𑁮. 𑀅𑀭𑀳𑀢𑁆𑀢𑀯𑀕𑁆𑀕𑁄

𑁧. 𑀤𑀼𑀓𑁆𑀔𑀲𑀼𑀢𑁆𑀢𑀁

𑁭𑁫. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂𑀳𑀺 𑀙𑀳𑀺? 𑀓𑀸𑀫𑀯𑀺𑀢𑀓𑁆𑀓𑁂𑀦, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁂𑀦, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂𑀦, 𑀓𑀸𑀫𑀲𑀜𑁆𑀜𑀸𑀬, 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬, 𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀬 𑁋 𑀇𑀫𑁂𑀳𑀺, 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂𑀳𑀺 𑀙𑀳𑀺? 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁂𑀦, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁂𑀦, 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂𑀦, 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀬, 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬, 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀬 𑁋 𑀇𑀫𑁂𑀳𑀺, 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺 𑀧𑀸𑀝𑀺𑀓𑀗𑁆𑀔𑀸’’𑀢𑀺. 𑀧𑀞𑀫𑀁.

𑁨. 𑀅𑀭𑀳𑀢𑁆𑀢𑀲𑀼𑀢𑁆𑀢𑀁

𑁭𑁬. ‘‘𑀙, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀙? 𑀫𑀸𑀦𑀁, 𑀑𑀫𑀸𑀦𑀁, 𑀅𑀢𑀺𑀫𑀸𑀦𑀁, 𑀅𑀥𑀺𑀫𑀸𑀦𑀁, 𑀣𑀫𑁆𑀪𑀁, 𑀅𑀢𑀺𑀦𑀺𑀧𑀸𑀢𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁.

‘‘𑀙, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀙? 𑀫𑀸𑀦𑀁, 𑀑𑀫𑀸𑀦𑀁, 𑀅𑀢𑀺𑀫𑀸𑀦𑀁, 𑀅𑀥𑀺𑀫𑀸𑀦𑀁, 𑀣𑀫𑁆𑀪𑀁, 𑀅𑀢𑀺𑀦𑀺𑀧𑀸𑀢𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀼𑀢𑁆𑀢𑀁

𑁭𑁭. ‘‘𑀙, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀙? 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀅𑀲𑀫𑁆𑀧𑀚𑀜𑁆𑀜𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀁, 𑀓𑀼𑀳𑀦𑀁, 𑀮𑀧𑀦𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀸𑀢𑀼𑀁.

‘‘𑀙, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀙? 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀅𑀲𑀫𑁆𑀧𑀚𑀜𑁆𑀜𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀁, 𑀓𑀼𑀳𑀦𑀁, 𑀮𑀧𑀦𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀲𑀼𑀔𑀲𑁄𑀫𑀦𑀲𑁆𑀲𑀲𑀼𑀢𑁆𑀢𑀁

𑁭𑁮. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀸𑀭𑀸𑀫𑁄 𑀳𑁄𑀢𑀺, 𑀪𑀸𑀯𑀦𑀸𑀭𑀸𑀫𑁄 𑀳𑁄𑀢𑀺, 𑀧𑀳𑀸𑀦𑀸𑀭𑀸𑀫𑁄 𑀳𑁄𑀢𑀺, 𑀧𑀯𑀺𑀯𑁂𑀓𑀸𑀭𑀸𑀫𑁄 𑀳𑁄𑀢𑀺, 𑀅𑀩𑁆𑀬𑀸𑀧𑀚𑁆𑀛𑀸𑀭𑀸𑀫𑁄 𑀳𑁄𑀢𑀺, 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀥𑀺𑀕𑀫𑀲𑀼𑀢𑁆𑀢𑀁

𑁭𑁯. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀅𑀦𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑀼𑀁, 𑀅𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀨𑀸𑀢𑀺𑀁 𑀓𑀸𑀢𑀼𑀁 [𑀨𑀸𑀢𑀺𑀓𑀢𑁆𑀢𑀼𑀁 (𑀲𑀻.), 𑀨𑀸𑀢𑀺𑀓𑀸𑀢𑀼𑀁 (𑀲𑁆𑀬𑀸. 𑀓𑀁. 𑀧𑀻.)]. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀆𑀬𑀓𑀼𑀲𑀮𑁄 𑀘 𑀳𑁄𑀢𑀺, 𑀦 𑀅𑀧𑀸𑀬𑀓𑀼𑀲𑀮𑁄 𑀘 𑀳𑁄𑀢𑀺, 𑀦 𑀉𑀧𑀸𑀬𑀓𑀼𑀲𑀮𑁄 𑀘 𑀳𑁄𑀢𑀺, 𑀅𑀦𑀥𑀺𑀕𑀢𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀥𑀺𑀕𑀫𑀸𑀬 𑀦 𑀙𑀦𑁆𑀤𑀁 𑀚𑀦𑁂𑀢𑀺, 𑀅𑀥𑀺𑀕𑀢𑁂 𑀓𑀼𑀲𑀮𑁂 𑀥𑀫𑁆𑀫𑁂 𑀦 𑀆𑀭𑀓𑁆𑀔𑀢𑀺 [𑀲𑀸𑀭𑀓𑁆𑀔𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻)], 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀦 𑀲𑀫𑁆𑀧𑀸𑀤𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀅𑀦𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑀼𑀁, 𑀅𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀨𑀸𑀢𑀺𑀁 𑀓𑀸𑀢𑀼𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀦𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑀼𑀁, 𑀅𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀨𑀸𑀢𑀺𑀁 𑀓𑀸𑀢𑀼𑀁. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀬𑀓𑀼𑀲𑀮𑁄 𑀘 𑀳𑁄𑀢𑀺, 𑀅𑀧𑀸𑀬𑀓𑀼𑀲𑀮𑁄 𑀘 𑀳𑁄𑀢𑀺, 𑀉𑀧𑀸𑀬𑀓𑀼𑀲𑀮𑁄 𑀘 𑀳𑁄𑀢𑀺, 𑀅𑀦𑀥𑀺𑀕𑀢𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀥𑀺𑀕𑀫𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺, 𑀅𑀥𑀺𑀕𑀢𑁂 𑀓𑀼𑀲𑀮𑁂 𑀥𑀫𑁆𑀫𑁂 𑀆𑀭𑀓𑁆𑀔𑀢𑀺, 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀲𑀫𑁆𑀧𑀸𑀤𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀦𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑀼𑀁, 𑀅𑀥𑀺𑀕𑀢𑀁 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀨𑀸𑀢𑀺𑀁 𑀓𑀸𑀢𑀼’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀫𑀳𑀦𑁆𑀢𑀢𑁆𑀢𑀲𑀼𑀢𑁆𑀢𑀁

𑁮𑁦. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀘𑀺𑀭𑀲𑁆𑀲𑁂𑀯 𑀫𑀳𑀦𑁆𑀢𑀢𑁆𑀢𑀁 [𑀫𑀳𑀢𑁆𑀢𑀁 (𑀲𑁆𑀬𑀸. 𑀓𑀁.)] 𑀯𑁂𑀧𑀼𑀮𑁆𑀮𑀢𑁆𑀢𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀼. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀮𑁄𑀓𑀩𑀳𑀼𑀮𑁄 𑀘 𑀳𑁄𑀢𑀺 𑀬𑁄𑀕𑀩𑀳𑀼𑀮𑁄 𑀘 𑀯𑁂𑀤𑀩𑀳𑀼𑀮𑁄 𑀘 𑀅𑀲𑀦𑁆𑀢𑀼𑀝𑁆𑀞𑀺𑀩𑀳𑀼𑀮𑁄 𑀘 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀉𑀢𑁆𑀢𑀭𑀺 𑀘 𑀧𑀢𑀸𑀭𑁂𑀢𑀺 [𑀧𑀓𑀭𑁄𑀢𑀺 (𑀓.)]. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀘𑀺𑀭𑀲𑁆𑀲𑁂𑀯 𑀫𑀳𑀦𑁆𑀢𑀢𑁆𑀢𑀁 𑀯𑁂𑀧𑀼𑀮𑁆𑀮𑀢𑁆𑀢𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀽’’𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀦𑀺𑀭𑀬𑀲𑀼𑀢𑁆𑀢𑀁

𑁮𑁧. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀙𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀸𑀧𑀺𑀘𑁆𑀙𑁄 𑀘, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀙𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀧𑁆𑀧𑀺𑀘𑁆𑀙𑁄 𑀘, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀦𑀺𑀭𑀬𑀲𑀼𑀢𑁆𑀢𑀁

𑁮𑁨. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀙𑀳𑀺 [𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀺𑀲𑀼𑀡𑀯𑀸𑀘𑀸 𑀳𑁄𑀢𑀺, 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, (𑀲𑀻. 𑀲𑁆𑀬𑀸. 𑀧𑀻.) 𑀏𑀯𑀁 𑀲𑀼𑀓𑁆𑀓𑀧𑀓𑁆𑀔𑁂𑀧𑀺]? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺 [𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀺𑀲𑀼𑀡𑀯𑀸𑀘𑀸 𑀳𑁄𑀢𑀺, 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, (𑀲𑀻. 𑀲𑁆𑀬𑀸. 𑀧𑀻.) 𑀏𑀯𑀁 𑀲𑀼𑀓𑁆𑀓𑀧𑀓𑁆𑀔𑁂𑀧𑀺], 𑀮𑀼𑀤𑁆𑀥𑁄 𑀘, 𑀧𑀕𑀩𑁆𑀪𑁄 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀙𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀮𑀼𑀤𑁆𑀥𑁄 𑀘, 𑀅𑀧𑁆𑀧𑀕𑀩𑁆𑀪𑁄 𑀘. 𑀇𑀫𑁂𑀳𑀺 𑀔𑁄 𑀪𑀺𑀓𑁆𑀔𑀯𑁂 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀅𑀝𑁆𑀞𑀫𑀁.

𑁯. 𑀅𑀕𑁆𑀕𑀥𑀫𑁆𑀫𑀲𑀼𑀢𑁆𑀢𑀁

𑁮𑁩. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀅𑀕𑁆𑀕𑀁 𑀥𑀫𑁆𑀫𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺, 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀲𑀸𑀧𑁂𑀓𑁆𑀔𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀅𑀕𑁆𑀕𑀁 𑀥𑀫𑁆𑀫𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀕𑁆𑀕𑀁 𑀥𑀫𑁆𑀫𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺, 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀕𑁆𑀕𑀁 𑀥𑀫𑁆𑀫𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀭𑀢𑁆𑀢𑀺𑀤𑀺𑀯𑀲𑀲𑀼𑀢𑁆𑀢𑀁

𑁮𑁪. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀳𑀺𑀘𑁆𑀙𑁄 𑀳𑁄𑀢𑀺, 𑀯𑀺𑀖𑀸𑀢𑀯𑀸, 𑀅𑀲𑀦𑁆𑀢𑀼𑀝𑁆𑀞𑁄, 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀺. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀫𑀳𑀺𑀘𑁆𑀙𑁄 𑀳𑁄𑀢𑀺, 𑀅𑀯𑀺𑀖𑀸𑀢𑀯𑀸, 𑀲𑀦𑁆𑀢𑀼𑀝𑁆𑀞𑁄, 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀲𑀢𑀺𑀫𑀸 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀻’’𑀢𑀺. 𑀤𑀲𑀫𑀁.

𑀅𑀭𑀳𑀢𑁆𑀢𑀯𑀕𑁆𑀕𑁄 𑀅𑀝𑁆𑀞𑀫𑁄. [𑀢𑀢𑀺𑀬𑁄 (𑀲𑁆𑀬𑀸. 𑀓.)]