(𑁧𑁫) 𑁫. 𑀢𑀺𑀓𑀡𑁆𑀟𑀓𑀻𑀯𑀕𑁆𑀕𑁄

𑁧. 𑀅𑀯𑀚𑀸𑀦𑀸𑀢𑀺𑀲𑀼𑀢𑁆𑀢𑀁

𑁧𑁪𑁧. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀺, 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀺, 𑀆𑀥𑁂𑀬𑁆𑀬𑀫𑀼𑀔𑁄 [𑀆𑀤𑀺𑀬𑁆𑀬𑀫𑀼𑀔𑁄 (𑀲𑀻.), 𑀆𑀤𑁂𑀬𑁆𑀬𑀫𑀼𑀔𑁄 (𑀲𑁆𑀬𑀸. 𑀓𑀁.), 𑀆𑀤𑀺𑀬𑀫𑀼𑀔𑁄 (𑀧𑀻.) 𑀅𑀝𑁆𑀞𑀓𑀣𑀸𑀬 𑀧𑀞𑀫𑀲𑀁𑀯𑀡𑁆𑀡𑀦𑀸𑀦𑀼𑀭𑀽𑀧𑀁. 𑀧𑀼. 𑀧. 𑁧𑁯𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀳𑁄𑀢𑀺, 𑀮𑁄𑀮𑁄 𑀳𑁄𑀢𑀺, 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀳𑁄𑀢𑀺 [𑀫𑀦𑁆𑀤𑁄 𑀳𑁄𑀢𑀺 𑀫𑁄𑀫𑀽𑀳𑁄 (𑀲𑀻.)].

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀤𑁂𑀫𑀺; 𑀅𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’𑀢𑀺. 𑀢𑀫𑁂𑀦𑀁 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀯𑀲𑁆𑀲𑀸𑀦𑀺. 𑀢𑀫𑁂𑀦𑀁 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀆𑀥𑁂𑀬𑁆𑀬𑀫𑀼𑀔𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀭𑀲𑁆𑀲 𑀯𑀡𑁆𑀡𑁂 𑀯𑀸 𑀅𑀯𑀡𑁆𑀡𑁂 𑀯𑀸 𑀪𑀸𑀲𑀺𑀬𑀫𑀸𑀦𑁂 𑀢𑀁 𑀔𑀺𑀧𑁆𑀧𑀜𑁆𑀜𑁂𑀯 𑀅𑀥𑀺𑀫𑀼𑀘𑁆𑀘𑀺𑀢𑀸 [𑀅𑀥𑀺𑀫𑀼𑀘𑁆𑀘𑀺𑀢𑁄 (𑀲𑁆𑀬𑀸.)] 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀆𑀥𑁂𑀬𑁆𑀬𑀫𑀼𑀔𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀇𑀢𑁆𑀢𑀭𑀲𑀤𑁆𑀥𑁄 𑀳𑁄𑀢𑀺 𑀇𑀢𑁆𑀢𑀭𑀪𑀢𑁆𑀢𑀻 𑀇𑀢𑁆𑀢𑀭𑀧𑁂𑀫𑁄 𑀇𑀢𑁆𑀢𑀭𑀧𑁆𑀧𑀲𑀸𑀤𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂 𑀦 𑀚𑀸𑀦𑀸𑀢𑀺, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀥𑀫𑁆𑀫𑁂 𑀦 𑀚𑀸𑀦𑀸𑀢𑀺, 𑀳𑀻𑀦𑀧𑁆𑀧𑀡𑀻𑀢𑁂 𑀥𑀫𑁆𑀫𑁂 𑀦 𑀚𑀸𑀦𑀸𑀢𑀺, 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀦 𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀞𑀫𑀁.

𑁨. 𑀆𑀭𑀪𑀢𑀺𑀲𑀼𑀢𑁆𑀢𑀁

𑁧𑁪𑁨. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺; 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

[𑀧𑀼. 𑀧. 𑁧𑁯𑁧] ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺, 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺; 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦 𑀆𑀭𑀪𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺; 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺; 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺; 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀺, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀆𑀬𑀲𑁆𑀫𑀢𑁄 𑀔𑁄 𑀆𑀭𑀫𑁆𑀪𑀚𑀸 [𑀆𑀭𑀩𑁆𑀪𑀚𑀸 (𑀧𑀻. 𑀓.), 𑀆𑀭𑀪𑀚𑀸 (𑀲𑁆𑀬𑀸. 𑀓𑀁.)] 𑀆𑀲𑀯𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀚𑀸 𑀆𑀲𑀯𑀸 𑀧𑀯𑀟𑁆𑀠𑀦𑁆𑀢𑀺 [𑀲𑀁𑀯𑀟𑁆𑀠𑀦𑁆𑀢𑀺 (𑀓.)], 𑀲𑀸𑀥𑀼 𑀯𑀢𑀸𑀬𑀲𑁆𑀫𑀸 𑀆𑀭𑀫𑁆𑀪𑀚𑁂 𑀆𑀲𑀯𑁂 𑀧𑀳𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀚𑁂 𑀆𑀲𑀯𑁂 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑁂𑀢𑀼 [𑀪𑀸𑀯𑁂𑀢𑀼𑀁 (𑀲𑀻. 𑀧𑀻.)]; 𑀏𑀯𑀫𑀸𑀬𑀲𑁆𑀫𑀸 𑀅𑀫𑀼𑀦𑀸 𑀧𑀜𑁆𑀘𑀫𑁂𑀦 𑀧𑀼𑀕𑁆𑀕𑀮𑁂𑀦 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀆𑀬𑀲𑁆𑀫𑀢𑁄 𑀔𑁄 𑀆𑀭𑀫𑁆𑀪𑀚𑀸 𑀆𑀲𑀯𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀚𑀸 𑀆𑀲𑀯𑀸 𑀦 𑀧𑀯𑀟𑁆𑀠𑀦𑁆𑀢𑀺, 𑀲𑀸𑀥𑀼 𑀯𑀢𑀸𑀬𑀲𑁆𑀫𑀸 𑀆𑀭𑀫𑁆𑀪𑀚𑁂 𑀆𑀲𑀯𑁂 𑀧𑀳𑀸𑀬 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑁂𑀢𑀼; 𑀏𑀯𑀫𑀸𑀬𑀲𑁆𑀫𑀸 𑀅𑀫𑀼𑀦𑀸 𑀧𑀜𑁆𑀘𑀫𑁂𑀦 𑀧𑀼𑀕𑁆𑀕𑀮𑁂𑀦 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀦 𑀆𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀆𑀬𑀲𑁆𑀫𑀢𑁄 𑀔𑁄 𑀆𑀭𑀫𑁆𑀪𑀚𑀸 𑀆𑀲𑀯𑀸 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀚𑀸 𑀆𑀲𑀯𑀸 𑀧𑀯𑀟𑁆𑀠𑀦𑁆𑀢𑀺, 𑀲𑀸𑀥𑀼 𑀯𑀢𑀸𑀬𑀲𑁆𑀫𑀸 𑀯𑀺𑀧𑁆𑀧𑀝𑀺𑀲𑀸𑀭𑀚𑁂 𑀆𑀲𑀯𑁂 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑁂𑀢𑀼; 𑀏𑀯𑀫𑀸𑀬𑀲𑁆𑀫𑀸 𑀅𑀫𑀼𑀦𑀸 𑀧𑀜𑁆𑀘𑀫𑁂𑀦 𑀧𑀼𑀕𑁆𑀕𑀮𑁂𑀦 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻’’’ 𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀦 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀆𑀬𑀲𑁆𑀫𑀢𑁄 𑀔𑁄 𑀆𑀭𑀫𑁆𑀪𑀚𑀸 𑀆𑀲𑀯𑀸 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀚𑀸 𑀆𑀲𑀯𑀸 𑀦 𑀧𑀯𑀟𑁆𑀠𑀦𑁆𑀢𑀺, 𑀲𑀸𑀥𑀼 𑀯𑀢𑀸𑀬𑀲𑁆𑀫𑀸 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑁂𑀢𑀼; 𑀏𑀯𑀫𑀸𑀬𑀲𑁆𑀫𑀸 𑀅𑀫𑀼𑀦𑀸 𑀧𑀜𑁆𑀘𑀫𑁂𑀦 𑀧𑀼𑀕𑁆𑀕𑀮𑁂𑀦 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀅𑀫𑀼𑀦𑀸 𑀧𑀜𑁆𑀘𑀫𑁂𑀦 𑀧𑀼𑀕𑁆𑀕𑀮𑁂𑀦 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 [𑀧𑀼. 𑀧. 𑁧𑁯𑁧]. 𑀤𑀼𑀢𑀺𑀬𑀁.

𑁩. 𑀲𑀸𑀭𑀦𑁆𑀤𑀤𑀲𑀼𑀢𑁆𑀢𑀁

𑁧𑁪𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀜𑁆𑀘𑀫𑀢𑁆𑀢𑀸𑀦𑀁 𑀮𑀺𑀘𑁆𑀙𑀯𑀺𑀲𑀢𑀸𑀦𑀁 𑀲𑀸𑀭𑀦𑁆𑀤𑀤𑁂 𑀘𑁂𑀢𑀺𑀬𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀧𑀜𑁆𑀘𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁? 𑀳𑀢𑁆𑀣𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀅𑀲𑁆𑀲𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀫𑀡𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀕𑀳𑀧𑀢𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺’’𑀦𑁆𑀢𑀺.

𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀫𑀕𑁆𑀕𑁂 𑀧𑀼𑀭𑀺𑀲𑀁 𑀞𑀧𑁂𑀲𑀼𑀁 [𑀧𑁂𑀲𑁂𑀲𑀼𑀁 (𑀲𑁆𑀬𑀸. 𑀓.)] 𑁋 ‘‘𑀬𑀤𑀸 𑀢𑁆𑀯𑀁 [𑀬𑀣𑀸 𑀢𑁆𑀯𑀁 (𑀲𑀻. 𑀧𑀻.)], 𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀲𑁆𑀲𑁂𑀬𑁆𑀬𑀸𑀲𑀺 𑀪𑀕𑀯𑀦𑁆𑀢𑀁, 𑀅𑀣 𑀅𑀫𑁆𑀳𑀸𑀓𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀅𑀤𑁆𑀤𑀲𑀸 𑀔𑁄 𑀲𑁄 𑀧𑀼𑀭𑀺𑀲𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀮𑀺𑀘𑁆𑀙𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀲𑁄, 𑀪𑀦𑁆𑀢𑁂, 𑀪𑀕𑀯𑀸 𑀕𑀘𑁆𑀙𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄; 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺.

𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀸𑀥𑀼, 𑀪𑀦𑁆𑀢𑁂, 𑀬𑁂𑀦 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀏𑀢𑀤𑀯𑁄𑀘 𑁋 ‘‘𑀓𑀸𑀬 𑀦𑀼𑀢𑁆𑀣, 𑀮𑀺𑀘𑁆𑀙𑀯𑀻, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀧𑀜𑁆𑀘𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁? 𑀳𑀢𑁆𑀣𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀅𑀲𑁆𑀲𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀫𑀡𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀕𑀳𑀧𑀢𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺’’’𑀦𑁆𑀢𑀺.

‘‘𑀓𑀸𑀫𑀸𑀥𑀺𑀫𑀼𑀢𑁆𑀢𑀸𑀦𑀁 𑀯𑀢, 𑀪𑁄, 𑀮𑀺𑀘𑁆𑀙𑀯𑀻𑀦𑀁 [𑀓𑀸𑀫𑀸𑀥𑀺𑀫𑀼𑀢𑁆𑀢𑀸𑀦𑀁 𑀯𑀢 𑀯𑁄 𑀮𑀺𑀘𑁆𑀙𑀯𑀻𑀦𑀁 (𑀲𑀻.), 𑀓𑀸𑀫𑀸𑀥𑀺𑀫𑀼𑀢𑁆𑀢𑀸𑀦𑀁 𑀯𑀢 𑀯𑁄 𑀮𑀺𑀘𑁆𑀙𑀯𑀻 (𑀲𑁆𑀬𑀸.), 𑀓𑀸𑀫𑀸𑀥𑀺𑀫𑀼𑀢𑁆𑀢𑀸𑀦𑀁𑀯 𑀯𑁄 𑀮𑀺𑀘𑁆𑀙𑀯𑀻 (?)] 𑀓𑀸𑀫𑀁𑀬𑁂𑀯 𑀆𑀭𑀩𑁆𑀪 𑀅𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺. 𑀧𑀜𑁆𑀘𑀦𑁆𑀦𑀁, 𑀮𑀺𑀘𑁆𑀙𑀯𑀻, 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁? 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀯𑀺𑀦𑀬𑀲𑁆𑀲 𑀤𑁂𑀲𑁂𑀢𑀸 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀯𑀺𑀦𑀬𑀲𑁆𑀲 𑀤𑁂𑀲𑀺𑀢𑀲𑁆𑀲 𑀯𑀺𑀜𑁆𑀜𑀸𑀢𑀸 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀯𑀺𑀦𑀬𑀲𑁆𑀲 𑀤𑁂𑀲𑀺𑀢𑀲𑁆𑀲 𑀯𑀺𑀜𑁆𑀜𑀸𑀢𑀸 [𑀯𑀺𑀜𑁆𑀜𑀸𑀢𑀲𑁆𑀲 (𑀲𑀻. 𑀧𑀻.) 𑀅. 𑀦𑀺. 𑁫.𑁧𑁯𑁫] 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁 𑀔𑁄, 𑀮𑀺𑀘𑁆𑀙𑀯𑀻, 𑀧𑀜𑁆𑀘𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀢𑀺𑀓𑀡𑁆𑀟𑀓𑀻𑀲𑀼𑀢𑁆𑀢𑀁

𑁧𑁪𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀓𑁂𑀢𑁂 𑀯𑀺𑀳𑀭𑀢𑀺 𑀢𑀺𑀓𑀡𑁆𑀟𑀓𑀻𑀯𑀦𑁂 [𑀓𑀡𑁆𑀟𑀓𑀻𑀯𑀦𑁂 (𑀲𑀁. 𑀦𑀺. 𑁫.𑁯𑁦𑁨)]. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 [𑀅𑀧𑁆𑀧𑀝𑀺𑀓𑁆𑀓𑀽𑀮𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀳𑀭𑁂𑀬𑁆𑀬. 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬. 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬. 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬. 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀧𑀝𑀺𑀓𑀽𑀮𑀜𑁆𑀘 𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄.

‘‘𑀓𑀺𑀜𑁆𑀘 [𑀓𑀣𑀜𑁆𑀘 (𑀲𑀻. 𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬? ‘𑀫𑀸 𑀫𑁂 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀭𑀸𑀕𑁄 𑀉𑀤𑀧𑀸𑀤𑀻’𑀢𑀺 𑁋 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬? ‘𑀫𑀸 𑀫𑁂 𑀤𑁄𑀲𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀤𑁄𑀲𑁄 𑀉𑀤𑀧𑀸𑀤𑀻’𑀢𑀺 𑁋 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬? ‘𑀫𑀸 𑀫𑁂 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀭𑀸𑀕𑁄 𑀉𑀤𑀧𑀸𑀤𑀺, 𑀫𑀸 𑀫𑁂 𑀤𑁄𑀲𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀤𑁄𑀲𑁄 𑀉𑀤𑀧𑀸𑀤𑀻’𑀢𑀺 𑁋 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬? ‘𑀫𑀸 𑀫𑁂 𑀤𑁄𑀲𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀤𑁄𑀲𑁄 𑀉𑀤𑀧𑀸𑀤𑀺, 𑀫𑀸 𑀫𑁂 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀭𑀸𑀕𑁄 𑀉𑀤𑀧𑀸𑀤𑀻’𑀢𑀺 𑁋 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀝𑀺𑀓𑀽𑀮𑀜𑁆𑀘 𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬? ‘𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸 𑀫𑁂 𑀓𑁆𑀯𑀘𑀦𑀺 [𑀓𑁆𑀯𑀘𑀺𑀦𑀺 (𑀲𑀻. 𑀲𑁆𑀬𑀸. 𑀧𑀻.)] 𑀓𑀢𑁆𑀣𑀘𑀺 𑀓𑀺𑀜𑁆𑀘𑀦𑀁 [𑀓𑀺𑀜𑁆𑀘𑀦 (𑀲𑀻. 𑀧𑀻.)] 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀭𑀸𑀕𑁄 𑀉𑀤𑀧𑀸𑀤𑀺, 𑀫𑀸 𑀫𑁂 𑀓𑁆𑀯𑀘𑀦𑀺 𑀓𑀢𑁆𑀣𑀘𑀺 𑀓𑀺𑀜𑁆𑀘𑀦𑀁 𑀤𑁄𑀲𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀤𑁄𑀲𑁄 𑀉𑀤𑀧𑀸𑀤𑀺, 𑀫𑀸 𑀫𑁂 𑀓𑁆𑀯𑀘𑀦𑀺 𑀓𑀢𑁆𑀣𑀘𑀺 𑀓𑀺𑀜𑁆𑀘𑀦𑀁 𑀫𑁄𑀳𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀫𑁄𑀳𑁄 𑀉𑀤𑀧𑀸𑀤𑀻’𑀢𑀺 𑁋 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀝𑀺𑀓𑀽𑀮𑀜𑁆𑀘 𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀦𑀺𑀭𑀬𑀲𑀼𑀢𑁆𑀢𑀁

𑁧𑁪𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀧𑀜𑁆𑀘𑀫𑀁.

𑁬. 𑀫𑀺𑀢𑁆𑀢𑀲𑀼𑀢𑁆𑀢𑀁

𑁧𑁪𑁬. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀺, 𑀅𑀥𑀺𑀓𑀭𑀡𑀁 𑀆𑀤𑀺𑀬𑀢𑀺, 𑀧𑀸𑀫𑁄𑀓𑁆𑀔𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀢𑁆𑀣𑀘𑀸𑀭𑀺𑀓𑀁 [𑀅𑀯𑀢𑁆𑀣𑀸𑀦𑀘𑀸𑀭𑀺𑀓𑀁 (𑀲𑁆𑀬𑀸.)] 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀦𑀧𑁆𑀧𑀝𑀺𑀩𑀮𑁄 𑀳𑁄𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀦 𑀲𑁂𑀯𑀺𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀺, 𑀦 𑀅𑀥𑀺𑀓𑀭𑀡𑀁 𑀆𑀤𑀺𑀬𑀢𑀺, 𑀦 𑀧𑀸𑀫𑁄𑀓𑁆𑀔𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑁄𑀢𑀺, 𑀦 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀢𑁆𑀣𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀧𑀝𑀺𑀩𑀮𑁄 𑀳𑁄𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄’’𑀢𑀺. 𑀙𑀝𑁆𑀞𑀁.

𑁭. 𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀁

𑁧𑁪𑁭. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀅𑀲𑀓𑁆𑀓𑀘𑁆𑀘𑀁 𑀤𑁂𑀢𑀺, 𑀅𑀘𑀺𑀢𑁆𑀢𑀻𑀓𑀢𑁆𑀯𑀸 [𑀅𑀘𑀺𑀢𑁆𑀢𑀺𑀓𑀢𑁆𑀯𑀸 (𑀧𑀻.), 𑀅𑀘𑀺𑀢𑀺𑀁 𑀓𑀢𑁆𑀯𑀸 (𑀲𑁆𑀬𑀸.), 𑀅𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 (𑀓.)] 𑀤𑁂𑀢𑀺, 𑀅𑀲𑀳𑀢𑁆𑀣𑀸 𑀤𑁂𑀢𑀺, 𑀅𑀧𑀯𑀺𑀤𑁆𑀥𑀁 [𑀅𑀧𑀯𑀺𑀝𑁆𑀝𑀁 (𑀲𑁆𑀬𑀸. 𑀓𑀁.)] 𑀤𑁂𑀢𑀺, 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄 𑀤𑁂𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀸𑀦𑀺.

‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀓𑁆𑀓𑀘𑁆𑀘𑀁 𑀤𑁂𑀢𑀺, 𑀘𑀺𑀢𑁆𑀢𑀻𑀓𑀢𑁆𑀯𑀸 𑀤𑁂𑀢𑀺, 𑀲𑀳𑀢𑁆𑀣𑀸 𑀤𑁂𑀢𑀺, 𑀅𑀦𑀧𑀯𑀺𑀤𑁆𑀥𑀁 𑀤𑁂𑀢𑀺, 𑀆𑀕𑀫𑀦𑀤𑀺𑀝𑁆𑀞𑀺𑀓𑁄 𑀤𑁂𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀧𑁆𑀧𑀼𑀭𑀺𑀲𑀤𑀸𑀦𑀸𑀦𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀁

𑁧𑁪𑁮. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀤𑁆𑀥𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑁂𑀢𑀺, 𑀓𑀸𑀮𑁂𑀦 𑀤𑀸𑀦𑀁 𑀤𑁂𑀢𑀺, 𑀅𑀦𑀼𑀕𑁆𑀕𑀳𑀺𑀢𑀘𑀺𑀢𑁆𑀢𑁄 [𑀅𑀦𑀕𑁆𑀕𑀳𑀺𑀢𑀘𑀺𑀢𑁆𑀢𑁄 (𑀲𑀻.)] 𑀤𑀸𑀦𑀁 𑀤𑁂𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀅𑀦𑀼𑀧𑀳𑀘𑁆𑀘 𑀤𑀸𑀦𑀁 𑀤𑁂𑀢𑀺.

‘‘𑀲𑀤𑁆𑀥𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀟𑁆𑀠𑁄 𑀘 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄, 𑀅𑀪𑀺𑀭𑀽𑀧𑁄 𑀘 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄.

‘‘𑀲𑀓𑁆𑀓𑀘𑁆𑀘𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀟𑁆𑀠𑁄 𑀘 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀧𑀼𑀢𑁆𑀢𑀸𑀢𑀺 𑀯𑀸 𑀤𑀸𑀭𑀸𑀢𑀺 𑀯𑀸 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 [𑀓𑀫𑁆𑀫𑀓𑀸𑀭𑀸𑀢𑀺 (𑀓.)] 𑀯𑀸, 𑀢𑁂𑀧𑀺 𑀲𑀼𑀲𑁆𑀲𑀽𑀲𑀦𑁆𑀢𑀺 𑀲𑁄𑀢𑀁 𑀑𑀤𑀳𑀦𑁆𑀢𑀺 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺.

‘‘𑀓𑀸𑀮𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀟𑁆𑀠𑁄 𑀘 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄; 𑀓𑀸𑀮𑀸𑀕𑀢𑀸 𑀘𑀲𑁆𑀲 𑀅𑀢𑁆𑀣𑀸 𑀧𑀘𑀼𑀭𑀸 𑀳𑁄𑀦𑁆𑀢𑀺.

‘‘𑀅𑀦𑀼𑀕𑁆𑀕𑀳𑀺𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀟𑁆𑀠𑁄 𑀘 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄; 𑀉𑀴𑀸𑀭𑁂𑀲𑀼 𑀘 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺.

‘‘𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀅𑀦𑀼𑀧𑀳𑀘𑁆𑀘 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀟𑁆𑀠𑁄 𑀘 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄; 𑀦 𑀘𑀲𑁆𑀲 𑀓𑀼𑀢𑁄𑀘𑀺 𑀪𑁄𑀕𑀸𑀦𑀁 𑀉𑀧𑀖𑀸𑀢𑁄 𑀆𑀕𑀘𑁆𑀙𑀢𑀺 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀭𑀸𑀚𑀢𑁄 𑀯𑀸 𑀘𑁄𑀭𑀢𑁄 𑀯𑀸 𑀅𑀧𑁆𑀧𑀺𑀬𑀢𑁄 𑀯𑀸 𑀤𑀸𑀬𑀸𑀤𑀢𑁄 𑀯𑀸 [𑀅𑀧𑁆𑀧𑀺𑀬𑀢𑁄 𑀯𑀸 𑀤𑀸𑀬𑀸𑀤𑀢𑁄 𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀅𑀧𑁆𑀧𑀺𑀬𑀤𑀸𑀬𑀸𑀤𑀢𑁄 𑀯𑀸 (𑀓.)]. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀧𑁆𑀧𑀼𑀭𑀺𑀲𑀤𑀸𑀦𑀸𑀦𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀲𑀫𑀬𑀯𑀺𑀫𑀼𑀢𑁆𑀢𑀲𑀼𑀢𑁆𑀢𑀁

𑁧𑁪𑁯. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀦 𑀓𑀫𑁆𑀫𑀸𑀭𑀸𑀫𑀢𑀸, 𑀦 𑀪𑀲𑁆𑀲𑀸𑀭𑀸𑀫𑀢𑀸, 𑀦 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀲𑀫𑀬𑀯𑀺𑀫𑀼𑀢𑁆𑀢𑀲𑀼𑀢𑁆𑀢𑀁

𑁧𑁫𑁦. [𑀓𑀣𑀸. 𑁨𑁬𑁭] ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀦 𑀓𑀫𑁆𑀫𑀸𑀭𑀸𑀫𑀢𑀸, 𑀦 𑀪𑀲𑁆𑀲𑀸𑀭𑀸𑀫𑀢𑀸, 𑀦 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀤𑀲𑀫𑀁.

𑀢𑀺𑀓𑀡𑁆𑀟𑀓𑀻𑀯𑀕𑁆𑀕𑁄 𑀧𑀜𑁆𑀘𑀫𑁄.