(𑁯) 𑁪. 𑀲𑀢𑀺𑀯𑀕𑁆𑀕𑁄

𑁧. 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀼𑀢𑁆𑀢𑀁

𑁮𑁧. ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑁂, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁. 𑀳𑀺𑀭𑁄𑀢𑁆𑀢𑀧𑁆𑀧𑁂 𑀅𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀅𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀻𑀮𑀁. 𑀲𑀻𑀮𑁂 𑀅𑀲𑀢𑀺 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀅𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀅𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄. 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁂 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀯𑀺𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂 𑀅𑀲𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁; 𑀳𑀺𑀭𑁄𑀢𑁆𑀢𑀧𑁆𑀧𑁂 𑀅𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑁂, 𑀪𑀺𑀓𑁆𑀔𑀯𑁂, 𑀲𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁. 𑀳𑀺𑀭𑁄𑀢𑁆𑀢𑀧𑁆𑀧𑁂 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀲𑀻𑀮𑀁. 𑀲𑀻𑀮𑁂 𑀲𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄. 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁂 𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺… 𑀨𑁂𑀕𑁆𑀕𑀼𑀧𑀺… 𑀲𑀸𑀭𑁄𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂 𑀲𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀁; 𑀳𑀺𑀭𑁄𑀢𑁆𑀢𑀧𑁆𑀧𑁂 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺. 𑀧𑀞𑀫𑀁.

𑁨. 𑀧𑀼𑀡𑁆𑀡𑀺𑀬𑀲𑀼𑀢𑁆𑀢𑀁

𑁮𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀅𑀧𑁆𑀧𑁂𑀓𑀤𑀸 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺, 𑀅𑀧𑁆𑀧𑁂𑀓𑀤𑀸 𑀦 𑀧𑀝𑀺𑀪𑀸𑀢𑀻’’𑀢𑀺? ‘‘𑀲𑀤𑁆𑀥𑁄 𑀘, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁄 𑀘𑀼𑀧𑀲𑀗𑁆𑀓𑀫𑀺𑀢𑀸; 𑀦𑁂𑀯 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺. 𑀬𑀢𑁄 𑀘 𑀔𑁄, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺, 𑀉𑀧𑀲𑀗𑁆𑀓𑀫𑀺𑀢𑀸 𑀘; 𑀏𑀯𑀁 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺. 𑀲𑀤𑁆𑀥𑁄 𑀘, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀳𑁄𑀢𑀺, 𑀉𑀧𑀲𑀗𑁆𑀓𑀫𑀺𑀢𑀸 𑀘, 𑀦𑁄 𑀘 𑀧𑀬𑀺𑀭𑀼𑀧𑀸𑀲𑀺𑀢𑀸…𑀧𑁂… 𑀧𑀬𑀺𑀭𑀼𑀧𑀸𑀲𑀺𑀢𑀸 𑀘, 𑀦𑁄 𑀘 𑀧𑀭𑀺𑀧𑀼𑀘𑁆𑀙𑀺𑀢𑀸… 𑀧𑀭𑀺𑀧𑀼𑀘𑁆𑀙𑀺𑀢𑀸 𑀘, 𑀦𑁄 𑀘 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺… 𑀑𑀳𑀺𑀢𑀲𑁄𑀢𑁄 𑀘 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀦𑁄 𑀘 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀢𑀺… 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺… 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺, 𑀦𑁄 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀦𑁂𑀯 𑀢𑀸𑀯 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺.

‘‘𑀬𑀢𑁄 𑀘 𑀔𑁄, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺, 𑀉𑀧𑀲𑀗𑁆𑀓𑀫𑀺𑀢𑀸 𑀘, 𑀧𑀬𑀺𑀭𑀼𑀧𑀸𑀲𑀺𑀢𑀸 𑀘, 𑀧𑀭𑀺𑀧𑀼𑀘𑁆𑀙𑀺𑀢𑀸 𑀘, 𑀑𑀳𑀺𑀢𑀲𑁄𑀢𑁄 𑀘 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺, 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺; 𑀏𑀯𑀁 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺. 𑀇𑀫𑁂𑀳𑀺 𑀔𑁄, 𑀧𑀼𑀡𑁆𑀡𑀺𑀬, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 [𑀲𑀫𑀦𑁆𑀦𑀸𑀕𑀢𑁄 (𑀲𑀻. 𑀧𑀻.), 𑀲𑀫𑀦𑁆𑀦𑀸𑀕𑀢𑀁 (𑀲𑁆𑀬𑀸. 𑀓.)] 𑀏𑀓𑀦𑁆𑀢𑀧𑀝𑀺𑀪𑀸𑀦𑀸 [𑀏𑀓𑀦𑁆𑀢𑀧𑀝𑀺𑀪𑀸𑀦𑀁 (𑀲𑀩𑁆𑀩𑀢𑁆𑀣) 𑀅. 𑀦𑀺. 𑁧𑁦.𑁮𑁩 𑀧𑀦 𑀧𑀲𑁆𑀲𑀺𑀢𑀩𑁆𑀩𑀁] 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑀽𑀮𑀓𑀲𑀼𑀢𑁆𑀢𑀁

𑁮𑁩. [𑀅. 𑀦𑀺. 𑁧𑁦.𑁫𑁮 𑀧𑀲𑁆𑀲𑀺𑀢𑀩𑁆𑀩𑀁] ‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀺𑀁𑀫𑀽𑀮𑀓𑀸, 𑀆𑀯𑀼𑀲𑁄, 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀫𑁆𑀪𑀯𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀫𑀼𑀤𑀬𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀫𑁄𑀲𑀭𑀡𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀧𑀫𑀼𑀔𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀅𑀥𑀺𑀧𑀢𑁂𑀬𑁆𑀬𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀉𑀢𑁆𑀢𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀸𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸’𑀢𑀺, 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀣𑀸’’𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸, 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀺𑀁𑀫𑀽𑀮𑀓𑀸, 𑀆𑀯𑀼𑀲𑁄, 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀫𑁆𑀪𑀯𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀫𑀼𑀤𑀬𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀫𑁄𑀲𑀭𑀡𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀧𑀫𑀼𑀔𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀅𑀥𑀺𑀧𑀢𑁂𑀬𑁆𑀬𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀉𑀢𑁆𑀢𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀓𑀺𑀁𑀲𑀸𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸’𑀢𑀺, 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑁋 ‘𑀙𑀦𑁆𑀤𑀫𑀽𑀮𑀓𑀸, 𑀆𑀯𑀼𑀲𑁄, 𑀲𑀩𑁆𑀩𑁂 𑀥𑀫𑁆𑀫𑀸, 𑀫𑀦𑀲𑀺𑀓𑀸𑀭𑀲𑀫𑁆𑀪𑀯𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀨𑀲𑁆𑀲𑀲𑀫𑀼𑀤𑀬𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀯𑁂𑀤𑀦𑀸𑀲𑀫𑁄𑀲𑀭𑀡𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀲𑀫𑀸𑀥𑀺𑀧𑁆𑀧𑀫𑀼𑀔𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀲𑀢𑀸𑀥𑀺𑀧𑀢𑁂𑀬𑁆𑀬𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀧𑀜𑁆𑀜𑀼𑀢𑁆𑀢𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀯𑀺𑀫𑀼𑀢𑁆𑀢𑀺𑀲𑀸𑀭𑀸 𑀲𑀩𑁆𑀩𑁂 𑀥𑀫𑁆𑀫𑀸’𑀢𑀺, 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣𑀸’’𑀢𑀺. 𑀢𑀢𑀺𑀬𑀁.

𑁪. 𑀘𑁄𑀭𑀲𑀼𑀢𑁆𑀢𑀁

𑁮𑁪. ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀳𑀸𑀘𑁄𑀭𑁄 𑀔𑀺𑀧𑁆𑀧𑀁 𑀧𑀭𑀺𑀬𑀸𑀧𑀚𑁆𑀚𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀅𑀧𑁆𑀧𑀳𑀭𑀦𑁆𑀢𑀲𑁆𑀲 𑀧𑀳𑀭𑀢𑀺, 𑀅𑀦𑀯𑀲𑁂𑀲𑀁 𑀆𑀤𑀺𑀬𑀢𑀺, 𑀇𑀢𑁆𑀣𑀺𑀁 𑀳𑀦𑀢𑀺, 𑀓𑀼𑀫𑀸𑀭𑀺𑀁 𑀤𑀽𑀲𑁂𑀢𑀺, 𑀧𑀩𑁆𑀩𑀚𑀺𑀢𑀁 𑀯𑀺𑀮𑀼𑀫𑁆𑀧𑀢𑀺, 𑀭𑀸𑀚𑀓𑁄𑀲𑀁 𑀯𑀺𑀮𑀼𑀫𑁆𑀧𑀢𑀺, 𑀅𑀘𑁆𑀘𑀸𑀲𑀦𑁆𑀦𑁂 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀦𑀺𑀥𑀸𑀦𑀓𑀼𑀲𑀮𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀳𑀸𑀘𑁄𑀭𑁄 𑀔𑀺𑀧𑁆𑀧𑀁 𑀧𑀭𑀺𑀬𑀸𑀧𑀚𑁆𑀚𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀳𑀸𑀘𑁄𑀭𑁄 𑀦 𑀔𑀺𑀧𑁆𑀧𑀁 𑀧𑀭𑀺𑀬𑀸𑀧𑀚𑁆𑀚𑀢𑀺, 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀦 𑀅𑀧𑁆𑀧𑀳𑀭𑀦𑁆𑀢𑀲𑁆𑀲 𑀧𑀳𑀭𑀢𑀺, 𑀦 𑀅𑀦𑀯𑀲𑁂𑀲𑀁 𑀆𑀤𑀺𑀬𑀢𑀺, 𑀦 𑀇𑀢𑁆𑀣𑀺𑀁 𑀳𑀦𑀢𑀺, 𑀦 𑀓𑀼𑀫𑀸𑀭𑀺𑀁 𑀤𑀽𑀲𑁂𑀢𑀺, 𑀦 𑀧𑀩𑁆𑀩𑀚𑀺𑀢𑀁 𑀯𑀺𑀮𑀼𑀫𑁆𑀧𑀢𑀺, 𑀦 𑀭𑀸𑀚𑀓𑁄𑀲𑀁 𑀯𑀺𑀮𑀼𑀫𑁆𑀧𑀢𑀺, 𑀦 𑀅𑀘𑁆𑀘𑀸𑀲𑀦𑁆𑀦𑁂 𑀓𑀫𑁆𑀫𑀁 𑀓𑀭𑁄𑀢𑀺, 𑀦𑀺𑀥𑀸𑀦𑀓𑀼𑀲𑀮𑁄 𑀘 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀳𑀸𑀘𑁄𑀭𑁄 𑀦 𑀔𑀺𑀧𑁆𑀧𑀁 𑀧𑀭𑀺𑀬𑀸𑀧𑀚𑁆𑀚𑀢𑀺, 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀫𑀡𑀲𑀼𑀢𑁆𑀢𑀁

𑁮𑁫. ‘‘‘𑀲𑀫𑀡𑁄’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀩𑁆𑀭𑀸𑀳𑁆𑀫𑀡𑁄’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀯𑁂𑀤𑀕𑀽’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀪𑀺𑀲𑀓𑁆𑀓𑁄’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀦𑀺𑀫𑁆𑀫𑀮𑁄’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀯𑀺𑀫𑀮𑁄’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀜𑀸𑀡𑀻’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀯𑀺𑀫𑀼𑀢𑁆𑀢𑁄’𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺.

‘‘𑀬𑀁 𑀲𑀫𑀡𑁂𑀦 𑀧𑀢𑁆𑀢𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀲𑀻𑀫𑀢𑀸;

𑀬𑀁 𑀯𑁂𑀤𑀕𑀼𑀦𑀸 𑀧𑀢𑁆𑀢𑀩𑁆𑀩𑀁, 𑀪𑀺𑀲𑀓𑁆𑀓𑁂𑀦 𑀅𑀦𑀼𑀢𑁆𑀢𑀭𑀁.

‘‘𑀬𑀁 𑀦𑀺𑀫𑁆𑀫𑀮𑁂𑀦 𑀧𑀢𑁆𑀢𑀩𑁆𑀩𑀁, 𑀯𑀺𑀫𑀮𑁂𑀦 𑀲𑀼𑀘𑀻𑀫𑀢𑀸;

𑀬𑀁 𑀜𑀸𑀡𑀺𑀦𑀸 𑀘 𑀧𑀢𑁆𑀢𑀩𑁆𑀩𑀁, 𑀯𑀺𑀫𑀼𑀢𑁆𑀢𑁂𑀦 𑀅𑀦𑀼𑀢𑁆𑀢𑀭𑀁.

‘‘𑀲𑁄𑀳𑀁 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀫𑀼𑀢𑁆𑀢𑁄 𑀫𑁄𑀘𑁂𑀫𑀺 𑀩𑀦𑁆𑀥𑀦𑀸;

𑀦𑀸𑀕𑁄𑀫𑁆𑀳𑀺 𑀧𑀭𑀫𑀤𑀦𑁆𑀢𑁄, 𑀅𑀲𑁂𑀔𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀧𑀜𑁆𑀘𑀫𑀁;

𑁬. 𑀬𑀲𑀲𑀼𑀢𑁆𑀢𑀁

𑁮𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂. 𑀅𑀲𑁆𑀲𑁄𑀲𑀼𑀁 𑀔𑁄 𑀇𑀘𑁆𑀙𑀸𑀦𑀗𑁆𑀕𑀮𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀇𑀘𑁆𑀙𑀸𑀦𑀗𑁆𑀕𑀮𑀁 𑀅𑀦𑀼𑀧𑁆𑀧𑀢𑁆𑀢𑁄 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’’𑀢𑀺.

𑀅𑀣 𑀔𑁄 𑀇𑀘𑁆𑀙𑀸𑀦𑀗𑁆𑀕𑀮𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀳𑀼𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀁𑀲𑀼 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀸𑀕𑀺𑀢𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀺𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁂 𑀧𑀦 𑀢𑁂, 𑀦𑀸𑀕𑀺𑀢, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂’’𑀢𑀺? ‘‘𑀏𑀢𑁂, 𑀪𑀦𑁆𑀢𑁂, 𑀇𑀘𑁆𑀙𑀸𑀦𑀗𑁆𑀕𑀮𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀳𑀼𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀸 𑀪𑀕𑀯𑀦𑁆𑀢𑀁𑀬𑁂𑀯 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸’’𑀢𑀺. ‘‘𑀫𑀸𑀳𑀁, 𑀦𑀸𑀕𑀺𑀢, 𑀬𑀲𑁂𑀦 𑀲𑀫𑀸𑀕𑀫𑀁, 𑀫𑀸 𑀘 𑀫𑀬𑀸 𑀬𑀲𑁄. 𑀬𑁄 𑀔𑁄, 𑀦𑀸𑀕𑀺𑀢, 𑀦𑀬𑀺𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀲𑁆𑀲 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 [𑀦𑀺𑀓𑀸𑀫𑀮𑀸𑀪𑀻 𑀅𑀲𑁆𑀲𑀁 (𑀩𑀳𑀽𑀲𑀼) 𑀅. 𑀦𑀺. 𑁫.𑁩𑁦 𑀧𑀲𑁆𑀲𑀺𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀅𑀬𑀁 𑀧𑀸𑀞𑀪𑁂𑀤𑀸 𑀦𑀢𑁆𑀣𑀺] 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀲𑁄 𑀢𑀁 𑀫𑀻𑀴𑁆𑀳𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀼𑀔𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺.

‘‘𑀅𑀥𑀺𑀯𑀸𑀲𑁂𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸. 𑀅𑀥𑀺𑀯𑀸𑀲𑁂𑀢𑀼 𑀲𑀼𑀕𑀢𑁄. 𑀅𑀥𑀺𑀯𑀸𑀲𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄. 𑀬𑁂𑀦 𑀬𑁂𑀦𑁂𑀯 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀕𑀫𑀺𑀲𑁆𑀲𑀢𑀺 𑀢𑀦𑁆𑀦𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀬𑀣𑀸𑀦𑀺𑀦𑁆𑀦𑀁 𑀉𑀤𑀓𑀸𑀦𑀺 𑀧𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀦𑁆𑀢𑁂, 𑀬𑁂𑀦 𑀬𑁂𑀦𑁂𑀯 𑀤𑀸𑀦𑀺 𑀪𑀕𑀯𑀸 𑀕𑀫𑀺𑀲𑁆𑀲𑀢𑀺 𑀢𑀦𑁆𑀦𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀻𑀮𑀧𑀜𑁆𑀜𑀸𑀡’’𑀦𑁆𑀢𑀺.

‘‘𑀫𑀸𑀳𑀁, 𑀦𑀸𑀕𑀺𑀢, 𑀬𑀲𑁂𑀦 𑀲𑀫𑀸𑀕𑀫𑀁, 𑀫𑀸 𑀘 𑀫𑀬𑀸 𑀬𑀲𑁄. 𑀬𑁄 𑀔𑁄, 𑀦𑀸𑀕𑀺𑀢, 𑀦𑀬𑀺𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀲𑁆𑀲 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀲𑁄 𑀢𑀁 𑀫𑀻𑀴𑁆𑀳𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀼𑀔𑀁 𑀲𑀸𑀤𑀺𑀬𑁂𑀬𑁆𑀬.

‘‘𑀤𑁂𑀯𑀢𑀸𑀧𑀺 𑀔𑁄, 𑀦𑀸𑀕𑀺𑀢, 𑀏𑀓𑀘𑁆𑀘𑀸 𑀦𑀬𑀺𑀫𑀲𑁆𑀲 [𑀏𑀓𑀘𑁆𑀘𑀸 𑀇𑀫𑀲𑁆𑀲 (?)] 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀺𑀦𑀺𑀬𑁄 𑀅𑀲𑁆𑀲𑀼 [𑀇𑀤𑀁 𑀧𑀤𑀁 𑀓𑀢𑁆𑀣𑀘𑀺 𑀦𑀢𑁆𑀣𑀺] 𑀅𑀓𑀺𑀘𑁆𑀙𑀮𑀸𑀪𑀺𑀦𑀺𑀬𑁄 [𑀦𑀺𑀓𑀸𑀫𑀮𑀸𑀪𑀺𑀦𑀺𑀬𑁄 𑀅𑀓𑀺𑀘𑁆𑀙𑀮𑀸𑀪𑀺𑀦𑀺𑀬𑁄 (?)] 𑀅𑀓𑀲𑀺𑀭𑀮𑀸𑀪𑀺𑀦𑀺𑀬𑁄, 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀢𑀼𑀫𑁆𑀳𑀸𑀓𑀫𑁆𑀧𑀺 [𑀢𑀸𑀲𑀫𑁆𑀧𑀺 (?)] 𑀔𑁄, 𑀦𑀸𑀕𑀺𑀢, 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑀸𑀦𑀁 𑀯𑀺𑀳𑀭𑀢𑀁 [𑀅𑀦𑀼𑀬𑀼𑀢𑁆𑀢𑁂 𑀯𑀺𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 (?)] 𑀏𑀯𑀁 𑀳𑁄𑀢𑀺 𑁋 ‘𑀦 𑀳𑀺 𑀦𑀽𑀦𑀫𑁂 [𑀦 𑀳𑀦𑀽𑀦𑀫𑁂 (𑀲𑀻. 𑀲𑁆𑀬𑀸. 𑀧𑀻.)] 𑀆𑀬𑀲𑁆𑀫𑀦𑁆𑀢𑁄 𑀇𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀺𑀦𑁄 𑀅𑀲𑁆𑀲𑀼 [𑀇𑀤𑀁 𑀧𑀤𑀁 𑀓𑀢𑁆𑀣𑀘𑀺 𑀦𑀢𑁆𑀣𑀺] 𑀅𑀓𑀺𑀘𑁆𑀙𑀮𑀸𑀪𑀺𑀦𑁄 𑀅𑀓𑀲𑀺𑀭𑀮𑀸𑀪𑀺𑀦𑁄. 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀢𑀣𑀸 𑀳𑀺 𑀧𑀦 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺’’’.

‘‘𑀇𑀥𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀽 𑀧𑀲𑁆𑀲𑀸𑀫𑀺 𑀅𑀜𑁆𑀜𑀫𑀜𑁆𑀜𑀁 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀦 [𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀳𑀺 (𑀲𑀻. 𑀧𑀻. 𑀓.)] 𑀲𑀜𑁆𑀚𑀕𑁆𑀖𑀦𑁆𑀢𑁂 𑀲𑀗𑁆𑀓𑀻𑀴𑀦𑁆𑀢𑁂. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀦 𑀳𑀺 𑀦𑀽𑀦𑀫𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀺𑀦𑁄 𑀅𑀲𑁆𑀲𑀼 𑀅𑀓𑀺𑀘𑁆𑀙𑀮𑀸𑀪𑀺𑀦𑁄 𑀅𑀓𑀲𑀺𑀭𑀮𑀸𑀪𑀺𑀦𑁄. 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀢𑀣𑀸 𑀳𑀺 𑀧𑀦 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀅𑀜𑁆𑀜𑀫𑀜𑁆𑀜𑀁 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀦 𑀲𑀜𑁆𑀚𑀕𑁆𑀖𑀦𑁆𑀢𑀺 𑀲𑀗𑁆𑀓𑀻𑀴𑀦𑁆𑀢𑀺’’’.

‘‘𑀇𑀥 𑀧𑀦𑀸𑀳𑀁 [𑀇𑀥𑀸𑀳𑀁 (𑀲𑀻. 𑀧𑀻. 𑀓.)], 𑀦𑀸𑀕𑀺𑀢, 𑀪𑀺𑀓𑁆𑀔𑀽 𑀧𑀲𑁆𑀲𑀸𑀫𑀺 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁂 𑀯𑀺𑀳𑀭𑀦𑁆𑀢𑁂. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀦 𑀳𑀺 𑀦𑀽𑀦𑀫𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀺𑀦𑁄 𑀅𑀲𑁆𑀲𑀼 𑀅𑀓𑀺𑀘𑁆𑀙𑀮𑀸𑀪𑀺𑀦𑁄 𑀅𑀓𑀲𑀺𑀭𑀮𑀸𑀪𑀺𑀦𑁄. 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀢𑀣𑀸 𑀳𑀺 𑀧𑀦 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺’’’.

‘‘𑀇𑀥𑀸𑀳𑀁 [𑀇𑀥 𑀧𑀦𑀸𑀳𑀁 (?)], 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑀺𑀁 𑀲𑀫𑀸𑀳𑀺𑀢𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺 𑀇𑀫𑀁 [𑀇𑀤𑀸𑀦𑀺𑀫𑀁 (𑀓𑀢𑁆𑀣𑀘𑀺) 𑀅. 𑀦𑀺. 𑁬.𑁪𑁨] 𑀆𑀬𑀲𑁆𑀫𑀦𑁆𑀢𑀁 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀢𑀺 [𑀧𑀘𑁆𑀘𑁂𑀲𑁆𑀲𑀢𑀺 (𑀲𑀻. 𑀧𑀻.), 𑀉𑀧𑀝𑁆𑀞𑀳𑀢𑀺 (𑀓.)] 𑀲𑀫𑀡𑀼𑀤𑁆𑀤𑁂𑀲𑁄 𑀯𑀸. 𑀢𑀁 𑀢𑀫𑁆𑀳𑀸 [𑀲𑁄 𑀢𑀫𑁆𑀳𑀸 (𑀓. 𑀲𑀻.), 𑀲𑁄 𑀢𑀁 𑀢𑀫𑁆𑀳𑀸 (?)] 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀲𑁆𑀲𑀢𑀻’𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀅𑀭𑀜𑁆𑀜𑁂 𑀧𑀘𑀮𑀸𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺 𑀅𑀬𑀫𑀸𑀬𑀲𑁆𑀫𑀸 𑀇𑀫𑀁 𑀦𑀺𑀤𑁆𑀤𑀸𑀓𑀺𑀮𑀫𑀣𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀅𑀭𑀜𑁆𑀜𑀲𑀜𑁆𑀜𑀁𑀬𑁂𑀯 𑀫𑀦𑀲𑀺 𑀓𑀭𑀺𑀲𑁆𑀲𑀢𑀺 𑀏𑀓𑀢𑁆𑀢’𑀦𑁆𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀅𑀭𑀜𑁆𑀜𑁂 𑀅𑀲𑀫𑀸𑀳𑀺𑀢𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺 𑀅𑀬𑀫𑀸𑀬𑀲𑁆𑀫𑀸 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀲𑁆𑀲𑀢𑀺 [𑀲𑀫𑀸𑀤𑀳𑁂𑀲𑁆𑀲𑀢𑀺 (𑀓𑀢𑁆𑀣𑀘𑀺)], 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀺𑀲𑁆𑀲𑀢𑀻’𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀅𑀭𑀜𑁆𑀜𑁂 𑀲𑀫𑀸𑀳𑀺𑀢𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺 𑀅𑀬𑀫𑀸𑀬𑀲𑁆𑀫𑀸 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀺, 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀺𑀲𑁆𑀲𑀢𑀻’𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑀺𑀁 𑀮𑀸𑀪𑀺𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀲𑁄 𑀢𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀺𑀓𑀸𑀫𑀬𑀫𑀸𑀦𑁄 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀭𑀺𑀜𑁆𑀘𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺; 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀁 𑀑𑀲𑀭𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀮𑀸𑀪𑀺𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀲𑁄 𑀢𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀝𑀺𑀧𑀡𑀸𑀫𑁂𑀢𑁆𑀯𑀸 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦 𑀭𑀺𑀜𑁆𑀘𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦. [[ ] 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀅. 𑀦𑀺. 𑁬.𑁪𑁨 𑀙𑀓𑁆𑀓𑀦𑀺𑀧𑀸𑀢𑁂𑀬𑁂𑀯 𑀤𑀺𑀲𑁆𑀲𑀢𑀺, 𑀦 𑀏𑀢𑁆𑀣 𑀅𑀝𑁆𑀞𑀓𑀦𑀺𑀧𑀸𑀢𑁂]

‘‘𑀬𑀲𑁆𑀫𑀸𑀳𑀁 [𑀬𑀲𑁆𑀫𑀺𑀁𑀳𑀁 (𑀓𑀢𑁆𑀣𑀘𑀺)], 𑀦𑀸𑀕𑀺𑀢, 𑀲𑀫𑀬𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀦 𑀓𑀜𑁆𑀘𑀺 𑀧𑀲𑁆𑀲𑀸𑀫𑀺 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸, 𑀨𑀸𑀲𑀼 𑀫𑁂, 𑀦𑀸𑀕𑀺𑀢, 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀅𑀦𑁆𑀢𑀫𑀲𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀸𑀬𑀸’’𑀢𑀺. 𑀙𑀝𑁆𑀞𑀁.

𑁭. 𑀧𑀢𑁆𑀢𑀦𑀺𑀓𑀼𑀚𑁆𑀚𑀦𑀲𑀼𑀢𑁆𑀢𑀁

𑁮𑁭. [𑀘𑀽𑀴𑀯. 𑁨𑁬𑁫] ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀢𑁆𑀢𑀁 𑀦𑀺𑀓𑁆𑀓𑀼𑀚𑁆𑀚𑁂𑀬𑁆𑀬 [𑀦𑀺𑀓𑀼𑀚𑁆𑀚𑁂𑀬𑁆𑀬 (𑀓.)]. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀪𑀺𑀓𑁆𑀔𑀽𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽𑀦𑀁 𑀅𑀯𑀸𑀲𑀸𑀬 [𑀅𑀦𑀸𑀯𑀸𑀲𑀸𑀬 (𑀲𑀻. 𑀲𑁆𑀬𑀸.)] 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀺 [𑀯𑀺𑀪𑁂𑀤𑁂𑀢𑀺 (𑀩𑀳𑀽𑀲𑀼)], 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀢𑁆𑀢𑀁 𑀦𑀺𑀓𑁆𑀓𑀼𑀚𑁆𑀚𑁂𑀬𑁆𑀬.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀢𑁆𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀦 𑀪𑀺𑀓𑁆𑀔𑀽𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀦 𑀪𑀺𑀓𑁆𑀔𑀽𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀦 𑀪𑀺𑀓𑁆𑀔𑀽𑀦𑀁 𑀅𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀦 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀦 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀺, 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀢𑁆𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀧𑁆𑀧𑀲𑀸𑀤𑀧𑀯𑁂𑀤𑀦𑀻𑀬𑀲𑀼𑀢𑁆𑀢𑀁

𑁮𑁮. ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑀸 𑀉𑀧𑀸𑀲𑀓𑀸 𑀅𑀧𑁆𑀧𑀲𑀸𑀤𑀁 𑀧𑀯𑁂𑀤𑁂𑀬𑁆𑀬𑀼𑀁. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺, 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀕𑁄𑀘𑀭𑁂 𑀘 𑀦𑀁 𑀧𑀲𑁆𑀲𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑀸 𑀉𑀧𑀸𑀲𑀓𑀸 𑀅𑀧𑁆𑀧𑀲𑀸𑀤𑀁 𑀧𑀯𑁂𑀤𑁂𑀬𑁆𑀬𑀼𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑀸 𑀉𑀧𑀸𑀲𑀓𑀸 𑀧𑀲𑀸𑀤𑀁 𑀧𑀯𑁂𑀤𑁂𑀬𑁆𑀬𑀼𑀁. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀦 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀦 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀦 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀦 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺, 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀕𑁄𑀘𑀭𑁂 𑀘 𑀦𑀁 𑀧𑀲𑁆𑀲𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑀸 𑀉𑀧𑀸𑀲𑀓𑀸 𑀧𑀲𑀸𑀤𑀁 𑀧𑀯𑁂𑀤𑁂𑀬𑁆𑀬𑀼’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀧𑀝𑀺𑀲𑀸𑀭𑀡𑀻𑀬𑀲𑀼𑀢𑁆𑀢𑀁

𑁮𑁯. [𑀘𑀽𑀴𑀯. 𑁩𑁯 𑀣𑁄𑀓𑀁 𑀯𑀺𑀲𑀤𑀺𑀲𑀁] ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺, 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀺𑀓𑀜𑁆𑀘 𑀕𑀺𑀳𑀺𑀧𑀝𑀺𑀲𑁆𑀲𑀯𑀁 𑀦 𑀲𑀘𑁆𑀘𑀸𑀧𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀝𑀺𑀲𑀸𑀭𑀡𑀻𑀬𑀁 𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀦 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀦 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀦 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀦 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺, 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀺𑀓𑀜𑁆𑀘 𑀕𑀺𑀳𑀺𑀧𑀝𑀺𑀲𑁆𑀲𑀯𑀁 𑀲𑀘𑁆𑀘𑀸𑀧𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸’’𑀢𑀺. 𑀦𑀯𑀫𑀁.

𑁧𑁦. 𑀲𑀫𑁆𑀫𑀸𑀯𑀢𑁆𑀢𑀦𑀲𑀼𑀢𑁆𑀢𑀁

𑁯𑁦. [𑀘𑀽𑀴𑀯. 𑁨𑁧𑁧] ‘‘𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸, 𑀦 𑀓𑀸𑀘𑀺 𑀲𑀗𑁆𑀖𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑁂𑀓𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑁄, 𑀦 𑀘 𑀢𑁂𑀦 𑀫𑀽𑀮𑁂𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑀫𑀁.

𑀲𑀢𑀺𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.