𑁧𑁧. 𑀓𑁄𑀥𑀦𑀲𑀼𑀢𑁆𑀢𑀁

𑁬𑁪. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀧𑀢𑁆𑀢𑀓𑀦𑁆𑀢𑀸 𑀲𑀧𑀢𑁆𑀢𑀓𑀭𑀡𑀸 𑀓𑁄𑀥𑀦𑀁 𑀆𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀓𑀢𑀫𑁂 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀤𑀼𑀩𑁆𑀩𑀡𑁆𑀡𑁄 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀯𑀡𑁆𑀡𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁 [𑀓𑁄𑀥𑀦𑀸𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀓𑀺𑀜𑁆𑀘𑀸𑀧𑀺 𑀲𑁄 𑀳𑁄𑀢𑀺 𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼 𑀑𑀤𑀸𑀢𑀯𑀢𑁆𑀣𑀯𑀲𑀦𑁄 [𑀑𑀤𑀸𑀢𑀯𑀲𑀦𑁄 (𑀓.)]; 𑀅𑀣 𑀔𑁄 𑀲𑁄 𑀤𑀼𑀩𑁆𑀩𑀡𑁆𑀡𑁄𑀯 𑀳𑁄𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀲𑀼𑀔𑀲𑁂𑀬𑁆𑀬𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀓𑀺𑀜𑁆𑀘𑀸𑀧𑀺 𑀲𑁄 𑀧𑀮𑁆𑀮𑀗𑁆𑀓𑁂 𑀲𑁂𑀢𑀺 𑀕𑁄𑀦𑀓𑀢𑁆𑀣𑀢𑁂 𑀧𑀝𑀮𑀺𑀓𑀢𑁆𑀣𑀢𑁂 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁂 𑀲𑀉𑀢𑁆𑀢𑀭𑀘𑁆𑀙𑀤𑁂 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁂; 𑀅𑀣 𑀔𑁄 𑀲𑁄 𑀤𑀼𑀓𑁆𑀔𑀜𑁆𑀜𑁂𑀯 𑀲𑁂𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀧𑀘𑀼𑀭𑀢𑁆𑀣𑁄 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀧𑀘𑀼𑀭𑀢𑁆𑀣𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀅𑀦𑀢𑁆𑀣𑀫𑁆𑀧𑀺 𑀕𑀳𑁂𑀢𑁆𑀯𑀸 ‘𑀅𑀢𑁆𑀣𑁄 𑀫𑁂 𑀕𑀳𑀺𑀢𑁄’𑀢𑀺 𑀫𑀜𑁆𑀜𑀢𑀺, 𑀅𑀢𑁆𑀣𑀫𑁆𑀧𑀺 𑀕𑀳𑁂𑀢𑁆𑀯𑀸 ‘𑀅𑀦𑀢𑁆𑀣𑁄 𑀫𑁂 𑀕𑀳𑀺𑀢𑁄’𑀢𑀺 𑀫𑀜𑁆𑀜𑀢𑀺. 𑀢𑀲𑁆𑀲𑀺𑀫𑁂 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀘𑁆𑀘𑀦𑀻𑀓𑀸 𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀓𑁄𑀥𑀸𑀪𑀺𑀪𑀽𑀢𑀲𑁆𑀲. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀪𑁄𑀕𑀯𑀸 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀪𑁄𑀕𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑀸𑀪𑀺𑀪𑀽𑀢𑀲𑁆𑀲 𑀓𑁄𑀥𑀧𑀭𑁂𑀢𑀲𑁆𑀲, 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀪𑁄𑀕𑀸 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀸 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑀸 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸, 𑀢𑁂𑀧𑀺 𑀭𑀸𑀚𑀸𑀦𑁄 𑀭𑀸𑀚𑀓𑁄𑀲𑀁 𑀧𑀯𑁂𑀲𑁂𑀦𑁆𑀢𑀺 𑀓𑁄𑀥𑀸𑀪𑀺𑀪𑀽𑀢𑀲𑁆𑀲. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀬𑀲𑀯𑀸 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀬𑀲𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀬𑁄𑀧𑀺𑀲𑁆𑀲 𑀲𑁄 𑀳𑁄𑀢𑀺 𑀬𑀲𑁄 𑀅𑀧𑁆𑀧𑀫𑀸𑀤𑀸𑀥𑀺𑀕𑀢𑁄, 𑀢𑀫𑁆𑀳𑀸𑀧𑀺 𑀥𑀁𑀲𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀫𑀺𑀢𑁆𑀢𑀯𑀸 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀫𑀺𑀢𑁆𑀢𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀓𑁄𑀥𑀸𑀪𑀺𑀪𑀽𑀢𑀁 𑀓𑁄𑀥𑀧𑀭𑁂𑀢𑀁, 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀢𑁂𑀧𑀺 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑁆𑀢𑀺 𑀓𑁄𑀥𑀸𑀪𑀺𑀪𑀽𑀢𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀙𑀝𑁆𑀞𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀲𑀼𑀕𑀢𑀺𑀕𑀫𑀦𑁂 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬…𑀧𑁂… 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀫𑁆𑀫𑀸 𑀲𑀧𑀢𑁆𑀢𑀓𑀦𑁆𑀢𑀸 𑀲𑀧𑀢𑁆𑀢𑀓𑀭𑀡𑀸 𑀓𑁄𑀥𑀦𑀁 𑀆𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸’’𑀢𑀺.

‘‘𑀓𑁄𑀥𑀦𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺, 𑀅𑀣𑁄 𑀤𑀼𑀓𑁆𑀔𑀫𑁆𑀧𑀺 𑀲𑁂𑀢𑀺 𑀲𑁄;

𑀅𑀣𑁄 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀦, 𑀅𑀦𑀢𑁆𑀣𑀁 𑀅𑀥𑀺𑀧𑀚𑁆𑀚𑀢𑀺 [𑀅𑀥𑀺𑀕𑀘𑁆𑀙𑀢𑀺 (𑀲𑀻.), 𑀧𑀝𑀺𑀧𑀚𑁆𑀚𑀢𑀺 (𑀲𑁆𑀬𑀸.)].

‘‘𑀢𑀢𑁄 𑀓𑀸𑀬𑁂𑀦 𑀯𑀸𑀘𑀸𑀬, 𑀯𑀥𑀁 𑀓𑀢𑁆𑀯𑀸𑀦 𑀓𑁄𑀥𑀦𑁄;

𑀓𑁄𑀥𑀸𑀪𑀺𑀪𑀽𑀢𑁄 𑀧𑀼𑀭𑀺𑀲𑁄, 𑀥𑀦𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺.

‘‘𑀓𑁄𑀥𑀲𑀫𑁆𑀫𑀤𑀲𑀫𑁆𑀫𑀢𑁆𑀢𑁄, 𑀆𑀬𑀲𑀓𑁆𑀬𑀁 [𑀆𑀬𑀲𑀓𑁆𑀔𑀁 (𑀲𑁆𑀬𑀸.)] 𑀦𑀺𑀕𑀘𑁆𑀙𑀢𑀺;

𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘, 𑀧𑀭𑀺𑀯𑀚𑁆𑀚𑀦𑁆𑀢𑀺 𑀓𑁄𑀥𑀦𑀁.

[𑀇𑀢𑀺𑀯𑀼. 𑁮𑁮 𑀇𑀢𑀺𑀯𑀼𑀢𑁆𑀢𑀓𑁂𑀧𑀺] ‘‘𑀅𑀦𑀢𑁆𑀣𑀚𑀦𑀦𑁄 𑀓𑁄𑀥𑁄, 𑀓𑁄𑀥𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀓𑁄𑀥𑁄 𑀲𑀳𑀢𑁂 𑀦𑀭𑀁.

‘‘𑀬𑀁 𑀓𑀼𑀤𑁆𑀥𑁄 𑀉𑀧𑀭𑁄𑀥𑁂𑀢𑀺, 𑀲𑀼𑀓𑀭𑀁 𑀯𑀺𑀬 𑀤𑀼𑀓𑁆𑀓𑀭𑀁;

𑀧𑀘𑁆𑀙𑀸 𑀲𑁄 𑀯𑀺𑀕𑀢𑁂 𑀓𑁄𑀥𑁂, 𑀅𑀕𑁆𑀕𑀺𑀤𑀟𑁆𑀠𑁄𑀯 𑀢𑀧𑁆𑀧𑀢𑀺.

‘‘𑀤𑀼𑀫𑁆𑀫𑀗𑁆𑀓𑀼𑀬𑀁 𑀧𑀤𑀲𑁆𑀲𑁂𑀢𑀺 [𑀲𑀤𑀲𑁆𑀲𑁂𑀢𑀺 (𑀲𑀻.), 𑀧𑀞𑀫𑀁 𑀤𑀲𑁆𑀲𑁂𑀢𑀺 (𑀲𑁆𑀬𑀸.)], 𑀥𑀽𑀫𑀁 𑀥𑀽𑀫𑀻𑀯 𑀧𑀸𑀯𑀓𑁄;

𑀬𑀢𑁄 𑀧𑀢𑀸𑀬𑀢𑀺 𑀓𑁄𑀥𑁄, 𑀬𑁂𑀦 𑀓𑀼𑀚𑁆𑀛𑀦𑁆𑀢𑀺 𑀫𑀸𑀦𑀯𑀸.

‘‘𑀦𑀸𑀲𑁆𑀲 𑀳𑀺𑀭𑀻 𑀦 𑀑𑀢𑁆𑀢𑀧𑁆𑀧𑀁 [𑀦 𑀅𑀲𑁆𑀲 𑀳𑀺𑀭𑀻 𑀑𑀢𑁆𑀢𑀧𑁆𑀧𑀜𑁆𑀘 (𑀓.)], 𑀦 𑀯𑀸𑀘𑁄 𑀳𑁄𑀢𑀺 𑀕𑀸𑀭𑀯𑁄;

𑀓𑁄𑀥𑁂𑀦 𑀅𑀪𑀺𑀪𑀽𑀢𑀲𑁆𑀲, 𑀦 𑀤𑀻𑀧𑀁 𑀳𑁄𑀢𑀺 𑀓𑀺𑀜𑁆𑀘𑀦𑀁.

‘‘𑀢𑀧𑀦𑀻𑀬𑀸𑀦𑀺 𑀓𑀫𑁆𑀫𑀸𑀦𑀺, 𑀬𑀸𑀦𑀺 𑀥𑀫𑁆𑀫𑁂𑀳𑀺 𑀆𑀭𑀓𑀸;

𑀢𑀸𑀦𑀺 𑀆𑀭𑁄𑀘𑀬𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀬𑀣𑀸 𑀢𑀣𑀁.

‘‘𑀓𑀼𑀤𑁆𑀥𑁄 𑀳𑀺 𑀧𑀺𑀢𑀭𑀁 𑀳𑀦𑁆𑀢𑀺, 𑀳𑀦𑁆𑀢𑀺 𑀓𑀼𑀤𑁆𑀥𑁄 𑀲𑀫𑀸𑀢𑀭𑀁;

𑀓𑀼𑀤𑁆𑀥𑁄 𑀳𑀺 𑀩𑁆𑀭𑀸𑀳𑁆𑀫𑀡𑀁 𑀳𑀦𑁆𑀢𑀺, 𑀳𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀣𑀼𑀚𑁆𑀚𑀦𑀁.

‘‘𑀬𑀸𑀬 𑀫𑀸𑀢𑀼 𑀪𑀢𑁄 𑀧𑁄𑀲𑁄, 𑀇𑀫𑀁 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺;

𑀢𑀫𑁆𑀧𑀺 𑀧𑀸𑀡𑀤𑀤𑀺𑀁 𑀲𑀦𑁆𑀢𑀺𑀁, 𑀳𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀣𑀼𑀚𑁆𑀚𑀦𑁄.

‘‘𑀅𑀢𑁆𑀢𑀽𑀧𑀫𑀸 𑀳𑀺 𑀢𑁂 𑀲𑀢𑁆𑀢𑀸, 𑀅𑀢𑁆𑀢𑀸 𑀳𑀺 𑀧𑀭𑀫𑁄 [𑀧𑀭𑀫𑀁 (𑀲𑀻. 𑀲𑁆𑀬𑀸.)] 𑀧𑀺𑀬𑁄;

𑀳𑀦𑁆𑀢𑀺 𑀓𑀼𑀤𑁆𑀥𑁄 𑀧𑀼𑀣𑀼𑀢𑁆𑀢𑀸𑀦𑀁, 𑀦𑀸𑀦𑀸𑀭𑀽𑀧𑁂𑀲𑀼 𑀫𑀼𑀘𑁆𑀙𑀺𑀢𑁄.

‘‘𑀅𑀲𑀺𑀦𑀸 𑀳𑀦𑁆𑀢𑀺 𑀅𑀢𑁆𑀢𑀸𑀦𑀁, 𑀯𑀺𑀲𑀁 𑀔𑀸𑀤𑀦𑁆𑀢𑀺 𑀫𑀼𑀘𑁆𑀙𑀺𑀢𑀸;

𑀭𑀚𑁆𑀚𑀼𑀬𑀸 𑀩𑀚𑁆𑀛 𑀫𑀻𑀬𑀦𑁆𑀢𑀺, 𑀧𑀩𑁆𑀩𑀢𑀸𑀫𑀧𑀺 𑀓𑀦𑁆𑀤𑀭𑁂.

‘‘𑀪𑀽𑀦𑀳𑀘𑁆𑀘𑀸𑀦𑀺 [𑀪𑀽𑀢𑀳𑀘𑁆𑀘𑀸𑀦𑀺 (𑀲𑀻. 𑀲𑁆𑀬𑀸.)] 𑀓𑀫𑁆𑀫𑀸𑀦𑀺, 𑀅𑀢𑁆𑀢𑀫𑀸𑀭𑀡𑀺𑀬𑀸𑀦𑀺 𑀘;

𑀓𑀭𑁄𑀦𑁆𑀢𑀸 𑀦𑀸𑀯𑀩𑀼𑀚𑁆𑀛𑀦𑁆𑀢𑀺 [𑀓𑀭𑁄𑀦𑁆𑀢𑁄 𑀦𑀸𑀯𑀩𑀼𑀚𑁆𑀛𑀢𑀺 (𑀓.)], 𑀓𑁄𑀥𑀚𑀸𑀢𑁄 𑀧𑀭𑀸𑀪𑀯𑁄.

‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦, 𑀫𑀘𑁆𑀘𑀼𑀧𑀸𑀲𑁄 𑀕𑀼𑀳𑀸𑀲𑀬𑁄;

𑀢𑀁 𑀤𑀫𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑁂, 𑀧𑀜𑁆𑀜𑀸𑀯𑀻𑀭𑀺𑀬𑁂𑀦 𑀤𑀺𑀝𑁆𑀞𑀺𑀬𑀸.

‘‘𑀬𑀣𑀸 𑀫𑁂𑀢𑀁 [𑀏𑀓𑀫𑁂𑀢𑀁 (𑀲𑁆𑀬𑀸.), 𑀏𑀓𑀫𑁂𑀢𑀁 (𑀲𑀻.)] 𑀅𑀓𑀼𑀲𑀮𑀁, 𑀲𑀫𑀼𑀘𑁆𑀙𑀺𑀦𑁆𑀤𑁂𑀣 𑀧𑀡𑁆𑀟𑀺𑀢𑁄;

𑀢𑀣𑁂𑀯 𑀥𑀫𑁆𑀫𑁂 𑀲𑀺𑀓𑁆𑀔𑁂𑀣, 𑀫𑀸 𑀦𑁄 𑀤𑀼𑀫𑁆𑀫𑀗𑁆𑀓𑀼𑀬𑀁 𑀅𑀳𑀼.

‘‘𑀯𑀻𑀢𑀓𑁄𑀥𑀸 𑀅𑀦𑀸𑀬𑀸𑀲𑀸, 𑀯𑀻𑀢𑀮𑁄𑀪𑀸 𑀅𑀦𑀼𑀲𑁆𑀲𑀼𑀓𑀸 [𑀅𑀦𑀺𑀲𑁆𑀲𑀼𑀓𑀸 (𑀲𑀻. 𑀲𑁆𑀬𑀸.) 𑀢𑀤𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀅𑀦𑀼𑀲𑁆𑀲𑀼𑀓𑀸’’ 𑀢𑁆𑀯𑁂𑀯 𑀤𑀺𑀲𑁆𑀲𑀢𑀺];

𑀤𑀦𑁆𑀢𑀸 𑀓𑁄𑀥𑀁 𑀧𑀳𑀦𑁆𑀢𑁆𑀯𑀸𑀦, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸’’𑀢𑀺 [𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀣𑀦𑀸𑀲𑀯𑀸𑀢𑀺 (𑀲𑁆𑀬𑀸.), 𑀧𑀭𑀺𑀦𑀺𑀩𑁆𑀩𑀺𑀁𑀲𑀼 𑀅𑀦𑀸𑀲𑀯𑀸𑀢𑀺 (𑀓.)]. 𑀏𑀓𑀸𑀤𑀲𑀫𑀁;

𑀅𑀩𑁆𑀬𑀸𑀓𑀢𑀯𑀕𑁆𑀕𑁄 𑀙𑀝𑁆𑀞𑁄.