(𑁯) 𑁪. 𑀫𑀘𑀮𑀯𑀕𑁆𑀕𑁄

𑁧. 𑀧𑀸𑀡𑀸𑀢𑀺𑀧𑀸𑀢𑀲𑀼𑀢𑁆𑀢𑀁

𑁮𑁧. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀧𑀞𑀫𑀁.

𑁨. 𑀫𑀼𑀲𑀸𑀯𑀸𑀤𑀲𑀼𑀢𑁆𑀢𑀁

𑁮𑁨. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀯𑀡𑁆𑀡𑀸𑀭𑀳𑀲𑀼𑀢𑁆𑀢𑀁

𑁮𑁩. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀧𑁆𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺, 𑀅𑀦𑀦𑀼𑀯𑀺𑀘𑁆𑀘 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀅𑀧𑁆𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀧𑁆𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀅𑀧𑁆𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀢𑀢𑀺𑀬𑀁.

𑁪. 𑀓𑁄𑀥𑀕𑀭𑀼𑀲𑀼𑀢𑁆𑀢𑀁

𑁮𑁪. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑁄𑀥𑀕𑀭𑀼 𑀳𑁄𑀢𑀺 𑀦 𑀲𑀤𑁆𑀥𑀫𑁆𑀫𑀕𑀭𑀼, 𑀫𑀓𑁆𑀔𑀕𑀭𑀼 𑀳𑁄𑀢𑀺 𑀦 𑀲𑀤𑁆𑀥𑀫𑁆𑀫𑀕𑀭𑀼, 𑀮𑀸𑀪𑀕𑀭𑀼 𑀳𑁄𑀢𑀺 𑀦 𑀲𑀤𑁆𑀥𑀫𑁆𑀫𑀕𑀭𑀼, 𑀲𑀓𑁆𑀓𑀸𑀭𑀕𑀭𑀼 𑀳𑁄𑀢𑀺 𑀦 𑀲𑀤𑁆𑀥𑀫𑁆𑀫𑀕𑀭𑀼 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀲𑀤𑁆𑀥𑀫𑁆𑀫𑀕𑀭𑀼 𑀳𑁄𑀢𑀺 𑀦 𑀓𑁄𑀥𑀕𑀭𑀼, 𑀲𑀤𑁆𑀥𑀫𑁆𑀫𑀕𑀭𑀼 𑀳𑁄𑀢𑀺 𑀦 𑀫𑀓𑁆𑀔𑀕𑀭𑀼, 𑀲𑀤𑁆𑀥𑀫𑁆𑀫𑀕𑀭𑀼 𑀳𑁄𑀢𑀺 𑀦 𑀮𑀸𑀪𑀕𑀭𑀼, 𑀲𑀤𑁆𑀥𑀫𑁆𑀫𑀕𑀭𑀼 𑀳𑁄𑀢𑀺 𑀦 𑀲𑀓𑁆𑀓𑀸𑀭𑀕𑀭𑀼 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀢𑀫𑁄𑀢𑀫𑀲𑀼𑀢𑁆𑀢𑀁

𑁮𑁫. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀢𑀫𑁄 𑀢𑀫𑀧𑀭𑀸𑀬𑀡𑁄 [… 𑀧𑀭𑀸𑀬𑀦𑁄 (𑀲𑁆𑀬𑀸. 𑀓𑀁. 𑀧𑀻.) 𑀧𑀼. 𑀧. 𑁧𑁬𑁮; 𑀲𑀁. 𑀦𑀺. 𑁧.𑁧𑁩𑁨], 𑀢𑀫𑁄 𑀚𑁄𑀢𑀺𑀧𑀭𑀸𑀬𑀡𑁄, 𑀚𑁄𑀢𑀺 𑀢𑀫𑀧𑀭𑀸𑀬𑀡𑁄, 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀢𑀫𑁄 𑀳𑁄𑀢𑀺 𑀢𑀫𑀧𑀭𑀸𑀬𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸 𑀯𑁂𑀦𑀓𑀼𑀮𑁂 𑀯𑀸 𑀦𑁂𑀲𑀸𑀤𑀓𑀼𑀮𑁂 𑀯𑀸 𑀭𑀣𑀓𑀸𑀭𑀓𑀼𑀮𑁂 𑀯𑀸 𑀧𑀼𑀓𑁆𑀓𑀼𑀲𑀓𑀼𑀮𑁂 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂 𑀓𑀲𑀺𑀭𑀯𑀼𑀢𑁆𑀢𑀺𑀓𑁂, 𑀬𑀢𑁆𑀣 𑀓𑀲𑀺𑀭𑁂𑀦 𑀖𑀸𑀲𑀘𑁆𑀙𑀸𑀤𑁄 𑀮𑀩𑁆𑀪𑀢𑀺. 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄 𑀩𑀯𑁆𑀳𑀸𑀩𑀸𑀥𑁄 𑀓𑀸𑀡𑁄 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑁄 𑀯𑀸 𑀧𑀓𑁆𑀔𑀳𑀢𑁄 𑀯𑀸, 𑀦 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀢𑀫𑁄 𑀳𑁄𑀢𑀺 𑀢𑀫𑀧𑀭𑀸𑀬𑀡𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀢𑀫𑁄 𑀳𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸 𑀯𑁂𑀦𑀓𑀼𑀮𑁂 𑀯𑀸 𑀦𑁂𑀲𑀸𑀤𑀓𑀼𑀮𑁂 𑀯𑀸 𑀭𑀣𑀓𑀸𑀭𑀓𑀼𑀮𑁂 𑀯𑀸 𑀧𑀼𑀓𑁆𑀓𑀼𑀲𑀓𑀼𑀮𑁂 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂 𑀓𑀲𑀺𑀭𑀯𑀼𑀢𑁆𑀢𑀺𑀓𑁂, 𑀬𑀢𑁆𑀣 𑀓𑀲𑀺𑀭𑁂𑀦 𑀖𑀸𑀲𑀘𑁆𑀙𑀸𑀤𑁄 𑀮𑀩𑁆𑀪𑀢𑀺; 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄 𑀩𑀯𑁆𑀳𑀸𑀩𑀸𑀥𑁄 𑀓𑀸𑀡𑁄 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑁄 𑀯𑀸 𑀧𑀓𑁆𑀔𑀳𑀢𑁄 𑀯𑀸 𑀦 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀢𑀫𑁄 𑀳𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀳𑁄𑀢𑀺 𑀢𑀫𑀧𑀭𑀸𑀬𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂; 𑀲𑁄 𑀘 𑀳𑁄𑀢𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀳𑁄𑀢𑀺 𑀢𑀫𑀧𑀭𑀸𑀬𑀡𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀳𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂; 𑀲𑁄 𑀘 𑀳𑁄𑀢𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀳𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀑𑀡𑀢𑁄𑀡𑀢𑀲𑀼𑀢𑁆𑀢𑀁

𑁮𑁬. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀑𑀡𑀢𑁄𑀡𑀢𑁄, 𑀑𑀡𑀢𑀼𑀡𑁆𑀡𑀢𑁄, 𑀉𑀡𑁆𑀡𑀢𑁄𑀡𑀢𑁄, 𑀉𑀡𑁆𑀡𑀢𑀼𑀡𑁆𑀡𑀢𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺 [𑀧𑀼. 𑀧. 𑁧𑁬𑁯]. 𑀙𑀝𑁆𑀞𑀁.

𑁭. 𑀧𑀼𑀢𑁆𑀢𑀲𑀼𑀢𑁆𑀢𑀁

𑁮𑁭. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀫𑀡𑀫𑀘𑀮𑁄, 𑀲𑀫𑀡𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑀧𑀤𑀼𑀫𑁄, 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀫𑀘𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀔𑁄 𑀳𑁄𑀢𑀺 𑀧𑀸𑀝𑀺𑀧𑀤𑁄 [𑀧𑀝𑀺𑀧𑀤𑁄 (𑀲𑁆𑀬𑀸. 𑀓𑀁. 𑀧𑀻.) 𑀫. 𑀦𑀺. 𑁨 𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀑𑀮𑁄𑀓𑁂𑀢𑀩𑁆𑀩𑀸]; 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀳𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑁄 𑀧𑀼𑀢𑁆𑀢𑁄 𑀆𑀪𑀺𑀲𑁂𑀓𑁄 𑀅𑀦𑀪𑀺𑀲𑀺𑀢𑁆𑀢𑁄 𑀫𑀘𑀮𑀧𑁆𑀧𑀢𑁆𑀢𑁄; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀔𑁄 𑀳𑁄𑀢𑀺 𑀧𑀸𑀝𑀺𑀧𑀤𑁄, 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀫𑀘𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀦𑁄 𑀘 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺 [𑀨𑀲𑁆𑀲𑀺𑀢𑁆𑀯𑀸 (𑀲𑀻. 𑀧𑀻.)]. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀝𑁆𑀞 𑀘 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄. 𑀬𑁂𑀳𑀺 𑀔𑁄 𑀧𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀺, 𑀢𑁆𑀬𑀲𑁆𑀲 [𑀢𑁆𑀬𑀸𑀲𑁆𑀲 (𑀲𑀻.) 𑀅. 𑀦𑀺. 𑁫.𑁧𑁦𑁪] 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀯𑀘𑀻𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀫𑀦𑁄𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑀁𑀬𑁂𑀯 𑀩𑀳𑀼𑀮𑀁 𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑀁. 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺 𑀯𑀸 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺 𑀯𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺 𑀯𑀸 𑀑𑀧𑀓𑁆𑀓𑀫𑀺𑀓𑀸𑀦𑀺 𑀯𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺 𑀯𑀸, 𑀢𑀸𑀦𑀺 𑀧𑀦𑀲𑁆𑀲 𑀦 𑀩𑀳𑀼𑀤𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺. 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺.

‘‘𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺, 𑀫𑀫𑁂𑀯 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺. 𑀅𑀳𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄; 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄. 𑀬𑁂𑀳𑀺 𑀔𑁄 𑀧𑀦 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀺 𑀢𑁂 𑀫𑁂 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀯𑀘𑀻𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀫𑀦𑁄𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦; 𑀫𑀦𑀸𑀧𑀁𑀬𑁂𑀯 𑀩𑀳𑀼𑀮𑀁 𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀺, 𑀅𑀧𑁆𑀧𑀁 𑀅𑀫𑀦𑀸𑀧𑀁. 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺 𑀯𑀸 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺 𑀯𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺 𑀯𑀸 𑀑𑀧𑀓𑁆𑀓𑀫𑀺𑀓𑀸𑀦𑀺 𑀯𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺 𑀯𑀸, 𑀢𑀸𑀦𑀺 𑀫𑁂 𑀦 𑀩𑀳𑀼𑀤𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀧𑁆𑀧𑀸𑀩𑀸𑀥𑁄𑀳𑀫𑀲𑁆𑀫𑀺. 𑀘𑀢𑀼𑀦𑁆𑀦𑀁 𑀔𑁄 𑀧𑀦𑀲𑁆𑀫𑀺 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺.

‘‘𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺, 𑀫𑀫𑁂𑀯 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀲𑀁𑀬𑁄𑀚𑀦𑀲𑀼𑀢𑁆𑀢𑀁

𑁮𑁮. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀫𑀡𑀫𑀘𑀮𑁄, 𑀲𑀫𑀡𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑀧𑀤𑀼𑀫𑁄, 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 [𑀧𑀼. 𑀧. 𑁧𑁯𑁦 (𑀣𑁄𑀓𑀁 𑀯𑀺𑀲𑀤𑀺𑀲𑀁)] 𑀲𑀫𑀡𑀫𑀘𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀫𑀘𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺? 𑀇𑀥 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸, 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀁

𑁮𑁯. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀫𑀡𑀫𑀘𑀮𑁄, 𑀲𑀫𑀡𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑀧𑀤𑀼𑀫𑁄, 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀫𑀘𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀆𑀚𑀻𑀯𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺 [𑀲𑀫𑁆𑀫𑀸𑀲𑀢𑀻 (𑀲𑀻. 𑀓.)] 𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 [𑀲𑀫𑁆𑀫𑀸𑀲𑀫𑀸𑀥𑀻 (𑀲𑀻. 𑀓.)] 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀫𑀘𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀆𑀚𑀻𑀯𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺 𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀺, 𑀲𑀫𑁆𑀫𑀸𑀜𑀸𑀡𑀻 𑀳𑁄𑀢𑀺, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 [𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻 (𑀲𑀻. 𑀓.)] 𑀳𑁄𑀢𑀺, 𑀦𑁄 𑀘 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀅𑀝𑁆𑀞 𑀘 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄…𑀧𑁂… 𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺, 𑀫𑀫𑁂𑀯 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀔𑀦𑁆𑀥𑀲𑀼𑀢𑁆𑀢𑀁

𑁯𑁦. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀫𑀡𑀫𑀘𑀮𑁄, 𑀲𑀫𑀡𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑀧𑀤𑀼𑀫𑁄, 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀫𑀘𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀔𑁄 𑀳𑁄𑀢𑀺 𑀅𑀧𑁆𑀧𑀢𑁆𑀢𑀫𑀸𑀦𑀲𑁄, 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀫𑀘𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸…𑀧𑁂… 𑀇𑀢𑀺 𑀲𑀜𑁆𑀜𑀸…𑀧𑁂… 𑀇𑀢𑀺 𑀲𑀗𑁆𑀔𑀸𑀭𑀸…𑀧𑁂… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺; 𑀦𑁄 𑀘 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸…𑀧𑁂… 𑀇𑀢𑀺 𑀲𑀜𑁆𑀜𑀸…𑀧𑁂… 𑀇𑀢𑀺 𑀲𑀗𑁆𑀔𑀸𑀭𑀸…𑀧𑁂… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺; 𑀅𑀝𑁆𑀞 𑀘 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑀧𑀤𑀼𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄…𑀧𑁂… 𑀫𑀫𑁂𑀯 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀤𑀲𑀫𑀁.

𑀫𑀘𑀮𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.