𑁬. 𑀅𑀩𑁆𑀬𑀸𑀓𑀢𑀯𑀕𑁆𑀕𑁄

𑁧. 𑀅𑀩𑁆𑀬𑀸𑀓𑀢𑀲𑀼𑀢𑁆𑀢𑀁

𑁫𑁪. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀦𑀼𑀧𑁆𑀧𑀚𑁆𑀚𑀢𑀺 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀽’’𑀢𑀺?

‘‘𑀤𑀺𑀝𑁆𑀞𑀺𑀦𑀺𑀭𑁄𑀥𑀸 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀦𑀼𑀧𑁆𑀧𑀚𑁆𑀚𑀢𑀺 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀼. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀕𑀢𑀫𑁂𑀢𑀁; ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀕𑀢𑀫𑁂𑀢𑀁; ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀕𑀢𑀫𑁂𑀢𑀁; ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀕𑀢𑀫𑁂𑀢𑀁. 𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀼, 𑀧𑀼𑀣𑀼𑀚𑁆𑀚𑀦𑁄 𑀤𑀺𑀝𑁆𑀞𑀺𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀧𑀯𑀟𑁆𑀠𑀢𑀺, 𑀲𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑀲𑀸𑀯𑀓𑁄 𑀤𑀺𑀝𑁆𑀞𑀺𑀁 𑀧𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀦𑀺𑀭𑀼𑀚𑁆𑀛𑀢𑀺, 𑀲𑁄 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀏𑀯𑀁 𑀚𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀧𑀲𑁆𑀲𑀁 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀩𑁆𑀬𑀸𑀓𑀭𑁄𑀢𑀺; ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀩𑁆𑀬𑀸𑀓𑀭𑁄𑀢𑀺; ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀩𑁆𑀬𑀸𑀓𑀭𑁄𑀢𑀺; ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀩𑁆𑀬𑀸𑀓𑀭𑁄𑀢𑀺. 𑀏𑀯𑀁 𑀚𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀧𑀲𑁆𑀲𑀁 𑀏𑀯𑀁 𑀅𑀩𑁆𑀬𑀸𑀓𑀭𑀡𑀥𑀫𑁆𑀫𑁄 𑀳𑁄𑀢𑀺 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀼. 𑀏𑀯𑀁 𑀚𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀧𑀲𑁆𑀲𑀁 𑀦 𑀙𑀫𑁆𑀪𑀢𑀺, 𑀦 𑀓𑀫𑁆𑀧𑀢𑀺, 𑀦 𑀯𑁂𑀥𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀼.

‘‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀡𑁆𑀳𑀸𑀕𑀢𑀫𑁂𑀢𑀁…𑀧𑁂… 𑀲𑀜𑁆𑀜𑀸𑀕𑀢𑀫𑁂𑀢𑀁 …𑀧𑁂… 𑀫𑀜𑁆𑀜𑀺𑀢𑀫𑁂𑀢𑀁…𑀧𑁂… 𑀧𑀧𑀜𑁆𑀘𑀺𑀢𑀫𑁂𑀢𑀁…𑀧𑁂… 𑀉𑀧𑀸𑀤𑀸𑀦𑀕𑀢𑀫𑁂𑀢𑀁…𑀧𑁂… ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀧𑁆𑀧𑀝𑀺𑀲𑀸𑀭𑁄 𑀏𑀲𑁄; ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀧𑁆𑀧𑀝𑀺𑀲𑀸𑀭𑁄 𑀏𑀲𑁄; ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀧𑁆𑀧𑀝𑀺𑀲𑀸𑀭𑁄 𑀏𑀲𑁄; ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀧𑁆𑀧𑀝𑀺𑀲𑀸𑀭𑁄 𑀏𑀲𑁄. 𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀼, 𑀧𑀼𑀣𑀼𑀚𑁆𑀚𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀯𑀟𑁆𑀠𑀢𑀺, 𑀲𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑀲𑀸𑀯𑀓𑁄 𑀯𑀺𑀧𑁆𑀧𑀝𑀺𑀲𑀸𑀭𑀁 𑀧𑀚𑀸𑀦𑀸𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀲𑁄 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀏𑀯𑀁 𑀚𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀧𑀲𑁆𑀲𑀁 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀩𑁆𑀬𑀸𑀓𑀭𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀩𑁆𑀬𑀸𑀓𑀭𑁄𑀢𑀺. 𑀏𑀯𑀁 𑀚𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀧𑀲𑁆𑀲𑀁 𑀏𑀯𑀁 𑀅𑀩𑁆𑀬𑀸𑀓𑀭𑀡𑀥𑀫𑁆𑀫𑁄 𑀳𑁄𑀢𑀺 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀼. 𑀏𑀯𑀁 𑀚𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀧𑀲𑁆𑀲𑀁 𑀦 𑀙𑀫𑁆𑀪𑀢𑀺, 𑀦 𑀓𑀫𑁆𑀧𑀢𑀺, 𑀦 𑀯𑁂𑀥𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀼. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀦𑀼𑀧𑁆𑀧𑀚𑁆𑀚𑀢𑀺 𑀅𑀩𑁆𑀬𑀸𑀓𑀢𑀯𑀢𑁆𑀣𑀽𑀲𑀽’’𑀢𑀺. 𑀧𑀞𑀫𑀁.

𑁨. 𑀧𑀼𑀭𑀺𑀲𑀕𑀢𑀺𑀲𑀼𑀢𑁆𑀢𑀁

𑁫𑁫. ‘‘𑀲𑀢𑁆𑀢 𑀘 [𑀲𑀢𑁆𑀢 (𑀲𑀻.), 𑀲𑀢𑁆𑀢 𑀘 𑀔𑁄 (𑀓.)], 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀕𑀢𑀺𑀬𑁄 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀼𑀧𑀸𑀤𑀸 𑀘 𑀧𑀭𑀺𑀦𑀺𑀩𑁆𑀩𑀸𑀦𑀁 [𑀧𑀭𑀺𑀦𑀺𑀩𑁆𑀩𑀸𑀡𑀁 (𑀲𑀻.)]. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀧𑀼𑀭𑀺𑀲𑀕𑀢𑀺𑀬𑁄?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀢𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀺, 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁 𑀢𑀁 𑀧𑀚𑀳𑀸𑀫𑀻’𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑁄 𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀺, 𑀅𑀢𑁆𑀣𑀼𑀢𑁆𑀢𑀭𑀺 𑀧𑀤𑀁 𑀲𑀦𑁆𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 [𑀤𑀺𑀯𑀲𑀲𑀦𑁆𑀢𑀢𑁆𑀢𑁂 (𑀲𑀻. 𑀲𑁆𑀬𑀸.) 𑀫. 𑀦𑀺. 𑁨.𑁧𑁫𑁪] 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀢𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀺, 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁 𑀢𑀁 𑀧𑀚𑀳𑀸𑀫𑀻’𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑁄 𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀺, 𑀅𑀢𑁆𑀣𑀼𑀢𑁆𑀢𑀭𑀺 𑀧𑀤𑀁 𑀲𑀦𑁆𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀢𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀺, 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁 𑀢𑀁 𑀧𑀚𑀳𑀸𑀫𑀻’𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑁄 𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀺, 𑀅𑀢𑁆𑀣𑀼𑀢𑁆𑀢𑀭𑀺 𑀧𑀤𑀁 𑀲𑀦𑁆𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑀼𑀧𑀳𑀘𑁆𑀘 𑀢𑀮𑀁 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑀳𑀘𑁆𑀘 𑀢𑀮𑀁 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀭𑀺𑀢𑁆𑀢𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀧𑀢𑁂𑀬𑁆𑀬. 𑀲𑀸 𑀢𑀢𑁆𑀣 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀬𑁆𑀬, 𑀥𑀽𑀫𑀫𑁆𑀧𑀺 𑀚𑀦𑁂𑀬𑁆𑀬, 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀢𑁆𑀯𑀸 𑀥𑀽𑀫𑀫𑁆𑀧𑀺 𑀚𑀦𑁂𑀢𑁆𑀯𑀸 𑀢𑀫𑁂𑀯 𑀧𑀭𑀺𑀢𑁆𑀢𑀁 𑀢𑀺𑀡𑀧𑀼𑀜𑁆𑀚𑀁 𑀯𑀸 𑀓𑀝𑁆𑀞𑀧𑀼𑀜𑁆𑀚𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀯𑀺𑀧𑀼𑀮𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀧𑀢𑁂𑀬𑁆𑀬. 𑀲𑀸 𑀢𑀢𑁆𑀣 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀬𑁆𑀬, 𑀥𑀽𑀫𑀫𑁆𑀧𑀺 𑀚𑀦𑁂𑀬𑁆𑀬, 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀢𑁆𑀯𑀸 𑀥𑀽𑀫𑀫𑁆𑀧𑀺 𑀚𑀦𑁂𑀢𑁆𑀯𑀸 𑀢𑀫𑁂𑀯 𑀯𑀺𑀧𑀼𑀮𑀁 𑀢𑀺𑀡𑀧𑀼𑀜𑁆𑀚𑀁 𑀯𑀸 𑀓𑀝𑁆𑀞𑀧𑀼𑀜𑁆𑀚𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀢𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀺, 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁 𑀢𑀁 𑀧𑀚𑀳𑀸𑀫𑀻’𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑁄 𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀺, 𑀅𑀢𑁆𑀣𑀼𑀢𑁆𑀢𑀭𑀺 𑀧𑀤𑀁 𑀲𑀦𑁆𑀢𑀁 𑀲𑀫𑁆𑀫𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀧𑀸𑀮𑁂 𑀳𑀜𑁆𑀜𑀫𑀸𑀦𑁂 𑀧𑀧𑀝𑀺𑀓𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀦𑁆𑀢𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀧𑀢𑁂𑀬𑁆𑀬. 𑀲𑀸 𑀢𑀢𑁆𑀣 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀬𑁆𑀬, 𑀥𑀽𑀫𑀫𑁆𑀧𑀺 𑀚𑀦𑁂𑀬𑁆𑀬, 𑀅𑀕𑁆𑀕𑀺𑀫𑁆𑀧𑀺 𑀚𑀦𑁂𑀢𑁆𑀯𑀸 𑀥𑀽𑀫𑀫𑁆𑀧𑀺 𑀚𑀦𑁂𑀢𑁆𑀯𑀸 𑀢𑀫𑁂𑀯 𑀫𑀳𑀦𑁆𑀢𑀁 𑀢𑀺𑀡𑀧𑀼𑀜𑁆𑀚𑀁 𑀯𑀸 𑀓𑀝𑁆𑀞𑀧𑀼𑀜𑁆𑀚𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀫𑁆𑀧𑀺 𑀤𑀳𑁂𑀬𑁆𑀬 [𑀟𑀳𑁂𑀬𑁆𑀬 (𑀅𑀜𑁆𑀜𑀢𑁆𑀣)], 𑀤𑀸𑀬𑀫𑁆𑀧𑀺 𑀤𑀳𑁂𑀬𑁆𑀬, 𑀕𑀘𑁆𑀙𑀫𑁆𑀧𑀺 𑀤𑀳𑀺𑀢𑁆𑀯𑀸 𑀤𑀸𑀬𑀫𑁆𑀧𑀺 𑀤𑀳𑀺𑀢𑁆𑀯𑀸 𑀳𑀭𑀺𑀢𑀦𑁆𑀢𑀁 𑀯𑀸 𑀧𑀣𑀦𑁆𑀢𑀁 𑀯𑀸 [𑀧𑀦𑁆𑀣𑀦𑁆𑀢𑀁 𑀯𑀸 (𑀲𑀻.) 𑀲𑁆𑀬𑀸𑀫𑀧𑁄𑀢𑁆𑀣𑀓𑁂 𑀇𑀤𑀁 𑀦 𑀤𑀺𑀲𑁆𑀲𑀢𑀺] 𑀲𑁂𑀮𑀦𑁆𑀢𑀁 𑀯𑀸 𑀉𑀤𑀓𑀦𑁆𑀢𑀁 𑀯𑀸 𑀭𑀫𑀡𑀻𑀬𑀁 𑀯𑀸 𑀪𑀽𑀫𑀺𑀪𑀸𑀕𑀁 𑀆𑀕𑀫𑁆𑀫 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸…𑀧𑁂… 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀧𑀼𑀭𑀺𑀲𑀕𑀢𑀺𑀬𑁄.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸, 𑀦 𑀪𑀯𑀺𑀲𑁆𑀲𑀢𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀺, 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁 𑀢𑀁 𑀧𑀚𑀳𑀸𑀫𑀻’𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑁄 𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀺, 𑀅𑀢𑁆𑀣𑀼𑀢𑁆𑀢𑀭𑀺 𑀧𑀤𑀁 𑀲𑀦𑁆𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀸𑀦𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀯𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺. 𑀲𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀧𑀼𑀭𑀺𑀲𑀕𑀢𑀺𑀬𑁄 𑀅𑀦𑀼𑀧𑀸𑀤𑀸 𑀘 𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀢𑀺𑀲𑁆𑀲𑀩𑁆𑀭𑀳𑁆𑀫𑀸𑀲𑀼𑀢𑁆𑀢𑀁

𑁫𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀤𑁆𑀯𑁂 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀫𑀼𑀢𑁆𑀢𑀸’’𑀢𑀺. 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀧𑀸𑀤𑀺𑀲𑁂𑀲𑀸 𑀲𑀼𑀯𑀺𑀫𑀼𑀢𑁆𑀢𑀸’’𑀢𑀺. 𑀇𑀤𑀫𑀯𑁄𑀘𑀼𑀁 𑀢𑀸 𑀤𑁂𑀯𑀢𑀸. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀣 𑀔𑁄 𑀢𑀸 𑀤𑁂𑀯𑀢𑀸 ‘‘𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀤𑁆𑀯𑁂 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀏𑀢𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀫𑀼𑀢𑁆𑀢𑀸’𑀢𑀺. 𑀅𑀧𑀭𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀏𑀢𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀧𑀸𑀤𑀺𑀲𑁂𑀲𑀸 𑀲𑀼𑀯𑀺𑀫𑀼𑀢𑁆𑀢𑀸’𑀢𑀺. 𑀇𑀤𑀫𑀯𑁄𑀘𑀼𑀁, 𑀪𑀺𑀓𑁆𑀔𑀯𑁂, 𑀢𑀸 𑀤𑁂𑀯𑀢𑀸. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀽’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀫𑁂𑀲𑀸𑀦𑀁 𑀔𑁄 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺? 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀺𑀲𑁆𑀲𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀥𑀼𑀦𑀸𑀓𑀸𑀮𑀗𑁆𑀓𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀢𑀢𑁆𑀭𑀸𑀧𑀺 𑀦𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘‘𑀢𑀺𑀲𑁆𑀲𑁄 𑀩𑁆𑀭𑀳𑁆𑀫𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑁋 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀤𑁆𑀤𑀲𑀸 𑀔𑁄 𑀢𑀺𑀲𑁆𑀲𑁄 𑀩𑁆𑀭𑀳𑁆𑀫𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦; 𑀲𑁆𑀯𑀸𑀕𑀢𑀁, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦! 𑀘𑀺𑀭𑀲𑁆𑀲𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺, 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀦𑀺𑀲𑀻𑀤, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀦𑀺𑀲𑀻𑀤𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀢𑀺𑀲𑁆𑀲𑁄𑀧𑀺 𑀔𑁄 𑀩𑁆𑀭𑀳𑁆𑀫𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀺𑀲𑁆𑀲𑀁 𑀩𑁆𑀭𑀳𑁆𑀫𑀸𑀦𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂𑀲𑀸𑀦𑀁 𑀔𑁄, 𑀢𑀺𑀲𑁆𑀲, 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺? ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺.

‘‘𑀲𑀩𑁆𑀩𑁂𑀲𑀜𑁆𑀜𑁂𑀯 𑀔𑁄, 𑀢𑀺𑀲𑁆𑀲, 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺? ‘‘𑀦 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀩𑁆𑀩𑁂𑀲𑀁 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺.

‘‘𑀬𑁂 𑀔𑁄 𑀢𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀩𑁆𑀭𑀳𑁆𑀫𑁂𑀦 𑀆𑀬𑀼𑀦𑀸 𑀲𑀦𑁆𑀢𑀼𑀝𑁆𑀞𑀸 𑀩𑁆𑀭𑀳𑁆𑀫𑁂𑀦 𑀯𑀡𑁆𑀡𑁂𑀦 𑀩𑁆𑀭𑀳𑁆𑀫𑁂𑀦 𑀲𑀼𑀔𑁂𑀦 𑀩𑁆𑀭𑀳𑁆𑀫𑁂𑀦 𑀬𑀲𑁂𑀦 𑀩𑁆𑀭𑀳𑁆𑀫𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀲𑀦𑁆𑀢𑀼𑀝𑁆𑀞𑀸, 𑀢𑁂 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺. 𑀢𑁂𑀲𑀁 𑀦 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’𑀢𑀺. 𑀬𑁂 𑀘 𑀔𑁄 𑀢𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀩𑁆𑀭𑀳𑁆𑀫𑁂𑀦 𑀆𑀬𑀼𑀦𑀸 𑀅𑀲𑀦𑁆𑀢𑀼𑀝𑁆𑀞𑀸, 𑀩𑁆𑀭𑀳𑁆𑀫𑁂𑀦 𑀯𑀡𑁆𑀡𑁂𑀦 𑀩𑁆𑀭𑀳𑁆𑀫𑁂𑀦 𑀲𑀼𑀔𑁂𑀦 𑀩𑁆𑀭𑀳𑁆𑀫𑁂𑀦 𑀬𑀲𑁂𑀦 𑀩𑁆𑀭𑀳𑁆𑀫𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀅𑀲𑀦𑁆𑀢𑀼𑀝𑁆𑀞𑀸, 𑀢𑁂 𑀘 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺.

‘‘𑀇𑀥, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀢𑀫𑁂𑀦𑀁 𑀢𑁂 𑀤𑁂𑀯𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀬𑀸𑀯𑀲𑁆𑀲 𑀓𑀸𑀬𑁄 𑀞𑀲𑁆𑀲𑀢𑀺 𑀢𑀸𑀯 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸. 𑀓𑀸𑀬𑀲𑁆𑀲 𑀪𑁂𑀤𑀸 𑀦 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁂𑀲𑀁 𑀤𑁂𑀯𑀸𑀦𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺.

‘‘𑀇𑀥 𑀧𑀦, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀢𑀫𑁂𑀦𑀁 𑀢𑁂 𑀤𑁂𑀯𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀬𑀸𑀯𑀲𑁆𑀲 𑀓𑀸𑀬𑁄 𑀞𑀲𑁆𑀲𑀢𑀺 𑀢𑀸𑀯 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸. 𑀓𑀸𑀬𑀲𑁆𑀲 𑀪𑁂𑀤𑀸 𑀦 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁂𑀲𑀁 𑀤𑁂𑀯𑀸𑀦𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺.

‘‘𑀇𑀥 𑀧𑀦, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺. 𑀢𑀫𑁂𑀦𑀁 𑀤𑁂𑀯𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀓𑀸𑀬𑀲𑀓𑁆𑀔𑀻. 𑀅𑀧𑁆𑀧𑁂𑀯 𑀦𑀸𑀫 𑀅𑀬𑀫𑀸𑀬𑀲𑁆𑀫𑀸 𑀅𑀦𑀼𑀮𑁄𑀫𑀺𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀫𑀸𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀦𑁆𑀦𑀸𑀦𑀬𑀫𑀸𑀦𑁄 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁂𑀲𑀁 𑀤𑁂𑀯𑀸𑀦𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺.

‘‘𑀇𑀥 𑀧𑀦, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺…𑀧𑁂… 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺…𑀧𑁂… 𑀥𑀫𑁆𑀫𑀸𑀦𑀼𑀲𑀸𑀭𑀻 𑀳𑁄𑀢𑀺. 𑀢𑀫𑁂𑀦𑀁 𑀢𑁂 𑀤𑁂𑀯𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀅𑀧𑁆𑀧𑁂𑀯 𑀦𑀸𑀫 𑀅𑀬𑀫𑀸𑀬𑀲𑁆𑀫𑀸 𑀅𑀦𑀼𑀮𑁄𑀫𑀺𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀫𑀸𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀦𑁆𑀦𑀸𑀦𑀬𑀫𑀸𑀦𑁄 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁂𑀲𑀁 𑀤𑁂𑀯𑀸𑀦𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀺𑀲𑁆𑀲𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀢𑀺𑀲𑁆𑀲𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

‘‘𑀦 𑀳𑀺 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀢𑀺𑀲𑁆𑀲𑁄 𑀩𑁆𑀭𑀳𑁆𑀫𑀸 𑀲𑀢𑁆𑀢𑀫𑀁 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀺𑀁 𑀧𑀼𑀕𑁆𑀕𑀮𑀁 𑀤𑁂𑀲𑁂𑀢𑀺’’. ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄! 𑀬𑀁 𑀪𑀕𑀯𑀸 𑀲𑀢𑁆𑀢𑀫𑀁 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀺𑀁 𑀧𑀼𑀕𑁆𑀕𑀮𑀁 𑀤𑁂𑀲𑁂𑀬𑁆𑀬. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀫𑁂𑀦𑀁 𑀢𑁂 𑀤𑁂𑀯𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀧𑁆𑀧𑁂𑀯 𑀦𑀸𑀫 𑀅𑀬𑀫𑀸𑀬𑀲𑁆𑀫𑀸 𑀅𑀦𑀼𑀮𑁄𑀫𑀺𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀫𑀸𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀦𑁆𑀦𑀸𑀦𑀬𑀫𑀸𑀦𑁄 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’𑀢𑀺. 𑀏𑀯𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁂𑀲𑀁 𑀤𑁂𑀯𑀸𑀦𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑀉𑀧𑀸𑀤𑀺𑀲𑁂𑀲𑁂 𑀯𑀸 𑀲𑀉𑀧𑀸𑀤𑀺𑀲𑁂𑀲𑁄𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑁄’’’𑀢𑀺. 𑀢𑀢𑀺𑀬𑀁.

𑁪. 𑀲𑀻𑀳𑀲𑁂𑀦𑀸𑀧𑀢𑀺𑀲𑀼𑀢𑁆𑀢𑀁

𑁫𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀓𑁆𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀤𑀸𑀦𑀨𑀮𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺?

‘‘𑀢𑁂𑀦 𑀳𑀺, 𑀲𑀻𑀳, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀇𑀥 𑀤𑁆𑀯𑁂 𑀧𑀼𑀭𑀺𑀲𑀸 𑁋 𑀏𑀓𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀏𑀓𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀓𑀁 𑀦𑀼 𑀔𑁄 [𑀓𑀺𑀁 𑀦𑀼 𑀔𑁄 (𑀓.)] 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑀸 𑀅𑀦𑀼𑀓𑀫𑁆𑀧𑁂𑀬𑁆𑀬𑀼𑀁 𑁋 ‘𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄’’’𑀢𑀺?

‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀓𑀺𑀦𑁆𑀢𑀁 [𑀓𑀺𑀦𑁆𑀢𑀺 (𑀓.)] 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑀸 𑀅𑀦𑀼𑀓𑀫𑁆𑀧𑀺𑀲𑁆𑀲𑀦𑁆𑀢𑀺! 𑀬𑁄 𑀘 𑀔𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄 𑀢𑀁𑀬𑁂𑀯 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑀸 𑀅𑀦𑀼𑀓𑀫𑁆𑀧𑁂𑀬𑁆𑀬𑀼𑀁’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀓𑀁 𑀦𑀼 𑀔𑁄 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑀸 𑀉𑀧𑀲𑀗𑁆𑀓𑀫𑁂𑀬𑁆𑀬𑀼𑀁 𑁋 ‘𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄’’’𑀢𑀺? ‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀓𑀺𑀦𑁆𑀢𑀁 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑀸 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺! 𑀬𑁄 𑀘 𑀔𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄 𑀢𑀁𑀬𑁂𑀯 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑀸 𑀉𑀧𑀲𑀗𑁆𑀓𑀫𑁂𑀬𑁆𑀬𑀼𑀁’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀓𑀲𑁆𑀲 𑀦𑀼 𑀔𑁄 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀼𑀁 𑁋 ‘𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄’’’𑀢𑀺? ‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀓𑀺𑀦𑁆𑀢𑀁 𑀢𑀲𑁆𑀲 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀺! 𑀬𑁄 𑀘 𑀔𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄 𑀢𑀲𑁆𑀲𑁂𑀯 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀼𑀁’’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀓𑀲𑁆𑀲 𑀦𑀼 𑀔𑁄 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀤𑁂𑀲𑁂𑀬𑁆𑀬𑀼𑀁 𑁋 ‘𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄’’’𑀢𑀺? ‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀓𑀺𑀦𑁆𑀢𑀁 𑀢𑀲𑁆𑀲 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀤𑁂𑀲𑁂𑀲𑁆𑀲𑀦𑁆𑀢𑀺! 𑀬𑁄 𑀘 𑀔𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄 𑀢𑀲𑁆𑀲𑁂𑀯 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀤𑁂𑀲𑁂𑀬𑁆𑀬𑀼𑀁’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀓𑀲𑁆𑀲 𑀦𑀼 𑀔𑁄 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑁂𑀬𑁆𑀬 𑁋 ‘𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄’’’𑀢𑀺? ‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀓𑀺𑀦𑁆𑀢𑀁 𑀢𑀲𑁆𑀲 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺𑀲𑁆𑀲𑀢𑀺! 𑀬𑁄 𑀘 𑀔𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄 𑀢𑀲𑁆𑀲𑁂𑀯 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑁂𑀬𑁆𑀬’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀓𑁄 𑀦𑀼 𑀔𑁄 𑀬𑀁𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑁂𑀬𑁆𑀬 𑀅𑀫𑀗𑁆𑀓𑀼𑀪𑀽𑀢𑁄 𑁋 ‘𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄’’’𑀢𑀺? ‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀓𑀺𑀁 𑀲𑁄 𑀬𑀁𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺, 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺 𑀅𑀫𑀗𑁆𑀓𑀼𑀪𑀽𑀢𑁄! 𑀬𑁄 𑀘 𑀔𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄 𑀲𑁄 𑀬𑀁𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑁂𑀬𑁆𑀬 𑀅𑀫𑀗𑁆𑀓𑀼𑀪𑀽𑀢𑁄’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀳, 𑀓𑁄 𑀦𑀼 𑀔𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬 𑁋 ‘𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀬𑁄 𑀯𑀸 𑀲𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄’’’𑀢𑀺? ‘‘𑀬𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄, 𑀓𑀺𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀺! 𑀬𑁄 𑀘 𑀔𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀤𑀸𑀦𑀧𑀢𑀺 𑀅𑀦𑀼𑀧𑁆𑀧𑀤𑀸𑀦𑀭𑀢𑁄 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬’’.

‘‘𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀦𑁆𑀤𑀺𑀝𑁆𑀞𑀺𑀓𑀸𑀦𑀺 𑀤𑀸𑀦𑀨𑀮𑀸𑀦𑀺 𑀅𑀓𑁆𑀔𑀸𑀢𑀸𑀦𑀺, 𑀦𑀸𑀳𑀁 𑀏𑀢𑁆𑀣 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺. 𑀅𑀳𑀫𑁆𑀧𑀺 𑀏𑀢𑀸𑀦𑀺 𑀚𑀸𑀦𑀸𑀫𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀫𑀁 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑀸 𑀅𑀦𑀼𑀓𑀫𑁆𑀧𑀦𑁆𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀫𑀁 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑀸 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀫𑀬𑁆𑀳𑀁 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀫𑀬𑁆𑀳𑀁 𑀅𑀭𑀳𑀦𑁆𑀢𑁄 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀤𑁂𑀲𑁂𑀦𑁆𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀫𑀬𑁆𑀳𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀻𑀳𑁄 𑀲𑁂𑀦𑀸𑀧𑀢𑀺 𑀤𑀸𑀬𑀓𑁄 𑀓𑀸𑀭𑀓𑁄 𑀲𑀗𑁆𑀖𑀼𑀧𑀝𑁆𑀞𑀸𑀓𑁄’𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀬𑀁𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀸𑀫𑀺, 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁…𑀧𑁂… 𑀬𑀤𑀺 𑀲𑀫𑀡𑀧𑀭𑀺𑀲𑀁 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀸𑀫𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀦𑁆𑀤𑀺𑀝𑁆𑀞𑀺𑀓𑀸𑀦𑀺 𑀤𑀸𑀦𑀨𑀮𑀸𑀦𑀺 𑀅𑀓𑁆𑀔𑀸𑀢𑀸𑀦𑀺, 𑀦𑀸𑀳𑀁 𑀏𑀢𑁆𑀣 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺. 𑀅𑀳𑀫𑁆𑀧𑀺 𑀏𑀢𑀸𑀦𑀺 𑀚𑀸𑀦𑀸𑀫𑀺. 𑀬𑀜𑁆𑀘 𑀔𑁄 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀤𑀸𑀬𑀓𑁄, 𑀲𑀻𑀳, 𑀤𑀸𑀦𑀧𑀢𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’𑀢𑀺. 𑀏𑀢𑀸𑀳𑀁 𑀦 𑀚𑀸𑀦𑀸𑀫𑀺, 𑀏𑀢𑁆𑀣 𑀘 𑀧𑀦𑀸𑀳𑀁, 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀻’’𑀢𑀺. ‘‘𑀏𑀯𑀫𑁂𑀢𑀁, 𑀲𑀻𑀳; 𑀏𑀯𑀫𑁂𑀢𑀁, 𑀲𑀻𑀳! 𑀤𑀸𑀬𑀓𑁄, 𑀲𑀻𑀳, 𑀤𑀸𑀦𑀧𑀢𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀭𑀓𑁆𑀔𑁂𑀬𑁆𑀬𑀲𑀼𑀢𑁆𑀢𑀁

𑁫𑁮. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺, 𑀢𑀻𑀳𑀺 𑀘 𑀅𑀦𑀼𑀧𑀯𑀚𑁆𑀚𑁄. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺? 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄; 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 𑁋 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄; 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 𑁋 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄; 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 𑁋 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄; 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀆𑀚𑀻𑀯𑁄 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 𑁋 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺.

‘‘𑀓𑀢𑀫𑁂𑀳𑀺 𑀢𑀻𑀳𑀺 𑀅𑀦𑀼𑀧𑀯𑀚𑁆𑀚𑁄? 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄. 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀺 𑁋 ‘𑀇𑀢𑀺𑀧𑀺 𑀢𑁆𑀯𑀁 𑀦 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑁄’𑀢𑀺. 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀏𑀢𑀫𑀳𑀁 [𑀏𑀢𑀁𑀧𑀳𑀁 (𑀲𑀻. 𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀺.

‘‘𑀲𑀼𑀧𑀜𑁆𑀜𑀢𑁆𑀢𑀸 𑀔𑁄 𑀧𑀦 𑀫𑁂, 𑀪𑀺𑀓𑁆𑀔𑀯𑁂, 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀬𑀣𑀸𑀧𑀝𑀺𑀧𑀦𑁆𑀦𑀸 𑀫𑀫 𑀲𑀸𑀯𑀓𑀸 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺. 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀺 𑁋 ‘𑀇𑀢𑀺𑀧𑀺 𑀢𑁂 𑀦 𑀲𑀼𑀧𑀜𑁆𑀜𑀢𑁆𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀬𑀣𑀸𑀧𑀝𑀺𑀧𑀦𑁆𑀦𑀸 𑀢𑀯 𑀲𑀸𑀯𑀓𑀸 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’𑀢𑀺. 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀺.

‘‘𑀅𑀦𑁂𑀓𑀲𑀢𑀸 𑀔𑁄 𑀧𑀦 𑀫𑁂, 𑀪𑀺𑀓𑁆𑀔𑀯𑁂, 𑀲𑀸𑀯𑀓𑀧𑀭𑀺𑀲𑀸 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺. 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀺 𑁋 ‘𑀇𑀢𑀺𑀧𑀺 𑀢𑁂 𑀦 𑀅𑀦𑁂𑀓𑀲𑀢𑀸 𑀲𑀸𑀯𑀓𑀧𑀭𑀺𑀲𑀸 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’𑀢𑀺. 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀺. 𑀇𑀫𑁂𑀳𑀺 𑀢𑀻𑀳𑀺 𑀅𑀦𑀼𑀧𑀯𑀚𑁆𑀚𑁄.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺, 𑀇𑀫𑁂𑀳𑀺 𑀘 𑀢𑀻𑀳𑀺 𑀅𑀦𑀼𑀧𑀯𑀚𑁆𑀚𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀓𑀺𑀫𑀺𑀮𑀲𑀼𑀢𑁆𑀢𑀁

𑁫𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀺𑀫𑀺𑀮𑀸𑀬𑀁 𑀯𑀺𑀳𑀭𑀢𑀺 𑀦𑀺𑀘𑀼𑀮𑀯𑀦𑁂 [𑀯𑁂𑀴𑀼𑀯𑀦𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀅. 𑀦𑀺. 𑁫.𑁨𑁦𑁨; 𑁭.𑁪𑁦]. 𑀅𑀣 𑀔𑁄 𑀆𑀬𑀲𑁆𑀫𑀸 𑀓𑀺𑀫𑀺𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺?

‘‘𑀇𑀥, 𑀓𑀺𑀫𑀺𑀮, 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀲𑀢𑁆𑀣𑀭𑀺 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀥𑀫𑁆𑀫𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀗𑁆𑀖𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀧𑀝𑀺𑀲𑀦𑁆𑀣𑀸𑀭𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸. 𑀅𑀬𑀁 𑀔𑁄, 𑀓𑀺𑀫𑀺𑀮, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺.

‘‘𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀓𑀺𑀫𑀺𑀮, 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀲𑀢𑁆𑀣𑀭𑀺 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀥𑀫𑁆𑀫𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀗𑁆𑀖𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀫𑀸𑀥𑀺𑀲𑁆𑀫𑀺𑀁 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀧𑀝𑀺𑀲𑀦𑁆𑀣𑀸𑀭𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸. 𑀅𑀬𑀁 𑀔𑁄, 𑀓𑀺𑀫𑀺𑀮, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀲𑀢𑁆𑀢𑀥𑀫𑁆𑀫𑀲𑀼𑀢𑁆𑀢𑀁

𑁬𑁦. ‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀘𑀺𑀭𑀲𑁆𑀲𑁂𑀯 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀝𑀺𑀲𑀮𑁆𑀮𑀻𑀦𑁄 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀲𑀢𑀺𑀫𑀸 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀘𑀺𑀭𑀲𑁆𑀲𑁂𑀯 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀧𑀘𑀮𑀸𑀬𑀫𑀸𑀦𑀲𑀼𑀢𑁆𑀢𑀁

𑁬𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀕𑀥𑁂𑀲𑀼 𑀓𑀮𑁆𑀮𑀯𑀸𑀴𑀧𑀼𑀢𑁆𑀢𑀕𑀸𑀫𑁂 [𑀓𑀮𑁆𑀮𑀯𑀸𑀮𑀫𑀼𑀢𑁆𑀢𑀕𑀸𑀫𑁂 (𑀲𑁆𑀬𑀸.)] 𑀧𑀘𑀮𑀸𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀫𑀕𑀥𑁂𑀲𑀼 𑀓𑀮𑁆𑀮𑀯𑀸𑀴𑀧𑀼𑀢𑁆𑀢𑀕𑀸𑀫𑁂 𑀧𑀘𑀮𑀸𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑁋 𑀪𑀕𑁆𑀕𑁂𑀲𑀼 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂 𑀅𑀦𑁆𑀢𑀭𑀳𑀺𑀢𑁄 𑀫𑀕𑀥𑁂𑀲𑀼 𑀓𑀮𑁆𑀮𑀯𑀸𑀴𑀧𑀼𑀢𑁆𑀢𑀕𑀸𑀫𑁂 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋

‘‘𑀧𑀘𑀮𑀸𑀬𑀲𑀺 𑀦𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀘𑀮𑀸𑀬𑀲𑀺 𑀦𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳, 𑀫𑁄𑀕𑁆𑀕𑀮𑁆𑀮𑀸𑀦, 𑀬𑀣𑀸𑀲𑀜𑁆𑀜𑀺𑀲𑁆𑀲 𑀢𑁂 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀢𑀁 𑀲𑀜𑁆𑀜𑀁 𑀫𑀸 𑀫𑀦𑀲𑀸𑀓𑀸𑀲𑀺 [𑀫𑀸 𑀫𑀦𑀲𑀺𑀓𑀸𑀲𑀺 (𑀲𑀻.), 𑀫𑀦𑀲𑀺 𑀓𑀭𑁂𑀬𑁆𑀬𑀸𑀲𑀺 (𑀲𑁆𑀬𑀸.), 𑀫𑀦𑀲𑀸𑀓𑀸𑀲𑀺 (𑀓.)], 𑀢𑀁 𑀲𑀜𑁆𑀜𑀁 𑀫𑀸 𑀩𑀳𑀼𑀮𑀫𑀓𑀸𑀲𑀺 [𑀢𑀁 𑀲𑀜𑁆𑀜𑀁 𑀩𑀳𑀼𑀮𑀁 𑀓𑀭𑁂𑀬𑁆𑀬𑀸𑀲𑀺 (𑀲𑁆𑀬𑀸.), 𑀢𑀁 𑀲𑀜𑁆𑀜𑀁 𑀩𑀳𑀼𑀮𑀫𑀓𑀸𑀲𑀺 (𑀓.)]. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣’’.

‘‘𑀦𑁄 𑀘𑁂 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣, 𑀢𑀢𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀬𑁆𑀬𑀸𑀲𑀺 𑀅𑀦𑀼𑀯𑀺𑀘𑀸𑀭𑁂𑀬𑁆𑀬𑀸𑀲𑀺, 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑁂𑀬𑁆𑀬𑀸𑀲𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣.

‘‘𑀦𑁄 𑀘𑁂 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣, 𑀢𑀢𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀲𑀚𑁆𑀛𑀸𑀬𑀁 𑀓𑀭𑁂𑀬𑁆𑀬𑀸𑀲𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣.

‘‘𑀦𑁄 𑀘𑁂 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣, 𑀢𑀢𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀉𑀪𑁄 𑀓𑀡𑁆𑀡𑀲𑁄𑀢𑀸𑀦𑀺 𑀆𑀯𑀺𑀜𑁆𑀙𑁂𑀬𑁆𑀬𑀸𑀲𑀺 [𑀆𑀯𑀺𑀜𑁆𑀚𑁂𑀬𑁆𑀬𑀸𑀲𑀺 (𑀲𑀻. 𑀲𑁆𑀬𑀸.)], 𑀧𑀸𑀡𑀺𑀦𑀸 𑀕𑀢𑁆𑀢𑀸𑀦𑀺 𑀅𑀦𑀼𑀫𑀚𑁆𑀚𑁂𑀬𑁆𑀬𑀸𑀲𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣.

‘‘𑀦𑁄 𑀘𑁂 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣, 𑀢𑀢𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀉𑀝𑁆𑀞𑀸𑀬𑀸𑀲𑀦𑀸 𑀉𑀤𑀓𑁂𑀦 𑀅𑀓𑁆𑀔𑀻𑀦𑀺 𑀅𑀦𑀼𑀫𑀚𑁆𑀚𑀺𑀢𑁆𑀯𑀸 [𑀧𑀦𑀺𑀜𑁆𑀚𑀺𑀢𑁆𑀯𑀸 (𑀓.)] 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀬𑁆𑀬𑀸𑀲𑀺, 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀉𑀮𑁆𑀮𑁄𑀓𑁂𑀬𑁆𑀬𑀸𑀲𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣.

‘‘𑀦𑁄 𑀘𑁂 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣, 𑀢𑀢𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀆𑀮𑁄𑀓𑀲𑀜𑁆𑀜𑀁 𑀫𑀦𑀲𑀺 𑀓𑀭𑁂𑀬𑁆𑀬𑀸𑀲𑀺, 𑀤𑀺𑀯𑀸𑀲𑀜𑁆𑀜𑀁 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀲𑀺 𑁋 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 [𑀯𑀺𑀯𑀝𑁆𑀝𑁂𑀦 (𑀲𑁆𑀬𑀸.), 𑀫𑀺𑀤𑁆𑀥𑀯𑀺𑀕𑀢𑁂𑀦 (𑀓.)] 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀬𑁆𑀬𑀸𑀲𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣.

‘‘𑀦𑁄 𑀘𑁂 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣, 𑀢𑀢𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 [𑀧𑀘𑁆𑀙𑀸𑀧𑀼𑀭𑁂 𑀢𑀣𑀸𑀲𑀜𑁆𑀜𑀻 (𑀓𑀢𑁆𑀣𑀘𑀺)] 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀲𑀺 𑀅𑀦𑁆𑀢𑁄𑀕𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀩𑀳𑀺𑀕𑀢𑁂𑀦 𑀫𑀸𑀦𑀲𑁂𑀦. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣.

‘‘𑀦𑁄 𑀘𑁂 𑀢𑁂 𑀏𑀯𑀁 𑀯𑀺𑀳𑀭𑀢𑁄 𑀢𑀁 𑀫𑀺𑀤𑁆𑀥𑀁 𑀧𑀳𑀻𑀬𑁂𑀣, 𑀢𑀢𑁄 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀧𑀝𑀺𑀩𑀼𑀤𑁆𑀥𑁂𑀦 𑀘 [𑀧𑀝𑀺𑀩𑀼𑀤𑁆𑀥𑁂𑀦𑁂𑀯 (𑀲𑁆𑀬𑀸.)] 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀔𑀺𑀧𑁆𑀧𑀜𑁆𑀜𑁂𑀯 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑀁 𑁋 ‘𑀦 𑀲𑁂𑀬𑁆𑀬𑀲𑀼𑀔𑀁 𑀦 𑀧𑀲𑁆𑀲𑀲𑀼𑀔𑀁 𑀦 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀏𑀯𑀜𑁆𑀳𑀺 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀫𑁄𑀕𑁆𑀕𑀮𑁆𑀮𑀸𑀦, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀉𑀘𑁆𑀘𑀸𑀲𑁄𑀡𑁆𑀟𑀁 𑀧𑀕𑁆𑀕𑀳𑁂𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’𑀢𑀺. 𑀏𑀯𑀜𑁆𑀳𑀺 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀉𑀘𑁆𑀘𑀸𑀲𑁄𑀡𑁆𑀟𑀁 𑀧𑀕𑁆𑀕𑀳𑁂𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺, 𑀲𑀦𑁆𑀢𑀺 𑀳𑀺, 𑀫𑁄𑀕𑁆𑀕𑀮𑁆𑀮𑀸𑀦, 𑀓𑀼𑀮𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀺. 𑀬𑁂𑀳𑀺 𑀫𑀦𑀼𑀲𑁆𑀲𑀸 𑀆𑀕𑀢𑀁 𑀪𑀺𑀓𑁆𑀔𑀼𑀁 𑀦 𑀫𑀦𑀲𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀭 𑀪𑀺𑀓𑁆𑀔𑀼𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑁄𑀲𑀼 𑀦𑀸𑀫 𑀇𑀤𑀸𑀦𑀺 𑀫𑀁 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀧𑀭𑀺𑀪𑀺𑀦𑁆𑀤𑀺, 𑀯𑀺𑀭𑀢𑁆𑀢𑀭𑀽𑀧𑀸 𑀤𑀸𑀦𑀺𑀫𑁂 𑀫𑀬𑀺 𑀫𑀦𑀼𑀲𑁆𑀲𑀸’𑀢𑀺. 𑀇𑀢𑀺𑀲𑁆𑀲 𑀅𑀮𑀸𑀪𑁂𑀦 𑀫𑀗𑁆𑀓𑀼𑀪𑀸𑀯𑁄, 𑀫𑀗𑁆𑀓𑀼𑀪𑀽𑀢𑀲𑁆𑀲 𑀉𑀤𑁆𑀥𑀘𑁆𑀘𑀁, 𑀉𑀤𑁆𑀥𑀢𑀲𑁆𑀲 𑀅𑀲𑀁𑀯𑀭𑁄, 𑀅𑀲𑀁𑀯𑀼𑀢𑀲𑁆𑀲 𑀆𑀭𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀫𑁆𑀳𑀸.

‘‘𑀢𑀲𑁆𑀫𑀸𑀢𑀺𑀳, 𑀫𑁄𑀕𑁆𑀕𑀮𑁆𑀮𑀸𑀦, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀓𑀣𑁂𑀲𑁆𑀲𑀸𑀫𑀻’𑀢𑀺. 𑀏𑀯𑀜𑁆𑀳𑀺 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀯𑀺𑀕𑁆𑀕𑀸𑀳𑀺𑀓𑀸𑀬, 𑀫𑁄𑀕𑁆𑀕𑀮𑁆𑀮𑀸𑀦, 𑀓𑀣𑀸𑀬 𑀲𑀢𑀺 𑀓𑀣𑀸𑀩𑀸𑀳𑀼𑀮𑁆𑀮𑀁 𑀧𑀸𑀝𑀺𑀓𑀗𑁆𑀔𑀁, 𑀓𑀣𑀸𑀩𑀸𑀳𑀼𑀮𑁆𑀮𑁂 𑀲𑀢𑀺 𑀉𑀤𑁆𑀥𑀘𑁆𑀘𑀁, 𑀉𑀤𑁆𑀥𑀢𑀲𑁆𑀲 𑀅𑀲𑀁𑀯𑀭𑁄, 𑀅𑀲𑀁𑀯𑀼𑀢𑀲𑁆𑀲 𑀆𑀭𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀫𑁆𑀳𑀸 [𑀦𑀸𑀳𑀁 𑀫𑁄𑀕𑁆𑀕𑀮𑀸𑀦 𑀲𑀩𑁆𑀩𑁂𑀳𑁂𑀯 𑀲𑀫𑀕𑁆𑀕𑀁 𑀯𑀡𑁆𑀡𑀬𑀸𑀫𑀺 𑀕𑀳𑀝𑁆𑀞𑁂𑀳𑀺. 𑀧𑀩𑁆𑀩𑀚𑀺𑀢𑁂𑀳𑀺 𑀔𑁄 𑀅𑀳𑀁 𑀫𑁄𑀕𑁆𑀕𑀮𑁆𑀮𑀸𑀦 𑀲𑀫𑀕𑁆𑀕𑀁 𑀯𑀡𑁆𑀡𑀬𑀸𑀫𑀺 (𑀓.)]. 𑀦𑀸𑀳𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀩𑁆𑀩𑁂𑀳𑁂𑀯 𑀲𑀁𑀲𑀕𑁆𑀕𑀁 𑀯𑀡𑁆𑀡𑀬𑀸𑀫𑀺. 𑀦 𑀧𑀦𑀸𑀳𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀩𑁆𑀩𑁂𑀳𑁂𑀯 𑀲𑀁𑀲𑀕𑁆𑀕𑀁 𑀦 𑀯𑀡𑁆𑀡𑀬𑀸𑀫𑀺. 𑀲𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀔𑁄 𑀅𑀳𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀁𑀲𑀕𑁆𑀕𑀁 𑀦 𑀯𑀡𑁆𑀡𑀬𑀸𑀫𑀺 [𑀦𑀸𑀳𑀁 𑀫𑁄𑀕𑁆𑀕𑀮𑁆𑀮𑀸𑀦 𑀲𑀩𑁆𑀩𑁂𑀳𑁂𑀯 𑀲𑀫𑀕𑁆𑀕𑀁 𑀯𑀡𑁆𑀡𑀬𑀸𑀫𑀺 𑀕𑀳𑀝𑁆𑀞𑁂𑀳𑀺, 𑀧𑀩𑁆𑀩𑀚𑀺𑀢𑁂𑀳𑀺 𑀔𑁄 𑀅𑀳𑀁 𑀫𑁄𑀕𑁆𑀕𑀮𑁆𑀮𑀸𑀦 𑀲𑀫𑀕𑁆𑀕𑀁 𑀯𑀡𑁆𑀡𑀬𑀸𑀫𑀺 (𑀓.)]. 𑀬𑀸𑀦𑀺 𑀘 𑀔𑁄 𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 [𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀸𑀦𑀺 (𑀲𑀻. 𑀲𑁆𑀬𑀸.)] 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺 𑀢𑀣𑀸𑀭𑀽𑀧𑁂𑀳𑀺 𑀲𑁂𑀦𑀸𑀲𑀦𑁂𑀳𑀺 𑀲𑀁𑀲𑀕𑁆𑀕𑀁 [𑀲𑀫𑀕𑁆𑀕𑀁 (𑀓.)] 𑀯𑀡𑁆𑀡𑀬𑀸𑀫𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺?

‘‘𑀇𑀥, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 𑁋 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺; 𑀏𑀯𑀜𑁆𑀘𑁂𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 𑁋 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺. 𑀲𑁄 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀺. 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀬𑀁𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸. 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀦 𑀓𑀺𑀜𑁆𑀘𑀺 [𑀦 𑀘 𑀓𑀺𑀜𑁆𑀘𑀺 (𑀲𑀻. 𑀲𑁆𑀬𑀸. 𑀓.) 𑀫. 𑀦𑀺. 𑁧.𑁩𑁯𑁦 𑀧𑀲𑁆𑀲𑀺𑀢𑀩𑁆𑀩𑀁] 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺, 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀪𑀺𑀓𑁆𑀔𑀼 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀫𑁂𑀢𑁆𑀢𑀲𑀼𑀢𑁆𑀢𑀁

𑁬𑁨. [𑀇𑀢𑀺𑀯𑀼. 𑁨𑁨 𑀇𑀢𑀺𑀯𑀼𑀢𑁆𑀢𑀓𑁂𑀧𑀺] ‘‘𑀫𑀸, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀦𑀁 𑀪𑀸𑀬𑀺𑀢𑁆𑀣. 𑀲𑀼𑀔𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 𑀧𑀼𑀜𑁆𑀜𑀸𑀦𑀺 [𑀬𑀤𑀺𑀤𑀁 𑀧𑀼𑀜𑁆𑀜𑀦𑁆𑀢𑀺 (𑀲𑀻.), 𑀬𑀤𑀺𑀤𑀁 𑀧𑀼𑀜𑁆𑀜𑀸𑀦𑀺 (𑀓.)]. 𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁 [𑀪𑀺𑀓𑁆𑀔𑀯𑁂 𑀤𑀻𑀖𑀭𑀢𑁆𑀢𑀁 𑀇𑀝𑁆𑀞𑀁 (𑀲𑁆𑀬𑀸.), 𑀪𑀺𑀓𑁆𑀔𑀯𑁂 𑀤𑀻𑀖𑀭𑀢𑁆𑀢𑀁 𑀧𑀼𑀜𑁆𑀜𑀸𑀦𑀁 𑀇𑀝𑁆𑀞𑀁 (?)], 𑀪𑀺𑀓𑁆𑀔𑀯𑁂, 𑀤𑀻𑀖𑀭𑀢𑁆𑀢𑀁 𑀓𑀢𑀸𑀦𑀁 𑀧𑀼𑀜𑁆𑀜𑀸𑀦𑀁 𑀤𑀻𑀖𑀭𑀢𑁆𑀢𑀁 𑀇𑀝𑁆𑀞𑀁 [𑀪𑀺𑀓𑁆𑀔𑀯𑁂 𑀤𑀻𑀖𑀭𑀢𑁆𑀢𑀁 𑀇𑀝𑁆𑀞𑀁 (𑀲𑁆𑀬𑀸.), 𑀪𑀺𑀓𑁆𑀔𑀯𑁂 𑀤𑀻𑀖𑀭𑀢𑁆𑀢𑀁 𑀧𑀼𑀜𑁆𑀜𑀸𑀦𑀁 𑀇𑀝𑁆𑀞𑀁 (?)] 𑀓𑀦𑁆𑀢𑀁 𑀫𑀦𑀸𑀧𑀁 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑀽𑀢𑀁. 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀪𑀸𑀯𑁂𑀲𑀺𑀁. 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀦𑀬𑀺𑀫𑀁 𑀮𑁄𑀓𑀁 𑀧𑀼𑀦𑀸𑀕𑀫𑀸𑀲𑀺𑀁. 𑀲𑀁𑀯𑀝𑁆𑀝𑀫𑀸𑀦𑁂 𑀲𑀼𑀤𑀸𑀳𑀁 [𑀲𑀁𑀯𑀝𑁆𑀝𑀫𑀸𑀦𑀲𑁆𑀲𑀼𑀤𑀸𑀳𑀁 (𑀓.)], 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀆𑀪𑀲𑁆𑀲𑀭𑀽𑀧𑀕𑁄 𑀳𑁄𑀫𑀺, 𑀯𑀺𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀲𑀼𑀜𑁆𑀜𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀸𑀫𑀺.

‘‘𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀳𑁄𑀫𑀺 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻. 𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀅𑀳𑁄𑀲𑀺𑀁 𑀤𑁂𑀯𑀸𑀦𑀫𑀺𑀦𑁆𑀤𑁄; 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀅𑀳𑁄𑀲𑀺𑀁 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺 𑀅𑀳𑁂𑀲𑀼𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁, 𑀳𑀢𑁆𑀣𑀺𑀭𑀢𑀦𑀁, 𑀅𑀲𑁆𑀲𑀭𑀢𑀦𑀁, 𑀫𑀡𑀺𑀭𑀢𑀦𑀁, 𑀇𑀢𑁆𑀣𑀺𑀭𑀢𑀦𑀁, 𑀕𑀳𑀧𑀢𑀺𑀭𑀢𑀦𑀁, 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀺’’𑀦𑁆𑀢𑀺 [𑀅𑀚𑁆𑀛𑀸𑀯𑀲𑀦𑁆𑀢𑀺 (𑀲𑁆𑀬𑀸.) 𑀅𑀚𑁆𑀛𑀸𑀯𑀲𑀢𑀺 (𑀲𑀻. 𑀓.)].

‘‘𑀧𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑀁, 𑀓𑀼𑀲𑀮𑀸𑀦𑀁 𑀲𑀼𑀔𑁂𑀲𑀺𑀦𑁄 [𑀲𑀼𑀔𑁂𑀲𑀺𑀦𑀁 (𑀲𑀻.)];

𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀯𑀺𑀪𑀸𑀯𑁂𑀢𑁆𑀯𑀸, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀯𑁄 [𑀪𑀺𑀓𑁆𑀔𑀯𑁂 (𑀓.)];

𑀲𑀢𑁆𑀢𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂, 𑀦𑀬𑀺𑀫𑀁 𑀮𑁄𑀓𑀁 𑀧𑀼𑀦𑀸𑀕𑀫𑀺𑀁 [𑀧𑀼𑀦𑀸𑀕𑀫𑀁 (𑀲𑁆𑀬𑀸.)].

‘‘𑀲𑀁𑀯𑀝𑁆𑀝𑀫𑀸𑀦𑁂 𑀮𑁄𑀓𑀫𑁆𑀳𑀺, 𑀳𑁄𑀫𑀺 𑀆𑀪𑀲𑁆𑀲𑀭𑀽𑀧𑀕𑁄;

𑀯𑀺𑀯𑀝𑁆𑀝𑀫𑀸𑀦𑁂 𑀮𑁄𑀓𑀲𑁆𑀫𑀺𑀁, 𑀲𑀼𑀜𑁆𑀜𑀩𑁆𑀭𑀳𑁆𑀫𑀽𑀧𑀕𑁄 𑀅𑀳𑀼𑀁.

‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀩𑁆𑀭𑀳𑁆𑀫𑀸, 𑀯𑀲𑀯𑀢𑁆𑀢𑀻 𑀢𑀤𑀸 𑀅𑀳𑀼𑀁;

𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

‘‘𑀘𑀓𑁆𑀓𑀯𑀢𑁆𑀢𑀻 𑀅𑀳𑀼𑀁 𑀭𑀸𑀚𑀸, 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 [𑀚𑀫𑁆𑀩𑀼𑀤𑀻𑀧𑀲𑁆𑀲 (𑀲𑀻.), 𑀚𑀫𑁆𑀩𑀼𑀲𑀡𑁆𑀟𑀲𑁆𑀲 (𑀲𑁆𑀬𑀸.)] 𑀇𑀲𑁆𑀲𑀭𑁄;

𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 [𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 (𑀓.)] 𑀔𑀢𑁆𑀢𑀺𑀬𑁄, 𑀫𑀦𑀼𑀲𑁆𑀲𑀸𑀥𑀺𑀧𑀢𑀻 𑀅𑀳𑀼𑀁.

‘‘𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦, 𑀯𑀺𑀚𑁂𑀬𑁆𑀬 𑀧𑀣𑀯𑀺𑀁 𑀇𑀫𑀁;

𑀅𑀲𑀸𑀳𑀲𑁂𑀦 𑀓𑀫𑁆𑀫𑁂𑀦 [𑀥𑀫𑁆𑀫𑁂𑀦 (𑀲𑀻. 𑀲𑁆𑀬𑀸.)], 𑀲𑀫𑁂𑀦 𑀅𑀦𑀼𑀲𑀸𑀲𑀺 𑀢𑀁.

‘‘𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂;

𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂, 𑀅𑀟𑁆𑀠𑁂 𑀅𑀚𑀸𑀬𑀺𑀳𑀁 𑀓𑀼𑀮𑁂.

‘‘𑀲𑀩𑁆𑀩𑀓𑀸𑀫𑁂𑀳𑀺 𑀲𑀫𑁆𑀧𑀦𑁆𑀦𑁂 [𑀲𑀫𑁆𑀧𑀼𑀡𑁆𑀡𑁂 (𑀓.)], 𑀭𑀢𑀦𑁂𑀳𑀺 𑀘 𑀲𑀢𑁆𑀢𑀳𑀺;

𑀩𑀼𑀤𑁆𑀥𑀸 𑀲𑀗𑁆𑀕𑀸𑀳𑀓𑀸 𑀮𑁄𑀓𑁂, 𑀢𑁂𑀳𑀺 𑀏𑀢𑀁 𑀲𑀼𑀤𑁂𑀲𑀺𑀢𑀁.

‘‘𑀏𑀲𑁄 𑀳𑁂𑀢𑀼 𑀫𑀳𑀦𑁆𑀢𑀲𑁆𑀲, 𑀧𑀣𑀩𑁆𑀬𑁄 𑀫𑁂 𑀦 𑀯𑀺𑀧𑀚𑁆𑀚𑀢𑀺 [𑀏𑀲 𑀳𑁂𑀢𑀼 𑀫𑀳𑀦𑁆𑀢𑀲𑁆𑀲, 𑀧𑀼𑀣𑀩𑁆𑀬𑁄 𑀬𑁂𑀦 𑀯𑀼𑀘𑁆𑀘𑀢𑀺 (𑀲𑀻. 𑀲𑁆𑀬𑀸.)];

𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄, 𑀭𑀸𑀚𑀸 𑀳𑁄𑀢𑀺 [𑀳𑁄𑀫𑀺 (𑀲𑀻. 𑀲𑁆𑀬𑀸.)] 𑀧𑀢𑀸𑀧𑀯𑀸.

‘‘𑀇𑀤𑁆𑀥𑀺𑀫𑀸 𑀬𑀲𑀯𑀸 𑀳𑁄𑀢𑀺 [𑀳𑁄𑀫𑀺 (𑀲𑀻. 𑀲𑁆𑀬𑀸.)], 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 [𑀚𑀫𑁆𑀩𑀼𑀲𑀡𑁆𑀟𑀲𑁆𑀲 (𑀲𑀻. 𑀲𑁆𑀬𑀸.)] 𑀇𑀲𑁆𑀲𑀭𑁄;

𑀓𑁄 𑀲𑀼𑀢𑁆𑀯𑀸 𑀦𑀧𑁆𑀧𑀲𑀻𑀤𑁂𑀬𑁆𑀬, 𑀅𑀧𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄.

‘‘𑀢𑀲𑁆𑀫𑀸 𑀳𑀺 𑀅𑀢𑁆𑀢𑀓𑀸𑀫𑁂𑀦 [𑀅𑀢𑁆𑀣𑀓𑀸𑀫𑁂𑀦 (𑀲𑁆𑀬𑀸. 𑀓.)], 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸;

𑀲𑀤𑁆𑀥𑀫𑁆𑀫𑁄 𑀕𑀭𑀼𑀓𑀸𑀢𑀩𑁆𑀩𑁄, 𑀲𑀭𑀁 𑀩𑀼𑀤𑁆𑀥𑀸𑀦𑀲𑀸𑀲𑀦’’𑀦𑁆𑀢𑀺. 𑀦𑀯𑀫𑀁;

𑁧𑁦. 𑀪𑀭𑀺𑀬𑀸𑀲𑀼𑀢𑁆𑀢𑀁

𑁬𑁩. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑁂 𑀫𑀦𑀼𑀲𑁆𑀲𑀸 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀢𑁂, 𑀕𑀳𑀧𑀢𑀺, 𑀦𑀺𑀯𑁂𑀲𑀦𑁂 𑀫𑀦𑀼𑀲𑁆𑀲𑀸 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂’’𑀢𑀺? ‘‘𑀅𑀬𑀁, 𑀪𑀦𑁆𑀢𑁂, 𑀲𑀼𑀚𑀸𑀢𑀸 𑀖𑀭𑀲𑀼𑀡𑁆𑀳𑀸 𑀅𑀟𑁆𑀠𑀓𑀼𑀮𑀸 𑀆𑀦𑀻𑀢𑀸. 𑀲𑀸 𑀦𑁂𑀯 𑀲𑀲𑁆𑀲𑀼𑀁 𑀆𑀤𑀺𑀬𑀢𑀺, 𑀦 𑀲𑀲𑀼𑀭𑀁 𑀆𑀤𑀺𑀬𑀢𑀺, 𑀦 𑀲𑀸𑀫𑀺𑀓𑀁 𑀆𑀤𑀺𑀬𑀢𑀺, 𑀪𑀕𑀯𑀦𑁆𑀢𑀫𑁆𑀧𑀺 𑀦 𑀲𑀓𑁆𑀓𑀭𑁄𑀢𑀺 𑀦 𑀕𑀭𑀼𑀁 𑀓𑀭𑁄𑀢𑀺 𑀦 𑀫𑀸𑀦𑁂𑀢𑀺 𑀦 𑀧𑀽𑀚𑁂𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀼𑀚𑀸𑀢𑀁 𑀖𑀭𑀲𑀼𑀡𑁆𑀳𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺, 𑀲𑀼𑀚𑀸𑀢𑁂’’𑀢𑀺! ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀼𑀚𑀸𑀢𑀸 𑀖𑀭𑀲𑀼𑀡𑁆𑀳𑀸 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀲𑀼𑀚𑀸𑀢𑀁 𑀖𑀭𑀲𑀼𑀡𑁆𑀳𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀢𑁆𑀢 𑀔𑁄 𑀇𑀫𑀸, 𑀲𑀼𑀚𑀸𑀢𑁂, 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸𑀬𑁄. 𑀓𑀢𑀫𑀸 𑀲𑀢𑁆𑀢? 𑀯𑀥𑀓𑀲𑀫𑀸, 𑀘𑁄𑀭𑀻𑀲𑀫𑀸, 𑀅𑀬𑁆𑀬𑀲𑀫𑀸, 𑀫𑀸𑀢𑀸𑀲𑀫𑀸, 𑀪𑀕𑀺𑀦𑀻𑀲𑀫𑀸, 𑀲𑀔𑀻𑀲𑀫𑀸, 𑀤𑀸𑀲𑀻𑀲𑀫𑀸. 𑀇𑀫𑀸 𑀔𑁄, 𑀲𑀼𑀚𑀸𑀢𑁂, 𑀲𑀢𑁆𑀢 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸𑀬𑁄. 𑀢𑀸𑀲𑀁 𑀢𑁆𑀯𑀁 𑀓𑀢𑀫𑀸’’𑀢𑀺? ‘‘𑀦 𑀔𑁄 𑀅𑀳𑀁 [𑀦𑀸𑀳𑀁 (𑀲𑁆𑀬𑀸.)], 𑀪𑀦𑁆𑀢𑁂, 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸𑀳𑀁 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀚𑀸𑀦𑁂𑀬𑁆𑀬’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀲𑀼𑀚𑀸𑀢𑁂, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀼𑀚𑀸𑀢𑀸 𑀖𑀭𑀲𑀼𑀡𑁆𑀳𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀻,

𑀅𑀜𑁆𑀜𑁂𑀲𑀼 𑀭𑀢𑁆𑀢𑀸 𑀅𑀢𑀺𑀫𑀜𑁆𑀜𑀢𑁂 𑀧𑀢𑀺𑀁;

𑀥𑀦𑁂𑀦 𑀓𑀻𑀢𑀲𑁆𑀲 𑀯𑀥𑀸𑀬 𑀉𑀲𑁆𑀲𑀼𑀓𑀸,

𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸;

‘𑀯𑀥𑀸 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺.

‘‘𑀬𑀁 𑀇𑀢𑁆𑀣𑀺𑀬𑀸 𑀯𑀺𑀦𑁆𑀤𑀢𑀺 𑀲𑀸𑀫𑀺𑀓𑁄 𑀥𑀦𑀁,

𑀲𑀺𑀧𑁆𑀧𑀁 𑀯𑀡𑀺𑀚𑁆𑀚𑀜𑁆𑀘 𑀓𑀲𑀺𑀁 𑀅𑀥𑀺𑀝𑁆𑀞𑀳𑀁;

𑀅𑀧𑁆𑀧𑀫𑁆𑀧𑀺 𑀢𑀲𑁆𑀲 𑀅𑀧𑀳𑀸𑀢𑀼𑀫𑀺𑀘𑁆𑀙𑀢𑀺,

𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸;

‘𑀘𑁄𑀭𑀻 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺.

‘‘𑀅𑀓𑀫𑁆𑀫𑀓𑀸𑀫𑀸 𑀅𑀮𑀲𑀸 𑀫𑀳𑀕𑁆𑀖𑀲𑀸,

𑀨𑀭𑀼𑀲𑀸 𑀘 𑀘𑀡𑁆𑀟𑀻 𑀤𑀼𑀭𑀼𑀢𑁆𑀢𑀯𑀸𑀤𑀺𑀦𑀻;

𑀉𑀝𑁆𑀞𑀸𑀬𑀓𑀸𑀦𑀁 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀺,

𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸;

‘𑀅𑀬𑁆𑀬𑀸 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺.

‘‘𑀬𑀸 𑀲𑀩𑁆𑀩𑀤𑀸 𑀳𑁄𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀻,

𑀫𑀸𑀢𑀸𑀯 𑀧𑀼𑀢𑁆𑀢𑀁 𑀅𑀦𑀼𑀭𑀓𑁆𑀔𑀢𑁂 𑀧𑀢𑀺𑀁;

𑀢𑀢𑁄 𑀥𑀦𑀁 𑀲𑀫𑁆𑀪𑀢𑀫𑀲𑁆𑀲 𑀭𑀓𑁆𑀔𑀢𑀺,

𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸;

‘𑀫𑀸𑀢𑀸 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺.

‘‘𑀬𑀣𑀸𑀧𑀺 𑀚𑁂𑀝𑁆𑀞𑀸 𑀪𑀕𑀺𑀦𑀻 𑀓𑀦𑀺𑀝𑁆𑀞𑀓𑀸 [𑀓𑀡𑀺𑀝𑁆𑀞𑀸 (𑀲𑀻.), 𑀓𑀦𑀺𑀝𑁆𑀞𑀸 (𑀲𑁆𑀬𑀸.)],

𑀲𑀕𑀸𑀭𑀯𑀸 𑀳𑁄𑀢𑀺 𑀲𑀓𑀫𑁆𑀳𑀺 𑀲𑀸𑀫𑀺𑀓𑁂;

𑀳𑀺𑀭𑀻𑀫𑀦𑀸 𑀪𑀢𑁆𑀢𑀼𑀯𑀲𑀸𑀦𑀼𑀯𑀢𑁆𑀢𑀺𑀦𑀻,

𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸;‘𑀪𑀕𑀺𑀦𑀻 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺.

‘‘𑀬𑀸𑀘𑀻𑀥 𑀤𑀺𑀲𑁆𑀯𑀸𑀦 𑀧𑀢𑀺𑀁 𑀧𑀫𑁄𑀤𑀢𑀺,

𑀲𑀔𑀻 𑀲𑀔𑀸𑀭𑀁𑀯 𑀘𑀺𑀭𑀲𑁆𑀲𑀫𑀸𑀕𑀢𑀁;

𑀓𑁄𑀮𑁂𑀬𑁆𑀬𑀓𑀸 𑀲𑀻𑀮𑀯𑀢𑀻 𑀧𑀢𑀺𑀩𑁆𑀩𑀢𑀸,

𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸;

‘𑀲𑀔𑀻 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺.

‘‘𑀅𑀓𑁆𑀓𑀼𑀤𑁆𑀥𑀲𑀦𑁆𑀢𑀸 𑀯𑀥𑀤𑀡𑁆𑀟𑀢𑀚𑁆𑀚𑀺𑀢𑀸,

𑀅𑀤𑀼𑀝𑁆𑀞𑀘𑀺𑀢𑁆𑀢𑀸 𑀧𑀢𑀺𑀦𑁄 𑀢𑀺𑀢𑀺𑀓𑁆𑀔𑀢𑀺;

𑀅𑀓𑁆𑀓𑁄𑀥𑀦𑀸 𑀪𑀢𑁆𑀢𑀼𑀯𑀲𑀸𑀦𑀼𑀯𑀢𑁆𑀢𑀺𑀦𑀻,

𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸;

‘𑀤𑀸𑀲𑀻 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺.

‘‘𑀬𑀸𑀘𑀻𑀥 𑀪𑀭𑀺𑀬𑀸 𑀯𑀥𑀓𑀸𑀢𑀺 𑀯𑀼𑀘𑁆𑀘𑀢𑀺,

‘𑀘𑁄𑀭𑀻 𑀘 𑀅𑀬𑁆𑀬𑀸’𑀢𑀺 𑀘 𑀬𑀸 𑀧𑀯𑀼𑀘𑁆𑀘𑀢𑀺;

𑀤𑀼𑀲𑁆𑀲𑀻𑀮𑀭𑀽𑀧𑀸 𑀨𑀭𑀼𑀲𑀸 𑀅𑀦𑀸𑀤𑀭𑀸,

𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺 𑀢𑀸.

‘‘𑀬𑀸𑀘𑀻𑀥 𑀫𑀸𑀢𑀸 𑀪𑀕𑀺𑀦𑀻 𑀲𑀔𑀻𑀢𑀺 𑀘,

‘𑀤𑀸𑀲𑀻 𑀘 𑀪𑀭𑀺𑀬𑀸’𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺;

𑀲𑀻𑀮𑁂 𑀞𑀺𑀢𑀢𑁆𑀢𑀸 𑀘𑀺𑀭𑀭𑀢𑁆𑀢𑀲𑀁𑀯𑀼𑀢𑀸,

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺 𑀢𑀸’’𑀢𑀺.

‘‘𑀇𑀫𑀸 𑀔𑁄, 𑀲𑀼𑀚𑀸𑀢𑁂, 𑀲𑀢𑁆𑀢 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸𑀬𑁄. 𑀢𑀸𑀲𑀁 𑀢𑁆𑀯𑀁 𑀓𑀢𑀫𑀸’’𑀢𑀺? ‘‘𑀅𑀚𑁆𑀚𑀢𑀕𑁆𑀕𑁂 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀤𑀸𑀲𑀻𑀲𑀫𑀁 𑀲𑀸𑀫𑀺𑀓𑀲𑁆𑀲 𑀪𑀭𑀺𑀬𑀁 𑀥𑀸𑀭𑁂𑀢𑀽’’𑀢𑀺. 𑀤𑀲𑀫𑀁.

𑁧𑁧. 𑀓𑁄𑀥𑀦𑀲𑀼𑀢𑁆𑀢𑀁

𑁬𑁪. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀧𑀢𑁆𑀢𑀓𑀦𑁆𑀢𑀸 𑀲𑀧𑀢𑁆𑀢𑀓𑀭𑀡𑀸 𑀓𑁄𑀥𑀦𑀁 𑀆𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀓𑀢𑀫𑁂 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀤𑀼𑀩𑁆𑀩𑀡𑁆𑀡𑁄 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀯𑀡𑁆𑀡𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁 [𑀓𑁄𑀥𑀦𑀸𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀓𑀺𑀜𑁆𑀘𑀸𑀧𑀺 𑀲𑁄 𑀳𑁄𑀢𑀺 𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼 𑀑𑀤𑀸𑀢𑀯𑀢𑁆𑀣𑀯𑀲𑀦𑁄 [𑀑𑀤𑀸𑀢𑀯𑀲𑀦𑁄 (𑀓.)]; 𑀅𑀣 𑀔𑁄 𑀲𑁄 𑀤𑀼𑀩𑁆𑀩𑀡𑁆𑀡𑁄𑀯 𑀳𑁄𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀲𑀼𑀔𑀲𑁂𑀬𑁆𑀬𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀓𑀺𑀜𑁆𑀘𑀸𑀧𑀺 𑀲𑁄 𑀧𑀮𑁆𑀮𑀗𑁆𑀓𑁂 𑀲𑁂𑀢𑀺 𑀕𑁄𑀦𑀓𑀢𑁆𑀣𑀢𑁂 𑀧𑀝𑀮𑀺𑀓𑀢𑁆𑀣𑀢𑁂 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁂 𑀲𑀉𑀢𑁆𑀢𑀭𑀘𑁆𑀙𑀤𑁂 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁂; 𑀅𑀣 𑀔𑁄 𑀲𑁄 𑀤𑀼𑀓𑁆𑀔𑀜𑁆𑀜𑁂𑀯 𑀲𑁂𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀧𑀘𑀼𑀭𑀢𑁆𑀣𑁄 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀧𑀘𑀼𑀭𑀢𑁆𑀣𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀅𑀦𑀢𑁆𑀣𑀫𑁆𑀧𑀺 𑀕𑀳𑁂𑀢𑁆𑀯𑀸 ‘𑀅𑀢𑁆𑀣𑁄 𑀫𑁂 𑀕𑀳𑀺𑀢𑁄’𑀢𑀺 𑀫𑀜𑁆𑀜𑀢𑀺, 𑀅𑀢𑁆𑀣𑀫𑁆𑀧𑀺 𑀕𑀳𑁂𑀢𑁆𑀯𑀸 ‘𑀅𑀦𑀢𑁆𑀣𑁄 𑀫𑁂 𑀕𑀳𑀺𑀢𑁄’𑀢𑀺 𑀫𑀜𑁆𑀜𑀢𑀺. 𑀢𑀲𑁆𑀲𑀺𑀫𑁂 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀘𑁆𑀘𑀦𑀻𑀓𑀸 𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀓𑁄𑀥𑀸𑀪𑀺𑀪𑀽𑀢𑀲𑁆𑀲. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀪𑁄𑀕𑀯𑀸 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀪𑁄𑀕𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑀸𑀪𑀺𑀪𑀽𑀢𑀲𑁆𑀲 𑀓𑁄𑀥𑀧𑀭𑁂𑀢𑀲𑁆𑀲, 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀪𑁄𑀕𑀸 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀸 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑀸 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸, 𑀢𑁂𑀧𑀺 𑀭𑀸𑀚𑀸𑀦𑁄 𑀭𑀸𑀚𑀓𑁄𑀲𑀁 𑀧𑀯𑁂𑀲𑁂𑀦𑁆𑀢𑀺 𑀓𑁄𑀥𑀸𑀪𑀺𑀪𑀽𑀢𑀲𑁆𑀲. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀬𑀲𑀯𑀸 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀬𑀲𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄, 𑀬𑁄𑀧𑀺𑀲𑁆𑀲 𑀲𑁄 𑀳𑁄𑀢𑀺 𑀬𑀲𑁄 𑀅𑀧𑁆𑀧𑀫𑀸𑀤𑀸𑀥𑀺𑀕𑀢𑁄, 𑀢𑀫𑁆𑀳𑀸𑀧𑀺 𑀥𑀁𑀲𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀦 𑀫𑀺𑀢𑁆𑀢𑀯𑀸 𑀅𑀲𑁆𑀲𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀫𑀺𑀢𑁆𑀢𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀓𑁄𑀥𑀸𑀪𑀺𑀪𑀽𑀢𑀁 𑀓𑁄𑀥𑀧𑀭𑁂𑀢𑀁, 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀢𑁂𑀧𑀺 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑁆𑀢𑀺 𑀓𑁄𑀥𑀸𑀪𑀺𑀪𑀽𑀢𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀙𑀝𑁆𑀞𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄 𑀯𑀢𑀸𑀬𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’𑀢𑀺! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀲𑀼𑀕𑀢𑀺𑀕𑀫𑀦𑁂 𑀦𑀦𑁆𑀤𑀢𑀺. 𑀓𑁄𑀥𑀦𑁄𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬…𑀧𑁂… 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀫𑁆𑀫𑀸 𑀲𑀧𑀢𑁆𑀢𑀓𑀦𑁆𑀢𑀸 𑀲𑀧𑀢𑁆𑀢𑀓𑀭𑀡𑀸 𑀓𑁄𑀥𑀦𑀁 𑀆𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸’’𑀢𑀺.

‘‘𑀓𑁄𑀥𑀦𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺, 𑀅𑀣𑁄 𑀤𑀼𑀓𑁆𑀔𑀫𑁆𑀧𑀺 𑀲𑁂𑀢𑀺 𑀲𑁄;

𑀅𑀣𑁄 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀦, 𑀅𑀦𑀢𑁆𑀣𑀁 𑀅𑀥𑀺𑀧𑀚𑁆𑀚𑀢𑀺 [𑀅𑀥𑀺𑀕𑀘𑁆𑀙𑀢𑀺 (𑀲𑀻.), 𑀧𑀝𑀺𑀧𑀚𑁆𑀚𑀢𑀺 (𑀲𑁆𑀬𑀸.)].