৯. রাজৰগ্গো

১৭৩. পুব্বে অপ্পটিসংৰিদিতো রঞ্ঞো অন্তেপুরং পৰিসন্তো দ্ৰে আপত্তিযো আপজ্জতি. পঠমং পাদং উম্মারং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

রতনং উগ্গণ্হন্তো দ্ৰে আপত্তিযো আপজ্জতি. গণ্হাতি, পযোগে দুক্কটং; গহিতে আপত্তি পাচিত্তিযস্স.

সন্তং ভিক্খুং অনাপুচ্ছা ৰিকালে গামং পৰিসন্তো দ্ৰে আপত্তিযো আপজ্জতি. পঠমং পাদং পরিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

অট্ঠিমযং ৰা দন্তমযং ৰা ৰিসাণমযং ৰা সূচিঘরং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে আপত্তি পাচিত্তিযস্স.

পমাণাতিক্কন্তং মঞ্চং ৰা পীঠং ৰা কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে আপত্তি পাচিত্তিযস্স.

মঞ্চং ৰা পীঠং ৰা তূলোনদ্ধং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে আপত্তি পাচিত্তিযস্স.

পমাণাতিক্কন্তং নিসীদনং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে আপত্তি পাচিত্তিযস্স.

পমাণাতিক্কন্তং কণ্ডুপ্পটিচ্ছাদিং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে আপত্তি পাচিত্তিযস্স.

পমাণাতিক্কন্তং ৰস্সিকসাটিকং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে আপত্তি পাচিত্তিযস্স.

চীৰরং কারাপেন্তো কতি আপত্তিযো আপজ্জতি? সুগতচীৰরপ্পমাণং চীৰরং কারাপেন্তো দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে আপত্তি পাচিত্তিযস্স – সুগতচীৰরপ্পমাণং চীৰরং কারাপেন্তো ইমা দ্ৰে আপত্তিযো আপজ্জতি.

রাজৰগ্গো নৰমো. খুদ্দকা নিট্ঠিতা.