𑁭. 𑀅𑀦𑀯𑀢𑁆𑀣𑀺𑀢𑀲𑀼𑀢𑁆𑀢𑀁

𑁧𑁦𑁨. ‘‘𑀙, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑁄𑀥𑀺𑀁 𑀓𑀭𑀺𑀢𑁆𑀯𑀸 𑀅𑀦𑀺𑀘𑁆𑀘𑀲𑀜𑁆𑀜𑀁 𑀉𑀧𑀝𑁆𑀞𑀸𑀧𑁂𑀢𑀼𑀁. 𑀓𑀢𑀫𑁂 𑀙? ‘𑀲𑀩𑁆𑀩𑀲𑀗𑁆𑀔𑀸𑀭𑀸 𑀘 𑀫𑁂 𑀅𑀦𑀯𑀢𑁆𑀣𑀺𑀢𑀸 [𑀅𑀦𑀯𑀝𑁆𑀞𑀺𑀢𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀔𑀸𑀬𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀮𑁄𑀓𑁂 𑀘 𑀫𑁂 𑀫𑀦𑁄 𑀦𑀸𑀪𑀺𑀭𑀫𑀺𑀲𑁆𑀲𑀢𑀺 [𑀦 𑀭𑀫𑀺𑀲𑁆𑀲𑀢𑀺 (𑀓.)], 𑀲𑀩𑁆𑀩𑀮𑁄𑀓𑀸 𑀘 𑀫𑁂 𑀫𑀦𑁄 𑀯𑀼𑀝𑁆𑀞𑀳𑀺𑀲𑁆𑀲𑀢𑀺, 𑀦𑀺𑀩𑁆𑀩𑀸𑀦𑀧𑁄𑀡𑀜𑁆𑀘 𑀫𑁂 𑀫𑀸𑀦𑀲𑀁 𑀪𑀯𑀺𑀲𑁆𑀲𑀢𑀺, 𑀲𑀁𑀬𑁄𑀚𑀦𑀸 𑀘 𑀫𑁂 𑀧𑀳𑀸𑀦𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺 [𑀕𑀘𑁆𑀙𑀦𑁆𑀢𑀺 (𑀲𑁆𑀬𑀸. 𑀧𑀻. 𑀓.)], 𑀧𑀭𑀫𑁂𑀦 𑀘 𑀲𑀸𑀫𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀆𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑁄𑀥𑀺𑀁 𑀓𑀭𑀺𑀢𑁆𑀯𑀸 𑀅𑀦𑀺𑀘𑁆𑀘𑀲𑀜𑁆𑀜𑀁 𑀉𑀧𑀝𑁆𑀞𑀸𑀧𑁂𑀢𑀼’’𑀦𑁆𑀢𑀺. 𑀲𑀢𑁆𑀢𑀫𑀁.