৫. চীৰরঅচ্ছিন্দনসিক্খাপদং

৬৩১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উপনন্দো সক্যপুত্তো ভাতুনো সদ্ধিৰিহারিকং ভিক্খুং এতদৰোচ – ‘‘এহাৰুসো, জনপদচারিকং পক্কমিস্সামা’’তি. ‘‘নাহং, ভন্তে, গমিস্সামি; দুব্বলচীৰরোম্হী’’তি. ‘‘এহাৰুসো, অহং তে চীৰরং দস্সামী’’তি তস্স চীৰরং অদাসি. অস্সোসি খো সো ভিক্খু – ‘‘ভগৰা কির জনপদচারিকং পক্কমিস্সতী’’তি. অথ খো তস্স ভিক্খুনো এতদহোসি – ‘‘ন দানাহং আযস্মতা উপনন্দেন সক্যপুত্তেন সদ্ধিং জনপদচারিকং পক্কমিস্সামি, ভগৰতা সদ্ধিং জনপদচারিকং পক্কমিস্সামী’’তি. অথ খো আযস্মা উপনন্দো সক্যপুত্তো তং ভিক্খুং এতদৰোচ – ‘‘এহি দানি, আৰুসো, জনপদচারিকং পক্কমিস্সামা’’তি. ‘‘নাহং, ভন্তে, তযা সদ্ধিং জনপদচারিকং পক্কমিস্সামি, ভগৰতা সদ্ধিং জনপদচারিকং পক্কমিস্সামী’’তি. ‘‘যম্পি ত্যাহং, আৰুসো, চীৰরং অদাসিং, মযা সদ্ধিং জনপদচারিকং পক্কমিস্সতী’’তি, কুপিতো অনত্তমনো অচ্ছিন্দি.

অথ খো সো ভিক্খু ভিক্খূনং এতমত্থং আরোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো ভিক্খুস্স সামং চীৰরং দত্ৰা কুপিতো অনত্তমনো অচ্ছিন্দিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, উপনন্দ, ভিক্খুস্স সামং চীৰরং দত্ৰা কুপিতো অনত্তমনো অচ্ছিন্দী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, ভিক্খুস্স সামং চীৰরং দত্ৰা কুপিতো অনত্তমনো অচ্ছিন্দিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৬৩২. ‘‘যো পন ভিক্খু ভিক্খুস্স সামং চীৰরং দত্ৰা কুপিতো অনত্তমনো অচ্ছিন্দেয্য ৰা অচ্ছিন্দাপেয্য ৰা, নিস্সগ্গিযং পাচিত্তিয’’ন্তি.

৬৩৩. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুস্সাতি অঞ্ঞস্স ভিক্খুস্স.

সামন্তি সযং দত্ৰা.

চীৰরং নাম ছন্নং চীৰরানং অঞ্ঞতরং চীৰরং, ৰিকপ্পনুপগং পচ্ছিমং.

কুপিতো অনত্তমনোতি অনভিরদ্ধো আহতচিত্তো খিলজাতো.

অচ্ছিন্দেয্যাতি সযং অচ্ছিন্দতি, নিস্সগ্গিযং পাচিত্তিযং [নিস্সগ্গিযং হোতি (স্যা.)].

অচ্ছিন্দাপেয্যাতি অঞ্ঞং আণাপেতি, আপত্তি দুক্কটস্স. সকিং আণত্তো বহুকম্পি অচ্ছিন্দতি, নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, চীৰরং ভিক্খুস্স সামং দত্ৰা অচ্ছিন্নং নিস্সগ্গিযং ইমাহং সঙ্ঘস্স নিস্সজ্জামীতি…পে… দদেয্যাতি …পে… দদেয্যুন্তি…পে… আযস্মতো দম্মীতি.

৬৩৪. উপসম্পন্নে উপসম্পন্নসঞ্ঞী চীৰরং দত্ৰা কুপিতো অনত্তমনো অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং. উপসম্পন্নে ৰেমতিকো চীৰরং দত্ৰা কুপিতো অনত্তমনো অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং. উপসম্পন্নে অনুপসম্পন্নসঞ্ঞী চীৰরং দত্ৰা কুপিতো অনত্তমনো অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং.

অঞ্ঞং পরিক্খারং দত্ৰা কুপিতো অনত্তমনো অচ্ছিন্দতি ৰা অচ্ছিন্দাপেতি ৰা, আপত্তি দুক্কটস্স. অনুপসম্পন্নস্স চীৰরং ৰা অঞ্ঞং ৰা পরিক্খারং দত্ৰা কুপিতো অনত্তমনো অচ্ছিন্দতি ৰা অচ্ছিন্দাপেতি ৰা, আপত্তি দুক্কটস্স. অনুপসম্পন্নে উপসম্পন্নসঞ্ঞী, আপত্তি দুক্কটস্স. অনুপসম্পন্নে ৰেমতিকো, আপত্তি দুক্কটস্স. অনুপসম্পন্নে অনুপসম্পন্নসঞ্ঞী, আপত্তি দুক্কটস্স.

৬৩৫. অনাপত্তি – সো ৰা দেতি, তস্স ৰা ৰিস্সসন্তো গণ্হাতি, উম্মত্তকস্স আদিকম্মিকস্সাতি.

চীৰরঅচ্ছিন্দনসিক্খাপদং নিট্ঠিতং পঞ্চমং.