(𑁮) 𑁩. 𑀆𑀦𑀦𑁆𑀤𑀯𑀕𑁆𑀕𑁄

𑁧. 𑀙𑀦𑁆𑀦𑀲𑀼𑀢𑁆𑀢𑀁

𑁭𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀙𑀦𑁆𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀙𑀦𑁆𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀢𑀼𑀫𑁆𑀳𑁂𑀧𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀭𑀸𑀕𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀣, 𑀤𑁄𑀲𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀣, 𑀫𑁄𑀳𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀣𑀸𑀢𑀺. 𑀫𑀬𑀁 𑀔𑁄, 𑀆𑀯𑀼𑀲𑁄, 𑀭𑀸𑀕𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀫, 𑀤𑁄𑀲𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀫, 𑀫𑁄𑀳𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀧𑁂𑀫𑀸’’𑀢𑀺.

‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀭𑀸𑀕𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀭𑀸𑀕𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀣, 𑀓𑀺𑀁 𑀤𑁄𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀤𑁄𑀲𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀣, 𑀓𑀺𑀁 𑀫𑁄𑀳𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀫𑁄𑀳𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀣𑀸’’𑀢𑀺?

‘‘𑀭𑀢𑁆𑀢𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀭𑀸𑀕𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀭𑀢𑁆𑀢𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺; 𑀭𑀸𑀕𑁂 𑀧𑀳𑀻𑀦𑁂 𑀦𑁂𑀯 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀭𑀢𑁆𑀢𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺; 𑀭𑀸𑀕𑁂 𑀧𑀳𑀻𑀦𑁂 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀅𑀦𑁆𑀥𑀓𑀭𑀡𑁄 𑀅𑀘𑀓𑁆𑀔𑀼𑀓𑀭𑀡𑁄 𑀅𑀜𑁆𑀜𑀸𑀡𑀓𑀭𑀡𑁄 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄 𑀯𑀺𑀖𑀸𑀢𑀧𑀓𑁆𑀔𑀺𑀓𑁄 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄.

‘‘𑀤𑀼𑀝𑁆𑀞𑁄 𑀔𑁄, 𑀆𑀯𑀼𑀲𑁄, 𑀤𑁄𑀲𑁂𑀦…𑀧𑁂… 𑀫𑀽𑀴𑁆𑀳𑁄 𑀔𑁄, 𑀆𑀯𑀼𑀲𑁄, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀫𑁄𑀳𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀫𑀽𑀴𑁆𑀳𑁄 𑀔𑁄, 𑀆𑀯𑀼𑀲𑁄, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺; 𑀫𑁄𑀳𑁂 𑀧𑀳𑀻𑀦𑁂 𑀦𑁂𑀯 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀫𑀽𑀴𑁆𑀳𑁄 𑀔𑁄, 𑀆𑀯𑀼𑀲𑁄, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺; 𑀫𑁄𑀳𑁂 𑀧𑀳𑀻𑀦𑁂 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀫𑁄𑀳𑁄 𑀔𑁄, 𑀆𑀯𑀼𑀲𑁄, 𑀅𑀦𑁆𑀥𑀓𑀭𑀡𑁄 𑀅𑀘𑀓𑁆𑀔𑀼𑀓𑀭𑀡𑁄 𑀅𑀜𑁆𑀜𑀸𑀡𑀓𑀭𑀡𑁄 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄 𑀯𑀺𑀖𑀸𑀢𑀧𑀓𑁆𑀔𑀺𑀓𑁄 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄. 𑀇𑀤𑀁 𑀔𑁄 𑀫𑀬𑀁, 𑀆𑀯𑀼𑀲𑁄, 𑀭𑀸𑀕𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀭𑀸𑀕𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀫. 𑀇𑀤𑀁 𑀤𑁄𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀤𑁄𑀲𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀫. 𑀇𑀤𑀁 𑀫𑁄𑀳𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀫𑁄𑀳𑀲𑁆𑀲 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀫𑀸’’𑀢𑀺.

‘‘𑀅𑀢𑁆𑀣𑀺 𑀧𑀦𑀸𑀯𑀼𑀲𑁄, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺? ‘‘𑀅𑀢𑁆𑀣𑀸𑀯𑀼𑀲𑁄, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺. ‘‘𑀓𑀢𑀫𑁄 𑀧𑀦𑀸𑀯𑀼𑀲𑁄, 𑀫𑀕𑁆𑀕𑁄 𑀓𑀢𑀫𑀸 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺? ‘‘𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺. ‘‘𑀪𑀤𑁆𑀤𑀓𑁄 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀪𑀤𑁆𑀤𑀺𑀓𑀸 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬. 𑀅𑀮𑀜𑁆𑀘 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀅𑀧𑁆𑀧𑀫𑀸𑀤𑀸𑀬𑀸’’𑀢𑀺. 𑀧𑀞𑀫𑀁.

𑁨. 𑀆𑀚𑀻𑀯𑀓𑀲𑀼𑀢𑁆𑀢𑀁

𑁭𑁩. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀆𑀚𑀻𑀯𑀓𑀲𑀸𑀯𑀓𑁄 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀆𑀚𑀻𑀯𑀓𑀲𑀸𑀯𑀓𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋

‘‘𑀓𑁂𑀲𑀁 𑀦𑁄, 𑀪𑀦𑁆𑀢𑁂 𑀆𑀦𑀦𑁆𑀤, 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄? 𑀓𑁂 𑀮𑁄𑀓𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸? 𑀓𑁂 𑀮𑁄𑀓𑁂 𑀲𑀼𑀓𑀢𑀸’’𑀢𑀺 [𑀲𑀼𑀕𑀢𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]? ‘‘𑀢𑁂𑀦 𑀳𑀺, 𑀕𑀳𑀧𑀢𑀺, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀬𑁂 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀤𑁄𑀲𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀢𑁂𑀲𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄 𑀦𑁄 𑀯𑀸? 𑀓𑀣𑀁 𑀯𑀸 𑀢𑁂 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀬𑁂, 𑀪𑀦𑁆𑀢𑁂, 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀤𑁄𑀲𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀢𑁂𑀲𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄. 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀬𑁂 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀤𑁄𑀲𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀮𑁄𑀓𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀦𑁄 𑀯𑀸? 𑀓𑀣𑀁 𑀯𑀸 𑀢𑁂 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀬𑁂, 𑀪𑀦𑁆𑀢𑁂, 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀤𑁄𑀲𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀮𑁄𑀓𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀬𑁂𑀲𑀁 𑀭𑀸𑀕𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀬𑁂𑀲𑀁 𑀤𑁄𑀲𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀬𑁂𑀲𑀁 𑀫𑁄𑀳𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀢𑁂 𑀮𑁄𑀓𑁂 𑀲𑀼𑀓𑀢𑀸 𑀦𑁄 𑀯𑀸? 𑀓𑀣𑀁 𑀯𑀸 𑀢𑁂 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀬𑁂𑀲𑀁, 𑀪𑀦𑁆𑀢𑁂, 𑀭𑀸𑀕𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀬𑁂𑀲𑀁 𑀤𑁄𑀲𑁄 𑀧𑀳𑀻𑀦𑁄…𑀧𑁂… 𑀬𑁂𑀲𑀁 𑀫𑁄𑀳𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀢𑁂 𑀮𑁄𑀓𑁂 𑀲𑀼𑀓𑀢𑀸. 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀇𑀢𑀺 𑀔𑁄, 𑀕𑀳𑀧𑀢𑀺, 𑀢𑀬𑀸𑀯𑁂𑀢𑀁 [𑀢𑀬𑀸 𑀘𑁂𑀢𑀁 (𑀲𑀻. 𑀧𑀻. 𑀓.)] 𑀩𑁆𑀬𑀸𑀓𑀢𑀁 𑁋 ‘𑀬𑁂, 𑀪𑀦𑁆𑀢𑁂, 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀤𑁄𑀲𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀢𑁂𑀲𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄’𑀢𑀺. 𑀢𑀬𑀸𑀯𑁂𑀢𑀁 𑀩𑁆𑀬𑀸𑀓𑀢𑀁 𑁋 ‘𑀬𑁂, 𑀪𑀦𑁆𑀢𑁂, 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀤𑁄𑀲𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀮𑁄𑀓𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸’𑀢𑀺. 𑀢𑀬𑀸𑀯𑁂𑀢𑀁 𑀩𑁆𑀬𑀸𑀓𑀢𑀁 𑁋 ‘𑀬𑁂𑀲𑀁, 𑀪𑀦𑁆𑀢𑁂, 𑀭𑀸𑀕𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀬𑁂𑀲𑀁 𑀤𑁄𑀲𑁄 𑀧𑀳𑀻𑀦𑁄…𑀧𑁂… 𑀬𑁂𑀲𑀁 𑀫𑁄𑀳𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀢𑁂 𑀮𑁄𑀓𑁂 𑀲𑀼𑀓𑀢𑀸’’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀦 𑀘𑁂𑀯 𑀦𑀸𑀫 𑀲𑀥𑀫𑁆𑀫𑀼𑀓𑁆𑀓𑀁𑀲𑀦𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀭𑀥𑀫𑁆𑀫𑀸𑀧𑀲𑀸𑀤𑀦𑀸 [𑀦 𑀧𑀭𑀥𑀫𑁆𑀫𑀸𑀧𑀲𑀸𑀤𑀦𑀸 (𑀲𑀻. 𑀧𑀻.), 𑀦 𑀧𑀭𑀥𑀫𑁆𑀫𑀯𑀫𑁆𑀪𑀦𑀸 (𑀫. 𑀦𑀺. 𑁨.𑁨𑁩𑁬)]. 𑀆𑀬𑀢𑀦𑁂𑀯 [𑀆𑀬𑀢𑀦𑁂 𑀘 (𑀫. 𑀦𑀺. 𑁨.𑁨𑁩𑁬)] 𑀥𑀫𑁆𑀫𑀤𑁂𑀲𑀦𑀸, 𑀅𑀢𑁆𑀣𑁄 𑀘 𑀯𑀼𑀢𑁆𑀢𑁄, 𑀅𑀢𑁆𑀢𑀸 𑀘 𑀅𑀦𑀼𑀧𑀦𑀻𑀢𑁄. 𑀢𑀼𑀫𑁆𑀳𑁂, 𑀪𑀦𑁆𑀢𑁂 𑀆𑀦𑀦𑁆𑀤, 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀣, 𑀤𑁄𑀲𑀲𑁆𑀲…𑀧𑁂… 𑀫𑁄𑀳𑀲𑁆𑀲 𑀧𑀳𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀣. 𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄. 𑀢𑀼𑀫𑁆𑀳𑁂, 𑀪𑀦𑁆𑀢𑁂 𑀆𑀦𑀦𑁆𑀤, 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸, 𑀤𑁄𑀲𑀲𑁆𑀲…𑀧𑁂… 𑀫𑁄𑀳𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀸. 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀮𑁄𑀓𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀭𑀸𑀕𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀢𑀼𑀫𑁆𑀳𑀸𑀓𑀁 𑀤𑁄𑀲𑁄 𑀧𑀳𑀻𑀦𑁄…𑀧𑁂… 𑀢𑀼𑀫𑁆𑀳𑀸𑀓𑀁 𑀫𑁄𑀳𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀢𑀼𑀫𑁆𑀳𑁂 𑀮𑁄𑀓𑁂 𑀲𑀼𑀓𑀢𑀸.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀅𑀬𑁆𑀬𑁂𑀦 𑀆𑀦𑀦𑁆𑀤𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀢𑀁 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀅𑀬𑁆𑀬𑁄 𑀆𑀦𑀦𑁆𑀤𑁄 𑀥𑀸𑀭𑁂𑀢𑀼, 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀫𑀳𑀸𑀦𑀸𑀫𑀲𑀓𑁆𑀓𑀲𑀼𑀢𑁆𑀢𑀁

𑁭𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀕𑀺𑀮𑀸𑀦𑀸𑀯𑀼𑀝𑁆𑀞𑀺𑀢𑁄 [𑀕𑀺𑀮𑀸𑀦𑀯𑀼𑀝𑁆𑀞𑀺𑀢𑁄 (𑀲𑀤𑁆𑀤𑀦𑀻𑀢𑀺)] 𑀳𑁄𑀢𑀺 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸. 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀻𑀖𑀭𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑁋 ‘𑀲𑀫𑀸𑀳𑀺𑀢𑀲𑁆𑀲 𑀜𑀸𑀡𑀁, 𑀦𑁄 𑀅𑀲𑀫𑀸𑀳𑀺𑀢𑀲𑁆𑀲𑀸’𑀢𑀺. 𑀲𑀫𑀸𑀥𑀺 𑀦𑀼 𑀔𑁄, 𑀪𑀦𑁆𑀢𑁂, 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀜𑀸𑀡𑀁; 𑀉𑀤𑀸𑀳𑀼 𑀜𑀸𑀡𑀁 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀲𑀫𑀸𑀥𑀻’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀸 𑀔𑁄 𑀕𑀺𑀮𑀸𑀦𑀯𑀼𑀝𑁆𑀞𑀺𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸. 𑀅𑀬𑀜𑁆𑀘 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀅𑀢𑀺𑀕𑀫𑁆𑀪𑀻𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀬𑀁𑀦𑀽𑀦𑀸𑀳𑀁 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀏𑀓𑀫𑀦𑁆𑀢𑀁 𑀅𑀧𑀦𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀧𑀦𑁂𑀢𑁆𑀯𑀸 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀔𑀫𑁆𑀧𑀺 𑀔𑁄, 𑀫𑀳𑀸𑀦𑀸𑀫, 𑀲𑀻𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀅𑀲𑁂𑀔𑀫𑁆𑀧𑀺 𑀲𑀻𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸; 𑀲𑁂𑀔𑁄𑀧𑀺 𑀲𑀫𑀸𑀥𑀺 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀅𑀲𑁂𑀔𑁄𑀧𑀺 𑀲𑀫𑀸𑀥𑀺 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀲𑁂𑀔𑀸𑀧𑀺 𑀧𑀜𑁆𑀜𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀅𑀲𑁂𑀔𑀸𑀧𑀺 𑀧𑀜𑁆𑀜𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀓𑀢𑀫𑀜𑁆𑀘, 𑀫𑀳𑀸𑀦𑀸𑀫, 𑀲𑁂𑀔𑀁 𑀲𑀻𑀮𑀁? 𑀇𑀥, 𑀫𑀳𑀸𑀦𑀸𑀫, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀇𑀤𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫, 𑀲𑁂𑀔𑀁 𑀲𑀻𑀮𑀁’’.

‘‘𑀓𑀢𑀫𑁄 𑀘, 𑀫𑀳𑀸𑀦𑀸𑀫, 𑀲𑁂𑀔𑁄 𑀲𑀫𑀸𑀥𑀺? 𑀇𑀥, 𑀫𑀳𑀸𑀦𑀸𑀫, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫, 𑀲𑁂𑀔𑁄 𑀲𑀫𑀸𑀥𑀺.

‘‘𑀓𑀢𑀫𑀸 𑀘, 𑀫𑀳𑀸𑀦𑀸𑀫, 𑀲𑁂𑀔𑀸 𑀧𑀜𑁆𑀜𑀸? 𑀇𑀥, 𑀫𑀳𑀸𑀦𑀸𑀫, 𑀪𑀺𑀓𑁆𑀔𑀼 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫, 𑀲𑁂𑀔𑀸 𑀧𑀜𑁆𑀜𑀸.

‘‘𑀲 𑀔𑁄 𑀲𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀏𑀯𑀁 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀏𑀯𑀁 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀫𑀳𑀸𑀦𑀸𑀫, 𑀲𑁂𑀔𑀫𑁆𑀧𑀺 𑀲𑀻𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀅𑀲𑁂𑀔𑀫𑁆𑀧𑀺 𑀲𑀻𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸; 𑀲𑁂𑀔𑁄𑀧𑀺 𑀲𑀫𑀸𑀥𑀺 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀅𑀲𑁂𑀔𑁄𑀧𑀺 𑀲𑀫𑀸𑀥𑀺 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀲𑁂𑀔𑀸𑀧𑀺 𑀧𑀜𑁆𑀜𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀅𑀲𑁂𑀔𑀸𑀧𑀺 𑀧𑀜𑁆𑀜𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀢𑀢𑀺𑀬𑀁.

𑁪. 𑀦𑀺𑀕𑀡𑁆𑀞𑀲𑀼𑀢𑁆𑀢𑀁

𑁭𑁫. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀅𑀪𑀬𑁄 𑀘 𑀮𑀺𑀘𑁆𑀙𑀯𑀺 𑀧𑀡𑁆𑀟𑀺𑀢𑀓𑀼𑀫𑀸𑀭𑀓𑁄 𑀘 𑀮𑀺𑀘𑁆𑀙𑀯𑀺 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀪𑀬𑁄 𑀮𑀺𑀘𑁆𑀙𑀯𑀺 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀕𑀡𑁆𑀞𑁄, 𑀪𑀦𑁆𑀢𑁂, 𑀦𑀸𑀝𑀧𑀼𑀢𑁆𑀢𑁄 [𑀦𑀸𑀣𑀧𑀼𑀢𑁆𑀢𑁄 (𑀲𑀻. 𑀧𑀻.)] 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀘𑀭𑀢𑁄 𑀘 𑀫𑁂 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢’𑀦𑁆𑀢𑀺. 𑀲𑁄 𑀧𑀼𑀭𑀸𑀡𑀸𑀦𑀁 𑀓𑀫𑁆𑀫𑀸𑀦𑀁 𑀢𑀧𑀲𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀧𑀜𑁆𑀜𑀧𑁂𑀢𑀺 𑀦𑀯𑀸𑀦𑀁 𑀓𑀫𑁆𑀫𑀸𑀦𑀁 𑀅𑀓𑀭𑀡𑀸 𑀲𑁂𑀢𑀼𑀖𑀸𑀢𑀁. 𑀇𑀢𑀺 𑀓𑀫𑁆𑀫𑀓𑁆𑀔𑀬𑀸 𑀤𑀼𑀓𑁆𑀔𑀓𑁆𑀔𑀬𑁄, 𑀤𑀼𑀓𑁆𑀔𑀓𑁆𑀔𑀬𑀸 𑀯𑁂𑀤𑀦𑀸𑀓𑁆𑀔𑀬𑁄, 𑀯𑁂𑀤𑀦𑀸𑀓𑁆𑀔𑀬𑀸 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀦𑀺𑀚𑁆𑀚𑀺𑀡𑁆𑀡𑀁 𑀪𑀯𑀺𑀲𑁆𑀲𑀢𑀺 𑁋 𑀏𑀯𑀫𑁂𑀢𑀺𑀲𑁆𑀲𑀸 𑀲𑀦𑁆𑀤𑀺𑀝𑁆𑀞𑀺𑀓𑀸𑀬 𑀦𑀺𑀚𑁆𑀚𑀭𑀸𑀬 𑀯𑀺𑀲𑀼𑀤𑁆𑀥𑀺𑀬𑀸 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀓𑀺𑀫𑀸𑀳𑀸’’𑀢𑀺?

‘‘𑀢𑀺𑀲𑁆𑀲𑁄 𑀔𑁄 𑀇𑀫𑀸, 𑀅𑀪𑀬, 𑀦𑀺𑀚𑁆𑀚𑀭𑀸 𑀯𑀺𑀲𑀼𑀤𑁆𑀥𑀺𑀬𑁄 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑁆𑀫𑀤𑀓𑁆𑀔𑀸𑀢𑀸 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀓𑀢𑀫𑀸 𑀢𑀺𑀲𑁆𑀲𑁄? 𑀇𑀥, 𑀅𑀪𑀬, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑁄 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀻𑀢𑀺.

‘‘𑀲 𑀔𑁄 𑀲𑁄, 𑀅𑀪𑀬, 𑀪𑀺𑀓𑁆𑀔𑀼 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀻𑀢𑀺.

‘‘𑀲 𑀔𑁄 𑀲𑁄, 𑀅𑀪𑀬, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 [𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀏𑀯𑀁 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 (𑀲𑀻. 𑀲𑁆𑀬𑀸. 𑀓𑀁.)] 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀫𑀸 𑀔𑁄, 𑀅𑀪𑀬, 𑀢𑀺𑀲𑁆𑀲𑁄 𑀦𑀺𑀚𑁆𑀚𑀭𑀸 𑀯𑀺𑀲𑀼𑀤𑁆𑀥𑀺𑀬𑁄 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑁆𑀫𑀤𑀓𑁆𑀔𑀸𑀢𑀸 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀧𑀡𑁆𑀟𑀺𑀢𑀓𑀼𑀫𑀸𑀭𑀓𑁄 𑀮𑀺𑀘𑁆𑀙𑀯𑀺 𑀅𑀪𑀬𑀁 𑀮𑀺𑀘𑁆𑀙𑀯𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀧𑀦 𑀢𑁆𑀯𑀁, 𑀲𑀫𑁆𑀫 𑀅𑀪𑀬, 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑀲𑀻’’𑀢𑀺? ‘‘𑀓𑁆𑀬𑀸𑀳𑀁, 𑀲𑀫𑁆𑀫 𑀧𑀡𑁆𑀟𑀺𑀢𑀓𑀼𑀫𑀸𑀭𑀓, 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑀺𑀲𑁆𑀲𑀸𑀫𑀺! 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬 𑀬𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑁂𑀬𑁆𑀬𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀦𑀺𑀯𑁂𑀲𑀓𑀲𑀼𑀢𑁆𑀢𑀁

𑁭𑁬. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑁂, 𑀆𑀦𑀦𑁆𑀤, 𑀅𑀦𑀼𑀓𑀫𑁆𑀧𑁂𑀬𑁆𑀬𑀸𑀣 𑀬𑁂 𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸 𑀢𑁂 𑀯𑁄, 𑀆𑀦𑀦𑁆𑀤, 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀫𑀸𑀤𑀧𑁂𑀢𑀩𑁆𑀩𑀸 [𑀲𑀫𑀸𑀤𑀸𑀧𑁂𑀢𑀩𑁆𑀩𑀸 (?)] 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸. 𑀓𑀢𑀫𑁂𑀲𑀼 𑀢𑀻𑀲𑀼? 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺; 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺, 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’’𑀢𑀺.

‘‘𑀲𑀺𑀬𑀸, 𑀆𑀦𑀦𑁆𑀤, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑁋 𑀧𑀣𑀯𑀻𑀥𑀸𑀢𑀼𑀬𑀸 𑀆𑀧𑁄𑀥𑀸𑀢𑀼𑀬𑀸 𑀢𑁂𑀚𑁄𑀥𑀸𑀢𑀼𑀬𑀸 𑀯𑀸𑀬𑁄𑀥𑀸𑀢𑀼𑀬𑀸, 𑀦 𑀢𑁆𑀯𑁂𑀯 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀢𑀢𑁆𑀭𑀺𑀤𑀁 𑀅𑀜𑁆𑀜𑀣𑀢𑁆𑀢𑀁. 𑀲𑁄 𑀯𑀢𑀸𑀦𑀦𑁆𑀤, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑀺𑀬𑀸, 𑀆𑀦𑀦𑁆𑀤, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑁋 𑀧𑀣𑀯𑀻𑀥𑀸𑀢𑀼𑀬𑀸 𑀆𑀧𑁄𑀥𑀸𑀢𑀼𑀬𑀸 𑀢𑁂𑀚𑁄𑀥𑀸𑀢𑀼𑀬𑀸 𑀯𑀸𑀬𑁄𑀥𑀸𑀢𑀼𑀬𑀸, 𑀦 𑀢𑁆𑀯𑁂𑀯 𑀥𑀫𑁆𑀫𑁂…𑀧𑁂… 𑀦 𑀢𑁆𑀯𑁂𑀯 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀢𑀢𑁆𑀭𑀺𑀤𑀁 𑀅𑀜𑁆𑀜𑀣𑀢𑁆𑀢𑀁. 𑀲𑁄 𑀯𑀢𑀸𑀦𑀦𑁆𑀤, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀬𑁂, 𑀆𑀦𑀦𑁆𑀤, 𑀅𑀦𑀼𑀓𑀫𑁆𑀧𑁂𑀬𑁆𑀬𑀸𑀣 𑀬𑁂 𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸 𑀢𑁂 𑀯𑁄, 𑀆𑀦𑀦𑁆𑀤, 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀧𑀞𑀫𑀪𑀯𑀲𑀼𑀢𑁆𑀢𑀁

𑁭𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀯𑁄, 𑀪𑀯𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀯𑁄 𑀳𑁄𑀢𑀻’’𑀢𑀺?

‘‘𑀓𑀸𑀫𑀥𑀸𑀢𑀼𑀯𑁂𑀧𑀓𑁆𑀓𑀜𑁆𑀘, 𑀆𑀦𑀦𑁆𑀤, 𑀓𑀫𑁆𑀫𑀁 𑀦𑀸𑀪𑀯𑀺𑀲𑁆𑀲, 𑀅𑀧𑀺 𑀦𑀼 𑀔𑁄 𑀓𑀸𑀫𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁, 𑀢𑀡𑁆𑀳𑀸 𑀲𑁆𑀦𑁂𑀳𑁄 [𑀲𑀺𑀦𑁂𑀳𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀳𑀻𑀦𑀸𑀬 𑀥𑀸𑀢𑀼𑀬𑀸 𑀯𑀺𑀜𑁆𑀜𑀸𑀡𑀁 𑀧𑀢𑀺𑀝𑁆𑀞𑀺𑀢𑀁 𑀏𑀯𑀁 𑀆𑀬𑀢𑀺𑀁 [𑀆𑀬𑀢𑀺 (𑀲𑀻.)] 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. ( ) [(𑀏𑀯𑀁 𑀔𑁄 𑀆𑀦𑀦𑁆𑀤 𑀪𑀯𑁄 𑀳𑁄𑀢𑀻𑀢𑀺) (𑀓.) 𑀤𑀼𑀢𑀺𑀬𑀲𑀼𑀢𑁆𑀢𑁂 𑀧𑀦 𑀇𑀤𑀁 𑀧𑀸𑀞𑀦𑀸𑀦𑀢𑁆𑀢𑀁 𑀦𑀢𑁆𑀣𑀺]

‘‘𑀭𑀽𑀧𑀥𑀸𑀢𑀼𑀯𑁂𑀧𑀓𑁆𑀓𑀜𑁆𑀘, 𑀆𑀦𑀦𑁆𑀤, 𑀓𑀫𑁆𑀫𑀁 𑀦𑀸𑀪𑀯𑀺𑀲𑁆𑀲, 𑀅𑀧𑀺 𑀦𑀼 𑀔𑁄 𑀭𑀽𑀧𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀇𑀢𑀺 𑀔𑁄 𑀆𑀦𑀦𑁆𑀤, 𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁, 𑀢𑀡𑁆𑀳𑀸 𑀲𑁆𑀦𑁂𑀳𑁄. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀫𑀚𑁆𑀛𑀺𑀫𑀸𑀬 𑀥𑀸𑀢𑀼𑀬𑀸 𑀯𑀺𑀜𑁆𑀜𑀸𑀡𑀁 𑀧𑀢𑀺𑀝𑁆𑀞𑀺𑀢𑀁 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. ( ) [(𑀏𑀯𑀁 𑀔𑁄 𑀆𑀦𑀦𑁆𑀤 𑀪𑀯𑁄 𑀳𑁄𑀢𑀻𑀢𑀺) (𑀓.) 𑀤𑀼𑀢𑀺𑀬𑀲𑀼𑀢𑁆𑀢𑁂 𑀧𑀦 𑀇𑀤𑀁 𑀧𑀸𑀞𑀦𑀸𑀦𑀢𑁆𑀢𑀁 𑀦𑀢𑁆𑀣𑀺]

‘‘𑀅𑀭𑀽𑀧𑀥𑀸𑀢𑀼𑀯𑁂𑀧𑀓𑁆𑀓𑀜𑁆𑀘, 𑀆𑀦𑀦𑁆𑀤, 𑀓𑀫𑁆𑀫𑀁 𑀦𑀸𑀪𑀯𑀺𑀲𑁆𑀲, 𑀅𑀧𑀺 𑀦𑀼 𑀔𑁄 𑀅𑀭𑀽𑀧𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁, 𑀢𑀡𑁆𑀳𑀸 𑀲𑁆𑀦𑁂𑀳𑁄. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀧𑀡𑀻𑀢𑀸𑀬 𑀥𑀸𑀢𑀼𑀬𑀸 𑀯𑀺𑀜𑁆𑀜𑀸𑀡𑀁 𑀧𑀢𑀺𑀝𑁆𑀞𑀺𑀢𑀁 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀯𑁄 𑀳𑁄𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀤𑀼𑀢𑀺𑀬𑀪𑀯𑀲𑀼𑀢𑁆𑀢𑀁

𑁭𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀯𑁄, 𑀪𑀯𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀯𑁄 𑀳𑁄𑀢𑀻’’𑀢𑀺?

‘‘𑀓𑀸𑀫𑀥𑀸𑀢𑀼𑀯𑁂𑀧𑀓𑁆𑀓𑀜𑁆𑀘, 𑀆𑀦𑀦𑁆𑀤, 𑀓𑀫𑁆𑀫𑀁 𑀦𑀸𑀪𑀯𑀺𑀲𑁆𑀲, 𑀅𑀧𑀺 𑀦𑀼 𑀔𑁄 𑀓𑀸𑀫𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁, 𑀢𑀡𑁆𑀳𑀸 𑀲𑁆𑀦𑁂𑀳𑁄. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀳𑀻𑀦𑀸𑀬 𑀥𑀸𑀢𑀼𑀬𑀸 𑀘𑁂𑀢𑀦𑀸 𑀧𑀢𑀺𑀝𑁆𑀞𑀺𑀢𑀸 𑀧𑀢𑁆𑀣𑀦𑀸 𑀧𑀢𑀺𑀝𑁆𑀞𑀺𑀢𑀸 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺’’.

‘‘𑀭𑀽𑀧𑀥𑀸𑀢𑀼𑀯𑁂𑀧𑀓𑁆𑀓𑀜𑁆𑀘, 𑀆𑀦𑀦𑁆𑀤, 𑀓𑀫𑁆𑀫𑀁 𑀦𑀸𑀪𑀯𑀺𑀲𑁆𑀲, 𑀅𑀧𑀺 𑀦𑀼 𑀔𑁄 𑀭𑀽𑀧𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁, 𑀢𑀡𑁆𑀳𑀸 𑀲𑁆𑀦𑁂𑀳𑁄. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀫𑀚𑁆𑀛𑀺𑀫𑀸𑀬 𑀥𑀸𑀢𑀼𑀬𑀸 𑀘𑁂𑀢𑀦𑀸 𑀧𑀢𑀺𑀝𑁆𑀞𑀺𑀢𑀸 𑀧𑀢𑁆𑀣𑀦𑀸 𑀧𑀢𑀺𑀝𑁆𑀞𑀺𑀢𑀸 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺’’.

‘‘𑀅𑀭𑀽𑀧𑀥𑀸𑀢𑀼𑀯𑁂𑀧𑀓𑁆𑀓𑀜𑁆𑀘, 𑀆𑀦𑀦𑁆𑀤, 𑀓𑀫𑁆𑀫𑀁 𑀦𑀸𑀪𑀯𑀺𑀲𑁆𑀲, 𑀅𑀧𑀺 𑀦𑀼 𑀔𑁄 𑀅𑀭𑀽𑀧𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁, 𑀢𑀡𑁆𑀳𑀸 𑀲𑁆𑀦𑁂𑀳𑁄. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀧𑀡𑀻𑀢𑀸𑀬 𑀥𑀸𑀢𑀼𑀬𑀸 𑀘𑁂𑀢𑀦𑀸 𑀧𑀢𑀺𑀝𑁆𑀞𑀺𑀢𑀸 𑀧𑀢𑁆𑀣𑀦𑀸 𑀧𑀢𑀺𑀝𑁆𑀞𑀺𑀢𑀸 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀯𑁄 𑀳𑁄𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀲𑀻𑀮𑀩𑁆𑀩𑀢𑀲𑀼𑀢𑁆𑀢𑀁

𑁭𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀩𑁆𑀩𑀁 𑀦𑀼 𑀔𑁄, 𑀆𑀦𑀦𑁆𑀤, 𑀲𑀻𑀮𑀩𑁆𑀩𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀉𑀧𑀝𑁆𑀞𑀸𑀦𑀲𑀸𑀭𑀁 𑀲𑀨𑀮’’𑀦𑁆𑀢𑀺? ‘‘𑀦 𑀔𑁆𑀯𑁂𑀢𑁆𑀣, 𑀪𑀦𑁆𑀢𑁂, 𑀏𑀓𑀁𑀲𑁂𑀦𑀸’’𑀢𑀺. ‘‘𑀢𑁂𑀦 𑀳𑀸𑀦𑀦𑁆𑀤, 𑀯𑀺𑀪𑀚𑀲𑁆𑀲𑀽’’𑀢𑀺.

‘‘𑀬𑀜𑁆𑀳𑀺𑀲𑁆𑀲 [𑀬𑀣𑀸𑀭𑀽𑀧𑀁 𑀳𑀺𑀲𑁆𑀲 (?) 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀸𑀦𑀼𑀭𑀽𑀧𑀁], 𑀪𑀦𑁆𑀢𑁂, 𑀲𑀻𑀮𑀩𑁆𑀩𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀉𑀧𑀝𑁆𑀞𑀸𑀦𑀲𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑀁 𑀲𑀻𑀮𑀩𑁆𑀩𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀉𑀧𑀝𑁆𑀞𑀸𑀦𑀲𑀸𑀭𑀁 𑀅𑀨𑀮𑀁. 𑀬𑀜𑁆𑀘 𑀔𑁆𑀯𑀸𑀲𑁆𑀲 [𑀬𑀜𑁆𑀳𑀺𑀲𑁆𑀲 (𑀓.), 𑀬𑀣𑀸𑀭𑀽𑀧𑀜𑁆𑀘 𑀔𑁆𑀯𑀸𑀲𑁆𑀲 (?)], 𑀪𑀦𑁆𑀢𑁂, 𑀲𑀻𑀮𑀩𑁆𑀩𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀉𑀧𑀝𑁆𑀞𑀸𑀦𑀲𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀭𑀽𑀧𑀁 𑀲𑀻𑀮𑀩𑁆𑀩𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀉𑀧𑀝𑁆𑀞𑀸𑀦𑀲𑀸𑀭𑀁 𑀲𑀨𑀮’’𑀦𑁆𑀢𑀺. 𑀇𑀤𑀫𑀯𑁄𑀘 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄; 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ‘‘𑀲𑀫𑀦𑀼𑀜𑁆𑀜𑁄 𑀫𑁂 𑀲𑀢𑁆𑀣𑀸’’𑀢𑀺, 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑁂𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄; 𑀦 𑀘 𑀧𑀦𑀲𑁆𑀲 𑀲𑀼𑀮𑀪𑀭𑀽𑀧𑁄 𑀲𑀫𑀲𑀫𑁄 𑀧𑀜𑁆𑀜𑀸𑀬𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀕𑀦𑁆𑀥𑀚𑀸𑀢𑀲𑀼𑀢𑁆𑀢𑀁

𑁮𑁦. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀢𑀻𑀡𑀺𑀫𑀸𑀦𑀺, 𑀪𑀦𑁆𑀢𑁂, 𑀕𑀦𑁆𑀥𑀚𑀸𑀢𑀸𑀦𑀺, 𑀬𑁂𑀲𑀁 𑀅𑀦𑀼𑀯𑀸𑀢𑀁𑀬𑁂𑀯 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀦𑁄 𑀧𑀝𑀺𑀯𑀸𑀢𑀁. 𑀓𑀢𑀫𑀸𑀦𑀺 𑀢𑀻𑀡𑀺? 𑀫𑀽𑀮𑀕𑀦𑁆𑀥𑁄, 𑀲𑀸𑀭𑀕𑀦𑁆𑀥𑁄, 𑀧𑀼𑀧𑁆𑀨𑀕𑀦𑁆𑀥𑁄 𑁋 𑀇𑀫𑀸𑀦𑀺 𑀔𑁄, 𑀪𑀦𑁆𑀢𑁂, 𑀢𑀻𑀡𑀺 𑀕𑀦𑁆𑀥𑀚𑀸𑀢𑀸𑀦𑀺, 𑀬𑁂𑀲𑀁 𑀅𑀦𑀼𑀯𑀸𑀢𑀁𑀬𑁂𑀯 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀦𑁄 𑀧𑀝𑀺𑀯𑀸𑀢𑀁. 𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁 𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺?

‘‘𑀅𑀢𑁆𑀣𑀸𑀦𑀦𑁆𑀤, 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁 [𑀅𑀢𑁆𑀣𑀸𑀦𑀦𑁆𑀤 𑀕𑀦𑁆𑀥𑀚𑀸𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺. ‘‘𑀓𑀢𑀫𑀜𑁆𑀘 𑀧𑀦, 𑀪𑀦𑁆𑀢𑁂, 𑀕𑀦𑁆𑀥𑀚𑀸𑀢𑀁 𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺?

‘‘𑀇𑀥𑀸𑀦𑀦𑁆𑀤, 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄.

‘‘𑀢𑀲𑁆𑀲 𑀤𑀺𑀲𑀸𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺 𑁋 ‘𑀅𑀫𑀼𑀓𑀲𑁆𑀫𑀺𑀁 [𑀅𑀲𑀼𑀓𑀲𑁆𑀫𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄’’’𑀢𑀺.

‘‘𑀤𑁂𑀯𑀢𑀸𑀧𑀺𑀲𑁆𑀲 [𑀤𑁂𑀯𑀢𑀸𑀧𑀺𑀲𑁆𑀲 𑀅𑀫𑀦𑀼𑀲𑁆𑀲𑀸 (𑀲𑀻. 𑀧𑀻.), 𑀤𑁂𑀯𑀢𑀸𑀧𑀺𑀲𑁆𑀲 𑀅𑀫𑀦𑀼𑀲𑁆𑀲𑀸𑀧𑀺 (𑀓.), 𑀤𑁂𑀯𑀢𑀸𑀧𑀺𑀲𑁆𑀲…𑀧𑁂… 𑀫𑀦𑀼𑀲𑁆𑀲𑀸𑀧𑀺𑀲𑁆𑀲 (?)] 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺 𑁋 ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄’𑀢𑀺. 𑀇𑀤𑀁 𑀔𑁄 𑀢𑀁, 𑀆𑀦𑀦𑁆𑀤, 𑀕𑀦𑁆𑀥𑀚𑀸𑀢𑀁 𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺.

‘‘𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺,

𑀦 𑀘𑀦𑁆𑀤𑀦𑀁 𑀢𑀕𑀭𑀫𑀮𑁆𑀮𑀺𑀓𑀸 [𑀢𑀕𑁆𑀕𑀭𑀫𑀮𑁆𑀮𑀺𑀓𑀸 (𑀧𑀻.)] 𑀯𑀸;

𑀲𑀢𑀜𑁆𑀘 𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺,

𑀲𑀩𑁆𑀩𑀸 𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀻’’𑀢𑀺. 𑀦𑀯𑀫𑀁;

𑁧𑁦. 𑀘𑀽𑀴𑀦𑀺𑀓𑀸𑀲𑀼𑀢𑁆𑀢𑀁

𑁮𑁧. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀫𑁆𑀫𑀼𑀔𑀸𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀪𑀕𑀯𑀢𑁄, 𑀆𑀦𑀦𑁆𑀤, 𑀲𑀺𑀔𑀺𑀲𑁆𑀲 𑀅𑀪𑀺𑀪𑀽 𑀦𑀸𑀫 𑀲𑀸𑀯𑀓𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 [𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀁 (𑀧𑀻.) 𑀲𑀁. 𑀦𑀺. 𑁧.𑁧𑁮𑁫 𑀯𑀺𑀢𑁆𑀣𑀸𑀭𑁄] 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀲𑀻’𑀢𑀺. 𑀪𑀕𑀯𑀸 𑀧𑀦, 𑀪𑀦𑁆𑀢𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀻𑀯𑀢𑀓𑀁 𑀧𑀳𑁄𑀢𑀺 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺? ‘‘𑀲𑀸𑀯𑀓𑁄 𑀲𑁄, 𑀆𑀦𑀦𑁆𑀤, 𑀅𑀧𑁆𑀧𑀫𑁂𑀬𑁆𑀬𑀸 𑀢𑀣𑀸𑀕𑀢𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀪𑀕𑀯𑀢𑁄, 𑀆𑀦𑀦𑁆𑀤, 𑀲𑀺𑀔𑀺𑀲𑁆𑀲 𑀅𑀪𑀺𑀪𑀽 𑀦𑀸𑀫 𑀲𑀸𑀯𑀓𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀲𑀻’𑀢𑀺. 𑀪𑀕𑀯𑀸 𑀧𑀦, 𑀪𑀦𑁆𑀢𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀻𑀯𑀢𑀓𑀁 𑀧𑀳𑁄𑀢𑀺 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺? ‘‘𑀲𑀸𑀯𑀓𑁄 𑀲𑁄, 𑀆𑀦𑀦𑁆𑀤, 𑀅𑀧𑁆𑀧𑀫𑁂𑀬𑁆𑀬𑀸 𑀢𑀣𑀸𑀕𑀢𑀸’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀫𑁆𑀫𑀼𑀔𑀸𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀪𑀕𑀯𑀢𑁄, 𑀆𑀦𑀦𑁆𑀤, 𑀲𑀺𑀔𑀺𑀲𑁆𑀲 𑀅𑀪𑀺𑀪𑀽 𑀦𑀸𑀫 𑀲𑀸𑀯𑀓𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀲𑀻’𑀢𑀺. 𑀪𑀕𑀯𑀸 𑀧𑀦, 𑀪𑀦𑁆𑀢𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀻𑀯𑀢𑀓𑀁 𑀧𑀳𑁄𑀢𑀺 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺? ‘‘𑀲𑀼𑀢𑀸 𑀢𑁂, 𑀆𑀦𑀦𑁆𑀤, 𑀲𑀳𑀲𑁆𑀲𑀻 𑀘𑀽𑀴𑀦𑀺𑀓𑀸 𑀮𑁄𑀓𑀥𑀸𑀢𑀽’’𑀢𑀺? ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄! 𑀬𑀁 𑀪𑀕𑀯𑀸 𑀪𑀸𑀲𑁂𑀬𑁆𑀬. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀡𑀸𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀢𑀸, 𑀆𑀦𑀦𑁆𑀤, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 [𑀘𑀦𑁆𑀤𑀺𑀫𑀲𑀼𑀭𑀺𑀬𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀭𑀺𑀳𑀭𑀦𑁆𑀢𑀺, 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸, 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄. 𑀢𑀲𑁆𑀫𑀺𑀁 𑀲𑀳𑀲𑁆𑀲𑀥𑀸 𑀮𑁄𑀓𑁂 𑀲𑀳𑀲𑁆𑀲𑀁 [𑀢𑀲𑁆𑀫𑀺𑀁 𑀲𑀳𑀲𑁆𑀲𑀁 (𑀲𑁆𑀬𑀸. 𑀓𑀁. 𑀧𑀻.)] 𑀘𑀦𑁆𑀤𑀸𑀦𑀁, 𑀲𑀳𑀲𑁆𑀲𑀁 𑀲𑀽𑀭𑀺𑀬𑀸𑀦𑀁, 𑀲𑀳𑀲𑁆𑀲𑀁 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸𑀦𑀁, 𑀲𑀳𑀲𑁆𑀲𑀁 𑀚𑀫𑁆𑀩𑀼𑀤𑀻𑀧𑀸𑀦𑀁, 𑀲𑀳𑀲𑁆𑀲𑀁 𑀅𑀧𑀭𑀕𑁄𑀬𑀸𑀦𑀸𑀦𑀁, 𑀲𑀳𑀲𑁆𑀲𑀁 𑀉𑀢𑁆𑀢𑀭𑀓𑀼𑀭𑀽𑀦𑀁, 𑀲𑀳𑀲𑁆𑀲𑀁 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀁, 𑀘𑀢𑁆𑀢𑀸𑀭𑀺 𑀫𑀳𑀸𑀲𑀫𑀼𑀤𑁆𑀤𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀫𑀳𑀸𑀭𑀸𑀚𑀲𑀳𑀲𑁆𑀲𑀸𑀦𑀺, 𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁, 𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦𑀁, 𑀲𑀳𑀲𑁆𑀲𑀁 𑀬𑀸𑀫𑀸𑀦𑀁, 𑀲𑀳𑀲𑁆𑀲𑀁 𑀢𑀼𑀲𑀺𑀢𑀸𑀦𑀁, 𑀲𑀳𑀲𑁆𑀲𑀁 𑀦𑀺𑀫𑁆𑀫𑀸𑀦𑀭𑀢𑀻𑀦𑀁, 𑀲𑀳𑀲𑁆𑀲𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁, 𑀲𑀳𑀲𑁆𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀲𑀳𑀲𑁆𑀲𑀻 𑀘𑀽𑀴𑀦𑀺𑀓𑀸 𑀮𑁄𑀓𑀥𑀸𑀢𑀼.

‘‘𑀬𑀸𑀯𑀢𑀸𑀦𑀦𑁆𑀤, 𑀲𑀳𑀲𑁆𑀲𑀻 𑀘𑀽𑀴𑀦𑀺𑀓𑀸 𑀮𑁄𑀓𑀥𑀸𑀢𑀼 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄. 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀤𑁆𑀯𑀺𑀲𑀳𑀲𑁆𑀲𑀻 𑀫𑀚𑁆𑀛𑀺𑀫𑀺𑀓𑀸 𑀮𑁄𑀓𑀥𑀸𑀢𑀼.

‘‘𑀬𑀸𑀯𑀢𑀸𑀦𑀦𑁆𑀤, 𑀤𑁆𑀯𑀺𑀲𑀳𑀲𑁆𑀲𑀻 𑀫𑀚𑁆𑀛𑀺𑀫𑀺𑀓𑀸 𑀮𑁄𑀓𑀥𑀸𑀢𑀼 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄. 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀢𑀺𑀲𑀳𑀲𑁆𑀲𑀻 𑀫𑀳𑀸𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼.

‘‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 [𑀢𑀺𑀲𑀳𑀲𑁆𑀲𑀺 𑀫𑀳𑀸𑀲𑀳𑀲𑁆𑀲𑀺𑀁 𑀮𑁄𑀓𑀥𑀸𑀢𑀼𑀁 (𑀲𑁆𑀬𑀸. 𑀓𑀁.), 𑀢𑀺𑀲𑀳𑀲𑁆𑀲𑀻𑀫𑀳𑀸𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀁 (𑀧𑀻.)] 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺? ‘‘𑀇𑀥𑀸𑀦𑀦𑁆𑀤, 𑀢𑀣𑀸𑀕𑀢𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀪𑀸𑀲𑁂𑀦 𑀨𑀭𑁂𑀬𑁆𑀬. 𑀬𑀤𑀸 𑀢𑁂 𑀲𑀢𑁆𑀢𑀸 𑀢𑀁 𑀆𑀮𑁄𑀓𑀁 𑀲𑀜𑁆𑀚𑀸𑀦𑁂𑀬𑁆𑀬𑀼𑀁, 𑀅𑀣 𑀢𑀣𑀸𑀕𑀢𑁄 𑀖𑁄𑀲𑀁 𑀓𑀭𑁂𑀬𑁆𑀬 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀬𑁆𑀬. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 (𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁) [(𑀪𑀕𑀯𑀦𑁆𑀢𑀁) (𑀲𑀻.), ( ) 𑀦𑀢𑁆𑀣𑀺 𑀲𑁆𑀬𑀸. 𑀓𑀁. 𑀧𑁄𑀢𑁆𑀣𑀓𑁂𑀲𑀼. 𑀅𑀝𑁆𑀞𑀓𑀣𑀸𑀬 𑀲𑀫𑁂𑀢𑀺] 𑀏𑀢𑀤𑀯𑁄𑀘 𑁋 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀲𑀢𑁆𑀣𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀢𑀼𑀬𑁆𑀳𑁂𑀢𑁆𑀣, 𑀆𑀯𑀼𑀲𑁄 𑀆𑀦𑀦𑁆𑀤, 𑀬𑀤𑀺 𑀢𑁂 𑀲𑀢𑁆𑀣𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀳𑁂𑀯𑀁, 𑀉𑀤𑀸𑀬𑀺, 𑀫𑀸 𑀳𑁂𑀯𑀁, 𑀉𑀤𑀸𑀬𑀺. 𑀲𑀘𑁂, 𑀉𑀤𑀸𑀬𑀺, 𑀆𑀦𑀦𑁆𑀤𑁄 𑀅𑀯𑀻𑀢𑀭𑀸𑀕𑁄 𑀓𑀸𑀮𑀁 𑀓𑀭𑁂𑀬𑁆𑀬, 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀬𑁆𑀬, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀇𑀫𑀲𑁆𑀫𑀺𑀁𑀬𑁂𑀯 𑀚𑀫𑁆𑀩𑀼𑀤𑀻𑀧𑁂 𑀫𑀳𑀸𑀭𑀚𑁆𑀚𑀁 𑀓𑀸𑀭𑁂𑀬𑁆𑀬. 𑀅𑀧𑀺 𑀘, 𑀉𑀤𑀸𑀬𑀺, 𑀆𑀦𑀦𑁆𑀤𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺. 𑀤𑀲𑀫𑀁.

𑀆𑀦𑀦𑁆𑀤𑀯𑀕𑁆𑀕𑁄 𑀢𑀢𑀺𑀬𑁄.