১. পারাজিককণ্ডং

১৫৭. মেথুনং ধম্মং পটিসেৰন্তো কতি আপত্তিযো আপজ্জতি? মেথুনং ধম্মং পটিসেৰন্তো তিস্সো আপত্তিযো আপজ্জতি. অক্খাযিতে সরীরে মেথুনং ধম্মং পটিসেৰতি, আপত্তি পারাজিকস্স; যেভুয্যেন খাযিতে সরীরে মেথুনং ধম্মং পটিসেৰতি, আপত্তি থুল্লচ্চযস্স; ৰট্টকতে [ৰিৰটকতে (স্যা.)] মুখে অচ্ছুপন্তং অঙ্গজাতং পৰেসেতি, আপত্তি দুক্কটস্স – মেথুনং ধম্মং পটিসেৰন্তো ইমা তিস্সো আপত্তিযো আপজ্জতি.

১৫৮. অদিন্নং আদিযন্তো কতি আপত্তিযো আপজ্জতি? অদিন্নং আদিযন্তো তিস্সো আপত্তিযো আপজ্জতি. পঞ্চমাসকং ৰা অতিরেকপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি পারাজিকস্স; অতিরেকমাসকং ৰা ঊনপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৰা ঊনমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযন্তো ইমা তিস্সো আপত্তিযো আপজ্জতি.

১৫৯. সঞ্চিচ্চ মনুস্সৰিগ্গহং জীৰিতা ৰোরোপেন্তো কতি আপত্তিযো আপজ্জতি? সঞ্চিচ্চ মনুস্সৰিগ্গহং জীৰিতা ৰোরোপেন্তো তিস্সো আপত্তিযো আপজ্জতি. মনুস্সং ওদিস্স ওপাতং খণতি ‘‘পপতিত্ৰা মরিস্সতী’’তি, আপত্তি দুক্কটস্স; পপতিতে দুক্খা ৰেদনা উপ্পজ্জতি, আপত্তি থুল্লচ্চযস্স; মরতি, আপত্তি পারাজিকস্স – সঞ্চিচ্চ মনুস্সৰিগ্গহং জীৰিতা ৰোরোপেন্তো ইমা তিস্সো আপত্তিযো আপজ্জতি.

১৬০. অসন্তং অভূতং উত্তরিমনুস্সধম্মং উল্লপন্তো কতি আপত্তিযো আপজ্জতি? অসন্তং অভূতং উত্তরিমনুস্সধম্মং উল্লপন্তো তিস্সো আপত্তিযো আপজ্জতি. পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স; ‘‘যো তে ৰিহারে ৰসতি, সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স – অসন্তং অভূতং উত্তরিমনুস্সধম্মং উল্লপন্তো ইমা তিস্সো আপত্তিযো আপজ্জতি.

চত্তারো পারাজিকা নিট্ঠিতা.