২. কোসিযৰগ্গো

১৬৩. কোসিযমিস্সকং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

সুদ্ধকাল়কানং এল়কলোমানং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

অনাদিযিত্ৰা তুলং ওদাতানং তুলং গোচরিযানং নৰং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

অনুৰস্সং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

অনাদিযিত্ৰা পুরাণসন্থতস্স সামন্তা সুগতৰিদত্থিং নৰং নিসীদনসন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

এল়কলোমানি পটিগ্গহেত্ৰা তিযোজনং অতিক্কামেন্তো দ্ৰে আপত্তিযো আপজ্জতি. পঠমং পাদং তিযোজনং অতিক্কামেতি, আপত্তি দুক্কটস্স; দুতিযং পাদং অতিক্কামেতি, নিস্সগ্গিযং পাচিত্তিযং.

অঞ্ঞাতিকায ভিক্খুনিযা এল়কলোমানি ধোৰাপেন্তো দ্ৰে আপত্তিযো আপজ্জতি. ধোৰাপেতি, পযোগে দুক্কটং; ধোৰাপিতে নিস্সগ্গিযং পাচিত্তিযং.

রূপিযং পটিগ্গণ্হন্তো দ্ৰে আপত্তিযো আপজ্জতি. গণ্হাতি, পযোগে দুক্কটং; গহিতে নিস্সগ্গিযং পাচিত্তিযং.

নানপ্পকারকং রূপিযসংৰোহারং সমাপজ্জন্তো দ্ৰে আপত্তিযো আপজ্জতি. সমাপজ্জতি, পযোগে দুক্কটং; সমাপন্নে নিস্সগ্গিযং পাচিত্তিযং.

নানপ্পকারকং কযৰিক্কযং সমাপজ্জন্তো দ্ৰে আপত্তিযো আপজ্জতি. সমাপজ্জতি, পযোগে দুক্কটং; সমাপন্নে নিস্সগ্গিযং পাচিত্তিযং.

কোসিযৰগ্গো দুতিযো.