𑁭. 𑀅𑀧𑁆𑀧𑀁𑀲𑀼𑀧𑀢𑀺𑀲𑀼𑀢𑁆𑀢𑀁

𑁧𑁩𑁭. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀦𑁆𑀢𑀺, 𑀩𑀳𑀼𑀁 𑀚𑀕𑁆𑀕𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀢𑁆𑀣𑀻, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀸 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀧𑀼𑀭𑀺𑀲𑁄, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀘𑁄𑀭𑁄, 𑀪𑀺𑀓𑁆𑀔𑀯𑁂, 𑀆𑀤𑀸𑀦𑀸𑀥𑀺𑀧𑁆𑀧𑀸𑀬𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀭𑀸𑀚𑀸 [𑀭𑀸𑀚𑀬𑀼𑀢𑁆𑀢𑁄 (𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀭𑀸𑀚𑀓𑀭𑀡𑀻𑀬𑁂𑀲𑀼 𑀬𑀼𑀢𑁆𑀢𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀯𑀺𑀲𑀁𑀬𑁄𑀕𑀸𑀥𑀺𑀧𑁆𑀧𑀸𑀬𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀦𑁆𑀢𑀺, 𑀩𑀳𑀼𑀁 𑀚𑀕𑁆𑀕𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.