𑁪. 𑀤𑁂𑀯𑀢𑀸𑀯𑀕𑁆𑀕𑁄

𑁧. 𑀲𑁂𑀔𑀲𑀼𑀢𑁆𑀢𑀁

𑁩𑁧. ‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀙? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀙? 𑀦 𑀓𑀫𑁆𑀫𑀸𑀭𑀸𑀫𑀢𑀸, 𑀦 𑀪𑀲𑁆𑀲𑀸𑀭𑀸𑀫𑀢𑀸, 𑀦 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀧𑀞𑀫𑀁.

𑁨. 𑀧𑀞𑀫𑀅𑀧𑀭𑀺𑀳𑀸𑀦𑀲𑀼𑀢𑁆𑀢𑀁

𑁩𑁨. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀙𑀬𑀺𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀙? 𑀲𑀢𑁆𑀣𑀼𑀕𑀸𑀭𑀯𑀢𑀸, 𑀥𑀫𑁆𑀫𑀕𑀸𑀭𑀯𑀢𑀸, 𑀲𑀗𑁆𑀖𑀕𑀸𑀭𑀯𑀢𑀸, 𑀲𑀺𑀓𑁆𑀔𑀸𑀕𑀸𑀭𑀯𑀢𑀸, 𑀅𑀧𑁆𑀧𑀫𑀸𑀤𑀕𑀸𑀭𑀯𑀢𑀸, 𑀧𑀝𑀺𑀲𑀦𑁆𑀣𑀸𑀭𑀕𑀸𑀭𑀯𑀢𑀸 [𑀧𑀝𑀺𑀲𑀦𑁆𑀥𑀸𑀭𑀕𑀸𑀭𑀯𑀢𑀸 (𑀓.)] 𑁋 𑀇𑀫𑁂 𑀔𑁄, 𑀪𑀦𑁆𑀢𑁂, 𑀙 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀤𑀫𑀯𑁄𑀘 𑀲𑀸 𑀤𑁂𑀯𑀢𑀸. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀣 𑀔𑁄 𑀲𑀸 𑀤𑁂𑀯𑀢𑀸 ‘‘𑀲𑀫𑀦𑀼𑀜𑁆𑀜𑁄 𑀫𑁂 𑀲𑀢𑁆𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀙𑀬𑀺𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀙? 𑀲𑀢𑁆𑀣𑀼𑀕𑀸𑀭𑀯𑀢𑀸, 𑀥𑀫𑁆𑀫𑀕𑀸𑀭𑀯𑀢𑀸, 𑀲𑀗𑁆𑀖𑀕𑀸𑀭𑀯𑀢𑀸, 𑀲𑀺𑀓𑁆𑀔𑀸𑀕𑀸𑀭𑀯𑀢𑀸, 𑀅𑀧𑁆𑀧𑀫𑀸𑀤𑀕𑀸𑀭𑀯𑀢𑀸, 𑀧𑀝𑀺𑀲𑀦𑁆𑀣𑀸𑀭𑀕𑀸𑀭𑀯𑀢𑀸 𑁋 𑀇𑀫𑁂 𑀔𑁄, 𑀪𑀦𑁆𑀢𑁂, 𑀙 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺. 𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺.

‘‘𑀲𑀢𑁆𑀣𑀼𑀕𑀭𑀼 𑀥𑀫𑁆𑀫𑀕𑀭𑀼, 𑀲𑀗𑁆𑀖𑁂 𑀘 𑀢𑀺𑀩𑁆𑀩𑀕𑀸𑀭𑀯𑁄;

𑀅𑀧𑁆𑀧𑀫𑀸𑀤𑀕𑀭𑀼 𑀪𑀺𑀓𑁆𑀔𑀼, 𑀧𑀝𑀺𑀲𑀦𑁆𑀣𑀸𑀭𑀕𑀸𑀭𑀯𑁄;

𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’𑀢𑀺. 𑀤𑀼𑀢𑀺𑀬𑀁;

𑁩. 𑀤𑀼𑀢𑀺𑀬𑀅𑀧𑀭𑀺𑀳𑀸𑀦𑀲𑀼𑀢𑁆𑀢𑀁

𑁩𑁩. ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀙𑀬𑀺𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀙? 𑀲𑀢𑁆𑀣𑀼𑀕𑀸𑀭𑀯𑀢𑀸, 𑀥𑀫𑁆𑀫𑀕𑀸𑀭𑀯𑀢𑀸, 𑀲𑀗𑁆𑀖𑀕𑀸𑀭𑀯𑀢𑀸, 𑀲𑀺𑀓𑁆𑀔𑀸𑀕𑀸𑀭𑀯𑀢𑀸, 𑀳𑀺𑀭𑀺𑀕𑀸𑀭𑀯𑀢𑀸, 𑀑𑀢𑁆𑀢𑀧𑁆𑀧𑀕𑀸𑀭𑀯𑀢𑀸 𑁋 𑀇𑀫𑁂 𑀔𑁄, 𑀪𑀦𑁆𑀢𑁂, 𑀙 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺. 𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺.

‘‘𑀲𑀢𑁆𑀣𑀼𑀕𑀭𑀼 𑀥𑀫𑁆𑀫𑀕𑀭𑀼, 𑀲𑀗𑁆𑀖𑁂 𑀘 𑀢𑀺𑀩𑁆𑀩𑀕𑀸𑀭𑀯𑁄;

𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄, 𑀲𑀧𑁆𑀧𑀢𑀺𑀲𑁆𑀲𑁄 𑀲𑀕𑀸𑀭𑀯𑁄;

𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’𑀢𑀺. 𑀢𑀢𑀺𑀬𑀁;

𑁪. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁

𑁩𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀓𑀢𑀫𑁂𑀲𑀸𑀦𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 [𑀲𑁄𑀢𑀸𑀧𑀦𑁆𑀦𑀸𑀫𑁆𑀳𑀸 (𑀲𑀻.), 𑀲𑁄𑀢𑀸𑀧𑀦𑁆𑀦𑀸𑀫𑁆𑀳 (𑀲𑁆𑀬𑀸. 𑀓𑀁. 𑀧𑀻.)] 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺? 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀺𑀲𑁆𑀲𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀥𑀼𑀦𑀸𑀓𑀸𑀮𑀗𑁆𑀓𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀢𑀢𑁆𑀭𑀧𑀺 𑀦𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘‘𑀢𑀺𑀲𑁆𑀲𑁄 𑀩𑁆𑀭𑀳𑁆𑀫𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 [𑀲𑀫𑁆𑀫𑀺𑀜𑁆𑀚𑀺𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑁋 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀤𑁆𑀤𑀲𑀸 𑀔𑁄 𑀢𑀺𑀲𑁆𑀲𑁄 𑀩𑁆𑀭𑀳𑁆𑀫𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦; 𑀲𑁆𑀯𑀸𑀕𑀢𑀁 [𑀲𑀸𑀕𑀢𑀁 (𑀲𑀻.)], 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦; 𑀘𑀺𑀭𑀲𑁆𑀲𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦; 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺, 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀦𑀺𑀲𑀻𑀤, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀦𑀺𑀲𑀻𑀤𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀢𑀺𑀲𑁆𑀲𑁄𑀧𑀺 𑀔𑁄 𑀩𑁆𑀭𑀳𑁆𑀫𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀺𑀲𑁆𑀲𑀁 𑀩𑁆𑀭𑀳𑁆𑀫𑀸𑀦𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁂𑀲𑀸𑀦𑀁 𑀔𑁄, 𑀢𑀺𑀲𑁆𑀲, 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺? ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺.

‘‘𑀲𑀩𑁆𑀩𑁂𑀲𑀜𑁆𑀜𑁂𑀯 𑀦𑀼 𑀔𑁄, 𑀢𑀺𑀲𑁆𑀲, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺? ‘‘𑀦 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀩𑁆𑀩𑁂𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀬𑁂 𑀔𑁄 𑀢𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀲𑀫𑀦𑁆𑀦𑀸𑀕𑀢𑀸 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀲𑀫𑀦𑁆𑀦𑀸𑀕𑀢𑀸 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀅𑀲𑀫𑀦𑁆𑀦𑀸𑀕𑀢𑀸 𑀦 𑀢𑁂𑀲𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀬𑁂 𑀘 𑀔𑁄 𑀢𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀢𑁂𑀲𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺.

‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀜𑁆𑀜𑁂𑀯 𑀦𑀼 𑀔𑁄, 𑀢𑀺𑀲𑁆𑀲, 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺 𑀉𑀤𑀸𑀳𑀼 𑀢𑀸𑀯𑀢𑀺𑀁𑀲𑀸𑀦𑀫𑁆𑀧𑀺 𑀤𑁂𑀯𑀸𑀦𑀁…𑀧𑁂… 𑀬𑀸𑀫𑀸𑀦𑀫𑁆𑀧𑀺 𑀤𑁂𑀯𑀸𑀦𑀁… 𑀢𑀼𑀲𑀺𑀢𑀸𑀦𑀫𑁆𑀧𑀺 𑀤𑁂𑀯𑀸𑀦𑀁… 𑀦𑀺𑀫𑁆𑀫𑀸𑀦𑀭𑀢𑀻𑀦𑀫𑁆𑀧𑀺 𑀤𑁂𑀯𑀸𑀦𑀁… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀫𑁆𑀧𑀺 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺? ‘‘𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀫𑁆𑀧𑀺 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺.

‘‘𑀲𑀩𑁆𑀩𑁂𑀲𑀜𑁆𑀜𑁂𑀯 𑀦𑀼 𑀔𑁄, 𑀢𑀺𑀲𑁆𑀲, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺? ‘‘𑀦 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀩𑁆𑀩𑁂𑀲𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀬𑁂 𑀔𑁄 𑀢𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀲𑀫𑀦𑁆𑀦𑀸𑀕𑀢𑀸, 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀲𑀫𑀦𑁆𑀦𑀸𑀕𑀢𑀸, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀅𑀲𑀫𑀦𑁆𑀦𑀸𑀕𑀢𑀸, 𑀦 𑀢𑁂𑀲𑀁 𑀤𑁂𑀯𑀸𑀦𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀬𑁂 𑀘 𑀔𑁄 𑀢𑁂, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀢𑁂𑀲𑀁 𑀏𑀯𑀁 𑀜𑀸𑀡𑀁 𑀳𑁄𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑀸 𑀦𑀸𑀫 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀺𑀲𑁆𑀲𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑁋 ‘𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀚𑁂𑀢𑀯𑀦𑁂 𑀧𑀸𑀢𑀼𑀭𑀳𑁄𑀲𑀻’’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀯𑀺𑀚𑁆𑀚𑀸𑀪𑀸𑀕𑀺𑀬𑀲𑀼𑀢𑁆𑀢𑀁

𑁩𑁫. ‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀓𑀢𑀫𑁂 𑀙? 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀧𑀳𑀸𑀦𑀲𑀜𑁆𑀜𑀸, 𑀯𑀺𑀭𑀸𑀕𑀲𑀜𑁆𑀜𑀸, 𑀦𑀺𑀭𑁄𑀥𑀲𑀜𑁆𑀜𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀯𑀺𑀯𑀸𑀤𑀫𑀽𑀮𑀲𑀼𑀢𑁆𑀢𑀁

𑁩𑁬. [𑀤𑀻. 𑀦𑀺. 𑁩.𑁩𑁨𑁫; 𑀫. 𑀦𑀺. 𑁩.𑁪𑁪; 𑀘𑀽𑀴𑀯. 𑁨𑁧𑁬] ‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀓𑀢𑀫𑀸𑀦𑀺 𑀙? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺, 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣. 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻…𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻… 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻… 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺… 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺, 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣. 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣. 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀙 𑀯𑀺𑀯𑀸𑀤𑀫𑀽𑀮𑀸𑀦𑀻’’𑀢𑀺. 𑀙𑀝𑁆𑀞𑀁.

𑁭. 𑀙𑀴𑀗𑁆𑀕𑀤𑀸𑀦𑀲𑀼𑀢𑁆𑀢𑀁

𑁩𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀴𑀼𑀓𑀡𑁆𑀟𑀓𑀻 [𑀯𑁂𑀴𑀼𑀓𑀡𑁆𑀟𑀓𑀺𑀬𑀸 (𑀅. 𑀦𑀺. 𑁭.𑁫𑁩; 𑁨.𑁧𑁩𑁪; 𑀲𑀁. 𑀦𑀺. 𑁨.𑁧𑁭𑁩)] 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀯𑁂𑀴𑀼𑀓𑀡𑁆𑀟𑀓𑀺𑀁 𑀦𑀦𑁆𑀤𑀫𑀸𑀢𑀭𑀁 𑀉𑀧𑀸𑀲𑀺𑀓𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺𑀁. 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀲𑀸, 𑀪𑀺𑀓𑁆𑀔𑀯𑁂, 𑀯𑁂𑀴𑀼𑀓𑀡𑁆𑀟𑀓𑀻 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺’’.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀤𑀓𑁆𑀔𑀺𑀡𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑀲𑁆𑀲 𑀢𑀻𑀡𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀢𑀻𑀡𑀗𑁆𑀕𑀸𑀦𑀺. 𑀓𑀢𑀫𑀸𑀦𑀺 𑀤𑀸𑀬𑀓𑀲𑁆𑀲 𑀢𑀻𑀡𑀗𑁆𑀕𑀸𑀦𑀺? 𑀇𑀥, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁄 𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄 𑀳𑁄𑀢𑀺, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺. 𑀇𑀫𑀸𑀦𑀺 𑀤𑀸𑀬𑀓𑀲𑁆𑀲 𑀢𑀻𑀡𑀗𑁆𑀕𑀸𑀦𑀺.

‘‘𑀓𑀢𑀫𑀸𑀦𑀺 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀢𑀻𑀡𑀗𑁆𑀕𑀸𑀦𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀸𑀳𑀓𑀸 𑀯𑀻𑀢𑀭𑀸𑀕𑀸 𑀯𑀸 𑀳𑁄𑀦𑁆𑀢𑀺 𑀭𑀸𑀕𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀤𑁄𑀲𑀸 𑀯𑀸 𑀳𑁄𑀦𑁆𑀢𑀺 𑀤𑁄𑀲𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀫𑁄𑀳𑀸 𑀯𑀸 𑀳𑁄𑀦𑁆𑀢𑀺 𑀫𑁄𑀳𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸. 𑀇𑀫𑀸𑀦𑀺 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀢𑀻𑀡𑀗𑁆𑀕𑀸𑀦𑀺. 𑀇𑀢𑀺 𑀤𑀸𑀬𑀓𑀲𑁆𑀲 𑀢𑀻𑀡𑀗𑁆𑀕𑀸𑀦𑀺, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀢𑀻𑀡𑀗𑁆𑀕𑀸𑀦𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀤𑀓𑁆𑀔𑀺𑀡𑀸 𑀳𑁄𑀢𑀺.

‘‘𑀏𑀯𑀁 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀬, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸𑀬 𑀦 𑀲𑀼𑀓𑀭𑀁 𑀧𑀼𑀜𑁆𑀜𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑁋 ‘𑀏𑀢𑁆𑀢𑀓𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀻’𑀢𑀺. 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 [𑀅𑀲𑀗𑁆𑀔𑁂𑀬𑁆𑀬𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀦 𑀲𑀼𑀓𑀭𑀁 𑀉𑀤𑀓𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑁋 ‘𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀲𑀳𑀲𑁆𑀲𑀸𑀦𑀻’𑀢𑀺 𑀯𑀸. 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀦 𑀲𑀼𑀓𑀭𑀁 𑀧𑀼𑀜𑁆𑀜𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑁋 ‘𑀏𑀢𑁆𑀢𑀓𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀻’𑀢𑀺. 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺.

[𑀧𑁂. 𑀯. 𑁩𑁦𑁫 𑀧𑁂𑀢𑀯𑀢𑁆𑀣𑀼𑀫𑁆𑀳𑀺𑀧𑀺] ‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀬𑀜𑁆𑀜𑀲𑁆𑀲 [𑀧𑀼𑀜𑁆𑀜𑀲𑁆𑀲 (𑀓.)] 𑀲𑀫𑁆𑀧𑀤𑀸.

‘‘𑀯𑀻𑀢𑀭𑀸𑀕𑀸 [𑀯𑀻𑀢𑀭𑀸𑀕𑁄 (𑀲𑁆𑀬𑀸. 𑀓𑀁. 𑀓.) 𑀏𑀯𑀁 𑀅𑀦𑀦𑁆𑀢𑀭𑀧𑀤𑀢𑁆𑀢𑀬𑁂𑀧𑀺] 𑀯𑀻𑀢𑀤𑁄𑀲𑀸, 𑀯𑀻𑀢𑀫𑁄𑀳𑀸 𑀅𑀦𑀸𑀲𑀯𑀸;

𑀔𑁂𑀢𑁆𑀢𑀁 𑀬𑀜𑁆𑀜𑀲𑁆𑀲 𑀲𑀫𑁆𑀧𑀦𑁆𑀦𑀁, 𑀲𑀜𑁆𑀜𑀢𑀸 𑀩𑁆𑀭𑀳𑁆𑀫𑀘𑀸𑀭𑀬𑁄 [𑀩𑁆𑀭𑀳𑁆𑀫𑀘𑀸𑀭𑀺𑀦𑁄 (𑀲𑁆𑀬𑀸. 𑀓𑀁.)].

‘‘𑀲𑀬𑀁 𑀆𑀘𑀫𑀬𑀺𑀢𑁆𑀯𑀸𑀦, 𑀤𑀢𑁆𑀯𑀸 𑀲𑀓𑁂𑀳𑀺 𑀧𑀸𑀡𑀺𑀪𑀺;

𑀅𑀢𑁆𑀢𑀦𑁄 𑀧𑀭𑀢𑁄 𑀘𑁂𑀲𑁄, 𑀬𑀜𑁆𑀜𑁄 𑀳𑁄𑀢𑀺 𑀫𑀳𑀧𑁆𑀨𑀮𑁄.

[𑀅. 𑀦𑀺. 𑁪.𑁪𑁦] ‘‘𑀏𑀯𑀁 𑀬𑀚𑀺𑀢𑁆𑀯𑀸 𑀫𑁂𑀥𑀸𑀯𑀻, 𑀲𑀤𑁆𑀥𑁄 𑀫𑀼𑀢𑁆𑀢𑁂𑀦 𑀘𑁂𑀢𑀲𑀸;

𑀅𑀩𑁆𑀬𑀸𑀧𑀚𑁆𑀚𑀁 𑀲𑀼𑀔𑀁 𑀮𑁄𑀓𑀁, 𑀧𑀡𑁆𑀟𑀺𑀢𑁄 𑀉𑀧𑀧𑀚𑁆𑀚𑀢𑀻’’𑀢𑀺. 𑀲𑀢𑁆𑀢𑀫𑀁;

𑁮. 𑀅𑀢𑁆𑀢𑀓𑀸𑀭𑀻𑀲𑀼𑀢𑁆𑀢𑀁

𑁩𑁮. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀺 𑁋 ‘𑀦𑀢𑁆𑀣𑀺 𑀅𑀢𑁆𑀢𑀓𑀸𑀭𑁄, 𑀦𑀢𑁆𑀣𑀺 𑀧𑀭𑀓𑀸𑀭𑁄’’’𑀢𑀺. ‘‘𑀫𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀯𑀸𑀤𑀺𑀁 𑀏𑀯𑀁𑀤𑀺𑀝𑁆𑀞𑀺𑀁 𑀅𑀤𑁆𑀤𑀲𑀁 𑀯𑀸 𑀅𑀲𑁆𑀲𑁄𑀲𑀺𑀁 𑀯𑀸. 𑀓𑀣𑀜𑁆𑀳𑀺 𑀦𑀸𑀫 𑀲𑀬𑀁 𑀅𑀪𑀺𑀓𑁆𑀓𑀫𑀦𑁆𑀢𑁄, 𑀲𑀬𑀁 𑀧𑀝𑀺𑀓𑁆𑀓𑀫𑀦𑁆𑀢𑁄 𑀏𑀯𑀁 𑀯𑀓𑁆𑀔𑀢𑀺 𑁋 ‘𑀦𑀢𑁆𑀣𑀺 𑀅𑀢𑁆𑀢𑀓𑀸𑀭𑁄, 𑀦𑀢𑁆𑀣𑀺 𑀧𑀭𑀓𑀸𑀭𑁄’’’𑀢𑀺!

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀣𑀺 𑀆𑀭𑀩𑁆𑀪𑀥𑀸𑀢𑀽’’𑀢𑀺? ‘‘𑀏𑀯𑀁, 𑀪𑁄’’. ‘‘𑀆𑀭𑀩𑁆𑀪𑀥𑀸𑀢𑀼𑀬𑀸 𑀲𑀢𑀺 𑀆𑀭𑀩𑁆𑀪𑀯𑀦𑁆𑀢𑁄 𑀲𑀢𑁆𑀢𑀸 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑁄’’. ‘‘𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀭𑀩𑁆𑀪𑀥𑀸𑀢𑀼𑀬𑀸 𑀲𑀢𑀺 𑀆𑀭𑀩𑁆𑀪𑀯𑀦𑁆𑀢𑁄 𑀲𑀢𑁆𑀢𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀅𑀬𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀓𑀸𑀭𑁄 𑀅𑀬𑀁 𑀧𑀭𑀓𑀸𑀭𑁄’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀣𑀺 𑀦𑀺𑀓𑁆𑀓𑀫𑀥𑀸𑀢𑀼…𑀧𑁂… 𑀅𑀢𑁆𑀣𑀺 𑀧𑀭𑀓𑁆𑀓𑀫𑀥𑀸𑀢𑀼… 𑀅𑀢𑁆𑀣𑀺 𑀣𑀸𑀫𑀥𑀸𑀢𑀼… 𑀅𑀢𑁆𑀣𑀺 𑀞𑀺𑀢𑀺𑀥𑀸𑀢𑀼… 𑀅𑀢𑁆𑀣𑀺 𑀉𑀧𑀓𑁆𑀓𑀫𑀥𑀸𑀢𑀽’’𑀢𑀺? ‘‘𑀏𑀯𑀁, 𑀪𑁄’’. ‘‘𑀉𑀧𑀓𑁆𑀓𑀫𑀥𑀸𑀢𑀼𑀬𑀸 𑀲𑀢𑀺 𑀉𑀧𑀓𑁆𑀓𑀫𑀯𑀦𑁆𑀢𑁄 𑀲𑀢𑁆𑀢𑀸 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑁄’’. ‘‘𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀉𑀧𑀓𑁆𑀓𑀫𑀥𑀸𑀢𑀼𑀬𑀸 𑀲𑀢𑀺 𑀉𑀧𑀓𑁆𑀓𑀫𑀯𑀦𑁆𑀢𑁄 𑀲𑀢𑁆𑀢𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀅𑀬𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀓𑀸𑀭𑁄 𑀅𑀬𑀁 𑀧𑀭𑀓𑀸𑀭𑁄’’.

‘‘𑀫𑀸𑀳𑀁, 𑀩𑁆𑀭𑀸𑀳𑁆𑀫𑀡 [𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀩𑁆𑀭𑀸𑀳𑁆𑀫𑀡 𑀫𑀸𑀳𑀁 (𑀓.)], 𑀏𑀯𑀁𑀯𑀸𑀤𑀺𑀁 𑀏𑀯𑀁𑀤𑀺𑀝𑁆𑀞𑀺𑀁 𑀅𑀤𑁆𑀤𑀲𑀁 𑀯𑀸 𑀅𑀲𑁆𑀲𑁄𑀲𑀺𑀁 𑀯𑀸. 𑀓𑀣𑀜𑁆𑀳𑀺 𑀦𑀸𑀫 𑀲𑀬𑀁 𑀅𑀪𑀺𑀓𑁆𑀓𑀫𑀦𑁆𑀢𑁄 𑀲𑀬𑀁 𑀧𑀝𑀺𑀓𑁆𑀓𑀫𑀦𑁆𑀢𑁄 𑀏𑀯𑀁 𑀯𑀓𑁆𑀔𑀢𑀺 𑁋 ‘𑀦𑀢𑁆𑀣𑀺 𑀅𑀢𑁆𑀢𑀓𑀸𑀭𑁄 𑀦𑀢𑁆𑀣𑀺 𑀧𑀭𑀓𑀸𑀭𑁄’’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺! 𑀅𑀝𑁆𑀞𑀫𑀁.

𑁯. 𑀦𑀺𑀤𑀸𑀦𑀲𑀼𑀢𑁆𑀢𑀁

𑁩𑁯. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀤𑁄𑀲𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀫𑁄𑀳𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀦, 𑀪𑀺𑀓𑁆𑀔𑀯𑁂, 𑀮𑁄𑀪𑀸 𑀅𑀮𑁄𑀪𑁄 𑀲𑀫𑀼𑀤𑁂𑀢𑀺; 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀮𑁄𑀪𑀸 𑀮𑁄𑀪𑁄𑀯 𑀲𑀫𑀼𑀤𑁂𑀢𑀺. 𑀦, 𑀪𑀺𑀓𑁆𑀔𑀯𑁂, 𑀤𑁄𑀲𑀸 𑀅𑀤𑁄𑀲𑁄 𑀲𑀫𑀼𑀤𑁂𑀢𑀺; 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁄𑀲𑀸 𑀤𑁄𑀲𑁄𑀯 𑀲𑀫𑀼𑀤𑁂𑀢𑀺. 𑀦, 𑀪𑀺𑀓𑁆𑀔𑀯𑁂, 𑀫𑁄𑀳𑀸 𑀅𑀫𑁄𑀳𑁄 𑀲𑀫𑀼𑀤𑁂𑀢𑀺; 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑁄𑀳𑀸 𑀫𑁄𑀳𑁄𑀯 𑀲𑀫𑀼𑀤𑁂𑀢𑀺. 𑀦, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀅𑀤𑁄𑀲𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀅𑀫𑁄𑀳𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀦, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀸 𑀮𑁄𑀪𑁄 𑀲𑀫𑀼𑀤𑁂𑀢𑀺; 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀸 𑀅𑀮𑁄𑀪𑁄𑀯 𑀲𑀫𑀼𑀤𑁂𑀢𑀺. 𑀦, 𑀪𑀺𑀓𑁆𑀔𑀯𑁂, 𑀅𑀤𑁄𑀲𑀸 𑀤𑁄𑀲𑁄 𑀲𑀫𑀼𑀤𑁂𑀢𑀺; 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀤𑁄𑀲𑀸 𑀅𑀤𑁄𑀲𑁄𑀯 𑀲𑀫𑀼𑀤𑁂𑀢𑀺. 𑀦, 𑀪𑀺𑀓𑁆𑀔𑀯𑁂, 𑀅𑀫𑁄𑀳𑀸 𑀫𑁄𑀳𑁄 𑀲𑀫𑀼𑀤𑁂𑀢𑀺; 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀫𑁄𑀳𑀸 𑀅𑀫𑁄𑀳𑁄𑀯 𑀲𑀫𑀼𑀤𑁂𑀢𑀺. 𑀦, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀅𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀅𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀅𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀅𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺. 𑀦𑀯𑀫𑀁.

𑁧𑁦. 𑀓𑀺𑀫𑀺𑀮𑀲𑀼𑀢𑁆𑀢𑀁

𑁪𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀺𑀫𑀺𑀮𑀸𑀬𑀁 𑀯𑀺𑀳𑀭𑀢𑀺 𑀦𑀺𑀘𑀼𑀮𑀯𑀦𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀓𑀺𑀫𑀺𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀓𑀺𑀫𑀺𑀮, 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀲𑀢𑁆𑀣𑀭𑀺 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀥𑀫𑁆𑀫𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀗𑁆𑀖𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀧𑀝𑀺𑀲𑀦𑁆𑀣𑀸𑀭𑁂 [𑀧𑀝𑀺𑀲𑀦𑁆𑀥𑀸𑀭𑁂 (𑀓.) 𑀅. 𑀦𑀺. 𑁫.𑁨𑁦𑁧; 𑁭.𑁫𑁯] 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸. 𑀅𑀬𑀁 𑀔𑁄, 𑀓𑀺𑀫𑀺𑀮, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺’’.

‘‘𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀓𑀺𑀫𑀺𑀮, 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀲𑀢𑁆𑀣𑀭𑀺 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀥𑀫𑁆𑀫𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀗𑁆𑀖𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀅𑀧𑁆𑀧𑀫𑀸𑀤𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀧𑀝𑀺𑀲𑀦𑁆𑀣𑀸𑀭𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸. 𑀅𑀬𑀁 𑀔𑁄, 𑀓𑀺𑀫𑀺𑀮, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺. 𑀤𑀲𑀫𑀁.

𑁧𑁧. 𑀤𑀸𑀭𑀼𑀓𑁆𑀔𑀦𑁆𑀥𑀲𑀼𑀢𑁆𑀢𑀁

𑁪𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀤𑁆𑀤𑀲 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁. 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄, 𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀅𑀫𑀼𑀁 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥’’𑀦𑁆𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺.

‘‘𑀆𑀓𑀗𑁆𑀔𑀫𑀸𑀦𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀫𑀼𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀧𑀣𑀯𑀻𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀺, 𑀆𑀯𑀼𑀲𑁄, 𑀅𑀫𑀼𑀫𑁆𑀳𑀺 𑀤𑀸𑀭𑀼𑀓𑁆𑀔𑀦𑁆𑀥𑁂 𑀧𑀣𑀯𑀻𑀥𑀸𑀢𑀼, 𑀬𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀫𑀼𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀧𑀣𑀯𑀻𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬. 𑀆𑀓𑀗𑁆𑀔𑀫𑀸𑀦𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀫𑀼𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀆𑀧𑁄𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬 …𑀧𑁂… 𑀢𑁂𑀚𑁄𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬… 𑀯𑀸𑀬𑁄𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬… 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬… 𑀅𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀣𑀺, 𑀆𑀯𑀼𑀲𑁄, 𑀅𑀫𑀼𑀫𑁆𑀳𑀺 𑀤𑀸𑀭𑀼𑀓𑁆𑀔𑀦𑁆𑀥𑁂 𑀅𑀲𑀼𑀪𑀥𑀸𑀢𑀼, 𑀬𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀫𑀼𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀅𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀦𑀸𑀕𑀺𑀢𑀲𑀼𑀢𑁆𑀢𑀁

𑁪𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂. 𑀅𑀲𑁆𑀲𑁄𑀲𑀼𑀁 𑀔𑁄 𑀇𑀘𑁆𑀙𑀸𑀦𑀗𑁆𑀕𑀮𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀇𑀘𑁆𑀙𑀸𑀦𑀗𑁆𑀕𑀮𑀁 𑀅𑀦𑀼𑀧𑁆𑀧𑀢𑁆𑀢𑁄 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁…𑀧𑁂… 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺. 𑀅𑀣 𑀔𑁄 𑀇𑀘𑁆𑀙𑀸𑀦𑀗𑁆𑀕𑀮𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀁𑀲𑀼 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀸𑀕𑀺𑀢𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀺𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁂 𑀧𑀦 𑀢𑁂, 𑀦𑀸𑀕𑀺𑀢, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂’’𑀢𑀺? ‘‘𑀏𑀢𑁂, 𑀪𑀦𑁆𑀢𑁂, 𑀇𑀘𑁆𑀙𑀸𑀦𑀗𑁆𑀕𑀮𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀸 𑀪𑀕𑀯𑀦𑁆𑀢𑀁𑀬𑁂𑀯 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸’’𑀢𑀺. ‘‘𑀫𑀸𑀳𑀁, 𑀦𑀸𑀕𑀺𑀢, 𑀬𑀲𑁂𑀦 𑀲𑀫𑀸𑀕𑀫𑀁, 𑀫𑀸 𑀘 𑀫𑀬𑀸 𑀬𑀲𑁄. 𑀬𑁄 𑀔𑁄, 𑀦𑀸𑀕𑀺𑀢, 𑀦𑀬𑀺𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀲𑁆𑀲 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀲𑁄 𑀢𑀁 𑀫𑀻𑀴𑁆𑀳𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀼𑀔𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺.

‘‘𑀅𑀥𑀺𑀯𑀸𑀲𑁂𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸; 𑀅𑀥𑀺𑀯𑀸𑀲𑁂𑀢𑀼, 𑀲𑀼𑀕𑀢𑁄; 𑀅𑀥𑀺𑀯𑀸𑀲𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄. 𑀬𑁂𑀦 𑀬𑁂𑀦𑁂𑀯 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀕𑀫𑀺𑀲𑁆𑀲𑀢𑀺, 𑀢𑀦𑁆𑀦𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀬𑀣𑀸𑀦𑀺𑀦𑁆𑀦𑀁 𑀉𑀤𑀓𑀸𑀦𑀺 𑀧𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀦𑁆𑀢𑁂, 𑀬𑁂𑀦 𑀬𑁂𑀦𑁂𑀯 𑀤𑀸𑀦𑀺 𑀪𑀕𑀯𑀸 𑀕𑀫𑀺𑀲𑁆𑀲𑀢𑀺, 𑀢𑀦𑁆𑀦𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀻𑀮𑀧𑀜𑁆𑀜𑀸𑀡’’𑀦𑁆𑀢𑀺.

‘‘𑀫𑀸𑀳𑀁, 𑀦𑀸𑀕𑀺𑀢, 𑀬𑀲𑁂𑀦 𑀲𑀫𑀸𑀕𑀫𑀁, 𑀫𑀸 𑀘 𑀫𑀬𑀸 𑀬𑀲𑁄. 𑀬𑁄 𑀔𑁄, 𑀦𑀸𑀕𑀺𑀢, 𑀦𑀬𑀺𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀲𑁆𑀲 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀬𑀲𑁆𑀲𑀸𑀳𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲 𑀧𑀯𑀺𑀯𑁂𑀓𑀲𑀼𑀔𑀲𑁆𑀲 𑀉𑀧𑀲𑀫𑀲𑀼𑀔𑀲𑁆𑀲 𑀲𑀫𑁆𑀩𑁄𑀥𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀲𑁄 𑀢𑀁 𑀫𑀻𑀴𑁆𑀳𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀼𑀔𑀁 𑀲𑀸𑀤𑀺𑀬𑁂𑀬𑁆𑀬.

‘‘𑀇𑀥𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑀺𑀁 𑀲𑀫𑀸𑀳𑀺𑀢𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺𑀫𑀁 𑀆𑀬𑀲𑁆𑀫𑀦𑁆𑀢𑀁 [𑀆𑀭𑀸𑀫𑀺𑀓𑁄 𑀯𑀸 𑀖𑀝𑁆𑀝𑁂𑀲𑁆𑀲𑀢𑀺 𑀲𑀫𑀡𑀼𑀤𑁆𑀤𑁂𑀲𑁄 𑀯𑀸, 𑀢𑀁 𑀢𑀫𑁆𑀳𑀸 (𑀓. 𑀲𑀻. 𑀧𑀻.) 𑀆𑀭𑀸𑀫𑀺𑀓𑁄 𑀯𑀸 𑀖𑀝𑁆𑀝𑁂𑀲𑁆𑀲𑀢𑀺 𑀲𑀫𑀡𑀼𑀤𑁆𑀤𑁂𑀲𑁄 𑀯𑀸, 𑀲𑁄 𑀢𑀁 𑀢𑀫𑁆𑀳𑀸 (𑀓. 𑀲𑀻.) 𑀅. 𑀦𑀺. 𑁮.𑁮𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀢𑀺 𑀲𑀫𑀡𑀼𑀤𑁆𑀤𑁂𑀲𑁄 𑀯𑀸 𑀢𑀁 𑀢𑀫𑁆𑀳𑀸 [𑀆𑀭𑀸𑀫𑀺𑀓𑁄 𑀯𑀸 𑀖𑀝𑁆𑀝𑁂𑀲𑁆𑀲𑀢𑀺 𑀲𑀫𑀡𑀼𑀤𑁆𑀤𑁂𑀲𑁄 𑀯𑀸, 𑀢𑀁 𑀢𑀫𑁆𑀳𑀸 (𑀓. 𑀲𑀻. 𑀧𑀻.) 𑀆𑀭𑀸𑀫𑀺𑀓𑁄 𑀯𑀸 𑀖𑀝𑁆𑀝𑁂𑀲𑁆𑀲𑀢𑀺 𑀲𑀫𑀡𑀼𑀤𑁆𑀤𑁂𑀲𑁄 𑀯𑀸, 𑀲𑁄 𑀢𑀁 𑀢𑀫𑁆𑀳𑀸 (𑀓. 𑀲𑀻.) 𑀅. 𑀦𑀺. 𑁮.𑁮𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀲𑁆𑀲𑀢𑀻’𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑁂𑀦. 𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀅𑀭𑀜𑁆𑀜𑁂 𑀧𑀘𑀮𑀸𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺 𑀅𑀬𑀫𑀸𑀬𑀲𑁆𑀫𑀸 𑀇𑀫𑀁 𑀦𑀺𑀤𑁆𑀤𑀸𑀓𑀺𑀮𑀫𑀣𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀅𑀭𑀜𑁆𑀜𑀲𑀜𑁆𑀜𑀁𑀬𑁂𑀯 𑀫𑀦𑀲𑀺 𑀓𑀭𑀺𑀲𑁆𑀲𑀢𑀺 𑀏𑀓𑀢𑁆𑀢’𑀦𑁆𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀅𑀭𑀜𑁆𑀜𑁂 𑀅𑀲𑀫𑀸𑀳𑀺𑀢𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺 𑀅𑀬𑀫𑀸𑀬𑀲𑁆𑀫𑀸 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀲𑁆𑀲𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀺𑀲𑁆𑀲𑀢𑀻’𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀅𑀭𑀜𑁆𑀜𑁂 𑀲𑀫𑀸𑀳𑀺𑀢𑀁 𑀦𑀺𑀲𑀺𑀦𑁆𑀦𑀁. 𑀢𑀲𑁆𑀲 𑀫𑀬𑁆𑀳𑀁, 𑀦𑀸𑀕𑀺𑀢, 𑀏𑀯𑀁 𑀳𑁄𑀢𑀺 𑁋 ‘𑀇𑀤𑀸𑀦𑀺 𑀅𑀬𑀫𑀸𑀬𑀲𑁆𑀫𑀸 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀲𑁆𑀲𑀢𑀺, 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀺𑀲𑁆𑀲𑀢𑀻’𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑀺𑀁 𑀮𑀸𑀪𑀺𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀲𑁄 𑀢𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀺𑀓𑀸𑀫𑀬𑀫𑀸𑀦𑁄 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁 𑀭𑀺𑀜𑁆𑀘𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺; 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀁 𑀑𑀲𑀭𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀢𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑁂𑀦.

‘‘𑀇𑀥 𑀧𑀦𑀸𑀳𑀁, 𑀦𑀸𑀕𑀺𑀢, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀸𑀫𑀺 𑀆𑀭𑀜𑁆𑀜𑀺𑀓𑀁 𑀮𑀸𑀪𑀺𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀲𑁄 𑀢𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀝𑀺𑀧𑀡𑀸𑀫𑁂𑀢𑁆𑀯𑀸 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁 𑀦 𑀭𑀺𑀜𑁆𑀘𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺. 𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦. 𑀬𑀲𑁆𑀫𑀸𑀳𑀁, 𑀦𑀸𑀕𑀺𑀢, 𑀲𑀫𑀬𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀦 𑀓𑀜𑁆𑀘𑀺 [𑀦 𑀓𑀺𑀜𑁆𑀘𑀺 (𑀲𑀻. 𑀧𑀻. 𑀓.)] 𑀧𑀲𑁆𑀲𑀸𑀫𑀺 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸, 𑀨𑀸𑀲𑀼 𑀫𑁂, 𑀦𑀸𑀕𑀺𑀢, 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺 𑀅𑀦𑁆𑀢𑀫𑀲𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀸𑀬𑀸’’𑀢𑀺. 𑀤𑁆𑀯𑀸𑀤𑀲𑀫𑀁.

𑀤𑁂𑀯𑀢𑀸𑀯𑀕𑁆𑀕𑁄 [𑀲𑁂𑀓𑁆𑀔𑀧𑀭𑀺𑀳𑀸𑀦𑀺𑀬𑀯𑀕𑁆𑀕𑁄 (𑀲𑁆𑀬𑀸.)] 𑀘𑀢𑀼𑀢𑁆𑀣𑁄.