৬. সুত্তৰিঞ্ঞত্তিসিক্খাপদং

৬৩৬. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন ছব্বগ্গিযা ভিক্খূ চীৰরকারসমযে বহুং সুত্তং ৰিঞ্ঞাপেসুং. কতেপি চীৰরে বহুং সুত্তং অৰসিট্ঠং হোতি. অথ খো ছব্বগ্গিযানং ভিক্খূনং এতদহোসি – ‘‘হন্দ মযং, আৰুসো, অঞ্ঞম্পি সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেমা’’তি. অথ খো ছব্বগ্গিযা ভিক্খূ অঞ্ঞম্পি সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেসুং. ৰীতেপি চীৰরে বহুং সুত্তং অৰসিট্ঠং হোতি. দুতিযম্পি খো ছব্বগ্গিযা ভিক্খূ অঞ্ঞম্পি সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেসুং. ৰীতেপি চীৰরে বহুং সুত্তং অৰসিট্ঠং হোতি. ততিযম্পি খো ছব্বগ্গিযা ভিক্খূ অঞ্ঞম্পি সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেসুং. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেস্সন্তী’’তি!

অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৬৩৭. ‘‘যো পন ভিক্খু সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেয্য, নিস্সগ্গিযং পাচিত্তিয’’ন্তি.

৬৩৮. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সামন্তি সযং ৰিঞ্ঞাপেত্ৰা.

সুত্তং নাম ছ সুত্তানি – খোমং কপ্পাসিকং কোসেয্যং কম্বলং সাণং ভঙ্গং.

তন্তৰাযেহীতি পেসকারেহি ৰাযাপেতি, পযোগে পযোগে দুক্কটং [ৰাযাপেতি, পযোগে দুক্কটং (স্যা.)]. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, চীৰরং সামং সুত্তং ৰিঞ্ঞাপেত্ৰা তন্তৰাযেহি ৰাযাপিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৩৯. ৰাযাপিতে ৰাযাপিতসঞ্ঞী, নিস্সগ্গিযং পাচিত্তিযং. ৰাযাপিতে ৰেমতিকো, নিস্সগ্গিযং পাচিত্তিযং. ৰাযাপিতে অৰাযাপিতসঞ্ঞী, নিস্সগ্গিযং পাচিত্তিযং.

অৰাযাপিতে ৰাযাপিতসঞ্ঞী, আপত্তি দুক্কটস্স. অৰাযাপিতে ৰেমতিকো, আপত্তি দুক্কটস্স. অৰাযাপিতে অৰাযাপিতসঞ্ঞী, অনাপত্তি.

৬৪০. অনাপত্তি – চীৰরং সিব্বেতুং, আযোগে, কাযবন্ধনে, অংসবন্ধকে [অংসৰট্টকে (সী.)], পত্তত্থৰিকায, পরিস্সাৰনে, ঞাতকানং, পৰারিতানং, অঞ্ঞস্সত্থায, অত্তনো ধনেন, উম্মত্তকস্স, আদিকম্মিকস্সাতি.

সুত্তৰিঞ্ঞত্তিসিক্খাপদং নিট্ঠিতং ছট্ঠং.