৯. রূপিযসংৰোহারসিক্খাপদং

৫৮৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ নানপ্পকারকং রূপিযসংৰোহারং সমাপজ্জন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা নানপ্পকারকং রূপিযসংৰোহারং সমাপজ্জিস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ নানপ্পকারকং রূপিযসংৰোহারং সমাপজ্জিস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, নানপ্পকারকং রূপিযসংৰোহারং সমাপজ্জথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, নানপ্পকারকং রূপিযসংৰোহারং সমাপজ্জিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৮৮. ‘‘যো পন ভিক্খু নানপ্পকারকং রূপিযসংৰোহারং সমাপজ্জেয্য, নিস্সগ্গিযং পাচিত্তিয’’ন্তি.

৫৮৯. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

নানপ্পকারকং নাম কতম্পি অকতম্পি কতাকতম্পি. কতং নাম সীসূপগং গীৰূপগং হত্থূপগং পাদূপগং কটূপগং. অকতং নাম ঘনকতং ৰুচ্চতি. কতাকতং নাম তদুভযং.

রূপিযং নাম সত্থুৰণ্ণো কহাপণো, লোহমাসকো, দারুমাসকো, জতুমাসকো যে ৰোহারং গচ্ছন্তি.

সমাপজ্জেয্যাতি কতেন কতং চেতাপেতি, নিস্সগ্গিযং পাচিত্তিযং [নিস্সগ্গিযং হোতি (স্যা.)]. কতেন অকতং চেতাপেতি, নিস্সগ্গিযং পাচিত্তিযং. কতেন কতাকতং চেতাপেতি, নিস্সগ্গিযং পাচিত্তিযং. অকতেন কতং চেতাপেতি, নিস্সগ্গিযং পাচিত্তিযং. অকতেন অকতং চেতাপেতি, নিস্সগ্গিযং পাচিত্তিযং. অকতেন কতাকতং চেতাপেতি, নিস্সগ্গিযং পাচিত্তিযং. কতাকতেন কতং চেতাপেতি, নিস্সগ্গিযং পাচিত্তিযং. কতাকতেন অকতং চেতাপেতি, নিস্সগ্গিযং পাচিত্তিযং. কতাকতেন কতাকতং চেতাপেতি, নিস্সগ্গিযং পাচিত্তিযং. সঙ্ঘমজ্ঝে নিস্সজ্জিতব্বং. এৰঞ্চ পন, ভিক্খৰে, নিস্সজ্জিতব্বং. তেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, ভন্তে, নানপ্পকারকং রূপিযসংৰোহারং সমাপজ্জিং. ইদং মে নিস্সগ্গিযং. ইমাহং সঙ্ঘস্স নিস্সজ্জামী’’তি. নিস্সজ্জিত্ৰা আপত্তি দেসেতব্বা. ব্যত্তেন ভিক্খুনা পটিবলেন আপত্তি পটিগ্গহেতব্বা. সচে তত্থ আগচ্ছতি আরামিকো ৰা উপাসকো ৰা সো ৰত্তব্বো – ‘‘আৰুসো, ইমং জানাহী’’তি. সচে সো ভণতি – ‘‘ইমিনা কিং আহরিয্যতূ’’তি, ন ৰত্তব্বো – ‘‘ইমং ৰা ইমং ৰা আহরা’’তি. কপ্পিযং আচিক্খিতব্বং – সপ্পি ৰা তেলং ৰা মধু ৰা ফাণিতং ৰা. সচে সো তেন পরিৰত্তেত্ৰা কপ্পিযং আহরতি, রূপিযচেতাপকং ঠপেত্ৰা, সব্বেহেৰ পরিভুঞ্জিতব্বং. এৰঞ্চেতং লভেথ, ইচ্চেতং কুসলং; নো চে লভেথ, সো ৰত্তব্বো – ‘‘আৰুসো, ইমং ছড্ডেহী’’তি. সচে সো ছড্ডেতি, ইচ্চেতং কুসলং; নো চে ছড্ডেতি, পঞ্চহঙ্গেহি সমন্নাগতো ভিক্খু রূপিযছড্ডকো সম্মন্নিতব্বো – যো ন ছন্দাগতিং গচ্ছেয্য, ন দোসাগতিং গচ্ছেয্য, ন মোহাগতিং গচ্ছেয্য, ন ভযাগতিং গচ্ছেয্য, ছড্ডিতাছড্ডিতঞ্চ জানেয্য. এৰঞ্চ পন, ভিক্খৰে, সম্মন্নিতব্বো. পঠমং ভিক্খু যাচিতব্বো. যাচিত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –

৫৯০. ‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং রূপিযছড্ডকং সম্মন্নেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো ইত্থন্নামং ভিক্খুং রূপিযছড্ডকং সম্মন্নতি. যস্সাযস্মতো খমতি ইত্থন্নামস্স ভিক্খুনো রূপিযছড্ডকস্স সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন ইত্থন্নামো ভিক্খু রূপিযছড্ডকো. খমতি সঙ্ঘস্স, তস্মা তুণ্হী, এৰমেতং ধারযামী’’তি.

তেন সম্মতেন ভিক্খুনা অনিমিত্তং কত্ৰা পাতেতব্বং. সচে নিমিত্তং কত্ৰা পাতেতি, আপত্তি দুক্কটস্স.

৫৯১. রূপিযে রূপিযসঞ্ঞী রূপিযং চেতাপেতি, নিস্সগ্গিযং পাচিত্তিযং. রূপিযে ৰেমতিকো রূপিযং চেতাপেতি, নিস্সগ্গিযং পাচিত্তিযং. রূপিযে অরূপিযসঞ্ঞী রূপিযং চেতাপেতি, নিস্সগ্গিযং পাচিত্তিযং. অরূপিযে রূপিযসঞ্ঞী রূপিযং চেতাপেতি, নিস্সগ্গিযং পাচিত্তিযং. অরূপিযে ৰেমতিকো রূপিযং চেতাপেতি, নিস্সগ্গিযং পাচিত্তিযং. অরূপিযে অরূপিযসঞ্ঞী রূপিযং চেতাপেতি, নিস্সগ্গিযং পাচিত্তিযং.

অরূপিযে রূপিযসঞ্ঞী, আপত্তি দুক্কটস্স. অরূপিযে ৰেমতিকো, আপত্তি দুক্কটস্স. অরূপিযে অরূপিযসঞ্ঞী, অনাপত্তি.

৫৯২. অনাপত্তি উম্মত্তকস্স, আদিকম্মিকস্সাতি.

রূপিযসংৰোহারসিক্খাপদং নিট্ঠিতং নৰমং.