𑁯. 𑀅𑀓𑀼𑀲𑀮𑀫𑀽𑀮𑀲𑀼𑀢𑁆𑀢𑀁

𑁭𑁦. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀫𑀽𑀮𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀮𑁄𑀪𑁄 𑀢𑀤𑀧𑀺 𑀅𑀓𑀼𑀲𑀮𑀫𑀽𑀮𑀁 [𑀅𑀓𑀼𑀲𑀮𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]; 𑀬𑀤𑀧𑀺 𑀮𑀼𑀤𑁆𑀥𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀅𑀓𑀼𑀲𑀮𑀁 [𑀅𑀓𑀼𑀲𑀮𑀫𑀽𑀮𑀁 (𑀓.)]; 𑀬𑀤𑀧𑀺 𑀮𑀼𑀤𑁆𑀥𑁄 𑀮𑁄𑀪𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 [𑀉𑀧𑀤𑀳𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺 𑀢𑀤𑀧𑀺 𑀅𑀓𑀼𑀲𑀮𑀁 [𑀇𑀤𑀁 𑀧𑀦 𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺]. 𑀇𑀢𑀺𑀲𑁆𑀲𑀫𑁂 𑀮𑁄𑀪𑀚𑀸 𑀮𑁄𑀪𑀦𑀺𑀤𑀸𑀦𑀸 𑀮𑁄𑀪𑀲𑀫𑀼𑀤𑀬𑀸 𑀮𑁄𑀪𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀤𑁄𑀲𑁄 𑀢𑀤𑀧𑀺 𑀅𑀓𑀼𑀲𑀮𑀫𑀽𑀮𑀁; 𑀬𑀤𑀧𑀺 𑀤𑀼𑀝𑁆𑀞𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀅𑀓𑀼𑀲𑀮𑀁; 𑀬𑀤𑀧𑀺 𑀤𑀼𑀝𑁆𑀞𑁄 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺 𑀢𑀤𑀧𑀺 𑀅𑀓𑀼𑀲𑀮𑀁. 𑀇𑀢𑀺𑀲𑁆𑀲𑀫𑁂 𑀤𑁄𑀲𑀚𑀸 𑀤𑁄𑀲𑀦𑀺𑀤𑀸𑀦𑀸 𑀤𑁄𑀲𑀲𑀫𑀼𑀤𑀬𑀸 𑀤𑁄𑀲𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀫𑁄𑀳𑁄 𑀢𑀤𑀧𑀺 𑀅𑀓𑀼𑀲𑀮𑀫𑀽𑀮𑀁; 𑀬𑀤𑀧𑀺 𑀫𑀽𑀴𑁆𑀳𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀅𑀓𑀼𑀲𑀮𑀁; 𑀬𑀤𑀧𑀺 𑀫𑀽𑀴𑁆𑀳𑁄 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺 𑀢𑀤𑀧𑀺 𑀅𑀓𑀼𑀲𑀮𑀁. 𑀇𑀢𑀺𑀲𑁆𑀲𑀫𑁂 𑀫𑁄𑀳𑀚𑀸 𑀫𑁄𑀳𑀦𑀺𑀤𑀸𑀦𑀸 𑀫𑁄𑀳𑀲𑀫𑀼𑀤𑀬𑀸 𑀫𑁄𑀳𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀭𑀽𑀧𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺 𑀅𑀓𑀸𑀮𑀯𑀸𑀤𑀻𑀢𑀺𑀧𑀺, 𑀅𑀪𑀽𑀢𑀯𑀸𑀤𑀻𑀢𑀺𑀧𑀺, 𑀅𑀦𑀢𑁆𑀣𑀯𑀸𑀤𑀻𑀢𑀺𑀧𑀺, 𑀅𑀥𑀫𑁆𑀫𑀯𑀸𑀤𑀻𑀢𑀺𑀧𑀺, 𑀅𑀯𑀺𑀦𑀬𑀯𑀸𑀤𑀻𑀢𑀺𑀧𑀺.

‘‘𑀓𑀲𑁆𑀫𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺 𑀅𑀓𑀸𑀮𑀯𑀸𑀤𑀻𑀢𑀺𑀧𑀺, 𑀅𑀪𑀽𑀢𑀯𑀸𑀤𑀻𑀢𑀺𑀧𑀺, 𑀅𑀦𑀢𑁆𑀣𑀯𑀸𑀤𑀻𑀢𑀺𑀧𑀺, 𑀅𑀥𑀫𑁆𑀫𑀯𑀸𑀤𑀻𑀢𑀺𑀧𑀺, 𑀅𑀯𑀺𑀦𑀬𑀯𑀸𑀤𑀻𑀢𑀺𑀧𑀺? 𑀢𑀣𑀸𑀳𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺. 𑀪𑀽𑀢𑁂𑀦 𑀔𑁄 𑀧𑀦 𑀯𑀼𑀘𑁆𑀘𑀫𑀸𑀦𑁄 𑀅𑀯𑀚𑀸𑀦𑀸𑀢𑀺, 𑀦𑁄 𑀧𑀝𑀺𑀚𑀸𑀦𑀸𑀢𑀺; 𑀅𑀪𑀽𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 𑀦 𑀆𑀢𑀧𑁆𑀧𑀁 𑀓𑀭𑁄𑀢𑀺, 𑀢𑀲𑁆𑀲 𑀦𑀺𑀩𑁆𑀩𑁂𑀞𑀦𑀸𑀬 𑀇𑀢𑀺𑀧𑁂𑀢𑀁 𑀅𑀢𑀘𑁆𑀙𑀁 𑀇𑀢𑀺𑀧𑁂𑀢𑀁 𑀅𑀪𑀽𑀢𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺 𑀅𑀓𑀸𑀮𑀯𑀸𑀤𑀻𑀢𑀺𑀧𑀺, 𑀅𑀪𑀽𑀢𑀯𑀸𑀤𑀻𑀢𑀺𑀧𑀺, 𑀅𑀦𑀢𑁆𑀣𑀯𑀸𑀤𑀻𑀢𑀺𑀧𑀺, 𑀅𑀥𑀫𑁆𑀫𑀯𑀸𑀤𑀻𑀢𑀺𑀧𑀺, 𑀅𑀯𑀺𑀦𑀬𑀯𑀸𑀤𑀻𑀢𑀺𑀧𑀺.

‘‘𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀮𑁄𑀪𑀚𑁂𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺, 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁. 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸.

‘‘𑀤𑁄𑀲𑀚𑁂𑀳𑀺…𑀧𑁂… 𑀫𑁄𑀳𑀚𑁂𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺, 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁. 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀸𑀮𑁄 𑀯𑀸 𑀥𑀯𑁄 𑀯𑀸 𑀨𑀦𑁆𑀤𑀦𑁄 𑀯𑀸 𑀢𑀻𑀳𑀺 𑀫𑀸𑀮𑀼𑀯𑀸𑀮𑀢𑀸𑀳𑀺 𑀉𑀤𑁆𑀥𑀲𑁆𑀢𑁄 𑀧𑀭𑀺𑀬𑁄𑀦𑀤𑁆𑀥𑁄 𑀅𑀦𑀬𑀁 𑀆𑀧𑀚𑁆𑀚𑀢𑀺, 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺, 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀮𑁄𑀪𑀚𑁂𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺, 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁. 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸.

‘‘𑀤𑁄𑀲𑀚𑁂𑀳𑀺…𑀧𑁂… 𑀫𑁄𑀳𑀚𑁂𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁. 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀫𑀽𑀮𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁, 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁, 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑁄 𑀢𑀤𑀧𑀺 𑀓𑀼𑀲𑀮𑀫𑀽𑀮𑀁 [𑀓𑀼𑀲𑀮𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]; 𑀬𑀤𑀧𑀺 𑀅𑀮𑀼𑀤𑁆𑀥𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀓𑀼𑀲𑀮𑀁 [𑀓𑀼𑀲𑀮𑀫𑀽𑀮𑀁 (𑀓.)]; 𑀬𑀤𑀧𑀺 𑀅𑀮𑀼𑀤𑁆𑀥𑁄 𑀮𑁄𑀪𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀦 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺 𑀢𑀤𑀧𑀺 𑀓𑀼𑀲𑀮𑀁. 𑀇𑀢𑀺𑀲𑁆𑀲𑀫𑁂 𑀅𑀮𑁄𑀪𑀚𑀸 𑀅𑀮𑁄𑀪𑀦𑀺𑀤𑀸𑀦𑀸 𑀅𑀮𑁄𑀪𑀲𑀫𑀼𑀤𑀬𑀸 𑀅𑀮𑁄𑀪𑀧𑀘𑁆𑀘𑀬𑀸 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀤𑁄𑀲𑁄 𑀢𑀤𑀧𑀺 𑀓𑀼𑀲𑀮𑀫𑀽𑀮𑀁; 𑀬𑀤𑀧𑀺 𑀅𑀤𑀼𑀝𑁆𑀞𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀓𑀼𑀲𑀮𑀁; 𑀬𑀤𑀧𑀺 𑀅𑀤𑀼𑀝𑁆𑀞𑁄 𑀤𑁄𑀲𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀦 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺 𑀢𑀤𑀧𑀺 𑀓𑀼𑀲𑀮𑀁. 𑀇𑀢𑀺𑀲𑁆𑀲𑀫𑁂 𑀅𑀤𑁄𑀲𑀚𑀸 𑀅𑀤𑁄𑀲𑀦𑀺𑀤𑀸𑀦𑀸 𑀅𑀤𑁄𑀲𑀲𑀫𑀼𑀤𑀬𑀸 𑀅𑀤𑁄𑀲𑀧𑀘𑁆𑀘𑀬𑀸 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀫𑁄𑀳𑁄 𑀢𑀤𑀧𑀺 𑀓𑀼𑀲𑀮𑀫𑀽𑀮𑀁; 𑀬𑀤𑀧𑀺 𑀅𑀫𑀽𑀴𑁆𑀳𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀓𑀼𑀲𑀮𑀁; 𑀬𑀤𑀧𑀺 𑀅𑀫𑀽𑀴𑁆𑀳𑁄 𑀫𑁄𑀳𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀦 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺 𑀢𑀤𑀧𑀺 𑀓𑀼𑀲𑀮𑀁. 𑀇𑀢𑀺𑀲𑁆𑀲𑀫𑁂 𑀅𑀫𑁄𑀳𑀚𑀸 𑀅𑀫𑁄𑀳𑀦𑀺𑀤𑀸𑀦𑀸 𑀅𑀫𑁄𑀳𑀲𑀫𑀼𑀤𑀬𑀸 𑀅𑀫𑁄𑀳𑀧𑀘𑁆𑀘𑀬𑀸 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀭𑀽𑀧𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺 𑀓𑀸𑀮𑀯𑀸𑀤𑀻𑀢𑀺𑀧𑀺, 𑀪𑀽𑀢𑀯𑀸𑀤𑀻𑀢𑀺𑀧𑀺, 𑀅𑀢𑁆𑀣𑀯𑀸𑀤𑀻𑀢𑀺𑀧𑀺, 𑀥𑀫𑁆𑀫𑀯𑀸𑀤𑀻𑀢𑀺𑀧𑀺, 𑀯𑀺𑀦𑀬𑀯𑀸𑀤𑀻𑀢𑀺𑀧𑀺.

‘‘𑀓𑀲𑁆𑀫𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺 𑀓𑀸𑀮𑀯𑀸𑀤𑀻𑀢𑀺𑀧𑀺, 𑀪𑀽𑀢𑀯𑀸𑀤𑀻𑀢𑀺𑀧𑀺, 𑀅𑀢𑁆𑀣𑀯𑀸𑀤𑀻𑀢𑀺𑀧𑀺, 𑀥𑀫𑁆𑀫𑀯𑀸𑀤𑀻𑀢𑀺𑀧𑀺, 𑀯𑀺𑀦𑀬𑀯𑀸𑀤𑀻𑀢𑀺𑀧𑀺? 𑀢𑀣𑀸𑀳𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺𑀧𑀺. 𑀪𑀽𑀢𑁂𑀦 𑀔𑁄 𑀧𑀦 𑀯𑀼𑀘𑁆𑀘𑀫𑀸𑀦𑁄 𑀧𑀝𑀺𑀚𑀸𑀦𑀸𑀢𑀺 𑀦𑁄 𑀅𑀯𑀚𑀸𑀦𑀸𑀢𑀺; 𑀅𑀪𑀽𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 𑀆𑀢𑀧𑁆𑀧𑀁 𑀓𑀭𑁄𑀢𑀺 𑀢𑀲𑁆𑀲 𑀦𑀺𑀩𑁆𑀩𑁂𑀞𑀦𑀸𑀬 𑁋 ‘𑀇𑀢𑀺𑀧𑁂𑀢𑀁 𑀅𑀢𑀘𑁆𑀙𑀁, 𑀇𑀢𑀺𑀧𑁂𑀢𑀁 𑀅𑀪𑀽𑀢’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺 𑀓𑀸𑀮𑀯𑀸𑀤𑀻𑀢𑀺𑀧𑀺, 𑀅𑀢𑁆𑀣𑀯𑀸𑀤𑀻𑀢𑀺𑀧𑀺, 𑀥𑀫𑁆𑀫𑀯𑀸𑀤𑀻𑀢𑀺𑀧𑀺, 𑀯𑀺𑀦𑀬𑀯𑀸𑀤𑀻𑀢𑀺𑀧𑀺.

‘‘𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀮𑁄𑀪𑀚𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

‘‘𑀤𑁄𑀲𑀚𑀸…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀫𑁄𑀳𑀚𑀸…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂, 𑀲𑀸𑀮𑁄 𑀯𑀸 𑀥𑀯𑁄 𑀯𑀸 𑀨𑀦𑁆𑀤𑀦𑁄 𑀯𑀸 𑀢𑀻𑀳𑀺 𑀫𑀸𑀮𑀼𑀯𑀸𑀮𑀢𑀸𑀳𑀺 𑀉𑀤𑁆𑀥𑀲𑁆𑀢𑁄 𑀧𑀭𑀺𑀬𑁄𑀦𑀤𑁆𑀥𑁄. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑁆𑀤𑀸𑀮-𑀧𑀺𑀝𑀓𑀁 [𑀓𑀼𑀤𑁆𑀤𑀸𑀮𑀧𑀺𑀝𑀓𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀆𑀤𑀸𑀬. 𑀲𑁄 𑀢𑀁 𑀫𑀸𑀮𑀼𑀯𑀸𑀮𑀢𑀁 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬, 𑀫𑀽𑀮𑁂 𑀙𑁂𑀢𑁆𑀯𑀸 𑀧𑀮𑀺𑀔𑀡𑁂𑀬𑁆𑀬, 𑀧𑀮𑀺𑀔𑀡𑀺𑀢𑁆𑀯𑀸 𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀉𑀲𑀻𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀺 [𑀉𑀲𑀻𑀭𑀦𑀸𑀴𑀫𑀢𑁆𑀢𑀸𑀦𑀺𑀧𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀲𑁄 𑀢𑀁 𑀫𑀸𑀮𑀼𑀯𑀸𑀮𑀢𑀁 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑁂𑀬𑁆𑀬, 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀢𑁆𑀯𑀸 𑀨𑀸𑀮𑁂𑀬𑁆𑀬, 𑀨𑀸𑀮𑁂𑀢𑁆𑀯𑀸 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑁂𑀬𑁆𑀬, 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑀺𑀢𑁆𑀯𑀸 𑀯𑀸𑀢𑀸𑀢𑀧𑁂 𑀯𑀺𑀲𑁄𑀲𑁂𑀬𑁆𑀬, 𑀯𑀸𑀢𑀸𑀢𑀧𑁂 𑀯𑀺𑀲𑁄𑀲𑁂𑀢𑁆𑀯𑀸 𑀅𑀕𑁆𑀕𑀺𑀦𑀸 𑀟𑀳𑁂𑀬𑁆𑀬, 𑀅𑀕𑁆𑀕𑀺𑀦𑀸 𑀟𑀳𑀺𑀢𑁆𑀯𑀸 𑀫𑀲𑀺𑀁 𑀓𑀭𑁂𑀬𑁆𑀬, 𑀫𑀲𑀺𑀁 𑀓𑀭𑀺𑀢𑁆𑀯𑀸 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀡𑁂𑀬𑁆𑀬 𑀦𑀤𑀺𑀬𑀸 𑀯𑀸 𑀲𑀻𑀖𑀲𑁄𑀢𑀸𑀬 𑀧𑀯𑀸𑀳𑁂𑀬𑁆𑀬. 𑀏𑀯𑀫𑀲𑁆𑀲 [𑀏𑀯𑀫𑀲𑁆𑀲𑀼 (𑀲𑀻.), 𑀏𑀯𑀲𑁆𑀲𑀼 (𑀓.)] 𑀢𑀸, 𑀪𑀺𑀓𑁆𑀔𑀯𑁂, 𑀫𑀸𑀮𑀼𑀯𑀸𑀮𑀢𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀮𑁄𑀪𑀚𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

‘‘𑀤𑁄𑀲𑀚𑀸 …𑀧𑁂… 𑀫𑁄𑀳𑀚𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀅𑀯𑀺𑀖𑀸𑀢𑀁 𑀅𑀦𑀼𑀧𑀸𑀬𑀸𑀲𑀁 𑀅𑀧𑀭𑀺𑀴𑀸𑀳𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺. 𑀦𑀯𑀫𑀁.