২. কতাপত্তিৰারো

১. পারাজিককণ্ডং

১৫৭. মেথুনং ধম্মং পটিসেৰন্তো কতি আপত্তিযো আপজ্জতি? মেথুনং ধম্মং পটিসেৰন্তো তিস্সো আপত্তিযো আপজ্জতি. অক্খাযিতে সরীরে মেথুনং ধম্মং পটিসেৰতি, আপত্তি পারাজিকস্স; যেভুয্যেন খাযিতে সরীরে মেথুনং ধম্মং পটিসেৰতি, আপত্তি থুল্লচ্চযস্স; ৰট্টকতে [ৰিৰটকতে (স্যা.)] মুখে অচ্ছুপন্তং অঙ্গজাতং পৰেসেতি, আপত্তি দুক্কটস্স – মেথুনং ধম্মং পটিসেৰন্তো ইমা তিস্সো আপত্তিযো আপজ্জতি.

১৫৮. অদিন্নং আদিযন্তো কতি আপত্তিযো আপজ্জতি? অদিন্নং আদিযন্তো তিস্সো আপত্তিযো আপজ্জতি. পঞ্চমাসকং ৰা অতিরেকপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি পারাজিকস্স; অতিরেকমাসকং ৰা ঊনপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৰা ঊনমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযন্তো ইমা তিস্সো আপত্তিযো আপজ্জতি.

১৫৯. সঞ্চিচ্চ মনুস্সৰিগ্গহং জীৰিতা ৰোরোপেন্তো কতি আপত্তিযো আপজ্জতি? সঞ্চিচ্চ মনুস্সৰিগ্গহং জীৰিতা ৰোরোপেন্তো তিস্সো আপত্তিযো আপজ্জতি. মনুস্সং ওদিস্স ওপাতং খণতি ‘‘পপতিত্ৰা মরিস্সতী’’তি, আপত্তি দুক্কটস্স; পপতিতে দুক্খা ৰেদনা উপ্পজ্জতি, আপত্তি থুল্লচ্চযস্স; মরতি, আপত্তি পারাজিকস্স – সঞ্চিচ্চ মনুস্সৰিগ্গহং জীৰিতা ৰোরোপেন্তো ইমা তিস্সো আপত্তিযো আপজ্জতি.

১৬০. অসন্তং অভূতং উত্তরিমনুস্সধম্মং উল্লপন্তো কতি আপত্তিযো আপজ্জতি? অসন্তং অভূতং উত্তরিমনুস্সধম্মং উল্লপন্তো তিস্সো আপত্তিযো আপজ্জতি. পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স; ‘‘যো তে ৰিহারে ৰসতি, সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স – অসন্তং অভূতং উত্তরিমনুস্সধম্মং উল্লপন্তো ইমা তিস্সো আপত্তিযো আপজ্জতি.

চত্তারো পারাজিকা নিট্ঠিতা.

২. সঙ্ঘাদিসেসকণ্ডং

১৬১. উপক্কমিত্ৰা অসুচিং মোচেন্তো তিস্সো আপত্তিযো আপজ্জতি. চেতেতি উপক্কমতি মুচ্চতি, আপত্তি সঙ্ঘাদিসেসস্স; চেতেতি উপক্কমতি ন মুচ্চতি, আপত্তি থুল্লচ্চযস্স; পযোগে দুক্কটং.

মাতুগামেন সদ্ধিং কাযসংসগ্গং সমাপজ্জন্তো তিস্সো আপত্তিযো আপজ্জতি. কাযেন কাযং আমসতি, আপত্তি সঙ্ঘাদিসেসস্স; কাযেন কাযপটিবদ্ধং আমসতি, আপত্তি থুল্লচ্চযস্স; কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

মাতুগামং দুট্ঠুল্লাহি ৰাচাহি ওভাসেন্তো তিস্সো আপত্তিযো আপজ্জতি. ৰচ্চমগ্গং পস্সাৰমগ্গং আদিস্স ৰণ্ণম্পি ভণতি, অৰণ্ণম্পি ভণতি, আপত্তি সঙ্ঘাদিসেসস্স; ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি, আপত্তি থুল্লচ্চযস্স; কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি, আপত্তি দুক্কটস্স.

অত্তকামপারিচরিযা ৰণ্ণং ভাসন্তো তিস্সো আপত্তিযো আপজ্জতি. মাতুগামস্স সন্তিকে অত্তকামপারিচরিযায ৰণ্ণং ভাসতি, আপত্তি সঙ্ঘাদিসেসস্স; পণ্ডকস্স সন্তিকে অত্তকামপারিচরিযায ৰণ্ণং ভাসতি, আপত্তি থুল্লচ্চযস্স; তিরচ্ছানগতস্স সন্তিকে অত্তকামপারিচরিযায ৰণ্ণং ভাসতি, আপত্তি দুক্কটস্স.

সঞ্চরিত্তং সমাপজ্জন্তো তিস্সো আপত্তিযো আপজ্জতি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স; পটিগ্গণ্হাতি ৰীমংসতি ন পচ্চাহরতি, আপত্তি থুল্লচ্চযস্স; পটিগ্গণ্হাতি ন ৰীমংসতি ন পচ্চাহরতি, আপত্তি দুক্কটস্স.

সঞ্ঞাচিকায কুটিং কারাপেন্তো তিস্সো আপত্তিযো আপজ্জতি. কারাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স.

মহল্লকং ৰিহারং কারাপেন্তো তিস্সো আপত্তিযো আপজ্জতি. কারাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স.

ভিক্খুং অমূলকেন পারাজিকেন ধম্মেন অনুদ্ধংসেন্তো তিস্সো আপত্তিযো আপজ্জতি. অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স; ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেন্তো তিস্সো আপত্তিযো আপজ্জতি. অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স; ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

সঙ্ঘভেদকো ভিক্খু যাৰততিযং সমনুভাসনায ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

ভেদকানুৰত্তকা ভিক্খূ যাৰততিযং সমনুভাসনায [সমনুভাসিযমানা (স্যা.)] ন পটিনিস্সজ্জন্তা তিস্সো আপত্তিযো আপজ্জন্তি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

দুব্বচো ভিক্খু যাৰততিযং সমনুভাসনায [সমনুভাসিযমানো (স্যা.)] ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

কুলদূসকো ভিক্খু যাৰততিযং সমনুভাসনায ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

তেরস সঙ্ঘাদিসেসা নিট্ঠিতা.

৩. নিস্সগ্গিযকণ্ডং

১. কথিনৰগ্গো

১৬২. অতিরেকচীৰরং দসাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

একরত্তং তিচীৰরেন ৰিপ্পৰসন্তো একং আপত্তিং আপজ্জতি. নিস্সগ্গিযং পাচিত্তিযং.

অকালচীৰরং পটিগ্গহেত্ৰা মাসং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

অঞ্ঞাতিকায ভিক্খুনিযা পুরাণচীৰরং ধোৰাপেন্তো দ্ৰে আপত্তিযো আপজ্জতি. ধোৰাপেতি, পযোগে দুক্কটং; ধোৰাপিতে নিস্সগ্গিযং পাচিত্তিযং.

অঞ্ঞাতিকায ভিক্খুনিযা হত্থতো চীৰরং পটিগ্গণ্হন্তো দ্ৰে আপত্তিযো আপজ্জতি. গণ্হাতি, পযোগে দুক্কটং; গহিতে নিস্সগ্গিযং পাচিত্তিযং.

অঞ্ঞাতকং গহপতিং ৰা গহপতানিং ৰা চীৰরং ৰিঞ্ঞাপেন্তো দ্ৰে আপত্তিযো আপজ্জতি. ৰিঞ্ঞাপেতি, পযোগে দুক্কটং; ৰিঞ্ঞাপিতে নিস্সগ্গিযং পাচিত্তিযং.

অঞ্ঞাতকং গহপতিং ৰা গহপতানিং ৰা ততুত্তরি চীৰরং ৰিঞ্ঞাপেন্তো দ্ৰে আপত্তিযো আপজ্জতি. ৰিঞ্ঞাপেতি, পযোগে দুক্কটং; ৰিঞ্ঞাপিতে নিস্সগ্গিযং পাচিত্তিযং.

পুব্বে অপ্পৰারিতো অঞ্ঞাতকং গহপতিকং উপসঙ্কমিত্ৰা চীৰরে ৰিকপ্পং আপজ্জন্তো দ্ৰে আপত্তিযো আপজ্জতি. ৰিকপ্পং আপজ্জতি, পযোগে দুক্কটং; ৰিকপ্পং আপন্নে নিস্সগ্গিযং পাচিত্তিযং.

পুব্বে অপ্পৰারিতো অঞ্ঞাতকে গহপতিকে উপসঙ্কমিত্ৰা চীৰরে ৰিকপ্পং আপজ্জন্তো দ্ৰে আপত্তিযো আপজ্জতি. ৰিকপ্পং আপজ্জতি, পযোগে দুক্কটং; ৰিকপ্পং আপন্নে নিস্সগ্গিযং পাচিত্তিযং.

অতিরেকতিক্খত্তুং চোদনায অতিরেকছক্খত্তুং ঠানেন চীৰরং অভিনিপ্ফাদেন্তো দ্ৰে আপত্তিযো আপজ্জতি. অভিনিপ্ফাদেতি, পযোগে দুক্কটং; অভিনিপ্ফাদিতে নিস্সগ্গিযং পাচিত্তিযং.

কথিনৰগ্গো পঠমো.

২. কোসিযৰগ্গো

১৬৩. কোসিযমিস্সকং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

সুদ্ধকাল়কানং এল়কলোমানং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

অনাদিযিত্ৰা তুলং ওদাতানং তুলং গোচরিযানং নৰং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

অনুৰস্সং সন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

অনাদিযিত্ৰা পুরাণসন্থতস্স সামন্তা সুগতৰিদত্থিং নৰং নিসীদনসন্থতং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে নিস্সগ্গিযং পাচিত্তিযং.

এল়কলোমানি পটিগ্গহেত্ৰা তিযোজনং অতিক্কামেন্তো দ্ৰে আপত্তিযো আপজ্জতি. পঠমং পাদং তিযোজনং অতিক্কামেতি, আপত্তি দুক্কটস্স; দুতিযং পাদং অতিক্কামেতি, নিস্সগ্গিযং পাচিত্তিযং.

অঞ্ঞাতিকায ভিক্খুনিযা এল়কলোমানি ধোৰাপেন্তো দ্ৰে আপত্তিযো আপজ্জতি. ধোৰাপেতি, পযোগে দুক্কটং; ধোৰাপিতে নিস্সগ্গিযং পাচিত্তিযং.

রূপিযং পটিগ্গণ্হন্তো দ্ৰে আপত্তিযো আপজ্জতি. গণ্হাতি, পযোগে দুক্কটং; গহিতে নিস্সগ্গিযং পাচিত্তিযং.

নানপ্পকারকং রূপিযসংৰোহারং সমাপজ্জন্তো দ্ৰে আপত্তিযো আপজ্জতি. সমাপজ্জতি, পযোগে দুক্কটং; সমাপন্নে নিস্সগ্গিযং পাচিত্তিযং.

নানপ্পকারকং কযৰিক্কযং সমাপজ্জন্তো দ্ৰে আপত্তিযো আপজ্জতি. সমাপজ্জতি, পযোগে দুক্কটং; সমাপন্নে নিস্সগ্গিযং পাচিত্তিযং.

কোসিযৰগ্গো দুতিযো.

৩. পত্তৰগ্গো

১৬৪. অতিরেকপত্তং দসাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

ঊনপঞ্চবন্ধনেন পত্তেন অঞ্ঞং নৰং পত্তং চেতাপেন্তো দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

ভেসজ্জানি পটিগ্গহেত্ৰা সত্তাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

অতিরেকমাসে সেসে গিম্হানে ৰস্সিকসাটিকচীৰরং পরিযেসন্তো দ্ৰে আপত্তিযো আপজ্জতি. পরিযেসতি, পযোগে দুক্কটং; পরিযিট্ঠে নিস্সগ্গিযং পাচিত্তিযং.

ভিক্খুস্স সামং চীৰরং দত্ৰা কুপিতো অনত্তমনো অচ্ছিন্দন্তো দ্ৰে আপত্তিযো আপজ্জতি. অচ্ছিন্দতি, পযোগে দুক্কটং; অচ্ছিন্নে নিস্সগ্গিযং পাচিত্তিযং.

সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেন্তো দ্ৰে আপত্তিযো আপজ্জতি. ৰাযাপেতি, পযোগে দুক্কটং; ৰাযাপিতে নিস্সগ্গিযং পাচিত্তিযং.

পুব্বে অপ্পৰারিতো অঞ্ঞাতকস্স গহপতিকস্স তন্তৰাযে উপসঙ্কমিত্ৰা চীৰরে ৰিকপ্পং আপজ্জন্তো দ্ৰে আপত্তিযো আপজ্জতি. ৰিকপ্পং আপজ্জতি, পযোগে দুক্কটং; ৰিকপ্পং আপন্নে নিস্সগ্গিযং পাচিত্তিযং.

অচ্চেকচীৰরং পটিগ্গহেত্ৰা চীৰরকালসমযং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

তিণ্ণং চীৰরানং অঞ্ঞতরং চীৰরং অন্তরঘরে নিক্খিপিত্ৰা অতিরেকছারত্তং ৰিপ্পৰসন্তো একং আপত্তিং আপজ্জতি. নিস্সগ্গিযং পাচিত্তিযং.

জানং সঙ্ঘিকং লাভং পরিণতং অত্তনো পরিণামেন্তো দ্ৰে আপত্তিযো আপজ্জতি. পরিণামেতি, পযোগে দুক্কটং; পরিণামিতে নিস্সগ্গিযং পাচিত্তিযং.

পত্তৰগ্গো ততিযো.

তিংস নিস্সগ্গিযা পাচিত্তিযা নিট্ঠিতা.

৪. পাচিত্তিযকণ্ডং

১. মুসাৰাদৰগ্গো

১৬৫. সম্পজানমুসাৰাদং ভাসন্তো কতি আপত্তিযো আপজ্জতি? সম্পজানমুসাৰাদং ভাসন্তো পঞ্চ আপত্তিযো আপজ্জতি. পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স; ভিক্খুং অমূলকেন পারাজিকেন ধম্মেন অনুদ্ধংসেতি, আপত্তি সঙ্ঘাদিসেসস্স; ‘‘যো তে ৰিহারে ৰসতি, সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স; সম্পজানমুসাৰাদে পাচিত্তিযং – সম্পজানমুসাৰাদং ভাসন্তো ইমা পঞ্চ আপত্তিযো আপজ্জতি.

ওমসন্তো দ্ৰে আপত্তিযো আপজ্জতি. উপসম্পন্নং ওমসতি, আপত্তি পাচিত্তিযস্স; অনুপসম্পন্নং ওমসতি, আপত্তি দুক্কটস্স.

পেসুঞ্ঞং উপসংহরন্তো দ্ৰে আপত্তিযো আপজ্জতি. উপসম্পন্নস্স পেসুঞ্ঞং উপসংহরতি, আপত্তি পাচিত্তিযস্স; অনুপসম্পন্নস্স পেসুঞ্ঞং উপসংহরতি, আপত্তি দুক্কটস্স.

অনুপসম্পন্নং পদসো ধম্মং ৰাচেন্তো দ্ৰে আপত্তিযো আপজ্জতি. ৰাচেতি, পযোগে দুক্কটং; পদে পদে আপত্তি পাচিত্তিযস্স.

অনুপসম্পন্নেন উত্তরিদিরত্ততিরত্তং সহসেয্যং কপ্পেন্তো দ্ৰে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

মাতুগামেন সহসেয্যং কপ্পেন্তো দ্ৰে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

মাতুগামস্স উত্তরিছপ্পঞ্চৰাচাহি ধম্মং দেসেন্তো দ্ৰে আপত্তিযো আপজ্জতি. দেসেতি, পযোগে দুক্কটং; পদে পদে আপত্তি পাচিত্তিযস্স.

অনুপসম্পন্নস্স উত্তরিমনুস্সধম্মং ভূতং আরোচেন্তো দ্ৰে আপত্তিযো আপজ্জতি. আরোচেতি, পযোগে দুক্কটং; আরোচিতে আপত্তি পাচিত্তিযস্স.

ভিক্খুস্স দুট্ঠুল্লং আপত্তিং অনুপসম্পন্নস্স আরোচেন্তো দ্ৰে আপত্তিযো আপজ্জতি. আরোচেতি, পযোগে দুক্কটং; আরোচিতে আপত্তি পাচিত্তিযস্স.

পথৰিং খণন্তো দ্ৰে আপত্তিযো আপজ্জতি. খণতি, পযোগে দুক্কটং; পহারে পহারে আপত্তি পাচিত্তিযস্স.

মুসাৰাদৰগ্গো পঠমো.

২. ভূতগামৰগ্গো

১৬৬. ভূতগামং পাতেন্তো দ্ৰে আপত্তিযো আপজ্জতি. পাতেতি, পযোগে দুক্কটং; পহারে পহারে আপত্তি পাচিত্তিযস্স.

অঞ্ঞেনঞ্ঞং পটিচরন্তো দ্ৰে আপত্তিযো আপজ্জতি. অনারোপিতে অঞ্ঞৰাদকে অঞ্ঞেনঞ্ঞং পটিচরতি, আপত্তি দুক্কটস্স; আরোপিতে অঞ্ঞৰাদকে অঞ্ঞেনঞ্ঞং পটিচরতি, আপত্তি পাচিত্তিযস্স.

ভিক্খুং উজ্ঝাপেন্তো দ্ৰে আপত্তিযো আপজ্জতি. উজ্ঝাপেতি, পযোগে দুক্কটং; উজ্ঝাপিতে আপত্তি পাচিত্তিযস্স.

সঙ্ঘিকং মঞ্চং ৰা পীঠং ৰা ভিসিং ৰা কোচ্ছং ৰা অজ্ঝোকাসে সন্থরিত্ৰা অনুদ্ধরিত্ৰা অনাপুচ্ছা পক্কমন্তো দ্ৰে আপত্তিযো আপজ্জতি. পঠমং পাদং লেড্ডুপাতং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

সঙ্ঘিকে ৰিহারে সেয্যং সন্থরিত্ৰা অনুদ্ধরিত্ৰা অনাপুচ্ছা পক্কমন্তো দ্ৰে আপত্তিযো আপজ্জতি. পঠমং পাদং পরিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

সঙ্ঘিকে ৰিহারে জানং পুব্বুপগতং ভিক্খুং অনুপখজ্জ সেয্যং কপ্পেন্তো দ্ৰে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

ভিক্খুং কুপিতো অনত্তমনো সঙ্ঘিকা ৰিহারা নিক্কড্ঢেন্তো দ্ৰে আপত্তিযো আপজ্জতি. নিক্কড্ঢতি, পযোগে দুক্কটং; নিক্কড্ঢিতে আপত্তি পাচিত্তিযস্স.

সঙ্ঘিকে ৰিহারে উপরিৰেহাসকুটিযা আহচ্চপাদকং মঞ্চং ৰা পীঠং ৰা অভিনিসীদন্তো দ্ৰে আপত্তিযো আপজ্জতি. অভিনিসীদতি, পযোগে দুক্কটং; অভিনিসিন্নে আপত্তি পাচিত্তিযস্স.

দ্ৰত্তিপরিযাযে অধিট্ঠহিত্ৰা ততুত্তরি অধিট্ঠহন্তো দ্ৰে আপত্তিযো আপজ্জতি. অধিট্ঠেতি, পযোগে দুক্কটং; অধিট্ঠিতে আপত্তি পাচিত্তিযস্স.

জানং সপ্পাণকং উদকং তিণং ৰা মত্তিকং ৰা সিঞ্চন্তো দ্ৰে আপত্তিযো আপজ্জতি. সিঞ্চতি, পযোগে দুক্কটং; সিঞ্চিতে আপত্তি পাচিত্তিযস্স.

ভূতগামৰগ্গো দুতিযো.

৩. ওৰাদৰগ্গো

১৬৭. অসম্মতো ভিক্খুনিযো ওৰদন্তো দ্ৰে আপত্তিযো আপজ্জতি. ওৰদতি, পযোগে দুক্কটং; ওৰদিতে আপত্তি পাচিত্তিযস্স.

অত্থঙ্গতে সূরিযে ভিক্খুনিযো ওৰদন্তো দ্ৰে আপত্তিযো আপজ্জতি. ওৰদতি, পযোগে দুক্কটং; ওৰদিতে আপত্তি পাচিত্তিযস্স.

ভিক্খুনুপস্সযং উপসঙ্কমিত্ৰা ভিক্খুনিযো ওৰদন্তো দ্ৰে আপত্তিযো আপজ্জতি. ওৰদতি, পযোগে দুক্কটং; ওৰদিতে আপত্তি পাচিত্তিযস্স.

‘‘আমিসহেতু ভিক্খূ ভিক্খুনিযো ওৰদন্তী’’তি ভণন্তো দ্ৰে আপত্তিযো আপজ্জতি. ভণতি, পযোগে দুক্কটং; ভণিতে আপত্তি পাচিত্তিযস্স.

অঞ্ঞাতিকায ভিক্খুনিযা চীৰরং দেন্তো দ্ৰে আপত্তিযো আপজ্জতি. দেতি, পযোগে দুক্কটং; দিন্নে আপত্তি পাচিত্তিযস্স.

অঞ্ঞাতিকা ভিক্খুনিযা চীৰরং সিব্বেন্তো দ্ৰে আপত্তিযো আপজ্জতি. সিব্বেতি, পযোগে দুক্কটং; আরাপথে আরাপথে আপত্তি পাচিত্তিযস্স.

ভিক্খুনিযা সদ্ধিং সংৰিধায একদ্ধানমগ্গং পটিপজ্জন্তো দ্ৰে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স.

ভিক্খুনিযা সদ্ধিং সংৰিধায একং নাৰং অভিরুহন্তো দ্ৰে আপত্তিযো আপজ্জতি. অভিরুহতি, পযোগে দুক্কটং; অভিরুল়্হে আপত্তি পাচিত্তিযস্স.

জানং ভিক্খুনিপরিপাচিতং পিণ্ডপাতং ভুঞ্জন্তো দ্ৰে আপত্তিযো আপজ্জতি. ‘‘ভুঞ্জিস্সামী’’তি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

ভিক্খুনিযা সদ্ধিং একো একায রহো নিসজ্জং কপ্পেন্তো দ্ৰে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

ওৰাদৰগ্গো ততিযো.

৪. ভোজনৰগ্গো

১৬৮. ততুত্তরি আৰসথপিণ্ডং ভুঞ্জন্তো দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

গণভোজনং ভুঞ্জন্তো দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

পরম্পরভোজনং ভুঞ্জন্তো দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

দ্ৰত্তিপত্তপূরে পূৰে পটিগ্গহেত্ৰা ততুত্তরি পটিগ্গণ্হন্তো দ্ৰে আপত্তিযো আপজ্জতি. গণ্হাতি, পযোগে দুক্কটং; গহিতে আপত্তি পাচিত্তিযস্স.

ভুত্তাৰী পৰারিতো অনতিরিত্তং খাদনীযং ৰা ভোজনীযং ৰা ভুঞ্জন্তো দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

ভিক্খুং ভুত্তাৰিং পৰারিতং অনতিরিত্তেন খাদনীযেন ৰা ভোজনীযেন ৰা অভিহট্ঠুং পৰারেন্তো দ্ৰে আপত্তিযো আপজ্জতি. তস্স ৰচনেন খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; ভোজনপরিযোসানে আপত্তি পাচিত্তিযস্স.

ৰিকালে খাদনীযং ৰা ভোজনীযং ৰা ভুঞ্জন্তো দ্ৰে আপত্তিযো আপজ্জতি. খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

সন্নিধিকারকং খাদনীযং ৰা ভোজনীযং ৰা ভুঞ্জন্তো দ্ৰে আপত্তিযো আপজ্জতি. খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

পণীতভোজনানি অত্তনো অত্থায ৰিঞ্ঞাপেত্ৰা ভুঞ্জন্তো দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

অদিন্নং মুখদ্ৰারং আহারং আহরন্তো দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

ভোজনৰগ্গো চতুত্থো.

৫. অচেলকৰগ্গো

১৬৯. অচেলকস্স, ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দেন্তো দ্ৰে আপত্তিযো আপজ্জতি. দেতি, পযোগে দুক্কটং; দিন্নে আপত্তি পাচিত্তিযস্স.

ভিক্খুং – ‘‘এহাৰুসো, গামং ৰা নিগমং ৰা পিণ্ডায পৰিসিস্সামা’’তি তস্স দাপেত্ৰা ৰা অদাপেত্ৰা ৰা উয্যোজেন্তো দ্ৰে আপত্তিযো আপজ্জতি. উয্যোজেতি, পযোগে দুক্কটং; উয্যোজিতে আপত্তি পাচিত্তিযস্স.

সভোজনে কুলে অনুপখজ্জ নিসজ্জং কপ্পেন্তো দ্ৰে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

মাতুগামেন সদ্ধিং রহো পটিচ্ছন্নে আসনে নিসজ্জং কপ্পেন্তো দ্ৰে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

মাতুগামেন সদ্ধিং একো একায রহো নিসজ্জং কপ্পেন্তো দ্ৰে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

নিমন্তিতো সভত্তো সমানো পুরেভত্তং পচ্ছাভত্তং কুলেসু চারিত্তং আপজ্জন্তো দ্ৰে আপত্তিযো আপজ্জতি. পঠমং পাদং উম্মারং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

ততুত্তরি ভেসজ্জং ৰিঞ্ঞাপেন্তো দ্ৰে আপত্তিযো আপজ্জতি. ৰিঞ্ঞাপেতি, পযোগে দুক্কটং; ৰিঞ্ঞাপিতে আপত্তি পাচিত্তিযস্স.

উয্যুত্তং সেনং দস্সনায গচ্ছন্তো দ্ৰে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতো পস্সতি, আপত্তি পাচিত্তিযস্স.

অতিরেকতিরত্তং সেনায ৰসন্তো দ্ৰে আপত্তিযো আপজ্জতি. ৰসতি, পযোগে দুক্কটং; ৰসিতে আপত্তি পাচিত্তিযস্স.

উয্যোধিকং গচ্ছন্তো দ্ৰে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতো পস্সতি, আপত্তি পাচিত্তিযস্স.

অচেলকৰগ্গো পঞ্চমো.

৬. সুরামেরযৰগ্গো

১৭০. মজ্জং পিৰন্তো দ্ৰে আপত্তিযো আপজ্জতি. ‘‘পিৰিস্সামী’’তি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

ভিক্খুং অঙ্গুলিপতোদকেন হাসেন্তো দ্ৰে আপত্তিযো আপজ্জতি. হাসেতি, পযোগে দুক্কটং; হসিতে আপত্তি পাচিত্তিযস্স.

উদকে কীল়ন্তো দ্ৰে আপত্তিযো আপজ্জতি. হেট্ঠাগোপ্ফকে উদকে কীল়তি, আপত্তি দুক্কটস্স; উপরিগোপ্ফকে কীল়তি, আপত্তি পাচিত্তিযস্স.

অনাদরিযং করোন্তো দ্ৰে আপত্তিযো আপজ্জতি. করোতি, পযোগে দুক্কটং; কতে আপত্তি পাচিত্তিযস্স.

ভিক্খুং ভিংসাপেন্তো দ্ৰে আপত্তিযো আপজ্জতি. ভিংসাপেতি, পযোগে দুক্কটং; ভিংসাপিতে আপত্তি পাচিত্তিযস্স.

জোতিং সমাদহিত্ৰা ৰিসিব্বেন্তো দ্ৰে আপত্তিযো আপজ্জতি. সমাদহতি, পযোগে দুক্কটং; সমাদহিতে আপত্তি পাচিত্তিযস্স.

ওরেনদ্ধমাসং নহাযন্তো দ্ৰে আপত্তিযো আপজ্জতি. নহাযতি, পযোগে দুক্কটং; নহানপরিযোসানে আপত্তি পাচিত্তিযস্স.

অনাদিযিত্ৰা তিণ্ণং দুব্বণ্ণকরণানং অঞ্ঞতরং দুব্বণ্ণকরণং নৰং চীৰরং পরিভুঞ্জন্তো দ্ৰে আপত্তিযো আপজ্জতি. পরিভুঞ্জতি, পযোগে দুক্কটং; পরিভুত্তে আপত্তি পাচিত্তিযস্স.

ভিক্খুস্স ৰা ভিক্খুনিযা ৰা সিক্খমানায ৰা সামণেরস্স ৰা সামণেরিযা ৰা সামং চীৰরং ৰিকপ্পেত্ৰা অপ্পচ্চুদ্ধারণং পরিভুঞ্জন্তো দ্ৰে আপত্তিযো আপজ্জতি. পরিভুঞ্জতি, পযোগে দুক্কটং; পরিভুত্তে আপত্তি পাচিত্তিযস্স.

ভিক্খুস্স পত্তং ৰা চীৰরং ৰা নিসীদনং ৰা সূচিঘরং ৰা কাযবন্ধনং ৰা অপনিধেন্তো দ্ৰে আপত্তিযো আপজ্জতি. অপনিধেতি, পযোগে দুক্কটং; অপনিধিতে আপত্তি পাচিত্তিযস্স.

সুরামেরযৰগ্গো ছট্ঠো.

৭. সপ্পাণকৰগ্গো

১৭১. সঞ্চিচ্চ পাণং জীৰিতা ৰোরোপেন্তো কতি আপত্তিযো আপজ্জতি? সঞ্চিচ্চ পাণং জীৰিতা ৰোরোপেন্তো চতস্সো আপত্তিযো আপজ্জতি. অনোদিস্স ওপাতং খণতি – ‘‘যো কোচি পপতিত্ৰা মরিস্সতী’’তি, আপত্তি দুক্কটস্স; মনুস্সো তস্মিং পপতিত্ৰা মরতি, আপত্তি পারাজিকস্স; যক্খো ৰা পেতো ৰা তিরচ্ছানগতমনুস্সৰিগ্গহো ৰা তস্মিং পপতিত্ৰা মরতি, আপত্তি থুল্লচ্চযস্স; তিরচ্ছানগতো তস্মিং পপতিত্ৰা মরতি, আপত্তি পাচিত্তিযস্স – সঞ্চিচ্চ পাণং জীৰিতা ৰোরোপেন্তো ইমা চতস্সো আপত্তিযো আপজ্জতি.

জানং সপ্পাণকং উদকং পরিভুঞ্জন্তো দ্ৰে আপত্তিযো আপজ্জতি. পরিভুঞ্জতি, পযোগে দুক্কটং; পরিভুত্তে আপত্তি পাচিত্তিযস্স.

জানং যথাধম্মং নিহতাধিকরণং পুনকম্মায উক্কোটেন্তো দ্ৰে আপত্তিযো আপজ্জতি. উক্কোটেতি, পযোগে দুক্কটং; উক্কোটিতে আপত্তি পাচিত্তিযস্স.

ভিক্খুস্স জানং দুট্ঠুল্লং আপত্তিং পটিচ্ছাদেন্তো একং আপত্তিং আপজ্জতি. পাচিত্তিযং.

জানং ঊনৰীসতিৰস্সং পুগ্গলং উপসম্পাদেন্তো দ্ৰে আপত্তিযো আপজ্জতি. উপসম্পাদেতি, পযোগে দুক্কটং; উপসম্পাদিতে আপত্তি পাচিত্তিযস্স.

জানং থেয্যসত্থেন সদ্ধিং সংৰিধায একদ্ধানমগ্গং পটিপজ্জন্তো দ্ৰে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স.

মাতুগামেন সদ্ধিং সংৰিধায একদ্ধানমগ্গং পটিপজ্জন্তো দ্ৰে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স.

পাপিকায দিট্ঠিযা যাৰততিযং সমনুভাসনায ন পটিনিস্সজ্জন্তো দ্ৰে আপত্তিযো আপজ্জতি. ঞত্তিযা দুক্কটং; কম্মৰাচাপরিযোসানে আপত্তি পাচিত্তিযস্স.

জানং তথাৰাদিনা ভিক্খুনা অকটানুধম্মেন তং দিট্ঠিং অপ্পটিনিস্সট্ঠেন সদ্ধিং সম্ভুঞ্জন্তো দ্ৰে আপত্তিযো আপজ্জতি. সম্ভুঞ্জতি, পযোগে দুক্কটং; সম্ভুত্তে আপত্তি পাচিত্তিযস্স.

জানং তথানাসিতং সমণুদ্দেসং উপলাপেন্তো দ্ৰে আপত্তিযো আপজ্জতি. উপলাপেতি, পযোগে দুক্কটং; উপলাপিতে আপত্তি পাচিত্তিযস্স.

সপ্পাণকৰগ্গো সত্তমো.

৮. সহধম্মিকৰগ্গো

১৭২. ভিক্খূহি সহধম্মিকং ৰুচ্চমানো – ‘‘ন তাৰাহং, আৰুসো, এতস্মিং সিক্খাপদে সিক্খিস্সামি যাৰ ন অঞ্ঞং ভিক্খুং ব্যত্তং ৰিনযধরং পরিপুচ্ছিস্সামী’’তি ভণন্তো দ্ৰে আপত্তিযো আপজ্জতি. ভণতি, পযোগে দুক্কটং; ভণিতে আপত্তি পাচিত্তিযস্স.

ৰিনযং ৰিৰণ্ণেন্তো দ্ৰে আপত্তিযো আপজ্জতি. ৰিৰণ্ণেতি, পযোগে দুক্কটং; ৰিৰণ্ণিতে আপত্তি পাচিত্তিযস্স.

মোহেন্তো দ্ৰে আপত্তিযো আপজ্জতি. অনারোপিতে মোহে মোহেতি, আপত্তি দুক্কটস্স; আরোপিতে মোহে মোহেতি, আপত্তি পাচিত্তিযস্স.

ভিক্খুস্স কুপিতো অনত্তমনো পহারং দেন্তো দ্ৰে আপত্তিযো আপজ্জতি. পহরতি, পযোগে দুক্কটং; পহতে আপত্তি পাচিত্তিযস্স.