২. সঙ্ঘাদিসেসকণ্ডং

১৬১. উপক্কমিত্ৰা অসুচিং মোচেন্তো তিস্সো আপত্তিযো আপজ্জতি. চেতেতি উপক্কমতি মুচ্চতি, আপত্তি সঙ্ঘাদিসেসস্স; চেতেতি উপক্কমতি ন মুচ্চতি, আপত্তি থুল্লচ্চযস্স; পযোগে দুক্কটং.

মাতুগামেন সদ্ধিং কাযসংসগ্গং সমাপজ্জন্তো তিস্সো আপত্তিযো আপজ্জতি. কাযেন কাযং আমসতি, আপত্তি সঙ্ঘাদিসেসস্স; কাযেন কাযপটিবদ্ধং আমসতি, আপত্তি থুল্লচ্চযস্স; কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

মাতুগামং দুট্ঠুল্লাহি ৰাচাহি ওভাসেন্তো তিস্সো আপত্তিযো আপজ্জতি. ৰচ্চমগ্গং পস্সাৰমগ্গং আদিস্স ৰণ্ণম্পি ভণতি, অৰণ্ণম্পি ভণতি, আপত্তি সঙ্ঘাদিসেসস্স; ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি, আপত্তি থুল্লচ্চযস্স; কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি, আপত্তি দুক্কটস্স.

অত্তকামপারিচরিযা ৰণ্ণং ভাসন্তো তিস্সো আপত্তিযো আপজ্জতি. মাতুগামস্স সন্তিকে অত্তকামপারিচরিযায ৰণ্ণং ভাসতি, আপত্তি সঙ্ঘাদিসেসস্স; পণ্ডকস্স সন্তিকে অত্তকামপারিচরিযায ৰণ্ণং ভাসতি, আপত্তি থুল্লচ্চযস্স; তিরচ্ছানগতস্স সন্তিকে অত্তকামপারিচরিযায ৰণ্ণং ভাসতি, আপত্তি দুক্কটস্স.

সঞ্চরিত্তং সমাপজ্জন্তো তিস্সো আপত্তিযো আপজ্জতি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স; পটিগ্গণ্হাতি ৰীমংসতি ন পচ্চাহরতি, আপত্তি থুল্লচ্চযস্স; পটিগ্গণ্হাতি ন ৰীমংসতি ন পচ্চাহরতি, আপত্তি দুক্কটস্স.

সঞ্ঞাচিকায কুটিং কারাপেন্তো তিস্সো আপত্তিযো আপজ্জতি. কারাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স.

মহল্লকং ৰিহারং কারাপেন্তো তিস্সো আপত্তিযো আপজ্জতি. কারাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স.

ভিক্খুং অমূলকেন পারাজিকেন ধম্মেন অনুদ্ধংসেন্তো তিস্সো আপত্তিযো আপজ্জতি. অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স; ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেন্তো তিস্সো আপত্তিযো আপজ্জতি. অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স; ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

সঙ্ঘভেদকো ভিক্খু যাৰততিযং সমনুভাসনায ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

ভেদকানুৰত্তকা ভিক্খূ যাৰততিযং সমনুভাসনায [সমনুভাসিযমানা (স্যা.)] ন পটিনিস্সজ্জন্তা তিস্সো আপত্তিযো আপজ্জন্তি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

দুব্বচো ভিক্খু যাৰততিযং সমনুভাসনায [সমনুভাসিযমানো (স্যা.)] ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

কুলদূসকো ভিক্খু যাৰততিযং সমনুভাসনায ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

তেরস সঙ্ঘাদিসেসা নিট্ঠিতা.