(𑁮) 𑁩. 𑀅𑀧𑀡𑁆𑀡𑀓𑀯𑀕𑁆𑀕𑁄

𑁧. 𑀧𑀥𑀸𑀦𑀲𑀼𑀢𑁆𑀢𑀁

𑁭𑁧. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀧𑀡𑁆𑀡𑀓𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀧𑀡𑁆𑀡𑀓𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺. 𑀧𑀞𑀫𑀁.

𑁨. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀁

𑁭𑁨. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀧𑀡𑁆𑀡𑀓𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁂𑀦, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁂𑀦, 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀧𑀡𑁆𑀡𑀓𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀧𑁆𑀧𑀼𑀭𑀺𑀲𑀲𑀼𑀢𑁆𑀢𑀁

𑁭𑁩. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑀧𑁆𑀧𑀼𑀭𑀺𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀧𑀭𑀲𑁆𑀲 𑀅𑀯𑀡𑁆𑀡𑁄 𑀢𑀁 𑀅𑀧𑀼𑀝𑁆𑀞𑁄𑀧𑀺 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀅𑀳𑀸𑀧𑁂𑀢𑁆𑀯𑀸 𑀅𑀮𑀫𑁆𑀩𑀺𑀢𑁆𑀯𑀸 𑀧𑀭𑀺𑀧𑀽𑀭𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀧𑀭𑀲𑁆𑀲 𑀯𑀡𑁆𑀡𑁄 𑀢𑀁 𑀧𑀼𑀝𑁆𑀞𑁄𑀧𑀺 𑀦 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀅𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀳𑀸𑀧𑁂𑀢𑁆𑀯𑀸 𑀮𑀫𑁆𑀩𑀺𑀢𑁆𑀯𑀸 𑀅𑀧𑀭𑀺𑀧𑀽𑀭𑀁 𑀅𑀯𑀺𑀢𑁆𑀣𑀸𑀭𑁂𑀦 𑀧𑀭𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀅𑀢𑁆𑀢𑀦𑁄 𑀅𑀯𑀡𑁆𑀡𑁄 𑀢𑀁 𑀧𑀼𑀝𑁆𑀞𑁄𑀧𑀺 𑀦 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀅𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀳𑀸𑀧𑁂𑀢𑁆𑀯𑀸 𑀮𑀫𑁆𑀩𑀺𑀢𑁆𑀯𑀸 𑀅𑀧𑀭𑀺𑀧𑀽𑀭𑀁 𑀅𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀢𑀦𑁄 𑀅𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀅𑀢𑁆𑀢𑀦𑁄 𑀯𑀡𑁆𑀡𑁄 𑀢𑀁 𑀅𑀧𑀼𑀝𑁆𑀞𑁄𑀧𑀺 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀅𑀳𑀸𑀧𑁂𑀢𑁆𑀯𑀸 𑀅𑀮𑀫𑁆𑀩𑀺𑀢𑁆𑀯𑀸 𑀧𑀭𑀺𑀧𑀽𑀭𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀢𑀦𑁄 𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑀧𑁆𑀧𑀼𑀭𑀺𑀲𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀧𑁆𑀧𑀼𑀭𑀺𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀧𑀭𑀲𑁆𑀲 𑀅𑀯𑀡𑁆𑀡𑁄 𑀢𑀁 𑀧𑀼𑀝𑁆𑀞𑁄𑀧𑀺 𑀦 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀅𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀳𑀸𑀧𑁂𑀢𑁆𑀯𑀸 𑀮𑀫𑁆𑀩𑀺𑀢𑁆𑀯𑀸 𑀅𑀧𑀭𑀺𑀧𑀽𑀭𑀁 𑀅𑀯𑀺𑀢𑁆𑀣𑀸𑀭𑁂𑀦 𑀧𑀭𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀧𑀭𑀲𑁆𑀲 𑀯𑀡𑁆𑀡𑁄 𑀢𑀁 𑀅𑀧𑀼𑀝𑁆𑀞𑁄𑀧𑀺 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀅𑀳𑀸𑀧𑁂𑀢𑁆𑀯𑀸 𑀅𑀮𑀫𑁆𑀩𑀺𑀢𑁆𑀯𑀸 𑀧𑀭𑀺𑀧𑀽𑀭𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀅𑀢𑁆𑀢𑀦𑁄 𑀅𑀯𑀡𑁆𑀡𑁄 𑀢𑀁 𑀅𑀧𑀼𑀝𑁆𑀞𑁄𑀧𑀺 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀅𑀳𑀸𑀧𑁂𑀢𑁆𑀯𑀸 𑀅𑀮𑀫𑁆𑀩𑀺𑀢𑁆𑀯𑀸 𑀧𑀭𑀺𑀧𑀽𑀭𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀢𑀦𑁄 𑀅𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀬𑁄 𑀳𑁄𑀢𑀺 𑀅𑀢𑁆𑀢𑀦𑁄 𑀯𑀡𑁆𑀡𑁄 𑀢𑀁 𑀧𑀼𑀝𑁆𑀞𑁄𑀧𑀺 𑀦 𑀧𑀸𑀢𑀼 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀅𑀧𑀼𑀝𑁆𑀞𑀲𑁆𑀲! 𑀧𑀼𑀝𑁆𑀞𑁄 𑀔𑁄 𑀧𑀦 𑀧𑀜𑁆𑀳𑀸𑀪𑀺𑀦𑀻𑀢𑁄 𑀳𑀸𑀧𑁂𑀢𑁆𑀯𑀸 𑀮𑀫𑁆𑀩𑀺𑀢𑁆𑀯𑀸 𑀅𑀧𑀭𑀺𑀧𑀽𑀭𑀁 𑀅𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀢𑀦𑁄 𑀯𑀡𑁆𑀡𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀧𑁆𑀧𑀼𑀭𑀺𑀲𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑀥𑀼𑀓𑀸 𑀬𑀜𑁆𑀜𑀤𑁂𑀯 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀁 𑀯𑀸 𑀆𑀦𑀻𑀢𑀸 𑀳𑁄𑀢𑀺, 𑀢𑀸𑀯𑀤𑁂𑀯𑀲𑁆𑀲𑀸 𑀢𑀺𑀩𑁆𑀩𑀁 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀲𑁆𑀲𑀼𑀬𑀸𑀧𑀺 𑀲𑀲𑀼𑀭𑁂𑀧𑀺 𑀲𑀸𑀫𑀺𑀓𑁂𑀧𑀺 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀲𑀼. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀁𑀯𑀸𑀲𑀫𑀦𑁆𑀯𑀸𑀬 𑀯𑀺𑀲𑁆𑀲𑀸𑀲𑀫𑀦𑁆𑀯𑀸𑀬 𑀲𑀲𑁆𑀲𑀼𑀫𑁆𑀧𑀺 𑀲𑀲𑀼𑀭𑀫𑁆𑀧𑀺 𑀲𑀸𑀫𑀺𑀓𑀫𑁆𑀧𑀺 𑀏𑀯𑀫𑀸𑀳 𑁋 ‘𑀅𑀧𑁂𑀣, 𑀓𑀺𑀁 𑀧𑀦 𑀢𑀼𑀫𑁆𑀳𑁂 𑀚𑀸𑀦𑀸𑀣𑀸’𑀢𑀺! 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀬𑀜𑁆𑀜𑀤𑁂𑀯 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀁 𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀢𑀸𑀯𑀤𑁂𑀯𑀲𑁆𑀲 𑀢𑀺𑀩𑁆𑀩𑀁 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀸𑀲𑀓𑁂𑀲𑀼 𑀉𑀧𑀸𑀲𑀺𑀓𑀸𑀲𑀼 𑀅𑀦𑁆𑀢𑀫𑀲𑁄 𑀆𑀭𑀸𑀫𑀺𑀓𑀲𑀫𑀡𑀼𑀤𑁆𑀤𑁂𑀲𑁂𑀲𑀼. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀁𑀯𑀸𑀲𑀫𑀦𑁆𑀯𑀸𑀬 𑀯𑀺𑀲𑁆𑀲𑀸𑀲𑀫𑀦𑁆𑀯𑀸𑀬 𑀆𑀘𑀭𑀺𑀬𑀫𑁆𑀧𑀺 𑀉𑀧𑀚𑁆𑀛𑀸𑀬𑀫𑁆𑀧𑀺 𑀏𑀯𑀫𑀸𑀳 𑁋 ‘𑀅𑀧𑁂𑀣, 𑀓𑀺𑀁 𑀧𑀦 𑀢𑀼𑀫𑁆𑀳𑁂 𑀚𑀸𑀦𑀸𑀣𑀸’𑀢𑀺! 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀥𑀼𑀦𑀸𑀕𑀢𑀯𑀥𑀼𑀓𑀸𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀧𑀞𑀫𑀅𑀕𑁆𑀕𑀲𑀼𑀢𑁆𑀢𑀁

𑁭𑁪. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀻𑀮𑀕𑁆𑀕𑀁, 𑀲𑀫𑀸𑀥𑀺𑀕𑁆𑀕𑀁 [𑀲𑀫𑀸𑀥𑀕𑁆𑀕𑀁 (𑀲𑀻. 𑀲𑁆𑀬𑀸. 𑀓𑀁)], 𑀧𑀜𑁆𑀜𑀸𑀕𑁆𑀕𑀁, 𑀯𑀺𑀫𑀼𑀢𑁆𑀢𑀕𑁆𑀕𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀕𑁆𑀕𑀸𑀦𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀅𑀕𑁆𑀕𑀲𑀼𑀢𑁆𑀢𑀁

𑁭𑁫. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀭𑀽𑀧𑀕𑁆𑀕𑀁, 𑀯𑁂𑀤𑀦𑀸𑀕𑁆𑀕𑀁, 𑀲𑀜𑁆𑀜𑀸𑀕𑁆𑀕𑀁, 𑀪𑀯𑀕𑁆𑀕𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀕𑁆𑀕𑀸𑀦𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀓𑀼𑀲𑀺𑀦𑀸𑀭𑀲𑀼𑀢𑁆𑀢𑀁

𑁭𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀯𑀺𑀳𑀭𑀢𑀺 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂 [𑀤𑀻. 𑀦𑀺. 𑁨.𑁨𑁧𑁭], 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸, 𑀧𑀼𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣 𑁋 ‘𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀅𑀳𑁄𑀲𑀺, 𑀦𑀸𑀲𑀓𑁆𑀔𑀺𑀫𑁆𑀳 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀧𑀼𑀘𑁆𑀙𑀺𑀢𑀼’’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸, 𑀧𑀼𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣 𑁋 ‘𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀅𑀳𑁄𑀲𑀺, 𑀦𑀸𑀲𑀓𑁆𑀔𑀺𑀫𑁆𑀳 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀧𑀼𑀘𑁆𑀙𑀺𑀢𑀼’’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸, 𑀧𑀼𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣 𑁋 ‘𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀅𑀳𑁄𑀲𑀺, 𑀦𑀸𑀲𑀓𑁆𑀔𑀺𑀫𑁆𑀳 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀧𑀼𑀘𑁆𑀙𑀺𑀢𑀼’’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀼𑀕𑀸𑀭𑀯𑁂𑀦𑀧𑀺 𑀦 𑀧𑀼𑀘𑁆𑀙𑁂𑀬𑁆𑀬𑀸𑀣, 𑀲𑀳𑀸𑀬𑀓𑁄𑀧𑀺, 𑀪𑀺𑀓𑁆𑀔𑀯𑁂, 𑀲𑀳𑀸𑀬𑀓𑀲𑁆𑀲 𑀆𑀭𑁄𑀘𑁂𑀢𑀽’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂! 𑀦𑀢𑁆𑀣𑀺 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸’’𑀢𑀺.

‘‘𑀧𑀲𑀸𑀤𑀸 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀯𑀤𑁂𑀲𑀺. 𑀜𑀸𑀡𑀫𑁂𑀯 𑀳𑁂𑀢𑁆𑀣, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑁋 ‘𑀦𑀢𑁆𑀣𑀺 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸’. 𑀇𑀫𑁂𑀲𑀜𑁆𑀳𑀺, 𑀆𑀦𑀦𑁆𑀤, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀬𑁄 𑀧𑀘𑁆𑀙𑀺𑀫𑀓𑁄 𑀪𑀺𑀓𑁆𑀔𑀼 𑀲𑁄 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺. 𑀙𑀝𑁆𑀞𑀁.

𑁭. 𑀅𑀘𑀺𑀦𑁆𑀢𑁂𑀬𑁆𑀬𑀲𑀼𑀢𑁆𑀢𑀁

𑁭𑁭. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺, 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺; 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀩𑀼𑀤𑁆𑀥𑀸𑀦𑀁, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄, 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄; 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀛𑀸𑀬𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀛𑀸𑀦𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄, 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄; 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄, 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄; 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀮𑁄𑀓𑀘𑀺𑀦𑁆𑀢𑀸, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑀸, 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸; 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺, 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺; 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀓𑁆𑀔𑀺𑀡𑀲𑀼𑀢𑁆𑀢𑀁

𑁭𑁮. ‘‘𑀘𑀢𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀯𑀺𑀲𑀼𑀤𑁆𑀥𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀤𑀸𑀬𑀓𑀢𑁄; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀦𑁂𑀯 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁄 𑀳𑁄𑀢𑀺 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄; 𑀧𑀝𑀺𑀕𑁆𑀕𑀸𑀳𑀓𑀸 𑀳𑁄𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 [𑀧𑀝𑀺𑀕𑁆𑀕𑀸𑀳𑀓𑁄 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 (𑀲𑁆𑀬𑀸. 𑀓𑀁. 𑀓.) 𑀫. 𑀦𑀺. 𑁩.𑁩𑁮𑁧 𑀑𑀮𑁄𑀓𑁂𑀢𑀩𑁆𑀩𑀁]. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀤𑀸𑀬𑀓𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁄 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄; 𑀧𑀝𑀺𑀕𑁆𑀕𑀸𑀳𑀓𑀸 𑀳𑁄𑀦𑁆𑀢𑀺 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀤𑀸𑀬𑀓𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀦𑁂𑀯 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁄 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄; 𑀧𑀝𑀺𑀕𑁆𑀕𑀸𑀳𑀓𑀸𑀧𑀺 𑀳𑁄𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀦𑁂𑀯 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘? 𑀇𑀥, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁄 𑀳𑁄𑀢𑀺 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄; 𑀧𑀝𑀺𑀕𑁆𑀕𑀸𑀳𑀓𑀸𑀧𑀺 𑀳𑁄𑀦𑁆𑀢𑀺 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀤𑀓𑁆𑀔𑀺𑀡𑀸 𑀯𑀺𑀲𑀼𑀤𑁆𑀥𑀺𑀬𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀯𑀡𑀺𑀚𑁆𑀚𑀲𑀼𑀢𑁆𑀢𑀁

𑁭𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀙𑁂𑀤𑀕𑀸𑀫𑀺𑀦𑀻 𑀳𑁄𑀢𑀺? 𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀦 𑀬𑀣𑀸𑀥𑀺𑀧𑁆𑀧𑀸𑀬𑀸 [𑀬𑀣𑀸𑀥𑀺𑀧𑁆𑀧𑀸𑀬𑀁 (𑀲𑀻.)] 𑀳𑁄𑀢𑀺? 𑀓𑁄 𑀦𑀼 𑀔𑁄, 𑀪𑀦𑁆𑀢𑁂 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀬𑀣𑀸𑀥𑀺𑀧𑁆𑀧𑀸𑀬𑀸 [𑀬𑀣𑀸𑀥𑀺𑀧𑁆𑀧𑀸𑀬𑀁 (𑀲𑀻.)] 𑀳𑁄𑀢𑀺? 𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀧𑀭𑀸𑀥𑀺𑀧𑁆𑀧𑀸𑀬𑀸 𑀳𑁄𑀢𑀻’’𑀢𑀺?

‘‘𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 𑁋 ‘𑀯𑀤𑀢𑀼, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸’𑀢𑀺. 𑀲𑁄 𑀬𑁂𑀦 𑀧𑀯𑀸𑀭𑁂𑀢𑀺 𑀢𑀁 𑀦 𑀤𑁂𑀢𑀺. 𑀲𑁄 𑀘𑁂 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑁄 𑀬𑀜𑁆𑀜𑀤𑁂𑀯 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑀺, 𑀲𑀸𑀲𑁆𑀲 𑀳𑁄𑀢𑀺 𑀙𑁂𑀤𑀕𑀸𑀫𑀺𑀦𑀻.

‘‘𑀇𑀥 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 𑁋 ‘𑀯𑀤𑀢𑀼, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸’𑀢𑀺. 𑀲𑁄 𑀬𑁂𑀦 𑀧𑀯𑀸𑀭𑁂𑀢𑀺 𑀢𑀁 𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑁂𑀢𑀺. 𑀲𑁄 𑀘𑁂 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑁄 𑀬𑀜𑁆𑀜𑀤𑁂𑀯 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑀺, 𑀲𑀸𑀲𑁆𑀲 𑀦 𑀳𑁄𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀸 [𑀬𑀣𑀸𑀥𑀺𑀧𑁆𑀧𑀸𑀬𑀁 (𑀲𑀻. 𑀓.)].

‘‘𑀇𑀥 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 𑁋 ‘𑀯𑀤𑀢𑀼, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸’𑀢𑀺. 𑀲𑁄 𑀬𑁂𑀦 𑀧𑀯𑀸𑀭𑁂𑀢𑀺 𑀢𑀁 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑁂𑀢𑀺. 𑀲𑁄 𑀘𑁂 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑁄 𑀬𑀜𑁆𑀜𑀤𑁂𑀯 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑀺, 𑀲𑀸𑀲𑁆𑀲 𑀳𑁄𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀸 [𑀬𑀣𑀸𑀥𑀺𑀧𑁆𑀧𑀸𑀬𑀁 (𑀲𑀻. 𑀓.)].

‘‘𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 𑁋 ‘𑀯𑀤𑀢𑀼, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸’𑀢𑀺. 𑀲𑁄 𑀬𑁂𑀦 𑀧𑀯𑀸𑀭𑁂𑀢𑀺 𑀢𑀁 𑀧𑀭𑀸𑀥𑀺𑀧𑁆𑀧𑀸𑀬𑀁 𑀤𑁂𑀢𑀺. 𑀲𑁄 𑀘𑁂 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑁄 𑀬𑀜𑁆𑀜𑀤𑁂𑀯 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑀺, 𑀲𑀸𑀲𑁆𑀲 𑀳𑁄𑀢𑀺 𑀧𑀭𑀸𑀥𑀺𑀧𑁆𑀧𑀸𑀬𑀸 [𑀧𑀭𑀸𑀥𑀺𑀧𑁆𑀧𑀸𑀬𑀁 (𑀓.)].

‘‘𑀅𑀬𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀙𑁂𑀤𑀕𑀸𑀫𑀺𑀦𑀻 𑀳𑁄𑀢𑀺. 𑀅𑀬𑀁 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀦 𑀬𑀣𑀸𑀥𑀺𑀧𑁆𑀧𑀸𑀬𑀸 𑀳𑁄𑀢𑀺. 𑀅𑀬𑀁 𑀔𑁄 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀬𑀣𑀸𑀥𑀺𑀧𑁆𑀧𑀸𑀬𑀸 𑀳𑁄𑀢𑀺. 𑀅𑀬𑀁 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀸𑀯 𑀯𑀡𑀺𑀚𑁆𑀚𑀸 𑀧𑀬𑀼𑀢𑁆𑀢𑀸 𑀧𑀭𑀸𑀥𑀺𑀧𑁆𑀧𑀸𑀬𑀸 𑀳𑁄𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀓𑀫𑁆𑀩𑁄𑀚𑀲𑀼𑀢𑁆𑀢𑀁

𑁮𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀸𑀢𑀼𑀕𑀸𑀫𑁄 𑀦𑁂𑀯 𑀲𑀪𑀸𑀬𑀁 𑀦𑀺𑀲𑀻𑀤𑀢𑀺, 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀺, 𑀦 𑀓𑀫𑁆𑀩𑁄𑀚𑀁 𑀕𑀘𑁆𑀙𑀢𑀻’’𑀢𑀺? ‘‘𑀓𑁄𑀥𑀦𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄; 𑀇𑀲𑁆𑀲𑀼𑀓𑀻, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄; 𑀫𑀘𑁆𑀙𑀭𑀻, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄; 𑀤𑀼𑀧𑁆𑀧𑀜𑁆𑀜𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄 𑁋 𑀅𑀬𑀁 𑀔𑁄, 𑀆𑀦𑀦𑁆𑀤, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀸𑀢𑀼𑀕𑀸𑀫𑁄 𑀦𑁂𑀯 𑀲𑀪𑀸𑀬𑀁 𑀦𑀺𑀲𑀻𑀤𑀢𑀺, 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀺, 𑀦 𑀓𑀫𑁆𑀩𑁄𑀚𑀁 𑀕𑀘𑁆𑀙𑀢𑀻’’𑀢𑀺. 𑀤𑀲𑀫𑀁.

𑀅𑀧𑀡𑁆𑀡𑀓𑀯𑀕𑁆𑀕𑁄 𑀢𑀢𑀺𑀬𑁄.