𑁭. 𑀫𑀳𑀸𑀯𑀕𑁆𑀕𑁄

𑁧. 𑀳𑀺𑀭𑀻𑀑𑀢𑁆𑀢𑀧𑁆𑀧𑀲𑀼𑀢𑁆𑀢𑀁

𑁬𑁫. [𑀅. 𑀦𑀺. 𑁫.𑁨𑁪, 𑁧𑁬𑁮; 𑁨.𑁬.𑁫𑁦] ‘‘𑀳𑀺𑀭𑁄𑀢𑁆𑀢𑀧𑁆𑀧𑁂, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄; 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀅𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀻𑀮𑀁; 𑀲𑀻𑀮𑁂 𑀅𑀲𑀢𑀺 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺; 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀅𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁; 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀅𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄; 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁂 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀯𑀺𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺 𑀨𑁂𑀕𑁆𑀕𑀼𑀧𑀺 𑀲𑀸𑀭𑁄𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀳𑀺𑀭𑁄𑀢𑁆𑀢𑀧𑁆𑀧𑁂 𑀅𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄; 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀅𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀻𑀮𑀁; 𑀲𑀻𑀮𑁂 𑀅𑀲𑀢𑀺 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺; 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀅𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁; 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀅𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄; 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁂 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀳𑀺𑀭𑁄𑀢𑁆𑀢𑀧𑁆𑀧𑁂, 𑀪𑀺𑀓𑁆𑀔𑀯𑁂, 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄; 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀲𑀻𑀮𑀁; 𑀲𑀻𑀮𑁂 𑀲𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺; 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁; 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄; 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁂 𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺 𑀨𑁂𑀕𑁆𑀕𑀼𑀧𑀺 𑀲𑀸𑀭𑁄𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀳𑀺𑀭𑁄𑀢𑁆𑀢𑀧𑁆𑀧𑁂 𑀲𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺. 𑀧𑀞𑀫𑀁.

𑁨. 𑀲𑀢𑁆𑀢𑀲𑀽𑀭𑀺𑀬𑀲𑀼𑀢𑁆𑀢𑀁

𑁬𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀅𑀫𑁆𑀩𑀧𑀸𑀮𑀺𑀯𑀦𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀅𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀅𑀦𑀲𑁆𑀲𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀲𑀺𑀦𑁂𑀭𑀼, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀸 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀆𑀬𑀸𑀫𑁂𑀦, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀯𑀺𑀢𑁆𑀣𑀸𑀭𑁂𑀦, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑁂 𑀅𑀚𑁆𑀛𑁄𑀕𑀸𑀴𑁆𑀳𑁄, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑀸 𑀅𑀘𑁆𑀘𑀼𑀕𑁆𑀕𑀢𑁄. 𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑀢𑀺. 𑀤𑁂𑀯𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀯𑀲𑁆𑀲𑀦𑁆𑀢𑁂 𑀬𑁂 𑀓𑁂𑀘𑀺𑀫𑁂 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀬𑁄 𑀢𑁂 𑀉𑀲𑁆𑀲𑀼𑀲𑁆𑀲𑀦𑁆𑀢𑀺 𑀯𑀺𑀲𑀼𑀲𑁆𑀲𑀦𑁆𑀢𑀺, 𑀦 𑀪𑀯𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀤𑀼𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀤𑀼𑀢𑀺𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀬𑀸 𑀓𑀸𑀘𑀺 𑀓𑀼𑀦𑁆𑀦𑀤𑀺𑀬𑁄 𑀓𑀼𑀲𑁄𑀩𑁆𑀪𑀸 [𑀓𑀼𑀲𑁆𑀲𑀼𑀩𑁆𑀪𑁄 (𑀲𑀻.), 𑀓𑀼𑀲𑁆𑀲𑁄𑀩𑁆𑀪𑀸 (𑀲𑁆𑀬𑀸.)] 𑀢𑀸 𑀉𑀲𑁆𑀲𑀼𑀲𑁆𑀲𑀦𑁆𑀢𑀺 𑀯𑀺𑀲𑀼𑀲𑁆𑀲𑀦𑁆𑀢𑀺, 𑀦 𑀪𑀯𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀢𑀢𑀺𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀬𑀸 𑀓𑀸𑀘𑀺 𑀫𑀳𑀸𑀦𑀤𑀺𑀬𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻, 𑀢𑀸 𑀉𑀲𑁆𑀲𑀼𑀲𑁆𑀲𑀦𑁆𑀢𑀺 𑀯𑀺𑀲𑀼𑀲𑁆𑀲𑀦𑁆𑀢𑀺, 𑀦 𑀪𑀯𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀘𑀢𑀼𑀢𑁆𑀣𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀘𑀢𑀼𑀢𑁆𑀣𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀬𑁂 𑀢𑁂 𑀫𑀳𑀸𑀲𑀭𑀸 𑀬𑀢𑁄 𑀇𑀫𑀸 𑀫𑀳𑀸𑀦𑀤𑀺𑀬𑁄 𑀧𑀯𑀢𑁆𑀢𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀦𑁄𑀢𑀢𑁆𑀢𑀸, 𑀲𑀻𑀳𑀧𑀧𑀸𑀢𑀸, 𑀭𑀣𑀓𑀸𑀭𑀸, 𑀓𑀡𑁆𑀡𑀫𑀼𑀡𑁆𑀟𑀸, 𑀓𑀼𑀡𑀸𑀮𑀸, 𑀙𑀤𑁆𑀤𑀦𑁆𑀢𑀸, 𑀫𑀦𑁆𑀤𑀸𑀓𑀺𑀦𑀺𑀬𑀸, 𑀢𑀸 𑀉𑀲𑁆𑀲𑀼𑀲𑁆𑀲𑀦𑁆𑀢𑀺 𑀯𑀺𑀲𑀼𑀲𑁆𑀲𑀦𑁆𑀢𑀺, 𑀦 𑀪𑀯𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀧𑀜𑁆𑀘𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀧𑀜𑁆𑀘𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀸𑀦𑀺 𑀑𑀕𑀘𑁆𑀙𑀦𑁆𑀢𑀺, 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀸𑀦𑀺 𑀑𑀕𑀘𑁆𑀙𑀦𑁆𑀢𑀺, 𑀢𑀺𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺, 𑀘𑀢𑀼𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺, 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺, 𑀙𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺, 𑀲𑀢𑁆𑀢𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀸𑀦𑀺 𑀑𑀕𑀘𑁆𑀙𑀦𑁆𑀢𑀺; 𑀲𑀢𑁆𑀢𑀢𑀸𑀮𑀫𑁆𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀲𑀡𑁆𑀞𑀸𑀢𑀺, 𑀙𑀢𑀸𑀮𑀫𑁆𑀧𑀺, 𑀧𑀜𑁆𑀘𑀢𑀸𑀮𑀫𑁆𑀧𑀺, 𑀘𑀢𑀼𑀢𑀸𑀮𑀫𑁆𑀧𑀺, 𑀢𑀺𑀢𑀸𑀮𑀫𑁆𑀧𑀺, 𑀤𑁆𑀯𑀺𑀢𑀸𑀮𑀫𑁆𑀧𑀺, 𑀢𑀸𑀮𑀫𑀢𑁆𑀢𑀫𑁆𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀲𑀡𑁆𑀞𑀸𑀢𑀺; 𑀲𑀢𑁆𑀢𑀧𑁄𑀭𑀺𑀲𑀫𑁆𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀲𑀡𑁆𑀞𑀸𑀢𑀺, 𑀙𑀧𑁄𑀭𑀺𑀲𑀫𑁆𑀧𑀺, 𑀧𑀜𑁆𑀘𑀧𑁄𑀭𑀺𑀲𑀫𑁆𑀧𑀺, 𑀘𑀢𑀼𑀧𑁄𑀭𑀺𑀲𑀫𑁆𑀧𑀺, 𑀢𑀺𑀧𑁄𑀭𑀺𑀲𑀫𑁆𑀧𑀺, 𑀤𑁆𑀯𑀺𑀧𑁄𑀭𑀺𑀲𑀫𑁆𑀧𑀺, 𑀧𑁄𑀭𑀺𑀲𑀫𑁆𑀧𑀺 [𑀧𑁄𑀭𑀺𑀲𑀫𑀢𑁆𑀢𑀫𑁆𑀧𑀺 (𑀲𑁆𑀬𑀸.)], 𑀅𑀟𑁆𑀠𑀧𑁄𑀭𑀺𑀲𑀫𑁆𑀧𑀺, 𑀓𑀝𑀺𑀫𑀢𑁆𑀢𑀫𑁆𑀧𑀺, 𑀚𑀡𑁆𑀡𑀼𑀓𑀸𑀫𑀢𑁆𑀢𑀫𑁆𑀧𑀺, 𑀕𑁄𑀧𑁆𑀨𑀓𑀫𑀢𑁆𑀢𑀫𑁆𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀭𑀤𑀲𑀫𑀬𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀕𑁄𑀧𑀤𑁂𑀲𑀼 [𑀕𑁄𑀧𑁆𑀨𑀓𑀧𑀤𑁂𑀲𑁂𑀲𑀼 (𑀓.)] 𑀉𑀤𑀓𑀸𑀦𑀺 𑀞𑀺𑀢𑀸𑀦𑀺 𑀳𑁄𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀢𑁆𑀣 𑀢𑀢𑁆𑀣 𑀕𑁄𑀧𑁆𑀨𑀓𑀫𑀢𑁆𑀢𑀸𑀦𑀺 [𑀕𑁄𑀧𑀤𑀫𑀢𑁆𑀢𑀸𑀦𑀺 (𑀲𑀻. 𑀲𑁆𑀬𑀸.)] 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀸𑀦𑀺 𑀞𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀜𑁆𑀘𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀗𑁆𑀕𑀼𑀮𑀺𑀧𑀩𑁆𑀩𑀫𑀢𑁆𑀢𑀫𑁆𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀦 𑀳𑁄𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀙𑀝𑁆𑀞𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀙𑀝𑁆𑀞𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀥𑀽𑀫𑀸𑀬𑀦𑁆𑀢𑀺 𑀲𑀁𑀥𑀽𑀫𑀸𑀬𑀦𑁆𑀢𑀺 𑀲𑀫𑁆𑀧𑀥𑀽𑀫𑀸𑀬𑀦𑁆𑀢𑀺 [𑀥𑀽𑀧𑀸𑀬𑀦𑁆𑀢𑀺 𑀲𑀦𑁆𑀥𑀽𑀧𑀸𑀬𑀦𑁆𑀢𑀺 𑀲𑀫𑁆𑀧𑀥𑀽𑀧𑀸𑀬𑀦𑁆𑀢𑀺 (𑀲𑀻. 𑀲𑁆𑀬𑀸.)]. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀫𑁆𑀪𑀓𑀸𑀭𑀧𑀸𑀓𑁄 𑀆𑀮𑁂𑀧𑀺𑀢𑁄 [𑀆𑀮𑀺𑀫𑁆𑀧𑀺𑀢𑁄 (𑀲𑀻. 𑀲𑁆𑀬𑀸.)] 𑀧𑀞𑀫𑀁 𑀥𑀽𑀫𑁂𑀢𑀺 𑀲𑀁𑀥𑀽𑀫𑁂𑀢𑀺 𑀲𑀫𑁆𑀧𑀥𑀽𑀫𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀙𑀝𑁆𑀞𑀲𑁆𑀲 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀥𑀽𑀫𑀸𑀬𑀦𑁆𑀢𑀺 𑀲𑀁𑀥𑀽𑀫𑀸𑀬𑀦𑁆𑀢𑀺 𑀲𑀫𑁆𑀧𑀥𑀽𑀫𑀸𑀬𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀲𑀢𑁆𑀢𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀲𑀢𑁆𑀢𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀽𑀭𑀺𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀆𑀤𑀺𑀧𑁆𑀧𑀦𑁆𑀢𑀺 𑀧𑀚𑁆𑀚𑀮𑀦𑁆𑀢𑀺 𑀏𑀓𑀚𑀸𑀮𑀸 𑀪𑀯𑀦𑁆𑀢𑀺. 𑀇𑀫𑀺𑀲𑁆𑀲𑀸 𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀣𑀯𑀺𑀬𑀸 𑀲𑀺𑀦𑁂𑀭𑀼𑀲𑁆𑀲 𑀘 𑀧𑀩𑁆𑀩𑀢𑀭𑀸𑀚𑀲𑁆𑀲 𑀛𑀸𑀬𑀫𑀸𑀦𑀸𑀦𑀁 𑀤𑀬𑁆𑀳𑀫𑀸𑀦𑀸𑀦𑀁 𑀅𑀘𑁆𑀘𑀺 𑀯𑀸𑀢𑁂𑀦 𑀔𑀺𑀢𑁆𑀢𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀕𑀘𑁆𑀙𑀢𑀺. 𑀲𑀺𑀦𑁂𑀭𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀲𑁆𑀲 𑀛𑀸𑀬𑀫𑀸𑀦𑀲𑁆𑀲 𑀤𑀬𑁆𑀳𑀫𑀸𑀦𑀲𑁆𑀲 𑀯𑀺𑀦𑀲𑁆𑀲𑀫𑀸𑀦𑀲𑁆𑀲 𑀫𑀳𑀢𑀸 𑀢𑁂𑀚𑁄𑀔𑀦𑁆𑀥𑁂𑀦 𑀅𑀪𑀺𑀪𑀽𑀢𑀲𑁆𑀲 𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺 𑀓𑀽𑀝𑀸𑀦𑀺 𑀧𑀮𑀼𑀚𑁆𑀚𑀦𑁆𑀢𑀺 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺, 𑀢𑀺𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺, 𑀘𑀢𑀼𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺, 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀺 𑀓𑀽𑀝𑀸𑀦𑀺 𑀧𑀮𑀼𑀚𑁆𑀚𑀦𑁆𑀢𑀺. 𑀇𑀫𑀺𑀲𑁆𑀲𑀸 𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀣𑀯𑀺𑀬𑀸 𑀲𑀺𑀦𑁂𑀭𑀼𑀲𑁆𑀲 𑀘 𑀧𑀩𑁆𑀩𑀢𑀭𑀸𑀚𑀲𑁆𑀲 𑀛𑀸𑀬𑀫𑀸𑀦𑀸𑀦𑀁 𑀤𑀬𑁆𑀳𑀫𑀸𑀦𑀸𑀦𑀁 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀢𑀺 𑀦 𑀫𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸 𑀛𑀸𑀬𑀫𑀸𑀦𑀲𑁆𑀲 𑀤𑀬𑁆𑀳𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀢𑀺 𑀦 𑀫𑀲𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀺𑀲𑁆𑀲𑀸 𑀘 𑀫𑀳𑀸𑀧𑀣𑀯𑀺𑀬𑀸 𑀲𑀺𑀦𑁂𑀭𑀼𑀲𑁆𑀲 𑀘 𑀧𑀩𑁆𑀩𑀢𑀭𑀸𑀚𑀲𑁆𑀲 𑀛𑀸𑀬𑀫𑀸𑀦𑀸𑀦𑀁 𑀤𑀬𑁆𑀳𑀫𑀸𑀦𑀸𑀦𑀁 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀢𑀺 𑀦 𑀫𑀲𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀦𑀲𑁆𑀲𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀓𑁄 𑀫𑀦𑁆𑀢𑀸 𑀓𑁄 𑀲𑀤𑁆𑀥𑀸𑀢𑀸 𑁋 ‘𑀅𑀬𑀜𑁆𑀘 𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀤𑀬𑁆𑀳𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀦 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀧𑀤𑁂𑀳𑀺?

[𑀅. 𑀦𑀺. 𑁬.𑁫𑁪; 𑁭.𑁭𑁩] ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀼𑀦𑁂𑀢𑁆𑀢𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺 𑀢𑀺𑀢𑁆𑀣𑀓𑀭𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄. 𑀲𑀼𑀦𑁂𑀢𑁆𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀼𑀦𑁄 𑀅𑀦𑁂𑀓𑀸𑀦𑀺 𑀲𑀸𑀯𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀲𑀼𑀦𑁂𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀺𑀁𑀲𑀼 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀺𑀁𑀲𑀼 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁄𑀳𑀁 𑀲𑀸𑀯𑀓𑀸𑀦𑀁 𑀲𑀫𑀲𑀫𑀕𑀢𑀺𑀬𑁄 𑀅𑀲𑁆𑀲𑀁 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀬𑀁𑀦𑀽𑀦𑀸𑀳𑀁 𑀉𑀢𑁆𑀢𑀭𑀺 𑀫𑁂𑀢𑁆𑀢𑀁 [𑀉𑀢𑁆𑀢𑀭𑀺 𑀫𑀕𑁆𑀕𑀁 (𑀓.)] 𑀪𑀸𑀯𑁂𑀬𑁆𑀬’’’𑀦𑁆𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀦𑁂𑀢𑁆𑀢𑁄 𑀲𑀢𑁆𑀣𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀪𑀸𑀯𑁂𑀲𑀺. 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀦𑀬𑀺𑀫𑀁 𑀮𑁄𑀓𑀁 𑀧𑀼𑀦𑀭𑀸𑀕𑀫𑀸𑀲𑀺. 𑀲𑀁𑀯𑀝𑁆𑀝𑀫𑀸𑀦𑁂 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀆𑀪𑀲𑁆𑀲𑀭𑀽𑀧𑀕𑁄 𑀳𑁄𑀢𑀺. 𑀯𑀺𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀲𑀼𑀜𑁆𑀜𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀳𑁄𑀢𑀺 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻. 𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀅𑀳𑁄𑀲𑀺 𑀤𑁂𑀯𑀸𑀦𑀫𑀺𑀦𑁆𑀤𑁄. 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀅𑀳𑁄𑀲𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀺. 𑀲𑁄 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀲𑀼𑀦𑁂𑀢𑁆𑀢𑁄 𑀲𑀢𑁆𑀣𑀸 𑀏𑀯𑀁 𑀤𑀻𑀖𑀸𑀬𑀼𑀓𑁄 𑀲𑀫𑀸𑀦𑁄 𑀏𑀯𑀁 𑀘𑀺𑀭𑀝𑁆𑀞𑀺𑀢𑀺𑀓𑁄 𑀅𑀧𑀭𑀺𑀫𑀼𑀢𑁆𑀢𑁄 𑀅𑀳𑁄𑀲𑀺 𑁋 ‘𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀅𑀧𑀭𑀺𑀫𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸’𑀢𑀺 𑀯𑀤𑀸𑀫𑀺’’.

‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀅𑀭𑀺𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀅𑀭𑀺𑀬𑀲𑁆𑀲 𑀲𑀫𑀸𑀥𑀺𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀅𑀭𑀺𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸. 𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀲𑀻𑀮𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀅𑀭𑀺𑀬𑁄 𑀲𑀫𑀸𑀥𑀺 𑀅𑀦𑀼𑀩𑁄𑀥𑁄 𑀧𑀝𑀺𑀯𑀺𑀤𑁆𑀥𑁄, 𑀅𑀭𑀺𑀬𑀸 𑀧𑀜𑁆𑀜𑀸 𑀅𑀦𑀼𑀩𑁄𑀥𑀸 𑀧𑀝𑀺𑀯𑀺𑀤𑁆𑀥𑀸, 𑀅𑀭𑀺𑀬𑀸 𑀯𑀺𑀫𑀼𑀢𑁆𑀢𑀺 𑀅𑀦𑀼𑀩𑁄𑀥𑀸 𑀧𑀝𑀺𑀯𑀺𑀤𑁆𑀥𑀸, 𑀉𑀘𑁆𑀙𑀺𑀦𑁆𑀦𑀸 𑀪𑀯𑀢𑀡𑁆𑀳𑀸, 𑀔𑀻𑀡𑀸 𑀪𑀯𑀦𑁂𑀢𑁆𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀘, 𑀯𑀺𑀫𑀼𑀢𑁆𑀢𑀺 𑀘 𑀅𑀦𑀼𑀢𑁆𑀢𑀭𑀸;

𑀅𑀦𑀼𑀩𑀼𑀤𑁆𑀥𑀸 𑀇𑀫𑁂 𑀥𑀫𑁆𑀫𑀸, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸.

‘‘𑀇𑀢𑀺 𑀩𑀼𑀤𑁆𑀥𑁄 𑀅𑀪𑀺𑀜𑁆𑀜𑀸𑀬, 𑀥𑀫𑁆𑀫𑀫𑀓𑁆𑀔𑀸𑀲𑀺 𑀪𑀺𑀓𑁆𑀔𑀼𑀦𑀁;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀲𑀢𑁆𑀣𑀸, 𑀘𑀓𑁆𑀔𑀼𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀤𑀼𑀢𑀺𑀬𑀁;

𑁩. 𑀦𑀕𑀭𑁄𑀧𑀫𑀲𑀼𑀢𑁆𑀢𑀁

𑁬𑁭. ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 [𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀁 (𑀓.)] 𑀳𑁄𑀢𑀺, 𑀘𑀢𑀼𑀦𑁆𑀦𑀜𑁆𑀘 𑀆𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀓𑀭𑀡𑀻𑀬𑀁 𑀩𑀸𑀳𑀺𑀭𑁂𑀳𑀺 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺.

‘‘𑀓𑀢𑀫𑁂𑀳𑀺 𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀏𑀲𑀺𑀓𑀸 𑀳𑁄𑀢𑀺 𑀕𑀫𑁆𑀪𑀻𑀭𑀦𑁂𑀫𑀸 [𑀕𑀫𑁆𑀪𑀻𑀭𑀦𑁂𑀫𑀺 (𑀓.)] 𑀲𑀼𑀦𑀺𑀔𑀸𑀢𑀸 𑀅𑀘𑀮𑀸 𑀅𑀲𑀫𑁆𑀧𑀯𑁂𑀥𑀻 [𑀅𑀲𑀫𑁆𑀧𑀯𑁂𑀥𑀺 (𑀲𑀻. 𑀲𑁆𑀬𑀸.)]. 𑀇𑀫𑀺𑀦𑀸 𑀧𑀞𑀫𑁂𑀦 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀦 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀧𑀭𑀺𑀔𑀸 𑀳𑁄𑀢𑀺 𑀕𑀫𑁆𑀪𑀻𑀭𑀸 𑀘𑁂𑀯 𑀯𑀺𑀢𑁆𑀣𑀢𑀸 𑀘. 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀦 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀅𑀦𑀼𑀧𑀭𑀺𑀬𑀸𑀬𑀧𑀣𑁄 𑀳𑁄𑀢𑀺 𑀉𑀘𑁆𑀘𑁄 𑀘𑁂𑀯 𑀯𑀺𑀢𑁆𑀣𑀢𑁄 𑀘. 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀦 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀆𑀯𑀼𑀥𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀲𑀮𑀸𑀓𑀜𑁆𑀘𑁂𑀯 𑀚𑁂𑀯𑀦𑀺𑀓𑀜𑁆𑀘 [𑀚𑁂𑀯𑀦𑀺𑀬𑀜𑁆𑀘 (𑀲𑀻. 𑀅𑀝𑁆𑀞.)]. 𑀇𑀫𑀺𑀦𑀸 𑀘𑀢𑀼𑀢𑁆𑀣𑁂𑀦 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀦 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀩𑀮𑀓𑀸𑀬𑁄 𑀧𑀝𑀺𑀯𑀲𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀸𑀭𑁄𑀳𑀸 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸 𑀥𑀦𑀼𑀕𑁆𑀕𑀳𑀸 𑀘𑁂𑀮𑀓𑀸 𑀘𑀮𑀓𑀸 𑀧𑀺𑀡𑁆𑀟𑀤𑀸𑀬𑀓𑀸 𑀉𑀕𑁆𑀕𑀸 𑀭𑀸𑀚𑀧𑀼𑀢𑁆𑀢𑀸 𑀧𑀓𑁆𑀔𑀦𑁆𑀤𑀺𑀦𑁄 𑀫𑀳𑀸𑀦𑀸𑀕𑀸 𑀲𑀽𑀭𑀸 𑀘𑀫𑁆𑀫𑀬𑁄𑀥𑀺𑀦𑁄 𑀤𑀸𑀲𑀓𑀧𑀼𑀢𑁆𑀢𑀸. 𑀇𑀫𑀺𑀦𑀸 𑀧𑀜𑁆𑀘𑀫𑁂𑀦 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀦 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀤𑁄𑀯𑀸𑀭𑀺𑀓𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀅𑀜𑁆𑀜𑀸𑀢𑀸𑀦𑀁 𑀦𑀺𑀯𑀸𑀭𑁂𑀢𑀸 𑀜𑀸𑀢𑀸𑀦𑀁 𑀧𑀯𑁂𑀲𑁂𑀢𑀸. 𑀇𑀫𑀺𑀦𑀸 𑀙𑀝𑁆𑀞𑁂𑀦 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀦 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀧𑀸𑀓𑀸𑀭𑁄 𑀳𑁄𑀢𑀺 𑀉𑀘𑁆𑀘𑁄 𑀘𑁂𑀯 𑀯𑀺𑀢𑁆𑀣𑀢𑁄 𑀘 𑀯𑀸𑀲𑀦𑀮𑁂𑀧𑀦𑀲𑀫𑁆𑀧𑀦𑁆𑀦𑁄 𑀘. 𑀇𑀫𑀺𑀦𑀸 𑀲𑀢𑁆𑀢𑀫𑁂𑀦 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀦 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀲𑀸𑀮𑀺𑀬𑀯𑀓𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀢𑀺𑀮𑀫𑀼𑀕𑁆𑀕𑀫𑀸𑀲𑀸𑀧𑀭𑀡𑁆𑀡𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀪𑁂𑀲𑀚𑁆𑀚𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁 𑀮𑁄𑀡𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀺, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀓𑀭𑀡𑀻𑀬𑀁 𑀩𑀸𑀳𑀺𑀭𑁂𑀳𑀺 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑀢𑁆𑀢𑀳𑀺 𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀘𑀢𑀼𑀦𑁆𑀦𑀜𑁆𑀘 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀭𑀡𑀻𑀬𑁄 𑀫𑀸𑀭𑀲𑁆𑀲 𑀅𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺 𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺?

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀏𑀲𑀺𑀓𑀸 𑀳𑁄𑀢𑀺 𑀕𑀫𑁆𑀪𑀻𑀭𑀦𑁂𑀫𑀸 𑀲𑀼𑀦𑀺𑀔𑀸𑀢𑀸 𑀅𑀘𑀮𑀸 𑀅𑀲𑀫𑁆𑀧𑀯𑁂𑀥𑀻 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 ‘𑀇𑀢𑀺𑀧𑀺 𑀲𑁄…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀲𑀤𑁆𑀥𑁂𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺; 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺; 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀫𑀺𑀦𑀸 𑀧𑀞𑀫𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀧𑀭𑀺𑀓𑁆𑀔𑀸 𑀳𑁄𑀢𑀺 𑀕𑀫𑁆𑀪𑀻𑀭𑀸 𑀘𑁂𑀯 𑀯𑀺𑀢𑁆𑀣𑀢𑀸 𑀘 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀳𑀺𑀭𑀻𑀫𑀸 𑀳𑁄𑀢𑀺, 𑀳𑀺𑀭𑀻𑀬𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀳𑀺𑀭𑀻𑀬𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀳𑀺𑀭𑀻𑀧𑀭𑀺𑀓𑁆𑀔𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺; 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺; 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀅𑀦𑀼𑀧𑀭𑀺𑀬𑀸𑀬𑀧𑀣𑁄 𑀳𑁄𑀢𑀺 𑀉𑀘𑁆𑀘𑁄 𑀘𑁂𑀯 𑀯𑀺𑀢𑁆𑀣𑀢𑁄 𑀘 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀑𑀢𑁆𑀢𑀧𑁆𑀧𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀑𑀢𑁆𑀢𑀧𑁆𑀧𑀧𑀭𑀺𑀬𑀸𑀬𑀧𑀣𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺; 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺; 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀆𑀯𑀼𑀥𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀲𑀮𑀸𑀓𑀜𑁆𑀘𑁂𑀯 𑀚𑁂𑀯𑀦𑀺𑀓𑀜𑁆𑀘 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑀼𑀢𑀸𑀯𑀼𑀥𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺; 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺; 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀫𑀺𑀦𑀸 𑀘𑀢𑀼𑀢𑁆𑀣𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀩𑀮𑀓𑀸𑀬𑁄 𑀧𑀝𑀺𑀯𑀲𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀸𑀭𑁄𑀳𑀸 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸 𑀥𑀦𑀼𑀕𑁆𑀕𑀳𑀸 𑀘𑁂𑀮𑀓𑀸 𑀘𑀮𑀓𑀸 𑀧𑀺𑀡𑁆𑀟𑀤𑀸𑀬𑀓𑀸 𑀉𑀕𑁆𑀕𑀸 𑀭𑀸𑀚𑀧𑀼𑀢𑁆𑀢𑀸 𑀧𑀓𑁆𑀔𑀦𑁆𑀤𑀺𑀦𑁄 𑀫𑀳𑀸𑀦𑀸𑀕𑀸 𑀲𑀽𑀭𑀸 𑀘𑀫𑁆𑀫𑀬𑁄𑀥𑀺𑀦𑁄 𑀤𑀸𑀲𑀓𑀧𑀼𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀯𑀻𑀭𑀺𑀬𑀩𑀮𑀓𑀸𑀬𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺; 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺; 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀫𑀺𑀦𑀸 𑀧𑀜𑁆𑀘𑀫𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀤𑁄𑀯𑀸𑀭𑀺𑀓𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀅𑀜𑁆𑀜𑀸𑀢𑀸𑀦𑀁 𑀦𑀺𑀯𑀸𑀭𑁂𑀢𑀸 𑀜𑀸𑀢𑀸𑀦𑀁 𑀧𑀯𑁂𑀲𑁂𑀢𑀸 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀢𑀺𑀫𑀸 𑀳𑁄𑀢𑀺 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸. 𑀲𑀢𑀺𑀤𑁄𑀯𑀸𑀭𑀺𑀓𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺; 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺; 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀫𑀺𑀦𑀸 𑀙𑀝𑁆𑀞𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀧𑀸𑀓𑀸𑀭𑁄 𑀳𑁄𑀢𑀺 𑀉𑀘𑁆𑀘𑁄 𑀘𑁂𑀯 𑀯𑀺𑀢𑁆𑀣𑀢𑁄 𑀘 𑀯𑀸𑀲𑀦𑀮𑁂𑀧𑀦𑀲𑀫𑁆𑀧𑀦𑁆𑀦𑁄 𑀘 𑀅𑀩𑁆𑀪𑀦𑁆𑀢𑀭𑀸𑀦𑀁 𑀕𑀼𑀢𑁆𑀢𑀺𑀬𑀸 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀧𑀜𑁆𑀜𑀸𑀯𑀸𑀲𑀦𑀮𑁂𑀧𑀦𑀲𑀫𑁆𑀧𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺; 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺; 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀫𑀺𑀦𑀸 𑀲𑀢𑁆𑀢𑀫𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻? 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀅𑀢𑁆𑀢𑀦𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀲𑀸𑀮𑀺𑀬𑀯𑀓𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀅𑀢𑁆𑀢𑀦𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀢𑀺𑀮𑀫𑀼𑀕𑁆𑀕𑀫𑀸𑀲𑀸𑀧𑀭𑀡𑁆𑀡𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀅𑀢𑁆𑀢𑀦𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑁂 𑀦𑀕𑀭𑁂 𑀩𑀳𑀼𑀁 𑀪𑁂𑀲𑀚𑁆𑀚𑀁 𑀲𑀦𑁆𑀦𑀺𑀘𑀺𑀢𑀁 𑀳𑁄𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁 𑀮𑁄𑀡𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀩𑀸𑀳𑀺𑀭𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀫𑁂𑀯𑀁 𑀔𑁄 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀅𑀢𑁆𑀢𑀦𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲. 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀭𑀡𑀻𑀬𑁄 𑀫𑀸𑀭𑀲𑁆𑀲 𑀅𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄’’𑀢𑀺. 𑀢𑀢𑀺𑀬𑀁.

𑁪. 𑀥𑀫𑁆𑀫𑀜𑁆𑀜𑀽𑀲𑀼𑀢𑁆𑀢𑀁

𑁬𑁮. ‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 …𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀜𑁆𑀜𑀽 𑀘 𑀳𑁄𑀢𑀺 𑀅𑀢𑁆𑀣𑀜𑁆𑀜𑀽 𑀘 𑀅𑀢𑁆𑀢𑀜𑁆𑀜𑀽 𑀘 𑀫𑀢𑁆𑀢𑀜𑁆𑀜𑀽 𑀘 𑀓𑀸𑀮𑀜𑁆𑀜𑀽 𑀘 𑀧𑀭𑀺𑀲𑀜𑁆𑀜𑀽 𑀘 𑀧𑀼𑀕𑁆𑀕𑀮𑀧𑀭𑁄𑀧𑀭𑀜𑁆𑀜𑀽 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀜𑁆𑀜𑀽 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀚𑀸𑀦𑀸𑀢𑀺 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀚𑀸𑀦𑁂𑀬𑁆𑀬 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁…𑀧𑁂… 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀦𑀬𑀺𑀥 ‘𑀥𑀫𑁆𑀫𑀜𑁆𑀜𑀽’𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀚𑀸𑀦𑀸𑀢𑀺 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁…𑀧𑁂… 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀢𑀲𑁆𑀫𑀸 ‘𑀥𑀫𑁆𑀫𑀜𑁆𑀜𑀽’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀥𑀫𑁆𑀫𑀜𑁆𑀜𑀽.

‘‘𑀅𑀢𑁆𑀣𑀜𑁆𑀜𑀽 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’𑀢𑀺. 𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑁂𑀬𑁆𑀬 𑁋 ‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’𑀢𑀺, 𑀦𑀬𑀺𑀥 ‘𑀅𑀢𑁆𑀣𑀜𑁆𑀜𑀽’𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’𑀢𑀺, 𑀢𑀲𑁆𑀫𑀸 ‘𑀅𑀢𑁆𑀣𑀜𑁆𑀜𑀽’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀥𑀫𑁆𑀫𑀜𑁆𑀜𑀽, 𑀅𑀢𑁆𑀣𑀜𑁆𑀜𑀽.

‘‘𑀅𑀢𑁆𑀢𑀜𑁆𑀜𑀽 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀢𑀸𑀦𑀁 𑀚𑀸𑀦𑀸𑀢𑀺 𑁋 ‘𑀏𑀢𑁆𑀢𑀓𑁄𑀫𑁆𑀳𑀺 𑀲𑀤𑁆𑀥𑀸𑀬 𑀲𑀻𑀮𑁂𑀦 𑀲𑀼𑀢𑁂𑀦 𑀘𑀸𑀕𑁂𑀦 𑀧𑀜𑁆𑀜𑀸𑀬 𑀧𑀝𑀺𑀪𑀸𑀦𑁂𑀦𑀸’𑀢𑀺. 𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀢𑀸𑀦𑀁 𑀚𑀸𑀦𑁂𑀬𑁆𑀬 𑁋 ‘𑀏𑀢𑁆𑀢𑀓𑁄𑀫𑁆𑀳𑀺 𑀲𑀤𑁆𑀥𑀸𑀬 𑀲𑀻𑀮𑁂𑀦 𑀲𑀼𑀢𑁂𑀦 𑀘𑀸𑀕𑁂𑀦 𑀧𑀜𑁆𑀜𑀸𑀬 𑀧𑀝𑀺𑀪𑀸𑀦𑁂𑀦𑀸’𑀢𑀺, 𑀦𑀬𑀺𑀥 ‘𑀅𑀢𑁆𑀢𑀜𑁆𑀜𑀽’𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀬𑀲𑁆𑀫𑀸 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀢𑀸𑀦𑀁 𑀚𑀸𑀦𑀸𑀢𑀺 𑁋 ‘𑀏𑀢𑁆𑀢𑀓𑁄𑀫𑁆𑀳𑀺 𑀲𑀤𑁆𑀥𑀸𑀬 𑀲𑀻𑀮𑁂𑀦 𑀲𑀼𑀢𑁂𑀦 𑀘𑀸𑀕𑁂𑀦 𑀧𑀜𑁆𑀜𑀸𑀬 𑀧𑀝𑀺𑀪𑀸𑀦𑁂𑀦𑀸’𑀢𑀺, 𑀢𑀲𑁆𑀫𑀸 ‘𑀅𑀢𑁆𑀢𑀜𑁆𑀜𑀽’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀥𑀫𑁆𑀫𑀜𑁆𑀜𑀽, 𑀅𑀢𑁆𑀣𑀜𑁆𑀜𑀽, 𑀅𑀢𑁆𑀢𑀜𑁆𑀜𑀽.

‘‘𑀫𑀢𑁆𑀢𑀜𑁆𑀜𑀽 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀢𑁆𑀢𑀁 𑀚𑀸𑀦𑀸𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀧𑀝𑀺𑀕𑁆𑀕𑀳𑀡𑀸𑀬. 𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀢𑁆𑀢𑀁 𑀚𑀸𑀦𑁂𑀬𑁆𑀬 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀧𑀝𑀺𑀕𑁆𑀕𑀳𑀡𑀸𑀬, 𑀦𑀬𑀺𑀥 ‘𑀫𑀢𑁆𑀢𑀜𑁆𑀜𑀽’𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀢𑁆𑀢𑀁 𑀚𑀸𑀦𑀸𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀧𑀝𑀺𑀕𑁆𑀕𑀳𑀡𑀸𑀬, 𑀢𑀲𑁆𑀫𑀸 ‘𑀫𑀢𑁆𑀢𑀜𑁆𑀜𑀽’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀥𑀫𑁆𑀫𑀜𑁆𑀜𑀽, 𑀅𑀢𑁆𑀣𑀜𑁆𑀜𑀽, 𑀅𑀢𑁆𑀢𑀜𑁆𑀜𑀽, 𑀫𑀢𑁆𑀢𑀜𑁆𑀜𑀽.

‘‘𑀓𑀸𑀮𑀜𑁆𑀜𑀽 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼, 𑀓𑀸𑀮𑀁 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀓𑀸𑀮𑁄 𑀉𑀤𑁆𑀤𑁂𑀲𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀭𑀺𑀧𑀼𑀘𑁆𑀙𑀸𑀬, 𑀅𑀬𑀁 𑀓𑀸𑀮𑁄 𑀬𑁄𑀕𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀝𑀺𑀲𑀮𑁆𑀮𑀸𑀦𑀲𑁆𑀲𑀸’𑀢𑀺. 𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑀁 𑀚𑀸𑀦𑁂𑀬𑁆𑀬 𑁋 ‘𑀅𑀬𑀁 𑀓𑀸𑀮𑁄 𑀉𑀤𑁆𑀤𑁂𑀲𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀭𑀺𑀧𑀼𑀘𑁆𑀙𑀸𑀬, 𑀅𑀬𑀁 𑀓𑀸𑀮𑁄 𑀬𑁄𑀕𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀝𑀺𑀲𑀮𑁆𑀮𑀸𑀦𑀲𑁆𑀲𑀸’𑀢𑀺, 𑀦𑀬𑀺𑀥 ‘𑀓𑀸𑀮𑀜𑁆𑀜𑀽’𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑀁 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀓𑀸𑀮𑁄 𑀉𑀤𑁆𑀤𑁂𑀲𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀭𑀺𑀧𑀼𑀘𑁆𑀙𑀸𑀬, 𑀅𑀬𑀁 𑀓𑀸𑀮𑁄 𑀬𑁄𑀕𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀝𑀺𑀲𑀮𑁆𑀮𑀸𑀦𑀲𑁆𑀲𑀸’𑀢𑀺, 𑀢𑀲𑁆𑀫𑀸 ‘𑀓𑀸𑀮𑀜𑁆𑀜𑀽’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀥𑀫𑁆𑀫𑀜𑁆𑀜𑀽, 𑀅𑀢𑁆𑀣𑀜𑁆𑀜𑀽, 𑀅𑀢𑁆𑀢𑀜𑁆𑀜𑀽, 𑀫𑀢𑁆𑀢𑀜𑁆𑀜𑀽, 𑀓𑀸𑀮𑀜𑁆𑀜𑀽.

‘‘𑀧𑀭𑀺𑀲𑀜𑁆𑀜𑀽 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀲𑀁 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀅𑀬𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸, 𑀅𑀬𑀁 𑀕𑀳𑀧𑀢𑀺𑀧𑀭𑀺𑀲𑀸, 𑀅𑀬𑀁 𑀲𑀫𑀡𑀧𑀭𑀺𑀲𑀸. 𑀢𑀢𑁆𑀣 𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀞𑀸𑀢𑀩𑁆𑀩𑀁, 𑀏𑀯𑀁 𑀓𑀢𑁆𑀢𑀩𑁆𑀩𑀁, 𑀏𑀯𑀁 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀲𑀺𑀢𑀩𑁆𑀩𑀁, 𑀏𑀯𑀁 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩’𑀦𑁆𑀢𑀺. 𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 ‘𑀅𑀬𑀁 𑀔𑀢𑁆𑀢𑀺𑀬𑀧𑀭𑀺𑀲𑀸…𑀧𑁂… 𑀏𑀯𑀁 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩’𑀦𑁆𑀢𑀺, 𑀦𑀬𑀺𑀥 ‘𑀧𑀭𑀺𑀲𑀜𑁆𑀜𑀽’𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀲𑀁 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀅𑀬𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸, 𑀅𑀬𑀁 𑀕𑀳𑀧𑀢𑀺𑀧𑀭𑀺𑀲𑀸, 𑀅𑀬𑀁 𑀲𑀫𑀡𑀧𑀭𑀺𑀲𑀸. 𑀢𑀢𑁆𑀣 𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀞𑀸𑀢𑀩𑁆𑀩𑀁, 𑀏𑀯𑀁 𑀓𑀢𑁆𑀢𑀩𑁆𑀩𑀁, 𑀏𑀯𑀁 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀲𑀺𑀢𑀩𑁆𑀩𑀁, 𑀏𑀯𑀁 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩’𑀦𑁆𑀢𑀺, 𑀢𑀲𑁆𑀫𑀸 ‘𑀧𑀭𑀺𑀲𑀜𑁆𑀜𑀽’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀥𑀫𑁆𑀫𑀜𑁆𑀜𑀽, 𑀅𑀢𑁆𑀣𑀜𑁆𑀜𑀽, 𑀅𑀢𑁆𑀢𑀜𑁆𑀜𑀽, 𑀫𑀢𑁆𑀢𑀜𑁆𑀜𑀽, 𑀓𑀸𑀮𑀜𑁆𑀜𑀽, 𑀧𑀭𑀺𑀲𑀜𑁆𑀜𑀽.

‘‘𑀧𑀼𑀕𑁆𑀕𑀮𑀧𑀭𑁄𑀧𑀭𑀜𑁆𑀜𑀽 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 [𑀲𑀩𑁆𑀩𑀢𑁆𑀣𑀧𑀺 𑀇𑀥 𑀆𑀭𑀫𑁆𑀪𑁂 ‘‘𑀪𑀺𑀓𑁆𑀔𑀼𑀦𑁄’’ 𑀢𑁆𑀯𑁂𑀯 𑀤𑀺𑀲𑁆𑀲𑀢𑀺] 𑀤𑁆𑀯𑀬𑁂𑀦 𑀧𑀼𑀕𑁆𑀕𑀮𑀸 𑀯𑀺𑀤𑀺𑀢𑀸 𑀳𑁄𑀦𑁆𑀢𑀺. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑁋 𑀏𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀓𑀸𑀫𑁄, 𑀏𑀓𑁄 𑀅𑀭𑀺𑀬𑀸𑀦𑀁 𑀦 𑀤𑀲𑁆𑀲𑀦𑀓𑀸𑀫𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀦 𑀤𑀲𑁆𑀲𑀦𑀓𑀸𑀫𑁄, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀓𑀸𑀫𑁄, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀓𑀸𑀫𑀸 𑁋 𑀏𑀓𑁄 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄, 𑀏𑀓𑁄 𑀲𑀤𑁆𑀥𑀫𑁆𑀫𑀁 𑀦 𑀲𑁄𑀢𑀼𑀓𑀸𑀫𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀫𑁆𑀫𑀁 𑀦 𑀲𑁄𑀢𑀼𑀓𑀸𑀫𑁄, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑁋 𑀏𑀓𑁄 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀏𑀓𑁄 𑀅𑀦𑁄𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑁄𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺 [𑀲𑀼𑀡𑀦𑁆𑀢𑀸 (𑀓.)] 𑁋 𑀏𑀓𑁄 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀏𑀓𑁄 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀦 𑀥𑀸𑀭𑁂𑀢𑀺. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀼𑀢𑁆𑀯𑀸 𑀦 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀺 [𑀥𑀸𑀭𑁂𑀦𑁆𑀢𑀸 (𑀓.)] 𑁋 𑀏𑀓𑁄 𑀥𑀸𑀢𑀸𑀦𑀁 [𑀥𑀢𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺, 𑀏𑀓𑁄 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀢𑀺. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀢𑀺, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀺 [𑀉𑀧𑀧𑀭𑀺𑀓𑁆𑀔𑀦𑁆𑀢𑀸 (𑀓.)] 𑁋 𑀏𑀓𑁄 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄, 𑀏𑀓𑁄 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑁋 𑀏𑀓𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑁄 𑀧𑀭𑀳𑀺𑀢𑀸𑀬, 𑀏𑀓𑁄 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀧𑀭𑀳𑀺𑀢𑀸𑀬 𑀘. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑁄 𑀧𑀭𑀳𑀺𑀢𑀸𑀬, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀢𑁆𑀣𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀧𑀭𑀳𑀺𑀢𑀸𑀬 𑀘, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 [𑀪𑀺𑀓𑁆𑀔𑀼𑀦𑀸 (𑀲𑀻. 𑀲𑁆𑀬𑀸.)] 𑀤𑁆𑀯𑀬𑁂𑀦 𑀧𑀼𑀕𑁆𑀕𑀮𑀸 𑀯𑀺𑀤𑀺𑀢𑀸 𑀳𑁄𑀦𑁆𑀢𑀺. 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀼𑀕𑁆𑀕𑀮𑀧𑀭𑁄𑀧𑀭𑀜𑁆𑀜𑀽 𑀳𑁄𑀢𑀺. ‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑀼𑀢𑁆𑀢𑀁

𑁬𑁯. ‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀧𑀡𑁆𑀟𑀼𑀧𑀮𑀸𑀲𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀧𑀡𑁆𑀟𑀼𑀧𑀮𑀸𑀲𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀧𑀦𑁆𑀦𑀧𑀮𑀸𑀲𑁄 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀧𑀦𑁆𑀦𑀧𑀮𑀸𑀲𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀧𑀦𑁆𑀦𑀧𑀮𑀸𑀲𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀚𑀸𑀮𑀓𑀚𑀸𑀢𑁄 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀚𑀸𑀮𑀓𑀚𑀸𑀢𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀚𑀸𑀮𑀓𑀚𑀸𑀢𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀔𑀸𑀭𑀓𑀚𑀸𑀢𑁄 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀔𑀸𑀭𑀓𑀚𑀸𑀢𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀔𑀸𑀭𑀓𑀚𑀸𑀢𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀓𑀼𑀝𑀼𑀫𑀮𑀓𑀚𑀸𑀢𑁄 [𑀓𑀼𑀟𑀼𑀫𑀮𑀓𑀚𑀸𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀓𑀼𑀝𑀼𑀫𑀮𑀓𑀚𑀸𑀢𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀓𑀼𑀝𑀼𑀫𑀮𑀓𑀚𑀸𑀢𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀓𑁄𑀭𑀓𑀚𑀸𑀢𑁄 [𑀓𑁄𑀓𑀸𑀲𑀓𑀚𑀸𑀢𑁄 (𑀲𑀻. 𑀲𑁆𑀬𑀸.), 𑀓𑁄𑀲𑀓𑀚𑀸𑀢𑁄 (𑀓.)] 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀓𑁄𑀭𑀓𑀚𑀸𑀢𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀓𑁄𑀭𑀓𑀚𑀸𑀢𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 [𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 (𑀲𑀻. 𑀧𑀻.)] 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀓𑁄𑀯𑀺𑀴𑀸𑀭𑀲𑁆𑀲 𑀫𑀽𑀮𑁂 𑀤𑀺𑀩𑁆𑀩𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺.

‘‘𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀓𑁄𑀯𑀺𑀴𑀸𑀭𑀲𑁆𑀲 𑀲𑀫𑀦𑁆𑀢𑀸 𑀧𑀜𑁆𑀜𑀸𑀲𑀬𑁄𑀚𑀦𑀸𑀦𑀺 𑀆𑀪𑀸𑀬 𑀨𑀼𑀝𑀁 𑀳𑁄𑀢𑀺, 𑀅𑀦𑀼𑀯𑀸𑀢𑀁 𑀬𑁄𑀚𑀦𑀲𑀢𑀁 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀬𑀫𑀸𑀦𑀼𑀪𑀸𑀯𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀓𑁄𑀯𑀺𑀴𑀸𑀭𑀲𑁆𑀲.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬 𑀘𑁂𑀢𑁂𑀢𑀺, 𑀧𑀡𑁆𑀟𑀼𑀧𑀮𑀸𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀤𑁂𑀯𑀸𑀦𑀁𑀯 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀧𑀦𑁆𑀦𑀧𑀮𑀸𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀤𑁂𑀯𑀸𑀦𑀁𑀯 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀚𑀸𑀮𑀓𑀚𑀸𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀤𑁂𑀯𑀸𑀦𑀁𑀯 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀔𑀸𑀭𑀓𑀚𑀸𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀤𑁂𑀯𑀸𑀦𑀁𑀯 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀼𑀝𑀼𑀫𑀮𑀓𑀚𑀸𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀤𑁂𑀯𑀸𑀦𑀁𑀯 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑁄𑀭𑀓𑀚𑀸𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀤𑁂𑀯𑀸𑀦𑀁𑀯 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀤𑁂𑀯𑀸𑀦𑀁𑀯 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄.

‘‘𑀢𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀼𑀫𑁆𑀫𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀦𑁆𑀢𑀺 𑁋 ‘𑀏𑀲𑁄 𑀇𑀢𑁆𑀣𑀦𑁆𑀦𑀸𑀫𑁄 𑀆𑀬𑀲𑁆𑀫𑀸 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀫𑀼𑀓𑀫𑁆𑀳𑀸 𑀕𑀸𑀫𑀸 𑀯𑀸 𑀦𑀺𑀕𑀫𑀸 𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺. 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸…𑀧𑁂… 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸… 𑀬𑀸𑀫𑀸 𑀤𑁂𑀯𑀸… 𑀢𑀼𑀲𑀺𑀢𑀸 𑀤𑁂𑀯𑀸… 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀸… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀦𑁆𑀢𑀺 𑁋 ‘𑀏𑀲𑁄 𑀇𑀢𑁆𑀣𑀦𑁆𑀦𑀸𑀫𑁄 𑀆𑀬𑀲𑁆𑀫𑀸 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀫𑀼𑀓𑀫𑁆𑀳𑀸 𑀕𑀸𑀫𑀸 𑀯𑀸 𑀦𑀺𑀕𑀫𑀸 𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺. 𑀇𑀢𑀺𑀳 𑀢𑁂𑀦 𑀔𑀡𑁂𑀦 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 [𑀲𑀸𑀥𑀼𑀓𑀸𑀭𑀲𑀤𑁆𑀤𑁄 (𑀲𑀻. 𑀅𑀝𑁆𑀞., 𑀓. 𑀅𑀝𑁆𑀞.)] 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀬𑀫𑀸𑀦𑀼𑀪𑀸𑀯𑁄 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀓𑁆𑀓𑀘𑁆𑀘𑀲𑀼𑀢𑁆𑀢𑀁

𑁭𑁦. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬𑀸’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀢𑁆𑀣𑀸𑀭𑀁 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬. 𑀥𑀫𑁆𑀫𑀁 𑀔𑁄, 𑀪𑀺𑀓𑁆𑀔𑀼…𑀧𑁂… 𑀲𑀗𑁆𑀖𑀁 𑀔𑁄, 𑀪𑀺𑀓𑁆𑀔𑀼…𑀧𑁂… 𑀲𑀺𑀓𑁆𑀔𑀁 𑀔𑁄, 𑀪𑀺𑀓𑁆𑀔𑀼…𑀧𑁂… 𑀲𑀫𑀸𑀥𑀺𑀁 𑀔𑁄, 𑀪𑀺𑀓𑁆𑀔𑀼…𑀧𑁂… 𑀅𑀧𑁆𑀧𑀫𑀸𑀤𑀁 𑀔𑁄, 𑀪𑀺𑀓𑁆𑀔𑀼…𑀧𑁂… 𑀧𑀝𑀺𑀲𑀦𑁆𑀣𑀸𑀭𑀁 𑀔𑁄, 𑀪𑀺𑀓𑁆𑀔𑀼 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸, 𑀬𑀁𑀦𑀽𑀦𑀸𑀳𑀁 𑀇𑀫𑁂 𑀥𑀫𑁆𑀫𑁂 𑀕𑀦𑁆𑀢𑁆𑀯𑀸 [𑀕𑀳𑁂𑀢𑁆𑀯𑀸 (𑀓.)] 𑀪𑀕𑀯𑀢𑁄 𑀆𑀭𑁄𑀘𑁂𑀬𑁆𑀬𑀁. 𑀏𑀯𑀁 𑀫𑁂 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀘𑁂𑀯 𑀪𑀯𑀺𑀲𑁆𑀲𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀲𑀗𑁆𑀔𑀸𑀢𑀢𑀭𑀸 𑀘. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀅𑀥𑀺𑀕𑀘𑁆𑀙𑁂𑀬𑁆𑀬 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀫𑁂 𑀲𑀼𑀯𑀡𑁆𑀡𑀦𑀺𑀓𑁆𑀔𑁄 𑀧𑀭𑀺𑀲𑀼𑀤𑁆𑀥𑁄 𑀧𑀭𑀺𑀬𑁄𑀤𑀸𑀢𑁄, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀕𑀦𑁆𑀢𑁆𑀯𑀸 [𑀕𑀳𑁂𑀢𑁆𑀯𑀸 (𑀓.)] 𑀓𑀫𑁆𑀫𑀸𑀭𑀸𑀦𑀁 𑀤𑀲𑁆𑀲𑁂𑀬𑁆𑀬𑀁. 𑀏𑀯𑀁 𑀫𑁂 𑀅𑀬𑀁 𑀲𑀼𑀯𑀡𑁆𑀡𑀦𑀺𑀓𑁆𑀔𑁄 𑀲𑀓𑀫𑁆𑀫𑀸𑀭𑀕𑀢𑁄 𑀧𑀭𑀺𑀲𑀼𑀤𑁆𑀥𑁄 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀧𑀭𑀺𑀲𑀼𑀤𑁆𑀥𑀲𑀗𑁆𑀔𑀸𑀢𑀢𑀭𑁄 𑀘. 𑀏𑀯𑀫𑁂𑀯𑀁 [𑀔𑁄 (𑀓.)] 𑀫𑁂 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸, 𑀬𑀁𑀦𑀽𑀦𑀸𑀳𑀁 𑀇𑀫𑁂 𑀥𑀫𑁆𑀫𑁂 𑀕𑀦𑁆𑀢𑁆𑀯𑀸 [𑀕𑀳𑁂𑀢𑁆𑀯𑀸 (𑀓.)] 𑀪𑀕𑀯𑀢𑁄 𑀆𑀭𑁄𑀘𑁂𑀬𑁆𑀬𑀁. 𑀏𑀯𑀁 𑀫𑁂 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀘𑁂𑀯 𑀪𑀯𑀺𑀲𑁆𑀲𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀲𑀗𑁆𑀔𑀸𑀢𑀢𑀭𑀸 𑀘𑀸’’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑀺𑀁 𑀦𑀼 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬𑀸’𑀢𑀺? 𑀅𑀣 𑀔𑁄 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀲𑀢𑁆𑀣𑀸𑀭𑀁 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬. 𑀥𑀫𑁆𑀫𑀁 𑀔𑁄, 𑀪𑀺𑀓𑁆𑀔𑀼 …𑀧𑁂… 𑀧𑀝𑀺𑀲𑀦𑁆𑀣𑀸𑀭𑀁 𑀔𑁄, 𑀪𑀺𑀓𑁆𑀔𑀼 𑀲𑀓𑁆𑀓𑀢𑁆𑀯𑀸…𑀧𑁂… 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬𑀸’𑀢𑀺. 𑀅𑀣 𑀔𑁄 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀇𑀫𑁂 𑀔𑁄 𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸, 𑀬𑀁𑀦𑀽𑀦𑀸𑀳𑀁 𑀇𑀫𑁂 𑀥𑀫𑁆𑀫𑁂 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀬𑁆𑀬𑀁. 𑀏𑀯𑀁 𑀫𑁂 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀘𑁂𑀯 𑀪𑀯𑀺𑀲𑁆𑀲𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀲𑀗𑁆𑀔𑀸𑀢𑀢𑀭𑀸 𑀘. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀅𑀥𑀺𑀕𑀘𑁆𑀙𑁂𑀬𑁆𑀬 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁. 𑀢𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀬𑀁 𑀔𑁄 𑀫𑁂 𑀲𑀼𑀯𑀡𑁆𑀡𑀦𑀺𑀓𑁆𑀔𑁄 𑀧𑀭𑀺𑀲𑀼𑀤𑁆𑀥𑁄 𑀧𑀭𑀺𑀬𑁄𑀤𑀸𑀢𑁄, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀕𑀦𑁆𑀢𑁆𑀯𑀸 𑀓𑀫𑁆𑀫𑀸𑀭𑀸𑀦𑀁 𑀤𑀲𑁆𑀲𑁂𑀬𑁆𑀬𑀁. 𑀏𑀯𑀁 𑀫𑁂 𑀅𑀬𑀁 𑀲𑀼𑀯𑀡𑁆𑀡𑀦𑀺𑀓𑁆𑀔𑁄 𑀲𑀓𑀫𑁆𑀫𑀸𑀭𑀕𑀢𑁄 𑀧𑀭𑀺𑀲𑀼𑀤𑁆𑀥𑁄 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀧𑀭𑀺𑀲𑀼𑀤𑁆𑀥𑀲𑀗𑁆𑀔𑀸𑀢𑀢𑀭𑁄 𑀘. 𑀏𑀯𑀫𑁂𑀯𑀁 𑀫𑁂 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸, 𑀬𑀁𑀦𑀽𑀦𑀸𑀳𑀁 𑀇𑀫𑁂 𑀥𑀫𑁆𑀫𑁂 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀬𑁆𑀬𑀁. 𑀏𑀯𑀁 𑀫𑁂 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀲𑀼𑀤𑁆𑀥𑀸 𑀘𑁂𑀯 𑀪𑀯𑀺𑀲𑁆𑀲𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀲𑀗𑁆𑀔𑀸𑀢𑀢𑀭𑀸 𑀘𑀸’’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀲𑀢𑁆𑀣𑀸𑀭𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬. 𑀥𑀫𑁆𑀫𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬. 𑀲𑀗𑁆𑀖𑀁 𑀔𑁄…𑀧𑁂… 𑀲𑀺𑀓𑁆𑀔𑀁 𑀔𑁄… 𑀲𑀫𑀸𑀥𑀺𑀁 𑀔𑁄… 𑀅𑀧𑁆𑀧𑀫𑀸𑀤𑀁 𑀔𑁄… 𑀧𑀝𑀺𑀲𑀦𑁆𑀣𑀸𑀭𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑁂𑀬𑁆𑀬, 𑀓𑀼𑀲𑀮𑀁 𑀪𑀸𑀯𑁂𑀬𑁆𑀬𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀲𑁆𑀲 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂𑀧𑀺 𑀲𑁄 𑀅𑀕𑀸𑀭𑀯𑁄’’.

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂𑀧𑀺 𑀲𑁄 𑀅𑀕𑀸𑀭𑀯𑁄.

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬𑀧𑀺 𑀲𑁄 𑀅𑀕𑀸𑀭𑀯𑁄.

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀫𑁆𑀧𑀺 𑀲𑁄 𑀅𑀕𑀸𑀭𑀯𑁄.

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑁄 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑁄 𑀅𑀧𑁆𑀧𑀫𑀸𑀤𑁂𑀧𑀺 𑀲𑁄 𑀅𑀕𑀸𑀭𑀯𑁄.

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑁄 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄…𑀧𑁂… 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑁄 𑀅𑀕𑀸𑀭𑀯𑁄.

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂𑀧𑀺 𑀲𑁄 𑀲𑀕𑀸𑀭𑀯𑁄…𑀧𑁂….

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄…𑀧𑁂. … 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂 𑀅𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄…𑀧𑁂… 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑁄 𑀲𑀕𑀸𑀭𑀯𑁄.

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂𑀧𑀺 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂𑀧𑀺 𑀲𑁄 𑀲𑀕𑀸𑀭𑀯𑁄…𑀧𑁂….

‘‘𑀲𑁄 𑀯𑀢, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄…𑀧𑁂… 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂 𑀲𑀕𑀸𑀭𑀯𑁄 𑀲𑀗𑁆𑀖𑁂 𑀲𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀲𑀕𑀸𑀭𑀯𑁄 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑁄 𑀲𑀕𑀸𑀭𑀯𑁄’’𑀢𑀺.

‘‘𑀇𑀫𑀲𑁆𑀲 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀲𑀸𑀥𑀼 𑀔𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀫𑀲𑁆𑀲 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀲𑀺. 𑀲𑁄 𑀯𑀢, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺…𑀧𑁂… 𑀬𑁄 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑁄 𑀅𑀧𑁆𑀧𑀫𑀸𑀤𑁂𑀧𑀺 𑀲𑁄 𑀅𑀕𑀸𑀭𑀯𑁄.

‘‘𑀲𑁄 𑀯𑀢, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑁄 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑁄 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑁄 𑀅𑀕𑀸𑀭𑀯𑁄.

‘‘𑀲𑁄 𑀯𑀢, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺…𑀧𑁂… 𑀬𑁄 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂𑀧𑀺 𑀲𑁄 𑀲𑀕𑀸𑀭𑀯𑁄 …𑀧𑁂….

‘‘𑀲𑁄 𑀯𑀢, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂 𑀲𑀕𑀸𑀭𑀯𑁄…𑀧𑁂… 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂 𑀅𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄…𑀧𑁂… 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑁄 𑀲𑀕𑀸𑀭𑀯𑁄.

‘‘𑀲𑁄 𑀯𑀢, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂𑀧𑀺 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀥𑀫𑁆𑀫𑁂𑀧𑀺 𑀲𑁄 𑀲𑀕𑀸𑀭𑀯𑁄…𑀧𑁂….

‘‘𑀲𑁄 𑀯𑀢, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄…𑀧𑁂… 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑁄 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀬𑁄 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄…𑀧𑁂… 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑁄 𑀧𑀝𑀺𑀲𑀦𑁆𑀣𑀸𑀭𑁂𑀧𑀺 𑀲𑁄 𑀲𑀕𑀸𑀭𑀯𑁄’’𑀢𑀺.

‘‘𑀇𑀫𑀲𑁆𑀲 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀙𑀝𑁆𑀞𑀁.

𑁭. 𑀪𑀸𑀯𑀦𑀸𑀲𑀼𑀢𑁆𑀢𑀁

𑁭𑁧. ‘‘𑀪𑀸𑀯𑀦𑀁 𑀅𑀦𑀦𑀼𑀬𑀼𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑁂𑀬𑁆𑀬𑀸’𑀢𑀺, 𑀅𑀣 𑀔𑁆𑀯𑀲𑁆𑀲 𑀦𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀪𑀸𑀯𑀺𑀢𑀢𑁆𑀢𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸? 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁, 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸. 𑀢𑀸𑀦𑀲𑁆𑀲𑀼 𑀓𑀼𑀓𑁆𑀓𑀼𑀝𑀺𑀬𑀸 𑀦 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺, 𑀦 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀺, 𑀦 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀺. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀅𑀪𑀩𑁆𑀩𑀸𑀯 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀦 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺, 𑀦 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀺, 𑀦 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀁 𑀅𑀦𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑁂𑀬𑁆𑀬𑀸’𑀢𑀺, 𑀅𑀣 𑀔𑁆𑀯𑀲𑁆𑀲 𑀦𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀪𑀸𑀯𑀺𑀢𑀢𑁆𑀢𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸? 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁, 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲.

‘‘𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑁂𑀬𑁆𑀬𑀸’𑀢𑀺, 𑀅𑀣 𑀔𑁆𑀯𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀪𑀸𑀯𑀺𑀢𑀢𑁆𑀢𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀲𑁆𑀲 𑀪𑀸𑀯𑀺𑀢𑀢𑁆𑀢𑀸? 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁, 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸. 𑀢𑀸𑀦𑀲𑁆𑀲𑀼 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺, 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀺, 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀺. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀪𑀩𑁆𑀩𑀸𑀯 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺, 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀺, 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑁂𑀬𑁆𑀬𑀸’𑀢𑀺, 𑀅𑀣 𑀔𑁆𑀯𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀪𑀸𑀯𑀺𑀢𑀢𑁆𑀢𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀲𑁆𑀲 𑀪𑀸𑀯𑀺𑀢𑀢𑁆𑀢𑀸? 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁…𑀧𑁂… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀨𑀮𑀕𑀡𑁆𑀟𑀲𑁆𑀲 [𑀧𑀮𑀕𑀡𑁆𑀟𑀲𑁆𑀲 (?)] 𑀯𑀸 𑀨𑀮𑀕𑀡𑁆𑀟𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀸 𑀤𑀺𑀲𑁆𑀲𑀦𑁆𑀢𑁂𑀯 [𑀔𑀻𑀬𑀦𑁆𑀢𑁂 (𑀓.)] 𑀯𑀸𑀲𑀺𑀚𑀝𑁂 [𑀤𑀺𑀲𑁆𑀲𑀦𑁆𑀢𑀺 𑀅𑀗𑁆𑀕𑀼𑀮𑀺𑀧𑀤𑀸𑀦𑀺 (𑀲𑀻.), 𑀅𑀗𑁆𑀕𑀼𑀮𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀅𑀗𑁆𑀕𑀼𑀮𑀧𑀤𑀁 (𑀓.)] 𑀅𑀗𑁆𑀕𑀼𑀮𑀺𑀧𑀤𑀸𑀦𑀺 𑀤𑀺𑀲𑁆𑀲𑀢𑀺 [𑀤𑀺𑀲𑁆𑀲𑀦𑁆𑀢𑀺 (𑀲𑁆𑀬𑀸.)] 𑀅𑀗𑁆𑀕𑀼𑀝𑁆𑀞𑀧𑀤𑀁 [𑀤𑀺𑀲𑁆𑀲𑀦𑁆𑀢𑀺 𑀅𑀗𑁆𑀕𑀼𑀮𑀺𑀧𑀤𑀸𑀦𑀺 (𑀲𑀻.), 𑀅𑀗𑁆𑀕𑀼𑀮𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀅𑀗𑁆𑀕𑀼𑀮𑀧𑀤𑀁 (𑀓.)]. 𑀦𑁄 𑀘 𑀔𑁆𑀯𑀲𑁆𑀲 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀏𑀢𑁆𑀢𑀓𑀁 𑀫𑁂 𑀅𑀚𑁆𑀚 𑀯𑀸𑀲𑀺𑀚𑀝𑀲𑁆𑀲 𑀔𑀻𑀡𑀁, 𑀏𑀢𑁆𑀢𑀓𑀁 𑀳𑀺𑀬𑁆𑀬𑁄, 𑀏𑀢𑁆𑀢𑀓𑀁 𑀧𑀭𑁂’𑀢𑀺, 𑀅𑀣 𑀔𑁆𑀯𑀲𑁆𑀲 𑀔𑀻𑀡𑁂 ‘𑀔𑀻𑀡’𑀦𑁆𑀢𑁂𑀯 𑀜𑀸𑀡𑀁 𑀳𑁄𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀏𑀢𑁆𑀢𑀓𑀁 𑀫𑁂 𑀅𑀚𑁆𑀚 𑀆𑀲𑀯𑀸𑀦𑀁 𑀔𑀻𑀡𑀁, 𑀏𑀢𑁆𑀢𑀓𑀁 𑀳𑀺𑀬𑁆𑀬𑁄, 𑀏𑀢𑁆𑀢𑀓𑀁 𑀧𑀭𑁂’𑀢𑀺, 𑀅𑀣 𑀔𑁆𑀯𑀲𑁆𑀲 𑀔𑀻𑀡𑁂 ‘𑀔𑀻𑀡’𑀦𑁆𑀢𑁂𑀯 𑀜𑀸𑀡𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀼𑀤𑁆𑀤𑀺𑀓𑀸𑀬 𑀦𑀸𑀯𑀸𑀬 𑀯𑁂𑀢𑁆𑀢𑀩𑀦𑁆𑀥𑀦𑀩𑀤𑁆𑀥𑀸𑀬 [𑀯𑁂𑀢𑁆𑀢𑀩𑀦𑁆𑀥𑀸𑀬 (𑀓.)] 𑀙 𑀫𑀸𑀲𑀸𑀦𑀺 𑀉𑀤𑀓𑁂 𑀧𑀭𑀺𑀬𑀸𑀤𑀸𑀬 𑀳𑁂𑀫𑀦𑁆𑀢𑀺𑀓𑁂𑀦 𑀣𑀮𑁂 𑀉𑀓𑁆𑀔𑀺𑀢𑁆𑀢𑀸𑀬 𑀯𑀸𑀢𑀸𑀢𑀧𑀧𑀭𑁂𑀢𑀸𑀦𑀺 𑀩𑀦𑁆𑀥𑀦𑀸𑀦𑀺, 𑀢𑀸𑀦𑀺 𑀧𑀸𑀯𑀼𑀲𑁆𑀲𑀓𑁂𑀦 𑀫𑁂𑀖𑁂𑀦 𑀅𑀪𑀺𑀧𑁆𑀧𑀯𑀼𑀝𑁆𑀞𑀸𑀦𑀺 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀭𑀺𑀳𑀸𑀬𑀦𑁆𑀢𑀺 [𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 (𑀲𑀻. 𑀲𑁆𑀬𑀸.)], 𑀧𑀽𑀢𑀺𑀓𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀲𑀁𑀬𑁄𑀚𑀦𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀧𑀽𑀢𑀺𑀓𑀸𑀦𑀺 𑀪𑀯𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀁

𑁭𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 [𑀲𑀜𑁆𑀚𑁄𑀢𑀺𑀪𑀽𑀢𑀁 (𑀲𑁆𑀬𑀸.)]. 𑀤𑀺𑀲𑁆𑀯𑀸𑀦 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀫𑀼𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑁋 𑀬𑀁 𑀅𑀫𑀼𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸, 𑀬𑀁 𑀯𑀸 𑀔𑀢𑁆𑀢𑀺𑀬𑀓𑀜𑁆𑀜𑀁 𑀯𑀸 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀁 𑀯𑀸 𑀕𑀳𑀧𑀢𑀺𑀓𑀜𑁆𑀜𑀁 𑀯𑀸 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀯𑀭𑀁 𑁋 𑀬𑀁 𑀔𑀢𑁆𑀢𑀺𑀬𑀓𑀜𑁆𑀜𑀁 𑀯𑀸 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀁 𑀯𑀸 𑀕𑀳𑀧𑀢𑀺𑀓𑀜𑁆𑀜𑀁 𑀯𑀸 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸, 𑀤𑀼𑀓𑁆𑀔𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀁 𑀅𑀫𑀼𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸’’𑀢𑀺.

‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑀤𑁂𑀯 𑀢𑀲𑁆𑀲 𑀯𑀭𑀁 𑀤𑀼𑀲𑁆𑀲𑀻𑀮𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀲𑁆𑀲 𑀅𑀲𑁆𑀲𑀫𑀡𑀲𑁆𑀲 𑀲𑀫𑀡𑀧𑀝𑀺𑀜𑁆𑀜𑀲𑁆𑀲 𑀅𑀩𑁆𑀭𑀳𑁆𑀫𑀘𑀸𑀭𑀺𑀲𑁆𑀲 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀲𑁆𑀲 𑀅𑀦𑁆𑀢𑁄𑀧𑀽𑀢𑀺𑀓𑀲𑁆𑀲 𑀅𑀯𑀲𑁆𑀲𑀼𑀢𑀲𑁆𑀲 𑀓𑀲𑀫𑁆𑀩𑀼𑀚𑀸𑀢𑀲𑁆𑀲 𑀬𑀁 𑀅𑀫𑀼𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬.

‘‘𑀬𑀜𑁆𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄…𑀧𑁂… 𑀓𑀲𑀫𑁆𑀩𑀼𑀚𑀸𑀢𑁄 𑀔𑀢𑁆𑀢𑀺𑀬𑀓𑀜𑁆𑀜𑀁 𑀯𑀸 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀁 𑀯𑀸 𑀕𑀳𑀧𑀢𑀺𑀓𑀜𑁆𑀜𑀁 𑀯𑀸 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑀢𑀺 𑀯𑀸 𑀉𑀧𑀦𑀺𑀧𑀚𑁆𑀚𑀢𑀺 𑀯𑀸, 𑀢𑀜𑁆𑀳𑀺 𑀢𑀲𑁆𑀲 [𑀢𑀁 𑀳𑀺𑀲𑁆𑀲 (𑀓.)], 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑁋 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀴𑁆𑀳𑀸𑀬 𑀯𑀸𑀮𑀭𑀚𑁆𑀚𑀼𑀬𑀸 𑀉𑀪𑁄 𑀚𑀗𑁆𑀖𑀸 𑀯𑁂𑀞𑁂𑀢𑁆𑀯𑀸 𑀖𑀁𑀲𑁂𑀬𑁆𑀬 𑁋 𑀲𑀸 𑀙𑀯𑀺𑀁 𑀙𑀺𑀦𑁆𑀤𑁂𑀬𑁆𑀬 𑀙𑀯𑀺𑀁 𑀙𑁂𑀢𑁆𑀯𑀸 𑀘𑀫𑁆𑀫𑀁 𑀙𑀺𑀦𑁆𑀤𑁂𑀬𑁆𑀬 𑀘𑀫𑁆𑀫𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀙𑀺𑀦𑁆𑀤𑁂𑀬𑁆𑀬 𑀫𑀁𑀲𑀁 𑀙𑁂𑀢𑁆𑀯𑀸 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑁂𑀬𑁆𑀬 𑀦𑁆𑀳𑀸𑀭𑀼𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁 𑀙𑀺𑀦𑁆𑀤𑁂𑀬𑁆𑀬 𑀅𑀝𑁆𑀞𑀺𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑁂𑀬𑁆𑀬, 𑀬𑀁 𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀅𑀪𑀺𑀯𑀸𑀤𑀦𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀯𑀭𑀁 𑁋 𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀅𑀪𑀺𑀯𑀸𑀤𑀦𑀁 𑀲𑀸𑀤𑀺𑀬𑁂𑀬𑁆𑀬, 𑀤𑀼𑀓𑁆𑀔𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀴𑁆𑀳𑀸𑀬 𑀯𑀸𑀮𑀭𑀚𑁆𑀚𑀼𑀬𑀸…𑀧𑁂… 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺.

‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑀤𑁂𑀯 𑀢𑀲𑁆𑀲 𑀯𑀭𑀁 𑀤𑀼𑀲𑁆𑀲𑀻𑀮𑀲𑁆𑀲…𑀧𑁂… 𑀓𑀲𑀫𑁆𑀩𑀼𑀚𑀸𑀢𑀲𑁆𑀲 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀴𑁆𑀳𑀸𑀬 𑀯𑀸𑀮𑀭𑀚𑁆𑀚𑀼𑀬𑀸 𑀉𑀪𑁄 𑀚𑀗𑁆𑀖𑀸 𑀯𑁂𑀞𑁂𑀢𑁆𑀯𑀸…𑀧𑁂… 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑀜𑁆𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄…𑀧𑁂… 𑀓𑀲𑀫𑁆𑀩𑀼𑀚𑀸𑀢𑁄 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀅𑀪𑀺𑀯𑀸𑀤𑀦𑀁 𑀲𑀸𑀤𑀺𑀬𑀢𑀺, 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑁋 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀺𑀡𑁆𑀳𑀸𑀬 𑀲𑀢𑁆𑀢𑀺𑀬𑀸 𑀢𑁂𑀮𑀥𑁄𑀢𑀸𑀬 𑀧𑀘𑁆𑀘𑁄𑀭𑀲𑁆𑀫𑀺𑀁 𑀧𑀳𑀭𑁂𑀬𑁆𑀬, 𑀬𑀁 𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀯𑀭𑀁 𑁋 𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀤𑀺𑀬𑁂𑀬𑁆𑀬, 𑀤𑀼𑀓𑁆𑀔𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀺𑀡𑁆𑀳𑀸𑀬 𑀲𑀢𑁆𑀢𑀺𑀬𑀸 𑀢𑁂𑀮𑀥𑁄𑀢𑀸𑀬 𑀧𑀘𑁆𑀘𑁄𑀭𑀲𑁆𑀫𑀺𑀁 𑀧𑀳𑀭𑁂𑀬𑁆𑀬𑀸’’𑀢𑀺.

‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑀤𑁂𑀯 𑀢𑀲𑁆𑀲 𑀯𑀭𑀁 𑀤𑀼𑀲𑁆𑀲𑀻𑀮𑀲𑁆𑀲…𑀧𑁂… 𑀓𑀲𑀫𑁆𑀩𑀼𑀚𑀸𑀢𑀲𑁆𑀲 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀺𑀡𑁆𑀳𑀸𑀬 𑀲𑀢𑁆𑀢𑀺𑀬𑀸 𑀢𑁂𑀮𑀥𑁄𑀢𑀸𑀬 𑀧𑀘𑁆𑀘𑁄𑀭𑀲𑁆𑀫𑀺𑀁 𑀧𑀳𑀭𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑀜𑁆𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄…𑀧𑁂… 𑀓𑀲𑀫𑁆𑀩𑀼𑀚𑀸𑀢𑁄 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀤𑀺𑀬𑀢𑀺, 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑁋 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀢𑁆𑀢𑁂𑀦 𑀅𑀬𑁄𑀧𑀝𑁆𑀝𑁂𑀦 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀓𑀸𑀬𑀁 𑀲𑀫𑁆𑀧𑀮𑀺𑀯𑁂𑀞𑁂𑀬𑁆𑀬, 𑀬𑀁 𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀯𑀭𑀁 𑁋 𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸…𑀧𑁂… 𑀲𑀤𑁆𑀥𑀸𑀤𑁂𑀬𑁆𑀬𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀤𑀼𑀓𑁆𑀔𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀢𑁆𑀢𑁂𑀦 𑀅𑀬𑁄𑀧𑀝𑁆𑀝𑁂𑀦 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀓𑀸𑀬𑀁 𑀲𑀫𑁆𑀧𑀮𑀺𑀯𑁂𑀞𑁂𑀬𑁆𑀬𑀸’’𑀢𑀺.

‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑀤𑁂𑀯 𑀢𑀲𑁆𑀲 𑀯𑀭𑀁 𑀤𑀼𑀲𑁆𑀲𑀻𑀮𑀲𑁆𑀲…𑀧𑁂… 𑀓𑀲𑀫𑁆𑀩𑀼𑀚𑀸𑀢𑀲𑁆𑀲 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀢𑁆𑀢𑁂𑀦 𑀅𑀬𑁄𑀧𑀝𑁆𑀝𑁂𑀦 𑀆𑀤𑀺𑀢𑁆𑀢𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁂𑀦 𑀲𑀚𑁄𑀢𑀺𑀪𑀽𑀢𑁂𑀦 𑀓𑀸𑀬𑀁 𑀲𑀫𑁆𑀧𑀮𑀺𑀯𑁂𑀞𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑀜𑁆𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄…𑀧𑁂… 𑀓𑀲𑀫𑁆𑀩𑀼𑀚𑀸𑀢𑁄 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑁋 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀢𑁆𑀢𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁆𑀢𑀁 𑀮𑁄𑀳𑀕𑀼𑀴𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬 𑁋 𑀢𑀁 𑀢𑀲𑁆𑀲 𑀑𑀝𑁆𑀞𑀫𑁆𑀧𑀺 𑀤𑀳𑁂𑀬𑁆𑀬 [𑀟𑀳𑁂𑀬𑁆𑀬 (𑀓𑀢𑁆𑀣𑀘𑀺)] 𑀫𑀼𑀔𑀫𑁆𑀧𑀺 𑀤𑀳𑁂𑀬𑁆𑀬 𑀚𑀺𑀯𑁆𑀳𑀫𑁆𑀧𑀺 𑀤𑀳𑁂𑀬𑁆𑀬 𑀓𑀡𑁆𑀞𑀫𑁆𑀧𑀺 𑀤𑀳𑁂𑀬𑁆𑀬 𑀉𑀭𑀫𑁆𑀧𑀺 [𑀫. 𑀦𑀺. 𑁩.𑁨𑁭𑁦 𑀤𑁂𑀯𑀤𑀽𑀢𑀲𑀼𑀢𑁆𑀢𑁂 𑀧𑀦 ‘‘𑀉𑀤𑀭𑀫𑁆𑀧𑀺’’ 𑀇𑀢𑀺 𑀯𑀺𑀤𑁂𑀲𑀧𑀸𑀞𑁄 𑀤𑀺𑀲𑁆𑀲𑀢𑀺] 𑀤𑀳𑁂𑀬𑁆𑀬 𑀅𑀦𑁆𑀢𑀫𑁆𑀧𑀺 𑀅𑀦𑁆𑀢𑀕𑀼𑀡𑀫𑁆𑀧𑀺 𑀆𑀤𑀸𑀬 𑀅𑀥𑁄𑀪𑀸𑀕𑀸 [𑀅𑀥𑁄𑀪𑀸𑀕𑀁 (𑀓.)] 𑀦𑀺𑀓𑁆𑀔𑀫𑁂𑀬𑁆𑀬, 𑀬𑀁 𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀯𑀭𑀁 𑁋 𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀤𑀼𑀓𑁆𑀔𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀢𑁆𑀢𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁆𑀢𑀁 𑀮𑁄𑀳𑀕𑀼𑀴𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬 𑁋 𑀢𑀁 𑀢𑀲𑁆𑀲 𑀑𑀝𑁆𑀞𑀫𑁆𑀧𑀺 𑀤𑀳𑁂𑀬𑁆𑀬 𑀫𑀼𑀔𑀫𑁆𑀧𑀺 𑀤𑀳𑁂𑀬𑁆𑀬 𑀚𑀺𑀯𑁆𑀳𑀫𑁆𑀧𑀺 𑀤𑀳𑁂𑀬𑁆𑀬 𑀓𑀡𑁆𑀞𑀫𑁆𑀧𑀺 𑀤𑀳𑁂𑀬𑁆𑀬 𑀉𑀭𑀫𑁆𑀧𑀺 𑀤𑀳𑁂𑀬𑁆𑀬 𑀅𑀦𑁆𑀢𑀫𑁆𑀧𑀺 𑀅𑀦𑁆𑀢𑀕𑀼𑀡𑀫𑁆𑀧𑀺 𑀆𑀤𑀸𑀬 𑀅𑀥𑁄𑀪𑀸𑀕𑀁 𑀦𑀺𑀓𑁆𑀔𑀫𑁂𑀬𑁆𑀬𑀸’’𑀢𑀺.

‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑀤𑁂𑀯 𑀢𑀲𑁆𑀲 𑀯𑀭𑀁 𑀤𑀼𑀲𑁆𑀲𑀻𑀮𑀲𑁆𑀲…𑀧𑁂… 𑀓𑀲𑀫𑁆𑀩𑀼𑀚𑀸𑀢𑀲𑁆𑀲 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀢𑁆𑀢𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁆𑀢𑀁 𑀮𑁄𑀳𑀕𑀼𑀴𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬 𑁋 𑀢𑀁 𑀢𑀲𑁆𑀲 𑀑𑀝𑁆𑀞𑀫𑁆𑀧𑀺 𑀤𑀳𑁂𑀬𑁆𑀬 𑀫𑀼𑀔𑀫𑁆𑀧𑀺 𑀤𑀳𑁂𑀬𑁆𑀬 𑀚𑀺𑀯𑁆𑀳𑀫𑁆𑀧𑀺 𑀤𑀳𑁂𑀬𑁆𑀬 𑀓𑀡𑁆𑀞𑀫𑁆𑀧𑀺 𑀤𑀳𑁂𑀬𑁆𑀬 𑀉𑀭𑀫𑁆𑀧𑀺 𑀤𑀳𑁂𑀬𑁆𑀬 𑀅𑀦𑁆𑀢𑀫𑁆𑀧𑀺 𑀅𑀦𑁆𑀢𑀕𑀼𑀡𑀫𑁆𑀧𑀺 𑀆𑀤𑀸𑀬 𑀅𑀥𑁄𑀪𑀸𑀕𑀁 𑀦𑀺𑀓𑁆𑀔𑀫𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑀜𑁆𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄…𑀧𑁂… 𑀓𑀲𑀫𑁆𑀩𑀼𑀚𑀸𑀢𑁄 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀜𑁆𑀳𑀺 𑀢𑀲𑁆𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑁋 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀔𑀦𑁆𑀥𑁂 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀢𑀁 𑀅𑀬𑁄𑀫𑀜𑁆𑀘𑀁 𑀯𑀸 𑀅𑀬𑁄𑀧𑀻𑀞𑀁 𑀯𑀸 𑀅𑀪𑀺𑀦𑀺𑀲𑀻𑀤𑀸𑀧𑁂𑀬𑁆𑀬 𑀯𑀸 𑀅𑀪𑀺𑀦𑀺𑀧𑀚𑁆𑀚𑀸𑀧𑁂𑀬𑁆𑀬 𑀯𑀸, 𑀬𑀁 𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀫𑀜𑁆𑀘𑀧𑀻𑀞𑀁 [𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 (𑀓.)] 𑀧𑀭𑀺𑀪𑀼𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀯𑀭𑀁 𑁋 𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀫𑀜𑁆𑀘𑀧𑀻𑀞𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀤𑀼𑀓𑁆𑀔𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀔𑀦𑁆𑀥𑁂 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀢𑀁 𑀅𑀬𑁄𑀫𑀜𑁆𑀘𑀁 𑀯𑀸 𑀅𑀬𑁄𑀧𑀻𑀞𑀁 𑀯𑀸 𑀅𑀪𑀺𑀦𑀺𑀲𑀻𑀤𑀸𑀧𑁂𑀬𑁆𑀬 𑀯𑀸 𑀅𑀪𑀺𑀦𑀺𑀧𑀚𑁆𑀚𑀸𑀧𑁂𑀬𑁆𑀬 𑀯𑀸’’𑀢𑀺.

‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑀤𑁂𑀯 𑀢𑀲𑁆𑀲 𑀯𑀭𑀁 𑀤𑀼𑀲𑁆𑀲𑀻𑀮𑀲𑁆𑀲…𑀧𑁂… 𑀓𑀲𑀫𑁆𑀩𑀼𑀚𑀸𑀢𑀲𑁆𑀲 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀔𑀦𑁆𑀥𑁂 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀢𑀁 𑀅𑀬𑁄𑀫𑀜𑁆𑀘𑀁 𑀯𑀸 𑀅𑀬𑁄𑀧𑀻𑀞𑀁 𑀯𑀸 𑀅𑀪𑀺𑀦𑀺𑀲𑀻𑀤𑀸𑀧𑁂𑀬𑁆𑀬 𑀯𑀸 𑀅𑀪𑀺𑀦𑀺𑀧𑀚𑁆𑀚𑀸𑀧𑁂𑀬𑁆𑀬 𑀯𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑀜𑁆𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄…𑀧𑁂… 𑀓𑀲𑀫𑁆𑀩𑀼𑀚𑀸𑀢𑁄 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀫𑀜𑁆𑀘𑀧𑀻𑀞𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑁋 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑁂𑀬𑁆𑀬 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑁋 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑁂𑀬𑁆𑀬 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑁂𑀬𑁆𑀬 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑁂𑀬𑁆𑀬, 𑀬𑀁 𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀯𑀭𑀁 𑁋 𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀤𑀼𑀓𑁆𑀔𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑁂𑀬𑁆𑀬 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑁋 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑁂𑀬𑁆𑀬 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑁂𑀬𑁆𑀬 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺.

‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑀤𑁂𑀯 𑀢𑀲𑁆𑀲 𑀯𑀭𑀁 𑀤𑀼𑀲𑁆𑀲𑀻𑀮𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲…𑀧𑁂… 𑀓𑀲𑀫𑁆𑀩𑀼𑀚𑀸𑀢𑀲𑁆𑀲 𑀬𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸…𑀧𑁂… 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑀜𑁆𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄…𑀧𑁂… 𑀓𑀲𑀫𑁆𑀩𑀼𑀚𑀸𑀢𑁄 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑁂𑀲𑀜𑁆𑀘 [𑀬𑁂𑀲𑀁 (?)] 𑀫𑀬𑀁 𑀧𑀭𑀺𑀪𑀼𑀜𑁆𑀚𑀸𑀫 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 [… 𑀧𑀭𑀺𑀓𑁆𑀔𑀸𑀭𑀸𑀦𑀁 (𑀲𑀻. 𑀲𑁆𑀬𑀸. 𑀓.)] 𑀢𑁂𑀲𑀁 𑀢𑁂 𑀓𑀸𑀭𑀸 𑀫𑀳𑀧𑁆𑀨𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸, 𑀅𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀧𑀩𑁆𑀩𑀚𑁆𑀚𑀸 𑀅𑀯𑀜𑁆𑀛𑀸 𑀪𑀯𑀺𑀲𑁆𑀲𑀢𑀺 𑀲𑀨𑀮𑀸 𑀲𑀉𑀤𑁆𑀭𑀬𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀢𑁆𑀢𑀢𑁆𑀣𑀁 𑀯𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀢𑀼𑀁; 𑀧𑀭𑀢𑁆𑀣𑀁 𑀯𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀢𑀼𑀁; 𑀉𑀪𑀬𑀢𑁆𑀣𑀁 𑀯𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀢𑀼’’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸 [𑀇𑀤𑀫𑀯𑁄𑀘 𑀪𑀕𑀯𑀸…𑀧𑁂… (𑀓.)]. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺 [𑀉𑀕𑁆𑀕𑀘𑁆𑀙𑀺 (𑀓.)]. 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀁𑀲𑀼 𑁋 ‘‘𑀲𑀼𑀤𑀼𑀓𑁆𑀓𑀭𑀁 𑀪𑀕𑀯𑀸, 𑀲𑀼𑀤𑀼𑀓𑁆𑀓𑀭𑀁 𑀪𑀕𑀯𑀸’’𑀢𑀺. 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺. 𑀅𑀝𑁆𑀞𑀫𑀁.

𑁯. 𑀲𑀼𑀦𑁂𑀢𑁆𑀢𑀲𑀼𑀢𑁆𑀢𑀁

𑁭𑁩. [𑀅. 𑀦𑀺. 𑁬.𑁫𑁪; 𑁭.𑁬𑁬] ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀼𑀦𑁂𑀢𑁆𑀢𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺 𑀢𑀺𑀢𑁆𑀣𑀓𑀭𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄. 𑀲𑀼𑀦𑁂𑀢𑁆𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀼𑀦𑁄 𑀅𑀦𑁂𑀓𑀸𑀦𑀺 𑀲𑀸𑀯𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀲𑀼𑀦𑁂𑀢𑁆𑀢𑁄 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂 [𑀬𑁂 𑀔𑁄 𑀪𑀺𑀓𑁆𑀔𑀯𑁂 (𑀲𑀻. 𑀲𑁆𑀬𑀸.)], 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀦𑀧𑁆𑀧𑀲𑀸𑀤𑁂𑀲𑀼𑀁 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀲𑀼𑀁 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀫𑀽𑀕𑀧𑀓𑁆𑀔𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺…𑀧𑁂… 𑀅𑀭𑀦𑁂𑀫𑀺 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺…𑀧𑁂… 𑀓𑀼𑀤𑁆𑀤𑀸𑀮𑀓𑁄 [𑀓𑀼𑀤𑁆𑀤𑀸𑀮𑁄 (𑀲𑀻. 𑀲𑁆𑀬𑀸.)] 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺…𑀧𑁂… 𑀳𑀢𑁆𑀣𑀺𑀧𑀸𑀮𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺…𑀧𑁂… 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺…𑀧𑁂… 𑀅𑀭𑀓𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺 𑀢𑀺𑀢𑁆𑀣𑀓𑀭𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄. 𑀅𑀭𑀓𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀼𑀦𑁄 𑀅𑀦𑁂𑀓𑀸𑀦𑀺 𑀲𑀸𑀯𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀅𑀭𑀓𑁄 𑀦𑀸𑀫 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀭𑀓𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀦𑀧𑁆𑀧𑀲𑀸𑀤𑁂𑀲𑀼𑀁, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀭𑀓𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀲𑀼𑀁, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀬𑁄 𑀇𑀫𑁂 𑀲𑀢𑁆𑀢 𑀲𑀢𑁆𑀣𑀸𑀭𑁂 𑀢𑀺𑀢𑁆𑀣𑀓𑀭𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂 𑀅𑀦𑁂𑀓𑀲𑀢𑀧𑀭𑀺𑀯𑀸𑀭𑁂 𑀲𑀲𑀸𑀯𑀓𑀲𑀗𑁆𑀖𑁂 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀅𑀓𑁆𑀓𑁄𑀲𑁂𑀬𑁆𑀬 𑀧𑀭𑀺𑀪𑀸𑀲𑁂𑀬𑁆𑀬, 𑀩𑀳𑀼𑀁 𑀲𑁄 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀲𑀢𑁆𑀣𑀸𑀭𑁂 𑀢𑀺𑀢𑁆𑀣𑀓𑀭𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂 𑀅𑀦𑁂𑀓𑀲𑀢𑀧𑀭𑀺𑀯𑀸𑀭𑁂 𑀲𑀲𑀸𑀯𑀓𑀲𑀗𑁆𑀖𑁂 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀅𑀓𑁆𑀓𑁄𑀲𑁂𑀬𑁆𑀬 𑀧𑀭𑀺𑀪𑀸𑀲𑁂𑀬𑁆𑀬, 𑀩𑀳𑀼𑀁 𑀲𑁄 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬. 𑀬𑁄 𑀏𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀅𑀬𑀁 𑀢𑀢𑁄 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑁄 𑀩𑀳𑀺𑀤𑁆𑀥𑀸 𑀏𑀯𑀭𑀽𑀧𑀺𑀁 𑀔𑀦𑁆𑀢𑀺𑀁 𑀯𑀤𑀸𑀫𑀺 𑀬𑀣𑀸𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼’’.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀦𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 [𑀦 𑀢𑁆𑀯𑁂𑀯 𑀅𑀫𑁆𑀳𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 (𑀲𑁆𑀬𑀸.) 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀅𑀜𑁆𑀜𑀣𑀸 𑀤𑀺𑀲𑁆𑀲𑀢𑀺] 𑀘𑀺𑀢𑁆𑀢𑀸𑀦𑀺 𑀧𑀤𑀼𑀝𑁆𑀞𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀅𑀭𑀓𑀲𑀼𑀢𑁆𑀢𑀁

𑁭𑁪. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀭𑀓𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺 𑀢𑀺𑀢𑁆𑀣𑀓𑀭𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄. 𑀅𑀭𑀓𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀼𑀦𑁄 𑀅𑀦𑁂𑀓𑀸𑀦𑀺 𑀲𑀸𑀯𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀅𑀭𑀓𑁄 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 𑀅𑀧𑁆𑀧𑀓𑀁, 𑀩𑁆𑀭𑀸𑀳𑁆𑀫𑀡, 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 [𑀮𑀳𑀼𑀲𑀁 (𑀝𑀻𑀓𑀸)] 𑀩𑀳𑀼𑀤𑀼𑀓𑁆𑀔𑀁 𑀩𑀳𑀼𑀧𑀸𑀬𑀸𑀲𑀁 𑀫𑀦𑁆𑀢𑀸𑀬𑀁 [𑀫𑀦𑁆𑀢𑀸𑀬 (𑀲𑀩𑁆𑀩𑀢𑁆𑀣) 𑀝𑀻𑀓𑀸 𑀧𑀲𑁆𑀲𑀺𑀢𑀩𑁆𑀩𑀸] 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀔𑀺𑀧𑁆𑀧𑀁𑀬𑁂𑀯 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀧𑀫𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 𑀩𑀳𑀼𑀤𑀼𑀓𑁆𑀔𑀁 𑀩𑀳𑀼𑀧𑀸𑀬𑀸𑀲𑀁 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑀩𑀼𑀩𑁆𑀩𑀼𑀴𑀁 [𑀉𑀤𑀓𑀧𑀼𑀧𑁆𑀨𑀼𑀴𑀁 (𑀓.)] 𑀔𑀺𑀧𑁆𑀧𑀁𑀬𑁂𑀯 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀉𑀤𑀓𑀩𑀼𑀩𑁆𑀩𑀼𑀴𑀽𑀧𑀫𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 𑀩𑀳𑀼𑀤𑀼𑀓𑁆𑀔𑀁 𑀩𑀳𑀼𑀧𑀸𑀬𑀸𑀲𑀁 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀔𑀺𑀧𑁆𑀧𑀁𑀬𑁂𑀯 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀉𑀤𑀓𑁂 𑀤𑀡𑁆𑀟𑀭𑀸𑀚𑀽𑀧𑀫𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁…𑀧𑁂… 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀦𑀤𑀻 𑀧𑀩𑁆𑀩𑀢𑁂𑀬𑁆𑀬𑀸 𑀤𑀽𑀭𑀗𑁆𑀕𑀫𑀸 𑀲𑀻𑀖𑀲𑁄𑀢𑀸 𑀳𑀸𑀭𑀳𑀸𑀭𑀺𑀦𑀻, 𑀦𑀢𑁆𑀣𑀺 𑀲𑁄 𑀔𑀡𑁄 𑀯𑀸 𑀮𑀬𑁄 𑀯𑀸 𑀫𑀼𑀳𑀼𑀢𑁆𑀢𑁄 𑀯𑀸 𑀬𑀁 𑀲𑀸 [𑀬𑀸𑀬 (𑀓.)] 𑀆𑀯𑀢𑁆𑀢𑀢𑀺 [𑀣𑀭𑀢𑀺 (𑀲𑀻.), 𑀥𑀭𑀢𑀺 (𑀲𑁆𑀬𑀸.), 𑀅𑀯𑀢𑀺𑀝𑁆𑀞𑁂𑀬𑁆𑀬 (?)], 𑀅𑀣 𑀔𑁄 𑀲𑀸 𑀕𑀘𑁆𑀙𑀢𑁂𑀯 𑀯𑀢𑁆𑀢𑀢𑁂𑀯 𑀲𑀦𑁆𑀤𑀢𑁂𑀯; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀦𑀤𑀻𑀧𑀩𑁆𑀩𑀢𑁂𑀬𑁆𑀬𑀽𑀧𑀫𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁…𑀧𑁂… 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀩𑀮𑀯𑀸 𑀧𑀼𑀭𑀺𑀲𑁄 𑀚𑀺𑀯𑁆𑀳𑀕𑁆𑀕𑁂 𑀔𑁂𑀴𑀧𑀺𑀡𑁆𑀟𑀁 𑀲𑀁𑀬𑀽𑀳𑀺𑀢𑁆𑀯𑀸 𑀅𑀓𑀲𑀺𑀭𑁂𑀦𑁂𑀯 𑀯𑀫𑁂𑀬𑁆𑀬 [𑀧𑀢𑀸𑀧𑁂𑀬𑁆𑀬 (𑀓.)]; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀔𑁂𑀴𑀧𑀺𑀡𑁆𑀟𑀽𑀧𑀫𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁…𑀧𑁂… 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 𑀅𑀬𑁄𑀓𑀝𑀸𑀳𑁂 𑀫𑀁𑀲𑀧𑁂𑀲𑀺 [𑀫𑀁𑀲𑀧𑁂𑀲𑀻 (𑀲𑀻. 𑀲𑁆𑀬𑀸.)] 𑀧𑀓𑁆𑀔𑀺𑀢𑁆𑀢𑀸 𑀔𑀺𑀧𑁆𑀧𑀁𑀬𑁂𑀯 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀁𑀲𑀧𑁂𑀲𑀽𑀧𑀫𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁…𑀧𑁂… 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀕𑀸𑀯𑀻 𑀯𑀚𑁆𑀛𑀸 𑀆𑀖𑀸𑀢𑀦𑀁 𑀦𑀻𑀬𑀫𑀸𑀦𑀸 𑀬𑀁 𑀬𑀤𑁂𑀯 𑀧𑀸𑀤𑀁 𑀉𑀤𑁆𑀥𑀭𑀢𑀺, 𑀲𑀦𑁆𑀢𑀺𑀓𑁂𑀯 𑀳𑁄𑀢𑀺 𑀯𑀥𑀲𑁆𑀲 𑀲𑀦𑁆𑀢𑀺𑀓𑁂𑀯 𑀫𑀭𑀡𑀲𑁆𑀲; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀕𑁄𑀯𑀚𑁆𑀛𑀽𑀧𑀫𑀁 [𑀕𑀸𑀯𑀻𑀯𑀚𑁆𑀛𑀽𑀧𑀫𑀁 (𑀲𑀻. 𑀲𑁆𑀬𑀸.)] 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 𑀩𑀳𑀼𑀤𑀼𑀓𑁆𑀔𑀁 𑀩𑀳𑀼𑀧𑀸𑀬𑀸𑀲𑀁 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡’’𑀦𑁆𑀢𑀺.

‘‘𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺, 𑀧𑀜𑁆𑀘𑀯𑀲𑁆𑀲𑀲𑀢𑀺𑀓𑀸 𑀓𑀼𑀫𑀸𑀭𑀺𑀓𑀸 𑀅𑀮𑀁𑀧𑀢𑁂𑀬𑁆𑀬𑀸 𑀅𑀳𑁄𑀲𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 𑀙𑀴𑁂𑀯 𑀆𑀩𑀸𑀥𑀸 𑀅𑀳𑁂𑀲𑀼𑀁 𑁋 𑀲𑀻𑀢𑀁, 𑀉𑀡𑁆𑀳𑀁, 𑀚𑀺𑀖𑀘𑁆𑀙𑀸, 𑀧𑀺𑀧𑀸𑀲𑀸, 𑀉𑀘𑁆𑀘𑀸𑀭𑁄, 𑀧𑀲𑁆𑀲𑀸𑀯𑁄. 𑀲𑁄 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀅𑀭𑀓𑁄 𑀲𑀢𑁆𑀣𑀸 𑀏𑀯𑀁 𑀤𑀻𑀖𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀏𑀯𑀁 𑀘𑀺𑀭𑀝𑁆𑀞𑀺𑀢𑀺𑀓𑁂𑀲𑀼 𑀏𑀯𑀁 𑀅𑀧𑁆𑀧𑀸𑀩𑀸𑀥𑁂𑀲𑀼 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺 𑁋 ‘𑀅𑀧𑁆𑀧𑀓𑀁, 𑀩𑁆𑀭𑀸𑀳𑁆𑀫𑀡, 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 𑀩𑀳𑀼𑀤𑀼𑀓𑁆𑀔𑀁 𑀩𑀳𑀼𑀧𑀸𑀬𑀸𑀲𑀁 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡’’’𑀦𑁆𑀢𑀺.

‘‘𑀏𑀢𑀭𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 𑀩𑀳𑀼𑀤𑀼𑀓𑁆𑀔𑀁 𑀩𑀳𑀼𑀧𑀸𑀬𑀸𑀲𑀁 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡’𑀦𑁆𑀢𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀬𑁄 𑀘𑀺𑀭𑀁 𑀚𑀻𑀯𑀢𑀺 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄. 𑀯𑀲𑁆𑀲𑀲𑀢𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀚𑀻𑀯𑀦𑁆𑀢𑁄 𑀢𑀻𑀡𑀺𑀬𑁂𑀯 𑀉𑀢𑀼𑀲𑀢𑀸𑀦𑀺 𑀚𑀻𑀯𑀢𑀺 𑁋 𑀉𑀢𑀼𑀲𑀢𑀁 𑀳𑁂𑀫𑀦𑁆𑀢𑀸𑀦𑀁, 𑀉𑀢𑀼𑀲𑀢𑀁 𑀕𑀺𑀫𑁆𑀳𑀸𑀦𑀁, 𑀉𑀢𑀼𑀲𑀢𑀁 𑀯𑀲𑁆𑀲𑀸𑀦𑀁. 𑀢𑀻𑀡𑀺 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀉𑀢𑀼𑀲𑀢𑀸𑀦𑀺 𑀚𑀻𑀯𑀦𑁆𑀢𑁄 𑀤𑁆𑀯𑀸𑀤𑀲 [𑀤𑁆𑀯𑀸𑀤𑀲𑀁 (𑀲𑀻. 𑀓.)] 𑀬𑁂𑀯 𑀫𑀸𑀲𑀲𑀢𑀸𑀦𑀺 𑀚𑀻𑀯𑀢𑀺 𑁋 𑀘𑀢𑁆𑀢𑀸𑀭𑀺 𑀫𑀸𑀲𑀲𑀢𑀸𑀦𑀺 𑀳𑁂𑀫𑀦𑁆𑀢𑀸𑀦𑀁, 𑀘𑀢𑁆𑀢𑀸𑀭𑀺 𑀫𑀸𑀲𑀲𑀢𑀸𑀦𑀺 𑀕𑀺𑀫𑁆𑀳𑀸𑀦𑀁, 𑀘𑀢𑁆𑀢𑀸𑀭𑀺 𑀫𑀸𑀲𑀲𑀢𑀸𑀦𑀺 𑀯𑀲𑁆𑀲𑀸𑀦𑀁. 𑀤𑁆𑀯𑀸𑀤𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀸𑀲𑀲𑀢𑀸𑀦𑀺 𑀚𑀻𑀯𑀦𑁆𑀢𑁄 𑀘𑀢𑀼𑀯𑀻𑀲𑀢𑀺𑀬𑁂𑀯 𑀅𑀤𑁆𑀥𑀫𑀸𑀲𑀲𑀢𑀸𑀦𑀺 𑀚𑀻𑀯𑀢𑀺 𑁋 𑀅𑀝𑁆𑀞𑀤𑁆𑀥𑀫𑀸𑀲𑀲𑀢𑀸𑀦𑀺 𑀳𑁂𑀫𑀦𑁆𑀢𑀸𑀦𑀁, 𑀅𑀝𑁆𑀞𑀤𑁆𑀥𑀫𑀸𑀲𑀲𑀢𑀸𑀦𑀺 𑀕𑀺𑀫𑁆𑀳𑀸𑀦𑀁, 𑀅𑀝𑁆𑀞𑀤𑁆𑀥𑀫𑀸𑀲𑀲𑀢𑀸𑀦𑀺 𑀯𑀲𑁆𑀲𑀸𑀦𑀁. 𑀘𑀢𑀼𑀯𑀻𑀲𑀢𑀺 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀲𑀢𑀸𑀦𑀺 𑀚𑀻𑀯𑀦𑁆𑀢𑁄 𑀙𑀢𑁆𑀢𑀺𑀁𑀲𑀁𑀬𑁂𑀯 𑀭𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀚𑀻𑀯𑀢𑀺 𑁋 𑀤𑁆𑀯𑀸𑀤𑀲 𑀭𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀳𑁂𑀫𑀦𑁆𑀢𑀸𑀦𑀁, 𑀤𑁆𑀯𑀸𑀤𑀲 𑀭𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀕𑀺𑀫𑁆𑀳𑀸𑀦𑀁, 𑀤𑁆𑀯𑀸𑀤𑀲 𑀭𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀯𑀲𑁆𑀲𑀸𑀦𑀁. 𑀙𑀢𑁆𑀢𑀺𑀁𑀲𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀚𑀻𑀯𑀦𑁆𑀢𑁄 𑀤𑁆𑀯𑁂𑀲𑀢𑁆𑀢𑀢𑀺𑀬𑁂𑀯 [𑀤𑁆𑀯𑁂𑀲𑀢𑁆𑀢𑀢𑀺𑀜𑁆𑀜𑁂𑀯 (𑀲𑁆𑀬𑀸.), 𑀤𑁆𑀯𑁂𑀲𑀢𑁆𑀢𑀢𑀺𑀜𑁆𑀘𑁂𑀯 (𑀓.)] 𑀪𑀢𑁆𑀢𑀲𑀳𑀲𑁆𑀲𑀸𑀦𑀺 𑀪𑀼𑀜𑁆𑀚𑀢𑀺 𑁋 𑀘𑀢𑀼𑀯𑀻𑀲𑀢𑀺 𑀪𑀢𑁆𑀢𑀲𑀳𑀲𑁆𑀲𑀸𑀦𑀺 𑀳𑁂𑀫𑀦𑁆𑀢𑀸𑀦𑀁, 𑀘𑀢𑀼𑀯𑀻𑀲𑀢𑀺 𑀪𑀢𑁆𑀢𑀲𑀳𑀲𑁆𑀲𑀸𑀦𑀺 𑀕𑀺𑀫𑁆𑀳𑀸𑀦𑀁, 𑀘𑀢𑀼𑀯𑀻𑀲𑀢𑀺 𑀪𑀢𑁆𑀢𑀲𑀳𑀲𑁆𑀲𑀸𑀦𑀺 𑀯𑀲𑁆𑀲𑀸𑀦𑀁 𑀲𑀤𑁆𑀥𑀺𑀁 𑀫𑀸𑀢𑀼𑀣𑀜𑁆𑀜𑀸𑀬 𑀲𑀤𑁆𑀥𑀺𑀁 𑀪𑀢𑁆𑀢𑀦𑁆𑀢𑀭𑀸𑀬𑁂𑀦.

‘‘𑀢𑀢𑁆𑀭𑀺𑀫𑁂 𑀪𑀢𑁆𑀢𑀦𑁆𑀢𑀭𑀸𑀬𑀸 𑀓𑀧𑀺𑀫𑀺𑀤𑁆𑀥𑁄𑀧𑀺 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺, 𑀤𑀼𑀓𑁆𑀔𑀺𑀢𑁄𑀧𑀺 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺, 𑀩𑁆𑀬𑀸𑀥𑀺𑀢𑁄𑀧𑀺 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺, 𑀉𑀧𑁄𑀲𑀣𑀺𑀓𑁄𑀧𑀺 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺, 𑀅𑀮𑀸𑀪𑀓𑁂𑀦𑀧𑀺 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀯𑀲𑁆𑀲𑀲𑀢𑀸𑀬𑀼𑀓𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀆𑀬𑀼𑀧𑀺 𑀲𑀗𑁆𑀔𑀸𑀢𑁄 [𑀲𑀗𑁆𑀔𑀸𑀢𑀁 (?)], 𑀆𑀬𑀼𑀧𑁆𑀧𑀫𑀸𑀡𑀫𑁆𑀧𑀺 𑀲𑀗𑁆𑀔𑀸𑀢𑀁, 𑀉𑀢𑀽𑀧𑀺 𑀲𑀗𑁆𑀔𑀸𑀢𑀸, 𑀲𑀁𑀯𑀘𑁆𑀙𑀭𑀸𑀧𑀺 𑀲𑀗𑁆𑀔𑀸𑀢𑀸, 𑀫𑀸𑀲𑀸𑀧𑀺 𑀲𑀗𑁆𑀔𑀸𑀢𑀸, 𑀅𑀤𑁆𑀥𑀫𑀸𑀲𑀸𑀧𑀺 𑀲𑀗𑁆𑀔𑀸𑀢𑀸, 𑀭𑀢𑁆𑀢𑀺𑀧𑀺 𑀲𑀗𑁆𑀔𑀸𑀢𑀸, 𑀤𑀺𑀯𑀸𑀧𑀺 𑀲𑀗𑁆𑀔𑀸𑀢𑀸, 𑀪𑀢𑁆𑀢𑀸𑀧𑀺 𑀲𑀗𑁆𑀔𑀸𑀢𑀸, 𑀪𑀢𑁆𑀢𑀦𑁆𑀢𑀭𑀸𑀬𑀸𑀧𑀺 𑀲𑀗𑁆𑀔𑀸𑀢𑀸. 𑀬𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸𑀭𑀸 𑀓𑀭𑀡𑀻𑀬𑀁 𑀲𑀸𑀯𑀓𑀸𑀦𑀁 𑀳𑀺𑀢𑁂𑀲𑀺𑀦𑀸 𑀅𑀦𑀼𑀓𑀫𑁆𑀧𑀓𑁂𑀦 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬; 𑀓𑀢𑀁 𑀯𑁄 𑀢𑀁 𑀫𑀬𑀸 𑀏𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀫𑀽𑀮𑀸𑀦𑀺 𑀏𑀢𑀸𑀦𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺. 𑀛𑀸𑀬𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀫𑀸𑀤𑀢𑁆𑀣; 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺. 𑀤𑀲𑀫𑀁.

𑀫𑀳𑀸𑀯𑀕𑁆𑀕𑁄 𑀲𑀢𑁆𑀢𑀫𑁄.