𑁬. 𑀫𑀺𑀢𑁆𑀢𑀲𑀼𑀢𑁆𑀢𑀁

𑁧𑁪𑁬. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀺, 𑀅𑀥𑀺𑀓𑀭𑀡𑀁 𑀆𑀤𑀺𑀬𑀢𑀺, 𑀧𑀸𑀫𑁄𑀓𑁆𑀔𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀢𑁆𑀣𑀘𑀸𑀭𑀺𑀓𑀁 [𑀅𑀯𑀢𑁆𑀣𑀸𑀦𑀘𑀸𑀭𑀺𑀓𑀁 (𑀲𑁆𑀬𑀸.)] 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀦𑀧𑁆𑀧𑀝𑀺𑀩𑀮𑁄 𑀳𑁄𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀦 𑀲𑁂𑀯𑀺𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀺, 𑀦 𑀅𑀥𑀺𑀓𑀭𑀡𑀁 𑀆𑀤𑀺𑀬𑀢𑀺, 𑀦 𑀧𑀸𑀫𑁄𑀓𑁆𑀔𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀦 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀢𑁆𑀣𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀧𑀝𑀺𑀩𑀮𑁄 𑀳𑁄𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄’’𑀢𑀺. 𑀙𑀝𑁆𑀞𑀁.