𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀕𑁄𑀢𑀫𑀻𑀯𑀕𑁆𑀕𑁄

𑁧. 𑀕𑁄𑀢𑀫𑀻𑀲𑀼𑀢𑁆𑀢𑀁

𑁫𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀻 [𑀫𑀳𑀸𑀧𑀚𑀸𑀧𑀢𑀺 (𑀲𑁆𑀬𑀸.) 𑀘𑀽𑀴𑀯. 𑁪𑁦𑁨] 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀕𑁄𑀢𑀫𑀺! 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀕𑁄𑀢𑀫𑀺! 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺. ‘‘𑀢𑀢𑀺𑀬𑀫𑁆𑀧𑀺 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀕𑁄𑀢𑀫𑀺! 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺.

𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 ‘‘𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀪𑀕𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀓𑁂𑀲𑁂 𑀙𑁂𑀤𑀸𑀧𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀲𑀫𑁆𑀩𑀳𑀼𑀮𑀸𑀳𑀺 𑀲𑀸𑀓𑀺𑀬𑀸𑀦𑀻𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀯𑁂𑀲𑀸𑀮𑀻 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺.

𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀺𑀁 𑀤𑀼𑀫𑁆𑀫𑀦𑀁 𑀅𑀲𑁆𑀲𑀼𑀫𑀼𑀔𑀺𑀁 𑀭𑀼𑀤𑀫𑀸𑀦𑀁 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀢𑁆𑀯𑀁, 𑀕𑁄𑀢𑀫𑀺, 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀸’’𑀢𑀺? ‘‘𑀢𑀣𑀸 𑀳𑀺 𑀧𑀦, 𑀪𑀦𑁆𑀢𑁂 𑀆𑀦𑀦𑁆𑀤, 𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑁄𑀢𑀫𑀺, 𑀫𑀼𑀳𑀼𑀢𑁆𑀢𑀁 𑀇𑀥𑁂𑀯 𑀢𑀸𑀯 𑀳𑁄𑀳𑀺, 𑀬𑀸𑀯𑀸𑀳𑀁 𑀪𑀕𑀯𑀦𑁆𑀢𑀁 𑀬𑀸𑀘𑀸𑀫𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑀸, 𑀪𑀦𑁆𑀢𑁂, 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀸 𑁋 ‘𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀆𑀦𑀦𑁆𑀤! 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀆𑀦𑀦𑁆𑀤! 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁. 𑀬𑀁𑀦𑀽𑀦𑀸𑀳𑀁 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀪𑀕𑀯𑀦𑁆𑀢𑀁 𑀬𑀸𑀘𑁂𑀬𑁆𑀬𑀁 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀩𑁆𑀩𑁄 𑀦𑀼 𑀔𑁄, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺? ‘‘𑀪𑀩𑁆𑀩𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀲𑀓𑀤𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀭𑀳𑀢𑁆𑀢𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀪𑀩𑁆𑀩𑁄 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺…𑀧𑁂… 𑀅𑀭𑀳𑀢𑁆𑀢𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀸𑀢𑀼𑀁, 𑀩𑀳𑀼𑀓𑀸𑀭𑀸, 𑀪𑀦𑁆𑀢𑁂, 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀪𑀕𑀯𑀢𑁄 𑀫𑀸𑀢𑀼𑀘𑁆𑀙𑀸 𑀆𑀧𑀸𑀤𑀺𑀓𑀸 𑀧𑁄𑀲𑀺𑀓𑀸 𑀔𑀻𑀭𑀲𑁆𑀲 𑀤𑀸𑀬𑀺𑀓𑀸; 𑀪𑀕𑀯𑀦𑁆𑀢𑀁 𑀚𑀦𑁂𑀢𑁆𑀢𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀣𑀜𑁆𑀜𑀁 𑀧𑀸𑀬𑁂𑀲𑀺. 𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺.

‘‘𑀲𑀘𑁂, 𑀆𑀦𑀦𑁆𑀤, 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀸𑀯𑀲𑁆𑀲𑀸 𑀳𑁄𑀢𑀼 𑀉𑀧𑀲𑀫𑁆𑀧𑀤𑀸 𑁋

[𑀧𑀸𑀘𑀺. 𑁧𑁪𑁯; 𑀘𑀽𑀴𑀯. 𑁪𑁦𑁩] ‘‘𑀯𑀲𑁆𑀲𑀲𑀢𑀽𑀧𑀲𑀫𑁆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀢𑀤𑀳𑀽𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 [𑀕𑀭𑀼𑀓𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀦 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀅𑀦𑁆𑀯𑀟𑁆𑀠𑀫𑀸𑀲𑀁 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸 [𑀧𑀘𑁆𑀘𑀸𑀲𑀺𑀁𑀲𑀺𑀢𑀩𑁆𑀩𑀸 (𑀲𑀻. 𑀲𑁆𑀬𑀸. 𑀧𑀻.)] 𑁋 𑀉𑀧𑁄𑀲𑀣𑀧𑀼𑀘𑁆𑀙𑀓𑀜𑁆𑀘, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀯𑀲𑁆𑀲𑀁𑀯𑀼𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀤𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑀺𑀪𑀸𑀲𑀺𑀢𑀩𑁆𑀩𑁄. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀅𑀚𑁆𑀚𑀢𑀕𑁆𑀕𑁂 𑀑𑀯𑀝𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀯𑀘𑀦𑀧𑀣𑁄, 𑀅𑀦𑁄𑀯𑀝𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀲𑀼 𑀯𑀘𑀦𑀧𑀣𑁄. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀲𑀘𑁂, 𑀆𑀦𑀦𑁆𑀤, 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀸𑀯𑀲𑁆𑀲𑀸 𑀳𑁄𑀢𑀼 𑀉𑀧𑀲𑀫𑁆𑀧𑀤𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀉𑀕𑁆𑀕𑀳𑁂𑀢𑁆𑀯𑀸 𑀬𑁂𑀦 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘 𑁋

‘‘𑀲𑀘𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀲𑀺, 𑀲𑀸𑀯 𑀢𑁂 𑀪𑀯𑀺𑀲𑁆𑀲𑀢𑀺 𑀉𑀧𑀲𑀫𑁆𑀧𑀤𑀸 𑁋

‘‘𑀯𑀲𑁆𑀲𑀲𑀢𑀽𑀧𑀲𑀫𑁆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀢𑀤𑀳𑀽𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄…𑀧𑁂….

‘‘𑀅𑀚𑁆𑀚𑀢𑀕𑁆𑀕𑁂 𑀑𑀯𑀝𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀯𑀘𑀦𑀧𑀣𑁄, 𑀅𑀦𑁄𑀯𑀝𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀲𑀼 𑀯𑀘𑀦𑀧𑀣𑁄. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄. 𑀲𑀘𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀲𑀺, 𑀲𑀸𑀯 𑀢𑁂 𑀪𑀯𑀺𑀲𑁆𑀲𑀢𑀺 𑀉𑀧𑀲𑀫𑁆𑀧𑀤𑀸’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂 𑀆𑀦𑀦𑁆𑀤, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 [𑀫𑀡𑁆𑀟𑀦𑀓𑀚𑀸𑀢𑀺𑀬𑁄 (𑀲𑀻. 𑀧𑀻.)] 𑀲𑀻𑀲𑀁𑀦𑁆𑀳𑀸𑀢𑁄 [𑀲𑀻𑀲𑀁𑀦𑀳𑀸𑀢𑁄 (𑀲𑀻. 𑀧𑀻.), 𑀲𑀻𑀲𑀦𑀳𑀸𑀢𑁄 (𑀲𑁆𑀬𑀸.)] 𑀉𑀧𑁆𑀧𑀮𑀫𑀸𑀮𑀁 𑀯𑀸 𑀯𑀲𑁆𑀲𑀺𑀓𑀫𑀸𑀮𑀁 𑀯𑀸 𑀅𑀥𑀺𑀫𑀼𑀢𑁆𑀢𑀓𑀫𑀸𑀮𑀁 [𑀅𑀢𑀺𑀫𑀼𑀢𑁆𑀢𑀓𑀫𑀸𑀮𑀁 (𑀲𑀻.)] 𑀯𑀸 𑀮𑀪𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁂’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀕𑁆𑀕𑀳𑀺𑀢𑀸, 𑀪𑀦𑁆𑀢𑁂, 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑀸’’𑀢𑀺.

‘‘𑀲𑀘𑁂, 𑀆𑀦𑀦𑁆𑀤, 𑀦𑀸𑀮𑀪𑀺𑀲𑁆𑀲 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀯𑀺𑀲𑁆𑀲, 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬. 𑀬𑀢𑁄 𑀘 𑀔𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀦 𑀤𑀸𑀦𑀺, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀪𑀯𑀺𑀲𑁆𑀲𑀢𑀺. 𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀬𑀸𑀦𑀺 𑀓𑀸𑀦𑀺𑀘𑀺 𑀓𑀼𑀮𑀸𑀦𑀺 𑀩𑀳𑀼𑀢𑁆𑀣𑀺𑀓𑀸𑀦𑀺 [𑀩𑀳𑀼𑀓𑀺𑀢𑁆𑀣𑀺𑀓𑀸𑀦𑀺 (𑀲𑀻. 𑀧𑀻.), 𑀩𑀳𑀼𑀇𑀢𑁆𑀣𑀺𑀓𑀸𑀦𑀺 (𑀲𑁆𑀬𑀸.)] 𑀅𑀧𑁆𑀧𑀧𑀼𑀭𑀺𑀲𑀓𑀸𑀦𑀺, 𑀢𑀸𑀦𑀺 𑀲𑀼𑀧𑁆𑀧𑀥𑀁𑀲𑀺𑀬𑀸𑀦𑀺 𑀳𑁄𑀦𑁆𑀢𑀺 𑀘𑁄𑀭𑁂𑀳𑀺 𑀓𑀼𑀫𑁆𑀪𑀢𑁆𑀣𑁂𑀦𑀓𑁂𑀳𑀺; 𑀏𑀯𑀫𑁂𑀯𑀁 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀮𑀪𑀢𑀺 𑀫𑀸𑀢𑀼𑀕𑀸𑀫𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀦 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀲𑀫𑁆𑀧𑀦𑁆𑀦𑁂 𑀲𑀸𑀮𑀺𑀓𑁆𑀔𑁂𑀢𑁆𑀢𑁂 𑀲𑁂𑀢𑀝𑁆𑀞𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀺 𑀦𑀺𑀧𑀢𑀢𑀺, 𑀏𑀯𑀁 𑀢𑀁 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀮𑀪𑀢𑀺 𑀫𑀸𑀢𑀼𑀕𑀸𑀫𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀦 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀲𑀫𑁆𑀧𑀦𑁆𑀦𑁂 𑀉𑀘𑁆𑀙𑀼𑀓𑁆𑀔𑁂𑀢𑁆𑀢𑁂 𑀫𑀜𑁆𑀚𑀺𑀝𑁆𑀞𑀺𑀓𑀸 [𑀫𑀜𑁆𑀚𑁂𑀝𑁆𑀞𑀺𑀓𑀸 (𑀲𑀻. 𑀲𑁆𑀬𑀸.)] 𑀦𑀸𑀫 𑀭𑁄𑀕𑀚𑀸𑀢𑀺 𑀦𑀺𑀧𑀢𑀢𑀺, 𑀏𑀯𑀁 𑀢𑀁 𑀉𑀘𑁆𑀙𑀼𑀓𑁆𑀔𑁂𑀢𑁆𑀢𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀮𑀪𑀢𑀺 𑀫𑀸𑀢𑀼𑀕𑀸𑀫𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀦 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀼𑀭𑀺𑀲𑁄 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻. 𑀧𑀻.)] 𑀆𑀴𑀺𑀁 𑀩𑀦𑁆𑀥𑁂𑀬𑁆𑀬 𑀬𑀸𑀯𑀤𑁂𑀯 𑀉𑀤𑀓𑀲𑁆𑀲 𑀅𑀦𑀢𑀺𑀓𑁆𑀓𑀫𑀦𑀸𑀬; 𑀏𑀯𑀫𑁂𑀯𑀁 𑀔𑁄, 𑀆𑀦𑀦𑁆𑀤, 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑀸’’𑀢𑀺. 𑀧𑀞𑀫𑀁.

𑁨. 𑀑𑀯𑀸𑀤𑀲𑀼𑀢𑁆𑀢𑀁

𑁫𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺𑀳𑀺 𑀦𑀼 𑀔𑁄, 𑀪𑀦𑁆𑀢𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄’’𑀢𑀺?

[𑀧𑀸𑀘𑀺. 𑁧𑁪𑁭] ‘‘𑀅𑀝𑁆𑀞𑀳𑀺 𑀔𑁄, 𑀆𑀦𑀦𑁆𑀤, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄; 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 [𑀯𑀺𑀲𑀝𑁆𑀞𑀸𑀬 (𑀓.)] 𑀅𑀦𑁂𑀮𑀕𑀴𑀸𑀬 [𑀅𑀦𑁂𑀴𑀕𑀴𑀸𑀬 (𑀲𑀻. 𑀓.)] 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀧𑀝𑀺𑀩𑀮𑁄 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁; 𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄; 𑀦 𑀔𑁄 𑀧𑀦𑁂𑀢𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸𑀬 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀲𑀦𑀸𑀬 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄 𑀳𑁄𑀢𑀺; 𑀯𑀻𑀲𑀢𑀺𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀲𑁆𑀲𑁄 𑀯𑀸. 𑀇𑀫𑁂𑀳𑀺 𑀔𑁄, 𑀆𑀦𑀦𑁆𑀤, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀁

𑁫𑁩. [𑀘𑀽𑀴𑀯. 𑁪𑁦𑁬] 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑀸 𑀯𑀽𑀧𑀓𑀝𑁆𑀞𑀸 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑀻 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. ‘‘𑀬𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀇𑀫𑁂 𑀥𑀫𑁆𑀫𑀸 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀯𑀺𑀭𑀸𑀕𑀸𑀬; 𑀲𑀁𑀬𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀯𑀺𑀲𑀁𑀬𑁄𑀕𑀸𑀬; 𑀆𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀅𑀧𑀘𑀬𑀸𑀬; 𑀫𑀳𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬; 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀲𑀦𑁆𑀢𑀼𑀝𑁆𑀞𑀺𑀬𑀸; 𑀲𑀗𑁆𑀕𑀡𑀺𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀧𑀯𑀺𑀯𑁂𑀓𑀸𑀬; 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀸𑀬; 𑀤𑀼𑀩𑁆𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀲𑀼𑀪𑀭𑀢𑀸𑀬𑀸’𑀢𑀺, 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀦𑁂𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀯𑀺𑀦𑀬𑁄, 𑀦𑁂𑀢𑀁 𑀲𑀢𑁆𑀣𑀼𑀲𑀸𑀲𑀦’’’𑀦𑁆𑀢𑀺.

‘‘𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀇𑀫𑁂 𑀥𑀫𑁆𑀫𑀸 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀲𑀭𑀸𑀕𑀸𑀬; 𑀯𑀺𑀲𑀁𑀬𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀲𑀁𑀬𑁄𑀕𑀸𑀬; 𑀅𑀧𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀆𑀘𑀬𑀸𑀬; 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀫𑀳𑀺𑀘𑁆𑀙𑀢𑀸𑀬; 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀅𑀲𑀦𑁆𑀢𑀼𑀝𑁆𑀞𑀺𑀬𑀸; 𑀧𑀯𑀺𑀯𑁂𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀲𑀗𑁆𑀕𑀡𑀺𑀓𑀸𑀬; 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀓𑁄𑀲𑀚𑁆𑀚𑀸𑀬; 𑀲𑀼𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀤𑀼𑀩𑁆𑀪𑀭𑀢𑀸𑀬𑀸’𑀢𑀺, 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄, 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦’’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀤𑀻𑀖𑀚𑀸𑀡𑀼𑀲𑀼𑀢𑁆𑀢𑀁

𑁫𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀮𑀺𑀬𑁂𑀲𑀼 𑀯𑀺𑀳𑀭𑀢𑀺 𑀓𑀓𑁆𑀓𑀭𑀧𑀢𑁆𑀢𑀁 𑀦𑀸𑀫 𑀓𑁄𑀮𑀺𑀬𑀸𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀤𑀻𑀖𑀚𑀸𑀡𑀼 𑀓𑁄𑀮𑀺𑀬𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀤𑀻𑀖𑀚𑀸𑀡𑀼 𑀓𑁄𑀮𑀺𑀬𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀁, 𑀪𑀦𑁆𑀢𑁂, 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄 [𑀓𑀸𑀫𑀪𑁄𑀕𑀻 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑀸𑀫, 𑀓𑀸𑀲𑀺𑀓𑀘𑀦𑁆𑀤𑀦𑀁 𑀧𑀘𑁆𑀘𑀦𑀼𑀪𑁄𑀫, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀸𑀫, 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀬𑀸𑀫. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀫𑁆𑀳𑀸𑀓𑀁 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑁂 𑀅𑀫𑁆𑀳𑀸𑀓𑀁 𑀅𑀲𑁆𑀲𑀼 𑀥𑀫𑁆𑀫𑀸 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀬, 𑀲𑀫𑁆𑀧𑀭𑀸𑀬𑀳𑀺𑀢𑀸𑀬 𑀲𑀫𑁆𑀧𑀭𑀸𑀬𑀲𑀼𑀔𑀸𑀬𑀸’’𑀢𑀺.

‘‘𑀘𑀢𑁆𑀢𑀸𑀭𑁄𑀫𑁂, 𑀩𑁆𑀬𑀕𑁆𑀖𑀧𑀚𑁆𑀚, 𑀥𑀫𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀉𑀝𑁆𑀞𑀸𑀦𑀲𑀫𑁆𑀧𑀤𑀸, 𑀆𑀭𑀓𑁆𑀔𑀲𑀫𑁆𑀧𑀤𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀫𑀚𑀻𑀯𑀺𑀢𑀸 [𑀲𑀫𑀚𑀻𑀯𑀺𑀓𑀢𑀸 (𑀲𑀻.) 𑀅. 𑀦𑀺. 𑁮.𑁭𑁫]. 𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀉𑀝𑁆𑀞𑀸𑀦𑀲𑀫𑁆𑀧𑀤𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 [𑀚𑀻𑀯𑀺𑀢𑀁 (𑀓.)] 𑀓𑀧𑁆𑀧𑁂𑀢𑀺 𑁋 𑀬𑀤𑀺 𑀓𑀲𑀺𑀬𑀸, 𑀬𑀤𑀺 𑀯𑀡𑀺𑀚𑁆𑀚𑀸𑀬, 𑀬𑀤𑀺 𑀕𑁄𑀭𑀓𑁆𑀔𑁂𑀦, 𑀬𑀤𑀺 𑀇𑀲𑁆𑀲𑀢𑁆𑀢𑁂𑀦 [𑀇𑀲𑁆𑀲𑀢𑁆𑀣𑁂𑀦 (𑀲𑀻. 𑀲𑁆𑀬𑀸. 𑀧𑀻.)], 𑀬𑀤𑀺 𑀭𑀸𑀚𑀧𑁄𑀭𑀺𑀲𑁂𑀦, 𑀬𑀤𑀺 𑀲𑀺𑀧𑁆𑀧𑀜𑁆𑀜𑀢𑀭𑁂𑀦 𑁋 𑀢𑀢𑁆𑀣 𑀤𑀓𑁆𑀔𑁄 𑀳𑁄𑀢𑀺 𑀅𑀦𑀮𑀲𑁄, 𑀢𑀢𑁆𑀭𑀼𑀧𑀸𑀬𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀅𑀮𑀁 𑀓𑀸𑀢𑀼𑀁 𑀅𑀮𑀁 𑀲𑀁𑀯𑀺𑀥𑀸𑀢𑀼𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀉𑀝𑁆𑀞𑀸𑀦𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀆𑀭𑀓𑁆𑀔𑀲𑀫𑁆𑀧𑀤𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀪𑁄𑀕𑀸 𑀳𑁄𑀦𑁆𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀸 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑀸, 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑀸, 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸. 𑀢𑁂 𑀆𑀭𑀓𑁆𑀔𑁂𑀦 𑀕𑀼𑀢𑁆𑀢𑀺𑀬𑀸 𑀲𑀫𑁆𑀧𑀸𑀤𑁂𑀢𑀺 𑁋 ‘𑀓𑀺𑀦𑁆𑀢𑀺 𑀫𑁂 𑀇𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁, 𑀦 𑀘𑁄𑀭𑀸 𑀳𑀭𑁂𑀬𑁆𑀬𑀼𑀁, 𑀦 𑀅𑀕𑁆𑀕𑀺 𑀟𑀳𑁂𑀬𑁆𑀬, 𑀦 𑀉𑀤𑀓𑀁 𑀯𑀳𑁂𑀬𑁆𑀬, 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼’𑀦𑁆𑀢𑀺! 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀆𑀭𑀓𑁆𑀔𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀧𑀝𑀺𑀯𑀲𑀢𑀺, 𑀢𑀢𑁆𑀣 𑀬𑁂 𑀢𑁂 𑀳𑁄𑀦𑁆𑀢𑀺 𑁋 𑀕𑀳𑀧𑀢𑀻 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀸 𑀯𑀸 𑀤𑀳𑀭𑀸 𑀯𑀸 𑀯𑀼𑀤𑁆𑀥𑀲𑀻𑀮𑀺𑀦𑁄, 𑀯𑀼𑀤𑁆𑀥𑀸 𑀯𑀸 𑀯𑀼𑀤𑁆𑀥𑀲𑀻𑀮𑀺𑀦𑁄, 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸, 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀘𑀸𑀕𑀲𑀫𑁆𑀧𑀦𑁆𑀦𑀸, 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸 𑁋 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀮𑁆𑀮𑀧𑀢𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺; 𑀬𑀣𑀸𑀭𑀽𑀧𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀲𑀻𑀮𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀘𑀸𑀕𑀲𑀫𑁆𑀧𑀦𑁆𑀦𑀸𑀦𑀁 𑀘𑀸𑀕𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸.

‘‘𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀲𑀫𑀚𑀻𑀯𑀺𑀢𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸, 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸, 𑀲𑀫𑀁 𑀚𑀻𑀯𑀺𑀓𑀁 [𑀲𑀫𑀚𑀻𑀯𑀺𑀓𑀁 (𑀲𑁆𑀬𑀸.), 𑀲𑀫𑀚𑀻𑀯𑀺𑀢𑀁 (𑀓.)] 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀢𑀼𑀮𑀸𑀥𑀸𑀭𑁄 𑀯𑀸 𑀢𑀼𑀮𑀸𑀥𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀼𑀮𑀁 𑀧𑀕𑁆𑀕𑀳𑁂𑀢𑁆𑀯𑀸 𑀚𑀸𑀦𑀸𑀢𑀺 𑁋 ‘𑀏𑀢𑁆𑀢𑀓𑁂𑀦 𑀯𑀸 𑀑𑀦𑀢𑀁 [𑀑𑀡𑀢𑀁 (𑀓.)], 𑀏𑀢𑁆𑀢𑀓𑁂𑀦 𑀯𑀸 𑀉𑀦𑁆𑀦𑀢’𑀦𑁆𑀢𑀺 [𑀉𑀡𑁆𑀡𑀢𑀦𑁆𑀢𑀺 (𑀓.)]; 𑀏𑀯𑀫𑁂𑀯𑀁 𑀔𑁄, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸, 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸, 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀲𑀘𑀸𑀬𑀁, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀅𑀧𑁆𑀧𑀸𑀬𑁄 𑀲𑀫𑀸𑀦𑁄 𑀉𑀴𑀸𑀭𑀁 𑀚𑀻𑀯𑀺𑀓𑀁 [𑀚𑀻𑀯𑀺𑀢𑀁 (𑀓.)] 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀉𑀤𑀼𑀫𑁆𑀩𑀭𑀔𑀸𑀤𑀻𑀯𑀸𑀬𑀁 [𑀉𑀤𑀼𑀫𑁆𑀩𑀭𑀔𑀸𑀤𑀺𑀓𑀁 𑀯𑀸𑀬𑀁 (𑀲𑀻. 𑀧𑀻.), 𑀉𑀤𑀼𑀫𑁆𑀩𑀭𑀔𑀸𑀤𑀓𑀁 𑀘𑀸𑀬𑀁 (𑀲𑁆𑀬𑀸.)] 𑀓𑀼𑀮𑀧𑀼𑀢𑁆𑀢𑁄 𑀪𑁄𑀕𑁂 𑀔𑀸𑀤𑀢𑀻’𑀢𑀺. 𑀲𑀘𑁂 𑀧𑀦𑀸𑀬𑀁, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀫𑀳𑀸𑀬𑁄 𑀲𑀫𑀸𑀦𑁄 𑀓𑀲𑀺𑀭𑀁 𑀚𑀻𑀯𑀺𑀓𑀁 [𑀚𑀻𑀯𑀺𑀢𑀁 (𑀓.)] 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀅𑀚𑁂𑀝𑁆𑀞𑀫𑀭𑀡𑀁𑀯𑀸𑀬𑀁 [𑀅𑀚𑀤𑁆𑀥𑀼𑀫𑀸𑀭𑀺𑀓𑀁 𑀯𑀸𑀬𑀁 (𑀲𑀻. 𑀧𑀻.), 𑀅𑀤𑁆𑀥𑀫𑀸𑀭𑀓𑀁 𑀘𑀸𑀬𑀁 (𑀲𑁆𑀬𑀸.), 𑀏𑀢𑁆𑀣 𑀚𑀤𑁆𑀥𑀽𑀢𑀺 𑀅𑀲𑀦𑀁 = 𑀪𑀢𑁆𑀢𑀪𑀼𑀜𑁆𑀚𑀦𑀁, 𑀢𑀲𑁆𑀫𑀸 𑀅𑀚𑀤𑁆𑀥𑀼𑀫𑀸𑀭𑀺𑀓𑀦𑁆𑀢𑀺 𑀅𑀦𑀲𑀦𑀫𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫. 𑀦𑀺. 𑁧.𑁩𑁭𑁯 𑀅𑀥𑁄𑀮𑀺𑀧𑀺𑀬𑀸 ‘‘𑀅𑀚𑀤𑁆𑀥𑀼𑀓’’𑀦𑁆𑀢𑀺 𑀧𑀤𑀁 𑀤𑀲𑁆𑀲𑀺𑀢𑀁] 𑀓𑀼𑀮𑀧𑀼𑀢𑁆𑀢𑁄 𑀫𑀭𑀺𑀲𑁆𑀲𑀢𑀻’𑀢𑀺. 𑀬𑀢𑁄 𑀘 𑀔𑁄𑀬𑀁, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸, 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸, 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀲𑀫𑀚𑀻𑀯𑀺𑀢𑀸.

‘‘𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁, 𑀩𑁆𑀬𑀕𑁆𑀖𑀧𑀚𑁆𑀚, 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀅𑀧𑀸𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀲𑀼𑀭𑀸𑀥𑀼𑀢𑁆𑀢𑁄, 𑀅𑀓𑁆𑀔𑀥𑀼𑀢𑁆𑀢𑁄, 𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀲𑀳𑀸𑀬𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀘𑀢𑁆𑀢𑀸𑀭𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺, 𑀘𑀢𑁆𑀢𑀸𑀭𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺. 𑀢𑀲𑁆𑀲 𑀧𑀼𑀭𑀺𑀲𑁄 𑀬𑀸𑀦𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺 𑀢𑀸𑀦𑀺 𑀧𑀺𑀤𑀳𑁂𑀬𑁆𑀬, 𑀬𑀸𑀦𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺 𑀢𑀸𑀦𑀺 𑀯𑀺𑀯𑀭𑁂𑀬𑁆𑀬; 𑀤𑁂𑀯𑁄 𑀘 𑀦 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀲𑁆𑀲, 𑀩𑁆𑀬𑀕𑁆𑀖𑀧𑀚𑁆𑀚, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀭𑀺𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀯𑀼𑀤𑁆𑀥𑀺; 𑀏𑀯𑀫𑁂𑀯𑀁, 𑀩𑁆𑀬𑀕𑁆𑀖𑀧𑀚𑁆𑀚, 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀅𑀧𑀸𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀲𑀼𑀭𑀸𑀥𑀼𑀢𑁆𑀢𑁄, 𑀅𑀓𑁆𑀔𑀥𑀼𑀢𑁆𑀢𑁄, 𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀲𑀳𑀸𑀬𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄.

‘‘𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁, 𑀩𑁆𑀬𑀕𑁆𑀖𑀧𑀚𑁆𑀚, 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀆𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀦 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀦 𑀲𑀼𑀭𑀸𑀥𑀼𑀢𑁆𑀢𑁄, 𑀦 𑀅𑀓𑁆𑀔𑀥𑀼𑀢𑁆𑀢𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀘𑀢𑁆𑀢𑀸𑀭𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺, 𑀘𑀢𑁆𑀢𑀸𑀭𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺. 𑀢𑀲𑁆𑀲 𑀧𑀼𑀭𑀺𑀲𑁄 𑀬𑀸𑀦𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺 𑀢𑀸𑀦𑀺 𑀯𑀺𑀯𑀭𑁂𑀬𑁆𑀬, 𑀬𑀸𑀦𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺 𑀢𑀸𑀦𑀺 𑀧𑀺𑀤𑀳𑁂𑀬𑁆𑀬; 𑀤𑁂𑀯𑁄 𑀘 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀲𑁆𑀲, 𑀩𑁆𑀬𑀕𑁆𑀖𑀧𑀚𑁆𑀚, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀬𑀕𑁆𑀖𑀧𑀚𑁆𑀚, 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀆𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀦 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀦 𑀲𑀼𑀭𑀸𑀥𑀼𑀢𑁆𑀢𑁄, 𑀦 𑀅𑀓𑁆𑀔𑀥𑀼𑀢𑁆𑀢𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀇𑀫𑁂 𑀔𑁄, 𑀩𑁆𑀬𑀕𑁆𑀖𑀧𑀚𑁆𑀚, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀬.

‘‘𑀘𑀢𑁆𑀢𑀸𑀭𑁄𑀫𑁂, 𑀩𑁆𑀬𑀕𑁆𑀖𑀧𑀚𑁆𑀚, 𑀥𑀫𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀫𑁆𑀧𑀭𑀸𑀬𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀫𑁆𑀧𑀭𑀸𑀬𑀲𑀼𑀔𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀤𑁆𑀥𑀸𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀘𑀸𑀕𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀲𑀤𑁆𑀥𑀸𑀲𑀫𑁆𑀧𑀤𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀲𑀤𑁆𑀥𑀸𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀲𑀻𑀮𑀲𑀫𑁆𑀧𑀤𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀲𑀻𑀮𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀘𑀸𑀕𑀲𑀫𑁆𑀧𑀤𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀘𑀸𑀕𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀬𑀕𑁆𑀖𑀧𑀚𑁆𑀚, 𑀧𑀜𑁆𑀜𑀸𑀲𑀫𑁆𑀧𑀤𑀸? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚, 𑀓𑀼𑀮𑀧𑀼𑀢𑁆𑀢𑁄 𑀧𑀜𑁆𑀜𑀯𑀸 𑀳𑁄𑀢𑀺, 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚, 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀇𑀫𑁂 𑀔𑁄, 𑀩𑁆𑀬𑀕𑁆𑀖𑀧𑀚𑁆𑀚, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀫𑁆𑀧𑀭𑀸𑀬𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀫𑁆𑀧𑀭𑀸𑀬𑀲𑀼𑀔𑀸𑀬𑀸’’𑀢𑀺.

‘‘𑀉𑀝𑁆𑀞𑀸𑀢𑀸 𑀓𑀫𑁆𑀫𑀥𑁂𑀬𑁆𑀬𑁂𑀲𑀼, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀥𑀸𑀦𑀯𑀸;

𑀲𑀫𑀁 𑀓𑀧𑁆𑀧𑁂𑀢𑀺 𑀚𑀻𑀯𑀺𑀓𑀁 [𑀚𑀻𑀯𑀺𑀢𑀁 (𑀓.)], 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑁄;

𑀦𑀺𑀘𑁆𑀘𑀁 𑀫𑀕𑁆𑀕𑀁 𑀯𑀺𑀲𑁄𑀥𑁂𑀢𑀺, 𑀲𑁄𑀢𑁆𑀣𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀁.

‘‘𑀇𑀘𑁆𑀘𑁂𑀢𑁂 𑀅𑀝𑁆𑀞 𑀥𑀫𑁆𑀫𑀸 𑀘, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀅𑀓𑁆𑀔𑀸𑀢𑀸 𑀲𑀘𑁆𑀘𑀦𑀸𑀫𑁂𑀦, 𑀉𑀪𑀬𑀢𑁆𑀣 𑀲𑀼𑀔𑀸𑀯𑀳𑀸.

‘‘𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬 𑀘;

𑀏𑀯𑀫𑁂𑀢𑀁 𑀕𑀳𑀝𑁆𑀞𑀸𑀦𑀁, 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀉𑀚𑁆𑀚𑀬𑀲𑀼𑀢𑁆𑀢𑀁

𑁫𑁫. 𑀅𑀣 𑀔𑁄 𑀉𑀚𑁆𑀚𑀬𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀚𑁆𑀚𑀬𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀁, 𑀪𑁄 𑀕𑁄𑀢𑀫, 𑀧𑀯𑀸𑀲𑀁 𑀕𑀦𑁆𑀢𑀼𑀓𑀸𑀫𑀸. 𑀢𑁂𑀲𑀁 𑀦𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑁋 𑀬𑁂 𑀅𑀫𑁆𑀳𑀸𑀓𑀁 𑀅𑀲𑁆𑀲𑀼 𑀥𑀫𑁆𑀫𑀸 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀸𑀬, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀬, 𑀲𑀫𑁆𑀧𑀭𑀸𑀬𑀳𑀺𑀢𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬𑀸’’𑀢𑀺.

‘‘𑀘𑀢𑁆𑀢𑀸𑀭𑁄𑀫𑁂, 𑀩𑁆𑀭𑀸𑀳𑁆𑀫𑀡, 𑀥𑀫𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀉𑀝𑁆𑀞𑀸𑀦𑀲𑀫𑁆𑀧𑀤𑀸, 𑀆𑀭𑀓𑁆𑀔𑀲𑀫𑁆𑀧𑀤𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀫𑀚𑀻𑀯𑀺𑀢𑀸. 𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀉𑀝𑁆𑀞𑀸𑀦𑀲𑀫𑁆𑀧𑀤𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑁋 𑀬𑀤𑀺 𑀓𑀲𑀺𑀬𑀸, 𑀬𑀤𑀺 𑀯𑀡𑀺𑀚𑁆𑀚𑀸𑀬, 𑀬𑀤𑀺 𑀕𑁄𑀭𑀓𑁆𑀔𑁂𑀦, 𑀬𑀤𑀺 𑀇𑀲𑁆𑀲𑀢𑁆𑀢𑁂𑀦, 𑀬𑀤𑀺 𑀭𑀸𑀚𑀧𑁄𑀭𑀺𑀲𑁂𑀦, 𑀬𑀤𑀺 𑀲𑀺𑀧𑁆𑀧𑀜𑁆𑀜𑀢𑀭𑁂𑀦 𑁋 𑀢𑀢𑁆𑀣 𑀤𑀓𑁆𑀔𑁄 𑀳𑁄𑀢𑀺 𑀅𑀦𑀮𑀲𑁄, 𑀢𑀢𑁆𑀭𑀼𑀧𑀸𑀬𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀅𑀮𑀁 𑀓𑀸𑀢𑀼𑀁 𑀅𑀮𑀁 𑀲𑀁𑀯𑀺𑀥𑀸𑀢𑀼𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀉𑀝𑁆𑀞𑀸𑀦𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀆𑀭𑀓𑁆𑀔𑀲𑀫𑁆𑀧𑀤𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀪𑁄𑀕𑀸 𑀳𑁄𑀦𑁆𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀸, 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑀸, 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑀸, 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸. 𑀢𑁂 𑀆𑀭𑀓𑁆𑀔𑁂𑀦 𑀕𑀼𑀢𑁆𑀢𑀺𑀬𑀸 𑀲𑀫𑁆𑀧𑀸𑀤𑁂𑀢𑀺 𑁋 ‘𑀓𑀺𑀦𑁆𑀢𑀺 𑀫𑁂 𑀇𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁, 𑀦 𑀘𑁄𑀭𑀸 𑀳𑀭𑁂𑀬𑁆𑀬𑀼𑀁, 𑀦 𑀅𑀕𑁆𑀕𑀺 𑀟𑀳𑁂𑀬𑁆𑀬, 𑀦 𑀉𑀤𑀓𑀁 𑀯𑀳𑁂𑀬𑁆𑀬, 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼’𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀆𑀭𑀓𑁆𑀔𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀧𑀝𑀺𑀯𑀲𑀢𑀺 𑀢𑀢𑁆𑀭 𑀬𑁂 𑀢𑁂 𑀳𑁄𑀦𑁆𑀢𑀺 𑁋 𑀕𑀳𑀧𑀢𑀻 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀸 𑀯𑀸 𑀤𑀳𑀭𑀸 𑀯𑀸 𑀯𑀼𑀤𑁆𑀥𑀲𑀻𑀮𑀺𑀦𑁄, 𑀯𑀼𑀤𑁆𑀥𑀸 𑀯𑀸 𑀯𑀼𑀤𑁆𑀥𑀲𑀻𑀮𑀺𑀦𑁄, 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸, 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀘𑀸𑀕𑀲𑀫𑁆𑀧𑀦𑁆𑀦𑀸, 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸 𑁋 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀮𑁆𑀮𑀧𑀢𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺; 𑀬𑀣𑀸𑀭𑀽𑀧𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀲𑀻𑀮𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀘𑀸𑀕𑀲𑀫𑁆𑀧𑀦𑁆𑀦𑀸𑀦𑀁 𑀘𑀸𑀕𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺, 𑀬𑀣𑀸𑀭𑀽𑀧𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀤𑀁 𑀅𑀦𑀼𑀲𑀺𑀓𑁆𑀔𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸.

‘‘𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀲𑀫𑀚𑀻𑀯𑀺𑀢𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀢𑀼𑀮𑀸𑀥𑀸𑀭𑁄 𑀯𑀸 𑀢𑀼𑀮𑀸𑀥𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀼𑀮𑀁 𑀧𑀕𑁆𑀕𑀳𑁂𑀢𑁆𑀯𑀸 𑀚𑀸𑀦𑀸𑀢𑀺 𑁋 ‘𑀏𑀢𑁆𑀢𑀓𑁂𑀦 𑀯𑀸 𑀑𑀦𑀢𑀁, 𑀏𑀢𑁆𑀢𑀓𑁂𑀦 𑀯𑀸 𑀉𑀦𑁆𑀦𑀢’𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀲𑀘𑀸𑀬𑀁, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀅𑀧𑁆𑀧𑀸𑀬𑁄 𑀲𑀫𑀸𑀦𑁄 𑀉𑀴𑀸𑀭𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀉𑀤𑀼𑀫𑁆𑀩𑀭𑀔𑀸𑀤𑀻𑀯𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀪𑁄𑀕𑁂 𑀔𑀸𑀤𑀢𑀻’𑀢𑀺. 𑀲𑀘𑁂 𑀧𑀦𑀸𑀬𑀁, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀫𑀳𑀸𑀬𑁄 𑀲𑀫𑀸𑀦𑁄 𑀓𑀲𑀺𑀭𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀅𑀚𑁂𑀝𑁆𑀞𑀫𑀭𑀡𑀁𑀯𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀫𑀭𑀺𑀲𑁆𑀲𑀢𑀻’𑀢𑀺. 𑀬𑀢𑁄 𑀘 𑀔𑁄𑀬𑀁, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀆𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀯𑀬𑀜𑁆𑀘 𑀪𑁄𑀕𑀸𑀦𑀁 𑀯𑀺𑀤𑀺𑀢𑁆𑀯𑀸 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀦𑀸𑀘𑁆𑀘𑁄𑀕𑀸𑀴𑁆𑀳𑀁 𑀦𑀸𑀢𑀺𑀳𑀻𑀦𑀁 𑁋 ‘𑀏𑀯𑀁 𑀫𑁂 𑀆𑀬𑁄 𑀯𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦 𑀘 𑀫𑁂 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀲𑀫𑀚𑀻𑀯𑀺𑀢𑀸.

‘‘𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁, 𑀩𑁆𑀭𑀸𑀳𑁆𑀫𑀡, 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀅𑀧𑀸𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀲𑀼𑀭𑀸𑀥𑀼𑀢𑁆𑀢𑁄, 𑀅𑀓𑁆𑀔𑀥𑀼𑀢𑁆𑀢𑁄, 𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀲𑀳𑀸𑀬𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀘𑀢𑁆𑀢𑀸𑀭𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺, 𑀘𑀢𑁆𑀢𑀸𑀭𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺. 𑀢𑀲𑁆𑀲 𑀧𑀼𑀭𑀺𑀲𑁄 𑀬𑀸𑀦𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺 𑀢𑀸𑀦𑀺 𑀧𑀺𑀤𑀳𑁂𑀬𑁆𑀬, 𑀬𑀸𑀦𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺 𑀢𑀸𑀦𑀺 𑀯𑀺𑀯𑀭𑁂𑀬𑁆𑀬; 𑀤𑁂𑀯𑁄 𑀘 𑀦 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀭𑀺𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀯𑀼𑀤𑁆𑀥𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀅𑀧𑀸𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀲𑀼𑀭𑀸𑀥𑀼𑀢𑁆𑀢𑁄, 𑀅𑀓𑁆𑀔𑀥𑀼𑀢𑁆𑀢𑁄, 𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀲𑀳𑀸𑀬𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄.

‘‘𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁, 𑀩𑁆𑀭𑀸𑀳𑁆𑀫𑀡, 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀆𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀦 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀦 𑀲𑀼𑀭𑀸𑀥𑀼𑀢𑁆𑀢𑁄, 𑀦 𑀅𑀓𑁆𑀔𑀥𑀼𑀢𑁆𑀢𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀘𑀢𑁆𑀢𑀸𑀭𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺. 𑀢𑀲𑁆𑀲 𑀧𑀼𑀭𑀺𑀲𑁄 𑀬𑀸𑀦𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺 𑀢𑀸𑀦𑀺 𑀯𑀺𑀯𑀭𑁂𑀬𑁆𑀬, 𑀬𑀸𑀦𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺 𑀢𑀸𑀦𑀺 𑀧𑀺𑀤𑀳𑁂𑀬𑁆𑀬; 𑀤𑁂𑀯𑁄 𑀘 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀘𑀢𑁆𑀢𑀸𑀭𑀺 𑀆𑀬𑀫𑀼𑀔𑀸𑀦𑀺 𑀳𑁄𑀦𑁆𑀢𑀺 𑁋 𑀦 𑀇𑀢𑁆𑀣𑀺𑀥𑀼𑀢𑁆𑀢𑁄…𑀧𑁂… 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀬.

‘‘𑀘𑀢𑁆𑀢𑀸𑀭𑁄𑀫𑁂, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀸 𑀲𑀫𑁆𑀧𑀭𑀸𑀬𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀫𑁆𑀧𑀭𑀸𑀬𑀲𑀼𑀔𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀤𑁆𑀥𑀸𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀘𑀸𑀕𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀲𑀤𑁆𑀥𑀸𑀲𑀫𑁆𑀧𑀤𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀲𑀤𑁆𑀥𑀸𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀲𑀻𑀮𑀲𑀫𑁆𑀧𑀤𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀲𑀻𑀮𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀘𑀸𑀕𑀲𑀫𑁆𑀧𑀤𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀘𑀸𑀕𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀜𑀸𑀲𑀫𑁆𑀧𑀤𑀸? 𑀇𑀥, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑁄 𑀧𑀜𑁆𑀜𑀯𑀸 𑀳𑁄𑀢𑀺…𑀧𑁂… 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀫𑁆𑀧𑀭𑀸𑀬𑀳𑀺𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀫𑁆𑀧𑀭𑀸𑀬𑀲𑀼𑀔𑀸𑀬𑀸’’𑀢𑀺.

‘‘𑀉𑀝𑁆𑀞𑀸𑀢𑀸 𑀓𑀫𑁆𑀫𑀥𑁂𑀬𑁆𑀬𑁂𑀲𑀼, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀥𑀸𑀦𑀯𑀸;

𑀲𑀫𑀁 𑀓𑀧𑁆𑀧𑁂𑀢𑀺 𑀚𑀻𑀯𑀺𑀓𑀁, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑁄;

𑀦𑀺𑀘𑁆𑀘𑀁 𑀫𑀕𑁆𑀕𑀁 𑀯𑀺𑀲𑁄𑀥𑁂𑀢𑀺, 𑀲𑁄𑀢𑁆𑀣𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀁.

‘‘𑀇𑀘𑁆𑀘𑁂𑀢𑁂 𑀅𑀝𑁆𑀞 𑀥𑀫𑁆𑀫𑀸 𑀘, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀅𑀓𑁆𑀔𑀸𑀢𑀸 𑀲𑀘𑁆𑀘𑀦𑀸𑀫𑁂𑀦, 𑀉𑀪𑀬𑀢𑁆𑀣 𑀲𑀼𑀔𑀸𑀯𑀳𑀸.

‘‘𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬 𑀘;

𑀏𑀯𑀫𑁂𑀢𑀁 𑀕𑀳𑀝𑁆𑀞𑀸𑀦𑀁, 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺. 𑀧𑀜𑁆𑀘𑀫𑀁;

𑁬. 𑀪𑀬𑀲𑀼𑀢𑁆𑀢𑀁

𑁫𑁬. ‘‘‘𑀪𑀬’𑀦𑁆𑀢𑀺 [𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁩𑁭], 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀤𑀼𑀓𑁆𑀔’𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀭𑁄𑀕𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀕𑀡𑁆𑀟𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀲𑀮𑁆𑀮’𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀲𑀗𑁆𑀕𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀧𑀗𑁆𑀓𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀕𑀩𑁆𑀪𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀫𑀸 𑀘, 𑀪𑀺𑀓𑁆𑀔𑀯𑁂, ‘𑀪𑀬’𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁? 𑀬𑀲𑁆𑀫𑀸 𑀘 𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀺 𑀪𑀬𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀲𑀫𑁆𑀧𑀭𑀸𑀬𑀺𑀓𑀸𑀧𑀺 𑀪𑀬𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘𑀪𑀬’𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀫𑀸 𑀘, 𑀪𑀺𑀓𑁆𑀔𑀯𑁂, ‘𑀤𑀼𑀓𑁆𑀔’𑀦𑁆𑀢𑀺…𑀧𑁂… ‘𑀭𑁄𑀕𑁄’𑀢𑀺… ‘𑀕𑀡𑁆𑀟𑁄’𑀢𑀺… ‘𑀲𑀮𑁆𑀮’𑀦𑁆𑀢𑀺… ‘𑀲𑀗𑁆𑀕𑁄’𑀢𑀺… ‘𑀧𑀗𑁆𑀓𑁄’𑀢𑀺… ‘𑀕𑀩𑁆𑀪𑁄’𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁? 𑀬𑀲𑁆𑀫𑀸 𑀘 𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀺 𑀕𑀩𑁆𑀪𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀲𑀫𑁆𑀧𑀭𑀸𑀬𑀺𑀓𑀸𑀧𑀺 𑀕𑀩𑁆𑀪𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘𑀕𑀩𑁆𑀪𑁄’𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁’’.

‘‘𑀪𑀬𑀁 𑀤𑀼𑀓𑁆𑀔𑀜𑁆𑀘 𑀭𑁄𑀕𑁄 𑀘, 𑀕𑀡𑁆𑀟𑁄 𑀲𑀮𑁆𑀮𑀜𑁆𑀘 𑀲𑀗𑁆𑀕𑁄 𑀘;

𑀧𑀗𑁆𑀓𑁄 𑀕𑀩𑁆𑀪𑁄 𑀘 𑀉𑀪𑀬𑀁, 𑀏𑀢𑁂 𑀓𑀸𑀫𑀸 𑀧𑀯𑀼𑀘𑁆𑀘𑀦𑁆𑀢𑀺;

𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄.

‘‘𑀑𑀢𑀺𑀡𑁆𑀡𑁄 𑀲𑀸𑀢𑀭𑀽𑀧𑁂𑀦, 𑀧𑀼𑀦 𑀕𑀩𑁆𑀪𑀸𑀬 𑀕𑀘𑁆𑀙𑀢𑀺;

𑀬𑀢𑁄 𑀘 𑀪𑀺𑀓𑁆𑀔𑀼 𑀆𑀢𑀸𑀧𑀻, 𑀲𑀫𑁆𑀧𑀚𑀜𑁆𑀜𑀁 [𑀲𑀫𑁆𑀧𑀚𑀜𑁆𑀜𑁄 (𑀲𑁆𑀬𑀸. 𑀓.) 𑀲𑀁. 𑀦𑀺. 𑁪.𑁨𑁫𑁧 𑀧𑀲𑁆𑀲𑀺𑀢𑀩𑁆𑀩𑀁] 𑀦 𑀭𑀺𑀘𑁆𑀘𑀢𑀺.

‘‘𑀲𑁄 𑀇𑀫𑀁 𑀧𑀮𑀺𑀧𑀣𑀁 𑀤𑀼𑀕𑁆𑀕𑀁, 𑀅𑀢𑀺𑀓𑁆𑀓𑀫𑁆𑀫 𑀢𑀣𑀸𑀯𑀺𑀥𑁄;

𑀧𑀚𑀁 𑀚𑀸𑀢𑀺𑀚𑀭𑀽𑀧𑁂𑀢𑀁, 𑀨𑀦𑁆𑀤𑀫𑀸𑀦𑀁 𑀅𑀯𑁂𑀓𑁆𑀔𑀢𑀻’’𑀢𑀺. 𑀙𑀝𑁆𑀞𑀁;

𑁭. 𑀧𑀞𑀫𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀁

𑁫𑁭. ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺 …𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑀫𑁆𑀫𑀸𑀤𑀲𑁆𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑁄; 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺; 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺; 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀁

𑁫𑁮. ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺 …𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁄; 𑀅𑀭𑀢𑀺𑀭𑀢𑀺𑀲𑀳𑁄 𑀳𑁄𑀢𑀺, 𑀉𑀧𑁆𑀧𑀦𑁆𑀦𑀁 𑀅𑀭𑀢𑀺𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀺; 𑀪𑀬𑀪𑁂𑀭𑀯𑀲𑀳𑁄 𑀳𑁄𑀢𑀺, 𑀉𑀧𑁆𑀧𑀦𑁆𑀦𑀁 𑀪𑀬𑀪𑁂𑀭𑀯𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀺; 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀧𑀼𑀕𑁆𑀕𑀮𑀲𑀼𑀢𑁆𑀢𑀁

𑁫𑁯. ‘‘𑀅𑀝𑁆𑀞𑀺𑀫𑁂 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸 𑀧𑀸𑀳𑀼𑀦𑁂𑀬𑁆𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑀸 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲? 𑀓𑀢𑀫𑁂 𑀅𑀝𑁆𑀞? 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀲𑀓𑀤𑀸𑀕𑀸𑀫𑀻, 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀭𑀳𑀸, 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺.

‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺. 𑀦𑀯𑀫𑀁;

𑁧𑁦. 𑀤𑀼𑀢𑀺𑀬𑀧𑀼𑀕𑁆𑀕𑀮𑀲𑀼𑀢𑁆𑀢𑀁

𑁬𑁦. ‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂 𑀅𑀝𑁆𑀞? 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄…𑀧𑁂… 𑀅𑀭𑀳𑀸, 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺.

‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀲𑀫𑀼𑀓𑁆𑀓𑀝𑁆𑀞𑁄, 𑀲𑀢𑁆𑀢𑀸𑀦𑀁 𑀅𑀝𑁆𑀞 𑀧𑀼𑀕𑁆𑀕𑀮𑀸.

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀏𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺. 𑀤𑀲𑀫𑀁;

𑀕𑁄𑀢𑀫𑀻𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑁄𑀢𑀫𑀻 𑀑𑀯𑀸𑀤𑀁 𑀲𑀁𑀔𑀺𑀢𑁆𑀢𑀁, 𑀤𑀻𑀖𑀚𑀸𑀡𑀼 𑀘 𑀉𑀚𑁆𑀚𑀬𑁄;

𑀪𑀬𑀸 𑀤𑁆𑀯𑁂 𑀆𑀳𑀼𑀦𑁂𑀬𑁆𑀬𑀸 𑀘, 𑀤𑁆𑀯𑁂 𑀘 𑀅𑀝𑁆𑀞 𑀧𑀼𑀕𑁆𑀕𑀮𑀸𑀢𑀺.

(𑁭) 𑁨. 𑀪𑀽𑀫𑀺𑀘𑀸𑀮𑀯𑀕𑁆𑀕𑁄

𑁧. 𑀇𑀘𑁆𑀙𑀸𑀲𑀼𑀢𑁆𑀢𑀁

𑁬𑁧. [𑀅. 𑀦𑀺. 𑁮.𑁭𑁭] ‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀅𑀝𑁆𑀞? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄 𑀖𑀝𑀢𑁄 𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀲𑁄𑀘𑀻 𑀘 𑀧𑀭𑀺𑀤𑁂𑀯𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄 𑀖𑀝𑀢𑁄 𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀫𑀚𑁆𑀚𑀢𑀺 𑀧𑀫𑀚𑁆𑀚𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘 𑀫𑀤𑀻 𑀘 𑀧𑀫𑀸𑀤𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺 𑀦 𑀖𑀝𑀢𑀺 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄 𑀅𑀖𑀝𑀢𑁄 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀲𑁄𑀘𑀢𑀺, 𑀓𑀺𑀮𑀫𑀢𑀺, 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺 𑀦 𑀖𑀝𑀢𑀺 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀲𑁄𑀘𑀻 𑀘 𑀧𑀭𑀺𑀤𑁂𑀯𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄, 𑀅𑀖𑀝𑀢𑁄, 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀫𑀚𑁆𑀚𑀢𑀺, 𑀧𑀫𑀚𑁆𑀚𑀢𑀺, 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺 𑀦 𑀖𑀝𑀢𑀺 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘 𑀫𑀤𑀻 𑀘, 𑀧𑀫𑀸𑀤𑀻 𑀘, 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄 𑀖𑀝𑀢𑁄 𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀦 𑀘 𑀲𑁄𑀘𑀻 𑀦 𑀘 𑀧𑀭𑀺𑀤𑁂𑀯𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀉𑀝𑁆𑀞𑀳𑀢𑁄 𑀖𑀝𑀢𑁄 𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀦 𑀫𑀚𑁆𑀚𑀢𑀺, 𑀦 𑀧𑀫𑀚𑁆𑀚𑀢𑀺, 𑀦 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀉𑀝𑁆𑀞𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘, 𑀦 𑀘 𑀫𑀤𑀻 𑀦 𑀘 𑀧𑀫𑀸𑀤𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄, 𑀅𑀖𑀝𑀢𑁄, 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀅𑀮𑀸𑀪𑁂𑀦 𑀦 𑀲𑁄𑀘𑀢𑀺, 𑀦 𑀓𑀺𑀮𑀫𑀢𑀺, 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀦 𑀘 𑀮𑀸𑀪𑀻, 𑀦 𑀘 𑀲𑁄𑀘𑀻 𑀦 𑀘 𑀧𑀭𑀺𑀤𑁂𑀯𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸’’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀮𑀸𑀪𑀸𑀬. 𑀲𑁄 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬. 𑀢𑀲𑁆𑀲 𑀅𑀦𑀼𑀝𑁆𑀞𑀳𑀢𑁄 𑀅𑀖𑀝𑀢𑁄 𑀅𑀯𑀸𑀬𑀫𑀢𑁄 𑀮𑀸𑀪𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑁂𑀦 𑀮𑀸𑀪𑁂𑀦 𑀦 𑀫𑀚𑁆𑀚𑀢𑀺, 𑀦 𑀧𑀫𑀚𑁆𑀚𑀢𑀺, 𑀦 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀇𑀘𑁆𑀙𑁄 𑀯𑀺𑀳𑀭𑀢𑀺 𑀮𑀸𑀪𑀸𑀬, 𑀦 𑀉𑀝𑁆𑀞𑀳𑀢𑀺, 𑀦 𑀖𑀝𑀢𑀺, 𑀦 𑀯𑀸𑀬𑀫𑀢𑀺 𑀮𑀸𑀪𑀸𑀬, 𑀮𑀸𑀪𑀻 𑀘, 𑀦 𑀘 𑀫𑀤𑀻 𑀦 𑀘 𑀧𑀫𑀸𑀤𑀻, 𑀅𑀘𑁆𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸 ’. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀞𑀫𑀁.

𑁨. 𑀅𑀮𑀁𑀲𑀼𑀢𑁆𑀢𑀁

𑁬𑁨. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄 𑀅𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 [𑀥𑀸𑀭𑀓𑀚𑀸𑀢𑀺𑀓𑁄 (𑀲𑀻. 𑀲𑁆𑀬𑀸. 𑀧𑀻.) 𑀅. 𑀦𑀺. 𑁮.𑁭𑁮] 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 [𑀥𑀢𑀸𑀦𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 [𑀅𑀢𑁆𑀣𑀽𑀧𑀯𑀭𑀺𑀓𑁆𑀔𑀻 (𑀲𑀻. 𑀲𑁆𑀬𑀸. 𑀧𑀻.)] 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺 𑀲𑀫𑀸𑀤𑀧𑀓𑁄 [𑀲𑀫𑀸𑀤𑀸𑀧𑀓𑁄 (?)] 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄 𑀅𑀮𑀁 𑀧𑀭𑁂𑀲𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄 𑀅𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺…𑀧𑁂… 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄 𑀅𑀮𑀁 𑀧𑀭𑁂𑀲𑀁.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄 𑀦𑀸𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀦𑁄 𑀘 𑀲𑀦𑁆𑀤𑀲𑁆𑀲𑀓𑁄 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄 𑀦𑀸𑀮𑀁 𑀧𑀭𑁂𑀲𑀁.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁 𑀦𑀸𑀮𑀁 𑀅𑀢𑁆𑀢𑀦𑁄. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀦 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄…𑀧𑁂… 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄.

‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄 𑀦𑀸𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀦𑁄 𑀘 𑀲𑀦𑁆𑀤𑀲𑁆𑀲𑀓𑁄 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁.

‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄. 𑀓𑀢𑀫𑁂𑀳𑀺 𑀢𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀦𑁄 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺…𑀧𑁂… 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄.

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀦𑁄 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺…𑀧𑁂… 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀦𑁄 𑀘 𑀲𑀦𑁆𑀤𑀲𑁆𑀲𑀓𑁄 𑀳𑁄𑀢𑀺…𑀧𑁂… 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀢𑁆𑀢𑀦𑁄, 𑀦𑀸𑀮𑀁 𑀧𑀭𑁂𑀲𑀁.

‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀔𑀺𑀧𑁆𑀧𑀦𑀺𑀲𑀦𑁆𑀢𑀺 𑀘 𑀳𑁄𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀦𑁄 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺; 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺; 𑀦𑁄 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺; 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸; 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀧𑀭𑁂𑀲𑀁, 𑀦𑀸𑀮𑀁 𑀅𑀢𑁆𑀢𑀦𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀁

𑁬𑁩. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. ‘‘𑀏𑀯𑀫𑁂𑀯𑀁 𑀧𑀦𑀺𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀫𑀫𑀜𑁆𑀜𑁂𑀯 𑀅𑀚𑁆𑀛𑁂𑀲𑀦𑁆𑀢𑀺. 𑀥𑀫𑁆𑀫𑁂 𑀘 𑀪𑀸𑀲𑀺𑀢𑁂 𑀫𑀫𑀜𑁆𑀜𑁂𑀯 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’𑀢𑀺. ‘‘𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁. 𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀪𑀕𑀯𑀢𑁄 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀁, 𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀪𑀕𑀯𑀢𑁄 𑀪𑀸𑀲𑀺𑀢𑀲𑁆𑀲 𑀤𑀸𑀬𑀸𑀤𑁄 𑀅𑀲𑁆𑀲’’𑀦𑁆𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀪𑀺𑀓𑁆𑀔𑀼 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀚𑁆𑀛𑀢𑁆𑀢𑀁 𑀫𑁂 𑀘𑀺𑀢𑁆𑀢𑀁 𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀲𑀼𑀲𑀡𑁆𑀞𑀺𑀢𑀁, 𑀦 𑀘 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀦𑁆𑀢𑀻’𑀢𑀺. 𑀏𑀯𑀜𑁆𑀳𑀺 𑀢𑁂, 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀺𑀢𑀩𑁆𑀩𑀁’’.

‘‘𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀞𑀺𑀢𑀁 𑀳𑁄𑀢𑀺 𑀲𑀼𑀲𑀡𑁆𑀞𑀺𑀢𑀁, 𑀦 𑀘 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀢𑀢𑁄 𑀢𑁂, 𑀪𑀺𑀓𑁆𑀔𑀼, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀫𑁂𑀢𑁆𑀢𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀪𑀯𑀺𑀲𑁆𑀲𑀢𑀺 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸’𑀢𑀺. 𑀏𑀯𑀜𑁆𑀳𑀺 𑀢𑁂, 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀩𑀳𑀼𑀮𑀻𑀓𑀢𑁄, 𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀇𑀫𑀁 𑀲𑀫𑀸𑀥𑀺𑀁 𑀲𑀯𑀺𑀢𑀓𑁆𑀓𑀫𑁆𑀧𑀺 𑀲𑀯𑀺𑀘𑀸𑀭𑀁 [𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁆𑀧𑀺 (𑀓.)] 𑀪𑀸𑀯𑁂𑀬𑁆𑀬𑀸𑀲𑀺, 𑀅𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀘𑀸𑀭𑀫𑀢𑁆𑀢𑀁 [𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀫𑁆𑀧𑀺 (𑀓.) 𑀯𑀺𑀲𑀼𑀤𑁆𑀥𑀺. 𑁧.𑁨𑁭𑁧 𑀧𑀲𑁆𑀲𑀺𑀢𑀩𑁆𑀩𑀁] 𑀪𑀸𑀯𑁂𑀬𑁆𑀬𑀸𑀲𑀺, 𑀅𑀯𑀺𑀢𑀓𑁆𑀓𑀫𑁆𑀧𑀺 𑀅𑀯𑀺𑀘𑀸𑀭𑀁 [𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀫𑁆𑀧𑀺 (𑀓.)] 𑀪𑀸𑀯𑁂𑀬𑁆𑀬𑀸𑀲𑀺, 𑀲𑀧𑁆𑀧𑀻𑀢𑀺𑀓𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀦𑀺𑀧𑁆𑀧𑀻𑀢𑀺𑀓𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀲𑀸𑀢𑀲𑀳𑀕𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺.

‘‘𑀬𑀢𑁄 𑀔𑁄, 𑀢𑁂 𑀪𑀺𑀓𑁆𑀔𑀼, 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁂, 𑀪𑀺𑀓𑁆𑀔𑀼, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀓𑀭𑀼𑀡𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺… 𑀫𑀼𑀤𑀺𑀢𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺… 𑀉𑀧𑁂𑀓𑁆𑀔𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀪𑀯𑀺𑀲𑁆𑀲𑀢𑀺 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸’𑀢𑀺. 𑀏𑀯𑀜𑁆𑀳𑀺 𑀢𑁂, 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀇𑀫𑀁 𑀲𑀫𑀸𑀥𑀺𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀲𑀧𑁆𑀧𑀻𑀢𑀺𑀓𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀦𑀺𑀧𑁆𑀧𑀻𑀢𑀺𑀓𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀲𑀸𑀢𑀲𑀳𑀕𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺.

‘‘𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁂, 𑀪𑀺𑀓𑁆𑀔𑀼, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀺𑀲𑁆𑀲𑀸𑀫𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’𑀦𑁆𑀢𑀺. 𑀏𑀯𑀜𑁆𑀳𑀺 𑀢𑁂, 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀩𑀳𑀼𑀮𑀻𑀓𑀢𑁄, 𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀇𑀫𑀁 𑀲𑀫𑀸𑀥𑀺𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀲𑀧𑁆𑀧𑀻𑀢𑀺𑀓𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀦𑀺𑀧𑁆𑀧𑀻𑀢𑀺𑀓𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀲𑀸𑀢𑀲𑀳𑀕𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀺.

‘‘𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁂, 𑀪𑀺𑀓𑁆𑀔𑀼, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀺𑀲𑁆𑀲𑀸𑀫𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’𑀦𑁆𑀢𑀺; 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀺𑀲𑁆𑀲𑀸𑀫𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’𑀦𑁆𑀢𑀺; 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀺𑀲𑁆𑀲𑀸𑀫𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’𑀦𑁆𑀢𑀺. 𑀏𑀯𑀜𑁆𑀳𑀺 𑀢𑁂, 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀬𑁂𑀦 𑀬𑁂𑀦𑁂𑀯 𑀕𑀕𑁆𑀖𑀲𑀺 𑀨𑀸𑀲𑀼𑀁𑀬𑁂𑀯 𑀕𑀕𑁆𑀖𑀲𑀺, 𑀬𑀢𑁆𑀣 𑀬𑀢𑁆𑀣 𑀞𑀲𑁆𑀲𑀲𑀺 𑀨𑀸𑀲𑀼𑀁𑀬𑁂𑀯 𑀞𑀲𑁆𑀲𑀲𑀺, 𑀬𑀢𑁆𑀣 𑀬𑀢𑁆𑀣 𑀦𑀺𑀲𑀻𑀤𑀺𑀲𑁆𑀲𑀲𑀺 𑀨𑀸𑀲𑀼𑀁𑀬𑁂𑀯 𑀦𑀺𑀲𑀻𑀤𑀺𑀲𑁆𑀲𑀲𑀺, 𑀬𑀢𑁆𑀣 𑀬𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑁆𑀲𑀲𑀺 𑀨𑀸𑀲𑀼𑀁𑀬𑁂𑀯 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑁆𑀲𑀲𑀻’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑀸 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀢𑀢𑀺𑀬𑀁.

𑁪. 𑀕𑀬𑀸𑀲𑀻𑀲𑀲𑀼𑀢𑁆𑀢𑀁

𑁬𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀕𑀬𑀸𑀬𑀁 𑀯𑀺𑀳𑀭𑀢𑀺 𑀕𑀬𑀸𑀲𑀻𑀲𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺…𑀧𑁂… ‘‘𑀧𑀼𑀩𑁆𑀩𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑁄𑀯 𑀲𑀫𑀸𑀦𑁄 𑀑𑀪𑀸𑀲𑀜𑁆𑀜𑁂𑀯 𑀔𑁄 𑀲𑀜𑁆𑀚𑀸𑀦𑀸𑀫𑀺, 𑀦𑁄 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺’’.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀲𑀘𑁂 𑀔𑁄 𑀅𑀳𑀁 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑁂𑀬𑁆𑀬𑀁 𑀭𑀽𑀧𑀸𑀦𑀺 𑀘 𑀧𑀲𑁆𑀲𑁂𑀬𑁆𑀬𑀁; 𑀏𑀯𑀁 𑀫𑁂 𑀇𑀤𑀁 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀲𑀼𑀤𑁆𑀥𑀢𑀭𑀁 𑀅𑀲𑁆𑀲𑀸’’’𑀢𑀺.

‘‘𑀲𑁄 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺, 𑀭𑀽𑀧𑀸𑀦𑀺 𑀘 𑀧𑀲𑁆𑀲𑀸𑀫𑀺; 𑀦𑁄 𑀘 𑀔𑁄 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀸𑀫𑀺 𑀲𑀮𑁆𑀮𑀧𑀸𑀫𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀸𑀫𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀲𑀘𑁂 𑀔𑁄 𑀅𑀳𑀁 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑁂𑀬𑁆𑀬𑀁, 𑀭𑀽𑀧𑀸𑀦𑀺 𑀘 𑀧𑀲𑁆𑀲𑁂𑀬𑁆𑀬𑀁, 𑀢𑀸𑀳𑀺 𑀘 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑁂𑀬𑁆𑀬𑀁 𑀲𑀮𑁆𑀮𑀧𑁂𑀬𑁆𑀬𑀁 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀁; 𑀏𑀯𑀁 𑀫𑁂 𑀇𑀤𑀁 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀲𑀼𑀤𑁆𑀥𑀢𑀭𑀁 𑀅𑀲𑁆𑀲𑀸’’’𑀢𑀺.

‘‘𑀲𑁄 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺, 𑀭𑀽𑀧𑀸𑀦𑀺 𑀘 𑀧𑀲𑁆𑀲𑀸𑀫𑀺, 𑀢𑀸𑀳𑀺 𑀘 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀸𑀫𑀺 𑀲𑀮𑁆𑀮𑀧𑀸𑀫𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀸𑀫𑀺; 𑀦𑁄 𑀘 𑀔𑁄 𑀢𑀸 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 𑀇𑀫𑀸 𑀤𑁂𑀯𑀢𑀸 𑀅𑀫𑀼𑀓𑀫𑁆𑀳𑀸 𑀯𑀸 𑀅𑀫𑀼𑀓𑀫𑁆𑀳𑀸 𑀯𑀸 𑀤𑁂𑀯𑀦𑀺𑀓𑀸𑀬𑀸𑀢𑀺.

‘‘𑀲𑁄 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺, 𑀭𑀽𑀧𑀸𑀦𑀺 𑀘 𑀧𑀲𑁆𑀲𑀸𑀫𑀺, 𑀢𑀸𑀳𑀺 𑀘 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀸𑀫𑀺 𑀲𑀮𑁆𑀮𑀧𑀸𑀫𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀸𑀫𑀺, 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 ‘𑀇𑀫𑀸 𑀤𑁂𑀯𑀢𑀸 𑀅𑀫𑀼𑀓𑀫𑁆𑀳𑀸 𑀯𑀸 𑀅𑀫𑀼𑀓𑀫𑁆𑀳𑀸 𑀯𑀸 𑀤𑁂𑀯𑀦𑀺𑀓𑀸𑀬𑀸’𑀢𑀺; 𑀦𑁄 𑀘 𑀔𑁄 𑀢𑀸 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 ‘𑀇𑀫𑀸 𑀤𑁂𑀯𑀢𑀸 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸’𑀢𑀺…𑀧𑁂… 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 ‘𑀇𑀫𑀸 𑀤𑁂𑀯𑀢𑀸 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸’𑀢𑀺; 𑀦𑁄 𑀘 𑀔𑁄 𑀢𑀸 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 ‘𑀇𑀫𑀸 𑀤𑁂𑀯𑀢𑀸 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀏𑀯𑀫𑀸𑀳𑀸𑀭𑀸 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀺𑀦𑀺𑀬𑁄’𑀢𑀺 …𑀧𑁂… 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 ‘𑀇𑀫𑀸 𑀤𑁂𑀯𑀢𑀸 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀏𑀯𑀫𑀸𑀳𑀸𑀭𑀸 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀺𑀦𑀺𑀬𑁄’𑀢𑀺; 𑀦𑁄 𑀘 𑀔𑁄 𑀢𑀸 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 ‘𑀇𑀫𑀸 𑀤𑁂𑀯𑀢𑀸 𑀏𑀯𑀁𑀤𑀻𑀖𑀸𑀬𑀼𑀓𑀸 𑀏𑀯𑀁𑀘𑀺𑀭𑀝𑁆𑀞𑀺𑀢𑀺𑀓𑀸’𑀢𑀺…𑀧𑁂… 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑀸𑀫𑀺 𑁋 ‘𑀇𑀫𑀸 𑀤𑁂𑀯𑀢𑀸 𑀏𑀯𑀁𑀤𑀻𑀖𑀸𑀬𑀼𑀓𑀸 𑀏𑀯𑀁𑀘𑀺𑀭𑀝𑁆𑀞𑀺𑀢𑀺𑀓𑀸’𑀢𑀺; 𑀦𑁄 𑀘 𑀔𑁄 𑀢𑀸 𑀤𑁂𑀯𑀢𑀸 𑀚𑀸𑀦𑀸𑀫𑀺 𑀬𑀤𑀺 𑀯𑀸 𑀫𑁂 𑀇𑀫𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀁 𑀬𑀤𑀺 𑀯𑀸 𑀦 𑀲𑀦𑁆𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀦𑁆𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀲𑀘𑁂 𑀔𑁄 𑀅𑀳𑀁 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑁂𑀬𑁆𑀬𑀁, 𑀭𑀽𑀧𑀸𑀦𑀺 𑀘 𑀧𑀲𑁆𑀲𑁂𑀬𑁆𑀬𑀁, 𑀢𑀸𑀳𑀺 𑀘 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑁂𑀬𑁆𑀬𑀁 𑀲𑀮𑁆𑀮𑀧𑁂𑀬𑁆𑀬𑀁 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀁, 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑁂𑀬𑁆𑀬𑀁 𑁋 ‘𑀇𑀫𑀸 𑀤𑁂𑀯𑀢𑀸 𑀅𑀫𑀼𑀓𑀫𑁆𑀳𑀸 𑀯𑀸 𑀅𑀫𑀼𑀓𑀫𑁆𑀳𑀸 𑀯𑀸 𑀤𑁂𑀯𑀦𑀺𑀓𑀸𑀬𑀸’𑀢𑀺, 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑁂𑀬𑁆𑀬𑀁 𑁋 ‘𑀇𑀫𑀸 𑀤𑁂𑀯𑀢𑀸 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸’𑀢𑀺, 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑁂𑀬𑁆𑀬𑀁 𑁋 ‘𑀇𑀫𑀸 𑀤𑁂𑀯𑀢𑀸 𑀏𑀯𑀫𑀸𑀳𑀸𑀭𑀸 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀺𑀦𑀺𑀬𑁄’𑀢𑀺, 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑁂𑀬𑁆𑀬𑀁 𑁋 ‘𑀇𑀫𑀸 𑀤𑁂𑀯𑀢𑀸 𑀏𑀯𑀁𑀤𑀻𑀖𑀸𑀬𑀼𑀓𑀸 𑀏𑀯𑀁𑀘𑀺𑀭𑀝𑁆𑀞𑀺𑀢𑀺𑀓𑀸’𑀢𑀺, 𑀢𑀸 𑀘 𑀤𑁂𑀯𑀢𑀸 𑀚𑀸𑀦𑁂𑀬𑁆𑀬𑀁 𑀬𑀤𑀺 𑀯𑀸 𑀫𑁂 𑀇𑀫𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀦𑁆𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀁 𑀬𑀤𑀺 𑀯𑀸 𑀦 𑀲𑀦𑁆𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀦𑁆𑀢𑀺; 𑀏𑀯𑀁 𑀫𑁂 𑀇𑀤𑀁 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀲𑀼𑀤𑁆𑀥𑀢𑀭𑀁 𑀅𑀲𑁆𑀲𑀸’’’𑀢𑀺.

‘‘𑀬𑀸𑀯𑀓𑀻𑀯𑀜𑁆𑀘 𑀫𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀅𑀝𑁆𑀞𑀧𑀭𑀺𑀯𑀝𑁆𑀝𑀁 𑀅𑀥𑀺𑀤𑁂𑀯𑀜𑀸𑀡𑀤𑀲𑁆𑀲𑀦𑀁 𑀦 𑀲𑀼𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀦𑁂𑀯 𑀢𑀸𑀯𑀸𑀳𑀁, 𑀪𑀺𑀓𑁆𑀔𑀯𑁂, ‘𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 [𑀅𑀪𑀺𑀲𑀫𑁆𑀩𑀼𑀤𑁆𑀥𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀬𑀢𑁄 𑀘 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀅𑀝𑁆𑀞𑀧𑀭𑀺𑀯𑀝𑁆𑀝𑀁 𑀅𑀥𑀺𑀤𑁂𑀯𑀜𑀸𑀡𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀅𑀣𑀸𑀳𑀁, 𑀪𑀺𑀓𑁆𑀔𑀯𑁂, ‘𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁; 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺; 𑀅𑀓𑀼𑀧𑁆𑀧𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 [𑀯𑀺𑀫𑀼𑀢𑁆𑀢𑀺 (𑀓. 𑀲𑀻. 𑀓.)]; 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀘𑀢𑀼𑀢𑁆𑀣𑀁.