৭. সাধারণৰারো

২৯৭. কতি সমথা ৰিৰাদাধিকরণস্স সাধারণা? কতি সমথা ৰিৰাদাধিকরণস্স অসাধারণা? কতি সমথা অনুৰাদাধিকরণস্স সাধারণা? কতি সমথা অনুৰাদাধিকরণস্স অসাধারণা? কতি সমথা আপত্তাধিকরণস্স সাধারণা? কতি সমথা আপত্তাধিকরণস্স অসাধারণা? কতি সমথা কিচ্চাধিকরণস্স সাধারণা? কতি সমথা কিচ্চাধিকরণস্স অসাধারণা?

দ্ৰে সমথা ৰিৰাদাধিকরণস্স সাধারণা – সম্মুখাৰিনযো, যেভুয্যসিকা. পঞ্চ সমথা ৰিৰাদাধিকরণস্স অসাধারণা – সতিৰিনযো, অমূল়্হৰিনযো, পটিঞ্ঞাতকরণং, তস্সপাপিযসিকা, তিণৰত্থারকো.

চত্তারো সমথা অনুৰাদাধিকরণস্স সাধারণা – সম্মুখাৰিনযো; সতিৰিনযো, অমূল়্হৰিনযো, তস্সপাপিযসিকা. তযো সমথা অনুৰাদাধিকরণস্স অসাধারণা – যেভুয্যসিকা, পটিঞ্ঞাতকরণং, তিণৰত্থারকো.

তযো সমথা আপত্তাধিকরণস্স সাধারণা – সম্মুখাৰিনযো, পটিঞ্ঞাতকরণং, তিণৰত্থারকো. চত্তারো সমথা আপত্তাধিকরণস্স অসাধারণা – যেভুয্যসিকা, সতিৰিনযো, অমূল়্হৰিনযো, তস্সপাপিযসিকা.

একো সমথো কিচ্চাধিকরণস্স সাধারণো – সম্মুখাৰিনযো. ছ সমথা কিচ্চাধিকরণস্স অসাধারণা – যেভুয্যসিকা, সতিৰিনযো, অমূল়্হৰিনযো, পটিঞ্ঞাতকরণং, তস্সপাপিযসিকা, তিণৰত্থারকো.

সাধারণৰারো নিট্ঠিতো সত্তমো.