অন্তরপেয্যালং

কতিপুচ্ছাৰারো

২৭১. কতি আপত্তিযো? কতি আপত্তিক্খন্ধা? কতি ৰিনীতৰত্থূনি? কতি অগারৰা? কতি গারৰা? কতি ৰিনীতৰত্থূনি? কতি ৰিপত্তিযো? কতি আপত্তিসমুট্ঠানা? কতি ৰিৰাদমূলানি? কতি অনুৰাদমূলানি? কতি সারণীযা ধম্মা? কতি ভেদকরৰত্থূনি? কতি অধিকরণানি? কতি সমথা?

পঞ্চ আপত্তিযো. পঞ্চ আপত্তিক্খন্ধা. পঞ্চ ৰিনীতৰত্থূনি. সত্ত আপত্তিযো. সত্ত আপত্তিক্খন্ধা. সত্ত ৰিনীতৰত্থূনি. ছ অগারৰা. ছ গারৰা. ছ ৰিনীতৰত্থূনি. চতস্সো ৰিপত্তিযো. ছ আপত্তিসমুট্ঠানা. ছ ৰিৰাদমূলানি. ছ অনুৰাদমূলানি. ছ সারণীযা ধম্মা. অট্ঠারস ভেদকরৰত্থূনি. চত্তারি অধিকরণানি. সত্ত সমথা.

তত্থ কতমা পঞ্চ আপত্তিযো? পারাজিকাপত্তি, সঙ্ঘাদিসেসাপত্তি, পাচিত্তিযাপত্তি, পাটিদেসনীযাপত্তি, দুক্কটাপত্তি – ইমা পঞ্চ আপত্তিযো.

তত্থ কতমে পঞ্চ আপত্তিক্খন্ধা? পারাজিকাপত্তিক্খন্ধো, সঙ্ঘাদিসেসাপত্তিক্খন্ধো, পাচিত্তিযাপত্তিক্খন্ধো, পাটিদেসনীযাপত্তিক্খন্ধো, দুক্কটাপত্তিক্খন্ধো – ইমে পঞ্চ আপত্তিক্খন্ধা.

তত্থ কতমানি পঞ্চ ৰিনীতৰত্থূনি? পঞ্চহি আপত্তিক্খন্ধেহি আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইমানি পঞ্চ ৰিনীতৰত্থূনি.

তত্থ কতমা সত্ত আপত্তিযো? পারাজিকাপত্তি, সঙ্ঘাদিসেসাপত্তি, থুল্লচ্চযাপত্তি, পাচিত্তিযাপত্তি, পাটিদেসনীযাপত্তি, দুক্কটাপত্তি, দুব্ভাসিতাপত্তি – ইমা সত্ত আপত্তিযো.

তত্থ কতমে সত্ত আপত্তিক্খন্ধা? পারাজিকাপত্তিক্খন্ধো, সঙ্ঘাদিসেসাপত্তিক্খন্ধো, থুল্লচ্চযাপত্তিক্খন্ধো, পাচিত্তিযাপত্তিক্খন্ধো, পাটিদেসনীযাপত্তিক্খন্ধো, দুক্কটাপত্তিক্খন্ধো, দুব্ভাসিতাপত্তিক্খন্ধো – ইমে সত্ত আপত্তিক্খন্ধা.

তত্থ কতমানি সত্ত ৰিনীতৰত্থূনি? সত্তহি আপত্তিক্খন্ধেহি আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইমানি সত্ত ৰিনীতৰত্থূনি.

তত্থ কতমে ছ অগারৰা? বুদ্ধে অগারৰো, ধম্মে অগারৰো, সঙ্ঘে অগারৰো, সিক্খায অগারৰো, অপ্পমাদে অগারৰো, পটিসন্ধারে অগারৰো – ইমে ছ অগারৰা.

তত্থ কতমে ছ গারৰা? বুদ্ধে গারৰো, ধম্মে গারৰো, সঙ্ঘে গারৰো, সিক্খায গারৰো, অপ্পমাদে গারৰো, পটিসন্ধারে গারৰো – ইমে ছ গারৰা.

তত্থ কতমানি ছ ৰিনীতৰত্থূনি? ছহি অগারৰেহি আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইমানি ছ ৰিনীতৰত্থূনি.

তত্থ কতমা চতস্সো ৰিপত্তিযো? সীলৰিপত্তি, আচারৰিপত্তি, দিট্ঠিৰিপত্তি, আজীৰৰিপত্তি – ইমা চতস্সো ৰিপত্তিযো.

তত্থ কতমে ছ আপত্তিসমুট্ঠানা? অত্থাপত্তি কাযতো সমুট্ঠাতি, ন ৰাচতো ন চিত্ততো; অত্থাপত্তি ৰাচতো সমুট্ঠাতি, ন কাযতো ন চিত্ততো; অত্থাপত্তি কাযতো চ ৰাচতো চ সমুট্ঠাতি, ন চিত্ততো; অত্থাপত্তি কাযতো চ চিত্ততো চ সমুট্ঠাতি, ন ৰাচতো; অত্থাপত্তি ৰাচতো চ চিত্ততো চ সমুট্ঠাতি, ন কাযতো; অত্থাপত্তি কাযতো চ ৰাচতো চ চিত্ততো চ সমুট্ঠাতি – ইমে ছ আপত্তিসমুট্ঠানা.

২৭২. তত্থ [চূল়ৰ. ২১৬; অ. নি. ৬.৩৬; ম. নি. ৩.৪৪; দী. নি. ৩.৩২৫] কতমানি ছ ৰিৰাদমূলানি? ইধ ভিক্খু কোধনো হোতি উপনাহী. যো সো ভিক্খু কোধনো হোতি উপনাহী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি. যো সো ভিক্খু সত্থরি অগারৰো ৰিহরতি অপ্পতিস্সো, ধম্মে…পে… সঙ্ঘে…পে… সিক্খায ন পরিপূরকারী, সো সঙ্ঘে ৰিৰাদং জনেতি. যো হোতি ৰিৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং. এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স পহানায ৰাযমেয্যাথ. এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স আযতিং অনৰস্সৰায পটিপজ্জেয্যাথ. এৰমেতস্স পাপকস্স ৰিৰাদমূলস্স পহানং হোতি. এৰমেতস্স পাপকস্স ৰিৰাদমূলস্স আযতিং অনৰস্সৰো হোতি.

[চূল়ৰ. ২১৬] পুন চপরং ভিক্খু মক্খী হোতি পল়াসী…পে… ইস্সুকী হোতি মচ্ছরী, সঠো হোতি মাযাৰী, পাপিচ্ছো হোতি মিচ্ছাদিট্ঠি, সন্দিট্ঠিপরামাসী হোতি আধানগ্গাহী দুপ্পটিনিস্সগ্গী. যো সো ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি. যো সো ভিক্খু সত্থরি অগারৰো ৰিহরতি অপ্পতিস্সো ধম্মে…পে… সঙ্ঘে…পে… সিক্খায ন পরিপূরকারী, সো সঙ্ঘে ৰিৰাদং জনেতি. যো সো হোতি ৰিৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং. এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স পহানায ৰাযমেয্যাথ. এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স আযতিং অনৰস্সৰায পটিপজ্জেয্যাথ. এৰমেতস্স পাপকস্স ৰিৰাদমূলস্স পহানং হোতি. এৰমেতস্স পাপকস্স ৰিৰাদমূলস্স আযতিং অনৰস্সৰো হোতি. ইমানি ছ ৰিৰাদমূলানি.

২৭৩. [চূল়ৰ. ২১৭] তত্থ কতমানি ছ অনুৰাদমূলানি? ইধ ভিক্খু কোধনো হোতি উপনাহী. যো সো ভিক্খু কোধনো হোতি উপনাহী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি. যো সো ভিক্খু সত্থরি অগারৰো ৰিহরতি অপ্পতিস্সো ধম্মে…পে… সঙ্ঘে …পে… সিক্খায ন পরিপূরকারী সো সঙ্ঘে অনুৰাদং জনেতি. যো হোতি অনুৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং. এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স পহানায ৰাযমেয্যাথ. এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স আযতিং অনৰস্সৰায পটিপজ্জেয্যাথ. এৰমেতস্স পাপকস্স অনুৰাদমূলস্স পহানং হোতি. এৰমেতস্স পাপকস্স অনুৰাদমূলস্স আযতিং অনৰস্সৰো হোতি.

পুন চপরং ভিক্খু মক্খী হোতি পলাসী…পে… ইস্সুকী হোতি মচ্ছরী, সঠো হোতি মাযাৰী, পাপিচ্ছো হোতি মিচ্ছাদিট্ঠি, সন্দিট্ঠিপরামাসী হোতি আধানগ্গাহী দুপ্পটিনিস্সগ্গী. যো সো ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি. যো ভিক্খু সত্থরি অগারৰো ৰিহরতি অপ্পতিস্সো ধম্মে…পে… সঙ্ঘে…পে… সিক্খায ন পরিপূরকারী সো সঙ্ঘে অনুৰাদং জনেতি. যো হোতি অনুৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং. এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স পহানায ৰাযমেয্যাথ. এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স আযতিং অনৰস্সৰায পটিপজ্জেয্যাথ. এৰমেতস্স পাপকস্স অনুৰাদমূলস্স পহানং হোতি. এৰমেতস্স পাপকস্স অনুৰাদমূলস্স আযতিং অনৰস্সৰো হোতি. ইমানি ছ অনুৰাদমূলানি.

২৭৪. [দী. নি. ৩.৩২৪; অ. নি. ৬.১১] তত্থ কতমে ছ সারণীযা ধম্মা? ইধ ভিক্খুনো মেত্তং কাযকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ. অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি.

পুন চপরং ভিক্খুনো মেত্তং ৰচীকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ. অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি.

পুন চপরং ভিক্খুনো মেত্তং মনোকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ. অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি.

পুন চপরং ভিক্খু যে তে লাভা ধম্মিকা ধম্মলদ্ধা অন্তমসো পত্তপরিযাপন্নমত্তম্পি তথারূপেহি লাভেহি অপ্পটিৰিভত্তভোগী হোতি সীলৰন্তেহি সব্রহ্মচারীহি সাধারণভোগী. অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি.

পুন চপরং ভিক্খু যানি তানি সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৰিঞ্ঞুপসত্থানি অপরামট্ঠানি সমাধিসংৰত্তনিকানি, তথারূপেসু সীলেসু সীলসামঞ্ঞগতো ৰিহরতি সব্রহ্মচারীহি আৰি চেৰ রহো চ. অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি.

পুন চপরং ভিক্খু যাযং দিট্ঠি অরিযা নিয্যানিকা নিয্যাতি তক্করস্স সম্মা দুক্খক্খযায তথারূপায দিট্ঠিযা দিট্ঠিসামঞ্ঞগতো ৰিহরতি সব্রহ্মচারীহি আৰি চেৰ রহো চ. অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি. ইমে ছ সারণীযা ধম্মা.

২৭৫. তত্থ কতমানি অট্ঠারস ভেদকরৰত্থূনি? ইধ ভিক্খু অধম্মং ‘‘ধম্মো’’তি দীপেতি, ধম্মং ‘‘অধম্মো’’তি দীপেতি, অৰিনযং ‘‘ৰিনযো’’তি দীপেতি, ৰিনযং ‘‘অৰিনযো’’তি দীপেতি, অভাসিতং অলপিতং তথাগতেন ‘‘ভাসিতং লপিতং তথাগতেনা’’তি দীপেতি, ভাসিতং লপিতং তথাগতেন ‘‘অভাসিতং অলপিতং তথাগতেনা’’তি দীপেতি, অনাচিণ্ণং তথাগতেন ‘‘আচিণ্ণং তথাগতেনা’’তি দীপেতি, আচিণ্ণং তথাগতেন ‘‘অনাচিণ্ণং তথাগতেনা’’তি দীপেতি, অপঞ্ঞত্তং তথাগতেন ‘‘পঞ্ঞত্তং তথাগতেনা’’তি দীপেতি, পঞ্ঞত্তং তথাগতেন ‘‘অপঞ্ঞত্তং তথাগতেনা’’তি দীপেতি, আপত্তিং ‘‘অনাপত্তী’’তি দীপেতি, অনাপত্তিং ‘‘আপত্তী’’তি দীপেতি, লহুকং আপত্তিং ‘‘গরুকা আপত্তী’’তি দীপেতি, গরুকং আপত্তিং ‘‘লহুকা আপত্তী’’তি দীপেতি, সাৰসেসং আপত্তিং ‘‘অনৰসেসা আপত্তী’’তি দীপেতি, অনৰসেসং আপত্তিং ‘‘সাৰসেসা আপত্তী’’তি দীপেতি, দুট্ঠুল্লং আপত্তিং ‘‘অদুট্ঠুল্লা আপত্তী’’তি দীপেতি, অদুট্ঠুল্লং আপত্তিং ‘‘দুট্ঠুল্লা আপত্তী’’তি দীপেতি. ইমানি অট্ঠারস ভেদকরৰত্থূনি.

[চূল়ৰ. ২১৫; পরি. ৩৪০] তত্থ কতমানি চত্তারি অধিকরণানি? ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং – ইমানি চত্তারি অধিকরণানি.

তত্থ কতমে সত্ত সমথা? সম্মুখাৰিনযো, সতিৰিনযো, অমূল়্হৰিনযো, পটিঞ্ঞাতকরণং, যেভুয্যসিকা, তস্সপাপিযসিকা, তিণৰত্থারকো – ইমে সত্ত সমথা.

কতিপুচ্ছাৰারো নিট্ঠিতো.

তস্সুদ্দানং –

আপত্তি আপত্তিক্খন্ধা, ৰিনীতা সত্তধা পুন;

ৰিনীতাগারৰা চেৰ, গারৰা মূলমেৰ চ.

পুন ৰিনীতা ৰিপত্তি, সমুট্ঠানা ৰিৰাদনা;

অনুৰাদা সারণীযং, ভেদাধিকরণেন চ.

সত্তেৰ সমথা ৰুত্তা, পদা সত্তরসা ইমেতি.

১. ছআপত্তিসমুট্ঠানৰারো

২৭৬. পঠমেন আপত্তিসমুট্ঠানেন পারাজিকং আপজ্জেয্যাতি? ন হীতি ৰত্তব্বং. সঙ্ঘাদিসেসং আপজ্জেয্যাতি? সিযাতি ৰত্তব্বং. থুল্লচ্চযং আপজ্জেয্যাতি? সিযাতি ৰত্তব্বং. পাচিত্তিযং আপজ্জেয্যাতি? সিযাতি ৰত্তব্বং. পাটিদেসনীযং আপজ্জেয্যাতি? সিযাতি ৰত্তব্বং. দুক্কটং আপজ্জেয্যাতি? সিযাতি ৰত্তব্বং. দুব্ভাসিতং আপজ্জেয্যাতি? ন হীতি ৰত্তব্বং.

দুতিযেন আপত্তিসমুট্ঠানেন পারাজিকং আপজ্জেয্যাতি? ন হীতি ৰত্তব্বং. সঙ্ঘাদিসেসং আপজ্জেয্যাতি? সিযাতি ৰত্তব্বং. থুল্লচ্চযং আপজ্জেয্যাতি? সিযাতি ৰত্তব্বং. পাচিত্তিযং আপজ্জেয্যাতি? সিযাতি ৰত্তব্বং. পাটিদেসনীযং আপজ্জেয্যাতি? ন হীতি ৰত্তব্বং. দুক্কটং আপজ্জেয্যাতি? সিযাতি ৰত্তব্বং. দুব্ভাসিতং আপজ্জেয্যাতি? ন হীতি ৰত্তব্বং.

ততিযেন আপত্তিসমুট্ঠানেন পারাজিকং আপজ্জেয্যাতি? ন হীতি ৰত্তব্বং. সঙ্ঘাদিসেসং আপজ্জেয্যাতি? সিযাতি ৰত্তব্বং. থুল্লচ্চযং আপজ্জেয্যাতি? সিযাতি ৰত্তব্বং. পাচিত্তিযং আপজ্জেয্যাতি? সিযাতি ৰত্তব্বং. পাটিদেসনীযং আপজ্জেয্যাতি? সিযাতি ৰত্তব্বং. দুক্কটং আপজ্জেয্যাতি? সিযাতি ৰত্তব্বং. দুব্ভাসিতং আপজ্জেয্যাতি? ন হীতি ৰত্তব্বং.

চতুত্থে আপত্তিসমুট্ঠানেন পারাজিকং আপজ্জেয্যাতি? সিযাতি ৰত্তব্বং. সঙ্ঘাদিসেসং আপজ্জেয্যাতি? সিযাতি ৰত্তব্বং. থুল্লচ্চযং আপজ্জেয্যাতি? সিযাতি ৰত্তব্বং. পাচিত্তিযং আপজ্জেয্যাতি? সিযাতি ৰত্তব্বং. পাটিদেসনীযং আপজ্জেয্যাতি? সিযাতি ৰত্তব্বং. দুক্কটং আপজ্জেয্যাতি? সিযাতি ৰত্তব্বং. দুব্ভাসিতং আপজ্জেয্যাতি? ন হীতি ৰত্তব্বং.

পঞ্চমেন আপত্তিসমুট্ঠানেন পারাজিকং আপজ্জেয্যাতি? সিযাতি ৰত্তব্বং. সঙ্ঘাদিসেসং আপজ্জেয্যাতি? সিযাতি ৰত্তব্বং. থুল্লচ্চযং আপজ্জেয্যাতি? সিযাতি ৰত্তব্বং. পাচিত্তিযং আপজ্জেয্যাতি? সিযাতি ৰত্তব্বং. পাটিদেসনীযং আপজ্জেয্যাতি? ন হীতি ৰত্তব্বং. দুক্কটং আপজ্জেয্যাতি? সিযাতি ৰত্তব্বং. দুব্ভাসিতং আপজ্জেয্যাতি? সিযাতি ৰত্তব্বং.

ছট্ঠেন আপত্তিসমুট্ঠানেন পারাজিকং আপজ্জেয্যাতি? সিযাতি ৰত্তব্বং. সঙ্ঘাদিসেসং আপজ্জেয্যাতি? সিযাতি ৰত্তব্বং. থুল্লচ্চযং আপজ্জেয্যাতি? সিযাতি ৰত্তব্বং. পাচিত্তিযং আপজ্জেয্যাতি? সিযাতি ৰত্তব্বং. পাটিদেসনীযং আপজ্জেয্যাতি? সিযাতি ৰত্তব্বং. দুক্কটং আপজ্জেয্যাতি? সিযাতি ৰত্তব্বং. দুব্ভাসিতং আপজ্জেয্যাতি? ন হীতি ৰত্তব্বং.

ছআপত্তিসমুট্ঠানৰারো নিট্ঠিতো পঠমো.

২. কতাপত্তিৰারো

২৭৭. পঠমেন আপত্তিসমুট্ঠানেন কতি আপত্তিযো আপজ্জতি? পঠমেন আপত্তিসমুট্ঠানেন পঞ্চ আপত্তিযো আপজ্জতি. ভিক্খু কপ্পিযসঞ্ঞী সঞ্ঞাচিকায কুটিং করোতি অদেসিতৰত্থুকং পমাণাতিক্কন্তং সারম্ভং অপরিক্কমনং, পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স; ভিক্খু কপ্পিযসঞ্ঞী ৰিকালে ভোজনং ভুঞ্জতি, আপত্তি পাচিত্তিযস্স; ভিক্খু কপ্পিযসঞ্ঞী অঞ্ঞাতিকায ভিক্খুনিযা অন্তরঘরং পৰিট্ঠায হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জতি, আপত্তি পাটিদেসনীযস্স – পঠমেন আপত্তিসমুট্ঠানেন ইমা পঞ্চ আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো সমুট্ঠন্তি, ন ৰাচতো ন চিত্ততো. চতুন্নং অধিকরণানং আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ.

২৭৮. দুতিযেন আপত্তিসমুট্ঠানেন কতি আপত্তিযো আপজ্জতি? দুতিযেন আপত্তিসমুট্ঠানেন চতস্সো আপত্তিযো আপজ্জতি – ভিক্খু কপ্পিযসঞ্ঞী সমাদিসতি – ‘‘কুটিং মে করোথা’’তি. তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমনং. পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু কপ্পিযসঞ্ঞী অনুপসম্পন্নং পদসো ধম্মং ৰাচেতি, আপত্তি পাচিত্তিযস্স – দুতিযেন আপত্তিসমুট্ঠানেন ইমা চতস্সো আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং চতূহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – ৰাচতো সমুট্ঠন্তি, ন কাযতো ন চিত্ততো. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ.

২৭৯. ততিযেন আপত্তিসমুট্ঠানেন কতি আপত্তিযো আপজ্জতি? ততিযেন আপত্তিসমুট্ঠানেন পঞ্চ আপত্তিযো আপজ্জতি. ভিক্খু কপ্পিযসঞ্ঞী সংৰিদহিত্ৰা কুটিং করোতি অদেসিতৰত্থুকং পমাণাতিক্কন্তং সারম্ভং অপরিক্কমনং. পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু কপ্পিযসঞ্ঞী পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স. ভিক্খু কপ্পিযসঞ্ঞী ভিক্খুনিযা ৰোসাসন্তিযা ন নিৰারেত্ৰা ভুঞ্জতি, আপত্তি পাটিদেসনীযস্স – ততিযেন আপত্তিসমুট্ঠানেন ইমা পঞ্চ আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৰাচতো চ সমুট্ঠন্তি, ন চিত্ততো. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ.

২৮০. চতুত্থেন আপত্তিসমুট্ঠানেন কতি আপত্তিযো আপজ্জতি? চতুত্থেন আপত্তিসমুট্ঠানেন ছ আপত্তিযো আপজ্জতি – ভিক্খু মেথুনং ধম্মং পটিসেৰতি, আপত্তি পারাজিকস্স; ভিক্খু অকপ্পিযসঞ্ঞী সঞ্ঞাচিকায কুটিং করোতি অদেসিতৰত্থুকং পমাণাতিক্কন্তং সারম্ভং অপরিক্কমনং, পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু অকপ্পিযসঞ্ঞী ৰিকালে ভোজনং ভুঞ্জতি, আপত্তি পাচিত্তিযস্স. ভিক্খু অকপ্পিযসঞ্ঞী অঞ্ঞাতিকায ভিক্খুনিযা অন্তরঘরং পৰিট্ঠায হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জতি, আপত্তি পাটিদেসনীযস্স. চতুত্থেন আপত্তিসমুট্ঠানেন ইমা ছ আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং ছহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ চিত্ততো চ সমুট্ঠন্তি, ন ৰাচতো. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ.

২৮১. পঞ্চমেন আপত্তিসমুট্ঠানেন কতি আপত্তিযো আপজ্জতি? পঞ্চমেন আপত্তিসমুট্ঠানেন ছ আপত্তিযো আপজ্জতি. ভিক্খু পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স; ভিক্খু অকপ্পিযসঞ্ঞী সমাদিসতি – ‘‘কুটিং মে করোথা’’তি. তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমনং. পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স. ভিক্খু অকপ্পিযসঞ্ঞী অনুপসম্পন্নং পদসো ধম্মং ৰাচেতি, আপত্তি পাচিত্তিযস্স. ন খুংসেতুকামো ন ৰম্ভেতুকামো ন মঙ্কুকত্তুকামো দৰকম্যতা হীনেন হীনং ৰদেতি, আপত্তি দুব্ভাসিতস্স – পঞ্চমেন আপত্তিসমুট্ঠানেন ইমা ছ আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি…পে… সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং ছহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন, সিযা দুব্ভাসিতাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – ৰাচতো চ চিত্ততো চ সমুট্ঠন্তি, ন কাযতো. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ.

২৮২. ছট্ঠেন আপত্তিসমুট্ঠানেন কতি আপত্তিযো আপজ্জতি? ছট্ঠেন আপত্তিসমুট্ঠানেন ছ আপত্তিযো আপজ্জতি – ভিক্খু সংৰিদহিত্ৰা ভণ্ডং অৰহরতি, আপত্তি পারাজিকস্স; ভিক্খু অকপ্পিযসঞ্ঞী সংৰিদহিত্ৰা কুটিং করোতি অদেসিতৰত্থুকং পমাণাতিক্কন্তং সারম্ভং অপরিক্কমনং, পযোগে দুক্কটং; একং পিণ্ডং অনাগতে আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স. ভিক্খু অকপ্পিযসঞ্ঞী পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স. ভিক্খু অকপ্পিযসঞ্ঞী ভিক্খুনিযা ৰোসাসন্তিযা ন নিৰারেত্ৰা ভুঞ্জতি, আপত্তি পাটিদেসনীযস্স – ছট্ঠেন আপত্তিসমুট্ঠানেন ইমা ছ আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি আপত্তিসমুট্ঠানেহি সমুট্ঠন্তি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং ছহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৰাচতো চ চিত্ততো চ সমুট্ঠন্তি. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চাতি.

ছন্নং আপত্তিসমুট্ঠানানং

কতাপত্তিৰারো নিট্ঠিতো দুতিযো.