৪. ৰস্সিকসাটিকসিক্খাপদং

৬২৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভগৰতা ভিক্খূনং ৰস্সিকসাটিকা অনুঞ্ঞাতা হোতি. ছব্বগ্গিযা ভিক্খূ – ‘‘ভগৰতা ৰস্সিকসাটিকা অনুঞ্ঞাতা’’তি, পটিকচ্চেৰ [পটিগচ্চেৰ (সী.)] ৰস্সিকসাটিকচীৰরং পরিযেসন্তি, পটিকচ্চেৰ কত্ৰা নিৰাসেন্তি, জিণ্ণায ৰস্সিকসাটিকায নগ্গা কাযং ওৰস্সাপেন্তি. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ পটিকচ্চেৰ ৰস্সিকসাটিকচীৰরং পরিযেসিস্সন্তি, পটিকচ্চেৰ কত্ৰা নিৰাসেস্সন্তি, জিণ্ণায ৰস্সিকসাটিকায নগ্গা কাযং ওৰস্সাপেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, পটিকচ্চেৰ ৰস্সিকসাটিকচীৰরং পরিযেসথ? পটিকচ্চেৰ কত্ৰা নিৰাসেথ? জিণ্ণায ৰস্সিকসাটিকায নগ্গা কাযং ওৰস্সাপেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে মোঘপুরিসা, পটিকচ্চেৰ ৰস্সিকসাটিকচীৰরং পরিযেসিস্সথ, পটিকচ্চেৰ কত্ৰা নিৰাসেস্সথ, জিণ্ণায ৰস্সিকসাটিকায নগ্গা কাযং ওৰস্সাপেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৬২৭. ‘‘মাসো সেসো গিম্হান’ন্তি ভিক্খুনা ৰস্সিকসাটিকচীৰরং পরিযেসিতব্বং; ‘অদ্ধমাসো সেসো গিম্হান’ন্তি কত্ৰা নিৰাসেতব্বং. ‘ওরেন চে মাসো সেসো গিম্হান’ন্তি ৰস্সিকসাটিকচীৰরং পরিযেসেয্য, ‘ওরেনদ্ধমাসো সেসো গিম্হান’ন্তি কত্ৰা নিৰাসেয্য, নিস্সগ্গিযং পাচিত্তিয’’ন্তি.

৬২৮. ‘মাসো সেসো গিম্হান’ন্তি ভিক্খুনা ৰস্সিকসাটিকচীৰরং পরিযেসিতব্বন্তি. যে মনুস্সা পুব্বেপি ৰস্সিকসাটিকচীৰরং দেন্তি তে উপসঙ্কমিত্ৰা এৰমস্সু ৰচনীযা – ‘‘কালো ৰস্সিকসাটিকায, সমযো ৰস্সিকসাটিকায, অঞ্ঞেপি মনুস্সা ৰস্সিকসাটিকচীৰরং দেন্তী’’তি. ন ৰত্তব্বা – ‘‘দেথ মে ৰস্সিকসাটিকচীৰরং, আহরথ মে ৰস্সিকসাটিকচীৰরং, পরিৰত্তেথ মে ৰস্সিকসাটিকচীৰরং, চেতাপেথ মে ৰস্সিকসাটিকচীৰর’’ন্তি.

‘অদ্ধমাসো সেসো গিম্হান’ন্তি কত্ৰা নিৰাসেতব্বন্তি. অদ্ধমাসে সেসে গিম্হানে কত্ৰা নিৰাসেতব্বং.

‘ওরেন চে মাসো সেসো গিম্হান’ন্তি অতিরেকমাসে সেস গিম্হানে ৰস্সিকসাটিকচীৰরং পরিযেসতি, নিস্সগ্গিযং পাচিত্তিযং.

‘ওরেনদ্ধমাসো সেসো গিম্হান’ন্তি অতিরেকদ্ধমাসে সেসে গিম্হানে কত্ৰা নিৰাসেতি, নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, ৰস্সিকসাটিকচীৰরং অতিরেকমাসে সেসে গিম্হানে পরিযিট্ঠং অতিরেকদ্ধমাসে সেসে গিম্হানে কত্ৰা পরিদহিতং নিস্সগ্গিযং. ইমাহং সঙ্ঘস্স নিস্সজ্জামীতি.…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬২৯. অতিরেকমাসে সেসে গিম্হানে অতিরেকসঞ্ঞী ৰস্সিকসাটিকচীৰরং পরিযেসতি, নিস্সগ্গিযং পাচিত্তিযং. অতিরেকমাসে সেসে গিম্হানে ৰেমতিকো ৰস্সিকসাটিকচীৰরং পরিযেসতি, নিস্সগ্গিযং পাচিত্তিযং. অতিরেকমাসে সেসে গিম্হানে ঊনকসঞ্ঞী ৰস্সিকসাটিকচীৰরং পরিযেসতি, নিস্সগ্গিযং পাচিত্তিযং.

অতিরেকদ্ধমাসে সেসে গিম্হানে অতিরেকসঞ্ঞী কত্ৰা নিৰাসেতি, নিস্সগ্গিযং পাচিত্তিযং. অতিরেকদ্ধমাসে সেসে গিম্হানে ৰেমতিকো কত্ৰা নিৰাসেতি, নিস্সগ্গিযং পাচিত্তিযং. অতিরেকদ্ধমাসে সেসে গিম্হানে ঊনকসঞ্ঞী কত্ৰা নিৰাসেতি, নিস্সগ্গিযং পাচিত্তিযং.

সতিযা ৰস্সিকসাটিকায নগ্গো কাযং ওৰস্সাপেতি, আপত্তি দুক্কটস্স. ঊনকমাসে সেসে গিম্হানে অতিরেকসঞ্ঞী, আপত্তি দুক্কটস্স. ঊনকমাসে সেসে গিম্হানে ৰেমতিকো, আপত্তি দুক্কটস্স. ঊনকমাসে সেসে গিম্হানে ঊনকসঞ্ঞী, অনাপত্তি.

ঊনকদ্ধমাসে সেসে গিম্হানে অতিরেকসঞ্ঞী, আপত্তি দুক্কটস্স. ঊনকদ্ধমাসে সেসে গিম্হানে ৰেমতিকো, আপত্তি দুক্কটস্স. ঊনকদ্ধমাসে সেসে গিম্হানে ঊনকসঞ্ঞী, অনাপত্তি.

৬৩০. অনাপত্তি ‘মাসো সেসো গিম্হান’ন্তি ৰস্সিকসাটিকচীৰরং পরিযেসতি, ‘অদ্ধমাসো সেসো গিম্হান’ন্তি কত্ৰা নিৰাসেতি, ‘ঊনকমাসো সেসো গিম্হান’ন্তি ৰস্সিকসাটিকচীৰরং পরিযেসতি, ‘ঊনকদ্ধমাসো সেসো গিম্হান’ন্তি কত্ৰা নিৰাসেতি, পরিযিট্ঠায ৰস্সিকসাটিকায ৰস্সং উক্কড্ঢিয্যতি, নিৰত্থায ৰস্সিকসাটিকায ৰস্সং উক্কড্ঢিয্যতি, ধোৰিত্ৰা নিক্খিপিতব্বং; সমযে নিৰাসেতব্বং, অচ্ছিন্নচীৰরস্স, নট্ঠচীৰরস্স, আপদাসু, উম্মত্তকস্স, আদিকম্মিকস্সাতি.

ৰস্সিকসাটিকসিক্খাপদং নিট্ঠিতং চতুত্থং.