(𑁭) 𑁨. 𑀫𑀳𑀸𑀯𑀕𑁆𑀕𑁄

𑁧. 𑀢𑀺𑀢𑁆𑀣𑀸𑀬𑀢𑀦𑀸𑀤𑀺𑀲𑀼𑀢𑁆𑀢𑀁

𑁬𑁨. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀣𑀸𑀬𑀢𑀦𑀸𑀦𑀺 𑀬𑀸𑀦𑀺 𑀧𑀡𑁆𑀟𑀺𑀢𑁂𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸𑀦𑀺 [𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑀸𑀦𑀺 (𑀲𑁆𑀬𑀸. 𑀓𑀁. 𑀓.)] 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑀸𑀦𑀺 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀸𑀦𑀺 𑀧𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀅𑀓𑀺𑀭𑀺𑀬𑀸𑀬 𑀲𑀡𑁆𑀞𑀳𑀦𑁆𑀢𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀽’𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸’’’𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’𑀢𑀺, 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’𑀢𑀺? 𑀢𑁂 𑀘 𑀫𑁂 [𑀢𑁂 𑀘𑁂 𑀫𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑀸’𑀢𑀺 [𑀆𑀫𑁄𑀢𑀺 (𑀲𑀻.)] 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦𑀳𑀸𑀬𑀲𑁆𑀫𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀫𑀼𑀲𑀸𑀯𑀸𑀤𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀧𑀺𑀲𑀼𑀡𑀯𑀸𑀘𑀸 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀨𑀭𑀼𑀲𑀯𑀸𑀘𑀸 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀅𑀪𑀺𑀚𑁆𑀛𑀸𑀮𑀼𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼’’’.

‘‘𑀧𑀼𑀩𑁆𑀩𑁂𑀓𑀢𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀢𑀁 𑀦 𑀳𑁄𑀢𑀺 𑀙𑀦𑁆𑀤𑁄 𑀯𑀸 𑀯𑀸𑀬𑀸𑀫𑁄 𑀯𑀸 𑀇𑀤𑀁 𑀯𑀸 𑀓𑀭𑀡𑀻𑀬𑀁 𑀇𑀤𑀁 𑀯𑀸 𑀅𑀓𑀭𑀡𑀻𑀬𑀦𑁆𑀢𑀺. 𑀇𑀢𑀺 𑀓𑀭𑀡𑀻𑀬𑀸𑀓𑀭𑀡𑀻𑀬𑁂 𑀔𑁄 𑀧𑀦 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀦𑀸𑀭𑀓𑁆𑀔𑀸𑀦𑀁 𑀯𑀺𑀳𑀭𑀢𑀁 𑀦 𑀳𑁄𑀢𑀺 𑀧𑀘𑁆𑀘𑀢𑁆𑀢𑀁 𑀲𑀳𑀥𑀫𑁆𑀫𑀺𑀓𑁄 𑀲𑀫𑀡𑀯𑀸𑀤𑁄. 𑀅𑀬𑀁 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀯𑀁𑀯𑀸𑀤𑀻𑀲𑀼 𑀏𑀯𑀁𑀤𑀺𑀝𑁆𑀞𑀻𑀲𑀼 𑀧𑀞𑀫𑁄 𑀲𑀳𑀥𑀫𑁆𑀫𑀺𑀓𑁄 𑀦𑀺𑀕𑁆𑀕𑀳𑁄 𑀳𑁄𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀽’𑀢𑀺, 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁𑀯𑀸𑀤𑀺𑀦𑁄 𑀏𑀯𑀤𑀺𑀝𑁆𑀞𑀺𑀦𑁄 𑁋 𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀽’𑀢𑀺? 𑀢𑁂 𑀘 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑀸’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦𑀳𑀸𑀬𑀲𑁆𑀫𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀫𑀼𑀲𑀸𑀯𑀸𑀤𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀧𑀺𑀲𑀼𑀡𑀯𑀸𑀘𑀸 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀨𑀭𑀼𑀲𑀯𑀸𑀘𑀸 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀅𑀪𑀺𑀚𑁆𑀛𑀸𑀮𑀼𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼’’’.

‘‘𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀢𑀁 𑀦 𑀳𑁄𑀢𑀺 𑀙𑀦𑁆𑀤𑁄 𑀯𑀸 𑀯𑀸𑀬𑀸𑀫𑁄 𑀯𑀸 𑀇𑀤𑀁 𑀯𑀸 𑀓𑀭𑀡𑀻𑀬𑀁 𑀇𑀤𑀁 𑀯𑀸 𑀅𑀓𑀭𑀡𑀻𑀬𑀦𑁆𑀢𑀺. 𑀇𑀢𑀺 𑀓𑀭𑀡𑀻𑀬𑀸𑀓𑀭𑀡𑀻𑀬𑁂 𑀔𑁄 𑀧𑀦 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀦𑀸𑀭𑀓𑁆𑀔𑀸𑀦𑀁 𑀯𑀺𑀳𑀭𑀢𑀁 𑀦 𑀳𑁄𑀢𑀺 𑀧𑀘𑁆𑀘𑀢𑁆𑀢𑀁 𑀲𑀳𑀥𑀫𑁆𑀫𑀺𑀓𑁄 𑀲𑀫𑀡𑀯𑀸𑀤𑁄. 𑀅𑀬𑀁 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀯𑀁𑀯𑀸𑀤𑀻𑀲𑀼 𑀏𑀯𑀁𑀤𑀺𑀝𑁆𑀞𑀻𑀲𑀼 𑀤𑀼𑀢𑀺𑀬𑁄 𑀲𑀳𑀥𑀫𑁆𑀫𑀺𑀓𑁄 𑀦𑀺𑀕𑁆𑀕𑀳𑁄 𑀳𑁄𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀬𑀁 𑀓𑀺𑀁 𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸’𑀢𑀺, 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 𑀬𑀁 𑀓𑀺𑀁 𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀲𑀩𑁆𑀩𑀁 𑀢𑀁 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸’𑀢𑀺? 𑀢𑁂 𑀘 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑀸’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦𑀳𑀸𑀬𑀲𑁆𑀫𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸’’’.

‘‘𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀁 [𑀅𑀳𑁂𑀢𑀼𑀁 (𑀲𑀻.), 𑀅𑀳𑁂𑀢𑀼 (𑀲𑁆𑀬𑀸. 𑀓𑀁.), 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸 (𑀧𑀻.), 𑀅𑀳𑁂𑀢𑀼𑀁 𑀅𑀧𑁆𑀧𑀘𑁆𑀘𑀬𑀁 (𑀓.)] 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀢𑀁 𑀦 𑀳𑁄𑀢𑀺 𑀙𑀦𑁆𑀤𑁄 𑀯𑀸 𑀯𑀸𑀬𑀸𑀫𑁄 𑀯𑀸 𑀇𑀤𑀁 𑀯𑀸 𑀓𑀭𑀡𑀻𑀬𑀁 𑀇𑀤𑀁 𑀯𑀸 𑀅𑀓𑀭𑀡𑀻𑀬𑀦𑁆𑀢𑀺. 𑀇𑀢𑀺 𑀓𑀭𑀡𑀻𑀬𑀸𑀓𑀭𑀡𑀻𑀬𑁂 𑀔𑁄 𑀧𑀦 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀦𑀸𑀭𑀓𑁆𑀔𑀸𑀦𑀁 𑀯𑀺𑀳𑀭𑀢𑀁 𑀦 𑀳𑁄𑀢𑀺 𑀧𑀘𑁆𑀘𑀢𑁆𑀢𑀁 𑀲𑀳𑀥𑀫𑁆𑀫𑀺𑀓𑁄 𑀲𑀫𑀡𑀯𑀸𑀤𑁄. 𑀅𑀬𑀁 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀯𑀁𑀯𑀸𑀤𑀻𑀲𑀼 𑀏𑀯𑀁𑀤𑀺𑀝𑁆𑀞𑀻𑀲𑀼 𑀢𑀢𑀺𑀬𑁄 𑀲𑀳𑀥𑀫𑁆𑀫𑀺𑀓𑁄 𑀦𑀺𑀕𑁆𑀕𑀳𑁄 𑀳𑁄𑀢𑀺.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺 𑀬𑀸𑀦𑀺 𑀧𑀡𑁆𑀟𑀺𑀢𑁂𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸𑀦𑀺 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑀸𑀦𑀺 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀸𑀦𑀺 𑀧𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀅𑀓𑀺𑀭𑀺𑀬𑀸𑀬 𑀲𑀡𑁆𑀞𑀳𑀦𑁆𑀢𑀺.

‘‘𑀅𑀬𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺? 𑀇𑀫𑀸 𑀙 𑀥𑀸𑀢𑀼𑀬𑁄𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀇𑀫𑀸𑀦𑀺 𑀙 𑀨𑀲𑁆𑀲𑀸𑀬𑀢𑀦𑀸𑀦𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀇𑀫𑁂 𑀅𑀝𑁆𑀞𑀸𑀭𑀲 𑀫𑀦𑁄𑀧𑀯𑀺𑀘𑀸𑀭𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺.

‘‘𑀇𑀫𑀸 𑀙 𑀥𑀸𑀢𑀼𑀬𑁄𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀥𑀸𑀢𑀼𑀬𑁄 𑁋 𑀧𑀣𑀯𑀻𑀥𑀸𑀢𑀼, 𑀆𑀧𑁄𑀥𑀸𑀢𑀼, 𑀢𑁂𑀚𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼, 𑀆𑀓𑀸𑀲𑀥𑀸𑀢𑀼, 𑀯𑀺𑀜𑁆𑀜𑀸𑀡𑀥𑀸𑀢𑀼. 𑀇𑀫𑀸 𑀙 𑀥𑀸𑀢𑀼𑀬𑁄𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀇𑀫𑀸𑀦𑀺 𑀙 𑀨𑀲𑁆𑀲𑀸𑀬𑀢𑀦𑀸𑀦𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀼 𑀨𑀲𑁆𑀲𑀸𑀬𑀢𑀦𑀁, 𑀲𑁄𑀢𑀁 𑀨𑀲𑁆𑀲𑀸𑀬𑀢𑀦𑀁, 𑀖𑀸𑀦𑀁 𑀨𑀲𑁆𑀲𑀸𑀬𑀢𑀦𑀁, 𑀚𑀺𑀯𑁆𑀳𑀸 𑀨𑀲𑁆𑀲𑀸𑀬𑀢𑀦𑀁, 𑀓𑀸𑀬𑁄 𑀨𑀲𑁆𑀲𑀸𑀬𑀢𑀦𑀁, 𑀫𑀦𑁄 𑀨𑀲𑁆𑀲𑀸𑀬𑀢𑀦𑀁. 𑀇𑀫𑀸𑀦𑀺 𑀙 𑀨𑀲𑁆𑀲𑀸𑀬𑀢𑀦𑀸𑀦𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀇𑀫𑁂 𑀅𑀝𑁆𑀞𑀸𑀭𑀲 𑀫𑀦𑁄𑀧𑀯𑀺𑀘𑀸𑀭𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺. 𑀇𑀫𑁂 𑀅𑀝𑁆𑀞𑀸𑀭𑀲 𑀫𑀦𑁄𑀧𑀯𑀺𑀘𑀸𑀭𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀙𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀥𑀸𑀢𑀽𑀦𑀁 𑀉𑀧𑀸𑀤𑀸𑀬 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺; 𑀑𑀓𑁆𑀓𑀦𑁆𑀢𑀺𑀬𑀸 𑀲𑀢𑀺 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸. 𑀯𑁂𑀤𑀺𑀬𑀫𑀸𑀦𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀜𑀧𑁂𑀫𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀧𑀜𑁆𑀜𑀧𑁂𑀫𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀧𑀜𑁆𑀜𑀧𑁂𑀫𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀧𑀜𑁆𑀜𑀧𑁂𑀫𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, ( ) [(𑀩𑁆𑀬𑀸𑀥𑀺𑀧𑀺 𑀤𑀼𑀓𑁆𑀔𑁄) (𑀲𑀻. 𑀧𑀻. 𑀓.) 𑀅𑀝𑁆𑀞𑀓𑀣𑀸𑀬 𑀲𑀁𑀲𑀦𑁆𑀤𑁂𑀢𑀩𑁆𑀩𑀁 𑀯𑀺𑀲𑀼𑀤𑁆𑀥𑀺. 𑁨.𑁫𑁩𑁭] 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, (𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄,) [(𑀦𑀢𑁆𑀣𑀺 𑀓𑀢𑁆𑀣𑀘𑀺)] 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑁆𑀬𑀸. 𑀓𑀁.)] 𑀅𑀭𑀺𑀬𑀲𑀘𑁆𑀘𑀁? 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑁆𑀬𑀸. 𑀓𑀁.)] 𑀅𑀭𑀺𑀬𑀲𑀘𑁆𑀘𑀁? 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁. ‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’𑀢𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀦𑀺𑀕𑁆𑀕𑀳𑀺𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄 𑀅𑀦𑀼𑀧𑀯𑀚𑁆𑀚𑁄 𑀅𑀧𑁆𑀧𑀝𑀺𑀓𑀼𑀝𑁆𑀞𑁄 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀧𑀞𑀫𑀁.

𑁬𑁩. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀻𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀳𑁄𑀢𑀺 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀫𑀳𑀸𑀅𑀕𑁆𑀕𑀺𑀟𑀸𑀳𑁄 𑀯𑀼𑀝𑁆𑀞𑀸𑀢𑀺. 𑀫𑀳𑀸𑀅𑀕𑁆𑀕𑀺𑀟𑀸𑀳𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀺𑀢𑁂 𑀢𑁂𑀦 𑀕𑀸𑀫𑀸𑀧𑀺 𑀟𑀬𑁆𑀳𑀦𑁆𑀢𑀺 𑀦𑀺𑀕𑀫𑀸𑀧𑀺 𑀟𑀬𑁆𑀳𑀦𑁆𑀢𑀺 𑀦𑀕𑀭𑀸𑀧𑀺 𑀟𑀬𑁆𑀳𑀦𑁆𑀢𑀺. 𑀕𑀸𑀫𑁂𑀲𑀼𑀧𑀺 𑀟𑀬𑁆𑀳𑀫𑀸𑀦𑁂𑀲𑀼 𑀦𑀺𑀕𑀫𑁂𑀲𑀼𑀧𑀺 𑀟𑀬𑁆𑀳𑀫𑀸𑀦𑁂𑀲𑀼 𑀦𑀕𑀭𑁂𑀲𑀼𑀧𑀺 𑀟𑀬𑁆𑀳𑀫𑀸𑀦𑁂𑀲𑀼 𑀢𑀢𑁆𑀣 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀦𑀧𑁆𑀧𑀝𑀺𑀮𑀪𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀦𑀧𑁆𑀧𑀝𑀺𑀮𑀪𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀁 𑀪𑀬𑀦𑁆𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀢𑀺. 𑀫𑀳𑀸𑀫𑁂𑀖𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀺𑀢𑁂 𑀫𑀳𑀸𑀉𑀤𑀓𑀯𑀸𑀳𑀓𑁄 𑀲𑀜𑁆𑀚𑀸𑀬𑀢𑀺. 𑀫𑀳𑀸𑀉𑀤𑀓𑀯𑀸𑀳𑀓𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀜𑁆𑀚𑀸𑀬𑀦𑁆𑀢𑁂 𑀢𑁂𑀦 𑀕𑀸𑀫𑀸𑀧𑀺 𑀯𑀼𑀬𑁆𑀳𑀦𑁆𑀢𑀺 𑀦𑀺𑀕𑀫𑀸𑀧𑀺 𑀯𑀼𑀬𑁆𑀳𑀦𑁆𑀢𑀺 𑀦𑀕𑀭𑀸𑀧𑀺 𑀯𑀼𑀬𑁆𑀳𑀦𑁆𑀢𑀺. 𑀕𑀸𑀫𑁂𑀲𑀼𑀧𑀺 𑀯𑀼𑀬𑁆𑀳𑀫𑀸𑀦𑁂𑀲𑀼 𑀦𑀺𑀕𑀫𑁂𑀲𑀼𑀧𑀺 𑀯𑀼𑀬𑁆𑀳𑀫𑀸𑀦𑁂𑀲𑀼 𑀦𑀕𑀭𑁂𑀲𑀼𑀧𑀺 𑀯𑀼𑀬𑁆𑀳𑀫𑀸𑀦𑁂𑀲𑀼 𑀢𑀢𑁆𑀣 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀦𑀧𑁆𑀧𑀝𑀺𑀮𑀪𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀦𑀧𑁆𑀧𑀝𑀺𑀮𑀪𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀁 𑀪𑀬𑀦𑁆𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀪𑀬𑀁 𑀳𑁄𑀢𑀺 𑀅𑀝𑀯𑀺𑀲𑀗𑁆𑀓𑁄𑀧𑁄, 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸 𑀚𑀸𑀦𑀧𑀤𑀸 𑀧𑀭𑀺𑀬𑀸𑀬𑀦𑁆𑀢𑀺. 𑀪𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀝𑀯𑀺𑀲𑀗𑁆𑀓𑁄𑀧𑁂 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑁂𑀲𑀼 𑀚𑀸𑀦𑀧𑀤𑁂𑀲𑀼 𑀧𑀭𑀺𑀬𑀸𑀬𑀦𑁆𑀢𑁂𑀲𑀼 𑀢𑀢𑁆𑀣 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀦𑀧𑁆𑀧𑀝𑀺𑀮𑀪𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀦𑀧𑁆𑀧𑀝𑀺𑀮𑀪𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀁 𑀪𑀬𑀦𑁆𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀻𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺.

‘‘𑀢𑀸𑀦𑀺 𑀔𑁄 𑀧𑀦𑀺𑀫𑀸𑀦𑀺 [𑀇𑀫𑀸𑀦𑀺 𑀔𑁄 (𑀲𑀻.), 𑀇𑀫𑀸𑀦𑀺 𑀔𑁄 𑀧𑀦 (𑀓.)], 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺𑀬𑁂𑀯 𑀪𑀬𑀸𑀦𑀺 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀻𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀳𑁄𑀢𑀺 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀫𑀳𑀸𑀅𑀕𑁆𑀕𑀺𑀟𑀸𑀳𑁄 𑀯𑀼𑀝𑁆𑀞𑀸𑀢𑀺. 𑀫𑀳𑀸𑀅𑀕𑁆𑀕𑀺𑀟𑀸𑀳𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀺𑀢𑁂 𑀢𑁂𑀦 𑀕𑀸𑀫𑀸𑀧𑀺 𑀟𑀬𑁆𑀳𑀦𑁆𑀢𑀺 𑀦𑀺𑀕𑀫𑀸𑀧𑀺 𑀟𑀬𑁆𑀳𑀦𑁆𑀢𑀺 𑀦𑀕𑀭𑀸𑀧𑀺 𑀟𑀬𑁆𑀳𑀦𑁆𑀢𑀺. 𑀕𑀸𑀫𑁂𑀲𑀼𑀧𑀺 𑀟𑀬𑁆𑀳𑀫𑀸𑀦𑁂𑀲𑀼 𑀦𑀺𑀕𑀫𑁂𑀲𑀼𑀧𑀺 𑀟𑀬𑁆𑀳𑀫𑀸𑀦𑁂𑀲𑀼 𑀦𑀕𑀭𑁂𑀲𑀼𑀧𑀺 𑀟𑀬𑁆𑀳𑀫𑀸𑀦𑁂𑀲𑀼 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀝𑀺𑀮𑀪𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀧𑀝𑀺𑀮𑀪𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀁𑀬𑁂𑀯 𑀪𑀬𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀁 𑀪𑀬𑀦𑁆𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀢𑀺. 𑀫𑀳𑀸𑀫𑁂𑀖𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀺𑀢𑁂 𑀫𑀳𑀸𑀉𑀤𑀓𑀯𑀸𑀳𑀓𑁄 𑀲𑀜𑁆𑀚𑀸𑀬𑀢𑀺. 𑀫𑀳𑀸𑀉𑀤𑀓𑀯𑀸𑀳𑀓𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀜𑁆𑀚𑀸𑀢𑁂 𑀢𑁂𑀦 𑀕𑀸𑀫𑀸𑀧𑀺 𑀯𑀼𑀬𑁆𑀳𑀦𑁆𑀢𑀺 𑀦𑀺𑀕𑀫𑀸𑀧𑀺 𑀯𑀼𑀬𑁆𑀳𑀦𑁆𑀢𑀺 𑀦𑀕𑀭𑀸𑀧𑀺 𑀯𑀼𑀬𑁆𑀳𑀦𑁆𑀢𑀺. 𑀕𑀸𑀫𑁂𑀲𑀼𑀧𑀺 𑀯𑀼𑀬𑁆𑀳𑀫𑀸𑀦𑁂𑀲𑀼 𑀦𑀺𑀕𑀫𑁂𑀲𑀼𑀧𑀺 𑀯𑀼𑀬𑁆𑀳𑀫𑀸𑀦𑁂𑀲𑀼 𑀦𑀕𑀭𑁂𑀲𑀼𑀧𑀺 𑀯𑀼𑀬𑁆𑀳𑀫𑀸𑀦𑁂𑀲𑀼 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀝𑀺𑀮𑀪𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀧𑀝𑀺𑀮𑀪𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀁𑀬𑁂𑀯 𑀪𑀬𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀁 𑀪𑀬𑀦𑁆𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀪𑀬𑀁 𑀳𑁄𑀢𑀺 𑀅𑀝𑀯𑀺𑀲𑀗𑁆𑀓𑁄𑀧𑁄, 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸 𑀚𑀸𑀦𑀧𑀤𑀸 𑀧𑀭𑀺𑀬𑀸𑀬𑀦𑁆𑀢𑀺. 𑀪𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀝𑀯𑀺𑀲𑀗𑁆𑀓𑁄𑀧𑁂 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑁂𑀲𑀼 𑀚𑀸𑀦𑀧𑀤𑁂𑀲𑀼 𑀧𑀭𑀺𑀬𑀸𑀬𑀦𑁆𑀢𑁂𑀲𑀼 𑀳𑁄𑀢𑀺 𑀲𑁄 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀝𑀺𑀮𑀪𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀧𑀝𑀺𑀮𑀪𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀁𑀬𑁂𑀯 𑀪𑀬𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀁 𑀪𑀬𑀦𑁆𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺. ‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺𑀬𑁂𑀯 𑀪𑀬𑀸𑀦𑀺 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀻𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺’’.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀚𑀭𑀸𑀪𑀬𑀁, 𑀩𑁆𑀬𑀸𑀥𑀺𑀪𑀬𑀁, 𑀫𑀭𑀡𑀪𑀬𑀦𑁆𑀢𑀺. 𑀦, 𑀪𑀺𑀓𑁆𑀔𑀯𑁂, 𑀫𑀸𑀢𑀸 𑀧𑀼𑀢𑁆𑀢𑀁 𑀚𑀻𑀭𑀫𑀸𑀦𑀁 𑀏𑀯𑀁 𑀮𑀪𑀢𑀺 𑁋 ‘𑀅𑀳𑀁 𑀚𑀻𑀭𑀸𑀫𑀺, 𑀫𑀸 𑀫𑁂 𑀧𑀼𑀢𑁆𑀢𑁄 𑀚𑀻𑀭𑀻’𑀢𑀺; 𑀧𑀼𑀢𑁆𑀢𑁄 𑀯𑀸 𑀧𑀦 𑀫𑀸𑀢𑀭𑀁 𑀚𑀻𑀭𑀫𑀸𑀦𑀁 𑀦 𑀏𑀯𑀁 𑀮𑀪𑀢𑀺 𑁋 ‘𑀅𑀳𑀁 𑀚𑀻𑀭𑀸𑀫𑀺, 𑀫𑀸 𑀫𑁂 𑀫𑀸𑀢𑀸 𑀚𑀻𑀭𑀻’’’𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀢𑀸 𑀧𑀼𑀢𑁆𑀢𑀁 𑀩𑁆𑀬𑀸𑀥𑀺𑀬𑀫𑀸𑀦𑀁 𑀏𑀯𑀁 𑀮𑀪𑀢𑀺 𑁋 ‘𑀅𑀳𑀁 𑀩𑁆𑀬𑀸𑀥𑀺𑀬𑀸𑀫𑀺, 𑀫𑀸 𑀫𑁂 𑀧𑀼𑀢𑁆𑀢𑁄 𑀩𑁆𑀬𑀸𑀥𑀺𑀬𑀻’𑀢𑀺; 𑀧𑀼𑀢𑁆𑀢𑁄 𑀯𑀸 𑀧𑀦 𑀫𑀸𑀢𑀭𑀁 𑀩𑁆𑀬𑀸𑀥𑀺𑀬𑀫𑀸𑀦𑀁 𑀦 𑀏𑀯𑀁 𑀮𑀪𑀢𑀺 𑁋 ‘𑀅𑀳𑀁 𑀩𑁆𑀬𑀸𑀥𑀺𑀬𑀸𑀫𑀺, 𑀫𑀸 𑀫𑁂 𑀫𑀸𑀢𑀸 𑀩𑁆𑀬𑀸𑀥𑀺𑀬𑀻’’’𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀢𑀸 𑀧𑀼𑀢𑁆𑀢𑀁 𑀫𑀻𑀬𑀫𑀸𑀦𑀁 𑀏𑀯𑀁 𑀮𑀪𑀢𑀺 𑁋 ‘𑀅𑀳𑀁 𑀫𑀻𑀬𑀸𑀫𑀺, 𑀫𑀸 𑀫𑁂 𑀧𑀼𑀢𑁆𑀢𑁄 𑀫𑀻𑀬𑀻’𑀢𑀺; 𑀧𑀼𑀢𑁆𑀢𑁄 𑀯𑀸 𑀧𑀦 𑀫𑀸𑀢𑀭𑀁 𑀫𑀻𑀬𑀫𑀸𑀦𑀁 𑀦 𑀏𑀯𑀁 𑀮𑀪𑀢𑀺 𑁋 ‘𑀅𑀳𑀁 𑀫𑀻𑀬𑀸𑀫𑀺, 𑀫𑀸 𑀫𑁂 𑀫𑀸𑀢𑀸 𑀫𑀻𑀬𑀻’𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀻’’𑀢𑀺.

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀁 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀁 𑀪𑀬𑀸𑀦𑀁 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀁 𑀪𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀓𑀢𑀫𑀸 𑀘 𑀧𑀝𑀺𑀧𑀤𑀸 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀁 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀁 𑀪𑀬𑀸𑀦𑀁 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀁 𑀪𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀁 𑀲𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀁 𑀪𑀬𑀸𑀦𑀁 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀁 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀁 𑀪𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀯𑁂𑀦𑀸𑀕𑀧𑀼𑀭𑀲𑀼𑀢𑁆𑀢𑀁

𑁬𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀯𑁂𑀦𑀸𑀕𑀧𑀼𑀭𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀯𑁂𑀦𑀸𑀕𑀧𑀼𑀭𑀺𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀯𑁂𑀦𑀸𑀕𑀧𑀼𑀭𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺 [𑀪𑀕𑀯𑀸 (𑀲𑀻. 𑀲𑁆𑀬𑀸 𑀓𑀁. 𑀧𑀻.) 𑀇𑀤𑀁 𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀅𑀝𑁆𑀞𑀓𑀣𑀸𑀬 𑀲𑀁𑀲𑀦𑁆𑀤𑁂𑀢𑀩𑁆𑀩𑀁 𑀧𑀸𑀭𑀸. 𑁧; 𑀤𑀻. 𑀦𑀺. 𑁧.𑁨𑁫𑁫 𑀧𑀲𑁆𑀲𑀺𑀢𑀩𑁆𑀩𑀁]. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀯𑁂𑀦𑀸𑀕𑀧𑀼𑀭𑀺𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑁂𑀦𑀸𑀕𑀧𑀼𑀭𑀺𑀓𑁄 𑀯𑀘𑁆𑀙𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀬𑀸𑀯𑀜𑁆𑀘𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀲𑀸𑀭𑀤𑀁 𑀩𑀤𑀭𑀧𑀡𑁆𑀟𑀼𑀁 [𑀫𑀡𑁆𑀟𑀁 (𑀓.)] 𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺 𑀧𑀭𑀺𑀬𑁄𑀤𑀸𑀢𑀁; 𑀏𑀯𑀫𑁂𑀯𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀢𑀸𑀮𑀧𑀓𑁆𑀓𑀁 𑀲𑀫𑁆𑀧𑀢𑀺 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑀁 [𑀫𑀼𑀢𑁆𑀢𑀁 (𑀲𑀻. 𑀧𑀻. 𑀓.)] 𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺 𑀧𑀭𑀺𑀬𑁄𑀤𑀸𑀢𑀁; 𑀏𑀯𑀫𑁂𑀯𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑁂𑀓𑁆𑀔𑀁 [𑀦𑀺𑀓𑁆𑀔𑀁-𑀇𑀢𑀺𑀧𑀺 (𑀫. 𑀦𑀺. 𑁩.𑁧𑁬𑁮)] 𑀚𑀫𑁆𑀩𑁄𑀦𑀤𑀁 𑀤𑀓𑁆𑀔𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑀼𑀧𑀭𑀺𑀓𑀫𑁆𑀫𑀓𑀢𑀁 𑀉𑀓𑁆𑀓𑀸𑀫𑀼𑀔𑁂 𑀲𑀼𑀓𑀼𑀲𑀮𑀲𑀫𑁆𑀧𑀳𑀝𑁆𑀞𑀁 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑀁 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑀺 𑀘; 𑀏𑀯𑀫𑁂𑀯𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀬𑀸𑀦𑀺 𑀢𑀸𑀦𑀺, 𑀪𑁄 𑀕𑁄𑀢𑀫, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺 𑀧𑀮𑁆𑀮𑀗𑁆𑀓𑁄 𑀕𑁄𑀦𑀓𑁄 𑀘𑀺𑀢𑁆𑀢𑀓𑁄 𑀧𑀝𑀺𑀓𑀸 𑀧𑀝𑀮𑀺𑀓𑀸 𑀢𑀽𑀮𑀺𑀓𑀸 𑀯𑀺𑀓𑀢𑀺𑀓𑀸 𑀉𑀤𑁆𑀤𑀮𑁄𑀫𑀻 𑀏𑀓𑀦𑁆𑀢𑀮𑁄𑀫𑀻 𑀓𑀝𑁆𑀝𑀺𑀲𑁆𑀲𑀁 𑀓𑁄𑀲𑁂𑀬𑁆𑀬𑀁 𑀓𑀼𑀢𑁆𑀢𑀓𑀁 𑀳𑀢𑁆𑀣𑀢𑁆𑀣𑀭𑀁 𑀅𑀲𑁆𑀲𑀢𑁆𑀣𑀭𑀁 𑀭𑀣𑀢𑁆𑀣𑀭𑀁 𑀅𑀚𑀺𑀦𑀧𑁆𑀧𑀯𑁂𑀡𑀻 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁 [𑀓𑀸𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁 (𑀲𑀻.)] 𑀲𑀉𑀢𑁆𑀢𑀭𑀘𑁆𑀙𑀤𑀁 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁, 𑀏𑀯𑀭𑀽𑀧𑀸𑀦𑀁 𑀦𑀽𑀦 𑀪𑀯𑀁 𑀕𑁄𑀢𑀫𑁄 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺.

‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺, 𑀩𑁆𑀭𑀸𑀳𑁆𑀫𑀡, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺 𑀧𑀮𑁆𑀮𑀗𑁆𑀓𑁄 𑀕𑁄𑀦𑀓𑁄 𑀘𑀺𑀢𑁆𑀢𑀓𑁄 𑀧𑀝𑀺𑀓𑀸 𑀧𑀝𑀮𑀺𑀓𑀸 𑀢𑀽𑀮𑀺𑀓𑀸 𑀯𑀺𑀓𑀢𑀺𑀓𑀸 𑀉𑀤𑁆𑀤𑀮𑁄𑀫𑀻 𑀏𑀓𑀦𑁆𑀢𑀮𑁄𑀫𑀻 𑀓𑀝𑁆𑀝𑀺𑀲𑁆𑀲𑀁 𑀓𑁄𑀲𑁂𑀬𑁆𑀬𑀁 𑀓𑀼𑀢𑁆𑀢𑀓𑀁 𑀳𑀢𑁆𑀣𑀢𑁆𑀣𑀭𑀁 𑀅𑀲𑁆𑀲𑀢𑁆𑀣𑀭𑀁 𑀭𑀣𑀢𑁆𑀣𑀭𑀁 𑀅𑀚𑀺𑀦𑀧𑁆𑀧𑀯𑁂𑀡𑀻 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁 𑀲𑀉𑀢𑁆𑀢𑀭𑀘𑁆𑀙𑀤𑀁 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁. 𑀤𑀼𑀮𑁆𑀮𑀪𑀸𑀦𑀺 𑀢𑀸𑀦𑀺 𑀧𑀩𑁆𑀩𑀚𑀺𑀢𑀸𑀦𑀁 𑀮𑀤𑁆𑀥𑀸 𑀘 𑀧𑀦 [𑀮𑀤𑁆𑀥𑀸𑀦𑀺 𑀘 (𑀲𑀻. 𑀲𑁆𑀬𑀸. 𑀓𑀁.), 𑀮𑀤𑁆𑀥𑀸 𑀘 (𑀧𑀻.)] 𑀦 𑀓𑀧𑁆𑀧𑀦𑁆𑀢𑀺.

‘‘𑀢𑀻𑀡𑀺 𑀔𑁄, 𑀇𑀫𑀸𑀦𑀺, 𑀩𑁆𑀭𑀸𑀳𑁆𑀫𑀡, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺, 𑀬𑁂𑀲𑀸𑀳𑀁 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀓𑀢𑀫𑀸𑀦𑀺 𑀢𑀻𑀡𑀺? 𑀤𑀺𑀩𑁆𑀩𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀩𑁆𑀭𑀳𑁆𑀫𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀅𑀭𑀺𑀬𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁. 𑀇𑀫𑀸𑀦𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀻𑀡𑀺 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺, 𑀬𑁂𑀲𑀸𑀳𑀁 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺.

‘‘𑀓𑀢𑀫𑀁 𑀧𑀦 𑀢𑀁, 𑀪𑁄 𑀕𑁄𑀢𑀫, 𑀤𑀺𑀩𑁆𑀩𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀬𑀲𑁆𑀲 𑀪𑀯𑀁 𑀕𑁄𑀢𑀫𑁄 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺? ‘‘𑀇𑀥𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺, 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀸𑀫𑀺. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑀦𑀦𑁆𑀢𑀜𑁆𑀜𑁂𑀯 𑀧𑀯𑀺𑀲𑀸𑀫𑀺 [𑀧𑀘𑀸𑀭𑀬𑀸𑀫𑀺 (𑀲𑀻. 𑀲𑁆𑀬𑀸. 𑀓𑀁.)]. 𑀲𑁄 𑀬𑀤𑁂𑀯 𑀢𑀢𑁆𑀣 𑀳𑁄𑀦𑁆𑀢𑀺 𑀢𑀺𑀡𑀸𑀦𑀺 𑀯𑀸 𑀧𑀡𑁆𑀡𑀸𑀦𑀺 𑀯𑀸 𑀢𑀸𑀦𑀺 𑀏𑀓𑀚𑁆𑀛𑀁 𑀲𑀗𑁆𑀖𑀭𑀺𑀢𑁆𑀯𑀸 𑀦𑀺𑀲𑀻𑀤𑀸𑀫𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀸𑀫𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀫𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀘𑀗𑁆𑀓𑀫𑀸𑀫𑀺, 𑀤𑀺𑀩𑁆𑀩𑁄 𑀫𑁂 𑀏𑀲𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑁄 𑀳𑁄𑀢𑀺. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀢𑀺𑀝𑁆𑀞𑀸𑀫𑀺, 𑀤𑀺𑀩𑁆𑀩𑀁 𑀫𑁂 𑀏𑀢𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀞𑀸𑀦𑀁 𑀳𑁄𑀢𑀺. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀦𑀺𑀲𑀻𑀤𑀸𑀫𑀺, 𑀤𑀺𑀩𑁆𑀩𑀁 𑀫𑁂 𑀏𑀢𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀲𑀦𑀁 𑀳𑁄𑀢𑀺. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀤𑀺𑀩𑁆𑀩𑀁 𑀫𑁂 𑀏𑀢𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀳𑁄𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑀺𑀩𑁆𑀩𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀬𑀲𑁆𑀲𑀸𑀳𑀁 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀓𑁄 𑀘𑀜𑁆𑀜𑁄 𑀏𑀯𑀭𑀽𑀧𑀲𑁆𑀲 𑀤𑀺𑀩𑁆𑀩𑀲𑁆𑀲 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀅𑀜𑁆𑀜𑀢𑁆𑀭 𑀪𑁄𑀢𑀸 𑀕𑁄𑀢𑀫𑁂𑀦!

‘‘𑀓𑀢𑀫𑀁 𑀧𑀦 𑀢𑀁, 𑀪𑁄 𑀕𑁄𑀢𑀫, 𑀩𑁆𑀭𑀳𑁆𑀫𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀬𑀲𑁆𑀲 𑀪𑀯𑀁 𑀕𑁄𑀢𑀫𑁄 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺? ‘‘𑀇𑀥𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺, 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀸𑀫𑀺. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑀦𑀦𑁆𑀢𑀜𑁆𑀜𑁂𑀯 𑀧𑀯𑀺𑀲𑀸𑀫𑀺. 𑀲𑁄 𑀬𑀤𑁂𑀯 𑀢𑀢𑁆𑀣 𑀳𑁄𑀦𑁆𑀢𑀺 𑀢𑀺𑀡𑀸𑀦𑀺 𑀯𑀸 𑀧𑀡𑁆𑀡𑀸𑀦𑀺 𑀯𑀸 𑀢𑀸𑀦𑀺 𑀏𑀓𑀚𑁆𑀛𑀁 𑀲𑀗𑁆𑀖𑀭𑀺𑀢𑁆𑀯𑀸 𑀦𑀺𑀲𑀻𑀤𑀸𑀫𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀸𑀫𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀛𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀲𑀩𑁆𑀩𑀢𑁆𑀣)] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀸𑀫𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀸𑀫𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁 [𑀘𑀢𑀼𑀢𑁆𑀣𑀺𑀁 (𑀲𑀻.)], 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀸𑀫𑀺. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀘𑀗𑁆𑀓𑀫𑀸𑀫𑀺, 𑀩𑁆𑀭𑀳𑁆𑀫𑀸 𑀫𑁂 𑀏𑀲𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑁄 𑀳𑁄𑀢𑀺. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀢𑀺𑀝𑁆𑀞𑀸𑀫𑀺…𑀧𑁂… 𑀦𑀺𑀲𑀻𑀤𑀸𑀫𑀺…𑀧𑁂… 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀩𑁆𑀭𑀳𑁆𑀫𑀁 𑀫𑁂 𑀏𑀢𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀳𑁄𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀬𑀲𑁆𑀲𑀸𑀳𑀁 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀓𑁄 𑀘𑀜𑁆𑀜𑁄 𑀏𑀯𑀭𑀽𑀧𑀲𑁆𑀲 𑀩𑁆𑀭𑀳𑁆𑀫𑀲𑁆𑀲 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀅𑀜𑁆𑀜𑀢𑁆𑀭 𑀪𑁄𑀢𑀸 𑀕𑁄𑀢𑀫𑁂𑀦!

‘‘𑀓𑀢𑀫𑀁 𑀧𑀦 𑀢𑀁, 𑀪𑁄 𑀕𑁄𑀢𑀫, 𑀅𑀭𑀺𑀬𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀬𑀲𑁆𑀲 𑀪𑀯𑀁 𑀕𑁄𑀢𑀫𑁄 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺? ‘‘𑀇𑀥𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺, 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀸𑀫𑀺. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑀦𑀦𑁆𑀢𑀜𑁆𑀜𑁂𑀯 𑀧𑀯𑀺𑀲𑀸𑀫𑀺. 𑀲𑁄 𑀬𑀤𑁂𑀯 𑀢𑀢𑁆𑀣 𑀳𑁄𑀦𑁆𑀢𑀺 𑀢𑀺𑀡𑀸𑀦𑀺 𑀯𑀸 𑀧𑀡𑁆𑀡𑀸𑀦𑀺 𑀯𑀸 𑀢𑀸𑀦𑀺 𑀏𑀓𑀚𑁆𑀛𑀁 𑀲𑀗𑁆𑀖𑀭𑀺𑀢𑁆𑀯𑀸 𑀦𑀺𑀲𑀻𑀤𑀸𑀫𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀏𑀯𑀁 𑀚𑀸𑀦𑀸𑀫𑀺 𑁋 ‘𑀭𑀸𑀕𑁄 𑀫𑁂 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄; 𑀤𑁄𑀲𑁄 𑀫𑁂 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄; 𑀫𑁄𑀳𑁄 𑀫𑁂 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄’. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀘𑀗𑁆𑀓𑀫𑀸𑀫𑀺, 𑀅𑀭𑀺𑀬𑁄 𑀫𑁂 𑀏𑀲𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑁄 𑀳𑁄𑀢𑀺. 𑀲𑁄 𑀘𑁂 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀪𑀽𑀢𑁄 𑀢𑀺𑀝𑁆𑀞𑀸𑀫𑀺…𑀧𑁂… 𑀦𑀺𑀲𑀻𑀤𑀸𑀫𑀺…𑀧𑁂… 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀅𑀭𑀺𑀬𑀁 𑀫𑁂 𑀏𑀢𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀳𑁄𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀭𑀺𑀬𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁, 𑀬𑀲𑁆𑀲𑀸𑀳𑀁 𑀏𑀢𑀭𑀳𑀺 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀓𑁄 𑀘𑀜𑁆𑀜𑁄 𑀏𑀯𑀭𑀽𑀧𑀲𑁆𑀲 𑀅𑀭𑀺𑀬𑀲𑁆𑀲 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀲𑁆𑀲 𑀦𑀺𑀓𑀸𑀫𑀮𑀸𑀫𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀅𑀜𑁆𑀜𑀢𑁆𑀭 𑀪𑁄𑀢𑀸 𑀕𑁄𑀢𑀫𑁂𑀦!

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀔𑁄 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺. 𑀢𑀢𑀺𑀬𑀁.

𑁪. 𑀲𑀭𑀪𑀲𑀼𑀢𑁆𑀢𑀁

𑁬𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀭𑀪𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁄 𑀳𑁄𑀢𑀺 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀲𑁄 𑀭𑀸𑀚𑀕𑀳𑁂 𑀧𑀭𑀺𑀲𑀢𑀺 [𑀧𑀭𑀺𑀲𑀢𑀺𑀁 (𑀲𑀻. 𑀧𑀻.)] 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘‘𑀅𑀜𑁆𑀜𑀸𑀢𑁄 𑀫𑀬𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄. 𑀅𑀜𑁆𑀜𑀸𑀬 𑀘 𑀧𑀦𑀸𑀳𑀁 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑀁 𑀏𑀯𑀸𑀳𑀁 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸 𑀅𑀧𑀓𑁆𑀓𑀦𑁆𑀢𑁄’’𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀅𑀲𑁆𑀲𑁄𑀲𑀼𑀁 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀭𑀪𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀭𑀸𑀚𑀕𑀳𑁂 𑀧𑀭𑀺𑀲𑀢𑀺 𑀏𑀯𑀁 𑀯𑀸𑀘𑀁 𑀪𑀸𑀲𑀫𑀸𑀦𑀲𑁆𑀲 𑁋 ‘‘𑀅𑀜𑁆𑀜𑀸𑀢𑁄 𑀫𑀬𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄. 𑀅𑀜𑁆𑀜𑀸𑀬 𑀘 𑀧𑀦𑀸𑀳𑀁 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑀁 𑀏𑀯𑀸𑀳𑀁 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸 𑀅𑀧𑀓𑁆𑀓𑀦𑁆𑀢𑁄’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀭𑀪𑁄 𑀦𑀸𑀫, 𑀪𑀦𑁆𑀢𑁂, 𑀧𑀭𑀺𑀩𑁆𑀩𑀸𑀚𑀓𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁄 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀲𑁄 𑀭𑀸𑀚𑀕𑀳𑁂 𑀧𑀭𑀺𑀲𑀢𑀺 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀅𑀜𑁆𑀜𑀸𑀢𑁄 𑀫𑀬𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄. 𑀅𑀜𑁆𑀜𑀸𑀬 𑀘 𑀧𑀦𑀸𑀳𑀁 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑀁 𑀏𑀯𑀸𑀳𑀁 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸 𑀅𑀧𑀓𑁆𑀓𑀦𑁆𑀢𑁄’𑀢𑀺. 𑀲𑀸𑀥𑀼 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑀁 [𑀲𑀧𑁆𑀧𑀺𑀦𑀺𑀓𑀸𑀢𑀻𑀭𑀁 (𑀲𑀻. 𑀧𑀻.), 𑀲𑀧𑁆𑀧𑀺𑀦𑀺𑀬𑀸 𑀢𑀻𑀭𑀁 (𑀲𑁆𑀬𑀸. 𑀓𑀁.)] 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄 𑀬𑁂𑀦 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑀁 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄 𑀬𑁂𑀦 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀲𑀭𑀪, 𑀏𑀯𑀁 𑀯𑀤𑁂𑀲𑀺 𑁋 ‘𑀅𑀜𑁆𑀜𑀸𑀢𑁄 𑀫𑀬𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄. 𑀅𑀜𑁆𑀜𑀸𑀬 𑀘 𑀧𑀦𑀸𑀳𑀁 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑀁 𑀏𑀯𑀸𑀳𑀁 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸 𑀅𑀧𑀓𑁆𑀓𑀦𑁆𑀢𑁄’’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀕𑀯𑀸 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀯𑀤𑁂𑀳𑀺, 𑀲𑀭𑀪, 𑀓𑀺𑀦𑁆𑀢𑀺 𑀢𑁂 𑀅𑀜𑁆𑀜𑀸𑀢𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄? 𑀲𑀘𑁂 𑀢𑁂 𑀅𑀧𑀭𑀺𑀧𑀽𑀭𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺. 𑀲𑀘𑁂 𑀧𑀦 𑀢𑁂 𑀧𑀭𑀺𑀧𑀽𑀭𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀅𑀦𑀼𑀫𑁄𑀤𑀺𑀲𑁆𑀲𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 (‘‘𑀬𑁄 [𑀫𑀬𑀸 (𑀲𑁆𑀬𑀸. 𑀓𑀁. 𑀧𑀻.)] 𑀔𑁄 𑀲𑀭𑀪 𑀧𑀜𑁆𑀜𑀸𑀬𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄) [( ) 𑀲𑀻. 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺] ‘‘𑀯𑀤𑁂𑀳𑀺, 𑀲𑀭𑀪, 𑀓𑀺𑀦𑁆𑀢𑀺 𑀢𑁂 𑀅𑀜𑁆𑀜𑀸𑀢𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄? 𑀲𑀘𑁂 𑀢𑁂 𑀅𑀧𑀭𑀺𑀧𑀽𑀭𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺. 𑀲𑀘𑁂 𑀧𑀦 𑀢𑁂 𑀧𑀭𑀺𑀧𑀽𑀭𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀅𑀦𑀼𑀫𑁄𑀤𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀅𑀣 𑀔𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀤𑁂𑀯 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀭𑀪, 𑀲𑀫𑀡𑀁 𑀕𑁄𑀢𑀫𑀁 𑀬𑀸𑀘𑁂𑀬𑁆𑀬𑀸𑀲𑀺 𑀢𑀤𑁂𑀯 𑀢𑁂 𑀲𑀫𑀡𑁄 𑀕𑁄𑀢𑀫𑁄 𑀧𑀯𑀸𑀭𑁂𑀢𑀺. 𑀯𑀤𑁂𑀳𑀸𑀯𑀼𑀲𑁄 𑀲𑀭𑀪, 𑀓𑀺𑀦𑁆𑀢𑀺 𑀢𑁂 𑀅𑀜𑁆𑀜𑀸𑀢𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀥𑀫𑁆𑀫𑁄? 𑀲𑀘𑁂 𑀢𑁂 𑀅𑀧𑀭𑀺𑀧𑀽𑀭𑀁 𑀪𑀯𑀺𑀲𑁆𑀲𑀢𑀺, 𑀲𑀫𑀡𑁄 𑀕𑁄𑀢𑀫𑁄 𑀧𑀭𑀺𑀧𑀽𑀭𑁂𑀲𑁆𑀲𑀢𑀺. 𑀲𑀘𑁂 𑀧𑀦 𑀢𑁂 𑀧𑀭𑀺𑀧𑀽𑀭𑀁 𑀪𑀯𑀺𑀲𑁆𑀲𑀢𑀺, 𑀲𑀫𑀡𑁄 𑀕𑁄𑀢𑀫𑁄 𑀅𑀦𑀼𑀫𑁄𑀤𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺.

𑀅𑀣 𑀔𑁄 𑀪𑀕𑀯𑀸 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀢𑀼𑀡𑁆𑀳𑀻𑀪𑀽𑀢𑀁 𑀫𑀗𑁆𑀓𑀼𑀪𑀽𑀢𑀁 𑀧𑀢𑁆𑀢𑀓𑁆𑀔𑀦𑁆𑀥𑀁 𑀅𑀥𑁄𑀫𑀼𑀔𑀁 𑀧𑀚𑁆𑀛𑀸𑀬𑀦𑁆𑀢𑀁 𑀅𑀧𑁆𑀧𑀝𑀺𑀪𑀸𑀦𑀁 𑀯𑀺𑀤𑀺𑀢𑁆𑀯𑀸 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘 𑁋

‘‘𑀬𑁄 𑀔𑁄 𑀫𑀁, 𑀧𑀭𑀺𑀩𑁆𑀩𑀸𑀚𑀓𑀸 [𑀧𑀭𑀺𑀩𑁆𑀩𑀸𑀚𑀓𑁄 (𑀧𑀻. 𑀓.)], 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’𑀢𑀺, 𑀢𑀫𑀳𑀁 𑀢𑀢𑁆𑀣 𑀲𑀸𑀥𑀼𑀓𑀁 𑀲𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀁 𑀲𑀫𑀦𑀼𑀕𑀸𑀳𑁂𑀬𑁆𑀬𑀁 𑀲𑀫𑀦𑀼𑀪𑀸𑀲𑁂𑀬𑁆𑀬𑀁. 𑀲𑁄 𑀯𑀢 𑀫𑀬𑀸 𑀲𑀸𑀥𑀼𑀓𑀁 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀲𑁄 𑀢𑀺𑀡𑁆𑀡𑀁 𑀞𑀸𑀦𑀸𑀦𑀁 𑀦𑀸𑀜𑁆𑀜𑀢𑀭𑀁 [𑀅𑀜𑁆𑀜𑀢𑀭𑀁 (𑀓.)] 𑀞𑀸𑀦𑀁 𑀦𑀺𑀕𑀘𑁆𑀙𑁂𑀬𑁆𑀬, 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀁 𑀧𑀝𑀺𑀘𑀭𑀺𑀲𑁆𑀲𑀢𑀺, 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀲𑁆𑀲𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑀺𑀲𑁆𑀲𑀢𑀺, 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 [𑀢𑀼𑀡𑁆𑀳𑀻𑀪𑀽𑀢𑁄 𑀯𑀸 𑀫𑀗𑁆𑀓𑀼𑀪𑀽𑀢𑁄 (𑀲𑀻. 𑀲𑁆𑀬𑀸. 𑀓𑀁.), 𑀢𑀼𑀡𑁆𑀳𑀻𑀪𑀽𑀢𑁄 𑀯𑀸 𑀫𑀗𑁆𑀓𑀼𑀪𑀽𑀢𑁄 𑀯𑀸 (𑀧𑀻.)] 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺𑀲𑁆𑀲𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄.

‘‘𑀬𑁄 𑀔𑁄 𑀫𑀁, 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸’𑀢𑀺, 𑀢𑀫𑀳𑀁 𑀢𑀢𑁆𑀣 𑀲𑀸𑀥𑀼𑀓𑀁 𑀲𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀁 𑀲𑀫𑀦𑀼𑀕𑀸𑀳𑁂𑀬𑁆𑀬𑀁 𑀲𑀫𑀦𑀼𑀪𑀸𑀲𑁂𑀬𑁆𑀬𑀁. 𑀲𑁄 𑀯𑀢 𑀫𑀬𑀸 𑀲𑀸𑀥𑀼𑀓𑀁 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀲𑁄 𑀢𑀺𑀡𑁆𑀡𑀁 𑀞𑀸𑀦𑀸𑀦𑀁 𑀦𑀸𑀜𑁆𑀜𑀢𑀭𑀁 𑀞𑀸𑀦𑀁 𑀦𑀺𑀕𑀘𑁆𑀙𑁂𑀬𑁆𑀬, 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀁 𑀧𑀝𑀺𑀘𑀭𑀺𑀲𑁆𑀲𑀢𑀺, 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀲𑁆𑀲𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑀺𑀲𑁆𑀲𑀢𑀺, 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺𑀲𑁆𑀲𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄.

‘‘𑀬𑁄 𑀔𑁄 𑀫𑀁, 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’𑀢𑀺, 𑀢𑀫𑀳𑀁 𑀢𑀢𑁆𑀣 𑀲𑀸𑀥𑀼𑀓𑀁 𑀲𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀁 𑀲𑀫𑀦𑀼𑀕𑀸𑀳𑁂𑀬𑁆𑀬𑀁 𑀲𑀫𑀦𑀼𑀪𑀸𑀲𑁂𑀬𑁆𑀬𑀁. 𑀲𑁄 𑀯𑀢 𑀫𑀬𑀸 𑀲𑀸𑀥𑀼𑀓𑀁 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀲𑁄 𑀢𑀺𑀡𑁆𑀡𑀁 𑀞𑀸𑀦𑀸𑀦𑀁 𑀦𑀸𑀜𑁆𑀜𑀢𑀭𑀁 𑀞𑀸𑀦𑀁 𑀦𑀺𑀕𑀘𑁆𑀙𑁂𑀬𑁆𑀬, 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀁 𑀧𑀝𑀺𑀘𑀭𑀺𑀲𑁆𑀲𑀢𑀺, 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀲𑁆𑀲𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑀺𑀲𑁆𑀲𑀢𑀺, 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺𑀲𑁆𑀲𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑁂 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀯𑁂𑀳𑀸𑀲𑀁 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀲𑀫𑀦𑁆𑀢𑀢𑁄 𑀯𑀸𑀘𑀸𑀬𑀲𑀦𑁆𑀦𑀺𑀢𑁄𑀤𑀓𑁂𑀦 [𑀯𑀸𑀘𑀸𑀲𑀢𑁆𑀢𑀺𑀢𑁄𑀤𑀓𑁂𑀦 (𑀲𑀻.)] 𑀲𑀜𑁆𑀚𑀫𑁆𑀪𑀭𑀺𑀫𑀓𑀁𑀲𑀼 [𑀲𑀜𑁆𑀘𑀼𑀫𑁆𑀪𑀭𑀺𑀫𑀓𑀁𑀲𑀼 (𑀧𑀻., 𑀤𑀻. 𑀦𑀺. 𑁧.𑁪𑁨𑁧) 𑀲𑀁. 𑀦𑀺. 𑁨.𑁨𑁪𑁩 𑀉𑀧𑀭𑀺𑀧𑀸𑀞𑁄 𑀯𑀺𑀬] 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀲𑀭𑀪, 𑀩𑁆𑀭𑀳𑀸𑀭𑀜𑁆𑀜𑁂 𑀚𑀭𑀲𑀺𑀗𑁆𑀕𑀸𑀮𑁄 ‘𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀻’𑀢𑀺 𑀲𑀺𑀗𑁆𑀕𑀸𑀮𑀓𑀁𑀬𑁂𑀯 [𑀲𑁂𑀕𑀸𑀮𑀓𑀁𑀬𑁂𑀯 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀤𑀢𑀺, 𑀪𑁂𑀭𑀡𑁆𑀟𑀓𑀁𑀬𑁂𑀯 𑀦𑀤𑀢𑀺 [𑀪𑁂𑀤𑀡𑁆𑀟𑀓𑀁 (𑀓.)]; 𑀏𑀯𑀫𑁂𑀯𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀭𑀪, 𑀅𑀜𑁆𑀜𑀢𑁆𑀭𑁂𑀯 𑀲𑀫𑀡𑁂𑀦 𑀕𑁄𑀢𑀫𑁂𑀦 ‘𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀻’𑀢𑀺 𑀲𑀺𑀗𑁆𑀕𑀸𑀮𑀓𑀁𑀬𑁂𑀯 𑀦𑀤𑀲𑀺 𑀪𑁂𑀭𑀡𑁆𑀟𑀓𑀁𑀬𑁂𑀯 𑀦𑀤𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀲𑀭𑀪, 𑀅𑀫𑁆𑀩𑀼𑀓𑀲𑀜𑁆𑀘𑀭𑀻 [𑀅𑀫𑁆𑀩𑀓𑀫𑀤𑁆𑀤𑀭𑀻 (𑀲𑀻.)] ‘𑀧𑀼𑀭𑀺𑀲𑀓𑀭𑀯𑀺𑀢𑀁 [𑀨𑀼𑀲𑁆𑀲𑀓𑀭𑀯𑀺𑀢𑀁 (𑀲𑀻.), 𑀧𑀼𑀲𑁆𑀲𑀓𑀭𑀯𑀺𑀢𑀁 (𑀲𑁆𑀬𑀸. 𑀓𑀁. 𑀧𑀻.)] 𑀭𑀯𑀺𑀲𑁆𑀲𑀸𑀫𑀻’𑀢𑀺 𑀅𑀫𑁆𑀩𑀼𑀓𑀲𑀜𑁆𑀘𑀭𑀺𑀭𑀯𑀺𑀢𑀁𑀬𑁂𑀯 𑀭𑀯𑀢𑀺; 𑀏𑀯𑀫𑁂𑀯𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀭𑀪, 𑀅𑀜𑁆𑀜𑀢𑁆𑀭𑁂𑀯 𑀲𑀫𑀡𑁂𑀦 𑀕𑁄𑀢𑀫𑁂𑀦 ‘𑀧𑀼𑀭𑀺𑀲𑀓𑀭𑀯𑀺𑀢𑀁 𑀭𑀯𑀺𑀲𑁆𑀲𑀸𑀫𑀻’𑀢𑀺, 𑀅𑀫𑁆𑀩𑀼𑀓𑀲𑀜𑁆𑀘𑀭𑀺𑀭𑀯𑀺𑀢𑀁𑀬𑁂𑀯 𑀭𑀯𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀲𑀭𑀪, 𑀉𑀲𑀪𑁄 𑀲𑀼𑀜𑁆𑀜𑀸𑀬 𑀕𑁄𑀲𑀸𑀮𑀸𑀬 𑀕𑀫𑁆𑀪𑀻𑀭𑀁 𑀦𑀤𑀺𑀢𑀩𑁆𑀩𑀁 𑀫𑀜𑁆𑀜𑀢𑀺; 𑀏𑀯𑀫𑁂𑀯𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀭𑀪, 𑀅𑀜𑁆𑀜𑀢𑁆𑀭𑁂𑀯 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀕𑀫𑁆𑀪𑀻𑀭𑀁 𑀦𑀤𑀺𑀢𑀩𑁆𑀩𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀲𑀫𑀦𑁆𑀢𑀢𑁄 𑀯𑀸𑀘𑀸𑀬𑀲𑀦𑁆𑀦𑀺𑀢𑁄𑀤𑀓𑁂𑀦 𑀲𑀜𑁆𑀚𑀫𑁆𑀪𑀭𑀺𑀫𑀓𑀁𑀲𑀽𑀢𑀺. 𑀘𑀢𑀼𑀢𑁆𑀣𑀁.

𑁫. 𑀓𑁂𑀲𑀫𑀼𑀢𑁆𑀢𑀺𑀲𑀼𑀢𑁆𑀢𑀁

𑁬𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀓𑁂𑀲𑀫𑀼𑀢𑁆𑀢𑀁 [𑀓𑁂𑀲𑀧𑀼𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀸𑀫 𑀓𑀸𑀮𑀸𑀫𑀸𑀦𑀁 𑀦𑀺𑀕𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀓𑁂𑀲𑀫𑀼𑀢𑁆𑀢𑀺𑀬𑀸 𑀓𑀸𑀮𑀸𑀫𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀓𑁂𑀲𑀫𑀼𑀢𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’’𑀢𑀺.

𑀅𑀣 𑀔𑁄 𑀓𑁂𑀲𑀫𑀼𑀢𑁆𑀢𑀺𑀬𑀸 𑀓𑀸𑀮𑀸𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀓𑁂𑀲𑀫𑀼𑀢𑁆𑀢𑀺𑀬𑀸 𑀓𑀸𑀮𑀸𑀫𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀦𑁆𑀢𑀺, 𑀪𑀦𑁆𑀢𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑁂𑀲𑀫𑀼𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀢𑁂 𑀲𑀓𑀁𑀬𑁂𑀯 𑀯𑀸𑀤𑀁 𑀤𑀻𑀧𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺, 𑀧𑀭𑀧𑁆𑀧𑀯𑀸𑀤𑀁 𑀧𑀦 𑀔𑀼𑀁𑀲𑁂𑀦𑁆𑀢𑀺 𑀯𑀫𑁆𑀪𑁂𑀦𑁆𑀢𑀺 𑀧𑀭𑀺𑀪𑀯𑀦𑁆𑀢𑀺 𑀑𑀫𑀓𑁆𑀔𑀺𑀁 [𑀑𑀧𑀧𑀓𑁆𑀔𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀑𑀫𑀓𑁆𑀔𑀺𑀓𑀁 (𑀓.)] 𑀓𑀭𑁄𑀦𑁆𑀢𑀺. 𑀅𑀧𑀭𑁂𑀧𑀺, 𑀪𑀦𑁆𑀢𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑁂𑀲𑀫𑀼𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀢𑁂𑀧𑀺 𑀲𑀓𑀁𑀬𑁂𑀯 𑀯𑀸𑀤𑀁 𑀤𑀻𑀧𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺, 𑀧𑀭𑀧𑁆𑀧𑀯𑀸𑀤𑀁 𑀧𑀦 𑀔𑀼𑀁𑀲𑁂𑀦𑁆𑀢𑀺 𑀯𑀫𑁆𑀪𑁂𑀦𑁆𑀢𑀺 𑀧𑀭𑀺𑀪𑀯𑀦𑁆𑀢𑀺 𑀑𑀫𑀓𑁆𑀔𑀺𑀁 𑀓𑀭𑁄𑀦𑁆𑀢𑀺. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀳𑁄𑀢𑁂𑀯 𑀓𑀗𑁆𑀔𑀸 𑀳𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑁋 ‘𑀓𑁄 𑀲𑀼 𑀦𑀸𑀫 𑀇𑀫𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀆𑀳, 𑀓𑁄 𑀫𑀼𑀲𑀸’’’𑀢𑀺? ‘‘𑀅𑀮𑀜𑁆𑀳𑀺 𑀯𑁄, 𑀓𑀸𑀮𑀸𑀫𑀸, 𑀓𑀗𑁆𑀔𑀺𑀢𑀼𑀁 𑀅𑀮𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀼𑀁. 𑀓𑀗𑁆𑀔𑀦𑀻𑀬𑁂𑀯 𑀧𑀦 [𑀓𑀗𑁆𑀔𑀦𑀻𑀬𑁂𑀯 𑀘 𑀧𑀦 (𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂)] 𑀯𑁄 𑀞𑀸𑀦𑁂 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀦𑁆𑀦𑀸’’.

‘‘𑀏𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 [𑀲𑀫𑀸𑀤𑀺𑀡𑁆𑀡𑀸 (𑀓.)] 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’’𑀢𑀺, 𑀅𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀧𑀚𑀳𑁂𑀬𑁆𑀬𑀸𑀣.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀮𑁄𑀪𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺?

‘‘𑀅𑀳𑀺𑀢𑀸𑀬, 𑀪𑀦𑁆𑀢𑁂’’.

‘‘𑀮𑀼𑀤𑁆𑀥𑁄 𑀧𑀦𑀸𑀬𑀁, 𑀓𑀸𑀮𑀸𑀫𑀸, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀮𑁄𑀪𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 [𑀢𑀤𑀢𑁆𑀣𑀸𑀬 (𑀓.)] 𑀲𑀫𑀸𑀤𑀧𑁂𑀢𑀺, 𑀬𑀁 𑀲 [𑀬𑀁 𑀢𑀲𑁆𑀲 (𑀓.) 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀧𑀦 ‘‘𑀬𑀁’ 𑀲’’ 𑀇𑀢𑁆𑀯𑁂𑀯 𑀲𑀩𑁆𑀩𑀢𑁆𑀣𑀧𑀺 𑀤𑀺𑀲𑁆𑀲𑀢𑀺] 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀤𑁄𑀲𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺?

‘‘𑀅𑀳𑀺𑀢𑀸𑀬, 𑀪𑀦𑁆𑀢𑁂’’.

‘‘𑀤𑀼𑀝𑁆𑀞𑁄 𑀧𑀦𑀸𑀬𑀁, 𑀓𑀸𑀮𑀸𑀫𑀸, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺 [𑀳𑀦𑁆𑀢𑀺 (𑀲𑀻. 𑀧𑀻.)], 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀫𑁄𑀳𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺?

‘‘𑀅𑀳𑀺𑀢𑀸𑀬, 𑀪𑀦𑁆𑀢𑁂’’.

‘‘𑀫𑀽𑀴𑁆𑀳𑁄 𑀧𑀦𑀸𑀬𑀁, 𑀓𑀸𑀮𑀸𑀫𑀸, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸’’𑀢𑀺?

‘‘𑀅𑀓𑀼𑀲𑀮𑀸, 𑀪𑀦𑁆𑀢𑁂’’.

‘‘𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’’𑀢𑀺?

‘‘𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂’’.

‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸’’𑀢𑀺?

‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀪𑀦𑁆𑀢𑁂’’.

‘‘𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀯𑀸? 𑀓𑀣𑀁 𑀯𑀸 [𑀓𑀣𑀁 𑀯𑀸 𑀯𑁄 (?)] 𑀏𑀢𑁆𑀣 𑀳𑁄𑀢𑀻’’𑀢𑀺?

‘‘𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀇𑀢𑀺 𑀔𑁄, 𑀓𑀸𑀮𑀸𑀫𑀸, 𑀬𑀁 𑀢𑀁 𑀅𑀯𑁄𑀘𑀼𑀫𑁆𑀳𑀸 [𑀅𑀯𑁄𑀘𑀼𑀫𑁆𑀳 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀅. 𑀦𑀺. 𑁪.𑁧𑁯𑁩] 𑁋 ‘𑀏𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸! 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺. 𑀬𑀤𑀸 𑀢𑀼𑀫𑁆𑀳𑁂 𑀓𑀸𑀮𑀸𑀫𑀸 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀅𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀧𑀚𑀳𑁂𑀬𑁆𑀬𑀸𑀣𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀏𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺, 𑀅𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀣.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀅𑀮𑁄𑀪𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺?

‘‘𑀳𑀺𑀢𑀸𑀬, 𑀪𑀦𑁆𑀢𑁂’’.

‘‘𑀅𑀮𑀼𑀤𑁆𑀥𑁄 𑀧𑀦𑀸𑀬𑀁, 𑀓𑀸𑀮𑀸𑀫𑀸, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀮𑁄𑀪𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀧𑀭𑀤𑀸𑀭𑀁 𑀕𑀘𑁆𑀙𑀢𑀺, 𑀦 𑀫𑀼𑀲𑀸 𑀪𑀡𑀢𑀺, 𑀦 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀅𑀤𑁄𑀲𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀅𑀫𑁄𑀳𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀏𑀯𑀁 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸’’𑀢𑀺?

‘‘𑀓𑀼𑀲𑀮𑀸, 𑀪𑀦𑁆𑀢𑁂’’.

‘‘𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’’𑀢𑀺?

‘‘𑀅𑀦𑀯𑀚𑁆𑀚𑀸, 𑀪𑀦𑁆𑀢𑁂’’.

‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸’’𑀢𑀺?

‘‘𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀪𑀦𑁆𑀢𑁂’’.

‘‘𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀸? 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺?

‘‘𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀇𑀢𑀺 𑀔𑁄, 𑀓𑀸𑀮𑀸𑀫𑀸, 𑀬𑀁 𑀢𑀁 𑀅𑀯𑁄𑀘𑀼𑀫𑁆𑀳𑀸 𑁋 ‘𑀏𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸! 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀅𑀣 𑀢𑀼𑀫𑁆𑀳𑁂, 𑀓𑀸𑀮𑀸𑀫𑀸, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀣𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀲 𑀔𑁄 𑀲𑁄 [𑀬𑁄 𑀔𑁄 (𑀓.)], 𑀓𑀸𑀮𑀸𑀫𑀸, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀯𑀺𑀕𑀢𑀸𑀪𑀺𑀚𑁆𑀛𑁄 𑀯𑀺𑀕𑀢𑀩𑁆𑀬𑀸𑀧𑀸𑀤𑁄 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄 [𑀲𑀢𑁄 (𑀓.)] 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

‘‘𑀲 [𑀲𑀘𑁂 (𑀓.)] 𑀔𑁄 𑀲𑁄, 𑀓𑀸𑀮𑀸𑀫𑀸, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀅𑀯𑁂𑀭𑀘𑀺𑀢𑁆𑀢𑁄 𑀏𑀯𑀁 𑀅𑀩𑁆𑀬𑀸𑀧𑀚𑁆𑀛𑀘𑀺𑀢𑁆𑀢𑁄 𑀏𑀯𑀁 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀏𑀯𑀁 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑁄. 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀘𑀢𑁆𑀢𑀸𑀭𑁄 𑀅𑀲𑁆𑀲𑀸𑀲𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺. ‘𑀲𑀘𑁂 𑀔𑁄 𑀧𑀦 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 [𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀣𑀸𑀳𑀁 [𑀞𑀸𑀦𑀫𑀳𑀁 (𑀲𑀻. 𑀧𑀻.), 𑀞𑀸𑀦𑀫𑁂𑀢𑀁 𑀬𑁂𑀦𑀸𑀳𑀁 (𑀲𑁆𑀬𑀸. 𑀓𑀁.)] 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺, 𑀅𑀬𑀫𑀲𑁆𑀲 𑀧𑀞𑀫𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘‘𑀲𑀘𑁂 𑀔𑁄 𑀧𑀦 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀣𑀸𑀳𑀁 [𑀇𑀥𑀸𑀳𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀛𑀁 𑀅𑀦𑀻𑀖𑀁 𑀲𑀼𑀔𑀺𑀁 [𑀲𑀼𑀔𑀁 (𑀲𑀻.), 𑀲𑀼𑀔𑀻 (𑀲𑁆𑀬𑀸. 𑀓𑀁.)] 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀸𑀫𑀻’𑀢𑀺, 𑀅𑀬𑀫𑀲𑁆𑀲 𑀤𑀼𑀢𑀺𑀬𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘‘𑀲𑀘𑁂 𑀔𑁄 𑀧𑀦 𑀓𑀭𑁄𑀢𑁄 𑀓𑀭𑀻𑀬𑀢𑀺 𑀧𑀸𑀧𑀁, 𑀦 𑀔𑁄 𑀧𑀦𑀸𑀳𑀁 𑀓𑀲𑁆𑀲𑀘𑀺 𑀧𑀸𑀧𑀁 𑀘𑁂𑀢𑁂𑀫𑀺. 𑀅𑀓𑀭𑁄𑀦𑁆𑀢𑀁 𑀔𑁄 𑀧𑀦 𑀫𑀁 𑀧𑀸𑀧𑀓𑀫𑁆𑀫𑀁 𑀓𑀼𑀢𑁄 𑀤𑀼𑀓𑁆𑀔𑀁 𑀨𑀼𑀲𑀺𑀲𑁆𑀲𑀢𑀻’𑀢𑀺, 𑀅𑀬𑀫𑀲𑁆𑀲 𑀢𑀢𑀺𑀬𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘‘𑀲𑀘𑁂 𑀔𑁄 𑀧𑀦 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀁, 𑀅𑀣𑀸𑀳𑀁 𑀉𑀪𑀬𑁂𑀦𑁂𑀯 𑀯𑀺𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀸𑀫𑀻’𑀢𑀺, 𑀅𑀬𑀫𑀲𑁆𑀲 𑀘𑀢𑀼𑀢𑁆𑀣𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘𑀲 𑀔𑁄 𑀲𑁄, 𑀓𑀸𑀮𑀸𑀫𑀸, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀅𑀯𑁂𑀭𑀘𑀺𑀢𑁆𑀢𑁄 𑀏𑀯𑀁 𑀅𑀩𑁆𑀬𑀸𑀧𑀚𑁆𑀛𑀘𑀺𑀢𑁆𑀢𑁄 𑀏𑀯𑀁 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀏𑀯𑀁 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑁄. 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀲𑁆𑀲𑀸𑀲𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀻’’𑀢𑀺.

‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢! 𑀲 𑀔𑁄 𑀲𑁄, 𑀪𑀦𑁆𑀢𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀅𑀯𑁂𑀭𑀘𑀺𑀢𑁆𑀢𑁄 𑀏𑀯𑀁 𑀅𑀩𑁆𑀬𑀸𑀧𑀚𑁆𑀛𑀘𑀺𑀢𑁆𑀢𑁄 𑀏𑀯𑀁 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀏𑀯𑀁 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑁄. 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀘𑀢𑁆𑀢𑀸𑀭𑁄 𑀅𑀲𑁆𑀲𑀸𑀲𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺. ‘𑀲𑀘𑁂 𑀔𑁄 𑀧𑀦 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀣𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺, 𑀅𑀬𑀫𑀲𑁆𑀲 𑀧𑀞𑀫𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘‘𑀲𑀘𑁂 𑀔𑁄 𑀧𑀦 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀣𑀸𑀳𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀛𑀁 𑀅𑀦𑀻𑀖𑀁 𑀲𑀼𑀔𑀺𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀸𑀫𑀻’𑀢𑀺, 𑀅𑀬𑀫𑀲𑁆𑀲 𑀤𑀼𑀢𑀺𑀬𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘𑀲𑀘𑁂 𑀔𑁄 𑀧𑀦 𑀓𑀭𑁄𑀢𑁄 𑀓𑀭𑀻𑀬𑀢𑀺 𑀧𑀸𑀧𑀁, 𑀦 𑀔𑁄 𑀧𑀦𑀸𑀳𑀁 𑁋 𑀓𑀲𑁆𑀲𑀘𑀺 𑀧𑀸𑀧𑀁 𑀘𑁂𑀢𑁂𑀫𑀺, 𑀅𑀓𑀭𑁄𑀦𑁆𑀢𑀁 𑀔𑁄 𑀧𑀦 𑀫𑀁 𑀧𑀸𑀧𑀓𑀫𑁆𑀫𑀁 𑀓𑀼𑀢𑁄 𑀤𑀼𑀓𑁆𑀔𑀁 𑀨𑀼𑀲𑀺𑀲𑁆𑀲𑀢𑀻’𑀢𑀺, 𑀅𑀬𑀫𑀲𑁆𑀲 𑀢𑀢𑀺𑀬𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘‘𑀲𑀘𑁂 𑀔𑁄 𑀧𑀦 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀁, 𑀅𑀣𑀸𑀳𑀁 𑀉𑀪𑀬𑁂𑀦𑁂𑀯 𑀯𑀺𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀸𑀫𑀻’𑀢𑀺, 𑀅𑀬𑀫𑀲𑁆𑀲 𑀘𑀢𑀼𑀢𑁆𑀣𑁄 𑀅𑀲𑁆𑀲𑀸𑀲𑁄 𑀅𑀥𑀺𑀕𑀢𑁄 𑀳𑁄𑀢𑀺.

‘‘𑀲 𑀔𑁄 𑀲𑁄, 𑀪𑀦𑁆𑀢𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀅𑀯𑁂𑀭𑀘𑀺𑀢𑁆𑀢𑁄 𑀏𑀯𑀁 𑀅𑀩𑁆𑀬𑀸𑀧𑀚𑁆𑀛𑀘𑀺𑀢𑁆𑀢𑁄 𑀏𑀯𑀁 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀏𑀯𑀁 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑁄. 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀲𑁆𑀲𑀸𑀲𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀸𑀴𑁆𑀳𑀲𑀼𑀢𑁆𑀢𑀁

𑁬𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀅𑀣 𑀔𑁄 𑀲𑀸𑀴𑁆𑀳𑁄 𑀘 𑀫𑀺𑀕𑀸𑀭𑀦𑀢𑁆𑀢𑀸 𑀲𑀸𑀡𑁄 𑀘 𑀲𑁂𑀔𑀼𑀦𑀺𑀬𑀦𑀢𑁆𑀢𑀸 [𑀭𑁄𑀳𑀡𑁄 𑀘 𑀧𑁂𑀔𑀼𑀡𑀺𑀬𑀦𑀢𑁆𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀬𑁂𑀦𑀸𑀬𑀲𑁆𑀫𑀸 𑀦𑀦𑁆𑀤𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀓𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀲𑀸𑀴𑁆𑀳𑀁 𑀫𑀺𑀕𑀸𑀭𑀦𑀢𑁆𑀢𑀸𑀭𑀁 𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀏𑀢𑀤𑀯𑁄𑀘 𑁋

‘‘𑀏𑀣 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 ‘𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺, 𑀅𑀣 𑀢𑀼𑀫𑁆𑀳𑁂 𑀲𑀸𑀴𑁆𑀳𑀸 𑀧𑀚𑀳𑁂𑀬𑁆𑀬𑀸𑀣.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀅𑀢𑁆𑀣𑀺 𑀮𑁄𑀪𑁄’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀅𑀪𑀺𑀚𑁆𑀛𑀸𑀢𑀺 𑀔𑁄 𑀅𑀳𑀁, 𑀲𑀸𑀴𑁆𑀳𑀸, 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀮𑀼𑀤𑁆𑀥𑁄 𑀔𑁄 𑀅𑀬𑀁, 𑀲𑀸𑀴𑁆𑀳𑀸, 𑀅𑀪𑀺𑀚𑁆𑀛𑀸𑀮𑀼 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀅𑀢𑁆𑀣𑀺 𑀤𑁄𑀲𑁄’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀩𑁆𑀬𑀸𑀧𑀸𑀤𑁄𑀢𑀺 𑀔𑁄 𑀅𑀳𑀁, 𑀲𑀸𑀴𑁆𑀳𑀸, 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀤𑀼𑀝𑁆𑀞𑁄 𑀔𑁄 𑀅𑀬𑀁, 𑀲𑀸𑀴𑁆𑀳𑀸, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀅𑀢𑁆𑀣𑀺 𑀫𑁄𑀳𑁄’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀅𑀯𑀺𑀚𑁆𑀚𑀸𑀢𑀺 𑀔𑁄 𑀅𑀳𑀁, 𑀲𑀸𑀴𑁆𑀳𑀸, 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀫𑀽𑀴𑁆𑀳𑁄 𑀔𑁄 𑀅𑀬𑀁, 𑀲𑀸𑀴𑁆𑀳𑀸, 𑀅𑀯𑀺𑀚𑁆𑀚𑀸𑀕𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸’’𑀢𑀺?

‘‘𑀅𑀓𑀼𑀲𑀮𑀸, 𑀪𑀦𑁆𑀢𑁂’’.

‘‘𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’’𑀢𑀺?

‘‘𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂’’.

‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸’’𑀢𑀺?

‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀪𑀦𑁆𑀢𑁂’’.

‘‘𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀯𑀸? 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺?

‘‘𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀇𑀢𑀺 𑀔𑁄, 𑀲𑀸𑀴𑁆𑀳𑀸, 𑀬𑀁 𑀢𑀁 𑀅𑀯𑁄𑀘𑀼𑀫𑁆𑀳𑀸 𑁋 ‘𑀏𑀣 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀅𑀣 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀧𑀚𑀳𑁂𑀬𑁆𑀬𑀸𑀣𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀏𑀣 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺, 𑀅𑀣 𑀢𑀼𑀫𑁆𑀳𑁂, 𑀲𑀸𑀴𑁆𑀳𑀸, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀣.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀅𑀢𑁆𑀣𑀺 𑀅𑀮𑁄𑀪𑁄’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀅𑀦𑀪𑀺𑀚𑁆𑀛𑀸𑀢𑀺 𑀔𑁄 𑀅𑀳𑀁, 𑀲𑀸𑀴𑁆𑀳𑀸, 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀅𑀮𑀼𑀤𑁆𑀥𑁄 𑀔𑁄 𑀅𑀬𑀁, 𑀲𑀸𑀴𑁆𑀳𑀸, 𑀅𑀦𑀪𑀺𑀚𑁆𑀛𑀸𑀮𑀼 𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀧𑀭𑀤𑀸𑀭𑀁 𑀕𑀘𑁆𑀙𑀢𑀺, 𑀦 𑀫𑀼𑀲𑀸 𑀪𑀡𑀢𑀺, 𑀧𑀭𑀫𑁆𑀧𑀺 𑀦 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀅𑀢𑁆𑀣𑀺 𑀅𑀤𑁄𑀲𑁄’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀅𑀩𑁆𑀬𑀸𑀧𑀸𑀤𑁄𑀢𑀺 𑀔𑁄 𑀅𑀳𑀁, 𑀲𑀸𑀴𑁆𑀳𑀸, 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀅𑀤𑀼𑀝𑁆𑀞𑁄 𑀔𑁄 𑀅𑀬𑀁, 𑀲𑀸𑀴𑁆𑀳𑀸, 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀧𑀭𑀤𑀸𑀭𑀁 𑀕𑀘𑁆𑀙𑀢𑀺, 𑀦 𑀫𑀼𑀲𑀸 𑀪𑀡𑀢𑀺, 𑀧𑀭𑀫𑁆𑀧𑀺 𑀦 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀅𑀢𑁆𑀣𑀺 𑀅𑀫𑁄𑀳𑁄’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀯𑀺𑀚𑁆𑀚𑀸𑀢𑀺 𑀔𑁄 𑀅𑀳𑀁, 𑀲𑀸𑀴𑁆𑀳𑀸, 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀅𑀫𑀽𑀴𑁆𑀳𑁄 𑀔𑁄 𑀅𑀬𑀁, 𑀲𑀸𑀴𑁆𑀳𑀸, 𑀯𑀺𑀚𑁆𑀚𑀸𑀕𑀢𑁄 𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀧𑀭𑀤𑀸𑀭𑀁 𑀕𑀘𑁆𑀙𑀢𑀺, 𑀦 𑀫𑀼𑀲𑀸 𑀪𑀡𑀢𑀺, 𑀧𑀭𑀫𑁆𑀧𑀺 𑀦 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺, 𑀬𑀁 𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀲𑀸𑀴𑁆𑀳𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸’’𑀢𑀺?

‘‘𑀓𑀼𑀲𑀮𑀸, 𑀪𑀦𑁆𑀢𑁂’’.

‘‘𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’’𑀢𑀺?

‘‘𑀅𑀦𑀯𑀚𑁆𑀚𑀸, 𑀪𑀦𑁆𑀢𑁂’’.

‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸’’𑀢𑀺?