𑀢𑁆𑀢 𑀓𑀺𑀭𑀺𑀬𑀸𑀪𑀽𑀢𑀁’’𑀢𑀺 𑀏𑀢𑁂𑀦 𑀓𑀫𑁆𑀫𑀲𑀤𑁆𑀤𑀲𑁆𑀲 𑀅𑀢𑁆𑀣𑀁. ‘‘𑀯𑀺𑀥𑀺𑀦𑀸’’𑀢𑀺 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭 𑀯𑀺𑀥𑀸𑀦𑁂𑀦. 𑀢𑀫𑁂𑀯 𑀯𑀺𑀥𑀸𑀦𑀁 𑀓𑀫𑁆𑀫𑁂𑀲𑀼 𑀦𑁂𑀢𑀩𑁆𑀩𑀢𑁆𑀢𑀸 𑀦𑀬𑁄𑀢𑀺 𑀘, 𑀉𑀧𑁂𑀢𑀩𑁆𑀩𑀢𑁆𑀢𑀸 𑀉𑀧𑀸𑀬𑁄𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀦𑀬𑁂𑀦 𑀉𑀧𑀸𑀬𑁂𑀦𑀸’’𑀢𑀺. 𑀢𑀫𑁂𑀯 𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀺 ‘‘𑀯𑀻𑀭𑀺𑀬𑀯𑀢𑁄’’𑀢𑀺𑀆𑀤𑀺𑀦𑀸. ‘‘𑀈𑀭𑀦𑁆𑀢𑀻’’𑀢𑀺 𑀏𑀭𑀬𑀦𑁆𑀢𑀺. ‘‘𑀓𑀺𑀘𑁆𑀘 𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦 𑀨𑀼𑀲𑀦𑀸𑀤𑀺 𑀓𑀺𑀘𑁆𑀘 𑀲𑀫𑁆𑀧𑀢𑁆𑀢𑀺 𑀅𑀢𑁆𑀣𑀸𑀬. 𑀩𑁆𑀬𑀸𑀯𑀝𑀸𑀦𑀺 𑀓𑀸𑀬𑀘𑀺𑀢𑁆𑀢𑀸𑀦𑀺 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. ‘‘𑀩𑁆𑀬𑀸𑀯𑀝𑀸𑀦𑀻’’𑀢𑀺 𑀉𑀲𑁆𑀲𑀸𑀳𑀺𑀢𑀸𑀦𑀺. ‘‘𑀣𑀽𑀡𑀽𑀧𑀢𑁆𑀣𑀫𑁆𑀪𑀦 𑀲𑀤𑀺𑀲𑀁’’𑀢𑀺 𑀚𑀺𑀡𑁆𑀡𑀲𑁆𑀲 𑀕𑁂𑀳𑀲𑁆𑀲 𑀅𑀧𑀢𑀦𑀢𑁆𑀣𑀸𑀬 𑀲𑀸𑀭𑀢𑁆𑀣𑀫𑁆𑀪𑁂𑀦 𑀉𑀧𑀢𑁆𑀣𑀫𑁆𑀪𑀦𑀲𑀤𑀺𑀲𑀁. 𑀉𑀧𑀢𑁆𑀣𑀫𑁆𑀪𑀓𑀢𑁆𑀣𑀫𑁆𑀪𑀲𑀤𑀺𑀲𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀲𑀩𑁆𑀩 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁’’𑀢𑀺 𑀲𑀩𑁆𑀩𑀸𑀲𑀁 𑀮𑁄𑀓𑀺𑀬 𑀲𑀫𑁆𑀧𑀢𑁆𑀢𑀻𑀦𑀁 𑀮𑁄𑀓𑀼𑀢𑁆𑀢𑀭 𑀲𑀫𑁆𑀧𑀢𑁆𑀢𑀻 𑀦𑀜𑁆𑀘 𑀫𑀽𑀮𑀁. 𑀓𑀲𑁆𑀫𑀸, 𑀧𑀼𑀜𑁆𑀜𑀓𑀫𑁆𑀫 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀸𑀭𑀫𑀺 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀢𑀺𑀝𑁆𑀞𑀸𑀦𑀢𑁆𑀢𑀸. 𑀲𑀢𑀺𑀳𑀺 𑀧𑀼𑀜𑁆𑀜𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸 𑀮𑁄𑀓𑀺𑀬 𑀲𑀫𑁆𑀧𑀢𑁆𑀢𑀺 𑀲𑀺𑀚𑁆𑀛𑀢𑀺. 𑀲𑀢𑀺 𑀘 𑀧𑀸𑀭𑀫𑀺 𑀧𑀼𑀜𑁆𑀜 𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀮𑁄𑀓𑀼𑀢𑁆𑀢𑀭 𑀲𑀫𑁆𑀧𑀢𑁆𑀢𑀺 𑀲𑀺𑀚𑁆𑀛𑀢𑀻𑀢𑀺. 𑀏𑀢𑁂𑀦 𑀳𑀻𑀦 𑀯𑀻𑀭𑀺𑀬𑁄 𑀦𑀸𑀫 𑀲𑀩𑁆𑀩 𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀺𑀩𑀸𑀳𑀺𑀬𑁄𑀢𑀺 𑀤𑀻𑀧𑁂𑀢𑀺.

𑁮𑁦. 𑀧𑀻𑀢𑀺𑀯𑀘𑀦𑀢𑁆𑀣𑁂. ‘‘𑀧𑀺𑀦𑀬𑀢𑀻’’𑀢𑀺 𑀧𑀺𑀦𑁂𑀢𑀺, 𑀧𑀺𑀦𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀢𑀧𑁆𑀧𑁂𑀢𑀻’’𑀢𑀺. 𑀢𑁄𑀲𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀼𑀝𑁆𑀞𑀺𑀁’’𑀢𑀺 𑀢𑀼𑀲𑀺𑀢𑀁, 𑀧𑀳𑀝𑁆𑀞𑀁. ‘‘𑀲𑀼𑀳𑀺𑀢𑀁’’𑀢𑀺 𑀲𑀼𑀥𑀸𑀢𑀁, 𑀲𑀼𑀧𑀼𑀡𑁆𑀡𑀁, 𑀯𑀤𑁆𑀥𑀺𑀢𑀁. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 ‘‘𑀯𑀟𑁆𑀠𑁂𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀧𑀺𑀦𑀦𑁆𑀢𑀻’’𑀢𑀺 𑀢𑀧𑁆𑀧𑀦𑁆𑀢𑀺, 𑀚𑁄𑀢𑀦𑁆𑀢𑀺, 𑀯𑀺𑀭𑁄𑀘𑀦𑁆𑀢𑀺, 𑀤𑀺𑀯𑀸 𑀢𑀧𑁆𑀧𑀢𑀺𑀆𑀤𑀺𑀘𑁆𑀘𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀔𑀼𑀤𑁆𑀤𑀺𑀓𑀸 𑀧𑀻𑀢𑀺 𑀦𑀸𑀫 𑀮𑁄𑀫𑀳𑀁𑀲 𑀦 𑀫𑀢𑁆𑀢𑀓𑀸𑀭𑀺𑀓𑀸 𑀧𑀻𑀢𑀺. 𑀔𑀡𑀺𑀓𑀸 𑀧𑀻𑀢𑀺 𑀦𑀸𑀫 𑀔𑀡𑁂 𑀔𑀡𑁂 𑀯𑀺𑀚𑁆𑀚𑀼𑀧𑁆𑀧𑀸𑀤𑀲𑀤𑀺𑀲𑀸 𑀧𑀻𑀢𑀺. 𑀑𑀓𑁆𑀓𑀦𑁆𑀢𑀺𑀓𑀸 𑀧𑀻𑀢𑀺 𑀦𑀸𑀫 𑀲𑀭𑀻𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀓𑁆𑀓𑀫𑀺𑀢𑁆𑀯𑀸𑀪𑀺𑀚𑁆𑀚𑀦𑁆𑀢𑀻 𑀧𑀻𑀢𑀺. 𑀉𑀩𑁆𑀩𑁂𑀕𑀸𑀧𑀻𑀢𑀺 𑀦𑀸𑀫 𑀓𑀸𑀬𑀁 𑀉𑀤𑀕𑁆𑀕𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀉𑀮𑁆𑀮𑀗𑁆𑀖𑀸𑀧𑁂𑀦𑁆𑀢𑀻 𑀧𑀻𑀢𑀺. 𑀨𑀭𑀡𑀸 𑀧𑀻𑀢𑀺 𑀦𑀸𑀫 𑀓𑀧𑁆𑀧𑀸𑀲𑀯𑀢𑁆𑀢𑀺𑀬𑀁 𑀨𑀭𑀡𑀓𑀢𑁂𑀮𑀁 𑀯𑀺𑀬 𑀲𑀓𑀮𑀓𑀸𑀬𑀁 𑀨𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀻𑀢𑀺.

𑁮𑁧. 𑀙𑀦𑁆𑀤𑀯𑀘𑀦𑀢𑁆𑀣𑁂. ‘‘𑀅𑀪𑀺𑀲𑀦𑁆𑀥𑀻’’𑀢𑀺 𑀅𑀪𑀺𑀮𑀸𑀲𑁄, 𑀅𑀪𑀺𑀓𑀗𑁆𑀔𑀦𑀁. ‘‘𑀓𑀢𑁆𑀢𑀼𑀲𑀤𑁆𑀤𑁄’’𑀢𑀺 𑀓𑀭𑀥𑀸𑀢𑀼 𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀓𑀺𑀭𑀺𑀬𑀸 𑀧𑀤𑀸𑀦𑀻’’𑀢𑀺 𑀲𑀩𑁆𑀩𑀸𑀦𑀺 𑀢𑀼𑀫𑀺𑀘𑁆𑀙𑀢𑁆𑀣 𑀓𑀺𑀭𑀺𑀬𑀸 𑀧𑀤𑀸𑀦𑀺. ‘‘𑀅𑀢𑁆𑀣𑀺𑀓𑁄’’𑀢𑀺 𑀅𑀲𑀺𑀤𑁆𑀥𑁄 𑀳𑀼𑀢𑁆𑀯𑀸 𑀲𑀸𑀥𑁂𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄 𑀅𑀲𑁆𑀲𑀸𑀢𑀺 𑀅𑀢𑁆𑀣𑀺𑀓𑁄. 𑀇𑀘𑁆𑀙𑀦𑁆𑀢𑁄𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀆𑀭𑀸𑀥𑁂𑀢𑀼𑀓𑀸𑀫𑀢𑀸 𑀯𑀲𑁂𑀦𑀸’’𑀢𑀺 𑀲𑀸𑀥𑁂𑀢𑀼 𑀓𑀸𑀫𑀢𑀸𑀯𑀲𑁂𑀦, 𑀲𑀫𑁆𑀧𑀸𑀤𑁂𑀢𑀼 𑀓𑀸𑀫𑀢𑀸 𑀯𑀲𑁂𑀦. 𑀉𑀲𑀼𑀁 𑀲𑀭𑀁 𑀅 𑀲𑀦𑁆𑀢𑀺 𑀔𑀺𑀧𑀦𑁆𑀢𑀻𑀢𑀺 𑀇𑀲𑁆𑀲𑀸𑀲𑀸. 𑀇𑀓𑀸𑀭𑀲𑁆𑀲 𑀉𑀓𑀸𑀭𑁄. 𑀥𑀦𑀼𑀕𑁆𑀕𑀳𑀸. ‘‘𑀬𑀲𑁂𑀦 𑀯𑀸’’𑀢𑀺 𑀧𑀭𑀺𑀯𑀸𑀭𑁂𑀦 𑀯𑀸, 𑀓𑀺𑀢𑁆𑀢𑀺 𑀲𑀤𑁆𑀤𑁂𑀦 𑀯𑀸. ‘‘𑀲𑀭𑁂’’𑀢𑀺 𑀓𑀡𑁆𑀟𑁂. 𑀯𑀺𑀪𑀸𑀯𑀦𑀺𑀧𑀸𑀞𑁂 𑀦𑀸𑀦𑀸𑀯𑀸𑀤 𑀲𑁄𑀥𑀦𑀢𑁆𑀣𑀁 𑀅𑀬𑀜𑁆𑀘𑀸𑀢𑀺𑀆𑀤𑀺𑀯𑀼𑀢𑁆𑀢𑀁. ‘‘𑀬𑀤𑀕𑁆𑀕𑁂𑀦𑀸’’𑀢𑀺 𑀬𑁂𑀦 𑀓𑀸𑀭𑀡 𑀓𑁄𑀝𑁆𑀞𑀸𑀲𑁂𑀦. 𑀲𑀗𑁆𑀕𑀳𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩 𑀬𑀼𑀢𑁆𑀢𑀓𑁂𑀦𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩 𑀬𑁄𑀕𑁆𑀬𑁂𑀦. ‘‘𑀢𑁂𑀦 𑀅𑀢𑁆𑀣𑀺𑀓𑁄 𑀬𑁂𑀯𑀸’’𑀢𑀺 𑀧𑀤𑀼𑀤𑁆𑀥𑀸𑀭𑁄. ‘‘𑀲𑁄 𑀦 𑀬𑀼𑀚𑁆𑀚𑀢𑀻’’𑀢𑀺 𑀲𑁄 𑀅𑀢𑁆𑀣𑁄 𑀦 𑀬𑀼𑀚𑁆𑀚𑀢𑀺. ‘‘𑀔𑀺𑀧𑀺𑀢 𑀉𑀲𑀽𑀦𑀁’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀔𑀺𑀧𑀺𑀢 𑀉𑀲𑀽𑀦𑀁. ‘‘𑀅𑀢𑁆𑀣𑀢𑁄 𑀧𑀦𑀸’’𑀢𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑀢𑁄 𑀧𑀦. ‘‘𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬𑀸’’𑀢𑀺 𑀮𑁄𑀓𑁂 𑀓𑀺𑀜𑁆𑀘𑀺 𑀇𑀘𑁆𑀙𑀦𑁆𑀢𑀲𑁆𑀲 𑀚𑀦𑀲𑁆𑀲 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀣𑀸𑀫𑀧𑀢𑁆𑀢𑁄’’𑀢𑀺 𑀅𑀥𑀺𑀧𑀢𑀺 𑀪𑀸𑀯 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀣𑀸𑀳𑁂𑀲𑀸’’𑀢𑀺𑀆𑀤𑀺𑀁. ‘‘𑀢𑀡𑁆𑀳𑀸𑀬 𑀳𑀢𑁆𑀣𑁂 𑀞𑀺𑀢𑀸’’𑀢𑀺 𑀉𑀧𑀘𑀸𑀭 𑀯𑀘𑀦𑀫𑁂𑀢𑀁. 𑀢𑀡𑁆𑀳𑀸𑀬 𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀲𑀓𑁆𑀔𑀺𑀲𑁆𑀲𑀦𑁆𑀢𑀺𑀬𑁂𑀯, 𑀦𑁄 𑀦𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 𑀙𑀦𑁆𑀤𑁄𑀬𑁂𑀯 𑀢𑀡𑁆𑀳𑀸𑀬 𑀩𑀮𑀯𑀢𑀭𑁄𑀢𑀺. 𑀓𑀲𑁆𑀫𑀸 𑀩𑀮𑀯𑀢𑀭𑁄𑀢𑀺. 𑀆𑀤𑀻𑀦𑀯𑀸𑀦𑀺𑀲𑀁𑀲 𑀤𑀲𑁆𑀲𑀦𑀜𑁆𑀜𑀸𑀡𑁂𑀦 𑀬𑀼𑀢𑁆𑀢𑀢𑁆𑀢𑀸𑀢𑀺.

𑁮𑁨. ‘‘𑀧𑀓𑀺𑀭𑀦𑁆𑀢𑀻’’𑀢𑀺 𑀧𑀢𑁆𑀣𑀭𑀦𑁆𑀢𑀺. ‘‘𑀲𑀫𑀸𑀦𑀸’’𑀢𑀺 𑀲𑀸𑀯𑀚𑁆𑀚𑁂𑀳𑀺 𑀬𑀼𑀢𑁆𑀢𑀸 𑀲𑀸𑀯𑀚𑁆𑀚𑀸, 𑀅𑀦𑀯𑀚𑁆𑀚𑁂𑀳𑀺 𑀬𑀼𑀢𑁆𑀢𑀸 𑀅𑀦𑀯𑀚𑁆𑀚𑀸𑀢𑀺 𑀏𑀯𑀁 𑀲𑀤𑀺𑀲𑀸, 𑀲𑀸𑀥𑀸𑀭𑀡𑀸.

𑀅𑀜𑁆𑀜𑀲𑀫𑀸𑀦𑀭𑀸𑀲𑀺𑀫𑁆𑀳𑀺𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁮𑁩. 𑀅𑀓𑀼𑀲𑀮𑀭𑀸𑀲𑀺𑀫𑁆𑀳𑀺. ‘‘𑀫𑀼𑀬𑁆𑀳𑀢𑀻’’𑀢𑀺 𑀜𑀸𑀢𑀩𑁆𑀩𑀲𑁆𑀲𑀜𑁂𑀬𑁆𑀬 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀡 𑀯𑀲𑁂𑀦 𑀲𑀫𑁆𑀫𑀼𑀬𑁆𑀳𑀢𑀺, 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑁄 𑀳𑁄𑀢𑀺. 𑀘𑀢𑀼𑀭𑀗𑁆𑀕𑀢𑀫𑁄 𑀦𑀸𑀫 ‘𑀓𑀸𑀴𑀧𑀓𑁆𑀔 𑀘𑀸𑀢𑀼𑀤𑁆𑀤𑀲𑀺 𑀤𑀺𑀯𑀲𑁄, 𑀅𑀟𑁆𑀠𑀭𑀢𑁆𑀢𑀺 𑀲𑀫𑀬𑁄, 𑀢𑀺𑀩𑁆𑀩𑀯𑀦𑀲𑀡𑁆𑀟𑁄, 𑀩𑀳𑀮𑀫𑁂𑀖𑀘𑁆𑀙𑀦𑁆𑀦𑁄,𑀢𑀺 𑀅𑀬𑀁 𑀘𑀢𑀼𑀭𑀗𑁆𑀕𑀢𑀫𑁄. 𑀲𑁄 𑀘𑀓𑁆𑀔𑀼𑀲𑁆𑀲 𑀅𑀦𑁆𑀥𑀪𑀸𑀯𑀁 𑀓𑀭𑁄𑀢𑀺. 𑀏𑀯𑀁 𑀢𑀲𑁆𑀲 𑀢𑀫𑀲𑁆𑀲 𑀘𑀓𑁆𑀔𑀼𑀲𑁆𑀲 𑀅𑀦𑁆𑀥𑀪𑀸𑀯𑀓𑀭𑀡𑀁 𑀯𑀺𑀬. 𑀜𑀸𑀡𑀕𑀢𑀺𑀓𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄 𑀅𑀝𑁆𑀞𑀓𑀣𑀸 𑀦𑀬𑁂𑀦. 𑀢𑀫𑁂𑀯 𑀅𑀝𑁆𑀞𑀓𑀣𑀸 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀳𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 𑀧𑀦 𑀫𑀺𑀘𑁆𑀙𑀸 𑀜𑀸𑀡𑀦𑁆𑀢𑀺 𑀫𑀺𑀘𑁆𑀙𑀸 𑀯𑀺𑀢𑀓𑁆𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀫𑀺𑀘𑁆𑀙𑀸 𑀲𑀗𑁆𑀓𑀧𑁆𑀧𑁄 𑀳𑀼𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭 𑀘𑀺𑀦𑁆𑀢𑀸 𑀧𑀯𑀢𑁆𑀢𑀺 𑀯𑀲𑁂𑀦 𑀜𑀸𑀡𑀕𑀢𑀺𑀓𑁄 𑀳𑁄𑀢𑀺. 𑀫𑁄𑀳𑁄 𑀧𑀦 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀻 𑀪𑀽𑀢𑁄, 𑀦𑀸𑀦𑀸𑀘𑀺𑀦𑁆𑀢𑀦 𑀓𑀺𑀘𑁆𑀘 𑀭𑀳𑀺𑀢𑁄, 𑀓𑀣𑀁 𑀜𑀸𑀡𑀕𑀢𑀺𑀓𑁄 𑀪𑀯𑁂𑀬𑁆𑀬𑀸𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀸𑀧 𑀓𑀺𑀭𑀺𑀬𑀸𑀲𑀽’’𑀢𑀺 𑀤𑀼𑀘𑁆𑀘𑀭𑀺𑀢 𑀓𑀫𑁆𑀫𑁂𑀲𑀼. ‘‘𑀉𑀧𑀸𑀬 𑀘𑀺𑀦𑁆𑀢𑀸𑀯𑀲𑁂𑀦𑀸’’𑀢𑀺 𑀓𑀢𑀓𑀫𑁆𑀫𑀲𑁆𑀲 𑀲𑀺𑀤𑁆𑀥𑀢𑁆𑀣𑀸𑀬 𑀲𑀢𑁆𑀣𑀸𑀯𑀼𑀥𑀸𑀤𑀺𑀯𑀺𑀥𑀸𑀦𑁂𑀲𑀼 𑀦𑀸𑀦𑀸𑀉𑀧𑀸𑀬 𑀘𑀺𑀦𑁆𑀢𑀸𑀯𑀲𑁂𑀦. 𑀅𑀧𑁆𑀧𑀝𑀺 𑀧𑀚𑁆𑀚𑀦𑀁 𑀅𑀧𑁆𑀧𑀝𑀺 𑀧𑀢𑁆𑀢𑀺. 𑀜𑀸𑀡 𑀕𑀢𑀺𑀁 𑀅𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑀸𑀡𑀫𑁂𑀯 𑀯𑀼𑀘𑁆𑀘𑀢𑀻’’𑀢𑀺. ‘‘𑀜𑀸𑀡𑀕𑀢𑀺𑀓𑀸’’𑀢𑀺 𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀲𑀫𑀸𑀦𑀧𑁆𑀧𑀯𑀢𑁆𑀢𑀺𑀓𑀸. 𑀮𑁄𑀪𑁄 𑀜𑀸𑀡 𑀕𑀢𑀺𑀓𑁄 𑀫𑀸𑀬𑀸𑀲𑀸𑀞𑁂𑀬𑁆𑀬 𑀓𑀫𑁆𑀫𑁂𑀲𑀼 𑀯𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀢𑁆𑀢𑀸. 𑀯𑀺𑀘𑀸𑀭𑁄 𑀜𑀸𑀡 𑀕𑀢𑀺𑀓𑁄. 𑀢𑀣𑀸𑀳𑀺 𑀲𑁄 𑀛𑀸𑀦𑀗𑁆𑀕𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀝𑀺𑀧𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀘𑀺𑀢𑁆𑀢𑀲𑁆𑀲 𑀜𑀸𑀡 𑀕𑀢𑀺 𑀓𑀢𑀸 𑀯𑀺𑀘𑀺𑀢𑁆𑀢𑀢𑁆𑀣𑀯𑀸𑀘𑀓𑁂𑀦 𑀘𑀺𑀢𑁆𑀢𑀲𑀤𑁆𑀤𑁂𑀦 𑀲𑀺𑀤𑁆𑀥𑁄. 𑀢𑁂 𑀘 𑀥𑀫𑁆𑀫𑀸 𑀲𑀩𑁆𑀩 𑀲𑀢𑁆𑀢𑁂𑀲𑀼 𑀜𑀸𑀡 𑀕𑀢𑀺𑀓𑀸 𑀦 𑀳𑁄𑀦𑁆𑀢𑀺. 𑀜𑀸𑀡𑀽𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑁂 𑀲𑀸𑀥𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀓𑀢𑀺𑀬𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀦𑀸𑀫 𑀢𑀺𑀳𑁂𑀢𑀼𑀓𑀧𑁆𑀧𑀝𑀺 𑀲𑀦𑁆𑀥𑀺𑀓𑀸. 𑀅𑀜𑁆𑀜𑀧𑁆𑀧𑀝𑀺 𑀲𑀦𑁆𑀥𑀺𑀓𑀸𑀧𑀺 𑀩𑁄𑀥𑀺𑀲𑀢𑁆𑀢 𑀪𑀽𑀫𑀺𑀬𑀁 𑀞𑀺𑀢𑀸 𑀯𑀸 𑀧𑀜𑁆𑀜𑀸𑀧𑀲𑀼𑀢 𑀪𑀯𑀢𑁄 𑀆𑀕𑀢𑀸 𑀯𑀸. 𑀲𑀼𑀢𑀧𑀭𑀺𑀬𑀢𑁆𑀢𑀺 𑀲𑀫𑁆𑀧𑀦𑁆𑀦𑀸 𑀦𑀸𑀫 𑀤𑁆𑀯𑀺𑀳𑁂𑀢𑀼𑀓𑀧𑁆𑀧𑀝𑀺 𑀲𑀦𑁆𑀥𑀺𑀓𑀸𑀧𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀩𑀳𑀼𑀲𑁆𑀲𑀼𑀢 𑀲𑀫𑁆𑀧𑀦𑁆𑀦𑀸 𑀘 𑀧𑀭𑀺𑀬𑀢𑁆𑀢𑀺 𑀓𑀫𑁆𑀫 𑀲𑀫𑁆𑀧𑀦𑁆𑀦𑀸 𑀘.

𑁮𑁪. 𑀅𑀳𑀺𑀭𑀺𑀓𑀯𑀘𑀦𑀢𑁆𑀣𑁂. ‘‘𑀦 𑀳𑀺𑀭𑀻𑀬𑀢𑀻’’𑀢𑀺 𑀦𑀸𑀫 𑀥𑀸𑀢𑀼 𑀧𑀤𑀫𑁂𑀢𑀁. 𑀳𑀭𑀸𑀬𑀢𑀺 𑀮𑀚𑁆𑀚𑀢𑀻𑀢𑀺 𑀳𑀺𑀭𑀻. 𑀳𑀭𑁂 𑀮𑀚𑁆𑀚𑀸𑀬𑀁𑀢𑀺 𑀥𑀸𑀢𑀼. 𑀦 𑀳𑀺𑀭𑀻 𑀅𑀳𑀺𑀭𑀻𑀢𑀺 𑀯𑀘𑀦𑀢𑁆𑀣𑁄. ‘‘𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺 𑀕𑀸𑀫𑀲𑀽 𑀓𑀭𑀲𑁆𑀲 𑀕𑀽𑀣𑀭𑀸𑀲𑀺 𑀤𑀲𑁆𑀲𑀦𑁂 𑀯𑀺𑀬 𑀘𑀺𑀢𑁆𑀢𑀭𑁄𑀘𑀦 𑀘𑀺𑀢𑁆𑀢 𑀔𑀫𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀅𑀢𑁆𑀢𑀸𑀦𑀁 𑀧𑀸𑀧𑀓𑀫𑁆𑀫 𑀮𑀺𑀫𑁆𑀧𑀢𑁄 𑀘𑀺𑀢𑁆𑀢𑀲𑁆𑀲 𑀅𑀮𑀻𑀦𑀢𑀸 𑀅𑀚𑀺𑀕𑀼𑀘𑁆𑀙𑀦𑀁 𑀦𑀸𑀫. 𑀅𑀢𑁆𑀢𑀸𑀦𑀁 𑀅𑀲𑀧𑁆𑀧𑀼𑀭𑀺𑀲 𑀪𑀸𑀯𑀧𑀢𑁆𑀢𑀺𑀢𑁄 𑀘𑀺𑀢𑁆𑀢𑀲𑁆𑀲 𑀅𑀮𑀻𑀦𑀢𑀸 𑀅𑀮𑀚𑁆𑀚𑀸 𑀦𑀸𑀫.

𑁮𑁫. 𑀅𑀦𑁄𑀢𑁆𑀢𑀧𑁆𑀧𑀯𑀘𑀦𑀢𑁆𑀣𑁂. ‘‘𑀦 𑀪𑀸𑀬𑀢𑀻’’𑀢𑀺 𑀧𑀸𑀧𑀓𑀫𑁆𑀫𑀁 𑀪𑀬𑀢𑁄 𑀦 𑀉𑀧𑀝𑁆𑀞𑀸𑀢𑀺. ‘‘𑀦 𑀉𑀢𑁆𑀭𑀲𑀢𑀻’’𑀢𑀺 𑀧𑀸𑀧𑀓𑀫𑁆𑀫 𑀳𑁂𑀢𑀼 𑀦 𑀓𑀫𑁆𑀧𑀢𑀺. ‘‘𑀢𑀸𑀲𑀽’’𑀢𑀺 𑀧𑀸𑀧𑀓𑀺𑀭𑀺𑀬𑀸𑀲𑀼. ‘‘𑀅𑀲𑀸𑀭𑀚𑁆𑀚𑀫𑀸𑀦𑀁 𑀓𑀢𑁆𑀯𑀸’’𑀢𑀺 𑀲𑀽𑀭𑀁 𑀯𑀺𑀲𑁆𑀲𑀝𑁆𑀞𑀁 𑀓𑀢𑁆𑀯𑀸. 𑀅𑀲𑀸𑀭𑀚𑁆𑀚𑀁 𑀦𑀸𑀫 𑀲𑀽𑀭𑀪𑀸𑀯𑁄. 𑀅𑀦𑀼𑀢𑁆𑀢𑀸𑀲𑁄 𑀦𑀸𑀫 𑀧𑀸𑀧𑀓𑀫𑁆𑀫 𑀳𑁂𑀢𑀼 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀧𑀦𑀁. 𑀕𑀸𑀣𑀸𑀬𑀁. 𑀅𑀚𑀺𑀕𑀼𑀘𑁆𑀙𑀦𑀲𑀻𑀮𑁄 𑀧𑀼𑀕𑁆𑀕𑀮𑁄 𑀅𑀚𑁂𑀕𑀼𑀘𑁆𑀙𑀻. ‘‘𑀧𑀸𑀧𑀸’’𑀢𑀺 𑀧𑀸𑀧𑀓𑀫𑁆𑀫𑀢𑁄. ‘‘𑀲𑀽𑀓𑀭𑁄’’𑀢𑀺 𑀕𑀸𑀫𑀲𑀽𑀓𑀭𑁄. 𑀲𑁄 𑀕𑀽𑀣𑀢𑁄 𑀅𑀚𑁂𑀕𑀼𑀘𑁆𑀙𑀻. 𑀅𑀳𑀺𑀭𑀺𑀓𑁄 𑀧𑀸𑀧𑀢𑁄 𑀅𑀚𑁂𑀕𑀼𑀘𑁆𑀙𑀻𑀢𑀺 𑀬𑁄𑀚𑀦𑀸. 𑀅𑀪𑀸𑀬𑀦𑀲𑀻𑀮𑁄 𑀅𑀪𑀻𑀭𑀽. ‘‘𑀲𑀮𑀪𑁄’’𑀢𑀺 𑀧𑀝𑀗𑁆𑀕𑁄. ‘‘𑀧𑀸𑀯𑀓𑀸’’𑀢𑀺 𑀤𑀻𑀧𑀚𑀸𑀮𑀫𑁆𑀳𑀸. 𑀲𑀮𑀪𑁄 𑀧𑀸𑀯𑀓𑀫𑁆𑀳𑀸 𑀅𑀪𑀻𑀭𑀽 𑀯𑀺𑀬 𑀅𑀦𑁄𑀢𑁆𑀢𑀯𑁆𑀯𑀻 𑀧𑀸𑀧𑀢𑁄 𑀅𑀪𑀻𑀭𑀽𑀢𑀺 𑀬𑁄𑀚𑀦𑀸.

𑁮𑁬. 𑀉𑀤𑁆𑀥𑀘𑁆𑀘𑀯𑀘𑀦𑀢𑁆𑀣𑁂. ‘‘𑀉𑀤𑁆𑀥𑀭𑀢𑀻’’𑀢𑀺 𑀉𑀓𑁆𑀔𑀺𑀧𑀢𑀺. 𑀆𑀭𑀫𑁆𑀫𑀡𑀲𑁆𑀫𑀺𑀁 𑀦 𑀲𑀦𑁆𑀦𑀺 𑀲𑀻𑀤𑀢𑀺. 𑀯𑀺𑀓𑁆𑀔𑀺𑀧𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀝𑁆𑀝𑁂𑀢𑁆𑀯𑀸’’𑀢𑀺 𑀆𑀯𑀝𑁆𑀝𑁂𑀢𑁆𑀯𑀸. ‘‘𑀯𑀺𑀲𑁆𑀲𑀝𑁆𑀞𑀕𑁂𑀡𑁆𑀟𑀼𑀓𑁄 𑀯𑀺𑀬𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑁄 𑀲𑀸𑀭𑀕𑁂𑀡𑁆𑀟𑀼𑀓𑁄 𑀯𑀺𑀬. ‘‘𑀥𑀚𑀧𑀝𑀸𑀓𑀸 𑀯𑀺𑀬𑀸’’𑀢𑀺 𑀯𑀸𑀢𑁂𑀭𑀺𑀢𑀸 𑀥𑀚𑀧𑀝𑀸𑀓𑀸 𑀯𑀺𑀬.

𑁮𑁭. 𑀮𑁄𑀪𑀯𑀘𑀦𑀢𑁆𑀣𑁂. ‘‘𑀮𑀼𑀩𑁆𑀪𑀢𑀻’’𑀢𑀺 𑀕𑀺𑀚𑁆𑀛𑀢𑀺, 𑀅𑀪𑀺𑀓𑀗𑁆𑀔𑀢𑀺. 𑀅𑀪𑀺𑀲𑀚𑁆𑀚𑀦𑀁 𑀅𑀪𑀺𑀮𑀕𑁆𑀕𑀦𑀁. 𑀫𑀓𑁆𑀓𑀝𑀁 𑀆𑀮𑀺𑀫𑁆𑀧𑀢𑀺 𑀩𑀦𑁆𑀥𑀢𑀺 𑀏𑀢𑁂𑀦𑀸𑀢𑀺 𑀫𑀓𑁆𑀓𑀝𑀸 𑀮𑁂𑀧𑁄. ‘‘𑀢𑀢𑁆𑀢 𑀓𑀧𑀸𑀮𑁂’’𑀢𑀺 𑀅𑀕𑁆𑀕𑀺𑀦𑀸𑀲𑀦𑁆𑀢𑀢𑁆𑀢𑁂 𑀖𑀝 𑀓𑀧𑀸𑀮𑁂. 𑀢𑁂𑀮𑀲𑁆𑀲 𑀯𑀢𑁆𑀣𑀫𑁆𑀳𑀺 𑀅𑀜𑁆𑀚𑀦𑀁 𑀅𑀪𑀺𑀮𑀕𑁆𑀕𑀦𑀁 𑀢𑁂𑀮𑀜𑁆𑀚𑀦𑀁. 𑀭𑀚𑁆𑀚𑀦𑀁 𑀧𑀝𑀺𑀲𑀚𑁆𑀚𑀦𑀁 𑀭𑀸𑀕𑁄. 𑀢𑁂𑀮𑀜𑁆𑀚𑀦 𑀪𑀽𑀢𑁄 𑀭𑀸𑀕𑁄 𑀢𑁂𑀮𑀜𑁆𑀚𑀦 𑀭𑀸𑀕𑁄. 𑀦 𑀓𑀺𑀮𑁂𑀲𑀭𑀸𑀕𑁄. 𑀭𑀢𑁆𑀢𑀺 𑀤𑀺𑀯𑀁 𑀧𑀯𑀢𑁆𑀢𑀦𑀝𑁆𑀞𑁂𑀦 𑀢𑀡𑁆𑀳𑀸 𑀏𑀯 𑀦𑀤𑀻𑀲𑁄𑀢𑀲𑀤𑀺𑀲𑀢𑁆𑀢𑀸 𑀢𑀡𑁆𑀳𑀸 𑀦𑀤𑀻. ‘‘𑀲𑀢𑁆𑀢𑀸𑀦𑀁’’𑀢𑀺 𑀧𑀼𑀣𑀼𑀚𑁆𑀚𑀦 𑀲𑀢𑁆𑀢𑀸𑀦𑀁. ‘‘𑀲𑀼𑀓𑁆𑀔𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀢𑀺𑀡𑀓𑀲𑀝𑀸𑀦𑀻’’𑀢𑀺 𑀲𑀼𑀓𑁆𑀔 𑀓𑀝𑁆𑀞𑀓𑀲𑀝𑀸𑀦𑀺, 𑀲𑀼𑀓𑁆𑀔 𑀲𑀸𑀔𑀸 𑀓𑀲𑀝𑀸𑀦𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀲𑀝 𑀲𑀤𑁆𑀤𑁂𑀦 𑀅𑀲𑀸𑀭𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀦𑀤𑀻 𑀯𑀺𑀬𑀸’’𑀢𑀺 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻 𑀯𑀺𑀬.

𑁮𑁮. 𑀤𑀺𑀝𑁆𑀞𑀺𑀯𑀘𑀦𑀢𑁆𑀣𑁂. ‘‘𑀤𑀲𑁆𑀲𑀦𑀁’’𑀢𑀺 𑀧𑀭𑀺𑀓𑀧𑁆𑀧𑀦𑀸 𑀲𑀺𑀤𑁆𑀥𑁂𑀲𑀼 𑀫𑀺𑀘𑁆𑀙𑀸 𑀲𑀪𑀸𑀯𑁂𑀲𑀼 𑀯𑀺𑀧𑀭𑀻𑀢 𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀥𑀫𑁆𑀫𑀸𑀦𑀁’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀥𑀫𑁆𑀫𑀸𑀦𑀁’’𑀢𑀺 𑀭𑀽𑀧𑀸𑀭𑀽𑀧 𑀥𑀫𑁆𑀫𑀸𑀦𑀁, 𑀅𑀦𑀺𑀘𑁆𑀘𑀢𑀸𑀤𑀺 𑀥𑀫𑁆𑀫𑀸𑀦𑀜𑁆𑀘. ‘‘𑀬𑀸𑀣𑀸𑀯 𑀲𑀪𑀸𑀯𑁂𑀲𑀽’’𑀢𑀺 𑀪𑀽𑀢𑀲𑀪𑀸𑀯𑁂𑀲𑀼. 𑀪𑀽𑀢𑀲𑀪𑀸𑀯𑁄 𑀳𑀺 𑀬𑀣𑀸 𑀥𑀫𑁆𑀫𑀁 𑀅𑀯𑀢𑀺 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁂𑀦 𑀬𑀸𑀣𑀸𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀸𑀦𑀁 𑀧𑀡𑁆𑀟𑀺𑀢𑀁 𑀫𑀜𑁆𑀜𑀦𑁆𑀢𑀻𑀢𑀺 𑀧𑀡𑁆𑀟𑀺𑀢 𑀫𑀸𑀦𑀺𑀦𑁄. 𑀧𑀝𑀺𑀯𑁂𑀥𑀜𑁆𑀜𑀸𑀡𑀁 𑀦𑀸𑀫 𑀅𑀭𑀺𑀬 𑀫𑀕𑁆𑀕𑀜𑁆𑀜𑀸𑀡𑀁. 𑀧𑀭𑀫𑀁 𑀯𑀚𑁆𑀚𑀦𑁆𑀢𑀺 𑀤𑀝𑁆𑀞𑀩𑁆𑀩𑀸 𑀮𑁄𑀓𑁂 𑀫𑀳𑀸𑀲𑀸𑀯𑀚𑁆𑀚𑀝𑁆𑀞𑁂𑀦 𑀢𑀁 𑀲𑀤𑀺𑀲𑀲𑁆𑀲 𑀅𑀜𑁆𑀜𑀲𑁆𑀲 𑀯𑀚𑁆𑀚𑀲𑁆𑀲 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁯. 𑀫𑀸𑀦𑀯𑀘𑀦𑀢𑁆𑀣𑁂. ‘‘𑀫𑀜𑁆𑀜𑀢𑀻’’𑀢𑀺 𑀪𑀽𑀢𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀅𑀥𑀺𑀓𑀁 𑀓𑀢𑁆𑀯𑀸 𑀅𑀳𑀫𑀲𑁆𑀫𑀻𑀢𑀺𑀆𑀤𑀺𑀦𑀸 𑀢𑁂𑀦 𑀢𑁂𑀦 𑀅𑀪𑀽𑀢𑀸𑀓𑀸𑀭𑁂𑀦 𑀫𑀜𑁆𑀜𑀢𑀺. 𑀢𑁂𑀦𑀸𑀳 ‘‘𑀅𑀳𑀁 𑀮𑁄𑀓𑁂’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀓𑀝𑁆𑀞𑀓𑀣𑀺𑀗𑁆𑀕𑀭𑁄 𑀯𑀺𑀬𑀸’’𑀢𑀺 𑀲𑀼𑀓𑁆𑀔𑀤𑀸𑀭𑀼𑀓𑁆𑀔𑀦𑁆𑀥𑁄 𑀯𑀺𑀬. 𑀲𑁄 𑀧𑀦 𑀉𑀧𑀢𑁆𑀣𑀫𑁆𑀪𑀺𑀢𑁄 𑀫𑀜𑁆𑀜𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀢𑁆𑀢𑀸𑀦𑀁 𑀅𑀘𑁆𑀘𑀼𑀕𑁆𑀕𑀢𑀁 𑀫𑀜𑁆𑀜𑀢𑀻’’𑀢𑀺 𑀧𑀼𑀕𑁆𑀕𑀮𑀁 𑀫𑀸𑀦𑁂𑀦 𑀅𑀪𑀺𑀦𑁆𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀉𑀦𑁆𑀦𑀢𑀺 𑀮𑀓𑁆𑀔𑀡𑁄’’𑀢𑀺 𑀉𑀦𑁆𑀦𑀫𑀦 𑀲𑀪𑀸𑀯𑁄.

𑁯𑁦. 𑀤𑁄𑀲𑀯𑀘𑀦𑀢𑁆𑀣𑁂. 𑀘𑀡𑁆𑀟𑁂𑀦 𑀓𑀸𑀬𑀯𑀘𑀻 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀡𑁆𑀟𑀺𑀓𑁄. 𑀘𑀡𑁆𑀟𑀺𑀓𑀲𑁆𑀲 𑀪𑀸𑀯𑁄 𑀘𑀡𑁆𑀟𑀺𑀓𑁆𑀓𑀁. ‘‘𑀧𑀳𑀢𑀸𑀲𑀻𑀯𑀺𑀲𑁄 𑀯𑀺𑀬𑀸’’𑀢𑀺 𑀤𑀡𑁆𑀟𑁂𑀦 𑀧𑀳𑀢𑁄 𑀆𑀲𑀻𑀯𑀺𑀲𑁄 𑀯𑀺𑀬. ‘‘𑀯𑀺𑀲𑀧𑁆𑀧𑀦𑀝𑁆𑀞𑁂𑀦𑀸’’𑀢𑀺 𑀲𑀓𑀮𑀓𑀸𑀬𑁂 𑀯𑀺𑀯𑀺𑀥𑁂𑀦 𑀲𑀧𑁆𑀧𑀦𑀝𑁆𑀞𑁂𑀦, 𑀨𑀭𑀡𑀝𑁆𑀞𑁂𑀦. 𑀇𑀤𑀜𑁆𑀘 𑀢𑀁 𑀲𑀫𑀼𑀝𑁆𑀞𑀸𑀦 𑀭𑀽𑀧𑀸𑀦𑀁 𑀨𑀭𑀡 𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀅𑀲𑀦𑀺𑀧𑀸𑀢𑁄 𑀯𑀺𑀬𑀸’’𑀢𑀺 𑀲𑀼𑀓𑁆𑀔𑀸 𑀲𑀦𑀺𑀧𑀢𑀦𑀁 𑀯𑀺𑀬. ‘‘𑀤𑀸𑀯𑀕𑁆𑀕𑀺𑀯𑀺𑀬𑀸’’𑀢𑀺 𑀅𑀭𑀜𑁆𑀜𑀕𑁆𑀕𑀺 𑀯𑀺𑀬. ‘‘𑀲𑀧𑀢𑁆𑀢𑁄 𑀯𑀺𑀬𑀸’’𑀢𑀺 𑀤𑀼𑀝𑁆𑀞𑀯𑁂𑀭𑀻 𑀯𑀺𑀬. ‘‘𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬𑀸’’𑀢𑀺 𑀬𑀣𑀸 𑀫𑀼𑀢𑁆𑀢𑀁 𑀦𑀸𑀫 𑀧𑀓𑀢𑀺𑀬𑀸 𑀏𑀯 𑀤𑀼𑀕𑁆𑀕𑀦𑁆𑀥𑀢𑁆𑀢𑀸 𑀧𑀝𑀺𑀓𑀼𑀮𑀢𑁆𑀢𑀸 𑀤𑀽𑀭𑁂 𑀙𑀝𑁆𑀝𑀦𑀻𑀬𑀦𑁆𑀢𑀺 𑀅𑀳𑀺𑀢𑀫𑁂𑀯 𑀳𑁄𑀢𑀺. 𑀧𑀼𑀦 𑀧𑀽𑀢𑀺𑀪𑀸𑀯𑁂 𑀲𑀢𑀺, 𑀤𑀽𑀭𑀢𑀭𑁂 𑀙𑀝𑁆𑀝𑁂𑀢𑀩𑁆𑀩𑀁. 𑀯𑀺𑀲𑀲𑀁𑀲𑀝𑁆𑀞𑁂𑀧𑀦 𑀯𑀢𑁆𑀢𑀩𑁆𑀩𑀫𑁂𑀯𑀦𑀢𑁆𑀣𑀺. 𑀲𑀩𑁆𑀩𑀲𑁄 𑀅𑀳𑀺𑀢𑀭𑀸𑀲𑀺 𑀳𑁄𑀢𑀺. 𑀏𑀯𑀁 𑀤𑁄𑀲𑁄𑀧𑀺 𑀢𑀁 𑀲𑀫𑀗𑁆𑀕𑀻𑀦𑁄 𑀢𑀲𑁆𑀫𑀺𑀁 𑀔𑀡𑁂 𑀧𑀭𑁂𑀲𑀁 𑀅𑀫𑀦𑀸𑀧𑀺𑀬𑀢𑀁 𑀆𑀧𑀸𑀤𑁂𑀢𑀺. 𑀅𑀢𑁆𑀢𑀳𑀺𑀢 𑀧𑀭𑀳𑀺𑀢 𑀯𑀺𑀦𑀸𑀲𑀜𑁆𑀘 𑀓𑀸𑀭𑁂𑀢𑀺, 𑀧𑀭𑀫𑁆𑀫𑀭𑀡𑀸 𑀅𑀧𑀸𑀬𑀜𑁆𑀘 𑀧𑀸𑀧𑁂𑀢𑀻𑀢𑀺 𑀲𑀩𑁆𑀩𑀲𑁄 𑀅𑀳𑀺𑀢𑀭𑀸𑀲𑀺 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺 𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄’’𑀢𑀺.

𑁯𑁧. 𑀇𑀲𑁆𑀲𑀸𑀯𑀘𑀦𑀢𑁆𑀣𑁂. 𑀤𑀼𑀯𑀺𑀥𑀸 𑀇𑀲𑁆𑀲𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺 𑀯𑀺𑀲𑀬𑀸 𑀘𑀮𑀪𑀺𑀢𑀩𑁆𑀩 𑀲𑀫𑁆𑀧𑀢𑁆𑀢𑀺 𑀯𑀺𑀲𑀬𑀸 𑀘. 𑀢𑀢𑁆𑀣 𑀮𑀤𑁆𑀥 𑀲𑀫𑁆𑀧𑀢𑁆𑀢𑀺 𑀯𑀺𑀲𑀬𑀁 𑀢𑀸𑀯𑀤𑀲𑁆𑀲𑁂𑀢𑀺 ‘‘𑀧𑀭𑁂𑀲𑀁 𑀧𑀓𑀢𑀺𑀬𑀸’’𑀢𑀺𑀆𑀤𑀺𑀦𑀸. 𑀮𑀤𑁆𑀥 𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑁂𑀦 𑀅𑀢𑀻𑀢 𑀲𑀫𑁆𑀧𑀢𑁆𑀢𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀇𑀲𑁆𑀲𑀸𑀧𑀓𑀢𑀺𑀓𑀸𑀳𑀺 𑀓𑁂𑀘𑀺 𑀅𑀲𑀼𑀓𑁄 𑀦𑀸𑀫 𑀧𑀼𑀩𑁆𑀩𑁂 𑀏𑀯𑀁 𑀲𑀫𑁆𑀧𑀢𑁆𑀢𑀺𑀓𑁄 𑀅𑀳𑁄𑀲𑀻𑀢𑀺 𑀯𑀸, 𑀅𑀳𑀁 𑀧𑀼𑀩𑁆𑀩𑁂 𑀏𑀯𑀁 𑀲𑀫𑁆𑀧𑀢𑁆𑀢𑀺𑀓𑁄 𑀅𑀳𑁄𑀲𑀺𑀦𑁆𑀢𑀺 𑀯𑀸 𑀲𑀼𑀢𑁆𑀯𑀸 𑀦𑀲𑀳𑀦𑁆𑀢𑀺𑀬𑁂𑀯. 𑀢𑀁 𑀯𑀘𑀦𑀁 𑀲𑁄𑀢𑀼𑀁𑀧𑀺 𑀦 𑀇𑀘𑁆𑀙𑀦𑁆𑀢𑀻𑀢𑀺. 𑀅𑀲𑀼𑀓𑁄𑀢𑀺𑀆𑀤𑀺𑀦𑀸 𑀮𑀪𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺.

𑁯𑁨. 𑀫𑀘𑁆𑀙𑀭𑀺𑀬𑀯𑀘𑀦𑀢𑁆𑀣𑁂. ‘‘𑀫𑀫 𑀏𑀯𑀸’’𑀢𑀺 𑀫𑀫𑀧𑀓𑁆𑀔𑁂 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀕𑀼𑀡𑀚𑀸𑀢𑀁’’𑀯𑀸𑀢𑀺 𑀅𑀢𑁆𑀢𑀦𑀺𑀯𑀺𑀚𑁆𑀚𑀫𑀸𑀦𑀁 𑀲𑀺𑀧𑁆𑀧𑀯𑀺𑀚𑁆𑀚𑀸𑀤𑀺 𑀲𑀫𑁆𑀧𑀢𑁆𑀢𑀺 𑀕𑀼𑀡𑀚𑀸𑀢𑀁 𑀯𑀸. ‘‘𑀯𑀢𑁆𑀣𑀼 𑀯𑀸’’𑀢𑀺 𑀥𑀦𑀥𑀜𑁆𑀜𑀸𑀤𑀺𑀯𑀢𑁆𑀣𑀼 𑀯𑀸. ‘‘𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀯𑀲𑁂𑀦𑀸’’𑀢𑀺 𑀅𑀜𑁆𑀜𑁂𑀦 𑀢𑀁 𑀲𑀺𑀧𑁆𑀧𑀯𑀺𑀚𑁆𑀚𑀸𑀤𑀺𑀓𑀁 𑀯𑀸 𑀥𑀦𑀥𑀜𑁆𑀜𑀸𑀤𑀺𑀓𑀁 𑀯𑀸 𑀫𑀬𑁆𑀳𑀁 𑀤𑁂𑀳𑀻𑀢𑀺 𑀯𑀼𑀢𑁆𑀢𑁂 𑀧𑀭𑀳𑀺𑀢𑀢𑁆𑀣𑀸𑀬 𑀤𑀸𑀢𑀩𑁆𑀩 𑀬𑀼𑀢𑁆𑀢𑀓𑀁 𑀤𑀲𑁆𑀲𑀸𑀫𑀻𑀢𑀺 𑀏𑀯𑀁 𑀘𑀺𑀢𑁆𑀢𑁂𑀲𑀢𑀺, 𑀧𑀭𑀳𑀺𑀢𑀧𑁆𑀨𑀭𑀡𑀸𑀯𑀲𑁂𑀦 𑀢𑀁 𑀘𑀺𑀢𑁆𑀢𑀁 𑀯𑀺𑀧𑁆𑀨𑀸𑀭𑀺𑀓𑀁 𑀦𑀸𑀫 𑀳𑁄𑀢𑀺. 𑀤𑁂𑀳𑀻𑀢𑀺 𑀯𑀘𑀦𑀫𑁆𑀧𑀺 𑀲𑁄𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀭𑀳𑀺𑀢𑀢𑁆𑀣𑀸𑀬 𑀅𑀯𑀺𑀧𑁆𑀨𑀸𑀭𑀺𑀓 𑀘𑀺𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀯𑀲𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀘𑁆𑀙𑀭𑀜𑁆𑀘 𑀓𑀸𑀭𑀲𑁆𑀲 𑀙 𑀓𑀸𑀭𑀁 𑀓𑀢𑁆𑀯𑀸. 𑀢𑀣𑀸 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁. 𑀧𑀼𑀕𑁆𑀕𑀮𑁄 𑀧𑀦 𑀫𑀘𑁆𑀙𑀭𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀁’’𑀢𑀺 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁. ‘‘𑀧𑀭𑁂𑀳𑀺 𑀲𑀸𑀥𑀸𑀭𑀡𑀁 𑀤𑀺𑀲𑁆𑀯𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀸𑀥𑀸𑀭𑀡𑀦𑁆𑀢𑀺 𑀘 𑀤𑁆𑀯𑀺𑀲𑀦𑁆𑀢𑀓𑀁 𑀯𑀸𑀢𑀺 𑀲𑀦𑁆𑀢𑀓𑀁 𑀯𑀸 𑀪𑀯𑀺𑀲𑁆𑀲𑀫𑀸𑀦𑀁, 𑀧𑀭𑁂𑀳𑀺 𑀯𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁. ‘‘𑀦𑀺𑀕𑁆𑀕𑀼𑀳𑀦𑀮𑀓𑁆𑀔𑀡𑀁’’𑀢𑀺 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀻𑀳𑀺𑀲𑀗𑁆𑀕𑁄𑀧𑀦 𑀲𑀪𑀸𑀯𑀁. 𑀅𑀢𑁆𑀢𑀦𑀸 𑀮𑀤𑁆𑀥 𑀲𑀫𑁆𑀧𑀢𑁆𑀢𑀺 𑀦𑀸𑀫 𑀇𑀲𑁆𑀲𑀸𑀬 𑀅𑀯𑀺𑀲𑀬𑁄. 𑀮𑀪𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺 𑀧𑀦 𑀉𑀪𑀬 𑀲𑀸𑀥𑀸𑀭𑀡𑀁. 𑀢𑀲𑁆𑀫𑀸 𑀢𑀢𑁆𑀣 𑀉𑀪𑀺𑀦𑁆𑀦𑀁 𑀯𑀺𑀲𑁂𑀲𑁄 𑀯𑀢𑁆𑀢𑀩𑁆𑀩𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀬𑀲𑁆𑀲 𑀮𑀸𑀪𑀁 𑀦 𑀇𑀘𑁆𑀙𑀢𑀻’’𑀢𑀺 𑀅𑀢𑁆𑀢𑀦𑀸 𑀮𑀪𑀢𑀼 𑀯𑀸 𑀫𑀸𑀯𑀸, 𑀓𑁂𑀯𑀮𑀁 𑀧𑀭 𑀲𑀫𑁆𑀧𑀢𑁆𑀢𑀺𑀁 𑀅𑀲𑀳𑀦𑁆𑀢𑁄 𑀬𑀲𑁆𑀲 𑀧𑀭𑀲𑁆𑀲 𑀮𑀸𑀪𑀁 𑀦 𑀇𑀘𑁆𑀙𑀢𑀺. ‘‘𑀘𑀺𑀢𑁆𑀢 𑀯𑀺𑀖𑀸𑀢𑁄’’𑀢𑀺 𑀘𑀺𑀢𑁆𑀢 𑀯𑀺𑀳𑀜𑁆𑀜𑀦𑀁. ‘‘𑀅𑀢𑁆𑀢𑀦𑀸 𑀮𑀤𑁆𑀥𑀼𑀁 𑀇𑀘𑁆𑀙𑀢𑀻’’𑀢𑀺 𑀧𑀭𑁄 𑀲𑀫𑁆𑀧𑀚𑁆𑀚𑀢𑀼 𑀯𑀸 𑀫𑀸𑀯𑀸, 𑀬𑀢𑁆𑀣 𑀧𑀭𑀮𑀸𑀪𑁂𑀲𑀢𑀺, 𑀅𑀢𑁆𑀢𑀦𑀸 𑀦 𑀮𑀪𑀺𑀲𑁆𑀲𑀢𑀺, 𑀢𑀢𑁆𑀣 𑀅𑀢𑁆𑀢𑀦𑀸𑀯 𑀮𑀤𑁆𑀥𑀼𑀁 𑀇𑀘𑁆𑀙𑀢𑀺. 𑀬𑀢𑁆𑀣 𑀅𑀢𑁆𑀢𑀦𑀸 𑀘 𑀮𑀪𑀢𑀺, 𑀧𑀭𑁄 𑀘 𑀮𑀪𑀢𑀺, 𑀢𑀢𑁆𑀣 𑀯𑀺𑀖𑀸𑀢𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀮𑀩𑁆𑀪𑀫𑀸𑀦𑀓𑀁 𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺 𑀅𑀢𑁆𑀢𑀦𑀸 𑀅𑀮𑀪𑀺𑀲𑁆𑀲𑀫𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸.

𑁯𑁩. 𑀓𑀼𑀓𑁆𑀓𑀼𑀘𑁆𑀘𑀯𑀘𑀦𑀢𑁆𑀣𑁂. ‘‘𑀓𑀺𑀭𑀺𑀬𑀸 𑀓𑀢𑀁’’𑀢𑀺 𑀓𑀢 𑀲𑀤𑁆𑀤𑀲𑁆𑀲𑀪𑀸𑀯 𑀲𑀸𑀥𑀦𑀫𑀸𑀳. 𑀏𑀯𑀁 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀅𑀪𑀺𑀥𑁂𑀬𑁆𑀬𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀅𑀦𑀼𑀲𑁄𑀘𑀦 𑀯𑀲𑁂𑀦𑀸’’𑀢𑀺 𑀧𑀘𑁆𑀙𑀸 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀧𑀯𑀲𑁂𑀦. 𑀲𑁄 𑀓𑀼𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀼𑀲𑀮 𑀥𑀫𑁆𑀫𑁂𑀲𑀽’’𑀢𑀺 𑀧𑀼𑀜𑁆𑀜 𑀓𑀺𑀭𑀺𑀬𑀯𑀢𑁆𑀣𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢 𑀧𑀭𑀺𑀬𑀸𑀤𑀸𑀦𑀸𑀬 𑀏𑀯 𑀲𑀁𑀯𑀢𑁆𑀢𑀢𑀺. 𑀓𑀼𑀓𑁆𑀓𑀼𑀘𑁆𑀘 𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀘𑀺𑀢𑁆𑀢 𑀲𑀼𑀔𑀁 𑀦 𑀮𑀪𑀢𑀺. 𑀩𑀳𑀼𑀚𑀦 𑀫𑀚𑁆𑀛𑁂 𑀯𑀲𑀺𑀢𑁆𑀯𑀸 𑀦𑀸𑀦𑀸𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁄 𑀦𑀸𑀦𑀸 𑀢𑀺𑀭𑀘𑁆𑀙𑀸𑀦 𑀓𑀣𑀁 𑀓𑀣𑁂𑀦𑁆𑀢𑁄 𑀘𑀺𑀢𑁆𑀢 𑀲𑀼𑀔𑀁 𑀮𑀪𑀢𑀺. 𑀢𑀤𑀸 𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫 𑀓𑀭𑀡𑀢𑁆𑀣𑀸𑀬 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀻𑀬𑀢𑀺, 𑀧𑀭𑀺𑀓𑁆𑀔𑀺𑀬𑁆𑀬𑀢𑀺. 𑀘𑀺𑀢𑁆𑀢𑀯𑀲𑀁 𑀕𑀘𑁆𑀙𑀦𑁆𑀢𑁄 𑀯𑀺𑀘𑀭𑀢𑀺. 𑀏𑀯𑀁 𑀘𑀺𑀢𑁆𑀢 𑀧𑀭𑀺𑀬𑀸𑀤𑀸𑀦𑀸𑀬 𑀏𑀯 𑀲𑀁𑀯𑀢𑁆𑀢𑀢𑀺. ‘‘𑀅𑀝𑁆𑀞𑀓𑀣𑀸𑀬𑀁’’𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁. ‘‘𑀓𑀢𑀸 𑀓𑀢𑀲𑁆𑀲 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀲𑁆𑀲𑀸’’𑀢𑀺 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀲𑀸𑀯𑀚𑁆𑀚𑀓𑀫𑁆𑀫𑀲𑁆𑀲, 𑀅𑀓𑀢𑀲𑁆𑀲 𑀅𑀦𑀯𑀚𑁆𑀚 𑀓𑀫𑁆𑀫𑀲𑁆𑀲. 𑀓𑀫𑁆𑀫𑀢𑁆𑀣𑁂𑀲𑀸𑀫𑀺𑀯𑀘𑀦𑀁. ‘‘𑀅𑀪𑀺𑀫𑀼𑀔𑀕𑀫𑀦𑀁’’𑀢𑀺 𑀆𑀭𑀫𑁆𑀫𑀡 𑀓𑀭𑀡𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀅𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀦𑀁. 𑀏𑀢𑁂𑀦 𑀧𑀝𑀺𑀫𑀼𑀔𑀁 𑀲𑀭𑀡𑀁 𑀘𑀺𑀦𑁆𑀢𑀦𑀁 𑀧𑀝𑀺𑀲𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀓𑀢𑀁 𑀦 𑀓𑀭𑁄𑀢𑀻’’𑀢𑀺 𑀅𑀓𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀓𑀢𑀁 𑀦 𑀓𑀭𑁄𑀢𑀻𑀢𑀺 𑀏𑀢𑁆𑀣𑀧𑀺. ‘‘𑀯𑀺𑀭𑀽𑀧𑁄’’𑀢𑀺 𑀯𑀻𑀪𑀘𑁆𑀙𑁄 𑀅𑀲𑁄𑀪𑀡𑁄. ‘‘𑀓𑀼𑀘𑁆𑀙𑀺𑀢𑁄’’𑀢𑀺 𑀕𑀭𑀳𑀺𑀢𑀩𑁆𑀩𑁄. 𑀦𑀦𑀼 𑀧𑀼𑀩𑁆𑀩𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀓𑀼𑀘𑁆𑀙𑀺𑀢𑁄𑀢𑀺 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑁄 𑀓𑀼𑀘𑁆𑀙𑀺𑀢𑁄𑀢𑀺 𑀯𑀼𑀢𑁆𑀢𑁄. 𑀉𑀪𑀬𑀫𑁂𑀢𑀁 𑀦 𑀲𑀫𑁂𑀢𑀻𑀢𑀺. 𑀦𑁄 𑀦 𑀲𑀫𑁂𑀢𑀺, 𑀅𑀜𑁆𑀜𑀣𑀸𑀦𑀼 𑀧𑀧𑀢𑁆𑀢𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀬𑁂𑀦 𑀘 𑀓𑀸𑀭𑀡𑁂𑀦𑀸’’𑀢𑀺 𑀓𑀢𑀸𑀓𑀢𑀁 𑀧𑀝𑀺𑀘𑁆𑀘 𑀦𑀺𑀭𑀢𑁆𑀣𑀓 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀓𑀸𑀭𑀡𑁂𑀦. 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀯 𑀓𑀼𑀓𑀢𑀧𑀤𑁂 𑀕𑀳𑁂𑀢𑀼𑀁 𑀬𑀼𑀢𑁆𑀢𑁄, 𑀦𑀯𑀺𑀪𑀸𑀯𑀦𑀺𑀬𑀁 𑀯𑀺𑀬 𑀓𑀢𑀸𑀓𑀢 𑀤𑀼𑀘𑁆𑀘𑀭𑀺𑀢 𑀲𑀼𑀘𑀭𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀯𑀺𑀪𑀸𑀯𑀦𑀺𑀬𑀫𑁆𑀧𑀺 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀯 𑀉𑀧𑀘𑀸𑀭 𑀦𑀬𑁂𑀦 𑀕𑀳𑀺𑀢𑁄𑀢𑀺 𑀘𑁂. 𑀬𑀼𑀢𑁆𑀢𑀺 𑀯𑀲𑁂𑀦 𑀘 𑀅𑀝𑁆𑀞𑀓𑀣𑀸𑀕𑀫𑁂𑀦 𑀘 𑀫𑀼𑀔𑁆𑀬𑀢𑁄 𑀲𑀺𑀤𑁆𑀥𑁂 𑀲𑀢𑀺, 𑀓𑀺𑀁 𑀉𑀧𑀘𑀸𑀭 𑀦𑀬𑁂𑀦. 𑀢𑁂𑀦𑀸𑀳 ‘‘𑀯𑀺𑀪𑀸𑀯𑀦𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀁. 𑀓𑀼𑀓𑀢𑀲𑁆𑀲𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀓𑀸𑀭𑀲𑁆𑀲 𑀉𑀓𑀸𑀭𑀁 𑀓𑀢𑁆𑀯𑀸𑀢𑀺 𑀅𑀬𑀁 𑀅𑀝𑁆𑀞𑀓𑀣𑀸𑀦𑀬𑁄. 𑀇𑀤𑀸𑀦𑀺 𑀲𑀤𑁆𑀤𑀲𑀢𑁆𑀣𑀦𑀬𑁂𑀦 𑀅𑀧𑀭𑀁 𑀯𑀘𑀦𑀢𑁆𑀣𑀜𑁆𑀘 𑀅𑀥𑀺𑀧𑁆𑀧𑀸𑀬𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀥𑀸𑀢𑀼𑀧𑀸𑀞𑁂𑀲𑀽’’𑀢𑀺 𑀅𑀓𑁆𑀔𑀭𑀥𑀸𑀢𑀼𑀧𑁆𑀧𑀓𑀸𑀲𑀦𑁂𑀲𑀼 𑀦𑀺𑀭𑀼𑀢𑁆𑀢𑀺 𑀧𑀸𑀞𑁂𑀲𑀼. 𑀧𑀞𑀦𑁆𑀢𑀺𑀬𑁂𑀯, 𑀦𑁄 𑀦 𑀧𑀞𑀦𑁆𑀢𑀺. 𑀢𑁂 𑀘 𑀅𑀢𑁆𑀣𑀸 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄 𑀯𑀺𑀮𑁂𑀔𑁄𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀳𑀺 𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀸𑀬𑁂𑀳𑀺 𑀲𑀫𑁂𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀅𑀬𑀁 𑀅𑀧𑀭𑁄𑀦𑀬𑁄 𑀇𑀥 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑁄 𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀯𑀺𑀧𑁆𑀧𑀝𑀺 𑀲𑀸𑀭𑀺𑀧𑀼𑀕𑁆𑀕𑀮𑁄 𑀘 𑀢𑀁 𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀯𑀺𑀧𑁆𑀧𑀝𑀺 𑀲𑀸𑀭𑀕𑁆𑀕𑀺𑀦𑀸 𑀤𑀬𑁆𑀳𑀫𑀸𑀦 𑀘𑀺𑀢𑁆𑀢𑁄 𑀧𑀼𑀜𑁆𑀜𑀓𑀫𑁆𑀫𑁂 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀦𑀮𑀪𑀢𑀺. 𑀘𑀺𑀢𑁆𑀢 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺. 𑀓𑀺𑀁 𑀇𑀫𑀺𑀦𑀸 𑀓𑀫𑁆𑀫𑁂𑀦𑀸𑀢𑀺 𑀢𑀁 𑀧𑀳𑀸𑀬 𑀬𑀢𑁆𑀣 𑀘𑀺𑀢𑁆𑀢 𑀲𑀼𑀔𑀁 𑀯𑀺𑀦𑁆𑀤𑀢𑀺, 𑀢𑀢𑁆𑀣 𑀯𑀺𑀘𑀭𑀢𑀺. 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀼𑀜𑁆𑀜𑀓𑀫𑁆𑀫𑀢𑁄 𑀲𑀗𑁆𑀓𑁄𑀘𑀦𑀁 𑀦𑀸𑀫 𑀳𑁄𑀢𑀻𑀢𑀺. 𑀓𑀺𑀮𑁂𑀲𑀲𑀮𑁆𑀮𑀺𑀔𑀦𑀁 𑀦𑀸𑀫 𑀲𑀦𑁆𑀢𑀼𑀝𑁆𑀞𑀺 𑀲𑀮𑁆𑀮𑁂𑀔𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀢𑀤𑀗𑁆𑀕𑀧𑁆𑀧𑀳𑀸𑀦𑀸𑀤𑀺𑀯𑀲𑁂𑀦 𑀢𑀁 𑀢𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀼𑀘𑁆𑀘𑀢𑀺. ‘‘𑀅𑀦𑀼𑀢𑁆𑀣𑀼𑀦𑀦𑀸𑀓𑀸𑀭𑁂𑀦𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀺𑀮𑀧𑀦𑀸𑀓𑀸𑀭𑁂𑀦. 𑀲𑀗𑁆𑀓𑁄𑀘𑀢𑀻𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀉𑀪𑀬𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀲𑀮𑀓𑀫𑁆𑀫 𑀲𑀫𑀸𑀤𑀸𑀦𑁂’’𑀢𑀺𑀆𑀤𑀺𑀫𑀸𑀳. 𑀦𑀫𑀺𑀢𑀼𑀫𑁆𑀧𑀺 𑀦 𑀤𑁂𑀢𑀺. 𑀓𑀼𑀢𑁄 𑀲𑀫𑀸𑀤𑀸𑀢𑀼𑀁 𑀯𑀸 𑀯𑀟𑁆𑀠𑁂𑀢𑀼𑀁 𑀯𑀸 𑀤𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀦𑀼𑀓𑀭𑀡𑁂𑀦𑀸’’𑀢𑀺 𑀤𑀼𑀩𑁆𑀩𑀮𑀓𑀭𑀡𑁂𑀦. 𑀯𑀺𑀲𑁂𑀲𑀦𑀝𑁆𑀞𑁂𑀓𑀭𑀡 𑀯𑀘𑀦𑀁. ‘‘𑀲𑁄’’𑀢𑀺 𑀥𑀫𑁆𑀫𑀲𑀫𑀽𑀳𑁄. 𑀢𑀁 𑀧𑀦 𑀓𑀼𑀓𑁆𑀓𑀼𑀘𑁆𑀘𑀁. 𑀓𑁂𑀘𑀺 𑀧𑀦 𑀓𑀼𑀓𑁆𑀓𑀼𑀘𑁆𑀘𑀁 𑀧𑀘𑁆𑀘𑀼𑀧𑁆𑀧𑀦𑁆𑀦 𑀲𑀼𑀘𑀭𑀺𑀢 𑀤𑀼𑀘𑁆𑀘𑀭𑀺𑀢𑀸 𑀭𑀫𑁆𑀫𑀡𑀫𑁆𑀧𑀺 𑀅𑀦𑀸𑀕𑀢 𑀲𑀼𑀘𑀭𑀺𑀢 𑀤𑀼𑀘𑁆𑀘𑀭𑀺𑀢𑀸 𑀭𑀫𑁆𑀫𑀡𑀫𑁆𑀧𑀺 𑀓𑀧𑁆𑀧𑁂𑀦𑁆𑀢𑀺. 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀫𑀳𑀸𑀦𑀺𑀤𑁆𑀤𑁂𑀲𑀧𑀸𑀞𑁂 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄𑀢𑀺 𑀧𑀸𑀞𑁄. ‘‘𑀓𑀢𑀢𑁆𑀢𑀸 𑀘𑀸’’𑀢𑀺 𑀅𑀓𑀢𑁆𑀢𑀩𑁆𑀩𑀲𑁆𑀲 𑀓𑀢𑀢𑁆𑀢𑀸 𑀘. ‘‘𑀅𑀓𑀢𑀢𑁆𑀢𑀸 𑀘𑀸’’𑀢𑀺 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀢𑀢𑁆𑀢𑀸 𑀘. 𑀓𑁂𑀘𑀺 𑀧𑀦 𑀅𑀬𑀁 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦𑀸𑀫 𑀓𑀤𑀸𑀘𑀺 𑀓𑀲𑁆𑀲𑀘𑀺 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀼𑀩𑁆𑀩𑁂𑀓𑀢 𑀲𑀼𑀘𑀭𑀺𑀢𑀫𑁆𑀧𑀺 𑀅𑀓𑀢 𑀤𑀼𑀘𑁆𑀘𑀭𑀺𑀢𑀫𑁆𑀧𑀺 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺. 𑀉𑀫𑁆𑀫𑀢𑁆𑀢𑀓𑀲𑀤𑀺𑀲𑀜𑁆𑀳𑀺 𑀧𑀼𑀣𑀼𑀚𑁆𑀚𑀦 𑀘𑀺𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀏𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑁄 𑀧𑀦 𑀓𑁂𑀲𑀜𑁆𑀘𑀺 𑀯𑀸𑀤𑁂 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦𑀸𑀫 𑀤𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀦 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀘 𑀔𑁄 𑀤𑁆𑀯𑀺𑀥𑀸 𑀪𑀸𑀯𑁄. 𑀅𑀧𑀸𑀬𑀪𑀬𑁂𑀦 𑀢𑀚𑁆𑀚𑀻𑀬𑀦𑁆𑀢𑀺 𑀢𑀸𑀲𑀻𑀬𑀦𑁆𑀢𑀻𑀢𑀺 𑀅𑀧𑀸𑀬𑀪𑀬 𑀢𑀚𑁆𑀚𑀺𑀢𑀸. ‘‘𑀦 𑀅𑀜𑁆𑀜𑁂𑀲𑀁’’𑀢𑀺 𑀲𑀼𑀘𑀭𑀺𑀢 𑀤𑀼𑀘𑁆𑀘𑀭𑀺𑀢𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀫𑀦𑀲𑀺𑀓𑀭𑁄𑀦𑁆𑀢𑀸𑀦𑀜𑁆𑀘 𑀦 𑀳𑁄𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂. 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢 𑀦𑀸𑀫𑁂𑀦 𑀅𑀦𑀼𑀲𑁄𑀘𑀦𑀸𑀓𑀸𑀭𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀓𑀢𑀁 𑀫𑁂’’𑀢𑀺𑀆𑀤𑀺. 𑀬𑀸𑀣𑀸𑀯𑀫𑀸𑀦𑁄 𑀦𑀸𑀫 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄 𑀳𑀫𑀲𑁆𑀫𑀻𑀢𑀺 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀪𑀽𑀢𑀫𑀸𑀦𑁄. 𑀬𑀜𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀓𑀢𑁆𑀯𑀸’’𑀢𑀺 𑀢𑀁 𑀓𑀮𑁆𑀬𑀸𑀡 𑀓𑀫𑁆𑀫𑀁 𑀅𑀓𑀢𑁆𑀯𑀸. ‘‘𑀓𑀢𑁆𑀯𑀸’’𑀢𑀺 𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸. 𑀇𑀤𑀁 𑀧𑀦 𑀧𑀼𑀩𑁆𑀩𑁂𑀓𑀢𑀸 𑀓𑀢𑀓𑀸𑀮𑁂 𑀏𑀯 𑀅𑀬𑀸𑀣𑀸𑀯𑀁 𑀳𑁄𑀢𑀺. 𑀅𑀦𑀼𑀲𑁄𑀘𑀦 𑀓𑀸𑀮𑁂𑀧𑀦 𑀬𑀸𑀣𑀸𑀯𑀫𑁂𑀯. ‘‘𑀳𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀁’’𑀢𑀺 𑀏𑀢𑁆𑀣 𑀲𑀗𑁆𑀓𑁄𑀘𑀦𑀢𑁆𑀣𑁄 𑀦 𑀮𑀩𑁆𑀪𑀢𑀺. 𑀓𑀼𑀘𑁆𑀙𑀺𑀢 𑀓𑀺𑀭𑀺𑀬𑀢𑁆𑀣𑁄 𑀏𑀯 𑀮𑀩𑁆𑀪𑀢𑀺. 𑀳𑀢𑁆𑀣𑀮𑁄𑀮𑀢𑀸𑀳𑀺 𑀳𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀤𑀮𑁄𑀮𑀢𑀸 𑀘 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁. 𑀢𑁂𑀦𑀸𑀳 ‘‘𑀅𑀲𑀁𑀬𑀢 𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫𑀸’’𑀢𑀺. 𑀬𑀁 𑀧𑀦 𑀓𑀼𑀓𑁆𑀓𑀼𑀘𑁆𑀘𑀁. ‘‘𑀢𑀁’’𑀢𑀺 𑀢𑀁 𑀯𑀢𑁆𑀣𑀼𑀁. 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸. 𑀦𑀸𑀫𑀥𑀸𑀢𑀼 𑀧𑀤𑀜𑁆𑀳𑁂𑀢𑀁. 𑀓𑀧𑁆𑀧𑀢𑀺 𑀦𑀼 𑀔𑁄, 𑀦 𑀦𑀼 𑀔𑁄 𑀓𑀧𑁆𑀧𑀢𑀻𑀢𑀺 𑀏𑀯𑀁 𑀯𑀺𑀦𑀬 𑀲𑀁𑀲𑀬𑀁 𑀉𑀧𑁆𑀧𑀸𑀤𑁂𑀦𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀓𑀢𑀢𑀸𑀬𑀸’’𑀢𑀺 𑀓𑀼𑀓𑁆𑀓𑀼𑀘𑁆𑀘𑁂𑀦 𑀅𑀧𑀓𑀢𑀢𑀸𑀬 𑀅𑀪𑀺𑀪𑀽𑀢𑀢𑀸𑀬. ‘‘𑀅𑀢𑁆𑀢𑀦𑁄 𑀅𑀯𑀺𑀲𑀬𑁂’’𑀢𑀺 𑀆𑀡𑀸𑀘𑀓𑁆𑀓𑀞𑀸𑀦𑁂. 𑀆𑀡𑀸𑀘𑀓𑁆𑀓 𑀲𑀸𑀫𑀺𑀦𑁄 𑀩𑀼𑀤𑁆𑀥𑀲𑁆𑀲𑀯𑀺𑀲𑀬𑀢𑁆𑀢𑀸 𑀅𑀢𑁆𑀢𑀦𑁄 𑀲𑀸𑀯𑀓 𑀪𑀽𑀢𑀲𑁆𑀲 𑀅𑀯𑀺𑀲𑀬𑁂𑀢𑀺 𑀅𑀢𑁆𑀣𑁄. 𑀬𑁂 𑀧𑀦 𑀓𑀭𑁄𑀦𑁆𑀢𑀺𑀬𑁂𑀯 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀧𑀢𑁆𑀢𑀺𑀁’’𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁.

𑁯𑁪-𑁯𑁫. 𑀣𑀺𑀦𑀫𑀺𑀤𑁆𑀥𑀯𑀘𑀦𑀢𑁆𑀣𑁂𑀲𑀼. ‘‘𑀘𑀺𑀢𑁆𑀢𑀁 𑀫𑀦𑁆𑀤𑀫𑀦𑁆𑀤𑀁 𑀓𑀢𑁆𑀯𑀸’’𑀢𑀺 𑀘𑀺𑀦𑁆𑀢𑀦 𑀓𑀺𑀘𑁆𑀘𑁂 𑀅𑀢𑀺𑀫𑀦𑁆𑀤𑀁 𑀧𑀭𑀺𑀤𑀼𑀩𑁆𑀩𑀮𑀁 𑀓𑀢𑁆𑀯𑀸. 𑀘𑀺𑀢𑁆𑀢𑀁 𑀕𑀺𑀮𑀸𑀦𑀁 𑀫𑀺𑀮𑀸𑀢𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀚𑁆𑀛𑁄𑀢𑁆𑀣𑀭𑀢𑀻’’𑀢𑀺 𑀅𑀪𑀺𑀪𑀯𑀢𑀺. 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦𑁂 𑀯𑀸 𑀚𑀯𑀦𑀓𑀺𑀘𑁆𑀘𑁂 𑀯𑀸 𑀧𑀭𑀺𑀳𑀻𑀦𑀣𑀸𑀫𑀩𑀮𑀁 𑀓𑀭𑁄𑀢𑀺. ‘‘𑀣𑀺𑀬𑀢𑀻’’𑀢𑀺 𑀧𑀤𑀁 𑀧𑀸𑀴𑀺𑀯𑀲𑁂𑀦 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀣𑀺𑀦𑀁 𑀣𑀺𑀬𑀦𑀸’’𑀢𑀺𑀆𑀤𑀺𑀁. ‘‘𑀅𑀓𑀫𑁆𑀫𑀜𑁆𑀜𑀪𑀽𑀢𑁂 𑀓𑀢𑁆𑀯𑀸’’𑀢𑀺 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀓𑀫𑁆𑀫𑀓𑁆𑀔𑀫𑁂 𑀧𑀭𑀺𑀤𑀼𑀩𑁆𑀩𑀮𑁂 𑀓𑀢𑁆𑀯𑀸. [𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ]. ‘‘𑀢𑁂’’𑀢𑀺 𑀘𑀺𑀢𑁆𑀢 𑀘𑁂𑀢𑀲𑀺𑀓𑁂 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂. ‘‘𑀑𑀮𑀻𑀬𑀸𑀧𑁂𑀢𑁆𑀯𑀸’’𑀢𑀺 𑀅𑀯𑀮𑀻𑀦𑁂 𑀅𑀯𑀲𑀻𑀤𑀦𑁆𑀢𑁂 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀇𑀭𑀺𑀬𑀸 𑀧𑀣𑀁 𑀧𑀻’’𑀢𑀺𑀆𑀤𑀺𑀁. 𑀣𑀺𑀦𑀁 𑀘𑀺𑀢𑁆𑀢𑀁 𑀅𑀪𑀺𑀪𑀯𑀢𑀺, 𑀯𑀺𑀚𑀸𑀦𑀦 𑀓𑀺𑀘𑁆𑀘𑀲𑁆𑀲 𑀕𑁂𑀮𑀜𑁆𑀜𑀢𑁆𑀢𑀸 𑀣𑀺𑀦𑀲𑁆𑀲. 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑁂 𑀅𑀪𑀺𑀪𑀯𑀢𑀺, 𑀨𑀼𑀲𑀦𑀸𑀤𑀺 𑀓𑀺𑀘𑁆𑀘𑀲𑁆𑀲 𑀕𑁂𑀮𑀜𑁆𑀜𑀢𑁆𑀢𑀸 𑀫𑀺𑀤𑁆𑀥𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁬. 𑀯𑀺𑀘𑀺𑀓𑀺𑀘𑁆𑀙𑀸𑀯𑀘𑀦𑀢𑁆𑀣𑁂. ‘‘𑀘𑀺𑀓𑀺𑀘𑁆𑀙𑀦𑀁’’𑀢𑀺 𑀭𑁄𑀕𑀸𑀧𑀦𑀬 𑀦𑀢𑁆𑀣𑁂 𑀓𑀺𑀢𑀥𑀸𑀢𑀼𑀯𑀲𑁂𑀦 𑀲𑀺𑀤𑁆𑀥𑀁 𑀲𑀗𑁆𑀔𑀢 𑀓𑀺𑀭𑀺𑀬𑀸 𑀧𑀤𑀦𑁆𑀢𑀺 𑀆𑀳 ‘‘𑀜𑀸𑀡𑀧𑁆𑀧𑀝𑀺𑀓𑀸𑀭𑁄𑀢𑀺 𑀅𑀢𑁆𑀣𑁄’’𑀢𑀺. ‘‘𑀧𑀝𑀺𑀓𑀸𑀭𑁄’’𑀢𑀺 𑀘 𑀭𑁄𑀕𑀲𑁆𑀲 𑀧𑀝𑀺𑀧𑀓𑁆𑀔 𑀓𑀫𑁆𑀫𑀁. ‘‘𑀏𑀢𑀸𑀬𑀸’’𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀯𑀺𑀘𑀺𑀦𑀦𑁆𑀢𑀺 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑀻𑀢𑀺 𑀯𑀺𑀘𑀺𑀦𑁄. 𑀥𑀫𑁆𑀫 𑀯𑀻𑀫𑀁𑀲𑀓𑀸. 𑀓𑀺𑀘𑁆𑀙𑀢𑀺 𑀓𑀺𑀮𑀫𑀢𑀺 𑀏𑀢𑀸𑀬𑀸𑀢𑀺 𑀓𑀺𑀘𑁆𑀙𑀸. 𑀯𑀺𑀘𑀺𑀦𑀁 𑀓𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀪𑀸𑀯𑀁’’𑀢𑀺𑀆𑀤𑀺𑀫𑀸𑀳. ‘‘𑀯𑀺𑀘𑀺𑀓𑀺𑀘𑁆𑀙𑀢𑀻’’𑀢𑀺 𑀲𑀗𑁆𑀔𑀢𑀥𑀸𑀢𑀼𑀧𑀤𑀁. 𑀢𑀜𑁆𑀘 𑀓𑀗𑁆𑀔𑀸𑀬𑀁 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀘𑀺𑀓𑀺𑀘𑁆𑀙𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑀺𑀥𑀸 𑀏𑀴𑀬𑀢𑀺 𑀓𑀫𑁆𑀧𑀢𑀻𑀢𑀺 𑀤𑁆𑀯𑁂𑀴𑀓𑀁. 𑀢𑀣𑀸 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁. 𑀤𑁆𑀯𑁂𑀴𑀓𑀲𑁆𑀲 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀩𑀼𑀤𑁆𑀥𑀸𑀤𑀻𑀲𑀼 𑀅𑀝𑁆𑀞𑀲𑀽’’𑀢𑀺 𑀩𑀼𑀤𑁆𑀥𑁂 𑀓𑀗𑁆𑀔𑀢𑀺, 𑀥𑀫𑁆𑀫𑁂 𑀓𑀗𑁆𑀔𑀢𑀺, 𑀲𑀗𑁆𑀖𑁂 𑀓𑀗𑁆𑀔𑀢𑀺, 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺, 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀢𑀺, 𑀅𑀧𑀭𑀦𑁆𑀢𑁂 𑀓𑀗𑁆𑀔𑀢𑀺, 𑀧𑀼𑀩𑁆𑀩𑀦𑁆𑀢𑀸 𑀧𑀭𑀦𑁆𑀢𑁂 𑀓𑀗𑁆𑀔𑀢𑀺, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀲𑀤𑁆𑀥𑁂𑀬𑁆𑀬 𑀯𑀢𑁆𑀣𑀽𑀲𑀼. 𑀢𑀢𑁆𑀣 ‘‘𑀩𑀼𑀤𑁆𑀥𑁂 𑀓𑀗𑁆𑀔𑀢𑀻’’𑀢𑀺 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀩𑀼𑀤𑁆𑀥𑀕𑀼𑀡𑁂𑀲𑀼 𑀅𑀲𑀤𑁆𑀤𑀳𑀦𑁆𑀢𑁄 𑀩𑀼𑀤𑁆𑀥𑁂 𑀓𑀗𑁆𑀔𑀢𑀺 𑀦𑀸𑀫. 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀥𑀫𑁆𑀫 𑀕𑀼𑀡𑁂𑀲𑀼 𑀅𑀲𑀤𑁆𑀤𑀳𑀦𑁆𑀢𑁄 𑀥𑀫𑁆𑀫𑁂 𑀓𑀗𑁆𑀔𑀢𑀺 𑀦𑀸𑀫. 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀲𑀗𑁆𑀖𑀕𑀼𑀡𑁂𑀲𑀼 𑀅𑀲𑀤𑁆𑀤𑀳𑀦𑁆𑀢𑁄 𑀲𑀗𑁆𑀖𑁂 𑀓𑀗𑁆𑀔𑀢𑀺 𑀦𑀸𑀫. 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀯𑀝𑁆𑀝 𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀦𑀝𑁆𑀞𑁂𑀲𑀼 𑀅𑀲𑀤𑁆𑀤𑀳𑀦𑁆𑀢𑁄 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺 𑀦𑀸𑀫. 𑀅𑀢𑁆𑀢𑀦𑁄 𑀅𑀢𑀻𑀢 𑀪𑀯𑀲𑁆𑀲 𑀅𑀢𑁆𑀣𑀺 𑀦𑀢𑁆𑀣𑀺𑀪𑀸𑀯𑁂 𑀓𑀗𑁆𑀔𑀦𑁆𑀢𑁄 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀢𑀺 𑀦𑀸𑀫. 𑀅𑀢𑁆𑀢𑀦𑁄 𑀧𑀭𑀫𑁆𑀫𑀭𑀡𑀸 𑀅𑀦𑀸𑀕𑀢 𑀪𑀯𑀲𑁆𑀲 𑀅𑀢𑁆𑀣𑀺 𑀦𑀢𑁆𑀣𑀺𑀪𑀸𑀯𑁂 𑀓𑀗𑁆𑀔𑀦𑁆𑀢𑁄 𑀅𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀦𑀸𑀫. 𑀢𑀤𑀼𑀪𑀬𑀲𑁆𑀲 𑀅𑀢𑁆𑀣𑀺 𑀦𑀢𑁆𑀣𑀺 𑀪𑀸𑀯𑁂 𑀓𑀗𑁆𑀔𑀦𑁆𑀢𑁄 𑀧𑀼𑀩𑁆𑀩𑀦𑁆𑀢𑀸 𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀦𑀸𑀫. 𑀇𑀫𑀲𑁆𑀫𑀺𑀁 𑀪𑀯𑁂 𑀅𑀢𑁆𑀢𑀦𑁄 𑀔𑀦𑁆𑀥𑀸𑀦𑀁 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑁂 𑀘 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑀪𑀸𑀯𑁂 𑀘 𑀓𑀗𑁆𑀔𑀦𑁆𑀢𑁄 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀺 𑀦𑀸𑀫. ‘‘𑀯𑀺𑀫𑀢𑀺 𑀯𑀲𑁂𑀦𑀸’’𑀢𑀺 𑀯𑁂𑀫𑀢𑀺𑀓𑀪𑀸𑀯𑁂𑀦. 𑀧𑀯𑀢𑁆𑀢𑀫𑀸𑀦𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀯𑀺𑀘𑀺𑀓𑀺𑀘𑁆𑀙𑀸 𑀧𑀝𑀺𑀭𑀽𑀧𑀓𑀸 𑀦𑀸𑀫 𑀲𑀩𑁆𑀩 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀩𑀼𑀤𑁆𑀥𑀻𑀦𑀁 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑀸𑀦𑀁 𑀏𑀯 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀲𑀩𑁆𑀩𑀜𑁆𑀜𑀽𑀦𑀁’’𑀢𑀺𑀆𑀤𑀺.

𑀅𑀓𑀼𑀲𑀮𑀭𑀸𑀲𑀺𑀫𑁆𑀳𑀺𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁭. 𑀲𑀤𑁆𑀥𑀸𑀯𑀘𑀦𑀢𑁆𑀣𑁂. ‘‘𑀲𑀦𑁆𑀦𑀺𑀲𑀺𑀦𑁆𑀦𑀁’’𑀢𑀺 𑀅𑀘𑀮𑀺𑀢𑀁. ‘‘𑀲𑀼𑀝𑁆𑀞𑀽’’𑀢𑀺 𑀅𑀦𑀲𑁆𑀲𑀦𑁆𑀢𑀁 𑀅𑀘𑀮𑀦𑁆𑀢𑀜𑁆𑀘 𑀓𑀢𑁆𑀯𑀸. ‘‘𑀥𑀸𑀭𑁂𑀢𑀻’’𑀢𑀺 𑀏𑀯𑀫𑁂𑀯 𑀳𑁄𑀢𑀻𑀢𑀺 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀥𑀸𑀭𑁂𑀢𑀺. 𑀢𑀣𑀸 𑀞𑀧𑁂𑀢𑀻𑀢𑀺. 𑀲𑀤𑁆𑀤𑀳𑀦𑁆𑀢𑀺 𑀯𑀸 𑀲𑀤𑁆𑀥𑀸 𑀲𑀫𑁆𑀧𑀦𑁆𑀦𑀸 𑀲𑀢𑁆𑀢𑀸. 𑀲𑀤𑁆𑀥𑀸𑀢𑀼𑀁 𑀅𑀭𑀳𑀦𑁆𑀢𑀻𑀢𑀺 𑀲𑀤𑁆𑀥𑁂𑀬𑁆𑀬𑀸𑀦𑀺. 𑀅𑀓𑀸𑀮𑀼𑀲𑁆𑀲𑀁 𑀯𑀼𑀘𑁆𑀘𑀢𑀺 𑀅𑀦𑀸𑀯𑀺𑀮𑀁 𑀘𑀺𑀢𑁆𑀢𑀁. 𑀅𑀓𑀸𑀮𑀼𑀲𑁆𑀲𑀁 𑀏𑀯 𑀅𑀓𑀸𑀮𑀼𑀲𑁆𑀲𑀺𑀬𑀁. 𑀢𑀲𑁆𑀲 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀑𑀓𑀧𑁆𑀧𑀦𑀸’’𑀢𑀺 𑀅𑀳𑁄𑀲𑀸𑀥𑀼 𑀅𑀳𑁄𑀲𑀼𑀝𑁆𑀞𑀽𑀢𑀺 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀘𑀺𑀦𑁆𑀢𑀦𑀸. ‘‘𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄 𑀬𑁂𑀯𑀸’’𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁄 𑀅𑀥𑀺𑀫𑁄𑀓𑁆𑀔𑁄𑀬𑁂𑀯. ‘‘𑀯𑀺𑀢𑁆𑀢𑁂 𑀅𑀲𑀢𑀻’’𑀢𑀺 𑀥𑀦𑁂 𑀅𑀲𑀢𑀺. 𑀥𑀦𑀜𑁆𑀳𑀺 𑀯𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀯𑀺𑀦𑁆𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. ‘‘𑀢𑁂𑀲𑀁’’𑀢𑀺 𑀫𑀦𑀼𑀲𑁆𑀲𑀸𑀦𑀁.

𑁯𑁮. 𑀲𑀢𑀺𑀯𑀘𑀦𑀢𑁆𑀣𑁂. ‘‘𑀲𑀭𑀢𑀻’’𑀢𑀺 𑀅𑀦𑀼𑀲𑁆𑀲𑀭𑀢𑀺. ‘‘𑀓𑀢𑀸𑀦𑀻’’𑀢𑀺 𑀧𑀼𑀩𑁆𑀩𑁂𑀓𑀢𑀸𑀦𑀺. ‘‘𑀓𑀢𑁆𑀢𑀩𑁆𑀩𑀸𑀦𑀻’’𑀢𑀺 𑀇𑀤𑀸𑀦𑀺 𑀯𑀸 𑀧𑀘𑁆𑀙𑀸 𑀯𑀸 𑀓𑀢𑁆𑀢𑀩𑁆𑀩𑀸𑀦𑀺. 𑀓𑀮𑁆𑀬𑀸𑀡 𑀓𑀫𑁆𑀫𑀁 𑀦𑀸𑀫𑀧𑀓𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀭𑀢𑀺𑀝𑁆𑀞𑀸𑀦𑀁 𑀦 𑀳𑁄𑀢𑀺. 𑀧𑀸𑀧 𑀓𑀫𑁆𑀫𑀫𑁂𑀯 𑀘𑀺𑀢𑁆𑀢𑀲𑁆𑀲 𑀭𑀢𑀺𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀓𑀮𑁆𑀬𑀸𑀡 𑀓𑀫𑁆𑀫𑁂 𑀏𑀯 𑀅𑀧𑁆𑀧𑀫𑀚𑁆𑀚𑀺𑀢𑀼𑀁 𑀯𑀺𑀲𑀼𑀁 𑀲𑀢𑀺𑀦𑀸𑀫 𑀇𑀘𑁆𑀙𑀺𑀢𑀩𑁆𑀩𑀸. 𑀧𑀸𑀧𑀓𑀫𑁆𑀫𑁂 𑀧𑀦 𑀯𑀺𑀲𑀼𑀁 𑀲𑀢𑀺𑀬𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀧𑀫𑀢𑁆𑀢 𑀭𑀽𑀧𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀢𑀭𑀸𑀧𑀦𑀸’’𑀢𑀺𑀆𑀤𑀺𑀁. ‘‘𑀲𑀢𑀺𑀬𑁂𑀯 𑀦 𑀳𑁄𑀢𑀻’’𑀢𑀺 𑀯𑀺𑀲𑀼𑀁 𑀲𑀢𑀺 𑀦𑀸𑀫𑀓𑁄 𑀏𑀓𑁄 𑀘𑁂𑀢𑀲𑀺𑀓𑁄𑀬𑁂𑀯 𑀦 𑀳𑁄𑀢𑀺. 𑀓𑀢𑀫𑀸 𑀧𑀦 𑀲𑀸 𑀳𑁄𑀢𑀻𑀢𑀺 𑀆𑀳 ‘‘𑀓𑀢𑀲𑁆𑀲𑀸’’𑀢𑀺𑀆𑀤𑀺𑀁. 𑀢𑀢𑁆𑀣 𑀓𑀢𑀲𑁆𑀲 𑀅𑀧𑁆𑀧𑀫𑀚𑁆𑀚𑀦𑀁 𑀦𑀸𑀫 𑀓𑁂𑀲𑀜𑁆𑀘𑀺 𑀅𑀦𑀼𑀫𑁄𑀤𑀦𑀯𑀲𑁂𑀦 𑀓𑁂𑀲𑀜𑁆𑀘𑀺 𑀅𑀦𑀼𑀲𑁄𑀘𑀦𑀯𑀲𑁂𑀦 𑀅𑀧𑁆𑀧𑀫𑀚𑁆𑀚𑀦𑀁. 𑀓𑀢𑁆𑀢𑀩𑁆𑀩𑀲𑁆𑀲 𑀅𑀧𑁆𑀧𑀫𑀚𑁆𑀚𑀦𑀁 𑀦𑀸𑀫 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀓𑀸𑀢𑀼𑀁 𑀅𑀪𑀺𑀫𑀼𑀔𑀢𑀸. ‘‘𑀓𑀢𑀲𑁆𑀲𑀸’’𑀢𑀺 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑀣𑀸 𑀲𑁂𑀲𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼. 𑀲𑀩𑁆𑀩𑁂𑀲𑀼 𑀭𑀸𑀚𑀓𑀫𑁆𑀫𑁂𑀲𑀼 𑀦𑀺𑀬𑀼𑀢𑁆𑀢𑁄 𑀲𑀩𑁆𑀩𑀓𑀫𑁆𑀫𑀺𑀓𑁄. ‘‘𑀦𑀺𑀬𑀼𑀢𑁆𑀢𑁄’’𑀢𑀺 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀩𑁆𑀬𑀸𑀯𑀝𑀓𑀸𑀬 𑀘𑀺𑀢𑁆𑀢𑁄. 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀸. 𑀲𑀸 𑀳𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀘𑀺𑀢𑁆𑀢𑀲𑁆𑀲 𑀆𑀭𑀓𑁆𑀔 𑀓𑀺𑀘𑁆𑀘𑀸 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬 𑀲𑀁𑀯𑀭𑀡 𑀥𑀫𑁆𑀫𑀢𑁆𑀢𑀸. 𑀢𑀲𑁆𑀫𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀮𑁄𑀪𑀫𑀽𑀮𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀸𑀬 𑀲𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀅𑀦𑀺𑀝𑁆𑀞𑀸 𑀭𑀫𑁆𑀫𑀡𑁂 𑀤𑁄𑀲𑀫𑀽𑀮 𑀘𑀺𑀢𑁆𑀢𑀲𑁆𑀲, 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀫𑁄𑀳𑀫𑀽𑀮 𑀘𑀺𑀢𑁆𑀢𑀲𑁆𑀲𑀸𑀢𑀺. 𑀅𑀧𑀺 𑀘, 𑀩𑁄𑀚𑁆𑀛𑀗𑁆𑀕 𑀪𑀸𑀯𑀦𑀸 𑀞𑀸𑀦𑁂𑀲𑀼 𑀇𑀤𑀁 𑀲𑀼𑀢𑁆𑀢 𑀧𑀤𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀪𑀸𑀯𑀦𑀸 𑀘𑀺𑀢𑁆𑀢𑀲𑁆𑀲 𑀮𑀻𑀦𑀝𑁆𑀞𑀸𑀦𑁂𑀧𑀺 𑀲𑀸 𑀇𑀘𑁆𑀙𑀺𑀢𑀩𑁆𑀩𑀸 𑀮𑀻𑀦𑀧𑀓𑁆𑀔𑀢𑁄 𑀘𑀺𑀢𑁆𑀢𑀲𑁆𑀲 𑀦𑀻𑀯𑀸𑀭𑀡𑀢𑁆𑀣𑀸𑀬𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸.

𑁯𑁯-𑁧𑁦𑁦. 𑀳𑀺𑀭𑀺𑀑𑀢𑁆𑀢𑀧𑁆𑀧𑀯𑀘𑀦𑀢𑁆𑀣𑁂𑀲𑀼. ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀮𑀚𑁆𑀚𑀢𑀻’’𑀢𑀺 𑀢𑀸𑀦𑀺𑀓𑀸𑀢𑀼𑀁 𑀮𑀚𑁆𑀚𑀢𑀺. 𑀢𑀸𑀦𑀺 𑀳𑀻𑀦𑀓𑀫𑁆𑀫𑀸𑀦𑀺 𑀮𑀸𑀫𑀓𑀓𑀫𑁆𑀫𑀸𑀦𑀻𑀢𑀺 𑀳𑀻𑀴𑁂𑀢𑁆𑀯𑀸 𑀢𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀺𑀢𑀼𑀁 𑀇𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀚𑀺𑀕𑀼𑀘𑁆𑀙𑀢𑀻’’𑀢𑀺. ‘‘𑀉𑀓𑁆𑀓𑀡𑁆𑀞𑀢𑀻’’𑀢𑀺 𑀯𑀺𑀭𑀼𑀚𑁆𑀛𑀢𑀺, 𑀯𑀺𑀬𑁄𑀕𑀁 𑀇𑀘𑁆𑀙𑀢𑀺. ‘‘𑀢𑁂𑀳𑀺 𑀬𑁂𑀯𑀸’’𑀢𑀺 𑀓𑀸𑀬 𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺𑀬𑁂𑀯. ‘‘𑀉𑀩𑁆𑀩𑀺𑀚𑁆𑀚𑀢𑀻’’𑀢𑀺 𑀉𑀢𑁆𑀢𑀲𑀢𑀺, 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺. 𑀕𑀸𑀣𑀸𑀲𑀼. ‘‘𑀅𑀮𑀚𑁆𑀚𑀺𑀬𑁂𑀲𑀽’’𑀢𑀺 𑀅𑀮𑀚𑁆𑀚𑀺𑀢𑀩𑁆𑀩𑁂𑀲𑀼 𑀓𑀮𑁆𑀬𑀸𑀡 𑀓𑀫𑁆𑀫𑁂𑀲𑀼. ‘‘𑀮𑀚𑁆𑀚𑀭𑁂’’𑀢𑀺 𑀮𑀚𑁆𑀚𑀦𑁆𑀢𑀺. ‘‘𑀅𑀪𑀬𑁂’’𑀢𑀺 𑀅𑀪𑀸𑀬𑀺𑀢𑀩𑁆𑀩𑁂 𑀓𑀮𑁆𑀬𑀸𑀡𑀓𑀫𑁆𑀫𑁂. 𑀬𑀲𑁆𑀫𑀸 𑀧𑀦 𑀲𑀧𑁆𑀧𑀼𑀭𑀺𑀲𑀸 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀳𑀺𑀭𑀺𑀬𑀸 𑀅𑀢𑁆𑀢𑀦𑀺 𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀕𑀼𑀡𑀸𑀤𑀺𑀓𑀁 𑀯𑀸 𑀲𑀻𑀮 𑀕𑀼𑀡𑀸𑀤𑀺𑀓𑀁 𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀤𑀺𑀲𑀲𑁆𑀲 𑀏𑀯 𑀭𑀽𑀧𑀁 𑀧𑀸𑀧𑀓𑀫𑁆𑀫𑀁 𑀅𑀬𑀼𑀢𑁆𑀢𑀁 𑀓𑀸𑀢𑀼𑀁. 𑀬𑀤𑀺 𑀓𑀭𑁂𑀬𑁆𑀬𑀁, 𑀧𑀘𑁆𑀙𑀸 𑀅𑀢𑁆𑀢𑀸𑀦𑀁 𑀅𑀲𑀼𑀤𑁆𑀥𑀁 𑀜𑀢𑁆𑀯𑀸 𑀤𑀼𑀓𑁆𑀔𑀻𑀤𑀼𑀫𑁆𑀫𑀦𑁄 𑀪𑀯𑁂𑀬𑁆𑀬𑀦𑁆𑀢𑀺 𑀏𑀯𑀁 𑀳𑀺𑀭𑀺𑀬𑀸 𑀅𑀢𑁆𑀢𑀦𑀺 𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. ‘‘𑀑𑀢𑁆𑀢𑀧𑁆𑀧𑁂𑀦 𑀧𑀭𑁂𑀲𑀼 𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺 𑀧𑀭𑀸𑀦𑀼𑀯𑀸𑀤𑀪𑀬𑀁 𑀪𑀸𑀬𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀧𑀭𑀸𑀦𑀼𑀯𑀸𑀤𑀪𑀬𑀁 𑀦𑀸𑀫 𑀧𑀭𑁂𑀲𑀁 𑀲𑀸𑀥𑀼 𑀚𑀦𑀸𑀦𑀁 𑀕𑀭𑀳𑀸 𑀪𑀬𑀁. 𑀅𑀜𑁆𑀜𑀫𑁆𑀧𑀺 𑀅𑀧𑀸𑀬𑀪𑀬𑀁 𑀲𑀁𑀲𑀸𑀭 𑀯𑀝𑁆𑀝𑀪𑀬𑀜𑁆𑀘 𑀏𑀢𑁆𑀣 𑀲𑀗𑁆𑀕𑀬𑁆𑀳𑀢𑀺𑀬𑁂𑀯. 𑀮𑁄𑀓𑀁𑀧𑀸𑀮𑁂𑀦𑁆𑀢𑀻𑀢𑀺 𑀮𑁄𑀓𑀧𑀸𑀮𑀸. ‘‘𑀮𑁄𑀓𑀁’’𑀢𑀺 𑀲𑀢𑁆𑀢𑀮𑁄𑀓𑀁. ‘‘𑀧𑀸𑀮𑁂𑀦𑁆𑀢𑀻’’𑀢𑀺 𑀅𑀧𑀸𑀬 𑀪𑀬𑀢𑁄 𑀭𑀓𑁆𑀔𑀦𑁆𑀢𑀺.

𑁧𑁦𑁧. 𑀅𑀮𑁄𑀪𑀯𑀘𑀦𑀢𑁆𑀣𑁂. 𑀅𑀓𑀸𑀭𑁄 𑀯𑀺𑀭𑀼𑀤𑁆𑀥𑀢𑁆𑀣𑁄𑀢𑀺𑀆𑀳 ‘‘𑀮𑁄𑀪𑀧𑁆𑀧𑀝𑀺𑀧𑀓𑁆𑀔𑁄’’𑀢𑀺. 𑀮𑁄𑀪𑀲𑁆𑀲 𑀧𑀝𑀺𑀯𑀺𑀭𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀯𑀺𑀭𑀼𑀤𑁆𑀥𑀢𑀸 𑀘 𑀧𑀳𑀸𑀬𑀓 𑀧𑀳𑀸𑀢𑀩𑁆𑀩 𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄 𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀯𑀲𑁂𑀦 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀳𑀺𑀢 𑀲𑀜𑁆𑀜𑀺𑀢𑁂𑀲𑀽’’𑀢𑀺 𑀇𑀤𑀁 𑀫𑁂 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬𑀸𑀢𑀺 𑀏𑀯𑀁 𑀲𑀜𑁆𑀜𑀺𑀢𑁂𑀲𑀼. ‘‘𑀮𑀕𑁆𑀕𑀦𑀯𑀲𑁂𑀦𑀸’’𑀢𑀺 𑀅𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸𑀯𑀲𑁂𑀦. 𑀢𑁂𑀲𑁆𑀯𑁂𑀯 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀪𑀯𑀪𑁄𑀕 𑀲𑀫𑁆𑀧𑀢𑁆𑀢𑀺𑀬𑁄 𑀕𑀽𑀣𑀭𑀸𑀲𑀺𑀁 𑀯𑀺𑀬 𑀳𑀻𑀴𑁂𑀢𑁆𑀯𑀸’’𑀢𑀺 𑀇𑀤𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀲𑁂𑀦 𑀦𑀺𑀤𑀲𑁆𑀲𑀦 𑀯𑀘𑀦𑀁. 𑀢𑀢𑁆𑀣 ‘‘𑀳𑀻𑀴𑁂𑀢𑁆𑀯𑀸’’𑀢𑀺 𑀕𑀭𑀳𑀺𑀢𑁆𑀯𑀸. 𑀦𑀺𑀓𑁆𑀔𑀫𑀦𑁆𑀢𑀺 𑀏𑀢𑁂𑀦𑀸𑀢𑀺 𑀦𑁂𑀓𑁆𑀔𑀫𑁆𑀫𑁄. 𑀲𑁄 𑀏𑀯 𑀥𑀸𑀢𑀽𑀢𑀺 𑀦𑁂𑀓𑁆𑀔𑀫𑁆𑀫𑀥𑀸𑀢𑀼.

𑁧𑁦𑁨. 𑀅𑀬𑀁 𑀦𑀬𑁄 𑀤𑁄𑀲𑀧𑁆𑀧𑀝𑀺𑀧𑀓𑁆𑀔𑁄, 𑀫𑁄𑀳𑀧𑁆𑀧𑀝𑀺𑀧𑀓𑁆𑀔𑁄𑀢𑀺𑀆𑀤𑀻𑀲𑀼𑀧𑀺 𑀦𑁂𑀢𑀩𑁆𑀩𑁄.

𑁧𑁦𑁩. 𑀢𑀢𑁆𑀭 𑀫𑀚𑁆𑀛𑀢𑁆𑀢𑀢𑀸𑀬𑀁. ‘‘𑀮𑀻𑀦𑀼𑀤𑁆𑀥𑀘𑁆𑀘𑀸𑀦𑀁’’𑀢𑀺 𑀘𑀺𑀢𑁆𑀢𑀲𑁆𑀲 𑀮𑀻𑀦𑀢𑀸 𑀏𑀓𑁄 𑀯𑀺𑀲𑀫𑀧𑀓𑁆𑀔𑁄. 𑀉𑀤𑁆𑀥𑀝𑀢𑀸 𑀤𑀼𑀢𑀻𑀬𑁄 𑀯𑀺𑀲𑀫𑀧𑀓𑁆𑀔𑁄. 𑀮𑀻𑀦𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑁂 𑀯𑀺𑀲𑀫𑀧𑀓𑁆𑀔𑁂 𑀧𑀢𑀢𑀺. 𑀉𑀤𑁆𑀥𑀝𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀯𑀺𑀲𑀫𑀧𑀓𑁆𑀔𑁂 𑀧𑀢𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀅𑀓𑀼𑀲𑀮 𑀧𑀓𑁆𑀔𑀺𑀓𑀁 𑀳𑁄𑀢𑀺. 𑀢𑀣𑀸 𑀘𑀺𑀢𑁆𑀢𑀲𑁆𑀲 𑀅𑀢𑀺 𑀮𑀽𑀔𑀢𑀸 𑀏𑀓𑁄 𑀯𑀺𑀲𑀫 𑀧𑀓𑁆𑀔𑁄. 𑀅𑀢𑀺𑀧𑀳𑀝𑁆𑀞𑀢𑀸 𑀏𑀓𑁄𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀩𑁄𑀚𑁆𑀛𑀗𑁆𑀕𑀯𑀺𑀥𑀸𑀦𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀢𑁆𑀭 𑀫𑀚𑁆𑀛𑀢𑁆𑀢𑀢𑀸 𑀧𑀦 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀧𑀸𑀢𑁂𑀢𑀼𑀁 𑀅𑀤𑀢𑁆𑀯𑀸 𑀲𑀬𑀁 𑀫𑀚𑁆𑀛𑀺𑀫𑀧𑁆𑀧𑀝𑀺𑀧𑀤𑀸𑀬𑀁 𑀤𑀴𑁆𑀳𑀁 𑀢𑀺𑀝𑁆𑀞𑀢𑀺.

𑁧𑁦𑁪. 𑀧𑀲𑁆𑀲𑀤𑁆𑀥𑀸𑀤𑀻𑀲𑀼. ‘‘𑀢𑀢𑁆𑀣 𑀢𑀁 𑀯𑀻𑀦𑁆𑀤𑀦𑁆𑀢𑀻’’𑀢𑀺 𑀢𑁂𑀲𑀼 𑀧𑀼𑀜𑁆𑀜 𑀓𑀫𑁆𑀫𑁂𑀲𑀼 𑀢𑀁 𑀘𑀺𑀢𑁆𑀢 𑀲𑀼𑀔𑀁 𑀧𑀝𑀺𑀮𑀪𑀦𑁆𑀢𑀺.

𑁧𑁦𑁫. 𑀮𑀳𑀼𑀢𑀸 𑀤𑁆𑀯𑀬𑁂. ‘‘𑀢𑀢𑁆𑀢𑀧𑀸𑀲𑀸𑀡𑁂’’𑀢𑀺 𑀲𑀦𑁆𑀢𑀢𑁆𑀢𑁂 𑀧𑀸𑀲𑀸𑀡𑀧𑀺𑀝𑁆𑀞𑁂. ‘‘𑀢𑀢𑁆𑀣𑀸’’𑀢𑀺 𑀧𑀼𑀜𑁆𑀜𑀓𑀫𑁆𑀫𑁂𑀲𑀼.

𑁧𑁦𑁬-𑁧𑁧𑁦. 𑀫𑀼𑀤𑀼𑀢𑀸 𑀤𑁆𑀯𑀬𑀸𑀤𑀻𑀲𑀼 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁧𑁧𑁧. 𑀯𑀺𑀭𑀢𑀺𑀢𑁆𑀢𑀬𑁂. ‘‘𑀓𑀣𑀸, 𑀘𑁂𑀢𑀦𑀸, 𑀯𑀺𑀭𑀢𑀺, 𑀯𑀲𑁂𑀦𑀸’’𑀢𑀺 ‘𑀓𑀣𑀸𑀲𑀫𑁆𑀫𑀸𑀯𑀸𑀘𑀸, 𑀘𑁂𑀢𑀦𑀸 𑀲𑀫𑁆𑀫𑀸𑀯𑀸𑀘𑀸, 𑀯𑀺𑀭𑀢𑀺 𑀲𑀫𑁆𑀫𑀸𑀯𑀸𑀘𑀸, 𑀯𑀲𑁂𑀦. 𑀢𑀁 𑀓𑀣𑀸𑀯𑀸𑀘𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀢𑀁 𑀲𑀫𑀼𑀝𑁆𑀞𑀸𑀧𑀺𑀓𑀸. 𑀬𑀸 𑀧𑀦 𑀧𑀸𑀧 𑀯𑀺𑀭𑀫𑀡𑀸𑀓𑀸𑀭𑁂𑀦 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀯𑀸’’𑀢𑀺 𑀫𑀼𑀲𑀸𑀯𑀸𑀤𑀸 𑀯𑀺𑀭𑀫𑀸𑀫𑀻𑀢𑀺𑀆𑀤𑀺𑀦𑀸 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀯𑀸. ‘‘𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀯𑀸’’𑀢𑀺 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀢𑀣𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀯𑀸. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀫𑀸𑀤𑀸𑀦 𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀁 𑀯𑀤𑀢𑀺. ‘‘𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸’’𑀢𑀺 𑀏𑀢𑁂𑀦 𑀲𑀫𑁆𑀧𑀢𑁆𑀢 𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀁 𑀯𑀤𑀢𑀺. ‘‘𑀏𑀢𑀸𑀬𑀸’’𑀢𑀺 𑀲𑀫𑁆𑀫𑀸𑀯𑀸𑀘𑀸 𑀯𑀺𑀭𑀢𑀺𑀬𑀸. 𑀲𑀸 𑀧𑀦 𑀓𑀢𑁆𑀢𑀼𑀦𑀸 𑀘 𑀓𑁆𑀭𑀺𑀬𑀸𑀬 𑀘 𑀲𑀳𑀪𑀸𑀯𑀺𑀦𑀻 𑀳𑀼𑀢𑁆𑀯𑀸 𑀲𑀫𑀸𑀤𑀸𑀦 𑀓𑁆𑀭𑀺𑀬𑀁 𑀲𑀼𑀝𑁆𑀞𑀼𑀢𑀭𑀁 𑀲𑀸𑀥𑁂𑀢𑀺. 𑀢𑀲𑁆𑀫𑀸 𑀲𑀸 𑀓𑀭𑀡 𑀲𑀸𑀥𑀦𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀓𑀭𑀡𑀢𑁆𑀣𑁂𑀯𑀸𑀓𑀭𑀡 𑀯𑀘𑀦’’𑀦𑁆𑀢𑀺. 𑀩𑀳𑀽𑀲𑀼𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀧𑀼𑀭𑀺𑀫 𑀧𑀼𑀭𑀺𑀫 𑀚𑀯𑀦𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑁆𑀫𑀸𑀯𑀸𑀘𑀸 𑀧𑀘𑁆𑀙𑀺𑀫 𑀧𑀘𑁆𑀙𑀺𑀫 𑀚𑀯𑀦𑀯𑀸𑀭𑀲𑀫𑀼𑀝𑁆𑀞𑀺𑀢𑀸𑀬 𑀲𑀫𑀸𑀤𑀸𑀦 𑀓𑁆𑀭𑀺𑀬𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀸 𑀧𑀦 𑀢𑀸𑀬 𑀓𑁆𑀭𑀺𑀬𑀸𑀬 𑀅𑀲𑀳𑀪𑀸𑀯𑀺𑀢𑁆𑀢𑀸 𑀓𑀭𑀡𑀮𑀓𑁆𑀔𑀡𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀳𑁂𑀢𑀼 𑀮𑀓𑁆𑀔𑀡𑁂 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀳𑁂𑀢𑀼 𑀅𑀢𑁆𑀣𑁂𑀯𑀸 𑀓𑀭𑀡𑀯𑀘𑀦’’𑀦𑁆𑀢𑀺. 𑀇𑀤𑀜𑁆𑀘 𑀅𑀢𑁆𑀣𑀢𑁄 𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀯𑀸𑀘𑀸𑀢𑀺 𑀧𑀤𑀁 𑀧𑀦 𑀓𑀺𑀢𑀲𑀸𑀥𑀦 𑀧𑀤𑀢𑁆𑀢𑀸𑀓𑀭𑀡𑀢𑁆𑀣𑁂 𑀏𑀯𑀲𑀺𑀤𑁆𑀥𑀁. 𑀦 𑀳𑀺 𑀅𑀓𑀸𑀭𑀓 𑀪𑀽𑀢𑁄 𑀳𑁂𑀢𑀼 𑀅𑀢𑁆𑀣𑁄 𑀲𑀸𑀥𑀦𑀁 𑀦𑀸𑀫 𑀲𑀫𑁆𑀪𑀯𑀢𑀺. ‘‘𑀲𑀫𑀸𑀤𑀸𑀦 𑀯𑀘𑀦𑀸𑀦𑀻’’𑀢𑀺 𑀲𑀫𑁆𑀫𑀸𑀯𑀸𑀘𑀸 𑀲𑀫𑀼𑀝𑁆𑀞𑀺𑀢𑀸𑀦𑀺 𑀲𑀫𑀸𑀤𑀸𑀦 𑀯𑀘𑀦𑀸𑀦𑀺. ‘‘𑀢𑀢𑁄’’𑀢𑀺 𑀢𑀢𑁄𑀧𑀭𑀁. ‘‘𑀢𑁂𑀲𑀁’’𑀢𑀺 𑀢𑁂 𑀲𑀁𑀯𑀤𑀫𑀸𑀦𑀸𑀦𑀁. 𑀇𑀤𑀜𑁆𑀘 𑀲𑀩𑁆𑀩𑀁 𑀲𑀫𑁆𑀫𑀸𑀯𑀸𑀘𑀸𑀢𑀺 𑀯𑀘𑀦𑁂 𑀯𑀘𑀻𑀪𑁂𑀤𑀯𑀸𑀘𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑁆𑀧𑀢𑁆𑀢𑀯𑀺𑀭𑀢𑀺 𑀲𑀫𑀼𑀘𑁆𑀙𑁂𑀤 𑀯𑀺𑀭𑀢𑀺𑀪𑀽𑀢𑀸𑀬 𑀧𑀦 𑀲𑀫𑁆𑀫𑀸𑀯𑀸𑀘𑀸𑀬 𑀯𑀘𑀻𑀪𑁂𑀤𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀯𑀺𑀭𑀢𑀺 𑀓𑀺𑀘𑁆𑀘 𑀫𑁂𑀯𑀧𑀥𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀯𑀢𑁆𑀢𑀫𑀸𑀦𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀢𑁆𑀢𑀸. 𑀯𑀺𑀲𑁂𑀲𑀦 𑀳𑁂𑀢𑀼 𑀧𑀤𑀫𑁂𑀢𑀁.

𑁧𑁧𑁨-𑁧𑁧𑁩. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀧𑀺 𑀲𑀫𑁆𑀫𑀸𑀆𑀚𑀻𑀯𑁂𑀧𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁧𑁧𑁪. ‘‘𑀲𑀫𑁆𑀧𑀢𑁆𑀢𑀁 𑀯𑀢𑁆𑀣𑀼𑀁’’𑀢𑀺 𑀧𑀸𑀡𑀸𑀢𑀺 𑀧𑀸𑀢𑀸𑀤𑀺𑀓𑀫𑁆𑀫𑀲𑁆𑀲 𑀯𑀢𑁆𑀣𑀼𑀁. 𑀲𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬𑁂𑀯. 𑀓𑀲𑁆𑀫𑀸, 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑁂 𑀲𑀫𑁆𑀧𑀢𑁆𑀢 𑀯𑀲𑁂𑀦𑀯𑀢𑁆𑀣𑀼𑀲𑁆𑀲𑀥𑀭𑀫𑀸𑀦𑀢𑁆𑀢𑀸. ‘‘𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀯𑀸 𑀉𑀧𑁆𑀧𑀦𑁆𑀦𑀸’’𑀢𑀺 𑀧𑀸𑀡𑀸𑀢𑀺 𑀧𑀸𑀢𑀸𑀧𑀝𑀺𑀯𑀺𑀭𑀫𑀸𑀥𑀻𑀢𑀺𑀆𑀤𑀺𑀦𑀸 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀬𑀸 𑀲𑀫𑀸𑀤𑀸𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺. ‘‘𑀲𑀸 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀳𑁄𑀢𑀻’’𑀢𑀺 𑀏𑀢𑁆𑀣 𑀓𑀣𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀭𑀫𑁆𑀫𑀡𑀸 𑀳𑁄𑀢𑀻𑀢𑀺. 𑀧𑀸𑀡𑀸𑀢𑀺 𑀧𑀸𑀢𑀸𑀧𑀝𑀺𑀯𑀺𑀭𑀫𑀸𑀥𑀻𑀢𑀺 𑀯𑀤𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀅𑀦𑀼𑀓𑁆𑀓𑀫𑁂𑀦 𑀧𑀸𑀡𑀲𑀤𑁆𑀤𑀸𑀤𑀻𑀦𑀁 𑀅𑀢𑁆𑀣𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀢𑀢𑁆𑀣 ‘‘𑀧𑀸𑀡𑁄’’𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄. 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑁄 𑀘 𑀲𑀢𑁆𑀢𑁄 𑀢𑀜𑁆𑀘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀮𑁄𑀓𑁂 𑀲𑀩𑁆𑀩𑀓𑀸𑀮𑀫𑁆𑀧𑀺 𑀲𑀁𑀯𑀺𑀚𑁆𑀚𑀢𑀺𑀬𑁂𑀯. 𑀏𑀯𑀭𑀽𑀧𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬 𑀲𑀸𑀫𑀜𑁆𑀜𑀁 𑀲𑀦𑁆𑀥𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀯𑀼𑀢𑁆𑀢𑀁. 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀫𑀸𑀥𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀅𑀦𑀸𑀕𑀢𑀸 𑀭𑀫𑁆𑀫𑀡𑀸𑀯𑀸’’𑀢𑀺 𑀏𑀢𑁆𑀣 𑀏𑀓𑀤𑀺𑀯𑀲𑀁 𑀦𑀺𑀬𑀫𑁂𑀢𑁆𑀯𑀸 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀥𑀭𑀫𑀸𑀦 𑀲𑀢𑁆𑀢𑀸𑀧𑀺 𑀅𑀢𑁆𑀣𑀺. 𑀉𑀧𑁆𑀧𑀚𑁆𑀚𑀺𑀲𑁆𑀲𑀫𑀸𑀦𑀲𑀢𑁆𑀢𑀸𑀧𑀺 𑀅𑀢𑁆𑀣𑀺. 𑀢𑀤𑀼𑀪𑀬𑀫𑁆𑀧𑀺 𑀧𑀸𑀡𑀯𑀘𑀦𑁂 𑀲𑀗𑁆𑀕𑀳𑀺𑀢𑀫𑁂𑀯. 𑀧𑀸𑀡𑀼𑀧𑁂𑀢𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀧𑀺 𑀘 𑀅𑀦𑀸𑀕𑀢𑀓𑀸𑀮𑀺𑀓𑀫𑁆𑀧𑀺 𑀲𑀫𑀸𑀤𑀸𑀦𑀁 𑀅𑀢𑁆𑀣𑀺𑀬𑁂𑀯. 𑀅𑀳𑀁 𑀅𑀲𑀼𑀓𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀥𑀻𑀢𑀺𑀆𑀤𑀺. 𑀏𑀯𑀁 𑀲𑀫𑀸𑀤𑀸𑀦 𑀯𑀺𑀭𑀢𑀺 𑀅𑀦𑀸𑀕𑀢𑀸 𑀭𑀫𑁆𑀫𑀡𑀸𑀧𑀺 𑀳𑁄𑀢𑀻𑀢𑀺. ‘‘𑀧𑀘𑁆𑀘𑀬𑀲𑀫𑀼𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺 𑀢𑀁 𑀢𑀁 𑀓𑀺𑀮𑁂𑀲𑀸𑀦𑀼𑀲𑀬 𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀲𑀫𑀼𑀘𑁆𑀙𑁂𑀤𑀯𑀲𑁂𑀦. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁧𑁧𑁫-𑁧𑁧𑁬. 𑀅𑀧𑁆𑀧𑀫𑀜𑁆𑀜𑀸𑀤𑁆𑀯𑀬𑁂. 𑀅𑀧𑀺𑀘𑀸𑀢𑀺𑀆𑀤𑀻𑀲𑀼. ‘‘𑀓𑀮𑀺𑀲𑀫𑁆𑀪𑀯𑁂𑀪𑀯𑁂’’𑀢𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀽𑀢𑁂 𑀲𑀁𑀲𑀸𑀭𑀪𑀯𑁂. ‘‘𑀧𑀸𑀧𑁂𑀓𑀮𑀺 𑀧𑀭𑀸𑀚𑀬𑁂’’𑀢𑀺 𑀓𑀮𑀺𑀲𑀤𑁆𑀤𑁄 𑀧𑀸𑀧𑁂 𑀘 𑀧𑀭𑀸𑀚𑀬𑁂 𑀘 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢𑁂𑀳𑀺 𑀓𑀮𑀺𑀁 𑀅𑀯𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀭𑀼𑀡𑀸. 𑀲𑀢𑁆𑀢𑁂𑀳𑀻𑀢𑀺 𑀘 𑀭𑀓𑁆𑀔𑀡𑀢𑁆𑀣𑀬𑁄𑀕𑁂 𑀇𑀘𑁆𑀙𑀺𑀢𑀲𑁆𑀫𑀺𑀁 𑀅𑀢𑁆𑀣𑁂 𑀅𑀧𑀸𑀤𑀸𑀦 𑀯𑀘𑀦𑀁. 𑀬𑀣𑀸-𑀓𑀸𑀓𑁂 𑀭𑀓𑁆𑀔𑀦𑁆𑀢𑀺 𑀢𑀡𑁆𑀟𑀼𑀮𑀸-𑀢𑀺. 𑀲𑀢𑁆𑀢𑁂𑀯𑀸 𑀓𑀮𑀺𑀢𑁄 𑀅𑀯𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀭𑀼𑀡𑀸. 𑀓𑀮𑀺𑀢𑁄𑀢𑀺 𑀘 𑀭𑀓𑁆𑀔𑀡𑀢𑁆𑀣 𑀬𑁄𑀕𑁂 𑀅𑀦𑀺𑀘𑁆𑀙𑀺𑀢𑀲𑁆𑀫𑀺𑀫𑁆𑀧𑀺 𑀅𑀧𑀸𑀤𑀸𑀦𑀯𑀘𑀦𑀁. 𑀬𑀣𑀸-𑀧𑀸𑀧𑀸𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂𑀢𑀺. 𑀏𑀓𑀲𑁆𑀫𑀺𑀁 𑀲𑀢𑁆𑀢𑁂 𑀧𑀯𑀢𑁆𑀢𑀸𑀧𑀺 𑀅𑀧𑁆𑀧𑀫𑀜𑁆𑀜𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀺. 𑀬𑀣𑀸 𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀳𑁄𑀢𑀻𑀢𑀺.

𑁧𑁧𑁭. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑀲𑁄𑀪𑀡𑀭𑀸𑀲𑀺𑀫𑁆𑀳𑀺𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁮. 𑀏𑀢𑀁 𑀧𑀭𑀺𑀫𑀸𑀡𑀁 𑀅𑀲𑁆𑀲𑀸𑀢𑀺 𑀏𑀢𑁆𑀢𑀸𑀯𑀁. ‘‘𑀏𑀢𑁆𑀢𑀸𑀯𑀢𑀸’’𑀢𑀺 𑀏𑀢𑁆𑀢𑀸𑀯𑀦𑁆𑀢𑁂𑀦-𑀨𑀲𑁆𑀲𑁄, 𑀯𑁂𑀤𑀦𑀸, 𑀲𑀜𑁆𑀜𑀸,𑀢𑀺𑀆𑀤𑀺𑀯𑀘𑀦𑀓𑁆𑀓𑀫𑁂𑀦. ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽’’𑀢𑀺 𑀏𑀢𑁆𑀣-𑀓𑀢𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢 𑀘𑀺𑀢𑁆𑀢𑀼𑀧𑁆𑀧𑀸𑀤𑀸-𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓 𑀲𑀫𑀽𑀳𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀘𑀺𑀢𑁆𑀢𑀸𑀦𑀺 𑀏𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽𑀢𑀺 𑀘𑀺𑀢𑁆𑀢𑁂𑀲𑀼 𑀇𑀘𑁆𑀘𑁂𑀯 𑀅𑀢𑁆𑀣𑁄’’𑀢𑀺. ‘‘𑀲𑀩𑁆𑀩𑀤𑀼𑀩𑁆𑀩𑀮𑀢𑁆𑀢𑀸’’𑀢𑀺 𑀲𑀩𑁆𑀩𑀘𑀺𑀢𑁆𑀢𑁂𑀳𑀺 𑀤𑀼𑀩𑁆𑀩𑀮𑀢𑀭𑀢𑁆𑀢𑀸. ‘‘𑀪𑀸𑀯𑀦𑀸 𑀩𑀮𑁂𑀦𑀸’’𑀢𑀺 𑀯𑀺𑀢𑀓𑁆𑀓 𑀯𑀺𑀭𑀸𑀕𑀲𑀢𑁆𑀢𑀺 𑀬𑀼𑀢𑁆𑀢𑁂𑀦 𑀉𑀧𑀘𑀸𑀭 𑀪𑀸𑀯𑀦𑀸 𑀩𑀮𑁂𑀦, 𑀯𑀼𑀝𑁆𑀞𑀸𑀦 𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸 𑀪𑀸𑀯𑀦𑀸 𑀩𑀮𑁂𑀦 𑀘. ‘‘𑀩𑀮𑀦𑀸𑀬𑀓𑀢𑁆𑀢𑀸’’𑀢𑀺 𑀩𑀮 𑀥𑀫𑁆𑀫𑀸𑀦𑀁 𑀦𑀸𑀬𑀓𑀢𑁆𑀢𑀸, 𑀚𑁂𑀝𑁆𑀞𑀓𑀢𑁆𑀢𑀸.

𑁧𑁧𑁯. 𑀅𑀓𑀼𑀲𑀮 𑀘𑁂𑀢𑀲𑀺𑀓𑁂𑀲𑀼. ‘‘𑀧𑀘𑁆𑀙𑀺𑀫𑀁’’𑀢𑀺 𑀲𑀩𑁆𑀩𑁂𑀲𑀼𑀧𑀺 𑀤𑁆𑀯𑀸𑀤𑀲𑀸 𑀓𑀼𑀲𑀮 𑀘𑀺𑀢𑁆𑀢𑁂𑀲𑀽𑀢𑀺 𑀯𑀘𑀦𑀁. ‘‘𑀧𑀼𑀭𑀺𑀫𑀲𑁆𑀲𑀸’’𑀢𑀺 𑀲𑀩𑁆𑀩𑀸 𑀓𑀼𑀲𑀮 𑀲𑀸𑀥𑀸𑀭𑀡𑀸 𑀦𑀸𑀫𑀸𑀢𑀺 𑀯𑀘𑀦𑀲𑁆𑀲. ‘‘𑀲𑀫𑀢𑁆𑀢𑀦 𑀯𑀘𑀦𑀁’’𑀢𑀺-𑀓𑀲𑁆𑀫𑀸 𑀲𑀩𑁆𑀩𑀸𑀓𑀼𑀲𑀮 𑀲𑀸𑀥𑀸𑀭𑀡𑀸 𑀦𑀸𑀫𑀸𑀢𑀺. 𑀬𑀲𑁆𑀫𑀸 𑀲𑀩𑁆𑀩𑁂𑀲𑀼𑀧𑀺. 𑀮. 𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸 𑀓𑀼𑀲𑀮 𑀲𑀸𑀥𑀸𑀭𑀡𑀸 𑀦𑀸𑀫𑀸-𑀢𑀺 𑀏𑀯𑀁 𑀲𑀸𑀥𑀦 𑀯𑀘𑀦𑀁. 𑀬𑀲𑁆𑀫𑀸 𑀧𑀦 𑀇𑀫𑁂𑀳𑀺 𑀘𑀢𑀽𑀳𑀺 𑀯𑀺𑀦𑀸𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀲𑀼 𑀢𑁂𑀲𑀼 𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀯𑀺𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀦 𑀳𑀺𑀢𑀸𑀦𑀻’’𑀢𑀺𑀆𑀤𑀺𑀁. ‘‘𑀢𑁂𑀳𑀻’’𑀢𑀺 𑀧𑀸𑀧𑁂𑀳𑀺. 𑀲𑀩𑁆𑀩 𑀧𑀸𑀧 𑀥𑀫𑁆𑀫𑀢𑁄𑀢𑀺 𑀅𑀢𑁆𑀣𑁄. ‘‘𑀢𑀣𑀸 𑀢𑀣𑀸 𑀆𑀫𑀲𑀺𑀢𑁆𑀯𑀸’’𑀢𑀺 𑀤𑀺𑀝𑁆𑀞𑀺 𑀔𑀦𑁆𑀥𑁂𑀲𑀼 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄𑀢𑀺𑀆𑀤𑀺𑀦𑀸 𑀆𑀫𑀲𑀢𑀺. 𑀫𑀸𑀦𑁄 𑀅𑀳𑀦𑁆𑀢𑀺 𑀯𑀸 𑀲𑁂𑀬𑁆𑀬𑁄 𑀲𑀤𑀺𑀲𑁄𑀢𑀺𑀆𑀤𑀺𑀦𑀸 𑀯𑀸 𑀆𑀫𑀲𑀢𑀺. 𑀏𑀯𑀁 𑀢𑀣𑀸 𑀢𑀣𑀸 𑀆𑀫𑀲𑀺𑀢𑁆𑀯𑀸. ‘‘𑀢𑁂𑀲𑀽’’𑀢𑀺 𑀤𑀺𑀝𑁆𑀞𑀺𑀫𑀸𑀦𑁂𑀲𑀼. 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀤𑀺𑀝𑁆𑀞𑀺 𑀧𑀭𑀸𑀫𑀲𑀦𑁆𑀢𑀻 𑀧𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀁 𑀕𑀳𑀺𑀢𑀸𑀓𑀸𑀭’’𑀦𑁆𑀢𑀺 𑀢𑀁 𑀅𑀳𑀦𑁆𑀢𑀺 𑀕𑀳𑀺𑀢𑀁 𑀦𑀺𑀫𑀺𑀢𑁆𑀢𑀸𑀓𑀸𑀭𑀁. 𑀲𑀓𑁆𑀓𑀸𑀬 𑀤𑀺𑀝𑁆𑀞𑀺 𑀏𑀯 𑀕𑀢𑀺 𑀬𑁂𑀲𑀁 𑀢𑁂 𑀤𑀺𑀝𑁆𑀞𑀺 𑀕𑀢𑀺𑀓𑀸. 𑀅𑀯𑀺𑀓𑁆𑀔𑀫𑁆𑀪𑀺𑀢 𑀲𑀓𑁆𑀓𑀸𑀬 𑀤𑀺𑀝𑁆𑀞𑀺𑀓𑀸. ‘‘𑀅𑀳𑀦𑁆𑀢𑀺 𑀕𑀡𑁆𑀳𑀦𑁆𑀢𑀻’’𑀢𑀺 𑀫𑀸𑀦𑁂𑀦 𑀕𑀡𑁆𑀳𑀦𑁆𑀢𑀺. ‘‘𑀦 𑀳𑀺 𑀫𑀸𑀦𑀲𑁆𑀲 𑀯𑀺𑀬𑀸’’𑀢𑀺 𑀬𑀣𑀸 𑀫𑀸𑀦𑀲𑁆𑀲 𑀅𑀢𑁆𑀢𑀲𑀫𑁆𑀧𑀕𑁆𑀕𑀳𑀡𑁂 𑀩𑁆𑀬𑀸𑀧𑀸𑀭𑁄 𑀅𑀢𑁆𑀣𑀺, 𑀦 𑀢𑀣𑀸 𑀤𑀺𑀝𑁆𑀞𑀺𑀬𑀸 𑀅𑀢𑁆𑀢𑀲𑀫𑁆𑀧𑀕𑁆𑀕𑀳𑀡𑁂 𑀩𑁆𑀬𑀸𑀧𑀸𑀭𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀅𑀢𑁆𑀢𑀲𑀫𑁆𑀧𑀕𑁆𑀕𑀳𑀡𑀁 𑀦𑀸𑀫 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼𑀧𑀕𑁆𑀕𑀳𑀡𑀁. ‘‘𑀦 𑀘 𑀤𑀺𑀝𑁆𑀞𑀺𑀬𑀸 𑀯𑀺𑀬𑀸’’𑀢𑀺 𑀬𑀣𑀸 𑀤𑀺𑀝𑁆𑀞𑀺𑀬𑀸 𑀥𑀫𑁆𑀫𑀸𑀦𑀁 𑀅𑀬𑀸𑀣𑀸𑀯𑀧𑀓𑁆𑀔𑀧𑀭𑀺𑀓𑀧𑁆𑀧𑀦𑁂 𑀩𑁆𑀬𑀸𑀧𑀸𑀭𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀬𑀸𑀣𑀸𑀯𑀧𑀓𑁆𑀔𑁄 𑀦𑀸𑀫 𑀅𑀢𑁆𑀢𑀸 𑀲𑀲𑁆𑀲𑀢𑁄 𑀉𑀘𑁆𑀙𑀺𑀦𑁆𑀦𑁄𑀢𑀺𑀆𑀤𑀺. 𑀫𑀘𑁆𑀙𑀭𑀺𑀬𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀻𑀲𑀼 𑀮𑀕𑁆𑀕𑀦𑀮𑁄𑀪𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀫𑀘𑁆𑀙𑀭𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀢𑀸𑀲𑀁’’𑀢𑀺 𑀅𑀢𑁆𑀢𑀲𑀫𑁆𑀧𑀢𑁆𑀢𑀻𑀦𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁧𑁨𑁦. 𑀲𑁄𑀪𑀡𑀘𑁂𑀢𑀲𑀺𑀓𑁂𑀲𑀼. ‘‘𑀢𑀻𑀲𑀼 𑀔𑀦𑁆𑀥𑁂𑀲𑀼’’𑀢𑀺 𑀲𑀻𑀮𑀓𑁆𑀔𑀦𑁆𑀥 𑀲𑀫𑀸𑀥𑀺𑀓𑁆𑀔𑀦𑁆𑀥 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀲𑀼 𑀘. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀘𑁆𑀙𑀺𑀫𑀓𑁄’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀓𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀭𑀺𑀯𑀸 𑀭𑀫𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀲𑁆𑀫𑀺𑀁 𑀅𑀲𑀢𑀺 𑀧𑀻’’𑀢𑀺 𑀤𑀼𑀢𑀻𑀬𑀚𑁆𑀛𑀸𑀦𑀺𑀓 𑀫𑀕𑁆𑀕𑀸𑀤𑀻𑀲𑀼 𑀢𑀲𑁆𑀫𑀺𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂 𑀅𑀲𑀦𑁆𑀢𑁂𑀧𑀺. ‘‘𑀲𑀻𑀮𑀲𑀫𑀸𑀥𑀺𑀓𑁆𑀔𑀦𑁆𑀥 𑀥𑀫𑁆𑀫𑁂𑀲𑀼 𑀧𑀦𑀸’’𑀢𑀺 ‘𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄,𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥 𑀥𑀫𑁆𑀫𑀸 𑀦𑀸𑀫. 𑀲𑀫𑁆𑀫𑀸 𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀻,𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀸 𑀦𑀸𑀫. 𑀇𑀫𑁂𑀲𑀼 𑀲𑀻𑀮𑀓𑁆𑀔𑀦𑁆𑀥 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀲𑀼. ‘‘𑀏𑀓𑁄 𑀏𑀓𑀲𑁆𑀲 𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀻’’𑀢𑀺 𑀢𑁂𑀲𑀼 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀺. 𑀲𑀫𑁆𑀫𑀸 𑀆𑀚𑀻𑀯𑀲𑁆𑀲 𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀺. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀘 𑀲𑀫𑁆𑀫𑀸𑀯𑀸𑀘𑀸𑀬 𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀻𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. ‘‘𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀯𑀲𑁂𑀦𑀸’’𑀢𑀺 𑀲𑀻𑀮𑀧𑁆𑀧𑀝𑀺𑀧𑀓𑁆𑀔 𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀓𑀸𑀭𑀺𑀢𑀸 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀼𑀲𑀸𑀯𑀸𑀤 𑀯𑀺𑀭𑀢𑀺 𑀫𑀼𑀲𑀸𑀯𑀸𑀤𑀫𑁂𑀯 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀇𑀢𑀭𑀸𑀦𑀺 𑀧𑀺𑀲𑀼𑀡𑀯𑀸𑀘𑀸𑀤𑀻𑀦𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀲𑀺𑀬𑀸. 𑀫𑀼𑀲𑀸𑀯𑀸𑀤𑀯𑀺𑀭𑀢𑀺 𑀦𑀸𑀫 𑀓𑀼𑀲𑀮 𑀥𑀫𑁆𑀫𑁄 𑀳𑁄𑀢𑀺. 𑀓𑀼𑀲𑀮 𑀥𑀫𑁆𑀫𑁄 𑀘 𑀦𑀸𑀫 𑀲𑀩𑁆𑀩𑀲𑁆𑀲 𑀅𑀓𑀼𑀲𑀮 𑀥𑀫𑁆𑀫𑀲𑁆𑀲 𑀧𑀝𑀺𑀧𑀓𑁆𑀔𑁄. 𑀏𑀓𑀲𑁆𑀫𑀺𑀫𑁆𑀧𑀺 𑀓𑀼𑀲𑀮 𑀥𑀫𑁆𑀫𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀩𑁆𑀩𑀸𑀦𑀺 𑀅𑀓𑀼𑀲𑀮𑀸𑀦𑀺 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀅𑀣 𑀘 𑀧𑀦 𑀫𑀼𑀲𑀸𑀯𑀸𑀤 𑀯𑀺𑀭𑀢𑀺 𑀫𑀼𑀲𑀸𑀯𑀸𑀤𑀫𑁂𑀯 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀓𑀣𑀫𑀺𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀯𑀼𑀘𑁆𑀘𑀢𑁂. 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀇𑀤𑀁 𑀧𑀜𑁆𑀘𑀲𑀼 𑀧𑀳𑀸𑀦𑁂𑀲𑀼 𑀢𑀤𑀗𑁆𑀕𑀧𑁆𑀧𑀳𑀸𑀦 𑀯𑀘𑀦𑀁. 𑀢𑀤𑀗𑁆𑀕𑀧𑁆𑀧𑀳𑀸𑀦𑀦𑁆𑀢𑀺 𑀘 𑀢𑁂𑀦 𑀢𑁂𑀦 𑀓𑀼𑀲𑀮𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀓𑀼𑀲𑀮𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀦𑀸𑀫. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀇𑀥 𑀲𑀧𑁆𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀫𑀸𑀫𑀻𑀢𑀺𑀆𑀤𑀺𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀸𑀡𑀸𑀢𑀺 𑀧𑀸𑀢𑀯𑀺𑀭𑀢𑀺 𑀲𑀗𑁆𑀔𑀸𑀢𑁂𑀦 𑀓𑀼𑀲𑀮𑀗𑁆𑀕𑁂𑀦 𑀧𑀸𑀡𑀸𑀢𑀺𑀧𑀸𑀢 𑀲𑀗𑁆𑀔𑀸𑀢𑀁 𑀅𑀓𑀼𑀲𑀮𑀗𑁆𑀕𑀁 𑀧𑀚𑀳𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦 𑀯𑀺𑀭𑀢𑀺 𑀲𑀗𑁆𑀔𑀸𑀢𑁂𑀦 𑀓𑀼𑀲𑀮𑀗𑁆𑀕𑁂𑀦 𑀅𑀤𑀺𑀦𑁆𑀦𑀸𑀤𑀸𑀦 𑀲𑀗𑁆𑀔𑀸𑀢𑀁 𑀅𑀓𑀼𑀲𑀮𑀗𑁆𑀕𑀁 𑀧𑀚𑀳𑀢𑀻𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀏𑀓𑀲𑁆𑀫𑀺𑀫𑁆𑀧𑀺 𑀓𑀼𑀲𑀮 𑀥𑀫𑁆𑀫𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀩𑁆𑀩𑀸𑀦𑀺 𑀅𑀓𑀼𑀲𑀮𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀧𑀦 𑀅𑀦𑁄𑀓𑀸𑀲𑀢𑁆𑀢𑀸 𑀏𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀧𑀳𑀸𑀦𑀢𑁆𑀢𑀸. 𑀦 𑀳𑀺 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀢𑀲𑁆𑀫𑀺𑀁 𑀔𑀡𑁂 𑀢𑀸𑀦𑀺 𑀅𑀓𑀼𑀲𑀮𑀸𑀦𑀺 𑀏𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣𑀔𑁄 𑀲𑀩𑁆𑀩𑀸𑀦𑀺 𑀅𑀜𑁆𑀜𑀸𑀦𑀺 𑀓𑀼𑀲𑀮 𑀘𑀺𑀢𑁆𑀢𑀸𑀦𑀺 𑀘 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀩𑁆𑀩𑀸𑀦𑀺 𑀅𑀩𑁆𑀬𑀸𑀓𑀢 𑀘𑀺𑀢𑁆𑀢𑀸𑀦𑀺 𑀘 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀅𑀦𑁄𑀓𑀸 𑀲𑀢𑁆𑀢𑀸 𑀏𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦 𑀧𑀳𑀸𑀦𑀢𑁆𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀤𑀗𑁆𑀕𑀧𑁆𑀧𑀳𑀸𑀦𑀸𑀤𑀺 𑀯𑀲𑁂𑀦 𑀧𑀦 𑀧𑀳𑀸𑀦𑀁 𑀲𑀦𑁆𑀥𑀸𑀬 𑀇𑀥 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺-𑀦 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀦𑀸𑀫 𑀲𑀼𑀧𑀸𑀓𑀝𑀁 𑀳𑁄𑀢𑀺. 𑀫𑀼𑀲𑀸𑀯𑀸𑀤 𑀯𑀺𑀭𑀢𑀺 𑀫𑀼𑀲𑀸𑀯𑀸𑀤𑀫𑁂𑀯 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀇𑀢𑀭𑀸𑀦𑀻𑀢𑀺 𑀇𑀤𑀜𑁆𑀘 𑀲𑀼𑀝𑁆𑀞𑀼 𑀉𑀧𑀧𑀦𑁆𑀦𑀁 𑀳𑁄𑀢𑀻𑀢𑀺. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼 𑀓𑀸𑀬𑀗𑁆𑀕𑀘𑁄𑀧𑀦𑀢𑁆𑀣𑀸𑀬 𑀯𑀸𑀘𑀗𑁆𑀕𑀘𑁄𑀧𑀦𑀢𑁆𑀣𑀸𑀬 𑀘 𑀧𑀯𑀢𑁆𑀢𑀸𑀦𑀺 𑀓𑀸𑀬𑀯𑀘𑀻𑀘𑁄 𑀧𑀦 𑀪𑀸𑀕𑀺𑀬𑀸𑀦𑀺 𑀦𑀸𑀫. 𑀓𑀸𑀫𑀸𑀯𑀘𑀭 𑀓𑀼𑀲𑀮𑁂𑀲𑁆𑀯𑁂𑀯 𑀯𑀺𑀭𑀢𑀺𑀬𑁄 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. ‘‘𑀓𑀸𑀫𑀸𑀯𑀘𑀭 𑀓𑀼𑀲𑀮𑁂𑀲𑀼 𑀧𑀻’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀘𑀦𑀁. 𑀓𑀸𑀫𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑁂𑀲𑀼 𑀏𑀯 𑀓𑀸𑀫𑀸𑀯𑀘𑀭 𑀓𑀼𑀲𑀮𑁂𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀢𑀺𑀯𑀺𑀥 𑀓𑀼𑀳𑀦𑀯𑀢𑁆𑀣𑀽𑀦𑀺 𑀘 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀼𑀝𑁆𑀞𑀸𑀦𑁂𑀞𑀺𑀢𑀸𑀦𑀺. 𑀏𑀢𑁆𑀣 𑀘 𑀓𑀼𑀳𑀦𑀁 𑀦𑀸𑀫 𑀯𑀺𑀫𑁆𑀳𑀸𑀧𑀦𑀁 𑀮𑀸𑀪𑀲𑀓𑁆𑀓𑀸𑀭 𑀲𑀺𑀮𑁄𑀓𑀢𑁆𑀣𑀸𑀬 𑀫𑀦𑀼𑀲𑁆𑀲𑀸𑀦𑀁 𑀦𑀸𑀦𑀸𑀫𑀸𑀬𑀸𑀲𑀸𑀞𑁂𑀬𑁆𑀬 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢 𑀪𑀸𑀯𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀦 𑀢𑀺𑀯𑀺𑀥𑀁 ‘𑀧𑀘𑁆𑀘𑀬𑀧𑁆𑀧𑀝𑀺𑀲𑁂𑀯𑀦𑀓𑀼𑀳𑀦𑀜𑁆𑀘, 𑀲𑀸𑀫𑀦𑁆𑀢𑀚𑀧𑁆𑀧𑀦 𑀓𑀼𑀳𑀦𑀜𑁆𑀘, 𑀇𑀭𑀺𑀬𑀸 𑀧𑀣𑀲𑀡𑁆𑀞𑀸 𑀧𑀦 𑀓𑀼𑀳𑀦𑀜𑁆𑀘. 𑀢𑀢𑁆𑀣 𑀫𑀳𑀺𑀘𑁆𑀙𑁄𑀬𑁂𑀯 𑀲𑀫𑀸𑀦𑁄 𑀅𑀧𑁆𑀧𑀺𑀘𑁆𑀙𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀆𑀤𑀺𑀢𑁄 𑀆𑀕𑀢𑀸 𑀕𑀢𑁂 𑀘𑀢𑀼𑀧𑀘𑁆𑀘𑀬𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀩𑀳𑀼𑀁 𑀩𑀳𑀼𑀁 𑀆𑀕𑀢𑁂 𑀧𑀘𑁆𑀘𑀬𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀇𑀤𑀁 𑀧𑀘𑁆𑀘𑀬𑀧𑁆𑀧𑀝𑀺𑀲𑁂𑀯𑀦 𑀓𑀼𑀳𑀦𑀁 𑀦𑀸𑀫. 𑀧𑀸𑀧𑀺𑀘𑁆𑀙𑁄𑀬𑁂𑀯 𑀲𑀫𑀸𑀦𑁄 𑀅𑀬𑀁 𑀛𑀸𑀦𑀮𑀸𑀪𑀻𑀢𑀺 𑀯𑀸 𑀅𑀪𑀺𑀜𑁆𑀜𑀸𑀮𑀸𑀪𑀻𑀢𑀺 𑀯𑀸 𑀅𑀭𑀳𑀸𑀢𑀺 𑀯𑀸 𑀚𑀦𑁄 𑀫𑀁 𑀲𑀫𑁆𑀪𑀸𑀯𑁂𑀢𑀽𑀢𑀺 𑀲𑀫𑁆𑀪𑀸𑀯𑀦𑀁 𑀇𑀘𑁆𑀙𑀦𑁆𑀢𑁄 𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲 𑀥𑀫𑁆𑀫𑀸𑀦𑀁 𑀲𑀦𑁆𑀢𑀺𑀓𑁂 𑀢𑁂 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀓𑀢𑁆𑀯𑀸 𑀯𑀜𑁆𑀘𑁂𑀢𑀺. 𑀇𑀤𑀁 𑀲𑀸𑀫𑀦𑁆𑀢𑀚𑀧𑁆𑀧𑀦 𑀓𑀼𑀳𑀦𑀁 𑀦𑀸𑀫. 𑀧𑀸𑀧𑀺𑀘𑁆𑀙𑁄𑀬𑁂𑀯 𑀲𑀫𑀸𑀦𑁄 𑀅𑀬𑀁 𑀲𑀦𑁆𑀢𑀯𑀼𑀢𑁆𑀢𑀺 𑀲𑀫𑀸𑀳𑀺𑀢𑁄 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀚𑀦𑁄 𑀫𑀁 𑀲𑀫𑁆𑀪𑀸𑀯𑁂𑀢𑀽𑀢𑀺 𑀲𑀫𑁆𑀪𑀸𑀯𑀦𑀁 𑀇𑀘𑁆𑀙𑀦𑁆𑀢𑁄 𑀇𑀭𑀺𑀬𑀸 𑀧𑀣 𑀦𑀺𑀲𑁆𑀲𑀺𑀢𑀁 𑀦𑀸𑀦𑀸𑀯𑀜𑁆𑀘𑀦𑀁 𑀓𑀭𑁄𑀢𑀺. 𑀇𑀤𑀁 𑀇𑀭𑀺𑀬𑀸 𑀧𑀣 𑀲𑀡𑁆𑀞𑀸𑀧𑀦 𑀓𑀼𑀳𑀦𑀁 𑀦𑀸𑀫. ‘‘𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀢𑁆𑀣𑀽𑀦𑀻’’𑀢𑀺 𑀲𑀼𑀭𑀸 𑀧𑀸𑀦 𑀯𑀺𑀓𑀸𑀮 𑀪𑁄𑀚𑀦 𑀦𑀘𑁆𑀘𑀕𑀻𑀢𑀯𑀸𑀤𑀺𑀢 𑀤𑀲𑁆𑀲𑀦 𑀲𑀯𑀦𑀸𑀤𑀻𑀦𑀺. 𑀲𑀼𑀭𑀸𑀫𑁂𑀭𑀬𑀧𑀸𑀦𑀸 𑀯𑀺𑀭𑀫𑀸𑀥𑀻𑀢𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀲𑀼𑀭𑀸𑀫𑁂𑀭𑀬𑀧𑀸𑀦 𑀘𑁂𑀢𑀦𑀸 𑀯𑀺𑀭𑀫𑀺𑀢𑀩𑁆𑀩 𑀯𑀢𑁆𑀣𑀼 𑀦𑀸𑀫. 𑀯𑀺𑀓𑀸𑀮 𑀪𑁄𑀚𑀦𑀸 𑀯𑀺𑀭𑀫𑀸𑀫𑀻𑀢𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀯𑀺𑀓𑀸𑀮𑁂 𑀬𑀸𑀯𑀓𑀸𑀮𑀺𑀓 𑀯𑀢𑁆𑀣𑀼𑀲𑁆𑀲 𑀧𑀭𑀺𑀪𑀼𑀜𑁆𑀚𑀦 𑀘𑁂𑀢𑀦𑀸 𑀯𑀺𑀭𑀫𑀺𑀢𑀩𑁆𑀩 𑀯𑀢𑁆𑀣𑀼 𑀦𑀸𑀫. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀮𑁄𑀓𑀼𑀢𑁆𑀢𑀭 𑀘𑀺𑀢𑁆𑀢𑁂𑀲𑀼. ‘𑀲𑀩𑁆𑀩𑀣𑀸𑀧𑀻,𑀢𑀺 𑀘 ‘𑀦𑀺𑀬𑀢𑀸’𑀢𑀺 𑀘 ‘𑀏𑀓𑀢𑁄 𑀯𑀸’𑀢𑀺 𑀘 𑀢𑀻𑀡𑀺 𑀯𑀺𑀲𑁂𑀲𑀦𑀸𑀦𑀺. 𑀮𑁄𑀓𑀺𑀬𑁂𑀲𑀼 𑀧𑀦 ‘𑀓𑀤𑀸𑀘𑀻’𑀢𑀺 𑀘 ‘𑀯𑀺𑀲𑀼𑀁 𑀯𑀺𑀲𑀼𑀁’𑀢𑀺 𑀘 𑀤𑁆𑀯𑁂 𑀤𑁆𑀯𑁂 𑀯𑀺𑀲𑁂𑀲𑀦𑀸𑀦𑀺. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑁂𑀲𑀼 ‘𑀲𑀩𑁆𑀩𑀣𑀸𑀧𑀻’𑀢𑀺 𑀇𑀤𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦 𑀤𑀲𑁆𑀲𑀦𑀁 𑀮𑁄𑀓𑀺𑀬𑁂𑀲𑀼𑀧𑀺 𑀢𑀩𑁆𑀩𑀺𑀧𑀭𑀻𑀢𑀁 𑀢𑀤𑀗𑁆𑀕𑀧𑁆𑀧𑀳𑀸𑀦 𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑀢𑁆𑀯𑀸 ‘‘𑀏𑀓𑁂𑀓 𑀤𑀼𑀘𑁆𑀘𑀭𑀺𑀢𑀧𑁆𑀧𑀳𑀸𑀦𑀯𑀲𑁂𑀦𑁂 𑀯𑀸’’𑀢𑀺 𑀯𑀼𑀢𑁆𑀢𑀁.

𑁧𑁨𑁧. 𑀅𑀧𑁆𑀧𑀫𑀜𑁆𑀜𑀸𑀲𑀼. ‘‘𑀯𑀺𑀪𑀗𑁆𑀕𑁂’’𑀢𑀺 𑀅𑀧𑁆𑀧𑀫𑀜𑁆𑀜𑀸 𑀯𑀺𑀪𑀗𑁆𑀕𑁂. ‘‘𑀓𑀸𑀭𑀼𑀜𑁆𑀜𑀧𑁆𑀧𑀓𑀢𑀺𑀓𑀲𑁆𑀲𑀸’’𑀢𑀺 𑀓𑀸𑀭𑀼𑀜𑁆𑀜𑀲𑀪𑀸𑀯𑀲𑁆𑀲. ‘‘𑀅𑀦𑀺𑀲𑁆𑀲𑀼𑀓𑀺𑀦𑁄’’𑀢𑀺 𑀇𑀲𑁆𑀲𑀸𑀥𑀫𑁆𑀫𑀭𑀳𑀺𑀢𑀲𑁆𑀲. 𑀣𑀸𑀫𑀕𑀢𑀸 𑀓𑀭𑀼𑀡𑀸 𑀤𑁄𑀲 𑀲𑀫𑀼𑀝𑁆𑀞𑀺𑀢𑀁 𑀯𑀺𑀳𑀺𑀁𑀲𑀁 𑀧𑀚𑀳𑀢𑀺. 𑀣𑀸𑀫𑀕𑀢𑀸 𑀫𑀼𑀤𑀺𑀢𑀸 𑀤𑁄𑀲𑀲𑀫𑀼𑀝𑁆𑀞𑀺𑀢𑀁 𑀅𑀭𑀢𑀺𑀁 𑀧𑀚𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀳𑀺𑀁𑀲𑀸 𑀅𑀭𑀢𑀻𑀦𑀁 𑀦𑀺𑀲𑁆𑀲𑀭𑀡 𑀪𑀽𑀢𑀸’’𑀢𑀺. 𑀏𑀢𑁆𑀣 𑀘 𑀅𑀭𑀢𑀺 𑀦𑀸𑀫 𑀲𑀼𑀜𑁆𑀜𑀸𑀕𑀸𑀭𑁂𑀲𑀼 𑀘 𑀪𑀸𑀯𑀦𑀸 𑀓𑀫𑁆𑀫𑁂𑀲𑀼 𑀘 𑀦𑀺𑀩𑁆𑀩𑀺𑀤𑀸. 𑀤𑁄𑀲 𑀦𑀺𑀲𑁆𑀲𑀭𑀡𑁂 𑀲𑀢𑀺 𑀤𑁄𑀫𑀦𑀲𑁆𑀲𑀦𑀺𑀲𑁆𑀲𑀭𑀡𑀫𑁆𑀧𑀺 𑀲𑀺𑀤𑁆𑀥𑀫𑁂𑀯. 𑀦𑀺𑀲𑁆𑀲𑀭𑀡𑀜𑁆𑀘 𑀦𑀸𑀫 𑀧𑀝𑀺𑀧𑀓𑁆𑀔 𑀥𑀫𑁆𑀫 𑀲𑀡𑁆𑀞𑀸𑀦𑁂𑀦 𑀳𑁄𑀢𑀺. 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀅𑀧𑁆𑀧𑀫𑀜𑁆𑀜𑀸𑀲𑀼 𑀦𑀺𑀘𑁆𑀘𑀁 𑀲𑁄𑀫𑀦𑀲𑁆𑀲 𑀲𑀡𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑁄𑀫𑀦𑀲𑁆𑀲𑀧𑁆𑀧𑀝𑀺𑀧𑀓𑁆𑀔𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀅𑀝𑁆𑀞𑀓𑀣𑀸𑀬𑀧𑀺 𑀲𑀳 𑀯𑀺𑀭𑀼𑀤𑁆𑀥𑁄’’𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀉𑀧𑁂𑀓𑁆𑀔𑀸 𑀲𑀳𑀕𑀢 𑀓𑀸𑀫𑀸𑀯𑀘𑀭 𑀓𑀼𑀲𑀮 𑀘𑀺𑀢𑁆𑀢𑁂𑀲𑀼 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀧𑀭𑀺𑀓𑀫𑁆𑀫𑀓𑀸𑀮𑁂𑀧𑀺 𑀳𑀺 𑀇𑀫𑁂𑀲𑀁 𑀉𑀧𑁆𑀧𑀢𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀸 𑀏𑀯𑀸-𑀢𑀺 𑀯𑀼𑀢𑁆𑀢𑀁. 𑀢𑀸𑀬 𑀅𑀝𑁆𑀞𑀓𑀣𑀸𑀬𑀧𑀺 𑀲𑀳 𑀯𑀺𑀭𑀼𑀤𑁆𑀥𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀧𑀝𑀺𑀓𑀽𑀮𑀸 𑀭𑀫𑁆𑀫𑀡𑁂𑀲𑀼 𑀧𑀦…𑀧𑁂… 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻’’𑀢𑀺 𑀧𑀝𑀺𑀓𑀽𑀮𑀸 𑀭𑀫𑁆𑀫𑀡𑀸𑀦𑀺 𑀦𑀸𑀫 𑀲𑁄𑀫𑀦𑀲𑁆𑀲𑁂𑀦 𑀤𑀽𑀭𑁂 𑀳𑁄𑀦𑁆𑀢𑀺, 𑀢𑀣𑀸 𑀤𑀼𑀓𑁆𑀔𑀺𑀢 𑀲𑀢𑁆𑀢𑀸 𑀘, 𑀢𑀲𑁆𑀫𑀸 𑀢𑀤𑀸 𑀭𑀫𑁆𑀫𑀡𑀸𑀦𑀺 𑀅𑀲𑀼𑀪 𑀪𑀸𑀯𑀦𑀸 𑀘𑀺𑀢𑁆𑀢𑀸𑀦𑀺 𑀘 𑀓𑀭𑀼𑀡𑀸 𑀪𑀸𑀯𑀦𑀸 𑀘𑀺𑀢𑁆𑀢𑀸𑀦𑀺 𑀘 𑀆𑀤𑀺𑀢𑁄 𑀉𑀧𑁂𑀓𑁆𑀔𑀸 𑀲𑀳𑀕𑀢𑀸 𑀦𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. ‘‘𑀲𑀸𑀳𑀺𑀯𑁂𑀤𑀦𑀼𑀧𑁂𑀓𑁆𑀔𑀸 𑀦𑀸𑀫𑀸’’𑀢𑀺 𑀓𑀸𑀫𑀸𑀯𑀘𑀭 𑀯𑁂𑀤𑀦𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀯𑀺𑀪𑀸𑀯𑀦𑀺𑀧𑀸𑀞𑁂, ‘‘𑀅𑀜𑁆𑀜𑀯𑀺𑀳𑀺𑀢𑀲𑁆𑀲 𑀧𑀻’’𑀢𑀺 𑀅𑀜𑁆𑀜𑀁 𑀆𑀭𑀫𑁆𑀫𑀡𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀧𑀺. 𑀲𑀚𑁆𑀛𑀸𑀬𑀦𑀁 𑀲𑀫𑁆𑀧𑀚𑁆𑀚𑀢𑀺, 𑀲𑀫𑁆𑀫𑀲𑀦𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 𑀧𑀸𑀞𑀲𑁂𑀲𑁄. 𑀇𑀢𑀺 𑀢𑀲𑁆𑀫𑀸. 𑀏𑀢𑁆𑀣 𑀲𑀺𑀬𑀸 ‘‘𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀦𑀼 𑀢𑀫𑁆𑀧𑀺 𑀉𑀧𑁂𑀓𑁆𑀔𑀸 𑀲𑀳𑀕𑀢 𑀘𑀺𑀢𑁆𑀢𑁂𑀲𑀼 𑀓𑀭𑀼𑀡𑀸 𑀫𑀼𑀤𑀺𑀢𑀸𑀦𑀁 𑀲𑀫𑁆𑀪𑀯𑀁 𑀲𑀸𑀥𑁂𑀢𑀺 𑀬𑁂𑀯𑀸𑀢𑀺. 𑀲𑀘𑁆𑀘𑀁 𑀲𑀸𑀥𑁂𑀢𑀺𑀬𑁂𑀯. 𑀢𑁂𑀦 𑀧𑀦 𑀧𑀭𑀺𑀘𑀬 𑀯𑀲𑁂𑀦 𑀢𑁂𑀲𑀼 𑀢𑀸𑀲𑀁 𑀲𑀫𑁆𑀪𑀯𑀁 𑀤𑀻𑀧𑁂𑀢𑀺. 𑀇𑀥 𑀧𑀦 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 ‘‘𑀧𑀝𑀺𑀓𑀽𑀮𑀸 𑀭𑀫𑁆𑀫𑀡𑁂𑀲𑀽’’𑀢𑀺𑀆𑀤𑀺𑀦𑀸 𑀘 𑀧𑀭𑀺𑀘𑀬𑁂𑀦 𑀯𑀺𑀦𑀸 𑀧𑀓𑀢𑀺𑀬𑀸 𑀢𑀸𑀲𑀁 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀬 𑀏𑀯 𑀲𑀳 𑀧𑀯𑀢𑁆𑀢𑀺 𑀩𑀳𑀼𑀮𑀢𑀸 𑀯𑀼𑀢𑁆𑀢𑀸𑀢𑀺. ‘‘𑀬𑁄𑀕𑀓𑀫𑁆𑀫 𑀩𑀮𑁂𑀦𑀸’’𑀢𑀺 𑀬𑀼𑀜𑁆𑀚𑀦 𑀯𑀻𑀭𑀺𑀬 𑀓𑀫𑁆𑀫 𑀩𑀮𑁂𑀦.

𑁧𑁨𑁨. 𑀘𑁂𑀢𑁄 𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼. 𑀳𑁂𑀝𑁆𑀞𑀸 𑀘 𑀯𑀼𑀢𑁆𑀢𑁄 ‘𑀓𑀤𑀸𑀘𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁, 𑀓𑀤𑀸𑀘𑀺 𑀦𑀸𑀦𑀸 𑀳𑀼𑀢𑁆𑀯𑀸 𑀚𑀸𑀬𑀦𑁆𑀢𑀻’𑀢𑀺. 𑀉𑀧𑀭𑀺 𑀘 𑀯𑀓𑁆𑀔𑀢𑀺 ‘𑀅𑀧𑁆𑀧𑀫𑀜𑁆𑀜𑀸 𑀯𑀺𑀭𑀢𑀺𑀬𑁄 𑀧𑀦𑁂𑀢𑁆𑀣 𑀧𑀜𑁆𑀘𑀧𑀺 𑀧𑀘𑁆𑀘𑁂𑀓𑀫𑁂𑀯 𑀬𑁄𑀚𑁂𑀢𑀩𑁆𑀩𑀸’𑀢𑀺. 𑀇𑀲𑁆𑀲𑀸𑀤𑀻𑀦𑀜𑁆𑀘 𑀦𑀸𑀦𑀸 𑀓𑀤𑀸𑀘𑀺 𑀬𑁄𑀕𑁄 𑀉𑀧𑀭𑀺 ‘𑀇𑀲𑁆𑀲𑀸𑀫𑀘𑁆𑀙𑁂𑀭 𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀧𑀦𑁂𑀢𑁆𑀣 𑀧𑀘𑁆𑀘𑁂𑀓𑀫𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀻’𑀢𑀺 𑀯𑀓𑁆𑀔𑀢𑀺. 𑀫𑀸𑀦𑀣𑀺𑀦 𑀫𑀺𑀤𑁆𑀥𑀸𑀦𑀁 𑀧𑀦 𑀦𑀸𑀦𑀸 𑀓𑀤𑀸𑀘𑀺 𑀬𑁄𑀕𑁄 𑀇𑀥 𑀯𑀢𑁆𑀢𑀩𑁆𑀩𑁄. ‘‘𑀓𑀤𑀸𑀘𑀻’’𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀢𑁂𑀲𑀁’’𑀢𑀺𑀆𑀤𑀺𑀦𑀸. ‘‘𑀢𑁂𑀲𑀁’’𑀢𑀺 𑀤𑀺𑀝𑁆𑀞𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁. ‘‘𑀦𑀺𑀤𑁆𑀤𑀸𑀪𑀺𑀪𑀽𑀢 𑀯𑀲𑁂𑀦𑀸’’𑀢𑀺 𑀦𑀺𑀤𑀲𑁆𑀲𑀦 𑀯𑀘𑀦𑀫𑁂𑀢𑀁. 𑀢𑁂𑀦 𑀓𑁄𑀲𑀚𑁆𑀚𑀸𑀤𑀻𑀦𑀫𑁆𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀓𑀫𑁆𑀫𑀜𑁆𑀜𑀢𑀸𑀬𑀸’’𑀢𑀺 𑀅𑀓𑀫𑁆𑀫𑀜𑁆𑀜𑀪𑀸𑀯𑁂𑀦. 𑀢𑁂𑀳𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬 𑀓𑀼𑀓𑁆𑀓𑀼𑀘𑁆𑀘𑁂𑀳𑀺. 𑀢𑁂𑀦 𑀘 𑀫𑀸𑀦𑁂𑀦. 𑀓𑀺𑀘𑁆𑀘 𑀯𑀺𑀭𑁄𑀥𑁂 𑀯𑀸 𑀆𑀭𑀫𑁆𑀫𑀡 𑀯𑀺𑀭𑁄𑀥𑁂 𑀯𑀸 𑀦𑀸𑀦𑀸𑀪𑀸𑀯𑁄. 𑀅𑀯𑀺𑀭𑁄𑀥𑁂 𑀲𑀳𑀪𑀸𑀯𑁄.

𑁧𑁨𑁩. ‘‘𑀬𑁄𑀕𑀝𑁆𑀞𑀸𑀦𑀧𑀭𑀺𑀘𑁆𑀙𑀺𑀦𑁆𑀤𑀦 𑀯𑀲𑁂𑀦𑀸’’𑀢𑀺 𑀲𑀩𑁆𑀩𑀘𑀺𑀢𑁆𑀢 𑀲𑀸𑀥𑀸𑀭𑀡𑀸 𑀢𑀸𑀯 𑀲𑀩𑁆𑀩𑁂𑀲𑀼𑀧𑀺 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼, 𑀯𑀺𑀢𑀓𑁆𑀓𑁄 𑀧𑀜𑁆𑀘𑀧𑀜𑁆𑀜𑀸 𑀲𑀘𑀺𑀢𑁆𑀢𑁂𑀲𑀽𑀢𑀺𑀆𑀤𑀺𑀦𑀸 𑀬𑀼𑀢𑁆𑀢𑀝𑁆𑀞𑀸𑀦 𑀪𑀽𑀢𑀸𑀦𑀁 𑀘𑀺𑀢𑁆𑀢𑀸𑀦𑀁 𑀕𑀡𑀦𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑀯𑀲𑁂𑀦. ‘‘𑀬𑀼𑀢𑁆𑀢 𑀥𑀫𑁆𑀫𑀭𑀸𑀲𑀺 𑀧𑀭𑀺𑀘𑁆𑀙𑀺𑀦𑁆𑀤𑀦 𑀯𑀲𑁂𑀦𑀸’’𑀢𑀺 𑀅𑀦𑀼𑀢𑁆𑀢𑀭𑁂 𑀙𑀢𑁆𑀢𑀺𑀁𑀲, 𑀫𑀳𑀕𑁆𑀕𑀢𑁂 𑀧𑀜𑁆𑀘𑀢𑀺𑀁𑀲𑀸𑀢𑀺𑀆𑀤𑀺𑀦𑀸 𑀬𑀼𑀢𑁆𑀢 𑀥𑀫𑁆𑀫𑀭𑀸𑀲𑀻𑀦𑀁 𑀕𑀡𑀦 𑀲𑀗𑁆𑀔𑁆𑀬𑀸 𑀧𑀭𑀺𑀘𑁆𑀙𑁂𑀤 𑀯𑀲𑁂𑀦. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀧𑀸𑀴𑀺𑀬𑀁’’𑀢𑀺 𑀥𑀫𑁆𑀫𑀲𑀗𑁆𑀕𑀡𑀺 𑀧𑀸𑀴𑀺𑀬𑀁. ‘‘𑀢𑁂𑀲𑀁 𑀦𑀬𑀸𑀦𑀁’’𑀢𑀺 𑀘𑀢𑀼𑀓𑁆𑀓 𑀧𑀜𑁆𑀘𑀓 𑀦𑀬𑀸𑀦𑀁.

𑁧𑁨𑁪. ‘‘𑀓𑀸𑀬𑀯𑀘𑀻 𑀯𑀺𑀲𑁄𑀥𑀦 𑀓𑀺𑀘𑁆𑀘𑀸’’𑀢𑀺 𑀓𑀸𑀬𑀤𑁆𑀯𑀸𑀭𑀯𑀘𑀻𑀤𑁆𑀯𑀸𑀭 𑀲𑁄𑀥𑀦 𑀓𑀺𑀘𑁆𑀘𑀸.

𑁧𑁨𑁫. 𑀮𑁄𑀓𑀼𑀢𑁆𑀢𑀭 𑀯𑀺𑀭𑀢𑀻𑀦𑀁 𑀮𑁄𑀓𑀼𑀢𑁆𑀢𑀭 𑀯𑀺𑀧𑀸𑀓𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀦𑀢𑁄 ‘‘𑀇𑀤𑀜𑁆𑀘…𑀧𑁂… 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀢𑀸𑀲𑀁 𑀅𑀧𑁆𑀧𑀫𑀜𑁆𑀜𑀸𑀦𑀁. 𑀢𑁂𑀲𑀼 𑀫𑀳𑀸𑀯𑀺𑀧𑀸𑀓𑁂𑀲𑀼. 𑀲𑀢𑁆𑀢𑀧𑀜𑁆𑀜𑀢𑁆𑀢𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀢𑁂𑀦𑀸’’𑀢𑀺 𑀓𑀼𑀲𑀮𑁂𑀦. ‘‘𑀯𑀺𑀓𑀧𑁆𑀧 𑀭𑀳𑀺𑀢𑀢𑁆𑀢𑀸’’𑀢𑀺 𑀯𑀺𑀯𑀺𑀥𑀸𑀓𑀸𑀭 𑀘𑀺𑀦𑁆𑀢𑀦 𑀭𑀳𑀺𑀢𑀢𑁆𑀢𑀸. 𑀅𑀧𑁆𑀧𑀦𑀸𑀧𑀢𑁆𑀢 𑀓𑀫𑁆𑀫 𑀯𑀺𑀲𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑀸 𑀅𑀧𑁆𑀧𑀦𑀸𑀧𑀢𑁆𑀢𑀓𑀫𑁆𑀫 𑀯𑀺𑀲𑁂𑀲 𑀦𑀺𑀩𑁆𑀩𑀢𑁆𑀢𑀸. 𑀧𑀜𑁆𑀜𑀢𑁆𑀢𑀺 𑀯𑀺𑀲𑁂𑀲𑀸𑀦𑀺 𑀦𑀸𑀫 𑀧𑀣𑀯𑀻𑀓𑀲𑀺𑀡 𑀦𑀺𑀫𑀺𑀢𑁆𑀢𑀸𑀤𑀻𑀦𑀺. ‘‘𑀅𑀧𑀺 𑀘𑀸’’𑀢𑀺𑀆𑀤𑀻𑀲𑀼. 𑀦 𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑁂𑀳𑀺 𑀅𑀢𑁆𑀣𑀺. 𑀏𑀯𑀜𑁆𑀘 𑀲𑀢𑀺, 𑀓𑀸𑀫𑀯𑀺𑀧𑀸𑀓𑀸𑀦𑀺 𑀓𑀸𑀫𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀆𑀮𑀫𑁆𑀩𑁂𑀬𑁆𑀬𑀼𑀦𑁆𑀢𑀺. ‘‘𑀲𑀗𑁆𑀕𑀳𑀦𑀬𑀪𑁂𑀤𑀓𑀸𑀭𑀓𑀸’’𑀢𑀺 𑀧𑀣 𑀫𑀚𑁆𑀛𑀸𑀦𑀺𑀓 𑀘𑀺𑀢𑁆𑀢𑁂𑀲𑀼 𑀙𑀢𑁆𑀢𑀺𑀁𑀲. 𑀤𑀼𑀢𑀻𑀬𑀚𑁆𑀛𑀸𑀦𑀺𑀓 𑀘𑀺𑀢𑁆𑀢𑁂𑀲𑀼 𑀧𑀜𑁆𑀘𑀢𑀺𑀁𑀲𑀸𑀢𑀺𑀆𑀤𑀺𑀦𑀸 𑀲𑀗𑁆𑀕𑀳𑀦𑀬𑀪𑁂𑀤𑀲𑁆𑀲 𑀓𑀸𑀭𑀓𑀸.

𑁧𑁨𑁬. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀻𑀲𑀼. ‘‘𑀧𑀜𑁆𑀘𑀲𑀼 𑀅𑀲𑀗𑁆𑀔𑀸𑀭𑀺𑀓𑁂𑀲𑀽’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀘𑀦𑀁. 𑀢𑀣𑀸 𑀧𑀜𑁆𑀘𑀲𑀼 𑀲𑀲𑀗𑁆𑀔𑀸𑀭𑀺𑀓𑁂𑀲𑀽𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁧𑁨𑁮. ‘‘𑀪𑀽𑀫𑀺 𑀚𑀸𑀢𑀺 𑀲𑀫𑁆𑀧𑀬𑁄𑀕𑀸𑀤𑀺𑀪𑁂𑀤𑁂𑀦𑀸’’𑀢𑀺 𑀨𑀲𑁆𑀲𑁄𑀢𑀸𑀯 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺 𑀓𑀸𑀫𑀸𑀯𑀘𑀭𑁄, 𑀭𑀽𑀧𑀸𑀯𑀘𑀭𑁄, 𑀅𑀭𑀽𑀧𑀸𑀯𑀘𑀭𑁄 𑀘𑀸𑀢𑀺. 𑀅𑀬𑀁 𑀪𑀽𑀫𑀺𑀪𑁂𑀤𑁄.

𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀨𑀲𑁆𑀲𑀸, 𑀓𑀼𑀲𑀮𑀸 𑀏𑀓𑀯𑀻𑀲𑀢𑀺;

𑀙𑀢𑁆𑀢𑀺𑀁𑀲𑁂𑀯 𑀯𑀺𑀧𑀸𑀓𑀸 𑀘, 𑀯𑀻𑀲𑀢𑀺 𑀓𑁆𑀭𑀺𑀬𑀸 𑀫𑀢𑀸.

𑀇𑀢𑀺 𑀅𑀬𑀁 𑀚𑀸𑀢𑀺𑀪𑁂𑀤𑁄. 𑀲𑁄𑀫𑀦𑀲𑁆𑀲 𑀲𑀳𑀕𑀢𑁄, 𑀤𑀺𑀝𑁆𑀞𑀺𑀕𑀢 𑀲𑀫𑁆𑀧𑀬𑀼𑀢𑁆𑀢𑁄, 𑀅𑀲𑀗𑁆𑀔𑀸𑀭𑀺𑀓𑁄 𑀘, 𑀲𑀲𑀗𑁆𑀔𑀸𑀭𑀺𑀓𑁄 𑀘𑀸𑀢𑀺𑀆𑀤𑀺𑀦𑀸 𑀲𑀫𑁆𑀧𑀬𑁄𑀕𑀸𑀤𑀺𑀪𑁂𑀤𑁄 𑀯𑀢𑁆𑀢𑀩𑁆𑀩𑁄. ‘‘𑀘𑀺𑀢𑁆𑀢𑁂𑀦 𑀲𑀫𑀁 𑀪𑁂𑀤’’𑀦𑁆𑀢𑀺 𑀅𑀢𑁆𑀢𑀦𑀸 𑀯𑀸 𑀲𑀫𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑀪𑁂𑀤𑁂𑀦 𑀲𑀫𑀁 𑀪𑁂𑀤𑀁. 𑀏𑀓𑀽𑀦𑀦 𑀯𑀼𑀢𑀺𑀬𑀸 𑀘𑀺𑀢𑁆𑀢𑁂𑀲𑀼 𑀯𑀸. 𑀏𑀢𑁆𑀣 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘𑁂𑀢𑀲𑀺𑀓𑀁 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀬𑀼𑀢𑁆𑀢𑀦𑁆𑀢𑀺 𑀏𑀓𑀫𑁂𑀯 𑀳𑁄𑀢𑀺. 𑀤𑁄𑀲𑁄, 𑀇𑀲𑁆𑀲𑀸, 𑀫𑀘𑁆𑀙𑀭𑀺𑀬𑀁, 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀤𑁆𑀯𑀻𑀲𑀼 𑀘𑀺𑀢𑁆𑀢𑁂𑀲𑀼 𑀬𑀼𑀢𑁆𑀢𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁆𑀯𑁂 𑀤𑁆𑀯𑁂 𑀳𑁄𑀦𑁆𑀢𑀺. 𑀢𑀣𑀸 𑀤𑀺𑀝𑁆𑀞𑀺𑀫𑀸𑀦𑀸 𑀧𑀘𑁆𑀘𑁂𑀓𑀁 𑀘𑀢𑁆𑀢𑀸𑀭𑁄. 𑀣𑀺𑀦𑀫𑀺𑀤𑁆𑀥𑀁 𑀧𑀘𑁆𑀘𑁂𑀓𑀁 𑀧𑀜𑁆𑀘𑀸𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀘𑁂𑀢𑀲𑀺𑀓𑀲𑀗𑁆𑀕𑀳𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.