১০. পরিণতসিক্খাপদং

৬৫৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সাৰত্থিযং অঞ্ঞতরস্স পূগস্স সঙ্ঘস্স সচীৰরভত্তং পটিযত্তং হোতি – ‘‘ভোজেত্ৰা চীৰরেন অচ্ছাদেস্সামা’’তি. অথ খো ছব্বগ্গিযা ভিক্খূ যেন সো পূগো তেনুপসঙ্কমিংসু; উপসঙ্কমিত্ৰা তং পূগং এতদৰোচুং – ‘‘দেথাৰুসো, অম্হাকং ইমানি চীৰরানী’’তি. ‘‘ন মযং, ভন্তে, দস্সাম. অম্হাকং সঙ্ঘস্স অনুৰস্সং সচীৰরভিক্খা পঞ্ঞত্তা’’তি. ‘‘বহূ, আৰুসো, সঙ্ঘস্স দাযকা, বহূ সঙ্ঘস্স ভত্তা [ভদ্দা (ক.)]. মযং তুম্হে নিস্সায তুম্হে সম্পস্সন্তা ইধ ৰিহরাম. তুম্হে চে অম্হাকং ন দস্সথ, অথ কো চরহি অম্হাকং দস্সতি? দেথাৰুসো, অম্হাকং ইমানি চীৰরানী’’তি. অথ খো সো পূগো ছব্বগ্গিযেহি ভিক্খূহি নিপ্পীল়িযমানো যথাপটিযত্তং চীৰরং ছব্বগ্গিযানং ভিক্খূনং দত্ৰা সঙ্ঘং ভত্তেন পরিৰিসি. যে তে ভিক্খূ জানন্তি সঙ্ঘস্স সচীৰরভত্তং পটিযত্তং, ন চ জানন্তি ছব্বগ্গিযানং ভিক্খূনং দিন্নন্তি, তে এৰমাহংসু – ‘‘ওণোজেথাৰুসো, সঙ্ঘস্স চীৰর’’ন্তি. ‘‘নত্থি, ভন্তে. যথাপটিযত্তং চীৰরং অয্যা ছব্বগ্গিযা অত্তনো পরিণামেসু’’ন্তি. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ জানং সঙ্ঘিকং লাভং পরিণতং অত্তনো পরিণামেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, জানং সঙ্ঘিকং লাভং পরিণতং অত্তনো পরিণামেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, জানং সঙ্ঘিকং লাভং পরিণতং অত্তনো পরিণামেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৬৫৮. ‘‘যো পন ভিক্খু জানং সঙ্ঘিকং লাভং পরিণতং অত্তনো পরিণামেয্য, নিস্সগ্গিযং পাচিত্তিয’’ন্তি.

৬৫৯. যো পনাতি যো যাদিসো…পে… ভিক্খূতি…পে… অয ইমস্মিং অত্থে অধিপ্পেতো ভিক্খূতি.

[পাচি. ৪৯১] জানাতি নাম সামং ৰা জানাতি অঞ্ঞে ৰা তস্স আরোচেন্তি সো ৰা আরোচেতি.

[পাচি. ৪৯১] সঙ্ঘিকং নাম সঙ্ঘস্স দিন্নং হোতি পরিচ্চত্তং.

[পাচি. ৪৯১] লাভো নাম চীৰরপিণ্ডপাতসেনাসনগিলানপ্পচ্চযভেসজ্জপরিক্খারা. অন্তমসো চুণ্ণপিণ্ডোপি, দন্তকট্ঠম্পি, দসিকসুত্তম্পি.

[পাচি. ৪৯১] পরিণতং নাম দস্সাম করিস্সামাতি ৰাচা ভিন্না হোতি.

অত্তনো পরিণামেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, জানং সঙ্ঘিকং লাভং পরিণতং অত্তনো পরিণামিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৬০. পরিণতে পরিণতসঞ্ঞী অত্তনো পরিণামেতি, নিস্সগ্গিযং পাচিত্তিযং.

পরিণতে ৰেমতিকো অত্তনো পরিণামেতি, আপত্তি দুক্কটস্স. পরিণতে অপরিণতসঞ্ঞী অত্তনো পরিণামেতি, অনাপত্তি. সঙ্ঘস্স পরিণতং অঞ্ঞসঙ্ঘস্স ৰা চেতিযস্স ৰা পরিণামেতি, আপত্তি দুক্কটস্স. চেতিযস্স পরিণতং অঞ্ঞচেতিযস্স ৰা সঙ্ঘস্স ৰা পুগ্গলস্স ৰা পরিণামেতি, আপত্তি দুক্কটস্স. পুগ্গলস্স পরিণতং অঞ্ঞপুগ্গলস্স ৰা সঙ্ঘস্স ৰা চেতিযস্স ৰা পরিণামেতি, আপত্তি দুক্কটস্স. অপরিণতে পরিণতসঞ্ঞী, আপত্তি দুক্কটস্স. অপরিণতে ৰেমতিকো, আপত্তি দুক্কটস্স. অপরিণতে অপরিণতসঞ্ঞী, অনাপত্তি.

৬৬১. অনাপত্তি কত্থ দেমাতি পুচ্ছিযমানো যত্থ তুম্হাকং দেয্যধম্মো পরিভোগং ৰা লভেয্য পটিসঙ্খারং ৰা লভেয্য চিরট্ঠিতিকো ৰা অস্স যত্থ ৰা পন তুম্হাকং চিত্তং পসীদতি তত্থ দেথাতি ভণতি, উম্মত্তকস্স, আদিকম্মিকস্সাতি.

পরিণতসিক্খাপদং নিট্ঠিতং দসমং.

পত্তৰগ্গো ততিযো.

তস্সুদ্দানং –

দ্ৰে চ পত্তানি ভেসজ্জং, ৰস্সিকা দানপঞ্চমং;

সামং ৰাযাপনচ্চেকো, সাসঙ্কং সঙ্ঘিকেন চাতি.

৬৬২. উদ্দিট্ঠা খো, আযস্মন্তো, তিংস নিস্সগ্গিযা পাচিত্তিযা ধম্মা. তত্থাযস্মন্তে পুচ্ছামি – ‘কচ্চিত্থ পরিসুদ্ধা’? দুতিযম্পি পুচ্ছামি – ‘কচ্চিত্থ পরিসুদ্ধা’? ততিযম্পি পুচ্ছামি – ‘কচ্চিত্থ পরিসুদ্ধা’? পরিসুদ্ধেত্থাযস্মন্তো, তস্মা তুণ্হী, এৰমেতং ধারযামীতি.

নিস্সগ্গিযকণ্ডং নিট্ঠিতং.