𑁧𑁦. 𑀉𑀧𑁄𑀲𑀣𑀲𑀼𑀢𑁆𑀢𑀁

𑁭𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀢𑀤𑀳𑀼𑀧𑁄𑀲𑀣𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀯𑀺𑀲𑀸𑀔𑁂, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺? ‘‘𑀉𑀧𑁄𑀲𑀣𑀸𑀳𑀁, 𑀪𑀦𑁆𑀢𑁂, 𑀅𑀚𑁆𑀚 𑀉𑀧𑀯𑀲𑀸𑀫𑀻’’𑀢𑀺.

‘‘𑀢𑀬𑁄 𑀔𑁄𑀫𑁂, 𑀯𑀺𑀲𑀸𑀔𑁂, 𑀉𑀧𑁄𑀲𑀣𑀸. 𑀓𑀢𑀫𑁂 𑀢𑀬𑁄? 𑀕𑁄𑀧𑀸𑀮𑀓𑀼𑀧𑁄𑀲𑀣𑁄, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄, 𑀅𑀭𑀺𑀬𑀼𑀧𑁄𑀲𑀣𑁄. 𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀕𑁄𑀧𑀸𑀮𑀓𑀼𑀧𑁄𑀲𑀣𑁄 𑀳𑁄𑀢𑀺? 𑀲𑁂𑀬𑁆𑀬𑀣𑀸𑀧𑀺, 𑀯𑀺𑀲𑀸𑀔𑁂, 𑀕𑁄𑀧𑀸𑀮𑀓𑁄 𑀲𑀸𑀬𑀦𑁆𑀳𑀲𑀫𑀬𑁂 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀚𑁆𑀚 𑀔𑁄 𑀕𑀸𑀯𑁄 𑀅𑀫𑀼𑀓𑀲𑁆𑀫𑀺𑀜𑁆𑀘 𑀅𑀫𑀼𑀓𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀘𑀭𑀺𑀁𑀲𑀼, 𑀅𑀫𑀼𑀓𑀲𑁆𑀫𑀺𑀜𑁆𑀘 𑀅𑀫𑀼𑀓𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀸𑀦𑀻𑀬𑀸𑀦𑀺 𑀧𑀺𑀯𑀺𑀁𑀲𑀼; 𑀲𑁆𑀯𑁂 𑀤𑀸𑀦𑀺 𑀕𑀸𑀯𑁄 𑀅𑀫𑀼𑀓𑀲𑁆𑀫𑀺𑀜𑁆𑀘 𑀅𑀫𑀼𑀓𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀘𑀭𑀺𑀲𑁆𑀲𑀦𑁆𑀢𑀺, 𑀅𑀫𑀼𑀓𑀲𑁆𑀫𑀺𑀜𑁆𑀘 𑀅𑀫𑀼𑀓𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀸𑀦𑀻𑀬𑀸𑀦𑀺 𑀧𑀺𑀯𑀺𑀲𑁆𑀲𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀔𑁄, 𑀯𑀺𑀲𑀸𑀔𑁂, 𑀇𑀥𑁂𑀓𑀘𑁆𑀘𑁄 𑀉𑀧𑁄𑀲𑀣𑀺𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁆𑀯𑀚𑁆𑀚 𑀇𑀤𑀜𑁆𑀘𑀺𑀤𑀜𑁆𑀘 𑀔𑀸𑀤𑀦𑀻𑀬𑀁 𑀔𑀸𑀤𑀺𑀁, 𑀇𑀤𑀜𑁆𑀘𑀺𑀤𑀜𑁆𑀘 𑀪𑁄𑀚𑀦𑀻𑀬𑀁 𑀪𑀼𑀜𑁆𑀚𑀺𑀁; 𑀲𑁆𑀯𑁂 𑀤𑀸𑀦𑀸𑀳𑀁 𑀇𑀤𑀜𑁆𑀘𑀺𑀤𑀜𑁆𑀘 𑀔𑀸𑀤𑀦𑀻𑀬𑀁 𑀔𑀸𑀤𑀺𑀲𑁆𑀲𑀸𑀫𑀺, 𑀇𑀤𑀁 𑀘𑀺𑀤𑀜𑁆𑀘 𑀪𑁄𑀚𑀦𑀻𑀬𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀢𑁂𑀦 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺. 𑀏𑀯𑀁 𑀔𑁄 𑀯𑀺𑀲𑀸𑀔𑁂, 𑀕𑁄𑀧𑀸𑀮𑀓𑀼𑀧𑁄𑀲𑀣𑁄 𑀳𑁄𑀢𑀺. 𑀏𑀯𑀁 𑀉𑀧𑀯𑀼𑀢𑁆𑀣𑁄 𑀔𑁄, 𑀯𑀺𑀲𑀸𑀔𑁂, 𑀕𑁄𑀧𑀸𑀮𑀓𑀼𑀧𑁄𑀲𑀣𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑁄 𑀦 𑀫𑀳𑀸𑀚𑀼𑀢𑀺𑀓𑁄 𑀦 𑀫𑀳𑀸𑀯𑀺𑀧𑁆𑀨𑀸𑀭𑁄.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄 𑀳𑁄𑀢𑀺? 𑀅𑀢𑁆𑀣𑀺, 𑀯𑀺𑀲𑀸𑀔𑁂, 𑀦𑀺𑀕𑀡𑁆𑀞𑀸 𑀦𑀸𑀫 𑀲𑀫𑀡𑀚𑀸𑀢𑀺𑀓𑀸. 𑀢𑁂 𑀲𑀸𑀯𑀓𑀁 𑀏𑀯𑀁 𑀲𑀫𑀸𑀤𑀧𑁂𑀦𑁆𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀸𑀡𑀸 𑀧𑀭𑀁 𑀬𑁄𑀚𑀦𑀲𑀢𑀁 𑀢𑁂𑀲𑀼 𑀤𑀡𑁆𑀟𑀁 𑀦𑀺𑀓𑁆𑀔𑀺𑀧𑀸𑀳𑀺; 𑀬𑁂 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀸𑀡𑀸 𑀧𑀭𑀁 𑀬𑁄𑀚𑀦𑀲𑀢𑀁 𑀢𑁂𑀲𑀼 𑀤𑀡𑁆𑀟𑀁 𑀦𑀺𑀓𑁆𑀔𑀺𑀧𑀸𑀳𑀺; 𑀬𑁂 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀧𑀸𑀡𑀸 𑀧𑀭𑀁 𑀬𑁄𑀚𑀦𑀲𑀢𑀁 𑀢𑁂𑀲𑀼 𑀤𑀡𑁆𑀟𑀁 𑀦𑀺𑀓𑁆𑀔𑀺𑀧𑀸𑀳𑀺; 𑀬𑁂 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀧𑀸𑀡𑀸 𑀧𑀭𑀁 𑀬𑁄𑀚𑀦𑀲𑀢𑀁 𑀢𑁂𑀲𑀼 𑀤𑀡𑁆𑀟𑀁 𑀦𑀺𑀓𑁆𑀔𑀺𑀧𑀸𑀳𑀻’𑀢𑀺. 𑀇𑀢𑀺 𑀏𑀓𑀘𑁆𑀘𑀸𑀦𑀁 𑀧𑀸𑀡𑀸𑀦𑀁 𑀅𑀦𑀼𑀤𑁆𑀤𑀬𑀸𑀬 𑀅𑀦𑀼𑀓𑀫𑁆𑀧𑀸𑀬 𑀲𑀫𑀸𑀤𑀧𑁂𑀦𑁆𑀢𑀺, 𑀏𑀓𑀘𑁆𑀘𑀸𑀦𑀁 𑀧𑀸𑀡𑀸𑀦𑀁 𑀦𑀸𑀦𑀼𑀤𑁆𑀤𑀬𑀸𑀬 𑀦𑀸𑀦𑀼𑀓𑀫𑁆𑀧𑀸𑀬 𑀲𑀫𑀸𑀤𑀧𑁂𑀦𑁆𑀢𑀺. 𑀢𑁂 𑀢𑀤𑀳𑀼𑀧𑁄𑀲𑀣𑁂 𑀲𑀸𑀯𑀓𑀁 𑀏𑀯𑀁 𑀲𑀫𑀸𑀤𑀧𑁂𑀦𑁆𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀲𑀩𑁆𑀩𑀘𑁂𑀮𑀸𑀦𑀺 [𑀲𑀩𑁆𑀩𑀯𑁂𑀭𑀸𑀦𑀺 (𑀓.)] 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀯𑀁 𑀯𑀤𑁂𑀳𑀺 𑁋 𑀦𑀸𑀳𑀁 𑀓𑁆𑀯𑀘𑀦𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀁 [𑀓𑀺𑀜𑁆𑀘𑀦𑀢𑀲𑁆𑀫𑀺 (?) 𑀓𑀺𑀭𑀺𑀬𑀸𑀧𑀤𑀫𑁂𑀢𑀁 𑀬𑀣𑀸 𑀓𑀺𑀜𑁆𑀘𑀦𑀢𑀢𑁆𑀣𑀻𑀢𑀺], 𑀦 𑀘 𑀫𑀫 𑀓𑁆𑀯𑀘𑀦𑀺 𑀓𑀢𑁆𑀣𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻’𑀢𑀺. 𑀚𑀸𑀦𑀦𑁆𑀢𑀺 𑀔𑁄 𑀧𑀦𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑁋 ‘𑀅𑀬𑀁 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄’𑀢𑀺; 𑀲𑁄𑀧𑀺 𑀚𑀸𑀦𑀸𑀢𑀺 𑁋 ‘𑀇𑀫𑁂 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀭𑁄’𑀢𑀺. 𑀚𑀸𑀦𑀸𑀢𑀺 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀤𑀸𑀭𑁄 𑁋 ‘𑀅𑀬𑀁 𑀫𑀬𑁆𑀳𑀁 𑀪𑀢𑁆𑀢𑀸’𑀢𑀺; 𑀲𑁄𑀧𑀺 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀫𑀬𑁆𑀳𑀁 𑀧𑀼𑀢𑁆𑀢𑀤𑀸𑀭𑁄’𑀢𑀺. 𑀚𑀸𑀦𑀦𑁆𑀢𑀺 𑀔𑁄 𑀧𑀦𑀲𑁆𑀲 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀸 𑁋 ‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄’𑀢𑀺; 𑀲𑁄𑀧𑀺 𑀚𑀸𑀦𑀸𑀢𑀺 𑁋 ‘𑀇𑀫𑁂 𑀫𑀬𑁆𑀳𑀁 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀸’𑀢𑀺. 𑀇𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁂 𑀲𑀫𑀸𑀤𑀧𑁂𑀢𑀩𑁆𑀩𑀸 𑀫𑀼𑀲𑀸𑀯𑀸𑀤𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀸𑀤𑀧𑁂𑀦𑁆𑀢𑀺. 𑀇𑀤𑀁 𑀢𑀲𑁆𑀲 𑀫𑀼𑀲𑀸𑀯𑀸𑀤𑀲𑁆𑀫𑀺𑀁 𑀯𑀤𑀸𑀫𑀺. 𑀲𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑁄𑀕𑁂 𑀅𑀤𑀺𑀦𑁆𑀦𑀁𑀬𑁂𑀯 𑀧𑀭𑀺𑀪𑀼𑀜𑁆𑀚𑀢𑀺. 𑀇𑀤𑀁 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀫𑀺𑀁 𑀯𑀤𑀸𑀫𑀺. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄 𑀳𑁄𑀢𑀺. 𑀏𑀯𑀁 𑀉𑀧𑀯𑀼𑀢𑁆𑀣𑁄 𑀔𑁄, 𑀯𑀺𑀲𑀸𑀔𑁂, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑁄 𑀦 𑀫𑀳𑀸𑀚𑀼𑀢𑀺𑀓𑁄 𑀦 𑀫𑀳𑀸𑀯𑀺𑀧𑁆𑀨𑀸𑀭𑁄.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀅𑀭𑀺𑀬𑀼𑀧𑁄𑀲𑀣𑁄 𑀳𑁄𑀢𑀺? 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲, 𑀯𑀺𑀲𑀸𑀔𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 [𑀧𑀭𑀺𑀬𑁄𑀤𑀸𑀧𑀦𑀸 (?)] 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀢𑀲𑁆𑀲 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀲𑀻𑀲𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀲𑀻𑀲𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀓𑀓𑁆𑀓𑀜𑁆𑀘 𑀧𑀝𑀺𑀘𑁆𑀘 𑀫𑀢𑁆𑀢𑀺𑀓𑀜𑁆𑀘 𑀧𑀝𑀺𑀘𑁆𑀘 𑀉𑀤𑀓𑀜𑁆𑀘 𑀧𑀝𑀺𑀘𑁆𑀘 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘, 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀲𑀻𑀲𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀏𑀯𑀫𑁂𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀢𑀲𑁆𑀲 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀯𑀺𑀲𑀸𑀔𑁂 𑁋 ‘𑀅𑀭𑀺𑀬𑀲𑀸𑀯𑀓𑁄 𑀩𑁆𑀭𑀳𑁆𑀫𑀼𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀩𑁆𑀭𑀳𑁆𑀫𑀜𑁆𑀘𑀲𑁆𑀲 [𑀩𑁆𑀭𑀳𑁆𑀫𑀜𑁆𑀘 (𑀓.)] 𑀆𑀭𑀩𑁆𑀪 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺’. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲, 𑀯𑀺𑀲𑀸𑀔𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺. 𑀢𑀲𑁆𑀲 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀓𑀸𑀬𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀓𑀸𑀬𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀲𑁄𑀢𑁆𑀢𑀺𑀜𑁆𑀘 𑀧𑀝𑀺𑀘𑁆𑀘, 𑀘𑀼𑀡𑁆𑀡𑀜𑁆𑀘 𑀧𑀝𑀺𑀘𑁆𑀘, 𑀉𑀤𑀓𑀜𑁆𑀘 𑀧𑀝𑀺𑀘𑁆𑀘, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀓𑀸𑀬𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀏𑀯𑀫𑁂𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺. 𑀢𑀲𑁆𑀲 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀯𑀺𑀲𑀸𑀔𑁂, ‘𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑀼𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀥𑀫𑁆𑀫𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀥𑀫𑁆𑀫𑀜𑁆𑀘𑀲𑁆𑀲 𑀆𑀭𑀩𑁆𑀪 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺’. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲, 𑀯𑀺𑀲𑀸𑀔𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺. 𑀢𑀲𑁆𑀲 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀯𑀢𑁆𑀣𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀯𑀢𑁆𑀣𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀉𑀲𑁆𑀫𑀜𑁆𑀘 [𑀊𑀲𑀜𑁆𑀘 (𑀲𑁆𑀬𑀸. 𑀓𑀁. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀧𑀸𑀞𑀦𑁆𑀢𑀭𑀁, 𑀲𑀁. 𑀦𑀺. 𑁩.𑁮𑁯 𑀔𑁂𑀫𑀓𑀲𑀼𑀢𑁆𑀢𑀧𑀸𑀴𑀺𑀬𑀸𑀧𑀺 𑀲𑀫𑁂𑀢𑀺.) 𑀉𑀲𑀼𑀫𑀜𑁆𑀘 (𑀲𑀻.)] 𑀧𑀝𑀺𑀘𑁆𑀘, 𑀔𑀸𑀭𑀜𑁆𑀘 𑀧𑀝𑀺𑀘𑁆𑀘, 𑀕𑁄𑀫𑀬𑀜𑁆𑀘 𑀧𑀝𑀺𑀘𑁆𑀘, 𑀉𑀤𑀓𑀜𑁆𑀘 𑀧𑀝𑀺𑀘𑁆𑀘, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀯𑀢𑁆𑀣𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀏𑀯𑀫𑁂𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺. 𑀢𑀲𑁆𑀲 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀯𑀺𑀲𑀸𑀔𑁂, ‘𑀅𑀭𑀺𑀬𑀲𑀸𑀯𑀓𑁄 𑀲𑀗𑁆𑀖𑀼𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀲𑀗𑁆𑀖𑀜𑁆𑀘𑀲𑁆𑀲 𑀆𑀭𑀩𑁆𑀪 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺’. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲, 𑀯𑀺𑀲𑀸𑀔𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀅𑀦𑀼𑀲𑁆𑀲𑀭𑀢𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺. 𑀢𑀲𑁆𑀲 𑀲𑀻𑀮𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀆𑀤𑀸𑀲𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀆𑀤𑀸𑀲𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀢𑁂𑀮𑀜𑁆𑀘 𑀧𑀝𑀺𑀘𑁆𑀘, 𑀙𑀸𑀭𑀺𑀓𑀜𑁆𑀘 𑀧𑀝𑀺𑀘𑁆𑀘, 𑀯𑀸𑀮𑀡𑁆𑀟𑀼𑀧𑀓𑀜𑁆𑀘 𑀧𑀝𑀺𑀘𑁆𑀘, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀆𑀤𑀸𑀲𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀏𑀯𑀫𑁂𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀅𑀦𑀼𑀲𑁆𑀲𑀭𑀢𑀺 𑀅𑀔𑀡𑁆𑀟𑀸𑀦𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺. 𑀢𑀲𑁆𑀲 𑀲𑀻𑀮𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀯𑀺𑀲𑀸𑀔𑁂, ‘𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀼𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀲𑀻𑀮𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀲𑀻𑀮𑀜𑁆𑀘𑀲𑁆𑀲 𑀆𑀭𑀩𑁆𑀪 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺’. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲, 𑀯𑀺𑀲𑀸𑀔𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀤𑁂𑀯𑀢𑀸 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑀦𑁆𑀢𑀺 𑀤𑁂𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀲𑀦𑁆𑀢𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀲𑀦𑁆𑀢𑀺 𑀤𑁂𑀯𑀸 𑀬𑀸𑀫𑀸, 𑀲𑀦𑁆𑀢𑀺 𑀤𑁂𑀯𑀸 𑀢𑀼𑀲𑀺𑀢𑀸, 𑀲𑀦𑁆𑀢𑀺 𑀤𑁂𑀯𑀸 𑀦𑀺𑀫𑁆𑀫𑀸𑀦𑀭𑀢𑀺𑀦𑁄, 𑀲𑀦𑁆𑀢𑀺 𑀤𑁂𑀯𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄, 𑀲𑀦𑁆𑀢𑀺 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀲𑀦𑁆𑀢𑀺 𑀤𑁂𑀯𑀸 𑀢𑀢𑀼𑀢𑁆𑀢𑀭𑀺 [𑀢𑀢𑀼𑀢𑁆𑀢𑀭𑀺𑀁 (𑀲𑀻. 𑀧𑀻.)]. 𑀬𑀣𑀸𑀭𑀽𑀧𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣𑀼𑀧𑀧𑀦𑁆𑀦𑀸 [𑀢𑀢𑁆𑀣𑀼𑀧𑁆𑀧𑀦𑁆𑀦𑀸 (𑀲𑀻. 𑀧𑀻.)], 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀲𑀤𑁆𑀥𑀸 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣𑀼𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀁 𑀲𑀻𑀮𑀁 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀲𑀼𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣𑀼𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀁 𑀲𑀼𑀢𑀁 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀘𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣𑀼𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑁄 𑀘𑀸𑀕𑁄 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣𑀼𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀧𑀜𑁆𑀜𑀸 𑀲𑀁𑀯𑀺𑀚𑁆𑀚𑀢𑀻’𑀢𑀺. 𑀢𑀲𑁆𑀲 𑀅𑀢𑁆𑀢𑀦𑁄 𑀘 𑀢𑀸𑀲𑀜𑁆𑀘 𑀤𑁂𑀯𑀢𑀸𑀦𑀁 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘 𑀲𑀼𑀢𑀜𑁆𑀘 𑀘𑀸𑀕𑀜𑁆𑀘 𑀧𑀜𑁆𑀜𑀜𑁆𑀘 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀉𑀓𑁆𑀓𑀜𑁆𑀘 𑀧𑀝𑀺𑀘𑁆𑀘, 𑀮𑁄𑀡𑀜𑁆𑀘 𑀧𑀝𑀺𑀘𑁆𑀘, 𑀕𑁂𑀭𑀼𑀓𑀜𑁆𑀘 𑀧𑀝𑀺𑀘𑁆𑀘, 𑀦𑀸𑀴𑀺𑀓𑀲𑀡𑁆𑀟𑀸𑀲𑀜𑁆𑀘 [𑀦𑀸𑀴𑀺𑀓𑀜𑁆𑀘 𑀧𑀝𑀺𑀘𑁆𑀘 𑀲𑀡𑁆𑀟𑀸𑀲𑀜𑁆𑀘 (𑀧𑀻. 𑀓.)] 𑀧𑀝𑀺𑀘𑁆𑀘, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺. 𑀏𑀯𑀫𑁂𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀤𑁂𑀯𑀢𑀸 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑀦𑁆𑀢𑀺 𑀤𑁂𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀲𑀦𑁆𑀢𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸…𑀧𑁂… 𑀲𑀦𑁆𑀢𑀺 𑀤𑁂𑀯𑀸 𑀢𑀢𑀼𑀢𑁆𑀢𑀭𑀺. 𑀬𑀣𑀸𑀭𑀽𑀧𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣𑀼𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀲𑀤𑁆𑀥𑀸 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀲𑀻𑀮𑁂𑀦…𑀧𑁂… 𑀲𑀼𑀢𑁂𑀦…𑀧𑁂… 𑀘𑀸𑀕𑁂𑀦…𑀧𑁂… 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣𑀼𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀧𑀜𑁆𑀜𑀸 𑀲𑀁𑀯𑀺𑀚𑁆𑀚𑀢𑀻’𑀢𑀺. 𑀢𑀲𑁆𑀲 𑀅𑀢𑁆𑀢𑀦𑁄 𑀘 𑀢𑀸𑀲𑀜𑁆𑀘 𑀤𑁂𑀯𑀢𑀸𑀦𑀁 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘 𑀲𑀼𑀢𑀜𑁆𑀘 𑀘𑀸𑀕𑀜𑁆𑀘 𑀧𑀜𑁆𑀜𑀜𑁆𑀘 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀯𑀺𑀲𑀸𑀔𑁂, ‘𑀅𑀭𑀺𑀬𑀲𑀸𑀯𑀓𑁄 𑀤𑁂𑀯𑀢𑀼𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀤𑁂𑀯𑀢𑀸 𑀆𑀭𑀩𑁆𑀪 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀬𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂 𑀧𑀳𑀻𑀬𑀦𑁆𑀢𑀺’. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀺.

‘‘𑀲 𑀔𑁄 𑀲𑁄, 𑀯𑀺𑀲𑀸𑀔𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀦𑀺𑀳𑀺𑀢𑀤𑀡𑁆𑀟𑀸 𑀦𑀺𑀳𑀺𑀢𑀲𑀢𑁆𑀣𑀸 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑀸 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀦𑁆𑀢𑀺; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀸𑀫𑀺. 𑀇𑀫𑀺𑀦𑀸𑀧𑀺 [𑀇𑀫𑀺𑀦𑀸𑀧𑀳𑀁 (𑀲𑀻.) 𑀅. 𑀦𑀺. 𑁮.𑁪𑁧] 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻, 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀦𑁆𑀢𑀺; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻, 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀸𑀫𑀺. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀆𑀭𑀸𑀘𑀸𑀭𑀻 [𑀅𑀦𑀸𑀘𑀸𑀭𑀻 (𑀧𑀻.)] 𑀯𑀺𑀭𑀢𑀸 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑀸 𑀣𑁂𑀢𑀸 𑀧𑀘𑁆𑀘𑀬𑀺𑀓𑀸 𑀅𑀯𑀺𑀲𑀁𑀯𑀸𑀤𑀓𑀸 𑀮𑁄𑀓𑀲𑁆𑀲; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀧𑀳𑀸𑀬 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀧𑀳𑀸𑀬 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀏𑀓𑀪𑀢𑁆𑀢𑀺𑀓𑀸 𑀭𑀢𑁆𑀢𑀽𑀧𑀭𑀢𑀸 𑀯𑀺𑀭𑀢𑀸 𑀯𑀺𑀓𑀸𑀮𑀪𑁄𑀚𑀦𑀸; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀏𑀓𑀪𑀢𑁆𑀢𑀺𑀓𑁄 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀧𑀳𑀸𑀬 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑀸 𑀦𑀻𑀘𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺 𑀫𑀜𑁆𑀘𑀓𑁂 𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑁂 𑀯𑀸; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀧𑀳𑀸𑀬 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀦𑀻𑀘𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺 𑀫𑀜𑁆𑀘𑀓𑁂 𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑁂 𑀯𑀸. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺, 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀅𑀭𑀺𑀬𑀼𑀧𑁄𑀲𑀣𑁄 𑀳𑁄𑀢𑀺. 𑀏𑀯𑀁 𑀉𑀧𑀯𑀼𑀢𑁆𑀣𑁄 𑀔𑁄, 𑀯𑀺𑀲𑀸𑀔𑁂, 𑀅𑀭𑀺𑀬𑀼𑀧𑁄𑀲𑀣𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄 𑀫𑀳𑀸𑀚𑀼𑀢𑀺𑀓𑁄 𑀫𑀳𑀸𑀯𑀺𑀧𑁆𑀨𑀸𑀭𑁄’’.

‘‘𑀓𑀻𑀯𑀫𑀳𑀧𑁆𑀨𑀮𑁄 𑀳𑁄𑀢𑀺 𑀓𑀻𑀯𑀫𑀳𑀸𑀦𑀺𑀲𑀁𑀲𑁄 𑀓𑀻𑀯𑀫𑀳𑀸𑀚𑀼𑀢𑀺𑀓𑁄 𑀓𑀻𑀯𑀫𑀳𑀸𑀯𑀺𑀧𑁆𑀨𑀸𑀭𑁄’’? ‘‘𑀲𑁂𑀬𑁆𑀬𑀣𑀸𑀧𑀺, 𑀯𑀺𑀲𑀸𑀔𑁂, 𑀬𑁄 𑀇𑀫𑁂𑀲𑀁 𑀲𑁄𑀴𑀲𑀦𑁆𑀦𑀁 𑀫𑀳𑀸𑀚𑀦𑀧𑀤𑀸𑀦𑀁 𑀧𑀳𑀽𑀢𑀭𑀢𑁆𑀢𑀭𑀢𑀦𑀸𑀦𑀁 [𑀧𑀳𑀽𑀢𑀲𑀢𑁆𑀢𑀭𑀢𑀦𑀸𑀦𑀁 (𑀓. 𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀝𑀻𑀓𑀸𑀬𑀁 𑀤𑀲𑁆𑀲𑀺𑀢𑀧𑀸𑀴𑀺𑀬𑁂𑀯. 𑀅. 𑀦𑀺. 𑁮.𑁪𑁨] 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀬𑁆𑀬, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀗𑁆𑀕𑀸𑀦𑀁, 𑀫𑀕𑀥𑀸𑀦𑀁, 𑀓𑀸𑀲𑀻𑀦𑀁, 𑀓𑁄𑀲𑀮𑀸𑀦𑀁, 𑀯𑀚𑁆𑀚𑀻𑀦𑀁, 𑀫𑀮𑁆𑀮𑀸𑀦𑀁, 𑀘𑁂𑀢𑀻𑀦𑀁, 𑀯𑀗𑁆𑀕𑀸𑀦𑀁, 𑀓𑀼𑀭𑀽𑀦𑀁, 𑀧𑀜𑁆𑀘𑀸𑀮𑀸𑀦𑀁, 𑀫𑀘𑁆𑀙𑀸𑀦𑀁 [𑀫𑀘𑁆𑀘𑀸𑀦𑀁 (𑀓.)], 𑀲𑀽𑀭𑀲𑁂𑀦𑀸𑀦𑀁, 𑀅𑀲𑁆𑀲𑀓𑀸𑀦𑀁, 𑀅𑀯𑀦𑁆𑀢𑀻𑀦𑀁, 𑀕𑀦𑁆𑀥𑀸𑀭𑀸𑀦𑀁, 𑀓𑀫𑁆𑀩𑁄𑀚𑀸𑀦𑀁, 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀉𑀧𑁄𑀲𑀣𑀲𑁆𑀲 𑀏𑀢𑀁 [𑀏𑀓𑀁 (𑀓.)] 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀓𑀧𑀡𑀁, 𑀯𑀺𑀲𑀸𑀔𑁂, 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀉𑀧𑀦𑀺𑀥𑀸𑀬’’.

‘‘𑀬𑀸𑀦𑀺, 𑀯𑀺𑀲𑀸𑀔𑁂, 𑀫𑀸𑀦𑀼𑀲𑀓𑀸𑀦𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄 [𑀭𑀢𑁆𑀢𑀺𑀤𑀺𑀯𑁄 (𑀓.)]. 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄. 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄. 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀸𑀦𑀺 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀓𑀧𑀡𑀁 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀉𑀧𑀦𑀺𑀥𑀸𑀬’’’.

‘‘𑀬𑀁, 𑀯𑀺𑀲𑀸𑀔𑁂, 𑀫𑀸𑀦𑀼𑀲𑀓𑀁 𑀯𑀲𑁆𑀲𑀲𑀢𑀁, 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄. 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄. 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄. 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀁 𑀯𑀲𑁆𑀲𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀓𑀧𑀡𑀁 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀉𑀧𑀦𑀺𑀥𑀸𑀬’’’.

‘‘𑀬𑀸𑀦𑀺, 𑀯𑀺𑀲𑀸𑀔𑁂, 𑀫𑀸𑀦𑀼𑀲𑀓𑀸𑀦𑀺 𑀤𑁆𑀯𑁂 𑀯𑀲𑁆𑀲𑀲𑀢𑀸𑀦𑀺, 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄. 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄. 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄. 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀸𑀦𑀺 𑀤𑁆𑀯𑁂 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀓𑀧𑀡𑀁 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀉𑀧𑀦𑀺𑀥𑀸𑀬’’’.

‘‘𑀬𑀸𑀦𑀺, 𑀯𑀺𑀲𑀸𑀔𑁂, 𑀫𑀸𑀦𑀼𑀲𑀓𑀸𑀦𑀺 𑀘𑀢𑁆𑀢𑀸𑀭𑀺 𑀯𑀲𑁆𑀲𑀲𑀢𑀸𑀦𑀺, 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄. 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄. 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄. 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀸𑀦𑀺 𑀘𑀢𑁆𑀢𑀸𑀭𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀓𑀧𑀡𑀁 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀉𑀧𑀦𑀺𑀥𑀸𑀬’’’.

‘‘𑀬𑀸𑀦𑀺, 𑀯𑀺𑀲𑀸𑀔𑁂, 𑀫𑀸𑀦𑀼𑀲𑀓𑀸𑀦𑀺 𑀅𑀝𑁆𑀞 𑀯𑀲𑁆𑀲𑀲𑀢𑀸𑀦𑀺, 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄. 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄. 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄. 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀸𑀦𑀺 𑀅𑀝𑁆𑀞 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀓𑀧𑀡𑀁 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀉𑀧𑀦𑀺𑀥𑀸𑀬’’’.

‘‘𑀬𑀸𑀦𑀺, 𑀯𑀺𑀲𑀸𑀔𑁂, 𑀫𑀸𑀦𑀼𑀲𑀓𑀸𑀦𑀺 𑀲𑁄𑀴𑀲 𑀯𑀲𑁆𑀲𑀲𑀢𑀸𑀦𑀺, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄. 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄. 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄. 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀸𑀦𑀺 𑀲𑁄𑀴𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑁋 ‘𑀓𑀧𑀡𑀁 𑀫𑀸𑀦𑀼𑀲𑀓𑀁 𑀭𑀚𑁆𑀚𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀉𑀧𑀦𑀺𑀥𑀸𑀬𑀸’’’𑀢𑀺.

‘‘𑀧𑀸𑀡𑀁 𑀦 𑀳𑀜𑁆𑀜𑁂 [𑀦 𑀳𑀸𑀦𑁂 (𑀲𑀻. 𑀧𑀻.), 𑀦 𑀳𑀦𑁂 (𑀓.)] 𑀦 𑀘𑀤𑀺𑀦𑁆𑀦𑀫𑀸𑀤𑀺𑀬𑁂,

𑀫𑀼𑀲𑀸 𑀦 𑀪𑀸𑀲𑁂 𑀦 𑀘 𑀫𑀚𑁆𑀚𑀧𑁄 𑀲𑀺𑀬𑀸;

𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑀺𑀭𑀫𑁂𑀬𑁆𑀬 𑀫𑁂𑀣𑀼𑀦𑀸,

𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀁.

‘‘𑀫𑀸𑀮𑀁 𑀦 𑀥𑀸𑀭𑁂 𑀦 𑀘 𑀕𑀦𑁆𑀥𑀫𑀸𑀘𑀭𑁂,

𑀫𑀜𑁆𑀘𑁂 𑀙𑀫𑀸𑀬𑀁 𑀯 𑀲𑀬𑁂𑀣 𑀲𑀦𑁆𑀣𑀢𑁂;

𑀏𑀢𑀜𑁆𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀸𑀳𑀼𑀧𑁄𑀲𑀣𑀁,

𑀩𑀼𑀤𑁆𑀥𑁂𑀦 𑀤𑀼𑀓𑁆𑀔𑀦𑁆𑀢𑀕𑀼𑀦𑀸 𑀧𑀓𑀸𑀲𑀺𑀢𑀁.

‘‘𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘 𑀉𑀪𑁄 𑀲𑀼𑀤𑀲𑁆𑀲𑀦𑀸,

𑀑𑀪𑀸𑀲𑀬𑀁 𑀅𑀦𑀼𑀧𑀭𑀺𑀬𑀦𑁆𑀢𑀺 𑀬𑀸𑀯𑀢𑀸;

𑀢𑀫𑁄𑀦𑀼𑀤𑀸 𑀢𑁂 𑀧𑀦 𑀅𑀦𑁆𑀢𑀮𑀺𑀓𑁆𑀔𑀕𑀸,

𑀦𑀪𑁂 𑀧𑀪𑀸𑀲𑀦𑁆𑀢𑀺 𑀤𑀺𑀲𑀸𑀯𑀺𑀭𑁄𑀘𑀦𑀸.

‘‘𑀏𑀢𑀲𑁆𑀫𑀺𑀁 𑀬𑀁 𑀯𑀺𑀚𑁆𑀚𑀢𑀺 𑀅𑀦𑁆𑀢𑀭𑁂 𑀥𑀦𑀁,

𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑀜𑁆𑀘 𑀪𑀤𑁆𑀤𑀓𑀁;

𑀲𑀺𑀗𑁆𑀕𑀻 𑀲𑀼𑀯𑀡𑁆𑀡𑀁 𑀅𑀣 𑀯𑀸𑀧𑀺 𑀓𑀜𑁆𑀘𑀦𑀁,

𑀬𑀁 𑀚𑀸𑀢𑀭𑀽𑀧𑀁 𑀳𑀝𑀓𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀅𑀝𑁆𑀞𑀗𑁆𑀕𑀼𑀧𑁂𑀢𑀲𑁆𑀲 𑀉𑀧𑁄𑀲𑀣𑀲𑁆𑀲,

𑀓𑀮𑀫𑁆𑀧𑀺 𑀢𑁂 𑀦𑀸𑀦𑀼𑀪𑀯𑀦𑁆𑀢𑀺 𑀲𑁄𑀴𑀲𑀺𑀁;

𑀘𑀦𑁆𑀤𑀧𑁆𑀧𑀪𑀸 𑀢𑀸𑀭𑀕𑀡𑀸 𑀘 𑀲𑀩𑁆𑀩𑁂.

‘‘𑀢𑀲𑁆𑀫𑀸 𑀳𑀺 𑀦𑀸𑀭𑀻 𑀘 𑀦𑀭𑁄 𑀘 𑀲𑀻𑀮𑀯𑀸,

𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀉𑀧𑀯𑀲𑁆𑀲𑀼𑀧𑁄𑀲𑀣𑀁;

𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦 𑀲𑀼𑀔𑀼𑀤𑁆𑀭𑀬𑀸𑀦𑀺,

𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦’’𑀦𑁆𑀢𑀺. 𑀤𑀲𑀫𑀁;

𑀫𑀳𑀸𑀯𑀕𑁆𑀕𑁄 𑀲𑀢𑁆𑀢𑀫𑁄.