(𑁮) 𑁩. 𑀬𑀫𑀓𑀯𑀕𑁆𑀕𑁄

𑁧. 𑀧𑀞𑀫𑀲𑀤𑁆𑀥𑀸𑀲𑀼𑀢𑁆𑀢𑀁

𑁭𑁧. ‘‘𑀲𑀤𑁆𑀥𑁄 𑀘 [𑀲𑀤𑁆𑀥𑁄 (𑀲𑁆𑀬𑀸.) 𑀏𑀢𑁆𑀣𑁂𑀯. 𑀅. 𑀦𑀺. 𑁯.𑁪], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁄 𑀘 [𑀦𑁄 (𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺 ‘‘𑀦𑁄’’𑀢𑁆𑀯𑁂𑀯 𑀤𑀺𑀲𑁆𑀲𑀢𑀺] 𑀲𑀻𑀮𑀯𑀸. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁 𑀲𑀻𑀮𑀯𑀸 𑀘𑀸’𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺.

‘‘𑀲𑀤𑁆𑀥𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺 𑀲𑀻𑀮𑀯𑀸 𑀘, 𑀦𑁄 𑀘 𑀩𑀳𑀼𑀲𑁆𑀲𑀼𑀢𑁄. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁, 𑀲𑀻𑀮𑀯𑀸 𑀘, 𑀩𑀳𑀼𑀲𑁆𑀲𑀼𑀢𑁄 𑀘𑀸’𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘 𑀩𑀳𑀼𑀲𑁆𑀲𑀼𑀢𑁄 𑀘, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺.

‘‘𑀲𑀤𑁆𑀥𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺 𑀲𑀻𑀮𑀯𑀸 𑀘 𑀩𑀳𑀼𑀲𑁆𑀲𑀼𑀢𑁄 𑀘, 𑀦𑁄 𑀘 𑀥𑀫𑁆𑀫𑀓𑀣𑀺𑀓𑁄…𑀧𑁂… 𑀥𑀫𑁆𑀫𑀓𑀣𑀺𑀓𑁄 𑀘, 𑀦𑁄 𑀘 𑀧𑀭𑀺𑀲𑀸𑀯𑀘𑀭𑁄…𑀧𑁂… 𑀧𑀭𑀺𑀲𑀸𑀯𑀘𑀭𑁄 𑀘, 𑀦𑁄 𑀘 𑀯𑀺𑀲𑀸𑀭𑀤𑁄 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀯𑀺𑀲𑀸𑀭𑀤𑁄 𑀘 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑁄 𑀘 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻…𑀧𑁂… 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀦𑁄 𑀘 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁, 𑀲𑀻𑀮𑀯𑀸 𑀘, 𑀩𑀳𑀼𑀲𑁆𑀲𑀼𑀢𑁄 𑀘, 𑀥𑀫𑁆𑀫𑀓𑀣𑀺𑀓𑁄 𑀘, 𑀧𑀭𑀺𑀲𑀸𑀯𑀘𑀭𑁄 𑀘, 𑀯𑀺𑀲𑀸𑀭𑀤𑁄 𑀘 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀘𑀢𑀼𑀦𑁆𑀦𑀜𑁆𑀘 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀲𑁆𑀲𑀁 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’’’𑀦𑁆𑀢𑀺.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺, 𑀲𑀻𑀮𑀯𑀸 𑀘, 𑀩𑀳𑀼𑀲𑁆𑀲𑀼𑀢𑁄 𑀘, 𑀥𑀫𑁆𑀫𑀓𑀣𑀺𑀓𑁄 𑀘, 𑀧𑀭𑀺𑀲𑀸𑀯𑀘𑀭𑁄 𑀘, 𑀯𑀺𑀲𑀸𑀭𑀤𑁄 𑀘 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀘𑀢𑀼𑀦𑁆𑀦𑀜𑁆𑀘 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀇𑀫𑁂𑀳𑀺, 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄 𑀘 𑀳𑁄𑀢𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄 𑀘𑀸’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀤𑁆𑀥𑀸𑀲𑀼𑀢𑁆𑀢𑀁

𑁭𑁨. ‘‘𑀲𑀤𑁆𑀥𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁄 𑀘 𑀲𑀻𑀮𑀯𑀸. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁 𑀲𑀻𑀮𑀯𑀸 𑀘𑀸’𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺.

‘‘𑀲𑀤𑁆𑀥𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑁄𑀢𑀺 𑀲𑀻𑀮𑀯𑀸 𑀘, 𑀦𑁄 𑀘 𑀩𑀳𑀼𑀲𑁆𑀲𑀼𑀢𑁄…𑀧𑁂… 𑀩𑀳𑀼𑀲𑁆𑀲𑀼𑀢𑁄 𑀘, 𑀦𑁄 𑀘 𑀥𑀫𑁆𑀫𑀓𑀣𑀺𑀓𑁄…𑀧𑁂… 𑀥𑀫𑁆𑀫𑀓𑀣𑀺𑀓𑁄 𑀘, 𑀦𑁄 𑀘 𑀧𑀭𑀺𑀲𑀸𑀯𑀘𑀭𑁄…𑀧𑁂… 𑀧𑀭𑀺𑀲𑀸𑀯𑀘𑀭𑁄 𑀘, 𑀦𑁄 𑀘 𑀯𑀺𑀲𑀸𑀭𑀤𑁄 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 …𑀧𑁂… 𑀯𑀺𑀲𑀸𑀭𑀤𑁄 𑀘 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑁄 𑀘 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀦𑁄 𑀘 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁, 𑀲𑀻𑀮𑀯𑀸 𑀘, 𑀩𑀳𑀼𑀲𑁆𑀲𑀼𑀢𑁄 𑀘, 𑀥𑀫𑁆𑀫𑀓𑀣𑀺𑀓𑁄 𑀘, 𑀧𑀭𑀺𑀲𑀸𑀯𑀘𑀭𑁄 𑀘, 𑀯𑀺𑀲𑀸𑀭𑀤𑁄 𑀘 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀁, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’’’𑀦𑁆𑀢𑀺.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺, 𑀲𑀻𑀮𑀯𑀸 𑀘, 𑀩𑀳𑀼𑀲𑁆𑀲𑀼𑀢𑁄 𑀘, 𑀥𑀫𑁆𑀫𑀓𑀣𑀺𑀓𑁄 𑀘, 𑀧𑀭𑀺𑀲𑀸𑀯𑀘𑀭𑁄 𑀘, 𑀯𑀺𑀲𑀸𑀭𑀤𑁄 𑀘 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸 𑀢𑁂 𑀘 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄 𑀘 𑀳𑁄𑀢𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄 𑀘𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀁

𑁭𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 [𑀦𑀸𑀤𑀺𑀓𑁂 (𑀲𑀻. 𑀲𑁆𑀬𑀸.), 𑀦𑀸𑀝𑀺𑀓𑁂 (𑀧𑀻.) 𑀅. 𑀦𑀺. 𑁬.𑁧𑁯] 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀫𑀭𑀡𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸. 𑀪𑀸𑀯𑁂𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 [𑀩𑀳𑀼𑀁 (𑀲𑀻. 𑀧𑀻.)] 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀤𑀺𑀯𑀲𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀉𑀧𑀟𑁆𑀠𑀤𑀺𑀯𑀲𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀉𑀧𑀟𑁆𑀠𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂 𑀲𑀗𑁆𑀔𑀸𑀤𑀺𑀢𑁆𑀯𑀸 [𑀲𑀗𑁆𑀔𑀭𑀺𑀢𑁆𑀯𑀸 (𑀓.)] 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀁 𑀆𑀮𑁄𑀧𑀁 𑀲𑀗𑁆𑀔𑀸𑀤𑀺𑀢𑁆𑀯𑀸 [𑀲𑀗𑁆𑀔𑀭𑀺𑀢𑁆𑀯𑀸 (𑀓.)] 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀅𑀲𑁆𑀲𑀲𑀺𑀢𑁆𑀯𑀸 𑀯𑀸 𑀧𑀲𑁆𑀲𑀲𑀸𑀫𑀺, 𑀧𑀲𑁆𑀲𑀲𑀺𑀢𑁆𑀯𑀸 𑀯𑀸 𑀅𑀲𑁆𑀲𑀲𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀬𑁆𑀯𑀸𑀬𑀁 [𑀬𑁄 𑀘𑀸𑀬𑀁 (𑀓. 𑀲𑀻.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀬𑁄 𑀘𑀸𑀬𑀁 [𑀬𑁄 𑀧𑀸𑀬𑀁 (𑀓.) 𑀅. 𑀦𑀺. 𑁬.𑁧𑁯 𑀧𑀲𑁆𑀲𑀺𑀢𑀩𑁆𑀩𑀁], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀤𑀺𑀯𑀲𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺; 𑀬𑁄 𑀘𑀸𑀬𑀁 [𑀬𑁄 𑀧𑀸𑀬𑀁 (𑀓.) 𑀅. 𑀦𑀺. 𑁬.𑁧𑁯 𑀧𑀲𑁆𑀲𑀺𑀢𑀩𑁆𑀩𑀁], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀉𑀧𑀟𑁆𑀠𑀤𑀺𑀯𑀲𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀬𑁄 𑀘𑀸𑀬𑀁 [𑀬𑁄 𑀧𑀸𑀬𑀁 (𑀓.) 𑀅. 𑀦𑀺. 𑁬.𑁧𑁯 𑀧𑀲𑁆𑀲𑀺𑀢𑀩𑁆𑀩𑀁], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺; 𑀬𑁄 𑀘𑀸𑀬𑀁 [𑀬𑁄 𑀧𑀸𑀬𑀁 (𑀓.) 𑀅. 𑀦𑀺. 𑁬.𑁧𑁯 𑀧𑀲𑁆𑀲𑀺𑀢𑀩𑁆𑀩𑀁], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀉𑀧𑀟𑁆𑀠𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀬𑁄 𑀘𑀸𑀬𑀁 [𑀬𑁄 𑀧𑀸𑀬𑀁 (𑀓.) 𑀅. 𑀦𑀺. 𑁬.𑁧𑁯 𑀧𑀲𑁆𑀲𑀺𑀢𑀩𑁆𑀩𑀁], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀽 𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀤𑀦𑁆𑀥𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬’’’.

‘‘𑀬𑁄 𑀘 𑀔𑁆𑀯𑀸𑀬𑀁 [𑀬𑁄 𑀘𑀸𑀬𑀁 (𑀲𑁆𑀬𑀸.), 𑀬𑁄 𑀘 𑀔𑁄 𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀁 𑀆𑀮𑁄𑀧𑀁 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀬𑁄 𑀘𑀸𑀬𑀁 [𑀬𑁄 𑀧𑀸𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀅𑀲𑁆𑀲𑀲𑀺𑀢𑁆𑀯𑀸 𑀯𑀸 𑀧𑀲𑁆𑀲𑀲𑀸𑀫𑀺, 𑀧𑀲𑁆𑀲𑀲𑀺𑀢𑁆𑀯𑀸 𑀯𑀸 𑀅𑀲𑁆𑀲𑀲𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀽 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀺𑀓𑁆𑀔𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬’’’.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀸𑀫, 𑀢𑀺𑀓𑁆𑀔𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑀬𑀺𑀲𑁆𑀲𑀸𑀫 𑀆𑀲𑀯𑀸𑀦𑀁 𑀔𑀬𑀸𑀬𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀁

𑁭𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 …𑀧𑁂… 𑀫𑀭𑀡𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸.

‘‘𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀫𑀭𑀡𑀲𑁆𑀲𑀢𑀺 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀺𑀯𑀲𑁂 𑀦𑀺𑀓𑁆𑀔𑀦𑁆𑀢𑁂 𑀭𑀢𑁆𑀢𑀺𑀬𑀸 𑀧𑀢𑀺𑀳𑀺𑀢𑀸𑀬 [𑀧𑀝𑀺𑀳𑀺𑀢𑀸𑀬 (𑀧𑀻.), (𑀅. 𑀦𑀺. 𑁬.𑁨𑁦 𑀧𑀲𑁆𑀲𑀺𑀢𑀩𑁆𑀩𑀁)] 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀩𑀳𑀼𑀓𑀸 𑀔𑁄 𑀫𑁂 𑀧𑀘𑁆𑀘𑀬𑀸 𑀫𑀭𑀡𑀲𑁆𑀲 𑁋 𑀅𑀳𑀺 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀯𑀺𑀘𑁆𑀙𑀺𑀓𑁄 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀲𑀢𑀧𑀤𑀻 𑀯𑀸 𑀫𑀁 𑀟𑀁𑀲𑁂𑀬𑁆𑀬; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸. 𑀲𑁄 𑀫𑀫 𑀅𑀲𑁆𑀲 [𑀫𑀫𑀲𑁆𑀲 (𑀅. 𑀦𑀺. 𑁬.𑁨𑁦)] 𑀅𑀦𑁆𑀢𑀭𑀸𑀬𑁄. 𑀉𑀧𑀓𑁆𑀔𑀮𑀺𑀢𑁆𑀯𑀸 𑀯𑀸 𑀧𑀧𑀢𑁂𑀬𑁆𑀬𑀁, 𑀪𑀢𑁆𑀢𑀁 𑀯𑀸 𑀫𑁂 𑀪𑀼𑀢𑁆𑀢𑀁 𑀩𑁆𑀬𑀸𑀧𑀚𑁆𑀚𑁂𑀬𑁆𑀬, 𑀧𑀺𑀢𑁆𑀢𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑁂𑀫𑁆𑀳𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑀢𑁆𑀣𑀓𑀸 𑀯𑀸 𑀫𑁂 𑀯𑀸𑀢𑀸 𑀓𑀼𑀧𑁆𑀧𑁂𑀬𑁆𑀬𑀼𑀁, 𑀫𑀦𑀼𑀲𑁆𑀲𑀸 𑀯𑀸 𑀫𑀁 𑀉𑀧𑀓𑁆𑀓𑀫𑁂𑀬𑁆𑀬𑀼𑀁, 𑀅𑀫𑀦𑀼𑀲𑁆𑀲𑀸 𑀯𑀸 𑀫𑀁 𑀉𑀧𑀓𑁆𑀓𑀫𑁂𑀬𑁆𑀬𑀼𑀁; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸. 𑀲𑁄 𑀫𑀫 𑀅𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸 𑀬𑁂 𑀫𑁂 𑀅𑀲𑁆𑀲𑀼 𑀭𑀢𑁆𑀢𑀺𑀁 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸 𑀬𑁂 𑀫𑁂 𑀅𑀲𑁆𑀲𑀼 𑀭𑀢𑁆𑀢𑀺𑀁 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑀡𑀻𑀬𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀘𑁂𑀮𑁄 𑀯𑀸 𑀆𑀤𑀺𑀢𑁆𑀢𑀲𑀻𑀲𑁄 𑀯𑀸 𑀢𑀲𑁆𑀲𑁂𑀯 𑀘𑁂𑀮𑀲𑁆𑀲 𑀯𑀸 𑀲𑀻𑀲𑀲𑁆𑀲 𑀯𑀸 𑀦𑀺𑀩𑁆𑀩𑀸𑀧𑀦𑀸𑀬 𑀅𑀥𑀺𑀫𑀢𑁆𑀢𑀁 𑀙𑀦𑁆𑀤𑀜𑁆𑀘 𑀯𑀸𑀬𑀸𑀫𑀜𑁆𑀘 𑀉𑀲𑁆𑀲𑀸𑀳𑀜𑁆𑀘 𑀉𑀲𑁆𑀲𑁄𑀴𑁆𑀳𑀺𑀜𑁆𑀘 𑀅𑀧𑁆𑀧𑀝𑀺𑀯𑀸𑀦𑀺𑀜𑁆𑀘 𑀲𑀢𑀺𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑀡𑀻𑀬𑀁.

‘‘𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀦𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸 𑀬𑁂 𑀫𑁂 𑀅𑀲𑁆𑀲𑀼 𑀭𑀢𑁆𑀢𑀺𑀁 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑀸𑀬 𑀤𑀺𑀯𑀲𑁂 𑀧𑀢𑀺𑀳𑀺𑀢𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀩𑀳𑀼𑀓𑀸 𑀔𑁄 𑀫𑁂 𑀧𑀘𑁆𑀘𑀬𑀸 𑀫𑀭𑀡𑀲𑁆𑀲 𑁋 𑀅𑀳𑀺 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀯𑀺𑀘𑁆𑀙𑀺𑀓𑁄 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀲𑀢𑀧𑀤𑀻 𑀯𑀸 𑀫𑀁 𑀟𑀁𑀲𑁂𑀬𑁆𑀬; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸. 𑀲𑁄 𑀫𑀫 𑀅𑀲𑁆𑀲 𑀅𑀦𑁆𑀢𑀭𑀸𑀬𑁄. 𑀉𑀧𑀓𑁆𑀔𑀮𑀺𑀢𑁆𑀯𑀸 𑀯𑀸 𑀧𑀧𑀢𑁂𑀬𑁆𑀬𑀁, 𑀪𑀢𑁆𑀢𑀁 𑀯𑀸 𑀫𑁂 𑀪𑀼𑀢𑁆𑀢𑀁 𑀩𑁆𑀬𑀸𑀧𑀚𑁆𑀚𑁂𑀬𑁆𑀬, 𑀧𑀺𑀢𑁆𑀢𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑁂𑀫𑁆𑀳𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑀢𑁆𑀣𑀓𑀸 𑀯𑀸 𑀫𑁂 𑀯𑀸𑀢𑀸 𑀓𑀼𑀧𑁆𑀧𑁂𑀬𑁆𑀬𑀼𑀁, 𑀫𑀦𑀼𑀲𑁆𑀲𑀸 𑀯𑀸 𑀫𑀁 𑀉𑀧𑀓𑁆𑀓𑀫𑁂𑀬𑁆𑀬𑀼𑀁, 𑀅𑀫𑀦𑀼𑀲𑁆𑀲𑀸 𑀯𑀸 𑀫𑀁 𑀉𑀧𑀓𑁆𑀓𑀫𑁂𑀬𑁆𑀬𑀼𑀁; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸. 𑀲𑁄 𑀫𑀫 𑀅𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸 𑀬𑁂 𑀫𑁂 𑀅𑀲𑁆𑀲𑀼 𑀤𑀺𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸 𑀬𑁂 𑀫𑁂 𑀅𑀲𑁆𑀲𑀼 𑀤𑀺𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑀡𑀻𑀬𑀁.

‘‘𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀦𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸 𑀬𑁂 𑀫𑁂 𑀅𑀲𑁆𑀲𑀼 𑀤𑀺𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀲𑁆𑀲𑀢𑀺 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀲𑀫𑁆𑀧𑀤𑀸𑀲𑀼𑀢𑁆𑀢𑀁

𑁭𑁫. ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀤𑀸. 𑀓𑀢𑀫𑀸 𑀅𑀝𑁆𑀞? [𑀅. 𑀦𑀺. 𑁮.𑁫𑁪] 𑀉𑀝𑁆𑀞𑀸𑀦𑀲𑀫𑁆𑀧𑀤𑀸, 𑀆𑀭𑀓𑁆𑀔𑀲𑀫𑁆𑀧𑀤𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀫𑀚𑀻𑀯𑀺𑀢𑀸, 𑀲𑀤𑁆𑀥𑀸𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀘𑀸𑀕𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀲𑀫𑁆𑀧𑀤𑀸’’𑀢𑀺.

‘‘𑀉𑀝𑁆𑀞𑀸𑀢𑀸 𑀓𑀫𑁆𑀫𑀥𑁂𑀬𑁆𑀬𑁂𑀲𑀼, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀥𑀸𑀦𑀯𑀸;

𑀲𑀫𑀁 𑀓𑀧𑁆𑀧𑁂𑀢𑀺 𑀚𑀻𑀯𑀺𑀓𑀁, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑁄;

𑀦𑀺𑀘𑁆𑀘𑀁 𑀫𑀕𑁆𑀕𑀁 𑀯𑀺𑀲𑁄𑀥𑁂𑀢𑀺, 𑀲𑁄𑀢𑁆𑀣𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀁.

‘‘𑀇𑀘𑁆𑀘𑁂𑀢𑁂 𑀅𑀝𑁆𑀞 𑀥𑀫𑁆𑀫𑀸 𑀘, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀅𑀓𑁆𑀔𑀸𑀢𑀸 𑀲𑀘𑁆𑀘𑀦𑀸𑀫𑁂𑀦, 𑀉𑀪𑀬𑀢𑁆𑀣 𑀲𑀼𑀔𑀸𑀯𑀳𑀸.

‘‘𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬 𑀘;

𑀏𑀯𑀫𑁂𑀢𑀁 𑀕𑀳𑀝𑁆𑀞𑀸𑀦𑀁, 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺. 𑀧𑀜𑁆𑀘𑀫𑀁;

𑁬. 𑀤𑀼𑀢𑀺𑀬𑀲𑀫𑁆𑀧𑀤𑀸𑀲𑀼𑀢𑁆𑀢𑀁

𑁭𑁬. ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀤𑀸. 𑀓𑀢𑀫𑀸 𑀅𑀝𑁆𑀞? 𑀉𑀝𑁆𑀞𑀸𑀦𑀲𑀫𑁆𑀧𑀤𑀸, 𑀆𑀭𑀓𑁆𑀔𑀲𑀫𑁆𑀧𑀤𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀫𑀚𑀻𑀯𑀺𑀢𑀸, 𑀲𑀤𑁆𑀥𑀸𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀘𑀸𑀕𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀉𑀝𑁆𑀞𑀸𑀦𑀲𑀫𑁆𑀧𑀤𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀺 𑁋 𑀬𑀤𑀺 𑀓𑀲𑀺𑀬𑀸 𑀬𑀤𑀺 𑀯𑀡𑀺𑀚𑁆𑀚𑀸𑀬 𑀬𑀤𑀺 𑀕𑁄𑀭𑀓𑁆𑀔𑁂𑀦 𑀬𑀤𑀺 𑀇𑀲𑁆𑀲𑀢𑁆𑀢𑁂𑀦 𑀬𑀤𑀺 𑀭𑀸𑀚𑀧𑁄𑀭𑀺𑀲𑁂𑀦 𑀬𑀤𑀺 𑀲𑀺𑀧𑁆𑀧𑀜𑁆𑀜𑀢𑀭𑁂𑀦 𑁋 𑀢𑀢𑁆𑀣 𑀤𑀓𑁆𑀔𑁄 𑀳𑁄𑀢𑀺 𑀅𑀦𑀮𑀲𑁄, 𑀢𑀢𑁆𑀭𑀼𑀧𑀸𑀬𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀅𑀮𑀁 𑀓𑀸𑀢𑀼𑀁 𑀅𑀮𑀁 𑀲𑀁𑀯𑀺𑀥𑀸𑀢𑀼𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀉𑀝𑁆𑀞𑀸𑀦𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀆𑀭𑀓𑁆𑀔𑀲𑀫𑁆𑀧𑀤𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀪𑁄𑀕𑀸 𑀳𑁄𑀦𑁆𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀸 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑀸 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸 𑀢𑁂 𑀆𑀭𑀓𑁆𑀔𑁂𑀦 𑀕𑀼𑀢𑁆𑀢𑀺𑀬𑀸 𑀲𑀫𑁆𑀧𑀸𑀤𑁂𑀢𑀺 𑁋 ‘𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁, 𑀦 𑀘𑁄𑀭𑀸 𑀳𑀭𑁂𑀬𑁆𑀬𑀼𑀁, 𑀦 𑀅𑀕𑁆𑀕𑀺 𑀟𑀳𑁂𑀬𑁆𑀬, 𑀦 𑀉𑀤𑀓𑀁 𑀯𑀳𑁂𑀬𑁆𑀬, 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼’𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀆𑀭𑀓𑁆𑀔𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀧𑀝𑀺𑀯𑀲𑀢𑀺, 𑀢𑀢𑁆𑀣 𑀬𑁂 𑀢𑁂 𑀳𑁄𑀦𑁆𑀢𑀺 𑀕𑀳𑀧𑀢𑀻 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀸 𑀯𑀸 𑀤𑀳𑀭𑀸 𑀯𑀸 𑀯𑀼𑀤𑁆𑀥𑀲𑀻𑀮𑀺𑀦𑁄 𑀯𑀼𑀤𑁆𑀥𑀸 𑀯𑀸 𑀯𑀼𑀤𑁆𑀥𑀲𑀻𑀮𑀺𑀦𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀘𑀸𑀕𑀲𑀫𑁆𑀧𑀦𑁆𑀦𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀮𑁆𑀮𑀧𑀢𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺; 𑀬𑀣𑀸𑀭𑀽𑀧𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀲𑀻𑀮𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀘𑀸𑀕𑀲𑀫𑁆𑀧𑀦𑁆𑀦𑀸𑀦𑀁 𑀘𑀸𑀕𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑀚𑀻𑀯𑀺𑀢𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀢𑀼𑀮𑀸𑀥𑀸𑀭𑁄 𑀯𑀸 𑀢𑀼𑀮𑀸𑀥𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀼𑀮𑀁 𑀧𑀕𑁆𑀕𑀳𑁂𑀢𑁆𑀯𑀸 𑀚𑀸𑀦𑀸𑀢𑀺 𑁋 ‘𑀏𑀢𑁆𑀢𑀓𑁂𑀦 𑀯𑀸 𑀑𑀦𑀢𑀁, 𑀏𑀢𑁆𑀢𑀓𑁂𑀦 𑀯𑀸 𑀉𑀦𑁆𑀦𑀢’𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀲𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀅𑀧𑁆𑀧𑀸𑀬𑁄 𑀲𑀫𑀸𑀦𑁄 𑀉𑀴𑀸𑀭𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀉𑀤𑀼𑀫𑁆𑀩𑀭𑀔𑀸𑀤𑀻 𑀯𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀪𑁄𑀕𑁂 𑀔𑀸𑀤𑀢𑀻’𑀢𑀺. 𑀲𑀘𑁂 𑀧𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀫𑀳𑀸𑀬𑁄 𑀲𑀫𑀸𑀦𑁄 𑀓𑀲𑀺𑀭𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀅𑀚𑁂𑀝𑁆𑀞𑀫𑀭𑀡𑀁 𑀯𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀫𑀭𑀺𑀲𑁆𑀲𑀢𑀻’𑀢𑀺. 𑀬𑀢𑁄 𑀘 𑀔𑁄𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀚𑀻𑀯𑀺𑀢𑀸.

‘‘𑀓𑀢𑀫𑀸 𑀘 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀲𑀫𑁆𑀧𑀤𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑀫𑁆𑀧𑀤𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀘𑀸𑀕𑀲𑀫𑁆𑀧𑀤𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺…𑀧𑁂… 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀘𑀸𑀕𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀲𑀫𑁆𑀧𑀤𑀸? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀧𑀜𑁆𑀜𑀯𑀸 𑀳𑁄𑀢𑀺…𑀧𑁂… 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀲𑀫𑁆𑀧𑀤𑀸’’𑀢𑀺.

‘‘𑀉𑀝𑁆𑀞𑀸𑀢𑀸 𑀓𑀫𑁆𑀫𑀥𑁂𑀬𑁆𑀬𑁂𑀲𑀼, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀥𑀸𑀦𑀯𑀸;

𑀲𑀫𑀁 𑀓𑀧𑁆𑀧𑁂𑀢𑀺 𑀚𑀻𑀯𑀺𑀓𑀁, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑁄;

𑀦𑀺𑀘𑁆𑀘𑀁 𑀫𑀕𑁆𑀕𑀁 𑀯𑀺𑀲𑁄𑀥𑁂𑀢𑀺, 𑀲𑁄𑀢𑁆𑀣𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀁.

‘‘𑀇𑀘𑁆𑀘𑁂𑀢𑁂 𑀅𑀝𑁆𑀞 𑀥𑀫𑁆𑀫𑀸 𑀘, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀅𑀓𑁆𑀔𑀸𑀢𑀸 𑀲𑀘𑁆𑀘𑀦𑀸𑀫𑁂𑀦, 𑀉𑀪𑀬𑀢𑁆𑀣 𑀲𑀼𑀔𑀸𑀯𑀳𑀸.

‘‘𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬 𑀘;

𑀏𑀯𑀫𑁂𑀢𑀁 𑀕𑀳𑀝𑁆𑀞𑀸𑀦𑀁, 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺. 𑀙𑀝𑁆𑀞𑀁;

𑁭. 𑀇𑀘𑁆𑀙𑀸𑀲𑀼𑀢𑁆𑀢𑀁

𑁭𑁭. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁄’’𑀢𑀺! ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

[𑀅. 𑀦𑀺. 𑁮.𑁬𑁧] ‘‘𑀅𑀝𑁆𑀞𑀺𑀫𑁂, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀅𑀝𑁆𑀞? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺, 𑀖𑀝𑀢𑀺, 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄, 𑀖𑀝𑀢𑁄, 𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺, 𑀖𑀝𑀢𑀺, 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀲𑁄𑀘𑀻 𑀘 𑀧𑀭𑀺𑀤𑁂𑀯𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺, 𑀖𑀝𑀢𑀺, 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄 𑀖𑀝𑀢𑁄 𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀫𑀚𑁆𑀚𑀢𑀺 𑀧𑀫𑀚𑁆𑀚𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘, 𑀫𑀤𑀻 𑀘 𑀧𑀫𑀸𑀤𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄, 𑀅𑀖𑀝𑀢𑁄, 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀲𑁄𑀘𑀻 𑀘 𑀧𑀭𑀺𑀤𑁂𑀯𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄, 𑀅𑀖𑀝𑀢𑁄, 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀫𑀚𑁆𑀚𑀢𑀺 𑀧𑀫𑀚𑁆𑀚𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺 𑀦 𑀖𑀝𑀢𑀺 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘, 𑀫𑀤𑀻 𑀘 𑀧𑀫𑀸𑀤𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺, 𑀖𑀝𑀢𑀺, 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄, 𑀖𑀝𑀢𑁄, 𑀯𑀸𑀬𑀫𑀢𑁄 𑀮𑀸𑀪𑀸𑀬, 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀦 𑀘 𑀲𑁄𑀘𑀻 𑀦 𑀘 𑀧𑀭𑀺𑀤𑁂𑀯𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺, 𑀖𑀝𑀢𑀺, 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄, 𑀖𑀝𑀢𑁄, 𑀯𑀸𑀬𑀫𑀢𑁄 𑀮𑀸𑀪𑀸𑀬, 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀦 𑀫𑀚𑁆𑀚𑀢𑀺 𑀦 𑀧𑀫𑀚𑁆𑀚𑀢𑀺 𑀦 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺, 𑀖𑀝𑀢𑀺, 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘, 𑀦 𑀘 𑀫𑀤𑀻 𑀦 𑀘 𑀧𑀫𑀸𑀤𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄, 𑀅𑀖𑀝𑀢𑁄, 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬, 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀦 𑀘 𑀲𑁄𑀘𑀻 𑀦 𑀘 𑀧𑀭𑀺𑀤𑁂𑀯𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄, 𑀅𑀖𑀝𑀢𑁄, 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬, 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀦 𑀫𑀚𑁆𑀚𑀢𑀺 𑀦 𑀧𑀫𑀚𑁆𑀚𑀢𑀺 𑀦 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘, 𑀦 𑀘 𑀫𑀤𑀻 𑀦 𑀘 𑀧𑀫𑀸𑀤𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀅𑀮𑀁𑀲𑀼𑀢𑁆𑀢𑀁

𑁭𑁮. [𑀅. 𑀦𑀺. 𑁮.𑁬𑁨] 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺…𑀧𑁂… 𑀙𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀅𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀙𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀅𑀮𑀁 𑀧𑀭𑁂𑀲𑀁.

‘‘𑀧𑀜𑁆𑀘𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀅𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺…𑀧𑁂… 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀅𑀮𑀁 𑀧𑀭𑁂𑀲𑀁.

‘‘𑀘𑀢𑀽𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺…𑀧𑁂… 𑀦𑁄 𑀘 𑀲𑀦𑁆𑀤𑀲𑁆𑀲𑀓𑁄 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁.

‘‘𑀘𑀢𑀽𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀦𑁄 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺…𑀧𑁂… 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄.

‘‘𑀢𑀻𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺…𑀧𑁂… 𑀦𑁄 𑀘 𑀲𑀦𑁆𑀤𑀲𑁆𑀲𑀓𑁄 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁.

‘‘𑀢𑀻𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀦𑁄 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺…𑀧𑁂… 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸, 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄.

‘‘𑀤𑁆𑀯𑀻𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀦𑁄 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺…𑀧𑁂… 𑀦𑁄 𑀘 𑀲𑀦𑁆𑀤𑀲𑁆𑀲𑀓𑁄 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁.

‘‘𑀤𑁆𑀯𑀻𑀳𑀸𑀯𑀼𑀲𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀦𑁄 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀦𑁄 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀆𑀯𑀼𑀲𑁄, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀭𑀺𑀳𑀸𑀦𑀲𑀼𑀢𑁆𑀢𑀁

𑁭𑁯. ‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸, 𑀲𑀁𑀲𑀕𑁆𑀕𑀸𑀭𑀸𑀫𑀢𑀸, 𑀧𑀧𑀜𑁆𑀘𑀸𑀭𑀸𑀫𑀢𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞? 𑀦 𑀓𑀫𑁆𑀫𑀸𑀭𑀸𑀫𑀢𑀸, 𑀦 𑀪𑀲𑁆𑀲𑀸𑀭𑀸𑀫𑀢𑀸, 𑀦 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀅𑀲𑀁𑀲𑀕𑁆𑀕𑀸𑀭𑀸𑀫𑀢𑀸, 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀢𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀓𑀼𑀲𑀻𑀢𑀸𑀭𑀫𑁆𑀪𑀯𑀢𑁆𑀣𑀼𑀲𑀼𑀢𑁆𑀢𑀁

𑁮𑁦. [𑀤𑀺. 𑀦𑀺. 𑁩.𑁩𑁩𑁪, 𑁩𑁫𑁮] ‘‘𑀅𑀝𑁆𑀞𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀻𑀢𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑀫𑁆𑀫𑀁 𑀔𑁄 𑀫𑁂 𑀓𑀢𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺. 𑀓𑀫𑁆𑀫𑀁 𑀔𑁄 𑀧𑀦 𑀫𑁂 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀫𑀺𑀲𑁆𑀲𑀢𑀺. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀓𑀼𑀲𑀻𑀢𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀓𑀫𑁆𑀫𑀁 𑀅𑀓𑀸𑀲𑀺𑀁. 𑀓𑀫𑁆𑀫𑀁 𑀔𑁄 𑀧𑀦 𑀫𑁂 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀦𑁆𑀢𑁄. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀓𑀼𑀲𑀻𑀢𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀫𑀕𑁆𑀕𑁄 𑀫𑁂 𑀕𑀦𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺. 𑀫𑀕𑁆𑀕𑀁 𑀔𑁄 𑀧𑀦 𑀫𑁂 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀫𑀺𑀲𑁆𑀲𑀢𑀺. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀓𑀼𑀲𑀻𑀢𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀫𑀕𑁆𑀕𑁄 𑀕𑀢𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀫𑀕𑁆𑀕𑀁 𑀅𑀕𑀫𑀸𑀲𑀺𑀁. 𑀫𑀕𑁆𑀕𑀁 𑀔𑁄 𑀧𑀦 𑀫𑁂 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀦𑁆𑀢𑁄. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀓𑀼𑀲𑀻𑀢𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦 𑀮𑀪𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦𑀸𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀫𑁂 𑀓𑀸𑀬𑁄 𑀓𑀺𑀮𑀦𑁆𑀢𑁄 𑀅𑀓𑀫𑁆𑀫𑀜𑁆𑀜𑁄. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀓𑀼𑀲𑀻𑀢𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀮𑀪𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀅𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀫𑁂 𑀓𑀸𑀬𑁄 𑀕𑀭𑀼𑀓𑁄 𑀅𑀓𑀫𑁆𑀫𑀜𑁆𑀜𑁄 𑀫𑀸𑀲𑀸𑀘𑀺𑀢𑀁 𑀫𑀜𑁆𑀜𑁂. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀙𑀝𑁆𑀞𑀁 𑀓𑀼𑀲𑀻𑀢𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀉𑀧𑁆𑀧𑀦𑁆𑀦𑁄 𑀔𑁄 𑀫𑁂 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄 𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼𑀁. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀫𑀁 𑀓𑀼𑀲𑀻𑀢𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 [𑀅. 𑀦𑀺. 𑁬.𑁧𑁬 𑀲𑀼𑀢𑁆𑀢𑀯𑀡𑁆𑀡𑀦𑀸 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀳𑁄𑀢𑀺 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸. 𑀢𑀲𑁆𑀲 𑀫𑁂 𑀓𑀸𑀬𑁄 𑀤𑀼𑀩𑁆𑀩𑀮𑁄 𑀅𑀓𑀫𑁆𑀫𑀜𑁆𑀜𑁄. 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’𑀢𑀺. 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀫𑀁 𑀓𑀼𑀲𑀻𑀢𑀯𑀢𑁆𑀣𑀼. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀓𑀼𑀲𑀻𑀢𑀯𑀢𑁆𑀣𑀽𑀦𑀺.

[𑀤𑀻. 𑀦𑀺. 𑁩.𑁩𑁩𑁫, 𑁩𑁫𑁮] ‘‘𑀅𑀝𑁆𑀞𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑀫𑁆𑀫𑀁 𑀔𑁄 𑀫𑁂 𑀓𑀢𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺. 𑀓𑀫𑁆𑀫𑀁 𑀔𑁄 𑀫𑀬𑀸 𑀓𑀭𑁄𑀦𑁆𑀢𑁂𑀦 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁. 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀲𑁄 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀆𑀭𑀫𑁆𑀪𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀓𑀫𑁆𑀫𑀁 𑀅𑀓𑀸𑀲𑀺𑀁. 𑀓𑀫𑁆𑀫𑀁 𑀔𑁄 𑀧𑀦𑀸𑀳𑀁 𑀓𑀭𑁄𑀦𑁆𑀢𑁄 𑀦𑀸𑀲𑀓𑁆𑀔𑀺𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁. 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀲𑁄 𑀯𑀻𑀭𑀺𑀬𑀁 𑀆𑀭𑀪𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀆𑀭𑀫𑁆𑀪𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀫𑀕𑁆𑀕𑁄 𑀔𑁄 𑀫𑁂 𑀕𑀦𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺. 𑀫𑀕𑁆𑀕𑀁 𑀔𑁄 𑀧𑀦 𑀫𑁂 𑀕𑀘𑁆𑀙𑀦𑁆𑀢𑁂𑀦 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁. 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀆𑀭𑀫𑁆𑀪𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀫𑀕𑁆𑀕𑁄 𑀕𑀢𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀅𑀳𑀁 𑀔𑁄 𑀫𑀕𑁆𑀕𑀁 𑀅𑀕𑀫𑀸𑀲𑀺𑀁. 𑀫𑀕𑁆𑀕𑀁 𑀔𑁄 𑀧𑀦𑀸𑀳𑀁 𑀕𑀘𑁆𑀙𑀦𑁆𑀢𑁄 𑀦𑀸𑀲𑀓𑁆𑀔𑀺𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁. 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀆𑀭𑀫𑁆𑀪𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦 𑀮𑀪𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦𑀸𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀫𑁂 𑀓𑀸𑀬𑁄 𑀮𑀳𑀼𑀓𑁄 𑀓𑀫𑁆𑀫𑀜𑁆𑀜𑁄. 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀆𑀭𑀫𑁆𑀪𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀮𑀪𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀅𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀢𑀲𑁆𑀲 𑀫𑁂 𑀓𑀸𑀬𑁄 𑀩𑀮𑀯𑀸 𑀓𑀫𑁆𑀫𑀜𑁆𑀜𑁄. 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀙𑀝𑁆𑀞𑀁 𑀆𑀭𑀫𑁆𑀪𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀉𑀧𑁆𑀧𑀦𑁆𑀦𑁄 𑀔𑁄 𑀫𑁂 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀫𑁂 𑀆𑀩𑀸𑀥𑁄 𑀧𑀯𑀟𑁆𑀠𑁂𑀬𑁆𑀬. 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀇𑀤𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀫𑀁 𑀆𑀭𑀫𑁆𑀪𑀯𑀢𑁆𑀣𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀫𑁂 𑀆𑀩𑀸𑀥𑁄 𑀧𑀘𑁆𑀘𑀼𑀤𑀸𑀯𑀢𑁆𑀢𑁂𑀬𑁆𑀬. 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀲𑁄 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀫𑀁 𑀆𑀭𑀫𑁆𑀪𑀯𑀢𑁆𑀣𑀼. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀻’’𑀢𑀺. 𑀤𑀲𑀫𑀁.

𑀬𑀫𑀓𑀯𑀕𑁆𑀕𑁄 𑀢𑀢𑀺𑀬𑁄.