𑁧𑁦. 𑀓𑀫𑁆𑀩𑁄𑀚𑀲𑀼𑀢𑁆𑀢𑀁

𑁮𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀸𑀢𑀼𑀕𑀸𑀫𑁄 𑀦𑁂𑀯 𑀲𑀪𑀸𑀬𑀁 𑀦𑀺𑀲𑀻𑀤𑀢𑀺, 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀺, 𑀦 𑀓𑀫𑁆𑀩𑁄𑀚𑀁 𑀕𑀘𑁆𑀙𑀢𑀻’’𑀢𑀺? ‘‘𑀓𑁄𑀥𑀦𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄; 𑀇𑀲𑁆𑀲𑀼𑀓𑀻, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄; 𑀫𑀘𑁆𑀙𑀭𑀻, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄; 𑀤𑀼𑀧𑁆𑀧𑀜𑁆𑀜𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄 𑁋 𑀅𑀬𑀁 𑀔𑁄, 𑀆𑀦𑀦𑁆𑀤, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀸𑀢𑀼𑀕𑀸𑀫𑁄 𑀦𑁂𑀯 𑀲𑀪𑀸𑀬𑀁 𑀦𑀺𑀲𑀻𑀤𑀢𑀺, 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀺, 𑀦 𑀓𑀫𑁆𑀩𑁄𑀚𑀁 𑀕𑀘𑁆𑀙𑀢𑀻’’𑀢𑀺. 𑀤𑀲𑀫𑀁.

𑀅𑀧𑀡𑁆𑀡𑀓𑀯𑀕𑁆𑀕𑁄 𑀢𑀢𑀺𑀬𑁄.