𑁯. 𑀦𑀺𑀩𑁆𑀩𑁂𑀥𑀺𑀓𑀲𑀼𑀢𑁆𑀢𑀁

𑁬𑁩. ‘‘𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁄 𑀘 𑀲𑁄, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄? 𑀓𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑁄 [𑀓𑀸𑀫𑀸𑀦𑀁 𑀦𑀺𑀭𑁄𑀥𑁄 (𑀓.) 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑁄-𑀇𑀘𑁆𑀘𑀸𑀤𑀻𑀲𑀼𑀧𑀺] 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 [𑀓𑀸𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀻 (𑀓.) 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻-𑀇𑀘𑁆𑀘𑀸𑀤𑀻𑀲𑀼𑀧𑀺] 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀯𑁂𑀤𑀦𑀸𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀲𑀜𑁆𑀜𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀜𑁆𑀜𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀲𑀜𑁆𑀜𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀜𑁆𑀜𑀸𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀆𑀲𑀯𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀆𑀲𑀯𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀲𑀯𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀆𑀲𑀯𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀲𑀯𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀓𑀫𑁆𑀫𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁, 𑀓𑀫𑁆𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀫𑁆𑀫𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀫𑁆𑀫𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀫𑁆𑀫𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀤𑀼𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘‘𑀓𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁 [𑀫. 𑀦𑀺. 𑁧.𑁧𑁬𑁬; 𑀲𑀁. 𑀦𑀺. 𑁪.𑁨𑁬𑁮]? 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸 𑁋 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀅𑀧𑀺 𑀘 𑀔𑁄, 𑀪𑀺𑀓𑁆𑀔𑀯𑁂, 𑀦𑁂𑀢𑁂 𑀓𑀸𑀫𑀸 𑀓𑀸𑀫𑀕𑀼𑀡𑀸 𑀦𑀸𑀫𑁂𑀢𑁂 [𑀢𑁂 𑀓𑀸𑀫𑀕𑀼𑀡𑀸 𑀦𑀸𑀫 𑀦𑁂𑀢𑁂 𑀓𑀸𑀫𑀸 (𑀓.)] 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑀼𑀘𑁆𑀘𑀦𑁆𑀢𑀺 𑁋

[𑀓𑀣𑀸. 𑁫𑁧𑁪] ‘‘𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄,

𑀦𑁂𑀢𑁂 [𑀦 𑀢𑁂 (𑀲𑁆𑀬𑀸.)] 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂;

𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄,

𑀢𑀺𑀝𑁆𑀞𑀦𑁆𑀢𑀺 𑀘𑀺𑀢𑁆𑀭𑀸𑀦𑀺 𑀢𑀣𑁂𑀯 𑀮𑁄𑀓𑁂;

𑀅𑀣𑁂𑀢𑁆𑀣 𑀥𑀻𑀭𑀸 𑀯𑀺𑀦𑀬𑀦𑁆𑀢𑀺 𑀙𑀦𑁆𑀤’’𑀦𑁆𑀢𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀓𑀸𑀫𑁄 𑀭𑀽𑀧𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀲𑀤𑁆𑀤𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀕𑀦𑁆𑀥𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀭𑀲𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀨𑁄𑀝𑁆𑀞𑀩𑁆𑀩𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀫𑀬𑀫𑀸𑀦𑁄 𑀢𑀚𑁆𑀚𑀁 𑀢𑀚𑁆𑀚𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸 𑀅𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀦𑀺𑀭𑁄𑀥𑁄? 𑀨𑀲𑁆𑀲𑀦𑀺𑀭𑁄𑀥𑁄 [𑀨𑀲𑁆𑀲𑀦𑀺𑀭𑁄𑀥𑀸 (𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀓𑀸𑀫𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄 [𑀬𑀢𑁄 𑀘 𑀔𑁄 (𑀩𑀳𑀽𑀲𑀼)], 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀓𑀸𑀫𑁂 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀸𑀦𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀓𑀸𑀫𑀦𑀺𑀭𑁄𑀥𑀁. 𑀓𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀺𑀲𑀸 𑀲𑀼𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀦𑀺𑀭𑀸𑀫𑀺𑀲𑀸 𑀲𑀼𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀲𑀸𑀫𑀺𑀲𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀦𑀺𑀭𑀸𑀫𑀺𑀲𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀲𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀦𑀺𑀭𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑁄? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀬𑀫𑀸𑀦𑁄 [𑀯𑁂𑀤𑀬𑀫𑀸𑀦𑁄 (𑀲𑁆𑀬𑀸. 𑀓𑀁.) 𑀅. 𑀦𑀺. 𑁪.𑁨𑁩𑁩] 𑀢𑀚𑁆𑀚𑀁 𑀢𑀚𑁆𑀚𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸 𑀅𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀺𑀭𑁄𑀥𑁄? 𑀨𑀲𑁆𑀲𑀦𑀺𑀭𑁄𑀥𑁄 [𑀨𑀲𑁆𑀲𑀦𑀺𑀭𑁄𑀥𑀸 (𑀲𑁆𑀬𑀸. 𑀓𑀁. 𑀓.)], 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀯𑁂𑀤𑀦𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺. 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀯𑁂𑀤𑀦𑀸𑀦𑀺𑀭𑁄𑀥𑀁. 𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑁋 𑀭𑀽𑀧𑀲𑀜𑁆𑀜𑀸, 𑀲𑀤𑁆𑀤𑀲𑀜𑁆𑀜𑀸, 𑀕𑀦𑁆𑀥𑀲𑀜𑁆𑀜𑀸, 𑀭𑀲𑀲𑀜𑁆𑀜𑀸, 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀥𑀫𑁆𑀫𑀲𑀜𑁆𑀜𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀭𑀽𑀧𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀲𑀤𑁆𑀤𑁂𑀲𑀼 [𑀅𑀜𑁆𑀜𑀸 𑀪𑀺𑀓𑁆𑀔𑀯𑁂 𑀭𑀽𑀧𑁂𑀲𑀼 𑀲𑀜𑁆𑀜𑀸 𑀅𑀜𑁆𑀜𑀸 𑀲𑀤𑁆𑀤𑁂𑀲𑀼 𑀲𑀜𑁆𑀜𑀸 (𑀓.) 𑀏𑀯𑀁 𑀲𑁂𑀲𑁂𑀲𑀼𑀧𑀺], 𑀅𑀜𑁆𑀜𑀸 𑀲𑀜𑁆𑀜𑀸 𑀕𑀦𑁆𑀥𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀭𑀲𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀨𑁄𑀝𑁆𑀞𑀩𑁆𑀩𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀥𑀫𑁆𑀫𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑀺𑀧𑀸𑀓𑁄? 𑀯𑁄𑀳𑀸𑀭𑀯𑁂𑀧𑀓𑁆𑀓𑀁 [𑀯𑁄𑀳𑀸𑀭𑀯𑁂𑀧𑀓𑁆𑀓𑀸𑀳𑀁 (𑀲𑁆𑀬𑀸. 𑀧𑀻.), 𑀯𑁄𑀳𑀸𑀭𑀧𑀓𑁆𑀓𑀸𑀳𑀁 (𑀲𑀻.)], 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀁 [𑀲𑀜𑁆𑀜𑀸 (𑀲𑁆𑀬𑀸. 𑀧𑀻.)] 𑀯𑀤𑀸𑀫𑀺. 𑀬𑀣𑀸 𑀬𑀣𑀸 𑀦𑀁 𑀲𑀜𑁆𑀚𑀸𑀦𑀸𑀢𑀺 𑀢𑀣𑀸 𑀢𑀣𑀸 𑀯𑁄𑀳𑀭𑀢𑀺, 𑀏𑀯𑀁 𑀲𑀜𑁆𑀜𑀻 𑀅𑀳𑁄𑀲𑀺𑀦𑁆𑀢𑀺 [𑀅𑀳𑁄𑀲𑀻𑀢𑀺 (𑀓.)]. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀺𑀭𑁄𑀥𑁄? 𑀨𑀲𑁆𑀲𑀦𑀺𑀭𑁄𑀥𑁄, [𑀨𑀲𑁆𑀲𑀦𑀺𑀭𑁄𑀥𑀸 (𑀲𑁆𑀬𑀸. 𑀓.)] 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀲𑀜𑁆𑀜𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀜𑁆𑀜𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀜𑁆𑀜𑀸𑀦𑀁 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀜𑁆𑀜𑀸𑀦𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀜𑁆𑀜𑀸𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀲𑀜𑁆𑀜𑀸𑀦𑀺𑀭𑁄𑀥𑀁. 𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀆𑀲𑀯𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀅𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦𑀺𑀭𑀬𑀕𑀫𑀦𑀻𑀬𑀸 [𑀦𑀺𑀭𑀬𑀕𑀸𑀫𑀺𑀦𑀺𑀬𑀸 (𑀲𑀻. 𑀓.)], 𑀅𑀢𑁆𑀣𑀺 𑀆𑀲𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀫𑀦𑀻𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀕𑀫𑀦𑀻𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀫𑀦𑀼𑀲𑁆𑀲𑀮𑁄𑀓𑀕𑀫𑀦𑀻𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀤𑁂𑀯𑀮𑁄𑀓𑀕𑀫𑀦𑀻𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀯𑀺𑀧𑀸𑀓𑁄? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀕𑀢𑁄 𑀢𑀚𑁆𑀚𑀁 𑀢𑀚𑁆𑀚𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸 𑀅𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀦𑀺𑀭𑁄𑀥𑁄? 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀪𑀺𑀓𑁆𑀔𑀯𑁂, 𑀆𑀲𑀯𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀆𑀲𑀯𑁂 𑀧𑀚𑀸𑀦𑀸𑀢𑀺, 𑀏𑀯𑀁 𑀆𑀲𑀯𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀆𑀲𑀯𑀸𑀦𑀁 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀆𑀲𑀯𑀸𑀦𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀆𑀲𑀯𑀸𑀦𑀁 𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀆𑀲𑀯𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀆𑀲𑀯𑀦𑀺𑀭𑁄𑀥𑀁. 𑀆𑀲𑀯𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀓𑀫𑁆𑀫𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁…𑀧𑁂… 𑀓𑀫𑁆𑀫𑀦𑀺𑀭𑁄𑀥𑀕𑀸𑀫𑀺𑀦𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? [𑀓𑀣𑀸. 𑁫𑁩𑁯] 𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺. 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀦𑀺𑀭𑀬𑀯𑁂𑀤𑀦𑀻𑀬𑀁, 𑀅𑀢𑁆𑀣𑀺 𑀓𑀫𑁆𑀫𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀯𑁂𑀤𑀦𑀻𑀬𑀁, 𑀅𑀢𑁆𑀣𑀺 𑀓𑀫𑁆𑀫𑀁 𑀧𑁂𑀢𑁆𑀢𑀺𑀯𑀺𑀲𑀬𑀯𑁂𑀤𑀦𑀻𑀬𑀁, 𑀅𑀢𑁆𑀣𑀺 𑀓𑀫𑁆𑀫𑀁 𑀫𑀦𑀼𑀲𑁆𑀲𑀮𑁄𑀓𑀯𑁂𑀤𑀦𑀻𑀬𑀁, 𑀅𑀢𑁆𑀣𑀺 𑀓𑀫𑁆𑀫𑀁 𑀤𑁂𑀯𑀮𑁄𑀓𑀯𑁂𑀤𑀦𑀻𑀬𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄? 𑀢𑀺𑀯𑀺𑀥𑀸𑀳𑀁 [𑀇𑀫𑀸𑀳𑀁 (𑀓.)], 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀯𑀤𑀸𑀫𑀺 𑁋 𑀤𑀺𑀝𑁆𑀞𑁂𑀯 [𑀤𑀺𑀝𑁆𑀞𑁂 𑀯𑀸 (𑀲𑀻.)] 𑀥𑀫𑁆𑀫𑁂, 𑀉𑀧𑀧𑀚𑁆𑀚𑁂 𑀯𑀸 [𑀉𑀧𑀧𑀚𑁆𑀚𑀁 𑀯𑀸 (𑀓. 𑀲𑀻., 𑀅. 𑀦𑀺. 𑁧𑁦.𑁨𑁧𑁭), 𑀉𑀧𑀧𑀚𑁆𑀚 𑀯𑀸 (?), 𑀫. 𑀦𑀺. 𑁩.𑁩𑁦𑁩 𑀧𑀸𑀴𑀺𑀬𑀸 𑀢𑀤𑀢𑁆𑀣𑀯𑀡𑁆𑀡𑀦𑀸𑀬 𑀘 𑀲𑀁𑀲𑀤𑁆𑀤𑁂𑀢𑀩𑁆𑀩𑀁], 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀦𑀺𑀭𑁄𑀥𑁄? 𑀨𑀲𑁆𑀲𑀦𑀺𑀭𑁄𑀥𑁄, [𑀨𑀲𑁆𑀲𑀦𑀺𑀭𑁄𑀥𑀸 (𑀓. 𑀲𑀻. 𑀲𑁆𑀬𑀸. 𑀓.)] 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀓𑀫𑁆𑀫𑀦𑀺𑀭𑁄𑀥𑀕𑀸𑀫𑀺𑀦𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀓𑀫𑁆𑀫𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀫𑁆𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀫𑁆𑀫𑀸𑀦𑀁 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀫𑁆𑀫𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀫𑁆𑀫𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀓𑀫𑁆𑀫𑀦𑀺𑀭𑁄𑀥𑀁. 𑀓𑀫𑁆𑀫𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁…𑀧𑁂… 𑀓𑀫𑁆𑀫𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀤𑀼𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀩𑁆𑀬𑀸𑀥𑀺𑀧𑀺 𑀤𑀼𑀓𑁆𑀔𑁄 [𑀩𑁆𑀬𑀸𑀥𑀺𑀧𑀺 𑀤𑀼𑀓𑁆𑀔𑀸 (𑀲𑁆𑀬𑀸. 𑀧𑀻. 𑀓.)], 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 [𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀧𑀺 (𑀓.)] 𑀤𑀼𑀓𑁆𑀔𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀢𑀡𑁆𑀳𑀸, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀥𑀺𑀫𑀢𑁆𑀢𑀁, 𑀅𑀢𑁆𑀣𑀺 𑀧𑀭𑀺𑀢𑁆𑀢𑀁, 𑀅𑀢𑁆𑀣𑀺 𑀤𑀦𑁆𑀥𑀯𑀺𑀭𑀸𑀕𑀺, 𑀅𑀢𑁆𑀣𑀺 𑀔𑀺𑀧𑁆𑀧𑀯𑀺𑀭𑀸𑀕𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀬𑁂𑀦 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 [𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 (𑀓.)] 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀬𑁂𑀦 𑀯𑀸 𑀧𑀦 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀩𑀳𑀺𑀤𑁆𑀥𑀸 𑀧𑀭𑀺𑀬𑁂𑀝𑁆𑀞𑀺𑀁 𑀆𑀧𑀚𑁆𑀚𑀢𑀺 𑁋 ‘𑀓𑁄 [𑀲𑁄 𑀦 (𑀓.)] 𑀏𑀓𑀧𑀤𑀁 𑀤𑁆𑀯𑀺𑀧𑀤𑀁 𑀚𑀸𑀦𑀸𑀢𑀺 [𑀧𑀚𑀸𑀦𑀸𑀢𑀺 (𑀓.)] 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑀸𑀬𑀸’𑀢𑀺? 𑀲𑀫𑁆𑀫𑁄𑀳𑀯𑁂𑀧𑀓𑁆𑀓𑀁 𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀯𑀤𑀸𑀫𑀺 𑀧𑀭𑀺𑀬𑁂𑀝𑁆𑀞𑀺𑀯𑁂𑀧𑀓𑁆𑀓𑀁 𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀢𑀡𑁆𑀳𑀸𑀦𑀺𑀭𑁄𑀥𑁄, [𑀢𑀡𑁆𑀳𑀸𑀦𑀺𑀭𑁄𑀥𑀸 (𑀓. 𑀲𑀻. 𑀲𑁆𑀬𑀸. 𑀓.)] 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀤𑀼𑀓𑁆𑀔𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀁. 𑀤𑀼𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀅𑀬𑀁 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀦𑀯𑀫𑀁.