(𑁧𑁪) 𑁪. 𑀭𑀸𑀚𑀯𑀕𑁆𑀕𑁄

𑁧. 𑀧𑀞𑀫𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀁

𑁧𑁩𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀯𑀢𑁆𑀢𑁂𑀢𑀺 [𑀧𑀯𑀢𑁆𑀢𑁂𑀢𑀺 (𑀲𑁆𑀬𑀸. 𑀧𑀻. 𑀓.)]; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 [𑀅𑀧𑁆𑀧𑀢𑀺𑀯𑀢𑁆𑀢𑀺𑀬𑀁 (𑀲𑀻.)] 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀅𑀢𑁆𑀣𑀜𑁆𑀜𑀽 𑀘 𑀳𑁄𑀢𑀺, 𑀥𑀫𑁆𑀫𑀜𑁆𑀜𑀽 𑀘, 𑀫𑀢𑁆𑀢𑀜𑁆𑀜𑀽 𑀘, 𑀓𑀸𑀮𑀜𑁆𑀜𑀽 𑀘, 𑀧𑀭𑀺𑀲𑀜𑁆𑀜𑀽 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀣𑀜𑁆𑀜𑀽, 𑀥𑀫𑁆𑀫𑀜𑁆𑀜𑀽, 𑀫𑀢𑁆𑀢𑀜𑁆𑀜𑀽, 𑀓𑀸𑀮𑀜𑁆𑀜𑀽, 𑀧𑀭𑀺𑀲𑀜𑁆𑀜𑀽. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀥𑀫𑁆𑀫𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀁

𑁧𑁩𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀥𑀫𑁆𑀫𑁂𑀦𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀅𑀢𑁆𑀣𑀜𑁆𑀜𑀽 𑀘 𑀳𑁄𑀢𑀺, 𑀥𑀫𑁆𑀫𑀜𑁆𑀜𑀽 𑀘, 𑀫𑀢𑁆𑀢𑀜𑁆𑀜𑀽 𑀘, 𑀓𑀸𑀮𑀜𑁆𑀜𑀽 𑀘, 𑀧𑀭𑀺𑀲𑀜𑁆𑀜𑀽 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀥𑀫𑁆𑀫𑁂𑀦𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀣𑀜𑁆𑀜𑀽, 𑀥𑀫𑁆𑀫𑀜𑁆𑀜𑀽, 𑀫𑀢𑁆𑀢𑀜𑁆𑀜𑀽, 𑀓𑀸𑀮𑀜𑁆𑀜𑀽, 𑀧𑀭𑀺𑀲𑀜𑁆𑀜𑀽. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀥𑀫𑁆𑀫𑀭𑀸𑀚𑀸𑀲𑀼𑀢𑁆𑀢𑀁

𑁧𑁩𑁩. ‘‘𑀬𑁄𑀧𑀺 𑀲𑁄 [𑀬𑁄𑀧𑀺 𑀔𑁄 (𑀲𑀻. 𑀲𑁆𑀬𑀸. 𑀧𑀻.)], 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸, 𑀲𑁄𑀧𑀺 𑀦 𑀅𑀭𑀸𑀚𑀓𑀁 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀧𑀦, 𑀪𑀦𑁆𑀢𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀭𑀸𑀚𑀸’’𑀢𑀺? ‘‘𑀥𑀫𑁆𑀫𑁄, 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀇𑀥, 𑀪𑀺𑀓𑁆𑀔𑀼, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀅𑀦𑁆𑀢𑁄𑀚𑀦𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀔𑀢𑁆𑀢𑀺𑀬𑁂𑀲𑀼 𑀅𑀦𑀼𑀬𑀦𑁆𑀢𑁂𑀲𑀼 [𑀅𑀦𑀼𑀬𑀼𑀢𑁆𑀢𑁂𑀲𑀼 (𑀲𑀻.) 𑀅. 𑀦𑀺. 𑁩.𑁧𑁪] …𑀧𑁂… 𑀩𑀮𑀓𑀸𑀬𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀫𑀺𑀕𑀧𑀓𑁆𑀔𑀻𑀲𑀼. 𑀲 𑀔𑁄 𑀲𑁄, 𑀪𑀺𑀓𑁆𑀔𑀼, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀔𑀢𑁆𑀢𑀺𑀬𑁂𑀲𑀼 𑀅𑀦𑀼𑀬𑀦𑁆𑀢𑁂𑀲𑀼 𑀩𑀮𑀓𑀸𑀬𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀫𑀺𑀕𑀧𑀓𑁆𑀔𑀻𑀲𑀼 𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀸𑀡𑀺𑀦𑀸.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀪𑀺𑀓𑁆𑀔𑀽𑀲𑀼 𑁋 ‘𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀦 𑀲𑁂𑀯𑀺𑀢𑀩𑁆𑀩𑁄; 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀦 𑀲𑁂𑀯𑀺𑀢𑀩𑁆𑀩𑁄’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀪𑀺𑀓𑁆𑀔𑀼𑀦𑀻𑀲𑀼 [𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 (𑀲𑀻. 𑀧𑀻.)] …𑀧𑁂… 𑀉𑀧𑀸𑀲𑀓𑁂𑀲𑀼…𑀧𑁂… 𑀉𑀧𑀸𑀲𑀺𑀓𑀸𑀲𑀼 𑁋 ‘𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀓𑀸𑀬𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀯𑀘𑀻𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀲𑁂𑀯𑀺𑀢𑀩𑁆𑀩𑀁, 𑀏𑀯𑀭𑀽𑀧𑀁 𑀫𑀦𑁄𑀓𑀫𑁆𑀫𑀁 𑀦 𑀲𑁂𑀯𑀺𑀢𑀩𑁆𑀩𑀁; 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀆𑀚𑀻𑀯𑁄 𑀦 𑀲𑁂𑀯𑀺𑀢𑀩𑁆𑀩𑁄; 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀦 𑀲𑁂𑀯𑀺𑀢𑀩𑁆𑀩𑁄’’’𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀲𑀼, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀉𑀧𑀸𑀲𑀓𑁂𑀲𑀼, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀲𑀼 𑀥𑀫𑁆𑀫𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺; 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀬𑀲𑁆𑀲𑀁𑀤𑀺𑀲𑀁𑀲𑀼𑀢𑁆𑀢𑀁

𑁧𑁩𑁪. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀬𑀲𑁆𑀲𑀁 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀯𑀺𑀳𑀭𑀢𑀺, 𑀲𑀓𑀲𑁆𑀫𑀺𑀁𑀬𑁂𑀯 𑀯𑀺𑀚𑀺𑀢𑁂 𑀯𑀺𑀳𑀭𑀢𑀺.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀅𑀟𑁆𑀠𑁄 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄; 𑀩𑀮𑀯𑀸 𑀔𑁄 𑀧𑀦 𑀳𑁄𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀯𑀸𑀬 𑀑𑀯𑀸𑀤𑀧𑀝𑀺𑀓𑀭𑀸𑀬; 𑀧𑀭𑀺𑀡𑀸𑀬𑀓𑁄 𑀔𑁄 𑀧𑀦𑀲𑁆𑀲 𑀳𑁄𑀢𑀺 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀁; 𑀢𑀲𑁆𑀲𑀺𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀬𑀲𑀁 𑀧𑀭𑀺𑀧𑀸𑀘𑁂𑀦𑁆𑀢𑀺. 𑀲𑁄 𑀇𑀫𑀺𑀦𑀸 𑀬𑀲𑀧𑀜𑁆𑀘𑀫𑁂𑀦 [𑀬𑀲𑁂𑀦 𑀧𑀜𑁆𑀘𑀫𑁂𑀦 (𑀓.), 𑀧𑀜𑁆𑀘𑀫𑁂𑀦 (𑀲𑀻.)] 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀬𑀲𑁆𑀲𑀁 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀯𑀺𑀳𑀭𑀢𑀺, 𑀲𑀓𑀲𑁆𑀫𑀺𑀁𑀬𑁂𑀯 𑀯𑀺𑀚𑀺𑀢𑁂 𑀯𑀺𑀳𑀭𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀯𑀺𑀚𑀺𑀢𑀸𑀯𑀻𑀦𑀁.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀬𑀲𑁆𑀲𑀁 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀯𑀺𑀳𑀭𑀢𑀺, 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀯 [𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 (𑀲𑀻. 𑀧𑀻.), 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀘 (𑀓.)] 𑀯𑀺𑀳𑀭𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑁋 𑀭𑀸𑀚𑀸𑀯 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑁋 𑀭𑀸𑀚𑀸𑀯 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄; 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑁋 𑀭𑀸𑀚𑀸𑀯 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀩𑀮𑀲𑀫𑁆𑀧𑀦𑁆𑀦𑁄; 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑁋 𑀭𑀸𑀚𑀸𑀯 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀧𑀭𑀺𑀡𑀸𑀬𑀓𑀲𑀫𑁆𑀧𑀦𑁆𑀦𑁄; 𑀢𑀲𑁆𑀲𑀺𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀸𑀘𑁂𑀦𑁆𑀢𑀺. 𑀲𑁄 𑀇𑀫𑀺𑀦𑀸 𑀯𑀺𑀫𑀼𑀢𑁆𑀢𑀺𑀧𑀜𑁆𑀘𑀫𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀬𑀲𑁆𑀲𑀁 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀯𑀺𑀳𑀭𑀢𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀯 𑀯𑀺𑀳𑀭𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀧𑀢𑁆𑀣𑀦𑀸𑀲𑀼𑀢𑁆𑀢𑀁

𑁧𑁩𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀭𑀚𑁆𑀚𑀁 𑀧𑀢𑁆𑀣𑁂𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄; 𑀫𑀸𑀢𑀸𑀧𑀺𑀢𑀽𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄; 𑀦𑁂𑀕𑀫𑀚𑀸𑀦𑀧𑀤𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄; 𑀬𑀸𑀦𑀺 𑀢𑀸𑀦𑀺 𑀭𑀜𑁆𑀜𑀁 𑀔𑀢𑁆𑀢𑀺𑀬𑀸𑀦𑀁 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀸𑀦𑀁 𑀲𑀺𑀧𑁆𑀧𑀝𑁆𑀞𑀸𑀦𑀸𑀦𑀺 𑀳𑀢𑁆𑀣𑀺𑀲𑁆𑀫𑀺𑀁 𑀯𑀸 𑀅𑀲𑁆𑀲𑀲𑁆𑀫𑀺𑀁 𑀯𑀸 𑀭𑀣𑀲𑁆𑀫𑀺𑀁 𑀯𑀸 𑀥𑀦𑀼𑀲𑁆𑀫𑀺𑀁 𑀯𑀸 𑀣𑀭𑀼𑀲𑁆𑀫𑀺𑀁 𑀯𑀸 𑀢𑀢𑁆𑀣 𑀲𑀺𑀓𑁆𑀔𑀺𑀢𑁄 𑀳𑁄𑀢𑀺 𑀅𑀦𑀯𑀬𑁄.

‘‘𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄𑀫𑁆𑀳𑀺 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀓𑀲𑁆𑀫𑀸𑀳𑀁 𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀓𑀲𑁆𑀫𑀸𑀳𑀁 𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑀺𑀬𑁄 𑀫𑀦𑀸𑀧𑁄. 𑀓𑀲𑁆𑀫𑀸𑀳𑀁 𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀦𑁂𑀕𑀫𑀚𑀸𑀦𑀧𑀤𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄. 𑀓𑀲𑁆𑀫𑀸𑀳𑀁 𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀬𑀸𑀦𑀺 𑀢𑀸𑀦𑀺 𑀭𑀜𑁆𑀜𑀁 𑀔𑀢𑁆𑀢𑀺𑀬𑀸𑀦𑀁 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀸𑀦𑀁 𑀲𑀺𑀧𑁆𑀧𑀝𑁆𑀞𑀸𑀦𑀸𑀦𑀺 𑀳𑀢𑁆𑀣𑀺𑀲𑁆𑀫𑀺𑀁 𑀯𑀸 𑀅𑀲𑁆𑀲𑀲𑁆𑀫𑀺𑀁 𑀯𑀸 𑀭𑀣𑀲𑁆𑀫𑀺𑀁 𑀯𑀸 𑀥𑀦𑀼𑀲𑁆𑀫𑀺𑀁 𑀯𑀸 𑀣𑀭𑀼𑀲𑁆𑀫𑀺𑀁 𑀯𑀸, 𑀢𑀢𑁆𑀣 [𑀢𑀢𑁆𑀣𑀫𑁆𑀳𑀺 (𑀲𑀻.), 𑀢𑀢𑁆𑀣𑀧𑀺 (𑀓.)] 𑀲𑀺𑀓𑁆𑀔𑀺𑀢𑁄 𑀅𑀦𑀯𑀬𑁄. 𑀓𑀲𑁆𑀫𑀸𑀳𑀁 𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬’𑀦𑁆𑀢𑀺! 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀭𑀚𑁆𑀚𑀁 𑀧𑀢𑁆𑀣𑁂𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀢𑁆𑀣𑁂𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄, 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬 𑀫𑀚𑁆𑀛𑀺𑀫𑀸𑀬 𑀧𑀥𑀸𑀦𑀓𑁆𑀔𑀫𑀸𑀬; 𑀅𑀲𑀞𑁄 𑀳𑁄𑀢𑀺 𑀅𑀫𑀸𑀬𑀸𑀯𑀻, 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀢𑀸 𑀲𑀢𑁆𑀣𑀭𑀺 𑀯𑀸 𑀯𑀺𑀜𑁆𑀜𑀽𑀲𑀼 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼; 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸.

‘‘𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄𑀫𑁆𑀳𑀺 𑀲𑀤𑁆𑀥𑁄, 𑀲𑀤𑁆𑀤𑀳𑀸𑀫𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. ‘𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀅𑀧𑁆𑀧𑀸𑀩𑀸𑀥𑁄 𑀅𑀧𑁆𑀧𑀸𑀢𑀗𑁆𑀓𑁄 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬 𑀫𑀚𑁆𑀛𑀺𑀫𑀸𑀬 𑀧𑀥𑀸𑀦𑀓𑁆𑀔𑀫𑀸𑀬. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀢𑀸 𑀲𑀢𑁆𑀣𑀭𑀺 𑀯𑀸 𑀯𑀺𑀜𑁆𑀜𑀽𑀲𑀼 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀸𑀫𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀧𑀜𑁆𑀜𑀯𑀸 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬’𑀦𑁆𑀢𑀺! 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀢𑁆𑀣𑁂𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀧𑀢𑁆𑀣𑀦𑀸𑀲𑀼𑀢𑁆𑀢𑀁

𑁧𑁩𑁬. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀑𑀧𑀭𑀚𑁆𑀚𑀁 [𑀉𑀧𑀭𑀚𑁆𑀚𑀁 (𑀲𑁆𑀬𑀸. 𑀧𑀻. 𑀓.)] 𑀧𑀢𑁆𑀣𑁂𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄; 𑀫𑀸𑀢𑀸𑀧𑀺𑀢𑀽𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀩𑀮𑀓𑀸𑀬𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄; 𑀧𑀡𑁆𑀟𑀺𑀢𑁄 𑀳𑁄𑀢𑀺 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀁.

‘‘𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄𑀫𑁆𑀳𑀺 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀓𑀲𑁆𑀫𑀸𑀳𑀁 𑀑𑀧𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀓𑀲𑁆𑀫𑀸𑀳𑀁 𑀑𑀧𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑀺𑀬𑁄 𑀫𑀦𑀸𑀧𑁄. 𑀓𑀲𑁆𑀫𑀸𑀳𑀁 𑀑𑀧𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀩𑀮𑀓𑀸𑀬𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄. 𑀓𑀲𑁆𑀫𑀸𑀳𑀁 𑀑𑀧𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀁. 𑀓𑀲𑁆𑀫𑀸𑀳𑀁 𑀑𑀧𑀭𑀚𑁆𑀚𑀁 𑀦 𑀧𑀢𑁆𑀣𑁂𑀬𑁆𑀬’𑀦𑁆𑀢𑀺! 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀑𑀧𑀭𑀚𑁆𑀚𑀁 𑀧𑀢𑁆𑀣𑁂𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀢𑁆𑀣𑁂𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 [𑀲𑀼𑀧𑀝𑁆𑀞𑀺𑀢𑀘𑀺𑀢𑁆𑀢𑁄 (𑀲𑀻. 𑀲𑁆𑀬𑀸.), 𑀲𑀽𑀧𑀝𑁆𑀞𑀺𑀢𑀘𑀺𑀢𑁆𑀢𑁄 (𑀓.)] 𑀳𑁄𑀢𑀺; 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼; 𑀧𑀜𑁆𑀜𑀯𑀸 𑀳𑁄𑀢𑀺, 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸.

‘‘𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄𑀫𑁆𑀳𑀺 𑀲𑀻𑀮𑀯𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀸𑀫𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀸𑀫𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 [𑀲𑀢𑁆𑀣𑀸 𑀩𑁆𑀬𑀜𑁆𑀚𑀦𑀸 (𑀲𑀻.)] 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸 𑀫𑁂 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀸𑀫𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬𑀁! 𑀅𑀳𑀁 𑀔𑁄𑀫𑁆𑀳𑀺 𑀧𑀜𑁆𑀜𑀯𑀸 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀓𑀲𑁆𑀫𑀸𑀳𑀁 𑀆𑀲𑀯𑀸𑀦𑀁 𑀔𑀬𑀁 𑀦 𑀧𑀢𑁆𑀣𑁂𑀬𑁆𑀬’𑀦𑁆𑀢𑀺! 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀢𑁆𑀣𑁂𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀅𑀧𑁆𑀧𑀁𑀲𑀼𑀧𑀢𑀺𑀲𑀼𑀢𑁆𑀢𑀁

𑁧𑁩𑁭. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀦𑁆𑀢𑀺, 𑀩𑀳𑀼𑀁 𑀚𑀕𑁆𑀕𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀢𑁆𑀣𑀻, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀸 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀧𑀼𑀭𑀺𑀲𑁄, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀘𑁄𑀭𑁄, 𑀪𑀺𑀓𑁆𑀔𑀯𑁂, 𑀆𑀤𑀸𑀦𑀸𑀥𑀺𑀧𑁆𑀧𑀸𑀬𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀭𑀸𑀚𑀸 [𑀭𑀸𑀚𑀬𑀼𑀢𑁆𑀢𑁄 (𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀭𑀸𑀚𑀓𑀭𑀡𑀻𑀬𑁂𑀲𑀼 𑀬𑀼𑀢𑁆𑀢𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀯𑀺𑀲𑀁𑀬𑁄𑀕𑀸𑀥𑀺𑀧𑁆𑀧𑀸𑀬𑁄 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀢𑀺, 𑀩𑀳𑀼𑀁 𑀚𑀕𑁆𑀕𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀧𑁆𑀧𑀁 𑀭𑀢𑁆𑀢𑀺𑀬𑀸 𑀲𑀼𑀧𑀦𑁆𑀢𑀺, 𑀩𑀳𑀼𑀁 𑀚𑀕𑁆𑀕𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀪𑀢𑁆𑀢𑀸𑀤𑀓𑀲𑀼𑀢𑁆𑀢𑀁

𑁧𑁩𑁮. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀪𑀢𑁆𑀢𑀸𑀤𑀓𑁄 𑀘 𑀳𑁄𑀢𑀺 𑀑𑀓𑀸𑀲𑀨𑀭𑀡𑁄 𑀘 𑀮𑀡𑁆𑀟𑀲𑀸𑀭𑀡𑁄 𑀘 𑀲𑀮𑀸𑀓𑀕𑁆𑀕𑀸𑀳𑀻 𑀘 𑀭𑀜𑁆𑀜𑁄 𑀦𑀸𑀕𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀅𑀓𑁆𑀔𑀫𑁄 𑀲𑀤𑁆𑀤𑀸𑀦𑀁, 𑀅𑀓𑁆𑀔𑀫𑁄 𑀕𑀦𑁆𑀥𑀸𑀦𑀁, 𑀅𑀓𑁆𑀔𑀫𑁄 𑀭𑀲𑀸𑀦𑀁, 𑀅𑀓𑁆𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀪𑀢𑁆𑀢𑀸𑀤𑀓𑁄 𑀘 𑀑𑀓𑀸𑀲𑀨𑀭𑀡𑁄 𑀘 𑀮𑀡𑁆𑀟𑀲𑀸𑀭𑀡𑁄 𑀘 𑀲𑀮𑀸𑀓𑀕𑁆𑀕𑀸𑀳𑀻 𑀘, 𑀭𑀜𑁆𑀜𑁄 𑀦𑀸𑀕𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀢𑁆𑀢𑀸𑀤𑀓𑁄 𑀘 𑀳𑁄𑀢𑀺, 𑀑𑀓𑀸𑀲𑀨𑀭𑀡𑁄 𑀘 𑀫𑀜𑁆𑀘𑀧𑀻𑀞𑀫𑀤𑁆𑀤𑀦𑁄 [𑀧𑀻𑀞𑀫𑀤𑁆𑀤𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘 𑀲𑀮𑀸𑀓𑀕𑁆𑀕𑀸𑀳𑀻 𑀘, 𑀪𑀺𑀓𑁆𑀔𑀼𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀅𑀓𑁆𑀔𑀫𑁄 𑀲𑀤𑁆𑀤𑀸𑀦𑀁, 𑀅𑀓𑁆𑀔𑀫𑁄 𑀕𑀦𑁆𑀥𑀸𑀦𑀁, 𑀅𑀓𑁆𑀔𑀫𑁄 𑀭𑀲𑀸𑀦𑀁, 𑀅𑀓𑁆𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀢𑁆𑀢𑀸𑀤𑀓𑁄 𑀘 𑀳𑁄𑀢𑀺 𑀑𑀓𑀸𑀲𑀨𑀭𑀡𑁄 𑀘 𑀫𑀜𑁆𑀘𑀧𑀻𑀞𑀫𑀤𑁆𑀤𑀦𑁄 𑀘 𑀲𑀮𑀸𑀓𑀕𑁆𑀕𑀸𑀳𑀻 𑀘, 𑀪𑀺𑀓𑁆𑀔𑀼𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀅𑀓𑁆𑀔𑀫𑀲𑀼𑀢𑁆𑀢𑀁

𑁧𑁩𑁯. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀦 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀦 𑀭𑀸𑀚𑀪𑁄𑀕𑁆𑀕𑁄, 𑀦 𑀭𑀜𑁆𑀜𑁄 𑀅𑀗𑁆𑀕𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀅𑀓𑁆𑀔𑀫𑁄 𑀲𑀤𑁆𑀤𑀸𑀦𑀁, 𑀅𑀓𑁆𑀔𑀫𑁄 𑀕𑀦𑁆𑀥𑀸𑀦𑀁, 𑀅𑀓𑁆𑀔𑀫𑁄 𑀭𑀲𑀸𑀦𑀁, 𑀅𑀓𑁆𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀳𑀢𑁆𑀣𑀺𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀅𑀲𑁆𑀲𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀭𑀣𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀧𑀢𑁆𑀢𑀺𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀳𑀢𑁆𑀣𑀺𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀅𑀲𑁆𑀲𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀭𑀣𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀧𑀢𑁆𑀢𑀺𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀪𑁂𑀭𑀺𑀧𑀡𑀯𑀲𑀗𑁆𑀔𑀢𑀺𑀡𑀯𑀦𑀺𑀦𑁆𑀦𑀸𑀤𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀬𑁂 𑀢𑁂 𑀭𑀜𑁆𑀜𑁄 𑀦𑀸𑀕𑀸 𑀅𑀪𑀺𑀚𑀸𑀢𑀸 𑀲𑀗𑁆𑀕𑀸𑀫𑀸𑀯𑀘𑀭𑀸 𑀢𑁂𑀲𑀁 𑀫𑀼𑀢𑁆𑀢𑀓𑀭𑀻𑀲𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀏𑀓𑀺𑀲𑁆𑀲𑀸 𑀯𑀸 𑀢𑀺𑀡𑁄𑀤𑀓𑀤𑀢𑁆𑀢𑀺𑀬𑀸 𑀯𑀺𑀫𑀸𑀦𑀺𑀢𑁄 [𑀯𑀺𑀳𑀦𑀻𑀢𑁄 (𑀲𑁆𑀬𑀸.), 𑀯𑀺𑀳𑀸𑀦𑀺𑀢𑁄 (𑀓𑀢𑁆𑀣𑀘𑀺)] 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀢𑀺𑀡𑁄𑀤𑀓𑀤𑀢𑁆𑀢𑀻𑀳𑀺 𑀯𑀺𑀫𑀸𑀦𑀺𑀢𑁄 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀏𑀓𑁂𑀦 𑀯𑀸 𑀲𑀭𑀯𑁂𑀕𑁂𑀦 𑀯𑀺𑀤𑁆𑀥𑁄, 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀲𑀭𑀯𑁂𑀕𑁂𑀳𑀺 𑀯𑀺𑀤𑁆𑀥𑁄 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀦 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀦 𑀭𑀸𑀚𑀪𑁄𑀕𑁆𑀕𑁄 𑀦 𑀭𑀜𑁆𑀜𑁄 𑀅𑀗𑁆𑀕𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀳𑀼𑀦𑁂𑀬𑁆𑀬𑁄 𑀦 𑀤𑀓𑁆𑀔𑀺𑀡𑁂𑀬𑁆𑀬𑁄 𑀦 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀦 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀅𑀓𑁆𑀔𑀫𑁄 𑀲𑀤𑁆𑀤𑀸𑀦𑀁, 𑀅𑀓𑁆𑀔𑀫𑁄 𑀕𑀦𑁆𑀥𑀸𑀦𑀁, 𑀅𑀓𑁆𑀔𑀫𑁄 𑀭𑀲𑀸𑀦𑀁, 𑀅𑀓𑁆𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀭𑀚𑀦𑀻𑀬𑁂 𑀭𑀽𑀧𑁂 𑀲𑀸𑀭𑀚𑁆𑀚𑀢𑀺, 𑀦 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀚𑀦𑀻𑀬𑁂 𑀲𑀤𑁆𑀤𑁂 𑀲𑀸𑀭𑀚𑁆𑀚𑀢𑀺, 𑀦 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀭𑀚𑀦𑀻𑀬𑁂 𑀕𑀦𑁆𑀥𑁂 𑀲𑀸𑀭𑀚𑁆𑀚𑀢𑀺, 𑀦 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀭𑀚𑀦𑀻𑀬𑁂 𑀭𑀲𑁂 𑀲𑀸𑀭𑀚𑁆𑀚𑀢𑀺, 𑀦 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸 𑀭𑀚𑀦𑀻𑀬𑁂 𑀨𑁄𑀝𑁆𑀞𑀩𑁆𑀩𑁂 𑀲𑀸𑀭𑀚𑁆𑀚𑀢𑀺, 𑀦 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀳𑀼𑀦𑁂𑀬𑁆𑀬𑁄 𑀦 𑀤𑀓𑁆𑀔𑀺𑀡𑁂𑀬𑁆𑀬𑁄 𑀦 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀦 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀔𑀫𑁄 𑀲𑀤𑁆𑀤𑀸𑀦𑀁, 𑀔𑀫𑁄 𑀕𑀦𑁆𑀥𑀸𑀦𑀁, 𑀔𑀫𑁄 𑀭𑀲𑀸𑀦𑀁, 𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀳𑀢𑁆𑀣𑀺𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀅𑀲𑁆𑀲𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀭𑀣𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀧𑀢𑁆𑀢𑀺𑀓𑀸𑀬𑀁 𑀯𑀸 𑀤𑀺𑀲𑁆𑀯𑀸 𑀦 𑀲𑀁𑀲𑀻𑀤𑀢𑀺 𑀦 𑀯𑀺𑀲𑀻𑀤𑀢𑀺, 𑀲𑀦𑁆𑀣𑀫𑁆𑀪𑀢𑀺 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀳𑀢𑁆𑀣𑀺𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀅𑀲𑁆𑀲𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀭𑀣𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀧𑀢𑁆𑀢𑀺𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀪𑁂𑀭𑀺𑀧𑀡𑀯𑀲𑀗𑁆𑀔𑀢𑀺𑀡𑀯𑀦𑀺𑀦𑁆𑀦𑀸𑀤𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀦 𑀲𑀁𑀲𑀻𑀤𑀢𑀺 𑀦 𑀯𑀺𑀲𑀻𑀤𑀢𑀺, 𑀲𑀦𑁆𑀣𑀫𑁆𑀪𑀢𑀺 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀬𑁂 𑀢𑁂 𑀭𑀜𑁆𑀜𑁄 𑀦𑀸𑀕𑀸 𑀅𑀪𑀺𑀚𑀸𑀢𑀸 𑀲𑀗𑁆𑀕𑀸𑀫𑀸𑀯𑀘𑀭𑀸 𑀢𑁂𑀲𑀁 𑀫𑀼𑀢𑁆𑀢𑀓𑀭𑀻𑀲𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀦 𑀲𑀁𑀲𑀻𑀤𑀢𑀺 𑀦 𑀯𑀺𑀲𑀻𑀤𑀢𑀺, 𑀲𑀦𑁆𑀣𑀫𑁆𑀪𑀢𑀺 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀏𑀓𑀺𑀲𑁆𑀲𑀸 𑀯𑀸 𑀢𑀺𑀡𑁄𑀤𑀓𑀤𑀢𑁆𑀢𑀺𑀬𑀸 𑀯𑀺𑀫𑀸𑀦𑀺𑀢𑁄 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀢𑀺𑀡𑁄𑀤𑀓𑀤𑀢𑁆𑀢𑀻𑀳𑀺 𑀯𑀺𑀫𑀸𑀦𑀺𑀢𑁄 𑀦 𑀲𑀁𑀲𑀻𑀤𑀢𑀺 𑀦 𑀯𑀺𑀲𑀻𑀤𑀢𑀺, 𑀲𑀦𑁆𑀣𑀫𑁆𑀪𑀢𑀺 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀏𑀓𑁂𑀦 𑀯𑀸 𑀲𑀭𑀯𑁂𑀕𑁂𑀦 𑀯𑀺𑀤𑁆𑀥𑁄, 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀲𑀭𑀯𑁂𑀕𑁂𑀳𑀺 𑀯𑀺𑀤𑁆𑀥𑁄 𑀦 𑀲𑀁𑀲𑀻𑀤𑀢𑀺 𑀦 𑀯𑀺𑀲𑀻𑀤𑀢𑀺, 𑀲𑀦𑁆𑀣𑀫𑁆𑀪𑀢𑀺 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀔𑀫𑁄 𑀲𑀤𑁆𑀤𑀸𑀦𑀁, 𑀔𑀫𑁄 𑀕𑀦𑁆𑀥𑀸𑀦𑀁, 𑀔𑀫𑁄 𑀭𑀲𑀸𑀦𑀁, 𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀭𑀚𑀦𑀻𑀬𑁂 𑀭𑀽𑀧𑁂 𑀦 𑀲𑀸𑀭𑀚𑁆𑀚𑀢𑀺, 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀚𑀦𑀻𑀬𑁂 𑀲𑀤𑁆𑀤𑁂 𑀦 𑀲𑀸𑀭𑀚𑁆𑀚𑀢𑀺, 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀲𑀤𑁆𑀤𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁. 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀭𑀚𑀦𑀻𑀬𑁂 𑀕𑀦𑁆𑀥𑁂 𑀦 𑀲𑀸𑀭𑀚𑁆𑀚𑀢𑀺, 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀕𑀦𑁆𑀥𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀭𑀚𑀦𑀻𑀬𑁂 𑀭𑀲𑁂 𑀦 𑀲𑀸𑀭𑀚𑁆𑀚𑀢𑀺, 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀲𑀸𑀦𑀁.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸 𑀭𑀚𑀦𑀻𑀬𑁂 𑀨𑁄𑀝𑁆𑀞𑀩𑁆𑀩𑁂 𑀦 𑀲𑀸𑀭𑀚𑁆𑀚𑀢𑀺, 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀨𑁄𑀝𑁆𑀞𑀩𑁆𑀩𑀸𑀦𑀁.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀦𑀯𑀫𑀁.

𑁧𑁦. 𑀲𑁄𑀢𑀲𑀼𑀢𑁆𑀢𑀁

𑁧𑁪𑁦. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑁄𑀢𑀸 𑀘 𑀳𑁄𑀢𑀺, 𑀳𑀦𑁆𑀢𑀸 𑀘, 𑀭𑀓𑁆𑀔𑀺𑀢𑀸 𑀘, 𑀔𑀦𑁆𑀢𑀸 𑀘, 𑀕𑀦𑁆𑀢𑀸 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑁄𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀬𑀫𑁂𑀦𑀁 𑀳𑀢𑁆𑀣𑀺𑀤𑀫𑁆𑀫𑀲𑀸𑀭𑀣𑀺 [𑀳𑀢𑁆𑀣𑀺𑀤𑀫𑁆𑀫𑀲𑀸𑀭𑀣𑀻 (𑀲𑀻.)] 𑀓𑀸𑀭𑀡𑀁 𑀓𑀸𑀭𑁂𑀢𑀺 𑁋 𑀬𑀤𑀺 𑀯𑀸 𑀓𑀢𑀧𑀼𑀩𑁆𑀩𑀁 𑀬𑀤𑀺 𑀯𑀸 𑀅𑀓𑀢𑀧𑀼𑀩𑁆𑀩𑀁 𑁋 𑀢𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 [𑀅𑀝𑁆𑀞𑀺𑀓𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀅. 𑀦𑀺. 𑁪.𑁧𑁧𑁪] 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 [𑀲𑀩𑁆𑀩𑀘𑁂𑀢𑀲𑀸 (?)] 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀲𑀼𑀡𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑁄𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀳𑀦𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀳𑀢𑁆𑀣𑀺𑀫𑁆𑀧𑀺 𑀳𑀦𑀢𑀺 [𑀳𑀦𑁆𑀢𑀺 (𑀲𑀻. 𑀧𑀻.)], 𑀳𑀢𑁆𑀣𑀸𑀭𑀼𑀳𑀫𑁆𑀧𑀺 𑀳𑀦𑀢𑀺, 𑀅𑀲𑁆𑀲𑀫𑁆𑀧𑀺 𑀳𑀦𑀢𑀺, 𑀅𑀲𑁆𑀲𑀸𑀭𑀼𑀳𑀫𑁆𑀧𑀺 𑀳𑀦𑀢𑀺, 𑀭𑀣𑀫𑁆𑀧𑀺 𑀳𑀦𑀢𑀺, 𑀭𑀣𑀺𑀓𑀫𑁆𑀧𑀺 [𑀭𑀣𑀸𑀭𑀼𑀳𑀫𑁆𑀧𑀺 (𑀧𑀻.)] 𑀳𑀦𑀢𑀺, 𑀧𑀢𑁆𑀢𑀺𑀓𑀫𑁆𑀧𑀺 𑀳𑀦𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀳𑀦𑁆𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀭𑀓𑁆𑀔𑀺𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀭𑀓𑁆𑀔𑀢𑀺 𑀧𑀼𑀭𑀺𑀫𑀁 𑀓𑀸𑀬𑀁, 𑀭𑀓𑁆𑀔𑀢𑀺 𑀧𑀘𑁆𑀙𑀺𑀫𑀁 𑀓𑀸𑀬𑀁, 𑀭𑀓𑁆𑀔𑀢𑀺 𑀧𑀼𑀭𑀺𑀫𑁂 𑀧𑀸𑀤𑁂, 𑀭𑀓𑁆𑀔𑀢𑀺 𑀧𑀘𑁆𑀙𑀺𑀫𑁂 𑀧𑀸𑀤𑁂, 𑀭𑀓𑁆𑀔𑀢𑀺 𑀲𑀻𑀲𑀁, 𑀭𑀓𑁆𑀔𑀢𑀺 𑀓𑀡𑁆𑀡𑁂, 𑀭𑀓𑁆𑀔𑀢𑀺 𑀤𑀦𑁆𑀢𑁂, 𑀭𑀓𑁆𑀔𑀢𑀺 𑀲𑁄𑀡𑁆𑀟𑀁, 𑀭𑀓𑁆𑀔𑀢𑀺 𑀯𑀸𑀮𑀥𑀺𑀁, 𑀭𑀓𑁆𑀔𑀢𑀺 𑀳𑀢𑁆𑀣𑀸𑀭𑀼𑀳𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀭𑀓𑁆𑀔𑀺𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀦𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀲𑀗𑁆𑀕𑀸𑀫𑀕𑀢𑁄 𑀔𑀫𑁄 𑀳𑁄𑀢𑀺 𑀲𑀢𑁆𑀢𑀺𑀧𑁆𑀧𑀳𑀸𑀭𑀸𑀦𑀁 𑀅𑀲𑀺𑀧𑁆𑀧𑀳𑀸𑀭𑀸𑀦𑀁 𑀉𑀲𑀼𑀧𑁆𑀧𑀳𑀸𑀭𑀸𑀦𑀁 𑀨𑀭𑀲𑀼𑀧𑁆𑀧𑀳𑀸𑀭𑀸𑀦𑀁 𑀪𑁂𑀭𑀺𑀧𑀡𑀯𑀲𑀗𑁆𑀔𑀢𑀺𑀡𑀯𑀦𑀺𑀦𑁆𑀦𑀸𑀤𑀲𑀤𑁆𑀤𑀸𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀔𑀦𑁆𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀕𑀦𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀬𑀫𑁂𑀦𑀁 𑀳𑀢𑁆𑀣𑀺𑀤𑀫𑁆𑀫𑀲𑀸𑀭𑀣𑀺 𑀤𑀺𑀲𑀁 𑀧𑁂𑀲𑁂𑀢𑀺 𑁋 𑀬𑀤𑀺 𑀯𑀸 𑀕𑀢𑀧𑀼𑀩𑁆𑀩𑀁 𑀬𑀤𑀺 𑀯𑀸 𑀅𑀕𑀢𑀧𑀼𑀩𑁆𑀩𑀁 𑁋 𑀢𑀁 𑀔𑀺𑀧𑁆𑀧𑀫𑁂𑀯 𑀕𑀦𑁆𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑁄 𑀕𑀦𑁆𑀢𑀸 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀦𑀸𑀕𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑀸 𑀘 𑀳𑁄𑀢𑀺, 𑀳𑀦𑁆𑀢𑀸 𑀘, 𑀭𑀓𑁆𑀔𑀺𑀢𑀸 𑀘, 𑀔𑀦𑁆𑀢𑀸 𑀘, 𑀕𑀦𑁆𑀢𑀸 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀤𑁂𑀲𑀺𑀬𑀫𑀸𑀦𑁂 𑀅𑀝𑁆𑀞𑀺𑀁𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑀦𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 (𑀳𑀦𑀢𑀺) [( ) 𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀅. 𑀦𑀺. 𑁪.𑁧𑁧𑁪] 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺; 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 (𑀳𑀦𑀢𑀺) [( ) 𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀅. 𑀦𑀺. 𑁪.𑁧𑁧𑁪] 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀳𑀦𑁆𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀓𑁆𑀔𑀺𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁; 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁; 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀓𑁆𑀔𑀺𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀦𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲 [… 𑀲𑀺𑀭𑀺𑀁𑀲𑀧 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀲𑀫𑁆𑀨𑀲𑁆𑀲𑀸𑀦𑀁; 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀦𑁆𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀦𑁆𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸 𑀲𑀸 𑀤𑀺𑀲𑀸 𑀅𑀕𑀢𑀧𑀼𑀩𑁆𑀩𑀸 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁, 𑀢𑀁 𑀔𑀺𑀧𑁆𑀧𑀜𑁆𑀜𑁂𑀯 𑀕𑀦𑁆𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀦𑁆𑀢𑀸 𑀳𑁄𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀤𑀲𑀫𑀁.

𑀭𑀸𑀚𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.