৩. পত্তৰগ্গো

১৬৪. অতিরেকপত্তং দসাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

ঊনপঞ্চবন্ধনেন পত্তেন অঞ্ঞং নৰং পত্তং চেতাপেন্তো দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

ভেসজ্জানি পটিগ্গহেত্ৰা সত্তাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

অতিরেকমাসে সেসে গিম্হানে ৰস্সিকসাটিকচীৰরং পরিযেসন্তো দ্ৰে আপত্তিযো আপজ্জতি. পরিযেসতি, পযোগে দুক্কটং; পরিযিট্ঠে নিস্সগ্গিযং পাচিত্তিযং.

ভিক্খুস্স সামং চীৰরং দত্ৰা কুপিতো অনত্তমনো অচ্ছিন্দন্তো দ্ৰে আপত্তিযো আপজ্জতি. অচ্ছিন্দতি, পযোগে দুক্কটং; অচ্ছিন্নে নিস্সগ্গিযং পাচিত্তিযং.

সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেন্তো দ্ৰে আপত্তিযো আপজ্জতি. ৰাযাপেতি, পযোগে দুক্কটং; ৰাযাপিতে নিস্সগ্গিযং পাচিত্তিযং.

পুব্বে অপ্পৰারিতো অঞ্ঞাতকস্স গহপতিকস্স তন্তৰাযে উপসঙ্কমিত্ৰা চীৰরে ৰিকপ্পং আপজ্জন্তো দ্ৰে আপত্তিযো আপজ্জতি. ৰিকপ্পং আপজ্জতি, পযোগে দুক্কটং; ৰিকপ্পং আপন্নে নিস্সগ্গিযং পাচিত্তিযং.

অচ্চেকচীৰরং পটিগ্গহেত্ৰা চীৰরকালসমযং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

তিণ্ণং চীৰরানং অঞ্ঞতরং চীৰরং অন্তরঘরে নিক্খিপিত্ৰা অতিরেকছারত্তং ৰিপ্পৰসন্তো একং আপত্তিং আপজ্জতি. নিস্সগ্গিযং পাচিত্তিযং.

জানং সঙ্ঘিকং লাভং পরিণতং অত্তনো পরিণামেন্তো দ্ৰে আপত্তিযো আপজ্জতি. পরিণামেতি, পযোগে দুক্কটং; পরিণামিতে নিস্সগ্গিযং পাচিত্তিযং.

পত্তৰগ্গো ততিযো.

তিংস নিস্সগ্গিযা পাচিত্তিযা নিট্ঠিতা.