𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀨𑀸𑀲𑀼𑀯𑀺𑀳𑀸𑀭𑀯𑀕𑁆𑀕𑁄

𑁧. 𑀲𑀸𑀭𑀚𑁆𑀚𑀲𑀼𑀢𑁆𑀢𑀁

𑁧𑁦𑁧. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀲𑁂𑀔𑀯𑁂𑀲𑀸𑀭𑀚𑁆𑀚𑀓𑀭𑀡𑀸 𑀥𑀫𑁆𑀫𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺.

‘‘𑀬𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀤𑁆𑀥𑀲𑁆𑀲 𑀲𑀸𑀭𑀚𑁆𑀚𑀁 𑀳𑁄𑀢𑀺, 𑀲𑀤𑁆𑀥𑀲𑁆𑀲 𑀢𑀁 𑀲𑀸𑀭𑀚𑁆𑀚𑀁 𑀦 𑀳𑁄𑀢𑀺. 𑀢𑀲𑁆𑀫𑀸𑀬𑀁 𑀥𑀫𑁆𑀫𑁄 𑀲𑁂𑀔𑀯𑁂𑀲𑀸𑀭𑀚𑁆𑀚𑀓𑀭𑀡𑁄.

‘‘𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀸𑀭𑀚𑁆𑀚𑀁 𑀳𑁄𑀢𑀺, 𑀲𑀻𑀮𑀯𑀢𑁄 𑀢𑀁 𑀲𑀸𑀭𑀚𑁆𑀚𑀁 𑀦 𑀳𑁄𑀢𑀺. 𑀢𑀲𑁆𑀫𑀸𑀬𑀁 𑀥𑀫𑁆𑀫𑁄 𑀲𑁂𑀔𑀯𑁂𑀲𑀸𑀭𑀚𑁆𑀚𑀓𑀭𑀡𑁄.

‘‘𑀬𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑁆𑀲𑀼𑀢𑀲𑁆𑀲 𑀲𑀸𑀭𑀚𑁆𑀚𑀁 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑀲𑁆𑀲 𑀢𑀁 𑀲𑀸𑀭𑀚𑁆𑀚𑀁 𑀦 𑀳𑁄𑀢𑀺. 𑀢𑀲𑁆𑀫𑀸𑀬𑀁 𑀥𑀫𑁆𑀫𑁄 𑀲𑁂𑀔𑀯𑁂𑀲𑀸𑀭𑀚𑁆𑀚𑀓𑀭𑀡𑁄.

‘‘𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀲𑀻𑀢𑀲𑁆𑀲 𑀲𑀸𑀭𑀚𑁆𑀚𑀁 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀢𑀁 𑀲𑀸𑀭𑀚𑁆𑀚𑀁 𑀦 𑀳𑁄𑀢𑀺. 𑀢𑀲𑁆𑀫𑀸𑀬𑀁 𑀥𑀫𑁆𑀫𑁄 𑀲𑁂𑀔𑀯𑁂𑀲𑀸𑀭𑀚𑁆𑀚𑀓𑀭𑀡𑁄.

‘‘𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀧𑁆𑀧𑀜𑁆𑀜𑀲𑁆𑀲 𑀲𑀸𑀭𑀚𑁆𑀚𑀁 𑀳𑁄𑀢𑀺, 𑀧𑀜𑁆𑀜𑀯𑀢𑁄 𑀢𑀁 𑀲𑀸𑀭𑀚𑁆𑀚𑀁 𑀦 𑀳𑁄𑀢𑀺. 𑀢𑀲𑁆𑀫𑀸𑀬𑀁 𑀥𑀫𑁆𑀫𑁄 𑀲𑁂𑀔𑀯𑁂𑀲𑀸𑀭𑀚𑁆𑀚𑀓𑀭𑀡𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑁂𑀔𑀯𑁂𑀲𑀸𑀭𑀚𑁆𑀚𑀓𑀭𑀡𑀸 𑀥𑀫𑁆𑀫𑀸’’𑀢𑀺. 𑀧𑀞𑀫𑀁.

𑁨. 𑀉𑀲𑁆𑀲𑀗𑁆𑀓𑀺𑀢𑀲𑀼𑀢𑁆𑀢𑀁

𑁧𑁦𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 𑀧𑀸𑀧𑀪𑀺𑀓𑁆𑀔𑀽𑀢𑀺 𑀅𑀧𑀺 𑀅𑀓𑀼𑀧𑁆𑀧𑀥𑀫𑁆𑀫𑁄𑀧𑀺 [𑀅𑀧𑀺 𑀅𑀓𑀼𑀧𑁆𑀧𑀥𑀫𑁆𑀫𑁄 (𑀲𑀻. 𑀲𑁆𑀬𑀸. 𑀓𑀁.)].

𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑁂𑀲𑀺𑀬𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀯𑀺𑀥𑀯𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀧𑀡𑁆𑀟𑀓𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀻𑀕𑁄𑀘𑀭𑁄 𑀯𑀸 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 𑀧𑀸𑀧𑀪𑀺𑀓𑁆𑀔𑀽𑀢𑀺 𑀅𑀧𑀺 𑀅𑀓𑀼𑀧𑁆𑀧𑀥𑀫𑁆𑀫𑁄𑀧𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑀳𑀸𑀘𑁄𑀭𑀲𑀼𑀢𑁆𑀢𑀁

𑁧𑁦𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀳𑀸𑀘𑁄𑀭𑁄 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀘 𑀳𑁄𑀢𑀺, 𑀕𑀳𑀦𑀦𑀺𑀲𑁆𑀲𑀺𑀢𑁄 𑀘, 𑀩𑀮𑀯𑀦𑀺𑀲𑁆𑀲𑀺𑀢𑁄 𑀘, 𑀪𑁄𑀕𑀘𑀸𑀕𑀻 𑀘, 𑀏𑀓𑀘𑀸𑀭𑀻 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀦𑀤𑀻𑀯𑀺𑀤𑀼𑀕𑁆𑀕𑀁 𑀯𑀸 𑀦𑀺𑀲𑁆𑀲𑀺𑀢𑁄 𑀳𑁄𑀢𑀺 𑀧𑀩𑁆𑀩𑀢𑀯𑀺𑀲𑀫𑀁 𑀯𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀕𑀳𑀦𑀦𑀺𑀲𑁆𑀲𑀺𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀢𑀺𑀡𑀕𑀳𑀦𑀁 𑀯𑀸 𑀦𑀺𑀲𑁆𑀲𑀺𑀢𑁄 𑀳𑁄𑀢𑀺 𑀭𑀼𑀓𑁆𑀔𑀕𑀳𑀦𑀁 𑀯𑀸 𑀭𑁄𑀥𑀁 [𑀕𑁂𑀥𑀁 (𑀲𑀻.) 𑀅. 𑀦𑀺. 𑁩.𑁫𑁧] 𑀯𑀸 𑀫𑀳𑀸𑀯𑀦𑀲𑀡𑁆𑀟𑀁 𑀯𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀕𑀳𑀦𑀦𑀺𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀩𑀮𑀯𑀦𑀺𑀲𑁆𑀲𑀺𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀭𑀸𑀚𑀸𑀦𑀁 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀯𑀸 𑀦𑀺𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀲𑀘𑁂 𑀫𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀯𑀓𑁆𑀔𑀢𑀺, 𑀇𑀫𑁂 𑀫𑁂 𑀭𑀸𑀚𑀸𑀦𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀸 𑀧𑀭𑀺𑀬𑁄𑀥𑀸𑀬 𑀅𑀢𑁆𑀣𑀁 𑀪𑀡𑀺𑀲𑁆𑀲𑀦𑁆𑀢𑀻’𑀢𑀺. 𑀲𑀘𑁂 𑀦𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀆𑀳, 𑀢𑁆𑀬𑀲𑁆𑀲 𑀭𑀸𑀚𑀸𑀦𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀸 𑀧𑀭𑀺𑀬𑁄𑀥𑀸𑀬 𑀅𑀢𑁆𑀣𑀁 𑀪𑀡𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀩𑀮𑀯𑀦𑀺𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀪𑁄𑀕𑀘𑀸𑀕𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀅𑀟𑁆𑀠𑁄 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀲𑀘𑁂 𑀫𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀯𑀓𑁆𑀔𑀢𑀺, 𑀇𑀢𑁄 𑀪𑁄𑀕𑁂𑀦 𑀧𑀝𑀺𑀲𑀦𑁆𑀣𑀭𑀺𑀲𑁆𑀲𑀸𑀫𑀻’𑀢𑀺. 𑀲𑀘𑁂 𑀦𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀆𑀳, 𑀢𑀢𑁄 𑀪𑁄𑀕𑁂𑀦 𑀧𑀝𑀺𑀲𑀦𑁆𑀣𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀪𑁄𑀕𑀘𑀸𑀕𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀏𑀓𑀘𑀸𑀭𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀏𑀓𑀓𑁄𑀯 𑀕𑀳𑀡𑀸𑀦𑀺 [𑀦𑀺𑀕𑁆𑀕𑀳𑀡𑀸𑀦𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀢𑁆𑀢𑀸 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀫𑀸 𑀫𑁂 𑀕𑀼𑀬𑁆𑀳𑀫𑀦𑁆𑀢𑀸 𑀩𑀳𑀺𑀤𑁆𑀥𑀸 𑀲𑀫𑁆𑀪𑁂𑀤𑀁 𑀅𑀕𑀫𑀁𑀲𑀽’𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑁄 𑀏𑀓𑀘𑀸𑀭𑀻 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀳𑀸𑀘𑁄𑀭𑁄 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀸𑀧𑀪𑀺𑀓𑁆𑀔𑀼 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀘 𑀳𑁄𑀢𑀺, 𑀕𑀳𑀦𑀦𑀺𑀲𑁆𑀲𑀺𑀢𑁄 𑀘, 𑀩𑀮𑀯𑀦𑀺𑀲𑁆𑀲𑀺𑀢𑁄 𑀘, 𑀪𑁄𑀕𑀘𑀸𑀕𑀻 𑀘, 𑀏𑀓𑀘𑀸𑀭𑀻 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀯𑀺𑀲𑀫𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀺𑀲𑀫𑁂𑀦 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀺𑀲𑀫𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀕𑀳𑀦𑀦𑀺𑀲𑁆𑀲𑀺𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀕𑀳𑀦𑀦𑀺𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀩𑀮𑀯𑀦𑀺𑀲𑁆𑀲𑀺𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀭𑀸𑀚𑀸𑀦𑀁 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀯𑀸 𑀦𑀺𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀲𑀘𑁂 𑀫𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀯𑀓𑁆𑀔𑀢𑀺, 𑀇𑀫𑁂 𑀫𑁂 𑀭𑀸𑀚𑀸𑀦𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀸 𑀧𑀭𑀺𑀬𑁄𑀥𑀸𑀬 𑀅𑀢𑁆𑀣𑀁 𑀪𑀡𑀺𑀲𑁆𑀲𑀦𑁆𑀢𑀻’𑀢𑀺. 𑀲𑀘𑁂 𑀦𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀆𑀳, 𑀢𑁆𑀬𑀲𑁆𑀲 𑀭𑀸𑀚𑀸𑀦𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀸 𑀧𑀭𑀺𑀬𑁄𑀥𑀸𑀬 𑀅𑀢𑁆𑀣𑀁 𑀪𑀡𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀩𑀮𑀯𑀦𑀺𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀪𑁄𑀕𑀘𑀸𑀕𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀮𑀸𑀪𑀻 𑀳𑁄𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀲𑀘𑁂 𑀫𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀯𑀓𑁆𑀔𑀢𑀺, 𑀇𑀢𑁄 𑀮𑀸𑀪𑁂𑀦 𑀧𑀝𑀺𑀲𑀦𑁆𑀣𑀭𑀺𑀲𑁆𑀲𑀸𑀫𑀻’𑀢𑀺. 𑀲𑀘𑁂 𑀦𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀆𑀳, 𑀢𑀢𑁄 𑀮𑀸𑀪𑁂𑀦 𑀧𑀝𑀺𑀲𑀦𑁆𑀣𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀪𑁄𑀕𑀘𑀸𑀕𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀏𑀓𑀘𑀸𑀭𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀏𑀓𑀓𑁄𑀯 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀦𑀺𑀯𑀸𑀲𑀁 𑀓𑀧𑁆𑀧𑁂𑀢𑀺. 𑀲𑁄 𑀢𑀢𑁆𑀣 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀦𑁆𑀢𑁄 𑀮𑀸𑀪𑀁 𑀮𑀪𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀸𑀧𑀪𑀺𑀓𑁆𑀔𑀼 𑀏𑀓𑀘𑀸𑀭𑀻 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀸𑀧𑀪𑀺𑀓𑁆𑀔𑀼 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀲𑀫𑀡𑀲𑀼𑀔𑀼𑀫𑀸𑀮𑀲𑀼𑀢𑁆𑀢𑀁

𑁧𑁦𑁪. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄. 𑀬𑁂𑀳𑀺 𑀔𑁄 𑀧𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀺, 𑀢𑁆𑀬𑀲𑁆𑀲 [𑀢𑁆𑀬𑀸𑀲𑁆𑀲 (𑀓.) 𑀅. 𑀦𑀺. 𑁪.𑁮𑁭] 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀯𑀘𑀻𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀫𑀦𑁄𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑀁𑀬𑁂𑀯 𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑀁. 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺 𑀯𑀸 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺 𑀯𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺 𑀯𑀸 𑀑𑀧𑀓𑁆𑀓𑀫𑀺𑀓𑀸𑀦𑀺 𑀯𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺 𑀯𑀸, 𑀢𑀸𑀦𑀺𑀲𑁆𑀲 𑀦 𑀩𑀳𑀼𑀤𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺, 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺.

‘‘𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄’𑀢𑀺, 𑀫𑀫𑁂𑀯 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 [𑀫𑀫𑁂𑀯 𑀢𑀁 𑀲𑀫𑁆𑀫𑀸 (?)] 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄’𑀢𑀺. 𑀅𑀳𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄. 𑀬𑁂𑀳𑀺 𑀔𑁄 𑀧𑀦 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀺, 𑀢𑁂 𑀫𑀁 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀯𑀘𑀻𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀫𑀦𑁄𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑀁𑀬𑁂𑀯 𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑀁. 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑁋 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺 𑀯𑀸 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺 𑀯𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺 𑀯𑀸 𑀑𑀧𑀓𑁆𑀓𑀫𑀺𑀓𑀸𑀦𑀺 𑀯𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺 𑀯𑀸 𑁋 𑀢𑀸𑀦𑀺 𑀫𑁂 𑀦 𑀩𑀳𑀼𑀤𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀧𑁆𑀧𑀸𑀩𑀸𑀥𑁄𑀳𑀫𑀲𑁆𑀫𑀺, 𑀘𑀢𑀼𑀦𑁆𑀦𑀁 𑀔𑁄 𑀧𑀦𑀲𑁆𑀫𑀺 [𑀘𑀢𑀼𑀦𑁆𑀦𑀁 𑀔𑁄 𑀧𑀦 (𑀲𑀻.), 𑀘𑀢𑀼𑀦𑁆𑀦𑀁 (𑀲𑁆𑀬𑀸. 𑀧𑀻.)] 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 [𑀦𑀺𑀓𑀸𑀫𑀮𑀸𑀪𑀻 𑀳𑁄𑀫𑀺 (𑀲𑀻. 𑀓.)] 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺.

‘‘𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄’𑀢𑀺, 𑀫𑀫𑁂𑀯 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄’’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀨𑀸𑀲𑀼𑀯𑀺𑀳𑀸𑀭𑀲𑀼𑀢𑁆𑀢𑀁

𑁧𑁦𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀨𑀸𑀲𑀼𑀯𑀺𑀳𑀸𑀭𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁…𑀧𑁂… 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘. 𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁧𑁦𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂 [𑀪𑀺𑀓𑁆𑀔𑀼𑀁𑀲𑀁𑀖𑁄 (𑀲𑁆𑀬𑀸. 𑀧𑀻.)] 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺? ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 [𑀅𑀢𑁆𑀢𑀦𑀸 𑀘 (𑀧𑀻. 𑀓.)] 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 [𑀦𑁄 𑀘 (𑀓.)] 𑀧𑀭𑀁 𑀅𑀥𑀺𑀲𑀻𑀮𑁂 𑀲𑀫𑁆𑀧𑀯𑀢𑁆𑀢𑀸 [𑀲𑀫𑁆𑀧𑀯𑀢𑁆𑀢𑀸 𑀳𑁄𑀢𑀺 (𑀓.)]; 𑀏𑀢𑁆𑀢𑀸𑀯𑀢𑀸𑀧𑀺 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺.

‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑀬𑀣𑀸 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺? ‘‘𑀲𑀺𑀬𑀸, 𑀆𑀦𑀦𑁆𑀤 [𑀆𑀦𑀦𑁆𑀤𑀸𑀢𑀺 𑀪𑀕𑀯𑀸 𑀆𑀯𑁄𑀘 (𑀲𑁆𑀬𑀸. 𑀧𑀻.)]! 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀅𑀥𑀺𑀲𑀻𑀮𑁂 𑀲𑀫𑁆𑀧𑀯𑀢𑁆𑀢𑀸; 𑀅𑀢𑁆𑀢𑀸𑀦𑀼𑀧𑁂𑀓𑁆𑀔𑀻 𑀘 𑀳𑁄𑀢𑀺, 𑀦𑁄 𑀧𑀭𑀸𑀦𑀼𑀧𑁂𑀓𑁆𑀔𑀻; 𑀏𑀢𑁆𑀢𑀸𑀯𑀢𑀸𑀧𑀺 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺.

‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑀬𑀣𑀸 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺? ‘‘𑀲𑀺𑀬𑀸, 𑀆𑀦𑀦𑁆𑀤! 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀅𑀥𑀺𑀲𑀻𑀮𑁂 𑀲𑀫𑁆𑀧𑀯𑀢𑁆𑀢𑀸; 𑀅𑀢𑁆𑀢𑀸𑀦𑀼𑀧𑁂𑀓𑁆𑀔𑀻 𑀘 𑀳𑁄𑀢𑀺, 𑀦𑁄 𑀧𑀭𑀸𑀦𑀼𑀧𑁂𑀓𑁆𑀔𑀻; 𑀅𑀧𑀜𑁆𑀜𑀸𑀢𑁄 𑀘 𑀳𑁄𑀢𑀺, 𑀢𑁂𑀦 𑀘 𑀅𑀧𑀜𑁆𑀜𑀸𑀢𑀓𑁂𑀦 𑀦𑁄 𑀧𑀭𑀺𑀢𑀲𑁆𑀲𑀢𑀺; 𑀏𑀢𑁆𑀢𑀸𑀯𑀢𑀸𑀧𑀺 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺.

‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑀬𑀣𑀸 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺? ‘‘𑀲𑀺𑀬𑀸, 𑀆𑀦𑀦𑁆𑀤! 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀅𑀥𑀺𑀲𑀻𑀮𑁂 𑀲𑀫𑁆𑀧𑀯𑀢𑁆𑀢𑀸; 𑀅𑀢𑁆𑀢𑀸𑀦𑀼𑀧𑁂𑀓𑁆𑀔𑀻 𑀘 𑀳𑁄𑀢𑀺, 𑀦𑁄 𑀧𑀭𑀸𑀦𑀼𑀧𑁂𑀓𑁆𑀔𑀻; 𑀅𑀧𑀜𑁆𑀜𑀸𑀢𑁄 𑀘 𑀳𑁄𑀢𑀺, 𑀢𑁂𑀦 𑀘 𑀅𑀧𑀜𑁆𑀜𑀸𑀢𑀓𑁂𑀦 𑀦𑁄 𑀧𑀭𑀺𑀢𑀲𑁆𑀲𑀢𑀺; 𑀘𑀢𑀼𑀦𑁆𑀦𑀜𑁆𑀘 [𑀘𑀢𑀼𑀦𑁆𑀦𑀁 (𑀧𑀻. 𑀓.)] 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀏𑀢𑁆𑀢𑀸𑀯𑀢𑀸𑀧𑀺 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺.

‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑀬𑀣𑀸 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺? ‘‘𑀲𑀺𑀬𑀸, 𑀆𑀦𑀦𑁆𑀤! 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀅𑀥𑀺𑀲𑀻𑀮𑁂 𑀲𑀫𑁆𑀧𑀯𑀢𑁆𑀢𑀸; 𑀅𑀢𑁆𑀢𑀸𑀦𑀼𑀧𑁂𑀓𑁆𑀔𑀻 𑀘 𑀳𑁄𑀢𑀺, 𑀦𑁄 𑀧𑀭𑀸𑀦𑀼𑀧𑁂𑀓𑁆𑀔𑀻; 𑀅𑀧𑀜𑁆𑀜𑀸𑀢𑁄 𑀘 𑀳𑁄𑀢𑀺, 𑀢𑁂𑀦 𑀘 𑀅𑀧𑀜𑁆𑀜𑀸𑀢𑀓𑁂𑀦 𑀦𑁄 𑀧𑀭𑀺𑀢𑀲𑁆𑀲𑀢𑀺; 𑀘𑀢𑀼𑀦𑁆𑀦𑀜𑁆𑀘 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀆𑀲𑀯𑀸𑀦𑀜𑁆𑀘 [𑀆𑀲𑀯𑀸𑀦𑀁 (𑀲𑀻. 𑀧𑀻. 𑀓.)] 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀏𑀢𑁆𑀢𑀸𑀯𑀢𑀸𑀧𑀺 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀳𑀭𑀦𑁆𑀢𑁄 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬.

‘‘𑀇𑀫𑀫𑁆𑀳𑀸 𑀘𑀸𑀳𑀁, 𑀆𑀦𑀦𑁆𑀤, 𑀨𑀸𑀲𑀼𑀯𑀺𑀳𑀸𑀭𑀸 𑀅𑀜𑁆𑀜𑁄 𑀨𑀸𑀲𑀼𑀯𑀺𑀳𑀸𑀭𑁄 𑀉𑀢𑁆𑀢𑀭𑀺𑀢𑀭𑁄 𑀯𑀸 𑀧𑀡𑀻𑀢𑀢𑀭𑁄 𑀯𑀸 𑀦𑀢𑁆𑀣𑀻𑀢𑀺 𑀯𑀤𑀸𑀫𑀻’’𑀢𑀺. 𑀙𑀝𑁆𑀞𑀁.

𑁭. 𑀲𑀻𑀮𑀲𑀼𑀢𑁆𑀢𑀁

𑁧𑁦𑁭. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀲𑁂𑀔𑀲𑀼𑀢𑁆𑀢𑀁

𑁧𑁦𑁮. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀓𑀢𑀫𑁂𑀳𑀺, 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀘𑀸𑀢𑀼𑀤𑁆𑀤𑀺𑀲𑀲𑀼𑀢𑁆𑀢𑀁

𑁧𑁦𑁯. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀘𑀸𑀢𑀼𑀤𑁆𑀤𑀺𑀲𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦; 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂𑀳𑀺, 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀘𑀸𑀢𑀼𑀤𑁆𑀤𑀺𑀲𑁄 𑀳𑁄𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀅𑀭𑀜𑁆𑀜𑀲𑀼𑀢𑁆𑀢𑀁

𑁧𑁧𑁦. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀺𑀢𑀼’’𑀦𑁆𑀢𑀺. 𑀤𑀲𑀫𑀁.

𑀨𑀸𑀲𑀼𑀯𑀺𑀳𑀸𑀭𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀸𑀭𑀚𑁆𑀚𑀁 𑀲𑀗𑁆𑀓𑀺𑀢𑁄 𑀘𑁄𑀭𑁄, 𑀲𑀼𑀔𑀼𑀫𑀸𑀮𑀁 𑀨𑀸𑀲𑀼 𑀧𑀜𑁆𑀘𑀫𑀁;

𑀆𑀦𑀦𑁆𑀤 𑀲𑀻𑀮𑀸𑀲𑁂𑀔𑀸 𑀘, 𑀘𑀸𑀢𑀼𑀤𑁆𑀤𑀺𑀲𑁄 𑀅𑀭𑀜𑁆𑀜𑁂𑀦 𑀘𑀸𑀢𑀺.

(𑁧𑁨) 𑁨. 𑀅𑀦𑁆𑀥𑀓𑀯𑀺𑀦𑁆𑀤𑀯𑀕𑁆𑀕𑁄

𑁧. 𑀓𑀼𑀮𑀽𑀧𑀓𑀲𑀼𑀢𑁆𑀢𑀁

𑁧𑁧𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀼𑀮𑀽𑀧𑀓𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀅𑀧𑁆𑀧𑀺𑀬𑁄 𑀘 𑀳𑁄𑀢𑀺 𑀅𑀫𑀦𑀸𑀧𑁄 𑀘 𑀅𑀕𑀭𑀼 𑀘 𑀅𑀪𑀸𑀯𑀦𑀻𑀬𑁄 𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑀦𑁆𑀣𑀯𑀯𑀺𑀲𑁆𑀲𑀸𑀲𑀻 [𑀅𑀲𑀦𑁆𑀣𑀼𑀢𑀯𑀺𑀲𑁆𑀲𑀸𑀲𑀻 (𑀲𑀻.), 𑀅𑀲𑀦𑁆𑀥𑀯𑀯𑀺𑀲𑁆𑀲𑀸𑀲𑀻 (𑀓.)] 𑀘 𑀳𑁄𑀢𑀺, 𑀅𑀦𑀺𑀲𑁆𑀲𑀭𑀯𑀺𑀓𑀧𑁆𑀧𑀻 𑀘, 𑀯𑀺𑀲𑁆𑀲𑀝𑁆𑀞𑀼𑀧𑀲𑁂𑀯𑀻 [𑀯𑀺𑀬𑀢𑁆𑀣𑀼𑀧𑀲𑁂𑀯𑀻 (𑀲𑀻.), 𑀩𑁆𑀬𑀢𑁆𑀣𑀼𑀧𑀲𑁂𑀯𑀻 (𑀲𑁆𑀬𑀸. 𑀓𑀁.), 𑀯𑁆𑀬𑀢𑁆𑀢𑀽𑀧𑀲𑁂𑀯𑀻 (𑀧𑀻.)] 𑀘, 𑀉𑀧𑀓𑀡𑁆𑀡𑀓𑀚𑀧𑁆𑀧𑀻 𑀘, 𑀅𑀢𑀺𑀬𑀸𑀘𑀦𑀓𑁄 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀼𑀮𑀽𑀧𑀓𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀅𑀧𑁆𑀧𑀺𑀬𑁄 𑀘 𑀳𑁄𑀢𑀺 𑀅𑀫𑀦𑀸𑀧𑁄 𑀘 𑀅𑀕𑀭𑀼 𑀘 𑀅𑀪𑀸𑀯𑀦𑀻𑀬𑁄 𑀘.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀼𑀮𑀽𑀧𑀓𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀅𑀲𑀦𑁆𑀣𑀯𑀯𑀺𑀲𑁆𑀲𑀸𑀲𑀻 𑀘 𑀳𑁄𑀢𑀺, 𑀦 𑀅𑀦𑀺𑀲𑁆𑀲𑀭𑀯𑀺𑀓𑀧𑁆𑀧𑀻 𑀘, 𑀦 𑀯𑀺𑀲𑁆𑀲𑀝𑁆𑀞𑀼𑀧𑀲𑁂𑀯𑀻 𑀘, 𑀦 𑀉𑀧𑀓𑀡𑁆𑀡𑀓𑀚𑀧𑁆𑀧𑀻 𑀘, 𑀦 𑀅𑀢𑀺𑀬𑀸𑀘𑀦𑀓𑁄 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀼𑀮𑀽𑀧𑀓𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸’’𑀢𑀺. 𑀧𑀞𑀫𑀁.

𑁨. 𑀧𑀘𑁆𑀙𑀸𑀲𑀫𑀡𑀲𑀼𑀢𑁆𑀢𑀁

𑁧𑁧𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀘𑁆𑀙𑀸𑀲𑀫𑀡𑁄 𑀦 𑀆𑀤𑀸𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀢𑀺𑀤𑀽𑀭𑁂 𑀯𑀸 𑀕𑀘𑁆𑀙𑀢𑀺 𑀅𑀘𑁆𑀘𑀸𑀲𑀦𑁆𑀦𑁂 𑀯𑀸, 𑀦 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀕𑀡𑁆𑀳𑀢𑀺, 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑀁 𑀦 𑀦𑀺𑀯𑀸𑀭𑁂𑀢𑀺, 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺 𑀚𑀴𑁄 𑀏𑀴𑀫𑀽𑀕𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀘𑁆𑀙𑀸𑀲𑀫𑀡𑁄 𑀦 𑀆𑀤𑀸𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀘𑁆𑀙𑀸𑀲𑀫𑀡𑁄 𑀆𑀤𑀸𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦𑀸𑀢𑀺𑀤𑀽𑀭𑁂 𑀕𑀘𑁆𑀙𑀢𑀺 𑀦 𑀅𑀘𑁆𑀘𑀸𑀲𑀦𑁆𑀦𑁂, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀕𑀡𑁆𑀳𑀢𑀺, 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀪𑀡𑀫𑀸𑀦𑀲𑁆𑀲 𑀦 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺 𑀅𑀚𑀴𑁄 𑀅𑀦𑁂𑀴𑀫𑀽𑀕𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀘𑁆𑀙𑀸𑀲𑀫𑀡𑁄 𑀆𑀤𑀸𑀢𑀩𑁆𑀩𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀫𑁆𑀫𑀸𑀲𑀫𑀸𑀥𑀺𑀲𑀼𑀢𑁆𑀢𑀁

𑁧𑁧𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀲𑀫𑁆𑀫𑀸𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀅𑀓𑁆𑀔𑀫𑁄 𑀲𑀤𑁆𑀤𑀸𑀦𑀁, 𑀅𑀓𑁆𑀔𑀫𑁄 𑀕𑀦𑁆𑀥𑀸𑀦𑀁, 𑀅𑀓𑁆𑀔𑀫𑁄 𑀭𑀲𑀸𑀦𑀁, 𑀅𑀓𑁆𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀪𑀩𑁆𑀩𑁄 𑀲𑀫𑁆𑀫𑀸𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀲𑀫𑁆𑀫𑀸𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀔𑀫𑁄 𑀲𑀤𑁆𑀤𑀸𑀦𑀁, 𑀔𑀫𑁄 𑀕𑀦𑁆𑀥𑀸𑀦𑀁, 𑀔𑀫𑁄 𑀭𑀲𑀸𑀦𑀁, 𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀲𑀫𑁆𑀫𑀸𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀅𑀦𑁆𑀥𑀓𑀯𑀺𑀦𑁆𑀤𑀲𑀼𑀢𑁆𑀢𑀁

𑁧𑁧𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀅𑀦𑁆𑀥𑀓𑀯𑀺𑀦𑁆𑀤𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀢𑁂 𑀯𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀲𑀫𑀸𑀤𑀧𑁂𑀢𑀩𑁆𑀩𑀸 [𑀲𑀫𑀸𑀤𑀸𑀧𑁂𑀢𑀩𑁆𑀩𑀸 (?)] 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸. 𑀓𑀢𑀫𑁂𑀲𑀼 𑀧𑀜𑁆𑀘𑀲𑀼? ‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀲𑀻𑀮𑀯𑀸 𑀳𑁄𑀣, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸 𑀯𑀺𑀳𑀭𑀣 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑀸 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀺𑀦𑁄, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀣 𑀲𑀺𑀓𑁆𑀔𑀸𑀧𑀤𑁂𑀲𑀽’𑀢𑀺 𑁋 𑀇𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸.

‘‘‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸 𑀯𑀺𑀳𑀭𑀣 𑀆𑀭𑀓𑁆𑀔𑀲𑀢𑀺𑀦𑁄 𑀦𑀺𑀧𑀓𑁆𑀓𑀲𑀢𑀺𑀦𑁄 [𑀦𑀺𑀧𑀓𑀲𑀢𑀺𑀦𑁄 (𑀲𑀻. 𑀲𑁆𑀬𑀸.), 𑀦𑁂𑀧𑀓𑁆𑀓𑀲𑀢𑀺𑀦𑁄 (?)], 𑀲𑀸𑀭𑀓𑁆𑀔𑀺𑀢𑀫𑀸𑀦𑀲𑀸 𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸 𑀲𑀫𑀦𑁆𑀦𑀸𑀕𑀢𑀸’𑀢𑀺 𑁋 𑀇𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸.

‘‘‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀅𑀧𑁆𑀧𑀪𑀲𑁆𑀲𑀸 𑀳𑁄𑀣, 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀺𑀦𑁄’𑀢𑀺 𑁋 𑀇𑀢𑀺 𑀪𑀲𑁆𑀲𑀧𑀭𑀺𑀬𑀦𑁆𑀢𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸.

‘‘‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀆𑀭𑀜𑁆𑀜𑀺𑀓𑀸 𑀳𑁄𑀣, 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀣𑀸’𑀢𑀺 𑁋 𑀇𑀢𑀺 𑀓𑀸𑀬𑀯𑀽𑀧𑀓𑀸𑀲𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸.

‘‘‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀳𑁄𑀣 𑀲𑀫𑁆𑀫𑀸𑀤𑀲𑁆𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀸’𑀢𑀺 𑁋 𑀇𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸. 𑀬𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀢𑁂 𑀯𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀘𑁆𑀙𑀭𑀺𑀦𑀻𑀲𑀼𑀢𑁆𑀢𑀁

𑁧𑁧𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀆𑀯𑀸𑀲𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀓𑀼𑀮𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀮𑀸𑀪𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀯𑀡𑁆𑀡𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀥𑀫𑁆𑀫𑀫𑀘𑁆𑀙𑀭𑀺𑀦𑀻 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀆𑀯𑀸𑀲𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀦 𑀓𑀼𑀮𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀦 𑀮𑀸𑀪𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀦 𑀯𑀡𑁆𑀡𑀫𑀘𑁆𑀙𑀭𑀺𑀦𑀻 𑀳𑁄𑀢𑀺, 𑀦 𑀥𑀫𑁆𑀫𑀫𑀘𑁆𑀙𑀭𑀺𑀦𑀻 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂’’𑀢𑀺. 𑀧𑀜𑁆𑀘𑀫𑀁.

𑁬. 𑀯𑀡𑁆𑀡𑀦𑀸𑀲𑀼𑀢𑁆𑀢𑀁

𑁧𑁧𑁬. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀧𑁆𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀅𑀧𑁆𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀧𑁆𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀅𑀧𑁆𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂’’𑀢𑀺. 𑀙𑀝𑁆𑀞𑀁.

𑁭. 𑀇𑀲𑁆𑀲𑀼𑀓𑀺𑀦𑀻𑀲𑀼𑀢𑁆𑀢𑀁

𑁧𑁧𑁭. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀇𑀲𑁆𑀲𑀼𑀓𑀺𑀦𑀻 𑀘 𑀳𑁄𑀢𑀺, 𑀫𑀘𑁆𑀙𑀭𑀺𑀦𑀻 𑀘, 𑀲𑀤𑁆𑀥𑀸𑀤𑁂𑀬𑁆𑀬𑀁 [𑀲𑀤𑁆𑀥𑀸𑀤𑁂𑀬𑁆𑀬𑀜𑁆𑀘 (𑀲𑁆𑀬𑀸.)] 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀺𑀲𑁆𑀲𑀼𑀓𑀺𑀦𑀻 𑀘 𑀳𑁄𑀢𑀺, 𑀅𑀫𑀘𑁆𑀙𑀭𑀺𑀦𑀻 𑀘, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂’’𑀢𑀺. 𑀲𑀢𑁆𑀢𑀫𑀁.

𑁮. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀁

𑁧𑁧𑁮. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀘 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀘, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀘, 𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀘, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂’’𑀢𑀺. 𑀅𑀝𑁆𑀞𑀫𑀁.

𑁯. 𑀫𑀺𑀘𑁆𑀙𑀸𑀯𑀸𑀘𑀸𑀲𑀼𑀢𑁆𑀢𑀁

𑁧𑁧𑁯. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀫𑀺𑀘𑁆𑀙𑀸𑀯𑀸𑀘𑀸 𑀘 𑀳𑁄𑀢𑀺, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸 𑀘, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀫𑁆𑀫𑀸𑀯𑀸𑀘𑀸 𑀘 𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸 𑀘, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂’’𑀢𑀺. 𑀦𑀯𑀫𑀁.

𑁧𑁦. 𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑀼𑀢𑁆𑀢𑀁

𑁧𑁨𑁦. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀫𑀺𑀘𑁆𑀙𑀸𑀯𑀸𑀬𑀸𑀫𑀸 𑀘 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀢𑀺𑀦𑀻 𑀘 [𑀫𑀺𑀘𑁆𑀙𑀸𑀲𑀢𑀺 𑀘 (𑀲𑁆𑀬𑀸.)], 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑀸 𑀘 𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺𑀦𑀻 𑀘, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦 𑀯𑀺𑀦𑀺𑀧𑀸𑀢𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀼𑀦𑀻 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂’’𑀢𑀺. 𑀤𑀲𑀫𑀁.

𑀅𑀦𑁆𑀥𑀓𑀯𑀺𑀦𑁆𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀮𑀽𑀧𑀓𑁄 𑀧𑀘𑁆𑀙𑀸𑀲𑀫𑀡𑁄, 𑀲𑀫𑀸𑀥𑀺𑀅𑀦𑁆𑀥𑀓𑀯𑀺𑀦𑁆𑀤𑀁;

𑀫𑀘𑁆𑀙𑀭𑀻 𑀯𑀡𑁆𑀡𑀦𑀸 𑀇𑀲𑁆𑀲𑀸, 𑀤𑀺𑀝𑁆𑀞𑀺𑀯𑀸𑀘𑀸𑀬 𑀯𑀸𑀬𑀫𑀸𑀢𑀺.

(𑁧𑁩) 𑁩. 𑀕𑀺𑀮𑀸𑀦𑀯𑀕𑁆𑀕𑁄

𑁧. 𑀕𑀺𑀮𑀸𑀦𑀲𑀼𑀢𑁆𑀢𑀁

𑁧𑁨𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀕𑀺𑀮𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀤𑀼𑀩𑁆𑀩𑀮𑀁 𑀕𑀺𑀮𑀸𑀦𑀓𑀁; 𑀤𑀺𑀲𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀬𑀁 𑀓𑀺𑀜𑁆𑀘𑀺 [𑀬𑀁 𑀓𑀺𑀜𑁆𑀘𑀺 (𑀲𑁆𑀬𑀸. 𑀓𑀁.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀤𑀼𑀩𑁆𑀩𑀮𑀁 [𑀪𑀺𑀓𑁆𑀔𑀯𑁂 𑀤𑀼𑀩𑁆𑀩𑀮𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑀺𑀮𑀸𑀦𑀓𑀁 𑀧𑀜𑁆𑀘 𑀥𑀫𑁆𑀫𑀸 𑀦 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀦𑀘𑀺𑀭𑀲𑁆𑀲𑁂𑀯 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀻’’’𑀢𑀺.

‘‘𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀓𑀸𑀬𑁂 𑀯𑀺𑀳𑀭𑀢𑀺, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀻, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺], 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻, 𑀫𑀭𑀡𑀲𑀜𑁆𑀜𑀸 𑀔𑁄 𑀧𑀦𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀬𑀁 𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀤𑀼𑀩𑁆𑀩𑀮𑀁 𑀕𑀺𑀮𑀸𑀦𑀓𑀁 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀦 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀦𑀘𑀺𑀭𑀲𑁆𑀲𑁂𑀯 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀻’’’𑀢𑀺. 𑀧𑀞𑀫𑀁.

𑁨. 𑀲𑀢𑀺𑀲𑀽𑀧𑀝𑁆𑀞𑀺𑀢𑀲𑀼𑀢𑁆𑀢𑀁

𑁧𑁨𑁨. ‘‘𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀧𑀜𑁆𑀘 𑀥𑀫𑁆𑀫𑁂 𑀪𑀸𑀯𑁂𑀢𑀺 𑀧𑀜𑁆𑀘 𑀥𑀫𑁆𑀫𑁂 𑀩𑀳𑀼𑀮𑀻𑀓𑀭𑁄𑀢𑀺, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸.

‘‘𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀚𑁆𑀛𑀢𑁆𑀢𑀜𑁆𑀜𑁂𑀯 𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀺 𑀥𑀫𑁆𑀫𑀸𑀦𑀁 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬, 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀓𑀸𑀬𑁂 𑀯𑀺𑀳𑀭𑀢𑀺, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀻, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀻, 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀪𑀸𑀯𑁂𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀩𑀳𑀼𑀮𑀻𑀓𑀭𑁄𑀢𑀺, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀉𑀧𑀝𑁆𑀞𑀸𑀓𑀲𑀼𑀢𑁆𑀢𑀁

𑁧𑁨𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀤𑀽𑀧𑀝𑁆𑀞𑀸𑀓𑁄 [𑀤𑀼𑀧𑀝𑁆𑀞𑀸𑀓𑁄 (𑀲𑁆𑀬𑀸. 𑀓𑀁. 𑀧𑀻. 𑀓.) 𑀫𑀳𑀸𑀯. 𑁩𑁬𑁬] 𑀳𑁄𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀦𑀧𑁆𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀦 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀆𑀯𑀺𑀓𑀢𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺 𑀞𑀺𑀢𑀁 𑀯𑀸 𑀞𑀺𑀢𑁄𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 [𑀢𑀺𑀧𑁆𑀧𑀸𑀦𑀁 (𑀲𑀻.) 𑀫𑀳𑀸𑀯. 𑁩𑁬𑁬] 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀤𑀽𑀧𑀝𑁆𑀞𑀸𑀓𑁄 𑀳𑁄𑀢𑀺.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀲𑀽𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀆𑀯𑀺𑀓𑀢𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺 𑀞𑀺𑀢𑀁 𑀯𑀸 𑀞𑀺𑀢𑁄𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀲𑀽𑀧𑀝𑁆𑀞𑀸𑀓𑁄 𑀳𑁄𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀉𑀧𑀝𑁆𑀞𑀸𑀓𑀲𑀼𑀢𑁆𑀢𑀁

𑁧𑁨𑁪. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦𑀧𑁆𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁; 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀦 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺, 𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺; 𑀆𑀫𑀺𑀲𑀦𑁆𑀢𑀭𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺, 𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑁄; 𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀯𑀦𑁆𑀢𑀁 𑀯𑀸 𑀔𑁂𑀴𑀁 𑀯𑀸 𑀦𑀻𑀳𑀭𑀺𑀢𑀼𑀁; 𑀦𑀧𑁆𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 [𑀲𑀫𑀸𑀤𑀸𑀧𑁂𑀢𑀼𑀁 (?) 𑀫𑀳𑀸𑀯. 𑁩𑁬𑁬] 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁; 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺, 𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺; 𑀫𑁂𑀢𑁆𑀢𑀘𑀺𑀢𑁆𑀢𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺, 𑀦𑁄 𑀆𑀫𑀺𑀲𑀦𑁆𑀢𑀭𑁄; 𑀅𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀯𑀦𑁆𑀢𑀁 𑀯𑀸 𑀔𑁂𑀴𑀁 𑀯𑀸 𑀦𑀻𑀳𑀭𑀺𑀢𑀼𑀁; 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀅𑀦𑀸𑀬𑀼𑀲𑁆𑀲𑀸𑀲𑀼𑀢𑁆𑀢𑀁

𑁧𑁨𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀦𑀸𑀬𑀼𑀲𑁆𑀲𑀸. 𑀓𑀢𑀫𑁂 𑀧𑀜𑁆𑀘? 𑀅𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀅𑀧𑀭𑀺𑀡𑀢𑀪𑁄𑀚𑀻 𑀘 𑀳𑁄𑀢𑀺, 𑀅𑀓𑀸𑀮𑀘𑀸𑀭𑀻 𑀘 𑀳𑁄𑀢𑀺, 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀅𑀦𑀸𑀬𑀼𑀲𑁆𑀲𑀸.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀆𑀬𑀼𑀲𑁆𑀲𑀸. 𑀓𑀢𑀫𑁂 𑀧𑀜𑁆𑀘? 𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀧𑀭𑀺𑀡𑀢𑀪𑁄𑀚𑀻 𑀘 𑀳𑁄𑀢𑀺, 𑀓𑀸𑀮𑀘𑀸𑀭𑀻 𑀘 𑀳𑁄𑀢𑀺, 𑀩𑁆𑀭𑀳𑁆𑀫𑀘𑀸𑀭𑀻 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀼𑀲𑁆𑀲𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀅𑀦𑀸𑀬𑀼𑀲𑁆𑀲𑀸𑀲𑀼𑀢𑁆𑀢𑀁

𑁧𑁨𑁬. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀦𑀸𑀬𑀼𑀲𑁆𑀲𑀸. 𑀓𑀢𑀫𑁂 𑀧𑀜𑁆𑀘? 𑀅𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀅𑀧𑀭𑀺𑀡𑀢𑀪𑁄𑀚𑀻 𑀘 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀘, 𑀧𑀸𑀧𑀫𑀺𑀢𑁆𑀢𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀅𑀦𑀸𑀬𑀼𑀲𑁆𑀲𑀸.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀆𑀬𑀼𑀲𑁆𑀲𑀸. 𑀓𑀢𑀫𑁂 𑀧𑀜𑁆𑀘? 𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀧𑀭𑀺𑀡𑀢𑀪𑁄𑀚𑀻 𑀘 𑀳𑁄𑀢𑀺, 𑀲𑀻𑀮𑀯𑀸 𑀘, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀼𑀲𑁆𑀲𑀸’’𑀢𑀺. 𑀙𑀝𑁆𑀞𑀁.

𑁭. 𑀯𑀧𑀓𑀸𑀲𑀲𑀼𑀢𑁆𑀢𑀁

𑁧𑁨𑁭. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀸𑀮𑀁 𑀲𑀗𑁆𑀖𑀫𑁆𑀳𑀸 𑀯𑀧𑀓𑀸𑀲𑀺𑀢𑀼𑀁 [𑀯𑀺 + 𑀅𑀧 + 𑀓𑀸𑀲𑀺𑀢𑀼𑀁 = 𑀯𑀧𑀓𑀸𑀲𑀺𑀢𑀼𑀁]. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦, 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀓𑀸𑀫𑀲𑀗𑁆𑀓𑀧𑁆𑀧𑀩𑀳𑀼𑀮𑁄 𑀘 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀸𑀮𑀁 𑀲𑀗𑁆𑀖𑀫𑁆𑀳𑀸 𑀯𑀧𑀓𑀸𑀲𑀺𑀢𑀼𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀲𑀗𑁆𑀖𑀫𑁆𑀳𑀸 𑀯𑀧𑀓𑀸𑀲𑀺𑀢𑀼𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦, 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀩𑀳𑀼𑀮𑁄 [𑀦 𑀓𑀸𑀫𑀲𑀗𑁆𑀓𑀧𑁆𑀧𑀩𑀳𑀼𑀮𑁄 (𑀓.)] 𑀘 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀮𑀁 𑀲𑀗𑁆𑀖𑀫𑁆𑀳𑀸 𑀯𑀧𑀓𑀸𑀲𑀺𑀢𑀼’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀲𑀫𑀡𑀲𑀼𑀔𑀲𑀼𑀢𑁆𑀢𑀁

𑁧𑁨𑁮. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀤𑀼𑀓𑁆𑀔𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦, 𑀅𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀅𑀦𑀪𑀺𑀭𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀫𑀡𑀤𑀼𑀓𑁆𑀔𑀸𑀦𑀺.

‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀲𑀼𑀔𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦, 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀅𑀪𑀺𑀭𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀫𑀡𑀲𑀼𑀔𑀸𑀦𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀭𑀺𑀓𑀼𑀧𑁆𑀧𑀲𑀼𑀢𑁆𑀢𑀁

𑁧𑁨𑁯. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀧𑀸𑀬𑀺𑀓𑀸 𑀦𑁂𑀭𑀬𑀺𑀓𑀸 𑀧𑀭𑀺𑀓𑀼𑀧𑁆𑀧𑀸 𑀅𑀢𑁂𑀓𑀺𑀘𑁆𑀙𑀸. 𑀓𑀢𑀫𑁂 𑀧𑀜𑁆𑀘? 𑀫𑀸𑀢𑀸 [𑀫𑀸𑀢𑀭𑀁 (𑀓.)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸 𑀳𑁄𑀢𑀺, 𑀧𑀺𑀢𑀸 [𑀧𑀺𑀢𑀭𑀁 (𑀓.)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄 [𑀯𑁄𑀭𑁄𑀧𑀺𑀢𑀸 (𑀓.)] 𑀳𑁄𑀢𑀺, 𑀅𑀭𑀳𑀁 [𑀅𑀭𑀳𑀦𑁆𑀢𑀁 (𑀓.), 𑀅𑀭𑀳𑀸 (𑀲𑁆𑀬𑀸.)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄 𑀳𑁄𑀢𑀺, 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑀺𑀢𑀁 𑀳𑁄𑀢𑀺, 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀧𑀸𑀬𑀺𑀓𑀸 𑀦𑁂𑀭𑀬𑀺𑀓𑀸 𑀧𑀭𑀺𑀓𑀼𑀧𑁆𑀧𑀸 𑀅𑀢𑁂𑀓𑀺𑀘𑁆𑀙𑀸’’𑀢𑀺. 𑀦𑀯𑀫𑀁.

𑁧𑁦. 𑀩𑁆𑀬𑀲𑀦𑀲𑀼𑀢𑁆𑀢𑀁

𑁧𑁩𑁦. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀲𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀜𑀸𑀢𑀺𑀩𑁆𑀬𑀲𑀦𑀁, 𑀪𑁄𑀕𑀩𑁆𑀬𑀲𑀦𑀁, 𑀭𑁄𑀕𑀩𑁆𑀬𑀲𑀦𑀁, 𑀲𑀻𑀮𑀩𑁆𑀬𑀲𑀦𑀁, 𑀤𑀺𑀝𑁆𑀞𑀺𑀩𑁆𑀬𑀲𑀦𑀁. 𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀜𑀸𑀢𑀺𑀩𑁆𑀬𑀲𑀦𑀳𑁂𑀢𑀼 𑀯𑀸 𑀪𑁄𑀕𑀩𑁆𑀬𑀲𑀦𑀳𑁂𑀢𑀼 𑀯𑀸 𑀭𑁄𑀕𑀩𑁆𑀬𑀲𑀦𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀲𑀻𑀮𑀩𑁆𑀬𑀲𑀦𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀤𑀺𑀝𑁆𑀞𑀺𑀩𑁆𑀬𑀲𑀦𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀩𑁆𑀬𑀲𑀦𑀸𑀦𑀺.

‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀤𑀸. 𑀓𑀢𑀫𑀸 𑀧𑀜𑁆𑀘? 𑀜𑀸𑀢𑀺𑀲𑀫𑁆𑀧𑀤𑀸, 𑀪𑁄𑀕𑀲𑀫𑁆𑀧𑀤𑀸, 𑀆𑀭𑁄𑀕𑁆𑀬𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀤𑀺𑀝𑁆𑀞𑀺𑀲𑀫𑁆𑀧𑀤𑀸. 𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀜𑀸𑀢𑀺𑀲𑀫𑁆𑀧𑀤𑀸𑀳𑁂𑀢𑀼 𑀯𑀸 𑀪𑁄𑀕𑀲𑀫𑁆𑀧𑀤𑀸𑀳𑁂𑀢𑀼 𑀯𑀸 𑀆𑀭𑁄𑀕𑁆𑀬𑀲𑀫𑁆𑀧𑀤𑀸𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀲𑀻𑀮𑀲𑀫𑁆𑀧𑀤𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀫𑁆𑀧𑀤𑀸’’𑀢𑀺. 𑀤𑀲𑀫𑀁.

𑀕𑀺𑀮𑀸𑀦𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑀺𑀮𑀸𑀦𑁄 𑀲𑀢𑀺𑀲𑀽𑀧𑀝𑁆𑀞𑀺, 𑀤𑁆𑀯𑁂 𑀉𑀧𑀝𑁆𑀞𑀸𑀓𑀸 𑀤𑀼𑀯𑀸𑀬𑀼𑀲𑀸;

𑀯𑀧𑀓𑀸𑀲𑀲𑀫𑀡𑀲𑀼𑀔𑀸, 𑀧𑀭𑀺𑀓𑀼𑀧𑁆𑀧𑀁 𑀩𑁆𑀬𑀲𑀦𑁂𑀦 𑀘𑀸𑀢𑀺.

(𑁧𑁪) 𑁪. 𑀭𑀸𑀚𑀯𑀕𑁆𑀕𑁄

𑁧. 𑀧𑀞𑀫𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀁

𑁧𑁩𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀯𑀢𑁆𑀢𑁂𑀢𑀺 [𑀧𑀯𑀢𑁆𑀢𑁂𑀢𑀺 (𑀲𑁆𑀬𑀸. 𑀧𑀻. 𑀓.)]; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 [𑀅𑀧𑁆𑀧𑀢𑀺𑀯𑀢𑁆𑀢𑀺𑀬𑀁 (𑀲𑀻.)] 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀅𑀢𑁆𑀣𑀜𑁆𑀜𑀽 𑀘 𑀳𑁄𑀢𑀺, 𑀥𑀫𑁆𑀫𑀜𑁆𑀜𑀽 𑀘, 𑀫𑀢𑁆𑀢𑀜𑁆𑀜𑀽 𑀘, 𑀓𑀸𑀮𑀜𑁆𑀜𑀽 𑀘, 𑀧𑀭𑀺𑀲𑀜𑁆𑀜𑀽 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀣𑀜𑁆𑀜𑀽, 𑀥𑀫𑁆𑀫𑀜𑁆𑀜𑀽, 𑀫𑀢𑁆𑀢𑀜𑁆𑀜𑀽, 𑀓𑀸𑀮𑀜𑁆𑀜𑀽, 𑀧𑀭𑀺𑀲𑀜𑁆𑀜𑀽. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀥𑀫𑁆𑀫𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀁

𑁧𑁩𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀥𑀫𑁆𑀫𑁂𑀦𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀅𑀢𑁆𑀣𑀜𑁆𑀜𑀽 𑀘 𑀳𑁄𑀢𑀺, 𑀥𑀫𑁆𑀫𑀜𑁆𑀜𑀽 𑀘, 𑀫𑀢𑁆𑀢𑀜𑁆𑀜𑀽 𑀘, 𑀓𑀸𑀮𑀜𑁆𑀜𑀽 𑀘, 𑀧𑀭𑀺𑀲𑀜𑁆𑀜𑀽 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀥𑀫𑁆𑀫𑁂𑀦𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀣𑀜𑁆𑀜𑀽, 𑀥𑀫𑁆𑀫𑀜𑁆𑀜𑀽, 𑀫𑀢𑁆𑀢𑀜𑁆𑀜𑀽, 𑀓𑀸𑀮𑀜𑁆𑀜𑀽, 𑀧𑀭𑀺𑀲𑀜𑁆𑀜𑀽. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀥𑀫𑁆𑀫𑀭𑀸𑀚𑀸𑀲𑀼𑀢𑁆𑀢𑀁

𑁧𑁩𑁩. ‘‘𑀬𑁄𑀧𑀺 𑀲𑁄 [𑀬𑁄𑀧𑀺 𑀔𑁄 (𑀲𑀻. 𑀲𑁆𑀬𑀸. 𑀧𑀻.)], 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸, 𑀲𑁄𑀧𑀺 𑀦 𑀅𑀭𑀸𑀚𑀓𑀁 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀧𑀦, 𑀪𑀦𑁆𑀢𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀭𑀸𑀚𑀸’’𑀢𑀺? ‘‘𑀥𑀫𑁆𑀫𑁄, 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀇𑀥, 𑀪𑀺𑀓𑁆𑀔𑀼, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀅𑀦𑁆𑀢𑁄𑀚𑀦𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀔𑀢𑁆𑀢𑀺𑀬𑁂𑀲𑀼 𑀅𑀦𑀼𑀬𑀦𑁆𑀢𑁂𑀲𑀼 [𑀅𑀦𑀼𑀬𑀼𑀢𑁆𑀢𑁂𑀲𑀼 (𑀲𑀻.) 𑀅. 𑀦𑀺. 𑁩.𑁧𑁪] …𑀧𑁂… 𑀩𑀮𑀓𑀸𑀬𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀫𑀺𑀕𑀧𑀓𑁆𑀔𑀻𑀲𑀼. 𑀲 𑀔𑁄 𑀲𑁄, 𑀪𑀺𑀓𑁆𑀔𑀼, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀔𑀢𑁆𑀢𑀺𑀬𑁂𑀲𑀼 𑀅𑀦𑀼𑀬𑀦𑁆𑀢𑁂𑀲𑀼 𑀩𑀮𑀓𑀸𑀬𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀫𑀺𑀕𑀧𑀓𑁆𑀔𑀻𑀲𑀼 𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀪𑀺𑀓𑁆𑀔𑀽𑀲𑀼 𑁋 ‘𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀦 𑀲𑁂𑀯𑀺𑀢𑀩𑁆𑀩𑁄; 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀦 𑀲𑁂𑀯𑀺𑀢𑀩𑁆𑀩𑁄’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀪𑀺𑀓𑁆𑀔𑀼𑀦𑀻𑀲𑀼 [𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 (𑀲𑀻. 𑀧𑀻.)] …𑀧𑁂… 𑀉𑀧𑀸𑀲𑀓𑁂𑀲𑀼…𑀧𑁂… 𑀉𑀧𑀸𑀲𑀺𑀓𑀸𑀲𑀼 𑁋 ‘𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀦 𑀲𑁂𑀯𑀺𑀢𑀩𑁆𑀩𑁄; 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀦 𑀲𑁂𑀯𑀺𑀢𑀩𑁆𑀩𑁄’’’𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀲𑀼, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀉𑀧𑀸𑀲𑀓𑁂𑀲𑀼, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀲𑀼 𑀥𑀫𑁆𑀫𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀢𑀢𑀺𑀬𑀁.