৮. সহধম্মিকৰগ্গো

১৭২. ভিক্খূহি সহধম্মিকং ৰুচ্চমানো – ‘‘ন তাৰাহং, আৰুসো, এতস্মিং সিক্খাপদে সিক্খিস্সামি যাৰ ন অঞ্ঞং ভিক্খুং ব্যত্তং ৰিনযধরং পরিপুচ্ছিস্সামী’’তি ভণন্তো দ্ৰে আপত্তিযো আপজ্জতি. ভণতি, পযোগে দুক্কটং; ভণিতে আপত্তি পাচিত্তিযস্স.

ৰিনযং ৰিৰণ্ণেন্তো দ্ৰে আপত্তিযো আপজ্জতি. ৰিৰণ্ণেতি, পযোগে দুক্কটং; ৰিৰণ্ণিতে আপত্তি পাচিত্তিযস্স.

মোহেন্তো দ্ৰে আপত্তিযো আপজ্জতি. অনারোপিতে মোহে মোহেতি, আপত্তি দুক্কটস্স; আরোপিতে মোহে মোহেতি, আপত্তি পাচিত্তিযস্স.

ভিক্খুস্স কুপিতো অনত্তমনো পহারং দেন্তো দ্ৰে আপত্তিযো আপজ্জতি. পহরতি, পযোগে দুক্কটং; পহতে আপত্তি পাচিত্তিযস্স.

ভিক্খুস্স কুপিতো অনত্তমনো তলসত্তিকং উগ্গিরন্তো দ্ৰে আপত্তিযো আপজ্জতি. উগ্গিরতি, পযোগে দুক্কটং; উগ্গিরিতে আপত্তি পাচিত্তিযস্স.

ভিক্খুং অমূলকেন সঙ্ঘাদিসেসেন অনুদ্ধংসেন্তো দ্ৰে আপত্তিযো আপজ্জতি. অনুদ্ধংসেতি, পযোগে দুক্কটং; অনুদ্ধংসিতে আপত্তি পাচিত্তিযস্স.

ভিক্খুস্স সঞ্চিচ্চ কুক্কুচ্চং উপদহন্তো দ্ৰে আপত্তিযো আপজ্জতি. উপদহতি, পযোগে দুক্কটং; উপদহিতে আপত্তি পাচিত্তিযস্স.

ভিক্খূনং ভণ্ডনজাতানং কলহজাতানং ৰিৰাদাপন্নানং উপস্সুতিং তিট্ঠন্তো দ্ৰে আপত্তিযো আপজ্জতি. ‘‘সোস্সামী’’তি গচ্ছতি, আপত্তি দুক্কটস্স; যত্থ ঠিতো সুণাতি, আপত্তি পাচিত্তিযস্স.

ধম্মিকানং কম্মানং ছন্দং দত্ৰা পচ্ছা খীযনধম্মং আপজ্জন্তো দ্ৰে আপত্তিযো আপজ্জতি. খিয্যতি, পযোগে দুক্কটং; খিয্যিতে আপত্তি পাচিত্তিযস্স.

সঙ্ঘে ৰিনিচ্ছযকথায ৰত্তমানায ছন্দং অদত্ৰা উট্ঠাযাসনা পক্কমন্তো দ্ৰে আপত্তিযো আপজ্জতি. পরিসায হত্থপাসং ৰিজহন্তস্স আপত্তি দুক্কটস্স; ৰিজহিতে আপত্তি পাচিত্তিযস্স.

সমগ্গেন সঙ্ঘেন চীৰরং দত্ৰা পচ্ছা খীযনধম্মং আপজ্জন্তো দ্ৰে আপত্তিযো আপজ্জতি. খিয্যতি, পযোগে দুক্কটং; খিয্যিতে আপত্তি পাচিত্তিযস্স.

জানং সঙ্ঘিকং লাভং পরিণতং পুগ্গলস্স পরিণামেন্তো দ্ৰে আপত্তিযো আপজ্জতি. পরিণামেতি, পযোগে দুক্কটং; পরিণামিতে আপত্তি পাচিত্তিযস্স.

সহধম্মিকৰগ্গো অট্ঠমো.