২০. সমুট্ঠাপনৰারো

৩১৪. ৰিৰাদাধিকরণং চতুন্নং অধিকরণানং কতমং অধিকরণং সমুট্ঠাপেতি? ৰিৰাদাধিকরণং চতুন্নং অধিকরণানং ন কতমং অধিকরণং সমুট্ঠাপেতি; অপিচ, ৰিৰাদাধিকরণপচ্চযা চত্তারো অধিকরণা জাযন্তি. যথা কথং ৰিয? [চূল়ৰ. ২১৫; পরি. ৩৪৮ আদযো] ইধ ভিক্খূ ৰিৰদন্তি – ‘‘ধম্মোতি ৰা, অধম্মোতি ৰা, ৰিনযোতি ৰা, অৰিনযোতি ৰা, অভাসিতং অলপিতং তথাগতেনাতি ৰা, ভাসিতং লপিতং তথাগতেনাতি ৰা, অনাচিণ্ণং তথাগতেনাতি ৰা, আচিণ্ণং তথাগতেনাতি ৰা, অপঞ্ঞত্তং তথাগতেনাতি ৰা, পঞ্ঞত্তং তথাগতেনাতি ৰা, আপত্তীতি ৰা, অনাপত্তীতি ৰা, লহুকা আপত্তীতি ৰা, গরুকা আপত্তীতি ৰা, সাৰসেসা আপত্তীতি ৰা, অনৰসেসা আপত্তীতি ৰা, দুট্ঠুল্লা আপত্তীতি ৰা অদুট্ঠুল্লা আপত্তীতি ৰা’’. যং তত্থ ভণ্ডনং কলহো ৰিগ্গহো ৰিৰাদো নানাৰাদো অঞ্ঞথাৰাদো ৰিপচ্চতায ৰোহারো মেধকং [মেধগং (ক.)], ইদং ৰুচ্চতি ৰিৰাদাধিকরণং. ৰিৰাদাধিকরণে সঙ্ঘো ৰিৰদতি. ৰিৰাদাধিকরণং ৰিৰদমানো অনুৰদতি. অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং. তায আপত্তিযা সঙ্ঘো কম্মং করোতি কিচ্চাধিকরণং. এৰং ৰিৰাদাধিকরণপচ্চযা চত্তারো অধিকরণা জাযন্তি.

৩১৫. অনুৰাদাধিকরণং চতুন্নং অধিকরণানং কতমং অধিকরণং সমুট্ঠাপেতি? অনুৰাদাধিকরণং চতুন্নং অধিকরণানং ন কতমং অধিকরণং সমুট্ঠাপেতি; অপিচ, অনুৰাদাধিকরণপচ্চযা চত্তারো অধিকরণা জাযন্তি. যথা কথং ৰিয? [চূল়ৰ. ২১৫; পরি. ৩৪৮ আদযো] ইধ ভিক্খূ ভিক্খুং অনুৰদন্তি সীলৰিপত্তিযা ৰা আচারৰিপত্তিযা ৰা দিট্ঠিৰিপত্তিযা ৰা আজীৰৰিপত্তিযা ৰা. যো তত্থ অনুৰাদো অনুৰদনা অনুল্লপনা অনুভণনা অনুসম্পৰঙ্কতা অব্ভুস্সহনতা অনুবলপ্পদানং, ইদং ৰুচ্চতি অনুৰাদাধিকরণং. অনুৰাদাধিকরণে সঙ্ঘো ৰিৰদতি. ৰিৰাদাধিকরণং ৰিৰদমানো অনুৰদতি. অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং. তায আপত্তিযা সঙ্ঘো কম্মং করোতি কিচ্চাধিকরণং. এৰং অনুৰাদাধিকরণপচ্চযা চত্তারো অধিকরণা জাযন্তি.

৩১৬. আপত্তাধিকরণং চতুন্নং অধিকরণানং কতমং অধিকরণং সমুট্ঠাপেতি? আপত্তাধিকরণং চতুন্নং অধিকরণানং ন কতমং অধিকরণং সমুট্ঠাপেতি; অপিচ, আপত্তাধিকরণপচ্চযা চত্তারো অধিকরণা জাযন্তি. যথা কথং ৰিয? পঞ্চপি আপত্তিক্খন্ধা আপত্তাধিকরণং, সত্তপি আপত্তিক্খন্ধা আপত্তাধিকরণং, ইদং ৰুচ্চতি আপত্তাধিকরণং. আপত্তাধিকরণে সঙ্ঘো ৰিৰদতি. ৰিৰাদাধিকরণং ৰিৰদমানো অনুৰদতি. অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং. তায আপত্তিযা সঙ্ঘো কম্মং করোতি কিচ্চাধিকরণং. এৰং আপত্তাধিকরণপচ্চযা চত্তারো অধিকরণা জাযন্তি.

৩১৭. কিচ্চাধিকরণং চতুন্নং অধিকরণানং কতমং অধিকরণং সমুট্ঠাপেতি? কিচ্চাধিকরণং চতুন্নং অধিকরণানং ন কতমং অধিকরণং সমুট্ঠাপেতি, অপিচ কিচ্চাধিকরণপচ্চযা চত্তারো অধিকরণা জাযন্তি. যথা কথং ৰিয? যা সঙ্ঘস্স কিচ্চযতা করণীযতা অপলোকনকম্মং ঞত্তিকম্মং ঞত্তিদুতিযকম্মং ঞত্তিচতুত্থকম্মং, ইদং ৰুচ্চতি কিচ্চাধিকরণং. কিচ্চাধিকরণে সঙ্ঘো ৰিৰদতি. ৰিৰাদাধিকরণং ৰিৰদমানো অনুৰদতি. অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং. তায আপত্তিযা সঙ্ঘো কম্মং করোতি কিচ্চাধিকরণং. এৰং কিচ্চাধিকরণপচ্চযা চত্তারো অধিকরণা জাযন্তি.

সমুট্ঠাপনৰারো নিট্ঠিতো ৰীসতিমো.