সমথভেদো

৬. অধিকরণপরিযাযৰারো

২৯২. ৰিৰাদাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি ৰিৰদতি? ৰিৰাদাধিকরণং কতিহি সমথেহি সম্মতি?

অনুৰাদাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি অনুৰদতি? অনুৰাদাধিকরণং কতিহি সমথেহি সম্মতি?

আপত্তাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি আপত্তিং আপজ্জতি? আপত্তাধিকরণং কতিহি সমথেহি সম্মতি?

কিচ্চাধিকরণস্স – কিং পুব্বঙ্গমং? কতি ঠানানি? কতি ৰত্থূনি? কতি ভূমিযো? কতি হেতূ? কতি মূলানি? কতিহাকারেহি কিচ্চং জাযতি? কিচ্চাধিকরণং কতিহি সমথেহি সম্মতি?

২৯৩. ৰিৰাদাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? অট্ঠারস ভেদকরৰত্থূনি ঠানানি. কতি ৰত্থূনীতি? অট্ঠারস ভেদকরৰত্থূনি. কতি ভূমিযোতি? অট্ঠারস ভেদকরৰত্থূনি ভূমিযো. কতি হেতূতি? নৰ হেতূ – তযো কুসলহেতূ, তযো অকুসলহেতূ, তযো অব্যাকতহেতূ. কতি মূলানীতি? দ্ৰাদস মূলানি. কতিহাকারেহি ৰিৰদতীতি? দ্ৰীহাকারেহি ৰিৰদতি – ধম্মদিট্ঠি ৰা অধম্মদিট্ঠি ৰা. [চূল়ৰ. ২২৮] ৰিৰাদাধিকরণং কতিহি সমথেহি সম্মতীতি? ৰিৰাদাধিকরণং দ্ৰীহি সমথেহি সম্মতি – সম্মুখাৰিনযেন চ যেভুয্যসিকায চ.

২৯৪. অনুৰাদাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? চতস্সো ৰিপত্তিযো ঠানানি. কতি ৰত্থূনীতি? চতস্সো ৰিপত্তিযো ৰত্থূনি. কতি ভূমিযোতি? চতস্সো ৰিপত্তিযো ভূমিযো. কতি হেতূতি? নৰ হেতূ – তযো কুসলহেতূ, তযো অকুসলহেতূ, তযো অব্যাকতহেতূ. কতি মূলানীতি? চুদ্দস মূলানি. কতিহাকারেহি অনুৰদতীতি? দ্ৰীহাকারেহি অনুৰদতি – ৰত্থুতো ৰা আপত্তিতো ৰা. [চূল়ৰ. ২৩৬] অনুৰাদাধিকরণং কতিহি সমথেহি সম্মতীতি? অনুৰাদাধিকরণং চতূহি সমথেহি সম্মতি – সম্মুখাৰিনযেন চ সতিৰিনযেন চ অমূল়্হৰিনযেন চ তস্সপাপিযসিকায চ.

২৯৫. আপত্তাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? সত্ত আপত্তিক্খন্ধা ঠানানি. কতি ৰত্থূনীতি? সত্ত আপত্তিক্খন্ধা ৰত্থূনি. কতি ভূমিযোতি? সত্ত আপত্তিক্খন্ধা ভূমিযো. কতি হেতূতি? ছ হেতূ [কতি হেতূতি নৰ হেতূ, তযো কুসলহেতূ (সী. স্যা.)] – তযো অকুসলহেতূ, তযো অব্যাকতহেতূ. কতি মূলানীতি? ছ আপত্তিসমুট্ঠানানি মূলানি. কতিহাকারেহি আপত্তিং আপজ্জতীতি? ছহাকারেহি আপত্তিং আপজ্জতি – অলজ্জিতা, অঞ্ঞাণতা, কুক্কুচ্চপকততা, অকপ্পিযে কপ্পিযসঞ্ঞিতা, কপ্পিযে অকপ্পিযসঞ্ঞিতা, সতিসম্মোসা. [চূল়ৰ. ২৩৯] আপত্তাধিকরণং কতিহি সমথেহি সম্মতীতি? আপত্তাধিকরণং তীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ, সম্মুখাৰিনযেন চ তিণৰত্থারকেন চ.

২৯৬. কিচ্চাধিকরণস্স কিং পুব্বঙ্গমন্তি? লোভো পুব্বঙ্গমো, দোসো পুব্বঙ্গমো, মোহো পুব্বঙ্গমো, অলোভো পুব্বঙ্গমো, অদোসো পুব্বঙ্গমো, অমোহো পুব্বঙ্গমো. কতি ঠানানীতি? চত্তারি কম্মানি ঠানানি. কতি ৰত্থূনীতি? চত্তারি কম্মানি ৰত্থূনি. কতি ভূমিযোতি? চত্তারি কম্মানি ভূমিযো. কতি হেতূতি? নৰ হেতূ – তযো কুসলহেতূ, তযো অকুসলহেতূ, তযো অব্যাকতহেতূ. কতি মূলানীতি? একং মূলং – সঙ্ঘো. কতিহাকারেহি কিচ্চং জাযতীতি? দ্ৰীহাকারেহি কিচ্চং জাযতি – ঞত্তিতো ৰা অপলোকনতো ৰা. [চূল়ৰ. ২৪২] কিচ্চাধিকরণং কতিহি সমথেহি সম্মতীতি? কিচ্চাধিকরণং একেন সমথেন সম্মতি – সম্মুখাৰিনযেন.

কতি সমথা? সত্ত সমথা. সম্মুখাৰিনযো, সতিৰিনযো, অমূল়্হৰিনযো, পটিঞ্ঞাতকরণং, যেভুয্যসিকা, তস্সপাপিযসিকা, তিণৰত্থারকো – ইমে সত্ত সমথা.

সিযা ইমে সত্ত সমথা দস সমথা হোন্তি, দস সমথা সত্ত সমথা হোন্তি ৰত্থুৰসেন পরিযাযেন সিযাতি.

কথঞ্চ সিযা? ৰিৰাদাধিকরণস্স দ্ৰে সমথা, অনুৰাদাধিকরণস্স চত্তারো সমথা, আপত্তাধিকরণস্স তযো সমথা, কিচ্চাধিকরণস্স একো সমথো. এৰং ইমে সত্ত সমথা দস সমথা হোন্তি, দস সমথা সত্ত সমথা হোন্তি ৰত্থুৰসেন পরিযাযেন.

পরিযাযৰারো নিট্ঠিতো ছট্ঠো.

৭. সাধারণৰারো

২৯৭. কতি সমথা ৰিৰাদাধিকরণস্স সাধারণা? কতি সমথা ৰিৰাদাধিকরণস্স অসাধারণা? কতি সমথা অনুৰাদাধিকরণস্স সাধারণা? কতি সমথা অনুৰাদাধিকরণস্স অসাধারণা? কতি সমথা আপত্তাধিকরণস্স সাধারণা? কতি সমথা আপত্তাধিকরণস্স অসাধারণা? কতি সমথা কিচ্চাধিকরণস্স সাধারণা? কতি সমথা কিচ্চাধিকরণস্স অসাধারণা?

দ্ৰে সমথা ৰিৰাদাধিকরণস্স সাধারণা – সম্মুখাৰিনযো, যেভুয্যসিকা. পঞ্চ সমথা ৰিৰাদাধিকরণস্স অসাধারণা – সতিৰিনযো, অমূল়্হৰিনযো, পটিঞ্ঞাতকরণং, তস্সপাপিযসিকা, তিণৰত্থারকো.

চত্তারো সমথা অনুৰাদাধিকরণস্স সাধারণা – সম্মুখাৰিনযো; সতিৰিনযো, অমূল়্হৰিনযো, তস্সপাপিযসিকা. তযো সমথা অনুৰাদাধিকরণস্স অসাধারণা – যেভুয্যসিকা, পটিঞ্ঞাতকরণং, তিণৰত্থারকো.

তযো সমথা আপত্তাধিকরণস্স সাধারণা – সম্মুখাৰিনযো, পটিঞ্ঞাতকরণং, তিণৰত্থারকো. চত্তারো সমথা আপত্তাধিকরণস্স অসাধারণা – যেভুয্যসিকা, সতিৰিনযো, অমূল়্হৰিনযো, তস্সপাপিযসিকা.

একো সমথো কিচ্চাধিকরণস্স সাধারণো – সম্মুখাৰিনযো. ছ সমথা কিচ্চাধিকরণস্স অসাধারণা – যেভুয্যসিকা, সতিৰিনযো, অমূল়্হৰিনযো, পটিঞ্ঞাতকরণং, তস্সপাপিযসিকা, তিণৰত্থারকো.

সাধারণৰারো নিট্ঠিতো সত্তমো.

৮. তব্ভাগিযৰারো

২৯৮. কতি সমথা ৰিৰাদাধিকরণস্স তব্ভাগিযা? কতি সমথা ৰিৰাদাধিকরণস্স অঞ্ঞভাগিযা? কতি সমথা অনুৰাদাধিকরণস্স তব্ভাগিযা? কতি সমথা অনুৰাদাধিকরণস্স অঞ্ঞভাগিযা? কতি সমথা আপত্তাধিকরণস্স তব্ভাগিযা? কতি সমথা আপত্তাধিকরণস্স অঞ্ঞভাগিযা? কতি সমথা কিচ্চাধিকরণস্স তব্ভাগিযা? কতি সমথা কিচ্চাধিকরণস্স অঞ্ঞভাগিযা?

দ্ৰে সমথা ৰিৰাদাধিকরণস্স তব্ভাগিযা – সম্মুখাৰিনযো, যেভুয্যসিকা. পঞ্চ সমথা ৰিৰাদাধিকরণস্স অঞ্ঞভাগিযা – সতিৰিনযো, অমূল়্হৰিনযো, পটিঞ্ঞাতকরণং, তস্সপাপিযসিকা, তিণৰত্থারকো.

চত্তারো সমথা অনুৰাদাধিকরণস্স তব্ভাগিযা – সম্মুখাৰিনযো, সতিৰিনযো, অমূল়্হৰিনযো, তস্সপাপিযসিকা. তযো সমথা অনুৰাদাধিকরণস্স অঞ্ঞভাগিযা – যেভুয্যসিকা, পটিঞ্ঞাতকরণং, তিণৰত্থারকো.

তযো সমথা আপত্তাধিকরণস্স তব্ভাগিযা – সম্মুখাৰিনযো, পটিঞ্ঞাতকরণং, তিণৰত্থারকো. চত্তারো সমথা আপত্তাধিকরণস্স অঞ্ঞভাগিযা – যেভুয্যসিকা, সতিৰিনযো, অমূল়্হৰিনযো, তস্সপাপিযসিকা.

একো সমথো কিচ্চাধিকরণস্স তব্ভাগিযো – সম্মুখাৰিনযো. ছ সমথা কিচ্চাধিকরণস্স অঞ্ঞভাগিযা – যেভুয্যসিকা, সতিৰিনযো, অমূল়্হৰিনযো, পটিঞ্ঞাতকরণং, তস্সপাপিযসিকা, তিণৰত্থারকো.

তব্ভাগিযৰারো নিট্ঠিতো অট্ঠমো.

৯. সমথা সমথস্স সাধারণৰারো

২৯৯. সমথা সমথস্স সাধারণা, সমথা সমথস্স অসাধারণা. সিযা সমথা সমথস্স সাধারণা, সিযা সমথা সমথস্স অসাধারণা.

কথং সিযা সমথা সমথস্স সাধারণা? কথং সিযা সমথা সমথস্স অসাধারণা? যেভুয্যসিকা সম্মুখাৰিনযস্স সাধারণা, সতিৰিনযস্স অমূল়্হৰিনযস্স পটিঞ্ঞাতকরণস্স তস্সপাপিযসিকায তিণৰত্থারকস্স অসাধারণা.

সতিৰিনযো সম্মুখাৰিনযস্স সাধারণো, অমূল়্হৰিনযস্স পটিঞ্ঞাতকরণস্স তস্সপাপিযসিকায তিণৰত্থারকস্স যেভুয্যসিকায অসাধারণো.

অমূল়্হৰিনযো সম্মুখাৰিনযস্স সাধারণো, পটিঞ্ঞাতকরণস্স তস্সপাপিযসিকায তিণৰত্থারকস্স যেভুয্যসিকায সতিৰিনযস্স অসাধারণো.

পটিঞ্ঞাতকরণং সম্মুখাৰিনযস্স সাধারণং, তস্সপাপিযসিকায তিণৰত্থারকস্স যেভুয্যসিকায সতিৰিনযস্স অমূল়্হৰিনযস্স অসাধারণং.

তস্সপাপিযসিকা সম্মুখাৰিনযস্স সাধারণা, তিণৰত্থারকস্স যেভুয্যসিকায সতিৰিনযস্স অমূল়্হৰিনযস্স পটিঞ্ঞাতকরণস্স অসাধারণা.

তিণৰত্থারকো সম্মুখাৰিনযস্স সাধারণো, যেভুয্যসিকায সতিৰিনযস্স অমূল়্হৰিনযস্স পটিঞ্ঞাতকরণস্স তস্সপাপিযসিকায অসাধারণো. এৰং সিযা সমথা সমথস্স সাধারণা; এৰং সিযা সমথা সমথস্স অসাধারণা.

সমথা সমথস্স সাধারণৰারো নিট্ঠিতো নৰমো.

১০. সমথা সমথস্স তব্ভাগিযৰারো

৩০০. সমথা সমথস্স তব্ভাগিযা, সমথা সমথস্স অঞ্ঞভাগিযা. সিযা সমথা সমথস্স তব্ভাগিযা, সিযা সমথা সমথস্স অঞ্ঞভাগিযা.

কথং সিযা সমথা সমথস্স তব্ভাগিযা? কথং সিযা সমথা সমথস্স অঞ্ঞভাগিযা? যেভুয্যসিকা সম্মুখাৰিনযস্স তব্ভাগিযা, সতিৰিনযস্স অমূল়্হৰিনযস্স পটিঞ্ঞাতকরণস্স তস্সপাপিযসিকায তিণৰত্থারকস্স অঞ্ঞভাগিযা.

সতিৰিনযো সম্মুখাৰিনযস্স তব্ভাগিযো, অমূল়্হৰিনযস্স পটিঞ্ঞাতকরণস্স তস্সপাপিযসিকায তিণৰত্থারকস্স যেভুয্যসিকায অঞ্ঞভাগিযো.

অমূল়্হৰিনযো সম্মুখাৰিনযস্স তব্ভাগিযো, পটিঞ্ঞাতকরণস্স তস্সপাপিযসিকায তিণৰত্থারকস্স যেভুয্যসিকায সতিৰিনযস্স অঞ্ঞভাগিযো.

পটিঞ্ঞাতকরণং সম্মুখাৰিনযস্স তব্ভাগিযং, তস্সপাপিযসিকায তিণৰত্থারকস্স যেভুয্যসিকায সতিৰিনযস্স অমূল়্হৰিনযস্স অঞ্ঞভাগিযং.

তস্সপাপিযসিকা সম্মুখাৰিনযস্স তব্ভাগিযা, তিণৰত্থারকস্স যেভুয্যসিকায সতিৰিনযস্স অমূল়্হৰিনযস্স পটিঞ্ঞাতকরণস্স অঞ্ঞভাগিযা.

তিণৰত্থারকো সম্মুখাৰিনযস্স তব্ভাগিযো, যেভুয্যসিকায সতিৰিনযস্স অমূল়্হৰিনযস্স পটিঞ্ঞাতকরণস্স তস্সপাপিযসিকায অঞ্ঞভাগিযো. এৰং সিযা সমথা সমথস্স তব্ভাগিযা, এৰং সিযা সমথা সমথস্স অঞ্ঞভাগিযা.

সমথা সমথস্স তব্ভাগিযৰারো নিট্ঠিতো দসমো.

১১. সমথসম্মুখাৰিনযৰারো

৩০১. সমথো সম্মুখাৰিনযো, সম্মুখাৰিনযো সমথো? সমথো যেভুয্যসিকা, যেভুয্যসিকা সমথো? সমথো সতিৰিনযো, সতিৰিনযো সমথো? সমথো অমূল়্হৰিনযো, অমূল়্হৰিনযো সমথো? সমথো পটিঞ্ঞাতকরণং, পটিঞ্ঞাতকরণং সমথো? সমথো তস্সপাপিযসিকা, তস্সপাপিযসিকা সমথো? সমথো তিণৰত্থারকো, তিণৰত্থারকো সমথো?

যেভুয্যসিকা সতিৰিনযো অমূল়্হৰিনযো পটিঞ্ঞাতকরণং তস্সপাপিযসিকা তিণৰত্থারকো – ইমে সমথা সমথা, নো সম্মুখাৰিনযো. সম্মুখাৰিনযো সমথো চেৰ সম্মুখাৰিনযো চ.

সতিৰিনযো অমূল়্হৰিনযো পটিঞ্ঞাতকরণং তস্সপাপিযসিকা তিণৰত্থারকো সম্মুখাৰিনযো – ইমে সমথা সমথা, নো যেভুয্যসিকা. যেভুয্যসিকা সমথো চেৰ যেভুয্যসিকা চ.

অমূল়্হৰিনযো পটিঞ্ঞাতকরণং তস্সপাপিযসিকা তিণৰত্থারকো সম্মুখাৰিনযো যেভুয্যসিকা – ইমে সমথা সমথা, নো সতিৰিনযো. সতিৰিনযো সমথো চেৰ সতিৰিনযো চ.

পটিঞ্ঞাতকরণং তস্সপাপিযসিকা তিণৰত্থারকো সম্মুখাৰিনযো যেভুয্যসিকা সতিৰিনযো – ইমে সমথা সমথা, নো অমূল়্হৰিনযো. অমূল়্হৰিনযো সমথো চেৰ অমূল়্হৰিনযো চ.

তস্সপাপিযসিকা তিণৰত্থারকো সম্মুখাৰিনযো যেভুয্যসিকা সতিৰিনযো অমূল়্হৰিনযো – ইমে সমথা সমথা, নো পটিঞ্ঞাতকরণং. পটিঞ্ঞাতকরণং সমথো চেৰ পটিঞ্ঞাতকরণঞ্চ.

তিণৰত্থারকো সম্মুখাৰিনযো যেভুয্যসিকা সতিৰিনযো অমূল়্হৰিনযো পটিঞ্ঞাতকরণং – ইমে সমথা সমথা, নো তস্সপাপিযসিকা. তস্সপাপিযসিকা সমথো চেৰ তস্সপাপিযসিকা চ.

সম্মুখাৰিনযো যেভুয্যসিকা সতিৰিনযো অমূল়্হৰিনযো পটিঞ্ঞাতকরণং তস্সপাপিযসিকা – ইমে সমথা সমথা, নো তিণৰত্থারকো. তিণৰত্থারকো সমথো চেৰ তিণৰত্থারকো চ.

সমথসম্মুখাৰিনযৰারো নিট্ঠিতো একাদসমো.

১২. ৰিনযৰারো

৩০২. ৰিনযো সম্মুখাৰিনযো, সম্মুখাৰিনযো ৰিনযো? ৰিনযো যেভুয্যসিকা, যেভুয্যসিকা ৰিনযো? ৰিনযো সতিৰিনযো, সতিৰিনযো ৰিনযো? ৰিনযো অমূল়্হৰিনযো, অমূল়্হৰিনযো ৰিনযো? ৰিনযো পটিঞ্ঞাতকরণং, পটিঞ্ঞাতকরণং ৰিনযো? ৰিনযো তস্সপাপিযসিকা, তস্সপাপিযসিকা ৰিনযো? ৰিনযো তিণৰত্থারকো, তিণৰত্থারকো ৰিনযো?

ৰিনযো সিযা সম্মুখাৰিনযো সিযা ন সম্মুখাৰিনযো. সম্মুখাৰিনযো ৰিনযো চেৰ সম্মুখাৰিনযো চ.

ৰিনযো সিযা যেভুয্যসিকা, সিযা ন যেভুয্যসিকা. যেভুয্যসিকা ৰিনযো চেৰ যেভুয্যসিকা চ.

ৰিনযো সিযা সতিৰিনযো, সিযা ন সতিৰিনযো. সতিৰিনযো ৰিনযো চেৰ সতিৰিনযো চ.

ৰিনযো সিযা অমূল়্হৰিনযো, সিযা ন অমূল়্হৰিনযো. অমূল়্হৰিনযো ৰিনযো চেৰ অমূল়্হৰিনযো চ.

ৰিনযো সিযা পটিঞ্ঞাতকরণং, সিযা ন পটিঞ্ঞাতকরণং. পটিঞ্ঞাতকরণং ৰিনযো চেৰ পটিঞ্ঞাতকরণঞ্চ.

ৰিনযো সিযা তস্সপাপিযসিকা, সিযা ন তস্সপাপিযসিকা. তস্সপাপিযসিকা ৰিনযো চেৰ তস্সপাপিযসিকা চ.

ৰিনযো সিযা তিণৰত্থারকো, সিযা ন তিণৰত্থারকো. তিণৰত্থারকো ৰিনযো চেৰ তিণৰত্থারকো চ.

ৰিনযৰারো নিট্ঠিতো দ্ৰাদসমো.

১৩. কুসলৰারো

৩০৩. সম্মুখাৰিনযো কুসলো অকুসলো অব্যাকতো? যেভুয্যসিকা কুসলা অকুসলা অব্যাকতা? সতিৰিনযো কুসলো অকুসলো অব্যাকতো? অমূল়্হৰিনযো কুসলো অকুসলো অব্যাকতো? পটিঞ্ঞাতকরণং কুসলং অকুসলং অব্যাকতং? তস্সপাপিযসিকা কুসলা অকুসলা অব্যাকতা? তিণৰত্থারকো কুসলো অকুসলো অব্যাকতো?

সম্মুখাৰিনযো সিযা কুসলো, সিযা অব্যাকতো. নত্থি সম্মুখাৰিনযো অকুসলো.

যেভুয্যসিকা সিযা কুসলা, সিযা অকুসলা, সিযা অব্যাকতা.

সতিৰিনযো সিযা কুসলো, সিযা অকুসলো, সিযা অব্যাকতো.

অমূল়্হৰিনযো সিযা কুসলো, সিযা অকুসলো, সিযা অব্যাকতো.

পটিঞ্ঞাতকরণং সিযা কুসলং, সিযা অকুসলং, সিযা অব্যাকতং.

তস্সপাপিযসিকা সিযা কুসলা, সিযা অকুসলা সিযা অব্যাকতা.

তিণৰত্থারকো সিযা কুসলো, সিযা অকুসলো, সিযা অব্যাকতো.

ৰিৰাদাধিকরণং কুসলং অকুসলং অব্যাকতং. অনুৰাদাধিকরণং কুসলং অকুসলং অব্যাকতং. আপত্তাধিকরণং কুসলং অকুসলং অব্যাকতং. কিচ্চাধিকরণং কুসলং অকুসলং অব্যাকতং.

ৰিৰাদাধিকরণং সিযা কুসলং, সিযা অকুসলং, সিযা অব্যাকতং.

অনুৰাদাধিকরণং সিযা কুসলং, সিযা অকুসলং, সিযা অব্যাকতং.

আপত্তাধিকরণং সিযা অকুসলং, সিযা অব্যাকতং. নত্থি আপত্তাধিকরণং কুসলং.

কিচ্চাধিকরণং সিযা কুসলং, সিযা অকুসলং, সিযা অব্যাকতং.

কুসলৰারো নিট্ঠিতো তেরসমো.

১৪. যত্থৰারো, পুচ্ছাৰারো

৩০৪. যত্থ যেভুয্যসিকা লব্ভতি, তত্থ সম্মুখাৰিনযো লব্ভতি; যত্থ সম্মুখাৰিনযো লব্ভতি, তত্থ যেভুয্যসিকা লব্ভতি. ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি.

যত্থ সতিৰিনযো লব্ভতি, তত্থ সম্মুখাৰিনযো লব্ভতি; যত্থ সম্মুখাৰিনযো লব্ভতি, তত্থ সতিৰিনযো লব্ভতি. ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি.

যত্থ অমূল়্হৰিনযো লব্ভতি, তত্থ সম্মুখাৰিনযো লব্ভতি; যত্থ সম্মুখাৰিনযো লব্ভতি, তত্থ অমূল়্হৰিনযো লব্ভতি. ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি, ন তত্থ সতিৰিনযো লব্ভতি.

যত্থ পটিঞ্ঞাতকরণং লব্ভতি, তত্থ সম্মুখাৰিনযো লব্ভতি; যত্থ সম্মুখাৰিনযো লব্ভতি, তত্থ পটিঞ্ঞাতকরণং লব্ভতি. ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি, ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি.

যত্থ তস্সপাপিযসিকা লব্ভতি, তত্থ সম্মুখাৰিনযো লব্ভতি; যত্থ সম্মুখাৰিনযো লব্ভতি, তত্থ তস্সপাপিযসিকা লব্ভতি. ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি, ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি.

যত্থ তিণৰত্থারকো লব্ভতি, তত্থ সম্মুখাৰিনযো লব্ভতি; যত্থ সম্মুখাৰিনযো লব্ভতি, তত্থ তিণৰত্থারকো লব্ভতি. ন তত্থ যেভুয্যসিকা লব্ভতি, ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি.

যত্থ যেভুয্যসিকা তত্থ সম্মুখাৰিনযো; যত্থ সম্মুখাৰিনযো তত্থ যেভুয্যসিকা. ন তত্থ সতিৰিনযো, ন তত্থ অমূল়্হৰিনযো, ন তত্থ পটিঞ্ঞাতকরণং, ন তত্থ তস্সপাপিযসিকা, ন তত্থ তিণৰত্থারকো.

যত্থ সতিৰিনযো তত্থ সম্মুখাৰিনযো; যত্থ সম্মুখাৰিনযো তত্থ সতিৰিনযো. ন তত্থ অমূল়্হৰিনযো, ন তত্থ পটিঞ্ঞাতকরণং, ন তত্থ তস্সপাপিযসিকা, ন তত্থ তিণৰত্থারকো, ন তত্থ যেভুয্যসিকা. সম্মুখাৰিনযং কাতুন মূলং…পে….

যত্থ তিণৰত্থারকো তত্থ সম্মুখাৰিনযো; যত্থ সম্মুখাৰিনযো তত্থ তিণৰত্থারকো. ন তত্থ যেভুয্যসিকা, ন তত্থ সতিৰিনযো, ন তত্থ অমূল়্হৰিনযো, ন তত্থ পটিঞ্ঞাতকরণং, ন তত্থ তস্সপাপিযসিকা.

চক্কপেয্যালং.

যত্থৰারো নিট্ঠিতো চুদ্দসমো.

১৫. সমথৰারো, ৰিস্সজ্জনাৰারো

৩০৫. যস্মিং সমযে সম্মুখাৰিনযেন চ যেভুয্যসিকায চ অধিকরণং ৰূপসম্মতি, যত্থ যেভুয্যসিকা লব্ভতি তত্থ সম্মুখাৰিনযো লব্ভতি, যত্থ সম্মুখাৰিনযো লব্ভতি তত্থ যেভুয্যসিকা লব্ভতি. ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি.

যস্মিং সমযে সম্মুখাৰিনযেন চ সতিৰিনযেন চ অধিকরণং ৰূপসম্মতি, যত্থ সতিৰিনযো লব্ভতি তত্থ সম্মুখাৰিনযো লব্ভতি, যত্থ সম্মুখাৰিনযো লব্ভতি তত্থ সতিৰিনযো লব্ভতি. ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি.

যস্মিং সমযে সম্মুখাৰিনযেন চ অমূল়্হৰিনযেন চ অধিকরণং ৰূপসম্মতি, যত্থ অমূল়্হৰিনযো লব্ভতি তত্থ সম্মুখাৰিনযো লব্ভতি, যত্থ সম্মুখাৰিনযো লব্ভতি তত্থ অমূল়্হৰিনযো লব্ভতি. ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি, ন তত্থ সতিৰিনযো লব্ভতি.

যস্মিং সমযে সম্মুখাৰিনযেন চ পটিঞ্ঞাতকরণেন চ অধিকরণং ৰূপসম্মতি, যত্থ পটিঞ্ঞাতকরণং লব্ভতি তত্থ সম্মুখাৰিনযো লব্ভতি, যত্থ সম্মুখাৰিনযো লব্ভতি তত্থ পটিঞ্ঞাতকরণং লব্ভতি. ন তত্থ তস্সপাপিযসিকা লব্ভতি, ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি, ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি.

যস্মিং সমযে সম্মুখাৰিনযেন চ তস্সপাপিযসিকায চ অধিকরণং ৰূপসম্মতি, যত্থ তস্সপাপিযসিকা লব্ভতি তত্থ সম্মুখাৰিনযো লব্ভতি, যত্থ সম্মুখাৰিনযো লব্ভতি তত্থ তস্সপাপিযসিকা লব্ভতি. ন তত্থ তিণৰত্থারকো লব্ভতি, ন তত্থ যেভুয্যসিকা লব্ভতি, ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি.

যস্মিং সমযে সম্মুখাৰিনযেন চ তিণৰত্থারকেন চ অধিকরণং ৰূপসম্মতি, যত্থ তিণৰত্থারকো লব্ভতি তত্থ সম্মুখাৰিনযো লব্ভতি, যত্থ সম্মুখাৰিনযো লব্ভতি তত্থ তিণৰত্থারকো লব্ভতি. ন তত্থ যেভুয্যসিকা লব্ভতি, ন তত্থ সতিৰিনযো লব্ভতি, ন তত্থ অমূল়্হৰিনযো লব্ভতি, ন তত্থ পটিঞ্ঞাতকরণং লব্ভতি, ন তত্থ তস্সপাপিযসিকা লব্ভতি.

সমথৰারো নিট্ঠিতো পন্নরসমো.

১৬. সংসট্ঠৰারো

৩০৬. অধিকরণন্তি ৰা সমথাতি ৰা ইমে ধম্মা সংসট্ঠা উদাহু ৰিসংসট্ঠা? লব্ভা চ পনিমেসং ধম্মানং ৰিনিব্ভুজিত্ৰা ৰিনিব্ভুজিত্ৰা [ৰিনিব্ভুজ্জিত্ৰা ৰিনিব্ভুজ্জিত্ৰা (ক.), টীকাযং একপদমেৰ দিস্সতি] নানাকরণং পঞ্ঞাপেতুন্তি?

অধিকরণন্তি ৰা সমথাতি ৰা ইমে ধম্মা ৰিসংসট্ঠা, নো সংসট্ঠা. লব্ভা চ পনিমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুন্তি. সো – ‘‘মা হেৰ’’ন্তিস্স ৰচনীযো. অধিকরণন্তি ৰা সমথাতি ৰা ইমে ধম্মা সংসট্ঠা, নো ৰিসংসট্ঠা. নো চ লব্ভা [ন চ লব্ভা (ক.)] ইমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং. তং কিস্স হেতু? ননু ৰুত্তং ভগৰতা – ‘‘চত্তারিমানি, ভিক্খৰে, অধিকরণানি, সত্ত সমথা. অধিকরণা সমথেহি সম্মন্তি, সমথা অধিকরণেহি সম্মন্তি. এৰং, ইমে ধম্মা সংসট্ঠা নো ৰিসংসট্ঠা; নো চ লব্ভা ইমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতু’’ন্তি.

সংসট্ঠৰারো নিট্ঠিতো সোল়সমো.

১৭. সম্মতিৰারো

৩০৭. ৰিৰাদাধিকরণং কতিহি সমথেহি সম্মতি? অনুৰাদাধিকরণং কতিহি সমথেহি সম্মতি? আপত্তাধিকরণং কতিহি সমথেহি সম্মতি? কিচ্চাধিকরণং কতিহি সমথেহি সম্মতি?

[চূল়ৰ. ২২৮, ২৩৬ আদযো] ৰিৰাদাধিকরণং দ্ৰীহি সমথেহি সম্মতি – সম্মুখাৰিনযেন চ যেভুয্যসিকায চ.

[চূল়ৰ. ২২৮, ২৩৬ আদযো] অনুৰাদাধিকরণং চতূহি সমথেহি সম্মতি – সম্মুখাৰিনযেন চ সতিৰিনযেন চ অমূল়্হৰিনযেন চ তস্সপাপিযসিকায চ.

[চূল়ৰ. ২৩৯, ২৪২ আদযো] আপত্তাধিকরণং তীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ তিণৰত্থারকেন চ.

[চূল়ৰ. ২৩৯, ২৪২ আদযো] কিচ্চাধিকরণং একেন সমথেন সম্মতি – সম্মুখাৰিনযেন.

ৰিৰাদাধিকরণঞ্চ অনুৰাদাধিকরণঞ্চ কতিহি সমথেহি সম্মন্তি? ৰিৰাদাধিকরণঞ্চ অনুৰাদাধিকরণঞ্চ পঞ্চহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ তস্সপাপিযসিকায চ.

ৰিৰাদাধিকরণঞ্চ আপত্তাধিকরণঞ্চ কতিহি সমথেহি সম্মন্তি? ৰিৰাদাধিকরণঞ্চ আপত্তাধিকরণঞ্চ চতূহি সমথেহি সম্মন্তি – সম্মুখাৰিনযেন চ যেভুয্যসিকায চ পটিঞ্ঞাতকরণেন চ তিণৰত্থারকেন চ.

ৰিৰাদাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? ৰিৰাদাধিকরণঞ্চ কিচ্চাধিকরণঞ্চ দ্ৰীহি সমথেহি সম্মন্তি – সম্মুখাৰিনযেন চ যেভুয্যসিকায চ.

অনুৰাদাধিকরণঞ্চ আপত্তাধিকরণঞ্চ কতিহি সমথেহি সম্মন্তি? অনুৰাদাধিকরণঞ্চ আপত্তাধিকরণঞ্চ ছহি সমথেহি সম্মন্তি – সম্মুখাৰিনযেন চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

অনুৰাদাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? অনুৰাদাধিকরণঞ্চ কিচ্চাধিকরণঞ্চ চতূহি সমথেহি সম্মন্তি – সম্মুখাৰিনযেন চ সতিৰিনযেন চ অমূল়্হৰিনযেন চ তস্সপাপিযসিকায চ.

আপত্তাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? আপত্তাধিকরণঞ্চ কিচ্চাধিকরণঞ্চ তীহি সমথেহি সম্মন্তি – সম্মুখাৰিনযেন চ পটিঞ্ঞাতকরণেন চ তিণৰত্থারকেন চ.

ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ কতিহি সমথেহি সম্মন্তি? ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ সত্তহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

ৰিৰাদাধিকরণঞ্চ অনুৰাদাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? ৰিৰাদাধিকরণঞ্চ অনুৰাদাধিকরণঞ্চ কিচ্চাধিকরণঞ্চ পঞ্চহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ তস্সপাপিযসিকায চ.

অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ ছহি সমথেহি সম্মন্তি – সম্মুখাৰিনযেন চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ সত্তহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

সম্মতিৰারো নিট্ঠিতো সত্তরসমো.

১৮. সম্মন্তি ন সম্মন্তিৰারো

৩০৮. ৰিৰাদাধিকরণং কতিহি সমথেহি সম্মতি, কতিহি সমথেহি ন সম্মতি? অনুৰাদাধিকরণং কতিহি সমথেহি সম্মতি, কতিহি সমথেহি ন সম্মতি? আপত্তাধিকরণং কতিহি সমথেহি সম্মতি, কতিহি সমথেহি ন সম্মতি? কিচ্চাধিকরণং কতিহি সমথেহি সম্মতি, কতিহি সমথেহি ন সম্মতি?

ৰিৰাদাধিকরণং দ্ৰীহি সমথেহি সম্মতি – সম্মুখাৰিনযেন চ যেভুয্যসিকায চ. পঞ্চহি সমথেহি ন সম্মতি – সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

অনুৰাদাধিকরণং চতূহি সমথেহি সম্মতি – সম্মুখাৰিনযেন চ সতিৰিনযেন চ অমূল়্হৰিনযেন চ তস্সপাপিযসিকায চ. তীহি সমথেহি ন সম্মতি – যেভুয্যসিকায চ পটিঞ্ঞাতকরণেন চ তিণৰত্থারকেন চ.

[চূল়ৰ. ২৩৯] আপত্তাধিকরণং তীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ তিণৰত্থারকেন চ. চতূহি সমথেহি ন সম্মতি – যেভুয্যসিকায চ সতিৰিনযেন চ অমূল়্হৰিনযেন চ তস্সপাপিযসিকায চ.

কিচ্চাধিকরণং একেন সমথেন সম্মতি – সম্মুখাৰিনযেন. ছহি সমথেহি ন সম্মতি – যেভুয্যসিকায চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

ৰিৰাদাধিকরণঞ্চ অনুৰাদাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৰিৰাদাধিকরণঞ্চ অনুৰাদাধিকরণঞ্চ পঞ্চহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ তস্সপাপিযসিকায চ. দ্ৰীহি সমথেহি ন সম্মন্তি – পটিঞ্ঞাতকরণেন চ তিণৰত্থারকেন চ.

ৰিৰাদাধিকরণঞ্চ আপত্তাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৰিৰাদাধিকরণঞ্চ আপত্তাধিকরণঞ্চ চতূহি সমথেহি সম্মন্তি – সম্মুখাৰিনযেন চ যেভুয্যসিকায চ পটিঞ্ঞাতকরণেন চ তিণৰত্থারকেন চ. তীহি সমথেহি ন সম্মন্তি – সতিৰিনযেন চ অমূল়্হৰিনযেন চ তস্সপাপিযসিকায চ.

ৰিৰাদাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৰিৰাদাধিকরণঞ্চ কিচ্চাধিকরণঞ্চ দ্ৰীহি সমথেহি সম্মন্তি – সম্মুখাৰিনযেন চ যেভুয্যসিকায চ. পঞ্চহি সমথেহি ন সম্মন্তি – সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

অনুৰাদাধিকরণঞ্চ আপত্তাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? অনুৰাদাধিকরণঞ্চ আপত্তাধিকরণঞ্চ ছহি সমথেহি সম্মন্তি – সম্মুখাৰিনযেন চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ. একেন সমথেন ন সম্মন্তি – যেভুয্যসিকায.

অনুৰাদাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? অনুৰাদাধিকরণঞ্চ কিচ্চাধিকরণঞ্চ চতূহি সমথেহি সম্মন্তি – সম্মুখাৰিনযেন চ সতিৰিনযেন চ অমূল়্হৰিনযেন চ তস্সপাপিযসিকা চ. তীহি সমথেহি ন সম্মন্তি – যেভুয্যসিকায চ পটিঞ্ঞাতকরণেন চ তিণৰত্থারকেন চ.

আপত্তাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? আপত্তাধিকরণঞ্চ কিচ্চাধিকরণঞ্চ তীহি সমথেহি সম্মন্তি – সম্মুখাৰিনযেন চ পটিঞ্ঞাতকরণেন চ তিণৰত্থারকেন চ. চতূহি সমথেহি ন সম্মন্তি – যেভুয্যসিকায চ সতিৰিনযেন চ অমূল়্হৰিনযেন চ তস্সপাপিযসিকায চ.

ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ সত্তহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

ৰিৰাদাধিকরণঞ্চ অনুৰাদাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৰিৰাদাধিকরণঞ্চ অনুৰাদাধিকরণঞ্চ কিচ্চাধিকরণঞ্চ পঞ্চহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ তস্সপাপিযসিকায চ. দ্ৰীহি সমথেহি ন সম্মন্তি – পটিঞ্ঞাতকরণেন চ তিণৰত্থারকেন চ.

অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ ছহি সমথেহি সম্মন্তি – সম্মুখাৰিনযেন চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ. একেন সমথেন ন সম্মন্তি – যেভুয্যসিকায.

ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ কতিহি সমথেহি সম্মন্তি? কতিহি সমথেহি ন সম্মন্তি? ৰিৰাদাধিকরণঞ্চ অনুৰাদাধিকরণঞ্চ আপত্তাধিকরণঞ্চ কিচ্চাধিকরণঞ্চ সত্তহি সমথেহি সম্মন্তি – সম্মুখাৰিনযেন চ যেভুয্যসিকায চ সতিৰিনযেন চ অমূল়্হৰিনযেন চ পটিঞ্ঞাতকরণেন চ তস্সপাপিযসিকায চ তিণৰত্থারকেন চ.

সম্মন্তি ন সম্মন্তিৰারো নিট্ঠিতো অট্ঠারসমো.

১৯. সমথাধিকরণৰারো

৩০৯. সমথা সমথেহি সম্মন্তি? সমথা অধিকরণেহি সম্মন্তি? অধিকরণা সমথেহি সম্মন্তি? অধিকরণা অধিকরণেহি সম্মন্তি?

সিযা সমথা সমথেহি সম্মন্তি, সিযা সমথা সমথেহি ন সম্মন্তি. সিযা সমথা অধিকরণেহি সম্মন্তি, সিযা সমথা অধিকরণেহি ন সম্মন্তি. সিযা অধিকরণা সমথেহি সম্মন্তি, সিযা অধিকরণা সমথেহি ন সম্মন্তি. সিযা অধিকরণা অধিকরণেহি সম্মন্তি, সিযা অধিকরণা অধিকরণেহি ন সম্মন্তি.

৩১০. কথং সিযা সমথা সমথেহি সম্মন্তি, কথং সিযা সমথা সমথেহি ন সম্মন্তি? যেভুয্যসিকা সম্মুখাৰিনযেন সম্মতি; সতিৰিনযেন ন সম্মতি, অমূল়্হৰিনযেন ন সম্মতি, পটিঞ্ঞাতকরণেন ন সম্মতি, তস্সপাপিযসিকায ন সম্মতি, তিণৰত্থারকেন ন সম্মতি.

সতিৰিনযো সম্মুখাৰিনযেন সম্মতি; অমূল়্হৰিনযেন ন সম্মতি, পটিঞ্ঞাতকরণেন ন সম্মাতি, তস্সপাপিযসিকায ন সম্মতি, তিণৰত্থারকেন ন সম্মতি, যেভুয্যসিকায ন সম্মতি.

অমূল়্হৰিনযো সম্মুখাৰিনযেন সম্মতি; পটিঞ্ঞাতকরণেন ন সম্মতি, তস্সপাপিযসিকায ন সম্মতি, তিণৰত্থারকেন ন সম্মতি, যেভুয্যসিকায ন সম্মতি, সতিৰিনযেন ন সম্মতি.

পটিঞ্ঞাতকরণং সম্মুখাৰিনযেন সম্মতি; তস্সপাপিযসিকায ন সম্মতি, তিণৰত্থারকেন ন সম্মতি, যেভুয্যসিকায ন সম্মতি, সতিৰিনযেন ন সম্মতি, অমূল়্হৰিনযেন ন সম্মতি.

তস্সপাপিযসিকা সম্মুখাৰিনযেন সম্মতি; তিণৰত্থারকেন ন সম্মতি, যেভুয্যসিকায ন সম্মতি, সতিৰিনযেন ন সম্মতি, অমূল়্হৰিনযেন ন সম্মতি, পটিঞ্ঞাতকরণেন ন সম্মতি.

তিণৰত্থারকো সম্মুখাৰিনযেন সম্মতি; যেভুয্যসিকায ন সম্মতি, সতিৰিনযেন ন সম্মতি, অমূল়্হৰিনযেন ন সম্মতি, পটিঞ্ঞাতকরণেন ন সম্মতি, তস্সপাপিযসিকায ন সম্মতি. এৰং সিযা সমথা সমথেহি সম্মন্তি. এৰং সিযা সমথা সমথেহি ন সম্মন্তি.

৩১১. কথং সিযা সমথা অধিকরণেহি সম্মন্তি, কথং সিযা সমথা অধিকরণেহি ন সম্মন্তি? সম্মুখাৰিনযো ৰিৰাদাধিকরণেন ন সম্মতি, অনুৰাদাধিকরণেন ন সম্মতি, আপত্তাধিকরণেন ন সম্মতি; কিচ্চাধিকরণেন সম্মতি.

যেভুয্যসিকা ৰিৰাদাধিকরণেন ন সম্মতি, অনুৰাদাধিকরণেন ন সম্মতি, আপত্তাধিকরণেন ন সম্মতি; কিচ্চাধিকরণেন সম্মতি.